\id 2PE  
\h 2 FITA 
\toc1 2 FITA  Fita imi suuk kon maak aaltam dola kosa uta ko 
\toc2 2 FITA 
\mt1 2 FITA  
\mt2 Fita imi suuk kon maak aaltam dola kosa uta ko  
\ib  
\ip \it Yesus iyo tam abiil tigiin unata, bii atol ulumi kup 35 umaak yak iinuta, Fita iyo suuk kon tem weng koyo dola ko Kristen segela yak abiip maak maak unsip imi kwaapma unsu ko. Tinum bisop bagamin iyo bogo-nilip e, “Yesus iyo asok tolon-temaala o,” agan-bilipta, Kristen iip maak maak iyo sa daga-bom-nilip e, Yesus iyo umik ugobe dupkaa ilimi kuguup uta kup ke-bilipta, Fita iyo Kristen unang tinum imi bogobe-nala e, “Ipmi Yesus imi ilak dugamin boyo fomtuup waafu-bom-nilipta o,” age-nalata, suuk kon koyo dola kwaapma Juda kasel Kristen unang tinum imi finang unsu ko.\it*  
\c 1  
\p
\v 1 Nugumal nuubip aga? Niyo Saimon Fita Yesus Krais imi ogok kemin tinum e minte kalaan tinum no nita suuk kon koyo ipmi dola kobelan o ageta kale, Yesus Krais beyo numi God e minte, beta numi ilim bo no ke-se kale, bemi aget fugunin uyo, maak beta win tibin e minte, maak beta win tibin binim no agan-bom-nalata, kanubesaala binim kale, alugum nuyo atin ki maagup dong dogobelata, ibo Krais ilami kalaan tinum numi tambaliim kup God imi ilak do-sulup ulutap ke-silip kale, suuk kon koyo alugum ipmi finang kwaabeli no tuluk o ageta ko.  
\v 2 Kale ibo kanube God so nulumi Kamogim Yesus so imi ilak uyo do-nilip tele itamsip umdii, ulim iyo tebe-nilip e, ibo telele-bilipta, ipmi aget tem uyo atin ki bilili ageluta, tambaliim bom-bilipta o ageta ko.   
\s1 God yagal tebe nuyo ulaa imdula ilami unang tinum ke-sulup uta ko  
\sr (Rom 12:6-8, 1 Kor 12:1-11, Ef 4:7-12, 1 Fit 4:7-11)  
\p
\v 3 God beyo, olabeli meng tilipta, nalami win tibin kemin kuguup so kuguup tambal so bomi atuk uyo kobelita, nin o age-nalata, olabe-se kale, God iyo nuyo itamata, iyo nalami ilak do-nilipta, tele nitamsip kalaa age-nalata, ilami titil uta ku-nalata, numi tambaliim kaa nup umi mufekmufek uyo alugum kobe-se kale, nuyo tii God imi kuguup umi diim ku-tele tambaliim kup nup kale,  
\v 4 ilami, “Kanubelan-temi o,” agesa uta waafu-nalata, ilami win tibin kemin kuguup sino kuguup tambal sino bomi diim ilep alugum mufekmufek afalik tambal tambal uyo nuyo kobe-se kale, kuguup mafak utam aget kup ugaa kwaagamin boyo kafin diim unang tinum numi diim kal bom-nuluta, nuyo atin ifak dagan-nuubu kuta, God imi alugum mufekmufek afalik tambal tambal ko numi kupka-em-nuuba bota tebe nuyo dong dogobeluta, nuyo kuguup mafak uyo kupkaa bilii yang iinom waalan-nulupta, God ilatap ke-nulupta, ilami kuguup so suun nin so uta kulan-temup ko.   
\p
\v 5 Kale ibo boyo utamta, bomi aget uyo fugun-bom-nilipta, kuguup tambal uyo dital fagaa ke-bom-nilip e, kwep yak ilipmi God imi ilak dugamin boyo atuk tifibe-nilip e minte, tele utamamin uyo ku-nilip e, kwep yak ilipmi kuguup tambal boyo atuk tifibe no ke-bom-nilip e minte,  
\v 6 aget tambal fugun-bom kuguup mafak umi aget kup-kagamin uyo ku-nilip e, kwep yak ilipmi tele utamamin bomi atuk daga-nilip e minte, bong faga-bom waafulin kup kemin kuguup uyo ku-nilip e, kwep yak ilipmi aget tambal fugun-bom kuguup mafak umi aget kup-kagamin bomi atuk daga-nilip e minte, fomtuup God imi kuguup waafunamin uyo ku-nilip e, kwep yak ilipmi bong faga-bom waafulin kup kemin kuguup bomi atuk daga-nilip e minte,  
\v 7 Kristen unang tinum ipmi ipkumal i-filinin uyo ku-nilip e, ipmi fomtuup God imi kuguup waafunamin umi tem kwegal kwego no ke-nilip e minte, ipkumal Kristen imi aget kup kupka-emin kuguup uyo ku-nilip e, kwep yak ipmi ipkumal i-filinin umi tem kwegal kwego no ke-bomta waafu-bilipta o ageta ko.  
\v 8 Kale kanupmin kuguup boyo ipmi diim uyo bom-nulu mitam sengamin kup kemu umdii, bota tebe ibo kafalebeluta, utamipta, Kamogim Yesus Krais iyo numi diim kal alba kalaa age tele atamipta, yagal dong dogobelata, God imi, “Kuguup bota kanumin o,” agan-be uyo kanuman-temip ko.  
\v 9 Kuta kanupmin kuguup bomi sang bogobeli boyo unang tinum iip maak maak imi diim uyo albaalu kale, bilip iyo God tebe siin bilip imi fengam-nuubip umi alugum tolobela tambalan-silip bomi aget uyo fugunolaalup o age ilumano kupka-silip kale, bilip iyo tiin suuk ilitap ke boyo utamipta, boyo mufekmufek kwiin kiim kalaa aganbaalip binim ko.   
\p
\v 10 Kale duubal Kristen unang tinum ibe. God iyo ibo olabela meng tamip tebe ibo ilami ulu-se kale, ibo bota dital fagaa olabe-se boyo abo dulu kanumin o ageta kale, kanumip umdii, ibo daak abelan-temaalip ko.  
\v 11 Kanube ibo kanupmin kuguup bomi kanuman-temip uta, God iyo deng tebe-bom-nalata, ibo imkala tam ipmi suun nan-temip umi abiip uyo unon-temip kale, abiip boyo numi Kamogim Yesus Krais nulumi ilim bo-se beta tebe-nalata, ilami unang tinum nuyo tiin molan-tema ko.   
\p
\v 12 Kale ibo weng kaa dola kobeli koyo fen kalaa age utam fomtuup waafusip kuta, bomi sang uyo ipmi aget fugunin uyo kufu-e-bili aget fugunin kup kemin o age-nilita, suun bogobe yakyak keman-temi ko.  
\v 13-14 Kale numi Kamogim Yesus Krais iyo niyo bogopne-nala kano, “Siit ilugolan-temap uyo kaanan-temap o,” age bogopnelata, utam-sii kale, nimi aget fugunin uyo, niyo kafin diim kaa siit ilugolan-temi uyo, God imi mufekmufek numi kanu-e-be bomi sang uyo ibo asok baga-e-bom-nilita, ipmi aget fugunin uyo kufu-e-bilita, fuguno yakyak keman-temip bota felepman-temu kalaa agan-bii kale,  
\v 15 niyo dital fagaa suuk kon tem kegal dola kobelita, suun kup bom-buluta, nimi imkaa kaanan-temi uyo, suuk kon bota tebe ise mufekmufek bomi aget uyo ipmi aget tem uyo kufu-e-buluta, asok fuguno yakyak ke-bilipta o age-nilita, bomi sang uta suuk kon koyo dola ko kwaabeli no tolon-temu ko.   
\s1 Nuyo God imi dong so titil so uyo Krais imi diim kal albu kalaa age-sulup umi sang uta ko  
\sr (Mat 17:1-13, Mak 9:2-9, Luk 9:28-36, 1 Jon 1:1-4)  
\p
\v 16 Kale Kamogim Yesus Krais imi kalaan tinum nuyo Kamogim imi titil sang so imi son-temu nala asok tal kafin diim e tolon-tema umi sang so uyo baga-e-bulup utamsip kuta, Krais imi sang boyo, nuyo utamsip tinum migik ilimi aget fugunin sang uta daam ku-nulupta, ibo kupka-em-nuubaalup kale, nulumi tiin fala atamupta, Krais iyo God imi titil uyo ku mitam kamok kesa kalaa age-nulupta, bomi sang uta ibo baga-em tebesup ko.  
\v 17 Kale minte atam-sulup boyo, Aalap God iyo numi Kamogim Yesus Krais imi win uyo ki atin kufobe kupka-nalata bole, ilami dong tambal uyo kobelata, mitam atin yagalami migik kelata, nuyo atamamupta, Bisel God iyo abiil tigiin kutam kal bom-nalata, bogo-nala e, “Ise beyo nalami man kale, bemi aget kup ugaa kwaa-bom-nilita, niyo bemi deng uyo atin migik ke-bomi o,” agan-bom-nalata, weng boyo kwaala malaak Yesus imi diim abe-buluta minte,  
\v 18 boyo amdu tigiin God imi, “Kutam kal o,” ageba umi diim kutam kal ilami okumop man asuno nuyo Yesus iso maagup bom-sulupta, abiil tigiin ilo God imi weng boyo baga-balata, nuyo tolong do-sulup ko.   
\p
\v 19 Kanubelu kalaa age-nulupta, nuyo, profet ko age God imi weng kem baga-emin tinum imi weng sugayok bogosip boyo aafen kalaa age-nulupta, fomtuup titil fagaa waafusup kale mungkup, ipkil imi weng boyo kanube fomtuup waafu-nimip uyo, tambaliim ko. Kale God imi weng kem baga-emin tinum ilimi weng dola-silip boyo, ilaam ulutap kale, ilaam umi dong boyo tebe mililep tem umi kefolu une-bom tele-bom kem-nuubip kale mungkup, weng kem baga-emin imi weng boyo tebe ibo dong dogobelu utamipta e, kafalemin tinum imi weng ipmi kupka-e-bilip boyo aafen baga-e-bilip bele ki, bisop baga-e-bilip kalaa agan-nuubip ko. Kale ibo weng kem baga-emin tinum imi weng boyo mogop waafu-bom-bilipta, bii Kamogim Yesus Krais iyo asok tal kafin diim tala kalaa age-nilipta, ipmi aget tem uyo deng tebemin o ageta kale, ko Yesus imi, asok tolon o age tolon-tema boyo am kel diim biningok afalik bigiduluup umi mitam molan-temu ulutap ko.  
\v 20-21 Kale minte God imi weng kem baga-emin imi weng boyo kamaki uyo mufekmufek maagup maak bota tele utam-nilipta o agan-bii-silip kale, boyo ki God imi profet ko age weng kem baga-emin tinum iyo ilimi aget fugunin weng min, tinum migik imi aget fugunin weng umaak ku-nilipta, unang tinum iyo baga-emsaalip kale, God imi Sinik Tambal ita tebe-nalata, dong daga-e-balata, God ilami weng kupka-e-be uta kup ku-nilipta, unang tinum iyo kupka-emsip kale, nuyo nulumi aget fugunin uta ku-nulupta, God imi weng kem baga-emin tinum suuk kon tem dola ko-silip umi magam uyo bisop dupkop dagamin ba kale, dagalupta, God imi Sinik Tambal yagal kafalebelata, utamum o ageta ko.   
\c 2  
\s1 Kafalemin igil tebe unang tinum kuguup mafak kafalemsip uta ko  
\sr (2 Kor 11:1-15, 1 Tim 1:3-11, 4:1-5, 6:3-10, 2 Tim 2:14-19, 3:12-13, 4:3-5, Tat 1:10-16, 1 Jon 2:18-29, Jut 3-16)  
\p
\v 1 Kale sugayok uyo tinum iip maak maak maak Israel unang tinum imi iibak tem kulaak-tele mitam-nilip e, bogolip, “Nuyo God imi weng kem baga-emin tinum o,” agan-bilip kuta, bilip iyo bisop baga-emsip kale, mungkup ulutap son-temu uyo, tinum iip maak maak iyo Kristen ilipmi iibak tem kulaak-tele mitam mo-nilip e, “Nuyo Krais imi sang uyo baga-emup o,” agan-kalon-temip kuta, bilip iyo bisop bagaman-temip kale, kafalemin tinum bilip iyo ibo bisop bogo filto-e-bom-nilip e, atin weng mafak mafak uyo kwep mitam daalip e, weng bota tebe-nulu e, ibo ifak daalan-temu kale, Kamogim iyo tebe bilip iyo mo-se kuta, Kamogim iyo umik ugobe no ke-nilipta, igil kanumin kup ke-bom bom-silipta, yuut God iyo tebe ifak daala binimanan-temip ko.  
\v 2 Kuta ilipmi unang tinum kwiin tagang iyo mitam-nilip e, kuguup mafak mafak kafalemup ko agan-kalin tinum imi kanum-nuubip ulutap ke-bilipta minte, Kamogim imi ilak dugamin binim iyo utam-nilipta, Krais imi daang baga-emin boyo utafinon-bom-nilipta, weng mafak kupka-eman-temip kale,  
\v 3 kafalemin tinum bilip iyo fen tinginmin tinum kale, ilimi bisop bagamin weng kwiin tagang uta baga-e-bom-nilip e, tebe ipmi mani min, mufekmufek uyo kwaa-eman-temip kuta, sugayok uyo God imi tebe yega dobela maagalo kelan-temip umi am daanan-temu uyo kota kalaa age telela kosa kale, iyo agaal unsaala binim kale, bilip iyo ifak daali binimanan-temip uta kup kalaa age fen-bom alba ko.  
\v 4 Kale nugol utamum. Sugayok uyo ensel iip maak maak imi fenga kosip uyo, God iyo imkalata, albaalip binim sok de imo imdala yang abiip mafak ko age atin mililan-suu kal bom-nilipta, God imi tebe yega duga-eman-tema umi am uyo daanu kalaa ageta o age-nilipta, kutam kal fen-bom albip ko.  
\v 5 Kale aa mungkup, sugayok umi unang tinum imi tebe God imi umik ugobe fengamsip iyo imkasaala binim kale, ok kwaala tebe anolu kaanipta ki, Noa tol kuguup umi sang unang tinum kupka-emin ita kup God iyo angkola kaanin-tem dupka-nalata, iso e minte unang tinum ban kal maak no kalip ita kup tiin mo-salata, waalansip ko.  
\v 6 Minte maak uyo, abiip afalik Sodom so Gomora so umi unang tinum iyo mungkup God iyo umik ugobe fenga-bilip kalaa age-nalata, ise bomi kalan uta God iyo yega dobe yan kebe-nalata, abiip alop boyo kwegala ken tebe tip uta kup kelu kupkalata, abiip kutam iyo atin binimansip ko. Ulutap kale, son-temu uyo, God imi sugayok yega dobe-se boyo tebe kafalebeluta, unang tinum God imi umik uga-eman-temip bilip iyo utamipta e, boyo fen God iyo kanube-nalata, yega dobelan-tema kalaa age-nilipta, bomi aget uyo finanan-temip ko.  
\v 7 Kuta Lot beyo kuguup tambal uta kup waafulin tinum kale, abiip Sodom kutam kal bom-nalata, utamata, abiip kutam iyo God imi ulo uyo fegel fegel ke-bom-nilip e minte, sa dagamin umi kuguup uyo ke-bom no kemip kalaa age-nalata, atin aget iluum kiim uyo ke-balata bole, God iyo tebe Lot beyo ulaa dupkan kelata, ipkumal isino kaansaala binim kale,  
\v 8 bomi magam uyo ki, Lot beyo tinum tambal kale, bemi aget tem uyo tambaliim kup bom-buluta, beyo Sodom kasel imi iibak tem kulagal bom-nalata, suun kup bilip imi kuguup mafak kanu-bilip min, weng mafak bagan-bilip uyo tiin kup utama-bom-nalata, imi aget tem uyo iluum kup tebe-e-buluta, bii-se ko.  
\v 9 Kale God imi kuguup boyo kanu-boma kale, nuyo boyo utamum. Kanube im-kugumin uyo mek unang tinum God imi kuguup waafulin imi diim uyo abelu umdii, Bisel iyo bomi ilep uyo utamsa kale, ulaa imkan kelan-tema e minte, unang tinum iyo kuguup mafak waafulip umdii, Bisel iyo bomi ilep uyo utamsa kale, bilip imi kuguup mafak bomi yan uyo kem abe-bala unanbu top-nuluta, God ilami tebe unang tinum yegeman-tema umi am daanan-temu kwek uta, yan kemin uyo kwiin kiim kobelan-tema ko.  
\v 10 Kale unang tinum iip maak maak imi aget tem uyo migik kepmu yang sa dagamin kuguup mafak uta waafu-nilip e minte, “God beyo titil binim o,” age atafi-bom kutaang tebe-bom no ke-bilipta, God iyo unang tinum kanu-bilip bilip iyo atin ki kaal fuyap kup kupka-eman-tema ko.  
\p Kale kafalemin tinum mafak bilip iyo kutaang kup tebe-bom, “Nuta kup o,” agan-bom-nilipta, ilimi aget fugunin uta kup waafuu kwep bomip kale, bilip iyo abiil tigiin kasel iyo aget tambal fugun-bom weng tambal umaak kupka-em-nuubaalip kale, finanin binim weng mafak kupka-em-nuubip ko.  
\v 11 Kale minte ensel iip maak maak iyo atin titil kup tebe-nilipta, bilip ita tebe kanupmin kafalemin tinum bilip iyo imdaak tama ita ita kesip kuta ki, ensel bilip iyo Bisel imi mep so kugol molip uyo, abiil tigiin kasel imi fengmin kupkem daga-e-bomta weng mafak umaak kupka-em-nuubaalip ko.   
\p
\v 12 Kale kafalemin tinum weng bisop bagamin bilip iyo aget tambal fugunin binim, kong kayaam imi aget fugunin ilitap kale, ilimi aget fugunin uta kup waafuu bomip utamta, weng mafak mafak uyo maagalo bagan-nuubip kale, bilip iyo dimduum dimduum imi ogen man fogolu tinum tebe togon-bom ano fuu-bom unan-nuubip ilitap kale, tinum tebe dimduum dimduum anolip kaanan-nuubip ulutap ke God iyo tebe kafalemin bilip iyo inola kaanan-temip ko.  
\v 13 Kale bilip iyo tebe aget iluum uyo ibo kupka-em-nuubip kale mungkup, God isiik tebe bilip iyo aget iluum so kaal fuyap so uyo kopman-tema ko. Kale bilip iyo fen-silip mililanuta, iman uyo un-bom min, ok mafak kwiin tagang uyo unan-bom min, sa daga-bom min kem-nuubaalip kale, taap so mililep so kanumin kup kem-nuubip kale, bilip imi aget fugunin uyo, kanupmin kuguup boyo numi aget tem umi deng tebemin kupka-emin uyo kulbu o age-nilipta, kanum-nuubip kale, fitom binim ke ipmi bisop bogo filto-e-bilipta, imkalipta, tam ipsino ton-bom komiyon unan-nuubip kuta, bilip imi kanumin kanumin kanum-nuubip boyo atin kuguup mafak fitom tebesu kuguup uta kanum-nuubip ko.  
\v 14 Kale kafalemin tinum mafak bilip iyo, unang so fengmin uta kemum o agan-bom-nilipta, unang imi tiin tem uyo kek fenin kup ke-bom-nilip e, bilip imi aget fugunin uyo, fengmin aget uta kup atin ugaa kwaasip kale, dogobeta boyo kupka-nimip binim kale, bilip iyo tebe unang tinum mitam Krais imi ilak dosip kuta, atuk atuk kem-nuubip iyo imdep meng daalip iso feng-bom-nilip e, kafalemin tinum bilip iyo ipkumal unang tinum migik imi mufekmufek tinginemin uyo kanubeta kanumin kalaa agesip bomi kuguup uta atin fomtuup waafuu no kesip kale, God iyo bogo-nala kano, “Kanupmin tinum bilip iyo atin mafak kale, ifak daalan-temi o,” agesa ko.  
\v 15 Kale bilip iyo kuguup tambal uyo umik ugobe-nilipta, yak kuguup mafak ugulumi migik migik uta kem-nuubip kale, bilip iyo tinum imi ki, ilep talak uyo kupka-nala sep ilep ku-tele unanbu no iip kugol ilum ilum ke-bii tonba ulutap kale, kafalemin tinum bilip iyo sugayok Beo imi man Balam imi kuguup kanu-bom-nala tuumon umi aget uta ugaa kwaaga-bom-nala ki kuguup mafak mafak uyo ke-bilita, king iyo, tisol uta kuganemak o agan-bom-nala kanu-bii-se umi kuguup uta iyo fomtuup waafu-bomta kanu-bilip kuta,  
\v 16 God iyo Balam imi kuguup mafak kanu-bala an-togonsa bomi magam uyo ki, kong ko age dongki bilip iyo tinum weng ulutap bagamin binim kale, bilip iyo hos ilimi weng ulutap uta kup olmin kuta, ise dongki ko Balam umi kaal diim tonba boyo tinum weng baga-bom-nulu e, Balam imi kuguup mafak ko kanubelan o agan-be bomi sang uyo baga-e-bom an-togonu kale, dongki umi kuguup ko kanumsu boyo ki, God ita weng kem baga-emin tinum Balam bemi ilum ilum kemin kuguup ko kanubelan o agan-be bomi ilep uta namdabe-se ko.   
\p
\v 17 Kale kafalemin tinum mafak bilip iyo ok ket fakam dagamin umi dugulu nuyo une-numup binim ulutap e minte, iip uyo tebe wep uyo kwaalu tolon o agelu dulul tebe fot tebelu unu wep malaak abe-numu binim ulutap no kale, mufekmufek alop boyo nuyo dong dogopmomu binim kale, ulutap mungkup kafalemin tinum bilip imi weng uyo atin bisop umi weng uta kup baga-bilipta kale, imi weng boyo dogobeta unang tinum iyo dong dogopmomu binim kemu kalaa age-nalata, God iyo bilip imi atin mililansu abiip maak ugaa kobe-nalata, ise kafalemin tinum mafak bilip iyo sok de imo imdala no kutam kal nan-temip kale,  
\v 18 kafalemin tinum bilip iyo weng tambal tambal kup bagan-bilip kuta, ilum ilum ke-bom-nilipta, bisop umi weng baga-bom-nilip e, tebe ipkumal iyo imdep meng daalipta, sa dagamin bomi aget uyo migik kepmuta, yangta sa boyo dagan-nuubip kale, bomi diim ilep ku-tele kafalemin tinum bilip iyo tebe tinum unang kamano kaa ipkumal imi kuguup mafak kanumin bomi kupkabip iyo ifak daga-bilipta bole, asok kupkaa yang kafin diim umi kuguup mafak uyo waafu-nilipta, yang iinbip ko.  
\v 19 Kale kafalemin tinum mafak bilip iyo bogo-nilip e, “Boyo tambaliim kale, ulo umaak tebe-nuluta, ilipmi aget fugunin uta kup yang kuguup mafak o agan-nuubip bomi kanumin boyo tiin mobaalu kale, kaya. Boyo kanumin uta kup o,” agan-nuubip kuta, kafalemin tinum mafak bilip iyo kuguup mafak uyo tebe de imosu kale, kanube tinum iyo kuguup min, ilami aget fugunin uyo, bota kanuman o agan-bala bomi aget uyo mitam sengan dupdaak tamalu atin mafagana umdii, kanupmin kuguup bota tebe tinum beyo de dolu kale, dogobeta ise kanupmin kuguup boyo kupkalan-temaala binim ko.  
\v 20 Aa bole, unang tinum iip maak maak iyo utamipta, fen Yesus Krais beyo numi Kamogim kalaa, beyo numi ilim bobe-se iyo beta kalaa age-nilipta, bota kafin diim unang tinum imi kuguup mafak mafak kanum-nuubip boyo kupka-nilipta, waalan-silip kuta, asok te yang kuguup mafak uyo ke-bilip ise kuguup mafak bota tebe sengan imdaak tamalu uyo, dogobeta nan-temip a? Iyo kamaki kutop uyo ki kuguup mafak uyo waafu-bom-nilipta, mafak so bii-silip kale minte, aaltam yang asok fengmin uyo waafulin kup keman-temip bota ki, atin fen mafaganan-temip ko.  
\v 21 Kale kanube unang tinum God imi, “Bota kanumin o,” age-se bomi utamsaalip binim iyo yang fengamip umdii, boyo mafak tap so kale minte, kanube unang tinum iyo kamaki kutop uyo God imi weng tambal ilami ogok kemin tinum tebe kobe-silip boyo utam waafu-siit-nilip, asok bisat kupkaa umik ugobelip umdii, boyo atin mafak ko.  
\v 22 Kale minte unang tinum iyo kanupmin kuguup boyo kanumip umdii, nuyo bota tebe do weng alop maak kafalebelan-temu kale, maak uyo bogo-nulu, “Kayaam iyo ilami usaan fuu tala uyo, asok yang unelan o age unon-tema o,” agelu e minte, maak uta bogo-nulu, “Kong iyo ok sam uyo ugobelip e, tam abiip tam-nala e, asok yagal daak igilek uyo fuuman-tema o,” age no kesu kale, kamaki kutop uyo kayaam so kong so maagup tambaliim bii-nilipta minte, aaltam kota mafaganan-temip kale, ulutap mungkup, unang tinum God imi weng umik ugobe kuguup mafak waafu-bii kupkasip asok waafunamin umi sang uta, do weng alop boyo bogosu ko.   
\c 3  
\s1 Fen Kamogim Yesus imi asok tolon-tema umi sang uta ko  
\sr 1 (Kor 3:13, 1 Tim 2:4, Jut 17-18)  
\p
\v 1 Kale atin nalami duubal ibe. Siin kamaki uyo suuk kon maak dola kwaabeli no ti-suu kale minte, aaltam kota maak uyo kwaabeli no tal no keluk o ageta dola-bii kale, suuk kon alop kwek umi tem boyo ki, mufekmufek maak umi sang uyo asok bogobe-nilita, ipmi aget fugunin uta dong daga-e-bilita, tambalanepmuk o ageta suuk kon maak uyo kwaali no ti-suu kale minte, maak koyo kwaali no tal no keluk o ageta kale, mufekmufek sang dola kobeli boyo ki,  
\v 2 ibo sugayok God imi weng kem kupka-emin tinum imi son-temu nala mufekmufek mitam tolon-temu umi sang baga-emsip umi aget uyo asok fugun-bom-nilip e minte, ibo numi ilim bo-emin tinum Kamogim Yesus imi tebe titil weng uyo God imi kalaan tinum nuyo kobela ipmi baga-emsup umi aget uyo asok fugun-bom no ke-bom-nilipta o ageta ko.   
\p
\v 3 Kale niyo, kamaki uyo ibo boyo utam-nilipta o agan-bii kale, son-temu nala Yesus Krais imi asok tal kafin diim tolon o agelan-tema uyo, aban faga-emin tinum isiik tal-nilip e, ilimi aget fugunin mafak uta kup weng mafak uyo kanube baga-e-bom-nilip e,  
\v 4 “Siin uyo Yesus iyo bogo-nala, ‘Niyo asok tolon-temi o,’ age-se uyo, atamum o ageta kale, dogap kal alba a? Boyo fen asok toloma binim ko. Siin uyo numi olal iyo fegep tam iinan tam tam kwep tal kaa diibelu koyo God imi sugayok alugum mufekmufek telela kosa uyo kanubesa uta kup nuubu kale minte, yak ipmi bogo-nilip, ‘Mufekmufek koyo mitam migik kelan-temu o,’ agan-nuubip boyo fen migik ke-numu binim o,” agan-kalon-temip ko.  
\v 5 Aa bole, agan-kalon-temip kuta, aget uyo fugun-bom-nilipta, mufekmufek kalbu koyo tele utamaalup o agan-bomta kam agan-kalon-temip kale, sugayok uyo God iyo weng uta kup bogolata, abiil uyo bisop ugol mitam tebelu e minte, kafin uyo ok umi iibak tem ilep ku-tele ok uyo kupkaa mitam sep abe nuubuta kale,  
\v 6 asok God iyo weng uta kup bogolata, kafin diim komi tiinemin ok so minte abiil tigiin ilo wep malaak abemin umi ok so uyo tebe tulu tulu ke ok muk iibolu kupkalu fogo tebe-nuluta, alugum mufekmufek kafin diim kaa albu uyo bugulu kupkaluta, alugum mufekmufek kafan so albip iyo mafagan kaansip kale, kutop uyo kafin uyo migik ke tebesuta, kulep tal kaa diipmu kuta, aban faga-emin tinum bilip iyo, boyo tele utamaalup o agan-kalon-temip ko.  
\v 7 Kale kamano kogal mungkup, God iyo weng uta kup bogolata, abiil so kafin so uyo bom-nuluta, God imi tebe kwek kola ken tebelan-temu uta mitam tilin-tem albu kale, God imi aget fugunin uyo, unang tinum umik uganem-nuubip bilip iyo bom-bilipta, imi yega duga-eman-temi umi am uyo daanu kalaa ageta kota kanupmin unang tinum kuso minte abiil so kafin so uyo alugum kwego dego ke-nilita, maagup kwegali ken tebeluk o age-nalata, fen-bom alba ko.   
\p
\v 8-9 Kale duubal ibaa. Ibo mufekmufek maagup komi aget uyo ilumamin ba ko. Unang tinum iip maak maak imi aget fugunin uyo, “Siin Yesus ilami bogo-nala, ‘Asok tolon-temi o,’ age-se boyo fiyaap fiyaap kem tebesa o,” agan-nuubip kuta, Kamogim Yesus Krais bemi am tiimin uyo kafin diim unang tinum numi tiimin ulutap ba kale, Kamogim bemi aget fugunin uyo ki, am maagup daanba kuso minte atol ulumi kup wan tausen (1,000) kuso alop bilip iyo atin maagup kalaa agan-nuuba kale, imi aget fugunin uyo ki, tinum maagup min, unang maagup umaak maagalo binimanan-tema bo mafak kale, alugum unang tinum imi aget uyo fupkela ko nalami ilak uyo dolip kalaa age-nilita o age-nalata, kafin diim unang tinum numi aget uta fugun-bom-nalata, alugum nuyo yuut yega dobelin-tem bom-nalata, fen-be ko.   
\s1 Abiil so kafin so komi binimanan-temu umi sang uta ko  
\sr (1 Tes 5:1-11, 2 Fit 3:8-9, Rev 16:1-21, 20:7-21:8, 22:6-17)  
\p
\v 10 Kale unang tinum iip maak maak iyo bogo-nilip, “Kamogim imi ‘Tolon-temi o,’ agin-se boyo fiyaap fiyaap kem tebesa o,” agan-nuubip kuta, am ko daan bom-sulu Kamogim imi tolon-tema uyo, tinum yuguut unin imi maagalo atamin-tem bom-salap teleba ulutap kelan-tema kale, am ko daanan-temu kwek uyo ki, biileng afek uyo uun-buluta, abiil uyo binimanu e minte, alugum biningok uyo at tebe fuulu ken tebe binimanu e minte, kafin so minte unang tinum ko bom imi mufekmufek ilimi sagaal diim telelasip so uyo alugum fuulu ken tebe binimanan-temu ko.   
\p
\v 11 Kale boyo kanum mitam abe-nuluta, mufekmufek boyo kanube binimanu kupkalan-temu kale, kamano koyo ibo dogonubelan-temip a? Kanubelu umdii, ibo kupkaa kuguup tambal uta ke-bom-nilipta, yak God ilami kuguup uta kup alugum waafu-bom-nilipta o ageta ko.  
\v 12 Kale ibo God imi afungen am daanan-temu bomi fen-bom nan-temip uyo, ibo, yuut mitam tuluk o age-nilipta, dital faga-bom kanupmin kuguup boyo waafulip kalaa age-nalata, God ilami afungen am boyo yuut kwaala mitam tuluk o ageta kale, God imi unang tinum yegeman-tema umi am ko daanan-temu kota, abiil uyo ken tebe binimanu e minte, at mimin kiim uta tebe alugum biningok min uyo fuulu ken tebe mitam ok ulutap ke-nulu e, binimanan-temu kuta,  
\v 13 nuyo utamupta e, God ilami, “Kanubelan-temi o,” age weng kwep daa-se uta waafulan-tema kalaa age-nulupta, mufekmufek binimanan-temu bomi aget uyo yamyam tagamin ba ko. Kale God bemi weng kwep daa-se bomi fen tebesup boyo ki, abiil so kafin so uyo migik telela kolata, bole alugum unang tinum albip iyo kuguup tambal uta kup waafulipta, bole alugum mufekmufek uyo, “Mitam tambalanan-temu o,” age-se umi sang uta ko.   
\s1 Fita imi bogo-nala, “Nuyo tele utama-bom-nulupta, fen-sulupta, Kamogim iyo talak o,” agesa uta ko  
\sr (Rom 2:4, 10:21, Jut 17)  
\p
\v 14 Kale atin duubal ibe. Mufekmufek boyo mitam tolon-temu o age-nilipta, fen-nuubip kale, ibo dital faga-nilip e, alugum kuguup mafak mafak boyo kupkek kupkek ke-bom-nilipta, kuguup tambal uta kup ke-bom-nilipta, ibo God so aget maagup bubul maagup ke-bilipta, God yagal utamata e, ibo tambaliim albip kalaa age-nala itamak o ageta ko.  
\v 15 Bole dam Kamogim iyo asok tolon o age fenin kup ke-be kale minte, beyo tebe-nalata, numi kuguup mafak uyo yuut yan ke-em-nuubaala binim kale, iyo tebe nuyo fiyaap yan kem-nuuba kale, bota tebe nuyo kafalebeluta, utamupta, God bemi aget fugunin uyo, tinum unang imi aget uyo fupkela ko nalami ilak kup dolipta, imdep no nalami abiip daalan o agan-be kalaa agan-bulup kale, God iyo nulumi duup Fol imi aget fugunin tambal uyo kobelata, yagal mungkup kanupmin weng boyo ibo dola kobe-se ko.  
\v 16 Kale Fol imi unang tinum imi suuk kon ko dolem-nuuba kwek uyo bomi sang kup bagan-nuuba kale, bemi weng dolam-nuuba boyo dam kuta, weng iip maak maak suuk kon tem kwek albu umi magam uyo kem albaalu binim kale, weng bomi magam uyo bong faga-bomta tele utaman-temup kale, tinum iip maak maak God imi weng dagaa ku imi ilak uyo tol dolin-tem iyo tebe-nilip e, Fol imi weng so e minte God imi suuk kon tem umi weng so uyo fupkela kup-kiit mo kup-kalaak mo ke-bilip weng ugulumi migik keluta, baga-em-nuubip kale, bomi kalan uta God iyo atin anola binim kelan-temip ko.   
\p
\v 17 Kuta nalami duup ibe. Mufekmufek ko mitam tolon-temu boyo ipkil utamsip kale, God imi ulo kwaasulemin tinum bilip imi bisop bagamin weng boyo tebe ibo imdep yang iinu ibo titil fagaa molin-tem kelan-temip kale, ipkil utama-bom-nilipta, ilipmi tiinemin tonamin uyo tele tiin mo-bom-nilipta o ageta ko.  
\v 18 Kale Yesus Krais numi Kamogim iyo tebe numi ilim uyo bo-se kale, ibo dital fagaa Yesus iyo maak so fomtuup tele ataman-temip uta, yagal tebe ipmi ilami ilak dugamin uyo telela kobela mitam titil fagaa som, minte ipmi tiinemin uyo mitam tambalan no keluk o ageta kale, nimi aget fugunin uyo, unang tinum iyo Yesus imi win uyo kufu-e-bilipta, kamano koyo mitam win soyaap ke-nalata, suun kup tebe-balata o ageta kale, bota kwa.