\id MAL – Tsakhur
\ide UTF-8
\toc3 Mal.
\toc2 Malakiya
\toc1 Malakiya peyğambarın kitab
\mt1 Malakiya peyğambarın kitab
\ip Malakiyayn do «Zı g'axuvuna, Yizda malaaik» eyhen vodun. Mang'vee man kitab yişde eerayle ögiyl xhod'esde asiree otk'unva vod eyhe. Man peyğambaraaşine kitabbışin nekke qiyğa otk'unin vodun.
\ip İzrailyne milletıken sabarabı mane gahılqasse Baabilğançe g'attipxhın sapk'ıl qabı vooxhe. Manbışe İyerusalimeedın Allahın Xav meed q'omançe alya'an. Manbışe Allahın Xav meed ale'eeyid, Allahne yəqqı'n əlyhəə vuxha deş. Manbışe Allahıs ı'bəədat yik'eençe deş ha'a ıxha. Manbı Allahne Q'aanunuka gyuv'ur-oza qeebaxhe vuxha deş. Manbışe cos nenniy ıkkan manıd ha'a ıxha.
\ip Malakiya peyğambarıs Allahne xənne mühübne hək'ee insanaaşis yik'el qalya'as ıkkiykın. Mang'us ıkkan ıxha, insanaaşe Allahıka hav'uyne mugaavileys sik'ı ı'mı'r he'ecen. Malakiya peyğambaree eyhe ıxha, Allahee g'axuvuna qalesda. Mang'vee Rəbbis yəq qaa'as. İncilyne kitabee, məxüd I'sa Masihıle ögiyl qarıyne xhineeqa k'yooq'ane Yəhyeyne hək'ee otk'un.
\c 1
\p
\v 1 Rəbbee Cun cuvab İzraililqa, Malakiya peyğambarıle ğana hixhar ha'a.
\s Rəbbee Yaaq'ub g'əyxı', Esavmee Cuke əq'əna qı'ı
\q
\v 2 Rəbbee «Zas şu vukkiykıninbıva» eyhe.
\b
\q Şossemee «Şi nəxübne vukkiykınva?» qiyghanas əxə.
\b
\q Rəbbeeyid inva eyhe:
\q – Nya'a, Esav Yaaq'ubna çoc dişdiy vor?
\q Zımee, Yaaq'ub ıkkanaalin şu, cuke g'abıynbı, g'əvxü,
\q
\v 3 Esaviy mang'uke g'abıynbımee, Zı əq'əna qav'u.
\q Zı manbı vooxhen suvabı q'əra qa'as hassır,
\q manbışde doyulin cigabı çaq'alaaşis huvu.
\b
\q
\v 4 Edom vooxhene, Esavıke g'abıynbışisse eyhes əxə:
\q – Şakın ıxheeyid,
\q şi meed man hatq'ur-hiyxürin cigabı qa'asınbıcad.
\q Saccu Xəəne G'oşunbışde Rəbbee inva vod eyhe:
\q – Hasre, manbışe ale'ecencad,
\q Zımee meed hı'ğəkkar ha'asın.
\q Gırgıne gahbışil
\q manbışde ölkayk'le g'ulyopt'ulna ölkava eyhes,
\q coyub Rəbbina qəl avquyn millet xhinne qıvaats'as.
\q
\v 5 Şok'le man vuşdecad uleppışika g'acumee,
\q şucad eyhes: «İzrailiked şaqana, Rəbbin do axtıda vod!»
\s Rəbbis dekkanan q'urbanbı
\q
\v 6 Xəəne G'oşunbışde Rəbbee eyhen:
\q – Ay Yizın do qizar hidya'an kaahinar!
\q Dixee dekkıs,
\q g'uleeyib cune iyesiys hı'rmat giviyxhe.
\q Zı Dekxheene, nyavxha şu Zas giviyxhena hı'rmat?
\q Zı İyesiyxhee meeb nyavxha şu Zas giviyxhena hı'rmat?
\b
\q Şosse «Nəxüdne şi Yiğın do qizar hidi'ıva?» qiyghanas əxə.
\b
\q
\v 7 – Şu Yizde q'urbanbı allya'ane cigalqa
\q kara idyalesın Zasın otxhuniy adı giyxhe.
\q Mançikad, «Şi Vas dekkanan nəxüdne ha'ava?» qiyghan.
\q Şu Rəbbin q'urbanbı allya'an ciga qizar hidi'ı,
\q məxüd Mang'us dekkanan ha'a.
\q
\v 8 Şu bı'rq'ı'n həyvanar q'urbanna alli'iy
\q yugunne vod?
\q K'aana, vuk'arna həyvan q'urbanna ablyav'uy
\q nya'a yugunne vod?
\q Məxbına sa həyvan yiğne ölkayne xərıng'us hevle,
\q ilekke mang'us ğu ikkiykanaseeva,
\q mang'vee yiğna haa'asee?
\q Məxüd Xəəne G'oşunbışde Rəbbee eyhe!
\b
\q
\v 9 Həşde Allahıs düə hee'e,
\q Mang'vee şos rəhı'm hee'ecen.
\q Şu məxdın q'urbanbı allya'amee,
\q Mana şoqa yugra eyxheye?
\q Məxüd Xəəne G'oşunbışde Rəbbee eyhe!
\b
\q
\v 10 Vuşde sang'vee, Yizde q'urbanbı allya'ane cigee,
\q q'ərane cigeeqa ts'a gyoxhxhan ha'asse,
\q Yizde xaan akkabıcad qı'iynxhiy yugda eyxheyiy!
\q Yizın yik' şoka gyotxhan deş,
\q şu allya'an q'urbanbıd alyaat'as deş!
\q Məxüd Xəəne G'oşunbışde Rəbbee eyhe!
\b
\q
\v 11 Verığ ılqəəne cigeençe, k'yooçene cigeeqamee,
\q Yizın do milletbışde yı'q'nee axtıda vod!
\q Gırgınəəng'ə Yizde doyule ətirbı gyoxhxhan ha'a,
\q məttın paybı adayle!
\q Man Yizın do milletbışde yı'q'nee,
\q axtıda ıxhayke ha'a!
\q Məxüd Xəəne G'oşunbışde Rəbbee eyhe!
\b
\q
\v 12 Şumee, «Rəbbine q'urbanbı allya'ane cigaylin otxhuniy muq'addasın deş vod,
\q man qizar hide'eeyid eyxheva» uvhu,
\q mançina muq'addasiyvalla avaak'an haa'a.
\q
\v 13 Ooğançe «İnimeena əq'übavad!» uvhu,
\q şu mançilqa yı'q' sak'al ha'a!
\q Məxüd Xəybışde Xərıng'vee Rəbbee eyhe!
\b
\q Şu Zas q'urbanna ablyaa'asva
\q q'ööq'üna, k'aana, vuk'arna həyvan abeene,
\q Zı mana şoke alyabat'aye?
\q Məxüd Rəbbee eyhe!
\b
\q
\v 14 Syuruneençe g'apsırne yugne g'argıne cigee,
\q Xudaavandays q'ı'bı'lyna həyvan abıyne horalays bed-düə vuxhena!
\q Zı inekke xərna Paççahva,
\q gırgıne milletbışe Yizın do axtı qa'a!
\q Məxüd Xəəne G'oşunbışde Rəbbee eyhe!
\c 2
\s Kaahinaaşis bed-düə haa'a
\q
\v 1-2 Xəəne G'oşunbışde Rəbbee eyhe vod:
\q – Kaahinar, ina əmr həşde vuşdemee vob:
\q Yizde cuvabıl k'ırı ilydiyxheene,
\q Yizın do yik'eençe axtı qıde'eene,
\q şolqa bed-düə gyooğav'u,
\q vuşun xayir-düəbı bed-düəlqa sak'al ha'as.
\q Şu Yizın do yik'eençe axtı qıdi'ıva,
\q şu Yizda bed-düə alyapt'ınacab.
\b
\q
\v 3 Zı şol-alla şoke g'abıynbışikınıd ha'asın.
\q Bayrambışil şu q'urbanna alli'iyne həyvanaaşin xhidbı
\q Zı vuşde aq'vabışile k'ena ı'xəs,
\q mançika sacigee şu dağaa'as.
\q
\v 4 Manke şok'le ats'axhxhes,
\q Zı mana əmr şoka, Leviyne nasılıka, hav'una mugaavile
\q aaxvecenva g'axuvu.
\q Məxüd Xəəne G'oşunbışde Rəbbee eyhe!
\b
\q
\v 5 Zı Leviyne nasılıka barakatnana ı'mı'r
\q hoolena mugaavileniy hav'u.
\q Zas hı'rmat gyuvxhuva,
\q Zı manbışis man gırgın huvuyn.
\q Manbıb Zale qəpq'ı'ninbı,
\q Yizde doyusub hı'rmat gyuvxhuna.
\q
\v 6 Manbışde mizel qopkuna Q'aanun vuxha,
\q ghaleençed horbı qığeeç'enbı deşdiy.
\q Manbışe Yizde ögiyl yugnayiy qopkuna ı'mı'r hav'u.
\q Geebınbı manbışe yəqqı'lqa sav'u.
\b
\q
\v 7 Kaahinaaşine ghalen ats'al havaces ıkkan,
\q insanaaşisse manbışde mizele
\q Q'aanun t'abal haa'as vəəxecenva.
\q Kaahinar Xəəne G'oşunbışde Rəbbee g'axuvuynbı vob.
\q
\v 8 Şumee, kaahinar, yəqqı'le qığeepç'ıynbı,
\q şu helene ats'aalybışika
\q mansanbıb şoqab qihna habğı.
\q Zı Leviyne nasılıka hav'una mugaavile
\q şu havakkal hav'una.
\q Məxüd Xəəne G'oşunbışde Rəbbee eyhe!
\b
\q
\v 9 Şu Yizde yəqqı'n apk'ın deş,
\q Q'aanunuka g'acesde işbışee,
\q şu gırgıng'uqa sa uleka ilyaakı deş.
\q Mançil-allab Zı şu milletnecab g'eliqqa hevles,
\q k'ap'ik'ıle avqa qaa'as.
\s Yahudayne milletın Allahıkana mugaavile havaakal haa'a
\q
\v 10 Yişda gırgıng'una Dek sa dişde vor?
\q Şi sa Allahee dişde ipxhın?
\q Nya'a manke şi dekkaaşika hav'una mugaavileyna
\q muq'addasiyvalla avaakan haa'a,
\q sana-sang'us horbı ha'a?
\q
\v 11 Yahudayne milletın Allahıs xayaanat hı'ı.
\q İzraileeyiy İyerusalimee həlyvəəq'ənasın işbı hı'ı:
\q Yahudabışee menne allahbışis
\q ı'bəədat ha'an yedar hav'u,
\q Rəbbis ıkkananne, muq'addasne cigayna
\q muq'addasiyvalla avaakan hav'u.
\q
\v 12 Man hı'ına insan vuşu ıxhay ixhecen,
\q Xəəne G'oşunbışde Rəbbis q'urban ablyaa'ana çikana ixheeyir,
\q Rəbbee mana Yaaq'ubne çadırbışisse g'e'eşşecen.
\b
\q
\v 13 Şu in karıd ha'an:
\q gyaaşu-gyaaxu, Rəbbin q'urbanbı allya'an cigad
\q ulene nağıka gyatsts'a'an.
\q Məxüd, şu adıyne q'urbanıqa Rəbb sak'ı ilydakkava,
\q manbı şoke ilydyaat'ava ha'a.
\q
\v 14 Şosse «Nişil allavane?» qidghın ha'as əxə.
\q Ğu mek'vranang'a hey'iyne zəiyfayneyiy yiğne yı'q'nee
\q Şahad Rəbb vorna.
\q Ğu, mana yiğna nikahıkana xhunaşşe yixhayka ilydyakkı,
\q məng'ı's xayaanat hı'ı.
\q
\v 15 Allahee şu sa tan, sa rı'h xhinne dişde ipxhın?
\q Nya'asdiyxan Mang'us şu sa vuxha vukkan?
\q Mang'us Cunemee nasılniy vukkan.
\q Mançil-allab şucab şu havaace.
\q Hasre şavaacad mek'vranang'a hey'iyne xhunaşşeys
\q xayaanat hıma'acen.
\b
\q
\v 16 İzrailyne Allahee, Rəbbee eyhen:
\q – Xhunaşşeyka yugra dexhena,
\q mana qıxeelena Zak'le g'ımece vor.
\q Mançil-allad şucab şu havaace,
\q xayaanat hıma'a!
\q Məxüd Xəəne G'oşunbışde Rəbbee eyhe!
\s Rəbb məhkama alğahas ayres
\q
\v 17 Vuşde yuşan hav'uyn Rəbb ozar ha'a.
\q «Nəxürne şi Mana ozar ha'ava?»
\q şosse qiyghanasıd əxə.
\q Şu eyhen:
\q – Qəlasın ha'anbı Rəbbine ulesqa yugba qöö,
\q Rəbbis manbı vukkananbı.
\q Şucadıd meed eyhen:
\q – Qopkuvalin məhkama alğayhena Allah nyaane?
\q Mançikar şu Mana ozar ha'a.
\c 3
\q
\v 1 Haane, Zı g'axuvuna ı'qqə vor.
\q Mana Zale ögee ark'ın yəq qaa'as.
\q Şu t'abal ha'ana Xudaavand
\q sayangara Cune İyerusalimeene xaaqa qales.
\q Şos g'aces ıkkanna, mugaavileyn cuvab
\q allesda qales.
\q Məxüd Xəəne G'oşunbışde Rəbbee eyhe!
\b
\q
\v 2 Vuşune öörxəs Rəbb qarıne yiğıl?
\q Vuşune öörxəs Mana qarımee?
\q Mana xhiməə qa'an ts'a xhinneyiy
\q mətta'an sap'ın xhinne ixhes.
\q
\v 3 Rəbbee Leviyna nasıl mətta'as.
\q Mang'vee man k'ınəəğəyiy nuk'ra ts'ayıka rışşi qı'ı,
\q mətta'ane insanee xhinne ha'as.
\q Mançile qiyğa manbışe Rəbbis qotkuyn q'urbanbı allya'as.
\q
\v 4 Manke Yahudayne ölkeeyiy İyerusalimee
\q avaalıyne yiğbışil allya'an,
\q ögiylyne senbışil allya'an q'urbanbı xhinne
\q Rəbbisqa yugda qales.
\q
\v 5 Zı vuşun məhkama alğahasdemee, şosqa ayres.
\q Cadubı ha'anbı, zina ha'anbı,
\q horbışika k'ın g'iysaranbı, işçiyn pıl qidelenbı,
\q adamer hapt'ı avxuyn yedariy
\q dek, yed dena avxuyn uşaxar t'yaats'axal haa'anbı,
\q menne cigeençe qabıynbı g'e'eebaşenbı,
\q Zale qı'dəəq'ənanbı man şu ha'an karbı
\q Zı sık'ınne gahıle aq'valqa qığahas!
\q Məxüd Xəəne G'oşunbışde Rəbbee eyhe!
\b
\q
\v 6 Zı Rəbb vorna, badaldexhena.
\q Yaaq'ubıke g'abıynbı, şunab badal meebaxhe!
\q
\v 7 Yizde əmrbışilqa şu dekkaaşine gahıle gibğıl
\q yı'q'bı sak'al ha'a.
\q Zalqana savk'le, Zınar şolqa sak'alasda!
\q Məxüd Xəəne G'oşunbışde Rəbbee eyhe!
\b
\q Şossemee «Nəhı'bna savk'alasva?»
\q qidghınıd ha'as əxə.
\q
\v 8 İnsaneeyid Allahıke qöqəyee?
\q Şumee Zake qöqən.
\q «Vake hucoona qöqəva?» şosse qiyghanas əxə.
\q Yits'ınçina sa pay\f + \fr 3:8 \fr*\fq Yits'ınçina sa pay: \fq*\ft Allahee İzrailybışis huvuyne Q'aanune otk'unin: şagavnayiy həyvanaaşina yits'ınçina pay Allahne yəqqə hevles vukkan. Mane Allahne yəqqə huvuyne karaka Allahın Xav havace ıxha. Mane karake sayıd maane kaahinaaşe otxhan ıxha.\ft*\f*, sayid Zas ikkekan.
\q
\v 9 Milletıncad Zake qöqənçil-alla,
\q vuşde gırgıng've bed-düə alyapt'ı.
\q
\v 10 Yits'ınçina sa pay bıkırba able,
\q Yizde xaa oxhanasın kar ixhecen.
\q Şu mançika Zı siliys ı'xe!
\q Nya'a, Zı mançile qiyğa şos xəən g'uleppı aaqas dişde,
\q hexxalika barakat hevles dişde?
\q Məxüd Xəəne G'oşunbışde Rəbbee eyhe!
\b
\q
\v 11 Zı ts'irtyaaşisqa vuşun ezuyn
\q kar oxhanas hassaras deş,
\q vuşde tayangbışile t'ımılid nyaqacad ixhes deş.
\q Məxüd Xəybışde Xərıng'vee Rəbbee eyhe!
\b
\q
\v 12 Vuşda ölka micagne cigalqa savk'uva,
\q gırgıne milletbışecad şok'le baxtivarva eyhes.
\q Məxüd Xəəne G'oşunbışde Rəbbee eyhe!
\s Qopkuynbışda hək'
\p
\v 13 «Şu Zak'le ivdyaak'asın cuvabbı uvhuva»
\q Rəbbee eyhe.
\q Şossemee «Nya'a, şi Vak'le hucoone uvhuva?»
\q qiyghanas əxə.
\q
\v 14 Şu uvhuyn: «Allahıs ı'bəədat hı'iy,
\q nişiscad karaı'dəən kar vodun.
\q Mang'vee eyhenbı hı'ı,
\q Xəəne G'oşunbışde Rəbbine ögiyl hapq'ır iviykıriyke nya'a,
\q şas hucoone ıxha?
\q
\v 15 Şi həşde cocab-co axtıba vukkekanbışik'le
\q baxtivararva eyhe.
\q Qəlasın ha'anbışin işbıd yugda ayk'an,
\q Allah siliys ı'xı'yxənbıb cazaake g'ittiviyxhananbı».
\b
\p
\v 16 Mane gahıl Rəbbile qəvəyq'ənanbı
\q sana-sang'uka yuşan haa'a vooxhe.
\q Manbışe yuşan ha'an Rəbbik'le g'iyxhe ıxha,
\q Mang'vee mançil yugda k'ırı iliyxhe.
\q Rəbbile qəpq'ı'n Mang'une doyus hı'rmat giviyxhenbışdemee,
\q Mang'une ögiyl manbışin işbı oyk'anan kitab aaqı eyxhe.
\q
\v 17 Xəəne G'oşunbışde Rəbbee eyhen:
\q – Mane yiğıl Zı manbışike Zas gıranın insanar haa'as.
\q Dekkıs vucee eyhen ha'ana dix nəxüriy qiykkan,
\q Zasıb manbı məxüb qivikkanasınbı.
\q
\v 18 Mane gahıl şosse qorkung'uke pisda,
\q Allahıs g'ullux ha'ang'uke hidya'ana
\q meer curaa'as əxəsda.
\c 4
\s Rəbbin yiğ
\q
\v 1 Xəəne G'oşunbışde Rəbbee eyhen:
\q – Peşt xhinne gyotxhanan yiğ k'ane qexhe vod.
\q Gırgın cocab co axtıba vukkekanbıyiy pisvalla haa'anbı,
\q mane yiğıl balybiy xhinne gyooxhanas.
\q Mane k'ane qexhene yiğın
\q manbı gyooxhan haa'asınbı.
\q Manbışike kokbıd, bıtağbıd axvas deş.
\q
\v 2 Zale qəvəyq'ənanbışdemeeme,
\q Qopkuvalina verığ ılqevç'es.
\q Mançine şü'ülee yug qav'iy ixhes.
\q Ağıleençe g'aykkiyn q'ıkar xhinne şu huvaagas.
\q
\v 3 Pisınbı şu kööq'əsınbı.
\q Zı man ha'asde yiğıl,
\q manbı vuşde g'elybışik avub yı'q xhinne vuxhes.
\q Məxüd Xəəne G'oşunbışde Rəbbee eyhe!
\b
\q
\v 4 Yizda nukar Mısa Xorevne suvalynang'a,
\q Zı mang'us İzrailyne milletnemeecab huvuna Q'aanun,
\q Yizın g'aydabıyiy əmrbı şu yik'el aqqe.
\b
\q
\v 5 İlyaake, Rəbbin xədın, dağamın yiğ qalesse,
\q Zı şosqa İlyas peyğambar g'axıles.
\q
\v 6 Zı qarı in cigabı
\q kunfa-yakun hıma'acenva,
\q Mang'vee dekkaaşin yik'bı dixbışilqa,
\q dixbışinbıd dekkaaşilqa sak'al ha'as.