\id JON – Tsakhur
\ide UTF-8
\toc3 Yun.
\toc2 Yunus
\toc1 Yunus peyğambarın kitab
\mt1 Yunus peyğambarın kitab
\ip İne kitabee otk'uninbı yişde eerayle ögiyl VIII-esde asiree ıxha. Allahee Yunus peyğambarık'le İzraileençe Nineviye eyhene şahareeqa, Assiriye imperiyne paytaxteeqa, hak'neva eyhe. Allahee mana Nineviyalqa maane insanaaşik'le cokun cone bınahbışil-alla ha'asınva eyhes g'ıxele. Assiriye imperiyeyn hiqiy-allane milletbışilqa yiğbı exa ıxha, manbı geeb eb deşin karbı vuxha. Mançil-allar Yunus peyğambarıs cune milletne duşmanaaşisqa ı'qqəs ıkkan ıxha deş. Mang'us Allahne cuvabıke qığeç'u, hixvas ıkkiykan. Qiyğa ıxhaynbı şok'le ats'axhxhes ıkkanxhee, şosse ine kitabee qətqəs əxə.
\c 1
\s Yunusun Allahıke hixvuy
\p
\v 1 Rəbbee Amitayne dixek'le Yunusuk'le inəxdun cuvab eyhe:
\p
\v 2 – Oza qıxha Nineva eyhene xənne şahareeqa hark'ın maabınbışilqa hixhar he'e: co ha'an nyaayid deşin karbı Zak'le ats'a vodunbı.
\p
\v 3 Yunususmee oza qıxha, Rəbbile hixu menne suralqa, Tarşişeeqa əlyhəəs ıkkiykan. Mana ghal-k'ena Yafeeqa qarayle. Ma'ad mang'vee Tarşişeeqa əlyhəən gamı t'abal ha'a. Yəqqı'na hək'ib quvu, Rəbbile hixvasva mana manbışika gameeqa giy'ar.
\p
\v 4 Rəbbemee mane gahıl deryahılqa məxübna it'umna mıts g'uxoole, gamı haq'varasınçil qexhe. 
\v 5 Gameebınbı qəpq'ı'n cone allahbışilqa ona'a giviyğal. Gamı sibık qa'asva manbışe gırgın kar deryaheeqa dağa'a.
\p Yunusmee mane gahılqasse gamıyne avudne cigeeqa giç'u it'umra g'alirxhu eyxhe. 
\v 6 Gamıyna xərna mang'usqa qarı eyhen:
\p – Ğu nya'a g'alirxhu? Oza qıxha yiğne Allahılqa one'e. Sayid Mang'vee şas kumag ha'a, hapt'ıyke g'attivxhan haa'a.
\p
\v 7 Gameebınbışe sana-sang'uk'le eyhen:
\p – Qudoora çöp k'eçç'u ilyaakas şavul-allayiy şalqa in yiğbı ı'qqə.
\p Çöp k'eçç'umee, man Yunusulqa g'e'exha.
\p
\v 8 Manbışe mang'uke qiyghanan:
\p – Həşde ğu şak'le eyhelan, in şak qitxhuyn divan şavul-allane vod? Ğu hucoonexhe ha'an? Nençene qöö? Vatan nyaa'ane vob? Nene milletnane vor?
\p
\v 9 Mang'vee eyhen:
\p – Zı cühüt' vorna. Zı ç'iyeyiy deryah itxhıning'us, xəybışde Allahıs, Rəbbis, ı'bəədat ha'a.
\p
\v 10 Mang'vee manbışik'le eyhen, vuc Rəbbile hexvava. Manbı it'umba qəpq'ı'n qiyghanan:
\p – Ğu in hı'iyn hucoone?
\p
\v 11 Deryaheena mıts it'um qooxhe g'avcu, manbışe mang'uke qiyghanan:
\p – Mana mıts huvoracenva şi vak hucoone ha'as?
\p
\v 12 Yunusee manbışik'le eyhen:
\p – Zı alyart'u deryaheeqa huvoxhre. Manke mıts ulyoozarasda. Zak'le ats'an, məxübne it'umne mıtseeqa şu zal-alla gyapk'ı.
\p
\v 13 Gameebınbışis avarbı it'umda alik'arı'ı xhyan g'ıttiyxhane cigeeqana əlyhəəs vukkiykıneeyib, geeb g'ooxhene mıtsın əlyhəəs havaasar deş. 
\v 14 Manke manbı giviyğalanbı Rəbbilqa ona'a:
\p – Hucoone ixhes, Rəbb, mane insanın şi tan ileşşeva şi gimabat'a. Bınah deşung'un hı'sab şake qımeqqa. Ğu, Rəbb, Vas ıkkanəxüd hı'ı.
\p
\v 15 Manbışe Yunus aqqı deryaheeqa g'uvorxhulymee, mıtsıb ulyoozarna. 
\v 16 Gameebınbı it'umba qəpq'ı'n, Rəbbis cuvab huvu q'urban ablyaa'a.
\s Yunusna düə
\p
\v 17 Rəbbee geed xədın baluğ qali'ı Yunus k'öğəs ilekka. Yunus baluğne vuxhnee xhebılle yiğnayiy xheyible xəmna axva. 
\c 2
\p
\v 1 Yunusee baluğne vuxhnenang'a cune Rəbbis Allahıs inəxübna düə haa'a:
\q1
\v 2 Rəbb, zı dağamiyvalenang'a Valqa onu'u,
\q2 Ğunad alidghıniy quvuyn.
\q1 Zı ahaleençe ts'ir hav'u,
\q2 Vak'le yizda ts'ir g'avxhuna.
\q1
\v 3 Ğu zı deryahne k'oralybışeeqa g'uvorxhul,
\q2 Zı xhyanbışde yı'q'nee axu,
\q1 Yiğın gırgın xhyanbıyiy dalğabı
\q2 Zal ooğançe ılğeeç'u.
\q1
\v 4 Manke zı uvhuyn: «Ğu zı Vake əq'əna qı'ı,
\q2 Meed zak'le Yiğın muq'addasın xav İyerusalimee g'acesıncad».
\q1
\v 5 Nafas əlyhəəsme xhyanbı zalqa qadı,
\q2 K'oralybışeeqa qıkkı,
\q1 Vuk'lelqad xavsiy alitk'ır.
\q2
\v 6 Suvabışde avqamee zı giç'una,
\q1 İttehesu Ğu dunyeyn akkabı zal oğa it'umetxha.
\q2 Ğumee yizda Rəbb Allah
\q1 Yizın tan k'oralybışeençe g'attixhan hı'iyn.
\q1
\v 7 Yizda ı'mı'r k'yabat'amee,
\q2 Zı Rəbb yik'el qali'ı,
\q1 Yizda düə Valqa,
\q2 Yiğne muq'addas xaalqa hipxhırna.
\q1
\v 8 Şavaayiy nişiscad karaı'dəəne bütbışis ı'bəədat ha'a,
\q2 Manbışe Ğu yik'el hixan ha'a,
\q2 Colqana rəhı'm avaak'an haa'a.
\q1
\v 9 Zımee şukur haa'ane mə'niybışika
\q2 Vas q'urbanbı allya'as.
\q1 Zı huvuyn cuvab cigeeqa qalya'asın.
\q2 G'attivxhan haa'ana sa Rəbb Vuc vorna!
\p
\v 10 Rəbbee baluğuk'le uvhuyng'a, mançin Yunus ghalençe xhyan deşde cigeeqa qığayhe.
\c 3
\s Yunus Nineveeqa arayle
\p
\v 1 Rəbbee Yunusuk'le q'ö'es inəxdun cuvab eyhe:
\p
\v 2 – Oza qıxha Nineva eyhene xənne şahareeqa hark'ın, Zı uvhuynbı maabınbışilqa hixhare'e.
\p
\v 3 Rəbbee uvhuynçil k'ırı gyaqqı, Yunus Ninevalqa ayk'an. Nineva geeb xəbna şahar vuxha, mançe ılğeç'esdemee xhebılle yiğniyxhe ıkkiykanan. 
\v 4 Yunus giyğalna şaharvolle iykar. Ts'ettiyne yiğıl ı'qqəs əxənemene cigabışeeqa hark'ın, mang'vee eyhen:
\p – Yoq'ts'alyne (40) yiğıle Nineva kunfa-yakun haa'asda!
\p
\v 5 Ninevağançenbışe Allahılqa inyam hı'ı, siv aqqeva ses qığayhe. Manbışe xərıng'ule otçu k'ıning'ulqamee palanbı alya'a.
\p
\v 6 Mana xabar Ninevayne paççahılqa hipxhırmee, mana cune taxtıle giç'u, paççahaaşin tanalinbı g'ayşu, palan alyı'ı yı'qqıl giy'ar. 
\v 7 Paççahee əmr haa'a cuneyiy ağsaqqalaaşine doyule Nineval inəxüd eyhecenva:
\pmo «İnsanaaşe, həyvanaaşe, çavra-vəq'əyn vuççud umoyxhancen, xhyanbı ulymoğacen, uxhiyxhanasıd hımayk'ancen. 
\v 8 İnsanaaşilqa, həyvanaaşilqa palanbı ale'ecen. Gırgıng'vee Allahıs geeb düə he'e. Havaasre manbışe karaı'dəəne işbışikeyiy insanaaşis haa'ane pisvalike xıl ts'ıts'ee'ecen. 
\v 9 Şavuk'lene ats'a, Allahee sayıb şalqana qəl rəhı'mılqa savaak'alav'u, şi hapt'ıyke g'attivxhan haa'a».
\p
\v 10 Allahık'le manbı karaı'dəəne işbışile sapk'ıl g'avcumee, manbışilqa rəhı'm haa'a. Manbışilqa ablyaa'asva uvhuna ver, ablyaa'a deş.
\c 4
\s Yunusee qəl haa'a
\p
\v 1 Yunusus man diykın, qəlın qoxa eyxhe. 
\v 2 Mang'vee Rəbbis inəxübna düə haa'a:
\p – Ya Rəbb, zı hamanva nya'a xaanang'acar dişdiy uvhu? Mançil-allar zı Tarşişeeqaniy hixu. Zak'le ats'anniy Yiğna yugvalla avayk'an deş, Ğu rəhı'mnana, xədın sabırnana, ablyaa'asva uvhuna ver, ablyaa'as devkanna Allah vor. 
\v 3 Rəbb, hucoone ixhes, həşdiyle yizın can alişşe, zas ı'mı'r haa'as vukkan deş, qik'as ıkkan.
\p
\v 4 Rəbbee mang'uk'le eyhen:
\p – Deşxhee, vas mançike geebne qəl vuxha?
\p
\v 5 Yunus qığeç'u şaharne şargne sural giy'ar. Ma'ad mang'vee cusun verığ qıdyoot'asın xhinnen cigad ali'ı, şaharık hucooyiy ixhesva ilyakka giy'arna. 
\v 6 Rəbb Allahee, Yunusus yugda ixhecenva, maa'ad əq gyaahasın sa ala aleylya'a. Yunus man ala g'acu geer şadexhena. 
\v 7 Qinne yiğıl miç'eeqana mane alalqa Allahee mı'q g'ıxoolee. Mane mı'qən ala adğançe otxhunmee, ala qeqqvan. 
\v 8 Verığ ılqevç'umee, Allahee maqa kar qeqqva'ana g'ümana mıts g'ıxoole. Verığın mang'una vuk'ul gyooxhanav'u, mana sa curay qa'a girğılymee, mang'vee cus qik'uy heqqa:
\p – Zas ı'mı'r haa'as vukkan deş, qik'as ıkkan!
\p
\v 9 Allahemee Yunusuk'le eyhen:
\p – Deşxhee, vas alayl-alla geebne qəl vuxha?
\p Yunusee eyhen:
\p – Ho'o! Zas qik'asda xhinnena qəl vuxha!
\p
\v 10 Rəbbee mang'uk'le eyhen:
\p – Ğu idezuyn, ğu ilydyakkıyn sa xəmne əəre alyadı-qeqquyn ala vas qiykkan! 
\v 11 Nəxübne Zas qidivkvanas manimee xəbna Nineva eyhena şahar, maadın vəşşe g'alle aazır (120 000) sağıy sol dyats'an milletiy manimeen çavra-vəq'ə?