\id 2SA – Tsakhur
\ide UTF-8
\toc3 2 Şam.
\toc2 2-Şamuelin
\toc1 Şamuelin q'öd'esın kitab
\mt1 Şamuelin q'öd'esın kitab
\c 1
\s Davuduk'le Şaul qik'uva g'iyxhe
\p
\v 1 Şaul qik'uyle qiyğa, Davud Amalekbışile ğamxha siyk'almee, mana Tsiklageeqa qarayle. Ma'ar mana q'ölle yiğna axva. 
\v 2 Xhebıd'esde yiğıl Şaulne zastaveençe sa insan arayle. Mang'vee culqa abına ver haagvasva tanalinbı qıt'axxa'a, vuk'ulelqa nyaq'v kyaa'a. Mana insan Davudusqana qarı, mang'une ögiyl ç'iyelqamee k'yoyzarna. 
\v 3 Davudee mang'uke qiyghanan:
\p – Nençene qöö?
\p Mane insanee eyhen:
\p – İzrailyne zastaveençe hixu, zıcar zı g'attixhan hı'ı.
\p
\v 4 Davudee mang'uk'le eyhen:
\p – Maa'ad hucoona ıxha? Hucoona ixhes, zak'le eyhe.
\p Mane insanee eyhen:
\p – Eskerar dəv'ə əlyhəəne cigeençe heepxıynbı, con g'ellesınbıb hapt'ıynbı. Şaulıy cuna dix Yonatanıb hapt'ıynbı.
\p
\v 5 Davudee cus xabar abıyne insanıke qiyghanan:
\p – Şaulıy Yonatan hapt'ıva vak'le nençene ats'a?
\p
\v 6 Mang'vee Davuduk'le eyhen:
\p – Mane gahıl nəxüdme ıxha, zı Gilboayne suvaliy. Zak'le maa'ar cune nizeyk qirzıl Şaul g'acu. Balkanaaşil aleepxıynbıyiy dəv'əyn daşk'abıd mang'usqayiy hiyxhar. 
\v 7 Şaul yı'q'əlqa sak'ı ilyakkımee, zı g'acu mang'vee onı'ıyn. Zı mang'uk'le «Hooyva» uvhu. 
\v 8 Mang'vee zake qiyghıniyn: «Ğu vuşune vor?» Zınad mang'uk'le, «Zı Amalekbışda vorva» uvhu. 
\v 9 Şaulee zak'le uvhuyn: «Zasqana qıxha, zı gik'e. Zı sakaratee vorna, zas ine ık'arbışike g'attixhanas ıkkan». 
\v 10 Zı mançil-alla mang'usqa qıxha, mana g'ik'una. Zak'le ats'anniy, mang'usse avur axuyle qiyğa, ı'mı'r haa'as vəəxəs deş. Qiyğa zı mang'une vuk'lelin taciy xılelin lexa g'ayşu, inyaqa yizde xərıng'unemee, vasqa adı.
\p
\v 11 Man g'ayxhımee, Davudeeyiy cune k'anenbışe ts'ıts'ı'ı colyun tanalinbı qıt'axxa'a. 
\v 12 Manbışe Şaulnemee, mang'une dixene Yonatannemee, gırgıne Rəbbine milletnemee exhalilqamee ak' avqu. Manbışe gyaaşe-gyaaşe sivar aqqaqqa, geebınbı g'ılıncıke alğav'u gyapt'ıva. 
\v 13 Davudee, cus mana xabar abıyne mek'vung'uk'le eyhen:
\p – Ğu nençenane vor?
\p Mang'vee alidghıniy qele:
\p – Zı menne cigeençena vor, zı Amalekbışde sang'una dix vor.
\p
\v 14 Davudee mang'uk'le eyhen:
\p – Nəxürne ğu qı'dərq'ı'n Rəbbee g'əyxı'ng'ulqa gik'asva xıl g'ott'ul? 
\v 15-16 Ğu gik'uyna bınah val vob! Ğucad, yiğne ghalika, gardanaqa alyaat'u, «Zı Rəbbee g'əyxı'na paççah gik'uva».
\p Davudee cune insanaaşina sa qort'ul eyhen:
\p – Hoora, mana gik'e.
\p Mang'veeyir ı'xı' mana g'ek'ana.
\s Davud Şaulıqayiy Yonatanıqa geşşe
\p
\v 17 Davudee, Şaulneyiy cune dixene Yonatanee ak'ee ina mə'niy qəpqı'. 
\v 18 Qiyğab mana «Vukuna mə'niy» Yahudabışik'le xəp quvxheva əmr haa'a (mana mə'niy «Qorkuyng'une kitabee» opk'un vobna):
\b
\q1
\v 19 İzrail, yiğna xəbvalla,
\q2 yiğnecab axtıne cigabışee güvk'una.
\q1 Nəxbın cehilyar hapt'ıynbı!
\b
\q1
\v 20 Filiştinaaşin içer şadmeebaxhecenva,
\q2 Sunnat hıdyav'uynbışde içeeşe bayrambı hıma'acenva.
\q1 İn Gatee ats'axhxhıma'a,
\q2 Aşkelonne şahrabışee mançina hımaa'a.
\b
\q1
\v 21 Gilboayn suvabı,
\q2 Şolqa çiyiy gyoğıy hasre mexhecen,
\q1 Vuşde q'adaalybışee hasre şagavıd ılymaylecen.
\q1 Maa'ad cehilyaaşiniy Şaulun g'alxan g'eliqqa huvu,
\q2 maa'ad çilqa q'ış qıdyadğu\f + \fr 1:21 \fr*\fq Q'ış qıdyadğu: \fq*\ft Duşmanın g'ılınc hitighnecenva, avaala g'alxanbı dəv'əysınbı xhinne qa'ang'a, mançilqa q'ış qadağva ıxha. \ft*\f*.
\b
\q1
\v 22 Gyapt'ıynbışde ebake,
\q2 gucnanbışde tanıke,
\q1 Yonatanın vuk yı'q'əlqa siyk'alan deşdiy,
\q2 Şaulunıd g'ılınc idyats'ı qadaylen deşdiy.
\q1
\v 23 Şaulıy Yonatan,
\q2 şu üç'übnang'a manimee vukkananbı,
\q1 yugunbı vuxha. Habat'ameeyib cureepxha deş.
\q1 Şu q'aacirıleb ek'ınbı,
\q2 Aslanaaşileb gucukanbı vuxha.
\b
\q1
\v 24 İzrailin içer, Şaulnemee gyaaşe!
\q2 Mang'vee şolqa ç'ərəxən,
\q2 gıranın tanalinbıniyxhe alya'anbı.
\q1 Tanalinçılqad k'ınəğəyken karbıniyxhe qa'anbı.
\b
\q1
\v 25 Siç'ookkane cigee nəxbın cehilyar hapt'ıynbı!
\q2 Yonatan şene axtıne tepabışil qik'u.
\q1
\v 26 Yizda çoc Yonatan, yiğnemee yizın yik' gyotxhan.
\q2 Ğu yizdemee, geer gıranra ıxha.
\q1 Yiğın zı ıkkiykıniy,
\q2 yedar vukkiykıniyle zı ooqaniy aqqaqqa.
\b
\q1
\v 27 Nəxüb cehilyar hapt'ıynbı!
\q2 Dəv'əyn silahbıd aguynbı!
\c 2
\s Davuduke paççah ha'a
\p
\v 1 Sabara gah ılğevç'uyle qiyğa, Davudee Rəbbike qiyghanan:
\p – Zı Yahudayne nenemecar şahareeqa hak'nene?
\p Rəbbee eyhen:
\p – Hak'ne.
\p Davudee qiyghanan:
\p – Nyaqane hak'ne?
\p Rəbbee eyhen:
\p – Xevroneeqa.
\p
\v 2 Davudur maqa cune q'öyursana xhunaşşeyka hayk'anna: İzre'elyğançena Axinoamır, Karmelyğançena Navalna sip'ıriy Avigailer. 
\v 3 Davudee cukan insanarıb cone xizanbışika Xevronqa qabı, mançine hiqiy-allane şaharbışee manbışis aaxvasın cigabı hele. 
\v 4 Yahudayeençen insanar abı, Davudulqa q'ış qadğu, maa'ar mang'uke Yahudayne nasılına paççah ha'a.
\p Maa'ad Davuduk'le uvhumee, Şaul Gileadeene Yaveşne milletın k'eyxhıva, 
\v 5 Davudee maqa cun insanar g'uxoole. Mang'vee cune insanaaşik'le eyhen:
\p – Maane milletılqa in yizın cuvab hixhar he'e: «Rəbbee şos xayir-düə hevlecen, vuşda xərna eyxhene Şaulus, şu yugvalla hav'u, mana k'eyxhıva. 
\v 6 Hasre mane vuşde işil-alla Rəbbee Cuna badal dyooxhena yugvalla şos haagvecen. Zınad mane vuşde işil-alla şos yugun ha'as. 
\v 7 Vuşda xərna eyxhena Şaul qik'uva şu həşde xıleppı avqa qıma'a, it'umba ulyoozre. Yahudayne nasılen, cosda paççah zake hı'ı».
\s Şaulna dix İşboşet İzrailyna paççah ıxha
\p
\v 8 Şaulne g'oşunbışde q'oma ulyorzuling'vee Nerne dixee Avneree, Şaulna dix İşboşet cukasana Maxanayimeeqa qıkkı ıxha. 
\v 9 Maa'ar Avneree mana Gileadne, Aşuriyne, İzre'elyne, Efrayimne, Benyaminne cigabışee vooxhene insanaaşde – gırgıne İzrailyna paççah ha'a.
\p
\v 10 Şaulne dixeqa, İşboşetıqa, İzrailyna paççah ıxhayng'a yoq'ts'al (40) senniy vod. Mang'una paççahiyvalla q'ölle senna ts'ıts'avxha. Yahudayne nasılınmee, Davudun sura aqqı ıxha. 
\v 11 Davudee Xevronee, Yahudayne nasıles paççahiyvalla yighılle sennayiy yixhıble vazna hav'u.
\s İzrailnayiy Yahudayna dəv'ə
\p
\v 12 Yiğbışde sa yiğıl Nerna dix Avner, Şaulne dixene İşboşetne insanaaşika Maxanayimğançe Giveoneeqa hayk'an. 
\v 13 Tseruya donane zəiyfayna\f + \fr 2:13 \fr*\fq Tseruya donana zəiyfa: \fq*\ft mana Davudna xını yeexhe.\ft*\f* dix Yoavmee, Davudne insanaaşika Giveonusneene xhyan sadıyne cigaysqa, manbışde ögiylqa qığeç'e. Yoav cune insanaaşika xhyan sadıyne cigayne sa aq'val, Avnerır cune insanaaşika – manisa aq'val giy'ar. 
\v 14 Avneree Yoavık'le eyhen:
\p – Havaasre mek'vunbı suğootsu, yişde ögiyl saç'ivkvecen.
\p Yoaveeyid eyhen:
\p – Havaasre saç'ivkvecen.
\p
\v 15 Şaulne dixene İşboşetne sural sıç'ookvan Benyaminaaşin mek'vunbı qəpqı'mee, yits'ıq'vəyre (12) insan eyxhe. Davudne suraler yits'ıq'vəyre eyxhe. 
\v 16 Manbışe sana-sananbı vuk'ulbışike avqu, g'ılıncbı hiyxə. Manbışin gırgınbı habat'anbı. Mançil-allad Giveoneene mane cigayk'le Xelqat-Hatsurimva (\it G'ılıncbışin çol\it*) eyhe.
\p
\v 17 Mane yiğıl ma'ad geed it'umın saç'ikkvuy ıxha. Avneriy İzrailybı, Davudne insanaaşis maa'ab avub avxu.
\p
\v 18 Tseruya donane zəiyfayna xhebırsana dix: Yoav, Avişay, Asahelib maa'ab vooxhe. Asahel, çolana ceyran xhinne, g'elike ek'ra ıxha. 
\v 19 Mana neng'uqacar ilydyakkı, Avnerıqa qihna girxhu. Mang'uqar qihna g'adayxhvanmee, 
\v 20 Avner yı'q'əlqa ilyakkı, eyhen:
\p – Asahel, ğune vor?
\p Mang'vee eyhen:
\p – Ho'o, zı vorna.
\p
\v 21 Avneree mang'uk'le eyhen:
\p – Yiğne sağıqa, soluqa sa ilekke. Mane mek'vunbışda sa aqqı, manbışin silahbı g'ayşe.
\p Asaheleemee Avnerıke xıl ts'ıts'a'a vuxha deş.
\p
\v 22 Avneree, Asahelik'le meed eyhen:
\p – Zaqar qihna gimexha, zake xıl ts'ıts'ee'e! Nişil-allane zı ğu gik'as? Qiyğa zı yiğne çoçune Yoavne aq'veeqa nəxürna ilyakkas?
\p
\v 23 Asahelee meeb mang'uke xıl ts'ıts'aa'a deş. Manke Avneree cun nize alyat'u, cık'rıhiyna mang'une vuxhnele k'ena məxüd ı'xiyxə, cık'rı\f + \fr 2:23 \fr*\fq Cık'rı: \fq*\ft man cık'rı yı'q'əled ek'ı'ı ıxha. \ft*\f* mang'une yı'q'ək ciga hı'ı qığeç'e. Asahel qukkyorkul cigeecar qek'ana. Mançile qiyğa Asahel qik'uyne cigaysse ı'lğən gırgınbı, maa'ab ulydyobzur ılğeebaç'e vuxha deş. 
\v 24 Yoaviy Avişay Avnerıqa qihna g'adaaxhvan. Verığ k'yooçemee, manbı qabı hiviyxharanbı Giveonne sahrayne yəqqı'lyne Giahne ögiylyne Ammava eyhene tepalqa. 
\v 25 Benyaminaaşinbı Avnerne hiqiy-alla savayle. Qiyğab apk'ın, sa tepayne q'omaqa ılqeepç'ı, maayib ulyoozaranbı. 
\v 26 Avneree ts'irıka Yoavık'le eyhen:
\p – Şi mısılqameene g'ılıncıke hapt'as? Nya'a, vak'le ats'a dişdiy, nekke qiyğa yugdacad ixhes deş? Ğu yiğne insanaaşik'le mısane eyhes, cone çocaaşiqab qihna gimabak'va?
\p
\v 27 Yoavee eyhen:
\p – Vorne Allahılqa k'ın ixhen, ğu manva ittevhuynxhiy, yizın insanar cone çocaaşiqa qihna miç'eebilqamee gyapk'asınbıniy.
\p
\v 28 Qiyğa Yoavee şeypur əlüvxümee, manbışin gırgınbı ulyoozaranbı. İzrailybışiqa qihna gyapk'iy ç'əvə'ən, manbışika sayib sıç'ookka deş. 
\v 29 Avneriy cun insanar xəmvolle Arava eyhene q'adaalile k'ena avayk'an. Manbı İordanne damayle ılğeepç'ı, Bitronule k'ena qabı, Maxanayimeeqa hiviyxhar. 
\v 30 Yoavee, Avnerıqa qihna girxhuy ç'əv hı'ı sark'ılymee, cuna g'oşun sa'a. Asahelıle ğayrı Davudne insanaaşike yits'ıyüç'ər (19) insan hiyxhar deşiy.
\p
\v 31 Davudne insanaaşemee, Benyaminaaşina, Avnerne insanaaşina, xhebıd vəşşe yixhts'al (360) insan gek'a. 
\v 32 Asahel Bet-Lexemqa qıkkı, cune dekkına nyaq'vanane mağaree k'eyxha. Yoaveeyiy cune insanaaşe xəmvolle yəq avayk'an, miç'eebiys manbı qabı Xevronqa hiviyxhar.
\c 3
\p
\v 1 Şaulneyiy Davudne nasılen səvxı'y xıliyda ts'ıts'exhe. Vaxt apk'ıniylette, Davudne nasılena guc hexxooxhe, Şaulnemee nasılena k'ıl qooxhe vuxha.
\s Davudun dixbı
\p
\v 2 Xevronee Davudus dixbı vooxhe.
\li Ts'erriyna dix İzre'elyğançene Axinoamee uxuna Amnon ıxha.
\li
\v 3 Q'ör'esda Karmelyğançene Navalne sip'ıree Avigailee uxuna Kilav ıxha.
\li Xhebır'esda Geşurne paççahne Talmayne yişşee Maakayee uxuna Avşalom ıxha.
\li
\v 4 Yoq'ur'esda Haggitee uxuna Adoniya,
\li xhor'esda Avitalee uxuna Şefatya,
\li
\v 5 yixhır'esdar Davudne xhunaşşee Eglayee uxuna İtream ıxha.
\p Davudus man gırgınbı dixbı Xevronee vuxha.
\s Avner Davudne suralqa ılğeç'e
\p
\v 6 Şaulnayiy Davudna nasıl siviyxəmee, Avneree Şaulne sural guc saa'a vuxha. 
\v 7 Şauluqa Ayyayna yiş Ritspa donana həmbal zəiyfa yixha. İşboşetee Avnerık'le eyhen:
\p – Nya'a ğu, yizde dekkıne həmbal zəiyfayka g'ılexha?
\p
\v 8 İşboşetne mane cuvabıke Avnerıs geeb qəl vuxha, eyhen:
\p – Nya'a zı vas, Yahudaabışin sura aqqına xvaana vuk'ulyne vob? Zı g'iyna yiğıniy yiğne dekkıne Şaulne nasılen, mang'une hambazaaşin sura aqqı. Zı ğu Davudne xılyaqa quvu deş. Ğu həşde mane zəiyfal-alla yizde gardanaqa bınah giviyxhe! 
\v 9 Zı Davudus, Rəbbee mang'us k'ın g'assırıyn hide'eene, hasre Allahee Avnerne vuk'lelqa yiğbı alle'ecen! 
\v 10 Zı paççahiyvalla Şaulne nasılıke g'avşu, Davudusqa qevles. Mana İzrailynayiy Yahudeyayna, Danile Beer-Şevalqamee\f + \fr 3:10 \fr*\fq Danile Beer-Şevalqamee: \fq*\ft Dan eyhena şahar mane gahıl İzrailyna nekke şimalılna şaharniy vob. Beer-Şeva eyhena şaharmee cühüt'yaaşine sahree, İzrailyna nekke canubulyna vuxha. «Danile Beer-Şevalqamee» İzrailyne k'anençe-qomaqqameeva eyhen ıxha.\ft*\f*, paççah ixhes.
\p
\v 11 İşboşetık'le man eyhenbı g'ayxhımee, mana Avnerıle qəyq'ən ıxhayke, mang'us alidghıniycad qeles dəxə axva. 
\v 12 Qiyğa Avneree, Davudusqa cun insanar g'axuvu, eyhen:
\p – İn ciga şavunne vod? Qora, zınayiy ğu cuvab g'ats'ak'vanas. Qiyğa gırgınacab İzrail yiğne suralqa ts'ıts'aa'as zı vas kumag ha'asın.
\p
\v 13 Davudee eyhen:
\p – Geed yugda, zı vaka cuvab g'ats'ak'vanasın. Saccu ğu zasqa ı'qqəmee, vakasana Şaulna yiş Mikal ayre. Mana dena zasqa ımmayle.
\p
\v 14 Davudee, İşboşetısqa Şaulne dixesqa cun insanar g'axuvu, eyhen:
\p – Zı vəş sunnat hıdi'ına Filiştinğançena gik'ul-alla zas Şaulee hiyvuna yizda xhunaşşe Mikal zasqa seek'al hee'e.
\p
\v 15 İşboşetee, insan g'axuvu, zəiyfa adamiysse Layişne dixesse Paltielsee g'ayşes ileeka. 
\v 16 Məng'ı'na adamiy geşşe-geşşe Baxurimqamee xhunaşşeyqa qihna ayk'an. Maa'ad Avneree mang'uk'le eyhen:
\p – Yı'q'əlqa sak'le.
\p Manar siyk'alna. 
\v 17 Avner İzrailyne ağsaqqalaaşika yuşanxha, eyhen:
\p – Şos mısa ıkkannaniy vor, Davuduke şos paççah ha'as! 
\v 18 Həşde vuşde yik'eençe ı'lğəən he'e! Rəbbee Davuduk'le dişdiy uvhu: «Zı Yizde nukarne Davudne xıleka, İzrail Filiştinaaşdeyiy gırgıne duşmanaaşine xılençe g'attivxhan haa'as».
\p
\v 19 Avneree man, hark'ın, Benyaminaaşik'led eyhen. Qiyğa İzrailyneyiy Benyaminaaşde yik'eençe ılğəən Davudus yuşan ha'asva, mana Xevronqa hayk'an. 
\v 20 Xevroneeqa, Avnerıka sacigee Davudusqa g'ayre (20) insan arayle. Davudee, Avnerısiy cune insanaaşis otxhun-ulyodğiy hele. 
\v 21 Avneree Davuduk'le eyhen:
\p – Hasre zı həşde hark'ın, gırgına İzrail yizde xərıng'usqa, paççahısqa, saa'as. Ğunar manbışika cuvab g'ats'ak'vne. Qiyğab vas nişşisiy vukkan, xəbvalla hee'e.
\p Məxüd ıxha Davudee Avner vuççud hidi'ı g'ekkana.
\s Yoavee Avner gek'a
\p
\v 22 Mane gahıl Yoav, Davudne insanaaşika dəv'eençe sark'ıl eyxhe. Manbışe mebınbışike g'ayşuyn geed kar adayle. Mane gahıl Avner, Davudusse Xevronğançe ark'ın eyxhe. Davudee, Avner vuççud hidi'ı, g'aykkı ıxha. 
\v 23 Yoav, gırgıne g'oşunuka sark'ıling'a, mang'uk'le eyhen:
\p – Nerna dix Avneriy arı. Paççahee mang'uk vuççud hidi'ı, g'aykkına.
\p
\v 24 Yoav, paççahne k'anyaqa qarı, eyhen:
\p – Ğu hı'iyn kar hucoone? Yiğne k'anyaqa Avnerniy'e arı? Ğu nya'a mana g'aykkı? Həşde mana ark'ınna. 
\v 25 Vak'lecar Nerna dix Avner ats'ana. Mang'vee vas horbı ha'asva, yiğın hark'ın-qaraylen cigayiy ğu g'ecen işbı ats'axhxhesvacar arı ıxha.
\p
\v 26 Yoav Davudusse qığeç'umee, mang'vee Avnerıqa qihna cun insanar g'uxoole. Manbışer Avner Sira eyhene kahrızısse yı'q'əlqa sak'al ha'a. Davuduk'le man ats'acad eyxhe deş. 
\v 27 Avner Xevronqa sak'ımee, Yoavee cona q'öyrecab, yuşan haa'asın xhinne, mana şaharne akkabışiyle aqa akkyayhe. Qiyğad cune çocul Asahelil-alla, mang'une vuxhnes g'ılıncıqa ı'xı', gek'ana.
\p
\v 28 Davuduk'le, man ats'axhxhamee, eyhen:
\p – Rəbbine ögiyl Nerne dixene Avnerne ebal-alla, mısacab zaliy yizde ölkal bınah aaxvas deş. 
\v 29 Havaasre mana bınah Yoavılqayiy mang'une xizanılqa vuxhecen. Hasre Yoavne nasılee maşika gyatsts'ıyn ı'xnabınana insan deşda, əsaka iykarna insan deşda, g'ılıncıke qek'ana insan deşda, mıssınçika qek'ana insan deşda gah mooxhecen.
\p
\v 30 Yoaveeyiy cune çocee Avişayee Avner gek'ana. Manbışe mana cona çoc Asahel Giveonee əlyhəəne dəv'ee gik'uynçil-alla gek'a.
\p
\v 31 Qiyğa Davudee Yoavık'leyiy cune k'anene insanaaşik'le eyhen:
\p – Tanalinbı qıt'axxı, palanbı ale'e, Avnernemee gyaaşe.
\p Avner qıkkek'ane mıghırıqa qihna vuc paççah Davud ayk'an. 
\v 32 Avner Xevronee k'eyxha. Paççah mang'une nyuq'vnel oo axtıra geşşena. Mang'uka sacigee milletıd geşşen. 
\v 33 Paççah Davud Avnerne nyuq'vnel oo inva eyhe-eyhe geşşu:
\b
\q1 Avner məxür, g'eliqqa huvu, gik'as dexheyiy.
\q2
\v 34 Yiğın xıleppı ayt'ıl ıxha deş,
\q2 G'elybışisıb zincır üvxü vuxha deş.
\q1 Ğu sixnareeşine ögiyl qukkyoyk'alan xhinne qukkyork'ul.
\b
\p Manva uvhumee, millet meed Avnernemee geşşen.
\p
\v 35 Qiyğa manbışin gırgınbı abı, Davudee, exha qixhesse, kar oxhnecenva mana ittunçil aqqaqqa ıxha. Davudeeme, k'ın g'assır, eyhen:
\p – Verığ k'yooçesse, yizde ghalik gıney, medın kar set'veene, havaasre Allahee zalqa ver ablee'ecen!
\p
\v 36 Milletık'le paççahee ha'an g'acu, man gırgın manbışde yik'eençe eyxhe. Paççahee ha'an gırgıncad milletıs ıkkiykanan. 
\v 37 Mane yiğıl gırgıne milletık'leyiy gırgıne İzrailik'lecad ats'axhxhen, Nerna dix Avner paççahee gidek'u ıxhay. 
\v 38 Paççahee cune insanaaşik'le eyhen:
\p – G'iyna İzrailee xərna, qıvaats'ına insan qik'uva ats'a dişde? 
\v 39 G'iyna zı g'əyxı'na paççahır ixheene, zaqa guc k'ılyba vob. Tseruyayn dixbı, Yoaviy Avişay, zale nimee vuxhee gucuka vob. Havaasre Rəbbee pisvalla haa'ang'us, haa'ane pisvallays sik'ı helecen!
\c 4
\s İşboşet gek'ana
\p
\v 1 Şaulne dixek'le İşboşetık'le, Avner Xevron eyhene şaharee gik'uva ats'axhxhamee, mang'us zeze ooxha. İzrailin milletıd man g'ayxhı qəyq'ən giyğal. 
\v 2 Şaulne dixeqa İşboşetıqa q'öyre cune destebışda xərna ıxha. Manbı Benyaminaaşinbı vooxhene Beerotğançene Rimmonun dixbı vuxha. Manbışde sang'un do Baana, mansang'unud Rexav ıxha. Beerot vucub Benyaminaaşinacab vuxha. 
\v 3 Beerotbı Gittayimeeqa heepxı qabı vuxha, g'iyniyne yiğılqameeyib\f + \fr 4:3 \fr*\fq g'iyniyne yiğılqameeyib: \fq*\ft in kitab otk'uning'vee kitab ok'anassencad gahbı eyhe ıxha.\ft*\f* manbı maa'ab menne cigaynbı xhinne aaxva.
\p
\v 4 (Şaulne dixeqa Yonatanıqa q'öyudsana g'el k'aana Mefiboşet donana dix ıxha. İzre'elyğançe Şaulıy Yonatan gyapt'ıva xabar qabımee, mang'uqa xholle sen ıxha. Mane k'ıning'uqa ileekang'vee mana mançe alyart'u, zaara heexvava, gade xılençe g'a'araççe mang'un g'elybı hayq'var.)
\p
\v 5 İşboşetee yı'q'ı'hna manzil haa'amee, Beerotğançene Rimmonun dixbı Rexaviy Baana yəqqı'l gyabak'va. Manbı pırane gahıl qabı mang'une xaasqa hiviyxhar. 
\v 6-7 İşboşet cune gozee tyulee g'alirxhu eyxhe. Rexaviy cuna çoc Baana suk alyabat'anbı xhinnee xaaqa ikkeepç'ı, mang'une vuxneeqa xincal hi'yxə. Qiyğab vuk'ul g'ats'pk'ın, vucub alyapt'ı, mançe heebaxanbı. Xəmvolle manbı Arava eyhene qadaalyne yəqqı'le k'ena avayk'ananbı. 
\v 8 İşboşetna vuk'ul manbışe Xevroneeqa Davudne k'anyaqa abı, paççahık'le eyhen:
\p – İna Şaulne yiğne duşmanna dixena İşboşetna vuk'ul vob. Mane Şaulısniy ğu gik'as ıkkan. G'iyna Rəbbee, yişde xərıng'ul – paççahıl-alla Şaulukeyiy cune nasılıke in hı'ı, qəl qığavhu.
\p
\v 9-11 Davudee Beerotğançene Rimmonne dixbışis Rexavısiy cune çocus Baanays inəxdın alidghıniy qele:
\p – Zı Tsiklageenang'a culygena ixheene zas yugna xabar ana insanniy arı: «Şaul qik'unava». Zı mançil-allar mana aqqı gik'as alikkı. Mang'vee zas abıyne xabarın mukaafat mang'us man ıxha. Həşde karaı'dəən insanar qopkune insanne xaaqa ikkeepç'ı, mana cune tyulee gik'uyng'a, şosqa nəxüdiy qöö, zı mang'una eb ç'iyel g'alepçı, manbı ç'iyene aq'val gidyapt'ı g'alyaa'aye? Zı gırgınçike g'attixhan ha'ane Vorne Rəbbilqan k'ın ixhen məxdın kar ixhes deş!
\p
\v 12 Davudee cune insanaaşilqa əmr haa'a, manbışeb manbı avqu gyabat'anbı. Qiyğad manbışin g'elybıyiy xıleppı gyatxı, Xevroneene xhyan səəne cigayne k'ane k'eyxə. İşboşetna vuk'ulyub alyapt'ı, Xevroneene Avnerne nyuq'vneeqa k'evxhu.
\c 5
\s Davuduke bıkırne İzrailyna paççah eyxhe
\p
\v 1 İzrailin gırgın nasılbı Xevronqa Davudne k'anyaqa abı inəxüd eyhe:
\p – Şi vaka sa milletınbı, sa ebanbı vob. 
\v 2 Şenke yişda paççah Şaulnang'a, ğucabniy İzrailybı dəv'eeqa vukku qavaylenbı. Rəbbee vak'leniy uvhu, ğu Cune milletıs çobaniyvalla haa'as, şi vuk'lek vukkeekana ixhes.
\p
\v 3 İzrailin gırgın ağsaqqalar Xevronqa paççah Davudne k'anyaqa abayle. Paççahee maa'ad Rəbbine ögiyl manbışika cuvab g'ats'ayk'van. Ağsaqqalaaşe Davud İzrailyna paççah ixhecenva mang'ulqa q'ış qadağva.
\p
\v 4 Davud paççah eyxheng'a mang'uqa xhebts'al (30) senniy vod. Mang'vee İzrailis yoq'ts'al (40) senna paççahiyvalla haa'a. 
\v 5 Davudee, Xevronee Yahudays yighılle sennayiy yixhıble vazna paççahiyvalla haa'a. İyerusalimeençeb mang'vee bıkırne İzrailisiy Yahudays xhebts'ale xhebılle (33) senna paççahiyvalla hav'u.
\s Davudee İyerusalim avqaaqqa
\p
\v 6 Paççahiy cun insanar İyerusalimqa hapk'ın, maane avaalacab vooxhene Yevusbışilqa k'yoohar. Yevusbışe Davuduk'le eyhen:
\p – Vasse inyaqa ikkeç'es əxəs deş. Ğu inyaqa areene yişde bı'rq'ı'nbışisser, k'aanbışisser ğu inençe g'e'eşşes əxəsda.
\p Manbışisqa məxüd qöö ıxha, Davudusse mane şahareeqa ikkeç'es əxəs deş. 
\v 7 Davudee maana Sion eyhena g'ala avqaaqqana. Həşde mançik'le «Davudna Şaharva» eyhe. 
\v 8 Davudee mane yiğıl eyhen:
\p – Vuşuyiy Yevusbışilqava arı, hasre xhyan qööne tuneleençe ılğeç'u qoracen. Məxüb şu Davud g'ımece eyxhene «bı'rq'ı'nbışileyiy k'aanbışile» ğameepxhes.
\p Həşde dişe eyhe: «Bı'rq'ı'nayiy k'aana xaaqa ikkeepç'es deş».
\p
\v 9 Davud mane g'aleecar axva, mançil-allad mane g'alayk'le Davudna Şaharva eyhe. Mang'vee g'alayn hiqiy-alladın cigad Millo eyhene tepaysqamee adın cigad ali'ı qa'an. 
\v 10 Xəəna G'oşunbışda Rəbb Davuduka ıxhal-alla, mang'una guc yiğ-yiğıle hexxooxhe vuxha.
\p
\v 11 Sur eyhene şaharne paççahee Xiramee, Davudne k'anyaqa cun insanar, sidırne yiven os, osanayiy g'ayeyna iş haa'as vəəxən insanar g'uxoole. Manbışe Davudus saray alya'a. 
\v 12 Manke Davuduk'le ats'axhxhen, Rəbbee vuc İzrailyna paççah hı'ı, cuna paççahiyvallab axtı qav'u.
\s Davudun mansa dixbı
\p
\v 13 Davud Xevronğançe İyerusalimqa qarıyle qiyğa, mang'vee cus mançe mebın xhunaşşeriy həmbal zəiyfabı haa'a. Manbışeb Davudus dixbıyiy yişbı vuxooxa. 
\v 14 Mang'us İyerusalim vuxhayne dixbışin dobı inbı vod: Şammua, Şovav, Natan, Sıleyman, 
\v 15 İvxar, Elişua, Nefeg, Yafia, 
\v 16 Elişama, Elyada, Elifelet.
\s Davud Filiştinaaşile ğamexhe
\p
\v 17 Filiştinaaşik'le g'iyxhen, Davud İzrailyna paççah ha'asva mang'ulqa q'ış qadğu. Manke manbışin gırgınbı Davud t'abal ha'asva avayk'an. Davuduk'le man ats'axhxhamee, yı'q'əlqa g'aleeqa siyk'al. 
\v 18 Filiştinarıb Refaimne q'adaalilqa qabı, maa'ab aaxva. 
\v 19 Davudee Rəbbike qiyghanan:
\p – Zı Filiştinaaşika səyxene? Ğu manbı yizde xılyaqa qevlesınbıne?
\p Rəbbee Davuduk'le eyhen:
\p – Ho'o, hoora səyxe, zı manbı yiğne xılyaqa qıdevu g'alepçes deş.
\p
\v 20 Davud Ba'al-Peratsimeeqa arı, Filiştinar gyapxı-gyapt'ı, eyhen:
\p – Selin çine ögeedın kar haq'var hiyxvər ha'an xhinnee, Rəbbeeyib yizde ögiylin duşmanar oot'al-ooxal hav'u.
\p Mançil-allad mane cigayn do Ba'al-Peratsim (\it ot'al-oxal ha'ana iyesiy\it*) giyxhe. 
\v 21 Filiştinar heepxı əlyhəəmee, con byuttyar maa'adcad g'alya'a. Davudeeyiy cune insanaaşed man byuttyar sı'ı, qıkkekkanbı.
\p
\v 22 Filiştinar meeb Refaimne q'adaalilqa abı, maa'ad çadırbı giyxə. 
\v 23 Mançinemee Davudee Rəbbike qiyghan, Rəbbeeyid Davuduk'le eyhen:
\p – Ts'erriykecar manbışde ögiylqa qığmeç'e. Yı'q'əle apk'ın, totan yivarnane surale manbışilqa k'yoohre. 
\v 24 Totane yivaaşine q'ombışile g'elybışin sesbı qöö gidğılmee, ğu zaara ı'ğı'ykre. Filiştinaaşde g'oşunukun ha'asva, mane gahıl Rəbb yiğne ögiyl əlyhəəs.
\p
\v 25 Davudee gırgın, Rəbbee cuk'le uvhuyn xhinnee ha'a. Mang'vee Gevayeençe Gezereeqa hivxharasdee cigeeqamee Filiştinar gyabat'a ıxha.
\c 6
\s Davudee Rəbbina q'utye İyerusalimeeqa savaak'al haa'a
\p
\v 1 Davudee İzrailyğançe meer yugna, siyxənə xhebts'al aazır (30 000) insan g'əyxı', saa'a. 
\v 2 Davud, Yahudeene Ba'ala eyhene şahareençe Allahna q'utye\f + \fr 6:2 \fr*\fq Allahna q'utye: \fq*\ft Allahee ina q'utye he'eva Mısa peyğambarık'le uvhu. Man Allah cune milletne yı'q'nee vor eyhen işaaratniy vod. Mane q'utyee g'ayebışde ooad otk'unin Allahın əmrbıniy havacenbı.\ft*\f* qavaalesva, cune insanaaşika sacige maqa ayk'an. Mana q'utye Rəbbine doyul vuxha. Mane q'utyel oo keruvar\f + \fr 6:2 \fr*\fq Keruvar: \fq*\ft xılibınan malaaikar vob. Rəbbine q'utyel oo q'ölle k'ınəəğəyken keruv ıxha.\ft*\f* ıxha. Xəəne G'oşunbışde Rəbbina taxt mane keruvaaşil oo vuxha. 
\v 3 Allahna q'utye ts'enne daşk'eeqa alivxhu, Avinadavne tepalyne xaançe qığaahana. Daşk'ad Avinadavne dixbışe Uzzayeeyiy Axioyee he'ekka ıxha. 
\v 4 Manbışe Allahna q'utye daşk'eeqa gyuvxhu qığaaha. Q'utyeyne ögiylir Axio ayk'an. 
\v 5 Davudur, gırgın İzrailin milletıd gıranne osake hı'iyn t'ampırbı, lirabı, dafbı, medın aalyatbı əlixı', Rəbbine ögiyl şadba mık'ar hı'ı.
\p
\v 6 Naxonne attayle ı'lğəəmee, yatsbı qaçayxaranbı. Uzzeeyib xıl hotku, g'ı'moxhacenva Allahna q'utye avqaaqqa. 
\v 7 Rəbbina Uzzalqa qəl avqaaqqa, mang'vee hı'rmat deşvaala hav'uva mana maacar ı'xı' gek'ana. Uzza Allahne q'utyeyne k'ane qek'a.
\p
\v 8 Davudus, Rəbbee Uzza gik'uva qəl vooxhe. Mane cigayn do g'iyniyne yiğılid\f + \fr 6:8 \fr*\fq g'iyniyne yiğılid: \fq*\ft in kitab otk'uning'vee kitab ok'anassencad gahbı eyhe ıxha.\ft*\f* Perets-Uzza (\it Uzzayn qik'uy\it*) vod.
\p
\v 9 Mane yiğıl Davud Rəbbile qərq'ı'n, eyhen:
\p – Zasqa Rəbbina q'utye nəxüb ables vooxheye?
\p
\v 10 Davudus Rəbbina q'utye cusqa, Davudne Şahareeqa quvkees vukkiykan deş. Mang'vee mana Gatğançene Oved-Edomne xaaqa quvkees ulyookka. 
\v 11 Rəbbina q'utye xheyible vazna Oved-Edomne xaa aaxva. Rəbbee Oved-Edomusub, mang'une xizanısıb yugna barakat hoole.
\p
\v 12 Paççah Davudulqa «Rəbbee Oved-Edomne xizanıb, mang'une gırgıne karasıb Allahne q'utyel-alla barakat huvuva» hixhar ha'a. Manke Davud Oved-Edomne xaaqa hark'ın, mançe Allahna q'utye cun do huvuyne Davudne şahareeqa şadba qavayle. 
\v 13 Rəbbina q'utye haaqqanbışe yixhnəqqees g'el qittumee, Davudee sa yats'iy tavulyna q'ıka gyook'a. 
\v 14 Davudee katanıken ileylığ\f + \fr 6:14 \fr*\fq Katanıken ileylığ: \fq*\ft kaahinaşe tanalqa alya'an kar ıxha.\ft*\f* ali'ı, Rəbbine ögiyl vəəxəxüb g'oyk'al-ulyoyk'al mık' haa'a. 
\v 15 Davuduka sacigee gırgıne İzrailyne milletın şadvalin ts'irbı ha'a-ha'a, şeypur ı'lyviyxə Rəbbina q'utye quvkeeka vuxha.
\p
\v 16 Rəbbina q'utye Davudne Şahareeqa quvkekkamee, Şaulna yiş Mikal g'uleençe ileeka yixha. Məng'ı'k'le paççah Davudee Rəbbine ögiyl g'oyk'al-ulyoyk'al mık' haa'a g'avcumee, məng'ee mana k'ap'ik'ıle avqa qa'a.
\p
\v 17 Rəbbina q'utye qabı, Davudee mançinemee güvxüyne çadırene ab, çisva qav'uyne cigeeqa giviyxhe. Davudee Rəbbine ögiyl gyoxhxhan ha'aniy medın q'urbanbı allya'a. 
\v 18 Davudee q'urbanbı alli'iyle qiyğa, milletıs, Xəəne G'oşunbışde Rəbbine doyule xayir-düə hoole. 
\v 19 Qiyğa mang'vee İzrailyne milletne adameeşisıb, yadaaşisıb gırgıng'uscab sa gıney, sık'ınin çuru, sa ts'ets'ib qooqqune t'ımılena hoole. Mançeb gırgınbı xaybışeeqa siviyk'al.
\p
\v 20 Davud cune xaabınbışis xayir-düə hevlesva xaaqa sak'ımee, Şaulna yiş Mikal mang'une ögiylqa qığeyç'u, eyhen:
\p – İzrailyne paççahee g'iyna vuceecar-vuc nəxür haguna! Mana cune insanaaşineyiy cune g'ulluxçiy içeeşine ögiyl bəç'ər xhinne ts'ele qıxha.
\p
\v 21 Davudee Mikalık'le eyhen:
\p – Zı man Rəbbine ögiyl hı'ı. Mang'vee zı yiğne dekkıneyiy mang'une bıkırne nasılene cigee g'əyxı', Cune milletıs, İzrailybışis, xərna hı'ı. Zı inçile qiyğar Rəbbine ögiyl şadxhesda. 
\v 22 Zı yizde ulene ögiyl sık'ırar uleke g'a'ayxhasda. Ğu eyhene g'ulluxçiy içeeşemee zı axtı qa'as.
\p
\v 23 Şaulne yişşeqa, Mikalıqa, qiyk'asde yiğılqamee uşax eyxhe deş.
\c 7
\s Allahee Davudus cuvab hele
\p
\v 1 Paççah cune sarayeeqa sarımee, Rəbbee mang'us cune hiqiy-allane duşmanaaşike macal hele. 
\v 2 Mane gahıl paççahee Natan donane peyğambarık'le eyhen:
\p – İlekke, zı sidırne gıranne yiveke ali'ıyne sarayee axva, Allahna q'utyemee çadıree\f + \fr 7:2 \fr*\fq çadır: \fq*\ft inyaa Allahne muq'addasne çadırene hək'ee eyhe. İzrailybı, Misirğançe qığeepç'iyle qiyğa, Allahee manbışik'le muq'addasna çadır hee'eva eyhe. Manbı sahree vuxhaylette manbışe mana çadır coka ı'ğviykar ha'a vuxha. Mana çadır işaarat vuxha, Allah cone yı'q'nee axvava. Mane muq'addasne çadırne ögiyl İzrailybışe Allahıs q'urbanbı gyaat'a, ı'bəədatbıniy ha'a. Qiyğab Davud peyğambarne gahılib mana İyerusalimeeniy vob.\ft*\f* vob.
\p
\v 3 Natanee paççahık'le eyhen:
\p – Rəbb vaka vor, hoora yiğne yik'eedın he'e.
\p
\v 4 Mane xəmde Rəbbee Natanık'le inəxdun cuvab eyhe:
\pm
\v 5 – Hark'ın yizde nukarık'le Davuduk'le eyhe, Rəbbee inıd eyhe: «Ğune, Zı axvasın, Zasın xav alya'as? 
\v 6 İzrailybı Misirğançe qığav'uyne yiğıle, g'iyniyne yiğılqamee Zı nenecar xaa axu deş. Zı nyaqa ark'ınee, Yizde çadıree axu. 
\v 7 Zı gırgıne gahbışilycar İzrailyne milletıka sacigee ı'ğiykır. Zı mısacad İzrailyne milletna haa'ane ç'ak'ınbışik'le uvhu deş: „Zas sidrıke xav ale'e“».
\pm
\v 8 Həşde Yizde nukarık'le Davuduk'le eyhe, Xəəne G'oşunbışde Rəbbee inıd eyhe: «Zı ğu vəq'əbı uxhiyxhanne cigabışeençe qarı, vake İzrailis xərna hı'ı. 
\v 9 Ğu hark'ınne gırgıne cigabışee, Zı vaka ıxha. Yiğne ögiylin duşmanar oot'al-ooxal hav'u. Həşded yiğın do menne qıvaats'ıyne insanaaşin do xhinne qıvaats'a'asın. 
\v 10-11 G'iyniyke şaqa cone cigabışee gyuv'recenva, şavaacabıb manbı mançe ı'ğviykar hımaa'acenva, Zı yizde milletne İzrailynemee sa ciga qa'as. Zı haakimar milletın ç'ak'ınbı xhinne gyuvxhuyng'a, qəlnane insanaaşe manbı hooç'an-g'ooç'ananbıniy. Həşde məxdın kar ixhes deş: Zı vas duşmanaaşine xılençe rəhətiyvalla hevles.
\pm Vake g'abıynbı paççahar vuxhesva, Rəbbee vak'le g'ayxha'a. 
\v 12 Yiğna ı'mı'r ç'əvuvxhamee, ğunar yiğne dekkaaşisqa ark'ınmee, yiğne cigeeqana yiğna dix ha'as. Zı mang'una paççahiyvalla it'umba haa'as. 
\v 13 Mang'vee Yizde doyulyun xav alya'as. Zınab mang'una paççahiyvalla gırgıne gahbışis it'umaa'asda. 
\v 14 Zı mang'unemee Dek ixhes, manar Yizdemee dix ixhes. Mang'vee bınah hav'umee, Zı mang'us, insanaaşe cone uşaxaaşis caza hoolena xhinnena, caza hevles. 
\v 15 Zı mang'uke Yizda badal dyooxhena yugvalla, Şauluke g'avşuna xhinne, g'avşes deş. 
\v 16 Zı məxüd ha'as yiğna nasılıb, yiğna paççahiyvallab gırgıne gahbışis vuxhes. Yiğna paççahiyvalina taxtıb gırgıne gahbışiscab vake g'abıynbışisne vuxhes».
\b
\p
\v 17 Natanee gırgın Allahee haguyn Davudus yuşan ha'an.
\s Davudna düə
\p
\v 18 Paççah Davud Allahne çadıreeqa ikkeç'u, Rəbbine ögiyl gyu'ur eyhen:
\pm – Ay Xudaavanda Rəbb, zı vuşune vor, yizda nasılıb şavnane vob, Ğu zı inimee axtı qı'ı? 
\v 19 Ya Xudaavanda Rəbb, Yiğne ulesqa manıd k'ılda qadı, Ğu zake g'abıynbışde vuk'lelqa qalesınıd uvhu. Xudaavanda Rəbb, inıd insanaaşinemee ı'brat ixhes.
\pm
\v 20 Davudusse medın Vak'le hucoo eyhes əxəyee? Ya Xudaavanda Rəbb, Vak'lecar zı, Yiğna g'ul, ats'ana! 
\v 21 Ğu in gırgın ç'ak'ın işbı, Yiğne cuvabnemee, Vas ıkkanəxüd zak'le hagvasdemee hı'ı.
\pm
\v 22 Ğu nimeecar Xərrayiy, ya Xudaavanda Rəbb! Şak'le yişde k'ırıbışika g'ayxhı, Vak akarana sacar deşda, Vale ğayrı Allahır deşda. 
\v 23 Yiğın İzrail millet xhinnen, ç'iyene aq'val, medın millet vodunne? Ğu manbı Misirğançe qığavhu, gattivxhan hav'u. Yiğın do ats'axhxhecenva Ğu manbışde ögiyl ç'ak'ın əlaamatbı hagu, ç'ak'ın işbı g'acu. Manbışike Vas millet ha'asva, Ğu manbışde ögiylin milletbıyiy manbışin allahbı g'e'epşi. 
\v 24 Gırgıne gahbışis Ğu İzrailike Vasın millet hı'ı, Ğunar, Rəbb, manbışda Allah ıxha.
\pm
\v 25 Həşdiyle, Ya Rəbb Allah, zasiy zake g'abıynbışis huvuyn cuvab həməxüd he'e, gırgıne gahbışis axvecen. Gırgınıd hasre Ğu eyhəxüd ixhecen. 
\v 26 Hasre insanaaşe «Xəəna G'oşunbışda Rəbb İzrailyna Allah vorva» uvhu, Yiğın do gırgıne gahbışis axtı qe'ecen! Yiğne g'uluna, Davudna nasılıb Yiğne ögiyl havaasre it'umba ulyoozrecen.
\pm
\v 27 Xəəna G'oşunbışda Rəbb, İzrailyna Allah, Ğu man zak'le hagu, uvhuyn: «Yiğna nasıl it'umba vuxhes». Mançil-alla zı yik' hı'ı Vas məxübna düə hav'u. 
\v 28 Ya Xudaavanda Rəbb, Ğu Allah vorna, Yiğın cuvabıd qotkuyn vod. Ğu həşde Yiğne g'ulus ina yugna xabar huvu. 
\v 29 Gırgıne gahbışil Yiğne ögiyl vuxhecenva, Yiğne g'ulune nasılıs xayir-düə huvuy Vasqa yugda qalecen. Ya Xudaavanda Rəbb, Ğu məxdın cuvabniy huvu. Yizde nasılen Yiğne xayir-düəyka gırgıne gahbışisda xayir-düə alept'ecen!
\c 8
\s Davud İzrailyne duşmanaaşile ğamexhena
\p
\v 1 Mançile qiyğa Davud Filiştinaaşile ğamxha, manbı cus vukkanəxüb vuk'lek vukkeeka. Manbışde xılençe Meteg-Ammahıb g'ooşena.
\p
\v 2 Qiyğa Davud Moavbışiler ğamexhena. Mang'vee manbı ç'iyelqa g'alyapk'as alivku, baağıka ulyoopku, manbı xhebne desteeqa bit'al ha'a. Xhebne desteyna q'öble deste mang'vee gyabat'anbı. Sa destemee mang'vee g'ookana. Moavbı Davudus nukarar vooxhe, mang'us nalok'bı qele giviyğal.
\p
\v 3 Tsovayna paççah eyxhena Rexovna dix Hadadezer, Fərat eyhene damayne hiqiy-alladın ciga meed cune xılyaqa alğahasva arayle. Maa'ar Davud mang'ule ğamexhena. 
\v 4 Davudee Hadadezerna aazıriy yighıd vəş (1 700) balkanılyna, g'ad aazırır (20 000) hoyhar arına esker aqqaqqa. Mang'une balkanaaşina vəş Davudee cus avqu, axuyne daşk'ayk qı'iyne balkanaaşinıd g'elin damarbı gyatxas ilekka.
\p
\v 5 Damask vooxhen Arambı Tsovayne paççahıs Hadadezerıs kumagıs abımee, Davudee manbışda g'ayeq'vəd aazır (22 000) insan gek'a. 
\v 6 Davudee Damask vooxhene Arambışde ölkee cun g'oşunbı ulyozar ha'a. Mang'vee manbışike nukarar haa'a, manbışe Davudus nalok'bı qele giviyğal. Davud nyaqa hark'ıneeyir, Rəbbee mana ğama'ananiy.
\p
\v 7 Mang'vee Hadadezerıne insanaaşin k'ınəəğəken g'alxanbı alyaat'u, İyerusalimqa qadayle. 
\v 8 Paççah Davudee, Hadadezerne Betaxiy Berotay donane şaharbışeençe geed yez adayle.
\p
\v 9 Xamatne paççahık'le Toik'le Davud Hadadezerne gırgıne g'oşunulecar ğamxhava g'iyxhe. 
\v 10 Hadadezeree hammaşee Toika dəv'ə haa'a vuxha. Hadadezerıle ğamxhava Davud nəxüriyva qiyghanas, sayir mana tabrik ha'asva paççah Toiyee dix Yoram mang'une k'anyaqa g'ıxele. Yoramee Davudus k'ınəəğəyn, nuk'rayn, yezan karbı adayle.
\p
\v 11 Paççah Davudee in cus adıyn k'ınəəğəyken, nuk'rayken, yezaken, vucee menne milletbışike g'ayşuyn karbı Rəbbis g'iysar. 
\v 12 Mang'vee Edombışike, Moavbışike, Ammonbışike, Filiştinaaşike, Amalekbışike g'ayşuyn karbı Rəbbis g'iysar. Davudee Tsovayne paççahısse Rexovna dix eyxhene Hadadezerıssed g'ayşuyn karbıd Rəbbis g'iysar.
\p
\v 13 Davudee Q'evane q'aadalil Edombışda yits'ımoled aazır (18 000) insan oot'al-ooxal hı'ı siyk'almee, mana gırgıng'uk'le ats'axhxhena. 
\v 14 Edomne gırgıne suralqa mang'vee cun g'oşunbı ulyoozar hı'iyle qiyğa, Edombı mang'un g'ular vooxhe. Davud nyaqa hark'ıneeyir Rəbbee mana ğama'ananiy.
\s Davudee gyuvxhiyn ç'ak'ınbı
\p
\v 15 Davud İzrailynacar paççah eyxhe. Mang'vee millet qotkuda vuk'lek ıkkekka, gırgıngunemeeyir mana qorkura ıxha. 
\v 16 Tseruya donane zəiyfayna dix Yoav g'oşunna xərna ıxha. Axiludna dix Yehoşafat taarix oyk'anna ıxha. 
\v 17 Axituvna dix Tsadokiy Evyatarna dix Aximelek kaahinar vuxha. Seraya mirza ıxha. 
\v 18 Yehoyadayna dix Benaya Keretbışdayiy Peletbışda\f + \fr 8:18 \fr*\fq Keretbıyiy Peletbı: \fq*\ft ine milletne insanaaşe paççahıs g'aravuliyvalla haa'a vuxha.\ft*\f* xərna ıxha. Davudun dixbı kaahinar vuxha.
\c 9
\s Davudee Mefiboşetıs yugvalla haa'a
\p
\v 1 Davudee eyhen:
\p – Şaulne nasılena üç'ürra axuna vornane? Yonatannemee, zı mang'us yugvalla haa'as.
\p
\v 2 Şaulne nasılıs g'ulluxçiyvalla haa'ana Tsiva donana sa insan ıxha. Mana Davudne k'anyaqa qoyt'al, paççahee mang'uke qiyghanan:
\p – Tsiva ğune vor?
\p Mang'vee eyhen:
\p – Ho'o, yizda xərna, zı vorna.
\p
\v 3 Paççahee eyhen:
\p – Şaulne nasıleençe saxheyir üç'ürna insan vornane, zı mang'us Allahne yəqqee yugvalla haa'ayiy?
\p Tsivee paççahıs alidghıniy qele:
\p – Ho'o, Yonatanıqa q'öyudsana g'el k'aana dix vor.
\p
\v 4 Paççahee mang'uk'le eyhen:
\p – Həşde mana nyaane vor?
\p Tsivee paççahık'le eyhen:
\p – Mana həşde Lo-Devar eyhene şaharee, Ammielyne dixene Makirne xaa vorna.
\p
\v 5 Paççah Davudee insan g'axuvu, Lo-Devarğançe Makirne xaançe Mefiboşet cusqa ayra'a.
\p
\v 6 Şaulna neva, Yonatanna dix eyxhena Mefiboşet Davudne k'anyaqa arı, mang'us hı'rmat gyuvxhu, k'yoyzarna. Davudee ona'an:
\p – Mefiboşet!
\p Mang'vee «Zı, yiğna nukar, inyaa vorva» alidghıniy qele. 
\v 7 Davudee mang'uk'le eyhen:
\p – Qı'məyq'ən, yiğne dekkıne Yonatannemee, zı vas yugvalla hidyav'u g'alerçes deş. Yiğne q'əsde dekkın Şaulun gırgın cigabı zı vas sak'al ha'as. Ğu gırgıne gahbışil yizde sufranıle otxhuniy oxhanas.
\p
\v 8 Mefiboşet Davudus k'yorzul, eyhen:
\p – Nya'a, zı, yiğna g'ul, vuşune eyxhe? Ğu, zına xhineene qivk'une xvaana haa'a?
\p
\v 9 Paççahee Şaulna g'ulluxçiy Tsiva qort'ul, eyhen:
\p – Şaulıniy mang'une nasılen gırgın kar, yiğne xərıng'une nevaysqa quvu. 
\v 10 Yiğne xərıng'une nevayn cigabı ğunayiy yiğne dixbışeyiy yiğne nukaraaşe mang'unemee ezu-qiyşalas. Şagavıd mang'usqa qeles, mang'uqa oxhanasın kar ixhecenva. Vuşde xərıng'une nevee, Mefiboşetee, gırgıne gahbışil yizde sufranıle kar oxhanas.
\p (Tsivayqa yitsıxhvayre (15) dixıy g'ayrer (20) nukar vor.) 
\v 11 Tsivee paççahık'le eyhen:
\p – Yizda xərna, paççah, ğu uvhuyn gırgın zı, yiğne g'ulee, ha'asın.
\p Mefiboşetee, paççahne dixbışde sang'vee xhinne, Davudne sufranıle otxhuniy oyxhan ıxha.
\p
\v 12 Mefiboşetıqa sa k'ınna Mika donana dix ıxha. Tsivayne xaabın gırgınbı Mefiboşetın nukarar vuxha. 
\v 13 Mefiboşetee paççahne sufranıle kar otxhan ıxhayke, mana mançile qiyğa İyerusalimee axva. Mang'un q'öyudsana g'el k'aada ıxha.
\c 10
\s Davud Ammonbışileyiy Arambışile ğamexhe
\p
\v 1 Sabara gahıle Ammonbışda paççah qek'a. Mang'une cigee paççah mang'una dix Xanun eyxhe.
\p
\v 2 Davudee eyhen:
\p – Dekkee zas badal dyooxhena yugvalla hav'uva, zınab mang'une dixes Xanunus yugvalla haa'as.
\p Davudee cun insanar Naxaşne dixene Xanunne k'anyaqa, dekkıs baş-sağlığıyvalla hevles g'uxoole. Davudun insanar Ammonne ölkeeqa qabı hipxhırmee, 
\v 3 Ammonbışde ç'ak'ınbışe cone xərıng'uk'le Xanunuk'le eyhen:
\p – Vak'le həməxüdmede ats'a, Davudee baş-sağlığıyvalla hevles insanar yiğne dekkıs hı'rmatnemeene g'uxoole? Davudee yiğne k'anyaqa insanar şahar uleke alğaahas, mana vaats'a vuxha, qiyğab hı'ğəəkar haa'as g'axuvu!
\p
\v 4 Xanunee Davudun insanar avqu, manbışin saqqalbı suralqamee, tanalqa ali'iyn karbıd avğançe giviy'arne cigeeqamee gyatxas ilekka. Qiyğab mang'vee manbı cone xaybışeeqa yəqqı'l haa'a. 
\v 5 Man kar Davudus yuşan hı'ımee, manbı naşvalin habat'ava, Davudee manbışde ögiylqa insanar g'uxoole. Paççahee eyhen:
\p – Saqqalbı aleelesmee Yerixoyee aaxve, qiyğa savk'le.
\p
\v 6 Ammonbışik'le co Davudne ulele gyapk'ı g'ooce. Manke manbışe Bet-Rexoveeneyiy Tsova eyhene cigeene Arambışike cos g'ad aazır (20 000) hoyharna esker pılıke kumagıs qot'alecenva insanar g'uxoole. Manbışe Maaka eyhene cigayna paççah aazırne (1 000) insanıka, sayir Tov eyhene cigeençe yits'ıq'vəd aazır (12 000) insan qoyt'al.
\p
\v 7 Davuduk'le man ats'axhxhamee, Yoavıka gırgın yugba sıç'ookan cehilyarnana g'oşun mang'ul ooqa g'uxoole. 
\v 8 Ammonbı qığeepç'ı, şaharne akkabışde ögiyl saç'uvkasınbı xhinne giviyk'an. Tsovayniy Rexovın Arambı, Tov eyhene cigayneyiy Maaka eyhene cigayne insanaaşika qığeepç'ı, g'ab curayba ulyoozar.
\p
\v 9 Yoavık'le cune g'oşunne ögiyleyiy yı'q'əle duşmanar gipk'ın g'avcumee, mang'vee İzrailyne gırgıne g'oşunuke yugun gəvxüyn cehilyar curav'u, Arambışde ögiylqa giviyk'an. 
\v 10 Avxuyne insanaaşilqar cuna çoc Avişay xərna gixhxhı, manbı Ammonbışde ögiyl giviyk'an. 
\v 11 Yoavee Avişayık'le eyhen:
\p – Arambı zale gucuka vuxheene, ğu zas kumagıs ayre. De'eş, Ammonbı vale gucuka vuxheene, zı vas kumagıs ayres. 
\v 12 Yik'eka ixhe. Qora, yişde milletnemee, yişde Allahne şaharbışdemee, yişda adamiyvalla haagvas. Hasre Rəbbeyid Cusqa neniy yugda qöö, man he'ecen.
\p
\v 13 Yoaviy mang'una g'oşun Arambışika sıç'ookka gibğılmee, Arambı Yoavne ögiyle heebaxanbı. 
\v 14 Ammonbışik'le Arambı heebaxa g'avcumee, coyub Avişayne ögiyle heepxı, şahareeqa ikkeebaç'e. Ammonbışikan saç'ivkuy ç'əvxhamee, Yoav İyerusalimqa siyk'al.
\p
\v 15 Arambışik'le co İzrailybışile avub aaxva g'avcumee, manbı sacigeeqa savayle. 
\v 16 Manbışde paççahee, Hadadezeree, insan g'axuvu, Fərat eyhene damayne şene aq'valin Arambı dəv'eeqa qığaa'a. Manbıb Hadadezerne g'oşunne xərıng'uka, Şovakıka, sacigee Xelam eyhene şahareeqa abayle.
\p
\v 17 Mançina xabar Davudus abımee, mang'vee gırgın İzrailybı sav'u, İordanne damayle ılğeç'u, Xelameeqa arayle. Arambı Davudne ögiyl saç'uvkasva giviyk'an. 
\v 18 Arambı İzrailybışde ögiyle heebaxanbı. Davudee Arambışda yighıd vəş (700) dəv'əyn daşk'a he'ekkana, yoq'ts'al aazırır (40 000) balkanıl alixı arına esker gek'a. Manbışda g'oşunna xərna Şovakır, Davudee ı'xı' maacar gek'ana. 
\v 19 Hadadezerne xılek avubne paççahaaşik'le con gırgınbı İzrailybışis avub avxu g'avcumee, manbışe İzrailybışikana dəv'ə ç'əv hav'u, manbışis nukarar vooxhe. Mançile qiyğa Arambı qəvəyq'ənanbı Ammonbışis kumagbı ha'as.
\c 11
\s Davudıy Bat-Şeva
\p
\v 1 Yuxhxhan qadımee, paççahar dəv'əys qığeebaç'ene gahıl, Davudee Yoav cune insanaaşikayiy gırgıne İzrailyne g'oşunuka dəv'eeqa yəqqı'l ha'a. Manbışe Ammonbışikın hı'ı, manbışda paytaxt Rabba hıqiy-allançe avqaaqqa. Davud vucmee İyerusalimcar axva.
\p
\v 2 Sa yiğıl exheeqana, Davud tyuleençe suğotsu, cune paççahaaşine sarayne daxalqa ılqeç'u maa'ar iykar giyğal. Mana daxayle ilyakkımee, mang'uk'le sa zəiyfa əyeexər g'eece. Mana zəiyfa geer uftanna yixha. 
\v 3 Zəiyfayne hək'ee qiyghanasva Davudee insan g'ıxele. G'axuvuyne insanee eyhen:
\p – Mana zəiyfa Q'etbışda eyxhene Uriyna xhunaşşe, Eliamnar yiş Bat-Şeva vor.
\p
\v 4 Davudee insanar g'axuvu mana cusqa ayree'e. Mana zəiyfa Davudusqa arımee, məng'ı'n yadaaşik eyxhenbı manke ç'əveetxha ıxha. Davud məng'ı'ka g'ılexhana. Mançile qiyğa zəiyfa cene xaaqa siyk'al. 
\v 5 Zəiyfa vuxhne eexva. Məng'ee Davudusqa insan g'ıxele «Zı vuxhne vorva» eyhes. 
\v 6 Davudee Yoavne k'anyaqa insan g'axuvu eyhen:
\p – Q'etbışda eyxhena Uriy yizde k'anyaqa g'axıle.
\p Yoavee Uriy Davudne k'anyaqa g'ıxele. 
\v 7 Uriy Davudne k'anyaqa arımee, Davudee mang'uke Yoaviy g'oşun nəxübne, dəv'ə nəxübne əlyhəəva qiyghan. 
\v 8 Qiyğa Davudee Uriyk'le eyhen:
\p – Xaaqa hoora, sık'ırra g'alixhe.
\p Uriy paççahne sarayeençe qığeç'umee, paççahee yı'q'əle mang'us pay g'uxoole. 
\v 9 Uriymee xaaqa ayk'an deş. Mana paççahne manesa nukaraaşika sacigee sarayne akkayne ghalee g'ılexha. 
\v 10 Davuduk'le «Uriy xaaqa ark'ın deşva» uvhumee, mang'vee Uriyke qiyghanan:
\p – Nya'a, ğu yəqqı'le dişde qarı? Nya'a xaaqa idyark'ın?
\p
\v 11 Uriyee Davuduk'le eyhen:
\p – Allahıka mugavilenana q'utye\f + \fr 11:11 \fr*\fq Allahıka mugavilenana q'utye: \fq*\ft Allahee ina q'utye he'eva Mısa peyğambarık'le uvhu. Man Allah cune milletne yı'q'nee vor eyhen işaaratniy vod. Mane q'utyee g'ayebışde ooad otk'unin Allahın əmrbıniy havacenbı.\ft*\f*, İzrailybı, Yahuder çadırbışee aaxvamee, yizda xərna eyxhena Yoaviy eskerar g'ab çolbışee aaxvamee, ho'ne zı xaaqa ark'ın otxhan-ulyoğa xhunaşşeyka g'alixhe? Valqaniy yiğne canılqan k'ın ixhen, zı məxdın kar mısacad ha'as deş.
\p
\v 12 Davudee Uriyk'le eyhen:
\p – Ğu g'iynar inyaa axve, zı ğu g'iyqa yəqqı'l ha'asda.
\p Uriy mane yiğılir, qinne yiğılir İyerusalim axva. 
\v 13 Davudee mana cusqa qort'ul yugda otxhun-ulyoğu'ı keçe xhinne qa'a. Uriy paççahısse exheeqana qığeç'e. Mana g'alixhasva meer cune ögiylynecar cigeeqa, paççahne nukaraaşisqa ayk'an. Mana cune xaaqa meer ayk'an deş.
\p
\v 14 Miç'eed qıxhamee, Davudee kağız otk'un, Yoavısqa hixhar he'ecenva Uriysqa qele. 
\v 15 Kağızee inva otk'un eyxhe: «Uriy it'umba dəv'ə əəne cigeeqa yəqqı'l he'e. Mana ögiyl ulyozar he'e, qiyğa zaraba şu yı'q'əlqa ts'ıts'eepxhe, hasre mana ı'xı' gik'ecen».
\p
\v 16 Yoavee şahar hiqiy-allançe avqumee, mang'uk'le şenbışin yugba aldaaxhvananbı nene surak vuxhay ats'anniy. Mançil-allar mang'vee Uriy mane suralqa salat' ha'a. 
\v 17 Şaharın insanar Yoavıka səvxəsva, şaharıke g'aqa qığeebaç'e. Manke Davudne g'oşunun sabarabı habat'anbı, habat'anbışde yı'q'nee Q'etbışda eyxhena Uriyer ıxhana. 
\v 18 Yoavee Davudne k'anyaqa dəv'ə nəxübiy ılğevç'uva xabar ana insan g'ıxele. 
\v 19 Mang'vee xabar ana g'ıxelene insanıs xət qa'an:
\p – Ğu dəv'əyne hək'ee yuşan hı'ı ç'əvexhemee, 
\v 20 paççahıs sayıb mançike qəl vuxha vake qiyghınee: «Nya'a şu səvxəsva şaharısqa manimee k'ane qeepxha? Nya'a şok'le ats'a dişdiy, manbışe cabırbışile vukbı ahas ıxhay? 
\v 21 Şavaane Yerubbeşetna dix Avimelek gik'u? Nya'a, cabırıle dişdiy mang'ulqa sa zəiyfee yöxxəyna g'aye g'a'apçı, mana Tevetsee gik'u? Nya'a şu manimee cabırbışisqa k'ane qeepxha?» Manva paççahee vak'le uvheene, ğu mang'uk'le eyhe: «Yiğna nukar Q'etbışda eyxhena Uriyer qik'una».
\p
\v 22 Xabar ana ı'qqəna insan yəqqı'lqa gexha. Mana qarı Davudusqa hirxhıl, Yoavee cuk'le uvhuyn gırgın mang'us yuşan ha'an. 
\v 23 Xabar ana arıyne insanee Davuduk'le eyhen:
\p – Şen insanar şalqa k'yoptul, şaka saç'uvkasva şaharıke g'aqa qığeepç'ı. Şinab manbı şaharne akkabışisqamee yı'q'əlqa g'ee'epşiynbı. 
\v 24 Vukbı ayhenbışee cabırbışile paççahne eskeraaşilqa vukbı gyoğu'u, paççahne eskeraaşike habat'anbıb vuxhaynbı. Yiğna nukar Q'etbışda eyxhena Uriyer maa'ar qik'una.
\p
\v 25 Davudee xabar abıyng'uk'le eyhen:
\p – Yoavık'le eyhe: «Mançil-alla aq'va havaxan hıma'acen. G'ılıncın ina-şena geer gik'u. Həşdiyle guc sacigeeqa sav'u, mane şaharılqa sayıb k'yoohre, mana hı'ğəəkar hee'e». Məxüd ğu Yoavıs yik'bı hele.
\p
\v 26 Uriyne xhunaşşeyk'le Bat-Şevayk'le Uriy qik'uva g'ayxhımee, mang'us ak' avqaaqqa. 
\v 27 Ak' ç'əvuvxhayle qiyğa, Davudee insan g'axuvu, Bat-Şeva cune xaaqa qiyelee'e. Məng'ı'ke cus xhunaşşe hee'e. Qiyğa məng'ee Davudus dix uxooxa. Davudee hav'una mana iş Rəbbine yik'eençe vooxhe deş.
\c 12
\s Natan peyğambaree Davuduk'le cuna bınah eyhe
\p
\v 1 Rəbbee Natan peyğambar Davudne k'anyaqa g'ıxele. Natan mang'une k'anyaqa arı, inəxüd eyhe:
\p – Sa şaharee q'öyre insan vooxhe. Manbışda sa karnana manasar kar deşda eyxhe. 
\v 2 Karnane insanıqa geed çavra-vəq'ə eyxhe. 
\v 3 Kar deşdang'uqamee alivşu xəp qaa'ane vughulyne bederıle ğayrı, vuççud eyxhe deş. Mang'vee mana beder cune uşaxaaşika sacigee xəp qaa'a vuxha. Mançin mang'une xılençe kar oyxhan ıxha, mang'une k'oleençed xhyan ulyoğa ıxha. G'alyuvxhasıb mana mang'ul oo g'ulyoxha vuxha. Mana mang'unemee yişşene cigee vuxha. 
\v 4 Sayəqees karnane insanısqa menne cigabışeençe mihman arayle. Karnane insanıs cong'əə arıyne mihmannemee otxhuniy ha'asva cune çavra-vəq'əyke həyvan avqu givk'as qiviykkanna. Mang'vee hark'ın kar deşing'una beder avqu abı, cong'əə arıyne mihmanıs otxhuniy ha'a.
\p
\v 5 Davudna mane insanılqa qəl avqu, Natanık'le eyhen:
\p – Vorne Rəbbilqan k'ın ixhen, man hı'iyne insanıs qik'uyud avaak'a. 
\v 6 Rəhı'm hidyav'u, məxbına iş g'avcuva, mang'vee mane bederıl-alla yoq'nəqees geed kar qeles.
\p
\v 7 Natanee Davuduk'le eyhen:
\p – Mana insan ğu vorna! İzrailyne Allahee Rəbbee inəxüdud eyhe: «Zı ğu İzrailyna paççah xhinne g'əyxı', Zı ğu Şaulne xılençe g'attixhan hı'ı. 
\v 8 Zı vas yiğne xərıng'un xav huvu. Mang'un yadar Zı yiğne xhılibışeeqa quvu. Zı vas İzrailiniy Yahudayn milletbı huvu. Man vak'le k'ılda g'acuxhee, Zı vas mançile hexxanıd helesınniy. 
\v 9 Nya'a ğu Rəbbine ulesqa pisba qööna iş hav'u? Nya'a ğu Mang'un cuvab g'eliqqa huvu? Q'etbışda eyxhene Uriyne xhunaşşeyke vas xhunaşşe hee'esva, ğu mana g'ılıncıqqa huvu. Ğu mana Ammonbışde xıleka gik'u. 
\v 10 G'iyniyke şaqa yiğne xaake mısacad g'ılınc əq'əna qixhes deş. Ğu Yizın cuvab g'eliqqa huvu, Q'etbışda eyxhene Uriyne xhunaşşeyke vas xhunaşşe hey'ı». 
\v 11 Rəbbee inəxüdud eyhe: «Zı vakın divan yiğne xaabınbışisqacad qaqqas alikkas. Zı yiğne ulene ögiyl, yiğın yadar alyapt'ı, vas delesne insanısqa qevles. Manar yiğne-yiğın, ulek'le g'ece-g'ece yiğne yadaaşika g'alixhas. 
\v 12 Ğu man kar dyugulenda hı'ı, Zımee man kar yiğene yı'q'ı'hne gahıl gırgıne İzrailybışde ulene ögiyl ha'as alikkas».
\p
\v 13 Davudee Natanık'le eyhen:
\p – Zı Rəbbine ögiyl bınah hav'u.
\p Nataneeyid sak'ı, Davuduk'le eyhen:
\p – Rəbbee yiğna bınah havaakal hav'una, ğu qik'as deş. 
\v 14 Ğu məxdın kar hı'iyle qiyğa, Rəbbine duşmanaaşisser Mana k'ap'ik'ıle avqa qa'as əxə. Mançil-allar vake ıxhana dix qik'asda, axvas deş.
\s Davudna Bat-Şevaykena dix qek'a
\p
\v 15 Mançile qiyğa Natan cune xaaqa siyk'al. Rəbbee, Davudna dix ık'iyk'ara'ana. Man uşax qik'uyne Uriyeyne xhunaşşeyken ıxha. 
\v 16 Davudee uşaxnemee Allahıs düə haa'a. Mana sivacı xəmbı cune gozee q'ərane ç'iyel alğa'a. 
\v 17 Sarayn ağsaqqalar mana ç'iyele oza qa'asva qabı k'ane ulyoozar. Mana ozar qexhe deş, karıd oyxhan deş.
\p
\v 18 Yighıd'esde yiğıl uşax qek'an. Davudun nukarar uşax qik'uva mang'uk'le eyhes qəvəyq'ənanbı. Manbışisqa məxüd qayle:
\p – Uşax üç'ürnang'a, şi mana ittunçil aqqeyir, mang'vee şal k'ırı alixhxhı deş. Həşde uşax qik'uva şi mang'uk'le nəxüdne eyhes? Sayid cuk sa kar ha'a.
\p
\v 19 Davuduk'le cune nukaraaşe ğud-ğud haa'a g'avxhumee, uşax qik'uva ats'axhxhen. Mang'vee manbışike «Uşax qik'uynneva?» qiyghan. Manbışe «Ho'ova» eyhe.
\p
\v 20 Man g'ayxhı, Davud ç'iyele oza qıxha, əyxı'r-səyxı'r vuk'lelqa zeytunun q'ışid qadğu, tanalinbıd badal hı'ı, Rəbbine xaaqa hark'ın, Mang'us kyoyzarna. Qiyğa mana mançe cune xaaqa sak'ı, cus otxhuniy heleva eyhe. Cus oxhanas hucooyiy huvu, mang'vee oyxhanan.
\p
\v 21 Nukaraaşe mang'uke qiyghanan:
\p – Ğu in ha'an kar hucoone? Uşax üç'ürnang'a, ğu sivacı geşşu-gyaxvananiy, həşde uşax qik'umee, ğu oza qıxha kar otxhan girğıl?
\p
\v 22 Davudee manbışis inəxdın alidghıniy qele:
\p – Uşax üç'ürnang'a, zı sivacı geşşu-gyaxvananiy. Zalygena ixhee, Rəbbis zı qiykkın, uşax gidek'avaniy eyhe. 
\v 23 Həşde uşax qik'uyn, zı nişisne siv aqqas? Nya'a mana zasse yı'q'əlqa sak'al ha'as əxəyee? Mana zasqa sak'alas deş, zı mang'usqa əlyhəəs.
\s Sıleyman yedike eyxhe
\p
\v 24 Qiyğa Davudee xhunaşşeys Bat-Şevays yik'bı hele, ikkeç'u məng'ı'ka g'ılexha. Mana vuxhne ayxu dix uxooxa. Davudee mang'un do Sıleyman giyxhe. Rəbbis man uşax ıkkiykanan. 
\v 25 Mang'vee maqa Natan peyğambar g'ıxele, mangv'eeyid uşaxın do Yedidiyah (\it Rəbbis ıkkanna\it*) giyxhe.
\s Davudee Rabba avqaaqqa
\p
\v 26 Yoavee Ammonbı vooxhene Rabba eyhene şaharılqa cuna g'oşun k'yoohar hav'u, maana paççahna g'ala avqaaqqa. 
\v 27 Qiyğa Yoavee Davudne k'anyaqa ina xabar ana insanar g'uxoole:
\p – Şi Rabba eyhene şaharılqa k'yophur, manbışe xhyan havacen cigabı aqqı. 
\v 28 Həşdiyle ğu avxuna g'oşun sav'u, arı mane şaharın hiqiy-alladın cigabı aqqe. Qiyğab vuc şahar alept'e. Deşxheene, zı mana şahar avqee, mançis yizın do heles.
\p
\v 29 Davudeeyib avxuna g'oşun sav'u, Rabbeeqa arı, dəv'əyka mana avqaaqqana. 
\v 30 Mang'vee manbışde paççahne vuk'lele tac alyaat'u, cune vuk'lelqa giyxhe. Man tac k'ınəəğəyke hı'ı ıxha, çina yı'q'vaalab sa talant\f + \fr 12:30 \fr*\fq Sa talant: \fq*\ft 34 kilelqa ələən ıxha. \ft*\f* vuxha. Mançine hiqiy-allançed gıranın g'ayebıyiy gitk'ın. Davudee mane şahareençe geed gıranın kar qığa'a. 
\v 31 Mane şahareedın millet mang'vee qığatxhu, ayxaaka, yivayne kılıngıkayiy yak'uka işbı gaces ilekka. Qiyğale xhinne manbışisqa karpıç ha'as ilekka ıxha. Davudee Ammonbışde gırgıne şaharbışik man hı'iyle qiyğa, qığeç'u cune g'oşunuka İyerusalimqa ayk'an.
\c 13
\s Amnoniy Tamar
\p
\v 1 Qiyğa in ıxha. Davudne dixeqa Avşalomuqa Tamar donana micagna yiçu yixha. Davudne menne dixes Amnonus mana Tamar\f + \fr 13:1 \fr*\ft İne kitabee ilyaake 3:1-3.\ft*\f* yikkiykan. 
\v 2 Amnonus cuna duvuxna yiçu Tamar manimee yikkiykan, mana mançike ık'iyk'arna. Mana adamiys hidyark'ınna içiy yixhayke, Amnonus məng'ı'k hucoomecad ha'as dağamda qöö ıxha.
\p
\v 3 Amnonuqa Yonadav donana sa hambaz ıxha. Yonadav Davudne çocuna, Şimayna dix ıxha. Vucur geer bicna kar ıxha. 
\v 4 Yonadavee Amnonuk'le eyhen:
\p – Ay paççahna dix, nya'a ğu yiğ-yiğıle k'eçe? Ğu man zak'le eyhelan!
\p Amnonee mang'uk'le eyhen:
\p – Zas yizde çocuna Avşalomna yiçu Tamar yikkan.
\p
\v 5 Yonadavee mang'uk'le eyhen:
\p – Tyuleeqa k'iç'u, ğucar ğu ık'arna xhinne hagve. Dek ğu g'acesva vasqa arımee, mang'uk'le eyhe: «Hucoona ixhes, yuçeyk'le Tamarık'le eyhe arı zas kar oxhan he'ecen. Yizde ulene ögiyl zas otxhuniy he'ecen, zak'ler mana g'ayces, məng'ı'ne xılençe kar oxhanas».
\p
\v 6 Amnon tyuleeqa k'iç'u, vuceecar vuc ı'kar hag'va. Paççah mana g'acesva arımee, mang'vee paççahık'le eyhen:
\p – Hucoona ixhes, yizda yiçu Tamar ayrecen, yizde ulene ögiyl zas q'öble kokay hee'ecen, zınad manbı cene xılençe oxhanas.
\p
\v 7 Davudee xaaqa insan g'axuvu, Tamarık'le eyhen:
\p – Həşde yiğne çocune Amnonne xaaqa hiyek'ne, mang'us oxhanasın kar he'e.
\p
\v 8 Tamar çocune Amnonne xaaqa hark'ıning'a, mana g'alirxhu eyxhe. Tamare xamır hı'ı, çocune ulene ögiyl kokaybı qece. 
\v 9 Qiyğa məng'ee tava alyapt'ı, çocune ögiylqa otxhanan kar giyxhe. Mang'us oxhanas ıkkiykan deş. Amnonee eyhen:
\p – Hasre gırgınbı zasse qığeepç'ecen.
\p Gırgınbı mang'usse qığeebaç'enbı. 
\v 10 Amnonee Tamarık'le eyhen:
\p – Otxhanan kar anne gozeeqa qıkkee, maa'ad zı yiğne xılençe alyaat'u oxhanasın.
\p Tamare çocusva hı'iyn kokaybı alyaat'u, anne gozeeqa qıkkekka. 
\v 11 Kokaybı Amnonee oxhnecenva cusqana qıkkekkamee, Amnon Tamarık at'irq'ın eyhen:
\p – Yiçu, qeera zaka g'aliyxhe.
\p
\v 12 Tamare mang'uk'le eyhen:
\p – De'eş çoc, yizın do qığmayhe! İzrailee məxdın karbı ha'anbı deşxhe. Məxbına beynyavavalla hımaa'a. 
\v 13 Məxdıne doyuka zı nyaqana yixhes? Yiğınıd İzrailee beynyavava do qığeç'es. Həşde hucoona ixhes, ğu hark'ın paççahıka yuşanxhe, mang'vee zı vas heylesda. De'eşva eyhes deş.
\p
\v 14 Amnonee məng'ı'l k'ırı ilydixhı, guc geeb vuxhayke mana qıkkeek'val hey'ı, məng'ı'ka g'ılexhana. 
\v 15 Mançile qiyğa Amnonuk'le Tamar g'ımeece qeexhe. Amnonus Tamar cus yic yikkanançiler geer g'imeece qeexhe. Mang'vee Tamarık'le «Oza qiyxha ğadariyxheva» eyhe.
\p
\v 16 Tamare mang'uk'le eyhen:
\p – De'eş, yizda çoc! Ğu zı g'e'eyşuyka, mançile ögiyl hav'uyne pisvalileb, sık'ılbab xəbna pisvalla zas haa'a.
\p Amnonee məng'ı'l k'ırı ilydiyxhı, 
\v 17 cuna nukar qort'ul eyhen:
\p – İna zasse g'e'eyşu, akka qe'e!
\p
\v 18 Nukareeyir içiy g'aqa qığeyhı, akka qa'an. İçiyne tanal gıranın micagın gurt eyxhe. Məxdın gurtbı paççahne adamiys hidyapk'ınne yişbışe alya'a ıxha. 
\v 19 Tamaree vuk'lelqa yı'q k'yaa'a. Qiyğad tanalin gurt qıt'axxı'ı, vuk'lelqa xıleppıd aqqı hülöörəxə geeşe-geeşe iyeek'anna. 
\v 20 Çocee Avşalomee məng'ı'kle eyhen:
\p – Vaka, yiğna çoc Amnonne g'alirxhu? Yiçu, həşde nıq' qığmayhe, mana yiğna çoc vorna. Man ıxhayn yik'eeqa ıkmekka.
\p Məxür Tamar cene çocune Avşalomne xaa gırgıng'vee dağerçuna xhinne eexva.
\p
\v 21 Paççah Davuduk'le mana gaf g'avxhumee, mana qəlın əq'əna. 
\v 22 Avşalomee Amnonuk'le yugunud pisınıd cuvab eyhe deş. Mang'vee yiçu mıc hey'ı, məng'ı'ka g'alirxhuynçil-alla Avşalomuk'le Amnon g'ımece ıxha.
\s Avşalomee Amnon gek'a
\p
\v 23 Ooğançe q'ölle sen ılğeç'uyle qiyğa, Efrayim eyhene şaharıs k'anene Ba'al-Xatsoree Avşalomee vəq'əbı qoyşar eyxhe. Avşalomus paççahın gırgın dixbı maqa otxhun-ulyoğas qoot'alas vukkiykan. 
\v 24 Mana paççahısqa arı, eyhen:
\p – G'iyna zı, yiğne nukaree, vəq'əbı qoyşar. Hucoona ixhes, g'iyna paççahiy cun insanar zasqa savaale.
\p
\v 25 Paççahee Avşalomuk'le eyhen:
\p – De'eş dix, yişin gırgınbı abee, vas yı'q'da gyuaras.
\p Avşalomee mana nimee ittunçil aqqeyir, paççah maqa arayle deş. Paççahee Avşalomus xayir-düəyib huvu, mana yəqqı'l araççe. 
\v 26 Avşalomee meed eyhen:
\p – Manke yizda çoc Amnonxheeyir şaka g'axıle.
\p Paççahee mang'uke qiyghanan:
\p – Nişisne mana şoka ıkkekka?
\p
\v 27 Avşalomee xıl ts'ıts'aa'a deş. Davudee manke Amnonur gırgın cun dixbıb mang'uka g'uxoolenbı.
\p
\v 28 Avşalomee cune insanaaşilqa əmr haa'a:
\p – İlyaake Amnonee çaxır ulyodğu vuc xhinne qıxhamee, zı şok'le «Amnonus ı'xeva!» eyhes. Manke şu mana gik'e, qı'məəq'ən. Zı şos əmr hoole! Adamer vuxhe, yik'eka vuxhe!
\p
\v 29 Avşalomee nəxüdiy uvhu, nukaraaşed həməxüd Amnonus ı'xiyxən. Paççahne dixbışik'le eyxhenbı g'acu, zaraba cone g'atiraaşilqa aleepxı, mançe heebaxanbı. 
\v 30 Manbı yəqqənang'a Davudulqa inəxübna gaf hiviyxhar:
\p – Avşalomee paççahın gırgın dixbı gyapt'ıynbı, manbışda nenacar üç'ürra g'alerçu deş.
\p
\v 31 Paççah oza qıxha, tanalin qıt'axxı'ı, ç'iyelqa gizyaraççe. Mang'une k'anene gırgıne cune insanaaşed tanalinbı qıt'axxa'anbı. 
\v 32 Davudne çocune Şimayne dixee Yonadaveeme inəxüd eyhe:
\p – Yizde xərıng'usqa həməxüd qımaylecen, cune dixbışin gırgınbıniyxan hapt'ı. Saccu Amnoncar qik'u. Avşalomuqa məxbına fıkır cuna yiçu Tamar Amnonee cuka g'aliyxhas aliykkıyne yiğıle vuxha. 
\v 33 Hasre yizde xərıng'un paççahın gırgın cun dixbı hapt'ıva gaf g'avxhuva yik' gimoyxhancen. Saccu Amnoncar qik'u.
\p
\v 34 Avşalommee hixu ark'ın ıxha. G'aravulee, vuk'ul ooqa qav'umee, tepayle geeb insanar gəə g'ooce. 
\v 35 Yonadavee paççahık'le eyhen:
\p – Haane paççahın dixbı qöövub! Zı, yiğne nukaree, nəxüdiy uvhu, həməxüdud eyxhen.
\p
\v 36 Mang'vee cuvab uvhu g'attirxhınmee, axtıba gyaaşe-gyaaşe maqa paççahın dixbı ikkeebaç'e. Paççahır gırgın cun insanarıb hülööbəxə gyaaşe giviyğal. 
\v 37-38 Davudee yiğıs-yiğıs dixes, Amnonus, ak' avqaaqqa vuxha. Avşalomeeme hixu Geşurne paççahne Talmayne k'anyaqa ayk'an. Talmay Ammihudna dix ıxha. Geşureeqa hixuna Avşalom maa'ar xhebılle senna axva. 
\v 39 Amnon qik'u, ooğançe sabara gah ılğevç'ule qiyğa, paççah Davud culqa qarayle. Mana Avşalomuke qəl qığahasva qihna gexha deş.
\c 14
\s Avşalom İyerusalimeeqa siyk'al
\p
\v 1 Tseruyayne dixek'le Yoavık'le ats'anniy, paççahın yik' Avşalomuqa gyotxhan ıxhay. 
\v 2 Yoavee Teqoayeeqa insan g'ıxele mançe ats'alynana zəiyfa ayres. Mang'vee arıyne zəiyfayk'le eyhen:
\p – Hucoona ixhes, ğucar ğu ak' avquyn xhinne heegve. K'aarın tanalinbı ale'e, vuk'lelqa zeytunun q'ış qımadağva, ğucar ğu qik'uyng'unemee geer yiğbına geeşen xhinne heegve. 
\v 3 Paççahne k'anyaqa hark'ın, inəxüd eyhe.
\p Yoavee, paççahık'le hucooyiy eyhesva, xət qa'an.
\p
\v 4 Teqoayeençena zəiyfa paççahısqa ikkeyç'u, mang'une ögee aq'vak k'ena ç'iyelqa gizerçu, eyhen:
\p – Ay paççah, kumag he'e!
\p
\v 5 Paççahee mang'uk'le eyhen:
\p – Vak hucoona ıxha?
\p Zəiyfee eyhen:
\p – Zalqa yiğ adı, yizda adamiy qik'u. Zı sip'ıriy vorna. 
\v 6 Zaqa, yiğne nukarıqa, q'öyre dixniy vor. Sa yiğıl manbışda q'öyre çolee sana-sang'uka aldapxhıninbı. Maa'ar manbı curaa'asda vuşucar ıxha deş. Sang'vee manasa ı'xı' gik'una. 
\v 7 Həşde gırgınacab xizan zalqa g'elil quvxha, manbışe eyhen: «Çoc gik'una şasqa qale, şi mana çoc gik'yunçil-alla gik'as. Dekkın kar şavusiy axvas manar gik'as». Manbışe məxüd zaqa vodun-deşin man ts'ünq' q'ətqa'as. Məxüb manbışe ç'iyeyne aqval yizde adamiyke g'abıynbı g'alepçes deş.
\p
\v 8 Paççahee zəiyfayk'le eyhen:
\p – Xaaqa sayk'le. Zı yiğne hək'ee əmr haa'asda.
\p
\v 9 Teqoayeençene xhunaşşee paççahık'le eyhen:
\p – Yizda xərna paççah, hasre mançina bınah zalqayiy yizde xizanılqa vuxhecen! Paççahılqayiy cune taxtılqa bınah gyumooxhacen!
\p
\v 10 Paççahee eyhen:
\p – Şavaayiy vak'le sa cuvab uvhu, mana zasqa ayre. Mançile qiyğa mana vak sayır set'as deş.
\p
\v 11 Zəiyfee eyhen:
\p – Hucoona ixhes, paççahee, Rəbbilqa, cune Allahılqa k'ın g'aysrecen, şavusqacad yizde dixıke qəl qığaahas havaasaras deşva. Deşxhee, manbışe yizda dix gik'as.
\p Davudee eyhen:
\p – Vorne Rəbbilqan k'ın ixhen, yiğne dixene vuk'lele ç'ərıb g'a'avxhas deş.
\p
\v 12 Zəiyfee Davuduk'le eyhen:
\p – Hucoona ixhes, zasqa sa cuvab eyhes hasre.
\p Paççahee «Eyheva» eyhe.
\p
\v 13 Zəiyfee eyhen:
\p – Nya'a manke ğu, Allahne milletne ögiyl məxbına iş hav'u? Ğu məxüd uvhuyka, valqa bınah qaa'a. Menne cigeeqa hixu ark'ınna yiğna dix ğu vasqa sak'al hı'ı deş. 
\v 14 Yişin gırgınbı hapt'asınbı, şi ç'iyelqa ott'ulne yı'q'əlqa sa'as dexhene xhyanık akar. Allaheeyid insanıke ts'ıts'ı'ı can g'eşşe deş, Mang'veeyib Cuke əq'ənaqa girxhuna nəxürne Cus k'ane qa'asva fıkır ooxhan. 
\v 15 Zı milletın qı'yeeq'ən hey'ı, çil-allar zı həşde vasqa, yizde xərıng'usqa paççahısqa arı. Yizde fıkreeqa qadıyn: «Hark'ın paççahıka gaf haa'as, sayid mang'vee zı uvhuyn ha'a. 
\v 16 Paççahee, zı uvhunçil k'ırı alixhxhı, zınayiy yizda dix, şi gyapt'as vukkanang'une xılençe g'attivxhan haa'a. Məxüb şi Allahne milletne yı'q'neençe hakkal hidyaa'a». 
\v 17 Mançil-alla zı məxüd uvhu: «Yizda xərna paççah, sa cuvab eyhe, yizın yik' cigeeqa qoracen». Vasse Allahne malaaikısse xhinne yugun pisınçike cura'as əxən. Hasre Rəbb, yiğna Allah, vas kumagxhecen!
\p
\v 18 Paççahee zəiyfayk'le eyhen:
\p – Zı vake sa cuvab qiyghanas, mançin alidghıniy zake dyugul hıma'a.
\p Zəiyfee eyhen:
\p – Yizda xərna paççah, hucoona ixhes qiyghne.
\p
\v 19 Paççahee qiyghanan:
\p – İne yiğne işee Yoavna xılyne alivku vob?
\p Zəiyfee alidghıniy qele:
\p – Yizda xərna paççah, valqan k'ın ixhen, şavussecad val k'ırı ilydiyxhı t'ub cigeençe ı'ğviykar haa'as vəəxəs deş. Ho'o, yiğne nukaree Yoavee zas əmr hav'u, zı hucooyiy eyhes ıkkanvad, mang'vee xət qı'ı. 
\v 20 Məxüd yiğne nukaree Yoavee mana iş qa'asva hı'ı. Yizde xərıng'una paççahna ək'el, Allahne malaaikna ək'elymee geeb vob, mang'uk'le dyunyel eyxhen gırgın ats'an.
\p
\v 21 Paççahee Yoavık'le eyhen:
\p – Ho'o, zı man kar ha'asın. Hoora, şena mek'vna Avşalom yı'q'əlqa sak'al he'e.
\p
\v 22 Yoav aq'vakkena ç'iyelqa gizerçu, «Ğu paççah geer qa'anava» uvhu. Qiyğa Yoavee meed eyhen:
\p – G'iyna paççahee, cune nukaree uvhuyn hı'ı. Həşde zak'le, yiğne nukarık'le, ats'axhxhayn, vasqa zı yugra qarı ıxhay.
\p
\v 23 Yoav Geşureeqa hark'ın, Avşalom İyerusalimeeqa sak'al ha'a. 
\v 24 Paççaheeme eyhen:
\p – Hasre mana cune xaaqa sak'lecen, yizde ulesqa qımaylecen.
\p Avşalom cune xaaqa siyk'al, mana paççahne ulesqa qarayle deş.
\s Davudee Avşalom cusqa qoyt'al
\p
\v 25 İzrailyvolle Avşalom xhinne micagna adameeşina insan ıxha deş. Gırgıng'us mana ıkkan ıxha. Vuk'lele kıts'alqamee mang'uqa qəlan ciga ıxha deş. 
\v 26 Senıs, ç'ərbışe mang'us yı'q'valla haa'ava, mang'vee manbı gyadaxa ıxha. Qiyğad g'apanıl gyoodkumee, q'öd vəş (200) şekel\f + \fr 14:26 \fr*\fq Q'öd vəş şekel: \fq*\ft 2 kileyle geed ıxha.\ft*\f* qadayle ıxha. (Şekel paççahee gixhxhiyn standart ıxha.)
\p
\v 27 Avşalomuqa xhebiyre dixiy Tamar donana sa yiş yixha. Tamar geer micagna içiy yixha.
\p
\v 28 Avşalom q'ölle senna İyerusalim axveeyir, mang'uk'le paççahın aq'va g'ece deş. 
\v 29 Avşalomee Yoavıqar qihna insan g'ıxele. Avşalomus ıkkananniy, Yoavee vuc paççahısqa ıkkı. Yoavıs mang'une k'anyaqa ayres ıkkiykan deş. Avşalomee q'ör'es Yoavne k'anyaqa insan g'ıxele. Mang'us meer mang'une k'anyaqa ayres ıkkiykan deş. 
\v 30 Avşalomee manke cune nukaraaşik'le eyhen:
\p – İlyaake, Yoavın xhıt'anan çol yizde çoluk at'itq'ın vod. Hapk'ın, maqa ts'a ı'xe.
\p Avşalomne nukaraaşed hapk'ın, maqa ts'a ı'xiyxən.
\p
\v 31 Manke Yoav Avşalomne xaaqa arı, qiyghanan:
\p – Nya'a yiğne nukaraaşe abı, yizde çolus ts'a ı'xı'?
\p
\v 32 Avşalomee Yoavık'le eyhen:
\p – Zasqa ayreva zı yiğne k'anyaqa insan g'axuvu. Eyhelan zak'le, zı inyaqa Geşureençe nişisniy qarı? Zı şaacar axunaxhiy inçile nimeexheyid yugda eyxheyiy. Hasre zak'le paççah g'aces. Zaqa bınah vobxhee, gik'ecen.
\p
\v 33 Yoavee hark'ın, man gırgın paççahılqa hixhar ha'an. Paççaheeyir Avşalom cusqa qoyt'al. Avşalom paççahısqa arı, mang'une ögiyl aq'va ç'iyek qet'asmee k'yoyzarna. Paççahee mang'us ubba ha'a.
\c 15
\s Avşalomee millet g'elil qa'a
\p
\v 1 Sabara gah ılğevç'uyle qiyğa, Avşalomee cus dəv'əyn daşk'a, balkanar, xhots'al (50) cune ögiyl g'adaxhvanasda insan t'abal ha'a. 
\v 2 Mana miç'eer çakra suğotsu, şaharne akkabışisqa əlyhəəne yəqqəniy ulyoyzarna. Mançe cone yı'q'nee gipxhına gaf paççahee məhkama alğehecenva vüqqən insanar ı'lğəəmee, mang'vee manbı cusqa qopt'ul, qiyghan ıxha:
\p – Ğu nene şahareençene?
\p Mane insaneeyid alidghıniy qele ıxha, vuc sa neneme İzrailyne nasıleençena vorna.
\p
\v 3 Avşalomee mane insanık'le inəxüd eyhe ıxha:
\p – Yiğna iş yugnab, qopkunab vuxheeyib, paççahısnee val k'ırı alixhxhesda insan deşda.
\p
\v 4 Avşalomee meed eyhe ıxha:
\p – İne ölkayna haakim zıcarxhiy hı'ına. Manke zı, vuşuyiy zasqa məhkamee he'eva arı, mang'une işiqa qorkuraniy ilyakkas.
\p
\v 5 Vuşumecar k'yozarasva Avşalomusqa qexhemee, mang'vee xıl hotku, mana insan cusqa ts'ıts'ı'ı, ubba ha'a ıxha. 
\v 6 Avşalomee məxüd paççahısqa məhkama ha'asva vüqqəne gırgıne İzrailybışikcad ha'a ıxha. Məxüb mang'vee İzrailybı culqa saa'a vuxha. 
\v 7 Yoq'ulle sen ılğeç'uyle qiyğa, Avşalomee paççahık'le eyhen:
\p – Hucoona ixhes, hasre zı Xevronqa hark'ın, Rəbbis cuvab huvuyn kar ha'as. 
\v 8 Zı, yiğna nukar, Aramne cigabışeene Geşurne şaharee axvamee, k'ınniy g'assır: «Rəbbee zı İyerusalimqa sak'al he'ee, zı Mang'us ı'bəədat ha'as Xevronqa ı'qqəs».
\p
\v 9 Paççahee mang'uk'le «Yugna yəq vuxhenava» eyhe.
\p Avşalomur Xevronqa ayk'an. 
\v 10 Avşalomee dyugulenba gırgıne İzrailyne nasılbışeeqa cun insanar g'axuvu, maabınbışik'le eyhen:
\p – Gaçeençe qı'ğəəne süttyun ses g'ayxhımee, «Avşalom Xevron paççah ıxhava» eyhe.
\p
\v 11 İyerusalimğançe Avşalomuka sacigee q'öd vəş (200) insan ayk'an. Manbı məttıne yik'eka mang'uqab qihna əlyhəə vuxha. Manbışis nişikecab xabar vuxha deş. 
\v 12 Avşalomee q'urbanbı allya'amee, mang'vee Davudna muşaavir Giloonçena Axitofel\f + \fr 15:12 \fr*\fq Axitofel: \fq*\ft şavuk'lene ats'a, mana insan Bat-Şevayna q'əsda dekmee ıxha. Bat-Şevayna adamiy, Uriy, Davudee gik'u'ı ıxha.\ft*\f* cune şahareençe, Giloonçe, cusqa qoyt'al. Avşalomne suralqa ı'lğəənbı yiğ-yiğıle geeb qeebaxhe vuxha. Manbışis Davudne yı'q'əle qeepxhes vukkan vuxha.
\s Davud İyerusalimğançe hexva
\p
\v 13 Sa insan Davudusqa arı, mang'uk'le eyhen:
\p – İzrailybışin yik'bı Avşalomulqa vod satk'ıl.
\p
\v 14 Davudee İyerusalimeene cune gırgıne insanaaşik'le eyhen:
\p – İnçe heepxas! Deşxheene, Avşalomne xılençe yişde neng'ussecar g'attixhanas əxəs deş. Zaraba vuxhe əlyhəəs. Deşxheene, mana şaka avarq'ıl, yişde vuk'lelqa yiğbı exas, şaharıb g'ılıncike alğaahas.
\p
\v 15 Paççahne insanaaşe eyhen:
\p – Şi yiğın nukarar vob, hasre ğu, yişde xərıng'vee, eyhen ixhecen.
\p
\v 16 Paççahıqab qihna mang'un gırgın xaabınbı qığeebaç'enbı. Mang'vee saccu yits'ıyre həmbal zəiyfa xaaqa ilyaakasva g'alyaa'a. 
\v 17 Paççahıqad qihna gırgın milletcad qığeç'u, şahareençe qı'ğəəne xaasqamee qadı, ulyoyzaran. 
\v 18 Gırgın mang'un insanar Keretbışika, Peletbışika\f + \fr 15:18 \fr*\fq Keretbı, Peletbı: \fq*\ft ine milletne insanaaşe paççahıs g'aravuliyvalla haa'a vuxha.\ft*\f*, yixhıd vəş (600) Gateençe cuqab qihna qabıyne Gatbışika sacigee, cune ögiyle ılğeebaç'e.
\p
\v 19 Paççahee Gatğançene İttayk'le eyhen:
\p – Ğu nya'a şaka ı'qqə? Sak'le, ixhesde paççahıka Avşalomuka axve. Ğu menne cigeençe g'e'eşşu qarına vor. 
\v 20 Ğu inyaqa həşdebışee qarı. G'iyna zı ğu zaka əlyhəəsne alikke? Zak'le zı nyaqa əlyəsvacar ats'a deş. Ğumee sak'le, yiğın insanarıb vaka quvke. Hasre Rəbbee Cuna badal dyooxhena yugvalla vak'le haagvecen!
\p
\v 21 İttayee paççahıs alidghıniy qele:
\p – Vorne Rəbbilqaniy yizde xərıng'une paççahne canılqan k'ın ixhen, ğu, yizda paççah, nyaa'ar ixhee, zınar qik'u ixheeyir, üç'ür ixheeyir, maa'ar ixhes.
\p
\v 22 Davudee İttayk'le eyhen:
\p – Qora manke ögiylqa ılğeç'e, ögee hoora.
\p Gatğançene İttaykan gırgın mang'un insanar, cone k'anebın gırgın uşaxar qabı, ılğeebaç'enbı.
\p
\v 23 Paççahın insanar əlyhəəmee, ölkeebın gırgın insanar okur aletçu gyaaşenbı. Paççahee Qidronna q'adaal ılğevç'umee, mang'ukan gırgın milletcad sahrayne suralqa ayk'an.
\p
\v 24 Maa'ar Tsadokır ıxhana. Mang'une k'ane Leviyke g'abıynbı\f + \fr 15:24 \fr*\fq Leviyke g'abıynbı: \fq*\ft Levi Yaaq'ubna xhebır'esda dix ıxha. Allahee İzrailybışde yı'q'neençe mang'uke g'abıynbı kaahinaaşin kumagçer vuxhecenva g'əvxü.\ft*\f* vuxhaynbı. Manbışe Allahıka mugaavilenana q'utye quvkekka vuxha. Allahna q'utye manbışe ç'iyelqa giviyxhe. Evyataree gırgın millet şahareençe qığeç'esmee q'urbanbı allya'a.
\p
\v 25 Paççahee Tsadokuk'le eyhen:
\p – Allahna q'utye şahareeqa savk'al hee'e. Zı Rəbbine ulesqa yugra qaree, Mang'vee meer zı yı'q'əlqa sak'al hı'ı, Cuna q'utyeyiy Cuna çadır\f + \fr 15:25 \fr*\fq Cuna çadır: \fq*\ft Mana Allahna muq'addasna çadır vob. inyaa Allahne muq'addasne çadırene hək'ee eyhe. İzrailybı, Misirğançe qığeepç'iyle qiyğa, Allahee manbışik'le muq'addasna çadır hee'eva eyhe. Manbı sahree vuxhaylette manbışe mana çadır coka ı'ğviykar ha'a vuxha. Mana çadır işaarat vuxha, Allah cone yı'q'nee axvava. Mane muq'addasne çadırne ögiyl İzrailybışe Allahıs q'urbanbı gyaat'a, ı'bəədatbıniy ha'a.\ft*\f* zak'le hagvasın. 
\v 26 De'eş, «ğu Zas ıkkanna deşurva» uvheene, hasre zak Cus hucooyiy ıkkan he'ecen. Zı Mang'une xıle vorna.
\p
\v 27 Paççahee kaahin Tsadokuk'le eyhen:
\p – İlekke, hucooyiy eyxhe. Ğunayiy yiğna dix Axima'ats, Evyatarne dixeka Yonatanıka sacigee hexxan hidi'ı şahareeqa savk'le. Ğunar, Evyatareeyib q'öyursana vuşun dixbı şoka vukkee. 
\v 28 Zı şoke xabar qavaalesmee, İordanne damayle ılğəəne cigee, sahree ixhes.
\p
\v 29 Tsadokeeyiy Evyataree Allahna q'utye İyerusalimeeqa savaak'al haa'a. Cona q'öyursanab İyerusalimee axva.
\p
\v 30 Davud Zeytunne suvalqa geşşe-geşşe ılqeç'e. Mang'vee vuk'lelqa kar atçu eyxhe, g'elilqamee kar ali'ı ıxha deş. Mang'uka sacigee suvalqa ı'lqəənbıb vuk'lelqa kar atçu gyaaşe-gyaaşe ılqeebaç'e.
\p
\v 31 Şavaame «Axitofel Avşalomne k'ane vorva, g'elil qeepxhaynbışde suralirva» xabar hoole. Davudee Rəbbis düə haa'a:
\p – Ya Rəbb, zı Vake heqqa, Axitofelin mı'sləhətbı nişiscad karaı'dəənbı he'e.
\p
\v 32 Davud milletın Allahıs ı'bəədat ha'ane suvane q'omaqa hirxhılymee, Arkibışda Xuşay mana g'aces arayle. Mang'vee culqa abına ver haagvasva tanalinbı qıt'axxa'a, vuk'ulelqa nyaq'v kyaa'a. 
\v 33 Davudee mang'uk'le eyhen:
\p – Ğunar zaka sacigee əlyhəəsxhee, ğu zas dağamra ixhes. 
\v 34 İnekke yugun, ğu şahareeqa sak'ı, Avşalomuk'le eyhe: «Paççah, zınar yiğna nukar ixhes. Şenke nəxübiy yiğne dekkıs nukariyvalla hav'u, həşdeb vas haa'as». Məxüd vasse zas kumag ha'as əxə. Vasse Axitofelin mı'sləhətbı alyt'ik'al ha'as əxə. 
\v 35 Kaahin Tsadokiy kaahin Evyatar maa'ab vaka vuxhes. Paççahne sarayee g'ayxhiyn gırgın kar, ğu kaahinaaşilqa Tsadokılqayiy Evyatarılqa hixhar ha'as. 
\v 36 Manbışda q'öyre dix – Tsadokna dix Axima'ats, Evyatarna dix Yonatan – manbışde k'ane vob. Şok'le g'ayxhiyn gırgın manbışde xıleka zalqa hixhar he'e.
\p
\v 37 Avşalom İyerusalimeeqa ı'kkəəmee, Davudna hambaz Xuşayır şahareeqa ikkeç'e.
\c 16
\s Davudıy Tsiva
\p
\v 1 Davud suvayle gəə girğılymee, mang'us Mefiboşetna nukar Tsiva qızaxxa. Mang'vee q'öd vəş (200) gıney, vəş t'exa qeqqvuyne t'ımılin, vəş t'exa incilyna, sa tuluğ çaxıren alyaat'u, manbıd q'öne əməlelqa alixhxhı, Davudne ögiylqa arayle.
\p
\v 2 Paççahee Tsivayk'le eyhen:
\p – İnbı nyaqane ıkkekka?
\p Tsivee eyhen:
\p – Əməler paççahın xaabınbı aleepxecenva, gıneyiy incilerıd yiğne nukaraaşe oxhnecenva, in çaxırıd sahreene obzuruynbışe ulyoğecenva adı.
\p
\v 3 Paççahee Tsivayk'le eyhen:
\p – Yiğne xərıng'una neva, Mefiboşet, nyaane vor?
\p Tsivee paççahık'le eyhen:
\p – Mana «G'iyna İzrailybışe yizde q'əsde dekkına paççahiyvalla zasqa savaak'al haa'asva» uvhu, İyerusalimee axu.
\p
\v 4 Paççahee Tsivayk'le eyhen:
\p – Manke Mefiboşetın gırgın kar yiğın eyxhe.
\p Tsiva paççahıs k'yorzul, alidghıniy qele:
\p – Saccu zı yiğne ulesqa yugra qoracen.
\s Şimeyee Davudus bed-düə haa'a
\p
\v 5 Paççah Davud Baxurim eyhene şahareeqa qarayle. Mançe mang'usqa Şaulne xınıbışda Gerayna dix Şimey qığeç'e. Şimey Davudus bed-düə haa'a-haa'a qığeç'e. 
\v 6 Davudne hiqiy-alla cehilyaariy cun esker vuxhayka ilydyakkı, mang'vee Davudulqayiy Davudne insanaaşilqa g'ayebı ayhe.
\p
\v 7 Şimeyee Davudulqa inəxübna bed-düə haa'a:
\p – Agvle, agvle, insanar gyabat'ana, karaı'dəəna insan! 
\v 8 Ğu Şaulne cigee paççah ıxha. Rəbbeeyid vak in Şaulne nasılıke k'yapk'ınne ebal-alla hı'ı. Həşde Rəbbee paççahiyvalla yiğne dixesqa Avşalomusqa quvu. Valqa mana ver ğu insanar gyabat'anava abı.
\p
\v 9 Tseruya donane zəiyfayne dixee Avişayee paççahık'le eyhen:
\p – Nya'a mane xvaan yizde xərıng'us, paççahıs, məxbına bed-düə hav'u? Hasre zı hark'ın mang'una vuk'ul qooxas.
\p
\v 10 Paççahee eyhen:
\p – Tseruyayn dixbı, zake şos hucoone? Mang'vee, Rəbbee «Davudus bed-düə hee'eva» uvhu, bed-düə haa'axhee, şavusse mang'uk'le «məxüd hıma'ava» eyhes əxəyee?
\p
\v 11 Davudee Avişayk'leyiy gırgıne cune insanaaşik'le eyhen:
\p – Zake g'ariyne yizde dixes zı gik'as ıkkan. Mane Benyaminyaaşikeng'uk'le hucoo eyhes eyxheyee! Mana culer-alqa g'alerçe, hasre heecen bed-düə. Mang'uk'le məxüd Rəbbee uvhu. 
\v 12 Həməxüd eyxhe, Rəbbik'le zak ıxhayn g'acu, şeng'vee g'iyna zas hav'uyne bed-düə-alla, zas yugun ha'a.
\p
\v 13 Davudıy cun insanar cone yəqqı'n əlyhəə vuxha. Şimeyeeme suvayne sirtıle bed-düə haa'a-haa'a ayk'an. Mang'vee manbışilqa g'aye, tooz dağa'a. 
\v 14 Paççahiy cukan gırgın insanar İordanne damaysqa hipxhır, obzurva maa'ad manzilybı ha'a.
\s Avşalom İyerusalimqa ikkeç'e
\p
\v 15 Avşalomiy gırgına İzrailybışda g'oşun İyerusalimeeqa qabayle. Axitofelir mang'uka sacigee ıxha. 
\v 16 Davudna hambaz, Arkibışda Xuşay, Avşalomusqa arı «Paççah geer qa'ana! Paççah geer qa'anava!» eyhe.
\p
\v 17 Avşalomee Xuşayk'le eyhen:
\p – Manane yiğne hambazılqana, Davudulqana, yiğna badal dyooxhena yugvalla? Nya'a hambazıka sacigee idyark'ın?
\p
\v 18 Xuşayee Avşalomuk'le eyhen:
\p – De'eş, zı saccu Rəbbee, ine milletın, gırgıne İzrailincar, g'əyxı'yne insanın sura aqqas. Zı mang'uka axvas. 
\v 19 Ğu zak'le eyhelan zı şavusne nukariyvalla haa'as? Hambazne dixes dişde? Yiğne dekkis nəxbına nukaruyvallayiy hav'u, vasıb həməxübna nukariyvalla haa'as.
\p
\v 20 Avşalomee Axitofelik'le eyhen:
\p – Şi hucooyiy ha'as ıkkanva mı'sləhət g'avcelan!
\p
\v 21 Axitofelee Avşalomuk'le eyhen:
\p – Yiğne dekkee xaaqa ilyaakasva g'alyav'uyne cune həmbal zəiyfabışika g'alixhe. Manke gırgıne İzrailik'lecad ğu dekkıs g'ımece qıxhava ats'axhxhesın. Yiğne suralyne gırgınbışeed yiğın sura sık'ıldad geed aqqas.
\p
\v 22 Avşalomee dekkıne sarayne oğa çadır güvxü, maa'ar gırgıne İzrailyne ulene ögiyl dekkıne həmbal zəiyfabışika g'ılexha.
\p
\v 23 Mane gahbışil Axitofelee g'avcuna mı'sləhət, Allahıken cuvab xhinne ıxha. Axitofelee g'avcuna mı'sləhət Davudnemeeyib Avşalomnemeeyib həməxüb vuxha.
\c 17
\s Axitofelinniy Xuşayn mı'sləhətbı
\p
\v 1 Axitofelee Avşalomuk'le eyhen:
\p – Hasre zı yits'ıq'vəd aazır (12 000) insan g'əyxı', xəmde Davuduqa qihna gixhas. 
\v 2 Mana orzul, rı'hı'le g'a'arxhung'a, şi manbışilqa k'yophur mang'una ul qəvəəq'ənaa'as. Manke mang'une k'anebın gırgınbı heepxasınbı. Zınar manke saccu paççah Davud gik'as. 
\v 3 Qiyğale gırgın millet zı vasqa sak'al ha'as, istağ tsumaysqa seek'al hee'en xhinne. Gırgınbı valqa savk'lecenva, ğu mana t'abal ha'ana insan gidek'u g'alerçes ıkkan deş. Manke milletıkıd vuççud ixhes deş.
\p
\v 4 Man cuvab Avşalomusud gırgıne İzrailyne ağsaqqalaaşisıd yugda qadayle. 
\v 5 Avşalomee eyhen:
\p – Qudoora, həşde Arkibışda Xuşayır qot'alas, sa mang'vee eyhenıçilid k'ırı alixhxhes.
\p
\v 6 Xuşay Avşalomusqa arımee, Avşalomee mang'uk'le eyhen:
\p – Axitofelee şas inəxübna mı'sləhət g'avcu. Şi mang'vee eyhəxüd ha'asee? De'eş, hidya'asxhee, ğu hucoo he'evane eyhe?
\p
\v 7 Xuşayee eyhen:
\p – Axitofelee həşde huvuna mı'sləhət yugna deşub. 
\v 8 Vak'lecad ats'an, yiğna dekkiy mang'ukan insanar igider vob. Manbı həşde balabı g'ayşu axuyn syobı xhinne vob. Yiğna dek ək'elika siç'ekkvana insan vor, mana mısacar g'oşunne yı'q'nee g'alixhas deş. 
\v 9 Mana həşde mağarabışde sançeeye, deşxhee, menne cigeeye dyugulyxha vor. Mang'una g'oşun yiğne eskeraaşilqa ts'eppa k'yophur, ğamuvxhee, man g'ayxhiynbışe eyhesın: «Avşalomuqa qihna apk'ıniynbı avub avxu». 
\v 10 Manke aslanaaşin xhinnen yik'bınan igiderıb qəvəəq'ənasınbı. Gırgıne İzrailybışik'lecad ats'an, yiğna dek nəxruna g'oçax ıxhay, cukanbıb nəxbın igider vuxhay.
\p
\v 11 Zı vas inəxübna mı'sləhət g'ooce: Danile Beer-Şevalqamee\f + \fr 17:11 \fr*\fq Danile Beer-Şevalqamee: \fq*\ft Dan eyhena şahar mane gahıl İzrailyna nekke şimalılna şaharniy vob. Beer-Şeva eyhena şaharmee cühüt'yaaşine sahree, İzrailyna nekke canubulyna vuxha. «Danile Beer-Şevalqamee» İzrailyne k'anençe-qomaqqameeva eyhen ıxha.\ft*\f* gırgın İzrailybı deryahne mıglena g'um xhinne vasqa savaalecen. Ğunab yiğne xılen manbı dəv'eeqa vukkee. 
\v 12 Mana axvane cigabışde sançee şi mang'ulqa xəənçe ç'iyelqa g'e'exhxhan şeh xhinne k'yooharas. Manar, cukane insanaaşina sacarır üç'ürra g'ılydyaraççe. 
\v 13 Mana menne şahareeqa ark'ın ixheene, gırgıne İzrailybışe mane şaharısqa t'ü'ər adı, mana şahar habğı, dameeqa g'a'apçes. Mane şaharıke sa k'ınna g'ayeb g'alepçes deş.
\p
\v 14 Avşalomeeyiy cukane gırgıne İzrailybışe eyhen:
\p – Arkibışda Xuşayna mı'sləhət, Axitofelyne mı'sləhətıle yugba vob.
\p Məxüd Rəbbee Avşalomne vuk'lelqa ver ablyaa'asdemee, Axitofelyna yugna mı'sləhət havaakal haa'a.
\s Xuşayee Davudus xabar hoole
\p
\v 15 Xuşayee kaahinaaşik'le Tsadokık'leyiy Evyatarık'le eyhen:
\p – Axitofelee Avşalomusiy İzrailyne ağsaqqalaaşis inəxübna mı'sləhət g'avcu. Zımee manbışik'le inva uvhu. 
\v 16 Həşde şu ina xabar ana Davudusqa zaara insan g'axıle. Şu mang'uk'le eyhe: «G'iyna xəm İordanne damayne ine aqval sahree hımaa'a. Damayne şene aq'valqa ılğeepç'e. Deşxheene, paççahır cukan gırgın insanarıb hapt'asınbı».
\p
\v 17 Yonataniy Axima'ats En-Rogelee aaxva vuxha. Sa nukar içee manbışis xabar abayle vuxha, manbışeb mana xabar paççah Davudus hivxhar haa'a vuxha. Manbı şaharee neng'uk'lecab g'avces vukkan deşdiy. 
\v 18 Sa gadeyk'le manbı g'ooce, mang'veeyid man hark'ın Avşalomulqa hixhar ha'a. Mançil-allab manbı mançe zaraba qığeepç'ı Baxurimee eyxhene sa adamiyne xaaqa qavayle. Mane adamiyne məhlee kahrız vooxhe. Manbı maqa k'eebaç'e. 
\v 19 Mang'une xhunaşşee örtyug alyaat'u kahrızılqa aççu, çilqab xhıt'a gyooka, şavuk'lecad vuççud g'ımececenva. 
\v 20 Avşalomun insanar mane xaaqa abı, zəiyfayke qiyghanan:
\p – Axima'atsiy Yonatan nyaane vob?
\p Zəiyfee manbışik'le eyhen:
\p – Damayke ılğeepç'ı.
\p Mane insanaaşe manbı t'abal haa'a. Vuşucar ivdeykımee, sapk'ıl İyerusalimqa avayk'an. 
\v 21 Avşalomun insanar apk'ıniyle qiyğa, Yonataniy Axima'ats kahrızeençe qığeepç'ı, paççah Davudus xabar hevlesva avayk'an. Manbışe mang'uk'le eyhen:
\p – Oza qeepxhe, damayke zaraba ılğeepç'e.
\p Manke manbışe Axitofelee uvhiynçina gaf ha'a.
\p
\v 22 Davudıy cun insanar İordanne damayle ılğeebaç'enbı. Miç'eerilqasse damayle ılğıdeç'una sa insan axva deş.
\p
\v 23 Axitofelik'le iş cune mı'sləhətıka hidyav'u g'avcumee, mang'vee cune əməleys palan ı'xı' cune şahareeqa, xaaqa siyk'al. Mang'vee cune karak hucooyiy ha'as ıkkanvad uvhu, ark'ın vuceecar vuc givayxanna. Mana, cuna dek k'eyxiyne mağaree k'eyxha.
\p
\v 24 Davud Maxanayimeeqa qarayle. Avşalomur cune k'anene gırgıne İzrailybışika İordanne damayle ılğeç'e. 
\v 25 Avşalomee, Amasa Yoavne cigeeqa g'oşunbışda xərna giyxhe. Amasa, Yitra donane İzrailyğançeng'una dix ıxha. Mang'una yed Naxaşna yiş Avigailiy yixha. Yoavna yed Tseruya Avigailiynar yiçu yeexhe. 
\v 26 Avşalomee İzrailybışika Gilead eyhene cigee çadırbı giyxə.
\p
\v 27 Davud Maxanayimeeqa arayle. Maqa mang'usqa Ammonne Rabba eyhene şahareençene Naxaşna dix Şovi, Lo-Devareençe Ammielyne dix Makir, Rogelim eyhene şahareençe Gileadğançena Barzilay abayle. 
\v 28 Manbışe Davudusiy cune g'oşunus doşagbı, k'olabı, nyuq'vneke hı'iyn g'abbı, ooxhanas suk, xhıt'a, urva, qoots'una suk, hüvə, 
\v 29 itv, şor, zerane nikneke hı'iyn nisse, vəq'əbı adayle. Manbışisqa məxüd qayle, g'oşun çolee mıssıbaniyxan, obzur, xhyan denamee avxu.
\c 18
\s Avşalom qek'ana
\p
\v 1 Davud cune hıqiy-allane g'oşunuqa ilyakka. Mang'vee g'oşun aazırna, vəşna bit'al hav'u, manbışilqa ç'ak'ınbı giviyxhe. 
\v 2 Davudee g'oşun xhebne cigeeqa bit'al haa'a. Ts'eppiyne destel ooqa Yoav, q'öd'esde destel ooqa Yoavna çoc, Tseruyayna dix Avişay, xhebıd'esde destel ooqar Gatğançena İttay xərna giyxhe. Paççahee g'oşunuk'le eyhen:
\p – Zı şoka dəv'eeqa hidyark'ın gyuaras deş.
\p
\v 3 Eskeraaşe mang'uk'le eyhen:
\p – Hımayk'an, şi heepxas gyapk'eene, manbı şaqa sapk'ıl ilyaakas deş. Yişinbışin surabı hapt'eeyib, manbı şaqa meeb sapk'ıl ilyaakas deş. Ğu yişde yits'ne aazırıng'ule ooqana vor. Mançilesa, ğu şas şahareençe kumag he'e.
\p
\v 4 Paççahee manbışik'le eyhen:
\p – Şosqa nəxüdiy yugda qöö, zı həməxüdud ha'asın.
\p Gırgına g'oşun vəşna, aazırna şahareençe qığevç'esmee, paççah şaharne akkabışisne ulyoyzar. 
\v 5 Paççahee Yoavılqa, Avişayalqa, İttayalqa əmr haa'a:
\p – Hucoona ixhes, yizdemee şene gadeyka, Avşalomuka, g'üvənaba vuxhe!
\p Paççahee g'oşunbışde vuk'lel ulyobzuriynbışis Avşalomne hək'ee huvuna q'arar gırgıne eskeraaşik'le g'avxhuna.
\p
\v 6 Davudna g'oşun, İzrailybışka dəv'ə haa'asva qığooç'e. Dəv'ə Efrayimne ç'alagee vooxhe. 
\v 7 Maa'ab İzrailyna g'oşun Davudne insanaaşile avub aaxva. Mane yiğıl maa'ab geeb eb k'yapk'ın, g'ad aazır (20 000) insan qik'u. 
\v 8 Maana dəv'ə hiqiy-allane gırgıne cigabışeeqab hiviyxharna. Mane yiğıl ç'alagın g'ılıncıle geeb insanar gyabat'a.
\p
\v 9 Avşalom Davudne insanaaşisqa qızaxxa. Mana cune g'atiril alixı, xənne mı'qəne yivek avğançe ı'lğəəmee, mang'una vuk'ul yivene geed bıtağbınane cigayk açayxar. Məxür mana xəə'ər givarxın axva, vuc alixına g'atirme qığevç'u avayk'anna. 
\v 10 Eskeraaşine sang'uk'le man g'acu, Yoavıs yuşan ha'a:
\p – Zak'le həşde Avşalom mı'qəne yivele qı'xı' g'acu.
\p
\v 11 Yoavee cus man yuşan hı'iyne insanık'le eyhen:
\p – Hucoo? Vak'le manayee g'acu? Nya'a ğu mana mankecar ı'xı' gidek'u? Zı vas mançil-alla yits'ılle şekel\f + \fr 18:11 \fr*\fq yits'ılle şekel: \fq*\ft 115 gramılqa ələən nuk'ra ıxha.\ft*\f* nuk'rayniy sayib ts'iraniy hevles.
\p
\v 12 Mane insanee Yoavık'le eyhen:
\p – Yizde xılyaqa aazır şekelib\f + \fr 18:12 \fr*\fq aazır şekel: \fq*\ft 11 kilolqa ələən nuk'ra ıxha.\ft*\f* huvunaxhiy, zı paççahne dixelqa xıl g'udyoyt'alıy. Vak'le, Avişayk'le, İttayk'le, «Yizdemee mana gade Avşalom havaceva» paççahee əmr haa'a zak'le g'ayxhiyn. 
\v 13 Zı paççahne cuvabıke qığeç'u, Avşalom gik'unaxhiy, vuççud nəxüdcad paççahıke dyugul ha'as eyxhe deş. Ğunad yizın sura aqqas deşdiy.
\p
\v 14 Yoavee mang'uk'le eyhen:
\p – Zaqa, vaka avaak'an haa'asda gah deşda.
\p Avşalom mı'qəne yivele qı'xı'carniy vor, mana qik'u deşiy. Yoavee xılyaqa xhebılle mizrag alyat'u, mang'une yik'eeqa hiyxə. 
\v 15 Yoavın silah haqqana yits'iyre gade Avşalomusqa yoq'ne surale qeepxha, mana ı'xı' gek'ana.
\p
\v 16 Qiyğa, g'oşunun İzrailybışiqa qihna gyapk'iy ç'əv he'ecenva, Yoavee şeypur ı'lyviyxə. 
\v 17 Avşalomur yivele g'ayşu, ç'alageene sa xənne g'uyeeqa dağaraççe. Ooqab g'ayebışda anbar saa'a. Manke gırgın İzrailybı cone xaybışeeqa heebaxa.
\p
\v 18 Avşalomee üç'ürnang'a sa xəbna g'aye alyapt'ı, mana Paççahaaşine Q'adaalil cus aabida xhinne ulyoozar haa'a. Mang'vee mane g'ayel «Zas yizın do havacesda dix ıxha deşva» uvhu, mane g'ayeys cun do hele. G'iyniyne yiğılid\f + \fr 18:18 \fr*\fq G'iyniyne yiğılid: \fq*\ft in kitab otk'uning'vee kitab ok'anassencad gahbı eyhe ıxha.\ft*\f* mançik'le Avşalomna haykalva eyhe.
\s Davuduk'le Avşalom qik'uva ats'axhxhe
\p
\v 19 Tsadokne dixee, Axima'atsee eyhen:
\p – Hasre zı g'adayxhvan paççahısqa hark'ın, Rəbbee vuc duşmanaaşine xılençe g'attixhan hı'ıva xabar hevles.
\p
\v 20 Yoavee mang'uk'le eyhen:
\p – Ğu mana gaf g'iyna deş, sa menne yiğıl sa mebna yugna gaf paççahıs hee'e. G'iyna mang'una dix qik'u.
\p
\v 21 Yoavee Kuş eyhene cigeençene adamiyk'le eyhen:
\p – Hoora, paççahısqa hak'ne, g'iyna g'acuynbı mang'us yuşan he'e.
\p Mana insanır Yoavıs kyorzul, mançe g'adayxhvan ayk'anna. 
\v 22 Tsadokne dixee Axima'atsee meed Yoavık'le eyhen:
\p – Hucooyiy eyxhe ixhecen, hasre zınar şene adamiyqa qihna g'adaxhvanas.
\p Yoavee eyhen:
\p – Nya'a, dix, vasır şeng'uqar qihna g'adaxhvanas ıkkan? Ğu mana gaf hav'uva vas mukaafat heles deş.
\p
\v 23 Mang'vee eyhen:
\p – Hasre hucooyiy eyxhe ixhecen, zı g'adaxhvanasda.
\p Yoavee mang'uk'le «G'adaxhvneva» eyhe. Axima'ats Q'adaaline yəqqı'n g'adarxhun, Kuş eyhene cigeençene adamiyle ögee qexhe. 
\v 24 Mane gahıl Davud anneyiy g'anne akkabışde yı'q'nee gyu'ur eyxhe. G'aravulyçiy şaharne akkayne oone cabırılqa ılqeç'umee, mang'uk'le sa insan g'adayxhvan qöö g'ece. 
\v 25 Mang'vee paççahılqa onu'u, cuk'le g'acuyn paççahıs yuşan ha'a. Paççahee eyhen:
\p – İnsan saxhee mang'vee, xabar vukkekka vuxhes.
\p Mana insan hiyxhar ıxha. 
\v 26 G'aravulyçiyk'le g'adayxhvan qööna sa merna insanır g'ece. Mang'vee akkee ulyorzuling'ulqa onu'u, eyhen:
\p – Meer sa merna insanır g'adayxhvan qöö.
\p Paççahee eyhen:
\p – Manar xabar vukkekana vor.
\p
\v 27 G'aravulyçee eyhen:
\p – Ts'erriyng'un g'adarxhuniy Tsadokne dixene Axima'atsne g'adarxhuniyıkıd akar.
\p Paççahee eyhen:
\p – Mana yugna insan vor, mana yugne xabarıka ı'qqə.
\p
\v 28 Axima'atsee paççahık'le it'umda eyhen:
\p – Gırgın yugda vod!
\p Qiyğa mana paççahne ögiyl ç'iyelqamee k'yorzul eyhen:
\p – Yuğne Allahıs, Rəbbis şukur vuxhena! Rəbbee valqa, yizde paççahılqa, xıl g'ott'uluynbı yuğnecab xılyaqa quvuynbı.
\p
\v 29 Paççahee eyhen:
\p – Yizda dix Avşalom yugrane vor?
\p Axima'atsee eyhen:
\p – Yoavee zınay sa merna paççahna nukar g'uxoolemee, zak'le maa'ad alikkı-gikkiy gitxhu g'acu. Zak'le maa hucoome ıxhay, nenme ıxhay ats'a deş.
\p
\v 30 Paççahee eyhen:
\p – Sa suralqana qıxha, maa'ar ulyozre.
\p Manar sa suralqana qıxha ulyoyzarna. 
\v 31 Kuş eyhene cigeençena qarı eyhen:
\p – Yizde xərıng'us, paççahıs zaqa yugna xabar vobna! Rəbbee g'iyna valqa g'elil qeepxhaynbışde xılençe ğu g'attixhan hı'ına.
\p
\v 32 Paççahee mang'uk'le eyhen:
\p – Yizda dix Avşalom yugrane vor?
\p Kuş eyhene cigeençeng'vee eyhen:
\p – Hasre yizde xərıng'une paççahne duşmanaaşikiy, mang'ulqa g'elil qeepxhayne gırgıng'uk Avşalomuk ıxhayn ixhecen.
\p
\v 33 Paççah sacuraycar qa'a. Mana şaharne akkabışde oone gozeeqa ılqeç'u, geşşena. Mang'vee ooqa ılqə-ılqə eyhe ıxha:
\p – Yizda dix, yizda dix Avşalom! Dix, yiğne cigee zıcarxhiy qik'una! Yizda dix Avşalom!
\c 19
\s Yoavee Davudus güx haa'a
\p
\v 1 Yoavılqa «Paççah Avşalomuqa vor geşşe, mang'vee ak'ıb avquva» hixhar ha'a.
\p
\v 2 Mane yiğıliyn duşmanaaşile ğamepxhay ak'ılqa siyk'al. Eskeraaşik'le paççahın yik' dixeqa gyotxhanva g'iyxhe. 
\v 3 G'oşun mane yiğıl şahareeqa, dəv'eençe hixu qööna, naş qexhe dyugulenra şahareeqa ı'kkəəna xhinne ikkyooç'e. 
\v 4 Paççahee aq'valqa kar atçu, it'umba ts'ir haa'a:
\p – Yizda dix Avşalom, ay Avşalom! Dix yizda, ay dix!
\p
\v 5 Yoav paççahne xaaqa ikkeç'u, eyhen:
\p – G'iyna yiğın can, dixbışin, yişbışin, yiğne yadaaşin, həmbal zəiyfabışin canbı g'attixhan hı'iyn yiğın insanar ğu k'ap'ik'ıle avqa qav'u. 
\v 6 Vas ğu g'ımecenanbı vukkan, ğu ıkkananbı vukkan deş. G'iyna ğu yişde gırgıng'uk'le haguyn, g'oşunbışin ç'ak'ınbıyiy manbışin insanar yiğnemee vuççud deşin kar vodun. G'iyna zalqa hitxhır, Avşalom axu yişin gırgınbı g'iyna hapt'ıynbıxhiy, man yiğnemee yugdaniy ixhes. 
\v 7 Həşde milletısqa qığeç'e, manbışis yik'bı hele. Rəbbilqan k'ın ixhen, ğu g'iyna milletısqa qığdeç'vee, vaka exhalilqasse sacar insan axvas deş. Manıd mek'valile g'iyniyne yiğılqamee yiğne vuk'lelqa qadıyn nekke pisın kar ixhes.
\p
\v 8 Paççah oza qıxha, şaharne akkabışisda giy'ar. G'oşunuk'led «Paççah şaharne akkabışisne gyu'urva» uvhumee, g'oşun paççahısqa savayle.
\s Davud İyerusalimqa siyk'al
\p Gırgın İzrailybıme cone xaybışeeqa apk'ın vooxhe. 
\v 9 İzrailyne gırgıne nasılbışe sana-sang'uka xıliyn ha'a, eyhe ıxha:
\p – Paççahee şi yişde duşmanaaşine xılençe g'attivxhan hav'u! Filiştinaaşde xılençeb mang'vee şi g'attivxhan hav'u. Həşder Avşalomul-alla mana vuccar ölkeençe hixu. 
\v 10 Şas xəbvalla hee'ecenva şi g'əyxı'na Avşalomur dəv'ee qik'una. Həşde paççah Davud yı'q'əlqa sak'al hı'iynemee, şu nya'a vuççud itteyhe?
\p
\v 11 Paççah Davudee kaahin Tsadokusqayiy kaahin Evyatarısqa in cuvab hixhar ha'as insan g'ıxele:
\p – Yahudayne ağsaqqalaaşik'le inəxüd eyhe: «Paççah yı'q'əlqa sak'al ha'amee, şu nya'a nekke qiyğiynbı vooxhe? İzrailycad yuşan ha'an karbı paççahılqa, mang'une xaalqa hiyxhar. 
\v 12 Yizın çocar, şi sa ebanbı vob. Nya'a paççah sak'al ha'ang'a şu nekke qiyğiynbı vooxhe?» 
\v 13 Amasayk'led eyhe: «Nya'a şi sa ebanbı dişde vob?\f + \fr 19:13 \fr*\fq Sa ebanbı: \fq*\ft Amasa Davudna xıdıl ıxha.\ft*\f* Yizde k'ane gırgıne gahbışis Yoavne cigeena g'oşunbışda xərna ğu dexheene, hasre Allahee zalqa mançileb pisda ver ablee'ecen».
\p
\v 14 Mang'vee məxüd gırgıne Yahudeeşin yik'bı sang'un yik' xhinne culqa sak'al ha'a. Manbışe paççahısqa insan g'axuvu, eyhen:
\p – Paççah, ğunar, yiğın gırgın insanarıb savk'le.
\p
\v 15 Paççah sak'ı, İordanne damaysqa hiyxhar. Yahuder paççahne ögeeqa, mana damayke alğahasva Gilgal eyhene cigeeqa abayle.
\s Davudee Şimeyilqa yiğ allya'a deş
\p
\v 16 Baxurimğançene Benyaminne nasıleençene Gerayna dix Şimeyir Yahudeeşika sacigee zaara paççah Davudne ögeeqava geç'e. 
\v 17 Mang'uka Benyaminaaşina aazır insan arayle. Qiyğa Şaulne xaana nukar Tsiva, yits'uxhvayre (15) mang'una dix, g'ayrer (20) nukar arayle. Manbı zaraba-zaraba İordanne suralqa paççahısqava avayk'an. 
\v 18 Coyub paççahısqa yugba qudoorabacenva mang'una xizan damayle alğaahas, damayne şena aq'valqa ılğeebaç'e. Gerayna dix Şimey, paççah İordanne damayle ılğeç'umee, Davudne ögiyl ç'iyelqa gizyaraççe. 
\v 19 Mang'vee paççahık'le eyhen:
\p – Hasre yizde xərıng'uk'le zal bınah g'umoocecen. Ğu, yizda paççah, İyerusalimğançe qığeç'uyne yiğıl zı, yiğne nukaree, hav'una bınah yik'el qavaale hımaa'a. 
\v 20 Zak'le hav'una bınah vaats'ana. Mançil-allar zı g'iyna paççahne ögiylqa gırgıne İzrailybışile ögee arı.
\p
\v 21 Tseruyayne dixee Avişayee eyhen:
\p – Şimeyee Rəbbee g'əyxı'ng'uk'le eyhesınbı-ittehesınbı axu deş. Mançil-allar mana gik'as ıkkan.
\p
\v 22 Davudee eyhen:
\p – Tseruyayn dixbı, zake şos hucoone? Nya'a zas duşmanna g'ats'apk'ın? Zak'le zı İzrailyna paççah ıxhay yugda ats'a vod, mançil-allar g'iyna İzrailee vuşucar gik'as deş.
\p
\v 23 Paççahee qiyğa Şimeyk'le eyhen:
\p – Ğu gik'as deş.
\p Paççahee mang'us k'ın g'iysar.
\s Mefiboşet Davudusqa arayle
\p
\v 24 Şaulna neva Mefiboşet paççahne ögiylqa arayle. Paççah ark'ınne yiğıle, xaaqa sağra-salamatra sak'alasde yiğılqamee, mang'vee g'elybıyiy tanalinbı hodğul deş, muç'ru gyapxhı deş. 
\v 25 Mana paççahne ögiylqa İyerusalimeeqa arımee, paççahee mang'uke qiyghanan:
\p – Nya'asdiy, Mefiboşet, ğu zaka qidyarı?
\p
\v 26 Mefiboşetee eyhen:
\p – Yizda xərna paççah! Zı, yiğna nukar, k'aarava, zas əməleys palanbı ı'xı', vaka sacigee əlyhəəsniy ıkkan. Yizde nukaree, Tsiveeme, zas horbı hı'ı. 
\v 27 Man k'ıldanan xhinne, mang'vee paççahne ögiyl zalqa zı hidi'iyncad karbı qı'ı. Yizda xərna paççah, ğu Allahna malaaik xhinnena insan vor. Həşde vas hucooyiy ıkkan manıd he'e. 
\v 28 Yizde q'əsde dekkıne nasılen gırgınbı ğu gyapt'askanniy. Ğumee zı, yiğna nukar, yiğne sufranıl gi'ı. Zaqa medın cuvab eyhesın ghal deşin.
\p
\v 29 Paççahee mang'uk'le eyhen:
\p – Nya'a xıliy qa'a? Zı vak'leyiy Tsivayk'le çolbı q'öna qe'eva eyhe.
\p
\v 30 Mefiboşetee paççahık'le eyhen:
\p – Yizda paççah xaaqa salamatra sak'iyle qiyğa, hasre gırgın vuceecad aleet'ecen.
\s Davudee Barzilayk'le geer qa'anava eyhe
\p
\v 31 Gileadğançena Barzilayır Rogelimğançe arı ıxha. Paççah İordanne damayke alğahasva, manar paççahıqa İordanne damaysqamee qaraylena. 
\v 32 Barzilay geer q'əsda, molyts'alyne (80) seneeqa hirxhılyna sa adamiy ıxha. Mana geed karnana insan ıxha. Paççah Maxanayim eyhene cigee axvamee, paççahısın gırgın kar Barzilayee adayle ıxha. 
\v 33 Paççahee Barzilayk'le eyhen:
\p – Zaka sacigee damayke ılğeç'e, vasın gırgın kar zı İyerusalimee helesın.
\p
\v 34 Barzilayee paççahık'le eyhen:
\p – Zaqa nimeena ı'mı'rne avxu zı vaka İyerusalimeeqa ı'qqəs? 
\v 35 Həşde zaqa molyts'al sen vod. Zı nişincar şada'a deş. Zasqa ulyoğançıniy otxhaxhançin evad qöönne? Zak'le mə'niy qədəqqəne adameeşiniy zəiyfabışin sesıd g'ayxhes əxəyee? Manke zı nişisne hexxara yizde xərıng'us paççahıs yuk ixhes? 
\v 36 Zas paççahıka İordanne damayle ılğeç'u sık'ınna yəq əlyhəəs vukkan. Nişisınne zas məxdın mukaafat? 
\v 37 Hasre zı sak'ı, yizde şaharee dekkıneyiy yedine k'ane qik'as. Yiğna nukar, yizda dix Kimham hasre vaka damayle ılğeç'ecen. Yiğne yik'eençe nena yugvallayiy qöö mang'us manab hee'e.
\p
\v 38 Paççahee eyhen:
\p – Kimham zaka sacigee damayne şene aq'valqa ılğeç'es, yiğne yik'esqa yugda qöön zı ha'asın. Vas zake hucooyiy ıkkan, vas ıkkanan gırgın zı ha'asın.
\p
\v 39 Gırgın millet İordanne damayle ılğeç'uyle qiyğa, paççahır damayle ılğeç'ena. Qiyğa paççahee Barzilayıs ubba hı'ı, mang'us xayir-düə hoole. Manar cune xaaqa siyk'al. 
\v 40 Paççah Gilgaleeqa ayk'an. Cuka sacigeeyir Kimham hayk'an. Yahudeeşina goşunna gırgına, İzrailybışdeme goşunna sura paççahıka avayk'an.
\s İzrailybışe Yahudeeşika xıliyn ha'a
\p
\v 41 Gırgın İzrailybı paççahısqa abı, eyhen:
\p – Nya'a yişde çocaaşe Yahudeeşe ğu qöqü? Nya'a manbışe ğu, yiğna xizan, yiğne k'anebın insanar İordanne damayle alğav'u?
\p
\v 42 Gırgıne Yahudeeşe alidghıniy qele:
\p – Paççah yişda xını eyxhe. Nya'a, mançike şos qəl vooxhe? Nya'a, şi paççahne sufranıle otxhuniy otxhuninne? Deşxhee, şi paççahıke hucoomecadee alyaat'u?
\p
\v 43 İzrailybışe Yahudeeşis alidghıniy quvu, eyhen:
\p – Paççah şas şole yits'ne yəqqees geer k'ane eyxhe. Davud şole şas geer eyxhe. Nya'a şu şaqa ooğançe avqa ilyaaka? Paççah yı'q'əlqa sak'al ha'asva, nya'a şi dişdiy ts'etta uvhu?
\p Yahudeeşin cuvab İzrailybışde cuvabıle qetan eyxhe.
\c 20
\s Şeva Davudulqa g'elil qıxha
\p
\v 1 Mane yiğbışil Benyaminaaşina Bikriyna dix Şeva donana sa karaı'dəəna insan Gilgalee eyxhe. Mang'vee şeypur əlixı', eyhen:
\p – Şaka Davuduka, Yesseyne dixeka, sacigeedın kar deşin! Yişda mang'uka avqas deş! İzrailybı, gırgınbı xaybışeeqa savk'le!
\p
\v 2 Gırgıne İzrailybışe Davud g'alerçu, Bikriyne dixeqa Şevayqa qihna avayk'an. Yahudermee cone paççahıke Davuduke cureebaxhe deş. Manbı İordanne damaysse İyerusalimqamee Davuduqa qihna avayk'an. 
\v 3 Davud cune İyerusalimeene sareeqa siyk'al. Mang'vee sarayqa ilyaakasva g'alyav'uyn həmbal zəiyfabı sa xaaqa akkyaa'a. Qiyğa mane xaane hiqiy-alla g'aravulyçer giviyxhe. Mang'vee manbışis gırgıncad helen. Mana saccu manbışika g'ılexha deş. Manbı sip'ırer xhinne vuxha. Manbı hapt'asmee mane xaançe qığeebaç'e deş.
\p
\v 4 Paççahee Amasayk'le eyhen:
\p – Xhebne yiğee Yahuder zasqa see'e, ğunar cone k'ane ixhe.
\p
\v 5 Amasa, Yahuder sacigeeqa qoot'alasva ark'ıneeyir, cus gyuvxhuyne gahıl yı'q'əlqa siyk'al deş. 
\v 6 Davudee Avişayk'le eyhen:
\p – Həşde Bikriyne dixee, Şevayee, şas dekkanan Avşalomuled geed ha'as. Yizın insanarıb alyapt'ı, ğu mang'uqar qihna hoora. Deşxheene, sayıb mang'vee hiqiy-allançe cabırbışika it'um hı'iyn şaharbı t'abal hı'ı, yişde uleke aygval.
\p
\v 7 Yoavın insanar, Keretbı, Peletbı, gırgın yugun cehiler Bikriyna dix Şeva t'abal ha'asva İyerusalimeençe mang'uqa qihna gyabak'a. Manbışil ooyur Avişay ıxha.
\s Yoavee Amasa gek'a
\p
\v 8 Manbı Giveoneene xənne g'ayeyne k'anenang'a Amasa manbışde ögiylqa arayle. Yoavıl dəv'əyn tanalinbı ıxha, yıq'eeqab ts'ira qav'u vuxha. Mane ts'iraylid g'ılınc givatxın ıxha. Mana ögilqava əlyhəəme, g'ılınc givatxınne cigeençe qakkitxhu, g'e'exhxhan.
\p
\v 9 Yoavee Amasayk'le eyhen:
\p – Yizda çoc, ğu yugrane vor?
\p Qiyğa Yoavee Amaseys ubba ha'asva, mana sağne xıleka muç'ruyke aqqaqqa. 
\v 10 Amasee, Yoavne solne xılene g'ılıncılqa fıkır hoole deş. Yoavee xılen g'ılınc Amasayne vuxhnyaqa hı'xı' mang'un iç'alatbı ç'iyelqa ehekka'a. Q'öd'es g'ılınc hı'xəsda iş aaxva deş, mana mankecar qek'ana.
\p Yoaviy cuna çoc Avişayıb Bikriyne dixeqa, Şevayqa, qihna avayk'an. 
\v 11 Yoavne insanaaşine sang'vee Amasayne k'ane ulyorzul, eyhen:
\p – Şavusiy Yoav ıkkan, vuşuyiy Davudne sural Yoavıqa qihna qoracen.
\p
\v 12 Amasa yəqqı'ne yı'q'nee eban alyart'u ıxha. Mane insanık'le g'ecen, Amasayne mayitısqa qarına-qarına maa'ar ulyoyzarır. Millet mang'usne ulyoyzar g'ecemee, mang'vee Amasayn mayit yəqqı'ne yı'q'neençe alyaat'u, çoleeqa qıkkı, ooqad tanalin kar adaççe. 
\v 13 Amasa yəqqı'le alyart'uyle qiyğa, gırgınbı Bikriyna dix Şeva aqqasva Yoavne qihna avayk'an.
\s Şeva gek'ana
\p
\v 14 Yoav Avel-Bet-Maaka eyhene şaharılqasse gırgıne İzrailyne nasılbışde yı'q'neençe ılğeç'e. Maane cigabışeençeb g'oşun sabı, mang'uqab qihna avayk'an. Sayib mang'uqab qihna Berim eyhene cigeençenbı avayk'an. 
\v 15 Yoavna g'oşun k'yoptul, Avel-Bet-Maaka hiqiy-allançe avqaaqqana. Manbışe şaharne cabırbışde hiqiy-alla nyuq'vneke sa axtın ciga hı'ı, cabırbı qukkyok'al ha'as havayk'an. 
\v 16 Mane gahil sa ək'elikane zəiyfee şahareençe ts'ir hav'u, eyhen:
\p – K'ırıbı alixhxhe! K'ırıbı alixhxhe! Hucoona ixhes, Yoavık'le inyaqana qoracen, cuk'le eyhesın cuvab vodun.
\p
\v 17 Yoav məng'ı'sqana qarımee, məng'ee qiyghanan:
\p – Yoav ğune vor?
\p Mang'vee, «Ho'o, zı vornava» eyhe.
\p Zəiyfee meed eyhen:
\p – K'ırı alixhxhe, zı, yiğne nukaree, vak'le hucooyiy eyhes.
\p Mang'vee «Yizın k'ırı val vodva» alidghıniy qele.
\p
\v 18 Zəiyfee eyhen:
\p – Şenke «Mı'sləhət Avel eyhene şahareençe hevqevaniyxhe» eyhen. İş manbışe məxüb g'ooce vuxha. 
\v 19 Mana İzrailyna yugvalla vukkanna qopkuna sa şahar vobna. Vas İzrailyne xəbne şaharbışda sane hı'ğəəkar haa'as vukkan? Nişil-allane vas Rəbbis vukkanne şaharbışda sa hı'ğəəkar ha'as vukkan?
\p
\v 20 Yoavee alidghıniy qelen:
\p – Hı'ğəəkaraa'asdayiy avaak'an haa'asda fıkır zake əq'əna quvxhecen! 
\v 21 Man ğu eyhen xhinne deş vod. Efrayimne suvabınane cigeençe Bikriyne dix Şeva paççah Davudılqa g'elil qıxha. Saccu mana şasqa qele, zınar ine şaharısse qığeç'u, əlyhəəsda.
\p Zəiyfee Yoavık'le eyhen:
\p – Mang'una vuk'ul şaharne cabırıle valqa dağepçes.
\p
\v 22 Zəiyfa ək'elika ı'ğiykır milletne k'anyaqa iyeek'an. Milletınıb Bikriyne dixena Şevayna vuk'ul gats'apk'ın, mang'usqa dağabaççe. Mançile qiyğa Yoavee şeypur ı'lyviyxə, g'oşunub şaharne hiqiy-allançe ts'ıts'ooxhena. Gırgınbı cone xaybışeeqa siviyk'al. Yoavır İyerusalimqa paççahne k'anyaqa siyk'al.
\s Davudus k'anebın insanar
\p
\v 23 Yoav gırgıne İzrailyne g'oşunna xərna ıxha. Yehoyadayna dix Benaya Keretbışdayiy Peletbışda xərna ıxha. 
\v 24 Adoram həmbalaaşina xərna ıxha. Axiludna dix Yehoşafat taarix oyk'anna ıxha. 
\v 25 Şeva mirza ıxha, Tsadokiy Evyatarıb kaahinar vuxha. 
\v 26 Yair eyhene şahareençena İra Davudusne kaahin ıxha.
\c 21
\s Giveonbışe Şaulıke g'abıynbışike qəl qığaaha
\p
\v 1 Davudee paççahiyvalla haa'ane gahıl, xhebille sen çiçiqad qihna q'ittin ıxha. Mançinemee Davudee Rəbbike qidghın ha'a. Rəbbee Davuduk'le eyhen:
\p – Man Şauleeyiy cune nasılen k'yav'uyne ebal-alla vod. Mang'vee Giveonğançenbıniy gyapt'ı.
\p
\v 2 Paççahee Giveonbı qopt'ul, manbışika yuşan ha'ana. Giveonbı İzrailybı deş vuxha. Manbı Emor eyhene milletıke avxuynbı vuxha. İzrailybışe manbı üçübba g'alya'asva k'ın g'assır ıxha. Şaulusmee manbı gyapt'ı avaak'an haa'as vukkiykın. Mang'us mane cigabışee saccu İzrailybıyiy Yahuder avxu vukkan vuxha. 
\v 3 Davudee Giveonaaşike qiyghanan:
\p – Zasse vuşdemee hucoo ha'as əxəyee? Şu, Rəbbee g'əyxı'yne milletıs xayir-düə huvuynemee, şi hav'una bınah zasse nəxüb havaakal haa'as vəəxəyee?
\p
\v 4 Giveonbışe mang'uk'le eyhen:
\p – Şas Şaulıniy cune nasılen k'ınəəğəyiy nuk'ra ıkkan deş. İzrailir şas vuşucar gik'as ıkkan deş.
\p Davudee manbışik'le eyhen:
\p – Şos hucooyiy ıkkan, zı manıd ha'asın.
\p
\v 5 Manbışe paççahık'le eyhen:
\p – Şi İzrailil ımaaxvacenva Şaulee şake öc alyapt'ı, şi gyapt'ı. 
\v 6 Mang'uke g'arına yighıyre adamiy şasqa hele. Şinab manbı Rəbbee g'əyxı'yne Şaulne Givea eyhene şaharee Rəbbine ögiyl givaaxanas.
\p Paççahee «Manbı zı şosqa qevlesınbıva» eyhe.
\p
\v 7 Paççah Davudus Şaulne ühatsühat Yonatanna dix Mefiboşet qiykkanna. Mang'us mana qiykkanna Rəbbine ögiyl Yonatanıs k'ın g'assırva. 
\v 8 Paççahee Armoniyiy merna Mefiboşet alyabat'a. Manbı Ayyayne yişşee Ritspee Şauluke vuxuyn dixbı vuxha. Sayıb mang'vee Şaulne yişşee Meravee Mexolğançene Barzilayne dixeke Adrielike vuxuyn xhoyre dix alyabat'a. 
\v 9 Mang'vee manbı Giveonbışisqa qoole. Giveonbışe manbı Rəbbine ögiyl suval givaaxananbı. Manbışda yighırsana sacigee habat'anbı. Manbı xhıt'a qiviyşalne ts'eppiyne yiğbışil givaaxan.
\p
\v 10 Ayyayne yişşee Ritspee cesva palan alyaat'u, ganzıl gyadaççe. Ritspa xhıt'abı qiyşal gibğılıne yiğbışile, givapxıninbışilqa gyoğiy gyoğasde yiğılqamee maa'ar ayxu. Məng'ee manbışde mayitbışisqa yiğniyığın xəybışin şit'yar, xəmded çolan həyvanar qeetxhes hassır deş. 
\v 11 Şaulne həmbal zəiyfee, Ayyayne yişşee Ritspee ha'ana mana iş Davudulqa hivxhar haa'ana.
\p
\v 12 Davudee hark'ın, Şaulıniy mang'une dixen Yonatanın bark'vbı Gileadne Yaveşne ç'ak'ınbışike g'eşşenbı. (Filiştinaaşe Gilboa eyhene suval Şaul gik'uyne yiğıl manbışin mayitbı Bet-Şeane maydama givayxananbı. Yaveşğançene insanaaşeb abı, manbışin mayitbı qöqənbı.) 
\v 13 Davudee Şauluniy mang'une dixen Yonatanın bark'vbı mançe alyaat'anbı, şene givapxınne yıghıng'unud bark'vbı sa'anbı.
\p
\v 14 Davudne insanaaşe Şaulıniy mang'une dixen Yonatanın bark'vbı Benyaminaaşine cigabışeene Tsela eyhene şaharee, Şaulne dekkıne, Gişine, mağareene nyuq'vnesnee k'eyxha. Paççahee manbışik'le uvhuyn gırgın, mane insanaaşe ha'an. Mançile qiyğa Allahee ölkaynemee ha'ane gırgıne düəbışis alidghıniy qelen.
\s Filiştinaaşikan dəv'əbı
\p
\v 15 Meeb Filiştinaaşda İzrailybışika dəv'ə gyooxha. Davud cune insanaaşika Filiştinaaşika səyxəsva ayk'an. Manbı Filiştinaaşika siviyxəmee Davud oyzarna. 
\v 16 Rafayke g'arıyne İşbi-Benovusus Davud gik'as ıkkiykan. Mang'une nizeyn siv tuncıke xhebıd vəş (300) şekel\f + \fr 21:16 \fr*\fq Xhebıd vəş (300) şekel: \fq*\ft mançee 3,5 kilo ıxha.\ft*\f* yı'q'vəlee ıxha. Yı'q'eeqad mang'vee ts'edın g'ılınc qı'ı eyxhe. 
\v 17 Tseruyayna dix Avişay Davudusqa kumagıs qarı, Filiştinğançena mang'vee ı'xı', gek'ana. Mane gahıl Davudne insanaaşe mang'us k'ın g'assır, eyhen:
\p – İzrailin işix k'imədəqqəcenva, sayır ğu şaka dəv'eeqa ayres deş.
\p
\v 18 Mançile qiyğa Filiştinaaşika Gov eyhene cigee meed səvxiy gexha. Mane gahıl Xuşa eyhene cigeençene Sibbekayee Rafayke g'arına Saf gek'ana.
\p
\v 19 Filiştinaaşika Gov eyhene cigee meed səvxiy gexha. Manke Bet-Lexemğançene Yareyne dixee Elxananee Gatğançena Golyatna çoc gek'ana. Mang'une nizeyn cık'rı qexhvane xhanayn arğacın dal xhinne xətta ıxha.
\p
\v 20 Gat eyhene şaharne k'ane sa menne yəqqees gitxhuyne səvxee, Rafayke g'arına sa axtına canakana insan ıxha. Mane insanne xıleppışilib, g'elybışilib yixhıble t'ubiy. Mang'uqa gırgıba g'ayeyoq'ab (24) t'ub vuxha. 
\v 21 İzrailybışik'le mang'vee nen qadiy eyhemee, Davudne çocune Şimayne dixee Yonatanee mana gek'ana.
\p
\v 22 Mana Rafayke g'arına yoq'uyre insan Gatğançenbı vuxha. Manbı Davudneyiy Davudne insanaaşine xıleke hapt'ı.
\c 22
\s Davudee Rəbbis opk'unna mə'niy
\p
\v 1 Rəbbee Davud gırgıne cune duşmanaaşineyiy Şaulne xılençe g'attixhan hı'ımee, Davudee Rəbbis ina mə'niy qəbəqqə:
\b
\q1
\v 2 Rəbb yizda suva vobna,
\q2 yizda g'ala, zı g'attixhan ha'ana vorna.
\q1
\v 3 Allah yizın ganz vodun,
\q2 Mang'usne zı dyugul ixhes.
\q1 Yizın g'alxan, zı g'attixhanasda suva,
\q2 it'umun ciga Mana vor.
\q1 Allahee zı g'attixhan ha'a.
\q2 Ğu, Rəbb, zı eb ulyooğanbışde xılençe g'attixhan ha'a!
\b
\q1
\v 4 Şukur gyooxhane Rəbbilqa ona'as,
\q2 yizde duşmanaaşine xılençer g'attixhanasda.
\q1
\v 5 Yizde hiqiy-alla gyabat'an mırtar ıxha,
\q2 zı gek'ane damabışile zı qəyq'ən ıxha.
\q1
\v 6 Ahalın t'ü'bı zalqa alitk'ır ıxha,
\q2 gyapt'asde gugubışeqar zı girxhu ıxha.
\b
\q1
\v 7 Dağamiyvalee zı Rəbbilqa onuiyn,
\q2 Allah kumagıs qort'ul.
\q1 Mang'uk'le yizın ses Cune Xaa\f + \fr 22:7 \fr*\fq Cune xaa: \fq*\ft Davudee inyaa Allahne çadırıne hək'ee eyhe. İzrailybı, Misirğançe qığeepç'iyle qiyğa, Allahee manbışik'le muq'addasna çadır hee'eva eyhe. Manbı sahree vuxhaylette manbışe mana çadır coka ı'ğviykar ha'a vuxha. Mana çadır işaarat vuxha, Allah cone yı'q'nee axvava. Mane muq'addasne çadırne ögiyl İzrailybışe Allahıs q'urbanbı gyaat'a, ı'bəədatbıniy ha'a. Qiyğab Davud peyğambarne gahılib mana İyerusalimeeniy vob.\ft*\f* g'ayxhiyn,
\q2 yizın uts'ur Mang'une k'ıriysqa hitxhıriyn.
\q1
\v 8 Mang'us qəl vuxhal-alla
\q2 ç'iye oyt'al, ı'ğiykaran,
\q2 xəən xhebbı ı'ğiykar, manbı hoyharanbı.
\q1
\v 9 Mang'une quşeençe kuma qığeç'u,
\q2 ghalençe gyooxhan haa'an ts'a ı'xiyxə.
\q2 Mançikeb gyopxhanna ghadır k'yoohar.
\q1
\v 10 Mang'vee xəybı qaxı, ç'iyelqamee geç'ena.
\q2 Miç'axiyvalla Mang'une g'elybışik avub vuxha.
\q1
\v 11 Sa keruvulil\f + \fr 22:11 \fr*\fq Keruv: \fq*\ft xılibınana malaaik vor.\ft*\f* alixı,
\q2 mıtsıne xılibışil ilexa.
\q1
\v 12 Hiqiy-allan ciga xəmdilqa sak'al ha'a,
\q2 xhineka gyatsts'ıyne k'aarıne buludbışike Culqa aççesın kar ha'a.
\q1
\v 13 Mang'une nuruke
\q2 gyotxhanan ts'a qı'ğəə ıxha.
\q1
\v 14 Rəbbee xəybı g'əhətqə'ə,
\q2 Haq'-Ta'aalee ses gyayhe.
\q1
\v 15 Vukbı avhu, duşmanar ehevkaa'anbı,
\q2 ts'ayılpan ı'xı'ı', manbı oot'al-ooxal haa'anbı.
\q1
\v 16 Qəvəəq'ənasde Rəbbine sesıke,
\q2 quşeençene qı'ğəəne it'umne nafasıke,
\q1 deryahın k'oralybı g'ece giyğal,
\q2 dyunyeyn xhebbı g'ece giyğal.
\b
\q1
\v 17 Mang'vee xəybışeençe xıl hotku, zı aqqı,
\q2 zı k'orane xhyanbışeençe qığavhu.
\q1
\v 18 Zı gucnane duşmanıke Mang'vee g'attixhan hı'ı,
\q2 zı g'ımece eyxhenbışike,
\q2 yizdemee geeb gucnanbışike g'attixhan hı'ı.
\q1
\v 19 Yizde pisde yiğıl manbı yizde ögiylqa qığeepç'ı,
\q2 Rəbbeeme zı aqqı.
\q1
\v 20 Mang'vee zı dağamiyvalike hixu'u,
\q2 zı ıkkiykın, zı g'attixhan hı'ı.
\b
\q1
\v 21 Yizde qopkuvalis sik'ı Rəbbee zas huvu,
\q2 yizde xılene məttıvalis sik'ı huvu.
\q1
\v 22 Mang'vee məxüd hı'iyn zı Rəbbina yəq' avquva,
\q2 pisda ıxha Allahılqa yı'q' sak'al hidi'ıva.
\q1
\v 23 Mang'un gırgın q'aanunbı yizde ögiyl vod,
\q2 Mang'une g'aydabışiler hixu deş.
\q1
\v 24 Zı Mang'une ögiyl məttıne yik'eka ıxha,
\q2 zıcar zı bınahıke havacına.
\q1
\v 25 Rəbbee yizde qopkuvalis sik'ı huvu,
\q2 Cune ulene ögiyl yizde məttıvalis sik'ı huvu.
\b
\q1
\v 26 Ğu saadik'ranang'uka saadik'ra eyxhe,
\q2 kaamilinbışika kaamilyra vor.
\q1
\v 27 Məttınbışika məttıra,
\q2 quç'opkuriynbışika, cone quç'opkuriys sik'ı eyxhe.
\q1
\v 28 Hooç'an-g'ooç'ananbı Ğu g'attivxhan haa'a,
\q2 cocab-co axtıba vukkekanbışilqab Ğu ul giviyxhe,
\q2 manbı k'ap'ik'ıle avqa qaa'a.
\q1
\v 29 Rəbb, Ğu yizın işix vod,
\q2 Ğu yizda miç'axiyvalla nurulqa savaak'al haa'a.
\q1
\v 30 Zı Vakasana duşmanaaşikın ha'a,
\q2 yizde Allahıka şaharbı aqqaqqa.
\b
\q1
\v 31 Allahna yəq kaamilyba vob,
\q2 Rəbbin cuvab məttıda vod!
\q1 Mang'ulqa yı'q' qizzırna gırgına,
\q2 Mang'vee g'attixhan ha'ana.
\q1
\v 32 Rəbbile ğayrı, Allah vuşune vor?
\q2 Yişde Allahıle ğayrı, medın ganz nenne vod?
\q1
\v 33 Allah yizda it'umna g'ala vobna,
\q2 Mang'vee yizda yəq qopku qaa'a.
\q1
\v 34 Mang'vee yizın g'elybı maralın g'elybı xhinne ek' qa'a,
\q2 Zı axtıvalee it'umra aqqaqqa.
\q1
\v 35 Mang'vee yizın xıleppı dəv'əysın xhinne qa'a,
\q2 zasse tuncıke hı'iyn vuk quç'okara'as əxən.
\q1
\v 36 Ğu zas g'attixha'anasın g'alxan huvu,
\q2 Ğu hı'iyne kumaagıka zı axtı qı'ı.
\q1
\v 37 Zasse saccu Vaka əq'ra iykaras əxə,
\q2 zı məxür qaçayxarır deş.
\b
\q1
\v 38 Zı duşmanar g'ee'epşiynbı, manbı gyapxıynbı,
\q2 manbışikın ixhesmee yı'q'əlqar sak'ı deş.
\q1
\v 39 Zı manbı hööq'əv'u ç'əvxhana,
\q2 manbışisse suğoots'asıb vəvxü deş,
\q2 yizde g'elybışik avqa manbı qukk'yopk'ul.
\q1
\v 40 Dəv'əynemee Ğu zalqa guc alipk'ır,
\q2 zalqa g'elil qeepxhaynbı Ğu yizde g'eliqqa huvu.
\q1
\v 41 Duşmanar zale heepxasınbı xhinne qaa'a,
\q2 zı g'ımecenanbışikınıd zı hı'iyn.
\q1
\v 42 Manbışe uleppı ooqa qe'eeyid, manbı g'attivxhan haa'anbı vuxha deş,
\q2 Rəbbilqa onu'eeyid, Mang'vee alidghıniy quvu deş.
\q1
\v 43 Zı manbı k'ööq'ü, tooz xhinne qav'u,
\q2 şahrabışeedın battağ xhinneeyib k'ööq'üynbı.
\b
\q1
\v 44 Ğu zı, yizde milletne g'elil qeepxhayke g'attixhan hı'ı,
\q2 zake milletbışda xərna hı'ı,
\q2 zak'le dyats'ancad milletbı yizde xılyaqa quvu.
\q1
\v 45 Menne cigeençenbı yizde ögiyl k'yoozarav'uynbı,
\q2 yizın do g'ayxhımee, eyhen ha'a.
\q1
\v 46 Menne cigeençenbı yizde ögiyl hapq'ıriynbı.
\q2 Qəpq'ı'n zezebı atk'u,
\q2 dyuguleepxhayne cigeençe qığeepç'iynbı.
\b
\q1
\v 47 Rəbb vorna! Yizde Ganzıs şukur vuxhena!
\q2 Zı g'attixhan hı'iyn Ganz, Allah, axtı qe'e!
\q1
\v 48 Allahee zal-alla qəl qığaaha,
\q2 milletbı yizde xılyaqa qele.
\q1
\v 49 Mang'vee zı yizde duşmanaaşine xılençe g'attixhan ha'a,
\q2 Mang'vee zı yizde duşmanaaşile ooqana ha'a,
\q2 Zı eb ulyooğanbışde xılençe g'attixhan hı'ı.
\q1
\v 50 Rəbb, mançil-alla zı Ğu menne milletbışde yı'q'nee axtı qa'as,
\q2 zı Yiğne doyus şukur haa'as!
\b
\q1
\v 51 Allahee Cune paççahıs xədın ğamxhaybı heles,
\q2 g'əyxı'yne Davudne nasıles gırgıne gahbışilycab yugvalla haagvas.
\c 23
\s Davudee nekke qiyğa uvhuynbı
\p
\v 1 Davudee nekke qiyğa inva uvhu:
\q1 – Yesseyne dixee Davudee,
\q2 Allahee axtı qı'ıne insanee,
\q1 Yaaq'ubne Allahee g'əyxı'ng'vee,
\q2 ittune miznane mə'niybı İzrailee qədəqqəng'vee
\q1 inəxüdud eyhe:
\b
\q1
\v 2 Rəbbine Rı'hı'n zale ğana uvhu,
\q2 Mang'un cuvab yizde mizel vod.
\q1
\v 3 İzrailyne Allahee inəxüd uvhu,
\q2 İzrailyne Ganzın zak'le inəxüd uvhu:
\q1 «Allahıle qəyq'ənang'vee
\q2 insanaaşis qopkuba xəbvalla haa'a.
\q1
\v 4 Mana buludbı deşde miç'eeb ılqəəne,
\q2 gyoğiyle qiyğa hits'aagharne,
\q2 ok' aleylyaa'ane verığne ulek akar».
\b
\q1
\v 5 Hək'ebab, Allahee yizda xizan g'əvxüna!
\q2 Mang'vee zaka gırgıne gahbışisın cuvab dişde g'ats'atk'un?
\q2 Man cuvab bıkırın, badal dexhen ıxha.
\q1 Mang'vee zas ıkkananbı hele,
\q2 Mang'vee zı g'attixhan ha'a.
\q1
\v 6 Gırgın karaı'dəənbı zazabı xhinne dağaa'as.
\q2 Manbışilqa şavaacad xıl hotkas deş.
\q1
\v 7 Manbışik soot'asınbışe,
\q2 nizeyl, g'ılıncıl alyapt'as vukkan.
\q1 Manbışin gırgınbı cigeecab
\q2 gyooxhan haa'asınbı.
\s Davudun igider
\p
\v 8 Davudne igideeşin dobı inbı vod:
\p Taxmonne şahareençena Yoşev-Başşevet xhebne igidna xərna ıxha. Sa dəv'ee mana molyud vəş (800) insanılqa nizeyka hark'ın, manbı gyapt'ıynbı.
\p
\v 9 Mang'ule qiyğa Axoxiyna neva, Dodoyna dix Eleazar ıxha. Mana xhebne igidna sa ıxha. Filiştinaaşine g'oşunulqa cuvab ayhemee, mana Davuduka ıxha. İzrailybı yı'q'əlqa ts'ıts'eepxhamee, 
\v 10 saccu sa Eleazar cune cigeençe ı'ğdiykar. Mang'vee g'ılıncıd alyaat'u, xıleppı rı'hı'le g'a'atk'vasmee, Filiştinar gyabat'a. Dəv'ə ç'əvuvxhayle qiyğa, mang'usse xıl aaqı, g'ılınc dağeççes əxə deş. Mane yiğıl Rəbbee İzrailybışis xədın ğameepxhay hele. İzrailybı mane yiğıl Eleazarısqa saccu maa'ab avxuyn hapt'ıynbı q'əra qaa'asvacab siviyk'al.
\p
\v 11 Mang'ule qiyğiyna Harar eyhene şahareençena Ageyna dix Şamma ıxha. Sa yəqqee Filiştinar Lexi eyhene cigee sabayle. Maad hüvə oozıyn çol ıxha. İzrailybışin millet Filiştinaaşile q'ətq'ı'n, mançe hexvan. 
\v 12 Saccu Şamma çolune yı'q'nee ulyoyzar. Mang'vee Filiştinaaşisqa çol qele deş, manbı gyabat'anbı. Mane yiğıl Rəbbee İzrailybışis xədın ğameepxhay hele.
\p
\v 13 Suk qiviyşalne gahıl xhebts'alyne (30) xərıng'una xhebiyre Davudne k'anyaqa Adullamne mağaraysqa abayle. Mane gahıl Filiştinaaşina g'oşun Refaimne q'adaalilqa savayle. 
\v 14 Davudmee xıl hidixharasde cigee ıxha. Filiştinaaşikene sabaranbı manke Bet-Lexem vuxha. 
\v 15 Davud xhyanıka gyorxhan ıxhayke eyhen:
\p – Zas Bet-Lexemne akkaysneene kahrızeençe xhyan ıkkekkanaxhiy ıxhana!
\p
\v 16 Manke mane xhebne igidee Filiştinar sabıyne cigayne yı'q'neençe g'ılıncbışika cosda yəq hav'u, Bet-Lexemne akkabışisneene kahrızeençe xhyan gyatsts'ı, paççah Davudus adayle. Davudus man xhyan ulyoğas diykkın, man xhyan Rəbbis helen xhinne ç'iyelqa ot'al ha'a. 
\v 17 Mang'vee eyhen:
\p – Rəbb, Ğu zı mançike havace. Nya'a, yizdemee hapt'ıyle qı'dəpq'ı'n xhyan gyatsts'es hapk'ıniynbışda zı eb ulyooğayee?
\p Mançil-allad mang'vee man xhyan ulyoğa deş. Man xhebne igidee hı'ı.
\p
\v 18 Yoavna çoc Tseruyayna dix Avişay xhebts'alyne (30) igidna xərna ıxha. Mana cune nizeyka xhebıd vəş (300) insanıka saçikku, manbışin gırgınbıb mang'vee gyapt'ıynbı. Mançile qiyğa mang'un do xhebne igidin do xhinne qıvaats'ıyn eyxhe. 
\v 19 Mana xhebts'alyne (30) igidiler qıvaats'ına ixheeyir, şene xhebne igidika avayq'ar deş.
\p
\v 20 Yehoyadayna dixır Benayır ç'ak'ın işbı g'ecena qıvaats'ına insan ıxha. Mana Qavtse'el eyhene şahareençe qarı ıxha. Benayee q'öyre Moavğançena inekke yugna igid gek'a. Mang'vee yiznane yiğıl k'orane cigeeqa giç'u, şir gik'u. 
\v 21 Sayır mang'vee sa geer xərna Misirğançena gik'u. Misirğançeng'une xıle nize ıxha. Benaya mang'ulqa t'at'aka ark'ın, Misirğançeng'une xılençe ts'ıts'ı'ı mang'un nize g'eşşen. Qiyğar Misirğançeng'une nizeykacar mana gek'ana. 
\v 22 Man gırgın Yehoyadayne dixee Benayee ha'a. Mançil-alla mana xhebiyre igid xhinne qıvaats'ına ıxha. 
\v 23 Mana xhebts'alyne (30) igidiler qıvaats'ına ixheeyir, şene xhebne igidika avayq'ar deş. Davudee mana, cus g'aravuliyvalla ha'anbışda xərna giyxhe.
\b
\p
\v 24 Mane xhebts'alyne (30) igidne yı'q'nee inbıb vuxhaynbı:
\li Yoavna çoc Asahel,
\li Bet-Lexemğançene Dodoyna dix Elxanan,
\li
\v 25 Xarodğançena Şammayiy Eliqa,
\li
\v 26 Peletğançena Xelets,
\li Teqoağançena İqqeşna dix İra,
\li
\v 27 Anatotğançena Aviezer,
\li Xuşabışda Mevunnay,
\li
\v 28 Axoxibışda Tsalmon,
\li Netofğançena Maharay,
\li
\v 29 Netofğançene Baana dix Xelev,
\li Benyaminne nasılena Giveağançene Rivayna dix İttay,
\li
\v 30 Piratonğançena Benaya,
\li Gaaşne q'adaalile Hidday,
\li
\v 31 Aravğançena Avi-Alvon,
\li Barxumğançena Azmavet,
\li
\v 32-33 Şaalvonğançena Eliaxba,
\li Yaşenın dixbı,
\li Hararğançene Şammayna dix Yonatan,
\li Ararğançene Şararna dix Axiam,
\li
\v 34 Maakağançene Axasbayna dix Elifelet,
\li Giloğançene Axitofelyna dix Eliam,
\li
\v 35 Karmelyğançena Xetsray,
\li Aravğançena Paaray,
\li
\v 36 Tsovağançene Natanna dix İgal,
\li Gadne nasılena Bani,
\li
\v 37 Ammonğançena Tseleq,
\li Tseruyayne dixen Yoavın silah ı'ğiykar ha'ana Beerotğançena Naxaray,
\li
\v 38 Yeterğançena İrayiy Garev,
\li
\v 39 Q'etbışda Uriy.
\b
\p Manbı gırgıba sacigee xhebts'ale yighıyre (37) insan ıxha.
\c 24
\s Davudee millet qədəqqə
\p
\v 1 Rəbbina qəl meeb İzraililqa avqaaqa. Mang'vee Davuduk'le eyhen: «Hoora, İzrailybıyiy Yahuder qəpqe». Məxür Mang'vee Davud İzrailybışilqa g'elil qı'ı.
\p
\v 2 Davudee cune k'anene g'oşunne xərıng'uk'le Yoavık'le eyhen:
\p – Həşde Danile Beer-Şevalqamee\f + \fr 24:2 \fr*\fq Danile Beer-Şevalqamee: \fq*\ft Dan eyhena şahar mane gahıl İzrailyna nekke şimalılna şaharniy vob. Beer-Şeva eyhena şaharmee cühüt'yaaşine sahree, İzrailyna nekke canubulyna vuxha. «Danile Beer-Şevalqamee» İzrailyne k'anençe-qomaqqameeva eyhen ıxha.\ft*\f*, gırgıne İzrailyne nasılbışde yı'q'nee iviykre, manbı qəpqe. Zak'le manbı nimeenbı vuxhay ats'axhxhes ıkkan.
\p
\v 3 Yoavee paççahık'le eyhen:
\p – Yiğın millet nimeeniy, hasre Rəbbee, yiğne Allahee, manbı vəş nəqqees mançile geeb qee'ecen. Yiğne ulek'led man g'acecen. Nya'a, nişil-allane yizde xərıng'us paççahıs məxbına iş haa'as vukkan?
\p
\v 4 Paççahın cuvab Yoavneyiy g'oşunne ç'ak'ınbışde cuvabıle ooqan ıxha. Yoaviy g'oşunun ç'ak'ınbı İzrailin millet qətqəs vüqqəva paççahısse qığeebaç'enbı. 
\v 5 Manbışe İordanne damayle ılğeepç'ı, Aroer eyhene şaharne k'ane çadırbı giyxə. Mana şahar q'adaalyne yı'q'nee vuxha. Qiyğa manbı Qadıne nasılene cigabışile k'ena Yazer eyhene şahareeqa avayk'an. 
\v 6 Mançe manbı Gileadeeqa, Taxtim-Xodşi eyhene cigeeqa havayk'an. Mançeb Dan-Yaan eyhena şahar ılğevç'u, Sidonne şahareeqa qabı hiviyxhar. 
\v 7 Sur eyhene g'aleeqa, Q'ivbışdeyiy Kana'anbışde gırgıne şaharbışeeqa manbı hapk'ın, hiviyxharanbı. Nekke qiyğab manbı qavaylenbı Yahudayne canubulyne Beer-Şeveeqa. 
\v 8 Yüç'ne vuzeyiy g'ane (20) yiğee manbışe ölka k'anençe-qomaqamee gits'ibaxhana. Mançe İyerusalimeeqa siviyk'al. 
\v 9 Yoavee nimeeniy insanar vuxhava paççahık'le eyhe. İzrailee mane gahıl g'ılıncıka səyxəs əxəsda molyud vəş aazır (800 000), Yahudeeyir xhod vəş aazır (500 000) igid ıxha.
\s Allahee Davudus caza hoole
\p
\v 10 Davudee millet qətqəs alikkıyle qiyğa, mang'us culecad cus naş qexhe. Mang'vee Rəbbik'le eyhen:
\p – Mana iş hav'u, zı xəbna bınah opxhun. Rəbb, həşde hucoona ixhes ine g'ulune taxsirıke ılyheç'e, zı bəç'əriyvalla hav'u.
\p
\v 11 Davud qinne yiğıl miç'eer oza qıxesse, Rəbbee Davudulqa hixhar ha'ane Qad peyğambarık'le eyhen:
\p
\v 12 – Hoora, Davuduk'le eyhe, Rəbbee inva vod eyhe: «Yiğne ögiylqa xhebılle kar gixhxhes. Mançin sa g'əyxe, Zı vak ha'as».
\p
\v 13 Qad Davudusqa arı, mang'uk'le eyhen:
\p – G'əyxe, yighılle senna yiğne ölkee mısvalybı ıxhane vas ıkkan? Xheyible vazna hixu yiğne duşmanaaşine xılençe iykarasne ıkkan? Deşxheene, xhebılle yiğna yiğne ölkee yı'q'ı'n ık'arbı ıxhane ıkkan? Həşde yugba fıkır opxhun, ğu yiğın cuvab eyhe. Zı hark'ın zı G'axuvuyng'uk'le eyhes.
\p
\v 14 Davudee Qadık'le eyhen:
\p – Yizdemee geed dağamda vod. İnsanne xılyaqa gyapk'asse hasre Rəbbine xılyaqa gyapk'ecen. Rəbbiqa rəhı'm geeb vob.
\p
\v 15 Mane yiğıl miç'ediyle otçu, Vucee gyuvxhuna gah ç'əvuvxhesmee, Rəbbee İzraililqa yı'q'ı'n ık'arbı g'ıxele. Danile Beer-Şevalqamee yights'al aazır (70 000) insan qek'a. 
\v 16 İyerusalimeen insanar gyapt'asva malaaikın xıl hodakkemee, Rəbbis maabın insanar qiviykkın, malaaikık'le eyhen:
\p – Ç'əv, xıl g'ayşe!
\p Rəbbin malaaik mane gahıl Aravna donane sa insanne attayne k'ane ıxha. Aravna Yevusbışda ıxha. 
\v 17 Davuduk'le millet gek'an malaaik g'acumee, Rəbbik'le eyhen:
\p – Bınah hav'una zı vor, taxsir zal vod. Nya'a ine syuru xhineene insanaaşe hucoone hı'ı? Manbışil-alla zasiy yizde xizanıs caza hevle.
\p
\v 18 Mane yiğıl Qad Davudusqa arı, eyhen:
\p – Hark'ın Yevusbışda eyxhene Aravnayne attal Rəbbis q'urbanbı allya'an ciga ale'e.
\p
\v 19 Qadıne cuvabıka, Davud, Rəbbee əmr hav'uyn xhinne maqa hayk'an. 
\v 20 Aravna avqa ilyakkımee, Davudıy cun insanar cusqa qöö g'ooce. Mana g'aqa qığeç'u, paççahne ögiyl ç'iyelqamee k'yorzul, 
\v 21 eyhen:
\p – Nəxürkenane yizda xərna paççah zasqa arı?
\p Davudee eyhen:
\p – Rəbbis q'urbanbı allya'an ciga alya'asdemee zı vake yiğna atta alivşes arı. Milletılin yı'qı'n ıkar ulyoozrecenva zı Rəbbis q'urbanbı alya'as.
\p
\v 22 Aravnee Davuduk'le eyhen:
\p – Hasre yizde xərıng'vee, paççahee cune ulesqa yugda qöönmeen alyaat'u, Rəbbis q'urbanbı alle'ecen. Haane gyoxhxhan hı'ı q'urbanna allya'asın yatsbı aleet'e. Gyoxhxhan ha'asde osune cigee mıgrabıyiy\f + \fr 24:22 \fr*\fq Mıgrabı: \fq*\ft man xhaneyk g'ayebı at'itq'ınne q'uvabışike ha'a ıxha. Mançika məxüb suk gıtike curaa'a vuxha.\ft*\f* yatsbışde gardanaqa qa'an karbı aleet'e. 
\v 23 Paççah, man gırgın zı vas hele.
\p Aravnee meed eyhen:
\p – Hasre Rəbb, yiğna Allah, vaka yugra ixhecen.
\p
\v 24 Paççaheeme Aravnayk'le eyhen:
\p – Zı vake man ciga məxüdcad deş alyaat'as, zı mançike vas hək' qevles. Zas q'ərad gitxhuyn kar zasse Rəbbis, yizde Allahıs, gyooxhan haa'ana q'urban xhinne ablyaa'as dəəxə.
\p Davudee attaykeyiy yatsbışike xhots'al (50) nuk'ra qele. 
\v 25 Davudee maa'ad Rəbbis q'urbanbı allya'an ciga ali'ı, maa'ad gyoxhxhan ha'aniy medın q'urbanbı allya'a. Rəbbee ölkaynemee haa'ana düə q'abıl haa'ana, mançikad İzrailee yı'q'ı'n ık'arbı ç'əveedaxhenbı.