\id JUD - Rana Tharu
\ide UTF-8
\h यहूदा
\toc3 यहूदा
\toc2 यहूदा
\toc1 यहूदा की चिट्ठी
\mt2 यहूदा की चिट्ठी
\mt1 यहूदा की चिट्ठी
\imt परिचय
\ip यहूदा नाओं की चिट्ठी को नाओं जाके लेखक के नाओं पर रखो गौ है। यहूदा खुदकै ईसु के भईय्या, याकूब के भईय्या के रूप मैं मानथै। तभईये बाकै ईसु के भईय्यन मैं से एक भी मानो जाथै\xt 1\xt*। हम नाय जानथैं कि का जौ चिट्ठी एक बिसेस कलीसिया के ताहीं अभिप्रेत रहै और पुराने नियम के संदर्भन के कारड़, यहूदा के मूल पढ़न बारे, हुई सकथैं: यहूदियन से बने रहैं। हालाकि, बौ अपनी चिट्ठी कै “बे सबन कै संबोधित करथै जो बुलाए गै हैं, जो दऊवा परमेस्वर मैं प्रेम करथैं और ईसु मसीह के ताहीं रखे जाथैं \xt 1\xt*।” जौ चिट्ठी हुई सकथै: ईसु के जनम के 60 के आसपास लिखी गई रहै।
\ip सबै मसीहियन कै चिट्ठी लिखन को बाको उद्देस्य उनकै झूठे सिक्छकन के जरिया गुमराह करे जान के खिलाप चितौनी देनो है \xt 4\xt*। बौ अपने तर्कन कै बल देन के ताहीं पुराने नियम की घटनाओं और वृतांतन को संदर्भ देथै। जौ चिट्ठी 2 पतरस के संग तमान बिचारन कै साझा करथै जामैं झूठे सिक्छकन के खिलाप चितौनी के संग-संग स्वर्गदूतन और सदोम और अमोरा के संदर्भ सामिल हैं। \xt यहूदा 4\xt*, \xt 2 पतरस 2:1\xt*
\iot रूपरेखा:
\io1 1. यहूदा पहले अपने पढ़न बारेन कै संबोधित करथै। \ior 1-2\ior*
\io1 2. जाके बाद, बौ लिखन को अपनो कारड़ बताथै जो उन्हैं झूठे सिक्छकन के खिलाप चितौनी देनो है। \ior 3-4\ior*
\io1 3. बाके बाद बौ पुराने नियम मैं लोगन और घटनाओं से उदाहरड़ देथै। \ior 5-16 \ior*
\io1 4. फिर बौ उनकै बताथै कि चितौनी के प्रति उनकी प्रतिसाद का होनी चाहिए। \ior 17-23\ior*
\io1 5. आखरी मैं बौ परमेस्वर की स्तुति करत भै चिट्ठी कै बंद करथै। \ior 24-25\ior*
\c 1
\p
\v 1 यहूदा के घाँईं से, जो ईसु मसीह को सेवक, और याकूब को भईय्या बे लोगन कै जिनकै परमेस्वर बुलाई है, जो परमेस्वर दऊवा के प्रेम और ईसु मसीह के अनुग्रह मैं रहथैं:
\p
\v 2 तुम्हैं दया, सांति और प्रेम बहुतायत से मिलत रहबै।
\s झूठे सिक्छक
\p
\v 3 मेरे प्रिय दोस्तौ, मैं तुम्हैं बौ उद्धार के बारे मैं लिखन की पूरी कोसिस करत रहौं, जामैं आपन सब सहभागी हैं, तौ मैं तुम्हैं ऐसे करकै लिखनो जरूरी समझो कि तुम बिस्वास के ताहीं लड़न की पूरी कोसिस करौ जो पवित्र लोगन कै एकै बार के ताहीं सुपर्त करी है। 
\v 4 काहैकि हमरे बीच कुछ भक्तिहीन लोग चुप्पे से सरक आए हैं, बे परमेस्वर के अनुग्रह कै गलत समझकै खुद के अनैतिकता कै सई बताथैं। बे हमरे गुरुजी और प्रभु ईसु मसीह कै ना पसंद करथैं। भौत पहले सास्त्र मैं उनकी बुराई करन की भविस्यवाँड़ी के बारे मैं लिखो गौ है।
\p
\v 5 भले ही तुम जौ सब जानथौ, लेकिन मैं तुमकै याद दिलानो चाहथौं कि कैसे प्रभु\f + \fr 1:5 \fr*\ft प्रभु; कुछ पांडुलिपियन मैं ईसु है, जो ग्रीक मैं यहोसू के तराहनी है।\ft*\f* एक बार इस्राएल के लोगन कै मिस्र देस मैं से बचाई रहै, लेकिन बाद मैं उनकै खतम कर दई, जो बाके ऊपर बिस्वास नाय करत रहैं। 
\v 6 और जो स्वर्गदूत अपने औधा कै बचाए कै नाय धरी रहै: लेकिन अपने खुद के घर कै छोड़ी है, परमेस्वर अनंत बंधन मैं जकड़ कै बौ बुरे दिन के न्याय के ताहीं अंधियारे मैं धरी है। 
\v 7 जो तरीका से सदोम और अमोरा और उनके आस-पास के नगर, जो इन्हईं के तराहनी छिनरइपना करन लगे रहैं और पराए सरीर के पच्छू लग गै रहैं आगी की अनंत सजा मैं पड़कै कहानी ठहरे हैं।
\p
\v 8 बैसिये जे लोगन के भी दर्सन होथैं, जो अपनेई सरीर के खिलाप पाप करन के ताहीं उनकै असुद्ध करथैं; बे परमेस्वर के अधिकार कै मामूली समझथैं और बाके गौरवसाली स्वर्गदूतन की बुराई करथैं। 
\v 9 लेकिन खास स्वर्गदूत मीकाईल भी, जब बौ मूसा के सरीर के बारे मैं सैतान से बहस करत रहै तौ, बाके संग गलत लब्ज बोलन के संग बुराई करन की हिम्मत ना करी, लेकिन इत्तो कही, “प्रभु तोकै झुकाबै!” 
\v 10 लेकिन जे भक्तिहीन लोग जो बात कै नाय समझथैं बे उनकी बुराई करथैं; और जंगली जानवर के हानी बुरी बातैं बिचार करे बिना करथैं, उन्हैं परमेस्वर सिक्छा देगो। 
\v 11 उनके ताहीं कितनो भयानक है! काहैकि बे सब कैन की रहामैं चलीं, और बे पैसा के ताहीं बिलाम के तराहनी भूल कर बैठे। और बे कोरह के हानी बिरोध करकै खतम हुईगै। 
\v 12 अपनी बेसरम हिफाजत से बे तुमरी संगती के खानु मैं गंदे धब्बा के हानी हैं। बे सब सिरफ खुद की देखभार करथैं। बे बादर के तराहनी होथैं जो बे ब्यार के संग नेंगथैं, लेकिन मेंहें नाय लाथैं। बे ऐसे पेंड़ के तराहनी हैं जो पतझड़ मैं भी बिना फरा के होथैं, ऐसे पेंड़न कै जर से उखाड़ो गौ है और बे पूरी तरह मर चुके हैं। 
\v 13 बे समुंदर की जंगली लहर के हानी हैं, जामैं उनके सर्मसार काम बुज-बुजा के तराहनी दिखाई देथैं। बे भटकत तारा के तराहनी हैं, उनके ताहीं परमेस्वर हमेसा बारी अंधियारो जघा ठहराई है।
\p
\v 14 जहे हनोक रहै, जो आदम से सातवी पीढ़ी को रहै, जो भौत अग्गु उनके बारे मैं जौ भविस्यवाँड़ी बताई: “देखौ प्रभु अपने हजारौ पवित्र स्वर्गदूतन के संग आगो 
\v 15 सबन की जिंदगी को न्याय करन के ताहीं, और बे सबन कै उन अधर्मी काम के ताहीं सजा देबै, जो बे करीं हैं, और बे सबै भयानक बचन के ताहीं जो अधार्मिक पापी बाके खिलाप कहीं हैं।”
\p
\v 16 जे लोग हमेसा दुसरेन के ऊपर बड़बोले और आरोप लगात रहथैं; बे अपनी बुरी इच्छा मैं चलथैं; बे अपने ऊपर घमंड करथैं और अपनी मंजिल पान के ताहीं दुसरेन की कानाफूसी करथैं।
\s चितौनी और निर्देस
\p
\v 17 लेकिन जे बातन कै याद करौ, मेरे प्रिय, तुमकै हमरे प्रभु ईसु मसीह के प्रेरित बीते भै समय मैं का बताईं रहैं। 
\v 18 बे तुमसे ऐसे करकै कहत रहैं, “आखरी के दिन मैं ऐसे ठट्टा करन बारे होंगे, ऐसे लोग खुद की बुरी इच्छा मैं चलथैं।” 
\v 19 जे लोग फूट डारन को काम करथैं, बे अपनी स्वाभाविक इच्छा के हिसाब से चलथैं, और बिना आत्मा के हैं। 
\v 20 लेकिन तुम, मेरे प्रिय, अपने अतिपवित्र बिस्वास कै खुद बनाबौ। और पवित्र आत्मा की ताकत से प्रार्थना करौ, 
\v 21 और खुदकै परमेस्वर के प्रेम मैं बनाये रखौ, जैसे की तुम हमरे प्रभु ईसु मसीह की दया से अनंत जिंदगी कै असियात रहबौ।
\p
\v 22 जिन्हैं संका है उनके ऊपर दया करौ; 
\v 23 और दुसरेन कै आगी मैं से झपट्टा मारकै बचाबौ, और औरन के ऊपर डराय-डराय कै दया करौ, लेकिन उनके खुद के पाप से सने भै लत्ता से नफरत करौ, जो सरीर के कलंकित हैं।
\s स्तुति की प्रार्थना
\p
\v 24 जो तुमकै ठोकर खबान से बचाए सकथै, बौ अपने महिमामय मौजुदगी मैं तुम्हैं निर्दोस और खुस करकै खड़ो कर सकथै। 
\v 25 हमरे प्रभु ईसु मसीह के जरिया हमरे सिरफ एकै उद्धारकर्ता परमेस्वर को बैभव, महिमा, सामर्थ्य और अधिकार युगानायुग से, अभै और हमेसा तक होत रहाबै! आमीन।