\id 3JN - Sudest - Mike Anderson & Solomon Joshua - June 8, 1998 
\h 3 Jon 
\toc1 Leta Theghetoniye Jon Le Rorori 
\toc2 3 Jon 
\toc3 3Jon 
\mt2 Leta Theghetoniye  
\mt1 Jon  
\mt2 Le Rorori  
\imt1 Utu iviva  
\ip Letake iyake Jon vambe i roriva na i variye weya amala regha idae Gaiyus. Amalake iyake ghathanavu i thovuye. Mbaŋa ravavaghare thɨ vaghɨliya, amalaghɨniye i vaŋguruwoŋgi ele ŋgolo na i njimbukikiŋgi, ghaghad thɨ wareri ma thɨ wava e ghemba regha. Le vakathake thovuye iyake kaiwae Jon i taraweŋa. Jon i giya utu vavurɨgheghe weya Gaiyus na i njimbukikiya lolo regha idae Diyotripes. Amalake iyake iye ekelesiya gharandeviva regha e valɨvaŋgako iyako, ko iyemaeŋge iye i thɨghɨya wanaŋgiya thiye thɨ vavaghɨliya na thɨ vavaghare. Jon tembe i utugiyava Demitriyas ghawovathovuthovuye weya Gaiyus. Ghayamoyamo ŋgoreiye Demitriyas iye ravavaghare regha, iya kaiwae Jon nuwaiya i govambwara weya Gaiyus na mbala i thalavu. Mbwata Demitriyas iyava i liya letake iyake.  
\c 1  
\p
\v 1 Ghino ekelesiya gharandeviva ya roriya letake iyake na ya variye i ghaona e ghen, Gaiyus, wou valɨghareghareŋgu emunjoru kaiwae mbe ghareŋgu vara moli e ghen.   
\p
\v 2 Wou valɨghareghareŋgu, lo naŋgo e tɨne nuwaŋguiya riwana i thovuye moli na bigibigike wolaghɨye thɨ thovuye e ghen ŋgoreiye e unena bigibigike wolaghɨye e tɨne i thovuye moliwe.  
\v 3 Ya warari laghɨye moli kaiwan mbaŋa oghaghanda vavana thɨ mena thɨ utuŋa utunin e ghino, thɨŋa ghen mbema emunjoru u ghambugha utu emunjoru moli na ya ghareghare mbaŋake wolaghɨye u vakavakatha ŋgoreiyako.  
\v 4 Thembaŋa thoŋgo ya loŋwevaidiyava lo ŋgaŋga utuninji, thiye thɨ loŋgaloŋga utu emunjoru moli e ghakamwathɨ, iyake i vakathaŋgo ya warari laghɨye, na lo warariko iyako i kivwala wararike wolaghɨye.   
\s1 Ra thalavuŋgiya Krais le rakakaiwo  
\p
\v 5 Wou valɨghareghareŋgu, emunjoru kaiwo thovuye iya u vakavakathana, kaiwae oghaghandana iya thɨ vavaghɨliyana na thɨ vavagharena u thalavuŋgi, othembe ma u ghareghareŋgi.  
\v 6 Len gharethovuna weŋgi kaero thɨ utuŋa weŋgiya ekelesiya e valɨvaŋgake iyake. Gharɨgharɨ ŋgoranjiyako, thoŋgo mbowo thɨ vaghɨliyava, nuwaŋguiya u thalavuŋgi lenji loŋgaloŋga kaiwae. Vakatha ŋgoreiyana Loi i warari kaiwae.  
\v 7 Gharɨgharɨna iya thɨ rakarakaraŋgina thɨ kaiwo Krais kaiwae. Ma thɨ mban mun ghanjithalavu weŋgiya thiye ma raloŋweloŋweghathɨ.  
\v 8 Iya kaiwae ghinda ekelesiya ra thalavuŋgiya gharɨgharɨ ŋgoranjiyako, na ghinda ra tabo ghanjirathalavu utu emunjoru e kaiwoniye tɨne.   
\s1 Tha u vakatha ŋgoreiye Diyotripes ko ŋgoreiye eŋge Demitriyas  
\p
\v 9 Va ya roriya ekelesiya lenji leta yaŋgara, ko iyemaeŋge Diyotripes mava i goru weya iya lama utuko kaiwae amalaghɨniye mbema nuwaiya eŋge ghamberegha i mbaro.  
\v 10 Mbaŋa ne ya ghaona, ne ya uturaŋgiya le vakathako wolaghɨye. Amalaghɨniye i utuutuvatharɨ ghime kaiwame. Ko ma mbe ghime eŋge kaiwame, ko iyemaeŋge oghaghandako iya thɨ vavaghare vaghɨliyako ma i kula ruwoŋgi ele ŋgolo. Na tembe ŋgoreiyeva, i dageten thavala nuwanjiya thɨ kula ruwoŋgi, na i variye raŋgiyaŋgi ekelesiya wabwiko e tɨne.   
\p
\v 11 Wou valɨghareghareŋgu, tha u varevare thanavu raitharɨ, ko iyemaeŋge u varevare thanavu thovuye. Thela thoŋgo i vakavakatha thanavu thovuye, iye Loi nariye. Thela thoŋgo i vakavakatha thanavu raitharɨ, iye ma i thuwathuwa na i ghareghareya Loi.   
\p
\v 12 Gharɨgharɨke wolaghɨye thɨ wovathovuthovuyeŋa Demitriyas. Thɨŋa iye lolo thovuye. Iye i ghambugha utu emunjoru, na iyake i vaemunjoruŋa iye lolo thovuye. Ghime tembe wo wovathovuthovuyeŋava ghathanavuko, na u ghareghare lama utuke emunjoru.   
\s1 Renuwaŋa momouniye  
\p
\v 13 Lo renuwaŋa i ghanagha mbe thiyake valɨkaiwae ya woraŋgiya e ghen, ko iyemaeŋge ma nuwaŋguiya ya rorinjoŋa e peipa.  
\v 14 Lo renuwaŋake mbe nuwaŋguiya vara ya ghaona ya thuweŋge, ra yaku namoghamwanda na ra utu.   
\p
\v 15 Loi le gharemalɨlɨ i yaku e gharena.  
\p Ghanuneke e valɨvaŋgake iyake thɨ mwaewo e ghen. Ghino lo mwaewo u utugiya weŋgiya wounena regha na regha e valɨvaŋgana iyena.