\id REV - Teribe NT (Gen, Ruth, Jonah and other portions) -Panama 2008 (DBL -2013) 
\h Apocalipsis 
\toc1 L̇l̇ëbo ëre pina Jesucristorë Juan kong, shji yo ĩno wl̈eni 
\toc2 Apocalipsis 
\toc3 Ap 
\mt1 Apocalipsis 
\mt2 L̇l̇ëbo ëre pina Jesucristorë Juan kong, shji yo ĩno wl̈eni 
\imt1 Kjibokwo ëre sorë 
\ip Domer shäng kjl̈ara ko Juan. Dënashko ga e Jesús oppingga. Jesús wol̈ono, ga woshrara Sbörë iröng obi irgo ga Juan beno shäng Sbö tjl̈õkwo l̈aga Jesús ãska wl̈eniyo shara. 
\ip Eshko dbaryo ga Juan iaraba beno shäng dl̈ung tjrëko ko Patmos l̈ishko, ba shdunggl̈o, Jesús roy pjl̈ú l̈ara kjĩshko. Pjl̈ara ga Jesucristo weno ba kong. Eshko ga l̇l̇ëbo pina ba kong, shji yo ĩno wl̈eni, ga ichara ba të, l̇l̇ëbo l̈i miyde nopga uunkongdë wl̈o. 
\ip Bäm go ga ichara kjibokwo të Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo l̈i kong. (Eeri ga kjok eshko l̈i ko Turquía.) 
\ip E irgo ga l̇l̇ëbo wen l̇l̇ono l̈i pina ba kong. Nopga owa l̈i shdũya Sbörë sorë l̈i pina ba kong. Ä ëngkjwë Sbö nopga tjok sorë l̈i pina ba kong. E zãya Jesúsdë sorë l̈i pina ba kong. L̇l̇ono ga nopga uunkong ber l̈öng sorë l̈i pina ba kong bakoe. 
\ip L̇l̇ëbo ĩna Juandë kës ëre tara beno Jesús tjl̈õkwo kjragaga kong. 
\c 1  
\p  
\v 1 L̇l̇ëbo ëre pina Sbörë Jesucristo kong, pĩya ba parkagaga kong wl̈o, l̇l̇ëbo wen dörö l̈i miyde l̈ok wl̈o. Eni ga tja Juan kong ga ba parkaga kjok dogo so ichara Jesucristorë ter shrono shäng bor kong, l̇l̇ëbo ëre pĩya bor kong wl̈o.  
\v 2 L̇l̇ëbo ĩnor l̈i tër uunkong bomi kong, Sbö tjl̈õkwo roy l̈ara Jesucristorë bor kong l̈i tër bomi kong bako, ber ba miydokl̈o wl̈o.  
\v 3 Ëye kjibokwo ëre l̈ë obl̈ë kong ga ber wopjl̈úe. Ëye tjl̈õkwo ëre kuk, ga kol̈e ga ber wopjl̈ú bako, dbar l̈ër shäng l̈i dörö kjĩshko. 
\p  
\v 4-5 Kjibokwo ëre taga tja Juandë. 
\p Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo, kjibokwo ëre ichër jek bomi kong. 
\p Rokër Sök Ĩyado l̈i\f + \fr 1:4-5 \fk Sök Ĩyado \ft l̈e l̈i, e \fk Data Sbö \ft l̈okl̈o.\f* kong, sëyaga dogl̈o kjäk (7) tjeng ba pjl̈u sökkl̈o jong l̈i bokshto l̈i\f + \fr 1:4-5 \fk Sëyaga dogl̈o kjäk (7) \ft l̈e l̈i, e \fk Sbö Sëya dbo obl̈ë obl̈ë \ft l̈i l̈okl̈o.\f* kong, Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe. Jesucristo, e Sbö tjl̈õkwo kura l̈i l̈aga jl̈õkoyo, woshrara bäm go l̈i e, pjl̈upga l̈öng kjok ëre kjing go ichaga l̈i e bakoe. Shji woyde ara, owa pjang bi go l̈i l̈öna beno dret, ba srëng kwona l̈i go,  
\v 6 ga shji iara beno l̈öng syõshtagaga parkë l̈öng Sbö, ba Data, borwa pjl̈uyo l̈i kong. E kjĩshko ga Cristo iëy ber kësbang, tjwl̈õ ara, dbo ara ĩyado wl̈o. Ber eni. 
\q1  
\v 7 Tja kuzĩa. L̇l̇ono ga Cristo ter pjäng sho roshko, 
\q2 ĩga uunkongdë, 
\q2 ba shorkegaga l̈öng dënashko l̈i omĩk bakoe. 
\q1 Eshko ga tjëyoga l̈öng kës l̈i ber l̈öng woydë ara ba kjĩshko. 
\q2 Ber eni. 
\p  
\v 8 Tjl̈apga Sbö tjl̈ẽ ga «Tja so tjl̈õkwo tokl̈o ko \tl Alfa\tl*\f + \fr 1:8 \ft Grecia so tjl̈õkwo go ga tjl̈õkwo tokl̈o ko \fk Alfa\ft , e ba bäm ĩyo, tjl̈õkwo tokl̈o ko \fk A \ft wl̈eni.\f* kjoyo, tja so tjl̈õkwo tokl̈o ko \tl Omega\tl*\f + \fr 1:8 \ft Grecia so tjl̈õkwo go ga tjl̈õkwo tokl̈o ko \fk Omega\ft , e ba pjirshko, tjl̈õkwo tokl̈o ko Z wl̈eni.\f* kjoyo bakoe. L̇l̇ëye l̇l̇ëm obishko ga tja sök tjän. L̇l̇ëbo uunkong pjitong dret ga tja sök obi. Sök Ĩyado l̈i tja. L̇l̇ëye shäryër woydë l̈i shäryër ga pjl̈úe» l̈e. 
\s1 Domer weno shäng kjl̈ara, so no to ter kjok dogo dwayo l̈i kjoyoe 
\p  
\v 9 Tja Juan, tja bomi kjl̈ara Jesús tjl̈õkwo kjraga. Shji mär bi pjl̈uyo Jesús go kjĩshko ga shji shdungoba, gueniyo kuy kjange. Sbö tjl̈õkwo roy l̈ara Jesúsdë bor kong l̈i l̈ër shäng oba kong kjĩshko ga tja icharaba beno sök dl̈ung tjrëko ko Patmos l̈ishko.  
\v 10 Pjl̈ara ga Tjl̈apga Jesús dbaryo\f + \fr 1:10 \fk Tjl̈apga Jesús Dbaryo \ft l̈e l̈i, e \fk dbar sondëshko \ft l̈okl̈o, e woshrara Sbörë e dbaryo kjĩshko.\f* ga tja go Sbö Sëya jl̈õkoyo. Eshko ga ybö kuror bor irgo pjl̈ara dbo ara, pjl̈uk wl̈i bakworoy wl̈eni.  
\v 11 Tjl̈ẽ bor kong ga «L̇l̇ëye ĩp l̈i tos ber pjang kjibokwo go. E irgo ga ichos jek Jesús tjl̈õkwo kjragaga kjringgwo kjäk (7) tjeng kjok shto obl̈ë obl̈ë Asia kjokyo l̈i kong. Ichos jek Éfeso kjokyo, Esmirna kjokyo, Pérgamo kjokyo, Tiatira kjokyo, Sardis kjokyo, Filadelfia kjokyo, Laodicea kjokyo bakoe» l̈e. 
\p  
\v 12 Eshko ga tja bojongö ĩn iröng, ëye ybö kuror tjl̈ẽ l̈i ë miydër wl̈o. Eshko ga ĩn ga iök shjiy bapkwo shäryak dbur sho shõyl̈ṍr go tjeng kjwo kjäk (7),  
\v 13 tjrëko shäng kjl̈ara so no to ter kjok dogo dwayo l̈i kjoyo, doyono shäng shwong kur may äär ba kju kjing go, dop pjrikkl̈o shäryak dbur sho shõyl̈ṍr go pjang ba pjl̈ú kjing go.  
\v 14 Ba kägä, ba käkzong, e kjwo pjl̈ubl̈ún so pjäng sho kjoyoe. Ba bok roy so iök l̈ok ri ri kjoyoe.  
\v 15 Ba dre so dröng sho so kl̈ung sho kjoyo l̈i iak jong iök pjë jong ri ri roshko l̈i kjoyoe. Ba ybö dbo ara, di kës pjl̈ubl̈unyo dik.  
\v 16 Orkwo kël̈ëkong dbala tjeng kjwo kjäk (7). Dröng tur jong ba kjak roy kjwangna, kowo stek kar kar. Ba bokkwo kãl̈ã l̇l̇etl̇l̇et, dl̈o wl̈eni. \fig Iök shjiy bapkwo shäryak dbur sho shõyl̈ṍr go kjwo kjäk (7) (Apocalipsis 1.12)|src="HK00264B.TIF" size="col" ref="Revelation 1.12 " \fig* 
\p  
\v 17 Ĩn jek drëng ga tja jek rish buk ba dre zl̈ong, shji wol̈ono buk wl̈eni. Gueniyo eshko ga tja porwara ba orkwo kël̈ëkong go, ga tjl̈ẽ bor kong ga «L̇l̇ëye bangkjrëp l̇l̇ëme. L̇l̇ëye l̇l̇ëm obishko ga tja sök tjän. L̇l̇ëbo uunkong pjitong dret ga tja sök obi.  
\v 18 Sök Ĩyado l̈i tja. Tja wol̈ono, gueniyo tja sök së ĩyado wl̈o. Shinmoga shtoyo u bäng bäng dökkl̈o tjeng bor wl̈oshko, epga woshrër iröng obi ga pjl̈úe. 
\p  
\v 19 »L̇l̇ëye ĩnop l̈i tozong. Eni tjok ga l̇l̇ëye shäryë l̈i tos, l̇l̇ëye wen tek iröng l̈i tos bakoe.  
\v 20 Dbala ĩnop tjeng kjwo kjäk (7) bor orkwo kël̈ëkong ëre, iök shjiy bapkwo shäryak dbur sho shõyl̈ṍr go tjeng kjwo kjäk (7) ëre, e l̇l̇ë l̈okl̈o l̈ër bop kong. Iök shjiy bapkwo kjwo kjäk (7) ëre, e bor tjl̈õkwo kjraga kjringgwo kjäk (7) tjeng kjok shto obl̈ë obl̈ë l̈i jyãgl̈o. Dbala kjwo kjäk (7) ëre, e roy sögaga kjok dogo so dogl̈o kjäk (7), parkë l̈öng bor tjl̈õkwo kjraga kjringgwo kjäk (7) kong l̈i jyãgl̈o bakoe. 
\c 2  
\s1 Kjibokwo tak pjang Jesús tjl̈õkwo kjragaga l̈öng Éfeso kjokyo l̈i kong 
\p  
\v 1 »Roy söga kjok dogo so shäng kjl̈ara, bor tjl̈õkwo kjragaga l̈öng Éfeso kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, orkwo kël̈ëkong dbala tjeng kjwo kjäk (7), jëk shäng iök shjiy bapkwo shäryak dbur sho shõyl̈ṍr go tjeng kjwo kjäk (7) l̈i tjrëko. E tjl̈ẽ bomi kong ga  
\v 2 ‘Pjãy jëk l̈öng sorë, e miydër. Pjãy parkë bor kong kjang, l̇l̇ëbo weno bomi kong owashko ga kumi kjang bakoe. No kjone kjone tjl̈ẽno ga “Tja Sbö tjl̈õkwo roy l̈aga Jesús ãska” l̈ara eni. Eshko ga tjl̈ĩnomi yõtso, ga miydoromi ga jyõ erä. Eshko ga ioromi beno jëk l̈öng bomi tjok ame.  
\v 3 Bor kjĩshko ga l̇l̇ëbo weno bomi kong owa ara, gueniyo kuromi kjang, pjãy wosonkono l̇l̇ëm bakoe. 
\pi1  
\v 4 ”’Gueniyo bor kong ga pjãy l̈öng l̇l̇ëbo shäryë owa kjrina. Pjãy mär l̈öng bor go kjwl̈ëshko ga pjãy ëng woydono ara kar kare. Gueniyo pjãy opshäryë eni ame.  
\v 5 Pjãy opshäryono dämärshko sorë l̈i woyotjl̈ĩzĩa. L̇l̇ëbo shäryëmi l̈öng owa l̈i, e owa jl̈õe l̈ozĩ, ga rayozĩ, ga l̇l̇ëbo shäryoromi dämärshko, Sbö tjl̈õkwo kjroromi kjwl̈ëshko l̈i shäryozĩ eni iröng obi. Shäryëmi eni l̇l̇ëm ga tja jek bomi iök shjiy bapkwo jong l̈i kjë bomi shjiryo.  
\v 6 Gueniyo l̇l̇ëbo ber pjl̈ú bomi kong, l̇l̇ëbo owa shärye nicolaítagarë l̈öng l̈i ĩywor shjiktëng, ga pjãy omĩywõ shjiktëng eni bakoe. 
\pi1  
\v 7 ”’Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso. Sbö kjok bukshko ga kjor jong kjl̈ara, ba bo uoroy ga shji wol̈on l̇l̇ëme. Ga ëye l̇l̇ëbo owa l̈i zano ga ichër kjor bo l̈i uë’ l̈e.” 
\s1 Kjibokwo tak pjang Jesús tjl̈õkwo kjragaga l̈öng Esmirna kjokyo l̈i kong 
\p  
\v 8 »Roy söga shäng kjl̈ara obi, bor tjl̈õkwo kjragaga l̈öng Esmirna kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, l̇l̇ëye l̇l̇ëm obishko ga sök tjän, l̇l̇ëbo uunkong pjitong dret ga sök obi. Era wol̈ono, ga woshrono iröng obi. E tjl̈ẽ bomi kong ga  
\v 9 ‘Pjãy shdungoba sorë, e miydër. Pjãy song jl̈õe. Gueniyo jl̈õkoyo ga pjãy song l̇l̇ëm, pjãy l̇l̇ëbo ara wl̈eni. Pjãy jyõyotke nopgarë sorë l̈i miydër. Epga tjl̈ẽ ga “Tjawa judíoga” l̈e, miga jyõ, epga Ä nopga erä.  
\v 10 L̇l̇ëbo wen tjwe bomi kong owa l̈i bangkjrëmi l̇l̇ëme. L̈ër bomi kong ga pjãy kjong kjong ie Ärë om go ber l̈öng no shdũzl̈ong uyo roshko, pjãy tjl̈ĩya wl̈o, l̇l̇ëbo owa shäryëmi wl̈o l̈e, ga pjãy shdũya song äär jong dbar sak kjwara (10). Gueniyo tja rayëmi l̇l̇ëm, äär jong pjãy wol̈ono guing. Shäryoromi eni ga pjãy iër ber l̈öng së ĩyado Sbö tjok. 
\pi1  
\v 11 ”’Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso. Ëye l̇l̇ëbo owa l̈i zano ga nopga wol̈ono tjeng l̈i wol̈on jek obi wl̈enishko ga l̇l̇ëye wen ba kong l̇l̇ëme’ l̈e.” 
\s1 Kjibokwo tak pjang Jesús tjl̈õkwo kjragaga l̈öng Pérgamo kjokyo l̈i kong 
\p  
\v 12 »Roy söga shäng kjl̈ara obi, bor tjl̈õkwo kjragaga l̈öng Pérgamo kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, dröng tjeng kjwangna, kowo stek kar kar. E tjl̈ẽ bomi kong ga  
\v 13 ‘Miydër ga pjãy l̈öng l̈ishko ga nopga pjl̈uyo l̈i Ä erä. Eni ëmdë ga pjãy mär l̈öng bor go ĩyado. Dënashko ga domer shäng kjl̈ara eshko ko Antipas. E parkono bor kong pjl̈úe. E zröraba bomi tjrëkoshko ga tja rayoromi l̇l̇ëme. 
\pi1  
\v 14 ”’Gueniyo bor kong ga pjãy l̈öng l̇l̇ëbo shäryë owa. Dënashko ga Balac pina Balándë Israel tjëyoga jyãpgwë ara. Epga ichara öng sho twaraba sböpga jyãgl̈o kong l̈i uë. Epga ichara pë no orkwosmono ba tjok l̇l̇ëm l̈i tjok. Pjãy kjone kjone jëk l̈öng tjl̈õkwo ëre go.  
\v 15 Pjãy kjone kjone jëk l̈öng tjl̈õkwo owa l̈e nicolaítagarë l̈i go bakoe.  
\v 16 E kjĩshko ga l̇l̇ëbo owa shäryëmi l̈öng l̈i, e owa jl̈õe l̈ozĩ, ga rayozĩa. L̇l̇ëm ga tja jek bomi shwoy, ga tja ëngkjwë bomi tjok, dröng tur jong bor kjak roy l̈i go. 
\pi1  
\v 17 ”’Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso. Ëye l̇l̇ëbo owa l̈i zano ga kong dl̈i ter kjok dogo dwayo miydëba kjok ëre kjing go l̇l̇ëm wl̈eniyo l̈i\f + \fr 2:17 \fk Dl̈i ter kjok dogo dwayo \ft l̈e l̈i, ko \fk maná.\f* twër ber ba kong. Kong akkwo kjwo pjl̈ubl̈ún twër kjwara bako, goshko ko jyã tak pjang tjagl̈ën, miydaga ërë l̇l̇ëm, miyde ba kjraga l̈irë eröe’ l̈e.” 
\s1 Kjibokwo tak pjang Jesús tjl̈õkwo kjragaga l̈öng Tiatira kjokyo l̈i kong 
\p  
\v 18 »Roy söga shäng kjl̈ara obi, bor tjl̈õkwo kjragaga l̈öng Tiatira kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Sbö Wa, ba bok roy so iök l̈ok ri ri kjoyo, ga ba dre so dröng sho so kl̈ung sho kjoyo krung beno shjiy kjoyo bakoe. E tjl̈ẽ bomi kong ga  
\v 19 ‘Pjãy jëk l̈öng sorë, e miydër. Pjãy ëng woydë ara, pjãy mär bor go, pjãy parkë bor kong pjl̈ú, l̇l̇ëbo wen bomi kong owashko ga kumi kjang bakoe. Miydër ga eerishko ga pjãy l̈öng l̇l̇ëbo pjl̈ú shäryë ara, pjãy mär bor go bäm go l̈i kjinmo bakoe. 
\pi1  
\v 20 ”’Gueniyo bor kong ga pjãy l̈öng l̇l̇ëbo shäryë owa kjrina. Wal̈ë shäng kjl̈ara ko Jezabel. E tjl̈ẽ ga “Tja Sbö tjl̈õkwo l̈aga” l̈e, gueniyo jyõ erä. Tjl̈õkwo l̈e shäng l̈i go ga bor parkagaga jyãpgwe ara. Epga iche pë no orkwosmono ba tjok l̇l̇ëm l̈i tjok. Epga iche öng sho twaraba sböpga jyãgl̈o kong l̈i uë bakoe. Eni ëmdë ga e sl̈omi l̇l̇ëme.  
\v 21 Kong dbar tworor kop ara, l̇l̇ëbo owa shärye shäng l̈i, e owa jl̈õe l̈e wl̈o, gueniyo raye woydë l̇l̇ëme.  
\v 22 E kjĩshko ga iër ber buk swl̈o ara, ba bukkl̈o kjing go. Ëye pë ba tjok, ga l̇l̇ëbo owa shärye l̈öng l̈i raye l̇l̇ëm ga shdun ara bakoe.  
\v 23 Wal̈ë l̈i wapga zrör drete. Eshko ga bor tjl̈õkwo kjragaga l̈öng kës l̈i ommiydë ga wotjl̈ĩk l̇l̇ë l̈i, l̇l̇ëye woyde l̈öng l̈i, e miydër pjl̈ú, ga pjãy kjl̈ara kjl̈ara potjwl̈ẽn, l̇l̇ëbo shäryoromi l̈i kjĩshko. 
\pi1  
\v 24 ”’Gueniyo pjãy kjone kjone jëk l̈öng Jezabel tjl̈õkwo l̈i go l̇l̇ëme. Pjãy oppino kjok miydë Ä ĩ miydëba l̇l̇ëm wl̈eniyo l̈ëba l̈i go l̇l̇ëm bakoe. Pjãyda ichër l̇l̇ëbo obl̈ë shäryë l̇l̇ëme.  
\v 25 Pjãy mär ber l̈öng tjl̈õkwo kjroromi l̈i go erä. 
\pi1  
\v 26 ”’Ëye l̇l̇ëbo owa l̈i zano, ga tja kol̈ara äär jong ba dbo go ga kong dbo twër, tjëyoga uunkong iche wl̈o,  
\v 27 dbo twara bor Datarë bor kong sorë ga eni. Ga “epga iche kjang; kol̈e l̈ok l̇l̇ëm ga shdũya ara, kl̈ung sbi dl̈oroy pjäs wl̈eni.”\f + \fr 2:27 \ft Salmo 2.9.\f* 
\v 28 Ga kong dbala ko Dbar Kjokl̈o l̈i twër ber ba kong bakoe.  
\v 29 Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso’ l̈e.” 
\c 3  
\s1 Kjibokwo tak pjang Jesús tjl̈õkwo kjragaga l̈öng Sardis kjokyo l̈i kong 
\p  
\v 1 »Roy söga shäng kjl̈ara obi, bor tjl̈õkwo kjragaga l̈öng Sardis kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, wl̈oshko tjeng Sbö Sëyaga dogl̈o kjäk (7),\f + \fr 3:1 \fk Sbö Sëyaga dogl̈o kjäk (7) \ft l̈e l̈i, e \fk Sbö Sëya dbo obl̈ë obl̈ë \ft l̈i l̈okl̈o.\f* dbala kjwo kjäk (7) bakoe. E tjl̈ẽ bomi kong ga ‘Pjãy jëk l̈öng sorë, e miydër. Pjãy l̈öng së l̈ëba, gueniyo pjãy wol̈ono l̈öng wl̈eni.  
\v 2 ¡Pjãy wol̇l̇enzong! Pjãy dbo beno sira dö, ga jetoe. E kjĩshko ga pjãy dbokjrozong. Ĩn ga pjãy jëk l̈öng pjl̈o bek bor Sbö bokso l̇l̇ëme.  
\v 3 Tjl̈õkwo kuromi, kjroromi l̈i, e woyoshrozĩ, kol̈ozĩ iröng obi. L̇l̇ëbo owa shäryëmi l̈öng l̈i, e owa jl̈õe l̈ozĩ, ga rayozĩa. Pjãy wol̇l̇en l̇l̇ëm ga tja koshëmi l̈öng l̇l̇ëmshko ga tja jek bomi shwoy, no l̈ũ ä wl̈eni. 
\pi1  
\v 4 ”’Pjãy kjl̈öbö, bomi shwong shtimirë wl̈iwl̈i wl̈eni l̇l̇ëm obi. Pjãyda omshäryono eni kjĩshko ga pjãy iër ber jëk l̈öng bor tjok, doyë shwong ko pjl̈ubl̈ún go.  
\v 5 Ëye l̇l̇ëbo owa l̈i zano ga doyë shwong ko pjl̈ubl̈ún go, baĩya dik. Ëye ber sök së ĩyado Sbö tjok wl̈o ga ba ko, e tak pjang Sbö kjibokwoyo l̈i go. Ga ëye l̇l̇ëbo owa l̈i zano ga ba ko l̈ön kjibokwo l̈i go dwayo l̇l̇ëme. Ba kjĩshko ga tja tjl̈ẽ bor Data, ba parkagaga kjok dogo so kong ga “Kjwe botoya” l̈ër ba kong l̈ok eni.  
\v 6 Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso’ l̈e.” 
\s1 Kjibokwo tak pjang Jesús tjl̈õkwo kjragaga l̈öng Filadelfia kjokyo l̈i kong 
\p  
\v 7 »Roy söga shäng kjl̈ara obi, bor tjl̈õkwo kjragaga l̈öng Filadelfia kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, e eröe. Tjl̈õkwo bek l̈aga l̈i e bakoe. Pjl̈u David u bäng bäng dökkl̈o tjeng ba wl̈oshko. U bäng bäng döra ga bängzaga ërë l̇l̇ëm, u bäng bäng bängzara ga döga ërë l̇l̇ëm bakoe. E tjl̈ẽ bomi kong ga  
\v 8 ‘Pjãy jëk l̈öng sorë, e miydër. Ĩzĩa. U bäng bäng döror jong bomi bokshto, bängzaga ërë l̇l̇ëme. Miydër ga pjãy dbo ara l̇l̇ëm, gueniyo bor tjl̈õkwo kol̈oromi, tja rayoromi l̇l̇ëm bakoe.  
\v 9 Pjãy l̈öng l̈ishko ga nopga l̈öng kjl̈öbö, tjl̈ẽ ga “Tjawa judíoga” l̈e, miga jyõ, epga Ä nopga erä. L̇l̇ono ga epga ichër kjök tjok bomi bokshto, ga tjl̈ẽ l̈ok bomi kong ga “Nopga woyde Jesúsdë ara l̈i pjãy” l̈e bomi kong eshko.  
\v 10 Dbar tjwe kjwara ga l̇l̇ëbo wen nopga l̈öng kjok kjwang jĩkong l̈i kong owa, epga tjl̈ĩn wl̈o. Dënashko ga tja tjl̈ẽno bomi kong ga “L̇l̇ëbo wen bomi kong owashko ga kuzĩ kjang, tja rayëmi l̇l̇ëme” l̈oror bomi kong eni, ga tjl̈õkwo l̈i kol̈oromi. E kjĩshko ga dbar owa l̈i tjweshko ga pjãy dër yõtso, pjãy där wl̈o. 
\pi1  
\v 11 ”’Tja äär mal̈inge. L̇l̇ëye tjeng bomi tjok l̈i jnezĩ, bomi potjwl̈ẽkkl̈o l̈i döga ërë bomi shjiryo l̇l̇ëm wl̈o.  
\v 12 Ëye l̇l̇ëbo owa l̈i zano ga iër ber shäng Sbö u shwl̈eyo wl̈eni, ga ber shäng eni ĩyado. E go ga bor Sbö ko l̈i tër, bor Sbö kjokyo ko l̈i tër, bor ko l̈i tër bakoe.\f + \fr 3:12 \ft Sbö ko l̈i tak l̈ok ba go, epga baĩya kjĩshko.\f* Ba kjokyo l̈i, Jerusalén kjokyo tjagl̈ën l̈i e. E ter kjok dogo dwayo.  
\v 13 Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso’ l̈e.” 
\s1 Kjibokwo tak pjang Jesús tjl̈õkwo kjragaga l̈öng Laodicea kjokyo l̈i kong 
\p  
\v 14 »Roy söga shäng kjl̈ara obi, bor tjl̈õkwo kjragaga l̈öng Laodicea kjokyo l̈i kong. Kong kjibokwo tos kjwara, söya jek ba kong wl̈o. Kjibokwo l̈i tos eni: 
\pi1 »“Shäng kjl̈ara, ‘Ber eni’ l̈aga l̈i e. L̇l̇ëye l̈e l̈i shärye eni ĩyado. L̇l̇ëye ĩna l̈i l̈e jl̈õkoyo. L̇l̇ëbo shäryara Sbörë kës ichaga l̈i e bakoe. E tjl̈ẽ bomi kong ga  
\v 15 ‘Pjãy jëk l̈öng sorë, e miydër. Pjãy zengteng anmoyõ wl̈eni l̇l̇ëm, pjãy kjl̈ik ara anmoyõ wl̈eni l̇l̇ëm bakoe. Woydër ga pjãy kjl̈ik wl̈eni, l̇l̇ëm ga pjãy zengteng wl̈eni.  
\v 16 Gueniyo pjãy kjl̈ikjl̈i wl̈eni erö kjĩshko ga pjãy tjwër bor kjak roy dwayo wl̈eni.\f + \fr 3:16 \ft Eshko dbaryo ga di bäng tjeng kjl̈ik ara anmoyõ, ga nopga dwl̈omnek di kjl̈ik l̈i go. Di bäng tjeng obi zengteng anmoyõ, ga di eniyo l̈i ie l̈ok, ber l̈öng wopjl̈ú wl̈o. Gueniyo di bäng tjeng kjl̈ikjl̈i l̇l̇ë, e ba kong ga l̇l̇ëno l̇l̇ëme.\f* 
\v 17 Pjãy tjl̈ẽ ga “Tjawa dbur sho ara. L̇l̇ëbo wl̈ẽnorwa ara. L̇l̇ëye obl̈ë woydërwa l̇l̇ëme” l̈ëmi eni. Gueniyo pjãy song jl̈õ, pjãy l̇l̇ëye dret, pjãy kjok ĩgö l̇l̇ëm, pjãy shwong l̇l̇ëm bakoe. ¿Pjãy opkugö l̈öng l̇l̇ëmde?  
\v 18 E kjĩshko ga l̈ër bomi kong ga dbur sho shõyl̈ṍr suk pjir beno pjl̈ú wl̈eniyo tjwl̈ẽzĩ bor kong, ber bomi kong wl̈o, pjãy ber l̈öng dbur ara jl̈õkoyo wl̈o. Shwong ko pjl̈ubl̈ún tjwl̈ẽzĩ bor kong, ber bomi kong wl̈o, pjãy doyë e go wl̈o, pjãy l̈öng kjl̈op dret l̈i l̈ökyo jnemi e go wl̈o. Ga bokkwo dwl̈oyo tjwl̈ẽzĩ bor kong, ber bomi kong wl̈o, pjãy kjok ĩgö pjl̈ú wl̈o. 
\pi1  
\v 19 ”’Ëye woydër l̈i jëk owashko ga wl̈on, ga poshdun, opyë jëk pjl̈o bek iröng wl̈o. Eni ga l̇l̇ëbo owa shäryëmi l̈öng l̈i, e owa jl̈õe l̈ozĩ, ga rayozĩa.  
\v 20 Kuzĩa. Tja shäng na bomi u bäng bäng bomi rokë, tja iëmi opzrëk jek bomi tjok wl̈o. Ëye, tja kura, ga u bäng bäng l̈i döra bor kong ga tja opzrëk jek ber sök ba tjok, ga tjawa ië ëng tjok. 
\pi1  
\v 21 ”’L̇l̇ëbo owa l̈i zanor, ga tja öötong sök bor Data tjok, ba pjl̈u sökkl̈o kjing go. Ëye l̇l̇ëbo owa l̈i zano ga kong dbo twër äär ber sök bor tjok, bor pjl̈u sökkl̈o kjing go eni bako wl̈o.  
\v 22 Ëye kwomgwo tjok ga woyde ga tjl̈õkwo l̈e Sbö Sëyarë bor tjl̈õkwo kjragaga kong l̈i kuya yõtso’ l̈e.”» 
\c 4  
\s1 Pjl̈u sökkl̈o jong kjwara kjok dogo 
\p  
\v 1 E irgo ga ĩnor jek obi, ga ĩn ga u bäng jong oojong kjwara kjok dogo. Ga ybö kuror pjl̈ara pjl̈uk wl̈i bakworoy wl̈eni l̈i tjl̈ẽno bor kong obi. Tjl̈ẽ ga «Pja tëmö. L̇l̇ëye wen ëre irgo l̈i pin bop kong» l̈e.  
\v 2 Jekdo eshko ga tja go Sbö Sëya jl̈õkoyo. Eshko ga pjl̈u sökkl̈o ĩn jong kjwara kjok dogo, kjing go ëbo sök kjl̈ara.  
\v 3 Sök l̈i so akkwo wol̈ësowa ko \tl jaspe\tl*, \tl cornalina\tl*, e kjoyoe. Sökkl̈o l̈i sor go, donku pjang pjribri, kãl̈ã kësong, akkwo wol̈ësowa ko \tl esmeralda\tl* kjoyoe.  
\v 4 Sökkl̈o l̈i sor go, pjl̈upga sökkl̈o l̈ok sak pjök kjingsho pkëng (24), tjl̈apga kjok l̇l̇gwega wl̈eniyo sök kjl̈ara kjl̈ara sökkl̈o l̈i kjing go, doyono sök shwong pjl̈ubl̈ún go, pjl̈u dl̈u iokl̈o shäryak dbur sho shõyl̈ṍr go jong ba dl̈u kjing go.  
\v 5 Sökkl̈o jong roworbëshko l̈i roy dwayo, l̇l̇gwl̈ëng tur jong l̇l̇etl̇l̇et l̇l̇aw pogo, kjrik ri ri l̈e ara bakoe. Sökkl̈o l̈i bokshto ga iök pjë l̈ok ri ri ba bapkwo roy kjwo kjäk (7). Sbö Sëyaga dogl̈o kjäk (7) l̈i\f + \fr 4:5 \fk Sbö Sëyaga dogl̈o kjäk (7) \ft l̈e l̈i, e \fk Sbö Sëya dbo obl̈ë obl̈ë \ft l̈i l̈okl̈o.\f* e.  
\v 6 Ga l̇l̇ëbo ĩn buk sökkl̈o l̈i bokshto obl̈ë, so dl̈ung shäryak batl̈ë sho go kjoyo, roĩgöy wẽl̈ëe. 
\p Sökkl̈o l̈i worbo go pjl̈or kar kar, äya l̈öng së wl̈eniyo tjeng kjl̈ara kjl̈ara. Dogl̈o pkëng (4) l̈i bokkwo l̈ok l̇l̇aw pogo, bäm l̈ë, iröng l̈ë bakoe.  
\v 7 Kjl̈ara so dbong kjoyo, kjl̈ara so sögl̈a kjoyo, kjl̈ara bokkwo so no kjoyo, kjl̈ara so döbung dbuk pjang kjoyoe.  
\v 8 Kjl̈ara kjl̈ara sjä̃gä l̈ok ko tjer (6), ga bokkwo l̈ok l̇l̇aw pogo, sjä̃gä l̈i dorko bakoe. Shkë dba ga tjl̈ẽ l̈öng ĩyado. Tjl̈ẽ ga 
\q1 «Tjl̈apga Sbö, l̇l̇ëye shäryëp woydë l̈i shäryëp ga pjl̈úe. 
\q2 Pja eröe. Pja eröe. Pja eröe. 
\q2 Pja sök ĩyado» l̈e l̈ok eni. 
\m  
\v 9 Sök pjl̈u sökkl̈o kjing go l̈i sök ĩyado. E poshrëya äya l̈öng së l̈irë ara, e ie l̈ok ber kësbang, tjwl̈õ ara. Ga tjl̈ẽ l̈ok ba kong ga «Tjawa wopjl̈ú bop tjok ĩyado» l̈e eni. L̈e l̈ok enishko ga  
\v 10 tjl̈apgaga kjok l̇l̇gwega wl̈eniyo dogl̈o sak pjök kjingsho pkëng (24) l̈öng l̈i kjök tok sök l̈i bokshto. Ga poshrëya l̈ok eni wopro ga ba pjl̈upga dl̈u iokl̈o ie ba sökkl̈o l̈i bokshto, ga tjl̈ẽ l̈ok ga 
\q1  
\v 11 «Borwa Tjl̈apga, borwa Sbö, 
\q2 l̇l̇ëbo tjeng kës l̈i shäryaga pjarë, 
\q2 woydorop eni kjĩshko. 
\q2 Ga beno l̈öng së l̈i l̈aga pjarë bakoe. 
\q1 E kjĩshko ga pja tjwl̈õ ara, 
\q2 pja iërwa ber kësbang, tjwl̈õ ara wl̈o, 
\q2 pja bangkjrërwa wl̈o, 
\q2 dbo ara l̈i ber bop kong wl̈o bakoe» l̈e l̈ok eni. 
\c 5  
\s1 Öng Wl̈ẽp Ushko So L̇l̇gwokl̈ë, kjibokwo 
\p  
\v 1 Eshko ga ĩn ga sök pjl̈u sökkl̈o kjing go l̈i orkwo kël̈ëkong kjibokwo tjeng kjwara, tak pjir kjwo kar kare. Kjibokwo l̈i dira pjir, ga kjarbo smona kjibokwo smokkl̈o go kjwo kjäk (7), roshwing l̇l̇ëm wl̈o.  
\v 2 Ga ĩn ga Sbö parkaga kjok dogo so shäng kjl̈ara, dbo ara wl̈eniyo. E tjl̈ẽno dbo go, tjl̈ẽ ga «¿Ëye tjwl̈õ ara, kjibokwo smokkl̈o iak l̈ok kjibokwo kjarbo go l̈i döya wl̈o, kjibokwo l̈i roshwĩya wl̈o?» l̈e.  
\v 3-4 Gueniyo ëye tjwl̈õ ara, kjibokwo l̈i roshwĩya, ĩya wl̈o dret, ëye sök kjok dogo eniyo l̇l̇ëm, ëye sök kjok ëre kjing go eniyo l̇l̇ëm, ëye sök kl̈ung ëre dorko eniyo l̇l̇ëm bakoe. E kjĩshko ga tja sl̈ar ëëe.  
\v 5 Gueniyo tjl̈apgaga kjok l̇l̇gwega wl̈eniyo kjl̈ara tjl̈ẽ bor kong ga «Pja sl̈ar ame. Judá tjëyo l̈i dbongyo sök kjwe ĩzong. Kjwe David tjëyo. L̇l̇ëbo owa l̈i zana pjire. E kjĩshko ga kjibokwo smokkl̈o iak l̈ok kjibokwo kjarbo kjwe döya ga pjl̈ú, kjibokwo kjwe roshwĩya ga pjl̈ú bakoe» l̈e. 
\p  
\v 6 Eshko ga ĩn ga Öng Wl̈ẽp Ushko So L̇l̇gwokl̈ë l̈i kojono sök pjl̈u sökkl̈o l̈ishko, äya l̈öng së dogl̈o pkëng (4) l̈i, tjl̈apgaga kjok l̇l̇gwega wl̈eniyo l̈öng l̈i, e tjrëko. Ga ĩn ga zröraba kjoyoe. Öng l̈i sjö kjwang kjäk (7), bokkwo kjwo kjäk (7), e Sbö Sëyaga dogl̈o kjäk (7),\f + \fr 5:6 \fk Sbö Sëyaga dogl̈o kjäk (7) \ft l̈e l̈i, e \fk Sbö Sëya dbo obl̈ë obl̈ë \ft l̈i l̈okl̈o.\f* ichak kjok kjwang jĩkong l̈i l̈okl̈o.  
\v 7 Eshko ga jek pjl̈u sökkl̈o l̈i zl̈ong, ga sök pjl̈u sökkl̈o kjing go l̈i, kjibokwo tjeng ba orkwo kël̈ëkong l̈i kjrara Öng l̈irë ey dwayo.  
\v 8 Kjrarashko ga äya l̈öng së dogl̈o pkëng (4) l̈i, tjl̈apgaga kjok l̇l̇gwega wl̈eniyo dogl̈o sak pjök kjingsho pkëng (24) l̈i, e kjök tono tjeng Öng l̈i bokshto. Kjl̈ara kjl̈ara wl̈oshko kjorkwang shäryak jong kjiyo tjok tëy or go wl̈eniyo tjeng kjwara, wl̈oshko di iokl̈o shäryak dbur sho shõyl̈ṍr go tjeng kjwöbö, roshko l̇l̇ëbo l̈õ pjl̈ëbl̈ëe. L̇l̇ëbo l̈õ pjl̈ëbl̈ë l̈i, e Sbö nopga syõ l̈i l̈okl̈o.  
\v 9-10 Eshko ga tono l̈ok tëkwo tjagl̈ën, tëkwoyo eni: 
\q1 «Pja zröraba, 
\q2 ga bop srëng kwonop l̈i go ga nopga tjwl̈ẽnop Sbö kong. 
\q2 Nopga tjwl̈ẽnop l̈i tjëyoga obl̈ë obl̈ë uunkong, tjl̈ẽ tjl̈õkwo obl̈ë obl̈ë uunkong, kjok shto obl̈ë obl̈ë uunkong sopga bakoe. 
\q1 Nopga l̈i iorop beno l̈öng syõshtagaga parkë l̈öng Sbö, borwa pjl̈uyo l̈i kong, 
\q2 ga ber l̈öng nopga l̈öng kjok ëre kjing go l̈i ichaga ĩyado wl̈o. 
\q1 E kjĩshko ga pja tjwl̈õ ara, 
\q2 kjibokwo kjwe kjrëp wl̈o, 
\q2 kjibokwo smokkl̈o iak l̈ok ba kjarbo go l̈i döp wl̈o bakoe» l̈e. 
\p  
\v 11 Eshko ga ĩnor jek obi, ga ĩn ga Sbö parkagaga kjok dogo so l̈öng träk l̇l̇ëm, shtëy ga äär l̇l̇ëm wl̈eni. L̈öng pjl̈u sökkl̈o l̈i, äya l̈öng së l̈i, tjl̈apgaga l̈i, e pjl̈or kal̈ëkong pjribrie.  
\v 12 Ga tjl̈ẽno l̈ok dbo ara. Tjl̈ẽ ga 
\q1 «¡Öng zröraba kjwe tjwl̈õ ara, 
\q2 dbo ara l̈i ber ba kong wl̈o, 
\q2 l̇l̇ëbo tjwl̈õ ara tjeng kës l̈i ber ba kong wl̈o, 
\q2 kjok miydë ara l̈i ber ba kong wl̈o, 
\q2 bangkjrëba wl̈o, 
\q2 iëba ber kësbang, tjwl̈õ ara wl̈o, 
\q2 poshrëkoba wl̈o bakoe!» l̈e. 
\p  
\v 13 Eshko ga l̇l̇ëbo tjeng kës shäryara Sbörë kjok dogo, kjok ëre kjing go, kl̈ung ëre dorko, dl̈ung tjrëko, e tjl̈ẽno l̈ok uunkong bakoe. Tjl̈ẽ ga 
\q1 «¡Sök pjl̈u sökkl̈o kjing go kjwe, Öng kjwe, 
\q2 e poshrërwa ĩyado, 
\q2 bangkjrërwa ĩyado, 
\q2 iërwa ber l̈öng këskës, tjwl̈õ ara ĩyado, 
\q2 dbo ara l̈i ber ba kong ĩyado bakoe!» l̈e. 
\p  
\v 14 Ga äya l̈öng së dogl̈o pkëng (4) l̈i tjl̈ẽ ga «Ber eni» l̈e, ga tjl̈apgaga l̈i kjök tono, ga sök pjl̈u sökkl̈o kjing go l̈i, Öng l̈i, e poshrëra l̈ok. 
\c 6  
\s1 Kjibokwo smokkl̈o iak l̈ok kjibokwo kjarbo go 
\p  
\v 1 E irgo ga ĩn ga Öng Wl̈ẽp Ushko So L̇l̇gwokl̈ë l̈i, kjibokwo smokkl̈o iak l̈ok kjibokwo go kjwo kjäk (7) l̈i döra kjwara. Ga kur ga äya l̈öng së l̈i kjl̈ara tjl̈ẽno dbo go, kjrik wl̈eni. Tjl̈ẽ ga «¡Pja tegö!» l̈e.  
\v 2 Ga ĩnor jek obi, ga ĩn ga kwomgl̈a sök kjl̈ara kjl̈o pjl̈ubl̈ún. Kjl̈ara sök ba kjing go wl̈oshko sböng tjeng kjwangna. Ga kong pjl̈u dl̈u iokl̈o twaraba kjwara. E irgo ga jek sök kwomgl̈a l̈i kjing go, oba zang wl̈o l̈e wl̈eni. 
\p  
\v 3 E irgo ga kjibokwo smokkl̈o döra Öng l̈irë kjwara obi. Eshko ga kur ga äya l̈öng së l̈i kjl̈ara obi tjl̈ẽ ga «¡Pja tegö!» l̈e.  
\v 4 Eshko ga kwomgl̈a wen sök kjl̈ara obi, kjl̈o srëzrë́n. Kjl̈ara sök ba kjing go. Ga kong dröng twaraba kjwangna kësbange. Ga kong dbo twaraba l̇l̇ëbo wl̈ẽp kjok ëre kjing go l̈i pjiya wl̈o, nopga ber l̈öng ëng zrök wl̈o. 
\p  
\v 5 E irgo ga kjibokwo smokkl̈o döra Öng l̈irë kjwara obi, e tjok ga öötong kjwo mya. Eshko ga kur ga äya l̈öng së l̈i kjl̈ara obi tjl̈ẽ ga «¡Pja tegö!» l̈e. Ga ĩnor jek obi, ga ĩn ga kwomgl̈a wen sök kjl̈ara obi, kjl̈o sĩ. Kjl̈ara sök ba kjing go, wl̈oshko l̇l̇ëbo tjl̈ĩkkl̈o tjeng kjwara.  
\v 6 Ga kur ga ëbo tjl̈ẽno äya l̈öng së dogl̈o pkëng (4) l̈öng l̈ishko dwayo. Tjl̈ẽ ga «Nopga iëy ber l̈öng parkë dbar kjwara, dwl̈a kjrina bayo gök tjung wl̈eni\f + \fr 6:6 \fk Gök tjung wl̈eni\ft , e \fk bayo litro kjwara dik.\f* ãska dö, l̇l̇ëm ga dwl̈a kjrina obi bayo gök tjung wl̈eni kjwo mya ãska döe. Gueniyo kjyo, kjil̇l̇gwo bo dyo, e iëy srer l̇l̇ëme» l̈e. 
\p  
\v 7 E irgo ga kjibokwo smokkl̈o döra Öng l̈irë kjwara obi. Eshko ga kur ga äya l̈öng së l̈i kjl̈ara obi tjl̈ẽ ga «¡Pja tegö!» l̈e.  
\v 8 Ga ĩnor jek obi, ga ĩn ga kwomgl̈a wen sök kjl̈ara obi, kjl̈o shwëshwë. Kjl̈ara sök ba kjing go ko Shinmo Kägäyo, ga kjl̈ara obi jek shäng ba irgo ko Shinmo Shtoyo. Kjok kjwang jĩkong l̈i shdöktong beno kjringgwo pkëng (4), ga epga kong dbo twaraba nopga l̈öng kjok kjrina l̈i zrök pjir wl̈o. Ga zröra dröng go, pjl̈i go, swl̈o go, äya kjl̈oshko so go bakoe. 
\p  
\v 9 E irgo ga kjibokwo smokkl̈o döra Öng l̈irë kjwara obi, e tjok ga öötong kjwo shkëng (5). Eshko ga ĩn ga shinmoga sëya l̈öng l̇l̇ëbo l̈õ pjl̈ëbl̈ë sukkl̈o jong eshko l̈i dirko. Epga l̈öng së obishko ga Sbö tjl̈õkwo kjrara l̈ok, ga l̈ara oba kong, ga zröraba e kjĩshko.  
\v 10 Eshko ga epga tjl̈ẽno dbo go. Tjl̈ẽ ga «Tjl̈apga, l̇l̇ëye shäryëp woydë l̈i shäryëp ga pjl̈úe. Pja eröe. Pja pjl̈o bek bakoe. ¿Äär jong l̇l̇ono ga nopga l̈öng kjok kjing go l̈i shdum, tjawa zröra l̈ok l̈i kjĩshko?» l̈e.  
\v 11 Eshko ga kjl̈ara kjl̈ara kong shwong twaraba ko pjl̈ubl̈ún, ga ëbo tjl̈ẽ ba kong l̈ok ga «Koshozĩ sira obi, bomi pjeyoga Sbö parkagaga zrökoba bomipjõy dik wl̈o l̈i, e zröraba pjir guing» l̈e. 
\p  
\v 12 E irgo ga kjibokwo smokkl̈o döra Öng l̈irë kjwara obi. Eshko ga ĩnor jek obi, ga ĩn ga yo tjwe pjang kësbang kjrina, dl̈o kworkwono beno pjang yẽt, shwong ko yẽt wl̈eni, mok kworkwono beno pjang srëzrë́n, srëng wl̈eni,  
\v 13 dbala l̈ono ter l̈ok kjok ëre kjing go, kjor ko \tl higuera\tl* bakwara pjl̈ukdëshko ga bo l̈ono wl̈eni,  
\v 14 kjok dogo jek jëktëng erä, kjibokwo diroy wl̈eni, ga dl̈up l̇l̇ë, di tjrëko l̇l̇ë, dl̈ung tjrëko l̇l̇ë, e opkwono l̈ok kjok shto obl̈ë uunkong. 
\p  
\v 15 Eshko ga pjl̈upga l̈öng kjok ëre kjing go, nopga tjwl̈õ ara wl̈eniyo, ëngkjwaga kägäyoga, nopga uunkong parkagaga tjwl̈ẽk l̈öng pjir wl̈eniyore, de l̇l̇ëmde, e töktong l̈öng uunkong guëng l̈ok ööng roshko, ak këskës tjeng dl̈up dirko bakoe.  
\v 16 Ga tjl̈ẽ l̈öng dl̈up kong, ak kong ga «Pjãy tarzong borwa kjing go. Tjawa jnezĩ bomi dorko, tjawa wl̈ẽya sök pjl̈u sökkl̈o kjing go l̈irë l̇l̇ëm wl̈o, tjawa shdũya Öng l̈irë ba iir ara l̈i go l̇l̇ëm wl̈o bakoe.  
\v 17 Borwa shdũzl̈ong dbaryo l̈araba l̈i öötonge. Ëye omkuk kjang ga äe» l̈e l̈öng eni. 
\c 7  
\s1 Nopga dogl̈o sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pkëng kjingsho sak dbäw dbäw pjl̈ogl̈o pkëng (144,000) iak l̈ok l̇l̇ëbo jyãgl̈o go 
\p  
\v 1 E irgo ga ĩn ga Sbö parkagaga kjok dogo so tjeng dogl̈o pkëng (4), kojono l̈öng kjok pjir worbo kjringgwo pkëng (4) l̈ishko, ga pjl̈uk tek eshko dwayo l̈i bänkira, kjok l̇l̇ë, dl̈ung l̇l̇ë, kjor l̇l̇ë, e pjiya l̇l̇ëm wl̈o.  
\v 2 Epga kong dbo twaraba, kjok ëre pjiya wl̈o, dl̈ung bakoe. Ga ĩn ga Sbö parkaga kjok dogo so kjl̈ara obi tek tjwe shäng dl̈o wen tëm shwo l̈ëkong dwayo, wl̈oshko Sbö Sök Ĩyado l̈i jyãgl̈o. Ga tjl̈ẽno parkagaga dogl̈o pkëng (4) l̈öng l̈i kong. Tjl̈ẽ ga  
\v 3 «Kjok l̇l̇ë, dl̈ung l̇l̇ë, kjor l̇l̇ë, e pjimi l̇l̇ëm, äär jong l̇l̇ëbo jyãgl̈o ioroy Sbö parkagaga l̈öng kës l̈i bokdo go guing» l̈e.  
\v 4 Eshko ga kur ga Israel tjëyoga iak l̈ok l̇l̇ëbo jyãgl̈o go l̈i dogl̈o sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pkëng kjingsho sak dbäw dbäw pjl̈ogl̈o pkëng (144,000). 
\li1  
\v 5 Judá tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Rubén tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Gad tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1  
\v 6 Aser tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Neftalí tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Manasés tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1  
\v 7 Simeón tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Leví tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Isacar tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1  
\v 8 Zabulón tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 José tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\li1 Benjamín tjëyoga iak l̈ok dogl̈o sak dbäw dbäw pjl̈ogl̈o sak kjwara kjingsho sak dbäw dbäw pjl̈ogl̈o pjök (12,000). 
\s1 Nopga ara doyono l̈öng shwong ko pjl̈ubl̈ún 
\p  
\v 9 E irgo ga ĩnor jek obi, ga ĩn eshko pjl̈u sökkl̈o l̈i, Öng l̈i, e bokshto ga nopga l̈öng träk l̇l̇ëm, shtëy ga äär l̇l̇ëm wl̈eni. Tjëyoga obl̈ë obl̈ë uunkong l̈öng eshko. Nopga kjok obl̈ë obl̈ë uunkong so l̈öng eshko. Nopga tjl̈ẽ tjl̈õkwo obl̈ë obl̈ë uunkong l̈öng eshko bakoe. Doyono l̈öng shwong pjl̈ubl̈ún go, kjl̈ara kjl̈ara wl̈oshko mek korga.  
\v 10 Ga tjl̈ẽno dbo go. Tjl̈ẽ ga 
\q1 «¡Borwa Sbö, e sök pjl̈u sökkl̈o kjwe kjing go! 
\q2 ¡No döga l̈i kjwe! 
\q2 ¡No döga l̈i Öng kjwe bakoe!» l̈e. 
\m  
\v 11 Sbö parkagaga kjok dogo so kojono l̈öng pjl̈u sökkl̈o l̈i, äya l̈öng së dogl̈o pkëng (4) l̈i, tjl̈apgaga l̈i, e pjl̈or kal̈ëkong pjribri l̈i, e kjujono bokdo kjl̈ay kl̈ung go, ga Sbö poshrëra l̈ok.  
\v 12 Tjl̈ẽ ga 
\q1 «¡Ber eni! 
\q1 ¡Borwa Sbö, 
\q2 e poshrërwa ĩyado, 
\q2 e iërwa ber kësbang, tjwl̈õ ara ĩyado, 
\q2 kjok miydë ara l̈i ber ba kong ĩyado, 
\q2 “Tjawa wopjl̈ú ba tjok” l̈ërwa ĩyado, 
\q2 dbo ara l̈i ber ba kong ĩyado bakoe! 
\q1 ¡Ber eni!» l̈e. 
\p  
\v 13 Eshko ga tjl̈apgaga l̈öng l̈i kjl̈ara tjl̈ẽ bor kong ga «¿L̈öng shwong ko pjl̈ubl̈ún kjwe ë, kjone so, e miydëpde?» 
\p  
\v 14 «Tjl̈apga, kjwepga ë miydër l̇l̇ëme» l̈ër ba kong. 
\p Kuya ga tjl̈ẽ bor kong ga «Kjwepga to jek l̈öng song jl̈õ, l̇l̇ëbo weno owa kësbang dbaryo, gueniyo ba shwong, e kwoshkwara Öng kjwe srëng l̈i go beno pjl̈ubl̈úne.  
\v 15 E kjĩshko ga l̈öng Sbö pjl̈u sökkl̈o kjwe bokshto, ga beno l̈öng parkë ba u roy shkë dbae. Ga kjwepga daga beno Sbörë om go.  
\v 16 Beno l̈öng pjl̈i kuk ame, wodogro ame, suya dl̈orë ame, barwe kjok kjl̈ikdë ame bakoe.  
\v 17 Öng sök pjl̈u sökkl̈o jong kjweshko go kjwe ber ba daga, kjwepga söya äär di shji ie ber l̈öng së jl̈õkoyo wl̈eniyo buk l̈ishko. Ga ba boryo krö̃ya Sbörë, ber l̈öng sl̈ar ame wl̈o» l̈e. 
\c 8  
\s1 L̇l̇ëbo l̈õ pjl̈ëbl̈ë bapkwo 
\p  
\v 1 E irgo ga kjibokwo smokkl̈o döra Öng l̈irë kjwara obi, e tjok ga öötong kjwo kjäk (7). Eshko ga kjok dogo beno kjing wop tjoke. 
\p  
\v 2 E irgo ga ĩn ga Sbö parkagaga kjok dogo so dogl̈o kjäk (7) l̈öng Sbö bokshto l̈i kong wl̈i twaraba kjwara kjwarae.  
\v 3 Eshko ga Sbö parkaga kjok dogo so tek shäng kjl̈ara obi, wl̈oshko l̇l̇ëbo l̈õ pjl̈ëbl̈ë bapkwo shäryak dbur sho shõyl̈ṍr go, ga öötong shäng l̇l̇ëbo l̈õ pjl̈ëbl̈ë sukkl̈o shäryak dbur sho shõyl̈ṍr go jong l̈i zl̈ong. Eshko ga kong l̇l̇ëbo l̈õ pjl̈ëbl̈ë twaraba ara, suya Sbö nopga syõ l̈i tjok, l̇l̇ëbo l̈õ pjl̈ëbl̈ë sukkl̈o jong pjl̈u sökkl̈o bokshto l̈i kjing go wl̈o.  
\v 4 Ga l̇l̇ëbo l̈õ pjl̈ëbl̈ë l̈i yõ jem pjang Sbö parkaga l̈i orkwo dwayo Sbö bokshto, Sbö nopga syõ l̈i tjok. 
\p  
\v 5 Eshko ga iök sëya kjrara Sbö parkaga l̈irë kjwöbö, l̇l̇ëbo l̈õ pjl̈ëbl̈ë sukkl̈o l̈i dwayo, ga iara l̇l̇ëbo bapkwo l̈i roy, beno tjunge. E irgo ga iök sëya tjeng ba bapkwo roy l̈i dbura jer kjok ëre kjing go. Eshko ga kjrik ri ri l̈e ara, l̇l̇gwl̈ëng tur jong l̇l̇etl̇l̇et l̇l̇aw pogo, yo iano bakoe. 
\s1 Wl̈i 
\p  
\v 6 E irgo ga Sbö parkagaga dogl̈o kjäk (7) l̈i poshäryono l̈öng pjir, ba wl̈i l̈i bakwë wl̈o. 
\p  
\v 7 Sbö parkaga bäm l̈i, ba wl̈i bakwara, ga iök l̈ono ter kjok ëre kjing go, di zeng kjwol̈ong tjok, srëng tjok bakoe. Ga kjok kjwang jĩkong l̈i shdöktong beno kjringgwo mya, ga kjok kjrina l̈i sura pjir, kjor l̇l̇ë, kjl̈o sho l̇l̇ë tjeng eshko l̈i tjok. 
\p  
\v 8 E irgo ga Sbö parkaga kjl̈ara obi, ba wl̈i bakwara, ga l̇l̇ëbo so dl̈up kësbang pjë jong ri ri kjoyo, e dburaba jer dl̈ung roshko. Ga dl̈ung kjwang jĩkong l̈i shdöktong beno kjringgwo mya, ga dl̈ung kjrina l̈i kworkwono beno srëng eröe.  
\v 9 Ga l̇l̇ëbo tjeng së ba roy l̈i kjëtong dret, kjyong jëk tjeng ba kjing go l̈i pjitong dret bakoe. 
\p  
\v 10 E irgo ga Sbö parkaga kjl̈ara obi, ba wl̈i bakwara, e tjok ga öötong pjl̈ogl̈o mya. Eshko ga di l̇l̇ë, di bäng l̇l̇ë, e shdöktong beno kjringgwo mya, ga dbala l̈ono kjwara kësbang, iök ri ri wl̈eni, di kjrina l̈i kjing go.  
\v 11 Dbala l̈i ko Këä, ga di kjrina l̈i iara beno tjeng këä. Di sreno l̈i kjĩshko ga nopga wol̈ono arae. 
\p  
\v 12 E irgo ga Sbö parkaga kjl̈ara obi, ba wl̈i bakwara, ga dl̈o kãl̈ã shdöktong beno kjringgwo mya, ga kjrina l̈i kworkwono beno yẽt, mok kãl̈ã shdöktong beno kjringgwo mya, ga kjrina l̈i kworkwono beno yẽt, dbala kãl̈ã shdöktong beno kjringgwo mya, ga kjrina l̈i kworkwono beno yẽt bakoe. E kjĩshko ga dba l̈i shdöktong beno kjringgwo mya, ga dbar kjwobi go ga kjrina l̈i beno kjok ro yẽt, shkë l̈i shdöktong beno kjringgwo mya bako, ga shkër kjwobi go ga kjrina l̈i beno kjok ro yẽt bakoe. 
\p  
\v 13 Eshko ga ĩnor jek obi, ga ĩn ga döbung kuror dbuk pjang kjwara kjok dogo, tjl̈ẽno pjang dbo go. Tjl̈ẽ ga «¡Pjãy nopga l̈öng kjok kjing go, Sbö parkagaga kjok dogo so dogl̈o mya obi l̈öng ba wl̈i bakwë wl̈o! ¡E kjĩshko ga pjãy song jl̈õ, pjãy song jl̈õ, pjãy song jl̈õe!» l̈e. 
\c 9  
\p  
\v 1 E irgo ga Sbö parkaga kjl̈ara obi, ba wl̈i bakwara, e tjok ga öötong pjl̈ogl̈o shkëng (5). Eshko ga ĩn ga dbala l̈ono ter kjwara kjok dogo dwayo, kjok ëre kjing go. Dbala l̈i kong u bäng bäng dökkl̈o twaraba kjwara, pjl̈ëbgwo jong rong anmoyõ l̈i dökkl̈o.  
\v 2 Ga pjl̈ëbgwo l̈i kop dörashko ga yõ tëm tur jong ba roy dwayo, l̇l̇ëbo sukkl̈o kësbang anmoyõ wl̈eni.  
\v 3 Eshko ga yõ jem pjang l̈i roshko dwayo sekwa ter tur jong träk l̇l̇ëm, shdöktong kjok kjwang jĩkong, ga kong dbo twaraba nopga ue wl̈o, no ue dyërë wl̈eni.  
\v 4 Gueniyo ichara kjl̈o sho l̇l̇ë, kjor korga l̇l̇ë, l̇l̇ëbo kësong l̇l̇ë, e uë l̇l̇ëme. Ichara nopga Sbö jyãgl̈o l̈ok ba bokdo go l̇l̇ëm wl̈eniyo l̈i uë eröe.  
\v 5 Gueniyo ichara beno l̈öng nopga l̈i zrök l̇l̇ëm, beno l̈öng ba shdung ara, äär jong mogl̈o shkëng (5). Ue l̈okshko ga kuya ga uara dyërë wl̈eni.  
\v 6 Eshko dbaryo ga nopga l̈öng l̈i wol̈on woydë, gueniyo wol̈on l̇l̇ëme. Wol̈on woydë ara ëmdë ga wol̈on ga äe. 
\p  
\v 7 Sekwa l̈ër l̈i, e so kwomgl̈a doyak pjir, jongya ëngkjwë wl̈o l̈i kjoyoe. Ba kä kjing go l̇l̇ëbo pjang so pjl̈upga dl̈u iokl̈o shäryak dbur sho shõyl̈ṍr go l̈i kjoyo, ba bokkwo so no bokkwo kjoyo,  
\v 8 ba käkzong so wal̈ë käkzong kjoyo, ba kowo so dbong kowo kjoyo bakoe.  
\v 9 Ba worbu wl̈ikokl̈o so worbu wl̈ikokl̈o shäryak dröng sho go kjoyo, ba sjä̃gä, e pjl̈uk so jëkkl̈o ara dopshira kwomgl̈arë jëk l̈öng ëngkjwë wl̈o l̈i kjoyo,  
\v 10 ba pjl̈ak, e dbo go jong swl̈et, so dyë shju kjoyo, ga ba pjl̈ak l̈i go ga nopga shduna ara, äär jong mogl̈o shkëng (5).  
\v 11 Sekwa l̈i pjl̈uyo sök kjl̈ara. Hebreo tjl̈õkwo go ko Abadón. Grecia so tjl̈õkwo go ko Apolión.\f + \fr 9:11 \ft Hebreo tjl̈õkwo \fk Abadón\ft , Grecia so tjl̈õkwo \fk Apolión\ft , e \fk no pjiga \ft l̈okl̈o.\f* E Ä parkaga, parkë shäng pjl̈ëbgwo jong rong anmoyõ l̈i daga. 
\p  
\v 12 L̇l̇ëbo owa anmoyõ bäm l̈i jek tjän. Gueniyo beno kjring pjök obi. 
\p  
\v 13 E irgo ga Sbö parkaga kjl̈ara obi, ba wl̈i bakwara. L̇l̇ëbo l̈õ pjl̈ëbl̈ë sukkl̈o shäryak dbur sho shõyl̈ṍr go jong Sbö bokshto l̈i goshko sjö iak l̈ok kjwang pkëng (4). Eshko ga ybö kuror pjl̈ara sjö l̈ok l̈i go dwayo.  
\v 14 Tjl̈ẽ parkaga wl̈i bakwaga l̈i kong ga «Sbö parkagaga kjok dogo so tjeng dogl̈o pkëng (4), pjrik l̈öng di kësbang ko Éufrates pjangshko l̈i, e döba» l̈e.  
\v 15 Sbö parkagaga tjeng dogl̈o pkëng (4) l̈i, e iak beno pjrik l̈öng eshko, ba dl̈oyo, dbaryo, mokyo, l̈uyo l̈i öötong guing, nopga zrök ara eshko wl̈o. Ga nopga l̈öng kjok ëre kjing go l̈i shdöktong beno kjringgwo mya. Ga parkagaga tjeng dogl̈o pkëng (4) l̈i döktong, ga nopga kjrina l̈i zröra l̈ok drete. 
\p  
\v 16 Eshko ga ëngkjwagaga jëk l̈öng kwomgl̈a söga ara. Kur ga dogl̈o sak dbäw dbäw pjl̈ogl̈o sak dbäw dbäw pjl̈ogl̈o sak dbäw dbäw pjl̈ogl̈o sak dbäw pjl̈ogl̈o pjök (200,000,000).  
\v 17 Kwomgl̈a, ba söga, e ĩnor, shji yoĩno wl̈eni l̈i, ga so eni. Ba worbu wl̈ikokl̈o kjwo srëzrë́n, ding ding, shõyl̈ṍr bakoe. Kwomgl̈a kägä l̈i so dbong kägä kjoyoe. Iök tur jong ba kjak roy dwayo, yõ tjok, akkwo ko \tl azufre\tl* tjok bakoe.  
\v 18 Ga nopga l̈öng kjok ëre kjing go l̈i shdöktong beno kjringgwo mya. Ga kjrina l̈i wol̈ono dret, l̇l̇ëbo tur ba kjak roy ëre kjĩshko.  
\v 19 Kwomgl̈a l̈i dbo ara tjeng ba kjakshko, ba pjl̈akshko bakoe. Ba pjl̈ak l̈i kägä tjok, so dgur kjoyo, ga nopga shduna l̈ok ara e go. 
\p  
\v 20 Nopga zröra l̇l̇ëbo owa l̈irë l̇l̇ëm, beno l̈öng së l̈i, l̇l̇ëbo owa shärye l̈öng l̈i rayara l̈ok l̇l̇ëm, beno l̈öng Ä sëyaga poshrëk, l̇l̇ëbo jyãgl̈o obl̈ë obl̈ë l̈i poshrëk bakoe. L̇l̇ëbo jyãgl̈o l̈i shäryak dbur sho shõyl̈ṍr go, dbur sho pjl̈ubl̈ún go, dröng sho so kl̈ung sho kjoyo go, ak go, kjorkwang go bako, gueniyo kjok ĩga l̈ok l̇l̇ëm, kjok kuga l̈ok l̇l̇ëm, jëk l̇l̇ëm bakoe.  
\v 21 Enido ga nopga l̈i beno l̈öng l̇l̇ëbo owa shäryë obl̈ë obl̈ë, oba zröya, oba ie ybi go, pë no orkwosmono ba tjok l̇l̇ëm l̈i tjok, l̈ũrkë bakoe. L̇l̇ëbo owa shäryara kës ëre, e rayara l̈ok l̇l̇ëme. 
\c 10  
\s1 Sbö parkaga kjok dogo so, wl̈oshko kjibokwo chirawa 
\p  
\v 1 E irgo ga ĩn ga Sbö parkaga kjok dogo so dbo ara wl̈eniyo ter pjang kjl̈ara obi kjok dogo dwayo, doyono pjäng sho go wl̈eni, donku pjang ba dl̈u kjing bakoe. Ba bokkwo so dl̈o kjoyo, ba dre so iök kjoyo.  
\v 2 Wl̈oshko tjeng kjibokwo kjwara chirawa, roshwing pjir ba orkwo kjing go. Ba dre kël̈ëkong iara dl̈ung kjing, ga mil̈ëkong iara kl̈ung kjing.  
\v 3 Eshko ga öö l̈e dbo go, dbong kjl̈uno wl̈eni. L̈ara pjirshko ga kjrik kjwang kjäk (7) l̈i dl̈oktong, ri ri l̈e kjwangnashko kjwangnashko.  
\v 4 Tjl̈õkwo l̈ara kjrik kjwang kjäk (7) l̈irë tër wl̈o l̈oror, gueniyo kur ga ybö ter kjok dogo dwayo pjl̈ara, tjl̈ẽ bor kong ga «Jnes ber tjeng bop pjl̈úshko. Tëy l̇l̇ëme» l̈e. 
\p  
\v 5 Eshko ga Sbö parkaga kojono shäng dl̈ung kjing, kl̈ung kjing l̈i, orkwo kël̈ëkong poyono jem kjok dogo,  
\v 6-7 ga tjl̈ẽno jl̈õkoyo. Tjl̈ẽ ga «¡L̇l̇ëye koshëy ame! L̇l̇ëye shäryë wl̈o l̈i, e l̈aga Sbörë, ga l̈ara ba tjl̈õkwo l̈agaga kong dënashko. Mal̈ing ga Sbö parkaga kjok dogo so kjl̈ara obi l̈i, ba wl̈i bakwe. Ga l̇l̇ëbo l̈ara Sbörë kës l̈i, e shäryë eshko» l̈e. Tjl̈ẽno enishko ga tjl̈ẽno jl̈õkoyo, Sök Ĩyado l̈i ko go. Kjok dogo, kl̈ung ëre, dl̈ung, e shäryaga l̈i e, l̇l̇ëbo tjeng kës eshko l̈i tjok. 
\p  
\v 8 E irgo ga kur ga ybö ter kjok dogo dwayo pjl̈ara jek obi, tjl̈ẽ bor kong ga «Pja nom, ga kjibokwo roshwing pjir tjeng Sbö parkaga kojono shäng dl̈ung kjing, kl̈ung kjing wl̈oshko l̈i kjrëba» l̈e. 
\p  
\v 9 Eni ga tja jek öötong Sbö parkaga l̈i zl̈ong, ga kjibokwo l̈i rokoror ba kong. Kuya ga tjl̈ẽ bor kong ga «Kjrozong. Uozong. Zrërop bop kjak roy ga kup ga pjl̈ëbl̈ë, or dyo dik, gueniyo jer öötong bop bögwo roshko ga bop bögwo l̈i ie ber kë ara» l̈e.  
\v 10 Eni ga kjroror ba wl̈oshko dwayo, ga uoror. Tjeng bor kjak royshko ga pjl̈ëbl̈ë, or dyo dik, gueniyo jer öötong bor bögwo roshko ga bor bögwo l̈i iara beno kë ara. 
\p  
\v 11 Eshko ga ëbo tjl̈ẽ bor kong ga «L̇l̇ëbo wen tjëyoga obl̈ë obl̈ë tjok l̈i, l̇l̇ëbo wen kjok shto obl̈ë obl̈ë sopga tjok l̈i, l̇l̇ëbo wen nopga tjl̈ẽ tjl̈õkwo obl̈ë obl̈ë tjok l̈i, l̇l̇ëbo wen pjl̈upga obl̈ë obl̈ë tjok l̈i, e l̈os jek obi» l̈e. 
\c 11  
\s1 Sbö tjl̈õkwo l̈agaga do pjök 
\p  
\v 1 Eshko ga tja kong kjorkwang twara ëborë kjl̈ara, l̇l̇ëbo tjl̈ĩkkl̈o wl̈eni, ga tjl̈ẽ bor kong ga «Pja kojõs, pja nom Sbö u tjl̈ĩk, öng sho sukkl̈o jong ba zl̈ong bäng l̈i tjok, ga l̈öng ba poshrëk eshko l̈i shtëp bakoe.  
\v 2 Gueniyo ba u bäng kjako l̈i tjl̈ĩp l̇l̇ëm, e twak beno tjeng nopga judío l̇l̇ëm wl̈eniyo l̈i kong. Sbö kjokyo Jerusalén, e twak beno tjeng ba wl̈oshko, epga jek l̈öng, tek l̈öng e roshko mogl̈o sak pkëng kjingsho pjök (42) wl̈o.  
\v 3 Eshkoshko ga nopga ichër do pjök, bor tjl̈õkwo roy l̈ë oba kong dbargwo sak dbäw dbäw kjingsho sak dbäw pjl̈ogl̈o pjök kjingsho sak tjer (1,260) wl̈o. Ga shärye l̈ok eni, doyono l̈öng sopokkl̈o shwongyo go» l̈e. 
\p  
\v 4 Kjok ëre Tjl̈apgayo l̈i bokshto ga kjor l̈ok do pjök ko \tl olivo\tl*, iök shjiy bapkwo l̈ok do pjök bakoe. Kjor l̈i, iök bapkwo l̈i, e nopga do pjök l̈i jyãgl̈o.  
\v 5 Ëye tjwe ba shdung l̈eshko ga iök to tur nopga do pjök l̈i kjak roy dwayo, ga ba wl̈oyoga tjwe l̈öng l̈i pjiya drete. Ëye ba shdung woydë ga wol̈on eni kjl̈uwe.  
\v 6 Epga kong dbo twaraba, shunyo sl̈ong, äär jong Sbö tjl̈õkwo l̈ara pjir guing. Ga kong dbo twaraba obi, di kjl̈opswë ber srëng wl̈o, swl̈o obl̈ë obl̈ë ichë tjwe kjok ëre kjing go wl̈o bakoe. 
\p  
\v 7 Sbö tjl̈õkwo l̈ara l̈ok pjir irgo ga äya owa sök pjl̈ëbgwo jong rong anmoyõ l̈ishko l̈i shrono shäng ëngkjwono ba tjok, ga epga zröra.  
\v 8 E irgo ga ba doyo beno tjeng kjok tjwl̈õ ara l̈i irbo bäng go, Tjl̈apga Jesús zröraba pjang kjl̈ös go dënashko kjokyo l̈ishko. Kjok eshko l̈i, e so Sodoma kjokyo, Egipto kjokyo, e kjoyoe.  
\v 9 Ga nopga tjwe shinmoga tjeng l̈i ĩk ara, tjëyoga obl̈ë obl̈ë uunkong, nopga tjl̈ẽ tjl̈õkwo obl̈ë obl̈ë uunkong, kjok shto obl̈ë obl̈ë uunkong sopga bakoe. Öör l̈öng eni äär jong dbargwo mya kjingsho bëy, gueniyo ëye wotjl̈ĩno ba doyo tjeng l̈i jnek l̇l̇ëme.  
\v 10 Eshkoshko ga nopga l̈öng kjok ëre kjing go beno l̈öng wopjl̈ú, ga l̇l̇ëbo twara l̈ok ëng kong, ba sënggl̈o, shinmoga wol̈ono dbaryo l̈i shrëk wl̈o. Shäryara l̈ok eni, l̈öng së obishko ga nopga l̈i shduna Sbö tjl̈õkwo l̈agaga l̈irë ara kjĩshko. 
\p  
\v 11 Gueniyo öötong dbargwo mya kjingsho bëyshko ga woshrara Sbörë iröng obi, ga kojongö l̈öng. Ĩya nopga l̈öng l̈irë ga bangkjre l̈ok ara anmoyõ.  
\v 12 Eshko ga ybö kura nopga do pjök l̈irë ter kjok dogo dwayo pjl̈ara, tjl̈ẽno dbo go. Tjl̈ẽ ba kong ga «Pjãy tëmö» l̈e. Ga ĩya ba wl̈oyogarë l̈öng wopro ga to jem kjok dogo, pjäng sho roshko. 
\p  
\v 13 Jekdo eshko ga yo to jem kësbang. Kjok eshko l̈i shdöktong beno kjringgwo sak kjwara (10), ga kjrina l̈ishko ga u l̈ok l̈i toktong pjir, ga nopga wol̈ono dogl̈o sak dbäw dbäw pjl̈ogl̈o kjäk (7,000). Beno l̈öng së l̈i, Sbö sök kjok dogo l̈i bangkjrara l̈ok ara, ga iara l̈ok beno kësbang, tjwl̈õ ara bakoe. 
\p  
\v 14 L̇l̇ëbo owa anmoyõ pjök l̈i jek tjän. Gueniyo kjrina obi l̈i tjwe döröe. 
\s1 Wl̈i kjwara obi 
\p  
\v 15 E irgo ga Sbö parkaga kjl̈ara obi, ba wl̈i bakwara, e tjok ga öötong pjl̈ogl̈o kjäk (7). Eshko ga ëbo tjl̈ẽno l̈ok dbo ara kjok dogo. Tjl̈ẽ ga 
\q1 «Bi Tjl̈apga, ba Cristo, 
\q2 e öötong beno l̈öng nopga l̈öng kjok kjing go l̈i pjl̈uyoga, 
\q2 ga iche l̈ok ĩyado» l̈e. 
\m  
\v 16 E irgo ga tjl̈apgaga kjok l̇l̇gwega wl̈eniyo dogl̈o sak pjök kjingsho pkëng (24) l̈öng Sbö bokshto, ba pjl̈u sökkl̈o kjwara kjwara kjing go l̈i kjök tono, ga Sbö poshrëra l̈ok,  
\v 17 tjl̈ẽ ga 
\q1 «Tjl̈apga Sbö, 
\q2 l̇l̇ëye shäryëp woydë l̈i shäryëp ga pjl̈úe. 
\q1 Pja sök ĩyado. 
\q1 Bop dbo ara go ga pja öötong sök nopga l̈öng kës l̈i ichaga. 
\q2 Tjawa wopjl̈ú bop tjok e kjĩshko. 
\q1  
\v 18 Tjëyoga l̈öng kës l̈i iirkono ara bop kongshko ga 
\q2 pja iirkono ara ba kong l̈ok bakoe. 
\q1 Shinmoga l̇l̇gwezl̈ong dbaryo l̈i öötonge. 
\q1 Bop parkagaga, bop tjl̈õkwo l̈agaga, ba potjwl̈ẽzl̈ong dbaryo l̈i öötong bakoe. 
\q2 Bop nopga tjwl̈õ ara, tjwl̈õ chira, bop ko bangkjragaga l̈öng kës, 
\q2 epga potjwl̈ẽp pjire. 
\q1 Ga kjok pjiga l̈i pjip drete» l̈e. 
\p  
\v 19 Eshko ga Sbö u jong kjok dogo l̈i u bäng roshwinaba jong oojong, ga roshko ba tjl̈õkwo woyoshrokl̈o bapkwo buk l̈i ĩnor. Eshko ga l̇l̇gwl̈ëng tur jong l̇l̇etl̇l̇et l̇l̇aw pogo, kjrik ri ri l̈e ara, yo ian pjang, di zeng shrono ter kjwol̈ong ara bakoe. 
\c 12  
\s1 Wal̈ë, äya so Ööka kjoyo 
\p  
\v 1 E irgo ga l̇l̇ëbo jyãgl̈o weno pjang kësbang kjok dogo. Wal̈ë shäng kjl̈ara eshko, doyono shäng dl̈o go wl̈eni, mok pjang ba dre dirko, ga dbala tjeng ba kä kjing kjwo sak kjwara kjingsho pjök (12), pjl̈u dl̈u iokl̈o wl̈eni.  
\v 2 Wal̈ë l̈i shäng kjl̈araso l̇l̇ëm, ga ay l̈e ara, chida buk dörö kjĩshko.  
\v 3 Eshko ga l̇l̇ëbo jyãgl̈o weno pjang kjrina obi. Äya kësbang sök kjl̈ara kjl̈o srëzrë́n, so Ööka kjoyoe. Äya l̈i kägä kjwo kjäk (7), pjl̈u dl̈u iokl̈o iak jong kjwara kjwara l̈i kjing go, sjö kjwang sak kjwara (10) bakoe.  
\v 4 Dbala shdöktong beno kjringgwo mya. Ga kjrara kjrina ba pjl̈ak go, ga dbura ter l̈ok kjok ëre kjing go. Eshko ga öötong sök wal̈ë l̈i bokshto, chida l̈i wen bukshko ga ue jekdo wl̈o l̈e. 
\p  
\v 5 E irgo ga chida buk kjl̈ara domer. L̇l̇ono ga tjëyoga l̈öng kës l̈i iche kjange. Gueniyo eshko ga chida l̈i kjara Sbörë ey dwayo, ga söra jek öötong kjok dogo beno sök ba tjok.  
\v 6 Wal̈ë l̈ira töktong jek öötong sök kjok shäryara Sbörë ba kong kjok dogro no l̇l̇ëmshko l̈ishko, ga dara Sbörë eshko dbargwo sak dbäw dbäw kjingsho sak dbäw pjl̈ogl̈o pjök kjingsho sak tjer (1,260). 
\s1 Miguel ëngkjwono äya so Ööka kjoyo l̈i tjok 
\p  
\v 7 E irgo ga Sbö parkaga kjok dogo so ko Miguel, e töno ba pjeyoga Sbö parkaga kjok dogo so tjok, ga ëngkjwono l̈ok äya l̈i tjok, äya pjeyoga kjok dogo so l̈i tjok bakoe.  
\v 8 Ga äya l̈i jenoe. E kjĩshko ga epga beno l̈öng eshko kjok dogo ame.  
\v 9 Äya l̈i dburaba ter kjok ëre kjing go, ba pjeyoga kjok dogo so l̈i tjok. Äya l̈i, dgur dënashko l̈i e. E kowëba Ä. Nopga Sbö miydë l̇l̇ëm wl̈eniyo jyãpgwaga l̈i e. 
\p  
\v 10 Eshko ga kur ga ëbo tjl̈ẽno dbo go kjok dogo. Tjl̈ẽ ga 
\q1 «Eeri ga ba nopga döra Sbörë pjire. 
\q1 Bi pjeyoga rotaga shkë dba bi Sbö bokshto l̈i, 
\q2 e dburaba jer kjok ëre kjing go. 
\q1 E go ga Sbö dbo ara, Cristo dbo ara, 
\q2 e ĩy wẽl̈ëe. 
\q1 Ga Sbö beno sök bi pjl̈uyo. 
\q1  
\v 11 Ä zana bi pjeyogarë pjir, 
\q2 Öng Wl̈ẽp Ushko So L̇l̇gwokl̈ë srëng l̈i go, 
\q2 Sbö tjl̈õkwo l̈ara l̈ok l̈i go bakoe. 
\q1 “Tjawa mär Öng l̈i go” l̈e l̈ok, 
\q2 ga wol̈on l̈i bangkjre l̈ok l̇l̇ëme. 
\q1  
\v 12 E kjĩshko ga pjãy l̈öng kjok dogo, 
\q2 pjãy wopjl̈úe. 
\q1 Gueniyo pjãy l̈öng kjok kjing go, 
\q2 pjãy l̈öng dl̈ung roy, 
\q2 pjãy song jl̈õe. 
\q1 Ä to jer öötong shäng bomi shwoy, 
\q2 ga iirkë ara, 
\q2 dbar ba kong beno sira dö kjĩshko. 
\q1 Pjãy l̈öng song jl̈õ e kjĩshko» l̈e. 
\p  
\v 13 Äya so Ööka kjoyo l̈i l̈ono ter kjok ëre kjing go eni. Miydarashko ga to shäng chida l̈i mekë irpjang.  
\v 14 Gueniyo wal̈ë l̈i kong, sjä̃gä twara Sbörë ko pjök, këskës, döbung sjä̃gä wl̈eni. E irgo ga sjä̃gä l̈i go ga dbuktong to, öötong sök kjok shäryara Sbörë ba kong kjok dogro no l̇l̇ëmshko l̈ishko, shaya dgur l̈irë ga ä l̈ishko, ga dara Sbörë eshko, l̈u pjl̈ogl̈o sak mya kjingsho bëy. 
\p  
\v 15 E irgo ga di ichara dgur l̈irë tur ba kjak roy dwayo, di kës wl̈eni, wal̈ë l̈i söya di l̈irë wl̈o l̈e.  
\v 16 Gueniyo wal̈ë l̈i kjimtara kl̈ung l̈irë, jyã dl̈oktong, ga di jer l̈i dwara pjire.  
\v 17 E kjĩshko ga äya l̈i iirkono ara wal̈ë l̈i kong, ga to ëngkjwë ba tjëyoga tek beno ba irgo l̈i tjok. Nopga Sbö tjl̈õkwo kol̈aga mär l̈öng Jesús go l̈i epga.  
\v 18 Äya l̈ira beno sök dl̈ung sor go erä. 
\c 13  
\s1 Äya weno tëm dl̈ung roy dwayo kjl̈ara 
\p  
\v 1 E irgo ga ĩn ga äya wen tëm sök kjl̈ara obi, dl̈ung roy dwayo. Äya l̈i kägä kjwo kjäk (7), sjö kjwang sak kjwara (10), pjl̈upga dl̈u iokl̈o iak jong kjwangna kjwangna l̈i kjing go. Ko jyã tak pjang kägä kjwara kjwara l̈i go, Sbö l̈ãywokl̈o owa wl̈eni.  
\v 2 Äya l̈i so dbong kjoyo, ba dre so äya kjl̈oshko so sok kësbang zok ara l̈i dre kjoyo, ba kjak so dbong kjak kjoyo bakoe. Eshko ga iara Äya so Ööka kjoyo l̈irë beno sök ba pjl̈u sökkl̈o kjing go, ga kong dbo twara, oba iche wl̈o.  
\v 3 Ĩn ga äya l̈i kägä kjwara zak jong ba skato, gueniyo pjano iröng. Ĩya nopga l̈öng kjok ëre kjing go l̈irë ga yëy l̈e l̈ok erä, ga uunkong töno l̈ok ba tjok.  
\v 4 Äya so Ööka kjoyo l̈i poshrëra l̈ok, dbo twara Äya l̈i kong kjĩshko. Äya weno tëm dl̈ung roy dwayo l̈i poshrëra l̈ok bakoe. Tjl̈ẽ l̈ok ga «¿Ëye äär äya kjwe dikdo? ¿Ëye äya kjwe zangdo?» l̈e l̈ok eni. 
\p  
\v 5 Äya l̈i iara Ärë krë ara wl̈o, tjl̈ẽ tjl̈õkwo Sbö l̈ãywokl̈o owa wl̈eni wl̈o, oba ichë mogl̈o sak pkëng kjingsho pjök (42) wl̈o bakoe.  
\v 6 Eshkoshko ga Sbö l̈ãywara owa jl̈õkoyo, Sbö ko, ba u, nopga l̈öng kjok dogo, e l̈ãywara owa uunkong.  
\v 7 E kong dbo twara Ärë to ëngkjwë Sbö nopga tjok wl̈o, ga epga zanae. Ga kong dbo twara Sbörë, kjok shto obl̈ë obl̈ë uunkong sopga, tjëyoga obl̈ë obl̈ë uunkong, nopga tjl̈ẽ tjl̈õkwo obl̈ë obl̈ë uunkong, e iche wl̈o.  
\v 8 Nopga l̈öng kjok ëre kjing go kës ko tak pjang Öng Wl̈ẽp Ushko So L̇l̇gwokl̈ë zröraba l̈i kjibokwoyo go l̇l̇ëm wl̈eniyo, Äya l̈i poshrëra l̈ok. Kjok shäryayde Sbörë l̇l̇ëm obishko ga ëye ber sök së ĩyado Sbö tjok wl̈o ga ba ko, e tak l̈ok kjibokwo ëre go tjän. 
\p  
\v 9 Ëye kwomgwo tjok ga woyde ga kuya yõtso. 
\q1  
\v 10 Ëye shakoba, sökoba kjok shto obl̈ë wl̈o ga 
\q2 shakoba, sökoba kjok shto obl̈ë. 
\q1 Ëye zrökoba dröng go wl̈o ga 
\q2 zrökoba dröng go. 
\m Miydëy tjl̈õkwo ëre go ga l̇l̇ëbo wen Sbö nopga kong owa ëmdë ga woyde ga kuya kjang, Sbö raye l̇l̇ëm bakoe. 
\s1 Äya weno tëm kl̈ung roy dwayo kjl̈ara 
\p  
\v 11 E irgo ga ĩn ga äya wen tëm sök kjl̈ara, kl̈ung roy dwayo. Äya l̈i sjö kjwang pjök, so öng wl̈ẽp ushko so l̇l̇gwokl̈ë sjö kjoyo, gueniyo tjl̈ẽ äya so Ööka kjoyo l̈i dik.  
\v 12 Era parkono Äya zak pjano l̈i dbo go, ga nopga l̈öng kjok ëre kjing go kës l̈i iara ba poshrëk.  
\v 13 Eshko ga l̇l̇ëbo ĩydëba l̇l̇ëm wl̈eniyo shäryara kësbang obl̈ë obl̈ë ara, kjrina l̈i, iök ichara ter kjok dogo dwayo shrono kjok ëre kjing go oba bokshto.  
\v 14 L̇l̇ëbo eni l̈i shäryara äya bäm ĩyo l̈i kong. E go ga nopga l̈öng kjok kjing go l̈i jyãpgwara uunkong. Ga epga iara äya bäm ĩyo l̈i jyãgl̈o shäryë kjl̈ara, ie l̈ok ber kësbang, tjwl̈õ ara wl̈o. Äya bäm ĩyo l̈i kjupäshko ga zaraba dröng go, gueniyo wol̈ono l̇l̇ëm, pjano iröng obi.  
\v 15 Äya weno tëm kl̈ung roy dwayo l̈i kong dbo twaraba, äya jyãgl̈o shäryara nopgarë l̈i iche tjl̈ẽ wl̈o. Eshko ga ëye äya jyãgl̈o l̈i poshrëra l̇l̇ëm ga ichara zrökoba wl̈o.  
\v 16 Ga nopga iara uunkong l̇l̇ëbo jyãgl̈o ie ba bokdo go, l̇l̇ëm ga ba orkwo kël̈ëkong go. Nopga tjwl̈õ ara wl̈eniyo, nopga tjwl̈õ chira wl̈eniyo, nopga dbur ara wl̈eniyo, nopga song wl̈eniyo, parkagaga tjwl̈ẽk l̈öng pjir wl̈eniyo, nopga eni l̇l̇ëm wl̈eniyo, e iara uunkong ba shäryë eni.  
\v 17 Eni ga ëye l̇l̇ëbo jyãgl̈o l̈i iak l̈ok l̇l̇ëm ga l̇l̇ëye tjwl̈ẽya ga ä, l̇l̇ëye soyneya ga ä bakoe. L̇l̇ëbo jyãgl̈o l̈i, e äya ko l̈i l̈okl̈o, ba ko l̈i shtoroy ga äär bayo kjöm l̈i l̈okl̈o bakoe. 
\p  
\v 18 Ba ko l̈i shtëy ga äär bayo kjöm l̈i miydëy wl̈o ga woyde ga shji kjok miydë ara. Ëye kjok miydë ara ga shte ga pjl̈ú, ga äär ber sak dbäw pjl̈ogl̈o tjer kjingsho sak tjer kjingsho tjer (666). Era domer kjl̈ara l̈i l̈okl̈o. 
\c 14  
\s1 Öng Wl̈ẽp Ushko So L̇l̇gwokl̈ë, nopga dogl̈o sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pkëng kjingsho sak dbäw dbäw pjl̈ogl̈o pkëng (144,000) 
\p  
\v 1 E irgo ga ĩnor jek obi, ga ĩn ga Öng Wl̈ẽp Ushko So L̇l̇gwokl̈ë l̈i sök Sión dl̈upyo go bor bokshto. Eshko ga yorkaga nopga dogl̈o sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pkëng kjingsho sak dbäw dbäw pjl̈ogl̈o pkëng (144,000), uunkong l̈i bokdo go Öng l̈i ko jyã tak pjang, Öng Data l̈i ko jyã tak pjang bakoe.  
\v 2 Eshko ga kur ga l̇l̇ëbo ter pjl̈uk jong kjok dogo dwayo, pjl̈uk l̈i so di kës pjl̈ubl̈unyo l̈i pjl̈ukyo kjoyo, so kjrik ri ri l̈i pjl̈ukyo kjoyo, so kjorkwang shäryak jong kjiyo tjok tëy or go wl̈eniyo tëba l̈öng l̈i kjoyo bakoe.  
\v 3 Ga nopga l̈öng l̈i tono l̈ok tëkwo tjagl̈ën, pjl̈u sökkl̈o jong kjok dogo l̈i bokshto, äya l̈öng së dogl̈o pkëng (4) l̈i bokshto, tjl̈apgaga kjok l̇l̇gwega wl̈eniyo l̈i bokshto bakoe. Gueniyo nopga dogl̈o sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pkëng kjingsho sak dbäw dbäw pjl̈ogl̈o pkëng (144,000) l̈i tokdo eröe. Nopga döktong l̈öng kjok ëre kjing go l̈i epga. Ëye obl̈ë të ba tëkwo l̈i go ga äe.  
\v 4-5 Epga l̇l̇ëbo owa shäryono wal̈ëga tjok l̇l̇ëm, jyõrkono l̇l̇ëm bakoe. Beno l̈öng pogo l̇l̇ëye dret Sbö bokso erä. Ga to l̈öng Öng l̈i irgo, jek kjone l̈ishko. Epga döraba nopga l̈öng kës l̈i tjrëko dwayo, ga twaraba Sbö kong, Öng l̈i kong, ba sënggl̈o, bo kwirkono bäm ĩyo l̈i kjraraba, twaraba ba kong wl̈eni. 
\s1 Sbö parkagaga kjok dogo so dogl̈o mya 
\p  
\v 6 Eshko ga ĩn ga Sbö parkaga kjok dogo so dbuk pjang kjl̈ara, tjl̈õkwo pjl̈ú ber ĩyado wl̈o l̈i söya tjeng nopga l̈öng kjok ëre kjing go kës l̈i kong, kjok shto obl̈ë obl̈ë uunkong sopga kong, tjëyoga obl̈ë obl̈ë uunkong kong, nopga tjl̈ẽ tjl̈õkwo obl̈ë obl̈ë uunkong kong bakoe.  
\v 7 Tjl̈ẽno pjang dbo go. Tjl̈ẽ ga «Nopga l̇l̇gweya Sbörë dbaryo l̈i öötonge. E kjĩshko ga Sbö bangkjrozĩ, iozĩ ber kësbang, tjwl̈õ ara, poshrëzĩ bakoe. Kjok uunkong shäryaga l̈i e, kjopkwo, kjok ëre, dl̈ung, di wen l̈ok kjone pogo bakoe» l̈e. 
\p  
\v 8 Eshko ga Sbö parkaga kjok dogo so wen pjang ba irgo kjl̈ara, tjl̈ẽ ga «¡E pjitonge! ¡Babilonia kjokyo tjwl̈õ ara l̈i pjitonge! Tjëyoga obl̈ë obl̈ë pinggaga l̇l̇ëbo owa shäryë obl̈ë obl̈ë l̈i e. Epga ichara Sbö rayë bakoe. E pjitong e kjĩshko» l̈e. 
\p  
\v 9 Eshko ga Sbö parkaga kjok dogo so wen pjang ba irgo kjl̈ara obi. Tjl̈ẽno pjang dbo go. Tjl̈ẽ ga «Ëye äya l̈i poshrëk, ëye ba jyãgl̈o l̈i poshrëk, ëye bokdo go, l̇l̇ëm ga orkwo go ba jyãgl̈o l̈i jyã tak pjang ga  
\v 10 Sbö iirkono ara ba kong. E kjĩshko ga ëye Sbö iono ber iirshko ga shdũya sorë ga epga shdũya eni bakoe. Epga suya akkwo ko \tl azufre\tl* pjë jong ri ri l̈i tjok, Sbö parkagaga kjok dogo so bokshto, Öng l̈i bokshto bakoe.  
\v 11 Epga shdũya eni ĩyado, ba iök l̈i sjer l̇l̇ëm shkë jĩk, dba jĩk. Shäryë eni, äya l̈i poshrëra l̈ok kjĩshko, ba jyãgl̈o l̈i poshrëra l̈ok kjĩshko, bokdo go, l̇l̇ëm ga orkwo go ba jyãgl̈o l̈i jyã tak pjang kjĩshko bakoe» l̈e. 
\p  
\v 12 Miydëy tjl̈õkwo ëre go ga l̇l̇ëbo wen Sbö nopga, ba kol̈agaga l̈i kong owa ëmdë ga woyde ga kuya kjang, Jesús raye l̇l̇ëm bakoe. 
\p  
\v 13 Eshko ga kur ga ybö ter kjok dogo dwayo pjl̈ara, tjl̈ẽ ga «Tjl̈õkwo ëre tozong. Eeri jek l̈ëkong ga ëye mär beno l̈öng Tjl̈apga Jesús go wol̈onoshko guing ga ber wopjl̈úe» l̈e. 
\p Kuya Sbö Sëyarë ga tjl̈ẽ ga «Ëng, eni. Epga sjeno parkorbo, ga potjwl̈ẽya Sbörë ba pak l̈i kjĩshko» l̈e. 
\s1 Dwl̈a bo skozl̈ong dbaryo, kjil̇l̇gwo bo skozl̈ong dbaryo 
\p  
\v 14 Eshko ga ĩnor jek obi, ga ĩn ga pjäng sho wen pjang kjrina pjl̈ubl̈ún, kjing go sök kjl̈ara so no to ter kjok dogo dwayo l̈i kjoyo, dl̈u kjing go pjl̈u dl̈u iokl̈o pjang kjwara shäryak dbur sho shõyl̈ṍr go, wl̈oshko dröng tjeng kjwangna zönge.  
\v 15 Eshko ga Sbö parkaga kjok dogo so opshino shäng kjl̈ara, Sbö u jong l̈i roy dwayo, ga tjl̈ẽno sök pjäng sho kjing go l̈i kong dbo go. Tjl̈ẽ ga «Dwl̈a bo kwirkono tjän, ga dwl̈a bo skozl̈ong dbaryo öötonge. E kjĩshko ga bop dröng kjwe sös, ga pja nom dwl̈a bo tjeng l̈i skok» l̈e.  
\v 16 Kuya ga ba dröng l̈i go ga dwl̈a bo tjeng kjok ëre kjing go kës l̈i zakza tas erä. 
\p  
\v 17 Eshko ga Sbö parkaga kjok dogo so opshino shäng kjl̈ara obi, Sbö u jong kjok dogo l̈i roy dwayo, wl̈oshko dröng tjeng kjwangna zöng bakoe.  
\v 18 E irgo ga Sbö parkaga kjok dogo so wen shäng kjl̈ara obi. E parkë shäng iök pjë jong ri ri l̇l̇ëbo l̈õ pjl̈ëbl̈ë sukkl̈o kjing go l̈i dë, sjer l̇l̇ëm wl̈o. Eshko ga tek shäng öng sukkl̈o jong l̈i shwoy dwayo, ga tjl̈ẽno wl̈oshko dröng tjeng l̈i kong dbo go. Tjl̈ẽ ga «Kjil̇l̇gwo bo kwirkono tjän. E kjĩshko ga bop dröng kjwe sös, ga pja nom jer kjok kjing go, kjil̇l̇gwo bo tjeng l̈i töng» l̈e.  
\v 19 Kuya ga ba dröng l̈i go ga kjil̇l̇gwo bo tjeng kjok ëre kjing go kës l̈i zakza tas, ga dbukza jer kjil̇l̇gwo bo l̇l̇ruzl̈ong shtoyo l̈i roshko. E no shdũzl̈ong shtoyo l̈i l̈okl̈o, ëye Sbö iono iirshko ga shdũya tjeng l̈ishko.  
\v 20 Kjil̇l̇gwo bo l̇l̇ruzl̈ong shtoyo l̈i jong kjok eshko l̈i worbo go. Eni ga kjil̇l̇gwo bo l̈i l̇l̇rura eshko, ga ba srëng l̈i tur jer jong e roy dwayo di kësbang wl̈eni, öötong kjl̈ay kwomgl̈a kjëngso go, äär jong pjolae. Shji äär ba pjl̈arbo wl̈o ga woyde ga shji jëk dbargwo sak kjwara (10) dik.\f + \fr 14:20 \fk Shji jëk dbargwo sak kjwara dik \ft l̈e l̈i, e \fk kilómetro kjringgwo sak dbäw pjl̈ogl̈o mya (300) \ft l̈okl̈o.\f* 
\c 15  
\s1 Sbö parkagaga kjok dogo so dogl̈o kjäk (7), no shdunggl̈o kjringgwo kjäk (7) 
\p  
\v 1 E irgo ga ĩn ga l̇l̇ëbo jyãgl̈o wen pjang kësbang kjok dogo kjrina obi. Sbö parkagaga kjok dogo so tjeng dogl̈o kjäk (7), no shdunggl̈o söya tjeng kjringgwo kjäk (7) ba tjok. Sbö iir l̈i pjir e go.  
\v 2 Eshko ga l̇l̇ëbo ĩn buk so dl̈ung shäryak batl̈ë sho go kjoyo, roshko iök. Dl̈ung l̈i sor go nopga kojono tjeng ara, äya l̈i zana l̈ok, ba jyãgl̈o l̈i zana l̈ok, ba ko l̈i shtoroy ga öötong kjöm l̈i zana l̈ok bakoe. Kong kjorkwang shäryak jong kjiyo tjok tëy or go wl̈eniyo twara Sbörë kjwara kjwara tjän, ga beno tjeng ba wl̈oshko.  
\v 3 Eshko ga tono l̈ok Sbö parkaga tek dënashko so Moisés l̈i tëkwo, Öng l̈i tëkwo bako, tëkwoyo eni: 
\q1 «Tjl̈apga Sbö, 
\q2 l̇l̇ëye shäryëp woydë l̈i shäryëp ga pjl̈úe. 
\q1 Bop pak shäryorop l̈i, 
\q2 e kësbang, wol̈ëso. 
\q1 L̇l̇ëbo bek l̈i, 
\q2 e shäryopdë. 
\q1 Tjëyoga kës pjl̈uyo ĩyado l̈i pja eröe. 
\q1  
\v 4 Tjl̈apga, ëye, pja bangkjre l̇l̇ëmyo drete. 
\q2 Ëye, bop ko ie ber kësbang, tjwl̈õ ara l̇l̇ëmyo drete. 
\q1 Pja eröe. 
\q2 Ëye obl̈ë eniyo drete. 
\q1 Bop pak pjl̈o bek l̈i beno wẽl̈ë, 
\q2 tjëyoga tjeng kës l̈i äär bop poshrëk e kjĩshko.» 
\p  
\v 5 E irgo ga ĩnor jek obi, ga ĩn kjok dogo ga Sbö u jong eshko l̈i jong oojong.  
\v 6 Ga Sbö parkagaga kjok dogo so opshino tek ba roy dwayo dogl̈o kjäk (7), no shdunggl̈o söya tjeng kjringgwo kjäk (7) ba tjok. Doyono l̈öng shwong ko pjl̈ubl̈ún, drëpdrë, pjl̈ú, tjwl̈õ ara wl̈eniyo go, dop pjrikkl̈o shäryak dbur sho shõyl̈ṍr go pjang ba pjl̈ú kjing go.  
\v 7 Eshko ga äya l̈öng së dogl̈o pkëng (4) kjl̈ara, epga kong di iokl̈o twara kjwara kjwara, shäryak dbur sho shõyl̈ṍr go, roshko Sbö Sök Ĩyado l̈i iir.  
\v 8 Ga Sbö u jong l̈i dl̈ino jong yõ sho go, Sbö dbo kãl̈ã tjeng eshko kjĩshko. Eni ga ëye opzrëk jek ba roy ga ä, äär jong no shdunggl̈o kjringgwo kjäk (7) söya Sbö parkagaga dogl̈o kjäk (7) l̈irë tjeng ba tjok l̈i shäryono pjir guing. 
\c 16  
\s1 Di iokl̈o kjwo kjäk (7) roshko Sbö iir 
\p  
\v 1 Eshko ga ybö kuror tek Sbö u jong l̈i roy dwayo pjl̈ara, tjl̈ẽno Sbö parkagaga dogl̈o kjäk (7) l̈i kong. Tjl̈ẽ ga «Pjãy nom Sbö iir tjeng di iokl̈o kjwo kjäk (7) roshko kjwe kwong kjok kjing go» l̈e.  
\v 2 Kuya l̈ok ga Sbö parkaga bäm ĩyo l̈i, l̇l̇ëbo tjeng ba di iokl̈o roshko l̈i kwona ter kjok ëre kjing go, ga nopga jyã tak l̈ok äya jyãgl̈o go, äya poshrëgaga l̈öng l̈i, e pogl̈o go ũta weno ara, bang ara. 
\p  
\v 3 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona ter dl̈ung kjing, ga dl̈ung dyo l̈i kworkwono beno obl̈ë, so shinmoga srëngyo kjoyo, ga l̇l̇ëbo tjeng kës dl̈ung roy l̈i kjëtong drete. 
\p  
\v 4 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona ter di l̇l̇ë, diwa l̇l̇ë, e kjing, e tjok ga öötong pjl̈ogl̈o mya. Eshko ga di l̈i kworkwono beno srëng.  
\v 5-6 Eshko ga Sbö parkaga kjok dogo so kuror kjl̈ara. Di l̇l̇ë ichaga l̈i e. Tjl̈ẽ ga 
\q1 «Sbö, pja sök ĩyado. 
\q2 Pja eröe. 
\q1 Nopga l̈öng l̈i, 
\q2 bop nopga srëng l̈i shira, 
\q2 bop tjl̈õkwo l̈agaga srëng l̈i shira bakoe. 
\q1 E kjĩshko ga 
\q2 iorop beno l̈öng srëng ië, ba shdunggl̈o. 
\q1 Kjok l̇l̇gwerop eni l̈i, 
\q2 e beke» l̈e. 
\m  
\v 7 Eshko ga kur ga l̇l̇ëbo l̈õ pjl̈ëbl̈ë sukkl̈o jong l̈i öö l̈e, tjl̈ẽ ga 
\q1 «Ëng, Tjl̈apga Sbö, 
\q2 l̇l̇ëye shäryëp woydë l̈i shäryëp ga pjl̈úe. 
\q1 Kjok l̇l̇gwerop sorë l̈i, 
\q2 e beke» l̈e. 
\p  
\v 8 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona jek dl̈o kjing, ga dl̈o l̈i kong dbo twara, nopga l̈öng l̈i suya ba kãl̈ã dbo ara l̈i go wl̈o.  
\v 9 Eshko ga nopga l̈öng l̈i sura dl̈o kãl̈ã l̈irë ara. Eni ëmdë ga l̇l̇ëbo owa shärye l̈öng l̈i rayara l̈ok l̇l̇ëm, Sbö iara beno kësbang, tjwl̈õ ara l̇l̇ëm bakoe. L̇l̇ëbo owa l̈i ichara Sbörë ba kong kuzong ga beno l̈öng Sbö ko l̈i l̈ãywë owa erä. 
\p  
\v 10 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona ter äya pjl̈u sökkl̈o jong l̈i kjing go, e tjok ga öötong pjl̈ogl̈o shkëng (5). Eshko ga äya l̈i kjokyo ro zoktong beno yẽt erä. Nopga l̈öng l̈i bang ara kuzong ga beno l̈öng ba kjyorkwo uë.  
\v 11 Eni ëmdë ga l̇l̇ëbo owa shärye l̈öng l̈i rayara l̈ok l̇l̇ëm, beno l̈öng Sbö sök kjok dogo l̈i l̈ãywë owa erä, ba bang ara l̈i kjĩshko, ba ũta l̈i kjĩshko bakoe. 
\p  
\v 12 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona jer Éufrates diyo l̈i kjing, ga di l̈i dano beno dogro, pjl̈upga tek dl̈o wen tëm shwo l̈ëkong dwayo l̈i jek dipzë ba ëngkjwagaga tjok di kar ga pjl̈ú wl̈o.  
\v 13 Eshko ga ĩn ga sëyaga owa wen tjeng dogl̈o mya, so kjl̈äk kjoyoe. Kjl̈ara opshino tek äya so Ööka kjoyo l̈i kjak roy dwayo, kjl̈ara opshino tek ba pjeyo äya owa l̈i kjak roy dwayo, kjl̈ara opshino tek äya dboryaga owa wl̈eniyo l̈i kjak roy dwayo bakoe.  
\v 14 Eshko ga sëyaga owa l̈i to l̈öng l̇l̇ëbo ĩydëba l̇l̇ëm wl̈eniyo shäryë obl̈ë obl̈ë. Ga pjl̈upga l̈öng kjok kjwang jĩkong l̈i töna l̈ok, ëngkjwë Sbö tjok, no l̇l̇gwezl̈ong dbaryo l̈ishko. Sbö, l̇l̇ëye shärye woydë l̈i shärye ga pjl̈úe. 
\p  
\v 15 Cristo tjl̈õkwo woyoshrozĩa. Tjl̈ẽno ga «¡Pjãy sjëke! Tja tjwe, oba tjwe l̈ũrkë ä wl̈eni. Ëye sök bor koshë jl̈õkoyo, sök së, ba shwong shäryak tjeng pjir ba tjok wl̈eni ga ber wopjl̈ú eshko. Eshko ga to shäng kjwor wl̈eni l̇l̇ëm, l̇l̇ëye l̈ökyotke l̇l̇ëm bakoe» l̈ara eni. 
\p  
\v 16 Eni ga pjl̈upga l̈i töna l̈ok pjir, söra l̈ok öötong l̈öng kjok kjrinashko. Hebreo tjl̈õkwo go ga kjok eshko l̈i ko Armagedón. 
\p  
\v 17 E irgo ga Sbö parkaga kjl̈ara obi, l̇l̇ëbo tjeng ba di iokl̈o roshko l̈i kwona jek aan, pjl̈uk jek pjang l̈i kjing, e tjok ga öötong pjl̈ogl̈o kjäk (7). Ga ëbo tjl̈ẽno dbo go pjl̈u sökkl̈o jong Sbö u jong l̈i roy dwayo. Tjl̈ẽ ga «Uunkong l̈i shäryono pjire» l̈e.  
\v 18 Eshko ga l̇l̇gwl̈ëng tur jong l̇l̇etl̇l̇et l̇l̇aw pogo, kjrik ri ri l̈e ara, yo ian pjang kësbang, dbo ara bakoe. Nopga iara Sbörë beno tjeng kjok ëre kjing go tek l̈ëkong ga yo ĩydë eni l̇l̇ëme.  
\v 19 Babilonia kjokyo tjwl̈õ ara l̈i, e shdöktong beno kjringgwo mya, ga tjëyoga obl̈ë obl̈ë l̈i kjokyo pjitong dret bakoe. Babilonia sopga shduna Sbörë ba iir ara l̈i go eni, l̇l̇ëbo owa shäryara l̈ok ara l̈i kjĩshko.  
\v 20 Dl̈ung tjrëko l̇l̇ë, di tjrëko l̇l̇ë, dl̈up l̇l̇ë, e jer piktong drete.  
\v 21 Ga di zeng shrono ter kjwol̈ong nopga beno l̈öng l̈i kjing go. Kjwara kjwara kwing ara kwing dunggwo kjwo sak dbäw (100) wl̈eni dik.\f + \fr 16:21 \fk Dunggwo kjwo sak dbäw (100) dik\ft , e \fk kwing libra sak dbäw (100) wl̈eni dik.\f* Eshko ga nopga l̈öng l̈i shduna Sbörë kjang anmoyõ eni kuzong ga Sbö l̈ãywe l̈ok owa erä. 
\c 17  
\s1 Wal̈ë owa kjl̈ara, äya kjl̈ara 
\p  
\v 1-2 Eshko ga Sbö parkagaga kjok dogo so dogl̈o kjäk (7), wl̈oshko tjeng di iokl̈o kjl̈ara tek shrono shäng bor zl̈ong, ga tjl̈ẽ bor kong ga «Kjok buk kjrina, di arashko. Wal̈ë sök kjl̈ara eshko, to shäng opsoynek domerga obl̈ë obl̈ë kong wl̈eniyo. Pjl̈upga l̈öng kjok ëre kjing go l̈i pono ba tjok, ga ba nopga tjeng kës l̈i ichara l̇l̇ëbo owa shäryë obl̈ë obl̈ë, ichara Sbö rayë bakoe. Eni ga pja tek bor tjok, wal̈ë l̈i shdũya Sbörë l̈i ĩp wl̈o» l̈e. 
\p  
\v 3 Eshko ga tja go Sbö Sëya jl̈õkoyo, ga tja söra parkaga l̈irë jek kjok dogro no l̇l̇ëmshko. Eshko ga ĩn ga wal̈ë sök kjl̈ara, äya sök kjl̈ara l̈i kjing go. Äya l̈i kjl̈o srëzrë́n, kägä kjwo kjäk (7), sjö kjwang sak kjwara (10) bakoe. Ba doyo l̈i go, ko jyã tak l̈ok obl̈ë obl̈ë l̇l̇aw pogo, Sbö l̈ãywokl̈o owa wl̈eni.  
\v 4 Wal̈ë l̈i doyono sök shwong ko dingding shwëshwë go, shwong ko srëzrë́n go bakoe. Shwong l̈i go, l̇l̇ëbo wol̈ësowa smok l̈ok ara, dbur sho shõyl̈ṍr, akkwo wol̈ësowa tjwl̈õ ara wl̈eniyo obl̈ë obl̈ë bakoe. Wl̈oshko di iokl̈o tjeng kjwara, shäryak dbur sho shõyl̈ṍr go, l̇l̇ëbo owa shäryara l̈i, l̇l̇ëbo shäryako l̇l̇ëm shäryara l̈i, e tjeng ba roshko.  
\v 5 L̇l̇ëbo jyã tak pjang ba bokdo go, gueniyo l̇l̇ë l̈okl̈o miydëba l̇l̇ëme. Tak pjang eni: «Babilonia kjokyo tjwl̈õ ara l̈i tja. Wal̈ëga to l̈öng opsoynek domerga obl̈ë obl̈ë kong wl̈eniyo pingga l̈i tja. Nopga ichaga l̇l̇ëbo shäryako l̇l̇ëm shäryë l̈i tja bakoe.»  
\v 6 Ĩn ga wal̈ë l̈i sök nel̈õ, srëng iono ara kjĩshko. Sbö nopga to l̈öng Jesús roy l̈ë oba kong zröra l̈i, e srëngyo iayde. Ĩn ga yëy l̈ër erä. 
\p  
\v 7 Eshko ga Sbö parkaga l̈i tjl̈ẽ bor kong ga «¿Pja opshgawë ega? Wal̈ë jek sök äya kjing go l̈i l̇l̇ë l̈okl̈o l̈ër bop kong. Äya kägä kjwo kjäk (7), sjö kjwang sak kjwara (10), e l̇l̇ë l̈okl̈o l̈ër bop kong bakoe.  
\v 8 Äya ĩnop l̈i dënashko ga sök së, gueniyo eeri ga sök ame. Gueniyo l̇l̇ono ga wen tëm pjl̈ëbgwo jong rong anmoyõ l̈i roy dwayo, ga to jongya shdũya, pjiya Sbörë wl̈o. E kjĩshko ga nopga l̈öng kjok ëre kjing go ko tak pjang Sbö kjibokwoyo go l̇l̇ëm wl̈eniyo kës l̈i, äya l̈i ĩya l̈ok ga yëy l̈e l̈ok erä. Kjok shäryayde Sbörë l̇l̇ëm obishko ga ëye ber sök së ĩyado Sbö tjok wl̈o ga ba ko, e tak pjang kjibokwo ëre go tjän. 
\p  
\v 9 »L̇l̇ëbo ëre l̇l̇ë l̈okl̈o miydëy wl̈o ga woyde ga shji kjok miydë ara. Äya kägä kjwo kjäk (7) l̈i, e dl̈up l̈ok kjwo kjäk (7) l̈okl̈o, ga wal̈ë l̈i sök ba kjing go.  
\v 10 Ba kägä kjwo kjäk (7) l̈i, e pjl̈upga dogl̈o kjäk (7) l̈okl̈o bakoe. Pjl̈upga shkëng (5) jũni wol̈ono tjän, kjl̈ara sök eerishko, ga kjl̈ara obi tjwayde l̇l̇ëm obi. Shrono ga ber sök wop sira döe.  
\v 11 Äya dënashko ga sök së, gueniyo eeri ga sök ame l̈i, e pjl̈u kjl̈ara obi l̈okl̈o, e tjok ga äär dogl̈o kjwong (8). Pjl̈upga dogl̈o kjäk (7) kjl̈ara woshrono iröng obi l̈i e, gueniyo to jongya shdũya, pjiya Sbörë wl̈o bakoe. 
\p  
\v 12 »Sjö kjwang sak kjwara (10) ĩnop l̈i, e pjl̈upga dogl̈o sak kjwara (10) wentë l̇l̇ëm obi l̈i l̈okl̈o. L̇l̇ono ga kong dbo twëba, parkë ber l̈öng no pjl̈uyoga äya l̈i tjok wop sira bakoe.  
\v 13 Eshkoshko ga wotjl̈ĩk l̈ok kjrinaso, ga ba dbo l̈i twe l̈ok äya l̈i kong, ba nopga tjeng kës l̈i iche wl̈o.  
\v 14 Ga ëngkjwë l̈ok Öng Wl̈ẽp Ushko So L̇l̇gwokl̈ë l̈i tjok. Gueniyo Öng l̈i, no kägäyoga uunkong kägäyo l̈i e, pjl̈upga uunkong pjl̈uyo l̈i e bakoe. E kjĩshko ga epga zãya. Ba nopga rokara, kjrara, mär l̈öng ba go ĩyado l̈i l̈öng ba tjok eshko. 
\p  
\v 15 »Wal̈ë to shäng opsoynek domerga obl̈ë obl̈ë tjok wl̈eniyo l̈i ĩnop sök di arashko. Di l̈i, e tjëyoga obl̈ë obl̈ë l̈i l̈okl̈o, nopga tjl̈ẽ tjl̈õkwo obl̈ë obl̈ë l̈i l̈okl̈o bakoe.  
\v 16 Sjö kjwang sak kjwara (10) l̈ok äya go l̈i, wal̈ë owa l̈i ĩywa l̈ok shjiktëng, shdũya l̈ok ara, ga ie l̈ok ber shäng kjwor. E irgo ga sho ue l̈ok, ga doyo suya l̈ok iök go.  
\v 17 Epga wotjl̈ĩno kjrinaso l̈i, ba dbo twara äya kong l̈i, e l̈aga Sbörë, l̈ara eni tek dënashko kjĩshko. Ga shärye l̈ok eni, äär jong l̇l̇ëye l̈ara Sbörë l̈i shäryono pjir guing. 
\p  
\v 18 »Wal̈ë ĩnop l̈i, e kjok tjwl̈õ ara l̈okl̈o, pjl̈upga l̈öng kjok ëre kjing go ichaga sök l̈ishko» l̈e. 
\c 18  
\s1 Babilonia kjokyo pjitonge 
\p  
\v 1 E irgo ga ĩn ga Sbö parkaga kjok dogo so ter shäng kjl̈ara obi, kjok dogo dwayo. E dbo ara, ga kjok ëre kjing iara ba kãl̈ã ara l̈irë beno buk shjiye.  
\v 2-3 Eshko ga tjl̈ẽno dbo go. Tjl̈ẽ ga 
\q1 «¡E pjitonge! 
\q2 ¡Babilonia kjokyo tjwl̈õ ara l̈i pjitonge! 
\q1 Tjëyoga obl̈ë obl̈ë, l̇l̇ëbo owa obl̈ë obl̈ë pina ba kong l̈i, 
\q2 e shäryara l̈ok pjir, 
\q2 Sbö rayara l̈ok bakoe. 
\q1 Pjl̈upga l̈öng kjok ëre kjing go kjl̈obi l̈i, 
\q2 e pono ba tjok wl̈eni. 
\q1 L̇l̇ëbo soynega kjok ëre so l̈i, 
\q2 e dbur shano ara, 
\q2 kjok eshko sopga dbur zano ara kjĩshko. 
\q1 E kjĩshko ga kjok eshko l̈i kworkwono beno buk Ä sëyaga shtoyo shara, 
\q2 sëyaga owa obl̈ë obl̈ë l̈öng eshko. 
\q1 Sënwa owa, woydëy l̇l̇ëm wl̈eniyo, 
\q2 e usho shäryë l̈ok eshko bakoe»\f + \fr 18:2-3 \ft Tek dënashko ga kjibokwo ëre jyã shiraba obl̈ë obl̈ë ara. Ga kjone kjone tjl̈ẽ ga «... e usho shäryë l̈ok eshko, ga äya owa, woydëy l̇l̇ëm wl̈eniyo, e l̈öng eshko bakoe.»\f* l̈e. 
\p  
\v 4 Eshko ga kur ga ybö ter kjok dogo dwayo pjl̈ara, tjl̈ẽ ga 
\q1 «Bor nopga, pjãy opshis kjok kjweshko dwayo, 
\q2 l̇l̇ëbo owa shärye nopga l̈öng kjweshkorë l̈i shäryëmi l̇l̇ëm wl̈o, 
\q2 kjwepga shdũya Sbörëshko ga pjãy shdũya eni l̇l̇ëm bako wl̈o. 
\q1  
\v 5 Nopga l̈öng kjweshko l̈i go owa ara, 
\q2 kjl̈ay kjok dogo. 
\q1 Kjwepga shdũya Sbörë ara, 
\q2 l̇l̇ëbo owa shäryara kës l̈i kjĩshko» l̈e. 
\m  
\v 6 Eshko ga ybö l̈i tjl̈ẽno nopga shdunggaga l̈i kong. Tjl̈ẽ ga 
\q1 «Nopga kjwe l̇l̇ëbo shäryono obl̈ë kong owa sorë ga 
\q2 shäryozĩ ba kong eni pjl̈ogl̈o pjök. 
\q1 Obl̈ë shduna sorë ga 
\q2 nopga kjwe shdũzĩ eni pjl̈ogl̈o pjök bakoe. 
\q1  
\v 7 L̇l̇ëbo shäryara ba kong om go ara, dbur zano ara, 
\q2 ber l̈öng wopjl̈ú wl̈o. 
\q1 Eni ga l̇l̇ëbo shäryozĩ ba kong owa bayo eni, 
\q2 ber l̈öng woydë ara wl̈o. 
\q1 Eerishko ga to l̈öng krë ara. Tjl̈ẽ ga 
\q2 “Tjawa pjl̈u boy wl̈eni, tjawa äär ber syã wl̈eni l̇l̇ëm, 
\q2 l̇l̇ëye wen borwa kong owa wl̈o drete” l̈e. 
\q1  
\v 8 Eni kuzong ga dbar kjwara ga l̇l̇ëbo wen ba kong owa obl̈ë obl̈ë, 
\q2 kjone kjone wol̈on, 
\q2 kjone kjone sl̈ar ara, 
\q2 kjone kjone pjl̈i kuk ara bakoe. 
\q1 Epga shdũya Tjl̈apga Sbörë, ba dbo ara go, 
\q2 ga ba kjok buk kës l̈i suya iök go, ber dret wl̈o» l̈e. 
\p  
\v 9 Pjl̈upga l̈öng kjok ëre kjing go pono wal̈ë l̈i tjok wl̈eni l̈i, l̇l̇ëbo shäryara ba kong om go ara, dbur zano l̈ok ara bakoe. Shäryara l̈ok eni, ber l̈öng wopjl̈ú baĩya dik wl̈o. Eni ga kjok l̈i pjë jong ri rishko ga ba yõ sho jem l̈i ĩya l̈ok ga sl̈ar ara, kjl̈oshtë ara ba kjĩshko.  
\v 10 Eshko ga wal̈ë l̈i shdũya Sbörë ara eni l̈i ĩya ga bangkjre l̈ok ara. Ber l̈öng kjl̈oshtë ara pjolae. Tjl̈ẽ l̈ok ga 
\q1 «¡Babilonia sopga, pjãy tjwl̈õ ara, dbo ara, 
\q2 gueniyo pjãy shduna ara, ga pjãy pjitong mal̈inge! 
\q1 ¡Pjãy song jl̈õe! 
\q2 ¡Pjãy song jl̈õe!» l̈e l̈ok eni. 
\p  
\v 11 Eshko ga l̇l̇ëbo soynegaga kjok ëre so l̈i sl̈ar ara, kjl̈oshtë ara, l̇l̇ëbo tjwl̈ẽkoba eshko ame kjĩshko.  
\v 12 Dbur sho shõyl̈ṍr, dbur sho pjl̈ubl̈ún, akkwo wol̈ësowa tjwl̈õ ara wl̈eniyo obl̈ë obl̈ë, e tjwl̈ẽkoba eshko ame. Shwong ko pjl̈ubl̈ún, pjl̈ú tjwl̈õ ara wl̈eniyo, shwong ko dingding shwëshwë, shwong pjl̈ú wl̈eniyo ko \tl seda\tl*, shwong ko srëzrë́n, e tjwl̈ẽkoba eshko ame. Kjorkwang l̈õ pjl̈ëbl̈ë wl̈eniyo obl̈ë obl̈ë, l̇l̇ëbo wol̈ësowa obl̈ë obl̈ë shäryak l̇l̇ëbo ko \tl marfil\tl* go, shäryak kjorkwang tjwl̈õ ara wl̈eniyo go, shäryak dröng sho so kl̈ung sho kjoyo go, shäryak dröng sho go, shäryak ak ko \tl mármol\tl* go, e tjwl̈ẽkoba eshko ame.  
\v 13 Dl̈i mokyo obl̈ë obl̈ë, l̇l̇ëbo l̈õ pjl̈ëbl̈ë suy wl̈o, dwl̈o poshtikkl̈o l̈õ pjl̈ëbl̈ë obl̈ë obl̈ë, poshtikkl̈o l̈õ pjl̈ëbl̈ë wl̈eniyo obl̈ë obl̈ë, kjil̇l̇gwo bo dyo dbo ara, kjyo pjl̈ú wl̈eniyo, pjl̈ung shosho pjl̈ú wl̈eniyo, e tjwl̈ẽkoba eshko ame. Sögl̈a, öng wl̈ẽp ushko so, kwomgl̈a, jëkkl̈o dopshiga kwomgl̈arë wl̈eniyo, parkagaga tjwl̈ẽk l̈öng pjir wl̈eniyo, nopga obl̈ë obl̈ë, e tjwl̈ẽkoba eshko ame. 
\p  
\v 14 Eshko ga l̇l̇ëbo soynegaga l̈i tjl̈ẽ l̈ok ga 
\q1 «¡Babilonia sopga, 
\q2 l̇l̇ëbo woydoromi ara l̈i, 
\q2 e pjitong drete. 
\q1 L̇l̇ëbo obl̈ë obl̈ë tjwl̈õ ara bomi kong l̈i, 
\q2 e pjitong dret bakoe. 
\q1 ¡Pjãy song jl̈õe! 
\q2 ¡Pjãy song jl̈õe!» l̈e l̈ok eni. 
\p  
\v 15 Eshko ga epga shdũya Sbörë ara eni l̈i ĩya l̇l̇ëbo ëre soynegaga l̈öng l̈irë ga bangkjre l̈ok ara. Ber l̈öng sl̈ar ara, kjl̈oshtë ara pjolae.  
\v 16-17 Tjl̈ẽ l̈ok ga 
\q1 «¡Babilonia sopga, 
\q2 pjãy doyono l̈öng shwong ko pjl̈ubl̈ún, pjl̈ú tjwl̈õ ara wl̈eniyo go, 
\q2 shwong ko dingding shwëshwë go 
\q2 shwong ko srëzrë́n go bakoe! 
\q1 ¡Pjãy obrikkwo wol̈ësowa obl̈ë obl̈ë 
\q2 shäryak dbur sho shõyl̈ṍr go, 
\q2 shäryak akkwo wol̈ësowa tjwl̈õ ara wl̈eniyo obl̈ë obl̈ë go bakoe! 
\q1 Gueniyo l̇l̇ëbo tjwl̈õ ara tjeng kës l̈i pjitong mal̈inge! 
\q1 ¡Pjãy song jl̈õe! 
\q2 ¡Pjãy song jl̈õe!» l̈e l̈ok eni. 
\p Eshko ga kjyong këskës sögaga, ba kägäyoga, nopga jëk l̈öng kjyong këskës go, e ber l̈öng pjola bakoe.  
\v 18 Ga kjok l̈i pjë jong ri rishko ga ba yõ sho jem l̈i ĩya l̈ok ga sl̈ar ara ba kjĩshko. Tjl̈ẽ l̈ok ga «Kjok obl̈ë äär tjwl̈õ ara, kjok kjweni dik l̇l̇ëme» l̈e l̈ok eni.  
\v 19 Eshko ga kl̈ung sho iara ba kä kjing go, l̈öng woydë ara l̈i l̈okl̈o, ga sl̈ar ara, kjl̈oshtë ara. Tjl̈ẽ l̈ok ga 
\q1 «Babilonia sopga, 
\q2 pjãy dbur ara kjĩshko ga 
\q2 kjyong këskës sogoga kës l̈i dbur shano ara. 
\q1 ¡Gueniyo pjãy pjitong mal̈inge! 
\q1 ¡Pjãy song jl̈õe! 
\q2 ¡Pjãy song jl̈õe! 
\q1  
\v 20 ¡Gueniyo kjok dogo so, 
\q2 Sbö nopga, 
\q2 Sbö tjl̈õkwo roy l̈agaga Jesús ãska, 
\q2 Sbö tjl̈õkwo l̈agaga, 
\q1 pjãy shduna l̈ok ara kuzong ga 
\q2 epga shduna Sbörë ara bakoe! 
\q1 ¡Pjãy l̈öng wopjl̈ú e kjĩshko!» l̈e. 
\p  
\v 21 Eshko ga Sbö parkaga kjok dogo so dbo ara wl̈eniyo kjl̈ara apkwo kjrono kjwara kësbang, bayo dwl̈a kjwokäkkl̈o apkwoyo wl̈eni, ga dbura jer dl̈ung roy, ga tjl̈ẽ ga 
\q1 «Apkwo dburor l̈i piktong dret, 
\q2 beno ĩgöy ame. 
\q1 Babilonia kjokyo l̈i pjir dret, 
\q2 ber ĩgöy ame eni bakoe. 
\q1  
\v 22 Kjorkwang shäryak jong kjiyo tjok tëy or go wl̈eniyo, dbonmo, wl̈i, 
\q2 e tëba eshko ame, 
\q2 ga ëye të eshko ame bakoe. 
\q1 Ëye parkë eshko ame, 
\q2 ga oba parkë l̈öng l̈i pjl̈ukyo kuy eshko ame bakoe. 
\q1  
\v 23 Iök shjiy eshko ame, 
\q2 ëye orkwosmok eshko ame bakoe. 
\q1 Dënashko ga l̇l̇ëbo soynegaga kjok eshko so l̈i tjwl̈õ ara. 
\q2 Ga tjëyoga obl̈ë obl̈ë jyãpgwara ba nopgarë ba ybi sho l̈i go. 
\q1  
\v 24 Sbö tjl̈õkwo l̈agaga, Sbö nopga, nopga obl̈ë, 
\q2 e zröraba ara kjok eshko» l̈e. 
\c 19  
\s1 Shji Tjl̈apga poshrëk ara 
\p  
\v 1-2 E irgo ga kur ga nopga träk l̇l̇ëm, öö l̈e ara kjok dogo. Tjl̈ẽ l̈ok ga 
\q1 «¡Shji Tjl̈apga poshrëk ara! 
\q1 Wal̈ë to shäng opsoynek domerga obl̈ë obl̈ë kong wl̈eniyo l̈i, 
\q2 nopga l̈öng kjok kjing go l̈i ichara l̇l̇ëbo owa shäryë obl̈ë obl̈ë, 
\q2 ichara Sbö rayë bakoe. 
\q1 Sbö nopga zröra ara kjĩshko ga 
\q2 wal̈ë l̈i shduna Sbörë. 
\q1 Kjok l̇l̇gwera sorë l̈i, 
\q2 e beke. 
\q1 Bi Sbö, 
\q2 e kësbang, tjwl̈õ ara, dbo ara bakoe. 
\q1 Bi döga kjl̈araso l̈i e» l̈e. 
\p  
\v 3 Ga öö l̈e l̈ok obi, tjl̈ẽ ga 
\q1 «¡Shji Tjl̈apga poshrëk ara! 
\q1 Wal̈ë l̈i doyo pjë ber buk ĩyado, 
\q2 pjë yõyo jem jong l̈i sl̈an l̇l̇ëme» l̈e. 
\p  
\v 4 Eshko ga tjl̈apgaga kjok l̇l̇gwega wl̈eniyo dogl̈o sak pjök kjingsho pkëng (24) l̈i, e kjök tono, ga Sbö sök pjl̈u sökkl̈o kjing go l̈i poshrëra. Tjl̈ẽ l̈ok ga 
\q1 «¡Ber eni! 
\q2 ¡Shji Tjl̈apga poshrëk ara!» l̈e. 
\p  
\v 5 Eshko ga ëbo tjl̈ẽno pjl̈u sökkl̈o jong l̈ishko dwayo. Tjl̈ẽ ga 
\q1 «¡Sbö parkagaga, 
\q2 Sbö bangkjragaga, 
\q2 pjãy tjwl̈õ arare, de l̇l̇ëmde, e l̇l̇ëno l̇l̇ëme. 
\q1 Bi Sbö poshrëzĩ pjãy uunkongdë!» l̈e. 
\p  
\v 6 Eshko ga kur ga nopga träk l̇l̇ëm, öö l̈e ara, pjl̈uk l̈i so di kës pjl̈ubl̈unyo l̈i pjl̈ukyo kjoyo, so kjrik ri ri l̈i pjl̈ukyo kjoyo bakoe. Tjl̈ẽ l̈ok ga 
\q1 «¡Shji Tjl̈apga poshrëk ara! 
\q1 Bi Tjl̈apga Sbö, 
\q2 l̇l̇ëye shärye woydë l̈i shärye ga pjl̈úe. 
\q1 Öötong sök nopga uunkong pjl̈uyo tjän. 
\q1  
\v 7 Shji wopjl̈ú e kjĩshko, 
\q2 iëy ber kësbang, tjwl̈õ ara bakoe. 
\q1 Öng Wl̈ẽp Ushko So L̇l̇gwokl̈ë orkwosmozl̈ong dbaryo l̈i öötong, 
\q2 ba boy poshäryono pjir, 
\q2 sök ba koshë. 
\q1  
\v 8 Kong shwong twara Sbörë doyë e go wl̈o. 
\q2 Shwong l̈i ko pjl̈ubl̈ún, pjl̈ú tjwl̈õ ara, drëpdrë, stek wl̈eniyo» l̈e. 
\m (Shwong l̈e l̈i, e l̇l̇ëbo pjl̈o bek shäryara Sbö nopgarë obl̈ë obl̈ë l̈i l̈okl̈o.) 
\p  
\v 9 Eshko ga Sbö parkaga kjok dogo so l̈i tjl̈ẽ bor kong ga «Tjl̈õkwo ëre tozong. Ëye mana Sbörë tek Öng Wl̈ẽp Ushko So L̇l̇gwokl̈ë orkwosmozl̈ong dl̈iyo l̈i uë ga ber wopjl̈úe» l̈e. Ga tjl̈ẽ obi ga «Tjl̈õkwo ëre l̈ara Sbörë l̈i, e beke» l̈e. 
\p  
\v 10 Kur ga tja kjök tono parkaga l̈i bokshto, ga poshrër l̈oror. Gueniyo tjl̈ẽ bor kong ga «¡Kjwe shäryëp l̇l̇ëme! ¡Tja parkaga Sbö kong eröe! ¡Pja, bop pjeyoga mär l̈öng Jesús tjl̈õkwo go l̈i, pjãy eni bakoe! ¡Ëye Jesús tjl̈õkwo roy l̈ë ga e Sbö tjl̈õkwo l̈aga! ¡E kjĩshko ga Sbö poshrëpdë dey!» l̈e. 
\s1 Kjl̈ara sök kwomgl̈a kjl̈o pjl̈ubl̈ún kjing go 
\p  
\v 11 Eshko ga kjok dogo roshwino beno jong oojong, ga ĩn ga kwomgl̈a sök kjl̈ara kjl̈o pjl̈ubl̈ún. Kjing go sök kjl̈ara. L̇l̇ëye l̈e l̈i shärye eni ĩyado l̈ëba, tjl̈õkwo bek l̈aga l̈i e l̈ëba bakoe. Kjok l̇l̇gweya bek, ga ëngkjwë ba wl̈oyoga tjok bek bakoe.  
\v 12 Ba bokkwo so iök pjë l̈ok ri ri kjoyo, ba kä kjing go pjl̈upga dl̈u iokl̈o l̈ok ara. Ko jyã tak pjang ba go kjwara, miydaga erë om go eröe.  
\v 13 Doyono sök shwong pöraba srëng go pjir l̈i go. E ko Sbö Tjl̈õkwo.  
\v 14 Ëngkjwagaga kjok dogo so uunkong l̈i jek l̈öng kwomgl̈a kjl̈o pjl̈ubl̈ún kjing go ba irgo, doyono l̈öng shwong ko pjl̈ubl̈ún, pjl̈ú tjwl̈õ ara, drëpdrë, stek wl̈eniyo go.  
\v 15 Dröng tur jong sök kwomgl̈a kjing go l̈i kjak roy kjwangna, kowo stek, tjëyoga obl̈ë obl̈ë tjeng kës l̈i pjiya e go wl̈o. L̇l̇ëye shärye woydë Sbörë l̈i shärye ga pjl̈ú, ga iirkono ara nopga l̈öng l̈i kong. E kjĩshko ga domer l̈i ichara ba shdung kjang, shji kjil̇l̇gwo bo shgl̈ëroy bi dre go wl̈eni. Jl̈õkoyo ga epga iche kjange.  
\v 16 Ko jyã tak pjang kjrina, ba shwong pjang l̈i go, ba kworbo do l̈i go bakoe. Ko l̈i tak pjang eni «Pjl̈upga Uunkong Pjl̈uyo, No Kägäyoga Uunkong Kägäyo.» 
\p  
\v 17 Eshko ga ĩn ga Sbö parkaga kjok dogo so shäng kojong kjl̈ara, dl̈o kjing go. Ga tjl̈ẽno sënwa sjëng uaga dbuk l̈ok kjok dogo kës l̈i kong dbo go. Tjl̈ẽ ga «Pjãy tönzong, Sbö dl̈iyo kësbang l̈i uëmi wl̈o.  
\v 18 Eshko ga pjl̈upga doyo sho, ëngkjwaga kägäyoga doyo sho, nopga tjwl̈õ ara wl̈eniyo doyo sho, kwomgl̈a doyo sho, ba sögaga doyo sho, e uëmi ga pjl̈ú, nopga uunkong tjwl̈ẽk l̈öng pjir wl̈eniyore, de l̇l̇ëmde, tjwl̈õ arare, de chirare, uunkong l̈i doyo sho uëmi ga pjl̈úe» l̈e. 
\p  
\v 19 Eshko ga ĩn ga pjl̈upga l̈öng kjok ëre kjing go, ba ëngkjwagaga kës l̈i töna l̈ok äya owa l̈i tjok, ëngkjwë sök kwomgl̈a kjing go l̈i tjok wl̈o, ëngkjwë ba ëngkjwagaga jek l̈öng ba tjok l̈i tjok wl̈o bakoe.  
\v 20 Eshko ga äya owa l̈i shara ba wl̈oyoga l̈irë, ga dbura jer akkwo ko \tl azufre\tl* pjë jong ri ri shtoyo l̈i roshko, ba dboryaga owa wl̈eniyo l̈i tjok. Shto, e kësbang, so dl̈ung kjoyoe. Kjupäbäshko ga ba dboryaga l̈i, l̇l̇ëbo ĩydëba l̇l̇ëm wl̈eniyo shäryara obl̈ë obl̈ë ba kong, ga nopga jyã tak l̈ok äya jyãgl̈o go, äya poshrëgaga l̈öng l̈i, e jyãpgwara e go.  
\v 21 Ga ëngkjwë l̈öngshko ga nopga töno tjeng äya owa tjok l̈i, e zröra dret, dröng tur jong sök kwomgl̈a kjing go l̈i kjak roy l̈i go. Eni ga sënwa l̈i l̈ono ba sho beno tjeng l̈i uë, beno l̈öng bökö tjung ara, no sho l̈i go. 
\c 20  
\s1 L̈u pjl̈ogl̈o sak dbäw dbäw (1,000) 
\p  
\v 1 Eshko ga ĩn ga Sbö parkaga kjok dogo so to ter kjok dogo dwayo kjl̈ara, wl̈oshko tjeng pjl̈ëbgwo jong rong anmoyõ l̈i dökkl̈o, no shakkl̈o shäryak dröng sho go tjeng pjl̈ara kësbang bakoe.  
\v 2-3 Ga äya so Ööka kjoyo l̈i shara, ga pjrira, ber buk eni l̈u pjl̈ogl̈o sak dbäw dbäw (1,000) wl̈o. E irgo ga dbura jer pjl̈ëbgwo jong rong anmoyõ l̈i roshko, kjing bängzara yõtso, tjëyoga obl̈ë obl̈ë jyãpgwe l̇l̇ëm, äär jong l̈u pjl̈ogl̈o sak dbäw dbäw (1,000) wl̈o. Eshko ga döya jek pjl̈ara obi, wop sira wl̈o. Äya l̈i, e Ä om go. 
\p  
\v 4 Eshko ga ĩn ga nopga sirkeno tjeng kjl̈öbö, pjl̈u sökkl̈o tjeng l̈i kjing go. Epga kong dbo twara Sbörë nopga l̇l̇gwek wl̈o. Dënashko ga nopga kä zaraba ara, Jesús roy l̈ara kjĩshko, Sbö tjl̈õkwo roy l̈ara kjĩshko bakoe. Äya owa l̈i poshrëra l̈ok l̇l̇ëm, ba jyãgl̈o l̈i poshrëra l̈ok l̇l̇ëm, bokdo, orkwo, e tak l̈ok ba jyãgl̈o go l̇l̇ëm bakoe. Nopga eniyo l̈i sëyaga ĩnor tjeng eshko, nopga sirkeno tjeng l̈i shwoy. Eshko ga woshrara Sbörë iröng obi, ga beno l̈öng nopga ichë Cristo tjok l̈u pjl̈ogl̈o sak dbäw dbäw (1,000).  
\v 5 Nopga woshrara Sbörë bäm go l̈i epga. L̇l̇amo woshrara l̇l̇ëm, äär jong l̈u pjl̈ogl̈o sak dbäw dbäw (1,000) l̈i pjitong guing.  
\v 6 Woshrara Sbörë bäm go l̈i ber wopjl̈ú, iak beno tjeng dboy Sbö kong bakoe. Nopga wol̈ono tjeng l̈i wol̈on jek obishko ga l̇l̇ëye wen ba kong l̇l̇ëm, ber l̈öng syõshtaga Sbö kong, Cristo kong, ga nopga iche ba tjok l̈u pjl̈ogl̈o sak dbäw dbäw (1,000) bakoe. 
\s1 Ä zanabae 
\p  
\v 7 Äär l̈u pjl̈ogl̈o sak dbäw dbäw (1,000) l̈ishko ga Ä döra ba shdũzl̈ong shtoyo jong l̈i dwayo,  
\v 8 ga opshino to shäng oba jyãpgwë kjok kjwang jĩkong, tö̃ya ëngkjwë wl̈o. Tjëyoga jyãpgwara l̈i ko Gog, Magog bakoe. Epga träk l̇l̇ëm, l̈a sho tjeng dl̈ung kjako wl̈eni.  
\v 9 Eshko ga töno l̈öng kjok kjwang jĩkong dwayo, ga Sbö nopga l̈öng l̈i kjokyo kopjrina l̈ok pjribrie. Kjok woyde Sbörë ara l̈i eshko.\f + \fr 20:9 \fk Kjok woyde Sbörë ara \ft l̈e l̈i, e \fk Jerusalén kjokyo \ft l̈okl̈o.\f* Gueniyo ga iök ichara Sbörë l̈on kjok dogo dwayo, ga epga pjira drete.  
\v 10 Eshko ga Ä, nopga jyãpgwaga l̈i shara, dbura jer akkwo ko \tl azufre\tl* pjë jong ri ri shtoyo l̈i roy, ba pjeyoga äya owa l̈i, ba dboryaga l̈i, e dbura beno tjeng dënashko l̈ishko. Shto, e kësbang, so dl̈ung kjoyoe. Ga mya jĩkong l̈i shdũya ber l̈öng eshko shkë dba, ĩyado wl̈o. 
\s1 Nopga l̇l̇gweraba l̈öng pjl̈u sökkl̈o jong kjwara kësbang, pjl̈ubl̈ún l̈i bokshto 
\p  
\v 11 Eshko ga ĩn ga pjl̈u sökkl̈o jong kjwara kësbang, pjl̈ubl̈ún, kjing go ëbo sök kjl̈ara. Eshko ga kjok uunkong töktong ba bokshto dwayo, kjok dogo, kl̈ung bakoe. Beno ĩgöy ame.  
\v 12 Ga ĩn ga nopga wol̈ono tjeng kës l̈i l̈öng pjl̈u sökkl̈o jong l̈i bokshto, nopga tjwl̈õ ara, nopga tjwl̈õ chira bakoe. Eshko ga kjibokwo tjeng l̈i roshwinaba. E irgo ga kjibokwo roshwinaba kjwara obi. Ëye ber sök së ĩyado Sbö tjok wl̈o ga ba ko, e tak pjang kjibokwo e go. Ga nopga wol̈ono tjeng l̈i l̇l̇gweraba, l̇l̇ëbo shäryara dö, tara beno tjeng kjibokwo tjeng kës roshko l̈i kjĩshko.  
\v 13 Nopga wol̈ono beno tjeng dl̈ung roy ga l̈öng eshko. Nopga wol̈ono beno tjeng sakshko ga l̈öng eshko. Nopga wol̈ono beno tjeng shinmoga shtoyo ga l̈öng eshko. Ga kjl̈ara kjl̈ara l̇l̇gweraba, l̇l̇ëbo shäryara dö l̈i kjĩshko.  
\v 14-15 Ëye ber sök së ĩyado Sbö tjok wl̈o ga ba ko, e tak pjang Sbö kjibokwoyo l̈i go. Gueniyo ëye ko wl̈ẽnaba tak pjang e go l̇l̇ëm ga dburaba jer beno tjeng iök pjë jong ri ri shtoyo l̈i roy, shinmoga shtoyo l̈i tjok. Shto, e kësbang, so dl̈ung kjoyoe. Nopga wol̈ono tjeng l̈i wol̈on jek obi wl̈eni eshko. 
\c 21  
\s1 Jerusalén kjokyo tjagl̈ën 
\p  
\v 1 E irgo ga ĩn ga kjopkwo pjang tjagl̈ën, kl̈ung buk tjagl̈ën bakoe. Kjopkwo këguë l̈i, kl̈ung këguë l̈i, dl̈ung këguë l̈i, e jeno uunkong, l̇l̇ëbo këguë l̈i beno ame.  
\v 2 Ga ĩn ga kjok ter pjang kjrina, Sbö sök kjok dogo l̈ishko dwayo. Kjok l̈i ko Jerusalén, e shäryak tjagl̈ën, kjok iak beno buk dboy Sbö kong l̈i e. Kjok l̈i shäryak wol̈ësowa, wal̈ë poshäryono orkwosmok dörö wl̈o wl̈eni.  
\v 3 Eshko ga ybö kuror tek pjl̈u sökkl̈o jong l̈ishko dwayo pjl̈ara, tjl̈ẽ ga «Sbö ber sök nopga l̈öng l̈ishko shara. E ber sök ba tjok, ga epga ber ba nopga. Sbö om go l̈i ber sök ba tjok, ga ber ba Sbö.  
\v 4 Ba boryo krö̃ya Sbörë, ber l̈öng sl̈ar ame wl̈o. Eshko ga l̇l̇ëbo këguë l̈i pjitong kjĩshko ga ëye wol̈on ame, sl̈ar ame, pogl̈o bang ame bakoe» l̈e. 
\p  
\v 5 Eshko ga sök pjl̈u sökkl̈o kjing go l̈i tjl̈ẽ bor kong ga «L̇l̇ëbo kës shäryër shäng ëre tjagl̈ën eröe. Tjl̈õkwo l̈oror l̈i, e bek, nopga mär ba go ga pjl̈úe. E kjĩshko ga tozong.  
\v 6 ¡Uunkong l̈i shäryono pjire! Tja so tjl̈õkwo tokl̈o ko \tl Alfa\tl*\f + \fr 21:6 \ft Grecia so tjl̈õkwo go ga tjl̈õkwo tokl̈o ko \fk Alfa\ft , e ba bäm ĩyo, A wl̈eni.\f* kjoyo, tja so tjl̈õkwo tokl̈o ko \tl Omega\tl*\f + \fr 21:6 \ft Grecia so tjl̈õkwo go ga tjl̈õkwo tokl̈o ko \fk Omega\ft , e ba pjirshko, Z wl̈eni.\f* kjoyo bakoe. Sök bäm go l̈i tja. Pjirshko ga ber sök l̈i tja bakoe. Di ichër tur di bokkwo roy dwayo, ëye omiono ga ber sök së ĩyado bor tjok. Ëye di ëre ië woydë ga kong twër, ga tjwl̈õ shir l̇l̇ëme.  
\v 7 Ëye l̇l̇ëbo owa l̈i zano ga l̇l̇ëbo kës ëre ber ba kong, ga tja ber ba Sbö, e ber bor wa bakoe. 
\p  
\v 8 »Gueniyo nopga kjok bangkjrë wl̈eniyo, nopga mär bor go l̇l̇ëm wl̈eniyo, nopga l̇l̇ëbo shäryako l̇l̇ëm l̈i shäryë wl̈eniyo, nopga obl̈ë zrök wl̈eniyo, nopga pë no orkwosmono ba tjok l̇l̇ëm l̈i tjok wl̈eniyo, nopga parkë ybi wl̈eniyo, nopga l̇l̇ëbo jyãgl̈o poshrëk wl̈eniyo, nopga l̈ũrkë ä wl̈eniyo, era dbukoba jer ber l̈öng akkwo ko \tl azufre\tl* pjë jong ri ri shtoyo l̈i roshko. Shto e kësbang, so dl̈ung kjoyoe. Nopga wol̈ono tjeng l̈i wol̈on jek obi wl̈eni eshko» l̈e. 
\p  
\v 9 Eshko ga Sbö parkagaga kjok dogo so dogl̈o kjäk (7), wl̈oshko tjeng di iokl̈o, roshko no shdunggl̈o tjeng kjringgwo kjäk (7) kjl̈ara l̈i tek shrono shäng bor zl̈ong, ga tjl̈ẽ bor kong ga «Pja tek bor tjok, ga wal̈ë orkwosmok Öng Wl̈ẽp Ushko So L̇l̇gwokl̈ë tjok wl̈o l̈i pin bop kong» l̈e.  
\v 10 Eshko ga tja go Sbö Sëya jl̈õkoyo, ga tja söra parkaga l̈irë jem dl̈up jong kësbang, kjókshko l̈i kjing go. Eshko ga kjok pina bor kong kjrina, ter pjang Sbö sök kjok dogo l̈ishko dwayo. Kjok l̈i ko Jerusalén. Kjok iak beno buk dboy Sbö kong l̈i e.  
\v 11 Sbö sök eshko kjĩshko ga kjok l̈i kãl̈ã bolo ara, so akkwo wol̈ësowa tjwl̈õ ara wl̈eniyo kãl̈ã kjoyo, so akkwo ko \tl jaspe\tl* kãl̈ã kjoyo, roĩgöy wẽl̈ë, so batl̈ë sho kjoyoe.  
\v 12-13 Kjëryo shäryak pjribri kjókshko, kjër l̈i shkl̈ukyo kjringgwo pkëng (4), ga kjër l̈i pjl̈or kar kar, u bäng bäng l̈ok kjwo mya mya, uunkong ga kjwo sak kjwara kjingsho pjök (12). U bäng bäng daga Sbö parkaga kjok dogo sorë kjl̈ara kjl̈arae. U bäng bäng kjwara kjwara l̈i go Israel tjëyoga dogl̈o sak kjwara kjingsho pjök (12) l̈i ko jyã tjang pjang kjrina kjrina eshko.  
\v 14 Kjok l̈i shakkl̈o kjwo sak kjwara kjingsho pjök (12), kjwara kjwara l̈i go Sbö tjl̈õkwo roy l̈aga Jesús ãska dogl̈o sak kjwara kjingsho pjök (12) l̈i ko jyã tak pjang kjrina kjrina eshko. 
\p  
\v 15 Parkaga l̈an shäng bor tjok l̈i, wl̈oshko l̇l̇ëbo tjl̈ĩkkl̈o shäryak dbur sho shõyl̈ṍr go tjeng kjwangna, kjok l̈i, u bäng bäng l̈i, kjër l̈i, e tjl̈ĩya e go wl̈o.  
\v 16 Kjok l̈i tjl̈ĩy ga pjl̈or kar kar bam beke. Ga tjl̈ĩna l̇l̇ëbo tjl̈ĩkkl̈o l̈i go ga beno kësbang anmoyõ. Shji jëk shkl̈uk kjrina dwayo äär shkl̈uk kal̈ëkong wl̈o ga woyde ga shji jëk dbargwo sak kjäk kjingsho shkëng (75) wl̈eni dik.\f + \fr 21:16 \fk Shji jëk dbargwo sak kjäk kjingsho shkëng (75) wl̈eni dik \ft l̈e l̈i, e \fk kilómetro kjringgwo sak dbäw dbäw pjl̈ogl̈o pjök kjingsho sak dbäw pjl̈ogl̈o pjök (2,200) \ft l̈okl̈o.\f* Ga jem kjomo l̈ëkong ga wop eni bakoe.  
\v 17 Kjër l̈i tjl̈ĩna, l̇l̇ëbo tjl̈ĩna norë wl̈eni ga shtëgro orkwo jyãgl̈o\f + \fr 21:17 \fk Orkwo jyãgl̈o pjl̈ara\ft , e \fk centímetro sak pkëng kjingsho shkëng (45) dik.\f* pjl̈ogl̈o sak dbäw kjingsho sak pkëng kjingsho pkëng (144).  
\v 18 Kjër l̈i shäryak akkwo ko \tl jaspe\tl* go. Kjok l̈i shäryak dbur sho shõyl̈ṍr go, ga roĩgöy wẽl̈ë, so batl̈ë sho kjoyoe.  
\v 19 Kjok l̈i shakkl̈o shäryak l̈ok akkwo wol̈ësowa tjwl̈õ ara wl̈eniyo obl̈ë obl̈ë go. Ba shakkl̈o bäm l̈i shäryak akkwo ko \tl jaspe\tl* go. Irgo shakkl̈o shäryak akkwo ko \tl zafiro\tl* go. Irgo shakkl̈o shäryak akkwo ko \tl ágata\tl* go. Irgo shakkl̈o shäryak akkwo ko \tl esmeralda\tl* go.  
\v 20 Irgo shakkl̈o shäryak akkwo ko \tl ónice\tl* go. Irgo shakkl̈o shäryak akkwo ko \tl cornalina\tl* go. Irgo shakkl̈o shäryak akkwo ko \tl crisólito\tl* go. Irgo shakkl̈o shäryak akkwo ko \tl berilo\tl* go. Irgo shakkl̈o shäryak akkwo ko \tl topacio\tl* go. Irgo shakkl̈o shäryak akkwo ko \tl crisopraso\tl* go. Irgo shakkl̈o shäryak akkwo ko \tl jacinto\tl* go. Irgo shakkl̈o shäryak akkwo ko \tl amatista\tl* go.  
\v 21 U bäng bäng kjwo sak kjwara kjingsho pjök (12) l̈i kjwarashko kjwarashko shäryak akkwo kjwara kjwara go. Akkwo l̈i wol̈ësowa tjwl̈õ ara wl̈eniyo ko \tl perla\tl*. Irbo kësbang jek buk kjok roshko l̈i shäryak dbur sho shõyl̈ṍr go, roĩgöy wẽl̈ë, so batl̈ë sho kjoyoe. 
\p  
\v 22 Tjl̈apga Sbö, l̇l̇ëye shärye woydë l̈i shärye ga pjl̈úe. Kjok eshko ga ba u, e poshrëkoba eshko wl̈o ĩnor l̇l̇ëm, sök om go eshko kjĩshko, Öng Wl̈ẽp Ushko So L̇l̇gwokl̈ë l̈i sök eshko kjĩshko bakoe.  
\v 23 Kjok eshko ga dl̈o kãl̈ã shjiy l̈i, mok kãl̈ã shjiy l̈i, e woyde l̇l̇ëme. Kjok l̈i ber shjiy, Sbö dbo kãl̈ã shjiy l̈i go, Öng l̈i dbo kãl̈ã shjiy l̈i go bakoe.  
\v 24 Ga tjëyoga obl̈ë obl̈ë l̈öng kjok ëre kjing go l̈i jëk l̈öng iök shjiy l̈i go, ga ba pjl̈uyoga, ba l̇l̇ëbo tjwl̈õ ara l̈i tek söya, ie l̈ok ber eshko wl̈o.  
\v 25 Dba ga kjok eshko l̈i u bäng bäng l̈ok oojong ĩyado, ga eshko ga shkë dret, kjok shjiy ĩyado.  
\v 26 Tjëyoga obl̈ë obl̈ë, ba l̇l̇ëbo tjwl̈õ ara l̈i tek söya, ie l̈ok ber eshko wl̈o.  
\v 27 Ga l̇l̇ëye ber Sbö bokshto ga ä l̈i, e äär eshko l̇l̇ëm, ëye wotjl̈ĩk owa wl̈eniyo l̇l̇ëm, ëye jyõrkë ä wl̈eniyo l̇l̇ëm bakoe. Nopga ko tak l̈ok Öng l̈i kjibokwoyo go l̈i, epga äär eshko eröe. Ëye ber sök së ĩyado Sbö tjok wl̈o ga ba ko, e tak pjang kjibokwo ëre go. 
\c 22  
\s1 Di pjang pjl̈ara, di l̈i, shji ie ber l̈öng së ĩyado 
\p  
\v 1 E irgo ga Sbö parkaga kjok dogo so l̈i, tja kong di pina pjl̈ara, di l̈i ioroy ga shji ber l̈öng së ĩyado Sbö tjok. Di l̈i tur ter Sbö, Öng Wl̈ẽp Ushko So L̇l̇gwokl̈ë, e l̈öng l̈ishko dwayo,  
\v 2 ga jer buk irbo kësbang jek buk kjok roshko l̈i tjrëko. Di pjang l̈i kjwo kar kar, kjor jong kjl̈ara, ba bo uoroy ga shji wol̈on l̇l̇ëme. L̈u pjl̈obi go ga kjor l̈i botjyë pjl̈ogl̈o sak kjwara kjingsho pjök (12), mok kjl̈arashko kjl̈arashko botjyë ĩyado. Kjor l̈i korga, e tjëyoga obl̈ë obl̈ë l̈i dwl̈omnekkl̈o. 
\p  
\v 3 Eshko ga ëye ie Sbörë ber shdungko ame. Sbö sök eshko, Öng l̈i sök eshko bakoe. Ga poshrëya ba parkagaga l̈öng l̈irë ĩyado.  
\v 4 Sbö bokkwo ĩya l̈ok om go, ga Sbö ko l̈i tak pjang uunkong l̈i bokdo go.  
\v 5 Eshko ga shkë drete. Iök shjiy woyde l̈ok l̇l̇ëm, dl̈o woyde l̈ok l̇l̇ëm bakoe. Kjok shjiy l̈aga ber Sbörë om go. Ga ber l̈öng nopga ichaga ĩyado. 
\s1 Jesús tjwe mal̈ing iröng obi 
\p  
\v 6 Eshko ga Sbö parkaga l̈i tjl̈ẽ bor kong ga «Tjl̈õkwo l̈oror l̈i, e bek, nopga mär ba go ga pjl̈úe. Dënashko ga Sbö tjl̈ẽno ba tjl̈õkwo l̈agaga kong om go. Ga ba parkaga ëre ichara, l̇l̇ëbo wen dörö l̈i pin ba parkagaga l̈öng l̈i kong wl̈o» l̈e. 
\p  
\v 7 Eshko ga Jesús tjl̈ẽ bor kong ga «¡Tja kuzong! Tja tjwe mal̈ing iröng obi. Ëye tjl̈õkwo tak pjang kjibokwo ëre go l̈i kol̈ë ga era ber wopjl̈úe» l̈e. 
\s1 Kjibokwo pjirzl̈ong 
\p  
\v 8 Tja Juan, l̇l̇ëbo uunkong ëre ĩnor, kuror tjarë om go. L̇l̇ëbo uunkong ëre ĩnor, kuror pjir ga tja kjök tono Sbö parkaga l̈i bokshto, ga poshrër l̈oror. 
\p  
\v 9 Gueniyo tjl̈ẽ bor kong ga «¡Kjwe shäryëp l̇l̇ëme! ¡Tja parkaga Sbö kong eröe! ¡Pja, bop pjeyoga Sbö tjl̈õkwo l̈aga l̈i, bop pjeyoga kjibokwo ëre kol̈aga l̈i, pjãy eni bakoe! ¡Sbö poshrëpdë dey!» l̈e. 
\p  
\v 10 Eshko ga tjl̈ẽ bor kong ga «Tjl̈õkwo tak pjang kjibokwo ëre go l̈i dbaryo äätoe. E kjĩshko ga tjl̈õkwo l̈i jnep ber l̈ũtshko l̇l̇ëme.  
\v 11 Ëye l̈öng l̇l̇ëbo owa shäryë ga owa l̈i shärye eni jek këgong; ëye l̈öng l̇l̇ëbo shäryako l̇l̇ëm l̈i shäryë ga owa l̈i shärye eni jek këgong; ëye l̈öng l̇l̇ëbo pjl̈ú shäryë ga pjl̈ú l̈i shärye eni jek këgong; ëye iak beno tjeng dboy Sbö kong ga ber eni jek këgong bakoe» l̈e. 
\p  
\v 12 Eshko ga Jesús tjl̈ẽ bor kong ga «¡Tja kuzong! Tja tjwe mal̈ing iröng obi. Bor nopga potjwl̈ẽkkl̈o tek sör bor tjok, ga kjl̈ara kjl̈ara l̈i potjwl̈ẽn eshko, l̇l̇ëbo shäryara dö l̈i kjĩshko.  
\v 13 Tja so tjl̈õkwo tokl̈o ko \tl Alfa\tl*\f + \fr 22:13 \ft Grecia so tjl̈õkwo go ga tjl̈õkwo tokl̈o ko \fk Alfa\ft , e ba bäm ĩyo, A wl̈eni.\f* kjoyo, tja so tjl̈õkwo tokl̈o ko \tl Omega\tl*\f + \fr 22:13 \ft Grecia so tjl̈õkwo go ga tjl̈õkwo tokl̈o ko \fk Omega\ft , e ba pjirshko, Z wl̈eni.\f* kjoyo bakoe. Sök bäm go l̈i tja. Pjirshko ga ber sök l̈i tja bakoe. 
\p  
\v 14 »Kjok tjagl̈ën l̈ishko ga kjor jong kjl̈ara, ba bo uoroy ga shji wol̈on l̇l̇ëme. Ëye shwong kwoshkwono beno drëpdrë wl̈eni ga ie Sbörë ber wopjl̈ú, kong dbo twe opzrëk kjok eshko wl̈o, kjor bo l̈i ue wl̈o bakoe.  
\v 15 Gueniyo nopga owa l̈ira ber l̈öng kjoko. Nopga parkë ybi wl̈eniyo, nopga pë no orkwosmono ba tjok l̇l̇ëm l̈i tjok wl̈eniyo, nopga obl̈ë zrök wl̈eniyo, nopga l̇l̇ëbo jyãgl̈o poshrëk wl̈eniyo, nopga l̈ũrkë ä wl̈eniyo, epga ber l̈öng kjoko erä. 
\p  
\v 16 »Tja Jesús, bor parkaga kjok dogo so ichoror, tjl̈õkwo ëre l̈ë bop kong wl̈o, roy shdöp bor tjl̈õkwo kjragaga l̈öng kës l̈i kong wl̈o. David tjëyo tjwl̈õ arayo l̈i tja. Dbala ko Dbar Kjokl̈o l̈i kãl̈ã bolo ara, tja so e kjoyoe» l̈e. 
\p  
\v 17 Sbö Sëya, Öng boy, e tjl̈ẽ ba kong ga «¡Pja tegö!» l̈e. 
\p Ëye omkuno ga tjl̈ẽ ba kong ga «¡Pja tegö!» l̈e. 
\p Di buk pjl̈ara, di ioroy ga shji wol̈on l̇l̇ëme. Ëye wodogro wl̈eni ga tjwe di l̈i ië ga pjl̈ú, ga tjwl̈õ shiya ërë l̇l̇ëme. 
\p  
\v 18 Ëye tjl̈õkwo tak pjang kjibokwo ëre kuk ga kong l̇l̇ëbo l̈ër wẽl̈ë, miyde l̈ok wl̈o. Tja tjl̈ẽ ba kong ga «Ëye kjibokwo ëre kjingsho tjl̈õkwo iono obi ga l̇l̇ëbo owa wen nopga owa kong tak l̈ok kjibokwo ëre go l̈i kjingsho ie Sbörë obi ba kong bakoe.  
\v 19 Tjl̈õkwo tak pjang kjibokwo ëre go kjrina, tjl̈ẽ ga kjor jong kjl̈ara Sbö kjokshko, ba bo uoroy ga shji wol̈ono l̇l̇ëme l̈e eni. Ëye kjibokwo ëre tjl̈õkwo l̈öno kjwara dö ëmdë ga kong dbo twe Sbörë, kjor bo l̈i ue wl̈o l̇l̇ëme» l̈ër ba kong eni. 
\p  
\v 20 Tjl̈õkwo ëre l̈aga tjl̈ẽ ga «Ëng, tja tjwe mal̈ing iröng obi» l̈e. 
\p Ber eni, Tjl̈apga Jesús. Pja tegö. 
\p  
\v 21 Rokër Tjl̈apga Jesús kong ga ba wopjl̈ú l̈i kjĩshko ga Sbö nopga kjimte ara. Ber eni.