\id PHP - Teribe NT (Gen, Ruth, Jonah and other portions) -Panama 2008 (DBL -2013) 
\h Filipenses 
\toc1 Kjibokwo ëre tara Pablorë Filipos sopga kong 
\toc2 Filipenses 
\toc3 Fil 
\mt1 Carta a los Filipenses 
\mt2 Kjibokwo ëre tara Pablorë Filipos sopga kong 
\imt1 Kjibokwo ëre sorë 
\ip Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Dënashko ga Pablo öötong shäng Filipos kjokyo Silas, Timoteo tjok, Jesús roy pjl̈ú l̈ë. Eshko ga nopga ara omtjl̈õkwo kjrono, tak pjang Hechos 16.12-40 go sorë l̈i eni. Pjl̈ara ga Pablo sök kjërshko Roma kjokyo, Jesús roy pjl̈ú l̈ara kjĩshko. Epga ommiydonoshko ga l̇l̇ëbo ichara l̈ok ba kjimtokl̈o, dbur bakoe. Ichara l̈ok domer kjl̈ara ko Epafrodito tjok. E kjĩshko ga kjibokwo ëre tara Pablorë, e beno wopjl̈ú ba kong l̈i l̈okl̈o. 
\ip Eshkoshko ga Jesús tjl̈õkwo kjragaga l̈öng Filipos kjokyo l̈i shdungoba ara. Eni ga kjibokwo ëre go ga Pablo shdungoba ara ëmdë ga shäng wopjl̈ú l̈i roy jyã tara, epga dbokjrë e go wl̈o. Ga epga ichara ber l̈öng wotöshko, ga ëng kjimtë kar kar bakoe. 
\ip Eshko dbaryo ga judíoga kjone kjone to l̈öng tjl̈ẽ ga shji där wl̈o ga woyde ga shji mär Jesús go dö l̇l̇ëm, woyde ga kjok l̇l̇gwekkl̈o tara Moisésdë l̈i söy bakoe l̈e l̈öng eni, miga jyõ erä. E kjĩshko ga kjibokwo ëre go ga Jesús tjl̈õkwo kjragaga l̈i ichara Pablorë ber l̈öng sjëk, nopga eniyo tjok. 
\ip Kjibokwo ëre tara ba kongshko ga sök no shdũzl̈ong uyo roshko Roma kjokyo, Jesús roy pjl̈ú l̈ara kjĩshko, tak pjang Hechos 28.16-31 go sorë l̈i eni. 
\c 1  
\p  
\v 1 Kjibokwo ëre taga tja Pablorë, Timoteo tjok. Tjawa Cristo Jesús parkaga. 
\p Sbö nopga töno beno tjeng Cristo Jesús tjok l̈öng Filipos kjokyo, kjibokwo ëre ichërwa jek bomi kong, bomi kägäyoga kong, ëye parkë l̈öng bomi tjok l̈i kong bakoe. 
\p  
\v 2 Rokër bi Data Sbö kong, Tjl̈apga Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe. 
\s1 Pablo syõshtono Sbö kong Filipos sopga kjĩshko 
\p  
\v 3-5 Tja öör Jesús roy pjl̈ú l̈ë bomi kong dämärshko tek l̈ëkong ga pjãy l̈öng parkë Jesús kong bor tjok pjl̈ú ĩyado. E kjĩshko ga pjãy woyotjl̈ĩnshko ga tja wopjl̈ú Sbö tjok, ga tja syõshtë ba kong bomi kjĩshko wopjl̈úe.  
\v 6 Sbö tjl̈õkwo pjl̈ú l̈i kjroromishko ga l̇l̇ëbo pjl̈ú shäryara Sbörë bomi pjl̈úshko, ga miydër ga shärye jek këgong, äär jong Cristo Jesús tjwe iröng obi guing. 
\p  
\v 7 Sbö wopjl̈ú l̈i kjĩshko ga «Jesús roy pjl̈ú l̈i, e jl̈õe» l̈ër to shäng tjl̈apgaga këskës bokshtoshko ga pjãy iara Sbörë beno l̈öng bor kjimtaga. Ga tja bängzak shäng ëreshko orkwo kjrochak pjir dröng sho goshko ga pjãy l̈öng bor kjimtë obi. E kjĩshko ga pjãy uunkong woydër ara. Eni kuzong ga tja wopjl̈ú bomi kjĩshko l̈i, e pjl̈úe.  
\v 8 Pjãy uunkong ĩn woydë ara, e miyde Sbörë pjire. Pjãy woydër ara, shji woyde Cristo Jesúsdë sorë ga eni. 
\p  
\v 9 Tja syõshtë Sbö kong bomi kjĩshkoshko ga rokër ba kong ga pjãy kjimte dbar kjwobi go obl̈ë woydë jek këgong këgong. Rokër ba kong obi ga pjãy opping jek këgong këgong ba kjok miydë l̈i go, ba wotjl̈ĩk pjl̈ú l̈i go bako,  
\v 10 l̇l̇ëbo pjl̈ú anmoyõ l̈i shäryëmi ĩyado wl̈o. Eni ga pjãy ber l̈öng pjl̈o bek, pogo l̇l̇ëye dret Sbö bokso, äär jong Cristo tjwe iröng obi guing.  
\v 11 Ga rokër ba kong ga pjãy kjimte Jesucristorë jëk l̈öng pjl̈o bek ĩyado, pjãy ĩkoba wl̈o, Sbö poshrëkoba bomi kjĩshko wl̈o, Sbö iëba ber tjwl̈õ ara anmoyõ bomi kjĩshko wl̈o bakoe. 
\s1 Pablo sök kjërshko, Cristo tjl̈õkwo roy pjl̈ú l̈e kjĩshko 
\p  
\v 12 Pjeyoga, l̇l̇ëye weno bor kong dö l̈i, e shäryono Jesús roy pjl̈ú shdär jek këgong wl̈o. E l̈ër bomi kong, miydëmi wl̈o.  
\v 13 Eerishko ga no dagaga parkë l̈öng no l̇l̇gwezl̈ong uyo ëreshko, nopga obl̈ë obl̈ë, miyde l̈ok ga tja iak shäng kjërshko orkwo kjrochak pjir dröng sho go, Cristo kjĩshko.  
\v 14 Bi pjeyoga l̇l̇amo l̈öng kës l̈i, tja roy kuya l̈ok ga opyono mär l̈öng Sbö tjl̈õkwo roy l̈ë jl̈õkoyo, l̇l̇ëye bangkjre l̈ok ame. 
\p  
\v 15-17 No kjong kjong Cristo roy l̈ë wopjl̈ú go. Shärye l̈ok eni, tja woyde ara kjĩshko. Miyde l̈ok ga tja iak shäng ëreshko, «Cristo tjl̈õkwo roy pjl̈ú l̈i, e jl̈õe» l̈ër oba kong wl̈o. Gueniyo kjong kjongda oml̈ë, gueniyo wotjl̈ĩk l̈öng obl̈ë. Shärye l̈öng eni, tja woyde l̇l̇ëm kjĩshko, äär ber tjwl̈õ ara bor kjinmo wl̈o. Woyde l̈ok ga songyo kjrër ara anmoyõ ëreshko l̈e. Miydër ga eni.  
\v 18-19 Gueniyo ga e l̇l̇ëye l̇l̇ëme. Cristo roy, e l̈e l̈öng enido. Wotjl̈ĩk pjl̈úre, de oware, gueniyo Cristo roy l̈e l̈öng enido. Tja wopjl̈ú e kjĩshko. 
\p L̇l̇ëbo weno bor kong owa ara ëre kjĩshko ga pjãy syõshtë l̈öng Sbö kong bor kjĩshko ara, ga tja kjimte Jesucristo Sëyarë ara bakoe. E kjĩshko ga miydër ga tja där, ga tja ber shäng wopjl̈ú ara anmoyõ e kjĩshko.  
\v 20 Bor kong ga Cristo tjl̈õkwo l̈ökyokjrër kjwe ga tja ber l̈ök ara eshko. Woydër eni l̇l̇ëme. Gueniyo miydër ga tja sgara shäng tjl̈ẽ Cristo kjĩshko sorë ga tja tjl̈ẽ eni ĩyado, ĩkoba ga Cristo, e tjwl̈õ ara l̈ëba wl̈o. Woydër ga tja sök sëre, de tja zrörabare, l̈ëba eni ĩyado.  
\v 21 Bor kong ga tja beno shäng ga tja shäng l̇l̇ëbo shäryë Cristo kong wl̈o eröe. Ga tja wol̈ono ga bor kong ga pjl̈ú anmoyõ.  
\v 22 Eni gueniyo ga tja sök kjok ëre kjing go obishko ga nopga kjimtër jek këgong ga pjl̈úe. ¿Woydër kjone dey yal̈ë? Miydër l̇l̇ëme.  
\v 23 Bor kong ga pjl̈úyo kjone dey l̈ër ga kjange. Tja wotjl̈ĩk kjrina ga tja wol̈on dey, tja to ber sök Cristo tjok wl̈o, e bor kong ga pjl̈ú anmoyõ.  
\v 24 Gueniyo tja wotjl̈ĩk kjrina obi ga ber pjl̈ú bomi kong wl̈o ga tja ber sök kjok ëre kjing go obi dey.  
\v 25 Miydër pjl̈ú ga eni. E kjĩshko ga miydër ga tja ber sök bomi tjok obi, pjãy kjimtër mär ber l̈öng Cristo go jek këgong wl̈o. Eshko ga pjãy ber l̈öng wopjl̈ú ara anmoyõ.  
\v 26 Ga tja sök bomi tjok obishko ga pjãy l̈öng wopjl̈ú Cristo Jesús tjok bor kjĩshko. 
\p  
\v 27 L̇l̇ëbo wen bor kong sorë pogo ga Cristo roy pjl̈ú l̈i kjroromi kuzong ga woydër ga pjãy jëk pjl̈o bek e go, Cristo roy pjl̈ú l̈i tjwl̈õ ara l̈ëba wl̈o. Eni ga tja äär bomi ĩkde, de pjãy roy kur eröre, miydër ga pjãy l̈öng wotjl̈ĩk kjrinaso, pjãy l̈öng parkë uunkong no kjl̈araso wl̈eni, Cristo roy shdär oba uunkong kong wl̈o.  
\v 28-29 L̇l̇ëbo shäryara Sbörë bomi kong pjl̈úe. Pjãy iara beno l̈öng mär Cristo go. Gueniyo erö l̇l̇ëme. Pjãy iara beno shdungoba song ba kjĩshko bakoe. Era l̇l̇ëbo pjl̈ú bomi kong bakoe. E kjĩshko ga bomi wl̈oyoga, e bangkjrëmi sira l̇l̇ëme. E goshko ga miyde l̈ok ga to jeno wl̈o, ga pjãyda där wl̈o. E l̈aga Sbörë eni.  
\v 30 Dënashko ga tja shdunaba sorë l̈i ĩnomi wẽl̈ëe. Eerishko ga roy kumi l̈öng ga tja shdungoba shäng e kjoyo obi. Ga miydër ga shäryëba l̈öng bomi kong eni bakoe. 
\c 2  
\p  
\v 1 Eni ga pjãy töno tjeng Cristo tjok kuzong ga pjãy kong dbo twe ĩyado. Pjãy woyde ara kjĩshko ga pjãy woydë l̇l̇ëme. Sbö Sëya tjeng bomi tjok ĩyado. Pjãy songe l̈e Sbörë bakoe.  
\v 2 Eni kuzong ga l̇l̇ëye l̈ër bomi kong l̈i shäryozĩa. Pjãy wotjl̈ĩs jong kjrinaso, l̇l̇ëye woyotjl̈ĩmi kës l̈i shäryëmi ga pjl̈ú wl̈o. Pjãy ëng woydos ara kar kar, pjãy ber l̈öng ëng tjok wopjl̈ú wl̈o. Shäryoromi eni ga tja ber wopjl̈ú kësbang eshko.  
\v 3 Pjãy l̇l̇ëbo shäryë, pjãy äär ber tjwl̈õ ara wl̈o l̈ëmi l̇l̇ëme. Pjãy opyë tjwl̈õ ara obl̈ë kjinmo l̇l̇ëme. Obl̈ë iozĩ ber tjwl̈õ ara bomi kjinmo dey. Pjãy ber wotöshko.  
\v 4 Pjãy l̇l̇ëbo wl̈ẽk pjl̈ú bomi kong dö l̇l̇ëme. Wl̈ẽzĩ ber pjl̈ú obl̈ë kong bakoe.  
\v 5 Cristo Jesús, e wotjl̈ĩk sorë ga pjãy wotjl̈ĩk eni bakoe. 
\q1  
\v 6 Kjok shäryayde Sbörë l̇l̇ëm obishko ga e Sbö jl̈õkoyo, tjwl̈õ baĩya dik bakoe. 
\q2 Gueniyo ga «Tja ber sök jũshko tjwl̈õ ara ĩyado wl̈o» l̈ara l̇l̇ëme. 
\q1  
\v 7 Opyono beno shäng tjwl̈õ l̇l̇ëm, 
\q2 parkaga tjwl̈ẽk shäng pjir wl̈eniyo dik, 
\q2 weno no, so shji kjoyoe. 
\q1  
\v 8 Eshko ga opyono beno shäng wotöshko anmoyõ. 
\q1 Ba Data kol̈ara kjĩshko ga 
\q2 opyono beno wol̈on pjang kjl̈ös go, nopga owa wl̈eni. 
\q1  
\v 9 E kjĩshko ga iara Sbörë beno tjwl̈õ ara anmoyõ, 
\q2 obl̈ëga kës l̈i kjinmo. 
\q1  
\v 10 Shäryara eni, uunkong kjök tok ba kong wl̈o, 
\q2 ëye l̈öng kjok dogo, ëye l̈öng kjok ëre kjing go, ëye l̈öng kl̈ung ëre dorko bakoe. 
\q1  
\v 11 Eshko ga «Jesucristo, e bi pjl̈uyo jl̈õe» l̈e l̈ok uunkong. 
\q2 Eni ga Data Sbö ber tjwl̈õ ara bakoe. 
\s1 Shji l̇l̇ëbo shäryë pjl̈úe 
\p  
\v 12-13 Pjeyoga, Sbö, e drön ëë bomi tjok, l̇l̇ëye l̈e l̈i shäryëmi eni wl̈o. Tja shäng bomi tjokshko ga tja kol̈oromi pjl̈úe. Era eerishko ga tja shäng pjola ga woyde ga pjãy drön ëë, Sbö kol̈ë, bangkjrë ĩyado wl̈o. Pjãy döra l̇l̇ëbo pjl̈ú ëre kong wl̈o. 
\p  
\v 14-16 L̇l̇ëye shäryëmi dö ga shäryozĩ l̈öng wopjl̈úe. Shji kjl̈oshtë l̇l̇ëm, shji ëng dboryë kar kar l̇l̇ëm bakoe. Eni ga pjãy l̈öng pjl̈o bek, pogo l̇l̇ëye dret Sbö bokso. Pjãy Sbö wapga tjän, pjãy l̈öng nopga owa jëk l̈öng pjl̈o bek l̇l̇ëm l̈i tjrëko gueniyo. E kjĩshko ga pjãy l̇l̇ëbo owa shäryë l̇l̇ëme. Eni ga shji ber l̈öng së jl̈õkoyo sorë tjl̈õkwoyo l̈i l̈ëmi nopga kongshko ga pjãy ĩya l̈ok ga obl̈ë, dbala l̈ok shjiy kjok ro sĩ roshko wl̈eni. Eni ga Cristo tjwe iröng obishko ga tja wopjl̈ú bomi kjĩshko, pak shäryoror l̈i beno tjwl̈õ ara kjĩshko.  
\v 17 Pjãy mär l̈öng Jesús go kjĩshko ga pjãy shdungoba l̈öng songe. Ga miydër ga tja kjwe zrökoba, tjl̈õkwo l̈oror bomi kong kjĩshko. Eni ëmdë ga tja wopjl̈úe. Tja wopjl̈ú bomi kjĩshko bakoe.  
\v 18 Pjl̈ú wl̈o ga l̇l̇ëye wen bomi kongshko ga pjãy l̈öng wopjl̈úe. Ga pjãy ber wopjl̈ú bor kjĩshko bakoe. 
\s1 Timoteo, Epafrodito 
\p  
\v 19 Pjãy roy miydër woydë, tja ber wopjl̈ú wl̈o. E kjĩshko ga tja kjimte Tjl̈apga Jesúsdë ga Timoteo, e ichër jek mal̈ing bomi ĩk, pjãy roy söya bor kong wl̈o l̈ër.  
\v 20 L̇l̇ëbo ber pjl̈ú bomi kong sorë l̈i woyotjl̈ĩya shäng jl̈õkoyo ĩyado botoya dik. Ëye obl̈ë, pjãy woyotjl̈ĩya eni l̇l̇ëme.  
\v 21 L̇l̇amo l̈öng ëreshkora, l̇l̇ëbo baĩya woyotjl̈ĩyde. L̇l̇ëbo Jesucristo ĩ, e woyotjl̈ĩya l̈öng l̇l̇ëme.  
\v 22 Gueniyo Timoteora parkë shäng bor tjok Jesús roy pjl̈ú l̈ë oba kong, wapga parkë l̈öng ba data tjok sorë ga eni. E miydoromi tjän.  
\v 23 Eni ga ichër woydë jek bomi ĩk, tja därde, de tja där l̇l̇ëm, e miydoror guing.  
\v 24 Ga miydër ga tja kjimte Tjl̈apgarë wop ä ga jek bomi ĩk bakoe l̈ër. 
\p  
\v 25 Bi kjl̈ara Epafrodito, e ichoromi tek bor kong, tja kjimte bomi ãska wl̈o. E parkono shäng bor tjok pjl̈ú, dröno ara bor kjimtë Cristo roy l̈ë. Gueniyo pjl̈ú wl̈o ga ichër jek woydë bomi shwoy iröng obi.  
\v 26 Pjãy ĩya woydë arae. Miyde ga swl̈o ara roy kuromi, ga woydë ara e kjĩshko.  
\v 27 Öör buk swl̈o ara jl̈õe. Wol̈ono seke. Gueniyo songe l̈ara Sbörë, ga kjimtara. L̇l̇ëye shäryara ba kong l̈i beno bor kong pjl̈ú bakoe. Tja song ĩyado. E wol̈ono kjwe ga tja beno sök woydë ara eshko.  
\v 28 E kjĩshko ga ichër jek woydë bomi shwoy mal̈ing, ĩnomishko ga pjãy ber l̈öng wopjl̈ú obi wl̈o, tja sök woydë ba kjĩshko ame wl̈o.  
\v 29-30 Tja kjimtëmi om go ga ä kjĩshko ga shrono shäng na bor kjimtë bomi ãska. Parkë shäng Cristo kong ëreshkoshko ga wol̈ono seke. E kjĩshko ga jek öötong shäng bomi shwoyshko ga wl̈okjrozĩ l̈öng wopjl̈ú, bomi kjl̈ara wl̈eni. Ëye parkë baĩya dik ga bangkjrozĩ bakoe. 
\c 3  
\s1 Shji mär Cristo Jesús go 
\p  
\v 1 Era eni ga pjeyoga, pjãy l̈öng mär Tjl̈apga Jesús go kuzong ga pjãy ber l̈öng wopjl̈ú e go. Tjl̈õkwo toror bomi kong l̈i tër bomi kong jek obi. Tja kwl̈eya ba të l̇l̇ëme. E ber bomi wl̈ikokl̈o wl̈eni. 
\p  
\v 2 Pjãy sjëk, nopga owa l̈öng l̇l̇ëbo owa shäryë wl̈eniyo tjok. Epga so shjiti kjl̈oshko so kjoyoe. To l̈öng tjl̈ẽ ga «Woyde ga shji opsho zë, shji ber jyã tak pjir Sbö ĩ wl̈o» l̈e l̈ok eni.  
\v 3 Miga jyõ erä. Jyã tak pjir Sbö ĩ jl̈õkoyo l̈i shji. Shji kjimte ba Sëyarë ba poshrëk. Shji töno beno tjeng Cristo Jesús tjok. Shji mär l̇l̇ëbo shäryëy om go l̈i go l̇l̇ëme. Shji jyã tak pjir Sbö ĩ jl̈õkoyo e kjĩshko. 
\p  
\v 4 Shji där l̇l̇ëbo shäryëy l̈i go kjwe ga där bäm go l̈i tja. Tja l̇l̇ëbo pjl̈ú shäryono ara anmoyõ, obl̈ë kjinmo.  
\v 5 Tja buk chirawa öötong dbar kjwongshko (8) ga tja doyo jyã taraba pjire. Tja Israel tjëyo, tja Benjamín tjëyo bakoe. Tja hebreo jl̈õkoyo tek dämär dwayo. Dënashko ga tja fariseo. E kjĩshko ga tja jëk to shäng pjl̈o bek kjok l̇l̇gwekkl̈o tara Moisésdë l̈i go.  
\v 6 Tja parkë woydë Sbö kong jl̈õkoyo. E kjĩshko ga Jesús tjl̈õkwo kjragaga irpjanor, shdunor ara. Kjok l̇l̇gwekkl̈o l̈i, e söror beke. Tja l̇l̇ëbo owa shäryono l̈ëba ga äe. 
\s1 Shji Cristo miydë woydë pjl̈úe 
\p  
\v 7 Dënashko ga tja mär l̇l̇ëbo tjeng kës ëre go. Gueniyo eerishko ga tja mär shäng Cristo go shara. E kjĩshko ga bor kong ga l̇l̇ëbo ëre tjwl̈õ drete.  
\v 8 Cristo Jesús, e bor Tjl̈apga. E miydër woydë pjl̈úe. Tjwl̈õ ara anmoyõ l̈i e. L̇l̇ëbo obl̈ë kës l̈i, e ber bor kong ga tjwl̈õ drete. Cristo kjĩshko ga l̇l̇ëbo kës l̈i, e rayoror pjir, bor kong ga ioror beno tjwl̈õ ame, l̇l̇ëbo dburoy wl̈eni. Woydër ara l̈i, e Cristo.  
\v 9 Woydër ga tja ber baĩya. Tja ber pjl̈o bek Sbö bokso wl̈o ga woyde ga tja jëk pjl̈o bek kjok l̇l̇gwekkl̈o tara Moisésdë l̈i go l̇l̇ëme. Woyde ga tja mär Cristo go dey. Eni ga tja ie Sbörë ber pjl̈o bek ba bokso.  
\v 10 Cristo, e miydër woydë pjl̈úe. Cristo woshrara Sbörë iröng obishko ga ba dbo ara pina bi kong wẽl̈ëe. Ba dbo l̈i miydër woydë bakoe. Cristo shdunaba ara, ga zrörabae. Woydër ga tja shdungoba eni bako, ga tja wol̈on woydë baĩya dik bebi.  
\v 11 Woydër eni, l̇l̇ono ga nopga woshre Sbörë iröng obishko ga tja woshre ba tjok bako wl̈o. 
\p  
\v 12 Tjl̈õkwo l̈oror kës ëre wl̈ẽnor pjir, e l̈otë l̇l̇ëme. Tja iara Sbörë beno pjl̈o bek tjän, e l̈otë l̇l̇ëm bakoe. Gueniyo tja jeke. Tja kjrara Cristo Jesúsdë, e miydër pjl̈ú wl̈o. E kjĩshko ga tja drön ara, e miydër wl̈o.  
\v 13 Pjeyoga, tja öötong tjän, e l̈otë l̇l̇ëme. Gueniyo tja wotjl̈ĩno to katöe. L̇l̇ëye shäryono tjän l̈i, e woyotjl̈ĩn ame, l̇l̇ëbo wen tjwe l̈i woyotjl̈ĩntë.  
\v 14 Tja töna Sbörë beno tjeng Cristo tjok ga tja rokara jem sök ba tjok ĩyado wl̈o, l̇l̇ëbo twe ber bor kong wl̈o. E kjĩshko ga tja drön ara, kjrër wl̈o. 
\p  
\v 15 Woyde ga shji wotjl̈ĩk këkboga dik. Pjãy kjone kjone wotjl̈ĩk obl̈ë sira wl̈eni ga pjl̈ú l̈i pĩya Sbörë bomi kong, miydëmi wl̈o.  
\v 16 L̇l̇ëye shäryëy kjone pogo ga woyde ga shji jëk l̈öng tjl̈õkwo bek miydoroy tjän l̈i go. 
\p  
\v 17 Pjeyoga, tja omshäryë shäng sorë ga pjãy omshäryos uunkong eni bakoe. No kjone kjone l̈öng bomi tjrëko omshäryë l̈öng pjl̈ú borwatoy dik. Pjãy omshäryos baĩya dik bakoe.  
\v 18 Tjl̈õkwo l̈oror bomi kong ara tjän l̈i, e l̈ër bomi kong jek pjl̈ara obi, ga tja sl̈ar ëëe. Nopga ara omshäryë pjl̈ú l̇l̇ëme. Cristo wol̈ono pjang kjl̈ös go l̈i, ba kong ga tjwl̈õ l̇l̇ëme l̈e l̈ok wl̈eni.  
\v 19 E beno tjeng shdungko ĩyado wl̈o. Wotjl̈ĩk Sbö l̇l̇ëme. Wotjl̈ĩk l̇l̇ëbo tjeng kjok ëre kjing go eröe. Wotjl̈ĩk l̈öng l̇l̇ëbo ber pjl̈ú ba doyo kong l̈i shäryayde. Zok ga l̇l̇ëbo owa shäryara l̈i, e kjwe l̈ökyokjre ara, gueniyo eni l̇l̇ëme. Roy shdöya l̈ok wopjl̈úe. 
\p  
\v 20 Gueniyo ga shjira kjok ëre so ame. Shji iara Sbörë beno l̈öng kjok dogo so tjän, l̇l̇ono ga shji äär ber l̈öng ba tjok eshko wl̈o. Bi döga tjwe eshko dwayo l̈i koshoydë l̈öng. Tjl̈apga Cristo Jesús l̈i e.  
\v 21 E dbo ara, l̇l̇ëbo tjeng kës l̈i iche ga pjl̈ú wl̈o. Ga ba dbo go ga bi doyo tjwl̈õ l̇l̇ëm ëre kjl̈opswe ber wol̈ëso, baĩya dik, e sök kjok dogo doyo sorë ga eni. 
\c 4  
\p  
\v 1 Era eni ga pjeyoga, pjãy wokjang, pjãy l̈öng Tjl̈apga Jesús tjok ĩyado. Pjãy woydër ara. Pjãy ĩn woydë ara. Tja iëmi ber wopjl̈úe. Pjãy beno bor potjwl̈ẽkkl̈o wl̈eni, tja parkono Sbö kong ara kjĩshko. 
\s1 Pablo l̈ano pjeyoga obl̈ë obl̈ë kjĩshko 
\p  
\v 2 Wal̈ëga tjeng eshko do pjök ko Evodia, Síntique. Rokër ba kong ga töno beno tjeng Tjl̈apga Jesús tjok kuzong ga jëk l̈öng wopjl̈ú ëng tjok, epenga dö wl̈eni.  
\v 3 Pja bor kjl̈ara, ga woydër ga pja ber shäng ba kjimtaga. Epga parkono l̈öng Jesús roy pjl̈ú shdök bor tjok pjl̈úe. Clemente, bi pjeyoga obl̈ë, epga parkono l̈öng bor tjok eni bakoe. Ëye ber l̈öng së ĩyado Sbö tjok wl̈o ga ba ko, e tak pjang Sbö kjibokwoyo go. Ga pjãy ko tak l̈ok e go bakoe. 
\p  
\v 4 Pjãy l̈öng mär Tjl̈apga Jesús go kuzong ga pjãy ber l̈öng wopjl̈úe. L̈ër jek obi ga pjãy ber l̈öng wopjl̈úe.  
\v 5 L̇l̇ëbo shäryozĩ obl̈ë kong yõtso, pjãy l̈öng wopjl̈ú oba kong l̈ëba wl̈o. Tjl̈apga Jesús, e tjwe döröe.  
\v 6 Shji woydë l̇l̇ë kjĩy l̇l̇ëme. Pjãy sorëborë ga pjãy syõshtos Sbö kong, «Tjawa kjimtozong» l̈ozĩ ba kong. Ga pjãy syõshtëshko ga «Tjawa wopjl̈ú bop tjok» l̈ozĩ ba kong eni bakoe.  
\v 7 Eni ga pjãy töno beno tjeng Cristo Jesús tjok kuzong ga pjãy ie Sbörë ber l̈öng wl̈ẽp, pjãy woydë ame wl̈o. Shji nopga kong ga shärye eni l̈i, e l̇l̇ëbo kësbang, e shay uunkong ber tjeng bi kä roy ga äe. 
\p  
\v 8 Era eni ga pjeyoga, l̇l̇ëbo bek l̈i, e woyotjl̈ĩzĩ eröe. Bangkjrako l̈i, bek l̈i, owa l̇l̇ëm l̈i, wol̈ëso l̈i, woydako l̈i, roy pjl̈ú l̈i, e woyotjl̈ĩmirë.  
\v 9 L̇l̇ëye l̈oror bomi kong kuromi l̈i, e shäryozĩ eni. L̇l̇ëye shäryoror ĩnomi sorë ga pjãy omshäryos eni bakoe. Eni ga pjãy ie Sbörë ber l̈öng wl̈ẽpe. 
\s1 Pablo wopjl̈ú, l̇l̇ëbo twara l̈ok ba kong l̈i kjĩshko 
\p  
\v 10 Tja kong l̇l̇ëbo shäryëmi kjwl̈ë jã. E go ga miydër ga tja woyotjl̈ĩmi l̈önge. E kjĩshko ga tja iara Tjl̈apga Jesúsdë beno sök wopjl̈úe. Tja woyojeromie l̈ër l̇l̇ëme. Miydër ga tja woyotjl̈ĩmi l̈öng ĩyado. Tja kjimtëmi l̈oromi ara, gueniyo tja kjimtëmi ga ä öötong dbar kop ara.  
\v 11 L̈ër bomi kong eni, l̇l̇ëbo woydër obi kjĩshko l̇l̇ëme. Tja sorë pogo ga tja oppino sök wopjl̈úe.  
\v 12 Shji l̇l̇ëye dret ga e sorë miydër. Shji l̇l̇ëbo ara ga e sorë miydër bakoe. Tja dl̈i arare, de tja pjl̈i ara, tja l̇l̇ëbo arare, de tja l̇l̇ëye dret, eshko ga tja oppino sök wopjl̈ú ĩyado.  
\v 13 Tja kjimte Tjl̈apga Jesúsdë kjĩshko ga l̇l̇ëbo uunkong eniyo shäryër ga pjl̈úe. 
\p  
\v 14 Eni gueniyo ga tja songshko ga tja kjimtoromi l̈i, e pjl̈úe.  
\v 15 Jesús roy pjl̈ú l̈ër soyër shäng pjãy Filipos sopga kongshko ga tja opshino jek bomi kjokyo Macedonia dwayo. Eshko ga dbur ichoromi bor kjimtokl̈o. Tjl̈õkwo kjragaga shto obl̈ë so l̈ira, tja kjimtara kjl̈ara l̇l̇ëme. E miydoromi tjän.  
\v 16 Tja sök Tesalónica kjokyo ëmdë ga dbur ichoromi bor kjimtokl̈o pjl̈araso l̇l̇ëme.  
\v 17 Tja wotjl̈ĩk l̇l̇ëbo ichoromi l̈i kjrë erö l̇l̇ëme. Woydër ga pjãy kong l̇l̇ëbo twe Sbörë ara e kjĩshko.  
\v 18 L̇l̇ëbo ichoromi Epafrodito tjok l̈i, e kjroror pjir tjän. E tjok ga öötong woydoror l̈i kjinmo, l̇l̇ëye woydër ame. L̇l̇ëbo ichoromi l̈i, e beno Sbö kong pjl̈ú, l̈õ pjl̈ëbl̈ë, öng zröraba, sho suraba, pjono dret, ba poshrëkkl̈o wl̈eni.  
\v 19 Bor Sbö, e l̇l̇ëbo ara. Eni ga l̇l̇ëye woydëmi l̈i, e twe bomi kong pjir, pjãy töno beno tjeng Cristo Jesús tjok kjĩshko.  
\v 20 Bi Sbö, e bi Data. E poshrëy, iëy ber kësbang, tjwl̈õ ara ĩyado wl̈o. Ber eni. 
\s1 Kjibokwo pjirzl̈ong 
\p  
\v 21 «¿Yonde?» l̈ëmi Sbö nopga töno beno tjeng Cristo Jesús tjok l̈öng l̈i kong. 
\p Pjeyoga l̈öng bor tjok ëreshko l̈i, «¿Pjãy yonde?» l̈e bomi kong. 
\p  
\v 22 Jesús tjl̈õkwo kjragaga l̈öng kës l̈i, «¿Pjãy yonde?» l̈e bomi kong. 
\p Tjl̈õkwo kjragaga parkë l̈öng pjl̈u kësbangyo ushko l̈i, «¿Pjãy yonde?» l̈e bomi kong bakoe. 
\p  
\v 23 Rokër Tjl̈apga Jesucristo kong ga ba wopjl̈ú l̈i kjĩshko ga pjãy kjimte ara. Ber eni.