\id JON - Teribe NT (Gen, Ruth, Jonah and other portions) -Panama 2008 (DBL -2013) 
\h Jonás 
\mt1 Jonás 
\c 1  
\s1 Jonás Jehová töywono 
\p  
\v 1 Domer shäng kjl̈ara ko Jonás, e Amitay wa. Pjl̈ara ga Jehová tjl̈ẽ ba kong ga  
\v 2 «Kjok buk kjrina kësbang, kjëryo shäryak ak go pjribri kjókshko ko Nínive. Pja nom eshko. Ga roy sös ba kong ga l̇l̇ëbo owa shärye l̈öng kës l̈i roy kuror, ga epga shdun e kjĩshko» l̈e. 
\p  
\v 3 Gueniyo ga kol̈ara Jonásdë l̇l̇ëm, jek Jope kjokyo shara. Öötong shäng eshko ga kjyong wl̈ẽna buk kjl̈ara ba brikdo, jongya jong Tarsis kjokyo, Jehová töywe wl̈o l̈e. Eni ga oppotjwl̈ẽno, opyono ba roshko, jek äär eshko wl̈o. 
\p  
\v 4-5 Gueniyo ga pjl̈uk ichara Jehovárë dl̈ung kjing kësbang, dbo ara. Eni ga kjyong sögaga l̈i bë l̈öng dete erä. Wotjl̈ĩk l̈ok ga kjyong dl̈ar l̈e, bangkjre l̈ok träk l̇l̇ëm, ga kjl̈ara kjl̈ara kjarga l̈öng syõshtë, kjl̈oshtë ba sböpga kong. Eshko ga ba kjyong jer pir l̇l̇ëm wl̈o ga kjyong roshko l̇l̇ëbo tjeng kës l̈i shira, dbura l̈ok jer dl̈ung roshko. 
\p E wopro ga Jonás beno buk pë dew, kjyong roshko.  
\v 6 Eni ga kjyong söga kägäyo jer Jonás bukshko ga tjl̈ẽ ba kong ga «¿Pja pë kjër ega? ¡Pja kojõs mal̈ing kjwey dwayo! ¡Pja syõshtos bop sbö kong, shji songe l̈e kjwe, shji wol̈on l̇l̇ëm wl̈o!» l̈e. 
\p  
\v 7 E irgo ga kjyong sögaga l̈i tjl̈ẽ l̈ok ëng kong ga «Kjweri, shji l̇l̇ëbo jyãgl̈o dbuk, l̇l̇ëbo owa jũ l̈aga ërë ĩy wẽl̈ë wl̈o» l̈e. Shäryara l̈ok eni, ga miydara e go ga wl̈oyo Jonásdë. 
\p  
\v 8 Eni ga tjl̈ẽ l̈ok ba kong ga «L̈os borwa kong ga ¿l̇l̇ëbo owa tjwe borwa kong ega? ¿Pja pak l̇l̇ë? ¿Pja tek kjone dwayo? ¿Pja kjone so? ¿Pja tjëyo kjone dey?» 
\p  
\v 9-10 «Tja hebreo. Jehová, e bangkjrotë. E Sbö, kjok uunkong shäryaga, dl̈ung ëre shäryaga bakoe. Tja ëre to shäng ba töywë» l̈e ba kong. 
\p Kuya l̈ok ga bangkjrara ara, tjl̈ẽ ba kong ga «¿Shäryëp eni ega?» l̈e.  
\v 11 Eshko ga dl̈ung poyong dbo kjrë jek këgong këgong, ga tjl̈ẽ l̈ok ba kong ga «¿L̇l̇ëye shäryërwa bop tjok, dl̈ung ëre sl̈an ber buk tjëkso wl̈o?» 
\p  
\v 12 «Tja dbuzĩ jer dl̈ung roy, ga dl̈ung kjwe ber buk tjëkso dani. Miydër pjl̈ú ga pjl̈uk to tek l̈öng kës bi kjing go ëre wl̈oyo tjarë» l̈e. 
\p  
\v 13 Eshko ga kjra l̈ara l̈ok dbo go, kjyong tjye l̈ok pjöshko l̈ara, gueniyo dl̈ung iirkono ara anmoyõ kjĩshko ga tjye ga äe.  
\v 14 Eni ga rokara Jehová kong ga tjl̈ẽ l̈ok ga «Jehová, tjawa iëp wol̈on, domer ëre zrörwa kjĩshko l̇l̇ëme. L̇l̇ëbo owa shäryara l̇l̇ëm wl̈eni ga owa ëre iëp ber pjang borwa go l̇l̇ëme. Jehová, l̇l̇ëbo uunkong ëre shäryaga l̈i pja» l̈e.  
\v 15 L̈ara l̈ok pjir ga Jonás dbura l̈ok jer dl̈ung roy, ga dl̈ung kjing shkuno, beno buk tjëkso.  
\v 16 Ĩya l̈ok ga Jehová bangkjrara l̈ok, ga l̇l̇ëbo söra, twara ba kong, ga tjl̈õkwo l̈ara ba kong jl̈õkoyo bakoe. \fig Jonás dburaba jer dl̈ung roy (Jonás 1.15)|src="CO01414B.TIF" size="span" ref="Jonah 1.15 " \fig* 
\p  
\v 17 Gueniyo ga mã dl̈ung roy so ichara Jehovárë kësbang kjl̈ara, Jonás dwe wl̈o. Ga Jonás beno sök mã l̈i bö roy dbargwo mya, shkër dbae. 
\c 2  
\s1 Jonás syõyo 
\p  
\v 1 Eni ga Jonás sök mã l̈i bö roshkoshko ga syõshtono ba Sbö Jehová kong. Tjl̈ẽ ga 
\q1  
\v 2 «Jehová, tja woydëshko ga 
\q2 pja rokoror, 
\q2 ga tja kar dboryorop. 
\q1 Tëm dl̈ung dorong dwayo, tja wol̈on döröshko ga 
\q2 pja rokoror, 
\q2 ga tja kurop. 
\q1  
\v 3 Tja ichorop jer dl̈ung dorong, 
\q2 ga tja popnena dl̈ung mäs l̈irë. 
\q1 Ba pjl̈ubl̈ún këskës l̈i 
\q2 to jek bor kjing go. 
\q1  
\v 4 Kur ga tja iorop beno sök tjoksa. 
\q2 Bop u ĩn ame l̈oror. 
\q1  
\v 5 Tja jnena dl̈ung dyorë uunkong, 
\q2 tja kjingara dl̈ung rong l̈irë, 
\q2 dl̈ung kjl̈o sho opl̇l̇gwing jong bor dl̈u go. 
\q1  
\v 6 Tja opl̈ono jer öötong shäng dl̈ung dl̈upyo jer äärshko. 
\q2 Kur ga tja shduna, iara beno sök eshko ĩyado. 
\q1 Gueniyo ga tja wol̈ontoshko ga tja dörop. 
\q2 Pja bor Sbö Jehová. 
\q1  
\v 7 Kur ga tja wol̈on döröshko ga 
\q2 Jehová, pja woyoshroror, 
\q1 ga bor syõ öötong bop shwoy, 
\q2 öötong bop u jong l̈ishko. 
\q1  
\v 8 Ëye mär sböpga jyãgl̈o go ga 
\q2 kjimtëp ame. 
\q1  
\v 9 Gueniyo bor tjl̈õkwo pjl̈ú go ga 
\q2 l̇l̇ëbo sör, twër ber bop kong. 
\q2 L̇l̇ëye l̈oror bop kong jl̈õkoyo l̈i shäryër eni. 
\q1 ¡Jehová, bor döga l̈i pja eröe!» l̈e. 
\p  
\v 10 Eni ga mã l̈i ichara Jehovárë Jonás tjwë dl̈ung kjako. 
\c 3  
\s1 Nínive sopga, l̇l̇ëbo owa shärye l̈öng l̈i rayara 
\p  
\v 1 E irgo ga Jehová tjl̈ẽno Jonás kong jek obi. Tjl̈ẽ ga  
\v 2 «Kjok buk kjrina kësbang, kjëryo shäryak ak go pjribri kjókshko ko Nínive. Pja nom eshko. Ga l̇l̇ëye l̈ër bop kong l̈i l̈ëp ba kong eni» l̈e. 
\p  
\v 3 Eni ga Sbö tjl̈õkwo l̈i kol̈ara, ga to jek Nínive kjokyo. Kjok, e kësbang, shji jek u ĩk ba roshko wl̈o ga woydara dbargwo mya.  
\v 4 Jonás jëktong shäng ba roshko dbar kjwara ga tjl̈ẽ nopga kong ga «Äär dbargwo sak pkëng (40) ga Nínive kjokyo ëre pjiya Sbörë» l̈e. 
\p  
\v 5 Kuya l̈ok ga tjl̈õkwo kjrarae. Ga tjl̈ẽ l̈ok ëng kong ga «Shji ië l̇l̇ëm Sbö kong» l̈e. Eshko ga nopga uunkong shwong pjuno shtëgro së ä wl̈eniyo, ba woowa l̈i ĩya Sbörë wl̈o l̈e. 
\p  
\v 6 Roy öötong Nínive so pjl̈uyo kongshko ga kojono ba sökkl̈o sökshko dwayo, ga shwong onmo pjl̈ú l̈i skwara, shwong shtëgro së ä wl̈eniyo pjuna, ga wl̈oktong sök töshko bakoe.  
\v 7 E irgo ga pjl̈u, ba pjl̈oyoga, e kjibokwo tono kjwara, miyde kjok eshko sopga uunkongdë wl̈o. Kjibokwo l̈i tjl̈ẽ ga 
\pi1 «Shji ië l̇l̇ëme. Öng l̇l̇ë së̃y l̇l̇ëm, kong di twëy l̇l̇ëm bakoe.  
\v 8 Shwong shtëgro së ä wl̈eniyo, e pjũzĩ, bi woowa l̈i ĩya Sbörë wl̈o. 
\pi1 Ga pjãy kjl̈oshtos jl̈õkoyo Sbö kong. L̇l̇ëye owa shäryëmi l̈öng ĩyado l̈i rayozĩa. Pjãy opshäryë owa, oba zrök, oba shpok, e rayozĩ bakoe.  
\v 9 Eni wl̈eni ga Sbö wotjl̈ĩk l̈i kjl̈opswë, ba iir l̈i l̈õya, sl̈õya, ga shji pjiya l̇l̇ëm kjwe.» 
\p  
\v 10 Ĩya Sbörë ga l̇l̇ëbo owa shärye l̈öng l̈i rayara kjĩshko ga epga songe l̈ara, ga l̇l̇ëye shärye ba tjok l̈ara l̈i shäryara eshko l̇l̇ëme. 
\c 4  
\s1 Jonás iirkono ara 
\p  
\v 1 E kjĩshko ga Jonás iirkono ara,  
\v 2 ga syõshtono Jehová kong, tjl̈ẽ ga «Jehová, tja kuzong. Tja shäng bor kjokshko obishko ga miydoror ga ëre shäryë jũni, ga l̈oror bop kong pjire. E kjĩshko ga tja töktong jek Tarsis kjokyo. Miydër ga pja Sbö, pja wopjl̈ú anmoyõ, nopga songe l̈ëp ĩyado, pja iirkë wl̈o ga kjange. Nopga shdum l̈ëpshko ga l̇l̇ëbo wl̈ẽp woydë obl̈ë obl̈ë enido, shdum l̇l̇ëm wl̈o. 
\p  
\v 3 »Eni ga rokër bop kong ga tja ios wol̈on jekdo. Tja ber sök së ame dey» l̈e. 
\p  
\v 4 Kuya ga tjl̈ẽ ba kong ga «¿Pja iirkë kjweni ga pjl̈úre?» l̈e. 
\p  
\v 5 Eshko ga Jonás opshino kjok eshko dwayo, jek öötong sök kjok buk dl̈o wen tëm shwo l̈ëkong. Eshko ga ukwang shäryara kjwara, ga beno sök ba dirko, l̇l̇ëye shäryë kjok buk l̈i tjok ĩya wl̈o. 
\p  
\v 6 Eshko ga kji sho iara Sbö Jehovárë wen jong kjl̈ara Jonás kopshko, ber sök wopjl̈ú wl̈o. Kji sho l̈i kjĩshko ga Jonás woowa l̇l̇ëme.  
\v 7 Gueniyo wẽshko kjok shröngto ga shtätä ichara Sbörë, kji sho l̈i ue wl̈o, ga sho dano beno drete.  
\v 8 Dl̈o wenoshko ga pjl̈uk kjl̈ik ichara Sbörë weno jong dl̈o wen tëm shwo l̈ëkong dwayo, ga dl̈o jong bek Jonás kä kjing go. Eni kuzong ga kuya mae, wopjir kjoyo, wol̈on woydë erä. Ga tjl̈ẽ ga «Tja sök së woydë ame» l̈e. 
\p  
\v 9 Kuya Sbörë ga tjl̈ẽ ba kong ga «¿Pja iirkë kji sho dano l̈i kjĩshko ga pjl̈úre?» 
\p «Ëng. Bor kong ga pjl̈úe. Tja sök ëreshko wol̈on iirdë» l̈e. 
\p  
\v 10 Kuya ga tjl̈ẽ ba kong ga «Kji sho kjwe dgaga pjarë l̇l̇ëm, kungga pjarë l̇l̇ëm bakoe. Shkër kjwara ga weno, wẽshko ga kjëtonge. Gueniyo ga songe l̈ëp.  
\v 11 Nínive kjokyora nopga ara, sak dbäw dbäw pjl̈ogl̈o sak dbäw kjingsho sak dbäw dbäw pjl̈ogl̈o sak pjök (120,000) kjinmo. L̇l̇ëye pjl̈úre, de oware, e miyde l̈ok l̇l̇ëme. Eshko ga öng ara bakoe. ¿Eni ga songe l̈ër l̇l̇ëm sorë?» l̈e.