\id 2TH - Teribe NT (Gen, Ruth, Jonah and other portions) -Panama 2008 (DBL -2013) 
\h 2 Tesalonicenses 
\toc1 Kjibokwo ëre tara Pablorë Tesalónica sopga kong 
\toc2 2 Tesalonicenses 
\toc3 2Te 
\mt1 Segunda Carta a los Tesalonicenses 
\mt2 Kjibokwo ëre tara Pablorë Tesalónica sopga kong 
\imt1 Kjibokwo ëre sorë 
\ip Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Jesús wol̈ono, ga woshrara Sbörë iröng obi irgo ga to jem kjok dogo. Eshko ga tjl̈ẽ ba tjl̈õkwo kjragaga kong ga l̇l̇ono ga tjwe iröng obi l̈e. Tesalónica kjokyo ga no kjone kjone to l̈öng tjl̈ẽ ga Jesús shrono shäng iröng obi tjän, e kjĩshko epga parkë ame ga pjl̈úe l̈e eni. Kuya l̈ok ga Jesús tjl̈õkwo kjragaga l̈öng eshko l̈i kjone kjone omtjl̈õkwo kjrono, ga parkono l̈ok ame. 
\ip E kjĩshko ga kjibokwo ëre tara Pablorë ba kong, l̇l̇ëbo ëre l̇l̇gweya wl̈o, Jesús tjwe iröng obi sorë l̈i miyde l̈ok wl̈o. Jesús tjwayde iröng l̇l̇ëm obi l̈i tara ba kong. Bäm go ga domer tjwe kjl̈ara obi Ä dbo l̈i tjok, ga nopga jyãpgwe ara l̈i tara ba kong. Jesús tjwe iröng obishko ga ëye mär l̈öng Jesús go l̇l̇ëm l̈i shdũya kjang l̈i tara ba kong. Ga epga ichara ber l̈öng parkë, Jesús shrono iröng obi guing. 
\ip Dënashko ga kjibokwo ichara Pablorë epga kong kjwara. Ëre tjok ga kjwo pjök. 
\c 1  
\p  
\v 1 Kjibokwo ëre taga tja Pablorë, Silvano,\f + \fr 1:1 \fk Silvano\ft , e kowëba \fk Silas \ft bakoe.\f* Timoteo tjok. 
\p Jesús tjl̈õkwo kjragaga l̈öng Tesalónica kjokyo, kjibokwo ëre ichërwa jek bomi kong. Pjãy Data Sbö nopga, pjãy Tjl̈apga Jesucristo nopga bakoe. 
\p  
\v 2 Rokërwa Data Sbö kong, Tjl̈apga Jesucristo kong ga ba wopjl̈ú l̈i kjĩshko ga pjãy kjimte l̈ok ara, pjãy ie ber l̈öng wl̈ẽp bakoe. 
\s1 Tjl̈apga Jesús tjwe iröng obi dbaryo 
\p  
\v 3-4 Pjeyoga, pjãy mär Jesucristo go jek këgong, pjãy uunkong ëng woydë ara kar kar jek këgong bakoe. E kjĩshko ga bëy wl̈o ga tjawa wopjl̈ú Sbö tjok ĩyado. L̇l̇ëbo wen tjwe bomi kong owa ara. Pjãy shdungoba ara. Gueniyo ga pjãy mär ber l̈öng Jesús go ĩyado, ba tjl̈õkwo rayëmi l̇l̇ëme. E kjĩshko ga tjawa l̈an Sbö tjl̈õkwo kjragaga tjok kjok shto obl̈ë obl̈ëshko ga pjãy l̈anyotkërwa wopjl̈úe. 
\p  
\v 5 Pjãy shdungoba eni kjĩshko ga miydëy ga Sbö tjwe no l̇l̇gwega l̈i, e pjl̈o beke. Nopga l̇l̇gweyashko ga pjãy ie Sbörë ber l̈öng ba nopga ĩyado wl̈o.  
\v 6 Bek ga bomi shdunggaga l̈öng l̈i shdũya,  
\v 7 ga pjãy shdung l̈öng l̈i ie woshtë, tjawa bakoe. Ëre shärye Tjl̈apga Jesúsdë wen iök pjë jong ri ri roshko ba parkagaga kjok dogo so dbo ara wl̈eniyo tjok jã.  
\v 8 Tjwe ëye Sbö miydë woydë l̇l̇ëm l̈i, Tjl̈apga Jesucristo tjl̈õkwo pjl̈ú l̈i kjrono l̇l̇ëm l̈i, e shdungga.  
\v 9 Epga, e shdũya ĩyado, dbuya to pjola Tjl̈apga Jesús bokshto dwayo. Ba dbo kãl̈ã ĩga l̈ok ame.  
\v 10 Tjl̈apga l̈i tjwe dbaryo l̈ishko ga e poshrëya ba nopga baĩyarë. Eshko ga yëy l̈e l̈ok ba tjl̈õkwo kjragaga uunkongdë, pjãy oml̈ë eni bako, tjl̈õkwo l̈ororwa bomi kong l̈i kjroromi kjĩshko. 
\p  
\v 11 Eni ga tjawa syõshtë ĩyado bomi kjĩshko. Pjãy rokara Sbörë ber ba nopga wl̈o, ga rokërwa ba kong ga pjãy kjimte jëk pjl̈o bek, e ber wopjl̈ú bomi tjok wl̈o. Pjãy mär Jesús go. E kjĩshko ga pjãy pak pjl̈ú shäryë woydë Sbö kong. Eni ga rokërwa ba kong ga pjãy kong dbo twe, bomi pak pjl̈ú l̈i shäryëmi wl̈o.  
\v 12 Pjãy jëk pjl̈o bek eni ga bi Tjl̈apga Jesús ko iëba ber kësbang, tjwl̈õ ara bomi kjĩshko. Ga pjãy ie ber tjwl̈õ ara bakoe. L̇l̇ëbo uunkong ëre shäryë bi Sbö wopjl̈ú l̈i kjĩshko, Tjl̈apga Jesucristo wopjl̈ú l̈i kjĩshko bakoe. 
\c 2  
\s1 L̇l̇ëbo owa l̈i sogo 
\p  
\v 1-2 Pjeyoga, Tjl̈apga Jesucristo tjwe iröng obi, shji tö̃ya ber l̈öng ba tjok wl̈o. Gueniyo kjone kjone tjl̈ẽ ga «Tjl̈apga l̈i shrono iröng tjän» l̈e. L̈aga Sbö Sëyarë l̈e bomi kong, l̈aga tjawarë l̈e bomi kong, kjibokwo ichaga tjawarë l̈e bomi kong bakoe. Gueniyo jl̈õ l̈ëmi l̇l̇ëm, pjãy opshgawë e go l̇l̇ëm bakoe.  
\v 3 Pjãy jyãpgwëba l̇l̇ë kjĩy l̇l̇ëme. Bäm go ga nopga opyë ber Sbö wl̈oyo. E irgo ga Jesús tjwe iröng obi dbaryo l̈i äätë l̇l̇ëm obishko ga l̇l̇ëbo owa sogo l̈i wen tjwe eshko. Weno shäng jer wl̈o l̈i e.  
\v 4 E opyë ber Sbö wl̈oyo, l̇l̇ëbo poshrëkoba Sbö wl̈eni l̈i moskwo bakoe. Woyde ga e poshrëydëba döe. Eshko ga opzrëk jek äär ber sök Sbö u jong Jerusalén kjokyo l̈i roshko, ga tjl̈ẽ oba kong ga «Sbö l̈i tja» l̈e. 
\p  
\v 5 Tja shäng bomi tjok obishko ga l̇l̇ëbo ëre l̈oror bomi kong. ¿E woyo bomi kong l̇l̇ëmdo?  
\v 6 Dbar iara Sbörë, l̇l̇ëbo owa sogo l̈i wen wl̈o. Gueniyo shaga shäng kjl̈ara, ba dbar l̈i äätë l̇l̇ëm obi wopro ga tjwe l̇l̇ëm wl̈o. Ba shaga l̈i ë miydëmi tjän.  
\v 7 Sbö moskwoga l̈öng parkë ara tjän, gueniyo ga l̇l̇ëbo owa sogo l̈i wen tjwe l̇l̇ëm, ba shaga l̈i kjara Sbörë guing.  
\v 8 Eni ga l̇l̇ëbo owa sogo l̈i wen eshko jã. Gueniyo Tjl̈apga Jesús tjwe iröng obishko ga ba kjamo pjl̈ukyo go dö ga e pjiya ber drete. Ĩkoba e goshko ga ba dbo l̈i kësbang anmoyõ. 
\p  
\v 9 L̇l̇ëbo owa sogo l̈i tjweshko ga kong dbo twaga Ärë. L̇l̇ëbo ĩydëba l̇l̇ëm wl̈eniyo shärye obl̈ë obl̈ë. Ga oba jyãpgwe e go.  
\v 10-12 Owa shärye l̇l̇ë pogo, nopga pjir tjeng l̈i jyãpgwe e go wl̈o. Nopga l̈i pjir, tjl̈õkwo bek l̈i woydara l̇l̇ëm kjĩshko. Tjl̈õkwo l̈i kjrara kjwe ga döktong e go. Gueniyo tjl̈õkwo bek l̈i kjrara l̇l̇ëme. L̇l̇ëbo owa shäryara l̈öng wopjl̈úe. E kjĩshko ga raye Sbörë ga jyãpgwe l̇l̇ëbo owa l̈irë, tjl̈õkwo bek l̇l̇ëm l̈i kjre l̈ok wl̈o, epga ber shdungko wl̈o. 
\s1 Shji l̈öng wokjang ĩyado 
\p  
\v 13-14 Pjeyoga, pjãy woyde Sbörë ara. Pjãy kjrara tek dämärshko, pjãy döya wl̈o. Ga Jesús tjl̈õkwo roy pjl̈ú l̈ororwa bomi kong. E go ga pjãy rokara Sbörë, ga tjl̈õkwo bek l̈i kjroromi, ga pjãy iara Sbö Sëyarë jëk l̈öng pjl̈o bek Sbö bokso. Pjãy döra eni, bi Tjl̈apga Jesucristo tjwl̈õ ara l̈i ber bomi kong bako wl̈o. E kjĩshko ga bëy wl̈o ga tjawa wopjl̈ú Sbö tjok ĩyado.  
\v 15 Eni ga pjeyoga, pjãy l̈öng wokjang ĩyado. Tjl̈õkwo l̈ororwa bomi kong l̈i, tjl̈õkwo tororwa, ichororwa jek bomi kong l̈i, e woyojemi l̇l̇ëme. 
\p  
\v 16 Bi Tjl̈apga Jesucristo, bi Data Sbö, shji woyde l̈ok ara. Ba wopjl̈ú l̈i kjĩshko ga shji ie l̈ok dbokjrë ĩyado, shji wosonkë l̇l̇ëm wl̈o, shji ie ber l̈öng ba koshë wopjl̈ú wl̈o bakoe.  
\v 17 Eni ga woydërwa ga pjãy ie l̈ok dbokjrë, pjãy wosonkë l̇l̇ëm wl̈o, ba tjl̈õkwo roy pjl̈ú l̈ëmi ĩyado wl̈o, l̇l̇ëbo pjl̈ú l̈i shäryëmi ĩyado wl̈o bakoe. 
\c 3  
\s1 «Pjãy syõshtë borwa kong» l̈ara Pablorë 
\p  
\v 1 Era eni ga pjeyoga, pjãy syõshtë Sbö kong borwa kjĩshko, Tjl̈apga Jesús tjl̈õkwo roy shdär kjone pogo wl̈o, tjl̈õkwo l̈i kjrëba wopjl̈ú wl̈o bako, pjãy omkjrono sorë ga eni.  
\v 2 Nopga mär Jesús go uunkong l̇l̇ëme. Kjone kjone owa, wotjl̈ĩk l̇l̇ëbo shäryë borwa kong owa. E kjĩshko ga pjãy syõshtë borwa kjĩshko, tjawa döya Sbörë ba wl̈oshko dwayo wl̈o.  
\v 3 Gueniyo Tjl̈apga l̈i, l̇l̇ëye l̈e l̈i shärye eni. Ga pjãy ie ber l̈öng wokjang ĩyado, pjãy wl̈ike, pjãy l̈on ber tjeng Ä wl̈oshko l̇l̇ëm wl̈o.  
\v 4 Miydërwa ga pjãy kjimte Tjl̈apga l̈irë shäng, tjl̈õkwo l̈ororwa bomi kong l̈i shäryëmi l̈öng ĩyado, ga rayëmi l̇l̇ëme.  
\v 5 Woydërwa ga pjãy kjimte Tjl̈apga l̈irë obl̈ë woydë ara wl̈o, shji woyde Sbörë sorë ga eni, ga pjãy kjimte, l̇l̇ëbo wen bomi kong owashko ga pjãy wokjang wl̈o, Cristo ĩ dik. 
\s1 Shji shmi ara l̇l̇ëme 
\p  
\v 6 Pjeyoga, kjone kjone shmi ara l̈öng bomi tjrëko, tjl̈õkwo pinorwa bomi kong l̈i kol̈e l̈öng l̇l̇ëme. Bi Tjl̈apga Jesucristo ko goshko ga l̈ërwa bomi kong jl̈õkoyo ga pjãy jëk l̈ok ba tjok l̇l̇ëme.  
\v 7 Tjawa l̈öng bomi tjokshko ga tjawa jëktong sorë l̈i miydëmi pjl̈úe. Bëy wl̈o ga pjãy jëk eni bakoe. Tjawa l̈öng bomi tjokshko ga tjawa shmirkono l̇l̇ëme.  
\v 8 Ëye dl̈i uororwa iguing l̇l̇ëme. Tjawa parkono shkë dba, ëye barwërwa l̇l̇ëm wl̈o.  
\v 9 Pjãy ichororwa borwa kjimtë dbo go kjwe ga pjl̈úe. Gueniyo shäryororwa eni l̇l̇ëm, tjawa ĩmi wl̈o, pjãy omshäryë eni bako wl̈o.  
\v 10 Tjawa l̈öng bomi tjokshko ga tjawa tjl̈ẽ bomi kong ga «Ëye parkë l̇l̇ëm ga ië l̇l̇ëm bakoe» l̈ërwa eni.  
\v 11 Gueniyo roy kurorwa ga pjãy kjone kjone shmi ara, parkë l̇l̇ëm, obl̈ë l̈anyotke erä.  
\v 12 Tjl̈apga Jesucristo ko goshko ga nopga l̈ërwa l̈öng l̈i ichërwa parkë, ba dl̈i tjwl̈ẽya l̈ok e go wl̈o. 
\p  
\v 13 Pjeyoga, pjãy kwl̈eya l̇l̇ëbo pjl̈ú shäryë l̇l̇ëme.  
\v 14 Ëye kjibokwo tororwa bomi kong ëre kol̈ë l̇l̇ëm ga pjãy jëk l̈ok ba tjok ame, epga l̈ökkjrë e go wl̈o.  
\v 15 Gueniyo iëmi ber bomi moskwo l̇l̇ëm, poshdũzĩ bomi kjl̈ara wl̈eni. 
\s1 Kjibokwo pjirzl̈ong 
\p  
\v 16 Shji l̈öng wl̈ẽp l̈aga Tjl̈apgarë. Eni ga woydërwa ga Tjl̈apga om go l̈i ber l̈öng bomi tjok ĩyado, ga pjãy ie ber l̈öng wl̈ẽp, l̇l̇ë pogo wen tjwe bomi kong gueniyo. 
\p  
\v 17 Tja Pablo, kjibokwo pjirzl̈ong ëre tër bomi kong bor orkwo om go go shara. Kjibokwo ichër ë kongshko ga tja sgara ba të jũni. 
\p  
\v 18 Rokër Tjl̈apga Jesucristo kong ga ba wopjl̈ú l̈i kjĩshko ga pjãy uunkong kjimte ara.