\id 1TH - Teribe NT (Gen, Ruth, Jonah and other portions) -Panama 2008 (DBL -2013) 
\h 1 Tesalonicenses 
\toc1 Kjibokwo ëre tara Pablorë Tesalónica sopga kong 
\toc2 1 Tesalonicenses 
\toc3 1Te 
\mt1 Primera Carta a los Tesalonicenses 
\mt2 Kjibokwo ëre tara Pablorë Tesalónica sopga kong 
\imt1 Kjibokwo ëre sorë 
\ip Domer shäng kjl̈ara ko Pablo. E Sbö tjl̈õkwo l̈aga Jesús ãska wl̈eniyo. Dënashko ga öör Jesús roy pjl̈ú l̈ë Tesalónica kjokyo. E irgo ga jek öör eshko pjl̈ara obi. Eshko ga Silvano, Timoteo, e söra jek ba tjok. Gueniyo nopga Sbö miydë l̇l̇ëm wl̈eniyo iirkono ara ba kong, ga Pablo töktong ey dwayo. 
\ip Jesús tjl̈õkwo kjragaga l̈öng Tesalónica kjokyo l̈i shdunaba ara. E kjĩshko ga Pablo jek woydë ba ĩk obi, gueniyo to jek ame. Eni ga kjibokwo ëre tara, twara Timoteo kong, ga ichara jek ba sök epga kong, epga dbokjrë e go wl̈o. 
\ip L̇l̇ëbo shäryara Sbörë epga kong pjl̈ú, ga Pablo beno wopjl̈ú e kjĩshko l̈i tara ba kong. Epga shdungoba ara ëmdë ga Sbö shäng ba tjok l̈i tara ba kong. Dënashko ga Pablo jëktong shäng ba tjok sorë l̈i tara ba kong. Epga ichara mär Jesús go jek këgong këgong. Epga ichara Jesús tjwe iröng obi dbaryo l̈i koshë wopjl̈ú bakoe. 
\c 1  
\p  
\v 1 Kjibokwo ëre taga tja Pablorë, Silvano,\f + \fr 1:1 \fk Silvano\ft , e kowëba \fk Silas \ft bakoe.\f* Timoteo tjok. 
\p Jesús tjl̈õkwo kjragaga l̈öng Tesalónica kjokyo, kjibokwo ëre ichërwa jek bomi kong. Pjãy Data Sbö nopga, pjãy Tjl̈apga Jesucristo nopga bakoe. 
\p Rokër Data Sbö kong ga ba wopjl̈ú l̈i kjĩshko ga pjãy kjimte ara, pjãy ie ber l̈öng wl̈ẽp bakoe. 
\s1 L̇l̇ëbo shäryara Tesalónica sopgarë pjl̈ú Sbö kong ara 
\p  
\v 2-3 Pjãy mär Tjl̈apga Jesucristo go kjĩshko ga pjãy parkë pjl̈ú Sbö kong. Obl̈ë woydëmi ara kjĩshko ga l̇l̇ëbo pjl̈ú shäryëmi ba kong. Bi Tjl̈apga Jesucristo, e koshëmi l̈öng wopjl̈ú ĩyado kjĩshko ga l̇l̇ëbo wen tjwe bomi kong owashko ga pjãy wosonkë l̇l̇ëm, pjãy pak shäryë pjl̈ú ĩyado. E kjĩshko ga tjawa wopjl̈ú Sbö tjok ĩyado. Tjawa syõshtëshko ga tjawa syõshtë bomi kjĩshko, ga l̇l̇ëye pjl̈ú shäryëmi l̈öng l̈i, e l̈ërwa Data Sbö kong. 
\p  
\v 4-5 Pjeyoga, pjãy woyde Sbörë ara. Jesucristo tjl̈õkwo roy pjl̈ú l̈ororwa bomi kongshko ga kuromi dö l̇l̇ëm, Sbö dbo ara l̈i ĩnomi bako, ga pjãy kjimtara Sbö Sëyarë tjl̈õkwo l̈i kjrë jl̈õkoyo. Miydërwa e go ga pjãy kjraga Sbörë om go. Tjawa l̈öng bomi tjokshko ga tjawa opshäryono bomi kong sorë l̈i, e miydëmi l̈öng pjl̈úe.  
\v 6 E irgo ga l̇l̇ëbo weno bomi kong owashko ga pjãy kjimtara Sbö Sëyarë beno l̈öng wopjl̈úe. Eni ga tjawa opshäryono sorë l̈i, Tjl̈apga Jesús opshäryono sorë l̈i, pjãy omshäryono eni bakoe. 
\p  
\v 7 Eni ga l̇l̇ëye shäryoromi pjl̈ú l̈i, e beno pjl̈ú Jesús tjl̈õkwo kjragaga l̈öng Macedonia kjokyo l̈i kong, l̈öng Acaya kjokyo l̈i kong, omshäryë l̈ok eni bako wl̈o.  
\v 8 Bomi kjĩshko ga Tjl̈apga Jesús tjl̈õkwo roy shdöktong Macedonia kjokyo, Acaya kjokyo, gueniyo eshko dö l̇l̇ëme. Pjãy mär Sbö go sorë l̈i roy shdöktong kjok kjwang jĩkong. E kjĩshko ga pjãy roy l̈ërwa ë kong ame ga pjl̈ú, kura l̈ok tjän kjĩshko.  
\v 9-10 L̈anyotkëba l̈öng om go ara. Tjawa öötong l̈öng bomi shwoyshko ga tjawa wl̈okjroromi l̈öng wopjl̈úe. Eshko ga bomi sböpga jyãgl̈o tjeng l̈i rayoromi pjir, ga pjãy optwono Sbö sök së jl̈õkoyo l̈i kong, pjãy parkë ber l̈öng ba kong shara wl̈o. Jesús, e Sbö Wa woshrara Sbörë iröng obi. E bi döga, no shdũzl̈ong dbaryoshko ga shji shdũya Sbörë l̇l̇ëm wl̈o. Ga Jesús ter tjwe kjok dogo dwayo iröng obi l̈i, e koshomirë l̈öng. Pjãy roy l̈ëba l̈öng eni. 
\c 2  
\s1 Pablo parkono Tesalónica kjokyo sorë 
\p  
\v 1 Pjeyoga, miydëmi pjl̈ú ga tjawa jek öör tjeng bomi ĩk l̈i beno pjl̈ú, owa l̇l̇ëme.  
\v 2 Miydëmi pjir ga tjawa äätë bomi shwoy l̇l̇ëm obishko ga tjawa l̈öng Filipos kjokyo. Eshko ga tjawa l̈araba owa ara, l̇l̇ëbo weno borwa kong owa bakoe. Eni ëmdë ga tjawa kjimtara Sbörë ba tjl̈õkwo roy pjl̈ú l̈ë bomi kong, tjawa wl̈oyoga l̈öng ara gueniyo.  
\v 3 Tjawa tjl̈õkwo l̈ono pjl̈o bek eröe. Tjawa diktong l̈öng l̇l̇ëme. Tjawa wotjl̈ĩno l̇l̇ëbo owa shäryë ë tjok l̇l̇ëme. Ëye jyãpgwërwa wl̈o l̈ororwa l̇l̇ëm bakoe.  
\v 4 Dënashko ga tjawa tjl̈ĩna Sbörë, ga tjawa iara beno l̈öng ba tjl̈õkwo roy pjl̈ú l̈aga oba kong. Tjawa tjl̈ẽno, nopga ber l̈öng wopjl̈ú borwa tjok wl̈o l̇l̇ëme. Tjawa tjl̈ẽno, Sbö ber wopjl̈ú borwa tjok wl̈o, shji wotjl̈ĩk l̈öng l̇l̇ë ĩya sök wẽl̈ë kjĩshko. 
\p  
\v 5 Miydëmi pjl̈ú ga tjl̈õkwo wol̈ëso ber pjl̈ú oba kong wl̈o l̈i l̈orwarë l̇l̇ëme. Miyde Sbörë om go ga tjawa opshäryono nopga to l̈öng dbur töng ba kong erö wl̈o wl̈eniyo dik l̇l̇ëm bakoe.  
\v 6-7 Tjawa to l̈öng poshrëmi wl̈o l̇l̇ëm, poshrëya obl̈ërë wl̈o l̇l̇ëm bakoe. Tjawa Sbö tjl̈õkwo roy l̈agaga Cristo ãska. E kjĩshko ga pjãy kjwe ichororwa borwa kjimtë dbo go ga pjl̈úe. Gueniyo tjawa opshäryono eni l̇l̇ëme. Tjawa opyono beno l̈öng wotöy bomi tjok, mekëga ba wapga dë wl̈eni.  
\v 8 Pjãy woydërwa ara. Sbö tjl̈õkwo roy pjl̈ú l̈ororwa bomi kong wopjl̈úe. Gueniyo erö l̇l̇ëme. Tjawa wopjl̈ú bomi tjok kjĩshko ga tjawa opyono beno l̈öng l̇l̇ë pogo shäryë bomi kong wl̈o.  
\v 9 Pjeyoga, tjawa l̈öng Sbö tjl̈õkwo roy pjl̈ú l̈ë bomi kongshko ga ëye kong pak twërwa woydë l̇l̇ëme. E kjĩshko ga tjawa parkono shkë dba, tjawa dröno däw, dl̈i l̇l̇ë wl̈ẽk borwa kong wl̈o. ¿E woyo bomi kong l̇l̇ëmdo? 
\p  
\v 10 Pjãy omĩno l̈öng, ga Sbö omĩno bakoe. Tjawa l̈öng pjãy Jesús tjl̈õkwo kjragaga tjokshko ga tjawa jëk l̈öng pjl̈o bek, tjawa pogo l̇l̇ëye dret Sbö bokso, nopga bokso bakoe.  
\v 11 Miydëmi pjl̈ú ga dataga opshäryë ba wapga tjok sorë ga tjawa opshäryono pjãy kjl̈ara kjl̈ara tjok eni bakoe.  
\v 12 Pjãy poshdunorwa, pjãy dbokjrë wl̈o, pjãy wosonkë l̇l̇ëm wl̈o bakoe. Sbö, e tjwl̈õ ara, ga pjãy roke ber l̈öng ba tjok, sök no pjl̈uyo ĩyado l̈ishko. E kjĩshko ga pjãy l̈öng pjl̈o beke l̈ororwa bomi kong, Sbö ber sök wopjl̈ú bomi tjok wl̈o. 
\p  
\v 13 Sbö tjl̈õkwo roy pjl̈ú l̈i, e nopga ĩ l̇l̇ëme. E Sbö ĩ. Ga kuromishko ga tjl̈õkwo l̈i kjroromi jl̈õkoyo eni. E kjĩshko ga tjawa wopjl̈ú Sbö tjok ĩyado. Tjl̈õkwo l̈i kjroromi kjĩshko ga pjãy kjl̈opswara beno wotjl̈ĩk obl̈ë.  
\v 14 Pjãy shduna bomi pjeyoga eshko so l̈irë. Sbö tjl̈õkwo kjragaga töno beno tjeng Cristo Jesús tjok l̈öng Judea kjokyo l̈i shdungga ba pjeyoga judíoga obi l̈irë eni bakoe.  
\v 15 Judíoga ëre, e Tjl̈apga Jesús zröga, Sbö tjl̈õkwo l̈agaga tek dënashko so l̈i zröga bakoe. Tjawara ichara l̈ok to kjok shto obl̈ë. Sbö wopjl̈ú ba tjok l̈ok l̇l̇ëme. Epga l̈öng nopga uunkong wl̈oyo.  
\v 16 Tjawa tjl̈ẽ woydë nopga judío l̇l̇ëm wl̈eniyo kong, döya Sbörë wl̈oshko ga tjawa ichara l̈ok ba shäryë l̇l̇ëme. Eni ga l̇l̇ëbo owa shärye l̈ok jek këgong këgong. E kjĩshko ga Sbö iirkë ara ba kong, ga epga shdũya döröe. 
\s1 Pablo jek woydë Tesalónica kjokyo obi 
\p  
\v 17 Pjeyoga, tjawa opshino jek bomi zl̈ong bäng dwayo dbar kjwöbö ga shji ëng ĩk l̇l̇ëm, gueniyo pjãy woyotjl̈ĩnwa ara. Ga pjãy ĩnwa woydë ara kjĩshko ga tjawa dröno ara jek bomi ĩk wl̈o.  
\v 18 Tjawa wotjl̈ĩno jek bomi ĩk l̈ororwa. Tja Pablo, tja jek bomi ĩk l̈oror pjl̈öböso, gueniyo tja sona Ärë.  
\v 19 Tjawa l̈öng Tjl̈apga Jesús tjwe iröng obi l̈i koshë l̈öng wopjl̈úe. Eshko ga tjawa l̈an wopjl̈ú bomi kjĩshko ba tjok, tjl̈õkwo l̈ororwa bomi kong l̈i kjroromi jl̈õkoyo kjĩshko.  
\v 20 Jl̈õkoyo ga bomi kjĩshko ga tjawa l̈öng wopjl̈ú, woowa l̇l̇ëme. 
\c 3  
\s1 Timoteo öör ba ĩk 
\p  
\v 1-2 Eni ga pjãy roy tjwe koshërwa woydë ameshko ga Timoteo ichororwa jek bomi ĩk, ga tjawara beno tjeng Atenas kjokyo tjoksa. Timoteo, e bi kjl̈ara, e parkë shäng Sbö kong, Cristo roy pjl̈ú l̈ë oba kong borwa tjok. Ichororwa jek bomi kjimtë, pjãy mär Jesús go jek këgong wl̈o,  
\v 3 l̇l̇ëbo tjwe kjang bomi kongshko ga pjãy wotjl̈ĩk Jesús rayë l̇l̇ëm wl̈o. Shji shdungoba song eni, e miydëmi l̈öng pjl̈úe.  
\v 4 Tjawa l̈öng bomi tjok obishko ga l̇l̇ëbo wen tjwe bi kong owa ara l̈ororwa bomi kong. Ga miydëmi ga shäryono eni.  
\v 5 E kjĩshko ga l̇l̇ëye koshoror ame, ga tja no ichono bomi ĩk, pjãy mär l̈öng Jesús gore ĩya wl̈o. Pjãy woyotjl̈ĩn ara, pjãy jyãpgwara Ärë ga pak shäryororwa l̈i beno tjwl̈õ ame, e bangkjrotë. 
\p  
\v 6 Gueniyo ga Timoteo tek shrono shäng iröng obishko ga pjãy roy söra pjl̈úe. Pjãy mär l̈öng Jesús go ĩyado l̈e. Pjãy ëng woydë ara kar kar l̈e. Tjawa woyotjl̈ĩmi, woydëmi l̈öng ĩyado l̈e. Tjawa ĩmi woydë ara, pjãy ĩnwa woydë sorë ga eni l̈e bakoe. 
\p  
\v 7 Pjeyoga, l̇l̇ëbo wen borwa kong owa ara. Gueniyo ga tjawa ber l̈öng wopjl̈ú, pjãy mär l̈öng Jesús go l̈i roy shrono borwa kong kjĩshko.  
\v 8 Pjãy mär l̈öng Tjl̈apga Jesús go jl̈õkoyo l̈i roy kurorwa. E kjĩshko ga tjawa beno l̈öng wopjl̈ú anmoyõ.  
\v 9 Tjawa wopjl̈ú Sbö tjok ara bomi kjĩshko. Tjawa syõshtë Sbö kong bomi kjĩshkoshko ga tjawa wopjl̈ú erä.  
\v 10 Shkë dba ga rokërwa ba kong ga tjawa kjimte äär bomi ĩk obi wl̈o, pjãy kjimtërwa mär Jesús go jek këgong wl̈o bakoe. 
\p  
\v 11-13 Woydërwa ga bi Data Sbö, bi Tjl̈apga Jesús, tjawa kjimte äär bomi ĩk wl̈o. Rokërwa Tjl̈apga kong ga pjãy kjimte ëng woydë ara kar kar jek këgong, pjãy kjimte obl̈ë woydë ara, pjãy woydërwa sorë ga eni, pjãy ie ber l̈öng wokjang jek këgong, pjãy jëk l̈öng pjl̈o bek wl̈o, Tjl̈apga Jesús tjwe iröng ba nopga iak beno tjeng dboy Sbö kong l̈i tjokshko ga pjãy pogo l̇l̇ëye dret bi Data Sbö bokso wl̈o. Rokërwa uunkong eni. 
\c 4  
\s1 Shji jëk sorë, Sbö ber wopjl̈ú bi tjok wl̈o 
\p  
\v 1 Era eni ga pjeyoga, tjawa ichara Tjl̈apga Jesúsdë tjl̈õkwo l̈ë bomi kong kjrina obi. Dënashko ga pjãy pinorwa jëk sorë, Sbö ber wopjl̈ú bomi tjok wl̈o, ga shäryëmi l̈öng eni. Gueniyo ga rokërwa bomi kong ga shäryëmi eni jek këgong këgong anmoyõ.  
\v 2 Miydëmi pjl̈ú ga tjl̈õkwo l̈ororwa bomi kongshko ga tjawa ichaga Tjl̈apga Jesúsdë. 
\p  
\v 3 L̇l̇ëye woyde Sbörë l̈i, e eni: Pjãy jëk l̈öng pjl̈o bek ba bokso ĩyado; shji orkwosmono ë tjok l̇l̇ëm ga shji pë ba tjok l̇l̇ëme;  
\v 4 l̇l̇ëbo owa shäryëy bi doyo om go l̈i go l̇l̇ëme; pjãy opdë yõtso, pjl̈o bek dey;  
\v 5 nopga Sbö miydë l̇l̇ëm wl̈eniyo söya ba wotjl̈ĩk owa l̈irë, l̇l̇ëbo owa shäryë ba doyo go, gueniyo shji omshäryë baĩya dik l̇l̇ëme.  
\v 6 Shji shdũya Sbörë jl̈õkoyo l̇l̇ëbo ëre kjĩshko. E l̈ororwa bomi kong tjän. E kjĩshko ga l̇l̇ëbo shäryëy eni obl̈ë kong l̇l̇ëm, ëye jyãpgwëy, l̇l̇ëbo owa shäryë wl̈o l̇l̇ëm bakoe.  
\v 7 Shji rokara Sbörë, shji ber l̈öng l̇l̇ëbo bëy shäryë wl̈o, shji ber l̈öng l̇l̇ëbo owa shäryë wl̈o l̇l̇ëme.  
\v 8 Eni ga ëye tjl̈õkwo ëre kjrë woydë l̇l̇ëm ga l̇l̇ëbo owa shärye shäng nopga kong l̇l̇ëm, shärye shäng Sbö kong. Sbö Sëya twaga bomi kong l̈i, Sbö l̈i e. 
\p  
\v 9 Pjãy pina Sbörë om go ëng woydë ara kar kar, epenga dö wl̈eni. Eni kuzong ga l̇l̇ëbo tërwa bomi kong kjibokwo go e kjĩshko l̇l̇ëno l̇l̇ëme.  
\v 10 Shäryëmi l̈öng eni pjeyoga l̈öng Macedonia kjokyo uunkong l̈i tjok. Pjeyoga, rokërwa bomi kong ga shäryozĩ eni jek këgong këgong anmoyõ.  
\v 11-12 Pjãy parkos wl̈ẽp bomi orkwo om go go, obl̈ë barwëmi l̇l̇ëm wl̈o. Pjãy mär obl̈ë go l̇l̇ëm, pjãy mär bomi pak om go l̈i go shara, l̈ororwa bomi kong sorë l̈i eni. Shäryozĩ eni, pjãy bangkjre nopga obl̈ërë wl̈o. 
\s1 Tjl̈apga Jesús tjwe iröng obi dbaryo 
\p  
\v 13 Pjeyoga, no shinmotkono irgo ga l̇l̇ëye wen ba tjok dö l̈i woydërwa ga miydëmi. Ëye wol̈onoshko ga pjãy ber l̈öng woydë, nopga l̇l̇ëbo koshë l̈öng l̇l̇ëm wl̈eniyo dik l̇l̇ëme.  
\v 14 Miydëy pjl̈ú ga Jesús wol̈ono, ga woshrara Sbörë iröng obi. E kjĩshko ga miydëy ga ëye mär l̈öng Jesús go ga wol̈ono ga woshre Sbörë Jesús tjok eni bakoe. 
\p  
\v 15 E kjĩshko ga l̈ërwa bomi kong ga Tjl̈apga Jesús tjwe iröng obishko ga shji l̈öng së obi l̈i jem wol̈ono tjeng l̈i bäm go l̇l̇ëme. Tjl̈õkwo ëre l̈aga Tjl̈apga Jesúsdë.  
\v 16 Eshko ga Tjl̈apga Jesús om go l̈i ter tjwe kjok dogo dwayo, ga öö l̈e jl̈õkoyo, bi ichokl̈o. Eshko ga ba parkaga kjok dogo so kägäyo l̈i tjl̈ẽ. Sbö wl̈i, e pjl̈ukyo kuy bakoe. Eshko ga ëye töno beno tjeng Cristo tjok, ga wol̈ono tjeng ga woshre bäm go.  
\v 17 E irgo ga shji beno l̈öng së l̈i, shji söya jem ba tjok pjäng sho roshko, ga shji ëng dowl̈ẽk Tjl̈apga l̈i tjok eshko. Eshko jek l̈ëkong ga shji ber l̈öng ba tjok.  
\v 18 Tjl̈õkwo ëre l̈õzĩ ëng kong, pjãy wokjang wl̈o. 
\c 5  
\p  
\v 1 Pjeyoga, l̇l̇ëbo ëre shäryë l̇l̇ono, kjok orë, e tërwa bomi kong l̇l̇ëno l̇l̇ëme.  
\v 2 Miydëmi pjl̈ú ga Tjl̈apga Jesús, e tjwe, koshëy l̈öng l̇l̇ëmshko, oba tjwe l̈ũrkë shkë wl̈eni.  
\v 3 «Shji l̈öng pjl̈úe» l̈ëbashko ga ba pjikkl̈o l̈i tjwe eshko, wal̈ë wl̈oshko dörö ga shara swl̈orë wl̈eni. Eshko ga ëye där kjl̈ara l̇l̇ëme. 
\p  
\v 4 Pjeyoga, nopga tjwe l̇l̇ëbo l̈ũyotkëshko ga shji wl̈ẽya l̈öng «¡L̇l̇ë!» l̈ëy. Gueniyo pjãy l̈öng kjok ro sĩ roy wl̈eni l̇l̇ëme. E kjĩshko ga Tjl̈apga l̈i tjweshko ga pjãy wl̈ẽya l̈öng «¡L̇l̇ë!» l̈ëmi eni l̇l̇ëme.  
\v 5 Pjãy dba so, shji shkë so l̇l̇ëme.  
\v 6 E kjĩshko ga e woyotjl̈ĩmi l̈öng ĩyado. Nopga obl̈ë omwoyotjl̈ĩk l̇l̇ëm, l̈öng pë wl̈eni. Gueniyo pjãy opshäryë eni l̇l̇ëme. Woyde ga shji l̈öng sjëk ĩyado. L̇l̇ëbo shäryëyshko ga woyde ga woyotjl̈ĩy yõtso guing.  
\v 7 Ëye pë ga pë shkë. Ëye nel̈õtkë ä ga nel̈õtkë shkë.  
\v 8 Gueniyo shji dba so ëre, woyde ga shji l̇l̇ëbo shäryë ga woyotjl̈ĩy yõtso guing. Shji mär Jesús go, nopga woydëy ara bakoe. Shäryëy eni, shji opwl̈ikë wl̈o, ëngkjwagaga opwl̈ikë ba worbu wl̈ikokl̈o go wl̈eni. Shji döya Sbörë l̇l̇ono, e koshoydë. Shäryëy eni, shji opwl̈ikë wl̈o, ëngkjwagaga opwl̈ikë ba kä wl̈ikokl̈o go wl̈eni. 
\p  
\v 9 Shji kjrara Sbörë, shji döya Tjl̈apga Jesucristorë wl̈o, shji shdũya wl̈o l̇l̇ëme.  
\v 10 Jesucristo wol̈ono bi kjĩshko. E kjĩshko ga tjwe iröng obishko ga shji wol̈ono tjeng l̈i, shji l̈öng së obi l̈i, shji söya uunkong ber tjeng ba tjok ĩyado wl̈o.  
\v 11 E kjĩshko ga pjãy ëng kjimtos kar kar, pjãy wokjankë jek këgong këgong wl̈o, tek shäryëmi l̈öng sorë ga eni. 
\s1 Jesús tjl̈õkwo kjragaga jëk ëng tjok sorë 
\p  
\v 12-13 Pjeyoga, nopga kjrara Tjl̈apga Jesúsdë parkë bomi tjrëko wl̈o. Epga, e bomi kägäyo, bomi poshdungga bakoe. L̈öng parkë ara. E kjĩshko ga bangkjrozĩ, tjwl̈õ ara l̈ozĩ, woydozĩ ara bakoe. Pjãy l̈öng wopjl̈ú ëng tjok kar kare.  
\v 14 Rokërwa bomi kong ga nopga parkë woydë l̇l̇ëm l̈öng l̈i poshdũzĩ jl̈õkoyo. Nopga kjimtako l̈i kjimtozĩa. Nopga wosong l̈i kjimtozĩ, wokjankë wl̈o. Pjãy kwl̈eya obl̈ë kjimtë mal̈ing l̇l̇ëme.  
\v 15 Pjãy sjëke. L̇l̇ëbo owa shäryëba bomi kongshko ga pjãy omshäryë ba kong eni l̇l̇ëme. Pjãy l̇l̇ëbo shäryos pjl̈ú ëng kong ĩyado, shäryozĩ obl̈ë kong eni bakoe. 
\p  
\v 16 Pjãy l̈öng wopjl̈ú ĩyado.  
\v 17 Pjãy syõshtë Sbö kong kjok orë pogo.  
\v 18 Pjãy wopjl̈ú Sbö tjok l̇l̇ëbo uunkong kjĩshko. Woyde Sbörë ga ëye töno beno tjeng Cristo Jesús tjok ga omshäryë eni. 
\p  
\v 19 Sbö Sëya pak l̈i, e sõy l̇l̇ëme.  
\v 20 «Tjl̈õkwo l̈ara Sbö Sëyarë bor kong l̈i l̈ër bomi kong» l̈e ërëshko ga kuy l̇l̇ëme l̈ëy l̇l̇ëme.  
\v 21 E kuzĩ, woyotjl̈ĩzĩ yõtso dey. E irgo ga tjl̈õkwo l̈i bek wl̈eni ga e kjromirë,  
\v 22 gueniyo tjl̈õkwo l̈i owa wl̈eni ga e kjrëy l̇l̇ëme. 
\p  
\v 23 Shji l̈öng wl̈ẽp l̈aga Sbörë. Ga woydërwa ga pjãy ie Sbörë om go ber tjeng dboy ba kong, pjãy jëk l̈öng pjl̈o bek ba bokso wl̈o. Ga bomi sëya, bomi wotjl̈ĩk, bomi doyo, e de yõtso, bi Tjl̈apga Jesucristo tjwe iröng obi dbaryoshko ga pjãy pogo l̇l̇ëye dret ba bokso wl̈o.  
\v 24 Pjãy rokara Sbörë, ga pjãy raye l̇l̇ëme. Shärye eni e kjĩshko. 
\s1 Kjibokwo pjirzl̈ong 
\p  
\v 25 Pjeyoga, pjãy syõshtë Sbö kong borwa kjĩshko. 
\p  
\v 26 Pjãy woydërwa ara. Eni ga «¿Yonde?» l̈ëmi ëng kong wopjl̈úe. 
\p  
\v 27 Rokër bomi kong ga kjibokwo ëre l̈ëmi pjeyoga uunkong kong. Woyde Tjl̈apga Jesúsdë eni. 
\p  
\v 28 Rokër Tjl̈apga Jesucristo kong ga ba wopjl̈ú l̈i kjĩshko ga pjãy kjimte ara.