\id ECC 
\ide UTF-8
\h Mpañoke
\toc1 Mpañoke
\toc2 Mpañoke
\toc3 Mpa
\mt1 Mpañoke
\c 1
\q1
\v 1 Ty taro’ i Mpañokey,
\q1 ana’ i Davide, mpanjaka e Ierosalaime ao.
\q1
\v 2 Hakafoahan-kafoake, hoe i Mpañokey,
\q1 Hakafoahan-kafoake! Fonga kafoake!
\q1
\v 3 Ino ty tombo’e ho a ondatio
\q1 amo fifanehafa’e ambane’ i àndroy?
\q1
\v 4 Mihelañe ty tariratse raike,
\q1 mbore limbezen-tariratse,
\q1 fe nainai’e eo ty tane toy.
\q1
\v 5 Manjirike ka i àndroy,
\q1 mitsofotse i àndroy,
\q1 mihiririñe mb’am-panjiriha’e añe.
\q1
\v 6 Mitioke mañatimo,
\q1 le mibalike mañavaratse;
\q1 mikariokariok’ avao i tiokey,
\q1 vaho mimpoly amo fiaria’eo.
\q1
\v 7 Songa mivariñe mb’an-driake mb’eo
\q1 o sakao fe tsy atseke i riakey;
\q1 mb’amy fikararaha’ o torahañeoy,
\q1 le mb’eo avao ty fikararaha’ iareo.
\q1
\v 8 Hene mahamamake,
\q1 tsy lefe’ ondaty volañeñe,
\q1 tsy mahaetsa-pihaino t’ie vazoho,
\q1 mbore tsy mahaenen-dravembia
\q1 te ijanjiñañe.
\q1
\v 9 Mbe ho avy indraike i fa añey,
\q1 naho mbe hanoeñe avao ze fa nanoeñe,
\q1 vaho tsy ambane’ i àndroy
\q1 ty atao vao.
\q1
\v 10 Eo hao ty mete hanoeñe ty hoe,
\q1 Heheke! vao itoy? Ie fa teo avao,
\q1 haehae taolon-tikañe añe.
\q1
\v 11 Tsy tiahy o raha taoloo,
\q1 naho o raha hifetsakeo,
\q1 vaho tsy hahatiahy irezay
\q1 o hanonjohio.
\p
\v 12 Izaho, i mpañokey, le fa mpanjaka Israele e Ierosalaime ao, 
\v 13 le nimanean-troko ty hañotsohotso naho hikodebe an-kihitse ze hene fitoloñañe ambanen-dike­rañe atoa; toe tolon-draha mahamokotse ty natolon’ Añahare am’ondatio hifanehafa’e. 
\v 14 Nitreako iaby ze fitoloñañe ambane’ i àndroy; le hehe t’ie fonga kafoake vaho fañeañan-tioke.
\q1
\v 15 Tsy mete ahity ty mengoke,
\q1 vaho tsy lefe iaheñe ty tsy eo.
\p
\v 16 Hoe iraho am-batako: Ingo fa natontoko mandikoatse ze hene mpifehe’ Ierosalaime taolo ahy ty fahaoniñañe ra’elahy; vaho nandifotse ty troko ty hihitse naho hilala. 
\v 17 Le nampitoloñeko ty troko hahaoniña’e hihitse naho hahafohiñe ty hadagolà naho ty hagegeañe. Nirendreko t’ie fañeañan-tioke ka.
\q1
\v 18 Amy te minday hasosoram-bey
\q1 ty hihitse maro,
\q1 vaho mampitombo haoreañe
\q1 ty fitomboan-kilala.
\c 2
\p
\v 1 Hoe iraho an-troko ao, Antao arè, hitso­ek’ azo an-kafaleañe, hahatrea ty soa. Te mone, hakafoahañe avao. 
\v 2 Hoe iraho ty amo fiankahafañeo, Hagegeañe! naho ty amo hafaleañeo, Ino ty atao’e? 
\v 3 Kinodebe’ ty ereñereko ty hañonkòñe ty troko ami’ty divay, ie nitehafen-kihitse ty fitsakoreako; naho ty hangazoñako o hadagolàñeo ampara’ te hahatreavako ze mahasoa o ana’ ondatio, hitoloña’e ambanen-dike­rañe atoa amo andron-kaveloma’e tsy ampe’ ampeo. 
\v 4 Nitratrañaheko o fitoloñakoo; nandranjy anjomba ho ahy, vaho namboleako tetem-bahe; 
\v 5 Namboarako goloboñe naho ala-vondro, vaho namboleako ze hene karazan-katae mamoa-voa. 
\v 6 Nihaliako antara hanondrahako o hatae mitiry amy alaio. 
\v 7 Nivily ondevo lahy naho ampela, naho nanañe ondevo terak’ an-trañoko ao; toe nanam-piharo troke naho mpirai-lia maro te amy ze hene taoloko e Ierosa­laime ao. 
\v 8 Natontoko amako ka ty volafoty naho ty volamena naho ty vara’ o mpanjaka naho tane fehekoo; nahazoako mpibeko lahilahy naho ampela, vaho ze mahanembanembañe ty tro’ o ana’ ondatio: sakeza tsifotofoto. 
\v 9 Aa le nitoabotse, nandikoareko ze hene taoloko e Ierosalaime ao; vaho nifahatse amako i hihikoy.
\q1
\v 10 Tsy eo ty nitanako amo masokoo
\q1 ze hene naina’e;
\q1 tsy nikalañeko ami’ty troko
\q1 ze atao finembanembàñe,
\q1 fa nahafale ty troko o fitoloñako iabio,
\q1 izay ty nanambe ahy
\q1 amo hene tolon-drahakoo.
\q1
\v 11 Ie amy zao hinaraharako
\q1 ze hene nanoen-tañako
\q1 naho o fifanehafañe nanoekoo,
\q1 le ingo fonga hakafoahañe,
\q1 naho fañeañan-tioke,
\q1 fa tsy aman-tombo’e
\q1 ty ambane’ i àndroy.
\p
\v 12 Aa le nitolike raho
\q1 hañarahara ty hihitse naho ty
\q1 hadagolàñe naho ty hagegeañe;
\q1 fa inom-bao ty hanoe’
\q1 ze manonjohy i mpanjakay?
\q1 Ts’ino naho tsy o fa noeñeo avao.
\q1
\v 13 Nizoeko amy zao te likoare’
\q1 ty hihitse ty hadagolàñe
\q1 manahake ty andikoara’
\q1 ty hazavàñe ty ieñe.
\q1
\v 14 Añambone’e eo ty fihaino’ o mahihitseo,
\q1 fe mañavelo añ’ieñe ao ty dagola.
\q1 Nirendreko amy zao te raik’ avao
\q1 ty toly mifetsak’am’ iereo iaby.
\q1
\v 15 Aa hoe iraho am-batako,
\q1 Ze mifetsak’ amy dagolay
\q1 ty hidoñe amako kañe;
\q1 aa vaho inom-barè
\q1 ty maha-loho mahihitse ahy?
\q1 le hoe iraho an-troko ao,
\q1 hakafoahañe ka ie iaby izay.
\q1
\v 16 Toe tsy eo ty tsy ho modo fitiahiañe
\q1 ty mahihitse naho i dagola,
\q1 songa ho haliño amo andro mbe ho avio.
\q1 sindre hivetrake ty dagola
\q1 naho i mahihitse.
\p
\v 17 Aa le nalaim-piaiñe iraho, fa nahangoae ahy ze fonga fanoeñe ambane’ i àndroy, fa hene kafo­ake, fañeañan-tioke avao. 
\v 18 Eka, nihejeko ze fonga fitoloñako nifanehafako ambane’ i àndroy, ie tsy mete tsy hene hengako am’indaty manonjohy ahiy. 
\v 19 Ia ty mahafohiñe, ke t’ie ondaty mahihitse, he dagola? Fe fonga ho fehe’e o nifanehafako naho nisafirie’ ty hihiko ambane’ i androio. Kafoake ka izay. 
\v 20 Aa le nitolike iraho, nadoko hioremeñe ty troko amo hene tolon-draha nitoloñeko ambane’ i androio, 
\v 21 Eo t’indaty nitoloñe an-kihitse naho hilala naho fahimbañañe, vaho atolo’e amy tsy nitoloñe ama’ey i anjara’ey. Hakafoahañe naho haloloañe! 
\v 22 Ino ty ho azo’ ondaty amo fifanehafa’e iabio naho amo fimanean-tro’e nitoloña’e ambane’ i androio? 
\v 23 Fa amo hene andro’eo, le fonga atsa-panaintaiñañe naho hasosorañe o fitoloña’eo; tsy mitofa o fitsakorea’eo ndra te haleñe. Kafoake ka izay. 
\v 24 Tsy eo ty mahasoa ondatio ta te mikama naho minoñe vaho manao an-tro’e te soa o fitoloña’eo. Izay ka ty nitreako boak’am-pitàn’ Añahare, 
\v 25 amy te ia ty hikama naho ia ty hifale mandikoatse ahy? 
\v 26 Toe toloran’ Añahare hihitse naho hilala vaho hafaleañe ze no’e am-pivazohoa’e eo; f’ie ami’ty mpanao hakeo ro ampitoloña’e fanontonañe naho fampitoboroñañe, hanolora’e amo noron’ Añahareo. Toe hakoahañe ka izay, fañeañan-tioke.
\c 3
\q1
\v 1 Songa namantañañe ty sa’e,
\q1 Sindre namotoañañ’ andro
\q1 ze nisatrie’e ambanen-dikerañe atoa:
\q1
\v 2 androm-pisamahañe,
\q1 androm-pihomahañe,
\q1 androm-pamboleañe naho
\q1 androm-pañombotañe i namboleñey;
\q1
\v 3 androm-pamonoañe,
\q1 naho androm-pañamelañañe;
\q1 androm-pandrebahañe mañambane
\q1 naho androm-pandranjiañe mañambone;
\q1
\v 4 androm-pirovetañe,
\q1 naho androm-piankahafañe;
\q1 androm-pangololoihañe
\q1 naho androm-pitsinjahañe;
\q1
\v 5 androm-pañiririñam-bato,
\q1 naho androm-panontonam-bato;
\q1 androm-pamejañañe naho
\q1 androm-pifoneñañe tsy hamejañe;
\q1
\v 6 androm-pikodebeañe,
\q1 naho androm-pahamotsoañe;
\q1 androm-pañajañe
\q1 naho androm-pañariañe;
\q1
\v 7 androm-pandrovitañe,
\q1 naho androm-panjairañe;
\q1 androm-pianjiñañe,
\q1 naho androm-pisaontsiañe;
\q1
\v 8 androm-pikokoañe
\q1 naho androm-pihejeañe;
\q1 androm-pialiañe vaho androm-panintsiñañe.
\p
\v 9 Ino ty tambem-pieke amy nitro­maha’ey? 
\v 10 Fa nitreako ty tolon-draha’ natolon’ Añahare amo ana’ ondatio, hitoloñañe. 
\v 11 Kila nanoe’e mañeva ty sa’e; vaho napo’e an-tro’e ao ty atao nainai’e donia, fe tsy ho taka’ ondaty ty fitsikarahañe ty satan’ Añahare boak’ am-baloha’e pak’am-pigadoña’e.
\p
\v 12 Apotako te tsy eo ty mahasoa ta t’ie hifale naho hinembanembañe naho mbe amañ’aiñe; 
\v 13 mbore falalàn’ Añahare te songa hikama naho hinoñe vaho hifale amo fitoloña’eo ondatio.
\q1
\v 14 Fantako te tsy modo nainai’e
\q1 ze anoen’ Añahare;
\q1 tsy mete tompeañe vaho
\q1 tsy mete angalañe;
\q1 nanoen’Añahare zao,
\q1 hañeveña’ ondatio añatrefa’e eo.
\q1
\v 15 Ze eo, le fa teo;
\q1 naho mbe ho avy ze fa teo;
\q1 vaho tsoehen’Añahare o horidañeñeo.
\q1
\v 16 Mbore nizoeko ambane’ i àndroy,
\q1 amy toem-pizakañey
\q1 te eo ka ty haratiañe,
\q1 vaho amy toen-kavantañañey
\q1 ty haloloañe.
\q1
\v 17 Hoe iraho an-troko ao,
\q1 ho zakaen’ Añahare
\q1 ty vañoñe naho ty raty,
\q1 fa kila namotoaña’e ze safiry
\q1 naho ze hene fitoloñañe.
\q1
\v 18 Hoe iraho an-troko ao
\q1 ty amo ana’ondatio:
\q1 Mitsoke iareo t’i Andrianañahare
\q1 hahaoniña’ iareo te biby avao.
\q1
\v 19 Hambañe ty toli’ondaty
\q1 naho ty toli’ o bibio;
\q1 Manahake ty fihomaha’ ty raike
\q1 ty hiantantirira’ ty ila’e.
\q1 Hambañe avao ty fikofò’ iareo,
\q1 aa le tsy aman-tombo’e amo bibio
\q1 t’indaty; toe fonga hakoahañe.
\q1
\v 20 Fonga homb’an-toetse raike:
\q1 sindre boak’an-debok’ ao vaho
\q1 songa mibalike mb’an-debok’ ao.
\q1
\v 21 Ia ty mahafohiñe ke
\q1 hañambone ty arofo’ ondaty he
\q1 hañambane mb’an-tane ao ty tro’ o bibio?
\q1
\v 22 Aa le nitreako te tsy eo ty mahasoa
\q1 ta te hene mifale amo fitoloña’eo ondatio,
\q1 ie tambe’ iareo;
\q1 fa ia ty hampandrendrek’ aze
\q1 te inoñe ty hanonjohy añe?
\c 4
\p
\v 1 Aa le niharaharaeko indraike ze forekekeñe iaby ambane’ i àndroy:
\q1 hehe ty ranomaso’ o forekekeñeo,
\q1 ie tsy amam-pañohò;
\q1 naho am-pità’ o mpamorekekeo
\q1 ty hafatrarañe;
\q1 f’ie tsy amam-pañimba.
\q1
\v 2 Aa le nandrenge o vilasy
\q1 fa nihomakeo iraho,
\q1 ambone’ o veloñe mbe amañ’aiñeo.
\q1
\v 3 Eka, lombolombo i roe rey
\q1 ty mbe lia’e tsy eo,
\q1 ie mbe tsy nahaoniñe ty sata-raty
\q1 anoeñe ambane’ i àndroy.
\p
\v 4 Nitreako indraike te o fitoloñañe iabio naho ze tolon-draha mahatafe­tetse, le voka’ ty fifampitsikiriha’ ondaty naho i rañe’ey. Hakafoahañe naho fañeañan-tioke ka zao.
\q1
\v 5 Mamihim-pitañe ty dagola,
\q1 vaho abotse’e ty nofo’e.
\q1
\v 6 Hàmake ty fianjiñañe mahapea-pitàñe,
\q1 ta ty fitàn-droe pea
\q1 fitromahañe naho fañeañan-tioke.
\p
\v 7 Nenteako indraike o hakafoahañe ambane’ i àndroy.
\q1
\v 8 Teo ty raike tsy amam-paha-roe;
\q1 toe tsy nanañ’ anake, tsy aman-drahalahy:
\q1 fe tsy mbia tsy heneke o fitoloña’eo;
\q1 vaho tsy mahaene-pihaino’e ty vara;
\q1 Tsie, hoe re, Ia ze o itoloñako zao,
\q1 malorè ty fiaiko tsy hanjo ty soa?
\q1 hakafoahañe ka zao
\q1 mbore fifanehafañe mahaore.
\q1
\v 9 Hàmake te roe ta t’ie raike;
\q1 amy te soa fitombo ty fitoloña’ iareo.
\q1
\v 10 Ie mikorovoke ty raike,
\q1 honjone’ i rañe’ey;
\q1 fe feh’ohatse te mikorovoke ty bangìñe
\q1 tsy manañ’ ila hampitroatse aze.
\q1
\v 11 Tovo izay, ie mitrao-pandreañe ty roe
\q1 le mafana: fa ino ty hampafana aze t’ie raike?
\q1
\v 12 Mete hiambotraha’ t’indaty
\q1 ty raike ie miereñereñe,
\q1 fe hijohañe hiatrek’ aze ty roe;
\q1 tsy rofondrofoteñe aniany
\q1 ty taly telo-randra.
\q1
\v 13 Ndra kitra’e ajalahy
\q1 rarake mahihitse
\q1 ta t’ie mpanjaka antetse gege
\q1 tsy mañaoñe hatahata.
\q1
\v 14 Toe niboak’am-balabey ao re
\q1 ho mpanjaka;
\q1 ie nirarake te nitoly am-pifehea’e ao.
\q1
\v 15 Nitreako te niarimboe’
\q1 ze hene veloñe ambane’ i àndroy,
\q1 i ajalahy tsinara valoha’ey,
\q1 i handimbe azey,
\q1
\v 16 naho te tsifotofoto ondaty
\q1 am-boriza’e ao,
\q1 f’ie tsy ho loho onjone’
\q1 o manonjohy azeo.
\q1 Toe hakafoahañe ka zao
\q1 vaho fañeañan-tioke.
\c 5
\p
\v 1 Ambeno ty lia’o mb’añ’an­jomban’ añahare mb’eo, harineo hijanjiñe’o, Hàmake izay ta te mañenga ty soro’ o seretseo, ie tsy apota’e te manao raty.
\p
\v 2 Ko meke am-palie, naho ko malisa an-tro’o ty hisaontsy ndra inoñe aman’ Añahare: fa an-dindiñe ao t’i Andrianañahare, ihe an-tane atoy, aa le anò tsy ampeampe o enta’oo.
\q1
\v 3 Mahavy nofy ty fimaneam-pitoloñañe;
\q1 fe fohiñe ami’ty hamaron-tsaontsi’e
\q1 ty feo’ i gegey.
\q1
\v 4 Ihe mifanta aman’ Añahare,
\q1 ko malaoñe hañavake;
\q1 fa tsy ifalea’e ty dagola:
\q1 ondroho i nifantà’oy.
\q1
\v 5 Hàmake t’ie tsy mifanta,
\q1 ta te mifanta tsy mañavake.
\q1
\v 6 Ko metè’o hañakeo azo ty vava’o;
\q1 le ko manao amy Irakey te nilosotse:
\q1 fa ino ty hiviñeran’ Añahare amy feo’oy,
\q1 handrotsaha’e o satan-taña’oo?
\q1
\v 7 Fa hakafoahañe ty halàko nofy
\q1 naho ty hamaro saontsy:
\q1 mone mañeveña aman’Añahare.
\q1
\v 8 Ie isa’o ty famorekekeañe o rarakeo,
\q1 naho ty fampitavanan-jo naho hatò
\q1 ampariparitse añe, ko ilatsa’o:
\q1 fa jilove’ i mpifelek’ azey ty mpifehe
\q1 vaho ambone ka ty bei’iareo.
\q1
\v 9 Amy te itraofa’ iabikey
\q1 ty tombo’ i taney:
\q1 toe mitoroñe i mpanjakay i tetekey.
\q1
\v 10 Tsy mahaeneñe ty mpitea-vola ty vola;
\q1 vaho ty mpikoko firegoregoañe
\q1 t’ie miegoego:
\q1 hakafoahañe ka izay.
\q1
\v 11 Ie mitobake ty havokarañe,
\q1 maro ka o mampibotsek’ azeo:
\q1 aa le ino ty tombo’e ho a i tompo’ey
\q1 ta te ho sambae’e am-pihaino avao?
\q1
\v 12 Mamy ty firota’ ty mpifanehake,
\q1 ndra te kede ty kamae’e ndra te bey:
\q1 fe tsy apo’e hirotse
\q1 ty havontsiña’ i mpañalealey.
\p
\v 13 Eo ty haratiañe manivontivoñe nitreako ambane’ i àndroy, te mijoy ty mpañefoefo o vara ahaja’eo. 
\v 14 Ie nikapaike i varay, amy te navaridì’e ami’ty tsy vara, le nahatoly ana-dahy f’ie an-tañam-polo. 
\v 15 Hambañe amy niboaha’e an-kovin-drene’ey, t’ie hiboridañe ka te himpoly, ndra loli’e tsy ho tintinem-pità’e amy fitromaha’ey. 
\v 16 Haratiañe manivontivoñe ka izay, te manahake ty nitolia’e ty himpolia’e: aa le ino ty tombo’ ty fitromahañe hahazoañe tioke? 
\v 17 Mikama añ’ieñe ao amo hene andro’eo, amy t’ie lako haemberañe naho hasilofañe vaho habosehañe. 
\v 18 Ingo, ty nitreako ho soa naho mañeva aze, t’ie mikama naho mitohoke vaho hifale ami’ty hasoa’ i tolon-draha itoloña’e ambane’ i àndroy amo andro tsy ampeampe iaiña’eo, o natolon’ Añahare azeo: fa izay ty anjara’e. 
\v 19 Naho ondaty nitoloran’ Añahare vara naho hanaña le nimea’e lily hikama naho handrambe anjara, vaho hirebek’ amy nifanehafa’ey; toe falalàn’ Añahare izay. 
\v 20 Le tsy beteke haereñere’e o andro iveloma’eo, amy t’ie ampitoloñen’ Añahare an-kafalean-troke.
\c 6
\p
\v 1 Eo ty haratiañe nitreako ambane’ i àndroy, toe mandrambañe am’ondatio, 
\v 2 eo t’indaty nitoloran’ Añahare drala naho vara vaho asiñe, ie tsy po-draha irien-troke, fe tsy nitoloran’ Añahare ty haozarañe hahafikama’e, te mone hane’ ty ambahiny; hakafoahañe izay vaho areten-draty. 
\v 3 Ndra te misamak’ anake zato indatiy, naho maro taoñe ty iaiña’e, ndra firefire, fe tsy enen-kasoa ty tro’e, naho tsy eo ty handeveñe aze, le hàmake t’ie niboloañe, 
\v 4 ho koake ty fiavi’e naho himoromoroñe ty fiengà’e, vaho ho kolopofe’ ty ieñe i tahina’ey; 
\v 5 le lia’e tsy ho isa’e i àndroy vaho hamoea’e; f’ie ty mitofa soa ta i raikey; 
\v 6 eka ndra te indroe veloñe arivo taoñe i raikey, ie tsy nanjo hasoa; tsy kila hikovovoke mb’an-toetse raike mb’eo hao? 
\v 7 Hene ho am-palie’e avao ty fitoloña’ ondaty, te tsy eneñe i hatea-hane’ey. 
\v 8 Aa inoñe ty mahazòke’ ty dagola i mahihitse? ino ty fitombo’ i rarakey, t’ie maha­fi­tson­tike añatrefa’ o veloñeo? 
\v 9 Hamake ty onim-pihaino, te ami’ty fisalalan-troke; hakafoahañe ka izay vaho fimanean-tioke. 
\v 10 Ze hene eo le fa nitolorañe añarañe, le fa arofoanañe te inoñe ondatio, vaho tsy aze ty hifandietse amy maozatse te ama’ey. 
\v 11 Maro ty raha manovoñe o hakoahañeo, aa le ino ty tombo’e ho a ondatio? 
\v 12 Ia ty mahafohiñe ze mahasoa ondatio ami’ty havelo’e, amo taoñe tsy ampeampe iveloma’e hoe evoñeo, ie mihelañe hoe talinjo avao? Fa ia ty hahatalily am’ondatio ty hanonjohy aze, ambane’ i àndroy?
\c 7
\q1
\v 1 Ambone’ ty fahosotse sarotse
\q1 ty tahinañe soa;
\q1 naho ty androm-pihomahañe,
\q1 ta ty andro nisamahañe.
\q1
\v 2 Hàmake t’ie mb’an-traño fandalàñe
\q1 ta te mb’añ’anjomba fisabadidahañe,
\q1 fa izay ty figadoña’ ze kila ondaty,
\q1 ee te hapo’ ty veloñe an-tro’e ao izay.
\q1
\v 3 Ambone’ ty fiankahafañe
\q1 ty haemberañe;
\q1 fa mete ho fale ty arofo
\q1 ndra te lonjetse ty laharañe.
\q1
\v 4 Añ-anjombam-pandalàñe ao
\q1 ty arofo’ o mahihitseo,
\q1 le an-trañom-piankahafañe ao
\q1 ty tro’ o dagolao.
\q1
\v 5 Hàmake t’ie mijanjiñe
\q1 ty fañendaha’ ty mahihitse,
\q1 ta te mitsanoñe ty sabo’ o mineñeo.
\q1
\v 6 Hambañe ami’ty fipipiham-patike
\q1 ambane’ valàñe eo,
\q1 ty fitohafa’ i dagola;
\q1 hakoahañe ka izay.
\q1
\v 7 Toe mampinè’ ty mahihitse
\q1 ty famorekekeañe,
\q1 vaho mamorek’ arofo ty vokàñe.
\q1
\v 8 Ambone’ ty fifotoran-draha
\q1 ty figadoña’e,
\q1 le ambone’ ty troke misenge
\q1 ty arofo mahaliñe.
\q1
\v 9 Ko malisa ho viñetse añ’arofo irehe,
\q1 amy te mimoneñe am-banian-dagola ao
\q1 ty habosehañe.
\q1
\v 10 Ko manao ty hoe,
\q1 Ino ty nahasoa o andro taoloo
\q1 te amo henanekeo?
\q1 toe tsy aman-kihitse i ontane’o zay.
\q1
\v 11 Raha soa te mitraoke an-kihitse ty lova,
\q1 toe tombo’ o mahaisake i androio.
\q1
\v 12 Manahake ty fañarova’ ty vara
\q1 ty fañambena’ i hihitsey;
\q1 fe ty hasoa’ o hilalao,
\q1 arova’ i hihitsey ty fiai’ o manañ’ azeo.
\q1
\v 13 Haraharao ty fitoloñan’ Añahare;
\q1 ia ty mahay mañity ty nimengoha’e.
\p
\v 14 Mifalea añ’andro vokatse, vaho mi­tsakorea añ’andron-kankàñe; songa nanoen’ Añahare itoy naho iroy, soa tsy ho oni’ ondaty ndra inoñ’ inoñe amo hanonjohy azeo. 
\v 15 Hene nitreako amo haveloko koakey; eo t’indaty vaño mihomak’ amy havantaña’ey, eo ka ty lo-tsereke mañalava andro amy haratia’ey. 
\v 16 Ko loho vantañe; ko losore’o ty hihitse; Ino ty hampiantoa’o ty vata’o? 
\v 17 Ko loho tsereheñe, naho ko manao gege; ino ty hivetraha’o aolo’ ty andro’o? 
\v 18 Soa re te fahara’o iroy, vaho tsy asita’o itoy, fa horihe’ ty mañeveñe aman’ Añahare i roe rey. 
\v 19 Mampaozatse ty mahihitse ambone’ ty mpifehe folo an-drova ao, ty hihitse. 
\v 20 Fa toe tsitantane t’indaty vañoñe mitolon-kavantañañe le lia’e tsy mandilatse. 
\v 21 Aa le ko loho haoñe’o ze fonga enta saontsieñe, tsy mone ho janji’o mamatse azo ty mpitoro’o; 
\v 22 amy te beteke, fohi’ ty vata’o te ihe namatse ty ila’e. 
\v 23 Fa hene nitsoheako an-kihitse, le hoe iraho: Ho paiako ty hihitse, fe nihànkañe amako. 
\v 24 Tsietoitane añe naho miheotse o raha fa nifetsakeo, ia ty hahatendreke aze? 
\v 25 Natoliko ty troko handrèndreke naho hitsikarake vaho hikodebe ty hihitse naho ty lengo’ o rahao, naho ty hahafohinako ty haratia’ ty hadagolàñe, vaho ty hanè’ o hagegeañeo; 
\v 26 le nitreako te mafaitse te ami’ty havilasy ty rakemba amam-pandrike, ie harato ty tro’e, naho silisilim-pandrohizañe o taña’eo; hiponiora’ ty mahafale an’ Andrianañahare; fe ho tsepahe’e ty mpanan-tahiñe. 
\v 27 Ingo, itoy ty nitreako, hoe ty mpañoke, ie tovoñañe ami’ty raha raike ty ila’e, hamoliliañ’ aze; 
\v 28 ie nitolom-pipay ty troko, fe mbe mboe tsy naharendreke; fa nahatrea ondaty raik’ ami’ty arivo iraho, fe tsy nahatrea rakemba raik’ amy rezay iaby. 
\v 29 Inao, te zao avao ty nitreako, te nanoen’ Añahare mahity t’indaty, f’ie mikitro-draha maro.
\c 8
\q1
\v 1 Ia ty manahake i mahihitsey?
\q1 Ia ty maharendreke ty ango’e?
\q1 Mahaloeloe ty lahara’ ondaty ty hihitse,
\q1 vaho mampiova ty hagàm-binta’e.
\p
\v 2 Mañòk’ azo iraho hiambeñe ty taro’ i mpanjakay ty amy nifantà’o aman’ Añaharey. 
\v 3 Ko malisa mienga amy fañatrefañe azey; le ko mifahatse ami’ty raha raty, amy te anoe’e ze satrie’e. 
\v 4 Aa kanao manandily ty saontsi’ i mpanjakay, ia ty hanao ama’e ty hoe: Ino o anoe’oo? 
\v 5 Tsy ife­tsahan-dilo ty mañamben-dily, amy te mahatsakore ty andro naho ty lily ty arofo mahihitse. 
\v 6 Kila manañe ty andro’e naho ty lili’e; ndra te mavesatse am’ ondatio ty haemberañe. 
\v 7 Kanao tsy fohiñe ty ho avy; ia ty mahatalily aze te inoñe ty hife­tsake. 
\v 8 Tsy a’ ondaty ty lily hanebañe ty fitiofa’ i tiokey; naho tsy anaña’e lily i androm-pikoromaha’ey; tsy eo ty famotsorañe amo alio; vaho tsy maha­fipoliotse ami’ty haratiañe o mitoloñe ama’eo. 
\v 9 Fonga nitreako, naho nitoloñe’ ty troko ze hene fitoloñañe ambane’ i àndroy atoy; ie nanan-dily amy t’indaty t’indaty vaho nijoia’e.
\p
\v 10 Nitreako ka ty fileveña’ o tsereheñeo, ie fa nimoake naho nienga i toetse miavakey, ie nandikofañe amy rova nanoeñe zaiy; hakoahañe ka izay. 
\v 11 Naho tsy andilova’ ty zaka aniany ty sata raty, le mañatsake ty tro’ o ana’ ondatio ty hanao raty; 
\v 12 aa ndra te mitolon-kanao raty in-jato ty mpanan-tahiñe, vaho mihamaro avao o andro’eo—mbe apotako te hanintsiñe o mañeveñe aman’ Añahareo, o miambane añatrefa’eo; 
\v 13 fe po-panintsiñañe ty tsereheñe, naho tsy hihalava hoe talinjo o andro’eo, ami’ty tsy fañeveña’e aman’Añahare.
\p
\v 14 Eo ty hakafoahañe fanoeñe ambone’ ty tane toy; te eo ty mifetsak’ amo vaño ze mañeva ty sata’ o ratio; vaho eo te mizo i ratiy ty sazò’ ty fitoloña’ o vantañeo—hoe iraho: Hakoahañe ka zao. 
\v 15 Aa le nonjoneko ty haravoañe, amy te tsy ambane’ i àndroy etoy ty hahasoa ondaty ta te mikama naho minoñe vaho mifale, fa irezay ty ho mpipitek’ ama’e amy fitoloña’ey amo hene andro natolon’ Añahare aze hiveloma’e ambane’ i androio.
\p
\v 16 Ie napoko an-troko ty han­drèndreke hihitse, hahatreava’e o fitoloñañe fanoeñe an-tane atoio—ndra te eo ty tsy mirotse handro ndra haleñe o fihaino’eo, 
\v 17 le hene nioniko o fitoloñan’ Añahareo, le tsapako te tsy lefe tsikaraheñe o fitoloñañe nanoeñe ambane’ i àndroio; ndra te imanea’ ondatio pay, tsy ho isa’e; vaho ndra te hanoe’ i mahihitsey ty hoe: “Fa fohiko!”, mbe lia’e tsy niisa’e.
\c 9
\p
\v 1 Toe fonga rinambeko an-troko ao zao, le ho taroñeko te songa am-pitàn’ Añahare ao o vantañeo naho o mahihitseo vaho o fitoloña’eo; tsy fohi’ ondaty ke te fikokoañe ke falaiñañe ty hiatrefa’e. 
\v 2 Kila ifetsahañe. Raike ty hizo i vantañey naho i tsereheñey, ho ami’ty soa, ami’ty malio naho ami’ty tsy malio; ho ami’ty mañenga soroñe naho ami’ty tsy misoroñe. Hambañe amy vantañey ty ho ami’ty mpanan-kakeo; vaho ho amy mifantay naho amy mihembam-pantay. 
\v 3 Izay ty haloloañe anoeñe ambane’ i àndroy, te raik’ avao ty toli’ ie iaby. Mbore lifo-karatiañe ty arofo’ o ana’ i Dameo, vaho añ’ova’ iareo ao ty hadagolañe manitsike ty havelo’ iareo, ie añe le migodam-ban-kavilasy ao. 
\v 4 Fe manan-ko tamae’e ze mpiamo veloñeo, amy te hamak’ amboa veloñe ta te liona mate. 
\v 5 Fohi’ o veloñeo te hikenkañe, fe tsy mahapota-draha o fa nihomakeo; ie tsy hanan-tambe ka, fa motso ty fitiahiañe iareo. 
\v 6 Fa ho momoke ty fikokoa’ iareo naho ty falai’iareo, vaho ty fahimbaña’ iareo; le tsy hanañ’ anjara ka iereo amy ze anoeñe ambane’ i àndroy. 
\v 7 Akia, ikamao an-kafaleañe ty mahakama’o, naho inomo am-pinembanemban-troke ty divai’o; fa nòn’ Añahare o fitoloña’oo. 
\v 8 Ee te ho foty nainai’e o siki’oo, naho ko apo’o tsy ho an-doha’o eo ty solike. 
\v 9 Mifalea, rekets’ i valy kokoa’oy amo haveloñeo, amo hene androm-piai’o mihelañe natolo’e azo ambane’ i àndroio, amy te izay ty anjara’o an-kaveloñe ao, naho amo tolon-draha ifanehafa’o ambane’ i androio. 
\v 10 Ze tendreham-pità’o hanoeñe, le anò ami’ty haozara’o; amy te tsy amam-pitoloñañe ndra safiry ndra hilala ndra hihitse ty an-tsikeokeoke hañaveloa’o ao. 
\v 11 Nitreako indraik’ ambane’ i àndroy te tsy a i masìkay ty mifandriadriake, naho tsy a i fanalolahiy ty hotakotake, tsy a i mahihitsey ty mahakama, tsy a i mahilalay ty vara, vaho tsy a i mahimbañey ty isoke, fa songa ifetsahan’ andro naho toly. 
\v 12 Toe tsy apota’ t’indaty ty namotoañañe aze. Hoe fiañe nizo an-karato raty, naho voroñe tsinepak’ am-pandri-bo, ty fiporengetañe ondaty amy andron-kekoheko ivovoa’ey. 
\v 13 Zao ka ty nitendrek’ ahy ho hihitse ambane’ i àndroy, le nijabajaba amako. 
\v 14 Teo ty rova kede ama’ ondaty tsy fire. Nivotrake eo amy zao ty mpanjaka ra’elahy, nañarikatoke naho nandranjy fanongañe jabajaba haname aze. 
\v 15 Tendrek’ ama’e ao t’indaty mahihitse fe rarake, ie ty nandrombake i rovay amy hihi’ey, fe leo raike tsy nahatiahy indaty rarakey. 
\v 16 Aa le hoe iraho, Ambone’ ty ozatse ty hihitse; fe sirikaeñe ty hihi’ i rarakey vaho tsy haoñeñe o enta’eo.
\p
\v 17 Hamake ty saontsi’ i mahihitsey janjiñeñe am-pian­jiñañe, ta ty tazatazam-pifehe amo dagolao. 
\v 18 Ambone’ o fialiañ’ alio ty hihitse, fe maharotsake ty hasoa maro ty mpanan-tahiñe raike.
\c 10
\p
\v 1 Mampitrotrotse ty menam-pañemboke ty laletse mate; le mavesatse te ami’ty hihitse naho ty asiñe, ty hagegeañe kede. 
\v 2 Mitolike mb’an-kavàna ty arofo’ i mahihitsey, mb’ankavia ka ty tro’ i dagolay. 
\v 3 Ndra te mijelanjelañe an-dalañe eo ty derendereñe, kanao po-hilala, aboa’e amy màroy ty hagegea’e. 
\v 4 Naho miforoforo ama’o ty haviñera’ ty mpifehe, ko apo’o ty toe’o, amy te mañafa-tsirìka-mena ty hamora-fo. 
\v 5 Eo ty haratiañe nitendrek’ahy ambane’ i àndroy, hoe lilatse aboa’ ty mpifehe.
\q1
\v 6 Onjoneñe mb’an-toetse ambone
\q1 ty seretse maro,
\q1 ie mitozoke ambane eo o mpañalealeo.
\q1
\v 7 Nahatrea ondevo miningi-tsoavala iraho,
\q1 vaho ty ana-donake
\q1 mañavelo an-tane eo hoe ondevo.
\q1
\v 8 Mete hivariñe ama’e ao
\q1 ty mihaly koboñe;
\q1 naho mete hehere’ ty mereñe
\q1 ze misorodidy kijoly.
\q1
\v 9 Mete joie’ ty vato ty mihaly aze;
\q1 le mete hizo fere ty mampitserake hatae.
\q1
\v 10 Naho malomo ty viñe,
\q1 ie tsy sioña’e ty lela’e,
\q1 le añ’ozatse ambone ty ifanehafa’e;
\q1 lombolombo’e ty hihitse mahatafetetse.
\q1
\v 11 Ie hehere’ ty mereñe
\q1 tsy nampipendreñeñe;
\q1 le an-koheke i mpitroboy.
\q1
\v 12 Matarike o entam-­palie’ i mahihitseio,
\q1 fe mampibotseke ty dagola o soñi’eo.
\q1
\v 13 Mifototse an-kagegeañe
\q1 o fivolam-bava’eo,
\q1 naho migadon-ko haratian-dagola;
\q1
\v 14 mangaradadak’ avao ty minè.
\q1 Tsy fohi’ ondatio ty ho zoeñe,
\q1 ia ty mahatalily ama’e ty hanonjohy aze?
\q1
\v 15 Akore ty hamokora’ i dagolay
\q1 amy fitromaha’ey, kanao tsy fohi’e
\q1 ty homba’e mb’an-drova mb’eo.
\q1
\v 16 Hoy hoy ty ama’o, ry tane,
\q1 naho ajaja ty mpanjaka’o
\q1 vaho mpanao bedidake maraindray
\q1 o ana-dona’oo!
\q1
\v 17 Haha irehe ry tane,
\q1 te roandriañe ty mpanjaka’o,
\q1 vaho mikama ami’ty evae’e
\q1 o ana-dona’oo hihaozara’e
\q1 fa tsy ty himamoa’e!
\q1
\v 18 Havotroañe ty mahakolemake tafo;
\q1 tañañe ledra’e
\q1 ty mahatsopatsopake traño.
\q1
\v 19 Natao hampiankahake ty sabadidake;
\q1 te hahafale fiay ty divay,
\q1 vaho te hamale ze he’e ty drala.
\q1
\v 20 tovo’e: Ko mamatse ty mpanjaka
\q1 am-pitsakorea’o ao,
\q1 naho ty mpiefoefo
\q1 an-trañom-pandrea’o ao;
\q1 ke hinday ty feo’o i voron-tiokey,
\q1 hera haboele’ i amañ’elatsey i enta’oy.
\c 11
\q1
\v 1 Ahifiho ambone’ o ranoo ty mofo’o,
\q1 le ho tendrek’azo andro maro añe.
\q1
\v 2 Zarao fito o vara’oo, he valo,
\q1 fa tsy fohi’o ze hankàñe
\q1 mete hifetsak’ an-tane atoy.
\q1
\v 3 Ie milodolodo o rahoñeo,
\q1 le adoa’e mb’an-tane atoy ty orañe;
\q1 aa ke mihorokodoboke mañatimo
\q1 ty hatae, he mañavaratse,
\q1 le amy ideboña’ey ty handrea’e.
\q1
\v 4 Tsy hitongy ty mpisamba tioke;
\q1 vaho tsy hanatake ty mpijilo rahoñe.
\q1
\v 5 Kanao tsy apota’o ty lala’ i tiokey,
\q1 naho tsy fohi’o ty fitiria’
\q1 o taolañe an-kovi’ i mivesatsey,
\q1 le tsy fohi’o ka ty fitoloñan’ Añahare
\q1 mpamboatse ze he’e.
\q1
\v 6 Tongiso maraindray o tabiri’oo,
\q1 vaho ko mampi-po pitàñe te hariva;
\q1 amy te tsy fohi’o ty ho lefe,
\q1 ke ty etoañe ke i eroañey,
\q1 hera ho soa iaby iereo roroe.
\q1
\v 7 Mamy o hazavàñeo,
\q1 naho mahafale fihaino
\q1 ty mahaoniñe i àndroy.
\q1
\v 8 Aa ndra te veloñe maro-taoñe t’indaty
\q1 ee te hirebeha’e iaby,
\q1 le ho tiahi’e abey
\q1 o andron-kamoromoroñañeo,
\q1 t’ie ho maro,
\q1 toe hakoahañ’ iaby ty ho avy.
\q1
\v 9 Mandià taroba ry ajalahy,
\q1 ihe mbe tora’e,
\q1 ee te hampahaehak’ azo ty tro’o
\q1 amo andron-katora’oo.
\q1 Oriho ty fisalalam-po’o
\q1 naho ty fañiria’ o maso’oo,
\q1 fe mahafohina t’ie hampiatrefen’
\q1 Añahare an-jaka ty amy hene rezay.
\q1
\v 10 Ano soike o halorèan-tro’oo,
\q1 vaho ampihankaño ami’ty sandri’o
\q1 ty falovilovia’e;
\q1 fa toe mihelañe ty hatorañe
\q1 naho ty haañom-piaiñe.
\c 12
\q1
\v 1 Tiahio i nitsene azo
\q1 an-tsan-kajalahi’o,
\q1 aolo’ ty fivotraha’ o andron-kasotriañeo,
\q1 naho ty hitotofa’ i taoñe hanoe’o ty hoe:
\q1 Tsy mahafale ahiko irezay;
\q1
\v 2 aolo’ ty fañamaieñañe ty hazava’
\q1 i àndroy naho i volañey vaho o vasiañeo,
\q1 naho ty fibaliha’ o rahoñeo
\q1 ie fa añe i orañey;
\q1
\v 3 amy andro hihondrahondrà’
\q1 o mpañambeñ’ anjombao,
\q1 naho hibokobokoha’ ondaty maozatseo,
\q1 naho hitroara’ o mpandisañeo
\q1 amy t’ie tsy ampe,
\q1 vaho mihamaieñe tsy hahaisaha’
\q1 ondaty mitilihitse amo lalan-kedeo;
\q1
\v 4 ie mirindriñe o lalam-ban-dalam-beio,
\q1 naho migeongeoñe avao
\q1 o vato fandisanañeo,
\q1 naho mahatsekake ondaty
\q1 ty feom-boroñe,
\q1 vaho hene namptsiñeñe o anak’ ampela mpibekoo;
\q1
\v 5 eka, mahahembañe ondatio
\q1 te an-kaboañe ey,
\q1 mirevendreveñe t’ie an-damoke eo;
\q1 mikò-foty o mahabiboo,
\q1 fe mikozozotse avao i valalay,
\q1 vaho milesa i vahen’ amaloy;
\q1 amy te migodañe mb’añ’akiba’e
\q1 nainai’e mb’eo ondatio,
\q1 ie midraidraitse an-dalañeo
\q1 o mpandàlao;
\q1
\v 6 aolo’ te tampake i fole volafotiy,
\q1 naho foy i korobo volamenay,
\q1 naho señak’ am-bava’ i vovoñey
\q1 ty fitovy,
\q1 naho nipozak’ an-kadaha eo
\q1 i larom-pitarikey,
\q1
\v 7 naho mibalike mb’an-tane
\q1 niboaha’e ao i debokey,
\q1 vaho mimpoly mb’
\q1 aman’Andrianamboatse azey
\q1 i kofòkey.
\q1
\v 8 Habibin-kakafoahañe izay,
\q1 hoe t’i Mpañoke; kila kafoake.
\p
\v 9 Tovo i hihi’ey, nanare’ i Mpañokey hilala ondatio, ie nandanja naho nañotsohotso vaho nañity razan-tsaontsy maro. 
\v 10 Nitsoeke fisaontsy mahafale i Mpañokey, vaho nanokitse tsara-to am-palangesañe. 
\v 11 Hoe fitsi­poke ty fisaontsi’ o mahihitseo, toe fati-by soa oreñe o razan-drehakeo, o natolo’ i Mpiarak’ añondriio.
\q1
\v 12 Aa, le mitaoa ry anake
\q1 amo mandikoatse irezaio,
\q1 fa tsy ho modo ty fanoañe boke maro,
\q1 vaho mahamamake o nofotseo
\q1 ty halako-pihotsohotsoañe.
\q1
\v 13 Ty figadoña’e, ie hene jinanjiñe:
\q1 Mañeveña aman’Añahare,
\q1 vaho ambeno o lili’eo;
\q1 ho a’ ze kila ondaty izay.
\q1
\v 14 Hendesen’ Añahare mb’an-jaka
\q1 ze hene sata, ze he’e mietake,
\q1 ndra t’ie soa ndra te raty.