\id HAG  
\h Haggai 
\toc1 Haggai Themgao Lekhabu 
\toc2 Haggai 
\toc3 Haggai 
\mt1 HAGGAI  
\mt2 THEMGAO LEKHABU  
\mt3 Haggai Themgao Lekhabu Sung Thu Umdan  
\ip Pathen panpina le phattheina jal’in Israelte chu Babylon’a kon in ahung kile tauvin ahi. Hinlah amahon Jerusalem sahphat kit ding ahitoh kilhon’a toh ding tham ding tampi amu-u chun, alung kim pouvin ahi. Hiche dinmun laitah chun, Hagggai Themgao leh Zechariah Themgao thuseiphong jal chun, amaho akipah thanom uvin, athah in akitil khou un ahi (Ezra 6:14). Ajeh chu amanin, Jerusalem Hou’in athah a tundoh kitna ding toh kisaija pan analah khom lhon ahi. Athu seiphong lhon jal chun, mipi lung akikhel hel jeng tan, Pathen lam vepum in, ama ama cheh in kiphal thengna aneiyun ahi.  
\ip Ipi dinga Israelte lungkim lou ahidem? Ajeh chu amahon Pathen Hou’in asah diu chu ahaimil uvin, amaho natong ding bangleh amaho in-kisah phat ding banga akigel khah jeh-u ahi (Haggai 1:9). Hijeh chun Haggai in, Pathen dinga akitom lah diu thudol aseijin, “Ipiti nahiu ham phaten kiveuvin!” atin ahi (Haggai 1:5).  
\is1 Lekhabu Jihpa Chule Akijih Kum  
\ip Hiche lekhabu hi Haggai Themgao in 520 BC a, anajih ahi. Haggai chun Pathen dinga kin abolna, adeh-a gaothu asei phatsung chu chomcha anahi. Aman gaova thu anasei phat hohi—Kum khat sung anahin, agom lam’a ledoh din, Lhajing 29, Ellha 17 chule Ollha 18 hohi ana hidehset ahi. Gaova thu asei pat apat ajona chan chu lha li halhin lou ahi.  
\c 1  
\s1 Pakai Hou’in Sadia Kouna  
\p
\v 1 Darius lengvaipoh kal kum ni lhinna, Lhajing nisim som ni le ko nin, Judah gamvaipo Shealtiel chapa Zerubabel le thempu chungnung Jehozadak chapa Jeshua henga Pakai in Haggai a konin thu ahinseiye. \x + \xo 1:1 \xt Ezra 4:24—5:2; 6:14\x*  
\v 2 “Van Pakai chun hitin aseiye: Hiche miten, ‘Pakai hou in sahphatna ding avatna laiye atiuve.’”  
\v 3 Hijeh chun Pakai in Haggai themgao kamin ahin seiye:  
\v 4 “I-atileh ka in asesa kijam’a nang ho in nomtah taha chen nahiuvem?  
\v 5 Hiche hi Van Pakai sei ahi: Ipiti nahiu ham phaten kiveuvin!  
\v 6 Muchi tamtah natudoh naovin, ahinlah lhomcha bou nakiat doh uve. An nane naovin, ahinlah navaset thei pouve. Twi nadon naovin, ahinlah na dangchah-u achimdeh poi. Von na kivon naovin, ahinlah lum nasah jou pouve. Na tohman jouseu jong akoina sumdip avangsa bangin amang pai ji'e!  
\v 7 Van Pakai chun hitin aseiye: Ipiti nahiu ham phaten kiveuvin!  
\v 8 Tun thinglhang langa kal’uvin, thing gasuivin lang, ka in sa phauvin. Chutileh keima kalung lhaiding chule kaloupi thei ding ahi, tin Pakai in aseiye.  
\v 9 Tohga tampi nakineppi uve, ahinlah na vaicha cheh jouve. Chule na tohga’u in nahin pohlut tengu, ka sem mangpeh jitaove. Ipijha ham? Ajeh chu ka in ase san akijamin, ahinlah nang ho amitaki’in ama in nomtah tah kisahnan naki salel uve, tin Van Pakai sepai chun aseiye.  
\v 10 Nang ho jeh'a van mun jousen gotwi daitwi atuhkih’a, chule leiset in jong ga asemdoh lou ahi.  
\v 11 Na louma dung jouse le na thinglhang jouseuva nichang kasat sahding – hiche nichang sat chun chang jouse agotsah ding, lengpi phung jouse jong, olive phung jouse jong, chule muchi chivo dang jouse jong agotlhah sah soh ding, hichun nang le na gancha jong kel natohsah diu, chule na tohga jouseu jong aboncha asuhset soh kei ding ahi.”   
\s1 Pathen Hou’in Natoh Machal Be  
\p
\v 12 Chuin Shealtiel chapa Zerubbabel le thempu chungnung Jehozadak chapa Jeshua chuleh ahingdoh Pathen mite amoh chengin Pakai a Pathen’u thusei anit tauvin ahi. Pakai a Pathenun ahinsol Haggai themgao thusei ajah doh-u chun mipin Pakai aging cheh taove.  
\v 13 Hijeh chun Pakai thangkouva pang Haggai chun mipi jaha Pakai thupeh chu hitin: “Keiman ka umpi jing nauve, tin Pakai in aseiye,” atin ahi.  
\v 14 Hijeh chun Pakai in Judah gamvaipo Shealtiel chapa Zerubbabel lungthim ahin, thempu chungnung Jehozadak chapa Jeshua lunghtim ahin, chuleh Pathen mite ahingdoh amoh chengse lunghtim atildoh in ahi. Hiti chun van Pakai, a Pathenu hou in chu asapan taovin ahi.  
\v 15 Darius lengvaipoh kal kumni lhinna, lhalam som ni le khat nia atohpat’u ahi.   
\c 2  
\s1 Hou’in Thah Loupina  
\p
\v 1 Chuin chuche kum leh chuche lha ma ma nisim somni le sagi nin Pakai in themgao Haggai koma thu ahin seikit tai.  
\v 2 “Judah gamvaipo Shealtiel chapa Zerubbabel ahin, thempu chungnung Jehozadak chapa Jeshua ahin, chuleh Pathen mite ahingdoh amoh cheng henga hitin seiyin:  
\v 3 ‘Koipen ham hiche in hejing nalaiya? – hiche houin – masanga aloupina leh ahoina he nalai? Hiche toh chun tedinga tua hi i-toh nabah sah uvem? Imacha hiloubeh toh abang jeng tai! \x + \xo 2:3 \xt Ezra 3:12\x*  
\v 4 Ahin tun Pakai in aseiye: Zerubbabel hat’in. Thempu chungnung Jehozadak chapa Jeshua hat’in. Gamsunga umcheng mipi teho nang ho jong hat’uvin. Chuleh tun kipat-un, tong pan’un, ajeh chu keiman ka umpi naove tin Pakai Van Sepai chun aseiye.  
\v 5 Egypt nahin dalhah uva, kakitepna bang bangin, kalhagao nalah uva, aum jing nai. Hijeh chun kichah hih hel’un.” \x + \xo 2:5 \xt Potdohbu 29:45,46\x*  
\v 6 Ijeh-inem itihleh Pakai Van Sepai chun hitin aseiye: Chomkhat jouleh van le leiset kaholing kit ding, twikhanglen leh gam go lai jouse jong ka holing ding ahi. \x + \xo 2:6 \xt Heb 12:26\x*  
\v 7 Namtin vaipi kaholing ding ahi, chuleh athil khol jouseu hiche houin sunga hung kilhut soh ding, Loupi taha kadip soh hel ding ahi, tin Pakai Van Sepai chun aseiyin ahi.  
\v 8 Sana jong keiya ahin, dangka jong keiya ahi tin Pakai Van Sepai chun aseiye.  
\v 9 Masanga aloupina sanga hiche houin hi hung loupi jo cheh ding ahi, tin Pakai Van Sepai chun seiyin ahi.   
\s1 Akitah Louho Phosal’a Um  
\p
\v 10 Darius lengvaipoh kal kumni lhin kum, Ollha nisim som le get nin Pakai in themgao Haggai henga thu ahin seiye:  
\v 11 “Hiche hi Pakai van sepai chun asei ahi. Hiche dan thupeh chung changa thudoh ho chu thempu ho dongin:  
\v 12 ‘nangho laha koipen hamkhat chun akithensosa satheng chu asangkhol chol a podoh henlang chule asongkhol chol chun changlhah ham ahilouleh anme ham, lengpi twi ham, olive thao twi ham ahilou jongleh nehthei khat pen pen chu tongkha taleh hichun thensah uvin tem? Thempu hon adonbut uvin,“Thensah ponte,” atiuve.  
\v 13 Chuin Haggai in adong in, “Mihem khat mithi long atohkhat jeh'a dan dungjuiya aboh a um chun hiche neh le chah ho chu tongkha taleh, abohsah ding hitam?” Chuin thempu hon adonbut uvin, “Henge abohsah ahitai,” atiuve. \x + \xo 2:13 \xt Minbu 19:11-22\x*  
\v 14 Chuin Haggai in adonbut in, “Hiche mipi le nam mite jong chu tobang chu ahiuve, tin Pakai in aseiye. Athilbol jouseu ahin chuleh athil todohu jouseu abon'a achonset uvin asuhboh sohji ahi.  
\v 15 Pakai houin sahna dinga abul naphudoh masangun nachung uva ipi pi anasoh ham vephaovin.  
\v 16 Na lou sohu thiltena som ni dinga nakinepiu chu som bou naki mubep un ahi. Lengpi twi tena somnga childoh dinga naginchat’u chu somni bou nate doh jouvin ahi.  
\v 17 Keiman nalouma jouseu ka motlhah sah’in, nget kaneh sah’in chuleh gelchang kalhah sah’in natohgau muchi chivo jouse kasumang in ahi. Hiche jouse nungin jong, ka henga nahung kile nom hih laiyuve, tin Pakai in aseiye.”  
\v 18 Phatechan tuni nikho, Ollha nisim som le get ni, hiche nikho, Pakai Houin ding abul kiphu nikho hi ngaitouvin. Lunggil tahin gel’uvin.  
\v 19 Tu nikho, na changchi’u changsala aumpet’a kakitep ahi. Chang na at hih laiyui, lengpi twi le theichang phung le olive phung le kolbuthei phung hon ga asepdoh hihlai uve. Hijeng jongle tuni nikhoa pat’a phatthei kaboh ding nahi tauve.”  
\v 20 Chuche nikho ma ma, Ollha nisim som le get nikhon Pakai in anivei chanan Haggai henga thu ahinsei kit in:  
\v 21 Judah gamvaipo Zerubbel henga seipehin, Keiman vanho jouse le leiset kaholing ding koncha ahitai.  
\v 22 Leng gam jouse leh alaltounau jouse akhup athal’a kale ding, Sagol kangtalai le  
\p achunga tou jouse jong akhup athal’a kale  
\p ding ahi. Sakol jouse lhalhop soh ding chuleh achunga tou jouse amaho le amaho kithat todiu ahi.   
\p
\v 23 “Hichu ahung lhung teng, ka lhacha Shealtiel chapa Zerubbabel, jabolna kapeh ding nahi, tin Pakai Van Sepai chun aseiye. Keiman mohor kisemna khutjem banga kasem ding nahi, ajeh chu kalhendohsa nahi tai, tin Pakai Van Sepai chun aseiye. Pakai Van Sepai, Keiman tahin kasei ahi!” ati.