\id 2TH  
\h 2 Thessalonica 
\toc1 Thessalonica Mite Henga Paul Lekha Thot Nina 
\toc2 2 Thessalonica 
\toc3 2 Thes 
\mt1 THESSALONICA  
\mt2 MITE HENGA  
\mt3 PAUL LEKHA THOT NINA  
\is1 Tuhchah in  
\is1 Christa hungkitna ding hin mipeng thahho thohhat ding atilkhouve  
\is1 2 Thessalonica sung thu umdan  
\ip Kikhel jing leiset'a um hijongleu hen, hiche lekhathot hin tonsot thu ding akikhel theilou ding thudol aseiye. Hiche lekhathot sunga Paul in vannoi kichai ding kimano phat ahijeng vanga, tonsot'a hinding kinepna nei hon Christian dou ho lah'a nitin hinkho kinepna neiya hinthei ahi thudol eihil-uve.  
\ip Bung khat sung hin Christian gimbol hesoh thoh hon, hahsatna athohsunguva tilkhouna Solchah Paul in aneina akisunin ahi.  
\ip Bung ni le thum sung hin ninunung chu hunglhunga chule hichu kichaiya ahitai, tia thuhil dihlou choiho thusei imudoh un ahi. Hiche bungteni hin Pakai Yeshua hungkit masanga thil soh ding phabep umho chu aseidoh in, chule Pathen in ahuhdohna tohgon chu thonlouva ahin suhbulhit ding ahi ti aseichen in ahi. Hijeh chun Houbung chu thohhat ding chule lungneng dinga tilkhouna anei ahi. Pakai Yeshua hungkit masang sea tahsan umtah'a gunchule thanom'a Pakai na itohjing diuvin, eitilkhou un ahi.  
\is1 Lekhathot jihpa chule ajih kum  
\ip Solchah Paul'in 2 Thessalonica hi AD 50 ahilouleh 51 kum kichaikon lam'a ajih ahi.  
\is1 Ipi dinga ajih ham?  
\ip Paul'in Thessalonica khopia mipengthah ho chu atahsan-u lunglhadah'a aum louna diuva Pakai nikho thu ahilchetpeh ahi. Hiche Thessalonica lekhathot nina sim jousen Pakai ngailutna le thohhat tah'a Pakai hungna ding kat-jinga umna eihil'u thudol kihoumatna a thu kisei kingai lha tobanga kisun ahi.  
\c 1  
\s1 Lemna Thu  
\p
\v 1 Hiche lekhathot hi Paul, Silas chule Timothy a kon ahi. Keiho hin I-Pau Pathen le Pakai Yeshua Christa a hi ho Thessalonica houbung henga kahinsut u ahi.\x + \xo 1:1 \xt Act 17:1\x*  
\v 2 I-Pau Pathen le Pakai Yeshua Christa chun lungsetna le cham-lungmon napeuhen.   
\s1 Christa hungkit teng thutanna  
\p
\v 3 Sopi deitah teho, keihon nangho jal in thangvahna kanei jingui, ajeh chu natahsanu akhangtou jingin chule nangho khatle khat nakingailutnau akhangtou cheh cheh in ahi.  
\v 4 Keihon nangho gimbol hesoh nathohnau jouseuva tahsan naumnau thu chule hahsatna natou thudola thohhat le tahsan naumnau thu chu kisonpi tah in Pathen houbung dang ho koma kaseiyuve.  
\v 5 Chule Pathen in hiche gimbol hesoh thohna hi athutan dihna avetsahnom hintin, chule a Lenggama dinga loma nasemuva, hichena dinga chu thoh hahsa nathoh u ahi.  
\v 6 Athutan dihna jal a aman gimhesoh a nabolhou chu alethuh ding ahi.  
\v 7 Chule Pathen in nangho gimbol hesohna thoh ho le keiho dinga I-Pakaiyu Yeshua vana kona ahung kilah tengleh kicholdona eipeh dingu ahi. Ama Avantil thahattah ho to hung kilang ding ahiuve.  
\v 8 Pathen sei ngailouva chule IPakaiyu Yeshua Christa Kipana Thupha joplou ho chunga meikou jejua thutanna ahinlhut dingu ahi.  
\v 9 Amaho chu Pakaiya kona kikhendoh dingu chule aloupina thaneinaa kona a-i-tih a dinga tonsot gimbolna a mahthah dingu ahiuve.\x + \xo 1:9 \xt Isa 2:10\x*  
\v 10 Ama chuche nikhoa ahung teng chuleh Aman amithengtea kona loupina amuding-atahsan ho jousea kona vahchoina akimu ding ahi. Chule hichea hin nangho jong najao uve, ajeh chu nanghon Ama thudol kaseipeh u chu natahsan tauve.  
\v 11 Hitia hi i-Pathen u chun Ama kouna totoh'a hinkho namansahna dinguva keiho hi nangho dinga taojoma kahiuve. Nanghon natahsan Pau chun thilpha natohsah jouseu chu nabulhit molsona dinguvin thaneina napeuhen.  
\v 12 Chutengleh i-Pakaiyu Yeshua chu nahinnau dung juiyin jabolin umintin, chule amatoh jabol a naumtha dingu ahitai. Hiche ho jouse hin hisah theiya um chu i-Pathen u lungsetna le Pakai Yeshua Christa jal ahi.   
\c 2  
\s1 Danbei mihem  
\p
\v 1 Sopi deitahte, tun keihon I-Pakaiyu Yeshua Christa hungna ding thule Amakoma ikikhop khom dingu thudol a seichetna hinnei uvinge.\x + \xo 2:1 \xt 1 Thes 4:15-17\x*  
\v 2 Pakai nikho chu ahunglhung'ah ahitai tiho jeh in nangho bailamtah in suhlongin ahilouleh lung tijan umhih'un. Amaho chun lhagaova vetsahna eikineiye, phondohna eikipei ahilouleh keihoa konin lekhathot kaneiye tijongleu tahsan hih un.  
\v 3 Amahon ipi thu aseiyun nathujo dauhen. Ajeh chu hiche nikho chu ahunglhun masanga Pathen douna nasatah hunglhung ding chule danbeipa-manthaina mihempa kiti chu hung kilangdoh ding ahi.  
\v 4 Ama kichoisang ding, chule mihon pathen atiuva aumsah u tapou chu ajahda ding chule amatah Pathen kahi tia hung ki Pathen sah ding ahi. Ama Pathen hou-in'a lut a, keima Pathen kahi ahungti ding ahi.\x + \xo 2:4 \xt Daniel 11:36; Ezekiel 28:2\x*  
\v 5 Keiman nangho kaumpi pet uva hiche thuho jouse hi kaseipehsau chu nageldoh lou u hitam?  
\v 6 Chule nanghon ama chu ipin atuh tang denham ti naheuve, ajeh iham itileh ama aphat lhinteng lebou hung kilang doh ding ahi.  
\v 7 Ajeh chu hiche danbeipa hin guhthima na atoh pat ahitai chule atuhtangpa hi lampia kona akiheidoh masangsea hitia hi umthim ding ahi.  
\v 8 Chujoutah leh Mihem dan neiloupa hung kiphong doh ding, hinla Pakai Yeshua chun akama ahaidoh hua chu amapa atha ding chule ahungna aloupina chun asuhmang ding ahitai.\x + \xo 2:8 \xt Isa 11:4\x*  
\v 9 Hichepa hin Satan natoh ama thaneina hilou chu ahinpat ding chule melchihna ho le thil kidang dang boldoh theina tha anei ding ahi.\x + \xo 2:9 \xt Matt 24:24\x*  
\v 10 Aman mahthahna lampia cheho chu doha lheplhahna pana angolbol ding ahi, ajeh chu amahon huhhing achan theina dinguva ngailutna le thutah chu akisan nomlouvu ahi.  
\v 11 Hitia chu Pathen in amaho chu hatah a lheplhahna a achuhsah ding, chule hiche jouthuho chu amahon atahsan dingu ahi.  
\v 12 Chutengleh amahon thutah chu tahsan tah sanga agilou chu athanoppi jeh uva themmo chang diu ahi.   
\s1 Huhhing'a um dinga lhenchom  
\p
\v 13 Sopite, keiho dingin vang nangho Pakai ngailut ho jal a bou Pathen chu thangvahna kapeh dingu tailou adang kahepouve.  
\v 14 Aman huhhing'a naumna dinguva nakouvu ahi thua keihon Kipana Thupha kaseipeh nahiuvin; tua hi nanghon i-Pakaiyu Yeshua Christa loupina a chu chan naneikhom theiyu ahitai.  
\v 15 Hiche ho jouse gel pumin, sopi deitahte, keihon nangho tahsa a kaumpi pet u hihenlang ahilouleh lekhathot a kon hijongleh nangho dingdet'un lang chule kathuhilu chu kolchah jinguvin.  
\v 16 Tun i-Pakaiyu Yeshua Christa Amatah le eingailu uvah I-Pau Pathen le Alungsetna jal a tonsot lhamonna chule kinepna kidangtah eipeuva chun,  
\v 17 Thilpha nabolna le naseinau jousea nalhamonu henlang chule nahat dohsah tauhen.   
\c 3  
\s1 Keiho ding in nei taopeh un  
\p
\v 1 Achainakeiyin sopi deitahte, keiho dingin hungtaovun tia kangeh nahiuve. Nangho henga anahung tobanga chu Pakai thuhil hi alhunna chan a gangtah a akithejala chule jabol'a aumtheina dingin taovun.  
\v 2 Chujongleh amitakip tahsannei ahiloujeh uvin, keiho migilou le miphalou hoa kona huhdoh kachan theina dinguvin taovun.  
\v 3 Hinlah Pakai hi tahsan umtah ahin, Aman natha hatsah uvintin, chule agiloupa a konin nahuhbit nauvinte.  
\v 4 Chule keiho Pakaiya kakisonnau chu–nanghon kathupeh u chu naboluva chule naboljom dingu ahi ti kakisonpiu nahiuve.  
\v 5 Pakaiyin nalungthimu Pathen ngailutna hetkhenna le phondohna bukim keiyin chule Christa a kona thohhatna lama napuiyu hen.   
\s1 Natohna dinga batnei  
\p
\v 6 Chule tun, sopi deitahte, Pakai Yeshua mina hiche thupeh hi kapeh nahiuve: tahsannei sopiho jouse thasea hinkho mangho chule keihoa kona kathuhilu juilou hoa konin kikhindoh un.  
\v 7 Ajeh chu nanghon keiho umchan najom diu adol ahi. Keiho nangho toka umkhom laiyun kathase khapouve.  
\v 8 Keihon kaneh manu pelouvin koima an kanepouve. Keihon koima kapohgih sah louna dinguvin sun le jan in katong gimuve.  
\v 9 Keihon neivah dinguva thupeh kapeh thei nahiuve, hinla keihon najui dinguvin vetsahna kapejo bou uve.  
\v 10 Keihon nangho kaumpi pet jenguva jong, hiche thupeh hi kapeh u nahi, “Natong nomlou hon nehding kimulou ding ahiuve,” tihi.  
\v 11 Ahijeng vang'in nangho phabep thasetah in hinkho namanguvin, natoh nanom pouve chule midang natohna chunga kikum naumuve.  
\v 12 Keihon hitobang miho chu thu kapeuvin, chule Pakai Yeshua Christa minin amaho chu kangeh uve, amaho chun ageltoh uva chule akihinsona diuva na atoh diu hi ahi.  
\v 13 Sopi deitahte, nangho lah a adangse dinga kasei chu, thilpha bolnaa chimhihbeh uvin.  
\v 14 Hiche lekhathot a keiho seingailou ho chu melchih uvin, amahoa konin kichom khendoh leu chun amaho jahcha tauvinte.  
\v 15 Amaho chu melma ho gelin gel hih un, hinla sopi nabolna bangun sosalun.   
\s1 Taokhum khana  
\p
\v 16 Tun Cham-lungmon kona Pathen chun cham-lungmon imatih chanin chule phat jousen nape jingu hen. Pakaiyin naumpi jingu hen.  
\v 17 Hiche hi keima Paul in kakhuttah a kajih chibai bohna ahi. Hitia keima tah in lekhathot kajihna ho photchennaa hitia hi kabolji ahi.  
\v 18 I-Pakaiyu Yeshua Christa milungsetna chun nabonchauvin naumpi tauhen.