\id ZEP ditammari 1998
\ide UTF-8
\h Sofonii
\toc1 Sofonii
\toc2 SOFONII
\mt1 Sofonii
\imt1 Ɗi mpɑ́tíri tɔ tìì nɑ́ɑǹtì
\ip Kuyie mpɑ̃ɑ̃nɑ́ɑǹtì nɑ́ɑǹtò Sofonii do yóó wɑ̃ri o pɑ́tíri kɛ̀ okpɑ̀ɑ̀tì Sosiɑsi mu nyí tũ̀ntɛ Kuyie ncĩ́ɛ̃̀tɛ̀ mubɑ́ɑmmu. (Wéntɛ́ 2 Bɛkpɑ̀ɑ̀tìbɛ̀ 23:1-28)
\ip Kòo nɑ́kɛ́ Kuyie nyóó bekɛ́nɛ̀mɛ̀ Sudɑɑ kó kuwuɔ nkɔbɛ nɛ̀ Isidɑyɛɛribɛ 1:1-2:3, kɛ́nɑ́kɛ́ kɛ dɔ̀: Kuyie nyóó kuɔ iwuɔ nyìì fitɛ́ Sudɑɑ ɛì nɛ̀ Sedisɑdɛmmu kpɛri, kɛ́wɛ̃tɛ kɛ́tũntɛ Sedisɑdɛmmu, bɛ̀ɛ̀ tú bɛnitisɑ̀ɑ̀bɛ̀ kɛ wetí kɛ̀ bɛɛ̀ mbo dɛ miɛkɛ.
\is1 Ɗi mpɑ́tíri nɑ́ɑǹtì duɔ́ kɛ dòmmɛ̀
\io1 1. Nɛbukɑnnɛsɑɑ yóó wɛ̃tɛ kɛ́ bɛ̀ domɛ̀
\io1 2. Kuyie mpɑ̃ɑ̃nɑ́ɑǹtì nɑ́ɑǹtò Sofonii dɛ nyu kɛ tú
\io1 3. Kuyie nkó diyiè 1:1-2:3
\io1 4. Ò nɑ̀kɛ́mɛ̀ Kuyie nyóó potɛ́mɛ̀ yɛbotɛ̀ yɛ̀ɛ̀ bɛ̀ fitɛ́ 2:4-15
\io1 5. Kuyie nyóó potɛ́ Sedisɑdɛmmu kɔbɛ kɛ́deè kɛ́ bɛ̀ dɛɛtɛ́mú 3:1-20
\c 1
\p
\v 1 Di m̀pɑ́tíri ti nɑ́ɑ́ nti Yiɛ̀ nKuyie ndo bɛ́innɛ̀ tì nti Sofonii. Esekiɑsi weè do pɛitɛ́ Amɑdiɑ, kɛ̀ Amɑdiɑɑ pɛitɛ́ Kedɑdiɑ, kɛ̀ Kedɑdiɑɑ pɛitɛ́ Kuusi, kɛ̀ Kuusi pɛitɛ́ Sofonii, kɛ̀ ti Yiɛ̀ nKuyie nhò bɛ́innɛ̀ Amɔɔ birɛ Sosiɑsi Sudɑɑ kɔbɛ kóo kpɑ̀ɑ̀tì kpɑ̀tì miɛkɛ.
\s1 Kuyie nnɑ̀kɛ́mɛ̀ kù yóó potɛ́mɛ̀ kutenkù kumɔu
\q1
\v 2 Kɛ̀ ti Yiɛ̀ nKuyie mbɛ́innɛ̀ Sofonii kɛ dɔ̀:
\q1 Mí ndi Yiɛ̀ nKuyie n yóó kuɔmu dɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀,
\q1 mí ndi Yiɛ̀ nKuyie mmíì bɛ́i.
\q1
\v 3 N yóó kuɔmu bɛnìtìbɛ̀ nɛ̀ iwũɔ̃ nɛ̀ sinɔɔ nɛ̀ siyĩĩ.
\q1 N yóó kuɔmu bɛnitiyɛibɛ nɛ̀ bɛ tɔ̃mmú,
\q1 n yí yóó súɔ́ nhonìtì bɑ́ omɑ́ɑ̀,
\q1 mí ndi Yiɛ̀ nKuyie mmíì bɛ́i.
\s1 Kuyie nyɛ̃mmɛ̀ kù yóó potɛ́ Sudɑɑ kɔbɛ nɛ̀ Sedisɑdɛmmu kɔbɛ
\q1
\v 4 Kɛ̀ Kuyie mbɛ́i nkɛ dɔ̀:
\q1 N yóó youtɛ n nɔ̀ùtɛ̀ ntɛ Sudɑɑ kɔbɛ,
\q1 nɛ̀ Sedisɑdɛmmu kɔbɛ bɛmɔu ĩ́nkɛ̀,
\q1 kɛ́dɛitɛ dibɔɔ̀ Bɑɑdi kpɛrɛ dɛ̀ɛ̀ kpɑɑ́ nɛ̀ bɛbɔɔyɛmbɛ̀,
\q1 bɛ̀ɛ̀ pĩ ndi tɔ̃mmú,
\q1
\v 5 kɛ́kuɔ bɛ̀ɛ̀ dèkù dɛdɑ̀nnɛ̀ kɛ bɑ́ɑ́ ndiyiè,
\q1 nɛ̀ otɑ̃̀nkù nɛ̀ siwɑ̃̀ɑ̃,
\q1 nɛ̀ bɛ̀ɛ̀ n dɔúnnɛ̀ dinùù kɛ tú bɛ̀ bo nni n tũ,
\q1 nkɛ wɛ̃̀tɛ kɛ pɑrìkunɛ̀ bɛ bɔɔ̀ Midikɔ̃ɔ̃ kó diyètìrì.
\q1
\v 6 M bo kuɔ bɛ̀ɛ̀ bùtínnɛ́ mí ndi Yiɛ̀ nKuyie nkɛ tɛ̃́nkɛ í n wɑɑ̀,
\q1 nkɛ tɛ̃́nkɛ í m bekù tìmɑtì.
\b
\q1
\v 7 Yĩ́nɛ̀ yúóó mí ndi Yiɛ̀ nKuyie,
\q1 m miɛkɛ kó diyiè duunnímu n wɑɑ́mmu n wũɔ̃ kɛ dèè,
\q1 kɛ cɑ̃̀ńnɛ́ bɛ̀ɛ̀ yóó di m bɑnni.
\b
\q1
\v 8 Dɛ yiè bo tuɔ̀kɛ dìì yiè
\q1 m bo potɛ́ okpɑ̀ɑ̀tì tɔ̃mbɛ̀ nɛ̀ sikpɑ̀ɑ̀tìbìí,
\q1 nɛ̀ bɛ̀ɛ̀ tekíí ibotí tɛì kó muyɑɑ̀ɑ̃nnímu kɛ cɔú bɛ borimɛ.
\q1
\v 9 Dɛ yiè m bo potɛ́ bɛ̀ɛ̀ dèkù yɛbɔɔwũɔ̃tɔ̀rɛ̀ nɛ̀ bɛ̀ɛ̀ tɑɑ̀ nɛ̀
\q1 bɛ̀ɛ̀ yìɛ̀ n cĩ́ɛ̃̀tɛ̀ bɛ̀ fèkɛ dɛ̀ nɛ̀ bɛ̀ ciitɛ́ bɛtɔbɛ̀ kɛ cuɔ́ dɛ̀.
\q1
\v 10 Dɛ yiè iúu bo dɑ́tínnɛ́ Sedisɑdɛmmu ɛì,
\q1 dibòrì bɛ̀ tu dì siyĩĩ kó dibòrì,
\q1 kɛ̀ yɛdɑbùò nní mbo dihɛikɑrì bɛ̀ tu dì Dihɛipɑ̀nnì,
\q1 kɛ̀ kunɔɔ̀roo ḿbo yɛtɑ̃rɛ̀ ĩ́nkɛ̀,
\q1 Mí ndi Yiɛ̀ nKuyie mmíì bɛ́i.
\q1
\v 11 Díndi bɛ̀ɛ̀ bo Sedisɑdɛmmu ɛikɑrì bɛ̀ tu dì Mɑkitɛsi,
\q1 kɔmmúnɛ̀ yɛdɑbùò nkɛ yɛ̃́
\q1 bɛpotɑmbɛ̀ bɛmɔu òmɔù í yóó nsúɔ́mmɛ̀.
\q1 Bɛpotɑndiɛbɛ̀ òmɔù í yóó nkpɑɑ́.
\q1
\v 12 Dɛ yiè m bo wɑmmú Sedisɑdɛmmu kɔbɛ nɛ̀ fɛmíìnfɛ̀,
\q1 m bo yɑ̀ dɛ yiè bɛ̀ɛ̀ kɑ̀ri bɛ kpɑ̀tì ĩ́nkɛ̀ bɛ̀tɛ̀ìì,
\q1 kɛ nɑ́ɑ́ nkɛ tú,
\q1 mí ndi Yiɛ̀ nKuyie n yí dɔɔ̀ri dɛ̀mɑrɛ̀ dɛ̀ɛ̀ tu dɛsɑ̀ɑ̀rɛ̀,
\q1 yoo dɛyɛirɛ.
\q1
\v 13 M bo duɔ́ nkɛ̀ bɛ̀ɛ ɛí bɛ kpɑ̀tì, kɛ́puɔ mbɛ cɛ̃́ĩ.
\q1 Bɛ̀ mɑɑ́mu sicɛ̃́ĩ bɛ̀ mɛ nyí sì tɑti,
\q1 bɛ̀ fìíkúmu fínyĩ̀ kó dɛtie mbɛ̀ mɛ mbɑ́ɑ́ yɑ̃̀ dɛ nɑɑ̀.
\s1 Bɛ̀ nɑ̀kɛ́mɛ̀ Kuyie mbeéntì kó diyiè kpɛ́í
\q1
\v 14 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Mí ndi Yiɛ̀ nKuyie m beéntì kó diyiè ɑutɛ́nímu,
\q1 dì duunnímu, kɛ tùɔ̀kɛní kɛ dèè,
\q1 yɛdɑbùò nkó diyiè ndi,
\q1 dɛ yiè dɛ̀ bo pɑ́kɛ́ bɛkpɑ̀rìtiebɛ kɛ̀ bɛ̀ nkuɔ̀ nkɛ tú:
\q1 We mbo ti dɛɛtɛ́!
\q1
\v 15 Dɛ kó diyiè m miɛkɛ bo di cɔ́útɛ́,
\q1 dɛ yiè kufɔ̃̀wɑɑ́ nnɛ̀ mɛyɛǹcɑɑ̀rìmɛ̀ kó diyiè ndi,
\q1 dɛ yiè ndi bɛ̀ yóó di pɔntɛmɛ̀ pɑ́í pɑ́í,
\q1 dɛ yiè dɛ̀ bo kɔ̃̀tì kɛ́yɑ̃́kɛ́,
\q1 dɛ yiè kupɑ̃̀kù nɛ̀ yɛwɛtɛ̀ dɛ̀ bo ɑ̃ntɛ̀,
\q1
\v 16 Dɛ yiè sikpɑ̀rìeú bo nkuɔ̀,
\q1 kɛ̀ bɛhɑ̃ɑ̃pɔ̀mbɛ̀ɛ duó yɛkɛkɛ̀ iduotí fitɛ́ yɛ̀,
\q1 kɛ́puɔ nyɛdèrɛ̀,
\b
\q1
\v 17 Dɛ yiè m bo tɑnnɛ́ bɛnìtìbɛ̀ mɛyɛǹcɑɑ̀rìmɛ̀ miɛkɛ,
\q1 kɛ̀ bɛ̀ nhɑ̃́ɑ̃ntɛ tiyũ̀ɔ̃̀ntì kɔ̃mɛ,
\q1 bɛ̀ n yetɛ́nɛ̀ mɛ̀ɛ̀ kpɛ́í mí ndi Yiɛ̀ nKuyie,
\q1 nɛ̀ dɛ kpɛ́í mbɛ yĩ̀ĩ̀ mbo cóú nkɛtenkɛ̀ mutɑ̃́ɑ̃́ nkɔ̃mɛ,
\q1 kɛ̀ bɛcíríbɛ̀ ncóú cóú tiyontì dòmmɛ̀.
\b
\q1
\v 18 Bɛ sɔɔ nyoo bɛ mɑ́tìpɛ́ítì bɑ́ɑ́ nɑ kɛ́ bɛ̀ dɛɛtɛ́,
\q1 m miɛkɛ bo bɛ̀ yɛ̀ dìì yiè,
\q1 kɛ́cɔ́útɛ́ muhɑ̃ɑ̃́ nkɔ̃mɛ
\q1 Dɛ yiè kutenkù kumɔu bo cɔ́útɛ́
\q1 Dɛ kó diyiè m bo kuɔ bɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀.
\q1 Diyiè yɛiri yó nni ndi dɛ yiè!
\c 2
\s1 Kuyie mpɑ̃ɑ̃nɑ́ɑǹtì nɑ́ɑǹtò túmɛ̀ bɛ̀ɛ ceetɛ
\q1
\v 1 Dɛ kó difɔ̃nkúò kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtòo bɛ́i nkɛ dɔ̀:
\q1 Díndi kubotí kùù kpɑ ifɛi,
\q1 Tíínnɛ̀ kɛ́totí di yɛ̀mmɛ̀ kɛ́ceetɛ,
\q1
\v 2 Kɛ̀ bɛ̀ mu nyí di bɛ̀ti,
\q1 kɛ̀ di cìɛ́tɛ́ kuyɑɑkù ɔ̃ɔ̃ tɔ mɛ̀ɛ̀ botí timútì.
\q1 Kɛ̀ ti Yiɛ̀ nKuyie mmiɛkɛ mu nyí di do,
\q1 kɛ̀ di cɔ̀útɛ́ muhɑ̃ɑ̃́ ntɛ̃mɛ̀.
\q1
\v 3 Díndi bɛ̀ɛ̀ dé ti Yiɛ̀ nKuyie nkɛ tũ̀ nku tɑnnɔ̀,
\q1 wɑmmúnɛ̀ ku, ndɔɔ̀rinɛ̀ kù dɔ́mɛ̀ kɛ kɛ̃́kùnko dimɑ́ɑ̀,
\q1 kɛ̀ dɛ̀ nɑɑti ku miɛkɛ yiè dí yentɛ́.
\s1 Kuyie ncɑummɛ̀ dɛyììkɛ̀ bíɛ́kɛ̀ kɔbɛ
\q1
\v 4 Kɑsɑɑ ɛì yóó dɔúnkomu,
\q1 kɛ̀ Asikɑnɔɔ kpɛrii nɑɑ́ ndikpɑ́ɑ̀,
\q1 kɛ̀ Asidɔti kɔbɛɛ cíɛ́tɛ́ bɑ́ diyiè mu nyí còńnɛ́ yɛyɔ,
\q1 bɛ̀ bo dennɛ Ekunɔɔ kɔbɛ bɛ ɛì miɛkɛ.
\q1
\v 5 Di bo yɑ̀ díndi dɑ̀mɛ́ɛ̀rì pɛɛ́mmɛ̀ kɔbɛ,
\q1 díndi Kedetiibɛ kó kubotí,
\q1 mí ndi Yiɛ̀ nKuyie m míì di kpɑnnɛ̀,
\q1 díndi Fidisitɛ̃ɛ̃bɛ Kɑnnɑhɑ̃ɑ̃ ɛì kɔbɛ,
\q1 kɛ tú di kó dihɛì bo pɑɑ̀ di nìtìbɛ̀.
\q1
\v 6 Dɑ̀mɛ́ɛ̀rì pɛɛ́mmɛ̀ kó kutempɛ̃ mbo nɑɑ́ ndinɑcɛ̃nhòò,
\q1 bɛnɑɑcɛ̃mbɛ kó diciènnì, tipìètì kó ditṹnnì.
\q1
\v 7 Sudɑɑ kɔbɛ bɛ̀ɛ̀ bo nkpɑɑ́ bɛɛ̀ yóó tiekɛ dɛ kó kutempɛ̃,
\q1 kɛ́ncɛ̃mmù bɛ wũɔ̃ kɛ wentí Asikɑnɔɔ ɛì kó sicɛ̃́ĩ miɛkɛ,
\q1 kɛ yɛ̃́ mí ndi Yiɛ̀ nKuyie mbɛ̀ tũ̀ nkù míì yóó bɛ̀ kòńnɛ́mɛ̀,
\q1 kɛ́wɛ̃tɛ kɛ́ bɛ̀ còńnɛ́ bɛ fɔ̃̀tìrì.
\s1 Kuyie ncɑummɛ̀ Mɔɑbu nɛ̀ Amɔɔ ɛkɛ̀ kɔbɛ
\q1
\v 8 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Díndi Mɔɑbu ɛì kɔbɛ nɛ̀ Amɔɔ ɛì kɔbɛ,
\q1 n kèèmu di dɑúmɛ̀ n nìtìbɛ̀ kɛ bɛ̀ sɑ̃̀ɑ̃́,
\q1 nkɛ fìetɛ bɛ tenkɛ̀ kɛ yìɛ́nɛ̀ di kɔkɛ.
\q1
\v 9 Nɛ̀ dɛ kpɛ́í mMɔɑbu kpɛrɛ bo nɑɑ́ nSodɔmmu kpɛrɛ,
\q1 Kɛ̀ Amɔɔ ɛì kɔbɛ kpɛrɛɛ nɑɑ́ Komɔɔ kpɛrɛ,
\q1 tipòtì bo yɛ̀ bɛ tenkɛ̀,
\q1 kɛ̀ bo nɑɑ́ ndikɔ́kɛ́tɑ̃́rì,
\q1 kɛ̀ bo dɔúnko yúóó.
\q1 N kɔbɛ bɛ̀ɛ̀ bo yentɛ́,
\q1 bɛ̀ bo bɛ̀ pɔ̀ntɛ kɛ́tiekɛ bɛ tenkɛ̀.
\q1 Mí ndi Yiɛ̀ nKuyie Mpɑkɛdɑɑ Isidɑyɛɛribɛ tũ nkù m bomu,
\q1 kɛ̀ míì bɛ́i.
\b
\q1
\v 10 Bɛ̀ mɔ̀ɔ̀tɛ tɛ̀ɛ̀ fentɛ̀ kó mucɔ̃́ntimu mmu dɛndɛ,
\q1 bɛ̀ sènkɛ̀rì mɛ̀ɛ̀ kpɛ́í, mí Mpɑkɛdɑɑ, n nìtìbɛ̀ kɛ bɛ̀ sɑ̃̀ḿmú.
\q1
\v 11 Mí ndi Yiɛ̀ nKuyie m bo bɛ̀ bɛnkɛ mmɑ́ɑ̀ kɛ̀ bɛ̀ n yɔtɛ,
\q1 m bo pɔntɛ yɛbɔkɛ̀ wɛ̃rímú,
\q1 kɛ̀ titentì timɔu kɔbɛɛ nínkú,
\q1 bɑ́ wè o kɑrì kɛ́ m bɑ́ntɛ̀.
\s1 Kuyie ncɑummɛ̀ kubɑkù yoú nɛ̀ kucɑ̃̀nku kɔbɛ
\q1
\v 12 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Díndi múnkɛ Etiopii ɛì kɔbɛ,
\q1 n yóó duɔ́ nkɛ̀ bɛ̀ di kuɔ mudoò miɛkɛ nkɛ.
\b
\q1
\v 13 N yóó youtɛmu n nɔ̀ùtɛ̀ kubɑkù yoú bíɛ́kɛ̀,
\q1 kɛ́pɔntɛ Asidii,
\q1 kɛ̀ Ninifu dɔúnko kɛ́nɑɑ́ ntɛdɔntɛ̀.
\q1
\v 14 Ninifu ɛì bo nɑɑ́ nyiwũɔ̃ kó diweńnì,
\q1 tikpɑsĩ̀ntì timɔu botí kó diɑ̃rì,
\q1 yɛondo nɛ̀ ondopúsícɑyì bo nwentí dɛ kó yɛsɑ̃ǹkɛ̀ ĩ́nkɛ̀.
\q1 Yɛondo bo nkuɔ̀ sicɛ̃́ĩ kó sibòo ĩ́nkɛ̀,
\q1 bɛ̀ bo u sɛ́tìrì kó idɛí.
\q1
\v 15 Bɛnìtìbɛ̀ bo m pɛ̃nkù kɛ dì yɑ̀u kɛ̀ dɛ̀ɛ bɛ̀ di
\q1 kɛ̀ bɛ̀ ndi dɑú kɛ yɔ̃kii bɛ bɑɑyɔ kɛ tú:
\q1 Dihɛì dìì do kɑri kɛ í yĩɛ̃̀kù,
\q1 kɛ̀ di yɛ̀mmɛ̀ ndò dì í mɑ̀nnɛ̀ dìmɑrì,
\q1 diì nɑɑ́ ntidobontì,
\q1 kɛ nɑɑ́ ntikpɑsĩ̀ntì kó diɑ̃rìɑ̀ɑ̀?
\c 3
\s1 Kuyie nkpɑ̀nnɛ̀ ti Sedisɑdɛmmu ɛì kɔbɛ
\q1
\v 1 Kɛ̀ Kuyie mbɛ́innɛ̀ Sedisɑdɛmmu ɛì kɔbɛ kɛ dɔ̀:
\q1 Di bo yɑ̀ díndi Sedisɑdɛmmu ɛì kɔbɛ,
\q1 di to yɛɛ̀ kpeńnì,
\q1 bɑ́ di borimɛ í wenni,
\q1 kɛ̀ di fɛ̃́ũnko ditɔbɛ̀,
\q1
\v 2 Mí ndi Yiɛ̀ nKuyie n di yumu kɛ̀ di yetɛ,
\q1 di í kèńtɛ́ n tié,
\q1 di í n duɔ́ ndimɑ́ɑ̀,
\q1 di í n tɔ̀ɔ́nnɛ̀ dimɑ́ɑ̀.
\q1
\v 3 Sedisɑdɛmmu kó bɛkpɑ̀ɑ̀tìbɛ̀ sɑ̃̀ɑ̃́tɛ́nɛ̀ yɛcìrícìrɛ̀ nyɛ,
\q1 yɛ̀ɛ̀ kontí.
\q1 Bɛ̀ɛ̀ bɑkɛ́ kɛ̀ bɛ̀ sɑ̃̀ɑ̃́tɛ́nɛ̀ timuntũntì,
\q1 tìì ɔ̃ɔ̃ pĩ́ nkuyuoku kɛ cɑ́ɑ́koo bɑ́ tì bɑ́ɑ́ súɔ́ nkɛ̀ dɛ̀ɛ wentɛ́.
\q1
\v 4 Bɛ̀ɛ̀ yɛ̃ mbɛ̀ tú m pɑ̃ɑ̃nɑ́ɑǹtì nɑ́ɑm̀bɛ̀ Sedisɑdɛmmu,
\q1 bɛ̀ í tũ n kuɔ́ bɛ̀ tú bɛyóóbɛ̀ mbɛ,
\q1 kɛ̀ ikuɔ́ nìùbɛ̀ sɑ̃ũri dɛ̀ɛ̀ tú n kpɛrɛ,
\q1 kɛ cɑɑ̀ri n kuɔ́.
\q1
\v 5 Mí ndi Yiɛ̀ nKuyie m mɛ mbo bɛ ɛì miɛkɛ,
\q1 kɛ dɔɔ̀ri dɛ̀ɛ̀ sìɛ́ dɛ̀ndɛ kɛ wenni,
\q1 bɑ́ dìì yiè kɛ bɛ̀ dènni n kuɔ́,
\q1 nh ɔ̃ɔ̃ í nsoó ndiyiè mɑrì.
\q1 Nɛ̀ mɛmmɛ ifɛi í pĩĩ mɛyɛi ndɔɔ̀rìwè.
\b
\b
\q1
\v 6 Kɛ̀ n kùɔ kɛ kùɔ yɛbotɛ̀,
\q1 kɛ pùɔ mbɛ dèrɛ̀ nɛ̀ bɛ ɛkɛ̀,
\q1 kɛ̀ yɛ kó icɛ dɔúnko,
\q1 bɑ́ òmɔù tɛ̃̀ńkɛ í dɛ̀ keri,
\q1 kɛ̀ bɛnìtìbɛ̀ dèè dihɛì,
\q1 onìtì tɛ̃̀ńkɛ í bo di miɛkɛ.
\q1
\v 7 Kɛ̀ n yɛ̀mmɛ̀ dò ndíndi Sedisɑdɛmmu kɔbɛ,
\q1 di bo n depɛ kɛ́kéntɛ́ n tié,
\q1 bɑ́ di bɑ́ɑ́ yɛ̃̀ n di tiè ntìì kpɛ́í,
\q1 kɛ̀ dɛ̀ɛ yie nkɛ̀ dihɛì bɑ́ɑ́ pɔntɛ
\q1 n nɛ́ níí di potɛ́ kɛ̀ di nɛ́ dɔkɛ dɔɔ̀ mɛyɛi,
\q1 nkɛ̀ dɛ̀ɛ pɛ̃ɛ̃tɛ́ dɛ̀ do dòmmɛ̀.
\q1
\v 8 Di nni m bɑɑ tũnkɛ mí ndi Yiɛ̀ nKuyie,
\q1 n kéróomu kɛ bo di bekɛ́nɛ̀.
\q1 N tɑ̃ɑ̃tɛ́mu kɛ bo tíí nyɛbotɛ̀,
\q1 kɛ́wɛ̃nnɛ́ yɛkpɑ̀ɑ̀tìyɔ,
\q1 kɛ̀ m miɛkɛɛ bɛ̀ cɔ̀útɛ́
\q1 kɛ̀ m miɛkɛ kó kuyiìnkù kumɔu bɛ̀ do.
\q1 Dɛ̀ n yonkɛmu di n yetɛ mɛ̀ɛ̀ kpɛ́í
\q1 kɛ̀ n yóó cɔ́u nkutenkù kumɔu mmuhɑ̃ɑ̃́.
\s1 Kuyie nnɑ̀kɛ́mɛ̀ kù yóó ceètɛmɛ̀ yɛbotɛ̀
\q1
\v 9 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Dɛ mɔ̀nnì bo tuɔkɛ dìì yiè m bo ceetɛ yɛbotɛ̀,
\q1 kɛ́wénkùnnɛ bɛ nɔ̀
\q1 kɛ̀ bɛ̀ nni mbɑ́ɑ́,
\q1 nkɛ pĩ́ n tɔ̃mmú nɛ̀ mɛyɛ̀mmɛ̀ mɛ̀mɑ́ɑ̀.
\q1
\v 10 Dɛ mɔ̀nnì n nìtìbɛ̀ bɛ̀ɛ̀ cìɛ́tɛ́ bɛ̀ bo ítɛ́ní Etiopii,
\q1 kɛ́kɔtɛní m borɛ̀ kɛ́ m bɑ́ntɛ̀ kɛ́ m pɑ̃mmú yɛpɑ̃rɛ̀.
\s1 Kuyie nyóó dɔɔ̀mɛ̀ Isidɑyɛɛribɛ bɛ̀ɛ̀ yó nkpɑɑ́
\q1
\v 11 Dɛ kó diyiè, díndi n kɔbɛ,
\q1 ifɛi tɛ̃́nkɛ í yó ndi bonɛ̀ mɛyɛi ndi n dɔ̀ɔ̀ mɛ̀.
\q1 Dɛ yiè n yóó dɛitɛmu sipɔɔ yɛmbɛ̀ di cuokɛ̀.
\q1 Dɛ mɔ̀nnì sifeí yɛmbɛ̀ í yó nkpɑɑ́,
\q1 ditɑ̃sɑ̀ɑ̀rì n cĩ́ɛ̃̀tɛ̀ bo dìì ĩ́nkɛ̀.
\q1
\v 12 Dɛ yiè n yóó súɔ́ mbɛ̀ɛ̀ í mɔkɛ bɛ̀mbɛ sifeí,
\q1 nɛ̀ bɛ̀ɛ̀ kɛ̃́kùnnɛ bɛmɑ́ɑ̀,
\q1 kɛ̀ bɛ̀ɛ wɑmmú disɔ̀rì m borɛ̀.
\q1
\v 13 Isidɑyɛɛribɛ bɛ̀ɛ̀ bo nkpɑɑ́ dɛ yiè,
\q1 bɛ̀ tɛ̃́nkɛ í yó ndɔɔ̀ri mɛyɛi,
\q1 bɛ̀ tɛ̃́nkɛ í yó nnɑ́ɑ́ nsiyɑ́ɑ̀bìsí,
\q1 bɛ̀ tɛ̃́nkɛ bɑ́ ncií mbɛtɔbɛ̀,
\q1 dɛ mɔ̀nnì bɛ̀ bo nyo nkɛ dɔu,
\q1 òmɔù bɑ́ mbɛ̀ kɔɔ́nnɛ̀.
\s1 Sedisɑdɛmmu kɔbɛ dòmmɛ̀ kɛ́nyɑ̃nku
\q1
\v 14 Díndi Sedisɑdɛmmu kɔbɛ ndiènnɛ̀ diwɛ̀ì,
\q1 nyíúnɛ̀, nyɑ̃nkunɛ̀, ndɑúnɛ̀ di yɛ̀mmɛ̀ mɛmɔu.
\q1
\v 15 Mí ndi Yiɛ̀ nKuyie n tɛ̃́nkɛ í yóó di potɛ́,
\q1 n kɛìmmu di dootitɔbɛ̀,
\q1 mí ndi Yiɛ̀ nKuyie nyIsidɑyɛɛribɛ kpɑ̀ɑ̀tì,
\q1 m bomu di cuokɛ̀,
\q1 di tɛ̃́nkɛ bɑ́ nyĩɛ̃̀kù dɛ̀mɑrɛ̀.
\q1
\v 16 Dɛ yiè bɛ̀ bo nnɑ́ɑ́ nSedisɑdɛmmu kɔbɛ kɛ tú:
\q1 Di bɑ́ nyĩɛ̃̀kù, di kɔ̃̀ntì bɑ́ɑ́ yɑ̃rikɛ.
\q1
\v 17 Mí ndi Yiɛ̀ nKuyie ndíndi Isidɑyɛɛribɛ di tũ nkù,
\q1 m bomu di cuokɛ̀
\q1 n tú okpɑ̀rìnuɔnti nwe kɛ di dɛɛrí,
\q1 diwɛ̀ì diì m bonɛ̀ díndi kɛ̀ n yɑ̃̀nku,
\q1 n di dɔ́mu kɛ di kpénkùnko,
\q1 kɛ yɑ̃nku kɛ íú di kpɛ́í,
\q1 kɛ̀ dɛ̀ n dò dibɑnni.
\b
\q1
\v 18 N yóó kɛìmmu mɛyɛi ndi ĩ́nkɛ̀, ifɛi tɛ̃́nkɛ í yó ndi bo.
\q1
\v 19 Dɛ mɔ̀nnì m bo kuɔ bɛ̀ɛ̀ do di fɛ̃́ũnko,
\q1 kɛ́dɛɛtɛ́ díndi bɛ̀ kɔ̀utɛ bɛ̀,
\q1 kɛ dí tíí díndi bɛ̀ do bɛ̀ti bɛ̀,
\q1 kɛ̀ di cíɛ́tɛ́ tipíìtì timɔu,
\q1 kɛ́wɛ̃tɛ kɛ dí duɔ́ ndiyetìdiɛrì nɛ̀ disɑ̃nni,
\q1 titentì timɔu tìì do di diinko ifɛi ti ììkɛ̀.
\q1
\v 20 M bo wɛ̃tɛ kɛ di tíí ndìì mɔ̀nnì míì yó ndi ni,
\q1 kɛ́wɛ̃tɛ kɛ di duɔ́ ndiyetìdiɛrì nɛ̀ disɑ̃nni,
\q1 titentì timɔu ììkɛ̀.
\q1 N yóó wɛ̃tɛ kɛ di cónnɛ́mu di kó difɔ̃̀tìrì,
\q1 kɛ̀ di dɛ̀ yɑ̀ nɛ̀ di nuɔ,
\q1 mí ndi Yiɛ̀ nKuyie mmíì bɛ́i!