\id ZEC di38.all Novembre 1998 BJ Parakou B{enin
\ide UTF-8
\h Sɑkɑrii
\toc1 Sɑkɑrii
\toc2 SAKARII
\mt1 Sɑkɑrii
\imt1 Di mpɑ́tíri tɔ tìì nɑ́ɑǹtì
\ip Sɑkɑrii do yóó nɑ́kɛ́ Kuyie mpɑ̃ɑ̃nɑ́ɑǹtì kɛ sɔ̃́ mbɛ̀ í kpɑɑní bɛ̀ do bɛ̀ pĩ̀ḿmú kɛ́kònnɛ̀ kɛ̀ Bɑbidɔnni. Ò nɑ̀kɛ́ tìì nɑ́ɑǹtì wetínɛ̀ mɛfíè mbɛ̀ mɑɑ́ dìì mɔ̀nnì ndi Kuyie ncĩ́ɛ̃̀tɛ̀ kɛ́ntɔ kɛ́tuɔkɛnɛ̀ yɛbie ntɛkɔ̀ùpíítɛ̀ (1000) Kirisi, okpɑ̀ɑ̀tì Kuyie ntɑ̃ɑ̃tɛ́ wè kɔbɛ yó mbo yɛ̀ diwɛ̀ì miɛkɛ. O pɑ́tíri nɑ́ɑǹtì cũmpúrìmu, kɛ̀ diì nɛ́ wɛ̃̀tɛ kɛ tú dìì nɑ̀kɛ́ Kirisi, okpɑ̀ɑ̀tì Kuyie ntɑ̃ɑ̃tɛ́ wè kpɛ́í nkɛ̀ dɛ̀ feí, diì múnkɛ nɑ̀kɛ́ Isidɑyɛɛribɛ kpɛ́í nnɛ̀ yɛbotɛ̀ kɛ̀ dɛ̀ feí, weè nɑ̀kɛ́ Kirisi, okpɑ̀ɑ̀tì Kuyie ntɑ̃ɑ̃tɛ́ wè tumɛ̀ Kuyie, nɛ̀ ò tumɛ̀ onìtì pɑ́íí, nɛ̀ ò tumɛ̀ ikuɔ́ nìùtì, ò kɛ̃́kùnnɛmɛ̀ omɑ́ɑ̀, kɛ kɔ̀tɛní kutenkù bɛ̀ɛ̀ do tú ikuɔ́ nìùbɛ̀ kɛ̀ bɛ̀ ò yetɛ. Weè múnkɛ nɑ̀kɛ́ bɛ̀ yóó ò fìtɛ́mɛ̀ kɛ́cɔutɛ́ mɛdítíbii nsipísìtɑ̃ɑ̃ti kɛ nɑ̀kɛ́nɛ̀ Kirisi, okpɑ̀ɑ̀tì Kuyie ntɑ̃ɑ̃tɛ́ wè wɛ̃tinímɛ̀ kɛ̀ Isidɑyɛɛribɛ bo ò yɑ̀ wenwe bɛ̀ bɑɑkɛ́ wè kɛ́demmu kɛ dɔ̀ ò tu bɛ kóo kpɑ̀ɑ̀tì. Weè nɑ̀kɛ́nɛ̀ Kuyie ncĩ́ɛ̃̀tɛ̀ yóó wɛ̃tɛ kɛ́mɑɑ́mɛ̀ Sedisɑdɛmmu, kɛ̀ diwɛ̀ìi kɔtɛní. Ò múnkɛ nɑ̀kɛ́mu yɛmɔ̀rɛ̀ sɔnyɛ kpɛ́í.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie mpɑ̃ɑ̃nɑ́ɑǹtì nɑ́ɑǹtò nɑ̀kɛ́mɛ̀ Isidɑyɛɛribɛ kɛ tú bɛ̀ɛ ceetɛ 1:1-6
\io1 2. Mɛbɛnkùmɛ̀ Kuyie mbɛ̀ bɛnkɛmɛ̀ kɛ bo bɑ́ntɛ̀ Sedisɑdɛmmu ɛì kɔbɛ 1:7-6:15
\io1 3. Bɛ̀ tɛ̃̀ńnɛ́ tì Bɑbidɔnni ɛì kɔbɛ tɔ̃nní bɛ̀ kɛ̀ dɛ̀ ntukúnɛ̀ mɛnùboúmmɛ̀ kó tinɑ́ɑǹtì 7-8
\io1 4. Kuyie mpɑ̃ɑ̃nɑ́ɑǹtì nɑ́ɑǹtò nɑ̀kɛ́ tì kɛ̀ dɛ̀ ntukúnɛ̀ tìì yóó dɔ̀ɔ̀ Isidɑyɛɛribɛ mɔ̀nnì kɛ́ntɔ kɛ́tuɔkɛnɛ̀ Kirisi, okpɑ̀ɑ̀tì Kuyie ntɑ̃ɑ̃tɛ́ wè bo wɛ̃tɛnímɛ̀ kɛ́di tikpɑ̀tì 9-14
\c 1
\ms1 SAKARII YÀ MƐ̀Ɛ̀ BƐNKÙMƐ̀
\s1 Kuyie ntumɛ̀ ku kɔbɛɛ wɛ̃tɛní ku borɛ̀
\p
\v 1 Okpɑ̀ɑ̀tì Dɑriyuusi kpɑ̀tì benni didɛ́rì otɑ̃̀nkù niínwè miɛkɛ nkɛ Kuyie mbɛ́innɛ̀mɛ̀ ku pɑ̃ɑ̃nɑ́ɑǹtì nɑ́ɑǹtò Sɑkɑrii Ido birɛ Bedekiɑ kó dɛbirɛ kɛ dɔ̀: 
\v 2 Mí ndi Yiɛ̀ nKuyie n tú, m miɛkɛ do pɛikɛmu di yɛmbɛ̀ mɛdiɛ̀. 
\v 3 A bɛ̀ nɑ̀kɛ́ kɛ dɔ̀: Mí ndi Yiɛ̀ nKuyie Mpɑkɛdɑɑ, míì tu bɛ̀ɛ wɛ̃tɛní m borɛ̀, kɛ̀ n wɛ̃too bɛ borɛ̀, míì mɛ nyɛ̃. 
\v 4 Di bɑ́ɑ́ teetɛ́ di yɛmbɛ̀, n do duɔ́ nkɛ̀ m pɑ̃ɑ̃nɑ́ɑǹtì nɑ́ɑm̀bɛ̀ n yu bɛ̀ kɛ tú bɛ̀ɛ wɛ̃tɛní m borɛ̀, kɛ́yóu kucɛ kuyɛiku bɛ̀ tũ nkù nɛ̀ bɛ dɔɔ̀rìmɛ̀ yɛimɛ, bɛ̀ mɛ nyí nkèńtɛ́ bɛ̀ bɛ̀ nɑ̀ɑ́ ntì, bɛ̀ í ndɑkɛ dɛ kpɛti. Mí ndi Yiɛ̀ nKuyie mmíì tì ndi denni. 
\v 5 Yé di yɛmbɛ̀ kɔ̀tɛ kɛ̀? M pɑ̃ɑ̃nɑ́ɑǹtì nɑ́ɑm̀bɛ̀ tɑ́? Bɛ̀ í kuɑ̀? 
\v 6 Bɑ́ nɛ̀ n duɔ́ nyɛ̀ɛ̀ tɑnnɔ̀ m pɑ̃ɑ̃nɑ́ɑǹtì nɑ́ɑm̀bɛ̀ nɛ̀ n do bɛ̀ nɑ̀kɛ́ tìì nɑ́ɑǹtì, dɛɛ̀ do tùɔ̀kɛní di yɛmbɛ̀ kɛ̀ bɛ̀ɛ wɛ̃tɛní kɛ́bɛ́i nkɛ dɔ̀, Kuyie Mpɑkɛdɑɑ do bɛ́i nkɛ dɔ̀ ò yóó ti dɔɔ̀mɛ̀ icɛ iyɛiyi ti tũ̀ nyì nɛ̀ ti dɔɔ̀rìmɛ̀ yɛimɛ kpɛ́í ò mɛ nti dɔ̀ɔ̀.
\s1 Kuyie ndo bɛnkɛmɛ̀ Sɑkɑrii kòo yɑ̀ bɛsɑ̃ndèèbɛ̀
\p
\v 7 Okpɑ̀ɑ̀tì Dɑriyuusi kpɑ̀tì benni didɛ́rì otɑ̃̀nkù tɛpíítɛ̀ nɛ̀ òmɑ́ɑ̀, bɛ̀ tu wèè tɑ̃̀nkù Sebɑti \f + \fr 1:7 \fr*\fk Sebɑti: \fk*\ft Bɛ̀ do kɑɑmmɛ̀ bɛtɑ̃̀ɑ̃̀bɛ̀ nɛ̀ ti bɛ̀ kɑ̀ɑmmɛ̀ dɛ̀ í wɛ̃. Bɛ kóo tɑ̃̀nkù Sebɑti berínɛ̀ ti kó bɛtɑ̃̀ɑ̃̀bɛ̀ oketiwè nɛ̀ odɛ́rì dɛ cuokɛ̀ nkɛ (tɑ̃ɑ̃̀pò nɛ̀ dɛwɑnnɛ̀ dɛ cuokɛ̀).\ft*\f*, diyiè sipísìdɛ́ nɛ̀ dinɑɑnnì yiè, kɛ̀ Kuyie mbɛ́innɛ̀ Sɑkɑrii ku pɑ̃ɑ̃nɑ́ɑǹtì nɑ́ɑǹtò. Sɑkɑrii do tú Ido birɛ Bedekiɑ kó dɛbirɛ ndɛ. 
\v 8 Kòo bɛ́i nkɛ dɔ̀: N duɔ́ kɛyènkɛ̀ nkɛ kɛ̀ Kuyie nni mbɛnkɛ, kɛ̀ n yɑ̀ onìtì mɔù kòò dèkɛ tɛsɑ̃nwũɔ̃tɛ̀ kɛ cómmú tifɑ̃pèùtì cuokɛ̀ bɛ̀ tu tì míìrìtì tìì cĩɛ̃ nfííkú kɛ cùtɛ́, kɛ̀ sitɛsì ò tũ̀nní siwũɔ̃sì nɛ̀ sìì dò mmɛtĩ̀ɛ̃̀ nnɛ̀ sìì pɛ́ì. 
\v 9 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: N Yiɛ̀ nhɔ̃̀mbɛ mbɛ? Kɛ̀ dì dɔ̀: N yóó dɑ nɑ́kɛ́mu bɛ̀ mbɛ.
\p
\v 10 Dì kpɑɑ́ mɛ nnɑ́ɑ́ nkòo nìtì wèè do cómmú titieti bɛ̀ tu tí míìrìtì ti cuokɛ̀ kɛ dekɛ tɛsɑ̃ntɛ̀ kòò dɔ̀: Kuyie nkuù bɛ̀ tɔ̃nní kɛ̀ bɛ̀ bo ce nkutenkù.
\p
\v 11 Mɛm̀mɛ kɛ̀ bɛ̀ɛ nɑ́kɛ́ Kuyie ntɔ̃nnì dìì còḿmú titieti bɛ̀ tu ti míìrìtì ti cuokɛ̀ kɛ dɔ̀: Ti cèmmu kutenkù bɑ́ kunɑmpoo í bo, bɛ̀ kɑ̀ri bɛ́u nwe.
\p
\v 12 Dɛ mɔ̀nnì ndi Kuyie ntɔ̃nnì bɛ́immɛ̀ kɛ dɔ̀: Ti Yiɛ̀ Kuyie Mpɑkɛdɑɑ! Dɛ̀ yó nkɑ̃́ɑ̃́kɛ́ dɛ kɛ̀ mɛsémmɛ̀ dɑ pĩ́nnɛ̀ Sedisɑdɛmmu nɛ̀ Sudɑɑ ɛkɛ̀ sɔnyɛ, ɑ miɛkɛ pɛ́ì yɛ̀ kɛ̀ dɛ̀ mɔ̀kɛ yíe nyɛbie nsipísìyiekɛ̀?
\p
\v 13 Kɛ̀ ti Yiɛ̀ nKuyie mbɛ́innɛ̀ tinɑ́ɑǹsɑ̀ɑ̀tì ibɑ́ɑmmìi kpɛti ku tɔ̃nnì dìì do n nɑ́ɑ́nnɛ̀, kɛ̀ dì dɔ̀:
\s1 Kuyie nyóó wɛ̃tɛ kɛ́tiekɛmɛ̀ Sedisɑdɛmmu
\p
\v 14 Nɑ́kɛ́ Sedisɑdɛmmu kɔbɛ nɛ̀ Siyɔ̃ɔ̃ kɔbɛ kɛ dɔ̀: Ti Yiɛ̀ nKuyie Mpɑkɛdɑɑ tu:
\q1 Kù bɛ̀ dɔ́mu kɛ̀ dɛ̀ kù tùɔ̀ mmuhɑ̃ɑ̃́ nkɔ̃mɛ.
\q1
\v 15 Kɛ̀ ku miɛkɛ nɛ́ cɔ́ú mmɛdiɛ̀ nyibotí tɛì,
\q1 ìì kɑ̀ri bɑ̀mmùù, kɛ yɛ̃́ ku miɛkɛ do pɛikɛmɛ̀
\q1 Isidɑyɛɛribɛ sɑ́m̀pɔ́ nwe,
\q1 kɛ̀ kù ndɔ́ ìi yṹɔ̃́ mbɛ to,
\q1 kɛ̀ ì nɛ́ tontɛ́ kɛ bɛ̀ tɑnnɛ́ mɛsémmɛ̀ miɛkɛ.
\q1
\v 16 Dɛɛ̀ kpɛ́í nte, kɛ̀ ti Yiɛ̀ nKuyie Mpɑkɛdɑɑ tu,
\q1 kù wɛ̃ti kɛ bo dɔ̀ɔ̀ Sedisɑdɛmmu ɛì mɛsɑ̀ɑ̀,
\q1 kɛ̀ ku cĩ́ɛ̃̀tɛ̀ɛ wɛ̃tɛ kɛ́mɑɑ́ di miɛkɛ,
\q1 kɛ̀ bɛ̀ɛ wɛ̃tɛ kɛ́mɑɑ́ sicɛ̃́ĩ di miɛkɛ.
\p
\v 17 Kɛ̀ Kuyie ntɔ̃nnìi yíɛ́ kɛ́ n nɑ́kɛ́ kɛ dɔ̀:
\q1 Nɑ́kɛ́ bɛ kɛ tú:
\q1 Mí ndi Yiɛ̀ nKuyie Mpɑkɛdɑɑ míì tu:
\q1 nh ɛkɛ̀ yóó wɛ̃tɛ kɛ́píɛmmu mɛsɑ̀ɑ̀,
\q1 kɛ̀ n wɛ̃tɛ kɛ́tiekɛ Sedisɑdɛmmu kɛ́bɑ́ntɛ̀ Siyɔ̃ɔ̃.
\s1 Kuyie nyìɛ́ kɛ bɛnkɛmɛ̀ Sɑkɑrii yɛyìè nnɛ̀ bɛmɑ́ɑ́bɛ̀
\p
\v 18 Kɛ̀ nní nwúó nkɛ̀ Kuyie nni mbɛnkɛ kɛ̀ n yɑ̀ yɛyìè nyɛ̀nɑ̀ɑ̀. 
\v 19 Kɛ̀ m bekɛ Kuyie ntɔ̃nnì dìì do n nɑ́ɑ́nnɛ̀ kɛ dɔ̀: Yɛ nyìè mbɛnkú bɑ? Kɛ̀ dì n tɛ̃́nnɛ́ kɛ dɔ̀: Yɛ̀ bɛnkú ibotí kperíyì nyi ìì do cíɛ nyIsidɑyɛɛribɛ Sudɑɑ kɔbɛ nɛ̀ Sedisɑdɛmmu kɔbɛ.
\p
\v 20 Kɛ̀ dɛndɛɛ pɛ̃ɛ̃tóo kɛ̀ ti Yiɛ̀ nKuyie nní mbɛnkɛ bɛmɑ́ɑ́bɛ̀ bɛ̀nɑ̀ɑ̀. 
\v 21 Kɛ̀ n kù bekɛ kɛ dɔ̀: Bɛ̀ kɔ̀tɛní kɛ bo dɔɔ̀ bɑ? Kɛ̀ kù dɔ̀: Bɛ̀ kɔ̀tɛní kɛ bo donnɛ́ yɛbotɛ̀ kɔ̃m̀bùɔ̀tì nti kɛ bɔ́kɛ́ yɛyìè nyɛ̀ do kũmmù nɛ̀ yɛ̀ Sudɑɑ kɔbɛ kɛ bɛ̀ ɑutɛ́ kɛ bɛ̀ cíɛ.
\c 2
\s1 Kuyie mbɛnkɛmɛ̀ Sɑkɑrii wèè tɔ kuhɔ̃ũ kɛ bo bennɛ́ dihɛì
\p
\v 1 Kɛ̀ Kuyie nní mbɛnkɛ kɛ̀ n yɑ̀ onìtì kòò pikú o nɔ̀ùtɛ̀ kuhɔ̃ũ kùù beúnɛ̀. 
\v 2 Kɛ̀ nh ò bekɛ kɛ dɔ̀: A kɔri kɛ? Kòò dɔ̀: N kɔri kɛ bo bennɛ́ Sedisɑdɛmmu nwe kɛ́yɑ̀ o okùmɛ̀ mɑ̀mɛ̀ nɛ̀ o pɛ̃kùmɛ̀.
\p
\v 3 Kuyie ntɔ̃nnì dìì do n nɑ́ɑ́nnɛ̀ kɛ̀ dì nkpɑɑ́ cómmú, kɛ̀ ditɛrì mɑrìi kétɛ́ní kɛ́ dì co. 
\v 4 Kɛ̀ dìi dì nɑ̀kɛ́ kɛ dɔ̀: Cokɛ́ kɛ́nɑ́kɛ́ odɑpɑ̀ɑ̀ nwèè mɛ ntɔ kuhɔ̃ũ kùù beúnɛ̀ kɛ dɔ̀: Sedisɑdɛmmu ɛì yó nfeíomu, iduotí bɑ́ɑ́ dì fitɛ́ bɛnìtìbɛ̀ bɛ̀ɛ̀ yó mbo di miɛkɛ nɛ̀ iwũɔ̃ dɛ̀ í sénní. 
\v 5 Mí ndi Yiɛ̀ nKuyie mmíì mɔ́mmuɔ n yó ndo mmuhɑ̃ɑ̃́ nkó kuduotí kɛ́ dì fitɛ́, kɛ̀ n kpetì mbo di miɛkɛ.
\s1 Kuyie nyumɛ̀ bɛ̀ɛ̀ do cìɛ́tɛ́
\p
\v 6 Kɛ̀ ti Yiɛ̀ nKuyie mpɛ́i nkɛ dɔ̀:
\q1 Eì! Mí ndi Yiɛ̀ nKuyie mmíì tu:
\q1 Ítɛ́nɛ̀ díndi n do cíɛ mbɛ̀
\q1 kɛ̀ di tɑɑ́ ibotí tɛì miɛkɛ
\q1 cokɛ́nɛ̀ kɛ́yɛ̀ kubɑkù cɑ̃̀nku kó dihɛì miɛkɛ.
\q1 Mí ndi Yiɛ̀ nKuyie mmíì bɛ́i.
\q1
\v 7 Eì! Díndi Sedisɑdɛmmu kɔbɛ
\q1 bɛ̀ɛ̀ do bo Bɑbidɔnni cokɛ́nɛ̀ kɛ́yentɛ́.
\p
\v 8 Di Yiɛ̀ nKuyie Mpɑkɛdɑɑ weè n tɔ̃nní kɛ n duɔ́ mmuwɛ̃rímú kɛ tú n nɑ́kɛ́ ibotí tɛì ìì di fɛ̃́ũnko kɛ dɔ̀:
\q1 Kɛ̀ wèè di kɑ̀ɑ́kɛ́ ò kɑ̀ɑ́ nku nɔnnìtɛ̀ ntɛ.
\q1
\v 9 Kuyie ntu kù yòutɛ ku nɔ̀ùtɛ̀ ntɛ
\q1 ibotí ìì do di dɔ̀ɔ̀tidɑɑtì i ĩ́nkɛ̀,
\q1 kɛ̀ ì bo nɑɑ́ ndi kó tidɑɑtì.
\m Dɛ̀ bo dɔɔ̀ dìì mɔ̀nnì di bo bɑntɛ́ kɛ dò nKuyie Mpɑkɛdɑɑ weè n tɔ̃nní.
\q1
\v 10 Kù tu: Nyíúnɛ̀,
\q1 kɛ́nyɑ̃nku díndi Sedisɑdɛmmu kɔbɛ,
\q1 kù kèróomu kɛ bo mbo di cuokɛ̀.
\q1 Kunku Kuyie nkuù bɛ́i.
\q1
\v 11 Yɛbotɛ̀ pɛ́u bo kù tɑunnɛ̀ dɛ yiè,
\q1 kɛ́ntú ku kɔbɛ kɛ̀ kù mbo bɛ cuokɛ̀.
\m Dɛ yiè bɛ̀ bo bɑntɛ́ kɛ dò nKuyie Mpɑkɛdɑɑ weè n tɔ̃nní.
\q1
\v 12 Kuyie nwɛ̃ti kɛ bo tiekɛmu Sudɑɑ kɔbɛ
\q1 kɛ̀ bɛ̀ mbo ku ɛì
\q1 kù wɛ̃ti kɛ bo tɑ̃ɑ̃tɛ́mu Sedisɑdɛmmu.
\q1
\v 13 Yɛbotɛ̀ ĩ́nɛ̀ yúóó Kuyie nyììkɛ̀,
\q1 kù ìtɛ́mu kɛ yɛtìní ku cɛ̃sɑ̀ɑ̀tɛ̀ miɛkɛ.
\c 3
\s1 Kuyie mbɛnkɛmɛ̀ ku pɑ̃ɑ̃nɑ́ɑǹtì nɑ́ɑǹtò ikuɔ́ nìùtì diɛwè Sosuwee
\p
\v 1 Kɛ̀ ti Yiɛ̀ nKuyie nni mbɛnkɛ ikuɔ́ nìùtì diɛwè kòò còḿmú Kuyie ntɔ̃nnì ììkɛ̀, kɛ̀ dibɔɔ̀ còḿmú o bɑkù yoú kɛ bo ò wɑ̀tí. 
\v 2 Kɛ̀ Kuyie ntɔ̃nnìi nɑ́kɛ́ dibɔɔ̀ kɛ dɔ̀: Fɔ̃́ ndibɔɔ̀ ti Yiɛ̀ nKuyie ntu ɑ cĩ́ɛ̃́kɛ́! Fɔ̃́ ndibɔɔ̀ Kuyie ntu ɑ bɑ́ nwɑ́tìrì Sedisɑdɛmmu kù tɑ̃ɑ̃tɛ́ wè, onìtì yiè ndònnɛ̀ kudɔú kùù cɔ̀ú nkù nku kɛ̀ bɛ̀ kù pùtɛ.
\p
\v 3 Kɛ sɔ̃́ nSosuwee còḿmú Kuyie ntɔ̃nnì ììkɛ̀ kɛ dɑ́ɑ́tí tiyɑ̀ɑ̀tì kɛ̀ tì ɑ̃ mɛyɔ̃́ɔ̃̀. 
\v 4 Kɛ̀ Kuyie ntɔ̃nnìi nɑ́kɛ́ bɛ̀ɛ̀ bo dɛ borɛ̀ kɛ dɔ̀: Dɑ́tɛ́nɛ̀ we tiyɑ̀ɑ̀tì mɛyɔ̃́ɔ̃̀ nkpɛti, kóò dɑ̀tínnɛ̀ tiyɑɑ̀sɑ̀ɑ̀tì. Di dèè mɛm̀mɛ kɛ́nɑ́kɛ́ Sosuwee kɛ dɔ̀: N dɑ wèńkùnnɛmu kɛ̀ bɛ̀ bo dɑ dɑ́tínnɛ́ tiyɑɑ̀sɑ̀ɑ̀tì.
\p
\v 5 Kɛ̀ Kuyie ntɔ̃nnìi sɔɔtɛ́ di nɑ́ɑǹtì kɛ dɔ̀: Ínnɛ́nɛ̀ we kuyɑɑ̀bomboúnkù sɑ̀ɑ̀kù, kɛ̀ bɛ̀ɛ ò ìńnɛ́ kuyɑɑ̀bomboúnkù sɑ̀ɑ̀kù, kóò dɑ̀tínnɛ́ tiyɑɑ̀sɑ̀ɑ̀tì, kɛ̀ Kuyie ntɔ̃nnì còḿmú dɛ borɛ̀. 
\v 6 Dɛ kó difɔ̃nkúò kɛ̀ Kuyie ntɔ̃nnìi nɑ́kɛ́ Sosuwee kɛ dɔ̀: 
\v 7 Ntɛ Kuyie Mpɑkɛdɑɑ nɑ̀ɑ́ ntì. Kù tu:
\q1 Kɑ̀ɑ tũ̀ nku kó kucɛ,
\q1 kɛ tũ̀ nku kuɔ́,
\q1 fɔ̃́ɔ̃̀ yó mbɑkɛ́ ku cĩ́ɛ̃̀tɛ̀,
\q1 kɛ̀ fɔ̃́ɔ̃̀ nwéí tɛ dɑ̀nkù,
\q1 kɛ̀ n dɑ tɑnnɛ̀ bɛ̀ɛ̀ mɛ ncómmú diɛ m̀bɛ kó fɛnɑfɛ miɛkɛ.
\s1 Kuyie nnɑ̀kɛ́mɛ̀ kù yóó duɔ́nnímɛ̀ odɛɛtíwè
\q1
\v 8 Kɛ̀ ti Yiɛ̀ nKuyie mbɛ́innɛ̀ Sosuwee kɛ dɔ̀:
\q1 Fɔ̃́ nSosuwee ikuɔ́ nìùtì diɛwè nɛ̀ ɑ kɔbɛ
\q1 kéntɛ́nɛ̀ kɛ́keè,
\q1 díndi bɛ̀ɛ̀ pĩ nyikuɔ́ tɔ̃mmú
\q1 kɛ dò mmɛbɛnkùmɛ̀ mɛ̀ɛ̀ bɛnkú n yóó duɔ́nkomu odɛɛtíwè,
\q1 wèè yètìrì tu kuye \f + \fr 3:8 \fr*\fk kuye: \fk*\ft Wèè yètìrì tu Kuye bɛ̀ yɛ̃ nYesu nwe o yètìrì\ft*\f* tɛrì ndi dɛ̀ɛ bɛnkú kɛ dò nnɛ̀ Yesu borɛ̀ mɛborimɛ pɑ̀mmɛ̀ mɛɛ̀ ketírí.
\q1
\v 9 N dɔú nditɑ̃́rì ndi Sosuwee ììkɛ̀
\q1 kɛ̀ dì mɔ̀kɛ inuɔ nyìyiekɛ̀.
\q1 Míì mɔ́mmuɔ n yóó kerí di ĩ́nkɛ̀ iwɑ̃rii.
\q1 M bo fũũ ndihɛì diì nkó mɛyɛi ndiyiè dìmɑ́ɑ̀ miɛkɛ.
\q1
\v 10 Dɛ yiè diwɛ̀ì bo di pĩ́
\q1 kɛ̀ di nyu ditɔbɛ̀ yɛbɑɑ
\q1 kɛ wɛ̃ nkɛ yo nfínyĩ̀ nɛ̀ fìkíè dɛ kó yɛbɛ.
\q1 Mí ndi Yiɛ̀ nKuyie Mpɑkɛdɑɑ míì bɛ́i.
\c 4
\s1 Kuyie mbɛnkɛmɛ̀ Sɑkɑrii tɛfitíkɛ̀kɛ̀tɛ̀ nɛ̀ odìfíè kó dɛtie
\p
\v 1 Kɛ̀ Kuyie ntɔ̃nnì dìì n nɑ̀ɑ́nnɛ̀, kɛ̀ dìi wɛ̃tɛní kɛ́ nh entɛ bɛ̀ ɔ̃ɔ̃ entɛ mɛ̀ɛ̀ botí onìtì wèè yɛ̃̀ nkɛ duɔ́. 
\v 2 Kɛ̀ dì m bekɛ n yɑ̀ mù, kɛ̀ n dɔ̀: N yɑ̀ tɛsɔɔfitíkɛ̀kɛ̀tɛ̀ ntɛ, kɛ̀ mɛkùɔ̀ ncũɔ̃́ tɛ cuokɛ̀ tɛ yómmɛ̀ kɛ̀ sifitibúkúsí bo sìyiekɛ̀ nɛ̀ dɛ kó iwɛ̃ĩ. 
\v 3 Kɛ̀ odìfíè kó dɛtie ncómmú tɛ tɑkɛ́, muù ntɛ bɑkù yoú, mutɛ̃mù ku cɑ̃̀nku.
\p
\v 4 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: N Yiɛ̀ diɛ m̀bɛnkú bɑ? 
\v 5 Kɛ̀ dì dɔ̀: A í bɑntɛ́ dɛ̀ bɛnkúmɑ̀ɑ̀? Kɛ̀ n dɔ̀: N yí bɑntɛ́.
\s1 Kuyie ndɔúnnɛ̀ dìì nùù Sodobɑbɛɛdi
\p
\v 6 Kɛ̀ Kuyie ntɔ̃nnì n nɑ́kɛ́ kɛ dɔ̀: Nɑ́kɛ́ ti nnɑ́ɑǹtì Sodobɑbɛɛdi kɛ tú:
\b
\q1 Dɛ̀ í tú nɛ̀ o wɛ̃rímú mmu yoo nɛ̀ o kpetì,
\q1 dɛ̀ tu nɛ̀ n kó Muyɑɑ́ mmu.
\q1 Mí ndi Yiɛ̀ nKuyie Mpɑkɛdɑɑ míì bɛ́i.
\q1
\v 7 Ditɑ̃rì diɛrì fɔ̃́ nhɑ í tùɔ̀kɛ dɛ̀mɑrɛ̀ Sodobɑbɛɛdi ììkɛ̀,
\q1 ò bo dɑ pɔntɛ kɛ́dɛ́ítɛ́ kɛ́dɛitɛ ditɑ̃́rì
\q1 ò yóó cɔ́ɔ́ ndì n cĩ́ɛ̃̀tɛ̀ yómmɛ̀,
\q1 kɛ̀ bɛnìtìbɛ̀ ndi sɑ̃ntí kɛ tú:
\q1 Dì wenni! Dì wenni!
\p
\v 8 Kɛ̀ Kuyie nyíɛ́ kɛ́ n nɑ́kɛ́ kɛ dɔ̀:
\q1
\v 9 Sodobɑbɛɛdi weè pũ̀ṹtɛ́ n cĩ́ɛ̃̀tɛ̀
\q1 kɛ̀ weè yóó tɛ̀ dèè.
\p Kɛ̀ dɛ̀ɛ yié nkɑ̀ɑ bɑntɛ́ kɛ dò mmí nKuyie mmíì ò tɔ̃nko.
\q1
\v 10 Wèè do senku Sodobɑbɛɛdi tɔ̃mmú
\q1 ò mù ketírí dìì mɔ̀nnì kɛ̀ mù yí dɛu,
\q1 dɛ̀ bo ò nɑrikɛ ò bo yɑ̀ dìì mɔ̀nnì ò mɑɑ́mɛ̀ n cĩ́ɛ̃̀tɛ̀.
\p
\v 11 Kɛ̀ n wɛ̃tɛ kɛ́bɛ́innɛ̀ Kuyie ntɔ̃nnì kɛ dɔ̀: Odìfíè kó dɛtie ndɛndɛ dɛ̀ɛ̀ còḿmú tɛfitíkɛ̀kɛ̀tɛ̀ tɑkɛ́, muù ntɛ bɑkù yoú, mutɛ̃mù kucɑ̃̀nku, dɛ̀ bɛnkú bɑ?
\p
\v 12 Kɛ̀ n yíɛ́ kɛ́bekɛ́ kɛ dɔ̀: Kɛ̀ odìfíè kó ibɑkɛ ìdɛ́ì ìì mɛ mmɔkɛ isɔɔkũɔ̃ti, kɛ̀ odìfíè kó mɛkùɔ̀ nyì tũ̀ nkɛ do mmɛsɔɔ, ndɛ̀ bɛnkú bɑ? 
\v 13 Kɛ̀ dì dɔ̀: A í yɛ̃́ dɛ̀ bɛnkúmɑ̀ɑ̀? Kɛ̀ n dɔ̀: Áɑ̀, n yiɛ̀, n yí yɛ̃́. 
\v 14 Kɛ̀ dì dɔ̀: Bɛnìtìbɛ̀ bɛ̀dɛ́bɛ̀ mbɛ n tɑ̃ɑ̃tɛ́ bɛ̀ kɛ̀ bɛ̀ cóu mmɛkùɔ̀ nkɛ̀ bɛ̀ còḿmú Kuyie Mpɑkɛdɑɑ ììkɛ̀.
\c 5
\s1 Kuyie mbɛnkɛmɛ̀ Sɑkɑrii dipɑ́tíri kɛ̀ dì pùtì
\p
\v 1 Kɛ̀ Kuyie nyíɛ́ kɛ́ m bɛnkɛ, kɛ̀ n yɑ̀ dipɑ́tíri kɛ̀ dì pùtì. 
\v 2 Kuyie ntɔ̃nnì dìì n nɑ̀ɑ́nnɛ̀ kɛ̀ di m bekɛ n yɑ̀ mù, kɛ̀ n dɔ̀: n yɑ̀ dipɑ́tíri mɑrì ndi kɛ̀ di okùmɛ̀ bo mɛ́tìrìbɛ̀ tɛpíítɛ̀, kɛ̀ di pɛ̃kùmɛ̀ bo mɛ́tìrìbɛ̀ bɛ̀nùmmù.
\p
\v 3 Dɛ mɔ̀nnì kɛ̀ Kuyie ntɔ̃nnì n nɑ́kɛ́ kɛ dɔ̀: Dɛ kó dipɑ́tíri tɔ mɛyɛi mmɛ̀ɛ̀ yóó tuɔkɛní dihɛì mɛ kó tinɑ́ɑǹtì nti. Kɛ̀ kupíkù mɑkù kpɛti tú bɛyóóbɛ̀ bɛmɔu, òmɔù í yó nkpɑɑ́ dihɛì, kɛ̀ kupíkù tɛkù kpɛti tú: Bɛ̀ɛ̀ ɔ̃ mpɑrìkunɛ̀ Kuyie nyètìrì kɛ nɛ́ soú mbɛ̀ kóò mɔù í yóó nkpɑɑ́ dihɛì. 
\v 4 Mí ndi Yiɛ̀ nKuyie Mpɑkɛdɑɑ n duɔ́nko dɛ kó mɛyɛi nkɛ̀ mɛ̀ bo do oyúókù cĩ́ɛ̃̀tɛ̀ ntɛ nɛ̀ bɛ̀ɛ̀ ɔ̃ mpɑrìkunɛ̀ n yètìrì kɛ nɛ́ soú. Mɛ̀ tɑti bɛɛ̀ cɛ̃́ĩ miɛkɛ kɛ bo cɔ́útɛ́ yɛsɑ̃ǹkɛ̀ kɛ́wɛ̃nnɛ́nɛ̀ imɑrí.
\s1 Kuyie mbɛnkɛmɛ̀ Sɑkɑrii onitipòkù mɔù kòò kɑ̀ri tɛnɑɑtɛ miɛkɛ
\p
\v 5 Dɛ mɔ̀nnì kɛ̀ Kuyie ntɔ̃nnì dìì n nɑ̀ɑ́nnɛ̀ kɛ̀ dìi tɔ́ɔ́nní m borɛ̀, kɛ́ m bɛ́innɛ̀ kɛ dɔ̀: Wéntɛ́ ɑ bo yɑ̀ dɛ̀ɛ̀ kèríní dɛ̀ dòmmɛ̀. 
\v 6 Kɛ̀ n dɔ̀: Bɑ nni ndɛ? Kɛ̀ dì dɔ̀: Tɛnɑɑtɛ ntɛ ɑ yɑ̀ mɛ̀ kɛ̀ tɛ̀ kèríní, kɛ n nɑ́kɛ́ kɛ dɔ̀: Dihɛì dimɔu kó mɛyɛi mmɛ.
\p
\v 7 Dɛ mɔ̀nnì kɛ̀ n yɑ̀ dibiɛrìmínnì kó kupòkù pòòtɛmɛ̀ kɛ ɑ̃̀ɑ̃̀tɛnní dɛ kó tɛnɑɑtɛ, kòo nitipòkù mɔù kɑ̀ri tɛ miɛkɛ. 
\v 8 Kɛ̀ Kuyie ntɔ̃nnì dɔ̀: Bɛ̀ we ntú kuyonku kɛ́ndɔ́ kóò tèntoo tɛ miɛkɛ, kɛ́poonko dibiɛrìmínnì kó kupòkù.
\p
\v 9 Dɛ kó difɔ̃nkúò kɛ̀ Kuyie nni mbɛnkɛ kɛ̀ n wéntɛ́ kɛ́yɑ̀ bɛnitipòbɛ̀ bɛ̀dɛ́bɛ̀ kɛ̀ bɛ̀ pùtì kɛ ɑ̃ ifìɛ̀ti kɛ̀ ì dònnɛ̀ fɛcònfɛ̀ kpɛyi. Kɛ̀ bɛ̀ɛ túótɛ́ tɛnɑɑtɛ kɛ́youtɛnɛ̀ kɛtenkɛ̀. 
\v 10 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: Bɛ̀ kɔ̀rinɛ̀ kɛ tɛnɑɑtɛ? 
\v 11 Kɛ̀ dì n tɛ̃́nnɛ́ kɛ dɔ̀: Bɛ̀ tɛ̀ kũntinɛ̀ Bɑbidɔnni nwe kɛ bo tɛ̀ mɑɑ́ tɛcĩ́ɛ̃̀tɛ̀, kɛ̀ bɛ̀ mɑɑ́ kɛ dèè, bɛ̀ɛ tɛ̀ cɔ̃nnɛ́ disɑ̃ɑ̃̀ kó ditɛitirì ĩ́nkɛ̀.
\c 6
\s1 Kuyie mbɛnkɛmɛ̀ Sɑkɑrii sinɑɑsɛ̃ĩ́ sìnɑ̀ɑ̀
\p
\v 1 Kɛ̀ Kuyie nní mbɛnkɛ kɛ̀ n yɑ̀ sinɑɑsɛ̃ĩ́ sìnɑ̀ɑ̀ kɛ̀ sì yɛ̀tìní yɛtɑ̃rɛ̀ yɛ̀dɛ́ɛ̀ cuokɛ̀, kɛ̀ dɛ kó yɛtɑ̃rɛ̀ tu disɔɔwũɔ̃̀. 
\v 2 Kɛ̀ sisɛ̃ĩ́ siwũɔ̃sì dɛ̀ri tɛketitɛ̀ kɛ̀ sisɔ̀ùsì dɛ̀ri tɛdɛ́tɛ̀. 
\v 3 Kɛ̀ sipɛ́ísì dɛ̀ri tɛtɑ̃ɑ̃́ntɛ̀, kɛ̀ yɛyɔ̃̀rɛ̀ kpɛsi dɛri tɛdɛ́tɛ̀. 
\v 4 Kɛ̀ m bekɛ Kuyie ntɔ̃nnì dìì n nɑ̀ɑ́nnɛ̀ kɛ dɔ̀: N Yiɛ̀ diɛ mbɛnkú bɑ? 
\v 5 Kɛ̀ Kuyie ntɔ̃nnì n nɑ́kɛ́ kɛ dɔ̀: Bɛ̀ yɛ̀nní itemmɑ̀nkɛ ìnɑ̀ɑ̀ ndi, bɛ̀ bonní kɛtenkɛ̀ kɛmɔu yiɛ̀ mborɛ̀ ndɛ, kɛ bo kɛ itiní bɑ̀mbɑ̀.
\p
\v 6 Tɛnɑɑsɑ̃ntɛ̀ sisɛ̃ĩ́ sɔ̀ùsì dɛ̀ri tɛ̀ kɔ̀ri kubɑkù yoú bíɛ́kɛ̀ nkɛ, kɛ̀ sipíɛ́ tɛ̀ tũ̀ nkɛ̀ yɛyɔ̃̀rɛ̀ kpɛsii kétɛ́ kubɑkù cɑ̃̀nku bíɛ́kɛ̀. 
\v 7 Kɛ̀ siwũɔ̃sìi kétɛ́ kɛ́ncɑtiri kɛ dɔ́ mɛcɑ̃ɑ̃, nkɛ bo ce nkutenkù, kɛ̀ Kuyie ndɔ̀: Kɔtɛnɛ̀ kɛ́ce nkutenkù.
\p Kɛ̀ sìi cokɛ́ kɛ́kɔtɛ kɛ́ kù ce. 
\v 8 Kɛ̀ kù m bekɛ kɛ dɔ̀: A wúó nsìì mɛ nkérí kubɑkù yoú bíɛ́kɑ̀ɑ̀? Sì yóó cṹũnko n Yɑɑ́ mmu dɛ kó kutempɛ̃ mmiɛkɛ.
\s1 Kuyie nnɑ̀kɛ́mɛ̀ kù yóó dɛ́úkùnnɛmɛ̀ ikuɔ́ nìùtì Sosuwee
\p
\v 9 Kɛ̀ Kuyie nní mbɛ́innɛ̀ kɛ dɔ̀: 
\v 10 Yíe nhɑ́ kɔtɛ Sefɑnniyɑ birɛ Sosiɑsi cĩ́ɛ̃̀tɛ̀ bɛ̀ɛ̀ ìtɛ́ Bɑbidɔnni kɛ konní bɛ̀ dɛ mbo, kɑ̀ɑ cɔutɛ́ Edidɑii nɛ̀ Tobiyɑ nɛ̀ Yedɑyɑ bɛ borɛ̀, bɛ̀ m pɑ̃ní yɛ̀ɛ̀ pɑ̃rɛ̀. 
\v 11 Kɑ̀ɑ yɛ̀ cɔutɛ́ ɑ túótɛ́ timɑ́tì pɛ́ítì nɛ̀ mɛsɔɔ nkɛ́dɔɔ̀ dikpɑ̀ɑ̀tìpìì, kɛ́ dì òó nYotisɑdɑki birɛ Sosuwee ikuɔ́ nìùtì diɛwè. 
\v 12 Kɑ̀ɑ dèè ɑ ò nɑ̀kɛ́ kɛ dɔ̀: Mí ndi Yiɛ̀ nKuyie Mpɑkɛdɑɑ míì tu:
\q1 Wèè yètìrì tu kuye \f + \fr 6:12 \fr*\fk kuye: \fk*\ft Kuye bɛ̀ nɑ̀ɑ́ nkùù kpɛ́í ndiɛ mbɛ̀ yɛ̃ nYesu nwe, odɛɛtíwè. Wéntɛ́ Esɑii 4:2.\ft*\f* weè yɛ̀tìní,
\q1 weè yóó mɑɑ́ mí ndi Yiɛ̀ nKuyie n cĩ́ɛ̃̀tɛ̀.
\q1
\v 13 Weè yóó tɛ̀ mɑɑ́ kɛ́ntú okpɑ̀ɑ̀tì diɛwè
\q1 kɛ́nkɑri okpɑ̀ɑ̀tìkɑ̀rì ĩ́nkɛ̀
\q1 kɛ bɑkɛ́ o nìtìbɛ̀ kɛ̀ ikuɔ́ nìùtì nkɑri o bɑkù yoú,
\q1 kɛ̀ kunɑɑtí diɛkù mbo bɛdɛ́ bɛ cuokɛ̀.
\p
\v 14 Kɛ̀ dikpɑ̀ɑ̀tìpìì dii, dì yó mbo n cĩ́ɛ̃̀tɛ̀ miɛkɛ nkɛ, kɛ̀ di denniní Edidɑii nɛ̀ Tobiyɑ nɛ̀ Yedɑyɑ nɛ̀ Sefɑnniyɑ birɛ bɛ̀ n dɔ̀ɔ̀ dìì wɛ̀ì.
\b
\p
\v 15 Dɛ mɔ̀nnì bɛ̀ɛ̀ bo mɛdɛ́timɛ̀ bɛ̀ bo kɔtɛní kɛ́mɑɑ́ Kuyie ncĩ́ɛ̃̀tɛ̀ kɛ̀ di bɑntɛ́ Kuyie Mpɑkɛdɑɑ weè n tɔ̃nnímɛ̀ di borɛ̀.
\p Kɛ̀ di yie ndi Yiɛ̀ nKuyie nkó mɛtɑmmɛ̀ dɛ̀ yóó dɔɔ̀mu nweti weti.
\c 7
\s1 Bɛ̀ nɑ̀kɛ́mɛ̀ mɛnùboúmmɛ̀ kó tinɑ́ɑǹtì
\p
\v 1 Okpɑ̀ɑ̀tì Dɑriyuusi kpɑ̀tì benni nɑɑnnì, otɑ̃̀nkù wɛínwè bɛ̀ tu wè Kisideu \f + \fr 7:1 \fr*\fk Kisideu: \fk*\ft Bɛ̀ do kɑɑmmɛ̀ bɛtɑ̃̀ɑ̃̀bɛ̀ nɛ̀ ti kɑɑmmɛ̀ dɛ̀ í wɛ̃. Bɛ kóo tɑ̃̀nkù Kisideu berínɛ̀ ti kó bɛtɑ̃̀ɑ̃̀bɛ̀ tɛpíítɛ̀ nɛ̀ oketiwè nɛ̀ tɛpíítɛ̀ nɛ̀ odɛ́rì dɛ cuokɛ̀ nkɛ (diyosɛ́ɛ̀ nɛ̀ mɛwɑɑnɑɑ̀ ndɛ cuokɛ̀).\ft*\f* o kó diyiè nɑɑnnì kɛ̀ Kuyie mbɛ́innɛ̀ mí nSɑkɑrii. 
\v 2 Kɛ sɔ̃́ mBetɛɛdi kɔbɛ tɔ̃nní Sɑdesɛɛ nɛ̀ o nìtìbɛ̀, Dekɛmmu-Mɛdɛki nɛ̀ o kɔbɛ Kuyie ncĩ́ɛ̃̀tɛ̀ kɛ̀ bɛ̀ bo kù bɑ́ntɛ̀, 
\v 3 kɛ́bekɛ́nɛ̀ Kuyie Mpɑkɛdɑɑ kuɔ́ nìùbɛ̀ nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kɛ tú, di dò nkɛ́nsɔkɛ́ kɛ kuɔ̀mmu kɛ bou dinùù otɑ̃ɑ̃̀nummuwè yiè mmiɛkɛ di do ɔ̃mmɛ̀ nɛ̀ dimɔ̀nnɑ̀ɑ̀?
\p
\v 4 Dɛ mɔ̀nnì kɛ̀ Kuyie Mpɑkɛdɑɑ m bɛ́innɛ̀ kɛ dɔ̀: 
\v 5 Nɑ́kɛ́ kubotí kumɔu nɛ̀ ikuɔ́ nìùbɛ̀ kɛ dɔ̀:
\q1 Di bou yɛ̀ɛ̀ nɔ̀ otɑ̃ɑ̃̀nummuwè nɛ̀ otɑ̃ɑ̃̀yiénwè
\q1 dɛ̀ tùɔ̀kɛ yíe nyɛbie nsipísìyiekɛ̀,
\q1 di bou dɛ kó yɛnɔ̀ di n dɔ́ mɛ̀ɛ̀ kpɛ́í nkɑɑ̀?
\q1
\v 6 Di ɔ̃ nyo ndìì mɔ̀nnì kɛ yɔ̃,
\q1 dɛ̀ ɔ̃ɔ̃ í ntú díì yo nkɛ̀ díì yɔ̃̀nɑ̀ɑ̀?
\p
\v 7 Di í yɛ̃́ Kuyie ndo nɑ̀kɛ́ tì nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ dimɔ̀nnì kɔbɛ nɔ̀ miɛkɛ, kɛ sɔ̃́ nSedisɑdɛmmu kɔbɛ nɛ̀ yɛhɛkɛ̀ yɛ̀ɛ̀ ò fitɛ́ bɛ̀ kpɑɑ́ kɑri bɑ́ dɛ̀mɑrɛ̀ í bɛ̀ kɔɔ́nnɛ̀. Kɛ̀ bɛnìtìbɛ̀ kpɑɑ́ píɛ́kɛ́ Nɛkɛfu nɛ̀ diyiè tɑɑ̀ kɛ̀ɛ̀ bíɛ́kɛ̀ kó yɛhɛkɑ̀ɑ̀?
\p
\v 8-9 Mɛm̀mɛ kɛ̀ Kuyie Mpɑkɛdɑɑ m bɛ́innɛ̀ kɛ dɔ̀ m bɛ̀ dèntɛ kù do bɛ̀ nɑ̀kɛ́ tì nɛ̀ dimɔ̀nnì kɛ dɔ̀:
\q1 Mbekùnɛ̀ timɔ́mmɔnti,
\q1 ndɔ́nɛ̀ ditɔbɛ̀ kɛ́mmɔkɛnɛ̀ ditɔbɛ̀ mɛsémmɛ̀.
\q1
\v 10 Di bɑ́ nfɛ̃́ũnko bɛkúpobɛ̀ nɛ̀ iciribí nɛ̀ bɛpɔ̀ɔ̀bɛ̀ nɛ̀
\q1 bɛsénnìbɛ̀ òmɔù bɑ́ nwɑntinɛ̀ otɔù mɛyɛi.
\p
\v 11 Bɛ̀ mɛ nyí nyie nkɛ bo kéntɛ́ kù tu mù, kɛ kù bùtínnɛ́ kɛ kpénkùnnɛ bɛ to. 
\v 12 Kɛ̀ bɛ yɛ̀mmɛ̀ɛ kpenkɛ kɛ nɑɑ́nnɛ̀ kupèrìkù, bɛ̀ í nyie nkɛ bo keè Kuyie Mpɑkɛdɑɑ bɛ̀ duɔ̀nní ìì tié nnɛ̀ tìì nɑ́ɑǹtì nɛ̀ ku Yɑɑ́ mmiɛkɛ, nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ dimɔ̀nnì kɔbɛ borɛ̀. Mɛm̀mɛ mí ndi Yiɛ̀ nKuyie Mpɑkɛdɑɑ kɛ̀ m miɛkɛɛ bɛ̀ pɛikɛ mɛdiɛ̀.
\q1
\v 13 Kɛ̀ bɛ̀ nni nyu kɛ̀ n cĩ̀ɛ̃́kɛ́
\q1 n do bɛ̀ yu kɛ̀ bɛ̀ cĩ̀ɛ̃́kɛ́ mɛ̀ɛ̀ botí.
\q1 Mí ndi Yiɛ̀ nKuyie Mpɑkɛdɑɑ míì mɛ nyɛ̃.
\q1
\v 14 Míì bɛ̀ cíɛ nkɛ̀ bɛ̀ tɑ ibotí tɛì bɛ̀ í yɛ̃́ ì miɛkɛ,
\q1 kɛ̀ bɛ ɛì dɔúnko,
\q1 òmɔù tɛ̃́nkɛ í yiɛ̀ní dɛ bíɛ́kɛ̀,
\q1 òmɔù mɛ ntɛ̃́nkɛ í kɛ̀ kɔ̀rì,
\q1 kɛtenkɛ̀ kɛ̀ɛ̀ kó mɛkɑ̀rìmɛ̀ do nɑɑti,
\q1 kɛ̀ kɛ̀ nɑɑ́nko tɛdɔntɛ̀.
\c 8
\s1 Kuyie nnɑ̀kɛ́mɛ̀ kù yóó dɔɔ̀ mɛ̀ɛ̀ sɑ̀ɑ̀ nkutenkù
\q1
\v 1 Kɛ̀ Kuyie Mpɑkɛdɑɑ m bɛ́innɛ̀ kɛ dɔ̀:
\q1
\v 2 Mí ndi Yiɛ̀ nKuyie Mpɑkɛdɑɑ míì tu
\q1 n dɔ́mu Sedisɑdɛmmu kɔbɛ kɛ̀ dɛ̀ n yóù mɛdiɛ̀,
\q1 nɛ̀ dɛ kpɛ́í, kɛ̀ m miɛkɛ cɔ́ú mbɛ dootitɔbɛ̀.
\q1
\v 3 Mí ndi Yiɛ̀ nKuyie mmíì tu n wɛ̃toomu Siyɔ̃ɔ̃,
\q1 kɛ bo mbo Sedisɑdɛmmu,
\q1 kɛ̀ bɛ̀ nhò yu kɛ tú:
\q1 Bɛ̀ɛ̀ dɔ̀ɔ̀ri Kuyie ndɔ́mɛ̀ bɛ ɛì,
\q1 kɛ́nyu Siyɔ̃ɔ̃ kɛ tú mí nKuyie Mpɑkɛdɑɑ n tɑ̃sɑ̀ɑ̀rì.
\q1
\v 4 Tidɑkótì nɛ̀ tipokótì bɛ̀ɛ̀ dúkutɛ ipɑ̀ɑ̀ti bɛ̀ kòtɛ́ mɛ̀ɛ̀ kpɛ́í,
\q1 kɛ̀ bɛ̀ɛ wɛ̃tɛ kɛ́buotɛ́ Sedisɑdɛmmu miɛkɛ.
\q1
\v 5 Idɑpùmbí nɛ̀ Isɑpùmbí kɛ̀ bɛ̀ nkpɛiti dihɛì miɛkɛ yɛcɛ̃kɑrɛ̀ yɛmɔu.
\q1
\v 6 Isidɑyɛɛribɛ bɛ̀ɛ̀ kpɑɑ́ di mmɔ̀nnì bɛ̀ í wúó nkɛ dò ndɛ̀ bo nɑ kɛ́dɔɔ̀,
\q1 di yɛ̀mmɛ̀ nɛ́ dò ndɛ̀ múnkɛ n yóùnɛ̀mu mí ndi Yiɛ̀ nKuyie Mpɑkɛdɑɑ?
\q1
\v 7 N yóó dɛɛtɛ́mu n nìtìbɛ̀ bɛ̀ɛ̀ cìɛ́tɛ́ kɛ bo diyiè yìɛ̀ní kɛ̀ɛ̀ bíɛ́kɛ̀ nɛ̀ dì tɑɑ̀ kɛ̀,
\q1 mí ndi Yiɛ̀ nKuyie Mpɑkɛdɑɑ míì bɛ́i.
\q1
\v 8 N yóó bɛ̀ tɛ̃̀ńnɛ́nímu kɛ̀ bɛ̀ mbo Sedisɑdɛmmu kɛ́ntú n kɔbɛ,
\q1 mí nKuyie kɛ̀ nní mbɛ̀ te,
\q1 kɛ́ mbɛ̀ bɑkɛ́, kɛ bɑ́ɑ́ bɛ̀ yóu,
\q1 m bo mbɛ̀ dɔ̀ɔ̀ri dɛ̀ɛ̀ sìɛ́.
\b
\q1
\v 9 Ntɛ mí ndi Yiɛ̀ nKuyie Mpɑkɛdɑɑ n tú mù:
\q1 Yɑ́úkùnnɛnɛ̀ di kɔ̃̀ntì
\q1 díndi bɛ̀ɛ̀ kèè m pɑ̃ɑ̃nɑ́ɑǹtì nɑ́ɑm̀bɛ̀ bɛ́i ntìì nɑ́ɑǹtì n cĩ́ɛ̃̀tɛ̀ pũũku dìì mɔ̀nnì.
\q1
\v 10 Dɛ mɔ̀nnì bɛ̀ do í yietì bɛtɔ̃mbɛ̀
\q1 iwũɔ̃ mɛ nyí mmɔkɛ mucɔ̃́ntimu mɑmù.
\q1 Bɛcièmbɛ̀ mɛ ndo í mɔkɛ mɛom̀pùmɛ̀ nɛ̀ bɛ kpɑntídɛ̀ntɔbɛ̀ kpɛ́í.
\q1 Míì do yóu bɑ́ wè kòò nwɑntinɛ̀ otɔù mɛyɛi.
\q1
\v 11 Di mmɔ̀nnì n tɛ̃́nkɛ í yóó dɔɔ̀ n kɔbɛ bɛ̀ɛ̀ kpɑɑ́ n do dɔ̀ɔ̀mɛ̀ dokɛ́ kɔbɛ.
\q1 Mí nKuyie Mpɑkɛdɑɑ míì bɛ́i!
\q1
\v 12 Dɛ mɔ̀nnì bɛ̀ bo nkɑri kɛ̀ dɛ̀ boo,
\q1 dɛtie mbɛ̀ tu dɛ̀ fínyĩ̀ kɛ̀ dɛ̀ mpɛí,
\q1 kɛ̀ bɛ̀ kùútí kɛtenkɛ̀ tidiitìi pɛitɛ́,
\q1 kɛ̀ kɛĩ́nkɛ̀ nduɔ̀nní fɛtɑɑfɛ̀,
\q1 n nìtìbɛ̀ bɛ̀ɛ̀ bo nkpɑɑ́ bɛɛ̀ yóó dɛ̀ tiekɛ.
\q1
\v 13 Díndi Sudɑɑ kɔbɛ nɛ̀ Isidɑyɛɛribɛ n do di dɔ̀ɔ̀ mɛ̀ɛ̀ botí mɛyɛi nkɛ ibotí tɛìi yɑ̀
\q1 mɛɛ̀ botí nku n yóó di dɔɔ̀mɛ̀ mɛsɑ̀ɑ̀ nkɛ̀ ìi yɑ̀.
\q1 Di bɑ́ nyĩɛ̃̀kù, yɑ́úkùnnɛ di kɔ̃̀ntì.
\b
\q1
\v 14 Mí ndi Yiɛ̀ nKuyie Mpɑkɛdɑɑ míì tu:
\q1 Di yɛmbɛ̀ do n cɑ̀ɑ̀rɛ̀mu kɛ íi m miɛkɛ
\q1 kɛ̀ n tɑ̃ɑ̃tɛ́ kɛ dɔ̀ n yí yóó yóu m bo bɛ̀ dɔ̀ɔ̀mɛ̀ mɛyɛi.
\q1
\v 15 Di mmɔ̀nnì n nɛ́ pètìnkɛ tɑ̃ɑ̃tɛ́ kɛ yóó di dɔɔ̀ mɛsɑ̀ɑ̀ mmɛ
\q1 díndi Sedisɑdɛmmu kɔbɛ, nɛ̀ Sudɑɑ tenkɛ̀ kɛmɔu kɔbɛ,
\q1 di tũ mbɑ́ nyĩɛ̃̀kù.
\q1
\v 16 Ntɛnɛ̀ di yó ntũ ntì,
\q1 bɑ́ wè, wè nnɑ́ɑ́ nhotɔù timɔ́mmɔnti kɛ̀ di mbekù timɔ́mmɔnti
\q1 dɛ̀ bo yiémmɛ̀ kɛ̀ kunɑɑtí mbo di cuokɛ̀.
\q1
\v 17 Di bo dɔɔ̀mɛ̀ ditɔbɛ̀ mɛyɛi ndɛ kó iyɛǹtotí bɑ́ɑ́ tɑnní di yɛ̀mmɛ̀ miɛkɛ
\q1 di níí bɑ́ mpɑrìku kɛ nɛ́ soú,
\q1 mí nKuyie n yí dɛ̀ dɔ́.
\s1 Mɛnùboúmmɛ̀ kó yɛwe yóó nɑɑ́mmɛ̀ yɛwe yɛbɑɑ nkpɛyɛ
\p
\v 18 Kɛ̀ Kuyie nní mbɛ́innɛ̀ kɛ dɔ̀: 
\v 19 Mí nKuyie Mpɑkɛdɑɑ míì tu: Sudɑɑ kɔbɛ bou mɛ̀ɛ̀ nùboúmmɛ̀ otɑ̃ɑ̃̀nɑɑnwè nɛ̀ onummuwè nɛ̀ okuɔ́nwè, nɛ̀ opíínwè dɛ kó yɛwe bo nɑɑ́ ndiwɛ̀ì kpɛyɛ, kuyɛǹnɑɑtí kpɛyɛ, yɛbɑɑ nkpɛyɛ, kɛ̀ di nyɑ̃nku. Nɛ́ ndɔ́nɛ̀ timɔ́mmɔnti kɛ̀ kunɑɑtí mbo di cuokɛ̀. 
\v 20 Mí nKuyie Mpɑkɛdɑɑ míì bɛ́i:
\q1 Ibotí nɛ̀ yɛhɛkɛ̀ dɛ̀ itinímu pɛ́u kɛ kɔriní Sedisɑdɛmmu.
\q1
\v 21 Dihɛì diì nkɔbɛ níí bo sɔ̃́nkɛ́ ditɛrì kɔbɛ kɛ́ bɛ̀ nɑ̀kɛ́ kɛ dɔ̀:
\q1 Ti kɔtɛnɛ̀ kɛ́bɑ́ntɛ̀ ti Yiɛ̀ nKuyie Mpɑkɛdɑɑ,
\q1 kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Ti kɔrimu.
\q1
\v 22 Yɛbotɛ̀ pɛ́u nɛ̀ ibotí ìì kpeńnì bɛ̀ bo kɔtɛní Sedisɑdɛmmu kɛ́wɑmmú ti Yiɛ̀ nKuyie Mpɑkɛdɑɑ,
\q1 kɛ́ kù bɑ̀ńtɛ̀.
\q1
\v 23 Mí ndi Yiɛ̀ nKuyie Mpɑkɛdɑɑ míì bɛ́i!
\q1 Dɛ yiè bɛnìtìbɛ̀ bo yɛ̀nní tɛpíítɛ̀ bɛ̀ɛ̀ cɑ̃̀ɑ̃́ nyibotí
\q1 kɛ́ncɑ́ɑ́tí Sifu òmɑ́ɑ̀ yɑɑ̀bòrì kɛ tú:
\q1 Ti dɔ́ kɛ dɑ nɛinɛ̀mu,
\q1 ti kèèmu Kuyie ndɑ bonɛ̀mɛ̀.
\c 9
\s1 Kuyie nkpɑ̀nnɛ̀mɛ̀ yɛhɛkɛ̀ yɛ̀ɛ̀ tɔ̀kɛ́nɛ̀ Isidɑyɛɛribɛ
\p
\v 1 Kɛ̀ Kuyie nní mbɛ́innɛ̀ kɛ dɔ̀:
\q1 Dɛ̀ í tú Isidɑyɛɛribɛ mɑ́ɑ̀ ndi n kpɑnnɛ̀mɛ̀,
\q1 Adɑrɑki tenkɛ̀ kɔbɛ nɛ̀ Dɑmɑɑsi ɛì kɔbɛ m bɛ̀ kpɑnnɛ̀mu múnkɛ.
\q1 Kɛ yɛ̃́ mí nKuyie n wúómmɛ̀mu bɛnìtìbɛ̀ bɛmɔu n wúó mmɛ̀ɛ̀ botí,
\q1 Isidɑyɛɛribɛ bɛmɔu.
\q1
\v 2 N kpɑǹnɛ̀mu múnkɛ Amɑti ɛì dìì tu kutemmɑ̀nku,
\q1 kɛ kpɑnnɛ̀ Tiiri nɛ̀ Sitɔ̃ɔ̃ kpɛyɛ yɛ̀ɛ̀ ciì ndɛu.
\q1
\v 3 Tiiri ɛì kɔbɛ mɑɑ́ tɛcɛ̃kpetɛ̀ ntɛ
\q1 kɛ píɛ ntimɑ́tì pɛ́ítì mutɑ̃́ɑ̃́ ndòmmɛ̀ kɛtenkɛ̀.
\q1 Kɛ píɛ mmɛsɔɔ mubirímú dòmmɛ̀ icɛ.
\q1
\v 4 Kuyie mmuwɛ̃rímú yiɛ̀ nyóó pɔntɛmu dihɛì,
\q1 kɛ́dɛ́ítɛ́ iduotí kɛ́tɑnnɛ́ dɑ̀mɛ́ɛ̀rì miɛkɛ,
\q1 kɛ́ dì cɔ́u mmuhɑ̃ɑ̃́.
\q1
\v 5 Kɛ̀ Asikɑnɔɔ kɔbɛɛ dɛ̀ yɑ̀ kɛ̀ kufɔ̃wɑɑ́ mbɛ̀ ɑutɛ́,
\q1 kɛ̀ Kɑsɑɑ ɛì kɔbɛ nkpeutí,
\q1 dɛ̀ bo di Ekunɔɔ ɛì kɔbɛ okpɑ̀ɑ̀tì tɛ̃́nkɛ í yó mbo Kɑsɑɑ ɛì miɛkɛ.
\q1 Onìtì tɛ̃́nkɛ bɑ́ nkɛ́rímu Asikɑnɔɔ ɛì,
\q1
\v 6 Bɛ̀ɛ̀ kɔkɛ́ ibotí bɛɛ̀ yó mbo Asidɔti ɛì,
\q1 m bo dɛitɛ Fidisitɛ̃ɛ̃bɛ fentɛ̀,
\q1
\v 7 M bo dɛitɛ iwũɔ̃ bɛ̀ í fìé ì kɛ̀ mɛyĩ̀ĩ̀ nyɛ̀ i kó imɑɑ mbɛ nɔ̀ miɛkɛ,
\q1 nɛ̀ bɛ̀ fìé ì yɛbɔkɛ̀.
\q1 Bɛ̀ɛ̀ bo nkpɑɑ́ dɛ yiè bɛ̀ bo nɑɑ́ n kɔbɛ,
\q1 kɛ́ndònnɛ̀ Sudɑɑ kó kunɑɑ̀mùnkù kɔbɛ dòmmɛ̀,
\q1 kɛ̀ Ekunɔɔ kɔbɛɛ tɑ n kɔbɛ miɛkɛ Sebusiibɛ do dɔ̀ɔ̀mmɛ̀.
\q1
\v 8 Míì mɔ́mmuɔ nyóó cómmú kɛ́bɑɑ nh ɛì, n dootitɔbɛ̀ kpɛ́í,
\q1 òmɔù tɛ̃́nkɛ bɑ́ɑ́ dì tɑ kɛ́fɛ̃́ũ n nìtìbɛ̀,
\q1 n yɑ̀mu m mɔ́mmuɔ nnɛ̀ n nɔ̀nfɛ̀.
\s1 Okpɑ̀ɑ̀tì wèè yóó tɔní diwɛ̀ì o kó tinɑ́ɑǹtì
\q1
\v 9 Díndi Sedisɑdɛmmu kɔbɛ nyɑ̃nkunɛ̀ diwɛ̀ì!
\q1 Díndi Siyɔ̃ɔ̃ kɔbɛ iinɛ̀!
\q1 Ntɛnɛ̀ di kóo kpɑ̀ɑ̀tì kɛ kéríní di borɛ̀.
\q1 Ò dɔ̀ɔ̀ri dɛ̀ɛ̀ sìɛ́ dɛ̀ndɛ kɛ nɔ ndɛmɔu,
\q1 kɛ yɔɔ̀ nkɛ dekɛ disɑ̃mmɑrínsɛrì kó dibii.
\q1
\v 10 Sikpɑ̀rìnɑɑsɛ̃ĩ́ í yó nkpɑɑ́ bo Efɑdɑimmu tenkɛ̀ miɛkɛ,
\q1 sikpɑ̀rìsɛ̃ĩ́ mɛ nyí yó nkpɑɑ́ Sedisɑdɛmmu ɛì.
\q1 Ò yóó kékɛ́mu dɛ tɑ̃nnɛ̀,
\q1 kɛ́ɑ̃nnɛ́ kunɑɑtí ibotí nɛ̀ itɛì dɛ cuokɛ̀.
\q1 O kpɑ̀ɑ̀tìyuu bo túótɛ́ dɑ̀mɛ́ɛ̀rì yie nkɛ́ntɔ kɛ́tuɔkɛnɛ̀ otɔù, kɛ́ditɛ́ kukó ndiɛkù Efɑdɑti nɛ̀ kutemmɑ̀nkoo.
\s1 Kuyie nyóó wɛ̃tɛ kɛ́cónnɛ́mɛ̀ Isidɑyɛɛribɛ bɛ fɔ̃̀tìrì
\p
\v 11 Kɛ̀ Kuyie mbɛ́i nkɛ dɔ̀:
\q1 Nɛ̀ ti kó mɛtɑummɛ̀ n di dɔ̀ɔ̀nɛ̀ mɛ̀ di n feu ìì wũɔ̃ kó mɛyĩ̀ĩ̀ mmiɛkɛ,
\q1 mɛɛ̀ te kɛ̀ n yóó di dennɛ di kpetí dìì fɔ̃̀tìrì miɛkɛ.
\q1
\v 12 Mí nKuyie mmíì tì ndi nɑ́ɑ́ nyíe, díndi tidɑɑtì tìì m bùɔ́!
\q1 Konnɛ̀nní di kó dihɛì iduotí fitɛ́ dì,
\q1 n yóó di dɔɔ̀mu mɛsɑ̀ɑ̀ nkɛ̀ dɛ̀ɛ pɛ̃ɛ̃tɛ́ kucɛ mɛ̀dɛ́mɛ̀ di di mɛ̀ɛ̀ sémmɛ̀.
\q1
\v 13 Siyɔ̃ɔ̃ ɛì, n yóó duɔ́ nkɑ̀ɑ nìtìbɛ̀ bɛɛ̀ do Yɑfɑnni kɔbɛ mudoò,
\q1 Sudɑɑ kɔbɛ bɛɛ̀ yó ntú n tɑ̃mmù,
\q1 kɛ̀ Efɑdɑimmu kɔbɛ tú m pie,
\q1 díndi Siyɔ̃ɔ̃ kɔbɛ kɛ̀ dí ntú n kpɑ̀rìsiè.
\q1
\v 14 Mí nKuyie n yó mbo n kɔbɛ yɔ ĩ́nkɛ̀ nkɛ kɛ̀ m pie ntú níɛ́ɛ́ fɛtɑɑfɛ̀ ɔ̃ɔ̃ míítɛ́mɛ̀,
\q1 mí ndi Yiɛ̀ nKuyie m bo kɔnnɛ́ dìì mɔ̀nnì ditɑ̃tɛheù kɛ́kétóo
\q1 nɛ̀ kubɑkù yoú bíɛ́kɛ̀ kó kuyɑɑkperíkù.
\q1
\v 15 Mí nKuyie Mpɑkɛdɑɑ n yó nkɑ̃nkɛ́mu n nìtìbɛ̀,
\q1 kɛ bɔmmɔ̀ɔ yɛtɑ̃́rɛ̀,
\q1 kɛ̀ yɛ̀ buɔti bɛ dootitɔbɛ̀, kɛ́ bɛ̀ nɑ̀ntɛ pɑ́íí bɛ̀ ɔ̃ɔ̃ nɑntɛmɛ̀ fínyĩ̀ bɛ,
\q1 kɛ̀ bɛ̀ mmɛ́ú mɛyĩ̀ĩ̀ mmiɛkɛ, bɛ̀ ɔ̃ɔ̃ féútɛ́ fɛɔ̃̀fɛ̀ kɛ̀ ikuɔ́ nìùtìi
\q1 kunnɛ mɛ̀ɛ̀ botí dinɑɑbuu mɛyĩ̀ĩ̀ mmiɛkɛ,
\q1 kɛ́ mɛ̀ wùɔ diwũɔ̃tɔ̀nnì bɑ̀kɛ̀.
\q1
\v 16 Mí mbɛ Yiɛ̀ nKuyie m bo bɛ̀ dɛɛtɛ́ dɛ yiè.
\q1 N nìtìbɛ̀ mbɛ, n kó ipe.
\q1 Bɛ̀ bo ndò nyɛtɑ̃́rɛ̀ yɛ̀ɛ̀ donku dɛu kɛ mmiɛti bɛ ɛì miɛkɛ.
\q1
\v 17 Dɛ yiè bɛ wenninku í yó mmɔkɛ kumɑ̀nku.
\q1 Bɛ wɛ̀ì mɛ nyí yó mmɔkɛ dì mɑ̀mɛ̀.
\q1 Tidiitì nɛ̀ mɛnɑbɛ́mmɛ̀ dɛ̀ bo nte bɛdɑpɑ̀mbɛ̀ nɛ̀ bɛsɑpɑ̀mbɛ̀
\q1 kɛ̀ bɛ̀ nkpeńnì.
\c 10
\s1 Kuyie nkuù duɔ̀ nfɛtɑɑfɛ̀
\q1
\v 1 Mɔɔnɛ̀ Kuyie nkɛ̀ kù dí duɔnní fɛtɑdentifɛ̀.
\q1 Kuù ɔ̃ nte kɛ̀ fɛtɑɑfɛ̀ɛ kperi kɛ́ni mɛdiɛ̀.
\q1 Bɑ́ wè kòo pɑkuu yɛ̀ tidiitì.
\q1
\v 2 Sibɔɔtenkɑɑnìi di soúmmu,
\q1 kɛ̀ bɛpɑ̃ɑ̃bɛ̀ di nɑ́ɑ́ nsiyɑ́ɑ̀bìsí,
\q1 di yɑu tìì dɔuǹtì tu dɛtetìrɛ̀ ndɛ
\q1 kɛ nɑ́ríkùnko di yɛ̀mmɛ̀ fɑ̀ɑ̀rɛ̀
\q1 dɛɛ̀ te kɛ̀ bɛnìtìbɛ̀ cìɛ́tɛ́ nɛ̀ mɛyɛǹcɑɑ̀rìmɛ̀
\q1 tipìètì tìì kpɑ ti cɛ̃nti ti kɔ̃mɛ.
\s1 Kuyie nnɑ̀kɛ́mɛ̀ kù yóó wɛ̃tɛ kɛ́dɛɛtɛ́mɛ̀ ku nìtìbɛ̀
\q1
\v 3 Kɛ̀ Kuyie mbɛ́i nkɛ dɔ̀:
\q1 Mí nKuyie m miɛkɛ kɛɛ̀ pɛikɛ bɛpecɛ̃nyɛibɛ,
\q1 n yìtɛ́ kɛ còḿmúmu bɛ kpɛ́í.
\q1 Mí nKuyie Mpɑkɛdɑɑ m bo dɑɑtɛní dìì yiè n kó ipe Sudɑɑ kɔbɛ kpɛ́í,
\q1 bɛ̀ bo nɑɑ́ nsikpɑ̀rìsɛ̃ĩ́ kperí kɛ̀ m bɛ̀ kɔ̀tɛnɛ̀ mudoò.
\q1
\v 4 Bɛkpɑ̀ɑ̀tìbɛ̀ yɛ̀tìní Sudɑɑ kó kufuku miɛkɛ nkɛ,
\q1 kɛ bo nkpeńnì kɛ dònnɛ̀ ditɑ̃́rì bɛ̀ ɔ̃ɔ̃ pṹṹtɛ́nɛ̀ dì,
\q1 kɛ dò nfɛbɑɑfɛ kɛ dò nhokpɑ̀rìnuɔnti kó mutɑ̃mmù.
\q1
\v 5 Bɛ̀ bo ntú bɛkpɑ̀rìnuɔmbɛ
\q1 kɛ nɑù bɛ dootitɔbɛ̀ kucɛ kó titɑ̃́tì kɔ̃mɛ.
\q1 Bɛ̀ bo mbɛ̀ nɑ̀ù kɛ yɛ̃́ mí nKuyie n yó mbɛ̀ bonɛ̀mɛ̀.
\q1 Dɛ yiè dɛ̀ bo di bɛ dootitɔbɛ̀ kó bɛhɑ̃ɑ̃pɔ̀nsɑ̃ndèèbɛ̀.
\q1
\v 6 M bo kpénkùnnɛ Sudɑɑ kɔbɛ,
\q1 m bo dɛɛtɛ́ Sosɛfu yɑɑ̀bí kɛ́ ì còńnɛ́ i fɔ̃̀tìrì,
\q1 mɛsémmɛ̀ mɛɛ̀ bɛ̀ nni mbonɛ̀.
\q1 Dɛ̀ tɛ̃́nkɛ bɑ́ ndò mbɛɛ̀ do n dootóo dimɔ̀nnì mɑrì.
\q1 Mí mbɛ Yiɛ̀ nKuyie mmíì bɛ̀ te,
\q1 kɛ yóó keè bɛ bɑ́ɑmmìi.
\q1
\v 7 Efɑdɑimmu kɔbɛ bo ntú bɛkpɑ̀rìnuɔmbɛ,
\q1 bɛ yɛ̀mmɛ̀ bo nnɑɑti kɛ dò mbɛ̀ yɑ̃̀ mɛnɑɑ̀.
\q1 Bɛ bí bo mbɛ̀ wùó nkɛ̀ diwɛ̀ì ì bo.
\q1 Bɛ yɛ̀mmɛ̀ bo nni nnɑɑtinɛ̀ mí mbɛ Yiɛ̀ nKuyie.
\q1
\v 8 Kɛ̀ n níí bɛ̀ yúnɛ̀ fɛfontìfɛ̀ kɛ̀ bɛ̀ɛ tíí,
\q1 nkɛ yɛ̃́ míì bɛ̀ dɛɛtɛ́mɛ̀,
\q1 kɛ̀ bɛ̀ sũ̀ṹ nkɛ mɑɑ̀tɛnɛ̀ bɛ̀ do mɑmɛ̀ nɛ̀ dimɔ̀nnì.
\p
\v 9 Míì bɛ̀ yɑɑ́ ibotí tɛì miɛkɛ
\q1 bɛ̀ ɔ̃ɔ̃ yɑɑ́ mɛ̀ɛ̀ botí mɛdibii,
\q1 bɛ̀ mɛ nyó nkɛ̀ bo kɛ́dentɛnímu n kpɛ́í
\q1 kɛ́tié mbɛ bí kɛ̀ bɛ̀ɛ wɛ̃tɛní.
\q1
\v 10 N yóó bɛ̀ dɛ̀itɛnímu Esibiti nɛ̀ Asidii,
\q1 kɛ́ bɛ̀ tìí nKɑdɑɑdi tenkɛ̀ miɛkɛ nɛ̀ Dimɑɑ, kɛ̀ bɛ̀ɛ duú.
\q1
\v 11 Kɛ séntɛ́ Esibiti kó kukó,
\q1 mí nKuyie míì yóó cónnɛ́ dɑ̀mɛ́ɛ̀rì kó yɛnɛ́fĩ̀nfĩ̀rɛ̀ kɛ̀ kukó nNiidi kṹṹ.
\q1 Asidii kɔbɛ fentɛ̀ bo deè.
\q1 Kɛ̀ fɛkpɑ̀ɑ̀tìpɑ̀tìfɛ̀ɛ dɛ́tɛ́nɛ̀ Esibiti kɔbɛ.
\q1
\v 12 Kɛ̀ n kpénkùnnɛ n nìtìbɛ̀ kɛ̀ bɛ̀ nkérí nɛ̀ n yètìrì,
\q1 mí nKuyie míì bɛ́i.
\c 11
\s1 Kuyie nnɑ̀kɛ́mɛ̀ yɛhɛkɛ̀ yɛ̀ɛ̀ kpeńnì yɛ̀ dotimɛ̀
\p
\v 1 Kɛ̀ Kuyie mbɛ́i nkɛ dɔ̀:
\q1 Fɔ̃́ nDimɑɑ tùúkú, kpetɛ́ ɑ bòrɛ̀,
\q1 kɛ̀ muhɑ̃ɑ̃́ ntɑ kɛ́cɔ́útɛ́ ɑ tediɛrɛ̀ sɛ́tìrì.
\q1
\v 2 Díndi dɛtie nsipɛ̀rɛ́sì, kɔmmúnɛ̀!
\q1 Sɛ́tìrìbɛ̀ duómu,
\q1 dɛ kó dɛtesɑ̀ɑ̀rɛ̀ tɛ̃́nkɛ í kpɑɑ́,
\q1 díndi Bɑsɑ̃ɑ̃ tie mbɛ̀ tu dɛ̀ sɛ́nnì, kɔmmúnɛ̀!
\q1 Kutúúkù bɛ̀ do í dɑɑti kɛ tɑɑ̀ kù domu, kù í kpɑɑ́.
\q1
\v 3 Ti yo bɛpecɛ̃mbɛ dɑbùò,
\q1 bɛ pe í kpɑɑ́ mɛ̀ɛ̀ kpɛ́í nkɛ.
\q1 Kɛ̀ yɛcìrícìrìbɛ kuɔ Suditɛ̃ɛ̃ tùúkù yɛ̀ do tɑ̃́ kù í kpɑɑ́ mmɛ̀ɛ̀ kpɛ́í.
\s1 Bɛpecɛ̃mbɛ bɛ̀dɛ́bɛ̀ kó tinɑ́ɑǹtì
\p
\v 4 Kɛ̀ Kuyie nní mbɛ́innɛ̀ kɛ dɔ̀: Cɛ̃mmú m pe ìì bo mukɔ̀ù kpɛ́í. 
\v 5 Bɛ̀ do nyì kɛ n kɔù bɑ́ òmɔù í bɛ̀ bɔnnɛ̀, kɛ̀ bɛ̀ɛ̀ fiiti kɛ̀ bɛ̀ tu: Kuyie nnɛ̀ mutɔ̃mmú, ti bo kpɑrìkɛ̀. Kɛ̀ i cɛ̃mbɛ nɛ́ búútóo bɑ́ mɛsémmɛ̀ í bɛ̀ bo. 
\v 6 M múnkɛ tɛ̃́nkɛ í yóó dɛɛtɛ́ di nhɛì kɔbɛ, mí nKuyie mmíì bɛ́i, n yóó yóumu bɑ́ wè kòò do o kou nɔu miɛkɛ, nɛ̀ o kóo kpɑ̀ɑ̀tì nɔu miɛkɛ, kɛ̀ bɛ̀ɛ bɛ̀ fɛ̃́ũ, m mɛ mbɑ́ɑ́ bɛ̀ dɛɛtɛ́.
\p
\v 7 Mɛm̀mɛ kɛ̀ n kɔtɛ kɛ bo cɛ̃mmu ipe bɛ̀ do nyì kɛ kɔù, kɛ́wɑɑ́ nyɛdɔ̀ yɛ̀dɛ́yɛ̀, kɛ yú dìmɑrì kɛ dɔ̀: Mɛsɑ̀ɑ̀, nkɛ yú ditɛrì kɛ dɔ̀: Mɛwɛ̃nnímɛ̀, kɛ́kɔtɛ kɛ́cɛ̃mmú ipe. 
\v 8 Otɑ̃̀nkù omɑ́ɑ̀ miɛkɛ kɛ̀ n cíɛ mbɛpecɛ̃mbɛ bɛ̀tɑ̃ɑ̃ti bɛ̀ɛ̀ do ì cɛ̃mmù. Kɛ̀ mɛminnímɛ̀ɛ ì nní ndòńtɛ́nɛ̀ kɛ̀ ì múnkɛ m pɛ̃̀. 
\v 9 Mɛm̀mɛ n yì nɑ̀kɛ́mɛ̀ kɛ dɔ̀: N tɛ̃́nkɛ í yóó ndi cɛ̃mmú kɛ̀ fɛ̀ɛ̀ bo kú, fɛ̀ɛ kú! Kɛ̀ fɛ̀ɛ̀ bo feti fɛ̀ɛ feti, ìì kpɑɑ́ kɛ̀ ì bo ncɑ́ɑ́ nyitɔbɛ̀, ì ncɑ́ɑ́.
\p
\v 10 Mɛm̀mɛ n tùótɛ́mɛ̀ didùɔ̀ n do yu dì kɛ dɔ̀: Mɛsɑ̀ɑ̀ nkɛ dì kèétɛ́, kɛ̀ dɛ̀ bo yie nkɛ̀ mɛtɑummɛ̀ n do dɔ̀ɔ̀nɛ̀mɛ̀ ibotí kɛ̀ mɛ̀ɛ tɔ̃tɛ. 
\v 11 N kèétɛ́ dìì mɔ̀nnì dɛ kó didùɔ̀ ipe kó bɛdombɛ bɛ̀ɛ̀ n wùó nkɛ̀ bɛ̀ɛ bɑntɛ́ Kuyie nkuù bɛ̀ nɑɑ́nnɛ̀mɛ̀ dɛ kó mɛdɔɔ̀rìmɛ̀ miɛkɛ. 
\v 12 Kɛ̀ m bɛ̀ nɑ̀kɛ́ kɛ dɔ̀: Kɛ̀ di pɛ́nsìrì n yietínɛ̀ kɛ̀ di mɛ nyí pɛ́nsìrì di yóu. Mɛm̀mɛ kɛ̀ bɛ̀ɛ kɑɑ nyidíítí mɛdítíbii nsipísìtɑ̃ɑ̃ti kɛ́ n duɔ́. 
\v 13 Kɛ̀ Kuyie nní nnɑ́kɛ́ kɛ dɔ̀: Túótɛ́ dɛ kó idìítí bɛ̀ yɛ̃ mbɛ̀ nu nni ntɑ̀ɑ nkùù donku kɛ́ɑ̃nnɛ́ n cĩ́ɛ̃̀tɛ̀ kó ditɔu miɛkɛ.
\p Kɛ̀ n túótɛ́ dɛ kó mɛdítíbii nsipísìtɑ̃ɑ̃ti kɛ́ɑ̃nnɛ́ Kuyie ncĩ́ɛ̃̀tɛ̀ kó ditɔu miɛkɛ. 
\v 14 Dɛ kó difɔ̃nkúò kɛ́túótɛ́ didùɔ̀ tɛrì dìì yètìrì tu: Mɛwɛ̃nnímɛ̀ kɛ kéétɛ́. Dɛ̀ɛ̀ bɛnkú kɛ dò nSudɑɑ kɔbɛ nɛ̀ Isidɑyɛɛribɛ bɛ kó mɛwɛ̃nnímɛ̀ tɔ̃̀tɛ. 
\v 15 Kɛ̀ Kuyie nyíɛ́ kɛ́bɛ́i nkɛ dɔ̀: Dɔɔ̀ ɑmɑ́ɑ̀ kɛ́ndò nhopecɛ̃nti wèè yɛ̀mmɛ̀ í nɑɑti, 
\v 16 kɛ yɛ̃́ mí nKuyie n yóó duɔ́nkomɛ̀ opecɛ̃nti tɔù nwe dɛ kó dihɛì miɛkɛ, wenwe bɑ́ kòò mɔ̀ńtɛ́ ipe o pecɛ̃nku miɛkɛ ò í yó ndɑkɛ dɛ kpɛti, kɛ̀ fɛ̀mɑfɛ̀ feti ò í yóó fɛ̀ wɑmmú, kɛ̀ fɛ̀mɑfɛ̀ kɔ̀utɛ ò bɑ́ɑ́ fɛ̀ tɑ̀ɑ, ò mɛ nyí yó mpiú ìì kɔ̃̀ntì nɑɑti, ò yó nkɔùmu ìì ɑ̃ mɛkùɔ̀ nkɛ cɑ́ɑ́ nkɛ dɛì isɔnyi kpɛ̀ɛ̀tɛ̀.
\b
\q1
\v 17 Di bo yɑ̀ díndi bɛ̀ɛ̀ tu dimɑ́ɑ̀ bɛpecɛ̃mbɛ,
\q1 díndi bɛ̀ɛ̀ dootóo m pe
\q1 bɛ̀ bo cɔ di bɑɑ̀ nyɛse,
\q1 kɛ́kṹṹkɛ́ di nuɔ nyouyi yɛse,
\q1 kɛ̀ di bɑɑ̀ nfɑ̃ũ nkɛ̀ di nuɔ nyouyii yɛ̃ĩ.
\c 12
\s1 Ibotí yóó wɛ̃nnɛ́mɛ̀ kɛ́do Sedisɑdɛmmu
\p
\v 1 Ntɛ Kuyie nnɑ̀kɛ́ tì Isidɑyɛɛribɛ,
\q1 Kuyie nkùù pitɛ́ tiwɛtì
\q1 kɛ fìí nkɛtenkɛ̀ kó yɛsɑ̃ǹkɛ̀,
\q1 kɛ ɑ̃nnɛ́ onìtì di wɛ̃nnì,
\q1 kuù bɛ́i nkɛ tú:
\m
\v 2 Mí nKuyie m bo dɔɔ̀ Sedisɑdɛmmu fɛbòòfɛ̀ kóò píɛ m miɛkɛ kó mɛnɑɑ̀, nyɛbotɛ̀ yɛ̀ɛ̀ ò fitɛ́, kɛ̀ yɛ̀ɛ yɑ̃̀ kɛ́muɔ́ nkɛ̀ yɛ ììkɛ̀ɛ fitɛ́. Dɛɛ̀ múnkɛ yóó tuɔkɛní Sudɑɑ kɔbɛ bɛ dootitɔbɛ̀ bo bɛ̀ do dìì mɔ̀nnì kɛ́pi Sedisɑdɛmmu. 
\v 3 Dɛ yiè m bo dɔú nSedisɑdɛmmu yɛbotɛ̀ ììkɛ̀ kòo ndo nkutɑ̃́ɑ̃́rí bɛ̀ɛ̀ bo ndɔ́ kóò còtɛ bɛ̀ bo kɔutɛ bɛmɑ́ɑ̀, yɛbotɛ̀ yɛmɔu bo wɛ̃nnɛ́ kóò do. 
\v 4 Dɛ yiè m bo duɔ́ nkɛ̀ sisɛ̃ĩ́ĩ́ wɑ́ɑ́tɛ́, kɛ̀ kufɔ̃wɑɑ́ nhɑutɛ́ si dèèbɛ̀, m bo yɛ̃ĩkùnnɛ ibotí tɛì kó sisɛ̃ĩ́, n nɔ̀nfɛ̀ mɛ mbɑ́ɑ́ ṹṹ nSudɑɑ kɔbɛ ĩ́nkɛ̀. 
\v 5 Dɛ mɔ̀nnì Sudɑɑ botí kó bɛkótíbɛ̀ bo nnɑ́ɑ́ mbɛ yɛ̀mmɛ̀ miɛkɛ kɛ tú: Sedisɑdɛmmu kɔbɛ kó muwɛ̃rímú bonní bɛ Yiɛ̀ nKuyie Mpɑkɛdɑɑ borɛ̀ ndɛ. 
\v 6 Dɛ mɔ̀nnì m bo duɔ́ nkɛ̀ Sudɑɑ kpɑ̀ɑ̀tìbɛ̀ kuɔ yɛhɛkɛ̀ yɛ̀ɛ̀ bɛ̀ fitɛ́ kubɑkù cɑ̃̀nku nɛ̀ kuyoú yɛ kɔbɛ, muhɑ̃ɑ̃́ nhɔ̃ɔ̃ cɔ́útɛ́ mɛ̀ɛ̀ botí timútì nɛ̀ idɛí. Kɛ̀ Sedisɑdɛmmu nkpɑɑ́ bo o kɑrì kɛ̀ bɛnìtìbɛ̀ ò ɑ̃.
\p
\v 7 Mí nKuyie n yóó ketɛ́ kɛ́dɛɛtɛ́ Sudɑɑ kó yɛfɛ kɔbɛ mbɛ, kɛ̀ dɛ̀ɛ yie nkɛ̀ Dɑfiti kɔbɛ nɛ̀ bɛ̀ɛ̀ bo Sedisɑdɛmmu kɛ̀ bɛ yɛ̀mmɛ̀ bɑ́ ndò mbɛ̀ bɛ̀ pɛ̃ɛ̃tɛ́. 
\v 8 Dɛ yiè mí nKuyie n yó nkɑ̃nkɛ́mu Sedisɑdɛmmu kɔbɛ, dɛ yiè wèè tu ocĩ̀rì bɛ miɛkɛ weè yó ndònnɛ̀ Dɑfiti do dòmmɛ̀ kɛ̀ bɛ̀ nwúó nho yɑɑ̀bí kɛ̀ dɛ̀ dò nKuyie, nkɛ dò nKuyie ntɔ̃nnì.
\s1 Bɛ̀ yóó kɔmmúmɛ̀ bɛ̀ kũ̀ṹ wè kɛ o dùùtɛ o kpɛ́í
\p
\v 9 Dɛ yiè m bo ítɛ́ kɛ́cómmú kɛ́kuɔ ibotí ìì bo kɔtɛní kɛ́ndɔ́ kɛ́do Sedisɑdɛmmu mudoò. 
\v 10 Dɛ yiè m bo ɑ̃nnɛ́ Dɑfiti kɔbɛ nɛ̀ Sedisɑdɛmmu kɔbɛ mɛyɛ̀mmɛ̀ bɛ̀ bo n kuɔ́nnɛ̀ mɛ̀ kɛ́ m bɑntɛ́ kɛ́wɛ̃ɛ̃tɛní m bíɛ́kɛ̀. Dɛ mɔ̀nnì kɛ́kɔmmú bɛ̀ kũ̀ṹ wè kɛ dùùtɛ o kpɛ́í, wèè birɛ bo dɛmɑ́ɑ̀ dɛ̀ ɔ̃ɔ̃ kú kòò nkuɔ̀mmɛ̀, Mpo ɔ̃ɔ̃ kú kɛ̀ bɛ̀ nkuɔ̀mmɛ̀. 
\v 11 Dɛ yiè yɛkúdɑbùò mbo dɑ́tínnɛ́ Sedisɑdɛmmu dibɔɔ̀ Adɑtidimɔɔ \f + \fr 12:11 \fr*\fk Aditidimɔɔ: \fk*\ft Fedisiibɛ kó dibɔɔ̀ mɑrì botí do nku, kɛ̀ bɛnìtìbɛ̀ yɛ̀mmɛ̀ ndò ndì ɔ̃ɔ̃ kú fɛtɑɑfɛ̀ kò ndìì mɔ̀nnì, kɛ́wɛ̃tɛ kɛ́yɛ̀nní fɛtɑɑfɛ̀ konní dìì mɔ̀nnì.\ft*\f* ɔ̃ɔ̃ kú kɛ̀ bɛ̀ nkuɔ̀mmɛ̀ Mɛkidoo biriku miɛkɛ. 
\v 12 Dihɛì miɛkɛ bɛ̀ bo nkuɔ̀ bɛ nɑɑ̀mùntì bɛ nɑɑ̀mùntì, kɛ̀ Dɑfiti kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́ nkɛ̀ Nɑtɑ̃ɑ̃ kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́. 
\v 13 Kɛ̀ Defii kó tɛcĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́ kɛ̀ Simɛii cĩ́ɛ̃̀tɛ̀ kɔbɛ ncɑ̃̀ɑ̃́ nkɛ̀ bɛ pobɛ̀ cɑ̃̀ɑ̃́. 
\v 14 Tinɑɑ̀mùntì sɔnti tìì kpɑɑ́ kɛ̀ tì cɑ̃̀ɑ̃́ ncɑ̃̀ɑ̃́ nkɛ̀ ti pobɛ̀ cɑ̃̀ɑ̃́.
\c 13
\p
\v 1 Dɛ yiè dinɛ́bòrì mɑrì bo mpũɔ̃̀ nkɛ ɔu Dɑfiti kɔbɛ nɛ̀ Sedisɑdɛmmu kɔbɛ kó mɛyɛi nnɛ̀ bɛ yɔ̃́ɔ̃̀.
\s1 Kuyie nyóó pɑɑmmɛ̀ yɛbɔkɛ̀ nɛ̀ bɛ̀ɛ̀ soú nkɛ tú bɛ̀ nɑ̀ɑ́ nku pɑ̃ɑ̃nɑ́ɑǹtì
\p
\v 2 Dɛ yiè m bo dɛitɛ yɛbɔkɛ̀ kó yɛyètɛ̀ bɛ nɔ̀ miɛkɛ, mí nKuyie mmíì bɛ́i. Òmɔù tɛ̃́nkɛ bɑ́ ndenniní yɛ kpɛ́í, m bo dennɛ dihɛì bɛ̀ɛ̀ tu bɛmɑ́ɑ̀ m pɑ̃ɑ̃nɑ́ɑǹtì nɑ́ɑm̀bɛ̀ nɛ̀ yɛbɔkɛ̀ yɛ̀ɛ̀ bɛ̀ sĩ̀nkùnko. 
\v 3 Dɛ mɔ̀nnì kòò mɔù cĩ̀ɛ̃́kɛ́ kɛ tú ò nɑ̀ɑ́ m pɑ̃ɑ̃nɑ́ɑǹtì, o cicɛ nɛ̀ o yɔ̃ bɛ̀ɛ̀ ò pɛitɛ́ bɛ̀ɛ ò nɑ̀kɛ́ kɛ dɔ̀: A yóó kúmu! A nɑ́ɑ́ nsiyɑ́ɑ̀bìsí nsi kɛ tú ɑ nɑ́ɑ́ nKuyie mpɑ̃ɑ̃nɑ́ɑǹtì. Kòò cĩ̀ɛ̃́kɛ́ kɛ tú ò nɑ̀ɑ́ m pɑ̃ɑ̃nɑ́ɑǹtì o cicɛ nɛ̀ o yɔ̃ bɛ̀ɛ ò kũ̀ṹ disiè kɛ́kuɔ. 
\v 4 Dɛ mɔ̀nnì ifɛi bo pĩ́ m pɑ̃ɑ̃nɑ́ɑǹtì nɑ́ɑm̀bɛ̀ nɛ̀ bɛ kó tipɑ̃ɑ̃nɑ́ɑǹtì kɛ̀ bɛ̀ tɛ̃́nkɛ bɑ́ ndɑ́ɑ́tí iwũɔ̃ kó ticìtì kó yɛyɑɑ̀bòrɛ̀ kɛ soú. 
\v 5 Bɛ̀ bo nyetírí kɛ tú: Mí n yí tú Kuyie mpɑ̃ɑ̃nɑ́ɑǹtì nɑ́ɑǹtò, n tú otenkútì nwe nɛ̀ bɛ̀ m pɛitɛ́mɛ̀ n tú kɛtenkɛ̀ kou nwe. 
\v 6 Kɛ̀ bɛ̀ ò bekɛ kɛ yĩ: Bɑ́ n kó tifíɛ̀tì nɛ́ bo ɑ cĩ̀ncĩ̀nnì? Ò dɔ̀: N nɛ́pobɛ̀ bɛɛ̀ dɛ̀ nni nkɔ̀ùtɛ.
\s1 Bɛ̀ɛ̀ yó nkpɑɑ́ bɛ̀ yóó bɑntɛ́mɛ̀ Kuyie
\p
\v 7 Ntɛnɛ̀ mí nKuyie Mpɑkɛdɑɑ n tú mù:
\q1 N tú nh ɛ̀i ndisiè ndi kɛ bo kɔ̃ṹ n kóo pecɛ̃nti
\q1 nɛ̀ wè ti wɛ̃ nkɛ́pĩ́ mmutɔ̃mmú kɛ́kuɔ,
\q1 kɛ̀ ipee cíɛ́tɛ́ kɛ̀ n kuɔ ipebí.
\p
\v 8 Kɛ̀ Kuyie nyíɛ́ kɛ́bɛ́i nkɛ dɔ̀: Dɛ yiè kɛtenkɛ̀ kó bɛnìtìbɛ̀ bo totɛ́ yɛwɛ́tiyɛ̀ yɛ̀tɑ̃ɑ̃ti, kɛ̀ yɛ̀dɛ́ɛ̀ kú kɛ̀ dìmɑ́ɑ̀ nkpɑɑ́ bo. 
\v 9 Kɛ̀ m bɛ̀ yɑ̀ɑ́kɛ́ kɛ́ bɛ̀ wénkùnnɛ bɛ̀ ɔ̃ɔ̃ pṹnnɛ́ mɛ̀ɛ̀ botí mɛsɔɔ nnɛ̀ timɑ́tì pɛ́ítì kɛ̀ dɛ̀ɛ wenkɛ. Dɛ yiè kɛ̀ bɛ̀ níí n yú kɛ̀ n yie nkɛ dɔ̀ bɛ̀ tu n kɔbɛ mbɛ, kɛ̀ bɛ̀ dɔ̀: Kuyie nkuù ti te.
\c 14
\s1 Kuyie n yóó bɑɑtɛ́mɛ̀ ku nìtìbɛ̀ mɛsɔmmɛ
\q1
\v 1 Kɛ̀ Kuyie mbɛ́i nkɛ dɔ̀:
\q1 Mí nKuyie n kó diyiè duunnímu
\q1 kɛ̀ di dootitɔbɛ̀ bo totí di kpɛrɛ di nuɔ mmiɛkɛ,
\q1 díndi Sedisɑdɛmmu kɔbɛ di nuɔ mmiɛkɛ.
\q1
\v 2 N yóó duɔ́ nkɛ̀ ibotí tɛìi tíímmu kɛ́do Sedisɑdɛmmu mudoò
\q1 kɛ́pɔntɛ dihɛì kɛ́hɛí dɛ̀ɛ̀ kó dimɑ̀ɑ̀ bo di miɛkɛ,
\q1 kɛ́pĩ́mmú bɛnitipòbɛ̀ kɛ́duɔ́nɛ̀,
\q1 kɛ́pĩ́mmú bɛsṹkùbɛ̀ kɛ́kũṹnnɛ̀ kɛ́dɔɔ̀ tidɑɑtì,
\q1 kɛ̀ bɛsɔmbɛ nkpɑɑ́ dihɛì.
\q1
\v 3 Dɛ mɔ̀nnì mí nKuyie nkɛ̀ n cómmú kɛ́dokɛ́nɛ̀ yɛbotɛ̀
\q1 n do ɔ̃mmɛ̀ mudoò mɔ̀nnì.
\q1
\v 4 Dɛ yiè n nɑɑ̀cɛ̀tɛ̀ bo nɑ odìfíè tɑ̃rì
\q1 dìì bo Sedisɑdɛmmu donfũ̀ɔ̃̀,
\q1 kɛ̀ dìi yɑtɛ́ di cuokɛ̀ diyiè yìɛ̀ní kɛ̀ɛ̀ bíɛ́kɛ̀
\q1 nɛ̀ dì tɑɑ̀ kɛ̀, kɛ̀ dɛ̀ɛ nɑɑ́ nkubiriku diɛkù
\q1 kɛ̀ diwɛtirì dìmɑ́ɑ̀ fũtɛ kubɑkù yoú bíɛ́kɛ̀
\q1 kɛ̀ ditɛrìi fũtɛ kucɑ̃̀nku.
\q1
\v 5 Kɛ̀ di cokɛ́ kɛ́tũnnɛ dɛ kó kubiriku
\q1 kɛ yɛ̃́ kù yó nduɔ́mɛ̀ kɛ́tuɔkɛnɛ̀ Asɔɔdi nwe,
\q1 kɛ̀ dí cokɛ́ kɛ́ kù tũ̀nnɛ
\q1 kɛtenkɛ̀ do ɑɑ́ Osiɑsi Sudɑɑ kɔbɛ kóo kpɑ̀ɑ̀tì mɔ̀nnì
\q1 kɛ̀ di yɛmbɛ̀ɛ cokɛ́ mɛ̀ɛ̀ botí.
\q1 Dɛ mɔ̀nnì kɛ̀ di Yiɛ̀ nKuyie nfeitɛ́ní
\q1 kɛ nɛínɛ̀ ku tɔ̃rɛ̀.
\q1
\v 6 Dɛ mɔ̀nnì diyiè tɛ̃́nkɛ í yó mbo
\q1 dɛ̀ yó ndò mbɑ̀mmùu nwe kɛ dò nnìkɛ̀ìì.
\q1
\v 7 Dɛ kó diyiè yó ncɑ̃́ɑ̃́mmu
\q1 Kuyie nkuù mɑ́ɑ̀ dì yɛ̃́
\q1 dɛ mɔ̀nnì kuyie nyí yó mbo
\q1 kɛyènkɛ̀ mɛ nyí yó mbo,
\q1 bɑ́ kuyuoku kuwenniku kuù yó mbo.
\q1
\v 8 Dɛ kó yɛwe miɛkɛ mɛniɛ mmɛ̀ɛ̀ duɔ̀ mmufòmmu
\q1 mɛ̀ bo nyiɛ̀ní Sedisɑdɛmmu
\q1 kɛ̀ mɛ̀mɑmɛ̀ mpũɔ̃̀ nkɛ tɑɑ̀ dɑ̀mɛ́ɛ̀rì diyiè yìɛ̀ní kɛ̀ɛ̀ bíɛ́kɛ̀ kou,
\q1 kɛ̀ mɛtɛ̃mɛ̀ ntɑɑ̀ diyiè tɑɑ̀ kɛ̀ɛ̀ bíɛ́kɛ̀ kou
\q1 kɛ́mpũɔ̃̀ ndiyɔ̃ɔ̃̀ nɛ̀ dipɑɑo.
\q1
\v 9 Dɛ kó yɛwe miɛkɛ
\q1 Kuyie nkuù yó ntú kɛtenkɛ̀ kɛmɔu kóo kpɑ̀ɑ̀tì
\q1 kɛ̀ bɛnìtìbɛ̀ bɛmɔu nkù bɑ̀ɑ́ nkɛ nkù yɛ̃́.
\b
\q1
\v 10 Kɛ̀ dihɛì dimɔuu wɛ̃tɛ kɛ́nɑɑ́ nkubiriku
\q1 kɛ́túótɛ́ Kebɑɑ kɛ́ntɔ kɛ́tuɔkɛnɛ̀ Dimɔɔ
\q1 kubɑkù cɑ̃̀nku Sedisɑdɛmmu diyiè yìɛ̀ní kɛ̀ɛ̀ bíɛ́kɛ̀
\q1 kɛ̀ Sedisɑdɛmmuu bɑɑtɛ́ yɛhɛkɛ̀ sɔnyɛ,
\q1 kɛ túótɛ́ Bɛnsɑmɛɛ kó dibòrì borɛ̀
\q1 kɛ́ntɔ kɛ́tuɔkɛnɛ̀ bɛ̀ tu dɛ̀ dibòrì kótírì,
\q1 kɛ́pɛ̃ɛ̃tɛ́ kɛ́tuɔkɛnɛ̀ dibòrì kuduotí kentímɛ̀ kpɛri
\q1 kɛ́ntɔ kɛ́tuɔkɛnɛ̀ Anɑnɛɛdi kó ditennì,
\q1 kɛ́pɛ̃ɛ̃tɛ́ kɛ́tuɔkɛnɛ̀ okpɑ̀ɑ̀tì kó diyɛtituò borɛ̀.
\q1
\v 11 Ikuɔ́ mɑì tɛ̃́nkɛ í yó mbo ɑ bo yetɛ́nɛ̀ ì kɛ̀ bɛ̀ dɑ́ kuɔ.
\q1 Bɛnìtìbɛ̀ bo nkɑri bɑ̀mmùù Sedisɑdɛmmu miɛkɛ.
\b
\q1
\v 12 Ntɛ Kuyie nyóó potɛ́ kùù yɛ̃ĩku bɛnìtìbɛ̀ bɛ̀ɛ̀ dokɛ́nɛ̀ Sedisɑdɛmmu:
\q1 Onìtì níí bo nkpɑɑ́ fòù kòo kɔ̃̀ntì pɑ̃̀ɑ̃̀kɛ,
\q1 kòo nɔm̀bii mpɑ̃̀ɑ̃̀kɛ,
\q1 kɛ̀ bɛ nɔ́ndiɛ́ mpɑ̃̀ɑ̃̀kɛ bɛ nɔ̀ miɛkɛ,
\q1
\v 13 Dɛ yiè kufɔ̃wɑɑ́ ndiɛkù bo ɑutɛ́ bɛnìtìbɛ̀
\q1 kɛ̀ bɛ̀ɛ kóntɛ́ kɛ́nkpɑnnɛ̀ bɛtɔbɛ̀,
\q1 bɑ́ wè kòò nkpɑǹnɛ̀ o cɛ̃pɛɛtitɔù.
\q1
\v 14 Kɛ̀ Sudɑɑ kɔbɛɛ wɛ̃nnɛ́nɛ̀ Sedisɑdɛmmu kɔbɛ
\q1 kɛ̀ bɛ̀ɛ dokɛ́nɛ̀ ibotí ìì bɛ̀ fitɛ́,
\q1 kɛ́koú bɛ mɑ́tì pɛ́ítì nɛ̀ mɛsɔɔ nnɛ̀ tiyɑ̀ɑ̀tì pɛ́u.
\q1
\v 15 Kuyɛ̃ĩku kùù do bɛnìtìbɛ̀ kuù doti sisɛ̃ĩ́,
\q1 nɛ̀ sitɛsì sɑ̃mmɑrímú nɛ̀ sisɛ̃ĩ́ dɛ̀ wɛ̃nnɛ́ kɛ pɛitɛ́ sì
\q1 nɛ̀ yòyóbɛ̀ nɛ̀ sɑ̃mmɑrímú
\q1 nɛ̀ iwũɔ̃ sɔnyi ìì bo bɛ ɑ̃ɑ̃pɔ̀nkɑrì.
\q1
\v 16 Dɛ mɔ̀nnì bɛ̀ɛ̀ bo nkpɑɑ́ fòù,
\q1 ibotí ìì dokɛ́nɛ̀ Sedisɑdɛmmu kɔbɛ i miɛkɛ,
\q1 bɛ̀ bo nkɔrìní Sedisɑdɛmmu bɑ́ dìì mɔ̀nnì,
\q1 kɛ ninku kɛ m bɑ́ɑ́ mmí nKuyie Mpɑkɛdɑɑ,
\q1 kɛ bɑɑ̀ ntitouti kó dibɑnni.
\q1
\v 17 Ibotí ìì kɔbɛ bo nkpɑɑ́o kɛ í nkɔ̀tɛní Sedisɑdɛmmu
\q1 mí nhokpɑ̀ɑ̀tì Kuyie Mpɑkɛdɑɑ m borɛ̀,
\q1 bɛ̀ bɑ́ɑ́ pɛ́tɛ́ fɛtɑɑfɛ̀.
\q1
\v 18 Kɛ̀ Esibiti kɔbɛ kpɑɑ́o kɛ í kɔ̀tɛní,
\q1 m potɛ́ kùù yɛ̃ĩku ibotí tɛì ìì í kɔ̀tɛní
\q1 kɛ bɑɑ́ ntitouti kó dibɑnni,
\q1 kuù doti bɛ ĩ́nkɛ̀.
\q1
\v 19 Esibiti kɔbɛ nɛ̀ ibotí tɛì ìì bo nkpɑɑ́o
\q1 kɛ í nkɔ̀tɛní kɛ bɑɑ́ ndibɑnni titouti kpɛri
\q1 tiì yɛ̃ĩti doti bɛ ĩ́nkɛ̀.
\b
\q1
\v 20 Dɛ yiè bɛ̀ bo wɑ̃ri sisɛ̃ĩ́ kó yɛsɑ̃nkɛwe ĩ́nkɛ̀
\q1 kɛ dɔ̀: Bɛ̀ cɑ̃̀ńnɛ́ dɛ̀ nKuyie nkpɛ́í.
\q1 Kɛ̀ n cĩ́ɛ̃̀tɛ̀ kó sikṹmboó nɑɑ́ nyɛbɔ
\q1 bɛ̀ yó mmɛ́ínɛ̀ yɛ̀ yɛwũɔ̃tɔ̀rɛ̀.
\q1
\v 21 Sedisɑdɛmmu kó sikṹmboó nɛ̀ Sudɑɑ tenkɛ̀ kpɛsi
\q1 kɛ̀ bɛ̀ɛ dɛ̀ duɔ́ mí nKuyie Mpɑkɛdɑɑ n kpɛ́í
\q1 bɛ̀ɛ̀ kó dimɑ̀ɑ̀ n feu iwũɔ̃ kɛ̀ bɛ̀ nsì tòú
\q1 kɛ berinɛ̀ imɑɑ,
\q1 bɛpotɑmbɛ̀ tɛ̃́nkɛ í yó nkpɑɑ́ mí nKuyie Mpɑkɛdɑɑ n cĩ́ɛ̃̀tɛ̀ miɛkɛ.