\id TIT di57.all F{evrier 1999 BJ Parakou B{enin
\ide UTF-8
\h Titi
\toc1 Pɔɔri wɑ̃̀ri dìì pɑ́tíri Titi
\toc2 Titi
\mt1 Pɔɔri wɑ̃̀ri dìì pɑ́tíri Titi
\imt1 Di mpɑ́tíri tɔ tìì nɑ́ɑǹtì
\ip Titi do tú onìtì nwe wèè í tú Sifu kó kubotí kou. Kòo yie nYesu, kɛ́nnɛitinɛ̀ Pɔɔri kɛ̀ bɛ̀ nɑ̀ɑ́ nKuyie nnɑ́ɑǹtì. Pɔɔri do yóó ò wɑ̃̀ri di mpɑ́tíri kɛ sɔ̃́ nhò bo Kɛdɛti nwe, Pɔɔri weè do kɛ̀ nhò tɔ̃ nkòò bo pɑɑtɛ́ mutɔ̃mmú centìmɛ̀ nɛ̀ bɛ̀ tũ̀ntɛmɛ̀ Kuyie mbɑ́ɑmmu.
\ip Mɛketimɛ̀ kòò dɔ̀ Titi dò nkɛ́ bɛ̀ dèntɛmu bɛ̀ɛ̀ ni Kirisi kɔbɛ tĩ̀rɛ̀ bɛ̀ dò nkɛ́ndòmmɛ̀, dɛ mɔ̀nnì bɑ́ wè ò do yɛ̃́mu kɛ dò nKɛdɛti kɔbɛ tú bɛ̀ɛ̀ fòmmu í wenni.
\ip Dɛ kó difɔ̃nkúò kɛ̀ Pɔɔri ò duɔ́ nyitié nhò bo ntièmmɛ̀ bɛdɑkótíbɛ̀ nɛ̀ bɛpokótíbɛ̀ Kirisi kɔbɛ tĩ̀nnì miɛkɛ, kɛ̀ bɛ̀ múnkɛɛ tuo ndɛ kó itié mbɛbɛ́mbɛ̀ nɛ̀ bɛ̀ɛ̀ tú tidɑɑtì. Kòo bɛ̀ dèntɛ Kirisi kɔbɛ dòmmɛ̀ kɛ́nnɑɑtinɛ̀ bɛtɔbɛ̀, kɛ̀ dɛ̀ɛ yie nkɛ̀ mɛtotímɛ̀ bɑ́ mbo.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Bɛwedɔunkótíbɛ̀ dò nkɛ́ndòmmɛ̀ 1
\io1 2. Bɛdɑkótíbɛ̀ nɛ̀ bɛpokótíbɛ̀ bɛ̀ dò nkɛ́ndòmmɛ̀ 2
\io1 3. Kirisi kɔbɛ dò nkɛ́ndòmmɛ̀ 3
\c 1
\s1 Mudɔummu
\p
\v 1 Mí mPɔɔri Kuyie nkóo tɔ̃ntì, n tú Yesu Kirisi kó ditɔ̃nnì ndi kɛ nɑ́ɑ́ nTinɑ́ɑǹsɑ̀ɑ̀tì.
\p Kuyie nkuù n duɔ́ ndɛ kó mutɔ̃mmú kɛ̀ m bo nɑ́kɛ́ Tinɑ́ɑǹsɑ̀ɑ̀tì kù tɑ̃ɑ̃tɛ́ bɛ̀ kɛ̀ bɛ̀ɛ ti bɑntɛ́ kɛ́ntɑ̃́ Kuyie, kɛ́ntũ̀ nku kó kucɛ bɛ̀ dò nkɛ́ nkù tũ̀mmɛ̀. 
\v 2 Kɛ̀ bɛ̀ɛ bɑntɛ́ kɛ dò mbɛ̀ mɔ̀kɛ mufòmmu mùù bo sɑ̃́ɑ̃̀, kù do yɛ̃ nkù yóó bɛ̀ duɔ́ mmù kɛ mu nyí dɔ̀ɔ̀ kutenkù. 
\v 3 Di mmɔ̀nnì kɛ mù nti bɛnkɛ kɛ duɔ́ nkɛ̀ n nɑ́ɑ́ nTinɑ́ɑǹsɑ̀ɑ̀tì. Kuù mɛ̀ dɔ̀ɔ̀ kɛ bo ti dɛɛtɛ́.
\p
\v 4 Míì dɑ wɑ̃̀ri di mpɑ́tíri fɔ̃́ nTiti m birɛ mɔ́mmɔndɛ Kuyie nkó kucɛ miɛkɛ. Ti cicɛ Kuyie nnɛ̀ ti Yiɛ̀ nYesu Kirisi bɛ̀ dɑ dɔɔ̀ mɛsɑ̀ɑ̀ nkɛ dɑ duɔ́ ndiwɛ̀ì!
\s1 Pɔɔri duɔ́ mmùù tɔ̃mmú Titi Kɛrɛti
\p
\v 5 N do dɑ yóu Kɛrɛti kɑ̀ɑ bo deè mutɔ̃mmú mùù kpɑɑ́ mùmmu, kɛ́ntũ nyitié n dɑ duɔ́ nyì, kɛ́tɑ̃nkɛ́ bɛwedɔunkótíbɛ̀ bɑ́ dìì ɛì miɛkɛ. 
\v 6 Wèè ni Kirisi kɔbɛ tĩ̀nnì o dò nkɛ́ntú onitisɑ̀ɑ̀wè nwe, kɛ́mpo onitipòkù omɑ́ɑ̀, kòo bí ntú bɛwedɔùmbɛ̀, kɛ̀ ì borimɛ wenni, kɛ̀ ì yìé nyi yɛmbɛ̀ kpɛti. 
\v 7 Wèè ni Kirisi kɔbɛ tĩ̀nnì ò pĩ nKuyie ntɔ̃mmú mmu, kɛ dò nkɛ́nwenni, ò bɑ́ mmɔkɛ tɛfentɛ̀, ò bɑ́ mmɔkɛ kɛmiɛkɛ, ò bɑ́ ntú kunɑɑ̀yɑ̃̀ɑ̃̀kù, ò bɑ́ nyóù, ò bɑ́ ncií nkɛ yo nyidíítí. 
\v 8 We ncɔú bɛpɔ̀ɔ̀bɛ̀, kɛ́ndɔɔri mɛsɑ̀ɑ̀ nkɛ ciì, kɛ dɔɔri Kuyie ndɔ́mɛ̀, kòo borimɛ nwenni, kòo nnɔ nkɛ pĩĩ nhomɑ́ɑ̀. 
\v 9 Wè mpĩ́ Kuyie nnɑ́ɑǹtì weti weti, kɛ tì tiè mbɛ̀ tì nhò tié mɛ̀ɛ̀ botí, kòò dɔ̀ɔ̀ri mɛmmɛ ò bo nɑ kɛ́ntiè mbɛnìtìbɛ̀ itié mɔ́mmɔnyi, kɛ̀ wèè yetɛ́ wèe nɑ kóo bɛnkɛ o yetímɛ̀.
\p
\v 10 Bɛ̀ɛ̀ í tũ nKuyie nkó itié nweti weti bɛ̀ dɔ̀kɛ sũ Sifubɛ bɛ̀ɛ̀ cɔutɛ́ Yesu bɛ miɛkɛ nkɛ, bɑ́ bɛ̀ í yíé ntìmɑtì, kɛ nɑ́ɑ́ mbɛnìtìbɛ̀ tinɑ́ɑǹtì pɛ́u kɛ bɛ̀ fétìnko. 
\v 11 A bɛ̀ bɑ̀ɑ kɛ̀ bɛ̀ bɑ́ nnɑ́ɑ́, bɛ̀ buɔ̀ nsicɛ̃́ĩ nsi kɛ sì pùɔ̀ mpɑ́íí kɛ tiè nyitié nyɛiyi kɛ dɔ́ ticuuti. 
\v 12 Kɛrɛti kɔbɛ kó Kuyie mpɑ̃ɑ̃nɑ́ɑǹtì nɑ́ɑǹtò mɔù do bɛ́immu kɛ dɔ̀: Kɛrɛti kɔbɛ tú siyɑ́ɑ̀bìsí yɛmbɛ̀ mbɛ kɛ yóù tikpɑsĩ̀ntì kɔ̃mɛ, kɛ dé mutɔ̃mmú, kɛ dɔ́ mudiì mɑ́ɑ̀. 
\v 13 Kuyie mpɑ̃ɑ̃nɑ́ɑǹtì nɑ́ɑǹtò bɛ́i ntì tu timɔ́mmɔnti nti, kpɑnnɛ̀ bɛ mɛdiɛ̀, kɛ̀ bɛ̀ɛ bɑntɛ́ bɛ̀ bo ntũmmɛ̀ Kuyie nkó kucɛ kɛ́cootɛ́. 
\v 14 Kɛ yóu bɛ̀ bo ntũmmɛ̀ Sifubɛ kó iyɑ́ɑ̀bìsítié kɛ́ntũ ntimɔ́mmɔnti kɛ yóu bɛnìtìbɛ̀ dɔú nyìì tié. 
\v 15 Dɛmɔu dɛ̀ wennimu Kuyie nwénkùnnɛ bɛ̀ borɛ̀. Dɛ̀mɑrɛ̀ mɛ nyí wenni bɛ̀ɛ̀ yetɛ Kuyie nkpɛti kɛ sĩ mbɛ borɛ̀, bɛ yɛ̀mmɛ̀ nɛ̀ bɛ dɔɔ̀rìmɛ̀ dɛ̀ sĩ̀mmu. 
\v 16 Kɛ̀ bɛ̀ yɛ̀mmɛ̀ dò mbɛ yɛ̃́ Kuyie nkɛ̀ bɛ dɔɔ̀rìmɛ̀ mɔ̀kɛ isíɛ, bɛ̀ í yie nKuyie nkpɛti, bɛ̀ bɑ́ɑ́ nɑ kɛ́dɔɔ̀ mɛsɑ̀ɑ̀ mmɑmɛ̀.
\c 2
\s1 Kirisi kou dòmmɛ̀ kɛ́ntiè nyitié nsɑ̀ɑ̀yì
\p
\v 1 Fɔ̃́ nni mbɛ̀ tiè nyitié nsɑ̀ɑ̀yì Kuyie nkpɛyi. 
\v 2 Nɑ́kɛ́ bɛdɑkótíbɛ̀ kɛ̀ bɛ̀ nnɔ nkɛ pĩĩ mbɛmɑ́ɑ̀, kɛ tú bɛnìtìbɛ̀ mɔ́mmɔmbɛ, kɛ̀ bɛnìtìbɛ̀ mbɛ̀ dé. Kɛ̀ bɛ̀ ntɑ̃́ Kuyie nweti weti, kɛ́ndɔ́ bɛ kɔbɛ tɔbɛ̀, kɛ mɔkɛ mɛminnímɛ̀. 
\v 3 A nɑ́kɛ́ bɛpokótíbɛ̀ kɛ̀ bɛ borimɛ nwenni, kɛ̀ bɛ̀ bɑ́ nnɑ́ɑntɛ bɛtɔbɛ̀ kpɛ́í mbɛ̀ bɑ́ ntú tinɑɑyɑ̃̀ɑ̃̀tì. Bɛ̀ nduɔ̀ nyitié nsɑ̀ɑ̀yì 
\v 4 bɛnitipobɛ́mbɛ̀, kɛ̀ bɛ̀ ndɔ́ bɛ dɑɑbɛ̀ nɛ̀ bɛ bí, 
\v 5 kɛ́ntú bɛnitiposɑ̀ɑ̀bɛ̀ kɛ́nwetí bɛ dɑɑbɛ̀, kɛ́nnɔ nkɛ pĩĩ mbɛmɑ́ɑ̀, kɛ pĩ́ mmucɛ̃tɔ̃mmú mɛsɑ̀ɑ̀, kɛ̀ bɛ yɛ̀mmɛ̀ wenni, kɛ̀ bɛ̀ yìé mbɛ dɑɑbɛ̀ kpɛti kɛ̀ bɛ dɔɔ̀rìmɛ̀ bɑ́ nte kòò mɔù senkɛ̀rì Kuyie nnɑ́ɑǹtì.
\p
\v 6 A ntiè mbɛbɛ́mbɛ̀ kɛ̀ bɛ̀ nciì, kɛ́nnɔ nkɛ pĩĩ mbɛmɑ́ɑ̀ dɛmɔu miɛkɛ. 
\v 7 Fɔ̃́ nhɑ mɔ́mmuɔ nkɑ̀ɑ borimɛ nwenni, kɑ̀ɑ mbɛ̀ tiè nyitié nsɑ̀ɑ̀yì, ìì tu imɔ́mmɔnyi. 
\v 8 A tié nni ndò mpɑ́íí kɛ̀ ti kpɑntídɛ̀ntɔbɛ̀ɛ mɔ́ntɛ́ bɛ̀ bo ti wɑ́tí tì, kɛ̀ ifɛii bɛ̀ pĩ.
\p
\v 9 A tié ntidɑɑtì kɛ̀ tì nyíé nti yɛmbɛ̀ kpɛti, kɛ́ndɔɔri bɛ̀ dɔ́mɛ̀, bɛ̀ níí bɑ́ɑ́ tì bɛ́innɛ̀ kɛ̀ tìi bɑɑo. 
\v 10 Tì bɑ́ mbɛ̀ yuuku, tì ndɔɔri mɛsɑ̀ɑ̀ nkɛ̀ ti borimɛ nwenni. Kɛ̀ bɛnìtìbɛ̀ ndé Kuyie nkùù dɛɛrí, kù ti duɔ́ ntìì nɑ́ɑǹtì.
\p
\v 11 Kuyie ndɔ̀ɔ̀ mɛsɑ̀ɑ̀ nkɛ dɔ́ kɛ́ ti dɛɛtɛ́mu kɛ̀ bɛnìtìbɛ̀ɛ kù bɑntɛ́. 
\v 12 Kù dɔ́ ti yóu mɛyɛi mmɛ nɛ̀ kutenkù kó mɛyɛ̀mmɛ̀, kɛ̀ ti borimɛ nwenni kɛ̀ tí nnɔ nkɛ pĩĩ ntimɑ́ɑ̀, kɛ dɔɔri Kuyie ndɔ́mɛ̀, 
\v 13 kɛ́nkémmúnɛ̀ diyiè diɛrì ti bɑɑ dì. Dɛ kó diyiè Kuyie ndiɛkù, ti Yiɛ̀ nYesu Kirisi odɛɛtíwè bo feítɛ́ní dì nɛ̀ tikpetì. 
\v 14 Ò duɔ́ nhomɑ́ɑ̀ ndi kɛ̀ bɛ̀ ò kùɔ ti yɛi nkpɛ́í, kòò ti dɛɛtɛ́, kɛ ti wénkùnnɛ, kɛ̀ ti tú o kɔbɛ, kɛ dɔ́ mɛsɑ̀ɑ̀ nkɛ mɛ̀ dɔ̀ɔ̀ri.
\p
\v 15 A dò nkɛ́ ntì mbɛ̀ tiè nnɛ̀ muwɛ̃rímú kɛ nyɑ́úkùnko bɛ kɔ̃̀ntì, kɛ̀ bɛ̀ ndɔɔri ti yɛ̃ mmù, Kuyie nkuù dɑ duɔ́ ndɛ kó mutɔ̃mmú, bɑ́ɑ́ yie nkòò mɔùu senkɛ̀rì ɑ tié.
\c 3
\s1 Kirisi kɔbɛ dò nkɛ́ndòmmɛ̀
\p
\v 1 Nɑ́kɛ́ bɛ kɛ̀ bɛ̀ ndé kɛtenkɛ̀ yɛmbɛ̀ nɛ̀ bɛkpɑ̀ɑ̀tìbɛ̀, kɛ́nyíé mbɛ kpɛti, kɛ́mpĩ́ mmutɔ̃mmú kɛ̀ dɛ̀ wenni. 
\v 2 Bɛ̀ bɑ́ mmɔkɛ tisĩ́ntɛnɑ́ɑǹtì, bɛ̀ bɑ́ nwɑnti yɛkpɑ̀rɛ̀, bɛ̀ nwɑnti bɛnìtìbɛ̀ bɛmɔu kó mɛsɑ̀ɑ̀. 
\v 3 Ti múnkɛ do tú tiyɛìntì nti, kɛ mɔkɛ mɛyɛ̀mmɛ̀ yɛimɛ, kɛ í yíé ntìmɑtì, kɛ tũ nkucɛ yɛiku, kɛ dɔ́ kutenkù kpɛrɛ dɛmɔu, kɛ dɔɔri dɛ̀ɛ̀ í wenni, kɛ ɛ̃ɛ̃nnɛ̀ titɔbɛ̀, kɛ beúnɛ̀ titɔbɛ̀. 
\v 4 Kɛ̀ Kuyie nti dɔ́ kɛ ti dɔ̀ɔ̀ mɛsɑ̀ɑ̀ nkɛ ti dɛɛtɛ́. 
\v 5 Dɛ̀ í tu ti dɔ̀ɔ̀ mɛsɑ̀ɑ̀ mmɑmɛ̀, kù ti kuɔ́ mmɛsémmɛ̀ mmɛ. Bɛ̀ ti kùnnɛ dìì mɔ̀nnì ndi mɛniɛ mMuyɑɑ́nsɑ̀ɑ̀mù ti dɔ̀ɔ̀mɛ̀ bɛnitipɑ̀mbɛ̀ kɛ ti duɔ́ mmufòmmu pɑ̀mmù. 
\v 6 Ti Yiɛ̀ nYesu Kirisi weè te kɛ̀ Kuyie nti duɔ́ mMuyɑɑ́nsɑ̀ɑ̀mù mɛdiɛ̀. 
\v 7 Ku kó mɛsɑ̀ɑ̀ mmɛɛ̀ te kɛ̀ ti wenkɛ, kɛ bɑɑ mufòmmu mùù bo sɑ̃́ɑ̃̀ kù yɛ̃ nkù yóó ti duɔ́ mmù. 
\v 8 Dɛ kó tinɑ́ɑǹtì tu timɔ́mmɔnti nti kɛ̀ n dɔ́ ɑ tì mbɛ̀ tié nkɛ̀ bɛ̀ɛ tì cɔutɛ́ kɛ̀ tìi bɛ̀ teennɛ̀, kɛ̀ bɛ̀ ndɔɔri mɛsɑ̀ɑ̀ ndɛ̀ɛ̀ wenni kɛ yóó teennɛ̀ bɛnìtìbɛ̀. 
\v 9 Á bɑ́ nkɔkɛ́ tisĩ́ntɛ́nɛìtì miɛkɛ: Ifukɛ kó tinɛìtì nɛ̀ Sifubɛ kó ikuɔ́, dɛ ce nyɛkpɑ̀rɛ̀ nyɛ, dɛ̀ í teennɛ̀ mùmɑmù. 
\v 10 Kòò mɔù totírí Kirisi kɔbɛ, ɑ́ ò cɑu nkucɛ mɛ̀dɛ́mɛ̀ kòo yetɛ ɑ́ ò bɛ̀ti. 
\v 11 Dɛ yiɛ̀ nkó kubotí fetimu, kɛ dɔɔri mɛyɛi nkɛ cɑɑ̀ri omɑ́ɑ̀.
\s1 Mucɑummu
\p
\v 12 Kɛ̀ n tɔ̃nko Atɛmɑɑ yoo Tisiki. Á kɔtɛní mɛcɑ̃ɑ̃ Nikɔpɔdiisi n yó ndɛ mbo diyɔ̃ɔ̃̀. 
\v 13 Teennɛ̀ Senɑɑsi obeéntì nɛ̀ Apodoosi kɛ̀ bɛ̀ɛ kɔtɛ kupɔ̀ɔ̀kù kɛ̀ dɛ̀mɑrɛ̀ bɑ́ɑ́ bɛ̀ dòńtɛ́. 
\v 14 Ti kɔbɛ múnkɛ dò nkɛ́ndɔɔrimu mɛsɑ̀ɑ̀, kɛ teennɛ̀ bɛnìtìbɛ̀ bɛ̀ɛ̀ bo ticĩ̀tì miɛkɛ kɛ bɑ́ɑ́ sɔ̃́ntɛ́ kɛ́mbo dɛtetìrɛ̀.
\p
\v 15 Kirisi kɔbɛ bɛ̀ɛ̀ bo diɛ mbɛ̀ dɑ dɔunko. Á dɔunko Kirisi kɔbɛ bɛ̀ɛ̀ bo di ciɛ.
\p Kuyie nkó mɛsɑ̀ɑ̀ nní ndi bonɛ̀ dimɔu!