\id SNG di22.all Novembre 1998 BJ Parakou B{enin
\ide UTF-8
\h Fɛcɑnyɛ̀nfɛ̀
\toc1 Fɛcɑnyɛ̀nfɛ̀
\toc2 FƐCANYƐ̀NFƐ̀
\mt1 Fɛcɑnyɛ̀nfɛ̀
\imt1 Di ḿpɑ́tíri tɔ tìì nɑ́ɑǹtì
\ip Wèè wɑ̃̀ri dɛ kó iyiɛ mbɛnìtìbɛ̀ yɛ̀mmɛ̀ dò nSɑdomɔɔ nwe kɛ bɛ yu dɛ kó iyiɛ nkɛ tú fɛcɑnyɛ̀nfɛ̀, kɛ yɛ̃́ dɛ kó fɛyɛ̀nfɛ̀ miɛkɛ nkɛ bɛ̀ nɑ̀ɑ́ mmɛ̀ mɛdɔ́kùmɛ̀ kó tinɑ́ɑǹtì: Osɑpɑ̀ɑ̀ nnɛ̀ odɑpɑ̀ɑ̀ nkɛ̀ bɛ̀ nɑ̀ɑ́ nkɛ tiètì bɛtɔbɛ̀ mɛdɔ́kùmɛ̀ kó tinɑ́ɑǹtì.
\ip Dɛ kó dipɑ́tíri tú mɛdonnimɛ̀ kpɛri ndi. Kɛ dɔ́ kɛ bɛnkɛ mɛdɔ́kùmɛ̀ mɛ̀ɛ̀ bo Kirisi nɛ̀ diwedɔuntĩ̀nnì bɛ cuokɛ̀. Dɛ kó dipɑ́tíri nɛ́ í bo kɛ bo bɛnkɛ mɛɛ̀ mɑ́ɑ̀, kɛ nsɑ̀ kɛ ti yie nkɛ dò nKuyie nkuù dɔ̀ɔ̀ onitidɔ̀ù nɛ̀ onitipòkù kɛ̀ bɛ̀ bo bɛtɔbɛ̀ kpɛ́í kɛ́ndònnɛ̀ ti wɑ̃̀rimɛ̀ Tenketɛ́ 2:23-25. Kɛ̀ ti kɑ̀ɑ ndɛ kó iyiɛ mmɛsɑ̀ɑ̀ nti bo yɑ̀ ì dɔ́mɛ̀ kɛ́ ti bɛnkɛ mɛdɔ́kùmɛ̀ do dò nkɛ́ndòmmɛ̀ mmɛ, kɛ́ bɑ́ ncɑ̃́nnì cɑ̃́nnì. Dɛɛ̀ te kɛ̀ Kuyie nduɔ́ nkɛ̀ bɛ keutɛ́ dɛ kó fɛyɛ̀nfɛ̀ kɛ fɛ̀ bo nti teennɛ̀.
\c 1
\p
\v 1 Sɑdomɔɔ wɑ̃̀ri fɛ̀ɛ̀ cɑnyɛ̀nfɛ̀.
\s1 Bɛ̀ɛ̀ dɔ́ bɛtɔbɛ̀ bɛ̀ nɑ̀ɑ́mmɛ̀
\sp (Osɑpɑ̀ɑ̀ mbɛ́i ntì)
\q1
\v 2 Á nh ɔrí,
\q1 ɔrí mí nwe,
\q1 n dɑ dɔ́ kɛ̀ dɛ̀ m muɔ́mmu kɛ pɛ̃ɛ̃tɛ́ mɛnɑɑ̀.
\q1
\v 3 A fɔ̃ɔ̃ku dònnɛ̀ tùdɑ̀ɑ̀rí kɔku nku,
\q1 ɑ yètìrì tu tùdɑ̀ɑ̀rí nwe,
\q1 dɛɛ̀ te kɛ̀ isɑmpùmbí dɑ dɔ́.
\q1
\v 4 N yṹɔ̃́nko ɑ borɛ̀ kɛ̀ ti cokɛ́
\q1 okpɑ̀ɑ̀tì ń tɑnnɛ́ ɑ cĩ́ɛ̃̀tɛ̀,
\q1 dɛ̀ bo nti nɑɑti tidɛ́, kɛ̀ tí nwɛi,
\q1 n dɑ dɔ́ kɛ̀ dɛ̀ m muɔ́mmu kɛ pɛ̃ɛ̃tɛ́ mɛnɑɑ̀.
\q1 Isɑpùmbí nɑɑtimu, ì mɛ̀ ndɑ dɔ́mɛ̀.
\b
\q1
\v 5 N sɔùmu, kɛ nɛ́ wenni,
\q1 n wenni kɛ dònnɛ̀ Kedɑɑ ɛì kó tiyɑ̀ɑ̀tì nti,
\q1 kɛ dònnɛ̀ Sɑdomɔɔ cĩ́ɛ̃̀tɛ̀ kó tiyɑɑ̀sɑ̀ɑ̀tì.
\b
\q1 Sedisɑdɛmmu ɛì kó bɛsɑpɑ̀mbɛ̀,
\q1
\v 6 Bɑ́ ndɑkɛnɛ̀ nkɔ̃nsɔ̀ùtì kpɛti,
\q1 diyiè diì n tùɔ
\q1 n yɔ̃fũ̀ɔ̃̀ kɔbɛ miɛkɛ kɛɛ̀ m pɛ́ì
\q1 kɛ̀ bɛ̀ m bɑ̀nnɛ dɛtie mbɛ̀ tu dɛ̀ fínyĩ̀.
\q1 N kpɛrɛ bomu m mɛ nyí dɛ̀ bɑ̀ɑ.
\b
\q1
\v 7 Fɔ̃́ n dɔ́ wè ɑ nɛ́ n nɑ́kɛ́,
\q1 ɑ kɔrinɛ̀ kɛ̀ ɑ wũɔ̃ kɛ bo ì cɛ̃mmú.
\q1 Diyiè bo nyóó cónnɛ́ yɛyɔ kɑ̀ɑ ì ompùnnɛ dɛ?
\q1 Kɛ̀ dɛ̀ɛ yié nkɛ̀ m bɑ́ nh ɑ̃́ɑ̃́ nhɑ nɛ́pobɛ̀ wũɔ̃cɛ̃nku miɛkɛ.
\sp (Bɛnɑɑcɛ̃mbɛ bɛ́i ntì)
\q1
\v 8 Kɑ̀ɑ í kù yɛ̃́ fɔ̃́ mbɛnitipowennibɛ kóo wenniwe,
\q1 yɛ̀roo kɛ́tũnnɛ ipe kó yɛnɑcɛ̀nɑ̀,
\q1 kɛ́ncɛ̃mmú ɑ bɔbí kɛ́kɔtɛ bɛnɑɑcɛ̃mbɛ kó titouti borɛ̀.
\sp (Onitidɔ̀ù bɛ́i ntì)
\q1
\v 9 A wenni kɛ dònnɛ̀ Esibiti kóo kpɑ̀ɑ̀tì kó tɛsɑ̃ntɛ̀
\q1 tɛ̀ɛ̀ dɛ̀ri okpɑ̀rìnɑɑsɑ̃ntɛ̀ ntɛ.
\q1
\v 10 A ììkɛ̀ yienɛ̀mu yɛtootɔ̃rɛ
\q1 kɑ̀ɑ fɔ̃̀níí yiennɛ̀ mɛdɛ̀ì.
\sp (Bɛnɑɑcɛ̃mbɛ bɛ́i ntì)
\q1
\v 11 Ti yóó dɑ dɔ̀ɔ̀ mɛsɔɔ nkó mɛdɛ̀ì mmɛ,
\q1 kɛ́ mɛ dɑ̀ri timɑ́tì pɛ́ítì.
\sp (Osɑpɑ̀ɑ̀ mbɛ́i ntì)
\q1
\v 12 Okpɑ̀ɑ̀tì bonɛ̀mu o kɔbɛ
\q1 kɛ̀ n kó mɛteniɛ nfɔ̃ɔ̃mɛ kó kufɔ̃ɔ̃ku yiɛ̀.
\q1
\v 13 Odɑsɑ́ɑ́tì n yɛ̀mmɛ̀ kou ɑ dò m borɛ̀ tùdɑ̀ɑ̀rí
\q1 bɛ̀ tu wè míírì o kó fɛbɑtifɛ nfɛ.
\q1 Kɛyènkɛ̀ ɑ ɔ̃ nduɔ́ m mɛ sɑku nku.
\q1
\v 14 N dɑcɛ̃nnì n yɛ̀mmɛ̀ kou
\q1 ɑ dònnɛ̀ mutie bɛ̀ tu mù ɛnnɛ́ɛ̀ mu kó mupóó mmu,
\q1 mùù bo fínyĩ̀ kó kupɑku miɛkɛ.
\sp (Onitidɔ̀ù bɛ́i ntì)
\q1
\v 15 M pocɛ̃nnì n yɛ̀mmɛ̀ kou ɑ wennimu,
\q1 kɛ mɛ̀nkɛ wenni.
\q1 Kɑ̀ɑ nuɔ ndò nfɛduonfɛ kpɛyi.
\sp (Osɑpɑ̀ɑ̀ mbɛ́i ntì)
\q1
\v 16 N dɑcɛ̃nnì fɔ̃́, ɑ wennimu kɛ mɛ̀nkɛ wenni.
\q1 Ti kó didɔ́ù yɔ̀ɔ̀ nkɛ dònnɛ̀ tifɑ̃ɑ̃̀bɛ́ntì nti.
\q1
\v 17 Ti kó tɛcĩ́ɛ̃̀tɛ̀ kó yɛsɑ̃ǹkɛ̀ tu sɛ́tìrì kó dɛtie ndɛ,
\q1 kɛ̀ ti cĩ́ɛ̃̀tɛ̀ kó itempìeti tú dɛtie mbɛ̀ tu dɛ̀ sìpɛ̀rɛ́sì dɛ kó tidɑbɛɛtì.
\c 2
\q1
\v 1 Kɛ̀ mí n tú mutepóó mmùù bo Sɑnɔɔ biriku miɛkɛ,
\q1 nɛ̀ bɛ̀ tu mù ɑdìmɔ́nnì.
\sp (Onitidɔ̀ù bɛ́i ntì)
\q1
\v 2 Mutepóó nhɔ̃ nwenni kɛ dòmmɛ̀ tipotì miɛkɛ,
\q1 m pocɛ̃nnì ɑ mɛ ndò mbɛnitipòbɛ̀ tɔbɛ̀ miɛkɛ.
\sp (Osɑpɑ̀ɑ̀ mbɛ́i ntì)
\q1
\v 3 N dɑcɛ̃nnì ɑ dònnɛ̀ mutie bɛ̀ tu mù pɔmmiè mùmmu,
\q1 kɛ sokɛ́ dɛtie ncuokɛ̀.
\q1 N dɑcɛ̃nnì ɑ mɛ ndò mbɛnitidɑɑbɛ̀ tɔbɛ̀ cuokɛ̀,
\q1 kɛ̀ nh ɔ̃ ndɔ́ kɛ́nkɑri ɑ dɛ́ɛ̀,
\q1 kɑ̀ɑ tebɛ nɑɑti kɛ n duɔ̀ ndiwɛ̀ì.
\q1
\v 4 Fɔ̃́ɔ̃̀ n niitɛ́ dibɑnni kó tɛcĩ́ɛ̃̀tɛ̀,
\q1 ɑ n cɑ̀nnɛ mɛ̀ɛ̀ cɑnnimɛ̀ tu ɑ n dɔ́mɛ̀.
\q1
\v 5 Á nni nduɔ̀ nfínyĩ̀ kó yɛbɛ kó yɛkɑ̀tìndɑ̀ kɛ̀ dɛ̀ n teénnɛ̀
\q1 n duɔ́ nyɛtebɛ bɛ̀ tu yɛ̀ pɔ́mmù kɛ̀ m pɛ́tɛ́ muwɛ̃rímú,
\q1 n dɑ dɔ́mu kɛ̀ dɛ̀ tontɛ́ kɛ n duɔ́ mmumɔmmú,
\q1
\v 6 A nɔ̀ùtɛ̀ cɑ̃̀nkutɛ̀ nceú n yuu
\q1 kɛ̀ tɛyoutɛ nh ɔrí.
\sp (Onitidɔ̀ù bɛ́i ntì)
\q1
\v 7 N di bɑ́ɑ́mmu díndi Sedisɑdɛmmu kó isɑpùmbí,
\q1 kɛ tú nɛ̀ iwɑurìi kó diyètìrì nɛ̀ siweí sìì bo dikpɑ́ɑ̀,
\q1 kɛ tú di bɑ́ɑ́ entɛ mɛdɔ́kùmɛ̀
\q1 di bɑ́ɑ́ mɛ̀ dɑ̀ńtɛ́ kɛ̀ mɛ mɔ̀nnì mu nyí tùɔ̀kɛ.
\sp (Osɑpɑ̀ɑ̀ mbɛ́i ntì)
\q1
\v 8 M bɑɑ̀ n dɑcɛ̃nnì ndi,
\q1 ntɛ di kɛ kéríní,
\q1 kɛ putìní yɛtɑ̃rɛ̀ ĩ́nkɛ̀,
\q1 kɛ buríní sitɑ̃ɑ̃́ ĩ́nkɛ̀,
\q1
\v 9 N dɑcɛ̃nnì dònnɛ̀ fɛwɑurìfɛ̀ nfɛ,
\q1 kɛ dònnɛ̀ kupɛriniku.
\q1 Ntɛ we kɛ cómmú ti cĩ́ɛ̃̀tɛ̀ donfũ̀ɔ̃̀
\q1 kɛ dommúní tɛcĩ́ɛ̃̀tɛ̀ kóo fenɛ́tì,
\q1 kɛ síetɛ fenɛ́tìbɛ̀ bɛ̀ɛ̀ ɑ̃ sidii,
\q1
\v 10 n dɑcɛ̃nnì n nɑ̀ɑ́nnɛ̀mu kɛ tú:
\q1 M pocɛ̃nnì, n cɑ̀ɑ̀, ítɛ́, kɔtɛní.
\q1
\v 11 Diyɔ̃ɔ̃̀ dèèmu,
\q1 fɛtɑɑfɛ̀ tɛ̃́nkɛ í niu,
\q1 fɛtɑɑfɛ̀ kòmmu,
\q1
\v 12 ti kó kɛtenkɛ̀ dɛtie mpòrímu,
\q1 iyiɛ nkó dimɔ̀nnì diì tùɔ̀kɛ,
\q1 kɛ̀ ti yo tɛnɔ́nkpetɛ dɑbònnì ti ɛì miɛkɛ.
\q1
\v 13 Dɛtie mbɛ̀ tu dɛ̀ fìkíè pɛitɛ́mu yɛbɛ ketiyɛ̀,
\q1 dɛtɛrɛ̀ bɛ̀ tu dɛ̀ fínyĩ̀ kɛ̀ dɛ póó nkó kufɔ̃ɔ̃ku yiɛ̀
\q1 ítɛ́ fɔ̃́ n cɑ̀ɑ̀, m pocɛ̃nnì kɔtɛní.
\q1
\v 14 N kó fɛpoduonfɛ fɛ̀ɛ̀ yĩɛ̃́ n yɛpèrɛ̀ fíè,
\q1 kɛ sɔri itɑ̃yiɛ mmiɛkɛ,
\q1 m bɛnkɛ ɑ ììkɛ̀,
\q1 bɛ́i nkɛ̀ n kèè ɑ tɑmmɛ̀,
\q1 ɑ tɑmmɛ̀ wɛ̀ɛ̀timu,
\q1 kɑ̀ɑ ììkɛ̀ wenni.
\sp (Onitipòkù yɔ̃ bɛ́i ntì)
\q1
\v 15 Ti pĩ́mmúnɛ̀ iɑ̃nkɛ́,
\q1 ti pĩ́mmúnɛ̀ iɑ̃nkɛ́ kó ibí,
\q1 ì cɑ̀ɑ̀ri fínyĩ̀ tie ndɛ,
\q1 fínyĩ̀ tie ndɛɛ̀ pòrí kɛ̀ ì dɛ̀ cɑ̀ɑ̀ri.
\sp (Osɑpɑ̀ɑ̀ bɛ́i ntì)
\q1
\v 16 N dɑcɛ̃nnì n duɔ́mmu dimɑ́ɑ̀,
\q1 kɛ̀ n dì duɔ́ m mɑ́ɑ̀,
\q1 di cɛ̃mmú di pe nyi mutepóó m miɛkɛ,
\q1
\v 17 N cɑ̀ɑ̀ ndònnɛ̀ fɛpɛrifɛ̀ nifɛ nfɛ,
\q1 cokɛ́ kɛ́cɑ̃́ntɛ́ yɛtɑ̃rɛ̀,
\q1 kɛ́kɔtɛní m borɛ̀ kɛ̀ diyiè mu nyí tònkɛ̀,
\q1 kɛ̀ mɛdɛ́ɛ̀ mmu nyí pɛ̃ɛ̃tɛ́.
\c 3
\s1 Osɑpɑ̀ɑ̀ nwɑntimɛ̀ ò dɔ́ wè
\sp (Osɑpɑ̀ɑ̀ mbɛ́i ntì)
\q1
\v 1 N duɔ́mu kɛyènkɛ̀ n dɔ́ù kɛ wɑnti n yɛ̀mmɛ̀ dɔ́ wè,
\q1 kɛ mɛ̀nkɛ ò wɑmmú m mɛ nyí ò yɑ̀,
\q1
\v 2 kɛ mɛ ǹyìtɛ́ kɛ cè ndihɛì,
\q1 kɛ tũ̀nnɛ icɛ, kɛ cè yɛcɛ̃kɑrɛ̀,
\q1 kɛ wɑnti n yɛ̀mmɛ̀ dɔ́ wè,
\q1 kɛ mɛ̀nkɛ ò wɑmmú bɑ́ n yí ò kɔ̃ṹ fɛnɔ̀nfɛ̀.
\q1
\v 3 Kɛ mɑutinɛ̀ bɛhɛikɛ̀mbɑ̀rìbɛ̀ bɛ̀ɛ̀ pɑkɛ́ dihɛì,
\q1 kɛ bɛ̀ bekútɛ kɛ̀ n tú di yɑ̀ n yɛ̀mmɛ̀ dɔ́ wèɑ̀?
\q1
\v 4 Kɛ̀ nní mbo kɛ yóó bɛ̀ pɛ̃ɛ̃tóo kɛ́yɑ̀ n yɛ̀mmɛ̀ dɔ́ wè,
\q1 kóò pĩ mbɑ́ ò tɛ̃́nkɛ í nfìtɛ́ n nɔ̀ùtɛ̀ miɛkɛ,
\q1 kɛ̀ nh ò tɑnnɛ́ n yɔ̃ cĩ́ɛ̃̀tɛ̀ miɛkɛ,
\q1 kudieku n yɔ̃ do m pùó nkùù miɛkɛ.
\q1
\v 5 N di bɑ́ɑ́mmu díndi Sedisɑdɛmmu ɛì kó isɑpùmbí,
\q1 kɛ̀ n tú nɛ̀ iwɑurìi kó diyètìrì,
\q1 nɛ̀ siweí sìì bo dikpɑ́ɑ̀ si kó diyètìrì,
\q1 di bɑ́ɑ́ entɛ n dɔ́kùmɛ̀
\q1 di bɑ́ɑ́ mɛ̀ dɑ̀ńtɛ́ kɛ̀ mɛ mɔ̀nnì mu nyí tùɔ̀kɛ.
\sp (Osɑpɑ̀ɑ̀ bɛ́i ntì)
\q1
\v 6 We nkèríní dikpɑ́ɑ̀ bíɛ́kɛ̀,
\q1 kɛ fĩ nkɛ dò nkuyukú,
\q1 kɛ fɔ̃ɔ̃ńnì kɛ dò ntùdɑ̀ɑ̀rí
\q1 bɛ̀ tu wè míírì nɛ̀ ɑ̃̀nsɑ̃́ɑ̃̀,
\q1 kòo fɔ̃ɔ̃ku dònnɛ̀ tùdɑ̀ɑ̀rí kɔku.
\q1
\v 7 Ntɛ okpɑ̀ɑ̀tì Sɑdomɔɔ kó kumìɛ̀kù,
\q1 kɛ̀ yɛkɔ̃m̀bɔ̀ yɛmbɛ̀ sipísìkuɔ̀ kù cɛ̃̀ɛ̃̀tɛ,
\q1 Isidɑyɛɛribɛ kó yɛkɔ̃m̀bɔ̀ yɛmbɛ̀ mbɛ.
\q1
\v 8 Bɛmɔu kɛ̀ bɛ̀ pikú tikpɑ̀rìseuti
\q1 kɛ wɑ̃kɛ́ mudoò kpɛ́í,
\q1 bɑ́ wè kòò yi o kpɑ̀rìsiè
\q1 kɛ bo mbɑɑnɛ̀ omɑ́ɑ̀ kɛyènkɛ̀.
\q1
\v 9 Okpɑ̀ɑ̀tì Sɑdomɔɔ duɔ́ nkɛ̀ bɛ̀ ò dɔ̀ɔ̀ didɔ́ù,
\q1 nɛ̀ Dimɑ́ɑ̀ tùúkù kó dɛtekperɛ̀ kó tidɑbɛɛtì ntì.
\q1
\v 10 Kɛ̀ di tɑ̀ɑ̀kɛ tú timɑ́tì pɛ́ítì,
\q1 kòo bɑɑ̀ nyó nyĩkú dɛ̀ tu mɛsɔɔ,
\q1 kòò yóó nkɑrì dɛ̀ tu tiyɑɑ̀kpetì,
\q1 kɛ̀ Sedisɑdɛmmu ɛì kó bɛsɑpɑ̀mbɛ̀
\q1 dì sɑ̃̀rinɛ̀ mɛdɔ́kùmɛ̀.
\q1
\v 11 Sedisɑdɛmmu ɛì kó bɛsɑpɑ̀mbɛ̀,
\q1 kɔtɛnɛ̀ní kɛ́yɑ̀ okpɑ̀ɑ̀tì Sɑdomɔɔ,
\q1 ò ìrí mupotúòmù kó fɛítòòdɑ́fɛ̀ nfɛ,
\q1 o yɔ̃ ò duɔ́ nfɛ̀ ò cɛ̃nnɛ́ dìì yiè.
\q1 O wɛ̀ì kó diyiè.
\c 4
\sp (Onitidɔ̀ù bɛ́i ntì)
\q1
\v 1 N cɑ̀ɑ̀ nhɑ wennimu,
\q1 ɑ tú oposɑ́ɑ́tì nwe,
\q1 ɑ ɔ̃ ndɑ́ɑ́tí kuyɑ̀ɑ̀kù
\q1 kɑ̀ɑ nɔmbii ndònnɛ̀ fɛduonfɛ kɔ̃mɛ mmɛ.
\q1 Kɑ̀ɑ yùtì dònnɛ̀ yɛbɔdɑkɛ̀
\q1 yɛ̀ɛ̀ pùù yɛtɑ̃rɛ̀ ĩ́nkɛ̀.
\q1
\v 2 Kɑ̀ɑ nìì mpɛ̀íkù dònnɛ̀ kupecɛ̃nku,
\q1 bɛ̀ kɛ̃ĩ́ ìì pe kó ticìtì
\q1 kɛ ì wùɔ̀ kɛ̀ ì yɛ̀tìní.
\q1 Imɔu kɛ̀ ì dò nhɛ̀rɛ,
\q1 kɛ bo imɔu bɑ́ fɛ̀mɑfɛ̀ í kpɑ.
\q1
\v 3 A bìɛ̀ ndònnɛ̀ kuyɑɑ̀wũɔ̃kù nku,
\q1 kɑ̀ɑ nɔ́ndɛnfɛ̀ wenni,
\q1 ɑ ɔ̃ nkɑ̀ɑ dɑ́ɑ́tí kuyɑ̀ɑ̀kù
\q1 ɑ bɑɑ̀ nní ndònnɛ̀ yɛtebɛ
\q1 bɛ̀ tu yɛ̀ kèdènɑ́tì yɛ̀ kó diyɑtirì ndi.
\q1
\v 4 Kɑ̀ɑ fɔ̃̀níí dònnɛ̀ Dɑfiti kó didènnì,
\q1 bɛ̀ mɑɑ́ dì kɛ̀ dì dò ncírícírí,
\q1 kɛ̀ tidɔpììtì tɛkɔupíítɛ̀ (1000) dì nùú.
\q1 Bɛkpɑ̀rìnuɔmbɛ kó tidɔpììtì.
\q1
\v 5 A mɛ yɛdɛ́ dònnɛ̀ kupɛriniku nku,
\q1 kɛ dònnɛ̀ fɛwɑurìfɛ̀ kó yɛtɑ́ɑ́tɛ́bɛ,
\q1 yɛ̀ɛ̀ cèntì mutepóó nhɑ̃ dɛ̀.
\q1
\v 6 Diyiè bo nkpɑɑ́ kɛ í tònkɛ̀,
\q1 kɛ̀ mɛdɛ́ɛ̀ mmu nyí pɛ̃ɛ̃tɛ́ kɛ̀ n kɔtoomu,
\q1 míírì tie mbɛ̀ dɔ̀ɔ̀rinɛ̀ dɛ̀ tùdɑ̀ɑ̀rí dɛ̀ bo dìì tɑ̃rì,
\q1 tihúúntì tie, bɛ̀ tu tì ɑ̃̀nsɑ̃́ɑ̃̀ kó tɛtɑ̃tɛ̀.
\q1
\v 7 A tú osɑpùnsɑ́ɑ́tì nwe,
\q1 n cɑ̀ɑ̀ nhɑ í ɑ̃ kuyɛ̀nkù kupíkù mɑkù.
\b
\q1
\v 8 Fɔ̃́ m pocɛ̃nnì, ítɛ́ní kutúúkù Dimɑɑ
\q1 kɛ́kɔtɛní kɛ̀ tí nnɛí,
\q1 ɑ itinímu Amɑnɑ kɛ̀ ti bo nnɛí,
\q1 ítɛ́ní ditɑ̃rì Seii nɛ̀ Ɛdimɔnni kpɛri.
\q1 Cokɛ́nɛ̀ yɛcìrícìrɛ̀ kɛ́kɔtɛní.
\q1 Dɛ kó yɛtɑ̃rɛ̀ tu yɛkpɑmɑɑ̀ nkpɛyɛ nyɛ.
\q1
\v 9 A tɑ n yɛ̀mmɛ̀ mmɛ n tɑ̃ũ̀, m pocɛ̃nnì,
\q1 ɑ n wèńtɛ́ kucɛ mɛ̀mɑ́ɑ̀ ndi
\q1 kɛ̀ n yɛ̀mmɛ̀ kɛ̃ɛ̃́ nkɛ dɑ tɑ,
\q1 mɛdɛ̀ì nhɑ dúúkúmɛ̀ mɛɛ̀ yũ̀ɔ̃́ n yɛ̀mmɛ̀.
\q1
\v 10 N cɑ̀ɑ̀ nhɑ kɑ́ɑm̀mù n nɑɑtimu,
\q1 ɑ kɑ́ɑm̀mù ɔ̃ nni nnɑɑtimu kɛ pɛ̃ɛ̃tɛ́ mɛnɑɑ̀,
\q1 ɑ kó kufɔ̃ɔ̃ku n nɑɑtimu
\q1 kɛ pɛ̃ɛ̃tɛ́ tùdɑ̀ɑ̀ríbɛ̀ bɛmɔu.
\q1
\v 11 M pocɛ̃nnì ɑ bìɛ̀ n wɛ̀ɛtimu,
\q1 mɛcekùɔ̀ ndòmmɛ̀,
\q1 ɑ nɔ́ndɛnkù dò nkù ɑ̃ mɛcekùɔ̀ mmɛ nɛ̀ mɛnɑɑmiɛ̀,
\q1 ɑ yɑɑ̀bòrɛ̀ fɔ̃ɔ̃ku dònnɛ̀ kutúúkù Dimɑɑ
\q1 kó kufɔ̃ɔ̃ku nku.
\q1
\v 12 N tɑ̃ũ̀, m pocɛ̃nnì, ɑ dònnɛ̀ dikũmpúrì sɑ̀ɑ̀rì ndi
\q1 dìì dìti,
\q1 m mɑ́ɑ̀ n kó tɛbintɛ, m mɑ́ɑ̀ n kó dinɛ́bòrì.
\q1
\v 13 A boomu kɛ dònnɛ̀ dɛtie mbɛ̀ tu dɛ̀ kèdènɑ́tì
\q1 dɛ̀ɛ̀ bo kupúú sɑ̀ɑ̀kù,
\q1 kɛ pɛí yɛbɛ kɛ̀ yɛ̀ nɑɑti,
\q1 kɑ̀ɑ fɔ̃ɔ̃ku dònnɛ̀ tùdɑ̀ɑ̀rí bɛ̀ tu wè ɛdéè.
\q1
\v 14 A kó kufɔ̃ɔ̃ku dònnɛ̀ tùdɑ̀ɑ̀rí
\q1 bɛ̀ dɔ̀ɔ̀nɛ̀ wè nwe dɛtie mbɛ̀ tu dɛ̀ nɑ́ɑ́rì
\q1 nɛ̀ dodiè nɛ̀ kɑ̀nɛ́dì nɛ̀ míírì nɛ̀ ɑ̀dòwɛ́ɛ̀
\q1 nɛ̀ dɛtɛrɛ̀ dɛ̀ɛ̀ kó dimɑ̀ɑ̀ fɔ̃̀ɔ̃́tí.
\q1
\v 15 Kɛ dònnɛ̀ kupúú kó tɛbintɛ,
\q1 kɛ dònnɛ̀ mɛnɛ́sɑ̀ɑ̀mɛ̀ kó tɛmintɛ
\q1 tɛ̀ɛ̀ pũɔ̃̀nní Dimɑɑ túúkù kó ditennì.
\sp (Osɑpɑ̀ɑ̀ mbɛ́i ntì)
\q1
\v 16 Kubɑkù yoú kó muyɑɑ́
\q1 nɛ̀ kubɑkù cɑ̃̀nku kɔ̃mu kɔtɛnɛ̀ní
\q1 kɛ́fuutɛ n kũmpúú,
\q1 kɛ̀ kufɔ̃ɔ̃kuu dɑ́tínnɛ́,
\q1 fɔ̃́ n dɑcɛ̃nnì kɔtɛní ɑ púú miɛkɛ
\q1 kɛ́di ɑ tebɛ sɑ̀ɑ̀yɛ̀, yɛnɑtiyɛ̀.
\c 5
\sp (Onitidɔ̀ù bɛ́i ntì)
\q1
\v 1 N tɑtimu n kũmpúú miɛkɛ,
\q1 fɔ̃́ n tɑ̃ũ̀, m pocɛ̃nnì,
\q1 kɛ bo tɔ̃ũ míírì nɛ̀ ɑdòmɑ́tì,
\q1 kɛ́dinɛ̀ n ciètì kɛ́yɑ̃̀ n nɑɑ̀ ndifɛ̃́ɛ̃̀ nɛ̀ n nɑɑmiɛ̀.
\sp (Onitidɔ̀ù nɛ́pobɛ̀ bɛ́i ntì)
\q1 N nɛ́pobɛ̀ yɑ̃nɛ̀ mɛdɔ́kùmɛ̀ kó mɛnɑɑ̀ nkɛ́muɔ́.
\sp (Onitipòkù bɛ́i ntì)
\q1
\v 2 N do yɛ̃̀ nkɛ́duɔ́mu kɛ̀ n yɛ̀mmɛ̀ nɛ́ nwúó,
\q1 kɛ̀ n kèè n dɑcɛ̃nnì biemmɛ̀ dicɑ̀ù kɛ tú:
\sp (Onitidɔ̀ù bɛ́i ntì)
\q1 ń kpetɛ́ n tɑ̃ũ̀, n cɑ̀ɑ̀,
\q1 fɔ̃́ n kó fɛpoduonfɛ n kóo sɑpùnsɑ́ɑ́tì,
\q1 n yuu diì dɑ̀ɑ́tí timɑɑ̀ntì,
\q1 kɛ̀ n yùtì bùútɛ́nɛ̀ tiyenkɛ̀mmɑɑ̀ntì,
\sp (onitipòkù mbɛ́i ntì)
\q1
\v 3 M bɑ̀tɛ́mu n yɑɑ̀bòrì,
\q1 m bɑ́ɑ́ nɑ kɛ́wɛ̃tɛ kɛ́ dì bɑ̀ɑ́tí!
\q1 Nh ɔ̀útɛ́mu n nɑɑ̀cɛ̀i
\q1 m bɑ́ɑ́ nɑ kɛ́wɛ̃tɛ kɛ́ sì sɑ̃ṹ,
\q1
\v 4 kɛ̀ n dɑcɛ̃nnì n yɛ̀mmɛ̀ kouu bɑɑní
\q1 o nɔ̀ùtɛ̀ dicɑ̀ù kó mɛfíè.
\q1 Kɛ̀ n kɔ̃m̀bùɔ̀tìi do.
\q1
\v 5 Kɛ̀ n yítɛ́ní kɛ́mbo kpetɛ́ n dɑcɛ̃nnì,
\q1 kɛ̀ n nɔ̀ùtɛ̀ dɑ̀ɑ́tí tùdɑ̀ɑ̀rí bɛ̀ tu wè míírì,
\q1 kɛ̀ m pĩ́ ndicɑ̀ù kó yɛ̀bɑ̀kɛ̀ kòo yɛ̀ tòri.
\q1
\v 6 Kɛ̀ n kpetɛ́ n dɑcɛ̃nnì,
\q1 kɛ nɛ́ nsɔ̃́ ndì pɛ̃ɛ̃tɛ́ bɑ́ dì í dɛ̀ kpɑɑ́,
\q1 kɛ̀ n yɛroo di wɑmmù kɛ́ dì wɑmmú kɛ́mɔ́ntɛ́,
\q1 kɛ́yú kɛ́yú, kɛ̀ dɛ̀ ndò nyúó.
\q1
\v 7 Kɛ̀ m mɑ́ɑ́nɛ̀ bɛhɛikɛ̀mbɑ̀rìbɛ̀ bɛ̀ɛ̀ bɑ̀ɑ̀ dihɛì,
\q1 kɛ̀ bɛ̀ m puotí kɛ́ n kɔutɛ kɔutɛ,
\q1 kɛ́bɑ́tɛ́ n yɑɑ̀bòrì.
\q1 Bɛmbɛ bɛ̀ɛ̀ bɑ̀ɑ̀ dihɛì kó iduotí.
\q1
\v 8 N di bɑ́ɑ́mmu Sedisɑdɛmmu kó isɑpùmbí,
\q1 kɛ̀ di mɑ́ɑ́nɛ̀ n dɑcɛ̃nnì n yɛ̀mmɛ̀ kpɛri,
\q1 di bo dì nɑ̀kɛ́ kɛ yĩ́ bɑ?
\q1 Dí dì nɑ̀kɛ́ kɛ́ yĩ́ n dì dɔ́mu
\q1 kɛ̀ dɛ̀ tontɛ́ kɛ n dɔ̀ɔ̀ mumɔmmú.
\sp (Osɑpɑ̀ɑ̀ ndúɔ̀bɛ̀ ò tɛ̃̀ńnɛ́ tì)
\q1
\v 9 Kɛ̀ bɛ̀ dɔ̀:
\q1 A dɔ́ wè ò mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀?
\q1 Fɔ̃́ nhoposɑ́ɑ́tì wèè pɛ̃ɛ̃tɛ́ bɛnitipòbɛ̀ bɛmɔu?
\q1 A dɔ́ wè mɔ̀kɛ bɑ kɛ̀ dɛ̀ pɛ̃ɛ̃tɛ́ bɛtɔbɛ̀
\q1 kɑ̀ɑ ti bɑ́ɑ́ mmɛmmɛ o kpɛ́í.
\sp (Osɑpɑ̀ɑ̀ m̀bɛ́i ntì)
\q1
\v 10 N dɑcɛ̃nnì tu tɛdɑhontɛ̀ ntɛ kɛ dò ndoii.
\q1 Bɑ́ kɛ̀ bɛnìtìbɛ̀ bo tɛkɔupíítɛ̀ (1000),
\q1 wè ncɑ̃́ɑ̃́ mbɛ miɛkɛ.
\q1
\v 11 Kòo yuu pĩnti kɛ dò mmɛsɔɔ nsɑ̀ɑ̀mɛ̀.
\q1 Kòo yùtì nɑmpú kukodɑyɔ́nkù kɔ̃mɛ
\q1 kɛ sɔù kɛ dònnɛ̀ dikɑ̃kɑ̃ɑ̃̀.
\q1
\v 12 Kòo nuɔ ndònnɛ̀ fɛduonfɛ kpɛyi,
\q1 fɛduonfɛ fɛ̀ɛ̀ bo mɛniɛ ntɑkɛ́,
\q1 kɛ pɛ́i kɛ dò mbɛ̀ ì ɔ́únɛ̀ mɛnɑɑmiɛ̀,
\q1 kɛ̀ fɛ̀ ompu mɛnɛ́sɑ̀ɑ̀mɛ̀ borɛ̀.
\q1
\v 13 Kòo bɑɑ dònnɛ̀ kupɛ̃ titieti fɔ̃ɔ̃ti buɔtí kùù ĩ́nkɛ̀,
\q1 kòo bìɛ̀ ndònnɛ̀ mutepóó.
\q1 Kɛ dò mmɛkùɔ̀ mmɛ̀ɛ̀ kɔkɛ́nɛ̀ tùdɑ̀ɑ̀rí.
\q1
\v 14 Kòò ũ mɛsɔɔ nkó dɛmɑ́mɑ́nnɛ̀
\q1 kɛ̀ dɛ̀ dɑ̀ri yɛtɑ̃́sɑ̀ɑ̀yɛ̀ bɛ̀ tu yɛ̀ sɑ̀fíírì,
\q1 kòo pɔutì dònnɛ̀ yɛpɑ́pɑ́nìì
\q1 bɛ̀ dɑ̀ri yɛ̀ yɛtɑ̃́sɑ̀ɑ̀yɛ̀ bɛ̀ tu yɛ̀ sɑ̀fíírì.
\q1
\v 15 Kòo tɑ̀ɑ̀kɛ dònnɛ̀ yɛtɑ̃́píɛ̀ kó fɛtofɛ,
\q1 kɛ̀ fɛ tɑ̀rì tu mɛsɔɔ nsɑ̀ɑ̀mɛ̀.
\q1 Kòo ììkɛ̀ wenni kɛ dònnɛ̀ kutúúkù Dimɑɑ kó dɛtie.
\q1 Kɛ cɑ̃́ɑ̃́ nkɛ dònnɛ̀ dɛtie mbɛ̀ tu dɛ̀ sɛ́tìrì.
\q1
\v 16 Kòo nùù yìɛ̀ kufɔ̃ɔ̃ku,
\q1 kɛ̀ nh ò yɑ̀ɑ́ nhomɔu.
\q1 Díndi Sedisɑdɛmmu sɑpɑ̀mbɛ̀
\q1 N dɑcɛ̃nnì n yɛ̀mmɛ̀ kou mɛ ndò,
\q1 wenwe n nɛititɔù.
\c 6
\sp (Osɑpɑ̀ɑ̀ ndúɔ̀bɛ̀ ò tɛ̃̀ńnɛ́ tì)
\q1
\v 1 Yé ɑ dɑcɛ̃nnì ɑ yɛ̀mmɛ̀ kou kɔ̀tɛ kɛ̀
\q1 fɔ̃́ mbɛposɑ́ɑ́tìbɛ̀ kóo nitiposɑ́ɑ́tì?
\q1 A dɑcɛ̃nnì ɑ yɛ̀mmɛ̀ kou cuó nhɔ̃̀nkɛ,
\q1 kɛ̀ ti dɑ teennɛ̀ kóò wɑmmú?
\sp (Osɑpɑ̀ɑ̀ mbɛ̀ tɛ̃̀ńnɛ́ tì)
\q1
\v 2 N dɑcɛ̃nnì n yɛ̀mmɛ̀ kou cùtɛ́ kukũmpúú nku,
\q1 titieti bɛ̀ dɔ̀ɔ̀ri nɛ̀ tì tùdɑ̀ɑ̀rí ti borɛ̀,
\q1 kɛ bo cɛ̃mmú o wũɔ̃ kɛ́tɔ̃ũ o tepóó.
\q1
\v 3 Mí n duɔ́mmu mmɑ́ɑ̀ n dɑcɛ̃nnì n yɛ̀mmɛ̀ kou,
\q1 kɛ̀ n dɑcɛ̃nnì n yɛ̀mmɛ̀ kpɛri n duɔ́ n dimɑ́ɑ̀,
\q1 dì cɛ̃mmú di wũɔ̃ mutepóó ncuokɛ̀ nkɛ̀.
\sp (Onitidɔ̀ù bɛí ntì)
\q1
\v 4 M pocɛ̃nnì, n cɑ̀ɑ̀, ɑ wennimu,
\q1 ɑ dònnɛ̀ Tidisɑɑ kó dihɛì ndi,
\q1 kɛ sɑ́ɑ́tí kɛ dònnɛ̀ Sedisɑdɛmmu ɛì,
\q1 kɛ toǹnì kɛ dònnɛ̀ dihɑ̃ɑ̃pɔ̀ntĩ̀nnì.
\q1
\v 5 Yóu ɑ bo nni nwúómmɛ̀,
\q1 ɑ n wúó nkɛ̀ dɛ̀ n kɔɔ́nnɛ̀mu,
\q1 ɑ yùtì dònnɛ̀ kubɔcɛ̃nku nku kùù cutiní Kɑdɑɑdi tɑ̃rì,
\q1
\v 6 A nìì ndònnɛ̀ ipe nyi kɛ̀ ì nɛí kucɛ̃nku,
\q1 kɛ̀ bɛ̀ ì wùɔ kɛ̀ ì yɛ̀tìní kukó,
\q1 imɔu kɛ dò nyì tɑ̀ɑ́tɛ́
\q1 kɛ bo imɔu fɛ̀mɑfɛ̀ í kpɑ,
\q1
\v 7 ɑ ɔ̃ ndɑ́ɑ́tí kuyɑ̀ɑ̀kù
\q1 kɑ̀ɑ bɑɑ̀ dònnɛ̀ yɛtebɛ bɛ̀ tu yɛ̀ nyɛ kèdènɑ́tì,
\q1 yɛ kó diwɛ́tirì ndi,
\b
\q1
\v 8 Okpɑ̀ɑ̀tì pobɛ̀ bo sikɔusìkuɔ̀ (600) ndi,
\q1 o pocĩɛ̃̀ nyí do nkɛ́kɑɑ nkɛ́deè,
\q1
\v 9 Bɛmɔu miɛkɛ òmɔù mɑ́ɑ̀ weè tu m pokù,
\q1 bɑ́ ò í dò nkɛ́sɛi,
\q1 o yɔ̃fũ̀ɔ̃̀ omɑ́ɑ̀ ndi,
\q1 kòo yɔ̃ ò yɑ́rí,
\q1 kɛ̀ bɛsɑpɑ̀mbɛ̀ ò yɑ̀u koò sɑ̃ntí,
\q1 kòo kpɑ̀ɑ̀tì pobɛ̀ ò dɛ̀úkùnko,
\q1
\v 10 wè nsɑpɑ̀ɑ̀ mbo yɛnní kɛ́nwenni miɛ mbotí,
\q1 we nsɑpɑ̀ɑ̀ ntu yie,
\q1 nwèè dònnɛ̀ diyennɛ́cɑ̀nnì,
\q1 kɛ pɛ́ì kɛ dònnɛ̀ otɑ̃̀nkù,
\q1 kɛ pĩnti kɛ dònnɛ̀ diyiè,
\q1 kɛ tonnì kɛ dònnɛ̀ bɛhɑ̃ɑ̃pɔ̀mbɛ̀.
\b
\q1
\v 11 N tɑti nkupúú nku dɛtie ndiɛrɛ̀ borɛ̀
\q1 kɛ bo yɑ̀ kɛ̀ nsɑ̀ kòò buɔtí dɛ̀ dipúrì dɛ̀ yìɛ̀ní,
\q1 kɛ́yɑ̀ kɛ̀ nsɑ̀ kɛ̀ dɛtie mbɛ̀ tu dɛ̀ fínyĩ̀
\q1 kɛ̀ dɛ̀ pũ̀ǹtɛ
\q1 kɛ́yɑ̀ kɛ̀ nsɑ̀ kɛ̀ kèdènɑ́tì kó dɛtie m pòrí.
\q1
\v 12 N do í yɛ̃́ kɛ dò mbɛ̀ bo n wɛ̃nnɛ́nɛ̀ sikpɑ̀ɑ̀tìbìí kɛ̀ n kɑri bɛ kpɑ̀rìsɑ̃ntɛ̀ miɛkɛ.
\sp (Bɛnitipòbɛ̀ nɛ̀ bɛsɑpɑ̀mbɛ̀ bɛ̀ nɑ̀kɛ́ tì)
\q1
\v 13 Wɛ̃tɛní, wɛ̃tɛní Sunɛmmu ɛì kóo sɑpɑ̀ɑ̀!
\q1 Wɛ̃tɛní, wɛ̃tɛní kɛ̀ ti ndɑ wúó.
\sp (Osɑpɑ̀ɑ̀ mbɛ̀ bekɛ tì)
\q1 Dɛ̀ dòmmɛ kɛ̀ di n wúó mmí nSunɛmmu ɛì kóo sɑpɑ̀ɑ̀
\q1 kɛ̀ dɛ̀ dònnɛ̀ tihɑutì kó yɛtĩ̀rɛ̀.
\c 7
\sp (Onitidɔ̀ù bɛ́i ntì)
\q1
\v 1 A nɑɑ̀cɛ̀i yiennɛ̀mu tinɛùtì,
\q1 fɔ̃́ nhokpɑ̀ɑ̀tì kóo sɑpɑ̀ɑ̀,
\q1 ɑ kɑ dònnɛ̀ oyɑ́ntì ɔ̃ɔ̃ dɔ̀ɔ̀ mɛdɛ̀ì
\q1 nkɛ̀ mɛ̀ ndòmmɛ̀ mmɛ.
\q1
\v 2 A pɛ̃ri dònnɛ̀ dibòò ndi,
\q1 mɛnɑɑ̀ nyí deu dìì miɛkɛ,
\q1 ɑ pɔutì dònnɛ̀ tidiitì bɛ̀ tu tì bèdéè
\q1 kó dicóù ndi mutepóó nfitɛ́ dì.
\q1
\v 3 Kɑ̀ɑ mɛ dònnɛ̀ fɛpɛrifɛ̀,
\q1 kɛ dònnɛ̀ tiwɑuripɑ̀ntì tìì tɑ̀ɑ́tɛ́.
\q1
\v 4 A fɔ̃̀níí dònnɛ̀ didènnì
\q1 bɛ̀ dɔ̀ɔ̀nɛ̀ dì ndi yɛpɑ́pɑ́nìì,
\q1 kɑ̀ɑ nɔmbii ndònnɛ̀ Ɛsibonni ɛì kó sibií
\q1 sìì bo ɑ bo nyɛ̀tòomɛ̀ dihɛì.
\q1 Kɑ̀ɑ ɔ̃nnì dò Dimɑɑ ɛì kó didènnì
\q1 dìì wetí Dɑmɑɑsi.
\q1
\v 5 A yuu dònnɛ̀ Kɑdimɛɛri kó ditɑ̃rì ndi,
\q1 ɑ yupɑ̃ɑ̃tí dònnɛ̀ mɛɔ̃̀rìmɛ̀ wũɔ̃mɛ̀ mmɛ,
\q1 kɛ yũɔ̃ nhokpɑ̀ɑ̀tì yɛ̀mmɛ̀.
\q1
\v 6 A wennimu kɛ tú oposɑ́ɑ́tì
\q1 kɛ̀ n yɛ̀mmɛ̀ dɑ tɑ kɛ̀ n dɑ dɔ́.
\q1
\v 7 A dò nsɛ̀rɛ̀rɛ̀ nwe kɛ dò mmupuommu,
\q1 kɑ̀ɑ mɛ dò nyɛpuo.
\q1
\v 8 Dɛɛ̀ te kɛ̀ m bɛ́i nkɛ yĩ n deètì mupuommu
\q1 kɛ bo tɔ̃ũ yɛpuo.
\q1 A mɛ dònnɛ̀ fínyĩ̀ kó yɛbɛ nyɛ,
\q1 ɑ fɔ̃ɔ̃ku dònnɛ̀ yɛtebɛ bɛ̀ tu yɛ̀ nyɛ pɔ́mmù.
\q1
\v 9 Kɛ̀ n sũ̀ɔ̃̀tɛ ɑ nùù m muɔ́ mbɛ̀ ɔ̃ɔ̃ muɔ́mmɛ̀ mɛnɑɑ̀.
\sp (Osɑpɑ̀ɑ̀ mbɛí ntì)
\b
\q1 Dɛ kó mɛnɑɑ̀ mbo n cɑ̀ɑ̀ nkpɛ́í nkɛ,
\q1 ti bo nduɔ́ dìì mɔ̀nnì kɛ mɛ̀ yɔ̃̀.
\q1
\v 10 M bo n dɑcɛ̃nnì kpɛ́í nkɛ
\q1 kɛ̀ n dɑcɛ̃nnì dɔ́kùmɛ̀ bo n yĩ́nkɛ̀.
\sp (Osɑpɑ̀ɑ̀ m̀bɛ́i ntì)
\q1
\v 11 Kɔtɛní n dɑcɛ̃nnì kɛ̀ ti kɔ̃tɛ́ dɛpɑɑ,
\q1 kɛ́nwentí sihɛkɛsí,
\q1
\v 12 kɛ̀ dɛ̀ wentɛ́ tí kɔtɛ dɛtie
\q1 mbɛ̀ tu dɛ̀ fínyĩ̀ dɛ kó kupɑku
\q1 kɛ́yɑ̀ kɛ̀ nsɑ̀ kɛ̀ dɛ kó dɛtie mpũnni,
\q1 kɛ́yɑ̀ kɛ̀ nsɑ̀ kɛ̀ dɛ̀ yɛ̀ tifɑ̃ɑ̃̀tì,
\q1 kɛ́yɑ̀ kɛ̀ nsɑ̀ kɛ̀ dɛtie
\q1 mbɛ̀ tu dɛ̀ kèdènɑ́tì kɛ̀ dɛ̀ pòrí.
\q1 Dɛborɛ̀ ndɛ n yóó dɑ bɛnkɛmɛ̀ n wɛ̀ì.
\q1
\v 13 Yɛtebɛ bɛ̀ tu mɑntidɑkɔ́ɔ̀\f + \fr 7:14 \fr*\fk mɑntidɑkɔ́ɔ̀: \fk*\ft Mutie mɑmù kó yɛbɛ nyɛ bɛ̀ do yɛ̃ nyɛ̀ɛ̀ teénnɛ̀ bɛnitipòbɛ̀ kɛ̀ bɛ̀ kɛ̀ bɛ̀ puo. Wéntɛ́ Tenketɛ́ 30:14.\ft*\f* yɛ kó kufɔ̃ɔ̃ku kuù dɑ̀ɑ́tí,
\q1 yɛtebɛ sɑ̀ɑ̀yɛ̀ yɛbotí yɛbotí yɛɛ̀ còú ti bòrì,
\q1 yɛpɑ̀ɑ̀ nnɛ̀ yɛkótɛ̀.
\q1 N dɑcɛ̃nnì n yɛ̀mmɛ̀ kou n yɛ̀ wɑɑ́ n fɔ̃́ nwe.
\c 8
\q1
\v 1 N dɔ́ ɑ nɑ ntú n tɑ̃ũ̀ nwè
\q1 nɛ̀ wè ti wɛ̃nnɛ́ ti yɔ̃ miɛ̀
\q1 kɛ̀ n dɑ mɑ́ɑ́nɛ̀ ditowɑɑ̀
\q1 kɛ dɑ ɔrí kɛ bɛnìtìbɛ̀ bɑ́ n sènkɛ̀rì.
\q1
\v 2 Kɛ̀ n dɑ tɔ kɛ́kònnɛ̀ n yɔ̃ cĩ́ɛ̃̀tɛ̀
\q1 kɑ̀ɑ n tié nyipocɛ̃ntié,
\q1 kɛ̀ n dɑ nii mmɛnɑɑ̀ mmɛ̀ɛ̀ fɔ̃ɔ̃ńnì,
\q1 n kó yɛtebɛ bɛ̀ tu yɛ̀ kèdènɑ́tì yɛ kó mɛnɑɑ̀.
\q1
\v 3 A nɔ̀ùtɛ̀ cɑ̃̀nkutɛ̀ nceú n yuu
\q1 kɛ̀ tɛyoutɛ n hɔrí.
\q1
\v 4 Sedisɑdɛmmu kó isɑpùmbí n di bɑ́ɑ́mmu,
\q1 di bɑ́ɑ́ entɛ mɛdɔ́kùmɛ̀,
\q1 di bɑ́ɑ́ mɛ̀ èntɛ kɛ̀ mɛ̀ mɔ̀nnì mu nyí tùɔ̀kɛ.
\sp (Osɑpɑ̀ɑ̀ ndúɔ̀bɛ̀ bɛ́i ntì)
\q1
\v 5 We nnitipòkù kèríní dikpɑ́ɑ̀,
\q1 kɛ pĩ́ nho dɑcɛ̃nnì?
\sp (Osɑpɑ̀ɑ̀ m̀bɛí ntì)
\q1 N dɑ èntɛ mutie bɛ̀ tu mù pɔmmié
\q1 mu fũ̀ɔ̃̀ ndi,
\q1 ɑ yɔ̃ dɑ pùó ndɛ̀,
\q1 ò dɑ pɛitɛ́ dɛ̀.
\q1
\v 6 N tɑnnɛ́ ɑ yɛ̀mmɛ̀ miɛkɛ
\q1 kɛ̀ nní ntú ɑ kó mɛcɑnnimɛ̀,
\q1 n kɑnnɛ ɑ borɛ̀,
\q1 kɛ̀ nní ndònnɛ̀ bɛ̀ fìí ndìì tɑ̃́rì
\q1 nɛ̀ ɑ kó diyètìrì,
\q1 kɑ̀ɑ nni mpíkù ɑ nɔ̀ùtɛ̀ miɛkɛ.
\q1 Mɛdɔ́kùmɛ̀ kpeńnìmu kɛ dònnɛ̀ mukṹṹ
\q1 kɛ tii kɛ dònnɛ̀ kudɔnkù,
\q1 kɛ cɔ́ú nfɛhɑ̃ɑ̃dɛɛ̀nfɛ̀ kɔ̃mɛ,
\q1 kɛ dò nti Yiɛ̀ nKuyie nkó muhɑ̃ɑ̃́.
\q1
\v 7 Yɛbirɛ diɛyɛ̀ bɑ́ɑ́ nɑ
\q1 kɛ́kuɔ ti kó mɛdɔ́kùmɛ̀ kó muhɑ̃ɑ̃́,
\q1 tibinti kó mɛniɛ mbɑ́ɑ́ nɑ kɛ́ mù dɑ̀tínnɛ́.
\q1 Kòò mɔù dènnɛ o cĩ́ɛ̃̀tɛ̀ kó tikpɑ̀tì timɔu
\q1 kɛ wɑnti kɛ bo dontɛ́ mɛdɔ́kùmɛ̀
\q1 bɛ̀ yóó ò sènkɛ̀rìmu.
\sp (Osɑpɑ̀ɑ̀ ntɑ̃bɛ̀ bɛ́i ntì)
\q1
\v 8 Ti mɔkɛ ti tɑ̃ũ̀ mɔù nwe
\q1 kòò kpɑɑ́ bɛ, ò mu nyí yɛ̀ yɛmɛ.
\q1 Ti bo yĩ́mɛ ti tɑ̃ũ̀,
\q1 bɛ̀ bo nnɑ́ɑ́ ndìì yiè o kó didɑkɛnyennì kpɛ́í?
\q1
\v 9 Kòò do ntú kuduotí nku
\q1 ti nɑ mmɑɑ́ o ĩ́nkɛ̀ yɛdítísɔ̀rɛ̀ nyɛ,
\q1 kòò do ntú dibòrì ndi
\q1 ti nɑ nhò kpetínnɛ́mu
\q1 kɛ pɑ́ɑ́ nsɛ́tìrì kó tidɑbɛɛtì.
\sp (Onitipòkù tɛ̃̀ńnɛ́ tì)
\q1
\v 10 N tú kuduotí nku,
\q1 kɛ̀ m mɛ tu yɛdèrɛ̀.
\q1 Kòò n wùó nkɛ̀ dɛ̀ ò duɔ̀ ndiwɛ̀ì.
\sp (Onitidɔ̀ù bɛ́i ntì)
\q1
\v 11 Sɑdomɔɔ mɔ̀kɛ
\q1 fínyĩ̀ kó mutie mmu Bɑɑdi Amɔɔ.
\q1 Kɛ duɔ́ nkɛ̀ bɛbɑ̀rìbɛ̀ mù bɑ̀ɑ̀,
\q1 bɑ́ wè kòò níí bo fítɛ́ mu bɛ
\q1 kóò tɔní mɛdítíbii ntɛkɔupíítɛ̀ (1000).
\q1
\v 12 Sɑdomɔɔ ɑ bo nɑ kɛ́nte ɑ dítíbii ntɛkɔ̀ùtɛ̀ (100)
\q1 kɛ duɔ̀ mmɛdítíbii nsikɔusìdɛ́ (200) bɛ̀ɛ̀ dɛ̀ bɑ̀ɑ.
\q1 N kó dɛtie ndiɛ tú n kpɛrɛ ndɛ kɛ̀ ndɛ bɑ̀ɑ m mɑ́ɑ̀
\q1
\v 13 Fɔ̃́ nhoposɑ́ɑ́tì ɑ kɑri ikũmpúú miɛkɛ nkɛ
\q1 kɛ̀ n nɛ́pobɛ̀ kèḿmú ɑ tɑmmɛ̀.
\q1 M bɛ́innɛ̀nní kɛ dɔ̀:
\q1
\v 14 Ítɛ́ n dɑcɛ̃nnì kɛ́ndònnɛ̀ fɛwɑurìfɛ̀ dòmmɛ̀,
\q1 kupɛriniku ɔ̃ n dòmmɛ̀ ditɑ̃rì ĩ́nkɛ̀,
\q1 ditɑ̃rì titieti fɔ̃ɔ̃ti borɛ̀.