\id RUT di08.all Novembre 1998 BJ Parakou B{enin
\ide UTF-8
\h Oduti
\toc1 ODUTI
\toc2 ODUTI
\mt1 ODUTI
\imt1 Di mpɑ́tíri tɔ tìì nɑ́ɑǹtì
\ip Oduti kó dipɑ́tíri ti nɑ́ɑ́ ntìì do dɔ̀ɔ̀ tì nti Bɛbɑɑtíbɛ̀ do bɑkɛ́ dìì mɔ̀nnì Isidɑyɛɛribɛ.
\ip Dikònnì mɑrì diì do tɑnní Isidɑyɛɛribɛ tenkɛ̀ kòo nìtì mɔù bo Betideɛmmu ɛì, Sudɑɑ tenkɛ̀ miɛkɛ, kòo yètìrì tu Edimɛdɛki kòò mɔ̀kɛ initidɑbí idɛ́, kòo ítɛ́ wenwe nɛ̀ o pokù Nɑomii nɛ̀ bɛ bí idɛ́ kɛ́kɔtɛ Mɔɑbu ɛì, kɛtenkɛ̀ nɑɑti dɛ̀ kɛ́kɑri. Kòo nitidɑbí idɛ́ puokɛ Mɔɑbu ɛì kó bɛnitipòbɛ̀ Ɔripɑ nɛ̀ Oduti.
\ip Oduti kó dipɑ́tíri dɔ́ kɛ́ ti nɑ́kɛ́ dɛ kóo nitipopɔ̀ɔ̀ Oduti wèè í tú Isidɑyɛɛribɛ botí kou ò tɑmɛ̀ mmɛ̀ Kuyie kɔbɛ miɛkɛ. Dɛ kpɛ́í nkɛ̀ dɛ kó dipɑ́tíri ti nɑ́ɑ́ nhOduti do tũnni mmɛ̀ɛ̀ botí o dɔù cĩ́ɛ̃̀tɛ̀ nɛ̀ ò do tũ̀ mmɛ̀ Kuyie nyIsidɑyɛɛribɛ tũ̀ nkù, wenwe wèè í tú Isidɑyɛɛribɛ botí kou.
\ip Dì nɑ̀ɑ́mmu Kuyie nhɔ̃ɔ̃ yietí mɛ̀ɛ̀ botí onìtì wèè dɔɔ̀rìmɛ̀ wenni ò pĩ́ mmùu tɔ̃mmú kpɛ́í. Di ti nɑ́ɑ́mmu Oduti nɛ̀ o cɔ̀kù Nɑomii bɛ̀ tɑ mɛ̀ɛ̀ sémmɛ̀ miɛkɛ. Kɛ̀ Kuyie nnɛ́ bɛ̀ dɔ̀ɔ̀ mɛsɑ̀ɑ̀ ndiɛmɛ̀. Dɛ̀ɛ̀ bɛnkú ò do tɑunnɛ̀mɛ̀ bɛnìtìbɛ̀ kɛ dɔɔri Kuyie ndɔ́ dɛ̀.
\ip Okpɑ̀ɑ̀tì Dɑfiti yɑ̀ɑ̀rì tu weè kó dɛbirɛ, wenwe Mɔɑbu ɛì kóò nitipòkù weè te Dɑfiti yɑ̀ɑ̀rìbɛ̀, Odɛɛtíwè Yesu yɛ̀nní bɛ̀ɛ̀ kó kufuku miɛkɛ. (Mɑtie 1:5).
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Dɛ̀ wũɔ̃́kɛ́mɛ̀ kɛ̀ Oduti yɑ̀ɑ nɛinɛ̀ o cɔ̀kù kɛ́konní Bɛtideɛmmu tì 1
\io1 2. Oduti kɔ̃tɛ́mɛ̀ kupɑku kɛ bo dɛ́rí tidiitì 2
\io1 3. Dɛ̀ wũɔ̃́kɛ́mɛ̀ kɛ̀ Boɑsi yɑ̀ɑ puokɛnɛ̀ Oduti 3-4
\c 1
\s1 Edimɛdɛki nɛ̀ o pokù bɛ̀ kɔ̀tɛmɛ̀ Mɔɑbu
\p
\v 1 Bɛbɑɑtíbɛ̀ bɑkɛ́ dìì mɔ̀nnì Isidɑyɛɛribɛ tenkɛ̀ kɛ̀ dikònnì diɛrì mɑrìi tɑnní dihɛì, kòo nìtì mɔùu ítɛ́ Bɛtideɛmmu ɛì Sudɑɑ tenkɛ̀ nɛ̀ o pokù nɛ̀ o nitidɑbí ìdɛ́ì kɛ́kɔtɛ kɛ́mbo Mɔɑbu kɔbɛ tenkɛ̀. 
\v 2 Dɛ kóo nìtì yètìrì do tú Edimɛdɛki (dɛ̀ɛ̀ tu Kuyie mbɑkɛ́), kòo pokù kpɛri tú Nɑomii (dɛ̀ɛ̀ tu Diwɛ̀ì yiɛ̀), kòo birɛ mɑrɛ̀ kó diyètìrì tú Mɑdonni (dɛ̀ɛ̀ tu Ocĩ̀rì) kɛ̀ dɛtɛrɛ̀ kpɛri tú Kidionni (dɛ̀ɛ̀ tu Mumɔmmú). Bɛ̀ do tú Efɑdɑtɑ nɑɑ̀mùnkù kɔbɛ mbɛ. Bɛ̀ do ìtɛ́ní Bɛtideɛmmu ɛì ndi Sudɑɑ tenkɛ̀ kɛ́kɔtɛ kɛ́mbo Mɔɑbu tenkɛ̀ dɛpɑɑ. 
\v 3 Kɛ̀ Edimɛdɛkii kú kɛ̀ Nɑomii nkpɑɑ́ nɛ̀ o nitidɑbí idɛ́. 
\v 4 Kòo bí puokɛ Mɔɑbu ɛì kó bɛsɑpɑ̀mbɛ̀. Kòo mɔù yètìrì ntú Ɔdipɑɑ, kòo tɔù kpɛri tú Oduti. Kɛ̀ bɛ̀ ndɛ̀ mɔ̀kɛ yɛbie ntɛpíítɛ̀. 
\v 5 Mɑdonni nɛ̀ Kidionni kɛ̀ bɛ̀ɛ kú kɛ̀ bɛ yɔ̃ nkpɑɑ́ omɑ́ɑ̀ kɛ pɑ̀ɑ̀ o dɔù nɛ̀ o bí.
\s1 Oduti nɛinɛ̀mɛ̀ Nɑomii kɛ̀ bɛ̀ɛ kò mBɛtideɛmmu
\p
\v 6 Mɛm̀mɛ kɛ̀ Nɑomii keè ti Yiɛ̀ nKuyie ndɔ̀ɔ̀mɛ̀ o kɔbɛ mɛsɑ̀ɑ̀ nkɛ̀ tidiitì buotɛ́ kɛ́ítɛ́ Mɔɑbu kɛ́bɑ́ɑ́tí kɛ́nkũnti kɛ nɛínɛ̀ o cɔ̀ɔ̀bɛ̀ bɛdɛ́. 
\v 7 Kɛ̀ bɛ̀ɛ kétɛ́ kɛ́mberínɛ̀ kucɛ. 
\v 8 Kɛ̀ Nɑomii nɑ́kɛ́ o cɔ̀ɔ̀bɛ̀ bɛdɛ́ kɛ dɔ̀: Bɑ́ wè wèe kò nho cĩ́ɛ̃̀tɛ̀ o yɔ̃ borɛ̀, kɛ̀ ti Yiɛ̀ nKuyie ndi dɔɔ̀ mɛsɑ̀ɑ̀ nkɛ́ndònnɛ̀ di mɛ̀ dɔ̀ɔ̀mɛ̀ bɛ̀ɛ̀ ku, nɛ̀ mí m mɔ́mmuɔ. 
\v 9 Ti Yiɛ̀ nKuyie ndi teennɛ̀ kɛ̀ di pɛ́tɛ́ di dɑɑbɛ̀ kɛ́om̀pɛ̀. Kòo bɛ̀ kɔúnnɛ̀ kɛ̀ bɛ̀ɛ kuɔ́. 
\v 10 Kɛ̀ bɛ̀ dɔ̀: Bìtì, ti yó ndɑ nɛínɛ̀mu ɑ ciɛ.
\p
\v 11 Kɛ̀ Nɑomii dɔ̀: M bí, kònnɛ̀. Bɑ nte kɛ̀ di dɔ́ kɛ́ nni nnɛínɛ̀? N yí kpɑɑ́ kɛ dò m bo pɛitɛ́ ibí kɛ̀ ì di puokɛ. 
\v 12 M bí, Wɛ̃tɛnɛ̀, N kòtɛ́mu mɛdiɛ̀, n yí kpɑɑ́ kɛ dò nkɛ́yenkɛ onitidɔ̀ù, Bɑ́ kɛ̀ n tu m bo yenkɛ yíe nkɛ́piɛ́ ibí, 
\v 13 di bo nɑ kɛ́mbɑɑ kɛ̀ ìi kótɑ́ɑ̀? Di bɑ́ɑ́ yenkɛ otɔù mɔùɑ̀ɑ̀? N sémmɛ̀ di pɛ̃ɛ̃tɛ́mu. Ti Yiɛ̀ nKuyie nkpɑ̀nnɛ̀ mí nwe.
\p
\v 14 Kòo cɔ̀ɔ̀bɛ̀ɛ kuɔ́ mbɛdɛ́ kɛ̀ Ɔdipɑɑ kɔúnnɛ̀ o cɔ̀kù kóò cɑu nkɛ́wɛ̃tɛ, kɛ̀ Oduti nhò kpɑɑ́nɛ̀. 
\v 15 Kɛ̀ Nɑomii dɔ̀: Ntɛ ɑ dúɔ̀ kɛ wɛ̃̀tɛ o kɔbɛ nɛ̀ o bɔkɛ̀ dɛ borɛ̀, múnkɛɛ wɛ̃tɛ.
\p
\v 16 Kɛ̀ Oduti dɔ̀: Bɑ́ ntú n dɑ yóu kɛ́wɛ̃tɛ, ɑ tɑti dɛ̀ n dɛ ntɑti, ɑ kɔbɛ yó ntú n kɔbɛ mbɛ, Kuyie nhɑ tũ nkù n yó nku ntũ. 
\v 17 A yóó kú dɛ̀, n yóó dɛ nkú kɛ̀ bɛ̀ n kũnnɛ́. Kɛ̀ n yí dɛ̀ dɔ̀ɔ̀ ti Yiɛ̀ nKuyie nní mpotɛ́. Mukṹṹ mmuù mɑ́ɑ̀ bo ti yɑtɛ mí nnɛ̀ fɔ̃́.
\p
\v 18 Kɛ̀ Nɑomii yɑ̀ ò yetoomɛ̀ kɛ bo nhò nɛínɛ̀ kɛ dɔ̀ yúóó.
\p
\v 19 Kɛ̀ bɛ̀ ńnɛí bɛdɛ́ kɛ́tuɔkɛ Bɛtideɛmmu, kɛ́ntɑtoo dihɛì, kɛ̀ dɛ̀ɛ di bɛnìtìbɛ̀. Kɛ̀ bɛnitipòbɛ̀ ntú: Nɑomii nweɑ̀? 
\v 20 Kòo dɔ̀: Di bɑ́ nni nyu kɛ tú: Nɑomii, di nni nyu kɛ tú: Mɛyɛǹcɑɑ̀rìmɛ̀. Kɛ yɛ̃́ muwɛ̃rímú mumɔu yiɛ̀ nni ndiímmɛ̀ mɛsémmɛ̀. 
\v 21 N do iti kɛ tɔmu, kɛ konní n nɔu sinùmmù. Bɑ́ nni nyunɛ̀ kɛ tú Nɑomii, ti Yiɛ̀ nKuyie mmuwɛ̃rímú mumɔu yiɛ̀ nni mbùtínnɛ́mu kɛ n tɑnnɛ́ mɛsémmɛ̀ miɛkɛ.
\p
\v 22 Mɛm̀mɛ Nɑomii nɛ̀ o cɔ̀kù Oduti Mɔɑbu ɛì kou bɛ̀ ìtɛ́mɛ̀ Mɔɑbu kɛ́tuɔkɛ Bɛtideɛmmu, dididɛ̀ì ketírí dìì mɔ̀nnì.
\c 2
\s1 Oduti dɛ̀ɛ́mmɛ̀ tidiitì Boɑsi pɑku
\p
\v 1 Nɑomii dɔù Edimɛdɛki nɑɑ̀mùnkù kou mɔù weè do bo kɛ mɔkɛ o kpɛrɛ kòo yètìrì feí, kɛ̀ bɛ̀ ò tu Boɑsi. 
\v 2 Diyiè mɑrì kɛ̀ Odutii nɑ́kɛ́ Nɑomii kɛ dɔ̀: N dɔ́ kɛ́kɔ̃tɛ́ òmɔù pɑku nku, kòo yie n dɛ́rí tidiitì. Kɛ̀ Nɑomii dɔ̀: Kɔ̃tɛ́ m birɛ.
\p
\v 3 Kòo kɔ̃tɛ́ kupɑku mɑkù kɛ̀ bɛtɔ̃mbɛ̀ nni kòò tũ̀ nkɛ dɛ́ɛ́ntɛ. O yuu yó nnɑɑti dɛ̀ kɛ sɔ̃́ nku pɑku tú Boɑsi kɔku nku.
\p
\v 4 Kɛ̀ Boɑsii ítɛ́ Bɛtideɛmmu kɛ́kɔ̃tóo kɛ́dɔu mbɛtɔ̃mbɛ̀ kɛ dɔ̀: Ti Yiɛ̀ nKuyie nni ndi bonɛ̀. Kɛ̀ bɛ̀ɛ ò tɛ̃̀ńnɛ́ kɛ dɔ̀: Kù dɑ dɔɔ̀ mɛsɑ̀ɑ̀.
\p
\v 5 Kɛ̀ Boɑsii bekɛ wèè bɑ̀ɑ bɛtɔ̃mbɛ̀ kɛ dɔ̀: We ntu onitipòkù yie?
\p
\v 6 Kòò dɔ̀: Nɑomii nɛínɛ̀ní wènwe Mɔɑbu, 
\v 7 ò mɔɔmu dinùù kɛ bo dɛ́rí, nɛ̀ dikṹnweńnì ndi ò dɛ̀ɛ́mmɛ̀, ò yĩ́ cɔ́kɛ̀ sɑ́m̀pɔ́ nwe.
\p
\v 8 Kɛ̀ Boɑsii nɑ́kɛ́ Oduti kɛ dɔ̀: N kóo sɑpɑ̀ɑ̀ nhɑ bɑ́ɑ́ kɔtɛ òmɔù pɑku, ḿbo diɛ nnɛ̀ n nitipotɔ̃mbɛ̀ kɛ dɛ́ɛ́. 
\v 9 N nɑ̀kɛ́mu bɛtɔ̃mbɛ̀ kɛ tú bɛ̀ bɑ́ɑ́ dɑ bɛ́innɛ̀, kɛ̀ sinɛ́yɛ̃ĩ dɑ pĩ nhɑ́ kɔtɛ kɛ́yɑ̃̀ bɛ̀ dòní mɛ̀ɛ̀ niɛ.
\p
\v 10 Kɛ̀ Odutii nínkú Boɑsi ììkɛ̀ kóò nɑ̀kɛ́ kɛ dɔ̀: Dɛ̀ yĩmɛ kɑ̀ɑ n dɔ̀ɔ̀ mɛsɑ̀ɑ̀ nkɛ m pɛ́nsìrì, mí nwèè tu opɔ̀ɔ̀?
\p
\v 11 Kɛ̀ Boɑsi dɔ̀: Bɛ̀ ǹ nɑ̀kɛ́mu ɑ dɔ̀ɔ̀mɛ̀ ɑ cɔ̀kù nɛ̀ ɑ dɔù kumɛ̀ nɛ̀ ɑ yóumɛ̀ ɑ cicɛ nɛ̀ ɑ yɔ̃ nɛ̀ ɑ ɛì kɛ kɔ̀tɛní kɛ bonɛ̀ kubotí tɛkù, ɑ do í yɛ̃́ kù. 
\v 12 Ti Yiɛ̀ nKuyie ndɑ yietí mɛsɑ̀ɑ̀ nhɑ dɔ̀ɔ̀ mɛ̀. Ti Yiɛ̀ nKuyie tínti nyIsidɑyɛɛribɛ tũ nkù dɑ dɔɔ̀ mɛsɑ̀ɑ̀ nkɛ̀ mɛ̀ ndɛu, kɛ́ n dɑ kɑ̃nkɛ́.
\p
\v 13 Kɛ̀ Oduti dɔ̀: N yiɛ̀ ɑ nni ndɔɔri mɛsɑ̀ɑ̀ nhɑ n dɔ̀ɔ̀mɛ̀ kɛ nɑ́ríkùnnɛ n yɛ̀mmɛ̀, kɛ n nɑ́ɑ́nɛ̀ diwɛ̀ì kɛ dò nhɑ kó bɛtɔ̃mbɛ̀ m mɛ nyí bɛ̀ tùɔ̀kɛ.
\p
\v 14 Bɛ̀ yóó di dìì mɔ̀nnì kɛ̀ Boɑsii nɑ́kɛ́ Oduti kɛ dɔ̀: Kɔtɛní kɛ́di, pɔɔ̀tɛ̀ ɑ pɛ̃́ɛ̃̀ tikṹntì. Kòo ò duɔ́ ntidiitì bɛ̀ pũ̀ńnɛ́ tì, kòò cɑ̀ɑ́kɛ́ kɛ́nsɑ̀nnɛ̀ kɛ́súɔ́. 
\v 15 Ò wɛ̃̀tɛ dìì mɔ̀nnì kɛ bo dɛ́rí kɛ̀ Boɑsii nɑ́kɛ́ bɛtɔ̃mbɛ̀ kɛ dɔ̀: Yóunɛ̀ we kòo ndɛ́ɛ́, di bɑ́ɑ́ ò kɔkɛ́nɛ̀. 
\v 16 Di yóu kɛ̀ tidiitì nduò kòò dɛ̀ɛ́, di bɑ́ɑ́ ò kpɑnnɛ̀.
\p
\v 17 Kɛ̀ Oduti ntṹṹ nkɛ dɛ́ɛ́ nkɛ́tuɔkɛnɛ̀ kuyuoku, kɛ́puotí kɛ́píɛ ntɛyɑ̀ɑ̀tɛ̀, 
\v 18 kɛ́tɔ kɛ́kònnɛ̀ kɛ́bɛnkɛ o cɔ̀kù, kóò duɔ́nnɛ̀ tidiitì ò do di kɛ́súɔ́ ntì. 
\v 19 Kòo cɔ̀kùu ò bekɛ kɛ dɔ̀: A dɛ̀rí we mpɑku yíe? A pĩ ndɛ mutɔ̃mmú? Ti Yiɛ̀ nKuyie ndɔɔ̀ mɛsɑ̀ɑ̀ nwèè dɑ cɔutɛ́.
\p Kɛ̀ Odutii ò nɑ̀kɛ́ dɛ̀ɛ̀ dɔ̀ɔ̀, kɛ dɔ̀ ò dɛ̀rí wèè pɑku o yètìrì tu Boɑsi. 
\v 20 Kɛ̀ Nɑomii dɔ̀: M bɑntɛ́ kɛ dò nti Yiɛ̀ nKuyie nkuù ti dɔ̀ɔ̀ mɛsɑ̀ɑ̀ nkù do mɛ dɔ̀ɔ̀mɛ̀ bɛ̀ɛ̀ ku, kùu dɔɔ̀ mɛsɑ̀ɑ̀ ndɛ kóo nìtì. Kɛ yíɛ́ bɛ́i nkɛ dɔ̀: Boɑsi tu tinɑɑ̀mùnkù kɔbɛ kóò mɔù nwe wèè dò nkɛ́ndɑkɛ ti kpɛ́í.
\p
\v 21 Kɛ̀ Oduti dɔ̀: Ò bɛ́immu kɛ tú nní mbonɛ̀ o tɔ̃mbɛ̀ kɛ dɛ́ɛ́ nkɛ bɛ̀ yɑ̀ɑ deènɛ̀ mudidɛ̀ì.
\p
\v 22 Kɛ̀ Nɑomii dɔ̀: Mbonɛ̀ Boɑsi tɔ̃mbɛ̀, ɑ bɑ́ɑ́ kɔtɛ kupɑku tɛkù mɑkù, bɛ̀ yɑ̀ɑ̀ bo dɑ kpɑnnɛ̀.
\p
\v 23 Kɛ̀ Oduti nkũɔ̃tìnɛ̀ Boɑsi nitipotɔ̃mbɛ̀ kɛ dɛ́ɛ́ nkɛ yɑ̀ɑ deènɛ̀ tidiitì ketitì nɛ̀ tidɛ́rítì, kɛ bɑɑ bonɛ̀ o cɔ̀kù.
\c 3
\s1 Nɑomii tiémmɛ̀ Oduti
\p
\v 1 Diyiè mɑrì kɛ̀ Nɑomii nɑ́kɛ́ Oduti kɛ dɔ̀: M birɛ, n wɑɑ̀ ndɛ̀ bo yĩ́mɛ̀ mmɛ kɑ̀ɑ ḿbo kɛ̀ dɛ̀ dɑ nɑɑti. 
\v 2 Di mmɔ̀nnì ɑ bɑntɛ́mu kɛ dò mBoɑsi ɑ niɛ̀nɛ̀ wèè kó bɛnitipotɔ̃mbɛ̀ kɛ dɛ́ɛ́ nho pɑku ò tu ti nɑɑ̀mùnkù kou nwe, ò puotì yíe nkó kɛyènkɛ̀ nkɛ o yiɛ́. 
\v 3 Wuɔ kɛ́yɔɔrɛ ɑmɑ́ɑ̀ tùdɑ̀ɑ̀rí kɛ́dɑ́ɑ́tí ɑ yɑɑ̀sɑ̀ɑ̀tì kɛ́kɔtɛ o yiɛ́, ɑ nɛ́ bɑ́ɑ́ yie nkòò dɑ yɑ̀ kɛ mu nyí di kɛ yɑ̃̀. 
\v 4 Kòò yóó duɔ́ ɑ nhò pɑkɛ́, kòo duɔ́ kɑ̀ɑ kɔtoo kɛ́dɑ́ɑ nho yɑ̀ɑ̀kù kɛ́duɔ́ o nɑɑ̀cɛ̀i tɑkɛ́ kòo bɑntɛ́ ɑ dɔ́mɛ̀ wèe dɑɑtɛ ɑ kpɛ́í. Ò bo dɑ nɑ́kɛ́ ɑ dò nkɛ́dɔɔ̀ dɛ̀. 
\v 5 Kɛ̀ Oduti dɔ̀: N yóó dɔɔ̀mu ɑ n nɑ̀kɛ́ tì timɔu.
\p
\v 6 Kɛ̀ Odutii ítɛ́ kɛ́kɔtɛ kuyiɛ́ kɛ́dɔɔ̀ o cɔ̀kù ò nɑ̀kɛ́ tì weti weti. 
\v 7 Kɛ̀ Boɑsii di kɛ́yɑ̃̀ kòo yɛ̀mmɛ̀ɛ cɑ́tɛ́ kòo kɔtɛ kɛ́nduɔ́ o diitì còú dɛ̀. Kɛ̀ Odutii bɑ́nnɛ́ kɛ́kɔtoo kɛ́dɑ́ɑ nkuyɑ̀ɑ̀kù o nɑɑ̀cɛ̀i tɑkɛ́ kɛ́nduɔ́. 
\v 8 Kɛyènkɛ̀ cuokɛ̀ kɛ̀ Boɑsii entɛní kɛ́yɑ̀ onitipòkù duɔ́mɛ̀ o nɑɑ̀cɛ̀i tɑkɛ́ kɛ̀ dɛ̀ɛ ò di. 
\v 9 Kòo dɔ̀: Wenninwe?
\p Kɛ̀ Oduti dɔ̀: Mí nhOduti nwe ɑ kóo tɔ̃ntì, dɑɑtɛ n kpɛ́í, fɔ̃́ɔ̃̀ tu ti nɑɑ̀mùnkù kou wèè tɔ̀kɛ́, kɛ dò nkɛ́ n tiekɛ.
\p
\v 10 Kɛ̀ Boɑsi dɔ̀: N kóo sɑpɑ̀ɑ̀ ti Yiɛ̀ nKuyie ndɑ dɔɔ̀ mɛsɑ̀ɑ̀, ɑ dɔ̀ɔ̀ dɛ̀ bɑ̀mbɑ̀ ndɛ̀ pɛ̃ɛ̃tɛ́mu ɑ dɔ̀ɔ̀ ndɛ̀ ɑ cɔ̀kù, dɛmɔu dɛɛ̀ bɛnkú ɑ dɔ́mɛ̀ ti nɑɑ̀mùnkù, ɑ í wɑmmú bɛdɑpɑ̀mbɛ̀ bɛ̀ɛ̀ mɔ̀kɛ bɛ kpɛrɛ yoo idɑwɑɑ́. 
\v 11 N kóo sɑpɑ̀ɑ̀ mbɑ́ nyĩɛ̃̀kù, n yóó dɔɔ̀mu ɑ dɔ́ tì. Bɛnìtìbɛ̀ bɛmɔu yɛ̃́mu ɑ túmɛ̀ onitiposɑ̀ɑ̀wè. 
\v 12 Mɔ́mmuɔ nwe n dòmmɛ̀ kɛ dɑ túótɛ́, òmɔù nɛ́ bomu wèè dɑ tɔ́kɛ́nɛ̀ kɛ m pɛ̃ɛ̃tɛ́. 
\v 13 Nduɔ́ diɛ nkɛ̀ dɛ̀ɛ wentɛ́ kɛ̀ tí tì yɑ̀. Kòò dɔ́ kɛ́ dɑ túótɛ́, wè dɑ túótɛ́, kòo mɛ nyí dɔ́, m bɛ́immu kɛ yu ti Yiɛ̀ nKuyie nyètìrì kɛ tú, m bo dɑ túótɛ́.
\p
\v 14 Kɛ̀ Oduti nduɔ́ kɛ̀ dɛ̀ɛ wentɛ́ kòo yɛ̀ kɛ̀ dɛ̀ kpɑɑ́ uu. Boɑsi do í dɔ́ bɛ̀ nyɛ̃́ ò kɔ̀tɛnímɛ̀ kuyiɛ́. 
\v 15 Kòò dɔ̀: N duɔnní ɑ yɑ̀ɑ̀kù.
\p Kɛ̀ Odutii ò duɔ́, kòo cũɔ̃́ tidiitì cìdóòbɛ̀ tɛpíítɛ̀ nɛ̀ bɛ̀nùmmù kóò toú. 
\v 16 Kòo kò ndihɛì o cɔ̀kù Nɑomii borɛ̀, kòo ò bekɛ kɛ dɔ̀: M birɛ ɔ̃̀nti dɔ̀ɔ̀?
\p Kɛ̀ Odutii ò nɑ̀kɛ́ dɛ kóo nìtì ò dɔ̀ɔ̀ dɛ̀ɛ̀ kó dimɑ̀ɑ̀. 
\v 17 Kɛ dɔ̀: Ò m pɑ̃ tidiitì cìdóòbɛ̀ tɛpíítɛ̀ nɛ̀ bɛ̀nùmmù kɛ tú m bɑ́ɑ́ wɛ̃tɛní n nɔunùmmù ɑ borɛ̀.
\p
\v 18 Kɛ̀ Nɑomii dɔ̀: M birɛ nkɑri bɛ́u kɛ́yɑ̀ dɛ kó tinɑ́ɑǹtì yóó kú dɛ̀. Boɑsi yóó tũntɛmu dɛ kó tinɑ́ɑǹtì yíe.
\c 4
\s1 Boɑsi sɔɔtɛ́mɛ̀ Edimɛdɛki fuku
\p
\v 1 Mɛm̀mɛ kɛ̀ Boɑsii kɔtɛ kɛ́nkɑri dihɛì bòrì bɛ̀ kɑ̀rì dɛ̀ kɛ tũnni tihɛikɛ̀nnɑ́ɑǹtì. Wèè do dò nkɛ́ndɑkɛ Oduti nɛ̀ o cɔkù Nɑomii bɛ kpɛ́í kòo mpɛ̃nkɛ́, kɛ̀ Boɑsi dɔ̀: N kou kɔtɛní kɛ́kɑri diɛ!
\p Kòo kɑri. 
\v 2 Kɛ̀ Boɑsii yú bɛhɛikɛ̀nkótíbɛ̀ tɛpíítɛ̀ kɛ dɔ̀: Kɑrinɛ̀ diɛ, kɛ̀ bɛ̀ɛ kɑri. 
\v 3 Kɛ̀ Boɑsii nɑ́kɛ́ wèè dò nkɛ́ndɑkɛ bɛ kpɛ́í kɛ dɔ̀: Nɑomii wèè konní Mɔɑbu weè fiiti ti tebitɛ Edimɛdɛki bɑ̀tɛ̀. 
\v 4 Kɛ̀ n nɛ́ yɛ̃ m bo dɑ nɑ́kɛ́ kɑ̀ɑ tɛ̀ dontɛ́ bɛ̀ɛ̀ kɑ̀ri diɛ nnɛ̀ bɛhɛikɛ̀nkótíbɛ̀ bɛ ììkɛ̀. Kɑ̀ɑ mɛ nyí yóó tɛ̀ dontɛ́ ɑ n nɑ́kɛ́ kɛ̀ nni nyɛ̃́, kɛ yɛ̃́ ɑ kó difɔ̃nkúò míì bɑɑtɛ́mmɛ̀.
\p Kòò dɔ̀: Kɛ̀ n nɑ m bo tɛ̀ dontɛ́.
\p
\v 5 Kɛ̀ Boɑsi dɔ̀: Kɑ̀ɑ dontɛ́ tɛbɑ̀tɛ̀, ɑ́ túótɛ́ Oduti Moɑbu kou okúpokù, kɛ́sɔɔtɛ́ wèè ku o cĩ́ɛ̃̀tɛ̀.
\p
\v 6 Kòò dɔ̀: M bɑ́ɑ́ nɑ kɛ́ dɛ̀ dontɛ́ n yɑ̀ɑ̀ bo pɑɑ̀ wèè bo túótɛ́ n kpɛrɛ. Dontɛ́ n nɑ ndontɛ́ dɛ̀, n yí yóó nɑ.
\p
\v 7 Nɛ̀ dimɔ̀nnì Isidɑyɛɛribɛ do ɔ̃ nkɛ̀ bɛ̀ dontɛ́ dɛ̀mɑrɛ̀ yoo bɛ̀ cèètɛ, òmɔù weè ɔ̃ɔ̃ dɛitɛ o nɛùkù kɛ́duɔ́ nhotɔù, dɛ̀ɛ̀ bɛnkú tinɑ́ɑǹtì tũ̀ntɛmɛ̀. 
\v 8 Wèè do dò nkɛ́dontɛ́ tɛbɑ̀tɛ̀ kòo nɑ́kɛ́ Boɑsi kɛ dɔ̀: Dontɛ́, kɛ́dɛitɛ o nɛùkù kóò duɔ́. 
\v 9 Kɛ̀ Boɑsii nɑ́kɛ́ bɛhɛikɛ̀nkótíbɛ̀ nɛ̀ bɛ̀ɛ̀ kó dimɑ̀ɑ̀ dɛ̀ bo kɛ dɔ̀: Di yɑ̀mu yíe n dontɛ́mmɛ̀ Nɑomii, Edimɛdɛki, Mɑdonni nɛ̀ Kidionni bɛ kpɛrɛ dɛmɔu, 
\v 10 kɛ́túótɛ́nɛ̀ Oduti Mɔɑbu kou Mɑdonni wèè ku o pokù kɛ́sɔɔtɛ́ ocíì cĩ́ɛ̃̀tɛ̀, kòo yètìrì bɑ́ɑ́ feti o kɔbɛ cuokɛ̀ nɛ̀ o ɛì.
\p
\v 11 Bɛ̀ɛ̀ dɛ̀ bo nɛ̀ bɛhɛikɛ̀nkótíbɛ̀ kɛ̀ bɛ̀ dɔ̀: Ti yɑ̀mu! Ti Yiɛ̀ nKuyie ndɔɔ̀ mɛsɑ̀ɑ̀ ɑ yóó túótɛ́ wèè nitipòkù kòo ndònnɛ̀ Dɑsɛɛdi nɛ̀ Deɑ bɛ̀ do dòmmɛ̀ bɛ̀ɛ̀ mɑɑ́ Isidɑyɛɛri cĩ́ɛ̃̀tɛ̀. Á kpenkɛ Efɑdɑtɑ tenkɛ̀ miɛkɛ kɑ̀ɑ yètìrìi feitɛ́ Bɛtideɛmmu. 
\v 12 Ti Yiɛ̀ nKuyie nyóu kɛ̀ dɛ kóo nitipòkù dɑ piɛ́ ibí pɛ́u, kɑ̀ɑ cĩ́ɛ̃̀tɛ̀ɛ nɑɑ́nnɛ̀ Sudɑɑ nɛ̀ Tɑmɑɑ bɛ birɛ di yɑ̀ɑ̀rì Pɛdɛsi kpɛtɛ do dòmmɛ̀.
\s1 Boɑsi tùótɛ́mɛ̀ Oduti kɛ puokɛ
\p
\v 13 Dɛ mɔ̀nnì ndi Boɑsii tùótɛ́mɛ̀ Oduti, kɛ̀ ti Yiɛ̀ nKuyie nhò dɔ̀ɔ̀ mɛsɑ̀ɑ̀ nkòo púó nkɛ́pɛitɛ́ dɛnitidɑbirɛ. 
\v 14 Kɛ̀ bɛnitipòbɛ̀ nnɑ́ɑ́ Nɑomii kɛ tú: Ti sɑ̃ntí ti Yiɛ̀ nKuyie nku yóumɛ̀ kɑ̀ɑ pɛ̀tɛ́ dɛyɑɑ̀birɛ dɛ̀ɛ̀ bo dɑ pií. Dɛ yètìrìi dɛukɛ Isidɑyɛɛribɛ miɛkɛ. 
\v 15 Dɛɛ̀ yó nte ɑ ɔ̃nnì, kɛ́ ndɑ tɔ ɑ kótì miɛkɛ. A cɔ̀kù wèè dɛ̀ ndɑ pɛitɛ́ ò dɑ dɔ́mu. Ò pɛ̃ɛ̃tɛ́mu initidɑbí ìyiekɛ̀.
\p
\v 16 Kɛ̀ Nɑomii cɔutɛ́ dɛbirɛ kɛ́ntɔu kɛ́ dɛ̀ yɔ̀. 
\v 17 Kòo cɛ̃pɛɛtitɔbɛ̀ dɔ̀: Bɛ̀ pɛitɛ́ Nɑomii dɛnitidɑbirɛ, kɛ́ dɛ̀ yú kɛ dɔ̀ Obɛdi. Kɛ̀ Obɛdii pɛitɛ́ Sɛsee kɛ̀ Sɛsee pɛitɛ́ Dɑfiti.
\s1 Dɑfiti kó kufuku
\p
\v 18 Pɛdɛsi weè pɛitɛ́ Ɛtisidonni. 
\v 19 Kɛ̀ Ɛtisidonnii pɛitɛ́ Adɑmu, kɛ̀ Adɑmuu pɛitɛ́ Amminɑdɑbu. 
\v 20 Kɛ̀ Amminɑdɑbuu pɛitɛ́ Nɑsɔ̃ɔ̃, kɛ̀ Nɑsɔ̃ɔ̃ pɛitɛ́ Sɑdimɑ. 
\v 21 Kɛ̀ Sɑdimɑɑ pɛitɛ́ Boɑsi, kɛ̀ Boɑsii pɛitɛ́ Obɛdi. 
\v 22 Kɛ̀ Obɛdii pɛitɛ́ Sɛsee, kɛ̀ Sɛsee pɛitɛ́ Dɑfiti.