\id PSA di19.all Novembre 1998 BJ Parakou B{enin
\ide UTF-8
\h Yɛsɑ̃ɑ̃
\toc1 Yɛsɑ̃ɑ̃
\toc2 YƐSÃÃ
\mt1 Yɛsɑ̃ɑ̃
\imt1 Di mpɑ́tíri tɔ tìì nɑ́ɑǹtì
\ip Bɛ̀ yu dɛ kó dipɑ́tíri kɛ tú Yɛsɑ̃ɑ̃ nkɛ yɛ̃́ iyiɛ nyi bɛ̀ do ɔ̃ ndìèmmɛ̀ mubɑ́ɑmmu miɛkɛ kɛ sɑ̃ntí Kuyie nyoo bɛ̀ɛ kù mɔɔ mɛteèmmɛ̀. Bɑ́ fɛ̀ɛ̀ yɛ̀nfɛ̀ kó diketirì kɛ̀ bɛ̀ ɔ̃ɔ̃ ketɛ́ kɛ́wɑ̃ri fɛ kũ̀nnì kɛ́nɑ́kɛ́ fɛ̀ dìè mmɛ̀ɛ̀ botí.
\ip Dɛ kó dipɑ́tíri tú dipɑ́tíri ndi bɛnìtìbɛ̀ dɔ́ dì mɛdiɛ̀ Bibidi kó yɛpɑ́tɛ yɛmɔu miɛkɛ. Kɛ yɛ̃́ dɛ kó iyiɛ ntumɛ̀ ìì kɑ̀ɑ́ nyìnyi bɛnìtìbɛ̀ yɛ̀mmɛ̀, kɛ̀ dɛ̀ ntukúnɛ̀ mubɑ́ɑmmu yoo Kuyie nkó disɑ̃nni yoo isɑ́útìi, yoo mɛyɛi nkó mudɑ́ɑmmù nɛ̀ ɑ bo ndémɛ̀ Kuyie nyoo ɑ bo mbomɛ̀ mɛhɑ́ɑ́rìmɛ̀ miɛkɛ kɛ̀ dɛ̀ mɛ ndò nhɑ kémmú Kuyie nkó mɛteèmmɛ̀ mmɛ yoo ɑ yɛ̀mmɛ̀ cɑ̀ɑ̀rɛ̀, kɛ̀ Kuyie ndɑ bɑ̀ńtɛ̀ yoo kù dɑ cĩ̀ɛ̃́ nkɛ̀ dɛ̀ dɑ nɑɑti, yoo nɛ̀ ku di kó mɛtɑummɛ̀ bíɛ́kɛ̀. Nɛ̀ dɛ kó yɛsɑ̃ɑ̃ mmiɛkɛ nkɛ ti ɔ̃ɔ̃ bɑntɛ́mɛ̀ Kuyie nti tɔ́kɛ́nɛ̀mɛ̀ kɛ fòù, kɛ tú kùù do mpɑ́íí, kɛ̀ kù dɔ́kùmɛ̀ dɛu ti ĩ́nkɛ̀, kɛ̀ kù dɔ̀ɔ̀ri kù bɛ́i ntì.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Yɛsɑ̃ɑ̃ nyɛ̀ɛ̀ dɛ̀úkùnko Kuyie nyètìrì: 8 nɛ̀ 19 nɛ̀ 33 nɛ̀ 100 nɛ̀ 103-105 nɛ̀ 111 nɛ̀ 113 nɛ̀ 114 nɛ̀ 117 nɛ̀ 135 nɛ̀ 136 nɛ̀ 145-149
\io1 2. Yɛsɑ̃ɑ̃ nyɛ̀ɛ̀ bɛnkú Kuyie nkuù tumɛ̀ okpɑ̀ɑ̀tì: 47 nɛ̀ 93 nɛ̀ 96-99
\io1 3. Yɛ̀ɛ̀ tu bɛ̀ bɑ̀ɑ́mmɛ̀ Kuyie nhokpɑ̀ɑ̀tì kpɛ́í 2 nɛ̀ 18 nɛ̀ 20 nɛ̀ 21 nɛ̀ 45 nɛ̀ 72 nɛ̀ 89 nɛ̀ 101 nɛ̀ 110 nɛ̀ 144
\io1 4. Yɛsɑ̃ɑ̃ nyɛ̀ɛ̀ tu Kuyie ncĩ́ɛ̃̀tɛ̀ tɑrimù kpɛyɛ: 15 nɛ̀ 24
\io1 5. Yɛ̀ɛ̀ tu bɛ̀ bo nkɔri Kuyie ncĩ́ɛ̃̀tɛ̀ dibɑnni kɛ dentì yɛ̀: 84 nɛ̀ 91 nɛ̀ 121 nɛ̀ 122
\io1 6. Yɛ̀ɛ̀ tu bɛ̀ do ɔ̃ ndìè nyɛ̀ Siyɔ̃ɔ̃ kɛ sɑ̃ntí dicɛ̃kɑrì Kuyie ntɑ̃ɑ̃tɛ́ dì Sedisɑdɛmmu kɛ bo mɑɑ́ ku cĩ́ɛ̃̀tɛ̀: 46 nɛ̀ 48 nɛ̀ 76 nɛ̀ 87 nɛ̀ 132
\io1 7. Yɛ̀ɛ̀ tu Kuyie ndo ɔ̃ɔ̃ nɑ́kɛ́ tì ikuɔ́ nìùtì mɔù yoo Kuyie mpɑ̃ɑ̃nɑ́ɑǹtì nɑ́ɑǹtò mɔù yoo kù bɛ̀ cɑu ntìmɑtì ĩ́nkɛ̀ yoo kù yɛ̃ mbɛ̀ɛ dɔɔ̀ tìmɑtì: 14 nɛ̀ 50 nɛ̀ 53 nɛ̀ 75 nɛ̀ 81 nɛ̀ 95
\io1 8. Yɛ̀ɛ̀ tu itié nKuyie nkɔbɛ kpɛ́í: 37 nɛ̀ 49 nɛ̀ 73 nɛ̀ 78 nɛ̀ 112 nɛ̀ 127 nɛ̀ 133 nɛ̀ kɛ nɛ́ yíɛ́nɛ̀ Yɛsɑ̃ɑ̃ 1 nɛ̀ 119
\io1 9. Kuyie nkɔbɛ bɛ̀ɛ̀ bo mɛyɛǹcɑɑ̀rìmɛ̀ miɛkɛ kɛ bɑ́ɑ́ nKuyie nkɛ kù mɔ̀ú mɛteèmmɛ̀. Bɛ̀ do ɔ̃ ndiè nyɛ̀: 12 nɛ̀ 44 nɛ̀ 58 nɛ̀ 60 nɛ̀ 74 nɛ̀ 79 nɛ̀ 80 nɛ̀ 83 nɛ̀ 85 nɛ̀ 90 nɛ̀ 94 nɛ̀ 106 nɛ̀ 108 nɛ̀ 123 nɛ̀ 126 nɛ̀ 137
\io1 10. Yɛ̀ɛ̀ tu mɛfɛ̃́ṹtímɛ̀ mɛbotí mɛbotí bo sɔ̃́ntɛ́mɛ̀ onìtì kòò kuɔ́nnɛ̀ Kuyie nkɛ́ kù mɔɔ mɛteèmmɛ̀. Dɛ kó yɛsɑ̃ɑ̃ mbotí yɛɛ̀ sũ: 5-7 nɛ̀ 13 nɛ̀ 17 nɛ̀ 22 nɛ̀ 25 nɛ̀ 26 nɛ̀ 28 nɛ̀ 31 nɛ̀ 35 nɛ̀ 38 nɛ̀ 39 nɛ̀ 41-43 nɛ̀ 51 nɛ̀ 54 nɛ̀ 57 nɛ̀ 59 nɛ̀ 61 nɛ̀ 63 nɛ̀ 64 nɛ̀ 69-71 nɛ̀ 86 nɛ̀ 88 nɛ̀ 102 nɛ̀ 109 nɛ̀ 120 nɛ̀ 130 nɛ̀ 140-143
\io1 11. Yɛsɑ̃ɑ̃ mmɔ́mmɔnyɛ, kɛ̀ dɛ̀ yɛ̀mmɛ Kuyie ndɑ dɛɛtɛ́ mɛ̀ɛ̀ kpɛ́í ntìmɑtì miɛkɛ, yoo kù dɑ cĩ̀ɛ̃́mmɛ̀ ɑ yɛi: 9-10 nɛ̀ 30 nɛ̀ 32 nɛ̀ 34 nɛ̀ 40:1-12 nɛ̀ 92 nɛ̀ 107 nɛ̀ 116 nɛ̀ 118
\io1 12. Yɛ̀ɛ̀ bɛnkú Kuyie nkou bo mmɔkɛmɛ̀ diwɛ̀ì o yɛ̀mmɛ̀ miɛkɛ nɛ̀ kù ò òmpùnnɛmɛ̀: 3 nɛ̀ 4 nɛ̀ 11 nɛ̀ 16 nɛ̀ 23 nɛ̀ 62 nɛ̀ 131 nɛ̀ 139
\ip Kɛ̀ dɛ̀ dò mmɛmmɛ ti bo nɑmu yié nkɛ́túótɛ́ dɛ kó iyiɛ nkó tinɑ́ɑǹtì kɛ́ndɛ́úkùnkonɛ̀ Kuyie nyètìrì kɛ́ɑ̃ɑ̃́ nɛ̀ ti kó mɛtɑmmɛ̀ kɛ́ntũ mbɛ ì nti nɑ̀kɛ́ kɛ̀ ì dòmmɛ̀.
\c 1
\ms1 YƐSÃÃ MPÁTÍRI DIKETIRÌ
\s1 Diwɛ̀ì mɔ́mmɔnni kó tinɑ́ɑǹtì
\r (Yɛsɑ̃ɑ̃ 1-41)
\q1
\v 1 Dɛ̀ nnɑɑti wèè í tũ mbɛnitiyonkubɛ tié,
\q1 wèè í tũũ̀ mbɛnitiyɛibɛ kó kucɛ,
\q1 wèè í kɑtìnɛ̀ bɛ̀ɛ̀ dɑú Kuyie.
\q1
\v 2 Wenwe dɔ́ Kuyie ntié nyi,
\q1 kɛ ì ɑ̃ɑ̃̀ o yɛ̀mmɛ̀ miɛkɛ kuyie nnɛ̀ kɛyènkɛ̀.
\q1
\v 3 Dɛ yiɛ̀ ndònnɛ̀ mutie mmu bɛ̀ buɔtí mù kukó ntɑkɛ́,
\q1 kɛ̀ mù pɛí yɛbɛ yɛ mɔ̀nnì,
\q1 bɑ́ mu fɑ̃ɑ̃̀tì í kpeì,
\q1 dɛ yiɛ̀ ndɔ̀ɔ̀ri dɛ̀ dɛmɔu ɔ̃ nyíémmu
\q1
\v 4 Bɛnitiyonkubɛ kpɛrɛ í mɛ ndò,
\q1 bɛ̀ dònnɛ̀ tiyontì nti kuyɑɑkù tɔ tì.
\q1
\v 5 Dɛɛ̀ te kɛ̀ bɛ̀ í yóó nɑ kɛ́cómmú Kuyie mbeéntì yiè,
\q1 bɛ̀ mɛ nyí yó nkɔkɛ́ Kuyie nkɔbɛ tĩ̀nnì.
\q1
\v 6 Kuyie nyɛ̃́mu bɛ̀ɛ̀ wetí bɛ kó kucɛ,
\q1 kɛ̀ bɛyɛibɛ biɛ tũ mmɛfétimɛ̀ kɔku.
\c 2
\s1 Kuyie ntɑ̃ɑ̃tɛ́ wèè kpɑ̀ɑ̀tì kó tinɑ́ɑǹtì
\q1
\v 1 Bɑ nte kɛ̀ ibotí miɛkɛ cɔ́ú?
\q1 Bɑ nte kɛ̀ yɛbotɛ̀ dɑ̀kii mɛyɛi nkpɛ́í ndɛtetìrɛ̀?
\q1
\v 2 Kɛ̀ kutenkù yɛmbɛ̀ bɑɑti dikpɑ̀nnì,
\q1 kɛ̀ sikpɑ̀ɑ̀tìbìí wɛ̃nnɛ́ kɛ bo kpɑnnɛ̀ Kuyie nnɛ̀ kù tɑ̃ɑ̃tɛ́ wè,
\q1 kɛ nɑ́ɑ́ nkɛ tú:
\q1
\v 3 Tí tɔ̃tɛ bɛ̀ ti pìtínnɛ́ ìì wɛ̃ĩ,
\q1 kɛ́pítɛ́ bɛ̀ ti dùú mɛ̀ɛ̀ fĩmmɛ kɛ́dootóo.
\b
\q1
\v 4 Wèè kɑ̀ri kɛĩ́nkɛ̀ kòò bɛ̀ dɑú,
\q1 ti Yiɛ̀ nKuyie mbɛ̀ ti mudɑɑ́ mmu.
\q1
\v 5 Kɛ bɛ̀ nɑ̀ɑ́nnɛ̀ kɛmiɛkɛ.
\q1 Nɛ̀ kɛmiɛyonkukɛ kɛ bɛ̀ ɑ̃ɑ̃̀ kufɔ̃wɑɑ́ nkɛ tú:
\q1
\v 6 Míì pĩ n kóo kpɑ̀ɑ̀tì,
\q1 ditɑ̃sɑ̀ɑ̀rì Siyɔ̃ɔ̃ ĩ́nkɛ̀.
\b
\q1
\v 7 N yó nnɑ́ɑ́mmu Kuyie nyɛ̃ nkù yóó dɔɔ̀ dɛ̀ kpɛ́í.
\q1 Kù ǹ nɑ̀kɛ́mu kɛ yĩ:
\q1 A tú m birɛ ndɛ yíe,
\q1 kɛ̀ n tú ɑ cicɛ,
\q1
\v 8 kɛ tú n kù mɔɔ yɛbotɛ̀ yɛmɔu kɛ̀ kùu yɛ̀ nni nduɔ́ nkɛ̀ n yɛ̀ tiekɛ,
\q1 kɛ́ntenɛ̀ itemmɑ̀nkoo,
\q1
\v 9 kɛ́ncɛ̃mmú yɛbotɛ̀ nɛ̀ kumɑ́tìpɑ̀ɑ̀ti,
\q1 kɛ́ nyɛ̀ pùɔ̀ ntiyɑɑmɑtì kɔ̃mɛ.
\b
\q1
\v 10 Díndi bɛkpɑ̀ɑ̀tìbɛ̀, ńciìnɛ̀,
\q1 kɛtenkɛ̀ kó bɛbeémbɛ̀, ńyiénnɛ̀ itié.
\q1
\v 11 Mpĩ́nnɛ̀ Kuyie ntɔ̃mmú kɛ kù dé,
\q1 nyɛ̃́nɛ̀ kù kpeńnìmɛ̀ kɛ̀ di kɔ̃m̀bùɔ̀tì nkù duò.
\q1
\v 12 Kɛ̀ di nkù dɛ́úkùnko
\q1 ku miɛkɛ yɑ̀ɑ̀ bo di pɛikɛ mɛ̀ɛ̀ kpɛ́í
\q1 kɛ̀ di feti di tũ nkùù cɛ miɛkɛ,
\q1 ku miɛkɛ í yóó ɔɔtɛ kɛ̀ bo pɛikɛmɛ̀.
\b
\q1 Dɛ̀ nnɑɑti bɛ̀ɛ̀ sɔ̀ri ku borɛ̀.
\c 3
\s1 Mɛdɛɛtímɛ̀ boní Kuyie mborɛ̀ ndɛ
\d Dɑfiti do cokùnɛ̀ o birɛ Abusɑdɔmmu, kɛ́ndiè nfɛ̀ɛ̀ yɛ̀nfɛ̀.
\b
\q1
\v 1 N Yiɛ̀ nKuyie n dùɔ̀ntɔbɛ̀ sũmu,
\q1 bɛ̀ɛ̀ n wɑnti bɛ̀ í sénní.
\q1
\v 2 Bɛ̀ í sénní bɛ̀ɛ̀ nɑ́ɑntɛ n kpɛ́í,
\q1 bɛ̀ɛ̀ tu fɔ̃́ nKuyie nhɑ í yó n dɛɛtɛ́
\q1
\v 3 N Yiɛ̀ nKuyie nfɔ̃́ɔ̃̀ tu n kó kudɔpìkù,
\q1 ɑ dɛumɛ̀ kpɛ́í nte kɛ̀ dɛ̀ n nɑɑti.
\b
\q1
\v 4 Kɛ̀ n kuɔ́nko kɛ yu n Yiɛ̀ nKuyie,
\q1 kù ɔ̃ɔ̃ yiemmu ku tɑ̃sɑ̀ɑ̀rì ĩ́nkɛ̀.
\q1
\v 5 N duɔ́mu kɛ yɛ̃̀ nkɛ duɔ́, kɛ èntɛ,
\q1 kɛ yɛ̃́ n Yiɛ̀ nKuyie nni ncúɔ́mɛ̀.
\q1
\v 6 N yí yĩɛ̃̀kù bɛnìtìbɛ̀ sikɔu sikɔu,
\q1 bɛ̀ɛ̀ n cɛ̃̀tinɛ̀ tipíìtì timɔu.
\b
\q1
\v 7 N Yiɛ̀ nKuyie,
\q1 ítɛ́ kɛ́cómmú kɛ́ n dɛɛtɛ́,
\q1 fɔ̃́ɔ̃̀ bèmmù n dootitɔbɛ̀,
\q1 kɛ bɔ́kíí bɛnitiyonkubɛ nìì.
\q1
\v 8 N Yiɛ̀ nfɔ̃́ɔ̃̀ dɛɛrí,
\q1 ɑ sɑ̀ɑ̀ nni mbonɛ̀ ɑ nìtìbɛ̀.
\c 4
\s1 Kuyie ndɛɛrímɛ̀ bɛ̀ sɔ̃̀ńtɛ́ kɛ wɑ́tìrì wè
\d Dɑfiti yɛ̀nfɛ̀ bɛ̀ dìè nfɛ̀ nkɛ biennɛ̀ tibómbonti.
\b
\q1
\v 1 Fɔ̃́ nKuyie nfɔ̃́ɔ̃̀ n kòḿmú,
\q1 n kuɔ̀nnɛ̀ fɔ̃́ nwe, n teennɛ̀!
\q1 N yɛ̀mmɛ̀ do cɑ̀ɑ̀rɛ̀ kɛ̀ fɔ̃́ɔ̃̀ n dɛɛtɛ́,
\q1 n kuɔ́ mmɛsémmɛ̀ kɛ́kéntɛ́ m bɑ́ɑmmìi.
\b
\q1
\v 2 Díndi bɛnìtìbɛ̀,
\q1 dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑ̀rimɛ̀ n yètìrì?
\q1 Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ndɔ́mɛ̀ dɛtetìrɛ̀ kpɛrɛ
\q1 kɛ wɑnti siyɑ́ɑ̀bìsí?
\q1
\v 3 Bɑntɛ́nɛ̀ Kuyie nkuù n dɔ̀ɔ̀mɛ̀ mɛsɑ̀ɑ̀,
\q1 kɛ̀ n kù yu kù n tee.
\q1
\v 4 Kɛ̀ di miɛkɛ pɛikɛ di bɑ́ɑ́ dɔɔ̀ mɛyɛi,
\q1 totínɛ̀ kɛyènkɛ̀ di yɛ̀mmɛ̀ di duɔ́ dɛ̀,
\q1 kɛ́bónkùnnɛ di miɛkɛ.
\q1
\v 5 Fíénɛ̀ Kuyie nyiwũɔ̃ kù dɔ́ ì,
\q1 kɛ́ kù duɔ́ ndimɑ́ɑ̀.
\b
\q1
\v 6 Bɛsṹkùbɛ̀ nɑ̀ɑ́mmu kɛ tú:
\q1 We mbo ti duɔ́ ndiwɛ̀ì?
\q1 Ti Yiɛ̀ nKuyie ntí míítɛ́ ɑ wenniku.
\q1
\v 7 A nɛ́ n duɔ́ ndìì wɛ̀ì pɛ̃ɛ̃tɛ́mu tidiitì nɛ̀ mɛnɑɑ̀
\q1 ndɛ̀ ɔ̃ mpíɛ́kɛ́ kɛ̀ bɛ̀ mɔ̀kɛ dì.
\q1
\v 8 Nh ɔ̃ɔ̃ duɔ́ kɛ́yɛ̃̀ nkɛ́duɔ́ nɛ̀ diwɛ̀ì ndi,
\q1 kɛ yɛ̃́ n Yiɛ̀ Kuyie nfɔ̃́ɔ̃̀ n kɑ̃nkɛ́mɛ̀.
\c 5
\s1 Kuyie ncɔutɛ́ wèè kó ibɑ́ɑmmìi
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ eunɛ̀ itɑ̃rí.
\b
\q1
\v 1 N Yiɛ̀ nKuyie nkéntɛ́ n nɑ́ɑǹtì,
\q1 keè n dɑbònnì.
\q1
\v 2 N kóo kpɑ̀ɑ̀tì, fɔ̃́ nKuyie fɔ̃́ɔ̃̀ n te,
\q1 keè n dɑ yumɛ̀, fɔ̃́ nwe m bɑ́ɑ́mmɛ̀.
\q1
\v 3 N Yiɛ̀ nKuyie ndikṹnweńnì ɑ ɔ̃ɔ̃ keèmu n tɑmmɛ̀,
\q1 nh ɔ̃ɔ̃ pikɛ mbúɔ́ fɔ̃́ nwe kɛ dɑ kémmú.
\b
\q1
\v 4 Kuyie nhɑ í dɔ́ mɛyɛi,
\q1 ɑ ɔ̃ɔ̃ í ncɔutɛ́ oyɛiwe.
\q1
\v 5 Bɛ̀ɛ̀ yetɛ yɛto bɛ̀ í yóó dɑ tɔ́ɔ́nnɛ̀,
\q1 ɑ í dɔ́ bɛ̀ɛ̀ dɔ̀ɔ̀ri bɛtɔbɛ̀ mɛyɛi.
\q1
\v 6 A kɔùmu siyɑ́ɑ̀bìsí yɛmbɛ̀,
\q1 nɛ̀ bɛ̀ɛ̀ cou mɛnitiyĩ̀ĩ̀ nɛ̀ bɛciìmbɛ̀,
\q1 ti Yiɛ̀ nKuyie mbɛ̀ dò nhɑ borɛ̀ isɔkɛ nyi.
\b
\q1
\v 7 Mí nyie ɑ n dɔ̀ɔ̀ mɛ̀ɛ̀ sɑ̀ɑ̀ ndɛumu,
\q1 kɛ̀ n tɑti ɑ cĩ́ɛ̃̀tɛ̀.
\q1 N dɑ dému,
\q1 kɛ yó nnínkú ɑ cɛ̃sɑ̀ɑ̀tɛ̀ miɛkɛ.
\q1
\v 8 N Yiɛ̀ nKuyie nhɑ tú timɔ́mmɔnti yiɛ̀ nwe,
\q1 nni ncɛ̃mmú bɛ̀ɛ̀ n dííntɛ bɛ kpɛ́í,
\q1 tũntɛ kucɛ ɑ dɔ́ n tũnnɛ kù.
\q1
\v 9 Bɛ̀ í mɔkɛ timɔ́mmɔnti,
\q1 bɛ̀ dɔ́ mɛyɛi mmɛ,
\q1 kɛ̀ bɛ nɑ́ɑǹtì dò nkufɔ̃ti kùù feí,
\q1 bɛ̀ tu bɛsoùmbɛ̀ mbɛ,
\q1 kɛ ɔ̃ nnɑ́ɑ́ nkɛ kpɛnti kɛ nɛ́ dɔ́ mɛyɛi.
\q1
\v 10 Kuyie nwéntɛ́ bɛ bɛyɛibɛ,
\q1 kɛ̀ bɛ̀ dɔ́ kɛ́dɔɔ̀ tìi bɛ̀ buɔ́,
\q1 bɛ yɛi nsũ̀ṹmmu,
\q1 bɛti bɛ,
\q1 bɛ̀ yetɛ ɑ kpɛti nti.
\b
\q1
\v 11 Kɛ̀ bɛ̀ɛ̀ biɛ sɔri ɑ borɛ̀,
\q1 kɛ̀ diwɛ̀ì mbɛ̀ bo,
\q1 kɛ̀ bɛ̀ nyɑ̃nku sɑ̃́ɑ̃̀ nɛ̀ diwɛ̀ì,
\q1 kɑ̀ɑ mbɛ̀ kɑ̃nkɛ́,
\q1 bɛ̀ dɑ dɔ́mu, yóu kɛ̀ bɛ̀ nyɑ̃nkunɛ̀ diwɛ̀ì.
\q1
\v 12 Fɔ̃́ nKuyie nfɔ̃́ɔ̃̀ dɔ̀ɔ̀ri mɛsɑ̀ɑ̀ mbɛsɑ̀ɑ̀bɛ̀,
\q1 kɑ̀ɑ sɑ̀ɑ̀ mbɛ̀ kɑ̃nkɛ́ kudɔpìkù kɔ̃mɛ.
\c 6
\s1 Bɛ̀ bɑ̀ɑ́mmɛ̀ Kuyie nkɛ dɔ́ mɛteèmmɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kubómbonku iwɛ̃ĩ ini kɔku.
\b
\q1
\v 1 Kuyie nhɑ bɑ́ m potɛ́ nɛ̀ kɛmiɛkɛ,
\q1 ɑ bɑ́ n tiénnɛ̀ kumiɛpíɛ́.
\q1
\v 2 N Yiɛ̀ nKuyie, n kuɔ́ mmɛsémmɛ̀, n cĩ̀tɛmu,
\q1 n Yiɛ̀ nKuyie, m miɛkùnnɛ n kṹɔ̃̀ í pĩ́ nyɛtɔbɛ̀.
\q1
\v 3 N yí yɛ̃́ m bo tìì miɛkɛ.
\q1 N Yiɛ̀ nKuyie dɛ̀ yó nkɑ̃́ɑ̃́kɛ́ dɛ kɑ̀ɑ n teennɛ̀?
\q1
\v 4 Áú n Yiɛ̀ nKuyie, bónkùnnɛ ɑ miɛkɛ kɛ́ n dɛɛtɛ́!
\q1 N coo nhɑ sɑ̀ɑ̀ nkpɛ́í.
\q1
\v 5 Bɛcíríbɛ̀ dɑ yɛ̃̀mmu,
\q1 we mbo dɑ sɑ̃ntɛ kudɔnkù?
\b
\q1
\v 6 N kuɔ̀mmu kɛ cĩtiroo,
\q1 bɑ́ kɛ̀ɛ̀ yènkɛ̀ nh ɔ̃ nkuɔ̀mmu kɛ̀ n dɔ́ùu búútɛ́,
\q1 n dɔ́ù diì sɑ̃̀ɑ̃̀kɛnɛ̀ tinɔnniɛti.
\q1
\v 7 Mɛsémmɛ̀ mɛɛ̀ te kɛ̀ n nuɔ ncĩ̀tɛ,
\q1 n dùɔ̀ntɔbɛ̀ bɛɛ̀ sũ kɛ̀ n nuɔ nhɔ̀u.
\b
\q1
\v 8 Fũtɛnɛ̀ m borɛ̀, díndi bɛ̀ɛ̀ dɔ̀ɔ̀ri mɛyɛi,
\q1 ti Yiɛ̀ nKuyie nkèèmu n dɑbònnì.
\q1
\v 9 Ti Yiɛ̀ nKuyie nkèèmu n sɑ́útìi,
\q1 kɛ cɔutɛ́ m bɑ́ɑmmìi.
\q1
\v 10 N dootitɔbɛ̀ kufɔ̃wɑɑ́ nkuù bɛ̀ pĩ nkɛ̀ bɛ̀ di ifɛi,
\q1 kɛ̀ bɛ kɔ̃̀ntì ɑu,
\q1 kɛ̀ bɛ̀ cokù mɛcɑ̃ɑ̃ nnɛ̀ ifɛi kɛ wɛ̃ti.
\c 7
\s1 Dɑfiti dɔ́mɛ̀ Kuyie nhò kòńnɛ́
\d Fɛyɛ̀nfɛ̀ Dɑfiti dèntɛ̀ fɛ̀ Kuyie. Kuusi, Bɛnsɑmɛɛ wuɔ nkou kpɛ́í.
\b
\q1
\v 1 N Yiɛ̀ nKuyie n sɔri fɔ̃́ɔ̃̀ borɛ̀,
\q1 n dɛɛtɛ́nɛ̀ bɛ̀ɛ̀ n fɛ̃́ũnko,
\q1 m pɑtɛ.
\q1
\v 2 Bɛ̀ yɑ̀ɑ̀ bo n nɛ́tɛ́ dicìrícìrì kɔ̃mɛ,
\q1 dicìrícìrì ɔ̃ɔ̃ pĩ́mmɛ̀ kɛ́nɛ́tɛ́ bɑ́ òmɔù bɑ́ɑ́ fietɛ.
\b
\q1
\v 3 N Yiɛ̀ nKuyie, kɛ̀ m mɛ̀nkɛ dɔ̀ɔ̀ bɛ̀ n wɑ́tìrì tì
\q1 kɛ̀ m mɛ̀nkɛ cɑ̀ɑ̀rɛ̀,
\q1
\v 4 Kɛ̀ n fɔ̀ɔ́ mmɛyɛi n wèè n dɔ̀ɔ̀ mɛyɛi,
\q1 kɛ̀ nh ɛí n dùɔ̀ntɔbɛ̀ kpɛrɛ dɛtetìrɛ̀,
\q1
\v 5 n dùɔ̀ntɔbɛ̀ɛ nni mbɛtì kɛ́ n nintɛ,
\q1 kɛ́ n yɛ̃ɛ̃rɛ, kɛ́ n kuɔ,
\q1 kɛ́kũnnɛ́ n yètìrì mutɑ̃́ɑ̃́ mmiɛkɛ.
\b
\q1
\v 6 N Yiɛ̀ nKuyie nyítɛ́ kɛ́cómmú,
\q1 kɑ̀ɑ miɛkɛɛ bɛ̀ yɛ̀,
\q1 bɑɑo n dùɔ̀ntɔbɛ̀ bɛ̀ɛ̀ miɛkɛ n cɔ́ú,
\q1 n kónnɛ́ fɔ̃́ nwèè te tibeéntì.
\q1
\v 7 Ibotí imɔuu tíí nhɑ borɛ̀,
\q1 kɑ̀ɑ mbo kɛĩ́nkɛ̀ kɛ ì bɑkɛ́.
\q1
\v 8 Kuyie nfɔ̃́ nwèè bekùnɛ̀ ibotí,
\q1 n kónnɛ́ n nɑɑtí kpɛ́í,
\q1 n yí cɑ̀ɑ̀rɛ̀ dɛ̀mɑrɛ̀.
\q1
\v 9 Cónnɛ́ bɛnitiyɛibɛ cɑɑ̀rìmɛ̀,
\q1 kɛ́kpénkùnnɛ bɛsɑ̀ɑ̀bɛ̀,
\q1 fɔ̃́ nwèè yɛ̃́ bɛnìtìbɛ̀ yɛ̀mmɛ̀,
\q1 nɛ̀ bɛ yɛntotí,
\q1 ɑ tú Kuyie nku kɛ wenni.
\b
\q1
\v 10 Kuyie nkuù tu n kó kudɔpìkù,
\q1 kuù dɛɛrí bɛsɑ̀ɑ̀bɛ̀.
\q1
\v 11 Kuyie nkuù bekùnɛ̀ timɔ́mmɔnti,
\q1 kɛ nɛ́ yóù sɑ̃́ɑ̃̀.
\b
\q1
\v 12 Kòo nitiyɛiwe í cèètɛ ò sɔ̃̀ṹ o siè ndi,
\q1 kɛ deenko o tɑ̃mmù.
\q1
\v 13 Ò mɑ̀ɑ́tí tìì kpɑ̀rìnɛntì yóó we nkuɔ,
\q1 ò sɔ̃̀ṹ ìì pie nyóó we ntɑ̃.
\q1
\v 14 Ò kuɔ̀ mmɛyɛi nkó tipɔutì nti,
\q1 ò pùó mmɛsoùmmɛ̀ mmɛ,
\q1 kɛ yóó pɛitɛ́ siyɑ́ɑ̀bìsí.
\q1
\v 15 Ò keù difɔ̃̀tìrì ndi kɛ dì cũmpùnko,
\q1 ò doti ò keú dìì fɔ̃̀tìrì miɛkɛ nkɛ.
\q1
\v 16 Ò dɔ̀ɔ̀ mɛ̀ɛ̀ yɛi ndoti o yuu ĩ́nkɛ̀ nkɛ,
\q1 ò yóù kùù yonku doti o tĩ́nnì ĩ́nkɛ̀ nkɛ.
\b
\q1
\v 17 N yó nsɑ̃ntímu n Yiɛ̀ nKuyie,
\q1 kù tumɛ̀ timɔ́mmɔnti yiɛ̀,
\q1 n yó ndièmmu kɛ bie ntibómbonti,
\q1 kɛ dɛ́úkùnko Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku yètìrì.
\c 8
\s1 Kuyie nkpeńnìmɛ̀ kɛ dɔ̀ɔ̀ onìtì kòò dɛu
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kubómbonku.
\b
\q1
\v 1 Ti Yiɛ̀ nKuyie nhɑ yètìrì feímu
\q1 kɛtenkɛ̀ kɛmɔu miɛkɛ.
\b
\q1 A yètìrì dɛumu kɛ sèńtɛ́ tiwɛtì,
\q1 n yó ndɑ sɑ̃ntímu.
\q1
\v 2 Ibí nɛ̀ ibíbɛ́nní bo ndiè nkɛ dɑ sɑntí,
\q1 iì kó yɛnɔ̀ peri ɑ dùɔ̀ntɔbɛ̀ diɛbɛ̀,
\q1 ɑ dootitɔbɛ̀ diɛbɛ̀ í piɛti tinɑ́ɑǹtì.
\b
\q1
\v 3 Kɛ̀ n wùó nkɛĩ́nkɛ̀ ɑ nɔu kó mutɔ̃mmú,
\q1 otɑ̃̀nkù nɛ̀ siwɑ̃̀ɑ̃ ɑ dɔ̀ɔ̀ dɛ̀,
\q1
\v 4 m bɑ́ɑ́ yɑ̀ onìtì tu wè kɑ̀ɑ yɛ̃́ o kpɛ́í,
\q1 n yí yɑ̀ onìtì yie ntu wè kɑ̀ɑ dɑ̀kɛ o kpɛ́í.
\q1
\v 5 Kuyie nhɑ ò dɔ̀ɔ̀ kòò sɑ̃kɛ dònnɛ̀ fɔ̃́ nwe,
\q1 kɑ̀ɑ ò duɔ́ ntikpetì nɛ̀ diyetìdiɛrì.
\q1
\v 6 Koò duɔ́ nhɑ dɔ̀ɔ̀ dɛ̀ɛ̀ kó dimɑ̀ɑ̀ kòò dɛ̀ bɑkɛ́,
\q1 kɑ̀ɑ ò bɑɑ́ ndɛmɔu.
\q1
\v 7 Tipìètì nɛ̀ inɑ̀ɑ̀kɛ nɛ̀ tikpɑsĩ̀ntòo,
\q1
\v 8 nɛ̀ sinɔɔ nɛ̀ siyĩĩ
\q1 nɛ̀ dɛ̀ɛ̀ kó dimɑ̀ɑ̀ bo mɛniɛ mmiɛkɛ.
\b
\q1
\v 9 Ti Yiɛ̀ nKuyie nhɑ yètìrì feímu
\q1 kɛtenkɛ̀ kɛmɔu miɛkɛ.
\c 9
\s1 Kuyie ndɛɛrímɛ̀ bɛcĩ̀rìbɛ̀ nɛ̀ bɛ̀ fɛ̃́ũnko bɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ dɛbémbénnɛ̀ mɛtɑmmɛ̀ dɑɑmɛ̀ kpɛrɛ.
\b
\q1
\v 1 N Yiɛ̀ nKuyie n yó ndɑ sɑ̃ntí nɛ̀ n yɛ̀mmɛ̀ mɛmɔu ndi,
\q1 kɛ́nnɑ́ɑ́ nhɑ kó tidiɛtì.
\q1
\v 2 Fɔ̃́ɔ̃̀ te kɛ̀ nh ɑunɛ̀ diwɛ̀ì,
\q1 kɛ diènnɛ̀ dɛbémbénnɛ̀ kɛ dɑ sɑ̃ntí,
\q1 fɔ̃́ nKuyie nhɑ bɑkɛ́mu kɛtenkɛ̀ nɛ̀ kɛĩ́nkɛ̀.
\b
\q1
\v 3 N dootitɔbɛ̀ bótìrì bɛ fɔ̃nkó nyɛ,
\q1 kɛ duò kɛ kɔ̃ nhɑ ììkɛ̀.
\q1
\v 4 Fɔ̃́ɔ̃̀ n kòḿmú kɛ kpɑ n kpɛ́í,
\q1 kɛ kɑri ɑ kpɑ̀ɑ̀tìkɑ̀rì kɛ bekùnɛ̀ timɔ́mmɔnti.
\b
\q1
\v 5 A puotìmu bɛ̀ɛ̀ í dɑ bɑ́ɑ́,
\q1 kɛ kɔù bɛnitiyɛibɛ,
\q1 kɛ ũũtì bɛ yètɛ̀ pɑíí sɑ̃́ɑ̃̀.
\q1
\v 6 Fɔ̃́ɔ̃̀ kùɔ ti dootitɔbɛ̀ kɛ bɛ̀ dèè,
\q1 kɛ pùɔ mbɛ ɛkɛ̀ pɑ́í pɑ́í,
\q1 kɛ̀ ti yɛ̃̀ mbɛ kpɛ́í.
\b
\q1
\v 7 Kuyie nkpɑ̀ɑ̀tirìmu sɑ̃́ɑ̃̀,
\q1 kɛ fìí nku kpɑ̀ɑ̀tìkɑ̀rì tibeéntì kpɛ́í.
\q1
\v 8 Kuù bɑkɛ́ kutenkù nɛ̀ timɔ́mmɔnti,
\q1 kɛ bekùnɛ̀ ibotí kɛ̀ dɛ̀ sìɛ́.
\b
\q1
\v 9 N Yiɛ̀ nKuyie nfɔ̃́ɔ̃̀ tu bɛ̀ fɛ̃́ũnko wè kó disɔ̀rì,
\q1 Bɛ̀ sɔ̀rì fɔ̃́ɔ̃̀ borɛ̀ mɛyɛǹcɑɑ̀rìmɛ̀ mɔ̀nnì.
\q1
\v 10 Bɛ̀ɛ̀ dɑ yɛ̃́ bɛ̀ dɑ duɔ́mmu bɛmɑ́ɑ̀,
\q1 kɛ yɛ̃́ fɔ̃́ nKuyie nhɑ í yóumɛ̀ bɛ̀ɛ̀ dɑ wɑɑ̀.
\b
\q1
\v 11 Ndiènnɛ̀ kɛ́dɛ́úkùnko ti Yiɛ̀ nKuyie,
\q1 kuù kɑ̀ri ku kpɑ̀ɑ̀tìkɑ̀rì ĩ́nkɛ̀ Siyɔ̃ɔ̃,
\q1 mpĩɛ̃kùnɛ̀ Kuyie ndɔ̀ɔ̀ mɛ̀ɛ̀ dɔɔ̀rìmɛ̀ diɛmɛ̀ ibotí miɛkɛ.
\q1
\v 12 Kuù bekùnɛ̀ bɛnitikɔ̀ùbɛ̀,
\q1 kɛ yɛ̃́ bɛcĩ̀rìbɛ̀ kpɛ́í,
\q1 kù í yɛ̃̀ mbɛ̀ɛ̀ kuɔ̀ mbɛ kpɛ́í.
\b
\q1
\v 13 N Yiɛ̀ nKuyie, n kuɔ́ mmɛsémmɛ̀,
\q1 wéntɛ́ n níim̀bɛ̀ n diinko mɛ̀ɛ̀ sémmɛ̀,
\q1 fɔ̃́ɔ̃̀ n dɛɛrínɛ̀ mukṹṹ.
\q1
\v 14 Kɛ̀ nní ndiènnɛ̀ diwɛ̀ì
\q1 kɛ dɑ sɑ̃ntí Siyɔ̃ɔ̃ kɔbɛ tĩ̀nnì miɛkɛ,
\q1 ɑ n dɛɛtɛ́mɛ̀.
\b
\q1
\v 15 Yɛbotɛ̀ duò yɛ̀ keú yɛ̀ɛ̀ fɔ̃̀tɛ̀ miɛkɛ nkɛ,
\q1 kɛ̀ yɛ̀ dii tìì cùɔ̀tì yɛ̀ pĩĩ.
\q1
\v 16 Kuyie mbɛnkúmu kù tu kù,
\q1 kɛ dɔɔri timɔ́mmɔnti,
\q1 kòo yɛiwe dii tìì mɑ́tì ò pĩĩ.
\b
\q1
\v 17 Bɛnitiyɛibɛ tɑti kudɔnkù nku,
\q1 nɛ̀ yɛbotɛ̀ yɛmɔu yɛ̀ɛ̀ yɛ̃̀ nKuyie.
\q1
\v 18 Kuyie nyí yóó yɛ̃̀ mbɛcĩ̀rìbɛ̀ kpɛ́í,
\q1 ocĩ̀rì í yó nkémmú dɛ̀mɑrɛ̀ kɛ́mɔ́ntɛ́ kɛ̀ dɛ̀ɛ deè.
\b
\q1
\v 19 Kuyie nyítɛ́ kɛ́cómmú,
\q1 bɑ́ɑ́ yóu kòo nìtì weè nɑ,
\q1 bekɛ́nɛ̀ yɛbotɛ̀.
\q1
\v 20 N Yiɛ̀ nKuyie nhɑ̃nnɛ́ yɛ̀ kufɔ̃wɑɑ́,
\q1 kɛ̀ yɛ̀ɛ bɑntɛ́ yɛ̀ tumɛ̀ bɛnìtìbɛ̀ mbɛ.
\c 10
\q1
\v 1 Dɛ̀ yĩ́mɛ n Yiɛ̀ nKuyie nkɑ̀ɑ dɛ́tɛ́?
\q1 Dɛ̀ dòmmɛ kɑ̀ɑ sɔ̀ri mɛyɛǹcɑɑ̀rìmɛ̀ mɔ̀nnì?
\b
\q1
\v 2 Bɛnitidɔnnibɛ̀ mɔ̀kɛ sipɔɔ nsi,
\q1 kɛ fɛ̃́ũnko bɛcĩ̀rìbɛ̀,
\q1 kɛ̀ bɛ dɔɔ̀rìmɛ̀ bɛ̀ pĩĩ.
\q1
\v 3 Dɛ̀ ɔ̃ nnɑɑtimu onitiyɛiwe ò dɔ́ kɛ́dɔɔ̀ tì kpɛ́í,
\q1 kòò fìètɛ otɔù kpɛrɛ dɛ̀ nhò nɑɑti,
\q1 kòò sɑ̃̀ɑ̃́ nKuyie.
\q1
\v 4 Onitiyɛiwe ɔ̃ nnɑ́ɑ́nnɛ̀ tɛpɔ̀tɛ̀ ntɛ kɛ tú:
\q1 Kuyie nyí kpetì òmɔù,
\q1 kù ketɛ́ kɛ́ í bo.
\q1 Tiì bo o yɛ̀mmɛ̀ sɑ̃́ɑ̃̀.
\q1
\v 5 Ò dɔ̀ɔ̀ri dɛ̀ yíémmu sɑ̃́ɑ̃̀,
\q1 ò í bɑnní Kuyie mbeéntì,
\q1 ò ɑúmmu o dootitɔbɛ̀ bɛmɔu.
\q1
\v 6 Kòò nɑ̀ɑ́ nho yɛ̀mmɛ̀ miɛkɛ kɛ tú:
\q1 N yí doti bìtì,
\q1 mɛyɛi nyí yó n yɑ̀ bìtì bìtì!
\b
\q1
\v 7 Kòo nùù mɔ̀kɛ tinɑ́ɑǹsĩ̀ntì,
\q1 siyɑ́ɑ̀bìsí nɛ̀ mɛciìmmɛ̀,
\q1 kòo nɑ́ɑǹtì tu tiyɛiti ò í nɑ́ɑ́ ntimɔ́mmɔnti.
\q1
\v 8 Ò ɔ̃ɔ̃ okɛ dihɛì tɑkɛ́ nkɛ,
\q1 kɛ́kuɔ wèè í cɑ̀ɑ̀rɛ̀ mùmɑmù disɔ̀rì
\q1 kɛ ɔ̃ ntṹṹ nkɛ pɑkɛ́ ocĩ̀rì.
\q1
\v 9 Ò ɔ̃ nhokɛ kutúúkù nku,
\q1 mɛdɛ́timɛ̀ dicìrícìrì kɔ̃mɛ,
\q1 kɛ pɑkɛ́ ocĩ̀rì,
\q1 kóò kpɑ̀ɑ̀kɛ kɛ́tɑnnɛ́ ticùɔ̀tì miɛkɛ.
\q1
\v 10 Ò ɔ̃ɔ̃ kúkúmu, kɛ́bɑkɛ,
\q1 kɛ́yɑ̃kɛ ocĩ̀rì.
\q1
\v 11 Kòo yɛ̀mmɛ̀ dò nKuyie nyɛ̃̀ nho kpɛti,
\q1 kɛ dò nkù í dɑkɛ o kpɛti ĩ́nkɛ̀,
\q1 kɛ dò nkù í wúó nhò dɔ̀ɔ̀ri dɛ̀.
\b
\q1
\v 12 Kuyie, nyítɛ́ kɛ́cómmú,
\q1 Kuyie, nyoutɛ ɑ nɔ̀ùtɛ̀!
\q1 Bɑ́ɑ́ yɛ̃̀ mbɛcĩ̀rìbɛ̀ kpɛ́í.
\q1
\v 13 Dɛ̀ yĩ́mɛ kòo yɛiwe dɑ dɑú,
\q1 kɛ tú ɑ í yóó ò kpetínnɛ́?
\b
\q1
\v 14 A wúómmu ocĩ̀rì ɑ́ɑ̀rìmɛ̀ kɛ fɛ̃́ṹrì,
\q1 fɔ̃́ɔ̃̀ ò kómmú.
\q1 Ocĩ̀rì duɔ́ nfɔ̃́ nwe omɑ́ɑ̀,
\q1 fɔ̃́ɔ̃̀ dɑ̀kɛ dɛciribirɛ kpɛ́í.
\q1
\v 15 Pɔntɛ oyɛiwe wɛ̃rímú,
\q1 yietí we o yɛi,
\q1 dɛitɛ we ɑ ììkɛ̀.
\q1
\v 16 Ti Yiɛ̀ nKuyie nfɔ̃́ɔ̃̀ tu okpɑ̀ɑ̀tì sɑ̃́ɑ̃̀,
\q1 bɛ̀ɛ̀ í dɑ yɛ̃́ bɛ̀ í yó nkpɑɑ́ ɑ ɛì.
\b
\q1
\v 17 A kemmumu bɛcĩ̀rìbɛ̀ dɔ́ tì,
\q1 kɛ nɑ́ríkùnko bɛ yɛ̀mmɛ̀,
\q1 kɛ yo bɛ̀ tu mù.
\q1
\v 18 Kɛ kommu iciribí nɛ̀ bɛ̀ fɛ̃́ũnko wè,
\q1 kɛ̀ dɛ̀ bo yie nkòo nìtì bɑ́ ndɔɔrinɛ̀ otɔù muwɛ̃rímú.
\c 11
\s1 Kuyie nwùómmɛ̀ bɛnìtìbɛ̀ bɛmɔu
\pi1
\v 1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1 Kuyie mborɛ̀ n dɛ nsɔri,
\q1 di bo yĩ́mɛ kɛ dɔ̀ nní ncokù yɛtɑ̃rɛ̀ miɛkɛ tɛnɔ̀tɛ̀ kɔ̃mɛ?
\q1
\v 2 Bɛyɛibɛ fĩ mbɛ tɑ̃nnɛ̀ ndɛ,
\q1 bɛ̀ sɛ̀unko bɛ pie nyi,
\q1 kɛ sɔri dibiìnnì miɛkɛ kɛ bo tɑ̃ wèè yɛ̀mmɛ̀ wenni.
\q1
\v 3 Kɛ̀ dihɛì cɑ̀ɑ̀rɛ̀,
\q1 onitisɑ̀ù bo dɔɔ̀ bɑ?
\b
\q1
\v 4 Kuyie mbo ku cɛ̃sɑ̀ɑ̀tɛ̀ miɛkɛ nkɛ,
\q1 ku kpɑ̀ɑ̀tìkɑ̀rì bo kɛĩ́nkɛ̀ nkɛ,
\q1 kù wùómmu bɛnìtìbɛ̀ bɛmɔu,
\q1 kɛ yɛ̃́ bɛ yɛ̀mmɛ̀ miɛkɛ dòmmɛ̀.
\q1
\v 5 Kuyie nyɛ̃́mu osɑ̀ɑ̀wè nɛ̀ oyɛiwe bɛ yɛ̀mmɛ̀,
\q1 kù í dɔ́ oyonkuwe.
\q1
\v 6 Kuyie nyóó cṹũnní yɛhɑ̃ɑ̃kũɔ̃ nyɛ nɛ̀ mɛhɑ̃ɑ̃kpɛ̀rìmɛ̀ bɛnitiyɛibɛ ĩ́nkɛ̀,
\q1 bɛ kó tiyeti dɛ ntú.
\q1
\v 7 Ti Yiɛ̀ nKuyie ntu timɔ́mmɔnti yiɛ̀ nwe,
\q1 kɛ dɔ́ wèè dɔ̀ɔ̀ri timɔ́mmɔnti,
\q1 bɛ̀ɛ̀ pĩ ntimɔ́mmɔnti bɛɛ̀ yóó kù yɑ̀.
\c 12
\s1 Bɛyɛibɛ sũ̀ṹmmɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ kukùtìdùkù iwɛ̃ĩ ini kɔku.
\b
\q1
\v 1 Ti Yiɛ̀ nKuyie nti dɛɛtɛ́,
\q1 bɛnitisɑ̀ɑ̀bɛ̀ dèèmu,
\q1 timɔ́mmɔnti yɛmbɛ̀ í kpɑɑ́.
\q1
\v 2 Bɑ́ wè ò wɑ́tìrì otɔù nwe,
\q1 koò kpɛ̀nti kòo yɛ̀mmɛ̀ nɛ́ bo mɛ̀dɛ́mɛ̀.
\q1
\v 3 Kuyie nkuɔ bɛnitikpɛntìbɛ̀,
\q1 nɛ̀ bɛ̀ɛ̀ nɑ̀ɑ́nnɛ̀ sifeí.
\q1
\v 4 Bɛ̀ɛ̀ tu:
\q1 Ti nɔ̀ yɛɛ̀ tu ti kó muwɛ̃rímú,
\q1 ti nɔ nkɛ nɑ́ɑ́mmu,
\q1 we mbo nɑ kɛ́ ti bɑɑtɛ́.
\b
\q1
\v 5 Kɛ̀ Kuyie ndɔ̀:
\q1 Mí nKuyie m bo ítɛ́ kɛ́cómmú,
\q1 bɛ̀ fɛ̃́ũnko bɛ̀ɛ̀ sénnìbɛ̀ kpɛ́í
\q1 nɛ̀ bɛcĩ̀rìbɛ̀ bɛ̀ɛ̀ kuɔ̀,
\q1 m bo dɛɛtɛ́ bɛ̀ sènkɛ̀rì bɛ̀.
\b
\q1
\v 6 Kuyie nnɑ́ɑǹtì dò mpɑ́íí nwe
\q1 kɛ dò mmɛsɔɔ mbɛ̀ pũ̀ńnɛ́ mɛ̀ fɛhɑ̃ɑ̃tofɛ,
\q1 kɛ̀ mɛ̀ wenkɛ mɛsɑ̀ɑ̀.
\q1
\v 7 Fɔ̃́ nti Yiɛ̀ Kuyie,
\q1 fɔ̃́ɔ̃̀ yó nti kɑ̃nkɛ́ bɛnìtìbɛ̀ biɛ̀ mbotí.
\q1
\v 8 Bɑ́ kɛ̀ dɛ kó bɛnìtìbɛ̀ bo tipíìtì timɔu,
\q1 bɑ́ kɛ̀ bɛyɛibɛ sũ̀ṹ nkutenkù.
\c 13
\s1 Onìtì dɔ́mɛ̀ Kuyie nhò dɛɛtɛ́ kɛ̀ dɛ̀ ò ɔɔtí
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Kuyie ndɛ yó nkɑ̃́ɑ̃́kɛ́ dɛ kɑ̀ɑ dentɛní n kpɛ́í?
\q1 Dɛ̀ yó nkɑ̃́ɑ̃́kɛ́ dɛ kɑ̀ɑ yóu kɛ̀ n dɑ yɑ̀?
\q1
\v 2 Dɛ̀ yó nkɑ̃́ɑ̃́kɛ́ dɛ kɛ̀ iyĩ̀ɛ̃̀kɛ nɛ̀ mɛyɛǹcɑɑ̀rìmɛ̀ yɛwe yɛmɔu kɔ̃mɛ kɛ̀ dɛ̀ɛ deè m miɛkɛ?
\q1 Dɛ̀ yó nkɑ̃́ɑ̃́kɛ́ dɛ kɛ̀ n nɑ n dootitɔbɛ̀?
\q1
\v 3 N yiɛ̀ nKuyie nwéntɛ́ní kɛ́keè n tú mù,
\q1 kɛ́ n yíɛ́ muwɛ̃rímú,
\q1 n yɑ̀ɑ̀ bo kú.
\q1
\v 4 Kɛ̀ n dootitɔbɛ̀ bɑ́ɑ́ yĩ́ bɛ̀ n nɑ,
\q1 dɛ̀ yɑ̀ɑ̀ bo nɑrikɛ n dootitɔbɛ̀ n yĩɛ̃kɛmɛ̀.
\b
\q1
\v 5 N yɛ̃́mu ɑ túmɛ̀ mɛsɑ̀ɑ̀ nyiɛ̀,
\q1 kɛ̀ n yɛ̀mmɛ̀ nɑɑti ɑ n dɛɛtɛ́mɛ̀.
\q1 N Yiɛ̀ nKuyie, n yó ndiè nkɛ dɑ sɑ̃ntímu,
\q1 ɑ n dɔ̀ɔ̀ mɛ̀ɛ̀ sɑ̀ɑ̀ nkpɛ́í.
\c 14
\s1 Onitiyɛiwe kó mɛborimɛ
\pi1
\v 1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1 Tiyɛìntì tiì ɔ̃ɔ̃ yĩ́ Kuyie nyí bo!
\q1 Bɛ̀ cɑ̀kɛmu, bɛ̀ dɔ̀ɔ̀ri isɔkɛ kpɛrɛ ndɛ,
\q1 òmɔù í bo bɛ miɛkɛ wèè dɔ̀ɔ̀ri mɛsɑ̀ɑ̀.
\q1
\v 2 Ti Yiɛ̀ nKuyie mboní kɛĩ́nkɛ̀ nkɛ kɛ wúó mbɛnìtìbɛ̀,
\q1 kɛ bo yɑ̀ wèè mɔ̀kɛ mɛyɛ̀mmɛ̀ kɛ kù wɑɑ̀.
\q1
\v 3 Bɛmɔu bɛ̀ fetimu kɛ cɑ̀kɛ,
\q1 òmɔù í bo wèè dɔ̀ɔ̀ri mɛsɑ̀ɑ̀ mbɑ́ omɑ́ɑ̀.
\b
\q1
\v 4 Kuyie mbɛ́imu kɛ tú: Dɛ kó bɛnìtìbɛ̀ sɑ̀ɑ̀ í yɛ̃́ dɛ̀mɑrɑ̀ɑ̀?
\q1 Kɛ soú n nìtìbɛ̀ kɛ bɛ̀ yo mbɑ́ bɛ̀ í dɑkɛ n kpɛtɑɑ̀?
\b
\q1
\v 5 Kufɔ̃wɑɑ́ n yóó bɛ̀ ɑutɛ́mu kɛ̀ bɛ̀ nkpeutí,
\q1 kɛ yɛ̃́ Kuyie nkommumɛ̀ bɛsɑ̀ɑ̀bɛ̀.
\q1
\v 6 Di pɑɑnkonɛ̀ bɛcĩ̀rìbɛ̀ mbɛ bɛ kpɛrɛ kɛ̀ ifɛi yóó di pĩ́,
\q1 kɛ yɛ̃́ ti Yiɛ̀ nKuyie nkuù tumɛ̀ bɛ kó disɔ̀rì.
\b
\q1
\v 7 Mɛdɛɛtímɛ̀ɛ yɛ̀nní Siyɔ̃ɔ̃ kɛ́dɛɛtɛ́ Isidɑyɛɛribɛ!
\q1 Kuyie mbo wɛ̃tɛ kɛ́tɛ̃́nnɛ́ní dìì mɔ̀nnì ku nìtìbɛ̀,
\q1 dɛ̀ bo nɑrikɛ Sɑkɔbu kɔbɛ,
\q1 Isidɑyɛɛribɛ bo nyɑ̃nku.
\c 15
\s1 Kuyie ndɔ́ ku kɔbɛ ndommɛ̀
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie nhɑ yóó cɔutɛ́ we ɑ cĩ́ɛ̃̀tɛ̀ miɛkɛ?
\q1 We n yó mbo ɑ tɑ̃sɑ̀ɑ̀rì ĩ́nkɛ̀?
\q1
\v 2 Wèè borimɛ wenni wènwe kòò tũ̀ ntimɔ́mmɔnti,
\q1 kɛ nɑ́ɑ́ mmɔ́mmuɔ ntìì boní o yɛ̀mmɛ̀.
\q1
\v 3 Wèè í wɑ́tìrì bɛtɔbɛ̀, wèè í cɑɑ̀ri o kou,
\q1 wèè í sɑ̃́ɑ̃́ nho cɛ̃pɛɛtitɔù.
\q1
\v 4 Wèè yetírí Kuyie nyetɛ bɛ̀, kɛ cɔú bɛ̀ɛ̀ kù dé,
\q1 kòò bɛ́i ndìì nùù bɑ́ kɛ̀ dì ò yóù wèe dì dɔ̀ɔ̀.
\q1
\v 5 Wèè í penni o díítí kɛ dɔ́ mucɔ̃́ntimu,
\q1 wèè ɔ̃ɔ̃ í ncɔutɛ́ ticuuti kɛ́cɑɑ̀rɛ̀ wèè nɑɑti.
\b
\q1 Wèè dɔ̀ɔ̀ri mɛmmɛ dɛ̀mɑrɛ̀ bɑ́ɑ́ ò nɑmpɛ.
\c 16
\s1 Kuyie ndɛɛtɛ́ wè kó diwɛ̀ì
\pi1
\v 1 Dɑfiti yɛ̀nfɛ̀.
\b
\q1 Áú Kuyie! Nni nkɑ̃nkɛ́,
\q1 fɔ̃́ɔ̃̀ tu n kó disɔ̀rì.
\q1
\v 2 N Yiɛ̀ nKuyie nfɔ̃́ɔ̃̀ m bɑkɛ́,
\q1 m pɛ́ú fɔ̃́ɔ̃̀ mɑ́ɑ̀ borɛ̀ diwɛ̀ì.
\b
\q1
\v 3 Bɛsɑ̀ɑ̀bɛ̀ bɛ̀ɛ̀ bo dihɛì miɛkɛ
\q1 bɛɛ̀ tu bɛnitimɔ́mmɔmbɛ n dé bɛ̀.
\q1
\v 4 Bɛ̀ɛ̀ kɔ̀rì yɛbɔkɛ̀ borɛ̀,
\q1 m bɑ́ɑ́ kɔtɛ bɛ̀ feu dɛ̀ bɛ kó iwũɔ̃,
\q1 m bɑ́ɑ́ fíé bɛ kó iwũɔ̃,
\q1 n ketɛ́ kɛ bɑ́ɑ́ ɑɑtɛ kɛ́yú bɛ bɔkɛ̀ kó yɛyètɛ̀.
\b
\q1
\v 5 N Yiɛ̀ nKuyie nfɔ̃́ɔ̃̀ tu n kpɛrɛ dɛmɔu,
\q1 fɔ̃́ɔ̃̀ n duɔ̀ n dɔ́ dɛ̀,
\q1 n kpɛti timɔu bo ɑ nɔu miɛkɛ nkɛ.
\q1
\v 6 A n duɔ́ ndɛ̀ n nɑɑtimu,
\q1 dɛ̀ tu dɛsɑ̀ɑ̀rɛ̀ ndɛ n kpɛ́í
\q1 kɛ n duɔ̀ ndiwɛ̀ì.
\b
\q1
\v 7 N sɑ̃ntímu Kuyie nkùù n tiè,
\q1 bɑ́ kɛyènkɛ̀ n yɛ̀mmɛ̀ ɔ̃ n dentɛmmu dɛ kó itié.
\q1
\v 8 M buɔ́ n Yiɛ̀ nKuyie nku sɑ̃́ɑ̃̀,
\q1 kù m bonɛ̀mu, m bɑ́ɑ́ kpeutɛ.
\q1
\v 9 Dɛɛ̀ te kɛ̀ n yɛ̀mmɛ̀ nɑɑti,
\q1 kɛ̀ n dìènnɛ̀ diwɛ̀ì.
\q1
\v 10 Kɛ yɛ̃́ kɛ dò mbɑ́ kɛ̀ n ku,
\q1 m bɑ́ nkpɑɑ́ kufɔ̃ti miɛkɛ,
\q1 kɛ yɛ̃́ ɑ í yóó yóumɛ̀ ɑ kou kòo pɑ̃ɑ̃kɛ.
\q1
\v 11 A m bɛnkɛmu mufòmmu kó kucɛ,
\q1 kɛ yo nni mbonɛ̀ kɛ n duɔ̀ ndiwɛ̀ì.
\c 17
\s1 Wèè í cɑ̀ɑ̀rɛ̀ mùmɑmù ò mɔɔmɛ̀ Kuyie mmɛteèmmɛ̀
\pi1
\v 1 Dɑfiti kó ibɑ́ɑmmìi.
\b
\q1 N Yiɛ̀ nKuyie, keè n dɑ mɔ́ú tì, kɛ́ n kónnɛ́,
\q1 keè n dɑbònnì kɛ́keè m bɑ́ɑmmìi,
\q1 siyɑ́ɑ̀bìsí í bo m miɛkɛ.
\q1
\v 2 Fɔ̃́ɔ̃̀ yó m bekɛ́nɛ̀,
\q1 fɔ̃́ɔ̃̀ yó m pútɛ́ n nɑɑtimu.
\q1
\v 3 A yɛ̃́mu n yɛ̀mmɛ̀, ɑ n séúmu kɛyènkɛ̀,
\q1 kɑ̀ɑ n fiɛ ɑ í yóó yɑ̀ tìmɑtì,
\q1 tìì bo n yɛ̀mmɛ̀ tiì yìɛ̀ní n nùù.
\q1
\v 4 A nɑ́ɑǹtì tiì n ni,
\q1 kɛ n yennínɛ̀ mmɑ́ɑ̀ bɛyɛibɛ kó icɛ.
\q1
\v 5 N tũmmu weti weti ɑ cɛ,
\q1 n tɑ̀ɑ̀kɛ í kpeutí.
\b
\q1
\v 6 Kuyie n dɑ yumu kɛ́ yɛ̃́ ɑ yó n tɛ̃́nnɛ́mɛ̀,
\q1 kéntɛ́ m bíɛ́kɛ̀ kɛ́keè n dɑ nɑ́ɑ́ ntì.
\q1
\v 7 Bɛnkɛ ɑ sɑ̀ɑ̀ n diɛmɛ̀ fɔ̃́ nwèè dɛɛrí bɛ̀ɛ̀ wɑnti disɔ̀rì ɑ borɛ̀,
\q1 kɛ bɛ̀ fèkù bɛ dootitɔbɛ̀ nɔu miɛkɛ.
\q1
\v 8-9 N ni nkɑ̃nkɛ́ kunɔmpòkù ɔ̃ nkɑ̃nkɛ́mɛ̀ tɛnɔnnìtɛ̀,
\q1 bɛnitiyɛibɛ bɛ̀ɛ̀ n fɛ̃́ũnko bɛ kpɛ́í,
\q1 ɑ nni ndíɛ́kɛ́ ɑ kó mɛdɛ́ɛ̀.
\q1 N dootitɔbɛ̀ yonkubɛ bɛ̀ɛ̀ n fitɛ́ bɛ kpɛ́í.
\b
\q1
\v 10 Bɛ̀ í mɔkɛ mɛsémmɛ̀,
\q1 bɛ̀ nɑ̀ɑ́nnɛ̀ sipɔɔ nsi.
\q1
\v 11 Bɛ̀ tũ n nɑɑ̀cɛ̀i nsi,
\q1 kɛ n fitɛ́ kɛ wɑnti kɛ́ m bɔ nkɛtenkɛ̀.
\q1
\v 12 Bɛ̀ dònnɛ̀ dicìrícìrì ndi dìì dɔ́ kɛ́pĩ́ nkɛ̀ dɛ̀ dì ɔɔtí,
\q1 musĩ̀mmù mùù òkɛ difɑ̃pèù kɛ díí.
\b
\q1
\v 13 Kuyie mbɑ́ɑ́tí kɛ́ bɛ̀ kpɑnnɛ̀,
\q1 kɛ́ bɛ̀ bɔ nkɛtenkɛ̀,
\q1 youtɛ ɑ siè kɛ́ n dɛɛtɛ́nɛ̀ bɛnitiyonkubɛ.
\q1
\v 14 A bɛ̀ kùɔnɛ̀ ɑ kpɑ̀rìsiè, kɛ́ bɛ̀ dèè pɑ́íí,
\q1 bɛ̀ bɑ́ nkpɑɑ́ bɛfòùbɛ̀ miɛkɛ,
\q1 nii mbɛ mɛnɛ́tiimɛ ɑ sùɔ́ mmɛ̀ bɛ kpɛ́í,
\q1 kɛ̀ bɛ bíí yɑ̃̀ kɛ́nsɑ̀nnɛ̀ kɛ́súɔ́ mbɛ yɑɑ̀bí.
\q1
\v 15 Mí n wetímu kɛ yóó dɑ yɑ̀,
\q1 m bo entɛ dìì mɔ̀nnì n yóó dɑ yɑ̀mu kɛ́nsɑ̀nnɛ̀.
\c 18
\s1 Dɑfiti dèntɛ̀mɛ̀ kɛ sɑ̃ntɛ Kuyie
\r (Wéntɛ́ 2 Sɑmmuyɛɛri 22.1-51)
\d Bɛdèmbɛ̀ dìèmmɛ̀ Dɑfiti Kuyie ntɔ̃ntì yɛ̀nfɛ̀. Ò do dèntɛ̀ dɛ kó fɛyɛ̀nfɛ̀ Kuyie nhò dɛɛtɛ́ dìì mɔ̀nnì ndi nɛ̀ o dootitɔbɛ̀ bɛmɔu nɛ̀ Sɑuri.
\b
\q1
\v 1 Kòò bɛ́i nkɛ́ dɔ̀:
\q1 N Yiɛ̀ nKuyie n dɑ dɔ́mu,
\q1 fɔ̃́ɔ̃̀ tu n kó muwɛ̃rímú.
\b
\q1
\v 2 N Yiɛ̀ nKuyie fɔ̃́ɔ̃̀ n te n sɔri fɔ̃́ɔ̃̀ borɛ̀,
\q1 fɔ̃́ɔ̃̀ tu n kó kupèrìkù kùù n kɑ̃nkɛ́,
\q1 fɔ̃́ɔ̃̀ tu n kó kudɔpìkù,
\q1 fɔ̃́ɔ̃̀ tu okperì wèè n dɛɛrí,
\q1 fɔ̃́ɔ̃̀ tu n kó tɛcɛ̃kpetɛ̀ n sɔri tɛ̀ɛ̀ miɛkɛ,
\q1 fɔ̃́ɔ̃̀ tu n dɛɛtíwè wèè n dɛɛtɛ́nɛ̀ bɛyɛibɛ,
\q1
\v 3 Kuyie nyètìrì ndɛu,
\q1 n ku n yu kɛ̀ kù n dɛɛtɛ́nɛ̀ n dootitɔbɛ̀.
\q1
\v 4 Mukṹṹ ndo m boúmu kɛ́ n fitɛ́,
\q1 mɛniɛ mmɛ̀ɛ̀ pũɔ̃̀ nkɛ kɔù kɛ̀ mɛ̀ɛ donnɛ́ n kɔ̃m̀bùɔ̀tì.
\q1
\v 5 Kudɔnkù kó iwɛ̃ĩ iì do n cɛ̃̀ɛ̃̀tɛ,
\q1 kɛ̀ mukṹṹ nkó ticùɔ̀tì nduɔ́ n yììkɛ̀.
\q1
\v 6 Dɛ̀ do n di kɛ̀ n yú Kuyie nku,
\q1 kɛ́ ku nkuɔ́nnɛ̀,
\q1 kɛ̀ kùu keè n tɑmmɛ̀ ku cĩ́ɛ̃̀tɛ̀ miɛkɛ,
\q1 kɛ̀ m bɑ́ɑmmìi tuɔkoo ku borɛ̀.
\b
\q1
\v 7 Kɛ̀ kɛtenkɛ̀ɛ ɑɑ́,
\q1 kɛ̀ yɛtɑ̃rɛ̀ɛ sɑ̃ntɛ̀ kɛ́ɑɑ́,
\q1 ku miɛkɛ pɛikɛ mɛ̀ɛ̀ kpɛ́í.
\q1
\v 8 Kɛ̀ kuyukú nyiɛ̀ní Kuyie nwũɔ̃̀,
\q1 nkɛ̀ fɛhɑ̃ɑ̃dɛɛ̀nfɛ̀ yìɛ̀ní ku nùù nɛ̀ ihɑ̃ɑ̃pɛ́m̀pɛ́rí.
\q1
\v 9 Kɛ̀ kùu bíi ntiwɛtì kɛ́cútɛ́ní,
\q1 kɛ́ncutiní kɛ nɑ yɛwɛtisùɔ̀.
\q1
\v 10 Kɛ dekɛ oĩ́nkɛ̀mbɑ̀rì, kɛ puù,
\q1 kɛ́mpùtì kuyɑɑkù miɛkɛ.
\q1
\v 11 Kɛ̀ yɛwɛtisùɔ̀ kù fitɛ́,
\q1 kɛ̀ yɛwɛtɛ̀ diɛyɛ̀ kù cɛ̃̀ɛ̃̀tɛ,
\q1 kɛ̀ dɛ̀ sɔ̀ù kɛ dò ndibinni cũmpuri.
\q1
\v 12 Kɛ̀ kuwenniku diɛkù yìɛ̀ní ku ììkɛ̀
\q1 Kɛ̀ yɛwɛtɛ̀ pɛ̃nkù nɛ̀ yɛmɑ́tɑ̃́rɛ̀ nɛ̀ ihɑ̃ɑ̃pɛ́m̀pɛ́rí.
\q1
\v 13 Kɛ̀ ti Yiɛ̀ nKuyie mpɛ́ú kɛĩ́nkɛ̀ fɛtɑɑfɛ̀ kɔ̃mɛ,
\q1 kɛ̀ bɛ̀ yo Kuyie nkùu bɑkɛ́ kɛĩ́nkɛ̀ nɛ̀ kɛtenkɛ̀ ku tɑmmɛ̀.
\q1 Kɛ̀ fɛtɑɑfɛ̀ mɑ́tɑ̃́rɛ̀ duòní,
\q1 kɛ̀ muhɑ̃ɑ̃́ ncɔ́ú.
\q1
\v 14 Kɛ̀ fɛtɑɑfɛ̀ nwéí tipíìtì timɔu,
\q1 kɛ̀ Kuyie ntɑ̃ũ ku pie ntipíìtì timɔu.
\q1
\v 15 Kɛ̀ kùu pɛɛ kɛ̀ dɑ̀mɛ́ɛ̀rì fũ̀ɔ̃̀ feitɛ́,
\q1 kɛ̀ kùu wei kɛ̀ kɛtenkɛ̀ miɛkɛɛ feitɛ́.
\b
\q1
\v 16 Kɛ̀ kùu youtɛní ku nɔ̀ùtɛ̀ kɛĩ́nkɛ̀,
\q1 kɛ n yṹɔ̃́ mmɛniɛ mmiɛkɛ kɛ́dennɛní.
\q1
\v 17 Kuù n dɛɛrínɛ̀ n dootitɔbɛ̀,
\q1 nɛ̀ n sĩ̀mbɛ̀ bɛ̀ɛ̀ wɛ̃rímú pɛ̃ɛ̃tɛ́ n kɔ̃mu.
\q1
\v 18 N do bo mɛsémmɛ̀ miɛkɛ nkɛ kɛ̀ bɛ̀ n cɛ̃̀ɛ̃̀tɛ,
\q1 kɛ̀ Kuyie mmɛ nní nni mbonɛ̀.
\q1
\v 19 Kɛ n dènnɛní difɔ̃̀tìrì miɛkɛ,
\q1 kɛ nh òmpùnnɛ kù n dɔ́ mɛ̀ɛ̀ kpɛ́í.
\b
\q1
\v 20 Kuyie nni nyietí n dɔɔri mɛ̀mmɛ dɛ̀ɛ̀ sìɛ́.
\q1 N wennimu kɛ̀ kù n yietí mɛsɑ̀ɑ̀.
\q1
\v 21 N tũmmu Kuyie nkó kucɛ,
\q1 n yí yetɛ ku kpɛti mɑtì.
\q1
\v 22 N yí yetɛ́ ku kuɔ́ mɑì,
\q1 m mɛ n yí yetɛ́ ku tɑnnùù mɑrì.
\q1
\v 23 N dɔɔrimu kù dɔ́mɛ̀.
\q1 N dɑkɛmu nyɑ̀ɑ̀ bo yetɛ́ mɛ̀ɛ̀ kpɛ́í.
\q1
\v 24 Kuyie nni nyietí n wetí kɛ̀ dɛ̀ mɑ̀mɛ̀ mmɛ,
\q1 n wennimu kɛ̀ kù n yietí mɛsɑ̀ɑ̀.
\b
\q1
\v 25 Kuyie, nwèè dɔ̀ɔ̀ri dɛ̀ɛ̀ wenni,
\q1 ɑ we ndɔɔri dɛ̀ɛ̀ wenni.
\q1 Wèè tu onìtì mɔ́mmuɔ ɑ we ndɔɔri timɔ́mmɔnti.
\q1
\v 26 Wèè dò mpɑ́íí, ɑ ɔ̃ɔ̃ ò bɛnkɛmu ɑmɑ́ɑ̀ pɑ́íí.
\q1 Kòò tu oyɛiwe ɑ nyɛ̃́ ɑ bo ò yĩ́mɛ̀.
\q1
\v 27 Fɔ̃́ɔ̃̀ dɛɛrí bɛsénnìbɛ̀
\q1 kɛ kɛ̃́kùnko sifeí yɛmbɛ̀.
\q1
\v 28 N Yiɛ̀ nKuyie nfɔ̃́ɔ̃̀ cɔ́unko n fìtírɛ̀,
\q1 fɔ̃́ɔ̃̀ m mí dibiìnnì miɛkɛ.
\q1
\v 29 Kuyie nfɔ̃́ɔ̃̀ te kɛ̀ n do n dootitɔbɛ̀.
\q1 Fɔ̃́ɔ̃̀ te kɛ̀ n sèńtɛ́ bɛ duotí.
\b
\q1
\v 30 Kuyie nkó kucɛ do mpɑ́íí nwe,
\q1 kɛ̀ ku nɑ́ɑǹtì tu timɔ́mmɔnti,
\q1 kɛ̀ kù dò nkudɔpìkù kɛ kɑ̃nkù bɛ̀ɛ̀ sɔ̀ri ku borɛ̀.
\q1
\v 31 Kuyie nkuù tu ti yiɛ̀,
\q1 Kuyie mbo kumɑ́ɑ̀ ndi,
\q1 kuù mɑ́ɑ̀ tu dipèrì dìì ti kɑ̃nkɛ́.
\q1
\v 32 Kuyie nkuù n duɔ̀ mmuwɛ̃rímú,
\q1 kuù wèńkùnko n cɛ.
\q1
\v 33 Kuù te kɛ̀ n tɑ̀ɑ̀kɛ cɑ̃ɑ̃ tɛhontɛ̀ kpɛyi kɔ̃mɛ.
\q1 Kuù te kɛ̀ n còḿmú ditennì ĩ́nkɛ̀.
\b
\q1
\v 34 Kuù m bɛnkú dikpɑ̀nnì,
\q1 kɛ n teénnɛ̀ kɛ̀ n nɔ nkɛ yũɔ̃ mmutɑ̃mmù.
\b
\q1
\v 35 N Yiɛ̀ nKuyie nhɑ nɔ̀ùtɛ̀ youtɛ tɛɛ̀ n tɔ,
\q1 kɛ n kɑ̃nkɛ́ kudɔpìkù kɔ̃mɛ, kɛ n dɛɛrí,
\q1 nh ɔ̃ɔ̃ dɑ yú kɑ̀ɑ yiemmu kɛ́ n kpénkùnnɛ.
\q1
\v 36 Fɔ̃́ɔ̃̀ te kɛ̀ n kèrí mɛcɑ̃ɑ̃,
\q1 bɑ́ n tɑ̀ɑ̀kɛ í seití.
\q1
\v 37 M bɛ̀ti n dootitɔbɛ̀ mbɛ kɛ bɛ̀ nìntɛ,
\q1 kɛ̀ n yí bɛ̀ kùɔ bɛmɔu m bɑ́ɑ́ wɛ̃tɛ.
\q1
\v 38 M bɛ̀ kèétɛ́ kéétɛ́mu kɛ̀ bɛ̀ còú kɛ̀ m bɛ̀ nɑ̀ù,
\q1 bɛ̀ bɑ́ɑ́ nɑ kɛ́ítɛ́, m bɛ̀ nɑmu.
\q1
\v 39 Kuù n duɔ́ mmukpɑ̀rìwɛ̃rímú,
\q1 kɛ te kɛ̀ n dootitɔbɛ̀ m bɔ̀útɛ́.
\q1
\v 40 Fɔ̃́ɔ̃̀ te kɛ̀ n dootitɔbɛ̀ bùtínnɛ́ kɛ cokɛ́,
\q1 kɛ̀ nh ɑutɛ́ n sĩ̀mbɛ̀ kɛ bɛ̀ kɔ̀ù.
\q1
\v 41 Kɛ̀ bɛ̀ kuɔ̀ mbɑ́ òmɔù í bɛ̀ teénnɛ̀,
\q1 kɛ̀ bɛ̀ dɑ kuɔ̀nnɛ̀ fɔ̃́ nKuyie mbɑ́ ɑ í bɛ̀ cɔ̀ú.
\q1
\v 42 M bɛ̀ nɑ̀ntɛmu kɛ̀ bɛ̀ nɑɑ́ nkutɑ̃ɑ̃yukú, kuyɑɑkù tɔ kù
\q1 kɛ̀ m bɛ̀ nɑ̀ù kucɛ kó tisɑ̃sɑ̃̀ɑ̃̀tì kɔ̃mɛ.
\b
\q1
\v 43 Kuù n dɛɛtɛ́nɛ̀ m botí kɔbɛ bɛ̀ɛ̀ yetɛ n kpɛti,
\q1 kɛ n nií nyibotí ììkɛ̀,
\q1 kɛ̀ kubotí n yí yɛ̃́ kù nɑɑ́ n kó tidɑɑtì.
\q1
\v 44 Kɛ̀ bɛpɔ̀ɔ̀bɛ̀ n sɑ̃ntí,
\q1 kɛ̀ m bɛ́i mmɛ̀mɑ́ɑ̀ bɛ̀ɛ yie n kpɛti.
\q1
\v 45 Kɛ̀ bɛ̀ cĩ̀tɛ kɛ kpeutí,
\q1 kɛ yiɛ̀ní bɛ sɔ̀rɛ̀ miɛkɛ.
\b
\q1
\v 46 N Yiɛ̀ nKuyie mbomu kuù tu n kó dipèrì.
\q1 Ndɛ́úkùnkonnɛ̀ ku yètìrì, kuù tu n dɛɛtíwè.
\q1
\v 47 Kuyie nkuù m pɛ̀ìri,
\q1 kɛ te kɛ̀ ibotí m bɔ̀útɛ́.
\q1
\v 48 Kuù n dɛɛrínɛ̀ n dootitɔbɛ̀,
\q1 kɛ te kɛ̀ n nɔ n kpɑntídɛ̀ntɔbɛ̀,
\q1 kuù n dɛɛrínɛ̀ bɛnitiyonkubɛ.
\q1
\v 49 Dɛɛ̀ kpɛ́í nte kɛ̀ n yó nkù sɑ̃ntí ibotí cuokɛ̀,
\q1 kɛ diè nkɛ dɛ́úkùnko ku yètìrì.
\q1
\v 50 Kuù dɛɛrí ku kóo kpɑ̀ɑ̀tì,
\q1 koò dɔ̀ɔ̀ri mɛsɑ̀ɑ̀ wenwe kù tɑ̃ɑ̃tɛ́ wè,
\q1 wenwe Dɑfiti nɛ̀ o yɑɑ̀bío sɑ̃́ɑ̃̀.
\c 19
\s1 Kuyie ndɔ̀ɔ̀ dɛ̀ dɛɛ̀ bɛnkú kù dɛumɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Kɛĩ́nkɛ̀ bɛnkúmu Kuyie ndɛumɛ̀,
\q1 kɛ̀ tiwɛtì bɛnkú kù pĩ mmùù tɔ̃mmú.
\q1
\v 2 Bɑ́ dìì yiè kɛ̀ dì nɑ̀ɑ́ nditɛrì kù dɛumɛ̀,
\q1 bɑ́ kɛ̀ɛ̀ yènkɛ̀ kɛ̀ kɛ̀ nɑ̀ɑ́ nkɛtɛkɛ̀ kù dɛumɛ̀.
\q1
\v 3 Dɛ̀ í tú nɛ̀ tinɑ́ɑǹtì, dɛ̀ í tú nɛ̀ yɛtɑnnɔ̀,
\q1 òmɔù í yo dɛ tɑmmɛ̀.
\q1
\v 4 Kɛ̀ dɛ nɑ́ɑǹtì nɛ́ pitɛ́ kutenkù kumɔu,
\q1 kɛ̀ bɛ̀ tì kèè itemmɑ̀nkɛ imɔu.
\b
\q1 Kuyie ndɔ̀ɔ̀ diyiè cĩ́ɛ̃̀tɛ̀ kɛĩ́nkɛ̀ nkɛ.
\q1
\v 5 Kɛ̀ dì ɔ̃ nyɛtìní kɛ do nwèè tùótɛ́ o pokù bɑ̀mbɑ̀,
\q1 kɛ dò ndikɔ̃m̀bùɔ̀ yiɛ̀ nwèè kèrí o cɛ kɛ̀ dɛ̀ ò nɑɑti.
\q1
\v 6 Kɛ̀ dì ɔ̃ɔ̃ yɛ̀nní ku ntemmɑ̀nku kɛ́nkérí kɛ́tɑ kutɛkù,
\q1 dɛ̀mɑrɛ̀ í yennínɛ̀ di iìnkù.
\b
\q1
\v 7 Kuyie nkuɔ́ dò mpɑ́íí nwe kɛ duɔ̀ mmufòmmu,
\q1 ku tɑnnɔ̀ tu yɛmɔ́mmɔnyɛ nyɛ, kɛ ciìnko bɛsĩ́ntíbɛ̀.
\q1
\v 8 Kuyie ndɔ́ dɛ̀ wennimu kɛ nɑ́ríkùnko mɛyɛ̀mmɛ̀,
\q1 ku tɑnnɔ̀ dò mpɑ́íí nwe kɛ nɑ́ríkùnko inuɔ.
\q1
\v 9 A bo ndémɛ̀ Kuyie ndɛ̀ wennimu,
\q1 dɛ kó fɛdédíéfɛ̀ ɔ̃ mbo sɑ̃́ɑ̃̀ nwe.
\q1 Kù tɑ̃ɑ̃tɛ́ tì wennimu kɛ tú timɔ́mmɔnti.
\q1
\v 10 Tì wenninɛ̀mu mɛsɔɔ,
\q1 kɛ pɛ̃nkù mɛsɔɔ nsɑ̀ɑ̀mɛ̀ kuwenniku.
\q1 Tì wɛ̀ɛ̀tinɛ̀mu mɛcekùɔ̀,
\q1 kɛ pɛ̃nkù mɛcekɔ̀bɛ́mmɛ̀ kunɑɑtí.
\b
\q1
\v 11 A dɛ̀ tiènnɛ̀ mí nwe ɑ kóo tɔ̃ntì.
\q1 Wèè yié nhɑ kpɛti ò pɛ́úmu mucɔ̃́ntimu diɛmù.
\q1
\v 12 We nyɛ̃́ o yetímɛ̀? N cĩ́ɛ̃́ n yí yɛ̃́ mɛ̀ɛ̀ yɛi,
\q1
\v 13 Nkɑ̃nkɛ́ mí nhɑ kóo tɔ̃ntì kɛ̀ tɛfentɛ̀ bɑ́ m pĩ́,
\q1 kɛ̀ nní nwenni kɛ bɑ́ɑ́ dɔɔ̀ mɛyɛi ndiɛmɛ̀.
\b
\q1
\v 14 Áú Kuyie! Cɔutɛ́ n nɑ́ɑǹtì nɛ̀ diwɛ̀ì,
\q1 kɛ́cɔutɛ́ tìì bo n yɛ̀mmɛ̀.
\q1 N Yiɛ̀ nKuyie nfɔ̃́ɔ̃̀ tu n kó dipèrì, n kóo donti.
\c 20
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Kɑ̀ɑ bo mɛyɛǹcɑɑ̀rìmɛ̀ miɛkɛ ti Yiɛ̀ nKuyie ndɑ teennɛ̀,
\q1 kunku Kuyie nSɑkɔbu do tũ nkù ndɑ kɑ̃nkɛ́.
\q1
\v 2 Kù mbo ku cĩ́ɛ̃̀tɛ̀ Sedisɑdɛmmu kɛ dɑ teennɛ̀,
\q1 kù mboní Siyɔ̃ɔ̃ tɑ̃rì kɛ dɑ cúɔ́.
\q1
\v 3 Kù bɑ́ɑ́ yɛ̃̀ nhɑ pɑ̃rɛ̀ kpɛ́í,
\q1 kùu cɔutɛ́ iwũɔ̃ ɑ kù feu ì kɛ tuɔ̀.
\q1
\v 4 Kù dɑ duɔ́ nhɑ yɛ̀mmɛ̀ dɔ́ dɛ̀ dɛmɔu,
\q1 kɛ́tũnnɛ ɑ dɔ́ kɛ́dɔɔ̀ tì timɔu.
\q1
\v 5 Kɛ̀ ti nyíúnɛ̀ diwɛ̀ì kù dɑ teennɛ̀mɛ̀ kɑ̀ɑ nɑ,
\q1 kɛ̀ ti còńnnɛ́ mɛnɑkùmɛ̀ kó mɛcɑnnimɛ̀ nɛ̀ ti Yiɛ̀ nKuyie nkó diyètìrì.
\q1 Ti Yiɛ̀ nKuyie ndɔɔ̀ ɑ kù mɔɔ dɛ̀ dɛmɔu.
\b
\q1
\v 6 N yɛ̃́mu kɛ dò nti Yiɛ̀ nKuyie ndɛɛrí okpɑ̀ɑ̀tì kù tɑ̃ɑ̃tɛ́ wè,
\q1 kɛ boní ku cĩ́ɛ̃̀tɛ̀ kɛĩ́nkɛ̀ koò teenní,
\q1 koò dɛɛrínɛ̀ ku wɛ̃rímú diɛmù.
\q1
\v 7 Bɛ̀mɑbɛ̀ tɑ̃́ bɛ kpɑ̀rìsɛ̃ĩ́ nsi,
\q1 kɛ̀ bɛtɔbɛ̀ tɑ̃́ bɛ sɛ̃ĩ́.
\q1 Tínti mɛ nyu ti Yiɛ̀ nKuyie nyètìrì ndi.
\q1
\v 8 Kɛ̀ bɛ̀ bótìrì kɛ duò,
\q1 kɛ̀ tínti biɛ cómmú teii,
\q1 ti í nɑmpú.
\b
\q1
\v 9 Kuyie nteennɛ̀ okpɑ̀ɑ̀tì,
\q1 kɛ̀ tì dɑ yu ɑ́ keè.
\c 21
\d Bɛ̀ dìèmmɛ̀ Dɑfiti yɛ̀nfɛ̀.
\b
\q1
\v 1 Ti Yiɛ̀ nKuyie ndɛ̀ nɑɑtimu okpɑ̀ɑ̀tì ɑ mɔkɛ mɛ̀ɛ̀ kpɛ́í mmuwɛ̃rímú,
\q1 ɑ ò teennɛ̀mu kɛ̀ dɛ kó diwɛ̀ì diɛrì ò bo.
\q1
\v 2 A ò duɔ́mmu o yɛ̀mmɛ̀ dɔ́ dɛ̀,
\q1 ɑ í ò yetɛnɛ̀ ò dɑ mɔɔ dɛ̀.
\q1
\v 3 A ɔ̃ɔ̃ ò conɛ̀ mɛsɑ̀ɑ̀ mmɛ,
\q1 kóò òó mmɛsɔɔ nsɑ̀ɑ̀mɛ̀ kó dipìì
\q1
\v 4 Ò dɑ mɔɔ mufòmmu mmu kɑ̀ɑ mù nhò duɔ́,
\q1 koò yìɛ́ yɛwe kòo fòmmu òkɛ̀ mɛdiɛ̀.
\q1
\v 5 Fɔ̃́ɔ̃̀ ò dɛɛtɛ́ kòo yètìrì dɛukɛ,
\q1 fɔ̃́ɔ̃̀ ò dɛ̀úkùnnɛ koò duɔ́ ndisɑ̃nni.
\q1
\v 6 Koò dɔ̀ɔ̀ri mɛsɑ̀ɑ̀ ndiɛmɛ̀ sɑ̃́ɑ̃̀,
\q1 kòo duɔ̀ ndiwɛ̀ì ɑ borɛ̀.
\q1
\v 7 Okpɑ̀ɑ̀tì duɔ́ nhomɑ́ɑ̀ ndi Kuyie,
\q1 nɛ̀ Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀
\q1 ku kó mɛsɑ̀ɑ̀ nkpɛ́í nkɛ ò fìíkúmɛ̀ teii.
\b
\q1
\v 8 Okpɑ̀ɑ̀tì, ɑ yóó nintɛmu ɑ dootitɔbɛ̀,
\q1 ɑ yóó pĩ́mmú bɛ̀ɛ̀ dɑ níí.
\q1
\v 9 A yóó feitɛ́ní dìì yiè kɛ́ bɛ̀ tɑnnɛ́ fɛhɑ̃ɑ̃tofɛ miɛkɛ nkɛ,
\q1 ti Yiɛ̀ nKuyie mbo bɛ̀ mɑɑnko nɛ̀ kɛmiɛkɛ kɛ̀ bɛ̀ɛ cɔ́útɛ́.
\q1
\v 10 A yóó kuɔmu bɛ kó fɛyɑnfɛ̀,
\q1 bɛ yɑɑ̀bí nɛ̀ bɛ botóo kɛtenkɛ̀ ĩ́nkɛ̀.
\q1
\v 11 Bɛ̀ dɔ́ kɛ dɑ́ dɔɔ̀ mɛyɛi mmɛ,
\q1 bɛ̀ wɛ̃nnɛ́ kɛ bo dɑ cɑkɛmu,
\q1 bɛ̀ mɛ nyí yóó nɑ.
\q1
\v 12 A yóó duɔ́ nkɛ̀ bɛ̀ɛ bútínnɛ́ kɛ́cokɛ́mu,
\q1 kɑ̀ɑ mbɛ̀ tɑ̃ũ ipie.
\b
\q1
\v 13 Ti Yiɛ̀ nKuyie mbɛnkɛ ɑ wɛ̃rímú diɛmù,
\q1 ti diè nkɛ dɛ́úkùnko fɔ̃́ɔ̃̀ yètìrì ɑ wɛ̃rímú kpɛ́í.
\c 22
\s1 Kuyie ndɛ̀ yĩ́mɛ kɑ̀ɑ n yóu?
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ bɛ̀ dìè nfɛ̀ nɛ̀ mɛtɑndɑɑmɛ̀.
\b
\q1
\v 1 Áú Kuyie! Áú Kuyie!
\q1 Dɛ̀ yĩ́mɛ kɑ̀ɑ n yóu?
\q1 Kɛ̀ n kuɔ̀ nkɛ kuɔ̀ mbɑ́ ɑ í n dɛɛrí?
\q1
\v 2 Kuyie, nh ɔ̃ ntṹṹ nkɛ kuɔ̀mmu kɑ̀ɑ dò nyúó,
\q1 kɛ̀ nní nyié nkɛ kuɔ̀ mbɑ́ n yí ompu.
\b
\q1
\v 3 Kɛ̀ fɔ̃́ɔ̃̀ nɛ́ tú wèè dò mpɑ́íí,
\q1 kɛ kɑri ɑ kpɑ̀ɑ̀tìkɑ̀rì kɛ̀ Isidɑyɛɛribɛ dɑ sɑ̃ntí.
\q1
\v 4 Ti yɛmbɛ̀ do duɔ́ nfɔ̃́ nwe bɛmɑ́ɑ̀,
\q1 bɛ̀ do búɔ́ fɔ̃́ nwe kɑ̀ɑ bɛ̀ dɛɛrí.
\q1
\v 5 Bɛ̀ do ɔ̃ɔ̃ kuɔ́nnɛ̀ fɔ̃́ nwe kɑ̀ɑ bɛ̀ dɛɛtɛ́.
\q1 Bɛ̀ do ĩkú fɔ̃́ɔ̃̀ ĩ́nkɛ̀ kɑ̀ɑ bɛ̀ dènnìnko ifɛi.
\b
\q1
\v 6 Mí n nɑɑ́ ndibɛù ndi!
\q1 N tɛ̃́nkɛ í tú onìtì,
\q1 bɛnìtìbɛ̀ bɛmɔu sɑ̃̀ɑ̃́ mmí nwe,
\q1 kubotí kumɔu sènkɛ̀rì mí nwe.
\q1
\v 7 Bɛnìtìbɛ̀ bɛmɔu n yɑ̀u kɛ dɑúmu,
\q1 kɛ cɔ̃́ṹ kɛ́héunko bɛ yɔ.
\q1
\v 8 Kɛ nɑ́ɑ́ n kpɛ́í nkɛ tú:
\q1 Ò yɛ̃ nhò duɔ́ nhomɑ́ɑ̀ ndi Kuyie,
\q1 kuù tũntɛ o kpɛti,
\q1 ò yɛ̃ nkù ò dɔ́mu,
\q1 kù tũ nhò dɛɛtɛ́.
\q1
\v 9 N Yiɛ̀ nKuyie nfɔ̃́ɔ̃̀ n dènnɛní n yɔ̃ pɔutì miɛkɛ,
\q1 fɔ̃́ɔ̃̀ n duɔ́ nho miɛ̀.
\q1
\v 10 Bɛ̀ m pɛitɛ́ kɛ n duɔ́ fɔ̃́ nwe,
\q1 nɛ̀ m pɛitɛ́nímɛ̀, Kuyie nfɔ̃́ɔ̃̀ ǹ te.
\q1
\v 11 Mɛyɛǹcɑɑ̀rìmɛ̀ mɛɛ̀ ǹ tɔ́kɛ́nɛ̀, ɑ bɑ́ n dɛ́tɛ́nɛ̀,
\q1 òmɔù í bo wèè bo n tee.
\b
\q1
\v 12 Yɛnɑɑdɑkɛ̀ pɛ́u yɛɛ̀ ǹ fitɛ́,
\q1 Bɑsɑ̃ɑ̃ nɑɑdɑkɛ̀ yɛɛ̀ n cɛ̃̀tinɛ̀.
\q1
\v 13 Yɛ̀ ɑ̀ɑ̀tɛ tinùùtì nti kɛ bo m pĩ́,
\q1 kɛ dò ndicìrícìrì dìì pĩ nkɛ kontí.
\q1
\v 14 N wɛ̃rímú muù sũ̀ɔ̃̀too mɛniɛ mbɛ̀ còúmmɛ̀ kɛtenkɛ̀ mɛ kɔ̃mɛ,
\q1 kɛ̀ n kṹɔ̃̀ bɔ̀kíí,
\q1 kɛ̀ n kɔ̃m̀bùɔ̀tì yìɛ̀tɛ mɛkùɔ̀ nkɔ̃mɛ.
\q1
\v 15 N níí kuù kpeí tiyɑɑ̀kpetì kɔ̃mɛ,
\q1 kɛ̀ n nɔ́ndɛnfɛ̀ dɑ̀ri n dɑ́ɑndɑɑkù.
\q1 A n dɔú nkufɔ̃ti bɛ̀nnì ndi.
\b
\q1
\v 16 Simɔɔ́ siì n cɛ̃̀ɛ̃̀tɛ kɛ bo n cɑ́ɑ́kɛ́,
\q1 bɛnitiyɛibɛ bɛɛ̀ n dií kɛ bo m pĩ́,
\q1 kɛ dùùtɛ n nɑɑ̀cɛ̀i nɛ̀ n nɔu.
\q1
\v 17 N yɔ̀kɛ̀ mɛdiɛ̀ mmɛ kɛ̀ n kṹɔ̃̀ feitɛ́.
\q1 N dootitɔbɛ̀ n wùómmu kɛ m pɑkɛ́,
\q1
\v 18 kɛ totí n yɑ̀ɑ̀tì,
\q1 kɛ tɑ̃ũ tɛ́tɛ́ n yɑɑ̀bòrì.
\b
\q1
\v 19 Fɔ̃́ nKuyie, nhɑ bɑ́ n dɛ́tɛ́nɛ̀,
\q1 fɔ̃́ɔ̃̀ tu n wɛ̃rímú,
\q1 cokɛ́ní mɛcɑ̃ɑ̃ kɛ́ n teennɛ̀.
\q1
\v 20 N dɛɛtɛ́nɛ̀ dikpɑ̀rìsiè,
\q1 kɛ́ n dɛɛtɛ́nɛ̀ yɛmɔnìì.
\q1
\v 21 N dɛɛtɛ́nɛ̀ dicìrícìrì nùù,
\q1 kɛ́ n dɛɛtɛ́nɛ̀ yɛpɑɑnɑɑdɑyìè.
\b
\q1 A n teemmu,
\q1
\v 22 m bo nnɑ́ɑ́ nhɑ kpɛ́í n kɔbɛ cuokɛ̀,
\q1 m bo ndɑ sɑ̃ntí ditĩ̀nnì cuokɛ̀.
\q1
\v 23 Díndi bɛ̀ɛ̀ dé Kuyie, nsɑ̃ntínɛ̀ kù,
\q1 díndi Sɑkɔbu yɑɑ̀bí dimɔu, ndɛ́úkùnkonɛ̀ ku yètìrì.
\q1 Díndi Isidɑyɛɛri yɑɑ̀bí dimɔu, nkpeutínɛ̀ ku ììkɛ̀.
\q1
\v 24 Kù ɔ̃ɔ̃ í n wúónko mɛsémmɛ̀ yiɛ̀ nho sémmɛ̀ miɛkɛ,
\q1 kù í ò yetírí,
\q1 kù ɔ̃ɔ̃ í nhò bùtínnɛ́,
\q1 kòò kù kuɔ́nnɛ̀ kù ɔ̃ɔ̃ kéntɛ́mu.
\b
\q1
\v 25 M bo ndɑ sɑ̃ntí ditĩ̀nnì diɛrì cuokɛ̀,
\q1 kɛ́dɔɔ̀ bɛ̀ɛ̀ dɑ dé bɛ cuokɛ̀ m bɛ́i ntì.
\q1
\v 26 Bɛcĩ̀rìbɛ̀ yóó dimu kɛ́nsɑ̀nnɛ̀,
\q1 bɛ̀ɛ̀ wɑɑ̀ nKuyie nkɛ̀ bɛ̀ nkù sɑ̃ntí,
\q1 kɛ́nfòù kɛ́mɔntɛ.
\b
\q1
\v 27 Itemmɑ̀nkɛ imɔu kɔbɛ yóó dentɛnɛ̀mu Kuyie nkpɛ́í,
\q1 bɛ̀ wɛ̃tinímu ku borɛ̀,
\q1 ibotí imɔu kɔbɛ yóó nínkúmu ku ììkɛ̀.
\q1
\v 28 Kɛ yɛ̃́ ti Yiɛ̀ nKuyie nkuù tumɛ̀ okpɑ̀ɑ̀tì,
\q1 kuù bɑkɛ́ ibotí imɔu.
\q1
\v 29 Bɛ̀ɛ̀ duɔ́ kɛtenkɛ̀ miɛkɛ bɛmɔu bɛ̀ yóó kɔ̃nkɛmu ku ììkɛ̀,
\q1 bɛ̀ɛ̀ kó dimɑ̀ɑ̀ tɑti kudɔnkù bɛ̀ bo nínkú ku ììkɛ̀.
\q1 Mí n fòù Kuyie nkpɛ́í nkɛ,
\q1
\v 30 kɛ̀ n yɑɑ̀bí yó nkù ntũ̀,
\q1 kɛ́nɑ́kɛ́ ku kpɛ́í mbɛ bí,
\q1
\v 31 kɛ̀ ìi nɑ́kɛ́ bɛ yɑɑ̀bí kù dɔ̀ɔ̀ dɛ̀
\q1 kɛ dɛɛtɛ́ ku kɔbɛ.
\c 23
\s1 Kuyie nkuù tu n cɛ̃nti
\pi1
\v 1 Dɑfiti yɛ̀nfɛ̀.
\b
\q1 Kuyie nkuù tu n cɛ̃nti kɛ̀ n tú ku kó fɛpìèfɛ̀
\q1 n yí yóó mɔ́ntɛ́ dɛ̀mɑrɛ̀.
\q1
\v 2 Kuù nh om̀pùnko timusũ̀ũ̀tì borɛ̀,
\q1 kɛ n kɔrìnɛ̀ mɛniɛ nyííkú dɛ̀ só.
\q1
\v 3 Kuù n kpénkùnko,
\q1 kɛ m bɛnkú kucɛ sɑ̀ɑ̀kù,
\q1 ku yètìrì dɛu mɛ̀ɛ̀ kpɛ́í.
\q1
\v 4 Kɛ̀ n kèrí dibiìnnì diɛrì miɛkɛ
\q1 m bɑ́ nyĩɛ̃̀kù dɛ̀mɑrɛ̀ kɛ yɛ̃́ kù m bonɛ̀mɛ̀,
\q1 kɛ tɔ kunɑɑcɛ̃ndùɔ̀kù kɛ m bɑɑ̀nɛ̀,
\q1 kɛ tɔ kunɑɑcɛ̃mpɑ̀ɑ̀ti
\q1 dɛɛ̀ n duɔ̀ ndikɔ̃m̀bùɔ̀.
\b
\q1
\v 5 Kù n duɔ̀ mmudiì mmu,
\q1 n dootitɔbɛ̀ ììkɛ̀,
\q1 ɑ nconɛ̀ diwɛ̀ì ndi kɛ wɑ́ɑ̀rì mɛkɔ̀fɔ̃ɔ̃mɛ n yuu,
\q1 kɛ píɛnko m bòòfɛ̀ kɛ̀ dɛ̀ cou.
\q1
\v 6 Diwɛ̀ì nɛ̀ mɛsɑ̀ɑ̀ dɛ̀ yó nni mbonɛ̀mu yɛwe yɛmɔu,
\q1 kɛ̀ nní mbo ɑ cĩ́ɛ̃̀tɛ̀ n fòmmu mumɔu.
\c 24
\s1 Kuyie ntɑtimɛ̀ ku cĩ́ɛ̃̀tɛ̀
\pi1
\v 1 Dɑfiti yɛ̀nfɛ̀.
\b
\q1 Kuyie nkuù te kɛtenkɛ̀ nɛ̀ dɛ̀ɛ̀ bo kɛ miɛkɛ,
\q1 kuù te kutenkù nɛ̀ bɛ̀ɛ̀ bo ku miɛkɛ.
\q1
\v 2 Kuyie nkuù fìí nkɛtenkɛ̀ dɑ̀mɛ́ɛ̀rì ĩ́nkɛ̀,
\q1 kuù kɛ̀ fìí nyikó nyĩ́nkɛ̀.
\b
\q1
\v 3 We mbo nɑ kɛ́dekɛ Kuyie ntɑ̃rì?
\q1 We mbo nɑ kɛ́tɑ ku cɛ̃sɑ̀ɑ̀tɛ̀ miɛkɛ?
\q1
\v 4 Wèè nɔu wenni kòo yɛ̀mmɛ̀ dò mpɑ́íí,
\q1 wèè í duɔ́ nho yɛ̀mmɛ̀ yɛbɔkɛ̀,
\q1 wèè ɔ̃ɔ̃ í mpɑriku kɛ nɛ́ soú.
\q1
\v 5 Weè yóó pɛ́tɛ́ Kuyie nkó mɛsɑ̀ɑ̀,
\q1 Kuyie nho dɛɛtíwè yóó wè kòńnɛ́mu.
\q1
\v 6 Bɛ̀ɛ̀ wɑnti Kuyie mbɛ kpɛrɛ yó mmɛ ndò,
\q1 bɛ̀ɛ̀ wɑnti Kuyie nSɑkɔbu do tũ nkù.
\b
\q1
\v 7 Di yíɛ́ kɛ́okùnnɛ yɛbòrɛ̀,
\q1 okùnnɛnɛ̀ yɛbòrɛ̀ yɛ̀ɛ̀ bo nɛ̀ dimɔ̀nnì,
\q1 kòo kpɑ̀ɑ̀tì diɛwèe tɑ.
\q1
\v 8 We ntu dɛ kóo kpɑ̀ɑ̀tì diɛwè?
\q1 Kuyie nku, kù kpeńnìmu,
\q1 kuù tu okɔ̃m̀bɔ̀teu.
\q1
\v 9 Yíɛ́ kɛ́okùnnɛ yɛbòrɛ̀,
\q1 okùnnɛ yɛbòrɛ̀ yɛ̀ɛ̀ do bonɛ̀ dimɔ̀nnì,
\q1 kòo kpɑ̀ɑ̀tì diɛwèe tɑ.
\q1
\v 10 We ntu dɛ kóo kpɑ̀ɑ̀tì diɛwè?
\q1 Kuyie Mpɑkɛdɑɑ nwe,
\q1 kuù tu okpɑ̀ɑ̀tì diɛwè.
\c 25
\s1 N Yiɛ̀ nKuyie m bɛnkɛ ɑ cɛ kɛ́ n cĩ́ɛ̃́ n yɛi
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie m búɔ́ fɔ̃́ nwe.
\q1
\v 2 N Yiɛ̀ nKuyie n duɔ́ nfɔ̃́ nwe m mɑ́ɑ̀,
\q1 A bɑ́ɑ́ yóu kɛ̀ n di ifɛi,
\q1 n dootitɔbɛ̀ bɑ́ n nɑ kɛ́nyɑ̃nku.
\q1
\v 3 Bɛ̀ɛ̀ dɑ duɔ́ mbɛmɑ́ɑ̀ ifɛi í bɛ̀ pĩĩ,
\q1 ì yóó pĩ́ mbɛ̀ɛ̀ dɑ yetɛ bɛ̀mbɛ.
\b
\q1
\v 4 N Yiɛ̀ nKuyie, m bɛnkɛ ɑ cɛ,
\q1 n niitɛ́ icɛ ɑ dɔ́ nní ntũ nyì.
\q1
\v 5 M bɛnkɛ timɔ́mmɔnti kó kucɛ kɛ́ n tié,
\q1 fɔ̃́ɔ̃̀ tu Kuyie nkɛ n dɛɛrí.
\q1 N yĩkú fɔ̃́ɔ̃̀ ĩ́nkɛ̀ yɛwe yɛmɔu.
\q1
\v 6 Ti Yiɛ̀ nKuyie nhɑ bɑ́ɑ́ yɛ̃̀, nhɑ ti kuɔ̀mmɛ̀ mɛsémmɛ̀
\q1 kɛ ti dɔɔri mɛsɑ̀ɑ̀ nsɑ̃́ɑ̃̀.
\q1 A sémmɛ̀ nɛ̀ ɑ sɑ̀ɑ̀ ndɛ̀ bomu nsɑ̃́ɑ̃̀.
\q1
\v 7 Bɑ́ ndenniní n do dɔɔri mɛ̀ɛ̀ yɛi,
\q1 nɛ̀ n yetɛ́mɛ̀ n kpɑɑ́ bɛ ndìì mɔ̀nnì,
\q1 ɑ sɑ̀ mɛ̀ɛ̀ kpɛ́í bɑ́ n yɛ̃̀.
\q1 A niti mɛ̀ɛ̀ kpɛ́í nyɛ̃́ n kpɛ́í.
\b
\q1
\v 8 Kuyie nwennimɛ̀ kɛ dɔɔri dɛ̀ɛ̀ wenni,
\q1 dɛɛ̀ te kɛ̀ kù bɛnkú onitiyɛiwe ò dò nkɛ́tũnnɛ kùù cɛ.
\q1
\v 9 Kɛ kerinɛ̀ bɛ̀ɛ̀ kɛ̃́kùnko bɛmɑ́ɑ̀ timɔ́mmɔnti miɛkɛ,
\q1 kɛ bɛ̀ bɛnkú ku kó kucɛ.
\q1
\v 10 Kuyie nkó itié nwennimu, kɛ tú imɔ́mmɔnyi,
\q1 bɛ̀ɛ̀ kù tɑunnɛ̀ kɛ tũ nku kuɔ́ bɛ kpɛ́í.
\q1
\v 11 Ti Yiɛ̀ nKuyie nnɛ̀ ɑ kó diyètìrì kpɛ́í,
\q1 n cĩ́ɛ̃́ n yɛi, mɛ̀ dɛumu.
\q1
\v 12 Kòo nìtì dé ti Yiɛ̀ nKuyie,
\q1 kù ɔ̃ɔ̃ ò bɛnkɛmu kucɛ ò dò nkɛ́tɑ̃ɑ̃tɛ́ kù.
\q1
\v 13 Dɛ yiɛ̀ nhɔ̃ɔ̃ di diwɛ̀ì ndi,
\q1 kòo bíi tiekɛ dihɛì.
\q1
\v 14 Kuyie mbɛnkúmu ku kó disɔ̀rì kpɛti bɛ̀ɛ̀ kù dé,
\q1 kɛ bɛ̀ bɛnkú ku tɑummɛ̀ tié.
\q1
\v 15 M buɔ́ Kuyie nku sɑ̃́ɑ̃̀,
\q1 kuù yó m pítɛ́ ticùɔ̀tì tìì m pĩ.
\b
\q1
\v 16 Wéntɛ́ní m bíɛ́kɛ̀ kɛ́ n kuɔ́ mmɛsémmɛ̀,
\q1 n kpɑ n kou nwe kɛ sénní.
\q1
\v 17 Kukɔ̃m̀bɔ̀dorí kuù m bo,
\q1 n dennɛ kukɔ̃m̀bɔ̀dorí miɛkɛ.
\q1
\v 18 Wéntɛ́ n sémmɛ̀ nɛ̀ n fɛ̃́ṹtímɛ̀,
\q1 kɛ́ n cĩ́ɛ̃́ n yɛi mmɛmɔu.
\q1
\v 19 Wéntɛ́ n dootitɔbɛ̀ sũmɛ̀,
\q1 bɛ miɛkɛ kɛɛ̀ ǹ cɔ̀ú.
\q1
\v 20 Nni nkɑ̃nkɛ́ kɛ́ n dɛɛtɛ́,
\q1 kɛ̀ m bɑ́ nsɔri ɑ borɛ̀ kɛ́di ifɛi.
\q1
\v 21 M búɔ́ fɔ̃́ nwe, fɔ̃́ɔ̃̀ yó n teennɛ̀,
\q1 kɛ̀ nní ndò mpɑ́íí kɛ wenni.
\q1
\v 22 Áú, Kuyie! Dɛɛtɛ́ Isidɑyɛɛribɛ
\q1 nɛ̀ bɛ ɑ́ɑ̀rìmɛ̀ mɛmɔu.
\c 26
\s1 Dɑfiti tumɛ̀ Kuyie nhò kòńnɛ́
\pi1
\v 1 Dɑfiti yɛ̀nfɛ̀.
\b
\q1 Ti Yiɛ̀ nKuyie n kónnɛ́,
\q1 n tũmmu ɑ kuɔ́,
\q1 n yĩkú fɔ̃́ɔ̃̀ ĩ́nkɛ̀ nɛ̀ n yɛ̀mmɛ̀ mɛmɔu,
\q1 n yí yóó nɑmpɛ.
\q1
\v 2 Ti Yiɛ̀ nKuyie, n wéntɛ́,
\q1 n yɑ́ɑ́kɛ́, fɛitɛ́ n yɛ̀mmɛ̀.
\b
\q1
\v 3 M búɔ́ fɔ̃́ nwe kɛ bɑ̀ɑ ɑ kó mɛsɑ̀ɑ̀,
\q1 n kérí ɑ kó timɔ́mmɔnti miɛkɛ nkɛ.
\q1
\v 4 N yí kɑtìnɛ̀ siyɑ́ɑ̀bìsí yɛmbɛ̀,
\q1 n yí nɛitinɛ̀ mɛyɛ̀mmɛ̀ mɛ̀dɛ́mɛ̀ yɛmbɛ̀.
\q1
\v 5 N yí dɔ́ bɛ̀ɛ̀ dɔ̀ɔ̀ri mɛyɛi mbɛ kó ditĩ̀nnì,
\q1 n yí kɑtìnɛ̀ bɛnitiyonkubɛ.
\b
\q1
\v 6 N Yiɛ̀ nKuyie n yóó nitɛ n nɔu nsi kɛ́bɛnkɛ n wennimɛ̀,
\q1 n firì ɑ wũɔ̃tɔ̀nnì ndi,
\q1
\v 7 kɛ dɑ sɑ̃ntí,
\q1 kɛ nɑ́ɑ́ nhɑ kó mɛsɑ̀ɑ̀ mmɛmɔu.
\q1
\v 8 N Yiɛ̀ nKuyie, n dɔ́mu kɛ́ mbo ɑ cĩ́ɛ̃̀tɛ̀,
\q1 ɑ wɛ̃rímú bo tɛ̀ɛ̀ miɛkɛ.
\b
\q1
\v 9 Bɑ́ n wɛ̃nnɛ́nɛ̀ bɛyɛibɛ kɛ́kuɔ,
\q1 bɑ́ n wɛ̃nnɛ́nɛ̀ bɛnitikɔ̀ùbɛ̀.
\q1
\v 10 Bɛ nɔu tú sisĩ̀nsì nsi,
\q1 bɛ̀ bɛ̀ duɔ̀ nticuuti nti kɛ dɔ́ bɛ̀ɛ bɛ̀ kòńnɛ́.
\q1
\v 11 N tũ̀mmu ɑ kuɔ́,
\q1 n kuɔ́ mmɛsémmɛ̀ kɛ́ n dɛɛtɛ́.
\q1
\v 12 N kérí kucɛ sɑ̀ɑ̀kù nku.
\q1 M bo nsɑ̃ntí n Yiɛ̀ nKuyie nku nìtìbɛ̀ tìkú dɛ̀.
\c 27
\s1 Ti Yiɛ̀ nKuyie nkɑ̃nkɛ́mɛ̀ wèè sɔ̀ri ku borɛ̀
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie nkuù m mí kɛ n dɛɛrí, n yí yĩɛ̃̀kù òmɔù.
\q1 N Yiɛ̀ nKuyie nkuù kɑ̃nkɛ́ n fòmmu, n yí dé òmɔù.
\q1
\v 2 Kɛ̀ bɛnitiyɛibɛ n tɔ̀ɔ́nnɛ̀,
\q1 kɛ dɔ́ kɛ́ n cɑ́ɑ́kɛ́ tikpɑsĩ̀ntì kɔ̃mɛ.
\q1 N dootitɔbɛ̀ bɛ̀ɛ̀ n wɑnti,
\q1 bɛɛ̀ yóó bétɛ́ kɛ́duó kɛtenkɛ̀.
\q1
\v 3 Bɑ́ kɛ̀ fɛkpɑ̀rìnɑfɛ n dintɛ́, kufɔ̃wɑɑ́ mbɑ́ m pĩ́,
\q1 kɛ̀ n dootitɔbɛ̀ dɔ́ kɛ́ n dokɛ́nɛ̀,
\q1 m bɑɑ nyĩkú ɑ ĩ́nkɛ̀ nkɛ.
\q1
\v 4 N dɔ́ dɛ̀mɑrɛ̀ mɑ́ɑ̀ ndi mɛdiɛ̀ nkɛ dɛ̀ mɔ̀ú ti Yiɛ̀ nKuyie:
\q1 M bo mbomɛ̀ ku cĩ́ɛ̃̀tɛ̀ miɛkɛ sɑ̃́ɑ̃̀,
\q1 kɛ wúó nku sɑ̀ɑ̀,
\q1 kɛ dɑkɛ ku cĩ́ɛ̃̀tɛ̀ kpɛ́í.
\q1
\v 5 Dɛǹdɛ kù yóó nni nkɑ̃nkɛ́mɛ̀ mɛyɛi ndiyiè yɛiri yiè,
\q1 kɛ̀ nní nsɔri ku cĩ́ɛ̃̀tɛ̀,
\q1 kɛ̀ kù n dee nku pèrì ĩ́nkɛ̀,
\q1 mɛyɛi nyí yó n nintɛ dɛ̀.
\q1
\v 6 N sĩ́ĩ́mmu n dootitɔbɛ̀ bɛ̀ɛ̀ n fitɛ́,
\q1 n yóó fíému yɛsɑ̃ɑ̃ nkó iwũɔ̃ ku cĩ́ɛ̃̀tɛ̀ kɛ́ndiè,
\q1 kɛ́dɛ́úkùnko ku yètìrì.
\b
\q1
\v 7 Áú n Yiɛ̀ nKuyie! N kuɔ́ mmɛsémmɛ̀ kɛ́ n teennɛ̀,
\q1 n kuɔ̀nnɛ̀ fɔ̃́ nwe, n kéntɛ́.
\q1
\v 8 N dèntɛní ɑ bɛ́i ntì nti kɛ tú: N wɑmmúnɛ̀!
\q1 N Yiɛ̀ nKuyie, n dɑ wɑɑ̀mmu.
\q1
\v 9 Bɑ́ m bútínnɛ́, ɑ miɛkɛ bɑ́ m pɛikɛ,
\q1 fɔ̃́ nwèè n dɛɛrí bɑ́ m bɔntóo.
\q1 Bɑ́ n yóu fɔ̃́ n Yiɛ̀ nKuyie,
\q1 fɔ̃́ɔ̃̀ n dɛɛrí.
\q1
\v 10 N cicɛ nɛ̀ n yɔ̃ kɛ̀ bɛ̀ n dootóo,
\q1 fɔ̃́ nyó n cɔutɛ́mu.
\q1
\v 11 N Yiɛ̀ nKuyie, m bɛnkɛ ɑ cɛ,
\q1 n dootitɔbɛ̀ bɛɛ̀ bo,
\q1 n niitɛ́ kucɛ sɑ̀ɑ̀kù.
\q1
\v 12 Bɑ́ɑ́ yóu kɛ̀ n dootitɔbɛ̀ n dɔ̀ɔ̀ bɛ̀ dɔ́mɛ̀,
\q1 bɛ̀ sɔ̃̀ńtɛ́ kɛ n wɑ́tìrìmu,
\q1 bɛ̀ dɔ́ mɛyɛi ndɔɔ̀rìmù mmu sɑ̃́ɑ̃̀.
\q1
\v 13 Dɛ̀ nɑ nni ndòmmɛ
\q1 kɛ̀ n do í yɛ̃́ kɛ dò m bo yɑ̀ ɑ kó mɛsɑ̀ɑ̀ kɛtenkɛ̀ kiɛ ĩ́nkɛ̀?
\b
\q1
\v 14 A mbúɔ́ Kuyie, kpénkùnnɛ ɑmɑ́ɑ̀,
\q1 yɑ́úkùnnɛ ɑ kɔ̃̀ntì, mbúɔ́ Kuyie.
\c 28
\s1 Wèè tɔ̀ɔ́nnɛ̀ mukṹṹ nhò bɑ̀ɑ́mmɛ̀ Kuyie
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie n kuɔ̀nnɛ̀ fɔ̃́ nwe,
\q1 fɔ̃́ɔ̃̀ tu dipèrì dìì n kɑ̃nkɛ́,
\q1 bɑ́ ncĩ́ɛ̃́kɛ́ kɛ̀ n kuɔ̀ nkɑ̀ɑ cĩ̀ɛ̃́kɛ́,
\q1 n tɑti kudɔnkù nku.
\q1
\v 2 Kéntɛ́ m bɑ́ɑmmìi n dɑ bɑ́ɑ́ nyì.
\q1 Keè n dɑ yumɛ̀ kɛ tú ɑ n tee.
\q1 N yuo n nɔu nsi ɑ cɛ̃sɑ̀ɑ̀tɛ̀ bíɛ́kɛ̀ kɛ dɑ bɑ́ɑ́.
\b
\q1
\v 3 Bɑ́ n wɛ̃nnɛ́nɛ̀ bɛyonkubɛ nɛ̀ bɛ̀ɛ̀ dɔ̀ɔ̀ri mɛyɛi,
\q1 bɛ̀ɛ̀ ɔ̃ nnɑ́ɑ́ mbɛ kɔbɛ diwɛ̀ì kó tinɑ́ɑǹtì,
\q1 kɛ̀ mɛyɛi nnɛ́ píɛ́kɛ́ bɛ miɛkɛ.
\q1
\v 4 Dɔɔ̀ bɛ bɛ tɔ̃mmú dòmmɛ̀, bɛ yɛi ndòmmɛ̀,
\q1 yietí bɛ bɛ yɛi mbɛ̀ dɔ̀ɔ̀ mɛ̀ bɛtɔbɛ̀.
\q1 Duɔ́ nkɛ̀ bɛ̀ dɔ̀ɔ̀ mɛ̀ɛ̀ yɛi ndo bɛ yɔ ĩ́nkɛ̀.
\q1
\v 5 Ti Yiɛ̀ nKuyie mbɛ̀ í dɑkɛ ɑ teèmmɛ̀ kpɛ́í
\q1 nɛ̀ ɑ pĩ́ mmùù tɔ̃mmú,
\q1 ti Yiɛ̀ nKuyie nhɑ bɛ̀ bɔ nkɛ bɑ́ɑ́ bɛ̀ íi.
\b
\q1
\v 6 Ti Yiɛ̀ nKuyie nyètìrì ndɛu,
\q1 kù kèèmɛ̀ m bɑ́ɑmmìi.
\q1
\v 7 Ti Yiɛ̀ nKuyie nkuù n kɑ̃nkɛ́,
\q1 kuù tu n kó kudɔpìkù,
\q1 n ku n duɔ́ mmɑ́ɑ̀,
\q1 kuù ǹ teénnɛ̀ kɛ̀ n yɛ̀mmɛ̀ nɑɑti,
\q1 n yó ndiè kɛ ku nsɑ̃ntí.
\b
\q1
\v 8 Ti Yiɛ̀ nKuyie nkuù kɑ̃nkɛ́ ku kɔbɛ,
\q1 kuù tu tɛcɛ̃kpetɛ̀ kɛ dɛɛrí kù tɑ̃ɑ̃tɛ́ wè.
\q1
\v 9 Ti Yiɛ̀ nKuyie ndɛɛtɛ́ ɑ kɔbɛ, fɔ̃́ɔ̃̀ bɛ̀ te,
\q1 dɔɔ̀ bɛ mɛsɑ̀ɑ̀, ɑ ntú bɛ kóo cɛ̃nti, ntɔ bɛ sɑ̃́ɑ̃̀.
\c 29
\s1 Kuyie mpɛ̀úmɛ̀ ku tɑmmɛ̀
\pi1
\v 1 Dɑfiti yɛ̀nfɛ̀.
\b
\q1 Díndi kɛĩ́nkɛ̀ kɔbɛ dɛ́úkùnkonɛ̀ Kuyie nyètìrì,
\q1 sɑ̃ntɛnɛ̀ ku, kù dɛu mɛ̀ɛ̀ kpɛ́í nkɛ mɔkɛ muwɛ̃rímú.
\q1
\v 2 Dɛ́úkùnnɛ ti Yiɛ̀ nKuyie nyètìrì,
\q1 nínkúnɛ̀ ku ììkɛ̀ ku cɛ̃sɑ̀ɑ̀tɛ̀ miɛkɛ.
\b
\q1
\v 3 Ti Yiɛ̀ nKuyie nkpeńnìmu, kuù te kɛ̀ fɛtɑɑfɛ̀ pɛ̀ú,
\q1 kɛ̀ kù pɛ̀ú mɛtɑmmɛ̀ mɛniɛ n yĩ́nkɛ̀,
\q1 kuù bɑkɛ́ mɛnɛ́diɛmɛ̀.
\q1
\v 4 Ti Yiɛ̀ nKuyie nkuù pĩɛ̃kù nɛ̀ muwɛ̃rímú,
\q1 ti Yiɛ̀ nKuyie nkuù pɛ̀ú mɛtɑmmɛ̀ kperímɛ̀.
\b
\q1
\v 5 Ti Yiɛ̀ nKuyie nkuù pɛ̀ú kɛ̀ dɛtekperɛ̀ duò.
\q1 Ti Yiɛ̀ nKuyie nkuù kèkíí Dimɑɑ kó dɛtekperɛ̀.
\q1
\v 6 Kuù duɔ́ nkɛ̀ Dimɑɑ kó yɛtɑ̃rɛ̀ yɑ̃̀nku kunɑɑbiiku kɔ̃mɛ,
\q1 kɛ̀ Edimɔɔ tɑ̃rì yɑ̃̀nku dipɑɑnɑɑbii kɔ̃mɛ.
\b
\q1
\v 7 Ti Yiɛ̀ nKuyie nkuù pɛ̀ú kɛ̀ fɛhɑ̃ɑ̃dɛɛ̀nfɛ̀ yiɛ̀.
\q1
\v 8 Kuyie nkuù pɛ̀ú mɛtɑmmɛ̀ kɛ̀ dikpɑ́ɑ̀ sɑ̃̀nti,
\q1 kuù duɔ́ nkɛ̀ Kɑdɛɛsi kpɑ́ɑ̀ sɑ̃̀nti.
\q1
\v 9 Kuyie nkuù pɛ̀ú mɛtɑmmɛ̀ kɛ̀ dɛtie nsɑ̃nti,
\q1 kuù pɛ̀ú kɛ̀ tifɑ̃ɑ̃̀tì yòrì dikpɑ́ɑ̀.
\b
\q1 Ku cĩ́ɛ̃̀tɛ̀ miɛkɛ bɛmɔu kɛ̀ bɛ̀ tu ku yètìrì ńdɛu.
\q1
\v 10 Ti Yiɛ̀ nKuyie nkuù do bɑkɛ́ fɛtɑdiɛfɛ̀ mɔ̀nnì,
\q1 kuù tu okpɑ̀ɑ̀tì sɑ̃́ɑ̃̀.
\b
\q1
\v 11 Ti Yiɛ̀ nKuyie nduɔ́ nhɑ kɔbɛ muwɛ̃rímú,
\q1 pɑ̃ bɛ mɛsɑ̀ɑ̀, kɛ́ bɛ̀ duɔ́ ndiwɛ̀ì.
\c 30
\s1 Kuyie nfòùkùnnɛmɛ̀ Dɑfiti kòò kù sɑ̃ntí
\d Dɑfiti yɛ̀nfɛ̀ bɛ̀ do kpetírí Kuyie ncĩ́ɛ̃̀tɛ̀ kɛ diè nfɛ̀.
\b
\q1
\v 1 N dɑ sɑ̃ntí n Yiɛ̀ nKuyie nhɑ n dènnɛ mɛ̀ɛ̀ kpɛ́í ndifɔ̃̀tìrì miɛkɛ,
\q1 ɑ í yóu kɛ̀ n dootitɔbɛ̀ n nɑ kɛ yɑ̃nku.
\b
\q1
\v 2 N Yiɛ̀ nKuyie n kuɔ́nnɛ̀ fɔ̃́ nwe,
\q1 kɑ̀ɑ m miɛkùnnɛ.
\q1
\v 3 Kuyie nfɔ̃́ɔ̃̀ n dènnɛní kudɔnkù
\q1 n do dommú kufɔ̃ti nku kɑ̀ɑ n fòùnkùnnɛ.
\b
\q1
\v 4 Díndi bɛ̀ɛ̀ tũ̀ nKuyie,
\q1 ńdiènnɛ̀ kɛ dɛ́úkùnko ku yètìrì,
\q1 nsɑ̃ntínɛ̀ ku, kù sɑ̀ mɛ̀ɛ̀ kpɛ́í.
\q1
\v 5 Ku miɛkɛ í ɔɔtí kɛ̀ bo bonkɛmɛ̀,
\q1 ku sɑ̀ɑ̀ mbo sɑ̃́ɑ̃̀ ndi,
\q1 yɛdɑbùò nhɔ̃ mbo kuyuoku nku,
\q1 kɛ̀ dikṹnweńnì ntú diwɛ̀ì.
\q1
\v 6 N yɛ̀mmɛ̀ do dò n fííkúmu,
\q1 kɛ̀ dɛ̀mɑrɛ̀ í yó n nɑmpɛ.
\q1
\v 7 N Yiɛ̀ nKuyie nɛ̀ ɑ kó mɛsɑ̀ɑ̀ nkpɛ́í,
\q1 fɔ̃́ɔ̃̀ do n kpénkùnnɛ ditɑ̃́rì kɔ̃mɛ,
\q1 di mmɔ̀nnì kɛ m bùtínnɛ́ kɛ̀ n yɛ̀mmɛ̀ cɑ̀ɑ̀rɛ̀.
\q1
\v 8 Kuyie n kuɔ̀nnɛ̀ fɔ̃́ nwe,
\q1 m bɑ́ɑ́ nfɔ̃́ nwe
\q1
\v 9 Kɑ̀ɑ n kùɔ ɑ́ cɔ̃ntɛ bɑ?
\q1 Kɑ̀ɑ n tɑnnɛ́ kufɔ̃ti ɑ bo cɔ̃ntɛ bɑ?
\q1 Bɛcíríbɛ̀ bo nɑ kɛ́nkpɑɑ́ kɛ dɑ sɑ̃ntɑ́ɑ̀?
\q1 Bɛ̀ bo nɑ kɛ́nkpɑɑ́ kɛ́nɑ́ɑ́ nhɑ kó timɔ́mmɔntɑɑ̀?
\q1
\v 10 Kuyie nhɑ n kéntɛ́ kɛ́ n kuɔ́ mmɛsémmɛ̀,
\q1 Kuyie nhɑ́ n teennɛ̀.
\b
\q1
\v 11 Fɔ̃́ɔ̃̀ dɛ̀ìtɛ n yɛǹcɑɑ̀rìmɛ̀ kɛ n duɔ́ ndiwɛ̀ì,
\q1 Fɔ̃́ɔ̃̀ n dɑ̀tɛ́ kufɔ̀ɔ̀tɔ̃̀nkù kɛ n dɑ̀tínnɛ́ tibɑnyɑ̀ɑ̀tì.
\q1
\v 12 N yóó ndɛ́úkùnkomu ɑ yètìrì nɛ̀ n yɛ̀mmɛ̀ mɛmɔu,
\q1 n yí yóó yóu m bo ndɑ sɑ̃ntímɛ̀.
\q1 N yó ndɑ sɑ̃ntímu sɑ̃́ɑ̃̀.
\c 31
\s1 Kuyie nkɑ̃nkɛ́mɛ̀ Dɑfiti
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 N Yiɛ̀ nKuyie n sɔrì fɔ̃́ɔ̃̀ borɛ̀,
\q1 bɑ́ɑ́ yóu kɛ̀ n di ifɛi bìtì,
\q1 ɑ sɑ̀mu n dɛɛtɛ́!
\q1
\v 2 Kéntɛ́ m bíɛ́kɛ̀, n dɛɛtɛ́ mɛcɑ̃ɑ̃,
\q1 Fɔ̃́ɔ̃̀ yó ntú n kó dipèrì kperì, tɛcɛ̃kpetɛ̀ tɛ̀ɛ̀ n dɛɛrí.
\q1
\v 3 Fɔ̃́ɔ̃̀ tu n kó dipèrì, n kó tɛcɛ̃kpetɛ̀.
\q1 A nni nni kɛ n cɛ̃mmú,
\q1 ɑ yètìrì bo dɛukɛ mɛ̀ɛ̀ kpɛ́í
\q1
\v 4 Fɔ̃́ɔ̃̀ yó n dennɛ bɛ̀ n dìí ntìì cùɔ̀tì,
\q1 kɛ yɛ̃́ fɔ̃́ɔ̃̀ n kɑ̃nkɛ́mɛ̀.
\q1
\v 5 N Yiɛ̀ nKuyie nh ɑ̃nnɛ́ m mɑ́ɑ̀ ɑ nɔu miɛkɛ nkɛ,
\q1 ɑ tú Kuyie nku timɔ́mmɔnti yiɛ̀, fɔ̃́ɔ̃̀ n dɛɛtɛ́.
\q1
\v 6 A í dɔ́ bɛbɔɔféúbɛ̀,
\q1 n duɔ́ nfɔ̃́ nwe m mɑ́ɑ̀.
\b
\q1
\v 7 N yóó nyɑ̃nku nɛ̀ diwɛ̀ì ndi ɑ sɑ̀ɑ̀ nkpɛ́í,
\q1 ɑ yɑ̀mɛ̀ n sémmɛ̀ kɛ bɑntɛ́ n yɛǹcɑɑ̀rìmɛ̀.
\q1
\v 8 A í yóu kɛ̀ n do n dootitɔbɛ̀ nɔu miɛkɛ,
\q1 ɑ n dɛɛtɛ́mu kɛ̀ n kèrí kɛ í yĩɛ̃̀kù.
\b
\q1
\v 9 N kuɔ́ mmɛsémmɛ̀ mɛyɛǹcɑɑ̀rìmɛ̀ mɛɛ̀ n dɛutɛ́
\q1 n kɔ̃̀ntì tiì bɛ̀ìtɛ̀ kɛ̀ n yɛ̀mmɛ̀ yɛ̀,
\q1 kɛ̀ n nuɔ nhòńtɛ́.
\q1
\v 10 N yóó kú mɛyɛǹcɑɑ̀rìmɛ̀ miɛkɛ nkɛ,
\q1 n yóó deè m bie iyɛntotí miɛkɛ nkɛ.
\q1 Mɛyɛi n dɔ̀ɔ̀ mɛ̀ mɛɛ̀ dɛ̀ìtɛ n wɛ̃rímú,
\q1 n wɛ̃rímú sɔmmu muù dèè.
\q1
\v 11 N kpɑntídɛ̀ntɔbɛ̀ bɛɛ̀ te kɛ̀ m pɛɛtitɔbɛ̀ n sɑ̃̀ɑ̃́
\q1 n dootitɔbɛ̀ bɛɛ̀ te bɛ̀ɛ̀ n yɛ̃́ kɛ̀ bɛ̀ n yɔ̀tɛ,
\q1 bɛ̀ɛ̀ n yɑ̀u kɛ̀ bɛ̀ n yɔ̀tɛ kɛ cokù
\q1 n nɑɑ́ kukṹmbocíríkù nku.
\q1
\v 12 Bɛ̀ n yɛ̃̀ nhocíì kɔ̃mɛ mmɛ,
\q1 n nɑɑ́ nkukṹntɑɑcíríkù nku.
\q1
\v 13 N yo bɛ̀ nɑ́ɑ́ntɛmɛ̀ mmɛ n kpɛ́í kɛ̀ kufɔ̃wɑɑ́ nni nhɑutɛ́,
\q1 bɛ̀ wɛ̃nnɛ́ bɛmɔu ndi kɛ n dɔ́nɛ̀ mɛyɛi,
\q1 bɛ̀ dɑ̀kɛmu kɛ bo n kuɔ.
\b
\q1
\v 14 N Yiɛ̀ nKuyie, n duɔ́ nfɔ̃́ nwe m mɑ́ɑ̀,
\q1 fɔ̃́ɔ̃̀ tu Kuyie kɛ n te.
\q1
\v 15 N kpɛti timɔu ɑ̃ fɔ̃́ɔ̃̀ nɔu miɛkɛ,
\q1 n dɛɛtɛ́nɛ̀ n kpɑntídɛ̀ntɔbɛ̀ nɛ̀ bɛ̀ɛ̀ ǹ fɛ̃́ũnko.
\q1
\v 16 N cɔutɛ́nɛ̀ diwɛ̀ì mí nhɑ kóo tɔ̃ntì,
\q1 nɛ̀ ɑ sɑ̀ɑ̀ nkpɛ́í n dɛɛtɛ́.
\q1
\v 17 N Yiɛ̀ nKuyie m bɑ́ɑ́ dɑ yú kɛ́di ifɛi,
\q1 bɛnitiyɛibɛ bɛɛ̀ dò nkɛ́ ì di kɛ dɔ̀ yúó kɛ́kú.
\q1
\v 18 Duɔ́ nkɛ̀ bɛ̀ɛ̀ nɑ̀ɑ́ nsiyɑ́ɑ̀bìsí osɑ̀ɑ̀wè kpɛ́í kɛ̀ bɛ̀ dɔ̀ yúóó,
\q1 sipɔɔ yɛmbɛ̀ nɛ̀ mɛsenkùmɛ̀ yɛmbɛ̀ nɛ̀ sifeí yɛmbɛ̀ kɛ̀ bɛ̀ɛ cĩ́ɛ̃́kɛ́.
\q1
\v 19 A sɑ̀ɑ̀ ndɛu mɛdiɛ̀ mmɛ,
\q1 bɛnìtìbɛ̀ bɛmɔu wùómmu ɑ dɔɔrimɛ̀ bɛ̀ɛ̀ dɑ dé,
\q1 bɛ̀ yɛ̃́mu ɑ ɑ̃ɑ̃̀ dɛ̀ bɛ̀ɛ̀ sɔ̀ri ɑ borɛ̀.
\q1
\v 20 A bɛ̀ sɔ̀ri ɑ borɛ̀ ndɛ kɛ bɛ̀ kɑ̃nkɛ́ bɛyɛibɛ kó mɛdíímmɛ̀,
\q1 kɛ̀ bɛ̀ bo ɑ cĩ́ɛ̃̀tɛ̀, kɛ dɛ́tirinɛ̀ iwɑ́tìi.
\b
\q1
\v 21 N Yiɛ̀ nKuyie nnɛ̀ mutɔ̃mmú ɑ n dɔ̀ɔ̀mɛ̀ mɛsɑ̀ɑ̀,
\q1 mí n dootitɔbɛ̀ do cɛ̃̀ɛ̃̀tɛ wè bɛ̀ ɔ̃ɔ̃ pi mɛ̀ɛ̀ botí dihɛì.
\q1
\v 22 Dɛ̀ do n dimu kɛ̀ n yɛ̀mmɛ̀ ndo n dɑ dɛ́tɛ́nɛ̀,
\q1 kɑ̀ɑ mɛ nkèè n kuɔ̀mmɛ̀ kɛ dɑ yu.
\b
\q1
\v 23 Ndɔ́nɛ̀ ti Yiɛ̀ nKuyie, díndi ku kó bɛsɑ̀ɑ̀bɛ̀,
\q1 ti Yiɛ̀ nKuyie nkɑ̃nkɛ́mu bɛ̀ɛ̀ kù tũ,
\q1 kɛ fɛ̃́ũnko mɛdiɛ̀ nsifeí yɛmbɛ̀.
\q1
\v 24 Kpénkùnnɛ dimɑ́ɑ̀ kɛ yɑ́úkùnnɛ di kɔ̃̀ntì,
\q1 díndi bɛ̀ɛ̀ bùɔ́ ti Yiɛ̀ nKuyie.
\c 32
\s1 Kuyie ncĩ̀ɛ̃́ nwè mɔ̀kɛmɛ̀ diwɛ̀ì
\pi1
\v 1 Dɑfiti yɛ̀nfɛ̀.
\b
\q1 Dɛ̀ nnɑɑti Kuyie ncĩ̀ɛ̃́ nwè o yetímɛ̀,
\q1 kù ũtɛ́ wè o yɛi.
\q1
\v 2 Dɛ̀ nnɑɑti ti yiɛ̀ nKuyie ntɛ̃́nkɛ í kɑɑ̀nnɛ̀ wèè kó mɛyɛi,
\q1 dɛ̀ nnɑɑti wèè yɛ̀mmɛ̀ wenni.
\b
\q1
\v 3 N do í dɑ́ɑ dìì mɔ̀nnì n yɛi nkɛ̀ n wɛ̃rímú mùù dèè,
\q1 kɛ̀ n níí ntṹṹ nkɛ mítìrì.
\q1
\v 4 Kɛ yɛ̃́ ɑ do m puotìmɛ̀ kuyie nnɛ̀ kɛyènkɛ̀,
\q1 kɛ̀ n wɛ̃rímú dèè kɛ̀ m mɔ̀tɛ́ mupɑɑkɛ̀ntie kɔ̃mɛ.
\q1
\v 5 M mɛ ndɑ dɑ́ɑmmu n yɛi,
\q1 n yí sɔ̀nnɛ n yetímɛ̀,
\q1 m bɛ́immu kɛ tú n cɑ̀ɑ̀rɛ̀, kɛ dɑ dɑ́ɑ n yɛi,
\q1 nkɑ̀ɑ mɛ̀ nni nhũtɛ́.
\b
\q1
\v 6 Dɛɛ̀ te kɛ̀ bɛsɑ̀ɑ̀bɛ̀ dò nkɛ́ ndɑ bɑ́ɑ́ ndimɔ̀nnì sɑ̀ɑ̀rì.
\q1 Bɑ́ kɛ̀ mɛyɛi tùɔ̀kɛní fɛtɑɑfɛ̀ diɛfɛ̀ kɔ̃mɛ mɛ̀ bɑ́ɑ́ bɛ̀ nìntɛ.
\q1
\v 7 Fɔ̃́ɔ̃̀ tu n kó disɔ̀rì kɛ ɔ̃ nni nkɑ̃nkɛ́ mɛhɑ́ɑ́rìmɛ̀ mɔ̀nnì,
\q1 M bo ndiè nkɛ dɑ sɑ̃ntí ɑ n kɑ̃nkɛ́ mɛ̀ɛ̀ kpɛ́í.
\b
\q1
\v 8 Kɛ̀ Kuyie ndɔ̀:
\q1 N yóó dɑ tiémmu kɛ dɑ bɛnkɛ kucɛ ɑ dò nkɛ́tũnnɛ kù,
\q1 m bo ndɑ duɔ̀ nyitié kɛ́ ndɑ wúó nsɑ̃́ɑ̃̀.
\q1
\v 9 Bɑ́ɑ́ yɛi ntɛsɑ̃ntɛ̀ nɛ̀ sɑ̃mmɑrímú dɛ kɔ̃mɛ,
\q1 bɛ̀ ɑ̃ɑ̃̀ dɛ̀ tisɑ̃nkɛ́ndɑ́ntì nɛ̀ iwɛ̃ĩ kɛ̀ dɛ̀ bo yie mbɛ kpɛti.
\b
\q1
\v 10 Oyɛiwe ɔ̃ nfɛ̃́ũrìmu mɛdiɛ̀,
\q1 kɛ̀ Kuyie nyɑ́rí wèè kù duɔ́ nhomɑ́ɑ̀.
\q1
\v 11 Díndi bɛsɑ̀ɑ̀bɛ̀ nyɑ̃nkunɛ̀ Kuyie nkó kucɛ miɛkɛ, diwɛ̀ì ndi bo.
\q1 Díndi bɛ̀ɛ̀ yɛ̀mmɛ̀ wenni mpĩɛ̃kùnɛ̀ diwɛ̀ì.
\c 33
\s1 Ti bo ndièmmɛ̀ kɛ sɑ̃ntí Kuyie
\q1
\v 1 Díndi bɛsɑ̀ɑ̀bɛ̀ dí mpĩɛ̃kùnɛ̀ diwɛ̀ì,
\q1 ndɛ́úkùnkonɛ̀ ti Yiɛ̀ nKuyie nyètìrì.
\q1 Díndi bɛ̀ɛ̀ yɛ̀mmɛ̀ wenni di kó diwɛ̀ì ndi di bo nkù sɑ̃ntímɛ̀.
\q1
\v 2 Sɑ̃ntɛnɛ̀ Kuyie nɛ̀ dɛbémbénnɛ̀ iwɛ̃ĩ kpɛrɛ,
\q1 sɑ̃ntɛnɛ̀ ku nɛ̀ kubómbonku iwɛ̃ĩ tɛpíítɛ̀ kɔku.
\q1
\v 3 Dentɛ̀nɛ̀ fɛyɛmpɑ̀nfɛ̀, mbíennɛ̀ dɛbémbénnɛ̀, piɛtɛnɛ̀ ku.
\b
\q1
\v 4 Kuyie nnɑ́ɑǹtì tu timɔ́mmɔnti nti,
\q1 kɛ̀ kù dɔ̀ɔ̀ri dɛ̀ tu dɛmɔ́mmɔnnɛ.
\q1
\v 5 Kù dɔ́ timɔ́mmɔnti nti nɛ̀ dɛ̀ɛ̀ wenni,
\q1 kɛ̀ ku sɑ̀ɑ̀ mpìɛ́kɛ́ kɛtenkɛ̀.
\q1
\v 6 Ti Yiɛ̀ nKuyie nkuù bɛ́i nkɛ̀ kɛĩ́nkɛ̀ dɔ̀ɔ̀,
\q1 kuù duɔ́ nkɛ̀ siwɑ̃̀ɑ̃ ɑ̃nnɛ́.
\q1
\v 7 Kuyie nkuù tìí ndɑ̀mɛ́ɛ̀rì kó mɛniɛ,
\q1 kɛ mɛ̀ ɑ̃nnɛ́ dɛ̀mɑrɛ̀ mɑ́ɑ̀.
\q1
\v 8 Kutenkù kumɔu kɔbɛ, ndénɛ̀ ti Yiɛ̀ nKuyie,
\q1 nkɛ̀ bɛnìtìbɛ̀ bɛmɔuu kù yɔ̀tɛ.
\q1
\v 9 Kù ɔ̃ɔ̃ bɛ́immu kɛ̀ dɛ̀ɛ dɔ̀ɔ̀,
\q1 kɛ̀ kù bɛ́i ntì tì dɔ̀ɔ̀mu bɑ̀mbɑ̀.
\b
\q1
\v 10 Kuyie nkuù ɔ̃ɔ̃ pɑɑ nyibotí dɔ́ kɛ́dɔɔ̀ tì,
\q1 kuù ɔ̃ɔ̃ cɑɑ̀rɛ̀ bɛnìtìbɛ̀ dɔ́ tì.
\q1
\v 11 Kuyie nkuu dɔ́ tì ɔ̃ mbomu sɑ̃́ɑ̃̀,
\q1 kɛ̀ ku yɛ̀mmɛ̀ dɔ́ tì mbo sɑ̃́ɑ̃̀.
\q1
\v 12 Dɛ̀ nnɑɑti kubotí ti Yiɛ̀ nKuyie mbɑkɛ́ kù.
\q1 Dɛ̀ nnɑɑti ti Yiɛ̀ nKuyie ntɑ̃ɑ̃tɛ́ bɛ̀ kɛ bɛ̀ te.
\b
\q1
\v 13 Ti Yiɛ̀ nKuyie mbo kɛĩ́nkɛ̀ nkɛ kɛ wúónní bɛnìtìbɛ̀ bɛmɔu.
\q1
\v 14 Kù kɑ̀ri ku kɑ̀rì ndi kɛ wúó nkutenkù kɔbɛ bɛmɔu.
\q1
\v 15 Kuù bɛ̀ dɔ̀ɔ̀ mɛyɛ̀mmɛ̀ bɛmɔu,
\q1 kù yɛ̃́mu bɛ̀ dɔ̀ɔ̀ri dɛ̀ dɛmɔu.
\b
\q1
\v 16 Fɛhɑ̃ɑ̃pɔ̀nnɑfɛ diɛfɛ̀ fɛɛ̀ í dɛɛrí okpɑ̀ɑ̀tì,
\q1 muwɛ̃rímú mudiɛmù muù í dɛɛrí dikɔ̃m̀bùɔ̀ yiɛ̀.
\q1
\v 17 Kɑ̀ɑ yɛ̀mmɛ̀ dò ntɛsɑ̃ntɛ̀ bo dɑ dɛɛtɛ́ ɑ soú nhɑ mɑ́ɑ̀ ndi,
\q1 tɛ wɛ̃rímú diɛmù í dennìnko onìtì mɛyɛi.
\q1
\v 18 Ti Yiɛ̀ nKuyie nkuù mɛ ndɑ̀kɛ bɛ̀ɛ̀ kù dé bɛ kpɛ́í,
\q1 bɛ̀ɛ̀ bɑ̀ɑ ku kó mɛsɑ̀ɑ̀.
\q1
\v 19 Kɛ bo bɛ̀ dɛɛtɛ́nɛ̀ mukṹṹ,
\q1 kɛ̀ dikònnì tɑnní bɛ̀ nfòù.
\q1
\v 20 Tínti buɔ́ Kuyie nku kuù ti teénnɛ̀,
\q1 kuù tu ti kó kudɔpìkù.
\q1
\v 21 Ti yɛ̀mmɛ̀ nɑɑtinɛ̀ kuǹku,
\q1 Kuyie nsɑ̀mu, ti ku nduɔ́ ntimɑ́ɑ̀.
\q1
\v 22 Ti Yiɛ̀ nKuyie nhɑ sɑ̀ɑ̀ nní nti bonɛ̀, ti búɔ́ fɔ̃́ nwe.
\c 34
\s1 Kuyie ndènnɛmɛ̀ Dɑfiti iyĩ̀ɛ̃̀kɛ
\pi1 Dɑfiti do dɔ̀ɔ̀ omɑ́ɑ̀ kuyɛìnkù okpɑ̀ɑ̀tì Abimɛdɛki ììkɛ̀,
\d kòo ò bɛ̀ti kɛ́deè kòo dèntɛ̀ fɛ̀ɛ̀ yɛ̀nfɛ̀ nfɛ.
\b
\q1
\v 1 N yó nsɑ̃ntímu n Yiɛ̀ nKuyie nsɑ̃́ɑ̃̀,
\q1 ku sɑ̃nni bɑ́ɑ́ dèè n nùù miɛkɛ.
\q1
\v 2 N yɛ̀mmɛ̀ nɑɑtinɛ̀mu n Yiɛ̀ nKuyie,
\q1 díndi bɛsĩ́ntíbɛ̀ nkémmúnɛ̀ n kù sɑ̃ntímɛ̀ kɛ́nyɑ̃nku.
\q1
\v 3 Di n wɛ̃nnɛ́nɛ̀ kɛ̀ tí nsɑ̃ntí ti Yiɛ̀ nKuyie,
\q1 tí nwɛ̃ nkɛ́dɛ́úkùnko ku yètìrì.
\b
\q1
\v 4 N yu Kuyie nku kɛ̀ kù yie,
\q1 kɛ n dɛɛtɛ́nɛ̀ n kó kukɔ̃m̀bɔ̀doróo.
\b
\q1
\v 5 Kɑ̀ɑ bɔ̀útɛ́ Kuyie, nhɑ yɛ̀mmɛ̀ mɛɛ̀ ɔ̃ɔ̃ cɑ́tɛ́,
\q1 bɑ́ ifɛi tɛ̃́nkɛ bɑ́ ndɑ bo.
\q1
\v 6 Kòo sénnìwè kuɔ́ nti Yiɛ̀ nKuyie nhɔ̃ɔ̃ keèmu,
\q1 kóò dɛɛtɛ́nɛ̀ mɛhɑ́ɑ́rìmɛ̀ mɛmɔu
\q1
\v 7 Kuyie ntɔ̃nnì diì bɑ̀ɑ bɛ̀ɛ̀ dé ti Yiɛ̀ nKuyie
\q1 kɛ bɛ̀ dɛɛrí.
\q1
\v 8 Yɑ́ɑ́kɛ́nɛ̀ kɛ́yɑ̀ Kuyie nwennimɛ̀,
\q1 dɛ̀ nnɑɑti wèè kù duɔ́ nhomɑ́ɑ̀.
\q1
\v 9 Díndi Kuyie nkó bɛsɑ̀ɑ̀bɛ̀, nkù dénɛ̀,
\q1 bɛ̀ɛ̀ kù dé dɛ̀mɑrɛ̀ í bɛ̀ dónnì.
\q1
\v 10 Yɛcìrícìrɛ̀ mɔ́nnìmu yɛ̀ dɔ́ dɛ̀ kɛ̀ dikònnì yɛ̀ pĩĩ,
\q1 dɛ̀mɑrɛ̀ í dónnì wèè bùɔ́ Kuyie.
\b
\q1
\v 11 M bí, kɔtɛnɛ̀ní kɛ́ n kéntɛ́,
\q1 kɛ̀ n di bɛnkɛ di bo ndé mɛ̀ɛ̀ botí Kuyie.
\q1
\v 12 Kòò mɔù dɔ́ mufòmmu,
\q1 kɛ bo nfòù kɛ̀ dɛ̀ nɑɑti,
\q1
\v 13 o nɔ́ndɛnfɛ̀ bɑ́ nnɑ́ɑ́ ntinɑ́ɑnyɛiti,
\q1 ò bɑ́ nsountɛ.
\q1
\v 14 Wèe dɛ́tɛ́nɛ̀ mɛyɛi,
\q1 kɛ́ndɔɔri mɛsɑ̀ɑ̀,
\q1 kɛ́nwɑɑ̀ nkunɑɑtí kɛ kù bɛ̀tì.
\q1
\v 15 Ti Yiɛ̀ nKuyie nwùómmu bɛsɑ̀ɑ̀bɛ̀,
\q1 kɛ yo bɛ dɑbùò.
\q1
\v 16 Ti Yiɛ̀ nKuyie nkpɑ̀nnɛ̀mu bɛyɛibɛ,
\q1 kɛ bo bɛ̀ dèè kɛtenkɛ̀ ĩ́nkɛ̀ kɛ̀ bɛ̀ɛ yɛ̃̀ mbɛ kpɛ́í.
\q1
\v 17 Kɛ̀ bɛsɑ̀ɑ̀bɛ̀ kuɔ́nnɛ̀ ti Yiɛ̀ nKuyie,
\q1 kù ɔ̃ɔ̃ keèmu kɛ́ bɛ̀ dɛɛtɛ́nɛ̀ mɛhɑ́ɑ́rìmɛ̀ mɛmɔu.
\q1
\v 18 Ti Yiɛ̀ nKuyie mbonɛ̀mu bɛ̀ɛ̀ yɛ̀mmɛ̀ cɑ̀ɑ̀rɛ̀,
\q1 kɛ dɛɛrí dɛ̀ di bɛ̀.
\q1
\v 19 Mɛhɑ́ɑ́rìmɛ̀ pɛ́u tuɔ̀kùnímu osɑ̀ɑ̀wè,
\q1 kɛ̀ ti Yiɛ̀ nKuyie mmɛ nhò dɛɛrínɛ̀ mɛ mɛmɔu.
\q1
\v 20 Kɛ dɑkɛ o tùòti imɔu kpɛ́í,
\q1 kɛ̀ bɛ̀ bɑ́ɑ́ kéétɛ́ o kɔ̃́ũ̀ mɑrì.
\q1
\v 21 Mɛyɛi mmɛɛ̀ kɔ̀ù oyɛiwe,
\q1 Kuyie nyóó kpetínnɛ́mu bɛ̀ɛ̀ nìí mbɛ̀ɛ̀ dɔ̀ɔ̀ri dɛ̀ɛ̀ wenni.
\q1
\v 22 Kuyie nkuù dɛɛrí ku tɔ̃mbɛ̀,
\q1 kù í yóó kpetínnɛ́ bɛ̀ɛ̀ sɔ̀ri ku borɛ̀.
\c 35
\s1 Kuyie nkòḿmúmɛ̀ ocĩ̀rì
\pi1
\v 1 Dɑfiti yɛ̀nfɛ̀.
\b
\q1 Kuyie nhɑ́ kpɑnnɛ̀ bɛ̀ɛ̀ ǹ kpɑ̀nnɛ̀,
\q1 kɛ́dokɛ́nɛ̀ bɛ̀ɛ̀ n dokùnɛ̀.
\q1
\v 2 Ítɛ́ kɛ́túótɛ́ kudɔpìkù kusɑ́m̀pɔ́kù nɛ̀ kudiɛkù.
\q1 Cómmú kɛ́ n dɛɛtɛ́.
\q1
\v 3 Youtɛ ɑ kpɑ̃nnì nɛ̀ ɑ cɑ́úkù,
\q1 kɛ́bɑɑo bɛ̀ɛ̀ n fɛ̃́ũnko.
\q1 N nɑ́kɛ́ fɔ̃́ɔ̃̀ tumɛ̀ n dɛɛtíwè.
\b
\q1
\v 4 Bɛ̀ɛ̀ dɔ́ kɛ́ n kuɔ ifɛii bɛ̀ pĩ nkɛ̀ bɛ̀ɛ kɛ̃kɛ,
\q1 bɛ̀ɛ̀ n dɔ́nɛ̀ mɛyɛi, ifɛii bɛ̀ pĩ kɛ̀ bɛ̀ɛ bótí bɛ fɔ̃nkúò,
\q1
\v 5 kɛ́nɑɑ́ ntiyontì kuyɑɑkù tɔ tì.
\q1 Kuyie ntɔ̃nnìi bɛ̀ bɛ̀ti.
\q1
\v 6 Bɛ cɛɛ nɑɑ́ ndibiìnnì kɛ́ɑnkɛ,
\q1 kɛ̀ Kuyie ntɔ̃nnì mbɛ̀ bɛ̀tì.
\q1
\v 7 Bɛ̀ sɔ̃̀ńtɛ́ kɛ n dii ticùɔ̀tì nti,
\q1 kɛ n keù difɔ̃̀tìrì kɛ̀ m bo do kɛ́kú.
\q1
\v 8 Mɛhɑ́ɑ́rìmɛ̀ɛ bɛ̀ dɛ̀ɛ́tɛ́,
\q1 bɛ̀ɛ tɑ bɛ̀ dìí ntìì cùɔ̀tì miɛkɛ,
\q1 kɛ́do bɛ̀ keú dìì fɔ̃̀tìrì.
\b
\q1
\v 9 Kɛ̀ diwɛ̀ì ní nni mbo,
\q1 kɛ̀ nní nyɑ̃nku,
\q1 Kuyie nni nteenɛ̀mɛ̀ kpɛ́í.
\q1
\v 10 N nɑ́ɑ́nnɛ̀ n yɛ̀mmɛ̀ mɛmɔu ndi,
\q1 kɛ tú òmɔù í dɑ dònnɛ̀ fɔ̃́ nKuyie,
\q1 fɔ̃́ɔ̃̀ ɔ̃ dɛɛtɛ́nɛ̀ ocĩ̀rì wèè ò kpeńnìnɛ̀,
\q1 kɛ dɛɛrí osénnìwè nɛ̀ bɛ̀ɛ̀ fèkù o kpɛrɛ.
\b
\q1
\v 11 Bɛ̀ nɑ̀ɑ́ mbɛ̀ í yɑ̀ tì nti,
\q1 Bɛ̀ m̀ bèkú nyí yɛ̃́ tì nti.
\q1
\v 12 Kɛ̀ n dɔ̀ɔ̀ri mɛsɑ̀ɑ̀ nkɛ̀ bɛ̀ n dɔ̀ɔ̀ri mɛyɛi,
\q1 kɛ̀ m bo m mɑ́ɑ̀.
\q1
\v 13 N dootitɔbɛ̀ ɔ̃ mmɔ nkɛ̀ n dɑ́ɑ́tí kufɔ̀ɔ̀tɔ̃̀nkù nku,
\q1 kɛ́bɛnkɛ n yɛǹcɑɑ̀rìmɛ̀
\q1 kɛ́boú dinùù kɛ́kɛ̃́kùnnɛ m mɑ́ɑ̀ kɛ́nsĩ́ĩ́,
\q1 kɛ́mmbɑ́ɑ́ nKuyie nsɑ̃́ɑ̃̀,
\q1
\v 14 kɛ́ndò n nɛ́po yoo n tebitɛ, kɛ̀ n yììkɛ̀ ńsɔ̀ù,
\q1 kɛ̀ n yɛ̀mmɛ̀ɛ cɑɑ̀rɛ̀ kɛ́ndò n yɔ̃ ku.
\b
\q1
\v 15 Kɛ̀ n do dìì mɔ̀nnì bɛ̀ nɛ́ tíí kɛ́ nni ndɑú,
\q1 kɛ́wɛ̃nnɛ́ kɛ́ nni ndɔɔri mɛyɛi,
\q1 kɛ̀ bɛpɔ̀ɔ̀bɛ̀ n yí yɛ̃́ bɛ̀ nni nnɑ́ɑ́ ntiyɛiti.
\q1
\v 16 Bɛ̀ɛ̀ í dé Kuyie nnɛ̀ bɛ̀ɛ̀ dɑú bɛnìtìbɛ̀
\q1 kɛ̀ bɛ̀ wɛ̃nnɛ́ kɛ n dɑú mɛdiɛ̀,
\q1 kɛ mɑɑ̀ nyɛbìɛ̀ n kpɛ́í.
\b
\q1
\v 17 N Yiɛ̀ nKuyie nhɑ yó nni nwúónkomɑɑ̀?
\q1 N dɛɛtɛ́nɛ̀ bɛ kó kuyonku,
\q1 bɛ̀ tu yɛcìrícìrɛ̀ nyɛ.
\q1
\v 18 M bo ndɑ sɑ̃ntí ditĩ̀nnì cuokɛ̀,
\q1 kɛ́ ndɑ sɑ̃ntí kubotí diɛkù cuokɛ̀.
\q1
\v 19 N dootitɔbɛ̀ bɑ́ nyɑ̃nku n kpɛ́í,
\q1 bɛ̀ɛ̀ sɔ̃́ntɛ́ kɛ n níí bɛ̀ bɑ́ nni nhũũnnɛ̀ inuɔ.
\q1
\v 20 Bɛ̀ í nɑ́ɑ́ ndiwɛ̀ì kó tinɑ́ɑǹtì bìtì!
\q1 Bɛ̀ dɑ̀kii kɛ bo dɔ̀ɔ̀ mɛyɛi mmɛ dihɛì kó bɛnitisɑ̀ɑ̀bɛ̀.
\q1
\v 21 Kɛ ɑɑri tinùùtì kɛ tú: Àɑ̀ ti dɑ yɑ̀mu!
\b
\q1
\v 22 N Yiɛ̀ nKuyie nhɑ wúómmu dɛ̀ɛ̀ dɔ̀ɔ̀ri,
\q1 bɑ́ ncĩ́ɛ̃́kɛ́, bɑ́ n dɛ́tɛ́nɛ̀.
\q1
\v 23 Kuyie nyítɛ́ kɛ́ n kónnɛ́!
\q1 N Yiɛ̀ nKuyie nhentɛ kɛ́kpɑ n kpɑ̀nnì.
\q1
\v 24 N Yiɛ̀ nKuyie nhɑ wennimu,
\q1 n kónnɛ́ kɛ̀ bɛ̀ bɑ́ nni ndɑú.
\q1
\v 25 Bɑ́ yóu kɛ̀ n dootitɔbɛ̀ dɔ̀:
\q1 Tóò! Ti do mɛ ndɔ́,
\q1 ti ò mɑɑnkomu.
\q1
\v 26 Bɛ̀ɛ̀ do n dɔ́nɛ̀ mɛyɛi nkɛ yɑ̃nku,
\q1 ifɛii bɛ̀ pĩ nkɛ̀ dɛ̀ɛ bɛ̀ di,
\q1 ìi pĩ mbɛ̀ɛ̀ yɛ̀mmɛ̀ do dò mbɛ̀ m pɛ̃ɛ̃tɛ́,
\q1 kɛ̀ bɛ̀ɛ kɛ̃kɛ kɛ̀ ifɛii bɛ̀ pĩ.
\b
\q1
\v 27 Bɛ̀ɛ̀ yɛ̃́ nyí dɔ̀ɔ̀mɛ̀ mɛyɛi,
\q1 bɛ yɛ̀mmɛ̀ ńnɑɑti,
\q1 kɛ̀ bɛ̀ ḿbonɛ̀ kunɑɑtí
\q1 kɛ́nnɑ́ɑ́ nsɑ̃́ɑ̃̀ kɛ tú:
\q1 Dɛ́úkùnnɛ Kuyie nyètìrì kùù dɔ́ ku tɔ̃ntì kó mɛsɑ̀ɑ̀.
\b
\q1
\v 28 Mí mmɔ́mmuɔ m bo nnɑ́ɑ́ nhɑ wennimɛ̀,
\q1 m bo ndɑ sɑ̃ntí sɑ̃́ɑ̃̀.
\c 36
\s1 Ti Yiɛ̀ nKuyie mborɛ̀ ndɛ mufòmmu bomɛ̀
\d Bɛdèmbɛ̀ kóo kótì dìèmmɛ̀ ti Yiɛ̀ nKuyie nkóo tɔ̃ntì Dɑfiti yɛ̀nfɛ̀.
\b
\q1
\v 1 Oyɛiwe nɑ́ɑ́ ntì tiì n yóù,
\q1 ò tu dɛ̀ ò bo ndé bɑ nkpɛ́í Kuyie?
\q1
\v 2 Ò tɑ̃́ omɑ́ɑ̀ ndi,
\q1 ò í dɔ́ kɛ́bɑntɛ́ o yɛi nkɛ́ mɛ̀ yetɛ.
\q1
\v 3 Ò mɔ̀kɛ siyɑ́ɑ̀bìsí nsi kɛ soú,
\q1 ò í dɔ́ kɛ́bɑntɛ́ mɛsɑ̀ɑ̀ ntúmɛ̀.
\q1
\v 4 Kòò duɔ́ wè ntotí o yɛ̀mmɛ̀ mɛyɛi nkpɛti mɑ́ɑ̀,
\q1 kɛ tũ nkucɛ yɛiku,
\q1 ò í yóu mɛyɛi.
\b
\q1
\v 5 Ti Yiɛ̀ nKuyie nhɑ sɑ̀ɑ̀ mmɑ̀nnɛ̀ tiwɛtì nti,
\q1 ɑ dɔɔrimu ɑ bɛ́i ntì kɛ̀ dɛ̀ feí tiwɛtì kɔ̃mɛ.
\q1
\v 6 A wetí kɛ̀ dɛ̀ dɛumu kɛ mɑ̀nnɛ̀ ɑ tɑ̃rɛ̀,
\q1 kɑ̀ɑ beéntì cũmpúrì difɔ̃̀tìrì kɔ̃mɛ.
\q1 Kuyie nkuù teénnɛ̀ bɛnìtìbɛ̀ nɛ̀ tikpɑsĩ̀ntì.
\q1
\v 7 Kuyie nhɑ sɑ̀ɑ̀ nwenni mɛdiɛ̀ mmɛ.
\q1 Bɛnìtìbɛ̀ dìɛ́kɛ́ ɑ fiɛti dɛ́ɛ̀ mmɛ.
\q1
\v 8 Bɛ̀ yo nhɑ cĩ́ɛ̃̀tɛ̀ sɑ̀ɑ̀ mmɛ̀ kɛ sɑ̀nnɛ̀,
\q1 kɑ̀ɑ bɛ̀ nììnko ɑ sɑ̀ɑ̀ nkó kukó.
\q1
\v 9 Fɔ̃́ɔ̃̀ tu mufòmmu kũ̀nnì,
\q1 fɔ̃́ɔ̃̀ ti duɔ̀ nkuwenniku.
\b
\q1
\v 10 A sɑ̀ɑ̀ nní mbonɛ̀ bɛ̀ɛ̀ dɑ yɛ̃́,
\q1 kɑ̀ɑ nkómmú bɛ̀ɛ̀ yɛ̀mmɛ̀ wenni.
\q1
\v 11 Bɑ́ɑ́ yie nkɛ̀ tɛpɔ̀tɛ̀ yiɛ̀ nni nnintɛ,
\q1 bɑ́ɑ́ yóu kòo yɛiwe nni mbɛti.
\q1
\v 12 Bɛ̀ɛ̀ dɔ̀ɔ̀ri dɛ̀ɛ̀ í wenni bɛ̀ duòmu,
\q1 bɛ̀ domu bɛ̀ í yóó nɑ kɛ́ítɛ́.
\c 37
\s1 Ti bo mbúɔ́mɛ̀ Kuyie
\pi1
\v 1 Dɑfiti yɛ̀nfɛ̀.
\b
\q1 A miɛkɛ bɑ́ mpɛ́i bɛyɛibɛ,
\q1 ɑ bɑ́ nyɑ́ɑ́ mbɛ̀ɛ̀ dɔ̀ɔ̀ri mɛyɛi.
\q1
\v 2 Bɛ̀ yóó kpeímu mɛcɑ̃ɑ̃ ntimútì kɔ̃mɛ,
\q1 kɛ́mɔ́tɛ́ tifɑ̃ɑ̃̀tì kɔ̃mɛ.
\b
\q1
\v 3 Duɔ́ nhɑmɑ́ɑ̀ Kuyie nkɛ́ndɔɔri dɛ̀ɛ̀ wenni,
\q1 mbonɛ̀ kunɑɑtí dihɛì kù dɑ duɔ́ ndì.
\q1
\v 4 A yɛ̀mmɛ̀ nnɑɑtinɛ̀ ɑ Yiɛ̀ nKuyie,
\q1 kù bo dɑ duɔ́ nhɑ yɛ̀mmɛ̀ dɔ́ dɛ̀.
\b
\q1
\v 5 Duɔ́ nhɑmɑ́ɑ̀ ɑ Yiɛ̀ nKuyie,
\q1 kɛ́ nkù bùɔ́,
\q1 kɛ̀ kùu pĩ́ mmutɔ̃mmú,
\q1
\v 6 kɛ́fei nhɑ borimɛ sɑ̀ɑ̀mɛ̀ kuwenniku kɔ̃mɛ,
\q1 kɛ́fei nhɑ kó timɔ́mmɔnti diyiè ɔ̃ ncómmú yɛyɔ kɛ dòmmɛ̀.
\b
\q1
\v 7 Ndò nyúóó Kuyie nyììkɛ̀ kɛ kù kèḿmú,
\q1 ɑ miɛkɛ bɑ́ mpɛ́ì wèè kpɛrɛ yíé,
\q1 ɑ miɛkɛ bɑ́ mpɛ́ì wèè dɔ̀ɔ̀ mɛyɛi nhò tɑ̃ɑ̃tɛ́ kɛ bo dɔɔ̀ mɛ̀.
\b
\q1
\v 8 Yóu kunɑupíɛ́,
\q1 yóu kɛmiɛtonnìkɛ̀,
\q1 ɑ miɛkɛ bɑ́ ncɔ́ú,
\q1 dɛ̀ ce mmɛyɛi mmɛ.
\q1
\v 9 Kuyie nyóó dɛitɛmu bɛ̀ɛ̀ dɔ̀ɔ̀ri mɛyɛi,
\q1 kɛ̀ bɛ̀ɛ̀ kù duɔ́ mbɛmɑ́ɑ̀ kɛ̀ bɛ̀ɛ tiekɛ dihɛì.
\q1
\v 10 Dɛ̀ kpɑɑ́ sɑ́m̀pɔ́ nwe kɛ̀ bɛyɛibɛɛ deè,
\q1 kɑ̀ɑ wɑmmú bɛ̀ do borɛ̀ ɑ bɑ́ɑ́ yɑ̀ òmɔù.
\q1
\v 11 Bɛ̀ɛ̀ yɛ̀mmɛ̀ boo kɛ̀ bɛ̀ɛ tiekɛ dihɛì,
\q1 kɛ́mbonɛ̀ kunɑɑtí nɛ̀ diwɛ̀ì mɔ́mmɔnni.
\b
\q1
\v 12 Onitiyɛiwe weè wɑntinɛ̀ osɑ̀ù mɛyɛi,
\q1 kɛ mɛ́ìrì o nɔ̀ùtɛ̀.
\q1
\v 13 Kɛ̀ ti Yiɛ̀ nnɛ́ ò wùó nkɛ dɑú,
\q1 kɛ yɛ̃́ o yiè duunnímɛ̀.
\b
\q1
\v 14 Bɛnitiyɛibɛ bɛɛ̀ kpɑ̀tɛ bɛ kpɑ̀rìse,
\q1 kɛ deenko bɛ tɑ̃nnɛ̀,
\q1 kɛ bo dokɛ́nɛ̀ ocĩ̀rì nɛ̀ osénnìwè,
\q1 kɛ́kuɔ bɛ̀ɛ̀ borimɛ wenni.
\q1
\v 15 Bɛ se yóó kóntɛ́ kɛ́kṹṹ bɛ dirɛ nyɛ,
\q1 kɛ̀ bɛ tɑ̃nnɛ̀ɛ kékɛ́.
\b
\q1
\v 16 Dɛsɑ́m̀pɔ́rɛ̀ wèè wetí ò mɔ̀kɛ dɛ̀ wenni kɛ pɛ̃ɛ̃tɛ́mu bɛyɛibɛ pɛ́u kó tikpɑ̀tì,
\q1
\v 17 Kɛ yɛ̃́ Kuyie nyóó pɔntɛmɛ̀ bɛyɛibɛ wɛ̃rímú,
\q1 kɛ́ntɔ bɛsɑ̀ɑ̀bɛ̀.
\b
\q1
\v 18 Kuyie nyɛ̃́mu bɛ̀ɛ̀ yié nku kuɔ́ bɛ we mɑ̀mɛ̀,
\q1 kù yóó bɛ̀ duɔ́ ndɛ̀ yó ntú bɛ kpɛrɛ ndɛ sɑ̃́ɑ̃̀.
\q1
\v 19 Kɛ̀ dimɔ̀nnì yɛiri tùɔ̀kɛní ifɛi bɑ́ɑ́ bɛ̀ pĩ,
\q1 bɑ́ kɛ̀ dikònnì bo bɛ̀ nyo nkɛ sɑ̀nnɛ̀.
\b
\q1
\v 20 Bɛyɛibɛ yóó kúmu,
\q1 kɛ̀ Kuyie ndootitɔbɛ̀ɛ pɛ̃ɛ̃tɛ́ mutepóó nkɔ̃mɛ kɛ́nɑɑ́ nkuyukú.
\b
\q1
\v 21 Oyɛiwe ɔ̃ɔ̃ pentɛ kɛ bɑ́ɑ́ tɛ̃́nnɛ́,
\q1 kòo sɑ̀ɑ̀wè yie mɔkɛ mɛsémmɛ̀ kɛ pɑ̃ɑ̃.
\q1
\v 22 Kuyie ndɔ̀ɔ̀ bɛ̀ mɛsɑ̀ɑ̀ mbɛɛ̀ yóó tiekɛ dihɛì,
\q1 kɛ̀ kùu bɛti kù cɔ̃ɔ̃ bɛ̀.
\q1
\v 23 Kɛ̀ Kuyie mpɛ́nsìrì onìtì borimɛ,
\q1 kuù ɔ̃ɔ̃ duɔ́ nkòò nkérí kɛ í yĩɛ̃̀kù.
\q1
\v 24 Kòò do ò bɑ́ nduɔ́,
\q1 Kuyie nkuù ɔ̃ɔ̃ pĩ́ nho nɔ̀ùtɛ̀ kɛ́yíi.
\b
\q1
\v 25 Nɛ̀ m bɛmmɛ̀ kɛ yɑ̀ɑ kótɛ́nɛ̀,
\q1 n yí yɑ̀ Kuyie mbɔntóo dɛ̀ osɑ̀ù,
\q1 yoo ò yɑɑ̀bí mmúɔ́tɛ dɛ̀ mudiì.
\q1
\v 26 Osɑ̀ù mɔ̀kɛ mɛsémmɛ̀ mmɛ sɑ̃́ɑ̃̀,
\q1 kɛ penni o kpɛrɛ bɛtɔbɛ̀,
\q1 kòo yɑɑ̀bí pɛ́ú dɛ kó mɛsɑ̀ɑ̀.
\b
\q1
\v 27 Yóu mɛyɛi nkɛ́ndɔɔri mɛsɑ̀ɑ̀,
\q1 ɑ yɑɑ̀bí bo ḿbo sɑ̃́ɑ̃̀ dihɛì.
\q1
\v 28 Kuyie ndɔ́ timɔ́mmɔnti nti,
\q1 kù í buɔnko bɛ̀ɛ̀ kù tũ.
\b
\q1 Kù bɛ̀ bɑ̀ɑ̀mu sɑ̃́ɑ̃̀,
\q1 kù yóó dɛitɛ bɛnitiyɛibɛ yɑɑ̀bí nyi.
\q1
\v 29 Kɛ̀ bɛsɑ̀ɑ̀bɛ̀ɛ tiekɛ dihɛì,
\q1 kɛ́ ndì bo sɑ̃́ɑ̃̀.
\b
\q1
\v 30 Osɑ̀ù nɑ̀ɑ́ mmɛciì nkó tinɑ́ɑǹtì nti,
\q1 tìì yìɛ̀ní o nùù kɛ̀ tì wenni.
\q1
\v 31 Ò dɔ́ Kuyie nkuɔ́ nyi,
\q1 kɛ yennínɛ̀ omɑ́ɑ̀ mɛyɛi.
\b
\q1
\v 32 Oyɛiwe ɔ̃ ndíímu osɑ̀ù,
\q1 kɛ dɔ́ kóò kùɔ.
\q1
\v 33 Ti Yiɛ̀ nKuyie nhɔ̃ɔ̃ í nyóu kòo sɑ̀ù tɑ oyɛiwe nɔu miɛkɛ,
\q1 kɛ̀ bɛ̀ ò bekùnɛ̀ kù bɑ́ɑ́ yóu kɛ̀ bɛ̀ɛ ò kpetínnɛ́.
\b
\q1
\v 34 Mbúɔ́ Kuyie nkɛ tũ nku kó kucɛ,
\q1 kù bo dɑ dɛ́úkùnnɛ kɑ̀ɑ tiekɛ dihɛì,
\q1 kɛ́yɑ̀ kù dɛ̀itɛmɛ̀ bɛnitiyɛibɛ.
\b
\q1
\v 35 N yɑ̀mu onitiyɛiwe mɔ̀ɔ̀tɛ dɛ̀ muwɛ̃rímú,
\q1 kɛ sɛ̀ntɛ̀ mutie sũ̀ũ̀mù kɔ̃mɛ,
\q1
\v 36 kɛ́pɛ̃ɛ̃tóo ò tɛ̃́nkɛ í ndɛ̀ kpɑɑ́,
\q1 kɛ̀ nh ò wɑmmú n yí ò yɑ̀.
\b
\q1
\v 37 Nwúó nwèè tũ̀ Kuyie nkuɔ́ nɛ̀ osɑ̀ù,
\q1 dɛ kóo nìtì botí ɔ̃ɔ̃ dentɛnɛ̀ mɛsɑ̀ɑ̀ mmɛ.
\q1
\v 38 Ti Yiɛ̀ nKuyie nyóó kuɔ̀mu bɛnitiyɛibɛ,
\q1 bɛ wuɔ nyí yó nkpɑɑ́.
\b
\q1
\v 39 Ti Yiɛ̀ nKuyie nkuù dɛɛrí bɛsɑ̀ɑ̀bɛ̀,
\q1 kɛ bɛ̀ kɑ̃nkɛ́ mɛhɑ́ɑ́rìmɛ̀ mɔ̀nnì.
\q1
\v 40 Kuyie nkuù bɛ̀ teénnɛ̀, kɛ bɛ̀ dɛɛrí,
\q1 kɛ bɛ̀ kɑ̃nkɛ́ bɛnitiyɛibɛ kɛ bɛ̀ dɛɛrí,
\q1 kɛ yɛ̃́ bɛ̀ sɔ̀rimɛ̀ kuù borɛ̀.
\c 38
\s1 Omuɔnti wèè bɑntɛ́ o yɛi nhò bɑ̀ɑ́mmɛ̀ Kuyie
\d Dɑfiti yɛ̀nfɛ̀ bɛ̀ dìè nfɛ̀ kɛ denniní Kuyie nkpɛ́í.
\b
\q1
\v 1 Ti Yiɛ̀ nKuyie nhɑ bɑ́ n fɛ̃́ũnnɛ̀ kɛmiɛkɛ,
\q1 bɑ́ m puotínɛ̀ kunɑupíɛ́.
\q1
\v 2 A pie nduò n yĩ́nkɛ̀ nkɛ,
\q1 kɑ̀ɑ nɑcɛ̀kuutɛ duò n yĩ́nkɛ̀.
\b
\q1
\v 3 N kɔ̃̀ntì miɛkɛ tɛ̃́nkɛ í pĩ́,
\q1 ɑ miɛkɛ n cɔ́ú mmɛ̀ɛ̀ kpɛ́í.
\q1 N kṹɔ̃̀ yɛɛ̀ bɔ̀kɛ́ n yɛi nkpɛ́í.
\q1
\v 4 N yɛi mmɛɛ̀ dɛukɛ kɛ m pɛ̃ɛ̃tɛ́,
\q1 mɛ̀ n yɔ̃̀ntɛmu ditɔu cɛ̃́ɛ̃́rì kɔ̃mɛ.
\b
\q1
\v 5 M muɔ nyɛɛ̀ ɑ̃nnɛ́ imɑǹcírí,
\q1 yɛ̀ pɑ̃̀ɑ̃̀kɛmu n yɛìntì kpɛ́í.
\q1
\v 6 Kuyonku kuù ǹ nɑ kɛ m̀ pũ̀tínnɛ́ mɛdiɛ̀,
\q1 kɛ̀ n yɛ̀mmɛ̀ cɑ̀ɑ̀ri yɛwe yɛmɔu.
\b
\q1
\v 7 N kɔ̃̀ntì tiì cɔ̀ú,
\q1 dɛ̀mɑrɛ̀ tɛ̃́nkɛ í pĩ́ n kɔ̃̀ntì miɛkɛ.
\q1
\v 8 N yí mɔkɛ muwɛ̃rímú,
\q1 n kɔ̃̀ntì kèétɛ́ kéétɛ́mu,
\q1 n yɛ̀mmɛ̀ mɛɛ̀ cɑ̀ɑ̀rɛ̀ kɛ̀ n kuɔ̀ nkɛ mítìrì.
\b
\q1
\v 9 Kuyie nhɑ yɛ̃́mu n dɔ́ dɛ̀,
\q1 ɑ wúómmu n dɑbònnì.
\q1
\v 10 N kɔ̃m̀bùɔ̀tì tiì duò,
\q1 kɛ̀ n wɛ̃rímú dèè,
\q1 n nuɔ ntɛ̃́nkɛ í wúó.
\b
\q1
\v 11 N nɛ́pobɛ̀ nɛ̀ n nɛitinɛ̀ bɛ̀ n kɛntɛ́mu,
\q1 n kɔbɛ n yentɛ́mu nh ɑ́ɑ̀rìmɛ̀ kpɛ́í.
\q1
\v 12 Bɛ̀ɛ̀ n dɔ́nɛ̀ mukṹṹ mbɛ̀ n dii timɑ́tì nti,
\q1 bɛ̀ɛ̀ n dɔ́nɛ̀ mɛyɛi nkɛ̀ bɛ̀ n sɑ̃́ɑ̃́,
\q1 bɛ̀ ɔ̃ ntṹṹ nkɛ nɑ́ɑntɛ n kpɛ́í nkɛ.
\q1
\v 13 Mí n nɑɑ́ ndiɔ̃̀nnì ndi, n tɛ̃́nkɛ í yo,
\q1 n nɑɑ́ nwèè nɔ́ndɛnfɛ̀ dɑ̀ri wènwe n yí nɑ́ɑ́ ntìmɑtì.
\q1
\v 14 N dò ndiɔ̃̀nnì ndi,
\q1 n yí tɛ̃́nninko tìmɑtì.
\b
\q1
\v 15 N Yiɛ̀ nKuyie m búɔ́ fɔ̃́ nwe,
\q1 Kuyie nfɔ̃́ɔ̃̀ n te,
\q1 fɔ̃́ɔ̃̀ yóó n teennɛ̀.
\q1
\v 16 Bɑ́ɑ́ yóu kɛ̀ bɛ̀ nni nyɑ̃nkunɛ̀,
\q1 n dɔ́ kɛ́do dìì mɔ̀nnì, bɑ́ɑ́ yóu kɛ̀ bɛ̀ n nɑ.
\b
\q1
\v 17 N tɔ̀ɔ́nnɛ̀ m bo domɛ̀ mmɛ,
\q1 mɛfɛ̃́ṹtímɛ̀ í iiti m borɛ̀.
\q1
\v 18 N yiemmu n cɑɑ̀rìmɛ̀,
\q1 kɛ̀ n yɛi nni nkɔɔ́nnɛ̀.
\b
\q1
\v 19 N dootitɔbɛ̀ kɔ̃̀ntì nɑɑtimu kɛ̀ bɛ̀ kpeńnì,
\q1 bɛ̀ɛ̀ n nìí ndɛtetìrɛ̀ bɛ̀ sũmu.
\q1
\v 20 M bɛ̀ dɔ̀ɔ̀ri mɛsɑ̀ɑ̀ mmɛ kɛ̀ bɛ̀ n tɛ̃̀ńnìnko mɛyɛi,
\q1 kɛ n kpɑnnɛ̀ n dɔɔri mɛ̀ɛ̀ kpɛ́í mmɛsɑ̀ɑ̀.
\b
\q1
\v 21 N Yiɛ̀ nKuyie mbɑ́ n dootóo,
\q1 bɑ́ n dɛ́tɛ́nɛ̀, Kuyie nfɔ̃́ɔ̃̀ ǹ te.
\q1
\v 22 Kɔtɛní mɛcɑ̃ɑ̃ nkɛ́ n teennɛ̀,
\q1 fɔ̃́ n Yiɛ̀ nKuyie n kóò dɛɛtíwè.
\c 39
\s1 Wèè fɛ̃́ũ̀rì ò bɑ̀ɑ́mmɛ̀ Kuyie
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ Yedutunni kpɛ́í.
\b
\q1
\v 1 N yɛ̀mmɛ̀ do dò n yó ndɑkɛmu n dɔɔ̀rìmɛ̀ kpɛ́í,
\q1 kɛ bɑ́ɑ́ bɛ́i ntìmɑtì kɛ́yetɛ́,
\q1 kɛ́mmuti tɑ́u oyɛiwe ììkɛ̀.
\q1
\v 2 Mɛm̀mɛ kɛ̀ nni ndò nyúóó kɛ dò nkɑ́rɛ́ kɛ í mmɔkɛ diwɛ̀ì,
\q1 kɛ̀ n fɛ̃́ṹtímɛ̀ nɛ́ dɔkɛ dɛukɛ.
\q1
\v 3 Kɛ̀ dɛ̀ n cɔ́ú m miɛkɛ,
\q1 kɛ̀ iyɛntotíi n tùɔ̀ nkɛ dò mmuhɑ̃ɑ̃́,
\q1 kɛ̀ n dentɛnɛ̀ m bo bɛ́immɛ̀.
\b
\q1
\v 4 N Yiɛ̀ nKuyie n nɑ́kɛ́ n fòmmu mɑmɛ̀,
\q1 n nɑ́kɛ́ n we kpɑɑ́ yɛ̀dɛ̀,
\q1 kɛ̀ m bɑntɛ́ n yí kpeńnìmɛ̀.
\q1
\v 5 A n duɔ́ mmùù fòmmu mɑ̀nnɛ̀ tɛnɔ̀ùtɛ̀ pɛ̃kùmɛ̀ mmɛ,
\q1 n we í tùɔ̀kɛ dɛ̀mɑrɛ̀ ɑ ììkɛ̀,
\q1 ɑ borɛ̀ onìtì dò mmuyɑɑ́ mmu.
\q1
\v 6 Onìtì dònnɛ̀ mɛdɛ́ɛ̀ mmɛ kɛ firì,
\q1 ò ɑ̀rìmu kɛ dò mmuyɑɑ́
\q1 kɛ wɑɑ̀ ntikpɑ̀tì ò mɛ nyí yɛ̃́ wèè yóó tì tiekɛ.
\b
\q1
\v 7 N Yiɛ̀ nKuyie, n kémmú we?
\q1 Fɔ̃́ nwe m búɔ́mɛ̀.
\q1
\v 8 N dɛɛtɛ́nɛ̀ n yɛi,
\q1 bɑ́ɑ́ yóu kɛ̀ tiyɛìntì nni ndɑú.
\q1
\v 9 M muti tɑ́u nwe,
\q1 n yí nɑ́ɑ́ nkɛ́yɛ̃́ dɛ̀ bonímɛ̀ fɔ̃́ɔ̃̀ borɛ̀.
\q1
\v 10 N yóu tiyɛ̃ĩti,
\q1 ɑ m puotì kɛ̀ n duòmu.
\q1
\v 11 A ɔ̃ mpuotì onìtì koò tiè nho yɛi nkpɛ́í nkɛ,
\q1 kɛ dò nyibiɛ́ kɛ cɑɑ̀ri ò dɔ́ dɛ̀ mɛdiɛ̀.
\q1 Onìtì dò mmuyɑɑ́ mmu.
\b
\q1
\v 12 N Yiɛ̀ nKuyie nkéntɛ́ m bɑ́ɑmmìi nɛ̀ n sɑ́útìi,
\q1 m bɑ́ nkuɔ̀ nkɑ̀ɑ cĩ̀ɛ̃́kɛ́,
\q1 n tú opɔ̀ɔ̀ nwe ɑ borɛ̀ kɛ yóó pɛ̃ɛ̃tɛ́ n yɛmbɛ̀ kɔ̃mɛ.
\b
\q1
\v 13 N yóu kɛ̀ nh om̀pɛ̀ kɛ̀ n yɛ̀mmɛ̀ɛ nɑrikɛ
\q1 kɛ̀ n nɛ́ nɑ kɛ́kpɑɑkɛ.
\c 40
\s1 Dɑfiti dɔ́mɛ̀ bɛ̀ɛ bɑntɛ́ Kuyie nhò dɔ̀ɔ̀ dɛ̀
\d Bɛ̀ dìèmmɛ̀ Dɑfiti yɛ̀nfɛ̀.
\b
\q1
\v 1 M bɔ̀útɛ́ Kuyie nku kɛ̀ kù cuonní m bíɛ́kɛ̀
\q1 kɛ kèè n dɑbònnì,
\q1
\v 2 kɛ n dènnɛní difɔ̃̀tìrì n nɑ nku dìì miɛkɛ,
\q1 kɛ n fũ̀ṹtɛ́ disɑ̃̀ũ̀ miɛkɛ,
\q1 kɛ n còńnɛ́ dipèrì ĩ́nkɛ̀,
\q1 kɛ kpénkùnnɛ n tɑ̀ɑ̀kɛ,
\q1
\v 3 kɛ ɑ̃nnɛ́ n nùù fɛyɛmpɑ̀nfɛ̀,
\q1 ku sɑ̃nni kɔfɛ,
\q1 bɛsṹkùbɛ̀ bo kù yɑ̀ kɛ́ kù depɛ,
\q1 kɛ́ kù duɔ́ mbɛmɑ́ɑ̀.
\q1
\v 4 Dɛ̀ nnɑɑti wèè duɔ́ nhomɑ́ɑ̀ Kuyie,
\q1 wèè í tũ nsipɔɔ yɛmbɛ̀,
\q1 nɛ̀ siyɑ́ɑ̀bìsí yɛmbɛ̀.
\b
\q1
\v 5 N Yiɛ̀ nKuyie nhɑ pĩ́ mmùù tɔ̃nsɑ̀ɑ̀mù ti kpɛ́í mmù sũmu,
\q1 ɑ dɔ́ kɛ́dɔɔ̀ tì ti kpɛ́í ntì sũmu,
\q1 òmɔù í dɑ mɑ̀nnɛ̀ ɑ tɔ̃mmú sũmu,
\q1 m bɑ́ɑ́ nɑ kɛ́nɑ́kɛ́ mù mɑ̀mɛ̀.
\q1
\v 6 A dɔ́ dɛ̀ í tú bɛ̀ bo ndɑ feumɛ̀ iwũɔ̃ yoo yɛpɑ̃rɛ̀,
\q1 n tì bɑntɛ́mu,
\q1 ɑ í dɔ́ bɛ̀ ndɑ feu iwũɔ̃ kɛ tuɔ̀ nyɛwũɔ̃tɔ̀rɛ̀ ĩ́nkɛ̀,
\q1 yoo bɛ̀ dɑ feu ì mɛyɛi ncĩ́ɛ̃́mmɛ̀ kpɛ́í.
\q1
\v 7 Dɛ mɔ̀nnì ndi n yĩ́mɛ̀: Ntɛ mí,
\q1 tì wɑ̃̀ri n kpɛ́í nyikuɔ́ pɑ́tíri miɛkɛ kɛ yɛ̃mmɛ̀.
\q1
\v 8 Kuyie n dɔ́ kɛ́yie nhɑ kpɛti nti,
\q1 ɑ kuɔ́ bomu n yɛ̀mmɛ̀ miɛkɛ.
\q1
\v 9 N nɑ̀kɛ́mu ditĩ̀nnì cuokɛ̀ ɑ sɑ̀ɑ̀,
\q1 n yí muti n nùù, n Yiɛ̀ nKuyie nhɑ ti yɛ̃́mu.
\q1
\v 10 N yí sɔrì mɛsɑ̀ɑ̀ nhɑ n dɔ̀ɔ̀ mɛ̀,
\q1 n nɑ́ɑ́mmu ditĩ̀nnì diɛrì miɛkɛ ɑ tú mɛ̀ n dɛɛtíwè kɛ wenni,
\q1 n yí sɔrì ɑ sɑ̀ɑ̀ nnɛ̀ ɑ kó timɔ́mmɔnti
\q1
\v 11 Kuyie nhɑ yó n kuɔ́mmu mɛsémmɛ̀,
\q1 ɑ sɑ̀ɑ̀ nnɛ̀ ɑ kó timɔ́mmɔnti dɛɛ̀ m bɑ̀ɑ̀ sɑ̃́ɑ̃̀.
\b
\q1
\v 12 Mɛyɛi mmɛ̀ɛ̀ n tùɔ̀kùní tipíìtì timɔu mɛ̀ í mɔkɛ mɛ̀ mɑ̀mɛ̀,
\q1 n yɛi mmɛ̀ɛ̀ n tũ̀ m mɛ̀ ɔ̀unɛ̀mu,
\q1 mɛ̀ sũnɛ̀mu n yùtì,
\q1 n kɔ̃m̀bùɔ̀ yɛ̀mu.
\q1
\v 13 Kuyie nyɑ̀ɑ̀ n dɛɛtɛ́!
\q1 N teennɛ̀ mɛcɑ̃ɑ̃.
\q1
\v 14 Bɛ̀ɛ̀ n dɔ́nɛ̀ mukṹṹ bɛmɔu ifɛii bɛ̀ pĩ nkɛ bɛ̀ɛ sĩ́nnɛ́,
\q1 bɛ̀ɛ̀ n dɔ́nɛ̀ mɛyɛi mbɛ̀ɛ bótí nɛ̀ ifɛi.
\q1
\v 15 Dɛ̀ɛ di bɛ̀ɛ̀ n ti mudɑɑ́,
\q1 ifɛii bɛ̀ pĩ.
\b
\q1
\v 16 Dɛ̀ nnɑɑti bɛ̀ɛ̀ wɑɑ̀ nKuyie,
\q1 kɛ̀ diwɛ̀ì mbɛ̀ bo.
\q1 Bɛ̀ɛ̀ dɔ́ mɛdɛɛtímɛ̀,
\q1 bɛ̀ ntú sɑ̃́ɑ̃̀: Kuyie nkuù dɛu.
\q1
\v 17 N tú ocĩ̀rì nwe, osénnìwè,
\q1 N Yiɛ̀ nKuyie nnɛ́ yɛ̃́mu n kpɛ́í,
\q1 Kuyie nfɔ̃́ɔ̃̀ tu n kóo teentì,
\q1 n dɛɛtíwè, bɑ́ɑ́ ɔɔtɛní!
\c 41
\s1 Bɛ̀ fɛ̃́ũnko wè bɑ̀ɑ́mmɛ̀ Kuyie
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Dɛ̀ nnɑɑti wèè dɑ̀kɛ bɛcĩ̀rìbɛ̀ kpɛ́í,
\q1 kɛ̀ mɛhɑ́ɑ́rìmɛ̀ ò tùɔ̀kɛní Kuyie nhɔ̃ɔ̃ ò dènnɛmu.
\q1
\v 2 Ti Yiɛ̀ nKuyie nhɔ̃ nhò kɑ̃nkɛ́mu kòo ńfòù,
\q1 kɛ́di kunɑɑtí kɛtenkɛ̀ miɛkɛ,
\q1 kù ɔ̃ɔ̃ í nyóu kòo dootitɔbɛ̀ɛ ò nɑ.
\q1
\v 3 Kòò mɔ nkɛ duɔ́ Kuyie nhɔ̃ nhò bɑ̀ɑ̀mu,
\q1 kɛ yɑ́úkùnko o kɔ̃̀ntì o muɔndɔ́ù ĩ́nkɛ̀.
\b
\q1
\v 4 Mí nhɔ̃ɔ̃ yĩ́: N Yiɛ̀ nKuyie n kuɔ́ mmɛsémmɛ̀
\q1 kɛ́ m miɛkùnnɛ n dɑ yetɛ́nɛ̀mu.
\q1
\v 5 N dootitɔbɛ̀ nɑ̀ɑ́mmu n kpɛ́í nkɛ tú:
\q1 Ò yóó kú ɔ̃̀mmɔ̀nnì?
\q1 O yètìrì yóó kpɑ́nnɛ́ ɔ̃mmɔ̀nnì?
\q1
\v 6 Bɛ miɛkɛ kòò mɔù kɔ̀tɛní kɛ n yɑ̀,
\q1 ò nni nwɑ́tìrì,
\q1 kɛ́tɔ siyɑ́ɑ̀bìsí kɛ́yɛ̀nnɛ̀ kɛ́pitɛ́.
\q1
\v 7 N dootitɔbɛ̀ ɔ̃ɔ̃ tíímmu kɛ́nwɛ́ú n kpɛ́í,
\q1 bɛ̀ nɑ́ɑntɛ n kó mɛyɛi mmɛ.
\q1
\v 8 Bɛ̀ tu dɛ̀ɛ ǹ tùɔ̀kɛní dɛ̀ í tú dɛsɑ̀ɑ̀rɛ̀,
\q1 bɛ̀ tu n domu kɛ tɛ̃́nkɛ í yóó ítɛ́.
\q1
\v 9 Kɛ̀ n nɛ́po mɔ́mmuɔ n tɑ̃́ wè,
\q1 nɛ̀ wè ti wɛ̃ nkɛ yo, weè kòńtɛ́ kɛ n cuùtì.
\q1
\v 10 N Yiɛ̀ nKuyie n kuɔ́ mmɛsémmɛ̀,
\q1 n yíi nkɛ̀ m bɛ̀ fɔ̀ɔ́ mbɛ̀ n dɔ̀ɔ̀ dɛ̀.
\b
\q1
\v 11 N yóó bɑntɛ́ ɑ n kómmúmɛ̀,
\q1 n dootitɔbɛ̀ n yĩɛ̃kɛ dìì mɔ̀nnì ndi.
\q1
\v 12 A yó nni ntɔ n yíé mmɛ̀ɛ̀ kpɛ́í nkɛ ɑ kuɔ́,
\q1 kɛ̀ nni mbo ɑ borɛ̀ sɑ̃́ɑ̃̀.
\q1
\v 13 N Yiɛ̀ nKuyie nyIsidɑyɛɛribɛ dɔú nkù,
\q1 ɑ yètìrì ńdɛu kɛ̀ tí ndɑ sɑ̃ntí sɑ̃́ɑ̃̀ fɔ̃́ nnɛ̀ mutɔ̃mmú ɑ pĩ́ mmù,
\q1 kɛ yó mmù pĩ nsɑ̃́ɑ̃̀,
\q1 kɛ̀ dɛ̀ mmɛ ndò. Ami.
\c 42
\ms1 YƐSÃÃ MPÁTÍRI DIDƐ́RÌ
\s1 Bɛ̀ pĩ nwè kɛ kònnɛ̀ ò yɑ̀ɑ́mmɛ̀ Kuyie ncĩ́ɛ̃̀tɛ̀
\r (Yɛsɑ̃ɑ̃ 42-72)
\d Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀.
\b
\q1
\v 1 Áú Kuyie!
\q1 Tɛyúɔ́tɛ̀ yɑ̀ɑ́ mmɛ̀ɛ̀ botí mɛniɛ,
\q1 mɛmmɛ n wɛ̃nnì dɑ yɑ́ɑ́mmɛ̀.
\b
\q1
\v 2 Kuyie nhɑ bomu kɛ̀ n dɑ yɑ́ɑ́
\q1 sinɛ́yɛ̃ĩ bo wè yɑ̀ɑ́ mmɛ̀ mɛniɛ.
\q1 N tɑti ɔ̃̀mmɔ̀nnì ɑ cĩ́ɛ̃̀tɛ̀ miɛkɛ, ɑ borɛ̀?
\q1
\v 3 Kɛyènkɛ̀ nɛ̀ Kuyie n nɔnniɛti tiì tu n kó mudiì,
\q1 kɛ̀ bɛ̀ m bekú sɑ̃́ɑ̃̀ kɛ tú:
\q1 Kuyie nhɑ tũ nkù borɛ?
\b
\q1
\v 4 Nh ɔ̃ɔ̃ dentɛní n do ɔ̃ nnɛínɛ̀ dìì mɔ̀nnì kunitisṹkù,
\q1 kɛ bo fɛnɑfɛ ììkɛ̀,
\q1 kɛ̀ ti kɔri Kuyie ncĩ́ɛ̃̀tɛ̀ dibɑnni,
\q1 kɛ diènnɛ̀ diwɛ̀ì Kuyie nkó yɛsɑ̃ɑ̃ kɛ n yɛ̀mmɛ̀ mɛɛ̀ cɑ̀ɑ̀rɛ̀.
\b
\q1
\v 5 N yɛ̀mmɛ̀ bo cɑɑ̀rɛ̀ bɑ n kpɛ́í
\q1 nkɛ̀ nní nsɑ́útí?
\q1 N yó mbúɔ́ Kuyie nku kɛ ku nsɑ̃ntí,
\q1 kunku kùù tu Kuyie n dɛɛtíwè.
\b
\q1
\v 6 N yɛ̀mmɛ̀ mɛɛ̀ cɑ̀ɑ̀rɛ̀ nɛ̀ tìì n tùɔ̀kùní,
\q1 kɛ̀ n dèntɛní ɑ kpɛ́í
\q1 m bo kɛ̀ Suditɛ̃ɛ̃ nɛ̀ Ɛdimɔɔ tɑ̃rì,
\q1 nɛ̀ Mitiseɑ kpɛri yɛ borɛ̀.
\q1
\v 7 Fɔ̃́ɔ̃̀ duɔ́ nkɛ̀ ikó nhuuti,
\q1 kɛ̀ mɛ nniɛ nní nyɛtì kɛ̀ mɛtɛ̃mɛ̀ tùɔ̀kùní,
\q1 kɛ̀ yɛnɛ́fĩ̀nfĩ̀rɛ̀ n dɑ̀tínnɛ́ kɛ́ n dìu pɑ́íí.
\b
\q1
\v 8 Ti Yiɛ̀ nKuyie nhɑ́ n dɔɔ̀ mɛsɑ̀ɑ̀ nkuyie mmɔ̀nnì,
\q1 kɛ̀ nní ndiè nkɛyènkɛ̀ ɑ kó yɛsɑ̃ɑ̃,
\q1 kɛ dɑ bɑ́ɑ́, fɔ̃́ nKuyie nkùù te kɛ̀ n fòù.
\q1
\v 9 N nɑ́ɑ́ nKuyie nku, kunku kùù tu dipèrì dìì n kɑ̃nkɛ́.
\q1 Dɛ̀ yĩ́mɛ kɑ̀ɑ n yɛ̃̀?
\q1 Bɑ nte kɛ̀ n fòùnɛ̀ mɛyɛǹcɑɑ̀rìmɛ̀?
\q1 Dɛ̀ dòmmɛ kɛ̀ n dootitɔbɛ̀ n nɑ?
\q1
\v 10 N dootitɔbɛ̀ bɛɛ̀ ɑ̃ kɛ n sɑ̃́ɑ̃́,
\q1 kɛ̀ n kṹɔ̃̀ kèétɛ́ kéétɛ́,
\q1 bɛ̀ m békúmu sɑ̃́ɑ̃̀ kɛ tú:
\q1 Kuyie nhɑ tũ nkù borɛ?
\b
\q1
\v 11 N yɛ̀mmɛ̀ bo cɑɑ̀rɛ̀ bɑ nkpɛ́í nkɛ̀ nní nsɑ́útí?
\q1 N yó mbúɔ́ Kuyie nku kɛ ku nsɑ̃ntí,
\q1 kunku kùù tu Kuyie n dɛɛtíwè.
\c 43
\q1
\v 1 Áú! Kuyie nhɑ n kónnɛ́,
\q1 cómmú n fɔ̃̀tìrì kɛ́kpɑnnɛ̀ bɛ̀ɛ̀ kpɑ onìtì kó mɛsémmɛ̀,
\q1 siyɑ́ɑ̀bìsí yɛmbɛ̀ nɛ̀ bɛsoùmbɛ̀.
\q1
\v 2 Kuyie nfɔ̃́ɔ̃̀ tu wèè n kɑ̃nkɛ́,
\q1 dɛ̀ yĩ́mɛ kɑ̀ɑ n yóu?
\q1 Bɑ nte kɛ̀ n fòùnɛ̀ mɛyɛǹcɑɑ̀rìmɛ̀?
\q1 Dɛ̀ dòmmɛ kɛ̀ n dootitɔbɛ̀ n nɑ?
\q1
\v 3 Duɔ́ nkɛ̀ kuwenniku nɛ̀ timɔ́mmɔnti kɛ̀ dɛ̀ n niitɛ́,
\q1 kɛ́ n kɔtɛnɛ̀ ɑ tɑ̃sɑ̀ɑ̀rì,
\q1 ɑ cĩ́ɛ̃̀tɛ̀ borɛ̀.
\q1
\v 4 Kɛ̀ n tɔ́ɔ́nnɛ̀ ɑ wũɔ̃tɔ̀nnì,
\q1 kɛ̀ n dɑ tɔ́ɔ́nnɛ̀ fɔ̃́ nhɑ mɔ́mmuɔ nwèè tu n wɛ̀ì,
\q1 kɛ́tuótɛ́ n kùtìdùkù kɛ́nyɑ̃nku,
\q1 kɛ dɑ sɑ̃ntí fɔ̃́ nKuyie.
\b
\q1
\v 5 N yɛ̀mmɛ̀ bo cɑɑ̀rɛ̀ bɑ nkpɛ́í kɛ̀ nní nsɑ́útí?
\q1 N yó mbúɔ́ Kuyie nku kɛ ku nsɑ̃ntí,
\q1 kunku kùù tu n dɛɛtíwè.
\c 44
\s1 Kuyie ndootóomɛ̀ ku kɔbɛ
\d Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀.
\b
\q1
\v 1 Ti kèèmu nɛ̀ ti to,
\q1 ti yɛmbɛ̀ ti nɑ̀kɛ́mu ɑ do dɔ̀ɔ̀ dɛ̀
\q1 dimɔ̀nnì kótírì miɛkɛ.
\q1
\v 2 Fɔ̃́ɔ̃̀ bɛ̀ti ibotí kɛ kɑ̀nnɛ ti kɔku,
\q1 kɛ potɛ́ ibotí kɛ̀ bɛ̀ kɑ̀ri kɛ pitɛ́.
\q1
\v 3 Dɛ̀ í tú nɛ̀ bɛ kpɑ̀rìse nyɛ bɛ tiekɛmɛ̀ dihɛì,
\q1 dɛ̀ í tú nɛ̀ bɛ wɛ̃rímú mmu bɛ̀ nɑmɛ̀,
\q1 nɛ̀ ɑ nɔyɔ̃nkperì ndi bɛ nɑmɛ̀
\q1 kɛ yɛ̃́ ɑ do bɛ̀ kòḿmúmɛ̀
\q1 ɑ bɛ̀ dɔ́ mɛ̀ɛ̀ kpɛ́í.
\b
\q1
\v 4 N Yiɛ̀ nKuyie, nfɔ̃́ɔ̃̀ tu nkóo kpɑ̀ɑ̀tì,
\q1 fɔ̃́ɔ̃̀ ɔ̃ɔ̃ duɔ́ nkɑ̀ɑ kɔbɛɛ nɑ.
\q1
\v 5 Fɔ̃́ɔ̃̀ te kɛ̀ ti bɛ̀ti ti dootitɔbɛ̀
\q1 nɛ̀ ɑ kó diyètìrì ndi ti nɑumɛ̀ bɛ̀ɛ̀ ti dokùnɛ̀
\q1
\v 6 n yí tɑ̃́ n tɑ̃mmù mmu,
\q1 n siè diì í dɛɛrí.
\q1
\v 7 Fɔ̃́ɔ̃̀ ti dɛɛrínɛ̀ ti dootitɔbɛ̀,
\q1 kɛ fɛikùnko bɛ̀ɛ̀ í ti dɔ́.
\q1
\v 8 Ti Yiɛ̀ nKuyie nti pɔtìnɛ̀ ɑ yètìrì ndi yɛwe yɛmɔu,
\q1 kɛ dɑ sɑ̃ntí sɑ̃́ɑ̃̀.
\b
\q1
\v 9 Nɛ̀ mɛmmɛ kɑ̀ɑ ti yetɛ
\q1 kɛ ti ɑ̃nnɛ́ ifɛi,
\q1 ɑ tɛ̃́nkɛ í niɛ̀nɛ̀ ti kó bɛhɑ̃ɑ̃pɔ̀mbɛ̀ dikpɑ̀nnì.
\q1
\v 10 Fɔ̃́ɔ̃̀ duɔ́ nkɛ̀ ti cokù ti dootitɔbɛ̀,
\q1 kɛ̀ bɛ̀ɛ̀ ti níí nkɛ̀ bɛ̀ ɛí ti kpɛrɛ bɛ̀ dɔ́mɛ̀.
\q1
\v 11 Fɔ̃́ɔ̃̀ bɛ̀ nti duɔ́ nyiwũɔ̃ bɛ̀ kɔ̀ù ì kɔ̃mɛ,
\q1 kɛ ti cíɛnko kɛ̀ ti tɑɑ̀ yɛhɛkɛ̀ tɛyɛ̀.
\q1
\v 12 A fiiti ɑ nìtìbɛ̀ mbɛ dɛtetìrɛ̀
\q1 ɑ bɛ̀ fiiti fɑ̀ɑ̀rɛ̀ fɑ̀ɑ̀rɛ̀ nwe.
\q1
\v 13 Kɛ yóu kɛ̀ ti cɛ̃pɛɛtitɔbɛ̀ ti senku,
\q1 kɛ̀ bɛ̀ɛ̀ ti tɔ́kɛ́nɛ̀ kɛ̀ bɛ̀ ti dɑú.
\q1
\v 14 Fɔ̃́ɔ̃̀ duɔ́ nkɛ̀ ibotí ti diè,
\q1 bɛ̀ ti dɑúmu kɛ éùròo.
\q1
\v 15 Nh ɔ̃ nkɛ̀ n kèè n kpɑntídɛ̀ntɔbɛ̀ tɑmmɛ̀ ifɛi iì ɔ̃ mpĩ́
\q1 kɛ̀ m pi n yììkɛ̀,
\q1 nh ɔ̃ nkɛ̀ n yɑ̀ n dootitɔbɛ̀ bɛ̀ɛ̀ ti sɑ̃́ɑ̃́ nkɛ ti wɛ̃́nnì
\q1 kɛ dɔ́ kɛ́pɛitɛ nh ɔ̃ senkɛ̀rì mmɑ́ɑ̀ ndi.
\b
\q1
\v 17 Dɛndɛ kó dimɑ̀ɑ̀ ti tùɔ̀kùmmu ti mɛ nyí dɑ yɛ̃̀,
\q1 ti í yetɛ ɑ tɑummɛ̀.
\q1
\v 18 Ti í wɛ̃̀tɛ ti fɔ̃nkó,
\q1 ti í yóu kucɛ ɑ ti bɛnkú kù.
\q1
\v 19 Kɑ̀ɑ nɛ́ ti kùɔ sikpɑmɔɔ́ miɛkɛ,
\q1 kɛ̀ mukṹṹ nkó dibiìnnì ti dɑ̀tínnɛ́.
\q1
\v 20 Kɛ̀ ti do ndɑ yɛ̃̀, fɔ̃́ nKuyie,
\q1 kɛ̀ ti do ntũ̀nnɛ yɛbɔkɛ̀,
\q1
\v 21 ɑ nɑ nyɛ̃́mu,
\q1 kɛ yɛ̃́ ɑ yɛ̃́mɛ̀ onìtì yɛ̀mmɛ̀ dòmmɛ̀.
\q1
\v 22 Fɔ̃́ɔ̃̀ kpɛ́í nkɛ kɛ̀ bɛ̀ ti dɔ́ mukɔ̀ù yɛwe yɛmɔu,
\q1 ti do ntipìètì tìì bo tìnti mukɔ̀ù kpɛ́í.
\b
\q1
\v 23 N Yiɛ̀ nKuyie, entɛ! Bɑ nte kɑ̀ɑ duɔ́? Entɛ!
\q1 Bɑ́ɑ́ ti bɔntóo sɑ̃́ɑ̃̀.
\q1
\v 24 Dɛ̀ yĩ́mɛ kɑ̀ɑ ti sɔrìnɛ̀?
\q1 Kɛ yɛ̃̀ mbɛ̀ ti yommɛ̀ nɛ̀ muwɛ̃rímú mmu kɛ ti fɛ̃́ũnko,
\q1
\v 25 kɛ̀ ti yɛ̀mmɛ̀ cɑ̀ɑ̀rɛ̀ kɛ̀ ti duɔ́ mutɑ̃́ɑ̃́ mmiɛkɛ,
\q1 kɛ cɑ̃ɑ̃̀nko kɛtenkɛ̀.
\q1
\v 26 Ítɛ́ kɛ ti dɛɛtɛ́! Nɛ̀ ɑ sɑ̀ɑ̀ nkpɛ́í nti coo.
\c 45
\s1 Okpɑ̀ɑ̀tì potúòmù yɛ̀nfɛ̀
\d Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀ nɛ̀ tibómbonti. Fɛcɑnyɛ̀nfɛ̀.
\b
\q1
\v 1 Tinɑ́ɑǹsɑ̀ɑ̀tì tiì doorí n nùù.
\q1 N dɔ́ kɛ́keutɛ́ fɛyɛ̀nfɛ̀ nfɛ okpɑ̀ɑ̀tì kpɛ́í,
\q1 n yóó dèntɛ̀ fɛyɛnsɑ̀ɑ̀fɛ̀ nfɛ
\q1 opɑ́tíwɑ̃ɑ̃̀tì sɑ̀ɑ̀wè ɔ̃ɔ̃ duɔ́kɛ́mɛ̀ o pɑ́tíri.
\b
\q1
\v 2 A wenni kɛ pɛ̃ɛ̃tɛ́ bɛnìtìbɛ̀ bɛmɔu ndi,
\q1 kɑ̀ɑ nɑ́ɑǹtì nɑɑti.
\q1 Dɛɛ̀ te kɛ̀ Kuyie ndɑ dɔ̀ɔ̀ mɛsɑ̀ɑ̀ nsɑ̃́ɑ̃̀.
\q1
\v 3 Okpɑ̀rìteu túótɛ́ ɑ siè
\q1 dɛɛ̀ tu ɑ sɑ̃nni nɛ̀ ɑ yetìdiɛrì.
\q1
\v 4 Túótɛ́ ɑ tɑ̃mmù kɛ́kétɛ́
\q1 dekɛ ɑ sɑ̃ntɛ̀,
\q1 kpɑ ntimɔ́mmɔnti kpɛ́í,
\q1 kónnɛ́ bɛcĩ̀rìbɛ̀.
\q1 Kónnɛ́ bɛ̀ɛ̀ nɑɑti.
\q1 A wɛ̃rímú muù yó nte kɑ̀ɑ nɑ dikpɑ̀nnì diɛrì.
\q1
\v 5 Nɛ̀ ɑ penyómmɛ̀ mmɛ ɑ yóó buɔ́mmɛ̀ ibotí,
\q1 okpɑ̀ɑ̀tì, ɑ yóó mɛ nkuɔnɛ̀ ɑ dootitɔbɛ̀.
\q1
\v 6 Dikpɑ̀ɑ̀tìkɑ̀rì Kuyie ndɑ duɔ́ ndì yó mbomu sɑ̃́ɑ̃̀,
\q1 ɑ bɑkɛ́ nɛ̀ timɔ́mmɔnti nti.
\q1
\v 7 A dɔ́ timɔ́mmɔnti nti, ɑ í dɔ́ mɛyɛi,
\q1 dɛɛ̀ te kɛ̀ Kuyie nhɑ Yiɛ̀ ndɑ tɑ̃ɑ̃tɛ́ ɑ kɔbɛ miɛkɛ
\q1 kɛ wɑɑrɛ ɑ yuu mɛkùɔ̀,
\q1 kɛ dɑ dɔ̀ɔ̀ diwɛ̀ì.
\q1
\v 8 A yɑ̀ɑ̀tì ɑ̃ tudɑ̀ɑ̀ríbɛ̀ bɛ̀ tu bɛ̀ míírì nɛ̀ ɑdòwɛ́ɛ̀ nɛ̀ kɑ́sì
\q1 bɛ kó kufɔ̃ɔ̃ku nku,
\q1 kɑ̀ɑ cĩ́ɛ̃̀tɛ̀ sɑ̃̀ri yɛpɑ́pɑ́nìì nkó tisɑ̃tì kɛ̀ bɛ̀ bie
\q1 dɛbémbénnɛ̀ ɑ cĩ́ɛ̃̀tɛ̀ kɛ̀ dɛ̀ dɑ nɑɑti.
\q1
\v 9 Bɛkpɑ̀ɑ̀tìsɑpɑ̀mbɛ̀ bɛɛ̀ ɔ̃ɔ̃ dɑ́ co,
\q1 onitipokpɑ̀ɑ̀tì ɔ̃ ncómmú ɑ píkù nku kɛ sɑ̃̀ri
\q1 mɛsɔɔ nsɑ̀ɑ̀mɛ̀ kó tisɑ̃tì.
\b
\q1
\v 10 N kóo sɑpɑ̀ɑ̀, nkéntɛ́ mɛsɑ̀ɑ̀ nkɛ́keè!
\q1 A tɛ̃́nkɛ bɑ́ ntoti ɑ yɛ̀mmɛ̀ ɑ botí kɔbɛ nɛ̀ ɑ cĩ́ɛ̃̀tɛ̀ kɔbɛ kpɛ́í.
\q1
\v 11 Okpɑ̀ɑ̀tì dɑ dɔ́ mɛdiɛ̀ mmɛ ɑ wenniku kpɛ́í,
\q1 ò tu ɑ yiɛ̀ nwe, nnínkú o ììkɛ̀.
\q1
\v 12 Tiiri ɛì kɔbɛ bɛdítíkpɑ̀ɑ̀tìbɛ̀ yóó dɑ wɑmmú nɛ̀
\q1 yɛpɑ̃rɛ̀ nyɛ.
\b
\q1
\v 13 Okpɑ̀ɑ̀tìsɑpɑ̀ɑ̀ mbo tɛkpɑ̀ɑ̀tìcĩ́ɛ̃̀tɛ̀ ntɛ kɛ wenni
\q1 kɛ dɑ́ɑ́tí tiyɑɑ̀sɑ̀ɑ̀tì tìì dùɔ̀kɛnɛ̀ musɔɔpɑ̀ɑ̀kómmú.
\q1
\v 14 Kɛ̀ tì kpɛ̃̀ nkɛ kpɛ̃̀ mmɛɔ̃̀rìmɛ̀ mɛbotí mɛbotí,
\q1 kɛ̀ bɛ̀ ò tɑtinɛ̀ okpɑ̀ɑ̀tì borɛ̀ kòo dúɔ̀bɛ̀ ò urí.
\q1
\v 15 Kɛ̀ bɛ̀ mbɛ̀ urí kɛ yɑ̃nku nɛ̀ diwɛ̀ì kɛ́tɑnnɛ̀nko
\q1 okpɑ̀ɑ̀tì cĩ́ɛ̃̀tɛ̀.
\b
\q1
\v 16 A bí iì yóó sɔɔtɛ́ ɑ yɛmbɛ̀ kpɑ̀tì,
\q1 kɑ̀ɑ ì bɑɑ́ nkɛ̀ ì mbɑkɛ́ kutenkù kumɔu.
\q1
\v 17 N yó nnɑ́ɑ́mmu ɑ kpɛ́í nyidɑpùntɛí imɔu,
\q1 kɛ̀ bɛnìtìbɛ̀ bɛmɔu ndɑ sɑ̃ntí sɑ̃́ɑ̃̀.
\c 46
\s1 Kuyie nti bonɛ̀mɛ̀
\d Bɛdèmbɛ̀ kóo kótì dìèmmɛ̀ Kodee bí yɛ̀nfɛ̀ kɛ biennɛ̀ dɛbémbénnɛ̀ mɛtɑmmɛ̀ mɛdɑɑmɛ̀ kpɛrɛ.
\b
\q1
\v 1 Kuyie nkuù tu ti kó disɔ̀rì mɔ́mmɔnni,
\q1 kuù ti duɔ̀ mmuwɛ̃rímú,
\q1 kuù ti teénnɛ̀ mɛyɛǹcɑɑ̀rìmɛ̀ mɔ̀nnì.
\q1
\v 2 Dɛɛ̀ te kɛ̀ ti í yĩɛ̃̀kù, bɑ́ kɛ̀ kɛtenkɛ̀ ɑu,
\q1 kɛ̀ yɛtɑ̃rɛ̀ duò dɑ̀mɛ́ɛ̀rì miɛkɛ.
\q1
\v 3 Bɑ́ kɛ̀ mɛniɛ nkpɑ nkɛ kóonko kɛ puotì yɛtɑ̃rɛ̀
\q1 kɛ̀ yɛ̀ sɑ̃̀nti.
\b
\q1
\v 4 Kukó nkuù pũɔ̃̀ nKuyie nhɛì,
\q1 kɛ duɔ̀ ndiwɛ̀ì Kuyie kùù bɑkɛ́ kɛĩ́nkɛ̀ nɛ̀ kɛtenkɛ̀ ku ɛì sɑ̀ɑ̀rì miɛkɛ.
\q1
\v 5 Kuyie mbomu dɛ kó dihɛì miɛkɛ,
\q1 kɛ̀ dì yó nfííkú teii, kuù di teénnɛ̀ dikṹnweńnì sɛ̀ì.
\q1
\v 6 Ibotí iì kuɔ̀ nkɛ̀ yɛkpɑ̀ɑ̀tìyɔ sɑ̃nti,
\q1 kɛ̀ Kuyie mpɛ́ú mɛtɑmmɛ̀ kɛ̀ kɛtenkɛ̀ pùɔ̀.
\q1
\v 7 Ti Yiɛ̀ nKuyie Mpɑkɛdɑɑ wèè bɑkɛ́ dɛmɔu,
\q1 wè ti bonɛ̀mu,
\q1 Kuyie nSɑkɔbu do tũ nkù tu ti kó tɛcɛ̃kpetɛ̀ ntɛ.
\b
\q1
\v 8 Kɔtɛnɛ̀ní kɛ́yɑ̀ ti Yiɛ̀ nKuyie ndɔ̀ɔ̀ dɛ̀,
\q1 kù cɑ̀kɛmɛ̀ kutenkù.
\q1
\v 9 Kuyie nkuù còḿmú dikpɑ̀nnì kutenkù kumɔu duɔ́mɛ̀,
\q1 kɛ kékíí dɛtɑ̃nnɛ̀ nɛ̀ yɛkpɑ̃ɑ̃̀, kɛ cɔ́unko sikpɑ̀rìsɛ̃ĩ́.
\b
\q1
\v 10 Kɛ nɑ́ɑ́ nkɛ tú: Yĩ́nɛ̀ só kɛ́bɑntɛ́ míì
\q1 túmɛ̀ Kuyie nkɛ bɑkɛ́ ibotí nɛ̀ kutenkù.
\q1
\v 11 Kuyie nkùù bɑkɛ́ dɛmɔu kù ti bonɛ̀mu,
\q1 Kuyie nSɑkɔbu do tũ nkù tu ti kó tɛcɛ̃kpetɛ̀ ntɛ.
\c 47
\s1 Ti bo dɛ́úkùnkomɛ̀ Kuyie nhokpɑ̀ɑ̀tì diɛwè
\d Bɛdèmbɛ̀ kóo kótì dìèmmɛ̀ Kodee bí kó didèntĩ̀nnì kó fɛyɛ̀nfɛ̀.
\b
\q1
\v 1 Ibotí imɔu, mpɛ́únɛ̀ di nɔu,
\q1 ńdiènnɛ̀ diwɛ̀ì kɛ sɑ̃ntí Kuyie.
\q1
\v 2 Ti Yiɛ̀ nKuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kù duò tikɔ̃m̀bùɔ̀tì nti,
\q1 kuù tu kɛtenkɛ̀ kɛmɔu kóo kpɑ̀ɑ̀tì diɛwè.
\q1
\v 3 Kuyie nkuù duɔ́ nkɛ̀ ti nɑ ti dootitɔbɛ̀
\q1 kuù te kɛ̀ ti nɔ nyɛbotɛ̀.
\q1
\v 4 Kuù ti tɑ̃ɑ̃tɛ́ ti yóó tiekɛ dɛ̀ tínti ku kɔbɛ,
\q1 ti yɛ̀mmɛ̀ nɑɑtinɛ̀mu ti yóó tiekɛ dɛ̀,
\q1 tínti Sɑkɔbu yɑɑ̀bí kù dɔ́ bɛ̀.
\q1
\v 5 Kuyie ndèètì Siyɔ̃ɔ̃ nwe kɛ̀ bɛ̀ kù sɑ̃ntí,
\q1 kɛ eu ditɑ̃tɛheù kɛ̀ kù kèrí.
\q1
\v 6 Nsɑ̃ntínɛ̀ Kuyie! Nsɑ̃ntínɛ̀ ku!
\q1 Nsɑ̃ntínɛ̀ ti kóo kpɑ̀ɑ̀tì! Nsɑ̃ntínɛ̀ we!
\q1
\v 7 Kuyie nkuù tu kɛtenkɛ̀ kɛmɔu kóo kpɑ̀ɑ̀tì,
\q1 ńdiènnɛ̀ kɛ kù sɑ̃ntí.
\q1
\v 8 Kuyie nkuù bɑkɛ́ yɛbotɛ̀,
\q1 kɛ kɑri ku kpɑ̀ɑ̀tìkɑ̀rì sɑ̀ɑ̀rì.
\q1
\v 9 Kutenkù kó ikpɑ̀ɑ̀tìbí,
\q1 wɛ̃nnɛ́nɛ̀mu Kuyie Abɑrɑhɑmmu do tũ nkù kɔbɛ,
\q1 Kuyie nkuù te bɛkpɑ̀ɑ̀tìbɛ̀ bɛ̀ɛ̀ bɑkɛ́ kutenkù,
\q1 kuù te kutenkù kó bɛkpɑ̀ɑ̀tìbɛ̀,
\q1 kuù bɑkɛ́ dɛmɔu.
\c 48
\s1 Okpɑ̀ɑ̀tì diɛwè ɛì kó tinɑ́ɑǹtì
\d Fɛyɛ̀nfɛ̀ Kodee bí kó didèntĩ̀nnì dìè nfɛ̀.
\b
\q1
\v 1 Ti Yiɛ̀ nKuyie ndɛumu, Kuyie nkuù dò mbɛ̀ nkù sɑ̃ntí
\q1 ku ɛì, ku tɑ̃sɑ̀ɑ̀rì ĩ́nkɛ̀.
\q1
\v 2 Siyɔ̃ɔ̃ tɑ̃rì kubɑkù yoú bíɛ́kɛ̀ okpɑ̀ɑ̀tì diɛwè ɛì.
\q1 Di wennimu kɛ̀ dɛ̀ nɑɑti kutenkù kumɔu di kpɛ́í
\q1
\v 3 Kuyie mbomu ku kpɑ̀ɑ̀tìcĩ́ɛ̃̀tɛ̀ miɛkɛ Siyɔ̃ɔ̃,
\q1 Kuyie nkuù tu ti kó tɛcɛ̃kpetɛ̀.
\b
\q1
\v 4 Bɛkpɑ̀ɑ̀tìbɛ̀ bɛɛ̀ wɛ̃nnɛ́ kɛ dɑ̀kɛ,
\q1 bɛ̀ bɑ̀ɑ́tímu kɛ bo kpɑnnɛ̀ Siyɔ̃ɔ̃.
\q1
\v 5 Kɛ yɑ̀ Siyɔ̃ɔ̃ kɛ̀ dɛ̀ bɛ̀ pĩ nkufɔ̃wɑɑ́,
\q1 kɛ̀ bɛ̀ yɔ̀tɛ kɛ cokɛ́.
\q1
\v 6 Kɛ̀ bɛ kɔ̃̀ntì ɑɑ́ dɛndɛ bɑ̀mbɑ̀,
\q1 nkupɛitɛ́yonku ɔ̃ɔ̃ pĩ́ nhonitipòkù kòò nkpeutímɛ̀.
\q1
\v 7 Kɛ dò ndiyiè yìɛ̀ní kɛ̀ɛ̀ bíɛ́kɛ̀ kó kuyɑɑkù kùù pùɔ̀ Tɑdisisi kóo bɑ̀tóòbɛ̀ diɛbɛ̀.
\b
\q1
\v 8 Ti kèè dɛ̀ ti dɛ nyɑ̀. Kuyie Mpɑkɛdɑɑ ɛì,
\q1 Kuyie nhɛì, kuù dì kpénkùnnɛ sɑ̃́ɑ̃̀.
\b
\q1
\v 9 Kuyie nti wɛ̃̀tɛ kɛ yɑumu ɑ sɑ̀ɑ̀ nhɑ cĩ́ɛ̃̀tɛ̀ miɛkɛ.
\q1
\v 10 Kuyie nhɑ yètìrì pitɛ́mɛ̀ kutenkù,
\q1 ɑ sɑ̃nni tùɔ̀kɛmu itemmɑ̀nkɛ,
\q1 kɑ̀ɑ bekù kɛ dɛ̀ sìɛ́.
\q1
\v 11 Siyɔ̃ɔ̃ tɑ̃rì kɔbɛ, nyɑ̃nkunɛ̀!
\q1 Kɛ̀ dɛ̀ nnɑɑti Sudɑɑ ɛkɛ̀ kɔbɛ
\q1 Kuyie mbeéntì kpɛ́í.
\b
\q1
\v 12 Fitɛ́nɛ̀ Siyɔ̃ɔ̃ ɛì
\q1 kɑɑnnɛ̀ o dèrɛ̀ mɑ̀mɛ̀.
\q1
\v 13 Kɛ wéntɛ́ o duotí kɛ́yɑ̀ o cɛ̃kperí,
\q1 kɛ́nɑ kɛ́nɑ́kɛ́ di yɑɑ̀bí,
\q1
\v 14 kɛ dɔ̀: Kuyie nkuù ti te kɛ yó nti ni nɛ̀ ti kṹṹnko.
\c 49
\s1 Onìtì bɑ́ɑ́ nɑ kɛ́dontɛ́ mufòmmu
\d Bɛdèmbɛ̀ kóo kótì dìèmmɛ̀ Kodee bí kó ditĩ̀nnì dìè nfɛ̀ɛ̀ yɛ̀nfɛ̀.
\b
\q1
\v 1 Díndi bɛnìtìbɛ̀, kéntɛ́nɛ̀,
\q1 kutenkù kumɔu kɔbɛ keènɛ̀:
\q1
\v 2 Bɛsɑ́m̀pɔ́bɛ̀ nɛ̀ bɛnitidiɛbɛ̀, bɛkpɑ̀ɑ̀tìbɛ̀ nɛ̀ idɑwɑɑ́ kèènɛ̀.
\q1
\v 3 N yóó bɛ́i mmɛciì nkó tinɑ́ɑǹtì nti,
\q1 n totí tì n yɛ̀mmɛ̀ miɛkɛ tisɑ̀ɑ̀tì nti.
\q1
\v 4 N yóó totí n yɛ̀mmɛ̀ mmɛ yɛkotinɔ̀ ĩ́nkɛ̀
\q1 kɛ́ndiè nkɛ nɑ́ɑ́ nyɛ̀ tu mù kɛ biennɛ̀ n kùtìdùkù.
\b
\q1
\v 5 Bɑ nte kɛ̀ m bo nyĩɛ̃̀kù mɛyɛi nni ntùɔ̀kɛní dìì mɔ̀nnì?
\q1 Bɛnitiyɛibɛ n cɛ̃̀ɛ̃̀tɛ dìì mɔ̀nnì kɛ bo n cɑɑ̀rɛ̀?
\q1
\v 6 Bɛ̀ tɑ̃́ bɛ kpɛrɛ ndɛ,
\q1 bɛ̀ pɔ̀tìnɛ̀ bɛ kpɑ̀tì nti.
\b
\q1
\v 7 Onìtì bɑ́ɑ́ nɑ kɛ́dontɛ́ otɔù fòmmu,
\q1 yoo wèe yietí Kuyie nho mɔ́mmuɔ nho donti.
\q1
\v 8 Onìtì fòmmu donku yóumu,
\q1 ɑ ketɛ́ kɛ bɑ́ɑ́ nɑ.
\q1
\v 9 Òmɔù bɑ́ɑ́ nɑ kɛ́nfòù sɑ̃́ɑ̃̀,
\q1 òmɔù í yóó yentɛ́nɛ̀ kufɔ̃ti.
\q1
\v 10 Ti yɑumu mɛciì nyɛmbɛ̀ kɔ̃mmɛ̀,
\q1 tiyɛìntì nɛ̀ tidìɛ̀ntì kɛ̀ bɛ̀ múnkɛ kɔ̃,
\q1 kɛ̀ bɛtɔbɛ̀ tòú bɛ kpɛrɛ.
\q1
\v 11 Kɛ̀ bɛ fɔ̃ti nɑɑ́ mbɛ cɛ̃́ĩ sɑ̃́ɑ̃̀ kpɛsi.
\q1 Bɛ yɛ̀mmɛ̀ do dò mbɛ cɛ̃́ĩ yó mbomu sɑ̃́ɑ̃̀
\q1 bɛ̀ yó mbo siì miɛkɛ sɑ̃́ɑ̃̀,
\q1 bɛmbɛ bɛ̀ɛ̀ do duɔ̀ mbɛ tenkɛ̀ bɛ yètɛ̀.
\q1
\v 12 Bɑ́ kòo nìtì yètìrì feí ò bɑ́ɑ́ nɑ kɛ́nfòù sɑ̃́ɑ̃̀,
\q1 ò dònnɛ̀ fɛɔ̃̀fɛ̀ nfɛ kɛ í mɔnni.
\q1
\v 13 Ntɛ bɛ̀ɛ̀ tɑ̃́ bɛmɑ́ɑ̀ bɛ̀ yóó dentɛnɛ̀ tì,
\q1 bɛ̀ɛ̀ dɔ́ kɛ́nkémmú bɛ̀ nɑ̀ɑ́ ntì bɛ kpɛrɛ yó mmɛ ndò.
\q1
\v 14 Bɛ̀ bɛ̀ kpɑ̀ɑ̀kɛ tipìètì kɔ̃mɛ mmɛ kɛ kɔrinɛ̀ dibiìnnì,
\q1 kɛ̀ mukṹṹ mbɛ̀ cɛ̃mmú kɛ̀ bɛ̀ tɑti kufɔ̃ti,
\q1 bɛ wenniku yóó deèmu kɛ̀ bɛ̀ mbo kudɔnkù.
\b
\q1
\v 15 Kuyie nnɛ́ yóó n dɛɛtɛ́nɛ̀mu mukṹṹ
\q1 nkɛ yɛ̃́ kù yó n túótɛ́mɛ̀.
\b
\q1
\v 16 Kòò mɔù kpɑ̀tì dɛ̀úkú ɑ bɑ́ ndɑkɛ.
\q1 Kòo kpɛrɛ sṹũnko ɑ bɑ́ ndɑkɛ.
\q1
\v 17 Ò í yóó kú kɛ́nnɛínɛ̀ o kpɛrɛ,
\q1 o kpɑ̀tì í yó nhò tũ̀ nkufɔ̃ti miɛkɛ.
\q1
\v 18 Ò do fòù kɛ̀ dɛ̀ ò nɑɑtimu,
\q1 kòò sɑ̃ntí omɑ́ɑ̀ o kpɛrɛ yíémɛ̀.
\q1
\v 19 Ò yóó sɔ̃́nkóo o yɛmbɛ̀ mbɛ kudɔnkù,
\q1 bɛ̀ tɛ̃́nkɛ í yóó yɑ̀ kuwenniku bìtì.
\q1
\v 20 Wèè mɔ̀kɛ tikpɑ̀tì kɛ í ciì,
\q1 ò yóó kú fɛɔ̃̀fɛ̀ kɔ̃mɛ mmɛ.
\c 50
\s1 Kuyie nyóó bekɛ́nɛ̀mɛ̀ ku kɔbɛ
\pi1
\v 1 Asɑfu kó fɛyɛ̀nfɛ̀ bɛ̀ dìè nfɛ̀.
\b
\q1 Ti Yiɛ̀ nKuyie nnɑ́ɑ́mmu,
\q1 kunku Kuyie nkù yumu kutenkù kumɔu kɔbɛ,
\q1 diyiè yìɛ̀ní kɛ̀ nɛ̀ dì tɑɑ̀ kɛ̀.
\q1
\v 2 Siyɔ̃ɔ̃ ɛì sɑ̀ɑ̀rì mɔ́mmɔnni,
\q1 Kuyie ndɛ mbo nɛ̀ ku kpetì.
\b
\q1
\v 3 Kuyie nkɔ̀rinímu,
\q1 kù í yó ndò nyúó.
\b
\q1 Kù yó nkéríní kɛ̀ muhɑ̃ɑ̃́ mmuù ni kɛ tuɔ̀,
\q1 kù yó nkéríní kɛ nɛínɛ̀ kuyɑɑkperíkù nku.
\q1
\v 4 Kuyie nyumu kɛĩ́nkɛ̀ kɛ yu tiwɛtì nɛ̀ kɛtenkɛ̀,
\q1 kɛ̀ dɛ̀ bo mbo kù bekù ndɛ̀ ku kɔbɛ.
\q1
\v 5 Kuù tu: Tíínnɛ̀nní díndi n kɔbɛ bɛ̀ɛ̀ yìé n kpɛti,
\q1 díndi bɛ̀ɛ̀ fèútɛ́ fɛɔ̃̀fɛ̀ kɛ n tɑunnɛ̀.
\q1
\v 6 Kɛĩ́nkɛ̀ nɑ̀ɑ́mmu Kuyie nwennimɛ̀,
\q1 kuù tu obeéntì.
\b
\q1
\v 7 Isidɑyɛɛribɛ kéntɛ́nɛ̀, n dɔ́ kɛ di bɛ́innɛ̀mu,
\q1 N kó bɛnìtìbɛ̀ n nɑ́ɑ́nnɛ̀ dí mbɛ kɛ di sɛí,
\q1 mí nKuyie ndi tũ nkù.
\q1
\v 8 N yí di sɛí nyiwũɔ̃ di n feu ì kpɛ́í,
\q1 di ì nni nfeumu sɑ̃́ɑ̃̀.
\q1
\v 9 N yí yóó pĩ́ nyɛnɑɑdɑkɛ̀ di cɛ̃́ĩ miɛkɛ,
\q1 yoo yɛbɔdɑkɛ̀ di bɔtuo miɛkɛ.
\q1
\v 10 Míì te ikpɑwũɔ̃ imɔu,
\q1 yɛtɑ̃rɛ̀ ĩ́nkɛ̀ kó siweí ticɛ̃nti ticɛ̃nti,
\q1 míì sì te.
\q1
\v 11 N yɛ̃́mu tinɔ̀tì timɔu,
\q1 tikpɑsĩ̀ntì timɔu tu n kpɛti nti.
\q1
\v 12 Kɛ̀ dikònnì do m bo m bɑ́ɑ́ di nɑ́kɛ́,
\q1 míì te kutenkù kumɔu nɛ̀ dɛ̀ɛ̀ bo ku miɛkɛ.
\q1
\v 13 N cɑ́ɑ́mmu yɛnɑɑdɑkɛ̀ kó imɑɑ nnɑɑ̀?
\q1 N yɔ̃̀mmu yɛbɔdɑkɛ̀ kó mɛyĩ̀ĩ̀ nnɑ̀ɑ̀?
\q1
\v 14 Di bo nni mpɑ̃ɑ̃mmɛ̀ yɛpɑ̃rɛ̀,
\q1 pètìnkɛ nni nsɑ̃ntínɛ̀mu mí nKuyie ndi tũ nkù,
\q1 ndɔɔrinɛ̀ mí nKuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ di yɛ̃ ndi yó n dɔɔ̀ tì.
\q1
\v 15 Kɛ̀ dɛ̀ di di dìì yiè dí n yú kɛ̀ n di dɛɛtɛ́,
\q1 kɛ̀ di nni nsɑ̃ntí.
\b
\q1
\v 16 Kuyie mmɛ nnɑ̀ɑ́mmu oyɛiwe kɛ tú:
\q1 Bɑ́ nnɑ́ɑ́nnɛ̀ ɑ nùù n kuɔ́,
\q1 bɑ́ nnɑ́ɑ́nnɛ̀ ɑ nùù n tɑnnɔ̀.
\q1
\v 17 Fɔ̃́ nwèè sènku n tié,
\q1 kɛ dokoo n kpɛti.
\q1
\v 18 Kɑ̀ɑ yɑ̀ oyúókù dɛ̀ ndɑ nɑɑtinɛ̀ we,
\q1 kòo nitipowɑntì mɛ nni nwe dí nnɛí.
\q1
\v 19 Kɑ̀ɑ nùù tɔ tinɑ́ɑǹyɛiti,
\q1 kɑ̀ɑ nɔ́ndɛnfɛ̀ nɔnnɛ̀ fɛ̀ bo ciitɛ́mɛ̀ otɔù.
\q1
\v 20 Kɑ̀ɑ nɑ́ɑntɛ ɑ kou kpɛ́í,
\q1 kɛ sĩnkùnko ɑ yɔ̃fũ̀ɔ̃̀ kou yètìrì.
\q1
\v 21 Ntɛ ɑ dɔ̀ɔ̀ tì kɑ̀ɑ yɛ̀mmɛ̀ dò nni ncĩ́ɛ̃́kɛ́,
\q1 kɛ yɛ̃́ kɛ tú n dònnɛ̀ fɔ̃́ nwe,
\q1 n nɛ́ yóó dɑ bɛnkɛmu ɑ dɔ̀ɔ̀ mɛ̀ɛ̀ yɛi mɛmɔu.
\b
\q1
\v 22 Díndi bɛ̀ɛ̀ m bùtínnɛ́ keènɛ̀ tii,
\q1 kɛ̀ mɛɛ̀ dɔkɛ m bo kɛ̃tɛ́ kɛ̃tɛ́ onìtì bɑ́ òmɔù bɑ́ɑ́ ò pɑ̀tɛ.
\b
\q1
\v 23 Wèè n sɑ̃ntí ò nɑ nni nfeumɛ̀ iwũɔ̃ weè n dɛ̀úkùnko,
\q1 wèè dɑ̀kɛ o borimɛ kpɛ́í n we mbɛnkú n túmɛ̀ Kuyie nkɛ dɛɛrí.
\c 51
\s1 Dɑfiti bɑ̀ɑ́mmɛ̀ Kuyie nho yɛi ncĩ́ɛ̃́mmɛ̀ kpɛ́í
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀. Dɑfiti duɔ́nɛ̀ Bɑtisebɑɑ kɛ̀ Nɑtɑ̃ɑ̃ wèè nɑ̀ɑ́ nKuyie mpɑ̃ɑ̃nɑ́ɑǹtìi kɔtɛ kóò yɑ̀ koò dentɛ̀ fɛ̀.
\b
\q1
\v 1 Áú Kuyie! N kuɔ́ mmɛsémmɛ̀ ɑ sɑ̀ɑ̀ nkpɛ́í,
\q1 ɑ sémmɛ̀ dɛumu, ũtɛ́ n yɛi.
\q1
\v 2 Nh ɔ́útɛ́ pɑ́íí kɛ́ n wénkùnnɛ n yɛi.
\b
\q1
\v 3 M bɑntɛ́mu n cɑ̀ɑ̀rɛ̀mɛ̀,
\q1 n wúómmu n yɛi n sɑ̃́ɑ̃̀.
\q1
\v 4 N yetɛ́nɛ̀ fɔ̃́ nwe ɑmɑ́ɑ̀,
\q1 kɛ dɔ̀ɔ̀ ɑ í dɔ́ dɛ̀,
\q1 dɛɛ̀ te kɑ̀ɑ yó nni nkpɑnnɛ̀ kɛ nɑɑti,
\q1 òmɔù bɑ́ɑ́ sɛi nhɑ beéntì.
\q1
\v 5 N tú mɛyɛi nyiɛ̀ nwe nɛ̀ bɛ̀ m pɛinímɛ̀,
\q1 nɛ̀ mɛyɛi mmɛ n yɔ̃ m pùónnímmɛ̀.
\q1
\v 6 A dɔ́ dɛ̀ onìtì yɛ̀mmɛ̀ miɛkɛ dɛɛ̀ tu:
\q1 Ò bo ntũmmɛ̀ timɔ́mmɔnti.
\q1 N duɔ́ mmɛciì n yɛ̀mmɛ̀ miɛkɛ.
\b
\q1
\v 7 N wénkùnnɛ nɛ̀ ìsɔ́pù kó tifɑ̃ɑ̃̀tì kɛ n wenkɛ pɑ́íí,
\q1 nh ɔ́útɛ́ kɛ n wenkɛ kɛ́nɑɑ́nnɛ̀ kupɑ̀ɑ̀kónkù.
\q1
\v 8 Nɑ́ríkùnnɛ n yɛ̀mmɛ̀, n duɔ́ ndiwɛ̀ì,
\q1 kɛ̀ n yɛ̀mmɛ̀ɛ cɑ́tɛ́, mí nhɑ potɛ́ wè kɛ n nɑ̀ntoo.
\q1
\v 9 Ũtɛ́ n yɛi mmɛmɔu,
\q1 bútínnɛ́ n cɑɑ̀rìmɛ̀.
\b
\q1
\v 10 Áú Kuyie! Nh ɑ̃nnɛ́ mɛyɛnwennimɛ,
\q1 tũntɛ n yɛ̀mmɛ̀ kɛ̀ mɛ̀ mbo ɑ bíɛ́kɛ̀.
\q1
\v 11 Kuyie mbɑ́ m bɔntóo,
\q1 bɑ́ɑ́ dɛitɛ ɑ kó Muyɑɑ́nsɑ̀ɑ̀mù m miɛkɛ.
\q1
\v 12 Wɛ̃tɛ kɛ́ n duɔ́ mmɛdɛɛtímɛ̀ kó diwɛ̀ì kɛ̀ nní ndɑ dɔ́,
\q1 n duɔ́ mmɛyɛ̀mmɛ̀ m bo nyíénnɛ̀mɛ̀ ɑ kpɛti.
\b
\q1
\v 13 N yóó bɛnkɛmu ɑ cɛ bɛ̀ɛ̀ yetɛ ɑ kpɛti,
\q1 kɛ̀ bɛyɛibɛɛ wɛ̃tɛní ɑ borɛ̀.
\q1
\v 14 Áú Kuyie! Kuyie n dɛɛtíwè,
\q1 n nɔ̀ùtɛ̀ tɛɛ̀ yetɛ́.
\q1 N dɛɛtɛ́ kɛ̀ nní mpĩɛ̃kù ɑ n dɛɛtɛ́mɛ̀.
\q1
\v 15 N Yiɛ̀ nKuyie nhɑɑ n nùù,
\q1 kɛ̀ n nɑ kɛ́ dɑ sɑ̃ntɛ.
\b
\q1
\v 16 A í dɔ́ iwũɔ̃ bɛ̀ dɑ feu ì,
\q1 ɑ í yíé mbɛ̀ dɑ feu ì kɛ tuɔ̀,
\q1 n nɑ nyì ndɑ fìému,
\q1
\v 17 Kuyie nhɑ dɔ́ yɛ̀ɛ̀ pɑ̃rɛ̀ tu idebìi nyi,
\q1 onìtì wèè bɑntɛ́ o cɑɑ̀rìmɛ̀.
\b
\q1 Áú Kuyie nhɑ í yetírí idebìi mɔ́mmɔnyi.
\b
\q1
\v 18 Bɛnkɛ ɑ sɑ̀mɛ̀ kɛ́dɔɔ̀ Siyɔ̃ɔ̃ mɛsɑ̀ɑ̀,
\q1 kɛ́wɛ̃tɛ kɛ́mɑɑ́ Sedisɑdɛmmu duotí.
\q1
\v 19 Dɛ mɔ̀nnì ndi ɑ yóó dɔkɛmɛ̀ iwũɔ̃ ɑ yɛ̃ mbɛ̀ ndɑ feu ì
\q1 nɛ̀ bɛ̀ yó ndɑ tuɔ̀ nyì.
\q1 Dɛ mɔ̀nnì ndi ti yóó nɑmɛ̀ kɛ́fíé yɛnɑɑdɑkɛ̀ ɑ wũɔ̃tɔ̀nnì ĩ́nkɛ̀.
\c 52
\s1 Tikpɑ̀tì yɛiti yiɛ̀ nyóó dentɛnɛ̀ tì
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀. Dowɛki Edomiibɛ kou do nɑ̀kɛ́ Sɑuri Dɑfiti tɑmɛ̀ Aimmɛdɛki cĩ́ɛ̃̀tɛ̀ kòò dentɛ̀ fɛ̀.
\b
\q1
\v 1 Dɛ̀ dòmmɛ fɔ̃́ nwèè kpeńnì mɛyɛi ndɔɔ̀rìmù miɛkɛ kɑ̀ɑ pɔ̀tìnɛ̀ mɛyɛi?
\q1 Kɛ ɔ̃ ntṹṹ nkɛ toti mukɔ̀ù mɑ́ɑ̀ kpɛ́í?
\q1
\v 2 A mɔkɛ mɛsoùmmɛ̀ mmɛ,
\q1 kɑ̀ɑ nùù nɑɑti kuponkù kɔ̃mɛ,
\q1 kɑ̀ɑ tú oniticiìntì.
\q1
\v 3 A dɔ́ mɛyɛi mmɛ kɛ yóu mɛsɑ̀ɑ̀,
\q1 kɛ dɔ́ siyɑ́ɑ̀bìsí kɛ yóu timɔ́mmɔnti.
\q1
\v 4 A nɔnnɛ̀ tinɑ́ɑǹtì tìì kó dimɑ̀ɑ̀ kɔ̀ùrì tìnti,
\q1 kɛ mɔkɛ mɛciìmmɛ̀.
\b
\q1
\v 5 Kuyie mbo dɑ bɔ nsɑ̃́ɑ̃̀,
\q1 kù bo dɑ uutɛ́ ɑ cĩ́ɛ̃̀tɛ̀ miɛkɛ kɛ́ dɑ dennɛ,
\q1 kɛ́ dɑ dɛitɛ bɛfòùbɛ̀ miɛkɛ kɛtenkɛ̀ kiɛ nyĩ́nkɛ̀.
\q1
\v 6 Bɛ̀ɛ̀ borimɛ wenni kɛ̀ bɛ̀ dɑ yɑ̀ kɛ kufɔ̃wɑɑ́ mbɛ̀ pĩ,
\q1 kɛ̀ bɛ̀ ndɑ dɑú kɛ tú:
\q1
\v 7 Ntɛnɛ̀ onìtì wèè do í yíé nKuyie mbo nhò kɑ̃nkɛ́mɛ̀,
\q1 kòo yɛ̀mmɛ̀ ńnɑɑtinɛ̀ o kpɑ̀tì,
\q1 ò do soutɛ́mu kɛ́kpenkɛ.
\b
\q1
\v 8 Mí m bo Kuyie ncĩ́ɛ̃̀tɛ̀ ntɛ kɛ dò mmutie mùù sɛ̀nti,
\q1 kɛ búɔ́ Kuyie nkó mɛsɑ̀ɑ̀ nsɑ̃́ɑ̃̀.
\b
\q1
\v 9 N yó nsɑ̃ntí fɔ̃́ nwe sɑ̃́ɑ̃̀ ɑ dɔ̀ɔ̀ dɛ̀ kpɛ́í,
\q1 n yó mbúɔ́ fɔ̃́ nwe kɛ yɛ̃́ ɑ sɑ̀ɑ̀ mbonɛ̀mɛ̀ bɛ̀ɛ̀ dɑ dɔ́.
\c 53
\s1 Kuyie nyí boɑ̀?
\r (Wéntɛ́ 14)
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ eu fɛtɑ̃rifɛ.
\b
\q1
\v 1 Kuyɛìnkù kuù ɔ̃ɔ̃ yĩ́ nɛ̀ ku yɛ̀mmɛ̀ miɛkɛ Kuyie nyí bo.
\q1 Bɛ̀ cɑ̀kɛmu kɛ dɔɔri isɔkɛ kpɛrɛ,
\q1 bɛ miɛkɛ òmɔù í dɔɔri dɛ̀ɛ̀ wenni.
\q1
\v 2 Kuyie mbo kɛĩ́nkɛ̀ nkɛ kɛ wúónní bɛnìtìbɛ̀,
\q1 kɛ bo yɑ̀ kòò mɔù bo wèè mɔ̀kɛ mɛyɛ̀mmɛ̀ kɛ kù wɑnti.
\q1
\v 3 Bɛmɔu bɛ̀ dɛ̀tɛ́nɛ̀ Kuyie nku,
\q1 bɛmɔu bɛ̀ cɑ̀kɛmu,
\q1 òmɔù í dɔɔri mɛsɑ̀ɑ̀ mbɑ́ omɑ́ɑ̀.
\b
\q1
\v 4 Bɛ̀ɛ̀ dɔ̀ɔ̀ri mɛyɛi mbɛtɔbɛ̀ bɛ̀ í yɛ̃́ dɛ̀mɑrɛ̀,
\q1 bɛ̀ soú n kɔbɛ mbɛ kɛ yo,
\q1 bɛ̀ í n yu mí nKuyie.
\b
\q1
\v 5 Ntɛ bɛ kɛ̀ kufɔ̃wɑɑ́ mbɛ̀ ɑutɛ́ dɛtetìrɛ̀,
\q1 Kuyie nyóó díɛ́mu ɑ dootitɔbɛ̀ kṹɔ̃̀,
\q1 kɑ̀ɑ bɛ̀ ɑ̃nnɛ́ ifɛi,
\q1 kɛ yɛ̃́ Kuyie mbɛ̀ bɔntóomɛ̀mu.
\b
\q1
\v 6 We nyóó yɛ̀nní Siyɔ̃ɔ̃ kɛ́dɛɛtɛ́ Isidɑyɛɛribɛ?
\q1 Kuyie mbo fietɛní dìì mɔ̀nnì ku kɔbɛ bɛ̀ɛ̀ tu tidɑɑtì,
\q1 dɛ̀ bo nɑrikɛ Sɑkɔbu kɔbɛ,
\q1 Isidɑyɛɛribɛ bo nyɑ̃nku.
\c 54
\s1 Wèè fɛ̃́ũ̀rì ò bɑ̀ɑ́mmɛ̀ Kuyie
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ bɛ̀ dìè nfɛ̀ kɛ bie ntibómbonti iwɛ̃ĩ kpɛti. Sifĩɛ̃bɛ do nɑ̀kɛ́ Sɑuri kɛ dɔ̀ Dɑfiti sɔ̀ri bɛ ciɛ kɛ̀ Dɑfitii dentɛ̀ fɛ̀.
\b
\q1
\v 1 Áú Kuyie! N dɛɛtɛ́ ɑ yètìrì kpɛ́í,
\q1 n kónnɛ́ kɛ́bɛnkɛ ɑ wɛ̃rímú.
\q1
\v 2 Kuyie nkéntɛ́ m bɑ́ɑmmìi,
\q1 keè n yɛ̃ mmù.
\b
\q1
\v 3 Bɛpɔ̀ɔ̀bɛ̀ bɛɛ̀ ìtɛ́ kɛ n dokùnɛ̀,
\q1 kɛ̀ bɛnitiyonkubɛ dɔ́ kɛ́ n kuɔ,
\q1 bɛ̀ í bɔti Kuyie nkpɛti.
\q1
\v 4 Kuyie nyó n teennɛ̀mu,
\q1 n Yiɛ̀ nKuyie nyó nni nkpénkùnkoomu.
\b
\q1
\v 5 Mɛyɛi ndo n dootitɔbɛ̀ ĩ́nkɛ̀,
\q1 fɔ̃́ ntimɔ́mmɔnti yiɛ̀, kuɔ bɛ pɑ́íí.
\q1
\v 6 M bo dɑ pɑ̃ dipɑ̃nnì nɛ̀ n yɛ̀mmɛ̀ mɛmɔu,
\q1 n Yiɛ̀ nKuyie m bo ndɛ́úkùnko ɑ yètìrì, ɑ wennimu.
\q1
\v 7 A n dɛɛtɛ́nɛ̀ mɛyɛǹcɑɑ̀rìmɛ̀ mɛmɔu ndi,
\q1 kɛ̀ n yɑ̀ n dootitɔbɛ̀ domɛ̀.
\c 55
\s1 Wèè nɛ́po ò fìtɛ́ ò sɑ̀útímɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ bɛ̀ dìè nfɛ̀ kɛ bie ntibómbonti iwɛ̃ĩ kpɛti.
\b
\q1
\v 1 Áú Kuyie! Kéntɛ́ m bɑ́ɑmmìi,
\q1 bɑ́ɑ́ yetɛ n sɑ́útìi.
\q1
\v 2 Dɔúnní ɑ toò m bíɛ́kɛ̀ kɛ́ n tɛ̃́nnɛ́,
\q1 nh ɑrìmu tipíìtì timɔu nɛ̀ mɛyɛǹcɑɑ̀rìmɛ̀ kɛ mítìrì
\q1
\v 3 n dootitɔù tɑmmɛ̀ kpɛ́í nɛ̀ oyɛiwe wèè ǹ fɛ̃̀ṹnko,
\q1 bɛ̀ n dɔ́nɛ̀ mɛyɛi mmɛ,
\q1 kɛ n wɑ́tìrì nɛ̀ kɛmiɛkɛ.
\q1
\v 4 Kufɔ̃wɑɑ́ nkuù m bo kɛ n kɔ̃̀ntì ɑu,
\q1 Mukṹṹ nkó kufɔ̃wɑɑ́ nkuù n do.
\q1
\v 5 Iyĩ̀ɛ̃̀kɛ nɛ̀ kukɔ̃m̀bɔ̀doróo dɛɛ̀ m̀ pĩ,
\q1 kufɔ̃wɑɑ́ nkuù nh ɑutɛ́, kɛ̀ n kɔ̃̀ntì ɑu.
\b
\q1
\v 6 Kɛ̀ n yĩ, we mbo m pɑ̃ ifìɛ̀ti,
\q1 kɛ̀ m puu tɛnɔ́nkpetɛ kɔ̃mɛ kɛ́sɔri.
\q1
\v 7 N nɑ mpùu kɛ dɛ̀tɛ́,
\q1 n nɑ nkɔ̀tɛ kɛ́mbo dikpɑ́ɑ̀.
\q1
\v 8 N nɑ ndɔ̀ɔ̀ mɛcɑ̃ɑ̃ nkɛ pɛ̀tɛ́ disɔ̀rì,
\q1 kɛ yentɛ́nɛ̀ kuyɑɑkù kperíkù.
\q1
\v 9 N Yiɛ̀ nKuyie, cɑkɛ n dootitɔbɛ̀ dɔ́ kɛ́dɔɔ̀ tì,
\q1 duɔ́ nkɛ̀ bɛ nɑ́ɑǹtì bɑ́ɑ́ mɑ́ɑ́.
\b
\q1 Kɛ yɛ̃́ n wúómmɛ̀ dihɛì miɛkɛ bɛ̀ kpɑ̀mmɛ̀ kɛ puotì bɛtɔbɛ̀.
\q1
\v 10 Bɛ̀ firì dihɛì duotí ĩ́nkɛ̀ nkɛ kɛyènkɛ̀ nɛ̀ kuyie.
\q1 Mɛyɛi nnɛ̀ mɛsémmɛ̀ dɛɛ̀ mɑ́ɑ̀ pìɛ́kɛ́ dihɛì.
\q1
\v 11 Munitikɔ̀ù muù píɛ ndihɛì,
\q1 siyɑ́ɑ̀bìsí nɛ̀ mɛsoùmmɛ̀ dɛ̀ í deu yɛcɛ̃kɑrɛ̀ miɛkɛ.
\b
\q1
\v 12 Kɛ̀ n kpɑntídɛ̀ntɔù weè do n sɑ̃́ɑ̃́ ndɛ̀ bɑ́ nni nyóù,
\q1 kɛ̀ n dootitɔù weè do n kpɑnnɛ̀ nnɑ nhò sɔ̀rinɛ̀mu.
\q1
\v 13 Fɔ̃́ n kó kutɔ̃nkù kou fɔ̃́ɔ̃̀ mɛ nni nwe,
\q1 nɛ̀ wè ti yɛ̃́ titɔbɛ̀ kpɛti kɛ nɛiti.
\q1
\v 14 Tíì do nɑɑti mɛsɑ̀ɑ̀,
\q1 kɛ niɛ̀ nɛ̀ ditĩ̀nnì kɛ kɔrì Kuyie ncĩ́ɛ̃̀tɛ̀.
\b
\q1
\v 15 Mukṹṹ mbɛ̀ dɛ̀ɛ́tɛ́ kɛ̀ bɛ̀ɛ tɑ kudɔnkù bɛfòùbɛ̀,
\q1 kɛ yɛ̃́ kuyonku bɛ̀ nɛínɛ̀mɛ̀ tipíìtì timɔu.
\b
\q1
\v 16 Mí nyóó yú Kuyie nku,
\q1 kɛ̀ kù n dɛɛtɛ́.
\q1
\v 17 N kuɔ̀mmu kɛ sɑ́útí dikṹnweńnì nɛ̀ kuyie nnɛ̀ kuyuoku,
\q1 kɛ̀ kù kèè n dɑbònnì.
\q1
\v 18 Kuù yó n dɛɛtɛ́ kɛ̀ n yɛ̀ sṹɔ̃́ɔ̃́,
\q1 bɑ́ bɛ̀ɛ̀ n kpɑ̀nnɛ̀ bɛ̀ mɛ nsũmɛ̀.
\q1
\v 19 Kuyie nyóó keèmu n dɑbònnì kɛ́ bɛ̀ kɛ̃́kùnnɛ,
\q1 kuù tu okpɑ̀ɑ̀tì sɑ̃́ɑ̃̀.
\b
\q1 Dɛ kó bɛnìtìbɛ̀ í yóó ceetɛ,
\q1 bɛ̀ í dé Kuyie.
\q1
\v 20 Dɛ kóo niticiìntò cɑ̀ɑ̀ri o nɛ́pobɛ̀ mbɛ,
\q1 kɛ tɔ̃ũ mɛtɑummɛ̀.
\q1
\v 21 O nɑ́ɑǹtì wɛ̀ɛ̀ti mɛcekùɔ̀ nkɔ̃mɛ mmɛ,
\q1 kòo yɛ̀mmɛ̀ nɛ́ dɔ́ dikpɑ̀nnì.
\q1 O nɑ́ɑǹtì yɔ̀ɔ̀ nkɛ pɛ̃ɛ̃tɛ́mu mɛkùɔ̀,
\q1 kɛ nɛ́ dò mmɛsekontibii.
\b
\q1
\v 22 Duɔ́ nti Yiɛ̀ nKuyie nhɑ yɛntotí kɛ̀ kù ndɑ tɔ,
\q1 kù í yóó yóu kɛ̀ dɛ̀ɛ di osɑ̀ù bìtì!
\b
\q1
\v 23 Fɔ̃́ nKuyie nhɑ yóó tɑnnɛ́ dɛ kó bɛnìtìbɛ̀ kufɔ̃ti miɛkɛ nkɛ,
\q1 bɛmbɛ bɛnitikɔ̀ùbɛ̀, bɛsoùmbɛ̀,
\q1 bɛ̀ í yóó tuɔkɛ bɛ we kó dikéè,
\q1 mí mmɛ ndɑ duɔ́ mmu mmɑ́ɑ̀.
\c 56
\s1 Bɛ̀ fɛ̃́ũnko wè ò duɔ́mmɛ̀ omɑ́ɑ̀ Kuyie
\d Bɛ̀dèmbɛ̀ kóo kótì dìèmmɛ̀ fɛyɛ̀nfɛ̀ Fidisitɛ̃ɛ̃bɛ do pĩ nDɑfiti Kɑti kó dihɛì kòo dentɛ̀ fɛ̀. Bɛ̀ fɛ̀ dìènnɛ̀ mɛ̀ɛ̀ tɑmmɛ̀ dònnɛ̀ dikpɛtinɔ́nkperi kó didɑbònnì ndi, dìì yìɛ̀ní dɛdɛ́tirɛ̀.
\b
\q1
\v 1 Áú! Kuyie n kuɔ́ mmɛsémmɛ̀,
\q1 bɛ̀ m bɛ̀tìmu,
\q1 kɛ n dimmù kɛ n dokùnɛ̀ yɛwe yɛmɔu.
\q1
\v 2 N kpɑntídɛ̀ntɔbɛ̀ m bɛ̀tì yɛwe yɛmɔu ndi,
\q1 bɛ̀ sũmu bɛ̀ɛ̀ n dimmù kɛ n dokùnɛ̀ tɛfentɛ̀.
\q1
\v 3 Kufɔ̃wɑɑ́ nhɔ̃ɔ̃ m pĩ́,
\q1 kɛ̀ n duɔ́ fɔ̃́ nwe mmɑ́ɑ̀.
\b
\q1
\v 4 N sɑ̃ntímu Kuyie nku nɑ́ɑǹtì kpɛ́í,
\q1 n ku nduɔ́ mmɑ́ɑ̀
\q1 n yí yĩɛ̃̀kù dɛ̀mɑrɛ̀,
\q1 bɛnìtìbɛ̀ bo nɑ kɛ́ n dɔɔ̀ bɑ?
\b
\q1
\v 5 Yɛwe yɛmɔu bɛ nɑ́ɑǹtì ǹ kɔɔ́nnɛ̀mu,
\q1 bɛ̀ n wɑntinɛ̀ mɛyɛi mmɛ.
\q1
\v 6 Bɛ̀ dɑ̀kiimu kɛ m pɑkíí,
\q1 bɛ̀ tũ n nɑɑ̀cɛ̀i nsi kɛ dɔ́ kɛ́ n kuɔ.
\q1
\v 7 Bɛ̀ bo dɔ̀ɔ̀ mɛyɛi mmiɛ nkɛ́nɑ kɛ dɑ yentɛ́nɑ̀ɑ̀?
\q1 Kuyie, mbɔ mbɛ nɛ̀ kɛmiɛkɛ.
\q1
\v 8 A yɛ̃́mu nh ɑrì mɛ̀ɛ̀ botí,
\q1 ceé n nɔnniɛti ɑ dɔukù miɛkɛ,
\q1 ɑ ti wɑ̃̀rimu ɑ pɑ́tíri miɛkɛ.
\q1
\v 9 Kɛ̀ n dɑ yu n dootitɔbɛ̀ ɔ̃ɔ̃ cokɛ́mu,
\q1 Kuyie, n yɛ̃́mu ɑ n kómmúmɛ̀.
\q1
\v 10 Kuyie n dɑ sɑ̃ntímu ɑ bɛ́i ntì kpɛ́í,
\q1 n Yiɛ̀ nKuyie n dɑ sɑ̃ntímu ɑ nɑ́ɑǹtì kpɛ́í.
\q1
\v 11 N dɑ duɔ́ mmɑ́ɑ̀ ndi n yí yĩɛ̃̀kù tìmɑtì,
\q1 bɛnìtìbɛ̀ bo nɑ kɛ́ n dɔɔ̀ bɑ?
\b
\q1
\v 12 Kuyie ndò nkɛ́dɔɔ̀mu n yɛ̃ n yóó dɑ dɔ̀ɔ̀ tì,
\q1 n yóó dɑ fíé disɑ̃nni kó iwũɔ̃ nyi.
\q1
\v 13 Fɔ̃́ɔ̃̀ n dɛɛtɛ́ nɛ̀ mukṹṹ,
\q1 fɔ̃́ɔ̃̀ n teennɛ̀ kɛ̀ n nɑɑ̀cɛ̀i í bètɛ́,
\q1 kɛ̀ dɛ̀ bo yie nkɛ̀ nni nkérí ɑ ììkɛ̀,
\q1 kɛ wúó mmɛnɑ́ɑ̀.
\c 57
\s1 Dɑfiti yumɛ̀ Kuyie nhoĩ́nkɛ̀nkpɑ̀ɑ̀tì
\r (Yɛnɑ́ɑǹkékɛ̀ 8-12, wéntɛ́ Yɛsɑ̃ɑ̃ 108:2-6)
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ ò do cokùnɛ̀ Sɑuri titɑ̃dèntì miɛkɛ kɛ́dentɛ̀ fɛ̀. Bɛ̀ do fɛ̀ dìènnɛ̀ mɛtɑmmɛ̀ mɛ̀ɛ̀ tu mɛ̀ mmɛ bɑ́ɑ́ kuɔ.
\b
\q1
\v 1 Áú Kuyie, n dɛɛtɛ́, yɑ̀ɑ n dɛɛtɛ́!
\q1 N sɔri ɑ fìɛ̀ti dɛ́ɛ̀ mmɛ,
\q1 kɛ kémmú mɛfɛ̃́ṹtímɛ̀ bo deèmɛ̀.
\q1
\v 2 Kuyie n dɑ yumu fɔ̃́ wèè bɑkɛ́ kɛĩ́nkɛ̀ nɛ̀ kɛtenkɛ̀,
\q1 fɔ̃́ɔ̃̀ te kɛ̀ n kpɛti timɔu yíé.
\q1
\v 3 A yó mboní kɛĩ́nkɛ̀ nkɛ kɛ́ n dɛɛtɛ́,
\q1 kɛ́fɛìkùnnɛ wèè m bɛ̀tì,
\q1 kɛ́ m bɛnkɛ ɑ sɑ̀ɑ̀ nnɛ̀ ɑ kó timɔ́mmɔnti.
\b
\q1
\v 4 N sokɛ́ yɛcìrícìrɛ̀ cuokɛ̀ nkɛ,
\q1 n duɔ́ bɛnìtìcɑ́ɑ̀mbɛ̀ cuokɛ̀ nkɛ,
\q1 Bɛ nìì ndò nyɛkpɑ̃ɑ̃̀ nyɛ nɛ̀ ipie,
\q1 kɛ̀ bɛ nɔ́ndiɛ́ ndò tikpɑ̀rìseuti.
\b
\q1
\v 5 Kuyie nhɑ yètìrì ńdɛu kɛĩ́nkɛ̀,
\q1 bɛnkɛ ɑ kpetì kɛtenkɛ̀ kɛmɔu miɛkɛ.
\b
\q1
\v 6 Bɛ̀ n dii ticùɔ̀tì nti,
\q1 bɛ̀ ɑ̀ɑ nkuhɔ̃ũ deè ndi kɛ bo n dúú,
\q1 bɛ̀ keù difɔ̃̀tìrì ndi n yììkɛ̀.
\q1 Bɛ̀ɛ do bɛmɔ́mmɔmbɛ di miɛkɛ.
\b
\q1
\v 7 Kuyie, m bùɔ̀tì tɛ̃́nkɛ í duò, n tɛ̃́nkɛ í yĩɛ̃̀kù,
\q1 m bo ndiè nkɛ dɑ sɑ̃ntí.
\q1
\v 8 N wɛ̃nnì, entɛ,
\q1 n kùtìdùkù nɛ̀ m bómbonku, entɛnɛ̀,
\q1 n yóó entɛmu dikṹnweńnì sɛ̀ì kɛ́dentɛ̀.
\b
\q1
\v 9 N Yiɛ̀ nKuyie n yó ndɑ sɑ̃ntímu bɛnìtìbɛ̀ cuokɛ̀,
\q1 kɛ́ndiè nkɛ dɛ́úkùnko ɑ yètìrì ibotí cuokɛ̀.
\q1
\v 10 Kɛ yɛ̃́ ɑ sɑ̀ɑ̀ ndɛumɛ̀ kɛ tuɔ̀kù tiwɛtì,
\q1 kɑ̀ɑ mɔ́mmɔnti tuɔ̀kù yɛwɛtɛ̀.
\b
\q1
\v 11 Áú Kuyie! A yètìrì ndɛu kɛĩ́nkɛ̀,
\q1 bɛnkɛ ɑ kpetì kɛtenkɛ̀ kɛmɔu miɛkɛ.
\c 58
\s1 Kuyie mbomɛ̀ kutenkù kɛ bekù
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ nɛ̀ mɛtɑmmɛ̀ mɛ̀ɛ̀ tu: Á bɑ́ɑ́ kuɔ.
\b
\q1
\v 1 Bɛkpɑ̀ɑ̀tìbɛ̀ di bekù bɑkɛ weti weti nweɑ̀?
\q1 Bɛ̀ bekùnɛ̀ miɛ̀ mmɛ bɛnìtìbɑ̀ɑ̀?
\q1
\v 2 Di dɔɔri dɛ̀ɛ̀ í wenni kɛ yɛ̃́mu,
\q1 díì píɛ mmɛyɛi ndihɛì.
\b
\q1
\v 3 Oyɛiwe tú oyɛiwe nwe nɛ̀ o yɔ̃ pɔutì miɛkɛ,
\q1 kɛ̀ siyɑ́ɑ̀bìsí yiɛ̀ nfeti nɛ̀ bɛ̀ ò pɛinímɛ̀.
\q1
\v 4 Bɛ̀ mɔ̀kɛ mɛdɑutidɔ̀mmɛ̀ mmɛ,
\q1 kɛ dɔɔri kɛ dò ndiwɑɑ̀hɔ̃̀nnì,
\q1
\v 5 dìì í yo owɑɑ̀pĩ́ntì tɑmmɛ̀,
\q1 kɛ í yo oteteu diɛwè nɑ́ɑǹtì.
\b
\q1
\v 6 Kuyie, mbɔ́kɛ́ bɛ nìì,
\q1 bɔ́kɛ́ yɛcìrícìrìnìì mbɛ̀ mɔ̀kɛ yɛ̀.
\q1
\v 7 Kɛ̀ bɛ̀ɛ pɛ̃ɛ̃tóo mɛniɛ nhɔ̃ɔ̃ pɔ̃ntɛ́ mmɛ̀ɛ̀ botí,
\q1 kɛ̀ bɛ̀ ntɑ̃ũ bɛ pie mbɑ́ ì bɑ́ɑ́ dɔ̀ɔ̀ dɛ̀mɑrɛ̀.
\q1
\v 8 Bɛ̀ɛ nɑɑ́nnɛ̀ tidɑ̀tìkonkontì,
\q1 tìì fũrì kɛ̀ ti ɑmmɛ̀ dèu,
\q1 bɛ̀ ndò mbɛ̀ pɛitɛ́ wè ocírì kòò í yɑ̀ diyiè.
\q1
\v 9 Bɛ po yó nkpɑɑ́ kɛ mu nyí yɛ̀ tifɑ̃ɑ̃̀tì,
\q1 kɛ̀ tɛfɔ̀dɔ́ntɛ̀ɛ ì tùótɛ́mu,
\q1 kɛ̀ dɛ̀ sɔ̃́ nyì sũ̀ tɛ̀ɛ ì tùótɛ́.
\b
\q1
\v 10 Osɑ̀ù bo yɑ̀ Kuyie mpɛ̀itɛmɛ̀ kɛ̀ dɛ̀ɛ ò nɑrikɛ mɛdiɛ̀,
\q1 kòo ɔ́ú o nɑɑ̀cɛ̀i bɛ yĩ̀ĩ̀ mmiɛkɛ.
\q1
\v 11 Kɛ̀ bɛnìtìbɛ̀ɛ dɛ̀ yɑ̀ kɛ dɔ̀:
\q1 Kuyie mmɛ̀nkɛ yietìmu osɑ̀ù,
\q1 bɛ̀ bo yĩ́ Kuyie mmɛ̀nkɛ bomu kɛtenkɛ̀ kɛ bekù.
\c 59
\s1 Dɑfiti bɑ̀ɑ́mmɛ̀ Kuyie nkɛ tú kù nhò kɑ̃nkɛ́
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀. Sɑuri do tɔ̃ nkɛ̀ bɛ̀ mbɑɑ Dɑfiti cĩ́ɛ̃̀tɛ̀ kɛ bo ò kùɔ kòo dentɛ̀ fɛ̀. Bɛ̀ do fɛ̀ dìènnɛ̀ mɛtɑmmɛ̀ mɛ̀ɛ̀ tu mɛ̀ mmɛ bɑ́ɑ́ kuɔ.
\b
\q1
\v 1 Kuyie n dɛɛtɛ́nɛ̀ n kpɑntídɛ̀ntɔbɛ̀,
\q1 bɑ́ɑ́ yie nkɛ̀ n dootitɔbɛ̀ n nintɛ.
\q1
\v 2 N dɛɛtɛ́nɛ̀ bɛ̀ɛ̀ n dɔ́nɛ̀ mɛyɛi,
\q1 n dɛɛtɛ́nɛ̀ bɛnitikɔ̀ùbɛ̀.
\b
\q1
\v 3 Bɛnitidɔnnibɛ̀ bɛɛ̀ dɑ̀kɛ kɛ n wɑnti,
\q1 bɛ̀ dɔ́ kɛ́ n kuɔmu.
\q1 N Yiɛ̀ nKuyie m mɛ nyí cɑ̀ɑ̀rɛ̀,
\q1 n yí dɔ̀ɔ̀ mɛyɛi mmɑmɛ̀.
\q1
\v 4 N yí cɑ̀ɑ̀rɛ̀ mùmɑmù kɛ̀ bɛ̀ cokùní kɛ bɑɑtiní kɛ bo n kuɔ.
\b
\q1 Ítɛ́ kɛ́ n teennɛ̀,
\q1 wéntɛ́ kɛ́yɑ̀.
\q1
\v 5 Ti Yiɛ̀ nKuyie Mpɑkɛdɑɑ Isidɑyɛɛribɛ tũ nkù,
\q1 cómmú kɛ́kpɑnnɛ̀ yɛbotɛ̀,
\q1 ɑ bɑ́ɑ́ cĩ́ɛ̃́ ndɛ kó bɛnitiyonkubɛ bɛ̀ɛ̀ í dɔɔri bɛ̀ nɑ̀ɑ́ ntì.
\b
\q1
\v 6 Bɛ̀ ɔ̃ɔ̃ wɛ̃tɛní kuyuoku nku,
\q1 kɛ́nhóú simɔɔ́ kɔ̃mɛ kɛ firì dihɛì.
\q1
\v 7 Tinɑ́ɑnyɛiti tiì pìɛ́kɛ́ bɛ nɔ̀ miɛkɛ,
\q1 kɛ̀ bɛ nɔ́ndiɛ́ ndò mmɛsekontibii,
\q1 bɛ yɛ̀mmɛ̀ dò nhòmɔù í yóó keèmu bɛ̀ nɑ̀ɑ́ ntì.
\b
\q1
\v 8 Fɔ̃́ n Yiɛ̀ nKuyie nkɑ̀ɑ nɛ́ bɛ̀ dɑú,
\q1 ɑ dɑúmu yɛbotɛ̀ yɛmɔu.
\q1
\v 9 M búɔ́ fɔ̃́ nwe, fɔ̃́ nwèè n kɑ̃nkɛ́,
\q1 fɔ̃́ nKuyie nfɔ̃́ɔ̃̀ tu n wɛ̃rímú.
\q1
\v 10 Fɔ̃́ nKuyie n tũ nkù ɑ sɑ̀mu kɛ̀ fɔ̃́ɔ̃̀ yó n niitɛ́,
\q1 fɔ̃́ɔ̃̀ yó nte kɛ̀ n nɑ n dootitɔbɛ̀.
\b
\q1
\v 11 Bɑ́ɑ́ kuɔ yɛbotɛ̀ mɛcɑ̃ɑ̃,
\q1 bɛnìtìbɛ̀ yɑ̀ɑ̀ bo yɛ̃̀ nhɑ nɑmɛ̀,
\q1 nɛ̀ ɑ kó muwɛ̃rímú duɔ́ nkɛ̀ bɛ̀ ncooti kɛ doti.
\q1 Kuyie nfɔ̃́ɔ̃̀ tu ti kó kudɔpìkù
\q1
\v 12 Bɛ̀ ɔ̃ɔ̃ bɛ́i nkɛ dɑ́ yetɛ́nɛ̀mu,
\q1 bɛ pɔ̀ɔ bɛ̀ tùɔ̀ti,
\q1 bɛ̀ buɔ̀ nkusĩ̀nkù nku kɛ soú.
\q1
\v 13 Kuɔ bɛ nɛ̀ kɛmiɛkɛ,
\q1 kuɔ bɛ kɛ̀ bɛ̀ tɛ̃́nkɛ bɑ́ mbo,
\q1 dɔɔ̀ kɛ̀ bɛnìtìbɛ̀ɛ bɑntɛ́ fɔ̃́ nKuyie nfɔ̃́ɔ̃̀ bɑkɛ́mɛ̀ Sɑkɔbu yɑɑ̀bí,
\q1 kɛ bɑkɛ́ kutenkù kumɔu.
\b
\q1
\v 14 Bɛ̀ ɔ̃ɔ̃ wɛ̃tɛní kuyuoku nku,
\q1 kɛ́nhóú simɔɔ́ kɔ̃mɛ kɛ firì dihɛì.
\q1
\v 15 Kɛ firì kɛ wɑnti bɛ̀ bo di mù,
\q1 kɛ̀ bɛ̀ di kɛ ɑutɛ́ bɛ̀ nkpɑ.
\b
\q1
\v 16 Mí m bo ndiè nkɛ dɑ sɑ̃ntí ɑ kpeńnìmɛ̀,
\q1 kɛ́mpĩɛ̃kù ɑ sɑ̀ɑ̀ ndikṹnweńnì,
\q1 Fɔ̃́ɔ̃̀ tu n kó tɛcɛ̃kpetɛ̀
\q1 nh ɔ̃ɔ̃ sɔri fɔ̃́ɔ̃̀ borɛ̀ mɛyɛǹcɑɑ̀rìmɛ̀ yiè.
\b
\q1
\v 17 Fɔ̃́ɔ̃̀ n kɑ̃nkɛ́,
\q1 m bo ndiè nkɛ dɛ́úkùnko ɑ yètìrì,
\q1 fɔ̃́ɔ̃̀ tu n wɛ̃rímú fɔ̃́ nKuyie nkùù n dɔ̀ɔ̀ri mɛsɑ̀ɑ̀.
\c 60
\s1 Bɛ̀ nɑmɛ̀ Kuyie nkɔbɛ kɛ̀ bɛ̀ kù yu
\r (Dinɑ́ɑǹkéè 7-14 dɛ kó tinɑ́ɑǹtì bomu 108:14)
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ itié nkɔfɛ nɛ̀ kukùtìdùkù, kɛ denniní ò do kpɑ̀nnɛ̀mɛ̀ Sidii ɛì kɔbɛ Mɛsopotɑmii ɛì kɔbɛ nɛ̀ Sobɑɑ ɛì kɔbɛ. Kɛ̀ bɛ̀ nkũntiní kɛ̀ Soɑbuu kpɑnnɛ̀ Edomiibɛ kubiriku bɛ̀ tu kù mukɔ́kúɔ́ nkó kubiriku, kɛ́nɑ bɛnìtìbɛ̀ tɛkɔupípíítɛ̀ nɛ̀ sikɔupísìdɛ́ (12000).
\b
\q1
\v 1 Kuyie nhɑ ti bɔntóomu kɛ pɔ̀ntɛ ti ɑ̃ɑ̃pɔ̀ntĩ̀nnì.
\q1 Bɑ́ nɛ̀ ɑ miɛkɛ mɛ nyɛ̀nnímɛ̀ wɛ̃tɛ kɛ ti cónnɛ́ ti fɔ̃̀tìrì.
\q1
\v 2 Fɔ̃́ɔ̃̀ sɑ̃̀ntɛ̀ kɛtenkɛ̀ kɛ̀ kɛ̀ pɑ̀ɑ́,
\q1 wɛ̃tɛ kɛ́mɑ́ú ndɛ kó iyiɛ,
\q1 kɛ̀ sɑ̃̀ntimu.
\q1
\v 3 Fɔ̃́ɔ̃̀ duɔ́ nkɑ̀ɑ nìtìbɛ̀ yɑ̀ mɛhɑ́ɑ́rìmɛ̀ diɛmɛ̀,
\q1 fɔ̃́ɔ̃̀ ti nìi mmɛnɑɑ̀ mmɛ̀ɛ̀ firì kɛyììkɛ̀.
\q1
\v 4 Fɔ̃́ɔ̃̀ duɔ́ nhɑ sɑ̀ɑ̀bɛ̀ mɛcɑnnimɛ̀ kɛ̀ bɛ̀ yentɛ́nɛ̀ bɛ̀ɛ̀ tɑ̃ũ ipie.
\q1
\v 5 Kɛ̀ dɛ̀ bo yie nkɑ̀ɑ dɛɛtɛ́ tínti ɑ dɔ́ bɛ̀,
\q1 yɑ̀ɑ ti dɛɛtɛ́ nɛ̀ ɑ wɛ̃rímú cɔutɛ́ ti bɑ́ɑmmu.
\b
\q1
\v 6 Kuyie mbɛ́immu ku cɛ̃sɑ̀ɑ̀tɛ̀ miɛkɛ kɛ tú
\q1 kuù yóó bɛ̀ nɑ!
\q1 Kɛ totí Sisɛmmu ɛì,
\q1 kɛ́berí Sukɔti biriku.
\q1
\v 7 Kuù te Kɑdɑɑdi nɛ̀ Mɑnɑnsee bɛ kó itempɛ̃,
\q1 kɛ̀ Efɑdɑimmu kɔku tú ku pìì,
\q1 kɛ̀ Sudɑɑ kɔku tú ku kpɑ̀ɑ̀tìpɑ̀ɑ̀ti.
\q1
\v 8 Mɔɑbu tú tɛnɑɑtɛ ntɛ kù wuɔ̀nɛ̀ tɛ̀,
\q1 kɛ̀ kù bɔmmù ku nɛùkù Edɔmmu kɛ bo bɛnkɛ kù ò temɛ̀,
\q1 Fidisitɛ̃ɛ̃bɛ yɛ̀mmɛ̀ dò mbɛ̀ bo kù nɑmɑɑ̀?
\b
\q1
\v 9 We nyó n kɔtɛnɛ̀ dihɛikperì?
\q1 We mbo n kɔtɛnɛ̀ Edɔmmu?
\q1
\v 10 Kɛ̀ dɛ̀ í tú fɔ̃́ nKuyie nkùù ti dootóo,
\q1 fɔ̃́ nwèè tɛ̃́nkɛ do í niɛ̀nɛ̀ ti kó yɛhɑ̃ɑ̃pɔ̀ntĩ̀rɛ̀ mudoò.
\q1
\v 11 Kɔtɛní kɛ ti teennɛ̀ ti dootitɔbɛ̀,
\q1 onìtì kó mɛteèmmɛ̀ í tú dɛ̀mɑrɛ̀.
\q1
\v 12 Kuyie nkuù yó nte kɛ̀ ti pĩ́ mmutɔ̃ndiɛmù,
\q1 kuù yó nte kɛ̀ ti nɑ ti dootitɔbɛ̀ kɛ́ mbɛ̀ cùùtì.
\c 61
\s1 Dɑfiti dɔ́mɛ̀ Kuyie nni nhò kɑ̃nkɛ́
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ biennɛ̀ tibómbonti iwɛ̃ĩ kpɛti.
\b
\q1
\v 1 Kuyie nkéntɛ́ n dɑbònnì,
\q1 keè m bɑ́ɑmmìi.
\q1
\v 2 M bo kutemmɑ̀nku nku,
\q1 kɛ̀ n yɛ̀mmɛ̀ cɑ̀ɑ̀rɛ̀ kɛ̀ n dɑ kuɔ̀nnɛ̀,
\q1 n dee kupèrìkù n yĩɛ̃kɛ kù.
\b
\q1
\v 3 Fɔ̃́ɔ̃̀ tu n kó disɔ̀rì,
\q1 didènnì kperì ti dootitɔbɛ̀ í yóó nintɛ dì.
\q1
\v 4 N dɔ́ kɛ́mbo ɑ cĩ́ɛ̃̀tɛ̀ miɛkɛ nkɛ,
\q1 kɛ́nsɔri ɑ fìɛ̀ti miɛkɛ sɑ̃́ɑ̃̀.
\b
\q1
\v 5 Kuyie nfɔ̃́ɔ̃̀ kèè n dɑ nɑ́ɑ́ ntì,
\q1 kɛ duɔ́ nhɑ kɔbɛ bɛ̀ɛ̀ dɑ dé bɛ kó kɛtenkɛ̀ sɑ̀ɑ̀kɛ̀.
\q1
\v 6 Yíɛ́ okpɑ̀ɑ̀tì mufòmmu,
\q1 kòò nfòù yɛbie nyɛbie.
\q1
\v 7 Kòò ndɑ tɑunnɛ̀, ɑ́ nhò bonɛ̀ kòo mbɑkɛ́ sɑ̃́ɑ̃̀,
\q1 kɑ̀ɑ sɑ̀ɑ̀ nnɛ̀ timɔ́mmɔnti nhò bɑ̀ɑ.
\b
\q1
\v 8 M bo ndiè nkɛ dɛ́úkùnko ɑ yètìrì sɑ̃́ɑ̃̀,
\q1 bɑ́ dìì yiè kɛ́ndɔɔri n yɛ̃ n yóó dɑ dɔɔ̀ tì.
\c 62
\s1 Kuyie mborɛ̀ n dɛ mmɔkɛ diwɛ̀ì
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ Yedutunni dìè nfɛ̀.
\b
\q1
\v 1 Kuyie mborɛ̀ mɑ́ɑ̀ ndi m mɔkɛmɛ̀ diwɛ̀ì,
\q1 kuù n dɛɛrí.
\q1
\v 2 Kuù tu dipèrì dìì n kɑ̃nkɛ́,
\q1 tɛcɛ̃kpetɛ̀ tɛ̀ɛ̀ n dɛɛrí,
\q1 kɛ̀ kù m bonɛ̀ m bɑ́ɑ́ cĩtɛ.
\b
\q1
\v 3 Ɔ̃mmɔ̀nnì ndi di yóó yóumɛ̀ di bo ntíkúmɛ̀,
\q1 di bo domɛ̀ onìtì kóò pɔ̀ntɛ kumɑrí kùù ku ku kɔ̃mɛ?
\q1 Kóò yèètɛ kuduotí kùù bíi nku kɔ̃mɛ?
\q1
\v 4 Di mɛ̀nkɛ dɑkiimu kɛ bo bɔ nhokpɑ̀ɑ̀tì,
\q1 kɛ nɔnnɛ̀ siyɑ́ɑ̀bìsí,
\q1 kɛ ɔ̃ nsɑ̃ntínɛ̀ di nɔ̀ di yɛ̀mmɛ̀ miɛkɛ kɛ nɛ́ buɔ̀ nkusĩ̀nkù.
\q1
\v 5 Kuyie mborɛ̀ mɑ́ɑ̀ ndi n yóó nɑ kɛ́pɛ́tɛ́mɛ̀ diwɛ̀ì,
\q1 kɛ yɛ̃́ n ku mbúɔ́mɛ̀.
\q1
\v 6 Kuù tu dipèrì dìì n kɑ̃nkɛ́,
\q1 tɛcɛ̃kpetɛ̀ tɛ̀ɛ̀ n dɛɛrí,
\q1 kɛ̀ n kù bonɛ̀ m bɑ́ cĩtɛ.
\q1
\v 7 Kuyie nkuù n dɛɛrí,
\q1 kuù tu n kó disɑ̃nni,
\q1 kuù tu dipèrì dìì n kɑ̃nkɛ́,
\q1 kuù tu n sɔ̀rì.
\q1
\v 8 Díndi Isidɑyɛɛribɛ mbúɔ́nɛ̀ ku sɑ̃́ɑ̃̀,
\q1 kɛ kù nɑ̀ɑ́ ndi yɛ̀mmɛ̀ kpɛti,
\q1 kuù tu ti kó disɔ̀rì.
\b
\q1
\v 9 Onìtì dò nkuyɑɑkù nku,
\q1 bɛnìtìbɛ̀ mɛ̀nkɛ tú siyɑ́ɑ̀bìsí yɛmbɛ̀ mbɛ,
\q1 kɑ̀ɑ bɛ̀ wɛ̃nnɛ́ kɛ́cɔ̃nnɛ́ cìdóò bɛ̀ bo nyɑu kɛ pɛ̃ɛ̃tɛ́ muyɑɑ́.
\q1
\v 10 Di bɑ́ ndɔ́ kɛ́nyo mbɛtɔbɛ̀ nɛ̀ muwɛ̃rímú,
\q1 bɑ́ ndɔ́nɛ̀ mufèè kpɛrɛ,
\q1 kɑ̀ɑ kpɑ̀tì dɛ̀úkú ɑ bɑ́ɑ́ tì duɔ́ nhɑ yɛ̀mmɛ̀.
\b
\q1
\v 11 Dɛ̀ í tú kucɛ mɛ̀mɑ́ɑ̀ ndi Kuyie mbɛ́immɛ̀.
\q1 N kèèmu kù tumɛ̀ kuù te muwɛ̃rímú.
\q1
\v 12 N Yiɛ̀ nKuyie nhɑ sɑ̀mu,
\q1 kɛ yɛ̃́ fɔ̃́ɔ̃̀ yietìmɛ̀ bɑ́ wè o tɔ̃mmú mɑnnɛ̀ tìì yeti.
\c 63
\s1 Kuyie m bo ndɑ dɔ́mɛ̀ pɛ̃ɛ̃tɛ́mu mufòmmu
\d Dɑfiti yɛ̀nfɛ̀ ò dèntɛ̀ fɛ̀ o cooti dìì mɔ̀nnì kɛ bo Sudɑɑ kpɑ́ɑ̀ miɛkɛ.
\b
\q1
\v 1 Kuyie, nfɔ̃́ɔ̃̀ tu Kuyie n dɑ wɑɑ̀mmu,
\q1 n dɑ yɑ́ɑ́mmu kɛ dò ntɛdɔntɛ̀ tɛ̀ɛ̀ kpeí tɛ̀ ɔ̃ ndɔ́mɛ̀ mɛniɛ.
\q1
\v 2 N dɔ́ kɛ́ ndɑ wúómmu ɑ cĩ́ɛ̃̀tɛ̀ miɛkɛ,
\q1 kɛ́yɑ̀ ɑ wɛ̃rímú nɛ̀ ɑ dɛumɛ̀.
\q1
\v 3 A n dɔ́mɛ̀ pɛ̃ɛ̃tɛ́mu m bo n fòùmɛ̀,
\q1 n yó ndɑ sɑ̃ntímu sɑ̃́ɑ̃̀.
\q1
\v 4 N yó ndɑ sɑ̃ntímu n fòmmu mumɔu miɛkɛ,
\q1 kɛ dɑ bɑ́ɑ́ nkɛ yu ɑ yètìrì.
\q1
\v 5 Fɔ̃́ɔ̃̀ te kɛ̀ n sɑ̀nnɛ̀ kɛ dò n di mɛkùɔ̀ nkpɛrɛ,
\q1 kɛ̀ dɛ̀ n nɑɑti kɛ̀ n dìè nkɛ dɑ sɑ̃ntí.
\b
\q1
\v 6 Kɛ̀ n duɔ́ nh ɔ̃ nyɛ̃́ fɔ̃́ɔ̃̀ kpɛ́í,
\q1 kɛ totí n yɛ̀mmɛ̀ ɑ bíɛ́kɛ̀ kɛyènkɛ̀ kɛmɔu.
\q1
\v 7 Fɔ̃́ɔ̃̀ n teénnɛ̀,
\q1 kɛ n kɑ̃nkɛ́ ɑ fìɛ̀ti,
\q1 kɛ̀ dɛ̀ n nɑɑti kɛ̀ n dìè nkɛ dɑ sɑ̃ntí.
\q1
\v 8 N dɑ pĩ́ n nɔu sidɛ́ ndi,
\q1 kɑ̀ɑ nɔ̀ùtɛ̀ youtɛ n cúɔ́.
\b
\q1
\v 9 Bɛ̀ɛ̀ dɔ́ kɛ́ n kuɔ,
\q1 bɛ̀ɛ tɑɑ́ kudɔnkù.
\q1
\v 10 Duɔ́ nkɛ̀ mudoò bɛ̀ kùɔ,
\q1 kɛ̀ sikpɑmɔɔ́ bɛ̀ cɑ̀ɑ́kɛ́.
\b
\q1
\v 11 Kɛ̀ Kuyie nnɑ́rìkùnnɛ okpɑ̀ɑ̀tì yɛ̀mmɛ̀.
\q1 Bɛ̀ɛ̀ cɑ̀nnɛnɛ̀ bɛtɔbɛ̀ yɛnɔ̀ nɛ̀ Kuyie nkó diyètìrì,
\q1 bɛ̀ yó nsɑ̃ntímu bɛmɑ́ɑ̀.
\q1 Siyɑ́ɑ̀bìsí yɛmbɛ̀ biɛ kó yɛnɔ̀ mɛ mbɑ́ɑ́ tɑ́útɛ́.
\c 64
\s1 Dɑfiti bɑ̀ɑ́mmɛ̀ Kuyie nkɛ tú kùu ò dɛɛtɛ́nɛ̀ bɛyɛibɛ
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Áú Kuyie! N kuɔ̀nnɛ̀ fɔ̃́ nwe,
\q1 kéntɛ́ n dɑbònnì,
\q1 ɑ nni nkɑ̃nkɛ́ n dootitɔbɛ̀,
\q1 n kɔ̃m̀bùɔ̀tì duò bɛ̀.
\q1
\v 2 N dɛɛtɛ́ nɛ̀ bɛnitiyɛibɛ dɑkii kɛ bo n dɔɔ̀ tì,
\q1 ɑ n dɛ́tinnɛ yɛdɔnnɛtĩ̀rɛ̀ yɛ̀ɛ̀ dɑ̀kii n kpɛ́í.
\b
\q1
\v 3 Bɛ nɔ́ndiɛ́ nyiì dò nyɛsekontɛ bɛ̀ sũ̀ɔ̃́tɛ́ yɛ̀,
\q1 kɛ̀ bɛ nɑ́ɑǹtì kɔ̀ùrì ipendɔ̀nni kɔ̃mɛ.
\q1
\v 4 Bɛɛ̀ ɔ̃ɔ̃ dɛ́kɛ́ bɛnitisɑ̀ɑ̀bɛ̀ kɛ́ mbɛ̀ tɑ̃ũ,
\q1 bɛ̀ ɔ̃ mbɛ̀ tɑ̃ũ disɔ̀rì ndi kɛ í yĩɛ̃̀kù.
\q1
\v 5 Bɛ̀ yɑ̀úkùnko bɛtɔbɛ̀ kɔ̃̀ntì nti kɛ bo ndɔɔri mɛyɛi,
\q1 kɛ dɑkii kɛ bo sɔri kɛ díí ntimɑ́tì,
\q1 kɛ nɑ́ɑ́ nkɛ tú: Òmɔù í yóó ti yɑ̀.
\q1
\v 6 Bɛ̀ dɑ̀kii kɛ dɔ́ mɛyɛi mmɑ́ɑ̀ ndi,
\q1 kɛ nɑ́ɑ́ nkɛ tú bɛ̀ bɑ̀ɑ́tí kɛ̀ dɛ̀ wennimu.
\q1 Onìtì yɛ̀mmɛ̀ cũmpúrìmu,
\q1 ɑ bɑ́ɑ́ nɑ kɛ́nyɛ̃́ dɛ̀ɛ̀ bo o miɛkɛ.
\b
\q1
\v 7 Kuyie mmɛ mbɛ̀ tɑ̃ũ ku pie nyi dɛndɛ bɑ̀mbɑ̀,
\q1 kɛ̀ ì bɛ̀ tùɔ̀tì kɛ̀ bɛ̀ duò.
\q1
\v 8 Bɛ nɔ̀ yɛɛ̀ bɛ̀ tùɔ̀tì,
\q1 bɛ̀ɛ̀ bɛ̀ yɑ̀u bɛ̀ bo ndɑú kɛ́héùròo.
\q1
\v 9 Kɛ̀ kufɔ̃wɑɑ́ mpĩ́ mbɛnìtìbɛ̀,
\q1 kɛ̀ bɛ̀ nnɑ́ɑ́ nKuyie ndɔɔ̀ dɛ̀,
\q1 kɛ́bɑntɛ́ kù pĩ mmɛ̀ɛ̀ botí mutɔ̃mmú.
\q1
\v 10 Wèè wetí we nyɑ̃nku o Yiɛ̀ nKuyie nkpɛ́í,
\q1 kɛ́nsɔ̀rì ku borɛ̀.
\q1 Bɛ̀ɛ̀ yɛ̀mmɛ̀ wenni kɛ̀ bɛ̀ nyɑ̃nku ku kpɛ́í.
\c 65
\s1 Kuyie nkuù mɑ̀nnɛ̀ ti nkù sɑ̃ntí
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Kuyie nhɑ ɛì Siyɔ̃ɔ̃ miɛkɛ fɔ̃́ɔ̃̀ dò mbɛnìtìbɛ̀ bɛmɔu ndɑ sɑ̃ntí,
\q1 bɑ́ wè kòo ndɔɔri ò dɑ dɔúnnɛ̀ dìì nùù.
\q1
\v 2 Fɔ̃́ nwèè yo bɛnìtìbɛ̀ bɑ́ɑmmìi,
\q1 bɛnìtìbɛ̀ bɛmɔu kɔ̀rìní ɑ borɛ̀ ndɛ.
\q1
\v 3 Ti yɛi mmɛɛ̀ ti dɛutɛ́,
\q1 fɔ̃́ɔ̃̀ ti cĩ́ɛ̃nko ti cɑɑ̀rìmɛ̀.
\q1
\v 4 Dɛ̀ nnɑɑti ɑ tɑ̃ɑ̃tɛ́ bɛ̀ kɛ̀ bɛ̀ bo mbo ɑ cĩ́ɛ̃̀tɛ̀,
\q1 tíì yó nte dɛsɑ̀ɑ̀rɛ̀ dɛ̀ɛ̀ bo ɑ cɛ̃sɑ̀ɑ̀tɛ̀ miɛkɛ,
\q1 kɛ̀ dɛ̀ nti sɑ̀nnɛ̀.
\q1
\v 5 Fɔ̃́ nKuyie nti dɛɛtíwè,
\q1 fɔ̃́ ntimɔ́mmɔnti yiɛ̀,
\q1 fɔ̃́ɔ̃̀ cɔú ti bɑ́ɑmmu kɛ dɔɔri tidiɛtì kɛ̀ titentì timɔu kɔbɛ dɑ búɔ́
\q1 nɛ̀ kɛtenkɛ̀ kɛ̀ɛ̀ sokɛ́ dɑ̀mɛ́ɛ̀rì cuokòo.
\b
\q1
\v 6 Fɔ̃́ɔ̃̀ kó muwɛ̃rímú te kɛ̀ yɛtɑ̃rɛ̀ fìíkú.
\q1 A wɛ̃rímú muù tu ɑ kpɑ̀rìnɛnkù.
\q1
\v 7 Fɔ̃́ɔ̃̀ commu dɑ̀mɛ́ɛ̀rì nɛ̀ o nɛ́fĩ̀nfĩ̀rɛ̀,
\q1 kɛ commu kutenkù kó kunɑmpoo.
\q1
\v 8 Kutenkù kumɔu yɑ̀ ɑ dɔɔri tìì diɛtì nti kɛ dɑ yɔ̀tɛ,
\q1 kɛ̀ diyiè yìɛ̀ kɛ̀ɛ̀ bíɛ́kɛ̀ nɛ̀ dì tɑɑ̀ kɛ̀ɛ̀ bíɛ́kɛ̀ kɔbɛ íú mɛdiɛ̀.
\b
\q1
\v 9 Fɔ̃́ɔ̃̀ dɔ̀ɔ̀ri kɛtenkɛ̀ mɛsɑ̀ɑ̀ kɛ kɛ̀ duɔ̀ nfɛtɑɑfɛ̀,
\q1 kɛ̀ dɛ̀ boo kɛ̀ tidiitì pɛí,
\q1 Kuyie nhɑ bintɛ í kũũ,
\q1 fɔ̃́ɔ̃̀ duɔ̀ mbɛnìtìbɛ̀ tidiitì,
\q1 kɛ tũnni kɛtenkɛ̀.
\q1
\v 10 Kɛ yɔ́ɔ̀rì ipɛ̃,
\q1 kɛ puɔ̀ nyɛdombiɛ,
\q1 kɛ duɔ̀ nkɛ̀ fɛtɑɑfɛ̀ nìù,
\q1 kɛ duɔ̀ nkɛ̀ tidiitì yìɛ̀.
\q1
\v 11 Kɛ dɔ̀ɔ̀ mɛsɑ̀ɑ̀ ndibenni dimɔu,
\q1 kɑ̀ɑ pɛ̃ɛ̃tɛ́ kɛ̀ɛ̀ bíɛ́kɛ̀ tidiitì mpíɛ́kɛ́.
\q1
\v 12 Kɛ̀ timútì yɛ̀ tɛdɔntɛ̀,
\q1 nɛ̀ yɛtɑ̃rɛ̀ ĩ́nkòo kɛ̀ dɛ̀ yɛ̀ nɑɑti.
\q1
\v 13 Kɛ̀ iwũɔ̃ pìɛ́kɛ́ dinɑɑcɛ̃nhòò,
\q1 kɛ̀ tidiitì dɑ̀ɑ́tí kubiriku,
\q1 dɛmɔu kɛ̀ dɛ̀ yɑ̃̀nku kɛ íú.
\c 66
\s1 Kuyie nkùù dɛɛrí ku yètìrì ndɛu
\pi1
\v 1 Bɛdèmbɛ̀ kóo kótì dìè nfɛ̀ɛ̀ yɛ̀nfɛ̀.
\b
\q1 Kutenkù kumɔu kɔbɛ nsɑ̃ntínɛ̀ Kuyie nkɛ pĩɛ̃kù.
\q1
\v 2 Ndiènnɛ̀ diwɛ̀ì kɛ dɛ́úkùnko ku yètìrì,
\q1 Nsɑ̃ntínɛ̀ ku iyiɛ mmiɛkɛ ku kpetì kpɛ́í.
\q1
\v 3 Nɑ́kɛ́nɛ̀ Kuyie nkɛ dɔ̀:
\q1 A tɔ̃mmú dɛumu kɛ mɛ̀nkɛ dɛu,
\q1 nɛ̀ ɑ wɛ̃rímú diɛmù kpɛ́í nkɛ
\q1 ɑ dootitɔbɛ̀ kɛ̃́kùnkoomɛ̀ bɛmɑ́ɑ̀.
\q1
\v 4 Kutenkù kumɔu kɔbɛɛ nínkú ɑ ììkɛ̀,
\q1 kɛ́ndiè nkɛ dɛ́úkùnko ɑ yètìrì.
\b
\q1
\v 5 Kɔtɛnɛ̀ní kɛ́yɑ̀ Kuyie mpĩ mmùù tɔ̃ndiɛmù,
\q1 kù kpeńnìmu kù pĩ mmùù tɔ̃mmú bɛnìtìbɛ̀ cuokɛ̀.
\b
\q1
\v 6 Kuù do kèétɛ́ dɑ̀mɛ́ɛ̀rì kó mɛniɛ,
\q1 kɛ̀ ti yɛmbɛ̀ɛ nɑ dɛkperɛ̀ kɛ́séntɛ́
\q1 kuù duɔ́ nkɛ̀ mɛniɛ nkũ̀ṹ kukó nkɛ̀ ti sèńtɛ́,
\q1 kɛ̀ dɛ̀ ti nɑɑti ku kpɛ́í.
\q1
\v 7 Kuù bɑkɛ́ nɛ̀ muwɛ̃rímú kutenkù kumɔu sɑ̃́ɑ̃̀,
\q1 kɛ pɑkɛ́ ibotí imɔu,
\q1 kù í yóó yóu bɛ̀ɛ̀ yetɛ ku kpɛti kɛ̀ bɛ̀ nkérí kɛ yíéo.
\b
\q1
\v 8 Ibotí, dɔunɛ̀ Kuyie mmutɔ̃mmú,
\q1 mpĩɛ̃kùnɛ̀ kɛ kù sɑ̃ntí.
\q1
\v 9 Kuù ti duɔ̀ mmufòmmu,
\q1 kɛ í yóu kɛ̀ ti duò.
\b
\q1
\v 10 Kuyie nhɑ ti wèńtɛ́mu kɛ ti yɑ̀ɑ́kɛ́,
\q1 bɛ̀ ɔ̃ɔ̃ pṹnnɛ́ mɛ̀ɛ̀ botí timɑ́tì pɛ́ítì,
\q1
\v 11 kɛ́ tì tɑnnɛ́ ticùɔ̀tì miɛkɛ,
\q1 kɛ́ tì toú nyɛtuɔ cɛ̃́ɛ̃́yɛ̀,
\q1
\v 12 kɛ duɔ́ nkɛ̀ bɛnìtìbɛ̀ nnɑ̀ù ti ĩ́nkɛ̀ nɛ̀ sisɛ̃ĩ́,
\q1 kɛ̀ ti tɑ muhɑ̃ɑ̃́ nkɛ tɑ mɛniɛ,
\q1 kɑ̀ɑ mɛ nti dènnɛní kɛ̀ ti di diwɛ̀ì.
\b
\q1
\v 13 N tɑti ɑ cĩ́ɛ̃̀tɛ̀ miɛkɛ nkɛ kɛ bo dɑ fíé iwũɔ̃,
\q1 kɛ dɑ́ dɔ̀ɔ̀ n yɛ̃ n yóó dɑ dɔɔ̀ tì,
\q1
\v 14 n do bɛ́i ntì n yɛǹcɑɑ̀rìmɛ̀ mɔ̀nnì.
\q1
\v 15 N yóó dɑ kuɔ iwũɔ̃ mɛkùɔ̀ nkpɛyi nyi,
\q1 yɛpedɑkɛ̀ nɛ̀ yɛnɑɑdɑkɛ̀ nɛ̀ yɛbɔdɑkɛ̀,
\q1 kɛ́cɔ́u nkɛ̀ kuyukúu dekoo ɑ bo kɛ̀.
\b
\q1
\v 16 Díndi bɛ̀ɛ̀ dé Kuyie kɔtɛnɛ̀ní dimɔu,
\q1 kɛ́kéntɛ́ kɛ̀ n di nɑ́kɛ́ kù n dɔ̀ɔ̀ dɛ̀.
\q1
\v 17 N ku kuɔ́nnɛ̀mu kɛ pɑ̃̀nkɛ ku sɑ̃ntɛ.
\q1
\v 18 Kɛ̀ n do nyɑ́ɑ́ mɛyɛi mmɑmɛ̀ n yɛ̀mmɛ̀ miɛkɛ,
\q1 n Yiɛ̀ nKuyie nnɑ bɑ́ nni nkèńtɛ́.
\q1
\v 19 Kù mɛ nni nkèńtɛ́mu
\q1 kù kèèmu m bɑ́ɑmmìi.
\q1
\v 20 Kuyie nnɛ̀ mutɔ̃mmú,
\q1 kù í yetɛ m bɑ́ɑmmu,
\q1 kù í m mɔ̀ntɛ ku kó mɛsɑ̀ɑ̀.
\c 67
\s1 Bɛnìtìbɛ̀ bɛmɔu dommɛ̀ kɛ́nsɑ̃ntí Kuyie
\d Bɛdèmbɛ̀ kóo kótì dìè nfɛ̀ɛ̀ yɛ̀nfɛ̀ kɛ bie ntibómbonti iwɛ̃ĩ kpɛti.
\b
\q1
\v 1 Kuyie ntí kuɔ́ mmɛsémmɛ̀,
\q1 ti dɔɔ̀ mɛsɑ̀ɑ̀,
\q1 ɑ ti wéntɛ́ fɛnɔnsɑ̀ɑ̀fɛ̀.
\q1
\v 2 Kɛ̀ dɛ̀ɛ yie nkɛ̀ kutenkù kumɔu kɔbɛɛ bɑntɛ́ ɑ cɛ,
\q1 kɛ̀ yɛbotɛ̀ɛ yĩ́ɛ̃́tɛ́ ɑ dɛɛrímɛ̀.
\q1
\v 3 Kɛ̀ bɛnìtìbɛ̀ bɛmɔu ndɑ sɑ̃ntí fɔ̃́ nKuyie,
\q1 kɛ̀ yɛbotɛ̀ yɛmɔu ndɛ́úkùnkoo ɑ yètìrì.
\q1
\v 4 Dɛ̀ nnɑɑti ibotí kɛ̀ ì dɑ sɑ̃ntí,
\q1 fɔ̃́ɔ̃̀ bekùnɛ̀ yɛbotɛ̀ kɛ̀ dɛ̀ sìɛ́,
\q1 kɛ ni ibotí kɛtenkɛ̀ ĩ́nkɛ̀.
\q1
\v 5 Bɛnìtìbɛ̀ bɛmɔu ndɑ sɑ̃ntí fɔ̃́ nKuyie,
\q1 kɛ̀ yɛbotɛ̀ yɛmɔu ndɛ́únkùnkoo ɑ yètìrì.
\b
\q1
\v 6 Ti Yiɛ̀ nKuyie nhɑ ti dɔ̀ɔ̀mu mɛsɑ̀ɑ̀,
\q1 kɛ̀ kɛtenkɛ̀ pɛí tidiitì.
\q1
\v 7 Kuyie nkuù ti dɔɔri mɛsɑ̀ɑ̀,
\q1 itemmɑ̀nkɛ imɔu kɔbɛ dí kù depɛ.
\c 68
\s1 Kuyie nnɑmɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 Kuyie nyìtɛ́ kɛ còḿmúmu,
\q1 kɛ̀ ku dootitɔbɛ̀ cìɛ́rì,
\q1 kɛ̀ ku sĩ̀mbɛ̀ cokù ku ììkɛ̀.
\q1
\v 2 Kuyukú yɛ̀nní mɛ̀ɛ̀ botí ɑ mɛ mbɛ̀ cíɛnko,
\q1 titɑnkṹǹtì yìɛ̀ri mɛ̀ɛ̀ botí muhɑ̃ɑ̃́ mmiɛkɛ,
\q1 bɛnitiyɛibɛ kpɛrɛ mɛ ndò nKuyie nyììkɛ̀.
\q1
\v 3 Bɛ̀ɛ̀ dɔ̀ɔ̀ri dɛ̀ɛ̀ sìɛ́, bɛmbɛ diwɛ̀ì diì bɛ̀ bo
\q1 kɛ̀ bɛ̀ yɑ̃̀nku Kuyie nyììkɛ̀!
\q1 Diwɛ̀ì diì bɛ̀ kɛ̀itɛ kɛ̀ bɛ̀ ti ientii.
\b
\q1
\v 4 Ndiènnɛ̀ kɛ dɛ́úkùnkoo Kuyie nyètìrì,
\q1 tũntɛnɛ̀ kucɛ wèè kèríní yɛwɛtɛ̀ miɛkɛ nɛ̀ o sɑ̃ntɛ̀ o kpɛ́í,
\q1 weè yètìrì tu: Ti Yiɛ̀.
\q1 Nyɑ̃nkunɛ̀ o ììkɛ̀.
\q1
\v 5 Weè tu isénnìmbí cicɛ,
\q1 weè kpɑ̀ mbɛkúpobɛ̀ kpɑ̀nnì,
\q1 weè tu Kuyie nkɛ bo o cɛ̃sɑ̀ɑ̀tɛ̀ miɛkɛ.
\q1
\v 6 Kuyie nkuù duɔ̀ nsicɛ̃́ĩ bɛ̀ɛ̀ kpɑ bɛ kɔbɛ,
\q1 kuù dènnìnko tikpetíntì kɛ ti duɔ̀ ndiwɛ̀ì,
\q1 bɛ̀ɛ̀ yetɛ Kuyie nkpɛti bɛɛ̀ mɑ́ɑ̀ ɔ̃ mbo tɛdɔnkpetɛ̀.
\b
\q1
\v 7 Kuyie nhɑ do ni dìì mɔ̀nnì ɑ kɔbɛ,
\q1 ɑ do kérí dìì mɔ̀nnì dikpɑ́ɑ̀ cuokɛ̀,
\q1
\v 8 kɛtenkɛ̀ do sɑ̃ntimu,
\q1 kɛ̀ mɛniɛ ncuutiní fɔ̃́ nKuyie nhɑ ììkɛ̀,
\q1 fɔ̃́ nKuyie nkùù do kɔ̀tɛní Sinɑii tɑ̃rì kɛ́bɛnkɛ ɑmɑ́ɑ̀ ɑ kɔbɛ,
\q1 Kuyie nyIsidɑyɛɛribɛ tũ nkù.
\q1
\v 9 Kuyie nfɔ̃́ɔ̃̀ cṹũnní fɛtɑsɑ̀ɑ̀fɛ̀,
\q1 fɔ̃́ɔ̃̀ bónkùnnɛ ɑ tenkɛ̀ kɛ̀ɛ̀ do cĩ̀tɛ.
\q1
\v 10 Dɛndɛ ɑ nìtìbɛ̀ bomɛ̀,
\q1 Ti Yiɛ̀ nKuyie nfɔ̃́ɔ̃̀ dɛ̀ mbɛ̀ kɑ̀nnɛ ɑ sɑ̀ɑ̀ nkpɛ́í,
\q1 fɔ̃́ɔ̃̀ tũ̀ntɛ dɛ kó dikɑ̀rì bɛsénnìbɛ̀ kpɛ́í.
\b
\q1
\v 11 Ti Yiɛ̀ nKuyie nkuù duɔ́ ndinùù ku nɑ́ɑǹtì kpɛ́í,
\q1 bɛ̀ɛ̀ tì pitírí kɛ̀ bɛ tĩ̀nnì sũ.
\q1
\v 12 Ti dootitɔbɛ̀ bɛkpɑ̀ɑ̀tìbɛ̀ nɛ̀ bɛ kó bɛhɑ̃ɑ̃pɔ̀mbɛ̀ bɛ̀ u yɛtɑ̀rɛ̀ nyɛ,
\q1 kɛ̀ bɛnitipòbɛ̀ ɛí dɛ̀ɛ̀ bo bɛ cɛ̃́ĩ kɛ totí.
\q1
\v 13 Di yó mbo di kɑrɛ̀ nyɛɑ̀?
\q1 Dikpɛtìnɔ́nkperi fìɛ̀ti dɑ̀ri mɛsɔɔ mpɛímɛ̀ mmɛ,
\q1 kɛ̀ di cìtì dɑ̀ri mɛsɔɔ nwũɔ̃mɛ̀.
\q1
\v 14 Ti Yiɛ̀ nKuyie Mpɑkɛdɑɑ yóó cíɛ ndìì mɔ̀nnì bɛkpɑ̀ɑ̀tìbɛ̀,
\q1 kɛ̀ mupɑ̃̀ɑ̃ mboomu muù dɑ̀ɑ́tí ditɑ̃rì Sɑdimɔɔ.
\b
\q1
\v 15 Fɔ̃́ nKuyie nkó ditɑ̃rì,
\q1 fɔ̃́ mBɑsɑ̃ɑ̃ tɑ̃rì,
\q1 fɔ̃́ nditɑ̃rì dìì yómmɛ̀ sũ,
\q1 fɔ̃́ mBɑsɑ̃ɑ̃ tɑ̃rì.
\q1
\v 16 Yɛtɑ̃rɛ̀ yɛ̀ɛ̀ yómmɛ̀ sũ,
\q1 bɑ nte kɛ̀ dɛ̀ di yóu Kuyie ntɑ̃ɑ̃tɛ́ dìì tɑ̃rì kpɛ́í,
\q1 kù bomu di ĩ́nkɛ̀ kɛ yó mbo sɑ̃́ɑ̃̀,
\q1 kù yó ndɛ̀ bomu sɑ̃́ɑ̃̀.
\b
\q1
\v 17 Kuyie nkpɑ̀rìsɛ̃ĩ́ bo sikɔupí sikɔupí nsi,
\q1 kù do si nkɔ̀tɛnɛ̀ní Sinɑii ditɑ̃sɑ̀ɑ̀rì.
\q1
\v 18 A dèkɛ kɛĩ́nkɛ̀ nkɛ,
\q1 kɛ nɛínɛ̀ní tidɑɑtì,
\q1 kɛ̀ bɛnìtìbɛ̀ dɑ pɑ̃mmú yɛpɑ̃rɛ̀,
\q1 bɑ́ bɛ̀ɛ̀ do yetírí ɑ kpɛti kɛ̀ bɛ̀ dɑ bɔ̀útɛ́,
\q1 kɛ dò nkɛ́ mbo ɑ borɛ̀ fɔ̃́ nti Yiɛ̀ nKuyie.
\b
\q1
\v 19 Ti nsɑ̃ntí Kuyie nyɛwe yɛmɔu,
\q1 kuù dɑ̀kɛ ti kpɛ́í,
\q1 kuù tu ti dɛɛtíwè.
\q1
\v 20 Kuyie nkuù tu ti dɛɛtíwè,
\q1 kuù yɛ̃́ kù bo yĩmɛ̀ kɛ́ tí dɛɛtɛ́nɛ̀ mukṹṹ.
\q1
\v 21 Kuyie mmɛ̀nkɛ yóó pɔntɛmu ku dootitɔbɛ̀ yɔ,
\q1 kɛ́pɔntɛ onitikɔ̀ùtì yuu nɛ̀ tiyùtì.
\b
\q1
\v 22 Kuyie mbɛ́immu kɛ tú kù bo cṹũnní ɑ dootitɔbɛ̀ bɛ̀ɛ̀ bo Bɑsɑ̃ɑ̃ tɑ̃rì,
\q1 kɛ́dennɛní bɛ̀ɛ̀ bo dɑ̀mɛ́ɛ̀rì fũ̀ɔ̃̀.
\q1
\v 23 Kɛ̀ dɛ̀ bo yie nkɑ̀ɑ nɑɑ̀cɛ̀i mbonti bɛ yĩ̀ĩ̀,
\q1 kɑ̀ɑ kó simɔɔ́ bɛ̀ pɛ̀tɛ́ kɛ́cɑ́ɑ́kɛ́.
\q1
\v 24 Kuyie nhɑ ɔ̃ɔ̃ kpɑ nkɛ́nɑ kɛ́nkũntiní,
\q1 kɛ̀ bɛnìtìbɛ̀ wùómmu ɑ kpɑ̀rìnɑfɛ ɑ cɛ̃sɑ̀ɑ̀tɛ̀ miɛkɛ,
\q1 fɔ̃́ nKuyie nkùù n te,
\q1 fɔ̃́ n kóo kpɑ̀ɑ̀tì.
\q1
\v 25 Kɛ̀ bɛdèmbɛ̀ ni dɛyììkɛ̀ kɛ̀ bɛsɑpɑ̀mbɛ̀ sokɛ́ dɛcuokɛ̀ kɛ bie nsibéí,
\q1 bɛ̀ɛ̀ bie ntikùtìdùùtì kɛ̀ bɛ̀ tũ.
\q1
\v 26 Nsɑ̃ntínɛ̀ Kuyie nditĩ̀nnì cuokɛ̀,
\q1 nsɑ̃ntínɛ̀ ti Yiɛ̀ nKuyie ndíndi Isidɑyɛɛri yɑɑ̀bí.
\q1
\v 27 Bɛnsɑmɛɛ tɛbíyɑ̃ɑ̃tɛ̀ tɛɛ̀ di ni,
\q1 kɛ̀ Sudɑɑ kó bɛkpɑ̀ɑ̀tìbɛ̀ nɛ̀ bɛ kó yɛtĩ̀rɛ̀
\q1 nɛ̀ Sɑbunɔɔ kɔbɛ nɛ̀ Nɛfutɑdii kɔbɛ kɛ̀ bɛ̀ tũ̀nní.
\q1
\v 28 Kuyie nkùù di te díndi Isidɑyɛɛribɛ kuù yɛ̃ ndí nkpeńnì.
\q1 Kuyie ndɔɔ̀ kɛ́fíí nhɑ dɔ̀ɔ̀ dɛ̀ ti kpɛ́í.
\q1
\v 29 A bo ɑ cĩ́ɛ̃̀tɛ̀ ntɛ,
\q1 kɛ bɑkɛ́ Sedisɑdɛmmu,
\q1 kɛ̀ bɛkpɑ̀ɑ̀tìbɛ̀ dɑ pɑ̃ɑ̃ nyɛpɑ̃rɛ̀.
\q1
\v 30 Kpɑnnɛ̀ musĩ̀mmù tipèntì kɔ̃mu,
\q1 kɛ́kpɑnnɛ̀ yɛbotɛ̀ yɛ̀ɛ̀ dònnɛ̀ yɛnɑɑdɑkɛ̀ nɛ̀ tinɑɑbiiti,
\q1 kɛ̀ dɛ̀ɛ nínkú ɑ ììkɛ̀ kɛ́ ndɑ pɑ̃ɑ̃ ntimɑ́tì pɛ́ítì.
\q1 Cíɛ nyɛbotɛ̀ yɛ̀ɛ̀ nɔnnɛ̀ yɛkpɑ̀rɛ̀.
\b
\q1
\v 31 Bɛnitidiɛbɛ̀ yìɛ̀ní Esibiti nwe,
\q1 kɛ̀ Etiopii kɔbɛ cokòo Kuyie mborɛ̀ kɛ yuo bɛ nɔu.
\q1
\v 32 Kɛtenkɛ̀ kó bɛkpɑ̀ɑ̀tìbɛ̀, ndiènnɛ̀ kɛ sɑ̃ntí Kuyie,
\q1 ndɛ́úkùnkonɛ̀ ti Yiɛ̀ nKuyie nyètìrì.
\q1
\v 33 Wèè cutiní kɛĩ́nkɛ̀ kɛ̀ɛ̀ bo nɛ̀ dimɔ̀nnì nɛ̀ o sɑ̃ntɛ̀,
\q1 weè pɛ́u mɛtɑnkperímɛ̀.
\q1
\v 34 Bɑntɛ́nɛ̀ Kuyie nkpeńnìmɛ̀,
\q1 kuù kpɑ̀ɑtirì Isidɑyɛɛribɛ,
\q1 ku wɛ̃rímú bo yɛwɛtɛ̀ miɛkɛ nkɛ.
\b
\q1
\v 35 Kuyie mbɛnkúmu kù kpeńnìmɛ̀ ku cɛ̃sɑ̀ɑ̀tɛ̀ miɛkɛ,
\q1 Kuyie nyIsidɑyɛɛribɛ tũ nkù kuù duɔ̀ nku kɔbɛ muwɛ̃rímú,
\q1 kuù te kɛ̀ bɛ̀ nɔ.
\q1 Ku yètìrì ndɛu.
\c 69
\s1 Dɑfiti yumɛ̀ Kuyie nkɛ̀ kù bo ò teennɛ̀
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ bie ntibómbonti.
\b
\q1
\v 1 Áú Kuyie n dɛɛtɛ́!
\q1 N tɑ mɛniɛ mmɛ kɛ tùɔ̀kɛ n fɔ̃̀níí.
\q1
\v 2 N fìíkú disɑ̃̀ũ̀ ndi,
\q1 n yí pɛ̀tɛ́ dɛkperɛ̀ kɛ nɑ,
\q1 n tɑ dɛcũmpurɛ ndɛ,
\q1 fɛnɛ́wuonfɛ fɛɛ̀ n tɔ.
\q1
\v 3 N kɔmmú kɛ ɔ̀umu kɛ̀ n níí kpeí,
\q1 m bɔ̀útɛ́ kɛ bɔ̀útɛ́ Kuyie nkùù n te kùnku kɛ̀ n nuɔ nyetɛ.
\q1
\v 4 Bɛ̀ɛ̀ n nìí nkɛ dɔ́ kɛ́ n kuɔ bɛ̀ sũmu kɛ pɛ̃ɛ̃tɛ́ n yùtì,
\q1 bɛ̀ n dɔ̀ɔ̀ bɛ dootitɔù nwe dɛtetìrɛ̀,
\q1 bɛ̀ kpeńnì kɛ m pɛ̃ɛ̃tɛ́mu kɛ yó n kuɔ,
\q1 kɛ duɔ́ nkɛ̀ n yietí n yí yùúkú dɛ̀.
\b
\q1
\v 5 Kuyie nhɑ yɛ̃́mu n yɛìntì,
\q1 n cɑɑ̀rìmɛ̀ í sɔri ɑ ììkɛ̀.
\b
\q1
\v 6 Kuyie Mpɑkɛdɑɑ, ɑ bɑ́ɑ́ yóu kɛ̀ míì nte,
\q1 kɛ̀ bɛ̀ɛ̀ dɑ búɔ́ kɛ̀ bɛ̀ɛ di ifɛi.
\q1 Fɔ̃́ nKuyie ntínti Isidɑyɛɛribɛ ti tũ nkù,
\q1 ɑ bɑ́ɑ́ yóu kɛ̀ míì nte kɛ̀ bɛ̀ɛ̀ dɑ wɑɑ̀ nkɛ̀ bɛ̀ɛ di ifɛi.
\q1
\v 7 Fɔ̃́ɔ̃̀ kpɛ́í nkɛ bɛ̀ n sɑ̃̀ɑ̃́mmɛ̀,
\q1 n yo nyifɛi fɔ̃́ɔ̃̀ kpɛ́í.
\q1
\v 8 N nɑɑ́ nhopɔ̀ɔ̀ nwe n kɔbɛ cuokɛ̀,
\q1 n yɔ̃ fũ̀ɔ̃̀ kɔbɛ tɛ̃́nkɛ í n yɛ̃́.
\q1
\v 9 Kɛ yɛ̃́ n dɔ́mɛ̀ ɑ cĩ́ɛ̃̀tɛ̀ mɛdiɛ̀ nkɛ̀ dɛ̀ n tùɔ̀,
\q1 bɛ̀ dɑ sɑ̃́ɑ̃́ nyɛ̀ɛ̀ sɑ̃́ɑ̃̀mbɛ̀ duò n yuu ĩ́nkɛ̀ nkɛ.
\q1
\v 10 M boú dinùù ndi kɛ kuɔ̀,
\q1 nɛ̀ dɛ kpɛ́í nkɛ̀ bɛ̀ n dɑú.
\q1
\v 11 N dɑ̀ɑ́tí kufɔ̀ɔ̀tɔ̃̀nkù nku,
\q1 kɛ̀ bɛ̀ nɑ́ɑntɛ n kpɛ́í kɛ n dɑú,
\q1
\v 12 Bɛ̀ kɑ̀tìnɛ̀ mí nwe yɛteyɔ,
\q1 míì nɑɑ́ nfɛnɑɑyɑ̃̀ɑ̃̀yɛ̀nfɛ̀.
\b
\q1
\v 13 Mí nyie n kuɔ̀nnɛ̀ fɔ̃́ nwe n Yiɛ̀ nKuyie,
\q1 dɛ̀ tùɔ̀kɛmu ɑ bo n tee ndɛ̀.
\q1 Áú Kuyie! A sɑ̀ɑ̀ ndɛumu, n kéntɛ́,
\q1 n yɛ̃́mu nweti weti kɛ dò nhɑ yó n dɛɛtɛ́.
\q1
\v 14 Nh uutɛ́ disɑ̃̀ũ̀, kɛ̀ n tɛ̃́nkɛ bɑ́ nfṹṹkú
\q1 n dennɛní dibinni,
\q1 n dɛɛtɛ́nɛ̀ bɛ̀ɛ̀ ǹ nìí.
\q1
\v 15 Bɑ́ɑ́ yóu kɛ̀ mɛniɛ nni mpɔ̃ntɛ́nɛ̀,
\q1 bɑ́ɑ́ yóu kɛ̀ n do kudúókù,
\q1 bɑ́ɑ́ yóu kɛ̀ tɛbintɛ n yɑ̃kɛ!
\q1
\v 16 Kuyie nhɑ n kéntɛ́ kɛ yɛ̃́ ɑ sɑ̀mɛ̀mu kɛ dɔɔri mɛsɑ̀ɑ̀,
\q1 wɛ̃ɛ̃tɛní m bíɛ́kɛ̀ ɑ sémmɛ̀ dɛu mɛ̀ɛ̀ kpɛ́í.
\q1
\v 17 Bɑ́ m bútínnɛ́ mí nhɑ kóo tɔ̃ntì,
\q1 nh ɑ́ɑ̀rìmu, cɑ̃rikɛní.
\q1
\v 18 Kɔtɛní kɛ́dontɛ́ nh ɔ̃nnì,
\q1 n dɛɛtɛ́nɛ̀ n dootitɔbɛ̀.
\b
\q1
\v 19 A wúómmu bɛ̀ n sɑ̃̀ɑ̃́mmɛ̀,
\q1 kɛ yɛ̃́ n yo nyìì fɛi kɛ kɛ̃kɛ,
\q1 n dootitɔbɛ̀ í dɑ sɔrìnɛ̀.
\q1
\v 20 Yɛsɑ̃́ɑ̃̀mbɛ̀ yɛɛ̀ kɔ̀ùrì n yɛ̀mmɛ̀ kɛ̀ m mɔ,
\q1 n wɑnti wèè bo n kuɔ́ nwè nwe mɛsémmɛ̀ bɑ́ sɑ́m̀pɔ́ kɛ mɔ̀ńtɛ́,
\q1 wèè bo m bɑ́ntɛ̀ ò í bo.
\q1
\v 21 Bɛ̀ ɑ̃ɑ̃̀ mutie mùù kɔ̀ù mùmmu n diì miɛkɛ,
\q1 kɛ̀ sinɛ́yɛ̃ĩ m pĩ́ nkɛ̀ bɛ̀ n duɔ́ mmɛnɛ́yɑ̃ɑ̃ mmɛ̀ɛ̀ kɔkɛ́nɛ̀ dɛtiirɛ.
\b
\q1
\v 22 Bɛ bɑndiitìi nɑɑ́ ntimɑ́tì kɛ́ bɛ̀ tùɔ̀ti,
\q1 kɛ̀ bɛ kpɑ̀tìi nɑɑ́ nkuyɑú.
\q1
\v 23 Bɛ nuɔ nhṹṹ nkɛ̀ bɛ̀ tɛ̃́nkɛ bɑ́ nwúó,
\q1 pṹtínnɛ́ bɛ sɑ̃́ɑ̃̀ kɛ̀ bɛ̀ɛ nɑɑ́ nsihùù yɛmbɛ̀.
\q1
\v 24 A miɛkɛɛ bɛ̀ pɛikɛ kɑ̀ɑ bɛ̀ potɛ́,
\q1 ɑ miɛkɛ diɛkɛ̀ɛ do bɛ ĩ́nkɛ̀ kɛ́ bɛ̀ cɔ̀útɛ́.
\q1
\v 25 Kɛ̀ bɛ cɛ̃kɑ̀rɛ̀ nɑɑ́ ntidobontì,
\q1 òmɔù bɑ́ nkpɑɑ́ bɛ cɛ̃́ĩ miɛkɛ.
\q1
\v 26 Bɛ̀ bɛ̀tì ɑ potɛ́ bɛ̀mbɛ,
\q1 kɛ nɑ́ɑntɛ ɑ kɔ̀utɛ bɛ̀ kó mɛfɛ̃́ṹtímɛ̀.
\q1
\v 27 Yietí bɛ bɛ yɛi mmɛmɔu,
\q1 bɑ́ bɛ̀ bɑ́ɑ́ yɑ̀ ɑ kó mɛsɑ̀ɑ̀ mbìtì.
\q1
\v 28 Ũtɛ́ bɛ yètɛ̀ mufòmmu pɑ́tíri miɛkɛ,
\q1 Bɑ́ mbɛ̀ wùónko kɛ dò mbɛ̀ í cɑ̀ɑ̀rɛ̀ mùmɑmù.
\b
\q1
\v 29 Áú Kuyie, n tú osénnìwè nwe kɛ fɛ̃́ũ̀rì,
\q1 n dɛɛtɛ́ kɛ́ nni nkɑ̃nkɛ́.
\q1
\v 30 M bo ndiè nkɛ sɑ̃ntí Kuyie,
\q1 m bo ndɛ́úkùnko ku yètìrì nɛ̀ yɛsɑ̃ɑ̃.
\q1
\v 31 Ti Yiɛ̀ nKuyie ndɛ ndɔ́ kɛ pɛ̃ɛ̃tɛ́ dinɑɑdɑɑ̀,
\q1 kɛ pɛ̃ɛ̃tɛ́ fɛnɑ̀ɑ̀fɛ̀ nɛ̀ yɛyìè nnɛ̀ yɛkpɛ̀ɛ̀tɛ̀.
\q1
\v 32 Kuyie nhɑ n dɛɛtɛ́mɛ̀ dɛɛ̀ nɑrikɛ bɛsĩ́ntíbɛ̀.
\q1 Díndi bɛ̀ɛ̀ wɑnti Kuyie di fòmmuu okɛ̀.
\q1
\v 33 Kuyie nyomu bɛsénnìbɛ̀ dɑbùò,
\q1 kù í buɔ̀nko ku kɔbɛ bɛ̀ bɛ̀ kpetí dìì mɔ̀nnì.
\q1
\v 34 Kɛtenkɛ̀ nɛ̀ kɛĩ́nkɛ̀, ńsɑ̃ntínɛ̀ Kuyie,
\q1 dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ nɑmpú o miɛkɛ, ńsɑ̃ntínɛ̀ ku.
\q1
\v 35 Kuyie nyóó dɛɛtɛ́mu Siyɔ̃ɔ̃ kɛ́mɑɑ́ Sudɑɑ ɛkɛ̀,
\q1 kɛ̀ ku kɔbɛɛ wɛ̃tɛ kɛ́ yɛ̀ tiekɛ kɛ́nhɑ̃.
\q1
\v 36 Kɛ̀ ku kɔbɛ yɑɑ̀bí dì sɔɔtɛ́,
\q1 bɛ̀ɛ̀ dɔ́ Kuyie nkɛ̀ bɛ̀ɛ pɛ́tɛ́ kɛ́mbo.
\c 70
\s1 Dɑfiti dɔ́mɛ̀ Kuyie nhò tee mmɛcɑ̃ɑ̃
\r (Wéntɛ́ Yɛsɑ̃ɑ̃ 40:14-18)
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ kɛ denniní Kuyie nkpɛ́í.
\b
\q1
\v 1 Kuyie, nyɑ̀ n dɛɛtɛ́!
\q1 Cɑ̃rikɛní kɛ́ n tee.
\q1
\v 2 Bɛ̀ɛ̀ n dɔ́nɛ̀ mukṹṹ ifɛii bɛ̀ pĩ́ nkɛ̀ bɛ̀ɛ sĩ́nnɛ́,
\q1 bɛ̀ɛ̀ n dɔ́nɛ̀ mɛyɛi bɛ̀ɛ di ifɛi kɛ́wɛ̃tɛ bɛ fɔ̃nkó.
\q1
\v 3 Bɛ̀ɛ̀ n dɑú kɛ tú wũ̀ɔ̃̀ɔ̃̀,
\q1 ifɛii bɛ̀ pĩ́ nkɛ̀ bɛ̀ɛ bótí.
\q1
\v 4 Bɛ̀ɛ̀ dɑ wɑɑ̀ ndɛ̀ mbɛ̀ nɑɑti kɛ̀ bɛ̀ nyɑ̃nku,
\q1 diwɛ̀ì mbo bɛ̀ɛ̀ dɔ́ fɔ̃́ nhOdɛɛtíwè,
\q1 bɛ̀ nnɑ́ɑ́ nsɑ̃́ɑ̃̀ kɛ tú ɑ yètìrì ndɛu.
\q1
\v 5 N tú osénnìwè nwe, ocĩ̀rì,
\q1 Kuyie mmɔ́nnɛ́ní kɛ́ n tee.
\q1 Fɔ̃́ɔ̃̀ tu n teentì n dɛɛtíwè.
\q1 N Yiɛ̀ nKuyie mbɑ́ɑ́ ɔɔtɛ!
\c 71
\s1 Okótì bɑ̀ɑ́mmɛ̀ Kuyie
\q1
\v 1 N Yiɛ̀ nKuyie n wɑɑ̀ nfɔ̃́ɔ̃̀ borɛ̀ disɔ̀rì,
\q1 bɑ́ɑ́ yóu kɛ̀ n di ifɛi bìtì!
\b
\q1
\v 2 A wetí mɛ̀ɛ̀ kpɛ́í, n dɛɛtɛ́ kɛ́ n coo,
\q1 n kéntɛ́ kɛ́ n dɛɛtɛ́.
\q1
\v 3 A ntú n kó dipèrì n sɔri dìì borɛ̀.
\q1 A yĩmu ɑ yó nni ndɛɛrí,
\q1 fɔ̃́ɔ̃̀ tu dipèrì dìì n kɑ̃nkɛ́,
\q1 fɔ̃́ɔ̃̀ tu n cɛ̃kpetɛ̀.
\q1
\v 4 Kuyie nkùù n te n dɛɛtɛ́nɛ̀ bɛyɛibɛ,
\q1 kɛ́ n fietɛnɛ̀ bɛkɔ̀ùbɛ̀ nɛ̀ bɛyonkubɛ nɔu miɛkɛ.
\q1
\v 5 N Yiɛ̀ nKuyie m búɔ́ fɔ̃́ nwe,
\q1 n yɛ̃́ fɔ̃́ɔ̃̀ kpɛ́í nɛ̀ m bɛmmɛ̀.
\q1
\v 6 Nɛ̀ bɛ̀ m pɛitɛ́nímɛ̀ m buɔ́ fɔ̃́ nwe,
\q1 fɔ̃́ɔ̃̀ n dènnɛní n yɔ̃ pɔutì miɛkɛ,
\q1 kɛ̀ n dɑ sɑ̃ntí sɑ̃́ɑ̃̀.
\q1
\v 7 Bɛsṹkùbɛ̀ ɔ̃ɔ̃ n yɑ̀ kɛ̀ dɛ̀ɛ̀ bɛ̀ dimu,
\q1 kɑ̀ɑ nɛ́ tú n kó disɔ̀rì kperì.
\q1
\v 8 A sɑ̃nni mbo n nùù miɛkɛ,
\q1 kɛ̀ nni ndɛ́úkùnko ɑ yètìrì sɑ̃́ɑ̃̀.
\b
\q1
\v 9 Kɛ̀ n kòtɛ́, ɑ bɑ́ m bɔntóo,
\q1 kɛ̀ n wɛ̃rímú dèè ɑ bɑ́ n yóu.
\q1
\v 10 N dootitɔbɛ̀ nɑ́ɑntɛ n kpɛ́í nkɛ,
\q1 bɛ̀ɛ̀ m pɑkíí bɛ̀ dɑ̀kiimu n kpɛ́í.
\q1
\v 11 Kɛ tú: Kuyie nhò dootóomu,
\q1 bɛtinɛ̀ we, pĩ́nnɛ̀ we,
\q1 òmɔù í yóó ò dɛɛtɛ́.
\q1
\v 12 Kuyie mbɑ́ n dɛ́tɛ́nɛ̀,
\q1 mɔ́nnɛ́ní mɛcɑ̃ɑ̃ kɛ́ n teennɛ̀.
\q1
\v 13 Ifɛi nɛ̀ mɛyɛi ndɛ̀ɛ do bɛ̀ɛ̀ n wɑ́tìrì,
\q1 bɛ̀ɛ̀ n dɔ́nɛ̀ mɛyɛi mbɛ̀ɛ bɛ̀ sènkɛ̀rì kɛ̀ bɛ̀ɛ di ifɛi.
\q1
\v 14 Mí m búɔ́ fɔ̃́ nwe sɑ̃́ɑ̃̀,
\q1 kɛ yó ndɑ sɑ̃ntí sɑ̃́ɑ̃̀,
\q1 kɛ bɑɑ dɑ sɑ̃ntí kɛ dɑ sɑ̃ntí.
\q1
\v 15 N níí bo ntṹṹ nkɛ nɑ́ɑ́ nhɑ túmɛ̀ timɔ́mmɔnti yiɛ̀,
\q1 kɛ nɑ́ɑ́ nhɑ dɛɛrímɛ̀,
\q1 kɑ̀ɑ sɑ̀ɑ̀ nsũ kɛ í dò nkɑɑ̀ nkɛ́deè.
\q1
\v 16 N Yiɛ̀ nKuyie m bo pĩ́ mmutɔ̃ndiɛmù nɛ̀ ɑ kó muwɛ̃rímú,
\q1 kɛ́nnɑ́ɑ́ nhɑ kó timɔ́mmɔnti kpɛ́í mmɑ́ɑ̀.
\b
\q1
\v 17 Kuyie nhɑ n tièmmu nɛ̀ m bíbɛ́ǹtì,
\q1 nɛ̀ yíenní kɛ n nɑ́ɑ́ nhɑ diɛtì.
\q1
\v 18 Nɛ̀ m bo kotɛ́mɛ̀ kɛ̀ n yùtì pɛikɛ,
\q1 ɑ́ú Kuyie nhɑ bɑ́ m bɔntóo
\q1 n dɔ́ kɛ́nɑ́kɛ́mu di mmɔ̀nnì kɔbɛ ɑ wɛ̃rímú,
\q1 kɛ́nɑ́kɛ́ bɛ̀ɛ̀ kpɑɑní ɑ kpeńnìmɛ̀.
\q1
\v 19 Kuyie nhɑ mɔ́mmɔnti dɛumu kɛ tuɔkù kɛĩ́nkɛ̀,
\q1 fɔ̃́ɔ̃̀ dɔ̀ɔ̀ dɛdiɛrɛ̀ dɛmɔu,
\q1 we ndɑ mɑ̀nnɛ̀?
\q1
\v 20 Fɔ̃́ɔ̃̀ duɔ́ nkɛ̀ n yɑ̀ mɛhɑ́ɑ́rìmɛ̀ nɛ̀ mɛsémmɛ̀,
\q1 kɑ̀ɑ yó n fòùkùnnɛ, kɛ́ n dennɛní kudɔnkù.
\q1
\v 21 A yóó wɛ̃tɛ kɛ́ m bɑ́ntɛ̀mu,
\q1 kɛ́ndɛ́úkùnnɛ.
\q1
\v 22 N yó ndɑ sɑ̃ntínɛ̀ kubómbonku nku,
\q1 ɑ tú mɛ̀ɛ̀ kpɛ́í ntimɔ́mmɔnti yiɛ̀ nfɔ̃́ nKuyie.
\q1 M bo ndɛ́úkùnko ɑ yètìrì nɛ̀ kukùtìdùkù,
\q1 fɔ̃́ nKuyie nyIsidɑyɛɛribɛ tũ nkù ɑ sɑ̀mu.
\q1
\v 23 M bo ndiè nkɛ dɑ sɑ̃ntí
\q1 kɛ́ndɛ́úkùnkoo ɑ yètìrì ɑ n dɛɛtɛ́ mɛ̀ɛ̀ kpɛ́í.
\q1
\v 24 N níí yó ntṹṹ nkɛ nɑ́ɑ́mmu ɑ kó timɔ́mmɔnti kpɛ́í,
\q1 ifɛi pĩ́mmu bɛ̀ɛ̀ n dɔ́nɛ̀ mɛyɛi nkɛ̀ bɛ̀ sĩ̀ńnɛ́.
\c 72
\s1 Bɛ̀ bɑ̀ɑ́mmɛ̀ Kuyie nkɛ̀ kù bo dɔɔ̀ okpɑ̀ɑ̀tì mɛsɑ̀ɑ̀
\pi1
\v 1 Bɛ̀ dìèmmɛ̀ Sɑdomɔɔ yɛ̀nfɛ̀.
\b
\q1 Kuyie nyóu kòo kpɑ̀ɑ̀tì mbekù ɑ bekù mɛ̀ɛ̀ botí,
\q1 duɔ́ nkòo kpɑ̀ɑ̀tì birɛ nni nɛ̀ timɔ́mmɔnti ɑ kɔ̃mɛ.
\q1
\v 2 Kòo mbekùnɛ̀ ɑ nìtìbɛ̀ kɛ̀ dɛ̀ wenni,
\q1 kɛ́ntũnni bɛsénnìbɛ̀ kpɛti.
\q1
\v 3 O kó tikpɑ̀tì miɛkɛ kɛ̀ bɛnìtìbɛ̀ɛ pɛ́tɛ́ yɛtɑ̃rɛ̀ kó mɛsɑ̀ɑ̀,
\q1 kɛ̀ sitɑ̃ɑ̃́ bɛ̀ dɔ̀ɔ̀ timɔ́mmɔnti.
\q1
\v 4 Kòo kpɑ̀ɑ̀tì mbekùnɛ̀ bɛcĩ̀rìbɛ̀ kɛ̀ dɛ̀ wenni,
\q1 kɛ dɛɛrí bɛsénnìbɛ̀, kɛ kɔù bɛ̀ɛ̀ bɛ̀ fɛ̃́ũnko.
\b
\q1
\v 5 Kɛ̀ bɛ̀ nhò dé sɑ̃́ɑ̃̀ diyiè bo mɛ̀ɛ̀ botí,
\q1 kɛ́ nhò cokù sɑ̃́ɑ̃̀ otɑ̃̀nkù bo mɛ̀ɛ̀ botí.
\q1
\v 6 Kòò ndò nfɛtɑɑfɛ̀ ɔ̃ nniùmɛ̀ kunɛ́pɛ̃kù,
\q1 diwɛtirì ɔ̃ɔ̃ cútɛ́ní mɛ̀ɛ̀ botí kɛtenkɛ̀.
\q1
\v 7 Kɛ̀ timɔ́mmɔnti ndɛ́úkú o kpɑ̀tì mɔ̀nnì,
\q1 kɛ̀ mɛsɑ̀ɑ̀ nni mbo otɑ̃̀nkù bo mɛ̀ɛ̀ botí sɑ̃́ɑ̃̀.
\b
\q1
\v 8 Kòo mbɑkɛ́ we ndɑ̀mɛ́ɛ̀rì nɛ̀ otɔù,
\q1 kukó ndiɛkù nɛ̀ itemmɑ̀nkɛ imɔu.
\q1
\v 9 Dikpɑ́ɑ̀ kɔbɛ yóó nínkúmu o ììkɛ̀,
\q1 kòo dootitɔbɛ̀ɛ múúkú mutɑ̃́ɑ̃́.
\q1
\v 10 Tɑdisisi kó bɛkpɑ̀ɑ̀tìbɛ̀,
\q1 nɛ̀ dɑ̀mɛ́ɛ̀rì cuokɛ̀ tenkɛ̀ kɔbɛ bo ò pɑ̃mmú yɛpɑ̃rɛ̀,
\q1 Sɑbɑɑ nɛ̀ Sebɑɑ kpɑ̀ɑ̀tìbɛ̀ kɛ̀ bɛ̀ɛ ò pɑ̃mmú yɛpɑ̃rɛ̀.
\q1
\v 11 Bɛkpɑ̀ɑ̀tìbɛ̀ bɛmɔu yóó nínkúmu o ììkɛ̀,
\q1 kɛ̀ yɛbotɛ̀ yɛmɔu mpĩ́ nho tɔ̃mmú.
\b
\q1
\v 12 Weè yóó dɛɛtɛ́ ocĩ̀rì,
\q1 kɛ́kuɔ́ nhosénnìwè mɛsémmɛ̀, wèè í mɔkɛ wèè bo ò teennɛ̀.
\q1
\v 13 Weè yóó kuɔ́ nhocĩ̀rì nɛ̀ wèè kpɑ o kpɛrɛ mɛsémmɛ̀,
\q1 kɛ́ bɛ̀ dɛɛtɛ́.
\q1
\v 14 Weè yóó bɛ̀ dɛɛtɛ́ nɛ̀ mɛfɛ̃́ṹtímɛ̀ nɛ̀ bɛnitiyonkubɛ,
\q1 kɛ yɛ̃́ ò wùómmɛ̀ bɛ fòmmu dɛ̀mɑrɛ̀ diɛrɛ̀.
\b
\q1
\v 15 Kòo kpɑ̀ɑ̀tì mbo kɛ̀ bɛ̀ nhò pɑ̃ɑ̃ mmɛsɔɔ nSebɑɑ kɔ̃mɛ,
\q1 kɛ níí ntṹṹ nkɛ bɑ́ɑ́ nKuyie nho kpɛ́í kɛ̀ kùu ò dɔ̀ɔ̀ mɛsɑ̀ɑ̀.
\q1
\v 16 Kɛ̀ tidiitì mbo dihɛì kɛ sũ,
\q1 kɛ̀ yɛtɑ̃rɛ̀ ĩ́nkɛ̀ nyuu ntidiitì Dimɑɑ tie nkó yɛbɛ kɔ̃mɛ,
\q1 kɛ̀ bɛnìtìbɛ̀ɛ pitɛ́ dihɛì timútì kɔ̃mɛ.
\q1
\v 17 Dɛ kóo kpɑ̀ɑ̀tì yètìrì mbo sɑ̃́ɑ̃̀,
\q1 kɛ́mbo sɑ̃́ɑ̃̀ diyiè bo mɛ̀ɛ̀ botí,
\q1 kɛ̀ bɛnìtìbɛ̀ nyu o yètìrì kɛ pɑ̃ɑ̃ mbɛtɔbɛ̀ mɛsɑ̀ɑ̀,
\q1 kɛ̀ yɛbotɛ̀ ntú: Dɛ̀ nnɑɑti okpɑ̀ɑ̀tì.
\b
\q1
\v 18 Ti Yiɛ̀ nKuyie nyIsidɑyɛɛribɛ tũ nkù,
\q1 kuù dɔɔri tidiɛtì kumɑ́ɑ̀,
\q1 ku yètìrì ndɛu.
\q1
\v 19 Ku yètìrì ndɛu sɑ̃́ɑ̃̀,
\q1 kɛ̀ ku kpetìi píɛ nkɛtenkɛ̀ kɛmɔu,
\q1 kɛ̀ dɛ̀ mmɛ ndò. Ami!
\b
\q1
\v 20 Isɑii birɛ Dɑfiti bɑ́ɑmmìi mɑ̀nku nku.
\c 73
\ms1 YƐSÃÃ MPÁTÍRI DITÃÃ́NNÌ
\s1 Bɛyɛibɛ kpɛrɛ ɔ̃ ndò ndɛ̀ yìémmu
\r (Yɛsɑ̃ɑ̃ 73-89)
\pi1
\v 1 Asɑfu yɛ̀nfɛ̀.
\b
\q1 Kuyie mmɛ̀nkɛ wennimu Isidɑyɛɛribɛ borɛ̀,
\q1 kɛ wenni bɛ̀ɛ̀ yɛ̀mmɛ̀ wenni bɛ borɛ̀.
\q1
\v 2 Bɑ́ nɛ̀ mɛmmɛ kɛ̀ nní ndɔ́ kɛ́yetɛ́,
\q1 dɛ̀ do kpɑɑ́ sɑ́m̀pɔ́ nwe kɛ̀ n do.
\b
\q1
\v 3 Kɛ yɛ̃́ n do yɑ̀ dìì mɔ̀nnì sipɔɔ yɛmbɛ̀ kpɛrɛ yíémmɛ̀ kɛ́ m bɛ̀ yɑ̀ɑ́mmu.
\q1
\v 4 Dɛ̀mɑrɛ̀ í bɛ̀ kɔɔ́nnɛ̀, nɛ̀ bɛ kṹṹnko,
\q1 bɛ̀ kpèńkúmu, kɛ ɑ̃ɑ̃̀ mɛkùɔ̀.
\q1
\v 5 Bɛ̀ í yɛ̃́ mɛfɛ̃́ṹtímɛ̀ mɑmɛ̀,
\q1 bɛtɔbɛ̀ bɛɛ̀ ɑ́ɑ̀rì, bɛmbɛ í ɑ́ɑ̀rì.
\q1
\v 6 Kɛ̀ bɛ feí tú bɛ dɛ̀ì mbɛ̀ dùúkú mɛ̀,
\q1 kɛ̀ kuyonku tú bɛ yɑɑ̀bòrɛ̀ bɛ̀ dɑ̀ɑ́tí yɛ̀.
\q1
\v 7 Kɛ̀ bɛ ììkɛ̀ píɛ nticɑ́kpɛ́útì nɛ̀ mɛkùɔ̀,
\q1 bɛ̀ totí bɛ yɛ̀mmɛ̀ bɛ̀ í mɑ̀nnɛ̀ tì nti.
\q1
\v 8 Kɛ mɔkɛ mudɑɑ́ nnɛ̀ tinɑ́ɑ́nyɛiti,
\q1 kɛ ɑ̃ɑ̃̀ kufɔ̃wɑɑ́, kɛ mɔkɛ sifeí.
\q1
\v 9 Kɛ sɑ̃́ɑ̃́ nkɛĩ́nkɛ̀,
\q1 bɛ̀ í sokù òmɔù kɛtenkɛ̀ ĩ́nkɛ̀.
\q1
\v 10 Dɛɛ̀ te kɛ̀ bɛnìtìbɛ̀ bɛ̀ tũ mbɑ́ nɛ̀ Kuyie nkɔboo,
\q1 kɛ yɔ̃ mbɛ nɑ́ɑǹtì mɛniɛ nkɔ̃mɛ.
\q1
\v 11 Kɛ nɑ́ɑ́ nkɛ tú:
\q1 Kuyie mbo yĩ́mɛ kɛ́ ntì yɛ̃́?
\q1 Kɛ tú: Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kù í yɛ̃́ dɛ̀mɑrɛ̀.
\q1
\v 12 Dɛ kó bɛnitiyɛibɛ dɛ̀mɑrɛ̀ í bɛ̀ kɔɔ́nnɛ̀,
\q1 bɛɛ̀ kpɑ̀tì dɛ̀úkú.
\q1
\v 13 N tũ nnɛ́ wèńkùnnɛ n yɛ̀mmɛ̀ dɛtetìrɛ̀ ndɛɑ̀?
\q1 N nìtɛ n nɔu kɛ bɛnkɛ n yí cɑ̀ɑ̀rɛ̀mɛ̀ dɛ̀mɑrɛ̀ fɑ̀ɑ̀rɛ̀ nweɑ̀?
\q1
\v 14 Kɛ̀ bɛ̀ ɔ̃ ntṹṹ nkɛ m puotì,
\q1 kɛ n kɔ̃mmù bɑ́ dìì kṹnweńnì.
\q1
\v 15 Kɛ̀ n do tú m bo nnɑ́ɑ́ mbɛ̀ nɑ̀ɑ́ mmɛ̀ɛ̀ botí,
\q1 n nɑ nsoutɛ́ ɑ kɔbɛ yɑɑ̀bí nyi.
\q1
\v 16 N totí n yɛ̀mmɛ̀ kɛ bo bɑntɛ́ dɛ kó tinɑ́ɑǹtì,
\q1 kɛ̀ ti bɑntímù n yonkɛnɛ̀mu.
\q1
\v 17 N tɑ dìì yiè ndi Kuyie ncĩ́ɛ̃̀tɛ̀,
\q1 m bɑntɛ́mɛ̀ tìì bɛ̀ bɑ̀ɑ.
\b
\q1
\v 18 A mɛ̀nkɛ bɛ̀ còńnɛ́ dɛ̀ɛ̀ ɑnni dɛ̀ndɛ,
\q1 kɛ bo bɛ̀ tèntɛ kɛ̀ bɛ̀ɛ do difɔ̃̀tìrì miɛkɛ.
\q1
\v 19 Dɛndɛ bɑ̀mbɑ̀ nkɛ̀ bɛ kpɛrɛɛ deè,
\q1 kɛ̀ bɛ kpɛrɛɛ mɔɔtɛ kukɔ̃m̀bɔ̀doróo.
\q1
\v 20 Ti Yiɛ̀ nKuyie nkɑ̀ɑ ìtɛ́ ɑ tɔ̃mmú bɛ kpɛrɛ yóó dèèmu,
\q1 tidɔùntì ɔ̃ɔ̃ pɛ̃ɛ̃tɛ́ mɛ̀ɛ̀ botí ɑ èntɛ dìì mɔ̀nnì.
\b
\q1
\v 21 Mɛyɛǹcɑɑ̀rìmɛ̀ do nh ɑutɛ́ dìì mɔ̀nnì,
\q1 kɛ̀ dɛ̀ n yonkɛ kɛ́ n tɑ mɛdiɛ̀ mmɛ.
\q1
\v 22 N yí nciì, n yí bɑnní dɛ̀mɑrɛ̀,
\q1 n do dò nfɛɔ̃̀fɛ̀ nfɛ ɑ ììkɛ̀.
\b
\q1
\v 23 Nɛ̀ mɛmmɛ kɛ́ ndɑ bonɛ̀ sɑ̃́ɑ̃̀,
\q1 kɑ̀ɑ m pĩ́ nhɑ nɔ̀ùtɛ̀ youtɛ.
\q1
\v 24 Fɔ̃́ɔ̃̀ yó n niitɛ́ ɑ tɑ̃ɑ̃tɛ́ tì n kpɛ́í nti miɛkɛ,
\q1 kɛ́ n tɑnnɛ́ ɑ kpetì miɛkɛ.
\q1
\v 25 M mɔkɛ we kɛĩ́nkɛ̀, kɛ̀ dɛ̀ í tú fɔ̃́?
\q1 N yí dɔ́ dɛtɛrɛ̀ mɑrɛ̀ kɛtenkɛ̀ ĩ́nkɛ̀, kɛ̀ dɛ̀ í tú fɔ̃́!
\q1
\v 26 N kɔ̃̀ntì nɛ̀ n yɛ̀mmɛ̀ dɛ̀ bo nɑ kɛ́deè,
\q1 Kuyie nfɔ̃́ɔ̃̀ nɛ́ yó ntú n yĩkú wèè ĩ́nkɛ̀ sɑ̃́ɑ̃̀.
\q1
\v 27 Bɛ̀ɛ̀ dɑ yóu bɛ̀ yóó duómu kɛ́kú,
\q1 kɑ̀ɑ kuɔ bɛ̀ɛ̀ dootóo ɑ bɛ̀ dɔ̀ɔ̀nɛ̀ mɛ̀ɛ̀ tɑummɛ̀.
\q1
\v 28 N kó mɛsɑ̀ɑ̀ tu m bo ndɑ tɔ́kɛ́nɛ̀mɛ̀,
\q1 n kó disɔ̀rì tu fɔ̃́ n Yiɛ̀ nKuyie,
\q1 kɛ̀ dɛ̀ bo yie nkɛ̀ nní nnɑ́ɑ́ nhɑ tɔ̃mmú mumɔu ɑ dɔ̀ɔ̀mu.
\c 74
\s1 Kuyie ncĩ́ɛ̃̀tɛ̀ cɔ̀útɛ́mɛ̀ kɛ̀ bɛ̀ kuɔ̀nnɛ̀ Kuyie
\pi1
\v 1 Asɑfu yɛ̀nfɛ̀.
\b
\q1 Áú Kuyie! Dɛ̀ yĩ́mɛ kɑ̀ɑ ti dootóo sɑ̃́ɑ̃̀?
\q1 Dɛ̀ dòmmɛ kɑ̀ɑ miɛkɛ ti cɔ́ú ntínti ɑ pe?
\q1
\v 2 Dentɛní ɑ kɔbɛ kpɛ́í, ɑ dontɛ́ bɛ̀ nɛ̀ dimɔ̀nnì,
\q1 bɛ̀ tu ɑ kɔbɛ mbɛ kɑ̀ɑ bɛ̀ tɔ,
\q1 dentɛní Siyɔ̃ɔ̃ tɑ̃rì kpɛ́í ɑ do ɑ̃ dɛ̀.
\b
\q1
\v 3 Kɔtɛ kɛ́yɑ̀ bɛ̀ cɑ̀ɑ̀ri dɛ̀ sɑ̃́ɑ̃̀ dɛ̀ dɛumɛ̀
\q1 ti dootitɔbɛ̀ cɑ̀kɛmu dɛmɔu ɑ cɛ̃sɑ̀ɑ̀tɛ̀.
\q1
\v 4 A dootitɔbɛ̀ tɑmu ɑ cɛ̃sɑ̀ɑ̀tɛ̀ kɛ íútí,
\q1 kɛ còńnɛ́ bɛ kó mɛcɑnnimɛ̀ ɑ kɔ̃mɛ do borɛ̀.
\q1
\v 5 Bɛ̀ pùɔ nhɑ cĩ́ɛ̃̀tɛ̀ otekɔ̃ũtì ɔ̃ɔ̃ kɔ̃ṹmɛ̀ mmɛ dɛtie ndikpɑ́ɑ̀,
\q1 kɛ́yɔ̃kii o pĩɛ̃tɛ̀.
\q1
\v 6 Bɛ̀ tɔ sipɛ̃ɛ̃́ nsi nɛ̀ mɑ̀ɑ̀tóòbɛ̀
\q1 kɛ puɔ̀ nhɑ cĩ́ɛ̃̀tɛ̀ kó tisɑ̃tì.
\q1
\v 7 Kɛ cɔ́u nhɑ cĩ́ɛ̃̀tɛ̀ kɛ tɛ̀ pùɔ,
\q1 kɛ sĩ̀nkùnnɛ ɑ cĩ́ɛ̃̀tɛ̀ bɛ̀ yu dɛ̀ ɑ yètìrì.
\q1
\v 8 Bɛ̀ do nɑ́ɑ́ mbɛmɑ́ɑ̀ ndi kɛ tú:
\q1 Ti yóó bɛ̀ puotímu,
\q1 kɛ́cɔ́u nyɛ bòrɛ̀ yɛmɔu dihɛì miɛkɛ bɛ̀ bɑ̀ɑ́ ndɛ̀ Kuyie.
\q1
\v 9 Yɛbɛnkùyɛ̀ mɑyɛ̀ tɛ̃́nkɛ í bo,
\q1 ti tɛ̃́nkɛ í mɔkɛ bɛ̀ɛ̀ nɑ̀ɑ́ nKuyie mpɑ̃ɑ̃nɑ́ɑǹtì,
\q1 òmɔù í yɛ̃́ dɛ̀ yó nkɑ̃́ɑ̃́kɛ́ dɛ̀.
\q1
\v 10 Áú Kuyie! Dɛ̀ yó nkɑ̃́ɑ̃́kɛ́ dɛ kɑ̀ɑ níím̀bɛ̀ɛ yóu bɛ̀ bo nyíinkomɛ̀ ɑ miɛkɛ?
\q1 Dɛ̀ yó nkɑ̃́ɑ̃́kɛ́ dɛ kɑ̀ɑ dootitɔbɛ̀ dɑ yóu mudɑɑ́?
\q1
\v 11 Dɛ̀ dòmmɛ kɑ̀ɑ wɛ̃̀nkɛ ɑ bɑɑ̀?
\q1 Dɛ̀ yĩ́mɛ kɑ̀ɑ mɛí ɑ nɔu?
\q1 Youtɛní ɑ nɔ̀ùtɛ̀ kɛ́ bɛ̀ kùɔ pɑíí.
\q1
\v 12 Kuyie nkuù tu n kóo kpɑ̀ɑ̀tì nɛ̀ ti bomɛ̀,
\q1 kuù dɛɛrí bɛnìtìbɛ̀ kɛtenkɛ̀ ĩ́nkɛ̀.
\q1
\v 13 Kuyie, nfɔ̃́ɔ̃̀ yɑtɛ́ dɑ̀mɛ́ɛ̀rì nɛ̀ ɑ wɛ̃rímú,
\q1 fɔ̃́ɔ̃̀ pɔ̀ntɛ musĩ̀mmù yɔ mɛniɛ mmiɛkɛ.
\q1
\v 14 Fɔ̃́ɔ̃̀ pɔ̀ntɛ musĩ̀mmù bɛ̀ tu mù Defiɑtɑ̃ɑ̃ mu yɔ,
\q1 kɛ mù duɔ́ ndɑ̀mɛ́ɛ̀rì kó yɛkũrɛ.
\q1
\v 15 Fɔ̃́ɔ̃̀ ɑ̃nnɛ́ sibií nɛ̀ ikó,
\q1 kɛ duɔ́ nkɛ̀ ikó nyìì í kũũ kɛ̀ ì kpeì.
\q1
\v 16 Fɔ̃́ɔ̃̀ te kuyie nnɛ̀ kɛyènkɛ̀,
\q1 fɔ̃́ɔ̃̀ dɔ̀ɔ̀ otɑ̃̀nkù nɛ̀ diyiè.
\q1
\v 17 Fɔ̃́ɔ̃̀ ɑ̃nnɛ́ itemmɑ̀nkɛ imɔu,
\q1 fɔ̃́ɔ̃̀ dɔ̀ɔ̀ dipɑɑ̀ nɛ̀ diyɔ̃ɔ̃̀.
\b
\q1
\v 18 N Yiɛ̀ nKuyie nhɑ nyɛ̃́ ɑ dootitɔbɛ̀ dɑ sɑ̃́ɑ̃́mmɛ̀,
\q1 kɛ̀ kubotí kùù yɛi nkɛ̀ kù cɑ̀ɑ̀ri ɑ yètìrì.
\q1
\v 19 Bɑ́ɑ́ yóu kɛ̀ dɛsĩ̀nnɛ̀ɛ pĩ́ nhɑ kɔbɛ bɛ̀ɛ̀ dò nsinɔ́nkpeé,
\q1 bɑ́ɑ́ yɛ̃̀ nhɑ kó bɛcĩ̀rìbɛ̀ kpɛ́í mbìtì bìtì.
\q1
\v 20 A bɑ́ɑ́ yɛ̃̀ nhɑ tɑummɛ̀ kpɛ́í,
\q1 ti píɛmmu dihɛì kó yɛsɔ̀rɛ̀ miɛkɛ,
\q1 kɛ̀ bɛ̀ ti fɛ̃́ũnkoo dɛborɛ̀.
\q1
\v 21 Bɑ́ɑ́ yóu kɛ̀ bɛ̀ fɛ̃́ũnko wèe di ifɛi,
\q1 ocĩ̀rì nɛ̀ osénnìwè bɛ̀ ndɛ́úkùnko ɑ yètìrì.
\q1
\v 22 Kuyie nyítɛ́ kɛ́cómmú kɛ́bɛnkɛ ɑ tú wè,
\q1 dentɛní yɛsɑ̃́ɑ̃̀mbɛ̀ kubotí yɛiku dɑ sɑ̃́ɑ̃́ nyɛ̀ sɑ̃́ɑ̃̀.
\q1
\v 23 A bɑ́ɑ́ yɛ̃̀ nhɑ dootitɔbɛ̀ kó fɛhúùfɛ̀ kpɛ́í,
\q1 kutoweku ɑ kpɑntídɛ̀ntɔbɛ̀ wèkíí kù kɛ̀ kù dɛ̀úkú sɑ̃́ɑ̃̀.
\c 75
\s1 Kuyie nkuù tu obeéntì diɛwè
\d Bɛdèmbɛ̀ kóo kótì dìèmmɛ̀ Asɑfu yɛ̀nfɛ̀ nɛ̀ mɛtɑmmɛ̀ mɛ̀ɛ̀ tu: Bɑ́ɑ́ kuɔ.
\b
\q1
\v 1 Kuyie nti dɛ́úkùnko fɔ̃́ nwe,
\q1 ɑ yètìrì í yiɛ̀ ti nɔ̀ miɛkɛ,
\q1 ti nɑ́ɑ́mmu ɑ dɔ̀ɔ̀ mùù tɔ̃ndiɛmù.
\b
\q1
\v 2 Kɛ̀ Kuyie mbɛ́i nkɛ dɔ̀:
\q1 Mí nKuyie, kɛ̀ m mɔ̀nnì tùɔ̀kɛ,
\q1 n yó mbekù kɛ̀ dɛ̀ sìɛ́mu.
\q1
\v 3 Kɛtenkɛ̀ sɑ̃̀ntimu nɛ̀ kɛ nìtìbɛ̀,
\q1 mí nKuyie míì fìí nkɛtenkɛ̀ sɑ̃ǹkɛ̀.
\q1
\v 4 N nɑ̀kɛ́mu sipɔɔ yɛmbɛ̀ kɛ tú bɛ̀ bɑ́ mmɔkɛ sipɔɔ,
\q1 kɛ nɑ̀kɛ́ bɛyɛibɛ kɛ tú bɛ̀ɛ yóu sifeí.
\q1
\v 5 Kɛ bɑ́ nhéunko bɛ yɔ,
\q1 bɛ̀ bɑ́ nnɑ́ɑ́ ntipocɛ̃mmúnɑ́ɑǹtì.
\q1
\v 6 Dɛ̀ í bonní diyiè yìɛ̀ní kɛ̀ɛ̀ bíɛ́kɛ̀ yoo diyiè tɑɑ̀ kɛ̀ɛ̀ bíɛ́kɛ̀,
\q1 dɛ̀ mɛ nyí bonní dikpɑ́ɑ̀ yoo yɛtɑ̃rɛ̀ ĩ́nkɛ̀.
\q1
\v 7 Dɛ̀ bonní Kuyie mborɛ̀ ndɛ̀,
\q1 kùù bekùnɛ̀ bɛnìtìbɛ̀
\q1 kuù ɔ̃ɔ̃ kɛ̃́kùnnɛ yie nkɛ́dɛ́úkùnnɛ otɔù.
\b
\q1
\v 8 Ti Yiɛ̀ nKuyie mpikú fɛbòòfɛ̀ nfɛ,
\q1 nɛ̀ ku miɛkɛ kó mɛnɑɑ̀ nkperímɛ̀ kù kɔnnɛ́mɛ̀,
\q1 kɛ̀ yóó mɛ̀ yɑutɛ́ bɛnitidɔnnibɛ̀ bɛmɔu,
\q1 kɛ̀ bɛ̀ɛ mɛ̀ yɑ̃̀ kɛ́kúótóo nɛ̀ dɛfũ̀ɔ̃̀ kpɛrɛ.
\b
\q1
\v 9 Mí nyó mpĩɛ̃kùmu sɑ̃́ɑ̃̀ ku yètìrì,
\q1 n yó ndièmmu kɛ sɑ̃ntí Kuyie Sɑkɔbu do tũ nkù.
\q1
\v 10 N yóó dɛitɛmu bɛyɛibɛ feí,
\q1 bɛ̀ɛ̀ wetí kɛ̀ bɛ̀ ndɛukú.
\c 76
\s1 Kuyie kuù nɔ nku dootitɔbɛ̀
\d Bɛdèmbɛ̀ kóo kótì dìèmmɛ̀ Asɑfu yɛ̀nfɛ̀ bɛ̀ dìè nfɛ̀ kɛ biennɛ̀ tibómbonti iwɛ̃ĩ kpɛti.
\b
\q1
\v 1 Kuyie nyètìrì feímu Sudɑɑ kɔbɛ cuokɛ̀,
\q1 ku yètìrì dɛumu bɛmbɛ Isidɑyɛɛribɛ borɛ̀.
\q1
\v 2 Ku cĩ́ɛ̃̀tɛ̀ bo Sɑdɛmmu nwe
\q1 kù ɑ̃ Siyɔ̃ɔ̃ nwe.
\q1
\v 3 Dɛǹdɛ Kuyie nkèkɛ́mɛ̀ bɛtɑ̃ntɑ̃ũbɛ̀ pie,
\q1 bɛ dɔpììtì nɛ̀ bɛ̀ kpɑ̀rìse, bɛ kpɑ̀rìnɛntì timɔu.
\b
\q1
\v 4 A nɑ́ɑ̀ ndɛumu nɛ̀ ɑ wenniku,
\q1 ɑ dɛumu kɛ pɛ̃ɛ̃tɛ́ yɛtɑ̃rɛ̀ yɛ̀ɛ̀ do bonɛ̀ dimɔ̀nnì.
\q1
\v 5 Yɛkɔ̃m̀bɔ̀ yɛmbɛ̀ yɛ̃̀ nkɛ duɔ́mu kɛ̀ bɛ̀ bɛ̀ ɛí,
\q1 bɛkpɑ̀rìtiebɛ nɔu bɛ̀ìtɛ̀mu.
\q1
\v 6 Kuyie nSɑkɔbu do tũ nkù kuù pɛ́i,
\q1 sikpɑ̀rìnɑɑsɛ̃ĩ́ nɛ̀ bɛhɑ̃ɑ̃pɔ̀nsɑ̃ndèèbɛ̀ kɛ̀ bɛ̀ yɛ̃̀ nkɛ duɔ́.
\q1
\v 7 Kuyie nhɑ duò tikɔ̃m̀bùɔ̀tì nti,
\q1 kɑ̀ɑ miɛkɛ pɛikɛ dìì yiè we mbo dɑ́ɑ́tí kɛ́cómmú ɑ ììkɛ̀?
\q1
\v 8 Kuyie nhɑ bo kɛĩ́nkɛ̀ nkɛ kɛ nɑ́ɑ́nní ɑ tɑ̃ɑ̃tɛ́ tì,
\q1 kɛ̀ kufɔ̃wɑɑ́ mpĩ kɛtenkɛ̀ kɔbɛ kɛ̀ bɛ̀ yɛ̃ nyúóó!
\q1
\v 9 A ìtɛ́ dìì mɔ̀nnì kɛ bo bekɛ́nɛ̀ kutenkù,
\q1 kɛ́dɛɛtɛ́ bɛ̀ɛ̀ kɛ̃́kùnnɛ bɛmɑ́ɑ̀.
\q1
\v 10 Bɑ́ bɛnìtìbɛ̀ kó kɛmiɛkɛ kɛ̀ dɛ̀úkùnkomu ɑ yètìrì,
\q1 bɛ̀ɛ̀ bo cootɛ́ ɑ miɛkɛ bo pɛikɛ dìì yiè bɛ̀ bo ɑ̃nnɛ́ dibɑnni ɑ kpɛ́í.
\b
\q1
\v 11 Dí dɔúnnɛ̀ di Yiɛ̀ nKuyie nyɛnɔ̀ kɛ́ yɛ̀ dɔ̀ɔ̀,
\q1 díndi bɛ̀ɛ̀ kù tɔ̀kɛ́nɛ̀, pɑ̃mmúnɛ̀ ku yɛpɑ̃rɛ̀, kù duò tikɔ̃m̀bùɔ̀tì nti.
\q1
\v 12 Kuù kèkíí sikpɑ̀ɑ̀tìbìí kó muwemmu,
\q1 kutenkù kó bɛkpɑ̀ɑ̀tìbɛ̀ í kù dɑɑti.
\c 77
\s1 Wèè tɑ mɛyɛǹcɑɑ̀rìmɛ̀ kɛ denniní Kuyie nkpɛ́í
\d Bɛdèmbɛ̀ kóo kótì Yedutunni tĩ̀nnì dìèmmɛ̀ Asɑfu yɛ̀nfɛ̀.
\b
\q1
\v 1 N kuɔ̀mmu kɛ yu Kuyie,
\q1 n yu Kuyie nku kɛ̀ kù yo n dɑbònnì.
\q1
\v 2 N tɑ mɛyɛǹcɑɑ̀rìmɛ̀ miɛkɛ nkɛ kɛ wɑɑ̀ n Yiɛ̀ nKuyie,
\q1 nh ɔ̃ nyié nkɛ yuo nnɔu nsi kù bíɛ́kɛ̀ bɑ́ mbɑ́ɑ́ ɔu,
\q1 kɛ yetírí bɛ̀ bo m bɑ́ntɛ̀mɛ̀.
\q1
\v 3 Nh ɔ̃ nkɛ̀ n dèntɛní Kuyie nkpɛ́í nní nkuɔ̀mmu,
\q1 kɛ̀ n sìɛ n yɛ̀mmɛ̀ mɛ̀ ɔ̃ɔ̃ cɑɑ̀rɛ̀mu.
\q1
\v 4 Nɛ̀ ɑ kpɛ́í n nɔ̀nfɛ̀ ɔ̃ɔ̃ í nhũ̀ṹ,
\q1 dɛ̀ n kɔɔ́nnɛ̀mu n yí nɔ nkɛ nɑ́ɑ́.
\q1
\v 5 N kpɑɑ́ yɛ̃́ dɛ̀ do dòmmɛ̀ mmɛ,
\q1 n kpɑɑ́ kɛ denniní nyɛbie yɛ̀ɛ̀ pɛ̃ɛ̃tɛ́ yɛ̀nyɛ.
\q1
\v 6 N do ɔ̃ ndiè nyìì yìɛ̀ nyiì ɔ̃ nyié nkɛ bo n yɛ̀mmɛ̀,
\q1 kɛ̀ n wentí kɛ totí n yɛ̀mmɛ̀,
\q1 kɛ siɛmu kɛ bo tì bɑntɛ́.
\q1
\v 7 N Yiɛ̀ nKuyie, ɑ ti dootóomu kɛ̀ dɛ̀ dèèɑ̀?
\q1 A bɑ́ɑ́ wɛ̃tɛ kɛ́dentɛní ti kpɛ́ínnɑ́ɑ̀?
\q1
\v 8 A sɑ̀ɑ̀ ndèèmu sɑ̃́ɑ̃̀?
\q1 A nɑ̀kɛ́ tì í kpɑɑ́ bo dɔɔ̀ dibenni mɑrɑ̀ɑ̀?
\q1
\v 9 Kuyie nhɑ tɛ̃́nkɛ í mɔkɛ mɛsémmɑ̀ɑ̀?
\q1 Kɛmiɛkɛ kɛɛ̀ te kɑ̀ɑ í ti kuɔ̀ mɛsémmɑ̀ɑ̀?
\q1
\v 10 Kɛ̀ m bɛ́i kɛ dɔ̀:
\q1 Dɛ̀ɛ̀ n yóù dɛɛ̀ tu
\q1 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku nɔ̀ùtɛ̀ tɛ̃́nkɛ í bomɛ̀ n yĩ́nkɛ̀.
\b
\q1
\v 11 N Yiɛ̀ nKuyie n yí yóó yɛ̃̀ nhɑ pĩ́ mùù tɔ̃mmú,
\q1 m mɔ́mmuɔ n kpɑɑ́ wúómmu tidiɛtì ɑ do dɔ̀ɔ̀ tì.
\q1
\v 12 N totimu n yɛ̀mmɛ̀ mutɔ̃mmú mumɔu ɑ do pĩ mmù ĩ́nkɛ̀,
\q1 n siɛmumu mutɔ̃ndiɛmù ɑ do dɔ̀ɔ̀ mù kpɛ́í.
\q1
\v 13 Kuyie nhɑ kó kucɛ sɑ̀mu.
\q1 Kuyie, kɛ̀ dɛ̀ í tú fɔ̃́ nkutɛkù mɑkù í bo kɛ dɑ mɑ̀nnɛ̀.
\q1
\v 14 Kuyie, fɔ̃́ɔ̃̀ dɔ̀ɔ̀ri tidiɛtì,
\q1 fɔ̃́ɔ̃̀ bɛnkɛ ɑ wɛ̃rímú yɛbotɛ̀.
\q1
\v 15 Nɛ̀ ɑ wɛ̃rímú mmu ɑ dɛɛtɛ́mɛ̀ ɑ nìtìbɛ̀,
\q1 Sɑkɔbu yɑɑ̀bí nɛ̀ Sosɛfu kpɛyi.
\q1
\v 16 Kuyie, mɛniɛ ndo yɑ̀ fɔ̃́ nwe,
\q1 mɛ̀ do dɑ yɑ̀mu kɛ́fɑ̃ntɛ,
\q1 kɛ̀ dɑ̀mɛ́ɛ̀rì fũ̀ɔ̃̀ kó mɛniɛ nkutìrɛ̀.
\q1
\v 17 Kɛ̀ yɛwɛtɛ̀ɛ cóúnní mɛniɛ,
\q1 nkɛ̀ itɑpíɛ nyiɛ̀ní,
\q1 kɛ̀ itɑpíɛ ntú níɛ́ɛ́ tipíìtì timɔu.
\q1
\v 18 Kɛ̀ fɛtɑɑfɛ̀ mpɛ́ú kɛ̀ kuyɑɑkù fĩ,
\q1 kɛ̀ fɛtɑɑfɛ̀ mìí kɛ̀ dɛ̀ɛ wenkɛ kɛtenkɛ̀ kɛmɔu,
\q1 kɛ̀ kɛtenkɛ̀ɛ ɑɑ́ kɛ́sɑ̃ntɛ̀.
\q1
\v 19 A kó kucɛ do yɛ̀ dɑ̀mɛ́ɛ̀rì miɛkɛ nkɛ,
\q1 ɑ do kérí mɛniɛ ncuokɛ̀ nkɛ,
\q1 òmɔù do í yɑu ɑ nɑcɛ̀fɔ̃̀tɛ̀.
\q1
\v 20 A do duɔ́ nkɛ̀ Mɔyiisi nɛ̀ Anɔɔ kɛ̀ bɛɛ̀ nni ɑ nìtìbɛ̀,
\q1 onìtì ɔ̃ ncɛ̃mmúmɛ̀ o pe.
\c 78
\s1 Kuyie ndɔ̀ɔ̀ dɛ̀ Isidɑyɛɛribɛ dɛ̀ í dò nkɛ́yɛ̃̀
\pi1
\v 1 Asɑfu yɛ̀nfɛ̀.
\b
\q1 Díndi n nìtìbɛ̀ kéntɛ́nɛ̀ n tié.
\q1 Kéntɛ́nɛ̀ mɛsɑ̀ɑ̀ nkɛ́keè n tú mù.
\q1
\v 2 N dɔ́ kɛ di onnimu,
\q1 m bo di nɑ́kɛ́ nɛ̀ yɛnɑ́ɑnhɑ̃ntíyɛ̀ dɛ̀ɛ̀ do dɔ̀ɔ̀ nɛ̀ dimɔ̀nnì.
\q1
\v 3 Ti kèè tì kɛ ti yɛ̃́,
\q1 ti yɛmbɛ̀ ti tùo ntì.
\q1
\v 4 Ti bɑ́ɑ́ tì sɔ̀nnɛ ti bí,
\q1 ti yóó ti tùòmmu ti yɑɑ̀bí,
\q1 Ti Yiɛ̀ nKuyie nkó disɑ̃nni nɛ̀ ku kó muwɛ̃rímú,
\q1 nɛ̀ tidiɛtì kù dɔ̀ɔ̀ tì.
\b
\q1
\v 5 Kuù dɔúnnɛ̀ Sɑkɔbu yɑɑ̀bí ku tié,
\q1 kuù duɔ́ nku kuɔ́ Isidɑyɛɛribɛ,
\q1 kɛ nɑ̀kɛ́ ti yɛmbɛ̀ kɛ tú bɛ̀ɛ tì tié mbɛ bí.
\q1
\v 6 Kɛ̀ dɛ̀ɛ yie nkɛ̀ kutɔ̃nkù kùù tũ̀nní kɛ̀ kù ntì yɛ̃́,
\q1 ibí bɛ̀ bo piɛ́ ì kɛ̀ ìi tì tùo nyi kó ibí.
\q1
\v 7 Kɛ̀ dɛ̀ɛ yie nkɛ̀ bɛ̀ mbúɔ́ Kuyie,
\q1 kɛ bɑ́ɑ́ yɛ̃̀ nku tɔ̃mmú,
\q1 bɛ̀ ntũ nku tɑnnɔ̀.
\q1
\v 8 Kɛ bɑ́ ndònnɛ̀ bɛ yɛmbɛ̀ kɛ̀ bɛ to nkpeńnì,
\q1 kɛ̀ bɛ̀ nyetírí Kuyie nkpɛti, kɛ́ntú bɛ̀ɛ̀ yɛ̀mmɛ̀ í fííkú,
\q1 bɛ̀ɛ̀ í tũ Kuyie nsɛ́i.
\q1
\v 9 Efɑdɑimmu kɔbɛ tú bɛtɑ̃nnuɔmbɛ mbɛ,
\q1 kɛ kũ̀ńnɛ́ mudoò kɛ bùtínnɛ́ kɛ cokɛ́.
\q1
\v 10 Bɛ̀ í yie nkɛ pĩ́ mmɛtɑummɛ̀ Kuyie mbɛ̀ dɔ̀ɔ̀nɛ̀ mɛ̀,
\q1 bɛ̀ í yie nkɛ tũ̀nnɛ ku kuɔ́.
\q1
\v 11 Kɛ yɛ̃̀ mmutɔ̃ndiɛmù kù do dɔ̀ɔ̀ mù,
\q1 bɛ̀ do yɑ̀ tìì diɛtì kó dimɑ̀ɑ̀.
\b
\q1
\v 12 Kuyie ndo dɔ̀ɔ̀mu tidiɛtì bɛ yɛmbɛ̀ nuɔ mmiɛkɛ,
\q1 Esibiti tenkɛ̀ Soɑ̃ɑ̃ tempɛ̃ miɛkɛ.
\q1
\v 13 Kuù do kèétɛ́ dɑ̀mɛ́ɛ̀rì kɛ̀ bɛ̀ɛ séntɛ́,
\q1 kɛ̀ mɛniɛ ncómmú kɛ́ndò nkuduotí.
\q1
\v 14 Kɛ̀ kù níí mbɛ̀ ni nɛ̀ diwɛtirì kuyie,
\q1 kɛyènkɛ̀ kɛ̀ dì mbɛ̀ mí muhɑ̃ɑ̃́.
\q1
\v 15 Kɛ̀ kùu dennɛní mɛniɛ ndipèrì miɛkɛ,
\q1 kɛ̀ mɛ̀ɛ pɔ̃ntɛ́ mɛdiɛ̀ nkɛ̀ bɛ̀ɛ yɑ̃̀.
\q1
\v 16 Kuù do yɑtɛ́ dipèrì dikpɑ́ɑ̀ cuokɛ̀ kɛ̀ mɛniɛ ncóúnní mɛdiɛ̀,
\q1 kuù do dènnɛní mɛniɛ nkɛ̀ mɛ̀ɛ puɔ̃́ sikondɑkɛsí nɛ̀ ikó ndiɛyì kɔ̃mɛ.
\q1
\v 17 Nɛ̀ mɛmmɛ kɛ̀ bɛ̀ nsɔkɛ́ kɛ cɑɑ̀ri Kuyie,
\q1 kɛ yetírí Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kpɛti tɛdɔnkpetɛ̀ ĩ́nkɛ̀.
\q1
\v 18 Nɛ̀ bɛ yɛ̀mmɛ̀ miɛkɛ kɛ̀ bɛ̀ ìínko Kuyie mmiɛkɛ,
\q1 kɛ kù bèkú tidiitì bɛ̀ dɔ́ tì.
\q1
\v 19 Kɛ̀ bɛ̀ n wɑ́tìrì Kuyie nkɛ tú:
\q1 Kuyie mbo nɑ kɛ́ ti duɔ́ ndikpɑ́ɑ̀ diì mmiɛkɛ mudiì kɛ̀ ti diɑ̀?
\q1
\v 20 Ntɛ kù potɛ́mɛ̀ dipèrì kɛ̀ mɛniɛ nni mpuunní kɛ pũɔ̃̀ nyikó kɔ̃mɛ,
\q1 kù bo nɑ kɛ ti duɔ́ mmudiì nɛ̀ imɑɑnnɑɑ̀?
\q1
\v 21 Kɛ̀ ti Yiɛ̀ nKuyie ti kèè kɛ̀ ku miɛkɛɛ pɛikɛ Sɑkɔbu yɑɑ̀bí,
\q1 kɛ́fɑ̃ntɛ mɛdiɛ̀ kɛ́tuɔ nyIsidɑyɛɛribɛ.
\q1
\v 22 Bɛ̀ í yie mmɛ̀ɛ̀ kpɛ́í nku kpɛti,
\q1 bɛ̀ í tɑ̃́mɛ̀ kɛ dò nkù bo bɛ̀ dɛɛtɛ́.
\q1
\v 23 Mɛmmɛ kù pɛ́immɛ̀ yɛwɛtɛ̀,
\q1 kɛ́kpetɛ́ yɛwɛtibòrɛ̀,
\q1
\v 24 kɛ́cṹũnní mɑ́nnì,
\q1 kɛĩ́nkɛ̀ kó mudiì mmu kù do bɛ̀ duɔnnímɛ̀.
\q1
\v 25 Bɛmbɛ bɛnìtìbɛ̀ kɛ̀ bɛ̀ɛ di bɛnitidiɛbɛ̀ kó mudiì,
\q1 kɛ̀ kù mbɛ̀ duɔ̀ mudiì bɛ̀ dɔ́ mɛ̀ɛ̀ botí.
\q1
\v 26 Kɛ̀ Kuyie nduɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu fuutɛ,
\q1 nɛ̀ ku kó tikpetì miɛkɛ kɛ̀ kùu duɔ́ nkɛ̀ kubɑkù cɑ̃̀nku kó kuyɑɑkùu fuutɛ.
\q1
\v 27 Kɛ̀ kùu cṹũnní imɑɑ mbɛ cuokɛ̀ kɛ̀ ì nsũ kɛ dò mmubirímú,
\q1 kɛ́tɔní yɛpɛ̀pɛ́rɛ̀ kɛ̀ yɛ̀ nsũ dɑ̀mɛ́ɛ̀rì kó mubirímú dòmmɛ̀.
\q1
\v 28 Kɛ̀ Kuyie nduɔ́ nkɛ̀ yɛ̀ nduò bɛ kɑrì
\q1 kɛ ncóú cóú kɛ́fitɛ́ bɛ touti.
\q1
\v 29 Kɛ̀ bɛ̀ɛ di bɛ̀ dɔ́mɛ̀ kɛ́nsɑ̀nnɛ̀,
\q1 kɛ̀ kùu bɛ̀ duɔ́ mbɛ yɛ̀mmɛ̀ kó mudiì.
\q1
\v 30 Kɛ̀ bɛ̀ nkpɑɑ́ kɛ mu nyí mù dɛ,
\q1 kɛ̀ dɛ kó tidiitì nkpɑɑ́ bo bɛ nɔ̀ miɛkɛ,
\q1
\v 31 Kɛ̀ Kuyie mmiɛkɛɛ bɛ yɛ̀,
\q1 kɛ̀ kùu kuɔ yɛdɑkperɛ̀,
\q1 nɛ̀ bɛdɑpɑ̀mbɛ̀ Isidɑyɛɛribɛ cuokɛ̀.
\b
\q1
\v 32 Bɑ́ nɛ̀ mɛmmɛ kɛ̀ bɛ̀ nsɔkɛ́ kɛ cɑɑri,
\q1 bɛ̀ í nyie nkɛ́ntɑ̃́ Kuyie ndɔ̀ɔ̀ tìì diɛtì.
\q1
\v 33 Mɛmmɛ kɛ̀ Kuyie mbɛ̀ fùùtɛ muyɑɑ́ nkɛ̀ bɛ̀ɛ kú,
\q1 kɛ̀ mɛyɛi mbɛ̀ do kɛ kṹntɛ́ bɛ fòmmu.
\q1
\v 34 Kɛ̀ Kuyie mbɛ̀ potɛ́ dìì mɔ̀nnì bɛ̀ɛ kù wɑmmú,
\q1 kɛ́wɛ̃ɛ̃tɛní ku bíɛ́kɛ̀, kɛ́cokɛ́ní ku borɛ̀,
\q1
\v 35 kɛ́dentɛní Kuyie nkuù do túmɛ̀ bɛ kó dipèrì,
\q1 kunku kùù bɑkɛ́ kɛĩ́nkɛ̀ nɛ̀ kɛtenkɛ̀ kuù tumɛ̀ bɛ kóo donti.
\q1
\v 36 Kɛ nɛ́ nku cií,
\q1 kɛ kù nɑ̀ɑ́ nsiyɑ́ɑ̀bìsí mɑ́ɑ̀.
\q1
\v 37 Bɛ yɛ̀mmɛ̀ do í fííkú ku ĩ́nkɛ̀,
\q1 bɛ̀ í mpĩ́ nkù bɛ̀ dɔ̀ɔ̀nɛ̀ mɛ̀ɛ̀ tɑummɛ̀.
\q1
\v 38 Nɛ̀ ku sémmɛ̀ diɛmɛ̀ kpɛ́í nkɛ̀ kù mbɛ̀ cĩ́ɛ̃́mmu,
\q1 bɑ́ kù í mbɛ̀ kùɔ kɛ́deè,
\q1 kucɛ mɛ̀pɛ́u kɛ́ mbɛ̀ mɔ̀kɛnɛ̀ mɛminnímɛ̀
\q1 bɑ́ kù í nyóu kɛ̀ ku miɛkɛɛ bɛ̀ yɛ̀ mɛdiɛ̀.
\q1
\v 39 Kù do yɛ̃́mu bɛ̀ tumɛ̀ bɛnìtìbɛ̀ mbɛ,
\q1 kɛ do mmuyɑɑ́ kɛ yóó pɛ̃ɛ̃tɛ́ kɛ̀ dɛ̀ɛ deè.
\b
\q1
\v 40 Kɛ̀ bɛ̀ɛ yetɛ ku kpɛti kucɛ mɛ̀pɛ́u dikpɑ́ɑ̀ miɛkɛ,
\q1 kɛ́mpɛ́íkùnko ku miɛkɛ kucɛ mɛ̀pɛ́u tɛdɔnkpetɛ̀ ĩ́nkɛ̀.
\q1
\v 41 Kɛ̀ bɛ̀ nsɔkɛ́ kɛ beú Kuyie,
\q1 kɛ íinko ku miɛkɛ kunku kùù bɛ̀ te bɛmbɛ Isidɑyɛɛribɛ.
\q1
\v 42 Bɛ̀ í ndenniní Kuyie nwɛ̃rímú kpɛ́í,
\q1 bɛ̀ í nkpɑɑ́ yɛ̃́ kù bɛ̀ dɛɛtɛ́ dìì yiè nɛ̀ bɛ dootitɔbɛ̀.
\q1
\v 43 Bɛ̀ í kpɑɑ́ yɛ̃́ kuù do dɔ̀ɔ̀mɛ̀ tidiɛtì Esibiti,
\q1 nɛ̀ kù do dɔ̀ɔ̀ mɛ̀ɛ̀ bɛnkùmɛ̀ Soɑ̃ɑ̃ tempɛ̃.
\q1
\v 44 Bɛ̀ í kpɑɑ́ yɛ̃́ kù do cèètɛmɛ̀ ikó nkó mɛniɛ kɛ̀ mɛ̀ɛ nɑɑ́ mmɛyĩ̀ĩ̀,
\q1 kɛ̀ Esibiti kɔbɛɛ mɛ yĩɛ̃kɛ muyɑ̃̀ɑ̃̀.
\q1
\v 45 Kù do duɔ́mmɛ̀ kɛ̀ sikonsɑpoo yɛ̀nní kɛ́ mbɛ̀ dɔmmù,
\q1 kɛ̀ yɛcɛdɑkɛ̀ɛ píɛ nkɛ cɑkɛ dihɛì.
\q1
\v 46 Kɛ̀ fɛcofɛɛ cɑ́ɑ́kɛ́ bɛ diitì,
\q1 kɛ̀ yɛcɑ́dúɔ̀ ndɛ́útóo bɛ ɔ̀ùtì kó mucɔ̃́ntimu.
\q1
\v 47 Kɛ̀ fɛtɑɑfɛ̀ mɑ́tɑ̃́rɛ̀ɛ cɑkɛ bɛ tie mbɛ̀ tu dɛ̀ fínyĩ̀,
\q1 kɛ̀ fɛtɑdiɛ̀fɛ̀ɛ kuɔ dɛtie mbɛ̀ tu dɛ̀ Sìkòmɔ́ɔ̀.
\q1
\v 48 Kɛ̀ fɛtɑɑfɛ̀ mɑ́tɑ̃́rɛ̀ɛ kuɔ bɛ wũɔ̃,
\q1 kɛ̀ fɛtɑpíɛ̀fɛ̀ɛ kuɔ bɛ nɑɑcɛ̃nti.
\q1
\v 49 Kɛ̀ ku miɛkɛɛ bɛ̀ pɛikɛ mɛsɑ̀ɑ̀,
\q1 kɛ́fɑ̃ntɛ kɛ́ bɛ̀ tùɔ nkɛ̀ dɛ̀ nyóù mɛdiɛ̀,
\q1 kɛ̀ kùu bɛ̀ duɔnní ku tɔ̃rɛ̀ yɛ̀ɛ̀ kɔ̀ù kucɛ̃nku.
\q1
\v 50 Ku miɛkɛ do bɛ̀ yɛ̀mu kɛ́tontɛ́,
\q1 bɑ́ kù í mbɛ̀ coo,
\q1 kɛ́ bɛ̀ bɔntɛ́ mutenkṹṹ nyɛimu,
\q1
\v 51 kɛ́potɛ́ bɛ̀ɛ̀ kó dimɑ̀ɑ̀ tu Mpo bɛmɔu Esibiti,
\q1 bɛ̀ɛ̀ kó dimɑ̀ɑ̀ do tú bɛketibɛ̀ Kɑmmu\f + \fr 78:51 \fr*\fk Kɑmmu: \fk*\ft Kɑmmu tu Nɔwee kó ibí kó dɛ̀mɑrɛ̀ ndɛ̀, ò do bɔntɛ́ dɛ̀ kusĩ̀nkù, o nɑɑ̀ mmɔntɛ́ dìì mɔ̀nnì.\ft*\f* kó kuwuɔ mmiɛkɛ.
\q1
\v 52 Kɛ̀ kùu dennɛ ku nìtìbɛ̀ onìtì ɔ̃ɔ̃ dennɛmɛ̀ o pe,
\q1 kɛ́ mbɛ̀ cɛ̃mmú onìtì ɔ̃ ncɛ̃mmúmɛ̀ o wũɔ̃ dikpɑ́ɑ̀ miɛkɛ.
\q1
\v 53 Kɛ̀ kù mbɛ̀ cɛ̃mmú bɛ́ù bɑ́ bɛ̀ í nyĩɛ̃̀kù,
\q1 kɛ̀ mɛniɛ mpɔ̃ntɛ́nɛ̀ bɛ dootitɔbɛ̀.
\b
\q1
\v 54 Kɛ̀ kùu bɛ̀ tɑnnɛ́ bɛ ɛì kù cɑ̃̀ńnɛ́ dì bɛ kpɛ́í,
\q1 ku tɑ̃sɑ̀ɑ̀rì kù fìètɛ dì nɛ̀ ku wɛ̃rímú.
\q1
\v 55 Kɛ̀ kùu bɛti yɛbotɛ̀ yɛ̀ɛ̀ do dɛ̀ bo,
\q1 kɛ́berí kɛtenkɛ̀ kɛ́ bɛ̀ totí,
\q1 kɛ̀ Isidɑyɛɛribɛ tiekɛ bɛ cɛ̃́ĩ kɛ́mbo.
\q1
\v 56 Nɛ̀ mɛmmɛ kɛ̀ bɛ̀ nyíinko Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku miɛkɛ,
\q1 kɛ́yetɛ ku kpɛti,
\q1 bɛ̀ í ndɑkɛ ku kuɔ́ kpɛti.
\q1
\v 57 Kɛ̀ bɛ̀ɛ dɛ́tɛ́nɛ̀ Kuyie mbɛ yɛmbɛ̀ kɔ̃mɛ,
\q1 kɛ́ nkù soú kɛ í ndò nhɑ́ nɑ kɛ́ mbɛ̀ tɑ̃́,
\q1 mutɑ̃mmù mùù í fĩ mmɛsɑ̀ɑ̀ mu kɔ̃mɛ.
\q1
\v 58 Kɛ̀ bɛ̀ nfeu yɛtɔ̀rɛ̀ kɛ íinkoo Kuyie mmiɛkɛ,
\q1 kɛ feu yɛbɔkɛ̀ kɛ̀ dɛ̀ kù yóù.
\q1
\v 59 Kɛ̀ Kuyie ndɛ̀ yɑ̀ kɛ̀ kù miɛkɛɛ pɛikɛ,
\q1 kɛ̀ kùu pɛ̃ nyIsidɑyɛɛribɛ pɑ́íí.
\q1
\v 60 Kɛ̀ dɛɛ̀ nte kɛ̀ kùu ítɛ́ ku kɑ̀rì Sidoo,
\q1 di tou kù do bo dì bɛnìtìbɛ̀ cuokɛ̀.
\q1
\v 61 Kɛ̀ kùu yóu kɛ̀ ibotí tɛì kònnɛ̀ ku tɑummɛ̀ tɔu,
\q1 dìì bɛnkú ku diɛtì nɛ̀ ku wɛ̃rímú
\q1 kɛ̀ dìi tɑ bɛ dootitɔbɛ̀ nɔu miɛkɛ.
\q1
\v 62 Kɛ̀ kùu yóu kɛ̀ bɛ̀ nkɔù ku nìtìbɛ̀,
\q1 ku miɛkɛ kɛɛ̀ do yɛ̀ ku kó bɛnìtìbɛ̀ kù te bɛ̀.
\q1
\v 63 Kɛ̀ muhɑ̃ɑ̃́ ncɔ́útɛ́ bɛdɑcɛ̃mbɛ̀,
\q1 kɛ̀ bɛporicɛ̃mbɛ̀ɛ pɑɑ̀ bɛ dɑɑbɛ̀.
\q1
\v 64 Kɛ̀ ikuɔ́ nìùbɛ̀ɛ kú mudoò miɛkɛ,
\q1 bɑ́ bɛkúpobɛ̀ í nkuɔ́.
\b
\q1
\v 65 Kɛ̀ ti Yiɛ̀ nKuyie nyítɛ́ kɛ́ndò nkù do yɛ̃̀ nkɛ duɔ́,
\q1 okpɑ̀rìnuɔnti ɔ̃ɔ̃ yɑ̃̀ mɛnɑɑ̀ nkɛ́muɔ́ kɛ̀ mɛ̀ɛ̀ íimmɛ̀ o kɔ̃̀ntì.
\q1
\v 66 Kɛ̀ bɛ̀ ncooti kɛ̀ kù tũ nkɛ poti,
\q1 kɛ̀ bɛ̀ɛ dì ifɛi sɑ̃́ɑ̃̀.
\q1
\v 67 Kɛ̀ kùu dootóo Sosɛfu kó tɛcĩ́ɛ̃̀tɛ̀,
\q1 kɛ́yetɛ kù bo tɑ̃ɑ̃tɛ́mɛ̀ Efɑdɑimmu kó kuwuɔ.
\q1
\v 68 Kɛ nɛ́ tɑ̃ɑ̃tɛ́ Sudɑɑ kó kuwuɔ,
\q1 Siyɔ̃ɔ̃ tɑ̃rì kù dɔ́ dì.
\q1
\v 69 Kù dɛ nfìí nku cĩ́ɛ̃̀tɛ̀ kɛ̀ tɛ okùmɛ̀ mmɑ̀nnɛ̀ yɛtɑ̃diɛyɛ̀,
\q1 kɛ́ndò nkɛtenkɛ̀ dòmmɛ̀ kɛ fííkú sɑ̃́ɑ̃̀.
\b
\q1
\v 70 Kuù tɑ̃ɑ̃tɛ́ ku kóo tɔ̃ntì Dɑfiti,
\q1 koò dɛ̀ìtɛní mupecɛ̃mmu miɛkɛ.
\q1
\v 71 Ò do cɛ̃mmú ipe nyi kɛ̀ kùu ò dɛ̀ìtɛní,
\q1 kòò bo ncɛ̃mmú ku nìtìbɛ̀ Sɑkɔbu yɑɑ̀bí,
\q1 nɛ̀ Isidɑyɛɛribɛ kù te bɛ̀.
\q1
\v 72 Kɛ̀ Dɑfiti mbɛ̀ cɛ̃mmù nɛ̀ mɛyɛ̀mmɛ̀ mɛmɔu,
\q1 kɛ́ mbɛ̀ ni kɛ̀ dɛ̀ dò nsɛ́i.
\c 79
\s1 Ti dɛɛtɛ́ ti tɑ mɛsémmɛ̀ miɛkɛ nkɛ
\pi1
\v 1 Asɑfu kó fɛyɛ̀nfɛ̀.
\b
\q1 Áú Kuyie! Yɛbotɛ̀ yɛɛ̀ do ɑ nìtìbɛ̀ tenkɛ̀.
\q1 Kɛ sɑ̃ũ nhɑ cɛ̃sɑ̀ɑ̀tɛ̀,
\q1 kɛ pɔ̀ntɛ Sedisɑdɛmmu kòò nɑɑ́ tidobontì.
\q1
\v 2 Kɛ kùɔ ɑ kó bɛtɔ̃mbɛ̀ kɛ dɔúnko kɛ̀ timɑncòntì bɛ̀ cɔ̀,
\q1 ɑ kɔbɛ nɑɑ́ ntikpɑsĩ̀ntì kó mudiì mmu.
\q1
\v 3 Kɛ̀ bɛ yĩ̀ĩ̀ ncòú kɛ pɔ̃ntɛ́ mɛniɛ nkɔ̃mɛ kɛ fitɛ́ Sedisɑdɛmmu,
\q1 kɛ̀ bɛ̀ duɔ́ bɑ́ òmɔù í bo wèè bo bɛ̀ kũnnɛ́.
\q1
\v 4 Kɛ̀ ti pɛɛtitɔbɛ̀ ti sɑ̃́ɑ̃́,
\q1 bɛ̀ɛ̀ ti fitɛ́ kɛ̀ bɛ̀ ti sènkɛ̀rì kɛ ti dɑú.
\b
\q1
\v 5 Ti Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ miɛkɛ do?
\q1 Dɛ̀ yó ndɑ yóùmu kɛ dɑ cɔ́ú nsɑ̃́ɑ̃̀ muhɑ̃ɑ̃́ nkɔ̃mɑɑ̀?
\q1
\v 6 Yóu kɑ̀ɑ miɛkɛɛ do ibotí tɛì ìì í dɑ yɛ̃́,
\q1 nɛ̀ yɛkpɑ̀ɑ̀tìyɔ yɛ̀ɛ̀ í yu ɑ yètìrì.
\q1
\v 7 Kɛ yɛ̃́ bɛɛ̀ pɔ̀ntɛmɛ̀ Sɑkɔbu yɑɑ̀bí,
\q1 kɛ cɑ̀kɛ Isidɑyɛɛribɛ tenkɛ̀.
\q1
\v 8 Bútínnɛ́ ti yɛi mmɛkótímɛ̀,
\q1 nɛ̀ ɑ mɔkɛmɛ̀ mɛnitisémmɛ̀ wɛ̃ɛ̃tɛní mɛcɑ̃ɑ̃ nti bíɛ́kɛ̀,
\q1 ti nɑɑ́ mbɛsénnìbɛ̀ mbɛ.
\q1
\v 9 Yɑ̀ɑ̀ ti dɛɛtɛ́ fɔ̃́ nKuyie nti dɛɛtíwè,
\q1 ɑ yetìsɑ̀ɑ̀rì bɑ́ɑ́ cɑkɛ mɛ̀ɛ̀ kpɛ́í,
\q1 ũtɛ́ ti yɛi nkɛ́ ti dɛɛtɛ́ kɛ́dɛ́úkùnnɛ ɑ yètìrì.
\q1
\v 10 Bɑ́ɑ́ yóu kɛ̀ bɛ̀ɛ̀ í tũ nfɔ̃́ nKuyie nkɛ̀ bɛ̀ɛ yĩ́:
\q1 Yé Kuyie mbɛ̀ tũ nkù bo dɛ̀?
\q1 Dɔɔ̀ kɛ̀ bɛ̀ɛ bɑntɛ́ ɑ pɛ̀ìtɛmɛ̀ ɑ kó bɛtɔ̃mbɛ̀ bɛ̀ kùɔ bɛ̀,
\q1 kɛ̀ tí dɛ̀ yɑ̀ nɛ̀ ti nuɔ.
\q1
\v 11 Keè tikpetíntì kó yɛdɑbùò,
\q1 ɑ kpeńnìmu, nkɑ̃nkɛ́ bɛ̀ dɔ́nɛ̀ bɛ̀ mukṹṹ.
\q1
\v 12 Ti Yiɛ̀ nKuyie nti pɛɛtitɔbɛ̀ dɑ sɑ̃̀ḿmú yɛ̀ɛ̀ sɑ̃́ɑ̃m̀bɛ̀,
\q1 ɑ yɛ̀ mbɛ̀ fɔ̀ɔ́ nkucɛ mɛ̀yiekɛ̀.
\b
\q1
\v 13 Tínti ɑ nìtìbɛ̀, tínti ɑ kó kupecɛ̃nku ɑ cɛ̃mmù kù,
\q1 ti sɑ̃ntí fɔ̃́ nwe
\q1 ti yó ndɑ sɑ̃ntímu nɛ̀ ti bo mbomɛ̀.
\c 80
\s1 Kuyie ntìímmɛ̀ Isidɑyɛɛribɛ bɛ ɛì
\d Bɛdèmbɛ̀ kóo kótì Asɑfu dentĩ̀nnì dìè nfɛ̀ɛ̀ yɛ̀nfɛ̀ kɛ bie nkubómbonku.
\b
\q1
\v 1 Isidɑyɛɛribɛ kóo cɛ̃nti, kéntɛ́ kɛ́keè,
\q1 fɔ̃́ nwèè kpɑ̀ɑkɛ Sosɛfu yɑɑ̀bí kupecɛ̃nku kɔ̃mɛ,
\q1 fɔ̃́ nwèè bɑkɛ́ bɛĩ́nkɛ̀mbɑ̀rìbɛ̀, bɛnkɛ ɑ kpetì!
\q1
\v 2 Bɛnkɛ ɑ wɛ̃rímú Efɑdɑimmu nɛ̀ Bɛnsɑmɛɛ nɛ̀ Mɑnɑnsee bɛ wuɔ mmiɛkɛ,
\q1 kɔtɛní kɛ́ ti dɛɛtɛ́!
\q1
\v 3 Duɔ́ nkɛ̀ tí wɛ̃tɛní,
\q1 ti wéntɛ́ fɛnɔnsɑ̀ɑ̀fɛ̀ kɛ́ ti dɛɛtɛ́.
\b
\q1
\v 4 Ti Yiɛ̀ nKuyie fɔ̃́ Mpɑkɛdɑɑ,
\q1 dɛ yó nkɑ̃́ɑ̃́kɛ́ dɛ kɑ̀ɑ miɛkɛɛ bonkɛ?
\q1 Ti bo ndɑ bɑ́ɑ́ nkɑ̀ɑ miɛkɛɛ ti pɛ́ìɑ̀?
\q1
\v 5 A kɔbɛ nɔnniɛti tiì nɑɑ́ mbɛ diì,
\q1 bɛ nɔnniɛti tiì piɛku yɛɔbɛ kɛ̀ bɛ yɔ̃̀.
\q1
\v 6 Ti pɛɛtitɔbɛ̀ nɛ́ kpɑ ntíì kpɛ́í,
\q1 ti dootitɔbɛ̀ ti dɑúmu.
\q1
\v 7 Kuyie nfɔ̃́ Mpɑkɛdɑɑ duɔ́ nkɛ tí wɛ̃tɛní,
\q1 ti wéntɛ́ fɛnɔnsɑ̀ɑ̀fɛ̀ kɛ́ ti dɛɛtɛ́.
\b
\q1
\v 8 A ti uutɛ́ní Esibiti nwe fínyĩ̀ kó mutie kɔ̃mɛ
\q1 kɛ bɛ̀ti yɛbotɛ̀ kɛ mù fìí.
\q1
\v 9 Kɛ píe mmu tɑkɛ́ kɛ̀ mu cĩɛ̃̀ ntɑ kɛtenkɛ̀,
\q1 kɛ̀ mù wùɔ nkɛ pitɛ́ kɛtenkɛ̀.
\q1
\v 10 Kɛ̀ mu dɛ́ɛ̀ ndɑ̀tínnɛ́ yɛtɑ̃rɛ̀,
\q1 kɛ̀ mu bɑkɛ yɛ̀ kɛ pɛ̃ɛ̃tɛ́ sɛ́tìrì kó dɛtie ndiɛrɛ̀.
\q1
\v 11 Kɛ̀ mu bɑkɛ wùɔ nkɛ tùɔ̀kɛ dɑ̀mɛ́ɛ̀rì,
\q1 kɛ̀ ibɑkɛ pɑ̀nyì yɛ̀ kɛ tùɔ̀kɛ kukó nhEfɑdɑti.
\b
\q1
\v 12 Dɛ̀ yĩ́mɛ kɑ̀ɑ kɛ̃tɛ́ kuperí kɛ̀ bɛcɛpɛ̃̀mbɛ̀ tɔ̃̀ũ̀ mu bɛ?
\q1
\v 13 Kɛ̀ dikpɑ́ɑ̀ kó sidoó cɑ́ɑ́ mmu fɑ̃ɑ̃̀tì,
\q1 kɛ̀ tikpɑsĩ̀ntì mù kɛ̃ĩ.
\q1
\v 14 Fɔ̃́ nKuyie Mpɑkɛdɑɑ wɛ̃ɛ̃tɛní,
\q1 mboní kɛĩ́nkɛ̀ kɛ́wéntɛ́ní kɛ́yɑ̀ tìì mù tùɔ̀kɛní,
\q1 kɛ́ mù dɛɛtɛ́.
\q1
\v 15 Fɔ̃́ɔ̃̀ mù fìí nnɛ̀ ɑ nɔ̀ùtɛ̀.
\q1 A nkɑ̃nkɛ́ ɑ birɛ dɛ̀ɛ̀ tu mutie ɑ fìí ḿmù,
\q1 kɛ mù kpénkùnnɛ.
\b
\q1
\v 16 N Yiɛ̀ nKuyie mbɛ̀ kɔ̃ṹmu ɑ tie kɛ mù cɔ́u.
\q1 Bɛ̀ɛ̀ mù cɔ́u wéntɛ́ bɛ fɛnɔnsĩ̀nfɛ̀ kɛ̀ bɛ̀ɛ kú.
\q1
\v 17 A wɛ̃rímú mbo okpɑ̀ɑ̀tì wèè bo ɑ bɑkù yoú o ĩ́nkɛ̀,
\q1 onìtì ɑ kpénkùnnɛ wè ɑ mɔ́mmuɔ.
\q1
\v 18 Ti tɛ̃́nkɛ bɑ́ɑ́ dɑ dɛ́tɛ́nɛ̀,
\q1 ɑ ti fòùkùnnɛ kɛ̀ tí ndɑ sɑ̃ntí.
\q1
\v 19 Ti Yiɛ̀ nKuyie Mpɑkɛdɑɑ duɔ́ nkɛ̀ tí wɛ̃tɛní,
\q1 ti wéntɛ́ fɛnɔnsɑ̀ɑ̀fɛ̀ kɛ ti dɛɛtɛ́.
\c 81
\s1 Isidɑyɛɛribɛ dòmmɛ̀ kɛ́yie nKuyie nkpɛti
\d Bɛdèmbɛ̀ kóo kótì Asɑfu yɛ̀nfɛ̀ bɛ̀ dìè nfɛ̀ kɛ biennɛ̀ kukùtìdùkù.
\b
\q1
\v 1 Diwɛ̀ì ndi bo kɛ̀ di nyíútí Kuyie nkpɛ́í nkuù tu ti kó muwɛ̃rímú,
\q1 piɛtɛnɛ̀ Kuyie nSɑkɔbu do tũ nkù.
\q1
\v 2 Bentɛnɛ̀ dɛbémbénnɛ̀ kɛ́dentɛ̀,
\q1 bentɛnɛ̀ yɛbɑ̀rɛ̀ nɛ̀ tikùtìdùùtì nɛ̀ tibómbonti.
\q1
\v 3 Yiénnɛ̀ yɛtɑ̃tɛhe otɑ̃ɑ̃pɑ̀nwè kó dibɑnni,
\q1 kòò còḿmú dɛdɑ̀nnɛ̀ ĩ́nkɛ̀ dí nheu, ti kó dibɑnni ndi.
\q1
\v 4 Dɛ̀ tu ikuɔ́ nyi tínti Isidɑyɛɛribɛ ti kpɛ́í,
\q1 dinùù ndi Kuyie nSɑkɔbu do tũ nkù dɔú ndì.
\q1
\v 5 Mɛtɑummɛ̀ mmɛ kù dɔ̀ɔ̀nɛ̀mɛ̀ Sosɛfu yɑɑ̀bí,
\q1 bɛ̀ yɛ̀nní dìì mɔ̀nnì kɛ bo dokɛ́nɛ̀ Esibiti.
\b
\q1 Bɛ̀ dɛ nkèè tinɑ́ɑǹtì bɛ̀ mu nyí kèè tì diyiè mɑrì tìì tu:
\q1
\v 6 N dɑ toutɛ́mu ditɔu cɛ̃́ɛ̃́rì,
\q1 kɑ̀ɑ nɔ̀ùtɛ̀ fĩ́ĩnko dimɑ́mmùyɑ́ɑ̀.
\q1
\v 7 Kɑ̀ɑ tɑ mɛyɛǹcɑɑ̀rìmɛ̀ miɛkɛ kɛ n kuɔ́nnɛ̀ kɛ̀ n dɑ dɛɛtɛ́,
\q1 kɛ dɑ bɛ́innɛ̀nní fɛtɑpíɛ̀fɛ̀ miɛkɛ,
\q1 kɛ dɑ yɑ̀ɑ́kɛ́ tɛbintɛ bɛ̀ tu tɛ̀ Mɛdibɑ tɛ borɛ̀.
\q1
\v 8 Díndi n nìtìbɛ̀ kentɛ́nɛ̀ kɛ̀ n di cɑu,
\q1 díndi Isidɑyɛɛribɛ kɛ̀ di do bo n kéntɛ́!
\q1
\v 9 Dibɔɔ̀ nɑ bɑ́ mbo di kóo mɔù cĩ́ɛ̃̀tɛ̀,
\q1 di kóo mɔù nɑ bɑ́ nninku dɛtɛrɛ̀ mɑrɛ̀ ììkɛ̀ kɛ dɛ̀ bɑ̀ɑ́.
\q1
\v 10 Míì tu di Yiɛ̀ nKuyie,
\q1 míì di dènnɛní Esibiti,
\q1 ɑɑtɛnɛ̀ di nɔ̀ kɛ̀ n yɛ̀ píɛ.
\b
\q1
\v 11 N nìtìbɛ̀ mɛ n yí n kèńtɛ́,
\q1 Isidɑyɛɛribɛ í dɔ́ n kpɛti.
\q1
\v 12 Kɛ̀ m mɛ mbɛ̀ yóu kɛ̀ bɛ̀ kèrí bɛ tookperí kó kucɛ,
\q1 kɛ tũ mbɛ mɔ́mmɔmbɛ bɛ̀ dɔ́mɛ̀.
\q1
\v 13 Díndi n nìtìbɛ̀ Isidɑyɛɛribɛ,
\q1 kɛ̀ di do bo n kéntɛ́,
\q1 kɛ̀ Isidɑyɛɛribɛ do ntũ n kó kucɛ.
\q1
\v 14 N nɑ nfɛ̀ikùnnɛmu bɛ dootitɔbɛ̀ bɑ̀mbɑ̀,
\q1 n nɑ nhɑ̃nnɛ́mu tɛnɔ̀ùtɛ̀ bɛ dùɔ̀ntɔbɛ̀.
\b
\q1
\v 15 Bɛ̀ɛ̀ nìí nKuyie mbɛ̀ nɑ nnìnkúmu ku ììkɛ̀ kɛ́ kù bɑ̀ńtɛ̀,
\q1 kɛ̀ Isidɑyɛɛribɛ kó diwɛ̀ì mbo sɑ̃́ɑ̃̀.
\q1
\v 16 Mí mbɛ Yiɛ̀ nKuyie nnɑ mbɛ̀ piúnɛ̀mu tidisɑ̀ɑ̀tì,
\q1 kɛ̀ bɛ̀ɛ di mɛcekùɔ̀ nkɛ́nsɑ̀nnɛ̀.
\c 82
\s1 Kuyie nyóó bekɛ́nɛ̀mɛ̀ bɛbeényɛibɛ
\pi1
\v 1 Asɑfu kó fɛyɛ̀nfɛ̀.
\b
\q1 Kuyie nyìtɛ́ kɛ còḿmúmu ku kó ditĩ̀nnì cuokɛ̀,
\q1 kɛ bekùnɛ̀ bɛ̀ɛ̀ tu bɛbeémbɛ̀.
\b
\q1
\v 2 Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑ̀rimɛ̀ tibeéntì,
\q1 nɛ̀ di bo nkómmúmɛ̀ bɛyɛibɛ?
\q1
\v 3 Di ntũ nyikuɔ́ yɛ̃mmɛ̀ kɛ́nduɔ̀ bɛcĩ̀rìbɛ̀ nɛ̀ iciribí bɛ̀ dò nkɛ́nte dɛ̀,
\q1 di mbekùnɛ̀ bɛsénnìbɛ̀ nɛ̀ bɛcĩ̀rìbɛ̀ dɛ̀ bèkúmɛ̀.
\q1
\v 4 Ndɛɛrínnɛ̀ bɛsénìbɛ̀ nɛ̀ bɛcĩ̀rìbɛ̀,
\q1 fietɛnɛ̀ bɛ bɛyɛibɛ nɔu miɛkɛ.
\b
\q1
\v 5 Di í yɛ̃́ dɛ̀mɑrɛ̀, di í ciì,
\q1 di kérí dibiìnnì miɛkɛ nkɛ,
\q1 kɛ̀ kɛtenkɛ̀ kó dipũũ dimɔu sɑ̃̀ntɛ̀.
\q1
\v 6 M bɛ́immu kɛ tú: Di tú kɛĩ́nkɛ̀ kɔbɛ mbɛ,
\q1 kɛ tú di mɔu Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kó ibí.
\q1
\v 7 Di yóó kú bɛnìtìbɛ̀ kɔ̃mɛ mmɛ,
\q1 di yóó duómu dimɔu sikpɑ̀ɑ̀tìbìí kɔ̃mɛ.
\b
\q1
\v 8 Ti Yiɛ̀ nKuyie nyítɛ́ kɛ́bekɛ́nɛ̀ kutenkù,
\q1 kɛ yɛ̃́ fɔ̃́ɔ̃̀ temɛ̀ yɛbotɛ̀ yɛmɔu.
\c 83
\s1 Bɛ̀ fɛ̃́ũnkomɛ̀ Kuyie nkɔbɛ kɛ̀ bɛ̀ bɑ̀ɑ́ nKuyie
\d Bɛ̀ dìèmmɛ̀ Asɑfu yɛ̀nfɛ̀.
\b
\q1
\v 1 Áú Kuyie! Bɑ́ nduɔ́ kɑ́rɛ́,
\q1 bɑ́ ndò nyúó! Bɑ́ mbúútóo.
\b
\q1
\v 2 A dootitɔbɛ̀ bɛɛ̀ burì,
\q1 ɑ níim̀bɛ̀ bɛɛ̀ bɑɑti ɑ kpɛ́í.
\q1
\v 3 Bɛ̀ dɑ̀kiimu ɑ nìtìbɛ̀ kpɛ́í,
\q1 bɛ̀ wɑnti kɛ́do ɑ kɔbɛ ɑ kɑ̃nkɛ́ bɛ̀mbɛ mudoò.
\q1
\v 4 Bɛ̀ nɑ̀ɑ́mmu kɛ tú:
\q1 tí kɔtɛnɛ̀ kɛ́kuɔ bɛ kó kuwuɔ nkumɔu,
\q1 kɛ̀ Isidɑyɛɛribɛ kó diyètìrìi kpɑ́nnɛ́.
\q1
\v 5 Bɛ̀ dɑ̀kɛmu kɛ wɛ̃nnɛ́ dinùù,
\q1 bɛ̀ dɔ̀ɔ̀nɛ̀ bɛtɔbɛ̀ mɛtɑummɛ̀ kɛ bo dokɛ́nɛ̀ fɔ̃́ nwe.
\q1
\v 6 Edomiibɛ nɛ̀ Isimɑyɛɛribɛ,
\q1 Mɔɑbiibɛ nɛ̀ Akɑdiibɛ.
\q1
\v 7 Kebɑdiibɛ nɛ̀ Amɔdiibɛ nɛ̀ Amɑdesiibɛ,
\q1 Fidisitɛ̃ɛ̃bɛ nɛ̀ Tiiri ɛì kɔbɛ.
\q1
\v 8 Bɑ́ Asidii kɔbɛ bɛ̀ wɛ̃nnɛ́mu,
\q1 bɛ̀ dɔ́ kɛ́teennɛ̀ Dɔti yɑɑ̀bí nyi.
\b
\q1
\v 9 Dɔɔ̀ bɛ ɑ do dɔ̀ɔ̀mɛ̀ Mɑndiyɑ̃ɑ̃ ɛì kɔbɛ,
\q1 Sisedɑɑ nɛ̀ Yɑbinni ɑ bɛ̀ dɔ̀ɔ̀mɛ̀ kukó nKisɔ̃ɔ̃.
\q1
\v 10 Adɔdi bintɛ bɛ̀ do dɛ nku bɛmɔu,
\q1 kɛ́nɑɑ́ ntikùtì kɛtenkɛ̀.
\q1
\v 11 Bɛ kó sikpɑ̀ɑ̀tìbìí dɔɔ̀ si ɑ do dɔ̀ɔ̀mɛ̀ Odɛbu nɛ̀ Sebu,
\q1 kɛ̀ bɛ kó bɛkpɑ̀ɑ̀tìbɛ̀ kpɛrɛ ndònnɛ̀ Sebɑ nɛ̀ Sɑdimmunɑ
\q1 bɛ kpɛrɛ do dòmmɛ̀.
\q1
\v 12 Bɛmbɛ bɛ̀ɛ̀ nɑ̀ɑ́ nkɛ tú:
\q1 Tí fietɛnɛ̀ Kuyie nkó kɛtenkɛ̀ kɛ́tiekɛ,
\q1
\v 13 Kuyie n tũ nkù,
\q1 ɑ yóu kɛ̀ tɛfɔ̀dɔ́ntɛ̀ɛ bɛ̀ tùótɛ́,
\q1 kuyɑɑkùu bɛ̀ tɔ tifɔ̃kpɛ̃ti tɛ̃mɛ̀.
\q1
\v 14 Cɔ́útɛ́ bɛ muhɑ̃ɑ̃́ nhɔ̃ɔ̃ cɔ́útɛ́ mɛ̀ɛ̀ botí kutúúkù,
\q1 dɛ́útóo bɛ fɛhɑ̃ɑ̃dɛɛ̀nfɛ̀ ɔ̃ɔ̃ dɛ́útóomɛ̀ ditɑ̃rì.
\q1
\v 15 Bɛti bɛ nɛ̀ kuyɑɑkù nɛ̀ fɛtɑɑfɛ̀,
\q1 donnɛ́ bɛ kɔ̃m̀bùɔ̀tì nɛ̀ kuyɑɑkperíkù.
\q1
\v 16 Ãnnɛ́ bɛ ifɛi,
\q1 kɛ̀ dɛ̀ɛ yie nkɛ̀ bɛ̀ dɑ wɑmmú fɔ̃́ nti Yiɛ̀ nKuyie.
\q1
\v 17 Yóu kɛ̀ bɛ̀ɛ di ifɛi,
\q1 kɛ̀ bɛ kɔ̃m̀bùɔ̀tì nduò sɑ̃́ɑ̃̀,
\q1 yóu kɛ̀ dɛ̀ɛ bɛ̀ di,
\q1 kɛ̀ bɛ̀ɛ kú.
\q1
\v 18 Kɛ̀ bɛ̀ɛ bɑntɛ́ kɛ do nfɔ̃́ɔ̃̀ mɑ́ɑ̀ yètìrì tu ti Yiɛ̀ nKuyie,
\q1 kɛ̀ fɔ̃́ɔ̃̀ bɑkɛ́ kɛtenkɛ̀ nɛ̀ kɛĩ́nkɛ̀.
\c 84
\s1 N yɑ́ɑ́mmu Kuyie ncĩ́ɛ̃̀tɛ̀
\d Bɛdèmbɛ̀ kóo kótì dìèmmɛ̀ Kodee bí kó fɛyɛ̀nfɛ̀ bɛ̀ dìè nfɛ̀ kɛ biennɛ̀ kubómbonku.
\b
\q1
\v 1 N Yiɛ̀ nKuyie Mpɑkɛdɑɑ n dɔ́mu ɑ cĩ́ɛ̃̀tɛ̀ mɛdiɛ̀.
\q1
\v 2 N yɑ́ɑ́mmu ɑ cĩ́ɛ̃̀tɛ̀ dɑ̀nkù mutɑrimù kɛ̀ dɛ̀ nh ɔɔtí,
\q1 m búɔ́ fɔ̃́ nwe kɛ̀ diwɛ̀ì m bo kɛ̀ ǹ yiú.
\q1
\v 3 Inɔribí cekù tiyĩ́ɛ̃̀ntì ɑ cĩ́ɛ̃̀tɛ̀ ntɛ,
\q1 sikpɑ̃̀ncɛ́ndéi dɔunko siyiè nkɛ pɛ̃ṹ si bí ɑ wũɔ̃tɔ̀rɛ̀ borɛ̀ ndɛ.
\q1 Fɔ̃́ nti Yiɛ̀ nKuyie Mpɑkɛdɑɑ,
\q1 Kuyie nfɔ̃́ɔ̃̀ tu nkóo kpɑ̀ɑ̀tì.
\q1
\v 4 Bɛ̀ɛ̀ bo ɑ cĩ́ɛ̃̀tɛ̀ dɛ̀ bɛ̀ nɑɑtimu kɛ̀ bɛ̀ dɑ sɑ̃ntí sɑ̃́ɑ̃̀.
\q1
\v 5 Dɛ̀ nnɑɑti bɛ̀ɛ̀ ĩkú Kuyie nyĩ́nkɛ̀,
\q1 icɛ imɔu tũ̀ntɛmu bɛ kpɛ́í
\q1
\v 6 Kɛ̀ bɛ̀ pɛ̃nkɛ́ tɛdɔntɛ̀ kpetɛ̀ ĩ́nkɛ̀,
\q1 mɛniɛ mbuotɛ́,
\q1 kɛ̀ fɛĩ́nkɛ̀mbóntɑɑfɛ̀ɛ ni kɛ́bónkùnnɛ kɛtenkɛ̀.
\q1
\v 7 Kɛ̀ bɛ̀ nkérí kɛ̀ bɛ wɛ̃rímú yɛ́útí,
\q1 kɛ̀ bɛ̀ɛ tuɔkɛnɛ̀ Siyɔ̃ɔ̃ Kuyie mborɛ̀.
\b
\q1
\v 8 Ti Yiɛ̀ nKuyie Mpɑkɛdɑɑ kéntɛ́ m bɑ́ɑmmìi,
\q1 fɔ̃́ nKuyie nSɑkɔbu do tũ nkù n keènɛ̀.
\q1
\v 9 Áú Kuyie! Fɔ̃́ɔ̃̀ tu ti kó kudɔpìkù,
\q1 wéntɛ́ní kɛ́yɑ̀ ɑ tɑ̃ɑ̃tɛ́ wè kɛ cɑ̃̀ńnɛ́.
\b
\q1
\v 10 Kɛ̀ n yĩ ɑ cĩ́ɛ̃̀tɛ̀ miɛkɛ diyiè dìmɑ́ɑ̀,
\q1 dɛ̀ pɛ̃ɛ̃tɛ́mu m bo yĩ́mɛ̀ yɛwe tɛkɔupíítɛ̀ (1000) kupíkù tɛkù.
\q1 Kɛ̀ n còḿmú fɔ̃́ Kuyie nkùù n te ɑ cĩ́ɛ̃̀tɛ̀ bòrì,
\q1 dɛ̀ wenninɛ̀mu m bo mbomɛ̀ bɛyɛibɛ cĩ́ɛ̃̀tɛ̀.
\b
\q1
\v 11 Ti Yiɛ̀ nKuyie ntu ti kó kuwenniku nku,
\q1 ti kó kudɔpìkù,
\q1 Kuyie mpɑ̃ɑ̃mu mɛsɑ̀ɑ̀ nnɛ̀ tikpetì,
\q1 kù ɔ̃ɔ̃ í mmɔ̀ntɛ diwɛ̀ì bɛ̀ɛ̀ borimɛ wenni.
\q1
\v 12 Dɛ̀ nnɑɑti wèè dɑ duɔ́ nho mɑ́ɑ̀,
\q1 fɔ̃́ nti Yiɛ̀ nKuyie Mpɑkɛdɑɑ.
\c 85
\s1 Kuyie nyĩmɛ̀ diwɛ̀ì bo mbonɛ̀ bɛ̀ɛ̀ kù dɔ́
\d Bɛdèmbɛ̀ kóo kótì dìèmmɛ̀ Kodee bí kó fɛyɛ̀nfɛ̀.
\b
\q1
\v 1 Ti Yiɛ̀ nKuyie nhɑ bɛnkɛmu ɑ dɔ́mɛ̀ ɑ tenkɛ̀,
\q1 kɛ kpɛ̃nnɛ́ní Sɑkɔbu yɑɑ̀bí ìì do tú tidɑɑtì.
\q1
\v 2 A dɛ̀ìtɛmu ɑ nìtìbɛ̀ kó mɛyɛi,
\q1 ɑ ũtɛ́mu bɛ yɛi mmɛmɔu.
\q1
\v 3 A bónkùnnɛmu ɑ miɛkɛ,
\q1 ɑ miɛkɛ domu.
\b
\q1
\v 4 Kuyie nfɔ̃́ nti dɛɛtíwè ti tɛ̃́nnɛ́ní,
\q1 bónkùnnɛ ɑ miɛkɛ kɛ̀ɛ̀ ti pɛikɛ.
\q1
\v 5 A miɛkɛ bo nhɑ̃ kɛ ti cɔ́ú nsɑ̃́ɑ̃̀?
\q1 A miɛkɛ bo mbo ti ĩ́nkɛ̀ nɛ̀ ti yɑɑ̀bíoɑ̀?
\q1
\v 6 Fɔ̃́ɔ̃̀ í yóó wɛ̃tɛ kɛ ti fòùkùnnɑɑ̀?
\q1 Tínti ɑ nìtìbɛ̀ kɛ ti pɛ́tɛ́ ɑ kó diwɛ̀ìɑ̀?
\q1
\v 7 Ti Yiɛ̀ nKuyie nti bɛnkɛ ɑ ti dɔ́mɛ̀,
\q1 kɛ ti dɛɛtɛ́.
\b
\q1
\v 8 N yó nkémmúmu n Yiɛ̀ nKuyie nyó n nɑ́kɛ́ tì,
\q1 kɛ́ yɛ̃́ kù nɑ̀kɛ́mɛ̀ ku kɔbɛ kɛ tú bɛ̀ bo mbo diwɛ̀ì miɛkɛ
\q1 bɛ̀ nɛ́ nyɛ̃́ kɛ bɑ́ɑ́ wɛ̃tɛ kɛ́tɑ dɛyɛinkpɛrɛ mudɔɔ̀rìmù.
\q1
\v 9 Kù dɛɛrímu bɛ̀ɛ̀ kù dé sɑ̃́ɑ̃̀,
\q1 ku kó tikpetì yóó wɛ̃tɛ kɛ́buotɛ́mu ti tenkɛ̀.
\b
\q1
\v 10 Mɛdɔɔ̀rìmɛ̀ sɑ̀ɑ̀mɛ̀ nɛ̀ timɔ́mmɔnti dɛ̀ wɛ̃̀tɛnímu,
\q1 dɛ̀ɛ̀ wenni nɛ̀ diwɛ̀ì kɛ̀ dɛ̀ buotɛ́.
\q1
\v 11 Timɔ́mmɔnti kó kuye yìɛ̀ní kɛtenkɛ̀ nkɛ,
\q1 dɛ̀ɛ̀ wenni kɛ̀ dɛ̀ cuutiní dɛĩ́nkɛ̀.
\q1
\v 12 Ti Yiɛ̀ nKuyie nyóó ti duɔ́mmu mɛtuɔ̀,
\q1 kɛ̀ tidiitìi pɛitɛ́ kɛtenkɛ̀.
\q1
\v 13 Timɔ́mmɔnti yó nnimu ku ììkɛ̀,
\q1 kɛ keri kɛ̀ ku tũ.
\c 86
\s1 Nh ɔ̃ mbo mɛyɛǹcɑɑ̀rìmɛ̀ miɛkɛ kɛ́kuɔ́nnɛ̀ fɔ̃́ nwe
\pi1
\v 1 Dɑfiti bɑ̀ńtɛ̀mɛ̀ Kuyie.
\b
\q1 N Yiɛ̀ nKuyie n kéntɛ́ kɛ́cɔutɛ́ m bɑ́ɑmmìi,
\q1 n tú ocĩ̀rì nwe, osénnìwè.
\q1
\v 2 N tú wèè dɔ̀ɔ̀ri wènwe ɑ dɔ́mɛ̀, ɑ nni nkɑ̃nkɛ́,
\q1 mí nhɑ kóo tɔ̃ntì, n dɛɛtɛ́,
\q1 n yĩkú fɔ̃́ɔ̃̀ ĩ́nkɛ̀ fɔ̃́ nwèè n te.
\q1
\v 3 N Yiɛ̀ nKuyie nhɑ́ n kuɔ́ mmɛsémmɛ̀,
\q1 n tṹṹ nkɛ kuɔ̀nnɛ̀ fɔ̃́ nwe.
\q1
\v 4 Nɑ́ríkùnnɛ n yɛ̀mmɛ̀ mí nhɑ kóo tɔ̃ntì,
\q1 n Yiɛ̀ nKuyie m búɔ́ fɔ̃́ nwe.
\q1
\v 5 N Yiɛ̀ nKuyie nhɑ sɑ̀mu kɛ cĩ́ɛ̃́mmu,
\q1 kɛ kuɔ̀ mmɛsémmɛ̀ mɛdiɛ̀ mbɛ̀ɛ̀ dɑ kuɔ̀nnɛ̀.
\q1
\v 6 N Yiɛ̀ nKuyie nkéntɛ́ m bɑ́ɑmmu,
\q1 kéntɛ́ n dɑbònnì n dɑ kuɔ̀nnɛ̀ dì.
\q1
\v 7 Kɛ̀ mɛyɛǹcɑɑ̀rìmɛ̀ n sɔ̃̀ńkɛ́ nh ɔ̃ɔ̃ kuɔ́nnɛ̀ fɔ̃́ nwe, kɑ̀ɑ n keènɛ̀.
\b
\q1
\v 8 Dibɔɔ̀ mɑrì í dɑ dònnɛ̀,
\q1 fɔ̃́ nti Yiɛ̀ nKuyie,
\q1 òmɔù bɑ́ɑ́ nɑ kɛ́dɔɔ̀ ɑ dɔɔri dɛ̀.
\q1
\v 9 Fɔ̃́ɔ̃̀ dɔ̀ɔ̀ yɛbotɛ̀ yɛmɔu,
\q1 yɛ̀ kɔ̀rinímu kɛ bo nínkú fɔ̃́ nti Yiɛ̀ nKuyie nhɑ ììkɛ̀,
\q1 kɛ́dɛ́úkùnnɛ ɑ yètìrì.
\q1
\v 10 Kɛ yɛ̃́ ɑ dɛumɛ̀ kɛ dɔɔri tidiɛtì,
\q1 fɔ̃́ɔ̃̀ mɑ́ɑ̀ tu Kuyie.
\b
\q1
\v 11 N Yiɛ̀ nKuyie m bɛnkɛ ɑ cɛ kɛ̀ nni ntũ nhɑ kó timɔ́mmɔnti,
\q1 yɔkùnnɛ n yɛ̀mmɛ̀ kɛ̀ nní dɑ dé.
\q1
\v 12 N Yiɛ̀ nKuyie n yó ndɑ sɑ̃ntímu nɛ̀ n yɛ̀mmɛ̀ mɛmɔu,
\q1 n yó ndɛ́úkùnkomu ɑ yètìrì sɑ̃́ɑ̃̀.
\q1
\v 13 Kɛ yɛ̃́ ɑ sɑ̀ɑ̀ ndɛumɛ̀ n yĩ́nkɛ̀,
\q1 kɑ̀ɑ dɛɛtɛ́ n wɛ̃nnì kɛ́ n dennɛní kudɔnkù.
\b
\q1
\v 14 Kuyie, sipɔɔ yɛmbɛ̀ bɛɛ̀ n dintɛ́,
\q1 bɛnitiyonkubɛ bɛɛ̀ m munnɛ́ kɛ bo n kuɔ bɑ́ bɛ̀ í dɑkɛ ɑ kpɛ́í.
\q1
\v 15 Fɔ̃́ nti Yiɛ̀ nKuyie nhɑ sɑ̀mu kɛ mɔkɛ onìtì kó mɛsémmɛ̀.
\q1 Kɑ̀ɑ miɛkɛ boo kɑ̀ɑ dɔ́ onìtì mɛdiɛ̀,
\q1 kɛ tú timɔ́mmɔnti yiɛ̀.
\q1
\v 16 Wɛ̃ɛ̃tɛní m bíɛ́kɛ̀ kɛ́ n kuɔ́ mɛsémmɛ̀,
\q1 duɔ́ mmí nhɑ kóo tɔ̃ntì muwɛ̃rímú,
\q1 n dɛɛtɛ́ mí nhɑ kóo nitipotɔ̃ntì birɛ.
\q1
\v 17 Dɔɔ̀ tidiɛtì n kpɛ́í tìì bɛnkú ɑ n dɔ́mɛ̀,
\q1 kɛ̀ n dootitɔbɛ̀ɛ yɑ̀ kɛ̀ ifɛi bɛ̀ pĩ,
\q1 N Yiɛ̀ nKuyie n teennɛ̀ kɛ nɑ́ríkùnnɛ n yɛ̀mmɛ̀.
\c 87
\s1 Siyɔ̃ɔ̃ nwe iwuɔ nyimɔu yóó yɛ̀nnímɛ̀
\pi1
\v 1 Kodee bí kó fɛyɛ̀nfɛ̀.
\b
\q1 Ti Yiɛ̀ nKuyie mpũ̀ṹtɛ́ Sedisɑdɛmmu ditɑ̃sɑ̀ɑ̀rì ĩ́nkɛ̀ nkɛ.
\q1
\v 2 Siyɔ̃ɔ̃ ɛì ndi ti Yiɛ̀ nKuyie ndɔ́mɛ̀,
\q1 kɛ̀ dɛ̀ pɛ̃ɛ̃tɛ́ yɛhɛkɛ̀ tɛyɛ̀ yɛmɔu Sɑkɔbu yɑɑ̀bí bo yɛ̀.
\b
\q1
\v 3 Fɔ̃́ nKuyie nkó dihɛì,
\q1 bɛ̀ dɑ sɑ̃ntí kɛ̀ dɛ̀ dɛumu ɑ yetìrì kpɛ́í.
\b
\q1
\v 4 Kɛ̀ Kuyie ndɔ̀: N yóó kɑɑmmu bɛ̀ɛ̀ n yɛ̃́,
\q1 kɛ́kɑɑnnɛ̀ Esibiti kɔbɛ nɛ̀ Bɑbidɔnni kɔbɛ
\q1 nɛ̀ Fidisii ɛì kɔbɛ nɛ̀ Tiiri ɛì kɔbɛ nɛ̀ Etiopii ɛì kɔbɛ
\q1 kɛ dɔ̀ bɛ̀ pɛitɛ́ diɛ.
\q1
\v 5 Siyɔ̃ɔ̃ ɛì diì yóó nɑɑ́ nyɛbotɛ̀ yɛmɔu kpɛri,
\q1 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kuù yóó dì mɑɑ́.
\b
\q1
\v 6 Ti Yiɛ̀ nKuyie nkuù yóó kɑɑ nyɛbotɛ̀,
\q1 kɛ́wɑ̃ri ku pɑ́tíri miɛkɛ kɛ dɔ̀:
\q1 bɛ̀ bɛ̀ pɛitɛ́ Sedisɑdɛmmu nwe.
\b
\q1
\v 7 Bɛhɑubɛ̀ nɛ̀ bɛdèmbɛ̀ kɛ̀ bɛ̀ ndiè kɛ dɑ sɑ̃ntí kɛ tú
\q1 bɛ kpɛrɛ dɛmɔu bonní ɑ borɛ̀ ndɛ.
\c 88
\s1 N duúnnɛ̀ mukṹṹ mmu
\d Bɛdèmbɛ̀ kóo kótì Kodee dentĩ̀nnì dìèmmɛ̀ Emɑnni Esidɑiti botí kou keutɛ́ fɛ̀ɛ̀ sɑ́útìyɛ̀nfɛ̀ kɛ eunɛ̀ fɛtɑ̃rifɛ.
\b
\q1
\v 1 N Yiɛ̀ nKuyie n dɛɛtíwè, nh ɔ̃ ntṹṹ nkɛ yu fɔ̃́ nwe,
\q1 kɛ̀ dɛ̀ bììtɛ nní ndɑ kuɔ̀nnɛ̀.
\q1
\v 2 Keè m bɑ́ɑmmìi,
\q1 kéntɛ́ n dɑbònnì.
\b
\q1
\v 3 Dɛ̀ bi n wɛ̃nnì ndi,
\q1 n duúnnɛ̀ kudɔnkù nku.
\q1
\v 4 Bɛ̀ n wèńtɛ́ ocíì nwe,
\q1 n wɛ̃rímú í kpɑɑ́.
\q1
\v 5 Nɛ̀ bɛ̀ɛ̀ duɔ́ kudɔnkù tíì wɛ̃ ndidɔ́ù,
\q1 n sɑ̃̀ɑ̃́tɛ́nɛ̀ ocíì nwe wèè bo kudɔnkù,
\q1 ɑ yɛ̃̀ nwèè kpɛ́í,
\q1 ɑ nɔ̀ùtɛ̀ dɛ̀tɛ́nɛ̀ wè.
\q1
\v 6 A n dootóo difɔ̃̀tìrì cũmpuri ndi,
\q1 dibiìnnì diɛrì miɛkɛ kudɔnkù.
\q1
\v 7 A miɛkɛ kɛmɔu kɛɛ̀ do n yĩ́nkɛ̀ kɛ n yɔ̃̀ntɛ,
\q1 ɑ yɛ̃ĩti timɔu sɑ̃rì n yĩ́nkɛ̀ nkɛ.
\q1
\v 8 Kɑ̀ɑ n dɛ́tinnɛ n kɔbɛ kɛ̀ n nɑɑ́ nyisíɛ́ bɛ kpɛ́í
\q1 n kpetímu, n yí mɔkɛ m bo yɛ̀ dɛ̀.
\q1
\v 9 N tɑ mɛfɛ̃́ṹtímɛ̀ mmɛ kɛ kɔmmú kɛ̀ n nuɔ ntiikɛ.
\b
\q1 N Yiɛ̀ nKuyie n kuɔ̀nnɛ̀ fɔ̃́ nwe yɛwe yɛmɔu,
\q1 n yuo n nɔu fɔ̃́ɔ̃̀ bíɛ́kɛ̀.
\q1
\v 10 Bɛcíríbɛ̀ kpɛ́í nkɛ ɑ dɔɔrimɛ̀ tidiɛtɑ̀ɑ̀?
\q1 Bɛdɔmbìùbɛ̀ bo entɛ kɛ dɑ sɑ̃ntɑɑ̀?
\q1
\v 11 Bɛ̀ɛ̀ bo difɔ̃̀tìrì miɛkɛ bɛ̀ nɑ̀ɑ́ nhɑ kó mɛsɑ̀ɑ̀ nkpɛ́ínɑ́ɑ̀?
\q1 Yɑ́ɑ̀ bɛ̀ɛ̀ duɔ́ kudɔnkù bɛ̀ bo nɑ́kɛ́ ɑ túmɛ̀ timɔ́mmɔnti yiɛ̀?
\q1
\v 12 Bɛ̀ɛ̀ bo dibiìnnì miɛkɛ bɛ̀ bo bɑntɛ́ ɑ kó tidiɛtɑ̀ɑ̀?
\q1 Wèè tɑ kudɔmbìùkù ò bo nɑ kɛ́bɑntɛ́ ɑ wetímɑ̀ɑ̀?
\b
\q1
\v 13 N Yiɛ̀ nKuyie m búɔ́ fɔ̃́ nwe kɛ dɑ kuɔ̀nnɛ̀,
\q1 bɑ́ dìì kṹnweńnì kɛ̀ m bɑ́ɑmmu tùɔ̀kɛmu ɑ borɛ̀.
\q1
\v 14 Dɛ̀ yĩ́mɛ n Yiɛ̀ nKuyie nkɑ̀ɑ n yetɛ,
\q1 bɑ nte kɑ̀ɑ í dɔ́ n dɑ yɑ̀.
\q1
\v 15 N tú osénnìwè nwe nɛ̀ m bɛmmɛ̀,
\q1 n yí dɛ́tirìnɛ̀ mukṹṹ,
\q1 ɑ donnɛ́ n kɔ̃m̀bùɔ̀tì nti,
\q1 n tɛ̃́nkɛ í yɛ̃́ m bo tìì miɛkɛ.
\q1
\v 16 A miɛkɛ kɛɛ̀ n cɔ̀útɛ́ kɛ n tùɔ,
\q1 ɑ yɛ̃ĩti tiì n sũ̀ṹ n kɛ̀ n yĩɛ̃kɛ tinɑ́ɑǹtì.
\q1
\v 17 Yɛwe yɛmɔu ɑ yɛ̃ĩti tiì n fitɛ́ kɛ n dɑ̀tínnɛ́ mɛniɛ nkɔ̃mɛ,
\q1 kɛ n dɑ̀tínnɛ́ m mɔu dimɔ̀nnì dìmɑ́ɑ̀.
\q1
\v 18 Kɑ̀ɑ n dɛ́tinnɛ n nɛ́pobɛ̀ nɛ̀ n nɛititɔbɛ̀,
\q1 kɛ̀ n kɔbɛ kó dimɑ̀ɑ̀ n dɛ́tɛ́nɛ̀.
\c 89
\s1 Kuyie ndo dɔúnnɛ̀ dìì nùù Dɑfiti dì borɛ?
\d Bɛ̀ dìèmmɛ̀ Etɑ̃ɑ̃ Esidɑiibɛ botí kou kó fɛyɛ̀nfɛ̀.
\b
\q1
\v 1 N Yiɛ̀ nKuyie n yó ndièmmu kɛ nɑ́ɑ́ nhɑ n dɔ̀ɔ̀ mɛ̀ɛ̀ sɑ̀ɑ̀.
\q1 N yóó nɑ́kɛ́mu tidɑpùtɔ̃ntì tìì tũ̀nní ɑ dɔɔrimɛ̀ timɔ́mmɔnti.
\q1
\v 2 A bɛ́immu kɛ tú ɑ kó tinìtì bomu sɑ̃́ɑ̃̀,
\q1 kɑ̀ɑ kó timɔ́mmɔnti fííkú tiwɛtì dòmmɛ̀.
\b
\q1
\v 3 Kɑ̀ɑ dɔ̀ɔ̀nɛ̀ mɛtɑummɛ̀ ɑ tɑ̃ɑ̃tɛ́ wè,
\q1 ɑ kóo tɔ̃ntì Dɑfiti,
\q1 koò dɔúnnɛ̀ dinùù kɛ tú
\q1
\v 4 ɑ yóó fíí nho kó kuwuɔ nsɑ̃́ɑ̃̀,
\q1 kɛ̀ tikpɑ̀tì mbo weè kó tɛcĩ́ɛ̃̀tɛ̀ nɛ̀ ti bo mbomɛ̀.
\b
\q1
\v 5 Ti Yiɛ̀ nKuyie nkɛĩ́nkɛ̀ kɔbɛ dɑ sɑ̃ntímu ɑ diɛtì kpɛ́í,
\q1 ɑ kɔbɛ tíkú kɛ sɑ̃ntí fɔ̃́ nwe,
\q1 ɑ dɔɔri mɛ̀ɛ̀ kpɛ́í nhɑ bɛ́i ntì.
\q1
\v 6 Òmɔù í bo kɛĩ́nkɛ̀ miɛkɛ wèè mɑ̀nnɛ̀ ti Yiɛ̀ nKuyie,
\q1 kɛĩ́nkɛ̀ kɔbɛ miɛkɛ òmɔù í dɑ dònnɛ̀.
\q1
\v 7 Kuyie nhɑ tɔ̃rɛ̀ kɑ̀rimɛ̀ yɛ̀ dé fɔ̃́ nwe,
\q1 bɛ̀ɛ̀ dɑ ɔrí bɛ̀ í dɑ dɑɑti.
\q1
\v 8 Ti Yiɛ̀ nKuyie Mpɑkɛdɑɑ, we nkpeńnì kɛ dɑ dònnɛ̀,
\q1 ti Yiɛ̀ nKuyie nhɑ kpeńnìmu kɛ̀ timɔ́mmɔnti dɑ fitɛ́.
\q1
\v 9 Fɔ̃́ɔ̃̀ bɑkɛ́ dɑ̀mɛ́ɛ̀rì koò ĩkù,
\q1 kɛ̀ yɛnɛ́fĩ̀nfĩ̀rɛ̀ pùùní fɔ̃́ɔ̃̀ ɔ̃ɔ̃ yɛ̀ bónkùnnɛ.
\q1
\v 10 Fɔ̃́ɔ̃̀ do nɑ̀ntɛ Esibiti kóò ũtirɛ kɛ́kuɔ,
\q1 fɔ̃́ɔ̃̀ do cíɛ nhɑ dootitɔbɛ̀ nɛ̀ ɑ kó muwɛ̃rímú.
\q1
\v 11 Fɔ̃́ɔ̃̀ te kɛĩ́nkɛ̀ kɛ̀ fɔ̃́ɔ̃̀ te kɛtenkɛ̀,
\q1 kɛtenkɛ̀ nɛ̀ kɛ kpɑ̀tì timɔu fɔ̃́ɔ̃̀ dɛ̀ fìí.
\q1
\v 12 Kubɑkù cɑ̃̀nku kó kutempɛ̃ nɛ̀ kubɑkù yoú kɔku fɔ̃́ɔ̃̀ dɛ̀ dɔ̀ɔ̀.
\q1 Bɛ̀ɛ̀ bo Tɑbɔɔ tɑ̃rì nɛ̀ bɛ̀ɛ̀ bo Ɛdimɔɔ kpɛri bɛ̀ dɛ̀úkùnko fɔ̃́ɔ̃̀ yètìrì.
\q1
\v 13 Fɔ̃́ɔ̃̀ kó kubɑkù kpeńnì kɑ̀ɑ nɔ̀ùtɛ̀ mɔ̀kɛ muwɛ̃rímú,
\q1 kɑ̀ɑ nɔ ndɛmɔu.
\q1
\v 14 A beéntì wennimu kɛ síɛ́ kɛ̀ tiì te kɑ̀ɑ kpɑ̀tì fìíkú.
\q1 A ni ɑ ɛì kɛ dì dɔɔri mɛsɑ̀ɑ̀ mmɛ nɛ̀ timɔ́mmɔnti.
\q1
\v 15 Dɛ̀ nnɑɑti kubotí kùù dɑ íútí fɔ̃́ nti Yiɛ̀ nKuyie.
\q1 Bɛ̀ bo nkérí ɑ kó kuwenniku miɛkɛ.
\q1
\v 16 Nɛ̀ ɑ kpɛ́í nkɛ bɛ̀ yɑ̃̀nkunɛ̀mɛ̀ diwɛ̀ì yɛwe yɛmɔu,
\q1 ɑ wetí mɛ̀ɛ̀ kpɛ́í nte kɛ̀ bɛ̀ sɑ̃ntí bɛ mɑ́ɑ̀.
\q1
\v 17 Fɔ̃́ɔ̃̀ te kɛ̀ bɛ yètɛ̀ feí kɛ̀ bɛ̀ mɔ̀kɛ̀ muwɛ̃rímú,
\q1 ɑ kó mɛsɑ̀ɑ̀ mmɛɛ̀ bɛ̀ yɛ̀útí muwɛ̃rímú.
\q1
\v 18 Ti Yiɛ̀ nKuyie nfɔ̃́ɔ̃̀ te wèè tu ti kó kudɔpìkù,
\q1 wèè te Isidɑyɛɛribɛ weè te ti kóo kpɑ̀ɑ̀tì.
\b
\q1
\v 19 A do bɛnkɛmu ɑmɑ́ɑ̀ ɑ nìtìbɛ̀ kɛ́ bɛ̀ bɛ́innɛ̀ kɛ dɔ̀:
\q1 Míì duɔ́ n kó mɛteèmmɛ̀ okpɑ̀rìnuɔnti,
\q1 míì dɛ̀ìtɛ n nìtìbɛ̀ miɛkɛ odɑpɑ̀ɑ̀ koò dɛ̀úkùnnɛ.
\q1
\v 20 N yɑ̀mu Dɑfiti n kóo tɔ̃ntì,
\q1 koò còú mmɛkùɔ̀ nkoò cɑ̃̀ńnɛ́.
\q1
\v 21 N yó nhò pĩ̀ḿmu nɛ̀ n nɔ̀ùtɛ̀,
\q1 míì ò kɑ̀nnɛ tikpɑ̀tì
\q1 kɛ yó nhò duɔ̀ mmuwɛ̃rímú
\q1
\v 22 O dootitɔbɛ̀ bɑ́ɑ́ ò do kóò dɛ̀ɛ́tɛ́,
\q1 onitiyɛiwe bɑ́ɑ́ ò dií nyifɛi.
\q1
\v 23 Míì yó nni o ììkɛ̀ kɛ kɔùtì o dùɔ̀ntɔbɛ̀,
\q1 kɛ poti bɛ̀ɛ̀ ò nìí.
\q1
\v 24 N kó timɔ́mmɔnti nɛ̀ n sɑ̀ɑ̀ dɛ̀ yóó nhò bonɛ̀mu,
\q1 nɛ̀ n kpɛ́í nkòo wɛ̃rímú ndɛ́úkú.
\q1
\v 25 M bo duɔ́ nkòo mbɑkɛ́ Mɛditedɑndee kóo dɑ̀mɛ́ɛ̀rì,
\q1 kɛ́ntɔ kɛ́dítɛ́nɛ̀ kukó nhEfɑdɑti.
\q1
\v 26 Ò bo nni nyu kɛ tú o cicɛ,
\q1 Kuyie nkùù ò te, o kó dipèrì dìì ò dɛɛrí.
\q1
\v 27 Kɛ̀ nh ò dɔ̀ɔ̀ n kóo po,
\q1 kòo ḿpɛ̃nkù bɛkpɑ̀ɑ̀tìbɛ̀ bɛmɔu bɛ̀ɛ̀ bo kɛtenkɛ̀ ĩ́nkɛ̀.
\q1
\v 28 Kɛ̀ n kó mɛsɑ̀ɑ̀ nní nhò bonɛ̀ sɑ̃́ɑ̃̀,
\q1 mí nnɛ̀ we ti kó mɛtɑummɛ̀ bɑ́ɑ́ kṹntɛ́.
\q1
\v 29 O cĩ́ɛ̃̀tɛ̀ bɑ́ɑ́ pɑɑ̀ okpɑ̀ɑ̀tì,
\q1 kɛĩ́nkɛ̀ bo mɛ̀ɛ̀ botí sɑ̃́ɑ̃̀ o kpɑ̀tì yó mmɛ mbo.
\b
\q1
\v 30 Kòo bí mɛ ndootóo n kuɔ́,
\q1 kɛ tɛ̃́nkɛ í tũ n tié,
\q1
\v 31 Kɛ̀ bɛ̀ cɑ̀ɑ̀ri n kuɔ́,
\q1 kɛ í tũ n tɑnnɔ̀.
\q1
\v 32 M bɛ̀ ɑ̃nnɛ́ kudɔú bɛ̀ yetɛ mɛ̀ɛ̀ kpɛ́í n kpɛti,
\q1 kɛ̀ bɛ̀ɛ cuɔ́ bɛ cɑɑ̀rìmɛ̀ kó tiyɛ̃ĩti.
\q1
\v 33 N nɛ́ bɑ́ɑ́ bɛ̀ yetɛnɛ̀ n kó mɛsɑ̀ɑ̀,
\q1 m bɑ́ɑ́ yóu m bo bɛ̀ dɔ̀ɔ̀mɛ̀ m bɛ́i ntì.
\q1
\v 34 M bɑ́ɑ́ cɑkɛ m bɛ̀ dɔ̀ɔ̀nɛ̀ mɛ̀ɛ̀ tɑummɛ̀,
\q1 m bɑ́ɑ́ nɑ́kɛ́ n nùù kɛ́kpɑtɛ.
\q1
\v 35 M bɛ́immu kɛ pɑ̀rìkɛ̀ nɛ̀ n yetìsɑ̀ɑ̀rì,
\q1 m bo soutɛ́ Dɑfitɑɑ? M bɑ́ɑ́ dɛ̀ dɔ̀ɔ̀ bìtì.
\q1
\v 36 O wuɔ nyó nsɔkɛ́mu sɑ̃́ɑ̃̀,
\q1 kòo fuku mbo sɑ̃́ɑ̃̀ diyiè dòmmɛ̀.
\q1
\v 37 Otɑ̃̀nkù bo mɛ̀ɛ̀ botí tiwɛtì sɑ̃́ɑ̃̀ kɛ̀ ti ò wùó,
\q1 o kpɑ̀tì yó mmɛ ndò.
\b
\q1
\v 38 Kuyie nhɑ nɛ́ ò yetɛmu koò dootóɑ̀?
\q1 Koò yɛ̀ kɛmiɛkɛ wenwe okpɑ̀ɑ̀tì ɑ tɑ̃ɑ̃tɛ́ wèɑ̀?
\q1
\v 39 Kɛ sènkɛ̀rì fɔ̃́ nnɛ̀ ɑ kóo tɔ̃ntì di kó mɛtɑummɛ̀,
\q1 kɛ bɔ nhokpɑ̀ɑ̀tì pìì kɛtenkɛ̀ kɛ̀ dì sɑ̃ṹ.
\q1
\v 40 Kɛ buɔ́ nyiduotí ìì fitɛ́ o cĩ́ɛ̃̀tɛ̀,
\q1 kɛ pùɔ nho cɛ̃́kperì kɛ̀ sì nɑɑ́ ntidobontì.
\q1
\v 41 Kɛ̀ bɛcɛpɛ̃̀mbɛ̀ pɛ̃nkù kɛ tóú bɛ̀ dɔ́ dɛ̀,
\q1 kòo pɛɛtitɔbɛ̀ ò dɑú.
\q1
\v 42 Kɛ duɔ́ kòo dùɔ̀ntɔbɛ̀ ò nɑ,
\q1 kòo dootitɔbɛ̀ yɑ̃̀nku.
\q1
\v 43 Fɔ̃́ɔ̃̀ kùɔ okpɑ̀rìsiè kó mɛnɑtimɛ̀,
\q1 bɑ́ ɑ í ò teennɛ̀ mudoò miɛkɛ.
\q1
\v 44 Fɔ̃́ɔ̃̀ fìètɛ fɛkpɑ̀ɑ̀tìpɑ̀tìfɛ̀ o nɔu miɛkɛ,
\q1 kɛ bɔ nhokpɑ̀ɑ̀tìkɑ̀rì kɛtenkɛ̀.
\q1
\v 45 Kɛ yɑ̀ɑ̀tɛ o dɑpɑ̀ntì kó yɛwe,
\q1 koò dii nyifɛi mɛdiɛ̀.
\q1
\v 46 N Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ yóu ɑ bo nti sɔrìnɛ̀mɛ̀?
\q1 A miɛkɛ bo nhɑ̃ kɛ ti cɔ́ú muhɑ̃ɑ̃́ nkɔ̃mɑɑ̀?
\q1
\v 47 A yɛ̃́mu kɛ dò n fòmmu í dɛtóo,
\q1 ɑ dɔ̀ɔ̀ onìtì dimɔ̀nnì sɑ́m̀pɔ́rì kpɛ́í nkɛ.
\q1
\v 48 Onìtì mɔù bo wèè bo nfòù kɛ bɑ́ɑ́ kúɑ̀?
\q1 Yɑ́ɑ̀ we mbo nɑ kɛ́yentɛ́nɛ̀ o wɛ̃nnì kudɔnkù?
\q1
\v 49 N Yiɛ̀ nKuyie mmɛsɑ̀ɑ̀ nhɑ do dɔɔrimɛ̀ kɔ̀tɛ kɛ?
\q1 A do nɑ̀kɛ́ Dɑfiti kɛ dɔ̀ ɑ yó nhò dɔ̀ɔ̀ri dɛ̀ borɛ?
\q1
\v 50 Kuyie nhɑ yɛ̃́mu bɛ̀ ti diìnko ìì fɛi tínti ɑ kó bɛtɔ̃mbɛ̀.
\q1 A yɛ̃́mu kɛ dò n tɔ yɛbotɛ̀ pɛ́u ndi.
\q1
\v 51 Bɛ̀ɛ̀ í dɑ dɔ́ bɛ̀ ti sɑ̃́ɑ̃́mmu,
\q1 kɛ sɑ̃́ɑ̃́ nhɑ kóo kpɑ̀ɑ̀tì ɑ cɑ̃̀ńnɛ́ wè tipíìtì timɔu.
\b
\q1
\v 52 N Yiɛ̀ nKuyie nhɑ yètìrì ndɛu sɑ̃́ɑ̃̀.
\q1 Kɛ̀ dɛ̀ mmɛ ndò. Ami.
\c 90
\ms1 YƐSÃÃ MPÁTÍRI DINAANNÌ
\s1 Onìtì pɛ̃nkùmu kɛ̀ Kuyie nkuu í pɛ̃nkù
\r (Yɛsɑ̃ɑ̃ 90-106)
\pi1
\v 1 Mɔyiisi Kuyie nkóo nìtì kù bɑ̀ńtɛ̀mɛ̀.
\b
\q1 Kòò dɔ̀: Ti Yiɛ̀ nKuyie nnɛ̀ mɛketimɛ̀ mɔ̀nnì fɔ̃́ɔ̃̀ bɑɑ tú ti kó disɔ̀rì.
\q1
\v 2 Yɛtɑ̃rɛ̀ do í bo dìì mɔ̀nnì,
\q1 kɛtenkɛ̀ mu ndo í dɔ̀ɔ̀ kɑ̀ɑ bomu sɑ̃́ɑ̃̀ kɛ tú Kuyie.
\b
\q1
\v 3 Fɔ̃́ɔ̃̀ tɛ̃̀ńnìnko bɛnìtìbɛ̀ kɛtenkɛ̀ bɛ̀ yɛ̀nní kɛ̀ɛ̀ miɛkɛ.
\q1 Fɔ̃́ɔ̃̀ ɔ̃ɔ̃ bɛ̀ nɑ̀kɛ́ kɛ dɔ̀: Bɛnìtìbɛ̀ díndi wɛ̃tɛnɛ̀ kɛtenkɛ̀.
\q1
\v 4 A borɛ̀, yɛbie ntɛkɔupíítɛ̀ (1000) dò ndiyiè dìmɑ́ɑ̀ ndi,
\q1 kɛyènkɛ̀ kɛ̀ɛ̀ bo kɛ wennɔ́ɔ, tɛyenkɛ̀nkéétɛ̀.
\q1
\v 5 A ɔ̃ɔ̃ yɛ̀ pɛ̃ɛ̃̀mmu tidɔùntì tɛ̃mɛ̀,
\q1 tìì ɔ̃ɔ̃ pɛ̃ɛ̃tóo dikṹnweńnì dɛ kó yɛbie nyí cɑ̃́ɑ̃́nnɛ̀ timútì.
\q1
\v 6 Timútì ɔ̃ɔ̃ kótɛ́mu dikṹnweńnì kɛ pórí,
\q1 kuyuoku kɛ́mɔ́tɛ́ kɛ́kpeí.
\b
\q1
\v 7 A miɛkɛ kɛɛ̀ ti yɛ̀ kɛ̀ ti wɛ̃rímú dèè,
\q1 ɑ miɛkɛ kɛɛ̀ donnìnko ti kɔ̃m̀bùɔ̀tì.
\q1
\v 8 A wúómmu ti cɑɑ̀rìmɛ̀,
\q1 ɑ kó kuwenniku mímu ti kó yɛsɔ̀rɛ̀ yɛmɔu.
\q1
\v 9 A miɛkɛ kɛɛ̀ ti yɛ̀ kɑ̀ɑ yɑ̀ɑ̀ri ti we,
\q1 kòo nìtì ɔ̃ nyóó wei mɛ̀mɑ́ɑ̀ kòo fòmmu pɑ̃̀nkɛ deè.
\q1
\v 10 Ti fòmmu kó yɛwe í pɛ̃nkù yɛbie nsipísìyiekɛ̀,
\q1 bɛkperíbɛ̀ bɛɛ̀ tùɔ̀kù yɛbie nsipísìni,
\q1 dɛ kó yɛwe miɛkɛ yɛsṹkùyɛ̀ tu mutɔ̃mmú kpɛyɛ nyɛ nɛ̀ tihɔ̀ùtì nɛ̀ mɛsémmɛ̀,
\q1 mufòmmu pɛ̃nkɛ́mu kɛ̀ ti kérí mukṹṹ mbíɛ́kɛ̀.
\q1
\v 11 We nyɛ̃́ ɑ miɛkɛ kó kuyonku mɑmɛ̀ kɛ nɑ kɛ́ ndɑ dé?
\q1 We mbo nɑ kɛ́yĩ́ɛ̃́tɛ́ ɑ miɛkɛ cɔ́ú nkɛ mɑmɛ̀?
\q1
\v 12 Ti bɛnkɛ ti we mɑ̀mɛ̀,
\q1 kɛ̀ ti nɑ kɛ́mɔɔtɛ mɛyɛ̀mmɛ̀.
\b
\q1
\v 13 Ti Yiɛ̀ nKuyie, dɛ̀ yó nkɑ̃́ɑ̃́kɛ́ dɛ kɑ̀ɑ wɛ̃tɛní ti bíɛ́kɛ̀?
\q1 Ti kuɔ́ mmɛsémmɛ̀ tínti ɑ kó bɛtɔ̃mbɛ̀.
\q1
\v 14 Cṹũnní ɑ kó mɛsɑ̀ɑ̀ mmɛdiɛ̀ pìkɛ dikṹnweńnì,
\q1 kɛ̀ ti nyɑ̃nku nɛ̀ diwɛ̀ì ti fòmmu mumɔu miɛkɛ.
\q1
\v 15 Ti duɔ́ ndiwɛ̀ì kɛ̀ dì mmɑnnɛ̀ ɑ ti dií mmɛ̀ɛ̀ sémmɛ̀.
\q1 Ti duɔ́ nkuyɛǹnɑɑtí kɛ̀ kù mmɑnnɛ̀ ɑ ti dií nyɛ̀ɛ̀ bie nyifɛi.
\q1
\v 16 Yóu tínti ɑ kó bɛtɔ̃mbɛ̀ kɛ̀ ti yɑ̀ ɑ kó tidiɛtì,
\q1 kɛ̀ ti yɑɑ̀bíi yɑ̀ ɑ kpeńnìmɛ̀.
\q1
\v 17 Ti Yiɛ̀ nKuyie nhɑ́ ti dɔɔ̀ mɛsɑ̀ɑ̀.
\q1 Duɔ́ nkɛ̀ ti tɔ̃mmú ti dɔɔri mù nyíé,
\q1 ɛ̃ɛ̃ yóu kɛ̀ ti tɔ̃mmú ti pĩ́ mmù nyíé.
\c 91
\s1 Kuyie nti kɑ̃nkɛ́mɛ̀
\pi1
\v 1 Fɔ̃́ nwèè ɑ̃ Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kó disɔ̀rì miɛkɛ
\q1 kɛ díɛ́kɛ́ muwɛ̃rímú mumɔu yiɛ̀ nkó mɛdɛ́ɛ̀,
\q1
\v 2 Fɔ̃́ɔ̃̀ kù yu kɛ tú: N kó disɔ̀rì n kó tɛcɛ̃kpetɛ̀.
\q1 Kuyie nkùù n te n duɔ́ nkù mmɑ́ɑ̀.
\b
\q1
\v 3 Kuù dɑ dɛɛrí nɛ̀ ticùɔ̀tì bɛ̀ dɑ dìí ntì,
\q1 nɛ̀ mutenkṹṹ mmùù nɑ ndɑ tùɔ̀kɛní.
\q1
\v 4 Kuù dɑ okɛ ku fìɛ̀ti kó mɛdɛ́ɛ̀.
\q1 Kuù kó tifɛ̀tì miɛkɛ nkɛ ɑ sɔrimɛ̀.
\q1 Ku kó timɔ́mmɔnti tiì dɑ kɑ̃nkɛ́ dikɑ̃tɛpìì nɛ̀ dimɑ́tìyɑɑ̀bòrì dɛ kɔ̃mɛ.
\q1
\v 5 Bɑ́ kɛ̀ kɛyènkɛ̀ bììtɛ kufɔ̃wɑɑ́ mbɑ́ ndɑ bo ɑ í yó nyĩɛ̃̀kù ipie nyìì duòní kuyie ncuokɛ̀.
\q1
\v 6 Yoo mutenkṹṹ mmùù cèntì kɛyènkɛ̀,
\q1 nɛ̀ mumɔmmú mùù cɑ̃́nnì kɛ kɔ̀ù kuyie ncuokɛ̀.
\q1
\v 7 Kɛ̀ bɛnìtìbɛ̀ do tɛkɔupíítɛ̀ (1000) ɑ píkù,
\q1 ɑ bɑkù yoú tɛkɔupípíítɛ̀ (10000) dɛ̀mɑrɛ̀ bɑ́ɑ́ dɑ kɑ́ɑ́kɛ́.
\q1
\v 8 Nwúó nkɛ́yɑ̀ nɛ̀ ɑ nuɔ,
\q1 A yóó yɑ̀mu Kuyie nyóó yietímɛ̀ bɛyɛibɛ.
\q1
\v 9 Ti Yiɛ̀ Kuyie nkuù tu ɑ kó disɔ̀rì.
\q1 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kuù dɑ kɑ̃nkɛ́.
\q1
\v 10 Mɛyɛi mbɑ́ɑ́ dɑ tuɔkɛ,
\q1 kuyɛ̃ĩku mɑkù bɑ́ɑ́ tɔ́ɔ́nní ɑ cĩ́ɛ̃̀tɛ̀.
\q1
\v 11 Ti Yiɛ̀ nKuyie nyóó duɔ́mmu dinùù ku tɔ̃rɛ̀,
\q1 kɛ̀ yɛ̀ ndɑ bɑɑ bɑ́ kɑ̀ɑ kɔ̀ri kɛ̀,
\q1
\v 12 kɛ́ ndɑ ceúnɛ̀ ku nɔu,
\q1 bɑ́ ɑ nɑɑ̀cɛ̀tɛ̀ bɑ́ɑ́ bétɛ́ ditɑ̃́rì mɑrì.
\q1
\v 13 A bo nnɑùtì yɛcìrícìrɛ̀ nɛ̀ yɛdɑutɛ,
\q1 kɛ́ncentì yɛkpɑmɑɑ̀ nnɛ̀ iwɑ̀ɑ̀kɛ ĩ́nkɛ̀.
\b
\q1
\v 14 Kɛ̀ Kuyie mbɛ́i nkɛ dɔ̀:
\q1 A mɛ nni cɑ́ɑ́tímɛ̀ n yóó dɑ dɛɛtɛ́mu,
\q1 ɑ mɛ nni mbɑ̀ńtɛ́mɛ̀ n yó ndɑ kɑ̃nkɛ́mu.
\q1
\v 15 Kɑ̀ɑ níí n yú kɛ̀ n yie,
\q1 m bo ndɑ bonɛ̀ mɛyɛǹcɑɑ̀rìmɛ̀ miɛkɛ,
\q1 m bo dɑ dɛɛtɛ́ kɛ́ dɑ dɛ́úkùnnɛ.
\q1
\v 16 M bo duɔ́ nkɑ̀ɑ mbo kɛ́mɔntɛ,
\q1 kɛ̀ dɛ̀ ndɑ nɑɑti,
\q1 kɛ̀ n dɑ bɛnkɛ míì tumɛ̀ ɑ dɛɛtíwè.
\c 92
\s1 Bɛyɛibɛ yóó yɑ̀mu mɛyɛi kɛ̀ bɛsɑ̀ɑ̀bɛ̀ɛ yɑ̀ mɛsɑ̀ɑ̀
\d Bɛ̀ dìè nfɛ̀ɛ̀ yɛ̀nfɛ̀ tɛom̀pùtɛ̀ yiè.
\b
\q1
\v 1 Dɛ̀ wennimu ti bo nsɑ̃ntímɛ̀ ti Yiɛ̀ nKuyie,
\q1 kɛ diè nkɛ dɛ́úkùnko ku yètìrì kuù bɑkɛ́ kɛĩ́nkɛ̀ nɛ̀ kɛtenkɛ̀.
\q1
\v 2 Dɛ̀ wennimu ti bo nnɑ́ɑ́mmɛ̀ ku kó mɛsɑ̀ɑ̀ nkpɛ́í dikṹnweńnì mɔ̀nnì,
\q1 kɛ̀ dɛ̀ bììtɛ tí mpĩɛ̃kù kù dɔ̀ɔ̀rimɛ̀ kù bɛ́i ntì,
\q1
\v 3 kɛ mbie ntikùtìdùùtì nɛ̀ tibómbonti,
\q1 kɛ bie ndɛbémbénnɛ̀ tɛrɛ̀ iwɛ̃ĩ kpɛrɛ.
\b
\q1
\v 4 N Yiɛ̀ nKuyie nhɑ pĩ́ mmùù tɔ̃mmú diwɛ̀ì mu nni bonɛ̀,
\q1 ɑ dɔɔri dɛ̀ dɛɛ̀ n nɑɑti kɛ̀ n yìú.
\q1
\v 5 N Yiɛ̀ nKuyie nhɑ tɔ̃mmú dɛumu,
\q1 kɑ̀ɑ yɛntotí cũmpúrì.
\q1
\v 6 Kuyɛìnkù bɑ́ɑ́ nɑ kɛ́ dɛ̀ bɑntɛ́,
\q1 kudìɛ̀nkù bɑ́ɑ́ nɑ kɛ́ dɛ̀ yĩ̀ɛ̃́tɛ́.
\q1
\v 7 Bɛyɛibɛ ɔ̃ nkótírí timútì kɔ̃mɛ mmɛ,
\q1 kɛ̀ mɛyɛi ndɔɔ̀rìbɛ̀ bitírí,
\q1 kɛ̀ mukṹṹ nsɑ̃́ɑ̃̀ nɛ́ bɛ̀ bɑ̀ɑ kumɑ̀nku.
\q1
\v 8 N Yiɛ̀ nKuyie fɔ̃́ mmɛ mbo kɛĩ́nkɛ̀ nkɛ sɑ̃́ɑ̃̀.
\q1
\v 9 Ti Yiɛ̀ nKuyie ntɛ ɑ dootitɔbɛ̀ kɛ kɔ̃,
\q1 mɛyɛi ndɔɔ̀rìbɛ̀ bɛmɔu cíɛ́rìmu.
\b
\q1
\v 10 Fɔ̃́ɔ̃̀ n duɔ́ mmupɑɑnɑ̀ɑ̀wɛ̃rímú,
\q1 kɛ n wɑɑrɛ mɛkɔpɑ̀mmɛ̀.
\q1
\v 11 N wúómmu n dootitɔbɛ̀ dɔɔri dɛ̀ bɑ́ n yí yĩɛ̃̀kù,
\q1 kɛ yo bɛ̀ɛ̀ n dɔ́nɛ̀ mɛyɛi bɛ kó ihúu kɛ̀ dɛ̀ í n kɔɔ́nnɛ̀.
\q1
\v 12 Wèè dɔ̀ɔ̀ri Kuyie ndɔ́mɛ̀ ò dònnɛ̀ mupuommu mmu mùù ɔ̃ nsɛnti,
\q1 kɛ dònnɛ̀ Dimɑɑ kó dɛtediɛrɛ̀ bɛ̀ tu dɛ̀ sɛ́tìrì dɛ̀ɛ̀ kòtírí mɛdiɛ̀,
\q1
\v 13 dɛ̀ɛ̀ fìíkú Kuyie ncĩ́ɛ̃̀tɛ̀ miɛkɛ,
\q1 kɛ sɛ̀ńtɛ̀ kɛ yɛ̀nní tɛ dɑ̀nkù.
\q1
\v 14 Dɛ kó dɛtie nhɔ̃ mpɛímu bɑ́ kɛ̀ dɛ̀ kòtɛ́,
\q1 dɛ̀ nkpɑɑ́ píɛ́kɛ́ mɛsɛ̀mmɛ̀ kɛ bitírí.
\q1
\v 15 Dɛɛ̀ bɛnkú o Yiɛ̀ nKuyie nwetímɛ̀,
\q1 kɛ tú o kó dipèrì,
\q1 mɛyɛi nyí bo ku borɛ̀.
\c 93
\s1 Kuyie nkuù tu okpɑ̀ɑ̀tì
\q1
\v 1 Kuyie nkuù tu okpɑ̀ɑ̀tì, tikpɑ̀tì tiì tu ku kó diyɑɑ̀bòrì,
\q1 kɛ̀ muwɛ̃rímú tú ku nɑɑ̀kɔ̃̀nfɛ̀.
\q1 Dɛɛ̀ te kɛ̀ kɛtenkɛ̀ fìíkú bɛ́ù bɑ́ kɛ í nɑmpú.
\b
\q1
\v 2 Ti Yiɛ̀ nKuyie, ɑ kpɑ̀tì í mɔkɛ tì ketɛ́ dɛ̀ tì mɛ nyí mɔkɛ kumɑ̀nku.
\q1 A bo nɛ̀ dimɔ̀nnì ndi kɛ yó mbo sɑ̃́ɑ̃̀.
\q1
\v 3 Ti Yiɛ̀ nKuyie nyikó mpíɛmmu kɛ uuti,
\q1 kɛ̀ yɛnɛ́fĩ̀nfĩ̀rɛ̀ iiti,
\q1 kɛ̀ kutoweku dɑ́ɑ́tí.
\q1
\v 4 A mɛ ndɛumu kɛ pɛ̃ɛ̃tɛ́ mɛniɛ nkó kunɔɔdoo,
\q1 kɛ pɛ̃ɛ̃tɛ́ dɑ̀mɛ́ɛ̀rì kó yɛnɛ́fĩ̀nfĩ̀rɛ̀.
\q1 Ti Yiɛ̀ nKuyie nhɑ bomu nkɛĩ́nkɛ̀ kɛ pɛ̃ɛ̃tɛ́ dɛndɛ kó dimɑ̀ɑ̀.
\b
\q1
\v 5 Ti Yiɛ̀ nKuyie nhɑ kuɔ́ tú imɔ́mmɔnyi nyi,
\q1 ɑ cĩ́ɛ̃̀tɛ̀ sɑ̀mu kɛ yóó nsɑ̀ sɑ̃́ɑ̃̀.
\c 94
\s1 Kuyie nkuù yóó pɛitɛ bɛ̀ dɔ̀ɔ̀ri dɛ̀ ku kɔbɛ
\q1
\v 1 Áú ti Yiɛ̀ nKuyie! Fɔ̃́ɔ̃̀ ɔ̃ɔ̃ pɛitɛ,
\q1 fɔ̃́ nwèè te mupɛitimù bɛnkɛ ɑ kpetì.
\q1
\v 2 Kuyie nfɔ̃́ nwèè yóó bekɛ́nɛ̀ kutenkù,
\q1 ítɛ́ kɛ́yietí sipɔɔ yɛmbɛ̀ bɛ̀ mɑ̀nnɛ̀ tìì yeti.
\b
\q1
\v 3 Ti Yiɛ̀ nKuyie, dɛ̀ yó nkɑ̃́ɑ̃́kɛ́ dɛ?
\q1 Yé dɛ̀ yó nkɑ̃́ɑ̃́kɛ́ dɛ̀ kɛ̀ bɛyɛibɛ yóu tiyɑ̃nkùtì.
\q1
\v 4 Bɛ̀ nɑ́ɑntɛ bɛtɔbɛ̀ kpɛ́í nkɛ,
\q1 kɛ pɛ̃ĩti pɛ̃ĩti,
\q1 kɛ nɑ́ɑntɛ sipɔɔ kó tinɑ́ɑǹtì,
\q1 kɛ tú mɛyɛi ndɔɔ̀rìbɛ̀.
\q1
\v 5 Ti Yiɛ̀ nKuyie mbɛ̀ fɛ̃́ũnko ɑ nìtìbɛ̀ mbɛ,
\q1 bɛ̀ diinko ɑ kɔbɛ mbɛ mɛsémmɛ̀.
\q1
\v 6 Bɛ̀ kɔ̀ù bɛkúpobɛ̀ mbɛ nɛ̀ bɛpɔ̀ɔ̀bɛ̀.
\q1 Kɛ feu iciribí.
\q1
\v 7 Kɛ nɑ́ɑ́ nkɛ tú: Ti Yiɛ̀ nKuyie nyí wúó,
\q1 ti Yiɛ̀ nKuyie nSɑkɔbu do tũ nkù í dɑkɛ.
\b
\q1
\v 8 Díndi tiyɛìntì dɔɔ̀nɛ̀ mɛyɔɔ̀mmɛ̀.
\q1 Tidìɛ̀ntì díndi dɛ̀ yó nkɑ̃́ɑ̃́kɛ́ dɛ kɛ̀ di mɔɔtɛ mɛyɛ̀mmɛ̀?
\q1
\v 9 Kuyie nkùù ɑ̃nnɛ́ onìtì yɛto, kù bo yĩɛ̃kɛ kù bo keèmɑ̀ɑ̀?
\q1 Kunku kùù ɑ̃nnɛ́ onìtì inuɔ kù bo yĩɛ̃kɛ kù bo yɑ̀mɑ̀ɑ̀?
\q1
\v 10 Kunku kùù tiè nyɛbotɛ̀ kù bɑ́ɑ́ nɑ kɛ́ bɛ̀ potɑ́ɑ̀?
\q1 Kuù í duɔ̀ mbɛnìtìbɛ̀ mɛciìnɑ̀ɑ̀?
\q1
\v 11 Ti Yiɛ̀ nKuyie nyɛ̃́mu onìtì kó iyɛǹtotí,
\q1 kù yɛ̃́mu ì tumɛ̀ kuyɑɑkù.
\b
\q1
\v 12 Dɛ̀ nnɑɑti onìtì ti Yiɛ̀ nKuyie ntié nwè,
\q1 kù ciìkùnko wè nɛ̀ ku kuɔ́.
\q1
\v 13 Dɛɛ̀ yó nhò kɑ̃nkɛ́ diyiè yɛiri yiè,
\q1 kɛ bɑɑnɛ̀ bɛ̀ bo keúmɛ̀ oyɛiwe fɔ̃ti.
\q1
\v 14 Kɛ yɛ̃́ ti Yiɛ̀ nKuyie nhɔ̃ í ndootóomɛ̀ ku kó bɛnìtìbɛ̀,
\q1 kù í yóó yóu ku te bɛ̀.
\q1
\v 15 Obeéntì sɑ̀ɑ̀wè yóó cɔutɛ́mu tibeéntì.
\q1 Bɛ̀ɛ̀ yɛ̀mmɛ̀ wenni kɛ̀ bɛ̀ nhò tũ.
\b
\q1
\v 16 We mbo n kónnɛ́ kɛ̀ tí dokɛ́nɛ̀ bɛyɛibɛ?
\q1 We mbo n teennɛ̀ kɛ̀ tí kpɑnnɛ̀ mɛyɛi ndɔɔ̀rìbɛ̀?
\q1
\v 17 Kɛ̀ ti Yiɛ̀ nKuyie ndo í n teennɛ̀
\q1 nɛ̀ yíe n do bo kudɔmbìùkù nku.
\q1
\v 18 Kɛ̀ n nɑɑ̀cɛ̀tɛ̀ dɔ́ kɛ́seitɛ.
\q1 Ti Yiɛ̀ nKuyie nkó mɛsɑ̀ɑ̀ mmɛɛ̀ ɔ̃ɔ̃ n cɔ́útɛ́.
\q1
\v 19 Kɛ̀ iyɛǹtotí n sũ̀ṹnnɛ̀,
\q1 ɑ ɔ̃ɔ̃ m bɑ́ntɛ̀mu kɛ nɑ́ríkùnnɛ n yɛ̀mmɛ̀.
\q1
\v 20 A bo wɛ̃nnɛ́nɛ̀ bɛbeémbɛ̀ bɛ̀ɛ̀ tu bɛnitikɔ̀ùbɛ̀,
\q1 bɛmbɛ bɛ̀ɛ̀ fɛ̃́ũnko bɛnìtìbɛ̀ nɛ̀ ikuɔ́ kó diyètìrɑ̀ɑ̀?
\q1
\v 21 Bɛmbɛ bɛ̀ɛ̀ ɔ̃ɔ̃ dɑkɛ kɛ bo kuɔ onitisɑ̀ù,
\q1 kɛ̀ dɔ̀ ò cɑ̀ɑ̀rɛ̀, bɑ́ ò í cɑ̀ɑ̀rɑ̀ɑ̀?
\q1
\v 22 N Yiɛ̀ nKuyie nkuù mɛ ntú n kó tɛcɛ̃kpetɛ̀.
\q1 Kuyie nkuù tu dipèrì dìì n kɑ̃nkɛ́.
\q1
\v 23 Kù yóó duɔ́ nkɛ̀ bɛ yɛi ndo bɛ yɔ ĩ́nkɛ̀ nkɛ.
\q1 Bɛ̀ yonku kpɛ́í nte kɛ̀ kù yóó bɛ̀ kùɔ pɑ́íí.
\q1 Ti Yiɛ̀ nKuyie nkuù ti te,
\q1 kuù yóó bɛ̀ kùɔ kɛ́deè.
\c 95
\s1 Tí kɔtɛnɛ̀ Kuyie ncĩ́ɛ̃̀tɛ̀ nɛ̀ diwɛ̀ì
\q1
\v 1 Ti kɔtɛnɛ̀ kɛ́nsɑ̃ntí ti Yiɛ̀ nKuyie,
\q1 diwɛ̀ì nti bonɛ̀ ti Yiɛ̀ nKuyie nkɛ̀ ti nyíútí,
\q1 kuù tu ti kó dipèrì dìì ti dɛɛrí.
\q1
\v 2 Ti kɔtɛnɛ̀ ku cĩ́ɛ̃̀tɛ̀ kɛ kù sɑ̃ntɛ,
\q1 kɛ́mpíɛ́tí kɛ bie ndɛbémbénnɛ̀ nɛ̀ diwɛ̀ì.
\q1
\v 3 Ti Yiɛ̀ nKuyie ndɛumu,
\q1 kù tu okpɑ̀ɑ̀tì diɛwè nwe kɛ kpeńnìnɛ̀ yɛbɔkɛ̀ yɛmɔu.
\q1
\v 4 Kuù bɑkɛ́ kɛtenkɛ̀ nɛ̀ kɛ cũmpumɛ,
\q1 yɛtɑ̃rɛ̀ nɛ̀ yɛ yómmɛ̀.
\q1
\v 5 Kuù dɔ̀ɔ̀ dɑ̀mɛ́ɛ̀rì kɛ̀ kuù ò te.
\q1 Kuù pìítɛ́ kɛtenkɛ̀ nɛ̀ ku nɔu.
\q1
\v 6 Tí tɑnnɛ̀ ku cĩ́ɛ̃̀tɛ̀ kɛ́nínkú kɛ́sĩ́nnɛ́ kɛ́kɔ̃nkɛ,
\q1 ti Yiɛ̀ nKuyie nkùù ti dɔ̀ɔ̀ ku ììkɛ̀.
\q1
\v 7 Kuù ti te kɛ̀ ti tú ku nìtìbɛ̀ kù cɛ̃mmú bɛ̀,
\q1 tipìètì kù kpɑ̀ɑkɛ tì nɛ̀ ku nɔ̀ùtɛ̀.
\b
\q1 Kɛ̀ Kuyie ndi bɛ́innɛ̀ yíe
\q1
\v 8 di bɑɑ́ kpénkùnnɛ di to,
\q1 di yɛmbɛ̀ do dɔ̀ɔrimɛ̀ Mɛdibɑ.
\q1 Bɛ̀ do dɔ̀ɔ̀ dɛ̀ diyiè mɑrì Mɑsɑ kó dikpɑ́ɑ̀ miɛkɛ.
\q1
\v 9 Di yɛmbɛ̀ do kù bennɛ́mu,
\q1 bɛ̀ do dɛ nkù yɑ̀ɑ́kɛ́ bɑ́ nɛ̀ bɛ̀ do mɛ nyɑ̀mɛ̀ kù pĩ mùù tɔ̃mmú.
\q1
\v 10 Yɛbie nsipísìnɑ̀ɑ̀ miɛkɛ kɛ̀ kùu bɛ̀ pɛ̃̀,
\q1 kɛ bɛ́i nkɛ dɔ̀ ku mbotí yɛ̀mmɛ̀ mɛɛ̀ kù dɛ̀tɛ́nɛ̀ bɑ́ bɛ̀ í yie ku kpɛti.
\q1
\v 11 Mɛmmɛ kɛ̀ ku miɛkɛɛ bɛ̀ pɛikɛ kɛ̀ kùu bɛ́i nkɛ́pɑrìkɛ̀ kɛ yĩ́
\q1 bɛ̀ í tɑti ku ɛì mɛom̀pùmɛ̀ kpɛri.
\c 96
\s1 Dentɛ̀nɛ̀ fɛyɛm̀pɑ̀nfɛ̀ Kuyie nkpɛ́í
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 16:23-33)
\q1
\v 1 Dentɛ̀nɛ̀ ti Yiɛ̀ nKuyie nkpɛ́í nfɛyɛm̀pɑ̀nfɛ̀,
\q1 kutenkù kumɔu kɔbɛ dentɛ̀nɛ̀ ti Yiɛ̀ nKuyie nkpɛ́í.
\q1
\v 2 Ndiènnɛ̀ ti Yiɛ̀ nKuyie nkpɛ́í, ndɛ́úkùnkonɛ̀ ku yètìrì.
\q1 Nnɑ́ɑ́nnɛ̀ yɛwe yɛmɔu tinɑ́ɑǹsɑ̀ɑ̀tì ku dɛɛtímɛ̀ kpɛti.
\q1
\v 3 Nɑ́kɛ́nɛ̀ ibotí tɛì ku kó tikpetì kpɛ́í.
\q1 Nɑ́kɛ́nɛ̀ yɛbotɛ̀ yɛmɔu ku tɔ̃ndiɛmù kpɛ́í.
\b
\q1
\v 4 Ti Yiɛ̀ nKuyie ndɛumu kɛ mɑ̀nnɛ̀ disɑ̃nni.
\q1 Kuù duò tikɔ̃m̀bùɔ̀tì kɛ pɛ̃ɛ̃tɛ́ yɛbɔkɛ̀ yɛmɔu.
\q1
\v 5 Yɛbotɛ̀ mɔ̀kɛ yɛ̀ɛ̀ bɔkɛ̀ tu siyɑ́ɑ̀bìsí kpɛyɛ nyɛ.
\q1 Ti Yiɛ̀ nKuyie nkuù mɛ ndɔɔ̀ kɛĩ́nkɛ̀.
\q1
\v 6 Kuwenniku diɛkù nɛ̀ tikpɑ̀tì dɛɛ̀ bo ku borɛ̀.
\q1 Tikpetì nɛ̀ tidiɛtì dɛɛ̀ pìɛ́kɛ́ ku cĩ́ɛ̃̀tɛ̀ miɛkɛ.
\b
\q1
\v 7 Kutenkù kumɔu kɔbɛ nsɑ̃ntí ti Yiɛ̀ nKuyie.
\q1 Ndɛ́úkùnkonɛ̀ ti Yiɛ̀ nKuyie ku kpetì nɛ̀ ku wɛ̃rímú dɛ kpɛ́í.
\q1
\v 8 Ndɛ́úkùnkonɛ̀ ti Yiɛ̀ nKuyie nyètìrì.
\q1 Di níí ntɔ yɛpɑ̃rɛ̀ kɛ́tɑnnɛ̀ ku cĩ́ɛ̃̀tɛ̀ dɑ̀nkù.
\q1
\v 9 Di níí ndò mpɑ́íí kɛ nínkú ti Yiɛ̀ nKuyie nyììkɛ̀,
\q1 kutenkù kumɔu kɔbɛ, nkpeutínɛ̀ ku ììkɛ̀.
\q1
\v 10 Nɑ́kɛ́nɛ̀ ibotí tɛì miɛkɛ ti Yiɛ̀ nKuyie nkuù tumɛ̀ okpɑ̀ɑ̀tì.
\q1 Kɛ̀ dɛ̀ɛ yie nkɛ̀ kutenkù nfííkú só kɛ bɑ́ nkpeutí.
\q1 Ti Yiɛ̀ nKuyie nkuù bekùnɛ̀ yɛbotɛ̀ kɛ̀ dɛ̀ wenni.
\b
\q1
\v 11 Kɛĩ́nkɛ̀ ɑ́ nyɑ̃nku, kɛtenkɛ̀, diwɛ̀ì ndɑ bo.
\q1 Dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo ɑ miɛkɛ yɔ̃ɔ̃tɛ̀nɛ̀.
\q1
\v 12 Dikpɑ́ɑ̀ nɛ̀ dɛ̀ɛ̀ kó dimɑ̀ɑ̀ bo ɑ miɛkɛ nhɑunɛ̀.
\q1 Titúútì kó dɛtie mpotɛ́nɛ̀ tipíɛ̀tì
\q1
\v 13 ti Yiɛ̀ nKuyie nyììkɛ̀, kù kèrínímu,
\q1 kù bonímu kɛ bo bekɛ́nɛ̀ kutenkù,
\q1 kù yóó bekɛ́nɛ̀ kutenkù kɛ̀ dɛ̀ nwennimu,
\q1 kɛ́bekɛ́nɛ̀ yɛbotɛ̀ nɛ̀ timɔ́mmɔnti.
\c 97
\s1 Kuyie mbɑkɛ́mɛ̀ kutenkù kumɔu
\q1
\v 1 Ti Yiɛ̀ nKuyie nkuù tu okpɑ̀ɑ̀tì,
\q1 kɛtenkɛ̀ kɛmɔu kɔbɛ nyɑ̃nkunɛ̀,
\q1 yɛhɛkɛ̀ dɛ́tiyɛ̀ kɔbɛ nhɑunɛ̀.
\b
\q1
\v 2 Diwɛtirì nɛ̀ dibiìnnì dɛɛ̀ kù fitɛ́,
\q1 kù bɑkɛ́ kɛ̀ dɛ̀ wennimu kɛ̀ ku beéntì sìɛ́.
\q1
\v 3 Muhɑ̃ɑ̃́ mmuù ni ku ììkɛ̀ kɛ kérí,
\q1 kɛ tɔntì ku dùɔ̀ntɔbɛ̀ bɛ̀ɛ̀ kù fitɛ́.
\q1
\v 4 Kuù duɔ́ nkɛ̀ fɛtɑɑfɛ̀ mìí nkutenkù,
\q1 kɛ̀ kutenkù kɔbɛ dɛ̀ yɑ̀u kɛ kpeutí.
\q1
\v 5 Yɛtɑ̃rɛ̀ yìɛ̀rimu ti Yiɛ̀ nKuyie nyììkɛ̀ mɛkùɔ̀ nkɔ̃mɛ,
\q1 kunku ti Yiɛ̀ nKuyie nkùù bɑkɛ́ kutenkù kumɔu ku ììkɛ̀.
\q1
\v 6 Kɛĩ́nkɛ̀ nɑ̀ɑ́mmu Kuyie ntumɛ̀ timɔ́mmɔnti yiɛ̀,
\q1 kɛ̀ yɛbotɛ̀ yɑ̀ ku kó tikpetì.
\b
\q1
\v 7 Bɛbɔɔféúbɛ̀ bɛmɔu ifɛi bo bɛ̀ pĩ́.
\q1 Bɛ̀ɛ̀ pɔ̀tìnɛ̀ yɛbɔkɛ̀ nɛ̀ sitenkɑɑnìi.
\q1 Díndi yɛbɔkɛ̀ dimɔu nínkúnɛ̀ ti Yiɛ̀ nKuyie nyììkɛ̀.
\q1
\v 8 Ti Yiɛ̀ nKuyie nhɑ dɔ̀ɔ̀ tì,
\q1 Siyɔ̃ɔ̃ kɔbɛ ti kèèmu kɛ̀ diwɛ̀ì bɛ̀ bo,
\q1 kɛ̀ Sudɑɑ kɔbɛ ti kèè kɛ yɑ̃nku.
\q1
\v 9 Kɛtenkɛ̀ kɛmɔu duɔ́mɛ̀,
\q1 ti Yiɛ̀ nKuyie nfɔ̃́ɔ̃̀ bɑkɛ́ kɛĩ́nkɛ̀ nɛ̀ kɛtenkɛ̀ kɛmɔu,
\q1 ɑ pɛ̃ɛ̃tɛ́mu yɛbɔkɛ̀ yɛmɔu.
\b
\q1
\v 10 Díndi bɛ̀ɛ̀ dɔ́ ti Yiɛ̀ nKuyie, nníínnɛ̀ mɛyɛi.
\q1 Kuù kɑ̃nkɛ́ ku kɔbɛ,
\q1 kɛ bɛ̀ dɛɛrínɛ̀ bɛyɛibɛ.
\q1
\v 11 Bɛ̀ɛ̀ dɔ̀ɔ̀ri timɔ́mmɔnti kuwenniku kuù ɔ̃ mbɛ̀ mí.
\q1 Bɛ̀ɛ̀ yɛ̀mmɛ̀ wenni bɛ̀ ɔ̃ mmɔkɛmu ndiwɛ̀ì.
\q1
\v 12 Díndi bɛ̀ɛ̀ dɔ̀ɔ̀ri timɔ́mmɔnti nyɑ̃nkunɛ̀,
\q1 nsɑ̃ntínɛ̀ ku kɛ dɛ́úkùnko ku yètìrì, kù do mpɑ́íí nwe.
\c 98
\s1 Piɛtɛnɛ̀ ti Yiɛ̀ nKuyie
\pi1
\v 1 Fɛyɛ̀nfɛ̀.
\b
\q1 Dentɛ̀nɛ̀ ti Yiɛ̀ nKuyie fɛyɛmpɑ̀nfɛ̀, kù dɔ̀ɔ̀ tìì diɛtì kpɛ́í.
\q1 Nɛ̀ ku wɛ̃rímú diɛmù mmu kù dɛɛrímɛ̀.
\q1
\v 2 Ti Yiɛ̀ nKuyie mbɛnkɛmu kutenkù kù dɛɛrímɛ̀.
\q1 Kuù bɛnkɛ yɛbotɛ̀ kù dɔ̀ɔ̀rimɛ̀ timɔ́mmɔnti.
\q1
\v 3 Kù í yɛ̃̀ mmɛsɑ̀ɑ̀ kù do yɛ̃ nkù yóó dɔɔ̀mɛ̀ Isidɑyɛɛribɛ,
\q1 kù pĩ̀ḿmu kù bɛ́i ntì.
\q1 Itemmɑ̀nkɛ imɔu kɔbɛ yɑ̀mu,
\q1 Kuyie nkùù ti te kù ti dɛɛtɛ́mɛ̀.
\b
\q1
\v 4 Kutenkù kumɔu kɔbɛ piɛtɛnɛ̀ ti Yiɛ̀ nKuyie,
\q1 ndiènnɛ̀ kɛ íú.
\q1
\v 5 Mbiennɛ̀ kukùtìdùkù kɛ dɛ́úkùnko ti Yiɛ̀ nKuyie,
\q1 kɛ́mbie ntibómbonti kɛ diè.
\q1
\v 6 Ndɛ́úkùnkonɛ̀ ku nɛ̀ siheú, nɛ̀ yɛtɑ̃tɛhe.
\q1 Piɛtɛnɛ̀ ti Yiɛ̀ nKuyie nkuù tu okpɑ̀ɑ̀tì.
\q1
\v 7 Fɔ̃́ ndɑ̀mɛ́ɛ̀rì yɔ̃ɔ̃tɛ̀ nɛ̀ ɑ mɔkɛ dɛ̀ dɛmɔu.
\q1 Kɛtenkɛ̀ nɛ̀ dɛ̀ɛ̀ kó dimɑ̀ɑ̀ bo ɑ miɛkɛ nyɑ̃nkunɛ̀.
\q1
\v 8 Díndi ikó, mpotɛ́nɛ̀ tipíɛ́tì.
\q1 Díndi yɛtɑ̃rɛ̀ kɛ̀ di wɛ̃nnɛ́ kɛ́iitɛ.
\q1
\v 9 Ti Yiɛ̀ nKuyie nkèrínímu kɛ yóó bekɛ́nɛ̀ kutenkù.
\q1 Kuù yóó bekɛ́nɛ̀ kutenkù kɛ̀ dɛ̀ nwenni.
\q1 Kuù yóó bekɛ́nɛ̀ yɛbotɛ̀ sɛ́i.
\c 99
\s1 Ti Yiɛ̀ nKuyie ti kóo kpɑ̀ɑ̀tì dò mpɑ́íí nwe
\q1
\v 1 Ti Yiɛ̀ nKuyie nkuù tu okpɑ̀ɑ̀tì kɛ̀ yɛbotɛ̀ kɔ̃̀ntì ɑu.
\q1 Kù kɑ̀ri ku kpɑ̀ɑ̀tìkɑ̀rì bɛĩ́nkɛ̀mbɑ̀rìbɛ̀ cuokɛ̀ nkɛ,
\q1 kɛ̀ kɛtenkɛ̀ sɑ̃̀nti.
\q1
\v 2 Ti Yiɛ̀ nKuyie nyètìrì dɛumu Siyɔ̃ɔ̃ ɛì miɛkɛ.
\q1 Kù dɛumu kɛ̀ kuù bɑkɛ́ yɛbotɛ̀ yɛmɔu.
\q1
\v 3 Nsɑ̃ntínɛ̀ ti Yiɛ̀ nKuyie, ku yètìrì dɛumu,
\q1 kɛ duò tikɔ̃m̀bùɔ̀tì kù dò mpɑ́íí nwe.
\q1
\v 4 A kpeńnìmu kɛ tú okpɑ̀ɑ̀tì wèè dɔ́ tibeéntì sɑ̀ɑ̀tì,
\q1 ti Yiɛ̀ nKuyie nfɔ̃́ɔ̃̀ ti bɛnkɛ kucɛ kùù sìɛ́.
\q1 Fɔ̃́ɔ̃̀ bɛnkɛ timɔ́mmɔnti Sɑkɔbu yɑɑ̀bí cuokɛ̀.
\b
\q1
\v 5 Ndɛ́úkùnkonɛ̀ ti Yiɛ̀ nKuyie nyètìrì.
\q1 Nínkúnɛ̀ ku kpɑ̀ɑ̀tìkɑ̀rì ììkɛ̀ kɛ́kɔ̃nkɛ, kù dò mpɑ́íí nwe.
\b
\q1
\v 6 Mɔyiisi nɛ̀ Anɔɔ bɛ̀ do tú Kuyie nkuɔ́ nìùbɛ̀ mbɛ,
\q1 kɛ̀ Sɑmmuyɛɛri ntú wèè bɑ̀ɑ́ nKuyie.
\q1 Bɛɛ̀ do ɔ̃ɔ̃ yú Kuyie nkɛ̀ kùu yie.
\q1
\v 7 Kù do bɛ̀ nɑ̀ɑ́nnɛ̀nní diwɛtirì miɛkɛ nkɛ.
\q1 Kɛ̀ bɛ̀ nyíé nku tɑnnɔ̀ kɛ pĩ́ nku kuɔ́ kù bɛ̀ duɔ́ nyì.
\b
\q1
\v 8 Ti Yiɛ̀ nKuyie, bɛ̀ do ɔ̃ ndɑ nɑ́ɑ́nnɛ̀ kɑ̀ɑ bɛ̀ cɔ̀úmmu,
\q1 fɔ̃́ nKuyie nkɛ bɛ̀ cĩ́ɛ̃́mmu bɛ yɛi.
\q1 Kɛ̀ bɛ̀ cɑ̀ɑ̀rɛ̀ ɑ nɛ́ yṹɔ̃́ mbɛ to.
\b
\q1
\v 9 Ndɛ́úkùnkonɛ̀ ti Yiɛ̀ nKuyie nyètìrì.
\q1 Nínkúnɛ̀ ku tɑ̃sɑ̀ɑ̀rì ĩ́nkɛ̀.
\q1 Ti Yiɛ̀ nKuyie ndò mpɑ́íí nwe.
\c 100
\s1 Ti níí tɑ Kuyie ncĩ́ɛ̃̀tɛ̀ nɛ̀ yɛsɑ̃ɑ̃
\pi1
\v 1 Disɑ̃nni kó fɛyɛ̀nfɛ̀.
\b
\q1 Kɛtenkɛ̀ kɛmɔu kɔbɛ piɛtɛnɛ̀ ti Yiɛ̀ nKuyie.
\q1
\v 2 Mpĩ́nnɛ̀ ti Yiɛ̀ nKuyie ntɔ̃mmú nɛ̀ diwɛ̀ì.
\q1 Kɔtɛnɛ̀ní ku borɛ̀ kɛ́ndiènnɛ̀ diwɛ̀ì.
\q1
\v 3 Bɑntɛ́nɛ̀ kɛ dò nKuyie nkuù tu ti Yiɛ̀.
\q1 Kuù ti dɔ̀ɔ̀ kɛ̀ ti tú ku kɔbɛ,
\q1 ku nìtìbɛ̀, ku pìètì kù cɛ̃mmú tì.
\b
\q1
\v 4 Kɛ̀ di níí tɑti ku cĩ́ɛ̃̀tɛ̀ di nkù sɑ̃ntí.
\q1 Kɛ̀ di tɑ tɛ dɑ̀nkù di ndɛ́úkùnko ku yètìrì,
\q1 kɛ́ nkù dɔúnnɛ̀ mutɔ̃mmú, kɛ dɛ́úkùnko ku yètìrì.
\b
\q1
\v 5 Ti Yiɛ̀ nKuyie nnìtimu kɛ̀ ku sɑ̀ɑ̀ mbo sɑ̃́ɑ̃̀.
\q1 Kuù dɔ̀ɔ̀ri timɔ́mmɔnti nɛ̀ kù bɑɑ bomɛ̀ sɑ̃́ɑ̃̀.
\c 101
\s1 Okpɑ̀ɑ̀tì yɛ̃mmɛ̀ ò yóó ntũ ntimɔ́mmɔnti
\pi1
\v 1 Dɑfiti kó fɛyɛ̀nfɛ̀.
\b
\q1 N yó ndièmmu Kuyie nkó mɛsɑ̀ɑ̀ nnɛ̀ ku beéntì,
\q1 n yó ndɛ́úkùnko fɔ̃́ɔ̃̀ yètìrì nɛ̀ n kó iyiɛ.
\b
\q1
\v 2 N yó nkérí bɛ̀ɛ̀ dɔ́ mɛwetímmɛ̀ bɛ̀ bo kùù cɛ miɛkɛ nkɛ.
\q1 Dɛ̀ yó nkɑ̃́ɑ̃́kɛ́ dɛ kɑ̀ɑ kɔtɛní m borɛ̀?
\q1 N yó ntũ nkucɛ wenniku nku n yɛ̀mmɛ̀ kɔku, n kɔbɛ cuokɛ̀.
\q1
\v 3 M bɑ́ɑ́ yie nkɛ́nwúó ndɛ̀mɑrɛ̀ yɛirɛ,
\q1 n yí dɔ́ bɛ̀ɛ̀ í tũ ntimɔ́mmɔnti bɛ kó mufòmmu,
\q1 bɛ borimɛ í n yũɔ̃.
\q1
\v 4 Mɛyɛ̀mmɛ̀ yɛimɛɛ fũtɛ m borɛ̀,
\q1 bɛyɛibɛ m bɑ́ɑ́ bɛ̀ tɔ̀ɔ́nnɛ̀.
\q1
\v 5 Bɛ̀ɛ̀ wɑ́tìrì bɛtɔbɛ̀ disɔ̀rì m bo bɛ̀ dɛ̀ìtɛ,
\q1 bɛ̀ɛ̀ mɔ̀kɛ sifeí nɛ̀ sipɔɔ yɛmbɛ̀ n yí yóó bɛ̀ wɛ̃nnɛ́nɛ̀.
\b
\q1
\v 6 Bɛ̀ɛ̀ dɔ̀ɔ̀ri timɔ́mmɔnti n yó mbɛ̀ yɛ̃́mu,
\q1 nɛ̀ bɛ tíì yó nwɛ̃ nkɛ bo,
\q1 wèè tũ̀ nkucɛ sɑ̀ɑ̀kù weè yó ntú n kóo tɔ̃ntì.
\b
\q1
\v 7 Wèè ciintɛ bɛtɔbɛ̀ dɛ yiɛ̀ nyí mɔkɛ dikɑ̀rì m borɛ̀.
\q1 Wèè mɔ̀kɛ siyɑ́ɑ̀bìsí dɛ yiɛ̀ mbɑ́ɑ́ cómmú n yììkɛ̀.
\q1
\v 8 Bɑ́ dìì kṹnweńnì n níí yóó dɛitɛmu bɛyɛibɛ ti kó kɛtenkɛ̀ miɛkɛ,
\q1 n yó dɛitɛmu bɛ̀ɛ̀ dɔ́nɛ̀ bɛtɔbɛ̀ mɛyɛi n Yiɛ̀ nKuyie nkó dihɛì miɛkɛ.
\c 102
\s1 Osénnìwè bɑ̀ɑ́mmɛ̀ Kuyie
\d Osénnìwè yɛ̀mmɛ̀ cɑ̀ɑ̀rɛ̀mɛ̀ kòò bɑ̀ɑ́ nKuyie nkɛ kù bɛnkú o sémmɛ̀.
\b
\q1
\v 1 N Yiɛ̀ nKuyie, kéntɛ́ m bɑ́ɑmmìi,
\q1 yóu kɛ̀ n dɑbònnìi tuɔkɛ ɑ borɛ̀.
\q1
\v 2 Bɑ́ m bútínnɛ́, mɛyɛǹcɑɑ̀rìmɛ̀ yiè,
\q1 kéntɛ́ní m bíɛ́kɛ̀, n dɑ kuɔ̀nnɛ̀mu yíe,
\q1 cɔutɛ́ m bɑ́ɑmmìi bɑ́ɑ́ ɔɔtɛ.
\q1
\v 3 N kó yɛwe yɛɛ̀ yɛnní kuyukú kɔ̃mɛ,
\q1 n kṹɔ̃̀ yɛɛ̀ cɔ̀útɛ́ yɛhɑ̃ɑ̃kũɔ̃ ntɛ̃mɛ̀.
\q1
\v 4 N yɛ̀mmɛ̀ mɛɛ̀ sɑ̃̀ɑ̃́tɛ́nɛ̀ timúkpetì,
\q1 n tɛ̃́nkɛ í yɛ̃́ mudiì kpɛti.
\q1
\v 5 N kɔmmú kɛ kɔmmúmu,
\q1 n kɔ̃̀ntì kpeímu kɛ dɑ̀ri n kṹɔ̃̀.
\q1
\v 6 N sɑ̃̀ɑ̃́tɛ́nɛ̀ kuyĩnwuokù kùù bo kùnku dikpɑ́ɑ̀,
\q1 n dònnɛ̀ dionduò dìì bo dìndi tidobontì miɛkɛ.
\q1
\v 7 Nh ɔ̃ n yié nkɛ́wúómmu kɛ kuɔ̀,
\q1 n cúɔ́kɛ́mu tɛnɔ̀tɛ̀ ɔ̃ ncúɔ́kɛ́mɛ̀ ditou ĩ́nkɛ̀.
\q1
\v 8 N yɛibɛ n sɑ̃́ɑ̃́ntɛmu yɛwe yɛmɔu,
\q1 n níim̀bɛ̀ ɔ̃ mbuɔ̀ nkusĩ̀nkù kɛ beúnɛ̀ mí nwe.
\q1
\v 9 A miɛkɛ kɛɛ̀ n yɛ̀ kɛ n cɔ̀útɛ́
\q1 kɛ̀ mutɑ́pɛí nnɑɑ́ n kó mudiì.
\q1 A miɛkɛ kɛɛ̀ n yonkɛ
\q1 kɛ̀ n nɔnniɛti tɑɑ̀ n yɔ̃̀ ndɛ̀
\q1 kɛ yɛ̃́ ɑ n dootóomɛ̀
\q1
\v 11 N we yɛɛ̀ pɛ̃nkɛ́ mɛdɛ́ɛ̀ ntɛ̃mɛ̀,
\q1 n kpeí timútì kɔ̃mɛ mmɛ.
\b
\q1
\v 12 N Yiɛ̀ nKuyie nhɑ kpɑɑtìrìmu sɑ̃́ɑ̃̀,
\q1 bɛnìtìbɛ̀ yó nyɛ̃́ fɔ̃́ɔ̃̀ kpɛ́í nsɑ̃́ɑ̃̀.
\q1
\v 13 A itimu kɛ bo kuɔ́ mmɛsémmɛ̀ Siyɔ̃ɔ̃ ɛì kɔbɛ,
\q1 ɑ do nɑ̀kɛ́ dìì mɔ́nnì kpɛ́í dì tùɔ̀kɛmu
\q1 kunɑ́ɑ́ mbo dɑ pĩ́nnɛ̀ dɛ̀ Siyɔ̃ɔ̃ kɔbɛ.
\q1
\v 14 A kó bɛtɔ̃mbɛ̀ tínti ti dɔ́mu Siyɔ̃ɔ̃ bɑ́ nɛ̀ ò mɛ ndomɛ̀,
\q1 mɛsémmɛ̀ wè nti bonɛ̀mu bɑ́ nɛ̀ ò mɛ nnɑɑ́mmɛ̀ tidobontì.
\b
\q1
\v 15 Yɛbotɛ̀ yóó bɑntɛ́mu ti Yiɛ̀ nKuyie nkó diyètìrì,
\q1 kutenkù kó bɛkpɑ̀ɑ̀tìbɛ̀ bɛmɔu yóó yɑ̀mu ku kpetì.
\q1
\v 16 Ti Yiɛ̀ nKuyie nyóó wɛ̃tɛ kɛ́mɑɑ́mu Siyɔ̃ɔ̃ ɛì,
\q1 kù yóó bɛnkɛmu ku kpetì o miɛkɛ.
\q1
\v 17 Kù yomu osénnìwè kó mubɑ́ɑmmu,
\q1 kù í senku o bɑ́ɑmmìi.
\q1
\v 18 Bɛ̀ɛ tì wɑ̃̀ri kutɔ̃nkù kùù kpɑɑní ku kpɛ́í,
\q1 kɛ̀ bɛ̀ yóó piɛ́ bɛ̀ɛ sɑ̃ntɛ ti Yiɛ̀ nKuyie.
\q1
\v 19 Kù boní kɛĩ́nkɛ̀ nkɛ ku cɛ̃sɑ̀ɑ̀tɛ̀ kɛ wúónní,
\q1 ti Yiɛ̀ nKuyie nkɛ mbo kɛ wúónní kɛtenkɛ̀.
\q1
\v 20 Kɛ bo keè tikpetíntì kó isɑ́útìi,
\q1 kɛ́dɛɛtɛ́ bɛ̀ɛ̀ duunnɛ̀ mukṹṹ,
\q1
\v 21 kɛ bɛ̀ɛ nɑ́kɛ́ Siyɔ̃ɔ̃ ɛì miɛkɛ ti Yiɛ̀ nKuyie nkpɛ́í,
\q1 kɛ́ nkù sɑ̃ntí Sedisɑdɛmmu ɛì miɛkɛ,
\q1
\v 22 yɛbotɛ̀ bo tíí ndìì mɔ̀nnì,
\q1 yɛkpɑ̀ɑ̀tìyɔ bo wɛ̃nnɛ́ kɛ́bɑ́ntɛ̀ ti Yiɛ̀ nKuyie.
\b
\q1
\v 23 M berínɛ̀ kucɛ cuokɛ̀ nkɛ kɛ̀ kù dɛ̀itɛ n wɛ̃rímú,
\q1 kɛ kṹpùnnɛ n we.
\q1
\v 24 Áú Kuyie! N dɑ bɑ́ɑ́mmu, bɑ́ n tootɛ,
\q1 kɛ yɛ̃́ fɔ̃́ bomɛ̀mu sɑ̃́ɑ̃̀ yɛbie nyɛbie.
\q1
\v 25 Fɔ̃́ɔ̃̀ dɔ̀ɔ̀ kɛtenkɛ̀ nɛ̀ dimɔ̀nnì,
\q1 tiwɛtì tu ɑ nɔ̀ùtɛ̀ kó mutɔ̃mmú mmu.
\q1
\v 26 Dɛndɛ yóó pɛ̃ɛ̃tɛ́mu, kɛ̀ fɔ̃́ nní mbo,
\q1 dɛ̀ yóó kótɛ́mu kuyɑ̀ɑ̀kù tɛ̃mɛ̀.
\q1 A yóó dɛ̀ kpɛ̀úmu kuyɑ̀ɑ̀kù kɔ̃mɛ, kɛ̀ dɛ̀ɛ ceetɛ.
\q1
\v 27 Fɔ̃́ nyie mɛ mbɑɑ yó ndò nhɑ dòntì nti,
\q1 ɑ we í deu.
\q1
\v 28 A kó bɛtɔ̃mbɛ̀ bí yóó mɔɔtɛmu dikɑ̀rì,
\q1 kɛ̀ bɛ yɑɑ̀bí nfííkú teii ɑ ììkɛ̀.
\c 103
\s1 Dɑfiti sɑ̃ntɛmɛ̀ Kuyie
\pi1
\v 1 Dɑfitii kó fɛyɛ̀nfɛ̀.
\b
\q1 N sɑ̃ntímu n Yiɛ̀ nKuyie nɛ̀ n yɛ̀mmɛ̀ mɛmɔu,
\q1 n wɛ̃nnì dɛ̀úkùnkomu ku yetisɑ̀ɑ̀rì.
\q1
\v 2 N sɑ̃ntímu n Yiɛ̀ nKuyie nnɛ̀ n yɛ̀mmɛ̀ mɛmɔu,
\q1 m bɑ́ɑ́ yɛ̃̀ mmɛsɑ̀ɑ̀ nkù n dɔ̀ɔ̀ mɛ̀ kó mɛ̀mɑmɛ̀.
\b
\q1
\v 3 Kuù n cĩ́ɛ̃nko n cɑɑ̀rìmɛ̀ mɛmɔu,
\q1 kuù m miɛkùnko m mɔmmú mumɔu.
\q1
\v 4 Kuù n dènnɛ difɔ̃̀tìrì miɛkɛ,
\q1 kuù còúnní ku kó mɛsɑ̀ɑ̀ n yĩ́nkɛ̀, kɛ n kuɔ̀ mmɛsémmɛ̀.
\q1
\v 5 Kɛ m píɛ ndiwɛ̀ì n fòmmu kó yɛwe yɛmɔu miɛkɛ,
\q1 kɛ wɛ̃̀tɛ kɛ m bɛ́nkùnnɛ kɛ̀ m pùù fɛcĩrifɛ ɔ̃mmɛ̀.
\q1
\v 6 Ti Yiɛ̀ nKuyie nkuù bekù kɛ̀ dɛ̀ wenni,
\q1 kuù ɔ̃ɔ̃ kónnɛ́ bɛ̀ di wè nɛ̀ muwɛ̃rímú kóò duɔ́ nhò dò nkɛ́nte dɛ̀.
\q1
\v 7 Kuù bɛnkɛ Mɔyiisi ku kó icɛ
\q1 kɛ̀ Isidɑyɛɛribɛ yɑ̀ ku diɛtì.
\q1
\v 8 Kuyie nsémmɛ̀ dɛumu, kɛ̀ kù dɔ̀ɔ̀ri mɛsɑ̀ɑ̀,
\q1 ku miɛkɛ í cɑ̃ɑ̃ kɛ́pɛ́íkú, kù nìtimu mɛdiɛ̀.
\q1
\v 9 Kù ɔ̃ɔ̃ í nhɑ̃ kɛ kpɑ nsɑ̃́ɑ̃̀,
\q1 ku miɛkɛ ɔ̃ɔ̃ í nhɑ̃ kɛ pɛ́ì.
\q1
\v 10 Kù í ti yietì ti cɑɑ̀rìmɛ̀ mɑ̀mɛ̀,
\q1 kù í ti fɔku ti yɛi mmɑ̀mɛ̀.
\b
\q1
\v 11 Tiwɛtì yòùtɛnɛ̀ mɛ̀ɛ̀ botí kɛtenkɛ̀,
\q1 Kuyie nkó mɛsɑ̀ɑ̀ mmɛ ndɛu bɛ̀ɛ̀ kù dé bɛ kpɛ́í.
\q1
\v 12 Diyiè yìɛ̀ní kɛ̀ dɛ̀ dɛ́tirìnɛ̀mɛ̀ dì tɑɑ̀ kɛ̀,
\q1 ti Yiɛ̀ nKuyie nhɔ̃ɔ̃ mɛ nti dɛ́tinnɛ ti cɑɑ̀rìmɛ̀.
\q1
\v 13 Onìtì ɔ̃ ndɔ́ mɛ̀ɛ̀ botí o bí,
\q1 ti Yiɛ̀ nKuyie mmɛ ndɔ́ bɛ̀ɛ̀ kù dé.
\q1
\v 14 Kuyie nyɛ̃́mu kù ti pìítɛ́nɛ̀ mù,
\q1 kù yɛ̃́mu kɛ dò nti tú mutɑ̃́ɑ̃́.
\b
\q1
\v 15 Onìtì fòmmu dònnɛ̀ timútì nti,
\q1 mù ɔ̃ɔ̃ pórímu timútì tɛ̃mɛ̀.
\q1
\v 16 Kɛ̀ kuyɑɑkùu fuutɛní kɛ̀ mu kpɛrɛɛ deè,
\q1 ɑ tɛ̃́nkɛ bɑ́ɑ́ bɑntɛ́ mù do borɛ̀.
\q1
\v 17 Ti Yiɛ̀ nKuyie nkó mɛsɑ̀ɑ̀ nhɔ̃ mbonɛ̀mu bɛ̀ɛ̀ kù dé sɑ̃́ɑ̃̀,
\q1 kù ɔ̃ mbɛ̀ dɔ̀ɔ̀rimu dɛ̀ɛ̀ sìɛ́ bɛmbɛ nɛ̀ bɛ yɑɑ̀bío.
\q1
\v 18 Dɛ kó mɛsɑ̀ɑ̀ mbomu bɛ̀ɛ̀ pĩ nku tɑummɛ̀,
\q1 kɛ yɛ̃́ ku kuɔ́ kpɛ́í nkɛ dɔɔri ì yɛ̃mmɛ̀ bɛ kpɛ́í.
\b
\q1
\v 19 Ti Yiɛ̀ nKuyie ǹfìí nku kpɑ̀ɑ̀tìkɑ̀rì tiwɛtì nti,
\q1 kɛ bɑkɛ́ dɛmɔu dɛ̀ɛ̀ bo.
\q1
\v 20 Díndi Kuyie ntɔ̃rɛ̀ nsɑ̃ntínɛ̀ ku,
\q1 díndi bɛ̀ɛ̀ tu muwɛ̃rímú yɛmbɛ̀ kɛ yíé nku kpɛti,
\q1 kɛ̀ kù ɔ̃ɔ̃ bɛ́i nkɛ̀ di yie nkù yɛ̃ mmù.
\q1
\v 21 Diyiè nɛ̀ otɑ̃̀nkù nɛ̀ siwɑ̃̀ɑ̃, nsɑ̃ntínɛ̀ ti Yiɛ̀ nKuyie Mpɑkɛdɑɑ,
\q1 díndi bɛ̀ɛ̀ pĩ́ nku tɔ̃mmú kɛ yíé nku kpɛti.
\q1
\v 22 Díndi kù dɔ̀ɔ̀ dɛ̀, nsɑ̃ntínɛ̀ ku,
\q1 kuù bɑkɛ́ tipíìtì timɔu.
\q1 N wɛ̃nnì, ɑ́ nsɑ̃ntí ɑ Yiɛ̀ nKuyie.
\c 104
\s1 Ti bo nsɑ̃ntímɛ̀ ti Yiɛ̀ nKuyie nkùù dɔ̀ɔ̀ dɛmɔu
\q1
\v 1 N wɛ̃nnì ɑ́ nsɑ̃ntí ɑ Yiɛ̀ nKuyie.
\b
\q1 N Yiɛ̀ nKuyie ndɛumu mɛdiɛ̀,
\q1 kuù te tikpetì nɛ̀ disɑ̃nni.
\q1
\v 2 Kù dɑ̀ɑ́tí kuwenniku nku diyɑɑ̀bòrì kɔ̃mɛ,
\q1 kuù pitɛ́ tiwɛtì bɛ̀ ɔ̃ɔ̃ pitɛ́mɛ̀ kuyɑ̀ɑ̀kù.
\q1
\v 3 Kuù fìí nku cĩ́ɛ̃̀tɛ̀ yɛwɛtɛ̀ ĩ́nkɛ̀,
\q1 kɛ̀ yɛwɛtɛ̀ tu ku sɑ̃ntɛ̀,
\q1 kɛ̀ ku fɛ̀tì tu kuyɑ̀ɑ̀kù.
\q1
\v 4 Kuyɑɑkù kuù tu ti Yiɛ̀ nKuyie ntɔ̃rɛ̀,
\q1 kɛ̀ fɛhɑ̃ɑ̃dɛɛ̀nfɛ̀ tu ku kó bɛtɔ̃mbɛ̀.
\b
\q1
\v 5 Kuyie n kuù fìí nkɛtenkɛ̀ kó dipũũ,
\q1 kɛ̀ kɛ̀ fìíkú sɑ̃́ɑ̃̀ yɛbie nyɛbie.
\q1
\v 6 Kɛ̀ kù kɛ̀ dɑ̀tínnɛ́ mɛnɛ́diɛmɛ̀ kuyɑ̀ɑ̀kù kɔ̃mɛ,
\q1 kɛ̀ mɛ̀ dɑ̀tínko yɛtɑ̃rɛ̀.
\q1
\v 7 Kɛ̀ kùu pɛ́i nkɛ̀ mɛ̀ɛ cokɛ́,
\q1 kɛ̀ kùu pɛɛ mmɛtɑmmɛ̀ bɑ́ mɛ̀ í wuɔkɛ́.
\q1
\v 8 Kɛ̀ mɛ̀ɛ pɔ̃ntɛní yɛtɑ̃rɛ̀ kɛ́cútɛ́ní dibiri,
\q1 kɛ́kɔtɛ kù mɛ̀ bɛnkɛ dìì bòrì.
\q1
\v 9 Kuù mɛ̀ kèétɛ́ kumɑ̀nku mɛ̀ yó nkɑ̃́ɑ̃́kɛ́ dɛ̀,
\q1 kɛ́ bɑ́ɑ́ wɛ̃tɛní kɛ́dɑ́tínnɛ́ kɛtenkɛ̀.
\b
\q1
\v 10 Kuù niù sibií kó mɛniɛ nkɛ̀ mɛ̀ tɑɑ̀ ikó,
\q1 nkɛ pũɔ̃̀ nkɛ tũũ̀ nyitɑ̃fuɔ.
\q1
\v 11 Kɛ̀ tiwɑnwɑntì timɔu yɔ̃̀,
\q1 kɛ̀ dikpɑ́ɑ̀ kó musɑ̃mmɑrímú\f + \fr 104:11 \fr*\fk dikpɑ́ɑ̀ kó musɑ̃mmɑrímú: \fk*\ft Tɛhontɛ̀ mɑtɛ̀ ntɛ kɛ̀ tɛ̀ dònnɛ̀ sɑ̃mmɑrímú kɛ nɛ́ bo dikpɑ́ɑ̀, dɛ kó siweí í bo kunitisɔ̀ùkù kɛ dò ntí nyɛ̃́ si yètɛ̀.\ft*\f* mɛ̀ kɔ̀ùnɛ̀ sinɛ́yɛ̃ĩ.
\q1
\v 12 Kɛ̀ sinɔɔ cekù si yĩ́ɛ̃̀ntì dɛborɛ̀,
\q1 kɛ kɑrì dɛtie nyĩ́nkɛ̀ kɛ kuɔ̀.
\b
\q1
\v 13 Kuyie mbo ku cĩ́ɛ̃̀tɛ̀ ntɛ kɛĩ́nkɛ̀,
\q1 kɛ yɔ́ɔ̀rì yɛtɑ̃rɛ̀, kuù te kɛ̀ kɛtenkɛ̀ sɑ̀nnɛ̀ mɛniɛ.
\q1
\v 14 Kuù te kɛ̀ timútì yìɛ̀ní kɛ̀ iwũɔ̃ bo nyo,
\q1 kɛ̀ tidiitì bo mpɛí kɛ̀ bɛnìtìbɛ̀ piɛti kɛ yo.
\q1
\v 15 Kɛtenkɛ̀ nkɛ mɛnɑɑ̀ nyìɛ̀nímɛ̀ kɛ cɑ́tìnko onìtì yɛ̀mmɛ̀,
\q1 ò ɔ̃ɔ̃ dɛ mpɛ́tɛ́ mɛkùɔ̀ nkɛ́wɑɑrɛ o ììkɛ̀ kɛ̀ kɛ̀ mmiɛti,
\q1 bɛ̀ dɛ mpiɛti tidiitì kɛ yo nkɛ mɔkɛ muwɛ̃rímú.
\b
\q1
\v 16 Kɛ̀ ti Yiɛ̀ nKuyie nkó dɛtie nsɑ̀nnɛ̀ mɛniɛ,
\q1 Dimɑɑ kó dɛtie mbɛ̀ tu dɛ̀ sɛ́tìrì kù fìíkú dɛ̀.
\q1
\v 17 Sinɔɔ dɛ ncekù si yĩ́ɛ̃̀ntì,
\q1 icuo ndɛ ncekù i yĩ́ɛ̃ǹtì kɛ wentí.
\q1
\v 18 Kɛ̀ sitɑ̃bɔɔ́ bo yɛtɑ̃rɛ̀ diɛyɛ̀ ĩ́nkɛ̀,
\q1 kɛ̀ yɛsetɛ tɑɑ̀ yɛpèrɛ̀ fíè.
\b
\q1
\v 19 Kuyie nkuù dɔ̀ɔ̀ otɑ̃̀nkù kòò bo m bɑɑ̀tì yɛmɔ̀rɛ̀,
\q1 kɛ̀ diyiè yɛ̃́ dì ɔ̃ɔ̃ tɑ dìì mɔ̀nnì.
\q1
\v 20 Kuù ɔ̃ɔ̃ yúní dibiìnnì kɛ̀ dɛ̀ɛ yĩ́ kɛyènkɛ̀
\q1 kɛ̀ tikpɑsĩ̀ntì timɔu ítɛ́ mucèmmu.
\q1
\v 21 Yɛcìrícìrɛ̀ kó yɛpɑ̀ɑ̀ nhɔ̃ mbɛti kɛ bo pĩ́,
\q1 kɛ kontí kɛ mɔ́ú Kuyie nku mudiì.
\q1
\v 22 Kɛ̀ diyiè yɛ̀tìní yɛ̀ɛ̀ cìɛ́tɛ́ kɛ́tɑɑ́ yɛ dèntì miɛkɛ.
\q1
\v 23 Kɛ̀ bɛnìtìbɛ̀ mɛ ntó yɛ̀nní kɛ́kũɔ̃tí bɛ tɔ̃nnɛ̀,
\q1 kɛ́nkémmúnɛ̀ kuyuoku.
\b
\q1
\v 24 N Yiɛ̀ nKuyie nhɑ pĩ́ mmutɔ̃mmú diɛmù mmu,
\q1 ɑ dɔ̀ɔ̀ dɛ̀ɛ̀ kó dimɑ̀ɑ̀ ɑ dɛ̀ dɔ̀ɔ̀nɛ̀ mɛciì mmɛ,
\q1 dɛ̀ɛ̀ pìɛ́kɛ́ kɛtenkɛ̀ fɔ̃́ɔ̃̀ dɛ̀ dɔ̀ɔ̀.
\q1
\v 25 Ntɛ dɑ̀mɛ́ɛ̀rì kɛ duɔ́ kɛ í sénní
\q1 tiwɑnwɑntì tibotí tibotí tidiɛtì nɛ̀ tisɑ́m̀pɔ́tì kɛ̀ dɛ̀ pìɛ́kɛ́ o miɛkɛ.
\q1 Bɑ́ tì í dò nkɛ́kɑɑ nkɛ́deè.
\q1
\v 26 Kɛ̀ bɑ̀tóòbɛ̀ cèntì o miɛkɛ tipíìtì timɔu,
\q1 dɑ̀mɛ́ɛ̀rì kó musĩ̀mmù\f + \fr 104:26 \fr*\fk dɑ̀mɛ́ɛ̀rì kó musĩ̀mmù: \fk*\ft Dimɔ̀nnì kɔbɛ yɛ̀mmɛ̀ do dò nfɛwɑ̀ɑ̀fɛ̀ mɑfɛ̀ fɛɛ̀ bo dɑ̀mɛ́ɛ̀rì miɛkɛ yoo fɛmùɔ̀fɛ̀ mɑfɛ̀ yoo dibɔɔ̀ dimɔ́mmɔnni fɛwɑ̀ɑ̀fɛ̀ diɛfɛ̀, Kuyie nyóó kuɔ fɛ̀ yɛmɔ̀rɛ̀ sɔnyɛ. (Wéntɛ́ Mudɑ́ɑmmu 12:3,9).\ft*\f* ɑ dɔ̀ɔ̀mù kɛ̀ mù bo nkpɛiti o miɛkɛ.
\b
\q1
\v 27 Tiwɑnwɑntì timɔu bùɔ́ fɔ̃́ nwe,
\q1 kɑ̀ɑ bo ntì duɔ̀ mmudiì dɛ̀ dò nhɑ́ ntì duɔ̀ ndìì mɔ̀nnì.
\q1
\v 28 Fɔ̃́ɔ̃̀ ɔ̃ɔ̃ yɑɑtɛ́ní kɛ̀ tìi koú,
\q1 fɔ̃́ɔ̃̀ ɔ̃ɔ̃ yɑnnɛ ɑ nɔ̀ùtɛ̀ kɛ̀ tìi di kɛ́nsɑ̀nnɛ̀.
\q1
\v 29 Á tì bùtínnɛ́ kɛ̀ tìi tɑ kukɔ̃m̀bɔ̀doróo miɛkɛ,
\q1 dɛitɛ ti wemmu kɛ̀ tìi kú kɛ́wɛ̃tɛ mutɑ̃́ɑ̃́ mmiɛkɛ.
\q1
\v 30 Kɑ̀ɑ ti duɔ́nko ɑ kó muyɑɑ́ nti fòùtɛmu,
\q1 kɛtenkɛ̀ bo wɛ̃tɛ kɛ́nɑɑ́ nkɛpɑ̀nkɛ̀.
\b
\q1
\v 31 N Yiɛ̀ nKuyie nhɑ kpetì mbo sɑ̃́ɑ̃̀,
\q1 dɛ̀ ndɑ nɑɑtinɛ̀ ɑ tɔ̃mmú ɑ pĩ́ mmù.
\q1
\v 32 Kɑ̀ɑ wèńtɛ́ kɛtenkɛ̀ kɛ̀ sɑ̃̀ntɛ̀mu
\q1 kɑ̀ɑ kɑ̀ɑ́kɛ́ yɛtɑ̃rɛ̀ yɛ̀ cɔ̀útɛ́ muhɑ̃ɑ̃́ mmu.
\b
\q1
\v 33 N fòmmu mumɔu n yó ndièmmu kɛ sɑ̃ntí n Yiɛ̀ nKuyie.
\q1 Kɛ̀ n kpɑɑ́ weí n yó ndɛ́úkùnkomu ku yètìrì.
\q1
\v 34 Kùu yie nkɛ́cɔutɛ́ n kó yɛsɑ̃ɑ̃,
\q1 mí n yie nYiɛ̀ nKuyie nkuù n duɔ́ ndiwɛ̀ì.
\q1
\v 35 Bɛyɛibɛ kó dimɑ̀ɑ̀ òmɔù bɑ́ nkpɑɑ́ kɛtenkɛ̀ ĩ́nkɛ̀.
\q1 Bɛnitidɔnnibɛ̀ɛ deè pɑ́íí kɛtenkɛ̀.
\b
\q1 N sɑ̃ntímu n Yiɛ̀ nKuyie nnɛ̀ n yɛ̀mmɛ̀ mɛmɔu.
\q1 Sɑ̃ntɛnɛ̀ ti Yiɛ̀ nKuyie!
\c 105
\s1 Ò dentɛnímɛ̀ Kuyie mbɛ̀ dɔ̀ɔ̀ dɛ̀
\r (Yɛnɑ́ɑǹkékɛ̀ 1-15 Wéntɛ́ 1 Bɛkpɑ̀ɑ̀tìbɛ̀ tɔ̃mmú 16:8-22)
\b
\q1
\v 1 Nsɑ̃ntínɛ̀ ti Yiɛ̀ nKuyie,
\q1 pĩɛ̃kɛ́nɛ̀ ku yètìrì.
\q1 Nɑ́kɛ́nɛ̀ yɛbotɛ̀ mutɔ̃ndiɛmù kù pĩ mmù.
\q1
\v 2 Ndiènnɛ̀ kɛ kù sɑ̃ntí nɛ̀ dɛbémbénnɛ̀,
\q1 nnɑ́ɑ́nnɛ̀ ku diɛtì kù dɔ̀ɔ̀ tì.
\q1
\v 3 Mpɔtìnɛ̀ ku yètìrì, kù dò mpɑ́íí nwe,
\q1 di yɛ̀mmɛ̀ nnɑɑti díndi bɛ̀ɛ̀ wɑnti ti Yiɛ̀ nKuyie.
\q1
\v 4 Wɑmmúnɛ̀ ti Yiɛ̀ nKuyie nnɛ̀ ku wɛ̃rímú,
\q1 nwɑntinɛ̀ kù bo ndi bonɛ̀mɛ̀ sɑ̃́ɑ̃̀.
\q1
\v 5-6 Díndi ku kóo tɔ̃ntì Abɑrɑhɑmmu kó kuwuɔ nkɔbɛ
\q1 di bɑ́ɑ́ yɛ̃̀ nku dɔ̀ɔ̀ tìì diɛtì kpɛ́í.
\q1 Díndi Sɑkɔbu yɑɑ̀bí kù tɑ̃ɑ̃tɛ́ bɛ̀
\q1 di bɑ́ɑ́ yɛ̃̀ mmutɔ̃ndiɛmù kù dɔ̀ɔ̀ mù nɛ̀ kù nɑ̀kɛ́ tì.
\b
\q1
\v 7 Kuù tu ti Yiɛ̀ nKuyie,
\q1 kuù bɑkɛ́ kɛtenkɛ̀ kɛmɔu.
\q1
\v 8 Kù í yĩɛ̃̀ mbìtì ku tɑummɛ̀ kpɛ́í,
\q1 ku nùù kù bɛ́i ndì tidɑpùntɔ̃ntì tɛkɔupíítɛ̀ (1000) kpɛ́í.
\q1
\v 9 Kù í yɛ̃̀ nkù dɔ̀ɔ̀nɛ̀ mɛ̀ɛ̀ tɑummɛ̀ Abɑrɑhɑmmu,
\q1 kù mɛ nyí yɛ̃̀ nkù dɔúnnɛ̀ dìì nùù Isɑki kɛ pɑ̀rìkɛ̀.
\q1
\v 10 Kù nɑ̀kɛ́ dìì nùù Sɑkɔbu di duɔ́mu,
\q1 kù dɔ̀ɔ̀nɛ̀ mɛ̀ɛ̀ tɑummɛ̀ Isidɑyɛɛri mɛ̀ bomu nsɑ̃́ɑ̃̀.
\q1
\v 11 Kù do ò nɑ̀kɛ́ dì kɛ dɔ̀:
\q1 N yóó dɑ duɔ́mmu Kɑnnɑhɑ̃ɑ̃ tenkɛ̀.
\q1 Di kpɛrɛ ndɛ n di duɔ́ ndɛ̀.
\b
\q1
\v 12 Bɛ̀ do í sũ, bɛ̀ do í tú bɛ̀mɑbɛ̀
\q1 kɛ tú bɛpɔ̀ɔ̀bɛ̀ dɛ kó kɛtenkɛ̀.
\q1
\v 13 Kɛ̀ bɛ̀ nkérí kɛ pɛ̃nkutɛ yɛbotɛ̀ yɛbotɛ̀,
\q1 kɛ tɑti yɛkpɑ̀ɑ̀tìyɔ yɛkpɑ̀ɑ̀tìyɔ.
\q1
\v 14 Kù do í yie nkòò mɔùu bɛ̀ fɛ̃́ũ,
\q1 kɛ́ncɑú mbɛkpɑ̀ɑ̀tìbɛ̀ bɛ kpɛ́í.
\q1
\v 15 Kɛ nɑ́ɑ́ nkɛ tú:
\q1 Di bɑ́ɑ́ kɑ́ɑ́kɛ́ n cɑ̃̀ńnɛ́ bɛ̀.
\q1 Di bɑ́ɑ́ dɔɔ̀ mɛyɛi mbɛ̀ɛ̀ nɑ́ɑ́ m pɑ̃ɑ̃nɑ́ɑǹtì.
\b
\q1
\v 16 Kɛ̀ kùu tɑnnɛ́ní dikònnì bɛ tenkɛ̀ miɛkɛ,
\q1 kɛ̀ bɛ̀ɛ mɔ́ntɛ́ mudiì.
\q1
\v 17 Kɛ̀ kù nɛ́ nií nhonìtì,
\q1 Sosɛfu bɛ̀ do fìtɛ́ wè kòò ntú kudɑɑkù.
\q1
\v 18 Kɛ̀ bɛ̀ɛ tɑ́ú nho nɑɑ̀cɛ̀i mɛfĩmmɛ,
\q1 kóò dùú ntimɑ́tì,
\q1
\v 19 kɛ́mbɑɑ̀nɛ̀ Kuyie ndo ò nɑ̀kɛ́ tì bo dɔɔ̀mɛ̀,
\q1 kɛ̀ Kuyie mbɛnkɛ ò í cɑ̀ɑ̀rɛ̀mɛ̀.
\q1
\v 20 Kòo kpɑ̀ɑ̀tìi duɔ́ nkɛ̀ bɛ̀ɛ ò pìtɛ́,
\q1 wenwe wèè bɑkɛ́ yɛbotɛ̀ weè ò fĩ́ĩ.
\q1
\v 21 Kòo kpɑ̀ɑ̀tìi ò bɑɑ́ nkòò mbɑkɛ́ o cĩ́ɛ̃̀tɛ̀ tɛmɔu,
\q1 kɛ́mbɑkɛ́nɛ̀ okpɑ̀ɑ̀tì te dɛ̀ dɛmɔu.
\q1
\v 22 Kɛ̀ dɛ̀ bo yie kòò niitɛ́ bɛ̀ɛ̀ tũ̀ nhokpɑ̀ɑ̀tì,
\q1 wenwe Sosɛfu ò bɛ̀ dɔ́nɛ̀mɛ̀
\q1 kɛ́tuo mmɛciì ndihɛì kó bɛkótíbɛ̀.
\q1
\v 23 Isidɑyɛɛri mɛ nkò nhEsibiti,
\q1 Sɑkɔbu mɛ nkɑ̀ri Kɑmmu tenkɛ̀.
\b
\q1
\v 24 Kuyie ndɛ nduɔ́ nkɛ̀ bɛ wuɔ nsṹṹ.
\q1 Bɛ̀ dɛ nkpenkɛ kɛ́pɛ̃ɛ̃tɛ́ bɛ dùɔ̀ntɔbɛ̀.
\q1
\v 25 Kɛ̀ Kuyie nceetɛ Esibiti kɔbɛ kó mɛyɛ̀mmɛ̀,
\q1 kɛ̀ bɛ̀ nníí nku nìtìbɛ̀,
\q1 kɛ́ndɔ́ kɛ́ bɛ̀ bɔ nnɛ̀ mɛciì.
\q1
\v 26 Kɛ̀ Kuyie ntɔ̃nní ku kóo tɔ̃ntì Mɔyiisi,
\q1 nɛ̀ Anɔɔ kù do tɑ̃ɑ̃tɛ́ wè.
\q1
\v 27 Kɛ̀ Kuyie nduɔ́ nkɛ̀ bɛ̀ɛ dɔɔ̀ mɛbɛnkùmɛ̀ Esibiti
\q1 nɛ̀ ku kó muwɛ̃rímú.
\q1 Kɑmmu ɛì ndi bɛ̀ do dɔ̀ɔ̀mɛ̀ tidiɛtì.
\q1
\v 28 Kɛ̀ kùu duɔnní dibiìnnì kɛ̀ dɛ̀ɛ biitɛ,
\q1 bɛ̀ mɔù í nnɑ kɛ́yetɛ ku nɑ́ɑǹtì.
\q1
\v 29 Kɛ̀ Kuyie nceetɛ mɛniɛ nkɛ̀ mɛ̀ɛ nɑɑ́ mmɛyĩ̀ĩ̀,
\q1 kɛ̀ siyĩĩ kú.
\q1
\v 30 Kɛ̀ yɛcɛdɑkɛ̀ɛ píɛ mbɛ tenkɛ̀ kɛmɔu,
\q1 nɛ̀ sikpɑ̀ɑ̀tìcɛ̃́ĩ miɛkoo.
\q1
\v 31 Kɛ̀ kùu bɛ́i nkɛ̀ isɛ̃ĩĩ píɛ ndihɛì nɛ̀ tidɔndɔntì.
\q1
\v 32 Fɛtɑɑfɛ̀ nɑ nniumɛ̀ kɛ̀ fɛtɑɑfɛ̀ mɑ́tɑ̃́rɛ̀ yɛɛ̀ nɛ́ cùtɛ́ní
\q1 kɛ̀ muhɑ̃ɑ̃́ ncɔ́útɛ́ bɛ tenkɛ̀ kɛmɔu,
\q1
\v 33 kɛ́cɑkɛ dɛtie mbɛ̀ tu dɛ̀ fínyĩ̀ nɛ̀ bɛ̀ tu dɛ̀ fìkíè,
\q1 kɛ́mɑrí dɛtie ndɛmɔu bɛ tenkɛ̀ miɛkɛ.
\q1
\v 34 Kɛ̀ kùu bɛ́i nkɛ̀ fɛcofɛɛ tɑnní,
\q1 nɛ̀ sibɛii pɛ́u pɛ́u.
\q1
\v 35 Kɛ̀ dɛ̀ɛ dɛ́útóo timútì timɔu kɛtenkɛ̀,
\q1 kɛ́ɑɑroo dɛ̀ɛ̀ kó dimɑ̀ɑ̀ yìɛ̀ní kɛtenkɛ̀.
\q1
\v 36 Kɛ̀ kùu potɛ́ bɛ̀ɛ̀ tu Mpo bɛmɔu Esibiti tenkɛ̀,
\q1 bɛ̀ piɛ́ bɛ̀ bɛ dɑcɛ̃ntì miɛkɛ.
\q1
\v 37 Kɛ̀ kù kɔbɛ nyɛtì kɛ tɔ timɑ́tì pɛ́ítì nɛ̀ mɛsɔɔ,
\q1 kɛ̀ bɛ̀ɛ kétɛ́ kɛ́yɛ̀ bɑ́ òmɔù kɔ̃̀ntì í nyɑ̃rikɛ.
\q1
\v 38 Kɛ̀ dɛ̀ɛ nɑrikɛ Esibiti kɔbɛ bɛ̀ yɛ̀mɛ̀,
\q1 kɛ yɛ̃́ kufɔ̃wɑɑ́ ndo bɛ̀ ɑutɛ́mɛ̀ mɛdiɛ̀.
\b
\q1
\v 39 Kɛ̀ Kuyie nduɔnní diwɛtirì kɛ̀ dì níí mbɛ̀ dìɛ́kɛ́,
\q1 kɛ níí mbɛ̀ mí kɛyènkɛ̀.
\q1
\v 40 Kɛ̀ bɛ̀ɛ mɔɔ Kuyie nyimɑɑ nkɛ̀ kùu bɛ̀ duɔ́ nyɛpɛ̀pɛ́rɛ̀
\q1 nɛ̀ kɛĩ́nkɛ̀ kó mudiì kɛ̀ bɛ̀ɛ di kɛ́nsɑ̀nnɛ̀.
\q1
\v 41 Kɛ̀ Kuyie nyɑtɛ́ dipèrì, kɛ̀ mɛniɛ nyɛ̀nní kɛ́mpũɔ̃̀,
\q1 kɛ́pɔ̃ntɛ́ tɛdɔntɛ̀ kó dikpɑ́ɑ̀ kukó nkɔ̃mɛ.
\b
\q1
\v 42 Kù do kpɑɑ́ yɛ̃́ ku nùù sɑ̀ɑ̀rì,
\q1 kù dɔúnnɛ̀ dì ndi ku kóo tɔ̃ntì Abɑrɑhɑmmu.
\q1
\v 43 Kuù dènnɛ ku nìtìbɛ̀ kù tɑ̃ɑ̃tɛ́ bɛ̀ nɛ̀ diwɛ̀ì,
\q1 kɛ̀ bɛ̀ nkérí kɛ íútí.
\q1
\v 44 Kɛ̀ kùu bɛ̀ duɔ́ nyɛbotɛ̀ tenkɛ̀,
\q1 kɛ̀ bɛ̀ɛ tiekɛ yɛbotɛ̀ ɔ̀ùtì kpɛrɛ.
\q1
\v 45 Kɛ̀ dɛ̀ bo yie nkɛ̀ bɛ̀ ntũ nku tié,
\q1 kɛ yíé nku kuɔ́ yɛ̃ mmù.
\q1 Nsɑ̃ntínɛ̀ ti Yiɛ̀ nKuyie!
\c 106
\s1 Isidɑyɛɛribɛ í dɔ́mɛ̀ Kuyie nkɛ̀ Kuyie mbɛ̀ dɔ́
\r (Dinɑ́ɑǹkéè 1, 47-48 wéntɛ́ 1 Bɛkpɑ̀ɑ̀tìbɛ̀ tɔ̃mmú 16:34-36)
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Dɛ́úkùnnɛ ti Yiɛ̀ nKuyie, kù nìtimu,
\q1 kɛ̀ ku kó mɛsɑ̀ɑ̀ mbo sɑ̃́ɑ̃̀.
\q1
\v 2 We mbo nɑ kɛ́nɑ́kɛ́ mutɔ̃ndiɛmù kù pĩ́ mmù?
\q1 We mbo nɑ kɛ́ kù sɑ̃ntɛ kɛ́deè ku sɑ̃nni?
\b
\q1
\v 3 Kunɑɑtí ḿbonɛ̀ bɛ̀ɛ̀ dɔ̀ɔ̀ri dɛ̀ɛ̀ wenni,
\q1 bɛ̀ɛ̀ tũ̀ ntimɔ́mmɔnti sɑ̃́ɑ̃̀.
\b
\q1
\v 4 N Yiɛ̀ nKuyie nhɑ́ nyɛ̃́ n kpɛ́í,
\q1 fɔ̃́ nwèè dɔ̀ɔ̀ri ɑ nìtìbɛ̀ mɛsɑ̀ɑ̀,
\q1 yɑ̀ɑ tí dɛɛtɛ́ fɔ̃́ nwèè tu odɛɛtíwè.
\q1
\v 5 Kɛ̀ dɛ̀ɛ yie nkɛ̀ m pɛ́tɛ́ mɛsɑ̀ɑ̀, ɑ dɔɔrimɛ̀ ɑ tɑ̃ɑ̃tɛ́ bɛ̀,
\q1 kɛ́nyɑ̃nku kubotí kùù tu ɑ kɔku kù yɑ̃̀nkumɛ̀,
\q1 kɛ̀ n wɛ̃nnɛ́nɛ̀ ɑ kɔbɛ kɛ̀ tí mpɔtì.
\b
\q1
\v 6 Ti cɑ̀kɛmu ti yɛmbɛ̀ cɑ̀kɛmɛ̀, ti yetɛ́mu,
\q1 tíì te mɛcɑɑ̀rìmɛ̀.
\b
\q1
\v 7 Ti yɛmbɛ̀ do í bɑntɛ́ tidiɛtì ɑ dɔ̀ɔ̀ tì Esibiti,
\q1 bɛ̀ do í kpɑɑ́ kɛ yɛ̃́ mɛsɑ̀ɑ̀ nhɑ do bɛ̀ dɔ̀ɔ̀rimɛ̀ pɛ́u, pɛ́u,
\q1 kɛ́yetɛ ɑ kpɛti dɑ̀mɛ́ɛ̀rì tipèntì kou borɛ̀.
\q1
\v 8 Kɑ̀ɑ bɑɑ bɛ̀ dɛɛtɛ́ ɑ yètìrì kpɛ́í,
\q1 kɛ̀ bɛnìtìbɛ̀ bo bɑntɛ́ ɑ kpeńnìmɛ̀.
\q1
\v 9 Fɔ̃́ɔ̃̀ do pɛ́i ndɑ̀mɛ́ɛ̀rì tipèntì kou, kòo kṹṹ,
\q1 kɛ̀ bɛ̀ nkérí mɛniɛ ndo borɛ̀ kɛ dò mbɛ̀ kèrí tɛdɔntɛ̀.
\q1
\v 10 Kɛ̀ fɔ̃́ɔ̃̀ bɛ̀ dɛɛtɛ́nɛ̀ bɛ̀ɛ̀ do bɛ̀ nìí
\q1 kɛ́ bɛ̀ pɑ̀tɛnɛ̀ bɛ dootitɔbɛ̀.
\q1
\v 11 Kɛ̀ mɛniɛ ndɑ́tínnɛ́ bɛ dùɔ̀ntɔbɛ̀
\q1 bɑ́ òmɔù í nyentɛ́ bɑ́ omɑ́ɑ̀.
\q1
\v 12 Kɛ̀ bɛ̀ɛ yie nhɑ nɑ́ɑǹtì, kɛ́ndiè nkɛ dɑ sɑ̃ntí.
\b
\q1
\v 13 Kɛ̀ dɛ̀ nyóó yíɛ́ kɛ̀ bɛ̀ yɛ̃̀nko ɑ pĩ mmùù tɔ̃mmú,
\q1 bɛ̀ í nkèńtɛ́ kɛ bo yɑ̀ ɑ yóó dɔɔ̀ tì.
\q1
\v 14 Bɛ̀ bo dìì mɔ̀nnì dikpɑ́ɑ̀ miɛkɛ,
\q1 kɛ́ketɛ́ bɛ̀ bo nyɑ́ɑ́mmɛ̀ bɛ̀ í mɔkɛ dɛ̀,
\q1 kɛ́ketɛ́ bɛ̀ bo nyíinkomɛ̀ fɔ̃́ nKuyie nhɑ miɛkɛ
\q1 dikpɑ́ɑ̀ tɛdɔntɛ̀ miɛkɛ.
\q1
\v 15 Kɑ̀ɑ bɛ̀ duɔ́ mbɛ̀ dɑ bekɛ́ dɛ̀,
\q1 kɛ̀ bɛ̀ɛ dɛ̀ di kɛ́pɛ̃.
\q1
\v 16 Bɛ kɑrì miɛkɛ kɛ̀ bɛ̀ɛ ítɛ́ kɛ́nhɛ̃ɛ̃nnɛ̀ Mɔyiisi nɛ̀ Anɔɔ ɑ cɑ̃̀ńnɛ́ wè.
\q1
\v 17 Kɛ̀ kɛtenkɛ̀ɛ ɑɑtɛ kɛ́mɑɑ́nkoo Dɑtɑnni,
\q1 kɛ̀ mutɑ̃́ɑ̃́ ndɑ́tínnɛ́ Abidɑmmu kó ditĩ̀nnì.
\q1
\v 18 Kɛ̀ muhɑ̃ɑ̃́ ncɔ́útɛ́ dɛ kó kutɔ̃nkù kɔbɛ,
\q1 kɛ̀ fɛhɑ̃ɑ̃dɛɛ̀nfɛ̀ɛ dɛ́útóo dɛ kó bɛnitiyɛibɛ.
\b
\q1
\v 19 Odɛbu tɑ̃rì bɛ̀ dɛ nyìɛ ntimɑ́tì kɛ́utɛ́ kɛ̀ dɛ̀ ndò nkunɑɑbiiku.
\q1 Kɛ̀ bɛ̀ nninku kɛ bɑ́ɑ́ ntimɑ́tì bɛ̀ yìɛ ntì kɛ utɛ́,
\q1
\v 20 kɛ́túótɛ́ Kuyie nkùù tu bɛ kó disɑ̃nni
\q1 kɛ́donnɛnɛ̀ fɛnɑ̀ɑ̀fɛ̀ kó kufènkù dɛ̀ɛ̀ cɑ̀ɑ́ ntimútì,
\q1
\v 21 kɛ́yɛ̃nko Kuyie nkpɛ́í,
\q1 kunku kùù tu bɛ dɛɛtíwè.
\q1 Kuù dɔ̀ɔ̀ tidiɛtì Esibiti ɛì miɛkɛ.
\q1
\v 22 Kuù do dɔ̀ɔ̀ tidiɛtì Kɑmmu tenkɛ̀ miɛkɛ.
\q1 Kuù do pĩ mmutɔ̃ndiɛmù dɑ̀mɛ́ɛ̀rì tipèntì kou miɛkɛ.
\q1
\v 23 Kɛ̀ Kuyie nni ndɔ́ kɛ́ bɛ̀ kùɔ bɛmɔu pɑ́íí,
\q1 kɛ̀ ku kóo tɔ̃ntì Mɔyiisi kù tɑ̃ɑ̃tɛ́ wè,
\q1 weè nɛ́ cómmú Kuyie nnɛ̀ bɛnìtìbɛ̀ bɛ cuokɛ̀,
\q1 kɛ́ bɛ̀ pɑ̀tɛ kɛ́bónkùnnɛ ku miɛkɛ bɑ́ kù í mbɛ̀ kùɔ.
\b
\q1
\v 24 Kɛ̀ bɛ̀ɛ senkɛ̀rì dihɛì sɑ̀ɑ̀rì,
\q1 bɛ̀ í nyie nkɛ dò nKuyie mbɛ̀ nɑ̀kɛ́ tì bo dɔɔ̀.
\q1
\v 25 Kɛ̀ bɛ̀ nsɛ́í nKuyie mbɛ touti miɛkɛ,
\q1 bɛ̀ í nkèńtɛ́ bɛ Yiɛ̀ nKuyie ntɑmmɛ̀.
\q1
\v 26 Kɛ̀ kùu youtɛ ku nɔ̀ùtɛ̀ kɛ́pɑrìkɛ̀ kɛ dɔ̀
\q1 kù bo bɛ̀ kùɔ dikpɑ́ɑ̀ miɛkɛ,
\q1
\v 27 kɛ́cíɛ mbɛ wuɔ nyimɔu kɛ̀ ìi tɑ ibotí tɛì tenkɛ̀,
\q1 kɛ́kú ibotí ìì í yɛ̃́ Kuyie nyi cuokɛ̀.
\b
\q1
\v 28 Kɛ̀ bɛ̀ɛ tɑunnɛ̀ dibɔɔ̀ Bɑɑdi Peɔɔ ɛì,
\q1 kɛ́cɑ́ɑ́kɛ́ iwũɔ̃ bɛ̀ fìé ì bɛcíríbɛ̀.
\q1
\v 29 Kɛ̀ bɛ dɔɔ̀rìmɛ̀ɛ yonkɛ Kuyie,
\q1 kɛ̀ kùu bɛ̀ potɛ́ kuyɛ̃ĩku mɑkù.
\q1
\v 30 Kɛ̀ Pinɑsi ítɛ́ kɛ́cómmú,
\q1 kɛ́potɛ́ bɛ̀ɛ̀ cɑ̀ɑ̀rɛ̀, kɛ̀ Kuyie nkó kuyɛ̃ĩkuu cómmú.
\q1
\v 31 Kɛ̀ Kuyie mpɛ́nsìrì o tɔ̃mmú kɛ̀ bɛ̀ nnɑ́ɑ́ mmu kpɛ́í nyɛbie nyɛbie.
\b
\q1
\v 32 Mɛdibɑ kó tɛbintɛ borɛ̀ kɛ̀ bɛ̀ɛ íi nKuyie mmiɛkɛ,
\q1 dɛɛ̀ tɔní Mɔyiisi mɛyɛi.
\q1
\v 33 Kɛ yɛ̃́ bɛ̀ do suurɛmɛ̀ o miɛkɛ kòo nɑ́kɛ́ bɑ́ ò í ntotí o yɛ̀mmɛ̀.
\b
\q1
\v 34 Bɛ̀ í nkùɔ ibotí tɛì,
\q1 ti Yiɛ̀ nKuyie ndo yɛ̃ mbɛ̀ɛ ì kùɔmɛ̀.
\q1
\v 35 Kɛ̀ bɛ̀ɛ kɔɔrɛnɛ̀ ibotí tɛì,
\q1 kɛ́tũnnɛ i kó mɛdɔɔ̀rìmɛ̀,
\q1
\v 36 kɛ́fíé iwũɔ̃ ibotí tɛì kó yɛbɔkɛ̀,
\q1 kɛ̀ yɛ̀ɛ bɛ̀ bɔ.
\q1
\v 37 Kɛ̀ bɛ̀ nfeu bɛ bí initidɑbí nɛ̀ initipobí yɛbɔkɛ̀,
\q1
\v 38 kɛ́nkɔù bɛnìtìbɛ̀ bɛ̀ɛ̀ í cɑ̀ɑ̀rɛ̀ dɛ̀mɑrɛ̀,
\q1 kɛ feu bɛ bí initidɑbí nɛ̀ initipobí,
\q1 bɛ̀ do ì feu Kɑnnɑhɑ̃ɑ̃ kó yɛbɔkɛ̀ nyɛ,
\q1 kɛ́sɑ̃ũ nkɛtenkɛ̀ nɛ̀ mɛnitiyĩ̀ĩ̀.
\q1
\v 39 Kɛ̀ bɛ dɔɔ̀rìmɛ̀ɛ bɛ̀ sĩ̀nkùnnɛ,
\q1 kɛ̀ bɛ̀ɛ yetɛ Kuyie nkɛ́nfeu yɛbɔkɛ̀ kɛ cɑ̃́nnì.
\q1
\v 40 Kɛ̀ Kuyie mmiɛkɛɛ bɛ̀ yɛ̀ mɛdiɛ̀ mbɛmbɛ ku nìtìbɛ̀,
\q1 kɛ̀ kùu bɛ̀ pɛ̃̀ mbɛmbɛ kù do te bɛ̀,
\q1
\v 41 Kɛ̀ kùu yóu kɛ̀ bɛ̀ɛ tɑ ibotí tɛì nɔu miɛkɛ,
\q1 bɛ̀ɛ̀ bɛ̀ nìí nkɛ̀ bɛ̀ɛ bɛ̀ bɑɑtɛ́ kɛ́ mbɛ̀ fɛ̃́ũnko.
\q1
\v 42 Kɛ̀ bɛ dootitɔbɛ̀ mbɛ̀ fɛ̃́ũnko,
\q1 kɛ̀ bɛ̀ɛ bɛ̀ bɔ̀útɛ́.
\q1
\v 43 Kɛ̀ Kuyie nni mbɛ̀ dɛɛrí kucɛ mɛ̀pɛ́u,
\q1 kɛ̀ bɛ̀ nɛ́ nyetírí ku tié, kɛ kpénkùnko bɛ to,
\q1 kɛ dɔkɛ tɑti mɛyɛi mmiɛkɛ.
\q1
\v 44 Kɛ̀ kùu yɑ̀ bɛ sémmɛ̀ kɛ́keè bɛ dɑbònnì,
\q1
\v 45 kɛ́dentɛní kù do bɛ̀ dɔ̀ɔ̀nɛ̀ mɛ̀ɛ̀ tɑummɛ̀ kpɛ́í,
\q1 ku sémmɛ̀ dɛu mɛ̀ɛ̀ kpɛ́í, kɛ̀ kùu bɛ̀ kuɔ́ mmɛsémmɛ̀.
\q1
\v 46 Kɛ̀ kùu duɔ́ nkɛ̀ bɛ̀ɛ̀ do bɛ̀ pĩ̀ḿmú,
\q1 kɛ̀ bɛ̀ɛ bɛ̀ kuɔ́ mmɛsémmɛ̀.
\b
\q1
\v 47 Ti Yiɛ̀ nKuyie nhɑ ti dɛɛtɛ́,
\q1 ti dennɛní ibotí tɛì miɛkɛ kɛ́ ti tíí,
\q1 kɛ̀ ti ndɛ́úkùnko ɑ yetisɑ̀ɑ̀rì,
\q1 kɛ̀ ti ndɑ pɔtìnɛ̀ kɛ dɑ sɑ̃ntí.
\b
\q1
\v 48 Ti Yiɛ̀ nKuyie ntínti Isidɑyɛɛribɛ tũ nkù, ɑ yètìrì ndɛu,
\q1 ɑ yètìrì do dɛumu kɛ yó ndɛu sɑ̃́ɑ̃̀,
\q1 bɛnìtìbɛ̀ bɛmɔu, yiennɛ̀ kɛ dɔ̀:
\q1 Dɛ̀ mmɛ ndò! Nsɑ̃ntínɛ̀ ti Yiɛ̀ nKuyie.
\ms1 YƐSÃÃ MPÁTÍRI DINUMMURÌ
\r (Yɛsɑ̃ɑ̃ 107-150)
\c 107
\s1 Kuyie ndɛɛtɛ́ bɛ̀ kù sɑ̃ntímɛ̀
\q1
\v 1 Ndɛ́úkùnkonɛ̀ ti Yiɛ̀ Kuyie nkù nìtimu,
\q1 ku sɑ̀ɑ̀ mbomu nsɑ̃́ɑ̃̀.
\q1
\v 2 Díndi ti Yiɛ̀ nKuyie ndɛɛtɛ́ bɛ̀, ńsɑ̃ntínɛ̀ ku,
\q1 díndi kù fìètɛ bɛ̀ di dootitɔbɛ̀ nɔu miɛkɛ.
\q1 Ndɛ́úkùnkonɛ̀ ku.
\q1
\v 3 Díndi kù dènnɛní bɛ̀ yɛhɛkɛ̀ yɛmɔu miɛkɛ kɛ̀ di tìí.
\q1 Diyiè yìɛ̀ní kɛ̀ nɛ̀ di tɑɑ̀ kɛ̀,
\q1 kubɑkù yoú nɛ̀ kucɑ̃̀nku kɔbɛ ńsɑ̃ntínɛ̀ ku.
\b
\q1
\v 4 Bɛ̀ do ɑ̃́ɑ̃́mmu dikpɑ́ɑ̀ miɛkɛ kɛtempɛ́íkɛ̀,
\q1 bɑ́ dihɛì í bo kɛ dò nkɛ́kɑri,
\q1
\v 5 kɛ̀ sinɛ́yɛ̃ĩ bɛ̀ potɛ́ nɛ̀ dikònnì,
\q1 kɛ̀ bɛ̀ɛ duúnnɛ̀ mukṹṹ,
\q1
\v 6 kɛ́tɑ mɛsémmɛ̀ miɛkɛ kɛ́kuɔ́nnɛ̀ bɛ Yiɛ̀ nKuyie,
\q1 kɛ̀ kùu bɛ̀ dɛɛtɛ́nɛ̀ mɛyɛǹcɑɑ̀rìmɛ̀.
\q1
\v 7 Kɛ́ bɛ̀ niitɛ́ kucɛ kùù sìɛ́,
\q1 kɛ̀ bɛ̀ bo kò ndihɛì kɛ́kɑri,
\q1
\v 8 kɛ́ndɛ́úkùnko ti Yiɛ̀ nKuyie nku sɑ̀ɑ̀ nkpɛ́í,
\q1 kù dɔ̀ɔ̀ tìì diɛtì kɛ bo dɛɛtɛ́ bɛnìtìbɛ̀ ti kpɛ́í.
\q1
\v 9 Kuù duɔ́ nsinɛ́yɛ̃ĩ do bo bɛ̀ kɛ̀ bɛ̀ yɑ̃̀,
\q1 kɛ duɔ́ ndikònnì do bo bɛ̀ kɛ̀ bɛ̀ di kɛ sɑ̀nnɛ̀.
\b
\q1
\v 10 Bɛmbɛ bɛ̀ɛ̀ do ɑ̃ dikpetíntou miɛkɛ dibiìnnì,
\q1 kɛ bo mɛsémmɛ̀ miɛkɛ kɛ tɑ́ú mɛfĩmmɛ.
\q1
\v 11 Kɛ yɛ̃́ bɛ̀ do yetɛmɛ̀ Kuyie nkpɛti,
\q1 kɛ́senkɛ̀rì Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kó itié.
\q1
\v 12 Kɛ̀ kùu bɛ̀ tɑnnɛ́ mɛhɑ́ɑ́rìmɛ̀ miɛkɛ kɛ̀ bɛ̀ɛ kɛ̃kɛ,
\q1 kɛ́nduò bɑ́ òmɔù í bɛ̀ íimmu.
\q1
\v 13 Kɛ̀ bɛ̀ɛ tɑ mɛsémmɛ̀ kɛ́kuɔ́nnɛ̀ bɛ Yiɛ̀ nKuyie,
\q1 kɛ̀ kùu bɛ̀ dènnɛ mɛyɛǹcɑɑ̀rìmɛ̀ miɛkɛ.
\q1
\v 14 Kɛ̀ kùu bɛ̀ dènnɛní dikpetíntou miɛkɛ dibiìnnì,
\q1 kɛ́kéétɛ́ tidɑɑtì kó iwɛ̃ĩ.
\q1
\v 15 Kɛ̀ bɛ̀ ndɛ́úkùnko ti Yiɛ̀ nKuyie nku sɑ̀ɑ̀ nkpɛ́í,
\q1 kù dɔ̀ɔ̀ tìì diɛtì kɛ bo dɛɛtɛ́ bɛnìtìbɛ̀ ti kpɛ́í.
\q1
\v 16 Kɛ yɛ̃́ kuù kèétɛ́mɛ̀ disɔɔwũɔ̃̀ kó yɛcɑ̀kɛ̀,
\q1 kɛ bɔ̀kɛ́ imɑtìdɛí ìì do pɑ́kɛ́.
\b
\q1
\v 17 Bɛ̀ tu tiyɛìntì nti kɛ tú bɛnitikɔ̀ùbɛ̀,
\q1 nɛ̀ bɛ kó mɛcɑɑ̀rìmɛ̀ kɛ tɑnnɛ́ bɛmɑ́ɑ̀ mɛsémmɛ̀.
\q1
\v 18 Kɛ pɛ̃̀ ntidiitì timɔu,
\q1 kɛ duúnnɛ̀ kufɔ̃ti.
\q1
\v 19 Kɛ tɑ mɛsémmɛ̀ miɛkɛ kɛ kuɔ́nnɛ̀ bɛ Yiɛ̀ nKuyie,
\q1 kɛ̀ kùu bɛ̀ dɛɛtɛ́nɛ̀ mɛyɛǹcɑɑ̀rìmɛ̀,
\q1
\v 20 kɛ́duɔnní ku nɑ́ɑǹtì kɛ̀ tìi bɛ̀ miɛkùnnɛ,
\q1 kɛ́ bɛ̀ dɛɛtɛ́nɛ̀ kufɔ̃ti.
\q1
\v 21 Kɛ̀ bɛ̀ ndɛ́úkùnko ti Yiɛ̀ nKuyie nku sɑ̀ɑ̀ nkpɛ́í,
\q1 kù dɔ̀ɔ̀ tìì diɛtì kɛ bo dɛɛtɛ́ bɛnìtìbɛ̀ ti kpɛ́í.
\q1
\v 22 Kɛ̀ bɛ̀ɛ kù pɑ̃mmú yɛsɑ̃ɑ̃ nkó yɛpɑ̃rɛ̀,
\q1 kɛ́mpĩɛ̃kùnɛ̀ diwɛ̀ì kɛ nɑ́ɑ́ nku dɔ̀ɔ̀ dɛ̀.
\b
\q1
\v 23 Bɛ̀ do centìnɛ̀ bɑ̀tóòbɛ̀ mbɛ dɑ̀mɛ́ɛ̀rì miɛkɛ,
\q1 kɛ pĩ́ mbɛ tɔ̃mmú dɑ̀mɛ́ɛ̀rì miɛkɛ.
\q1
\v 24 Bɛ̀ yɑ̀mu ti Yiɛ̀ nKuyie mpĩ mmùù tɔ̃mmú,
\q1 kù dɔ̀ɔ̀ tìì diɛtì mɛniɛ mmiɛkɛ.
\q1
\v 25 Kù do bɛ́i nku nùù mɛ̀mɑ́ɑ̀ ndi,
\q1 kɛ̀ kuyɑɑkù diɛkùu ítɛ́ní kɛ́nyíínko yɛnɛ́fĩ̀nfĩ̀rɛ̀,
\q1
\v 26 kɛ̀ bɑ̀tóòbɛ̀ nyiiti kɛ dekù dɛĩ́nkɛ̀,
\q1 kɛ cuuti kɛtenkɛ̀ fũ̀ɔ̃̀,
\q1 kɛ bɛ̀ duɔ̀ mmɛyɛǹcɑɑ̀rìmɛ̀.
\q1
\v 27 Kɛ̀ bɛ̀ ììkɛ̀ɛ fitɛ́ kɛ̀ bɛ̀ nhɑ̃́ɑ̃́ nkɛ dò mbɛ̀ muɔ́ mmɛnɑɑ̀.
\q1 Kɛ̀ bɛ ciì mmɛmɔuu deè.
\q1
\v 28 Kɛ̀ bɛ̀ɛ tɑ mɛsémmɛ̀ miɛkɛ kɛ́kuɔ́nnɛ̀ ti Yiɛ̀ nKuyie,
\q1 kɛ̀ kùu bɛ̀ dènnɛ mɛyɛǹcɑɑ̀rìmɛ̀ miɛkɛ,
\q1
\v 29 kɛ́cónnɛ́ kuyɑɑkperíkù só,
\q1 kɛ̀ yɛnɛ́fĩ̀nfĩ̀rɛ̀ dɔ̀ bɛ́ù.
\q1
\v 30 Kɛ̀ dɛ̀ɛ bɛ̀ nɑrikɛ kuyɑɑkù kperíkù còḿmúmɛ̀,
\q1 kɛ̀ ti Yiɛ̀ nKuyie mbɛ̀ sée mbɛ̀ dɔ́ dìì bòrì.
\q1
\v 31 Kɛ̀ bɛ̀ ndɛ́úkùnko ti Yiɛ̀ nKuyie nku sɑ̀ɑ̀ nkpɛ́í.
\q1 Tidiɛtì kù dɔ̀ɔ̀ tì kɛ dɛɛtɛ́ bɛnìtìbɛ̀ ti kpɛ́í.
\q1
\v 32 Nsɑ̃ntínɛ̀ Kuyie kubotí kumɔu tĩ̀nnì miɛkɛ,
\q1 kɛ́ nkù sɑ̃ntí bɛkotibɑɑbɛ̀ tìí ndɛ̀.
\b
\q1
\v 33 Kuyie nkuù ɔ̃ɔ̃ ceetɛ ikó ndiɛyì kɛ̀ dɛ̀ɛ nɑɑ́ ntɛdɔnkpetɛ̀,
\q1 kɛ́duɔ́ nkɛ̀ sibií kó kɛtenkɛ̀ɛ nɑɑ́ nkɛtenkɛ̀ kɛ̀ɛ̀ dòńtɛ́ mɛniɛ.
\q1
\v 34 Kuù do duɔ́ nkɛ̀ kɛtensɑ̀ɑ̀kɛ̀ɛ nɑɑ́ mmɛtĩ̀ɛ̃̀ nkó kɛtenkɛ̀,
\q1 bɛnìtìbɛ̀ bɛ̀ɛ̀ kɛ̀ bo bɛ kó kuyonku kpɛ́í.
\q1
\v 35 Kɛ̀ kù mɛ ndɔ́ kùu ceetɛ tɛdɔnkpetɛ̀ kɛ̀ mɛniɛ nyɛ̀nní,
\q1 kɛ̀ mɛniɛ ndo í bo dɛ̀ɛ̀ nɑɑ́ nsibií.
\q1
\v 36 Kɛ̀ kùu dɛ̀ kɑ̀nnɛ dikònnì do bo bɛ̀,
\q1 kɛ̀ dɛ̀ɛ nɑɑ́ ndihɛì kɛ̀ bɛnìtìbɛ̀ mbo,
\q1
\v 37 kɛ́kúútí dɛpɑɑ nkɛ́fííkú dɛtie mbɛ̀ tu dɛ̀ fínyĩ̀,
\q1 kɛ̀ dɛ̀ɛ piɛ́ mmɛdiɛ̀.
\q1
\v 38 Kɛ̀ kùu bɛ̀ dɔ̀ɔ̀ mɛsɑ̀ɑ̀ nkɛ̀ bɛ̀ɛ piɛ́ kɛ́sṹṹ,
\q1 kù í nyóu kɛ̀ bɛ wũɔ̃ yɑɑtɛ.
\b
\q1
\v 39 Mɛsémmɛ̀ nɛ̀ mɛhɑ́ɑ́rìmɛ̀,
\q1 dɛɛ̀ do bɛ̀ yɑ̀ɑ̀tɛ kɛ́kɛ̃́kùnnɛ.
\q1
\v 40 Kɛ̀ ti Yiɛ̀ nKuyie nsenkɛ̀rì sikpɑ̀ɑ̀tìbìí,
\q1 kɛ́duɔ́ nkɛ̀ bɛ̀ nhɑ̃́ɑ̃́ nfɛkpɑ́fɛ̀ miɛkɛ kucɛ í borɛ̀.
\q1
\v 41 Kuù dɛɛtɛ́ bɛcĩ̀rìbɛ̀ mɛsémmɛ̀ miɛkɛ,
\q1 kɛ duɔ́ nkɛ̀ bɛ wuɔ nsũ̀ṹ nyiwũɔ̃ dòmmɛ̀.
\b
\q1
\v 42 Bɛ̀ɛ̀ dɔ̀ɔ̀ri dɛ̀ɛ̀ sìɛ́ kɛ̀ bɛ̀ɛ dɛ̀ yɑ̀ kɛ̀ dɛ̀ɛ bɛ̀ nɑrikɛ,
\q1 bɛyɛibɛ biɛ kó yɛnɔ̀ í ntɑ̀útɛ́.
\q1
\v 43 Wèè mɔ̀kɛ mɛyɛ̀mmɛ̀ wèe dɑɑtɛ dɛ kpɛ́í,
\q1 wèe bɑntɛ́ ti Yiɛ̀ nKuyie nkó mɛsɑ̀ɑ̀ nkù dɔ̀ɔ̀ mɛ̀.
\c 108
\s1 N dɔ́ kɛ́nɑmpɛmu kɛ́entɛ dikṹnweńnì ndi
\r (Yɛnɑ́ɑǹkékɛ̀ 2-6 Wéntɛ́ Yɛsɑ̃ɑ̃ 57:8-12. Yɛnɑ́ɑǹkékɛ̀ 7-14 wéntɛ́ Yɛsɑ̃ɑ̃ 60:7-14)
\d Dɑfiti yɛ̀nfɛ̀ ò dèntɛ̀ fɛ̀.
\b
\q1
\v 1 N kɔ̃m̀bùɔ̀tì í nɑmpú,
\q1 Kuyie n yó n dièmmu kɛ dɑ sɑ̃ntí.
\q1 Kɛ biennɛ̀ dɛbémbénnɛ̀ dɛ̀ɛ̀ tu n kó disɑ̃nni.
\q1
\v 2 N kùtìdùùtì nɛ̀ m bómbonti, entɛnɛ̀!
\q1 N dɔ́ kɛ́entɛ dikṹnweńnì ndi.
\b
\q1
\v 3 N Yiɛ̀ nKuyie nyó ndɑ sɑ̃ntímu bɛnìtìbɛ̀ cuokɛ̀,
\q1 kɛ́ndɛ́úkùnko ɑ yètìrì ibotí cuokɛ̀.
\q1
\v 4 Kɛ yɛ̃́ ɑ sɑ̀ɑ̀ mpɛ̃ɛ̃tóomɛ̀ tiwɛtì,
\q1 kɑ̀ɑ kó timɔ́mmɔnti sèńtɛ́ yɛwɛtɛ̀.
\q1
\v 5 Kuyie nhɑ́ ńdɛu kɛĩ́nkɛ̀
\q1 kɑ̀ɑ kpetì ḿbo kɛtenkɛ̀ kɛmɔu ĩ́nkɛ̀.
\q1
\v 6 A ti dɛɛtɛ́ tínti ɑ dɔ́ bɛ̀ mɛdiɛ̀.
\q1 Kéntɛ́ m bɑ́ɑmmu, yɑ̀ɑ ti pɑtɛ nɛ̀ ɑ wɛ̃rímú.
\b
\q1
\v 7 Kuyie mbɛ́immu ku cɛ̃sɑ̀ɑ̀tɛ̀ miɛkɛ,
\q1 kɛ tú kù yóó bɛ̀ nɑmu, kɛ́totí Sisɛmmu ɛì,
\q1 kɛ́berí Sukɔti biriku kɛ́totí,
\q1
\v 8 kɛ́nte Kɑdɑɑdi ɛì nɛ̀ Mɑnɑnsee kpɛri.
\q1 Kɛ̀ Efɑdɑimmu ntú ku pìì,
\q1 kɛ̀ Sudɑɑ tu ku kó kukpɑ̀ɑ̀tìpɑ̀ɑ̀ti.
\q1
\v 9 Mɔɑbu tu tɛnɑɑtɛ ntɛ, kù wùɔ̀nɛ̀ tɛ̀,
\q1 kù nɑmu Edɔmmu koò bɔntɛ́ kunɛùkù dɛ̀ɛ̀ bɛnkú kù bɛ̀ temɛ̀,
\q1 kɛ pɛ́ú Fidisitɛ̃ɛ̃bɛ mɛkpɑ̀rìtɑmmɛ̀.
\b
\q1
\v 10 We mbo n kɔtɛnɛ̀ dihɛikperì?
\q1 We mbo n tɑnnɛ́ Edɔmmu tenkɛ̀?
\q1
\v 11 Kɛ̀ dɛ̀ í tú fɔ̃́ nKuyie nkùù do ti dootóo,
\q1 bɑ́ ɑ tɛ̃́nkɛ í niɛ̀nɛ̀ ti kó bɛhɑ̃ɑ̃pɔ̀mbɛ̀ mudoò.
\b
\q1
\v 12 Kɔtɛní kɛ́ tí teennɛ̀, tí pɑtɛnɛ̀ ti dootitɔbɛ̀.
\q1 Kɛ yɛ̃́ onìtì kó mɛteèmmɛ̀ í túmɛ̀ mɛ̀mɑmɛ̀.
\q1
\v 13 Kuyie nyó nti bonɛ̀mu kɛ̀ ti pĩ́ mmutɔ̃ndiɛmù.
\q1 Kuù yóó nɑ̀u ti dùɔ̀ntɔbɛ̀.
\c 109
\s1 Bɛ̀ sɛi nwè mɔɔmɛ̀ Kuyie mmɛteèmmɛ̀
\pi1
\v 1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1 Kuyie n sɑ̃ntí fɔ̃́ nwe, bɑ́ ncĩ́ɛ̃́kóo,
\q1
\v 2 kɛ yɛ̃́ bɛyɛibɛ, bɛsoùmbɛ̀ nɑ́ɑ́ntɛmɛ̀ n kpɛ́í,
\q1 bɛ̀ nɑ̀ɑ́ ntì tu siyɑ́ɑ̀bìsí nsi.
\q1
\v 3 Mɛníímmɛ̀ kó tinɑ́ɑǹtì tiì n fitɛ́,
\q1 bɛ̀ n kpɑ̀nnɛ̀ dɛtetìrɛ̀ ndɛ.
\q1
\v 4 Mí mɛ mbɛ̀ dɔ́mu kɛ̀ n kó ticuuti nɛ́ tú iwɑ́tii,
\q1 n nɛ́ kuɔ̀nnɛ̀ Kuyie nku bɛ kpɛ́í.
\q1
\v 5 M bɛ̀ dɔ̀ɔ̀ri mɛsɑ̀ɑ̀ mmɛ, kɛ̀ bɛ̀ n yietì mɛyɛi,
\q1 m bɛ̀ dɔ́mu kɛ̀ bɛ̀ n cu mɛníìmmɛ̀.
\b
\q1
\v 6 Bɛ̀ nɑ̀ɑ́mmu n kpɛ́í nkɛ tú:
\q1 Duɔ́nnɛ̀ we onitiyɛiwe,
\q1 kòo dùɔ̀ntɔù wèè bo ò wɑ̀tí kòo mbo o bɑkù yoú.
\q1
\v 7 Kɛ̀ bɛ̀ɛ ò bekɛ́nɛ̀ kɛ́yɑ̀ o cɑɑ̀rìmɛ̀,
\q1 Kòo kó mubɑ́ɑmmuu nɑɑ́ mmuyɛimu.
\q1
\v 8 Kòo kó yɛwee kũpɛ,
\q1 kòo tɔù mɔùu cɔutɛ́ o fɔ̃̀tìrì,
\q1
\v 9 kòo bíi nɑɑ́ nyiciribí,
\q1 kòo pokùu nɑɑ́ nhokúpokù.
\q1
\v 10 Kòo bíi nɑɑ́ mbɛcièmbɛ̀, kɛ́mmúɔ́tɛ,
\q1 kɛ́yɛ̀ i dobontì kɛ́nyɑ̃ũti.
\q1
\v 11 Kòo bɑntiebɛɛ tiekɛ ò mɔ̀kɛ dɛ̀ dɛmɔu,
\q1 kɛ̀ bɛpɔ̀ɔ̀bɛ̀ɛ ɛí o ɔ̀ùtì kpɛrɛ.
\q1
\v 12 Òmɔù tɛ̃́nkɛ bɑ́ nhò dɔ̀ɔ̀ri mɛsɑ̀ɑ̀,
\q1 òmɔù mɛ mbɑ́ɑ́ kuɔ́ nho bí mmɛsémmɛ̀, ò ku kɛ yóu ì.
\q1
\v 13 Kòo yɑɑ̀bíi kú kɛ deè, kòo kó kuwuɔ nkpɑnnɛ́,
\q1 o yètìrì bɑ́ nkpɑɑ́ bo.
\q1
\v 14 N Yiɛ̀ nKuyie nhɑ bɑ́ɑ́ yɛ̃̀ nho yɛmbɛ̀ kó mɛyɛi nkpɛ́í,
\q1 o yɔ̃ kó mɛcɑɑ̀rìmɛ̀ bɑ́ɑ́ ítɛ́ ɑ ììkɛ̀.
\q1
\v 15 N Yiɛ̀ nKuyie nhɑ́ nyɛ̃́ bɛ yɛi nkpɛ́í,
\q1 kɛ̀ bɛ̀ bɑ́ ndenniní bɛ kpɛ́í kɛtenkɛ̀ ĩ́nkɛ̀.
\q1
\v 16 Dɛ kóo nìtì í mɔ̀ɔ̀tɛ mɛ̀ɛ̀ kpɛ́í mmɛsémmɛ̀,
\q1 kɛ fɛ̃́ũ nhocĩ̀rì, koò kùɔ mɛsémmɛ̀ miɛkɛ.
\q1
\v 17 Ò mɛ ndɔ́mɛ̀ kusĩ̀nkù nku kùu do o ĩ́nkɛ̀,
\q1 ò í mɛ ndɔ́mɛ̀mu mɛsɑ̀ɑ̀, mɛ̀ɛ ò dɛ́tɛ́nɛ̀.
\q1
\v 18 Kɛ̀ kusĩ̀nkùu ò dɑ̀tínnɛ́ diyɑɑ̀bòrì kɔ̃mɛ,
\q1 kɛ́tɑ o miɛkɛ mɛniɛ nkɔ̃mɛ,
\q1 kɛ́tuɔkɛ o kṹɔ̃̀ mɛkùɔ̀ nhɔ̃mmɛ̀.
\q1
\v 19 Kusĩ̀nkùu nɑɑ́ nho kó diyɑɑ̀bòrì kɛ́nɑɑ́ nfɛnɑɑkɔ̃̀nfɛ̀,
\q1 kòò nkù yì sɑ̃́ɑ̃̀.
\b
\q1
\v 20 Kuyie nhɑ́ yóu kɛ̀ dɛ̀ mmɛ ndò mbɛ̀ɛ̀ nɑ́ɑntɛ n kpɛ́í.
\q1 Bɛ̀ɛ̀ kó dimɑ̀ɑ̀ nɑ́ɑ́ntɛ n kó mɛyɛi dɛ̀ɛ mɛ mbɛ̀ dɔ̀ɔ̀.
\q1
\v 21 Fɔ̃́ n Yiɛ̀ nKuyie, fɔ̃́ nwèè n te,
\q1 ɑ bɑ́ m bɔntóo ɑ kó diyètìrì kpɛ́í.
\q1 A sɑ̀ɑ̀ ndɛumu, yɑ̀ɑ n dɛɛtɛ́.
\q1
\v 22 N tú osénnìwè nwe, ocĩ̀rì.
\q1 Dɛ̀ cɑ̀ɑ̀rɛ̀ n yɛ̀mmɛ̀ mmɛ.
\q1
\v 23 N kérí kɛ pɛ̃nkɛ́mu mɛdɛ́ɛ̀ ntɛ̃mɛ̀,
\q1 bɛ̀ m bɛ̀tìmu dicɑ́dɔ́nnì kɔ̃mɛ.
\q1
\v 24 M boú kɛ boú dinùù ndi kɛ̀ n núù nhɔ̀ɔ̀tɛ,
\q1 m mɔ̀ntɛ mmɑ́ɑ̀ ndi mudiì kɛ cĩ̀tɛ.
\q1
\v 25 N nɑɑ́ nyisíɛ́ kpɛrɛ ndɛ bɛ ììkɛ̀,
\q1 kɛ̀ bɛ̀ n yɑ̀u kɛ dɑ́ɑnkoo bɛ yɔ.
\b
\q1
\v 26 N Yiɛ̀ nKuyie nfɔ̃́ɔ̃̀ n te, yɑ̀ɑ n teennɛ̀,
\q1 nɛ̀ ɑ kó mɛsɑ̀ɑ̀ nkpɛ́í yɑ̀ɑ n dɛɛtɛ́.
\q1
\v 27 Dɔɔ̀ kɛ̀ bɛ̀ɛ bɑntɛ́ ɑ kó muwɛ̃rímú mmumɛ̀,
\q1 kɛ́bɑntɛ́ kɛ dò n Yiɛ̀ nKuyie nfɔ̃́ɔ̃̀ mɛ̀ dɔ̀ɔ̀.
\q1
\v 28 Bɛmbɛ m bɔmmù kusĩ̀nkù nku,
\q1 kɛ̀ fɔ̃́ nni n dɔɔri mɛsɑ̀ɑ̀.
\q1 Kɛ̀ bɛ̀ ìtɛ́ kɛ còḿmú bɛɛ̀ yóó di ifɛi,
\q1 mí nhɑ kóo tɔ̃ntì kɛ̀ nni mbo diwɛ̀ì miɛkɛ.
\q1
\v 29 Mɛsenkùmɛ̀ɛ dɑ́tínnɛ́ n níim̀bɛ̀,
\q1 kɛ̀ bɛ̀ɛ dɑ́ɑ́tí ifɛi diyɑɑ̀bòrì kɔ̃mɛ.
\b
\q1
\v 30 N yó nsɑ̃ntí n Yiɛ̀ nKuyie nnɛ̀ mɛtɑnkperímɛ̀ mmɛ,
\q1 bɑ́ nɛ̀ ditĩ̀nnì miɛkoo n yó ndɛ́úkùnkomu ku yètìrì.
\q1
\v 31 Kɛ yɛ̃́ kuù kommumɛ̀ ocĩ̀rì,
\q1 kɛ bo ò pɑ̀tɛnɛ̀ bɛ̀ɛ̀ ò bekùnɛ̀.
\c 110
\s1 Kuyie ntɑ̃ɑ̃tɛ́ wè kòò tu ikuɔ́ nìùtì kɛ tú okpɑ̀ɑ̀tì
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie n nɑ̀kɛ́mu n Yiɛ̀ nkɛ yĩ
\q1 we nkɑ̀ri o bɑkù yoú,
\q1 kɛ kémmúnɛ̀ kù bo ò duɔ́mmɛ̀ o dootitɔbɛ̀,
\q1 kòo bɛ̀ cùùti.
\q1
\v 2 Kuyie ndɑ duɔ́mmu fɛkpɑ̀ɑ̀tìpɑ̀tìfɛ̀ Siyɔ̃ɔ̃,
\q1 mbɑkɛ́ ɑ dootitɔbɛ̀.
\q1
\v 3 A kpɑ̀rìnuɔmbɛ dɑ duɔ́mmu bɛmɑ́ɑ̀,
\q1 ɑ ɔ̃ nyóó tíí nhɑ ɑ̃ɑ̃pɔ̀mbɛ̀ kɛ̀ bɛ̀ɛ kɔtɛnímu nɛ̀ tikɔ̃nyɑuti ɑ cɛ̃sɑ̀ɑ̀tɛ̀,
\q1 kɑ̀ɑ dɑpɑ̀ntì kó muwɛ̃rímúu wɛ̃tɛní ɑ borɛ̀
\q1 tikṹnwentɛ́mɑɑ̀ntì kɔ̃mɛ.
\b
\q1
\v 4 Ti Yiɛ̀ nKuyie m bɛ́immu kɛ ĩkú,
\q1 kù í yóó kpɑtɛ ku nùù.
\q1 Kù yĩ ɑ tú ikuɔ́ nìùtì nwe sɑ̃́ɑ̃̀,
\q1 kɛ dònnɛ̀ Mɛsisedɛki.
\q1
\v 5 Ti Yiɛ̀ nKuyie, n kómmú fɔ̃́ nwe,
\q1 kù miɛkɛ bo ítɛ́ dìì yiè,
\q1 kù bo ũtirɛ bɛkpɑ̀ɑ̀tìbɛ̀.
\q1
\v 6 Kuyie nyóó bekɛ́nɛ̀mu yɛbotɛ̀,
\q1 kɛ̀ bɛcíríbɛ̀ mɑ́ɑ̀ píɛ ndihɛì.
\q1 Kù kóo kpɑ̀ɑ̀tì yóó ũtirɛmu kɛtendiɛkɛ̀ kóo kpɑ̀ɑ̀tì.
\b
\q1
\v 7 Ò yó nkérí kɛ́yɑ̃̀ kukó nku,
\q1 kɛ́wɛ̃tɛ kɛ́pɛ́tɛ́ muwɛ̃rímú ò yóó nɑnɛ̀ mù o dootitɔbɛ̀. \f + \fr 110:7 \fr*\ft fr 110:7 \ft*\ft Dɛ kó tinɑ́ɑǹtì bo nɑ kɛ́mbɛnkú bɛhɑ̃ɑ̃pɔ̀mbɛ̀ bɛ̀ɛ̀ do yɑ̃̀ kukó nkɛ́pɛ́tɛ́ muwɛ̃rímú Sedeɔ̃ɔ̃ kó dimɔ̀nnì, yoo ti Yiɛ̀ nYesu wèè nɑ o dootitɔbɛ̀ nɛ̀ Kuyie nkó mɛteèmmɛ̀, kɛ kérí kɛ yíéo.\ft*\f*
\c 111
\s1 Bɛ̀ sɑ̃ntímɛ̀ Kuyie nkù dɔ̀ɔ̀ dɛ̀ kpɛ́í
\q1
\v 1 Nsɑ̃ntínɛ̀ Kuyie, kù bomu nsɑ̃́ɑ̃̀!
\b
\q1 N yó nsɑ̃ntímu n Yiɛ̀ nKuyie nnɛ̀ n yɛ̀mmɛ̀ mɛmɔu
\q1 bɛ̀ɛ̀ tũ ntimɔ́mmɔnti bɛ cuokɛ̀, ku tĩ̀nnì tìkú dɛ̀.
\q1
\v 2 Ti Yiɛ̀ nKuyie ntɔ̃mmú dɛumu,
\q1 bɛ̀ɛ̀ mù dɔ́ kɛ̀ bɛ̀ wɑnti kɛ́ mù yĩ̀ɛ̃́tɛ́.
\q1
\v 3 Ku tɔ̃mmú dɛumu kɛ wenni,
\q1 kù dɔ̀ɔ̀ri timɔ́mmɔnti nti sɑ̃́ɑ̃̀.
\q1
\v 4 Kù dɔ́ tí nyɛ̃́mu kù pĩ́ mmùù tɔ̃ndiɛmù kpɛ́í,
\q1 ti Yiɛ̀ nKuyie nsɑ̀mu kɛ mɔkɛ onìtì kó mɛsémmɛ̀.
\q1
\v 5 Kɛ duɔ̀ mmudiì bɛ̀ɛ̀ kù dé,
\q1 kù í yĩɛ̃̀ nkù bɛ̀ dɔúnnɛ̀ dìì nùù kpɛ́í bìtì.
\q1
\v 6 Kù bɛnkɛmu ku nìtìbɛ̀ kù pĩ mmùù tɔ̃ndiɛmù,
\q1 kɛ bɛ̀ duɔ́ nyibotí tɛì kó yɛhɛkɛ̀ kɛ̀ bɛ̀ tiekɛ.
\q1
\v 7 Kù dɔ̀ɔ̀ri dɛ̀ɛ̀ kó dimɑ̀ɑ̀ tu timɔ́mmɔnti nti kɛ síɛ́,
\q1 ku tɑnnɔ̀ í ceeri.
\q1
\v 8 Yɛ̀ fìíkúmu sɑ̃́ɑ̃̀, yɛ̀ í yóó ceetɛ,
\q1 yɛ̀ tu timɔ́mmɔnti nti kɛ síɛ́.
\q1
\v 9 Kuù dontɛ́ ku nìtìbɛ̀,
\q1 kɛ bɛ̀ dɔ̀ɔ̀nɛ̀ mɛtɑummɛ̀ kɛ̀ mɛ̀ bo sɑ̃́ɑ̃̀.
\q1 Kù dò mpɑ́íí nwe, kɛ duò tikɔ̃m̀bùɔ̀tì.
\q1
\v 10 A bo ndémɛ̀ Kuyie ndɛɛ̀ tu mɛciì nkó diketírì,
\q1 bɛ̀ɛ̀ dɔ̀ɔ̀ri mɛmmɛ bɛ̀ mɔ̀kɛ mɛyɛ̀mmɛ̀ mmɛ.
\q1 Kuyie nhɑ sɑ̃nni bomu nsɑ̃́ɑ̃̀.
\c 112
\s1 Wèè wetí ò ɔ̃ nkɑrimɛ̀ kɛ í yĩɛ̃̀kù
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Dɛ̀ nnɑɑti onìtì wèè dé Kuyie,
\q1 dɛ̀ nnɑɑti wèè piɛti diwɛ̀ì ku tɑnnɔ̀ miɛkɛ.
\q1
\v 2 Kuyie mbo dɔɔ̀ mɛsɑ̀ɑ̀ nwèè wetí o kó fɛyɑnfɛ̀,
\q1 o kó kuwuɔ mbo nkpeńnì bɛ tenkɛ̀ miɛkɛ.
\q1
\v 3 Mɛsɑ̀ɑ̀ nɛ̀ tikpɑ̀tì dɛ̀ yó mbomu dɛ yiɛ̀ ncĩ́ɛ̃̀tɛ̀,
\q1 Kuyie nhò wùó nwèè wetí wènwe sɑ̃́ɑ̃̀.
\q1
\v 4 Kɛ̀ dɛ̀ bììtoo wèè wetí Kuyie nkuù ɔ̃ɔ̃ ò mìítɛ́,
\q1 wèè sɑ̀ kɛ mɔkɛ onìtì kó mɛsémmɛ̀,
\q1 Kuyie nkuù ɔ̃ nhò mí.
\q1
\v 5 Dɛ̀ ńnɑɑti onìtì wèè pènni bɛtɔbɛ̀ o kpɛrɛ nɛ̀ diwɛ̀ì,
\q1 kɛ tũ nyikuɔ́ duɔ́ kɛ dòmmɛ̀,
\q1 kɛ tũnni o kpɛti.
\q1
\v 6 Dɛ yiɛ̀ nhɔ̃ í ndo bìtì.
\q1 Bɛ̀ ɔ̃ nyɛ̃́mu wèè wetí o kpɛ́í nsɑ̃́ɑ̃̀
\q1
\v 7 Dɛ yiɛ̀ nkòo kèè tiyɛiti mɑtì ò ɔ̃ɔ̃ í nyĩɛ̃̀kù,
\q1 dɛ̀ ɔ̃ɔ̃ í nhò nɑmpɛ kɛ yɛ̃́ ò duɔ́mmɛ̀ omɑ́ɑ̀ Kuyie nku.
\q1
\v 8 O kɔ̃m̀bùɔ̀tì í duò, ò í yĩɛ̃̀kù dɛ̀mɑrɛ̀,
\q1 kòò wetí o dootitɔbɛ̀, ò ɔ̃ nyɛ̃́mu weè yóó nɑmɛ̀.
\q1
\v 9 O nɔ̀ùtɛ̀ yɑ̀ɑmmu kòò pɑ̃ɑ̃ mbɛcĩ̀rìbɛ̀,
\q1 Kuyie nhò wùó nwèè wetí wènwe sɑ̃́ɑ̃̀,
\q1 o wɛ̃rímú nɛ̀ o kpetì kɛ̀ dɛ̀ dɛ̀úkú.
\q1
\v 10 Kòo yɛiwe ò wùó nkɛ̀ dɛ̀ ò yóù,
\q1 kòò cɑ̀ɑ́ nho nìì kɛ cĩtiri,
\q1 oyɛiwe dɔ́ dɛ̀ ɔ̃ɔ̃ yɛ̀ dɛtetìrɛ̀ ndɛ.
\c 113
\s1 Ti dòmmɛ̀ kɛ́nsɑ̃ntí ti Yiɛ̀ nKuyie
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Díndi ti Yiɛ̀ nKuyie nkó bɛtɔ̃mbɛ̀, ńsɑ̃ntínɛ̀ ku,
\q1 ndɛ́úkùnkonɛ̀ ti Yiɛ̀ nKuyie nyètìrì.
\q1
\v 2 Ti Yiɛ̀ nKuyie nyètìrì ndɛu
\q1 kɛ́túótɛ́ yíe nnɛ̀ ti bo mbomɔ̀ɔ sɑ̃́ɑ̃̀.
\q1
\v 3 Ndɛ́úkùnkonɛ̀ ti Yiɛ̀ nKuyie nyètìrì,
\q1 diyiè bo yɛ̀nnímɛ̀ nɛ̀ di yɑ̀ɑ bo tɑmɛ̀.
\q1
\v 4 Ti Yiɛ̀ nKuyie nkuù bɑkɛ́ yɛbotɛ̀ yɛmɔu,
\q1 kɛ̀ ku kpetì dèkɛ kɛ sèńtɛ́ tiwɛtì.
\b
\q1
\v 5 We ndònnɛ̀ ti Yiɛ̀ nKuyie nti tũ nkù?
\q1 Ku kpɑ̀ɑ̀tìkɑ̀rì bo kɛĩ́nkɛ̀ nkɛ.
\q1
\v 6 Kɛ̀ ku ɔ̃ɔ̃ sĩ́nnɛ́ kɛ́wéntɛ́ní,
\q1 kɛĩ́nkɛ̀ nɛ̀ kɛtenkɛ̀.
\q1
\v 7 Kuù ɔ̃ɔ̃ íinní osénnìwè mutɑ̃́ɑ̃́ mmiɛkɛ,
\q1 kuù ɔ̃ɔ̃ kũtɛ́ní ocĩ̀rì ditɑ́pùò miɛkɛ,
\q1
\v 8 kóò wɛ̃nnɛ́nɛ̀ sikpɑ̀ɑ̀tìbìí kɛ́kɑnnɛ,
\q1 kɛ̀ wèe wɛ̃nnɛ́nɛ̀ o ɛì kó bɛkótíbɛ̀.
\q1
\v 9 Kuù ɔ̃ɔ̃ pɑ̃ tɛcĩ́ɛ̃̀tɛ̀ wèè do tú tɛhɑ̃ũntɛ,
\q1 kòò nɑɑ́ nhobíyɔ̃ kɛ́mbonɛ̀ diwɛ̀ì.
\b
\q1 Nsɑ̃ntínɛ̀ ti Yiɛ̀ nKuyie!
\c 114
\s1 Isidɑyɛɛribɛ sèńtɛ́mɛ̀ dɑ̀mɛ́ɛ̀rì tipèntì kou
\q1
\v 1 Isidɑyɛɛribɛ yɛ̀ dìì mɔ̀nnì Esibiti,
\q1 Sɑkɔbu yɑɑ̀bí yɛ̀ dìì mɔ̀nnì bɛkpɑ́kpɑ̀rìbɛ̀ tenkɛ̀.
\q1
\v 2 Kɛ̀ Sudɑɑ wuɔ nni ntú ku kɔbɛ mbɛ,
\q1 kɛ̀ Isidɑyɛɛribɛ tu kù te bɛ̀.
\b
\q1
\v 3 Kɛ̀ dɑ̀mɛ́ɛ̀rìi bɛ̀ yɑ̀ kɛ́cokɛ́.
\q1 Kɛ̀ Suditɛ̃ɛ̃ kó mɛniɛ mbótí.
\q1
\v 4 Kɛ̀ yɛtɑ̃rɛ̀ ḿpuù yɛpedɑkɛ̀ kɔ̃mɛ,
\q1 kɛ̀ sitɑ̃ɑ̃́ puù yɛbɔdɑkɛ̀ kɔ̃mɛ.
\b
\q1
\v 5 Dɑ̀mɛ́ɛ̀rì ɑ cokùnɛ̀ bɑ?
\q1 Fɔ̃́ nSuditɛ̃ɛ̃ dɛ̀ dòmmɛ kɑ̀ɑ niɛ mbòtí?
\q1
\v 6 Díndi yɛtɑ̃rɛ̀ dɛ̀ dòmmɛ kɛ̀ di puù yɛpedɑkɛ̀ kɔ̃mɛ?
\q1 Sitɑ̃ɑ̃́ bɑ nte kɛ̀ di puù yɛbɔdɑkɛ̀ tɛ̃mɛ̀?
\b
\q1
\v 7 Kɛtenkɛ̀ ɑ kɔ̃̀ntì nhɑu ti Yiɛ̀ nKuyie nyììkɛ̀,
\q1 kunku Sɑkɔbu do tũ nkù
\q1
\v 8 Kuù ɔ̃ɔ̃ ceetɛ dipèrì borɛ̀ kɛ̀ dɛ̀ɛ nɑɑ́ ndibinni,
\q1 kutɑ̃ɑ̃́ duɔ́ dɛ̀ kɛ̀ dɛ̀ɛ nɑɑ́ nkukó.
\c 115
\s1 Kuyie nkuù mɑ́ɑ̀ dò tí nkù sɑ̃ntí
\q1
\v 1 Ti Yiɛ̀ nKuyie dɛ̀ í tú tíì te disɑ̃nni,
\q1 fɔ̃́ɔ̃̀ te disɑ̃nni, dɛ́úkùnnɛ ɑ yètìrì
\q1 ɑ sɑ̀ mɛ̀ɛ̀ kpɛ́í nkɛ dɔɔri timɔ́mmɔnti.
\b
\q1
\v 2 Bɑ nte kɛ̀ yɛbotɛ̀ bo mbékú kɛ tú:
\q1 Yé Kuyie mbɛ̀ tũ nkù borɛ̀?
\q1
\v 3 Kuyie nti tũ nkù bomu kɛĩ́nkɛ̀,
\q1 kɛ dɔɔri ku dɔ́ dɛ̀ dɛmɔu.
\q1
\v 4 Bɛ bɔkɛ̀ tu timɑ́tì pɛ́ítì nti nɛ̀ mɛsɔɔ,
\q1 bɛɛ̀ yɛ̀ dɔ̀ɔ̀ nɛ̀ bɛ nɔu.
\q1
\v 5 Yɛ̀ mɔ̀kɛmu yɛnɔ̀ yɛ̀ mɛ nyí nɔ nkɛ nɑ́ɑ́,
\q1 kɛ mɔkɛ inuɔ, nyɛ̀ mɛ nyí wúó.
\q1
\v 6 Kɛ mɔkɛ yɛto, yɛ̀ mɛ nyí yo,
\q1 kɛ mɔkɛ yɛwũɔ̃̀, nyɛ̀ mɛ nhɔ̃ɔ̃ í nkèè kunɔ́ú.
\q1
\v 7 Kɛ ɑ̃ sinɔu, yɛ̀ mɛ nyí nɔ nkɛ pĩĩ,
\q1 kɛ mɔkɛ sinɑɑ̀cɛ̀i, yɛ̀ mɛ nyí nɔ nkɛ ceǹtì,
\q1 mɛtɑmmɛ̀ í yiɛ̀ní yɛ níí miɛkɛ.
\q1
\v 8 Bɛ̀ɛ̀ dɔ̀ɔ̀ri dɛ kó sitenkɑɑnìi, bɛ̀ɛ sì nɑɑ́nnɛ̀,
\q1 bɛ̀ɛ̀ kó dimɑ̀ɑ̀ sì duɔ́ mbɛmɑ́ɑ̀, bɛ̀ɛ sì nɑɑ́nnɛ̀.
\q1
\v 9 Díndi Isidɑyɛɛribɛ kó kuwuɔ, duɔ́nnɛ̀ dimɑ́ɑ̀ di Yiɛ̀ nKuyie,
\q1 nkuù tu di kóo teèntì, di kó kudɔpìkù.
\q1
\v 10 Díndi Anɔɔ kó kuwuɔ nkɔbɛ duɔ́nnɛ̀ ndimɑ́ɑ̀ di Yiɛ̀ nKuyie,
\q1 nkuù tu di kóo teèntì, di kó kudɔpìkù.
\q1
\v 11 Díndi bɛ̀ɛ̀ dé ti Yiɛ̀ nKuyie duɔ́nnɛ̀ ku dimɑ́ɑ̀,
\q1 kuù tu di kó oteèntì, di kó kudɔpìkù.
\b
\q1
\v 12 Ti Yiɛ̀ nKuyie nyí yɛ̃̀ nti kpɛ́í, kù yóó ti dɔɔ̀mu mɛsɑ̀ɑ̀,
\q1 kù yóó dɔɔ̀mu mɛsɑ̀ɑ̀ nyIsidɑyɛɛribɛ kó kuwuɔ,
\q1 kɛ́dɔɔ̀ mɛsɑ̀ɑ̀ nhAnɔɔ kó kuwuɔ.
\q1
\v 13 Ti Yiɛ̀ nKuyie nyóó dɔɔ̀mu mɛsɑ̀ɑ̀ mbɛ̀ɛ̀ kù dé,
\q1 bɛsɑ́m̀pɔ́bɛ̀ nɛ̀ bɛdiɛbɛ̀ bɛmɔu.
\q1
\v 14 Ti Yiɛ̀ nKuyie nduɔ́ nkɛ̀ di sṹṹ,
\q1 díndi nɛ̀ di bío.
\q1
\v 15 Ti Yiɛ̀ nKuyie nkùù dɔ̀ɔ̀ kɛĩ́nkɛ̀ nɛ̀ kɛtenkɛ̀,
\q1 kù di dɔɔ̀ mɛsɑ̀ɑ̀.
\b
\q1
\v 16 Kɛĩ́nkɛ̀ ti Yiɛ̀ nKuyie nkuù kɛ̀ te,
\q1 kɛ duɔ́ nkɛtenkɛ̀ tínti bɛnìtìbɛ̀.
\q1
\v 17 Ti Yiɛ̀ nKuyie ndɛ̀ í tú bɛcíríbɛ̀ bɛɛ̀ yó ndɑ sɑ̃ntí,
\q1 Bɛdɔmbɛ̀ bɛɛ̀ í yó ndɑ sɑ̃ntí.
\q1
\v 18 Tínti biɛ mɛ nyó nsɑ̃ntímu ti Yiɛ̀ nKuyie,
\q1 di mmɔ̀nnì nɛ̀ ti bo mbomɔ̀ɔ.
\b
\q1 Nsɑ̃ntínɛ̀ ti Yiɛ̀ nKuyie!
\c 116
\s1 Kuyie ndɛɛtɛ́nɛ̀ wè mukṹṹ nkòò kù sɑ̃ntí
\q1
\v 1 N dɔ́mu n Yiɛ̀ nKuyie,
\q1 kɛ yɛ̃́ kù yomɛ̀ nkó yɛdɑbùò nnɛ̀ m bɑ́ɑmmìi.
\q1
\v 2 Kù n kèḿmúmu, kɛ̀ ku to bo m bíɛ́kɛ̀,
\q1 n yó nkù yumu sɑ̃́ɑ̃̀ nɛ̀ m bo mbomɛ̀.
\b
\q1
\v 3 Mukṹṹ mmuù do m pìtínnɛ́ mu kó iwɛ̃ĩ,
\q1 kɛ̀ kudɔnkù kó ticùɔ̀tì m pĩ́,
\q1 kɛ̀ mɛyɛǹcɑɑ̀rìmɛ̀ n nɑ,
\q1 kɛ̀ n tɑ kukɔ̃m̀bɔ̀doróo miɛkɛ.
\q1
\v 4 Kɛ kuɔ́nkoo kɛ́yú n Yiɛ̀ nKuyie nkɛ yĩ́:
\q1 N Yiɛ̀ nKuyie nyɑ̀ɑ n dɛɛtɛ́.
\q1
\v 5 Ti Yiɛ̀ nKuyie nwetímu, kɛ mɔkɛ mɛsémmɛ̀,
\q1 Kuyie nti tũ nkù kuɔ̀mmu onìtì mɛsémmɛ̀.
\q1
\v 6 N Yiɛ̀ nKuyie nkuù kɑ̃nkù bɛsĩ́ntíbɛ̀,
\q1 n do cĩ̀tɛmu kɛ̀ kù n dɛɛtɛ́.
\b
\q1
\v 7 N wɛ̃̀tɛ kɛ pɛ̀tɛ́mu mɛom̀pùmɛ̀,
\q1 N Yiɛ̀ nKuyie nkuù n dɔ̀ɔ̀ mɛsɑ̀ɑ̀.
\q1
\v 8 Kuù n dɛɛtɛ́nɛ̀ mukṹṹ, kɛ ũtɛ́ n nɔnniɛti,
\q1 kɛ pĩ n nɑɑ̀cɛ̀i, bɑ́ n yí do.
\q1
\v 9 N Yiɛ̀ nKuyie nkuù yó nni nwúó nkɛ̀ n kérí,
\q1 kɛtenkɛ̀ ĩ́nkɛ̀ bɛfòùbɛ̀ borɛ̀.
\b
\q1
\v 10 N yɛ̀mmɛ̀ do í nɔ̀ɔ́tɛ́ n Yiɛ̀ nKuyie nyĩ́nkɛ̀.
\q1 Bɑ́ nɛ̀ m mɛ̀ n tɑmɛ̀ mɛsémmɛ̀ miɛkɛ.
\q1
\v 11 N do tɑ mɛyɛǹcɑɑ̀rìmɛ̀ miɛkɛ nkɛ,
\q1 kɛ nɑ́ɑ́ nkɛ tú bɛnìtìbɛ̀ bɛmɔu tú siyɑ́ɑ̀bìsí yɛmbɛ̀ mbɛ.
\q1
\v 12 M bo nɑ kɛ́yietí bɑ Kuyie kù n dɔ̀ɔ̀ mɛ̀ɛ̀ sɑ̀ɑ̀ mmɛmɔu?
\q1
\v 13 N Yiɛ̀ nKuyie nni ndɛɛtɛ́mu,
\q1 kɛ̀ n yó nyuo mɛdɛɛtímɛ̀ kó fɛbòòfɛ̀\f + \fr 116:13 \fr*\fk fɛbòòfɛ̀: \fk*\ft Dɛ kó fɛbòòfɛ̀ bɛnkú mɛnɑɑ̀ bɛ̀ do ɔ̃ɔ̃ pɑ̃ dìì pɑ̃nnì Kuyie, nkɛ́yɔɔrɛ mɛ̀ɛ̀ nɑɑ̀ mmɛ di ĩ́nkɛ̀, dɛ kó dipɑ̃nnì do ɔ̃ ntú disɑ̃nni kó dipɑ̃nni ndi. Kɛ bɛnkú diyentɛ́bɑnni kó mudiì bɛ do ɔ̃ nyo mmù kɛ denniní Kuyie mbɛ̀ dɛɛtɛ́mɛ̀ Esibiti. Pɔɔri dɛ ntú ti ɔ̃ɔ̃ sɑ̃ntɛ Kuyie nkɛ́yɑ̃̀ fɛ̀ɛ̀ bòòfɛ̀. (Wéntɛ́ 1 Kɔdɛnti 10:16).\ft*\f* kɛ kù sɑ̃ntí.
\q1
\v 14 N yó ndɔɔrimu n dɔúnnɛ̀ yɛ̀ɛ̀ nɔ̀ Kuyie
\q1 n kɔbɛ bɛmɔu ììkɛ̀.
\b
\q1
\v 15 Ti Yiɛ̀ nKuyie nkɔbɛ kó mukṹṹ nku dò ndɛ̀mɑrɛ̀ diɛrɛ̀ ndɛ.
\q1
\v 16 N Yiɛ̀ nKuyie n tú ɑ kóo tɔ̃ntì nwe,
\q1 kɛ̀ n yɔ̃ tú ɑ kóo tɔ̃ntì,
\q1 kɑ̀ɑ m pìtɛ́ iwɛ̃ĩ.
\q1
\v 17 N yóó dɑ fíému iwũɔ̃ disɑ̃nni kpɛyi,
\q1 kɛ̀ n yu fɔ̃́ n Yiɛ̀ nKuyie ɑ yètìrì.
\b
\q1
\v 18 N yó ndɔɔrimu n dɔúnnɛ̀ yɛ̀ɛ̀ nɔ̀ n Yiɛ̀ nKuyie,
\q1 ku kɔbɛ bɛmɔu ììkɛ̀.
\q1
\v 19 Ti Yiɛ̀ nKuyie ncĩ́ɛ̃̀tɛ̀ dɑ̀nkù miɛkɛ,
\q1 nɛ̀ Sedisɑdɛmmu ɛì miɛkɛ.
\b
\q1 Nsɑ̃ntínɛ̀ ti Yiɛ̀ Kuyie!
\c 117
\s1 Ti mɔu ti dòmmɛ̀ kɛ́nsɑ̃ntí ti Yiɛ̀ nKuyie
\q1
\v 1 Díndi yɛbotɛ̀ nsɑ̃ntínɛ̀ ti Yiɛ̀ nKuyie,
\q1 díndi ibotí imɔu ndɛ́úkùnkonɛ̀ ku yètìrì.
\q1
\v 2 Ku sɑ̀ɑ̀ mbomu sɑ̃́ɑ̃̀,
\q1 kù tɔ timɔ́mmɔnti nti sɑ̃́ɑ̃̀.
\b
\q1 Nsɑ̃ntínɛ̀ ti Yiɛ̀ nKuyie!
\c 118
\s1 Ti bo nsɑ̃ntímɛ̀ ti Yiɛ̀ nKuyie nku dɔ̀ɔ̀ dɛ̀ kpɛ́í
\q1
\v 1 Nsɑ̃ntínɛ̀ ti Yiɛ̀ nKuyie nkù nìtimu,
\q1 kù sɑ̀ɑ̀ mbomu sɑ̃́ɑ̃̀.
\q1
\v 2 Isidɑyɛɛribɛ kó kuwuɔ nkɛ̀ di dɔ̀:
\q1 Ku sɑ̀ɑ̀ mbomu sɑ̃́ɑ̃̀.
\q1
\v 3 Díndi Anɔɔ kó kuwuɔ nkɛ̀ di yĩ́:
\q1 Ku sɑ̀ɑ̀ mbomu nsɑ̃́ɑ̃̀
\q1
\v 4 Díndi bɛ̀ɛ̀ dé ti Yiɛ̀ nKuyie nkɛ̀ di dɔ̀:
\q1 Ku sɑ̀ɑ̀ mbomu nsɑ̃́ɑ̃̀.
\b
\q1
\v 5 M bo mɛyɛǹcɑɑ̀rìmɛ̀ miɛkɛ nkɛ kɛ kuɔ́nnɛ̀ ti Yiɛ̀ nKuyie,
\q1 kɛ̀ kù kèè kɛ cɑ́tinnɛ n yɛ̀mmɛ̀.
\q1
\v 6 N Yiɛ̀ nKuyie nni nkómmúmu,
\q1 n yí dé dɛ̀mɑrɛ̀.
\q1 Onìtì bo nɑ kɛ́ n dɔ̀ɔ̀ bɑ?
\q1
\v 7 N Yiɛ̀ nKuyie nni mbonɛ̀mu kɛ n teénnɛ̀,
\q1 dɛɛ̀ te kɛ̀ n wùó n níím̀bɛ̀ duòmɛ̀.
\q1
\v 8 A bo nsɔrimɛ̀ ti Yiɛ̀ nKuyie mborɛ̀,
\q1 dɛ̀ wenninɛ̀mu ɑ bo mbuɔ́mɛ̀ onìtì.
\q1
\v 9 A bo n sɔrimɛ̀ ti Yiɛ̀ nKuyie mborɛ̀,
\q1 dɛ̀ wenninɛ̀mu ɑ bo mbuɔ́mɛ̀ sikpɑ̀ɑ̀tìbìí.
\b
\q1
\v 10 Iwuɔ ntɛì kɔbɛ do n cɛ̃̀ɛ̃̀tɛmu,
\q1 kɛ̀ n yú n Yiɛ̀ nKuyie nyètìrì kɛ́ bɛ̀ bìɛ́.
\q1
\v 11 Bɛ̀ do n cɛ̃̀ɛ̃̀tɛmu kɛ́ nh ɛ̃́ṹtɛ́,
\q1 kɛ̀ n yú n Yiɛ̀ nKuyie nyètìrì kɛ́ bɛ̀ bìɛ́.
\q1
\v 12 Bɛ̀ do n cɛ̃̀ɛ̃̀tɛmu kɛ́ m munnɛ́ ice kɔ̃mɛ,
\q1 kɛ́kú dɛndɛ bɑ̀mbɑ̀ tipotì kó muhɑ̃ɑ̃́ ntɛ̃mɛ̀,
\q1 n yú n Yiɛ̀ nKuyie nyètìrì ndi kɛ bɛ̀ bìɛ́.
\b
\q1
\v 13 Bɛ̀ do n tèntoomu kɛ́ndɔ́ kɛ́ m bɔ,
\q1 kɛ̀ n Yiɛ̀ nKuyie mmɛ nni nteennɛ̀.
\q1
\v 14 N Yiɛ̀ nKuyie nkuù tu n wɛ̃rímú,
\q1 n diè nkɛ ku nsɑ̃ntí, kuù tu ndɛɛtíwè.
\b
\q1
\v 15 Ti yo bɛ̀ɛ̀ dɔ̀ɔ̀ri timɔ́mmɔnti bɛ̀ nɑmɛ̀ mmɛ kɛ íúní bɛ touti
\q1 kɛ yɛ̃́ Kuyie mpĩ̀ḿmɛ̀ ku tɔ̃mmú nɛ̀ ku wɛ̃rímú.
\q1
\v 16 Ti Yiɛ̀ nKuyie nnɔmmu dɛmɔu,
\q1 ku pĩ nku tɔ̃mmú nɛ̀ muwɛ̃rímú mmu.
\b
\q1
\v 17 N yí yóó kú, n yó nfòùmu,
\q1 kɛ nɑ́ɑ́ nKuyie mpĩ́ mmùù tɔ̃mmú.
\q1
\v 18 N Yiɛ̀ nKuyie nyũ̀ɔ̃́mmu n to,
\q1 kù mɛ n yí yóu kɛ̀ m bo kú.
\q1
\v 19 N kpetɛ́nɛ̀ yɛbòrɛ̀ bɛ̀ɛ̀ tũ̀ ntimɔ́mmɔnti bɛ̀ tɑɑ̀ yɛ̀,
\q1 kɛ̀ n tɑ kɛ́sɑ̃ntɛ n Yiɛ̀ nKuyie.
\q1
\v 20 Kɛ̀ bɛ̀ dɔ̀: Ntɛ ti Yiɛ̀ nKuyie ncĩ́ɛ̃̀tɛ̀ kó dibòrì.
\q1 Bɛ̀ɛ̀ tũ̀ ntimɔ́mmɔnti bɛ̀ di ntɑɑ̀.
\q1
\v 21 N yó ndɑ dɛ́úkùnkomu nYiɛ̀ nKuyie
\q1 nkɛ yɛ̃́ ɑ kèèmɛ̀ n dɑbònnì kɛ n dɛɛtɛ́.
\b
\q1
\v 22 Bɛ̀ɛ̀ mɑɑ̀ bɛ̀ dootóo dìì tɑ̃́rì,
\q1 diì nɑɑ́ ndipũũ kó ditɑ̃́rì mɔ́mmɔnni.
\q1
\v 23 Ti Yiɛ̀ nKuyie nkuù pĩ ndɛ kó mutɔ̃mmú,
\q1 kɛ̀ mù tu tidiɛtì kɔ̃mu, kɛ̀ ti mu yɑ̀.
\q1
\v 24 Ti Yiɛ̀ nKuyie nkó diyiè tu dii,
\q1 kɛ̀ ti dò nkɛ́yɑ̃nku nɛ̀ diwɛ̀ì.
\q1
\v 25 Áú, ti Yiɛ̀ nKuyie! Nyɑ̀ɑ tí dɛɛtɛ́!
\q1 Áú Ti Yiɛ̀ nKuyie nhɑ́ ti pɑ̃ muwɛ̃rímú kɛ̀ ti nɑ.
\q1
\v 26 Mɛsɑ̀ɑ̀ nní mbonɛ̀ wèè kèríní nɛ̀ ti Yiɛ̀ nKuyie nkó diyètìrì,
\q1 ti bo Kuyie ncĩ́ɛ̃̀tɛ̀ ntɛ, kɛ kù mɔ̀ú mɛsɑ̀ɑ̀ ndi kpɛ́í.
\q1
\v 27 Ti Yiɛ̀ nKuyie ntú Kuyie nku,
\q1 kuù ti mí ku kó kuwenniku, ti dɔ́ɔ́tɛ́nɛ̀ dibɑnni kɛ́ntɔ tipuonti,
\q1 kɛ́tuɔkɛ ku wũɔ̃tɔ̀nnì bɑ̀kɛ̀ borɛ̀.
\b
\q1
\v 28 A tú Kuyie nku kɛ n te, n yó ndɑ dɛ́úkùnkomu.
\q1 Kuyie fɔ̃́ nwèè n te n yó ndɑ sɑ̃ntímu.
\q1
\v 29 Ndɛ́úkùnkonɛ̀ ti Yiɛ̀ nKuyie, kù nìtimu.
\q1 Ku sɑ̀ɑ̀ mbomu nsɑ̃́ɑ̃̀.
\c 119
\s1 Kuyie nkuɔ́ túmɛ̀ isɑ̀ɑ̀yì
\q1
\v 1 Dɛ̀ nnɑɑti bɛ̀ɛ̀ borimɛ wenni,
\q1 bɛ̀ɛ̀ tũ nti Yiɛ̀ nKuyie nkó ikuɔ́.
\q1
\v 2 Dɛ̀ nnɑɑti bɛ̀ɛ̀ yie nkɛ tũ nku tié,
\q1 bɛ̀ɛ̀ kù wɑnti nɛ̀ bɛ yɛ̀mmɛ̀ mɛmɔu.
\q1
\v 3 Dɛ̀ nnɑɑti bɛ̀ɛ̀ í dɔɔri mɛyɛi,
\q1 bɛ̀ɛ̀ tũ nku kó kucɛ.
\q1
\v 4 Ti Yiɛ̀ nKuyie nkuù duɔ́ nku kuɔ́.
\q1 Kɛ̀ ti bo nyi tũ nweti weti.
\q1
\v 5 N dɔ́ kɛ́ntũmmu ɑ kó kucɛ weti weti,
\q1 kɛ́ndɔɔri ɑ kuɔ́ yɛ̃ mmù.
\q1
\v 6 Kɛ̀ dɛ̀ɛ yie nkɛ̀ n níí bɑ́ɑ́ wéntɛ́ ɑ tɑnnɔ̀ kɛ̀ ifɛi m pĩ́.
\q1
\v 7 N yó ndɑ sɑ̃ntímu nɛ̀ mɛyɛ̀mmɛ̀ mɛ̀mɑ́ɑ̀.
\q1 N yó nhɑ̃ɑ̃̀mu ɑ tɑnnɔ̀ n yɛ̀mmɛ̀ miɛkɛ.
\q1
\v 8 N yó ndɔɔrimu ɑ tié nyɛ̃mmɛ̀.
\q1 A bɑ́ m bɔntóo yúó.
\q1
\v 9 O bíɛ́ mbo yĩ́mɛ̀ kòo borimɛ nwenni?
\q1 Ò bo ndɔɔri ɑ nɑ́ɑǹtì yɛ̃mmɛ̀ mmɛ.
\q1
\v 10 N dɑ wɑɑ̀mmu nɛ̀ n yɛ̀mmɛ̀ mɛmɔu,
\q1 ɑ bɑ́ɑ́ yóu kɛ̀ n dɛ́tɛ́nɛ̀ ɑ tɑnnɔ̀.
\q1
\v 11 N sɔrìmu ɑ nɑ́ɑǹtì n yɛ̀mmɛ̀ miɛkɛ,
\q1 kɛ̀ dɛ̀ bo yie nkɛ̀ m bɑ́ɑ́ dɑ yetɛ́nɛ̀.
\q1
\v 12 N Yiɛ̀ Kuyie nhɑ yètìrì dɛumu,
\q1 m bɛnkɛ ɑ tié.
\q1
\v 13 Nɛ̀ n nùù ndi mbɑɑ̀tìmɛ̀ ɑ tɑnnɔ̀.
\q1
\v 14 M bo ntũmmɛ̀ ɑ tɑnnɔ̀ dɛ̀ n nɑɑtimu,
\q1 kɛ dònnɛ̀ m bo mmɔkɛmɛ̀ tikpɑ̀tì mɛdiɛ̀.
\q1
\v 15 N totímu n yɛ̀mmɛ̀ ɑ tié nyĩ́nkɛ̀ kɛ wéí ɑ kó icɛ.
\q1
\v 16 Dɛ̀ n nɑɑtimu m bo ntũmmɛ̀ ɑ kuɔ́,
\q1 n yí yóó yɛ̃̀ nhɑ nɑ́ɑǹtì.
\b
\q1
\v 17 Dɔɔ̀ mí nhɑ kóo tɔ̃ntì mɛsɑ̀ɑ̀.
\q1 Kɛ̀ nní nfòù kɛ dɔɔri ɑ nɑ́ɑǹtì yɛ̃mmɛ̀.
\q1
\v 18 Wéi n nuɔ nkɛ̀ n nɑ kɛ́yɑ̀,
\q1 ɑ kuɔ́ wennimu mɛdiɛ̀.
\q1
\v 19 N tú opɔ̀ɔ̀ nwe kɛtenkɛ̀ ĩ́nkɛ̀,
\q1 bɑ́ n sɔnnɛ ɑ tɑnnɔ̀.
\q1
\v 20 N dɔ́mu nɛ̀ n yɛ̀mmɛ̀ mɛmɔu
\q1 kɛ́nyɛ̃́ ɑ tɑnnɔ̀ sɑ̃́ɑ̃̀.
\q1
\v 21 A kpɑnnɛ̀mu sifeí yɛmbɛ̀, kusĩ̀nkù do bɛ̀,
\q1 bɛ̀ɛ dɛ́tɛ́nɛ̀ ɑ tɑnnɔ̀.
\q1
\v 22 N yɑ̃ɑ̃tɛ yɛsɑ̃́ɑ̃̀mbɛ̀ nɛ̀ mɛsenkùmɛ̀,
\q1 kɛ yɛ̃́ m pĩ̀ḿmɛ̀mu ɑ tɑnnɔ̀.
\q1
\v 23 Bɑ́ kɛ̀ sikpɑ̀ɑ̀tìbìí tìí nkɛ nɑ́ɑ́ n kpɛ́í,
\q1 mí n tú ɑ kóo tɔ̃ntì nwe, kɛ tũ nhɑ kuɔ́ yɛ̃ mmù.
\q1
\v 24 A tié nni nnɑɑtimu
\q1 iì n tiè.
\b
\q1
\v 25 N duɔ́ mutɑ̃́ɑ̃́ mmiɛkɛ nkɛ,
\q1 n fòùkùnnɛ kɛ́ndò nhɑ bɛ́immɛ̀.
\q1
\v 26 N dɑ bɑ̀tɛmu n kó icɛ imɔu, kɑ̀ɑ kèè.
\q1 Á m bɛnkɛ ɑ tié.
\q1
\v 27 M bɛnkɛ ɑ kó kucɛ kó yɛtɑnnɔ̀,
\q1 kɛ̀ n nɑ kɛ́totí n yɛ̀mmɛ̀ ɑ kó mɛsɑ̀ɑ̀ nyĩ́nkɛ̀.
\q1
\v 28 Mɛyɛǹcɑɑ̀rìmɛ̀ mɛɛ̀ n dɛutɛ́ kɛ̀ n kuɔ̀,
\q1 n yíi nkɛ́ndò nhɑ nɑ́ɑǹtì bɛ́immɛ̀.
\q1
\v 29 A n dɛ́tinnɛnɛ̀ siyɑ́ɑ̀bìsí kó kucɛ.
\q1 N dɔɔ̀ mɛsɑ̀ɑ̀ nkɛ̀ n nɑ kɛ́tũnnɛ ɑ kó ikuɔ́.
\q1
\v 30 N tɑ̃ɑ̃tɛ́mu timɔ́mmɔnti kó kucɛ.
\q1 N tũ nhɑ tɑnnɔ̀ nyɛ.
\q1
\v 31 N Yiɛ̀ nKuyie n tũ nhɑ tié nyi.
\q1 A bɑ́ɑ́ yie nkɛ̀ n di ifɛi.
\q1
\v 32 M bɛti ɑ kó yɛtɑnnɔ̀ nyɛ,
\q1 kɛ yɛ̃́ ɑ cɑ́tinnɛmɛ̀ n yɛ̀mmɛ̀.
\b
\q1
\v 33 N Yiɛ̀ nKuyie n tié nhɑ kuɔ́,
\q1 kɛ̀ dɛ̀ɛ yie nkɛ̀ nní nyì tũ̀ nkɛ́tuɔkɛnɛ̀ kumɑ̀nku.
\q1
\v 34 M pɑ̃ mɛciì nkɛ̀ n tũnnɛ ɑ kuɔ́
\q1 kɛ́ nyì pĩ̀ńnɛ̀ n yɛ̀mmɛ̀ mɛmɔu.
\q1
\v 35 A nni nni ɑ tɑnnɔ̀ kó kucɛ miɛkɛ,
\q1 n wɛ̀ì bo kùù miɛkɛ.
\q1
\v 36 Yṹɔ̃́nní n yɛ̀mmɛ̀ ɑ tié bíɛ́kɛ̀,
\q1 kɛ̀ mɛ̀ bɑ́ ndɔ́ mucɔ̃́ntimu.
\q1
\v 37 Bentɛ n nɔ̀nfɛ̀ kɛ̀ fɛ̀ bɑ́ nwúó ndɛ̀ɛ̀ tu dɛtetìrɛ̀,
\q1 duɔ́ nkɛ̀ nni ntũ nhɑ kó kucɛ.
\q1
\v 38 Dɔɔ̀ mí nhɑ kóo tɔ̃ntì ɑ bɛ́i ntì bɛ̀ɛ̀ dɑ dé bɛ kpɛ́í.
\q1
\v 39 A m péítɛ́ munitidɑɑ́, m mu nyĩɛ̃̀kù,
\q1 ɑ tɑnnɔ̀ yɛɛ̀ tu yɛsɑ̀ɑ̀yɛ̀.
\q1
\v 40 N dɔ́mu kɛ́ntũ nhɑ tɑnnɔ̀,
\q1 yóu kɛ̀ nni nfòù ɑ kó timɔ́mmɔnti miɛkɛ.
\b
\q1
\v 41 N Yiɛ̀ nKuyie nhɑ́ n dɔɔ̀ ɑ kó mɛsɑ̀ɑ̀,
\q1 n dɛɛtɛ́ kɛ́ndò nhɑ bɛ́immɛ̀.
\q1
\v 42 Kɛ̀ dɛ̀ɛ yie nkɛ̀ n níí nɑ kɛ́tɛ̃́nnɛ́ tinɑ́ɑǹtì bɛ̀ɛ̀ n sɑ̃́ɑ̃̀,
\q1 kɛ yɛ̃́ n yĩkúmɛ̀ ɑ nɑ́ɑǹtì ĩ́nkɛ̀ nkɛ.
\q1
\v 43 Á bɑ́ɑ́ dɛitɛ timɔ́mmɔnti n nùù miɛkɛ yúó,
\q1 m bɑɑ ɑ tɑ̃ɑ̃tɛ́ tìnti.
\q1
\v 44 N yóó mpĩ́mmu ɑ kuɔ́,
\q1 n yí yóó yóu ɑ kuɔ́ nɛ̀ m bo mbomɛ̀.
\q1
\v 45 Yóu kɛ̀ nní mbonɛ̀ kuyɛǹnɑɑtí,
\q1 kɛ yɛ̃́ n tũmmɛ̀ ɑ tɑnnɔ̀.
\q1
\v 46 N yó nnɑ́ɑ́mmu ɑ tié bɛkpɑ̀ɑ̀tìbɛ̀ ììkɛ̀,
\q1 ifɛi í yó nyì nni mbonɛ̀.
\q1
\v 47 Dɛ̀ ɔ̃ nni nnɑɑtinɛ̀mu ɑ tɑnnɔ̀,
\q1 n yɛ̀ dɔ́mu.
\q1
\v 48 N yuo n nɔu nsi kɛ bo cɔutɛ́ ɑ tɑnnɔ̀,
\q1 n yɛ̀ dɔ́mu, nh ɑ̃ɑ̃̀mu ɑ kuɔ́ n yɛ̀mmɛ̀ miɛkɛ.
\b
\q1
\v 49 Dentɛní ɑ nɑ̀kɛ́ tìì nɑ́ɑǹtì,
\q1 mí nhɑ kóo tɔ̃ntì n ti mbɑɑ.
\q1
\v 50 Nh ɔ̃ mbo mɛyɛǹcɑɑ̀rìmɛ̀ miɛkɛ, kɛ̀ dɛ̀ɛ m bɑ́ntɛ̀ dɛɛ̀ tu:
\q1 A nɑ́ɑǹtì n duɔ̀mmɛ̀ mufòmmu.
\q1
\v 51 Sipɔɔ yɛmbɛ̀ n dɑúmu,
\q1 m mɛ nyí yetɛ́nɛ̀ ɑ kuɔ́.
\q1
\v 52 Nh ɔ̃ɔ̃ dentɛní ɑ tɑ̃ɑ̃tɛ́ tì nti,
\q1 n Yiɛ̀ nKuyie nkɛ̀ dɛ̀ɛ nɑ́ríkùnnɛ n yɛ̀mmɛ̀.
\q1
\v 53 M miɛkɛ yɛ̀nnímu bɛnitiyonkubɛ,
\q1 bɛ̀ dootóomu ɑ kuɔ́.
\q1
\v 54 A tié nyiì tu n kó fɛyɛ̀nfɛ̀,
\q1 kɛtenkɛ̀ kiɛ m bo kɛ̀ kupɔ̀ɔ̀kù nku.
\q1
\v 55 N Yiɛ̀ nKuyie, kɛyènkɛ̀ nh ɔ̃ɔ̃ í nyɛ̃̀ nhɑ kpɛ́í.
\q1 N tũmmu ɑ kuɔ́.
\q1
\v 56 N kpɛti n te tì tu
\q1 m bo tũnnɛmɛ̀ ɑ tɑnnɔ̀.
\b
\q1
\v 57 N Yiɛ̀ nKuyie nkpɛti tú tì n ti mbɛ́i.
\q1 Tìì tu: M bo ntũmmɛ̀ ɑ nɑ́ɑǹtì.
\q1
\v 58 Nɛ̀ n yɛ̀mmɛ̀ mɛmɔu ndi n dɑ kuɔ̀nnɛ̀mɛ̀,
\q1 n kuɔ́ mmɛsémmɛ̀ kɛ́ndònnɛ̀ ɑ bɛ́i mmɛ.
\q1
\v 59 N wèńnímu n tũ nyìì cɛ̀.
\q1 Kɛ wɛ̃̀tɛní kɛ bo tũnnɛ ɑ tié.
\q1
\v 60 N tɛ̃́nkɛ í yóó ɔɔtɛ, n dɔ́ mɛfɛì mmɛ,
\q1 kɛ bo tũnnɛ ɑ tɑnnɔ̀.
\q1
\v 61 Bɛnitiyonkubɛ bɛɛ̀ n dií nticùɔ̀tì kɛ̀ tì m pĩ́.
\q1 M mɛ nyí yɛ̃̀ nhɑ kuɔ́.
\q1
\v 62 Kɛyènkɛ̀ cuokɛ̀ nh ɔ̃ɔ̃ entɛmu kɛ́ ndɑ sɑ̃ntí.
\q1 A tɑ̃ɑ̃tɛ́ tì sìɛ́ mɛ̀ɛ̀ kpɛ́í.
\q1
\v 63 N nɑɑtinɛ̀mu bɛ̀ɛ̀ kó dimɑ̀ɑ̀ dɑ dé.
\q1 Bɛ̀ɛ̀ kó dimɑ̀ɑ̀ tũ nhɑ tɑnnɔ̀.
\q1
\v 64 N Yiɛ̀ nKuyie nhɑ sɑ̀ɑ̀ mmɛɛ̀ pìɛ́kɛ́ kutenkù
\q1 n tié nhɑ kuɔ́.
\b
\q1
\v 65 N Yiɛ̀ nKuyie nhɑ do tì bɛ́immu,
\q1 kɛ mɛ nni ndɔ̀ɔ̀ mɛsɑ̀ɑ̀ m mí nhɑ kóo tɔ̃ntì.
\q1
\v 66 M bɛnkɛ mɛsɑ̀ɑ̀ nnɛ̀ m bo mbɑɑ̀tìmɛ̀ dɛ̀ɛ̀ wenni nɛ̀ mɛciì.
\q1 Kɛ yɛ̃́ n yĩkúmɛ̀ ɑ tɑnnɔ̀ ĩ́nkɛ̀ nkɛ.
\q1
\v 67 N do í kɛ̃kɛ dìì mɔ̀nnì kɛ dɑ dɛ́tirìnɛ̀mu,
\q1 di mmɔ̀nnì m mɛ mpĩ̀ḿmu ɑ nɑ́ɑǹtì.
\q1
\v 68 A nitimu kɛ dɔɔri mɛsɑ̀ɑ̀,
\q1 n tié nhɑ kuɔ́.
\q1
\v 69 Sipɔɔ yɛmbɛ̀ bɛɛ̀ n sĩ̀nkùnnɛ nɛ̀ bɛ kó siyɑ́ɑ̀bìsí,
\q1 mí m mɛ mpĩmmu ɑ tɑnnɔ̀ nɛ̀ n yɛ̀mmɛ̀ mɛmɔu.
\q1
\v 70 Bɛ̀ ɑnkɛmu tìmɑtì í bɛ tɑɑ̀,
\q1 dɛ̀ mɛ nni nɑɑtimu nɛ̀ ɑ kuɔ́.
\q1
\v 71 Bɛ̀ n dií nyifɛi kɛ̀ dɛ̀ n dɔ̀ɔ̀ mɛsɑ̀ɑ̀ mmɛ,
\q1 kɛ̀ n yĩ̀ɛ̃́tɛ́ ɑ kuɔ́.
\q1
\v 72 Mí m borɛ̀ ikuɔ́ ìì yɛ̀nní ɑ nùù ì pɛ̃ɛ̃tɛ́mu yɛsɔɔwèrɛ̀,
\q1 sikɔupí sikɔupí yoo timɑ́tì pɛ́ítì kpɛyɛ.
\b
\q1
\v 73 A nɔu siì n dɔ̀ɔ̀ kɛ̀ siì n kpénkùnnɛ,
\q1 m pɑ̃ mɛciì, kɛ̀ n nɑ kɛ́yĩ́ɛ̃́tɛ́ ɑ kuɔ́.
\q1
\v 74 Bɛ̀ɛ̀ dɑ dé, bɛ̀ n wùó nkɛ̀ dɛ̀ bɛ̀ nɑɑtimu.
\q1 Kɛ yɛ̃́ n kémmúmɛ̀mu ɑ nɑ́ɑǹtì.
\q1
\v 75 N Yiɛ̀ nKuyie n yɛ̃́mu kɛ dò nhɑ tɑ̃ɑ̃tɛ́ tì wenni,
\q1 ɑ n kɛ̃́kùnnɛ kɛ nɑɑtimu.
\q1
\v 76 A sɑ̀mu m bɑ́ntɛ̀!
\q1 A tì nɑ̀kɛ́mu mí nhɑ kóo tɔ̃ntì.
\q1
\v 77 A n kuɔ́ mmɛsémmɛ̀ kɛ̀ nní nfòù.
\q1 Kɛ yɛ̃́ n nɑɑtinɛ̀mɛ̀ ɑ kó ikuɔ́.
\q1
\v 78 Ifɛi iì bo pĩ́ sipɔɔ yɛmbɛ̀ bɛ̀ɛ̀ n fɛ̃́ũnko dɛtetìrɛ̀,
\q1 mí n wèè pĩ nhɑ tɑnnɔ̀.
\q1
\v 79 Bɛ̀ɛ̀ dɑ dé, bɛ̀ɛ kɔtɛní m borɛ̀.
\q1 Kɛ̀ dɛ̀ɛ yie nkɛ̀ bɛ̀ɛ bɑntɛ́ ɑ tié.
\q1
\v 80 N dɔ́mu nɛ̀ n yɛ̀mmɛ̀ mɛmɔu kɛ́dɔɔ̀ ɑ kuɔ́,
\q1 kɛ̀ dɛ̀ɛ yie nkɛ̀ ifɛi bɑ́ m pĩ́ nhɑ ììkɛ̀.
\b
\q1
\v 81 Dɛ̀ nh ɔɔtímu ɑ bo n dɛɛtɛ́mɛ̀,
\q1 n kémmúmu ɑ bo dɔɔ̀mɛ̀ ɑ bɛ́i ntì.
\q1
\v 82 N kémmú ɑ bɛ́i ntì bo dɔɔ̀mɛ̀ mmɛ, kɛ̀ dɛ̀ nh ɔ̀u,
\q1 kɛ̀ m bèkú mmɑ́ɑ̀ kɛ tú: Ɔ̃mmɔ̀nnì ndi ɑ yó m bɑ́ntɛ̀mɛ̀?
\q1
\v 83 N dònnɛ̀ kudɔukù bɛ̀ nùńnɔ́ɔ kùnku muhɑ̃ɑ̃fɔ̃rímú ĩ́nkɛ̀,
\q1 m mɛ nyí yɛ̃̀ nhɑ kó itié.
\q1
\v 84 Mí nhɑ kóo tɔ̃ntì n we kpɑɑ́ yɛ̀dɛ?
\q1 A yóó bekɛ́nɛ̀ ɔ̃̀nyiè bɛ̀ɛ̀ n fɛ̃́ũnko?
\q1
\v 85 Sipɔɔ yɛmbɛ̀ n keù yɛfɔ̃̀tɛ̀ nyɛ.
\q1 Kɛ búútóo ɑ kuɔ́ kpɛti.
\q1
\v 86 A tɑnnɔ̀ tu yɛmɔ́mmɔnyɛ nyɛ,
\q1 bɛ̀ n fɛ̃́ũnko dɛtetìrɛ̀ ndɛ, yɑ̀ɑ n dɛɛtɛ́.
\q1
\v 87 Dɛ̀ do kpɑɑ́ sɑ́m̀pɔ́ nwe kɛ̀ bɛ̀ n dɛitɛ kɛtenkɛ̀ ĩ́nkɛ̀,
\q1 nɛ̀ mɛmmɛ m mɛ nyí bùtínnɛ́ ɑ tɑnnɔ̀.
\q1
\v 88 A sɑ̀mu, n foukùnnɛ,
\q1 kɛ̀ dɛ̀ɛ yié nkɛ̀ nní mpĩ́ nhɑ tié.
\b
\q1
\v 89 N Yiɛ̀ nKuyie, ɑ nɑ́ɑǹtì bomu nsɑ̃́ɑ̃̀,
\q1 tì fìíkú kɛĩ́nkɛ̀ nkɛ.
\q1
\v 90 A tú timɔ́mmɔnti yiɛ̀ nwe nɛ̀ ɑ bomɛ̀!
\q1 Fɔ̃́ɔ̃̀ fìí nkɛtenkɛ̀ kɛ̀ kɛ̀ fìíkú.
\q1
\v 91 A bɛ́immu dɛmɔu kɛ̀ dɛ̀ buotɛ́ kɛ bo nɛ̀ yíenní,
\q1 kɛ yɛ̃́ dɛmɔu dɛ̀ pĩ̀ḿmɛ̀ ɑ tɔ̃mmú mmu.
\q1
\v 92 Kɛ̀ dɛ̀ do í n nɑɑtinɛ̀ ɑ kuɔ́,
\q1 nɛ̀ yíe n do kumu n sémmɛ̀ miɛkɛ.
\q1
\v 93 N yí yóó yɛ̃̀ nhɑ tɑnnɔ̀ bìtì!
\q1 Kɛ yɛ̃́ ɑ n duɔ̀mmɛ̀ mufòmmu nɛ̀ yɛɛ̀ borɛ̀ ndɛ.
\q1
\v 94 N tú ɑ kou nwe, n dɛɛtɛ́,
\q1 kɛ yɛ̃́ n tũmmɛ̀mu ɑ tɑnnɔ̀.
\q1
\v 95 Bɛyɛibɛ n díímu kɛ bo n kuɔ,
\q1 mí mmɛ n kèḿmú ɑ tié nyi.
\q1
\v 96 Dɛmɔu bɑ́ dɛ̀ɛ̀ dɔ̀ɔ̀ kɛ wenni dɛ̀ mɔ̀kɛmu kumɑ̀nku,
\q1 ɑ tɑnnɔ̀ yiɛ mɛ̀ nyí mɔkɛ kumɑ̀nku.
\b
\q1
\v 97 N dɔ́mu ɑ kuɔ́ mɛdiɛ̀,
\q1 yɛwe yɛmɔu nh ɔ̃ ntoti n yɛ̀mmɛ̀ iì ĩ́nkɛ̀.
\q1
\v 98 A kó yɛtɑnnɔ̀ n ciikùnnɛmu.
\q1 Kɛ̀ n ciì kɛ pɛ̃ɛ̃tɛ́ n dootitɔbɛ̀.
\q1 Kɛ yɛ̃́ yɛ̀ bomɛ̀ n yɛ̀mmɛ̀ miɛkɛ nkɛ sɑ̃́ɑ̃̀.
\q1
\v 99 N ciìmu kɛ pɛ̃ɛ̃tɛ́ bɛ̀ɛ̀ n tiè,
\q1 kɛ yɛ̃́ n totimɛ̀ n yɛ̀mmɛ̀ ɑ tié nyĩ́nkɛ̀.
\q1
\v 100 N yɛ̀mmɛ̀ dɛunɛ̀mu bɛhɛikɛ̀nkótíbɛ̀ kɔ̃mɛ,
\q1 kɛ yɛ̃́ m pĩ́mmɛ̀mu ɑ tɑnnɔ̀.
\q1
\v 101 N yennínɛ̀mu mɛyɛi nkó icɛ imɔu,
\q1 kɛ̀ dɛ̀ bo yie nkɛ̀ nni mpĩ́ nhɑ nɑ́ɑǹtì.
\q1
\v 102 N yí bùtínnɛ́ ɑ tɑnnɔ̀,
\q1 kɛ yɛ̃́ fɔ̃́ɔ̃̀ yɛ̀ nni ntiémmɛ̀.
\q1
\v 103 A nɑ́ɑǹtì wɛ̀ɛ̀timu n nùù miɛkɛ,
\q1 kɛ pɛ̃ɛ̃tɛ́ mɛcekùɔ̀.
\q1
\v 104 A kó yɛtɑnnɔ̀ yɛɛ̀ te kɛ̀ n ciitɛ́,
\q1 Dɛɛ̀ te kɛ̀ n yí dɔ́ iyɑ́ɑ̀bisícɛ.
\b
\q1
\v 105 A nɑ́ɑǹtì tu dɛfìtírɛ̀ ndɛ dɛ̀ɛ̀ m mí,
\q1 Tiì n duɔ̀ nkuwenniku n kó kucɛ miɛkɛ.
\q1
\v 106 M bɛ́i ndìì nùù n yó ndi pĩ̀ḿmu.
\q1 Diì tu m bo tũmmɛ̀ ɑ tɑnnɔ̀ yɛ̀ɛ̀ tu timɔ́mmɔnti.
\q1
\v 107 N di ifɛi nyi mɛdiɛ̀,
\q1 n Yiɛ̀ nKuyie nhɑ n fòùkùnnɛ ɑ nɑ́ɑǹtì yɛ̃mmɛ̀.
\q1
\v 108 N Yiɛ̀ nKuyie ncɔutɛ́ n sɑ̃ɑ̃,
\q1 kɛ́ n tié nhɑ tɑnnɔ̀.
\q1
\v 109 M bo mukṹṹ nnɛ̀ mufòmmu dɛ sɑku nku,
\q1 m mɛ nyí yɛ̃̀ nhɑ kuɔ́.
\q1
\v 110 Bɛyɛibɛ n dii ticùɔ̀tì nti,
\q1 m mɛ nyí dɛ̀tɛ́nɛ̀ ɑ tɑnnɔ̀.
\q1
\v 111 A tié nyiì tu n kpɛrɛ n te dɛ̀,
\q1 n yɛ̀mmɛ̀ i nnɑɑtinɛ̀.
\q1
\v 112 N duɔ́mmu n yɛ̀mmɛ̀ kɛ dɔɔri ɑ kuɔ́ yɛ̃mmɛ̀,
\q1 kɛ yó mmɛ̀ dɔ̀ɔ̀ri sɑ̃́ɑ̃̀ n fòmmu mumɔu.
\b
\q1
\v 113 N yí dɔ́ yɛnɔ̀ yɛ̀dɛ́ɛ̀ yɛmbɛ̀,
\q1 n dɔ́ ɑ kuɔ́ nyi.
\q1
\v 114 Fɔ̃́ɔ̃̀ tu n kó disɔ̀rì, n kó kudɔpìkù,
\q1 n kémmú ɑ yó n nɑ́kɛ́ tì nti.
\q1
\v 115 Díndi bɛnitiyɛibɛ fũtɛnɛ̀ m borɛ̀.
\q1 Kɛ̀ dɛ̀ɛ yie nkɛ̀ nní ntũ n Yiɛ̀ nKuyie ntɑnnɔ̀.
\q1
\v 116 A nni mpĩ́ nhɑ bɛ́i nkɛ yɛ̃ mmù.
\q1 Kɛ̀ dɛ̀ɛ yie nkɛ̀ nní fòù.
\q1 A bɑ́ɑ́ yóu kɛ̀ nní ndɑ kémmú kɛ́di ifɛi.
\q1
\v 117 Fɔ̃́ɔ̃̀ yó ntú nkó dipĩ̀ńnì kɛ̀ n nɑ kɛ́cootɛ́.
\q1 Kɛ̀ dɛ̀ɛ yie nkɛ̀ nní ndɑkɛ ɑ kuɔ́ kpɛ́í.
\q1
\v 118 A dootóomu bɛ̀ɛ̀ kó dimɑ̀ɑ̀ bùtínnɛ́ ɑ kuɔ́.
\q1 Kɛ yɛ̃́ bɛ kó mutɔ̃mmú mumɔu túmɛ̀ siyɑ́ɑ̀bìsí kɔ̃mu mmu.
\q1
\v 119 A ùtóomu bɛyɛibɛ kó dimɑ̀ɑ̀ tiyontì kɔ̃mɛ.
\q1 Dɛɛ̀ te kɛ̀ n dɔ́ ɑ tié.
\q1
\v 120 N wúó nhɑ kuɔ́ kɛ̀ n kɔ̃̀ntì ɑumu,
\q1 kɛ̀ n kɔ̃m̀bùɔ̀tì duònɛ̀ ɑ tɑ̃ɑ̃tɛ́ tì.
\b
\q1
\v 121 N dɔɔrimu dɛ̀ɛ̀ sìɛ́,
\q1 kɛ tũ ntimɔ́mmɔnti,
\q1 bɑ́ɑ́ yóu kɛ̀ n do bɛ̀ɛ̀ n fɛ̃́ũnko bɛ nɔu miɛkɛ.
\q1
\v 122 Dɔúnnɛ̀ mí nhɑ kóo tɔ̃ntì dinùù kɛ yĩ:
\q1 A yó nni ndɔɔri mɛsɑ̀ɑ̀.
\q1 Bɑ́ɑ́ yóu kɛ̀ sipɔɔ yɛmbɛ̀ nni nfɛ̃́ũnko.
\q1
\v 123 M bɔ́ú nhɑ kó mɛdɛɛtímɛ̀ kɛ ɔ̀umu,
\q1 n kémmú timɔ́mmɔnti ɑ nɑ̀kɛ́ tìì kpɛ́í kɛ̀ dɛ̀ m bimu.
\q1
\v 124 Dɔɔ̀ mí nhɑ kóo tɔ̃ntì mɛsɑ̀ɑ̀, ɑ nitimu,
\q1 m bɛnkɛ kɛ̀ n yĩ́ɛ̃́tɛ́ ɑ kuɔ́.
\q1
\v 125 N tú ɑ kóo tɔ̃ntì nwe,
\q1 m pɑ̃ mɛciì nkɛ̀ m bɑntɛ́ ɑ tié.
\q1
\v 126 N Yiɛ̀ nKuyie ndɛ̀ tùɔ̀kɛmu ɑ bo pĩ́ ndɛ̀ ɑ tɔ̃mmú.
\q1 Bɛnìtìbɛ̀ cɑ̀ɑ̀rimu ɑ kuɔ́.
\q1
\v 127 N dɔ́mu ɑ tɑnnɔ̀ kɛ̀ dɛ̀ pɛ̃ɛ̃tɛ́ mɛsɔɔ.
\q1 Kɛ pɛ̃ɛ̃tɛ́ mɛsɔɔ nsɑ̀ɑ̀mɛ̀.
\q1
\v 128 A tɑnnɔ̀ yɛmɔu n yɛ̀ wùó nkɛ̀ yɛ̀ wennimu,
\q1 n yí dɔ́ dɛyɑ́ɑ̀bìsíkpɛrɛ ndɛ.
\b
\q1
\v 129 A tié ntú isɑ̀ɑ̀yì nyi.
\q1 Dɛɛ̀ kpɛ́í nte kɛ̀ n yì ɑ̃ɑ̃̀ n yɛ̀mmɛ̀ miɛkɛ.
\q1
\v 130 Kɑ̀ɑ wɛ̀ɛ́tɛ́ ɑ nɑ́ɑǹtì kɛ bɛnkɛ onìtì dɛ̀ ɔ̃ɔ̃ ò duɔ́ nkuwenniku nku.
\q1 Tiì duɔ̀ mmɛciì mbɛsĩ́ntíbɛ̀.
\q1
\v 131 Nh onnɛ́ n níí nku kɛ bo mɑɑ́nko ɑ tɑnnɔ̀,
\q1 n dɔ́ mɛ̀ɛ̀ kpɛ́í nhɑ tɑnnɔ̀ kɛ̀ dɛ̀ nh ɔɔtí.
\q1
\v 132 Wɛ̃ɛ̃tɛní m bíɛ́kɛ̀ kɛ́ n kuɔ́ mmɛsémmɛ̀,
\q1 kɛ́ndònnɛ̀ ɑ dɔɔrimɛ̀ bɛ̀ɛ̀ dɑ dɔ́.
\q1
\v 133 N teennɛ̀ kɛ̀ nní nyĩkú ɑ nɑ́ɑǹtì ĩ́nkɛ̀.
\q1 A bɑ́ɑ́ yóu kɛ̀ mɛyɛi mmɑmɛ̀ n nɑ.
\q1
\v 134 A n dɛɛtɛ́nɛ̀ bɛ̀ɛ̀ n fɛ̃́ũnko
\q1 kɛ̀ n nɑ kɛ́ntũ nhɑ tɑnnɔ̀.
\q1
\v 135 Wéntɛ́ní mí nhɑ kóo tɔ̃ntì fɛnɔnsɑ̀ɑ̀fɛ̀,
\q1 kɛ́ n tié nhɑ kó ikuɔ́.
\q1
\v 136 N nɔnniɛti tiì pũɔ̃̀,
\q1 bɛnìtìbɛ̀ í tũ mmɛ̀ɛ̀ kpɛ́í ɑ kuɔ́.
\b
\q1
\v 137 N Yiɛ̀ nKuyie nhɑ wetímu,
\q1 kɑ̀ɑ beéntì dò nsɛ́i.
\q1
\v 138 A wɑ̃̀ri ɑ tié kɛ̀ ì wennimu,
\q1 kɛ tú timɔ́mmɔnti mɑ́ɑ̀.
\q1
\v 139 N wúó n dootitɔbɛ̀ yɛ̃̀mmɛ̀ ɑ nɑ́ɑǹtì,
\q1 kɛ̀ dɛ̀ n yóumu.
\q1
\v 140 N yɑ̀ɑ́kɛ́mu ɑ nɑ́ɑǹtì, tì mɛ̀nkɛ tú timɔ́mmɔnti nti.
\q1 Mí nhɑ kóo tɔ̃ntì kɛ̀ n tì dɔ́.
\q1
\v 141 N kũɔ̃nnìmu kɛ̀ bɛ̀ n sènkɛ̀rì.
\q1 M mɛ nyí yɛ̃̀ nhɑ tɑnnɔ̀.
\q1
\v 142 Timɔ́mmɔnti ɑ dɔú ntì bomu nsɑ̃́ɑ̃̀,
\q1 kɑ̀ɑ kuɔ́ tú timɔ́mmɔnti.
\q1
\v 143 Mɛyɛǹcɑɑ̀rìmɛ̀ nɛ̀ kukɔ̃m̀bɔ̀doróo dɛɛ̀ n tùɔ̀kɛní.
\q1 Dɛ̀ɛ̀ n nɑɑti dɛɛ̀ nɛ́ tú ɑ tɑnnɔ̀.
\q1
\v 144 A tié ndò nsɛ́í nwe sɑ̃́ɑ̃̀.
\q1 M pɑ̃ mɛciì kɛ̀ dɛ̀ɛ yie nkɛ̀ nní nfòù.
\b
\q1
\v 145 N Yiɛ̀ nKuyie n dɑ yu nɛ̀ n yɛ̀mmɛ̀ mɛmɔu ndi.
\q1 Yie nkɛ́ n teennɛ̀ kɛ̀ nní ntũ nhɑ kuɔ́.
\q1
\v 146 N dɑ kuɔ̀nnɛ̀mu kɛ tú ɑ́ n dɛɛtɛ́,
\q1 kɛ̀ nni ntũ nhɑ tié.
\q1
\v 147 Dɛ̀ ɔ̃ nkpɑɑ́ kɛ í wentɛ́,
\q1 kɛ̀ n kuɔ̀nɛ̀ fɔ̃́ nwe.
\q1 N kémmú ɑ yó n nɑ́kɛ́ tì nti.
\q1
\v 148 Dɛ̀ ɔ̃ n kpɑɑ́ uú kɛ̀ n nɔ̀nfɛ̀ sìékɛ́ ɑ nɑ́ɑǹtì nti.
\q1 Kɛ̀ nh ɑ̃ɑ̃̀ ɑ tié n yɛ̀mmɛ̀ miɛkɛ.
\q1
\v 149 N Yiɛ̀ nKuyie, nkéntɛ́ n dɑbònnì,
\q1 ɑ sɑ̀ mɛ̀ɛ̀ kpɛ́í, n fòùkùnnɛ kɛ́ndò nhɑ tɑ̃ɑ̃tɛ́ tì.
\q1
\v 150 Bɛ̀ɛ̀ n fɛ̃́ũnko bɛ̀ n tɔ̀ɔ́ntɛnímu,
\q1 dɛ kó isɔkɛ yɛmbɛ̀ dɛ̀tɛ́nɛ̀mu ɑ kó ikuɔ́.
\q1
\v 151 Fɔ̃́ n Yiɛ̀ nKuyie nhɑ n tɔ́kɛ́nɛ̀mu,
\q1 ɑ tɑnnɔ̀ yɛmɔu tú timɔ́mmɔnti nti.
\q1
\v 152 N yɛ̃́mu nɛ̀ dimɔ̀nnì ɑ tié,
\q1 fɔ̃́ɔ̃̀ ì nɑ̀kɛ́ kɛ̀ ì bo sɑ̃́ɑ̃̀.
\b
\q1
\v 153 Wéntɛ́ n yo mmɛ̀ɛ̀ sémmɛ̀,
\q1 kɛ́ n dɛɛtɛ́ kɛ yɛ̃́ n yí yɛ̃̀mmɛ̀ ɑ kuɔ́.
\q1
\v 154 N kónnɛ́ kɛ́ n dɛɛtɛ́
\q1 n fòùkùnnɛ kɛ́ndò nhɑ bɛ́immɛ̀.
\q1
\v 155 Bɛyɛibɛ í yóó cootɛ́,
\q1 kɛ yɛ̃́ bɛ̀ í wɑntimɛ̀ kɛ bo tũnnɛ ɑ kuɔ́.
\q1
\v 156 Áú n Yiɛ̀ nKuyie! A sémmɛ̀ dɛumu.
\q1 N dɔ́ kɛ́ntũ nhɑ tɑnnɔ̀ nyɛ.
\q1
\v 157 N dùɔ̀ntɔbɛ̀ bɛ̀ɛ̀ n fɛ̃́ũnko bɛ̀ í sénní
\q1 m mɛ nyí bùtínnɛ́ ɑ tié.
\q1
\v 158 N yɑ̀mu bɛnìtìbɛ̀ fiiti mɛ̀ɛ̀ botí bɛtɔbɛ̀,
\q1 kɛ̀ dɛ̀ m pĩ nyisíɛ́.
\q1 Dɛ yɛmbɛ̀ í tũ nhɑ kó ikuɔ́.
\q1
\v 159 N Yiɛ̀ nKuyie n wéntɛ́ n dɔ́mu ɑ tɑnnɔ̀.
\q1 A sɑ̀mu n fòùkùnnɛ.
\q1
\v 160 A nɑ́ɑǹtì kó dikũ̀nnì tu timɔ́mmɔnti nti.
\q1 A tɑnnɔ̀ tu yɛmɔ́mmɔnyɛ nyɛ kɛ bo sɑ̃́ɑ̃̀.
\b
\q1
\v 161 Sikpɑ̀ɑ̀tìbìí n fɛ̃́ũnko dɛtetìrɛ̀ ndɛ,
\q1 m bùɔ̀tì mɛ nduò ɑ nɑ́ɑǹtì mɑ́ɑ̀ ndi.
\q1
\v 162 A nɑ́ɑǹtì n duɔ̀ ndiwɛ̀ì ndi
\q1 kɛ̀ dì dònnɛ̀ wèè dokɛ́ kɛ ɛí o kpɛri ɔ̃ ndommɛ̀.
\q1
\v 163 N yí dɔ́ siyɑ́ɑ̀bìsí, sì n dò nyisíɛ́ nyi.
\q1 N dɔ́ ɑ kuɔ́ nyi.
\q1
\v 164 Diyiè dimɑ́ɑ̀ miɛkɛ kucɛ mɛ̀yiekɛ̀ ndi,
\q1 nh ɔ̃ɔ̃ dɑ sɑ̃ntɛmɛ̀.
\q1 A tɑnnɔ̀ tu yɛmɔ́mmɔnyɛ nyɛ.
\q1
\v 165 Diwɛ̀ì diɛrì bo bɛ̀ɛ̀ dɔ́ ɑ kó ikuɔ́ bɛ kpɛ́í nkɛ.
\q1 Mɛdítímmɛ̀ mɑmɛ̀ í bo bɛ kpɛ́í.
\q1
\v 166 N Yiɛ̀ nKuyie n kémmú ɑ bo n dɛɛtɛ́mɛ̀ mmɛ,
\q1 kɛ yɛ̃́ n dɔɔrimɛ̀ ɑ tɑnnɔ̀ yɛ̃mmɛ̀.
\q1
\v 167 N tũmmu ɑ tié nnɛ̀ n yɛ̀mmɛ̀.
\q1 N yì dɔ́mu mɛdiɛ̀.
\q1
\v 168 N tũmmu ɑ tɑnnɔ̀ nɛ̀ ɑ tié.
\q1 N cɛ imɔu ɑ ì wùómmu.
\b
\q1
\v 169 N Yiɛ̀ nKuyie nyóu kɛ̀ n dɑbònnìi tuɔkoo ɑ borɛ̀.
\q1 N duɔ́ mmɛciì kɛ́ndò nhɑ tì bɛ́immɛ̀.
\q1
\v 170 Yóu kɛ̀ m bɑ́ɑmmìi tuɔkoo ɑ borɛ̀,
\q1 n dɛɛtɛ́ kɛ́ndò nhɑ tì bɛ́immɛ̀.
\q1
\v 171 A sɑ̃nni bɑ́ɑ́ yɛ̀ n nùù miɛkɛ.
\q1 Kɛ yɛ̃́ ɑ m bɛnkɛmɛ̀mu ɑ kuɔ́.
\q1
\v 172 M bɑ́ɑ́ yóu m bo n dièmmɛ̀ ɑ n dɔúnnɛ̀ dìì nùù
\q1 kɛ yɛ̃́ ɑ tɑnnɔ̀ yɛmɔu túmɛ̀ yɛ̀ɛ̀ sìɛ́ yɛ̀ nyɛ.
\q1
\v 173 A nɔ̀ùtɛ̀ nni nteénnɛ̀.
\q1 Kɛ yɛ̃́ n tɑ̃ɑ̃tɛ́mɛ̀ ɑ kó yɛtɑnnɔ̀ nyɛ.
\q1
\v 174 N Yiɛ̀ nKuyie, n yɑ́ɑ́mu ɑ bo n dɛɛtɛ́mɛ̀,
\q1 n yɛ̀mmɛ̀ nɑɑtinɛ̀mu ɑ kó ikuɔ́.
\q1
\v 175 N dɔ́ nni nfòùmu kɛ dɑ sɑ̃ntí.
\q1 Yóu kɑ̀ɑ tɑ̃ɑ̃tɛ́ tì nni ncúɔ́.
\q1
\v 176 Nh ɑ̃tirɛmu kɛ dònnɛ̀ fɛpìèfɛ̀ fɛ̀ɛ̀ feti.
\q1 N wɑmmú mí nhɑ kóo tɔ̃ntì,
\q1 kɛ yɛ̃́ n yí yɛ̃̀mmɛ̀ ɑ tɑnnɔ̀.
\c 120
\s1 Onìtì bɛ̀ wɑ̀tí wè kó mubɑ́ɑmmu
\pi1
\v 1 Bɛ̀ ɔ̃ nkɔri Kuyie ncĩ́ɛ̃̀tɛ̀ kɛ dentì fɛ̀ɛ̀ yɛ̀nfɛ̀.
\b
\q1 N tɑ mɛyɛǹcɑɑ̀rìmɛ̀ kɛ kuɔ́nnɛ̀ n Yiɛ̀ nKuyie nku,
\q1 kɛ̀ kù cɔutɛ́ n dɑbònnì.
\q1
\v 2 N Yiɛ̀ nKuyie nhɑ n dɛɛtɛ́nɛ̀ siyɑ́ɑ̀bìsí yɛmbɛ̀.
\q1 Fũũ mbɛsoùmbɛ̀.
\b
\q1
\v 3 Díndi bɛ̀ɛ̀ ɔ̃ mpɑriku kɛ nɛ́ soú.
\q1 Di dò mbɛ̀ di yĩ́mɛ?
\q1 Di dò mbɛ̀ dí dɔɔ̀ bɑ?
\q1
\v 4 Mɛpenyómmɛ̀ bɛ̀ sũ̀ɔ̃́tɛ́ mɛ̀ nɛ̀ yɛhɑ̃ɑ̃kũɔ̃ nyɛ̀ɛ̀ cɔ̀ú mmuhɑ̃ɑ̃́
\q1 dɛɛ̀ yó ntú di kó tiyeti.
\q1
\v 5 N kóò kɛ́mbo bɛkpɑ́kpɑ̀rìbɛ̀ cuokɛ̀ dɛ̀ í n dɔ̀ɔ̀ mɛsɑ̀ɑ̀,
\q1 n kóò kɛ́nhɑ̃nɛ̀ bɛ̀ɛ̀ í yɛ̃́ Kuyie dɛ̀ n cɑ̀ɑ̀rɛ̀mu.
\q1
\v 6 N kɑrinɛ̀ bɛ̀ɛ̀ í dɔ́ kunɑɑtí kɛ̀ dɛ̀ mɔ̀ntɛmu.
\q1
\v 7 Mí n dɔ́ kunɑɑtí nku,
\q1 kɛ̀ n nɛ́ nɑ́ɑ́ mbɛ̀ nni nwɑntinɛ̀ mudoò.
\c 121
\s1 Ti Yiɛ̀ nKuyie ntúmɛ̀ Isidɑyɛɛribɛ kóo bɑ̀rì
\pi1
\v 1 Bɛ̀ ɔ̃ nkɔri Kuyie ncĩ́ɛ̃̀tɛ̀ kɛ dentì fɛ̀ɛ̀ yɛ̀nfɛ̀.
\b
\q1 M búɔ́ yɛtɑ̃rɛ̀ bíɛ́kɛ̀ nkɛ
\q1 mɛteèmmɛ̀ yóó kɛ nyɛnní.
\b
\q1
\v 2 N Yiɛ̀ nKuyie nkuù tu n kóo teèntì,
\q1 kunku kùù dɔ̀ɔ̀ kɛĩ́nkɛ̀ nɛ̀ kɛtenkɛ̀.
\q1
\v 3 Kuyie mbɑ́ɑ́ yóu díndi Isidɑyɛɛribɛ kɛ̀ di nɑɑ̀cɛ̀ii seitɛ,
\q1 wèè di bɑɑ munɔndɔmmú í ò pĩĩ.
\b
\q1
\v 4 Isidɑyɛɛribɛ kóo bɑ̀rì munɔndɔmmú í ò pĩĩ,
\q1 ò ɔ̃ɔ̃ í nyɛ̃̀ nkɛ́duɔ́.
\q1
\v 5 Ti Yiɛ̀ nKuyie nkuù tu di kóo bɑ̀rì kɛ di díɛ́kɛ́ ku kó mɛdɛ́ɛ̀,
\q1 kù bomu di bɑkù yoú.
\q1
\v 6 Diyiè bɑ́ɑ́ di kɔkɛ́nɛ̀ kuyie mmɔ̀nnì,
\q1 yoo otɑ̃̀nkù kɛyènkɛ̀ mɔ̀nnì.
\q1
\v 7 Ti Yiɛ̀ nKuyie nyó ndi kɑ̃nkɛ́mu mɛyɛi mɛmɔu.
\q1 Kù yó nkɑ̃nkɛ́mu di fòmmu.
\q1
\v 8 Kɛ̀ di yɛtì, ti Yiɛ̀ nKuyie nyó ndi bonɛ̀mu,
\q1 kɛ̀ di kũntiní kù ndi bonɛ̀,
\q1 kɛ́túótɛ́ yíe nnɛ̀ di bo mbomɔ̀ɔ sɑ̃́ɑ̃̀.
\c 122
\s1 Kunɑɑtí mbonɛ̀ Sedisɑdɛmmu
\pi1
\v 1 Dɑfiti yɛ̀nfɛ̀ bɛ̀ ɔ̃ ndiè nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Kɛ̀ bɛ̀ ǹ nɑ̀kɛ́ kɛ yĩ:
\q1 Ti kɔtɛ ti Yiɛ̀ nKuyie ncĩ́ɛ̃̀tɛ̀.
\q1 Dɛ̀ ɔ̃ nni nɑɑtimu.
\q1
\v 2 Sedisɑdɛmmu ti cómmú ɑ bòrì ndi.
\q1
\v 3 A mɑɑ́ kɛ wennimu kɛ̀ kuduotí kperíkù dɑ fitɛ́.
\q1
\v 4 Iwuɔ ndɛ nkɔrìní,
\q1 ti Yiɛ̀ nKuyie nkó iwuɔ,
\q1 kɛ dɛ́úkùnko ti Yiɛ̀ nKuyie nkù bɛ̀ nɑ̀kɛ́ kɛ yɛ̃ mbɛ̀ ndɔɔrimɛ̀.
\q1
\v 5 Dɑfiti yɑɑ̀bí kó yɛkpɑ̀ɑ̀tìkɑ̀rɛ̀ bo fɔ̃́ɔ̃̀ miɛkɛ,
\q1 bɛ̀ dɛ nkɑrì kɛ bekù.
\q1
\v 6 Ti mɔ́ú tì Kuyie ntiì tu
\q1 kunɑɑtí bo mbonɛ̀mɛ̀ fɔ̃́ nSedisɑdɛmmu,
\q1 bɛ̀ɛ̀ dɑ dɔ́ kɛ̀ bɛ̀ nkɑrì bɑ̀mmùù.
\q1
\v 7 Kunɑɑtí mbo Sedisɑdɛmmu miɛkɛ,
\q1 kɛ̀ bɛ̀ nkɑri sicɛ̃́ĩ kɛ̀ tìmɑtì í bɛ̀ kɔɔ́nnɛ̀.
\q1
\v 8 N kɔbɛ nɛ̀ n nɛ́pobɛ̀ kpɛ́í nte,
\q1 kɛ̀ n tú kunɑɑtí mbo ɑ miɛkɛ.
\q1
\v 9 Ti Yiɛ̀ nKuyie n tũ nkù kó tɛcĩ́ɛ̃̀tɛ̀ tɛ̀ɛ̀ bo ɑ miɛkɛ
\q1 tɛɛ̀ kpɛ́í n te kɛ̀ n dɔ́ diwɛ̀ì mbo ɑ miɛkɛ.
\c 123
\s1 Bɛ̀ sènkɛ̀rì bɛ̀ kuɔ̀nnɛ̀mɛ̀ Kuyie
\pi1
\v 1 Bɛ̀ ɔ̃ nkɔri Kuyie ncĩ́ɛ̃̀tɛ̀ kɛ dentì fɛ̀ɛ̀ yɛ̀nfɛ̀.
\b
\q1 M búɔ́ fɔ̃́ɔ̃̀ bíɛ́kɛ̀,
\q1 fɔ̃́ nwèè kɑ̀ri ɑ kpɑ̀ɑ̀tìkɑ̀rì kɛĩ́nkɛ̀.
\b
\q1
\v 2 Tidɑɑtì ɔ̃ mbúɔ́ mɛ̀ɛ̀ botí ti yɛmbɛ̀,
\q1 kunitipodɑɑkù ɔ̃ mbúɔ́ mɛ̀ɛ̀ botí ku yiɛ̀,
\q1 mɛɛ̀ botí nku ti búɔ́mɛ̀ ti Yiɛ̀ nKuyie,
\q1 kunku ti tũ nkù,
\q1 kɛ̀ kù bo ti kuɔ́ mmɛsémmɛ̀.
\b
\q1
\v 3 Tí kuɔ́ mmɛsémmɛ̀ ti Yiɛ̀ nKuyie!
\q1 Ti kuɔ́ mmɛsémmɛ̀!
\q1 Mɛsenkùmɛ̀ mɛɛ̀ ti bi.
\q1
\v 4 Sipɔɔ yɛmbɛ̀ kó mudɑɑ́ nti bimu,
\q1 sifeí yɛmbɛ̀ ti cɛ̃̀ ndiyuu ndi mɛdiɛ̀.
\c 124
\s1 Isidɑyɛɛribɛ sɑ̃ntímɛ̀ Kuyie nkù bɛ̀ dɛɛtɛ́mɛ̀
\pi1
\v 1 Dɑfiti yɛ̀nfɛ̀ bɛ̀ ɔ̃ ndentì fɛ̀ kɛ kɔri Kuyie ncĩ́ɛ̃̀tɛ̀.
\b
\q1 Kɛ̀ ti Yiɛ̀ nKuyie ndo í ti bonɛ̀...
\q1 Isidɑyɛɛribɛ, nnɑ́ɑ́nnɛ̀ ti kɛ tú:
\q1
\v 2 Kɛ̀ ti Yiɛ̀ nKuyie ndo í ti bonɛ̀,
\q1 bɛnìtìbɛ̀ do ìtɛ́ dìì mɔ̀nnì ti kpɛ́í.
\q1
\v 3 Bɛ̀ nɑ nti mɑɑnkomu ti fòùbɛ̀,
\q1 bɛ miɛkɛ mɛ̀ ndo ti cɔ̀útɛ́ mɛ̀ɛ̀ botí.
\q1
\v 4 Mɛniɛ mmɛɛ̀ nɑ nti pɔ̃ntɛ́nɛ̀,
\q1 ti nɑ ndìu fɛnɛ́wuonfɛ nfɛ.
\q1
\v 5 Yɛnɛ́fĩ̀nfĩ̀rɛ̀ yɛɛ̀ nɑ nti dɑ̀tínnɛ́,
\q1 yɛnɛ́fĩ̀nfĩ̀rɛ̀ diɛyɛ̀ yɛɛ̀ nɑ mpɛ̃ɛ̃tɛ́ ti ĩ́nkɛ̀.
\b
\q1
\v 6 Ti Yiɛ̀ nKuyie nyètìrì ndɛu,
\q1 kunku kùù í yóu kɛ̀ bɛ̀ ti di.
\q1
\v 7 Kuù te kɛ̀ ti nɑ kɛ yentɛ́,
\q1 tɛnɔ̀tɛ̀ ɔ̃ɔ̃ yentɛ́nɛ̀ mɛ̀ɛ̀ botí ticùɔ̀tì,
\q1 kuù tɔ̃̀tɛ ticùɔ̀tì kɛ̀ ti nɑ kɛ yentɛ́.
\q1
\v 8 Ti kó mɛteèmmɛ̀ boní ti Yiɛ̀ nKuyie mborɛ̀ ndɛ,
\q1 kunku kùù dɔ̀ɔ̀ kɛtenkɛ̀ nɛ̀ kɛĩ́nkɛ̀.
\c 125
\s1 Kuyie mbonɛ̀mɛ̀ bɛ̀ɛ̀ ĩkú ku ĩ́nkɛ̀
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Bɛ̀ɛ̀ ĩkú Kuyie nyĩ́nkɛ̀ bɛ̀ dònnɛ̀ Siyɔ̃ɔ̃ tɑ̃rì ndi
\q1 dìì fìíkú kɛ í nɑmpú,
\q1 dì fííkúmu sɑ̃́ɑ̃̀.
\q1
\v 2 Yɛtɑ̃rɛ̀ fitɛ́ mɛ̀ɛ̀ botí Sedisɑdɛmmu,
\q1 ti Yiɛ̀ nKuyie mmɛ nfitɛ́ ku nìtìbɛ̀ di mmɔ̀nnì nɛ̀ sɑ̃́ɑ̃̀o.
\q1
\v 3 Okpɑ̀ɑ̀tì yɛiwe bɑ́ɑ́ kɑri bɛ̀ɛ̀ wetí bɛ tenkɛ̀ bìtì,
\q1 bɛ̀ɛ̀ wetí bɛ̀ yɑ̀ɑ̀ bo dɔkɛ mɛyɛi mmudɔɔ̀rìmù.
\b
\q1
\v 4 Ti Yiɛ̀ nKuyie ndɔɔ̀ mɛsɑ̀ɑ̀ mbɛ̀ɛ̀ dɔ̀ɔ̀ri dɛ̀ɛ̀ wenni,
\q1 bɛ̀ɛ̀ yɛ̀mmɛ̀ wenni.
\b
\q1
\v 5 Bɛ̀ɛ̀ tũ̀ nyicɛ yɛiyi ti Yiɛ̀ nKuyie nhɑ́ bɛ̀ bɛ̀ti,
\q1 kɛ́wɛ̃nnɛ́nɛ̀ bɛyɛibɛ.
\b
\q1 Kɛ̀ kunɑɑtí mbonɛ̀ Isidɑyɛɛribɛ.
\c 126
\s1 Wèè kɔ̃ti kɛ kɔnti diwɛ̀ì ɔ̃ nhò bomɛ̀ dididɛ̀ì mɔ̀nnì
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Ti Yiɛ̀ nKuyie nwɛ̃̀tɛ kɛ tɛ̃̀ńnɛ́ní dìì mɔ̀nnì Siyɔ̃ɔ̃
\q1 bɛ̀ do pĩ̀ḿmú bɛ̀,
\q1 dɛ̀ do ti dò ntidɔùntì nti.
\q1
\v 2 Kɛ̀ mudɑɑ́ nti kuɔ kɛ̀ ti nyíútí,
\q1 kɛ̀ ibotí tɛì nɑ̀ɑ́ nkɛ tú:
\q1 Bɛ Yiɛ̀ nKuyie nkuù pĩ mmutɔ̃ndiɛmù bɛ kpɛ́í.
\q1
\v 3 Ti Yiɛ̀ nKuyie nkuù pĩ mmutɔ̃ndiɛmù ti kpɛ́í,
\q1 kɛ̀ ti bo diwɛ̀ì miɛkɛ.
\b
\q1
\v 4 Ti Yiɛ̀ nKuyie nhɑ́ wɛ̃tɛ kɛ́tɛ̃́nnɛ́ní bɛ̀ do pĩmmú bɛ̀,
\q1 mɛniɛ nhɔ̃ɔ̃ tɑ mɛ̀ɛ̀ botí kukó nkùù do kũ̀ṹ.
\b
\q1
\v 5 Wèè buɔtì nɛ̀ tinɔnniɛti,
\q1 ò ɔ̃ ntì dɛ̀ì kɛ dièmmu nɛ̀ diwɛ̀ì.
\q1
\v 6 Wèè kɔ̃ti kɛ bo buɔtí tidibotì kɛ kɔnti,
\q1 ò ɔ̃ɔ̃ nti dɛ̀ì kɛ́ntɔ kɛ̀ diwɛ̀ì diì ò bo
\q1 kòò ìútí kɛ kũnti.
\c 127
\s1 Kuyie nkuù mɑɑ̀ tɛcĩ́ɛ̃̀tɛ̀
\pi1
\v 1 Sɑdomɔɔ kó fɛyɛ̀nfɛ̀, bɛ̀ ɔ̃ ndiè nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Kɛ̀ ti Yiɛ̀ nKuyie nyí mɑɑ́ tɛcĩ́ɛ̃̀tɛ̀,
\q1 kɛ̀ bɛ̀ɛ̀ tɛ̀ mɑɑ̀ bɛ̀ ɔ̀ù dɛtetìrɛ̀ ndɛ.
\q1 Kɛ̀ ti Yiɛ̀ nKuyie nyí bɑɑ dihɛì,
\q1 kɛ̀ wèè dì bɑ̀ɑ ò dì bɑ̀ɑ̀ dɛtetìrɛ̀ ndɛ.
\q1
\v 2 Di bo nɑ kɛ níí pikɛ entɛ mɛcɑ̃ɑ̃ nkɛ́kɔ̃tɛ́,
\q1 kɛ bɑ́ɑ́ cɑ̃rikɛ kɛ́konní,
\q1 kɛ níí kɑ̃́tɛ́ di tĩ́ĩ̀ nkɛ nɑ kɛ́pɛ́tɛ́ kɛ́di,
\q1 Kuyie nkuu mɛ nduɔ̀ nkù dɔ́ wè o dɔ́ù ndi.
\b
\q1
\v 3 Ibí tú mɛsɑ̀ɑ̀ mmɛ ti Yiɛ̀ nKuyie nhɔ̃ɔ̃ dɔɔ̀mɛ̀ tɛcĩ́ɛ̃̀tɛ̀,
\q1 ibí tú mucɔ̃́ntimu mmu ti Yiɛ̀ nKuyie ndi duɔ̀ mmù.
\q1
\v 4 Ipie nhɔ̃ ndommɛ̀ okpɑ̀rìnuɔnti nɔu miɛkɛ,
\q1 onìtì pɛitɛ ìì bí o dɑcɛ̃ntì mɔ̀nnì ì ɔ̃ mmɛ nhò dò.
\q1
\v 5 Dɛ̀ nnɑɑti onìtì wèè píɛ nyipie nho doò,
\q1 dɛ yiɛ̀ nhò bo bootɛnɛ̀ dìì mɔ̀nnì o dootitɔbɛ̀ dihɛì kó dibòrì nùù
\q1 dɛ̀ bɑ́ ò di.
\c 128
\s1 Bɛ̀ɛ̀ wetí bɛ̀ yóó yɑ̀ mɛ̀ɛ̀ sɑ̀ɑ̀
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Dɛ̀ nnɑɑti onìtì wèè dé Kuyie,
\q1 wèè tũ nku kó kucɛ.
\q1
\v 2 Dɛ yiɛ̀ nyó nyommu o ɔ̀ùtì kó mucɔ̃́ntimu,
\q1 ò tu diwɛ̀ì yiɛ̀ nwe,
\q1 o kpɛrɛ dɛmɔu yó nyíémmu.
\q1
\v 3 Dɛ yiɛ̀ mpokù bo mpɛí,
\q1 fínyĩ̀ tie mùù pɛí mɛsɑ̀ɑ̀ mmu kɔ̃mɛ,
\q1 o bí níí bo nhò murí odìfíè tie nkɔ̃mɛ,
\q1 ò yo ndɛ̀.
\q1
\v 4 Onìtì wèè dé ti Yiɛ̀ nKuyie,
\q1 kù ɔ̃ɔ̃ ò dɔ̀ɔ̀ mɛsɑ̀ɑ̀ mmɛɛ̀ botí.
\b
\q1
\v 5 Kuyie nhɑ́ mboní ɑ cĩ́ɛ̃̀tɛ̀,
\q1 Siyɔ̃ɔ̃ tɑ̃rì kóò dɔ̀ɔ̀ mɛsɑ̀ɑ̀,
\q1 kòò yɑ̀ Sedisɑdɛmmu yóó yɑ̀ mɛ̀ɛ̀ sɑ̀ɑ̀
\q1 o fòmmu mumɔu miɛkɛ.
\q1
\v 6 Kòò yɑ̀ o yɑɑ̀bí.
\b
\q1 Kunɑɑtí mbonɛ̀ Isidɑyɛɛribɛ.
\c 129
\s1 Bɛyɛibɛ cɑ̀kɛmu kɛ̀ dɛ̀ dɛu
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 N dootitɔbɛ̀ n do kɛ n domu mudoò nɛ̀ m bɛmmɛ̀.
\q1 Isidɑyɛɛribɛ nnɑ́ɑ́nnɛ̀ ti.
\q1
\v 2 Bɛ̀ n do kɛ n domu mudoò nɛ̀ m bɛmmɛ̀,
\q1 bɛ̀ mɛ nyí n nɑ.
\q1
\v 3 Kɛ dirí kɛ dirí n yĩ́nkɛ̀,
\q1 kɛ̀ dɛ̀ dò mbɛ̀ dɛí kupɑku ipɛ̃ nhokùì.
\q1
\v 4 Ti Yiɛ̀ nKuyie nwetímu,
\q1 kuù tɔ̃̀tɛ bɛyɛibɛ kó iwɛ̃ĩ iì do m boú.
\b
\q1
\v 5 Bɛ̀ɛ̀ kó dimɑ̀ɑ̀ í dɔ́ Siyɔ̃ɔ̃ ɛì,
\q1 ifɛi bɛ̀ pĩ nkɛ̀ bɛ̀ɛ bútínnɛ́ kɛ́cokɛ́.
\q1
\v 6 Bɛ̀ dònnɛ̀ timútì tìì ɔ̃ɔ̃ yɛ̀nní tìnti kudɑ̀nkù ĩ́nkɛ̀,
\q1 bɛ̀ ɔ̃ nkpɑɑ́ kɛ í uutɛ́ tì kɛ̀ tì kpeío.
\q1
\v 7 Tì mɛ mbɑ́ɑ́ píɛ nwèè tì uutɛ́ o nɔ̀ùtɛ̀,
\q1 tì mɛ mbɑ́ɑ́ tuɔkɛ ò bo tì boúmɛ̀ dibou.
\q1
\v 8 Bɛcɛpɛ̃̀mbɛ̀ bɑ́ɑ́ mɔɔ ti Yiɛ̀ nKuyie nkó mɛsɑ̀ɑ̀ ndi kpɛ́í.
\b
\q1 Bɛ̀ bɑ́ɑ́ yĩ́:
\q1 Ti tú ti Yiɛ̀ nKuyie ndi dɔɔ̀ mɛsɑ̀ɑ̀.
\c 130
\s1 Mɛyɛǹcɑɑ̀rìmɛ̀ kó fɛyɛ̀nfɛ̀
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Mɛyɛǹcɑɑ̀rìmɛ̀ mɛɛ̀ m bi,
\q1 kɛ̀ n dɑ yu fɔ̃́ n Yiɛ̀ nKuyie.
\q1
\v 2 N Yiɛ̀ nKuyie, keè n tɑmmɛ̀,
\q1 bíinní ɑ toò kɛ́keè ibɑ́ɑmmìi n dɑ bɑ́ɑ́ nyì.
\q1
\v 3 Ti Yiɛ̀ nKuyie nkɑ̀ɑ tu ɑ bo wéntɛ́ ti yɛi,
\q1 we mbo nkpɑɑ́ bo?
\q1
\v 4 A mɛ ntu mɛcĩ́ɛ̃́mmɛ̀ yiɛ̀ nwe,
\q1 kɛ dò nti ndɑ dé.
\b
\q1
\v 5 M buɔ́ n Yiɛ̀ nKuyie nku,
\q1 n kémmú kù yó n nɑ́kɛ́ tì nti.
\q1
\v 6 N wɛ̃nnì yɑ̀ɑ́ nYiɛ̀ nKuyie
\q1 kɛ̀ dɛ̀ pɛ̃ɛ̃tɛ́mu ohɛikɛ̀mbɑ̀rì ɔ̃ nyɑ́ɑ́mmɛ̀ dikṹnweńnì.
\q1 Dɛ̀ pɛ̃ɛ̃tɛ́mu ohɛibɑ̀rì yɑ̀ɑ́mmɛ̀ dɛ̀ bo wentɛ́mɛ̀.
\b
\q1
\v 7 Isidɑyɛɛribɛ, mbúɔ́nɛ̀ ti Yiɛ̀ nKuyie,
\q1 kɛ yɛ̃́ mɛsɑ̀ɑ̀ mbomɛ̀ kuù borɛ̀,
\q1 mɛdɛɛtímɛ̀ mɛbotí mɛbotí bo kuù borɛ̀.
\q1
\v 8 Kuù yóó dɛɛtɛ́ Isidɑyɛɛribɛ bɛ yɛi mmɛmɔu miɛkɛ.
\c 131
\s1 Wèè dèntɛ̀ ò kɛ̃́kùnnɛmɛ̀ omɑ́ɑ̀ dɛbirɛ kɔ̃mɛ
\pi1
\v 1 Dɑfiti yɛ̀nfɛ̀ bɛ̀ ɔ̃ ndentì fɛ̀ kɛ kɔri Kuyie ncĩ́ɛ̃̀tɛ̀.
\b
\q1 N Yiɛ̀ nKuyie, n yí mɔkɛ tɛfentɛ̀,
\q1 n yí tú tɛpɔ̀tɛ̀ yiɛ̀,
\q1 n yí bɛtì dɛdiɛrɛ̀,
\q1 n yí wɑnti dɛ̀ɛ̀ m pɛ̃ɛ̃tɛ́.
\q1
\v 2 N dò mbɛ́u nwe, kɛ dò nsó,
\q1 dɛbirɛ dɛ̀ɛ̀ yɑ̃ɑ̃́ nkɛ sɑnnɛ̀ dɛ̀ ɔ̃ ndòmmɛ̀ dɛ yɔ̃ kpèrɛ̀ ĩ́nkɛ̀,
\q1 n yɛ̀mmɛ̀ dònnɛ̀ dɛbirɛ kɔ̃mɛ dòmmɛ̀ mmɛ.
\b
\q1
\v 3 Isidɑyɛɛribɛ, nyĩkúnɛ̀ di Yiɛ̀ nKuyie nyĩ́nkɛ̀,
\q1 kɛ́túótɛ́ di mmɔ̀nnì nɛ̀ sɑ̃́ɑ̃̀o.
\c 132
\s1 Ti Yiɛ̀ nKuyie ncĩ́ɛ̃̀tɛ̀ bomɛ̀ Siyɔ̃ɔ̃ Dɑfiti ɛì
\pi1
\v 1 Bɛ̀ ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 N Yiɛ̀ nKuyie ndentɛní Dɑfiti kpɛ́í,
\q1 ɑ bɑ́ɑ́ yɛ̃̀ ntihɔ̀ùtì ò ɔ̀u tì.
\b
\q1
\v 2 Kuyie nSɑkɔbu do tũ nkù kpeńnìmu,
\q1 Dɑfiti do kù dɔúnnɛ̀mu dinùù,
\q1 kɛ́pɑrìkɛ̀ kɛ́yú ku yètìrì kɛ dɔ̀:
\q1
\v 3 M bɑ́ɑ́ tɑ n cĩ́ɛ̃̀tɛ̀ miɛkɛ bìtì,
\q1 m bɑ́ɑ́ duɔ́ n dɔ́ù ĩ́nkɛ̀ kɛ́om̀pɛ̀.
\q1
\v 4 M bɑ́ɑ́ yie nkɛ̀ n nuɔ nhṹṹ,
\q1 m bɑ́ɑ́ yie nkɛ̀ munɔndɔmmú m pĩ́.
\q1
\v 5 Kɛ̀ n yí pɛ̀tɛ́ n Yiɛ̀ nKuyie ndikɑ̀rì,
\q1 kɛ̀ n yí pɛ̀tɛ́ tɛcĩ́ɛ̃̀tɛ̀,
\q1 Kuyie nkùù kpeńnì,
\q1 Sɑkɔbu do tũ nkù kpɛ́í.
\b
\q1
\v 6 Ti do kèèmu Kuyie ntɑummɛ̀ tɔu bomɛ̀ Efɑdɑtɑ,
\q1 kɛ̀ ti di yɑ̀ Yɑɑri kó dɛpɑɑ mmiɛkɛ.
\q1
\v 7 Ti tɑnnɛ̀ ti Yiɛ̀ nKuyie ncĩ́ɛ̃̀tɛ̀
\q1 kɛ́nínkú kɛ́sĩ́nnɔ́ɔ ku ììkɛ̀.
\q1
\v 8 Ti Yiɛ̀ nKuyie nkɔtɛní
\q1 ɑ cĩ́ɛ̃̀tɛ̀ nɛ̀ ɑ tɑummɛ̀ tɔu ɑ wɛ̃rímú borɛ̀,
\q1 kɛ́kɔtɛní ɑ cĩ́ɛ̃̀tɛ̀ kɛ́om̀pɛ̀.
\q1
\v 9 A kuɔ́ nìùbɛ̀ ndɑɑti ɑ kó timɔ́mmɔnti,
\q1 bɛ̀ɛ̀ wetí kɛ̀ bɛ̀ nyɑ̃nkunɛ̀ diwɛ̀ì.
\q1
\v 10 Nɛ̀ ɑ kóo tɔ̃ntì Dɑfiti ɑ dɔ́ wè kpɛ́í,
\q1 ɑ bɑ́ɑ́ dootóo ɑ tɑ̃ɑ̃tɛ́ wè.
\q1
\v 11 Ti Yiɛ̀ nKuyie ndɔúnnɛ̀ dìì nùù Dɑfiti,
\q1 di í yóó dɛitɛ,
\q1 dì bomu nsɑ̃́ɑ̃̀, diì tu:
\q1 A bí ɑ pɛitɛ́ ì miɛkɛ i kóò mɔù
\q1 weè yóó kɑri ɑ kpɑ̀ɑ̀tìkɑ̀rì.
\q1
\v 12 Kɛ̀ nsɑ̀ kɑ̀ɑ bí pĩ́ mmɛtɑummɛ̀ m bɛ̀ dɔ̀ɔ̀nɛ̀mɛ̀,
\q1 kɛ tũ n kuɔ́ m bɛ̀ duɔ́ nyì,
\q1 bɛkpɑ̀ɑ̀tìbɛ̀ yó nyiɛ̀ní bɛɛ̀ miɛkɛ,
\q1 bɛmbɛ nɛ̀ bɛ yɑɑ̀bío sɑ̃́ɑ̃̀ kɛ́nkɑrì ɑ kpɑ̀ɑ̀tìkɑ̀rì.
\b
\q1
\v 13 Ti Yiɛ̀ nKuyie nkuù tɑ̃ɑ̃tɛ́ Siyɔ̃ɔ̃,
\q1 kuù dɔ́ kɛ́dɔɔ̀ ku cĩ́ɛ̃̀tɛ̀.
\q1
\v 14 Ku kó diom̀pùrì ndi,
\q1 ku kó diɑ̃rì ndi,
\q1 kuù dɔ́ kɛ́ ndɛ̀ bo.
\q1
\v 15 Kù yóó dɔɔ̀mu Siyɔ̃ɔ̃ ɛì kɔbɛ mɛsɑ̀ɑ̀
\q1 kɛ̀ bɛ̀ mmɔkɛ tidiitì mɛdiɛ̀,
\q1 kù yóó duɔ́mmu o kó bɛcĩ̀rìbɛ̀ mudiì bɛ̀ dɔ́ mɛ̀.
\q1
\v 16 Ikuɔ́ nìùbɛ̀ bo ntú bɛ̀ɛ̀ tɔu mɛdɛɛtímɛ̀ kó tinɑ́ɑǹtì,
\q1 bɛ̀ɛ̀ wetí kɛ̀ bɛ̀ nyɑ̃nkunɛ̀ diwɛ̀ì.
\q1
\v 17 Kù yóó yíɛ́mu okpɑ̀ɑ̀tì Dɑfiti muwɛ̃rímú,
\q1 kù bo ò duɔ́ nwèè yóó sɔɔtɛ́ o kpɑ̀tì wenwe kù tɑ̃ɑ̃tɛ́ wè.
\q1
\v 18 O dootitɔbɛ̀ kù bo bɛ̀ dií nyifɛi,
\q1 kɛ̀ wenwe kó dipìì\f + \fr 132:18 \fr*\ft fr 132:18 \+fk dipìì: \+fk*\ft*\ft Dɛ kó dipìì bɛ̀ nɑ̀ɑ́ ndìì kpɛ́í diɛ, ikuɔ́ nìùtì weè do ɔ̃ ndì òkɛ́, yoo okpɑ̀ɑ̀tì, yoo okótì wèè ni Kuyie nkuɔ́.\ft*\f* mmìɛ̀ti o tĩ́nnì.
\c 133
\s1 Mɛwɛ̃nnímɛ̀ sɑ̀ɑ̀mɛ̀
\pi1
\v 1 Dɑfiti yɛ̀nfɛ̀ bɛ̀ ɔ̃ɔ̃ ndentì fɛ̀ kɛ kɔri Kuyie ncĩ́ɛ̃̀tɛ̀.
\b
\q1 Dɛ̀ wennimu, kɛ nɑɑti Kuyie nkɔbɛ bo nwɛ̃mmɛ̀ kɛ bo.
\q1
\v 2 Dɛ̀ dò mbɛ̀ ɔ̃ɔ̃ cóú mmɛ̀mmɛ ikuɔ́ kó mɛkùɔ̀ nyikuɔ́ nìùtì yuu,
\q1 kɛ̀ mɛ̀ɛ ɔri o dɛɛ̀nfɛ̀,
\q1 ikuɔ́ nìùtì Anɔɔ dɛɛ̀nfɛ̀,
\q1 kɛ́ɔri o yɑɑ̀bòrì mɑ̀nkɛ.
\q1
\v 3 Kɛ dò nhƐdimɔɔ tɑ̃rì ɔ̃ɔ̃ mɑntɛ̀mɛ̀,
\q1 kɛ́pɔ̃ntɛ́ kɛ́cútɛ́nní Siyɔ̃ɔ̃ tɑ̃rì ĩ́nkɛ̀
\q1 dɛɛ̀ borɛ̀ ndɛ Kuyie nduɔ́mmɛ̀ ku kó mɛsɑ̀ɑ̀ nku kɔbɛ nɛ̀ mufòmmu sɑ̃́ɑ̃̀.
\c 134
\s1 Kuyie ntɔ̃mbɛ̀ nsɑ̃ntínɛ̀ Kuyie
\pi1
\v 1 Bɛ̀ do ɔ̃ ndentì fɛ̀ɛ̀ yɛ̀nfɛ̀ kɛ kɔri Kuyie ncĩ́ɛ̃̀tɛ̀.
\b
\q1 Díndi Kuyie ntɔ̃mbɛ̀ dimɔu sɑ̃ntɛnɛ̀ ku,
\q1 díndi bɛ̀ɛ̀ bo ti Yiɛ̀ nKuyie ncĩ́ɛ̃̀tɛ̀
\q1 kɛ pĩ́ nku tɔ̃mmú kɛyènkɛ̀.
\b
\q1
\v 2 Youtɛnɛ̀ di nɔu Kuyie ncĩ́ɛ̃̀tɛ̀ bíɛ́kɛ̀ kɛ́sɑ̃ntɛ ti Yiɛ̀ nKuyie.
\b
\q1
\v 3 Ti Yiɛ̀ nKuyie nní mboní Siyɔ̃ɔ̃ tɑ̃rì kɛ́ di dɔ̀ɔ̀ mɛsɑ̀ɑ̀,
\q1 kunku kùù dɔ̀ɔ̀ kɛĩ́nkɛ̀ nɛ̀ kɛtenkɛ̀.
\c 135
\s1 Disɑ̃nni kó fɛyɛ̀nfɛ̀
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Dɛ́úkùnnɛ ku yètìrì.
\q1 Díndi ti Yiɛ̀ nKuyie ntɔ̃mbɛ̀, nsɑ̃ntínɛ̀ ku.
\q1
\v 2 Díndi bɛ̀ɛ̀ bo ku cĩ́ɛ̃̀tɛ̀ miɛkɛ nɛ̀ díndi bɛ̀ɛ̀ bo tɛ dɑ̀ntì.
\q1
\v 3 Nsɑ̃ntínɛ̀ ti Yiɛ̀ nKuyie nkɛ yɛ̃́ kù wennimɛ̀,
\q1 dɛ́úkùnnɛ ku yètìrì kɛ yɛ̃́ kù ti dɔ́nɛ̀mɛ̀ mɛsɑ̀ɑ̀.
\q1
\v 4 Kɛ yɛ̃́ kuù tɑ̃ɑ̃tɛ́mɛ̀ Sɑkɔbu yɑɑ̀bí,
\q1 bɛmbɛ Isidɑyɛɛribɛ kɛ̀ bɛ̀ tu ku kɔbɛ.
\b
\q1
\v 5 N yɛ̃́mu ti Yiɛ̀ nKuyie ndɛumɛ̀,
\q1 ti Yiɛ̀ nKuyie nkpeńnìnɛ̀mu yɛbɔkɛ̀ yɛmɔu.
\q1
\v 6 Ti Yiɛ̀ nKuyie ndɔ́ kɛ́dɔɔ̀ dɛ̀,
\q1 kù dɛ̀ dɔ̀ɔ̀rimu kɛĩ́nkɛ̀ miɛkɛ nɛ̀ kɛtenkɛ̀ ĩ́nkɛ̀,
\q1 dɑ̀mɛ́ɛ̀rì miɛkɛ nɛ̀ dɛcũmpurɛ dɛmɔu miɛkoo.
\q1
\v 7 Kuù ɔ̃ɔ̃ íinní yɛwɛtɛ̀ itemmɑ̀nkɛ,
\q1 kuù ɔ̃ɔ̃ duɔ́ nkɛ̀ fɛtɑɑfɛ̀ɛ kperi kɛ́mmíí kɛ niù,
\q1 kuù ɔ̃ɔ̃ kpetɛ́ kuyɑɑkù.
\b
\q1
\v 8 Kuù do kùɔ Esibiti kɔbɛ bɛ̀ɛ̀ tu Mpo nɛ̀ iwũɔ̃ ketiyì.
\q1
\v 9 Kɛ̀ kù dɔɔ̀ mɛbɛnkùmɛ̀ nɛ̀ tidiɛtì Esibiti ɛì miɛkɛ,
\q1 kɛ bo bɛnkɛ Esibiti kóo kpɑ̀ɑ̀tì nɛ̀ o tɔ̃mbɛ̀,
\q1
\v 10 kuù potɛ́ yɛbotɛ̀ pɛ́u,
\q1 kuù kùɔ bɛkpɑ̀ɑ̀tìbɛ̀ kperíbɛ̀.
\q1
\v 11 Siyɔ̃ɔ̃ Amɔriibɛ kpɑ̀ɑ̀tì, nɛ̀ Ɔku Bɑsɑ̃ɑ̃ tenkɛ̀ kóo kpɑ̀ɑ̀tì
\q1 nɛ̀ Kɑnnɑhɑ̃ɑ̃ kó bɛkpɑ̀ɑ̀tìbɛ̀ bɛmɔu.
\q1
\v 12 Kɛ duɔ́ nkɛ̀ ku nìtìbɛ̀ɛ tiekɛ bɛ tenkɛ̀,
\q1 kɛ́ nkɛ̀ te bɛmbɛ Isidɑyɛɛribɛ.
\b
\q1
\v 13 Ti Yiɛ̀ nKuyie nyètìrì feímu sɑ̃́ɑ̃̀,
\q1 ti bɑ́ɑ́ yɛ̃̀ nhɑ kpɛ́í nɛ̀ ti yɑɑ̀bío.
\q1
\v 14 Ti Yiɛ̀ nKuyie nyóó kónnɛ́mú ku nìtìbɛ̀,
\q1 kù yóó kuɔ́mmu ku nìtìbɛ̀ mɛsémmɛ̀.
\q1
\v 15 Yɛbotɛ̀ kó yɛbɔkɛ̀ tu timɑ́tì pɛ́ítì nɛ̀ mɛsɔɔ,
\q1 bɛnìtìbɛ̀ dɔ̀ɔ̀ dɛ̀ndɛ nɛ̀ bɛ nɔu.
\q1
\v 16 Yɛ̀ mɔ̀kɛmu yɛnɔ̀ yɛ̀ mɛ nyí nɔ nkɛ nɑ́ɑ́,
\q1 kɛ mɔkɛ inuɔ nyɛ̀ mɛ nyí wúó.
\q1
\v 17 Yɛ̀ mɔ̀kɛmu yɛto, yɛ̀ mɛ nyí yo,
\q1 yɛ̀ í mɔkɛ muwemmu.
\q1
\v 18 Bɛ̀ɛ̀ dɔ̀ɔ̀ri dɛ kó yɛbɔkɛ̀ bɛ̀ɛ yɛ̀ nɑɑ́nnɛ̀,
\q1 bɛ̀ɛ̀ kó dimɑ̀ɑ̀ yɛ̀ duɔ́ mbɛmɑ́ɑ̀ bɛ̀ɛ yɛ̀ nɑɑ́nnɛ̀.
\b
\q1
\v 19 Díndi Isidɑyɛɛribɛ sɑ̃ntɛnɛ̀ ti Yiɛ̀ nKuyie.
\q1 Díndi ikuɔ́ nìùbɛ̀ Anɔɔ kó kuwuɔ nkɔbɛ, ńsɑ̃ntínɛ̀ ti Yiɛ̀ nKuyie.
\q1
\v 20 Díndi Defii kó kuwuɔ nkɔbɛ, nsɑ̃ntínɛ̀ ti Yiɛ̀ nKuyie,
\q1 Díndi bɛ̀ɛ̀ dé ti Yiɛ̀ nKuyie, nsɑ̃ntínɛ̀ ku.
\q1
\v 21 Nsɑ̃ntínɛ̀ ti Yiɛ̀ nKuyie nkùù bo Siyɔ̃ɔ̃, kunku kùù ɑ̃ Sedisɑdɛmmu.
\b
\q1 Nsɑ̃ntínɛ̀ ti Yiɛ̀ nKuyie!
\c 136
\s1 Disɑ̃nni kó fɛyɛ̀nfɛ̀
\q1
\v 1 Nsɑ̃ntínɛ̀ ti Yiɛ̀ nKuyie, kù nìtimu,
\q1 ku sɑ̀ɑ̀ nyí mɔkɛ kumɑ̀nku.
\q1
\v 2 Nsɑ̃ntínɛ̀ Kuyie nkù kpénnìnɛ̀mu yɛbɔkɛ̀ yɛmɔu,
\q1 ku sɑ̀ɑ̀ nyí mɔkɛ kumɑ̀nku.
\q1
\v 3 Nsɑ̃ntínɛ̀ ti Yiɛ̀ nKuyie nkuù bɑkɛ́ dɛmɔu,
\q1 ku sɑ̀ɑ̀ nyí mɔkɛ kumɑ̀nku.
\b
\q1
\v 4 Kuù mɑ́ɑ̀ dɔ̀ɔ̀ri tidiɛtì,
\q1 kù sɑ̀ɑ̀ nyí mɔkɛ kumɑ̀nku.
\q1
\v 5 Kuù dɔ̀ɔ̀ kɛĩ́nkɛ̀ nɛ̀ ku kó mɛciì,
\q1 ku sɑ̀ɑ̀ nyí mɔkɛ kumɑ̀nku.
\q1
\v 6 Kuù pitɛ́ kɛtenkɛ̀ mɛniɛ nyĩ́nkɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 7 Kuù dɔ̀ɔ̀ diyiè nɛ̀ otɑ̃̀nkù nɛ̀ siwɑ̃̀ɑ̃.
\q1 Ku sɑ̀ɑ̀ nyí mɔkɛ kumɑ̀nku.
\q1
\v 8 Kuù dɔ̀ɔ̀ diyiè kɛ̀ dì bo mmí kuyie,
\q1 ku sɑ̀ɑ̀ nyí mɔkɛ kumɑ̀nku.
\q1
\v 9 Kuù dɔ̀ɔ̀ otɑ̃̀nkù nɛ̀ siwɑ̃̀ɑ̃ kɛ̀ dɛ̀ bo mmí kɛyènkɛ̀,
\q1 ku sɑ̀ɑ̀ nyí mɔkɛ kumɑ̀nku.
\b
\q1
\v 10 Kunku kùù kùɔ Esibiti tenkɛ̀ kɔbɛ bɛ̀ɛ̀ tu Mpo,
\q1 kù sɑ̀ɑ̀ nyí mɔkɛ kumɑ̀nku.
\q1
\v 11 Kɛ dènnɛ Isidɑyɛɛribɛ Esibiti ɛì kɔbɛ cuokɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 12 Nɛ̀ ku wɛ̃rímú diɛmù mmu kù bɛ̀ dènnɛmɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 13 Kuù do totɛ́ tipèntì kóo dɑ̀mɛ́ɛ̀rì mɛ̀dɛ́mɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 14 Kɛ duɔ́ nkɛ̀ Isidɑyɛɛribɛ nɑ̀ o miɛkɛ kɛ sèńtɛ́,
\q1 ku sɑ̀ɑ̀ nyí mɔkɛ kumɑ̀nku.
\q1
\v 15 Kuù dìu Esibiti kóo kpɑ̀ɑ̀tì nɛ̀ o ɑ̃ɑ̃pɔ̀mbɛ̀ tipèntì kóo dɑ̀mɛ́ɛ̀rì,
\q1 ku sɑ̀ɑ̀ nyí mɔkɛ kumɑ̀nku.
\q1
\v 16 Kuù do ni ku nìtìbɛ̀ bɛ̀ kèrí dɛ̀ dikpɑ́ɑ̀ miɛkɛ,
\q1 ku sɑ̀ɑ̀ nyí mɔkɛ kumɑ̀nku.
\q1
\v 17 Kuù do kɔùtì bɛkpɑ̀ɑ̀tìbɛ̀ diɛbɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 18 Kuù do kùɔ bɛkpɑ̀ɑ̀tìkperíbɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 19 Amɔriibɛ kpɑ̀ɑ̀tì Siyɔ̃ɔ̃,
\q1 ku sɑ̀ɑ̀ nyí mɔkɛ kumɑ̀nku.
\q1
\v 20 Bɑsɑ̃ɑ̃ tenkɛ̀ kóo kpɑ̀ɑ̀tì Ɔku,
\q1 ku sɑ̀ɑ̀ nyí mɔkɛ kumɑ̀nku.
\q1
\v 21 Kɛ̀ bɛ̀ɛ tiekɛ bɛ tenkɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 22 Ku kó bɛtɔ̃mbɛ̀ Isidɑyɛɛribɛ bɛɛ̀ do tiekɛ bɛ tenkɛ̀,
\q1 ku sɑ̀ɑ̀ nyí mɔkɛ kumɑ̀nku.
\b
\q1
\v 23 Ti bo dìì mɔ̀nnì mɛsémmɛ̀ miɛkɛ kù í yĩɛ̃̀ nti kpɛ́í.
\q1 Ku sɑ̀ɑ̀ nyí mɔkɛ kumɑ̀nku.
\q1
\v 24 Kuù ti dɛɛtɛ́nɛ̀ ti dùɔ̀ntɔbɛ̀,
\q1 ku sɑ̀ɑ̀ nyí mɔkɛ kumɑ̀nku.
\q1
\v 25 Kuù duɔ̀ nfɛnitiyɑnfɛ̀ fɛmɔu mudiì,
\q1 ku sɑ̀ɑ̀ nyí mɔkɛ kumɑ̀nku.
\q1
\v 26 Nsɑ̃ntínɛ̀ Kuyie nkù bɑkɛ́mu dɛmɔu,
\q1 ku sɑ̀ɑ̀ nyí mɔkɛ kumɑ̀nku.
\c 137
\s1 Bɛ̀ pĩ̀ḿmú bɛ̀ kɛ dɔ̀ɔ̀ tidɑɑtì bɛ̀ dìè nfɛ̀ɛ̀ yɛ̀nfɛ̀
\q1
\v 1 Ti do kɑri Bɑbidɔnni kó kukó nnùù ndi,
\q1 ti do dɛ nkɑri kɛ́dentɛní Siyɔ̃ɔ̃ ɛì kpɛ́í kɛ́nkuɔ̀.
\q1
\v 2 Ti do nùńnɛ́ núnnɛ́ ti kó tikùtìdùùtì kukó nkó titieti nti.
\q1
\v 3 Bɛ̀ɛ̀ ti pĩ̀ḿmúní bɛmbɛ bɛ̀ɛ̀ ti fɛ̃́ũnko bɛ̀ dɛ nti békú kɛ tú
\q1 ti bɛ̀ dèntɛ̀ diwɛ̀ì kó fɛyɛ̀nfɛ̀,
\q1 Siyɔ̃ɔ̃ ɛì kó fɛyɛ̀nfɛ̀.
\q1
\v 4 Ti nɛ́ bo yĩ́mɛ kɛ́dentɛ̀ ti Yiɛ̀ nKuyie nkó fɛyɛ̀nfɛ̀ bɛtɔbɛ̀ ciɛ.
\q1
\v 5 Sedisɑdɛmmu kɛ̀ n dɑ yɛ̃̀,
\q1 n nɔ̀ùtɛ̀ youtɛɛ fɑ̃ũ.
\q1
\v 6 N nɔ́ndɛnfɛ̀ɛ dɑri, kɛ̀ nsɑ̀ kɛ̀ n dɑ yɛ̃̀.
\q1 Fɛ̀ɛ dɑri kɛ̀ nsɑ̀ kɛ̀ dɛ̀ í n nɑɑtinɛ̀ fɔ̃́ nSedisɑdɛmmu kɛ pɛ̃ɛ̃tɛ́ dɛsɔnnɛ dɛmɔu.
\b
\q1
\v 7 N Yiɛ̀ nKuyie nhɑ bɑ́ɑ́ yɛ̃̀ nhEdɔmmu ɛì kɔbɛ do dɔ̀ɔ̀ dɛ̀,
\q1 bɛ̀ pɔ̀ntɛ dìì yiè Sedisɑdɛmmu bɛ̀ do pĩɛ̃kù kɛ tú:
\q1 Pɔntɛnɛ̀ we kɛ́dɛ́ítɛ́ pɑ́íí nɛ̀ dipũũo.
\q1
\v 8 Bɛ̀ɛ̀ yóó pɔntɛ Bɑbidɔnni ɛì kɔbɛ, kunɑɑtí mbɛ̀ bonɛ̀.
\q1 Bɛɛ̀ yóó di fɔ́ɔ́ mmɛyɛi ndì ti dɔ̀ɔ̀ mɛ̀.
\q1
\v 9 Dɛ̀ nnɑɑti bɛ̀ɛ̀ bo pĩ́mmú Bɑbidɔnni ɛì kó ibíbɛ́nní
\q1 kɛ ì fɑ̃̀ṹtɛ́ fɑ̃́ṹtɛ́ dipèrì ĩ́nkɛ̀!
\c 138
\s1 Disɑ̃nni kó fɛyɛ̀nfɛ̀
\pi1
\v 1 Bɛ̀ dìèmmɛ̀ Dɑfiti yɛ̀nfɛ̀.
\b
\q1 N Yiɛ̀ nKuyie n dɑ dɛ́úkùnkomu nɛ̀ n yɛ̀mmɛ̀ mɛmɔu,
\q1 n yó ndièmmu kɛ dɑ sɑ̃ntí ɑ tɔ̃rɛ̀ ììkɛ̀.
\q1
\v 2 N nínkúmu ɑ cɛ̃sɑ̀ɑ̀tɛ̀ kɛ dɛ́úkùnko ɑ yètìrì,
\q1 ɑ sɑ̀ mɛ̀ɛ̀ kpɛ́í nɛ̀ ɑ túmɛ̀ timɔ́mmɔnti yiɛ̀,
\q1 kɛ yɛ̃́ ɑ ti dɔúnnɛ̀ dìì nùù pɛ̃ɛ̃tɛ́mɛ̀ ti yɛ̀mmɛ̀ do dò nhɑ́ bo ti dɔɔ̀mɛ̀.
\q1
\v 3 N dɑ yu dìì yiè kɑ̀ɑ yiemmu,
\q1 kɛ yɑ́úkùnnɛ n kɔ̃̀ntì kɛ n kpénkùnnɛ.
\b
\q1
\v 4 N Yiɛ̀ nKuyie, yɛbotɛ̀ yɛmɔu kó bɛkpɑ̀ɑ̀tìbɛ̀ yó ndɛ́úkùnko fɔ̃́ nwe,
\q1 bɛ̀ bo keè dìì mɔ̀nnì ɑ nùù.
\q1
\v 5 Bɛ̀ yó ndièmmu ti Yiɛ̀ nKuyie mpĩ́ mùù tɔ̃mmú,
\q1 kɛ yɛ̃́ ti Yiɛ̀ nKuyie nkpetì dɛumɛ̀mu.
\q1
\v 6 Ti Yiɛ̀ nKuyie mborɛ̀ í tɔ́kɛ́,
\q1 kɛ̀ kù wùónní bɛsĩ́ntíbɛ̀,
\q1 kù wùómmu sipɔɔ yɛmbɛ̀ bɑ́ kɛ̀ bɛ̀ borɛ̀.
\b
\q1
\v 7 Bɑ́ kɛ̀ m bo mbo mɛyɛǹcɑɑ̀rìmɛ̀ miɛkɛ,
\q1 fɔ̃́ɔ̃̀ yó nkɑ̃nkɛ́ n fòmmu,
\q1 kɛ̀ n dootitɔbɛ̀ miɛkɛ n yɛ̀nní,
\q1 fɔ̃́ɔ̃̀ yóó bɛ̀ còńnɛ́ kɛ́ n dɛɛtɛ́ nɛ̀ ɑ wɛ̃rímú.
\q1
\v 8 N Yiɛ̀ nKuyie nyóó pṹɔ̃mmu kù ketɛ́ mùù tɔ̃mmú,
\q1 n Yiɛ̀ nKuyie nhɑ sɑ̀ɑ̀ mbomu sɑ̃́ɑ̃̀,
\q1 bɑ́ɑ́ kṹnnɛ́ ɑ tɔ̃mmú.
\c 139
\s1 N Yiɛ̀ nKuyie nhɑ yɛ̃́mu n kpɛti timɔu
\pi1
\v 1 Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1 N Yiɛ̀ nKuyie nhɑ n wúómu kɛ n yɛ̃́.
\q1
\v 2 Kɛ̀ n kɑ̀ri ɑ yɛ̃́mu, kɛ̀ ǹ yìtɛ́ ɑ yɛ̃́mu,
\q1 n yɛntotí ɔ̃ nkpɑɑ́ díɛtirì kɑ̀ɑ ì yɛ̃́mu.
\q1
\v 3 Kɛ̀ m bo kupɔ̀ɔ̀kù ɑ yɛ̃́mu, kɛ̀ n duɔ́ ɑ yɛ̃́mu,
\q1 ɑ í biinnìnɛ̀ n kó kucɛ mɑkù.
\q1
\v 4 Tinɑ́ɑǹtì ɔ̃ɔ̃ í nyɛ̀nní n nùù,
\q1 n Yiɛ̀ nKuyie nkɑ̀ɑ pɑ̃̀nkɛ ti yɛ̃́mu timɔu.
\q1
\v 5 A bomu n fɔ̃nkúò, kɛ bo n yììkɛ̀,
\q1 kɛ̀ m bo ɑ nɔ̀ùtɛ̀ miɛkɛ.
\q1
\v 6 A n yɛ̃́ kɛ̀ dɛ̀ tontɛ́mu,
\q1 m bɑ́ɑ́ nɑ kɛ́bɑntɛ́ ɑ n yɛ̃́ kɛ̀ dɛ̀ mɑ̀mɛ̀,
\q1 dɛ̀ pɛ̃ɛ̃tɛ́mu n ciì.
\b
\q1
\v 7 M bo kɔtɛ kɛ kɛ dɑ dɛ́tɛ́nɛ̀?
\q1 M bo cokɛ́ kɛ́cuó nkɛ kɑ̀ɑ í nni nyɑ̀?
\q1
\v 8 Kɛ̀ n dèkɛ kɛĩ́nkɛ̀ ɑ kɛ̀ bomu,
\q1 kɛ̀ n tɑ kudɔnkù ɑ kɛ̀ bomu.
\b
\q1
\v 9 Bɑ́ kɛ̀ m pùu kɛ kɔ̀tɛ diyiè yìɛ̀ní kɛ̀,
\q1 bɑ́ kɛ̀ n sèńtɛ́ dɑ̀mɛ́ɛ̀rì yɑ́ɑ̀ ɑ kɛ̀ bomu.
\q1
\v 10 A nɔ̀ùtɛ̀ tɛɛ̀ bɑɑ yó nni nni,
\q1 kɑ̀ɑ nɔ̀ùtɛ̀ youtɛ m pĩ́.
\q1
\v 11 Kɛ̀ n yĩ di mmɔ̀nnì dibiìnnì nɛ́ ǹ dɑ̀tínnɛ́mu
\q1 dibiìnnì dìì n fitɛ́ dìi nɑɑ́nko kuwenniku.
\q1
\v 12 A borɛ̀ dibiìnnì í tú dibiìnnì,
\q1 ɑ borɛ̀ kɛyènkɛ̀ dò nkuyie nku,
\q1 ɑ borɛ̀ dibiìnnì nɛ̀ kuwenniku dɛmɑ́ɑ̀ ndi.
\b
\q1
\v 13 Fɔ̃́ɔ̃̀ n dɔ̀ɔ̀,
\q1 fɔ̃́ɔ̃̀ m pìítɛ́ n yɔ̃ pɔutì miɛkɛ.
\q1
\v 14 N dɑ sɑ̃ntímu, ɑ n dɔ̀ɔ̀ kɛ̀ m mɛ̀nkɛ wennimu mɛdiɛ̀,
\q1 ɑ tɔ̃mmú dɛumu kɛ̀ n tì yɛ̃́ mɛsɑ̀ɑ̀.
\q1
\v 15 N kṹɔ̃̀ do í dɑ biìnninɛ̀,
\q1 ɑ do n dɔɔri dìì mɔ̀nnì disɔ̀rì,
\q1 ɑ do m pìítɛ́ dìì mɔ̀nnì n yɔ̃ pɔutì miɛkɛ.
\q1
\v 16 N do ketírí n yɔ̃ pɔutì miɛkɛ, kɑ̀ɑ n wùómu,
\q1 kɛ wɑ̃̀ri ɑ pɑ́tíri miɛkɛ yɛwe ɑ n duɔ́ nyɛ̀,
\q1 bɑ́ dìmɑrì mu nyí ketɛ́.
\b
\q1
\v 17 Kuyie nhɑ yɛntotí í dò n yì nìntɛ,
\q1 ì mɛ̀nkɛ dɛumu.
\q1
\v 18 Kɛ̀ n tú m bo ì kɑ̀ɑ m bɑ́ɑ́ deè,
\q1 ì sũnɛ̀mu mubirímú,
\q1 bɑ́ dìì yiè nh ɔ̃ɔ̃ entɛní kɛ nsɔ̃́ m bonɛ̀ fɔ̃́ nwe.
\b
\q1
\v 19 Áú Kuyie! Kɑ̀ɑ bo yie nhɑ́ kuɔ bɛyɛibɛ,
\q1 kɛ̀ dɛ̀ bo yie nhɑ dɛ́tinnɛ bɛnitikɔ̀ùbɛ̀.
\q1
\v 20 Bɛ̀ yu ɑ yètìrì nɛ̀ siyɑ́ɑ̀bìsí nsi,
\q1 bɛ̀ tɔ ɑ yètìrì dɛtetìrɛ̀ ndɛ bɛmbɛ ɑ dùɔ̀ntɔbɛ̀.
\q1
\v 21 Ti Yiɛ̀ nKuyie mbɛ̀ɛ̀ dɑ níí, n yí bɛ̀ dɔ́,
\q1 bɛ̀ɛ̀ í dɔ́ ɑ kpɛti bɛ̀ n dò nyisíɛ́ nyi.
\q1
\v 22 M mɛ̀nkɛ bɛ̀ nìímmu timɔ́mmɔnti,
\q1 bɛ̀ tu n dootitɔbɛ̀ mbɛ.
\b
\q1
\v 23 Kuyie! Á n wéntɛ́ nɛ̀ n yɛ̀mmɛ̀ miɛkoo,
\q1 ɑ́ n yɑ́ɑ́kɛ́ kɛ́yɑ n yɛntotí dòmmɛ̀.
\q1
\v 24 N wéntɛ́ mɛsɑ̀ɑ̀ kɛ̀ m bɑ́ ntũ nkucɛ yɛiku mɑkù,
\q1 kɑ̀ɑ n niitɛ́ kucɛ kùù í ceeri ku miɛkɛ.
\c 140
\s1 Dɑfiti túmɛ̀ Kuyie nhò dɛɛtɛ́nɛ̀ bɛyɛibɛ
\d Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀.
\b
\q1
\v 1 N Yiɛ̀ nKuyie nhɑ́ n dɛɛtɛ́nɛ̀ bɛyɛibɛ,
\q1 ɑ́ nni nkɑ̃nkɛ́ bɛnitiyonkubɛ.
\q1
\v 2 Bɛ̀ ɔ̃ ntoti bɛ yɛ̀mmɛ̀ kɛ bo dɔɔ̀ mɛyɛi mmɛ,
\q1 yɛwe yɛmɔu bɛ̀ dɑ̀ńnì yɛkpɑ̀rɛ̀ nyɛ.
\q1
\v 3 Bɛ̀ pɛ̀rímú bɛ nɔ́ndiɛ́ nyi iwɑ̀ɑ̀kɛ kɔ̃mɛ,
\q1 kɛ̀ bɛ nɑ́ɑǹtì dò mmɛwɑɑ̀dɔ̀mmɛ̀.
\q1
\v 4 N Yiɛ̀ nKuyie nhɑ́ nni nkɑ̃nkɛ́ bɛnitiyɛibɛ,
\q1 ɑ́ nni mbɑɑ bɛnitiyonkubɛ,
\q1 bɛ̀ɛ̀ wɑnti kɛ́kotɛ n tɑ̀ɑ̀kɛ.
\q1
\v 5 Sipɔɔ yɛmbɛ̀ n díí kufɑ̃ku nku,
\q1 bɛ̀ piiti iwɛ̃ĩ nyi n kó kucɛ,
\q1 bɛ̀ dɔú nticùɔ̀tì nti n kérí kùù cɛ,
\q1 bɛ̀ n dìí timɑ́tì nti.
\b
\q1
\v 6 N Yiɛ̀ nKuyie n dɑ nɑ̀kɛ́mu kɛ tú
\q1 fɔ̃́ɔ̃̀ tu Kuyie n tũ nkù,
\q1 n Yiɛ̀ nKuyie nkéntɛ́ m bɑ́ɑmmìi.
\q1
\v 7 N Yiɛ̀ nKuyie nhɑ kpeńnìmu, kɛ n dɛɛrí,
\q1 fɔ̃́ɔ̃̀ ɔ̃ nkɑ̃nkɛ́ n yuu mudoò miɛkɛ.
\q1
\v 8 N Yiɛ̀ nKuyie nhɑ bɑ́ɑ́ yie kòo nitiyonkuwe wɑnti kɛ bo dɔɔ̀ tìi dɔɔ̀,
\q1 bɑ́ɑ́ yóu kòò n dííntɛ kɛ bo dɔɔ̀ tìi dɔɔ̀,
\q1 ɑ bɑ́ɑ́ yóu kòò n sée nfɛnɔ̀nfɛ̀.
\b
\q1
\v 9 Yóu kɛ̀ bɛ̀ɛ̀ n cɛ̃̀ɛ̃̀tɛ, kɛ̀ bɛ yɛi ndo bɛ yɔ ĩ́nkɛ̀.
\q1
\v 10 Cóú mbɛ yɔ yɛhɑ̃ɑ̃kũɔ̃, yeetoo bɛ muhɑ̃ɑ̃́ mmiɛkɛ,
\q1 tɑnnɛ́ bɛ kudúókù kɛ̀ bɛ̀ tɛ̃́nkɛ bɑ́ɑ́ yɛ̀nní.
\q1
\v 11 Iwɑ́tìi yɛmbɛ̀ bɑ́ɑ́ nɑɑ́ mbɛ̀mɑbɛ̀ dihɛì miɛkɛ,
\q1 mɛyɛi mmɛɛ̀ yó mbɛtì bɛnitiyonkubɛ kɛ bɛ̀ fɛ̃mmú.
\b
\q1
\v 12 N yɛ̃́mu kɛ do nti Yiɛ̀ nKuyie nyóó kónnɛ́ bɛsénnìbɛ̀ bɛ̀ nɑɑti dìì mɔ̀nnì,
\q1 kɛ́duɔ́ bɛcĩ̀rìbɛ̀ bɛ̀ dò nkɛ́nte dɛ̀.
\q1
\v 13 Bɛ̀ɛ̀ wetí bɛ̀ yó ndɛ́úkùnkomu ɑ yètìrì,
\q1 bɛ̀ɛ̀ dɔ̀ɔ̀ri dɛ̀ɛ̀ sìɛ́ kɛ̀ bɛ̀ ndɑ bonɛ̀.
\c 141
\s1 N Yiɛ̀ nKuyie m píe mbɛyɛibɛ
\pi1
\v 1 Dɑfiti kó fɛyɛ̀nfɛ̀.
\b
\q1 N Yiɛ̀ nKuyie n dɑ yumu, cɑ̃rikɛní kɛ́ n teennɛ̀,
\q1 kéntɛ́ kɛ́keè n dɑ kuɔ̀nnɛ̀mɛ̀.
\q1
\v 2 Yóu kɛ̀ m bɑ́ɑmmuu tuɔkoo ɑ borɛ̀,
\q1 kɛ́ndò ntihúúntì fɔ̃ɔ̃ti,
\q1 cɔutɛ́ m bɑ́ɑmmìi kɛ̀ ì ndò nkuyuoku kó dipɑ̃nnì.
\b
\q1
\v 3 N Yiɛ̀ nKuyie nhɑ́ ndò n nùù kóo bɑ̀rì,
\q1 mbɑɑ n nùù dibòrì kɔ̃mɛ.
\q1
\v 4 Bɑ́ɑ́ yóu kɛ̀ n duɔ́ n yɛ̀mmɛ̀ dɛyɛirɛ,
\q1 bɑ́ɑ́ yóu kɛ̀ n tũnnɛ bɛnitiyonkubɛ kó mɛdɔɔ̀rìmɛ̀,
\q1 kɛ́dɔɔ̀ mɛyɛi, bɑ́ɑ́ yóu kɛ̀ n di bɛ kó tibɑndiitì.
\q1
\v 5 Wèè wetí kòò bo m potɛ́ ò n dɔ́mu,
\q1 kɛ̀ Kuyie nkóo nìtì n tiè ndɛ̀ dò nhò yɔ́ɔ̀rì tùdɑ̀ɑ̀rí nwe n yuu,
\q1 m bɑ́ɑ́ ò yetɛnɛ̀ n yuu,
\q1 m bɑ́ɑ́ yóu m bo m bɑ́ɑ́mmɛ̀ Kuyie nkɛ tú kùu cónnɛ́ bɛyɛibɛ yɛi.
\b
\q1
\v 6 Bɛ̀ bo ntemmùní dìì mɔ̀nnì bɛ kó bɛbɑɑtíbɛ̀ yɛtɑ̃́rɛ̀ ĩ́nkɛ̀,
\q1 bɛ̀ bo bɑntɛ́ ɑ nɑ́ɑǹtì do nɑɑtimɛ̀.
\q1
\v 7 Bɛ̀ ɔ̃ nduɔ̀ kɛtenkɛ̀ kɛ̀ kɛ̀ yɑúmɛ̀,
\q1 kudɔnkù yóó mɛ nhɑɑtɛ,
\q1 kɛ̀ bɛ kṹɔ̃̀ yɛ̀ɛ̀ yɑɑ́ yɑɑ́ kɛ̀ yɛ̀ɛ tɑɑ́ kudɔnkù.
\b
\q1
\v 8 N Yiɛ̀ nKuyie m búɔ́ fɔ̃́ nwe,
\q1 n sɔri fɔ̃́ɔ̃̀ borɛ̀ ɑ bɑ́ɑ́ yóu kɛ̀ n kú.
\q1
\v 9 A nni nkɑ̃nkɛ́ bɛ̀ n dii tìì cùɔ̀tì,
\q1 n dɛ́tinnɛ mɛyɛi ndɔɔ̀rìbɛ̀ kó yɛdíìntɑ̃́rɛ̀.
\b
\q1
\v 10 Yóu kɛ̀ bɛyɛibɛɛ duó bɛ̀ dii tìì cùɔ̀tì miɛkɛ
\q1 kɛ̀ mí n yentɛ́.
\c 142
\s1 Wèè kuɔ̀nnɛ̀ mɛsémmɛ̀ kɛ yu Kuyie
\d Dɑfiti dèntɛ̀ fɛ̀ɛ̀ yɛ̀nfɛ̀ ò bo dìì mɔ̀nnì kutɑ̃dènkù miɛkɛ.
\b
\q1
\v 1 N kuɔ̀mmu kɛ yu n Yiɛ̀ nKuyie,
\q1 n kù kuɔ̀nnɛ̀mu kɛ kù sɛ̀ɛ́tí.
\q1
\v 2 N kù sɑ̀útínɛ̀mu
\q1 kɛ kù nɑ̀ɑ́ n yɛǹcɑɑ̀rìmɛ̀.
\q1
\v 3 N wɛ̃rímú ɔ̃ nkɛ̀ mù dèè, fɔ̃́ɔ̃̀ ɔ̃ n yɛ̃́ kucɛ n yóó tũnnɛ kù,
\q1 bɛ̀ n dii ticùɔ̀tì nti kucɛ n kérí kùù miɛkɛ.
\q1
\v 4 Wéntɛ́ m bɑkù yoú bíɛ́kɛ̀ kɛ́yɑ̀,
\q1 òmɔù í dɑkɛ n kpɛ́í,
\q1 n tɛ̃́nkɛ í mɔkɛ m bo sɔri dɛ̀,
\q1 òmɔù í bɔti n fòmmu kpɛti.
\b
\q1
\v 5 N Yiɛ̀ nKuyie n kuɔ̀nnɛ̀ fɔ̃́ nwe,
\q1 kɛ̀ n tú fɔ̃́ɔ̃̀ tu n kó disɔ̀rì,
\q1 n kpɛrɛ dɛmɔu tú fɔ̃́ nwe kɛtenkɛ̀ kiɛ̀ nyĩ́nkɛ̀.
\q1
\v 6 Kéntɛ́ kɛ́keè n dɑbònnì,
\q1 n di mɛsémmɛ̀ mmɛ, n dɛɛtɛ́nɛ̀ bɛ̀ɛ̀ n fɛ̃́ũnko,
\q1 bɛ̀ kpénnìmu kɛ m pɛ̃ɛ̃tɛ́.
\q1
\v 7 Á n dennɛ dikpetíntou miɛkɛ,
\q1 kɛ̀ nní ndɛ́úkùnko ɑ yètìrì,
\q1 bɛ̀ɛ̀ wetí bɛ̀ yó nh ɔnnɛ́mu,
\q1 bɛ̀ bo yɑ̀ dìì mɔ̀nnì mɛsɑ̀ɑ̀ nhɑ n dɔ̀ɔ̀ mɛ̀.
\c 143
\s1 Osénnìwè kuɔ̀nnɛ̀mɛ̀ Kuyie
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie nkéntɛ́ m bɑ́ɑmmìi,
\q1 ɑ tú timɔ́mmɔnti yiɛ̀ nwe,
\q1 kɛ dɔɔri ɑ bɛ́i ntì,
\q1 kéntɛ́ kɛ́keè n sɑ́útìi,
\q1 cɔutɛ́ m bɑ́ɑmmìi.
\q1
\v 2 Bɑ́ɑ́ bekɛ́nɛ̀ mí nhɑ́ kóo tɔ̃ntì,
\q1 kɛ yɛ̃́ òmɔù í bomɛ̀ wèè bo yĩ́ ò í mɔkɛ mɛyetímɛ̀.
\b
\q1
\v 3 N dootitɔù weè m bɛ̀ti,
\q1 ò m bɔmmu kɛ nɑù,
\q1 ò n tɑnnɛ́ dibiìnnì miɛkɛ nkɛ,
\q1 kɛ̀ n sɑ̃̀ɑ̃́tɛ́nɛ̀ bɛ̀ɛ̀ duɔ́ kudɔnkù nɛ̀ dimɔ̀nnì.
\q1
\v 4 Dɛ̀ m bimu n tɛ̃́nkɛ í nɔ nkɛ nɑmpú.
\q1
\v 5 N kpɑɑ́ kɛ yɛ̃́mu yɛwe yɛ̀ɛ̀ pɛ̃ɛ̃tɛ́ yɛ kpɛ́í,
\q1 n kpɑɑ́ siɛmmumu mutɔ̃mmú ɑ do dɔɔri mù ĩ́nkɛ̀,
\q1 kɛ totí n yɛ̀mmɛ̀ ɑ dɔ̀ɔ̀ dɛ̀ ĩ́nkɛ̀.
\q1
\v 6 N yuo n nɔu nsi kɛ dɑ bɑ́ɑ́,
\q1 n dònnɛ̀ kɛtenkɛ̀ kɛ̀ɛ dóntɛ́ kɛ̀nkɛ mɛniɛ.
\b
\q1
\v 7 N Yiɛ̀ nKuyie ncɑ̃rikɛ kɛ́cɔutɛ́ m bɑ́ɑmmìi,
\q1 dɛ̀ m bimu ɑ bɑ́ɑ́ m bútínnɛ́,
\q1 kɛ̀ mɛɛ̀ dɔkɛ m bo nɑɑ́nnɛ̀ bɛ̀ɛ̀ duɔ́ kudɔnkù.
\q1
\v 8 Bɑ́ dìì kṹnweńnì ɑ n nɑ́kɛ́ ɑ kó mɛsɑ̀ɑ̀,
\q1 kɛ yɛ̃́ n yĩkúmɛ̀ fɔ̃́ɔ̃̀ ĩ́nkɛ̀,
\q1 m bɛnkɛ kucɛ n do nkɛ́tũnnɛ kù,
\q1 n duɔ́ nfɔ̃́ nwe mmɑ́ɑ̀.
\q1
\v 9 N Yiɛ̀ nKuyie nhɑ́ n dɛɛtɛ́nɛ̀ n dootitɔbɛ̀,
\q1 n sɔri fɔ̃́ɔ̃̀ borɛ̀.
\q1
\v 10 M bɛnkɛ kɛ̀ n nɑ kɛ́ndɔɔri ɑ dɔ́ dɛ̀,
\q1 kɛ́yɛ̃́ fɔ̃́ nKuyie nfɔ̃́ɔ̃̀ n temɛ̀,
\q1 ɑ kó Muyɑɑ́nsɑ̀ɑ̀mù n niitɛ́ kucɛ kùù ɛ̀ri.
\q1
\v 11 N Yiɛ̀ nKuyie, dɛ́úkùnnɛ ɑ yètìrì, n fòùkùnnɛ,
\q1 ɑ tú timɔ́mmɔnti yiɛ̀ nwe,
\q1 n dennɛ mɛyɛǹcɑɑ̀rìmɛ̀ miɛkɛ.
\q1
\v 12 A n dɔ́ mɛ̀ɛ̀ kpɛ́í, ɑ́ kuɔ n dootitɔbɛ̀,
\q1 ɑ bɑ́ɑ́ súɔ́ n dùɔ̀ntɔbɛ̀ kóò mɔù,
\q1 kɛ yɛ̃́ n túmɛ̀ ɑ kóo tɔ̃ntì nwe.
\c 144
\s1 Kuyie nte bɛ̀ bomɛ̀ diwɛ̀ì miɛkɛ
\pi1
\v 1 Dɑfiti yɛ̀nfɛ̀.
\b
\q1 N Yiɛ̀ nKuyie nyètìrì ndɛu,
\q1 kuù tu dipèrì dìì n kɑ̃nkɛ́,
\q1 kuù kpénkùnko m bɑɑ̀ mmudoò kpɛ́í,
\q1 kɛ kpénkùnko n nɔu dikpɑ̀nnì kpɛ́í.
\q1
\v 2 Kuù n dɔ̀ɔ̀ri mɛsɑ̀ɑ̀ nkɛ̀ kuù tu n kó tɛcɛ̃kpetɛ̀,
\q1 n cɛ̃diɛtɛ̀, n dɛɛtíwè, n kó kudɔpìkù, n sɔri dɛ̀,
\q1 kuù te kɛ̀ ibotí m búɔ́.
\b
\q1
\v 3 N Yiɛ̀ nKuyie, we ntu onìtì kɛ dò nhɑ́ ndɑkɛ o kpɛ́í?
\q1 Onìtì yie ntu we kɛ dò nhɑ́ nyɛ̃́ o kpɛ́í.
\q1
\v 4 Onìtì dònnɛ̀ muyɑɑ́ mmu,
\q1 kòo we pɛ̃nkɛ́ mɛdɛ́ɛ̀ nkɔ̃mɛ.
\b
\q1
\v 5 N Yiɛ̀ nKuyie nkpɛ́ú ntiwɛtì kɛ́cútɛ́ní,
\q1 kɛ́kɑ́ɑ́kɛ́ yɛtɑ̃rɛ̀ kɛ̀ yɛ̀ɛ̀ cɔ̀útɛ́.
\q1
\v 6 Duɔnní itɑpíɛ kɛ̀ ìì ciɛ́ n dùɔ̀ntɔbɛ̀,
\q1 tɑ̃ũ ɑ pie nkɛ̀ bɛ̀ɛ cíɛ́tɛ́.
\q1
\v 7 Youtɛní ɑ nɔ̀ùtɛ̀ dɛĩ́nkɛ̀ kɛ́ n dɛɛtɛ́,
\q1 kɛ́ n dennɛní kubinku miɛkɛ,
\q1 kɛ́ n dɛɛtɛ́nɛ̀ bɛkpɑ́kpɑ̀rìbɛ̀.
\q1
\v 8 Bɛ̀ɛ̀ nɑ́ɑntɛ siyɑ́ɑ̀bìsí,
\q1 bɛ̀ɛ̀ ɔ̃ɔ̃ mpɑriku kɛ nɛ́ soú.
\b
\q1
\v 9 Kuyie n yóó dɑ dentɛ̀ fɛyɛmpɑ̀nfɛ̀ nfɛ,
\q1 kɛ́mbiennɛ̀ kukùtìdùkù iwɛ̃ĩ tɛpíítɛ̀ kɔku.
\q1
\v 10 Fɔ̃́ nwèè ɔ̃ nte kɛ̀ bɛkpɑ̀ɑ̀tìbɛ̀ɛ nɑ,
\q1 fɔ̃́ nwèè dɛɛrí mí nhɑ kóo tɔ̃ntì Dɑfiti.
\q1
\v 11 N dɛɛtɛ́, n fietɛ bɛkpɑ́kpɑ̀rìbɛ̀ nɔu miɛkɛ,
\q1 bɛ̀ nɑ́ɑntɛ siyɑ́ɑ̀bìsí nsi.
\q1 Bɛ̀ ɔ̃ mpɑrìkumu kɛ nɛ́ soú.
\b
\q1
\v 12 Ti bí initidɑɑì ndònnɛ̀ dɛtie ndɛ̀ɛ̀ yɛ̀ kɛ kótírí,
\q1 kɛ̀ ti nitipobí nwenni kɛdònnɛ̀ sikpɑ̀ɑ̀tìcɛ̃́ĩ kó yɛsɑ̃ǹkɛ̀,
\q1 bɛ̀ kèrí yɛ̀ tifèntì.
\q1
\v 13 Kɛ̀ ti buɔ mpíɛmmu tidiitì,
\q1 kɛ̀ ti wũɔ̃ pɛí ti pɑɑ mmiɛkɛ kɛ sṹṹmmu sikɔupí sikɔupí.
\q1
\v 14 Ti nɑ̀ɑ̀kɛ ìì tɔu tinɛntì kɛ̀ ìì sũ̀ṹ,
\q1 kɛ̀ ti dootitɔbɛ̀ bɑ́ ntɑɑ̀ kɛ ì pĩĩ n kɛ kũũ̀nnɛ̀,
\q1 yɛdɑbùò ntɛ̃́nkɛ bɑ́ mbo ti ɛkɛ̀ miɛkɛ.
\q1
\v 15 Dɛ̀ nnɑɑti kuwuɔ nkùù bo pɛ́tɛ́ dɛ kó mɛsɑ̀ɑ̀,
\q1 dɛ̀ nnɑɑti kuwuɔ nti Yiɛ̀ nKuyie nte kù.
\c 145
\s1 Kuyie nkpɑ̀tì bomɛ̀ sɑ̃́ɑ̃̀
\pi1
\v 1 Disɑ̃nni kó fɛyɛ̀nfɛ̀ Dɑfiti dèntɛ̀ fɛ̀.
\b
\q1 N yó nsɑ̃ntímu Kuyie nkùù n te,
\q1 kuù tu n kóo kpɑ̀ɑ̀tì,
\q1 n yó ndɛ́úkùnkomu ku yètìrì sɑ̃́ɑ̃̀.
\q1
\v 2 Bɑ́ dìì yiè n yó nkù sɑ̃ntímu,
\q1 kɛ́dɛ́úkùnko ku yètìrì sɑ̃́ɑ̃̀ nɛ̀ m bo mbomɛ̀.
\q1
\v 3 Ti Yiɛ̀ nKuyie ndɛumu mɛdiɛ̀ kɛ mɑ̀nnɛ̀ disɑ̃nni,
\q1 kù dɛumu kɛ í mɔkɛ kumɑ̀nku.
\q1
\v 4 Bɛnìtìbɛ̀ yɛmɔ̀rɛ̀ yɛmɔu kɔbɛ sɑ̃ntímu ɑ tɔ̃ndiɛmù,
\q1 kɛ yó nnɑ́ɑ́ nhɑ tɔ̃mmú dɛumɛ̀.
\q1
\v 5 N yó nnɑ́ɑ́mmú ɑ yetidiɛrì nɛ̀ ɑ kpetì nɛ̀ ɑ sɑ̃nni,
\q1 n yó nnɑ́ɑ́mmú bɛnìtìbɛ̀ ɑ tɔ̃ndiɛmù kpɛ́í.
\q1
\v 6 Bɛnìtìbɛ̀ yó nnɑ́ɑ́mmú ɑ kpeńnìmɛ̀ kɛ duò tikɔ̃m̀bùɔ̀tì,
\q1 kɛ̀ mí nní nnɑ́ɑ́ nhɑ dɛumɛ̀.
\q1
\v 7 Bɛ̀ yó ndeninímu ɑ̀ sɑ̀ɑ̀ ndɛumɛ̀,
\q1 kɛ pĩɛ̃kù ɑ túmɛ̀ timɔ́mmɔnti yiɛ̀.
\b
\q1
\v 8 Ti Yiɛ̀ nKuyie mmɔ̀kɛ onìtì kó mɛsémmɛ̀ mmɛ kɛ sɑ̀,
\q1 ku miɛkɛ í cɑ̃ɑ̃ kɛ pɛ́íkú kɛ̀ kù ti dɔ́ mɛdiɛ̀.
\q1
\v 9 Ti Yiɛ̀ nKuyie nnìtimu timɔu ti kpɛ́í,
\q1 kù dɔ́mu mɛdiɛ̀ kù dɔ̀ɔ̀ dɛ̀ dɛmɔu.
\q1
\v 10 Ti Yiɛ̀ nKuyie nhɑ dɔ̀ɔ̀ dɛ̀ɛ̀ kó dimɑ̀ɑ̀ yó ndɑ sɑ̃ntímu,
\q1 bɛ̀ɛ̀ dɔ̀ɔ̀ri ɑ dɔ́ dɛ̀ kɛ̀ bɛ̀ ndɛ́úkùnko ɑ yètìrì.
\q1
\v 11 Bɛ̀ yó nnɑ́ɑ́mmú ɑ kpɑ̀tì dɛumɛ̀,
\q1 kɛ́nnɑ́ɑ́ mutɔ̃ndiɛmù ɑ dɔ̀ɔ̀ mù kpɛ́í.
\q1
\v 12 Kɛ̀ dɛ̀ɛ yie nkɛ̀ bɛnìtìbɛ̀ɛ bɑntɛ́ ɑ pĩ́ mmùù tɔ̃ndiɛmù,
\q1 ɑ kpeńnìmɛ̀ mɛdiɛ̀ nkɛ bɑkɛ́.
\b
\q1
\v 13 A kpɑɑtìrìmu yɛmɔ̀rɛ̀ yɛmɔu,
\q1 fɔ̃́ɔ̃̀ yó mbɑkɛ́ yɛmɔ̀rɛ̀ yɛmɔu.
\q1
\v 14 Ti Yiɛ̀ nKuyie nhɔ̃ ncúɔ́mu bɛ̀ɛ̀ duò,
\q1 kɛ teénnɛ̀ bɛcĩ̀rìbɛ̀.
\q1
\v 15 Bɛnìtìbɛ̀ bɛmɔu bùɔ́ fɔ̃́ nwe,
\q1 kɑ̀ɑ bo mbɛ̀ duɔ̀ mmudiì dikònnì bɛ̀ bo dìì mɔ̀nnì.
\q1
\v 16 Fɔ̃́ɔ̃̀ ɔ̃ɔ̃ yɑnnɛ ɑ nɔ̀ùtɛ̀,
\q1 bɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀ kɛ̀ bɛ̀ɛ di kɛ́nsɑ̀nnɛ̀.
\q1
\v 17 Ti Yiɛ̀ nKuyie nkó icɛ imɔu wetímu,
\q1 kɛ̀ ku tɔ̃mmú mumɔu tú mɛsɑ̀ɑ̀ nkɔ̃mu.
\q1
\v 18 Bɛ̀ɛ̀ yu ti Yiɛ̀ nKuyie nkù ɔ̃ɔ̃ mbɛ̀ tɔ̀kɛ́nɛ̀mu,
\q1 kù í yóu bɛ̀ɛ̀ kù yunɛ̀ timɔ́mmɔnti.
\q1
\v 19 Kù ɔ̃ɔ̃ dɔɔ̀mu bɛ̀ɛ̀ kù dé bɛ̀ dɔ́ tì,
\q1 kù ɔ̃ɔ̃ keèmu bɛ dɑbùò kɛ́ bɛ̀ dɛɛtɛ́.
\q1
\v 20 Ti Yiɛ̀ nKuyie nhɔ̃ɔ̃ mbɑɑ̀mu bɛ̀ɛ̀ kù dɔ́,
\q1 kɛ́kuɔ bɛnitiyonkubɛ bɛmɔu.
\b
\q1
\v 21 N Yiɛ̀ nKuyie nsɑ̃nni í yóó deè n nùù miɛkɛ,
\q1 dɛ̀ɛ̀ kó dimɑ̀ɑ̀ weí dɛ̀ nsɑ̃ntí Kuyie nkùù dò mpɑ́í pɑ́í sɑ̃́ɑ̃̀.
\c 146
\s1 Kuyie nkɑ̃nkɛ́mɛ̀ bɛcĩ̀rìbɛ̀
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 N yó nsɑ̃ntímu n Yiɛ̀ nKuyie.
\q1
\v 2 N yó nsɑ̃ntímu n Yiɛ̀ nKuyie n fòmmu mumɔu,
\q1 n fòmmu mumɔu n yó ndièmmu kɛ kù sɑ̃ntí.
\b
\q1
\v 3 Di bɑ́ɑ́ duɔ́ ndimɑ́ɑ̀ kutenkù kó bɛkpɑ̀ɑ̀tìbɛ̀,
\q1 bɛnìtìbɛ̀ mbɛ bɛ̀ bɑ́ɑ́ nɑ kɛ́ di dɛɛtɛ́.
\q1
\v 4 Kòò nìtì wemmu kũ̀ńtɛ́, ò tɑ kɛtenkɛ̀ nkɛ,
\q1 kòò do wúó ntìi deè dɛ yiè.
\b
\q1
\v 5 Dɛ̀ nnɑɑti onìtì wèè ĩkú Kuyie nSɑkɔbu do tũ nkù ĩ́nkɛ̀,
\q1 wèè kèḿmú ti Yiɛ̀ nKuyie nhò tũ̀ nkù.
\b
\q1
\v 6 Kuù dɔ̀ɔ̀ kɛĩ́nkɛ̀ nɛ̀ kɛtenkɛ̀,
\q1 dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ
\q1 kuù pĩ ntimɔ́mmɔnti sɑ̃́ɑ̃̀.
\q1
\v 7 Kuù ɔ̃ɔ̃ kónnɛ́ ocĩ̀rì ò nɑɑti dìì mɔ̀nnì,
\q1 kuù duɔ̀ mmudiì dikònnì bo bɛ̀,
\q1 ti Yiɛ̀ nKuyie nkuù ɔ̃ɔ̃ pítɛ́ tidɑɑtì iwɛ̃ĩ.
\q1
\v 8 Ti Yiɛ̀ nKuyie nkuu ɔ̃ɔ̃ wéí nwèè tu kuyũ̀ɔ̃̀nkù,
\q1 kuù ɔ̃ɔ̃ teennɛ̀ bɛcĩ̀rìbɛ̀,
\q1 ti Yiɛ̀ ndɔ́mu bɛ̀ɛ̀ tũ̀ ntimɔ́mmɔnti.
\q1
\v 9 Ti Yiɛ̀ nKuyie nkuù ɔ̃ɔ̃ nkɑ̃nkɛ́ bɛpɔ̀ɔ̀bɛ̀,
\q1 kuù kommu iciribí nɛ̀ bɛkúpobɛ̀,
\q1 kuù ɔ̃ɔ̃ duɔ́ nkɛ̀ bɛnitiyonkubɛ dɔ́ kɛ́dɔɔ̀ tìi yetɛ.
\b
\q1
\v 10 Ti Yiɛ̀ nKuyie mbɑkɛ́mu sɑ̃́ɑ̃̀,
\q1 Siyɔ̃ɔ̃ ɛì kɔbɛ Kuyie ndi tũ nkù yó mbɑkɛ́mu sɑ̃́ɑ̃̀.
\b
\q1 Nsɑ̃ntínɛ̀ ti Yiɛ̀ nKuyie!
\c 147
\s1 Sɑ̃ntɛnɛ̀ Kuyie ku tɔ̃ndiɛmù kpɛ́í
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Dɛ̀ wennimu ti bo nsɑ̃ntímɛ̀ ti Yiɛ̀ nKuyie,
\q1 dɛ̀ nɑɑtimu ti bo nkù dɛ̀úkùnkomɛ̀, kuù mɑ̀nnɛ̀ disɑ̃nni.
\q1
\v 2 Ti Yiɛ̀ nKuyie nkuù wɛ̃̀tɛ kɛ íi nSedisɑdɛmmu,
\q1 kɛ tìí nyIsidɑyɛɛribɛ bɛ̀ɛ̀ do cìɛ́tɛ́.
\q1
\v 3 Kuù ɔ̃ɔ̃ miɛkùnnɛ wèè yɛ̀mmɛ̀ kɔ̀ùtɛ,
\q1 kɛ ɔu bɛ muɔ.
\q1
\v 4 Kuù kɑ̀ɑ nsiwɑ̃̀ɑ̃ kɛĩ́nkɛ̀ kɛ yɛ̃́ sì mɑ̀mɛ̀,
\q1 kɛ yu bɑ́ tɛ̀ nɛ̀ tɛ yètìrì.
\q1
\v 5 Ti Yiɛ̀ nKuyie ndɛumu mɛdiɛ̀ nkɛ kpeńnì,
\q1 ku ciì nyí mɔkɛ mɛ mɑ̀nku.
\q1
\v 6 Ti Yiɛ̀ nKuyie nkuù ɔ̃ ncúɔ́ ocĩ̀rì kóò íi,
\q1 kuù ɔ̃ɔ̃ kotɛ oyɛiwe tɑ̀ɑ̀kɛ kòò do.
\b
\q1
\v 7 Dentɛ̀nɛ̀ yɛsɑ̃ɑ̃ nkó iyiɛ ti Yiɛ̀ nKuyie nkpɛ́í,
\q1 ndiènnɛ̀ ku, kɛ biennɛ̀ dɛbémbénnɛ̀ iwɛ̃ĩ kpɛrɛ.
\q1
\v 8 Kuù ɔ̃ɔ̃ dennɛní yɛwɛtɛ̀ kɛĩ́nkɛ̀,
\q1 kuù ɔ̃ɔ̃ duɔ́ nkɛ̀ fɛtɑɑfɛ̀ɛ kperi kɛ́ni,
\q1 kuù ɔ̃ɔ̃ duɔ́ nkɛ̀ timusũ̀ũ̀tìi yɛ̀ yɛtɑ̃rɛ̀.
\q1
\v 9 Kuù duɔ̀ nyiwũɔ̃ nɛ̀ tiwɑnwɑntì mudiì,
\q1 kuù yɛ̃́ yɛkɑ̃kɑ̃bɛ bo di mù dikònnì yɛ̀ bo dìì mɔ̀nnì.
\q1
\v 10 Kuyie nkpɛti í bonɛ̀ tɛsɑ̃ntɛ̀ tɛ̀ɛ̀ nɔ mmuceé,
\q1 kù í dɑkɛ wèè tɑ̃ntɑ̃ɑ̃ nnɑɑti o kpɛti.
\q1
\v 11 Ti Yiɛ̀ nKuyie nyɛ̀mmɛ̀ nɑɑtinɛ̀ bɛ̀ɛ̀ kù dé bɛ̀mbɛ,
\q1 bɛ̀ɛ̀ kèḿmú kɛ́ yɛ̃́ kɛ do nkù bo bɛ̀ dɔ̀ɔ̀ mɛsɑ̀ɑ̀.
\b
\q1
\v 12 Díndi Sedisɑdɛmmu kɔbɛ dɛ́úkùnnɛ ti Yiɛ̀ nKuyie nyètìrì,
\q1 díndi Siyɔ̃ɔ̃ ɛì kɔbɛ nsɑ̃ntínɛ̀ Kuyie ndi tũ nkù.
\q1
\v 13 Kɛ yɛ̃́ ku kpénkùnnɛmɛ̀ dihɛì kó yɛmɑ́tìcɑ̀kɛ̀,
\q1 kɛ dɔ̀ɔ̀ mɛsɑ̀ɑ̀ ndi nìtìbɛ̀.
\q1
\v 14 Kuù duɔ́ nkɛ̀ di kó kutempɛ̃ nkɔbɛ kɑri kɛ̀ dɛ̀ bɛ̀ nɑɑti,
\q1 kɛ bɛ̀ duɔ́ ntidiitì sɑ̀ɑ̀tì kɛ̀ bɛ̀ yo nkɛ sɑ̀nnɛ̀.
\q1
\v 15 Kuù ɔ̃ɔ̃ pɛ́i nkutenkù,
\q1 kɛ̀ kù bɛ́i ntì bɑ́ɑ́ wuɔkɛ́.
\q1
\v 16 Kuù ɔ̃ɔ̃ duɔ́ nkɛ̀ mupɑ̃̀ɑ̃ mboomu nduò kɛtenkɛ̀ tikóntì tɛ̃mɛ̀,
\q1 kɛ́yɑɑtɛ́ kɛtenkɛ̀ mutɑ́pɛí nkɔ̃mɛ.
\q1
\v 17 Kuù ɔ̃ɔ̃ duɔ́ nkɛ̀ fɛtɑɑfɛ̀ mɑ́tɑ̃́rɛ̀ nwɛ́ú kɛ duòní,
\q1 kɛ̀ dɛ̀ɛ bonkɛ kɛ̀ muséé nhɑutɛ́ bɛnìtìbɛ̀.
\q1
\v 18 Kɛ̀ kù bɛ́i nku nùù dɛ̀ɛ yiɛtɛ,
\q1 kɛ̀ kù fùùtɛ dɛ̀ɛ nɑɑ́ mmɛniɛ.
\q1
\v 19 Kuù nɑ̀kɛ́ ku nɑ́ɑǹtì Sɑkɔbu yɑɑ̀bí,
\q1 kuù duɔ́ nku kuɔ́ nɛ̀ ku tɑnnɔ̀ Isidɑyɛɛribɛ.
\q1
\v 20 Kù í dɔ̀ɔ̀ mɛbotí kubotí tɛkù mɑkù cuokɛ̀,
\q1 kubotí mɑkù kɔbɛ í yɛ̃́ ku tɑnnɔ̀.
\b
\q1 Nsɑ̃ntínɛ̀ ti Yiɛ̀ nKuyie!
\c 148
\s1 Kɛĩ́nkɛ̀ kɔbɛ nɛ̀ kɛtenkɛ̀ kɔbɛ dommɛ̀ kɛ́nsɑ̃ntí Kuyie
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Díndi kɛĩ́nkɛ̀ kɔbɛ nsɑ̃ntínɛ̀ ti Yiɛ̀ Kuyie,
\q1 díndi bɛ̀ɛ̀ bo kɛĩ́nkɛ̀, nkù sɑ̃ntínɛ̀.
\q1
\v 2 Kuyie ntɔ̃rɛ̀ yɛmɔu, nsɑ̃ntínɛ̀ ku,
\q1 Díndi ku ɑ̃ɑ̃pɔ̀mbɛ̀, nsɑ̃ntínɛ̀ ku.
\q1
\v 3 Fɔ̃́ ndiyiè nɛ̀ fɔ̃́ nhotɑ̃̀nkù kɛ̀ dí nkù sɑ̃ntí,
\q1 díndi siwɑ̃̀ɑ̃ sìì kó dimɑ̀ɑ̀ mí, nsɑ̃ntínɛ̀ ku.
\q1
\v 4 Díndi tiwɛtì ĩ́nkɛ̀ kɔbɛ, nsɑ̃ntínɛ̀ Kuyie,
\q1 tiwɛtì ĩ́nkɛ̀ kó mɛniɛ, nsɑ̃ntínɛ̀ ku.
\q1
\v 5 Dɛ̀ɛ̀ kó dimɑ̀ɑ̀ bo dɛ̀ nsɑ̃ntí ti Yiɛ̀ nKuyie,
\q1 kɛ yɛ̃́ kuù bɛ́immɛ̀ ku nùù mɛ̀mɑ́ɑ̀ kɛ̀ dɛ̀ buotɛ́.
\q1
\v 6 Kɛ̀ kù dɛ̀ ɑ̃nnɛ́ kɛ̀ dɛ̀ bo sɑ̃́ɑ̃̀,
\q1 kɛ̀ kù dɛ̀ kèétɛ́ ikuɔ́ ìì í yóó ceetɛ.
\b
\q1
\v 7 Dɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀, nsɑ̃ntínɛ̀ ti Yiɛ̀ nKuyie,
\q1 Dɑ̀mɛ́ɛ̀rì, nɛ̀ dɛsĩ̀nnɛ̀ dɛ̀ɛ̀ bo dɛ miɛkɛ, nsɑ̃ntínɛ̀ ku.
\q1
\v 8 Muhɑ̃ɑ̃́ nɛ̀ fɛtɑɑfɛ̀ mɑ́tɑ̃́rɛ̀, mupɑ̃̀ɑ̃ mboomu nɛ̀ mutonnìmù nɛ̀ kuyɑɑkperíkù,
\q1 díndi bɛ̀ɛ̀ yie nku nɑ́ɑǹtì nsɑ̃ntínɛ̀ ku.
\q1
\v 9 Díndi yɛtɑ̃rɛ̀ nɛ̀ díndi sitɑ̃ɑ̃́,
\q1 nɛ̀ dɛtie ndɛ̀ɛ̀ pɛí nɛ̀ dɛtie mbɛ̀ tu dɛ̀ nsɛ́tìrì, nsɑ̃ntínɛ̀ ku.
\q1
\v 10 Iwũɔ̃ imɔu nɛ̀ tiwɑnwɑntì,
\q1 dɛbɑmbɑɑ̀nnɛ̀ nɛ̀ tinɔ̀tì dɛmɔu, nsɑ̃ntínɛ̀ ku,
\q1
\v 11 Díndi bɛkpɑ̀ɑ̀tìbɛ̀ nɛ̀ ibotí imɔu,
\q1 díndi sikpɑ̀ɑ̀tìbìí nɛ̀ bɛnìùbɛ̀ bɛmɔu,
\q1
\v 12 bɛdɑpɑ̀mbɛ̀ nɛ̀ bɛsɑpɑ̀mbɛ̀,
\q1 bɛdɑkótíbɛ̀ nɛ̀ ibí nsɑ̃ntínɛ̀ ku!
\q1
\v 13 Dimɔu di nsɑ̃ntí ti Yiɛ̀ nKuyie,
\q1 kɛ yɛ̃́ kuù mɑ́ɑ̀ yètìrì feímɛ̀,
\q1 kuù tu dɛĩ́nkɛ̀ nɛ̀ kɛtenkɛ̀ kóo kpɑ̀ɑ̀tì.
\q1
\v 14 Kuù wɛ̃̀tɛ kɛ duɔ́ nku kɔbɛ muwɛ̃rímú,
\q1 bɛ̀ɛ̀ yie nku kpɛti kɛ̀ bɛ̀ bɛ̀ sɑ̃ntí,
\q1 bɛmbɛ Isidɑyɛɛribɛ bɛ̀ɛ̀ kù tɔ̀kɛ́nɛ̀ bɛ kpɛ́í.
\b
\q1 Nsɑ̃ntínɛ̀ ti Yiɛ̀ nKuyie!
\c 149
\s1 Kuyie nkɔbɛ kó diwɛ̀ì
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Dentɛ̀nɛ̀ fɛyɛmpɑ̀nfɛ̀ di Yiɛ̀ nKuyie nkpɛ́í,
\q1 díndi bɛ̀ɛ̀ dɔ̀ɔ̀ri Kuyie ndɔ́mɛ̀ kɛ̀ di tìí, nsɑ̃ntínɛ̀ ti Yiɛ̀ nKuyie.
\q1
\v 2 Isidɑyɛɛribɛ diwɛ̀ì ndi bonɛ̀ wèè di dɔ̀ɔ̀,
\q1 Siyɔ̃ɔ̃ ɛì kɔbɛ, nyɑ̃nkunɛ̀ di kóo kpɑ̀ɑ̀tì kpɛ́í.
\q1
\v 3 Nhɑunɛ̀ kɛ sɑ̃ntí ti Yiɛ̀ nKuyie,
\q1 ndiènnɛ̀ kɛ kù sɑ̃ntí kɛ biennɛ̀ yɛbɑ̀rɛ̀ nɛ̀ tibómbonti,
\q1
\v 4 kɛ yɛ̃́ ti Yiɛ̀ nKuyie mpiɛtimɛ̀ ku kó diwɛ̀ì ku kɔbɛ cuokɛ̀ nkɛ,
\q1 kɛ̀ bɛsĩ́ntíbɛ̀ kó tisɑ̃tì tu mɛdɛɛtímɛ̀.
\b
\q1
\v 5 Díndi bɛ̀ɛ̀ dɔ̀ɔ̀ri Kuyie ndɔ́mɛ̀ nyɑ̃nkunɛ̀ diwɛ̀ì,
\q1 kɛ dɛ́úkùnko ku yètìrì, kɛ́nyíútí nɛ̀ di dúɔ̀ ĩ́nkòo.
\q1
\v 6 Kuyie nsɑ̃nni mbo di nɔ miɛkɛ,
\q1 kɛ̀ di nɔu mpikú kuseú mɛnɑtimɛ̀ mɛ̀dɛ́mɛ̀ kɔku.
\q1
\v 7 Dí pɛitɛ yɛbotɛ̀ yɛ̀ di dɔ̀ɔ̀ dɛ̀,
\q1 dí ɑ̃nnɛ́ ibotí tiyɛ̃ĩti kɛ́fɔ́ɔ́,
\q1
\v 8 kɛ́pĩ́mmú yɛ kó bɛkpɑ̀ɑ̀tìbɛ̀ kɛ́ bɛ̀ boú mɛfĩmmɛ,
\q1 kɛ́tɑ́ú mbɛ kpɑ̀ɑ̀tìtũ̀mbɛ̀ timɑ́tì.
\q1
\v 9 Dí bɛ̀ bekɛ́nɛ̀ tì wɑ̃̀ri kɛ yɛ̃mmɛ̀,
\q1 bɛ̀ɛ̀ dɔ̀ɔ̀ri Kuyie ndɔ́mɛ̀ bɛ kó disɑ̃nni ndi mɛmmɛ.
\b
\q1 Nsɑ̃ntínɛ̀ ti Yiɛ̀ nKuyie!
\c 150
\s1 Nsɑ̃ntínɛ̀ Kuyie nnɛ̀ dɛbémbénnɛ̀
\q1
\v 1 Nsɑ̃ntínɛ̀ ti Yiɛ̀ nKuyie!
\b
\q1 Nsɑ̃ntínɛ̀ ti Yiɛ̀ nKuyie nku cɛ̃sɑ̀ɑ̀tɛ̀ miɛkɛ,
\q1 Nsɑ̃ntínɛ̀ ku kɛĩ́nkɛ̀ ku kpetì borɛ̀.
\q1
\v 2 Nsɑ̃ntínɛ̀ ku ku tɔ̃ndiɛmù kpɛ́í,
\q1 nsɑ̃ntínɛ̀ ku kɛ yɛ̃́ ku kpetì dɛumɛ̀ kɛ í mɔkɛ kumɑ̀nku.
\b
\q1
\v 3 Nsɑ̃ntínɛ̀ ku nɛ̀ yɛtɑ̃tɛhe,
\q1 nsɑ̃ntínɛ̀ ku nɛ̀ tibómbonti nɛ̀ tikùtìdùùtì.
\q1
\v 4 Nsɑ̃ntínɛ̀ ku kɛ bie nyɛbɑ̀rɛ̀ kɛ ɑu,
\q1 nsɑ̃ntínɛ̀ ku nɛ̀ tikùtìdùùtì nɛ̀ siheú.
\q1
\v 5 Nsɑ̃ntínɛ̀ ku nɛ̀ tikɑ̃penti tìì tɑmmɛ̀ kpeńnì,
\q1 nsɑ̃ntínɛ̀ ku nɛ̀ tikɑ̃penti tìì tɑmmɛ̀ yìɛ̀ mɛdiɛ̀.
\b
\q1
\v 6 Dɛ̀ɛ̀ kó dimɑ̀ɑ̀ weí dɛ̀ nsɑ̃ntí ti Yiɛ̀ nKuyie.
\q1 Nsɑ̃ntínɛ̀ ti Yiɛ̀ nKuyie!