\id PHP di51.all F{evrier 1999 BJ Parakou B{enin
\ide UTF-8
\h Fidipu
\toc1 Pɔɔri wɑ̃̀ri dìì pɑ́tíri Kirisi kɔbɛ bɛ̀ɛ̀ bo Fidipu
\toc2 Fidipu
\mt1 Pɔɔri wɑ̃̀ri dìì pɑ́tíri Kirisi kɔbɛ bɛ̀ɛ̀ bo Fidipu
\imt1 Di mpɑ́tíri tɔ tìì nɑ́ɑǹtì
\ip Bɛ̀ do kpetí Pɔɔri Odommu nwe kòo wɑ̃ri dɛ kó dipɑ́tíri, ò do yóó dì wɑ̃̀ri kɛ̀ bɛnìtìbɛ̀ mɑbɛ̀ bɛɛ̀ tɑnní kɛ tiè nyitié nyɛyi Kirisi kɔbɛ bɛ̀ɛ̀ bo Fidipu kɛ̀ bɛ yɛ̀mmɛ̀ɛ cɑɑ̀rɛ̀. Bɑ́ nɛ̀ mɛmmɛ kɛ̀ Pɔɔri mmɔkɛ diwɛ̀ì kɛ yɛ̃́ kɛ dò nnɛ̀ mɛtɑ̃́kùmɛ̀ ò mɔ̀kɛ mɛ̀ Yesu Kirisi ĩ́nkɛ̀, dɛ bo tũntɛ. Kòo bɛ̀ sɑ̃ntɛ bɛ̀ ò pɑ̃ dìì pɑ̃nnì kɛ bo ò teennɛ̀ dikpetíntou miɛkɛ, kɛ́ndɔ́ kɛ́yɑ́úkùnnɛ bɛ kɔ̃̀ntì kɛ̀ bɛ̀ nwetí Kirisi kɛ bɑ́ɑ́ yóu kɛ̀ itié nyɛyii ìì tɑní kɛ̀ ìì bɛ̀ soutɛ́. Ò do wɛ̃̀tɛ kɛ́ndɔ́ kɛ́yɑ́úkùnnɛ bɛ kɔ̃̀ntì nti kɛ̀ bɛ̀ɛ̀ wɑmmú bɛ̀ bo ntɑunɛ̀mɛ̀ bɛtɔbɛ̀ kɛ́mmɔkɛ mɛyɛ̀mmɛ̀ mɛmɑ́ɑ̀ Kirisi kó mutɔ̃mmú kpɛ́í.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Mudɔummu nɛ̀ ò bɑ́ntɛ̀mɛ̀ Kuyie mbɛ kpɛ́í. 1:1-11
\io1 2. Ò do bo mɛ̀ɛ̀ borimɛ miɛkɛ 1:12-26
\io1 3. Ò yɛ̃mmɛ̀ bɛ̀ ntɑunɛ̀ Kirisi 1:27-2:18
\io1 4. Epɑfɑdoosi nɛ̀ Timɔntee bɛ̀ɛ̀ do dɔɔri dɛ̀ɛ̀ wenni Pɔɔri nɛ̀ Fidipu ɛì kɔbɛ bɛ cuokɛ̀. 2:19-30
\io1 5. Pɔɔri do cɑummɛ̀ Fidipu kɔbɛ bɛdùɔ̀ntɔbɛ̀ kó mɛyɛi nkpɛ́í 3:1-4:9
\io1 6. Ò dèntɛnɛ̀ ti tú ò yɑ́úkùnnɛmɛ̀ bɛ kɔ̃̀ntì, kɛ bɛ̀ dɔunɛ̀ mutɔ̃mmú, nɛ̀ nɑ́kɛ mudɔummu cɛ̃́nkɛ 4:10-21
\c 1
\s1 Pɔɔri dɔummɛ̀ Fidipu kɔbɛ
\p
\v 1 Mí mPɔɔri nɛ̀ Timɔntee Yesu Kirisi kó bɛtɔ̃mbɛ̀, ti di dɔunko díndi Kirisi kɔbɛ bɛ̀ɛ̀ bo Fidipu nɛ̀ bɛ̀ɛ̀ ni Kirisi kɔbɛ tĩ̀rɛ̀ nɛ̀ bɛ kó bɛwedɔunkótíbɛ̀. 
\v 2 Ti cicɛ Kuyie nnɛ̀ ti Yiɛ̀ Yesu Kirisi bɛ̀ di dɔɔ̀ mɛsɑ̀ɑ̀ nkɛ́ di duɔ́ ndiwɛ̀ì.
\s1 Pɔɔri dɔ́mɛ̀ Kirisi kɔbɛ bɛ̀ɛ̀ bo Fidipu
\p
\v 3 M bɑɑ ɔ̃ nkɛ̀ n dèntɛní di kpɛ́í nni nsɑ̃ntímu Kuyie. 
\v 4 Nh ɔ̃ɔ̃ mbɑ́ɑ́mmu Kuyie ndi kpɛ́í nsɑ̃́ɑ̃̀ kɛ̀ dɛ̀ n nɑɑti, 
\v 5 di n teénnɛ̀mɛ̀ kɛ̀ ti pitírí Tinɑ́ɑǹsɑ̀ɑ̀tì nɛ̀ di yiemmɛ̀ Yesu nɛ̀ yíenní. 
\v 6 N yɛ̃́mu weti weti kɛ dò nKuyie nkùù ketɛ́ dɛ kó mutɔ̃mmú sɑ̀ɑ̀mù di miɛkɛ, kù bo mmù sɔkɛ́ kɛ́ mù dèè ti Yiɛ̀ nYesu Kirisi bo wɛ̃tɛnní dìì yiè. 
\v 7 N di dɔ́mu mɛsɑ̀ɑ̀ n yí di yĩɛ̃̀kù, kɛ yɛ̃́ ti wɛ̃ḿmɛ̀ Kuyie nkó mɛsɑ̀ɑ̀ dì mmɔ̀nnì m mɛ nkpetímɛ̀ nɛ̀ n yí kpetí dìì mɔ̀nnì nɛ̀ m mɑumɛ̀ kɛ bo fíí nTinɑ́ɑǹsɑ̀ɑ̀tì. 
\v 8 N di dɔ́mu kɛ̀ Kuyie nyɛ̃́, Yesu Kirisi weè n duɔ́ ndɛ kó mɛdɔ́kùmɛ̀.
\p
\v 9 M bɑ́ɑ́mmu Kuyie nkɛ tú kù di teennɛ̀ kɛ̀ di dɔkɛ ndɔ́ ditɔbɛ̀, kɛ́yĩ́ɛ̃́tɛ́ Kuyie nkɛ́bɑntɛ́ mɛsɑ̀ɑ̀ nkù dɔ́ dɛ̀, 
\v 10 kɛ́nɑ kɛ́mbɑɑ̀tì mɛsɑ̀ɑ̀ nnɛ̀ mɛyɛi kɛ́nwenni kɛ̀ dɛ̀ɛ yie nkɛ̀ Yesu wɛ̃tiní ò bɑ́ɑ́ yɑ̀ ò bo di sɛi ntìì ĩ́nkɛ̀. 
\v 11 Yesu Kirisi yóó di teennɛ̀mu kɛ̀ di dɔɔ̀rìmɛ̀ ńwenni kɛ̀ bɛ̀ nsɑ̃ntí Kuyie kɛ dɛ́úkùnko ku yètìrì.
\s1 Tínti Kirisi kɔbɛ ti fòù Kirisi kpɛ́í nkɛ
\p
\v 12 N kɔbɛ n dɔ́ di bɑntɛ́mu tìì n tùɔ̀kɛní tii temɛ̀ kɛ̀ Kuyie nnɑ́ɑǹtì nɛ́ dɔkɛ pitɛ́. 
\v 13 Tihɑ̃ɑ̃pɔ̀ntì tìì bɑ̀ɑ okpɑ̀ɑ̀tì diɛwè nɛ̀ bɛsɔmbɛ bɛmɔu bɛ̀ yɛ̃́mu bɛ n kpetínnɛ́mɛ̀ Kirisi kpɛ́í nkɛ. 
\v 14 Kɛ̀ Kirisi kɔbɛ kusṹkù yɑ̀ n kpetímɛ̀ kɛ̀ bɛ kɔ̃̀ntì yɑukɛ, kɛ̀ bɛ̀ nɑ̀ɑ́ nKuyie nnɑ́ɑǹtì nɛ̀ dikɔ̃m̀bùɔ̀.
\p
\v 15 Kɛ̀ bɛ̀mɑbɛ̀ tì nɑ̀ɑ́ nkɛ m betínɛ̀ kɛ nh ɛ̃ɛ̃̀nnɛ̀, kɛ̀ bɛtɔbɛ̀ ti nɑ̀ɑ́nnɛ̀ mɛyɛ̀mmɛ̀ mɛ̀ɛ̀ wenni, 
\v 16 bɛ̀ n dɔ́ mɛ̀ɛ̀ kpɛ́í, kɛ yɛ̃́ kɛ dò nKuyie nni nduɔ́ ndɛ kó mutɔ̃mmú kɛ̀ m bo mɑ ku nɑ́ɑǹtì kpɛ́í. 
\v 17 Bɛ̀ɛ̀ nh ɛ̃ɛ̃̀nnɛ̀ bɛ̀ í nɑ́ɑ́ nKirisi kpɛti nɛ̀ mɛyɛ̀mmɛ̀ mɛmɑ́ɑ̀, bɛ̀ dɔ́ kɛ́ n yíɛ́ mɛyɛǹcɑɑ̀rìmɛ̀ mmɛ dikpetíntou miɛkɛ.
\p
\v 18 Kɛ̀ bɛ yɛ̀mmɛ̀ wenni yoo mɛ̀ í wenni, bɛ̀ cɛ̃́nkɛ mɛ nnɑ̀kɛ́mɛ̀ Kirisi kpɛti, dɛ̀ n nɑɑtimu kɛ yó nni nɑɑti sɑ̃́ɑ̃̀. 
\v 19 Kɛ yɛ̃́ n yɛ̃́mu kɛ dò ndi bɑ́ɑ́ Kuyie n kpɛ́í, kɛ̀ Muyɑɑ́nsɑ̀ɑ̀mù n teénnɛ̀, dɛmɔu dɛ̀ tú n kó mɛdɛɛtímɛ̀ mmɛ. 
\v 20 M bɑ́ɑ́mmu Kirisi nɛ̀ n yɛ̀mmɛ̀ mɛmɔu, ifɛi í we nni mbonɛ̀. Bɑ́ kɛ̀ n fɛ̃́ũ̀rì, n yó nnɑ́ɑ́mmu o kpɛ́í nnɛ̀ tikɔ̃nyɑuti, kɛ́ndònnɛ̀ n tì nɑ̀kɛ́mɛ̀. Kɛ̀ m bo kú yoo m bo nfòù, n dɔ́ kɛ́ndɛ́úkùnko o yètìrì ndi. 
\v 21 Kɛ̀ n fòù n dò nkɛ́mpĩ́ Kirisi kó mutɔ̃mmú mmu, kɛ̀ m mɛ nku n dɔkɛ cɔ̃ntɛmu. 
\v 22 Kɛ̀ m mɛ nfòù n yó nnɑ́ɑ́mmu bɛnìtìbɛ̀ Kirisi kpɛti, dɛɛ̀ te kɛ̀ n yí bɑntɛ́ mufòmmu nɛ̀ mukṹṹ n dò nkɛ́tɑ̃ɑ̃tɛ́ dɛ̀. 
\v 23 N yɛ̀mmɛ̀ mɛɛ̀ sũ. Mɔ̀nnì mɑrì dɛ̀ ɔ̃ ndò nni nfòù, ditɛrì kɛ́ndò n kú kɛ́kɔtɛ Kirisi borɛ̀, n dɔkɛ mɛ ndɔ́. 
\v 24 Dɛ̀ nɛ́ békú kɛ dò nni nkpɑɑ́ fòùmu kɛ di teénnɛ̀. 
\v 25 Dɛɛ̀ kpɛ́í nte kɛ̀ n yɛ̃́ kɛ dò n yó nkpɑɑ́ fòù kɛ́ ndi teénnɛ̀, kɛ̀ di kpenkɛ Kuyie nkó kucɛ miɛkɛ, kɛ́mɔɔtɛ diwɛ̀ì. 
\v 26 Kɛ̀ dɛ̀ɛ yie nkɛ̀ n wɛ̃̀too dìì yiè kɛ̀ di n yɑ̀, di sɑ̃ntɛ Yesu Kirisi mɛdiɛ̀ ndi fòmmu miɛkɛ.
\p
\v 27 Bɑ́ kɛ̀ dɛ̀ dòmmɛ̀, ntũnnɛ Kuyie nnɑ́ɑǹtì yɛ̃mmɛ̀, kɛ̀ n nɑ kɛ kɔ̀too yoo n yí nɑ, nni nyo di wɛ̃ḿmɛ̀ mɛyɛ̀mmɛ̀ mɛmɑ́ɑ̀ kɛ pitírí Kuyie nnɑ́ɑǹtì, kɛ fííkú mɛtɑ̃́kùmɛ̀ miɛkɛ. 
\v 28 Di bɑ́ nyĩɛ̃̀kù di kpɑntídɛ̀ntɔbɛ̀ bɛ̀ɛ̀ í dɔ́ Kuyie nnɑ́ɑǹtì, dɛɛ̀ bɛnkú bɛ̀ fetimɛ̀, kɛ̀ di kó tikɔ̃nyɑuti bɛnkú di cootɛ́mɛ̀. 
\v 29 Kuyie nyí di dɔ̀ɔ̀ mɛsɑ̀ɑ̀ nkɛ̀ di bo yie nYesu mɑ́ɑ̀, kù dɔ́ di fɛ̃́ṹtɛ́mu múnkɛ. 
\v 30 Mí nnɛ̀ díndi ti wɛ̃ nkɛ mɑùmu, di sòò yɑ̀mu m mɑùmɛ̀, kɛ kpɑɑ́ mɑù nɛ̀ yíenní.
\c 2
\s1 Yesu kɛ̃́kùnnɛmɛ̀ omɑ́ɑ̀
\p
\v 1 Di yie nKirisi kɛ̀ dɛ̀ di kpénkùnko o kó kucɛ miɛkɑɑ̀? Ò di dɔ́ kɛ̀ dɛ̀ yɑ̀úkùnko di kɔ̃̀ntɑ̀ɑ̀? Muyɑɑ́nsɑ̀ɑ̀mù di bonɑ̀ɑ̀? Di dɔ́ ditɔbɛ̀ mɛsɑ̀ɑ̀ nkɛ kuɔ̀ nditɔbɛ̀ mɛsémmɑ̀ɑ̀? 
\v 2 Kɛ̀ dɛndɛ kó dimɑ̀ɑ̀ bo, di nwɛ̃ ndinùù, kɛ wɛ̃ mmɛdɔ́kùmɛ̀, kɛ wɛ̃ mmɛyɛ̀mmɛ̀ mɛmɑ́ɑ̀, kɛ pĩ́ mmutɔ̃mmú kɛ̀ dɛ̀ n nɑɑti. 
\v 3 Di bɑ́ ndɔɔri dɛ̀mɑrɛ̀ kɛ ɛ̃ɛ̃̀nnɛ̀ ditɔbɛ̀, yoo di ndɛ̀ dɔ̀ɔ̀ri kɛ dɔ́ disɑ̃nni dɛtetìrɛ̀ kpɛri. Di nkɛ̃́kùnko dimɑ́ɑ̀ di dɔɔ̀rìmɛ̀ miɛkɛ, kɛ níí nwúó nditɔbɛ̀ kɛ̀ dò mbɛɛ̀ di dɛunɛ̀. 
\v 4 Òmɔù bɑ́ nwɑnti ò kó mɛsɑ̀ɑ̀ mmɑ́ɑ̀, múnkɛ nwɑɑ̀nnɛ̀ bɛtɔbɛ̀ kɔ̃mɛ. 
\v 5 Ntũnnɛ̀ Yesu Kirisi kó mɛborimɛ.
\q1
\v 6 Ò do tú Kuyie nku,
\q1 ò mɛ nyí ndɔ́ kɛ́ kù ɛ̀nnɛnɛ̀ omɑ́ɑ̀,
\q1
\v 7 kɛ́yóu o wɛ̃rímú kɛ́nɑɑ́ nhonìtì,
\q1 kɛ́dɔɔ̀ omɑ́ɑ̀ otɔ̃ntì,
\q1
\v 8 kɛ́kɛ̃́kùnnɛ omɑ́ɑ̀,
\q1 kɛ́nyíé nKuyie nkpɛti
\q1 kɛ̀ bɛ̀ yɑ̀ɑ ò bɑɑkɛ́nɛ̀ kudɑpɑ̃ɑ̃tí
\q1 onitikɔ̀ùtì kɔ̃mɛ kòo kú.
\q1
\v 9 Kɛ̀ dɛɛ̀ nte kɛ̀ Kuyie nhò dɛ̀úkùnnɛ,
\q1 kóo duɔ́ ndiyetidiɛrì
\q1 dìì pɛ̃ɛ̃tɛ́ yɛsɔnyɛ.
\q1
\v 10 Kɛ̀ kɛĩ́nkɛ̀ kɔbɛ nɛ̀ kɛtenkɛ̀
\q1 nɛ̀ kɛtenkɛ̀ miɛkɛ kɔbɛ
\q1 kɛ̀ bɛ̀ bo nínkú o ììkɛ̀.
\q1
\v 11 Bɑ́ wè kòo bɛ́i nnɛ̀ o nùù,
\q1 kɛ dɔ̀ Yesu Kirisi tú o Yiɛ̀!
\q1 Kɛ̀ ti cicɛ Kuyie nyètìrìi dɛukɛ.
\s1 Kirisi kɔbɛ bo mmimmɛ̀ kutenkù miɛkɛ
\p
\v 12 N kɔbɛ nh ɔ̃ mbo di borɛ̀ kɛ̀ di yíémmu n kpɛti, nyíénnɛ̀ ti bɑ́ kɛ̀ n yí bo, dɛɛ̀ dɔ̀kɛ wenni. Kuyie ndi dɛɛtɛ́mu, mpĩ́nnɛ̀ ku tɔ̃mmú kɛ kù dé mɛdiɛ̀. 
\v 13 Kuyie nkuù ɔ̃ɔ̃ di duɔ́ mmɛyɛ̀mmɛ̀, kɛ̀ di ndɔ́ kɛ́dɔɔ̀ kù dɔ́mɛ̀, kɛ di duɔ́ mmuwɛ̃rímú kɛ̀ di nɑ kɛ́ mɛ̀ dɔ̀ɔ̀.
\p
\v 14 Di níí bɑ́ ndɔɔri dɛ̀mɑrɛ̀ kɛ̀ di yɛ̀mmɛ̀ í bo kɛ̀ di kpɑ. 
\v 15 Di ńwenni pɑ́íí kɛ̀ bɛ̀ bɑ́ɑ́ yɑ̀ di cɑɑ̀rìmɛ̀, Kuyie nkó ibí dò nkɛ́nwennimu pɑ́íí bɛnitiyɛibɛ bɛ̀ɛ̀ dɔ̀ɔ̀ri dɛ̀ɛ̀ í wenni bɛ cuokɛ̀, kɛ́mmí fìtírɛ̀ kɔ̃mɛ, 
\v 16 kɛ̀ bɛ̀ nɑ́ɑ́ mmufòmmu kó tinɑ́ɑǹtì. Kɛ̀ di dɔɔri mɛmmɛ, n yɛ̀mmɛ̀ bo ndi nɑɑtinɛ̀, kɛ̀ Kirisi wɛ̃tɛní dìì yiè, dɛ̀ɛ bɛnkɛ n tɔ̃mmú nɛ̀ n wɛ̃́ɛ̃̀rìmɛ̀ dɛ̀ í yɛ̀mɛ̀ dɛtetìrɛ̀.
\p
\v 17 Di tɑ̃́mɛ̀ Kuyie ndɛɛ̀ dò ndipɑ̃nnì di kù pɑ̃ dì. Kɛ̀ n ku kɛ kpɑ̃ɑ̃ dɛ kó dipɑ̃nnì, dɛ̀ nni nnɑɑti. Dɛ̀ n nɑɑtimu kɛ̀ diwɛ̀ì m bo nɛ̀ díndi. 
\v 18 Díndi múnkɛ, nyɑ̃nkunɛ̀ kɛ̀ ti nwɛ̃ nkɛ yɑ̃nku.
\s1 Pɔɔri tɔ̃mmɛ̀ Timɔntee nɛ̀ Epɑfoditi Fidipu kó dihɛì
\p
\v 19 Kɛ̀ Kuyie ndɔ́ m bo tɔ̃nko Timɔntee bɑ̀mbɑ̀ nkɛ́keè di bo kɛ̀ dɛ̀ dòmmɛ̀, kɛ̀ dɛ̀ɛ yɑ́úkùnnɛ n kɔ̃̀ntì. 
\v 20 Otɔù mɔù í bo nɛ̀ wè ti wɛ̃ nkɛ dɑkɛ di kpɛ́í. 
\v 21 Bɛtɔbɛ̀ biɛ dɑkɛnɛ̀ bɛ kpɛrɛ wɑmmù mmu, bɛ̀ í dɑkɛ Kirisi kɔbɛ kpɛ́í. 
\v 22 Di yɛ̃́mu Timɔntee duɔ́mmɛ̀ omɑ́ɑ̀ kɛ n teénnɛ̀ kɛ̀ ti nɑ́ɑ́ nTinɑ́ɑǹsɑ̀ɑ̀tì, kɛ dò nhonìtì nɛ̀ o birɛ. 
\v 23 Kɛ̀ m bɑntɛ́ dìì mɔ̀nnì dɛ̀ yó nni ndòmmɛ̀ m bo ò tɔ̃nko. 
\v 24 N yɛ̃́mu weti weti kɛ dò nti Yiɛ̀ mbo n teennɛ̀ kɛ̀ n kɔtoo m mɔ́mmuɔ nkɛ́ di yɑ̀.
\p
\v 25 N yɛ̀mmɛ̀ dò m bo wɛ̃tɛ kɛ́ di duɔ́nko Epɑfoditi, di sòò m pɑ̃ dipɑ̃nnì kɛ́duɔnní wè, kɛ dɔ̀ wè n teennɛ̀ mutɔ̃mmú kɛ̀ ti wɛ̃nnɛ́ kɛ mù pĩ nkɛ fɛ̃̀ṹtɛ́. 
\v 26 Ò kèè di kèèmɛ̀ mmɛ ò muɔkɛmɛ̀ kòo yɛ̀mmɛ̀ cɑ̀ɑ̀rɛ̀, kòò dɔ́ kɛ́ di yɑ̀. 
\v 27 Ò mɛ̀nkɛ sòò muɔkɛmu, kɛ́kɑ́ɑ́tɛ́ mukṹṹ, kɛ Kuyie nhò kuɔ́ mmɛsémmɛ̀ nɛ̀ mí m múnkɛ, koò miɛkùnnɛ, n yɛ̀mmɛ̀ dɔ̀kɛ bɑ́ɑ́ cɑɑ̀rɛ̀ mɛ̀ɛ̀ kpɛ́í. 
\v 28 Dɛɛ̀ te kɛ̀ n dɔ́ koò tɛ̃̀ńnɔ́ɔ mɛcɑ̃ɑ̃, nkɛ̀ di ò yɑ̀ kɛ̀ di yɛ̀mmɛ̀ɛ nɑrikɛ, kɛ̀ n kɔ̃mɛ múnkɛɛ nɑrikɛ. 
\v 29 Cɔutɛ́nɛ̀ we nɛ̀ diwɛ̀ì ti Yiɛ̀ nkó mɛwɛ̃nnímɛ̀ miɛkɛ, ndénɛ̀ dɛ kó bɛnìtìbɛ̀ botí. 
\v 30 Ò duɔ́ nhomɑ́ɑ̀ ndi Kirisi tɔ̃mmú kpɛ́í, nkɛ kɑ̀ɑ́tɛ́ mukṹṹ kɛ n teennɛ̀ díndi bɛ̀ɛ̀ dɛ́tirì di do í yóó nɑ kɛ́ n teennɛ̀ mɛ̀ɛ̀ botí.
\c 3
\s1 Pɔɔri yóumɛ̀ dɛmɔu Kirisi kpɛ́í
\p
\v 1 Tisɔnti tú tì, ńyɑ̃nkunɛ̀ ti Yiɛ̀ nkó kucɛ miɛkɛ, n do tì wɑ̃̀rimu kɛ wɛ̃̀tɛ kɛ tì yíɛ́, dɛ̀ wennimu di kpɛ́í. 
\v 2 Ndɑkɛnɛ̀ sinitimɔɔ́ kpɛ́í, bɛtɔ̃mbɛ̀ yɛibɛ, bɛ̀ɛ̀ tú bɛ̀ cɑ̃mmú, dɛ kó mucɑ̃mmù nɛ́ í tú mùmɑmù. 
\v 3 Tínti bɛ̀ɛ̀ bɑ́ɑ́ nKuyie nnɛ̀ Muyɑɑ́nsɑ̀ɑ̀mù mmiɛkɛ, kɛ í tũ mbɛnìtìbɛ̀ kó ikuɔ́, tíì tu bɛ̀ɛ̀ cɑ̃mmù mucɑ̃mmù mɔ́mmɔmmu. 
\v 4 Kòò mɔù yɛ̀mmɛ̀ dò nhò bo cootɛ́ ò tũ mmɛ̀ɛ̀ kpɛ́í nyikuɔ́, n yɛ̃́mu ikuɔ́ koò pɛ̃ɛ̃tɛ́. 
\v 5 Bɛ̀ m pɛitɛ́ kɛ̀ nni mmɔkɛ yɛwe yɛ̀ni ndi kɛ̀ bɛ̀ n cɑ̃ntɛ́, n tú Isidɑyɛɛri mɔ́mmuɔ nwe, Bɛnsɑmɛɛ kó kufuku kou, Ebedee mɔ́mmuɔ nkɛ tú Fɑɑdisĩɛ̃ ikuɔ́ yiɛ̀ mmɔ́mmuɔ. 
\v 6 Kɛ̀ n kɔ̃̀ntì ńyɑu kɛ̀ n fɛ̃́ũnko Kirisi kɔbɛ, kɛ yetíróo kɛ bo ntũ nyikuɔ́ imɔu. 
\v 7 Dɛ̀ɛ̀ do tú n kó disɑ̃nni n dɛ̀ ǹwéntɛ́ di mmɔ̀nnì dɛtetìrɛ̀ Kirisi kpɛ́í. 
\v 8 Dɛ̀ í tú dɛ̀ɛ̀ do tú n kó disɑ̃nni mɑ́ɑ̀ nɛ̀ dɛ̀ɛ̀ do tú n kó mucɔ̃́ntimu, n dɛ̀ yetɛmu n yĩ̀ɛ̃́tɛ́ mɛ̀ɛ̀ kpɛ́í nYesu Kirisi wenwe wèè pɛ̃ɛ̃tɛ́ dɛmɔu. Weè te kɛ̀ n dɛ̀ wúó nkɛ̀ dɛ̀ dò ntiyontì kɛ̀ dɛ̀ bo yie nkɛ̀ nní mmɔkɛ Kirisi. 
\v 9 Nh ò mɔ̀ɔ̀tɛ dɛ̀ í tú Kuyie nyɛ̃ n wetí n tũ mmɛ̀ɛ̀ kpɛ́í nyikuɔ́, n tɑ̃́ Yesu nwe kɛ̀ kù yɛ̃ n wetí, kɛ yɛ̃́ Kuyie nhɔ̃ɔ̃ yĩ́mɛ̀ onìtì wetí ò tɑ̃́ dìì mɔ̀nnì ndi Yesu. 
\v 10 N dɔ́ tì di mmɔ̀nnì tu m bo yĩ́ɛ̃́tɛ́ Kirisi mɑ́ɑ̀, kɛ́pɛ́tɛ́ muwɛ̃rímú diɛmù mùù te kòò yɑ̃̀ńtɛ́, kɛ fɛ̃́ṹtɛ́ o kpɛ́í nkɛ́kú o kpɛ́í. 
\v 11 Kɛ̀ dɛ̀ bo yie nní ntú bɛ̀ɛ̀ yóó yɑ̃́ntɛ́ bɛ kóò mɔù.
\s1 Ti bo ncokùmɛ̀ kɛ dɔ́ kumɑ̀nku
\p
\v 12 Dɛ̀ í tú n yɛ̃ n nìntɛ m bɛtì dɛ̀ yoo n wenkɛ pɑ́íí, n kpɑɑ́ cokùmu kɛ yetíróo kɛ bo nintɛ Kirisi ò n nìntɛ mɛ̀ɛ̀ botí. 
\v 13 N kɔbɛ m mu nyí tùɔ̀kɛ kumɑ̀nku, n dɔɔri dɛ̀mɑrɛ̀ mɑ́ɑ̀ ndi, n yĩɛ̃̀ ndifɔ̃nkúò kpɛrɛ ndɛ, kɛ bɛtì dɛ̀ɛ̀ bo n yììkɛ̀. 
\v 14 N cokùmu kɛ dɔ́ dɛyììkɛ̀, kɛ bo nintɛ ticuuti Kuyie nti yu kɛ bo ti duɔ́ ntì kɛĩ́nkɛ̀, nɛ̀ Yesu Kirisi kpɛ́í.
\p
\v 15 Tínti bɛ̀ɛ̀ kpenkɛ Kuyie nkó kucɛ miɛkɛ, ti dò nkɛ́mmɔkɛ mɛɛ̀ yɛ̀mmɛ̀, kòò mɔù kɔ̃mɛ kpɑɑ́ cɑ̃́ɑ̃́, Kuyie mbo ò teennɛ̀ kòo bɑntɛ́. 
\v 16 Ti yĩ̀ɛ̃́tɛ́ tì, yóunɛ̀ kɛ̀ ti ntì pĩ nkɛ wɛ̃ nkɛ kérí kucɛ kumɑ́ɑ̀.
\p
\v 17 Ntũnnɛ n kó mɛborimɛ, kɛ múnkɛ ntũ mbɛtɔbɛ̀ bɛ̀ɛ̀ kɔ̃mɛ dònnɛ̀ ti kɔ̃mɛ. 
\v 18 N tì ndi nɑ̀kɛ́mu kɛ wɛ̃̀tɛ kɛ tì ndi nɑ́ɑ́ nnɛ̀ tinɔnniɛti, bɛsṹkùbɛ̀ tú bɛmɑ́ɑ̀ Kirisi kɔbɛ, kɛ̀ bɛ dɔɔ̀rìmɛ̀ nɛ́ bɛnkú bɛ̀ senkɛ̀rìmɛ̀ ò kúmɛ̀ kudɑpɑ̃ɑ̃tí. 
\v 19 Bɛ kó kumɑ̀nku tú bɛ̀ bo fetimɛ̀ sɑ̃́ɑ̃̀, kɛ̀ bɛ pitɛ tú bɛ kó Kuyie, kɛ̀ dɛ̀ bɛ̀ nɑɑtinɛ̀ ifɛi do dò nkɛ́ mbɛ̀ bonɛ̀ dɛ̀, kɛ̀ bɛ̀ dɔ́ kutenkù kpɛrɛ mɑ́ɑ̀. 
\v 20 Tínti tú kɛĩ́nkɛ̀ kɔbɛ mbɛ, kɛ bɑɑ ti Yiɛ̀ nYesu Kirisi bo wɛ̃tɛnnímɛ̀, 
\v 21 kɛ́ceetɛ ti kó tikɔ̃ncĩ̀tì kɛ̀ tìi nɑɑ́nnɛ̀ o kpɛti kɛ́kpenkɛ kɛ́wenkɛ, ò yóó nɑmu kɛ́ dɛ̀ dɔ̀ɔ̀ kɛ yɛ̃́ ò mɔ̀kɛmɛ̀ muwɛ̃rímú kɛ bɑkɛ́ dɛnɛnnɛ̀ dɛmɔu.
\c 4
\s1 Pɔɔri tiémmɛ̀ Fidipu kɔbɛ
\p
\v 1 Díndi n kɔbɛ n di dɔ́mu mɛdiɛ̀, n dɔ́ kɛ́wɛ̃tɛ kɛ́ di yɑ̀mu, díì tu n kó diwɛ̀ì nɛ̀ n kó mucɔ̃́ntimu, di ntɑunɛ̀ ti Yiɛ̀ ntei tei.
\p
\v 2 M bɑ́ɑ́mmu Efodii nɛ̀ Sɛ̃ntisi kɛ tú bɛ̀ ńwɛ̃ mmɛyɛ̀mmɛ̀ Kuyie nkó kucɛ miɛkɛ. 
\v 3 Fɔ̃́ n nɛ́po Sisii nɛ̀ wè ti wɛ̃ mmutɔ̃mmú, ɑ nteénnɛ̀ dɛ kó bɛnitipòbɛ̀, bɛ̀ n wɛ̃nnɛ́nɛ̀mu kɛ̀ ti nɑ̀kɛ́ Tinɑ́ɑǹsɑ̀ɑ̀tì kɛ fɛ̃̀ṹtɛ́. Kɛ múnkɛ wɛ̃nnɛ́nɛ̀ Kedemɑɑ mutɔ̃mmú nɛ̀ bɛtɔbɛ̀ bɛ̀ɛ̀ kó yɛyètɛ̀ wɑ̃̀ri mufòmmu pɑ́tíri miɛkɛ.
\p
\v 4 Nyɑ̃nkunɛ̀ sɑ̃́ɑ̃̀ ti Yiɛ̀ nkó kucɛ miɛkɛ, n yíɛ́ kɛ tì bɛ́immu, ńyɑ̃nkunɛ̀.
\p
\v 5 Yóunɛ̀ kɛ̀ bɛnìtìbɛ̀ bɛmɔuu yɑ̀ di nitìmɛ̀, ti Yiɛ̀ nduúnnímu. 
\v 6 Di bɑ́ nyĩɛ̃̀kù, kɛ̀ di dɔ́ dɛ̀, mɔɔnɛ̀ Kuyie nkɛ́ nkù sɑ̃ntí. 
\v 7 Kɛ̀ di dɔɔri mɛmmɛ Kuyie mbo di duɔ́ nku kó diwɛ̀ì nɛ̀ Yesu Kirisi di kó mɛwɛ̃nnímɛ̀ miɛkɛ, dìì dɛu, kɛ í dò nkɛ́nɑ kɛ́yɑ̀ dì mɑ̀mɛ̀.
\p
\v 8 N kɔbɛ n nɑ́ɑ́nnɛ̀ timɔ́mmɔnti, kɛ́ndɔɔri dɛ̀ɛ̀ wenni, kɛ́ndɔɔri Kuyie ndɔ́ dɛ̀, kɛ́ndɔɔri dɛ̀ɛ̀ sɑ̀, dɛ̀ɛ̀ dò nkɛ́ndɔ́, dɛ̀ɛ̀ mɑ̀nnɛ̀ disɑ̃nni. 
\v 9 Ndɔɔrinɛ̀ di kèè tì m borɛ̀, kɛ́ntũ n kó mɛdɔɔ̀rìmɛ̀, Kuyie nkùù duɔ́ ndiwɛ̀ì kù yó ndi bonɛ̀mu.
\s1 Pɔɔri dɔummɛ̀ Fidipu kɔbɛ nɛ̀ mutɔ̃mmú
\p
\v 10 Dɛ̀ n nɑrikɛ mɛdiɛ̀ kɛ̀ n sɑ̃ntí ti Yiɛ̀ ndi wɛ̃̀tɛ kɛ n teémmɛ̀, n yɛ̃́mu kɛ dò ndi ɔ̃ ndɔ́ kɛ́ n teénnɛ̀ di nɛ́ mu nyí mpɛ̀tɛ́ kucɛ. 
\v 11 Dɛ̀ í tú n kpɑ mɛ̀ɛ̀ kpɛ́í nte kɛ̀ n nɑ̀ɑ́ mɛmmɛ, kɛ̀ m mɔ̀kɛ yoo n kpɑ, dɛ̀ ɔ̃ nni nnɑɑtimu. 
\v 12 M mɑntɛ́nɛ̀mu m bo mmɔkɛmɛ̀ nɛ̀ m bo nkpɑmɛ̀, kɛ̀ n di kɛ sɑnnɛ̀ yoo nh ɑutɛ́, kɛ̀ m mɔ̀kɛ kɛ̀ dɛ̀ sũ yoo dɛ̀ n dòńtɛ́, dɛ̀ n nɑɑtimu. 
\v 13 Kirisi weè n duɔ́ muwɛ̃rímú kɛ̀ n dɛ̀ nɔ ndɛmɔu. 
\v 14 Dɛ̀ nɛ́ wennimu di n teémmɛ̀ nh ɑ́ɑ̀rìmɛ̀ miɛkɛ.
\p
\v 15 Díndi Fidipu kɔbɛ, di yɛ̃́mu kɛ dò n di nɑ̀kɛ́ dìì mɔ̀nnì Tinɑ́ɑǹsɑ̀ɑ̀tì mɛketimɛ̀, kɛ́nyɛtì Mɑseduɔnni kó kɛtenkɛ̀ díì mɑ́ɑ̀ kó ditĩ̀nnì do n teennɛ̀. 
\v 16 Kɛ̀ nní mbo Tɛsɑdoniki kɛ̀ di n teennɛ̀ kucɛ mɛ̀dɛ́mɛ̀. 
\v 17 Dɛ̀ í tú dɛ̀ n nɑɑti yɛpɑ̃rɛ̀ mɑ́ɑ̀ kpɛ́í, dɛ̀ɛ̀ n nɑɑti dɛɛ̀ tu di bo pɛ́tɛ́mɛ̀ mucɔ̃́ntimu. 
\v 18 N yɑ̀mu di m pɑ̃ dɛ̀ kɛ duɔnní Epɑfoditi, di mmɔ̀nnì kɛ̀ m mɔ̀kɛ pɛ́u. Di pɑ̃rɛ̀ dònnɛ̀ tudɑ̀ɑ̀rí nwe wèè fɔ̃ɔ̃ku nɑɑti kɛ̀ Kuyie nyɛ̀ cɔutɛ́. 
\v 19 Kuyie nkùù n te ku kpɑ̀tì í sénní, kù yó ndi duɔ̀mmu dɛ̀ di békú dɛ̀ nɛ̀ Yesu Kirisi di kó mɛtɑummɛ̀ miɛkɛ. 
\v 20 Ti cicɛ Kuyie nyètìrì ndɛu sɑ̃́ɑ̃̀. Kɛ̀ dɛ̀ mmɛ̀ ndò.
\s1 Mucɑummu
\p
\v 21 Dɔunnɛ̀ Yesu Kirisi kɔbɛ bɛmɔu bɛ̀ɛ̀ bo di ciɛ, kɛ dɔ̀ bɛ̀ɛ̀ bo diɛ mbɛ̀ bɛ̀ dɔunko. 
\v 22 Kòo kpɑ̀ɑ̀tì diɛwè Sesɑɑ cĩ́ɛ̃̀tɛ̀ kɔbɛ múnkɛ di dɔunko.
\p
\v 23 Ti Yiɛ̀ nYesu Kirisi kó mɛsɑ̀ɑ̀ nni ndi bonɛ̀.