\id NUM di04.all Octobre 1998 BJ Parakou B{enin
\ide UTF-8
\h Mukétímù
\toc1 Mukétímù
\toc2 MUKÉTÍMÙ
\mt1 Mukétímù
\imt1 Di mpɑ́tíri tɔ tìì nɑ́ɑǹtì
\ip Mukétímù kó dipɑ́tíri ti nɑ́ɑ́ mMɔyiisi do bɛ̀ duɔ́ nKuyie nkuɔ́ Sinɑii tɑ̃rì kɛ́deè kɛ̀ bɛ̀ɛ bɑ́ɑ́tímɛ̀ mmɛ kɛ́kétɛ́ kɛ bo tɑ Kuyie mbɛ̀ duɔ́ ndìì ɛì. Bɛ̀ dɛ nkètɛ́ kɛ́tuɔkɛ Kɑdɛɛsi Bɑdinnɛɑ tenkɛ̀ kɛ̀ dɛ̀ nkpɑɑ́ bɛ̀ bo tɑmɛ̀ dihɛì mɑ́ɑ̀, kɛ̀ bɛ̀ nɛ́ depɛ bɛ̀ bo tɑmɛ̀ dɛ kó dihɛì. Kɛ̀ Kuyie nyṹɔ̃́ mbɛ to, kɛ̀ bɛ̀ɛ fitɛ́ kɛ dɔ̀ yɛbie nsipísìnɑ̀ɑ̀ dikpɑ́ɑ̀ miɛkɛ, kɛ̀ dɛ̀ mboní kɛ̀ bɛ̀ bɑɑ tuɔkɛ Mɔɑbu tenkɛ̀ mukɔ́kúɔ́ nkóò dɑ̀mɛ́ɛ̀rì bɑkù yoú. Isidɑyɛɛribɛ do dò nkɛ́ dɛ nyítɛ́ kɛ́tɑ Kuyie mbɛ̀ duɔ́ nkɛ̀ɛ̀ tenkɛ̀ Kɑnnɑhɑ̃ɑ̃.
\ip Dɛ kó dipɑ́tíri sɔɔtɛ́ Mudennimù kó dipɑ́tíri nɛ̀ ikuɔ́ nìùbɛ̀ pɑ́tíri yɛ kó tinɑ́ɑǹtì nti, kɛ bɛnkú Kuyie nkó bɛnìtìbɛ̀ do cĩĩnnìmɛ̀, kɛ̀ bɛ tɑ̃́kùmɛ̀ níí bonkɛ di nyiè kɛ́wɛ̃tɛ kɛ́tonkɛ̀ ditɛrì. Nɛ̀ mɛmmɛ kɛ̀ Kuyie nkuu mɛ mpĩ nku nùù kù bɛ̀ dɔ́unnɛ̀ dì kɛ dɔ́ kɛ́ dì dɔ̀ɔ̀. Kɛ̀ Mɔyiisi ncómmú bɛnìtìbɛ̀ cuokɛ̀ kɛ nɑ́ɑ́ mbɛnìtìbɛ̀ Kuyie nhò nɑ̀kɛ́ tì, kɛ kù bɑ̀ɑ́ mbɛnìtìbɛ̀ kpɛ́í.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Bɛ̀ do kérímɛ̀ ditɑ̃rì Sinɑii kó dikpɑ́ɑ̀ miɛkɛ 1:1-10:10
\io1 2. Bɛ̀ ìtɛ́mɛ̀ Sinɑii kɛ tɑ Mɔɑbu biriku 10:11-21:35
\io1 3. Bɛ̀ bomɛ̀ Mɔɑbu tenkɛ̀:
\io2 Bɑdɑki do yɛ̃mmɛ̀ Bɑdɑmmuu bɔntɛ́ Isidɑyɛɛribɛ kusĩ̀nkù 22-24
\io2 Bɛ̀ yetɛ́nɛ̀mɛ̀ Kuyie, mucèmmu sɔɔtɛ́mɛ̀ nɛ̀ ikuɔ́ mɑì dɛ kó tinɑ́ɑǹtì 25-36
\c 1
\ms1 ISIDAYƐƐRIBƐ DO KÉRÍMƐ̀ DITÃRÌ SINNAII KÓ DIKPÁÀ
\s1 Bɛ̀ kɑ̀ɑmmɛ̀ Isidɑyɛɛribɛ mɛketimɛ̀
\p
\v 1 Isidɑyɛɛribɛ yɛ̀ Esibiti kɛ̀ dɛ̀ mmɔkɛ dibenni ndi. Dibenni dɛ́rì kóo tɑ̃̀nkù odɛ́rì kó diyiè ketirì, kɛ̀ ti Yiɛ̀ nKuyie mbɛ́innɛ̀ Mɔyiisi Sinɑii kó dikpɑ́ɑ̀ ku tɑummɛ̀ tou miɛkɛ kɛ dɔ̀: 
\v 2 Kɑɑnnɛ̀ Isidɑyɛɛribɛ kɛ́ntũ mbɛ nɑɑ̀mùntì tũmmɛ̀ titɔbɛ̀ nɛ̀ bɛ cɛ̃́ĩ tũ ntũmmɛ̀ sitɔbɛ̀, di kɑɑ mbɛ̀ɛ̀ kó dimɑ̀ɑ̀ tu bɛnitidɑɑbɛ̀ kɛ́wɑ̃ri bɑ́ wè o yètìrì. 
\v 3 Mɔyiisi fɔ̃́ nnɛ̀ Anɔɔ di kɑɑ nyIsidɑyɛɛribɛ bɛ̀ɛ̀ mɔ̀kɛ yɛbie nsipísìdɛ́ kɛ́ntɔ kɛ deètìnko bɛ̀ɛ̀ bo nɑ kɛ́kɔtɛ mudoò bɛ tĩ̀rɛ̀ dòmmɛ̀. 
\v 4 Bɑ́ kùù nɑɑ̀mùnkù bɛ cɛ̃́ĩ miɛkɛ dí dɛitɛ okótì òmɑ́ɑ̀ òmɑ́ɑ̀ kɛ̀ bɛ̀ ndi nɛínɛ̀. 
\v 5 Ntɛ bɛ̀ɛ̀ yóó di nɛinɛ̀ bɛ yètɛ̀:
\m Dubɛnni kó kunɑɑ̀mùnkù miɛkɛ, Sedeuu birɛ Edisuu.
\m
\v 6 Simmɛɔ̃ɔ̃ kɔku miɛkɛ, Sudisɑdɑii birɛ Sedumiɛri.
\m
\v 7 Sudɑɑ kɔku, Amminɑdɑbu birɛ Nɑsɔ̃ɔ̃.
\m
\v 8 Isɑkɑɑ kɔku, Suɑɑ birɛ Nɛtɑnnɛyɛɛdi.
\m
\v 9 Sɑbunɔɔ kɔku, Edonni birɛ Ediɑbu.
\m
\v 10 Sosɛfu kó ibí Efɑdɑimmu nɛ̀ Mɑnɑnsee bɛ kó tinɑɑ̀mùntì kɔbɛ:
\m Efɑdɑimmu kɔku, Ammiudi birɛ Edisɑmɑ.
\m Mɑnɑnsee kɔku, Pedɑsuu birɛ Kɑmmidiyɛɛdi.
\m
\v 11 Bɛnsɑmɛɛ kɔku, Kideonii birɛ Abidɑnni.
\m
\v 12 Dɑnni kɔku, Amisɑdɑii birɛ Ayiesɛɛ.
\m
\v 13 Asɛɛ kɔku, Okɑdɑnni birɛ Pɑkiyɛɛdi.
\m
\v 14 Kɑdi kɔku, Deuyɛɛdi birɛ Ediɑsɑfu.
\m
\v 15 Nɛfutɑdii kɔku, Enɑnni birɛ Aidɑ.
\b
\p
\v 16 Dɛ kó bɛnìtìbɛ̀ do tú bɛ̀ tɑ̃ɑ̃tɛ́ bɛ̀mbɛ. Bɛ̀ do tú bɛ̀ɛ̀ kòtí bɛ̀mbɛ bɛ botí miɛkɛ kɛ ni bɛnìtìbɛ̀ sikɔupí. 
\v 17 Mɛm̀mɛ Mɔyiisi nɛ̀ Anɔɔ kɛ̀ bɛ̀ɛ túótɛ́ dɛ kó bɛnìtìbɛ̀ bɛ̀ tɑ̃ɑ̃tɛ́ bɛ̀, 
\v 18 kɛ́tíí nyIsidɑyɛɛribɛ bɛmɔu otɑ̃̀nkù dɛ́rì kó diyiè ketirì, kɛ̀ Isidɑyɛɛribɛɛ bɑtɛ bɛ nɑɑ̀mùntì nɛ̀ bɛ cɛ̃́ĩ, kɛ̀ bɛ̀ɛ dɛi bɛ̀ɛ̀ mɔ̀kɛ yɛbie nsipísìdɛ́ sìdɛ́ kɛ́ndeètìnko.
\b
\p
\v 19 Mɛm̀mɛ Mɔyiisi bɛ̀ kɑ̀ɑmmɛ̀ Sinɑii kó dikpɑ́ɑ̀ miɛkɛ ti Yiɛ̀ nKuyie ndo tì nhò nɑ̀kɛ́ kɛ yɛ̃ ndɛ̀ ndòmmɛ̀.
\s1 Bɛ̀ ketɛ́mɛ̀ mukɑ̀mmù
\p
\v 20 Bɛ̀ bɑ̀tɛ dìì mɔ̀nnì Dubɛnni wèè tu Isidɑyɛɛribɛ kóo po kó kunɑɑ̀mùnkù kɛ́deè kɛ̀ bɛ̀ɛ kɑɑ mbɛ̀ɛ̀ kó dimɑ̀ɑ̀ tùɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò mbɛ̀ bo nɑ kɛ́kɔtɛ mudoò.
\m
\v 21 Bɛ̀ do kɑ̀ɑ mbɛ̀ Dubɛnni kó kunɑɑ̀mùnkù bɛ̀ do bo sikɔupípísìnɑ̀ɑ̀ nɛ̀ sikɔupísìkuɔ̀ nɛ̀ sikɔusìnùmmù ndi (46500).
\m
\v 22 Kɛ̀ bɛ̀ɛ bɑtɛ Simmɛɔ̃ɔ̃ kó kunɑɑ̀mùnkù kɛ́kɑɑ mbɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko bɛnitidɑɑbɛ̀ mɑ́ɑ̀ kɛ́wɑ̃ri bɛ yètɛ̀. 
\v 23 Kɛ̀ bɛ̀ ḿbo sikɔupípísìnùmmù nɛ̀ sikɔupísìwɛi nɛ̀ sikɔusìtɑ̃ɑ̃ti (59300).
\m
\v 24 Kɛ̀ bɛ̀ɛ bɑtɛ Kɑdi nɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀, bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko bɛ̀ɛ̀ dò nkɛ́nɑ kɛ́kɔtɛ mudoò. 
\v 25 Kɛ̀ bɛ̀ ḿbo sikɔupípísìnɑ̀ɑ̀ nɛ̀ sikɔupísìnùmmù nɛ̀ sikɔusìkuɔ̀ nɛ̀ sipísìnùmmù (45650).
\m
\v 26 Kɛ̀ bɛ̀ɛ bɑtɛ Sudɑɑ nɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀, bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko bɛ̀ɛ̀ dò nkɛ́nɑ kɛ́kɔtɛ mudoò. 
\v 27 Kɛ̀ bɛ̀ ḿbo sikɔupípísìyiekɛ̀ nɛ̀ sikɔupísìnɑ̀ɑ̀ nɛ̀ sikɔusìkuɔ̀ (74600).
\m
\v 28 Kɛ̀ bɛ̀ɛ bɑtɛ Isɑkɑɑ nɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 29 kɛ̀ bɛ̀ ḿbo sikɔupípísìnùmmù nɛ̀ sikɔupísìnɑ̀ɑ̀ nɛ̀ sikɔusìnɑ̀ɑ̀ (54400).
\m
\v 30 Kɛ̀ bɛ̀ɛ bɑtɛ Sɑbunɔɔ nɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko bɛ̀ɛ̀ dò nkɛ́nɑ kɛ́kɔtɛ mudoò, 
\v 31 kɛ̀ bɛ̀ ḿbo sikɔupípísìnùmmù nɛ̀ sikɔupísìyiekɛ̀ nɛ̀ sikɔusìnɑ̀ɑ̀ (57400).
\m
\v 32 Kɛ̀ bɛ̀ɛ bɑtɛ Sosɛfu birɛ Efɑdɑimmu kó kunɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 33 kɛ̀ bɛ̀ ḿbo sikɔupípísìnɑ̀ɑ̀ nɛ̀ sikɔusìnùmmù (40500).
\m
\v 34 Kɛ̀ bɛ̀ɛ bɑtɛ Mɑnɑnsee, Sosɛfu birɛ tɛrɛ̀ kó kunɑɑ̀mùnkù kɔbɛ, bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 35 kɛ̀ bɛ̀ ḿbo sikɔupípísìtɑ̃ɑ̃ti nɛ̀ sikɔupísìdɛ́ nɛ̀ sikɔusìdɛ́ (32200).
\m
\v 36 Kɛ̀ bɛ̀ɛ bɑtɛ Bɛnsɑmɛɛ kó kunɑɑ̀mùnkù kɔbɛ bɛ cɛ̃́ĩ dò ndòmmɛ̀ bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 37 kɛ̀ bɛ̀ ḿbo sikɔupípísìtɑ̃ɑ̃ti nɛ̀ sikɔupísìnùmmù nɛ̀ sikɔusìnɑ̀ɑ̀ (35400).
\m
\v 38 Kɛ̀ bɛ̀ɛ bɑtɛ Dɑnni kó kunɑɑ̀mùnkù kɔbɛ bɛ cɛ̃́ĩ dò ndòmmɛ̀, bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 39 kɛ̀ bɛ̀ ḿbo sikɔupípísìkuɔ̀ nɛ̀ sikɔupísìdɛ́ nɛ̀ sikɔusìyiekɛ̀ (62700).
\m
\v 40 Kɛ̀ bɛ̀ɛ bɑtɛ Asɛɛ kó kunɑɑ̀mùnkù kɔbɛ bɛ cɛ̃́ĩ dò ndòmmɛ̀, bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò, 
\v 41 kɛ̀ bɛ̀ ḿbo sikɔupípísìnɑ̀ɑ̀ nɛ̀ tɛkɔupíítɛ̀ nɛ̀ sikɔusìnùmmù (41500).
\m
\v 42 Kɛ̀ bɛ̀ɛ bɑtɛ Nɛfutɑdii kó kunɑɑ̀mùnkù kɔbɛ bɛ cɛ̃́ĩ dò ndòmmɛ̀, bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò. 
\v 43 Kɛ̀ bɛ̀ ḿbo sikɔupípísìnùmmù nɛ̀ sikɔupísìtɑ̃ɑ̃ti nɛ̀ sikɔusìnɑ̀ɑ̀ (53400).
\p
\v 44 Mɛm̀mɛ Mɔyiisi nɛ̀ Anɔɔ nɛ̀ Isidɑyɛɛribɛ kó tinɑɑ̀mùntì tɛpíítɛ̀ nɛ̀ tìdɛ́tì kó bɛkótíbɛ̀ kɑ̀ɑmmɛ̀ Isidɑyɛɛribɛ bɛ cɛ̃́ĩ dò ndòmmɛ̀. 
\v 45 Kɛ̀ bɛ̀ɛ bɑtɛ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko bɛ̀ɛ̀ dò nkɛ́nɑ kɛ́kɔtɛ mudoò, 
\v 46 kɛ̀ bɛ̀ɛ wɛ̃nnɛ́ bɛmɔu kɛ́mbo sikɔupíkɔùsìkuɔ̀ nɛ̀ sikɔupísìtɑ̃ɑ̃ti nɛ̀ sikɔusìnùmmù nɛ̀ sipísìnùmmù (603550). 
\v 47 Bɛ̀ nɛ́ í nwɛ̃nnɛ́nɛ̀ Defii kó kuwuɔ nkɛ kɑ̀ɑ.
\s1 Defiibɛ kó mutɔ̃mmú
\p
\v 48 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 49 A bɑ́ɑ́ kɑɑ nDefii kó kuwuɔ, ɑ bɑ́ɑ́ bɛ̀ kɑ̀ɑnnɛ̀ Isidɑyɛɛribɛ. 
\v 50 Á bɛ̀ duɔ́ mmɛtɑummɛ̀ tou kó mutɔ̃mmú, kɛ̀ bɛ̀ ndɑkɛ n nɛntì kpɛ́í nnɛ̀ dɛ̀ɛ̀ kó dimɑ̀ɑ̀ cɛ̃́nkɛ tú mɛtɑummɛ̀ tou kpɛrɛ. Bɛɛ̀ yó ntɔu n tɑummɛ̀ tou nɛ̀ di nɛntì, bɛɛ̀ yó nte dɛ kó mutɔ̃mmú, kɛ̀ di bɑ̀tɛ́ dɛ̀ bɛɛ̀ yóó fitɛ́ mɛtɑummɛ̀ tou. 
\v 51 Kɛ̀ mɛtɑummɛ̀ tou do nkɛ́sɔɔ́ ndikɑrì bɛɛ̀ yóó dì kpèétɛ́, kɛ̀ dì tùɔ̀kɛ dì bo cómmú dɛ̀, bɛ̀ɛ dì còńnɛ́. Wèè í tú Defii botí kou kòò dì tɔ̀ɔ́nnɛ̀ bɛ̀ɛ ò kùɔ. 
\v 52 Isidɑyɛɛribɛ bɑ́ dìì tĩ̀nnì dì níí bɑ́tɛ́ di kó mɛfíè, di kó mɛcɑnnimɛ̀ borɛ̀. 
\v 53 Kɛ̀ Defiibɛ bɛɛ̀ bɑ́tɛ́ kɛ́fitɛ́ mɛtɑummɛ̀ tou, kɛ̀ dɛ̀ɛ yie mmí nKuyie nkɛ̀ m miɛkɛ bɑ́ɑ́ do Isidɑyɛɛribɛ. Defiibɛ bɛɛ̀ yó mpĩ́ mɛtɑummɛ̀ tou miɛkɛ mutɔ̃mmú.
\p
\v 54 Mɛm̀mɛ kɛ̀ Isidɑyɛɛribɛɛ tũnnɛ weti weti ti Yiɛ̀ nKuyie nnɑ̀kɛ́ tì Mɔyiisi bɛ kpɛ́í nkòò tì mbɛ̀ nɑ̀kɛ́.
\c 2
\s1 Bɛ̀ kɑ̀nnɛ mɛ̀ɛ̀ botí Isidɑyɛɛribɛ
\p
\v 1 Dɛ kó difɔ̃nkúò kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 2 Isidɑyɛɛribɛ bɑ́ dìì tĩ̀nnì dì níí bɑ́tɛ́ di wuɔ nkó mɛcɑnnimɛ̀ borɛ̀ kɛ́fitɛ́ mɛtɑummɛ̀ tou, kɛ́ ndì ciɛ́nnɛ̀.
\p
\v 3-8 Sudɑɑ kó ditĩ̀nnì kɔbɛ nɛ̀ Isɑkɑɑ kpɛri kɔbɛ nɛ̀ Sɑbunɔɔ kpɛri bɛɛ̀ yóó wɛ̃nnɛ́ kɛ́bɑ́tɛ́ mɛtɑummɛ̀ tou diyiè yìɛ̀ní kɛ̀ɛ̀ bíɛ́kɛ̀, Sudɑɑ kó mɛcɑnnimɛ̀ borɛ̀.
\m Kɛ̀ Amminɑdɑbu birɛ Nɑsɔ̃ɔ̃ nni Sudɑɑ kɔbɛ kó dihɑ̃ɑ̃pɔ̀ntĩ̀nnì kɛ̀ dì ḿbo bɛhɑ̃ɑ̃pɔ̀mbɛ̀ sikɔupípísìyiekɛ̀ nɛ̀ sikɔupísìnɑ̀ɑ̀ nɛ̀ sikɔusìkuɔ̀ (74600).
\m Kɛ̀ Suɑɑ birɛ Nɛtɑnnɛ yɛɛdi nni Isɑkɑɑ kɔbɛ kó dihɑ̃ɑ̃pɔ̀ntĩ̀nnì bɛhɑ̃ɑ̃pɔ̀mbɛ̀ sikɔupípísìnùmmù nɛ̀ sikɔupísìnɑ̀ɑ̀ nɛ̀ sikɔusìnɑ̀ɑ̀ (54400).
\m Kɛ̀ Edonni birɛ Ediɑbu ni Sɑbunɔɔ kɔbɛ kó dihɑ̃ɑ̃pɔ̀ntĩ̀nnì bɛhɑ̃ɑ̃pɔ̀mbɛ̀ sikɔupípísìnùmmù nɛ̀ sikɔupísìyiekɛ̀ nɛ̀ sikɔusìnɑ̀ɑ̀ (57400).
\m
\v 9 Kɛ̀ bɛ̀ɛ wɛ̃nnɛ́ bɛmɔu kɛ́mbo bɛhɑ̃ɑ̃pɔ̀mbɛ̀ tɛkɔupíkɔ̀ùtɛ̀ nɛ̀ sikɔupípísìni nɛ̀ sikɔupísìkuɔ̀ nɛ̀ sikɔusìnɑ̀ɑ̀ (186400).
\m Bɛɛ̀ kó dihɑ̃ɑ̃pɔ̀ntĩ̀nnì níí yóó niitɛ́ kɛ́ítɛ́.
\p
\v 10-16 Dubɛnni kó ditĩ̀nnì kɔbɛ nɛ̀ Simmɛɔ̃ɔ̃ kó ditĩ̀nnì kɔbɛ nɛ̀ Kɑdi kó ditĩ̀nnì kɔbɛ bɛɛ̀ yóó wɛ̃nnɛ́ kɛ́bɑ́tɛ́ mɛtɑummɛ̀ tou bɑkù cɑ̃̀nku bíɛ́kɛ̀, Dubɛnni kó mɛcɑnnimɛ̀ borɛ̀.
\m Kɛ̀ Sedeuu birɛ, Edisuu nni Dubɛnni kó dihɑ̃ɑ̃pɔ̀ntĩ̀nnì bɛhɑ̃ɑ̃pɔ̀mbɛ̀ sikɔupípísìnɑ̀ɑ̀ nɛ̀ sikɔupísìkuɔ̀ nɛ̀ sikɔusìnùmmù (46500).
\m Kɛ̀ Sudisɑdɑii birɛ Sedumiɛri nni Simmɛɔ̃ɔ̃ kó ditĩ̀nnì kɔbɛ bɛhɑ̃ɑ̃pɔ̀mbɛ̀ sikɔupípísìnùmmù nɛ̀ sipísìwɛi nɛ̀ sikɔusìtɑ̃ɑ̃ti (59300).
\m Kɛ̀ Deuyɛɛdi birɛ Ediɑsɑfu nni Kɑdi kó ditĩ̀nnì kɔbɛ bɛhɑ̃ɑ̃pɔ̀mbɛ̀ sikɔupípísìnɑ̀ɑ̀ nɛ̀ sikɔupísìnùmmù nɛ̀ sikɔusìkuɔ̀ nɛ̀ sipísìnùmmù (45650).
\m Kɛ̀ bɛ̀ɛ wɛ̃nnɛ́ bɛmɔu kɛ́mbo bɛhɑ̃ɑ̃pɔ̀mbɛ̀ tɛkɔupíkɔ̀ùpíítɛ̀ nɛ̀ sikɔupípísìnùmmù nɛ̀ tɛkɔupíítɛ̀ nɛ̀ sikɔusìnɑ̀ɑ̀ nɛ̀ sipísìnùmmù (151450).
\m Bɛɛ̀ yó mpokoo Sudɑɑ nɛ̀ o kɔbɛ bɛ kó yɛtĩ̀rɛ̀.
\p
\v 17 Bɛ kó difɔ̃nkúò kɛ̀ Defiibɛɛ tũnnɛ nɛ̀ mɛtɑummɛ̀ tou, Defiibɛ kó dikɑrì diì níí yó mbo dɛ cuokɛ̀. Bɛ̀ yó ntũ mbɛ̀ bɑ̀tɛ́ mɛ̀ɛ̀ botí nku kɛ iiti, bɑ́ wè ò níí yó mbo o kó mɛcɑnnimɛ̀ borɛ̀ ndɛ.
\p
\v 18-24 Efɑdɑimmu kó ditĩ̀nnì kɔbɛ nɛ̀ Mɑnɑnsee kpɛri bɛɛ̀ yóó wɛ̃nnɛ́ kɛ́bɑ́tɛ́ mɛtɑummɛ̀ tou diyiè tɑɑ̀ kɛ̀ɛ̀ bíɛ́kɛ̀ Efɑdɑimmu kó mɛcɑnnimɛ̀ borɛ̀.
\m Kɛ̀ Ammiudi birɛ Edisɑmɑ nni Efɑdɑimmu kɔbɛ kó dihɑ̃ɑ̃pɔ̀ntĩ̀nnì bɛhɑ̃ɑ̃pɔ̀mbɛ̀ sikɔupípísìnɑ̀ɑ̀ nɛ̀ sikɔusìnùmmù (40500).
\m Kɛ̀ Pedɑsuu birɛ Kɑmmidiyɛɛri nni Mɑnɑnsee kɔbɛ kó dihɑ̃ɑ̃pɔ̀ntĩ̀nnì sikɔupípísìtɑ̃ɑ̃ti nɛ̀ sikɔupísìdɛ́ nɛ̀ sikɔusìdɛ́ (32200).
\m Kɛ̀ Kideonii birɛ Abidɑnni nni Bɛnsɑmɛɛ kɔbɛ kó dihɑ̃ɑ̃pɔ̀ntĩ̀nnì bɛhɑ̃ɑ̃pɔ̀mbɛ̀ sikɔupípísìtɑ̃ɑ̃ti nɛ̀ sikɔupísìnùmmù nɛ̀ sikɔusìnɑ̀ɑ̀ (35400).
\m Kɛ̀ bɛ̀ɛ wɛ̃nnɛ́ bɛmɔu bɛhɑ̃ɑ̃pɔ̀mbɛ̀ tɛkɔupíkɔ̀ùpíítɛ̀ nɛ̀ sikɔupísìni nɛ̀ tɛkɔ̀ùtɛ̀ (108100).
\m Bɛɛ̀ níí yó ntú ditĩ̀nnì tɑ̃ɑ̃́nnì kɛ́ítɛ́.
\p
\v 25-31 Dɑnni kó ditĩ̀nnì kɔbɛ nɛ̀ Asɛɛ kó ditĩ̀nnì kɔbɛ nɛ̀ Nɛfutɑdii kó ditĩ̀nnì kɔbɛ bɛɛ̀ yóó wɛ̃nnɛ́ kɛ́bɑ́tɛ́ mɛtɑummɛ̀ tou bɑkù yoú bíɛ́kɛ̀, Dɑnni kó mɛcɑnnimɛ̀ borɛ̀.
\m Kɛ̀ Amisɑdɑii birɛ Ayiesɛɛ nni Dɑnni kó dihɑ̃ɑ̃pɔ̀ntĩ̀nnì kɔbɛ bɛhɑ̃ɑ̃pɔ̀mbɛ̀ sikɔupípísìkuɔ̀ nɛ̀ sikɔupísìdɛ́ nɛ̀ sikɔusìyiekɛ̀ (62700).
\m Kɛ̀ Okɑdɑnni birɛ Pɑkiyɛɛdi nni Asɛɛ kó dihɑ̃ɑ̃pɔ̀ntĩ̀nnì kɔbɛ bɛhɑ̃ɑ̃pɔ̀mbɛ̀ sikɔupípísìnɑ̀ɑ̀ nɛ̀ tɛkɔupíítɛ̀ nɛ̀ sikɔusìnùmmù (41500).
\m Kɛ̀ Enɑnni birɛ Aidɑ nni Nɛfutɑdii kó dihɑ̃ɑ̃pɔ̀ntĩ̀nnì sikɔupípísìnùmmù nɛ̀ sikɔupísìtɑ̃ɑ̃ti nɛ̀ sikɔusìnɑ̀ɑ̀ (53400).
\m Kɛ̀ bɛ̀ɛ wɛ̃nnɛ́ bɛmɔu bɛhɑ̃ɑ̃pɔ̀mbɛ̀ tɛkɔupíkɔ̀ùtɛ̀ nɛ̀ sikɔupípísìnùmmù nɛ̀ sikɔupísìyiekɛ̀ nɛ̀ sikɔusìkuɔ̀ (157600).
\m Bɛɛ̀ níí yó ntú bɛsɔmbɛ kɛ́ítɛ́.
\p Bɑ́ dìì ɑ̃ɑ̃pɔ̀ntĩ̀nnì níí yó mbo di kó mɛcɑnnimɛ̀ borɛ̀ ndɛ.
\b
\p
\v 32 Isidɑyɛɛribɛ mbɛ bɛ̀ do kɑ̀ɑ mbɛ̀ kɛ́ bɛ̀ bɑ̀tɛ bɛ cɛ̃́ĩ dòmmɛ̀, bɛ kó yɛhɑ̃ɑ̃pɔ̀ntĩ̀rɛ̀ yɛmɔu kɛ̀ yɛ̀ɛ wɛ̃nnɛ́ kɛ́mbo bɛhɑ̃ɑ̃pɔ̀mbɛ̀ sikɔupípísìkuɔ̀ nɛ̀ sikɔupísìtɑ̃ɑ̃ti nɛ̀ sikɔusìnùmmù nɛ̀ sipísìnùmmù (603550). 
\v 33 Bɛ̀ mɛ nyí nkɑ̀ɑnnɛ̀ Defiibɛ Isidɑyɛɛribɛ tɔbɛ̀ cuokɛ̀ ti Yiɛ̀ nKuyie ndo ti nɑ̀kɛ́ Mɔyiisi kɛ yɛ̃ ndɛ̀ ndòmmɛ̀.
\p
\v 34 Kɛ̀ Isidɑyɛɛribɛɛ tũnnɛ weti weti ti Yiɛ̀ nKuyie ndo nɑ̀kɛ́ tì Mɔyiisi. Mɛm̀mɛ kɛ̀ bɛ̀ɛ cómmú bɛmɑ bɛmɑ bɛ cɑnnimɛ̀ dò ndòmmɛ̀. Mɛm̀mɛ bɛ̀ ìtɛ́mɛ̀ bɛ kɑrì bɑ́ wè o nɑɑ̀mùnkù dòmmɛ̀ nɛ̀ o cĩ́ɛ̃̀tɛ̀.
\c 3
\s1 Defiibɛ kó mutɔ̃mmú dò nkɛ́ndòmmɛ̀
\p
\v 1 Ntɛ Mɔyiisi nɛ̀ Anɔɔ bɛ kó iwuɔ. Ti Yiɛ̀ nKuyie ndo yóó bɛ́innɛ̀ Mɔyiisi Sinɑii tɑ̃rì ĩ́nkɛ̀ kɛ̀ Anɔɔ mɔ̀kɛ ibí ìnɑ̀ɑ̀ ndi ìì yètɛ̀ tu: 
\v 2 Nɑdɑbu weè do tú Mpo, kɛ́nɑntɛ Abiu, kòo nɑntɛ Edeɑsɑɑ nɛ̀ Itɑmɑɑ. 
\v 3 Anɔɔ kó ibí nyi mɛmmɛ, bɛ̀ do còú mbɛ̀ɛ̀ yɔ mɛkùɔ̀ nkɛ bɛ̀ cɑ̃̀ńnɛ́ kɛ̀ bɛ̀ bo mpĩ́ nyikuɔ́ tɔ̃mmú. 
\v 4 Nɑdɑbu nɛ̀ Abiu kɛ̀ bɛ̀ɛ kú Sinɑii kó dikpɑ́ɑ̀ mɛtɑummɛ̀ tou bòrìnùù, kɛ yɛ̃́ bɛ̀ do tùɔnnɛ̀mɛ̀ ti Yiɛ̀ nKuyie ntihúúntì muhɑ̃ɑ̃́ nsɔ̃́ntíkɛ kɔ̃mu. Bɛ̀ do yóó kú kɛ í mɔkɛ ibí. Edeɑsɑɑ nɛ̀ Itɑmɑɑ kɛ̀ bɛ̀ɛ sɔɔtɛ́ kɛ́mpĩ́nnɛ̀ bɛ cicɛ Anɔɔ ikuɔ́ tɔ̃mmú.
\p
\v 5 Mɛm̀mɛ kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 6 Duɔ́ nkɛ̀ Defii kó kuwuɔ nkɔbɛɛ tíínní, kɑ̀ɑ bɛ̀ duɔ́ nhAnɔɔ kɛ̀ bɛ̀ nwɛ̃ nkɛ pĩ́ mmutɔ̃mmú. 
\v 7 Kɛ̀ bɛ̀ɛ nhò teénnɛ̀ kɛ̀ bɛ̀ mpĩ́ mmutɔ̃mmú mɛtɑummɛ̀ tou, Isidɑyɛɛribɛ bɛmɔu kpɛ́í. 
\v 8 Bɛɛ̀ yó ndɑkɛ mɛtɑummɛ̀ tou kó tinɛntì kpɛ́í kɛ́mpĩ́ nyIsidɑyɛɛribɛ kó mutɔ̃mmú mɛtɑummɛ̀ tou. 
\v 9 Á duɔ́ nDefiibɛ Anɔɔ nɛ̀ o bí, míì bɛ̀ dɛ̀itɛ Isidɑyɛɛribɛ miɛkɛ kɛ yɛ̃ nhɑ́ bɛ̀ mbɛ̀ duɔ́. 
\v 10 Anɔɔ nɛ̀ o bí bɛɛ̀ mɑ́ɑ̀ yó ntú ikuɔ́ nìùbɛ̀, kɛ́mpĩ́ nyikuɔ́ tɔ̃mmú, kɛ̀ wèè í tú Defii botí kou kòò kɑ̀ɑ́kɛ́ dɛ kó mutɔ̃mmú bɛ̀ɛ ò kùɔ.
\p
\v 11 Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́bɛ́i nkɛ dɔ̀: 
\v 12 Míì tɑ̃ɑ̃tɛ́ Defiibɛ Isidɑyɛɛribɛ sɔmbɛ cuokɛ̀, kɛ̀ bɛ̀ bo cɔutɛ́ bɛ̀ɛ̀ tu Mpo bɛ kó difɔ̃̀tìrì kɛ́mpĩ́ n tɔ̃mmú, míì bɛ̀ te. 
\v 13 Kɛ yɛ̃́ bɛ̀ɛ̀ tu Mpo bɛ kó dimɑ̀ɑ̀ tumɛ̀ n kɔbɛ mbɛ. M potɛ́ dìì yiè Esibiti tenkɛ̀ miɛkɛ bɛ̀ɛ̀ tu Mpo, dɛ yiè ndi n cɑ̃̀ńnɛ́mɛ̀ Isidɑyɛɛribɛ miɛkɛ bɛ̀ɛ̀ tu Mpo nɛ̀ bɛ wũɔ̃ piɛ́ ìì bí ketiyì kɛ̀ ì tu idɑɑì, kɛ̀ dɛ̀ bo ntú mí ndi Yiɛ̀ nKuyie n kpɛrɛ.
\s1 Bɛ̀ kɑ̀ɑmmɛ̀ Defiibɛ kó kubotí
\p
\v 14 Mɛm̀mɛ kɛ̀ ti Yiɛ̀ nKuyie nnɑ́kɛ́ Mɔyiisi Sinɑii kó dikpɑ́ɑ̀ miɛkɛ kɛ dɔ̀: 
\v 15 Á kɑɑ nDefii kó ibí initidɑɑì bɛ nɑɑ̀mùntì nɛ̀ bɛ cɛ̃́ĩ, kɛ́ketɛ́nɛ̀ ìì mɔ̀kɛ otɑ̃̀nkù òmɑ́ɑ̀ òmɑ́ɑ̀ kɛ́ndeètìnko.
\p
\v 16 Kɛ̀ Mɔyiisii tũnnɛ ti Yiɛ̀ nKuyie nhò nɑ̀kɛ́ tì kɛ́ bɛ̀ kɑ̀ɑ.
\b
\p
\v 17 Ntɛ Defii bí kó yɛyètɛ̀: Kɛrisonni nɛ̀ Keɑti nɛ̀ Mɛdɑdi. 
\v 18 Kɛ̀ Kɛrisonni kó ibí ntú: Dibini nɛ̀ Simɛii. Bɛ kó tinɑɑ̀mùntì nti mɛmmɛ. 
\v 19 Kɛ̀ Keɑti kó ibí ntú: Amudɑmu nɛ̀ Isɑɑdi nɛ̀ Ebunɔɔ nɛ̀ Usiyɛɛdi. Bɛ kó tinɑɑ̀mùntì nti mɛmmɛ. 
\v 20 Kɛ̀ Mɛdɑdi kpɛyi ntú: Mɑdi nɛ̀ Musi. Defii kó ibí nyi mɛmmɛ bɛ nɑɑ̀mùntì nɛ̀ bɛ cɛ̃́ĩ.
\p
\v 21 Kɛrisonni kó tinɑɑ̀mùntì do tú: Dibunii kɔku nɛ̀ Semmɛii kɔku kɛ̀ bɛ̀ ntú Kɛrisonniibɛ. 
\v 22 Kɛ̀ bɛ̀ɛ bɛ̀ kɑ̀ɑ nkɛ́tuotɛ́ initidɑbí ìì mɔ̀kɛ otɑ̃̀nkù kɛ́ntɔ kɛ deètìnko kɛ̀ bɛ̀ mbo sikɔupísìyiekɛ̀ nɛ̀ sikɔusìnùmmù (7500). 
\v 23 Kɛrisonniibɛɛ kó tinɑɑ̀mùntì kɔbɛ bɛɛ̀ do kɑri mɛtɑummɛ̀ tou fɔ̃nkúò diyiè tɑɑ̀ kɛ̀ɛ̀ bíɛ́kɛ̀. 
\v 24 Dɑyɛɛdi birɛ Ediɑsɑfu weè do tú bɛ kó tɛcĩ́ɛ̃̀tɛ̀ kóo kótì. 
\v 25 Kɛrisonniibɛ kó mutɔ̃mmú do tú bɛ̀ bo ndɑkɛmɛ̀ mɛtɑummɛ̀ tou kpɛ́í nnɛ̀ kuyɑ̀ɑ̀kù kùù dì dɑ̀ɑ́tí nɛ̀ kùù kpetí dibòrì. 
\v 26 Nɛ̀ tìì fitɛ́ kudɑ̀nkù nɛ̀ kùù kpetí ditowɑɑ̀ kó dibòrì nɛ̀ dɛ kó iwɛ̃ĩ bɛ̀ ɔ̃ɔ̃ pítínnɛ́ ì dɛ kó tiyɑ̀ɑ̀tì.
\p
\v 27 Keɑti kó tinɑɑ̀mùntì do tú: Amudɑɑbɛ nɛ̀ Isɑɑbɛ nɛ̀ Ebunɔɔbɛ nɛ̀ Usiyɛɛdibɛ bɛ kó tinɑɑ̀mùntì nti mɛmmɛ. 
\v 28 Kɛ̀ bɛ̀ɛ bɛ̀ kɑ̀ɑ nkɛ́túótɛ́ initidɑbí ìì mɔ̀kɛ otɑ̃̀nkù òmɑ́ɑ̀ kɛ́ndeètìnko kɛ̀ bɛ̀ ḿbo sikɔupísìni nɛ̀ sikɔusìkuɔ̀ (8600) bɛɛ̀ do pĩ́ mmɛtɑummɛ̀ tou kó mutɔ̃mmú. 
\v 29 Keɑtiibɛ kó tinɑɑ̀mùntì kɔbɛ bɛɛ̀ do kɑri mɛtɑummɛ̀ tou bɑkù cɑ̃̀nku bíɛ́kɛ̀. 
\v 30 Usiyɛɛdi birɛ Edisɑfɑ̃ɑ̃ weè do tú bɛ cĩ́ɛ̃̀tɛ̀ kóo kótì. 
\v 31 Bɛɛ̀ do te bɛ̀ bo ndɑkɛmɛ̀ mɛtɑummɛ̀ tɔu kpɛ́í nnɛ̀ tɑ́bùrì nɛ̀ tɛfitíkɛ̀kɛ̀tɛ̀ nɛ̀ yɛwũɔ̃tɔ̀rɛ̀ nɛ̀ tinɛntì tɛtì bɛ̀ pĩĩnnɛ̀ tì ikuɔ́ tɔ̃mmú nɛ̀ kuyɑ̀ɑ̀kù dɛ miɛkɛ kɔku nɛ̀ iwɛ̃ĩ ìì kù pìítínɛ̀.
\p
\v 32 Bɛɛ̀ do pĩ́ mmɛtɑummɛ̀ tou miɛkɛ mutɔ̃mmú kɛ̀ bɛ kóo kótì tu ikuɔ́ nìùtì Anɔɔ birɛ Edeɑsɑɑ, kɛ̀ weè mbɛ̀ bɑkɛ́.
\p
\v 33 Mɛdɑdi kó tinɑɑ̀mùntì kɔbɛ do tú: Mɑdiibɛ nɛ̀ Musiibɛ. Mɛdɑdi kó tinɑɑ̀mùntì nti mɛmmɛ. 
\v 34 Kɛ̀ bɛ̀ɛ kɑɑ nyinitidɑbí ìì mɔ̀kɛ otɑ̃̀nkù kɛ́ntɔ kɛ deètìnko kɛ̀ bɛ̀ mbo sikɔupísìkuɔ̀ nɛ̀ sikɔusìdɛ́ (6200). 
\v 35 Kɛ̀ Abiyɑi birɛ Sudiyɛɛdi weè ntú bɛ kó tɛcĩ́ɛ̃̀tɛ̀ kóo kótì, bɛɛ̀ do kɑri mɛtɑummɛ̀ tou bɑkù yoú. 
\v 36 Mɛdɑdi kó tinɑɑ̀mùntì kɔbɛ kó mutɔ̃mmú do tú bɛ̀ bo ndɑkɛmɛ̀ mɛtɑummɛ̀ tou kó tidɑbɛɛtì kpɛ́í nnɛ̀ ticɑ́dɔɔti nɛ̀ yɛsɑ̃ǹkɛ̀ nɛ̀ yɛ kó yɛtɛitiyɛ̀ nɛ̀ di kó tinɛntì tɛtì timɔu. 
\v 37 Bɛɛ̀ do dɑkɛnɛ̀ mɛtɑummɛ̀ tou kó kudɑ̀nkù kó yɛsɑ̃ǹkɛ̀ kpɛ́í nnɛ̀ yɛ kó yɛtɛitiyɛ̀ nɛ̀ dɛ kó ibɑɑkɛ́ nɛ̀ dɛ kó iwɛ̃ĩ.
\p
\v 38 Mɔyiisi nɛ̀ Anɔɔ nɛ̀ bɛ bí kɛ̀ bɛ̀ɛ kɑri mɛtɑummɛ̀ tou diyiè yìɛ̀ní kɛ̀ɛ̀ bíɛ́kɛ̀ dibòrì bo kɛ̀ɛ̀ bíɛ́kɛ̀, kɛ́mpĩ́ nyikuɔ́ tɔ̃mmú Isidɑyɛɛribɛ kpɛ́í. Kɛ̀ wèè í tú Defii botí kou kɛ dɛ̀ tɔ́ɔ́nko, bɛ̀ɛ ò kùɔ.
\p
\v 39 Kɛ̀ bɛ̀ɛ kɑɑ nDefiibɛ kɛ́túótɛ́ initidɑbí ìì mɔ̀kɛ otɑ̃̀nkù kɛ́ndeètìnko, bɛmɔu kɛ̀ bɛ̀ ḿbo sikɔupípísìdɛ́ nɛ̀ sikɔupísìdɛ́ (22000). Mɔyiisi nɛ̀ Anɔɔ bɛɛ̀ do bɛ̀ kɑ̀ɑ kɛ́ntũ mbɛ nɑɑ̀mùntì dò ndòmmɛ̀, ti Yiɛ̀ nKuyie ndo bɛ̀ nɑ̀kɛ́mɛ̀.
\s1 Bɛ̀ cèètɛ̀nɛ̀mɛ̀ Defiibɛ bɛ̀ɛ̀ tu Mpo
\p
\v 40 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Kɑɑ nyIsidɑyɛɛribɛ bɛ̀ɛ̀ kó dimɑ̀ɑ̀ tu Mpo bɛmɔu, kɛ́ketɛ́nɛ̀ ibí ìì mɔ̀kɛ otɑ̃̀nkù òmɑ́ɑ̀ kɛ́ndeètìnko, ɑ́ bɛ̀ kɑ̀ɑ nkɛ́wɑ̃ri bɛ yètɛ̀. 
\v 41 Kɑ̀ɑ dèè, ɑ́ túótɛ́ Defiibɛ kɛ́ bɛ̀ nni nduɔ́, Isidɑyɛɛribɛ bɛ̀ɛ̀ tu Mpo bɛ kó difɔ̃̀tìrì kɛ̀ bɛ̀ ntú n kɔbɛ, kɛ́túótɛ́ bɛ wũɔ̃ kɛ́ceetɛnɛ̀ Isidɑyɛɛribɛ kó iwũɔ̃ piɛ́ ìì bí ketiyì kɛ̀ ì tu idɑɑì.
\p
\v 42 Kɛ̀ Mɔyiisii kɑɑ nyIsidɑyɛɛribɛ bɛ̀ɛ̀ tu Mpo ti Yiɛ̀ nKuyie nhò nɑ̀kɛ́ kɛ yɛ̃ ndɛ̀ ndòmmɛ̀. 
\v 43 Kɛ̀ bɛ̀ɛ kɑɑ nkɛ́wɑ̃ri bɛ yètɛ̀ kɛ́túótɛ́ ibí ìì mɔ̀kɛ otɑ̃̀nkù kɛ́ndeètìnko kɛ̀ bɛ̀ mbo sikɔupípísìdɛ́ nɛ̀ sikɔupísìdɛ́ nɛ̀ sikɔusìdɛ́ nɛ̀ sipísìyiekɛ̀ nɛ̀ bɛ̀tɑ̃ɑ̃ti (22273).
\p
\v 44 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 45 Túótɛ́ Defiibɛ kɛ́cónnɛ́ Isidɑyɛɛribɛ bɛ̀ɛ̀ tu Mpo bɛ kó difɔ̃̀tìrì kɛ̀ nní mbɛ̀ te kɛ́túótɛ́ Defiibɛ kó iwũɔ̃ piɛ́ ìì bí ketiyì kɛ̀ ì tu idɑɑì kɛ́ceetɛnɛ̀ Isidɑyɛɛribɛ kpɛyi Defiibɛ, míì yó mbɛ̀ te, mí mbɛ Yiɛ̀ nKuyie. 
\v 46 Isidɑyɛɛribɛ bɛ̀ɛ̀ tu Mpo bɛ̀ɛ̀ nɔ̀ńkɛ́ Defiibɛ ĩ́nkɛ̀ sikɔusìdɛ́ nɛ̀ sipísìyiekɛ̀ nɛ̀ bɛ̀tɑ̃ɑ̃ti (273). 
\v 47 A cɔutɛ́ bɑ́ wè yuu ĩ́nkɛ̀ mɛdítíbii mmɛ̀nùmmù ìì kèétɛ́ mɛtɑummɛ̀ tou kpɛ́í. 
\v 48 Kɑ̀ɑ duɔ́ ndɛ kó idíítí Anɔɔ nɛ̀ o bí, kɛ̀ bɛ̀ɛ do mbɛ̀ɛ̀ tu Mpo bɛ̀ɛ̀ nɔ̀ńkɛ́.
\p
\v 49 Kɛ̀ Mɔyiisi cuɔ́ dɛ kó idíítí kɛ̀ bɛ̀ bo donnɛ̀ Isidɑyɛɛribɛ bɛ̀ɛ̀ tu Mpo bɛ̀ɛ̀ nɔ̀ńkɛ́. 
\v 50 Kɛ̀ bɛ̀ɛ ì cuɔ́ kɛ̀ ì ḿbo mɛdítíbii ntɛkɔupíítɛ̀ nɛ̀ sikɔusìtɑ̃ɑ̃ti nɛ̀ sipísìkuɔ̀ nɛ̀ mɛ̀nùmmù (1365) bɛ̀ do kèétɛ́ ìì díítí nyi mɛtɑummɛ̀ tou kpɛ́í. 
\v 51 Kòo ì duɔ́ nhAnɔɔ nɛ̀ o bí ti Yiɛ̀ nKuyie ndo tì nhò nɑ̀kɛ́ wenwe Mɔyiisi kɛ nyɛ̃ bɛ̀ɛ dɔɔ̀mɛ̀.
\c 4
\s1 Defiibɛ nɑɑ̀mùntì kɔbɛ kó mutɔ̃mmú
\s1 DÈÈNNÌ: Keɑti nɑɑ̀mùnkù kɔbɛ kó mutɔ̃mmú
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi nɛ̀ Anɔɔ kɛ dɔ̀: 
\v 2 Kɑɑnnɛ̀ Defiibɛ nɑɑ̀mùntì miɛkɛ Keɑti kó ibí bɛ nɑɑ̀mùntì dòmmɛ̀ nɛ̀ bɛ cɛ̃́ĩ, 
\v 3 kɛ́ketɛ́nɛ̀ bɛnitidɑɑbɛ̀ bɛ̀ɛ̀ mɔ̀kɛ yɛbie nsipísìtɑ̃ɑ̃ti kɛ́ntɔ kɛ́tuɔkɛnɛ̀ bɛ̀ɛ̀ mɔ̀kɛ yɛbie nsipísìnùmmù kɛ dò nkɛ́nɑ kɛ́pĩ́ mɛtɑummɛ̀ tou kó mutɔ̃mmú. 
\v 4 Keɑti nɑɑ̀mùntì kɔbɛ kó mutɔ̃mmú yó ntú bɛ̀ bo ndɑkɛmɛ̀ ikuɔ́ nɛntì kpɛ́í. 
\v 5 Kɛ̀ dɛ̀ níí tùɔ̀kɛ di bo ítɛ́mɛ̀ di bɑ̀tɛ́ dɛ̀ kɛ́sɔɔ́, Anɔɔ nɛ̀ o bí bɛ̀ɛ kɔtɛní kɛ́núntɛ́ kuyɑ̀ɑ̀kù kùù pi ikuɔ́ nɛntì kó kufɑ̃́ɑ̃́. 
\v 6 Bɛ̀ɛ kù pɔ̃ṹ mmɛtɑummɛ̀ tɔu. Kɛ̀ bɛ̀ dèè bɛ̀ɛ di dɑ́tínnɛ́ kukɔ̃̀nkperíkù kɛ́nɔ́ɔ́ nkuyɑ̀ɑ̀kù kùù wũ̀ɔ̃ tibedɛncɛ̃ɛ̃̀tì kɛ́ dì tɔ̃nnɛ́ ipɑ̀ɑ̀ti. 
\v 7 Kɛ̀ bɛ̀ dèè bɛ̀ɛ dɑ́tínnɛ́ kuyɑ̀ɑ̀kù kùù do wũ̀ɔ̃ tibedɛncɛ̃ɛ̃̀tì tɑ́bùrì bɛ̀ dɑkù dɛ̀ pɛ̃́ɛ̃̀bɛ̀ bɛ̀ m pɑ̃ɑ̃ mbɛ̀ mí ndi Yiɛ̀ nKuyie, kɛ́cɔ̃nnɛ́ yɛbɔ nɛ̀ ibòòkɛ nɛ̀ yɛbɔ yɛ̀ɛ̀ yĩɛ̃̀nnɛ̀ mɛniɛ nnɛ̀ yɛdíè nyikuɔ́ kó mɛnɑɑ̀ nhɔ̃ nhɑ̃ yɛ̀ɛ̀ miɛkɛ, bɛ̀ yó ndɛ ndɑkù pɛ̃́ɛ̃̀bɛ̀ bɛ̀ yó nni mpɑ̃ɑ̃ mbɛ̀ sɑ̃́ɑ̃̀. 
\v 8 Bɛ̀ɛ dɑ́tínnɛ́ dɛ ĩ́nkɛ̀ kuyɑ̀ɑ̀kù kùù wũ̀ɔ̃ tibedɛncɛ̃ɛ̃̀tì kɛ́nɔ́ɔ́ nkukɔ̃̀nkperíkù kɛ́tɔ̃nnɛ́ tɑ́bùrì kó ipɑ̀ɑ̀ti. 
\v 9 Kɛ̀ bɛ̀ dèè bɛ̀ɛ dɑ́tínnɛ́ tɛfitíkɛ̀kɛ̀tɛ̀ kuyɑ̀ɑ̀kù kùù wũ̀ɔ̃ tibedɛncɛ̃ɛ̃̀tì nɛ̀ yɛfitibɔ nɛ̀ dɛ kó siseú nɛ̀ dɛ̀ɛ̀ kounɛ̀ mutɑ́pɛí nnɛ̀ mɛkùɔ̀ ncũɔ̃̀ sìì bukúsí miɛkɛ. 
\v 10 Kɛ̀ bɛ̀ɛ dɛ̀ wɛ̃nnɛ́ kɛ́pɔ̃ṹ nkukɔ̃̀nkperíkù, kɛ́dɑɑ́ nkudɑbɛkù ĩ́nkɛ̀, 
\v 11 kɛ́dɑ́tínnɛ́ disɔɔwũɔ̃tɔ̀nnì kuyɑ̀ɑ̀kù kùù wũ̀ɔ̃ tibedɛncɛ̃ɛ̃̀tì kɛ nɔ́ɔ́ nkukɔ̃̀nkperíkù kɛ́tɔ̃nnɛ́ ipɑ̀ɑ̀ti. 
\v 12 Kɛ̀ bɛ̀ dèè bɛ̀ɛ túótɛ́ bɛ̀ pĩ̀ńnɛ̀ tìì nɛntì ikuɔ́ tɔ̃mmú kɛ́pɔ̃ṹ nkuyɑ̀ɑ̀kù kùù wũ̀ɔ̃ tibedɛncɛ̃ɛ̃̀tì nkɛ́nɔ́ɔ́ nkukɔ̃̀nkperíkù kɛ́ dɛ̀ wɛ̃nnɛ́ kɛ́dɑɑ́ nkudɑbɛkù ĩ́nkɛ̀. 
\v 13 Kɛ̀ bɛ̀ koutɛ́ diwũɔ̃tɔ̀nnì kó mutɑ́pɛí nkɛ dèè bɛ̀ɛ dì dɑ̀tínnɛ́ kuyɑɑ̀wũɔ̃kù, 
\v 14 bɛ̀ yóó dɛ ndɑɑ́ nyikuɔ́ nɛntì timɔu bɛ̀ tùɔ̀nnɛ̀ tì tihúúntì nɛ̀ simɑ́tìkũmpeé yɛnìì nkpɛsi nɛ̀ tikɑ̃penti nɛ̀ ibòòkɛ bɛ̀ mɛ̀ínɛ̀ ì mɛyĩ̀ĩ̀, diwũɔ̃tɔ̀nnì kó tinɛntì timɔu cɛ̃́nkɛ, kɛ́ dɛ̀ dɑ̀tínnɛ́ kukɔ̃̀nkperíkù kɛ́tɔ̃nnɛ́ ipɑ̀ɑ̀ti kɛ bo ndi tòúnɛ̀. 
\v 15 Anɔɔ nɛ̀ o bí kɛ̀ bɛ̀ pɔ̃ṹ ndìì mɔ̀nnì ikuɔ́ nɛntì kɛ dèè. Kɛ̀ dɛ̀ tùɔ̀kɛ di bo ítɛ́ dɛ̀ kɛ́sɔɔ́, Keɑti kó ibí kɔtɛní kɛ́ dɛ̀ tɔ, bɛ̀ nɛ́ bɑ́ɑ́ yie nkɛ̀ bɛ nɔ̀ùtɛ̀ɛ kɑ́ɑ́kɛ́ ikuɔ́ nɛntì, kɛ̀ bɛ̀ tì kɑ̀ɑ́kɛ́ bɛ̀ yóó kúmu. Bɛ kó mutɔ̃mmú tú bɛ̀ bo ntɔumɛ̀ ikuɔ́ nɛntì. 
\v 16 Kɛ̀ ikuɔ́ nìùtì Anɔɔ birɛ Edeɑsɑɑ yie kó mutɔ̃mmú yó ntú ò bo ndɑkɛmɛ̀ mmɛ tɛfitíkɛ̀kɛ̀tɛ̀ kó mɛkùɔ̀ nkpɛ́í nɛ̀ tihúúntì kufɔ̃ɔ̃ku kpɛti. Nɛ̀ tidiitì bɛ̀ m pɑ̃ɑ̃ ntì yɛwe yɛmɔu nɛ̀ mɛkùɔ̀ mbɛ̀ ɔ̃ɔ̃ cóú mmɛ̀ onìtì yoo dɛ̀mɑrɛ̀ kɛ́ dɛ̀ cɑ̃̀ńnɛ́ n tɔ̃mmú kpɛ́í. Weè yó ndɑkɛ mɛtɑummɛ̀ tou dimɔu kpɛ́í nnɛ̀ dɛ̀ɛ̀ kó dimɑ̀ɑ̀ bo di miɛkɛ nɛ̀ ikuɔ́ nɛntì timɔu.
\p
\v 17 Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi nɛ̀ Anɔɔ kɛ dɔ̀: 
\v 18 Dí ndɑkɛ kɛ̀ Keɑti nɑɑ̀mùnkù kɔbɛ bɑ́ɑ́ kú. 
\v 19 Ntɛnɛ̀ di bo yĩ́mɛ̀ kɛ̀ dɛ̀ɛ yie nkɛ̀ bɛ̀ bɑ́ɑ́ kɑ́ɑ́kɛ́ ikuɔ́ nɛntì tìì bo kufɑ̃́ɑ̃́ mmiɛkɛ kɛ́kú. Anɔɔ nɛ̀ o bí bɛɛ̀ yóó bɛ̀ bɛnkɛ bɑ́ wè o tɔ̃mmú nɛ̀ ò yó ntɔu tìì nɛntì. 
\v 20 Di bɑ́ɑ́ yie nkɛ̀ bɛ̀ɛ yɑ̀ ikuɔ́ nɛntì tìì bo kufɑ̃́ɑ̃́, kɛ̀ bɛ̀ tì yɑ̀ bɑ́ sɑ́m̀pɔ́ bɛ̀ kumu.
\s1 DƐ́Ɛ́NNÍ: Kɛdisonni nɑɑ̀mùntì kɔbɛ kó mutɔ̃mmú yó ntú mù
\p
\v 21 Kɛ̀ ti Yiɛ̀ nKuyie nyíɛ́ kɛ́bɛ́innɛ̀ Mɔyiisi kɛ dɔ̀: 
\v 22 Kɑɑ nKɛrisonni kɔbɛ bɛ nɑɑ̀mùntì dò ndòmmɛ̀ nɛ̀ bɛ cɛ̃́ĩ. 
\v 23 Á kɑɑ mbɛnitidɑɑbɛ̀ bɛ̀ɛ̀ kó dimɑ̀ɑ̀ mɔ̀kɛ yɛbie nsipísìtɑ̃ɑ̃ti kɛ́ntɔ kɛ́tuɔkɛnɛ̀ sipísìnùmmù kɛ dò nkɛ́nɑ kɛ́pĩ́ mmɛtɑummɛ̀ tou kó mutɔ̃mmú. 
\v 24 Ntɛ Kerisonni nɑɑ̀mùntì kɔbɛ kó mutɔ̃mmú yó ntú mù nɛ̀ bɛ̀ yó ntɔu dɛ̀. 
\v 25 Bɛ̀ yó ntɔu mɛtɑummɛ̀ tou kó tiyɑ̀ɑ̀tì nti, kuyɑ̀ɑ̀kù kùù ɔ̃ɔ̃ di dɑ̀tínnɛ́ nɛ̀ dɛ kó kukɔ̃̀nkù nɛ̀ kuyɑ̀ɑ̀kù kùù ɔ̃ɔ̃ kpetínnɛ́ mɛtɑummɛ̀ tou kó dibòrì. 
\v 26 Nɛ̀ kuyɑ̀ɑ̀kù kùù fitɛ́ mɛtɑummɛ̀ tou nɛ̀ diwũɔ̃tɔ̀nnì nɛ̀ kùù kpetí dɛ kó kudɑ̀nkù kó dibòrì nɛ̀ iwɛ̃ĩ bɛ̀ ɔ̃ɔ̃ núnnɛ́ ì kuyɑ̀ɑ̀kù nɛ̀ ikuɔ́ nɛntì timɔu tìì pĩĩnnɛ̀ ikuɔ́ tɔ̃mmú. Bɛɛ̀ yó nte dɛ kó mutɔ̃mmú. 
\v 27-28 Anɔɔ nɛ̀ o bí bɛɛ̀ yó mbɛnkú Kerisonni nɑɑ̀mùntì kɔbɛ bɛ kó mutɔ̃mmú nɛ̀ bɛ̀ yó ntɔu tìì nɛntì, kɛ̀ Itɑmɑɑ ikuɔ́ nìùtì Anɔɔ birɛ mbɛ̀ ni.
\s1 TÃÃTI: Bɛ̀ kɑɑ̀mmɛ̀ Mɛdɑdi nɑɑ̀mùnkù kɔbɛ
\p
\v 29 Kɛ̀ ti Yiɛ̀ nKuyie nyíɛ́ kɛ́bɛ́innɛ̀ Mɔyiisi kɛ dɔ̀: Kɑɑ Mɛdɑdi kɔbɛ bɛ nɑɑ̀mùntì nɛ̀ bɛ cɛ̃́ĩ dò ndòmmɛ̀. 
\v 30 Á kɑɑ̀ mbɛnitidɑɑbɛ̀ bɛ̀ɛ̀ mɔ̀kɛ yɛbie nsipísìtɑ̃ɑ̃ti kɛ́ntɔ kɛ́tuɔkɛnɛ̀ yɛbie nsipísìnùmmù kɛ dò nkɛ́nɑ kɛ́pĩ́ mɛtɑummɛ̀ tou kó mutɔ̃mmú. 
\v 31 Ntɛ bɛ kó mutɔ̃mmú yó ntú mù: Bɛɛ̀ yó nte bɛ̀ bo ntɔumɛ̀ mɛtɑummɛ̀ tou kó tidɑbɛɛtì nɛ̀ di kó ipɑ̀ɑ̀ti nɛ̀ di kó yɛsɑ̃ǹkɛ̀ nɛ̀ yɛ kó yɛtɛitiyɛ̀, 
\v 32 yɛsɑ̃ǹkɛ̀ yɛ̀ɛ̀ fitɛ́ mɛtɑummɛ̀ tou kó kudɑ̀nkù nɛ̀ yɛ kó yɛtɛitiyɛ̀ nɛ̀ dɛ kó ibɑɑkɛ́ nɛ̀ dɛ kó iwɛ̃ĩ nɛ̀ dɛ kó tinɛntì timɔu. Dí bɛnkɛ bɑ́ wè ò dò nkɛ́ntɔu tìì nɛntì. 
\v 33 Mɛdɑdi nɑɑ̀mùntì kɔbɛ kó mutɔ̃mmú mmu bɛ̀ yó mpĩ́ mmù mɛtɑummɛ̀ tou miɛkɛ. Itɑmɑɑ ikuɔ́ nìùtì Anɔɔ birɛ, weè yó mbɛ̀ ni dɛ kó mutɔ̃mmú miɛkɛ.
\s1 Bɛ̀ kɑ̀ɑmmɛ̀ Defiibɛ bɛ̀ɛ̀ pĩ mmɛtɑummɛ̀ tou kó mutɔ̃mmú
\p
\v 34-49 Mɔyiisi nɛ̀ Anɔɔ nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ kɑɑ nDefiibɛ bɛ nɑɑ̀mùntì nɛ̀ bɛ cɛ̃́ĩ dò ndòmmɛ̀. Keɑti nɑɑ̀mùntì kɔbɛ nɛ̀ Kɛrisonni nɑɑ̀mùntì kɔbɛ nɛ̀ Mɛdɑdi nɑɑ̀mùntì kɔbɛ, kɛ́ketɛ́nɛ̀ bɛ̀ɛ̀ mɔ̀kɛ yɛbie nsipísìtɑ̃ɑ̃ti kɛ́ntɔ kɛ́tuɔkɛnɛ̀ yɛbie nsipísìnùmmù kɛ dò nkɛ́pĩ́ mmɛtɑummɛ̀ tou kó mutɔ̃mmú. Kuyie ndo nɑ̀kɛ́ Mɔyiisi nwe kòo duɔ́ nkɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo:
\q1 Keɑti nɑɑ̀mùntì kɔbɛ sikɔupísìdɛ́ nɛ̀ sikɔusìyiekɛ̀ nɛ̀ sipísìnùmmù (2750).
\q1 Kɛrisonni nɑɑ̀mùntì kɔbɛ sikɔupísìdɛ́ nɛ̀ sikɔusìkuɔ̀ nɛ̀ sipísìtɑ̃ɑ̃ti (2630).
\q1 Mɛdɑdi nɑɑ̀mùntì kɔbɛ sikɔupísìtɑ̃ɑ̃ti nɛ̀ sikɔusìdɛ́ (3200).
\q1 Bɛmɔu kɛ̀ bɛ̀ɛ wɛ̃nnɛ́ kɛ́mbo sikɔupísìni nɛ̀ sikɔusìnùmmù nɛ̀ sipísìni (8580).
\p Kɛ̀ bɛ̀ɛ bɛ̀ nɑ̀kɛ́ bɛ̀ dò nkɛ́pĩ́ mmùù tɔ̃mmú nɛ̀ tinɛntì bɛ̀ dò nkɛ́ntɔu tì, ti Yiɛ̀ nKuyie ndo ti nɑ̀kɛ́ Mɔyiisi kɛ yɛ̃ ndɛ̀ ndòmmɛ̀.
\c 5
\s1 Dɛ̀ɛ̀ bo nte kɛ̀ bɛ̀ɛ dennɛ onìtì Isidɑyɛɛribɛ cuokɛ̀
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Nɑ́kɛ́ Isidɑyɛɛribɛ kɛ tú kɛ̀ tikɔ̀ntì pĩ nhòmɔù yoo ò tùɔ̀ti yɛfɔtɛ̀ yoo ò kɑ̀ɑ́kɛ́ ocíì. 
\v 3 Kòo nitidɔ̀ù nwe yoo onitipòkù dí ò bɛ̀ti kóò dènnɛ di kó dikɑrì. Kɛ̀ dɛ̀ɛ yie ndíndi Isidɑyɛɛribɛ kɛ̀ di bɑ́ɑ́ sĩnkùnnɛ di kó dikɑrì, m borɛ̀ di cuokɛ̀.
\p
\v 4 Kɛ̀ Isidɑyɛɛribɛɛ dɔɔ̀ ti Yiɛ̀ nKuyie nnɑ̀kɛ́ tì Mɔyiisi bɛ kpɛ́í kòò tì mbɛ̀ nɑ̀kɛ́, kɛ́mbɛtì bɛ kó dikɑrì bɛ̀ɛ̀ kó dimɑ̀ɑ̀ sĩ̀ntɛ.
\s1 A bo tũntɛmɛ̀ ɑ cɑɑ̀rìmɛ̀
\p
\v 5 Mɛm̀mɛ kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 6 Nɑ́kɛ́ Isidɑyɛɛribɛ kɛ tú: Kòò mɔù cɑ̀ɑ̀rɛ̀ o kou tɔù kpɛrɛ yoo ò dɔ̀ɔ̀ mɛyɛi mmɑmɛ̀, ò cɑ̀ɑ̀rɛ̀ mí ndi Yiɛ̀ nKuyie mmí nwe. 
\v 7 Wèe dɑ́ɑ ndɛ kó mɛyɛi nhò dɔ̀ɔ̀ mɛ̀ kɛ́tɛ̃́nnɛ́ ò cɑ̀ɑ̀rɛ̀ dɛ̀ dɛ yiɛ̀, kɛ́nɔ́ɔ́ nkɛ̀ dɛ̀ mmɑnɛ̀ ò cɑ̀ɑ̀rɛ̀ dɛ kó mɛtotímɛ̀ yɛwɛ́tiyɛ̀ yɛ̀nùmmù kó dìmɑ́ɑ̀. 
\v 8 Kɛ̀ bɛ̀ cɑ̀ɑ̀rɛ̀ wè mɛ nkumu kɛ í mɔkɛ o cɛ̃dɛ́tɛ̀ kou, bɛ̀ nɑ nhò yietí dɛ̀, bɛ̀ɛ dɛ̀ duɔ́ mmí ndi Yiɛ̀ nKuyie nkɛ̀ ikuɔ́ nìùtìi dɛ̀ tùótɛ́, kɛ nɛ́ mbúútí dipedɑɑ̀ mɛyɛi nhũtímù kpɛri, ò yóó dɔɔ̀nɛ̀ dì mɛwénkùmɛ̀ kó ikuɔ́. 
\v 9 Kɛ̀ Isidɑyɛɛribɛ níí dɛ̀itɛ dɛ̀mɑrɛ̀ dɛ̀ɛ̀ tu n kpɛrɛ dɛ miɛkɛ kɛ duɔ́ nyikuɔ́ nìùtì o kpɛrɛ ndɛ, n yɛ̃ ndi mbɛ̀ duɔ̀ ndɛ̀ndɛ. 
\v 10 Kɛ̀ bɛ̀ cɑ̃̀ńnɛ́ dɛ̀ n kpɛ́í bɛ̀ɛ dɛ̀ duɔ́ nyikuɔ́ nìùtì, kɛ̀ bɛ̀ duɔ́ ndɛ̀ ikuɔ́ nìùtì o kpɛrɛ ndɛ.
\s1 Ikuɔ́ ìì tukúnɛ̀ bɛ̀ bo wɑ́tímɛ̀ onitipòkù kɛ dɔ̀ ò dɔuti dɔutinɛ̀ bɛnitidɑɑbɛ̀
\p
\v 11 Kɛ̀ ti Yiɛ̀ nKuyie m bɛ́innɛ̀ Mɔyiisi kɛ dɔ̀: 
\v 12 Nɑ́kɛ́ Isidɑyɛɛribɛ kɛ dɔ̀: Kòo mɔù kóo pokù dɔuti dɔutinɛ̀ bɛnitidɑɑbɛ̀, 
\v 13 kɛ duɔ́nɛ̀ onitidɔ̀ù mɔù kòo dɔù í bɛ̀ sɔ̃̀ńkɛ́, kòò sɑ̃ũ nhomɑ́ɑ̀ bɑ́ òmɔù í ò yɑ̀, bɛ̀ mɛ nyí ò sɔ̃̀ńkɛ́ bɛ̀ duɔ́ dɛ̀, 
\v 14 yoo kòo dɔù yɛ̀mmɛ̀ mɛɛ̀ mɛ yetɛ kòò ò wɑ́tìrì dɛtetìrɛ̀, yoo ò mɛ̀nkɛ dɛ̀ dɔ̀ɔ̀mu. 
\v 15 Kɛ̀ dɛ̀ tùɔ̀kɛní kɛ dò mmɛ botí dɛ yiɛ̀ nkɔtɛnɛ̀ o pokù ikuɔ́ nìùtì borɛ̀, kɛ́ntɔnɛ̀ muyuo ncìdóòbɛ̀ bɛ̀tɑ̃ɑ̃ti, ò bɑ́ɑ́ mù yɔɔrɛ mɛkùɔ̀ nyoo tihúúntì, kɛ yɛ̃́ dɛ̀ tumɛ̀ mɛpútímɛ̀ kó mɛdɔɔ̀rìmɛ̀ mmɛ, mɛɛ̀ yóó bɛnkɛ bɛ̀ wɑ́tìrì wè dɔ̀ɔ̀mɛ̀ mɛyɛi nyoo ò í mɛ̀ dɔ̀ɔ̀. 
\v 16 Ikuɔ́ nìùtìi kɔtɛnɛ̀ dɛ kóo nitipòkù mí ndi Yiɛ̀ nKuyie ncĩ́ɛ̃̀tɛ̀ kóò còńnɛ́ n yììkɛ̀. 
\v 17 Kɛ̀ ikuɔ́ nìùtìi yɑutɛ́ ikuɔ́ kó mɛniɛ ndibuu miɛkɛ kɛ́yɛ̃tɛ́ n cĩ́ɛ̃̀tɛ̀ kó mutɑ̃́ɑ̃́ nkɛ́ɑ̃nnɛ́ dɛ miɛkɛ, 
\v 18 kɛ́cónnɛ́ onitipòkù n yììkɛ̀ kɛ́dɑ́tɛ́ o yuu kuyɑ̀ɑ̀kù, kɛ́duɔ́ nkòo ceé nho nɔu, kòo ɑ̃nnɛ́ mɛpútímɛ̀ kó muyuo nhò dɔù wɑɑnní mù kɛ bo ò yɑ̀ɑ́kɛ́nɛ̀, kɛ̀ ikuɔ́ nìùtì mɔ́mmuɔ nní ntɔ mɛnɛ́tiimɛ mɛ̀ɛ̀ tɔuní mɛyɛi. 
\v 19 Dɛ mɔ̀nnì kɛ̀ ikuɔ́ nìùtìi bɛ́i nhonitipòkù ììkɛ̀ kɛ dɔ̀: Kɛ̀ nsɑ̀ kɑ̀ɑ í duɔ́nɛ̀ onitidɔ̀ù tɔù, kòò mɔù í dɑ yùúkú kɛ duɔ́nɛ̀ kɛ dɑ sɑ̃ũ, mɛnɛ́tiimɛ miɛ̀ mmɛ̀ɛ̀ tɔ kusĩ̀nkù mɛ̀ bɑ́ɑ́ dɑ tɔní mɛyɛi mmɑmɛ̀. 
\v 20 Kɑ̀ɑ mɛ nduɔ́nɛ̀mu onitidɔ̀ù tɔù, kɛ soú nkɛ̀ dɛ̀ tu mɔ́mmuɔ nwe onitidɔ̀ù tɔù dɑ duɔ́nɛ̀mɛ̀, 
\v 21 ti Yiɛ̀ nKuyie ndɑ cɔ̃ɔ̃ kɑ̀ɑ nitipòtìi kṹṹ kɑ̀ɑ nɑɑ́ ntɛhɑ̃ũntɛ, kɛ́suɔ nkɛ́nɑɑ́ ndibɛnkɛ̀rì, kɑ̀ɑ botí kɔbɛ níí nnɑ́ɑ́ nhɑ kpɛ́í mbɛ̀ dɔ́ dìì mɔ̀nnì kɛ́pɑrìkɛ̀. 
\v 22 Kɛ̀ mɛniɛ mmiɛ̀ ntɑ ɑ pɔutì ɑ nitipòtìi kṹṹ kɑ̀ɑ suɔ. Kòo nitipòkùu cɔ́útɛ́ kɛ dɔ̀: Dɛ̀ mmɛ ndò.
\p
\v 23 Kɛ̀ ikuɔ́ nìùtìi wɑ̃ri yɛtɑnnɔ̀ yɛiyɛ ò bɛ́i nyɛ̀ kɛ́ yɛ̀ ɔ̀útɛ́nɛ̀ mɛnɛ́tiimɛ, 
\v 24 kɛ bo nii nhonitipòkù dɛ kó mɛnɛ́tiimɛ mɛmmɛ mɛ̀ɛ̀ tɔuní mɛyɛi nkòo yɑ̃̀ dɛ kó mɛnɛ́tiimɛ. 
\v 25 Kɛ̀ ikuɔ́ nìùtìi cɔutɛ́ muyuo mɛpútímɛ̀ kɔ̃mu kɛ́ mù bɛnkɛ ti Yiɛ̀ nKuyie kɛ́ mù kɔ̀tɛnɛ̀ diwũɔ̃tɔ̀nnì borɛ̀, 
\v 26 kɛ́fɔ́ɔ́tɛ́ dɛ kó muyuo nkɛ̀ mù ndò ndibɛnkɛ̀rì kòo mù tùɔ ndiwũɔ̃tɔ̀nnì ĩ́nkɛ̀ kɛ nɛ́ nɑ kɛ́nii ndɛ kó mɛniɛ nhonitipòkù. 
\v 27 Kòò mɛ̀ yɑ̃̀ kɛ sɔ̃́ nhò mɛ̀nkɛ duɔ́nɛ̀mu onitidɔ̀ù tɔù kɛ soú, kɛ̀ dɛ kó mɛnɛ́tiimɛ mɛ̀ɛ̀ tɔ kusĩ̀nkù tɑ o pɔutì mɛ̀ bo nte kòo nitipòtìi kṹṹ, kòo nɑɑ́ ntɛhɑ̃ũntɛ, kɛ́suɔ nkɛ́nɑɑ́ ndibɛnkɛ̀rì kòo botí kɔbɛ níí bɛ́i nho kpɛ́í bɛ̀ dɔ́ dìì mɔ̀nnì kɛ́pɑrìkɛ̀. 
\v 28 Kɛ̀ dɛ̀ mɛ nsɔ̃́ nhò í duɔ́nɛ̀ onitidɔ̀ù tɔù kɛ dò mpɑ́í pɑ́í kɛ̀ dɛ̀ sɔ̃́ nhò í sɑ̃ũ omɑ́ɑ̀ mɛyɛi mmɑmɛ̀ bɑ́ɑ́ ò tùɔ̀kɛní kòò nsɔkɛ́ kɛ pɛí ibí.
\p
\v 29 Dɛ kó ikuɔ́ tú mɛpútímɛ̀ kpɛyi nyi, kɛ tukúnɛ̀ onitipòkù wèè bo nye nkòo nitidɔ̀ù tɔùu ò duɔ́nɛ̀ kóò sĩ̀nkùnnɛ. 
\v 30 Kɛ̀ dɛ̀ mɛ ndò nhonitipòkù í dɔ̀ɔ̀ dɛ̀mɑrɛ̀ kòo dɔù yóù mɛ̀ɛ̀ kpɛ́í nho ĩ́nkɛ̀ kɛ̀ dɛɛ̀ te, kòò ò kɔ̀tɛnɛ̀ ikuɔ́ nìùtì borɛ̀ kɛ̀ ikuɔ́ nìùtì ò dɔ̀ɔ̀ dɛ kó ikuɔ́. 
\v 31 Bɛ̀ í yóó sɛi nhonitidɔ̀ù ò wɑ̀tí mɛ̀ɛ̀ kpɛ́í nho pokù, kòo nitipòkù mɛ mmɛ̀nkɛ mɛ dɔ̀ɔ̀mu weè yóó tɔ dɛ kó mucɔ̃́ntimu.
\c 6
\s1 Bɛ̀ɛ̀ cɑ̀nnɛnɛ̀ Kuyie ndinùù bɛ kó ikuɔ́
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Nɑ́kɛ́ Isidɑyɛɛribɛ kɛ tú n yɛ̃ nkòo nitidɔ̀ù yoo onitipòkù n cɑ̀nnɛnɛ̀ dinùù kɛ bo soó ntiyùtì kɛ̀ dɛ̀ɛ bɛnkɛ ò n cɑ̀nnɛmɛ̀ dinùù. 
\v 3 Ò bɑ́ nyɔ̃̀ mmɛnɑɑ̀ mbɛ̀ tumɛ̀ difɛ̃́ɛ̃̀ nɛ̀ mɛtɛ̃mɛ̀ mɛ̀ɛ̀ muɔ̀, ò bɑ́ nyɔ̃ mmɛnɑcɛ́duo, kɛ̀ bɛ̀ nìú fínyĩ̀ kó yɛbɛ ò bɑ́ɑ́ yɑ̃̀ dɛ kó dinɑɑbɛ́nnì, ò mɛ mbɑ́ɑ́ cɑ́ɑ́kɛ́ fínyĩ̀ kó yɛbɛ sũ̀ũ̀yɛ̀ yoo yɛkperɛ̀. 
\v 4 Dɛ kó yɛwe wè n cɑ̀nnɛnɛ̀ yɛ̀ dinùù yɛ miɛkɛ, ò bɑ́ɑ́ di fínyĩ̀ kpɛrɛ mɑrɛ̀, yɛtebɛ kó tiwɛ́ɛ́tì yoo yɛ kó mɛbii. 
\v 5 Dɛ kó yɛwe ò n cɑ̀nnɛnɛ̀ yɛ̀ dinùù yɛ miɛkɛ kuponkù bɑ́ɑ́ kɑ́ɑ́kɛ́ o yuu yoo o dɛɛ̀nfɛ̀ kɛ̀ dɛ kó yɛwe ò n cɑ̀nnɛnɛ̀ yɛ̀ dinùù yɑ̀ɑ deènɛ̀. 
\v 6 Dɛ kó yɛwe ò n cɑ̀nnɛnɛ̀ yɛ̀ dinùù yɛ miɛkɛ ò bɑ́ɑ́ tɔ́ɔ́nnɛ̀ ocíì. 
\v 7 Kòo cicɛ nwe yoo o yɔ̃ yoo o kóo kótì yoo o nɑntɛ̀ yoo o tɑ̃ũ̀ ò bɑ́ɑ́ ò tɔ̀ɔ́nnɛ̀, kɛ́sĩnkùnnɛ omɑ́ɑ̀. Ò cɑ̃̀ɑ̃́mmu n kó mutɔ̃mmú kpɛ́í kɛ sokɛ́ tiyùtì.
\p
\v 8 Ò sokɛ́ yɛ̀ɛ̀ we tiyùtì yɛ miɛkɛ ò cɑ̃̀ɑ̃́mmu n kó mutɔ̃mmú kpɛ́í. 
\v 9 Kɛ̀ dɛ̀ mɛ ndò nhòmɔù ku o tɑkɛ́ mɛtòntòmmɛ̀ kɛ sĩ̀nkùnnɛ o yùtì diyiè yiénnì yiè wèe kuó o yùtì kɛ́wénkùnnɛ omɑ́ɑ̀. 
\v 10 Diyiè niínnì yiè kɛ́wɑɑ́ nsinɔ́nkpeé sìdɛ́sì yoo yɛkpɛtìnɔ́nkperɛ kó yɛpɑ̀ɑ̀ nyɛ̀dɛ́ɛ̀ kɛ́ dɛ̀ duɔ́ nyikuɔ́ nìùtì mɛtɑummɛ̀ tou bòrì nùù. 
\v 11 Kɛ̀ ikuɔ́ nìùtìi féútɛ́ tɛ̀mɑ́ɑ̀ mɛyɛi n cĩ́ɛ̃́mmɛ̀ kpɛ́í, kɛ́féútɛ́ tɛtɛtɛ̀ kɛ́tuɔ nkɛ́deè kóò dɔ̀ɔ̀ ikuɔ́ mɛwénkùmɛ̀ kpɛyi, kóò wénkùnnɛ ò tɔ̀ɔ́nnɛ́mɛ̀ ocíì kɛ sĩ̀ntɛ. Dɛ kó diyiè kòo wɛ̃tɛ kɛ́nɑɑ́ nwèè cɑ̃̀ɑ̃́. 
\v 12 Kòo wɛ̃tɛ kɛ́cɑ̃́nnɛ́ omɑ́ɑ̀ mɛpɑ̀mmɛ̀ kɛ́soó ntiyùtì kɛ́wɑɑ́ ndipedɑbii dìì mɔ̀kɛ dibenni dìmɑ́ɑ̀ kɛ dì nni nféútɛ́ mɛyɛi nhũtímù kpɛ́í, yɛwe yɛ̀ɛ̀ pɛ̃ɛ̃tɛ́ yɛ̀ tɛ̃́nkɛ í kɑɑ̀ nkɛ yɛ̃́ ò sòò sĩ̀nkùnnɛmɛ̀ o yùtì.
\p
\v 13 Ntɛ wèè n cɑ̀nnɛnɛ̀ dinùù dɛ kó ikuɔ́ yó ndòmmɛ̀, kɛ̀ dɛ kó yɛwe dèè dìì mɔ̀nnì wèe kɔtɛ mɛtɑummɛ̀ tou, 
\v 14 kɛ́ntɔnɛ̀ o wũɔ̃ ò yó n féútɛ́ ì dipedɑbii dìì mɔ̀kɛ dibenni dìmɑ́ɑ̀ kɛ kpɑ kuyɛ̀nkù kɛ́ dì nni nféútɛ́ kɛ́tuɔ, nnɛ̀ dipesɛrì dìì mɔ̀kɛ dibenni dìmɑ́ɑ̀ kɛ kpɑ kuyɛ̀nkù kɛ dì nni nféútɛ́ mɛyɛi ncĩ́ɛ̃́mmɛ̀ kpɛ́í nnɛ̀ dipedɑɑ̀ dìì kpɑ kuyɛ̀nkù mɛtɑummɛ̀ kpɛ́í. 
\v 15 Muyuo nsɑ̀ɑ̀mù bɛ̀ ɑ̃̀ntɛnɛ̀ mù mɛkùɔ̀ nkó yɛkɑ̀tìndɑ̀ dɛmɔ́mbirɛ nɛ̀ muyuo mmùù í kɔɔrɛnɛ̀ mutie mùù muuti pɛ̃́ɛ̃̀ mu kó tipɛ̃́mpɛ̃ńtì kɛ́ tì wɑɑrɛ mɛkùɔ̀ nnɛ̀ muyuo, ò yó m pɑ̃ mù nɛ̀ mɛnɑɑ̀ mbɛ̀ ɔ̃ɔ̃ yɔɔrɛ mɛ̀. 
\v 16 Kòo dɛ̀ tɔo dɛmɔu mɛtɑummɛ̀ tou borɛ̀, kɛ̀ ikuɔ́ nìùtìi dɛ̀ nni mbɛnkɛ kɛ́féútɛ́, mɛyɛi ncĩ́ɛ̃́mmɛ̀ kó fɛɔ̃̀fɛ̀ nɛ̀ fɛ̀ɛ̀ yóó tuɔ nhò n cɑ̀nnɛnɛ̀ dìì nùù kpɛ́í. 
\v 17 Kòò dèè ò n féútɛ́ dipedɑɑ̀ mɛtɑummɛ̀ kpɛ́í nkɛ́ n duɔ́ mmuyuo mmùù í kɔɔrɛnɛ̀ mutie mùù muuti mu kó yɛkɑ̀tìndɑ̀ dɛmɔ́mbirɛ, kɛ̀ ikuɔ́ nìùtì n duɔ́ ndɛ kó dipɑ̃nnì kɛ́ di yɔɔrɛ mɛnɑɑ̀. 
\v 18 Kòò dèè, wèè n cɑ̀nnɛnɛ̀ dinùù wèe kuó o yùtì mɛtɑummɛ̀ tou bòrìnùù, kɛ́túótɛ́ o yùtì ò kuó tì kɛ́wɛ̃nnɛ́nɛ̀ mɛtɑummɛ̀ kó fɛɔ̃̀fɛ̀ kɛ́cɔ́u. 
\v 19 Kɛ̀ ikuɔ́ nìùtìi túótɛ́ dipedɑɑ̀ kó kubɑkù kùù bèńnɛ́ kɛ́dɛitɛ muyuo mmùù í kɔɔrɛnɛ̀ mutie mùù muuti mu kó dikɑ̀tìndɑ̀ɑ̀ dìmɑ́ɑ̀ dɛmɔ́mbirɛ miɛkɛ nɛ̀ mu kó kupɛ̃́mpɛ̃ńkù kùmɑ́ɑ̀, kɛ́ dɛ̀ duɔ́ nwèè n cɑ̀nnɛnɛ̀ dinùù ò kuó dìì mɔ̀nnì o yùtì kɛ dèè. 
\v 20 Ikuɔ́ nìùtì mɔ́mmuɔ nwèè yóó dɛ̀ bɛnkɛ mí ndi Yiɛ̀ nKuyie nkɛ́dɔɔ̀ dɛ kó ikuɔ́, o kpɛrɛ ndɛ kɛ nɛ́ mbúútí dicĩ̀ncĩ̀nnì kó kumɑɑ ndi yòutɛ kù kɛ m bɛnkɛ nɛ̀ dikpèrì bɛ̀ cɑ̃̀ńnɛ́ dì. Dɛ mɔ̀nnì wèè n cɑ̀nnɛnɛ̀ dinùù ò bo nɑ kɛ́wɛ̃tɛ kɛ́yɑ̃̀ mɛnɑɑ̀.
\p
\v 21 Wèè cɑ̀nnɛnɛ̀ mí ndi Yiɛ̀ nKuyie ndinùù o kó ikuɔ́ nyi mɛmmɛ nɛ̀ ò dò nkɛ́kuɔ ìì wũɔ̃ ò dɔ́ kɛ́kuó dìì yie, kòò mɔ̀kɛ yɛpɑ̃rɛ̀ kɛ bo yíɛ́, dɛ̀ í yetɛ, ò nɛ́ dò nkɛ́dɔɔ̀mu o korimù yiè ò n cɑ̀nnɛnɛ̀ dìì nùù kó ikuɔ́ bekɛ́ dɛ̀.
\s1 Ikuɔ́ nìùtì níí bo pɑ̃ mɛ̀ɛ̀ botí Kuyie nkó mɛsɑ̀ɑ̀ mbɛnìtìbɛ̀
\p
\v 22 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 23 Nɑ́kɛ́ Anɔɔ nɛ̀ o bí kɛ tú n yɛ̃ mbɛ̀ níí pɑ̃ mɛsɑ̀ɑ̀ n kó bɛnìtìbɛ̀ Isidɑyɛɛribɛ kɛ dɔ̀:
\q1
\v 24 Ti Yiɛ̀ nKuyie ndi dɔɔ̀ mɛsɑ̀ɑ̀ nkɛ́ ndi kɑ̃nkɛ́!
\q1
\v 25 Ti Yiɛ̀ nKuyie ndi wéntɛ́ fɛnɔnsɑ̀ɑ̀fɛ̀ kɛ́ di pɑ̃ diwɛ̀ì!
\q1
\v 26 Ti Yiɛ̀ nKuyie nwéntɛ́ní di bíɛ́kɛ̀ kɛ dí duɔ́ ndiwɛ̀ì!
\m
\v 27 Bɛ̀ níí yóó mɛ nyú n yètìrì Isidɑyɛɛribɛ ĩ́nkɛ̀ kɛ̀ ḿ bɛ̀ dɔ̀ɔ̀ mɛsɑ̀ɑ̀.
\c 7
\s1 Bɛ̀ do pɑ̃ sìì nɑɑsɛ̃ĩ́ mɛtɑummɛ̀ tou kó mutɔ̃mmú kpɛ́í
\p
\v 1 Mɔyiisi dèè dìì mɔ̀nnì mɛtɑummɛ̀ tou kó mudɔɔ̀rìmù kɛ́ dì còú mmɛkùɔ̀ nkɛ́ dì cɑ̃̀ńnɛ́ nɛ̀ di nɛntì timɔu nɛ̀ diwũɔ̃tɔ̀nnì nɛ̀ di kó tinɛntì timɔu. Ò dɛ̀ còú ndìì mɔ̀nnì mɛkùɔ̀ nkɛ dɛ̀ cɑ̃̀ńnɛ́ kɛ dèè, 
\v 2 dɛ yiè kɛ̀ Isidɑyɛɛribɛ cɛ̃́ĩ kó bɛkótíbɛ̀ bɛ̀ɛ̀ bɑkɛ́ bɛ nɑɑ̀mùntì bɛ̀ɛ̀ do ni mukɑ̀mmù kó mutɔ̃mmú kɛ̀ bɛ̀ɛ pɑ̃mmú yɛpɑ̃rɛ̀. 
\v 3 Kɛ̀ bɛ̀ɛ tɔní bɛ pɑ̃rɛ̀ mɛtɑummɛ̀ tou ti Yiɛ̀ nKuyie nyììkɛ̀, sinɑɑsɛ̃ĩ́ sìkuɔ̀ kɛ sì dɑ̀ɑ́tí tiyɑ̀ɑ̀tì nɛ̀ inɑ̀ɑ̀kɛ tɛpíítɛ̀ nɛ̀ ìdɛ́ì, bɛkótíbɛ̀ bɛ̀dɛ́bɛ̀, tɛnɑɑsɑ̃ntɛ̀ tɛ̀mɑ́ɑ̀, bɑ́ wè fɛnɑ̀ɑ̀fɛ̀ fɛ̀mɑ́ɑ̀. Kɛ̀ bɛ̀ɛ dɛ̀ tɔní dɛmɔu mɛtɑummɛ̀ tou borɛ̀. 
\v 4 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 5 Cɔutɛ́ dɛ bɛ borɛ̀, kɛ́ dɛ̀ duɔ́ mmɛtɑummɛ̀ tou mí ndi Yiɛ̀ nKuyie n tɔ̃mmú kpɛ́í. Á dɛ̀ duɔ́ nDefiibɛ bɑ́ wè o tɔ̃mmú dòmmɛ̀.
\p
\v 6 Kɛ̀ Mɔyiisii túótɛ́ sinɑɑsɛ̃ĩ́ nɛ̀ inɑ̀ɑ̀kɛ kɛ́ dɛ̀ duɔ́ nDefiibɛ 
\v 7 kɛ́duɔ́ nKɛrisonni nɑɑ̀mùntì kɔbɛ sinɑɑsɛ̃ĩ́ sìdɛ́sì nɛ̀ inɑ̀ɑ̀kɛ ìnɑ̀ɑ̀ kɛ́ntũ mbɛ tɔ̃mmú dòmmɛ̀, 
\v 8 kɛ́duɔ́ mMɛdɑdi nɑɑ̀mùntì kɔbɛ sinɑɑsɛ̃ĩ́ sìnɑ̀ɑ̀ nɛ̀ inɑ̀ɑ̀kɛ ìni kɛ́ntũ mbɛ tɔ̃mmú dòmmɛ̀. Ikuɔ́ nìùtì Anɔɔ birɛ Itɑmɑɑ do bɛ̀ ni kɛ̀ bɛ̀ pĩ́ mmù. 
\v 9 Bɛ̀ í n duɔ́ nKeɑti kɔbɛ biɛ mùmɑmù kɛ yɛ̃́ bɛmbɛ do bukùmɛ̀mu ikuɔ́ nɛntì bɛ̀ do dò nkɛ́ntɔu tì.
\s1 Bɛ̀ pɑ̃mmú yɛ̀ɛ̀ pɑ̃rɛ̀ diwũɔ̃tɔ̀nnì kpɛ́í
\p
\v 10 Bɛ̀ do cɑ̃́nnìnko dìì yiè diwũɔ̃tɔ̀nnì Kuyie nkpɛ́í kɛ̀ Isidɑyɛɛribɛɛ pɑ̃mmú yɛpɑ̃rɛ̀ diwũɔ̃tɔ̀nnì kó mucɑ̃́nnímù kpɛ́í, kɛ́ yɛ̀ tɔní diwũɔ̃tɔ̀nnì borɛ̀. 
\v 11 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Bɑ́ dìì yiè Isidɑyɛɛribɛ kó bɛkótíbɛ̀ miɛkɛ òmɑ́ɑ̀ níí tɔní yɛpɑ̃rɛ̀ kɛ̀ bɛ̀ɛ cɑ̃́nnɛ́nɛ̀ diwũɔ̃tɔ̀nnì Kuyie nkpɛ́í.
\p
\v 12-83 Mɛm̀mɛ kɛ̀ bɛ̀ nkɔrìnní bɛmɑ bɛmɑ bɛ pɑ̃rɛ̀.
\m Diyiè ketirì yiè Sudɑɑ nɑɑ̀mùnkù kou, Nɑsɔ̃ɔ̃ birɛ Amminɑdɑbu.
\m Didɛ́rì yiè Isɑkɑɑ nɑɑ̀mùnkù kou Suɑɑ birɛ nNɛtɑnnɛyɛɛdi.
\m Ditɑ̃ɑ̃́nnì yiè Sɑbunɔɔ nɑɑ̀mùnkù kou Edonni birɛ Ediɑbu.
\m Dinɑɑnnì yiè Dubɛnni nɑɑ̀mùnkù kou Sedeuu birɛ Edisuu.
\m Dinummurì yiè Simmɛɔ̃ɔ̃ nɑɑ̀mùnkù kou Sudisɑdɑii birɛ Sedumiɛri.
\m Dikuɔ́nnì yiè Kɑdi nɑɑ̀mùnkù kou Deuyɛɛdi birɛ Ediɑsɑfu.
\m Diyiénnì yiè Efɑdɑimmu nɑɑ̀mùnkù kou Ammiudi birɛ Edisɑmɑ.
\m Diniínnì yiè Mɑnɑnsee nɑɑ̀mùnkù kou Pedɑsuu birɛ Kɑmmidiyɛɛri.
\m Diyiè wɛínnì yiè Bɛnsɑmɛɛ nɑɑ̀mùnkù kou Kideoni birɛ Abidɑnni.
\m Diyiè píínnì yiè Dɑnni nɑɑ̀mùnkù kou Amisɑdɑii birɛ Ayiesɛɛ.
\m Diyiè tɛpíítɛ̀ nɛ̀ dìmɑ́ɑ̀ yiè Asɛɛ nɑɑ̀mùnkù kou Okɑdɑnni birɛ Pɑkiyɛɛdi.
\m Diyiè tɛpíítɛ̀ nɛ̀ didɛ́rì yiè Nɛfutɑdii nɑɑ̀mùnkù kou Enɑnni birɛ Aidɑ.
\p Ntɛ bɑ́ wè ò do tɔní yɛ̀ɛ̀ pɑ̃rɛ̀:
\m Timɑ́tì pɛ́ítì kó kubuuku cɛ̃́ɛ̃́kù do bo cìdóò òmɑ́ɑ̀ nɛ̀ sɑ́m̀pɔ́rɛ̀ nɛ̀ timɑ́tì pɛ́ítì kó dibuu dìì yó mmɛ́ínɛ̀ mɛyĩ̀ĩ̀ kɛ̀ di cɛ̃́ɛ̃́kù mbo cìdóò kó dikéè nɛ̀ sɑ́m̀pɔ́ bɛ̀ do kèétɛ́ wèè cìdóò nwe ti Yiɛ̀ nKuyie ncĩ́ɛ̃̀tɛ̀ kpɛ́í. Kɛ̀ Muyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ nkɛ̀ mù pìɛ́kɛ́ dɛ kó yɛbɔ. Tidiitì kó dipɑ̃nnì ndi.
\m Fɛsɔɔbòòfɛ̀ fɛ̀mɑ́ɑ̀ fɛ̀ɛ̀ cɛ̃́ɛ̃́kù bo kɑ̀dɑ́ɑ̀mmù tɛkɔ̀ùtɛ̀ kɛ̀ tihúúntì pìɛ́kɛ́ dɛ miɛkɛ bɛ̀ ɔ̃ɔ̃ tuɔ ntì.
\m Dinɑɑdɑɑ̀ dìmɑ́ɑ̀ nɛ̀ dipedɑbii dìì mɔ̀kɛ dibenni dìmɑ́ɑ̀ bɛ̀ ɔ̃ɔ̃ kuɔ dì kɛ́tuɔ
\m nnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛrɛ.
\m Inɑ̀ɑ̀kɛ ìdɛ́ì, yɛpedɑkɛ̀ yɛ̀nùmmù, yɛbɔdɑkɛ̀ yɛ̀nùmmù nɛ̀ yɛpedɑbɛ yɛ̀nùmmù yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀, bɛ̀ ɔ̃ɔ̃ féútɛ́ yɛ̀ ti Yiɛ̀ nKuyie mmɛtɑummɛ̀ kpɛ́í.
\b
\p
\v 84 Isidɑyɛɛribɛ kó bɛkótíbɛ̀ do pɑ̃mmú yɛ̀ɛ̀ pɑ̃rɛ̀ kɛ bo cɑ̃́nnɛ́nɛ̀ diwũɔ̃tɔ̀nnì Kuyie nkpɛ́í, ntɛ yɛ̀ do wɛ̃nnɛ́ yɛmɔu kɛ́mbomɛ̀: Timɑ́tì pɛ́ítì kó tibuuti tɛpíítɛ̀ nɛ̀ tìdɛ́ nɛ̀ yɛbɔ tɛpíítɛ̀ nɛ̀ yɛ̀dɛ́ɛ̀ yɛ̀ɛ̀ yó mmɛ́ínɛ̀ mɛyĩ̀ĩ̀ nnɛ̀ isɔɔbòòkɛ tɛpíítɛ̀ nɛ̀ ìdɛ́ì. 
\v 85 Bɑ́ kùù buuku kó kucɛ̃́ɛ̃́kù do bo cìdóò òmɑ́ɑ̀ ndi nɛ̀ sɑ́m̀pɔ́, bɑ́ dìì buu kɛ̀ di kɔku ḿbo cìdóò òmɑ́ɑ̀ kó dikéè nɛ̀ sɑ́m̀pɔ́, timɑ́tì pɛ́ítì kó yɛbɔ yɛnyɛ kɛ̀ yɛ cɛ̃́ɛ̃́kùu wɛ̃nnɛ́ cìdóòbɛ̀ sipísìdɛ́ nɛ̀ bɛ̀nɑ̀ɑ̀. Bɛ̀ kèétɛ́ wèè cìdóò nwe ti Yiɛ̀ nKuyie ncĩ́ɛ̃̀tɛ̀ kpɛ́í. 
\v 86 Bɑ́ fɛ̀ɛ̀ sɔɔbòòfɛ̀ kó kucɛ̃́ɛ̃́kù do bo kɑ̀dɑ́ɑ̀mmù tɛkɔ̀ùtɛ̀, kɛ̀ ì mbo tɛpíítɛ̀ nɛ̀ ìdɛ́ì, kɛ̀ dɛ cɛ̃́ɛ̃́kùu wɛ̃nnɛ́ cìdóò òmɑ́ɑ̀ nɛ̀ sɑ́m̀pɔ́, kɛ̀ tihúúntì bɛ̀ tùɔ̀ ntì pìɛ́kɛ́ i miɛkɛ. 
\v 87 Kɛ nɛ́ mbúútí yɛnɑɑdɑkɛ̀ tɛpíítɛ̀ nɛ̀ yɛ̀dɛ́ɛ̀ nɛ̀ yɛpedɑkɛ̀ tɛpíítɛ̀ nɛ̀ yɛ̀dɛ́ɛ̀ nɛ̀ yɛpedɑbɛ tɛpíítɛ̀ nɛ̀ yɛ̀dɛ́ɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀. Bɛ̀ do yóó kuɔ yɛ̀ kɛ́tuɔ kɛ́wɛ̃nnɛ́nɛ̀ tidiitì kó yɛpɑ̃rɛ̀ nɛ̀ yɛbɔdɑkɛ̀ tɛpíítɛ̀ nɛ̀ yɛ̀dɛ́ɛ̀ bɛ̀ yóó kuɔ yɛ̀ mɛyɛi ncĩ́ɛ̃́mmɛ̀ kpɛ́í. 
\v 88 Kɛ̀ dɛ̀ɛ wɛ̃nnɛ́ yɛnɑɑdɑkɛ̀ sipísìdɛ́ nɛ̀ yɛ̀nɑ̀ɑ̀, yɛpedɑkɛ̀ sipísìkuɔ̀, yɛbɔdɑkɛ̀ sipísìkuɔ̀ yɛpedɑbɛ sipísìkuɔ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀. Bɛ̀ yóó kuɔ yɛ̀ mɛtɑummɛ̀ kpɛ́í. Bɛ̀ do pɑ̃ yɛ̀ɛ̀ pɑ̃rɛ̀ nyɛ kɛ̀ bɛ̀ bo cɑ̃́nnɛ́ diwũɔ̃tɔ̀nnì Kuyie nkpɛ́í.
\b
\p
\v 89 Mɔyiisi tɑ dìì mɔ̀nnì mɛtɑummɛ̀ tou kɛ bo bɛ́innɛ̀ ti Yiɛ̀ nKuyie kɛ́keè ti Yiɛ̀ nKuyie ntɑmmɛ̀ mɛtɑummɛ̀ tɔu ĩ́nkɛ̀ bɛĩ́nkɛ̀mbɑ̀rìbɛ̀ kó sitenkɑɑnìi sìdɛ́sì cuokɛ̀ sìì còḿmú mɛtɑummɛ̀ tɔu ikuɔ́ nɛntì ɑ̃ dɛ kó kupòkù ĩ́nkɛ̀. Mɛm̀mɛ kòò nkù nɑ̀ɑ́nnɛ̀.
\c 8
\s1 Kuyie ncĩ́ɛ̃̀tɛ̀ kó dɛfìtírɛ̀ yó ntuɔ̀ mmɛ̀ɛ̀ botí
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Nɑ́kɛ́ Anɔɔ kɛ tú, kòò yóó cónnɛ́ tɛfitíkɛ̀kɛ̀tɛ̀, wèe dɔɔ̀ kɛ̀ tɛ̀ nwetí dɛ ììkɛ̀, kɛ̀ ifìtíì ìyiekɛ̀ mmí dɛ ììkɛ̀ bíɛ́kɛ̀.
\p
\v 3 Kɛ̀ Anɔɔ dɔɔ̀ ti Yiɛ̀ nKuyie ntì nɑ̀kɛ́mɛ̀ Mɔyiisi, kɛ́cónnɛ́ tɛfitíkɛ̀kɛ̀tɛ̀ kɛ̀ tɛ fitíì nwetí dɛyììkɛ̀ bíɛ́kɛ̀. 
\v 4 Dɛ kó tɛfitíkɛ̀kɛ̀tɛ̀ bɛ̀ do yìɛ mmɛsɔɔ mmɛ kɛ́ tɛ̀ utɛ́, tɛ tɑ̀rì nɛ̀ tɛ bɑ̀kɛ nɛ̀ dɛ̀ɛ̀ dò mmutepóó. Bɛ̀ do tɛ̀ dɔ̀ɔ̀ kɛ̀ tɛ̀ ndònnɛ̀ ti Yiɛ̀ nKuyie ndo bɛnkɛ tɛ̀ntɛ Mɔyiisi.
\s1 Kuyie nnɑ̀kɛ́mɛ̀ bɛ̀ yóó cɑ̃́nnɛ́mɛ̀ Defiibɛ
\p
\v 5 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 6 Tɑ̃ɑ̃tɛ́ Isidɑyɛɛribɛ botí miɛkɛ Defiibɛ kɛ́ bɛ̀ dɔ̀ɔ̀ mɛwénkùmɛ̀ kó ikuɔ́. 
\v 7 Ntɛ ɑ yóó bɛ̀ wénkùnnɛ mɛ̀ɛ̀ botí: Á bɛ̀ mìɛ́tɛ́ ikuɔ́ kó mɛniɛ kɛ̀ bɛ̀ɛ kuó bɛ cìtì timɔu kɛ́ɔ́ú bɛ yɑ̀ɑ̀tì kɛ́wenkɛ. 
\v 8 Kɑ̀ɑ dèè bɛ̀ɛ tɔní dinɑɑdɑpɑ̀nnì nɛ̀ muyuo nsɑ̀ɑ̀mù bɛ̀ ɑ̃̀ntɛnɛ̀ mù mɛkùɔ̀. Kɑ̀ɑ túótɛ́ dinɑɑdɑpɑ̀nnì tɛrì ɑ yóó kuɔ dì mɛyɛi ncĩ́ɛ̃́mmɛ̀ kpɛ́í. 
\v 9 Á duɔ́ nkɛ̀ Defiibɛɛ kɔtɛní mɛtɑummɛ̀ tou borɛ̀, kɑ̀ɑ tíí nyIsidɑyɛɛribɛ bɛmɔu. 
\v 10 Kɛ̀ Defiibɛ tɔ̀ɔ́nní dìì mɔ̀nnì mɛtɑummɛ̀ tou bòrì n yììkɛ̀, ɑ́ duɔ́ nkɛ̀ Isidɑyɛɛribɛɛ bɛ̀ nɔ̀ɔ́ nsinɔu. 
\v 11 Kɛ̀ Anɔɔ bɛ̀ tùótɛ́ Isidɑyɛɛribɛ borɛ̀, kɛ́ bɛ̀ nni m bɛnkɛ bɛ̀ ɔ̃ɔ̃ dɔɔ̀mɛ̀ bɛ̀ m pɑ̃ dìì pɑ̃nnì, kɛ́deè kɛ̀ bɛ̀ nɛ́ nɑ kɛ́tɑ n kó mutɔ̃mmú. 
\v 12 Dɛ kó difɔ̃nkúò kɛ̀ Defiibɛɛ nɔ́ɔ́ mbɛ nɔu yɛnɑɑdɑkɛ̀ yɔ ĩ́nkɛ̀, kɑ̀ɑ féútɛ́ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́féútɛ́ ditɛrì kɛ́tuɔ, kɛ́dɔɔ̀ Defiibɛ mɛwénkùmɛ̀ kó ikuɔ́. 
\v 13 Kɑ̀ɑ còńnɛ́ dìì mɔ̀nnì Defiibɛ Anɔɔ nɛ̀ o bí bɛ ììkɛ̀, fɔ̃́ mMɔyiisi ɑ́ bɛ̀ nni mbɛnkɛ di ɔ̃ɔ̃ m bɛnkɛ mɛ̀ɛ̀ botí dipɑ̃nnì. 
\v 14 Mɛm̀mɛ ɑ yóó dɔɔ̀mɛ̀ kɛ́cɑ̃́nnɛ́ Defiibɛ Isidɑyɛɛribɛ cuokɛ̀ kɛ̀ bɛ̀ ntú n kɔbɛ. 
\v 15 Dɛ mɔ̀nnì ndi Defiibɛ bo nɑmɛ̀ kɛ́ketɛ́ n tɔ̃mmú mɛtɑummɛ̀ tou miɛkɛ.
\p Mɛm̀mɛ ɑ yóó bɛ̀ wénkùnnɛmɛ̀ nɛ̀ mɛwénkùmɛ̀ kó ikuɔ́ kɛ́ bɛ̀ nni mbɛnkɛ kɛ́ bɛ̀ nni nduɔ́. 
\v 16 Kɛ yɛ̃́ bɛ̀ cɑ̃̀ɑ̃́mmɛ̀mu kɛ tú n kɔbɛ kɛ cɔutɛ́ Isidɑyɛɛribɛ bɛ̀ɛ̀ tu Mpo kó difɔ̃̀tìrì. 
\v 17 Isidɑyɛɛribɛ bɛ̀ɛ̀ tu Mpo míì bɛ̀ te, kɛ́túótɛ́ n kùɔ dìì yiè bɛ̀ɛ̀ tu Mpo Esibiti miɛkɛ nɛ̀ yíenní, míì te bɛ̀ɛ̀ tu Mpo nɛ̀ iwũɔ̃ pɛí ìì bí iketiyì kɛ̀ ì tu idɑɑì, dɛ yiè ndi m bɛ̀ tɑ̃ɑ̃tɛ́mɛ̀. 
\v 18 Isidɑyɛɛribɛ bɛ̀ɛ̀ tu Mpo bɛ kó difɔ̃̀tìrì ndi n tùótɛ́mɛ̀ Defiibɛ, 
\v 19 kɛ bɛ̀ duɔ́ nhAnɔɔ nɛ̀ o bí, m bɛ̀ nhò duɔ́mmu kɛ̀ bɛ̀ bo mpĩ́ mmɛtɑummɛ̀ tou miɛkɛ mutɔ̃mmú Isidɑyɛɛribɛ kpɛ́í. Bɛɛ̀ yó ndɔɔri mɛwénkùmɛ̀ kó ikuɔ́ Isidɑyɛɛribɛ kɛ̀ dɛ̀ɛ yie nkɛ̀ bɛ̀ tɔ̀ɔ́nnɛ̀ mɛtɑummɛ̀ tou m bɑ́ɑ́ bɛ̀ potɛ́.
\b
\p
\v 20 Mɔyiisi nɛ̀ Anɔɔ nɛ̀ Isidɑyɛɛribɛ sɔmbɛ kɛ̀ bɛ̀ɛ tũnnɛ ti Yiɛ̀ nKuyie ndo nɑ̀kɛ́ Mɔyiisi kɛ dɔ̀ bɛ̀ɛ dɔɔ̀mɛ̀ Defiibɛ, kɛ̀ bɛ̀ɛ mɛ mbɛ̀ dɔ̀ɔ̀. 
\v 21 Kɛ̀ Defiibɛɛ wénkùnnɛ bɛmɑ́ɑ̀ kɛ́ɔ́ú bɛ yɑ̀ɑ̀tì kɛ̀ Anɔɔ bɛ̀ duɔ́ nti Yiɛ̀ nKuyie nkɛ́ bɛ̀ dɔ̀ɔ̀ dɛ kó ikuɔ́, kɛ́deè kɛ́ bɛ̀ dɔ̀ɔ̀ mɛwénkùmɛ̀ kpɛyi, kɛ́ bɛ̀ wénkùnnɛ. 
\v 22 Mɛm̀mɛ kɛ̀ Defiibɛ nɛ́ nɑ kɛ́ketɛ́ bɛ tɔ̃mmú mɛtɑummɛ̀ tou miɛkɛ. Anɔɔ nɛ̀ o bí kɛ̀ bɛ̀ mbɛ̀ ni ti Yiɛ̀ nKuyie ndo tì nɑ̀kɛ́mɛ̀ Mɔyiisi Defiibɛ kpɛ́í, kɛ̀ bɛ̀ɛ mɛ ndɔɔ̀.
\p
\v 23 Kɛ̀ ti Yiɛ̀ nKuyie nyíɛ́ nɑ́kɛ́ Mɔyiisi kɛ dɔ̀: 
\v 24 Defiibɛ níí yó mmɔkɛ yɛbie nsipísìdɛ́ nɛ̀ yɛ̀nùmmù ndi kɑ̀ɑ bɛ̀ duɔ́ mmutɔ̃mmú mɛtɑummɛ̀ tou miɛkɛ. 
\v 25 Kɛ̀ wèè tùɔ̀kɛ yɛbie nsipísìnùmmù wèe yóu mutɔ̃mmú kɛ tɛ̃́nkɛ bɑ́ mpĩ́. 
\v 26 Ò nɛ́ bo nɑ kɛ́nteénnɛ̀ o kɔbɛ mutɔ̃mmú mɛtɑummɛ̀ tou miɛkɛ, ò nɛ́ tɛ̃́nkɛ bɑ́ mmɔkɛ o kɔ̃mu ò wetí mù. Defiibɛ tɔ̃mmú kó ikuɔ́ yó mmɛ ndò.
\c 9
\s1 Kuyie nnɑ̀kɛ́mɛ̀ Isidɑyɛɛribɛ bɛ̀ bo mbɑɑ̀mmɛ̀ diyentɛ́bɑnni
\p
\v 1 Isidɑyɛɛribɛ do bo bɛ benni didɛ́rì miɛkɛ nkɛ nɛ̀ bɛ̀ yɛ̀mɛ̀ Esibiti otɑ̃̀nkù ketiwè kɛ̀ ti Yiɛ̀ nKuyie mbɛ́innɛ̀ Mɔyiisi Sinɑii kó dikpɑ́ɑ̀ miɛkɛ kɛ dɔ̀: 
\v 2 Isidɑyɛɛribɛ dò nkɛ́mbɑɑ̀mmu diyentɛ́bɑnni n yɛ̃ mbɛ̀ ndì bɑɑ̀ ndìì mɔ̀nnì. 
\v 3 Otɑ̃̀nkù yie nkó diyiè tɛpíítɛ̀ nɛ̀ dinɑɑnnì yie ndi dihuri, di yóó ketɛ́mɛ̀ dɛ kó dibɑnni. Dí ntũ ndɛ kó ikuɔ́ nɛ̀ dɛ kó itié n di nɑ̀kɛ́ kɛ yɛ̃ ndɛ̀ ndòmmɛ̀.
\p
\v 4 Kɛ̀ Mɔyiisii nɑ́kɛ́ bɛnìtìbɛ̀ kɛ dɔ̀: Bɑɑ́nnɛ̀ diyentɛ́bɑnni. 
\v 5 Kɛ̀ bɛ̀ɛ di bɑɑ́ nSinɑii kó dikpɑ́ɑ̀ miɛkɛ, otɑ̃̀nkù ketiwè kó diyiè tɛpíítɛ̀ nɛ̀ dinɑɑnnì yiè kó dihuri. Kɛ̀ Isidɑyɛɛribɛɛ dɔɔ̀ ti Yiɛ̀ nKuyie nnɑ̀kɛ́ tì Mɔyiisi timɔu.
\b
\p
\v 6 Kɛ̀ bɛnìtìbɛ̀ mɑbɛ̀ ḿbo kɛ í nnɑ kɛ bɑɑ́ ndiyentɛ́bɑnni bɛ̀ kɑ̀ɑ́kɛ́ mɛ̀ɛ̀ kpɛ́í nhocíì kɛ sĩ̀ntɛ kɛ́ítɛ́ dɛ yiè kɛ́kɔtɛ kɛ́yɑ̀ Mɔyiisi nɛ̀ Anɔɔ. 
\v 7 Kɛ dɔ̀: Ti kɑ̀ɑ́kɛ́ mɛ̀ɛ̀ kpɛ́í nhocíì, kɛ sĩ̀ntɛ dɛɛ̀ bo nte kɛ̀ ti bɑ́ɑ́ pɑ̃ ti Yiɛ̀ nKuyie nyɛpɑ̃rɛ̀ Isidɑyɛɛribɛ tɔbɛ̀ kɔ̃mɛ diyentɛ́bɑnni yièɑ̀? 
\v 8 Kɛ̀ Mɔyiisii bɛ̀ tɛ̃̀ńnɛ́ kɛ dɔ̀: Ncómmúnɛ̀ dɛndɛ kɛ̀ n yɑ̀ ti Yiɛ̀ nKuyie mbo n nɑ́kɛ́ tì di kpɛ́í.
\p
\v 9 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 10 Nɑ́kɛ́ Isidɑyɛɛribɛ kɛ tú n yɛ̃ ndíndi nɛ̀ di yɑɑ̀bío kòò mɔù kɑ̀ɑ́kɛ́ ocíì kɛ sĩ̀ntɛ yoo ò bo kupɔ̀ɔ̀kù dɛdɛ́tirɛ̀ ò dò nkɛ́bɑɑ́mmu diyentɛ́bɑnni. 
\v 11 Otɑ̃̀nkù dɛ́rì kó diyiè tɛpíítɛ̀ nɛ̀ dinɑɑnnì kó dihuri ndi diyentɛ́bɑnni, dɛ yiè di níí cɑ́ɑ́kɛ́ dipedɑbii kó imɑɑ nnɛ̀ pɛ̃́ɛ̃̀ wèè í kɔɔrɛnɛ̀ mutie mùù muuti, kɛ́ ì cɑ̀ɑ́kɛ́ nɛ̀ tikũnfɑ̃ɑ̃̀tì tiiti. 
\v 12 Di níí bɑ́ɑ́ dì cɑ̀ɑ́kɛ́ kɛ́súɔ́ nkɛ̀ dɛ̀ɛ wentɛ́, di mɛ mbɑ́ɑ́ kéétɛ́ dikɔ̃́ũ̀ mɑrì. Dí ntũ ndiyentɛ́bɑnni kó ikuɔ́ duɔ́ kɛ dòmmɛ̀. 
\v 13 Kòò mɔù í sɑ̃ũ nhomɑ́ɑ̀, ò mɛ nyí kɔ̀tɛ kupɔ̀ɔ̀kù kɛ nɛ́ yóu ò bo bɑɑ́mmɛ̀ diyentɛ́bɑnni kɛ́pɑ̃ mí ndi Yiɛ̀ nKuyie ndipɑ̃nnì, dɛ yiɛ̀ mbɛ̀ɛ ò dɛ̀itɛ o kɔbɛ cuokɛ̀, kòò sèńtɛ́ diyentɛ́bɑnni kó diyiè n dɔú ndì, o yɛi mbo o yuu ĩ́nkɛ̀ nkɛ. 
\v 14 Kòo pɔ̀ɔ̀ mɔù bo di cuokɛ̀ kɛ dɔ́ kɛ́bɑɑ́ ndiyentɛ́bɑnni, wèe tũnnɛ diyentɛ́bɑnni kó itié nnɛ̀ dɛ kó ikuɔ́ duɔ́ kɛ dòmmɛ̀. Diyentɛ́bɑnni kó ikuɔ́ imɑ́ɑ̀ ndi, wèè tu Isidɑyɛɛri o kpɛ́í, nnɛ̀ wèè tu opɔ̀ɔ̀.
\s1 Diwɛtirì dɑ̀tínnɛ́mɛ̀ mɛtɑummɛ̀ tou
\p
\v 15 Bɛ̀ còńnɛ́ dìì yiè Kuyie ntou mɛtɑummɛ̀ tɔu bo dìì miɛkɛ kɛ́deè kɛ̀ diwɛtirìi kɔtɛní kɛ́ dì dɑ̀tínnɛ́ kuyuoku kɛ́ndò mmuhɑ̃ɑ̃́ nkɛ̀ dɛ̀ yɑ̀ɑ wentɛ́. 
\v 16 Kɛ̀ dìi sɔɔtɛ́ kɛ́ mmɛ ndò, kɛ níí ntú kuyie mmɔ̀nnì diwɛtirì kɛ́ntú muhɑ̃ɑ̃́ nkɛyènkɛ̀. 
\v 17 Kɛ̀ diwɛtirì ìtɛ́ dìì mɔ̀nnì Kuyie ntɑummɛ̀ tou ĩ́nkɛ̀ Isidɑyɛɛribɛɛ ítɛ́. Kɛ̀ dì kɔ̀tɛ kɛ còḿmú dɛ̀, bɛ̀ɛ dɛ mbɑ́tɛ́. 
\v 18 Kɛ̀ Isidɑyɛɛribɛ mmɛ ndɔɔri, kɛ̀ diwɛtirì ìtɛ́ bɛ̀ɛ ítɛ́, kɛ̀ dì còḿmú bɛ̀ɛ bɑ́tɛ́, kɛ̀ diwɛtirì mɛ nyí ìtɛ́ bɛ̀ bɑ́ɑ́ ítɛ́ ti Yiɛ̀ nKuyie ndo ti mbɛ̀ nɑ̀kɛ́. 
\v 19 Kɛ̀ diwɛtirì còḿmú Kuyie ntou ĩ́nkɛ̀ kɛ yĩ yɛwe pɛ́u, Isidɑyɛɛribɛ múnkɛ bɑ́ɑ́ ítɛ́ bɛ̀ ndɛ mbo kɛ pĩ́ ti Yiɛ̀ nKuyie mbɛ̀ nɑ̀kɛ́ tì. 
\v 20 Kɛ̀ dɛ̀ mɛ ndò ndiwɛtirì í mɔ̀ntɛ bɛ̀ ḿbo, kɛ̀ ti Yiɛ̀ nKuyie mmɛ nyĩ́ bɛ̀ɛ ítɛ́, bɛ̀ɛ ítɛ́. 
\v 21 Di mɔ̀nnì mɑrì diwɛtirì níí ncómmú Kuyie ntou ĩ́nkɛ̀ kuyuoku nɛ̀ dɛ bo wentɛ́mɛ̀, dikṹnweńnì kɛ̀ dì ìtɛ́ bɛ̀ɛ ítɛ́, yoo dì ncómmú kɛ dɔ̀ kɛyènkɛ̀ kɛ̀mɑ́ɑ̀, kuyie nkùmɑ́ɑ̀, kɛ̀ diwɛtirì ìtɛ́ dìì mɔ̀nnì bɛ̀ɛ ítɛ́. 
\v 22 Yoo dì dɔ̀ yɛwe yɛ̀dɛ́ɛ̀, yoo otɑ̃̀nkù yoo dibenni, kɛ̀ diwɛtirì còḿmú Kuyie ntou ĩ́nkɛ̀ kɛ í ìtɛ́ Isidɑyɛɛribɛ nkɑri bɛ̀ bɑ̀tɛ́ dɛ̀, bɛ̀ bɑ́ɑ́ ítɛ́. Kɛ̀ dì mɛ nyìtɛ́ dìì mɔ̀nnì bɛ̀ɛ ítɛ́. 
\v 23 Isidɑyɛɛribɛ do ɔ̃ nkɛ̀ bɛ̀ bɑ̀tɛ́ bɛ̀ nkɑrimu, kɛ̀ ti Yiɛ̀ nKuyie nyí yĩ: Ítɛ́nɛ̀. Bɛ̀ bɑ́ɑ́ ítɛ́. Kɛ̀ kù mɛ nyĩ: Ítɛ́nɛ̀! Bɛ̀ɛ ítɛ́. Bɛ̀ do tũ nti Yiɛ̀ nKuyie mbɛ̀ nɑ̀ɑ́ tì nti nɛ̀ Mɔyiisi nùù miɛkɛ.
\c 10
\s1 Kuyie nyɛ̃mmɛ̀ bɛ̀ɛ dɔɔ̀ yɛmɑ́tìtɑ̃tɛhe
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Duɔ́ nkɛ̀ bɛ̀ɛ yiɛ ntimɑ́tì pɛ́ítì kɛ́dɔɔ̀ yɛmɑ́tìtɑ̃tɛhe yɛ̀dɛ́ɛ̀, bɛ̀ níí yóó yɛ nheé kɛ̀ dí tíí, yoo bɛ̀ɛ eé kɛ̀ dí ítɛ́ di bɑ̀tɛ́ dɛ̀. 
\v 3 Bɛ̀ níí yóó yɛ nheé kɛ̀ Isidɑyɛɛribɛ bɛmɔuu tíí nhɑ borɛ̀ mɛtɑummɛ̀ tou borìnùù. 
\v 4 Kɛ̀ bɛ̀ níí eé ditɑ̃tɛheù dìmɑ́ɑ̀ Isidɑyɛɛribɛ kó bɛkótíbɛ̀ nɛ̀ sikpɑ̀ɑ̀tìbìí bɛɛ̀ dò nkɛ́tíí nhɑ borɛ̀. 
\v 5 Kɛ̀ bɛ̀ mɛ nheé kɛ iinɛ̀ bɛ̀ɛ̀ kɑ̀ri mɛtɑummɛ̀ tou diyiè yìɛ̀ní kɛ̀ɛ̀ bíɛ́kɛ̀ bɛ̀ɛ ítɛ́ kɛ́kétɛ́. 
\v 6 Kɛ̀ bɛ̀ yíɛ́ kɛ eé kɛ iinɛ̀, kubɑkù cɑ̃̀nku kɔbɛɛ ítɛ́ kɛ́kétɛ́. 
\v 7 Kɛ̀ dì mɛ ndɔ́ kɛ́tíí nyIsidɑyɛɛribɛ bɛmɔu ndi, dí eé di bɑ́ɑ́ iinɛ̀.
\p
\v 8 Anɔɔ bí ikuɔ́ nìùbɛ̀ bɛɛ̀ yó nheu yɛtɑ̃tɛhe, dɛ yó ntú di kó ikuɔ́ nyi nɛ̀ di yɑɑ̀bío sɑ̃́ɑ̃̀.
\p
\v 9 Kɛ̀ di mɛ mbɑ̀ɑ́tí kɛ bo do di dootitɔbɛ̀ bɛ̀ɛ̀ di fɛ̃́ũnko bɛ̀mbɛ mudoò, di eé ditɑ̃tɛheù kɛ́iinɛ̀. Mí ndi Yiɛ̀ nKuyie mmí nwèè di te n yóó dentɛnímu di kpɛ́í nkɛ́ di dɛɛtɛ́nɛ̀ di dootitɔbɛ̀. 
\v 10 Kɛ̀ di mɛ nhɑ̃nnɛ́ tikpɛitì nti yoo dibɑnni n kpɛ́í nyoo otɑ̃̀nkù pɑ̀nwè kó dibɑnni, kɛ̀ di yó n fíé dìì mɔ̀nnì iwũɔ̃ kɛ́tuɔ nyoo mɛtɑummɛ̀ kpɛyi, dí eé ditɑ̃tɛheù kɛ̀ n dentɛní di kpɛ́í. Mí ndi Yiɛ̀ nKuyie mmíì di te.
\ms1 BƐ̀ ÌtƐ́MƐ̀ DITÃRÌ SINAII KƐ TÙƆ̀KƐNƐ̀ MƆABU TENKƐ̀ MÀNKU
\s1 Bɛ̀ dò nkɛ́nyiiti mɛ̀ɛ̀ botí bɛ tĩ̀rɛ̀
\p
\v 11 Isidɑyɛɛribɛ do yɛ̀ Esibiti kɛ́mbo bɛ benni dɛ́rì otɑ̃̀nkù dɛ́rì kó diyiè sipísìdɛ́ kó diyiè ndi, diwɛtirì ìtɛ́mɛ̀ Kuyie ntɑummɛ̀ tou mɛtɑummɛ̀ tɔu bo dìì miɛkɛ di ĩ́nkɛ̀. 
\v 12 Kɛ̀ Isidɑyɛɛribɛɛ ítɛ́ Sinɑii kó dikpɑ́ɑ̀ kɛ́dɔ́ɔ́tɛ́ bɛ̀ dò nkɛ́kétɛ́ mɛ̀ɛ̀ botí. Kɛ̀ diwɛtirìi kɔtɛ kɛ́cómmú Pɑdɑnni kpɑ́ɑ̀ miɛkɛ. 
\v 13 Mɛɛ̀ do tú kucɛ mɛketimɛ̀ bɛ̀ ìtɛ́mɛ̀ kɛ́ntũ ti Yiɛ̀ nKuyie ndo ti nɑ̀kɛ́mɛ̀ Mɔyiisi kòo tì mbɛ̀ nɑ̀kɛ́.
\p
\v 14-16 Sudɑɑ kó ditĩ̀nnì kɔbɛ nɛ̀ Isɑkɑɑ kpɛri kɔbɛ nɛ̀ Sɑbunɔɔ kpɛri kɔbɛ bɛɛ̀ yó ntú bɛketibɛ̀ kɛ́ítɛ́nɛ̀ bɛ kó mɛcɑnnimɛ̀ kɛ̀ Amminɑdɑbu birɛ Nɑsɔ̃ɔ̃ nni Sudɑɑ kɔbɛ kó dihɑ̃ɑ̃pɔ̀ntĩ̀nnì. Kɛ̀ Suɑɑ Nɛtɑnnɛyɛɛdi nni Isɑkɑɑ kɔbɛ kó dihɑ̃ɑ̃pɔ̀ntĩ̀nnì kɛ̀ Edonni birɛ Ediɑbu nni Sɑbunɔɔ kɔbɛ kó dihɑ̃ɑ̃pɔ̀ntĩ̀nnì.
\p
\v 17 Kɛ̀ bɛ̀ɛ uutɛ́ mɛtɑummɛ̀ tou kɛ́kpɛ́ú. Kɛrisonni bí nɛ̀ Mɛdɑdi kpɛyi bɛɛ̀ do te bɛ̀ bo ndì tɔumɛ̀ kɛ̀ bɛ̀ɛ tɔ kɛ́kétɛ́.
\p
\v 18-20 Bɛ kó difɔ̃nkúò kɛ̀ Dubɛnni kó ditĩ̀nnì kɔbɛ nɛ̀ Simmɛɔ̃ɔ̃ kó ditĩ̀nnì nɛ̀ Kɑdi kó ditĩ̀nnì kɔbɛ kɛ̀ bɛ̀ɛ ntú bɛdɛ́ríbɛ̀ kɛ́kétɛ́nɛ̀ bɛ kó mɛcɑnnimɛ̀ kɛ̀ Sedeuu birɛ Edisuu nni Dubɛnni kó dihɑ̃ɑ̃pɔ̀ntĩ̀nnì. Kɛ̀ Sudisɑdɑii birɛ Sedumiɛri nni Simmɛɔ̃ɔ̃ kó dihɑ̃ɑ̃pɔ̀ntĩ̀nnì. Kɛ̀ Deuyɛɛdi birɛ Ediɑsifu nni Kɑdi kó dihɑ̃ɑ̃pɔ̀ntĩ̀nnì.
\p
\v 21 Bɛ kó difɔ̃nkúò kɛ̀ Keɑti nɑɑ̀mùnkù kɔbɛ bɛ̀ɛ̀ tɔu Kuyie ntɑummɛ̀ tɔu kɛ̀ bɛ̀ɛ kétɛ́, Defiibɛ tɔbɛ̀ do niitɛ́mu kɛ́cónnɛ́ mɛtɑummɛ̀ tou kɛ̀ bɛ̀ bo ntuɔ̀kòo.
\p
\v 22-24 Bɛ kó difɔ̃nkúò kɛ̀ Efɑdɑimmu kó ditĩ̀nnì kɔbɛ nɛ̀ Mɑnɑnsee kó ditĩ̀nnì kɔbɛ nɛ̀ Bɛnsɑmɛɛ kó ditĩ̀nnì kɔbɛ kɛ̀ bɛɛ̀ ntú bɛtɑ̃ɑ̃́mbɛ̀ kɛ́kétɛ́ nɛ̀ bɛ kó mɛcɑnnimɛ̀ kɛ̀ Ammiudi birɛ Edisɑmɑ nni Efɑdɑimmu kó dihɑ̃ɑ̃pɔ̀ntĩ̀nnì kɛ̀ Pedɑsuu birɛ Kɑmmidiyɛɛri nni Mɑnɑnsee kɔbɛ kó dihɑ̃ɑ̃pɔ̀ntĩ̀nnì kɛ̀ Kideonii birɛ Abidɑnni nni Bɛnsɑmɛɛ kɔbɛ kó dihɑ̃ɑ̃pɔ̀nntĩ̀nnì
\p
\v 25-27 Bɛ kó difɔ̃nkúò kɛ̀ Dɑnni kɔbɛ kó ditĩ̀nnì nɛ̀ Asɛɛ kɔbɛ kó ditĩ̀nnì nɛ̀ Nɛfutɑdii kɔbɛ kó ditĩ̀nnì kɛ̀ bɛ̀ɛ yɑ̃ɑ̃ nfɛnɑfɛ fũ̀ɔ̃̀ nɛ̀ bɛ kó mɛcɑnnimɛ̀. Kɛ̀ Amisɑdɑii birɛ Ayesɛɛ nni Dɑnni kó dihɑ̃ɑ̃pɔ̀ntĩ̀nnì kɛ̀ Okɑdɑnni birɛ nni Asɛɛ kó dihɑ̃ɑ̃pɔ̀ntĩ̀nnì kɛ̀ Enɑnni birɛ Aidɑ nni Nɛfutɑdii kó dihɑ̃ɑ̃pɔ̀ntĩ̀nnì.
\p
\v 28 Isidɑyɛɛribɛ kó yɛtĩ̀rɛ̀ do iiti miɛ̀ mbotí nku bɛ ɑ̃ɑ̃pɔ̀nkɑrɛ̀ kɛ keri.
\s1 Mɔyiisi do wɑɑ́mmɛ̀ wèè bo bɛ̀ niitɛ́ kucɛ
\p
\v 29 Mɛm̀mɛ kɛ̀ Mɔyiisii nɑ́kɛ́ o cɔ̀kù Deuyɛɛdi, Mɑndiyɑ̃ɑ̃ ɛì kou kó dɛbirɛ Obɑbu kɛ dɔ̀: Ti kɔri ti Yiɛ̀ nKuyie nyɛ̃ nkù yóó ti duɔ́ ndìì ɛì ndi, yóu kɛ̀ tí nnɛí, ɑ yóó pɛ́tɛ́mu mɛsɑ̀ɑ̀ ti Yiɛ̀ nKuyie nyɛ̃ nkù yóó ti duɔ́ mmɛ̀. 
\v 30 Kɛ̀ Obɑbuu ò tɛ̃̀ńnɛ́ kɛ dɔ̀: N bɑ́ɑ́ nɛi n kũnti n ciɛ nkɛ n kɔbɛ borɛ̀. 
\v 31 Kɛ̀ Mɔyiisi dɔ̀: Bɑ́ɑ́ ti bɔntóo fɔ̃́ɔ̃̀ yɛ̃́ dikpɑ́ɑ̀ miɛkɛ dɛ̀ɛ̀ dò nkɛ́bɑ́tɛ́, fɔ̃́ɔ̃̀ dò nkɛ́ tí niitɛ́. 
\v 32 Kɑ̀ɑ ti nɛinɛ̀ kɛ̀ ti Yiɛ̀ nKuyie nti dɔ̀ɔ̀ dìì mɔ̀nnì kù do yɛ̃ nkù yóó ti dɔɔ̀ mɛ̀ɛ̀ sɑ̀ɑ̀ ɑ í yóó mɔ́ntɛ́ ɑ kɔ̃mɛ.
\p
\v 33 Mɛm̀mɛ kɛ̀ bɛ̀ɛ ítɛ́ ti Yiɛ̀ nKuyie ntɑ̃rì kɛ́mmɔkɛ yɛwe yɛ̀tɑ̃ɑ̃ti mucèmmu kɛ̀ Kuyie ntɑummɛ̀ tɔu ni bɛ ììkɛ̀, dɛ kó yɛwe yɛ̀tɑ̃ɑ̃ti miɛkɛ kɛ bo yɑ̀ bɛ̀ bo bɑ́tɛ́ dɛ̀. 
\v 34 Bɛ̀ do ìtɛ́ kuyie nku, kɛ̀ Kuyie nkó diwɛtirì mbɛ̀ dɑ̀ɑ́tí. 
\v 35 Kuyie ntɑummɛ̀ tɔu ketɛ́ dìì mɔ̀nnì kɛ̀ Mɔyiisii kuɔ́nko kɛ dɔ̀: Kuyie, nyítɛ́ kɛ́cómmú! Kɑ̀ɑ dootitɔbɛ̀ɛ cíɛ́tɛ́, kɑ̀ɑ níímbɛ̀ ncokù ɑ ììkɛ̀. 
\v 36 Kɛ̀ bɛ̀ ĩ̀ńnɛ́ dìì mɔ̀nnì mɛtɑummɛ̀ tɔu wèe pĩɛ̃kɛ́ kɛ dɔ̀: Ti Yiɛ̀ nKuyie nwɛ̃tɛní kɛ́mbo ɑ kɔbɛ kuwuɔ ndiɛkù Isidɑyɛɛribɛ cuokɛ̀.
\c 11
\s1 Isidɑyɛɛribɛ do tùùtɛnɛ̀mɛ̀ ti Yiɛ̀ nKuyie
\p
\v 1 Diyiè mɑrì kɛ̀ Isidɑyɛɛribɛɛ tuutɛ kɛ́kpɑnnɛ̀ ti Yiɛ̀ nKuyie nkɛ̀ kùu dɛ̀ kèè kɛ̀ ku miɛkɛɛ bɛ̀ pɛikɛ kɛ̀ kùù cṹũnní muhɑ̃ɑ̃́ nkɛ̀ mùu cɔ́útɛ́ bɛ kɑrì kupíkù kùmɑ́ɑ̀. 
\v 2 Kɛ̀ bɛ̀ɛ kuɔ́nnɛ̀ Mɔyiisi kòo bɑ́ntɛ̀ ti Yiɛ̀ nKuyie nkɛ̀ muhɑ̃ɑ̃́ nkú. 
\v 3 Kɛ̀ bɛ̀ɛ yú dɛborɛ̀ kɛ dɔ̀ Tɑbedɑɑ (dɛ̀ɛ̀ tu kuhɑ̃ɑ̃tɔ̀ntɔ̀nkù), kɛ yɛ̃́ ti Yiɛ̀ nKuyie ndo dɛ ncɔ́ummɛ̀ bɛ kɑrì.
\s1 Isidɑyɛɛribɛ do bekɛmɛ̀ Kuyie nyimɑɑ
\p
\v 4 Kɛ̀ kuníí pĩ́ mbɛsĩ́ntɛnìtìbɛ̀ bɛ̀ɛ̀ do nɛínɛ̀ Isidɑyɛɛribɛ bɛ̀ yɛ̀tì dìì mɔ̀nnì Esibiti, Isidɑyɛɛribɛ mɔ́mmɔmbɛ kɛ̀ bɛ̀ɛ tuutɛ kɛ́nkpɑnnɛ̀ ti Yiɛ̀ nKuyie nkɛ tú: We mbo ti duɔ́ nyimɑɑ nkɛ̀ ti cɑ́ɑ́kɛ́? 
\v 5 Ti kpɑɑ́ wúónnímu siyĩĩ ti do cɑ́ɑ́ nsì Esibiti fɑ̀ɑ̀rɛ̀ nɛ̀ yɛpérɛ̀ nɛ̀ yɛyɑɑ̀ nwɛɛtìyɛ̀ nɛ̀ tikũnfɑ̃ɑ̃̀tì nɛ̀ yɛdimɑsirɛ̀ dɛbotí dɛbotí. 
\v 6 Ti dɛ mpɑ̀ɑ̀ diɛ nkɛ kɔ̃nnɛ̀ dikònnì. Mɑ́nnì mɑ́ɑ̀ mɑ́ɑ̀ bɑɑ nɛ́ nwe yɛwe yɛmɔu.
\p
\v 7 Mɑ́nnì do ɔ̃ ndònnɛ̀ mɛdibii mmɛ kɛ pɛ́ì. 
\v 8-9 Timɑɑ̀ntì tiì ɔ̃ɔ̃ nwɛ̃nnɛ́ dɛ kó tidiitì kɛ́yɛ̀nní kɛyènkɛ̀ mɔ̀nnì. Kɛ̀ dɛ̀ wentɛ́ bɛ̀ɛ cíɛ́tóo kɛ́koúní, kɛ́nɑɑ nyoo bɛ̀ɛ ti kɛ́bénnɛ́, kɛ̀ bɛ̀ mɛ ndɔ́ bɛ̀ɛ dɔɔ̀ yɛpɔ̃́mpũɔ̃. Dɛ kó tidiitì nɑɑtí do ɔ̃ ndònnɛ̀ yɛkɑ̀tìndɑ̀ kó kunɑɑtí nku.
\s1 Mɔyiisi kuɔ́nnɛ̀mɛ̀ Kuyie
\p
\v 10 Kɛ̀ Mɔyiisii keè Isidɑyɛɛribɛ tùùtɛmɛ̀ kɛ kpɑnnɛ̀ ti Yiɛ̀ nKuyie mbɑ́ tɛ̀ɛ̀ cĩ́ɛ̃̀tɛ̀ tɛ touku bòrìnùù. Kɛ̀ ti Yiɛ̀ nKuyie mmiɛkɛ pɛikɛ mɛdiɛ̀ nkɛ̀ Mɔyiisi yɛ̀mmɛ̀ɛ cɑɑ̀rɛ̀, 
\v 11 kòo kuɔ́nnɛ̀ ti Yiɛ̀ nKuyie nkɛ dɔ̀: Kuyie mbɑ nkpɛ́í nte kɑ̀ɑ yóu kɛ̀ tiì nni ntùɔ̀kɛní? Dɛ̀ yĩ́mɛ kɑ̀ɑ n yetɛnɛ̀ ɑ kó mɛsɑ̀ɑ̀, kɛ n tou nditɔu diì nkɛ tú nní nni bɛ nnìtìbɛ̀? 
\v 12 Míì í pùó ndɛ kó kubotí, míì mɛ nyí kù pɛitɛ́. Dɛ̀ nɛ́ yĩmɛ kɑ̀ɑ tu nní mbɛ̀ ùúkú kubíyɔ̃kù ɔ̃ nhúúkúmɛ̀ ku birɛ, kɛ́ bɛ̀ tɑnnɛ̀ dihɛì ɑ do yɛ̃ nhɑ yóó duɔ́ ndì bɛ yɛmbɛ̀? 
\v 13 M bo pɛ́tɛ́ dɛ imɑɑ nkɛ́duɔ́ nkubotí kuu? Bɛ̀ n kuɔ̀nnɛ̀mu kɛ tú m bɛ̀ duɔ́ nyimɑɑ nkɛ̀ bɛ̀ɛ cɑ́ɑ́kɛ́! 
\v 14 M bɑ́ɑ́ nɑ m mɑ́ɑ̀ kɛ́tɔ bɛnìtìbɛ̀ biɛ, dɛ kó ditɔu n cɛ̃́ɛ̃́nɛ̀mu. 
\v 15 Kɛ̀ dɛ̀ yó nni ndò mmiɛ̀, ɑ pɑ̃̀nkɛ n kuɔ. Kuyie mbɑ́ɑ́ yóu kɛ̀ n tɛ̃́nkɛɛ yɑ̀ mɛyɛi mmiɛ, n dɑ bɑ́ɑ́mmu.
\p
\v 16 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Tíí nyIsidɑyɛɛribɛ miɛkɛ bɛkotibɑɑbɛ̀ kɛ̀ bɛ̀ ḿbo sipísìyiekɛ̀. A yɛ̃́ kɛ̀ bɛ̀ɛ̀ tu Isidɑyɛɛribɛ miɛkɛ bɛkótíbɛ̀ nɛ̀ bɛ̀ɛ̀ bɑkɛ́, kɛ̀ di kɔtɛní mɛtɑummɛ̀ tou fɔ̃́ nnɛ̀ bɛ kɛ́cómmú. 
\v 17 N cutoomu kɛ bo dɑ bɛ́innɛ̀, n yóó bɛ̀ duɔ́ mmuyɑɑ́ nhɑ mɔkɛ mù botí nku, dɛ mɔ̀nnì kɛ̀ bɛ̀ dɑ teennɛ̀ bɛ nnìtìbɛ̀ kó ditɔu, kɑ̀ɑ tɛ̃́nkɛ bɑ́ ndi tɔ ɑmɑ́ɑ̀. 
\v 18 Á bɛ̀ nɑ̀kɛ́ kɛ̀ bɛ̀ɛ wénkùnnɛ bɛmɑ́ɑ̀: Nɑnkɛ di yóó cɑ́ɑ́kɛ́mu imɑɑ nkɛ yɛ̃́ díì n kuɔ́nnɛ̀mɛ̀ mí ndi Yiɛ̀ nKuyie nkɛ tú: We mbo ti duɔ́ nyimɑɑ nkɛ̀ ti cɑ́ɑ́kɛ́? Ti do bo Esibiti kɛ yo nkunɑɑtí nku! Nɛ̀ dɛ kpɛ́í mí ndi Yiɛ̀ nKuyie n yóó di duɔ́mmu imɑɑ nkɛ̀ di cɑ́ɑ́kɛ́. 
\v 19 Dɛ̀ í tú diyiè dìmɑ́ɑ̀ miɛkɛ, yoo yɛ̀dɛ́ɛ̀ yoo yɛ̀nùmmù yoo tɛpíítɛ̀ yoo sipísìdɛ́ di yó nyì cɑ̀ɑ́mmɛ̀. 
\v 20 Di yó nyì cɑ̀ɑ́ nkɛ́deè otɑ̃̀nkù nwe, di bo ciɛ̀ nkɛ́keè i nɔ́ú kɛ́ ì pɛ̃̀ kɛ yɛ̃́ mí ndi Yiɛ̀ nKuyie ndi bonɛ̀mɛ̀mu kɛ̀ di m bùtínnɛ́ kɛ kuɔ̀ nkɛ tú: Bɑ nte kɛ̀ ti yɛ̀nní Esibiti.
\p
\v 21 Kɛ̀ Mɔyiisi dɔ̀: Bɛnìtìbɛ̀ bɛ̀ɛ̀ m bonɛ̀ kɛ dò nkɛ́nɑ kɛ́kɔtɛ mudoò bɛ̀ bo sikɔupíkɔusìkuɔ̀ ndi (600000) kɑ̀ɑ tu ɑ bo mbɛ̀ duɔ́ nyimɑɑ nkɛ dɔ̀ otɑ̃̀nkɑ̀ɑ̀! 
\v 22 Bɑ́ kɛ̀ ti fìé iwũɔ̃ imɔu bɛ̀ɛ cɑ́ɑ́kɛ́ kɛ́nsɑ̀nnɑ̀ɑ̀? Bɑ́ kɛ̀ ti ũrí dɑ̀mɛ́ɛ̀rì kó siyĩĩ simɔu bɛ̀ bo cɑ́ɑ́kɛ́ kɛ́nsɑ̀nnɑ̀ɑ̀?
\p
\v 23 Kɛ̀ ti Yiɛ̀ nKuyie ntɛ̃́nnɛ́ Mɔyiisi kɛ dɔ̀: Mí ndi Yiɛ̀ nKuyie n nɔ̀ùtɛ̀ kũpúrìmɑɑ̀? A yóó yɑ̀mu kɛ́nsɑ̀ kɛ̀ n dɑ nɑ̀kɛ́ tì bo dɔɔ̀ yoo tì bɑ́ɑ́ dɔɔ̀!
\s1 Kuyie ncṹũnnímɛ̀ ku yɑɑ́ bɛkotibɑɑbɛ̀ ĩ́nkɛ̀
\p
\v 24 Kɛ̀ Mɔyiisii yɛ̀nní kɛ́nɑ́kɛ́ bɛnìtìbɛ̀ ti Yiɛ̀ nKuyie nhò nɑ̀kɛ́ tì, kɛ́deè kɛ́tíí nyIsidɑyɛɛribɛ miɛkɛ bɛkotibɑɑbɛ̀ sipísìyiekɛ̀ kɛ́duɔ́ nkɛ̀ bɛ̀ɛ cómmú kɛ́fitɛ́ mɛtɑummɛ̀ tou. 
\v 25 Kɛ̀ ti Yiɛ̀ nKuyie ncútɛ́ní diwɛtirì miɛkɛ kɛ́bɛ́innɛ̀ Mɔyiisi kɛ́duɔ́ mmuyɑɑ́ nhò mɔ̀kɛ mù botí bɛkotibɑɑbɛ̀ sipísìyiekɛ̀ bɛmbɛ. Kuyie nYɑɑ́ mbɛ tɑ dìì mɔ̀nnì kɛ̀ bɛ̀ nnɑ́ɑ́ nKuyie mpɑ̃ɑ̃nɑ́ɑǹtì dɛ kó dimɔ̀nnì dìmɑ́ɑ̀ miɛkɛ, bɛ̀ mɛ nyí sɔkɛ́.
\p
\v 26 Dɛ̀ do sɔ̃́ mbɛkotibɑɑbɛ̀ sipísìyiekɛ̀ bɛmbɛ miɛkɛ bɛ̀dɛ́bɛ̀ bɛɛ̀ kpɑɑní bɛ̀ bɑ̀tɛ́ dɛ̀, kòò mɔù yètìrì tu Edidɑdi kòo tɔù kpɛri tú Mɛdɑdi, kɛ̀ Kuyie nYɑɑ́ ncútɛ́ní bɛ ĩ́nkɛ̀, bɑ́ bɛ̀ í mɛ nkɔ̀tɛnímɛ̀ mɛtɑummɛ̀ tou, kɛ̀ bɛ̀ɛ ketɛ́ kɛ́nnɑ́ɑ́ nKuyie mpɑ̃ɑ̃nɑ́ɑǹtì. 
\v 27 Kòo dɑpɑ̀ɑ̀ mmɔùu cokɛ́ kɛ́nɑ́kɛ́ Mɔyiisi kɛ dɔ̀: Edidɑdi nɛ̀ Mɛdɑdi bɛ̀ nɑ̀ɑ́ nKuyie mpɑ̃ɑ̃nɑ́ɑǹtì.
\p
\v 28 Dɛ mɔ̀nnì Nunni birɛ Sosuwee wèè do nɛitinɛ̀ Mɔyiisi nɛ̀ o bíkɛ́mbɛ́ntì, kòo bɛ́i nkɛ dɔ̀: Okótì pɑɑ mbɛ kɛ̀ bɛ̀ bɑ́ nnɑ́ɑ́ nKuyie mpɑ̃ɑ̃nɑ́ɑǹtì.
\p
\v 29 Kɛ̀ Mɔyiisii ò tɛ̃̀ńnɛ́ kɛ dɔ̀: A yĩɛ̃̀kùmu n kpɛ́ínɑ́ɑ̀? Mí n dɔ́ Kuyie nduɔ́mmu ku Yɑɑ́ mbɛnìtìbɛ̀ bɛmɔu kɛ̀ bɛ̀ nnɑ́ɑ́ nku pɑ̃ɑ̃nɑ́ɑǹtì.
\p
\v 30 Mɛm̀mɛ Mɔyiisi nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ kò mbɛ̀ bɑ̀tɛ́ dɛ̀.
\s1 Kuyie mbɛ̀ duɔ́mmɛ̀ yɛpɛ̀pɛ́rɛ̀
\p
\v 31 Kɛ̀ ti Yiɛ̀ nKuyie nduɔnní kuyɑɑkperíkù mɑkù dɑ̀mɛ́ɛ̀rì bíɛ́kɛ̀, kɛ̀ kùu tɔní yɛpɛ̀pɛ́rɛ̀ kɛ́cóú mbɛ kɑrì kɛ̀ yɛ̀ɛ fitɛ́ tipíìtì timɔu kɛ́dɔú ntɛbɑ̀tɛ̀ mɛsɑ̀ɑ̀, kɛ́mmɑ̀nnɛ̀ ɑ bo cemmɛ̀ diyiè dìmɑ́ɑ̀ miɛkɛ, kɛ́ncóú kɛ ìtɛ́nɛ̀ kɛtenkɛ̀ kɛ mmɑ̀nnɛ̀ mɛ́tìrì òmɑ́ɑ̀. 
\v 32 Kɛ̀ bɛnìtìbɛ̀ ntṹṹ nkɛ kou, kɛ yɑ̀ɑ nyié nkɛ kou kɛ̀ dɛ̀ yɑ̀ɑ wentɛ́nko. Wèè tu ò í koú kɛ̀ dɛ̀ sũ dɛ̀ í ndòńtɛ́ cìdóò sikɔu sikɔu kɛ̀ bɛ̀ɛ yɛ̀ yennɛ́ kɛ́fitɛ́ bɛ kɑrì. 
\v 33 Kɛ̀ yɛ̀ nkpɑɑ́ kɛ ɑ̃ bɛ nɔ̀ miɛkɛ bɑ́ bɛ̀ mu nyí cɑ̀ɑ́kɛ́ yɛ kó imɑɑ nkɛ̀ ti Yiɛ̀ nKuyie mmiɛkɛ bɛ pɛikɛ kɛ̀ kùu bɛ̀ potɛ́ kuyɛ̃ĩku diɛkù. 
\v 34 Kɛ̀ bɛ̀ɛ yú dɛborɛ̀ kɛ dɔ̀ Kibodoti-Atɑɑfɑ, dɛ̀ɛ̀ tu kuníí kó kufɔ̃ti, kɛ yɛ̃́ bɛ̀ do dɛ nkũnnɛ́mɛ̀ kuníí do pĩ mbɛ̀ kɛ̀ bɛ̀ ndɔ́ kɛ́cɑ́ɑ́kɛ́ imɑɑ.
\p
\v 35 Bɛ̀ dɛ nyìtɛ́ kɛ́kɔtɛ kɛ́bɑ́tɛ́ Asedɔti kɛ́kɑri.
\c 12
\s1 Midiyɑmmu nɛ̀ Anɔɔ bɛ̀ tùùtɛmɛ̀
\p
\v 1 Kɛ Midiyɑmmu nnɑ́ɑ́nnɛ̀ Anɔɔ kɛ kpɑ Mɔyiisi tùótɛ́ mɛ̀ɛ̀ kpɛ́í Kuusi botí kóo nitipòkù. 
\v 2 Kɛ̀ bɛ̀ nnɑ́ɑ́ nkɛ tú: Ti Yiɛ̀ nKuyie nnɑ́ɑ́nnɛ̀ Mɔyiisi mɑ́ɑ̀ ndi kɛ í ti nɑ́ɑ́nnɑ́ɑ̀?
\p Kɛ̀ ti Yiɛ̀ nKuyie nkeè. 
\v 3 Mɔyiisi do tú onìtì wèè í mɔkɛ wènwe tɛfentɛ̀ bɑ́ sɑ́m̀pɔ́, bɑ́ òmɔù í bo kutenkù miɛkɛ wèè ò dònnɛ̀. 
\v 4 Dɛndɛ bɑ̀mbɑ̀ kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ Anɔɔ nɛ̀ Midiyɑmmu kɛ dɔ̀: Dí kɔtɛní dimɔu, di tɑ̃ɑ̃ti mɛmmɛ mɛtɑummɛ̀ tou borɛ̀.
\p Kɛ̀ bɛ̀ɛ kɔtɛ. 
\v 5 Kɛ̀ ti Yiɛ̀ nKuyie ncútɛ́ní diwɛtirì miɛkɛ kɛ́cómmú mɛtɑummɛ̀ tou bòrìnùù kɛ yú Anɔɔ nɛ̀ Midiyɑmmu kɛ̀ bɛ̀ɛ kɔtoo bɛdɛ́. 
\v 6 Kɛ̀ ti Yiɛ̀ nKuyie mbɛ̀ bɛ́innɛ̀ kɛ dɔ̀: Kéntɛ́nɛ̀ n yóó di nɑ́kɛ́ tì, kòò mɔù tu di miɛkɛ mpɑ̃ɑ̃nɑ́ɑǹtì nɑ́ɑǹtò mí nKuyie n yóó ò bɛnkɛ m mɑ́ɑ̀ nɛ̀ mɛbɛnkùmɛ̀ miɛkɛ nkɛ, kɛ́ nhò nɑ̀ɑ́nnɛ̀ tidɔuǹtì miɛkɛ. 
\v 7 N kóo tɔ̃ntì Mɔyiisi kpɛrɛ í mɛ ndò, ò pĩ n nìtìbɛ̀ mɛsɑ̀ɑ̀ mmɛ. 
\v 8 Nɛ̀ wenwe ti ɔ̃ nnɑ́ɑ́ nkɛ cɔ́ú ntitɔbɛ̀ mbɛ kɛ̀ dɛ̀ feío, n yí ò nɑ̀ɑ́nnɛ̀ yɛnɑ́ɑǹhɑ̃ntíyɛ̀, nh ɔ̃ɔ̃ ò bɛnkɛmu m mɑ́ɑ̀ kòo yɑ̀ n fènkù. Dɛ̀ dòmmɛ kɛ̀ di í ò dé, wenwe n kóo tɔ̃ntì Mɔyiisi?
\p
\v 9 Mɛm̀mɛ ti Yiɛ̀ nKuyie mmiɛkɛ bɛ̀ yɛ̀mɛ̀ kɛ̀ kùu ítɛ́. 
\v 10 Diwɛtirì kɑ̃ɑ̃tɛ́ dìì mɔ̀nnì mɛtɑummɛ̀ tou ĩ́nkɛ̀, kɛ̀ bɛ̀ nsɔ̃́ ntikɔ̀ntì pĩ mMidiyɑmmu kòo kɔ̃̀ntì pɛikɛ kɛ nɑɑ́ ntikóntì kɛ̀ Anɔɔ ò yɑ̀ kɛ́nsɔ̃́ ntikɔ̀ntì tiì ò pĩ. 
\v 11 Kòo nɑ́kɛ́ Mɔyiisi kɛ dɔ̀: Áú n yiɛ̀! N dɑ bɑ́ɑ́mmu bɑ́ɑ́ yóu kɛ̀ mɛyɛi nti dɔ̀ɔ̀ mɛ̀ɛ do ti yɔ ĩ́nkɛ̀, ti dɔ̀ɔ̀ tiyɛìntì nti, ti cɑ̀ɑ̀rɛ̀mu. 
\v 12 N dɑ bɑ́ɑ́mmu ɑ bɑ́ɑ́ yóu kòo kɔ̃̀ntì dɔntɛ́ dɔntɛ́ bɛ̀ pɛitɛ́ wè dicírì kpɛti kɔ̃mɛ.
\p
\v 13 Kɛ̀ Mɔyiisii kuɔ́nnɛ̀ Kuyie nkɛ dɔ̀: N dɑ bɑ́ɑ́mmu wɛ̃́ɛ̃́roo kóò miɛkùnnɛ.
\p
\v 14 Kɛ̀ Kuyie ntɛ̃́nnɛ́ Mɔyiisi kɛ dɔ̀: Kòo cicɛ weè do ntĩ̀ṹtɛ́ o ììkɛ̀ tinɔ́ntɔ̃ũtì, ifɛi nɑɑ bɑ́ nhò bo kɛ dɔ̀ yɛwe yɛ̀yiekɑ̀ɑ̀? Mɛɛ̀ botí nku di dòmmɛ̀ kóò dènnɛ di kó dikɑrì, kɛ̀ yɛwe yɛ̀yiekɛ̀ɛ pɛ̃ɛ̃tɛ́ kòo wɛ̃tɛní.
\p
\v 15 Mɛm̀mɛ kɛ̀ bɛ̀ɛ dennɛ Midiyɑmmu bɛ kɑrì kɛ́nkémmú yɛwe yɛ̀yiekɛ̀ bo pɛ̃ɛ̃tɛ́mɛ̀ kòo wɛ̃tɛní kɛ̀ bɛ̀ nɛ́ nɑ kɛ́pɛ̃ɛ̃tɛ́. 
\v 16 Dɛ kó difɔ̃nkúò kɛ̀ bɛ̀ɛ ítɛ́ Asedɔti kɛ́kɔtɛ kɛ́bɑ́tɛ́ Pɑdɑnni kó dikpɑ́ɑ̀.
\c 13
\s1 Mɔyiisi tɔ̃mmɛ̀ bɛnìtìbɛ̀ kɛ̀ bɛ̀ bo pɑɑtɛ́ Kɑnnɑhɑ̃ɑ̃ kó dihɛì
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 2 Á dɛitɛ Isidɑyɛɛribɛ botí miɛkɛ bɛkotibɑɑbɛ̀, bɑ́ kùù botí miɛkɛ onìtì òmɑ́ɑ̀ òmɑ́ɑ̀ kɛ́ bɛ̀ tɔ̃ nkɛ̀ bɛ̀ɛ pɑɑtɛ́ Kɑnnɑhɑ̃ɑ̃ kó dihɛì n yɛ̃ n yóó di duɔ́ ndì.
\p
\v 3 Kɛ̀ Mɔyiisii tũnnɛ ti Yiɛ̀ nKuyie nhò nɑ̀kɛ́ tì dɛndɛ Pɑdɑnni kó dikpɑ́ɑ̀ miɛkɛ, kɛ́dɛi Isidɑyɛɛribɛ miɛkɛ bɛkotibɑɑbɛ̀ kɛ́tɔ̃. 
\v 4 Ntɛ ò do tɔ̃ mbɛ̀ kó yɛyètɛ̀: Dubɛnni kó kubotí kou do tú Sɑkuu birɛ Sɑmmuɑ.
\m
\v 5 Kɛ̀ Simmɛɔ̃ɔ̃ kó kubotí kou ntú Ɔɔri birɛ Sɑfɑti.
\m
\v 6 Kɛ̀ Sudɑɑ kó kubotí kou ntú Yefundee birɛ Kɑdɛbu.
\m
\v 7 Kɛ̀ Isɑkɑɑ kó kubotí kou ntú Sosɛfu birɛ Ikɑdi.
\m
\v 8 Kɛ̀ Efɑdɑimmu kó kubotí kou ntú Nunni birɛ Oseɑ.
\m
\v 9 Kɛ̀ Bɛnsɑmɛɛ kó kubotí kou ntú Dɑfuu birɛ Pɑditi.
\m
\v 10 Kɛ̀ Sɑbunɔɔ kó kubotí kou ntú Sodi birɛ Kɑdiyɛɛdi.
\m
\v 11 Kɛ̀ Sosɛfu kó kubotí nɛ̀ Mɑnɑnsee kɔku kɛ̀ bɛ kou ntú Susi birɛ Kɑdi.
\m
\v 12 Kɛ̀ Dɑnni kó kubotí kou ntú Kemɑdi birɛ Amiyɛɛdi.
\m
\v 13 Kɛ̀ Asɛɛ kó kubotí kou ntú Mikɑyɛɛri birɛ Sefudi.
\m
\v 14 Kɛ̀ Nɛfutɑdii kó kubotí kou ntú Fofisi birɛ Nɑbi.
\m
\v 15 Kɛ̀ Kɑdi kó kubotí kou ntú Mɑkii birɛ Ketuyɛɛdi.
\p
\v 16 Bɛnìtìbɛ̀ Mɔyiisi do tɔ̃ mbɛ̀ kɛ̀ bɛ̀ bo pɑɑtɛ́ dihɛì bɛ yètɛ̀ nyɛ mɛmmɛ. Kɛ̀ Mɔyiisii yú Nunni birɛ Oseɑ kɛ dɔ̀ Sosuwee.
\b
\p
\v 17 Kɛ̀ Mɔyiisii bɛ̀ tɔ̃ nkɛ́ bɛ̀ nɑ̀kɛ́ kɛ dɔ̀: Di kétɛ́ kɛ́tɑ Kɑnnɑhɑ̃ɑ̃ tenkɛ̀ kubɑkù cɑ̃̀nku bíɛ́kɛ̀, kɛ́pɛ̃ɛ̃tɛ́ kɛ́dekɛ yɛtɑ̃rɛ̀ ĩ́nkɛ̀ kó yɛhɛkɛ̀, 
\v 18 kɛ́pɑɑtɛ́ dihɛì mɛsɑ̀ɑ̀ nkɛ́yɑ̀ dì dòmmɛ̀ nɛ̀ bɛnìtìbɛ̀ bɛ̀ɛ̀ bo di miɛkɛ bɛ̀ dòmmɛ̀, kɛ̀ bɛ̀ kpeńnì yoo bɛ̀ cĩ̀ĩnnì kɛ̀ bɛ̀ sũ yoo bɛ̀ í sũ. 
\v 19 Dí pɑɑtɛ́ bɛ tenkɛ̀ dòmmɛ̀, kɛ̀ kɛ̀ wenni yoo kɛ̀ sĩ̀, nɛ̀ bɛ̀ bo yɛ̀ɛ̀ ɛkɛ̀ dòmmɛ̀, kɛ̀ iduotí yɛ̀ fitɛ́ yoo yɛ̀ feío, 
\v 20 kɛ́yɑ̀ kɛ̀ kɛtenkɛ̀ nɑɑti yoo kɛ̀ sɛɛ, kɛ̀ titieti bo yoo ti kpɑ, yɑ́úkùnnɛnɛ̀ di kɔ̃̀ntì. Dí ntɔní bɛ tenkɛ̀ kó yɛtebɛ.
\p Dɛ̀ do sɔ̃́ ndɛtie mbɛ̀ tu dɛ̀ fínyĩ̀ dɛ bɛ ketiyɛ̀ biì dìì mɔ̀nnì ndi.
\p
\v 21 Kɛ̀ bɛ̀ɛ kɔtɛ kɛ́pɑɑtɛ́ Kɑnnɑhɑ̃ɑ̃ tenkɛ̀, kɛ́túótɛ́ Sinni kpɑ́ɑ̀ kɛ́ntɔ kɛ́tuɔkɛnɛ̀ Deɔbu Amɑti tenkɛ̀ mɑ̀nku, 
\v 22 kɛ́kɔtɛ kɛ́tɑ dihɛì kubɑkù cɑ̃̀nku bíɛ́kɛ̀ Ebunɔɔ kó diberímberi, Anɑkii yɑɑ̀bí tidɑdiɛtì, Aimɑnni nɛ̀ Sesɑii nɛ̀ Tɑdimɑii bɛ kó dikɑrì. Ebunɔɔ kó dihɛì mɑɑ́ kɛ̀ dɛ̀ mmɔkɛ yɛbie nyɛ̀yiekɛ̀ ndi kɛ̀ bɛ̀ nɛ́ nɑ kɛ́mɑɑ́ Esibiti kpɛri bɛ̀ tu dì Tɑniisi. 
\v 23 Kɛ̀ bɛ̀ɛ tuɔkɛ Ɛsikɔɔdi biriku kɛ́kɔ̃ṹ fínyĩ̀ kó yɛbɛ tɛyùtɛ̀ kɛ́sɛu nkudɔú kɛ́buutɛ́ bɛnìtìbɛ̀ bɛ̀dɛ́bɛ̀, nɛ̀ yɛtebɛ tɛyɛ̀ bɛ̀ tu yɛ̀ kèdènɑ́tì nɛ̀ fìkíè kó yɛbɛ. 
\v 24 Kɛ̀ bɛ̀ɛ yú dɛborɛ̀ kɛ dɔ̀ Ɛsikɔɔdi biriku, dɛ̀ɛ̀ tu siyuu biriku, bɛ̀ dɛ̀ kɔ̃ũ mɛ̀ɛ̀ kpɛ́í yɛtebɛ kó siyuu.
\s1 Mɔyiisi do tɔ̃ mbɛ̀ kɛ̀ bɛ̀ bo pɑɑtɛ́ dihɛì bɛ̀ konní kóò nɑ̀kɛ́ tì
\p
\v 25 Yɛwe sipísìnɑ̀ɑ̀ kó difɔ̃nkúò bɛ̀ɛ̀ do kɔ̀tɛ dihɛì pɑɑtímù kɛ̀ bɛ̀ɛ konní, 
\v 26 kɛ́kɔtɛ kɛ́yɑ̀ Mɔyiisi nɛ̀ Anɔɔ nɛ̀ Isidɑyɛɛribɛ sɔmbɛ Pɑdɑnni kó dikpɑ́ɑ̀ Kɑdɛɛsi kó kutempɛ̃ mmiɛkɛ kɛ́ bɛ̀ nɑ̀kɛ́ bɛ̀ yɑ̀ní tìì kó dimɑ̀ɑ̀, kɛ́ bɛ̀ bɛnkɛnɛ̀ yɛtebɛ bɛ̀ tɔní yɛ̀ dɛ kó kɛtenkɛ̀. 
\v 27 Kɛ̀ bɛ̀ɛ bɛ̀ nɑ̀kɛ́ kɛ dɔ̀: Ti kɔ̀tɛmu dihɛì ɑ ti tɔ̃ ndì tenkɛ̀ miɛkɛ. Mɔ́mmuɔ nwe mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀mmu. Ntɛ ti tɔní yɛ̀ɛ̀ tebɛ. 
\v 28 Bɛnìtìbɛ̀ bɛ̀ɛ̀ bo dɛ kó dihɛì miɛkɛ bɛɛ̀ nɛ́ kpeńnì kɛ̀ iduotí fitɛ́ bɛ ɛkɛ̀, kɛ̀ ti yɑ̀ yɛ miɛkɛ Anɑkii yɑɑ̀bí tidɑdiɛtì. 
\v 29 Amɑdesiibɛ bɛɛ̀ bo kubɑkù cɑ̃̀nku bíɛ́kɛ̀ kó kutempɛ̃, kɛ̀ Itiibɛ nɛ̀ Sebusiibɛ nɛ̀ Amɔriibɛ kɛ̀ bɛ̀ bo yɛtɑ̃rɛ̀ ĩ́nkɛ̀, kɛ̀ Kɑnnɑhɑ̃ɑ̃ kɔbɛ bo dɑ̀mɛ́ɛ̀rì nɛ̀ Suditɛ̃ɛ̃ dɛ pɛɛ́mmɛ̀.
\p
\v 30 Dɛ mɔ̀nnì kɛ̀ Kɑdɛbuu duɔ́ nkɛ̀ bɛnìtìbɛ̀ bɛ̀ɛ̀ kpɑ̀nnɛ̀ Mɔyiisi kɛ̀ bɛ̀ dɔ̀ yúóó. Kòò dɔ̀: Tí kɔtɛnɛ̀ ti yóó bɛ̀ nɑmu kɛ́fietɛ bɛ tenkɛ̀.
\p
\v 31 Bɛnìtìbɛ̀ ò do nɛinɛ̀ bɛ̀ kɛ̀ bɛmbɛ dɔ̀: Ti bɑ́ɑ́ nɑ kɛ́dokɛ́nɛ̀ dɛ kó bɛnìtìbɛ̀, bɛ̀ kpeńnìmu kɛ ti pɛ̃ɛ̃tɛ́.
\p
\v 32 Kɛ̀ bɛ̀ɛ ketɛ́ bɛ̀ bo nsĩnkùnkomɛ̀ dɛ kó kɛtenkɛ̀, kɛ́nnɑ́ɑ́ nyIsidɑyɛɛribɛ kɛ tú: Dɛ kó kɛtenkɛ̀ yo mbɛnìtìbɛ̀ mbɛ! Ti yɑ̀ bɛ̀ɛ̀ nìtìbɛ̀ kɛ miɛkɛ bɛ̀ tu tidɑdiɛtì nti. 
\v 33 Anɑkiibɛ bɛɛ̀ kɛ̀ bo, ti do bo bɛ ììkɛ̀ kɛ do nyɛcɑ́dúɔ̀ nyɛ, kɛ̀ bɛ̀ múnkɛ mmɛ nti wúó.
\c 14
\s1 Isidɑyɛɛribɛ yetɛmɛ̀ Kuyie nkpɛti
\p
\v 1 Kɛ̀ Isidɑyɛɛribɛ kó ditĩ̀nnìi tiitɛ́ yɛdɑbùò nkɛ́ nyié nkɛ kuɔ̀ nkɛyènkɛ̀ kɛmɔu, 
\v 2 kɛ́nkpɑnnɛ̀ Mɔyiisi nɛ̀ Anɔɔ kɛ nɑ́ɑ́ nkɛ tú: Kɛ̀ ti do nku Esibiti nwe yoo dikpɑ́ɑ̀ miɛkɛ dɛ̀ ntɔ̃ũ. 
\v 3 Bɑ nte kɛ̀ ti Yiɛ̀ nKuyie nti tɔní dikpɑ́ɑ̀ diì mmiɛkɛ kɛ̀ ti dootitɔbɛ̀ bo ti kuɔ kɛ́hɛí ti pobɛ̀ nɛ̀ ti bí? Kɛ̀ ti wɛ̃̀tɛ Esibiti dɛ̀ bɑ́ ntɔ̃ũɑ̀?
\p
\v 4 Kɛ̀ bɛ̀ nnɑ́ɑ́ mbɛtɔbɛ̀ kɛ tú: Tí tɑ̃ɑ̃tɛ́nɛ̀ wèè bo ntú ti kóo kpɑ̀ɑ̀tì kɛ́wɛ̃tɛ Esibiti.
\p
\v 5 Mɔyiisi nɛ̀ Anɔɔ kɛ̀ bɛ̀ɛ do kɛ́sĩ́nnɔ́ɔ Isidɑyɛɛribɛ bɛmɔu ììkɛ̀. 
\v 6 Kɛ̀ Nunni birɛ Sosuwee nɛ̀ Yefundee birɛ Kɑdɛbu bɛ̀ɛ̀ do kɔ̀tɛ kɛ́pɑɑtɛ́ kɛtenkɛ̀ kɛ̀ bɛ̀ɛ kɛ̃rí bɛ yɑ̀ɑ̀tì, 
\v 7 kɛ́nɑ́kɛ́ Isidɑyɛɛribɛ bɛmɔu tĩ̀nnì kɛ dɔ̀: Kɛtenkɛ̀ ti kɔ̀tɛ kɛ yɑ̀ kɛ̀, kɛ̀ tu kɛtensɑ̀ɑ̀kɛ̀ nkɛ, dihɛì sɑ̀ɑ̀rì mɔ́mmɔnni. 
\v 8 Ti Yiɛ̀ nKuyie nti kómmúmu kɛ yóó ti tɑnnɛ́ dɛ kó kɛtenkɛ̀ mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ nkɛ̀, kɛ́ kɛ̀ nti duɔ́. 
\v 9 Ti bɑ́ɑ́ tuutɛnɛ̀ Kuyie, ti bɑ́ɑ́ yɔtɛ dɛ kó kɛtenkɛ̀ kɔbɛ. Ti yóó bɛ̀ ɑutɛ́mu dimɔ̀nnì dìmɑ́ɑ̀ miɛkɛ. Bɛ bɔkɛ̀ cokɛ́mu! Ti Yiɛ̀ nKuyie nti bonɛ̀mu, di bɑ́ mbɛ̀ dé.
\s1 Kuyie mmiɛkɛ pɛikɛmɛ̀ Isidɑyɛɛribɛ kɛ̀ Mɔyiisii kù bɑ́ntɛ̀
\p
\v 10 Mɛm̀mɛ kɛ̀ Isidɑyɛɛribɛ bɛmɔu tĩ̀nnì nnɑ́ɑ́ nkɛ́tú, bɛ̀ bo búɔ́tí Mɔyiisi nɛ̀ Anɔɔ yɛtɑ̃́rɛ̀ kɛ́kuɔ. Bɛ̀ kpɑɑ́ mɛ nnɑ́ɑ́ nkɛ̀ ti Yiɛ̀ nKuyie nkó tikpetìi cútɛ́ní mɛtɑummɛ̀ tou ĩ́nkɛ̀ Isidɑyɛɛribɛ bɛmɔu nuɔ mmiɛkɛ. 
\v 11 Kɛ̀ ti Yiɛ̀ nKuyie mbɛ́inɛ̀ Mɔyiisi kɛ dɔ̀: Dɛ̀ yó nkɑ̃́ɑ̃́kɛ́ dɛ kɛ̀ bɛ nnìtìbɛ̀ yóu bɛ̀ bo nni nsenkumɛ̀? Dɛ̀ yó nkɑ̃́ɑ̃́kɛ́ dɛ kɛ̀ bɛ̀ɛ yie n kpɛti? M mɛ ndɔ̀ɔ̀mu tidiɛtì bɛ cuokɛ̀. 
\v 12 N yóó bɛ̀ bɔntɛ́ mutenkṹṹ mmu kɛ̀ bɛ̀ɛ kú kɛ́deè pɑ́í pɑ́í kɛ̀ n duɔ́ nkɑ̀ɑ botíi sṹṹ nkɛ́ bɛ̀ pɛ̃ɛ̃tɛ́, kɛ́kpenkɛ kɛ́ bɛ̀ pɛ̃ɛ̃tɛ́.
\p
\v 13 Kɛ̀ Mɔyiisii nɑ́kɛ́ ti Yiɛ̀ nKuyie nkɛ dɔ̀: Esibiti kɔbɛ kèèmu fɔ̃́ɔ̃̀ dènnɛmɛ̀ ɑ nìtìbɛ̀ bɛ ɛì miɛkɛ nɛ̀ ɑ kó muwɛ̃rímú. 
\v 14 Dihɛì diì nkɔbɛ kèèmu fɔ̃́ ti Yiɛ̀ nKuyie nhɑ bɛ̀ bonɛ̀mɛ̀ kɛ bɛ̀ bɛnkú ɑmɑ́ɑ̀, kɑ̀ɑ wɛtirì ɔ̃ mbɛ̀ dìɛ́kɛ́ kuyie nkɛ́ mbɛ̀ mí kɛyènkɛ̀. 
\v 15 Kɑ̀ɑ bɛ̀ kùɔ́ dimɔ̀nnì dìmɑ́ɑ̀ miɛkɛ, bɛ̀ɛ̀ do kèè bɛ̀ nɑ̀ɑ́mmɛ̀ ɑ kpɛ́í mbɛ̀ bo yĩ́, 
\v 16 fɔ̃́ nti Yiɛ̀ nKuyie nhɑ yĩɛ̃kɛ ɑ bo bɛ̀ tɑnnɛ́mɛ̀ mmɛ kɛtenkɛ̀ ɑ do yɛ̃ nhɑ yóó bɛ̀ duɔ́ nkɛ̀, dɛɛ̀ te kɑ̀ɑ bɛ̀ kùɔ dikpɑ́ɑ̀ miɛkɛ. 
\v 17 N Yiɛ̀ nKuyie n dɑ bɑ́ɑ́mmu, bɛnkɛ ɑ wɛ̃rímú ɑ bɛ́i nkɛ yɛ̃ ndɛ̀ ndòmmɛ̀. 
\v 18 A bɛ́immu kɛ tú fɔ̃́ nti Yiɛ̀ nKuyie nhɑ miɛkɛ boo, kɑ̀ɑ sɑ̀ɑ̀ ndɛu, kɛ̀ bɛnìtìbɛ̀ ɔ̃ ndɑ cɑɑ̀ri kɛ yetírí ɑ kpɛti, kɑ̀ɑ mmi ɑ mɛ nhɔ̃ í nwúónko oyɛiwe kɛ ɔ̃ɔ̃ kpetínnɛ́ ibí i yɛmbɛ̀ yɛi nkpɛ́í nnɛ̀ bɛ yɑɑ̀bí kó iyɑɑ̀bío. 
\v 19 Ti Yiɛ̀ nKuyie nhɑ sémmɛ̀ dɛumu, cĩ́ɛ̃́ mbɛ kɛ́ndònnɛ̀ ɑ bɛ̀ cĩ̀ɛ̃́nkomɛ̀ nɛ̀ bɛ̀ yɛ̀mɛ̀ Esibiti kɛ tùɔ̀kɛnní yíe. 
\v 20 Kɛ̀ ti Yiɛ̀ nKuyie ndɔ̀: A mɛ̀ nni mbɑ́ntɛ̀mɛ̀ m bɛ̀ cĩ̀ɛ̃́mmu. 
\v 21 Mí ndi Yiɛ̀ nKuyie m bomu! Kɛ̀ n kpetì pìɛ́kɛ́ kutenkù kumɔu dɛ̀ bɑ́ɑ́ pɑ̃. 
\v 22 Bɛ̀ɛ̀ kó dimɑ̀ɑ̀ yɑ̀ n kpetì nɛ̀ n dɔ̀ɔ̀ tìì diɛtì Esibiti nɛ̀ dikpɑ́ɑ̀ miɛkɛ, nɛ̀ mɛmmɛ kɛ cĩ́ɛ̃́kɛ́ kɛ n yɑ́ú kɛ tùɔ̀kɛ kucɛ tɛpíítɛ̀ bɑ́ bɛ̀ í yie n kpɛti. 
\v 23 M pɑrìkɛ̀mu bɛ kóò mɔù bɑ́ɑ́ yɑ̀ dihɛì n do yɛ̃ n yóó duɔ́ ndì bɛ yɛmbɛ̀, bɛ̀ɛ̀ n sènkɛ̀rì, bɛ kóò mɔù bɑ́ɑ́ dì yɑ̀. 
\v 24 N kóo tɔ̃ntì Kɑdɛbu yie kó mɛyɛ̀mmɛ̀ mɛ ncɑ̃̀ɑ̃́mmɛ̀, kòò yié n kpɛti timɔu, n yóo ò tɑnnɛ́mu dɛ kó dihɛì ò kɔ̀tɛ kɛ yɑ̀ dì, kòo yɑɑ̀bí di tiekɛ. 
\v 25 Amɑdesiibɛ nɛ̀ Kɑnnɑhɑ̃ɑ̃ kɔbɛ mɛ̀ mbomɛ̀ kubiriku bíɛ́kɛ̀ kó yɛhɛkɛ̀, di nɑɑ kɔ́ntɛ́ kɛ́yɛ̀ dikpɑ́ɑ̀ kɛ́tũnnɛ kucɛ kùù yìɛ̀nɛ̀ tipèntì kóo dɑ̀mɛ́ɛ̀rì.
\s1 Kuyie nyũ̀ɔ̃́mmɛ̀ ku kɔbɛ to
\p
\v 26 Kɛ̀ ti Yiɛ̀ nKuyie mbɛ́inɛ̀ Mɔyiisi nɛ̀ Anɔɔ kɛ dɔ̀: 
\v 27 Dɛ̀ yó nkɑ̃́ɑ̃́kɛ́ dɛ kɛ̀ kubotí yɛiku kuù nyóu kù bo nni nkpɑ̀nnɛ̀mɛ̀ kɛ yetírí n kpɛti? N kèèmu bɛ̀ tùùtɛ kɛ nɑ́ɑ́ ntì. 
\v 28 Nɑ́kɛ́ bɛ kɛ dɔ̀ n tú: Mí ndi Yiɛ̀ nKuyie m bomu kɛ̀ míì bɛ́i, n yóó di dɔɔ̀ di nɑ̀kɛ́ tìnti. 
\v 29 Di yóó kú dikpɑ́ɑ̀ miɛkɛ nkɛ díndi bɛ̀ kɑ̀ɑ mbɛ̀ kó dimɑ̀ɑ̀ kɛ́túótɛ́ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko. Díndi bɛ̀ɛ̀ kó dimɑ̀ɑ̀ tùùtɛ, 
\v 30 di í tɑti kɛtenkɛ̀ n do bɛ́i nkɛ́pɑrìkɛ̀ kɛ dɔ̀ n yóó di duɔ́ nkɛ̀, kɛ̀ dɛ̀ í tú Yefundee birɛ Kɑdɛbu nɛ̀ Nunni birɛ Sosuwee. 
\v 31 Di yɑɑ̀bí di do yɛ̃ mbɛ̀ yóó di kuɔ kɛ́hɛí ì, n yóó i ntɑnnɛ́ kɛtenkɛ̀ di sènkɛ̀rì kɛ̀, kɛ̀ ìi kɛ̀ tiekɛ. 
\v 32 Kɛ̀ díndi biɛ di yóó kú dikpɑ́ɑ̀ miɛkɛ nkɛ. 
\v 33 Di n yetɛ mɛ̀ɛ̀ kpɛ́í nte kɛ̀ di bí yó nhɑ̃́ɑ̃́ ndikpɑ́ɑ̀ miɛkɛ kɛ dɔ̀ yɛbie nsipísìnɑ̀ɑ̀ kɛ fɛ̃́ũ̀rì kɛ bɑɑnɛ̀ di bo kúmɛ̀ dimɔu kɛ́deè. 
\v 34 Yɛwe sipísìnɑ̀ɑ̀ di do dɔ̀ɔ̀ yɛ̀ di kɔ̀tɛ dìì mɔ̀nnì kɛ bo pɑɑtɛ́ kɛtenkɛ̀, yɛ̀ bo nɑɑ́ nyɛbie nsipísìnɑ̀ɑ̀. Dibenni dìmɑ́ɑ̀ diyiè dìmɑ́ɑ̀ kpɛ́í, di bo yɑ̀ di yɛi nkó tiyeti kɛ́bɑntɛ́ di bo yetɛmɛ̀ n kpɛti dɛ̀ mɔ̀kɛ mùù cɔ̃́ntimu. 
\v 35 Mí ndi Yiɛ̀ nKuyie mmíì bɛ́i nkɛ yóó tì dɔ̀ɔ̀, kubotí yɛiku kuù nkɔbɛ bɛ̀ɛ̀ wɛ̃nnɛ́ kɛ yetɛ n kpɛti, bɛ̀ yóó kú dikpɑ́ɑ̀ dii mmiɛkɛ nkɛ, bɑ́ òmɔù bɑ́ɑ́ súɔ́.
\p
\v 36 Dɛ kó bɛnìtìbɛ̀ Mɔyiisi do tɔ̃ mbɛ̀ kɛ̀ bɛ̀ɛ kɔtɛ kɛ́pɑɑtɛ́ dihɛì kɛ́wɛ̃tɛní kɛ́sukú bɛtɔbɛ̀ kɛ̀ bɛ̀ɛ tuutɛ kɛ́nsĩnkùnko dɛ kó kɛtenkɛ̀ bɛ̀ kɔ̀tɛ kɛ yɑ̀ kɛ̀. 
\v 37 Bɛ̀ɛ̀ do tùùtɛ kɛ nnɑ́ɑ́ ntìì í wenni dɛ kó kɛtenkɛ̀ kpɛ́í ti Yiɛ̀ nKuyie ndo bɛ̀ potɛ́mu kɛ̀ bɛ̀ɛ do ku ììkɛ̀ kɛ́kú. 
\v 38 Nunni birɛ Sosuwee nɛ̀ Yefundee birɛ Kɑdɛbu bɛɛ̀ do kpɑɑ́ kɛ í nku bɛ̀ɛ̀ do kɔ̀tɛ kɛ́pɑɑtɛ́ kɛtenkɛ̀ bɛ miɛkɛ.
\s1 Isidɑyɛɛribɛ dèmmumɛ̀ kɛ nɛ́ sɔ̃́ ndɛ̀ ɔɔtɛ
\p
\v 39 Kɛ̀ Mɔyiisii kɔtɛ kɛ́nɑ́kɛ́ Isidɑyɛɛribɛ bɛmɔu ti Yiɛ̀ nKuyie nhò nɑ̀kɛ́ tì kɛ̀ bɛ̀ɛ tiitɛ́ yɛdɑbùò. 
\v 40 Kɛ̀ dɛ̀ɛ wentɛ́ kɛ̀ bɛ̀ɛ pikɛ cutɛ kɛ́dekɛ ditɑ̃rì ĩ́nkɛ̀ kɛ́nnɑ́ɑntɛ kɛ tú: Ti bɑntɛ́mu ti cɑ̀ɑ̀rɛ̀mɛ̀, ti nɛ́ bɑ̀ɑ́tímu kɛ kɔri ti Yiɛ̀ nKuyie nti duɔ́ ndìì ɛì. 
\v 41 Kɛ̀ Mɔyiisii bɛ̀ nɑ̀kɛ́ kɛ dɔ̀: Dɛ̀ dòmmɛ kɛ̀ di dɔ́ kɛ́yetɛ ti Yiɛ̀ nKuyie nkpɛti. Di í yóó nɑ. 
\v 42 Bɑ́ɑ́ kɔtɛnɛ̀ ti Yiɛ̀ nKuyie nyí di bonɛ̀, di bɑ́ɑ́ bennɛ́ kɛ́kɔtɛ kɛ̀ di dootitɔbɛ̀ di kuɔ. 
\v 43 Amɑdesiibɛ nɛ̀ Kɑnnɑhɑ̃ɑ̃ kɔbɛ bɛ̀ɛ̀ bo di ììkɛ̀, bɛ̀ yóó di fíému, di bùtínnɛ́mu ti Yiɛ̀ nKuyie, kù tɛ̃́nkɛ í di bonɛ̀.
\p
\v 44 Kɛ̀ Isidɑyɛɛribɛɛ yetɛ kɛ́kpénkùnnɛ bɛ to kɛ dɔ̀: Ti deètìmu ditɑ̃rì ĩ́nkɛ̀ kó kutempɛ̃. Kɛ̀ Mɔyiisi yie mɛ nni nkpɑɑ́ bɛ kɑrì nɛ̀ Kuyie ntɑummɛ̀ tɔu. 
\v 45 Mɛm̀mɛ Amɑdesiibɛ nɛ̀ Kɑnnɑhɑ̃ɑ̃ kɔbɛ cùtɛ́nímɛ̀ kɛ́potɛ́ Isidɑyɛɛribɛ kɛ́ mbɛ̀ bɛ̀tì kɛ kɔù kɛ́tuɔkɛnɛ̀ Ɔdimɑɑ.
\c 15
\s1 Kuyie nnɑ̀kɛ́mɛ̀ bɛ̀ yó nkù pɑ̃ɑ̃ mmɛ̀ɛ̀ botí tidiitì kó yɛpɑ̃rɛ̀
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 2 Nɑ́kɛ́ Isidɑyɛɛribɛ kɛ dɔ̀ n tú: Kɛ̀ di tɑ dìì mɔ̀nnì kɛtenkɛ̀ n yɛ̃ n yóó di duɔ́ nkɛ̀ kɛ̀ dí mbo, 
\v 3 kɛ̀ di yó n féútɛ́ fɛɔ̃̀fɛ̀ kɛ́tuɔ nyoo mɛtɑummɛ̀ kpɛ́í, kòò mɔù mɛ nyó n féútɛ́ fɛɔ̃̀fɛ̀ ò n cɑ̀nnɛnɛ̀ dìì nùù kpɛ́í, yoo ò bɑɑ dɔ́ kɛ́ m pɑ̃ dipɑ̃nnì ndi, yoo dibɑnni mɑrì kpɛ́í, kòò yó n féútɛ́ fɛɔ̃̀fɛ̀ diɛfɛ̀ nfɛ, yoo fɛsɑ́m̀pɔ́fɛ̀, dipɑ̃nnì ndi dìì kó kufɔ̃ɔ̃ku n nɑɑti, 
\v 4 wèè te fɛɔ̃̀fɛ̀ wèe wɑɑ́ mmuyuo nsɑ̀ɑ̀mù cìdóò bɛ̀tɑ̃ɑ̃ti kɛ́ mù ɑ̃̀ntɛnɛ̀ mɛkɔsɑ̀ɑ̀mɛ̀ dítìrì nɛ̀ dikéè. 
\v 5 Kɛ̀ dipebii mɛ nni ndi dɛ yiɛ̀ ndɔ́ kɛ́ n féútɛ́mɛ̀ kɛ́tuɔ nyoo mɛtɑummɛ̀ kpɛ́í, wèe wɑɑ́ mmɛnɑɑ̀ ndítìrì òmɑ́ɑ̀ nɛ̀ dikéè. 
\v 6 Kɛ̀ dipedɑɑ̀ mɛ nni ndi wèe wɑɑ́ mmuyuo nsɑ̀ɑ̀mù cìdóò bɛ̀kuɔ̀ kɛ́ mù ɑ̃̀ntɛnɛ̀ mɛkɔsɑ̀ɑ̀mɛ̀ dítìrì bɛ̀dɛ́bɛ̀, 
\v 7 kɛ́yɔɔrɛnɛ̀ mɛnɑɑ̀ ndítìrì bɛ̀dɛ́bɛ̀. Dipɑ̃nnì ndi dìì kó kufɔ̃ɔ̃ku n nɑɑti. 
\v 8 Kɛ̀ fɛnɑ̀ɑ̀fɛ̀ mɛ nni nfɛ ò yó n féútɛ́mɛ̀ kɛ́tuɔ nyoo mɛtɑummɛ̀ kpɛ́í, yoo ò dɔ́ kɛ́ n féútɛ́ fɛɔ̃̀fɛ̀ ò n cɑ̀nnɛnɛ̀ dìì nùù kpɛ́í. 
\v 9 Dinɑɑdɑɑ̀ dìmɑ́ɑ̀ wèe wɑɑ́ mmuyuo ncìdóò bɛ̀wɛi, kɛ́ɑ̃ntɛnɛ̀ mɛkùɔ̀ ndítìrì bɛ̀tɑ̃ɑ̃ti, 
\v 10 kɛ́yɔɔrɛnɛ̀ difɛ̃́ɛ̃̀ dítìrì bɛ̀tɑ̃ɑ̃ti. Dipɑ̃nnì ndi dìì kó kufɔ̃ɔ̃ku n nɑɑti.
\p
\v 11-12 Bɑ́ kɛ̀ ì sũ kɛ mɑmɛ̀ di yó mmɛ ndɔɔri bɑ́ fɛ̀ɛ̀ ɔ̃̀fɛ̀ ĩ́nkɛ̀ kɛ́ntũ nfɛ kuɔ́ duɔ́ kɛ dòmmɛ̀, kɛ̀ fɛnɑ̀ɑ̀fɛ̀ nfɛ yoo dipedɑɑ̀ yoo dipedɑbii yoo tɛbuɔtɛ̀. 
\v 13 Isidɑyɛɛribɛ níí yóó mɛ ndɔɔ̀ bɛ̀ m pɑ̃ɑ̃ nyɛ̀ɛ̀ pɑ̃rɛ̀ kɛ tuɔ̀. Yɛpɑ̃rɛ̀ nyɛ yɛ̀ɛ̀ kó kufɔ̃ɔ̃ku n nɑɑti. 
\v 14 Bɛpɔ̀ɔ̀bɛ̀ bɛ̀ɛ̀ bo di cuokɛ̀ yoo bɛ̀ɛ̀ kó bɛyɑ̀ɑ̀rìbɛ̀ do kɔ̀tɛní kɛ́ ndi bonɛ̀, bɛ miɛkɛ kòò mɔù dɔ́ kɛ́ m pɑ̃ mí ndi Yiɛ̀ nKuyie ndipɑ̃nnì kɛ́tuɔ ò yóó mɛ ndɔɔ̀. Dipɑ̃nnì ndi dìì kó kufɔ̃ɔ̃ku n nɑɑti. 
\v 15 Dɛ kó ikuɔ́ yó mbomu ditĩ̀nnì dimɔu kpɛ́í nsɑ̃́ɑ̃̀ nɛ̀ di yɑɑ̀bío opɔ̀ɔ̀ kpɛ́í nnɛ̀ tɛhɛikɛ̀mbitɛ kpɛ́í. Tɛhɛikɛ̀mbitɛ dɔɔrimɛ̀ opɔ̀ɔ̀ yóó mmɛ ndɔɔri. 
\v 16 Ikuɔ́ imɑ́ɑ̀ yó nni nyi mɛdɔɔ̀rìmɛ̀ mɛmɑ́ɑ̀, díndi nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀.
\s1 Bɛ̀ bo mpɑ̃ɑ̃mmɛ̀ Kuyie ntidipɑ̀ntì kóo pɛ̃́ɛ̃̀
\p
\v 17 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 18 Nɑ́kɛ́ Isidɑyɛɛribɛ kɛ dɔ̀ n tú: Kɛ̀ di tɑ dìì mɔ̀nnì kɛtenkɛ̀ n di kɔrinɛ̀ kɛ̀ɛ̀ miɛkɛ. 
\v 19 Kɛ̀ di dɔ̀ɔ̀ pɛ̃́ɛ̃̀bɛ̀ kɛ bo cɑ́ɑ́kɛ́, dí dɛitɛ mí ndi Yiɛ̀ nKuyie n kpɛrɛ. 
\v 20-21 Kɛ̀ di níí nɑ̀ɑ mmuyuo kɛ dɔ̀ɔ̀ tipɛ̃́mpɛ̃ńtì dí dɛitɛ n kɔku, di ɔ̃ɔ̃ dɛitɛ mɛ̀ɛ̀ botí tidiketitì miɛkɛ n kpɛti, di tì puotì dìì mɔ̀nnì kuyiɛ́. Di yó mmɛ ndɔɔri sɑ̃́ɑ̃̀ nɛ̀ di yɑɑ̀bío.
\s1 Kɛ̀ dɛ̀ dɑ kpɛtɛ́nɛ̀ kɑ̀ɑ cɑ̀ɑ̀rɛ̀ ɑ dò nkɛ́féútɛ́ fɛ̀ɛ̀ ɔ̃̀fɛ̀
\p
\v 22-23 Kɛ̀ ti Yiɛ̀ nKuyie mbɛ́i nkɛ dɔ̀: Kɛ̀ dɛ̀ dò ndɛ̀ di kpɛtɛ́nɛ̀ kɛ di yetɛnɛ̀ n duɔ́ nyìì kuɔ́ Mɔyiisi kòò ì ndi tùo i kó ìmɑì, kɛ́túótɛ́ yíe nnɛ̀ di bo mbomɛ̀ nɛ̀ di yɑɑ̀bío, 
\v 24 kɛ̀ dɛ̀ dò ndɛ̀ kpɛtɛ́nɛ̀ òmɔù kɛ̀ ditĩ̀nnì dimɔu í yɛ̃́ kɛ yetɛ́nɛ̀ ikuɔ́ mɑì, di wɛ̃nnɛ́ kɛ́wɑɑ́ ndinɑɑdɑɑ̀, kɛ́ dì nni nféútɛ́ kɛ́wɛ̃nnɛ́nɛ̀ muyuo mmùù ɑ̃̀ntɛnɛ̀ mɛkùɔ̀ nnɛ̀ mɛnɑɑ̀ kɛ́tuɔ nyikuɔ́ yɛ̃mmɛ̀. Dipɑ̃nnì ndi dìì kó kufɔ̃ɔ̃ku n nɑɑti, dí wɑɑ́nnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛri. 
\v 25 Kɛ̀ ikuɔ́ nìùtìi dɔɔ̀ ditĩ̀nnì dimɔu mɛyɛi ncĩ́ɛ̃́mmɛ̀ kó ikuɔ́, kɛ̀ n di cĩ́ɛ̃́ nkɛ yɛ̃́ dɛ̀ di kpɛtɛ́nɛ̀mɛ̀mu. Kɛ̀ dí tɔní di diitì kó yɛpɑ̃rɛ̀ di yó m pɑ̃ yɛ̀ kɛ́tuɔ, kɛ́fíénɛ̀ mɛyɛi ncĩ́ɛ̃́mmɛ̀ kó iwũɔ̃ kɛ yɛ̃́ dɛ̀ di kpɛtɛ́nɛ̀mɛ̀mu. 
\v 26 Dɛ mɔ̀nnì n yóó di cĩ́ɛ̃́mmu di yɛi ndíndi Isidɑyɛɛribɛ nɛ̀ bɛpɔ̀ɔ̀bɛ̀ bɛ̀ɛ̀ di bonɛ̀ kɛ yɛ̃́ dɛ̀ di kpɛtɛ́nɛ̀mu dimɔu.
\p
\v 27 Kɛ̀ dɛ̀ mɛ ndò ndɛ̀ kpɛtɛ́nɛ̀ onìtì òmɑ́ɑ̀ ndi kòò dɔ̀ɔ̀ mɛyɛi nwèe wɑɑ́ ndibɔsɛrì dìì mɔ̀kɛ dibenni dìmɑ́ɑ̀ kɛ́ dì nni nféútɛ́ o yɛi ncĩ́ɛ̃́mmɛ̀ kpɛ́í. 
\v 28 Kɛ̀ ikuɔ́ nìùtìi ò dɔ̀ɔ̀ mɛyɛi nhũtímù kó ikuɔ́ mɛtɑummɛ̀ tou ììkɛ̀ kɛ̀ nhò cĩ̀ɛ̃́, 
\v 29 díndi Isidɑyɛɛribɛ kɛ̀ di kóò mɔù nwe yoo opɔ̀ɔ̀ wèè di bonɛ̀ ikuɔ́ imɑ́ɑ̀ yóó nni nyi ìì tukúnɛ̀ dɛ̀ bo kpɛtɛ́nɛ̀ wè, kòo yetɛ́nɛ̀ ikuɔ́.
\p
\v 30 Kɛ̀ wèè yie bo ncɑɑ̀ri kɛ yɛ̃́, kòò tu Isidɑyɛɛri nwe yoo ò tu opɔ̀ɔ̀ ò cɑ̀ɑ̀rɛ̀ mí ndi Yiɛ̀ nKuyie mmí nwe. Dí ò dènnɛ di cuokɛ̀. 
\v 31 Dɛ kóo nìtì botí ò sènkɛ̀rì mí ndi Yiɛ̀ nKuyie n nɑ́ɑǹtì nti kɛ cɑɑri n kuɔ́, dí ò dɛ̀itɛ di cuokɛ̀, o yɛi mbo o yuu ĩ́nkɛ̀ nkɛ.
\s1 Wèè do yetɛ́nɛ̀ tɛom̀pùtɛ̀ kó ikuɔ́
\p
\v 32 Isidɑyɛɛribɛ do bo dìì mɔ̀nnì dikpɑ́ɑ̀ miɛkɛ, diyiè mɑrì kɛ̀ bɛ̀mɑbɛ̀ɛ yɑ̀ òmɔù kòò kɑu idɛí tɛom̀pùtɛ̀ yiè 
\v 33 kɛ̀ bɛ̀ɛ ò kɔ̀tɛnɛ̀ Mɔyiisi nɛ̀ Anɔɔ nɛ̀ Isidɑyɛɛribɛ sɔmbɛ borɛ̀, 
\v 34 kɛ́duɔ́ nkɛ̀ bɛ̀ nhò bɑ̀ɑ kɛ yɛ̃́ ikuɔ́ mu ndo í nɑ̀kɛ́mɛ̀ bɛ̀ dò nkóò dɔ̀ɔ̀mɛ̀. 
\v 35 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Dɛ kóo nìtì dò nkɛ́kuɔ̀mu, Isidɑyɛɛribɛ dimɔu dí ò dènnɛ di kó dikɑrì kóò bùɔ́tí yɛtɑ̃́rɛ̀ kɛ́kuɔ.
\p
\v 36 Mɛm̀mɛ kɛ̀ ditĩ̀nnì dimɔuu ò dènnɛ bɛ kɑrì kɛ́ nhò buɔti yɛtɑ̃́rɛ̀ kòò yɑ̀ɑ kúnɛ̀, ti Yiɛ̀ nKuyie ndo nɑ̀kɛ́mɛ̀ Mɔyiisi kɛ nyɛ̃ ndɛ̀ ndòmmɛ̀.
\s1 Kuyie nyɛ̃mmɛ̀ ku nìtìbɛ̀ nhɑ̃ɑ̃̀ iyɑɑ̀yuɔ́ mbɛ yɑ̀ɑ̀tì
\p
\v 37 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 38 Á nɑ́kɛ́ Isidɑyɛɛribɛ kɛ dɔ̀ n tú: Díndi nɛ̀ di yɑɑ̀bío di nhɑ̃ɑ̃̀ iyɑɑ̀yuɔ́ ndi yɑ̀ɑ̀tì, kɛ̀ di níí yɑ ntiyɑ̀ɑ̀tì di ɑ̃nnɛ́ mupɑɑ̀kómmú mùù wũɔ̃ tiɔ̃̀tì tìì dònnɛ̀ tibedɛncɛ̃ɛ̃̀tì mu kó iyúɔ́ nti mɑ̀nkɛ. 
\v 39 Di yɑ̀ɑ̀tì níí nhɑ̃ iyúɔ́ nkɛ̀ di nyì yɑ̀u kɛ denniní n kuɔ́ mí ndi Yiɛ̀ Kuyie nkɛ tũ nyì yɛ̃mmɛ̀, kɛ bɑ́ ndɔɔri di yɛ̀mmɛ̀ dɔ́ dɛ̀ nɛ̀ di nuɔ ndɔ́ dɛ̀, dɛ̀ yɑ̀ɑ̀ bo nte kɛ̀ dí m bútínnɛ́ mí ndi Yiɛ̀ nKuyie. 
\v 40 Mɛm̀mɛ di bo ndennimɛ̀ n tɑnnɔ̀ yɛmɔu. Kɛ dɔɔri yɛ̀ yɛ̃mmɛ̀ kɛ̀ dɛ̀ɛ bɛnkɛ kɛ dò ndi cɑ̃́ɑ̃́ nkɛ tú n kɔbɛ. 
\v 41 Mí ndi Yiɛ̀ nKuyie m míì di te kɛ di dènnɛní Esibiti kɛ̀ di bo ntú n kɔbɛ.
\c 16
\s1 Kodee yetɛmɛ̀ Kuyie nkpɛti
\p
\v 1 Defii mɔù Keɑti nɑɑ̀mùnkù kou weè do pɛitɛ́ Isɑɑdi kɛ̀ Isɑɑdi pɛitɛ́ Kodee. Kòo sukú Dubɛnni nɑɑ̀mùnkù kɔbɛ bɛ̀tɑ̃ɑ̃ti, Ediɑbu bí Dɑtɑnni nɛ̀ Abidɑmmu nɛ̀ Pedɛti birɛ Onni. 
\v 2 Nɛ̀ Isidɑyɛɛribɛ sikɔusìdɛ́ nɛ̀ sipísìnùmmù (250), bɛ̀ɛ̀ do tú bɛ botí miɛkɛ bɛkótíbɛ̀ kɛ ni bɛ tĩ̀rɛ̀ kɛ̀ bɛ yètɛ̀ feí. 
\v 3 Kɛ̀ bɛ̀ɛ cɛ̃ɛ̃tɛ Mɔyiisi nɛ̀ Anɔɔ kɛ́ mbɛ̀ kpɑ̀nnɛ̀ kɛ tú: Di tɛrɛ̀ tontɛ́mu Isidɑyɛɛribɛ botí kumɔu tu Kuyie nkɔbɛ mbɛ, kɛ̀ kù bɛ̀ bonɛ̀. Dɛ̀ yĩmɛ kɛ̀ di dɔ́ kɛ́ nti bɑkɛ́.
\p
\v 4 Mɔyiisi kèè dìì mɔ̀nnì dɛ kó tinɑ́ɑǹtì kɛ́do kɛ́sĩ́nnɔ́ɔ kɛtenkɛ̀, 
\v 5 kɛ́nɑ́kɛ́ Kodee nɛ̀ o kó ditĩ̀nnì kɔbɛ kɛ dɔ̀: Nɑnkɛ dikṹnweńnì ti Yiɛ̀ nKuyie mbo bɛnkɛ wèè tu ku kou, kù tɑ̃ɑ̃tɛ́ wè koò cɑ̃̀ńnɛ́, kòò bo nkù tɔkunɛ̀, dɛ yiɛ̀ nweè yó nkù tɔkunɛ̀. 
\v 6 Nɛ́ ntɛ di dò nkɛ́dɔɔ̀mɛ̀: Fɔ̃́ nKodee nɛ̀ ɑ kó ditĩ̀nnì kɔbɛ bɛmɔu túótɛ́nɛ̀ sisɔɔsékɛ́búkúsí, 
\v 7 di nɑɑ sì ɑ̃nnɛ́ muhɑ̃ɑ̃́ nkɛ́yɔɔrɛ tihúúntì mu ĩ́nkɛ̀ ti Yiɛ̀ nKuyie ntɑummɛ̀ tou ììkɛ̀, kɛ̀ tí yɑ̀ ti Yiɛ̀ nKuyie nyóó tɑ̃ɑ̃tɛ́ wè, wèè tu ku kou kù cɑ̃̀ńnɛ́ wè. Díndi Defiibɛ di kpɛrɛ dɛɛ̀ tontɛ́.
\p
\v 8 Kɛ̀ Mɔyiisii wɛ̃tɛ kɛ́nɑ́kɛ́ Kodee kɛ dɔ̀: Kéntɛ́nɛ̀ díndi Defiibɛ, 
\v 9 dɛ̀ í di sɑ̀nnɛ̀ ti Yiɛ̀ nKuyie nyIsidɑyɛɛribɛ tũ̀ nkù di tɑ̃ɑ̃tɛ́mɛ̀ Isidɑyɛɛribɛ botí miɛkɛ, kɛ di yu kɛ di dɔ̀ɔ̀ ku tɔ̃mbɛ̀ kɛ̀ di pĩ́ nku tɑummɛ̀ tou miɛkɛ ku tɔ̃mmú nɛ̀ Isidɑyɛɛribɛ bɛmɔu kó diyètìrɑ̀ɑ̀? 
\v 10 Kuyie ndɑ yu fɔ̃́ nKodee nɛ̀ ɑ kɔbɛ Defiibɛ bɛmɔu kɛ̀ di kù tɔ̀kɛ́nɛ̀ kɛ̀ di nɛ́ tontɛ́ kɛ wɑnti kɛ́nɑɑ́ nyikuɔ́ nìùbɑ̀ɑ̀? 
\v 11 Fɔ̃́ nnɛ̀ ɑ kó ditĩ̀nnì kɔbɛ di kpɑnnɛ̀ ti Yiɛ̀ nKuyie nku. Anɔɔ tu we kɛ̀ di bo nhò sɛí?
\p
\v 12 Kɛ̀ Mɔyiisii tɔ̃ nkɛ̀ bɛ̀ bo yúní Ediɑbu kó ibí Dɑtɑnni nɛ̀ Abidɑmmu kɛ̀ bɛ̀ɛ ò tɛ̃̀ńnɛ́ kɛ dɔ̀: Ti í kɔroo? 
\v 13 A ti dènnɛní mɛnɑɑmiɛ̀ nnɛ̀ mɛcekùɔ̀\f + \fr 16:13 \fr*\fk mɛnɑɑmiɛ̀ nnɛ̀ mɛcekùɔ̀: \fk*\ft Kuyie ndo dènnɛní Isidɑyɛɛribɛ kɛ́ bɛ̀ nɑ̀kɛ́ kɛ dɔ̀ kù yóó bɛ̀ duɔ́ mmɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ ndìì ɛì ndi. Bɛ̀ berínɛ̀ dìì mɔ̀nnì dikpɑ́ɑ̀ miɛkɛ kɛ̀ tidiitìi bɛ̀ dòńtɛ́ kɛ̀ bɛ̀ ńkpɑnnɛ̀ Mɔyiisi kɛ wɛ̃̀tɛ kɛ nɑ́ɑ́ ndɛ kó ditɑnfɔ̃̀tìrì kɛ nɛ́ buɔ̀ Esibiti ɛì, bɛ̀ yɛ̀nní kɛ̀. Wéntɛ́ Mudennimù 3:8.\ft*\f* dɛ̀ pũɔ̃̀ ndɛ̀, kɛ ti kɔ̀tɛnní dikpɑ́ɑ̀ tɛdɔntɛ̀ tiɛ̀ mmiɛkɛ kɛ̀ dɛ̀ í dɑ sɑ̀nnɛ̀ kɑ̀ɑ wɛ̃̀tɛ kɛ dɔ́ kɛ́ nti kpɑɑtìrɑ̀ɑ̀? 
\v 14 Ti yetɛmu! Bìtì bìtì ɑ í ti niitɛ́ mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ ndɛ̀, ɑ mɛ nyí ti duɔ́ nkɛtenkɛ̀ nɛ̀ dɛpɑɑ nnɛ̀ fínyĩ̀ kó dɛtie. A ti wúó ntiyũ̀ɔ̃̀ntì ntɑɑ̀? Ti í kɔroo!
\p
\v 15 Kɛ̀ Mɔyiisi miɛkɛɛ cɔ́útɛ́ mɛdiɛ̀ nkòo nɑ́kɛ́ ti Yiɛ̀ nKuyie nkɛ dɔ̀: A bɑ́ɑ́ cɔutɛ́ bɛ pɑ̃rɛ̀, n yí cɔutɛ́ bɛ mɔù kóo sɑ̃mmɑrímú, m mɛ nyí yetɛ́nɛ̀ òmɔù.
\s1 Kuyie mpùtɛ́mɛ̀ Kodee nɛ̀ Anɔɔ
\p
\v 16 Mɛm̀mɛ kɛ̀ Mɔyiisii nɑ́kɛ́ Kodee kɛ dɔ̀: Nɑnkɛ fɔ̃́ nnɛ̀ ɑ kó ditĩ̀nnì kɔbɛ nɛ̀ Anɔɔ, dí kɔtɛní kɛ́cómmú mɛtɑummɛ̀ tou ììkɛ̀. 
\v 17 A kɔbɛ sikɔusìdɛ́ nɛ̀ sipísìnùmmù (250), bɑ́ wè wèe túótɛ́ o sɔɔsékɛ́buutɛ kɛ́ɑ̃nnɛ́ tihúúntì kɛ́tɔní ti Yiɛ̀ nKuyie tou ììkɛ̀, fɔ̃́ nKodee nɛ̀ Anɔɔ kɛ̀ di múnkɛ mɛ ndɔɔ̀.
\p
\v 18 Kɛ̀ Kodee tíí nyIsidɑyɛɛribɛ nɛ̀ o kɔbɛ kɛ̀ bɛ̀ɛ yie mbɑ́ wè kòo túótɛ́ o sɔɔsékɛ́buutɛ kɛ́ɑ̃nnɛ́ muhɑ̃ɑ̃́, nkɛ́yɔɔrɛ tihúúntì muhɑ̃ɑ̃́ nyĩ́nkɛ̀ kɛ́kɔtɛ kɛ́cómmú mɛtɑummɛ̀ tou bòrìnùù, Mɔyiisi nɛ̀ Anɔɔ kɛ̀ bɛ̀ múnkɛ mɛ ndɔɔ̀. 
\v 19 Kɛ̀ Kodee tíí nyIsidɑyɛɛribɛ bɛmɔu Mɔyiisi nɛ̀ Anɔɔ bɛ ììkɛ̀ mɛtɑummɛ̀ tou bòrìnùù.
\p Kɛ̀ ti Yiɛ̀ nKuyie nkó tikpetìi cútɛ́ní bɛ ĩ́nkɛ̀. 
\v 20 Kɛ̀ ti Yiɛ̀ nKuyie mbɛ́innɛ̀ Mɔyiisi nɛ̀ Anɔɔ kɛ dɔ̀: 
\v 21 Kɛntɛ́nɛ̀ dimɑ́ɑ̀ dɛ kó bɛnìtìbɛ̀, n yóó bɛ̀ kùɔ̀mu dimɔ̀nnì dimɑ́ɑ̀.
\p
\v 22 Mɔyiisi nɛ̀ Anɔɔ kɛ̀ bɛ̀ɛ do kɛ́sĩ́nnɔ́ɔ kɛtenkɛ̀ kɛ́kuɔ́nko kɛ dɔ̀: Áú Kuyie! Fɔ̃́ nwèè duɔ̀ mmufòmmu dɛ̀ɛ̀ kó dimɑ̀ɑ̀ fòù, ɑ miɛkɛ bo do kubotí kumɔu onìtì omɑ́ɑ̀ kó mɛcɑɑ̀rìmɛ̀ kpɛ́ínɑ́ɑ̀?
\p
\v 23 Kɛ̀ ti Yiɛ̀ nKuyie nyíɛ́ kɛ́bɛ́innɛ̀ Mɔyiisi kɛ dɔ̀: 
\v 24 Á nɑ́kɛ́ Isidɑyɛɛribɛ botí kumɔu kɛ dɔ̀: Bɛ̀ɛ kɛntɛ́nɛ̀ Kodee cĩ́ɛ̃̀tɛ̀ nɛ̀ Dɑtɑnni nɛ̀ Abidɑmmu bɛ kpɛsi.
\p
\v 25 Mɛm̀mɛ kɛ̀ Mɔyiisii ítɛ́ kɛ́nkɔri Dɑtɑnni nɛ̀ Abidɑmmu bɛ borɛ̀ kɛ̀ Isidɑyɛɛribɛ kó bɛkótíbɛ̀ ò tũ̀. 
\v 26 Kòo nɑ́kɛ́ ditĩ̀nnì kɛ dɔ̀: Kɛntɛ́nɛ̀ bɛnitidɔnnibɛ̀ biɛ ncɛ̃́ĩ borɛ̀, di bɑ́ɑ́ kɑ́ɑ́kɛ́ dɛ̀mɑrɛ̀ dɛ̀ɛ̀ tu bɛ kpɛrɛ di yɑ̀ɑ̀ bo kú bɛ kó mɛcɑɑ̀rìmɛ̀ kpɛ́í.
\p
\v 27 Kɛ̀ bɛ̀ɛ ítɛ́ kɛ dɛ́tɛ́nɛ̀ Kodee cĩ́ɛ̃̀tɛ̀.
\b
\p Dɑtɑnni nɛ̀ Abidɑmmu bɛ̀ do yɛ̀nní kɛ́ncómmú bɛ touti bòrɛ̀ nyɛ nɛ̀ bɛ pobɛ̀ nɛ̀ bɛ bí nɛ̀ bɛ yɑɑ̀bí. 
\v 28 Kɛ̀ Mɔyiisii bɛ́i nkɛ dɔ̀: Di yóó bɑntɛ́ diɛ ndɛ kɛ dò ti Yiɛ̀ nKuyie nkuù n tɔ̃nní kɛ̀ m pĩ ndɛ kó mutɔ̃mmú mumɔu kɛ̀ dɛ̀ í tú m mù pĩ̀ńnɛ̀ m mɑ́ɑ̀ kó muwɛ̃rímú. 
\v 29 Kɛ̀ dɛ kó bɛnìtìbɛ̀ ku mukṹṹ mbɛtɔbɛ̀ kɔ̃ mmù kɛ í ku kɛ̀ dɛ̀ cɑ̃̀ɑ̃́nnɛ̀ bɛtɔbɛ̀ kɔ̃mmɛ̀ ti Yiɛ̀ nKuyie nkuù í n tɔ̃nní. 
\v 30 Kɛ̀ dɛ̀ dò nti Yiɛ̀ nKuyie mbo dɔɔ̀ tidiɛtì kpɛrɛ mɑrɛ̀, kɛ̀ kɛtenkɛ̀ɛ ɑɑtɛ kɛ́mɑɑ́nko dɛ kó bɛnìtìbɛ̀ nɛ̀ dɛ̀ɛ̀ kó dimɑ̀ɑ̀ tu bɛ kpɛrɛ kɛ̀ bɛ̀ɛ tɑ kudɔnkù bɛfòùbɛ̀, di bo bɑntɛ́ kɛ dò ndɛ kó bɛnìtìbɛ̀ cɑ̀ɑ̀rɛ̀ ti Yiɛ̀ nKuyie nku.
\p
\v 31 Mɔyiisi kpɑɑ́ kɛ mɛ nnɑ́ɑ́ nkɛ̀ kɛtenkɛ̀ɛ yɑtɛ́ bɛ̀ còḿmú dɛ̀, 
\v 32 kɛ́ɑɑtɛ kɛ́ bɛ̀ mɑɑ́nko bɛmbɛ nɛ̀ bɛ cɛ̃́ĩ kɔbɛ nɛ̀ Kodee nɛ̀ o kó ditĩ̀nnì kɔbɛ nɛ̀ bɛ kpɛrɛ dɛmɔu. 
\v 33 Kɛ̀ bɛ̀ɛ tɑ kudɔnkù bɛfòùbɛ̀ nɛ̀ bɛ kpɛrɛ bɛ̀ mɔ̀kɛ dɛ̀, kɛ̀ kɛtenkɛ̀ɛ mutìnnɛ. Mɛm̀mɛ bɛ̀ kpɑɑkɛmɛ̀ bɛ kɔbɛ Isidɑyɛɛribɛ cuokɛ̀. 
\v 34 Bɛ̀ɛ̀ kó dimɑ̀ɑ̀ dɛ̀ bo kɛ̀ bɛ̀ɛ keè bɛ dɑbùò kɛ́ncooti kɛ tú: Tí cokɛ́nɛ̀ kɛtenkɛ̀ yɑ̀ɑ̀ bo ti mɑɑ́nko! 
\v 35 Mɛm̀mɛ kɛ̀ ti Yiɛ̀ nKuyie ncṹũnní muhɑ̃ɑ̃́ nkɛ̀ mùù cɔ́útóo bɛnìtìbɛ̀ sikɔusìdɛ́ nɛ̀ sipísìnùmmù (250) bɛmbɛ bɛ̀ɛ̀ do tuɔ̀ ntihúúntì.
\s1 Muhɑ̃ɑ̃́ ncɔ̀útɛ́mɛ̀ Kodee kó ditĩ̀nnì kɔbɛ
\p
\v 36 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 37 Nɑ́kɛ́ Anɔɔ birɛ Edeɑsɑɑ ikuɔ́ nìùtì kɛ tú n yɛ̃ nwèe pṹtɛ́ sisɔɔsékɛ́búkúsí kɛ́fũũ mmuhɑ̃ɑ̃́. Kɛ yɛ̃́ bɛ̀ sì nni nduɔ́mmɛ̀mu kɛ̀ sì tu n kpɛsi. 
\v 38 Bɛ̀ɛ̀ sì tɔní kɛ̀ bɛ̀ ku kɛ yietí bɛ yɛi. Dí sì mɑ timɑ́tipenti kɛ́dɑri n wũɔ̃tɔ̀nnì kɛ̀ dɛ̀ ndò mmɛbɛnkùmɛ̀ Isidɑyɛɛribɛ bɛmɔu kpɛ́í.
\p
\v 39 Kɛ̀ ikuɔ́ nìùtì Edeɑsɑɑ túótɛ́ disɔɔwũɔ̃̀ kó sisɔɔsékɛ́búkúsí dɛ kó bɛnìtìbɛ̀ do tɔní sì kɛ̀ muhɑ̃ɑ̃́ nsì cɔ̀útɛ́, kɛ̀ bɛ̀ɛ sì mɑ timɑ́tipenti kɛ́dɑri diwũɔ̃tɔ̀nnì. 
\v 40 Bɛ̀ do mɑ tìì mɑ́tìpenti kɛ́dɑri diwũɔ̃tɔ̀nnì tiì do denniní Isidɑyɛɛribɛ òmɔù í dòmmɛ̀ kɛ́ntuɔ̀ ntihúúntì ti Yiɛ̀ nKuyie nyììkɛ̀ kɛ̀ dɛ̀ í tú Anɔɔ nɛ̀ o yɑɑ̀bí, kɛ̀ wèè mɛ̀ dɔ̀ɔ̀ tìì tùɔ̀kɛní Kodee nɛ̀ o kɔbɛ tiì yóó ò tùɔ̀kɛní ti Yiɛ̀ nKuyie ndo mɛ ntì nɑ̀kɛ́ Mɔyiisi kòò tì mbɛ̀ nɑ̀kɛ́.
\s1 Isidɑyɛɛribɛ tùùtɛmɛ̀
\p
\v 41 Kɛ̀ dɛ̀ɛ̀ wentɛ́ kɛ̀ Isidɑyɛɛribɛɛ ítɛ́ bɛ botí kumɔu kɛ́nkpɑnnɛ̀ Mɔyiisi nɛ̀ Anɔɔ kɛ tú: Díì kùɔ ti Yiɛ̀ nKuyie nkɔbɛ.
\p
\v 42 Bɛ̀ cɛ̃̀ɛ̃̀tɛ dìì mɔ̀nnì Mɔyiisi nɛ̀ Anɔɔ kɛ́wɛ̃ɛ̃tɛ mɛtɑummɛ̀ tou bíɛ́kɛ̀ kɛ́nsɔ̃́ diwɛtirì dɑ̀tínnɛ́ mɛtɑummɛ̀ tou, kɛ̀ bɛ̀ɛ yɑ̀ ti Yiɛ̀ nKuyie nkó tikpetì. 
\v 43 Mɔyiisi nɛ̀ Anɔɔ kɛ̀ bɛ̀ɛ kɔtɛ mɛtɑummɛ̀ tou ììkɛ̀ 
\v 44 kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 45 Yɛ̀nnɛ̀ dɛ kó ditĩ̀nnì cuokɛ̀, n yóó bɛ̀ kùɔmu dimɔ̀nnì dimɑ́ɑ̀ kɛ̀ Mɔyiisi nɛ̀ Anɔɔ kɛ̀ bɛ̀ɛ do kɛ́sĩ́nnɔ́ɔ kɛtenkɛ̀. 
\v 46 Kɛ̀ Mɔyiisii nɑ́kɛ́ Anɔɔ kɛ dɔ̀: Túótɛ́ tɛsɔɔsékɛ́buutɛ kɛ́dɛitɛ diwũɔ̃tɔ̀nnì ĩ́nkɛ̀ kó muhɑ̃ɑ̃́ nkɛ́ɑ̃nnɛ́ tɛ miɛkɛ kɛ́tuɔ ntihúúntì kɛ́cokóo ditĩ̀nnì borɛ̀, kɛ́dɔɔ̀ mɛyɛi ncĩ́ɛ̃́mmɛ̀ kó ikuɔ́ kɛ yɛ̃́ ti Yiɛ̀ nKuyie mmiɛkɛ cɔ̀útɛ́mɛ̀ kɛ̀ bɛnìtìbɛ̀ ketɛ́ mukṹṹ.
\p
\v 47 Kɛ̀ Anɔɔ túótɛ́ tɛsɔɔsékɛ́buutɛ nɛ̀ muhɑ̃ɑ̃́ Mɔyiisi tì nhò nɑ̀kɛ́ kɛ yɛ̃ ndɛ̀ ndòmmɛ̀, kɛ́cokóo ditĩ̀nnì cuokɛ̀, kɛ́nsɔ̃́ bɛnìtìbɛ̀ ketɛ́ mukṹṹ, kòo tuɔ ntihúúntì kɛ́dɔɔ̀ mɛyɛi ncĩ́ɛ̃́mmɛ̀ kó ikuɔ́ Isidɑyɛɛribɛ kpɛ́í, 
\v 48 kɛ́ncómmú bɛcíríbɛ̀ nɛ̀ bɛfòùbɛ̀ bɛ cuokɛ̀ kɛ̀ ti Yiɛ̀ nKuyie mbɛ̀ potɛ́ kùù yɛ̃ĩnkuu cómmú. 
\v 49 Bɛnìtìbɛ̀ bɛ̀ɛ̀ do ku bɛ̀ do bo tɛkɔupípíítɛ̀ nɛ̀ sikɔupísìnɑ̀ɑ̀ nɛ̀ sikɔusìyiekɛ̀ ndi (14700) kɛ́ nɛ́ mbúútí bɛ̀ɛ̀ do ku Kodee kó mɛcɑɑ̀rìmɛ̀ kpɛ́í. 
\v 50 Kɛ̀ Anɔɔ wɛ̃tɛní Mɔyiisi borɛ̀ mɛtɑummɛ̀ tou bòrìnùù, kɛ̀ ti Yiɛ̀ nKuyie mbɛ̀ potɛ́ kùù yɛ̃ĩkuu cómmú.
\c 17
\s1 Anɔɔ kó kupɑ̀ɑ̀ti yɛ̀mɛ̀ tifɑ̃ɑ̃̀tì
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Á nɑ́kɛ́ Isidɑyɛɛribɛ wuɔ ntɛpíítɛ̀ nɛ̀ ìdɛ́ì, bɑ́ kùù wuɔ nkɛ̀ ku kóo kpɑ̀ɑ̀tì dɑ tɔní kupɑ̀ɑ̀ti. A yóó ì cuɔ́ kɛ̀ ì mbo tɛpíítɛ̀ nɛ̀ ìdɛ́ì nyi, kɑ̀ɑ wɑ̃ri bɑ́ kùù wuɔ nkóo kpɑ̀ɑ̀tì tɔní kùù pɑ̀ɑ̀ti ĩ́nkɛ̀ dɛ kó kuwuɔ nyètìrì, 
\v 3 kɛ́wɑ̃ri Defii kó kupɑ̀ɑ̀ti ĩ́nkɛ̀ Anɔɔ kó diyètìrì. Mɛm̀mɛ bɑ́ kùù wuɔ nkóo kpɑ̀ɑ̀tì yó mmɔkɛmɛ̀ kupɑ̀ɑ̀ti. 
\v 4 A yóó ì dɔú mmɛtɑummɛ̀ tou miɛkɛ nkɛ Kuyie ntɑummɛ̀ tɔu ììkɛ̀, mí nnɛ̀ fɔ̃́ nti ɔ̃ɔ̃ mɑ́ɑ́ dɛ̀. 
\v 5 Onìtì wèè kó kupɑ̀ɑ̀ti bo yɛ tifɑ̃ɑ̃̀tì weǹwe n tɑ̃ɑ̃tɛ́mɛ̀. Dɛ mɔ̀nnì kɛ̀ m pɑɑ nyɛsɑ̃́ɑ̃̀mbɛ̀ Isidɑyɛɛribɛ di sɑ̃́ɑ̃́ nyɛ̀.
\p
\v 6 Kɛ̀ Mɔyiisii tì nɑ̀kɛ́ Isidɑyɛɛribɛ wuɔ ntɛpíítɛ̀ nɛ̀ ìdɛ́ì miɛkɛ bɑ́ kùù wuɔ nkɛ̀ ku kóo kpɑ̀ɑ̀tìi tɔní kupɑ̀ɑ̀ti bɛ wuɔ ndò ndòmmɛ̀ imɔu kɛ̀ ìì wɛ̃nnɛ́ tɛpíítɛ̀ nɛ̀ ìdɛ́ì, kɛ̀ Anɔɔ kɔku nsokɛ́ i cuokɛ̀. 
\v 7 Kɛ̀ Mɔyiisi ì tɑnnɛ̀ mɛtɑummɛ̀ tou miɛkɛ kɛ́ ì dɔú ti Yiɛ̀ nKuyie nyììkɛ̀ mɛtɑummɛ̀ tɔu borɛ̀. 
\v 8 Kɛ̀ dɛ̀ɛ wentɛ́ kɛ̀ Mɔyiisi mbo tuɔkoo kɛ sɔ̃́ nhAnɔɔ Defii kó kuwuɔ nkou kó kupɑ̀ɑ̀ti yɛ̀ tifɑ̃ɑ̃̀tì kɛ pòrí kɛ pɛitɛ́ yɛbɛ kɛ̀ yɛ̀ bi. 
\v 9 Kɛ̀ Mɔyiisii ì koutɛ́ imɔu ti Yiɛ̀ nKuyie nyììkɛ̀ kɛ́kɔtɛnɛ̀ kɛ́bɛnkɛ Isidɑyɛɛribɛ kɛ̀ bɛ̀ɛ ì yɑ̀ bɛmɔu, bɑ́ wè kòo túótɛ́ o kɔku. 
\v 10 Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀: Dɔú nhAnɔɔ kó kupɑ̀ɑ̀ti ikuɔ́ tɔu ììkɛ̀, kɛ̀ kù ndò ndibɛnkɛ̀rì dɛ kó itookperí yɛmbɛ̀ kpɛ́í. Dɛ mɔ̀nnì kɛ̀ m pɑɑ nyɛsɑ̃́ɑ̃̀mbɛ̀ bɛ̀ di sɑ̃́ɑ̃́ nyɛ̀, kɛ̀ yɛ̀ tùɔ̀kɛní m borɛ̀ kɛ̀ bɛ̀ tɛ̃́nkɛ bɑ́ɑ́ kú.
\p
\v 11 Kɛ̀ Mɔyiisii dɔɔ̀ ti Yiɛ̀ nKuyie nhò nɑ̀kɛ́ tì.
\s1 Ikuɔ́ nìùbɛ̀ nɛ̀ Defiibɛ dò nkɛ́mpĩ́ mmùù tɔ̃mmú
\p
\v 12 Dɛ mɔ̀nnì kɛ̀ Isidɑyɛɛribɛɛ nɑ́kɛ́ Mɔyiisi kɛ dɔ̀: Ti yóó kúmu, ti kumu kɛ dèè. 
\v 13 Kòò mɔù tɔ̀ɔ́nnɛ̀ mɛtɑummɛ̀ tou ò ɔ̃ɔ̃ kúmu, ti yóó mɛ nhɔ̃ nkɛ yɑ̀ɑ deèɑ̀?
\c 18
\p
\v 1 Kɛ̀ ti Yiɛ̀ nKuyie nnɑ́kɛ́ Anɔɔ kɛ dɔ̀: Kòò mɔù yetɛ́nɛ̀ mɛtɑummɛ̀ tou fɔ̃́ nnɛ̀ ɑ bí díì te mɛyetímɛ̀. Kòò mɔù cɑ̀ɑ̀rɛ̀ ikuɔ́ tɔ̃mmú díì te dɛ kó mɛcɑɑ̀rìmɛ̀. 
\v 2 A yú ɑ cicɛ nɑɑ̀mùnkù kɔbɛ Defiibɛ kɛ̀ bɛ̀ dɑ wɛ̃nnɛ́nɛ̀ kɛ́ ndɑ teénnɛ̀ mutɔ̃mmú. Fɔ̃́ nnɛ̀ ɑ bí díì níí yóó tɑ mɛtɑummɛ̀ tou kɛ́pĩ́ nyikuɔ́ tɔ̃mmú mɛtɑummɛ̀ tɔu ììkɛ̀. 
\v 3 Bɛ̀ɛ̀ yó ndɑ teénnɛ̀ mɛtɑummɛ̀ tou dimɔu kó mutɔ̃mmú bɛ̀ nɛ́ bɑ́ɑ́ tɔ́ɔ́nnɛ̀ ikuɔ́ nɛntì mɑtì yoo diwũɔ̃tɔ̀nnì, kɛ̀ dɛ̀ɛ yie nkɛ̀ di bɑ́ɑ́ kú kɛ́ bɛ̀ wɛ̃nnɛ́nɛ̀. 
\v 4 Bɛ̀ɛ̀ yó ndɑ wɛ̃nnɛ́ kɛ dɑ teennɛ̀ mɛtɑummɛ̀ tou kó mutɔ̃mmú mumɔu, wèè í tú Defii botí kou ò bɑ́ɑ́ di wɛ̃nnɛ́nɛ̀ mutɔ̃mmú. 
\v 5 Fɔ̃́ nnɛ̀ ɑ bí díì te mɛtɑummɛ̀ tou nɛ̀ diwũɔ̃tɔ̀nnì dɛ kó mutɔ̃mmú kɛ̀ dɛ̀ɛ yie nkɛ̀ m miɛkɛ bɑ́ɑ́ do Isidɑyɛɛribɛ. 
\v 6 Míì tɑ̃ɑ̃tɛ́ ɑ kɔbɛ Defiibɛ Isidɑyɛɛribɛ cuokɛ̀, bɛ̀ tu n kɔbɛ mbɛ kɛ̀ m bɛ̀ ndɑ duɔ́ nkɛ̀ bɛ̀ bo mpĩ́ mmɛtɑummɛ̀ tou kó mutɔ̃mmú. 
\v 7 Fɔ̃́ nhAnɔɔ nɛ̀ ɑ bí n duɔ́ ndí mbɛ ikuɔ́ kó mutɔ̃mmú diwũɔ̃tɔ̀nnì ĩ́nkɛ̀ nɛ̀ ikuɔ́ nɛntì kó kufɑ̃́ɑ̃́ nkuyɑ̀ɑ̀kù pi kù, n duɔ́ ndí mbɛ dɛ kó mutɔ̃mmú, wèè í tú Defii botí kou kɛ dɛ̀ tɔ̀ɔ́nnɛ̀ ò kumu.
\s1 Ikuɔ́ nìùbɛ̀ dò nkɛ́nte dɛ̀
\p
\v 8 Kɛ̀ ti Yiɛ̀ nKuyie nnɑ́kɛ́ Anɔɔ kɛ dɔ̀: Míì dɑ duɔ́ nkɑ̀ɑ bo ndɑkɛ Isidɑyɛɛribɛ m pɑ̃ɑ̃ nyɛ̀ɛ̀ pɑ̃rɛ̀ kpɛ́í, ɑ níí yóó dɛ ndɛitɛ dɛ̀ɛ̀ tu ɑ kpɛrɛ, n dɑ còú mmɛkùɔ̀ mmɛɛ̀ kpɛ́í nkɛ dɑ cɑ̃̀ńnɛ́ fɔ̃́ nnɛ̀ ɑ bí n tɔ̃mmú kpɛ́í, dɛ kó ikuɔ́ yó mbomu sɑ̃́ɑ̃̀ nɛ̀ ɑ yɑɑ̀bío. 
\v 9 Ntɛ dɛ̀ɛ̀ yó ntú ɑ kpɛrɛ, bɛ̀ m pɑ̃ɑ̃ nyɛ̀ɛ̀ pɑ̃rɛ̀ miɛkɛ, kɛ́mbúútí yɛ̀ɛ̀ yóó tuɔ. Muyuo nkó yɛpɑ̃rɛ̀ nɛ̀ bɛ̀ n fìé ìì wũɔ̃ mɛyɛi ncĩ́ɛ̃́mmɛ̀ kpɛ́í nnɛ̀ mɛyɛi nhũtímù kpɛ́í. Bɛ̀ m pɑ̃ɑ̃ nyɛ̀ɛ̀ pɑ̃rɛ̀ kó dimɑ̀ɑ̀ tu ɑ kpɛyɛ nyɛ fɔ̃́ nnɛ̀ ɑ yɑɑ̀bío. 
\v 10 Díì níí dɛ̀ di dɛ̀ tu n kpɛrɛ ndɛ, bɛnitidɑɑbɛ̀ bɛ̀ɛ̀ bo di cɛ̃́ĩ bɛ̀ bo nɑ kɛ́ dɛ̀ di. 
\v 11 Ntɛ dɛtɛrɛ̀ dɛ̀ɛ̀ níí yó ntú ɑ kpɛrɛ Isidɑyɛɛribɛ dɛ̀ìtɛ dɛ̀ɛ̀ kó dimɑ̀ɑ̀ kɛ m pɑ̃ kɛ dɛ̀ nni nyòutɛ, n dɛ̀ ndɑ duɔ́mmu fɔ̃́ nnɛ̀ ɑ yɑɑ̀bío initidɑɑì nɛ̀ initipòì. Bɛ̀ɛ̀ kó dimɑ̀ɑ̀ bo ɑ cĩ́ɛ̃̀tɛ̀ kɛ wenni bɛ̀ bo nɑ kɛ́ dɛ̀ di. 
\v 12 N di duɔ́mmu tidiketitì kó yɛpɑ̃rɛ̀ sɑ̀ɑ̀yɛ̀ Isidɑyɛɛribɛ m pɑ̃ɑ̃ nyɛ̀: Mɛkùɔ̀ nnɛ̀ mɛnɑɑ̀ nnɛ̀ tidiitì bɛ̀ tu tì bèdéè. 
\v 13 Bɛ ɛì kó tidiketitì bɛ̀ m pɑ̃ɑ̃ ntìì kó dimɑ̀ɑ̀, n ti n di duɔ́mmu bɛ̀ɛ̀ kó dimɑ̀ɑ̀ bo di cɛ̃́ĩ kɛ wenni bɛ̀ bo nɑ kɛ́ dɛ̀ di. 
\v 14 Kɛ̀ Isidɑyɛɛribɛ níí m pɑ̃ dɛ̀ kɛ tú bɛ̀ dɛ̀ nni m pɑ̃mu sɑ̃́ɑ̃̀, díì yó ndɛ̀ te. 
\v 15 Isidɑyɛɛribɛ bɛ̀ɛ̀ tu Mpo nɛ̀ bɛ wũɔ̃ ketiyì bɛ̀ m pɑ̃ɑ̃ ndɛ̀ tu di kpɛrɛ ndɛ. Bɛ̀ɛ̀ tu Mpo bɛ̀ níí bɛ̀ ndi dontɛ́nɛ̀, kɛ̀ fɛɔ̃̀fɛ̀ ketifɛ̀ mɑfɛ̀ tu bɛ̀ í n feu fɛ̀ bɛ̀ɛ fɛ̀ ndi dontɛ́nɛ̀. 
\v 16 Dɛnitidɑbirɛ dɛ̀ɛ̀ mɔ̀kɛ otɑ̃̀nkù omɑ́ɑ̀ dɛ donku dò nkɛ́mbo mɛdítíbii mmɛ̀nùmmù ndi bɛ̀ kèétɛ́mɛ̀ mɛtɑummɛ̀ tou kpɛ́í, mɛ̀ɛ̀ cɛ̃̀ɛ̃́kù bo kɑ̀dɑ́ɑ̀mmù tɛpíítɛ̀. 
\v 17 Kɛ̀ fɛnɑ̀ɑ̀fɛ̀ nfɛ yoo fɛpìèfɛ̀ yoo tɛbuɔtɛ̀ dɛ̀ pɛitɛ́ ìì bí idɑɑì mɛketimɛ̀, bɛ̀ ì nni nfeumu, bɛ̀ bɑ́ɑ́ wɛ̃tɛ kɛ́ ì ndi dontɛ́nɛ̀, dí ì nni nféútɛ́ kɛ́cóú mmɛyĩ̀ĩ̀ ndiwũɔ̃tɔ̀nnì, kɛ́tuɔ ndɛ̀ɛ̀ tu mɛkùɔ̀ nkpɛrɛ, dipɑ̃nnì ndi dìì kó kufɔ̃ɔ̃ku n nɑɑti. 
\v 18 Imɑɑ ntu di kpɛyi nyi, kɛ́yíɛ́nɛ̀ di n yòùtɛ ì, dicĩ̀ncĩ̀nnì nɛ̀ dikpèrì youri.
\p
\v 19 Isidɑyɛɛribɛ ɔ̃ɔ̃ dɛitɛ yɛ̀ɛ̀ pɑ̃rɛ̀ kɛ́ m pɑ̃, n yɛ̀ ndi duɔ́mmu díndi nɛ̀ di yɑɑ̀bío, initidɑɑì nɛ̀ initipòì, dɛ kó mɛtɑummɛ̀ yó mbomu, n di dɔúnnɛ̀ dìì nùù ndi sɑ̃́ɑ̃̀.
\s1 Ikuɔ́ nìùbɛ̀ Defiibɛ dò nkɛ́nte dɛ̀
\p
\v 20 Kɛ̀ ti Yiɛ̀ nKuyie nyíɛ́ kɛ́nɑ́kɛ́ Anɔɔ kɛ dɔ̀: N duɔ́ nkɛ̀ɛ̀ tenkɛ̀ Isidɑyɛɛribɛ, kɛ miɛkɛ ɑ í yó mmɔkɛ ɑ kɔkɛ, míì yó ntú ɑ kpɛrɛ Isidɑyɛɛribɛ cuokɛ̀. 
\v 21 Díndi Defiibɛ, kɛ̀ Isidɑyɛɛribɛ níí dɛ̀itɛ bɛ̀ mɔ̀kɛ dɛ̀ miɛkɛ dɛpííndɛ̀ kɛ m pɑ̃, n dɛ̀ ndi duɔ́mmu di pĩ́ mmùù tɔ̃mmú kpɛ́í mɛtɑummɛ̀ tou. 
\v 22 Isidɑyɛɛribɛ sɔmbɛ bɑ́ ntɔkunɛ̀ mɛtɑummɛ̀ tou bɛ̀ yɑ̀ɑ̀ bo cé mbɛmɑ́ɑ̀ mɛyɛi nkɛ́kú. 
\v 23 Díndi Defiibɛ díì mɑ́ɑ̀ yó mpĩ́ mmɛtɑummɛ̀ tou kó mutɔ̃mmú, kòò mɔù yetɛ́nɛ̀ mɛtɑummɛ̀ tou díì te dɛ kó mɛyetímɛ̀, dɛ kó ikuɔ́ yó mbomu sɑ̃́ɑ̃̀. Di í yó mmɔkɛ di kó kɛtenkɛ̀ Isidɑyɛɛribɛ tɔbɛ̀ cuokɛ̀. 
\v 24 Isidɑyɛɛribɛ ɔ̃ɔ̃ dɛitɛ dɛ̀ bɛ̀ mɔ̀kɛ dɛ miɛkɛ dɛ̀ɛ̀ tu dɛpííndɛ̀ kɛ́ m pɑ̃, n dɛ̀ ndi duɔ́mmu. Dɛɛ̀ te kɛ̀ n tu di í yó mmɔkɛ di kó kɛtenkɛ̀ Isidɑyɛɛribɛ cuokɛ̀.
\p
\v 25 Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀: 
\v 26 Á nɑ́kɛ́ Defiibɛ kɛ tú n yɛ̃ nkɛ̀ Isidɑyɛɛribɛ níí dɛ̀itɛ bɛ̀ mɔ̀kɛ dɛ̀ miɛkɛ dɛ̀ɛ̀ tu dɛpííndɛ̀ n yɛ̃ mbɛ̀ ndi duɔ̀ ndɛ̀ kɛ bɛ duɔ́, bɛ̀ɛ dɛitɛ dɛ miɛkɛ dɛ̀ɛ̀ tu dɛpííndɛ̀ kɛ́ n duɔ́. 
\v 27 Dɛɛ̀ múnkɛ yó ntú bɛ kpɛrɛ bɛ̀ mɔ̀kɛ dɛ kó dɛpííndɛ̀. Bɛ kɔbɛ dɛ̀ìtɛ mɛ̀ɛ̀ botí tidiitì kó dɛpííndɛ̀ nɛ̀ mɛnɑɑ̀ nkɛ dɛ̀ mbɛ̀ duɔ́. 
\v 28 Bɛ̀ níí dɛitɛ Isidɑyɛɛribɛ dɛ̀itɛ dɛ̀ bɛ̀ mɔ̀kɛ dɛ̀ miɛkɛ, dɛ̀ɛ̀ tu dɛpííndɛ̀ kɛ́ bɛ̀ duɔ́, bɛ̀ɛ dɛitɛ dɛpííndɛ̀ dɛ miɛkɛ n kpɛrɛ ndɛ, dí dɛ̀ duɔ́ nyikuɔ́ nìùtì Anɔɔ. 
\v 29 Bɛ̀ yó ndi duɔ̀ nyɛ̀ɛ̀ pɑ̃rɛ̀ yɛmɔu ĩ́nkɛ̀ di níí dɛitɛ bɑ́ dìì pɑ̃nnì ĩ́nkɛ̀ dɛ̀ɛ̀ tu dɛsɑ̀ɑ̀rɛ̀ kɛ́cɑ̃́nnɛ́ n kpɛ́í, n kpɛrɛ ndɛ. 
\v 30 Nɑ́kɛ́ bɛ kɛ̀ bɛ̀ dɛ̀itɛ dìì mɔ̀nnì dɛ̀ɛ̀ tu dɛsɑ̀ɑ̀rɛ̀ n kpɛrɛ tú dɛ̀, kɛ cɑ̃̀ńnɛ́ dɛ̀ɛ̀ kpɑɑ́ dɛ̀ tu bɛ kpɛrɛ ndɛ. Kɛ́ndònnɛ̀ Isidɑyɛɛribɛ ɔ̃ɔ̃ súɔ́mmɛ̀ bɛ diitì nɛ̀ bɛ nɑɑ̀. 
\v 31 Di bo nɑ kɛ́ dɛ̀ di bɑ́ kɛ̀ɛ̀ bíɛ́kɛ̀ nɛ̀ di cɛ̃́ĩ kɔbɛ bɛmɔu. Dɛ̀ tu di kó tiyeti nti mutɔ̃mmú di pĩ́ mmù mɛtɑummɛ̀ tou mu kpɛ́í. 
\v 32 Di dɛ̀itɛ dìì mɔ̀nnì dɛ̀ɛ̀ tu dɛsɑ̀ɑ̀rɛ̀ n kpɛrɛ tú dɛ̀, kɛ n duɔ́, dí di dɛsɔnnɛ. Dɛ mɔ̀nnì dɛ̀ í tú mɛyɛi, di yó mmɛ ndɔɔri kɛ bɑ́ɑ́ sĩnkùnnɛ Isidɑyɛɛribɛ m pɑ̃ɑ̃ nyɛ̀ɛ̀ pɑ̃rɛ̀ kɛ́kú.
\c 19
\s1 Fɛnɑɑ̀wũɔ̃fɛ̀ kó mutɑ́pɛí nkó ikuɔ́ yó ndòmmɛ̀
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi nɛ̀ Anɔɔ kɛ dɔ̀: 
\v 2 Mí ndi Yiɛ̀ nKuyie míì di dɔúnnɛ̀ ikuɔ́. Dí nɑ́kɛ́ Isidɑyɛɛribɛ kɛ tú n yɛ̃ mbɛ̀ɛ wɑɑ́ nfɛnɑɑ̀wũɔ̃fɛ̀ fɛ̀ɛ̀ í mɔkɛ kuyɛ̀nkù bɑ́ sɑ́m̀pɔ́, bɛ̀ mu nyí buú nfɛ̀ kudɔú kɛ̀ fɛ̀ dùɔ. 
\v 3 Kɛ̀ di fɛ̀ duɔ́ nyikuɔ́ nìùtì Edeɑsɑɑ kòo fɛ̀ dènnɛ dihɛì mɑ̀nku kɛ̀ dí fɛ̀ fèútɛ́ o ììkɛ̀. 
\v 4 Kɛ̀ ikuɔ́ nìùtì Edeɑsɑɑ pɔɔ̀tɛ̀ o nɔ́mbii fɛ yĩ̀ĩ̀ nkɛ́míɛ́tɛ́ mɛtɑummɛ̀ tou bòrìnùù kucɛ mɛ̀yiekɛ̀. 
\v 5 Kɛ̀ dí fɛ̀ tùɔ nkɛnkɛ ikuɔ́ nìùtì ììkɛ̀ kɛ́tuɔ nfɛ yĩ̀ĩ̀ nnɛ̀ fɛ mɑɑ nnɛ̀ fɛ kɔ̃̀nkù nɛ̀ fɛ piti. 
\v 6 Kɛ̀ ikuɔ́ nìùtìi wɑɑ́ mmutie bɛ̀ tu mù sɛ́tìrì mu kó kudɔú nɛ̀ bɛ̀ tu mù ìsɔ́pù mu kɔku nɛ̀ tipècìtì tìì to mmɛwũɔ̃̀ nkɛ́ dɛ̀ wɛ̃nnɛ́ kɛ́ɑ̃nnɛ́ muhɑ̃ɑ̃́ mbɛ̀ tùɔ mmùù miɛkɛ fɛnɑ̀ɑ̀fɛ̀. 
\v 7 Kòò dèè wèe ɔ́ú o yɑ̀ɑ̀tì kɛ́wuɔ kɛ nɛ́ nɑ kɛ́kò mbɛ̀ bɑ̀tɛ́ dɛ̀. Ò yó nsĩ̀mmu kɛ́tuɔkɛnɛ̀ kuyuoku. 
\v 8 Wèè tùɔ nfɛnɑ̀ɑ̀fɛ̀ kòò ɔ́ú o yɑ̀ɑ̀tì, kɛ́wuɔ. Ò yó nsĩ̀mmu kɛ́tuɔkɛnɛ̀ kuyuoku. 
\v 9 Onìtì wèè í sɑ̃ũ nhomɑ́ɑ̀ kɛ̀ wèe koutɛ́ mutɑ́pɛí mbɛ̀ tùɔ nfɛ̀ɛ̀ nɑ̀ɑ̀fɛ̀ kɔ̃mu, kɛ́ mù fũ̀tɛnɛ̀ bɛ kɑrì kɛ́cóú ndibòrì bɛ̀ tɑ̃ɑ̃tɛ́ dì dɛ kpɛ́í, kɛ̀ mù mbo Isidɑyɛɛribɛ kpɛ́í kɛ̀ bɛ̀ mmù dɔ̀ɔ̀rinɛ̀ mɛwénkùmɛ̀ kó mɛniɛ. Dɛ kó ikuɔ́ yó ndònnɛ̀ mɛyɛi ncĩ́ɛ̃́mmɛ̀ kpɛyi nyi. 
\v 10 Wèè koutɛ́ dɛ kó fɛnɑ̀ɑ̀fɛ̀ kó mutɑ́pɛí nwèe ɔ́ú o yɑ̀ɑ̀tì ò yó nsĩ̀mmu kɛ́tuɔkɛnɛ̀ kuyuoku. Dɛ kó ikuɔ́ yó mbomu Isidɑyɛɛribɛ kpɛ́í nnɛ̀ bɛpɔ̀ɔ̀bɛ̀ bɛ̀ɛ̀ bɛ̀ bonɛ̀.
\s1 Wèè sĩ̀ntɛ ò bo wénkùnnɛ mɛ̀ɛ̀ botí omɑ́ɑ̀
\p
\v 11 Kɛ̀ wèè kɑ̀ɑ́kɛ́ ocíì, bɑ́ wèè cíì botí cɛ̃́nkɛ ò sĩ̀ntɛmu, kɛ́nsĩ̀ nkɛ dɔ̀ yɛwe yɛ̀yiekɛ̀. 
\v 12 Wèe wuɔnɛ̀ mmɛwénkùmɛ̀ kó mɛniɛ diyiè tɑ̃ɑ̃́nnì nɛ̀ diyiénnì kɛ nɛ́ nɑ kɛ́wenkɛ. Kòò í wùɔ diyiè tɑ̃ɑ̃́nnì nɛ̀ diyiénnì ò bɑ́ɑ́ wenkɛ. 
\v 13 Wèè bo kɑ́ɑ́kɛ́ ocíì kɛ í nwùɔnɛ̀ mɛwénkùmɛ̀ kó mɛniɛ nhò sĩ̀nkùnko mí ndi Yiɛ̀ nKuyie n cĩ́ɛ̃̀tɛ̀ ntɛ, dɛ yiɛ̀ mbɛ̀ɛ ò dènnɛ Isidɑyɛɛribɛ cuokɛ̀, ò sĩ̀mmu kɛ yɛ̃́ ò í wùɔmɛ̀ ikuɔ́ kó mɛniɛ.
\p
\v 14 Ntɛnɛ̀ ikuɔ́ tɛì: Kòò mɔù ku ditou mɑrì miɛkɛ kɛ̀ wèè tɑ di miɛkɛ ò sĩ̀ntɛmu wenwe nɛ̀ bɛ̀ɛ̀ bo di miɛkɛ kɛ́nsĩ̀ nkɛ dɔ̀ yɛwe yɛ̀yiekɛ̀. 
\v 15 Tinɛntì tìì kó dimɑ̀ɑ̀ bo mbo dɛ kó ditou miɛkɛ kɛ í pokɛ kɛ boú teitei tì sĩ̀ntɛmu. 
\v 16 Kòò mɔù kèrí dikpɑ́ɑ̀ miɛkɛ kɛ kɑ̀ɑ́kɛ́ ocíì bɛ̀ kùɔ wè yoo ò nɑ òmɔù kó yɛkṹɔ̃̀ yoo kufɔ̃ti ò sĩ̀ntɛmu kɛ yó nsĩ̀ nkɛ dɔ̀ yɛwe yɛ̀yiekɛ̀. 
\v 17 Kòo nìtì sĩ̀ntɛ kɛ̀ di yóó ò wénkùnnɛ, dí wɑɑ́ nfɛnɑɑ̀wũɔ̃fɛ̀ fɛnfɛ bɛ̀ kùɔ fɛ̀ kó mutɑ́pɛí nkɛ́ɑ̃nnɛ́ dibuu miɛkɛ kɛ́ɑ̃nnɛ́ mɛniɛ. 
\v 18 Kɛ̀ di dèè onìtì wèè í sɑ̃ũ nhomɑ́ɑ̀ wèe wɑɑ́ ìsɔ́pù kó kudɔú kɛ́pɔɔ̀tɛ̀ dɛ kó mɛniɛ nkɛ́míɛ́tɛ́ míɛ́tɛ́ dɛ kó ditou nɛ̀ tinɛntì nɛ̀ bɛnìtìbɛ̀ bɛ̀ɛ̀ kó dimɑ̀ɑ̀ bo dɛ kó ditou miɛkɛ nɛ̀ wèè kɑ̀ɑ́kɛ́ bɛ̀ kùɔ wè yoo ò nɑ òmɔù kó yɛkṹɔ̃̀ yoo ò nɑ̀ kufɔ̃ti. 
\v 19 Onìtì wèè í sɑ̃ũ nhomɑ́ɑ̀ weè yóó míɛ́tɛ́ mɛniɛ nhonìtì wèè sɑ̃ũ nhomɑ́ɑ̀ diyiè tɑ̃ɑ̃́nnì nɛ̀ diyiénnì. Diyiénnì yiè wèe ɔ́ú o yɑ̀ɑ̀tì, kɛ́wuɔ kɛ́wenkɛ kuyuoku mɔ̀nnì.
\p
\v 20 Wèè bo sɑ̃ũ nhomɑ́ɑ̀ kɛ í ndɔ́ kɛ́wénkùnnɛ omɑ́ɑ̀ bɛ̀ɛ ò dènnɛ Isidɑyɛɛribɛ cuokɛ̀, kɛ yɛ̃́ ò sĩ̀nkùnnɛmɛ̀ mí ndi Yiɛ̀ nKuyie n cĩ́ɛ̃̀tɛ̀ ntɛ. Ò mɛ nyí wùɔnɛ̀ ikuɔ́ kó mɛniɛ, nnɛ̀ dɛ kpɛ́í nhò sĩ̀mmu.
\p
\v 21 Dɛ̀ yó ntú ikuɔ́ nyi sɑ̃́ɑ̃̀, wèè bo míɛ́tɛ́ ikuɔ́ kó mɛniɛ nwèe ɔ́ú o yɑ̀ɑ̀tì, kɛ̀ wèè kɑ̀ɑ́kɛ́ dɛ kó mɛniɛ nhò sĩ̀ntɛmu kɛ́ntɔ kɛ́tuɔkɛnɛ̀ kuyuoku. 
\v 22 Wèè sɑ̃ũ nhomɑ́ɑ̀ kòò kɑ̀ɑ́kɛ́ dɛ̀, dɛ̀ sĩ̀ntɛmu, kɛ̀ wèè kɑ̀ɑ́kɛ́ dɛ̀ɛ̀ sĩ̀ nhò sĩ̀ntɛmu kɛ́ntɔ kɛ́tuɔkɛnɛ̀ kuyuoku.
\c 20
\s1 Isidɑyɛɛribɛ do mɔ̀ńtɛ́mɛ̀ mɛniɛ nSinni kó dikpɑ́ɑ̀ miɛkɛ
\p
\v 1 Dibenni tɑ̃̀nkù ketiwè kɛ̀ Isidɑyɛɛribɛ tĩ̀nnìi tuɔkɛ Sinni kó dikpɑ́ɑ̀ kɛ́bɑ́tɛ́ Kɑdɛɛsi kɛ́kɑri. Midiyɑmmu dɛ nku kɛ̀ bɛ̀ɛ ò kũnnɛ́.
\b
\p
\v 2 Bɛ̀ í mpɛ̀tɛ́ mɛniɛ nkɛ bo yɑ̃̀ kɛ́tíí nkɛ́nkpɑnnɛ̀ Mɔyiisi nɛ̀ Anɔɔ kɛ tú: 
\v 3 Kɛ̀ ti Yiɛ̀ nKuyie ndo nti wɛ̃nnɛ́nɛ̀ ti kɔbɛ bɛ̀ɛ̀ ku kɛ́potɛ́, kɛ̀ ti kú dɛ̀ í ntɔ̃ũɑ̀? 
\v 4 Dɛ̀ yĩ́mɛ kɛ̀ di tɔní tínti ti Yiɛ̀ nKuyie nkɔbɛ kɛ kɔ̀tɛnní dikpɑ́ɑ̀ diì mmiɛkɛ kɛ̀ ti bo kú tínti nɛ̀ ti wũɔ̃? 
\v 5 Bɑ nte kɛ̀ di ti dènnɛní Esibiti kɛ ti tɔní dibòrì yɛiri dii? Dɛ̀ í dò mbuɔtí dɛ̀mɑrɛ̀, dɛtie mbɛ̀ tu dɛ̀ fìkíè dɛ̀ í bo kɛ̀ ti nɛ́ bɑ́ɑ́ buɔ́nɛ̀ fínyĩ̀ nɛ̀ kèdènɑ́tì kpɛrɛ, mɛniɛ nketɛ́ kɛ í bo kɛ dò nyɑ̃̀.
\p
\v 6 Mɛm̀mɛ Mɔyiisi nɛ̀ Anɔɔ bɛ̀ ìtɛ́mɛ̀ Isidɑyɛɛribɛ borɛ̀ kɛ́kɔtɛ mɛtɑummɛ̀ tou borìnùù kɛ́do kɛ́sĩ́nnɔ́ɔ kɛtenkɛ̀ kɛ̀ ti Yiɛ̀ nKuyie mbɛ̀ bɛnkɛ ku kpetì, 
\v 7 kɛ́bɛ́innɛ̀ Mɔyiisi kɛ dɔ̀: 
\v 8 Túótɛ́ ɑ pɑ̀ɑ̀ti fɔ̃́ nnɛ̀ ɑ kóo kótì Anɔɔ kɛ̀ di tíí nyIsidɑyɛɛribɛ, kɛ̀ bɛ̀ mbo kɛ wúó nkɑ̀ɑ bɛ́innɛ̀ diperì kɛ̀ mɛniɛ nyɛ̀nní, kɑ̀ɑ duɔ́ nkɛ̀ bɛ̀ɛ yɑ̃̀ bɛmbɛ nɛ̀ bɛ wũɔ̃.
\p
\v 9 Kɛ̀ Mɔyiisii túótɛ́ o pɑ̀ɑ̀ti mɛtɑummɛ̀ tou miɛkɛ kɛ́ndònnɛ̀ ti Yiɛ̀ nKuyie ndo tì nhò nɑ̀kɛ́mɛ̀. 
\v 10 Wenwe nɛ̀ Anɔɔ kɛ̀ bɛ̀ɛ tíí nyIsidɑyɛɛribɛ dipèrì borɛ̀, kòo bɛ̀ nɑ̀kɛ́ kɛ dɔ̀: Kéntɛ́nɛ̀ díndi itookperí yɛmbɛ̀! Ti bo dennɛní mɛniɛ ndipèrì dii mmiɛkɛ nkɛ kɛ̀ di yɑ̃̀ɑ̃̀?
\p
\v 11 Mɛm̀mɛ ò yòùtɛmɛ̀ o pɑ̀ɑ̀ti kɛ́potɛ́ dipèrì mɛ̀dɛ́mɛ̀, kɛ̀ mɛniɛ nyɛ̀nní mɛdiɛ̀. Isidɑyɛɛribɛ nɛ̀ bɛ wũɔ̃ kɛ̀ dɛ̀ɛ yɑ̃̀.
\s1 Kuyie nkpɑnnɛ̀mɛ̀ Mɔyiisi nɛ̀ Anɔɔ bɛ̀ yetɛ́ mɛ̀ɛ̀ kpɛ́í
\p
\v 12 Kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ Anɔɔ kɛ dɔ̀: Di yɛ̀mmɛ̀ í mɛ nyiemmɛ̀ kɛ dò ndɛ̀ bo dɔɔ̀, di í mɛ ndɛ́úkùnnɛmɛ̀ n yètìrì Isidɑyɛɛribɛ ììkɛ̀, dì tɛ̃́nkɛ í yóó tɑnnɛ́ n nìtìbɛ̀ kɛtenkɛ̀ m bɛ̀ duɔ́ nkɛ̀.
\p
\v 13 Dɛɛ̀ do te kɛ̀ bɛ̀ɛ yú dɛ kó mɛniɛ nkɛ dɔ̀ Mɛdibɑ, dɛ̀ɛ̀ tu dikpɑ̀nnì, kɛ yɛ̃́ Isidɑyɛɛribɛ do dɛ̀ nwɛ̃̀ńtɛ́mɛ̀ ti Yiɛ̀ nKuyie nkɛ̀ kùu bɛ̀ bɛnkɛ kù dòmmɛ̀ pɑ́í pɑ́í.
\s1 Edɔmmu kóo kpɑ̀ɑ̀tì yetɛmɛ̀ Isidɑyɛɛribɛ bo pɛ̃ɛ̃tɛ́mɛ̀ o tenkɛ̀
\p
\v 14 Kɛ̀ bɛ̀ mbo Kɑdɛɛsi kɛ̀ Mɔyiisii dɛitɛ bɛnìtìbɛ̀ kɛ́ bɛ̀ tɔ̃ nkɛ dɔ̀ bɛɛ̀ kɔtɛ kɛ́nɑ́kɛ́ Edɔmmu kóo kpɑ̀ɑ̀tì kɛ dɔ̀: Tínti ɑ tebìí tíì tu ɑ yɛ̃́mu ti tɑmɛ̀ mɛhɑ́ɑ́rìmɛ̀ miɛkɛ. 
\v 15 Ti yɛmbɛ̀ bɛɛ̀ do kɔ̀tɛ Esibiti kɛ̀ ti nkɛ bo kɛ́mɔntɛ kɛ̀ Esibiti kɔbɛ ti fɛ̃́ũ tínti nɛ̀ ti yɛmbɛ̀. 
\v 16 Kɛ̀ ti kuɔ́nnɛ̀ ti Yiɛ̀ nKuyie nkɛ̀ kùu keè ti dɑbònnì kɛ́duɔnní ku tɔ̃nnì kɛ̀ dì ti dènnɛní Esibiti. Kɛ̀ ti tùɔ̀kɛní diɛ nKɑdɛɛsi dihɛì dìì bo ɑ tenkɛ̀ mɑ̀nku, 
\v 17 kɑ̀ɑ bo yie, nyóu kɛ̀ ti pɛ̃ɛ̃tɛ́ ɑ ɛì miɛkɛ, ti í yɛtì dɛpɑɑ mmiɛkɛ yoo fínyĩ̀ kó dɛtie mmiɛkɛ, ti í yóó yɑ̃̀ ɑ kó sibií kó mɛniɛ, ti yóó kétɛ́ kucɛ diɛkù nku kɛ́pɛ̃ɛ̃tɛ́nɛ̀ ɑ ɛì, ti í yóó dɑutɛ́ kupíkù mɑkù. 
\v 18 Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í yóó pɛ̃ɛ̃tɛ́ diɛ nh ɛì. Kɛ̀ di mɛ nyetɛ n yóó bɑ́ɑ́tóomu kɛ́ di co kɛ̀ tí dokɛ́.
\p
\v 19 Kɛ̀ Isidɑyɛɛribɛɛ ò tɛ̃̀ńnɛ́ kɛ dɔ̀: Ti yóó kétɛ́ kucɛ diɛkù mɑ́ɑ̀ ndi kɛ ti yɑ̃̀ ɑ ɛì kó mɛniɛ tínti nɛ̀ ti wũɔ̃ ti bo dɑ yietí. Dɛ̀ í tú tìmɑtì, ti yóó nɑ ɑ tenkɛ̀ mɑ́ɑ̀ ndi kɛ́pɛ̃ɛ̃tɛ́. 
\v 20 Kɛ̀ Edɔmmu kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Di í pɛ̃nkɛ́.
\p Kɛ̀ Edomiibɛɛ bɑ́ɑ́tí nɛ̀ bɛhɑ̃ɑ̃pɔ̀nkperíbɛ̀ pɛ́u kɛ́ bɛ̀ co. 
\v 21 Mɛm̀mɛ Edɔmmu kóo kpɑ̀ɑ̀tì yetɛmɛ̀ Isidɑyɛɛribɛ bo pɛ̃ɛ̃tɛ́mɛ̀ o ɛì, kɛ̀ Isidɑyɛɛribɛ pɛɛ́ nkupíkù tɛkù.
\s1 Anɔɔ yóó kúmɛ̀
\p
\v 22 Kɛ̀ Isidɑyɛɛribɛɛ ítɛ́ Kɑdɛɛsi kɛ́kɔtɛ ditɑ̃rì bɛ̀ tu dì Ɔdi. 
\v 23 Ti Yiɛ̀ nKuyie ndɛ mbɛ́innɛ̀ Mɔyiisi nɛ̀ Anɔɔ Ɔdi tɑ̃rì Edɔmmu temmɑ̀nku kɛ dɔ̀: 
\v 24 Anɔɔ kũnti o yɛmbɛ̀ borɛ̀ ndɛ, ò í tɑti dihɛì n yɛ̃ n yóó duɔ́ ndì Isidɑyɛɛribɛ kɛ yɛ̃́ di do yetɛmɛ̀ n kpɛti Mɛdibɑ kó mɛniɛ mborɛ̀. 
\v 25 Túótɛ́ Anɔɔ nɛ̀ o birɛ Edeɑsɑɑ kɛ̀ di dekɛ Ɔdi tɑ̃rì. 
\v 26 Kɑ̀ɑ dɑ́tɛ́ Anɔɔ yɑ̀ɑ̀tì kɛ́dɑ́tínnɛ́ o birɛ Edeɑsɑɑ. Anɔɔ yóó dɛ nkú.
\p
\v 27 Kɛ̀ Mɔyiisii dɔɔ̀ ti Yiɛ̀ nKuyie nhò nɑ̀kɛ́ tì Isidɑyɛɛribɛ bɛmɔu ììkɛ̀, kɛ̀ bɛ̀ɛ dekɛ Ɔdi tɑ̃rì. 
\v 28 Kɛ̀ Mɔyiisii dɑ́tɛ́ Anɔɔ yɑ̀ɑ̀tì kɛ́dɑ́tínnɛ́ o birɛ Edeɑsɑɑ. Anɔɔ dɛ nku Ɔdi tɑ̃rì ĩ́nkɛ̀. Mɔyiisi nɛ̀ Edeɑsɑɑ kɛ̀ bɛ̀ɛ cútɛ́ní. 
\v 29 Isidɑyɛɛribɛ tĩ̀nnì dimɔu kɛ̀ bɛ̀ɛ yɑ̀ Anɔɔ kumɛ̀ kɛ́kɔmmú o kṹṹ nkɛ dɔ̀ yɛwe sipísìtɑ̃ɑ̃ti.
\c 21
\s1 Isidɑyɛɛribɛ nɑmɛ̀ Kɑnnɑhɑ̃ɑ̃ tenkɛ̀ kɔbɛ
\p
\v 1 Mɛm̀mɛ Kɑnnɑhɑ̃ɑ̃ kóo kpɑ̀ɑ̀tì Adɑdi wèè do bo Nɛkɛbu ò kèèmɛ̀ Isidɑyɛɛribɛ kèróomɛ̀ Atɑdimmu kó kucɛ, kɛ́ítɛ́ní kɛ́ bɛ̀ do kɛ́pĩ́mmú bɛ miɛkɛ bɛ̀mɑbɛ̀ kɛ́dɔɔ̀ tidɑɑtì. 
\v 2 Kɛ̀ Isidɑyɛɛribɛɛ dɔúnnɛ̀ ti Yiɛ̀ nKuyie ndinùù kɛ dɔ̀: Ti Yiɛ̀ nKuyie nkɑ̀ɑ ti duɔ́ mbɛ nnìtìbɛ̀ ti bo bɛ̀ kùɔ pɑ́íí kɛ́pɔntɛ bɛ ɛì kɛ́dɛ́ítɛ́ ti bɑ́ɑ́ súɔ́ ndɛ̀mɑrɛ̀.
\p
\v 3 Kɛ̀ ti Yiɛ̀ nKuyie nkeè bɛ bɑ́ɑmmìi kɛ́ɑ̃nnɛ́ Kɑnnɑhɑ̃ɑ̃ kɔbɛ bɛ nɔu miɛkɛ, kɛ̀ bɛ̀ɛ bɛ̀ kùɔ pɑ́íí kɛ́pɔntɛ bɛ ɛkɛ̀ kɛ́dɛ́ítɛ́ kɛ́ dɛ̀ yu kɛ dɔ̀ Ɔdimɑɑ, dɛ̀ɛ̀ tu tidobontì.
\s1 Mɔyiisi dɔ̀ɔ̀mɛ̀ disɔɔwũɔ̃̀ kó fɛwɑ̀ɑ̀fɛ̀ kɛ́cónnɛ́
\p
\v 4 Kɛ̀ Isidɑyɛɛribɛɛ ítɛ́ Ɔdi tɑ̃rì kɛ́tũnnɛ kucɛ kùù yìɛ̀nɛ̀ dɑ̀mɛ́ɛ̀rì tipèntì kou kɛ bo kɔ́ntɛ́ kɛ bɑ́ɑ́ yɛ̀nnɛ̀ Edɔmmu tenkɛ̀. 
\v 5 Bɛ̀ kètɛ́ mɛm̀mɛ kɛ́nkɑ̃́ɑ̃́kɛ́ kucɛ kɛ̀ mɛminnímɛ̀ɛ bɛ̀ dòńtɛ́. Kɛ̀ bɛ̀ɛ ketɛ́ bɛ̀ bo nkpɑ̀nnɛ̀mɛ̀ ti Yiɛ̀ nKuyie nnɛ̀ Mɔyiisi kɛ tú: Bɑ nte kɛ̀ di ti dènnɛní Esibiti kɛ̀ ti bo kú dikpɑ́ɑ̀ dii mmiɛkɛ? Tidiitì sɑ̀ɑ̀tì mɑtì í bo, mɛniɛ mmɛ nyí bo, kɛ̀ ti bɑɑ nɛ́ yó nyo tisénnìndiitì tii nti yɛwe yɛmɔu.
\p
\v 6 Mɛm̀mɛ kɛ̀ ti Yiɛ̀ nKuyie nduɔnní iwɑɑyɛiyi kɛ̀ ì mbɛ̀ dɔmmù kɛ̀ bɛ̀ɛ kú kusṹkù. 
\v 7 Bɛ̀ɛ̀ kpɑɑ́ kɛ̀ bɛ̀ɛ nɑ́kɛ́ Mɔyiisi kɛ dɔ̀: Ti cɑ̀ɑ̀rɛ̀mu, ti tùùtɛnɛ̀mɛ̀ ti Yiɛ̀ nKuyie nkɛ dɑ kpɑnnɛ̀. Nɛ̀ dɛ kpɛ́í, nhɑ́ bɑ́ntɛ̀ ti Yiɛ̀ nKuyie nkɛ̀ kùu dɛ́tìnnɛ dɛ kó iwɑ̀ɑ̀kɛ.
\p Kɛ̀ Mɔyiisii kuɔ́nnɛ̀ ti Yiɛ̀ nKuyie mbɛ kpɛ́í. 
\v 8 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: Túótɛ́ disɔɔwũɔ̃̀ kɛ́dɔɔ̀nɛ̀ fɛwɑ̀ɑ̀fɛ̀ kɛ́ fɛ̀ dɑ̀nnɛ kudɔú kɛ́cónnɛ́, kɛ̀ fɛwɑ̀ɑ̀fɛ̀ níí dɔntɛ́ wè kòò fɛ̀ bɔ̀útɛ́ ò bɑ́ɑ́ kú.
\p
\v 9 Mɛm̀mɛ kɛ̀ Mɔyiisii dɔ̀ɔ̀ disɔɔwũɔ̃̀ kó fɛwɑ̀ɑ̀fɛ̀ kɛ́cónnɛ́, kɛ̀ fɛwɑ̀ɑ̀fɛ̀ níí dɔntɛ́ wè kòò fɛ̀ bɔ̀útɛ́ o bɑ́ɑ́ kú.
\s1 Isidɑyɛɛribɛ do kɑtìmɛ̀ kɛ sɔɔti kɛ yɑ̀ɑ tuɔkɛnɛ̀ Pisikɑɑ tɑ̃rì.
\p
\v 10 Kɛ̀ Isidɑyɛɛribɛɛ ítɛ́ dɛborɛ̀ kɛ́kɔtɛ kɛ́bɑ́tɛ́ Obɔti, 
\v 11 kɛ́ítɛ́ dɛndɛ kɛ́bɑ́tɛ́ Iyee-Abɑdimmu kpɑ́ɑ̀ kɛ́nwetí Mɔɑbu diyiè yìɛ̀ní kɛ̀ɛ̀ bíɛ́kɛ̀ kó dikpɑ́ɑ̀. 
\v 12 Kɛ̀ bɛ̀ɛ ítɛ́ dɛndɛ kɛ́bɑ́tɛ́ kukó nSedɛti kó mɛpɛɛ́mmɛ̀. 
\v 13 Bɛ̀ ìtɛ́ dɛ̀ndɛ kɛ́séntɛ́ kukó nhAdinɔ, kùù pũɔ̃̀ nkɛ pɛ̃nkù dikpɑ́ɑ̀ kɛ kɔrì Amɔriibɛ tenkɛ̀. Dɛ kó kukó kuù tu Mɔɑbu kɔbɛ nɛ̀ Amɔriibɛ bɛ tenkɛ̀ mɑ̀nku. 
\v 14 Dɛɛ̀ kpɛ́í nte kɛ̀ tì wɑ̃̀ri ti Yiɛ̀ nKuyie nkó mudoò pɑ́tíri\f + \fr 21:14 \fr*\fk mudoò pɑ́tíri: \fk*\ft Dɛ kó dipɑ́tíri bɛ̀ nɑ̀ɑ́ ndìì kpɛ́í ndiɛ ndì fetimu. Kɛ̀ dɛ̀ í tú diɛ mbɛ̀ í bɛ̀í nkupíkù tɛkù mɑkù di kpɛ́í.\ft*\f* miɛkɛ kɛ tú...Wɑɛbu, Sufɑ tempɛ̃ mmiɛkɛ nɛ̀ Adinɔ nɛ̀ dɛ kó ikó, 
\v 15 nɛ̀ ikó ntɛì ìì pũɔ̃̀ nkɛ tɑɑ̀ Adinɔ dihɛì Adi píkù iì tu Mɔɑbu tenkɛ̀ mɑ̀nku. 
\v 16 Bɛ̀ dɛ nyìtɛ́ kɛ́bɑ́tɛ́ bɛ̀ tu dɛ̀ tɛbintɛ, ti Yiɛ̀ nKuyie ndo nɑ̀kɛ́ dɛ̀ Mɔyiisi kɛ dɔ̀: Tíí nyIsidɑyɛɛribɛ kɛ̀ m bɛ̀ duɔ́ mmɛniɛ.
\p
\v 17 Dɛ mɔ̀nnì ndi Isidɑyɛɛribɛ dèntɛ̀mɛ̀ fɛyɛ̀nfɛ̀ kɛ dɔ̀:
\q1 Tí dentɛ̀ kɛ̀ mɛniɛ nyɛ̀nní tɛbintɛ.
\q1
\v 18 Tɛbintɛ sikpɑ̀ɑ̀tìbìí keú tɛ̀,
\q1 dihɛì kó bɛkótíbɛ̀ tũ tɛ̀
\q1 nɛ̀ bɛ pɑ̀ɑ̀ti nɛ̀ bɛ dɔ̀.
\m Bɛ̀ dɛ nyìtɛ́ kɛ́kɔtɛ kɛ́bɑ́tɛ́ Mɑtɑnɑ, 
\v 19 kɛ́ítɛ́ dɛndɛ kɛ́bɑ́tɛ́ Nɑɑdiɛdi, kɛ́ítɛ́ dɛborɛ̀ kɛ́kɔtɛ Bɑmɔti. 
\v 20 Bɛ̀ ìtɛ́ Bɑmɔti nwe kɛ́kɔtɛ Mɔɑbu kpɑ́ɑ̀ kɛ́nwetí Pisikɑɑ tɑ̃rì, dìì sĩ̀ĩ́ ntɛdɔntɛ̀ kó dikpɑ́ɑ̀.
\s1 Isidɑyɛɛribɛ domɛ̀ Amɔriibɛ kóo kpɑ̀ɑ̀tì Sionni
\p
\v 21 Mɛm̀mɛ kɛ̀ Isidɑyɛɛribɛɛ dɛitɛ yɛtɔ̃rɛ̀ kɛ́tɔ̃ nkɛ̀ bɛ̀ɛ nɑ́kɛ́ Amɔriibɛ kóo kpɑ̀ɑ̀tì Sionni kɛ dɔ̀: 
\v 22 Ti dɔ́ kɛ́pɛ̃ɛ̃tɛ́ ɑ ɛì miɛkɛ nkɛ, ti í yóó tɑ dɛpɑɑ mmiɛkɛ yoo fínyĩ̀ kó dɛtie mmiɛkɛ, ti í yóó yɑ̃̀ mɛniɛ nti yó mbɔkɛ́ kucɛ diɛkù nku, ti í yóó dɑutɛ́ kɛ yɑ̀ɑ pɛ̃ɛ̃tɛ́nɛ̀.
\p
\v 23 Okpɑ̀ɑ̀tì Sionni mɛ nyí nyie nkɛ̀ Isidɑyɛɛribɛ bo pɛ̃ɛ̃tɛ́ o tempɛ̃, kòo ítɛ́nɛ̀ kɛmiɛkɛ kɛ́tíí nho nìtìbɛ̀ bɛmɔu kɛ̀ bɛ̀ɛ kétɛ́ní kɛ́co Isidɑyɛɛribɛ dikpɑ́ɑ̀ kɛ́ bɛ̀ do mudoò Yɑɑsi ɛì miɛkɛ. 
\v 24 Kɛ̀ Isidɑyɛɛribɛ bɛ̀ cɔ̀ yɛse kɛ́kuɔ kɛ́fietɛ bɛ tenkɛ̀, kɛ́túótɛ́ kukó nhAdinɔ kɛ́ntɔ kɛ́tuɔkɛnɛ̀ Sɑbɔki kɔku kɛ́sɔɔtɛ́ kɛ́tuɔkɛnɛ̀ Amɔniibɛ tenkɛ̀ mɑ̀nku kùù do kpetí mɛsɑ̀ɑ̀. 
\v 25 Kɛ̀ bɛ̀ɛ fietɛ dɛ kó yɛhɛkɛ̀ yɛmɔu, kɛ́tiekɛ Amɔriibɛ tenkɛ̀ kɛmɔu kɛ́kɑri, kɛ́tɑunnɛ̀ Ɛsibonni nɛ̀ sihɛkɛsí sìì dɛ̀ tɔ̀kɛ́. 
\v 26 Ɛsibonni do tú Amɔriibɛ kpɑ̀ɑ̀tì Sionni bo dìì ɛì ndi. Sionni weè do pɔ̀ntɛ Mɔɑbiibɛ kpɑ̀ɑ̀tì ketiwè kɛ́fietɛ o tenkɛ̀ kɛmɔu kɛ́kɔtɛ kɛ́dítɛ́nɛ̀ kukó nhAdinɔ. 
\v 27 Dɛɛ̀ te kɛ̀ bɛyɛndèmbɛ̀ dìè nkɛ tú:
\q1 Tí kɔtɛnɛ̀ Ɛsibonni ɛì,
\q1 tí kɔtɛ kɛ́wɛ̃tɛ kɛ dì mɑɑ́,
\q1 tí wɛ̃tɛ kɛ́ dì còńnɛ́.
\q1
\v 28 Muhɑ̃ɑ̃́ mmuù yɛ̀nní Ɛsibonni,
\q1 Sionni ɛì miɛkɛ nkɛ mù tĩ̀ɛ̃́tɛ́mɛ̀
\q1 kɛ cɔ̀útɛ́ Adi ɛì Mɔɑbu tempɛ̃ mmiɛkɛ,
\q1 kɛ cɔ̀útɛ́nɛ̀ Bɑɑdi kó yɛtɔ̀rɛ̀ yɛ̀ɛ̀ bo kukó nhAdinɔ pɛɛ́mmɛ̀.
\q1
\v 29 Díndi Mɔɑbu tenkɛ̀ kɔbɛ di bo yɑ̀
\q1 di fetimu díndi dibɔɔ̀ Kɛmɔɔsi kɔbɛ
\q1 di dɑpɑ̀mbɛ̀ cokɛ́mu
\q1 kɛ̀ bɛ̀ pĩ̀ḿmú di sɑpùmbí kɛ kònnɛ̀
\q1 kɛ duɔ́ nhAmɔriibɛ kpɑ̀ɑ̀tì Sionni.
\q1
\v 30 Díndi Ɛsibonni kɔbɛ bɛ̀ di tɑ̃ɑ̃́ ipie nyi,
\q1 kɛ di bɛ̀ti kɛ tùɔ̀kɛnɛ̀ Dibonni
\q1 kɛ̀ di ɛkɛ̀ dɔúnko
\q1 kɛ́túótɛ́nɛ̀ Dofɑɑ kɛ́ntɔ kɛ́tuɔkɛnɛ̀ Mɛdebɑ.
\b
\m
\v 31 Kɛ̀ Isidɑyɛɛribɛɛ tɑ Amɔriibɛ tenkɛ̀. 
\v 32 Kɛ̀ Mɔyiisii tɔ̃ nkɛ̀ bɛ̀ɛ pɑɑtɛ́ Yɑsɛɛ ɛì kɛ́deè kɛ̀ bɛ̀ɛ di do, kɛ́bɛti Amɔriibɛ bɛ̀ɛ̀ dɛ̀ bo nɛ̀ sihɛkɛsí sìì dɛ̀ tɔ̀kɛ́ si kɔbɛ kɛ́fietɛ bɛ ɛkɛ̀ kɛ́kɑri. 
\v 33 Bɛ̀ kɑ̀ri mɛm̀mɛ kɛ́kétɛ́ kɛ́wetínnɛ́ Bɑsɑ̃ɑ̃ ɛì bíɛ́kɛ̀. Kɛ̀ Bɑsɑ̃ɑ̃ kóo kpɑ̀ɑ̀tì Ɔkuu ítɛ́ní nɛ̀ o nìtìbɛ̀ kɛ bo do Isidɑyɛɛribɛ mudoò Etedeii ɛì. 
\v 34 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: A bɑ́ nhò yĩ̀ɛ̃̀kù, n wè ndi duɔ́mmu kɛ̀ di bo ò nɑ wenwe nɛ̀ o nìtìbɛ̀. Kɑ̀ɑ ò dɔ̀ɔ̀ ɑ dɔ̀ɔ̀mɛ̀ Amɔriibɛ kpɑ̀ɑ̀tì Sionni Ɛsibonni ɛì kou.
\p
\v 35 Mɛm̀mɛ̀ Isidɑyɛɛribɛ nɑmɛ̀ Ɔku kóò kùɔ wenwe nɛ̀ o bí nɛ̀ o nìtìbɛ̀ bɑ́ òmɔù í nyentɛ́ bɑ́ òmɑ́ɑ̀ kɛ̀ bɛ̀ɛ tiekɛ bɛ tenkɛ̀.
\c 22
\ms1 ISIDAYƐƐRIBƐ BOMƐ̀ MƆABU TENKƐ̀
\s1 Bɑdɑki yumɛ̀ Bɑdɑmmu kòò bo bɔntɛ́ kusĩ̀nkù Isidɑyɛɛribɛ
\p
\v 1 Kɛ̀ Isidɑyɛɛribɛɛ ítɛ́ dɛborɛ̀ kɛ́bɑ́tɛ́ Mɔɑbu kó kubiriku kukó nSuditɛ̃ɛ̃ yɑ́ɑ̀ kɛ́nwetí Sedikoo.
\p
\v 2 Kɛ̀ Mɔɑbu kóo kpɑ̀ɑ̀tì Sipɔɔ birɛ Bɑdɑkii yɑ̀ Isidɑyɛɛribɛ dɔ̀ɔ̀ dɛ̀ Amɔriibɛ. 
\v 3 Kɛ̀ kufɔ̃wɑɑ́ mbɛ̀ ɑutɛ́ mɛdiɛ̀ wenwe nɛ̀ o kɔbɛ kɛ̀ bɛ̀ɛ yɔtɛ Isidɑyɛɛribɛ kɛ yɛ̃́ bɛ̀ tumɛ̀ kuwuɔ ndiɛkù nku. 
\v 4 Kòo tɔ̃ nkɛ̀ bɛ̀ɛ nɑ́kɛ́ Mɑndiyɑ̃ɑ̃ ɛì kó bɛkótíbɛ̀ kɛ dɔ̀: Ditĩ̀nnì dii nyóó dɛ́útóomu dɛ̀ɛ̀ kó dimɑ̀ɑ̀ bo ti tenkɛ̀, fɛnɑ̀ɑ̀fɛ̀ ɔ̃ɔ̃ dɛ́útóomɛ̀ mɛmúpɑ̀mmɛ̀. Sipɔɔ birɛ Bɑdɑki weè do tú okpɑ̀ɑ̀tì Mɔɑbu tenkɛ̀ dɛ mɔ̀nnì.
\p
\v 5 Mɛm̀mɛ kɛ̀ Bɑdɑki dɛitɛ yɛtɔ̃rɛ̀ kɛ́tɔ̃ nho ɛì kótírì Petɔɔ dìì bo kukó nhEfɑdɑti borɛ̀, kɛ̀ yɛ̀ bo nɑ́kɛ́ Beɔɔ birɛ Bɑdɑmmu kɛ dɔ̀: Kubotí mɑkù kùù yɛ̀nní Esibiti kɛ mɔ́nkɛ pitírí kɛtenkɛ̀ kɛ bɑ̀tɛ́ diɛ nh ɛì mɑ̀nku kɛ n wetí. 
\v 6 Dɛ kó kubotí kpeńnìmu kɛ m pɛ̃ɛ̃tɛ́, n dɑ bɑ́ɑ́mmu kɔtɛní kɛ́ bɛ̀ bɔntɛ́ kusĩ̀nkù kɛ̀ dɛ̀ nɑɑti m bɛ̀ nɑ. N yɛ̃́mu kɛ dò nkɑ̀ɑ yĩ wèè yɑ̀ mɛyɛi nhò ɔ̃ɔ̃ mɛ̀ yɑ̀mu. Kɑ̀ɑ yĩ wèè yɑ̀ mɛsɑ̀ɑ̀ nwèe mɛ̀ yɑ̀. 
\v 7 Mɔɑbu ɛì kó bɛkótíbɛ̀ nɛ̀ Mɑndiyɑ̃ɑ̃ ɛì kɔbɛ kɛ̀ bɛ̀ɛ kɔtɛ kɛ́yɑ̀ Bɑdɑmmu kɛ tɔnɛ̀ ticuuti kɛ bo ò cu, kɛ́tuɔkoo kóò nɑ̀kɛ́ bɛ̀ tɔ tì timɔu. 
\v 8 Kɛ̀ Bɑdɑmmuu bɛ̀ nɑ̀kɛ́ kɛ dɔ̀: Duɔ́nɛ̀, kɛ̀ dɛ̀ wentɛ́ n di nɑ́kɛ́ m beé nti Yiɛ̀ nKuyie nkɛ̀ kù n nɑ̀kɛ́ tì. Mɛm̀mɛ kɛ̀ Mɔɑbu ɛì kó bɛkótíbɛ̀ɛ yié nho cĩ́ɛ̃̀tɛ̀. 
\v 9 Kɛ̀ Kuyie nkɔtɛní kɛ́bekɛ Bɑdɑmmu kɛ dɔ̀: Bɛnìtìbɛ̀ ɔ̃̀mbɛ bo ɑ cĩ́ɛ̃̀tɛ̀? 
\v 10 Kɛ̀ Bɑdɑmmuu kù tɛ̃̀ńnɛ́ kɛ dɔ̀: Sipɔɔ birɛ Bɑdɑki Mɔɑbu ɛì kóo kpɑ̀ɑ̀tì weè bɛ̀ tɔ̃nní kɛ tú: 
\v 11 Kubotí mɑkù kuù yɛ̀nní Esibiti kɛ mɔ́nkɛ pitírí kɛtenkɛ̀, kòò tu kɛ̀ m bo yie n kɔtoo kɛ́ bɛ̀ bɔntɛ́ kusĩ̀nkù kɛ̀ dɛ̀ bo yie nwèe bɛ̀ nɑ kɛ́ bɛ̀ bɛ̀ti. 
\v 12 Kɛ̀ Kuyie nhò nɑ̀kɛ́ kɛ dɔ̀: A bɑ́ɑ́ kɔtɛ, ɑ bɑ́ɑ́ bɛ̀ bɔntɛ́ kusĩ̀nkù, míì bɛ̀ dɔ̀ɔ̀ mɛsɑ̀ɑ̀.
\p
\v 13 Kɛ̀ dɛ̀ɛ wentɛ́ kɛ̀ Bɑdɑmmuu bɛ̀ nɑ̀kɛ́ kɛ dɔ̀: Kònnɛ̀ di ciɛ, ti Yiɛ̀ nKuyie nyetɛmu kɛ tú m bɑ́ɑ́ di nɛinɛ̀.
\p
\v 14 Kɛ̀ Mɔɑbu ɛì kó bɛkótíbɛ̀ɛ ítɛ́ kɛ́kò kɛ́nɑ́kɛ́ Bɑdɑki kɛ dɔ̀: Bɑdɑmmu yetɛmu kɛ tú ò bɑ́ɑ́ ti nɛinní. 
\v 15 Kɛ̀ Bɑdɑkii yíɛ́ kɛ́tɔ̃ nkutɔ̃nkù dɛ́rínkù kɛ̀ kù nsũnɛ̀ kuketikù kɛ tú bɛnitidiɛbɛ̀ kɛ pɛ̃ɛ̃tɛ́ bɛketibɛ̀. 
\v 16 Kɛ̀ bɛ̀ɛ tuɔkoo Bɑdɑmmu borɛ̀ kóò nɑ̀kɛ́ kɛ dɔ̀: Sipɔɔ birɛ Bɑdɑki weè ti tɔ̃nní kɛ tú ò dɑ bɑ́ɑ́mmu ɑ bɑ́ɑ́ yetɛ ɑ bo kɔtoomɛ̀ o borɛ̀. 
\v 17 Ò tu ò yóó dɑ dɛ́úkùnnɛmu mɛdiɛ̀ nkɛ́dɔɔ̀ ɑ ò nɑ̀kɛ́ tìì kó dimɑ̀ɑ̀, ò tu ò dɑ bɑ́ɑ́mmu ɑ bɑ́ɑ́ yetɛ, ɑ́ kɔtoo kɛ́ bɛ̀ nhò bɔntɛ́ kusĩ̀nkù.
\p
\v 18 Kɛ̀ Bɑdɑmmuu bɛ̀ tɛ̃̀ńnɛ́ kɛ dɔ̀: Bɑ́ kɛ̀ Bɑdɑki n duɔ́ nho cĩ́ɛ̃̀tɛ̀ kɛ̀ timɑ́tì pɛ́ítì tɛ̀ pìɛ́kɛ́ nɛ̀ mɛsɔɔ nyí yóó nɑ kɛ́dɔɔ̀ tìmɑtì kɛ̀ tì ndɛu yoo tì nkɛ̃ńnì kɛ́petɛnɛ̀ ti Yiɛ̀ nKuyie n tũ nkù bo n nɑ́kɛ́ tì. 
\v 19 Di nɛ́ yié ndiɛ nkɛyènkɛ̀ kɛ̀ n yɑ̀ ti Yiɛ̀ nKuyie nyóó yíɛ́ kɛ́ n nɑ́kɛ́ tì.
\p
\v 20 Kɛ̀ Kuyie nkɔtɛní kɛyènkɛ̀ Bɑdɑmmu borɛ̀ kóò nɑ̀kɛ́ kɛ dɔ̀: Dɛ kó bɛnìtìbɛ̀ mɛ nkɔ̀tɛnímɛ̀ kɛ bo dɑ yú, ítɛ́ kɛ́ bɛ̀ nɛinɛ̀. A nɛ́ yó ndɔɔri n dɑ nɑ́ɑ́ ntì mɑ́ɑ̀ ndi.
\p
\v 21 Kɛ̀ dɛ̀ɛ wentɛ́ kɛ̀ Bɑdɑmmuu boú o sɑ̃mmɑrímú dɛ kɑ̀rì kɛ́nɛinɛ̀ Mɔɑbu ɛì kó bɛkótíbɛ̀.
\s1 Sɑ̃mmɑrímú bɛ́innɛ̀mɛ̀ dɛ yiɛ̀
\p
\v 22 Kɛ̀ Bɑdɑmmuu ketɛ́ kɛ́nnɛínɛ̀ o kó bɛtɔ̃mbɛ̀ bɛ̀dɛ́bɛ̀, kɛ̀ Kuyie mmiɛkɛ ò yɛ̀ mɛdiɛ̀. Kɛ̀ ti Yiɛ̀ nKuyie nkó ditɔ̃nnìi ò dintɛ́ kɛ́ncómmú kucɛ. 
\v 23 Kɛ̀ sɑ̃mmɑrímúu yɑ̀ ti Yiɛ̀ nKuyie ntɔ̃nnì còḿmúmɛ̀ kucɛ kɛ pikú mɛsebii kɛ̀ sɑ̃mmɑrímúu dɑutɛ́ kɛ́tɑ dɛpɑɑ mmiɛkɛ kɛ̀ Bɑdɑmmuu dɛ̀ potɛ́ kɛ̀ dɛ̀ɛ bɔɔ́ nkucɛ. 
\v 24 Kɛ̀ ti Yiɛ̀ nKuyie ntɔ̃nnìi sɔɔ́ nkɛ́kɔtɛ kɛ́cómmú fínyĩ̀ kó dɛtie nkó kupɑku mɑkù kucɛ pɛ̃̀ṹ dɛ̀ kɛ̀ bɛ̀ mɑɑ́ kɛ pèńnɛ́ ku m̀píkù nɛ̀ kutɛkù. 
\v 25 Kɛ̀ sɑ̃mmɑrímúu yɑ̀ ti Yiɛ̀ nKuyie ntɔ̃nnì kɛ́dɑutɛ́ kɛ́dínnɛ́nɛ̀ kumɑrí kɛ́hɛ̃́ṹtɛ́ Bɑdɑmmu nɑɑ̀cɛ̀tɛ̀ kumɑrí kòo wɛ̃tɛ kɛ́ dɛ̀ potɛ́. 
\v 26 Kɛ̀ ti Yiɛ̀ nKuyie ntɔ̃nnìi sɔɔ́ nkɛ́kɔtɛ kɛ́cómmú kucɛ pɛ̃̀ṹ dɛ̀ mɛfíè nyí borɛ̀ kɛ dò nkɔ́ntɛ́ kubɑkù yoú bíɛ́kɛ̀ yoo kucɑ̃̀nku bíɛ́kɛ̀. 
\v 27 Kɛ̀ sɑ̃mmɑrímúu yɑ̀ ti Yiɛ̀ nKuyie ntɔ̃nnì kɛ́okoo, kɛ̀ Bɑdɑmmu miɛkɛɛ yɛ̀nní kòò dɛ̀ potɛ́ kupɑ̀ɑ̀ti. 
\v 28 Kɛ̀ ti Yiɛ̀ nKuyie nduɔ́ nkɛ̀ sɑ̃mmɑrímúu nɑ kɛ́bɛ́i, nkɛ́bekɛ́ Bɑdɑmmu kɛ dɔ̀: N dɑ cɑ̀kɛ bɑ kɑ̀ɑ m puotì kucɛ mɛtɑ̃ɑ̃́mmɛ̀? 
\v 29 Kɛ̀ Bɑdɑmmu dɔ̀: A yetɛ n yɛ̃ mmù mmu dɛɛ̀ te, kɛ̀ n do ntɔ disiè nɛ̀ yíe n do dɑ kùɔ̀mu nɛ̀ dimɔ̀nnì. 
\v 30 Kɛ̀ sɑ̃mmɑrímúu ò tɛ̃̀ńnɛ́ kɛ dɔ̀: N tú ɑ sɑ̃mmɑrímú mmu kɑ̀ɑ n dèkù sɑ̃́ɑ̃̀, n dɑ dɔ̀ɔ̀ miɛ̀ mbotí diyiè mɑrɑ̀ɑ̀? Kòò dɔ̀: Ɔ́ɔ̀.
\p
\v 31 Dɛ mɔ̀nnì ndi ti Yiɛ̀ nKuyie nkpetɛ́mɛ̀ Bɑdɑmmu nuɔ nkòo yɑ̀ ku tɔ̃nnì kɛ̀ dì còḿmú kucɛ kɛ pikú mɛsebii nkòo do kɛ́nínkú kɛ́sĩ́nnɔ́ɔ kɛtenkɛ̀. 
\v 32 Kɛ̀ ti Yiɛ̀ nKuyie ntɔ̃nnìi ò bekɛ kɛ dɔ̀: Bɑ nte kɑ̀ɑ potɛ́ sɑ̃mmɑrímú kɛ tùɔ̀kɛ kucɛ mɛ̀tɑ̃ɑ̃ti? Míì dɑ dintɛ́ kɛ bo dɑ pɛ́ítɛ́, kɛ yɛ̃́ ɑ kérímɛ̀ kucɛ yɛiku nku. 
\v 33 Sɑ̃mmɑrímú n yɑ̀mu kɛ kɔ̀ńtɛ́ kucɛ mɛ̀tɑ̃ɑ̃ti kɛ̀ mɛɛ̀ dɔkɛ nɛ̀ yíe n do dɑ kùɔ̀mu kɛ̀ sɑ̃mmɑrímú nfòù.
\p
\v 34 Kɛ̀ Bɑdɑmmuu nɑ́kɛ́ ti Yiɛ̀ nKuyie ntɔ̃nnì kɛ dɔ̀: N cɑ̀ɑ̀rɛ̀mu n do í yɛ̃́ kɛ do nfɔ̃́ɔ̃̀ n dintɛ́ kucɛ. Kɛ̀ dɛ̀ í dɑ nɑɑti m bo kɔtɛmɛ̀ dɛ kó kucɛ m bo wɛ̃tɛ. 
\v 35 Kɛ̀ ti Yiɛ̀ nKuyie ntɔ̃nnì dɔ̀: Nɛinɛ̀ bɛ kɛ̀ dí kɔtɛ, ɑ nɛ́ yó nnɑ́ɑ́ nh ɑ̃nnɛ́ tì nti ɑ nùù miɛkɛ.
\p Mɛm̀mɛ kɛ̀ Bɑdɑmmuu nɛinɛ̀ Bɑdɑki tɔ̃nní bɛ̀ɛ̀ kpɑ̀ɑ̀tìbɛ̀ kɛ̀ bɛ̀ɛ kɔtɛ.
\s1 Bɑdɑki comɛ̀ Bɑdɑmmu
\p
\v 36 Kɛ̀ Bɑdɑkii keè Bɑdɑmmu kèróomɛ̀ kɛ́kétɛ́ní kóò co dihɛì bɛ̀ tu dì Adi-Mɔɑbu dìì tɔ̀kɛ́nɛ̀ kukó nhAdinɔ kùù tu bɛ tenkɛ̀ mɑ̀nku. 
\v 37 Kòo bekɛ Bɑdɑmmu kɛ dɔ̀: N tɔ̃nko bɛnìtìbɛ̀ kɛ tú bɛ̀ dɑ yúní, dɛ̀ yĩ́mɛ kɑ̀ɑ í kɔ̀tɛní? Yɑ́ɑ̀ ɑ yɛ̀mmɛ̀ do dò n yí yóó dɑ dɛ́úkùnnɛmu? 
\v 38 Kɛ̀ Bɑdɑmmuu ò tɛ̃̀ńnɛ́ kɛ dɔ̀: Bɑ́ nɛ̀ mmɛ nkɔ̀tɛnímɛ̀ m bo nɑ́kɛ́ ɔ̃̀nti nɛ̀ mmɑ́ɑ̀? Kuyie nhɑ̃nnɛ́ tì n nùù n yóó ti ndɑ nɑ́kɛ́.
\p
\v 39 Mɛm̀mɛ Bɑdɑmmu nɛinɛ̀mɛ̀ Bɑdɑki kɛ̀ bɛ̀ɛ kò nKidiyɑ-Usoo. 
\v 40 Kɛ̀ Bɑdɑkii fíé inɑ̀ɑ̀kɛ nɛ̀ ipe kɛ́pɑ̃mmú imɑɑ Bɑdɑmmu nɛ̀ bɛkótíbɛ̀ bɛ̀ɛ̀ do ò cíe.
\s1 Bɑdɑmmu pɑ̃mɛ̀ Kuyie nkó mɛsɑ̀ɑ̀ nyIsidɑyɛɛribɛ
\p
\v 41 Kɛ̀ dɛ̀ɛ wentɛ́ kɛ̀ Bɑdɑkii túótɛ́ Bɑdɑmmu kɛ̀ bɛ̀ɛ dekɛ Bɑmɔti-Bɑɑdi kó ditennì yɛtɔ̀rɛ̀ borɛ̀, kòo nɑ kɛ́yɑ̀ Isidɑyɛɛribɛ kó dikéè.
\c 23
\p
\v 1 Kɛ̀ Bɑdɑmmuu duɔ́ nkɛ̀ Bɑdɑki mɑɑ́ yɛwũɔ̃tɔ̀rɛ̀ yɛ̀yiekɛ̀ dɛborɛ̀, kɛ́wɑɑ́ nyɛnɑɑdɑkɛ̀ yɛ̀yiekɛ̀ nɛ̀ yɛpedɑkɛ̀ yɛ̀yiekɛ̀. 
\v 2 Kɛ̀ Bɑdɑkii dɔɔ̀ Bɑdɑmmu ò nɑ̀kɛ́ tì, kɛ̀ bɛ̀ɛ féútɛ́ bɑ́ dìì wũɔ̃tɔ̀nnì ĩ́nkɛ̀ dinɑɑdɑɑ̀ nɛ̀ dipedɑɑ̀. 
\v 3 Kòo deè kɛ̀ Bɑdɑmmuu nɑ́kɛ́ Bɑdɑki kɛ dɔ̀: Ncómmú diɛ nhɑ wũɔ̃ ɑ fìé ì kɛ tùɔ nyì borɛ̀. Kɛ̀ n kɛntɛ́ kɛ́yɑ̀ ti Yiɛ̀ nKuyie bo m bɛ́innɛ̀ tì, kɛ̀ n wɛ̃tɛní kɛ dɑ nɑ́kɛ́ kù yɛ̃ mmù. Ò mɛ nyĩ kɛ́dekɛ ditɑ̃rì yómmɛ̀. 
\v 4 Kɛ̀ Kuyie nkɔtɛní o borɛ̀ kòo kù nɑ̀kɛ́ kɛ dɔ̀: M mɑɑ́ yɛwũɔ̃tɔ̀rɛ̀ yɛ̀yiekɛ̀ ndi kɛ fèútɛ́ bɑ́ dìì ĩ́nkɛ̀ dinɑɑdɑɑ̀ nɛ̀ dipedɑɑ̀ kɛ tùɔ.
\p
\v 5 Kɛ̀ ti Yiɛ̀ nKuyie nhò nɑ̀kɛ́ tinɑ́ɑǹtì ò bií yóó nɑ́kɛ́ tì Bɑdɑki, kɛ́deè kóò nɑ̀kɛ́ kɛ dɔ̀: Wɛ̃tɛ kɛ́nɑ́kɛ́ Bɑdɑki kɛ dɔ̀ muu. 
\v 6 Kɛ̀ Bɑdɑmmuu wɛ̃too Bɑdɑki borɛ̀ o cómmú dɛ̀ o wũɔ̃ ò fìé ì kɛ tùɔ nyi borɛ̀, wenwe nɛ̀ Mɔɑbu kó bɛkótíbɛ̀ bɛmɔu. 
\v 7 Mɛm̀mɛ Bɑdɑmmu dèntɛ̀mɛ̀ o onnìfɛ̀ kɛ dɔ̀:
\q1 Bɑdɑki duɔ́ nkɛ̀ bɛ̀ n yuní Arɑmu tenkɛ̀
\q1 wenwe Mɔɑbu kpɑ̀ɑ̀tì ò duɔ́ nkɛ̀ bɛ̀ n yuní
\q1 diyiè yìɛ̀ní kɛ̀ɛ̀ bíɛ́kɛ̀ kó yɛtɑ̃rɛ̀ ĩ́nkɛ̀,
\q1 Ò tu n kɔtɛní kóò bɔntɛ́ kusĩ̀nkù nku Sɑkɔbu yɑɑ̀bí,
\q1 kɛ tú nhò cɑ̀ɑ̀rɛ̀ Isidɑyɛɛribɛ.
\q1
\v 8 N nɛ́ bo yĩ́mɛ kɛ́bɔntɛ́ kusĩ̀nkù Kuyie nyí bɔntɛ́ bɛ̀ kusĩ̀nkù?
\q1 M bo yĩ́mɛ kɛ̀ m miɛkɛɛ pɛikɛ ti Yiɛ̀ nKuyie mmiɛkɛ í pɛikɛ bɛ̀?
\q1
\v 9 N wúónní Isidɑyɛɛribɛ yɛtɑ̃rɛ̀ ĩ́nkɛ̀
\q1 m bɛ̀ pɑɑtɛ́ní ditennì ĩ́nkɛ̀ nkɛ
\q1 bɛ̀ tu kubotí kùù cɑ̃̀ɑ̃́ nkù nku
\q1 bɛ̀ í wɛ̃nnɛ́ ibotí tɛì.
\q1
\v 10 We mbo nɑ kɛ́ bɛ̀ kɑ̀ɑ?
\q1 Bɛ yɑɑ̀bí dònnɛ̀ mubirímú mmu.
\q1 We mbo nɑ kɛ́kɑɑ nyIsidɑyɛɛribɛ kó dikéè
\q1 kɛ́nɑ́kɛ́ bɛ̀ mɑ̀mɛ̀?
\q1 N dɔ́ kɛ́wɛ̃nnɛ́nɛ̀ dɛ kó bɛnitisɑ̀ɑ̀bɛ̀ mbɛ kɛ́kú.
\q1 N dɔ́ n fòmmu mɑ̀nku ndònnɛ̀ bɛ kɔ̃mu kɔku nku.
\p
\v 11 Kɛ̀ Bɑdɑkii nɑ́kɛ́ Bɑdɑmmu kɛ dɔ̀: A n dɔ̀ɔ̀ bɑ? N dɑ yùní kɑ̀ɑ bo kɔtɛní kɛ́bɔntɛ́ kusĩ̀nkù n dootitɔbɛ̀, kɑ̀ɑ nɛ́ bɛ̀ duɔ̀ mɛsɑ̀ɑ̀nɑ̀ɑ̀? 
\v 12 Kɛ̀ Bɑdɑmmuu ò tɛ̃̀ńnɛ́ kɛ dɔ̀: Ti Yiɛ̀ nKuyie nhɑ̃nnɛ́ tì n nùù n dò nkɛ́ tì mbɛ́i.
\s1 Bɑdɑmmu yìɛ́ kɛ pɑ̃mɛ̀ Isidɑyɛɛribɛ Kuyie nkó mɛsɑ̀ɑ̀
\p
\v 13 Kɛ̀ Bɑdɑki dɔ̀: Kɔtɛní kɛ̀ ti kɔtɛ kupíkù tɛkù, kɑ̀ɑ bɛ̀ yɑ̀ bɛmɔu, ɑ do yɑ̀ dikéè ndi, dɛborɛ̀ ɑ bo bɛ̀ yɑ̀mu bɛmɔu kɛ́ bɛ̀ nni mbɔntɛ́ kusĩ̀nkù.
\p
\v 14 Ò mɛ nyĩ kóò kɔ̀tɛnɛ̀ bɛ̀ɛ̀ pɑkɛ́ dihɛì bɛ kó dikɑrì Pisikɑɑ tɑ̃rì yómmɛ̀, kɛ́mɑɑ́ yɛwũɔ̃tɔ̀rɛ̀ yɛ̀yiekɛ̀ kɛ́féútɛ́ bɑ́ dìì wũɔ̃tɔ̀nnì ĩ́nkɛ̀ dinɑɑdɑɑ̀ nɛ̀ dipedɑɑ̀ kɛ́tuɔ. 
\v 15 Kɛ̀ Bɑdɑmmuu nɑ́kɛ́ Bɑdɑki kɛ dɔ̀: Ncómmú diɛ ɑ fìé ìì wũɔ̃ borɛ̀ kɛ̀ n kɔtɛ ciɛ nkɛ́yɑ̀ ti Yiɛ̀ nKuyie nyó n nɑ́kɛ́ tì.
\p
\v 16 Kɛ̀ ti Yiɛ̀ nKuyie nkɔtɛní Bɑdɑmmu borɛ̀ kɛ́ɑ̃nnɛ́ tinɑ́ɑǹtì ò nùù miɛkɛ kɛ dɔ̀: Wɛ̃too kóò nɑ̀kɛ́ kɛ dɔ̀ muu. 
\v 17 Kɛ̀ Bɑdɑmmu wɛ̃too kɛ́nsɔ̃́ Bɑdɑki bɑɑ cómmú o wũɔ̃ ò fìé ì kɛ tùɔ nyi borɛ̀, wenwe nɛ̀ Mɔɑbu kó bɛkótíbɛ̀ bɛmɔu. Kɛ̀ Bɑdɑkii ò bekɛ dɔ̀: Ti Yiɛ̀ nKuyie ndɑ nɑ̀kɛ́ ɔ̃̀nti?
\p
\v 18 Kɛ̀ Bɑdɑmmuu deǹtɛ̀ fɛyɛ̀nfɛ̀ kɛ dɔ̀:
\q1 Bɑdɑki ítɛ́ kɛ́keè.
\q1 Fɔ̃́ nSipɔɔ birɛ kéntɛ́ kɛ́keè.
\q1
\v 19 Kuyie nyí tú onìtì kɛ bo soutɛ́,
\q1 kù mɛ nyí do nhonìtì dòmmɛ̀ kɛ bo bɛ́i nkɛ́ceetɛ,
\q1 kù ɔ̃ɔ̃ í nnɑ̀kɛ́ tìmɑtì kɛ̀ tì í ntùɔ̀kɛní
\q1 kù bɛ́i ntì kù ɔ̃ɔ̃ tì dɔ̀ɔ̀mu.
\q1
\v 20 Kuyie nkuù n nɑ̀kɛ́ kɛ tú m bɛ̀ pɑ̃ mɛsɑ̀ɑ̀,
\q1 kɛ̀ m mɛ mbɛ̀ pɑ̃, n yí yóó ceetɛ.
\q1
\v 21 Kù í yɑ̀ Isidɑyɛɛribɛ cɑ̀ɑ̀rɛ̀ mù
\q1 Kù í yɑ̀ Sɑkɔbu yɑɑ̀bí kó mɛyɛi mmɑmɛ̀,
\q1 bɛ Yiɛ̀ nKuyie mbɛ̀ bonɛ̀mu,
\q1 kɛ̀ bɛ̀ kù sɑ̃ntí yɛkpɑ̀ɑ̀tìsɑ̃ɑ̃.
\q1
\v 22 Kuyie nkuù bɛ̀ dènnɛní Esibiti
\q1 kɛ bɛ̀ duɔ́ mmupɑɑnɑ̀ɑ̀wɛ̃rímú.
\q1
\v 23 Dɛnitinɔ̀nkpɛrɛ bɑ́ɑ́ nɑ kɛ́dɔɔ̀ dɛ̀mɑrɛ̀ Sɑkɔbu yɑɑ̀bí.
\q1 Tidiɛtì kpɛrɛ bɑ́ɑ́ kɑ́ɑ́kɛ́ Isidɑyɛɛribɛ.
\q1 Dɛɛ̀ te kɛ̀ bɛ̀ ɔ̃ mbɛnkú Isidɑyɛɛribɛ kɛ tú:
\q1 Ntɛ Kuyie ndɔ̀ɔ̀ dɛ̀ bɛ kpɛ́í.
\q1
\v 24 Dɛ kó kubotí ɔ̃ɔ̃ ítɛ́ní musĩ̀mmù kɔ̃mɛ mmɛ
\q1 bɛ̀ còḿmú dicìrícìrì tɛ̃mɛ̀ mmɛ
\q1 kɛ̀ bɛ̀ í nìntɛ kɛ pĩ nkɛ cɑ̀ɑ́kɛ́
\q1 kɛ yɑ̃̀ mɛyĩ̀ĩ̀ mbɛ̀ ɔ̃ɔ̃ í nduɔ́.
\b
\p
\v 25 Kɛ̀ Bɑdɑki dɔ̀: Kɑ̀ɑ í yóó bɛ̀ bɔntɛ́ kusĩ̀nkù ɑ yóu ɑ bo mbɛ̀ pɑ̃ɑ̃mmɛ̀ mɛsɑ̀ɑ̀.
\p
\v 26 Kɛ̀ Bɑdɑmmuu ò tɛ̃̀ńnɛ́ kɛ dɔ̀: N do í dɑ nɑ̀kɛ́ kɛ tú kɛ̀ Kuyie nni nnɑ̀kɛ́ tì, n dò nkɛ́ ti nnɑ́kɑ́ɑ̀?
\s1 Bɑdɑmmu pɑ̃mɛ̀ Isidɑyɛɛribɛ Kuyie nkó mɛsɑ̀ɑ̀ kucɛ mɛtɑ̃ɑ̃́mmɛ̀
\p
\v 27 Kɛ̀ Bɑdɑki dɔ̀: Kɔtɛní kɛ̀ tí kɔtɛ kupíkù tɛkù kɛ̀ dɛ̀ nɑɑti Kuyie nyie nkɑ̀ɑ bɛ̀ nni mbɔntɛ́ kusĩ̀nkù.
\p
\v 28 Kɛ̀ Bɑdɑkii tɔ Bɑdɑmmu kɛ̀ bɛ̀ɛ dekɛ Peɔɔ tɑ̃rì yómmɛ̀ dìì sĩ̀ĩ́ ndikpɑ́ɑ̀. 
\v 29 Kɛ̀ Bɑdɑmmuu nɑ́kɛ́ Bɑdɑki kɛ dɔ̀: Mɑɑ́ diɛ nyɛwũɔ̃tɔ̀rɛ̀ yɛ̀yiekɛ̀ kɛ́féútɛ́ bɑ́ dìì wũɔ̃tɔ̀nnì ĩ́nkɛ̀ dinɑɑdɑɑ̀ nɛ̀ dipedɑɑ̀. 
\v 30 Kɛ̀ Bɑdɑkii dɔɔ̀ Bɑdɑmmu ò nɑ̀kɛ́ tì kɛ́féútɛ́ bɑ́ dìì wũɔ̃tɔ̀nnì ĩ́nkɛ̀ dinɑɑdɑɑ̀ nɛ̀ dipedɑɑ̀.
\c 24
\p
\v 1 Kɛ̀ Bɑdɑmmuu bɑntɛ́ ti Yiɛ̀ nKuyie ndɔ́mɛ̀ kɛ́pɑ̃ Isidɑyɛɛribɛ mɛsɑ̀ɑ̀ nkɛ́yóu kɛ tɛ̃́nkɛ í nkɔ̀tɛ kɛ bo wɑmmú ò dò nkɛ́nɑ́kɛ́ tì kɛ́wɛ̃ɛ̃tɛ dikpɑ́ɑ̀ bíɛ́kɛ̀, 
\v 2 kɛ́wéntɛ́ kɛ́yɑ̀ Isidɑyɛɛribɛ bɑ̀tɛ́mɛ̀ kɛ kɑri bɛ botí dò ndòmmɛ̀. Mɛm̀mɛ Kuyie nYɑɑ́ ncùtɛ́nímɛ̀ o ĩ́nkɛ̀. 
\v 3 Kòo deǹtɛ̀ fɛyɛ̀nfɛ̀ kɛ dɔ̀:
\q1 Mí mBeɔɔ birɛ Bɑdɑmmu m bɛ́immu,
\q1 onìtì wèè wùó ndisɔ̀rì kpɛti míì bɛ́i.
\q1
\v 4 Mí nwèè yo Kuyie ntɑmmɛ̀
\q1 mí nwèè ɔ̃ɔ̃ nínkú kɛ́bɑ́ntɛ̀ Kuyie nkɛ̀ kùu kpetɛ́ n nuɔ,
\q1 mí nwèè yɑ̀u muwɛ̃rímú mumɔu yiɛ̀ nkó mɛbɛnkùmɛ̀
\q1 ntɛ n tú mù:
\q1
\v 5 Díndi bɛ̀ɛ̀ tu Isidɑyɛɛribɛ di kɑrɛ̀ wennimu,
\q1 Díndi Sɑkɔbu yɑɑ̀bí di ɑ̃ tìì touti wennimu,
\q1
\v 6 dɛ̀ pitɛ́ ikó nkɔ̃mɛ mmɛ,
\q1 kɛ do nkupúú dòmmɛ̀ kukó ntɑkɛ́,
\q1 kɛ dònnɛ̀ dɛtekperɛ̀ ti Yiɛ̀ nKuyie nfìí ndɛ̀.
\q1 Kɛ sɑ̃́kɛ́nɛ̀ sɛ́tìrì kó dɛtie ndɛ̀ɛ̀ bo kukó ntɑkɛ́.
\q1
\v 7 Kɛ dò mmɛniɛ nhɔ̃ɔ̃ píɛmmɛ̀ kukó
\q1 kɛ́yɑɑtɛ́ní kɛtenkɛ̀ kɛ́nyɔ́ɔ̀rì tidiitì.
\q1 Bɛ kóo kpɑ̀ɑ̀tì í wéí okpɑ̀ɑ̀tì Akɑki
\q1 bɛ kó dikpɑ̀ɑ̀tìyuu kpénkúmu.
\q1
\v 8 Kuyie mbɛ̀ dènnɛní Esibiti kɛ bɛ̀ duɔ́ mmupɑɑnɑ̀ɑ̀wɛ̃rímú mmu
\q1 kɛ̀ bɛ̀ kɔ̀ùtì bɛ dootitɔbɛ̀
\q1 kɛ bɛ̀ tɑ̃ũ ipie.
\q1
\v 9 Bɛ̀ ɔ̃ nhokɛ yɛcìrícìrɛ̀ kɔ̃mɛ mmɛ
\q1 kɛ duɔ́ musĩ̀mmù kɔ̃mɛ.
\q1 We mbo dɑ́ɑ́tí kɛ́ bɛ̀ íi?
\q1 Mɛsɑ̀ɑ̀ nní mbonɛ̀ bɛ̀ɛ̀ bɛ̀ dɔ́nɛ̀ mɛsɑ̀ɑ̀.
\q1 Bɛ̀ɛ̀ bɛ̀ dɔ́nɛ̀ mɛyɛi mmɛ̀ɛ do bɛ ĩ́nkɛ̀.
\b
\p
\v 10 Kɛ̀ dɛ̀ɛ yonkɛ Bɑdɑki kòo potɛ́ o nɔ̀ùtɛ̀ kɛtenkɛ̀ kɛ́nɑ́kɛ́ Bɑdɑmmu kɛ dɔ̀: N do dɑ yùní kɑ̀ɑ bo bɛ̀ bɔntɛ́ kusĩ̀nkù nku, kɑ̀ɑ nɛ́ bɛ̀ pɑ̃ mɛsɑ̀ɑ̀ nkucɛ mɛtɑ̃ɑ̃tɑɑ̀? 
\v 11 Di mmɔ̀nnì kò nhɑ ciɛ! N do tú m bo dɑ dɛ́úkùnnɛmu, ɑ Yiɛ̀ nKuyie mmɛ ndɛ̀ ndɑ pɑ̀ɑmmu.
\s1 Bɑdɑmmu nɑ̀kɛ́mɛ̀ Isidɑyɛɛribɛ yóó nɑmɛ̀ bɛ dootitɔbɛ̀
\p
\v 12 Kɛ̀ Bɑdɑmmuu ò tɛ̃̀ńnɛ́ kɛ dɔ̀: A do tɔ̃nní bɛnìtìbɛ̀ kɛ̀ n yí mbɛ̀ nɑ̀kɑ́ɑ̀? 
\v 13 N do bɛ̀ nɑ̀kɛ́mu kɛ̀ n dɔ̀: Bɑ́ kɛ̀ Bɑdɑki n duɔ́ ntimɑ́tì pɛ́ítì nɛ̀ mɛsɔɔ ndɛ̀ɛ̀ pìɛ́kɛ́ o cĩ́ɛ̃̀tɛ̀ n yí yóó nɑ kɛ́dɔɔ̀ tìmɑtì nɛ̀ m mɑ́ɑ̀, tisĩ̀ntì yoo tisɑ̀ɑ̀tì. Kuyie nni nnɑ̀kɛ́ tì nti n yóó dɔɔ̀mɛ̀. 
\v 14 N kũntimu yíe n kɔbɛ borɛ̀ n nɛ́ yóó dɑ nɑ́kɛ́mu Isidɑyɛɛribɛ yóó dɔɔ̀mɛ̀ ɑ nìtìbɛ̀ yɛwe yɛ̀ɛ̀ kpɑɑní yɛ miɛkɛ.
\p
\v 15 Mɛm̀mɛ ò dèntɛ̀mɛ̀ fɛyɛ̀nfɛ̀ kɛ dɔ̀:
\q1 Mí mBeɔɔ birɛ Bɑdɑmmu m bɛ́immu,
\q1 mí nhonìtì wèè wùó ndisɔ̀rì kpɛti míì bɛ́i.
\q1
\v 16 Mí nwèè yo Kuyie ntɑmmɛ̀,
\q1 mí nwèè yɛ̃́ Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kù dɔ́ kɛ́dɔɔ̀ tì,
\q1 mí nwèè ɔ̃ɔ̃ nínkú kɛ́bɑ́ntɛ̀ Kuyie nkɛ̀ kùu kpetɛ́ n nuɔ,
\q1 mí nwèè yɑ̀u muwɛ̃rímú mumɔu yiɛ̀ nkó mɛbɛnkùmɛ̀ ntɛ n tú mù:
\b
\q1
\v 17 N yɑ̀mu dɛ̀ɛ̀ kèríní dɛ̀ nɛ́ í yóó tuɔkɛní bɑ̀mbɑ̀
\q1 n dɛ̀ wùónnímu dɛ̀ nɛ́ mu nyí tùɔ̀kɛ.
\q1 Okpɑ̀ɑ̀tì weè yɛ̀tìní Isidɑyɛɛribɛ miɛkɛ,
\q1 tɛwɑ̃̀tɛ̀ mɑtɛ̀ tɛɛ̀ yɛ̀tìní Sɑkɔbu yɑɑ̀bí miɛkɛ,
\q1 kɛ yó mpuotì Mɔɑbu kɔbɛ tempɑ́ɑ́tì nɛ̀ tɛ pɑ̀ɑ̀ti
\q1 kɛ kɔ̃mmù Sɛti yɑɑ̀bí yɔ.
\q1
\v 18 Weè yóó tiekɛ Edɔmmu ɛì,
\q1 weè yóó fietɛ bɛ dootitɔbɛ̀ Seii ɛì kɔbɛ ɛkɛ̀.
\q1 Isidɑyɛɛribɛ wɛ̃rímú dɛumu.
\q1
\v 19 Sɑkɔbu yɑɑ̀birɛ dɛɛ̀ yóó bɑɑtɛ́ bɛ dootitɔbɛ̀,
\q1 kɛ́kuɔ bɛsɔmbɛ bɛ̀ɛ̀ bo yentɛ́ kɛ́nkpɑɑ́ dihɛì.
\s1 Bɑdɑmmu nɑ̀kɛ́mɛ̀ bɛ̀ yóó pɔntɛmɛ̀ Isidɑyɛɛribɛ dootitɔbɛ̀
\p
\v 20 Dɛ kó difɔ̃nkúò kɛ̀ Bɑdɑmmuu yɑ̀ Amɑdesiibɛ kɛ́dentɛ̀ o onnìfɛ̀ kɛ dɔ̀:
\q1 Amɑdesiibɛ bɛɛ̀ tu bɛketibɛ̀ ibotí miɛkɛ
\q1 kɛ nɛ́ yóó dentɛnɛ̀ bɛ̀ bo bɛ̀ pɔ̀ntɛmɛ̀ pɑ́íí.
\p
\v 21 Kòo yɑ̀ Keniibɛ kɛ dɔ̀:
\q1 Díndi Keniibɛ di bomu kɛ í yĩɛ̃̀kù
\q1 di dònnɛ̀ tinɔriyĩ́ɛ̃̀ntì tìì sĩɛ̃kɛ́ ntìnti tipètì miɛkɛ.
\q1
\v 22 Nɛ̀ mɛmmɛ muhɑ̃ɑ̃́ mmuù nɛ́ yóó cɔ́útɛ́ di kó dihɛì Kɑinni
\q1 kɛ̀ Asidii kɔbɛɛ di pĩ́mmú kɛ kònnɛ̀.
\p
\v 23 Kòo sɔɔtɛ́ o onnìfɛ̀ kɛ dɔ̀:
\q1 Kuyie mbo ítɛ́ kɛ cómmú dìì mɔ̀nnì we mbo nkpɑɑ́ bo?
\q1
\v 24 Ketimmu itimu nɛ̀ bɑ̀tóòbɛ̀
\q1 kɛ bo fɛ̃́ũ Asuu ɛì kɔbɛ nɛ̀ Ebɛɛ ɛì kɔbɛ
\q1 bɛ mɔ́mmɔmbɛ bɛ̀ mɛ mmúnkɛ í yóó cootɛ́.
\b
\p
\v 25 Dɛ kó difɔ̃nkúò kɛ̀ Bɑdɑmmuu ítɛ́ kɛ́kò, kɛ̀ Bɑdɑkii múnkɛɛ ketɛ́ o kó kucɛ.
\c 25
\s1 Isidɑyɛɛribɛ yetɛmɛ̀ Kuyie nkɛ fìé iwũɔ̃ yɛbɔkɛ̀
\p
\v 1 Mɛm̀mɛ kɛ̀ Isidɑyɛɛribɛ ḿbo Sitimmu kɛ́duɔ́ mbɛ mɑ́ɑ̀ mufòmmu yɛimu kɛ́ndɔuti dɔutinɛ̀ Mɔɑbu ɛì kó bɛnitipòbɛ̀. 
\v 2 Kɛ̀ bɛɛ̀ nitipòbɛ̀ɛ bɛ̀ yũ̀ɔ̃́ nkɛ́tɑnnɛ́ mubɔɔféù miɛkɛ kɛ̀ bɛ̀ɛ wɛ̃nnɛ́ kɛ́di tibɔɔdiitì kɛ́nninku kɛ yɛ̀ bɑ̀ɑ́. 
\v 3 Kɛ̀ Isidɑyɛɛribɛɛ fíé iwũɔ̃ dibɔɔ̀ Bɑɑdi-Peɔɔ, kɛ̀ ti Yiɛ̀ nKuyie mmiɛkɛɛ bɛ̀ cɔ̀útɛ́. 
\v 4 Kɛ̀ kùu nɑ́kɛ́ Mɔyiisi kɛ dɔ̀: Tɔní diɛ nyIsidɑyɛɛribɛ kó bɛkótíbɛ̀ kɛ́ bɛ̀ nùńnɛ́ diɛ n yììkɛ̀, kɛ́wetínnɛ́ diyiè, kɛ̀ dɛ̀ɛ yie mmí ndi Yiɛ̀ nKuyie nkɛ̀ m miɛkɛɛ do.
\p
\v 5 Kɛ̀ Mɔyiisii nɑ́kɛ́ Isidɑyɛɛribɛ kó bɛkótíbɛ̀ kɛ dɔ̀: Di miɛkɛ bɑ́ wè wèe kuɔ o kó bɛnìtìbɛ̀ bɛ̀ɛ̀ fìé iwũɔ̃ dibɔɔ̀ Bɑɑdi-Peɔɔ.
\p
\v 6 Mɛm̀mɛ Mɔyiisi nɛ̀ Isidɑyɛɛribɛ sɔmbɛ kɛ̀ bɛ̀ ḿbo mɛtɑummɛ̀ tou bòrìnùù kɛ kuɔ̀. Bɛ nuɔ mmiɛkɛ nkɛ Isidɑyɛɛribɛ kóò mɔù tɔnímɛ̀ Mɑndiyɑ̃ɑ̃bɛ kóo nitipòkù mɔù. 
\v 7 Kɛ̀ ikuɔ́ nìùtì Pinɑsi Edeɑsɑɑ birɛ, Anɔɔ kó dɛyɑɑ̀birɛɛ ítɛ́ Isidɑyɛɛribɛ cuokɛ̀ kɛ́túótɛ́ dɛ kpɑ̃nnì, 
\v 8 kóò tũ̀nnɔɔ o touku miɛkɛ kɛ́ bɛ̀ tɑ̃ dikpɑ̃nnì bɛ pɔutì bɛdɛ́ kɛ́kuɔ. Dɛ mɔ̀nnì Kuyie ndo potɛ́ kùù yɛ̃ĩku Isidɑyɛɛribɛ kɛ̀ kùu cómmú. 
\v 9 Kɛ mɛ nsɔ̃́ mbɛnìtìbɛ̀ kú sikɔupípísìdɛ́ nɛ̀ sikɔupísìnɑ̀ɑ̀ (24000).
\b
\p
\v 10 Mɛm̀mɛ kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 11 Ikuɔ́ nìùtì Pinɑsi Edeɑsɑɑ birɛ Anɔɔ yɑɑ̀birɛ bónkùnnɛmu m miɛkɛ kɛ yɛ̃́ Isidɑyɛɛribɛ n dɔ̀ɔ̀ dɛ̀ ò yonkɛmɛ̀. Dɛɛ̀ te kɛ̀ n yí kùɔ Isidɑyɛɛribɛ kɛ bɛ̀ dèè bɑ́ nɛ̀ dɛ̀ do mɛ nni nyonkɛmɛ̀. 
\v 12 Nɛ̀ dɛ kpɛ́í nnɑ́kɛ́ we kɛ tú m bo ò tɑunnɛ̀ kɛ̀ kunɑɑtí mbo ti cuokɛ̀. 
\v 13 Wenwe nɛ̀ o yɑɑ̀bí nɛ̀ i kó iyɑɑ̀bío bɛ̀ bo ntú ikuɔ́ nìùbɛ̀ sɑ̃́ɑ̃̀ kɛ yɛ̃́ bɛ̀ n dɔ̀ɔ̀ dɛ̀ ò yonkɛmɛ̀, kòò tũ̀ntɛ tìì do bo mí nnɛ̀ Isidɑyɛɛribɛ ti cuokɛ̀.
\b
\p
\v 14 Isidɑyɛɛribɛ do wɛ̃nnɛ́nɛ̀ bɛ kou wè nɛ̀ Mɑndiyɑ̃ɑ̃ kóo nitipòkù kɛ́kuɔ o yètìrì do tú Simudi Sɑduu kó dɛbirɛ, ò do tú Simmɛɔ̃ɔ̃ kó kunɑɑ̀mùnkù kóo kótì mɔù nwe. 
\v 15 Kɛ̀ Mɑndiyɑ̃ɑ̃bɛ kóo nitipòkù wenwe yètìrì ntú Kosibi, kòo cicɛ tú Mɑndiyɑ̃ɑ̃bɛ kó kubotí kóo kótì kòo yètìrì tu Tisuu.
\b
\p
\v 16 Kɛ̀ ti Yiɛ̀ nKuyie nnɑ̀kɛ́ Mɔyiisi kɛ dɔ̀: 
\v 17 Donɛ̀ Mɑndiyɑ̃ɑ̃ ɛì kɔbɛ mudoò kɛ́ bɛ̀ kùɔ. 
\v 18 Kɛ yɛ̃́ bɛ̀ do di soutɛ́mɛ̀ kɛ̀ di fìé iwũɔ̃ dibɔɔ̀ Bɑɑdi Peɔɔ tɑ̃rì ĩ́nkɛ̀, kɛ̀ ti Yiɛ̀ nKuyie ndi potɛ́, nɛ̀ tìì do dɔ̀ɔ̀ kɛ̀ bɛ̀ɛ kuɔ Mɑndiyɑ̃ɑ̃ ɛì kɔbɛ kóo kótì kóò sɑpɑ̀ɑ̀ nKosibi.
\c 26
\s1 Bɛ̀ kɑ̀ɑmmɛ̀ Isidɑyɛɛribɛ kucɛ mɛdɛ́rímɛ̀
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi nɛ̀ ikuɔ́ nìùtì Edeɑsɑɑ Anɔɔ birɛ kɛ dɔ̀: 
\v 2 Kɑɑnnɛ̀ Isidɑyɛɛribɛ botí kumɔu bɛ cɛ̃́ĩ dò ndòmmɛ̀ kɛ́ketɛ́nɛ̀ bɛ̀ɛ̀ mɔ̀kɛ yɛbie nsípísìdɛ́ kɛ́ndeètìnko, bɛ̀ɛ̀ dò nkɛ́nɑ kɛ́kɔtɛ mudoò.
\p
\v 3-4 Mɔyiisi nɛ̀ Edeɑsɑɑ ikuɔ́ nìùtì kɛ̀ bɛ̀ɛ dɔɔ̀ ti Yiɛ̀ nKuyie mbɛ̀ nɑ̀kɛ́ tì kɛ́kɑɑ mbɛ̀ɛ̀ mɔ̀kɛ yɛbie nsipísìdɛ́ kɛ́ntɔ kɛ deètìnko. Bɛ̀ do bɛ̀ kɑ̀ɑ mMɔɑbu biriku miɛkɛ nkɛ kukó nSuditɛ̃ɛ̃ tɑkɛ́, Sedikoo ɛì ììkɛ̀.
\b
\p Ntɛ Isidɑyɛɛribɛ bɛ̀ɛ̀ do yɛ̀ Esibiti kó dihɛì: 
\v 5-6 Sɑkɔbu bɛ̀ do yu wè kɛ dɔ̀ Isidɑyɛɛri, o kóo po Dubɛnni weè pɛitɛ́ Enɔki nɛ̀ Pɑduu nɛ̀ Ɛtisidonni nɛ̀ Kɑdimii. Kɛ̀ Anɔkii piɛ́ Anɔkiibɛ. Kɛ̀ Pɑduu piɛ́ Pɑduyiibɛ. Kɛ̀ Ɛtisidonni piɛ́ Ɛtisidonniibɛ. Kɛ̀ Kɑdimii piɛ́ Kɑdimiibɛ. 
\v 7 Dubɛnni kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnɑ̀ɑ̀ nɛ̀ sikɔupísìtɑ̃ɑ̃ti nɛ̀ sikɔusìyiekɛ̀ nɛ̀ sipísìtɑ̃ɑ̃ti (43730).
\p
\v 8 Pɑduu birɛ mɑrɛ̀ do tú Ediɑbu. 
\v 9 Kɛ̀ Ediɑbu kó ibí ntú Nɛmmuyɛɛdi nɛ̀ Dɑtɑnni nɛ̀ Abidɑmmu. Dɑtɑnni nɛ̀ Abidɑmmu bɛɛ̀ do niitɛ́ Kodee kó kutɔ̃nkù kɔbɛ bɛ̀ɛ̀ do yetɛ bɛ Yiɛ̀ nKuyie nɛ̀ Mɔyiisi nɛ̀ Anɔɔ bɛ kpɛti. 
\v 10 Kɛ̀ kɛtenkɛ̀ɛ ɑɑtɛ kɛ́ bɛ̀ mɑɑ́nko, bɛmbɛ nɛ̀ Kodee, kɛ̀ muhɑ̃ɑ̃́ ncɔ́útɛ́ bɛnìtìbɛ̀ sikɔusìdɛ́ nɛ̀ sipísìnùmmù (250), kɛ̀ dɛ̀ bo ndò ndibɛnkɛ̀rì. 
\v 11 Kɛ̀ Kodee kó ibí iì nkpɑɑ́, inyi do í ku dɛ yiè.
\b
\p
\v 12-13 Ntɛ Simmɛɔ̃ɔ̃ nɑɑ̀mùnkù, weè do pɛitɛ́ Yemmuyɛɛdi nɛ̀ Yɑminni nɛ̀ Yɑkinni nɛ̀ Sedɑɑ nɛ̀ Sɑudi. Kòo birɛ Yemmuyɛɛdii piɛ́ Yemmuyɛɛdiibɛ, kɛ̀ Yɑminnii piɛ́ Yɑminniibɛ, kɛ̀ Yɑkinnii piɛ́ Yɑkinniibɛ, kɛ̀ Sedɑɑ piɛ́ Sedɑɑbɛ, kɛ̀ Sɑudii piɛ́ Sɑudiibɛ. 
\v 14 Simmɛɔ̃ɔ̃ kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìdɛ́ nɛ̀ sikɔupísìdɛ́ nɛ̀ sikɔusìdɛ́ (22200).
\b
\p
\v 15-17 Ntɛ Kɑdi kó kunɑɑ̀mùnkù, weè do pɛitɛ́ Sefonni nɛ̀ Akii nɛ̀ Suni nɛ̀ Osini nɛ̀ Ɛdi nɛ̀ Adodi nɛ̀ Adedii. Kòo birɛ Sefonnii piɛ́ Sefonniibɛ, kɛ̀ Akii piɛ́ Akiibɛ, kɛ̀ Sunni piɛ́ Suniibɛ kɛ̀ Osini piɛ́ Osiniibɛ, kɛ̀ Ɛdii piɛ́ Ɛdiibɛ, kɛ̀ Adodii piɛ́ Adodiibɛ. Kɛ̀ Adedii piɛ́ Adediibɛ. 
\v 18 Kɑdi kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnɑ̀ɑ̀ nɛ̀ sikɔusìnùmmù (40500).
\b
\p
\v 19 Sudɑɑ weè do pɛitɛ́ Ɛɛ nɛ̀ Onɑnni kɛ̀ bɛ̀ɛ kú Kɑnnɑhɑ̃ɑ̃ kó dihɛì. 
\v 20 Kòo yíɛ́ kɛ́pɛitɛ́ Sedɑɑ nɛ̀ Pɛdɛsi nɛ̀ Seedɑ. Kɛ̀ Sedɑɑ piɛ́ Sedɑɑbɛ, kɛ̀ Pɛdɛsii piɛ́ Pɛdɛsiibɛ, kɛ̀ Seedɑɑ piɛ́ Seedɑɑbɛ. 
\v 21 Pɛdɛsi weè do yìɛ́ kɛ́pɛitɛ́ Ɛtisidonni nɛ̀ Amudi. Kɛ̀ Ɛtisidonni piɛ́ Ɛtisidonniibɛ, kɛ Amudii piɛ́ Amudiibɛ. 
\v 22 Sudɑɑ kó tinɑɑ̀mùntì nti mɛmmɛ, kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìyiekɛ̀ nɛ̀ sìkɔupísìkuɔ̀ nɛ̀ sikɔusìnùmmù (76500).
\b
\p
\v 23-24 Isɑkɑɑ weè do pɛitɛ́ Todɑ nɛ̀ Puwɑ nɛ̀ Yɑsubu nɛ̀ Simmudonni. Kɛ̀ Todɑɑ piɛ́ Todɑɑbɛ kɛ̀ Puwɑ piɛ́ Puwɑɑbɛ, kɛ̀ Yɑsubuu piɛ́ Yɑsubuubɛ, kɛ̀ Simmudonni piɛ́ Simmudonniibɛ. 
\v 25 Isɑkɑɑ kó tinɑɑ̀mùntì nti mɛmmɛ, kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìkuɔ̀ nɛ̀ sikɔupísìnɑ̀ɑ̀ nɛ̀ sikɔusìtɑ̃ɑ̃ti (64300).
\b
\p
\v 26 Sɑbunɔɔ weè do pɛitɛ́ Sedɛdi nɛ̀ Edonni nɛ̀ Yɑdɛɛdi. Kɛ̀ Sedɛdi piɛ́ Sedɛdiibɛ, kɛ̀ Edonni piɛ́ Edonniibɛ, kɛ̀ Yɑdɛɛdi piɛ́ Yɑdɛɛdiibɛ. 
\v 27 Sɑbunɔɔ kó tinɑɑ̀mùntì nti mɛmmɛ, kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìkuɔ̀ nɛ̀ sikɔusìnùmmù (60500).
\b
\p
\v 28 Sosɛfu weè do pɛitɛ́ Mɑnɑnsee nɛ̀ Efɑdɑimmu. 
\v 29 Kɛ̀ Mɑnɑnsee pɛitɛ́ Mɑkiidi, kɛ̀ Mɑkidii piɛ́ Mɑkidiibɛ kɛ yíɛ́ kɛ́pɛitɛ́ Kɑdɑɑdi kòo piɛ́ Kɑdɑɑdiibɛ, 
\v 30 kɛ́yíɛ́ kɛ́pɛitɛ́ Yesɛɛ nɛ̀ Edɛki. Kɛ̀ Yesɛɛ piɛ́ Yesɛɛbɛ, kɛ̀ Edɛkii piɛ́ Edɛkiibɛ. 
\v 31 Asidiyɛɛdi weè piɛ́ Asidiyɛɛdibɛ, kɛ̀ Sisɛmmu piɛ́ Sisɛmmubɛ, 
\v 32 Kɛ̀ Semidɑɑ piɛ́ Semidɑɑbɛ, kɛ̀ Efɛɛ piɛ́ Efɛɛbɛ. 
\v 33 Efɛɛ birɛ Sedofɑdi í mpɛitɛ́ initidɑbí kɛ́piɛ́ initipobí mɑ́ɑ̀. Ntɛ i yètɛ̀: Mɑdɑ nɛ̀ Nɔɑ nɛ̀ Okudɑ nɛ̀ Midikɑ nɛ̀ Tidisɑɑ. 
\v 34 Mɑnɑnsee kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnùmmù nɛ̀ sikɔupísìdɛ́ nɛ̀ sikɔusìyiekɛ̀ (52700).
\b
\p
\v 35 Kɛ̀ Efɑdɑimmuu pɛitɛ́ Sutedɑɑ nɛ̀ Bekɛɛ nɛ̀ Tɑɑnni. Kɛ̀ Sutedɑɑ piɛ́ Sutedɑɑbɛ, kɛ̀ Bekɛɛ piɛ́ Bekɛɛbɛ, kɛ̀ Tɑɑnnii piɛ́ Tɑɑnniibɛ, 
\v 36 Kɛ̀ Sutedɑɑ yíɛ́ kɛ́pɛitɛ́ Edɑnni kòo piɛ́ Edɑnniibɛ. 
\v 37 Efɑdɑimmu kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìtɑ̃ɑ̃ti nɛ̀ sikɔupísìdɛ́ nɛ̀ sikɔusìnùmmù (32500). Sosɛfu bí kó tinɑɑ̀mùntì nti mɛmmɛ.
\b
\p
\v 38-39 Kɛ̀ Bɛnsɑmɛɛ pɛitɛ́ Bedɑɑ nɛ̀ Asebɛɛdi nɛ̀ Ayidɑmmu nɛ̀ Sufɑmmu nɛ̀ Ufɑmmu. Kɛ̀ Bedɑɑ piɛ́ Bedɑɑbɛ, kɛ̀ Asebɛɛdi piɛ́ Asebɛɛdiibɛ, kɛ̀ Ayidɑmmuu piɛ́ Ayidɑmmuubɛ, kɛ̀ Sufɑmmuu piɛ́ Sufɑmmuubɛ, kɛ̀ Ufɑmmu piɛ́ Ufɑmmuubɛ. 
\v 40 Kɛ̀ Bedɑɑ yíɛ́ kɛ́pɛitɛ́ Adidi nɛ̀ Nɑmɑnni. Kɛ̀ Adidi piɛ́ Adidiibɛ, kɛ̀ Nɑmɑnni piɛ́ Nɑmɑnniibɛ. 
\v 41 Bɛnsɑmɛɛ kó tinɑɑ̀mùntì nti mɛmmɛ, kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnɑ̀ɑ̀ nɛ̀ sikɔupísìnùmmù nɛ̀ sikɔusìkuɔ̀ (45600).
\b
\p
\v 42-43 Dɑnni kó kunɑɑ̀mùnkù do bo kùmɑ́ɑ̀ ndi, kuù do tú Suɑmiibɛ Suɑmmuu kó ibí, kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìkuɔ̀ nɛ̀ sikɔupísìnɑ̀ɑ̀ nɛ̀ sikɔusìnɑ̀ɑ̀ (64400).
\b
\p
\v 44 Kɛ̀ Asɛɛ pɛitɛ́ Imunɑ nɛ̀ Isefii nɛ̀ Bediyɑ. Kɛ̀ Imunɑ piɛ́ Imunɑɑbɛ, kɛ̀ Isifii piɛ́ Isifiibɛ, kɛ̀ Bediyɑɑ piɛ́ Bediyɑɑbɛ. 
\v 45 Kɛ̀ Bediyɑɑ yíɛ́ kɛ́pɛitɛ́ Ebɛɛ nɛ̀ Mɑdikiyɛɛdi. Kɛ̀ Ebɛɛ piɛ́ Ebɛɛbɛ, kɛ̀ Mɑdikiyɛɛdi piɛ́ Mɑdikiyɛɛdibɛ. 
\v 46 Kɛ̀ Asɛɛ pɛitɛ́ dɛnitipobirɛ kɛ́ dɛ̀ yu kɛ dɔ̀: Sedɑki. 
\v 47 Asɛɛ kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnùmmù nɛ̀ sikɔupísìtɑ̃ɑ̃ti nɛ̀ sikɔusìnɑ̀ɑ̀ (53400).
\b
\p
\v 48-49 Kɛ̀ Nɛfutɑdii pɛitɛ́ Yɑseyɛɛdi nɛ̀ Kunni nɛ̀ Yesɛɛ nɛ̀ Sidɛmmu. Kɛ̀ Yɑseyɛɛdii piɛ́ Yɑseyɛɛdiibɛ, kɛ̀ Kunnii piɛ́ Kunniibɛ, kɛ̀ Yesɛɛ piɛ́ Yesɛɛbɛ, kɛ̀ Sidɛmmuu piɛ́ Sidɛmmuubɛ. 
\v 50 Nɛfutɑdii kó tinɑɑ̀mùntì nti mɛmmɛ kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupípísìnɑ̀ɑ̀ nɛ̀ sikɔupísìnùmmù nɛ̀ sikɔusìnɑ̀ɑ̀ (45400).
\b
\p
\v 51 Isidɑyɛɛribɛ bɛmɔu kɛ̀ bɛ̀ɛ bɛ̀ kɑ̀ɑ nkɛ̀ bɛ̀ mbo sikɔupíkɔusìkuɔ̀ nɛ̀ tɛkɔupíítɛ̀ nɛ̀ sikɔusìyiekɛ̀ nɛ̀ sipísìtɑ̃ɑ̃ti (601730).
\s1 Kuyie mbɛ̀ nɑ̀kɛ́mɛ̀ bɛ̀ bo totímɛ̀ kɛtenkɛ̀
\p
\v 52 Kɛ̀ ti Yiɛ̀ nKuyie nsɔɔtɛ́ kɛ́bɛ́innɛ̀ Mɔyiisi kɛ dɔ̀: 
\v 53 Tiì nɑɑ̀mùntì nti di yóó totímɛ̀ kɛtenkɛ̀ kɛ́ntũ mbɛ̀ sũ kɛ dò ndòmmɛ̀. 
\v 54 Kɛ̀ bɛ̀ɛ̀ kó kunɑɑ̀mùnkù dɛu bɛ kó kɛtenkɛ̀ ndɛu, kɛ̀ bɛ̀ɛ̀ kɔku kɛ̃ńnì bɛ kɔkɛ nkɛ̃ńnì, di bɛ̀ totí bɑ́ wè o nɑɑ̀mùnkù mɑ̀mɛ̀. 
\v 55 Di yóó tɑ̃ɑ̃́ tɛ́tɛ́ nwe kɛ́totí dɛ kó kɛtenkɛ̀, di níí yóó duɔ́ mbɑ́ wè o kó kɛtenkɛ̀ dí kɑ̀ɑ nho nɑɑ̀mùnkù miɛkɛ bɛnìtìbɛ̀ kɛ̀ bɛ̀ mɑ̀mɛ̀ mmɛ. 
\v 56 Tɛ́tɛ́ weè níí yóó bɛnkɛ di yóó duɔ́ nkùù nɑɑ̀mùnkù dɛu kɛtenkɛ̀ kɛ̀ kɛ̀ mmɑmɛ̀, kɛ́duɔ́ nkùù kɛ̃ńnì kɛ̀ kɛ̀ mmɑmɛ̀.
\s1 Bɛ̀ kɑ̀ɑmmɛ̀ Defii kó kuwuɔ nkɔbɛ mɛdɛ́rímɛ̀
\p
\v 57 Kɛ̀ bɛ̀ɛ kɑɑ nDefii kó kuwuɔ, ntɛ bɛ̀ do kù kɑ̀ɑ nkɛ̀ kù ndò ndòmmɛ̀. Kɛ̀ Kɛrisonni kó kunɑɑ̀mùnkù ntú Kɛrisonniibɛ, kɛ̀ Keɑti kɔku ntú Keɑtiibɛ, kɛ̀ Mɛdɑdi kɔku ntú Mɛdɑdiibɛ. 
\v 58 Defii kó tinɑɑ̀mùntì tɛtì do tú: Dibiniibɛ nɛ̀ Ebedoniibɛ nɛ̀ Mɑdiibɛ nɛ̀ Musiibɛ nɛ̀ Kodeyiibɛ. Keɑti weè do pɛitɛ́ Amudɑmu. 
\v 59 Kɛ̀ Amudɑmuu puokɛ Defii botí kóo sɑpɑ̀ɑ̀ mmɔù, kòo yètìrì tu Yokebɛti bɛ̀ do pɛitɛ́ wè Esibiti kòò ò pɛitɛ́nɛ̀ Anɔɔ nɛ̀ Mɔyiisi nɛ̀ bɛ tɑ̃ũ̀ Midiyɑmmu. 
\v 60 Kɛ̀ Anɔɔ pɛitɛ́ Nɑdɑbu nɛ̀ Abiu nɛ̀ Edeɑsɑɑ nɛ̀ Idɑmɑɑ. 
\v 61 Nɑdɑbu nɛ̀ Abiu kɛ̀ bɛ̀ɛ tùɔ nti Yiɛ̀ nKuyie ntihúúntì nɛ̀ muhɑ̃ɑ̃́ nsɔ̃́ntíkɛ kɔ̃mu kɛ́kú. 
\v 62 Kɛ̀ bɛ̀ɛ kɑɑ mbɛnitidɑɑbɛ̀ kɛ́túótɛ́ ibí ìì mɔ̀kɛ otɑ̃̀nkù òmɑ́ɑ̀ kɛ́ntɔ kɛ deètìnko kɛ̀ bɛ̀ ḿbo sikɔupípísìdɛ́ nɛ̀ sikɔupísìtɑ̃ɑ̃ti (23000). Bɛ̀ do í bɛ̀ wɛ̃nnɛ́nɛ̀ Isidɑyɛɛribɛ sɔmbɛ kɛ́kɑɑ, nkɛ yɛ̃́ bɛ̀ do í mɔkɛmɛ̀ kɛtenkɛ̀ Isidɑyɛɛribɛ miɛkɛ. 
\v 63 Mɔyiisi nɛ̀ ikuɔ́ nìùtì Edeɑsɑɑ kɛ̀ bɛ̀ɛ bɛ̀ kɑ̀ɑ Mɔɑbu biriku Suditɛ̃ɛ̃ kó ntɑkɛ́ Sedikoo ɛì ììkɛ̀. 
\v 64 Mɔyiisi nɛ̀ ikuɔ́ nìùtì Anɔɔ bɛ̀ do kɑ̀ɑ mbɛ̀ Sinɑii kó dikpɑ́ɑ̀ miɛkɛ bɛ kóò mɔù tɛ̃́nkɛ do í kpɑɑ́. 
\v 65 Ti Yiɛ̀ nKuyie nkuù do bɛ́i nkɛ dɔ̀: Bɛmɔu bɛ̀ bo kú dikpɑ́ɑ̀ miɛkɛ, kɛ̀ bɛ̀ mɛ̀nkɛ kú bɑ́ òmɔù í nsùɔ́ mbɑ́ òmɑ́ɑ̀, kɛ̀ dɛ̀ í tú Yefundee birɛ Kɑdɛbu nɛ̀ Nunni birɛ Sosuwee.
\c 27
\s1 Bɛnitipòbɛ̀ dò nkɛ́nte dɛ̀
\p
\v 1 Sosɛfu birɛ Mɑnɑnsee kó kunɑɑ̀mùnkù kou mɔù bɛ̀ tu wè Mɑkiidi, weè do pɛitɛ́ Kɑdɑɑdi kòo mɛ ntó pɛitɛ́ Efɛɛ kɛ̀ Efɛɛ pɛitɛ́ Sedofɑdi kòo piɛ́ bɛsɑpɑ̀mbɛ̀ mɑ́ɑ̀ bɛ̀ɛ̀ yètɛ̀ tu: Mɑdɑ nɛ̀ Nɔɑ nɛ̀ Okudɑ nɛ̀ Midikɑ nɛ̀ Tidisɑɑ. 
\v 2 Kɛ̀ bɛ̀ɛ kɔtɛ kɛ́yɑ̀ Mɔyiisi nɛ̀ ikuɔ́ nìùtì Edeɑsɑɑ nɛ̀ Isidɑyɛɛribɛ kó bɛkótíbɛ̀ nɛ̀ Isidɑyɛɛribɛ bɛmɔu mɛtɑummɛ̀ tou borɛ̀, kɛ́ bɛ̀ nɑ̀kɛ́ kɛ dɔ̀: 
\v 3 Ti cicɛ ku dikpɑ́ɑ̀ miɛkɛ nkɛ, ò mɛ ndo í kɔkɛ́ Kodee kó kutɔ̃nkù miɛkɛ bɛ̀ɛ̀ do yetɛ ti Yiɛ̀ nKuyie nkpɛti. Ò ku omɑ́ɑ̀ kó mɛyɛi nkó mukṹṹ mmu ò mɛ nyí mɔkɛ dɛnitidɑbirɛ. 
\v 4 Ti cicɛ yètìrì bo kpɑ́nnɛ́ o tebìí nɑɑ̀mùnkù miɛkɛ ò í mɔkɛ mɛ̀ɛ̀ kpɛ́í nhonitidɔ̀ùɑ̀? Dí ti duɔ́ nti kó kɛtenkɛ̀ ti cicɛ tebìí kɔkɛ borɛ̀.
\p
\v 5 Kɛ̀ Mɔyiisii beé nKuyie, 
\v 6 Kɛ̀ kùu ò tɛ̃̀ńnɛ́ kɛ dɔ̀: 
\v 7 Sedofɑdi kó bɛsɑpɑ̀mbɛ̀ nɑɑtimu duɔ́ mbɛ bɛ kó kɛtenkɛ̀, bɛ cicɛ tebìí kɔkɛ borɛ̀, bɛɛ̀ yó nte bɛ cicɛ kó kɛtenkɛ̀. 
\v 8 Kɑ̀ɑ nɑ́kɛ́ Isidɑyɛɛribɛ kɛ tú: Kòo nìtì níí ku kɛ í mɔkɛ dɛnitidɑbirɛ, kòò mɔ̀kɛ dɛnitipobirɛ dɛɛ̀ yóó tiekɛ o kpɛrɛ. 
\v 9 Kòò mɛ nyí mɔkɛ dɛnitipobirɛ o tebìí tiekɛ o kpɛrɛ. 
\v 10 Kòò í mɔkɛ o tebìí o cicɛ kó sitebìí tiekɛ o kpɛrɛ. 
\v 11 Kòo cicɛ mɛ nyí mɔkɛ o tebìí o nɑɑ̀mùnkù kou wèè ò tɔ̀kɛ́nɛ̀ wèe dɛ̀ tiekɛ. Isidɑyɛɛribɛ kpɛrɛ bɛ̀ mɔ̀kɛ dɛ kó ikuɔ́ yó nni nyi, ti Yiɛ̀ nKuyie ndo mɛ nnɑ̀kɛ́ Mɔyiisi.
\s1 Sosuwee cɔutɛ́mɛ̀ Mɔyiisi mutɔ̃mmú
\p
\v 12 Kɛ̀ ti Yiɛ̀ nKuyie nsɔɔtɛ́ kɛ́nɑ́kɛ́ Mɔyiisi kɛ dɔ̀: Dekɛ ditɑ̃rì Abɑdimmu ĩ́nkɛ̀, kɛ wéntɛ́ kɛ́yɑ̀ dihɛì n duɔ́ ndì Isidɑyɛɛribɛ. 
\v 13 Kɑ̀ɑ di yɑ̀ kɛ dèè ɑ kũnti ɑ yɛmbɛ̀ borɛ̀ ndɛ, ɑ kóo kótì Anɔɔ kɔ̃mɛ. 
\v 14 Kɛ yɛ̃́ di do í yiemmɛ̀ kɛ tũ̀nnɛ n nùù Sinni kó dikpɑ́ɑ̀ miɛkɛ. Isidɑyɛɛribɛ do tùùtɛ dìì mɔ̀nnì kɛ́ nni nkpɑnnɛ̀, kɛ̀ di ndò nkɛ bɛ̀ duɔ́ mmɛniɛ nkɛ̀ bɛ̀ɛ yɑ̀ n cɑ̃́ɑ̃́mmɛ̀ kɛ kpeńnì, di mɛ nyí mɛ̀ dɔ̀ɔ̀.
\p Kù do buɔ̀ dikpɑ̀nnì kó mɛniɛ mmɛ bɛ̀ do bo dìì mɔ̀nnì Kɑdɛɛsi Sinni kó dikpɑ́ɑ̀ miɛkɛ.
\p
\v 15 Kɛ̀ Mɔyiisii nɑ́kɛ́ ti Yiɛ̀ nKuyie nkɛ dɔ̀: 
\v 16 Ti Yiɛ̀ nKuyie nfɔ̃́ nwèè duɔ̀ ndɛnɛnnɛ̀ dɛmɔu mufòmmu, tɑ̃ɑ̃tɛ́ onìtì wèè yó mbɑkɛ́ ɑ nìtìbɛ̀. 
\v 17 Onìtì wèè yó mbɛ̀ ni dɛmɔu miɛkɛ, wèè níí yóó bɛ̀ dènnɛ kɛ́ bɛ̀ tɑnnɛ́, kɛ̀ dɛ̀ɛ yie nkɛ̀ Isidɑyɛɛribɛɛ bɑ́ ndò ntipìètì tìì kpɑ ocɛ̃nti.
\p
\v 18 Kɛ̀ ti Yiɛ̀ Kuyie nnɑ̀kɛ́ Mɔyiisi kɛ dɔ̀: Túótɛ́ Nunni birɛ Sosuwee, n kó Muyɑɑ́ mbonɛ̀ wè, kóò nɔ̀ɔ́ nsinɔu. 
\v 19 Kóò bɛnkɛ ikuɔ́ nìùtì Edeɑsɑɑ nɛ̀ Isidɑyɛɛribɛ bɛmɔu kòo dɑ cɔutɛ́ mutɔ̃mmú. 
\v 20 Kɑ̀ɑ ò yɑ̀ɑ̀tɛ ɑ kó muwɛ̃rímú kɛ̀ dɛ̀ɛ yie nkɛ̀ Isidɑyɛɛribɛ bɛmɔu nyíé nho kpɛti. 
\v 21 Wenwe o mɔ́mmuɔ ò níí yóó kɔtɛ ikuɔ́ nìùtì Edeɑsɑɑ borɛ̀ ndɛ kòo m beé nnɛ̀ ikuɔ́ nɛntì bɛ̀ tu tì udimmu. Sosuwee o mɔ́mmuɔ nnɛ̀ Isidɑyɛɛribɛ sɔmbɛ bɛ̀ níí yó ntũ nweè kó dinùù. Kòò yĩ: Yɛ̀nnɛ̀! Bɛ̀ɛ yɛ̀. Kòò yĩ: Tɑnnɛ̀! Bɛ̀ɛ tɑ.
\p
\v 22 Kɛ̀ Mɔyiisii dɔɔ̀ ti Yiɛ̀ nKuyie nhò nɑ̀kɛ́ tì kɛ́kɔtɛnɛ̀ Sosuwee ikuɔ́ nìùtì Edeɑsɑɑ borɛ̀ Isidɑyɛɛribɛ bɛmɔu borɛ̀. 
\v 23 Kóò nɔ̀ɔ́ nsinɔu, kóò duɔ́ mmutɔ̃mmú ti Yiɛ̀ nKuyie ndo ò nɑ̀kɛ́ kɛ yɛ̃ ndɛ̀ ndòmmɛ̀.
\c 28
\s1 Kuyie mbɛ̀ nɑ̀kɛ́mɛ̀ bɛ̀ bo nkù feumɛ̀ iwũɔ̃
\s1 DÈÈNNÌ: Bɛ̀ bo nkù feu ì yɛwe yɛmɔu
\p
\v 1 Kɛ̀ ti Yiɛ̀ nKuyie mbɛ́innɛ̀ Mɔyiisi kɛ dɔ̀: 
\v 2 Nɑ́kɛ́ Isidɑyɛɛribɛ kɛ tú n yɛ̃ nkɛ̀ dɛ̀ níí tùɔ̀kɛ bɛ̀ bo n fíé dɛ̀ iwũɔ̃ kɛ́tuɔ bɛ̀ ndɑkɛ kɛ ì nni nfíé kɛ́tuɔ dipɑ̃nnì ndi dìì kó kufɔ̃ɔ̃ku n nɑɑti.
\p
\v 3 Bɑ́ dìì yiè bɛ̀ níí n féútɛ́ dipedɑbii dìì mɔ̀kɛ dibenni dìmɑ́ɑ̀ kɛ kpɑ kuyɛ̀nkù. Bɑ́ dìì yiè yɛ̀dɛ́ɛ̀. 
\v 4 Di níí n féútɛ́ dipedɑpɑ̀nnì dìmɑ́ɑ̀ dikṹnweńnì, didɛ́rì kuyuoku dihuri. 
\v 5 Kɛ̀ dí dì wɛ̃nnɛ́nɛ̀ muyuo nsɑ̀ɑ̀mù cìdóò bɛ̀tɑ̃ɑ̃ti kɛ́ mu kɔɔrɛnɛ̀ mɛkɔ̀sɑ̀ɑ̀mɛ̀ dítìrì omɑ́ɑ̀ nɛ̀ dikéè kɛ́ɑ̃ntɛ. 
\v 6 Di yó nyi nni nfeumu di do ì nni nfeumɛ̀ Sinɑii tɑ̃rì nɛ̀ dimɔ̀nnì kɛ tuɔ̀, dipɑ̃nnì ndi dìì kó kufɔ̃ɔ̃ku n nɑɑti. 
\v 7 Dikṹnweńnì kó dipedɑpɑ̀nnì níí yó nnɛínɛ̀ mɛnɑɑ̀ mmɛ dítìrì nɛ̀ dikéè. Mɛtɑummɛ̀ tou miɛkɛ nkɛ di níí yóó mɛ nni ncóúmmɛ̀. 
\v 8 Di níí féútɛ́ dipedɑpɑ̀nnì tɛrì kuyuoku dihuri, kɛ yíɛ́nɛ̀ yɛpɑ̃rɛ̀ di bɑɑ do m pɑ̃ɑ̃ nyɛ̀ dikṹnweńnì kó dipedɑpɑ̀nnì ĩ́nkɛ̀, kɛ di nni ntuɔ, dipɑ̃nnì ndi dìì kó kufɔ̃ɔ̃ku n nɑɑti.
\s1 DƐ́Ɛ́NNÍ: Bɛ̀ bo nfeu ì tɛom̀pùtɛ̀ yiè
\p
\v 9 Tɛom̀pùtɛ̀ yiè di níí n féútɛ́ yɛpedɑbɛ yɛ̀dɛ́ɛ̀, yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù, kɛ́yíɛ́nɛ̀ muyuo nsɑ̀ɑ̀mù cìdóò bɛ̀kuɔ̀, kɛ mù ɑ̃̀ntɛnɛ̀ mɛkɔsɑ̀ɑ̀mɛ̀, kɛ yíɛ́nɛ̀ mɛnɑɑ̀. 
\v 10 Bɑ́ tɛ̀ɛ̀ om̀pùtɛ̀ yiè di níí yóó yíɛ́mu dɛ kó iwũɔ̃ di do n feu ì yɛwe yɛmɔu i ĩ́nkɛ̀ nɛ̀ dɛ kó mɛnɑɑ̀.
\s1 TÃÃTI: Bɛ̀ bo nfeu ì otɑ̃̀nkù yiè ketirì
\p
\v 11 Otɑ̃̀nkù yiè ketirì di níí n féútɛ́ yɛnɑɑdɑkɛ̀ yɛ̀dɛ́ɛ̀ kɛ́tuɔ, nnɛ̀ dipedɑɑ̀ dìmɑ́ɑ̀ nɛ̀ yɛpedɑpɑ̀ɑ̀ yɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 12 Kɛ níí pɑ̃nɛ̀ bɑ́ fɛ̀ɛ̀ ɔ̃̀fɛ̀ ĩ́nkɛ̀ muyuo nsɑ̀ɑ̀mù mùù ɑ̃̀ntɛnnɛ̀ mɛkùɔ̀, ncìdóò bɛ̀wɛi bɑ́ dìì nɑɑdɑɑ̀ ĩ́nkɛ̀, cìdóò bɛ̀kuɔ̀ bɑ́ dìì pedɑɑ̀ ĩ́nkɛ̀. 
\v 13 Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀, kɛ̀ dí dɛ̀ tùɔ, yɛpɑ̃rɛ̀ nyɛ yɛ̀ɛ̀ kó kufɔ̃ɔ̃ku n nɑɑti. 
\v 14 Mɛnɑɑ̀ ndítìrì bɛ̀tɑ̃ɑ̃ti bɛ̀tɑ̃ɑ̃ti bɑ́ dìì nɑɑdɑɑ̀ ĩ́nkɛ̀, dítìrì bɛ̀dɛ́ bɑ́ dìì pedɑɑ̀ ĩ́nkɛ̀, dítìrì òmɑ́ɑ̀ òmɑ́ɑ̀ nɛ̀ dikéè bɑ́ dìì pedɑpɑ̀nnì ĩ́nkɛ̀. Bɑ́ wèè tɑ̃̀nkù kó diyiè ketirì di níí yó n fíé ìì wũɔ̃ nyi nɛ̀ dɛ kó yɛpɑ̃rɛ̀. 
\v 15 Di níí n féútɛ́ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ìì wũɔ̃ kɛ tuɔ̀ nyɛwe yɛmɔu nɛ̀ dɛ kó mɛnɑɑ̀ di m pɑ̃ɑ̃ mmɛ̀.
\s1 NÀÀ: Bɛ̀ bo nfeu ì diyentɛ́bɑnni yiè
\p
\v 16 Dibenni tɑ̃̀nkù ketiwè diyiè tɛpíítɛ̀ nɛ̀ dinɑɑnnì di níí bɑɑ́ ndiyentɛ́bɑnni kɛ́dɛ́úkùnnɛ mí ndi Yiɛ̀ nKuyie n yètìrì. 
\v 17 Diyiè tɛpíítɛ̀ nɛ̀ dinummurì yiè ndi, dibɑnni yóó ketɛ́mɛ̀ kɛ̀ di ncɑ́ɑ́ mpɛ̃́ɛ̃̀ wèè í kɔɔrɛnɛ̀ mutie mùù muuti kɛ dɔ̀ yɛwe yɛ̀yiekɛ̀. 
\v 18 Dibɑnni ketírí dìì yiè di tíí nkɛ́sɑ̃ntɛ mí ndi Yiɛ̀ nKuyie di bɑ́ɑ́ pĩ́ mmutɔ̃mmú mɑmù dɛ yiè. 
\v 19 Dɛ yiè di níí n féútɛ́ i nwũɔ̃ kɛ́tuɔ: Yɛnɑɑdɑkɛ̀ yɛ̀dɛ́ɛ̀, dipedɑɑ̀ dìmɑ́ɑ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 20 Di níí pɑ̃nɛ̀ bɑ́ fɛ̀ɛ̀ ɔ̃̀fɛ̀ yuu ĩ́nkɛ̀ muyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi bɑ́ dìì nɑɑdɑɑ̀ ĩ́nkɛ̀, cìdóò bɛ̀kuɔ̀ bɑ́ dìì pedɑɑ̀ ĩ́nkɛ̀, 
\v 21 cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀. 
\v 22 Kɛ̀ di n féútɛ́ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ̀ bɛ̀ di dɔ̀ɔ̀ mɛyɛi ncĩ́ɛ̃́mmɛ̀ kó ikuɔ́. 
\v 23 Di níí yó n fíé ìì wũɔ̃ nyi kɛ́mbúútí di n feu ì yɛwe yɛmɔu kɛ tuɔ̀. 
\v 24 Di yó mmɛ nhɔ̃ nkɛ dɔ̀ yɛwe yɛ̀yiekɛ̀, mudiì mmu di níí yó m pɑ̃ mù kɛ́tuɔ, mùù kó kufɔ̃ɔ̃ku n nɑɑti. Dɛ kó dipɑ̃nnì cɑ̃̀ɑ̃́nnɛ̀ mu di n feu ì yɛwe yɛmɔu kɛ tuɔ̀ nnɛ̀ dɛ kó mɛnɑɑ̀. 
\v 25 Diyiè yiénnì yiè di tíí nkɛ́sɑ̃ntɛ mí ndi Yiɛ̀ nKuyie, di bɑ́ɑ́ pĩ́ mmutɔ̃mmú mɑmù dɛ yiè.
\s1 NÙMMÙ: Bɛ̀ bo nfeu ì dididɛ̀ìbɑnni yiè
\p
\v 26 Dididɛ̀ìbɑnni yiè, di yó m pɑ̃ dìì yiè tidipɑ̀ntì, dɛ yiè di tíí nkɛ́ n sɑ̃ntɛ, di bɑ́ɑ́ pĩ́ mmutɔ̃mmú mɑmù. 
\v 27 Dɛ yiè di n féútɛ́ yɛnɑɑdɑkɛ̀ yɛ̀dɛ́ɛ̀ nɛ̀ dipedɑɑ̀ nɛ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ́ dɛ̀ tùɔ, dipɑ̃nnì ndi dìì kó kufɔ̃ɔ̃ku n nɑɑti. 
\v 28 Kɛ̀ di wɑɑ́ mbɑ́ fɛ̀ɛ̀ ɔ̃̀fɛ̀ yuu ĩ́nkɛ̀ muyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi bɑ́ dìì nɑɑdɑɑ̀ ĩ́nkɛ̀, cìdóò bɛ̀kuɔ̀ bɑ́ dìì pedɑɑ̀ ĩ́nkɛ̀. 
\v 29 Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀. 
\v 30 Kɛ̀ di kuɔnɛ̀ dibɔdɑɑ̀ kɛ̀ bɛ̀ di dɔɔ̀ mɛyɛi ncĩ́ɛ̃́mmɛ̀ kó ikuɔ́. 
\v 31 Di yó n fíé ìì wũɔ̃ nyi kɛ nɛ́ mbúútí di ɔ̃ n fíé ì nɛ̀ tidiitì kó yɛpɑ̃rɛ̀. Dɛ kó iwũɔ̃ yó ntú ìì kpɑ ìnyi kuyɛ̀nkù kɛ́yíɛ́nɛ̀ dɛ kó mɛnɑɑ̀.
\c 29
\s1 KUƆ̀: Bɛ̀ bo nfeu ì disɑ̃nni kó dibɑnni yiè
\p
\v 1 Dibenni tɑ̃̀nkù yiénwè kó diyiè ketirì di níí tíí nkɛ́ n sɑ̃ntɛ dɛ yiè, di bɑ́ɑ́ pĩ́ mmutɔ̃mmú mɑmù. Disɑ̃nni kó dibɑnni ndi. 
\v 2 Dɛ yiè di n féútɛ́ dinɑɑdɑɑ̀ nɛ̀ dipedɑɑ̀ nɛ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù, kɛ́ dɛ̀ tùɔ. 
\v 3 Di wɑɑ́ mbɑ́ fɛ̀ɛ̀ ɔ̃̀fɛ̀ kpɛ́í muyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi dinɑɑdɑɑ̀ ĩ́nkɛ̀, cìdóò bɛ̀kuɔ̀ dipedɑɑ̀ ĩ́nkɛ̀. 
\v 4 Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀. 
\v 5 Kɛ̀ dí kuɔnɛ̀ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ̀ bɛ̀ di dɔ̀ɔ̀ mɛyɛi ncĩ́ɛ̃́mmɛ̀ kó ikuɔ́. 
\v 6 Dɛ kó iwũɔ̃ cɑ̃́ɑ̃́nnɛ̀mu di n feu ì yɛwe yɛmɔu kɛ tuɔ̀ nnɛ̀ di m pɑ̃ɑ̃ mmùù diì nɛ̀ dɛ kó mɛnɑɑ̀. Dɛ kó dipɑ̃nnì níí yó ntú di tuɔ ndì ndi dìì kó kufɔ̃ɔ̃ku n nɑɑti.
\s1 YIEKƐ̀: Bɛ̀ bo nfeu ì mɛyɛi nhũtímù kó diyiè diɛrì
\p
\v 7 Dibenni tɑ̃̀nkù yiénwè kó diyiè píínnì yiè di níí tíí nkɛ́boú dinùù kɛ́ n sɑ̃ntɛ. Di bɑ́ɑ́ pĩ́ mmutɔ̃mmú mɑmù. 
\v 8 Dɛ yiè di n féútɛ́ dinɑɑdɑɑ̀ nɛ̀ dipedɑɑ̀ nɛ̀ yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀, kɛ kpɑ kuyɛ̀nkù kɛ́ yɛ̀ nni ntuɔ. Dipɑ̃nnì ndi dìì kó kufɔ̃ɔ̃ku n nɑɑti. 
\v 9 Dí wɑɑ́ mmuyuo nsɑ̀ɑ̀mù mùù ɑ̃̀ntɛnɛ̀ mɛkùɔ̀ ncìdóò bɛ̀wɛi dinɑɑdɑɑ̀ ĩ́nkɛ̀, cìdóò bɛ̀kuɔ̀ dipedɑɑ̀ ĩ́nkɛ̀, 
\v 10 cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀, 
\v 11 kɛ́kuɔnɛ̀ dibɔdɑɑ̀ dìmɑ́ɑ̀ mɛyɛi nhũtímù kpɛ́í kɛ̀ bɛ̀ di dɔɔ̀ dɛ kó ikuɔ́, kɛ nɛ́ mbúútí di n fèútɛ́ dì mɛyɛi nhũtímù kó diyiè diɛrì nɛ̀ di n feu ì yɛwe yɛmɔu kɛ tuɔ̀ nnɛ̀ dɛ kó mudiì nɛ̀ dɛ kó mɛnɑɑ̀.
\s1 NNI: Bɛ̀ bo nfeu ì titouti kó dibɑnni yiè
\p
\v 12 Otɑ̃̀nkù yiénwè kó diyiè tɛpíítɛ̀ nɛ̀ dinummurì, di níí tíí nkɛ́ n sɑ̃ntɛ, di bɑ́ɑ́ pĩ́ mmutɔ̃mmú mɑmù. Di yó mbɑɑ̀ mmí ndi Yiɛ̀ nKuyie n kó dibɑnni ndi kɛ dɔ̀ yɛwe yɛ̀yiekɛ̀. 
\v 13 Diyiè ketirì kɛ́ n féútɛ́ yɛnɑɑdɑkɛ̀ tɛpíítɛ̀ nɛ̀ yɛ̀tɑ̃ɑ̃ti kɛ́tuɔ nnɛ̀ yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. Dipɑ̃nnì ndi dìì kó kufɔ̃ɔ̃ku n nɑɑti. 
\v 14 Kɛ̀ di wɑɑ́ mmuyuo mmùù ɑ̃̀ntɛnɛ̀ mɛkùɔ̀ ncìdóò bɛ̀wɛi, bɑ́ dìì nɑɑdɑpɑ̀nnì ĩ́nkɛ̀. Cìdóò bɛ̀kuɔ̀ bɑ́ dìì pedɑɑ̀ ĩ́nkɛ̀. 
\v 15 Cìdóò bɛ̀tɑ̃ɑ̃ti bɛ̀tɑ̃ɑ̃ti bɑ́ dìì pedɑpɑ̀nnì ĩ́nkɛ̀. 
\v 16 Kɛ̀ di kuɔnɛ̀ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nɛ̀ dɛ kó mɛnɑɑ̀.
\p
\v 17 Diyiè dɛ́rì yiè dí n féútɛ́ yɛnɑɑdɑpɑ̀ɑ̀ ntɛpíítɛ̀ nɛ̀ yɛ̀dɛ́ɛ̀ nɛ̀ yɛpedɑkɛ̀ nyɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 18 Dí nɔ́ɔ́nnɛ̀ tidiitì di ɔ̃ɔ̃ nɔ́ɔ́ nkɛ̀ tì mmɑmɛ̀ bɑ́ fɛ̀ɛ̀ ɔ̃̀fɛ̀ ĩ́nkɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 19 Dí kuɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ́tuɔ nnɛ̀ dɛ kó tidiitì nɛ̀ mɛnɑɑ̀.
\m
\v 20 Diyiè tɑ̃ɑ̃́nnì yiè kɛ̀ dí n féútɛ́ yɛnɑɑdɑkɛ̀ tɛpíítɛ̀ nɛ̀ dìmɑ́ɑ̀ nɛ̀ yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 21 Dí yíɛ́nɛ̀ tidiitì nɛ̀ dɛ kó mɛnɑɑ̀, kɛ̀ dɛ̀ mmɑ̀nnɛ̀ yɛnɑɑdɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 22 Dí di kùɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í kɛ́mbúútí di n feu ì yɛwe yɛmɔu kɛ tuɔ nnɛ̀ dɛ kó tidiitì nɛ̀ dɛ kó mɛnɑɑ̀.
\m
\v 23 Diyiè nɑɑnnì yiè dí n féútɛ́ yɛnɑɑdɑkɛ̀ tɛpíítɛ̀ nɛ̀ yɛpedɑkɛ̀ yɛ̀dɛ́ɛ̀, nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 24 Kɛ̀ dí wɑɑ́nnɛ̀ tidiitì nɛ̀ mɛnɑɑ̀ kɛ̀ dɛ̀ mmɑ̀nnɛ̀ iwũɔ̃ mɑmɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 25 Kɛ̀ dí kuɔ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.
\m
\v 26 Diyiè nummurì yiè dí n feutɛ́ yɛnɑɑdɑkɛ̀ yɛ̀wɛi, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 27 Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 28 Kɛ̀ di kuɔnɛ̀ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.
\m
\v 29 Diyiè kuɔ́nnì yiè kɛ̀ dí n feutɛ́ yɛnɑɑdɑkɛ̀ yɛ̀ni, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù, 
\v 30 kɛ́ yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 31 Kɛ̀ dí kuɔ dibɔdɑɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.
\p
\v 32 Diyiè yiénnì yiè kɛ̀ dí n feutɛ́ yɛnɑɑdɑkɛ̀ yɛ̀yiekɛ̀, yɛpedɑkɛ̀ yɛ̀dɛ́ɛ̀ nɛ̀ yɛpedɑpɑ̀ɑ̀ ntɛpíítɛ̀ nɛ̀ yɛ̀nɑ̀ɑ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ kpɑ kuyɛ̀nkù. 
\v 33 Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnnɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 34 Kɛ̀ dí kuɔ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.
\p
\v 35 Diyiè niínnì yó ntú dibɑnni denni dìì yiè ndi di bɑ́ mpĩ́ mmutɔ̃mmú mɑmù dɛ kó diyiè. 
\v 36 Dɛ yiè dí n féútɛ́ dinɑɑdɑɑ̀ dìmɑ́ɑ̀, yɛpedɑpɑ̀ɑ̀ nyɛ̀yiekɛ̀ yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ́tuɔ, dipɑ̃nnì ndi dìì kó kufɔ̃ɔ̃ku n nɑɑti. 
\v 37 Kɛ̀ dí yíɛ́nɛ̀ tidiitì nɛ̀ mɛnɑɑ̀ kɛ̀ dɛ̀ mmɑnɛ̀ dinɑɑdɑɑ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ ndɛ̀ mɑ̀mɛ̀, kɛ́ndònnɛ̀ di mɔkɛmɛ̀ dɛ kó mɛmɑntímɛ̀. 
\v 38 Dí kuɔ dibɔdɑɑ̀ dìmɑ́ɑ̀ mɛyɛi ncĩ́ɛ̃́mmɛ̀ kpɛ́í, kɛ́mbúútí di n feu ì yɛwe yɛmɔu kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀.
\b
\p
\v 39 Kɛ̀ dɛ kó dimɔ̀nnì níí tùɔ̀kɛ di yóó i nni nfíé kɛ́mbúútí di n feu ì di n cɑ̀nnɛnɛ̀ yɛ̀ɛ̀ nɔ̀ kpɛ́í nɛ̀ di n feu ì nɛ̀ diwɛ̀ì nɛ̀ di n feu ì kɛ tuɔ̀ nnɛ̀ dɛ kó tidiitì nɛ̀ dɛ kó mɛnɑɑ̀ nnɛ̀ di n feu ì mɛtɑummɛ̀ kpɛ́í.
\p
\v 40 Kɛ̀ Mɔyiisii nɑ́kɛ́ Isidɑyɛɛribɛ ti Yiɛ̀ nKuyie nhò nɑ̀kɛ́ tì timɔu.
\c 30
\s1 Ikuɔ́ ìì tukúnɛ̀ ɑ bo cɑnnɛmɛ̀ Kuyie ndinùù
\p
\v 1 Mɛm̀mɛ kɛ̀ Mɔyiisi bɛ́innɛ̀ Isidɑyɛɛribɛ botí kó bɛkótíbɛ̀ kɛ́ bɛ̀ nɑ̀kɛ́ kɛ dɔ̀: Ntɛnɛ̀ ti Yiɛ̀ nKuyie mbɛ́i ntì.
\p
\v 2 Kù tu kòo mɔù kù cɑ̀nnɛnɛ̀ dinùù kɛ pɑ̀rìkɛ̀ kɛ yu ku yètìrì kɛ yɛ̃ nhò yóó kù dɔ̀ɔ̀ mɛ̀, ò bɑ́ɑ́ yóu ò bo mɛ̀ dɔ̀ɔ̀ mɛ̀. Ò dò nkɛ́ mɛ̀ dɔɔ̀mu mɛmɔu.
\p
\v 3 Kɛ̀ dɛ̀ dò nhosɑpɑ̀ɑ̀ mmɔù kpɑɑ́ ɑ̃ nɛ̀ o cicɛ kɛ cɑ̀nnɛnɛ̀ ti Yiɛ̀ nKuyie ndinùù kɛ yɛ̃ nhò yóó kù dɔ̀ɔ̀ mɛ̀, 
\v 4 kòo cicɛ kèè ò cɑ̀nnɛnɛ̀mɛ̀ ti Yiɛ̀ nKuyie ndinùù kɛ pɑ̀rìkɛ̀. Kòo cicɛ í ò nɑ̀kɛ́ tìmɑtì ò dò nkɛ́ mɛ̀ dɔ̀ɔ̀mu mɛmɔu ò yɛ̃ nhò yóó dɔɔ̀ mɛ̀. 
\v 5 Kɛ̀ dɛ̀ mɛ ndò nho cicɛ ti kèè dìì yiè kòò tì yetɛ ò tɛ̃́nkɛ bɑ́ɑ́ dɔɔ̀ ò kù cɑ̀nnɛnɛ̀ dinùù kɛ pɑ̀rìkɛ̀ kɛ yɛ̃ nhò yóó dɔɔ̀mɛ̀, ti Yiɛ̀ nKuyie nyóó ò cĩ́ɛ̃́mmu kɛ yɛ̃́ o cicɛ weè yetɛmɛ̀.
\p
\v 6 Kɛ̀ dɛ̀ mɛ ndò nhosɑpɑ̀ɑ̀ mmɔù yenkɛ, kòo nùù ò fìtɛ́nɛ̀ kòò cɑ̀nnɛnɛ̀ ti Yiɛ̀ nKuyie ndinùù kɛ pɑ̀rìkɛ̀ kɛ yunɛ̀ ku yètìrì, 
\v 7 kòo dɔù tì kèè dìì yiè kɛ í bɛ́i ntìmɑtì, dɛ kó dinùù kpɑɑ́ cɑmmumu, kòò dò nkɛ́dɔɔ̀ ò pɑ̀rìkɛ̀ kɛ yɛ̃ nhò yóó dɔɔ̀ mɛ̀. 
\v 8 Kɛ̀ dɛ̀ mɛ ndò nho dɔù tì kèè dìì yiè kòò tì yetɛ, o nùù do ò fìtɛ́nɛ̀ kòò kù cɑ̀nnɛnɛ̀ dinùù kɛ́pɑrìkɛ̀ kɛ yɛ̃ nhò yóó dɔɔ̀ mɛ̀, dɛ kó dinùù tɛ̃́nkɛ í yóó nhò pĩ, ti Yiɛ̀ nKuyie nhò cĩ́ɛ̃́mmu.
\p
\v 9 Kɛ̀ dɛ̀ mɛ ntu okúpokù nwe yoo wèè yenkɛ kòo dɔù ò yetɛ, kòò cɑ̀nnɛnɛ̀ ti Yiɛ̀ nKuyie ndinùù ò dò nkɛ́ dì dɔ̀ɔ̀mu.
\p
\v 10 Kɛ̀ dɛ̀ mɛ ntú o dɔù cĩ́ɛ̃̀tɛ̀ ntɛ ò cɑ̀nnɛ̀nɛ̀mɛ̀ dinùù ti Yiɛ̀ nKuyie nkɛ pɑ̀rìkɛ̀, 
\v 11 kòo dɔù tì kèè kɛ í ò bɛ́innɛ̀ tìmɑtì ò mɛ nyí yetɛ ò dò nkɛ́dɔɔ̀mu ò kù cɑ̀nnɛnɛ̀ dìì nùù nɛ̀ ò pɑ̀rìkɛ̀ kɛ yɛ̃ nhò yóó dɔɔ̀ tì, bɑ́ kɛ̀ tì tu tì. 
\v 12 Kɛ̀ dɛ̀ mɛ ndò nho dɔù tì kèè dìì yiè kòò tì yetɛ kɛ pɑ̀ɑ ndɛ kó dinùù nɛ̀ ò pɑ̀rìkɛ̀ kɛ yɛ̃ nhò yóó dɔɔ̀ mɛ̀, mɛ̀ pɑ̀ɑ̀mu kɛ̀ ti Yiɛ̀ nKuyie nhò cĩ́ɛ̃́. 
\v 13 Onitipòkù cɑ̀nnɛnɛ̀ yɛ̀ɛ̀ nɔ̀ Kuyie nyɛmɔu nɛ̀ ò pɑ̀rìkɛ̀ kɛ bɛ́i nkɛ yɛ̃ nhò yóó fɛ̃́ṹ mmɛ̀ɛ̀ botí omɑ́ɑ̀, o dɔù bo nɑ kɛ tì pɑ̀ɑ. 
\v 14 Kɛ̀ dɛ̀ mɛ ndò nho dɔù tì kèè kɛ cĩ́ɛ̃́kɛ́ kɛ í ò bɛ́innɛ̀ tìmɑtì, kɛ̀ dɛ̀ wentɛ́ ò yiemmu ò cɑ̀nnɛnɛ̀ tì ti Yiɛ̀ nKuyie nyɛ̀ɛ̀ nɔ̀ yɛmɔu, nɛ̀ ò pɑ̀rìkɛ̀ kɛ bɛí ntì timɔu, kɛ yɛ̃́ ò tì kèè dìì yiè ò í ò nɑ̀kɛ́mɛ̀ tìmɑtì. 
\v 15 Kòo dɔù mɛ nyóu kɛ̀ dɛ̀ wentɛ́ kòò nɛ́ ti pɑ̀ɑ, weè yóó tɔ o pokù kó mɛcɑɑ̀rìmɛ̀ kó tiyeti.
\p
\v 16 Ikuɔ́ ti Yiɛ̀ nKuyie nduɔ́ nyìnyi Mɔyiisi dɛ̀ɛ̀ tukúnɛ̀ onitipòkù wèè yenkɛ nɛ̀ osɑpɑ̀ɑ̀ nwèè kpɑɑ́ ɑ̃ o cicɛ cĩ́ɛ̃̀tɛ̀.
\c 31
\s1 Bɛ̀ dokɛ́nɛ̀mɛ̀ Mɑndiyɑ̃ɑ̃bɛ
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 2 Dokɛ́nɛ̀ Mɑndiyɑ̃ɑ̃bɛ kɛ́pɛitɛ bɛ̀ dɔ̀ɔ̀ mɛ̀ɛ̀ yɛi nyIsidɑyɛɛribɛ. Kɑ̀ɑ dèè ɑ kũnti ɑ yɛmbɛ̀ borɛ̀ ndɛ.
\p
\v 3 Mɛm̀mɛ kɛ̀ Mɔyiisii nɑ́kɛ́ Isidɑyɛɛribɛ kɛ dɔ̀: Bɛ̀mɑbɛ̀ɛ bɑ́ɑ́tí di miɛkɛ kɛ́kɔtɛ kɛ́do Mɑndiyɑ̃ɑ̃bɛ mudoò kɛ́pɛitɛ ti Yiɛ̀ nKuyie nkó dipɛ̀ì. 
\v 4 Di tɑ̃ɑ̃tɛ́ Isidɑyɛɛribɛ wuɔ mmiɛkɛ bɑ́ kù bɛnìtìbɛ̀ tɛkɔupíítɛ̀ píítɛ̀ (1000) kɛ̀ bɛ̀ɛ kɔtɛ mudoò.
\p
\v 5-6 Kɛ̀ bɛ̀ɛ dɛitɛ Isidɑyɛɛribɛ wuɔ mmiɛkɛ bɑ́ kù tɛkɔupíítɛ̀ píítɛ̀ kɛ̀ bɛ̀ɛ wɛ̃nnɛ́ bɛmɔu bɛhɑ̃ɑ̃pɔ̀mbɛ̀ tɛkɔupípíítɛ̀ nɛ̀ sìkɔupísìdɛ́ (12000) kɛ̀ Mɔyiisi duɔ́ nkɛ̀ bɛ̀ɛ kɔtɛ mudoò kòo bɛ̀ nɛínnɛ̀ Edeɑsɑɑ birɛ Pinɑsi ikuɔ́ nìùtì, kòo ntɔ ikuɔ́ nɛntì nɛ̀ sikpɑ̀rìheú. 
\v 7 Kɛ̀ bɛ̀ɛ do Mɑndiyɑ̃ɑ̃bɛ mudoò ti Yiɛ̀ nKuyie ndo tì nɑ̀kɛ́ Mɔyiisi kɛ yɛ̃ ndɛ̀ ndòmmɛ̀, kɛ́kuɔ bɛnitidɑɑbɛ̀ bɛmɔu, 
\v 8 kɛ́kuɔnɛ̀ Mɑndiyɑ̃ɑ̃bɛ kó bɛkpɑ̀ɑ̀tìbɛ̀ bɛnùmmù, Efii nɛ̀ Dekɛmmu nɛ̀ Tisuu nɛ̀ Uuri nɛ̀ Debɑɑ kɛ féútɛ́nɛ̀ Beɔɔ birɛ Bɑdɑmmu, 
\v 9 kɛ́pĩ́mmú bɛ pobɛ̀ nɛ̀ bɛ bí kɛ́kònnɛ̀, kɛ́pĩ́mmú bɛ wũɔ̃ imɔu kɛ́hɛí bɛ kpɛrɛ dɛmɔu, 
\v 10 kɛ́cɔ́u mbɛ ɛkɛ̀ nɛ̀ bɛ ɑ̃ɑ̃pɔ̀nkɑrɛ̀, 
\v 11 kɛ́ɛínɛ̀ bɛ kpɛrɛ bɛ̀ yɑ̀ dɛ̀ dɛmɔu nɛ̀ bɛnìtìbɛ̀ nɛ̀ iwũɔ̃, 
\v 12 kɛ́ dɛ̀ tɔní dɛmɔu bɛ ɑ̃ɑ̃pɔ̀nkɑrì Mɔyiisi nɛ̀ Edeɑsɑɑ ikuɔ́ nìùtì nɛ̀ Isidɑyɛɛribɛ sɔmbɛ borɛ̀ Mɔɑbu biriku, kukó nSuditɛ̃ɛ̃ borɛ̀ Sedikoo ɛì ììkɛ̀.
\p
\v 13 Mɔyiisi nɛ̀ ikuɔ́ nìùtì Edeɑsɑɑ nɛ̀ Isidɑyɛɛribɛ kó bɛkotibɑɑbɛ̀ kɛ̀ bɛ̀ɛ ítɛ́ kɛ́yɛroo bɛ ɑ̃ɑ̃pɔ̀nkɑrì kɛ bo bɛ̀ co. 
\v 14 Kɛ̀ Mɔyiisi miɛkɛɛ pɛikɛ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ bɛ̀ɛ̀ ni bɛhɑ̃ɑ̃pɔ̀mbɛ̀ tɛkɔupíítɛ̀ píítɛ̀ nɛ̀ tɛkɔ̀ùtɛ̀ kɔ̀ùtɛ̀ bɛ̀ɛ̀ kũntiní mudoò. 
\v 15 Kòo bɛ̀ bekɛ kɛ dɔ̀: Dɛ̀ dòmmɛ kɛ̀ di yóu bɛnitipòbɛ̀ kɛ í bɛ̀ kùɔ? 
\v 16 Di yɛ̃́mu kɛ dò mbɛɛ̀ nitipòbɛ̀ do tũ̀nnɛ Bɑdɑmmu kó itié nkɛ́nte kɛ̀ Isidɑyɛɛribɛ cɑɑ̀rɛ̀ ti Yiɛ̀ nKuyie mmɛdiɛ̀ mPeɔɔ tɑ̃rì kɛ́nte kɛ̀ kùu bɛ̀ potɛ́. 
\v 17 Kuɔnɛ̀ di mmɔ̀nnì initidɑbí imɔu nɛ̀ bɛnitipòbɛ̀ bɛmɔu bɛ̀ɛ̀ yenkɛ. 
\v 18 Di yóu isɑpùmbí ìì mu nyi yɛ̃́ onitidɔ̀ù kɛ́puokɛ. 
\v 19 Díndi bɛ̀ɛ̀ kó dimɑ̀ɑ̀ kùɔ onìtì yoo di kɑ̀ɑ́kɛ́ ocíì, di nciɛ́nnɛ̀ dihɑ̃ɑ̃pɔ̀nkɑrì kɛ dɔ̀ yɛwe yɛ̀yiekɛ̀, kɛ̀ bɛ̀ di dɔɔ̀ mɛwénkùmɛ̀ kó ikuɔ́ diyiè ditɑ̃ɑ̃́nnì nɛ̀ diyiénnì, díndi nɛ̀ di pĩ̀ḿmú bɛ̀. 
\v 20 Kɛ̀ di múnkɛɛ wénkùnnɛ di yɑ̀ɑ̀tì nɛ̀ di nɛntì tikɔ̃̀ntì kpɛti nɛ̀ tibɔcìtì kpɛti nɛ̀ idɛí kpɛti.
\p
\v 21 Mɛm̀mɛ kɛ̀ ikuɔ́ nìùtì Edeɑsɑɑ nɑ́kɛ́ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ bɛ̀ɛ̀ do kɔ̀tɛ mudoò kɛ dɔ̀: Ntɛnɛ̀ ti Yiɛ̀ nKuyie ndo nɑ̀kɛ́ ìì kuɔ́ Mɔyiisi: 
\v 22 Mɛsɔɔ nnɛ̀ timɑ́tì pɛ́ítì nɛ̀ disɔɔwũɔ̃̀ nɛ̀ timɑ́tì nɛ̀ mɛbiɛrimɛ nɛ̀ dibiɛrìmínnì, 
\v 23 dɛ̀ɛ̀ kó dimɑ̀ɑ̀ í yóó cɔ́útɛ́ di dɛ̀ pũ̀ńnɛ́ muhɑ̃ɑ̃́ nkɛ̀ dɛ̀ɛ wenkɛ. Dɛ̀ɛ̀ yóó cɔ́útɛ́ di dɛ mpɔɔ̀tɛ̀ mɛwénkùmɛ̀ kó mɛniɛ mmɑ́ɑ̀. 
\v 24 Diyiè yiénnì yiè kɛ̀ di ɔ́ú di yɑ̀ɑ̀tì kɛ́wenkɛ, dɛ mɔ̀nnì di bo nɑ kɛ́kò ndi bɑ̀tɛ́ dɛ̀.
\s1 Bɛ̀ níí bo totí mɛ̀ɛ̀ botí bɛ̀ ɛí dɛ̀
\p
\v 25 Kɛ̀ ti Yiɛ̀ nKuyie nnɑ̀kɛ́ Mɔyiisi kɛ dɔ̀: 
\v 26 Fɔ̃́ nnɛ̀ Edeɑsɑɑ nɛ̀ Isidɑyɛɛribɛ kó bɛkótíbɛ̀ dí kɑɑ mbɛ̀ pĩ̀ḿmúní bɛ̀ɛ̀ nìtìbɛ̀ nɛ̀ ìì wũɔ̃, 
\v 27 kɑ̀ɑ dɛ̀ totɛ́ mɛ̀dɛ́mɛ̀, bɛ̀ɛ̀ kɔ̀tɛ mudoò kɛ̀ bɛ̀ nte dikéè dìmɑ́ɑ̀, kɛ̀ bɛtɔbɛ̀ bɛ̀ɛ̀ do kpɑɑ́ kɛ̀ bɛ̀ nte ditɛrì. 
\v 28 Kɑ̀ɑ dɛitɛ bɛ̀ɛ̀ kɔ̀tɛ mudoò bɛ kpɛri miɛkɛ onìtì òmɑ́ɑ̀ bɛnìtìbɛ̀ sikɔusìnùmmù (500) miɛkɛ kóò cɑ̃̀nnɛ́ n kpɛ́í, kɛ mɛ nyĩ́ inɑ̀ɑ̀kɛ nɛ̀ sɑ̃mmɑrímú nɛ̀ ipe nɛ̀ sibɔɔ́. 
\v 29 Kɛ̀ di dɛ̀ duɔ́ nyikuɔ́ nìùtì Edeɑsɑɑ, dɛ̀ tu mí ndi Yiɛ̀ nKuyie n kpɛrɛ ndɛ. 
\v 30 Isidɑyɛɛribɛ sɔmbɛ bɛ̀ɛ̀ do kpɑɑ́ bɛ kó dikéè miɛkɛ, ɑ́ dɛitɛ bɛnìtìbɛ̀ sipísìnùmmù miɛkɛ òmɑ́ɑ̀, kɛ mɛ nyĩ́ inɑ̀ɑ̀kɛ nɛ̀ sɑ̃mmɑrímú nɛ̀ ipe nɛ̀ sibɔɔ́, kɑ̀ɑ dɛ̀ duɔ́ nDefiibɛ bɛ̀ɛ̀ pĩ n cĩ́ɛ̃̀tɛ̀ mutɔ̃mmú. 
\v 31 Mɔyiisi nɛ̀ Edeɑsɑɑ ikuɔ́ nìùtì kɛ̀ bɛ̀ɛ dɔɔ̀ ti Yiɛ̀ nKuyie nnɑ̀kɛ́ tì Mɔyiisi. 
\v 32 Bɛ̀ɛ̀ kɔ̀tɛ mudoò bɛ̀ ɛí dɛ̀ɛ̀ kó dimɑ̀ɑ̀ miɛkɛ dɛ̀ɛ̀ kpɑɑ́ kɛ̀ dɛ̀ mbo sikɔupíkɔusìkuɔ̀ nɛ̀ sikɔupípísìyiekɛ̀ nɛ̀ sikɔupísìnùmmù (675000) ipe nɛ̀ sibɔɔ́. 
\v 33 Inɑ̀ɑ̀kɛ sikɔupípísìyiekɛ̀ nɛ̀ sikɔupísìdɛ́ (72000). 
\v 34 Sɑ̃mmɑrímú sikɔupípísìkuɔ̀ nɛ̀ tɛkɔupíítɛ̀ (61000). 
\v 35 Isɑpùmbí ìì mu nyí duɔ́nɛ̀ onitidɔ̀ù kɛ̀ ì mbo sikɔupípísìtɑ̃ɑ̃ti nɛ̀ sikɔupísìdɛ́ (32000). 
\v 36 Bɛ̀ duɔ́ ndìì kéè bɛ̀ɛ̀ kɔ̀tɛ mudoò ipe nɛ̀ sibɔɔ́ kɛ̀ dɛ̀ mbo sikɔupíkɔusìtɑ̃ɑ̃ti nɛ̀ sikɔupípísìtɑ̃ɑ̃ti nɛ̀ sikɔupísìyiekɛ̀ nɛ̀ sikɔu sìnùmmù (337500). 
\v 37 Kɛ̀ bɛ̀ɛ dɛitɛ dɛ miɛkɛ sikɔusìkuɔ̀ nɛ̀ sipísìyiekɛ̀ nɛ̀ dɛ̀nùmmù (675) bɛ Yiɛ̀ nKuyie nkpɛ́í. 
\v 38 Inɑ̀ɑ̀kɛ sikɔupípísìtɑ̃ɑ̃ti nɛ̀ sikɔupísìkuɔ̀ (36000) kɛ̀ bɛ̀ɛ dɛitɛ sipísìyiekɛ̀ nɛ̀ ìdɛ́ì bɛ Yiɛ̀ nKuyie nkpɛ́í. 
\v 39 Sɑ̃mmɑrímú sikɔupísìtɑ̃ɑ̃ti nɛ̀ sikɔusìnùmmù (30500) kɛ̀ bɛ̀ɛ dɛitɛ sipísìkuɔ̀ nɛ̀ dɛ̀mɑ́ɑ̀ bɛ Yiɛ̀ nKuyie nkpɛ́í. 
\v 40 Bɛnìtìbɛ̀ tɛkɔupípíítɛ̀ nɛ̀ sikɔupísìkuɔ̀ (16000) kɛ̀ bɛ̀ɛ dɛitɛ sipísìtɑ̃ɑ̃ti nɛ̀ bɛ̀dɛ́bɛ̀ bɛ Yiɛ̀ nKuyie nkpɛ́í. 
\v 41 Kɛ̀ Mɔyiisii duɔ́ nyikuɔ́ nìùtì Edeɑsɑɑ dɛ̀ɛ̀ tu ti Yiɛ̀ nKuyie nkpɛrɛ o Yiɛ̀ nKuyie nhò nɑ̀kɛ́ kɛ yɛ̃ ndɛ̀ ndòmmɛ̀. 
\v 42-43 Dikéè tɛrì dìì kpɑɑ́ Isidɑyɛɛribɛ kpɛ́í kɛ̀ dì mmɑ̀nnɛ̀ bɛ̀ɛ̀ do kɔ̀tɛ mudoò bɛ kpɛri mɑmɛ̀, ipe nɛ̀ sibɔɔ́ sikɔupíkɔusìtɑ̃ɑ̃ti nɛ̀ sikɔupípísìtɑ̃ɑ̃ti nɛ̀ sikɔupísìyiekɛ̀ nɛ̀ sikɔu sìnùmmù (337500). 
\v 44 Inɑ̀ɑ̀kɛ sikɔupípísìtɑ̃ɑ̃ti nɛ̀ sikɔupísìkuɔ̀ (36000). 
\v 45 Sɑ̃mmɑrímú sikɔupísìtɑ̃ɑ̃ti nɛ̀ sikɔusìnùmmù (30500). 
\v 46 Bɛnìtìbɛ̀ tɛkɔupípíítɛ̀ nɛ̀ sikɔupísìkuɔ̀ (16000). 
\v 47 Kɛ̀ Mɔyiisii dɛitɛ bɛnìtìbɛ̀ sipísìnùmmù miɛkɛ òmɑ́ɑ̀ òmɑ́ɑ̀, iwũɔ̃ mɛmmɛ, kɛ́duɔ́ nDefiibɛ bɛ̀ɛ̀ pĩ Kuyie ncĩ́ɛ̃̀tɛ̀ tɔ̃mmú ti Yiɛ̀ nKuyie ndo ti nɑ̀kɛ́ kɛ yɛ̃ ndɛ̀ ndòmmɛ̀.
\s1 Bɛ̀ pɑ̃ yɛ̀ɛ̀ pɑ̃rɛ̀ Kuyie
\p
\v 48 Bɛ̀ɛ̀ do ni mudoò kɛ bɑkɛ́ bɛhɑ̃ɑ̃pɔ̀mbɛ̀ tɛkɔupíítɛ̀ píítɛ̀, tɛkɔ̀ùtɛ̀ kɔ̀ùtɛ̀ kɛ̀ bɛ̀ɛ kɔtɛ kɛ́yɑ̀ Mɔyiisi kóò nɑ̀kɛ́ kɛ dɔ̀: 
\v 49 Ti kɑ̀ɑ mbɛhɑ̃ɑ̃pɔ̀mbɛ̀ ti bɑkɛ́ bɛ̀ kɛ sɔ̃́ nhòmɔù í kpɑ bɑ́ òmɑ́ɑ̀. 
\v 50 Dɛɛ̀ te kɛ̀ ti tɔní ti Yiɛ̀ nKuyie nyɛpɑ̃rɛ̀ kɛ bo mɔɔ ti yɛi ncĩ́ɛ̃́mmɛ̀, mɛsɔɔ nkó tisɑ̃tì ti ɛí tì ti ti ntɔní, yɛtootɔ̃rɛ nɛ̀ sinɛí nɛ̀ mɛfĩmmɛ, nɛ̀ dɛmɑ́mɑ́nnɛ̀ nɛ̀ dɛ̀ɛ̀ ɔ̃ ncɑ́ɑ́tí mɛfĩmmɛ.
\p
\v 51 Mɔyiisi nɛ̀ ikuɔ́ nìùtì Edeɑsɑɑ kɛ̀ bɛ̀ɛ cuɔ́ mɛsɔɔ nkó tisɑ̃tì bɛ̀ tɔní tì. 
\v 52 Bɛhɑ̃ɑ̃pɔ̀mbɛ̀ bɛ̀ɛ̀ bɑkɛ́ yɛtĩ̀rɛ̀ bɛ̀ do duɔ́ ntìì nɛntì kó kucɛ̃́ɛ̃́kù do bo cìdóò tɛkɔ̀ùtɛ̀ nɛ̀ sipísìyiekɛ̀ (170). 
\v 53 Kɛ̀ bɛhɑ̃ɑ̃pɔ̀mbɛ̀ sɑ́m̀pɔ́bɛ̀ biɛ tiekɛ bɑ́ wè ò ɛí dɛ̀. 
\v 54 Mɔyiisi nɛ̀ Edeɑsɑɑ kɛ̀ bɛ̀ɛ tɑnnɛ́ mɛsɔɔ nkó tinɛntì bɛhɑ̃ɑ̃pɔ̀mbɛ̀ bɛ̀ɛ̀ bɑkɛ́ yɛtĩ̀rɛ̀ tɛkɔupíítɛ̀ píítɛ̀ nɛ̀ tɛkɔ̀ùtɛ̀ kɔ̀ùtɛ̀ bɛ̀ duɔ́ ntì mɛtɑummɛ̀ tou, kɛ̀ dɛ̀ bo yie nkɛ̀ ti Yiɛ̀ nKuyie mbɑ́ɑ́ yɛ̃̀ nyIsidɑyɛɛribɛ kpɛ́í.
\c 32
\s1 Bɛ̀ duɔ́mmɛ̀ Dubɛnni nɛ̀ Kɑdi nɑɑ̀mùntì kɔbɛ kɛtenkɛ̀
\p
\v 1 Dubɛnni nɛ̀ Kɑdi bɛ nɑɑ̀mùnkù kɔbɛ do mɔkɛ iwũɔ̃ nyi kɛ̀ ì sũ mɛdiɛ̀ nkɛ̀ bɛ̀ɛ yɑ̀ Yɑsɛɛ ɛì nɛ̀ Kɑdɑɑdi kpɛri yɛ tenkɛ̀ bo yiénnɛ̀mɛ̀ iwũɔ̃ kó mucɛ̃mmu. 
\v 2 Mɛm̀mɛ bɛ̀ kɔ̀tɛmɛ̀ kɛ́yɑ̀ Mɔyiisi nɛ̀ Edeɑsɑɑ nɛ̀ Isidɑyɛɛribɛ kó bɛkótíbɛ̀ kɛ bɛ̀ nɑ̀kɛ́ kɛ dɔ̀: 
\v 3-4 Ti Yiɛ̀ nKuyie nduɔ́ ntínti Isidɑyɛɛribɛ kɛ̀ ti fìètɛ yɛ̀ɛ̀ ɛkɛ̀ yɛ̀ yiénnɛ̀ iwũɔ̃ kó mucɛ̃mmu mmu, tínti ɑ kó bɛtɔ̃mbɛ̀ ti mɛ ntu iwũɔ̃ kó bɛcɛ̃mbɛ mbɛ, dɛ kó yɛhɛkɛ̀ tu: Atɑdoti, Dibonni, Yɑsɛɛ nɛ̀ Nimudɑ, Ɛsibonni nɛ̀ Edeyɑde nɛ̀ Sebɑmmu nɛ̀ Nɛbo nɛ̀ Beonni.
\p
\v 5 Kɛ̀ bɛ̀ɛ deè kɛ dɔ̀: Mɔyiisi, kɑ̀ɑ bo yie nhɑ ti duɔ́ ndɛ kó kɛtenkɛ̀, di bɑ́ɑ́ ti sée kukó nSuditɛ̃ɛ̃ yɑ́ɑ̀.
\p
\v 6 Kɛ̀ Mɔyiisi bɛ̀ tɛ̃̀ńnɛ́ kɛ dɔ̀: Di tú bɑ? Di tebìí bo nkɔri mudoò kɛ̀ di nɛ́ nkpɑɑ́ diɛnnɑɑ̀? 
\v 7 Dɛ̀ yĩ́mɛ kɛ̀ di dɔ́ kɛ́yɑ̃́ríkùnnɛ Isidɑyɛɛribɛ kɔ̃̀ntì bɛ̀ bo tɑmɛ̀ dihɛì ti Yiɛ̀ nKuyie mbɛ̀ duɔ́ ndì. 
\v 8 Ti bo dìì mɔ̀nnì Kɑdɛɛsi-Bɑnnɛɑ, kɛ̀ n tɔ̃ ndi cicɛbɛ̀ kɛ̀ bɛ̀ bo pɑɑtɛ́ Kɑnnɑhɑ̃ɑ̃ ɛì kɛ̀ bɛ̀ɛ mɛ ndɔɔ̀. 
\v 9 M bɛ̀ tɔ̃ mmɛmmɛ kɛ̀ bɛ̀ɛ kɔtɛ Ɛsikɔɔdi biriku kɛ́yɑ̀ dihɛì kɛ́wɛ̃tɛní kɛ́yɑ̃́ríkùnnɛ Isidɑyɛɛribɛ kɔ̃̀ntì bɛ̀ bo tɑmɛ̀ dihɛì ti Yiɛ̀ nKuyie mbɛ̀ duɔ́ ndì. 
\v 10 Mɛm̀mɛ kɛ̀ ti Yiɛ̀ nKuyie mmiɛkɛɛ pɛikɛ kɛ̀ kùu pɑrìkɛ̀ kɛ dɔ̀: 
\v 11 Bɛnìtìbɛ̀ bɛ̀ɛ̀ kó dimɑ̀ɑ̀ yɛ̀nní Esibiti, kɛ́túótɛ́ bɛ̀ɛ̀ mɔ̀kɛ yɛbie nsipísìdɛ́ kɛ́ndeètìnko òmɔù nɑɑ̀cɛ̀tɛ̀ bɑ́ɑ́ tɑ dihɛì n do yɛ̃ n yóó duɔ́ ndì bɛ yɛmbɛ̀ Abɑrɑhɑmmu nɛ̀ Isɑki nɛ̀ Sɑkɔbu, kɛ yɛ̃́ bɛ̀ í yiemmɛ̀ kɛ n tũ̀nnɛ sɛi. 
\v 12 Kɛ̀ dɛ̀ í tú Yefundee Kɑdɛbu Kenɑsi nɑɑ̀mùnkù kou nɛ̀ Nunni birɛ Sosuwee, bɛɛ̀ mɑ́ɑ̀ dì tɑti, kɛ yɛ̃́ bɛɛ̀ yiemmɛ̀ kɛ n tũ̀nnɛ sɛi. 
\v 13 Mɛm̀mɛ ti Yiɛ̀ nKuyie mmiɛkɛ pɛikɛmɛ̀ Isidɑyɛɛribɛ kɛ̀ kùu duɔ́ nkɛ̀ bɛ̀ nhɑ̃́ɑ̃́ ndikpɑ́ɑ̀ miɛkɛ kɛ kémmúnɛ̀ dɛ kó kutɔ̃nkù kɔbɛ bɛ̀ɛ̀ do dɔ̀ɔ̀ kù í dɔ́ dɛ̀ bɛ̀ bo kúmɛ̀ kɛ́deè. 
\v 14 Bɛcɑɑ̀rìbɛ̀ kó kubotí díndi, dɛ̀ yĩ́mɛ kɛ̀ di dɔ́ kɛ́sɔɔtɛ́ di yɛmbɛ̀ tɔ̃mmú kɛ tikii ti Yiɛ̀ nKuyie mmiɛkɛ kó muhɑ̃ɑ̃́ nyIsidɑyɛɛribɛ ĩ́nkɛ̀? 
\v 15 Kɛ̀ di bùtínnɛ́ di Yiɛ̀ nKuyie nkù bo yóu kɛ̀ di nkpɑɑ́ dikpɑ́ɑ̀ diì mmiɛkɛ kɛ́mɔntɛ, kɛ̀ díì nɛ́ nte kɛ̀ Isidɑyɛɛribɛ bɛmɔuu feti. 
\v 16 Kɛ̀ dɛ kó bɛnìtìbɛ̀ tɔ́ɔ́nkoo Mɔyiisi borɛ̀ kóò nɑ̀kɛ́ kɛ dɔ̀: Ti dɔ́ kɛ́dɔɔ̀ ti wũɔ̃ kó dibɑɑkɛ̀rì ndi kɛ́mɑɑ́ yɛhɛkɛ̀ kɛ̀ ti bí nhɑ̃. 
\v 17 Ti mɔ́mmɔmbɛ kɛ̀ ti túótɛ́ ti kpɑ̀rìnɛntì kɛ́niitɛ́ fɛnɑfɛ ììkɛ̀, kɛ́kɔtɛ kɛ́tɑnnɛ́ ti tebìí dɛ kó yɛhɛkɛ̀, ti bí sɑ́m̀pɔ́ì ii yó mbo diɛ nyɛhɛkɛ̀ ti yóó mɑɑ́ yɛ̀ kɛ́fii nyiduotí kɛ́nsɔrinɛ̀ dɛ kó kɛtenkɛ̀ kɔbɛ. 
\v 18 Kɛ̀ Isidɑyɛɛribɛ bɛmɔu í kɑ̀ri bɑ́ wè o tenkɛ̀ ti í wɛ̃tiní. 
\v 19 Kɛ̀ di ti duɔ́ ndiɛ nti kó kɛtenkɛ̀ ti tɛ̃́nkɛ í yó nwɑnti dí ti duɔ́ nkɛtɛkɛ̀ Suditɛ̃ɛ̃ kó nyɑ́ɑ̀ tɛrì, kɛ yɛ̃́ ti kɔkɛ bomɛ̀ diɛ ndiyɑ́ɑ̀ diyiè yìɛ̀ní kɛ̀ɛ̀ bíɛ́kɛ̀ kpɛri. 
\v 20 Kɛ̀ Mɔyiisi dɔ̀: Kɛ̀ di pĩ́ ndi bɛ́i ndìì nùù, kɛ̀ di tùótɛ́ di kpɑ̀rìnɛntì kɛ dokɛ́ ti Yiɛ̀ nKuyie nyɛ̃ ndɛ̀ ndòmmɛ̀. 
\v 21 Kɛ̀ di bɑ̀ɑ́tí kɛ sèńtɛ́ Suditɛ̃ɛ̃ di Yiɛ̀ nKuyie nyɛ̃ ndɛ̀ ndòmmɛ̀ kɛ bɑɑnɛ̀ kù bo duɔ́mmɛ̀ kɛ̀ bɛ̀ɛ nɑ bɛ dootitɔbɛ̀ kɛ́ bɛ̀ bɛ̀ti. 
\v 22 Kɛ̀ ti Yiɛ̀ nKuyie mbɛ̀ duɔ́ ndìì mɔ̀nnì bɛ tenkɛ̀, dɛ mɔ̀nnì di bo nɑ kɛ́wɛ̃tɛní di tenkɛ̀, Isidɑyɛɛribɛ bɑ́ɑ́ di sɛi ndi Yiɛ̀ nKuyie mmɛ ntɛ̃́nkɛ bɑ́ɑ́ di sɛi. 
\v 23 Kɛ̀ di mɛ nyí dɔ̀ɔ̀ mɛmmɛ di yetɛ́nɛ̀ ti Yiɛ̀ nKuyie nku, dɛ mɔ̀nnì di nyɛ̃́ kɛ dò ndi yɛi mbo di pĩ́. 
\v 24 Mɑɑ́nɛ̀ tũnkɛ́ yɛhɛkɛ̀ kɛ́tɑnnɛ́ di bí sɑ́m̀pɔ́ì, kɛ́dɔɔ̀ di wũɔ̃ kó yɛbɑɑkùyɛ̀, di nɛ́ bɑ́ɑ́ yɛ̃̀ ndi bɛ́i ndìì nùù. 
\v 25 Kɑdi nɑɑ̀mùnkù nɛ̀ Dubɛnni nɑɑ̀mùnkù kɔbɛ kɛ̀ bɛ̀ɛ nɑ́kɛ́ Mɔyiisi kɛ dɔ̀: A kó bɛtɔ̃mbɛ̀ tínti ti yóó dɔ̀ɔ̀mu fɔ̃́ nti yiɛ̀ nhɑ ti nɑ̀kɛ́ tì. 
\v 26 Ti bí nɛ̀ ti pobɛ̀ nɛ̀ ti pe nɛ̀ ti wũɔ̃ dɛ̀ yó mbo diɛ ndɛ Kɑdɑɑdi ɛkɛ̀ miɛkɛ. 
\v 27 A kó bɛtɔ̃mbɛ̀ tínti bɛ̀ɛ̀ bɑ̀ɑ́tí tikpɑ̀rìnɛntì ti kɔrimu kɛ̀ ti Yiɛ̀ nKuyie nyóó ti niitɛ́ kɛ̀ tí bɛ̀ dokɛ́nɛ̀ ɑ yɛ̃ ndɛ̀ ndòmmɛ̀.
\p
\v 28 Mɛm̀mɛ kɛ̀ Mɔyiisii nɑ́kɛ́ ikuɔ́ nìùtì Edeɑsɑɑ nɛ̀ Nunni birɛ Sosuwee nɛ̀ Isidɑyɛɛribɛ kó bɛkótíbɛ̀ dɛ kó bɛnìtìbɛ̀ kpɛ́í nkɛ dɔ̀: 
\v 29 Kɛ̀ Kɑdi nɑɑ̀mùnkù kɔbɛ nɛ̀ Dubɛnni kɔku kɔbɛ bɛ̀ɛ̀ bɑɑti tikpɑ̀rìnɛntì kɛ̀ bɛ̀ di nɛinɛ̀ kɛ́séntɛ́ kukó nkɛ̀ di Yiɛ̀ nKuyie ndi niitɛ́ kɛ̀ di dokɛ́, kɛ̀ di tiekɛ dìì mɔ̀nnì di ɛkɛ̀, dí bɛ̀ duɔ́ nKɑdɑɑdi tenkɛ̀ kɛ̀ bɛ̀ɛ tiekɛ. 
\v 30 Kɛ̀ bɛ̀ mɛ nyí bɑ̀ɑ́tí kɛ di nɛinɛ̀ Kɑnnɑhɑ̃ɑ̃ kó kɛtenkɛ̀ miɛkɛ nkɛ di yóó bɛ̀ duɔ́mmɛ̀ kɛtenkɛ̀ di kɔkɛ miɛkɛ.
\p
\v 31 Kɑdi nɑɑ̀mùnkù kɔbɛ nɛ̀ Dubɛnni nɑɑ̀mùnkù kɔbɛ kɛ̀ bɛ̀ dɔ̀: Ti Yiɛ̀ nKuyie nnɑ̀kɛ́ tì tínti ɑ kó bɛtɔ̃mbɛ̀ ti yóó tì dɔ̀ɔ̀mu. 
\v 32 Ti yóó bɑ́ɑ́tímu ti Yiɛ̀ nKuyie nyɛ̃ ndɛ̀ ndòmmɛ̀ kɛ́kɔtɛ Kɑnnɑhɑ̃ɑ̃, ti nɛ́ dɔ́ tì tu, ɑ tí duɔ́ nti kó kɛtenkɛ̀ Suditɛ̃ɛ̃ kó nyɑ́ɑ̀ dii ndi.
\b
\p
\v 33 Mɛm̀mɛ kɛ̀ Mɔyiisi duɔ́ nKɑdɑɑdi nɑɑ̀mùnkù kɔbɛ nɛ̀ Dubɛnni nɑɑ̀mùnkù kɔbɛ nɛ̀ Sosɛfu birɛ Mɑnɑnsee botí kɔbɛ dikéè, Amɔriibɛ kpɑ̀ɑ̀tì Sionni kó dikpɑ̀ɑ̀tìyuu nɛ̀ Bɑsɑ̃ɑ̃ kɔbɛ kóo kpɑ̀ɑ̀tì Ɔku kpɛri nɛ̀ yɛhɛkɛ̀ yɛ̀ɛ̀ bo bɛ tenkɛ̀ mɑ̀nku nɛ̀ yɛhɛkɛ̀ yɛ̀ɛ̀ dɛ̀ tɔ̀kɛ́.
\b
\p
\v 34 Mɛm̀mɛ kɛ̀ Kɑdi nɑɑ̀mùnkù kɔbɛɛ mɑɑ́ Dibonni nɛ̀ Atɑdoti nɛ̀ Adowɛɛ, 
\v 35 nɛ̀ Atɑdɔti-Sofɑnni Yɑsɛɛ nɛ̀ Yoboɑ 
\v 36 nɛ̀ Bɛti-Nimudɑ nɛ̀ Bɛti-Adɑnnii kɛ yɛ̀ fii nyiduotí, kɛ́mɑɑ́nɛ̀ bɛ wũɔ̃ kó yɛtuo.
\p
\v 37 Kɛ̀ Dubɛnni nɑɑ̀mùnkù kɔbɛɛ wɛ̃tɛ kɛ́mɑɑ́ Ɛsibonni Edeyɑde nɛ̀ Kidiyɑtɑimmu 
\v 38 nɛ̀ Nɛbo nɛ̀ Bɑɑdi-Nɛɔɔ nɛ̀ Sibemɑ kɛ́ yɛ̀ cèètɛ yɛyètɛ̀.
\p
\v 39 Mɛm̀mɛ kɛ̀ Mɑnɑsee birɛ Mɑkiidi nɑɑ̀mùnkù kɔbɛɛ do Kɑdɑɑdi ɛì kɛ́bɛti Amɔniibɛ bɛ̀ɛ̀ do dɛ̀ bo. 
\v 40 Kɛ̀ Mɔyiisi bɛ̀ duɔ́ ndɛ kó dihɛì kɛ̀ bɛ̀ɛ kɑri. 
\v 41 Kɛ̀ Mɑnɑsee birɛ tɛrɛ̀ bɛ̀ tu dɛ̀ Yɑii kó kunɑɑ̀mùnkù kɔbɛɛ túótɛ́ Amɔriibɛ ɛkɛ̀ dɛpɑɑ nkpɛyɛ kɛ́ yɛ̀ yu kɛ dɔ̀: Yɑii ɛkɛsí. 
\v 42 Kɛ̀ Nɔbɑɑ kɔbɛɛ do Kenɑti nɛ̀ yɛhɛkɛ̀ yɛ̀ɛ̀ ò tɔ̀kɛ́nɛ̀ kɛ́ yɛ̀ yu o mɔ́mmuɔ nho kó diyètìrì kɛ dɔ̀ Nɔbɑ.
\c 33
\s1 Isidɑyɛɛribɛ yɛ̀ Esibiti kɛ́nkɑtìmɛ̀ kɛ sɔɔti kɛ́tuɔkɛnɛ̀ kukó nSuditɛ̃ɛ̃
\p
\v 1 Ntɛ Isidɑyɛɛribɛ do yɛtì Esibiti kɛ́dɔ́ɔ́tɛ́mɛ̀ bɛ ɑ̃ɑ̃pɔ̀ntĩ̀rɛ̀ dò ndòmmɛ̀, Mɔyiisi nɛ̀ Anɔɔ kɛ̀ bɛ̀ mbɛ̀ ni kɛ̀ bɛ̀ɛ kétɛ́ kɛ́yɛ̀ yɛ̀ɛ̀ bòrɛ̀. 
\v 2 Kɛ̀ Ti Yiɛ̀ nKuyie nnɑ́kɛ́ Mɔyiisi kòo nwɑ̃ũ bɛ̀ kɑ̀tì dɛ̀ kɛ sɔɔti, ntɛ ò do dɛ̀ wɑ̃̀ũ mɛ̀ɛ̀ botí:
\p
\v 3 Dibenni tɑ̃̀nkù ketiwè do nwe diyiè tɛpíítɛ̀ nɛ̀ dinummurì bɛ̀ bɑɑ́mmɛ̀ diyentɛ́bɑnni, kɛ̀ dɛ̀ɛ wentɛ́ kɛ̀ Isidɑyɛɛribɛɛ ítɛ́ Dɑmmusɛsi ɛì kɛ́nkérí kɛ yɛtì kɛ̀ Esibiti tenkɛ̀ kɔbɛ bɛ̀ wùó nkɛ̀ bɛ̀ kérí. 
\v 4 Dɛ mɔ̀nnì kɛ̀ Esibiti kɔbɛ kũrì bɛcíríbɛ̀, bɛ̀ɛ̀ tu Mpo ti Yiɛ̀ nKuyie ndo potɛ́ bɛ̀ kɛ bo bɛnkɛ Esibiti kɔbɛ kù kpeńnìnɛ̀mɛ̀ bɛ kó yɛbɔkɛ̀. 
\v 5 Kɛ̀ Isidɑyɛɛribɛɛ ítɛ́ Dɑmmusɛsi kɛ́kɔtɛ kɛ́bɑ́tɛ́ Sukɔti, 
\v 6 kɛ́ítɛ́ Sukɔti kɛ́kɔtɛ kɛ́bɑ́tɛ́ Etɑmmu ɛì tɛdɔntɛ̀ kó dikpɑ́ɑ̀ mɑ̀nku. 
\v 7 Bɛ̀ ìtɛ́ Etɑmmu ɛì ndi tɛdɔntɛ̀ kó dikpɑ́ɑ̀ mɑ̀nku kɛ́kɔ́ntɛ́ kɛ́wɛ̃tɛní Pi-Aidɔti, Bɑɑdi-Sefɔ̃ɔ̃ ììkɛ̀, kɛ́bɑ́tɛ́ kɛ́nwetí Mikidɔdi. 
\v 8 Bɛ̀ ìtɛ́ Mikidɔdi nwe kɛ́séntɛ́ dɑ̀mɛ́ɛ̀rì tipèntì kou, kɛ́tɑ dikpɑ́ɑ̀ tɛdɔntɛ̀ kpɛri, kɛ́mmɔkɛ mucèmmu yɛwe yɛ̀tɑ̃ɑ̃ti Etɑmmu kó dikpɑ́ɑ̀ tɛdɔntɛ̀ kpɛri miɛkɛ, kɛ́kɔtɛ kɛ́bɑ́tɛ́ bɛ̀ tu dɛ̀ Mɑdɑ. 
\v 9 Bɛ̀ ìtɛ́ Mɑɑrɑ nwe kɛ́tuɔkɛ Edimmu sibií do borɛ̀ tɛpíítɛ̀ nɛ̀ sìdɛ́sì nɛ̀ dɛpuonnɛ sipísìyiekɛ̀, kɛ́bɑ́tɛ́ dɛborɛ̀. 
\v 10 Bɛ̀ ìtɛ́ dɛǹdɛ kɛ́bɑ́tɛ́ tipèntì kóo dɑ̀mɛ́ɛ̀rì pɛɛ́mmɛ̀, 
\v 11 kɛ́ítɛ́ tipèntì kóo dɑ̀mɛ́ɛ̀rì pɛɛ́mmɛ̀ kɛ́bɑ́tɛ́ Sinni kpɑ́ɑ̀ miɛkɛ, 
\v 12 kɛ́ítɛ́ Sinni kpɑ́ɑ̀ tɛdɔntɛ̀ kpɛri kɛ́bɑ́tɛ́ Dofikɑɑ, 
\v 13 kɛ́ítɛ́ Dofikɑɑ kɛ́bɑ́tɛ́ Aduusi, 
\v 14 kɛ́ítɛ́ Aduusi kɛ́bɑ́tɛ́ Defidimmu kɛ í mpɛ̀tɛ́ dɛborɛ̀ mɛniɛ nkɛ yɑ̃̀.
\p
\v 15 Bɛ̀ ìtɛ́ Defidimmu nwe kɛ́bɑ́tɛ́ Sinɑii kó dikpɑ́ɑ̀ tɛdɔntɛ̀ kpɛri miɛkɛ. 
\v 16 Bɛ̀ ìtɛ́ dɛǹdɛ kɛ́bɑ́tɛ́ Kibodoti-Atɑɑfɑ 
\v 17 kɛ́ítɛ́ Kibodoti-Atɑɑfɑ kɛ́bɑ́tɛ́ Asedɔti, 
\v 18 kɛ́ítɛ́ Asedɔti kɛ́bɑ́tɛ́ Ditimɑ, 
\v 19 kɛ́ítɛ́ Ditimɑ kɛ́bɑ́tɛ́ Dimɔɔ Pɛdɛsi, 
\v 20 kɛ́ítɛ́ Dimɔɔ Pɛdɛsi kɛ́bɑ́tɛ́ Dibunɑ, 
\v 21 kɛ́ítɛ́ Dibunɑ kɛ́bɑ́tɛ́ Disɑɑ, 
\v 22 kɛ́ítɛ́ Disɑɑ kɛ́bɑ́tɛ́ Keedɑtɑ. 
\v 23 Bɛ̀ ìtɛ́ Keedɑtɑ nwe kɛ́bɑ́tɛ́ Sefɛɛdi tɑ̃rì. 
\v 24 Sefɛɛdi tɑ̃rì ndi bɛ̀ ìtɛ́mɛ̀ kɛ́bɑ́tɛ́ Adɑdɑ, 
\v 25 kɛ́ítɛ́ Adɑdɑ kɛ́bɑ́tɛ́ Mɑkidɔti, 
\v 26 kɛ́ítɛ́ Mɑkidɔti kɛ́kɔtɛ kɛ́bɑ́tɛ́ Tɑɑti, 
\v 27 kɛ́ítɛ́ Tɑɑti kɛ́bɑ́tɛ́ Tedɑɑ, 
\v 28 kɛ́ítɛ́ Tedɑɑ kɛ́bɑ́tɛ́ Mitikɑ, 
\v 29 kɛ́ítɛ́ Mitikɑ kɛ́kɔtɛ kɛ́bɑ́tɛ́ Asimɔnɑ, 
\v 30 kɛ́ítɛ́ dɛndɛ kɛ́kɔtɛ kɛ́bɑ́tɛ́ Mɔsedɔti, 
\v 31 kɛ́ítɛ́ Mɔsedɔti kɛ́bɑ́tɛ́ Bendee-Yɑkɑnni, 
\v 32 kɛ́ítɛ́ Bendee-Yɑkɑnni kɛ́bɑ́tɛ́ Ɔdi-Kidikɑɑdi, 
\v 33 kɛ́ítɛ́ Ɔdi-Kidikɑɑdi kɛ́bɑ́tɛ́ Yotibɑtɑ, 
\v 34 kɛ́ítɛ́ Yotibɑtɑ kɛ́bɑ́tɛ́ Abudonnɑ, 
\v 35 Bɛ̀ ìtɛ́ dɛǹdɛ kɛ́bɑ́tɛ́ Esiyonni-Kebɛɛ, 
\v 36 kɛ́ítɛ́ Esiyonni-Kebɛɛ kɛ́bɑ́tɛ́ Sinni kpɑ́ɑ̀ tɛdɔntɛ̀ kpɛri bɛ̀ tu dɛ̀ Kɑdɛɛsi. 
\v 37 Bɛ̀ ìtɛ́ Kɑdɛɛsi nwe kɛ́kɔtɛ kɛ́bɑ́tɛ́ Ɔdi tɑ̃rì Edɔmmu tenkɛ̀ mɑ̀nku.
\p
\v 38 Dɛǹdɛ ti Yiɛ̀ nKuyie nduɔ́mmɛ̀ kɛ̀ ikuɔ́ nìùtì Anɔɔ dekɛ Ɔdi tɑ̃rì ĩ́nkɛ̀, ò dɛ nku, kɛ sɔ̃́ ndɛ̀ mɔ̀kɛ yɛbie nsipísìnɑ̀ɑ̀ nɛ̀ bɛ̀ yɛ̀mɛ̀ Esibiti, dibenni tɑ̃̀nkù nummuwè do nwe diyiè ketirì. 
\v 39 Dɛndɛ Ɔdi tɑ̃rì ĩ́nkɛ̀ ò kumɛ̀, kɛ nyóó kú kɛ mɔkɛ yɛbie ntɛkɔ̀ùtɛ̀ nɛ̀ sipísìdɛ́ nɛ̀ yɛ̀tɑ̃ɑ̃ti. 
\v 40 Dɛ kó difɔ̃nkúò ndi Kɑnnɑhɑ̃ɑ̃ kɔbɛ kóo kpɑ̀ɑ̀tì Adɑdi Nɛkɛfu ɛì kou kèèmɛ̀ Isidɑyɛɛribɛ kéróomɛ̀.
\p
\v 41 Kɛ̀ Isidɑyɛɛribɛ ìtɛ́ Ɔdi tɑ̃rì ĩ́nkɛ̀ kɛ́kɔtɛ kɛ́bɑ́tɛ́ Sɑdimɔnɑ, 
\v 42 kɛ́ítɛ́ Sɑdimɔnɑ kɛ́kɔtɛ kɛ́bɑ́tɛ́ Punɔɔ, 
\v 43 kɛ́ítɛ́ Punɔɔ kɛ́kɔtɛ kɛ́bɑ́tɛ́ Obɔdi, 
\v 44 kɛ́ítɛ́ Obɔdi kɛ́bɑ́tɛ́ Iyee-Abɑdimmu, Mɔɑbu tenkɛ̀ mɑ̀nku, 
\v 45 kɛ́ítɛ́ Iye-Abɑdimmu kɛ́bɑ́tɛ́ Dibonni-Kɑdi, 
\v 46 kɛ́ítɛ́ Dibonni-Kɑdi kɛ́bɑ́tɛ́ Adimɔnni-Dibɑdɑtɑimmu, 
\v 47 kɛ́ítɛ́ Adimɔnni-Dibɑdɑtɑimmu kɛ́bɑ́tɛ́ Abɑdimmu tɑ̃rì ĩ́nkɛ̀ kɛ́nwetí Nɛbo ɛì. 
\v 48 Bɛ̀ itɛ́ Abɑdimmu tɑ̃rɛ̀ nyɛ kɛ́bɑ́tɛ́ Mɔɑbu tenkɛ̀ kó kubiriku, kukó nSuditɛ̃ɛ̃ tɑkɛ́, kɛ́nwetí Sedikoo. 
\v 49 Bɛ̀ do bɑ̀tɛ́ kɛ́nhɛ́rinɛ̀ kukó nSuditɛ̃ɛ̃ nwe kɛ́túótɛ́ Bɛti-Yesimɔti kɛ́ntɔ kɛ́tuɔkɛnɛ̀ Abɛɛdi-Sitimmu ɛì Mɔɑbu biriku.
\s1 Isidɑyɛɛribɛ dò nkɛ́totí mɛ̀ɛ̀ botí kɛtenkɛ̀
\p
\v 50 Dɛndɛ Mɔɑbu biriku Suditɛ̃ɛ̃ kó ntɑkɛ́ Sedikoo ììkɛ̀ ti Yiɛ̀ nKuyie mbɛ́innɛ̀mɛ̀ Mɔyiisi kɛ dɔ̀: 
\v 51 Nɑ́kɛ́ Isidɑyɛɛribɛ kɛ tú n yɛ̃ nkɛ̀ di sèńtɛ́ Suditɛ̃ɛ̃ kɛ tɑ Kɑnnɑhɑ̃ɑ̃ tenkɛ̀, 
\v 52 dí bɛti dɛ kó kɛtenkɛ̀ kɔbɛ bɛmɔu, kɛ́mpuɔ̀ mbɛ tenkɑɑnìi yɛtɑ̃́rɛ̀ kpɛsi kɛ́bɔ́kɛ́ timɑ́tì kpɛsi, kɛ́puɔ mbɛ wũɔ̃tɔ̀rɛ̀ kɛ́cɑkɛ bɛ tɔ̀rɛ̀, 
\v 53 kɛ́tiekɛ dihɛì kɛ́mbo. N dì ndi duɔ́mmu kɛ̀ di dò nkɛ́ ndi te. 
\v 54 Di yóó tɑ̃ũ tɛ́tɛ́ nwe kɛ́totí di tenkɛ̀ di nɑɑ̀mùntì dò ndòmmɛ̀, kɛ̀ kùù nɑɑ̀mùnkù sũ ku kó kɛtenkɛ̀ ndɛu, kɛ̀ kùù kɛ̃ńnì ku kɔkɛ nkɛ̃ńnì, kɛ̀ di tɑ̃ũ tɛ́tɛ́ kɛ̀ kùù nɑɑ̀mùnkù do dɛ̀, ku kó kɛtenkɛ̀ kɛ ntú. Di yó ntũ ndi wuɔ ndòmmɛ̀ mmɛ kɛ́totí di tenkɛ̀. 
\v 55 Kɛ̀ di mɛ nyí bɛ̀ti Kɑnnɑhɑ̃ɑ̃ kɔbɛ bɛmɔu, kɛ̀ di yóu bɛ̀mɑbɛ̀ bɛɛ̀ yó ndo ntipotì kɛ́nkũũ di nuɔ, kɛ́ndò nyinɑɑcɛ̃mpɑ̀ɑ̀ti ìì cùɔ́kɛ́ sikɑ̃ũ kɛ kũũ di píìtì kɛ di ɛ̃́ṹtɛ́ dihɛì di bo dìì miɛkɛ. 
\v 56 Dɛ mɔ̀nnì n do nɑ mbɛ̀ dɔ̀ɔ̀mɛ̀ kɛ̀ n nɛ́ mɛ̀ dɔ̀ɔ̀ dí mbɛ.
\c 34
\s1 Kɑnnɑhɑ̃ɑ̃ tenkɛ̀ mɑ̀nkɛ
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 2 Nɑ́kɛ́ Isidɑyɛɛribɛ kɛ tú n yɛ̃ nkɛ̀ di tùɔ̀kɛ dìì mɔ̀nnì Kɑnnɑhɑ̃ɑ̃ tenkɛ̀ n di duɔ́ nkɛ̀ kɛ̀ di bo tiekɛ, ntɛ di tenkɛ̀ mɑ̀nkɛ yóó dítɛ́ dɛ̀.
\m
\v 3 Kubɑkù cɑ̃̀nku bíɛ́kɛ̀ di tenkɛ̀ kó kumɑ̀nku yóó dítɛ́ tɛdɔntɛ̀ kó dikpɑ́ɑ̀ Sinni nwe kɛ́mpɛkɛ́nɛ̀ Edɔmmu kó kutempɛ̃. Kɛ̀ diyiè yìɛ̀ní kɛ̀ɛ̀ bíɛ́kɛ̀ kó kumɑ̀nkuu dítɛ́ mukɔ́kúɔ́ nkóo dɑ̀mɛ́ɛ̀rì. 
\v 4 Kù yóó fitɛ́ kubɑkù cɑ̃̀nku bíɛ́kɛ̀ nkɛ kɛ́kɔ́ntɛ́ kɛ́dekɛ inɑɑ́ nkó ditennì kɛ́yɛ̀nnɛ̀ Sinni, Kɑdɛɛsi-Bɑnnɛɑ kubɑkù cɑ̃̀nku kɛ́tuɔkɛ Asɑɑ-Adɑɑ nɛ̀ Asimɔɔ, 
\v 5 kɛ́kɔtɛ kɛ́dítɛ́ Esibiti kó kukó kɛ́ntɔ kɛ́tuɔkɛnɛ̀ dɑ̀mɛ́ɛ̀rì Mɛditedɑndee.
\m
\v 6 Kɛ̀ diyiè tɑɑ̀ kɛ̀ɛ̀ bíɛ́kɛ̀ kó kumɑ̀nku ntú Mɛditedɑndee kóo dɑ̀mɛ́ɛ̀rì.
\m
\v 7 Kɛ̀ kubɑkù yoú bíɛ́kɛ̀ kó kumɑ̀nkuu dítɛ́ Mɛditedɑndee kóo dɑ̀mɛ́ɛ̀rì kɛ́ntɔ kɛ́tuɔkɛnɛ̀ Ɔdi kó ditɑ̃rì, 
\v 8 kɛ́ítɛ́ Ɔdi kó ditɑ̃rì kɛ́yɛ̀ Debo-Amɑti kɛ́ntɔ kɛ́tuɔkɛnɛ̀ Sedɑti, 
\v 9 kɛ́pɛ̃ɛ̃tɛ́ kɛ́tuɔkɛnɛ̀ Sifunɔɔ, kɛ́pɛ̃ɛ̃tɛ́ kɛ́kɔtɛ Asɑɑ-Anɑnni di kó kutemmɑ̀nku kubɑkù yoú kɔku yó ndɛ kɑ̃́ɑ̃́kɛ́.
\m
\v 10 Diyiè yìɛ̀ní kɛ̀ɛ̀ bíɛ́kɛ̀ kó kumɑ̀nku kunku di kù yɛ̀nnɛ̀ Asɑɑ-Enɑnni kɛ́ntɔ kɛ́tuɔkɛnɛ̀ Sefɑmmu. 
\v 11 Kɛ̀ kùu ítɛ́ Sefɑmmu kɛ́yɛ̀nnɛ̀ Dibudɑ Ainni diyiè yìɛ̀ní kɛ̀ɛ̀ bíɛ́kɛ̀ kɛ́ntɔ kɛ́tuɔkɛnɛ̀ ditennì yúnnímɛ̀ Sennɛsɑdɛti kóo dɑ̀mɛ́ɛ̀rì diyiè yìɛ̀ní kɛ̀ɛ̀ bíɛ́kɛ̀. 
\v 12 Dɛ kó kumɑ̀nku yó mmɛ ndò kɛ́tuɔkɛnɛ̀ Suditɛ̃ɛ̃, kɛ́cɑ́ɑ́tínɛ̀ mukɔ́kúɔ́ nkóo dɑ̀mɛ́ɛ̀rì. Di kó kɛtenkɛ̀ kó kumɑ̀nku yó ndɛ nkɑ̃́ɑ̃́kɛ́.
\p
\v 13 Mɛm̀mɛ kɛ̀ Mɔyiisi nɑ́kɛ́ Isidɑyɛɛribɛ ti Yiɛ̀ nKuyie nhò nɑ̀kɛ́ tì kɛ dɔ̀: Ntɛ ti Yiɛ̀ nKuyie ndi duɔ́ nkɛ̀ɛ̀ tenkɛ̀ díndi iwuɔ nyìwɛi nɛ̀ dikéè kɛ̀ di tɑ̃ɑ̃́ tɛ́tɛ́ kɛ́ kɛ̀ totí. 
\v 14-15 Kɛ̀ Dubɛnni kó kuwuɔ nkɔbɛ nɛ̀ bɛ cɛ̃́ĩ nɛ̀ Kɑdi kó kuwuɔ nkɔbɛ nɛ̀ bɛ cɛ̃́ĩ kɛ́yíɛ́nɛ̀ Mɑnɑnsee kó kuwuɔ ndikéè, bɛmbɛ cɔutɛ́mu bɛ kó kɛtenkɛ̀ kukó nSuditɛ̃ɛ̃ yɑ́ɑ̀ diyiè yìɛ̀ní kɛ̀ɛ̀ bíɛ́kɛ̀ Sedikoo ììkɛ̀.
\s1 Bɛ̀ɛ̀ totí kɛtenkɛ̀ bɛ yètɛ̀
\p
\v 16 Kɛ̀ ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 17 Ntɛ bɛnìtìbɛ̀ bɛ̀ɛ̀ yóó di totí di tenkɛ̀ bɛ yètɛ̀: Edeɑsɑɑ ikuɔ́ nìùtì kɛ́yíɛ́nɛ̀ Nunni birɛ Sosuwee. 
\v 18 Dí dɛitɛ bɑ́ kùù wuɔ mmiɛkɛ wèè tu okótì kòo di teennɛ̀ kɛtenkɛ̀ kó mutotímù. 
\v 19 Ntɛ dɛ kó bɛnìtìbɛ̀ yètɛ̀:
\m Sudɑɑ kó kuwuɔ Yefundee birɛ Kɑdɛbu,
\m
\v 20 Simmɛɔ̃ɔ̃ kó kuwuɔ, Ammiudi birɛ Semmuyɛɛdi.
\m
\v 21 Bɛnsɑmɛɛ kó kuwuɔ, Kisinɔɔ birɛ Edidɑdi.
\m
\v 22 Dɑnni bí kó kuwuɔ, Yokidi birɛ Bukii.
\m
\v 23 Sosɛfu birɛ Mɑnɑnsee kó kuwuɔ, Efodi birɛ Anniyɛɛdi.
\m
\v 24 Sosɛfu birɛ tɛrɛ̀ Efɑdɑimmu kó kuwuɔ, Sifutɑ̃ɑ̃ birɛ Kemmuyɛɛdi.
\m
\v 25 Sɑbunɔɔ kó kuwuɔ, Pɑdunɑki birɛ Edisɑfɑ̃ɑ̃.
\m
\v 26 Isɑkɑɑ kó kuwuɔ Asɑ̃ɑ̃ birɛ Pedɑyɛɛdi,
\m
\v 27 Asɛɛ kó kuwuɔ Sodomii birɛ Aiudi.
\m
\v 28 Nɛfutɑdii kó kuwuɔ, Ammiudi birɛ Pedɑyɛɛdi.
\p
\v 29 Bɛm̀bɛ ti Yiɛ̀ nKuyie ntɑ̃ɑ̃tɛ́mɛ̀ kɛ̀ bɛ̀ bo totí Kɑnnɑhɑ̃ɑ̃ kó kɛtenkɛ̀.
\c 35
\s1 Defii bí kó yɛhɛkɛ̀
\p
\v 1 Kɛ̀ ti Yiɛ̀ nKuyie nnɑ́kɛ́ Mɔyiisi Mɔɑbu kó kubiriku miɛkɛ Suditɛ̃ɛ̃ tɑkɛ́, Sedikoo ììkɛ̀ kɛ dɔ̀: 
\v 2 Nɑ́kɛ́ Isidɑyɛɛribɛ kɛ̀ bɛ̀ɛ duɔ́ nDefiibɛ kɛtenkɛ̀ bɛ kɔkɛ miɛkɛ nɛ̀ bɛ̀ yóó ncɛ̃mmù dɛ̀ bɛ wũɔ̃. 
\v 3 Kɛ̀ bɛ̀ mbo dɛ kó yɛhɛkɛ̀ miɛkɛ kɛ cɛ̃mmù bɛ wũɔ̃ yɛ tenkɛ̀. 
\v 4 Kɛtenkɛ̀ kɛ̀ɛ̀ fitɛ́ dɛ kó yɛhɛkɛ̀ bɛ̀ yó ncɛ̃mmù kɛnkɛ bɛ wũɔ̃, kɛ́túótɛ́ dihɛì kó kuduotí borɛ̀, di kɛ̀ bennɛ́ kɛ̀ kɛ̀ ḿbo mɛ́tìrì sikɔusìnùmmù (500). 
\v 5 Kɛ̀ dí túótɛ́ kuduotí borɛ̀ dikpɑ́ɑ̀ diyiè yìɛ̀ní kɛ̀ɛ̀ bíɛ́kɛ̀ kɛ̀ kɛ̀ mbo mɛ́tìrì tɛkɔupíítɛ̀ (1000), kɛ́bennɛ́ kubɑkù yoú bíɛ́kɛ̀ kɛ̀ kɛ̀ mbo mɛ́tìrì tɛkɔupíítɛ̀ (1000), kɛ́bennɛ́ diyiè tɑɑ̀ kɛ̀ɛ̀ bíɛ́kɛ̀ kɛ̀ kɛ̀ mbo mɛ́tìrì tɛkɔupíítɛ̀ (1000), kɛ́bennɛ́ kubɑkù yoú bíɛ́kɛ̀ kɛ̀ kɛ̀ mbo mɛ́tìrì tɛkɔupíítɛ̀ (1000). Kɛ̀ dihɛì nsokɛ́ dɛ cuokɛ̀. Bɛ̀ yó mmɔkɛ kɛ̀ɛ̀ tenkɛ̀ nkɛ bɛ ɛì fitímɛ̀. 
\v 6 Dí duɔ́ nDefiibɛ yɛhɛkɛ̀ yɛ̀kuɔ̀ disɔ̀rì kpɛyɛ, kɛ̀ dɛ̀ kpɛtɛ́nɛ̀ òmɔù kòò kùɔ onìtì wèe cokɛ́ kɛ́sɔri dɛ kó yɛhɛkɛ̀ miɛkɛ, kɛ́yíɛ́nɛ̀ yɛhɛkɛ̀ tɛyɛ̀ sipísìnɑ̀ɑ̀ nɛ̀ yɛ̀dɛ́ɛ̀. 
\v 7 Yɛmɔu kɛ̀ yɛ̀ɛ wɛ̃nnɛ́ kɛ́mbo yɛhɛkɛ̀ sipísìnɑ̀ɑ̀ nɛ̀ yɛ̀ni kɛ nɛ́ yíɛ́nɛ̀ kɛtenkɛ̀ bɛ̀ yó ncɛ̃mmù dɛ̀ bɛ wũɔ̃. 
\v 8 Isidɑyɛɛribɛ wuɔ mmiɛkɛ bɑ́ kù kùu yɑɑtɛ ku ɛkɛ̀ bɛ̀ kù duɔ́ nyɛ̀ miɛkɛ kɛ́duɔ́ nDefiibɛ, kɛ̀ kùù mɔ̀kɛ kɛ̀ yɛ̀ sũ ku kpɛyɛ nsũ, kɛ̀ kùù mɔ̀kɛ kɛ̀ yɛ̀ kɛ̃ńnì ku kpɛyɛ nkɛ̃ńnì. Bɑ́ kùù wuɔ nkùu yɑɑtɛ ku tenkɛ̀ kɛ́duɔ́ nDefiibɛ bɛ̀ kù duɔ́ nkɛ̀ kɛ̀ mɑ̀mɛ̀.
\s1 Disɔ̀rì kó yɛhɛkɛ̀ yó ntú yɛ̀
\p
\v 9 Kɛ̀ Ti Yiɛ̀ nKuyie nnɑ́kɛ́ Mɔyiisi kɛ dɔ̀: 
\v 10 Nɑ́kɛ́ Isidɑyɛɛribɛ kɛ tú n yɛ̃ nkɛ̀ di sèńtɛ́ dìì mɔ̀nnì kukó nSuditɛ̃ɛ̃ kɛ bo tɑ Kɑnnɑhɑ̃ɑ̃ tenkɛ̀, 
\v 11 di tɑ̃ɑ̃tɛ́ yɛhɛkɛ̀ yɛ̀ɛ̀ yó ntú di kó disɔ̀rì, kɛ̀ dɛ̀ kpɛtɛ́nɛ̀ òmɔù kòò kùɔ onìtì wèe cokɛ́ kɛ́ dì tɑ kɛ́sɔri. 
\v 12 Dɛ kó yɛhɛkɛ̀ yó ntú di kó disɔ̀rì ndi kɛ̀ dɛ̀ɛ yie nkɛ̀ dɛ̀ kpɛtɛ́nɛ̀ òmɔù kòò kùɔ onìtì, wèe cokɛ́ kɛ́tɑ kɛ́yentɛ́nɛ̀ wèè dɔ́ kɛ́pɛitɛ. Kɛ̀ dɛ̀ kpɛtɛ́nɛ̀ òmɔù kòò kùɔ onìtì bɛ̀ bɑ́ɑ́ ò kùɔ kɛ mu nyí ò tɔní ditĩ̀nnì ììkɛ̀ kɛ̀ dì ò bekɛ́nɛ̀. 
\v 13 Di yóó bɛ̀ duɔ́ nyɛ̀ɛ̀ ɛkɛ̀ miɛkɛ disɔ̀rì kpɛyɛ yó mbo yɛ̀kuɔ̀ ndi. 
\v 14 Di tɑ̃ɑ̃tɛ́ yɛ̀tɑ̃ɑ̃ti Suditɛ̃ɛ̃ kó nyɑ́ɑ̀, yɛ̀tɑ̃ɑ̃ti Kɑnnɑhɑ̃ɑ̃ kó dihɛì. 
\v 15 Dɛ kó yɛhɛkɛ̀ yɛkuɔ̀ yɛnyɛ yó ntú Isidɑyɛɛribɛ kó disɔ̀rì ndi, nɛ̀ bɛpɔ̀ɔ̀bɛ̀ bɛ̀ɛ̀ bo di cuokɛ̀. Kɛ̀ dɛ̀ kpɛtɛ́nɛ̀ òmɔù kòò kùɔ onìtì, dɛ yiɛ̀ mbo nɑ kɛ́cokɛ́ kɛ́sɔri yɛ miɛkɛ dìmɑrì.
\p
\v 16 Kòò mɔù potɛ́ otɔù nɛ̀ kunɛnkù mɑkù timɑ́tì kɔku, kòò kú, dɛ yiɛ̀ nhonitikɔ̀ùtì nwe, bɛ̀ɛ ò kùɔ. 
\v 17 Kòò mɛ nhò bɔ̀tɛ́ ditɑ̃́rì ndi kòò kú dɛ̀ yiɛ̀ nhonitikɔ̀ùtì nwe, bɛ̀ɛ ò kùɔ. 
\v 18 Kɛ̀ dɛ̀ mɛ ndò nhò ò potɛ́nɛ̀ kudɔú nku kòò kú, dɛ yiɛ̀ nhonitikɔ̀ùtì nwe, bɛ̀ɛ ò kùɔ. 
\v 19 Wèè dò nkɛ́pɛitɛ kòò ò mɑ̀ɑ́nɛ̀ dɛ̀ wèe ò kùɔ. 
\v 20 Kòò mɔù níí nhotɔù koò tèntɛ kòò do yoo ò díi nkóò bɔ̀tɛ́ dɛ̀mɑrɛ̀ kòò ku, 
\v 21 yoo kòo miɛkɛ kɛɛ̀ mɛ nhò pɛ́ì kòò ò potɛ́ dinɑcɛkutiri kòò ku, onitikɔ̀ùtì nwe, wèè dò nkɛ́pɛitɛ kòò ò mɑɑ́nɛ̀ dɛ̀ wèe ò kùɔ.
\p
\v 22 Kɛ̀ dɛ̀ mɛ ndò ndɛ̀ kpɛtɛ́nɛ̀ òmɔù kòò tèntɛ òmɔù kòò do kɛ ku, kɛ̀ mɛníìmmɛ̀ í bo bɛ cuokɛ̀, ò mɛ nyí ò dìí nkoò bɔ̀tɛ́ dɛ̀mɑrɛ̀, 
\v 23 kòò mɛ ndootɛ́ ditɑ̃́rì ndi kɛ̀ dì ò mɑ̀ɑ́nɛ̀ kòò ku, kɛ do í tú o dootitɔù, kòò do í ò dɔ́nɛ̀ mɛyɛi, 
\v 24 kɛ̀ dɛ̀ dò mmɛmmɛ ditĩ̀nnìi tũnnɛ ikuɔ́ ìì tukúnɛ̀ wèè kùɔ nɛ̀ wèè dɔ́ kɛ́pɛitɛ kɛ̀ bɛ̀ɛ bekɛ́nɛ̀ dɛ yiɛ̀. 
\v 25 Kɛ̀ ditĩ̀nnìi dɛɛtɛ́ wèè kùɔ wèè dò nkɛ́pɛitɛ kòò bɑ́ɑ́ ò kùɔ. Ditĩ̀nnìi ò tɛ̃̀ńnɛ́ dihɛì ò do sɔri dì, kòo nkɛ̀ bo kɛ bɑɑnɛ̀ ikuɔ́ nìùtì diɛwè bɛ̀ còú nwe mɛkùɔ̀ nhò bo kúmɛ̀. 
\v 26 Kɛ̀ dɛ̀ mɛ ndò nwèè kùɔ ò yɛ̀nní dihɛì ò do sɔri dì kó mutentɑ̃́ɑ̃́. 
\v 27 Kɛ̀ wèè dò nkɛ́pɛitɛ kòò ò yɑ̀ kòò í bo dihɛì ò do sɔri dì kó mutentɑ̃́ɑ̃́ nkòò ò kùɔ ò í cɑ̀ɑ̀rɛ̀. 
\v 28 Kɛ̀ dɛ̀ mɛ nkpɛtɛ́nɛ̀ òmɔù kòò kùɔ onìtì ò dò nkɛ́mbo disɔ̀rì kó dihɛì ndi kɛ bɑɑnɛ̀ ikuɔ́ nìùtì diɛwè bɛ̀ cou nwè mɛkùɔ̀ nhò bo kúmɛ̀ kòò nɛ́ wɛ̃tɛ o ɛì.
\p
\v 29 Di yó ntũ nyiì kuɔ́ nɛ̀ di yɑɑ̀bío bɑ́ kɛ̀ di borɛ̀.
\b
\p
\v 30 Kɛ̀ dɛ̀ tùɔ̀kɛní kɛ dò mmɛmmɛ wèè kùɔ onìtì bɛ̀ dò nkɛ́ nyóó ò kùɔ kɛ̀ bɛnìtìbɛ̀ pɛ́u bɛɛ̀ yɛ̃́ mùù te, bɛ̀ bɑ́ɑ́ kuɔ òmɔù kòo nìtì òmɑ́ɑ̀ weè tu ò yɛ̃́ mùù te. 
\v 31 Òmɔù bɑ́ɑ́ kuɔ onìtì kɛ́ndò ndi ò kùɔ kɛ̀ dí cɔutɛ́ ticuuti kóò yóu, ò dò nkɛ́kuɔmu. 
\v 32 Di bɑ́ɑ́ yie nkòò mɔù dí yietí ticuuti kɛ́yɛ̀nní disɔ̀rì kó dihɛì kɛ́konní o ɛì, kɛ̀ ikuɔ́ nìùtì diɛwè mu nyí ku.
\p
\v 33 Di yóó kɑri dìì ɛì di bɑ́ɑ́ cóú mmɛnitiyĩ̀ĩ̀, mɛnitiyĩ̀ĩ̀ nsĩ̀nkùnko dihɛì ndi, dɛ̀mɑrɛ̀ í bo di bo dɔɔ̀ dɛ̀ kɛ̀ dɛ̀ɛ wénkùnnɛ dihɛì mɛnitiyĩ̀ĩ̀ nsĩ̀nkùnnɛ dì, kɛ̀ dɛ̀ í tú di bo kuɔmɛ̀ wèè kùɔ. 
\v 34 Di bɑ́ɑ́ sĩnkùnnɛ dihɛì di yóó kɑri dì, n yó mbo dì, mí ndi Yiɛ̀ nKuyie n yó mbomu díndi Isidɑyɛɛribɛ di cuokɛ̀.
\c 36
\s1 Bɛnitipòbɛ̀ bɛ̀ɛ̀ tiekɛ bɛ yɛmbɛ̀ tenkɛ̀ bɛ̀ dò nkɛ́nyenkú mɛ̀ɛ̀ botí
\p
\v 1 Kɛ̀ Sosɛfu birɛ Mɑnɑnsee birɛ Mɑkiidi kó dɛbirɛ Kɑdɑɑdi nɑɑ̀mùnkù kɔbɛ nɛ̀ Isidɑyɛɛribɛ kó bɛkotibɑɑbɛ̀ nɛ̀ bɛ cɛ̃́ĩ kó bɛkótíbɛ̀ɛ kɔtɛ kɛ́yɑ̀ Mɔyiisi kóò nɑ̀kɛ́ kɛ dɔ̀: 
\v 2 Ti Yiɛ̀ nKuyie ndɑ nɑ̀kɛ́mu kɛ tú di tɑ̃ɑ̃́ tɛ́tɛ́ kɛ́totí kɛtenkɛ̀ Isidɑyɛɛribɛ kó iwuɔ kɛ dɑ nɑ̀kɛ́ kɛ tú: Á duɔ́ nti tebitɛ Sedofɑdi kó kɛtenkɛ̀ o sɑpɑ̀mbɛ̀. 
\v 3 Kɛ̀ bɛ̀ mɛ nyenkɛ Isidɑyɛɛribɛ wuɔ mmiɛkɛ kutɛkù mɑkù, ti kéétɛ́ dɛ kó kɛtenkɛ̀ kɛ yíɛ́ bɛ̀ yenkɛ kùù wuɔ nkɔkɛ, dɛ mɔ̀nnì ti kó kɛtenkɛ̀ yóó yɑɑtɛmu. 
\v 4 Kɛ̀ mɛtɛ̃́nnímɛ̀ kó dibenni tùɔ̀kɛ Kuyie nkó dibɑnni diɛrì, bɛ kó kɛtenkɛ̀ɛ nɑɑ́ mbɛ̀ yenkɛ kùù wuɔ nkɔkɛ kɛ tɛ̃́nkɛ bɑ́ ntú bɛ yɛmbɛ̀ kɔkɛ.
\p
\v 5 Mɛm̀mɛ kɛ̀ Mɔyiisii nɑ́kɛ́ Isidɑyɛɛribɛ ti Yiɛ̀ nKuyie nhò nɑ̀kɛ́ tì kɛ dɔ̀: Sosɛfu yɑɑ̀bí bɛ́i nkɛ nɑɑtimu. 
\v 6 Ntɛ Ti Yiɛ̀ nKuyie nnɑ̀kɛ́ tì tìì tukúnɛ̀ Sedofɑdi kó bɛsɑpɑ̀mbɛ̀ bɛ̀ɛ̀ yenkɛ bɛ̀ dɔ́ wè, kɛ̀ dɛ yiɛ̀ ncɛ̃́nkɛ tú bɛ kó kuwuɔ nkou. 
\v 7 Kɛ̀ dɛ̀ɛ yie nkɛ̀ Isidɑyɛɛribɛ kó kɛtenkɛ̀ bɑ́ ntɑɑ̀ iwuɔ ntɛì kɔkɛ miɛkɛ, Isidɑyɛɛribɛ bɑ́ kùù wuɔ kɛ̀ kù nkɑri ku yɛmbɛ̀ tenkɛ̀. 
\v 8 Isidɑyɛɛribɛ wuɔ mmiɛkɛ bɛnitipòbɛ̀ bɛ̀ɛ̀ yóó tiekɛ bɛ yɛmbɛ̀ tenkɛ̀ bɛ̀ nyenkú bɛ kó tinɑɑ̀mùntì miɛkɛ nkɛ, kɛ̀ dɛ̀ɛ yie mbɑ́ wèè Isidɑyɛɛri kòo nte o yɛmbɛ̀ tenkɛ̀. 
\v 9 Mɛɛ̀ botí nku bɑ́ kùù nɑɑ̀mùnkù bo ntemɛ̀ ku yɛmbɛ̀ tenkɛ̀.
\p
\v 10-11 Mɛm̀mɛ kɛ̀ Tisododi kó bɛsɑpɑ̀mbɛ̀ Mɑdɑ nɛ̀ Tidisɑɑ nɛ̀ Okudɑ nɛ̀ Midikɑ nɛ̀ Nɔɑ kɛ̀ bɛ̀ɛ tũnnɛ ti Yiɛ̀ nKuyie ndo nɑ̀kɛ́ tì Mɔyiisi kɛ́yenkɛ bɛ cicɛ tebìí kó bɛdɑpɑ̀mbɛ̀. 
\v 12 Sosɛfu birɛ Mɑnɑnsee kó ibí nyi bɛ̀ do yenkɛmɛ̀ kɛ̀ bɛ cicɛbɛ̀ tenkɛ̀ nkpɑɑ́ kɛ tú bɛ nɑɑ̀mùnkù kɔkɛ.
\b
\p
\v 13 Isidɑyɛɛribɛ bo dìì mɔ̀nnì Mɔɑbu biriku miɛkɛ kukó nSuditɛ̃ɛ̃ pɛɛ́mmɛ̀ kɛ wetí Sedikoo, dɛndɛ ti Yiɛ̀ nKuyie nduɔ́mmɛ̀ Mɔyiisi i nkuɔ́ nɛ̀ yɛ ntɑnnɛ̀ kòo dɛ̀ mbɛ̀ tùo.