\id NEH di16.all Novembre 1998 BJ Parakou B{enin
\ide UTF-8
\h Nɛemii
\toc1 Nɛemii
\toc2 NƐEMII
\mt1 Nɛemii
\imt1 Di mpɑ́tíri tɔ tìì nɑ́ɑǹtì
\ip Nɛemii kó dipɑ́tíri ti nɑ́ɑ́ nNɛemii kpɛ́í nkɛ, wèè do tú okpɑ̀ɑ̀tì Aditɑkisɛsi kóo tɔ̃ntì diɛwè. Kòo kɔbɛ mɑbɛ̀ɛ kò nSedisɑdɛmmu kɛ́wɛ̃tɛní kóò nɑ̀kɛ́ Sedisɑdɛmmu ɛì domɛ̀ kɛ̀ dɛ̀ dò mmɛsémmɛ̀ kòo tì kèè kòo yɛ̀mmɛ̀ɛ cɑɑ̀rɛ̀ mɛdiɛ̀. Mɛm̀mɛ kòo mɔɔ kucɛ okpɑ̀ɑ̀tì kɛ bo kò nkɛ́yɑ̀ Sedisɑdɛmmu do mɛ̀ɛ̀ botí, kɛ bo wɛ̃tɛ kɛ́mɑɑ́ iduotí kɛ́mɑɑ́nɛ̀ dihɛì.
\ip Nɛemii kɔ̃nyɑuti kpɛ́í ndo te kɛ̀ kuduotíi mɑɑ́ kɛ́deè, dɛ̀ do ò yóùnɛ̀mu mɛdiɛ̀, kɛ yɛ̃́ bɛ dootitɔbɛ̀ do bomɛ̀mu kɛ dɔ́ kɛ́pɑɑ mmutɔ̃mmú, kòo ndɑkɛ bɛ kpɛ́í nkɛ yɑ́úkùnko bɛtɔ̃mbɛ̀ kɔ̃̀ntì, kɛ̀ kuduotí kó mumɑrimùu deè yɛwè sipísìnùmmù nɛ̀ yɛ̀dɛ́ɛ̀ miɛkɛ.
\ip Nɛemii do dɔ́ kɛ́tũntɛmu kuduotí kupɑ̀nkù ò mɑɑ́ kù kó dibɑnni, kɛ́bɛnkɛ bɛ̀ dò nkɛ́mpĩ́ mmɛ̀ɛ̀ botí Kuyie ncĩ́ɛ̃̀tɛ̀ nɛ̀ bɛ̀ɛ̀ pĩ ntɛ miɛkɛ mutɔ̃mmú, nɛ̀ bɛ̀ bo ndɑkɛmɛ̀ tɛom̀pùtɛ̀ yiè kpɛ́í.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Okpɑ̀ɑ̀tì Aditɑkisɛsi pɑ̃mɛ̀ Nɛemii kucɛ kòo bo kò nkɛ́pɑ̀ɑ̀rɛ̀ Sedisɑdɛmmu 1:1-2:10
\io1 2. Bɛ̀ wɛ̃̀tɛ kɛ mɑɑ́mɛ̀ Sedisɑdɛmmu kó iduotí 2:11-7:72
\io1 3. Ɛsitɑdɑsi kɑ̀ɑmmɛ̀ Kuyie nkuɔ́ pɑ́tíri kɛ̀ Sifubɛ bɑntɛ́ bɛ̀ yetɛ́nɛ̀mɛ̀ Kuyie 8-10
\io1 4. Nɛemii do pĩ mmùù tɔ̃mmú tɛmù 11-13
\c 1
\s1 Bɛ̀ nɑ̀kɛ́mɛ̀ Nɛemii Sedisɑdɛmmu kpɛti dòmmɛ̀
\p
\v 1 Okpɑ̀ɑ̀tì Aditɑkisɛsi kpɑ̀tì benni sipísìdɛ́ kpɛri miɛkɛ nkɛ, otɑ̃̀nkù bɛ̀ tu wè Kiside\f + \fr 1:1 \fr*\fk Kiside: \fk*\ft Bɛ̀ do kɑɑmmɛ̀ bɛtɑ̃̀ɑ̃̀bɛ̀ nɛ̀ ti bɛ̀ kɑɑmmɛ̀ dɛ̀ í wɛ̃. Bɛ kóo tɑ̃̀nkù Kiside berínɛ̀ ti kó bɛtɑ̃̀ɑ̃̀bɛ̀ tɛpíítɛ̀ nɛ̀ oketiwè nɛ̀ tɛpíítɛ̀ nɛ̀ odɛ́rì dɛ cuokɛ̀ nkɛ̀ (diyosɛ́ɛ̀ nɛ̀ mɛwɑɑnɑɑ̀ ndɛ cuokɛ̀).\ft*\f* o miɛkɛ, kɛ sɔ̃́ mmí Akɑdiɑ birɛ Nɛemii kɛ̀ m bo dihɛidiɛ̀ Susi miɛkɛ. 
\v 2 Kɛ̀ n tebitɛ Anɑnni ítɛ́ní Sedisɑdɛmmu Sudɑɑ tenkɛ̀ kɛ́kɔtɛní kɛ nɛínɛ̀ bɛnìtìbɛ̀ mɑbɛ̀, kɛ̀ m bɛ̀ bekɛ sifubɛ bɛ̀ɛ̀ do tú tidɑɑtì kɛ kònko bɛ kpɛti dòmmɛ̀, nɛ̀ Sedisɑdɛmmu kpɛti dòmmɛ̀. 
\v 3 Kɛ̀ bɛ̀ n tɛ̃̀ńnɛ́ kɛ dɔ̀: Tidɑɑtì tìì kònko kɛ bo Sudɑɑ tempɛ̃ mmiɛkɛ bɛ̀ bo mɛsémmɛ̀ diɛmɛ̀ miɛkɛ nkɛ nɛ̀ ifɛi diɛyì. Sedisɑdɛmmu kó iduotí pɔ̀ntɛ pɔntɛmu, kɛ̀ yɛcɑ̀kɛ̀ yɛ̀ɛ̀ do kpetí dihɛì kó yɛbòrɛ̀ kɛ̀ yɛ̀ cɔ̀útɛ́.
\s1 Nɛemii kuɔ́nnɛ̀mɛ̀ Kuyie nSifubɛ kpɛ́í
\p
\v 4 N kèè dìì mɔ̀nnì dɛ kó tinɑ́ɑǹtì kɛ́nkɑri kɛ kuɔ̀, kɛ dɔ̀ yɛwe pɛ́u kɛ̀ n yɛ̀mmɛ̀ cɑ̀ɑ̀rɛ̀ mɛdiɛ̀ nkɛ̀ m boú dinùù kɛ́nkuɔ̀nnɛ̀ Kuyie nkunku kùù bo kɛĩ́nkɛ̀ kɛ tú: 
\v 5 Áú! N Yiɛ̀ nKuyie nfɔ̃́ nwèè bo kɛĩ́nkɛ̀, fɔ̃́ nwèè dɛu kɛ̀ ti dɑ dé, fɔ̃́ nwèè pĩ mmɛtɑummɛ̀ ɑ dɔ̀ɔ̀nɛ̀mɛ̀ ɑ kɔbɛ, kɛ kuɔ̀ mmɛsémmɛ̀ bɛ̀ɛ̀ dɑ dɔ́ kɛ pĩ́ nhɑ tɑnnɔ̀, 
\v 6 wɛ̃ɛ̃tɛní m bíɛ́kɛ̀, kéntɛ́ kɛ́keè n dɑ kuɔ̀nnɛ̀ dìì dɑbònnì, n dɑ bɑ́ɑ́mmu kɛyènkɛ̀ nɛ̀ kuyie ɑ kó bɛtɔ̃mbɛ̀ Isidɑyɛɛribɛ kpɛ́í, ti bɑntɛ́mu mɛyɛi ntínti Isidɑyɛɛribɛ ti dɔ̀ɔ̀ mɛ̀. Mí nnɛ̀ n yɛmbɛ̀ ti cɑ̀ɑ̀rɛ̀mu. 
\v 7 Ti dɑ cɑ̀ɑ̀rɛ̀mu mɛdiɛ̀, ti í tũ̀nnɛmɛ̀ ɑ tɑnnɔ̀ nɛ̀ ɑ tié nnɛ̀ ɑ kuɔ́ ɑ duɔ́ ndɛ̀ ɑ kóo tɔ̃ntì Mɔyiisi. 
\v 8 Kuyie ndentɛní ɑ do nɑ̀kɛ́ dìì nùù ɑ kóo tɔ̃ntì Mɔyiisi dìì tu: Kɛ̀ ti yetɛ ɑ kpɛti ɑ bo ti cíɛ nkɛ̀ tí tɑ ibotí tɛì miɛkɛ. 
\v 9 Kɛ̀ ti mɛ nwɛ̃̀tɛní ɑ borɛ̀ kɛ tũ̀nnɛ ɑ tɑnnɔ̀ kɛ dɔɔri yɛ̀ yɛ̃mmɛ̀, bɑ́ kɛ̀ dɛ̀ sɔ̃́ nti cìɛ́tɛ́ kɛ bo itemmɑ̀nkɛ, ɑ bo wɛ̃tɛ kɛ́ ti tíí ndibòrì ɑ tɑ̃ɑ̃tɛ́ dì kɛ dɔ́ ɑ yètìrì ndɛ̀ yu. 
\v 10 Ti Yiɛ̀ nKuyie nti tú ɑ tɔ̃mbɛ̀ mbɛ, ɑ nìtìbɛ̀, fɔ̃́ɔ̃̀ ti dɛɛtɛ́ nɛ̀ ɑ kó tikpetì nɛ̀ ɑ wɛ̃rímú diɛmù. 
\v 11 Áú! N Yiɛ̀ nKuyie, kéntɛ́ mí nhɑ kóo tɔ̃ntí, n dɑ bɑ́ɑ́mmɛ̀, ɑ kó bɛtɔ̃mbɛ̀ tɔbɛ̀ bɛ̀ɛ̀ dɑ dé, bɛ̀ dɑ bɑ́ɑ́mmɛ̀, dɔɔ̀ n dɑ mɔ́ú tì, yóu kòo kpɑ̀ɑ̀tì n kéntɛ́.
\p Dɛ mɔ̀nnì míì do tú wèè yɑurí okpɑ̀ɑ̀tì mɛnɑɑ̀ nkòò yɔ̃̀.
\c 2
\s1 Bɛ̀ pɑ̃mɛ̀ Nɛemii kucɛ kòò bo kò nSedisɑdɛmmu
\p
\v 1 Okpɑ̀ɑ̀tì Aditɑkisɛsi kpɑ̀tì benni sipísìdɛ́ kpɛri miɛkɛ bɑkɛ, otɑ̃̀nkù bɛ̀ tu wè Nisɑ̃ɑ̃\f + \fr 2:1 \fr*\fk Nisɑ̃ɑ̃: \fk*\ft Bɛ̀ do kɑɑmmɛ̀ bɛtɑ̃̀ɑ̃̀bɛ̀ nɛ̀ ti bɛ̀ kɑɑmmɛ̀ dɛ̀ í wɛ̃. Bɛ kóo tɑ̃̀nkù Nisɑ̃ɑ̃ berínɛ̀ ti kó bɛtɑ̃̀ɑ̃̀bɛ̀ otɑ̃ɑ̃́nwè nɛ̀ onɑɑnwè dɛ cuokɛ̀ nkɛ (tibéntì nɛ̀ dinɔ́tɔ̃ɔ̃̀rì dɛ cuokɛ̀).\ft*\f* o miɛkɛ, kɛ sɔ̃́ ndɛ̀ tu n kó mɛfíè mmɛ m bo duɔ́mmɛ̀ okpɑ̀ɑ̀tì mɛnɑɑ̀. Kɛ̀ n túótɛ́ mɛnɑɑ̀ kɛ́ mmɛ̀ yɑurí okpɑ̀ɑ̀tì, kɛ̀ n yɛ̀mmɛ̀ cɑ̀ɑ̀rɛ̀, mɛ̀ mu nyí cɑ̀ɑ̀rɛ̀ diyiè mɑrì o ììkɛ̀. 
\v 2 Kòo kpɑ̀ɑ̀tì m bekɛ́ kɛ dɔ̀: A yɛ̀mmɛ̀ cɑ̀ɑ̀rɛ̀ nɛ̀ bɑ? A kɔ̃̀ntì bɑɑ nɑɑtimɑɑ̀? Yɑ́ɑ̀ tìmɑtì tiì dɑ kɔɔ́nnɛ̀?
\p Kɛ̀ n kɔ̃m̀bùɔ̀tìi do mɛdiɛ̀. 
\v 3 Kɛ̀ nhò nɑ̀kɛ́ kɛ dɔ̀: Okpɑ̀ɑ̀tì ḿbo sɑ̃́ɑ̃̀! N yɛ̀mmɛ̀ bo yĩ́mɛ kɛ bɑ́ɑ́ cɑɑ̀rɛ̀ dihɛì n yɛmbɛ̀ kũrí dì pɔ̀ntɛ dìì mɔ̀nnì kɛ̀ yɛcɑ̀kɛ̀ yɛ̀ɛ̀ kpetí dihɛì kó iduotí kɛ̀ yɛ̀ cɔ̀útɛ́? 
\v 4 Kòo kpɑ̀ɑ̀tì m bekɛ́ kɛ dɔ̀: A yɛ̀mmɛ̀ dòmmɛ̀?
\p Nɛ̀ n yɛ̀mmɛ̀ miɛkɛ kɛ̀ m bɑ́ntɛ̀ Kuyie nkunku kùù bo kɛĩ́nkɛ̀, 
\v 5 kɛ́bɛ́innɛ̀ okpɑ̀ɑ̀tì kɛ dɔ̀: Okpɑ̀ɑ̀tì kɑ̀ɑ bo yie nkɛ́ n dɔɔ̀ diwɛ̀ì, mí nhɑ kóo tɔ̃ntì, m pɑ̃ kucɛ kɛ̀ n kɔtɛ Sudɑɑ tenkɛ̀ n yɛmbɛ̀ kũrí dìì ɛì kɛ́wɛ̃tɛ kɛ́ dì mɑɑ́.
\p
\v 6 Kòo kpɑ̀ɑ̀tì m bekɛ́ kɛ dɔ̀: A dɔ́ kɛ́mɔntɛ kɛ̀ dɛ̀ mmɑmɛ̀? A bo wɛ̃tɛní ɔ̃̀mmɔ̀nnì?
\p Kɛ sɔ̃́ nhonitipokpɑ̀ɑ̀tì kɑ̀ri koò pɛ̀kɛ́nɛ̀, kɛ̀ nh ò nɑ̀kɛ́ m bo wɛ̃tɛní dìì mɔ̀nnì, kɛ̀ dɛ̀ nhò sɑ̀nnɛ̀, kòò yie nkɛ dɔ̀: Kɔtɛ. 
\v 7 Kɛ̀ n yíɛ́ kɛ dɔ̀: Okpɑ̀ɑ̀tì kɑ̀ɑ bo yie nhɑ́ n duɔ́ nyɛpɑ́tɛ yɛ̀ɛ̀ bo nte kɛ̀ kukó nyɑ́ɑ̀ kóo kùmɑ̀ndɑ́ɑ̀bɛ̀ n yóu kɛ̀ m pɛ̃ɛ̃tɛ́ kɛ́tuɔkɛ Sudɑɑ tenkɛ̀, 
\v 8 kɛ́ n duɔ́nnɛ̀ dipɑ́tíri tɛrì m bo duɔ́ ndì Asɑfu wèè bɑ̀ɑ fɔ̃́ nhokpɑ̀ɑ̀tì ɑ tie nkòo n duɔ́ nyidɛí kɛ̀ n dɔɔ̀nɛ̀ yɛcɑ̀kɛ̀, yɛ̀ɛ̀ bo kpetínnɛ́ tɛcɛ̃kpetɛ̀ tɛ̀ɛ̀ tɔ̀kɛ́nɛ̀ Kuyie ncĩ́ɛ̃̀tɛ̀ nɛ̀ dihɛì kó kuduotí nɛ̀ n cĩ́ɛ̃̀tɛ̀ n yó mbo tɛ̀.
\p Kòo kpɑ̀ɑ̀tìi yie nkɛ yɛ̀ nni nduɔ́ nkɛ yɛ̃́ Kuyie ndo m bonɛ̀mɛ̀ kɛ̀ n dɔɔri mɛsɑ̀ɑ̀. 
\v 9 Mɛm̀mɛ kɛ̀ n tuɔkɛ kukó nyɑ́ɑ̀ kóo kùmɑ̀ndɑ́ɑ̀bɛ̀ borɛ̀ kɛ́ bɛ̀ duɔ́ nyɛpɑ́tɛ. Okpɑ̀ɑ̀tì do duɔ́ nkɛ̀ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ nɛ̀ bɛsɑ̃ndèèbɛ̀ kɛ̀ bɛɛ̀ n cíe. 
\v 10 Odoniibɛ botí kou Sɑ̃mbɑdɑɑ nɛ̀ Tobiyɑ wèè do ò pòkoo kɛ bɑkɛ́ Amɔɔ ɛì, kɛ̀ bɛ̀ɛ keè òmɔù kɔ̀tɛnímɛ̀ kɛ bo tũntɛ Isidɑyɛɛribɛ kpɛti, kɛ̀ dɛ̀ɛ bɛ̀ yonkɛ mɛdiɛ̀.
\s1 Nɛemii cemmɛ̀ Sedisɑdɛmmu kɛ pɑ̀ɑ̀rɛ̀ iduotí
\p
\v 11 Kɛ̀ n tuɔkɛ Sedisɑdɛmmu kɛ́mmɔkɛ yɛwe yɛ̀tɑ̃ɑ̃ti, 
\v 12 bɑ́ m mu nyí nɑ̀kɛ́ òmɔù Kuyie nyɛ̃ n dɔɔ̀ tì Sedisɑdɛmmu, kɛ́ítɛ́ kɛyènkɛ̀ kɛ́dekɛ nsɑ̃mmɑrímú kɛ̀ bɛnìtìbɛ̀ mɑbɛ̀ n cíe, fɛɔ̃̀fɛ̀ mɑfɛ̀ do í ti nɛínɛ̀ kɛ̀ dɛ̀ í tú n do dekɛ wèè sɑ̃mmɑrímú. 
\v 13 Mɛm̀mɛ n yìtɛ́mɛ̀ kɛyènkɛ̀ kɛ́yɛ kubiriku bíɛ́kɛ̀ kó dibòrì kɛ kétɛ́ kɛ́nwetí musĩ̀mmù bintɛ nɛ̀ dibòrì bɛ̀ tu dì tikùtì kó dibòrì, kɛ́nwéitɛ mɛsɑ̀ɑ̀ Sedisɑdɛmmu kó iduotí kɛ́nsɔ̃́ nyì dùùtɛ duutɛ kɛ̀ yɛcɑ̀kɛ̀ cùɔ́. 
\v 14 Kɛ̀ n kétɛ́ kɛ́pɛ̃ɛ̃tɛ́ tɛbintɛ kó dibòrì kɛ́nwetí okpɑ̀ɑ̀tì kó kubinku, kɛ̀ n dèkɛ wèè sɑ̃mmɑrímú tɛ̃́nkɛ í mpɛ̀tɛ́ mɛfíè nkɛ bo pɛ̃ɛ̃tɛ́. 
\v 15 Kɛ̀ n yóu kɛ́tũnnɛ dikondɑɑ kɛ́bɔ́u, kɛyènkɛ̀ kɛ̀mɑ́ɑ̀ bɑkɛ, kɛ wéitɛ kuduotí mɛsɑ̀ɑ̀ kɛ́kɔtɛ kɛ́tũnnɛ kubiriku kó dibòrì kɛ́konní.
\p
\v 16 Bɛ̀ɛ̀ bɑkɛ́ dihɛì bɛ kóò mɔù do í yɛ̃́ n kɔ̀tɛ kɛ̀ nɛ̀ m pĩ mmù. M mɛ mmu n do í nɑ̀kɛ́ tìmɑtì Sifubɛ nɛ̀ ikuɔ́ nìùbɛ̀ nɛ̀ bɛhɛikɛ̀nkótíbɛ̀ nɛ̀ bɛkótíbɛ̀ sɔmbɛ, òmɔù do í yɛ̃́ n kɔ̀tɛ kɛ̀. 
\v 17 Dɛ mɔ̀nnì ndi m bɛ̀ nɑ̀kɛ́mɛ̀ kɛ dɔ̀: Wéntɛ́nɛ̀ ti bo mɛ̀ɛ̀ sémmɛ̀ miɛkɛ, Sedisɑdɛmmu domu kɛ nɑɑ́ ntidobontì, kòo bòrɛ̀ kó yɛcɑ̀kɛ̀ cùɔ́. Kɔtɛnɛ̀ní kɛ̀ ti mɑɑ́ Sedisɑdɛmmu kó iduotí kɛ tɛ̃́nkɛ bɑ́ mbo ifɛi miɛkɛ.
\p
\v 18 Mɛm̀mɛ m bɛ̀ nɑ̀kɛ́mɛ̀ Kuyie ndo m bonɛ̀mɛ̀ kɛ n dɔ̀ɔ̀ mɛsɑ̀ɑ̀, nɛ̀ okpɑ̀ɑ̀tì do m bɛ́innɛ̀ mɛ̀ɛ̀ botí. Kɛ̀ bɛ̀ dɔ̀: Ítɛ́nɛ̀ kɛ̀ tí mɑɑ́ dihɛì!
\p Kɛ̀ tí ítɛ́nɛ̀ tikɔ̃nyɑuti kɛ bo pĩ́ mmutɔ̃mmú. 
\v 19 Mɛm̀mɛ Sɑ̃mbɑdɑɑ Odoniibɛ botí kou nɛ̀ Tobiyɑ wèè do ò pòkoo kɛ bɑkɛ́ Amɔɔ ɛì, nɛ̀ Adɑbubɛ botí kou Kesɛmmu, bɛ̀ ti sènkɛ̀rìmɛ̀ kɛ́ nti dɑú kɛ nɑ́ɑ́ nkɛ tú: Di dɔɔri bɑ dɛndɛ, di dɔ́ kɛ́yetɛ okpɑ̀ɑ̀tì kpɛti ntɑɑ̀?
\p
\v 20 Kɛ̀ m bɛ̀ tɛ̃̀ńnɛ́ kɛ dɔ̀: Kuyie nkunku kùù bo kɛĩ́nkɛ̀ kù yóó ti teennɛ̀mu, tínti ku kó bɛtɔ̃mbɛ̀, ti itimu kɛ bo mɑɑ́ dihɛì. Di í mɔkɛ kɛtenkɛ̀ Sedisɑdɛmmu miɛkɛ, di í mɔkɛ kucɛ, òmɔù í yɛ̃́ di kpɛ́í Sedisɑdɛmmu miɛkɛ.
\c 3
\s1 Sifubɛ wɛ̃̀tɛ kɛ mɑɑ́mɛ̀ Sedisɑdɛmmu kó kuduotí
\p
\v 1 Kɛ̀ ikuɔ́ nìùtì diɛwè Ediɑsibu nɛ̀ o tebìí ikuɔ́ nìùbɛ̀ tɔbɛ̀ kɛ̀ bɛ̀ɛ mɑɑ́ bɛ̀ tu dɛ̀ ipe kó dibòrì, kɛ́ dì kɔutɛ́, kɛ́cónnɛ́ dicɑ̀ù kó idɛí, kɛ́deè kɛ́tũntɛ kuduotí kɛ́ntɔ kɛ́tuɔkɛnɛ̀ ditou bɛ̀ tu dì tɛkɔ̀ùtɛ̀. Kɛ̀ bɛ̀ɛ sɔɔtɛ́ kɛ́tuɔkɛnɛ̀ ditou tɛrì bɛ̀ tu di Anɑnɛɛdi, kɛ́deè kɛ́ kù kɔutɛ́. 
\v 2 Bɛ kó difɔ̃nkúò kɛ̀ Sedikoo kɔbɛɛ sɔɔtɛ́, bɛ kó difɔ̃nkúò kɛ̀ Immuri birɛ Sɑkuu sɔɔtɛ́. 
\v 3 Bɛ kó difɔ̃nkúò kɛ̀ Asennɑɑ bíi mɑɑ́ bɛ̀ tu dɛ̀ siyĩĩ kó dibòrì kɛ́cónnɛ́ ticɑ́dɔɔti kɛ́ɑ̃nnɛ́ yɛcɑ̀kɛ̀ kó idɛí nɛ̀ dɛ kó yɛkpetínyɛ̀. 
\v 4 Bɛ kó difɔ̃nkúò kɛ̀ Akikoti birɛ Udiyɑ birɛ Mɛdemɔtii sɔɔtɛ́. O kó difɔ̃nkúò kɛ̀ Mɛsesɑbɛɛri birɛ Bedekiɑ birɛ Mɛsudɑmmuu sɔɔtɛ́. O kó difɔ̃nkúò kɛ̀ Bɑɑnɑ birɛ Sɑkɔbuu sɔɔtɛ́. 
\v 5 Bɛmbɛ kó difɔ̃nkúò kɛ̀ Tekoɑɑ ɛì kɔbɛɛ sɔɔtɛ́. Kɛ̀ bɛ kó bɛkótíbɛ̀ í ntũ̀nnɛ bɛ̀ɛ̀ bɛ̀ ni mutɔ̃mmú bɛ̀ bɛ̀ nɑ̀ɑ́ ntì, kɛ́yetɛ mutɔ̃mmú.
\p
\v 6 Bɛ kó difɔ̃nkúò kɛ̀ Pɑseyɑɑ birɛ Yoyɑdɑ nɛ̀ Besodiɑ birɛ Mɛsudɑmmu kɛ̀ bɛ̀ɛ sɔɔtɛ́ kɛ́dɔɔ̀ dicɑ̀ù ketirì, kɛ́deè kɛ́cónnɛ́ dicɑ̀ù kó idɛí nɛ̀ dɛ kó ipɑ̀ɑ̀ti nɛ̀ yɛkpetínyɛ̀. 
\v 7 Bɛ kó difɔ̃nkúò kɛ̀ Kɑbɑɔ̃ɔ̃ ɛì kou Mɛdɑtiɑ nɛ̀ Mɛdonniibɛ botí kou Yɑdonni kɛ̀ bɛ̀ɛ sɔɔtɛ́ nɛ̀ Kɑbɑɔ̃ɔ̃ ɛì kɔbɛ nɛ̀ Misepɑɑ ɛì kɔbɛ. Kukó nyɑ́ɑ̀ diyiè tɑɑ̀ kɛ̀ɛ̀ bíɛ́kɛ̀ kóo kùmɑ̀ndɑ́ɑ̀ kɔbɛ do mbɛ. 
\v 8 Bɛ kó difɔ̃nkúò kɛ̀ Adɑyɑ birɛ Osiyɛɛri wèè do tú mɛsɔɔ nkóo mɑ́ɑ́tì kòò sɔɔtɛ́. O kó difɔ̃kúò kɛ́feí Anɑnniyɑ wèè do tú tihúúntì kóo dɔɔ̀rìwè. Bɛ̀ do dèè bɛ tɔ̃mmú Sedisɑdɛmmu duotí pɛ̃kɛ̀ dìì bòrì ndi. 
\v 9 Bɛ kó difɔ̃nkúò kɛ̀ Uuri birɛ Edefɑyɑɑ sɔɔtɛ́, weè do bɑkɛ́ Sedisɑdɛmmu ɛì kó dikéè. 
\v 10 Kɛ̀ wenwee feí Adumɑfu birɛ Yedɑyɑɑ, kòo sɔɔtɛ́ kɛ́nwetí o cĩ́ɛ̃̀tɛ̀ ììkɛ̀, kɛ́feí Asɑbunniyɑ birɛ Atuusi. 
\v 11 Bɛmbɛ kó difɔ̃nkúò Adimmu birɛ Mɑdikiɑ nɛ̀ Pɑsɑti-Mɔɑbu birɛ Asubu kɛ̀ bɛ̀ɛ sɔɔtɛ́ kɛ́tuɔkɛnɛ̀ yɛpɛ̃́ɛ̃̀pũnnɛ́tuo kó mɛkentímɛ̀. 
\v 12 Kɛ̀ bɛ̀ɛ deè kɛ́feí Adoɛsi birɛ Sɑdummu wèè do bɑkɛ́ Sedisɑdɛmmu kó dihɛì kó dikéè tɛrì wenwe nɛ̀ o nitipobí. 
\v 13 Anunni nɛ̀ Sɑndoɑɑ ɛì kɔbɛ kɛ̀ bɛmbɛ mɛ ntó sɔɔtɛ́ kubiriku kó dibòrì bíɛ́kɛ̀ bɛɛ̀ do kù mɑɑ́ kɛ́cónnɛ́ yɛcɑ̀kɛ̀ kó idɛí nɛ̀ dɛ kó ipɑ̀ɑ̀ti nɛ̀ yɛkpetínyɛ̀, kɛ́nsɔkɛ́ kɛ́tuɔkɛnɛ̀ bɛ̀ tu dɛ̀ tikùtì kó dibòrì. 
\v 14 Bɛ̀ dɛ nkɑ̃̀ɑ̃́ nkɛ̀ Edekɑbu birɛ Mɑdikiɑ sɔɔtɛ́, weè do bɑkɛ́ Bɛti-Kedɛmmu kó dihɛì, weè do kù mɑɑ́ kɛ́cónnɛ́ yɛcɑ̀kɛ̀ kó idɛí ipɑ̀ɑ̀ti nɛ̀ yɛkpetínyɛ̀.
\p
\v 15 Bɛ kó difɔ̃nkúò kɛ̀ Kɔdi-Osee birɛ Sɑdummu wèè do bɑkɛ́ Misipɑɑ kó dihɛì, kòo sɔɔtɛ́ kɛ́mɑɑ́ dibòrì bɛ̀ tu dì tɛbintɛ kó dibòrì kɛ̀ dì pĩ̀ĩ́ nkɛ́cónnɛ́ yɛcɑ̀kɛ̀ kó idɛí nɛ̀ ipɑ̀ɑ̀ti nɛ̀ yɛkpetínyɛ̀, kɛ́mɑɑ́nɛ̀ Sidoee kó kubiriku okpɑ̀ɑ̀tì kó mupérímù tɑkɛ́ kɛ́ntɔ kɛ́túɔkɛnɛ̀ yɛdɛtìsɑ̀kɛ̀ yɛ̀ɛ̀ kɔ̀rìnɛ̀ Dɑfiti ɛì. 
\v 16 Ò dɛ ndɔú nkɛ̀ Asibuku birɛ Nɛemiɑɑ túótɛ́, weè do bɑkɛ́ Bɛti-Tisuu ɛì dikéè kɛ́ntɔ kɛ́tuɔkɛnɛ̀ Dɑfiti kó kufɔ̃ti borɛ̀, kɛ́ntɔ kɛ́tuɔkɛnɛ̀ kubinku bɛ̀ do keú kù kɛ́pɛ̃ɛ̃tɛ́ kɛ́tuɔkɛnɛ̀ bɛ̀ɛ̀ bɑ̀ɑ okpɑ̀ɑ̀tì bɛ kó tɛcĩ́ɛ̃̀tɛ̀. 
\v 17 Bɛ kó difɔ̃nkúò kɛ̀ Defiibɛ wuɔ nkou Bɑni birɛ Deummu nɛ̀ o kɔbɛ kɛ̀ bɛ̀ɛ sɔɔtɛ́ kɛ́dɔú, kɛ̀ Asɑbiɑ wèè do bɑkɛ́ Keidɑɑ kó dihɛì dikéè kòo sɔɔtɛ́ o ɛì kó mɛfíè. 
\v 18 Kɛ̀ wenwee dɔú, nkɛ̀ Enɑdɑdi birɛ Binnuii tebitɛɛ sɔɔtɛ́. Weè do bɑkɛ́ Keidɑɑ kó dihɛì tɛrì dikéè. 
\v 19 Kɛ̀ wenwee feí Yesuɑɑ birɛ Asɛɛ wèè do bɑkɛ́ Misipɑɑ, kòo sɔɔtɛ́ kɛ́nwetí ditennì bɛ̀ dɔ̀ɔ̀ri dɛ̀ tikpɑ̀rìnɛntì, kɛ́ntɔ kɛ́tuɔkɛnɛ̀ iduotí mɑɑ́ dɛ̀. 
\v 20 O kó difɔ̃nkúò kɛ̀ Sɑbuyii Bɑduki birɛɛ sɔɔtɛ́ nɛ̀ tikɔ̃nyɑuti kɛ́túótɛ́ iduotí mɑ̀ɑ́ dɛ̀ kɛ́ntɔ kɛ́tuɔkɛnɛ̀ ikuɔ́ nìùtì diɛwè Ediɑsibu cĩ́ɛ̃̀tɛ̀ bòrìnùù. 
\v 21 Bɛ kó difɔ̃nkúò kɛ́feí Akikoti birɛ Udiyɑ kó dɛbirɛ Mɛdemɔti, kòo túótɛ́ Ediɑsibu cĩ́ɛ̃̀tɛ̀ bòrìnùù kɛ́ntɔ kɛ́tuɔkɛnɛ̀ tɛ mɑ̀nku.
\p
\v 22 O kó difɔ̃nkúò kɛ̀ ikuɔ́ nìùbɛ̀ bɛ̀ɛ̀ yɛ̀nní yɛhɛkɛ̀ yɛ̀ɛ̀ tɔ̀kɛ́nɛ̀ Sedisɑdɛmmu kɛ̀ bɛ̀ɛ sɔɔtɛ́. 
\v 23 Kɛ̀ bɛmbɛɛ dɔú nkɛ̀ Bɛnsɑmɛɛ nɛ̀ Asubu kɛ̀ bɛ̀ɛ sɔɔtɛ́ bɛ cɛ̃́ĩ ììkɛ̀. Bɛ kó difɔ̃nkúò kɛ̀ Anɑnniyɑ birɛ Mɑseyɑ kó dɛbirɛ Asɑdiɑ sɔɔtɛ́ o cĩ́ɛ̃̀tɛ̀ ììkɛ̀. 
\v 24 Kɛ̀ bɛmbɛɛ feí Enɑdɑdi birɛ Binnuii, kòo túótɛ́ Asɑdiɑ cĩ́ɛ̃̀tɛ̀ píkù tɛkù kɛ́ntɔ kɛ́tuɔkɛnɛ̀ iduotí mɑ̀ɑ́ dɛ̀ nɛ̀ i kentímɛ̀. 
\v 25 Kɛ̀ bɛmbɛɛ feí Usɑii birɛ Pɑdɑdi, kòo túótɛ́ kuduotí kentímɛ̀ kɛ́tuɔkɛ okpɑ̀ɑ̀tì cĩ́ɛ̃̀tɛ̀ kó ditou diɛrì dìì benkɛ́ kɛ tɔ́kɛ́nɛ̀ dikpetíntou kó ditowɑɑ̀. Kɛ̀ wenwee feí mPɑdosi birɛ Pedɑyɑɑ 
\v 26 nɛ̀ bɛ̀ɛ̀ teénnɛ̀ Kuyie ncĩ́ɛ̃̀tɛ̀ tɔ̃mbɛ̀ bɛ̀ɛ̀ ɑ̃ Ofɛri ɛì, kɛ̀ bɛ̀ɛ túótɛ́ dibòrì bɛ̀ tu dì mɛniɛ nkó dibòrì dìì bo diyiè yìɛ̀ní kɛ̀ɛ̀ bíɛ́kɛ̀ kɛ́ntɔ kɛ́tuɔkɛnɛ̀ ditou dìì benkɛ́. 
\v 27 Kɛ̀ Tekoɑɑ ɛì kɔbɛɛ sɔɔtɛ́ ditou diɛrì dìì benkɛ́ di ììkɛ̀, kɛ́ntɔ kɛ́tuɔkɛnɛ̀ Ofɛri duotí.
\p
\v 28 Kɛ̀ ikuɔ́ nìùbɛ̀ɛ sɔɔtɛ́ sisɛ̃ĩ́ kó dibòrì kó mɛfíè, bɑ́ wè kòo nwetí o cĩ́ɛ̃̀tɛ̀. 
\v 29 Bɛ kó difɔ̃nkúò kɛ̀ Imɛɛ birɛ Sɑdɔki mɛ ntó sɔɔtɛ́ kɛ́nwetí o cĩ́ɛ̃̀tɛ̀, kɛ́feí nSekɑnniyɑ birɛ Semmɑyɑ wèè do tú diyiè yìɛ̀ní kɛ̀ɛ̀ bíɛ́kɛ̀ kó dibòrì kóo bɑ̀rì, kòò tó sɔɔtɛ́. 
\v 30 Kɛ̀ wenwee deè kɛ́feí Sedemiɑ birɛ Anɑnniyɑ nɛ̀ Tisɑdɑfu birɛ dɛ̀ɛ̀ do tú dɛkuɔ́nnɛ̀ nɛ̀ Anunni, kɛ̀ Bedekiɑ birɛ Mɛsudɑmmuu sɔɔtɛ́ kɛ́nwetí o cĩ́ɛ̃̀tɛ̀. 
\v 31 Kɛ̀ wenwee deè kɛ́feí Mɑdikiɑ, wèè do mɑ́ɑ́tí mɛsɔɔ nkó tinɛntì, kòo túótɛ́ bɛ̀ɛ̀ teé mbɛ̀ɛ̀ pĩ nKuyie ncĩ́ɛ̃̀tɛ̀ miɛkɛ mutɔ̃mmú nɛ̀ bɛpotɑmbɛ̀ bɛ cɛ̃́ĩ kó mɛfíè mmɛ̀ɛ̀ wetí dibòrì bɛ̀ tu dì Mifikɑdi, kɛ́ntɔ kɛ́tuɔkɛnɛ̀ ditou diɛrì dìì bo mɛkentímɛ̀. 
\v 32 Bɛ̀ɛ̀ tu tisɔɔnɛntì kó bɛmɑ́ɑ́bɛ̀ nɛ̀ bɛpotɑmbɛ̀ kɛ̀ bɛ̀ɛ túótɛ́ dikéè sɔnni kɛ́ntɔ kɛ́tuɔkɛnɛ̀ bɛ̀ tu dɛ̀ ipe kó dibòrì.
\c 4
\s1 Sɑ̃mbɑdɑɑ nɛ̀ Tobiyɑ bɛ̀ dɔ́mɛ̀ kɛ́pɑɑ nkuduotí kó mumɑrimù
\p
\v 1 Mɛm̀mɛ Sɑ̃mbɑdɑɑ kèèmɛ̀ ti mɑɑ̀mɛ̀ kuduotí kòo miɛkɛɛ pɛikɛ kɛ́cɔ́útɛ́ mɛdiɛ̀ kòò ti senkɛ̀rì tínti Sifubɛ, 
\v 2 kɛ́nnɑ́ɑ́ nho kɔbɛ nɛ̀ Sɑmmɑrii kó bɛhɑ̃ɑ̃pɔ̀mbɛ̀ kɛ tú: Dɛ kó bɛsĩ́ntɛ́nìtìbɛ̀ dɔ̀ɔ̀ri bɑ? Ti yóu kɛ̀ bɛ̀ nsɔkɛ́ kɛ pĩ́ ndɛ kó mutɔ̃mmú kɛ́ mù dèèɑ̀? Diyiè dìmɑ́ɑ̀ kó mutɔ̃mmú dɔkɛ. Yɛtɑ̃́rɛ̀ yɛ̀ɛ̀ diɛ nkɛ cɔ̀útɛ́, bɛ̀ bo nɑ kɛ́wɛ̃tɛ kɛ́yíi ndɛ kó tidobontì kɛ́fíé nKuyie nyiwũɔ̃ɑ̀?
\p
\v 3 Dɛ̀ do sɔ̃́ nTobiyɑ Amɔniibɛ botí kou weè bo Sɑ̃mbɑdɑɑ borɛ̀, kɛ́bɛ́i nkɛ dɔ̀: Yóunɛ̀ kɛ̀ bɛ̀ɛ mɑɑ́! Kɛ̀ tɛkpɑmɔtɛ̀ dèkɛ dɛ kó kuduotí kùù mɑɑ́nɛ̀ yɛtɑ̃́rɛ̀ kù dotimu.
\b
\p
\v 4 Dɛ mɔ̀nnì kɛ̀ m bɑ́ntɛ̀ Kuyie nkɛ dɔ̀: Ti Yiɛ̀ nKuyie nwéntɛ́ bɛ̀ ti sènkɛ̀rìmɛ̀, yóu kɛ̀ yɛsɑ̃́ɑ̃̀mbɛ̀ bɛ̀ ti sɑ̃́ɑ̃́ nyɛ̀ɛ do bɛ yɔ ĩ́nkɛ̀, yóu kɛ̀ bɛ̀ɛ bɛ̀ pĩ̀ḿmú kɛ́kònnɛ̀ dihɛì tɛrì kɛ̀ bɛ̀ɛ nɑɑ́ ntidɑɑtì kɛ́di ifɛi. 
\v 5 Bɑ́ɑ́ bɛ̀ cĩ̀ɛ̃́, bɑ́ɑ́ ũtɛ́ bɛ yɛi, bɛ̀ ti cɑ̀ɑ̀rɛ̀mu tínti bɛ̀ɛ̀ mɑɑ̀ kuduotí.
\b
\p
\v 6 Mɛm̀mɛ kɛ̀ ti mɑɑ́ kuduotí kɛ́ kù tũ̀ntɛ kɛ́fitɛ́ kɛ̀ mɛokùmɛ̀ mɛɛ̀ mɑ́ɑ̀ nkpɑɑ́ kṹmmú. Bɛnìtìbɛ̀ do pĩ́ mmutɔ̃mmú nɛ̀ bɛ yɛ̀mmɛ̀ mɛmɔu ndi.
\p
\v 7 Sɑ̃mbɑdɑɑ nɛ̀ Tobiyɑ nɛ̀ Adɑbubɛ nɛ̀ Amɔniibɛ nɛ̀ Asidodiibɛ bɛ̀ kèè dìì mɔ̀nnì ti mɑɑ́mɛ̀ kuduotí kɛ ĩ̀ĩ́tí yɛfɔ̃̀tɛ̀ kɛ fitɛ́, kɛ̀ bɛ miɛkɛɛ pɛikɛ mɛdiɛ̀. 
\v 8 Kɛ̀ bɛ̀ɛ wɛ̃nnɛ́ bɛmɔu kɛ bo kɔtɛní kɛ́do Sedisɑdɛmmu kóò cɑ̀kɛ. 
\v 9 Kɛ̀ tí kuɔ́nnɛ̀ Kuyie nkɛ́wɑɑ́ mbɛ̀ɛ̀ bo mbɑɑ dihɛì kuyie nnɛ̀ kɛyènkɛ̀, kɛ̀ bɛ̀ bɑ́ɑ́ tɑnní. 
\v 10 Kɛ̀ Sudɑɑ kɔbɛ nɑ́ɑ́ nkɛ tú:
\q1 Bɛtɔ̃mbɛ̀ ɔ̀umu!
\q1 Dɛ̀ɛ̀ pùɔ nkɛ̀ dɛ̀ dɛu,
\q1 ti bɑ́ɑ́ nɑ kɛ́mɑɑ́ kuduotí kɛ́deè.
\p
\v 11 Kɛ̀ ti dootitɔbɛ̀ biɛ nɑ́ɑ́ nkɛ tú: Bɛ̀ í yó ndɑkɛ ti kpɛ́í nkɛ̀, tí bɛ̀ do kɛ́ bɛ̀ kùɔ kɛ̀ mutɔ̃mmúu pɑɑ̀.
\s1 Nɛemii duɔ́mmɛ̀ bɛtɔ̃mbɛ̀ tikpɑ̀rìnɛntì
\p
\v 12 Sifubɛ bɛ̀ɛ̀ bo ti dootitɔbɛ̀ ɛkɛ̀ fitímɛ̀ kɛ̀ bɛ̀ nkɔrìní kucɛ mɛ̀pɛ́u kɛ ti nɑ́ɑ́ nkɛ tú: Bɛ̀ kèrínímu tipíìtì timɔu kɛ bo ti do. 
\v 13 Mɛm̀mɛ kɛ̀ nh oo nhoo mbɛnìtìbɛ̀ kuduotí fɔ̃nkúò yɛfɔ̃̀tɛ̀ miɛkɛ kɛ́ bɛ̀ tũ̀nnɛ bɛ nɑɑ̀mùntì dò ndòmmɛ̀, kɛ̀ bɛ̀ ntɔ bɛ se nɛ̀ bɛ kpɑ̃ɑ̃̀ nnɛ̀ bɛ tɑ̃nnɛ̀. 
\v 14 Kɛ̀ n yɑ̀ kufɔ̃wɑɑ́ mbɛ̀ bomɛ̀ kɛ́ítɛ́ kɛ́pĩɛ̃kɛ́ kɛ́nɑ́kɛ́ dihɛì kó bɛkótíbɛ̀ nɛ̀ bɛbeémbɛ̀ nɛ̀ bɛsɔmbɛ kɛ dɔ̀: Di bɑ́ mbɛ̀ yĩ̀ɛ̃̀kù, dentɛnɛ̀ní Kuyie ndi tũ nkù kpeńnìmɛ̀ kɛ̀ bɛ̀ kù dé, kpɑnnɛ̀ di tebìí kpɛ́í nnɛ̀ di bí kpɛ́í, initidɑɑì nɛ̀ initipòì nɛ̀ di pobɛ̀ nɛ̀ di cɛ̃́ĩ.
\p
\v 15 Mɛm̀mɛ kɛ̀ ti dootitɔbɛ̀ɛ keè ti kèèmɛ̀ bɛ kpɛ́í, kɛ́bɑntɛ́ Kuyie ncɑ̀kɛmɛ̀ bɛ dɔ́ kɛ́dɔɔ̀ tì. Dɛ mɔ̀nnì kɛ̀ tí wɛ̃tɛ kuduotí borɛ̀ bɑ́ wè kòo sɔɔtɛ́ o tɔ̃mmú. 
\v 16 Kɛ̀ tí túótɛ́ dɛ kó diyiè nɛ̀ yɛwe yɛ̀ɛ̀ kpɑɑní, kɛ̀ bɛtɔ̃mbɛ̀ dikéè diì nní mpĩ́ mmutɔ̃mmú, kɛ̀ dikéè tɛrì tɔ yɛkpɑ̃ɑ̃̀ nnɛ̀ tidɔpììtì nɛ̀ dɛtɑ̃nnɛ̀ kɛ dɑ́ɑ́tí yɛmɑ́tìyɑɑ̀bòrɛ̀, kɛ̀ bɛkpɑ̀ɑ̀tìbɛ̀ còḿmú Sudɑɑ kɔbɛ fɔ̃nkúò. 
\v 17 Kɛ̀ bɛmɑribɛ̀ mmɑɑ̀, bɛ̀ɛ̀ bɛ̀ duɔ̀ ntitɑ̃́tì kɛ̀ bɛ̀ mpĩ́nnɛ̀ mutɔ̃mmú sinɔu sìmɑsì mɑsì kɛ̀ sitɛsì tɔ tikpɑ̀rìnɛntì. 
\v 18 Kɛ̀ bɛmɑribɛ̀ mmɑɑ̀ kɛ yi yɛse, kɛ̀ ditɑ̃tɛheù yiɛ̀ ncòḿmú m píkù. 
\v 19 Kɛ̀ n nɑ́kɛ́ bɛkótíbɛ̀ nɛ̀ bɛbeémbɛ̀ nɛ̀ bɛnìtìbɛ̀ sɔmbɛ kɛ dɔ̀: Mutɔ̃mmú dɛumu kuduotí í sénní kɛ̀ ti dò nti bíɛ́kɛ̀ ti bíɛ́kɛ̀ òmɔù í tɔ̀kɛ́nɛ̀ otɔù. 
\v 20 Kɛ̀ di bo kùù píkù kɛ kèè ditɑ̃tɛheù kuɔ́mmɛ̀, dí tíí nkɛ́kɔtɛní ti borɛ̀, Kuyie nti tũ nkù yóó kpɑ̀mmu ti kpɛ́í.
\p
\v 21 Mɛm̀mɛ kɛ̀ ti níí mpĩ́ mmutɔ̃mmú kukṹnwentóo nɛ̀ kɛyènkɛ̀, ti miɛkɛ kɛ̀ dikéè níí ntɔ yɛkpɑ̃ɑ̃̀. 
\v 22 Kɛ̀ n nɑ́kɛ́ bɛ̀ɛ̀ ni mutɔ̃mmú kɛ dɔ̀: Bɑ́ wè nɛ̀ o kó ditĩ̀nnì bɛ̀ níí nyié nSedisɑdɛmmu miɛkɛ kɛ níí nti bɑɑ kɛyènkɛ̀, kɛ̀ dɛ̀ wentɛ́ bɛ̀ mpĩ́ mmutɔ̃mmú. 
\v 23 Mí nnɛ̀ n tebìí nɛ̀ n kó bɛtɔ̃mbɛ̀ nɛ̀ ti bɑ̀rìbɛ̀ bɛ̀ɛ̀ ti nɛínɛ̀, òmɔù í ndɛì o yɑ̀ɑ̀tì, bɑ́ wè kòò mpikú kukpɑ̀rìnɛnkù o nɔ̀ùtɛ̀ youtɛ.
\c 5
\s1 Nɛemii yetɛmɛ̀ Sifubɛ bo wɛ̃tɛ kɛ́nfɛ̃́ũnkomɛ̀ bɛ tebìí
\p
\v 1 Diyiè mɑrì kɛ̀ Sifubɛ mɑbɛ̀, bɛnitidɑɑbɛ̀ nɛ̀ bɛnitipòbɛ̀ɛ ítɛ́ kɛ́nsɛ́í mbɛ tebìí mɛdiɛ̀. 
\v 2 Kɛ bɛ̀ nɑ̀ɑ́ nkɛ tú: Tínti nɛ̀ ti bí ti sũmu initidɑɑì nɛ̀ initipòì dí ti duɔ́ ntidiitì kɛ̀ tí nyo nkɛ fòùnɛ̀. 
\v 3 Kɛ̀ bɛtɔbɛ̀ tu: Dikònnì ɔ̃ɔ̃ tɑnní kɛ̀ ti duɔ́ ndɛpɑɑ ndɛ nɛ̀ ti kó titebiiti nɛ̀ ti cɛ̃́ĩ kɛ̀ bɛ̀ bo ti duɔ́ ntidiitì. 
\v 4 Kɛ̀ bɛtɔbɛ̀ tu ti ɔ̃ ndò nkɛ́yietí okpɑ̀ɑ̀tì dɑ̀mpóò kɛ́pentɛmu kɛ́ bɛ̀ yietí ti pɑɑ nnɛ̀ fínyĩ̀ kó dɛtie. 
\v 5 Ti mɛ ntu mɛyĩ̀ĩ̀ mmɛ̀mɑ́ɑ̀ kɔbɛ mbɛ, bɛ bí í pɛ̃ɛ̃tɛ́ ti kpɛyi, nɛ̀ mɛmmɛ kɛ̀ ti dò nkɛ́duɔ́ nti bí initidɑɑì nɛ̀ initipòì kɛ̀ ìi nɑɑ́ mbɛ kó tidɑɑtì. Ti bí initipòì mɑì nɑɑ́mmu bɛ kó tidɑɑtì kɛ́pĩ́ mbɛ tɔ̃mmú. Ti í mɔkɛ ti bo yĩ́mɛ̀, ti pɑɑ nnɛ̀ fínyĩ̀ kó dɛtie, bɛtɔbɛ̀ bɛɛ̀ dɛ̀ tiekɛ.
\p
\v 6 N kèè dìì mɔ̀nnì dɛ kó tinɑ́ɑǹtì kɛ̀ dɛ̀ n yonkɛ mɛdiɛ̀. 
\v 7 Kɛ̀ mɛyɛ̀mmɛ̀ mɑmɛ̀ n tɑnní kɛ́ndò n kpɑnnɛ̀ dihɛì kó bɛkótíbɛ̀ nɛ̀ bɛbeémbɛ̀, kɛ́ bɛ̀ nɑ̀kɛ́ kɛ tú dɛ̀ dòmmɛ kɛ̀ di diinko di tebìí mɛsémmɛ̀. Mɛm̀mɛ n yumɛ̀ mɛtíímmɛ̀ diɛmɛ̀, 
\v 8 kɛ́ bɛ̀ bekɛ kɛ dɔ̀: Ti wɛ̃tɛ kɛ do nti tebìí bɛ̀ do fìítí sì bɛtɔbɛ̀ ciɛ, kɛ̀ sì tu tidɑɑtì, kɛ̀ di nɛ́ wɛ̃tɛ kɛ́ sì fiiti di miɛkɑɑ̀?
\p Kɛ̀ bɛ̀ ndò nkɑ́rɛ́, òmɔù í mpɛ̀tɛ́ kɛ́bɛ́i. 
\v 9 Kɛ̀ m bɛ̀ nɑ̀kɛ́ kɛ dɔ̀: Di dɔɔri dɛ̀ í wenni, di dò nkɛ́ndému Kuyie nkɛ̀ dɛ̀ɛ yie nkɛ̀ ti bɑ́ɑ́ ɑ̃nnɛ́ timɑ́ɑ̀ ifɛi ibotí tɛì ììkɛ̀, ìì tu ti dootitɔbɛ̀. 
\v 10 Mí m mɔ́mmuɔ nnɛ̀ n tebìí nɛ̀ n kó bɛtũ̀mbɛ̀ ti múnkɛ do pèntɛmu bɛnìtìbɛ̀ idíítí nɛ̀ tidiitì, ti dɛ̀ mbɛ̀ pɑ̃, ti bɑ́ɑ́ bɛ̀ bekɛ dɛ kó yɛbɑ̀ɑ̀. 
\v 11 Di do cuɔ́ bɛ̀ɛ̀ kó dɛpɑɑ mbɛ̀ di bɑnnɛ̀ mɛ̀ɛ̀ kpɛ́í, dí dɛ̀ mbɛ̀ tɛ̃̀ńnɛ́ yíe nyíe. Bɛ pɑɑ nnɛ̀ bɛ fínyĩ̀ kó dɛtie nnɛ̀ odìfíè kpɛrɛ nɛ̀ bɛ cɛ̃́ĩ nɛ̀ bɛ diitì nɛ̀ mɛnɑɑ̀bɛ́mmɛ̀ nɛ̀ mɛkùɔ̀ di do bɛ̀ pèntɛ dɛ̀ nɛ̀ di do dɔ́ kɛ́ cɔ̃ntɛ dɛ̀. 
\v 12 Kɛ̀ bɛ̀ɛ yie mbɛmɔu kɛ dɔ̀: Ti yóó dɔɔ̀mu ɑ ti nɑ̀kɛ́ tì, ti bo bɛ̀ tɛ̃̀ńnɛ́ ti do cuɔ́ dɛ̀ bɑ́ ti tɛ̃́nkɛ bɑ́ɑ́ bɛ̀ bekɛ dɛ̀mɑrɛ̀.
\p Mɛm̀mɛ kɛ̀ n tíí nyikuɔ́ nìùbɛ̀ kɛ́duɔ́ nkɛ̀ bɛ̀ɛ pɑrìkɛ̀ bɛnìtìbɛ̀ ììkɛ̀ kɛ dɔ̀ bɛ̀ bo dɔɔ̀ bɛ̀ bɛ́i ntì. 
\v 13 Dɛ kó difɔ̃nkúò kɛ̀ n kpɑ̃́ɑ̃́tɛ́ n yɑɑ̀yɔ̀rì kɛ́bɛ́i nkɛ dɔ̀: Kɛ̀ wèè í dɔ̀ɔ̀ ò bɛ́i ntì Kuyie nyóó ò kpɑ̃̀ɑ̃́tɛ́ mɛɛ̀ botí kóò dènnɛ o cĩ́ɛ̃̀tɛ̀ kòo pɑɑ̀ o kpɛrɛ dɛmɔu kɛ tɛ̃́nkɛ bɑ́ mmɔkɛ dɛ̀mɑrɛ̀. Ditĩ̀nnì dimɔu kɛ̀ di dɔ̀: Dɛ̀ mmɛ ndò.
\p Kɛ̀ bɛ̀ɛ sɑ̃ntɛ Kuyie nkɛ̀ bɛnìtìbɛ̀ɛ dɔɔ̀ bɛ̀ bɛ́i ntì.
\b
\p
\v 14 Nɛ̀ n nɑɑ́mmɛ̀ Sifubɛ kóo kùmɑ̀ndɑ́ɑ̀ Sudɑɑ tenkɛ̀ okpɑ̀ɑ̀tì Aditɑkisɛsi kpɑ̀tì benni sipísìdɛ́ kpɛri miɛkɛ kɛ́ntɔ kɛ́tuɔkɛnní yɛbie nsipísìtɑ̃ɑ̃ti dɛ̀ mɔ̀kɛ yíe nyɛbie ntɛpíítɛ̀ nɛ̀ yɛ̀dɛ́ɛ̀ mí nnɛ̀ n kɔbɛ ti í bekɛ bɛ̀ dò nkɛ́yietí dɛ̀ kùmɑ̀ndɑ́ɑ̀. 
\v 15 Bɛ̀ɛ̀ n niitɛ́nɛ̀ kɛ nɑɑ́ nkùmɑ̀ndɑ́ɑ̀bɛ̀ bɛ do fɛ̃́ũnkomu bɛnìtìbɛ̀ kɛ békú idíítí nɛ̀ mɛnɑɑ̀ nkɛ cɔú dɑ̀mpóò mɛdítíbii nsipísìnɑ̀ɑ̀ sìnɑ̀ɑ̀ bɑ́ dìì yiè, kɛ̀ kùmɑ̀ndɑ́ɑ̀ kó bɛtũ̀mbɛ̀ múnkɛ nfɛ̃́ũnko bɛnìtìbɛ̀. Mí mmɛ nyí dɔ̀ɔ̀ dɛndɛ kó dimɑ̀ɑ̀ n dé mɛ̀ɛ̀ kpɛ́í nKuyie. 
\v 16 M pètìnkɛ do pĩ́mmu m mɔ́mmuɔ mmutɔ̃mmú kɛ mɑɑ̀ kuduotí, n kɔbɛ bɛmɔu bɛ̀ɛ̀ m bonɛ̀ kɛ̀ bɛ̀ múnkɛ pĩ́ mmutɔ̃mmú. N yí dontɛ́ òmɔù kó kupɑku kudonku sɑ́m̀pɔ́kù n tú mɛ̀ɛ̀ kpɛ́í kùmɑ̀ndɑ́ɑ̀. 
\v 17 Sifubɛ kó bɛkótíbɛ̀ nɛ̀ bɛbeémbɛ̀ bɛ̀ɛ̀ do yo n kó mudiì bɛ̀ do bo tɛkɔ̀ùtɛ̀ nɛ̀ sipísìnùmmù (150) ndi kɛ nɛ́ mbúútí bɛ̀ɛ̀ do iitiní ibotí tɛì ìì ti tɔ́kɛ́nɛ̀ i miɛkɛ kɛ kɔrìní. 
\v 18 Bɑ́ dìì yiè n do ɔ̃ɔ̃ dontɛ́nɛ̀ n kó idíítí nyi fɛnɑ̀ɑ̀fɛ̀ nɛ̀ yɛpedɑkɛ̀ mɛkùɔ̀ nkpɛyɛ yɛkuɔ̀ kɛ nɛ́ yíɛ́nɛ̀ sikoó. Yɛwe tɛpíítɛ̀ mɛnɑɑ̀ nyɛnɑɑdɔ́ yɛnɑɑdɔ́. Bɑ́ nɛ̀ mɛmmɛ n yí bɛ̀ bekɛ kɛ tú bɛ̀ nni nyietì bɛ dò nkɛ́ n yietì dɛ̀ kùmɑ̀ndɑ́ɑ̀ kɛ yɛ̃́ kuduotí kó mumɑrimù do túmɛ̀ mutɔ̃mmú cɛ̃́ɛ̃́mù mmu dihɛì yɛmbɛ̀ kpɛ́í.
\b
\p
\v 19 Áú Kuyie! M pĩ mmùù tɔ̃mmú bɛnìtìbɛ̀ biɛ nkpɛ́í mmù dɛumu, ɑ bɑ́ɑ́ yɛ̃̀ n kpɛ́í.
\c 6
\s1 Bɛ̀ mɑɑ́mɛ̀ kuduotí kɛ́deè
\p
\v 1 Bɛ̀ nɑ̀kɛ́ dìì mɔ̀nnì Sɑ̃mbɑdɑɑ nɛ̀ Tobiyɑ nɛ̀ Kesɛmmu Adɑbubɛ botí kou nɛ̀ ti dootitɔbɛ̀ ti mɑɑ́mɛ̀ kuduotí kɛ dèè kɛ̀ mɛfíè mmɑmɛ̀ í kpɑɑ́. Dɛ̀ do sɔ̃́ m mu nyí còńnɛ́ yɛcɑ̀kɛ̀ kó idɛí. 
\v 2 Sɑ̃mbɑdɑɑ nɛ̀ Kesɛmmu kɛ̀ bɛ̀ɛ tɔ̃nní kɛ̀ bɛ̀ n nɑ́kɛ́ kɛ dɔ̀ n kɔtoo kɛ̀ tí mɑ́ɑ́ Kefɛdimmu Onɔɔ biriku kɛ́nɑ́kɛ́. Nɛ̀ bɛ yɛ̀mmɛ̀ miɛkɛ kɛ nɛ́ dɔ́ kɛ́ n dɔɔ̀ mɛyɛi. 
\v 3 Kɛ̀ n tɔ̃nkoo kɛ̀ bɛ̀ɛ bɛ̀ nɑ̀kɛ́ kɛ dɔ̀: M pĩ́ mmùù tɔ̃mmú í tú musɑ́m̀pɔ́mù, m bɑ́ɑ́ nɑ kɛ́ mù kũ̀ńnɛ́ kɛ́kɔtoo kɛ́ bɛ̀ yɑ̀, kɛ̀ n yìtɛ́, mutɔ̃mmú yóó cómmúmu. 
\v 4 Kucɛ mɛ̀nɑ̀ɑ̀ bɛ̀ n duɔnnímɛ̀ dipɑ́tíri kɛ̀ dì tɔ tinɑ́ɑǹtì tìmɑ́ɑ̀. Kɛ̀ m múnkɛ mbɛ̀ tɛ̃̀ńnìnko mɛtɛ̃́nnímɛ̀ mɛ̀mɑ́ɑ̀. 
\v 5 Kucɛ mɛ̀nùmmù Sɑ̃mbɑdɑɑ tɔ̃nnɛ̀nnímɛ̀ o kóo tɔ̃ntì dipɑ́tíri kɛ̀ dì feí, 
\v 6 kɛ wɑ̃̀ri kɛ tú yɛhɛkɛ̀ yɛmɔu kɔbɛ nɑ́ɑ́mmu kɛ̀ Kesɛmmu nɑ̀ɑ́ nkɛ tú: Fɔ̃́ nnɛ̀ Sifubɛ sɔmbɛ di dɔ́ kɛ́bɔ nhokpɑ̀ɑ̀tì nwe, kɛ̀ dɛɛ̀ te kɑ̀ɑ mɑɑ́ kuduotí kɛ bo nɑɑ́ nSedisɑdɛmmu kóo kpɑ̀ɑ̀tì, 
\v 7 kɛ̀ kɑnnɛ ikuɔ́ nìùbɛ̀ bɛ̀ɛ yóó pĩɛ̃kɛ́ Sedisɑdɛmmu miɛkɛ ɑ túmɛ̀ Sudɑɑ kɔbɛ kóo kpɑ̀ɑ̀tì. Okpɑ̀ɑ̀tì yóó tì kèèmu. Dɛɛ̀ te kɛ̀ n tu ɑ́ kɔtɛní kɛ̀ ti nɑ́kɛ́. 
\v 8 Kɛ̀ nh ò tɛ̃̀ńnɛ́ kɛ dɔ̀: A mɛ nnɑ̀kɛ́ tì òmɔù weè í tì bɛ́i, fɔ̃́ɔ̃̀ yɛ̀mmɛ̀ mɛ̀ dò nkɛ̀ fɔ̃́ɔ̃̀ tì keutɛ́ kɛ nɑ́ɑ́. 
\v 9 Bɛ̀ dɔ́ kɛ́donnɛ́ ti kɔ̃m̀bùɔ̀tì nti kɛ nɑ́ɑ́ nkɛ tú: Bɛ kɔ̃̀ntì bo yɑ̃rikɛ kɛ̀ mutɔ̃mmúu cómmú.
\b
\p N Yiɛ̀ nKuyie nhɑ́ n kpénkùnnɛ n tɔ̃mmú miɛkɛ.
\b
\p
\v 10 Diyiè mɑrì kɛ̀ n kɔtɛ Dedɑyɑ birɛ Semmɑyɑ borɛ̀ Mɛetɑbɛɛdi yɑɑ̀birɛ, kɛ yɛ̃́ ò do í nɑmɛ̀ kɛ́kɔtɛní m borɛ̀. Kòo n nɑ́kɛ́ kɛ dɔ̀: Tí tɑ Kuyie ncĩ́ɛ̃̀tɛ̀ miɛkɛ, kɛ́kpetínnɛ́ yɛbòrɛ̀, ɑ dootitɔbɛ̀ bɛɛ̀ kɔ̀riní kɛ nyènkɛ̀ kɛ bo dɑ pĩ́ nkɛ́kuɔ. 
\v 11 Kɛ̀ nh ò tɛ̃̀ńnɛ́ kɛ dɔ̀: Míì kó kubotí í cokù, n ketɛ́ kɛ í dò nkɛ́tɑ Kuyie ncĩ́ɛ̃̀tɛ̀ kɛ́nkpɑɑ́ kɛ fòù. N yí tɑti.
\p
\v 12 N do bɑntɛ́mu kɛ dò nhò nnɑ̀ɑ́ ntìì nɑ́ɑǹtì í bonní Kuyie mborɛ̀, ò tì nɑ̀ɑ́ nTobiyɑ nɛ̀ Sɑ̃mbɑdɑɑ bɛ̀ ò yietí mɛ̀ɛ̀ kpɛ́í nkɛ. 
\v 13 Ò bɛ́i mmɛmmɛ kɛ̀ kufɔ̃wɑɑ́ nkuù bo m pĩ́ nkɛ̀ n dɔɔ̀ ò yɛ̃mmɛ̀ kɛ́yetɛ́nɛ̀ Kuyie, kòo nɑ kɛ́sĩ̀nkùnnɛ n yètìrì kɛ́ nh ɑ̃nnɛ́ ifɛi. 
\v 14 Kuyie nhɑ bɑ́ɑ́ yɛ̃̀ Tobiyɑ nɛ̀ Sɑ̃mbɑdɑɑ bɛ̀ n dɔ̀ɔ̀ dɛ̀, ɑ múnkɛ í yɛ̃̀ Nɔdɑdiɑ onitipòkù wèè nɑ̀ɑ́ nhɑ pɑ̃ɑ̃nɑ́ɑǹtì nɛ̀ bɛtɔbɛ̀ bɛ̀ɛ̀ nɑ̀ɑ́ nhɑ pɑ̃ɑ̃nɑ́ɑǹtì bɛ̀ do dɔ́mɛ̀ kɛ́donnɛ́ n kɔ̃m̀bùɔ̀tì.
\b
\p
\v 15 Kuduotí kó mumɑrimù do dèè dibenni tɑ̃̀nkù bɛ̀ tu wè Edudi\f + \fr 6:15 \fr*\fk Edudi: \fk*\ft Bɛ̀ do kɑɑmmɛ̀ bɛtɑ̃̀ɑ̃̀bɛ̀ nɛ̀ ti bɛ̀ kɑɑmmɛ̀ dɛ̀ í wɛ̃. Bɛ kóo tɑ̃̀nkù Edudi berínɛ̀ ti kó bɛtɑ̃̀ɑ̃̀bɛ̀ oniínwè nɛ̀ owɛínwè dɛ cuokɛ̀ nkɛ (diyofíì nɛ̀ kupɔɔsɛ̃ĩkù dɛ cuokɛ̀).\ft*\f* kó diyiè sipísìdɛ́ nɛ̀ dinummurì ndi. Ti do mɑɑ̀ kɛ́mmɔkɛ yɛwe sipísìnùmmù nɛ̀ yɛ̀dɛ́ɛ̀ ndi. 
\v 16 Ti dootitɔbɛ̀ nɛ̀ yɛhɛkɛ̀ yɛ̀ɛ̀ ti fitɛ́ yɛ kɔbɛ kèè dìì mɔ̀nnì ti mɑɑ́mɛ̀ kuduotí kɛ dèè kɛ̀ dɛ̀ɛ bɛ̀ di kɛ̀ bɛ̀ ti yɔtɛ, kɛ́bɑntɛ́ Kuyie nkuù ti niitɛ́mɛ̀ dɛ kó mutɔ̃mmú.
\p
\v 17 Dɛ kó mɛfíè mmiɛkɛ Sudɑɑ ɛì kó bɛkótíbɛ̀ nɛ̀ Tobiyɑ kɛ̀ bɛ̀ wɑ̃̀ũ bɛtɔbɛ̀ yɛpɑ́tɛ mɛcɑ̃ɑ̃ mmɛcɑ̃ɑ̃. 
\v 18 Kɛ̀ Sudɑɑ kɔbɛ pɛ́u nhò mɔ̀kɛnɛ̀ mɛtɑummɛ̀ kɛ yɛ̃́ ò do túmɛ̀ Sifubɛ botí kou Adɑɑ birɛ Sikɑnniyɑ cɔ̀kù nwe. Kòo birɛ Yoɑnɑnni po Bɛdekiɑ birɛ Mɛsudɑmmu kóo sɑpɑ̀ɑ̀. 
\v 19 Kɛ̀ bɛ̀ nhò sɑ̃ntí n yììkɛ̀ kɛ tɔu n nɑ́ɑǹtì koò nɑ̀ɑ́. Mɛm̀mɛ kɛ̀ Tobiyɑ wɑ̃riní yɛpɑ́tɛ kɛ bo yɑ̃́ríkùnnɛ n kɔ̃̀ntì.
\c 7
\s1 Bɛ̀ kɑ̀nnɛmɛ̀ bɛbɑ̀rìbɛ̀ dihɛì kpɛ́í
\p
\v 1 Kuduotí mɑɑ́ dìì mɔ̀nnì kɛ́deè kɛ̀ n cónnɛ́ yɛbòrɛ̀ kó idɛí nɛ̀ yɛcɑ̀kɛ̀ kɛ́deè, bɛ̀ɛ yó mbɑɑ yɛbòrɛ̀ nɛ̀ bɛyɛndèmbɛ̀ nɛ̀ Defiibɛ kɛ̀ bɛ̀ɛ ketɛ́ bɛ tɔ̃mmú. 
\v 2 Kɛ̀ n túótɛ́ n tebitɛ Anɑnni kɛ́bɑɑ́ nSedisɑdɛmmu kɛ́túótɛ́ Anɑnniyɑ bɛhɑ̃ɑ̃pɔ̀mbɛ̀ kóo kótí kòo mbɑkɛ́ tɛcɛ̃kpetɛ̀. Ò do tú onìtì wèè dɔ̀ɔ̀ri wènwe ò bɛ́i ntì kɛ dé Kuyie nkɛ̀ dɛ̀ pɛ̃ɛ̃tɛ́ bɛsɔmbɛ pɛ́u. 
\v 3 Kɛ̀ m bɛ̀ nɑ̀kɛ́ kɛ dɔ̀: Sedisɑdɛmmu kó yɛbòrɛ̀ níí bɑ́ɑ́ kpetɛ́ kɛ̀ diyiè í tònkɛ̀, kuyuoku kɛ́ nyɛ̀ kpetí. Bɛ̀ɛ̀ bɑ̀ɑ yɛbòrɛ̀ kɛ̀ bɛ̀ bo kɛ cómmú bɛ kɑrɛ̀ bɛ̀ kɑrɛ̀. Kɛ̀ m bɛ̀ nɑ̀kɛ́ kɛ dɔ̀ bɛ̀ɛ mɑɑ́ didènnì bɛ̀ɛ̀ yó mbɑɑ dihɛì bɛ kpɛ́í, bɑ́ wè o kó dikɑrì mbo o cĩ́ɛ̃̀tɛ̀ ììkɛ̀. 
\v 4 Sedisɑdɛmmu ɛì do pɛ̃kɛ̀mu kɛ dɛu, bɛnìtìbɛ̀ nɛ́ í nsũ di miɛkɛ, sicɛ̃́ĩ mu ndo í mɑɑ́ kɛ́deè.
\s1 Bɛ̀ kɑ̀ɑmmɛ̀ Sifubɛ bɛ̀ɛ̀ bo Sedisɑdɛmmu
\p
\v 5 Kɛ̀ Kuyie nni mbɛ́innɛ̀ kɛ̀ n tíí ndihɛì kó bɛkótíbɛ̀ nɛ̀ bɛbeémbɛ̀ nɛ̀ bɛnìtìbɛ̀ sɔmbɛ. Kɛ̀ n duɔ́ nkɛ̀ bɛ̀ɛ kɑɑ mbɛnìtìbɛ̀ kɛ̀ n wéntɛ́ bɛ̀ɛ do niitɛ́ kɛ́konní Sedisɑdɛmmu bɛ yètɛ̀ wɑ̃̀ri dìì pɑ́tíri miɛkɛ kɛ́yɑ̀ yɛyètɛ̀ yɛ̀ɛ̀ mɛ̀ ntũ̀nní.
\p
\v 6 Ntɛ okpɑ̀ɑ̀tì Nɛbukɑnnɛsɑɑ kó dimɔ̀nnì bɛ̀ do pĩ̀ḿmú bɛ̀ kɛ́kònnɛ̀ Bɑbidɔnni, kɛ̀ kusṹkùu wɛ̃tɛ kɛ́kò nSedisɑdɛmmu Sudɑɑ tenkɛ̀, bɑ́ wè kòo kɑri o ɛì. 
\v 7 Bɛ̀ɛ̀ do nɛínɛ̀ Sodobɑbɛɛdi kɛ́konní bɛɛ̀ yètɛ̀ tu yiɛ: Sosuwee nɛ̀ Nɛemii nɛ̀ Asɑdiɑ nɛ̀ Adɑmmiɑ nɛ̀ Nɑɑmɑnni nɛ̀ Mɔdokɑii nɛ̀ Bidisɑnni nɛ̀ Misipedɛti nɛ̀ Bikibɑii nɛ̀ Nɛummu nɛ̀ Bɑɑnɑ. Ntɛ bɛ nɑɑ̀mùntì dò ndòmmɛ̀.
\m
\v 8 Kɛ̀ Pɑdeosi nɑɑ̀mùnkù kɔbɛ ḿbo sikɔupísìdɛ́ nɛ̀ tɛkɔ̀ùtɛ̀ nɛ̀ sipísìyiekɛ̀ nɛ̀ bɛ̀dɛ́bɛ̀ (2172).
\m
\v 9 Kɛ̀ Sefɑtiɑ nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìyiekɛ̀ nɛ̀ bɛ̀dɛ́bɛ̀ (372).
\m
\v 10 Kɛ̀ Adɑɑ nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìnùmmù nɛ̀ bɛ̀dɛ́bɛ̀ (652).
\m
\v 11 Kɛ̀ Sosuwee nɛ̀ Yoɑbu bɛ yɑɑ̀birɛ Pɑsɑti-Mɔɑbu kó kunɑɑ̀mùnkù kɔbɛ ḿbo sikɔupísìdɛ́ nɛ̀ sikɔusìni nɛ̀ tɛpíítɛ̀ nɛ̀ bɛ̀ni (2818).
\m
\v 12 Kɛ̀ Edɑmmu nɑɑ̀mùnkù kɔbɛ ḿbo tɛkɔùpíítɛ̀ nɛ̀ sikɔusìdɛ́ nɛ̀ sipísìnùmmù nɛ̀ bɛ̀nɑ̀ɑ̀ (10254).
\m
\v 13 Kɛ̀ Sɑtuu nɑɑ̀mùnkù kɔbɛ ḿbo sikɔusìni nɛ̀ sipísìnɑ̀ɑ̀ nɛ̀ bɛ̀nùmmù (845).
\m
\v 14 Kɛ̀ Sɑkɑii nɑɑ̀mùnkù kɔbɛ ḿbo sikɔusìyiekɛ̀ nɛ̀ sipísìkuɔ̀ (760).
\m
\v 15 Kɛ̀ Binnuii nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìnɑ̀ɑ̀ nɛ̀ bɛ̀ni (648).
\m
\v 16 Kɛ Bebɑii nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìdɛ́ nɛ̀ bɛ̀ni (628).
\m
\v 17 Kɛ Asikɑdi nɑɑ̀mùnkù kɔbɛ ḿbo sikɔupísìdɛ́ nɛ̀ sipísìtɑ̃ɑ̃ti nɛ̀ sipísìdɛ́ nɛ̀ bɛ̀dɛ́bɛ̀ (2322).
\m
\v 18 Kɛ̀ Adonnikɑmmu nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìkuɔ̀ nɛ̀ bɛ̀yiekɛ̀ (667).
\m
\v 19 Bikibɑii nɑɑ̀mùnkù kɔbɛ ḿbo sikɔupísìdɛ́ nɛ̀ sipísìkuɔ̀ nɛ̀ bɛ̀yiekɛ̀ (267).
\m
\v 20 Kɛ̀ Adinni nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìnùmmù nɛ̀ bɛ̀nùmmù (655).
\m
\v 21 Kɛ̀ Esekiɑsi yɑɑ̀birɛ Atɛɛ nɑɑ̀mùnkù kɔbɛ ḿbo sipísìwɛi nɛ̀ bɛ̀ni.
\m
\v 22 Kɛ̀ Asummu nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìdɛ́ nɛ̀ bɛ̀ni (328).
\m
\v 23 Kɛ̀ Besɑii nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìdɛ́ nɛ̀ bɛ̀nɑ̀ɑ̀ (324).
\m
\v 24 Kɛ̀ Adifi nɑɑ̀mùnkù kɔbɛ ḿbo tɛkɔ̀ùtɛ̀ nɛ̀ tɛpíítɛ̀ nɛ̀ bɛ̀dɛ́bɛ̀ (112).
\m
\v 25 Kɛ̀ Kɑbɑɔ̃ɔ̃ ɛì kɔbɛ ḿbo sipísìwɛi nɛ̀ bɛ̀nùmmù (95).
\m
\v 26 Kɛ̀ Bɛtideɛmmu nɛ̀ Nɛtofɑɑ kɛ̀ dɛ kó yɛhɛkɛ̀ kɔbɛ ḿbo tɛkɔ̀ùtɛ̀ nɛ̀ sipísìni nɛ̀ bɛ̀ni (188).
\m
\v 27 Anɑtɔti ɛì kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀ni (128).
\m
\v 28 Kɛ̀ Bɛti-Asimmɑfɛti ɛì kɔbɛ ḿbo sipísìnɑ̀ɑ̀ nɛ̀ bɛ̀dɛ́bɛ̀.
\m
\v 29 Kɛ̀ Kidiyɑ-Yeɑdimmu nɛ̀ Kefidɑɑ nɛ̀ Bedɔti kɛ̀ dɛ ɛkɛ̀ kɔbɛ ḿbo sikɔusìyiekɛ̀ nɛ̀ sipísìnɑ̀ɑ̀ nɛ̀ bɛ̀tɑ̃ɑ̃ti (743).
\m
\v 30 Kɛ̀ Dɑmɑɑ nɛ̀ Kebɑɑ kɛ dɛ ɛkɛ̀ kɔbɛ ḿbo sikɔusìkuɔ̀ nɛ̀ sipísìdɛ́ nɛ̀ òmɑ́ɑ̀ (621).
\m
\v 31 Kɛ̀ Mikimɑsi ɛì kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀dɛ́bɛ̀ (122).
\m
\v 32 Kɛ̀ Betɛɛdi nɛ̀ Aii kɛ̀ dɛ ɛkɛ̀ kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀tɑ̃ɑ̃ti (123).
\m
\v 33 Kɛ̀ Nɛbo kó dihɛì tɛrì kɔbɛ ḿbo sipísìnùmmù nɛ̀ bɛ̀dɛ́bɛ̀.
\m
\v 34 Kɛ̀ Edɑmmu tɔù kó kunɑɑ̀mùnkù kɔbɛ ḿbo tɛkɔ̀ùpíítɛ̀ nɛ̀ sikɔusìdɛ́ nɛ̀ sipísìnùmmù nɛ̀ bɛ̀nɑ̀ɑ̀ (1254).
\m
\v 35 Kɛ̀ Adimmu nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìdɛ́ (320).
\m
\v 36 Kɛ̀ Sedikoo ɛì kɔbɛ ḿbo sikɔusìtɑ̃ɑ̃ti nɛ̀ sipísìnɑ̀ɑ̀ nɛ̀ bɛ̀nùmmù (345).
\m
\v 37 Dɔdi nɛ̀ Adidi nɛ̀ Onɔɔ ɛkɛ̀ kɔbɛ ḿbo sikɔusìyiekɛ̀ nɛ̀ sipísìdɛ́ nɛ̀ òmɑ́ɑ̀ (721).
\b
\m
\v 38 Kɛ̀ Senɑɑ ɛì kɔbɛ ḿbo sikɔupísìtɑ̃ɑ̃ti nɛ̀ sikɔusìwɛi nɛ̀ sipísìtɑ̃ɑ̃ti (3930).
\m
\v 39 Kɛ̀ ikuɔ́ nìùtì Sosuwee yɑɑ̀birɛ Yedɑyɑ nɑɑ̀mùnkù kɔbɛ ḿbo sikɔusìwɛi nɛ̀ sipísìyiekɛ̀ nɛ̀ bɛ̀tɑ̃ɑ̃ti (973).
\m
\v 40 Imɛɛ nɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìnùmmù nɛ̀ bɛ̀dɛ́bɛ̀ (1052).
\m
\v 41 Kɛ̀ Pɑsuu nɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìdɛ́ nɛ̀ sipísìnɑ̀ɑ̀ nɛ̀ bɛ̀yiekɛ̀ (1247).
\b
\m
\v 42 Kɛ̀ Abimmu nɑɑ̀mùnkù kɔbɛ ḿbo tɛkɔupíítɛ̀ nɛ̀ tɛpíítɛ̀ nɛ̀ bɛ̀yiekɛ̀ (1017).
\b
\m
\v 43 Kɛ̀ Defiibɛ kó kunɑɑ̀mùnkù kɔbɛ ntú biɛ: Odefɑɑ yɑɑ̀bí Sosuwee nɛ̀ Kɑdimiɛdi bɛ nɑɑ̀mùnkù sipísìyiekɛ̀ nɛ̀ bɛ̀nɑ̀ɑ̀.
\b
\m
\v 44 Kuyie ncĩ́ɛ̃̀tɛ̀ kó bɛdèmbɛ̀ miɛkɛ Asɑfu nɑɑ̀mùnkù kɔbɛ tɛkɔ̀ùtɛ̀ nɛ̀ sipísìnɑ̀ɑ̀ nɛ̀ bɛ̀ni (148).
\m
\v 45 Bɛ̀ɛ̀ bɑ̀ɑ yɛbòrɛ̀ bɛ miɛkɛ Sɑdummu nɛ̀ Atɛɛ nɛ̀ Tɑdimɔɔ nɛ̀ Akubu nɛ̀ Atitɑ nɛ̀ Sobɑii bɛ nɑɑ̀mùntì kɔbɛ tɛkɔ̀ùtɛ̀ nɛ̀ sipísìtɑ̃ɑ̃ti nɛ̀ bɛ̀ni (138).
\b
\m
\v 46 Kɛ̀ Kuyie ncĩ́ɛ̃̀tɛ̀ tɔ̃mbɛ̀ kó ditĩ̀nnì kɔbɛ ntú biɛ: Tisisɑ nɛ̀ Asufɑ nɛ̀ Tɑbɑɔti 
\v 47 nɛ̀ Kedosi nɛ̀ Siyɑ nɛ̀ Pɑdonni 
\v 48 nɛ̀ Debɑnɑɑ nɛ̀ Akɑbɑ nɛ̀ Sɑdimɑii 
\v 49 Annɑni nɛ̀ Kidɛdi nɛ̀ Kɑsɑɑ 
\v 50 nɛ̀ Edeɑyɑɑ nɛ̀ Edesinni nɛ̀ Nɛkodɑɑ 
\v 51 nɛ̀ Kɑsɑmmu nɛ̀ Usɑɑ nɛ̀ Pɑseyɑɑ 
\v 52 nɛ̀ Besɑii nɛ̀ Mɛunimmu nɛ̀ Nɛfusesimmu 
\v 53 Bɑkibuku nɛ̀ Akufɑ nɛ̀ Aduuri 
\v 54 nɛ̀ Bɑtisidouti nɛ̀ Mɛidɑɑ nɛ̀ Adisɑ 
\v 55 nɛ̀ Bɑdikosi nɛ̀ Sisedɑɑ nɛ̀ Temɑɑ, 
\v 56 nɛ̀ Nɛtisiɑ nɛ̀ Atifɑ.
\b
\m
\v 57 Sɑdomɔɔ kó bɛtɔ̃mbɛ̀ nɑɑ̀mùntì kɔbɛ do tú biɛ: Sotɑii nɛ̀ Sofedɛti nɛ̀ Pedidɑ, 
\v 58 Yɑɑdɑ nɛ̀ Dɑdikonni nɛ̀ Kidɛdi, 
\v 59 Sefɑtiɑ nɛ̀ Atidi nɛ̀ Pokedɛti-Asebɑimmu nɛ̀ Amɔɔ.
\b
\m
\v 60 Bɛ̀ɛ do tú Kuyie ncĩ́ɛ̃̀tɛ̀ kó bɛtɔ̃mbɛ̀ nɛ̀ Sɑdomɔɔ kó bɛtɔ̃mbɛ̀ yɑɑ̀bí kɛ̀ bɛ̀ɛ wɛ̃nnɛ́ kɛ́mbo sikɔusìtɑ̃ɑ̃ti nɛ̀ sipísìwɛi nɛ̀ bɛ̀dɛ́bɛ̀ (392).
\b
\p
\v 61 Bɛ̀ɛ̀ do ìtɛ́ Bɑbidɔnni kɛ́konní Sedisɑdɛmmu kɛ í nnɑ kɛ́nɑ́kɛ́ bɛ yɑɑ̀rìbɛ̀ yètɛ̀ kɛ́bɛnkɛ bɛ̀ tumɛ̀ Isidɑyɛɛribɛ bɛ̀ɛ do tú: Tɛdi-Mɛdɑɑ nɛ̀ Tɛdi-Adisɑɑ nɛ̀ Kedubu-Adonni nɛ̀ Imɛɛ ɛkɛ̀ kɔbɛ. 
\v 62 Bɛmɔu kɛ̀ bɛ̀ɛ wɛ̃nnɛ́ kɛ́mbo sikɔusìkuɔ̀ nɛ̀ sipísìnɑ̀ɑ̀ nɛ̀ bɛ̀dɛ́bɛ̀ (642). Dedɑyɑ nɛ̀ Tobiyɑ nɛ̀ Nɛkodɑ bɛ yɑɑ̀bí nyi mɛmmɛ.
\p
\v 63 Ikuɔ́ nìùbɛ̀ miɛkɛ kɛ̀ bɛ̀mɑbɛ̀ ḿbo kɛ tú: Obɑyɑɑ nɛ̀ Akikoti nɛ̀ Bɑdisidɑii bɛ nɑɑ̀mùntì kɔbɛ. Bɑdisidɑii do tùótɛ́ Bɑdisidɑii Kɑdɑɑdi ɛì kou kóo sɑpɑ̀ɑ̀ nwe kɛ̀ bɛ̀ɛ ò yu o yètìrì. 
\v 64 Kòo wɑmmú o botí kɔbɛ pɑ́tíri miɛkɛ o yètìrì kɛ́mɔ́ntɛ́ kɛ̀ bɛ̀ɛ bɛ̀ dènnɛ ikuɔ́ tɔ̃mmú miɛkɛ. 
\v 65 Kɛ̀ kùmɑ̀ndɑ́ɑ̀ bɛ̀ nɑ̀kɛ́ kɛ dɔ̀: Bɛ̀ bɑ́ɑ́ di bɛ̀ pɑ̃ mùù diì Kuyie kɛ́nkémmúnɛ̀ ikuɔ́ nìùtì bo beémmɛ̀ Kuyie nnɛ̀ ikuɔ́ nɛntì bɛ̀ tu tì udimmu nɛ̀ tumimmu.
\b
\p
\v 66 Isidɑyɛɛribɛ bɛ̀ɛ̀ ìtɛ́ Bɑbidɔnni kɛ konní Sedisɑdɛmmu bɛ̀ do bo sikɔupípísìnɑ̀ɑ̀ nɛ̀ sikɔupísìdɛ́ nɛ̀ sikɔusìtɑ̃ɑ̃ti nɛ̀ sipísìkuɔ̀ ndi (42360). 
\v 67 Kɛ̀ bɛ̀ɛ nɛínɛ̀ bɛtɔ̃mbɛ̀ bɛnitidɑɑbɛ̀ nɛ̀ bɛnitipòbɛ̀ sikɔupísìyiekɛ̀ nɛ̀ sikɔusìtɑ̃ɑ̃ti nɛ̀ sipísìtɑ̃ɑ̃ti nɛ̀ bɛ̀yiekɛ̀ (7337). Bɛdèmbɛ̀ bɛnitidɑɑbɛ̀ nɛ̀ bɛnitipòbɛ̀ kɛ̀ bɛ̀ ḿbo sikɔusìdɛ́ nɛ̀ sipísìnɑ̀ɑ̀ nɛ̀ bɛ̀nùmmù (245), 
\v 69 kɛ mɔkɛnɛ̀ yòyóbɛ̀ sikɔusìnɑ̀ɑ̀ nɛ̀ sipísìtɑ̃ɑ̃ti nɛ̀ bɛ̀nùmmù (435). Sɑ̃mmɑrímú sikɔupísìkuɔ̀ nɛ̀ sikɔusìyiekɛ̀ nɛ̀ sipísìdɛ́ (6720). 
\v 70 Kɛ̀ dihɛì kó bɛkótíbɛ̀ mɑbɛ̀ɛ pɑ̃mmú yɛpɑ̃rɛ̀ kɛ̀ bɛ̀ bo mɑɑ́nɛ̀ Kuyie ncĩ́ɛ̃̀tɛ̀. Kɛ̀ kùmɑ̀ndɑ́ɑ̀ pɑ̃ yɛsɔɔwèrɛ̀ tɛkɔupíítɛ̀ (1000). Yɛbɔ bɛ̀ bo mmɛ́ínɛ̀ yɛ̀ mɛyĩ̀ĩ̀ nsipísìnùmmù yɛkɔutɛ́yɑɑ̀bòrɛ̀ sikɔusìnùmmù nɛ̀ sipísìtɑ̃ɑ̃ti (530) kɛ̀ bɛ̀ bo mpĩ́nnɛ̀ Kuyie ncĩ́ɛ̃̀tɛ̀ miɛkɛ ikuɔ́ tɔ̃mmú. 
\v 71 Bɛhɛikɛ̀nkótíbɛ̀ do pɑ̃mmú yɛ̀ɛ̀ pɑ̃rɛ̀ miɛkɛ kɛ̀ mɛsɔɔ nní ḿbo yɛsɔɔwèrɛ̀ sikɔupípísìdɛ́ (20000) nɛ̀ timɑ́tì pɛ́ítì cìdóòbɛ̀ tɛkɔupíítɛ̀ nɛ̀ tɛkɔ̀ùtɛ̀ (1100). 
\v 72 Kɛ̀ Isidɑyɛɛribɛ sɔmbɛɛ pɑ̃ yɛsɔɔwèrɛ̀ sikɔupípísìdɛ́ (20000), timɑ́tì pɛ́ítì cìdóòbɛ̀ tɛkɔupíítɛ̀ (1000) nɛ̀ yɛkɔutɛ́yɑɑ̀bòrɛ̀ sipísìkuɔ̀ nɛ̀ yɛ̀yiekɛ̀ ikuɔ́ nìùbɛ̀ kpɛ́í.
\b
\p
\v 73 Ikuɔ́ nìùbɛ̀ nɛ̀ Defiibɛ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛdèmbɛ̀ nɛ̀ Isidɑyɛɛribɛ miɛkɛ bɛ̀mɑbɛ̀ bɛ̀ɛ̀ pĩ mmutɔ̃mmú Kuyie ncĩ́ɛ̃̀tɛ̀ miɛkɛ nɛ̀ Isidɑyɛɛribɛ sɔmbɛ kɛ̀ bɛ̀ɛ kɑri bɛ ɛkɛ̀ bɛ ɛkɛ̀.
\c 8
\s1 Ɛsitɑdɑsi do kɑ̀ɑmmɛ̀ Kuyie nkuɔ́ bɛnìtìbɛ̀ ììkɛ̀
\p Dibenni tɑ̃̀nkù yiénwè miɛkɛ kɛ̀ Isidɑyɛɛribɛ ítɛ́ní bɛ ɛkɛ̀ bɛ̀ do bo yɛ̀ɛ̀ miɛkɛ. 
\v 1 Kɛ̀ Isidɑyɛɛribɛɛ wɛ̃nnɛ́ dinùù kɛ́tíí mbɛ̀ tu dìì bòrì mɛniɛ nkó dibòrì, kɛ́nɑ́kɛ́ ikuɔ́ wɑ̃ɑ̃̀tì Ɛsitɑdɑsi kɛ dɔ̀ wèe túótɛ́ní Kuyie nkuɔ́ pɑ́tíri kù do duɔ́ nkɛ̀ Mɔyiisii wɑ̃ri dì. 
\v 2 Mɛm̀mɛ kɛ̀ ikuɔ́ nìùtì Ɛsitɑdɑsii túótɛ́ní Kuyie nkuɔ́ pɑ́tíri kɛ̀ bɛnìtìbɛ̀ɛ tíí, mbɛnitidɑɑbɛ̀ nɛ̀ bɛnitipòbɛ̀ nɛ̀ bɛ̀ɛ̀ kó dimɑ̀ɑ̀ mɔ̀kɛ mɛyɛ̀mmɛ̀ kɛ bo nɑ kɛ́keè, otɑ̃̀nkù yiénwè kó diyiè ketirì do ndi. 
\v 3 Dɛndɛ dibòrì bɛ̀ tu dì mɛniɛ nkó dibòrì ò kɑ̀ɑmmɛ̀ Kuyie nkuɔ́ pɑ́tíri kɛ́ ndì kɑ̀ɑ̀ ndikṹnweńnì kɛ̀ diyiè yɑ̀ɑ cónnɛ́nɛ̀ yɛyɔ, kòo dì kɑ̀ɑ̀ mbɛnitidɑɑbɛ̀ nɛ̀ bɛnitipòbɛ̀ nɛ̀ bɛ̀ɛ̀ kó dimɑ̀ɑ̀ dò nkɛ́nɑ kɛ́keè. Bɛmɔu kɛ̀ bɛ̀ kémmú.
\p
\v 4 Bɛ̀ do dɔ̀ɔ̀ diwũɔ̃tɔ̀nnì ndi nɛ̀ idɛí kɛ̀ Ɛsitɑdɑsi ndekɛ di ĩ́nkɛ̀. Mɑtitiɑ nɛ̀ Sɛmmɑ nɛ̀ Annɑyɑ nɛ̀ Udii nɛ̀ Idikiyɑ nɛ̀ Mɑseyɑ kɛ̀ bɛ̀ còḿmú o bɑkù yoú. Pedɑyɑ nɛ̀ Mikɑyɛɛdi nɛ̀ Mɑdikiɑ nɛ̀ Asummu nɛ̀ Asibɑdɑnɑ nɛ̀ Sekɑdii nɛ̀ Mɛsudɑmmu kɛ̀ bɛ̀ bo kucɑ̃̀nku. 
\v 5 Kɛ̀ Ɛsitɑdɑsii pĩntɛ dipɑ́tíri bɛnìtìbɛ̀ bɛmɔu ììkɛ, kɛ̀ bɛ̀ɛ di yɑ̀ kɛ yɛ̃́ ò do cómmúmɛ̀ dɛ iitírɛ̀ ndɛ. Ò dì pĩ̀ntɛ dìì mɔ̀nnì kɛ̀ bɛ̀ɛ ítɛ́ kɛ́cómmú. 
\v 6 Kɛ̀ Ɛsitɑdɑsii sɑ̃ntɛ Kuyie nkperíkù kɛ̀ bɛnìtìbɛ̀ bɛmɔu cɔ́útɛ́ kɛ dɔ̀: Dɛ̀ mmɛ ndò. Kɛ́do kɛ́nínkú kɛ́sĩ́nnɔ́ɔ kɛtenkɛ̀, 
\v 7 kɛ́ítɛ́ní kɛ́cómmɔ́ɔ Defiibɛ bɛ̀ɛ̀ do tú ikuɔ́ nìùbɛ̀, kɛ̀ bɛ̀ mbɛ̀ tiè Kuyie nkuɔ́ bɛ̀ kɑ̀ɑ nyì ĩ́nkɛ̀, bɛɛ̀ Defiibɛ yètɛ̀ do tú: Sosuwee nɛ̀ Bɑni nɛ̀ Sedebiɑ nɛ̀ Yɑminni nɛ̀ Akubu nɛ̀ Sɑbetɑii nɛ̀ Odiɑ nɛ̀ Mɑseyɑ nɛ̀ Keitɑɑ nɛ̀ Asɑdiɑ nɛ̀ Yosɑbɑdi nɛ̀ Annɑni nɛ̀ Pedɑyɑɑ. 
\v 8 Kɛ̀ Ɛsitɑdɑsi nkɑɑ nKuyie nkuɔ́ pɑ́tíri kɛ̀ dɛ̀ feí kɛ tì wèńkùnko, kɛ nɑ́ɑ́ mbɛnìtìbɛ̀ tì tu mù, kɛ̀ bɛ̀ kèḿmú.
\p
\v 9 Kɛ̀ bɛnìtìbɛ̀ bɛmɔuu tì kèè nkɛ́tiitɛ́ yɛdɑbùò. Mɛm̀mɛ kùmɑ̀ndɑ́ɑ̀ Nɛemii nɛ̀ ikuɔ́ nìùtì Ɛsitɑdɑsi nɛ̀ Defiibɛ bɛ̀ɛ̀ do duɔ̀ nyitié mbɛnìtìbɛ̀ kɛ̀ bɛ̀ɛ nɑ́kɛ́ bɛnìtìbɛ̀ kɛ dɔ̀: Bɑ́ nkuɔ̀nnɛ̀, yíe nkó diyiè tu Kuyie nkpɛri ndi.
\p
\v 10 Kɔtɛnɛ̀ kɛ́di tidiitì sɑ̀ɑ̀tì kɛ́yɑ̃̀ mɛnɑɑ̀ nsɑ̀ɑ̀mɛ̀, kòò mɔù bo di cuokɛ̀ kɛ í mɔkɛ, dí ò totɛ́nɛ̀. Yíe nkó diyiè tu Kuyie nkpɛri ndi, di yɛ̀mmɛ̀ bɑ́ɑ́ cɑ̀ɑ̀rɛ̀, yóunɛ̀ kɛ̀ Kuyie ndi duɔ́ ndìì wɛ̀ì ntú di kó muwɛ̃rímú.
\p
\v 11 Kɛ̀ Defiibɛ mbɑ́ɑ́ mbɛnìtìbɛ̀ kɛ tú: Cĩ́ɛ̃́kɛ́nɛ̀, yíe nkó diyiè tu Kuyie nkpɛri ndi, bɑ́ɑ́ yóunɛ̀ kɛ̀ di yɛ̀mmɛ̀ɛ cɑɑ̀rɛ̀.
\p
\v 12 Mɛm̀mɛ kɛ̀ bɛnìtìbɛ̀ɛ kɔtɛ kɛ́di kɛ́yɑ̃̀ mɛnɑɑ̀ kɛ́pɑ̃mmú bɛ kɔbɛ tidiitì kɛ̀ diwɛ̀ì mbɛ̀ bo mɛdiɛ̀ nkɛ yɛ̃́ bɛ̀ do kèèmɛ̀mu bɛ̀ bɛ̀ nɑ̀kɛ́ tì.
\s1 Bɛ̀ do bɑɑ́mmɛ̀ titouti kó dibɑnni
\p
\v 13 Otɑ̃̀nkù yiè dɛ́rì yiè, bɛhɛikɛ̀nkótíbɛ̀ nɛ̀ ikuɔ́ nìùbɛ̀ nɛ̀ Defiibɛ kɛ̀ bɛ̀ɛ tíí nyikuɔ́ wɑ̃ɑ̃̀tì Ɛsitɑdɑsi borɛ̀ kɛ́nwéí Kuyie nkuɔ́ pɑ́tíri ò bɛ̀ kɑ̀ɑ ndì kó tinɑ́ɑǹtì. 
\v 14 Kɛ̀ bɛ̀ɛ yɑ̀ ikuɔ́ pɑ́tíri Kuyie ndo duɔ́ nkɛ̀ Mɔyiisii wɑ̃ri dì miɛkɛ tì wɑ̃̀rimɛ̀ kɛ tú Isidɑyɛɛribɛ dò nkɛ́mbo titouti miɛkɛ nkɛ otɑ̃̀nkù yiénwè kó dibɑnni miɛkɛ. 
\v 15 Mɛm̀mɛ bɛ̀ yɑ̀mɛ̀ kɛ dɔ̀ bɛ̀ dò nkɛ́pĩɛ̃kɛ́ yɛhɛkɛ̀ yɛmɔu miɛkɛ nɛ̀ Sedisɑdɛmmu. Mɛm̀mɛ kɛ̀ bɛ̀ɛ pĩɛ̃kɛ́ kɛ dɔ̀: Dekɛnɛ̀ ditɑ̃rì kɛ́kɔ̃ũní odìfíè dikpɑ́ɑ̀ kou kó tifɑ̃ɑ̃̀tì nɛ̀ dɛtie mbɛ̀ tu dɛ̀ míírì dɛ kó tifɑ̃ɑ̃̀tì nɛ̀ tipuonti nɛ̀ tifɑ̃pèùtì, kɛ́dɔɔ̀nɛ̀ tì wɑ̃̀rimɛ̀.
\p
\v 16 Bɛ̀ pĩɛ̃kɛ́ mɛmmɛ kɛ̀ Isidɑyɛɛribɛɛ yɛ̀ kɛ́wɑɑnní tifɑ̃ɑ̃̀tì, bɑ́ wè kòo dɔɔ̀ kutouku o cĩ́ɛ̃̀tɛ̀ dɑ̀nkù nɛ̀ o pérímù miɛkɛ nɛ̀ Kuyie ncĩ́ɛ̃̀tɛ̀ pérímù miɛkɛ, nɛ̀ bɛ̀ tu dìì bòrì mɛniɛ nkó dibòrì borɛ̀, nɛ̀ dibòrì bɛ̀ tu dì Efɑdɑimmu kpɛri dì borɛ̀. 
\v 17 Isidɑyɛɛribɛ bɛ̀ɛ̀ do tú tidɑɑtì Bɑbidɔnni kɛ konní Sedisɑdɛmmu kɛ̀ bɛ̀ɛ dɔɔ̀ titouti bɛmɔu kɛ́mbo, kɛ yɑ̃nkùnnɛ diwɛ̀ì mɛsɑ̀ɑ̀, kɛ yɛ̃́ nɛ̀ Nunni birɛ Sosuwee kó dimɔ̀nnì kɛ́ntɔ kɛ́tuɔkɛnní dɛ yiè bɛ̀ do í dɔ̀ɔ̀mɛ̀ mɛbotí. 
\v 18 Kɛ̀ bɛ̀ nkɑɑ nKuyie nkuɔ́ pɑ́tíri yɛwe yɛmɔu, kɛ́túótɛ́ dibɑnni yiè ketirì kɛ́ntɔ kɛ́tuɔkɛnɛ̀ disɔnni. Kɛ̀ dibɑnni mmɔkɛ yɛwe yɛ̀yiekɛ̀ kɛ̀ diniínnì ntú dibɑnni denni dìì yiè, kɛ̀ bɛ̀ɛ ɑ̃nnɛ́ mɛtíímmɛ̀ diɛmɛ̀ ikuɔ́ yɛ̃mmɛ̀.
\c 9
\s1 Bɛ̀ kuɔ́nnɛ̀mɛ̀ Kuyie nkɛ́ kù nɑ̀kɛ́ bɛ̀ cɑɑ̀rìmɛ̀
\p
\v 1 Mɛm̀mɛ dɛ kóo tɑ̃̀nkù omɑ́ɑ̀ miɛkɛ bɑkɛ diyiè sipísìdɛ́ nɛ̀ dinɑɑnnì yiè kɛ̀ Isidɑyɛɛribɛɛ tíí mbɛmɔu kɛ bo boú dinùù kɛ́dɑ́ɑ́tí tifɔ̀ɔ̀tɔ̃̀ntì kɛ́pũ mbɛ yɔ mutɑ̃́ɑ̃́. 
\v 2 Kɛ̀ Isidɑyɛɛribɛ kó kubotí kɔbɛɛ bɑntɛ́ bɛ cɑɑ̀rìmɛ̀ kɛ́cɑ̃́nnɛ́nɛ̀ ibotí tɛì kɔbɛ kɛ́nnɑ́ɑ́ nKuyie mbɛ cɑɑ̀rìmɛ̀ nɛ̀ bɛ yɛmbɛ̀ kɔ̃mɛ. 
\v 3 Kɛ̀ bɛ̀ɛ ítɛ́ kɛ́cómmú, kɛ̀ bɛ̀ɛ kɑɑ nKuyie nkuɔ́ pɑ́tíri kɛ́mmɔkɛ tɛwebiètɛ̀ mɛfitímɛ̀ mɛ̀tɑ̃ɑ̃ti, kɛ́deè kɛ̀ bɛ̀ɛ sɔɔtɛ́ kɛ́nnɑ́ɑ́ nKuyie mbɛ cɑɑ̀rìmɛ̀, kɛ dɔ̀ tɛwebiètɛ̀ mɛfitímɛ̀ mɛ̀tɑ̃ɑ̃ti kɛ ninku kɛ kù bɑ̀ɑ́.
\p
\v 4 Kɛ̀ Sosuwee nɛ̀ Bɑni nɛ̀ Kɑdimiɛdi nɛ̀ Sebɑnniyɑ nɛ̀ Bunni nɛ̀ Sedebiɑ nɛ̀ Bɑnni nɛ̀ Kenɑnni kɛ̀ bɛ̀ɛ dekɛ diwũɔ̃tɔ̀nnì ĩ́nkɛ̀ kɛ bɔ́útɛ́ kɛĩ́nkɛ̀, kɛ bɑ́ntɛ̀ Kuyie nnɛ̀ mɛtɑmmɛ̀ kperímɛ̀. 
\v 5 Kɛ̀ Defiibɛ Sosuwee nɛ̀ Kɑdimiɛdi nɛ̀ Bɑni nɛ̀ Asɑbunniyɑ nɛ̀ Sedebiɑ nɛ̀ Odiɑ nɛ̀ Sebɑnniyɑ nɛ̀ Petɑyɑɑ kɛ̀ bɛ̀ɛ bɛ́i nkɛ dɔ̀: Ítɛ́nɛ̀ kɛ́cómmú kɛ́sɑ̃ntɛ ti Yiɛ̀ nKuyie nkuù te disɑ̃nni sɑ̃́ɑ̃̀.
\s1 Ɛsitɑdɑsi bɑ́ntɛ̀mɛ̀ Kuyie
\p Kɛ̀ Ɛsitɑdɑsii bɑ́ntɛ̀ Kuyie nkɛ dɔ̀:
\q1 Kuyie nfɔ̃́ɔ̃̀ yètìrì dɛu kɛ dò ntí ndɑ sɑ̃ntí,
\q1 fɔ̃́ɔ̃̀ yètìrì pɛ̃ɛ̃tɛ́ yɛsɑ̃ɑ̃ nyɛmɔu,
\q1 fɔ̃́ɔ̃̀ te disɑ̃nni.
\b
\q1
\v 6 Fɔ̃́ nhɑmɑ́ɑ̀ fɔ̃́ɔ̃̀ tu ti Yiɛ̀,
\q1 fɔ̃́ɔ̃̀ dɔ̀ɔ̀ kɛĩ́nkɛ̀ nɛ̀ dɛ̀ɛ̀ kó dimɑ̀ɑ̀ bo kɛĩ́nkɛ̀ miɛkɛ,
\q1 fɔ̃́ɔ̃̀ dɔ̀ɔ̀ kɛtenkɛ̀ nɛ̀ dɛ̀ɛ̀ kó dimɑ̀ɑ̀ bo kɛtenkɛ̀ miɛkɛ,
\q1 dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ.
\q1 Fɔ̃́ɔ̃̀ te dɛmɔu kɛ dɛ̀ fòù,
\q1 kɛĩ́nkɛ̀ kó bɛkperíbɛ̀\f + \fr 9:6 \fr*\fk kɛĩ́nkɛ̀ kó bɛkperíbɛ̀: \fk*\ft Bɛ̀ nɑ̀ɑ́ mbɛ̀ɛ̀ kpɛ́í diɛ, ti í yɛ̃́ bɛ̀ɛ̀ kperíbɛ̀ botí nku. Mɔ̀nnì mɑrì dɛ̀ bo nɑ kɛ́ntú Kuyie ntɔ̃rɛ̀ yoo diyiè yoo otɑ̃̀nkù nɛ̀ siwɑ̃̀ɑ̃.\ft*\f* ninku fɔ̃́ɔ̃̀ ììkɛ̀ kɛ dɑ bɑ́ɑ́.
\q1
\v 7 Ti Yiɛ̀ nKuyie, fɔ̃́ɔ̃̀ tɑ̃ɑ̃tɛ́ Abɑrɑɑmmu
\q1 koò dènnɛ Uudi Kɑndee kó kɛtenkɛ̀ koò yu kɛ yĩ Abɑrɑhɑmmu.
\q1
\v 8 Kɛ pɛ́nsìrì o yɛ̀mmɛ̀,
\q1 koò dɔ̀ɔ̀nɛ̀ mɛtɑummɛ̀ kɛ bɛ́i nkɛ yĩ,
\q1 ɑ bo ò duɔ́ nKɑnnɑhɑ̃ɑ̃ kó kɛtenkɛ̀,
\q1 Itiibɛ nɛ̀ Amɔriibɛ nɛ̀ Pedisiibɛ nɛ̀
\q1 Sebusiibɛ nɛ̀ Kidikɑsiibɛ bɛ̀ bo kɛ̀,
\q1 kòo tiekɛ wenwe nɛ̀ o yɑɑ̀bío.
\q1 Kɛ dɔ̀ɔ̀ ɑ bɛ́i ntì kɛ yɛ̃́ ɑ wetímɛ̀mu.
\b
\q1
\v 9 Kɛ yɑ̀ ti yɛmbɛ̀ fɛ̃́ṹrìmɛ̀ Esibiti
\q1 kɛ́keè bɛ dɑbùò ntipèntì kóo dɑ̀mɛ́ɛ̀rì pɛɛ́mmɛ̀.
\q1
\v 10 Kɛ dɔ̀ɔ̀ mmɛbɛnkùmɛ̀ pɛ́u nɛ̀ tidiɛtì,
\q1 kɛ bɛnkɛ Esibiti kóo kpɑ̀ɑ̀tì
\q1 nɛ̀ o kó bɛtɔ̃mbɛ̀ nɛ̀ o ɛì kɔbɛ bɛmɔu,
\q1 kɛ yɛ̃́ ɑ do yɑ̀mɛ̀ bɛ̀ fɛ̃́ũnkomɛ̀ ti yɛmbɛ̀ nɛ̀ kɛmiɛkɛ,
\q1 kɛ bɛ̀ dɛɛtɛ́ kɛ dɛ̀úkùnnɛ ɑ yètìrì
\q1 kɛ̀ di kpɑɑ́ kɛ dɛu nɛ̀ yíenní.
\q1
\v 11 Kɛ kèétɛ́ dɑ̀mɛ́ɛ̀rì niɛ mbɛ nùɔ mmiɛkɛ
\q1 kɛ̀ bɛ̀ nɑ̀ dɛkperɛ̀ kɛ́séntɛ́,
\q1 kɑ̀ɑ dìu mbɛ̀ɛ̀ do bɛ̀ bɛ̀tiní mɛniɛ mmiɛkɛ
\q1 ditɑ̃́rì ɔ̃ɔ̃ do mɛ̀ɛ̀ botí dibinni.
\q1
\v 12 Kɛ níí mbɛ̀ ni kuyie nnɛ̀ diwɛtirì
\q1 kɛ́ mbɛ̀ ni kɛyènkɛ̀ nɛ̀ muhɑ̃ɑ̃́ nkó diwɛtirì
\q1 kɛ́ mbɛ̀ mí kɛ̀ bɛ̀ wùó mbɛ̀ kèrí dɛ̀.
\q1
\v 13 Kɑ̀ɑ cùtɛ́ní Sinɑii tɑ̃rì ĩ́nkɛ̀ kɛ́ bɛ̀ bɛ́innɛ̀,
\q1 kɛ́ bɛ̀ duɔ́ nhɑ tié nnɛ̀ ɑ kuɔ́
\q1 ìì tu timɔ́mmɔnti kpɛyi,
\q1 nɛ̀ ɑ cìrìmù nɛ̀ ɑ tɑnnɔ̀ sɑ̀ɑ̀yɛ̀.
\q1
\v 14 Kɑ̀ɑ bɛ̀ nɑ̀kɛ́ ɑ kó diyiè kpɛ́í
\q1 dìì tu tɛom̀pùtɛ̀ yiè
\q1 kɛ́ bɛ̀ duɔ́ nhɑ tɑnnɔ̀ nɛ̀ ɑ kuɔ́ nɛ̀ ɑ tié
\q1 kɑ̀ɑ kóo tɔ̃ntì Mɔyiisi tì mbɛ̀ tùo.
\q1
\v 15 Kɛ̀ dikònnìi bɛ̀ pĩ
\q1 kɑ̀ɑ cṹũnní mudiì kɛĩ́nkɛ̀ kɛ̀ bɛ̀ɛ di.
\q1 Kɛ̀ sinɛ́yɛ̃ĩĩ bɛ̀ pĩ
\q1 kɑ̀ɑ duɔ́ nkɛ̀ mɛniɛ nyɛ̀nní dipèrì kɛ̀ bɛ̀ɛ yɑ̃̀
\q1 kɑ̀ɑ bɛ̀ nɑ̀kɛ́ kɛ tú,
\q1 bɛ̀ɛ kɔtɛ kɛ́túótɛ́ dihɛì ɑ do bɛ́i nkɛ́ pɑrìkɛ̀
\q1 kɛ dɔ̀ ɑ yóó duɔ́ ndì bɛ yɛmbɛ̀
\q1 kɛ̀ bɛ̀ɛ tiekɛ.
\b
\q1
\v 16 Kɛ̀ tɛfentɛ̀ nɛ́ dɛutɛ́ ti yɛmbɛ̀,
\q1 kɛ̀ bɛ̀ɛ kpénkùnnɛ bɛ to kɛ́yetɛ ɑ kpɛti
\q1 bɑ́ bɛ̀ í ntũ̀nnɛ ɑ tɑnnɔ̀.
\q1
\v 17 Kɛ̀ bɛ̀ɛ yɛ̃̀ ntidiɛtì ɑ do dɔ̀ɔ̀ tì bɛ cuokɛ̀
\q1 kɛ́kpénkùnnɛ bɛ to kɛ́yetɛ ɑ kpɛti,
\q1 kɛ́tɑ̃ɑ̃tɛ́ kɛ bo wɛ̃tɛ Esibiti
\q1 bɛ̀ do borɛ̀ kɛ pĩ́ mmudɑɑtɔ̃mmú.
\q1 Fɔ̃́ nKuyie nhɑ mɛ ntú wèè cĩ́ɛ̃nko wè nwe,
\q1 kɛ dɔɔri mɛsɑ̀ɑ̀ nkɛ kuɔ̀ mmɛsémmɛ̀,
\q1 kɑ̀ɑ miɛkɛ boo,
\q1 nɛ̀ dɛ̀ kpɛ́í nhɑ í mbɛ̀ bɔntóo.
\q1
\v 18 Bɑ́ nɛ̀ bɛ̀ mɛ ndɔ̀ɔ̀mɛ̀ fɛsɔɔmɑ́tínɑ̀ɑ̀fɛ̀ kɛ́nnɑ́ɑ́ nkɛ tú:
\q1 Ntɛnɛ̀ Kuyie nkùù ti dènnɛní Esibiti.
\q1 Bɛ̀ do dɑ yetɛ́nɛ̀mu kɛ́nnɑ́ɑ́ nkɛ tú:
\q1 Ntɛnɛ̀ Kuyie nkùù ti dènnɛní Esibiti.
\q1 Bɛ̀ do dɑ yetɛ́nɛ̀mu mɛdiɛ̀.
\q1
\v 19 Nɛ̀ ɑ kó mɛsémmɛ̀ diɛmɛ̀ kpɛ́í,
\q1 nhɑ í mbɛ̀ yóu kɛ̀ bɛ̀ nhɑ̃́ɑ̃́ ndikpɑ́ɑ̀ miɛkɛ,
\q1 kɛ̀ diwɛtirì bɑɑ níí mbɛ̀ ni kuyie nnɛ̀ kɛyènkɛ̀
\q1 kɛ́ mbɛ̀ mí kɛ̀ bɛ̀ kèrí.
\q1
\v 20 Kɑ̀ɑ bɛ̀ duɔ́ nhɑ kó muyɑɑ́
\q1 kɛ̀ bɛ̀ bo nɑ kɛ́mbɑɑ̀tìnɛ̀ dɛ̀ɛ̀ wenni,
\q1 kɑ̀ɑ cṹũnní mudiì kɛĩ́nkɛ̀ kɛ̀ bɛ̀ɛ di.
\q1 Kɑ̀ɑ bɛ̀ duɔ́ mmɛniɛ nkɛ̀ bɛ̀ɛ yɑ̃̀.
\q1
\v 21 Kɑ̀ɑ mbɛ̀ tɔ dikpɑ́ɑ̀ miɛkɛ
\q1 kɛ dɔ̀ yɛbie nsipísìnɑ̀ɑ̀
\q1 bɑ́ bɛ̀ í mmɔ̀ńtɛ́ mùmɑmù bɛ yɑ̀ɑ̀tì í nkɛ̃rí,
\q1 bɛ nɑɑ̀cɛ̀i mɛ nyí mmùútí.
\b
\q1
\v 22 Kɑ̀ɑ duɔ́ nkɛ bɛ̀ɛ nɑ ibotí nɛ̀ yɛkpɑ̀ɑ̀tìyɔ
\q1 nɛ̀ yɛhɛkɛ̀ yɛ̀ɛ̀ bɛ̀ fitɛ́
\q1 nɛ̀ Ɛsimɔɔ kóo kpɑ̀ɑ̀tì Sionni tenkɛ̀
\q1 nɛ̀ Bɑsɑ̃ɑ̃ kóo kpɑ̀ɑ̀tì Ɔku kɔkɛ.
\q1
\v 23 Kɑ̀ɑ duɔ́ nkɛ̀ bɛ yɑɑ̀bíi sṹṹ
\q1 kɛ́mɑɑtɛnɛ̀ siwɑ̃̀ɑ̃ dòmmɛ̀ kɛĩ́nkɛ̀,
\q1 kɑ̀ɑ bɛ̀ tɑnnɛ́ dihɛì ɑ do bɛ́i nkɛ́pɑrìkɛ̀
\q1 kɛ dɔ̀ ɑ yóó duɔ́ ndì bɛ yɛmbɛ̀ kɛ̀ bɛ̀ɛ dì tiekɛ.
\q1
\v 24 Kɛ̀ bɛ̀ bíi dì tɑ kɛ́ di tiekɛ,
\q1 kɑ̀ɑ duɔ́ nkɛ̀ bɛ̀ɛ̀ do bo dɛ kó kɛtenkɛ̀
\q1 kɛ̀ bɛ̀ɛ bɛ̀ bɔ̀útɛ́,
\q1 kɛ́duɔ́ nkɛ̀ bɛ̀ɛ nɑ Kɑnnɑhɑ̃ɑ̃ kɔbɛ
\q1 nɛ̀ bɛ kó bɛkpɑ̀ɑ̀tìbɛ̀ nɛ̀ bɛ̀ɛ̀ bo bɛ tenkɛ̀ miɛkɛ.
\q1 Kɛ̀ bɛ̀ mbɛ̀ dɔ̀ɔ̀ri bɛ̀ bɛ̀ dɔ́ mmɛ̀,
\q1
\v 25 kɛ́fietɛ yɛhɛkɛ̀ iduotí fitɛ́ yɛ̀
\q1 kɛ̀ yɛ tenkɛ̀ nɑɑti,
\q1 kɛ́tiekɛ sicɛ̃́ĩ kɛ̀ sì pìɛ́kɛ́ tinɛntì
\q1 nɛ̀ sibií bɛ̀ keú sì,
\q1 kɛ̀ fínyĩ̀ kó dɛtie nnɛ̀ fìkíè kpɛrɛ
\q1 nɛ̀ titebiiti timɔu botí kó dɛtie,
\q1 kɛ̀ bɛ̀ nyo nkɛ sɑ̀nnɛ̀ kɛ́dunnɛ
\q1 kɛ́tuɔ nhɑ bɛ̀ dɔ̀ɔ̀ mɛ̀ɛ̀ sɑ̀ɑ̀ nkpɛ́í.
\b
\q1
\v 26 Nɛ̀ mɛmmɛ kɛ̀ bɛ too kpenkɛ
\q1 kɛ̀ bɛ̀ɛ yetɛ ɑ kpɛti kɛ́dootóo ɑ tié
\q1 kɛ ì bùtínnɛ́,
\q1 kɛ́kuɔ bɛ̀ɛ̀ nɑ̀ɑ́ nhɑ pɑ̃ɑ̃nɑ́ɑǹtì
\q1 bɛ̀ɛ̀ do bɛ̀ tiè nkɛ tú bɛ̀ɛ wɛ̃tɛní ɑ borɛ̀.
\q1 Bɛ̀ do dɑ yetɛ́nɛ̀mu mɛdiɛ̀.
\q1
\v 27 Mɛm̀mɛ kɑ̀ɑ dɛitɛ ɑ nɔ̀ùtɛ̀ bɛ ĩ́nkɛ̀
\q1 kɛ̀ bɛ dootitɔbɛ̀ɛ bɛ̀ do mudoò,
\q1 kɛ̀ bɛ̀ɛ tɑ mɛyɛǹcɑɑ̀rìmɛ̀ miɛkɛ kɛ dɑ kuɔ́nnɛ̀,
\q1 kɑ̀ɑ ḿbo kɛĩ́nkɛ̀ kɛ́keè bɛ dɑbùò.
\q1 Nɛ̀ ɑ kó mɛsémmɛ̀ miɛkɛ kɛ́ bɛ̀ duɔ́ mbɛ̀ɛ̀ bo bɛ̀ dɛɛtɛ́nɛ̀ bɛ dootitɔbɛ̀.
\q1
\v 28 Bɛ̀ tɑ dìì mɔ̀nnì mɛom̀pùmɛ̀ miɛkɛ
\q1 kɛ́wɛ̃tɛ kɛ́tɑ mɛyɛi mmudɔɔ̀rìmù,
\q1 kɑ̀ɑ nɔ́ɔ́tɛ́ ɑ nɔ̀ùtɛ̀ bɛ ĩ́nkɛ̀
\q1 kɛ̀ bɛ dootitɔbɛ̀ɛ bɛ̀ nɑ kɛ́ mbɛ̀ fɛ̃́ũnko.
\q1 Kɛ̀ bɛ̀ dɑ kuɔ́nnɛ̀ kɑ̀ɑ ḿboní kɛĩ́nkɛ̀ kɛ́keè,
\q1 kɛ́ bɛ̀ dɛɛtɛ́ kucɛ mɛ̀pɛ́u nɛ̀ ɑ kó mɛsémmɛ̀ kpɛ́í.
\q1
\v 29 Kɑ̀ɑ bɛ̀ tié nkɛ dɔ̀ bɛ̀ɛ wɛ̃tɛní ɑ borɛ̀,
\q1 kɛ̀ tɛfentɛ̀ɛ bɛ̀ dɛutɛ́ kɛ̀ bɛ̀ í nyie nkɛ kèńtɛ́ ɑ tié
\q1 kɛ́yetɛ́nɛ̀ ɑ tɑnnɔ̀,
\q1 bɛ̀ bo ntũ nyɛ̀ kɛ́nfòù,
\q1 kɛ̀ bɛ̀ɛ kpénkùnnɛ bɛ to,
\q1 bɛ̀ í nyie nkɛ kèńtɛ́ ɑ kpɛti.
\b
\q1
\v 30 Kɑ̀ɑ mbɛ̀ mɔ̀kɛnɛ̀ mɛminnímɛ̀ yɛbie mpɛ́u miɛkɛ,
\q1 kɛ́duɔ́ nhɑ kó muyɑɑ́ mbɛ̀ɛ̀ nɑ̀ɑ́ nhɑ pɑ̃ɑ̃nɑ́ɑǹtì
\q1 kɛ̀ bɛ̀ mbɛ̀ tiè, bɛ̀ mɛ̀ nyí nkèńtɛ́,
\q1 mɛmmɛ kɑ̀ɑ duɔ́ nkɛ̀ yɛhɛkɛ̀ tɛyɛ̀ kɔbɛɛ bɛ̀ nɑ.
\q1
\v 31 Nɛ̀ ɑ kó mɛsémmɛ̀ kpɛ́í nhɑ í mbɛ̀ kùɔ bɛmɔu,
\q1 ɑ í mbɛ̀ dootóo,
\q1 kɛ yɛ̃́ ɑ túmɛ̀ Kuyie nku kɛ dɔɔri mɛsɑ̀ɑ̀,
\q1 kɛ mɔkɛ onìtì kó mɛsémmɛ̀.
\b
\q1
\v 32 Áú! Ti Yiɛ̀ nKuyie nhɑ dɛumu kɛ kpeńnì,
\q1 kɛ duò tikɔ̃m̀bùɔ̀tì.
\q1 Fɔ̃́ nwèè pĩ mmɛtɑummɛ̀ ɑ ti dɔ̀ɔ̀nɛ̀ mɛ̀,
\q1 ɑ bɑ́ɑ́ cɛ̃̀ mmɛhɑ́ɑ́rìmɛ̀ ti tɑ mɛ̀,
\q1 tínti nɛ̀ ti kó bɛkpɑ̀ɑ̀tìbɛ̀
\q1 nɛ̀ bɛ̀ɛ̀ bɑkɛ́ ti kó yɛhɛkɛ̀,
\q1 nɛ̀ ikuɔ́ nìùbɛ̀ nɛ̀ ti yɛmbɛ̀,
\q1 ti kó kubotí kumɔu,
\q1 kɛ́túótɛ́ Asidii kó bɛkpɑ̀ɑ̀tìbɛ̀ ti do dìì yiè kɛ́ntɔ kɛ́tuɔkɛnní yíe.
\q1
\v 33 Tìì ti tùɔ̀kɛní timɔu ti miɛkɛ ɑ nɑɑtimu,
\q1 ɑ dɔ̀ɔ̀ dɛ̀ wennimu,
\q1 tíì cɑ̀ɑ̀rɛ̀.
\q1
\v 34 Ti kó bɛkpɑ̀ɑ̀tìbɛ̀ nɛ̀ bɛ̀ɛ̀ ti bɑkɛ́
\q1 nɛ̀ ikuɔ́ nìùbɛ̀ nɛ̀ ti yɛmbɛ̀ bɛ̀ í yie nhɑ tié,
\q1 bɛ̀ í tũ̀nnɛ ɑ kuɔ́ nɛ̀ ɑ tɑnnɔ̀.
\q1
\v 35 Bɑ́ nɛ̀ ɑ mɛ mbɛ̀ duɔ́mmɛ̀ dihɛì
\q1 kɛ̀ bɛ̀ di te kɛ dì bɑkɛ́,
\q1 kɑ̀ɑ bɛ̀ dɔ̀ɔ̀ mɛsɑ̀ɑ̀ mmɛ botí mmɛ botí dɛ kó kɛtendiɛkɛ̀,
\q1 kɛtennɑtikɛ̀, bɛ̀ í nyie nkɛ dɑ tũ̀nnɛ,
\q1 bɛ̀ í nyóu mɛdɔɔ̀rìmɛ̀ yɛimɛ.
\q1
\v 36 Ntɛ tínti yíe nkɛ tú tidɑɑtì
\q1 dihɛì ɑ do duɔ́ ndì ti yɛmbɛ̀,
\q1 kɛ dɔ̀ bɛ̀ ḿbo kɛ yo ntidiitì kɛ̀ dɛ̀ bɛ nɑɑti.
\q1 Tíì nɛ́ nɑɑ́ ntidɑɑtì yíe ndɛ kó dihɛì miɛkɛ.
\q1
\v 37 Bɛkpɑ̀ɑ̀tìbɛ̀ ɑ duɔ́ nkɛ̀ bɛ̀ɛ ti nɑ
\q1 ti yɛi ǹkpɛ́í bɛɛ̀ nɛ́ yo ndɛ kó tidiitì,
\q1 kɛ ti dɔɔrinɛ̀ bɛ̀ dɔ́mɛ̀ tínti nɛ̀ ti wũɔ̃,
\q1 kɛ̀ ti bo mɛyɛǹcɑɑ̀rìmɛ̀ diɛmɛ̀ miɛkɛ.
\s1 Isidɑyɛɛribɛ do tɑ̃ɑ̃tɛ́mɛ̀ kɛ bo ntũ nKuyie nkuɔ́
\p
\v 38 Nɛ̀ dɛ̀ɛ̀ kó dimɑ̀ɑ̀ ti tùɔ̀kɛní dɛ kpɛ́í, kɛ̀ ti wɛ̃nnɛ́ kɛ́dɔúnnɛ̀ Kuyie ndinùù kɛ́wɑ̃ri dipɑ́tíri kɛ̀ ti kó bɛkpɑ̀ɑ̀tìbɛ̀ nɛ̀ Defiibɛ nɛ̀ ikuɔ́ nìùbɛ̀ kɛ̀ bɛ̀ɛ ĩkú bɛ nɔu.
\c 10
\m
\v 1 Ntɛ bɛ̀ɛ̀ do ĩkú bɛ nɔu bɛ yètɛ̀: Akɑdiɑ birɛ Nɛemii wèè do tú kùmɑ̀ndɑ́ɑ̀ nɛ̀ Sidikiɑ. 
\v 2 Sedɑyɑ nɛ̀ Aɑsɑdiɑ Idimmɛyɑ. 
\v 3 Pɑsuu nɛ̀ Amɑdiɑ nɛ̀ Mɑdikiɑ 
\v 4 Atuusi nɛ̀ Sebɑnniyɑ nɛ̀ Mɑduki 
\v 5 Adimmu nɛ̀ Mɛdemɔti nɛ̀ Abudiɑsi 
\v 6 Dɑnniyɛɛri nɛ̀ Kinnɛtonni nɛ̀ Bɑduki 
\v 7 Mɛsudɑmmu nɛ̀ Abiyɑ nɛ̀ Minyɑminni 
\v 8 Mɑsiɑ nɛ̀ Bidikɑii Semmɑyɑ.
\m Ikuɔ́ nìùbɛ̀ kó kutɔ̃nkù kɔbɛ mbɛ, 
\v 9 kɛ́feí nDefiibɛ kó kutɔ̃nkù kɔbɛ Asɑnniyɑ birɛ Sosuwee, Enɑdɑdi bí miɛkɛ kɛ̀ Binnuii yɛ̀nní nɛ̀ Kɑmiɛdi, 
\v 10 nɛ̀ bɛ tebitɛ Sebɑnniyɑ nɛ̀ Odiyɑ nɛ̀ Keditɑ nɛ̀ Pedɑyɑ nɛ̀ Annɑni, 
\v 11 nɛ̀ Misee nɛ̀ Deɔbu nɛ̀ Asɑbiɑ 
\v 12 nɛ̀ Sɑkudi nɛ̀ Sedebiɑ nɛ̀ Sebɑnniyɑ 
\v 13 nɛ̀ Odiyɑ nɛ̀ Bɑni nɛ̀ Beninu.
\m
\v 14 Bɛkpɑ̀ɑ̀tìbɛ̀ kó kutɔ̃nkù miɛkɛ Pɑdeosi nɛ̀ Pɑsɑti-Mɔɑbu, nɛ̀ Edɑmmu nɛ̀ Sɑtuu nɛ̀ Bɑnni, 
\v 15 nɛ̀ Bunni nɛ̀ Asikɑdi nɛ̀ Bebɑii, 
\v 16 nɛ̀ Adonniyɑ nɛ̀ Bikibɑii nɛ̀ Adinni, 
\v 17 nɛ̀ Atɛɛ nɛ̀ Esekiɑsi nɛ̀ Asuu, 
\v 18 nɛ̀ Odiyɑ nɛ̀ Asummu nɛ̀ Bɛsɑii, 
\v 19 nɛ̀ Adifi nɛ̀ Anɑtɔti nɛ̀ Nɛbɑii, 
\v 20 nɛ̀ Mɑkipiɑsi nɛ̀ Mɛsudɑmmu nɛ̀ Esii, 
\v 21 nɛ̀ Mɛsesɑbɛɛri nɛ̀ Sɑdɔki nɛ̀ Yɑduɔ, 
\v 22 nɛ̀ Pedɑtiɑ nɛ̀ Annɑni nɛ̀ Anɑnniyɑ, 
\v 23 nɛ̀ Oseɑ nɛ̀ Anɑnniyɑ nɛ̀ Asubu, 
\v 24 nɛ̀ Adosɛsi nɛ̀ Pidisɑ nɛ̀ Sobɛki, 
\v 25 nɛ̀ Deummu nɛ̀ Asɑbunɑ nɛ̀ Mɑseyɑ, 
\v 26 nɛ̀ Aiyɑ nɛ̀ Annɑni nɛ̀ Anɑɑ, 
\v 27 nɛ̀ Mɑduki nɛ̀ Adimmu nɛ̀ Bɑɑnɑ.
\b
\p
\v 28 Tínti Isidɑyɛɛribɛ kɛ nɛ́ yíɛ́nɛ̀ ikuɔ́ nìùbɛ̀ sɔmbɛ nɛ̀ Defiibɛ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛdèmbɛ̀ nɛ̀ bɛ̀ɛ̀ pĩ nKuyie ncĩ́ɛ̃̀tɛ̀ miɛkɛ mutɔ̃mmú nɛ̀ bɛ̀ɛ̀ kó dimɑ̀ɑ̀ do yɑtɛnɛ̀ ibotí tɛì kɛ́ntũ nKuyie nkuɔ́ nɛ̀ bɛ pobɛ̀ nɛ̀ bɛ bí initidɑɑì nɛ̀ initipòì bɛ̀ɛ̀ kó dimɑ̀ɑ̀ dò nkɛ́ nɑ kɛ́keè. 
\v 29 Mɛm̀mɛ ti kɔbɛ bɛ̀ɛ̀ tu bɛkótíbɛ̀ kɛ̀ bɛ̀ɛ bɛ̀ wɛ̃nnɛ́nɛ̀ kɛ́dɔúnnɛ̀ Kuyie ndinùù kɛ́bɛ́i nkɛ́pɑrìkɛ̀ kɛ dɔ̀: Ti bo ntũ nku kuɔ́ nɛ̀ kù do duɔ́ nyì ku kóo tɔ̃ntì Mɔyiisi kòo ì wɑ̃̀ri kɛ́ndɔɔri ku tié nnɛ̀ ku kuɔ́ nɛ̀ ku tɑnnɔ̀ dɛ̀ yɛ̃mmɛ̀.
\p
\v 30 Kɛ̀ bɛ̀ɛ yíɛ́ kɛ́bɛ́i nkɛ dɔ̀: Ti í yóó duɔ́ nti bí di nhɛì kɔbɛ kɛ̀ bɛ̀ɛ puokɛ yoo tí túókɛ́ bɛ kó bɛsɑpɑ̀mbɛ̀ kɛ́puó nti bí. 
\v 31 Kɛ̀ dihɛì yɛmbɛ̀ mɛ ntɔní bɛ potɑntì tɛom̀pùtɛ̀ yiè kɛ fiiti yoo dibɑnni mɑrì yiè ti bɑ́ɑ́ tì dontɛ́. Dibenni yiénnì kɛ́soó mmukútímù, kɛ̀ bɛ̀ɛ̀ ti mɔkɛnɛ̀ yɛbɑ̀ɑ̀ nti yɛ̀ mbɛ̀ pɑ̃. 
\v 32 Kɛ̀ ti túótɛ́ mɛtɑ̃ɑ̃tímɛ̀ timɔ́mmɔmbɛ kɛ bo nduɔ̀ mmɛdítíbii mmɛ̀mɑ́ɑ̀ bɑ́ dìì benni Kuyie ntɔ̃mmú kpɛ́í. 
\v 33 Kɛ̀ bɛ̀ bo ndonnɛ̀ pɛ̃́ɛ̃̀bɛ̀ bɛ̀ pɑ̃ɑ̃ mbɛ̀ Kuyie mbɑ́ dìì yiè nɛ̀ dɛ kó tidiitì nɛ̀ bɛ̀ kù feu ìì wũɔ̃ yɛwe yɛmɔu kɛ cɔ́unko nɛ̀ bɛ̀ kù feu ì siom̀pùsi kó yɛwe nɛ̀ yɛbɑɑ nkó yɛwe nɛ̀ otɑ̃ɑ̃̀pɑ̀nwè kó dibɑnni nɛ̀ yɛbɑɑ ntɛyɛ̀ nɛ̀ dɛ̀ɛ̀ kó dimɑ̀ɑ̀ tu Kuyie nkpɛrɛ nɛ̀ bɛ̀ bo nkɔù ìì wũɔ̃ mɛyɛi ncĩ́ɛ̃́mmɛ̀ kpɛ́í Kuyie ncĩ́ɛ̃̀tɛ̀ miɛkɛ kó mutɔ̃mmú mumɔu. 
\v 34 Tínti ikuɔ́ nìùbɛ̀ nɛ̀ Defiibɛ nɛ̀ kubotí kumɔu kɛ̀ tí tɑ̃ɑ̃́ tɛ́tɛ́ kɛ bo yɑ̀ ti yó nwɑɑ̀nní mɛ̀ɛ̀ botí idɛí bɛ̀ yó ntuɔ̀nnɛ̀ ì iwũɔ̃ diwũɔ̃tɔ̀nnì ĩ́nkɛ̀ bɑ́ dìì benni, bɑ́ tɛ̀ɛ̀ cĩ́ɛ̃̀tɛ̀ nɛ̀ tɛ kó mɛfíè tì wɑ̃̀ri Kuyie nkuɔ́ pɑ́tíri miɛkɛ kɛ yɛ̃ ndɛ̀ ndòmmɛ̀. 
\v 35 Kɛ̀ ti nɑ́kɛ́ kɛ dɔ̀: Ti dò nkɛ́ntɔuní Kuyie ncĩ́ɛ̃̀tɛ̀ miɛkɛ ti pɑɑ nkó tidiitì ketitì, dɛtie ndɛmɔu kó yɛtebɛ ketiyɛ̀ bɑ́ dìì benni, 
\v 36 nɛ̀ ti bí ìì tu Mpo nɛ̀ ti wũɔ̃ ketiyì. Tì wɑ̃̀rimu Kuyie nkuɔ́ pɑ́tíri miɛkɛ kɛ tú ti ntɔuní iwũɔ̃ diɛyì nɛ̀ isɑ́m̀pɔ́ì dɛ kó ibí ketiyì Kuyie ncĩ́ɛ̃̀tɛ̀ miɛkɛ, ikuɔ́ nìùbɛ̀ bɛ̀ɛ̀ pĩ mmutɔ̃mmú Kuyie ncĩ́ɛ̃̀tɛ̀ miɛkɛ bɛ kpɛ́í. 
\v 37 Kɛ̀ bɛ̀ dò nkɛ́nduɔ́ mmuyuo nsɑ̀ɑ̀mù nɛ̀ yɛtebɛ sɑ̀ɑ̀yɛ̀ nɛ̀ mɛnɑɑ̀ mpɑ̀mmɛ̀ nɛ̀ mɛkùɔ̀ kɛ dɛ̀ duɔ̀ nyikuɔ́ nìùbɛ̀ Kuyie ncĩ́ɛ̃̀tɛ̀ miɛkɛ. Kɛ̀ ti níí kùútí kɛ dɛ̀itɛ tidiitì ti túótɛ́ dɛ̀ɛ̀ tu dɛpíínnɛ̀ kɛ́duɔ́ nDefiibɛ, ti ɛkɛ̀ yɛmɔu ti yó mmɛ ndɔɔri. 
\v 38 Kɛ̀ ikuɔ́ nìùbɛ̀ Anɔɔ bí miɛkɛ kòò mɔù níí nnɛínɛ̀ Defiibɛ bɛ̀ yóó cuɔ́ dìì mɔ̀nnì bɛ̀ kùútí kɛ dɛ̀itɛ tìì diitì kó dɛpíínnɛ̀, kɛ̀ Defiibɛɛ dɛi dɛ kó dɛpíínnɛ̀ kó dɛpíínnɛ̀ kɛ́ dɛ̀ tɑnnɛ́ Kuyie ncĩ́ɛ̃̀tɛ̀ kó tidiitì kó kudieku. 
\v 39 Tɛɛ̀ cĩ́ɛ̃̀tɛ̀ miɛkɛ nkɛ Isidɑyɛɛribɛ nɛ̀ Defiibɛ nɔ́ɔ̀rì dɛ̀ bɛ diitì kó dɛpíínnɛ̀ ĩ́nkɛ̀ dɛ bomɛ̀ dɛ̀ɛ̀ tu: Tidiitì nɛ̀ mɛnɑɑ̀ nɛ̀ mɛkùɔ̀ nɛ̀ tinɛntì tìì pĩ̀ńnɛ̀ Kuyie ncĩ́ɛ̃̀tɛ̀ mutɔ̃mmú ikuɔ́ nìùbɛ̀ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛdèmbɛ̀ bɛ̀ pĩ̀ńnɛ̀ tì mutɔ̃mmú.
\p Mɛm̀mɛ ti do dɔ̀ɔ̀mɛ̀ kɛ̀ dɛ̀ bo yie nkɛ̀ ti bɑ́ɑ́ dootóo Kuyie ncĩ́ɛ̃̀tɛ̀.
\c 11
\s1 Bɛ̀ do kɑ̀ɑmmɛ̀ Sifubɛ bɛ̀ɛ̀ wɛ̃̀tɛ kɛ́konní Sedisɑdɛmmu
\p
\v 1 Sifubɛ kó bɛkpɑ̀ɑ̀tìbɛ̀ bɛ̀ɛ̀ do bo Sedisɑdɛmmu. Sifubɛ sɔmbɛ bɛ̀ɛ̀ do bo yɛhɛkɛ̀ tɛyɛ̀ kɛ̀ bɛ̀ɛ̀ tɑ̃ɑ̃́ tɛ́tɛ́ bɛnìtìbɛ̀ tɛpíítɛ̀ ĩ́nkɛ̀ kɛ́dɛitɛ onìtì omɑ́ɑ̀ omɑ́ɑ̀ kòo kɔtɛ kɛ́mbo Sedisɑdɛmmu Kuyie nhɛì kɛ̀ bɛsɔmbɛ nkpɑɑ́ bɛ ɛkɛ̀. 
\v 2 Mɛm̀mɛ kɛ̀ bɛnìtìbɛ̀ɛ mɔɔ Kuyie nkó mɛsɑ̀ɑ̀ mbɛnìtìbɛ̀ bɛ̀ɛ̀ duɔ́ mbɛmɑ́ɑ̀ kɛ bo kɔtɛ kɛ́mbo Sedisɑdɛmmu bɛ kpɛ́í.
\b
\p
\v 3 Isidɑyɛɛribɛ sɔmbɛ nɛ̀ ikuɔ́ nìùbɛ̀ nɛ̀ Defiibɛ nɛ̀ Kuyie ncĩ́ɛ̃̀tɛ̀ tɔ̃mbɛ̀ nɛ̀ Sɑdomɔɔ tɔ̃mbɛ̀ yɑɑ̀bí, kɛ̀ bɛ̀ ḿbo bɛ ɛkɛ̀ bɑ́ wè o tenkɛ̀. Ntɛ bɛ̀ɛ̀ do bɑkɛ́ bɑkɛ́ yɛhɛikɑrɛ̀ kɛ bo Sedisɑdɛmmu bɛ yètɛ̀: 
\v 4 Sudɑɑ wuɔ nkɔbɛ mɑbɛ̀ nɛ̀ Bɛnsɑmɛɛ kɔbɛ mɑbɛ̀ bɛ̀ do bomu Sedisɑdɛmmu.
\p Sudɑɑ wuɔ nkɔbɛ do tú: Mɑdɑdeyɛɛdi kòo pɛitɛ́ Sefɑtiɑ, kɛ̀ Sefɑtiɑ pɛitɛ́ Amɑdiɑ kɛ̀ Amɑdiɑɑ pɛitɛ́ Sɑkɑrii kòo pɛitɛ́ Osiɑ kɛ̀ Osiɑɑ pɛitɛ́ Atɑyɑ bɛɛ̀ do tú Pedɛsi nɑɑ̀mùnkù kɔbɛ. 
\v 5 Sidonni weè pɛitɛ́ Sɑkɑrii, kɛ̀ Sɑkɑrii pɛitɛ́ Yoyɑdibu kɛ̀ Yoyɑdibuu pɛitɛ́ Adɑyɑ kɛ̀ Adɑyɑɑ pɛitɛ́ Asɑyɑɑ kɛ̀ Asɑyɑɑ mɛ ntó pɛitɛ́ Kɔdi-Osee kɛ̀ Kɔdi-Osee pɛitɛ́ Bɑduki kòo pɛitɛ́ Mɑseyɑ. 
\v 6 Pedɛsi yɑɑ̀bí miɛkɛ bɛɛ̀ do bo Sedisɑdɛmmu kɛ bo bɛnitidɑɑbɛ̀ sikɔusìnɑ̀ɑ̀ nɛ̀ sipísìkuɔ̀ nɛ̀ bɛ̀ni (468) bɛ̀ɛ̀ tu yɛkɔ̃m̀bɔ̀ yɛmbɛ̀.
\p
\v 7 Esɑii weè do pɛitɛ́ Itiyɛɛdi kɛ̀ Itiyɛɛdii pɛitɛ́ Mɑseyɑ kɛ̀ Mɑseyɑɑ pɛitɛ́ Kodɑyɑ kɛ̀ Kodɑyɑɑ pɛitɛ́ Pedɑyɑ kɛ̀ Pedɑyɑɑ mɛ ntó pɛitɛ́ Yoɛri kòo pɛitɛ́ Mɛsudɑmmu. Bɛnsɑmɛɛ wuɔ nkɔbɛ mbɛ bɛɛ̀ do bo Sedisɑdɛmmu, 
\v 8 kɛ́yíɛ́nɛ̀ Kɑbibɑii nɛ̀ Sɑdɑii kɛ̀ bɛ̀ɛ wɛ̃nnɛ́ bɛmɔu kɛ́mbo sikɔusìwɛi nɛ̀ sipísìdɛ́ nɛ̀ bɛ̀ni (928). 
\v 9 Sikidi birɛ Sowɛɛri weè do bɑkɛ́ dɛ kó ditĩ̀nnì kɛ̀ Sennuyɑɑ birɛ Sudɑɑ ò pòkoo.
\p
\v 10 Ikuɔ́ nìùbɛ̀ miɛkɛ kɛ̀ Yoyɑdibu birɛ Yedɑyɑ ḿbo nɛ̀ Yɑkinni. 
\v 11 Ikuɔ́ nìùtì diɛwè Asitubu weè do pɛitɛ́ Mɛdɑyɔti, kòo pɛitɛ́ Sɑdɔki, kòo pɛitɛ́ Mɛsudɑmmu kòo pɛitɛ́ Idikiyɑ kòo pɛitɛ́ Sedɑyɑɑ. 
\v 12 Kɛ̀ bɛ̀ɛ yíɛ́nɛ̀ bɛ nɑɑ̀mùntì kɔbɛ bɛ̀ɛ̀ do pĩ́ nKuyie ncĩ́ɛ̃̀tɛ̀ mutɔ̃mmú, kɛ̀ bɛ̀ɛ wɛ̃nnɛ́ sikɔusìni nɛ̀ sipísìdɛ́ nɛ̀ bɛ̀dɛ́bɛ̀ (822). Mɑdikiɑ weè do pɛitɛ́ Pesuu kɛ̀ Peseuu pɛitɛ́ Sɑkɑrii kɛ̀ Sɑkɑrii pɛitɛ́ Amutisi kɛ̀ Amutisii pɛitɛ́ Pedɑyɑɑ kɛ̀ Pedɑyɑɑ pɛitɛ́ Yedokɑmmu, kòo pɛitɛ́ Adɑyɑ. 
\v 13 Kɛ̀ bɛ̀ɛ yíɛ́nɛ̀ sicɛ̃́ĩ kó bɛkótíbɛ̀ sikɔusìdɛ́ nɛ̀ sipísìnɑ̀ɑ̀ nɛ̀ bɛ̀dɛ́bɛ̀ (242) nɛ̀ Amɑsɑii bɛɛ̀ do tú o botí kɔbɛ: Imɛɛ weè do pɛitɛ́ Misidemɔti kòo pɛitɛ́ Asɑii kɛ̀ Asɑii pɛitɛ́ Asɑdɛɛdi. 
\v 14 Nɛ̀ bɛhɑ̃ɑ̃pɔ̀mbɛ̀ yɛkɔ̃m̀bùɔ̀ yɛmbɛ̀ bɛ̀ɛ̀ do tú o botí kɔbɛ Sɑbidiɛri weè do bɑkɛ́ dɛ kó ditĩ̀nnì, ò do tú Akedodimmu birɛ ndɛ.
\p
\v 15 Bunni weè do pɛitɛ́ Asɑbiɑ kɛ̀ Asɑbiɑɑ pɛitɛ́ Asidikɑmmu, kòo pɛitɛ́ Asubu, kɛ̀ Asubuu pɛitɛ́ Semmɑyɑ Defiibɛ botí kɔbɛ mbɛ. 
\v 16 Nɛ̀ Defiibɛ kó bɛkótíbɛ̀ bɛ̀ɛ̀ do bɑkɛ́ Kuyie ncĩ́ɛ̃̀tɛ̀ towɑɑ̀ kó mutɔ̃mmú Sɑbetɑii nɛ̀ Yosɑbɑdi 
\v 17 Asɑfu weè do pɛitɛ́ Sɑbudi, kɛ̀ Sɑbudii pɛitɛ́ Misee, kɛ̀ Misee pɛitɛ́ Mɑtɑnniyɑ bɛɛ̀ do ɔ̃ɔ̃ niitɛ́ Kuyie nsɑ̃ɑ̃ nkó iyiɛ kɛ̀ bɛtɔbɛ̀ɛ nɛ́ cɔ́útɛ́. Kɛ̀ Bɑkibukiɑ ntú odɛ́rì Mɑtɑnniyɑ tebìí miɛkɛ tɛɛ̀ ò pòkoo, kɛ́yíɛ́nɛ̀ Abudɑ. Yedutunni weè do pɛitɛ́ Kɑdɑri, kɛ̀ Kɑdɑri pɛitɛ́ Sɑmmuɑ kɛ̀ Sɑmmuɑ nɛ́ pɛitɛ́ Abudɑ. 
\v 18 Defiibɛ bɛ̀ɛ̀ do bo Sedisɑdɛmmu bɛ̀ do bo sikɔusìdɛ́ nɛ̀ sipísìni nɛ̀ bɛ̀nɑ̀ɑ̀ ndi (284).
\p
\v 19 Dɛ kó difɔ̃nkúò bɛ̀ɛ̀ bɑ̀ɑ yɛbòrɛ̀ kɛ̀ bɛ̀ ntú Akubu nɛ̀ o nɑɑ̀mùnkù kɔbɛ bɛ̀ɛ̀ do ɔ̃ ḿbo yɛbòrɛ̀ kɛ̀ bɛ̀ ḿbo tɛkɔ̀ùtɛ̀ nɛ̀ sipísìyiekɛ̀ nɛ̀ bɛ̀dɛ́bɛ̀ (172).
\p
\v 20 Defiibɛ sɔmbɛ nɛ̀ ikuɔ́ nìùbɛ̀ nɛ̀ Isidɑyɛɛribɛ sɔmbɛ kɛ̀ bɛ̀ ḿbo Sudɑɑ kɔbɛ kó yɛhɛkɛ̀ tɛyɛ̀ miɛkɛ bɑ́ wè o ɛì. 
\v 21 Bɛ̀ɛ̀ do tú Kuyie ncĩ́ɛ̃̀tɛ̀ kó bɛtɔ̃mbɛ̀ bɛɛ̀ do bo Sedisɑdɛmmu kó dicɛ̃kɑrì bɛ̀ tu dì Ofɛri, Tisiɑ nɛ̀ Kisipɑ kɛ̀ bɛɛ̀ mbɛ̀ ni.
\p
\v 22 Asɑfu weè do pɛitɛ́ Misee, kòo pɛitɛ́ Mɑtɑnniyɑ kɛ̀ Mɑtɑnniyɑ pɛitɛ́ Asɑbiɑ, kɛ̀ Asɑbiɑɑ pɛitɛ́ Bɑni kòo pɛitɛ́ Usii, kòò nni Defiibɛ Sedisɑdɛmmu miɛkɛ, Asɑfu kó kunɑɑ̀mùnkù kɔbɛ mbɛ, bɛ̀ɛ̀ do ni bɛ̀ɛ̀ tu bɛdèmbɛ̀ kó ditĩ̀nnì Kuyie ncĩ́ɛ̃̀tɛ̀ miɛkɛ. 
\v 23 Bɛ̀ɛ̀ yó mbie ndɛbémbénnɛ̀, okpɑ̀ɑ̀tì do wɑ̃̀rimu bɛ yètɛ̀ kɛ́nyɛ̃́ ò yó mbɛ̀ toti mɛ̀ɛ̀ botí mutɔ̃mmú bɑ́ dìì yiè.
\p
\v 24 Sedɑɑ nɑɑ̀mùnkù kou Mɛsesɑbɛɛri birɛ Petɑyɑɑ Sudɑɑ wuɔ nkou weè do nɑ́ɑ́nnɛ̀ bɛ kó diyètìrì Pɛdɛsi kóo kpɑ̀ɑ̀tì borɛ̀.
\s1 Sifubɛ tɔbɛ̀ bɛ̀ɛ̀ do í bo Sedisɑdɛmmu
\p
\v 25 Sudɑɑ wuɔ nkɔbɛ mɑbɛ̀ bɛɛ̀ do bo Kidiyɑ-Adibɑ nɛ̀ o kó sihɛkɛsí kɛ̀ bɛtɔbɛ̀ ḿbo Dibonni nɛ̀ o kó sihɛkɛsí kɛ̀ bɛtɔbɛ̀ bo Yekɑbusɛdi nɛ̀ o kó sihɛkɛsí. 
\v 26 Kɛ̀ bɛtɔbɛ̀ bo Yesuwɑ nɛ̀ Mɔdɑdɑ nɛ̀ Bɛti-Pɑdɛti 
\v 27 nɛ̀ Asɑɑ-Suɑdi nɛ̀ Bɛɛrisebɑɑ nɛ̀ yɛ kó sihɛkɛsí. 
\v 28 Nɛ̀ Sikidɑki nɛ̀ Mɛkonnɑ nɛ̀ dɛ kó sihɛkɛsí 
\v 29 nɛ̀ Ã-Dimɔɔ nɛ̀ Tisodeɑ nɛ̀ Yɑdimuti 
\v 30 Sɑndoɑɑ nɛ̀ Adudɑmmu dɛ kó sihɛkɛsí nɛ̀ Dɑkiisi nɛ̀ o kó sihɛkɛsí nɛ̀ Asekɑɑ nɛ̀ o kó sihɛkɛsí bɛ̀ do bo Bɛɛrisebɑɑ bɑkù cɑ̃̀nku nku kɛ́ntɔ kɛ́tuɔkɛnɛ̀ Inɔmmu kó kubiriku kubɑkù yoú bíɛ́kɛ̀.
\p
\v 31 Bɛnsɑmɛɛ wuɔ nkɔbɛ do bo Kebɑɑ nɛ̀ Mikimɑsi nɛ̀ Ayɑ nɛ̀ Bɛtɛɛri dɛ kó sihɛkɛsí nsi, 
\v 32 Annɑtɔti nɛ̀ Nɔbu nɛ̀ Anɑnniyɑ 
\v 33 Asɔɔ nɛ̀ Dɑmɑɑ Kitɑimmu 
\v 34 Adidi nɛ̀ Siboyimmu nɛ̀ Nɛbɑdɑdi 
\v 35 Dɔdi nɛ̀ Anɔɔ nɛ̀ bɛ̀ do tú dɛ̀ bɛyɑ́ntìbɛ̀ kó kubiriku.
\p
\v 36 Kɛ̀ Defiibɛ mɑbɛ̀ ḿbo Sudɑɑ kɔbɛ nɛ̀ Bɛnsɑmɛɛ kɔbɛ cuokɛ̀.
\c 12
\s1 Bɛ̀ bɑ̀tɛmɛ̀ ikuɔ́ nìùbɛ̀ nɛ̀ Defiibɛ
\p
\v 1 Ntɛ ikuɔ́ nìùbɛ̀ nɛ̀ Defiibɛ bɛ̀ɛ̀ do nɛínɛ̀ Sodobɑbɛɛri Seditiɛri birɛ nɛ̀ Sosuwee kɛ́kò Sedisɑdɛmmu Sedɑyɑɑ nɛ̀ Sedemii nɛ̀ Esidɑdɑsi 
\v 2 nɛ̀ Amɑdiɑ nɛ̀ Mɑduki nɛ̀ Atuusi, 
\v 3 nɛ̀ Sekɑnniyɑ nɛ̀ Edeummu nɛ̀ Mɛdemɔti. 
\v 4 Ido nɛ̀ Kinnɛtoii nɛ̀ Abiyɑ. 
\v 5 Minyɑminni nɛ̀ Mɑɑdiɑ nɛ̀ Bidikɑɑ, 
\v 6 nɛ̀ Semmɑyɑ nɛ̀ Yoyɑdibu nɛ̀ Yedɑyɑ. 
\v 7 Sɑduu nɛ̀ Amɔki nɛ̀ Idikiyɑ Yedɑyɑ bɛɛ̀ do tú bɛ̀ɛ̀ ní ikuɔ́ nìùbɛ̀ bɛmbɛ nɛ̀ bɛ tebìí Sosuwee kó dimɔ̀nnì. 
\v 8 Defiibɛ miɛkɛ Sosuwee nɛ̀ Binnuii nɛ̀ Kɑdimiɛdi nɛ̀ Sedebiɑ nɛ̀ Sudɑɑ nɛ̀ Mɑtɑnniyɑ nɛ̀ o tebìí bɛɛ̀ do niù iyiɛ nKuyie ncĩ́ɛ̃̀tɛ̀ miɛkɛ. 
\v 9 Kɛ̀ bɛ tebìí Bɑkibukiɑ nɛ̀ Unni kɛ̀ bɛ̀ ḿbo bɛ ììkɛ̀ kɛ pĩ́ mbɛ kó mutɔ̃mmú.
\s1 Ikuɔ́ nìùbɛ̀ diɛbɛ̀ kó yɛyètɛ̀
\p
\v 10 Sosuwee weè do pɛitɛ́ Yoyɑkimmu kɛ̀ Yoyɑkimmuu pɛitɛ́ Ediɑsibu kɛ̀ Ediɑsibuu pɛitɛ́ Yoyɑdɑ. 
\v 11 Kɛ̀ Yoyɑdɑɑ pɛitɛ́ Yonnɑtɑnni kɛ̀ Yonnɑtɑnnii pɛitɛ́ Yɑduɑ.
\p
\v 12 Yoyɑkimmu kó dimɔ̀nnì kɛ̀ ikuɔ́ nìùbɛ̀ bɛ̀ɛ̀ bɑkɛ́ tinɑɑ̀mùntì bɛɛ̀ tu biɛ: Sedɑyɑ wèè do bɑkɛ́ Mɛdɑyɑ kó kunɑɑ̀mùnkù kɛ̀ Anɑnniyɑ mbɑkɛ́ Sedemii kɔku. 
\v 13 Kɛ̀ Mɛsudɑmmu mbɑkɛ́ Esitɑdɑsi kɔku, kɛ̀ Yoɑnɑnni Amɑdiɑ kɔku. 
\v 14 Kɛ̀ Sonnɑtɑ̃ɑ̃ mbɑkɛ́ Mɛduii kɔku, kɛ̀ Sosɛfu mbɑkɛ́ Sebɑnniyɑ kɔku. 
\v 15 Kɛ̀ Adinɑ mbɑkɛ́ Adimmu kɔku, kɛ̀ Edikɑii mbɑkɛ́ Mɛdɑyɔti kɔku. 
\v 16 Kɛ̀ Sɑkɑrii mbɑkɛ́ Ido kɔku, kɛ̀ Mɛsudɑmmu mbɑkɛ́ Kinnɛtonni kɔku. 
\v 17 Kɛ̀ Sikidi mbɑkɛ́ Abiyɑ kɔku, kòò tɔù mɔù mbɑkɛ́ Minyɑminni kɔku, kɛ̀ Piditɑyii mbɑkɛ́ Mɔɑdiɑ kɔku. 
\v 18 Kɛ̀ Sɑmmuyɑɑ mbɑkɛ́ Bidikɑɑ kɔku, kɛ̀ Sonnɑtɑ̃ɑ̃ mbɑkɛ́ Semmɑyɑ kɔku. 
\v 19 Kɛ̀ Mɑtennɑii mbɑkɛ́ Yoyɑdibu kɔku, kɛ̀ Usii mbɑkɛ́ Yedɑyɑ kɔku. 
\v 20 Kɛ̀ Kɑdɑii mbɑkɛ́ Sɑdɑii kɔku, kɛ̀ Ebɛɛ mbɑkɛ́ Amɔki kɔku. 
\v 21 Kɛ̀ Asɑbiɑ mbɑkɛ́ Idikiyɑ kɔku kɛ̀ Nɛtɑnnɛyɛɛdi mbɑkɛ́ Yedɑyɑ kɔku.
\p
\v 22 Ikuɔ́ nìùbɛ̀ diɛbɛ̀ Ediɑsibu nɛ̀ Yoyɑdɑ nɛ̀ Yosɑnɑnni nɛ̀ Yɑduɑ bɛ kó dimɔ̀nnì kɛ̀ bɛ̀ wɑ̃̀ũmu Defiibɛ kó bɛkótíbɛ̀ yètɛ̀ kɛ́ntɔ kɛ́tuɔkɛnní Dɑriyuusi Pɛrɛsi tenkɛ̀ kóo kpɑ̀ɑ̀tì diɛwè kó dimɔ̀nnì.
\p
\v 23 Defii wuɔ nkɔbɛ bɛ̀ɛ̀ bɑkɛ́ bɛ̀ do wɑ̃ũmu bɛ yètɛ̀ okpɑ̀ɑ̀tì dɔɔ̀rìmɛ̀ pɑ́tíri miɛkɛ kɛ́ntɔ Ediɑsibu birɛ Yosɑnɑnni kó dimɔ̀nnì.
\p
\v 24 Bɛ̀ɛ̀ do bɑkɛ́ Defii wuɔ nkɔbɛ bɛɛ̀ do tú Asɑbiɑ nɛ̀ Sedebiɑ nɛ̀ Sosuwee nɛ̀ Kɑdimiɛdi birɛ nɛ̀ bɛ tebìí sìì do ɔ̃ ḿbo bɛ ììkɛ̀ kɛ diè Kuyie nkóo nìtì Dɑfiti kó iyiɛ, bɑ́ wè o kó mɛfíè ndòmmɛ̀ kɛ̀ bɛ̀ ndiè nkɛ sɑ̃ntí Kuyie.
\p
\v 25 Mɑtɑnniyɑ nɛ̀ Bɑkibukiɑ nɛ̀ Abudiɑsi nɛ̀ Mɛsudɑmmu nɛ̀ Tɑdimɔɔ nɛ̀ Akubu bɛɛ̀ do tú bɛ̀ɛ̀ bɑ̀ɑ yɛbòrɛ̀ kó yɛtuo tinɛntì do ɔ̃ nhɑ̃ yɛ̀ɛ̀ miɛkɛ. 
\v 26 Bɛ̀ do pĩ́ mbɛ tɔ̃mmú Sosuwee birɛ Yoyɑkimmu, Yotisɑdɑki yɑɑ̀birɛ kó dimɔ̀nnì ndi. Nɛemii weè do tú kùmɑ̀ndɑ́ɑ̀ kɛ̀ Ɛsitɑdɑsi tu ikuɔ́ nìùtì nɛ̀ ikuɔ́ wɑ̃ɑ̃̀tì dɛ kó dimɔ̀nnì.
\s1 Bɛ̀ bɑɑ́mmɛ̀ kuduotí kó dibɑnni
\p
\v 27 Ti mɑɑ́ dìì mɔ̀nnì Sedisɑdɛmmu kó kuduotí kɛ́deè, kɛ́ce nDefiibɛ ɛkɛsí simɔu miɛkɛ, kɛ́ bɛ̀ nɑ̀kɛ́ kɛ̀ bɛ̀ɛ tíí nSedisɑdɛmmu kɛ̀ tí ɑ̃nnɛ́ dibɑnni kɛ́ndiè nyiyiɛ̀ nkɛ bie nyɛbɑ̀rɛ̀ nɛ̀ tikùtìdùùtì nɛ̀ tibómbonti, kɛ dɛ́úkùnko Kuyie nyètìrì. 
\v 28-29 Bɛyɛndèmbɛ̀ bɛ̀ɛ do mɑɑ́ kɛ́fitɛ́ Sedisɑdɛmmu nɛ̀ ditennì Nɛfotɑɑ kɛ́túótɛ́ Bɛti-Kidikɑɑdi kɛ́ntɔ kɛ́tuɔkɛnɛ̀ Kebɑɑ nɛ̀ Asimɑfɛti, kɛ̀ bɛ̀ɛ tíínní Sedisɑdɛmmu. 
\v 30 Kɛ̀ ikuɔ́ nìùbɛ̀ nɛ̀ Defiibɛ kɛ̀ bɛ̀ɛ wénkùnnɛ bɛmɑ́ɑ̀ kɛ́wénkùnnɛ Isidɑyɛɛribɛ bɛmɔu, kɛ́wénkùnnɛ kuduotí nɛ̀ yɛbòrɛ̀.
\p
\v 31 Kɛ̀ n tɑ̃ɑ̃tɛ́ Sudɑɑ wuɔ mmiɛkɛ bɛkótíbɛ̀ kɛ́duɔ́ nkɛ̀ bɛ̀ɛ dekɛ kuduotí ĩ́nkɛ̀ kɛ̀ n totɛ́ yɛdentĩ̀rɛ̀ diɛyɛ̀ yɛ̀dɛ́ɛ̀, kɛ̀ diketirìi kétɛ́ kubɑkù yoú kɛ́nwetí bɛ̀ tu dɛ̀ Tikùtì kó dibòrì. 
\v 32 Kɛ̀ Oseɑ mbɛ̀ tũ̀nko nɛ̀ Sudɑɑ wuɔ nkó bɛkótíbɛ̀ dikéè, 
\v 33 Asɑdiɑ nɛ̀ Ɛsitɑdɑsi nɛ̀ Mɛsudɑmmu, 
\v 34 nɛ̀ Sudɑɑ nɛ̀ Bɛnsɑmɛɛ nɛ̀ Sedemii nɛ̀ Semmɑyɑ. 
\v 35 Ikuɔ́ nìùbɛ̀ miɛkɛ, kɛ̀ Sonnɑtɑ̃ɑ̃ birɛ Sɑkɑrii ntɔ tɛheutɛ̀, weè yɑ̀ɑ̀rìbɛ̀ tu: Semmɑyɑ nɛ̀ Mɑtɑnniyɑ nɛ̀ Misee nɛ̀ Sɑkuu nɛ̀ Asɑfu. 
\v 36 Kɛ̀ bɛ̀ɛ yíɛ́nɛ̀ bɛ tebìí Semmɑyɑ nɛ̀ Asɑdɛɛdi nɛ̀ Midɑdɑii nɛ̀ Kidɑdɑii nɛ̀ Mɑhɑii nɛ̀ Nɑtɑnnɛyɛɛdi nɛ̀ Sudɑɑ nɛ̀ Anɑnni. Kɛ̀ bɛ̀ ntɔ dɛbémbénnɛ̀ nɛ̀ siheú Kuyie nkóo tɔ̃ntì Dɑfiti do dɔ̀ɔ̀ dɛ̀. Ikuɔ́ wɑ̃ɑ̃̀tì Ɛsitɑdɑsi weè do ni dɛ kó ditĩ̀nnì. 
\v 37 Bɛ̀ tùɔ̀kɛ dìì mɔ̀nnì dibòrì bɛ̀ tu dì tɛbintɛ kó dibòrì, kɛ́yóu kuduotí kɛ́tũnnɛ yɛdɛtìsɑ̀kɛ̀ yɛ̀ɛ̀ kɔ̀rìnɛ̀ Dɑfiti kó dicɛ̃kɑrì dìì sĩ̀ĩ́ ntɛkpɑ̀ɑ̀tìcĩ́ɛ̃̀tɛ̀, kɛ́pɛ̃ɛ̃tɛ́ kɛ́tuɔkɛ dibòrì mɛniɛ nkpɛri diyiè yìɛ̀ní kɛ̀ɛ̀ bíɛ́kɛ̀.
\p
\v 38 Kɛ̀ didentĩ̀nnì dɛ́rìi kétɛ́ kubɑkù cɑ̃̀nku bíɛ́kɛ̀, m mɔ́mmuɔ nkɛ̀ nní mbɛ̀ tũ. Kɛ̀ Sudɑɑ wuɔ nkó bɛkótíbɛ̀ dikéè sɔnni n nɛinɛ̀, kɛ̀ tí tuɔkɛ fɛpɛ̃́ɛ̃̀pṹnnɛ́tofɛ kó dibòrì kuduotí pɛ̃kɛ̀ dɛ̀, 
\v 39 kɛ́sɔɔtɛ́ kɛ́tuɔkɛ Efɑdɑimmu kó dibòrì nɛ̀ Yesɑnnɑ kpɛri, nɛ̀ bɛ̀ tu dì siyĩĩ kpɛri, kɛ́sɔɔtɛ́ kɛ́tuɔkɛnɛ̀ Anɑnɛɛdi kó didènnì nɛ̀ bɛ̀ tu dì tɛkɔ̀ùtɛ̀ kó didènnì, kɛ́pɛ̃ɛ̃tɛ́ kɛ́tuɔkɛ ipe kó dibòrì kɛ kɑ̃́ɑ̃́ mbɛbɑ̀rìbɛ̀ kó dibòrì. 
\v 40 Kɛ̀ yɛdentĩ̀rɛ̀ yɛ̀dɛ́ɛ̀ tuɔkɛ Kuyie ncĩ́ɛ̃̀tɛ̀ kɛ́tɑ, kɛ̀ m múnkɛ bɛ̀ nɛinɛ̀ nɛ̀ bɛbeémbɛ̀ kó ditĩ̀nnì kɔbɛ mɑbɛ̀ bɛ̀ɛ̀ do n nɛínɛ̀. 
\v 41 Kɛ̀ ikuɔ́ nìùbɛ̀ Ediɑkimmu nɛ̀ Mɑɑseyɑ nɛ̀ Minyɑminni nɛ̀ Misee nɛ̀ Ediyoyennɑii nɛ̀ Sɑkɑrii nɛ̀ Anɑnniyɑ kɛ̀ bɛ̀ eu siheú. 
\v 42 Kɛ̀ Mɑseyɑ nɛ̀ Semmɑyɑ nɛ̀ Edeɑsɑɑ nɛ̀ Usii nɛ̀ Yoɑnɑnni nɛ̀ Mɑdikiɑ nɛ̀ Edɑmmu nɛ̀ Esɛɛ kɛ̀ bɛ̀ dìè, kɛ̀ Sisidɑsiɑ bɛ̀ ni.
\p
\v 43 Dɛ yiè kɛ̀ tí fíé iwũɔ̃ pɛ́u Kuyie nkɛ́mbo diwɛ̀ì miɛkɛ. Kuyie nkuù do tì duɔ́ diwɛ̀ì dɛ yiè, bɛnitipòbɛ̀ nɛ̀ ibí kɛ̀ bɛ̀ nyɑ̃nku Sedisɑdɛmmu, bɛ̀ɛ̀ bo mɛdɛ́timɛ̀ kɛ̀ bɛ̀ nyo bɛ̀ ìítímɛ̀.
\s1 Ikuɔ́ nìùbɛ̀ nɛ̀ Defiibɛ bɛ̀ dò nkɛ́nte dɛ̀
\p
\v 44 Dɛ yiè kɛ̀ bɛ̀ɛ tɑ̃ɑ̃tɛ́ bɛnìtìbɛ̀ kɛ̀ bɛ̀ bo mbɑɑ tidieti kɛ́cɔ́u tidiitì bɛ̀ pɑ̃ɑ̃ ntì Kuyie nnɛ̀ tidiketitì nɛ̀ dɛpíínnɛ̀ bɛ̀ɛ̀ bo dɛpɑɑ kɛ kuuti bɛ̀ dò nkɛ níí duɔ́ ndɛ̀ ikuɔ́ nìùbɛ̀ nɛ̀ Defiibɛ kpɛ́í. Bɛnìtìbɛ̀ do pɛ́nsìrìmu Defiibɛ nɛ̀ ikuɔ́ nìùbɛ̀ bɛ̀ pĩ mmùù tɔ̃mmú. 
\v 45 Kɛ̀ bɛ̀ mpĩ́ nKuyie ntɔ̃mmú kɛ dɔɔri mɛwénkùmɛ̀ kó ikuɔ́ bɛnìtìbɛ̀, bɛmbɛ nɛ̀ bɛyɛndèmbɛ̀ nɛ̀ bɛ̀ɛ̀ bɑ̀ɑ yɛbòrɛ̀ bɛ̀ do tũ nKuyie nkóo tɔ̃ntì Dɑfiti nɛ̀ o birɛ Sɑdomɔɔ bɛ̀ do dɔú ndìì nùù ndi, 
\v 46 kɛ́túótɛ́ Dɑfiti nɛ̀ Asɑfu bɛ kó dimɔ̀nnì bɛ̀ɛ̀ niù iyiɛ mbɛ̀ do bomu kɛ níí nni bɛyɛndèmbɛ̀ kɛ̀ bɛ̀ dɛ̀úkùnko Kuyie nyètìrì kɛ kù sɑ̃ntí. 
\v 47 Sodobɑbɛɛri kó dimɔ̀nnì nɛ̀ Nɛemii kpɛri Isidɑyɛɛribɛ bɛmɔu do duɔ́mmu bɛ̀ dò nkɛ́duɔ́ ndɛ̀ bɛdèmbɛ̀ nɛ̀ bɛ̀ɛ̀ bɑ̀ɑ yɛbòrɛ̀ bɑ́ dìì yiè, kɛ́dɛì dɛ̀ɛ̀ tu Kuyie nkpɛrɛ kɛ́duɔ̀ nDefiibɛ kɛ̀ bɛ̀ɛ dɛì ikuɔ́ nìùbɛ̀ Anɔɔ yɑɑ̀bí kpɛrɛ kɛ́ bɛ̀ duɔ́.
\c 13
\s1 Nɛemii do wɛ̃̀tɛ kɛ́tũntɛmɛ̀ Kuyie ntɔ̃mmú
\p
\v 1 Mɛm̀mɛ bɛ̀ kɑ̀ɑmmɛ̀ Mɔyiisi wɑ̃̀ri ìì kuɔ́ kɛ́yɑ̀ tì wɑ̃̀rimɛ̀ kɛ tú Amɔniibɛ nɛ̀ Mɔɑbiibɛ bɛ̀ bɑ́ nkɔkɛ́ Kuyie nkɔbɛ kó ditĩ̀nnì bìtì nɛ̀ bɛ̀ bo mbomɛ̀. 
\v 2 Kɛ yɛ̃́ bɛ̀ do í comɛ̀ Isidɑyɛɛribɛ kɛ́ bɛ̀ pɑ̃ mudiì nɛ̀ mɛniɛ, bɛɛ̀ Mɔɑbiibɛ bɛɛ̀ do yietí Bɑdɑmmu, kòo bɔntɛ́ kusĩ̀nkù Isidɑyɛɛribɛ kɛ̀ ti Yiɛ̀ nKuyie nceetɛ dɛ kó kusĩ̀nkù kɛ̀ kùu nɑɑ́ mmɛsɑ̀ɑ̀. 
\v 3 Bɛ̀ kɑ̀ɑ ndìì mɔ̀nnì Kuyie nkuɔ́ pɑ́tíri kɛ̀ Isidɑyɛɛribɛɛ dènnɛ bɛ cuokɛ̀ bɛ̀ɛ̀ kó dimɑ̀ɑ̀ í tú Sifubɛ weti weti.
\b
\p
\v 4 Dɛ̀ do sɔ̃́ nyikuɔ́ nìùtì nhEdiɑsibu weè bɑkɛ́ Kuyie ncĩ́ɛ̃̀tɛ̀ kó tidieti. Ò nɛ́ do mɛ ntɑunnɛ̀mɛ̀ Tobiyɑ 
\v 5 kòo ò duɔ́ nkudieku mɑkù bɛ̀ do ɑ̃ɑ̃̀ kù yɛpɑ̃rɛ̀ bɛ̀ pɑ̃ɑ̃ nyɛ̀ Kuyie nnɛ̀ ku cĩ́ɛ̃̀tɛ̀ kó tinɛntì nɛ̀ dɛpíínnɛ̀ bɛ̀ do ɔ̃ɔ̃ nɔ́ɔ́tɛ́ dɛ̀ kɛ́duɔ́ nKuyie, tidiitì nɛ̀ mɛnɑɑ̀ mpɑ̀mmɛ̀ nɛ̀ mɛkùɔ̀ bɛ̀ do dò nkɛ níí duɔ́ ndɛ̀ Defiibɛ nɛ̀ bɛyɛndèmbɛ̀ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ dɛ̀ɛ̀ do tú ikuɔ́ nìùbɛ̀ kpɛrɛ.
\p
\v 6 Dɛ kó dimɔ̀nnì dɛ̀ do sɔ̃́ mmí nNɛemii n yí bo Sedisɑdɛmmu kɛ yɛ̃́ okpɑ̀ɑ̀tì Aditɑkisɛsi kpɑ̀tì benni sipísìtɑ̃ɑ̃ti nɛ̀ yɛ̀dɛ́ɛ̀ miɛkɛ n do kɔ̀tɛmɛ̀ o borɛ̀ Bɑbidɔnni kɛ̀ ti dɔ̀ yɛwe sɑ́m̀pɔ́ kòo m pɑ̃ kucɛ kɛ̀ n wɛ̃tɛní Sedisɑdɛmmu. 
\v 7 Mɛm̀mɛ n yɑ̀mɛ̀ mɛyɛi Ediɑsibu do dɔ̀ɔ̀mɛ̀ kɛ́duɔ́ nTobiyɑ Kuyie ncĩ́ɛ̃̀tɛ̀ kó kudieku mɑkù. 
\v 8 Kɛ̀ dɛ̀ n yonkɛ mɛdiɛ̀, kɛ̀ n dennɛ Tobiyɑ kó tinɛntì timɔu dɛ kó kudieku miɛkɛ, 
\v 9 kɛ́duɔ́ nkɛ̀ bɛ̀ɛ kù dɔ̀ɔ̀ mɛwénkùmɛ̀ kó ikuɔ́. Kɛ̀ n tɔní Kuyie ncĩ́ɛ̃̀tɛ̀ nɛntì nɛ̀ yɛpɑ̃rɛ̀ bɛ̀ kù pɑ̃ɑ̃ nyɛ̀ nɛ̀ tihúúntì kɛ́wɛ̃tɛ kɛ́tɑnnɛ́ ku miɛkɛ.
\b
\p
\v 10 Kɛ̀ n keè bɛ̀ tɛ̃́nkɛ í duɔ̀mmɛ̀ Defiibɛ bɛ̀ do dò nkɛ́ mbɛ̀ duɔ̀ ndɛ̀, bɛmbɛ nɛ̀ bɛdèmbɛ̀ kɛ̀ bɛ̀ cìɛ́tɛ́ kɛ kũɔ̃tí bɛ pɑɑ nkɛ yóu Kuyie ntɔ̃mmú. 
\v 11 Kɛ̀ n kpɑnnɛ̀ bɛbeémbɛ̀ mùù kpɛ́í nte kɛ̀ bɛ̀ yóu kɛ̀ Kuyie ncĩ́ɛ̃̀tɛ̀ kó mutɔ̃mmú do, kɛ́deè kɛ́tíí nDefiibɛ kɛ́duɔ́ nkɛ̀ bɛ̀ɛ sɔɔtɛ́ bɛ tɔ̃mmú. 
\v 12 Mɛm̀mɛ kɛ̀ Sudɑɑ kɔbɛ bɛmɔuu ndɛì bɛ kpɛrɛ bɛ̀ mɔ̀kɛ dɛ kó dɛpííndɛ̀ kɛ ɑ̃ɑ̃̀ Kuyie nkó yɛbuɔ. 
\v 13 Kɛ̀ n tɑ̃ɑ̃tɛ́ ikuɔ́ nìùtì Sedemiɑ nɛ̀ ikuɔ́ wɑ̃ɑ̃̀tì Tisɑdɔki nɛ̀ Pedɑyɑ Defii wuɔ nkou, kɛ̀ Mɑtɑnniyɑ birɛ Sɑkuu kó dɛbirɛ Annɑni nhò teénnɛ̀, bɛ̀ do bɛ̀ yɛ̃́mu kɛ̀ bɛ dɔɔ̀rìmɛ̀ sìɛ́, kɛ̀ m bɛ̀ duɔ́ mmutɔ̃mmú kɛ̀ bɛɛ̀ nte bɛ̀ bo ntotimɛ̀ tidiitì bɛ tebìí.
\b
\p
\v 14 Áú! N Yiɛ̀ nKuyie nhɑ bɑ́ɑ́ yɛ̃̀ n kpɛ́í nɛ̀ m pĩ́ mmùù tɔ̃mmú sɑ̀ɑ̀mù ɑ cĩ́ɛ̃̀tɛ̀ mu kpɛ́í nnɛ̀ n tũnnɛ̀mɛ̀ ɑ kuɔ́.
\b
\p
\v 15 Dɛ kó yɛwe miɛkɛ bɑkɛ kɛ̀ n yɑ̀ bɛnìtìbɛ̀ Sudɑɑ ɛì miɛkɛ kɛ̀ bɛ̀ nɑ̀ù fínyĩ̀ kó yɛbɛ diyɛtituò miɛkɛ tɛom̀pùtɛ̀ yiè kɛ̀ bɛtɔbɛ̀ tɔu tidiitì kɛ deenko bɛ sɑ̃mmɑrímúbɛ̀ nɛ̀ mɛnɑɑ̀ mpɑ̀mmɛ̀ nɛ̀ fínyĩ̀ kó yɛbɛ nɛ̀ fìkíè kpɛyɛ nɛ̀ tinɛntì tɛtì pɛ́u kɛ kũũ̀nnɛ̀ Sedisɑdɛmmu, kɛ̀ m bɛ̀ cɑu nkɛ dɔ̀ bɛ̀ bɑ́ nfiiti bɛ potɑntì tɛom̀pùtɛ̀ yiè. 
\v 16 Kɛ̀ Tiiri ɛì kɔbɛ bɛ̀ɛ̀ bo Sedisɑdɛmmu kɛ̀ bɛ̀ tɔuní siyĩĩ nɛ̀ tipotɑntì tibotí tibotí kɛ fiitinɛ̀ Sudɑɑ kɔbɛ Sedisɑdɛmmu miɛkɛ tɛom̀pùtɛ̀ yiè. 
\v 17 Kɛ̀ n kpɑnnɛ̀ Sudɑɑ kó bɛkótíbɛ̀ kɛ́ bɛ̀ nɑ̀kɛ́ kɛ dɔ̀: Di dɔɔri bɑ mbotí nku kɛ sĩnkùnko tɛom̀pùtɛ̀ kó diyiè? 
\v 18 Dɛ̀ í dò ndi yɛmbɛ̀ do mɛ ndɔ̀ɔ̀, kɛ̀ Kuyie nduɔ́ nkɛ̀ mɛyɛi nti do, tínti nɛ̀ ti ɛìɑ̀? Di sĩnkùnko dìì mɔ̀nnì tɛom̀pùtɛ̀ kó diyiè di dɔkɛ íinko Kuyie mmiɛkɛ nkɛ Isidɑyɛɛribɛ ĩ́nkɛ̀. 
\v 19 Dɛ mɔ̀nnì ndi n duɔ́mmɛ̀ kɛ̀ bɛ̀ níí kpetínnɛ́ Sedisɑdɛmmu kó yɛbòrɛ̀ kuyuoku kɛ̀ dɛ̀ɛ wentɛ́ tɛom̀pùtɛ̀, kɛ́mbɑɑnɛ̀ tɛom̀pùtɛ̀ bo pɛ̃ɛ̃tɛ́mɛ̀ kɛ̀ bɛ̀ nɛ́ yɛ̀ kpetɛ́, kɛ̀ n dɛitɛ n kɔbɛ mɑbɛ̀ kɛ́bɑnnɛ kɛ́ bɛ̀ nɑ̀kɛ́ kɛ dɔ̀ bɛ̀ bɑ́ɑ́ yie nkɛ̀ tipotɑntì mɑtìi tɑnní dihɛì tɛom̀pùtɛ̀ yiè. 
\v 20 Kucɛ mɛ̀mɑ́ɑ̀ ndi yoo mɛ̀dɛ́mɛ̀ n yɑ̀mɛ̀ bɛpotɑmbɛ̀ dènnɛmɛ̀ bɛ potɑntì kɛ́kɛ́nnɛ́ kuduotí fɔ̃nkúò. 
\v 21 Kɛ̀ m bɛ̀ kpɑnnɛ̀ kɛ dɔ̀: Dɛ̀ dòmmɛ̀ kɛ̀ di kɛ̀ńnɛ́ kuduotí? Kɛ̀ di dɛ̀ yìɛ́ n yóó di pĩ́mmu. Dɛ kó diyiè nɛ̀ yɛwe yɛ̀ɛ̀ kpɑɑní òmɔù tɛ̃́nkɛ í nyɛ̀nnɛ̀ tipotɑntì tɛom̀pùtɛ̀ yiè. 
\v 22 Mɛm̀mɛ n nɑ̀kɛ́mɛ̀ Defiibɛ kɛ dɔ̀ bɛ̀ɛ dɔɔ̀ bɛmɑ́ɑ̀ mɛwénkùmɛ̀ kó ikuɔ́ kɛ́kɔtɛ kɛ́mbɑɑ yɛbòrɛ̀ kɛ̀ dɛ̀ɛ yie nkɛ̀ bɛ̀ bɑ́ɑ́ sĩnkùnnɛ tɛom̀pùtɛ̀ kó diyiè.
\p Nɛ̀ dɛ kpɛ́í, ɑ́ú! Kuyie nhɑ nyɛ̃́ n kpɛ́í, fɔ̃́ nwèè tu osɑ̀ù, ɑ́ n kuɔ́ mmɛsémmɛ̀.
\b
\p
\v 23 Mɛm̀mɛ n yɑ̀mɛ̀ Sifubɛ mɑbɛ̀ tùókɛ́mɛ̀ Asidodiibɛ nɛ̀ Amɔniibɛ nɛ̀ Mɔɑbiibɛ miɛkɛ bɛnitipòbɛ̀. 
\v 24 Kɛ̀ bɛ̀mɑbɛ̀ nɑ̀ɑ́ nhAsidotiibɛ kó tinɑ́ɑǹtì kɛ̀ bɛtɔbɛ̀ nɑ̀ɑ́ ntitɛtì, bɑ́ bɛ̀ tɛ̃́nkɛ í nɑ́ɑ́ nSifubɛ kó tinɑ́ɑǹtì. 
\v 25 Kɛ̀ m bɛ̀ kpɑnnɛ̀ mɛdiɛ̀ kɛ́ bɛ̀ bɔntɛ́ kusĩ̀nkù, kɛ́puotí bɛsṹkùbɛ̀ kɛ́fɔ̃ri bɛ yùtì, kɛ́duɔ́ nkɛ̀ bɛ̀ɛ pɑrìkɛ̀ kɛ́yú Kuyie nyètìrì kɛ dɔ̀: Ti í yóó bɛ̀ duɔ́ nti kó bɛsɑpɑ̀mbɛ̀ kɛ̀ bɛ̀ɛ puó mbɛ bí, ti mɛ nyí yóó túókɛ́ bɛ kó bɛsɑpɑ̀mbɛ̀ kɛ́puó nti bí yoo tí bɛ̀ puokɛ ti mɔ́mmɔmbɛ. 
\v 26 Kɛ̀ m bɛ̀ nɑ̀kɛ́ dɛ kó mɛborimɛ mɛɛ̀ bɔmmɛ̀ Sɑdomɔɔ wèè do tú Isidɑyɛɛribɛ kóo kpɑ̀ɑ̀tì, ibotí tɛì imɔu miɛkɛ okpɑ̀ɑ̀tì mɔù do í bo wèè ò mɑ̀nnɛ̀ tikpɑ̀tì Kuyie ndo ò dɔ́mu kóò dɔ̀ɔ̀ okpɑ̀ɑ̀tì kòo mbɑkɛ́ Isidɑyɛɛribɛ bɛmɔu. Nɛ̀ mɛmmɛ kɛ̀ bɛnìtìbɛ̀ ibotí tɛì kɔbɛɛ ò tèntɛ kòo yetɛ́nɛ̀ Kuyie. 
\v 27 Kɛ̀ m bɛ̀ kpɑnnɛ̀ kɛ dɔ̀: Ti tɛ̃́nkɛ í dɔ́ kɛ́keè kɛ̀ di dɔɔri mɛyɛi ndiɛmɛ̀ miɛ mbotí kɛ tóú ibotí tɛì kó bɛnitipòbɛ̀ kɛ cɑɑ̀ri Kuyie nyètìrì.
\b
\p
\v 28 Dɛ̀ do sɔ̃́ ikuɔ́ nìùtì diɛwè Ediɑsibu birɛ Yoyɑdɑ po Sɑ̃mbɑdɑɑ Odoniibɛ botí kou kóo sɑpɑ̀ɑ̀ nwe, kɛ̀ nh ò bɛ̀ti m borɛ̀.
\b
\p
\v 29 Kuyie nhɑ nyɛ̃́ dɛ kó bɛnìtìbɛ̀ kpɛ́í bɛ̀ɛ̀ do cɑ̀kɛ ɑ yètìrì nɛ̀ ɑ tɔ̃mmú, kɛ́tɔ̃tɛ mɛtɑummɛ̀ ɑ do dɔ̀ɔ̀nɛ̀mɛ̀ ikuɔ́ nìùbɛ̀ nɛ̀ Defiibɛ.
\b
\p
\v 30 Mɛm̀mɛ m bɛ̀ dɔ̀ɔ̀mɛ̀ mɛwénkùmɛ̀ kó ikuɔ́ kɛ́wɛ̃tɛ kɛ́kɑnnɛ ikuɔ́ nìùbɛ̀ nɛ̀ Defiibɛ bɑ́ wè o tɔ̃mmú. 
\v 31 Kɛ̀ n wɛ̃tɛ kɛ́dɔu mmɛfíè ti yóó ntɔuní mɛ̀ɛ̀ botí idɛí Kuyie ncĩ́ɛ̃̀tɛ̀ nɛ̀ tidipɑ̀ntì.
\b
\p Kuyie ɑ nyɛ̃́ n kpɛ́í kɛ́ n dɔɔ̀ mɛsɑ̀ɑ̀.