\id NAM di34.all Novembre 1998 BJ Parakou B{enin
\ide UTF-8
\h Nɑummu
\toc1 Nɑummu
\toc2 NAHUMMU
\mt1 Nɑummu
\imt1 Di mpɑ́tíri tɔ tìì nɑ́ɑǹtì
\ip Nɑummu kó dipɑ́tíri tú fɛyɛ̀nfɛ̀ nfɛ Ninifu dihɛidiɛ̀ kó mupɔ̀mmù kpɛ́í. Kɛ bɛnkú Kuyie nkuù kpeńnìmɛ̀ kɛ̀ kuù bɑkɛ́ kù dɔ̀ɔ̀ dɛ̀ dɛmɔu Ninifu ɛì kɔbɛ do dokùnɛ̀mu Isidɑyɛɛribɛ kɛ̀ dɛ̀ yóù mɛdiɛ̀ nnɛ̀ dimɔ̀nnì, kɛ̀ Nɑummu nnɑ́ɑ́ nkɛ tú Kuyie nyóó pɔntɛmu Ninifu dihɛiyonkuri, dihɛiyɛiri kɛ́dɛɛtɛ́ Sudɑɑ kɔbɛ. Kòo nɑ́kɛ́ kɛ dɔ̀: Dɛ kó dihɛì kó mupɔ̀mmù yó ntú Kuyie nkó tiyɛ̃ĩti nti, bɛ kó tidɔnnitì kpɛ́í.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie nyóó bekɛ́nɛ̀mɛ̀ Ninifu ɛì 1:1-8
\io1 2. Kuyie nyóó potɛ́mɛ̀ ku dootitɔbɛ̀ 1:9-14
\io1 3. Kuyie nnɑ̀kɛ́mɛ̀ Ninifu ɛì kó mupɔ̀mmù duunnímɛ̀ 2:1-14
\io1 4. Mùù te kɛ̀ Kuyie nyóó pɔntɛ Ninifu 3:1-19
\c 1
\p
\v 1 Ntɛ ti Yiɛ̀ nKuyie mbɛnkɛ tì Nɑummu Ɛdikɔsi ɛì kou Ninifu dihɛidiɛ̀ kpɛ́í.
\s1 Kuyie mmiɛkɛ yóumu kɛ̀ kù nɛ́ wenni
\q1
\v 2 Ti Yiɛ̀ nKuyie mmiɛkɛ yóumu,
\q1 kɛ̀ kù puotì bɛ̀ɛ̀ yetɛ ku kpɛti.
\q1 Ku miɛkɛ yóumu mɛdiɛ̀,
\q1 kù ɔ̃ɔ̃ í nyóu kù bo pɛitɛmɛ̀ bɛ̀ɛ̀ kù nìí,
\q1 kù ɔ̃ɔ̃ í mbɛ̀ wùónko.
\q1
\v 3 Ku miɛkɛ boomu, kɛ̀ kù kpetì dɛu mɛdiɛ̀,
\q1 kù nɛ́ ɔ̃ɔ̃ í nyóu oyɛiwe,
\q1 kù ɔ̃ nkérí nɛ̀ tɛfɔ̀dɔ́ntɛ̀ ntɛ kɛ̀ kuyɑɑkù fĩ,
\q1 ku nɑɑ̀cɛ̀i íinko mùù tɑ̃́ɑ̃́ mmuù tu yɛwɛtɛ̀.
\q1
\v 4 Kuù ɔ̃ɔ̃ pɛ́i ndɑ̀mɛ́ɛ̀rì kòo kṹṹ,
\q1 kɛ̀ kù bɛ́i nyikó nkpeí,
\q1 Bɑsɑ̃ɑ̃ biriku kó timútì nɛ̀ Kɑdimɛɛdi tɑ̃rì kpɛti kɛ̀ tìi kpeí,
\q1 kɛ̀ Dimɑɑ túúkù kó mutepóó mmɔ́tɛ́.
\q1
\v 5 Kuù ɔ̃ɔ̃ bɛnkɛ ku wɛ̃rímú kɛ̀ yɛtɑ̃rɛ̀ɛ sɑ̃̀ntɛ̀,
\q1 kɛ̀ sitɑ̃ɑ̃́ nkpeutí,
\q1 kɛ̀ kɛtenkɛ̀ nhɑu kɛ kónnìnɛ̀ dɛ̀ɛ̀ kó dimɑ̀ɑ̀ bo kɛ miɛkɛ.
\q1
\v 6 Kɛ̀ ti Yiɛ̀ nKuyie mmiɛkɛ pɛikɛ we mbo nɑ kɛ́ kù bɑ̀ɑo?
\q1 Kɛ̀ ku miɛkɛ cɔ̀útɛ́ we mbo nkpɑɑ́?
\q1 Ku miɛkɛ cɔ́ú nfɛhɑ̃ɑ̃dɛɛ̀nfɛ̀ kɔ̃mɛ mmɛ kɛ̀ yɛpèrɛ̀ pùɔ̀.
\q1
\v 7 Ti Yiɛ̀ nKuyie nwennimu,
\q1 kuù ɔ̃ nkɑ̃nkɛ́ bɛ̀ɛ̀ sɔ̀ri ku borɛ̀ mɛyɛǹcɑɑ̀rìmɛ̀ yiè,
\q1 kuù ɔ̃ ndɑkɛ bɛ̀ɛ̀ sɔ̀ri ku borɛ̀ bɛ kpɛ́í.
\q1
\v 8 Kɛ̀ mɛniɛ ntɑ ikó nkɛ bo pɔ̃ntɛ́nɛ̀ dihɛì.
\q1 Kuù ɔ̃ɔ̃ pɔ̃nnɛ́ bɛ̀ɛ̀ kù nìí mpɑ́íí,
\q1 kɛ́ bɛ̀ kpɑ̀ɑ̀kɛ kɛ́tɑnnɛ́ dibiìnnì miɛkɛ.
\s1 Ti Yiɛ̀ nKuyie nnɑ̀kɛ́ tì Sudɑɑ kɔbɛ nɛ̀ Ninifu kɔbɛ bɛ kpɛ́í
\q1
\v 9 Kɛ̀ ti Yiɛ̀ nKuyie mbɛ́innɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kɛ dɔ̀:
\q1 Díndi Ninifu kɔbɛ n kó mɛyɛi nhɔ̃̀mmɛ mmɛ di yɑ̀mɛ̀?
\q1 Míì kɔù di dootitɔbɛ̀ di í wɛ̃ti kɛ bo yɑ̀ mɛyɛi mmɑmɛ̀.
\q1
\v 10 Bɛ̀ɛ̀ di níí mbɛ̀ yóó cɔ́útɛ́ tipotì tìì kpeí kɛ cóú ti kɔ̃mɛ mmɛ,
\q1 timúkpetì tɛ̃mɛ̀.
\b
\q1
\v 11 Ninifu ɛì, fɔ̃́ɔ̃̀ miɛkɛ nkɛ,
\q1 wèè wɑnti kɛ́ n dɔ̀ɔ̀ mí nKuyie mmɛyɛi nhò yɛ̀nnímɛ̀.
\q1 Dɛ yiɛ̀ nhò mɔ̀kɛ mɛyɛ̀mmɛ̀ yɛimɛ mmɛ.
\b
\q1
\v 12 Kɛ̀ ti Yiɛ̀ nKuyie nyíɛ́ kɛ́bɛ́i nkɛ dɔ̀:
\q1 Díndi Sudɑɑ kɔbɛ bɑ́ nɛ̀ di dootitɔbɛ̀ mɛ nsũmɛ̀ kɛ kpeńnì,
\q1 m bo bɛ̀ kùɔ kɛ́ bɛ̀ dèè.
\q1 Míì do duɔ́ nkɛ̀ bɛ̀ ndi fɛ̃́ũnko,
\q1 m mɛ ntɛ̃́nkɛ í yó nsɔkɛ́ kɛ di fɛ̃́ũnko.
\q1
\v 13 Di mmɔ̀nnì n di dɛɛtɛ́nɛ̀mu Asidii kɔbɛ bɛ̀ɛ̀ do di fɛ̃́ũnko,
\q1 kɛ di pìtɛ́ tidɑɑtì kó iwɛ̃ĩ.
\b
\q1
\v 14 Díndi Ninifu kɔbɛ, ntɛnɛ̀ ti Yiɛ̀ nKuyie ntɑ̃ɑ̃tɛ́ tì di kpɛ́í:
\q1 Di kó kufuku miɛkɛ òmɔù í yó nkpɑɑ́
\q1 wèè bo sɔɔtɛ́ di kó diyètìrì.
\q1 Sibɔɔtenkɑɑnìi idɛí kpɛsi nɛ̀ timɑ́tì kpɛsi,
\q1 dɛ̀ tɛ̃́nkɛ í yó nkpɑɑ́ di bɔɔtuo miɛkɛ.
\q1 N keù di fɔ̃ti nku,
\q1 di tɛ̃́nkɛ í tú bɛ̀mɑbɛ̀ ti Yiɛ̀ nKuyie nyììkɛ̀.
\q1
\v 15 Díndi Sudɑɑ kɔbɛ!
\q1 Ntɛnɛ̀ wèè nɑ̀ɑ́ ntinɑ́ɑǹsɑ̀ɑ̀tì kɛ kéríní yɛtɑ̃rɛ̀ ĩ́nkɛ̀,
\q1 ò tɔní diwɛ̀ì kó tinɑ́ɑǹtì nti.
\q1 Sudɑɑ kɔbɛ mbɑɑ̀nnɛ̀ di bɑɑ,
\q1 kɛ́ndɔɔri di dɔúnnɛ̀ yɛ̀ɛ̀ nɔ̀ ti Yiɛ̀ nKuyie,
\q1 kɛ yɛ̃́ Asidii kóò kpɑ̀ɑ̀tì yɛiwe tɛ̃́nkɛ í wɛ̃tinímɛ̀ di borɛ̀,
\q1 bɛ̀ ò dɛ̀ìtɛ pɑ́íí nwe.
\c 2
\b
\q1
\v 1 Díndi Ninifu kɔbɛ bɛ̀ di doti mudoò mmu,
\q1 dekɛnɛ̀ dihɛì kó iduotí kɛ́mbɑɑ yɛbòrɛ̀,
\q1 kɛ́pénnɛ́ icɛ, bɑ́ɑ́tínɛ̀ mɛsɑ̀ɑ̀, nkɛ pĩ́ ndimɑ́ɑ̀,
\q1
\v 2 Ti Yiɛ̀ nKuyie nwɛ̃ti kɛ bo duɔ́mmu Sɑkɔbu yɑɑ̀bí i wɛ̃rímú,
\q1 kù wɛ̃ti kɛ bo cónnɛ́mu Isidɑyɛɛribɛ bɛ fɔ̃̀tìrì,
\q1 bɛfèèbɛ̀ bɛɛ̀ do bɛ̀ pɔ̀ntɛ.
\s1 Kuyie mpɑ̃ɑ̃nɑ́ɑǹtì nɑ́ɑǹtò nɑ̀kɛ́mɛ̀ bɛ̀ yóó domɛ̀ Ninifu kóò pɔ̀ntɛ
\q1
\v 3 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Ninifu kɔbɛ di dootitɔbɛ̀ dɔpììtì tò mmɛwũɔ̃̀ mmɛ,
\q1 bɛ kó bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ dɑ̀ɑ́tí tiyɑɑ̀wũɔ̃tì nti,
\q1 kɛ̀ bɛ kpɑ̀rìnɑɑsɛ̃ĩ́ pĩnti kɛ dò mmuhɑ̃ɑ̃́, kɛ̀ bɛ̀ yùo yɛkpɑ̃ɑ̃̀.
\q1
\v 4 Ntɛ bɛkpɑ̀rìnɑɑsɛ̃ĩ́ kɛ puotì yɛtɑ̀rɛ̀ di kó dihɛì miɛkɛ,
\q1 kɛ tũũ̀ ndi cɛ nɛ̀ di kɑri dɛ̀,
\q1 kɛ pĩnti kɛ dò nyɛhɑ̃ɑ̃tĩrɛ,
\q1 kɛ cɑ̃ɑ̃́ fɛtɑpíɛ̀fɛ̀ kɔ̃mɛ.
\q1
\v 5 Ninifu kpɑ̀ɑ̀tì yumu o ɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ̀ bɛ̀ kpeutí,
\q1 kɛ̀ bɛ dootitɔbɛ̀ cokɛ́ mɛcɑ̃ɑ̃ nkɛ kɔ̀tɛ kuduotí borɛ̀ kɛ bɛ̀ bɑ̀ɑ̀,
\q1
\v 6 kɛ còńnɛ́ kuperí, kɛ pɔ̀ntɛ kunɛ́cɛ kó dibòrì.
\q1 Kɛ̀ kufɔ̃wɑɑ́ nhɑutɛ́ tɛkpɑ̀ɑ̀tìcĩ́ɛ̃̀tɛ̀ kɔbɛ.
\q1
\v 7 Kɛ̀ bɛ̀ dɛ̀itɛ tɛbɔɔtenkɑɑnìtɛ̀ sɑ̃tì,
\q1 kɛ tɛ̀ uutɛ́ kɛ kònnɛ̀.
\q1 Bɛnitipòbɛ̀ bɛ̀ɛ̀ do tɛ̀ bɑ̀ɑ,
\q1 kɛ̀ bɛ̀ kuɔ̀ nyɛsɑ́útìdɑbùò
\q1 nyɛkpɛtìnɔ́nkperɛ kɔ̃mɛ,
\q1 kɛ pĩĩ mbɛ cĩ̀ncĩ̀rɛ̀.
\q1
\v 8 Kɛ̀ bɛnìtìbɛ̀ cokù Ninifu kɛ yiɛ̀ kubinku ɔ̃ɔ̃ kpɛ̃́tɛ́,
\q1 kɛ̀ mɛniɛ nní nhorì mɛ̀ɛ̀ botí,
\q1 kɛ̀ bɛ̀ pɛ́inko kɛ tú: Cómmúnɛ̀! Cómmúnɛ̀!
\q1 Òmɔù mɛ nyí wɛ̃ɛ̃ri.
\q1
\v 9 Kounɛ̀ mɛsɔɔ, kounɛ̀ timɑ́tì pɛ́ítì.
\q1 Tikpɑ̀tì tìì bo dihɛì tì í dò nkɛ́deè,
\q1 Tinɛnsɑ̀ɑ̀tì tibotí tibotí píɛ́kɛ́mu.
\q1
\v 10 Pɔntɛnɛ̀ kɛ́dɛ́ítɛ́ kɛ́hɛí di dɔ́ dɛ̀,
\q1 bɛmɔu bɛ kɔ̃m̀bùɔ̀tì domu,
\q1 kɛ̀ bɛ núù mbɔ̀kɛ́
\q1 kɛ̀ bɛ kɔ̃̀ntì ɑu.
\s1 Bɛ̀ dònnɛnɛ̀mɛ̀ Ninifu dicìrícìrì bɛ̀ nɑ dì
\q1
\v 11 Yé dihɛì dìì do tú yɛcìrícìrɛ̀ kó kudènkù dì kɔ̀tɛ kɛ̀?
\q1 Dìì nìtìbɛ̀ do bo yɛcìrícìrìbɛ kɔ̃mɛ bɑ́ òmɔù í bɛ̀ kɔɔ́nnɛ̀.
\q1
\v 12 Dɛ kó dihɛì kɔbɛ do wɑɑ̀ mbɛ diitì dicìrícìrì ɔ̃ɔ̃ pĩ́mmɛ̀ mmɛ kɛ́dɔú nkɛ̀ yɛniiyɛɛ túótɛ́,
\q1 Dì ɔ̃ɔ̃ pĩ́ nkɛ́píɛmmu yɛ dènkù iorimɑɑ.
\b
\q1
\v 13 Di mmɔ̀nnì mí ndi Yiɛ̀ nKuyie Mpɑkɛdɑɑ n yìtɛ́ kɛ còḿmúmu fɔ̃́ nNinifu ɛì ɑ kpɛ́í,
\q1 kɛ bo cɔ́u nhɑ kpɑ̀rìnɑɑsɛ̃ĩ́,
\q1 kɛ́fíé ɑ nìtìbɛ̀ bɛ̀ɛ̀ dònnɛ̀ yɛcìrícìrìbɛ.
\q1 A tɛ̃́nkɛ í yó nkpɑɑ́ pĩĩ ntiwɑnwɑntì,
\q1 kɛtenkɛ̀ ĩ́nkɛ̀ dɛndɛ dèèmu.
\q1 Bɛ̀ tɛ̃́nkɛ bɑ́ɑ́ keè dɛ̀mɑrɛ̀ ɑ tɔ̃rɛ̀ kó mɛtɑmmɛ̀.
\c 3
\s1 Bɛ̀ kùɔmɛ̀ Ninifu kɔbɛ bɛ̀ɛ̀ do kɔù bɛnìtìbɛ̀
\q1
\v 1 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Dihɛì diì nkó bɛnìtìbɛ̀ kɔ̀ù bɛnìtìbɛ̀ mbɛ,
\q1 kɛ tú siyɑ́ɑ̀bìsí yɛmbɛ̀,
\q1 kɛ yuuku kɛ fekù bɛcĩ̀rìbɛ̀ kpɛrɛ,
\q1 bɛ̀ bo yɑ̀!
\q1
\v 2 Bɛ dootitɔbɛ̀ bɛɛ̀ bɛ̀ doti,
\q1 bɛ̀ fɑ̃̀ɑ̃́ nyɛdɑ́ nyɛ sisɛ̃ĩ́ kɛ̀ yɛ̀ kuɔ̀ nsɑ̃́ũ,
\q1 kɛ̀ sì cokù, kɛ̀ sikpɑ̀rìnɑɑsɛ̃ĩ́ cɛ̃̀ɛ̃̀tiyɛ̀ urì, kɛ̀ sì pùù.
\q1
\v 3 Kɛ̀ bɛsɑ̃ndèèbɛ̀ fĩmmúnɛ̀ sisɛ̃ĩ́,
\q1 kɛ̀ yɛse pĩ̀nti, kɛ̀ yɛkpɑ̃ɑ̃̀ ntu níɛ́ɛ́,
\q1 kɛ̀ bɛnìtìbɛ̀ duò kɛ kɔ̃, nkɛ̀ bɛcíríbɛ̀ còú còú,
\q1 bɑ́ bɛ̀ í dò nkɛ́kɑɑ̀ nkɛ́dee, kɛ̀ bɛ̀ bɛ̀ bètírí.
\s1 Ninifu ɛì dimɛ̀ ifɛi
\q1
\v 4 Ninifu ɛì kɔbɛ dibɔɔtɔ̃mmú muù tontɛ́,
\q1 di wenniku nɛ̀ di kó diwɛ̀ì nɛ̀ di dɔ̀ɔ̀ri dɛ̀ɛ̀ tie,
\q1 dɛɛ̀ te kɛ̀ dì yũɔ̃nní bɛnìtìbɛ̀ nɛ̀ yɛbotɛ̀,
\q1 kɛ bɛ̀ dɔ̀ɔ̀ri tidɑɑtì kɛ̀ bɛ̀ pĩĩ ndi tɔ̃mmú.
\q1
\v 5 Mí ndi Yiɛ̀ nKuyie Mpɑkɛdɑɑ n yìtɛ́ kɛ còḿmúmu ɑ kpɛ́í,
\q1 kɛ bo kɑ̃́tɛ́ fɔ̃́ nNinifu ɑ yɑɑ̀bòrì kɛ́deènní ɑ ììkɛ̀,
\q1 kɛ̀ bɛnìtìbɛ̀ɛ yɑ̀ ɑ fɛi.
\q1 Kɛ̀ yɛkpɑ̀ɑ̀tìyɔɔ dɑ wénní.
\q1
\v 6 N yóó dɑ dɑ́tínnɛ́ tiyontì nti,
\q1 kɛ dɑ́ yɑ́úkùnnɛ, kɛ̀ bɛnìtìbɛ̀ dɑ wénní,
\q1
\v 7 kɛ́ ndɑ yɑu kɛ cokù,
\q1 kɛ tú Ninifu kpɛrɛ dò mmɛsémmɛ̀ mmɛ,
\q1 òmɔù bɑ́ɑ́ ò kuɔ́ ndɛ kó mɛsémmɛ̀,
\q1 òmɔù bɑ́ɑ́ ò bɑ̀ńtɛ̀.
\s1 Tìì do tùɔ̀kɛní Tebɛsi ɛì tiì yóó tuɔkɛní Ninifu
\q1
\v 8 Fɔ̃́ nNinifu ɑ yɛ̀mmɛ̀ do nhɑ pɛ̃ɛ̃tɛ́mu Tebɛsi ɛì
\q1 dìì do sokɛ́ Niidi kó ikó ncuokɛ̀
\q1 kɛ̀ mɛniɛ nhò fitɛ́ kóo kɔ̀ńtɛ́ iduotí kɔ̃mɑɑ̀?
\q1
\v 9 Etiopii nɛ̀ Esibiti,
\q1 dɛ kó yɛhɛkɛ̀ do kpeńnìmu mɛdiɛ̀,
\q1 yɛɛ̀ do tú ɑ kó muwɛ̃rímú.
\q1 Puti kɔbɛ nɛ̀ Dibii kɔbɛ kɛ̀ bɛ̀ dɑ nɑɑtinɛ̀.
\q1
\v 10 Nɛ̀ mɛmmɛ kɛ̀ bɛ̀ bɛ̀ pĩ nkɛ kònnɛ̀ kɛ dɔ̀ɔ̀ tidɑɑtì,
\q1 kɛ nɑù bɛ bí icɛ imɔu miɛkɛ.
\q1 Kɛ tɑ̃ɑ̃́ tɛ́tɛ́ kɛ totí sikpɑ̀ɑ̀tìbìí,
\q1 kɛ boú bɛ̀ɛ̀ tu bɛnitidiɛbɛ̀ mɛfĩmmɛ.
\q1
\v 11 Fɔ̃́ nNinifu dɛ̀ tùɔ̀kɛ ɑ kó dimɔ̀nnì ndi,
\q1 kɑ̀ɑ yɑ̃̀ kuyonku kɛ muɔ́ nkɛ dìu,
\q1 kɛ wɑnti disɔ̀rì,
\q1 ɑ bo sɔri dɛ̀ kɑ̀ɑ dootitɔbɛ̀ dɑ mɔ́ntɛ́.
\s1 Ninifu ɛì kɔbɛ bɑ̀ɑ́tí fɑ̀ɑ̀rɛ̀ nwe
\q1
\v 12 Ninifu! A cɛ̃kpetɛ̀ sɑ̃̀ɑ̃́tɛ́nɛ̀ fìkíè tie mmu,
\q1 mùù kó yɛbɛ ketiyɛ̀ bi mɛsɑ̀ɑ̀,
\q1 kɛ̀ yɛ cɑ́ɑǹtì nɑmpɛ kɛ̀ yɛ̀ pɑ̃̀nkɛ donní o nùù miɛkɛ.
\q1
\v 13 Kɑ̀ɑ ɑ̃ɑ̃pɔ̀mbɛ̀ sɑ̃̀ɑ̃́tɛ́nɛ̀ bɛnitipòbɛ̀,
\q1 kɑ̀ɑ cɑ̀kɛ̀ kpetɛ́ kɛ feío,
\q1 kɑ̀ɑ dootitɔbɛ̀ bo nɑ kɛ́tɑ.
\q1 Muhɑ̃ɑ̃́ mmuù cɔ̀útɛ́ ɑ cɑ̀kɛ̀ kó yɛkpetínyɛ̀.
\q1
\v 14 Ítɛ́nɛ̀ kɛ́dó mɛniɛ ndi bo nyɔ̃ mmɛ̀,
\q1 bɛ̀ dɔ́ kɛ dí pimu, nɑnɛ̀ titɑ̃́tì,
\q1 ũtínɛ̀ tiyɑɑtì, pííkúnɛ̀ yɛdombiɛ,
\q1 kɛ́mɑɑ́ iduotí kɛ́pénnɛ́.
\q1
\v 15 Muhɑ̃ɑ̃́ mbo di cɔ́útɛ́,
\q1 bɛ̀ bo di kuɔ mudoò miɛkɛ,
\q1 bɑ́ kɛ̀ di dɔ́ dí nsũ yɛcɑ́dúɔ̀ ntɛ̃mɛ̀,
\q1 bɑ́ kɛ̀ di dɔ́ dí mɑɑtɛnɛ̀ fɛcofɛ mɑmɛ̀.
\q1
\v 16 Ninifu ɛì ɑ potɑmbɛ̀ do sũmu
\q1 kɛ dònnɛ̀ siwɑ̃̀ɑ̃ dòmmɛ̀ kɛĩ́nkɛ̀.
\q1 Bɛ̀ ìtɛ́mu fɛcofɛ tɛ̃mɛ̀.
\q1
\v 17 Bɛ̀ɛ̀ dɑ̀kɛ mutɔ̃mmú kpɛ́í,
\q1 kɛ̀ bɛ̀ sũ kɛ dònnɛ̀ fɛcofɛ,
\q1 kɛ̀ bɛpɑ́tíwɑ̃ɑ̃̀bɛ̀ sũ,
\q1 kɛ do ntikotɑɑ̀yòùtì ɔ̃ɔ̃ yɛ̀nní kubooku mɔ̀nnì kɛ́ndòmmɛ̀,
\q1 kɛ̀ diyiè yɛ̀nní tìi cíɛ́tɛ́,
\q1 ɑ tɛ̃́nkɛ bɑ́ɑ́ bɑntɛ́ tì do borɛ̀.
\s1 Mɛyɛi mmɛ̀ɛ̀ í mɔkɛ mutie
\q1
\v 18 Asidii ɛì kɔbɛ di kó bɛkpɑ̀ɑ̀tìbɛ̀ yɛ̃̀ nkɛ duɔ́mu bɛ̀ í yóó entɛ.
\q1 Munɔndɔmmú koutɛ́mu ɑ kó iwɛ̃ĩ yɛmbɛ̀ sɑ̃́ɑ̃̀.
\q1 A ɑ̃ɑ̃pɔ̀mbɛ̀ cìɛ́tɛ́mu kɛ dèkɛ yɛtɑ̃rɛ̀ ĩ́nkɛ̀,
\q1 òmɔù í bo wèè bo bɛ̀ tìí,
\q1
\v 19 A kó mumɔmmú í mɔkɛ mutie,
\q1 ɑ mɔnni í yóó miɛtɛ́.
\q1 Bɛ̀ɛ̀ kó dimɑ̀ɑ̀ yo bɛ̀ nɑ̀ɑ́ ntì ɑ kpɛ́í,
\q1 bɛ̀ fɑ̃̀ɑ̃́ mbɛ bɑɑ̀ ndɛ,
\q1 we mbo dɛ̀mɑrɛ̀ tɛ̃́nkɛ, wèè í yĩ̀ɛ̃́tɛ́ ɑ yóumɛ̀?