\id MIC di33.all Novembre 1998 BJ Parakou B{enin
\ide UTF-8
\h Misee
\toc1 Misee
\toc2 MISEE
\mt1 Misee
\imt1 Di mpɑ́tíri tɔ tìì nɑ́ɑǹtì
\ip Kuyie mpɑ̃ɑ̃nɑ́ɑǹtì nɑ́ɑǹtò Misee nɛ̀ Esɑii bɛ mɔ̀nnì dimɑ́ɑ̀ ndi. Kòò múnkɛ nɑ́ɑ́nnɛ̀ Sudɑɑ kó dikpɑ̀ɑ̀tìyuu kɔbɛ Esɑii do nɑ́ɑ́nnɛ̀ bɛ̀. Dɛ̀ do sɔ̃́ nhAsidii kó bɛhɑ̃ɑ̃pɔ̀mbɛ̀ bɛɛ̀ bɛ̀ fɛ̃́ũnko.
\ip Kɛ̀ Misee bɛ̀ nɑ̀kɛ́ kɛ tú tìì tùɔ̀kɛní Sɑmmɑrii kɔbɛ tiì yóó bɛ̀ tùɔ̀kɛní, kɛ yɛ̃́ bɛ yɛi mmɛmɑ́ɑ̀ ndi, mɛ̀ɛ̀ tu bɛ̀ fɛ̃́ũnkomɛ̀ bɛtɔbɛ̀. Kòo múnkɛɛ kpɑ̀nnɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛ̀ɛ̀ soú mbɛnìtìbɛ̀, Misee do nɑ́ɑ́nnɛ̀ bɛ̀ kɛ́ndɔ́ bɛ̀ɛ totí bɛ yɛ̀mmɛ̀ kɛ́tɑ̃ɑ̃tɛ́ tìì dò mbɛ̀ɛ tì tɑ̃ɑ̃tɛ́. Ò do bɛ̀ cɑummu kɛ́wɛ̃tɛ kɛ́ mbɛ̀ nɑ̀ɑ́ nKuyie nyóó dɔɔ̀ dɛ̀ yɛwe yɛ̀ɛ̀ kpɑɑní yɛ miɛkɛ kɛ́dɛɛtɛ́ ku nìtìbɛ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie mbeéntì dotimɛ̀ Isidɑyɛɛri kó dikpɑ̀ɑ̀tìyuu nɛ̀ Sudɑɑ kɔbɛ kpɛri 1:1-3:12
\io1 2. Kuyie nyóó wɛ̃tɛ kɛ́tɛ̃́nnɛ́nímɛ̀ Isidɑyɛɛribɛ bɛ tenkɛ̀, kɛ̀ bɛ̀ɛ di diwɛ̀ì 4:1-5:15
\io1 3. Misee bɑ̀ńtɛ̀mɛ̀ Kuyie nkɛ̀ kù dɔ̀ kù yóó bɛ̀ kuɔ́ mmɛsémmɛ̀ 6:1-7:20
\c 1
\s1 Kuyie nkpɑ̀nnɛ̀ tì Isidɑyɛɛribɛ nɛ̀ Sudɑɑ kɔbɛ
\p
\v 1 Sudɑɑ kpɑ̀ɑ̀tìbɛ̀ Yotɑmmu nɛ̀ Akɑsi nɛ̀ Esekiɑsi bɛ kpɑ̀tì bie mmiɛkɛ nkɛ ti Yiɛ̀ nKuyie mbɛnkɛmɛ̀ Misee Mɔdɛsɛti ɛì kou ku nɑ́ɑǹtì, Sɑmmɑrii ɛì nɛ̀ Sedisɑdɛmmu kpɛri yɛ kpɛ́í.
\q1
\v 2 Yɛbotɛ̀ yɛmɔu kɔbɛ kéntɛ́nɛ̀!
\q1 Titentì timɔu kɔbɛ nɛ̀ dɛ̀ɛ̀ kó dimɑ̀ɑ̀ bo kɛtenkɛ̀ ĩ́nkɛ̀ keènɛ̀!
\q1 Ti Yiɛ̀ nKuyie nyìtɛ́nímu ku cɛ̃sɑ̀ɑ̀tɛ̀
\q1 kɛ bo di bekɛ́nɛ̀.
\q1
\v 3 Kù ìtɛ́nímu ku kɑ̀rì
\q1 Kù cùtɛ́nímu kɛ centìní yɛtɑ̃rɛ̀ ĩ́nkɛ̀.
\q1
\v 4 Kɛ yɛ̀ nɑ̀ù kɛ̀ yɛ̀ yìɛ̀ri,
\q1 muhɑ̃ɑ̃́ nhɔ̃ɔ̃ eutɛ mɛkùɔ̀ nkɛ̀ mɛ̀ɛ̀ yiɛtɛmɛ̀,
\q1 yɛ̀ pũɔ̃̀mmu kɛ cuutiní kubiriku miɛkɛ,
\q1 kɛ kù dɑmmù mɛniɛ nhɔ̃ mpũɔ̃̀ ndɛ̀ɛ̀ yùú nkɛ dòmmɛ̀.
\q1
\v 5 Isidɑyɛɛribɛ di kó mɛyɛi mmɛɛ̀ te,
\q1 Isidɑyɛɛribɛ kó mɛyetímɛ̀ kpɛ́í nte.
\q1 We ntɑnnɛ́ Isidɑyɛɛribɛ mɛyɛi mmiɛkɛ?
\q1 Bɛ̀ɛ̀ bo bɛ̀mbɛ dihɛidiɛ̀ Sɑmmɑrii.
\q1 We nte kɛ̀ Sudɑɑ kɔbɛ fìé yɛbɔkɛ̀ yɛtɑ̃rɛ̀ ĩ́nkɛ̀?
\q1 Bɛ̀ɛ̀ bo bɛ̀mbɛ dihɛidiɛ̀ Sedisɑdɛmmu.
\q1
\v 6 Nɛ̀ dɛ kpɛ́í, mí ndi Yiɛ̀ nKuyie m bo dɔ̀ɔ̀ Sɑmmɑrii ɛì tidobontì,
\q1 kɛ̀ dìì yɑ̃ɑ̃ nyɑ̃ɑ̃ nkɛ́nɑɑ́ nyɛdobuò nkɛ́yĩ́ dikpɑ́ɑ̀,
\q1 kɛ̀ bɛ̀ ndɛ̀ fiiku dɛtie mmɑ́ɑ̀.
\q1 M bo díɛ́ o tɑ̃́rɛ̀ kɛ cṹũ nkubiriku,
\q1 kòo pũũ feitóo.
\q1
\v 7 Kɛ̀ m bɔ́kɛ́ o bɔɔtenkɑɑnìi kɛ́ sì cɔ́u,
\q1 tibɔɔnɛntì bɛ̀ pɑ̃mmú tì bɛ bɔkɛ̀ n yóó tì cɔ́ummu.
\q1 Bɛ̀ fìé iwũɔ̃ nyi yɛbɔkɛ̀ kɛ tì do.
\q1 Bɛ̀ dootitɔbɛ̀ bo tì tɔ kɛ́cú bɛ kó yɛbɔkɛ̀.
\s1 Mɛyɛi mmɛ̀ɛ̀ yóó do Sedisɑdɛmmu
\q1
\v 8 Mí mMisee n yó nkuɔ̀mmu kɛ mítìrì,
\q1 kɛ centì mɛnɑcɛ̀bii kɛ bo n tetìrì,
\q1 kɛ úú sikpɑmɔɔ́ kɔ̃mɛ,
\q1 kɛ kuɔ̀ ndisendɑbònnì fɛcònfɛ̀ tɛ̃mɛ̀.
\q1
\v 9 Sɑmmɑrii cɔú tìì yɛ̃ĩti í yóó deè,
\q1 dɛ kó tiyɛ̃ĩti yó nsɔkɛ́mu kɛ́tuɔkɛ Sudɑɑ tenkɛ̀,
\q1 tì tùɔ̀kɛnímu kɛ bo Sedisɑdɛmmu ɛì kó dibòrì.
\b
\q1
\v 10 Di bɑ́ɑ́ tì yèè ti dootitɔbɛ̀ Kɑti ɛì kɔbɛ cuokɛ̀,
\q1 ncĩ́ɛ̃́kɛ́nɛ̀, di bɑ́ɑ́ kuɔ́, nhAkɔɔ ɛì miɛkɛ,
\q1 Bɛti-Deɑfɑdɑ ɛì kɔbɛ,
\q1 pũńnɛ̀ mutɑ̃́ɑ̃́ nkɛ́bɛnkɛ di yɛǹcɑɑ̀rìmɛ̀.
\q1
\v 11 Sɑfii ɛì kɔbɛ cɑ̃rikɛnɛ̀ kɛ́ yɛ̀ dihɛì di fɔ̃̀kperɛ̀ nɛ̀ ifɛi.
\q1 Sɑnɑɑ ɛì kɔbɛ tɛ̃́nkɛ í dɑ̀ɑ́tí kɛ bo yɛ̀nní bɛ ɛì.
\q1 Bɛti-Esɛdi ɛì kɔbɛ biɛ nɛ́ kuɔ mmɑ́ɑ̀ ndi,
\q1 mɛteèmmɛ̀ tɛ̃́nkɛ í kɛ̀ bo.
\q1
\v 12 Mɑdoti ɛì kɔbɛ kɔ̃̀ntì ɑu kɛ nɑɑtimu,
\q1 ti Yiɛ̀ nKuyie nduɔ̀nní tìì yɛ̃ĩti tùɔ̀kɛnímu kɛ dèè kɛ bo Sedisɑdɛmmu.
\q1
\v 13 Dɑkiisi ɛì kɔbɛ cɑ́tínnɛ̀ di sɛ̃ĩ́.
\q1 Di teetɛ́nɛ̀ Isidɑyɛɛribɛ mbɛ kɛ dɔ̀ɔ̀ mɛyɛi,
\q1 díì te kɛ̀ Sedisɑdɛmmu kɔbɛ yetɛ n kpɛti.
\q1
\v 14 Dɛɛ̀ kpɛ́í nte kɛ̀ di dò nkɛ́yɑtɛnɛ̀ Mɔdɛsɛti ɛì,
\q1 dìì bo Kɑti tempɛ̃ mmiɛkɛ di kɔbɛ.
\q1 Akisibu cɛ̃́ĩ kɔbɛ í yóó nɑ kɛ́teennɛ̀ okpɑ̀ɑ̀tì tìmɑtì
\q1
\v 15 Mɑdesɑɑ ɛì kɔbɛ, ti Yiɛ̀ nKuyie nyóó yíɛ́ kɛ́duɔnnímu,
\q1 di dootitɔbɛ̀ kɛ̀ bɛ̀ɛ pɔntɛ di ɛì,
\q1 kɛ̀ di kó bɛkpɑ̀ɑ̀tìdiɛbɛ̀ɛ cokɛ́ kɛ́kɔtɛ kɛ́sɔri Adudɑmmu tɑ̃dènkù.
\b
\q1
\v 16 Díndi Sedisɑdɛmmu ɛì kɔbɛ kuónɛ̀ di yùtì kɛ́níntɛ́ mɛyùbii,
\q1 nkɛ di yɔɔ dontɛnɛ̀ timɑncòntì kpɛyɛ.
\q1 Kɔmmúnɛ̀ di bí kpɛ́í,
\q1 di bí sɑ̀ɑ̀yì nyi kɛ di ì dɔ́,
\q1 kɛ yɛ̃́ di dootitɔbɛ̀ yóó ì pĩ̀ḿmúmɛ̀ kɛ́kònnɛ̀.
\c 2
\s1 Kuyie nkpɑ̀nnɛ̀mɛ̀ bɛ̀ɛ̀ fèkù bɛtɔbɛ̀ kpɛrɛ
\q1
\v 1 Di bo yɑ̀ díndi bɛ̀ɛ̀ ɔ̃ nyié nkɛ toti di yɛ̀mmɛ̀ mɛyɛi nyĩ́nkɛ̀ mɑ́ɑ̀,
\q1 kɛ́ mɛ̀ tũ̀ntɛ di duɔ́ dɛ̀ di dúɔ̀
\q1 kɛ̀ tɛkotɛ nyóó kuɔ́ nkɛ̀ di mɛ̀ dɔ̀ɔ̀ri,
\q1 di mɔkɛ mɛ̀ɛ̀ kpɛ́í mmuwɛ̃rímú.
\q1
\v 2 Di ɔ̃ nkɛ̀ di yɑɑ nwèè pɑku di kù fìètɛmu,
\q1 kɛ̀ tɛcĩ́ɛ̃̀tɛ̀ mɛ nni ntɛ di tɛ̀ fìètɛ,
\q1 kɛ níí pi onìtì nɛ̀ o cĩ́ɛ̃̀tɛ̀
\q1 kɛ́fietɛ dɛ̀ɛ̀ do tú o kpɛrɛ.
\q1
\v 3 Dɛɛ̀ kpɛ́í nte kɛ̀ ti Yiɛ̀ nKuyie ntu,
\q1 kù bo di bɔntɛ́ní mɛyɛi mmiɛkɛ.
\q1 Bɑ́ di bɑ́ɑ́ nɑ kɛ́yentɛ́,
\q1 di mɛ̀ mbɑ́ɑ́ nɑ kɛ́íi ndi yɔ.
\q1 Dɛ kó yɛwe yó ntú mɛyɛi nkpɛyɛ nyɛ.
\q1
\v 4 Dɛ kó diyiè bɛ̀ bo ntekíí di kó dikúdɑbònnì kɛ tú:
\q1 Bɛ̀ ti pɔ̀ntɛmu pɑ́íí kɛ̀ ti nìtìbɛ̀ pɑ̀ɑ̀ bɛ tenkɛ̀,
\q1 Kuyie nkuù kɛ̀ cɔutɛ́ kɛ kɛ̀ totí ti dootitɔbɛ̀.
\b
\q1
\v 5 Ti Yiɛ̀ nKuyie nkɔbɛ wɛ̃ti kɛ bo totímu bɛ̀ tenkɛ̀,
\q1 di kóò mɔù mɛ nyí yó nkɔkɛ́ dɛ miɛkɛ.
\s1 Bɛ̀ yetɛmɛ̀ Kuyie mpɑ̃ɑ̃nɑ́ɑǹtì nɑ́ɑǹtò bɛ̀ nɑ̀kɛ́ tì
\q1
\v 6 Bɛ̀ nɑ̀ɑ́mmu n kpɛ́í,
\q1 bɛ̀ tu n yóu tiyɛìnnɑ́ɑǹtì, n nɑ́ɑ́ ntì
\q1 kɛ tú ifɛi í yóó bɛ̀ do,
\q1 ifɛi mɑì í yóó bɛ̀ do bìtì.
\b
\q1
\v 7 Kɛ nɑ́ɑ́ nkɛ tú ti Yiɛ̀ nKuyie n cɔ̃ɔ̃mu Isidɑyɛɛribɑ̀ɑ̀?
\q1 Kù minnímɛ̀ dòńtɛ́mɑ́ɑ̀?
\q1 Ku borimɛ mɛ ndònnɑ̀ɑ̀?
\q1 Tinɑ́ɑǹtì n nɑ́ɑ́ ntì nɑɑtimu,
\q1 bɛ̀ɛ̀ dɔ̀ɔ̀ri dɛ̀ɛ̀ sìɛ́.
\q1
\v 8 Ti Yiɛ̀ nKuyie nnɑ̀ɑ́ díì kpɛ́í kɛ tú:
\q1 Nɛ̀ yíe ndɔkɛ di túmɛ̀ ku nìtìbɛ̀ dootitɔbɛ̀,
\q1 kɛ fekù bɛ yɑɑ̀bòrɛ̀ bɛ kũũ̀nní dìì mɔ̀nnì mudoò,
\q1 kɛ yɛ̃́ kɛ dò dɛ̀mɑrɛ̀ tɛ̃́nkɛ í bɛ̀ kɔɔ́nnɛ̀.
\q1
\v 9 Kɛ dennìnko n nìtìbɛ̀ pobɛ̀ bɛ cɛ̃́ĩ miɛkɛ,
\q1 diwɛ̀ì bɛ̀ bonɛ̀ sì kɛ̀ bɛ̀ sì dɔ́,
\q1 kɛ pɑɑnkonɛ̀ bɛ bí dɛsɑ̀ɑ̀rɛ̀ n yì duɔ́ ndɛ̀ kɛ̀ ì borɛ̀ tiekɛ.
\q1
\v 10 Ítɛ́nɛ̀ kɛ́yɛ̀!
\q1 Mɛom̀pùmɛ̀ tɛ̃́nkɛ í bo dɛ kó dihɛì,
\q1 dɛ kó dihɛì yɛi mmɛɛ̀ te mɛfɛ̃́ṹtímɛ̀.
\b
\q1
\v 11 Kɛ̀ n do nkɔ̀tɛní kɛ́ mbɛ̀ nɑ̀ɑ́ nsiyɑ́ɑ̀bìsí,
\q1 dɛtetìrɛ̀ kpɛsi nsi kɛ tú bɛ̀ bo mmɔkɛ mɛnɑɑ̀ nkperímɛ̀
\q1 pɛ́u dɛ kó kubotí mɛ ndɔ́.
\s1 Kuyie nnɑ̀kɛ́mɛ̀ kù yóó wɛ̃tɛ kɛ́tíímmɛ̀ Isidɑyɛɛribɛ
\q1
\v 12 Mí ndi Yiɛ̀ nKuyie mmíì bɛ́i nkɛ tú,
\q1 n yóó wɛ̃tɛ kɛ́tíímmu Sɑkɔbu yɑɑ̀bí,
\q1 n yóó tíímmu Isidɑyɛɛribɛ bɛ̀ɛ̀ kpɑɑ́,
\q1 kɛ̀ bɛ̀ɛ dontɛnɛ̀ kupecɛ̃nku ɔ̃ ndòmmɛ̀ dipedie miɛkɛ.
\q1 Inɑ̀ɑ̀kɛ ɔ̃ ndòmmɛ̀ dinɑɑbɑɑkɛ̀rì,
\q1 kɛ̀ bɛ̀ɛ wɛ̃tɛ kɛ́sṹṹ mbɛ ɛì miɛkɛ.
\q1
\v 13 Okpɑ̀rìteu wèè yóó niitɛ́ kɛ́keutɛ́ kucɛ,
\q1 weè tu ti Yiɛ̀ nKuyie, kɛ yóó duutɛ kuduotí kɛ̀ bɛ̀ɛ yɛ̀,
\q1 kɛ̀ kù mbɛ̀ ni kɛ bɛ̀ bɑkɛ́.
\c 3
\s1 Kuyie mpɑ̃ɑ̃nɑ́ɑǹtì nɑ́ɑǹtò kpɑ̀nnɛ̀mɛ̀ bɛ̀ɛ̀ ni Isidɑyɛɛribɛ
\q1
\v 1 Kéntɛ́nɛ̀ díndi Sɑkɔbu yɑɑ̀bí!
\q1 N nɑ́ɑ́nnɛ̀ dím̀bɛ, díndi Isidɑyɛɛribɛ kó sikpɑ̀ɑ̀tìbìí,
\q1 di kó mutɔ̃mmú í tú di bo ndɑkɛmɛ̀,
\q1 kɛ̀ bɛnìtìbɛ̀ ndɔɔri dɛ̀ɛ̀ sìɑ́ɑ̀?
\q1
\v 2 Dɛ̀ nɛ́ yĩmɛ kɛ̀ di níí ndɛ̀ɛ̀ sìɛ́,
\q1 kɛ dɔɔri mɛyɛi,
\q1 kɛ fɛ̃́ṹ bɛnìtìbɛ̀ kɔ̃̀ntì kɛ dɛì bɛ̀ mɑm̀bii,
\q1 kɛ feinko bɛ kṹɔ̃̀?
\q1
\v 3 Díì bɛ̀ cɑ̀ɑ́ nkɛ fɛ̃́ṹ bɛ kɔ̃̀ntì kɛ kékíí bɛ kṹɔ̃̀,
\q1 kɛ bɛ̀ yɔurí bɛ̀ ɔ̃ɔ̃ yĩ́mɛ̀ imɑɑ nkɛ́utɛ́ tɛkṹmbotɛ̀.
\q1 Bɛ̀ ɔ̃ɔ̃ posìrìmɛ̀ itùòti kɛ́ɑ̃nnɛ́ kukɑ̀dɑ̀ɑ̀buuku.
\q1
\v 4 Di bo kuɔ́nnɛ̀ dìì mɔ̀nnì ti Yiɛ̀ nKuyie nkù bɑ́ɑ́ di cɔ́útɛ́,
\q1 kù bo mbúútóo di kpɛti di dɔ̀ɔ̀ mɛ̀ɛ̀ yɛi nkpɛ́í.
\s1 Kuyie ncɑummɛ̀ bɛpɑ̃ɑ̃soùmbɛ̀
\q1
\v 5 Ntɛ ti Yiɛ̀ nKuyie nkpɑ̀nnɛ̀ tì bɛpɑ̃ɑ̃soùmbɛ̀,
\q1 bɛ̀ɛ̀ fétìnko ku nìtìbɛ̀.
\q1 Bɛ̀ɛ̀ ɔ̃ nkɛ̀ wèè wɑɑrɛ bɛ nɔ̀ mɛkùɔ̀ mbɛ̀ dɔ̀
\q1 diwɛ̀ì bo nhò bonɛ̀.
\q1 Kɛ̀ wèè mɛ nyí wɑɑrɛ bɛ nɔ̀ mɛkùɔ̀ mbɛ̀ dɔ̀,
\q1 mɛyɛi mbo ò dò.
\q1
\v 6 Dɛɛ̀ kpɛ́í nte mí ndi Yiɛ̀ nKuyie nkɛ̀ n tu,
\q1 m bo duɔ́ nkɛ̀ dɛ̀ɛ bɛ̀ bììtɛ,
\q1 bɛ̀ bɑ́ɑ́ yɑ̀ n kó mɛbɛnkùmɛ̀
\q1 m bo bɛ̀ bɔntɛ́ dibiìnnì bɑ́ bɛ̀ bɑ́ɑ́ yɑ̀ tipɑ̃ɑ̃nɑ́ɑǹtì,
\q1 dɛ yiè dɛ̀ bo bɛ̀ sɔ̀ùtɛ sɑ̃̀ṹ sɑ̃̀ṹ.
\q1
\v 7 Dɛ mɔ̀nnì ifɛi bo pĩ́ ndɛ kó bɛyuwúòmbɛ̀,
\q1 dɛ̀ bo bɛ̀ di, kɛ̀ bɛ̀ ḿpi bɛ ììkɛ̀,
\q1 kɛ yɛ̃́ Kuyie ntɛ̃́nkɛ í yó mbɛ̀ tɛ̃́nnìnkomɛ̀ bɛ̀ kù bèkú tì.
\b
\q1
\v 8 Mí nyie, ti Yiɛ̀ nKuyie nni nduɔ́mmu ku Yɑɑ́,
\q1 kɛ̀ m mɔ̀kɛ muwɛ̃rímú kɛ nɑ́ɑ́nnɛ̀ dikɔ̃m̀bùɔ̀ dɛ̀ɛ̀ sìɛ́,
\q1 kɛ bɛnkú Isidɑyɛɛribɛ bɛ yetímɛ̀ nɛ̀ bɛ yɛi.
\s1 Kuyie mpɑ̃ɑ̃nɑ́ɑǹtì nɑ́ɑǹtò Misee nɑ̀kɛ́mɛ̀ Sedisɑdɛmmu yóó pɔntɛmɛ̀
\q1
\v 9 Kéntɛ́nɛ̀ díndi Sɑkɔbu yɑɑ̀bí,
\q1 n nɑ́ɑ́nnɛ̀ dím̀bɛ Isidɑyɛɛribɛ kó bɛbɑɑtíbɛ̀,
\q1 díndi bɛ̀ɛ̀ bekùnɛ̀ Isidɑyɛɛribɛ,
\q1 díndi bɛ̀ɛ̀ í dɔ́ dɛ̀ɛ̀ sìɛ́,
\q1 kɛ penni tibeéntì.
\q1
\v 10 Di kɔù bɛnìtìbɛ̀ mbɛ kɛ mɑɑ̀nɛ̀ Kuyie nhɛì,
\q1 Nɛ̀ kuyonku nku di mɑɑ́nɛ̀mɛ̀ Sedisɑdɛmmu.
\q1
\v 11 Dɛ kó bɛnìùbɛ̀ bekù ticuuti kpɛ́í nkɛ,
\q1 kɛ̀ ikuɔ́ nìùbɛ̀ tiè nkɛ dɔ́ mucɔ̃́ntimu,
\q1 bɛ̀ɛ̀ tu m pɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ pɑ̃ũ̀ kɛ dɔ́ idíítí,
\q1 kɛ bɑɑ nu nnɛ́ ĩkú ti Yiɛ̀ nKuyie ĩ́nkɛ̀ nkɛ kɛ nɑ́ɑ́ nkɛ tú:
\q1 Kù ti bonɛ̀mu mɛyɛi nyí yóó ti tuɔkɛní.
\q1
\v 12 Nɛ̀ di kpɛ́í Siyɔ̃ɔ̃ Sedisɑdɛmmu ɛì bo nɑɑ́ ndikpɑ́ɑ̀,
\q1 kɛ̀ bɛ̀ɛ dɛ̀ kùútí,
\q1 Sedisɑdɛmmu bo nɑɑ́ nyɛdobuò kɛ́ncóú,
\q1 kɛ̀ ti Yiɛ̀ Kuyie ncĩ́ɛ̃̀tɛ̀ kó ditɑ̃rìi nɑɑ́ nkutúúkù.
\c 4
\s1 Kuyie nyóó wɛ̃tɛ kɛ́bɑɑtɛ́mɛ̀ Sedisɑdɛmmu
\q1
\v 1 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Yɛwe sɔnyɛ miɛkɛ n cĩ́ɛ̃̀tɛ̀ tɑ̃rì bo wɛ̃tɛ kɛ́kpenkɛnɛ̀ yɛtɑ̃rɛ̀ tɛyɛ̀,
\q1 kɛ́bɑɑtɛ́ sitɑ̃ɑ̃́.
\q1 Kɛ̀ yɛbotɛ̀ ndɔkuní di borɛ̀,
\q1
\v 2 Bɛ̀ bo nnɑ́ɑ́ mbɛtɔbɛ̀ kɛ tú:
\q1 Tí kɔtɛnɛ̀ ti Yiɛ̀ nKuyie ntɑ̃rì,
\q1 Kuyie nSɑkɔbu do tũ nkù cĩ́ɛ̃̀tɛ̀.
\q1 Kɛ̀ kù tí tie nku dɔ́ tí nfòù mɛ̀ɛ̀ botí,
\q1 kɛ̀ ti tũnnɛ kù ti bɛnkɛ kùù cɛ,
\q1 ku tié mbonní Siyɔ̃ɔ̃ tɑ̃rì ndi,
\q1 ku nɑ́ɑǹtì yìɛ̀ní Sedisɑdɛmmu nwe.
\q1
\v 3 Dɛ mɔ̀nnì ti Yiɛ̀ nKuyie mbo mbɑkɛ́ yɛbotɛ̀,
\q1 kuù yó nni ibotí ìì kpeńnì kɛ díɛtirì,
\q1 kɛ́bɔ́kɛ́ bɛ kpɑ̀rìseuti kɛ́mɑ́ sitũ̀kusi,
\q1 kɛ mɑ́ bɛ kpɑ̃ɑ̃̀ sicɑmúkɛ̃kusí,
\q1 kubotí mɑkù tɛ̃́nkɛ bɑ́ nkpɑ̀nnɛ̀ kutɛkù.
\q1 Bɛ̀ tɛ̃́nkɛ bɑ́ mpĩĩ nhòmɔù tihɑ̃ɑ̃pɔ̀ntì.
\q1
\v 4 Bɑ́ wè kòo nkuuti nɛ̀ diwɛ̀ì o pɑku,
\q1 nɛ̀ o pérímù bɑ́ dɛ̀mɑrɛ̀ í nhò kɔɔ́nnɛ̀.
\q1 Mí ndi Yiɛ̀ nKuyie Mpɑkɛdɑɑ míì bɛ́i.
\b
\q1
\v 5 Ibotí tɛì tũ nyɛbɔkɛ̀ nyɛ,
\q1 tínti biɛ mɛ ntũ̀ nti Yiɛ̀ nKuyie nku sɑ̃́ɑ̃̀.
\s1 Kuyie nyóó wɛ̃tɛ kɛ́tíínnímɛ̀ ku kɔbɛ kɛ́ bɛ̀ bɑɑtɛ́
\q1
\v 6 Kɛ̀ ti Yiɛ̀ nKuyie nsɔɔtɛ́ kɛ́ m bɛ́innɛ̀ kɛ dɔ̀:
\q1 Dɛ yiè kpɑɑnímu kɛ̀ m bo wɛ̃tɛ kɛ́tíí m pekpĩɛ̃̀ nyɛ̀ɛ̀ cìɛ́tɛ́,
\q1 n do ì potɛ́mu.
\q1
\v 7 N yóó tíímmu yɛpekpĩɛ̃̀,
\q1 kɛ́dɔ̀ɔ̀ ìì cìɛ́tɛ́ kubotí kùù kpeńnì,
\q1 mí ndi Yiɛ̀ nKuyie nkɛ̀ nní mbo Siyɔ̃ɔ̃ tɑ̃rì,
\q1 kɛ bɛ̀ bɑkɛ́ sɑ̃́ɑ̃̀.
\q1
\v 8 Fɔ̃́ nSedisɑdɛmmu nɛ̀ fɔ̃́ɔ̃̀ borɛ̀ ndɛ Kuyie mpɑkɛ́mɛ̀,
\q1 ku nìtìbɛ̀ opecɛ̃nti ɔ̃ ndekɛ mɛ̀ɛ̀ botí didènnì kɛ pɑkɛ́ o pe,
\q1 fɔ̃́ɔ̃̀ yóó wɛ̃tɛ kɛ́nɑɑ́ ndihɛidiɛ̀ okpɑ̀ɑ̀tì yó mbo dì.
\s1 Kuyie nyɑ̀ɑ́kɛ́mu Sedisɑdɛmmu ɛì kɔbɛ kɛ dèè kɛ bɛ̀ dɛɛtɛ́
\q1
\v 9 Díndi Sedisɑdɛmmu kɔbɛ dɛ̀ dòmmɛ kɛ̀ di kuɔ̀?
\q1 Di tɛ̃́nkɛ í mɔkɛ okpɑ̀ɑ̀tɑ̀ɑ̀?
\q1 Bɛ̀ tɛ̃́nkɛ í di duɔ̀ nyitiénɑ́ɑ̀?
\q1 Dɛ̀ nɛ́ yĩ́mɛ kɛ̀ di mítìrìnɛ̀ kuyonku
\q1 onitipòkù wèè yóó pɛitɛ́ o kɔ̃mɛ?
\b
\q1
\v 10 Di nɑɑtimu ńkuɔ̀nnɛ̀ kɛ́nfɑ̃ũ dimɑ́ɑ̀,
\q1 onitipòkù wèè pɛí o kɔ̃mɛ
\q1 kɛ yɛ̃́ bɛ̀ yóó di dennɛmɛ̀mu dihɛì,
\q1 kɛ̀ dí mbo dikpɑ́ɑ̀ kɛ̀ bɛ̀ di kònnɛ̀ Bɑbidɔnni.
\q1 Dɛndɛ ti Yiɛ̀ nKuyie nyóó di dɛɛtɛ́mɛ̀,
\q1 kɛ́ di fietɛ di dootitɔbɛ̀ nɔu miɛkɛ.
\q1
\v 11 Yɛbotɛ̀ pɛ́u ìtɛ́ kɛ còḿmú di kpɛ́í nkɛ, kɛ nɑ́ɑ́ nkɛ tú:
\q1 Ti dɔ́ Sedisɑdɛmmuu cɑkɛmu kɛ́sĩntɛ,
\q1 kɛ̀ ti yɑ̀ Sedisɑdɛmmu pɔ̀ntɛmɛ̀ dɛ̀ bo nti nɑɑti.
\q1
\v 12 Yɛ̀ í bɑntɛ́ mɛ̀ɛ̀ kpɛ́í nkɛ ti Yiɛ̀ nKuyie ndɔ́ kɛ́dɔɔ̀ tì,
\q1 yɛ̀ í yɛ̃́ ti Yiɛ̀ nKuyie nyɛǹtotí dòmmɛ̀,
\q1 yɛ̀ í yɛ̃́ kɛ dò nkù bɛ̀ tìí mbɛ̀ ɔ̃ɔ̃ tíímmɛ̀ mmɛ tidiitì
\q1 kuyiɛ́ miɛkɛ kɛ́ tì puotí.
\q1
\v 13 Kɛ̀ Kuyie mbɛ́innɛ̀ Sedisɑdɛmmu kɔbɛ kɛ dɔ̀:
\q1 Ítɛ́nɛ̀ kɛ́cómmú kɛ̀ n di kpénkùnnɛ dinɑɑdɑɑ̀ kɔ̃mɛ,
\q1 kɛ́ di duɔ́ nyɛmɑ́tìwìè nnɛ̀ disɔɔwũɔ̃̀ kó yɛkpɛ̀ɛ̀tɛ̀,
\q1 kɛ̀ di nnɑù di dootitɔbɛ̀, kɛ bɛ̀ yɔurí,
\q1 kɛ ɛí bɛ kpɑ̀tì, kɛ́ tì duɔ́ mmí ndi Yiɛ̀ nKuyie,
\q1 nkùù bɑkɛ́ kɛtenkɛ̀ kɛmɔu.
\c 5
\q1
\v 1 N nɛ́ di nɑ́ɑ́mmu kɛ̀ n tu ńkuɔ̀nnɛ̀ yɛkúdɑbùò,
\q1 kɛ yɔ́ú dimɑ́ɑ̀, kɛ̀ bɛ̀ di pĩ́mmú kɛ́bemmu di kóo kpɑ̀ɑ̀tì mɛtofíè.
\s1 Bɛ̀ nɑ̀kɛ́mɛ̀ okpɑ̀ɑ̀tì wèè yóó dɛɛtɛ́ Isidɑyɛɛribɛ o kpɛ́í
\q1
\v 2 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Fɔ̃́ mBɛtideɛmmu Efɑdɑtɑ,
\q1 fɔ̃́ɔ̃̀ tu Sudɑɑ ɛkɛ̀ miɛkɛ disɑ́m̀pɔ́rì.
\q1 Nɛ̀ mɛmmɛ wèè yó mbɑkɛ́ n nìtìbɛ̀ ò yɛ̀tìní fɔ̃́ɔ̃̀ miɛkɛ,
\q1 wèè yó mbɑkɛ́ n nìtìbɛ̀ Isidɑyɛɛribɛ.
\q1 Dɛ yiɛ̀ ntu wèè do bo wènwe nɛ̀ dimɔ̀nnì.
\q1
\v 3 M mu nyó mbɛ̀ wùónkomu,
\q1 kɛ kémmúnɛ̀ wèè dò nkóò pɛitɛ́ ò bo ò pɛitɛ́mɛ̀.
\q1 Dɛ mɔ̀nnì ndi o kɔbɛ bɛ̀ɛ̀ do kpɑɑ́ bɛ̀ do bɛ̀ pĩ̀ḿmú,
\q1 kɛ́kònnɛ̀ kɛ̀, bɛ̀ wɛ̃tinímɛ̀ Isidɑyɛɛribɛ tɔbɛ̀ borɛ̀.
\q1
\v 4 Dɛ mɔ̀nnì kòo cómmú kɛ́ mbɛ̀ cɛ̃mmú nɛ̀ ti Yiɛ̀ nKuyie nkó muwɛ̃rímú nɛ̀ o kó tikpetì,
\q1 opecɛ̃nti ɔ̃ ncɛ̃mmú mɛ̀ɛ̀ botí o pe,
\q1 kɛ̀ bɛ̀ mbo kɛ̀ dɛ̀ bɛ̀ nɑɑti kɛ̀ bɛ̀ ò dé,
\q1 kòo yètìrìi feitɛ́ titentì timɔu miɛkɛ.
\q1
\v 5 Ò yó ntú wèè duɔ̀ nwènwe mɛom̀pùmɛ̀.
\b
\q1 Bɑ́ kɛ̀ Asidii kɔbɛ ti do,
\q1 kɛ tɑ ti tenkɛ̀,
\q1 kɛ puɔ nti kpɑ̀ɑ̀tìcɛ̃́ĩ
\q1 ti bo tɔ̃nko bɛnìùbɛ̀ bɛ̀yiekɛ̀,
\q1 nɛ̀ sikpɑ̀ɑ̀tìbìí sìni kɛ̀ bɛ̀ɛ bɛ̀ bɑ̀ɑo.
\q1
\v 6 Bɛ̀ bo ncɛ̃mmú Asidii kɔbɛ nɛ̀ disiè,
\q1 kɛ́mbɑkɛ́ Nɛmmudoti kɔbɛ nɛ̀ disekontiri,
\q1 kɛ̀ dɛ̀ dò nhAsidii kɔbɛ tɑ ti tenkɛ̀
\q1 bɛɛ̀ yóó ti dɛɛtɛ́nɛ̀ bɛ.
\s1 Isidɑyɛɛribɛ bɛ̀ɛ̀ bo nkpɑɑ́ yɛmɔ̀rɛ̀ sɔnyɛ bɛ̀ yóó pĩ́ mmùù tɔ̃mmú
\q1
\v 7 Dɛ kó dimɔ̀nnì Isidɑyɛɛribɛ bɛ̀ɛ̀ kpɑɑ́ ibotí pɛ́u miɛkɛ,
\q1 bɛ̀ bo ndò ntimɑɑ̀ntì ti Yiɛ̀ nKuyie nduɔ̀nní tì ɔ̃ ndòmmɛ̀,
\q1 kɛ duɔ̀ nkubooku kɛtenkɛ̀,
\q1 bɛ̀ bo ndò nfɛtɑɑfɛ̀ dòmmɛ̀ kɛ ɔ̃ nyɔ́ɔ̀rì timútì,
\q1 fɛ̀ dɔ́ dìì mɔ̀nnì, bɑ́ onìtì kpɛti mɑtì í kɔkɛ́ dɛ miɛkɛ.
\b
\q1
\v 8 Dɛ mɔ̀nnì Isidɑyɛɛribɛ bo nkpeńnì ibotí tɛì pɛ́u cuokɛ̀,
\q1 yɛcìrícìrɛ̀ dòmmɛ̀ tiwɑnwɑntì cuokɛ̀,
\q1 yɛcìrícìrɛ̀ ɔ̃ ndòmmɛ̀ ipe cuokɛ̀.
\q1 Bɛ̀ níí bo nyì nɑ̀ù kɛ kɔù òmɔù mɛ mbɑ́ɑ́ nɑ kɛ́ bɛ̀ bɑ̀ɑo.
\b
\q1
\v 9 Isidɑyɛɛribɛ donɛ̀ di dootitɔbɛ̀,
\q1 kɛ́ bɛ̀ yɔurɛ pɑ́íí.
\s1 Kuyie nnɑ̀kɛ́mɛ̀ kù yóó dɛitɛmɛ̀ Isidɑyɛɛribɛ yɛ̀mmɛ̀ nɑɑtinɛ̀ dɛ̀
\q1
\v 10 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Dɛ yiè kpɑɑnímu kɛ̀ m bo kuɔ di sɛ̃ĩ́, kɛ́puɔ ndi kpɑ̀rìnɑɑsɛ̃ĩ́.
\q1
\v 11 M bo puɔ ndi tenkɛ̀ yɛhɛkɛ̀ diɛyɛ̀,
\q1 kɛ́buɔ́ nyɛhɛkɛ̀ iduotí fitɛ́ yɛ̀.
\q1
\v 12 M bo pɑɑ ntinitinɔ̀ntì di cuokɛ̀,
\q1 opɑ̃ũ̀ tɛ̃́nkɛ bɑ́ mbo di tenkɛ̀.
\q1
\v 13 M bo u di bɔkɛ̀ nɛ̀ di tenkɑɑnìi,
\q1 bɑ́ di tɛ̃́nkɛ bɑ́ɑ́ nɑ kɛ́nínkú
\q1 di dɔ̀ɔ̀ dɛ̀ nɛ̀ di nɔu dɛ ììkɛ̀ nɛ̀ di bo mbomɛ̀.
\q1
\v 14 M bo u di bɔɔ̀ Asedɑɑ teedɛí kɛ́puɔ ndi ɛkɛ̀ diɛyɛ̀.
\q1
\v 15 Dɛ mɔ̀nnì m miɛkɛ bo yɛ̀ mɛdiɛ̀ mbɛ̀ɛ̀ yetɛ n kpɛti,
\q1 kɛ̀ m bɛ̀ potɛ́ kɛ́pɛitɛ.
\c 6
\s1 Ti Yiɛ̀ nKuyie nsɛimmɛ̀ ku nìtìbɛ̀
\q1
\v 1 Kɛ̀ ti Yiɛ̀ nKuyie nní mbɛ́innɛ̀ kɛ dɔ̀:
\q1 Ítɛ́ kɛ́cómmú kɛ́kpɑnnɛ̀ n nìtìbɛ̀ yɛtɑ̃rɛ̀ nɛ̀ sitɑ̃ɑ̃́ kɛ̀ dɛ̀ɛ keè.
\q1
\v 2 Nɑ́kɛ́ bɛ kɛ dɔ̀, ti Yiɛ̀ nKuyie ntu:
\q1 Díndi yɛtɑ̃rɛ̀ keènɛ̀ Kuyie nkó tibeéntì.
\q1 Díndi kɛtenkɛ̀ kó yɛsɑ̃ǹkɛ̀ yɛ̀ɛ̀ fìíkú teii keènɛ̀!
\q1 Kù sɛimmu ku kɔbɛ kɛ kpɑnnɛ̀ Isidɑyɛɛribɛ.
\q1
\v 3 Mí ndi Yiɛ̀ nKuyie mmíì tu:
\q1 Díndi n nìtìbɛ̀ n nɑ́kɛ́nɛ̀ n di cɑ̀kɛ mù.
\q1 Di nh ɔ̀unɛ̀ bɑ nkpɛ́í? N nɑ́kɛ́nɛ̀!
\q1
\v 4 Míì di dènnɛní Esibiti tenkɛ̀
\q1 kɛ dì dɛɛtɛ́nɛ̀ mudɑɑtɔ̃mmú
\q1 kɛ duɔ́ nkɛ̀ Mɔyiisi nɛ̀ Anɔɔ nɛ̀ Midiyɑmmu
\q1 kɛ̀ bɛ̀ di niitɛ́.
\q1
\v 5 Dentɛnɛ̀ní Mɔɑbu kóo kpɑ̀ɑ̀tì Bɑdɑki do dɔ́ kɛ́ di dɔ̀ɔ̀mɛ̀,
\q1 dentɛnɛ̀ní Beɔɔ birɛ Bɑdɑmmu do ò tɛ̃̀ńnɛ́ tì,
\q1 kɛ́dentɛní di do ìtɛ́ Sitimmu
\q1 kɛ́séntɛ́ Suditɛ̃ɛ̃ kɛ̀ dɛ̀ ndòmmɛ̀,
\q1 kɛ̀ di tuɔkɛnɛ̀ Kidikɑɑdi.
\q1 Dɛ mɔ̀nnì di bo bɑntɛ́ n di dɔ̀ɔ̀ mɛ̀ɛ̀ sɑ̀ɑ̀.
\s1 Ti Yiɛ̀ nKuyie ndɔ́ ku nìtìbɛ̀ ndòmmɛ̀
\q1
\v 6 Kɛ̀ Isidɑyɛɛribɛɛ bɛ́i nkɛ dɔ̀:
\q1 Ti níí bo ntɔ ɔ̃̀ndi pɑ̃nnì kɛ́pɑ̃ ti Yiɛ̀ nKuyie
\q1 ti dɔ́ dìì mɔ̀nnì kɛ́ kù bɑ́ntɛ̀?
\q1 Ti Yiɛ̀ nKuyie ndɔ́ ti níí bo ntɔ mɛ̀mmɛ yɛnɑɑdɑkɛ̀
\q1 yɛ̀ɛ̀ mɔ̀kɛ dibenni dìmɑ́ɑ̀ dìmɑ́ɑ̀ kɛ́ kù fìé kɛ́tuɔnɑɑ̀?
\q1
\v 7 Ti Yiɛ̀ nKuyie ndɔ́ ti níí ntɔ yɛpedɑkɛ nyɛ sikɔu sikɔu
\q1 yɑ́ɑ̀ mɛkùɔ̀ sicèe sicèe
\q1 yɑ́ɑ̀ ti nɛ́ níí bo kù fìé bɛ̀ɛ̀ tu bɛ̀mbɛ̀ Mpo
\q1 kɛ̀ kù ti cĩ́ɛ̃́ nti yɛi?
\b
\q1
\v 8 Di yɛ̃́mu dɛ̀ɛ̀ wenni!
\q1 Ti Yiɛ̀ nKuyie ndi wúónnɛ̀ tì tu:
\q1 Di bo ndɔɔrimɛ̀ ditɔbɛ̀ dɛ̀ɛ̀ sìɛ́,
\q1 kɛ́ndɔ́ mɛsɑ̀ɑ̀ nkó mmudɔɔ̀rìmù,
\q1 kɛ́kɛ̃́kùnnɛ dimɑ́ɑ̀ kɛ́ nkù tũ̀.
\s1 Kuyie nyɛ̃mmɛ̀ kù yóó potɛ́ Sedisɑdɛmmu ɛì kɔbɛ bɛ yonku nɛ̀ bɛ̀ yuukumɛ̀ kpɛ́í
\q1
\v 9 Kɛ̀ ti Yiɛ̀ nKuyie mbɛ́innɛ̀ Sedisɑdɛmmu ɛì kɔbɛ kɛ dɔ̀:
\q1 Wèè ciì wèe dɑɑtɛ ndi nɑ́ɑ́ ntì kpɛ́í.
\q1 Díndi Sudɑɑ kɔbɛ nɛ̀ bɛ̀ɛ̀ kó dimɑ̀ɑ̀ bo dihɛì miɛkɛ,
\q1 kéntɛ́nɛ̀ n tɑ̃ɑ̃tɛ́ tì!
\q1
\v 10 Dɛ̀ í yie m bo nwúómmɛ̀ bɛnitiyɛibɛ yuuku dɛ̀,
\q1 kɛ̀ dɛ̀ bo bɛ cɛ̃́ĩ miɛkɛ,
\q1 bɛ̀ beú nɛ̀ siyɑ́ɑ̀bìsí bièpeé sì ndò nyisɔkɛ nyi,
\q1 nyí sì dɔ́.
\q1
\v 11 M bɑ́ɑ́ nɑ kɛ́nwúónko bɛ̀ɛ̀ tɔuti siyɑ́ɑ̀bìsíbie,
\q1 kɛ cɔ̃ti bɛ yɔ̀rɛ̀ miɛkɛ cìdóò tɑ̃́rɛ̀ siyɑ́ɑ̀bìsí kpɛyɛ.
\q1
\v 12 Di nhɛì kó bɛkpɑ̀ɑ̀tìbɛ̀ nɔnnɛ̀ muyóò mmu,
\q1 kɛ soú nkɛ cií mbɛtɔbɛ̀.
\q1
\v 13 Di yɛi mmɛɛ̀ sũ̀ṹ,
\q1 dɛɛ̀ te kɛ̀ n yó ndi puotì
\q1 n yóó di deèmu pɑ́íí dɛ kó mɛyɛi nkpɛ́í.
\q1
\v 14 Di níí bo di, di bɑ́ nsɑ̀nnɛ̀,
\q1 dikònnì bo ndi bo,
\q1 kɛ̀ di sùɔ́ ndɛ̀, di bɑ́ɑ́ nɑ kɛ́ dɛ̀ sɔ̀nnɛ,
\q1 bɑ́ kɛ̀ di nɑ kɛ sɔ̀nnɛ n dɛ̀ cɑ̀kɛ.
\q1
\v 15 Di níí bo kúútí bɑ́ di bɑ́ɑ́ dɛitɛ,
\q1 kɛ níí díí mɛkùɔ̀ ndi mɛ mbɑ́ɑ́ mɛ̀ dɔ̀ɔ̀nɛ̀ mùmɑmù,
\q1 kɛ níí kuɔti mɛnɑɑ̀ di mɛ mbɑ́ɑ́ mɛ̀ yɑ̃̀.
\q1
\v 16 Di tũ̀nnɛ okpɑ̀ɑ̀tì Ɔmmidi nɛ̀ o cicɛ Akɑbu,
\q1 nɛ̀ o cĩ́ɛ̃̀tɛ̀ bɛ borimɛ yɛimɛ mmɛ weti weti,
\q1 dɛɛ̀ kpɛ́í nte kɛ̀ m bo duɔ́ nkɛ̀ di kó dihɛìi nɑɑ́ ntidobontì,
\q1 kɛ̀ bɛ̀ di dɑɑ́ díndi dihɛidiɛ̀ kɔbɛ,
\q1 kɛ ifɛi dí pĩ́.
\c 7
\s1 Kuyie mpɑ̃ɑ̃nɑ́ɑǹtì nɑ́ɑǹtò sɑutɛmɛ̀ bɛnìtìbɛ̀ dɔɔri mɛ̀ɛ̀ yɛi nkpɛ́í
\q1
\v 1 Mí mMisee kɛ̀ m bɛ́i nkɛ dɔ̀:
\q1 Mí nhosénnìwè!
\q1 N kpɛrɛ dònnɛ̀ wèè dɔ́ wènwe kɛ́tɔ̃ũ yɛtebɛ yɛ mɔ̀nnì kɛ mɔ̀ńtɛ́
\q1 yoo wèè kɔ̀tɛ kɛ bo dɛ́rí yɛtebɛ
\q1 bɑ́ ò í mpɛ̀tɛ́ bɑ́ dìmɑ́ɑ̀ kɛ cɑ̀ɑ́kɛ́,
\q1 ò í mpɛ̀tɛ́ ditebii sũ̀ũ̀rì ò dɔ́ dì.
\q1
\v 2 Òmɔù tɛ̃́nkɛ í kpɑɑ́ di tenkɛ̀ miɛkɛ,
\q1 wèè dɔɔri ti Yiɛ̀ nKuyie ndɔ́ dɛ̀,
\q1 òmɔù í wetí bɑ́ omɑ́ɑ̀.
\q1 Bɑ́ wè ò dɔ́ munitikɔ̀ù mmu, bɛ̀ dii bɛtɔbɛ̀ mbɛ tìmɑtì.
\q1
\v 3 Mɛyɛi ndɔɔ̀rìmù bíɛ́kɛ̀ bɛɛ̀ tu bɛketibɛ̀,
\q1 bɛkpɑ̀ɑ̀tìbɛ̀ nɛ̀ bɛbeémbɛ̀ kɛ̀ bɛ̀ wɛ̃ ndinùù bɛmɔu,
\q1 kɛ ɔ̃ mbekù kɛ dɔ́ ticuuti,
\q1 kɛ̀ bɛhɛikɛ̀nkótíbɛ̀ ɔ̃ nnɑ́ɑ́ nkɛ dɔ́ mucɔ̃́ntimu.
\q1
\v 4 Bɛ miɛkɛ wèè tɔ̃ũ weè dònnɛ̀ tipotì
\q1 wèè tu osɑ̀ù bɛ miɛkɛ,
\q1 weè dɔɔrimɛ̀ nɛ́ dònnɛ̀
\q1 ɑ ɔ̃ɔ̃ tɑ tisɑ̃mpotì còú kùù yiɛ́ kɛ̀ dɛ̀ dɑ dɔ̀ɔ̀mɛ̀.
\b
\q1 Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì bɛ kpɛ́í,
\q1 ti tùɔ̀kɛnímu kɛ dèè, dɛ̀ bɛ̀ dimu.
\q1
\v 5 Òmɔù tɛ̃́nkɛ bɑ́ ntɑ̃́ o tebitɛ,
\q1 òmɔù mɛ mbɑ́ɑ́ duɔ́ nho yɛ̀mmɛ̀ o nɛ́po,
\q1 bɑ́ o pokù mɔ́mmuɔ mborɛ̀,
\q1 ò bɑ́ɑ́ yie nkòo nùù tɑ́útɛ́.
\q1
\v 6 Kɛ yɛ̃́ di m̀mɔ̀nnì dɛnitidɑbirɛ sɑ̃́ɑ̃́mmɛ̀mu dɛ cicɛ,
\q1 kɛ̀ dɛsɑpùmbirɛ kpɑnnɛ̀ dɛ yɔ̃,
\q1 kòo cɛ̃pokù sĩ̀nnɛ̀ o cɔkù,
\q1 bɑ́ wè kòo cĩ́ɛ̃̀tɛ̀ kɔbɛ tú o dootitɔbɛ̀.
\b
\q1
\v 7 Mí m mɛ mbùɔ́ ti Yiɛ̀ nKuyie nku,
\q1 n tɑ̃́ kù, kunku n tũ nkù,
\q1 kù yóó keèmu n dɑbònnì kɛ́ n dɛɛtɛ́.
\s1 Dɛ̀ nɑɑtimɛ̀ Kuyie nkó bɛnìtìbɛ̀ kù bo bɛ̀ dɛɛtɛ́mɛ̀
\q1
\v 8 Díndi ti dootitɔbɛ̀ dɛ̀ bɑ́ ndi nɑɑti ti do mɛ̀ɛ̀ kpɛ́í.
\q1 Ti domu kɛ̀ ti Yiɛ̀ nKuyie mmɛ nyóó ti íi,
\q1 ti bo dibiìnnì miɛkɛ nkɛ kɛ̀ ku mɛ nyóó ti míítɛ́.
\q1
\v 9 Ti cɑ̀kɛmu ti Yiɛ̀ nKuyie nyììkɛ̀,
\q1 kɛ do ntí yɑ̀ dɛ kó mɛyɛi nkó tiyeti.
\q1 Dɛ mɔ̀nnì nɛ́ kpɑɑnímu kɛ̀ kù bo ti pɑtɛ,
\q1 kɛ́wɛ̃tɛ kɛ́ ti cónnɛ́ ti fɔ̃̀tìrì,
\q1 kɛ̀ tí tɑ kuwenniku miɛkɛ,
\q1 kɛ́yɑ̀ kù dɔ̀ɔ̀ri mɛ̀ɛ̀ sɑ̀ɑ̀ nkù wetí mɛ̀ɛ̀ kpɛ́í.
\q1
\v 10 Dɛ mɔ̀nnì ti dootitɔbɛ̀
\q1 bo dɛ̀ yɑ̀ kɛ̀ ifɛii bɛ̀ pĩ,
\q1 bɛmbɛ bɛ̀ɛ̀ do ɔ̃ ntú:
\q1 Yé di Yiɛ̀ nKuyie ndi tũ̀ nkù íkuu borɛ?
\q1 Dɛ mɔ̀nnì bɛ dootitɔbɛ̀ bo mbɛ̀ nɑ̀ù kɛ̀ ti wúó
\q1 bɛ̀ ɔ̃ nnɑ̀ù mɛ̀ɛ̀ botí kucɛ kó mutɑ̃́ɑ̃́.
\b
\q1
\v 11 Díndi Isidɑyɛɛribɛ dɛ yiè kpɑɑnímu,
\q1 kɛ̀ di bo wɛ̃tɛ kɛ́mɑɑ́ kuduotí kɛ́fii ndihɛì,
\q1 dɛ yiè bɛ̀ bo dɛ́tinnɛ di tenkɛ̀ mɑ̀nku.
\q1
\v 12 Dɛ yiè di kɔbɛ bo yɛ̀nní Asidii,
\q1 kɛ́ntɔ kɛ́tuɔkɛnɛ̀ Esibiti tenkɛ̀,
\q1 kɛ́túótɛ́ kukó nNiidi kɛ́ntɔ kɛ́tuɔkɛnɛ̀ Efɑdɑti kɔku,
\q1 nɛ̀ dɑ̀mɛ́ɛ̀rì pɛɛ́mmɛ̀ nɛ̀ yɛtɑ̃rɛ̀ ĩ́nkɛ̀ kɔbɛ, kɛ́konní di borɛ̀.
\q1
\v 13 Kɛ̀ kɛtenkɛ̀ bɛ̀ do bo kɛ̀ɛ dɔúnko,
\q1 kɛ́nɑɑ́ ntɛdɔntɛ̀ bɛnìtìbɛ̀ bɛ̀ɛ̀ kɛ̀ bo bɛ yɛi nsũ̀ṹ mmɛ̀ɛ̀ kpɛ́í.
\b
\q1
\v 14 Kuyie, cɛ̃mmú ɑ nìtìbɛ̀ nɛ̀ ɑ pɑ̀ɑ̀ti,
\q1 bɛ̀ tu ɑ kɔbɛ mbɛ,
\q1 bɛ̀ bo tɛdɔntɛ̀ miɛkɛ nkɛ,
\q1 kɛ̀ dɛpɑɑ mbɛ̀ fitɛ́.
\q1 Cɛ̃mmú bɛ ɑ do ɔ̃ mbɛ̀ cɛ̃mmúmɛ̀ Bɑsɑ̃ɑ̃ nɛ̀ Kɑdɑɑdi kpɑ́ɑ̀ timúsũ̀ũ̀tì borɛ̀.
\q1
\v 15 Ti Yiɛ̀ nKuyie ndɔ̀ɔ̀ tidiɛtì,
\q1 ɑ do tì dɔ̀ɔ̀ri mɛ̀ɛ̀ botí ɑ ti dènnɛ dìì mɔ̀nnì Esibiti tenkɛ̀.
\q1
\v 16 Kɛ̀ ibotí tɛì kɔbɛɛ dɛ̀ yɑ̀,
\q1 kɛ̀ ifɛii bɛ̀ pĩ mbɑ́ nɛ̀ bɛ wɛ̃rímú mɛ ndɛumɛ̀,
\q1 dɛ̀ bo bɛ̀ di kɛ́ bɛ̀ kpeí,
\q1 kɛ̀ bɛ̀ mpi bɛ nɔ̀,
\q1 dɛ̀ bo ndò mbɛ̀ tu yɛwũ̀ɔ̃̀.
\q1
\v 17 Kɛ̀ bɛ̀ɛ múúkú mutɑ̃́ɑ̃́ nyiwɑ̀ɑ̀kɛ nɛ̀ dɛbɑmbɑɑ̀nnɛ̀ tɛrɛ̀ kɔ̃mɛ,
\q1 kufɔ̃wɑɑ́ mbo bɛ̀ kpɛ̀ɛ́tɛ́,
\q1 kɛ̀ bɛ̀ɛ yɛ̀nní bɛ sɔ̀rɛ̀ miɛkɛ
\q1 kɛ́kɔtɛní fɔ̃́ nti Yiɛ̀ nKuyie nti tũ nkù ɑ borɛ̀ kɛ́ dɑ yɔtɛ.
\q1
\v 18 We ndɑ dònnɛ̀ fɔ̃́ nti Yiɛ̀ nKuyie,
\q1 fɔ̃́ nwèè minnímɛ̀ dɛu kɑ̀ɑ ti cĩ́ɛ̃nko ti yɛi,
\q1 tínti ɑ nìtìbɛ̀ bɛ̀ɛ̀ kpɑɑ́.
\q1 A miɛkɛ ɔ̃ɔ̃ yí nhɑ̃ kɛ pɛ́ì,
\q1 fɔ̃́ nwèè nɔnnɛ̀ ɑ bo dɔɔ̀mɛ̀ onìtì mɛsɑ̀ɑ̀.
\q1
\v 19 A ti cĩ́ɛ̃́ nti yɛi, nkɛ́ mɛ̀ yɛ̃̀,
\q1 kɛ́ mɛ̀ dìu ndɑ̀mɛ́ɛ̀rì miɛkɛ.
\q1
\v 20 A yóó ti dɔɔ̀mu mɛsɑ̀ɑ̀,
\q1 tínti Abɑrɑhɑmmu nɛ̀ Sɑkɔbu bɛ yɑɑ̀bí
\q1 kɛ́ndònnɛ̀ ɑ do bɛ̀ dɔúnnɛ̀mɛ̀ dinùù nɛ̀ dimɔ̀nnì.