\id MAL di39.all Novembre 1998 BJ Parakou B{enin
\ide UTF-8
\h Mɑdɑsii
\toc1 Mɑdɑsii
\toc2 MADASII
\mt1 Mɑdɑsii
\imt1 Di mpɑ́tíri tɔ tìì nɑ́ɑǹtì
\ip Mɑdɑsii wɑ̃̀ri o pɑ́tíri kɛ̀ dɛ̀ mmɔkɛ yɛbie nsikɔusìnɑ̀ɑ̀ (400) miɛkɛ nkɛ kɛ̀ Yesu nɛ́ nɑ kɛ́kɔtɛní. Ò do yóó nɑ́kɛ́ dɛ kó tinɑ́ɑǹtì kɛ sɔ̃́ nKuyie ncĩ́ɛ̃̀tɛ̀ wɛ̃̀tɛ kɛ mɑɑ́mu kɛ̀ bɛ̀ wɛ̃̀tɛ kɛ feu iwũɔ̃ Kuyie nku cĩ́ɛ̃̀tɛ̀ miɛkɛ, kɛ nɛ́ wɛ̃̀tɛ kɛ bonkɛ Kuyie nkó kucɛ, bɑ́ wè kòò fòù ò dɔ́mɛ̀. Kɛ̀ bɛnìtìbɛ̀ soú nKuyie nnɛ̀ bɛ pɑ̃rɛ̀ miɛkɛ, bɑ́ òmɔù tɛ̃́nkɛ í dɑkɛ Kuyie nkuɔ́ kpɛ́í. Kɛ̀ Mɑdɑsii nnɑ́ɑ́ nyikuɔ́ nìùbɛ̀ nɛ̀ bɛnìtìbɛ̀ sɔmbɛ kɛ tú bɛ̀ɛ ceetɛ, kɛ́ mbɛ̀ dènni Kuyie mbɛ̀ dɔ́mɛ̀, kɛ bɛ̀ nɑ̀ɑ́nnɛ̀ múnkɛ ku beéntì kpɛ́í.
\ip Mɑdɑsii do bɛ̀ nɑ̀ɑ́ nKuyie nyóó tɔ̃nnímɛ̀ mmɛ wèè bo nɑ́kɛ́ ku nɑ́ɑǹtì (3:1) Kuyie mpɑ̃ɑ̃nɑ́ɑǹtì nɑ́ɑǹtò Edii do nɑ̀kɛ́mɛ̀ (3:23) Mɑtie kó dipɑ́tíri nɛ̀ Duku kpɛri Mɑdɑsii nɑ̀kɛ́ dìì nùù bomu yɛ miɛkɛ, diì tú: Isɑ̃ɑ̃-Bɑtiisi do nɑ́ɑ́mmɛ̀ kɛ tú ò kɔ̀tɛní kɛ bo tũntɛ Yesu nwe kucɛ (Mɑtie 17:11-13, Duku 1:17).
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Isidɑyɛɛribɛ í bɑntɛ́ Kuyie mbɛ̀ dɔ́mɛ̀ 1:1-5
\io1 2. Bɛ̀ sɛimmɛ̀ ikuɔ́ nìùbɛ̀ kɛ tú bɛ̀ sènkɛ̀rì Kuyie nkɛ̀ bɛ̀ yetírí 1:6-2:9
\io1 3. Mɛcɑɑ̀rìmɛ̀ Isidɑyɛɛribɛ do cɑɑ̀rimɛ̀ bɛtɔbɛ̀ 2:10-16
\io1 4. Kuyie mpɑ̃ɑ̃nɑ́ɑǹtì nɑ́ɑǹtò nɑ̀kɛ́mɛ̀ Isɑ̃ɑ̃-Bɑtisi yóó kɔtɛnímɛ̀ kɛ́tũntɛ kucɛ kɛ̀ Yesu nɛ́ nɑ kɛ́kɔtɛní 2:17-3:5
\io1 5. Isidɑyɛɛribɛ dòmmɛ̀ kɛ́wɛ̃tɛní Kuyie mborɛ̀ nɛ̀ dɛ̀ɛ̀ yóó dɔɔ̀ Yesu bo wɛ̃tɛní dìì yiè 3:6-23
\c 1
\p
\v 1 Di mpɑ́tíri ti nɑ́ɑ́ ti Yiɛ̀ nKuyie mbɛ́innɛ̀ tìnti Mɑdɑsii Isidɑyɛɛribɛ kpɛ́í.
\s1 Kuyie nhɔ̃ɔ̃ tɑ̃ɑ̃tɛ́mɛ̀ kù dɔ́ wè
\p
\v 2 Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀: N di dɔ́mu kɛ̀ di nɛ́ békú dimɑ́ɑ̀ kɛ tú: Bɑ mbɛnkú ti Yiɛ̀ Kuyie nti dɔ́mɛ̀? Dɛ̀ í dò nhEsɑyuu weè kòtí Sɑkɔbɑɑ? Nɛ̀ mɛmmɛ kɛ̀ n dɔkɛ Sɑkɔbu kɛ nii Esɑyuu. 
\v 3 Kɛ pɔ̀ntɛ o kó kutempɛ̃ nkó yɛhɛkɛ̀ kɛ duɔ́ nkɛ̀ yɛ̀ dɔúnko, kɛ nɑɑ́ nsikpɑmɔɔ́ kó diɑ̃rì. 
\v 4 Kɛ̀ dɛ̀ dò nhEdɔmmu ɛì kɔbɛ bo yĩ́, bɛ̀ mɛ̀ nti pɔ̀ntɛmɛ̀ ti bo mɑɑ́, kɛ̀ bɛ̀ mɑɑ́ m borɛ̀ pɔ̀ntɛ, mí nKuyie Mpɑkɛdɑɑ míì bɛ́i! M bo bɛ̀ pɔ̀ntɛ kɛ̀ bɛ̀ɛ yú dɛ kó kɛtenkɛ̀ kɛ dɔ̀: Mɛyɛi nhɛì, m miɛkɛ pɛ́ì bɛ̀ sɑ̃́ɑ̃̀ bɛ ɛì. 
\v 5 Díndi Isidɑyɛɛribɛ kɛ̀ dí dɛ̀ yɑ̀, kɛ́bɑntɛ́ kɛ dò m mí ndi Yiɛ̀ nKuyie n dɛu kɛ í pĩ ndíì mɑ́ɑ̀ kó yɛhɛkɛ̀ mutɔ̃mmú.
\s1 Ikuɔ́ nìùbɛ̀ cɑ̀ɑ̀rɛ̀mɛ̀ kɛ̀ Kuyie mbɛ̀ kpɑnnɛ̀
\p
\v 6 Kɛ̀ ti Yiɛ̀ Kuyie Mpɑkɛdɑɑ bɛ́innɛ̀ ikuɔ́ nìùbɛ̀ kɛ dɔ̀: Dɛbirɛ ɔ̃ ndému dɛ cicɛ kɛ̀ kudɑɑkù yìé nku yiɛ̀ nkpɛti. Kɛ̀ n tu di cicɛ dɛ̀ nɛ́ yĩmɛ kɛ̀ di í n dé? Kɛ̀ n tu di yiɛ̀, dɛ̀ nɛ́ yĩmɛ kɛ̀ di í yíé n kpɛti? Di n sènkɛ̀rìmu kɛ nɛ́ békú dimɑ́ɑ̀ kɛ tú: Ti kù sènkɛ̀rì bɑ mmiɛkɛ? 
\v 7 Dɛ̀ yĩ́mɛ kɛ̀ di m pɑ̃ɑ̃ n ci dɛ̀, kɛ dɛ̀ dɑkù n wũɔ̃tɔ̀rɛ̀ ĩ́nkɛ̀? Di cɑɑ̀ri n yètìrì ndi, di wèńtɛ́ n wũɔ̃tɔ̀rɛ̀ nyɛ dɛtetìrɛ̀. Kɛ nɛ́ békú dimɑ́ɑ̀ kɛ tú ti sĩ̀nkùnnɛ ɔ̃̀mmɛ botí ku wũɔ̃tɔ̀rɛ̀? 
\v 8 Di n feu dìì mɔ̀nnì iwũɔ̃ ìì ɑ̃ inuɔ nyìmɑ́ɑ̀ ìmɑ́ɑ̀ nɛ̀ ìì tu yɛkpĩɛ̃̀ nnɛ̀ ìì mɔ, di yɛ̀mmɛ̀ dò ndɛ wennimɑɑ̀? Kɛ̀ di yɛ̀mmɛ̀ dò ndɛ̀ wennimu dí dɛ̀ pɑ̃ di kóo kùmɑ̀ndɑ́ɑ̀, kɛ́ nsɑ̀ kɛ̀ dɛ̀ bo ò nɑrikɛ kòo dì cɔutɛ́. Mí nKuyie Mpɑkɛdɑɑ míì bɛ́i! 
\v 9 Di bo dɔɔ̀ dɛndɛ kó dimɑ̀ɑ̀ kɛ́deè kɛ nɛ́ nni nyu, mí nKuyie nkɛ tú n di kuɔ́ mmɛsémmɛ̀, kɛ̀ n tì kèèɑ̀? Mí nKuyie Mpɑkɛdɑɑ m bɑ́ɑ́ tì kèè bìtì! 
\v 10 Kòò mɔù di miɛkɛ do nkpetínnɛ́ n cĩ́ɛ̃̀tɛ̀ kó yɛbòrɛ̀ dɛ̀ nɑ ntɔ̃ũmu, kɛ̀ di bɑ́ ncɔ́unko n wũɔ̃tɔ̀nnì dɛtetìrɛ̀. N di wúó ndɛ̀ í n nɑɑti, nyí cɔú di m pɑ̃ɑ̃ nyɛ̀ɛ̀ pɑ̃rɛ̀ ketíkɛ. 
\v 11 Titentì timɔu duɔ́mɛ̀ n yètìrì feímu tipíìtì timɔu. Kɛ̀ bɛ̀ m pɑ̃ɑ̃ nyɛpɑ̃rɛ̀ sɑ̀ɑ̀yɛ̀, kɛ n tuɔ̀ ntihúúntì. Mí nKuyie Mpɑkɛdɑɑ n yètìrì feímu titentì timɔu miɛkɛ. 
\v 12 Kɛ̀ díndi nɛ́ cɑɑ̀ri n yètìrì kɛ̀ di yɛ̀mmɛ̀ dò n kó diwũɔ̃tɔ̀nnì tu cɛ̃́nkoo kpɛri, kɛ̀ di bo nɑ kɛ́dɑɑ́ ndìì ĩ́nkɛ̀ di cɛ̃́nkɛ nìntɛ dɛ̀. 
\v 13 Kɛ̀ dɛ̀ di dònnɛ̀ muwɛ̃rímú. Di sènkɛ̀rìmu mí nKuyie Mpɑkɛdɑɑ, kɛ m pɑ̃ɑ̃ nyiwũɔ̃ di yùúkú ì yoo ìì tú yɛkpĩɛ̃̀, yoo ìì mɔ. Mí ndi Yiɛ̀ nKuyie m bɑ́ɑ́ cɔutɛ́ dɛ kó yɛpɑ̃rɛ̀. 
\v 14 Di yuukumu díndi bɛ̀ɛ̀ ɔ̃ mmɔkɛ iwũɔ̃ sɑ̀ɑ̀yì di dò nkɛ́ m pɑ̃ ì kɛ nɛ́ n féútɛ́ fɛ̀ɛ̀ ɑ̃ kuyɛ̀nkù. Dɛ̀ yɛmbɛ̀ díndi di bo yɑ̀. N tú okpɑ̀ɑ̀tì diɛwè nwe, kɛ̀ yɛbotɛ̀ yɛmɔu yɛ̃́ n kpɛ́í. Mí ndi Yiɛ̀ nKuyie Mpɑkɛdɑɑ míì bɛ́i.
\c 2
\s1 Kuyie ndɔ́mɛ̀ bɛ̀ mpĩ nku tɔ̃mmú kɛ̀ dɛ̀ wenni
\p
\v 1 Kɛ̀ Kuyie mbɛ́i nkɛ dɔ̀: N nɑ́ɑ́nnɛ̀ dím̀bɛ ikuɔ́ nìùbɛ̀. 
\v 2 Kɛ̀ di í kèńtɛ́ n nɑ́ɑ́ ntì, kɛ̀ di í yie nkɛ dɛ̀úkùnnɛ n yètìrì, m bo duɔ́ nkɛ̀ mɛyɛi ndi do, di bo pɑ̀ɑ̀ mɛsɑ̀ɑ̀ nkɛ yɛ̃́ òmɔù í bomɛ̀ di miɛkɛ wèè ɑ̃ɑ̃̀ n nɑ́ɑǹtì o yɛ̀mmɛ̀ miɛkɛ. Mí ndi Yiɛ̀ nKuyie Mpɑkɛdɑɑ míì bɛ́i! 
\v 3 M bo di kɛi n cĩ́ɛ̃̀tɛ̀ tɔ̃mmú, kɛ́ di úútí di wũɔ̃ di n feu ì kó tipiti di ììkɛ̀, kɛ̀ bɛ̀ di wɛ̃nnɛ́nɛ̀ ti kɛ́kɑ́útɛ́. 
\v 4 Dɛ mɔ̀nnì kɛ̀ dí bɑntɛ́ kɛ dò m mí nKuyie Mpɑkɛdɑɑ n di kpɑnnɛ̀ kɛ̀ dɛ̀ bo yie nkɛ̀ mɛtɑummɛ̀ n do dɔ̀ɔ̀nɛ̀mɛ̀ Defii nɛ̀ o yɑɑ̀bí kɛ̀ mɛɛ̀ bɑ́ɑ́ tɔ̃tɛ. 
\v 5 Nɛ̀ dɛ kó mɛtɑummɛ̀ miɛkɛ nkɛ n do bɛ̀ duɔ́mmɛ̀ mufòmmu nɛ̀ diwɛ̀ì kɛ̀ bɛ̀ nni ndé, kɛ yíé n kpɛti, kɛ mɔkɛ n kó kufɔ̃wɑɑ́ n yètìrì dɛu mɛ̀ɛ̀ kpɛ́í. 
\v 6 Kɛ̀ bɛ̀ ntiè mbɛnìtìbɛ̀ timɔ́mmɔnti, kɛ̀ siyɑ́ɑ̀bìsí í bo bɛ nɔ̀ miɛkɛ, mí nnɛ̀ bɛ kɛ̀ tí nnɑɑti, kɛ̀ bɛ̀ dɔ̀ɔ̀ri dɛ̀ɛ̀ sìɛ́ kɛ yũɔ̃nní bɛnìtìbɛ̀ m bíɛ́kɛ̀ kɛ̀ bɛ̀ you mɛyɛi. 
\v 7 Ikuɔ́ nìùtì weè dò nkɛ́tié mbɛnìtìbɛ̀ n tié, weè borɛ̀ ndɛ bɛnìtìbɛ̀ dò nkɛ́pɛ́tɛ́mɛ̀ n tié kɛ yɛ̃́ ò tumɛ̀ mí ndi Yiɛ̀ nKuyie Mpɑkɛdɑɑ n kóo tɔ̃ntì nwe. 
\v 8 Kɛ̀ díndi biɛ mɛ ndɛ̀tɛ́nɛ̀ n kó kucɛ, kɛ fétìnnɛ kusṹkù nɛ̀ di kó itié mmiɛkɛ, kɛ tɔ̃̀tɛ mɛtɑummɛ̀ mí ndi Yiɛ̀ nKuyie Mpɑkɛdɑɑ n do dɔ̀ɔ̀nɛ̀ mɛ̀ Defii. 
\v 9 Dɛɛ̀ te kɛ̀ n duɔ́ nkɛ̀ ibotí tɛì di sènkɛ̀rì kɛ di cɛ̃̀ nkɛ yɛ̃́ di í yiemmɛ̀ n kpɛti, kɛ bekù tikouti.
\s1 Mɛborimɛ mɛ̀dɛ́mɛ̀ mɛ̀ɛ̀ cɑ̀ɑ̀rɛ̀ Defiibɛ nɛ̀ Kuyie mbɛ kó mɛtɑummɛ̀
\p
\v 10 Kɛ̀ Mɑdɑsii bɛ́i nkɛ dɔ̀: Dɛ̀ í dò nti cicɛ omɑ́ɑ̀ ndiɑ̀? Dɛ̀ í tú Kuyie nkumɑ́ɑ̀ kuù ti dɔ̀ɔ̀ɑ̀? Dɛ̀ nɛ́ dòmmɛ kɛ̀ ti fiiti titɔbɛ̀ kɛ cɑɑ̀ri mɛtɑummɛ̀ mɛ̀ɛ̀ do bo Kuyie nnɛ̀ ti yɛmbɛ̀ bɛ cuokɛ̀? 
\v 11 Sudɑɑ kɔbɛ cɑ̀kɛmu dinùù ti Yiɛ̀ nKuyie ndo bɛ̀ dɔúnnɛ̀ dì, kɛ dɔ̀ɔ̀ isɔkɛ kpɛrɛ Sedisɑdɛmmu nɛ̀ Isidɑyɛɛribɛ tenkɛ̀ kɛmɔu. Ti Yiɛ̀ nKuyie ncĩ́ɛ̃̀tɛ̀ cɑ̃̀ɑ̃́mmu kɛ tú ku kpɛtɛ kɛ̀ kù tɛ̀ dɔ́ kɛ̀ bɛ̀ tɛ̀ sĩ̀nkùnnɛ kɛ tùókɛ́ bɛnitipòbɛ̀ bɛ̀ɛ̀ feu yɛbɔkɛ̀. 
\v 12 Wèè dɔ̀ɔ̀ mɛbotí, dɛ yiɛ̀ mbɑ́ɑ́ pɛ́tɛ́ wèè bo ò kòńnɛ́ Sɑkɔbu nɑɑ̀mùnkù miɛkɛ ò mɛ̀ mbɑ́ɑ́ pɛ́tɛ́ wèè bo fèútɛ́ fɔ̃́ nKuyie Mpɑkɛdɑɑ fɛɔ̃̀fɛ̀ o kpɛ́í.
\p
\v 13 Ntɛ dɛ̀mɑrɛ̀ dɛdɛ́ríndɛ̀ di dɔɔri dɛ̀, di kuɔ̀ nyɛ̀ɛ̀ dɑbùò kɛ wuɔ̀ Kuyie nwũɔ̃tɔ̀nnì ntinɔnniɛti, ku í dɑkɛ di pɑ̃rɛ̀ kpɛ́í nkù mɛ̀ nyí yɛ̀ cɔú. 
\v 14 Kɛ̀ di nɛ́ békú dimɑ́ɑ̀ mùù kpɛ́í nte kɛ̀ kù yí cɔú di pɑ̃rɛ̀. Di yetírí mɛ̀ɛ̀ kpɛ́í nkɛ di pobɛ̀ di puokɛ bɛ̀ di dɑpɑ̀ntì mɔ̀nnì kɛ bɛ́i nKuyie nyììkɛ̀ kɛ yĩ di yó mbɛ̀ po kɛ nɛ́ wɛ̃̀tɛ kɛ bɛ̀ bɛ̀tì. 
\v 15 Kuyie ndi wɛ̃nnɛ́ onìtì omɑ́ɑ̀ ndi fɔ̃́ nnɛ̀ ɑ pokù, kù nɛ́ mɛ̀ dɔ̀ɔ̀ kɛ dɔ́ bɑ? Kù dɔ́ dí nwɛ̃ ntikɔ̃̀ntì nti nɛ̀ mɛyɛ̀mmɛ̀ di wɛ̃nnɛ́ dìì mɔ̀nnì kɛ nɑɑ́ nhonìtì omɑ́ɑ̀ di ɔ̃ mbɑɑ bɑ? Di ɔ̃ mbɑɑ̀ Kuyie mbo di duɔ́ mmɛm̀mɛ ibí. Nyɛ̃́nɛ̀ tũ̀nkɛ kòò mɔù bɑ́ɑ́ yetɛ o pokù o puokɛ wè o dɑpɑ̀ntì mɔ̀nnì nɛ̀ o bí bɛ̀ ntú ku kɔbɛ mbɛ. Nyɛ̃́nɛ̀ tũ̀nkɛ di toti tì di yɛ̀mmɛ̀ ti kpɛ́í nnɛ̀ di pobɛ̀ di puokɛ bɛ̀ didɑcɛ̃ntì mɔ̀nnì, kòò mɔù bɑ́ɑ́ yetɛ o pokù. 
\v 16 Mí nKuyie Mpɑkɛdɑɑ Isidɑyɛɛribɛ tũ nkù m miɛkɛ cɔ́ummu wèè bɛ̀ti o pokù kɛ yɛ̃́ wè ò bɛ̀timɛ̀ nɛ̀ kuyonku nku. Ndɑkɛnɛ̀ di toti tì di yɛ̀mmɛ̀ miɛkɛ ti kpɛ́í. Kòò mɔù bɑ́ɑ́ yetɛ o pokù.
\s1 Kuyie nnɑ̀kɛ́mɛ̀ kù yóó duɔnnímɛ̀ ku kó ditɔ̃nnì
\p
\v 17 Kɛ̀ Mɑdɑsii bɛ́i nkɛ dɔ̀: Ti Yiɛ̀ nKuyie nhɔ̀unɛ̀mu di kó tinɑ́ɑǹtì. Kɛ̀ di nɛ́ békú dimɑ́ɑ̀ kɛ tú, kù tì ɔ̀unɛ̀ bɑ nkpɛ́í? Kù di ɔ̀unɛ̀ tì, tiì tú, di ɔ̃ nnɑ́ɑ́ ntì kɛ tú ti Yiɛ̀ nKuyie nhɔ̃ nwúó nwèè dɔ̀ɔ̀ri mɛyɛi nkɛ dɛ̀ kù nɑɑti, kɛ̀ kù ò yɑ̀rí, kù nɛ́ yɛ̃ nkù wetí ɔ̃̀mmɛ botí?
\c 3
\p
\v 1 Kɛ̀ ti Yiɛ̀ Kuyie mbɛ́i nkɛ dɔ̀: Mí nKuyie Mpɑkɛdɑɑ, m bɛ́immu kɛ tú: M bo duɔ́nko n kó ditɔ̃nnì kɛ̀ dìi keutɛ́ kucɛ. Di yiɛ̀ ndi bɑ̀ɑ wè ò yóó di dɛ́ɛ́tɛ́mu kɛ̀ dí tɑ o cĩ́ɛ̃̀tɛ̀ miɛkɛ. Di yiɛ̀ nwèè di dɔ̀ɔ̀nɛ̀ mɛtɑummɛ̀ ò kèrínímu. Mí ndi Yiɛ̀ nKuyie Mpɑkɛdɑɑ míì bɛ́i! 
\v 2 We mbo nkpɑɑ́ dɛ yiè? Kòò feitɛ́ní we mbo nkpɑɑ́ cómmú! Ò yó ndònnɛ̀ dihònnì kó muhɑ̃ɑ̃́ mmùù ɔ̃ɔ̃ wénkùnnɛ mù mmu mɛsɔɔ nkɛ́ndò nciɛkúrɛ̀ bɛ̀ ɔunɛ̀ dɛ̀ tiyɑ̀ɑ̀tì. 
\v 3 Weè yóó wénkùnnɛ bɛnìtìbɛ̀ mɛsɔɔ nkɔ̃mɛ. Weè yóó wénkùnnɛ Defiibɛ muhɑ̃ɑ̃́ nhɔ̃ɔ̃ wénkùnnɛ mɛ̀ɛ̀ botí timɑ́tì pɛ́ítì nɛ̀ mɛsɔɔ. Dɛ mɔ̀nnì kɛ̀ bɛ̀ɛ nɑɑ́ mbɛ̀ɛ̀ yó nni mpɑ̃ɑ̃ nyɛpɑ̃rɛ̀ ikuɔ́ yɛ̃mmɛ̀. 
\v 4 Dɛ mɔ̀nnì kɛ̀ ti Yiɛ̀ nKuyie ncɔutɛ́ Sudɑɑ kɔbɛ nɛ̀ Isidɑyɛɛribɛ kó yɛpɑ̃rɛ̀ kù do yɛ̀ cɔú mɛ̀ɛ̀ botí nɛ̀ dimɔ̀nnì, yɛbie nketiyɛ̀ miɛkɛ. 
\v 5 Dɛ mɔ̀nnì mí ndi Yiɛ̀ nKuyie Mpɑkɛdɑɑ m bo ndi kómmú kɛ́bekɛ́nɛ̀ bɛtediibɛ̀ nɛ̀ bɛ̀ɛ̀ dɔuti dɔutinɛ̀ bɛtɔbɛ̀ nɛ̀ bɛ̀ɛ̀ ɔ̃ mpɑrìkunɛ̀ n yètìrì kɛ nɛ́ soú, nɛ̀ bɛ̀ɛ̀ í yietì bɛ kó bɛtɔ̃mbɛ̀ bɛ díítí nɛ̀ bɛkúpobɛ̀ nɛ̀ iciribí kpɛrɛ nɛ̀ bɛ̀ɛ̀ fɛ̃́ũnko bɛpɔ̀ɔ̀bɛ̀ bɑ́ bɛ̀ í n dé mí ndi Yiɛ̀ nKuyie Mpɑkɛdɑɑ.
\s1 Isidɑyɛɛribɛ dòmmɛ̀ kɛ́wɛ̃tɛní bɛ Yiɛ̀ nKuyie mborɛ̀
\p
\v 6 Kɛ̀ ti Yiɛ̀ nKuyie mbɛ́i nkɛ dɔ̀: Mí ndi Yiɛ̀ nKuyie n yí cèètɛ, di mɛ nyí yóu di bo ntúmɛ̀ Sɑkɔbu yɑɑ̀bí. 
\v 7 Nɛ̀ di yɛmbɛ̀ do bomɛ̀ mmɛ di bùtínnɛ́mɛ̀ n tié kɛ í ì tũ, wɛ̃tɛnɛ̀ní m borɛ̀ kɛ̀ m múnkɛɛ wɛ̃too di borɛ̀. Mí ndi Yiɛ̀ nKuyie Mpɑkɛdɑɑ míì bɛ́i! Kɛ̀ di nɛ́ békú dimɑ́ɑ̀ kɛ tú: Ti bo wɛ̃too ɔ̃̀mmɛ botí ku borɛ̀? 
\v 8 Ntɛ m múnkɛ yóó di bekɛ tì, onìtì bo nɑ kɛ́soutɛ́ mí nKuyie nnɑɑ̀? Kɛ̀ dɛ yɛ̀mmɛ̀ di bo yĩ́: Nɛ̀ bɑ mmiɛkɛ nkɛ ti dɑ soúmmɛ̀? Di mɔkɛ dɛ̀ dɛmɔu kó dɛpííndɛ̀ di dò nkɛ́ nni n duɔ̀ ndɛ̀. Nɛ̀ di dò nkɛ́ nni mpɑ̃ɑ̃ nyɛ̀ɛ̀ pɑ̃rɛ̀, dɛɛ̀ miɛkɛ nkɛ di n soúmmɛ̀. 
\v 9 Mɛyɛi ndi do, kubotí kumɔu n soú mmɛ̀ɛ̀ kpɛ́í nkɛ. 
\v 10 Tɔnní dɛ̀ɛ̀ kó dimɑ̀ɑ̀ tú dɛpííndɛ̀ kɛ́ɑ̃nnɛ́ n cĩ́ɛ̃̀tɛ̀ miɛkɛ kɛ̀ dɛ̀ɛ yie nkɛ̀ n cĩ́ɛ̃̀tɛ̀ mmɔkɛ tidiitì. N yɑ́ɑ́kɛ́nɛ̀ kɛ́yɑ̀ kɛ́nsɑ̀ kɛ̀ m bɑ́ɑ́ kpetɛ́ iwɛtibori, kɛ́cṹũnko kɛĩ́nkɛ̀ kó mɛsɑ̀ɑ̀ nkɛ̀ mɛɛ̀ píɛ. Mí nKuyie Mpɑkɛdɑɑ míì bɛ́i! 
\v 11 Kɛ̀ nsɑ̀ kɛ̀ m bɑ́ɑ́ bɛti yɛcɑ́dúɔ̀ mbɑ́ yɛ̀ tɛ̃́nkɛ bɑ́ ncɑ́ɑ́ ndi diitì, kɛ̀ fínyĩ̀ kó dɛtie mpɛitɛ́. 
\v 12 Kɛ̀ yɛbotɛ̀ yɛmɔu ndi tú diwɛ̀ì yɛmbɛ̀, kɛ yɛ̃́ di tenkɛ̀ kó mɛkɑ̀rìmɛ̀ yó nnɑɑtimɛ̀. Mí ndi Yiɛ̀ nKuyie Mpɑkɛdɑɑ míì bɛ́i!
\s1 Bɛ̀ɛ̀ tũ nKuyie nnɛ̀ timɔ́mmɔnti bɛ̀ yóó yɑ̀mɛ̀ mucɔ̃́ntimu
\p
\v 13 Kɛ̀ ti Yiɛ̀ nKuyie mbɛ́i nkɛ dɔ̀: Di nɑ́ɑ́ ntì ti kpɛ́í ntì tu tipocɛ̃mmúnɑ́ɑǹtì nti, kɛ̀ di nɛ́ békú dimɑ́ɑ̀ kɛ tú: Ti kù cɛ̃nnɛ́nɛ̀ ɔ̃̀nti? 
\v 14 Díì bɑɑ nɑ́ɑ́ nkɛ tú: Kɑ̀ɑ tũ̀ nKuyie, dɛtetìrɛ̀ ndɛ, kɑ̀ɑ tũ̀ nku tɑnnɔ̀ dɛ̀ í mɔkɛ mucɔ̃́ntimu mɑmù, kɛ̀ di nù nkɔmmú yɛdɑbùò m mí nKuyie Mpɑkɛdɑɑ n yììkɛ̀ bɑ́ di í yɑ̀ mucɔ̃́ntimu mɑmù. 
\v 15 Kɛ̀ sipɔɔ yɛmbɛ̀ bɛɛ̀ nɛ́ bo kɛ̀ dɛ̀ bɛ̀ nɑɑti, kɛ̀ bɛdɔnnibɛ̀ kpɛrɛ yíé mbɑ́ kɛ̀ bɛ̀ wɛ̃̀ńtɛ́ mí nKuyie ndɛ̀mɑrɛ̀ bɑ́ɑ́ bɛ̀ dɔ̀ɔ̀.
\p
\v 16 Bɛ̀ɛ̀ n dé bɛɛ̀ nɑ̀ɑ́ mmɛmmɛ kɛ̀ n kèè bɛ̀ nɑ̀ɑ́mmɛ̀ kɛ duɔ́ nkɛ̀ bɛ̀ wɑ̃̀ri bɛ yètɛ̀ bɛmbɛ bɛ̀ɛ̀ n dé kɛ yɛ̃́ n kpɛ́í. 
\v 17 Mɛm̀mɛ mí ndi Yiɛ̀ nKuyie Mpɑkɛdɑɑ m bɛ́immɛ̀ kɛ dɔ̀: M bɑ̀ɑ́tí dìì yiè kpɛ́í ndi bo tuɔkɛ dìì yiè, bɛ̀ bo ntú n kɔbɛ kɛ̀ m bɛ̀ te. M bo mbɛ̀ mɔ̀kɛnɛ̀ mɛsémmɛ̀, onìtì ɔ̃ mmɔkɛnɛ̀mɛ̀ o birɛ dɛ̀ɛ̀ pĩ nho tɔ̃mmú mɛsémmɛ̀. 
\v 18 Dɛ yiè di bo yɑ̀ mɛbɑtimɛ̀ mɛ̀ɛ̀ bo bɛyɛibɛ nɛ̀ bɛsɑ̀ɑ̀bɛ̀ bɛ cuokɛ̀, wèè pĩ n tɔ̃mmú nɛ̀ wèè í mù pĩ mbɛ cuokɛ̀.
\c 4
\p  
\v 1 Dɛ yiè kèrínímu kɛ yó ntònnì diònnì kó muhɑ̃ɑ̃́ nkɔ̃mɛ. Dɛ yiè mɛyɛi ndɔɔ̀rìbɛ̀ nɛ̀ sipɔɔ yɛmbɛ̀ bɛ̀ bo cɔ́útɛ́ timúkpetì kɔ̃mɛ pɑ́íí, bɛ̀ cĩɛ̃ nnɛ̀ bɛ fɑ̃ɑ̃̀tì bɑ́ dɛ̀mɑrɛ̀ bɑ́ nsúɔ́. Mí di Yiɛ̀ nKuyie Mpɑkɛdɑɑ míì bɛ́i! 
\v 2 Díndi bɛ̀ɛ̀ n dé, dɛ yiè m bo di dɔ̀ɔ̀ dɛ̀ɛ̀ sìɛ́ kɛ̀ mɛdɛɛtímɛ̀ kó diwennɛ́cɑ̀nnì di míítɛ́, kɛ́ di miɛkùnnɛ kɛ̀ dí mpuù yɛnɑɑdɑpɑ̀ɑ̀ mbɛ̀ pìtɛ́ yɛ̀ kɛ fĩ̀ĩ́nko yɛ kɔ̃mɛ. 
\v 3 Dɛ yiè di bo nɑ̀u bɛyɛibɛ kɛ̀ bɛ̀ɛ nɑɑ́ mmutɑ̃́ɑ̃́. Mí ndi Yiɛ̀ nKuyie Mpɑkɛdɑɑ míì bɑ̀ɑ́tí dɛ kó diyiè kpɛ́í.
\s1 Edii yóó wɛ̃tɛnímɛ̀
\p
\v 4 Di bɑ́ɑ́ yɛ̃̀ nkóo tɔ̃ntì Mɔyiisi di duɔ́ nyìì kuɔ́ kpɛ́í. Ntũnnɛ̀ n tɑnnɔ̀ nɛ̀ n tié n do ò duɔ́ ndɛ̀ Ɔdɛbu tɑ̃rì ĩ́nkɛ̀ Isidɑyɛɛribɛ dimɔu di kpɛ́í.
\p
\v 5 N yóó niitɛ́ kɛ́duɔ́nko m pɑ̃ɑ̃nɑ́ɑǹtì nɑ́ɑǹtò Edii nwe kɛ̀ diyiè diɛrì dìì duò tikɔ̃m̀bùɔ̀tì kɛ̀ dì nɛ́ nɑ kɛ́tuɔkɛní. 
\v 6 Weè yóó wɛ̃tɛ kɛ́tɑu nyibí nɛ̀ i cicɛbɛ̀ kɛ́tɑu mbɛ̀ɛ̀ tu ibí cicɛbɛ̀ nɛ̀ bɛ bí, kɛ̀ dɛ̀ɛ yie nkɛ̀ m bɑ́ nkeróo kɛ́potɛ́ di kó dihɛì dimɔu pɑ́íí.