\id LAM di25.all Novembre 1998 BJ Parakou B{enin
\ide UTF-8
\h Isɑ́útìi
\toc1 Sedemii kó Isɑ́útìi
\toc2 ISÁÚTÌI
\mt1 Sedemii kó Isɑ́útìi
\imt1 Di mpɑ́tíri tɔ tìì nɑ́ɑǹtì
\ip Sedemii weè wɑ̃̀ri dɛ kó dipɑ́tíri, kɛ di wɑ̃̀ri kɛ̀ dɛ̀ ntukúnɛ̀ Sedisɑdɛmmu kó mupɔ̀mmù kó tinɑ́ɑǹtì. Ti yɛ̃́mu kɛ dò nSedemii do tú Kuyie mpɑ̃ɑ̃nɑ́ɑǹtì nɑ́ɑǹtò nwe, kɛ̀ kùu ò nɑ̀kɛ́ Sedisɑdɛmmu kó mùpɔ̀mmù kpɛ́í, Nɛbukɑnnɛsɑɑ Bɑbidɔnni kóo kpɑ̀ɑ̀tì do bɛ̀ pɔ̀ntɛmu, kɛ̀ Sudɑɑ kɔbɛ kó dikpɑ̀ɑ̀tìyuu do. Bɛmbɛ Kuyie ndo dɔúnnɛ̀ bɛ̀ dinùù kɛ dɔ̀: Dɑfiti kó dikpɑ̀ɑ̀tìyuu bɑ́ɑ́ pɑ̀ɑ̀ okpɑ̀ɑ̀tì. Kɛ̀ diì kpɑ̀ɑ̀tìyuu nɛ́ pɔ̀ntɛ nɛ̀ bɛ ɛì Sedisɑdɛmmu, kɛ̀ bɛ̀ɛ tɑ mɛsémmɛ̀ miɛkɛ, kɛ́tɑ tidɑwɑntì miɛkɛ, kɛ̀ dikònnìi bɛ̀ pĩ nkɛ̀ bɛ dootitɔbɛ̀ɛ kuɔ bɛ bí nɛ̀ bɛ dɑpɑ̀mbɛ̀ nɛ̀ bɛhɛikɛ̀nkótíbɛ̀ kɛ́tɑunɛ̀ ikuɔ́ nìùbɛ̀ nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀, nɛ̀ bɛkpɑ̀ɑ̀tìbɛ̀, kɛ́cɑkɛ Kuyie ncɛ̃sɑ̀ɑ̀tɛ̀.
\ip Mɛm̀mɛ kɛ̀ dɛ̀ɛ pĩ́ nSedemii mɛsémmɛ̀ kòo nɛ́ kuɔ́ ndɛ kó dikúdɑbònnì kɛ́sɑutɛ, dɛ̀ɛ̀ bɛ̀ tùɔ̀kɛní bɛmbɛ Kuyie nkó bɛnìtìbɛ̀ dɛ kpɛ́í. Kɛ bo bɛ̀ bɛnkɛ kɛ tú tìì bɛ̀ tùɔ̀kɛní Kuyie nkó tɛnɔ̀ùtɛ̀ tɛɛ̀ bɛ̀ potɛ́, kɛ bo bɛ̀ bɛnkɛ kù í dɔ́mɛ̀ mɛyɛi mbɛ̀ dɔ̀ɔ̀rimɛ̀, kɛ́ bɛ̀ bɛnkɛ Kuyie ntumɛ̀ kùù wetí kùnku kɛ̀ bɛ̀ yóu bɛ yɛi nkɛ wɛ̃̀tɛní kù yóó bɛ̀ cĩ̀ɛ̃́mmu bɛ yɛi nkɛ́ bɛ̀ dɛɛtɛ́.
\ip Sedemii nɛ̀ o sɑ́útìi miɛkɛ kòo bɑntɛ́ kɛ dò nhonìtì bɑ́ɑ́ nɑ nɛ̀ omɑ́ɑ̀ kɛ́wɛ̃tɛní Kuyie mborɛ̀ kɛ̀ dɛ̀ í tú Kuyie nku mɔ́mmɔnku kuù bo ò ɑ̃nnɛ́ dɛ kó mɛyɛ̀mmɛ̀. Mɛm̀mɛ kòo bɛ́í nkɛ dɔ̀: Ti Yiɛ̀ nKuyie nhɑ ti tɛ̃́nnɛ́ní ɑ bíɛ́kɛ̀ kɛ̀ dɛ̀ɛ yie nkɛ̀ ti wɛ̃tɛní ɑ borɛ̀ (mukɑ̀mmù 5:21).
\ip Mukɑ̀mmù 3:22-23 kòo ti bɛnkɛ kɛ tú Kuyie nkó mɛsɑ̀ɑ̀ nyí deu bɑ́ kɛ̀ tìi ti tùɔ̀kɛní kɛ̀ ti kpɑɑ́ fííkú Kuyie nkó kucɛ miɛkɛ kù yóó ti teennɛ̀mu kɛ́ ti dennɛ dɛ kó difɔ̃̀tìrì miɛkɛ.
\is1 Dɛ kó dipɑ́tíri nɑ́ɑǹtì duɔ́ kɛ dòmmɛ̀
\io1 Sedemii kuɔ́ ndìì kúdɑbònnì Sedisɑdɛmmu ɛì kpɛ́í 1
\io1 Kuyie mmiɛkɛ pɛikɛmɛ̀ Isidɑyɛɛribɛ̀ 2
\io1 Mɛfɛ̃́ṹtímɛ̀ kó didɑbònnì 3
\io1 Mɛyɛi mmɛ̀ɛ̀ do Sedisɑdɛmmu 4
\io1 Bɛ̀ pɔ̀ntɛmɛ̀ Sedisɑdɛmmu kɛ̀ Isidɑyɛɛribɛ bɑ̀ɑ́ nKuyie 5
\c 1
\s1 Sedemii kuɔ́ ndìì kúdɑbònnì Sedisɑdɛmmu ɛì kpɛ́í
\q1
\v 1 Dɛ̀ dòmmɛ Sedisɑdɛmmu kɑ̀ɑ kɑ̀ri kɛ sĩ́ĩ́!
\q1 fɔ̃́ nwèè do tú dihɛì diɛrì kɑ̀ɑ nìtìbɛ̀ sũ!
\q1 Dɛ̀ dòmmɛ kɑ̀ɑ sɑ̃̀ɑ̃́tɛ́nɛ̀ okúpokù!
\q1 Fɔ̃́ nwèè yètìrì do feínɛ̀ yɛhɛkɛ̀ yɛmɔu kutenkù,
\q1 Fɔ̃́ nwèè do bɑkɛ́ yɛhɛkɛ̀ tɛyɛ̀,
\q1 kɛ̀ fɔ̃́ɔ̃̀ nɛ́ nɑɑ́ nkudɑɑkù!
\q1
\v 2 Kɛ wentí kɛ kuɔ̀ ndɛyènnɛ̀ dɛmɔu,
\q1 kɑ̀ɑ bɑ̀ɑ̀ búútɛ́nɛ̀ tinɔnniɛti,
\q1 bɑ́ òmɔù í dɑ bɑ́ɑ́,
\q1 kɑ̀ɑ nɑtitɔbɛ̀ bɛmɔu dɑ fitɛ́,
\q1 bɛɛ̀ nɑɑ́ nhɑ dootitɔbɛ̀.
\q1
\v 3 Kɛ̀ bɛ̀ pĩ̀ḿmú Sudɑɑ kɔbɛ kɛ kònnɛ̀ kɛ bɛ̀ fɛ̃́ũnko,
\q1 kɛ bɛ̀ pĩ̀ńnɛ́ mudɑɑtɔ̃mmú diɛmù,
\q1 kɛ̀ bɛ̀ wɛ̃ńnɛ̀ bɛ̀ɛ̀ í yɛ̃́ Kuyie nkɛ bo,
\q1 bɑ́ bɛ̀ í mɔkɛ mɛom̀pùmɛ̀,
\q1 bɛ̀ɛ̀ bɛ̀ bɛ̀ti, bɛ̀ bɛ̀ nìntɛmu,
\q1 kɛ bɛ̀ ɛ̃̀ṹtɛ́ dɛpɛ̃́ṹtírɛ̀.
\q1
\v 4 Siyɔ̃ɔ̃ ɛì kó icɛ dɔúnkomu,
\q1 òmɔù tɛ̃́nkɛ í dɛ̀ kɔ̀rìní Kuyie mbɑnni,
\q1 kɛ̀ dihɛì kó yɛbòrɛ̀ cɑ̀kɛ,
\q1 kɛ̀ ikuɔ́ nìùbɛ̀ ti yɛkúdɑbùò,
\q1 kɛ̀ bɛsɑpɑ̀mbɛ̀ bo mɛyɛǹcɑɑ̀rìmɛ̀ miɛkɛ,
\q1 dihɛì dimɔ́mmɔnni kɛ̀ dì tɑ mɛyɛǹcɑɑ̀rìmɛ̀ miɛkɛ.
\q1
\v 5 Bɛ dootitɔbɛ̀ bɛɛ̀ bɛ̀ bɑɑtɛ́,
\q1 bɛ dootitɔbɛ̀ bɛɛ̀ di diwɛ̀ì.
\q1 Ti Yiɛ̀ nKuyie nkuù bɛ̀ potɛ́,
\q1 bɛ yɛi nsũ̀ṹ mmɛ̀ɛ̀ kpɛ́í,
\q1 kɛ̀ bɛ̀ pĩ̀ḿmú bɛ bí kɛ dɔ̀ɔ̀ tidɑɑtì,
\q1 kɛ ì nií nkɛ kpɑɑkɛ.
\q1
\v 6 Siyɔ̃ɔ̃ ɛì, ɑ sɑ̃nni dimɔu yɛ̀mu,
\q1 kɑ̀ɑ kpɑ̀ɑ̀tìbìí sɑ̃̀ɑ̃́tɛ́nɛ̀ siweí sìì í pɛ̀tɛ́ timútì kɛ bo di,
\q1 kɛ cĩ̀tɛ kɛ kérí kɛ ni, kɛ̀ bɛ̀ɛ̀ sì bɛ̀tì kɛ̀ bɛ̀ tũ nkɛ bɛtì.
\q1
\v 7 Sedisɑdɛmmu ɑ̃tirɛmu kɛ di ifɛi,
\q1 kɛ dèntɛní tikpɑ̀tì ò do mɔkɛ tì nɛ̀ dimɔ̀nnì ti kpɛ́í,
\q1 di mmɔ̀nnì o kɔbɛ mɛ ndomu bɛ dootitɔbɛ̀ nɔu miɛkɛ,
\q1 bɑ́ òmɔù í kɔriní kɛ bo bɛ̀ teennɛ̀,
\q1 kɛ̀ bɛ dootitɔbɛ̀ bɛ̀ dɑú bɛ ɛì dɔúnkomɛ̀.
\q1
\v 8 Sedisɑdɛmmu cɑɑ̀rìmɛ̀ mɛɛ̀ sũ̀ṹ ndɛɛ̀ te kòò sĩ̀ntɛ,
\q1 bɛ̀ɛ̀ kó dimɑ̀ɑ̀ do ò sɑ̃ntí kɛ̀ bɛ̀ ò sènku.
\q1 Kɛ yɛ̃́ bɛ̀ yɑ̀mɛ̀ o fɛi,
\q1 o mɔ́mmuɔ nkɛ̀ dɛ̀ ò yóù kòò tu sĩ́mmú sĩ́mmú,
\q1 kɛ bùtínnɛ́ kɛ ìtɛ́.
\q1
\v 9 O yɔ̃́ɔ̃̀ mmɛɛ̀ sɑ̃ṹ nho yɑɑ̀bòrì,
\q1 ò do í totí o yɛ̀mmɛ̀ ò yóó dentɛnɛ̀ tì,
\q1 kɛ do mɛdiɛ̀ mmɔ́mmɔmmɛ dɛfũ̀ɔ̃̀,
\q1 bɑ́ òmɔù í bo wèè bo ò bɑ́ntɛ̀,
\q1 kòò kuɔ̀ nkɛ tú:
\q1 Kuyie nwéntɛ́ n sémmɛ̀,
\q1 ɑ yɑ̀ n dootitɔbɛ̀ n nɑmɑɑ̀?
\q1
\v 10 O dootitɔbɛ̀ bɛɛ̀ yùo bɛ nɔu o kpɑ̀tì timɔu ĩ́nkɛ̀,
\q1 Ò yɑ̀mu ketíkɛ yɛbotɛ̀ kɔbɛ tɑmɛ̀ Kuyie ncĩ́ɛ̃̀tɛ̀,
\q1 ti Yiɛ̀ nKuyie ndo bɛ́i mbɛ̀ɛ̀ kpɛ́í nkɛ́pɑrìkɛ̀,
\q1 kɛ dɔ̀ bɛ̀ í yóó nkɔkɛ́ ku kɔbɛ miɛkɛ.
\q1
\v 11 Kòo nìtìbɛ̀ kuɔ̀ mbɛmɔu kɛ wɑnti mudiì,
\q1 kɛ tóú bɛ kpɛrɛ dɛsɑ̀ɑ̀rɛ̀ kɛ cekiinɛ̀ mudiì kɛ bo nfòùnɛ̀,
\q1 kɛ kuɔ̀ nkɛ tú:
\q1 N Yiɛ̀ nKuyie nwéntɛ́ kɛ́yɑ̀ bɛ̀ n sènkɛ̀rì mɛ̀ɛ̀ botí.
\b
\q1
\v 12 Dimɔu díndi bɛcɛpɛ̃̀mbɛ̀, wéntɛ́nɛ̀ kɛ́yɑ̀,
\q1 òmɔù yo kuyonku mɑkù dɛ̀mɑrɛ̀ kɛ̀ kù dònnɛ̀ m mɛ̀ nyo kùù yonkɑɑ̀?
\q1 Ti Yiɛ̀ nKuyie mmiɛkɛ mɛ̀ nni nyɛ̀ kɛ̀ kù m potɛ́ kuù yonku botí!
\q1
\v 13 Kù bɔntɛ́ní kɛĩ́nkɛ̀ nkɛ muhɑ̃ɑ̃́ kɛ̀ mù cɔ́u n kṹɔ̃̀ kɛ tɑɑ̀o,
\q1 kù ndìí nticùɔ̀tì nti kɛ̀ m̀ bètɛ́ kɛ do,
\q1 kù m bɔmmu kɛ m bɔntóo, kɛ̀ n sonnɛ́ kɛ muɔkɛ sɑ̃́ɑ̃̀.
\q1
\v 14 Kuyie nwùómmu mɛyɛi n dɔɔri mɛ̀ mɛmɔu,
\q1 kɛ mɛ̀ wɛ̃nnɛ́ kɛ boú kɛ m buú,
\q1 kɛ̀ mɛ̀ n yɔ̃̀ntɛ kɛ̀ n cĩ̀tɛ.
\q1 N Yiɛ̀ nKuyie nkuù nh ɑ̃nnɛ́ n dootitɔbɛ̀ nɔu miɛkɛ,
\q1 n tɛ̃́nkɛ í dò m bo nɑ kɛ́ bɛ̀ bɑ̀ɑo.
\q1
\v 15 N Yiɛ̀ nKuyie nkuù bɛ̀ti n kó bɛhɑ̃ɑ̃pɔ̀mbɛ̀ bɛ̀ɛ̀ do m bonɛ̀,
\q1 kɛ tìí n dootitɔbɛ̀ kó bɛhɑ̃ɑ̃pɔ̀mbɛ̀ n kpɛ́í
\q1 kɛ̀ bɛ̀ bo kuɔ n kó bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀,
\q1 kɛ́ n nɑntɛ mí nSiyɔ̃ɔ̃ ɛì Sudɑɑ tenkɛ̀ miɛkɛ,
\q1 bɛ̀ ɔ̃ɔ̃ nɑu mɛ̀ɛ̀ botí fínyĩ̀ kó yɛbɛ diyɛtituò.
\q1
\v 16 Dɛɛ̀ kpɛ́í nte kɛ̀ n kuɔ̀ kɛ̀ n nuɔ nti tinɔnniɛti,
\q1 kɛ yɛ̃́ wèè bo m bɑ́ntɛ̀ ò í bo mɛ̀.
\q1 We m bo n kpénkùnnɛ kɛ̀ nní nfòù?
\q1 M bí tɛ̃́nkɛ í dɛ̀ kpɑɑ́,
\q1 N dootitɔbɛ̀ bɛɛ̀ ì pĩ̀ḿmú kɛ kònnɛ̀.
\b
\q1
\v 17 Siyɔ̃ɔ̃ kuɔ̀mmu kɛ yuo sinɔu,
\q1 òmɔù í bo wèè bo ò bɑ́ntɛ̀, bɑ́ omɑ́ɑ̀.
\q1 Ti Yiɛ̀ nKuyie nkuù íìnní Sɑkɔbu yɑɑ̀bí dootitɔbɛ̀ bɛ̀ɛ̀ bɛ̀ fitɛ́,
\q1 Sedisɑdɛmmu nɑɑ́ mbɛ kpɛ́í dɛ̀mɑrɛ̀ sĩ̀nnɛ̀ ndɛ.
\b
\q1
\v 18 N Yiɛ̀ nKuyie nwetímu,
\q1 kɛ yɛ̃́ n yetɛmɛ̀mu ku kpɛti.
\q1 Kéntɛ́nɛ̀ tũnkɛ́ díndi yɛbotɛ̀ yɛmɔu kɔbɛ,
\q1 wéntɛ́nɛ̀ kùù yonku n tɑɑ̀,
\q1 n kó bɛsɑpɑ̀mbɛ̀ nɛ̀ bɛdɑpɑ̀mbɛ̀ bɛ̀ bɛ̀ pĩ̀ḿmúmɛ̀ kɛ dɔ̀ɔ̀ tidɑɑtì.
\q1
\v 19 Kɛ̀ n yu n nɑtitɔbɛ̀ do tú bɛ̀ kɛ sɔ̃́ mbɛ̀ n soutɛ́mu.
\q1 N kó ikuɔ́ nìùbɛ̀ do tú bɛ̀ nɛ̀ bɛhɛikɛ̀nkótíbɛ̀ kɛ̀ bɛ̀ ku dihɛì miɛkɛ,
\q1 bɛ̀ do wɑnti mudiì mmu kɛ bo di kɛ́nfòù.
\q1
\v 20 N Yiɛ̀ nKuyie nwéntɛ́ n yɛǹcɑɑ̀rìmɛ̀,
\q1 Dɛ̀ kpɛ́inko n nɑutì nti m miɛkɛ,
\q1 n yɛ̀mmɛ̀ mɛɛ̀ m bekùnɛ̀,
\q1 kɛ yɛ̃́ m mɛ̀nkɛ yetɛmɛ̀ ɑ kpɛti mɛdiɛ̀ mmɛ.
\q1 Ditowɑɑ̀ bíɛ́kòo mudoò muù dèu m bí,
\q1 Dihɛì miɛkɛ mukṹṹ nciɛ nkɛ.
\q1
\v 21 Bɛ̀ yomu n kuɔ̀mmɛ̀,
\q1 bɑ́ òmɔù í bo wèè bo m bɑ́ntɛ̀,
\q1 n dootitɔbɛ̀ yɑ̀mu mɛyɛi mmɛ̀ɛ̀ n tùɔ̀kɛní,
\q1 kɛ̀ dɛ̀ bɛ̀ nɑrikɛ ɑ n dɔ̀ɔ̀ dɛ̀.
\q1 Yṹɔ̃́nní diyiè ɑ nɑ̀kɛ́ dìì kɔ̃mɛ kɛ̀ bɛ̀ɛ yɑ̀ n yɑ̀ dɛ̀.
\q1
\v 22 Yóu kɛ̀ bɛ yonku kumɔuu feitɛ́ ɑ ììkɛ̀,
\q1 kɑ̀ɑ bɛ̀ dɔ̀ɔ̀ ɑ n dɔ̀ɔ̀mɛ̀ n cɑɑ̀rìmɛ̀ mɛmɔu kpɛ́í,
\q1 n dɑbònnì diì dɛutɛ́ mɛdiɛ̀,
\q1 kɛ̀ n sonnɛ́ kɛ muɔkɛ.
\c 2
\s1 Kuyie mmiɛkɛ pɛikɛmɛ̀ Isidɑyɛɛribɛ
\q1
\v 1 Ti Yiɛ̀ nKuyie ndɛ̀ yĩ́mɛ kɑ̀ɑ miɛkɛ pɛikɛ kɑ̀ɑ tɑnnɛ́ Siyɔ̃ɔ̃ ɛì dibiìnnì miɛkɛ?
\q1 Kɛ bɔntɛ́ní Isidɑyɛɛribɛ kɛtenkɛ̀ fũ̀ɔ̃̀ bɛmbɛ bɛ̀ɛ̀ yètìrì do feí?
\q1 A miɛkɛ kɛɛ̀ pɛikɛ kɑ̀ɑ yɛ̃̀ nhɑ cĩ́ɛ̃̀tɑ̀ɑ̀?
\q1
\v 2 Ti Yiɛ̀ nKuyie nkuù pɔ̀ntɛ Sɑkɔbu yɑɑ̀bí ɛkɛ̀, bɑ́ mɛsémmɛ̀ í kù bo,
\q1 ku miɛkɛ kɛɛ̀ pɛikɛ kɛ̀ kù buɔ́ nSudɑɑ kɔbɛ kó sicɛ̃kperí,
\q1 kɛ yèkɛ yɛkpɑ̀ɑ̀tìyɔ,
\q1 kɛ yɛ̀ sĩ̀nkùnnɛ yɛnyɛ nɛ̀ sikpɑ̀ɑ̀tìbìí.
\q1
\v 3 Ku miɛkɛ kɛɛ̀ yonkɛ mɛdiɛ̀,
\q1 kɛ̀ kù pɔ̀ntɛ Isidɑyɛɛribɛ kó muwɛ̃rímú mumɔu,
\q1 kɛ̀ bɛ dootitɔbɛ̀ kèríní kɛ̀ kù kɑ̃ɑ̃tɛ́ ku nɔ̀ùtɛ̀ bɛ ĩ́nkɛ̀.
\q1 Kù cɔ́u mmuhɑ̃ɑ̃́ mmu Sɑkɔbu yɑɑ̀bí,
\q1 kɛ̀ mù bɛ̀ cɔ́u nkɛ fitɛ́ tipíìtì timɔu.
\q1
\v 4 Kù sɛ̀u nkupie nku bɛ dootitɔù kɔ̃mɛ,
\q1 kɛ yũ̀ɔ̃́ nku tɑ̃mmù bɛ dootitɔbɛ̀ kɔ̃mɛ,
\q1 kɛ kùɔ bɛbɛ́mbɛ̀ bɛ̀ do ɔ̃ɔ̃ yɑ̀ bɛ̀ kɛ̀ dɛ̀ɛ bɛ̀ nɑrikɛ,
\q1 kɛ còúnní ku miɛkɛ kɛ dò mmuhɑ̃ɑ̃pòpùò Sedisɑdɛmmu ɛì ĩ́nkɛ̀
\q1
\v 5 Ti Yiɛ̀ nKuyie nsɑ̃́ɑ̃́tɛ́nɛ̀ Isidɑyɛɛribɛ dootitɔù nwe,
\q1 kɛ bɛ̀ pùɔ̀ nkɛ buɔ́ mbɛ kpɑ̀ɑ̀tìcɛ̃́ĩ,
\q1 kɛ yèkɛ bɛ cɛ̃kperí,
\q1 kɛ duɔ́ nkɛ̀ yɛdɑbùò nnɛ̀ isɑ́útìi kɛ̀ dɛ̀ dɑ̀tínnɛ́ Sudɑɑ ɛì.
\q1
\v 6 Kuù kɛ̃tɛ́ ku cɛ̃sɑ̀ɑ̀tɛ̀ kó kuperí,
\q1 kɛ pɔ̀ntɛ ku cĩ́ɛ̃̀tɛ̀,
\q1 kɛ̀ Siyɔ̃ɔ̃ ɛì kɔbɛ yɛ̃̀ nku kó yɛbɑɑ nnɛ̀ siom̀pùsi.
\q1 Ku miɛkɛ kɛɛ̀ yɛ̀nní kɛ tontɛ́ kɛ̀ kù ùtóo bɛkpɑ̀ɑ̀tìbɛ̀ nɛ̀ ikuɔ́ nìùbɛ̀.
\q1
\v 7 Ti Yiɛ̀ nKuyie mpɛ̃̀mu ku wũɔ̃tɔ̀nnì,
\q1 kɛ wentɛ́ ku cĩ́ɛ̃̀tɛ̀ isɔkɛ kpɛtɛ,
\q1 kɛ ɑ̃nnɛ́ sicɛ̃sɑ̀ɑ̀sì sìì bo Siyɔ̃ɔ̃ bɛ dootitɔbɛ̀ nɔu miɛkɛ,
\q1 kɛ̀ bɛ̀ wèkíí ku cĩ́ɛ̃̀tɛ̀ miɛkɛ kɛ̀ dɛ̀ dò nku bɑnni ɔ̃ mbo kɛ̀ dɛ̀ dòmmɛ̀.
\q1
\v 8 Ti Yiɛ̀ nKuyie nkuù tɑ̃ɑ̃tɛ́ kɛ bo puɔ nSiyɔ̃ɔ̃ ɛì kó iduotí,
\q1 kù dɔú nkuhɔ̃ũ nku kùù beúnɛ̀,
\q1 kù í yóó cɑ̃nnɛ ku nɔ̀ùtɛ̀ dɛmɔu kɛ̀ dɛ̀ í do,
\q1 kuù pùɔ̀ nkuduotí dɛ miɛkɛ kɔku nɛ̀ ditowɑɑ̀ kɔku kɛ̀ ì wɛ̃nnɛ́ kɛ do kɛ nɑɑ́ ntidobontì.
\q1
\v 9 Kɛ̀ yɛcɑ̀kɛ̀ duò kɛtenkɛ̀,
\q1 kɛ̀ yɛkpetínyɛ̀ bɔ̀kɛ́ kɛ yɑrí kɛ cóú,
\q1 bɛ̀ɛ̀ í yɛ̃́ Kuyie nkɛ̀ bɛ̀ kònnɛ̀ okpɑ̀ɑ̀tì nɛ̀ sikpɑ̀ɑ̀tìbìí,
\q1 ikuɔ́ tɛ̃́nkɛ í bo,
\q1 Kuyie ntɛ̃́nkɛ í duɔ̀ nku pɑ̃ɑ̃nɑ́ɑǹtì ku pɑ̃ɑ̃nɑ́ɑǹtì nɑ́ɑm̀bɛ̀,
\q1 ti Yiɛ̀ nKuyie ntɛ̃́nkɛ í bɛ̀ duɔ̀ ntìmɑtì.
\q1
\v 10 Siyɔ̃ɔ̃ ɛì kó bɛkótíbɛ̀ kɑ̀ri kɛtenkɛ̀ nkɛ,
\q1 bɑ́ bɛ̀ í nɑ́ɑ́ ntìmɑtì,
\q1 kɛ pũ mmutɑ̃́ɑ̃́ mbɛ yɔ,
\q1 kɛ dɑ́ɑ́tí tifɔ̀ɔ̀tɔ̃̀ntì.
\q1 Sedisɑdɛmmu ɛì kɔbɛ sĩ̀ńnɛ́ bɛ yɔ nyɛ kɛtenkɛ̀.
\b
\q1
\v 11 N kɔmmúmu kɛ̀ n nuɔ ntiikɛnɛ̀ tinɔnniɛti,
\q1 dɛ̀ cɔ́u m miɛkɛ nkɛ,
\q1 n yí nɑ kɛ bo pĩ́ m mɑ́ɑ̀,
\q1 mɛyɛi mmɛ̀ɛ̀ tùɔ̀kɛní n nìtìbɛ̀ mɛ kpɛ́í,
\q1 ibí nɛ̀ ibíbɛ́nní kɛ̀ dɛ̀ kɔ̃ ndihɛì mmiɛkɛ,
\q1
\v 12 kɛ békú i yɔ̃bɛ̀ kɛ tú: Tidiitì í boɑɑ̀?
\q1 Ì cĩ̀tɛmu kɛ duò bɛ̀ kɔ̀ùtɛ bɛ̀ kɔ̃mɛ,
\q1 kɛ̀ i wemmu deu kɛ̀ ì kɔ̃ ndihɛì miɛkɛ,
\q1 i yɔ̃bɛ̀ kpèrɛ̀ ĩ́nkɛ̀.
\b
\q1
\v 13 M bo dɑ nɑ́kɛ́ ɔ̃̀nti fɔ̃́ nSedisɑdɛmmu?
\q1 M bo dɑ donnɛnɛ̀ we?
\q1 M bo dɑ ɛnnɛnɛ̀ we kɛ dɑ bɑ́ntɛ̀ fɔ̃́ nSiyɔ̃ɔ̃ ɛì?
\q1 A mɔnnɛ dɛɛ̀ dɛukɛ dɑ̀mɛ́ɛ̀rì tɛ̃mɛ̀,
\q1 we mbo nɑ kɛ dɑ tɑɑ̀?
\q1
\v 14 Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛ̀ɛ̀ bo ɑ miɛkɛ bɛ̀ dɑ nɑ́ɑ́ ntì tu dɛtetìrɛ̀ ndɛ, siyɑ́ɑ̀bìsí,
\q1 bɛ̀ í dɑ bɛnkɛ ɑ cɑɑ̀rìmɛ̀ kɛ̀ dɛ̀ bo yie nkɑ̀ɑ nɑ kɛ́yentɛ́, kɛ̀ bɛ̀ bɑ́ɑ́ dɑ dɔɔ̀ kudɑɑkù,
\q1 bɛ̀ dɑ nɑ̀kɛ́ tìì pɑ̃ɑ̃nɑ́ɑǹtì tu siyɑ́ɑ̀bìsí nsi, dɛtetìrɛ̀ kpɛti.
\q1
\v 15 Bɛcɛpɛ̃̀mbɛ̀ bo ndɑ yɑu kɛ ti mudɑɑ́ nkɛ cɔ̃́ṹo,
\q1 kɛ bɔkìi yɛyɔ Sedisɑdɛmmu ɛì kɔbɛ kpɛ́í,
\q1 kɛ nɑ́ɑ́ nkɛ tú dihɛì dìì wenniku do pɛ̃nkù yɛtɛyɛ̀,
\q1 kɛ̀ kutenkù kumɔu yɛ̀mmɛ̀ dì nɑɑtinɛ̀ diì tu dinnɑɑ̀?
\q1
\v 16 Bɛ̀ɛ̀ tu ɑ yɛibɛ bɛ̀ bo nhɑɑri tinùùtì kɛ dɑ dɑú,
\q1 kɛ cɔ̃́ṹ kɛ mɑɑ̀ nyɛbìɛ̀,
\q1 kɛ tú: Ti dɑ mɑɑ́nkomu,
\q1 ti do bɑɑ dìì yiè diì tùɔ̀kɛní,
\q1 ti bo di miɛkɛ nkɛ.
\q1
\v 17 Ti Yiɛ̀ nKuyie ndo tɑ̃ɑ̃tɛ́ tìnti,
\q1 kù do nɑ̀kɛ́ tì tiì dɔ̀ɔ̀,
\q1 kù do bɛ́i ntì nti nɛ̀ dimɔ̀nnì,
\q1 kuù dɑ pɔ̀ntɛ bɑ́ mɛsémmɛ̀ í kù bo,
\q1 kuù duɔ́ nkɑ̀ɑ dootitɔbɛ̀ yɑ̃̀nku ɑ kpɛ́í,
\q1 kɛ duɔ́ mmuwɛ̃rímú ɑ dootitɔbɛ̀.
\b
\q1
\v 18 Sedisɑdɛmmu, ńkuɔ̀ nkɑ̀ɑ dɑbònnìì dekɛ ɑ Yiɛ̀ nKuyie mborɛ̀,
\q1 yóu kɑ̀ɑ nɔnniɛti ḿpũɔ̃̀ nkukó nkɔ̃mɛ kuyie nnɛ̀ kɛyènkɛ̀,
\q1 ɑ bɑ́ɑ́ yie nkɛ́ntú ɑ bo ompɛ̀,
\q1 ɑ bɑ́ɑ́ yie nkɑ̀ɑ nɔnniɛtii cómmú.
\q1
\v 19 A níí nyié nkɛ kuɔ̀nnɛ̀ Kuyie kɛ kù nɑ́ɑ́ nhɑ yɛ̀mmɛ̀ kpɛti,
\q1 bɑ́ntɛ̀ ku ibíbɛ́nní kpɛ́í,
\q1 ìì cĩ̀tɛ nɛ̀ dikònnì kɛ kɔ̃ ndihɛì miɛkɛ tipíìtì timɔu.
\b
\q1
\v 20 N Yiɛ̀ nKuyie nwéntɛ́ kɛ́yɑ̀,
\q1 ɔ̃̀nku botí nku ɑ fɛ̃́ũ mmɛ̀ miɛ̀ mbotí diyiè mɑrì?
\q1 bɛnitipòbɛ̀ cɑ̀ɑ́mmu bɛ bí bɛ̀ ùúkú ì,
\q1 ɑ kuɔ́ nìùbɛ̀ nɛ̀ ɑ pɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ kɔ̃ nhɑ cĩ́ɛ̃̀tɛ̀ miɛkɛ.
\q1
\v 21 Ibí nɛ̀ bɛkótíbɛ̀ bɛɛ̀ ku kɛ duɔ́ duɔ́ icɛ miɛkɛ,
\q1 mudoò muù kùɔ bɛsɑpɑ̀mbɛ̀ nɛ̀ bɛdɑpɑ̀mbɛ̀,
\q1 ɑ miɛkɛ kɛɛ̀ yɛ̀nní kɑ̀ɑ bɛ̀ kùɔ, kɛ bɛ̀ fìé,
\q1 bɑ́ mɛsémmɛ̀ í dɑ bo.
\q1
\v 22 A yùní kukɔ̃m̀bɔ̀doróo nku kɛ̀ kù n duò tipíìtì timɔu,
\q1 n Yiɛ̀ nKuyie nhɑ miɛkɛ yɛ̀nní dìì yiè, òmɔù do í yentɛ́ bɑ́ omɑ́ɑ̀,
\q1 m pií bɛ̀ kɛ bɛ̀ yɔ̀,
\q1 n dootitɔù bɛ̀ kùɔ̀mu bɛmɔu pɑ́íí.
\c 3
\s1 Mɛfɛ̃́ṹtímɛ̀ kó didɑbònnì
\q1
\v 1 N tú onìtì wèè di wenwe mɛsémmɛ̀,
\q1 Kuyie mmiɛkɛ kɛɛ̀ yonkɛ kɛ̀ kù m potɛ́,
\q1
\v 2 Kuù n tèntoo kɛ n tɑnnɛ́ dibiìnnì miɛkɛ,
\q1 dibiìnnì miɛkɛ nkɛ dɛ̀ í tú kuwenniku.
\q1
\v 3 Míì ĩ́nkɛ̀ bɑɑ nɛ́ nkɛ ku nɔ̀ùtɛ̀ ɔ̃ ntṹṹ nkɛ duòmɛ̀,
\q1 kɛ kónnì
\q1
\v 4 Kuù cṹũ m mɑmbii nnɛ̀ n kɔ̃̀ntì,
\q1 kɛ bɔ̀kɛ́ kṹɔ̃̀.
\q1
\v 5 Kù m pèńnɛ́ kudookɔti nku,
\q1 mɛfɛ̃́ṹtímɛ̀ mɛɛ̀ n fitɛ́ kɛ tii mɛdɔ̀mmɛ̀ tɛ̃mɛ̀.
\q1
\v 6 Kuù duɔ́ nkɛ̀ nh ɑ̃ dibiìnnì miɛkɛ,
\q1 bɛ̀ɛ̀ ku nɛ̀ dimɔ̀nnì bɛ kɔ̃mɛ.
\b
\q1
\v 7 Kù n fii nkuduotí nku kɛ̀ dɛ̀ bo yie nkɛ̀ m bɑ́ɑ́ yɛ̀,
\q1 kɛ m boú ntifĩnti cɛ̃́ɛ̃́tì.
\q1
\v 8 Kɛ̀ n kuɔ̀ nkɛ kù yu kɛ ɔ̀ù,
\q1 kɛ̀ kù yetɛ kù bo keèmɛ̀ n dɑbònnì.
\q1
\v 9 Kɛ pèńnɛ́ yɛtɑ̃́rɛ̀ diɛyɛ̀ n kó kucɛ,
\q1 kɛ diti ncɛ imɔu.
\b
\q1
\v 10 Kù òkɛ musĩ̀mmù kɔ̃mɛ mmɛ,
\q1 kɛ n dìí dicìrícìrì ɔ̃ nhokɛmɛ̀ kucɛ timútì miɛkɛ.
\q1
\v 11 Kɛ òòtɛní kɛ n dɛ̀too kɛ nɛ̀tɛ́ nɛ́tɛ́,
\q1 kɛ dɔúnko.
\q1
\v 12 Kù sɛ̀u nkupie nku kɛ n wetínnɛ́ tɛhontɛ̀ tɛ̃mɛ̀,
\q1 kɛ bo tɑ̃.
\b
\q1
\v 13 Kù n tɑ̃ɑ̃́ ku pie nyi,
\q1 kɛ̀ ì tɑ kɛ tùɔ̀ti n ceumbɛ̀,
\q1 kù kùótɛ́ ku doò dimɔu ndi n yĩ́nkɛ̀.
\q1
\v 14 M botí kɔbɛ bɛmɔu n dɑúmu,
\q1 kɛ̀ dɛ̀ sonnɛ́ kɛ nɑɑ́ mbɛ kó fɛyɛ̀nfɛ̀.
\q1
\v 15 Kuù n dií ndɛtiirɛ kɛ̀ n dɛ,
\q1 kɛ n nìi mmɛdɔ̀mmɛ̀.
\b
\q1
\v 16 Kuù duɔ́ nkɛ̀ n cɑ̀ɑ́kɛ́ itɑ̃́ɑ̃́,
\q1 kɛ n kũnnɛ́ mutɑ́pɛí mmiɛkɛ.
\q1
\v 17 Kuù n dɛ́tinnɛ mɛom̀pùmɛ̀,
\q1 kɛ̀ n yɛ̃̀nko bɛ̀ tu dɛ̀ diwɛ̀ì.
\q1
\v 18 Mɛm̀mɛ kɛ̀ m bɛ́i nkɛ dɔ̀:
\q1 n kpɛrɛ dèèmu mmɛmmɑɑ̀!
\q1 N do bɑɑ dɛ̀ n Yiɛ̀ nKuyie mborɛ̀,
\q1 dɛ̀ yɛ̀ dɛtetìrɛ̀ ndɛɑ̀!
\b
\q1
\v 19 Dentɛní n do dimɛ̀ ifɛi kɛ́nhɑ̃́ɑ̃́,
\q1 n cɑ̀ɑ́kɛ́ mɛ̀ɛ̀ sémmɛ̀ tii kɛ dò mmɛdɔ̀mmɛ̀ mmɛ.
\q1
\v 20 N ti ndenniní,
\q1 kɛ̀ n yɛ̀mmɛ̀ cɑ̀ɑ̀ri m miɛkɛ sɑ̃́ɑ̃̀.
\q1
\v 21 N tɛ n dɔ́ kɛ́ndenniní tì,
\q1 tìì te kɛ̀ n kpɑɑ́ kémmú tiì tu tii:
\b
\q1
\v 22 Ti Yiɛ̀ nKuyie nkó mɛsɑ̀ɑ̀ mmu nyí dèè,
\q1 ku sémmɛ̀ mu nyí tùɔ̀kɛ mɛ mɑ̀nku.
\q1
\v 23 Mɛ̀ ɛ̃nkùmu bɑ́ dìì kṹnweńnì,
\q1 n Yiɛ̀ nKuyie nhɑ tú timɔ́mmɔnti yiɛ̀ nwe sɑ̃́ɑ̃̀.
\q1
\v 24 N Yiɛ̀ nKuyie nkuù tu n kpɑ̀tì,
\q1 dɛɛ̀ te kɛ̀ n kù bùɔ́.
\b
\q1
\v 25 Ti Yiɛ̀ nKuyie nnìtimu wèè ĩkú ku ĩ́nkɛ̀ o kpɛ́í,
\q1 wenwe wèè kù wɑnti.
\q1
\v 26 Dɛ̀ wennimu onìtì ɑ bo ndòmmɛ̀ kɑ́rɛ́,
\q1 kɛ kémmú ɑ Yiɛ̀ nKuyie mbo dɑ dɛɛtɛ́mɛ̀.
\q1
\v 27 Dɛ̀ wennimu onìtì fɔ̃́ nhɑ bo yiemmɛ̀,
\q1 bɛ̀ dɑ nɑ́ɑ́ ntì ɑ bíkɛ́mbɛ́ntì mɔ̀nnì.
\b
\q1
\v 28 Kɛ̀ ti Yiɛ̀ nKuyie ndɑ tɑnnɛ́ mɛhɑ́ɑ́rìmɛ̀ miɛkɛ,
\q1 ɑ kɛntɛ́ ɑmɑ́ɑ̀ kɛ́dɔ̀ só.
\q1
\v 29 Kɑroo kɛ́fṹṹ nhɑ nùù kɛtenkɛ̀,
\q1 kɛ̀ dɛ̀ nɑɑti ɑ yɑ̀ mɛteèmmɛ̀.
\q1
\v 30 Bɛnkɛ ɑ bɑɑ bɛ̀ɛ̀ dɔ́ kɛ dɑ́ puotì,
\q1 bɛ̀ɛ̀ wɑnti kɛ́ dɑ dií nyifɛi.
\b
\q1
\v 31 Kɛ yɛ̃́ ti Yiɛ̀ nKuyie nhɔ̃ɔ̃ í ndootóomɛ̀ onìtì sɑ̃́ɑ̃̀.
\q1
\v 32 Kù ɔ̃ɔ̃ potɛ́ kɛ́wɛ̃tɛ kɛ́kuɔ́mmu mɛsémmɛ̀,
\q1 kɛ yɛ̃́ ku sɑ̀ɑ̀ ndɛumɛ̀mu.
\q1
\v 33 Dɛ̀ í tú nɛ̀ ku yɛ̀mmɛ̀ mmɛ kù fɛ̃́ũnkomɛ̀ bɛnìtìbɛ̀,
\q1 kɛ diinko mɛsémmɛ̀ fɛnitiyɑnfɛ̀,
\b
\q1
\v 34 Bɛ̀ mɛ̀ ncùùtì tikpetíntì timɔu dihɛì miɛkɛ,
\q1
\v 35 kɛ kommu bɛ̀ɛ̀ í nɑɑti tibeéntì miɛkɛ,
\q1 fɔ̃́ nKuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ɑ ììkɛ̀.
\q1
\v 36 Bɛ̀ mɛ̀ ncɑɑ̀ri tibeéntì,
\q1 Ti Yiɛ̀ nKuyie nkɑ̀ɑ í wúónnɑ́ɑ̀?
\b
\q1
\v 37 We mbo bɛ́i nkɛ̀ dɛ̀ɛ dɔɔ̀,
\q1 kɛ̀ dɛ̀ í tú ti Yiɛ̀ nKuyie nkuù duɔ́ ndinùù
\q1
\v 38 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kuù ɔ̃ɔ̃ bɛ́i,
\q1 nkòo nìtìi yɑ̀ mɛyɛi nyoo mɛsɑ̀ɑ̀.
\q1
\v 39 Onìtì fɔ̃́ nnɛ̀ ɑ yɛi mmiɛkɛ,
\q1 kɑ̀ɑ fòù ɑ tɛ̃́nkɛ nɛ́ nsɑ́útí nɛ̀ ɔ̃̀nti?
\q1 kɑ̀ɑ í kuɔ̀ nhɑ yɛi nkpɛ́í nkɛ.
\b
\q1
\v 40 Yóunɛ̀ kɛ̀ ti wéntɛ́ icɛ ti tũ nyì,
\q1 kɛ ì pɑɑtɛ́ mɛsɑ̀ɑ̀,
\q1 kɛ́wɛ̃tɛ ti Yiɛ̀ nKuyie mborɛ̀.
\q1
\v 41 Tí youtɛ ti nɔu Kuyie mbíɛ́kɛ̀,
\q1 kɛ́ kù bɑ́ntɛ̀ nɛ̀ ti yɛ̀mmɛ̀ mɛmɔu.
\q1
\v 42 Kuyie nti dɑ cɑ̀kɛmu mɛdiɛ̀ nkɛ yetɛ ɑ kpɛti,
\q1 dɛɛ̀ te kɑ̀ɑ múnkɛ í ti cĩ̀ɛ̃́.
\b
\q1
\v 43 Kuyie ndɑ̀ɑ́tí ku miɛkɛ nkɛ diyɑɑ̀bòrì kɔ̃mɛ,
\q1 kɛ ti bɛtì kɛ kɔùtì bɑ́ mɛsémmɛ̀ í kù bo.
\q1
\v 44 A dɑ̀tínnɛ́ ɑ mɑ́ɑ̀ ndi yɛwɛtɛ̀,
\q1 kɛ̀ dɛ̀ bo yie nkɛ̀ ti bɑ́ɑmmu bɑ́ɑ́ dɑ tuɔkɛ.
\q1
\v 45 A ti dɔ̀ɔ̀ tiyontì nti,
\q1 dɛsĩ́ntɛ́kpɛrɛ yɛbotɛ̀ ììkɛ̀.
\b
\q1
\v 46 Kɛ̀ ti dootitɔbɛ̀ bɛmɔu,
\q1 ɑ̀ɑ̀tɛ tinùùtì kɛ ti wetí.
\q1
\v 47 Kukɔ̃m̀bɔ̀doróo nɛ̀ mɛyɑnfiì,
\q1 dɛɛ̀ nɛ́ tú ti kpɛrɛ,
\q1 kɛ̀ bɛ̀ ti puɔ̀ nkɛ ti kɔù.
\q1
\v 48 N nuɔ nyiì pũɔ̃̀ ntinɔnniɛti,
\q1 mɛyɛi mmɛ̀ɛ̀ tùɔ̀kɛní n nìtìbɛ̀ mɛ kpɛ́í.
\b
\q1
\v 49 N nuɔ nyiì ti tinɔnniɛti sɑ̃́ɑ̃̀,
\q1 bɑ́ mɛom̀pùmɛ̀ í bo.
\q1
\v 50 Kɛ̀ n kèḿmú n Yiɛ̀ nKuyie
\q1 mbo sĩ́nnɛ́nímɛ̀ kɛĩ́nkɛ̀ kɛ́ n yɑ̀.
\q1
\v 51 N kɔmmúmu kɛ̀ n nuɔ nyonkɛ,
\q1 tìì tùɔ̀kɛní nh ɛì kɔbɛ ti kpɛ́í.
\b
\q1
\v 52 Bɛ̀ɛ̀ n nìí mbɛ̀ n nìí ndɛtetìrɛ̀ ndɛ,
\q1 kɛ m bɛ̀tì tɛnɔ̀tɛ̀ kɔ̃mɛ.
\q1
\v 53 Kɛ n tɑnnɛ́ n fòùwè difɔ̃̀tìrì,
\q1 kɛ m bɔmmù yɛtɑ̃́rɛ̀.
\q1
\v 54 Kɛ̀ mɛniɛ ndɑ̀tínnɛ́ n yuu,
\q1 kɛ̀ nní nyɛ̃́ kɛ tú n kpɛrɛ dèèmu.
\q1
\v 55 Kɛ̀ nní mbo difɔ̃̀tìrì cũmpuri miɛkɛ kɛ yu ɑ yètìrì,
\q1 Áú n Yiɛ̀ nKuyie!
\q1
\v 56 A kèèmu n dɑbònnì,
\q1 bɑ́ɑ́ pi ɑ toò,
\q1 keè nh úùfɛ̀.
\q1
\v 57 N do dɑ yu kɑ̀ɑ n tɔ́ɔ́nnímu,
\q1 kɛ n nɑ́kɛ́ kɛ tú m bɑ́ nyĩɛ̃̀kù.
\b
\q1
\v 58 N Yiɛ̀ nKuyie nhɑ n kòńnɛ́mu,
\q1 kɛ n dɛɛtɛ́.
\q1
\v 59 N Yiɛ̀ nKuyie nhɑ yɑ̀mu bɛ̀ n cɑ̀ɑ̀rɛ̀mɛ̀,
\q1 ɑ m pútɛ́ kɛ́ m pɑtɛ.
\q1
\v 60 A yɑ̀mu bɛ miɛkɛ n cɔ́úmmɛ̀,
\q1 kɛ̀ bɛ̀ nɑ́ɑntɛ n kpɛ́í kɛ bo n kuɔ.
\b
\q1
\v 61 N Yiɛ̀ nKuyie nhɑ kèèmu bɛ̀ n sɑ̃̀ɑ̃́mmɛ̀,
\q1 bɛ̀ dɑmmù mɛ̀ɛ̀ botí n cĩɛ̃.
\q1
\v 62 N níim̀bɛ̀ nɑ̀ɑ́ ntì n kpɛ́í,
\q1 nɛ̀ bɛ̀ n dɔ́nɛ̀ tì yɛwe yɛmɔu tì tu tiyɛiti nti.
\q1
\v 63 Kɛ̀ bɛ̀ kɑ̀ri yoo bɛ̀ còḿmú,
\q1 míì nɑɑ́ mbɛ kó fɛyɛ̀nfɛ̀.
\b
\q1
\v 64 N Yiɛ̀ nKuyie nfɔ́ɔ́ mbɛ bɛ̀ n dɔ̀ɔ̀ dɛ̀,
\q1 yietí bɛ bɛ tɔ̃mmú mɑ̀nnɛ̀ tìì yeti.
\q1
\v 65 Duɔ́ nkɛ̀ bɛ too kpenkɛ,
\q1 kɑ̀ɑ bɛ̀ dɔ̀ɔ̀ mɛyɛi.
\q1
\v 66 Kɑ̀ɑ bɛ̀ bɛ̀tinɛ̀ kɛmiɛkɛ,
\q1 kɛ́ bɛ̀ kùɔ kɛtenkɛ̀ ĩ́nkɛ̀ kɛ́ bɛ̀ dèè.
\c 4
\s1 Mɛyɛi mmɛ̀ɛ̀ do Sedisɑdɛmmu
\q1
\v 1 Dɛ̀ dòmmɛ kɛ̀ mɛsɔɔ mmɛ̀ɛ̀ do tú mɛsɔɔ nsɑ̀ɑ̀mɛ̀ kɛ̀ mɛ̀ sĩ̀ntɛ?
\q1 Dɛ̀ dòmmɛ kɛ̀ bɛ̀ do cɑ̃̀ńnɛ́ yɛ̀ɛ̀ tɑ̃́sɑ̀ɑ̀yɛ̀ Kuyie nkpɛ́í nkɛ̀ yɛ̀ cìɛ́tɛ́ kɛ yɑɑ́ yɑɑ́ dihɛì kó icɛ miɛkɛ?
\q1
\v 2 Dɛ̀ dòmmɛ kɛ̀ Siyɔ̃ɔ̃ ɛì kó ibí ìì yètɛ̀ do feí mɛsɔɔ nsɑ̀ɑ̀mɛ̀ kpɛri kɔ̃mɛ,
\q1 kɛ̀ bɛ̀ nɑɑ́ ntiyɑɑmɑtì,
\q1 bɛ̀ mɑɑ̀nɛ̀ tì sinɔu?
\q1
\v 3 Sikpɑmɔɔ́ mɔ́mmɔnsi yɑ̃ɑ̃nkomu si bí,
\q1 kɛ̀ n nìtìbɛ̀ biɛ nɛ́ yonkɛ,
\q1 kɛ pɛ̃ɛ̃tɛ́ dikpɑ́ɑ̀ kó icùo ndiɛyì dòmmɛ̀.
\q1
\v 4 Sinɛ́yɛ̃ĩ siì pĩ nyibíbɛ́nní,
\q1 kɛ̀ i nɔ́ndiɛ́ nkpeí,
\q1 kɛ̀ ikótí békú mudiì,
\q1 bɑ́ òmɔù í ì pɑ̃ɑ̃.
\q1
\v 5 Bɛ̀ɛ̀ do yo ntidiitì sɑ̀ɑ̀tì,
\q1 bɛ̀ɛ̀ kɔ̃nnɛ̀ dikònnì icɛ miɛkɛ,
\q1 bɛ̀ɛ̀ do ɑ̃ sicɛ̃sɑ̀ɑ̀sì miɛkɛ,
\q1 bɛ̀ɛ̀ kũrí kũrí yɛtɑ́pò miɛkɛ.
\q1
\v 6 N nìtìbɛ̀ kó mɛyɛi ndɛumu,
\q1 kɛ pɛ̃ɛ̃tɛ́ Sodɔmmu ɛì kɔ̃mɛ do dòmmɛ̀,
\q1 kɛ̀ dìi do dimɔ̀nnì dimɑ́ɑ̀,
\q1 bɑ́ òmɔù í dì kɑ̀ɑ́kɛ́.
\q1
\v 7 Bɛ kó sikpɑ̀ɑ̀tìbìí do pĩntimu,
\q1 kɛ pɛ̃nkù siwɑ̃̀ɑ̃,
\q1 kɛ pɛ́ì kɛ pɛ̃ɛ̃tɛ́ mɛnɑɑmiɛ̀,
\q1 kɛ̀ bɛ kɔ̃̀ntì wũɔ̃,
\q1 kɛ pɛ̃ɛ̃tɛ́ mɛdɛ̀ì nwũɔ̃mɛ̀,
\q1 kɛ̀ bɛ ììkɛ̀ dò ndoii,
\q1 kɛ dò nditɑ̃́sɑ̀ɑ̀rì bɛ̀ tu dì sɑ̀fíì.
\q1
\v 8 Kɛ̀ bɛɛ̀ nɛ́ sɔ̀ùtɛ kɛ pɛ̃ɛ̃tɛ́ yɛhɑ̃ɑ̃kũɔ̃,
\q1 bɛ̀ tɛ̃́nkɛ í bɛ̀ bɑí diciènnì,
\q1 kɛ̀ bɛ kɔ̃̀mmɛ̀ dɑ̀rinɛ̀ bɛ kṹɔ̃̀,
\q1 kɛ̀ bɛ̀ kpeí kɛ dòntɛnɛ̀ idɑkperí.
\q1
\v 9 Bɛ̀ɛ̀ ku mudoò miɛkɛ,
\q1 bɛ kpɛrɛ tɔ̃ũnɛ̀mu dikònnì kùɔ bɛ̀,
\q1 mudiì bo dóntɛ́ bɛ̀,
\q1 kɛ̀ bɛ̀ɛ cĩtɛ kɛ́nkɔ̃nnɛ̀ dikònnì.
\q1
\v 10 Bɛnitipòbɛ̀ bɑ́ nɛ̀ bɛ̀ mɛ ndɔ́mɛ̀ bɛ bí,
\q1 kɛ̀ bɛ̀ɛ ì kùɔ kɛ́bénnɛ́,
\q1 kɛ̀ ìì nɑɑ́ mbɛ kó mudiì,
\q1 n nìtìbɛ̀ tɑ mɛ̀ɛ̀ fɛ̃́ṹtímɛ̀ mɛɛ̀ te.
\b
\q1
\v 11 Ti Yiɛ̀ nKuyie mmiɛkɛ kɛɛ̀ bɛ̀ yɛ̀ kɛ tontɛ́,
\q1 kɛ̀ kù còúnní ku miɛkɛ kó muhɑ̃ɑ̃́ nSiyɔ̃ɔ̃ ɛì ĩ́nkɛ̀,
\q1 kɛ̀ mù cɔ̀útɛ́ dihɛì nɛ̀ di pũkoo.
\q1
\v 12 Kutenkù kó bɛkpɑ̀ɑ̀tìbɛ̀ nɛ̀ bɛ̀ɛ̀ kó dimɑ̀ɑ̀ bo kutenkù,
\q1 òmɔù do í yɛ̃́ kɛ dò nSedisɑdɛmmu ɛì dùɔ̀ntɔbɛ̀,
\q1 o dootitɔbɛ̀, òmɔù bo tɑ Sedisɑdɛmmu ɛì kó yɛbòrɛ̀.
\q1
\v 13 Tìì mɛ̀ ntùɔ̀kɛní,
\q1 Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛ̀ɛ̀ bo Sedisɑdɛmmu,
\q1 nɛ̀ ikuɔ́ nìùbɛ̀ bɛɛ̀ kó mɛcɑɑ̀rìmɛ̀ kpɛ́í nte,
\q1 bɛmbɛ bɛ̀ɛ̀ do kɔù bɛnitisɑ̀ɑ̀bɛ̀,
\q1 kɛ cou bɛ yĩ̀ĩ̀ ndɛtetìrɛ̀.
\q1
\v 14 Bɛɛ̀ do ɔ̃ nhɑ̃́ɑ̃ntɛ icɛ miɛkɛ,
\q1 kɛ muɔ̀tì mɛnitiyĩ̀ĩ̀,
\q1 nɛ̀ dɛ kpɛ́í mbɑ́ bɛ yɑ̀ɑ̀tì í ndò ndɑ́ɑ́tí kɛ́kɑ́ɑ́kɛ́.
\q1
\v 15 Bɛ̀ do ɔ̃ɔ̃ bɛ nyɑ̀ kɛ́pĩɛ̃kɛ́ kɛ dɔ̀:
\q1 Cíɛ́tɛ́nɛ̀ bɛsĩ̀mbɛ̀ mbɛ,
\q1 cíɛ́tɛ́nɛ̀ kɛ́fũtɛ kɛ bɑ́ɑ́ bɛ̀ kɑ̀ɑ́kɛ́,
\q1 kɛ̀ bɛ̀ nhɑ̃́ɑ̃ntɛ bɑ́ bɛ̀ í mɔkɛ bɛ̀ bo cuó nkɛ̀,
\q1 kɛ̀ ibotí tɛì kɔbɛ tú:
\q1 Di bɑ́ɑ́ kɑri diɛ nti ciɛ.
\q1
\v 16 Kuyie nku mɔ́mmɔnku kuù bɛ̀ cíɛ,
\q1 kù tɛ̃́nkɛ í bɛ̀ wùó,
\q1 bɛnìtìbɛ̀ í bɛ̀ wùó nyikuɔ́ nìùbɛ̀,
\q1 bɛ̀ í bɛ̀ wùó mbɛkótíbɛ̀.
\b
\q1
\v 17 Kɛ̀ bɛ̀ nɑ̀ɑ́ nkɛ tú:
\q1 Ti nuɔ nyiì ɔ̀unɛ̀ muwéìmù,
\q1 kɛ̀ ti bɑɑ bɛ̀ɛ̀ bo ti teennɛ̀ òmɔù í kɔrìní,
\q1 kɛ̀ ti dekɛ ti dèrɛ̀ ĩ́nkɛ̀ kɛ pɑkɛ́ kɛ wéí dɛtetìrɛ̀,
\q1 kuwuɔ nkùù í yóó nɑ kɛ ti dɛɛtɛ́ ku bíɛ́kɛ̀,
\q1
\v 18 Kɛ̀ bɛ̀ mpɑkíí ti cèmmu,
\q1 bɑ́ ti í nɔ nkɛ yiɛ̀,
\q1 ti mɔ̀nnì diì ɑutɛ́ní,
\q1 ti kṹṹ mmuù duunní,
\q1 kɛ tùɔ̀kɛní kɛ dèè.
\q1
\v 19 Bɛ̀ɛ̀ ti bɛtì kɛ̀ bɛ̀ ncɑ̃ɑ̃,
\q1 kɛ́pɛ̃ɛ̃tɛ́ icĩrí dòmmɛ̀,
\q1 kɛ ti bɛ̀ti kɛ dèènko yɛtɑ̃rɛ̀ ĩ́nkɛ̀,
\q1 kɛ ti dintɛ́ dikpɑ́ɑ̀ miɛkɛ.
\q1
\v 20 Wèè do tú ti kó muwemmu,
\q1 ti Yiɛ̀ nKuyie ntɑ̃ɑ̃tɛ́ wè koò còú mmɛkùɔ̀,
\q1 kòò do bɛ fɔ̃̀tìrì bɛ̀ keú dì miɛkɛ,
\q1 ti yɛ̀mmɛ̀ do dò nti yó ndiɛku
\q1 wèè kó mɛdɛ́ɛ̀ nyibotí tɛì cuokɛ̀.
\b
\q1
\v 21 Díndi Edɔmmu ɛì kɔbɛ nyɑ̃nkunɛ̀,
\q1 díndi bɛ̀ɛ̀ bo Uusi ɛì bɛ̀ yóó di duɔ́mmu Kuyie mmiɛkɛ kó fɛbòòfɛ̀,
\q1 kɛ̀ di fɛ̀ yɑ̃̀ kɛ́muɔ́ nkɛ́dɑ́tɛ́ di yɑ̀ɑ̀tì kɛ́nfeío.
\q1
\v 22 Díndi Siyɔ̃ɔ̃ ɛì kɔbɛ di kó mɛyɛi ndèèmu,
\q1 bɛ̀ tɛ̃́nkɛ í yóó di pĩ́ nkɛ́dɔɔ̀ tidɑɑtì,
\q1 Díndi Edɔmmu ɛì kɔbɛ di kó tiyɛ̃ĩti tiì tùɔ̀kɛ,
\q1 Di yɛi mmɛɛ̀ dɑ̀tɛ́ kɛ feío.
\c 5
\s1 Bɛ̀ pɔ̀ntɛmɛ̀ Sedisɑdɛmmu kɛ̀ Isidɑyɛɛribɛ bɑ̀ɑ́ nKuyie
\q1
\v 1 Ti Yiɛ̀ nKuyie ndentɛní tìì ti tùɔ̀kɛní,
\q1 wéntɛ́ kɛ́yɑ̀ ti dimɛ̀ ifɛi.
\b
\q1
\v 2 Kɛ̀ bɛpɔ̀ɔ̀bɛ̀ tiekɛ ti tenkɛ̀,
\q1 kɛ̀ bɛkpɑ́kpɑ̀rìbɛ̀ tɑɑ̀ ti cɛ̃́ĩ.
\q1
\v 3 Kɛ̀ ti nɑɑ́ nyiciribí bɑ́ ti í mɔkɛ ti cicɛbɛ̀,
\q1 kɛ̀ ti yɔ̃bɛ̀ nɑɑ́ mbɛkúpobɛ̀.
\q1
\v 4 Ti ɔ̃ɔ̃ dontɛ́mu mɛniɛ nkɛ́yɑ̃̀,
\q1 ti ɔ̃ɔ̃ yietímu kɛ́nɑ kɛ́pɛ́tɛ́ idɛí.
\q1
\v 5 Kɛ̀ ti dootitɔbɛ̀ bo ti dɑ̀kɛ̀ sɑ̃́ɑ̃̀,
\q1 bɑ́ ti í mɔkɛ mɛom̀pùmɛ̀.
\q1
\v 6 Ti cekɛ́ ti nɔu Esibiti nwe nɛ̀ Asidii,
\q1 kɛ bo pɛ́tɛ́ kɛ́di.
\q1
\v 7 Ti yɛmbɛ̀ bɛɛ̀ cɑ̀kɛ, bɛ̀ mɛ ntɛ̃́nkɛ í kpɑɑ́,
\q1 kɛ̀ bɛ yɛi nkó tiyeti nɛ́ duò tíì kó yɛyɔ ĩ́nkɛ̀.
\q1
\v 8 Tidɑɑtì tiì nɛ́ ti bɑkɛ́,
\q1 ti mɛ nyí mɔkɛ wèè bo ti dɛɛtɛ́.
\q1
\v 9 Ti ɔ̃ nkɔ̃ti tidiitì wɑmmù kɛ́cĩnnɛ ti bɔ nyɛ,
\q1 ti ɔ̃ɔ̃ kɛ̃tɛ́ ti dootitɔbɛ̀ kó tikpɑ̀rìseuti nti dikpɑ́ɑ̀.
\q1
\v 10 Kɛ̀ dikònnì tí potɛ́,
\q1 kɛ̀ tikɔ̃̀ntì cɔ̀útɛ́ kɛdɛkɛ̀ tɛ̃mɛ̀.
\q1
\v 11 Kɛ̀ bɛ̀ pĩ̀ḿmú bɛnitipòbɛ̀ Siyɔ̃ɔ̃ ɛì kɛ duɔ́nɛ̀,
\q1 kɛ cɑ̀kɛ bɛsɑpɑ̀mbɛ̀ Sudɑɑ ɛkɛ̀ miɛkɛ.
\q1
\v 12 Kɛ pĩ̀ḿmú bɛ̀ɛ̀ do tũ nhokpɑ̀ɑ̀tì kɛ bɛ̀ nùńnɛ́ kɛ bɛ̀ kùɔ,
\q1 bɑ́ bɛ̀ í depɛ bɛ̀ɛ̀ tu bɛkótíbɛ̀.
\q1
\v 13 Kɛ tounko bɛdɑpɑ̀mbɛ̀ yɛnɑ̀kɛ̀,
\q1 kɛ̀ ibí duònɛ̀ yɛdɑtuɔ.
\q1
\v 14 Bɛkótíbɛ̀ tɛ̃́nkɛ í kɔ̀rì dihɛì kó dibòrì,
\q1 bɛ̀ kɑ̀rì dɛ̀ kɛ bekù,
\q1 kɛ̀ bɛdɑpɑ̀mbɛ̀ yóu iyiɛ mmudèmmù.
\q1
\v 15 Diwɛ̀ì tɛ̃́nkɛ í bo ti yɛ̀mmɛ̀ miɛkɛ,
\q1 kɛ̀ ti kó tihɑutì cèètɛ kɛ nɑɑ́ ndikúdɑbònnì.
\q1
\v 16 Kɛ̀ ti kó dikpɑ̀ɑ̀tìpìì òótɛ́ kɛ do kɛtenkɛ̀,
\q1 ti dɔ̀ɔ̀ mɛyɛi mmɛ kɛ tùɔ̀ti icɛ.
\q1
\v 17 Dɛɛ̀ te kɛ̀ ti mɔ nti yɛ̀mmɛ̀,
\q1 bɑ́ ti nuɔ ntɛ̃́nkɛ í wúónnɛ̀ tinɔnniɛti.
\q1
\v 18 Siyɔ̃ɔ̃ tɑ̃rì diì dɔúnko,
\q1 kɛ nɑɑ́ nyiɑ̃nkɛ́ kó ditṹnnì, i kó diciènnì.
\b
\q1
\v 19 Ti Yiɛ̀ nKuyie nfɔ̃́ɔ̃̀ bɑkɛ́ sɑ̃́ɑ̃̀,
\q1 ɑ kpɑ̀ɑ̀tìkɑ̀rì yó mbomu sɑ̃́ɑ̃̀.
\q1
\v 20 A bɑ́ɑ́ yɛ̃̀ nti kpɛ́í nsɑ̃́ɑ̃̀,
\q1 ɑ bɑ́ɑ́ ti bɔntóo ti fòmmu mumɔu.
\q1
\v 21 Ti Yiɛ̀ nKuyie nti tɛ̃́nnɛ́ní ɑ borɛ̀ kɛ̀ ti wɛ̃tɛní,
\q1 wɛ̃tɛ kɛ́ ti tɛ̃́nnɛ́ ti do dòmmɛ̀ dimɔ̀nnì.
\q1
\v 22 A ti dootóomu kɛ̀ dɛ̀ dèèɑ̀?
\q1 A miɛkɛ bo ti yɛ̀ kɛ́tontɑ́ɑ̀?