\id JOS di06.all Novembre 1998 BJ Parakou B{enin
\ide UTF-8
\h Sosuwee
\toc1 Sosuwee
\toc2 SOSUWEE
\mt1 Sosuwee
\imt1 Di mpɑ́tíri tɔ tìì nɑ́ɑǹtì
\ip Dɛ kó dipɑ́tíri tɔ tìì nɑ́ɑǹtì tu: Mɔyiisi do ku kɛ̀ Sosuwee weè sɔɔtɛ́ kɛ́niitɛ́ Isidɑyɛɛribɛ, kɛ̀ bɛ̀ɛ dokɛ́ kɛ́fietɛ Kɑnnɑhɑ̃ɑ̃ kó kɛtenkɛ̀ Kuyie mbɛ̀ duɔ́ nkɛ̀. Kuyie nkuù do dɔ̀ɔ̀ tidiɛtì bɛ̀ dokùnɛ̀ dìì mɔ̀nnì Kɑnnɑhɑ̃ɑ̃ kɔbɛ kɛ̀ bɛ̀ɛ bɛ̀ nɑ.
\ip Yɛtɑnyɔ yɛdiɛyɛ̀ yɛ̀ɛ̀ bo dɛ kó dipɑ́tíri miɛkɛ yɛɛ̀ tú: Bɛ̀ sèntɛ́mɛ̀ Suditɛ̃ɛ̃. Bɛ̀ dokɛ́nɛ̀mɛ̀ Aii ɛì kɔbɛ. Bɛ̀ tɑ̃ɑ̃mɛ̀ tɛ́tɛ́ kɛ́totí kɛtenkɛ̀ Kuyie mbɛ̀ duɔ́ nkɛ̀. Kuyie nwɛ̃̀tɛ kɛ èntɛnɛ̀ mɛtɑummɛ̀ kù dɔ̀ɔ̀nɛ̀mɛ̀ ku nìtìbɛ̀. Sosuwee bɛ̀ tìímmɛ̀ kɛ dɔ̀: Bɛ̀ɛ tɑ̃ɑ̃tɛ́ bɛ̀ dɔ́ kɛ́tũnnɛ wè, bɛmɔu kɛ̀ bɛ̀ dɔ̀ bɛ̀ dɔ́ kɛ́tũnnɛ Kuyie nku.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Bɛ̀ bɑ̀ɑ́tímɛ̀ kɛ bo tɑ dihɛì Kuyie mbɛ̀ duɔ́ ndì 1-5
\io1 2. Bɛ̀ dokɛ́mɛ̀ kɛ fìètɛ dihɛì 6-12
\io1 3. Isidɑyɛɛribɛ kó iwuɔ ntotɛ́mɛ̀ kɛtenkɛ̀ 13-22
\io1 4. Sosuwee nɑ́ɑǹtì sɔnti nɛ̀ o kṹṹ 23-24
\c 1
\s1 Sosuwee nimɛ̀ Isidɑyɛɛribɛ
\p
\v 1 Mɔyiisi ti Yiɛ̀ nKuyie nkóo tɔ̃ntì do ku, kɛ̀ ti Yiɛ̀ nKuyie nnɑ́kɛ́ o kóo tɔ̃ntì Nunni birɛ Sosuwee kɛ dɔ̀: 
\v 2 Mɔyiisi n kóo tɔ̃ntì kumu, ítɛ́ nɛ̀ n nìtìbɛ̀ kɛ̀ di séntɛ́ kukó nSuditɛ̃ɛ̃ kɛ́tɑ dihɛì n duɔ́ ndì Isidɑyɛɛribɛ. 
\v 3 Di nɑɑ̀cɛ̀tɛ̀ bo nɑ kɛ̀ɛ̀ tenkɛ̀ n kɛ̀ ndi duɔ́mmu, kɛ́ndònnɛ̀ n tì nɑ̀kɛ́mɛ̀ Mɔyiisi. 
\v 4 Di kó kɛtenkɛ̀ yóó ketɛ́ dikpɑ́ɑ̀ mɑ̀nku nku kɛ́túótɛ́nɛ̀ ditɑ̃rì Dimɑɑ, kɛ́dítɛ́ kukó ndiɛkù Efɑdɑti Itiibɛ kó kɛtenkɛ̀ kɛmɔu, kɛ́tuɔkɛnɛ̀ dɑ̀mɛ́ɛ̀rì diɛwè Mɛditedɑndee diyiè tɑɑ̀ kɛ̀ɛ̀ bíɛ́kɛ̀. 
\v 5 Òmɔù í yóó dɑ dɑ́ɑ́tí ɑ fòmmu mumɔu, n yó ndɑ bonɛ̀mu n do bonɛ̀ mɛ̀ɛ̀ botí Mɔyiisi. N yí yóó dɑ bútínnɛ́, n yí yóó dɑ dootóo. 
\v 6 Cómmú kɛ́tɛ̃ĩ́ nkɛ́yɑ́úkùnnɛ ɑ kɔ̃̀ntì, fɔ̃́ɔ̃̀ yóó tɑnnɛ́ bɛ nnìtìbɛ̀ dihɛì n do yɛ̃ n yóó duɔ́ ndì bɛ yɛmbɛ̀, kɛ̀ bɛ̀ɛ dì tiekɛ. 
\v 7 Fɔ̃́ ncɛ̃́nkɛɛ cómmú kɛ́tɛ̃ĩ́, nkɛ́ntũ n kóo tɔ̃ntì Mɔyiisi dɑ duɔ́ nyìì kuɔ́, ɑ bɑ́ɑ́ wɛ̃ɛ̃tɛ ɑ bɑkù cɑ̃̀nku yoo kuyoú. Mɛm̀mɛ ɑ tɔ̃mmú mumɔu bo nkérímɛ̀ dɛ ììkɛ̀. 
\v 8 Ikuɔ́ pɑ́tíri dii mbɑ́ɑ́ dɛ́tɛ́nɛ̀ ɑ nùù, ɑ́ ndì kɑ̀ɑ̀ kuyie nnɛ̀ kɛyènkɛ̀ kɛ tũ ntì wɑ̃̀ri kɛ yɛ̃mmɛ̀. Mɛm̀mɛ ɑ tɔ̃mmú mumɔu bo nkérímɛ̀ dɛ ììkɛ̀ kɑ̀ɑ dɔ̀ɔ̀ri dɛ̀ nyíé. 
\v 9 N dɑ nɑ̀kɛ́mu kɛ tú cómmú kɛ́tɛ̃ĩ́ nkɛ́yɑ́úkùnnɛ ɑ kɔ̃̀ntì, ɑ bɑ́ nyĩɛ̃̀kù kɑ̀ɑ kɔ̃m̀bùɔ̀tì duò. Mí nhɑ Yiɛ̀ nKuyie n yó ndɑ bonɛ̀mu ɑ tɔ̃mmú mumɔu miɛkɛ.
\s1 Sosuwee duɔ́mmɛ̀ kɛ̀ bɛ̀ bo séntɛ́ Suditɛ̃ɛ̃
\p
\v 10 Kɛ̀ Sosuwee nɑ́kɛ́ Isidɑyɛɛribɛ kó bɛkótíbɛ̀ kɛ dɔ̀: 
\v 11 Cennɛ̀ kɛ́nɑ́kɛ́ bɛnìtìbɛ̀ kɛ̀ bɛ̀ɛ bɑ́ɑ́tí, kɛ́wɑɑ́ ntidiitì. Yɛwe yɛ̀tɑ̃ɑ̃ti miɛkɛ di yóó séntɛ́mu Suditɛ̃ɛ̃ kɛ́tɑ dihɛì di Yiɛ̀ nKuyie nkùù di te kù di duɔ́ ndì. 
\v 12 Kɛ̀ Sosuwee nɑ́kɛ́ Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè kɛ dɔ̀: 
\v 13 Dentɛnɛ̀ní ti Yiɛ̀ nKuyie nkóo tɔ̃ntì Mɔyiisi do di nɑ̀kɛ́ tì kɛ dɔ̀: Di Yiɛ̀ nKuyie ndi duɔ́mmu di kó kɛtenkɛ̀ Suditɛ̃ɛ̃ yɑ́ɑ̀ diyiè yìɛ̀ní kɛ̀ɛ̀ bíɛ́kɛ̀, kɛ di ompùnnɛ. 
\v 14 Di pobɛ̀ nɛ̀ di bí dɛ yó nkpɑɑ́ diɛ ndɛ Mɔyiisi di duɔ́ nkɛ̀ɛ̀ tenkɛ̀, kɛ̀ dí bɑ́ɑ́tí kɛ́nɛinɛ̀ di tebìí kɛ̀ dí séntɛ́ kukó nkɛ̀ dí bɛ̀ teennɛ̀ dikpɑ̀nnì, 
\v 15 kɛ́mbɑɑ̀nɛ̀ ti Yiɛ̀ nKuyie mbo bɛ̀ duɔ́mmɛ̀ bɛ kó kɛtenkɛ̀ kù di duɔ́ mmɛ̀ɛ̀ botí di kɔkɛ, kɛ́deè kɛ̀ dí wɛ̃tɛní kɛ́kɑri di kɔkɛ ti Yiɛ̀ nKuyie nkóo tɔ̃ntì Mɔyiisi do di duɔ́ nkɛ̀ kukó nSuditɛ̃ɛ̃ kó diyɑ́ɑ̀ diyiè yìɛ̀ní kɛ̀ɛ̀ bíɛ́kɛ̀.
\p
\v 16 Kɛ̀ bɛ̀ dɔ̀: Ti yiémmu ɑ ti nɑ̀kɛ́ tì timɔu, kɑ̀ɑ yĩ tí kɔtɛ kɛ̀ɛ̀ bíɛ́kɛ̀ tí kɔtɛ. 
\v 17 Ti yó nyiemmu ɑ kpɛti ti do yíé mmɛ̀ɛ̀ botí Mɔyiisi kpɛti ti Yiɛ̀ nKuyie nní ndɑ bonɛ̀ kù do bonɛ̀mɛ̀ Mɔyiisi. 
\v 18 Kòò mɔù yetɛ ɑ kpɛti bɛ̀ɛ ò kùɔ. Cómmú kɛ́tɛ̃ĩ́ nkɛ́yɑ́úkùnnɛ ɑ kɔ̃̀ntì.
\c 2
\s1 Sosuwee tɔ̃mmɛ̀ bɛnìtìbɛ̀ bɛ̀dɛ́bɛ̀ kɛ̀ bɛ̀ bo pɑɑtɛ́ Sedikoo
\p
\v 1 Kɛ̀ Nunni birɛ Sosuwee tɔ̃ mbɛnìtìbɛ̀ bɛ̀dɛ́bɛ̀ kɛ̀ bɛ̀ bo kɔtɛ kɛ́bɑ́nnɛ́ kɛ́pɑɑtɛ́ dihɛì. Kɛ̀ bɛ̀ɛ ítɛ́ Sitimmu kɛ́kɔtɛ Sedikoo kɛ́bɑ́tɛ́ onitipòkù mɔù wèè dɔuti dɔutinɛ̀ bɛnitidɑɑbɛ̀ o cĩ́ɛ̃̀tɛ̀ kɛ̀ bɛ̀ ò tu Dɑhɑbu, kɛ bo yié. 
\v 2 Kɛ̀ bɛ̀ɛ nɑ́kɛ́ Sedikoo kóo kpɑ̀ɑ̀tì kɛ dɔ̀: Isidɑyɛɛribɛ mɑbɛ̀ tɑnní diɛ nkɛyènkɛ̀ kɛ bo pɑɑtɛ́ dihɛì. 
\v 3 Kòo kpɑ̀ɑ̀tìi tɔ̃ mbɛnìtìbɛ̀ Dɑhɑbu borɛ̀ kɛ dɔ̀: Bɛnìtìbɛ̀ bɛ̀ɛ̀ kɔ̀tɛní ɑ cĩ́ɛ̃̀tɛ̀, bɛ̀ kɔ̀tɛní kɛ bo pɑɑtɛ́ dihɛì ndi. Dennɛní bɛ!
\p
\v 4 Kɛ̀ Dɑhɑbuu sɔnnɛ dɛ kó bɛnìtìbɛ̀ bɛdɛ́ kɛ dɔ̀: Bɛ̀ kɔ̀tɛnímu yie n cĩ́ɛ̃̀tɛ̀ m mɛ nyí yɛ̃́ bɛ̀ yɛ̀nní kɛ̀. 
\v 5 Bɛ̀ yɛ̀ dɛ̀ urikɛ dìì mɔ̀nnì ndi kɛ̀ bɛ̀ kpetí yɛcɑ̀kɛ̀, n yí yɛ̃́ bɛ̀ kɔ̀tɛ kɛ̀ɛ̀ bíɛ́kɛ̀. Tũnnɛnɛ̀ bɛ di yóó bɛ̀ nìntɛmu.
\p
\v 6 Kɛ yɛ̃́ kòò bɛ̀ dèe ntimùmmùntì nti, kɛ bɛ̀ sɔ̀nnɛ titɔ̃̀ntì mɑtì miɛkɛ ò dɔ̀ɔ̀ tì. 
\v 7 Kòo kpɑ̀ɑ̀tì tɔ̃nní bɛ̀ɛ yɛ̀, kɛ̀ bɛ̀ɛ kpetínnɛ́ dihɛì kó dibòrì, kɛ̀ bɛ̀ɛ bɛ̀ tũ̀nnɛ kɛ́yɛ̀ Suditɛ̃ɛ̃ tipètì borɛ̀ diyɛ̀rì. 
\v 8 Kɛ̀ dɛ kó bɛnìtìbɛ̀ nsɔri timùmmùntì ĩ́nkɛ̀, bɛ̀ mu nyí nduɔ́ kɛ̀ Dɑhɑbuu dekoo bɛ borɛ̀, 
\v 9 kɛ́ bɛ̀ nɑ̀kɛ́ kɛ dɔ̀: N yɛ̃́mu kɛ tú ti Yiɛ̀ nKuyie ndi duɔ́ ndi nhɛì. Bɛnìtìbɛ̀ bɛmɔu kèè di kpɛ́í nkɛ̀ kufɔ̃wɑɑ́ nkuù bɛ̀ ɑutɛ́ kɛ̀ bɛ̀ kɔ̃̀ntì ɑu. 
\v 10 Ti kèèmu di yɛ̀nní Esibiti kɛ̀ di Yiɛ̀ nKuyie ndɔ̀ɔ̀ dɛ̀, kɛ kèétɛ́ tipèntì kóo dɑ̀mɛ́ɛ̀rì kɛ̀ dɛ̀ kpeí kɛ̀ di sèńtɛ́, kɛ kèè di kùɔmɛ̀ Amɔriibɛ kó bɛkpɑ̀ɑ̀tìbɛ̀ bɛdɛ́ Sionni nɛ̀ Ɔku kukó Suditɛ̃ɛ̃ kó diyɑ́ɑ̀ kɛ bɛ̀ pɔ̀ntɛ. 
\v 11 Ti dɛ̀ kèèmu kɛ̀ ti kɔ̃m̀bùɔ̀tì duò, òmɔù tɛ̃́nkɛ í mɔkɛ dikɔ̃m̀bùɔ̀ kɛ bo di bɑɑo. Di Yiɛ̀ nKuyie ndi tũ nkù kuù bɑkɛ́ kɛĩ́nkɛ̀ nɛ̀ kɛtenkɛ̀. 
\v 12 N di bɑ́ɑmmu kɛ tú di yú Kuyie nyètìrì kɛ dɔ̀ di yó n dɔɔ̀ mɛsɑ̀ɑ̀ n di dɔ̀ɔ̀ mɛ̀, kɛ́ m bɛnkɛ dɛ kó mɛcɑnnimɛ̀. 
\v 13 Dí bɛ́i nweti weti kɛ dɔ̀ di yóó yóu n cicɛ nɛ̀ n yɔ̃ nɛ̀ n yɔ̃fũ̀ɔ̃̀ kɔbɛ nɛ̀ bɛ cɛ̃́ĩ kɔbɛ bɛnitidɑɑbɛ̀ nɛ̀ bɛnitipòbɛ̀.
\p
\v 14 Kɛ̀ dɛ kó bɛnìtìbɛ̀ dɔ̀: Ti bo kúmɛ̀ bo ntɔ̃ũ kɛ̀ fɔ̃́ɔ̃̀ sɑ̀ɑ̀ í ti dɑ́ɑ. Kɛ̀ ti Yiɛ̀ nKuyie nti duɔ́ ndihɛì ti yóó dɑ dɔɔ̀mu mɛsɑ̀ɑ̀.
\s1 Dɑhɑbu sɔ̀nnɛmɛ̀ Sosuwee tɔ̃ mbɛ̀
\p
\v 15 Kɛ̀ Dɑhɑbuu bɛ̀ cũ̀ũnnɛ̀ kuhɔ̃ũ tɛbòtɛ̀. O cĩ́ɛ̃̀tɛ̀ do cómmú dihɛì kó kuduotí ĩ́nkɛ̀ nkɛ. 
\v 16 Kòo bɛ̀ nɑ̀kɛ́ kɛ dɔ̀: Kɔtɛnɛ̀ ditɑ̃rì bíɛ́kɛ̀ kɛ́nsɔri kɛ dɔ̀ yɛwe yɛ̀tɑ̃ɑ̃ti. Kɛ̀ bɛ̀ɛ wɛ̃tɛní kɛ̀ di nɛ́ nɑ kɛ́kétɛ́, kɛ̀ di kètɛ́ di yɑ̀ɑ̀ bo bɛ̀ conɛ̀.
\p
\v 17 Kɛ̀ dɛ kó bɛnìtìbɛ̀ dɔ̀: Ntɛ ɑ yóó dɔɔ̀mɛ̀, kɛ̀ tí nɑ kɛ́ dɑ dɔɔ̀ ti yu Kuyie nyètìrì kɛ bɛ́i ntì. 
\v 18 Kɛ̀ ti tɑtiní dìì mɔ̀nnì dihɛì ɑ́ núnnɛ́ mupɑ̀ɑ̀konwũɔ̃́ ntɛbòtɛ̀ ɑ ti cũ̀ũ ntɛ̀. Kɑ̀ɑ dèè ɑ́ tíí nhɑ kɔbɛ bɛmɔu ɑ cĩ́ɛ̃̀tɛ̀ miɛkɛ. A cicɛ nɛ̀ ɑ yɔ̃, ɑ yɔ̃fũ̀ɔ̃̀ kɔbɛ nɛ̀ ɑ cĩ́ɛ̃̀tɛ̀ kɔbɛ bɛnitidɑɑbɛ̀ nɛ̀ bɛnitipòbɛ̀. 
\v 19 Kɑ̀ɑ cĩ́ɛ̃̀tɛ̀ kou mɔù yɛ̀, kɛ̀ ti ò kùɔ dɛ̀ tu o kó mɛyɛi mmɛ, kɛ̀ ti mɛ nkùɔ òmɔù ɑ cĩ́ɛ̃̀tɛ̀ miɛkɛ dɛ̀ tu tíì kó mɛyɛi. 
\v 20 Kɑ̀ɑ mɛ nti dɑ́ɑ, ti tɛ̃́nkɛ bɑ́ɑ́ dɑ dɔɔ̀ ti yu Kuyie nyètìrì kɛ bɛ́i ntì. 
\v 21 Kòò dɔ̀: N yiemmu di bɛ́i ntì.
\p Kɛ̀ bɛ̀ɛ ò cɑu nkɛ́ítɛ́, kòo pɑ̃̀nkɛɛ núnnɛ́ mupɑ̀ɑ̀konwũɔ̃́ ntɛbòtɛ̀. 
\v 22 Kɛ̀ dɛ kó bɛnìtìbɛ̀ɛ kɔtɛ kɛ́nsɔri ditɑ̃rì ĩ́nkɛ̀ kɛ dɔ̀ yɛwe yɛ̀tɑ̃ɑ̃ti, bɛ̀ɛ̀ do bɛ̀ tũ̀nnɛ kɛ̀ bɛ̀ɛ bɛ̀ wɑmmú kɛ́mɔ́ntɛ́ kɛ́wɛ̃tɛní. 
\v 23 Kɛ̀ dɛ kó bɛnìtìbɛ̀ bɛdɛ́ɛ cútɛ́ní ditɑ̃rì, kɛ́séntɛ́ kukó nSuditɛ̃ɛ̃, kɛ́wɛ̃tɛ Nunni birɛ Sosuwee borɛ̀ kóò nɑ̀kɛ́ dɛ̀ɛ̀ dɔ̀ɔ̀. 
\v 24 Kɛ dɔ̀: Ti Yiɛ̀ nKuyie mmɛ̀nkɛ ti duɔ́mmu dɛ kó kɛtenkɛ̀, bɛ̀ ti yɑ̀ kɛ bɛ kɔ̃̀ntì ɑumu bɛmɔu.
\c 3
\s1 Isidɑyɛɛribɛ sèńtɛ́mɛ̀ kukó Suditɛ̃ɛ̃
\p
\v 1 Mɛm̀mɛ Sosuwee nɛ̀ Isidɑyɛɛribɛ kɛ̀ bɛ̀ɛ ítɛ́ Sitimmu dikṹnweńnì sɛ̀ì kɛ́bɑ́tɛ́ Suditɛ̃ɛ̃ kɛ́nyié nkɛ bɑɑ̀nɛ̀ bɛ̀ bo séntɛ́mɛ̀. 
\v 2 Yɛwe yɛ̀tɑ̃ɑ̃ti kó difɔ̃nkúò kɛ̀ Isidɑyɛɛribɛ kó bɛkótíbɛ̀ɛ ce mbɛ kɑrì dimɔu, 
\v 3 kɛ́nɑ́kɛ́ bɛnìtìbɛ̀ kɛ dɔ̀: Kɛ̀ di yɑ̀ kɛ̀ ikuɔ́ nìùbɛ̀ Defiibɛ tùótɛ́ ti Yiɛ̀ nKuyie ntɑummɛ̀ tɔu kɛ kètɛ́, dí tũnnɛ. 
\v 4 Diì yó nni kɛ̀ di tũ nkɛ yɛ̃́ di í yɛ̃́mɛ̀ kucɛ. Di bɑ́ ndì tɔ̀kɛ́nɛ̀, dí dì bɔ mmɛfíè nkɛ̀ mɛ̀ mbo cìdòmɛ́tìrì òmɑ́ɑ̀.
\p
\v 5 Kɛ̀ Sosuwee nɑ́kɛ́ bɛnìtìbɛ̀ kɛ dɔ̀: Dí wénkùnnɛ dimɑ́ɑ̀, ti Yiɛ̀ nKuyie nnɑɑ yóó dɔɔ̀ tidiɛtì kpɛrɛ ndɛ di cuokɛ̀.
\p
\v 6 Díndi ikuɔ́ nìùbɛ̀, túótɛ́nɛ̀ Kuyie ntɑummɛ̀ tɔu kɛ́niitɛ́, kɛ̀ bɛ̀ɛ dì tùótɛ́ kɛ́niitɛ́. 
\v 7 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: M bo dɑ dɛ́úkùnnɛ yíe nyIsidɑyɛɛribɛ bɛmɔu ììkɛ̀ kɛ̀ bɛ̀ɛ bɑntɛ́ n dɑ bonɛ̀mɛ̀ n do bonɛ̀ mɛ̀ɛ̀ botí Mɔyiisi. 
\v 8 Kɛ̀ kùu yíɛ́ kɛ dɔ̀: Nɑ́kɛ́ ikuɔ́ nìùbɛ̀ bɛ̀ɛ̀ tɔ Kuyie ntɑummɛ̀ tɔu, kɛ̀ bɛ̀ tɑ dìì mɔ̀nnì Suditɛ̃ɛ̃ bɛ̀ ncómmú mɛniɛ mmiɛkɛ.
\p
\v 9 Kɛ̀ Sosuwee yú bɛnìtìbɛ̀ kɛ dɔ̀: Tɔ́ɔ́nnɛ̀nní kɛ́keè ti Yiɛ̀ nKuyie nyɛ̃ mmù, 
\v 10 kɛ́nɑ́kɛ́ bɛnìtìbɛ̀ kɛ dɔ̀: Nɛ̀ diɛ mmiɛkɛ nkɛ di yóó bɑntɛ́mɛ̀ ti Yiɛ̀ nKuyie ndi bonɛ̀mɛ̀, kɛ yóó bɛti Kɑnnɑhɑ̃ɑ̃ kɔbɛ nɛ̀ Itiibɛ nɛ̀ Efiibɛ nɛ̀ Pedisiibɛ nɛ̀ Kidikɑsiibɛ, Amɔriibɛ nɛ̀ Sebusiibɛ. 
\v 11 Kuyie nkuù te ikuɔ́ nìùbɛ̀ kɛtenkɛ̀ kɛmɔu, bɛ̀ɛ̀ tɔ ku tɑummɛ̀ tɔu bɛɛ̀ yóó niitɛ́ kɛ́tɑ Suditɛ̃ɛ̃ miɛkɛ. 
\v 12 Tɑ̃ɑ̃tɛ́nɛ̀ Isidɑyɛɛribɛ botí tɛpíítɛ̀ nɛ̀ idɛ́ì miɛkɛ onìtì òmɑ́ɑ̀ òmɑ́ɑ̀. 
\v 13 Ikuɔ́ nìùbɛ̀ bɛ̀ɛ̀ tɔ ti Yiɛ̀ nKuyie nkùù bɑkɛ́ kɛtenkɛ̀ nɛ̀ kɛĩ́nkɛ̀ ku tɑummɛ̀ tɔu, bɛ̀ bo nyóó nɑ dìì mɔ̀nnì kukó nSuditɛ̃ɛ̃ kó mɛniɛ nkɛ̀ mɛ̀ pɑ̃̀nkɛ kèétɛ́mu, mɛ̀ɛ̀ do pũɔ̃̀ ndɛ fũ̀ɔ̃̀ kɛ̀ mɛ̀ mpɛ̃nkù, kɛ̀ mɛ̀ɛ̀ do pũɔ̃̀nní kɛ̀ mɛ̀ɛ cómmú só kɛ́pénnɛ́.
\p
\v 14 Kɛ̀ bɛnìtìbɛ̀ɛ ítɛ́ kɛ bo séntɛ́ Suditɛ̃ɛ̃, ikuɔ́ nìùbɛ̀ bɛ̀ɛ̀ tɔ Kuyie ntɑummɛ̀ tɔu kɛ̀ bɛ̀ɛ niitɛ́ dɛ ììkɛ̀. 
\v 15 Dɛ̀ do tú mudidɛ̀ì mɔ̀nnì ndi, kɛ sɔ̃́ nSuditɛ̃ɛ̃ tɑ mɛniɛ nkɛ píɛ, ikuɔ́ nìùbɛ̀ bɛ̀ɛ̀ tɔ Kuyie ntɑummɛ̀ tɔu kɛ̀ bɛ̀ɛ nɑ mɛniɛ. 
\v 16 Kɛ̀ mɛ̀ɛ cómmú kukó nyuu dɛdɛ́tirɛ̀ Atɑ̃ɑ̃ Sɑditɑ̃ɑ̃ bíɛ́kɛ̀ kɛ̀ mɛtɛ̃mɛ̀ɛ pɔ̃ntɛ́ kɛ́yúnnɛ́ dɑ̀mɛ́ɛ̀rì mukɔ́kúɔ́ nkou bíɛ́kɛ̀ tɛdɔntɛ̀ Adɑbu kó dikpɑ́ɑ̀, kɛ̀ Isidɑyɛɛribɛɛ nɑ dɛkperɛ̀ kɛ́séntɛ́ kɛ́nwetí Sedikoo. 
\v 17 Kɛ̀ ikuɔ́ nìùbɛ̀ ncómmú kukó ncuokɛ̀ kɛ tɔ Kuyie ntɑummɛ̀ tɔu, kɛ̀ Isidɑyɛɛribɛ bɛmɔuu yɑ̀ɑ séntɛ́nɛ̀ diyɑ́ɑ̀ tɛrì.
\c 4
\s1 Bɛ̀ fìí nyɛ̀ɛ̀ tɑ̃́rɛ̀ Suditɛ̃ɛ̃ miɛkɛ kɛ bo ndenniní
\p
\v 1 Isidɑyɛɛribɛ sèńtɛ́ dìì mɔ̀nnì Suditɛ̃ɛ̃ kɛ́deè, kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: 
\v 2 Tɑ̃ɑ̃tɛ́nɛ̀ Isidɑyɛɛribɛ botí tɛpíítɛ̀ nɛ̀ idɛ́ì miɛkɛ onìtì òmɑ́ɑ̀ òmɑ́ɑ̀. 
\v 3 Kɛ̀ bɛ̀ɛ tɑ kukó ncuokɛ̀ ikuɔ́ nìùbɛ̀ còḿmú dɛ̀, kɛ́wɑɑ́ nyɛtɑ̃́rɛ̀ tɛpíítɛ̀ nɛ̀ yɛ̀dɛ́ɛ̀ kɛ́ntɔ kɛ́dɔú ndi yóó yié ndɛ̀.
\p
\v 4 Kɛ̀ Sosuwee yú bɛnìtìbɛ̀ tɛpíítɛ̀ nɛ̀ bɛ̀dɛ́bɛ̀ bɛ̀ tɑ̃ɑ̃tɛ́ bɛ̀ Isidɑyɛɛribɛ botí miɛkɛ kɛ́ bɛ̀ nɑ̀kɛ́ kɛ dɔ̀: 
\v 5 Tɑnnɛ̀ kukó nSuditɛ̃ɛ̃ cuokɛ̀ bɛ̀ còḿmúnɛ̀ dɛ̀ ti Yiɛ̀ nKuyie ntɑummɛ̀ tɔu, bɑ́ wè kòo buutɛ́ ditɑ̃́rì, Isidɑyɛɛribɛ botí mɑ̀mɛ̀. 
\v 6 Kɛ̀ yɛ̀ ḿbo, kɛ̀ di bí di bekɛ diyiè mɑrì kɛ tú: Yɛtɑ̃́rɛ̀ yiɛ ǹtu bɑ? Di dɔ̀: 
\v 7 Ti do senti Suditɛ̃ɛ̃ nwe nɛ̀ ti Yiɛ̀ nKuyie ntɑummɛ̀ tɔu kɛ̀ mɛniɛ ncómmú, dɛ kó yɛtɑ̃́rɛ̀ yó mbomu sɑ̃́ɑ̃̀ kɛ denniní Isidɑyɛɛribɛ Kuyie ndɔ̀ɔ̀ tìì diɛtì.
\p
\v 8 Kɛ̀ Isidɑyɛɛribɛɛ dɔɔ̀ Sosuwee bɛ̀ nɑ̀kɛ́ tì, kɛ́wɑɑ́ nyɛtɑ̃́rɛ̀ tɛpíítɛ̀ nɛ̀ yɛ̀dɛ́ɛ̀ bɛ botí mɑ̀mɛ̀ kɛ́ntũ nti Yiɛ̀ nKuyie nnɑ̀kɛ́mɛ̀ Sosuwee kɛ̀ bɛ̀ nyɛ̀ tɔ kɛ́dɔú mbɛ̀ yóó yié ndɛ̀. 
\v 9 Kɛ̀ Sosuwee fíí nyɛtɑ̃́rɛ̀ tɛyɛ̀ tɛpíítɛ̀ nɛ̀ yɛ̀dɛ́ɛ̀, ikuɔ́ nìùbɛ̀ do tɔ ti Yiɛ̀ nKuyie ntɑummɛ̀ tɔu kɛ cómmúnɛ̀ dɛ̀, kɛ̀ yɛ̀ kpɑɑ́ dɛ̀ bo nɛ̀ yíenní.
\p
\v 10 Ikuɔ́ nìùbɛ̀ bɛ̀ɛ̀ tɔ Kuyie ntɑummɛ̀ tɔu kɛ̀ bɛ̀ ncómmú kukó ncuokɛ̀, kɛ̀ ti Yiɛ̀ nKuyie ndo duɔ́ nkɛ̀ Sosuwee bɛ̀ nɑ̀kɛ́ tì timɔu dɔɔ̀. Sosuwee do tũ̀nnɛ Mɔyiisi ò nɑ̀kɛ́ tì nti timɔu. Mɛm̀mɛ kɛ̀ bɛnìtìbɛ̀ bɛmɔuu séntɛ́ kukó mmɛcɑ̃ɑ̃. 
\v 11 Bɛ̀ sèńtɛ́ dìì mɔ̀nnì bɛmɔu kɛ deè kɛ̀ ikuɔ́ nìùbɛ̀ɛ niitɛ́ bɛ ììkɛ̀ nɛ̀ ti Yiɛ̀ nKuyie ntɑummɛ̀ tɔu. 
\v 12 Kɛ̀ Dubɛnniibɛ nɛ̀ Kɑdiibɛ nɛ̀ Mɑnnɑsee kɔbɛ dikéè kɛ̀ bɛ̀ɛ niitɛ́ fɛkpɑ̀rìnɑfɛ ììkɛ̀ kɛ́ntũ Mɔyiisi do bɛ̀ nɑ̀kɛ́mɛ̀. 
\v 13 Kɛ̀ bɛhɑ̃ɑ̃pɔ̀mbɛ̀ sikɔupípísìnɑ̀ɑ̀ (40000) bɛ̀ɛ̀ do bɑɑti tikpɑ̀rìnɛntì mudoò kpɛti. Kɛ̀ bɛ̀ɛ séntɛ́ kukó nSuditɛ̃ɛ̃ kɛ́nwetí kubiriku kɛ̀ ti Yiɛ̀ nKuyie mbɛ̀ bonɛ̀. 
\v 14 Dɛ kó diyiè kɛ̀ ti Yiɛ̀ nKuyie ndɛ́úkùnnɛ Sosuwee Isidɑyɛɛribɛ bɛmɔu ììkɛ̀, kɛ̀ bɛ̀ɛ ò yɔ̀tɛ kɛ́ nhò dé o fòmmu mumɔu miɛkɛ bɛ̀ do dé mɛ̀ɛ̀ botí Mɔyiisi.
\p
\v 15 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: 
\v 16 Duɔ́ ndinùù ikuɔ́ nìùbɛ̀ bɛ̀ɛ̀ tɔ Kuyie ntɑummɛ̀ tɔu kɛ̀ bɛ̀ɛ yɛ̀ Suditɛ̃ɛ̃.
\p
\v 17 Kòo bɛ̀ duɔ́ ndinùù. 
\v 18 Ikuɔ́ nìùbɛ̀ bɛ̀ɛ̀ tɔ ti Yiɛ̀ nKuyie ntɑummɛ̀ tɔu bɛ̀ yɛ̀nní dìì mɔ̀nnì kɛ́nɑ dikonnɛ́bɛ̀nnì, kɛ̀ mɛniɛ nwɛ̃tɛ kɛ́pɔ̃ntɛ́ mɛ̀ do dòmmɛ̀ kɛ̀ kukó nSuditɛ̃ɛ̃ píɛ. 
\v 19 Bɛ̀ do sèńtɛ́ kukó nSuditɛ̃ɛ̃ otɑ̃̀nkù ketiwè yiè píínnì ndi, kɛ́bɑ́tɛ́ Kidikɑɑdi Sedikoo fɔ̃nkúò.
\p
\v 20 Kɛ̀ Sosuwee fíí nKidikɑɑdi yɛtɑ̃́rɛ̀ tɛpíítɛ̀ nɛ̀ yɛ̀dɛ́ɛ̀ bɛ̀ do tùótɛ́ yɛ̀ kukó nSuditɛ̃ɛ̃ miɛkɛ. 
\v 21 Ò dèè mɛm̀mɛ kɛ́nɑ́kɛ́ Isidɑyɛɛribɛ kɛ dɔ̀: Kɛ̀ di bí di bekɛ diyiè mɑrì kɛ tú bɑ nkó yɛtɑ̃́rɛ̀ nyɛ? 
\v 22 Dí ì nɑ̀kɛ́ kɛ dɔ̀: Ti do senti kukó nSuditɛ̃ɛ̃ nwe kɛ̀ mɛniɛ ncómmú kɛ̀ tí nɑ dɛkperɛ̀ kɛ́séntɛ́. 
\v 23 Ti Yiɛ̀ nKuyie nkuù do còńnɛ́ kukó nSuditɛ̃ɛ̃ kó mɛniɛ nkɛ̀ dɛ̀ɛ kpeí kɛ̀ tí séntɛ́, kù do dɔ̀ɔ̀ mɛ̀ɛ̀ botí tipèntì kóo dɑ̀mɛ́ɛ̀rì kɛ̀ tí séntɛ́. 
\v 24 Kù dɔ̀ɔ̀ mɛmmɛ kɛ̀ bɛnìtìbɛ̀ bɛmɔu bo bɑntɛ́ kù kpeńnìmɛ̀ mmɛ, kɛ̀ tí nkù dé sɑ̃́ɑ̃̀.
\c 5
\s1 Amɔriibɛ kèèmɛ̀ Isidɑyɛɛribɛ kpɛ́í nkɛ̀ kufɔ̃wɑɑ́ mbɛ̀ pĩ
\p
\v 1 Kɛ̀ Amɔriibɛ kpɑ̀ɑ̀tìbɛ̀ bɛ̀ɛ̀ bo Suditɛ̃ɛ̃ diyiè tɑɑ̀ kɛ̀ɛ̀ bíɛ́kɛ̀ nɛ̀ Kɑnnɑhɑ̃ɑ̃ kɔbɛ bɛ̀ɛ̀ bo dɑ̀mɛ́ɛ̀rì tɑkɛ́, kɛ̀ bɛ̀ɛ keè ti Yiɛ̀ nKuyie ncòńnɛ́mɛ̀ kukó nSuditɛ̃ɛ̃ kó mɛniɛ, kɛ̀ Isidɑyɛɛribɛ sèńtɛ́, kɛ̀ kufɔ̃wɑɑ́ mbɛ̀ ɑutɛ́, bɛ̀ í ndɑ̀ɑ́tí kɛ bo bɑɑo Isidɑyɛɛribɛ.
\s1 Bɛ̀ cɑ̃mmúmɛ̀ Isidɑyɛɛribɛ bɛ̀ piɛ́ bɛ̀ kucɛ miɛkɛ
\p
\v 2 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: Dɔɔ̀ mɛtɑ̃́ntɛ̀nsiɛ̀ nkɛ́cɑ̃mmú Isidɑyɛɛribɛ bɛ̀ piɛ́ bɛ̀ kucɛ miɛkɛ.
\p
\v 3 Kòo dɔɔ̀ mɛtɑ̃́ntɛ̀nsiɛ̀ nkɛ́ bɛ̀ cɑ̃mmú dicɑ̃ntɛ́tɑ̃rì ĩ́nkɛ̀. 
\v 4 Ntɛ dɛ̀ɛ̀ do te kɛ̀ Sosuwee cɑ̃mmú bɛnitidɑɑbɛ̀ bɛ̀ do yɛtìní Esibiti kɛ̀ bɛ̀ɛ̀ kó dimɑ̀ɑ̀ ndò nkɛ́nɑ kɛ́kɔtɛ mudoò, bɛ̀ do ku dikpɑ́ɑ̀ cuokɛ̀ nkɛ. 
\v 5 Bɛ̀ do yɛtìní Esibiti kɛ̀ bɛ̀ɛ̀ bo bɛ̀ do cɑ̃mmúmu, bɛ̀ do piɛ́ bɛ̀ kucɛ bɛɛ̀ do í cɑ̃mmú. 
\v 6 Isidɑyɛɛribɛ do yɛ̀nní Esibiti kɛ́mmɔkɛ yɛbie nsipísìnɑ̀ɑ̀ ndi dikpɑ́ɑ̀, bɛ̀ do yɛtìní kɛ̀ bɛ̀ɛ̀ dò mbɛ̀ bo nɑ kɛ́kɔtɛ dikpɑ̀nnì kɛ̀ bɛ̀ɛ kú, bɛ̀ yetɛ mɛ̀ɛ̀ kpɛ́í ti Yiɛ̀ nKuyie nkpɛti, kɛ̀ kù dɔ̀ bɛ̀ í tɑti kù do yɛ̃ nkù yóó duɔ́ ndìì ɛì bɛ yɛmbɛ̀, mɛnɑɑmiɛ̀ nnɛ̀ mɛcekùɔ̀ ndɛ̀ pũɔ̃̀ ndɛ̀. 
\v 7 Bɛ bí iì do cɔutɛ́ bɛ fɔ̃̀tɛ̀, kɛ̀ Sosuwee bɛ̀ cɑ̃mmú kɛ yɛ̃́ bɛ̀ mu ndo í cɑ̃mmúmɛ̀. 
\v 8 Ò bɛ̀ cɑ̃mmú kɛ́deè kɛ̀ bɛ̀ mbo bɛ kɑrɛ̀ nyɛ kɛ yɑ̀ɑ miɛtɛ́nɛ̀. 
\v 9 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: N dɛ̀itɛ yíe ndi fɛi nyi, di yɛ̀nnɛ̀nní ì Esibiti.
\p Dɛɛ̀ te kɛ̀ bɛ̀ yu dɛ kó dibòrì kɛ tú Kidikɑɑdi nɛ̀ yíenní.
\s1 Bɛ̀ bɑɑ́mmɛ̀ diyentɛ́bɑnni Kɑnnɑhɑ̃ɑ̃
\p
\v 10 Dɛ mɔ̀nnì kɛ̀ Isidɑyɛɛribɛ nkɑri Kidikɑɑdi kɛ́bɑɑ́ ndiyentɛ́bɑnni otɑ̃̀nkù yiè tɛpíítɛ̀ nɛ̀ dinɑɑnnì yiè kuyuoku, Sedikoo ɛì kó kubiriku. 
\v 11 Kɛ̀ bɛ̀ɛ di dɛ yiè dihɛì kó tidiitì, kɛ́cɑ́ɑ́kɛ́ pɛ̃́ɛ̃̀ wèè í kɔɔrɛnɛ̀ mutie mùù muuti nɛ̀ tidiitì tìì cìe. 
\v 12 Kɛ̀ dɛ̀ɛ wentɛ́ kɛ̀ mɑ́nnì tɛ̃́nkɛ í mbo, kɛ̀ bɛ̀ nyo nKɑnnɑhɑ̃ɑ̃ kó mudiì.
\s1 Sosuwee yɑ̀mɛ̀ wèè bɑkɛ́ Kuyie nhɑ̃ɑ̃pɔ̀nnɑfɛ
\p
\v 13 Diyiè mɑrì kɛ̀ Sosuwee ḿbo Sedikoo tɑkɛ́ kɛ́yɑ̀ onìtì mɔù kòò tɔ mɛsebii nkɛ cómmú, kɛ̀ Sosuwee ò bekɛ kɛ dɔ̀: A tú ti kouɑɑ̀ kɛ̀ ti dootitɔù? 
\v 14 Kòò dɔ̀: N tú wèè bɑkɛ́ wènwe ti Yiɛ̀ nKuyie nhɑ̃ɑ̃pɔ̀nnɑfɛ, m bo kɛ tuɔ̀kùnímu. Kɛ̀ Sosuwee nínkóo o ììkɛ̀ kɛ dɔ̀: N yiɛ̀, ɑ dɔ́ kɛ́ n nɑ́kɛ́ ɔ̃̀nti?
\p
\v 15 Wèè bɑkɛ́ ti Yiɛ̀ nKuyie nhɑ̃ɑ̃pɔ̀nnɑfɛ kòo dɔ̀: Dɛitɛ ɑ nɛùtì, ɑ cómmú dibòrì sɑ̀ɑ̀rì ndi.
\p Kɛ̀ Sosuwee tì dɛ̀itɛ.
\c 6
\s1 Isidɑyɛɛribɛ pɔ̀ntɛmɛ̀ Sedikoo
\p
\v 1 Sedikoo ɛì do kpetí tɑ́u nwe kɛ pɑ́kɛ́ Isidɑyɛɛribɛ kpɛ́í, òmɔù í tɑɑ̀ òmɔù mɛ nyí yiɛ̀. 
\v 2 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: N dɑ duɔ́mmu Sedikoo ɛì nɛ̀ di kóo kpɑ̀ɑ̀tì nɛ̀ o ɑ̃ɑ̃pɔ̀mbɛ̀ kperíbɛ̀. 
\v 3 Fɔ̃́ nnɛ̀ ɑ ɑ̃ɑ̃pɔ̀mbɛ̀ di níí fitɛ́ Sedikoo ɛì kucɛ mɛ̀mɑ́ɑ̀ diyiè miɛkɛ kɛ dɔ̀ yɛwe yɛ̀kuɔ̀. 
\v 4 Kɛ̀ ikuɔ́ nìùbɛ̀ bɛ̀yiekɛ̀ ntɔ yɛtɑ̃tɛhe yɛ̀yiekɛ̀ kɛ ni ti Yiɛ̀ nKuyie ntɑummɛ̀ tɔu ììkɛ̀, diyiè yiénnì yiè kɛ́nheu kɛ̀ di fitɛ́ dihɛì kucɛ mɛ̀yiekɛ̀. 
\v 5 Kɛ̀ ditɑ̃tɛheù kuɔ́ ndìì mɔ̀nnì dí uu dimɔu Sedikoo ɛì duotí yóó domu bɑ́ wè kòo wetínnɛ́ o ììkɛ̀.
\p
\v 6 Kɛ̀ Nunni birɛ Sosuwee yú ikuɔ́ nìùbɛ̀ bɛ̀yiekɛ̀ kɛ dɔ̀: Túótɛ́nɛ̀ ti Yiɛ̀ nKuyie ntɑummɛ̀ tɔu, kɛ̀ ikuɔ́ nìùbɛ̀ tɔbɛ̀ bɛ̀yiekɛ̀ ntɔ yɛtɑ̃tɛhe yɛ̀yiekɛ̀ kɛ ni.
\p
\v 7 Kɛ̀ bɛhɑ̃ɑ̃pɔ̀mbɛ̀ nni ti Yiɛ̀ nKuyie ntɑummɛ̀ tɔu ììkɛ̀ kɛ̀ dí fitɛ́ dihɛì.
\p
\v 8 Kɛ̀ ikuɔ́ nìùbɛ̀ bɛ̀yiekɛ̀ɛ túótɛ́ yɛtɑ̃tɛhe yɛ̀yiekɛ̀, kɛ́niitɛ́ ti Yiɛ̀ nKuyie ntɑummɛ̀ tɔu ììkɛ̀ kɛ́nheu. 
\v 9 Kɛ̀ bɛhɑ̃ɑ̃pɔ̀mbɛ̀ mɑbɛ̀ nni ikuɔ́ nìùbɛ̀ bɛ̀ɛ̀ eu yɛtɑ̃tɛhe, kɛ̀ ti Yiɛ̀ nKuyie ntɑummɛ̀ tɔu bɛ̀ tũ nkɛ̀ bɛhɑ̃ɑ̃pɔ̀mbɛ̀ tũ̀nní kɛ̀ yɛtɑ̃tɛhe kuɔ̀. 
\v 10 Sosuwee do bɛ̀ nɑ̀kɛ́mu kɛ tú bɛ̀ bɑ́ɑ́ wekii bɛ̀ ndò nyúó kɛ kémmú ò bo yĩ́mɛ̀: Uunɛ̀! Kɛ̀ bɛ̀ nɛ́ uu. 
\v 11 Kɛ̀ bɛ̀ɛ fitɛ́ dihɛì kucɛ mɛ̀mɑ́ɑ̀ diyiè mɑrì mɑ́ɑ̀ miɛkɛ nɛ̀ ti Yiɛ̀ nKuyie ntɑummɛ̀ tɔu, kɛ́kò mbɛ̀ bɑ̀tɛ́ dɛ̀ kɛ́duɔ́.
\p
\v 12 Kɛ̀ dɛ̀ɛ wentɛ́ dikṹnweńnì sɛ̀ì, kɛ̀ Sosuwee duɔ́ nkɛ̀ ikuɔ́ nìùbɛ̀ɛ tɔ ti Yiɛ̀ nKuyie ntɑummɛ̀ tɔu. 
\v 13 Kɛ̀ bɛhɑ̃ɑ̃pɔ̀mbɛ̀ mɑbɛ̀ nni ikuɔ́ nìùbɛ̀ bɛ̀ɛ̀ eu yɛtɑ̃tɛhe bɛ ììkɛ̀, kɛ̀ ti Yiɛ̀ nKuyie ntɑummɛ̀ tɔu bɛ̀ tũ̀, kɛ̀ bɛhɑ̃ɑ̃pɔ̀mbɛ̀ tɔbɛ̀ tũ̀nní, kɛ̀ yɛtɑ̃tɛhe kuɔ̀. 
\v 14 Diyiè didɛ́rì yiè, kɛ̀ bɛ̀ tó fitɛ́ dihɛì kucɛ mɛ̀mɑ́ɑ̀, kɛ́ mmɛ nhɔ̃ nkɛ dɔ̀ yɛwe yɛ̀kuɔ̀. 
\v 15 Diyiénnì yiè kɛ́yɛ̀ dikṹnweńnì sɛ̀ì kɛ́fitɛ́ dihɛì kɛ dɔ̀ kucɛ mɛ̀yiekɛ̀. Dɛ kó diyiè dimɑ́ɑ̀ ndi bɛ̀ fitɛ́mɛ̀ kucɛ mɛ̀yiekɛ̀. 
\v 16 Kɛ̀ bɛ̀ nfiti kucɛ mɛyiémmɛ̀, kɛ̀ ikuɔ́ nìùbɛ̀ eu yɛtɑ̃tɛhe, kɛ̀ Sosuwee nɑ́kɛ́ bɛnìtìbɛ̀ kɛ dɔ̀: Uunɛ̀! Ti Yiɛ̀ nKuyie ndi duɔ́mmu dihɛì, 
\v 17 dí dì kùɔ pɑ́íí kɛ̀ di ɛí dɛ̀ ntú ti Yiɛ̀ nKuyie nkpɛrɛ. Dí yóu Dɑhɑbu onitipòkù wèè dɔuti dɔutinɛ̀ bɛnitidɑɑbɛ̀ omɑ́ɑ̀ nɛ̀ bɛ̀ɛ̀ bo o cĩ́ɛ̃̀tɛ̀, ò sòò sɔ̀nnɛ mɛ̀ɛ̀ kpɛ́í nti tɔ̃nní bɛ̀ kɛ̀ bɛ̀ bo pɑɑtɛ́ dihɛì. 
\v 18 Dɔɔ̀nɛ̀ mɛyɔɔ̀mmɛ̀ di bɑ́ɑ́ yúúkú dɛ̀mɑrɛ̀, kɛ̀ di tùótɛ́ dɛ̀mɑrɛ̀ di yóó ɑ̃nnɛ́ mɛyɔ̃́ɔ̃̀ mmɛ Isidɑyɛɛribɛ kɛ̀ bɛ̀ɛ bɛ̀ kùɔ. 
\v 19 Mɛsɔɔ nnɛ̀ timɑ́tì pɛ́ítì, disɔɔwũɔ̃̀ nɛ̀ timɑ́tì dɛ̀ yó ntú ti Yiɛ̀ nKuyie nkpɛrɛ ndɛ, kɛ̀ dí dɛ̀ ɑ̃nnɛ́ ku cĩ́ɛ̃̀tɛ̀ miɛkɛ.
\p
\v 20 Kɛ̀ bɛ̀ɛ eé yɛtɑ̃tɛhe, kɛ̀ bɛ̀ɛ uu kɛ̀ kuduotíi do, kɛ̀ Isidɑyɛɛribɛɛ tɑ dihɛì bɑ́ wè kòo wetínnɛ́ o ììkɛ̀. 
\v 21 Kɛ̀ bɛ̀ɛ kuɔ bɛnìtìbɛ̀ bɛmɔu bɛnitidɑɑbɛ̀ nɛ̀ bɛnitipòbɛ̀, ibí nɛ̀ bɛkótíbɛ̀, inɑ̀ɑ̀kɛ nɛ̀ ipe nɛ̀ sɑ̃mmɑrímúbɛ̀.
\s1 Sosuwee yóumɛ̀ Dɑhɑbu
\p
\v 22 Kɛ̀ Sosuwee nɑ́kɛ́ bɛnìtìbɛ̀ bɛdɛ́bɛ̀ bɛ̀ do tɔ̃ mbɛ̀ kɛ dɔ̀: Tɑnnɛ̀ Dɑhɑbu onitipòkù wèè dɔuti dɔutinɛ̀ bɛnitidɑɑbɛ̀ cĩ́ɛ̃̀tɛ̀ kóo dènnɛní nɛ̀ o cĩ́ɛ̃̀tɛ̀ kɔbɛ bɛmɔu kɛ́ntũ ndi sòò ò nɑ̀kɛ́ tì.
\p
\v 23 Kɛ̀ bɛ̀ɛ tɑ kɛ́dennɛní Dɑhɑbu nɛ̀ o yɛmbɛ̀ nɛ̀ o yɔ̃fũ̀ɔ̃̀ kɔbɛ bɛmɔu, nɛ̀ o kɔbɛ bɛmɔu. Kɛ̀ bɛ̀ɛ bɛ̀ kɑ̀nnɛ bɛ̀ bɑ̀tɛ́ dɛ̀ kɛ́tɔ́ɔ́nnɛ̀ bɛmɑ́ɑ̀, kɛ́ndɑkɛ bɛ kpɛ́í. 
\v 24 Bɛ̀ mɛ nyĩ kɛ́cɔ́u ndihɛì nɛ̀ dɛ̀ɛ̀ kó dimɑ̀ɑ̀ bo di miɛkɛ, kɛ́túótɛ́ mɛsɔɔ nnɛ̀ timɑ́tì pɛ́ítì, disɔɔwũɔ̃̀ nɛ̀ timɑ́tì kɛ́tɑnnɛ ti Yiɛ̀ nKuyie ncĩ́ɛ̃̀tɛ̀. 
\v 25 Kɛ̀ Sosuwee yóu Dɑhɑbu onitipòkù wèè dɔuti dɔutinɛ̀ bɛnitidɑɑbɛ̀ nɛ̀ o kɔbɛ kɛ̀ bɛ̀ nfòù, ò sɔ̀nnɛ mɛ̀ɛ̀ kpɛ́í nho tɔ̃ mbɛ̀ kɛ̀ bɛ̀ pɑɑtɛ́ dihɛì. Dɑhɑbu kó kufuku kpɑɑ́ bomu Isidɑyɛɛribɛ cuokɛ̀ nɛ̀ yíenní.
\p
\v 26 Dɛ mɔ̀nnì ndi Sosuwee bɛ́immɛ̀ kɛ́yú ti Yiɛ̀ nKuyie nyètìrì kɛ dɔ̀:
\q1 Wèè bo ndɔ́ kɛ́mɑɑ́ dihɛì dii, nhò bo yɑ̀!
\q1 Ò bo ndì pũũku kòo bíketirɛ̀ɛ kú,
\q1 kòo ndì kpetì yɛcɑ̀kɛ̀ kòo bíyɑ̃ɑ̃tɛ̀ɛ kú.
\p
\v 27 Kuyie ndo bonɛ̀mu Sosuwee kòo yètìrìi feitɛ́ bɛ tenkɛ̀ kɛmɔu miɛkɛ.
\c 7
\s1 Akɑ̃ɑ̃ dɔ̀ɔ̀mɛ̀ mɛyɛi nkɛ̀ bɛ̀ɛ ò kùɔ
\p
\v 1 Kɛ̀ Isidɑyɛɛribɛɛ dɔɔ̀ mɛyɛi ndiɛmɛ̀, kɛ́túótɛ́ ti Yiɛ̀ nKuyie nyɛ̃ mbɛ̀ bɑ́ɑ́ túótɛ́ dɛ̀, kɛ̀ ku miɛkɛɛ bɛ̀ pɛikɛ. Sudɑɑ nɑɑ̀mùnkù kou Sedɑɑ birɛ Sɑbudi weè do pɛitɛ́ Kɑdimii, kòo pɛitɛ́ Akɑ̃ɑ̃. Akɑ̃ɑ̃ weè do yùúkú.
\p
\v 2 Kɛ̀ Sosuwee tɔ̃ mbɛnìtìbɛ̀ kɛ̀ bɛ̀ bo pɑɑtɛ́ Aii ɛì, dihɛì dìì bo Betɛɛdi diyiè yìɛ̀ní kɛ̀ɛ̀ bíɛ́kɛ̀, kɛ tɔ́kɛ́nɛ̀ Bɛti-Afɛnni, kɛ̀ bɛ̀ɛ kɔtɛ kɛ́ dì pɑɑtɛ́. 
\v 3 Bɛ̀ wɛ̃̀tɛní mɛm̀mɛ kóò nɑ̀kɛ́ kɛ dɔ̀: Dɛ kó dihɛì í dɛu ɑ bɑ́ɑ́ fɛ̃́ũ mbɛnìtìbɛ̀ bɛmɔu. Sikɔupísìdɛ́ (2000) yoo sikɔupísìtɑ̃ɑ̃ti (3000) yó nsɑ̀nnɛ̀mu.
\p
\v 4 Bɛ̀ɛ̀ do kɔtɛ, bɛ̀ bo ntùɔ̀kɛ sikɔupísìtɑ̃ɑ̃ti (3000). Kɛ̀ Aii kɔbɛɛ bɛ̀ nɑ kɛ́bɛti. 
\v 5 Bɛ̀ kùɔ bɛ̀ɛ̀ nìtìbɛ̀ bo ntùɔ̀kɛ sipísìtɑ̃ɑ̃ti nɛ̀ bɛ̀kuɔ̀, kɛ̀ bɛ̀ɛ bɛ̀ bɛ̀ti kɛ́dennɛ dihɛì kó dibòrì Sebɑdimmu kɛ́ bɛ̀ cṹũnko, kɛ̀ kufɔ̃wɑɑ́ mbɛ̀ ɑutɛ́ kɛ̀ dɛ̀ɛ bɛ̀ kpeí.
\p
\v 6 Sosuwee nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ kɛ̃rí bɛ yɑ̀ɑ̀tì, kɛ́pũ mmutɑ̃́ɑ̃́ mbɛ yɔ kɛ́nnínkú ti Yiɛ̀ nKuyie ntɑummɛ̀ tɔu ììkɛ̀ nɛ̀ kuyuokoo. 
\v 7 Kɛ̀ Sosuwee bɛ́i nkɛ dɔ̀: Áú, n Yiɛ̀ nKuyie! Dɛ̀ yĩ́mɛ kɑ̀ɑ ti séenní kukó nkɛ̀ Amɔriibɛ yóó ti kuɔ? Ti nɑ nkpɑɑní kukó nSuditɛ̃ɛ̃ kó diyɑ́ɑ̀. 
\v 8 Kuyie nhɑ bɑ́ɑ́ yĩ́ n dɑ cɑ̀ɑ̀rɛ̀, m bo yĩ́ bɑ? Tínti Isidɑyɛɛribɛ ti dootitɔbɛ̀ ti nɑmu. 
\v 9 Kɑnnɑhɑ̃ɑ̃ kɔbɛ nɛ̀ yɛhɛkɛ̀ tɛyɛ̀ kɔbɛ yóó tì kèèmu kɛ́ ti dintɛ́ kɛ́kuɔ, kɑ̀ɑ nɛ́ yĩ́mɛ kɛ́bɛnkɛ ɑ yetidiɛrì?
\p
\v 10 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: Ítɛ́! Dɛ̀ yĩmɛ kɑ̀ɑ nìńkú kɛ sĩ́ĩ́? 
\v 11 Díndi Isidɑyɛɛribɛ di dɔ̀ɔ̀ mɛyɛi mmɛ kɛ yetɛ n di nɑ̀kɛ́ tì, kɛ yùúkú n do yɛ̃ ndi bɑ́ɑ́ yúúkú dɛ̀, kɛ dɛ̀ sɔ̀nnɛ di nɛntì miɛkɛ. 
\v 12 Di tɛ̃́nkɛ í yóó nɑ di dootitɔbɛ̀, di dootitɔbɛ̀ yó ndi bɛtìmu kɛ di kɔù. N tɛ̃́nkɛ í yó ndi bonɛ̀, kɛ̀ di í dènnɛ n yɛ̃ ndi bɑ́ɑ́ túótɛ́ dɛ̀ di cuokɛ̀. 
\v 13 Ítɛ́ kɛ́wénkùnnɛ bɛnìtìbɛ̀! Nɑ́kɛ́ bɛ kɛ̀ bɛ̀ɛ wénkùnnɛ bɛmɑ́ɑ̀ kɛ̀ ti nɑɑ mɑ́ɑ́. Á bɛ̀ nɑ̀kɛ́ kɛ dɔ̀: Mí ndi Yiɛ̀ nKuyie ndíndi Isidɑyɛɛribɛ di tũ nkù míì tu n yɛ̃ ndi bɑ́ɑ́ túótɛ́ dɛ̀, dɛɛ̀ bo di cuokɛ̀, kɛ̀ di í dɛ̀ dènnɛ di bɑ́ɑ́ nɑ kɛ́bɑɑo di dootitɔbɛ̀. 
\v 14 Nɑnkɛ dikṹnweńnì, ɑ́ tíí nyiwuɔ nyiwuɔ kɛ́tɑ̃ũ tɛ́tɛ́ kɛ̀ m bɛnkɛ kùù wuɔ nkùu bɑtɛ tinɑɑ̀mùntì, kɛ̀ m bɛnkɛ kùù nɑɑ̀mùnkù kùu bɑtɛ sicɛ̃́ĩ, kɛ̀ m bɛnkɛ tɛ̀ɛ̀ cĩ́ɛ̃̀tɛ̀ tɛ̀ɛ bɑtɛ bɛnìtìbɛ̀. 
\v 15 Kɛ̀ m bɛnkɛ wèè nìtì bɛ̀ɛ ò cɔ́u nnɛ̀ o kpɛrɛ dɛmɔu, ò yetɛ mɛ̀ɛ̀ kpɛ́í n nɑ̀kɛ́ tì kɛ dɔ̀ɔ̀ mɛyɛi ndiɛmɛ̀ Isidɑyɛɛribɛ miɛkɛ.
\p
\v 16 Dikṹnweńnì sɛ̀ì kɛ̀ Sosuwee tíí nyIsidɑyɛɛribɛ kó iwuɔ nyimɔu. Kɛ̀ Kuyie mbɛnkɛ Sudɑɑ kó kuwuɔ. 
\v 17 Kòo bɛ̀ bɑ̀tɛ bɛ nɑɑ̀mùntì, kɛ̀ Kuyie mbɛnkɛ Sedɑɑ kɔku, kòo bɛ̀ bɑ̀tɛ bɛ cɛ̃́ĩ, kɛ̀ Kuyie mbɛnkɛ Sɑbudi kpɛtɛ. 
\v 18 Kòo bɛ̀ bɑ̀tɛ onìtì onìtì, kɛ̀ Kuyie mbɛnkɛ Akɑ̃ɑ̃. Akɑ̃ɑ̃ cicɛ do tú Kɑdimii, kɛ̀ Kɑdimii cicɛ tú Sɑbudi, kɛ̀ Sɑbudi cicɛ tú Sedɑɑ. Sudɑɑ kó kuwuɔ kɔbɛ mbɛ. 
\v 19 Kɛ̀ Sosuwee ò nɑ̀kɛ́ kɛ dɔ̀: Bɑntɛ́ ti Yiɛ̀ nKuyie nyIsidɑyɛɛribɛ tũ nkù dɛumɛ̀ kɛ́ n nɑ́kɛ́ dɛmɔu, ɑ bɑ́ɑ́ n sɔnnɛ dɛ̀mɑrɛ̀.
\p
\v 20 Kɛ̀ Akɑ̃ɑ̃ dɔ̀: Ɛ̃ɛ̃, míì dɔ̀ɔ̀ mɛyɛi ti Yiɛ̀ nKuyie nyIsidɑyɛɛribɛ tũ nkù ììkɛ̀. Ntɛ n dɔ̀ɔ̀ dɛ̀: 
\v 21 N yɑ̀ ti dootitɔbɛ̀ nɛntì miɛkɛ nkɛ Mɛsopotɑmii kɔbɛ kó diyɑɑ̀bòrì sɑ̀ɑ̀rì mɑrì nɛ̀ mɛdítíbii nsikɔusìdɛ́ (200) nɛ̀ disɔɔwènnì cìdóò kó dikéè, kɛ dɛ̀ yɑɑ nkɛ tùótɛ́, di bo dɛ̀ yɑ̀ n tou miɛkɛ, kɛ̀ dɛ̀ kũrí kɛ̀ idíítí ni.
\p
\v 22 Kɛ̀ Sosuwee tɔ̃ mbɛnìtìbɛ̀ kɛ̀ bɛ̀ɛ kɔtɛ o dieku kɛ́nsɔ̃́ ndɛ̀ mɛ ndò nkɛ̀ idíítí ni. 
\v 23 Kɛ̀ bɛ̀ɛ dɛ̀ kũtɛ́ o dieku kɛ́tɔní Sosuwee nɛ̀ Isidɑyɛɛribɛ bɛmɔu borɛ̀, kɛ̀ bɛ̀ɛ dɛ̀ còú ti Yiɛ̀ nKuyie nyììkɛ̀. 
\v 24 Sosuwee nɛ̀ Isidɑyɛɛribɛ bɛmɔu kɛ̀ bɛ̀ɛ túótɛ́ Akɑ̃ɑ̃ nɛ̀ idíítí nɛ̀ diyɑɑ̀bòrì nɛ̀ disɔɔwènnì nɛ̀ o bí, initidɑɑì nɛ̀ initipòì nɛ̀ o nɑ̀ɑ̀kɛ nɛ̀ o sɑ̃mmɑrímúbɛ̀ nɛ̀ o pe nɛ̀ o bɔɔ́ nɛ̀ o touku nɛ̀ ò mɔ̀kɛ dɛ̀ɛ̀ kó dimɑ̀ɑ̀, kɛ́kɔtɛnɛ̀ kubiriku bɛ̀ tu kù Dikɔnkɔɔ̀nnì biriku. 
\v 25 Kɛ̀ Sosuwee nɑ́kɛ́ Akɑ̃ɑ̃ kɛ dɔ̀: Fɔ̃́ɔ̃̀ te kɛ̀ mɛyɛi nti tùɔ̀kɛní, ti Yiɛ̀ nKuyie mbo dɑ dɔɔ̀ mɛyɛi nyíe.
\p Mɛm̀mɛ kɛ̀ Isidɑyɛɛribɛɛ buɔ́tí Akɑ̃ɑ̃ yɛtɑ̃́rɛ̀ kɛ́kuɔ, kɛ́ mɛ ndɔɔ̀ o kɔbɛ bɛmɔu nɛ̀ o kpɛrɛ dɛmɔu, 
\v 26 kɛ́tíí ndɛborɛ̀ ditɑ̃́ntɛ́nkou diɛrì kɛ̀ dì kpɑɑ́ bo nɛ̀ yíenní, dɛɛ̀ te kɛ̀ bɛ̀ yu dɛborɛ̀ kɛ tú dikɔnkɔɔ̀nnì biriku.
\p Mɛm̀mɛ ti Yiɛ̀ nKuyie mmiɛkɛ domɛ̀.
\c 8
\s1 Bɛ̀ pɔ̀ntɛmɛ̀ Aii
\p
\v 1 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: A bɑ́ nyĩɛ̃̀kù, ɑ kɔ̃m̀bùɔ̀tì bɑ́ nduò, túótɛ́ ɑ ɑ̃ɑ̃pɔ̀mbɛ̀ bɛmɔu kɛ̀ dí kɔtɛ kɛ́pi Aii, n we ndɑ duɔ́mmu nɛ̀ o kóo kpɑ̀ɑ̀tì nɛ̀ o nìtìbɛ̀ nɛ̀ o ɛì nɛ̀ o tenkɛ̀. 
\v 2 Á pɔntɛ Aii nɛ̀ o kóo kpɑ̀ɑ̀tì ɑ pɔ̀ntɛ mɛ̀ɛ̀ botí Sedikoo nɛ̀ o kou, kɛ̀ dí ɛí bɛ kpɛrɛ nɛ̀ bɛ wũɔ̃. A duɔ́ nkɛ̀ bɛhɑ̃ɑ̃pɔ̀mbɛ̀ɛ bɛ̀ dɛ̀kɛ́ diyiè yìɛ̀ní kɛ̀ɛ̀ bíɛ́kɛ̀.
\p
\v 3 Kɛ̀ Sosuwee bɑ́ɑ́tí nɛ̀ o ɑ̃ɑ̃pɔ̀mbɛ̀ kɛ bo pi Aii, kɛ́tɑ̃ɑ̃tɛ́ bɛkpɑ̀rìnuɔmbɛ sikɔupípísìtɑ̃ɑ̃ti (30000) kɛ́nií nkɛyènkɛ̀, 
\v 4 kɛ́ bɛ̀ nɑ̀kɛ́ kɛ dɔ̀: Kɔtɛnɛ̀ kɛ́nhokɛ dihɛì fɔ̃nkúò, di bɑ́ɑ́ dɛ́tɛ́nɛ̀ dihɛì. Dí nwɑ̃kɛ́, kɛ̀ dɛ̀ fuutɛ dí yɛ̀nní. 
\v 5 Mí nnɛ̀ n kɔbɛ kɛ̀ ti tɑroo dihɛì, kɛ̀ bɛ̀ yɛ̀nní kɛ bo ti dokɛ́nɛ̀ tí cokɛ́ ti sòò yĩmɛ̀. 
\v 6 Bɛ̀ yóó ti bɛtimu kɛ̀ tí bɛ̀ dɛ̀tɛ́nɛ̀ dihɛì kɛ̀ bɛ yɛ̀mmɛ̀ ndò nti cokɛ́ ti sòò yĩmɛ̀. 
\v 7 Dɛ mɔ̀nnì kɛ̀ dí yɛ̀nní kɛ́pɔntɛ dihɛì. Ti Yiɛ̀ nKuyie ndì ndi duɔ́mmu. 
\v 8 Kɛ̀ di tɑ dihɛì dí dì cɔ́u nkɛ́dɔɔ̀ ti Yiɛ̀ Kuyie nyɛ̃mmɛ̀ kɛ́ntũ n di nɑ̀kɛ́ tì.
\p
\v 9 Kɛ̀ bɛkpɑ̀rìnuɔmbɛɛ kɔtɛ Sosuwee bɛ̀ bɛnkɛ dɛ̀, kɛ́nhokɛ Aii nɛ̀ Betɛɛdi dɛ cuokɛ̀ diyiè yìɛ̀ní kɛ̀ɛ̀ bíɛ́kɛ̀, kɛ̀ Sosuwee nkpɑɑ́nɛ̀ bɛsɔmbɛ kɛyènkɛ̀.
\p
\v 10 Kɛ̀ dɛ̀ɛ wentɛ́ kɛ̀ Sosuwee wénní o nìtìbɛ̀ kɛ́tɑ̃nkɛ́ Isidɑyɛɛribɛ kó bɛkótíbɛ̀ kɛ̀ bɛ̀ɛ niitɛ́ fɛnɑfɛ. 
\v 11 Kɛ̀ bɛkpɑ̀rìnuɔmbɛɛ ò nɛinɛ̀ kɛ̀ bɛ̀ɛ kɔtɛ Aii kɛ́tɔ́ɔ́nko kɛ́bɑ́tɛ́ Aii bɑkù cɑ̃̀nku bíɛ́kɛ̀ kɛ̀ kubiriku mɑkù ńsokɛ́ nɛ̀ Aii bɛ cuokɛ̀. 
\v 12 Kɛ̀ Sosuwee túótɛ́ bɛnìtìbɛ̀ bɛ̀ bo ntùɔ̀kɛ sikɔupísìnùmmù (5000) kɛ́ bɛ̀ òo ndiyiè yìɛ̀ní kɛ̀ɛ̀ bíɛ́kɛ̀ Betɛɛdi nɛ̀ Aii dɛ cuokɛ̀. 
\v 13 Kɛ̀ ditĩ̀nnì diɛrì ḿbo dihɛì bɑkù cɑ̃̀nku bíɛ́kɛ̀, kɛ̀ ditɛrì bo diyiè yìɛ̀ní kɛ̀ɛ̀ bíɛ́kɛ̀, kɛ̀ Sosuwee yie ḿbo kubiriku dɛ kó kɛyènkɛ̀. 
\v 14 Kɛ̀ Aii kóo kpɑ̀ɑ̀tìi yɑ̀ Isidɑyɛɛribɛ, kɛ́bɑ́ɑ́tí mɛcɑ̃ɑ̃ nnɛ̀ o ɑ̃ɑ̃pɔ̀mbɛ̀ kɛ bo bɛ̀ dokɛ́nɛ̀ ò sòò bɛ̀ dokɛ́ ndɛ̀ Suditɛ̃ɛ̃ biriku, kɛ wetí tɛdɔntɛ̀ Adɑbɑ kó dikpɑ́ɑ̀. Bɑ́ bɛ̀ í yɛ̃́ kɛ dò mbɛ̀mɑbɛ̀ òkɛ diyiè yìɛ̀ní kɛ̀ɛ̀ bíɛ́kɛ̀. 
\v 15 Sosuwee nɛ̀ o kɔbɛ kɛ̀ bɛ̀ɛ dɔɔ̀ kɛ́ndò mbɛ̀ cokɛ́ kɛ́wetínnɛ́ dikpɑ́ɑ̀ diɛrì bíɛ́kɛ̀. 
\v 16 Kɛ̀ bɛ̀ɛ pɛ́i nkɛ̀ bɛnìtìbɛ̀ɛ ítɛ́ dihɛì dimɔu, kɛ́ bɛ̀ tũ̀nnɛ kɛ́dɛ́tɛ́nɛ̀ dihɛì. 
\v 17 Kɛ̀ bɛ̀ɛ yɛ̀ bɛmɔu kɛ́tũnnɛ Isidɑyɛɛribɛ, bɑ́ òmɔù í nkpɑɑ́ Aii kɛ bɑɑ dihɛì. 
\v 18 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: Youtɛ ɑ kpɑ̃nnì Aii bíɛ́kɛ̀, n dɑ duɔ́mmu dɛ kó dihɛì.
\p Kɛ̀ Sosuwee yie. 
\v 19 Ò yòùtɛ dìì mɔ̀nnì o nɔ̀ùtɛ̀ kɛ̀ Isidɑyɛɛribɛ bɛ̀ɛ do sɔri kɛ̀ bɛ̀ɛ yɛnní mɛcɑ̃ɑ̃ nkɛ́tɑ dihɛì kɛ́ dì do, kɛ́ dì cɔ́u ndɛndɛ bɑ̀mbɑ̀.
\p
\v 20-21 Kɛ̀ Aii kɔbɛɛ wɛ̃ɛ̃tɛ kɛ́yɑ̀ kuyukú dɑ̀tínnɛ́mɛ̀ bɛ ɛì, kɛ́mɔ́ntɛ́ bɛ̀ bo cokɛ́ kɛ́cuó nkɛ̀ɛ̀ bíɛ́kɛ̀. Sosuwee nɛ̀ o kɔbɛ bɛ̀ɛ̀ do cokù kɛ̀ bɛ̀ɛ yɑ̀ bɛ̀ɛ̀ do sɔri diyiè yìɛ̀ní kɛ̀ɛ̀ bíɛ́kɛ̀ bɛ̀ yɛ̀nnímɛ̀ kɛ cɔ́u ndihɛì, kɛ́wɛ̃ɛ̃tɛ kɛ́dokɛ́nɛ̀ bɛ̀ɛ̀ bɛ̀ bɛ̀ti. 
\v 22 Bɛ̀ɛ̀ cɔ́u ndihɛì kɛ̀ bɛ̀ɛ yɛ̀nní kɛ̀ bɛ̀ɛ cɛ̃tinnɛ Aii kɔbɛ dɛ cuokɛ̀, òmɔù í nyentɛ́. Kɛ̀ bɛ̀ɛ bɛ̀ kùɔ bɛmɔu, 
\v 23 kɛ́pĩ́ nhAii kóo kpɑ̀ɑ̀tì kɛ́kɔtɛnɛ̀ Sosuwee borɛ̀.
\p
\v 24 Isidɑyɛɛribɛ kùɔ dìì mɔ̀nnì bɛ̀ɛ̀ bɛ̀ tũ̀nnɛ dikpɑ́ɑ̀ miɛkɛ kɛ́deè kɛ́wɛ̃tɛní dihɛì kɛ́kuɔ bɛsɔmbɛ bɛmɔu. 
\v 25 Aii kɔbɛ, bɛnitidɑɑbɛ̀ nɛ̀ bɛnitipòbɛ̀ bɛ̀ kùɔ bɛ̀ do bo tɛkɔupípíítɛ̀ nɛ̀ sikɔupísìdɛ́ ndi (12000). 
\v 26 Kɛ̀ Sosuwee ńyuo o kpɑ̃nnì Aii bíɛ́kɛ̀ kɛ̀ bɛ̀ yɑ̀ɑ kuɔnɛ̀ bɛnìtìbɛ̀ bɛmɔu kɛ́deè. 
\v 27 Sosuwee nɛ̀ o kɔbɛ kɛ̀ bɛ̀ɛ ɛí bɛ kpɛrɛ nɛ̀ bɛ wũɔ̃ kɛ́ndònnɛ̀ ti Yiɛ̀ nKuyie ntì nhò nɑ̀kɛ́mɛ̀. 
\v 28 Kɛ̀ Sosuwee cɔ́u nhAii kòo cɔ́útɛ́ fũku fũku kɛ́nɑɑ́ ntidobontì bɑ́ dɛ̀mɑrɛ̀ í dɛ̀ bo nɛ̀ yíenní, 
\v 29 kɛ́núnnɛ́ Aii kóo kpɑ̀ɑ̀tì mutie kòo nsɑkɛ nɛ̀ kuyuokoo. Diyiè tɑti dìì mɔ̀nnì kɛ̀ Sosuwee duɔ́ nkɛ̀ bɛ̀ɛ ò cṹũnní kɛ́dɔú ndihɛì mɑ̀nku dibòrì, kɛ́tíí nditɑ̃́ntɛ́nkou o ĩ́nkɛ̀ kɛ̀ dì kpɑɑ́ bo nɛ̀ yíenní.
\s1 Sosuwee kɑ̀ɑmmɛ̀ Kuyie nkuɔ́ imɔu Isidɑyɛɛribɛ
\p
\v 30 Kɛ̀ Sosuwee mɑɑ́ ti Yiɛ̀ nKuyie nyIsidɑyɛɛribɛ tũ nkù diwũɔ̃tɔ̀nnì ditɑ̃rì bɛ̀ tu dì Ebɑɑdi di ĩ́nkɛ̀. 
\v 31 Ò dì mɑɑ́nɛ̀ yɛtɑ̃́rɛ̀ yɛ̀ɛ̀ í cìɛ́kɛ́ yɛ̀nyɛ. Timɑ́tì mɑtì í kɑ̀ɑ́kɛ́ yɛ̀ kɛ́ndònnɛ̀ Mɔyiisi ti Yiɛ̀ nKuyie tɔ̃ntì do tì nɑ̀kɛ́mɛ̀ Isidɑyɛɛribɛ, kɛ̀ tì wɑ̃̀ri o kuɔ́ pɑ́tíri miɛkɛ, kòo kù fìé iwũɔ̃ kɛ́tuɔ nkɛ́fíé mɛtɑummɛ̀ kpɛyi. 
\v 32 Kòo wɑ̃ri Mɔyiisi kó ikuɔ́ yɛtɑ̃́rɛ̀ ĩ́nkɛ̀ Isidɑyɛɛribɛ bɛmɔu ììkɛ̀. 
\v 33 Isidɑyɛɛribɛ nɛ̀ bɛ kó bɛkótíbɛ̀ nɛ̀ bɛpɑ́tíwɑ̃ɑ̃̀bɛ̀ nɛ̀ bɛbɑɑtíbɛ̀ kɛ̀ bɛ̀ɛ cómmú kɛ́fitɛ́ mɛtɑummɛ̀ tɔu kɛ́nwetí ikuɔ́ nìùbɛ̀ Defiibɛ bɛ̀ɛ̀ dì tɔ. Isidɑyɛɛribɛ sɔmbɛ nɛ̀ bɛpɔ̀ɔ̀bɛ̀, kɛ̀ bɛ̀ còḿmú biɛ nKɑrisimmu tɑ̃rì ĩ́nkɛ̀ bɛtɔbɛ̀ Ebɑɑdi kpɛri ĩ́nkɛ̀, kɛ́ndònnɛ̀ ti Yiɛ̀ nKuyie nkóo tɔ̃ntì Mɔyiisi do yɛ̃ mbɛ̀ níí dɔɔ̀mɛ̀ kɛ́pɑ̃ Kuyie nkó mɛsɑ̀ɑ̀ nyIsidɑyɛɛribɛ. 
\v 34 Kɛ̀ Sosuwee kɑɑ nyikuɔ́ imɔu, kɛ́kɑɑnnɛ̀ Kuyie nyɛ̃ nkɛ̀ bɛ̀ dɔ̀ɔ̀ dɛ̀ kùu bɛ̀ dɔ̀ɔ̀ mɛsɑ̀ɑ̀ nnɛ̀ kù yɛ̃ nkɛ̀ bɛ̀ dɔ̀ɔ̀ dɛ̀ kùu bɛ̀ dɔ̀ɔ̀ mɛyɛi, tìì kó dimɑ̀ɑ̀ wɑ̃̀ri ikuɔ́ pɑ́tíri miɛkɛ, 
\v 35 kɛ́kɑɑ nKuyie ntɑnnɔ̀ yɛmɔu kù do duɔ́ nyɛ̀ Mɔyiisi, bɛnìtìbɛ̀ bɛmɔu ììkɛ̀ nɛ̀ bɛnitipòbɛ̀ nɛ̀ ibí nɛ̀ bɛpɔ̀ɔ̀bɛ̀. Bɑ́ ò í nsùɔ́ ndìmɑrì.
\c 9
\s1 Sosuwee do tɑunnɛ̀mɛ̀ Kɑbɑɔ̃ɔ̃ kɔbɛ
\p
\v 1 Kɛ̀ bɛkpɑ̀ɑ̀tìbɛ̀ bɛ̀ɛ̀ bo kukó nSuditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀: Yɛtɑ̃rɛ̀ ĩ́nkɛ̀ kɔbɛ nɛ̀ kubiriku kɔbɛ nɛ̀ bɛ̀ɛ̀ bo dɑ̀mɛ́ɛ̀rì pɛɛ́mmɛ̀ kɛ́tuɔkɛnɛ̀ Dimɑɑ. Itiibɛ nɛ̀ Amɔriibɛ nɛ̀ Kɑnnɑhɑ̃ɑ̃ kɔbɛ nɛ̀ Pedisiibɛ nɛ̀ Efiibɛ nɛ̀ Sebusiibɛ kɛ̀ bɛ̀ɛ keè bɛ̀ pɔ̀ntɛmɛ̀ Aii, 
\v 2 kɛ́wɛ̃nnɛ́ bɛmɔu kɛ bo kpɑnnɛ̀ Sosuwee nɛ̀ o kɔbɛ Isidɑyɛɛribɛ.
\p
\v 3 Kɛ̀ Kɑbɑɔ̃ɔ̃ kɔbɛɛ keè Sosuwee pɔ̀ntɛmɛ̀ Sedikoo nɛ̀ Aii, 
\v 4 kɛ́soutɛ́ kɛ́ndò mbɛ̀ bonní dɛdɛ́tirɛ̀ kɛ tɔ mudiì, kɛ boú tiyɔ̀tì tìì kɛ̃rí bɛ sɑ̃mmɑrímúbɛ̀, kɛ tɔ mɛnɑɑ̀ nkó tidɔutì kótì, tìì kɛ̃rí kɛ̀ bɛ̀ yɑ́. 
\v 5 Kɛ dɑ́ɑ́tí tiyɑɑ̀cítì kɛ ɑ̃nnɛ́ tinɛùtì tìì kɛ̃rí kɛ̀ bɛ̀ yɑ́, kɛ tɔ pɛ̃́ɛ̃̀bɛ̀ bɛ̀ɛ̀ kpeí kɛ wɛ̀rí. 
\v 6 Kɛ̀ bɛ̀ɛ tuɔkoo Kidikɑɑdi kɛ́yɑ̀ Sosuwee nɛ̀ o kɔbɛ kɛ dɔ̀: Ti boní dɛdɛ́tirɛ̀ ndɛ kɛ dɔ́ nɛ̀ díndi tí tɑu.
\p
\v 7 Kɛ̀ Isidɑyɛɛribɛɛ bɛ̀ tɛ̃̀ńnɛ́ kɛ dɔ̀: We nyɛ̃́ kɛ̀ di í ɑ̃ diɛ ndɛ dɛtɔ́ɔ́nnɛ̀. Ti bo yĩ́mɛ kɛ́ di tɑunnɛ̀.
\p
\v 8 Kɛ̀ bɛ̀ɛ nɑ́kɛ́ Sosuwee kɛ dɔ̀: Ti tú ɑ kó bɛtɔ̃mbɛ̀ mbɛ. Kɛ̀ Sosuwee dɔ̀: Di tú ɔ̃̀mbɛ? Di bonní dɛ?
\p
\v 9 Kɛ̀ bɛ̀ dɔ̀: A kó bɛtɔ̃mbɛ̀ tínti ti bonní dihɛì dɛ́tirì ndi, kɛ kèè ɑ Yiɛ̀ nKuyie nhɑ tũ nkù kpɛ́í nnɛ̀ kù dɔ̀ɔ̀ tìì diɛtì Esibiti. 
\v 10 Nɛ̀ kù dɔ̀ɔ̀ dɛ̀ Amɔriibɛ kó bɛkpɑ̀ɑ̀tìbɛ̀ bɛdɛ́ kukó nSuditɛ̃ɛ̃ kó diyɑ́ɑ̀. Sionni, Ɛsibonni kóo kpɑ̀ɑ̀tì nɛ̀ Ɔku Bɑsɑ̃ɑ̃ kou, wèè do bo Asitɑdoti. 
\v 11 Ti ɛì kó bɛkótíbɛ̀ ti nɑ̀kɛ́mu kɛ tú: Túótɛ́nɛ̀ mudiì kɛ́kɔtɛ kɛ́ bɛ̀ co, kɛ́mpĩ́ mbɛ tɔ̃mmú kɛ̀ dí dɔɔ̀ mɛtɑummɛ̀. 
\v 12 Ntɛnɛ̀ pɛ̃́ɛ̃̀, ti sòò yóó kétɛ́ní kòò kpɑɑ́ tonnìmu, bɑ̀mbɑ̀ mmiɛ nkɛ kpeí kɛ pũ̀ũti kɛ wɛ̀rí. 
\v 13 Ti sòò yóó túótɛ́ mɛnɑɑ̀ nkó tidɔutì kɛ̀ tì pɑ̀ɑnnìmu, di mmɔ̀nnì kɛ kɛ̃rí, tinɛùtì nɛ̀ tiyɑ̀ɑ̀tì kɛ̀ dɛ̀ kɛ̃rí kucɛ okù mɛ̀ɛ̀ kpɛ́í.
\p
\v 14 Kɛ̀ Isidɑyɛɛribɛ kó bɛkótíbɛ̀ɛ cɔutɛ́ bɛ diì bɑ́ bɛ̀ í beé ti Yiɛ̀ nKuyie. 
\v 15 Kɛ̀ Sosuwee bɛ̀ dɔ̀ɔ̀nɛ̀ mɛtɑummɛ̀, kɛ̀ bɛ̀ɛ nɑrikɛ, kòò dɔ̀ bɛ̀ í yóó bɛ̀ kùɔ. Kɛ̀ Isidɑyɛɛribɛ kó bɛkótíbɛ̀ɛ yie nkɛ yú ti Yiɛ̀ nKuyie nyètìrì.
\p
\v 16 Yɛwe yɛ̀tɑ̃ɑ̃ti kó difɔ̃nkúò bɛ̀ tɑummɛ̀ kɛ dèè, kɛ̀ Isidɑyɛɛribɛɛ keè bɛ̀ bomɛ̀ dɛndɛ ndɛ dɛtɔ́ɔ́nnɛ̀. 
\v 17 Kɛ̀ bɛ̀ mmɔkɛ yɛwe yɛ̀tɑ̃ɑ̃ti mucèmmu kɛ́tuɔkɛ dɛ kó bɛnìtìbɛ̀ ciɛ: Kɑbɑɔ̃ɔ̃ nɛ̀ Kefidɑɑ nɛ̀ Bedɔti nɛ̀ Kidiyɑ-Yeɑdimmu. 
\v 18 Bɛ̀ í mbɛ̀ kùɔ, kɛ yɛ̃́ Isidɑyɛɛribɛ kó bɛkótíbɛ̀ do bɛ̀ tɑunnɛ̀mɛ̀ kɛ́yú ti Yiɛ̀ nKuyie nyètìrì, kɛ̀ bɛ kɔbɛ Isidɑyɛɛribɛ mbɛ̀ kpɑ̀nnɛ̀. 
\v 19 Kɛ̀ bɛkótíbɛ̀ bɛmɔu dɔ̀: Tíì bɛ̀ tɑunnɛ̀ kɛ yu ti Yiɛ̀ nKuyie nyètìrì, ti bɑ́ɑ́ nɑ kɛ́ bɛ̀ kùɔ, 
\v 20 ti yóó bɛ̀ yóumu kɛ̀ bɛ̀ nfòù kɛ yɛ̃́ ti bɛ́immɛ̀ kɛ yu ti Yiɛ̀ nKuyie nyètìrì, ti yɑ̀ɑ̀ bo íi nti Yiɛ̀ nKuyie mmiɛkɛ. Ntɛnɛ̀ ti yóó bɛ̀ dɔ̀ɔ̀mɛ̀. 
\v 21 Ti yóó bɛ̀ yóumu kɛ̀ bɛ̀ nfòù kɛ ti do mmɛniɛ nkɛ ti kɑu idɛí.
\p Bɛkótíbɛ̀ ti mbɛ́i. 
\v 22 Kɛ̀ Sosuwee yú Kɑbɑɔ̃ɔ̃ nìtìbɛ̀ kɛ́ bɛ̀ bekɛ kɛ dɔ̀: Dɛ̀ yĩ́mɛ kɛ̀ di ti soutɛ́ kɛ yɛ̃ ndi ciɛ díɛtirì kɛ nɛ́ bo ti tɑkɛ́? 
\v 23 Di yó ntú tidɑɑtì nti sɑ̃́ɑ̃̀, kɛ kɔ̃ũ Kuyie ncĩ́ɛ̃̀tɛ̀ kó idɛí kɛ́ ndo mmɛniɛ.
\p
\v 24 Kɛ̀ Kɑbɑɔ̃ɔ̃ nìtìbɛ̀ɛ tɛ̃́nnɛ́ Sosuwee kɛ dɔ̀: Ti kèè di Yiɛ̀ nKuyie nduɔ́mmɛ̀ mmɛ ku kóo tɔ̃ntì Mɔyiisi kɛ ntenkɛ̀ kɛ tú dí nkɔù bɛ̀ɛ̀ kó dimɑ̀ɑ̀ dɛ̀ bo, kɛ̀ kufɔ̃wɑɑ́ nti pĩ nkɛ̀ ti yĩɛ̃̀kù di bo ti kuɔmɛ̀, dɛɛ̀ te kɛ̀ ti dɔ̀ɔ̀ mɛmmɛ. 
\v 25 Ti bo ɑ nɔu miɛkɛ nkɛ ɑ pɛ́nsìrìmɛ̀, mɛ̀ɛ̀ dɑ wenni dɔɔ̀ mɛ.
\p
\v 26 Ntɛ Sosuwee do yetɛ bɛ̀ bo bɛ̀ kùɔmɛ̀ kɛ́dɔɔ̀ tì. 
\v 27 Dɛ yiè kɛ̀ Sosuwee duɔ́ nkɛ̀ bɛ̀ nkɑu idɛí kɛ do mmɛniɛ nyIsidɑyɛɛribɛ nɛ̀ ti Yiɛ̀ nKuyie nwũɔ̃tɔ̀nnì kpɛ́í nkù dɔ́ bɛ̀ɛ di mɑɑ́ dɛ̀. Dɛ kó bɛnìtìbɛ̀ kpɑɑ́ pĩ́mmu dɛ kó mutɔ̃mmú nɛ̀ yíenní.
\c 10
\s1 Isidɑyɛɛribɛ nɑmɛ̀ Amɔriibɛ
\p
\v 1 Kɛ̀ Adoni-Sedɛki Sedisɑdɛmmu kóo kpɑ̀ɑ̀tìi keè Sosuwee pɔ̀ntɛmɛ̀ Aii nɛ̀ o kóo kpɑ̀ɑ̀tì kɛ bɛ̀ kùɔ pɑ́íí ò do dɔ̀ɔ̀mɛ̀ Sedikoo nɛ̀ o kóo kpɑ̀ɑ̀tì, kɛ́keè Kɑbɑɔ̃ɔ̃ kɔbɛ tɑunnɛ̀mɛ̀ Isidɑyɛɛribɛ kɛ bo bɛ cuokɛ̀. 
\v 2 Kɛ̀ kufɔ̃wɑɑ́ mbɛ̀ ɑutɛ́, kɛ yɛ̃́ yɛkpɑ̀ɑ̀tìhɛkɛ̀ miɛkɛ Kɑbɑɔ̃ɔ̃ do túmɛ̀ dihɛì diɛrì ndi kɛ pɛ̃ɛ̃tɛ́ Aii, kɛ̀ bɛkɔ̃m̀bɔ̀tiebɛ mɑ́ɑ̀ dì bo. 
\v 3 Kɛ̀ Adoni-Sedɛki Sedisɑdɛmmu kóo kpɑ̀ɑ̀tìi tɔ̃ nkɛ̀ bɛ̀ɛ nɑ́kɛ́ Oɑmmu Ebunɔɔ kpɑ̀ɑ̀tì, nɛ̀ Pidɑmmu Yɑdimuti kpɑ̀ɑ̀tì, nɛ̀ Yɑfiɑ Dɑkiisi kpɑ̀ɑ̀tì nɛ̀ Debii Ekunɔɔ kpɑ̀ɑ̀tì kɛ dɔ̀: 
\v 4 Kɔtɛnní kɛ́ n teennɛ̀ kɛ̀ ti kpɑnnɛ̀ Kɑbɑɔ̃ɔ̃ kɔbɛ kɛ yɛ̃́ bɛ̀ tɑunnɛ̀mɛ̀ Sosuwee nɛ̀ o kɔbɛ Isidɑyɛɛribɛ.
\p
\v 5 Mɛm̀mɛ kɛ̀ Amɔriibɛ kó bɛkpɑ̀ɑ̀tìbɛ̀ bɛ̀nùmmùu wɛ̃nnɛ́nɛ̀ Sedisɑdɛmmu kou nɛ̀ Ebunɔɔ kou nɛ̀ Yɑdimuti kou nɛ̀ Dɑkiisi kou nɛ̀ Ekunɔɔ kou, kɛ́túótɛ́ bɛ ɑ̃ɑ̃pɔ̀ntĩ̀rɛ̀ kɛ́pi Kɑbɑɔ̃ɔ̃ kɔbɛ mudoò. 
\v 6 Kɛ̀ Kɑbɑɔ̃ɔ̃ kɔbɛɛ tɔ̃ nSosuwee borɛ̀ Kidikɑɑdi kɛ̀ bɛ̀ɛ ò nɑ̀kɛ́ kɛ dɔ̀: Kɔtɛní kɛ́dɛɛtɛ́ ɑ kó bɛtɔ̃mbɛ̀, bɑ́ɑ́ yetɛ Amɔriibɛ kó bɛkpɑ̀ɑ̀tìbɛ̀ bɛ̀ɛ̀ bo yɛtɑ̃rɛ̀ ĩ́nkɛ̀ bɛɛ̀ wɛ̃nnɛ́ kɛ bo ti dokɛ́nɛ̀.
\p
\v 7 Kɛ̀ Sosuwee pɑ̃̀nkɛɛ ítɛ́ Kidikɑɑdi nɛ̀ bɛhɑ̃ɑ̃pɔ̀mbɛ̀ nɛ̀ bɛkpɑ̀rìnuɔmbɛ. 
\v 8 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: A bɑ́ nyĩɛ̃̀kù m bɛ̀ ndɑ duɔ́mmu ɑ yóó bɛ̀ nɑmu bɛmɔu pɑ́íí, òmɔù bɑ́ɑ́ dɑ nɑ.
\p
\v 9 Sosuwee nɛ̀ o kɔbɛ kɛ̀ bɛ̀ɛ ítɛ́ Kidikɑɑdi kɛ́nyié nkɛ kérí kɛyènkɛ̀ kɛmɔu kɛ́pi Amɔriibɛ bɑ́ bɛ̀ í yɛ̃́. 
\v 10 Kɛ̀ ti Yiɛ̀ nKuyie nduɔ́ nkɛ̀ Amɔriibɛɛ bútínnɛ́ kɛ́cokɛ́ kɛ̀ Isidɑyɛɛribɛɛ nɑ Amɔriibɛ, kɛ́ bɛ̀ ɑutɛ́ Kɑbɑɔ̃ɔ̃, kɛ́ bɛ̀ bɛ̀ti Bɛti-Onɔɔ tɑ̃rì, kɛ́ mbɛ̀ kɔ̀ùtì kɛ́tuɔkɛnɛ̀ Asekɑɑ nɛ̀ Mɑkedɑɑ. 
\v 11 Kɛ̀ Amɔriibɛɛ cokɛ́ kɛ́ncuti Bɛti Onɔɔ kɛ̀ ti Yiɛ̀ nKuyie ncṹũnní yɛmɑ́tɑ̃́rɛ̀ diɛyɛ̀ kɛ̀ yɛ̀ɛ bɛ̀ kùɔ kɛ̀ bɛ̀ nsũ kɛ́pɛ̃ɛ̃tɛ́ Isidɑyɛɛribɛ kùɔ bɛ̀ nɛ̀ yɛse.
\p
\v 12 Ti Yiɛ̀ nKuyie nduɔ́ ndìì yiè Amɔriibɛ Isidɑyɛɛribɛ kɛ̀ bɛ̀ nkpɑ nkɛ̀ Sosuwee bɛ́i nyIsidɑyɛɛribɛ bɛmɔu ììkɛ̀ kɛ dɔ̀: Fɔ̃́ ndiyiè, cómmú Kɑbɑɔ̃ɔ̃ ĩ́nkɛ̀, fɔ̃́ nhotɑ̃̀nkù kɑ̀ɑ cómmú Ayɑnɔɔ biriku! 
\v 13 Kɛ̀ diyièe cómmú, kòo tɑ̃̀nkùu cómmú, kɛ̀ Isidɑyɛɛribɛ yɑ̀ɑ nɑnɛ̀ bɛ dootitɔbɛ̀. Tì wɑ̃̀rimu Owenniwe pɑ́tíri\f + \fr 10:13 \fr*\fk Owenniwe pɑ́tíri: \fk*\ft Iyiɛ nkó dipɑ́tíri dikótírì mɑrì ndi kɛ feti bɑ̀mbɑ̀. Bɛ̀ múnkɛ bɛ́immu di kpɛ́í 2 Sɑmmuyɛɛri 1:18.\ft*\f* miɛkɛ kɛ tú: Kɛ̀ diyiè ncómmú tiwɛtì cuokɛ̀ kɛ dɔ̀ diyiè difòùrì kɛ í tɑ. 
\v 14 Kɛ̀ dɛ kó diyiè í dɔkɛ ti Yiɛ̀ nKuyie nyí yie ndiyiè mɑrì onìtì kpɛti mɛmmɛ kó kubotí. Ti Yiɛ̀ nKuyie nku mɔ́mmɔnku kuù do kpɑ nyIsidɑyɛɛribɛ kpɛ́í.
\p
\v 15 Sosuwee nɛ̀ o kɔbɛ Isidɑyɛɛribɛ bɛmɔu kɛ̀ bɛ̀ɛ wɛ̃tɛ bɛ kɑ̀ri dɛ̀ Kidikɑɑdi.
\s1 Bɛkpɑ̀ɑ̀tìbɛ̀ bɛ̀nùmmù do sɔrimɛ̀ Mɑkedɑɑ tɑ̃dènkù
\p
\v 16 Kɛ̀ Amɔriibɛ kpɑ̀ɑ̀tìbɛ̀ bɛnùmmùu cokɛ́ kɛ́sɔri Mɑkedɑɑ tɑ̃dènkù. 
\v 17 Kɛ̀ bɛ̀ɛ nɑ́kɛ́ Sosuwee kɛ dɔ̀: Ti yɑ̀mu bɛkpɑ̀ɑ̀tìbɛ̀ bɛnùmmù kɛ̀ bɛ̀ cokɛ́ kɛ sɔ̀ri Mɑkedɑɑ tɑ̃dènkù. 
\v 18 Kɛ̀ Sosuwee nɑ́kɛ́ bɛnìtìbɛ̀ kɛ dɔ̀: Biennɛ̀ yɛtɑ̃́diɛyɛ̀ kɛ́kpetínnɛ́ dibòrì kɛ́mbɑɑ. 
\v 19 Nkpɑɑ́ bɛtìnɛ̀ di dootitɔbɛ̀, kɛ́ bɛ̀ dintɛ́, di bɑ́ɑ́ yie nkɛ̀ bɛ̀ɛ kò nti Yiɛ̀ nKuyie mbɛ̀ ndi duɔ́mmu.
\p
\v 20 Sosuwee nɛ̀ o kɔbɛ Isidɑyɛɛribɛ kɛ̀ bɛ̀ɛ kuɔ Amɔriibɛ kɛ́ndɔ́ kɛ́ bɛ̀ dèè, kɛ̀ bɛ̀mɑbɛ̀ɛ nɑ kɛ́yentɛ́ kɛ́tɑɑ́ bɛ ɛkɛ̀ iduotí fitɛ́ yɛ̀. 
\v 21 Kɛ̀ Isidɑyɛɛribɛɛ wɛ̃tɛ Mɑkedɑɑ bɛ̀ bɑ̀tɛ́ dɛ̀, òmɔù tɛ̃́nkɛ í ndɑ̀ɑ́tí kɛ bɛ̀ bɛ́innɛ̀ tìmɑtì.
\p
\v 22 Kɛ̀ Sosuwee dɔ̀: Kpetɛ́nɛ̀ kutɑ̃dènkù kɛ́dennɛní bɛkpɑ̀ɑ̀tìbɛ̀ bɛnùmmù bɛmbɛ. 
\v 23 Kɛ̀ bɛ̀ɛ kpetɛ́ kɛ́ bɛ̀ dènnɛní, Sedisɑdɛmmu kóo kpɑ̀ɑ̀tì nɛ̀ Ebunɔɔ kou nɛ̀ Yɑdimuti kou nɛ̀ Dɑkiisi kou, nɛ̀ Ekunɔɔ kou, kɛ́ bɛ̀ duɔ́ nSosuwee. 
\v 24 Kòo yú Isidɑyɛɛribɛ bɛmɔu kɛ́nɑ́kɛ́ bɛ̀ɛ̀ do ò nɛínɛ̀ kɛ ni mudoò kɛ dɔ̀: Kɔtɛnní kɛ́nɑ bɛ fɔ̃̀níí. Kɛ̀ bɛ̀ɛ ì nɑ, kɛ̀ Sosuwee dɔ̀: 
\v 25 Di bɑ́ nyĩɛ̃̀kù kɛ̀ di kɔ̃m̀bùɔ̀tì duò, tɛ̃ĩ́nnɛ̀ kɛ́yɑ́úkùnnɛ di kɔ̃̀ntì, ti Yiɛ̀ nKuyie nyóó dɔɔ̀ miɛ mmɛ di dootitɔbɛ̀ bɛmɔu. 
\v 26 Dɛ kó difɔ̃nkúò kɛ́ bɛ̀ kùɔ, kɛ́sɑɑ ndɛtie ndɛ̀nùmmù. Kɛ̀ bɛ̀ nsɑkɛ nɛ̀ kuyuokoo.
\p
\v 27 Diyiè tɑti dìì mɔ̀nnì kɛ̀ Sosuwee duɔ́ nkɛ̀ bɛ̀ɛ bɛ̀ cṹũnní kɛ́tɑnnɛ́ kutɑ̃dènkù bɛ̀ do sɔri kùù miɛkɛ, kɛ́ĩ́tínnɛ́ yɛtɑ̃́rɛ̀ diɛyɛ̀ kɛ̀ yɛ̀ kpɑɑ́ bo nɛ̀ yíenní.
\s1 Sosuwee nɑmɛ̀ kubɑkù cɑ̃̀nku kó yɛhɛkɛ̀
\p
\v 28 Dɛ kó diyiè dimɑ́ɑ̀ miɛkɛ kɛ̀ Sosuwee pi Mɑkedɑɑ kó dihɛì kɛ́kuɔ okpɑ̀ɑ̀tì nɛ̀ bɛnìtìbɛ̀ bɛmɔu ò í nsùɔ́ nhòmɔù, kɛ́dɔɔ̀ okpɑ̀ɑ̀tì ò do dɔ̀ɔ̀mɛ̀ Sedikoo kou.
\p
\v 29 Sosuwee nɛ̀ o kɔbɛ Isidɑyɛɛribɛ kɛ̀ bɛ̀ɛ ítɛ́ Mɑkedɑɑ kɛ́kɔtɛ kɛ́pi Dibunɑɑ ɛì kɔbɛ. 
\v 30 Kɛ̀ ti Yiɛ̀ nKuyie mbɛ̀ duɔ́ ndɛ kó dihɛì kɛ̀ bɛ̀ɛ kuɔ okpɑ̀ɑ̀tì nɛ̀ bɛnìtìbɛ̀ bɛmɔu, bɛ̀ í nsùɔ́ nhòmɔù, kɛ́dɔɔ̀ okpɑ̀ɑ̀tì bɛ̀ do dɔ̀ɔ̀mɛ̀ Sedikoo kou.
\p
\v 31 Sosuwee nɛ̀ o kɔbɛ Isidɑyɛɛribɛ kɛ̀ bɛ̀ɛ ítɛ́ Dibunɑɑ kɛ́kɔtɛ kɛ́bɑ́tɛ́ Dɑkiisi ɛì tɑkɛ́ kɛ́ dì pi. 
\v 32 Kɛ̀ ti Yiɛ̀ nKuyie mbɛ̀ duɔ́ ndɛ kó dihɛì kɔbɛ kɛ̀ bɛ̀ɛ bɛ̀ nɑ diyiè dɛ́rì kɛ́kuɔ bɛnìtìbɛ̀ bɛmɔu bɛ̀ dɔ̀ɔ̀mɛ̀ Dibunɑɑ. Bɛ̀ í nsùɔ́ nhòmɔù. 
\v 33 Kɛ̀ Odɑmmu Kesɛɛ kpɑ̀ɑ̀tìi bɑ́ɑ́tí kɛ́teennɛ̀ Dɑkiisi, kɛ̀ Sosuwee ò kùɔ nɛ̀ o kɔbɛ bɛmɔu, ò í nsùɔ́ nhòmɔù.
\p
\v 34 Sosuwee nɛ̀ o kɔbɛ kɛ̀ bɛ̀ɛ ítɛ́ Dɑkiisi kɛ́bɑ́tɛ́ Ekunɔɔ ɛì tɑkɛ́ kɛ́ bɛ̀ pi kɛ́ bɛ̀ dokɛ́nɛ̀, 
\v 35 kɛ́ bɛ̀ nɑ kɛ́kuɔ bɛnìtìbɛ̀ bɛmɔu dɛ yiè bɛ̀ dɔ̀ɔ̀ mɛ̀ɛ̀ botí Dɑkiisi ɛì kɔbɛ.
\p
\v 36 Sosuwee nɛ̀ o kɔbɛ kɛ̀ bɛ̀ɛ ítɛ́ Ekunɔɔ kɛ́kɔtɛ Ebunɔɔ ɛì kɛ́ bɛ̀ pi kɛ́ bɛ̀ dokɛ́nɛ̀, 
\v 37 kɛ́ bɛ̀ nɑ kɛ́kuɔ okpɑ̀ɑ̀tì nɛ̀ o nìtìbɛ̀, kɛ́pi yɛhɛkɛ̀ yɛ̀ɛ̀ dɛ̀ tɔ̀kɛ́ kɛ́kuɔ bɛnìtìbɛ̀ bɛmɔu, ò í nsùɔ́ nhòmɔù, ò dɔ̀ɔ̀ mɛ̀ɛ̀ botí Ekunɔɔ ɛì kɔbɛ.
\p
\v 38 Sosuwee nɛ̀ o kɔbɛ kɛ̀ bɛ̀ɛ kóntɛ́ kɛ́wetínnɛ́ Debii ɛì kɔbɛ, kɛ́ bɛ̀ pi, kɛ́ bɛ̀ dokɛ́nɛ̀, 
\v 39 kɛ́ bɛ̀ nɑ kɛ́kuɔ okpɑ̀ɑ̀tì kɛ́puɔ nyɛhɛkɛ̀ yɛ̀ɛ̀ dɛ̀ tɔ̀kɛ́ ò í nsùɔ́ nhòmɔù, kɛ́dɔɔ̀ Dibii kpɑ̀ɑ̀tì ò dɔ̀ɔ̀ mɛ̀ɛ̀ botí Ebunɔɔ kou nɛ̀ Dibunɑɑ kou.
\p
\v 40 Kɛ̀ Sosuwee nɑ yɛhɛkɛ̀ yɛmɔu: Yɛtɑ̃rɛ̀ ĩ́nkɛ̀ kó bɛkpɑ̀ɑ̀tìbɛ̀ nɛ̀ kubɑkù cɑ̃̀nku kɔbɛ nɛ̀ kubiriku kɔbɛ nɛ̀ diyiè yìɛ̀ní kɛ̀ɛ̀ bíɛ́kɛ̀ kɔbɛ. Ò í nsùɔ́ nhòmɔù. Kɛ́ndònnɛ̀ ti Yiɛ̀ nKuyie nyIsidɑyɛɛribɛ tũ nkù do bɛ̀ nɑ̀kɛ́mɛ̀. 
\v 41 Kɛ̀ Sosuwee nɑ Kɑdɛɛsi-Bɑnnɛɑ kɛ́ntɔ kɛ́tuɔkɛnɛ̀ Kɑsɑɑ diyiè yìɛ̀ní kɛ̀ɛ̀ bíɛ́kɛ̀ kubɑkù cɑ̃̀nku, kɛ́nɑ Kɔsɛnni kó kutempɛ̃ kɛ́ntɔ nkɛ́tuɔkɛnɛ̀ Kɑbɑɔ̃ɔ̃ diyiè yìɛ̀ní kɛ̀ɛ̀ bíɛ́kɛ̀ kubɑkù yoú. 
\v 42 Kɛ̀ Sosuwee nɑ bɛkpɑ̀ɑ̀tìbɛ̀ bɛmɔu nɛ̀ bɛ ɛkɛ̀ kucɛ mɛ̀mɑ́ɑ̀. Ti Yiɛ̀ nKuyie nkuù do kpɑ nku kó bɛnìtìbɛ̀ Isidɑyɛɛribɛ kpɑ̀nnì. 
\v 43 Dɛ kó difɔ̃nkúò Sosuwee nɛ̀ o kɔbɛ bɛmɔu kɛ̀ bɛ̀ɛ wɛ̃tɛ bɛ kɑrì Kidikɑɑdi.
\c 11
\s1 Bɛ̀ dokɛ́mɛ̀ Mɛdommu bií tɑkɛ́
\p
\v 1 Kɛ̀ Yɑbinni Asɔɔ kpɑ̀ɑ̀tìi keè Sosuwee nɑmɛ̀ yɛhɛkɛ̀ kɛ́tɔ̃ nkɛ̀ bɛ̀ɛ nɑ́kɛ́ Yobɑbu Mɑtɔ̃ɔ̃ kpɑ̀ɑ̀tì nɛ̀ Simmudonni kou nɛ̀ Akisɑfi kou, 
\v 2 kɛ́tɔ̃ nkɛ̀ bɛ̀ɛ nɑ́kɛ́ tɛdɔntɛ̀ Adɑbɑ tɑ̃rɛ̀ fíè nkó bɛkpɑ̀ɑ̀tìbɛ̀ kubɑkù yoú kɔbɛ nɛ̀ Suditɛ̃ɛ̃ biriku kɔbɛ nɛ̀ bɛ̀ɛ̀ tɔ̀kɛ́nɛ̀ Kinnɑdoti\f + \fr 11:2 \fr*\fk Kinnɑdoti: \fk*\ft Dɛ kó tɛdɔntɛ̀ bo Sennɛsɑdɛti kó mɛniɛ mborɛ̀.\ft*\f* kóo dɑ̀mɛ́ɛ̀rì, nɛ̀ yɛhɛkɛ̀ yɛ̀ɛ̀ sokɛ́ ditɑ̃rì nɛ̀ dɑ̀mɛ́ɛ̀rì dɛ cuokɛ̀ kɛ́tuɔkɛnɛ̀ Dɔɔ kó kutempɛ̃ diyiè yìɛ̀ní kɛ̀ɛ̀ bíɛ́kɛ̀. 
\v 3 Kòo tɑunnɛ̀ Kɑnnɑhɑ̃ɑ̃ kɔbɛ diyiè yìɛ̀ní kɛ̀ɛ̀ bíɛ́kɛ̀ kɔbɛ nɛ̀ bɛ̀ɛ̀ bo yɛtɑ̃rɛ̀ ĩ́nkɛ̀, nɛ̀ Amɔriibɛ nɛ̀ Itiibɛ nɛ̀ Pedisiibɛ nɛ̀ Sebusiibɛ bɛ̀ɛ̀ bo yɛtɑ̃rɛ̀ ĩ́nkɛ̀ nɛ̀ Efiibɛ bɛ̀ɛ̀ bo Edimɔɔ tɑ̃rì pɛɛ́mmɛ̀ Misipɑɑ kó kutempɛ̃ mmiɛkɛ. 
\v 4 Kɛ̀ bɛ̀ɛ bɑ́ɑ́tí nɛ̀ bɛhɑ̃ɑ̃pɔ̀mbɛ̀ kɛ́nsũ mɛsɑ̀ɑ̀ nkɛ mɑ̀nnɛ̀ dɑ̀mɛ́ɛ̀rì nùù kó mubirímú nɛ̀ sisɛ̃ĩ́ pɛ́u nɛ̀ sinɑɑsɛ̃ĩ́. 
\v 5 Kɛ̀ bɛ̀ɛ wɛ̃nnɛ́ bɛmɔu kɛ́bɑ́tɛ́ Mɛdommu sibií borɛ̀ kɛ bo dokɛ́nɛ̀ Isidɑyɛɛribɛ.
\p
\v 6 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: A bɑ́ɑ́ bɛ̀ yɔ̀tɛ, dɛ̀ nɑɑ yó nkɑ̃́ɑ̃́kɛ́ miɛ nkɛ̀ n duɔ́ nkɛ̀ bɛ̀ɛ kúmu bɛmɔu Isidɑyɛɛribɛ ììkɛ̀. Kɑ̀ɑ kékɛ́ bɛ sɛ̃ĩ́ duɔti kɛ́cɔ́u mbɛ nɑɑsɛ̃ĩ́.
\p
\v 7 Sosuwee nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ bɛ̀ do kɛ́ bɛ̀ dɛ̀ɛ́tɛ́ dɛndɛ bɑ̀mbɑ̀ mMɛdommu sibií borɛ̀. 
\v 8 Kɛ̀ ti Yiɛ̀ nKuyie nduɔ́ nkɛ̀ Isidɑyɛɛribɛɛ bɛ̀ nɑ kɛ́ bɛ̀ bɛ̀ti kubɑkù yoú bíɛ́kɛ̀ kɛ́tuɔkɛnɛ̀ dihɛì bɛ̀ tu dì Sidonni diɛwè, kɛ́tuɔkɛnɛ̀ Misidefɔti Misifɔɔ Mɑyimmu diyiè yìɛ̀ní kɛ̀ɛ̀ bíɛ́kɛ̀, kɛ́tuɔkɛnɛ̀ Misipee biriku diyiè yìɛ̀ní kɛ̀ɛ̀ bíɛ́kɛ̀, kɛ́ bɛ̀ kùɔ bɛmɔu bɛ̀ í nsùɔ́ nhòmɔù. 
\v 9 Kɛ̀ Sosuwee dɔɔ̀ ti Yiɛ̀ nKuyie nhò nɑ̀kɛ́ tì kɛ́kékɛ́ bɛ sɛ̃ĩ́ duɔti kɛ́cɔ́u mbɛ nɑɑsɛ̃ĩ́.
\s1 Sosuwee nɑmɛ̀ Asɔɔ
\p
\v 10 Kɛ̀ Sosuwee nwɛ̃tiní kɛ́pi Asɔɔ ɛì kɛ́kuɔ di kóo kpɑ̀ɑ̀tì. Asɔɔ do tú kubɑkù yoú kó bɛkpɑ̀ɑ̀tìbɛ̀ kó dihɛì diɛrì ndi. 
\v 11 Kòo kuɔ bɛnìtìbɛ̀ bɛmɔu nɛ̀ dɛ̀ɛ̀ kó dimɑ̀ɑ̀ weí, ò í nsùɔ́ nhòmɔù, kɛ́cɔ́u ndihɛì. 
\v 12 Kɛ̀ bɛ̀ɛ nɑ bɛkpɑ̀ɑ̀tìbɛ̀ bɛ̀ɛ̀ wɛ̃nnɛ́, kɛ́ bɛ̀ kùɔ bɛmɔu nɛ̀ bɛnìtìbɛ̀ kɛ́ndònnɛ̀ Mɔyiisi ti Yiɛ̀ nKuyie tɔ̃ntì do tì nɑ̀kɛ́mɛ̀. 
\v 13 Isidɑyɛɛribɛ do í cɔ́u nyɛtɑ̃rɛ̀ ĩ́nkɛ̀ kó dihɛì mɑrì, Asɔɔ mɑ́ɑ̀ ndi Sosuwe do cɔ́ummɛ̀. 
\v 14 Kɛ̀ Isidɑyɛɛribɛɛ kuɔ bɛnìtìbɛ̀ bɛmɔu bɛ̀ í nsùɔ́ nhòmɔù, kɛ́hɛí bɛ kpɛrɛ dɛmɔu nɛ̀ bɛ wũɔ̃. 
\v 15 Ti Yiɛ̀ nKuyie ndo nɑ̀kɛ́ tì ku kóo tɔ̃ntì Mɔyiisi ò do ti nnɑ̀kɛ́ Sosuwee kɛ̀ Sosuwee tì dɔ̀ɔ̀ timɔu ò í nsùɔ́ ntìmɑtì.
\s1 Sosuwee nɑmɛ̀ yɛhɛkɛ̀ yɛmɔu
\p
\v 16 Mɛmmɛ Sosuwee nɑmɛ̀ yɛhɛkɛ̀ yɛmɔu: Yɛtɑ̃rɛ̀ ĩ́nkɛ̀ kpɛyɛ Nɛkɛfu kpɛyɛ nɛ̀ Kosɛnni kpɛyɛ dikpɑ́ɑ̀ tɛdɔntɛ̀ Adɑbɑɑ biriku kpɛyɛ nɛ̀ Sefedɑɑ, nɛ̀ kubɑkù yoú kó yɛtɑ̃rɛ̀ nɛ̀ dɛ kó kubiriku kpɛyɛ. 
\v 17 Kɛ̀ bɛ̀ɛ nɑ bɛkpɑ̀ɑ̀tìbɛ̀ bɛ̀ɛ̀ bo ditɑ̃rì dìì í ɑ̃ timútì, kɛ tɔ́kɛ́nɛ̀ Seii, kɛ́tuɔkɛ Bɑdikɑɑdi kubiriku, Dimɑɑ nɛ̀ Edimɔɔ tɑ̃rì, kɛ́ bɛ̀ kùɔ bɛmɔu pɑ́íí. 
\v 18 Sosuwee do dokɛ́nɛ̀ bɛkpɑ̀ɑ̀tìbɛ̀ kɛ̀ dɛ̀ɛ mɔntɛmu. 
\v 19 Bɛ̀mɑbɛ̀ do í ò tɑunnɛ̀ kɛ̀ dɛ̀ í tú Efiibɛ Kɑbɑɔ̃ɔ̃ ɛì kɔbɛ. Kɛ̀ Isidɑyɛɛribɛɛ kuɔ yɛhɛkɛ̀ sɔnyɛ kɔbɛ bɛmɔu, kɛ́tiekɛ bɛ ɛkɛ̀. 
\v 20 Ti Yiɛ̀ nKuyie nkuù do kpénkùnnɛ bɛ to, kɛ̀ bɛ̀ ndɔ́nɛ̀ Isidɑyɛɛribɛ dikpɑ̀nnì. Kɛ̀ Isidɑyɛɛribɛ mbɛ̀ kɔ̀ù. Ti Yiɛ̀ nKuyie nkuù do tì nɑ̀kɛ́ ku kóo tɔ̃ntì Mɔyiisi.
\p
\v 21 Dɛ kó dimɔ̀nnì dimɑ́ɑ̀ kɛ̀ Sosuwee dokɛ́nɛ̀ Anɑkiibɛ bɛ̀ɛ̀ do bo yɛtɑ̃rɛ̀ kó yɛhɛkɛ̀ nɛ̀ Ebunɔɔ nɛ̀ Debii nɛ̀ Anɑbu nɛ̀ Sudɑɑ nɛ̀ Isidɑyɛɛribɛ kó yɛtɑ̃rɛ̀ yɛmɔu kɔbɛ kɛ́kuɔ dɛ kó bɛnìtìbɛ̀, kɛ́puɔ mbɛ ɛkɛ̀ pɑ́í pɑ́í. 
\v 22 Anɑkiibɛ tɛ̃́nkɛ í nkpɑɑ́ Isidɑyɛɛribɛ ɛì, bɛ̀ do kpɑɑ́ bo Kɑsɑɑ nwe nɛ̀ Kɑti nɛ̀ Asidɔti. 
\v 23 Kɛ̀ Sosuwee tiekɛ kɛtenkɛ̀ kɛmɔu kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ Mɔyiisi, kɛ̀ Sosuwee kɛ̀ totí bɛ botí dòmmɛ̀, kɛ̀ dikpɑ̀nnìi deè kɛ̀ dɛ̀ɛ bonkɛ.
\c 12
\s1 Isidɑyɛɛribɛ nɑ bɛ̀ɛ̀ kpɑ̀ɑ̀tìbɛ̀ kó yɛyètɛ̀
\p
\v 1 Ntɛ Isidɑyɛɛribɛ do nɑ yɛ̀ɛ̀ ɛkɛ̀ kó bɛkpɑ̀ɑ̀tìbɛ̀ kɛ́tiekɛ bɛ ɛkɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀, kɛ́túótɛ́ kukó nhAdinɔ nkɛ́tuɔkɛnɛ̀ Ɛdimɔɔ tɑ̃rì nɛ̀ Adɑbɑ biriku. 
\v 2 Oketiwè tu Sionni Amɔriibɛ kóo kpɑ̀ɑ̀tì wèè do bo Ɛsibonni kɛ te Adowɛɛ kɛ́tuɔkɛnɛ̀ Adinɔ biriku kó dikéè nɛ̀ Kɑdɑɑdi kó dikéè kɛ́tuɔkɛnɛ̀ kukó nSɑbɔki nɛ̀ Amɔniibɛ bɛ mɑ̀nku. 
\v 3 Weè do te nɛ̀ Suditɛ̃ɛ̃ biriku diyiè yìɛ̀ní kɛ̀ɛ̀ bíɛ́kɛ̀ Sennɛsɑdɛti kóo dɑ̀mɛ́ɛ̀rì kɛ́tuɔkɛ dɑ̀mɛ́ɛ̀rì mukɔ́kúɔ́ nkou, Bɛti-Yesimɔti tɑkɛ́, nɛ̀ kubɑkù cɑ̃̀nku Pisikɑɑ tɑ̃rì kó yɛhɛkɛ̀. 
\v 4 Odɛ́rì do tú: Ɔku Dɛfɑiibɛ botí kóò sɔnwe, wèè do bɑ̀tɛ́ Bɑsɑ̃ɑ̃, kɛ ɑ̃ Asetɑdoti nɛ̀ Etedeii. 
\v 5 Weè do bɑkɛ́ Ɛdimɔɔ tɑ̃rì, kɛ bɑkɛ́ Sɑdikɑɑ nɛ̀ Bɑsɑ̃ɑ̃ omɔu, kɛ́tuɔkɛ Kesuriibɛ nɛ̀ Mɑkɑtiibɛ bɛ mɑ̀nku, nɛ̀ Kɑdɑɑdi kó dikéè kɛ́tuɔkɛ Sionni Ɛsibonni kpɑ̀ɑ̀tì mɑ̀nku. 
\v 6 Mɔyiisi ti Yiɛ̀ nKuyie nkóo tɔ̃ntì nɛ̀ Isidɑyɛɛribɛ bɛ̀ do nɑmu dɛ kó bɛkpɑ̀ɑ̀tìbɛ̀ kɛ̀ Mɔyiisii duɔ́ ndɛ kó kɛtenkɛ̀ Dubɛnniibɛ nɛ̀ Kɑdiibɛ nɛ̀ Mɑnɑnsee botí kɔbɛ kó dikéè.
\p
\v 7 Sosuwee nɛ̀ Isidɑyɛɛribɛ kɛ̀ bɛ̀ɛ nɑ bɛkpɑ̀ɑ̀tìbɛ̀ bɛ̀ɛ̀ bo Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀. Bɛ̀ɛ̀ do te Bɑdikɑɑdi nɛ̀ Dimɑɑ kó kubiriku kɛ́ntɔ kɛ́tuɔkɛnɛ̀ ditɑ̃rì dìì í ɑ̃ timútì kubɑkù cɑ̃̀nku bíɛ́kɛ̀, kɛ tɔ́kɛ́nɛ̀ Seii diyiè yìɛ̀ní kɛ̀ɛ̀ bíɛ́kɛ̀. Kɛ̀ Sosuwee totí dɛ kó kɛtenkɛ̀ Isidɑyɛɛribɛ bɛ botí dòmmɛ̀. 
\v 8 Dɛ kó yɛhɛkɛ̀ yɛɛ̀ do tú yɛtɑ̃rɛ̀ kó kutempɛ̃ nnɛ̀ kubiriku nɛ̀ Suditɛ̃ɛ̃ kó kubiriku nɛ̀ ditɑ̃rì pɛ̃ri nɛ̀ dikpɑ́ɑ̀ bíɛ́kɛ̀ kpɛri nɛ̀ Nɛkɛfu kpɛri. Itiibɛ, nɛ̀ Amɔriibɛ, Kɑnnɑhɑ̃ɑ̃ kɔbɛ Pedisiibɛ nɛ̀ Efiibɛ nɛ̀ Sebusiibɛ, bɛɛ̀ do te dɛ kó yɛhɛkɛ̀. 
\v 9 Ntɛ Sosuwee nɑ yɛ̀ɛ̀ ɛkɛ̀ kó bɛkpɑ̀ɑ̀tìbɛ̀ kó yɛhɛkɛ̀ yètɛ̀: Sedikoo kou nɛ̀ Aii kou dìì tɔ́kɛ́nɛ̀ Betɛɛdi, 
\v 10 nɛ̀ Sedisɑdɛmmu kou nɛ̀ Ebunɔɔ kou 
\v 11 nɛ̀ Yɑdimuti kou nɛ̀ Dɑkiisi kou 
\v 12 nɛ̀ Ekunɔɔ kou nɛ̀ Kesɛɛ kou 
\v 13 nɛ̀ Debii kou nɛ̀ Kedɛɛ kou 
\v 14 nɛ̀ Ɔdimɑɑ kou nɛ̀ Adɑdi kou 
\v 15 nɛ̀ Dibunɑɑ kou nɛ̀ Adudɑmmu kou 
\v 16 nɛ̀ Mɑkedɑɑ kou nɛ̀ Betɛɛdi kou 
\v 17 nɛ̀ Tɑpuɑ kou nɛ̀ Efɛɛ kou 
\v 18 nɛ̀ Afɛki kou nɛ̀ Sɑnɔɔ kou 
\v 19 nɛ̀ Mɑnɔɔ nɛ̀ Asɔɔ 
\v 20 nɛ̀ Simminɔɔ Mɛnɔɔ kou nɛ̀ Akisɑfi kou 
\v 21 nɛ̀ Tɑnɑki kou nɛ̀ Mɛkidoo kou 
\v 22 nɛ̀ Kedɛsi kou nɛ̀ Yokindeɑmmu kou nɛ̀ Kɑdimɛɛdi kou 
\v 23 nɛ̀ Dɔɔ dɑ̀mɛ́ɛ̀rì tɑkɛ́ kou nɛ̀ Koimmu dìì bo Kidikɑɑdi kó kutempɛ̃ mmiɛkɛ. 
\v 24 Nɛ̀ Tidisɑɑ kou. Bɛmɔu bɛ̀ bo bɛkpɑ̀ɑ̀tìbɛ̀ sipísìtɑ̃ɑ̃ti nɛ̀ òmɑ́ɑ̀ ndi.
\c 13
\s1 Isidɑyɛɛribɛ totí mɛ̀ɛ̀ botí kɛtenkɛ̀
\p
\v 1 Kɛ̀ Sosuwee kótɛ́ kɛ̀ ti Yiɛ̀ nKuyie nhò nɑ̀kɛ́ kɛ dɔ̀: A kòtɛ́mu mɛdiɛ̀ nkɛ̀ yɛhɛkɛ̀ kpɑɑ́ sũ ɑ dò nkɛ́tiekɛ yɛ̀. 
\v 2 Fidisitɛ̃ɛ̃bɛ nɛ̀ Kesuriibɛ kó itempɛ̃. 
\v 3 Kɑnnɑhɑ̃ɑ̃ kɔbɛ kó kɛtenkɛ̀ kɛ̀ɛ̀ ketɛ́ kukó nSiɔɔri nɛ̀ Esibiti kɔbɛ dɛ̀ mɑ̀nku, kɛ́tuɔkɛ Ekunɔɔ kubɑkù yoú. Fidisitɛ̃ɛ̃bɛ kó bɛkpɑ̀ɑ̀tìbɛ̀ bɛnùmmù borɛ̀, kɛ̀ bɛ ɛkɛ̀ diɛyɛ̀ tu: Kɑsɑɑ nɛ̀ Asidɔti nɛ̀ Asikɑnɔɔ nɛ̀ Kɑti nɛ̀ Ekunɔɔ nɛ̀ Afiibɛ kó kɛtenkɛ̀, 
\v 4 kɛ́túótɛ́ kubɑkù cɑ̃̀nku bíɛ́kɛ̀ Kɑnnɑhɑ̃ɑ̃ kɔbɛ kó kɛtenkɛ̀ kɛmɔu, kɛ́túótɛ́ Adɑɑ Sidonniibɛ kó kɛtenkɛ̀ kɛ́tuɔkɛ Afɛki, nɛ̀ Amɔriibɛ dɛ mɑ̀nku. 
\v 5 Kebɑɑdi kó kɛtenkɛ̀ nɛ̀ Dimɑɑ diyiè yìɛ̀ní kɛ̀ɛ̀ bíɛ́kɛ̀, kɛ́túótɛ́ Bɑdikɑɑdi Ɛdimɔɔ tɑ̃rì pɛ̃ri, kɛ́tuɔkɛ Debo Amɑti. 
\v 6 Nɛ̀ ditɑ̃rì kó yɛhɛkɛ̀ yɛ̀ɛ̀ bo Dimɑɑ nɛ̀ Misifɔɔ-Mɑyimmu dɛ cuokɛ̀, Sidonniibɛ bɛmɔu ɑ̃ yɛ̀. Kɛ̀ ti Yiɛ̀ nKuyie mbɛ́i nkɛ dɔ̀: N yó nni kɛ bɛ̀ bɛ̀tìmu kɛ̀ di tũ. Kɑ̀ɑ totí Isidɑyɛɛribɛ dɛ kó yɛhɛkɛ̀ kɛ́ndònnɛ̀ n tì ndi nɑ̀kɛ́mɛ̀.
\p
\v 7 Totí dɛ kó kɛtenkɛ̀ Isidɑyɛɛribɛ ibotí iwɛì nɛ̀ Mɑnɑnsee botí kɔbɛ kó dikéè.
\s1 Bɛ̀ totímɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ kó yɛhɛkɛ̀
\p
\v 8 Mɑnɑnsee botí kɔbɛ kó dikéè nɛ̀ Dubɛnniibɛ nɛ̀ Kɑdiibɛ bɛ̀ do bɛ duɔ́mmu bɛ kó kɛtenkɛ̀ Suditɛ̃ɛ̃ yɑ́ɑ̀ diyiè yìɛ̀ní kɛ̀ɛ̀ bíɛ́kɛ̀. Mɔyiisi ti Yiɛ̀ nKuyie nkóo tɔ̃ntì weè do kɛ̀ mbɛ̀ totí. 
\v 9 Bɛ tenkɛ̀ mɑ̀nku do tú Adowɛɛ, kubɑkù cɑ̃̀nku bíɛ́kɛ̀, kɛ́yɛ̀nnɛ̀ kukó nhAdinɔ nɛ̀ dihɛì dìì sokɛ́ dɛ kó kubiriku dɛ cuokɛ̀, bɛɛ̀ do te nɛ̀ Mɛdebɑɑ Dibonni tɑ̃dɑ̀nkù. 
\v 10 Nɛ̀ Amɔriibɛ kpɑ̀ɑ̀tì diɛwè Sionni kó yɛhɛkɛ̀. Weè do bɑkɛ́ Ɛsibonni kɛ́tuɔkɛnɛ̀ Amɔniibɛ dɛ mɑ̀nku. 
\v 11 Bɛɛ̀ do te nɛ̀ Kɑdɑɑdi kó dihɛì nɛ̀ Kesuriibɛ kó kutempɛ̃ nnɛ̀ Mɑɑkɑɑ nɛ̀ Ɛdimɔɔ tɑ̃rì nɛ̀ Bɑsɑ̃ɑ̃ omɔu, kɛ́tuɔkɛ Sɑdikɑɑ. 
\v 12 Kɛ tenɛ̀ okpɑ̀ɑ̀tì Ɔku Defɑiibɛ botí kou sɔnwe kó kɛtenkɛ̀ weè do bɑkɛ́ Asetɑdoti nɛ̀ Etedeii Bɑsɑ̃ɑ̃ tempɛ̃ mmiɛkɛ. Mɔyiisi weè do bɛ̀ nɑ kɛ́cɔutɛ́ bɛ tenkɛ̀. 
\v 13 Isidɑyɛɛribɛ mɛ nyí mbɛ̀ti Kesuriibɛ nɛ̀ Mɑkɑtiibɛ, kɛ̀ bɛ̀ kpɑɑ́ bo bɛ cuokɛ̀ nɛ̀ yíenní.
\p
\v 14 Defiibɛ bɛɛ̀ mɑ́ɑ̀ do í mɔkɛ kɛtenkɛ̀ bɛ̀ do pɑ̃ɑ̃ nyɛ̀ɛ̀ pɑ̃rɛ̀ ti Yiɛ̀ nKuyie nyɛɛ̀ do tú bɛ kpɛrɛ kɛ́ndònnɛ̀ ti Yiɛ̀ nKuyie ndo tì mbɛ̀ nɑ̀kɛ́mɛ̀.
\s1 Bɛ̀ totímɛ̀ Dubɛnniibɛ bɛ tenkɛ̀
\p
\v 15 Ntɛnɛ̀ Mɔyiisi duɔ́mmɛ̀ Dubɛnniibɛ bɛ kó kɛtenkɛ̀ bɛ botí dòmmɛ̀. 
\v 16 Bɛ tenkɛ̀ mɑ̀nku do tú Adowɛɛ kubɑkù cɑ̃̀nku bíɛ́kɛ̀ kɛ́yɛ̀nnɛ̀ kukó nhAdinɔ nɛ̀ dihɛì dìì sokɛ́ dɛ kó kubiriku dɛ cuokɛ̀ bɛɛ̀ do te nɛ̀ Mɛdebɑɑ tɑ̃dɑ̀nkù kó kɛtenkɛ̀. 
\v 17 Nɛ̀ Ɛsibonni nɛ̀ yɛhɛkɛ̀ yɛmɔu yɛ̀ɛ̀ bo kutɑ̃dɑ̀nkù: Dibonni nɛ̀ Bɑmɔti-Bɑɑdi nɛ̀ Bɛtibɑdimɛɔ̃ɔ̃ 
\v 18 nɛ̀ Yɑɑsi nɛ̀ Ketimɔti nɛ̀ Mɛfɑɑ 
\v 19 nɛ̀ Kidiyɑtɑimmu nɛ̀ Simbemɑɑ nɛ̀ Sedesɑɑ dìì bɑkɛ́ kubiriku 
\v 20 nɛ̀ Bɛti-Pɛɔɔ nɛ̀ Disikɑɑ tɑ̃rì pɛ̃ri nɛ̀ Bɛti-Yesimɔti 
\v 21 nɛ̀ kutɑ̃dɑ̀nkù kó yɛhɛkɛ̀ yɛmɔu. Amɔriibɛ kpɑ̀ɑ̀tì Sionni wèè do bɑkɛ́ Ɛsibonni o kó yɛhɛkɛ̀ bomu dɛ miɛkɛ. Mɔyiisi weè do nɑ Sionni nɛ̀ Mɑndiyɑ̃ɑ̃ kpɑ̀ɑ̀tì, kɛ̀ bɛ̀ ndò nho kó tidɑɑtì kɛ bo o tenkɛ̀: Efii nɛ̀ Dekɛmmu nɛ̀ Tisuu nɛ̀ Uuri nɛ̀ Debɑɑ. 
\v 22 Opɑ̃ũ̀ Bɑdɑmmu Beɔɔ birɛ do kɔkɛ́mu Isidɑyɛɛribɛ kùɔ bɛ̀ miɛkɛ. 
\v 23 Suditɛ̃ɛ̃ weè do tú Dubɛnniibɛ tenkɛ̀ mɑ̀nku dɛ ììkɛ̀ bíɛ́kɛ̀. Bɛ̀ do bɛ̀ totí yɛ̀ɛ̀ ɛkɛ̀ bɛ botí dòmmɛ̀ yɛɛ̀ kó yɛyètɛ̀ tu ti yɑ̀ní yɛ̀.
\s1 Bɛ̀ totímɛ̀ Kɑdiibɛ bɛ tenkɛ̀
\p
\v 24 Ntɛnɛ̀ Mɔyiisi duɔ́mmɛ̀ Kɑdiibɛ bɛ kó kɛtenkɛ̀ bɛ botí dòmmɛ̀. 
\v 25 Yɛɑsɛɛ nɛ̀ Kɑdɑɑdi kó kɛtenkɛ̀ kɛmɔu nɛ̀ Amɔniibɛ kó kɛtenkɛ̀ dikéè kɛ́tuɔkɛnɛ̀ Adowɛɛ ɛì dìì tɔ̀kɛ́nɛ̀ Dɑbɑɑ, 
\v 26 kɛ́túótɛ́ Ɛsibonni kɛ́ntɔ kɛ́tuɔkɛnɛ̀ Dɑmɑti-Misipee nɛ̀ Betonimmu kɛ́ntɔ kɛ́tuɔkɛnɛ̀ Mɑɑnɑimmu kɛ́ntɔ kɛ́tuɔkɛnɛ̀ Debii tenkɛ̀ mɑ̀nku. 
\v 27 Nɛ̀ Suditɛ̃ɛ̃ kó kubiriku nɛ̀ Bɛti-Adɑmmu nɛ̀ Bɛti Nimudɑ nɛ̀ Sukɔti nɛ̀ Sɑfɔ̃ɔ̃ nɛ̀ Sionni nɛ̀ Ɛsibonni kpɑ̀ɑ̀tì do bɑkɛ́ yɛ̀ɛ̀ ɛkɛ̀. Dɛ kó yɛhɛkɛ̀ do bo Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ nkɛ, kɛ tú bɛ mɑ̀nku kɛ́tuɔkɛnɛ̀ Kinnɛdɛti kóo dɑ̀mɛ́ɛ̀rì kubɑkù yoú. 
\v 28 Bɛ̀ do totí yɛ̀ɛ̀ ɛkɛ̀ nyɛ Kɑdiibɛ bɛ botí dòmmɛ̀.
\s1 Bɛ̀ totímɛ̀ Mɑnɑnsee kɔbɛ kó dikéè bɛ tenkɛ̀
\p
\v 29 Ntɛnɛ̀ Mɔyiisi duɔ́mmɛ̀ yɛhɛkɛ̀ Mɑnɑnsee botí kɔbɛ kó dikéè bɛ botí dòmmɛ̀. 
\v 30 Bɛ mɑ̀nku do tú Mɑɑnɑimmu kubɑkù cɑ̃̀nku, kɛ́túótɛ́ Bɑsɑ̃ɑ̃ Ɔku kpɑ̀ɑ̀tì tenkɛ̀ kɛmɔu, nɛ̀ yɛhɛkɛ̀ sipísìkuɔ̀ yɛ̀ɛ̀ bo Yɑii tempɛ̃ mmiɛkɛ, 
\v 31 kɛ́túótɛ́ Kɑdɑɑdi ɛì kó dikéè nɛ̀ Asetɑdoti nɛ̀ Etedeii nɛ̀ Ɔku Bɑsɑ̃ɑ̃ kpɑ̀ɑ̀tì ɛkɛ̀ diɛyɛ̀ do tú yɛ̀, kɛ́duɔ́ ndɛ kó kɛtenkɛ̀ kɛmɔu Mɑnɑnsee yɑɑ̀birɛ Mɑkii bí dikéè.
\p
\v 32 Mɔyiisi do bo Mɔɑbu biriku nku Sedikoo diyiè yìɛ̀ní kɛ̀ɛ̀ bíɛ́kɛ̀ kɛ́ bɛ̀ totí dɛ kó kɛtenkɛ̀. 
\v 33 Mɔyiisi do í duɔ́ nDefiibɛ kɛtenkɛ̀, ti Yiɛ̀ nKuyie nyIsidɑyɛɛribɛ tũ nkù kuù do tú bɛ kó ticɔ̃nti kɛ́ndònnɛ̀ kù do ti mbɛ̀ nɑ̀kɛ́mɛ̀.
\c 14
\s1 Bɛ̀ totímɛ̀ Kɑnnɑhɑ̃ɑ̃ kó kɛtenkɛ̀
\p
\v 1 Ntɛ bɛ̀ do duɔ́ nkɛ̀ɛ̀ tenkɛ̀ Isidɑyɛɛribɛ Kɑnnɑhɑ̃ɑ̃ kó kɛtenkɛ̀ miɛkɛ kɛ̀ ikuɔ́ nìùtì Edeɑsɑɑ nɛ̀ Nunni birɛ Sosuwee nɛ̀ Isidɑyɛɛribɛ botí kó bɛkótíbɛ̀, kɛ̀ bɛ̀ɛ kɛ̀ mbɛ̀ totí. 
\v 2 Kɛ̀ bɛ̀ɛ tɑ̃ũ tɛ́tɛ́ ibotí ìwɛi nɛ̀ dikéè kó kɛtenkɛ̀, kɛ́ntũ nti Yiɛ̀ nKuyie ndo tì nɑ̀kɛ́mɛ̀ Mɔyiisi kòo bɛ̀ nɑ̀kɛ́. 
\v 3 Mɔyiisi do duɔ́mmu ibotí ìdɛ́ì nɛ̀ dikéè i kó kɛtenkɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ ò mɛ nyí nduɔ́ nDefiibɛ. 
\v 4 Bɛ̀ do bɛ̀ duɔ́ nyɛhɛkɛ̀ mɑ́ɑ̀ ndi bɛ̀ bo mborɛ̀ nɛ̀ bɛ wũɔ̃ bo ncentì dɛ̀ nɛ̀ bɛ kpɛrɛ bo mborɛ̀. Sosɛfu bí do totɛ́ tinɑɑ̀mùntì tìdɛ́tì nti. Mɑnɑnsee kɔku nɛ̀ Efɑdɑimmu kɔku. 
\v 5 Ti Yiɛ̀ nKuyie nyIsidɑyɛɛribɛ tũ nkù kuù do tì nɑ̀kɛ́ Mɔyiisi kòo bɛ̀ totí kɛtenkɛ̀.
\s1 Bɛ̀ duɔ́mmɛ̀ Kɑdɛbu o kó kɛtenkɛ̀
\p
\v 6 Diyiè mɑrì kɛ̀ Sudɑɑ botí kɔbɛɛ kɔtɛní Sosuwee borɛ̀ Kidikɑɑdi kɛ̀ Kɑdɛbu Yefundee birɛ Kenɑɑsi nɑɑ̀mùnkù kouu bɛ́innɛ̀ Sosuwee kɛ dɔ̀: A kpɑɑ́ yɛ̃́ ti do bo Kɑdɛɛsi-Bɑnnɛɑ kɛ̀ ti Yiɛ̀ nKuyie nnɑ̀kɛ́ tì Mɔyiisi ku kóo nìtì ɑ kpɛ́í nnɛ̀ n kpɛ́ínɑ́ɑ̀? 
\v 7 N do mɔkɛ yɛbie nsipísìnɑ̀ɑ̀ ndi kɛ̀ ti mbo Kɑdɛɛsi-Bɑnnɛɑ kɛ̀ Mɔyiisi ti Yiɛ̀ nKuyie ntɔ̃ntì n tɔ̃ nkɛ̀ n kɔtɛ kɛ́pɑɑtɛ́ dihɛì kɛ́wɛ̃tɛní kóò nɑ̀kɛ́ weti weti. 
\v 8 N kɔbɛ bɛ̀ɛ̀ do n nɛinɛ̀ kɛ̀ bɛ̀ɛ yɑ̃́ríkùnnɛ bɛnìtìbɛ̀ kɔ̃̀ntì, kɛ̀ mí n yie ti Yiɛ̀ nKuyie nkpɛti. 
\v 9 Kɛ̀ Mɔyiisii bɛ́i nkɛ́yú Kuyie nyètìrì kɛ dɔ̀: M bo tiekɛ n nɑɑ̀cɛ̀tɛ̀ nɑ dìì ɛì nɛ̀ n yɑɑ̀bío sɑ̃́ɑ̃̀, n yié mmɛ̀ɛ̀ kpɛ́í nti Yiɛ̀ nKuyie nkpɛti. 
\v 10 Dɛ̀ mɔ̀kɛ yíe nyɛbie nsipísìnɑ̀ɑ̀ nɛ̀ yɛ̀nùmmù ndi nɛ̀ ti Yiɛ̀ nKuyie mbɛ́innɛ̀mɛ̀ dɛ kó tinɑ́ɑǹtì Mɔyiisi Isidɑyɛɛribɛ bo dìì mɔ̀nnì dikpɑ́ɑ̀ cuokɛ̀. Kɛ̀ ti Yiɛ̀ nKuyie nni ntɔ kɛ̀ n kpɑɑ́ fòù nɛ̀ yíenní, kɛ tùɔ̀kɛ yɛbie sipísìni nɛ̀ yɛ̀nùmmù. 
\v 11 N kpɑɑ́ mɔkɛmu muwɛ̃rímú kɛ dònnɛ̀ Mɔyiisi do yó n tɔ̃ nkɛ̀ n dòmmɛ̀, kɛ bo nɑ kɛ́dokɛ́, kɛ́nɑ kɛ́pĩ́ mmutɔ̃mmú mumɔu. 
\v 12 N duɔ́ nyɛtɑ̃rɛ̀ kó kutempɛ̃, Anɑkiibɛ borɛ̀ yɛhɛkɛ̀ diɛyɛ̀, iduotí fitɛ́ yɛ̀. Ti Yiɛ̀ nKuyie yó nni mbonɛ̀mu kɛ̀ m bɛ̀ bɛ̀ti kɛ́ndònnɛ̀ kù bɛ́immɛ̀.
\p
\v 13 Kɛ̀ Sosuwee pɑ̃ Kuyie nkó mɛsɑ̀ɑ̀ Yefundee birɛ Kɑdɛbu kóò duɔ́ nhEbunɔɔ. 
\v 14 Kɛ̀ Yefundee birɛ Kɑdɛbu Kenɑɑsi nɑɑ̀mùnkù kouu tiekɛ Ebunɔɔ, kɛ kpɑɑ́ koò te nɛ̀ yíenní ò yié mmɛ̀ɛ̀ kpɛ́í nti Yiɛ̀ nKuyie nyɛ̃ mmù weti weti. 
\v 15 Bɛ̀ do yu Ebunɔɔ nɛ̀ dimɔ̀nnì kɛ tú Kidiyɑ-Adibɑ nwe, Adibɑ do tú onìtì diɛwè nwe Anɑkiibɛ miɛkɛ.
\p Mɛm̀mɛ kɛ̀ dikpɑ̀nnìi deè kɛ̀ dɛ̀ɛ bonkɛ.
\c 15
\s1 Bɛ̀ duɔ́mmɛ̀ Sudɑɑ o kó kɛtenkɛ̀
\p
\v 1 Bɛ̀ do tɑ̃ɑ̃́ tɛ́tɛ́ kɛ́duɔ́ nkɛ̀ɛ̀ tenkɛ̀ Sudɑɑ kɔbɛ do ketɛ́ diyiè yìɛ̀ní kɛ̀ɛ̀ bíɛ́kɛ̀ nkɛ kubɑkù cɑ̃̀nku kɛ́tuɔkɛ Edɔmmu mɑ̀nku, Tisĩnni kó dikpɑ́ɑ̀ kɛ́nwetí Kɑdɛɛsi. 
\v 2 Kɛ̀ kubɑkù cɑ̃̀nku kó kumɑ̀nkuu ketɛ́ kɛtenkɛ̀ kɛ̀ɛ̀ cùɔ dɑ̀mɛ́ɛ̀rì mukɔ́kúɔ́ nkou borɛ̀ kɛ́nwetí Nɛkɛfu. 
\v 3 Kɛɛ̀ yɛ̀ Akɑdɑbimmu tennì kɛ yɛ̀ Tisĩnni, kɛ yɛ̀ Kɑdɛɛsi-Bɑnnɛɑ bɑkù cɑ̃̀nku, kɛ kɔ̀ńtɛ́ kɛ yɛ̀ Ɛtisidonni kɛ tùɔ̀kɛ Adɑɑ, kɛ kɔ̀ńtɛ́ kɛ nwetí Kɑdikɑɑ, 
\v 4 kɛ pɛ̃ɛ̃tɛ́ kɛ tùɔ̀kɛ Asimɔɔ, kɛ tɑ Esibiti kó kukó, nkɛ pɛ̃ɛ̃tɛ́ kɛ tɑ Mɛditedɑndee, ntɛ Sudɑɑ tenkɛ̀ mɑ̀nku kubɑkù cɑ̃̀nku bíɛ́kɛ̀.
\p
\v 5 Diyiè yìɛ̀ní kɛ̀ɛ̀ bíɛ́kɛ̀ kó kumɑ̀nku do ketɛ́ dɑ̀mɛ́ɛ̀rì mukɔ́kúɔ́ nkou nwe kɛ́ntɔ kɛ́tuɔkɛnɛ̀ Suditɛ̃ɛ̃ ò tɑ dɛ̀.
\p Dɛndɛ kubɑkù cɑ̃̀nku bíɛ́kɛ̀ kó kumɑ̀nku ketɛ́mɛ̀, 
\v 6 kɛ́tuɔkɛ Bɛti Okɑdɑɑ nɛ̀ Bɛti Adɑbɑɑ bɑkù yoú, kɛ́pɛ̃ɛ̃tɛ́ kɛ́tuɔkɛ Dubɛnni birɛ Bohɑ̃ɑ̃ tɑ̃rì. 
\v 7 Kuù yɛ̀ kubiriku bɛ̀ tu kù Dikɔnkɔɔ̀nnì biriku kɛ tùɔ̀kɛ Debii, kɛ kɔ̀ńtɛ́ kubɑkù yoú bíɛ́kɛ̀ kɛ yɛ̀ Kidikɑɑdi, kɛ wetínnɛ́ Adumimmu ditennì, dìì bo kukó mbɑkù cɑ̃̀nku, kɛ pɛ̃ɛ̃tɛ́ kɛ yɛ̀ Ã-Semɛsi bií, kɛ tùɔ̀kɛ Ã-Dokɛdi, 
\v 8 kɛ yɛ̀ Inɔmmu biriku, kɛ yɛ̀ Sebusiibɛ tɑ̃rì pɛ̃ri nkubɑkù cɑ̃̀nku Sedisɑdɛmmu borɛ̀. Kuù pɛ̃ɛ̃tɛ́ kɛ yɛ̀ ditɑ̃rì ĩ́nkɛ̀ Inɔmmu biriku diyiè yìɛ̀ní kɛ̀ɛ̀ bíɛ́kɛ̀, kɛ tùɔ̀kɛ Defɑimmu biriku mɑ̀nku kubɑkù yoú, 
\v 9 kɛ pɛ̃ɛ̃tɛ́ kɛ yɛ̀ Nɛfutoɑ bií, kɛ tùɔ̀kɛ yɛhɛkɛ̀ yɛ̀ɛ̀ bo Efunɔɔ tɑ̃rɛ̀, kɛ cuó mBɑdɑɑ bɛ̀ tu wè Kidiyɑ-Yeɑdimmu. 
\v 10 Bɛ mɑ̀nku do yɛ̀ Bɑdɑɑ diyiè yìɛ̀ní kɛ̀ɛ̀ bíɛ́kɛ̀ nkɛ kɛ́nwetí Seii tɑ̃rì, kɛ́pɛ̃ɛ̃tɛ́ kɛ́yɛ̀ ditɑ̃rì dɛtie nkpɛri bɛ̀ tu dì Kesɑnɔɔ kubɑkù yoú kɛ́cutɛ́ Bɛti-Semɛsi kɛ́pɛ̃ɛ̃tɛ́ Timunɑ, 
\v 11 kɛ́pɛ̃ɛ̃tɛ́ kɛ́yɛ̀ Ekunɔɔ kubɑkù yoú, kɛ́kɔ́ntɛ́ kɛ́yɛ̀ Sikɑɑnɔɔ, kɛ́pɛ̃ɛ̃tɛ́ Bɑdɑɑ tɑ̃rì, kɛ́yɛ̀ Yɑbunnɛyɛɛri kɛ́kɑ̃́ɑ̃́ mMɛditedɑndee kóo dɑ̀mɛ́ɛ̀rì.
\p
\v 12 Dɛ ììkɛ̀ bíɛ́kɛ̀ kó kumɑ̀nku do tú dɑ̀mɛ́ɛ̀rì Mɛditedɑndee kou nwe.
\p Sudɑɑ botí kɔbɛ tenkɛ̀ mɑ̀nku nku.
\p
\v 13 Kɛ̀ bɛ̀ɛ wɛ́tɛ́ Sudɑɑ botí kɔbɛ tenkɛ̀ kɛ́duɔ́ nKɑdɛbu kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ Sosuwee. Bɛ̀ do ò duɔ́ nKidiyɑ-Adibɑ nwe, Adibɑ do tú Anɑkiibɛ yɑ̀ɑ̀rì nwe. Kɛ̀ bɛ̀ yu dɛ kó dihɛì di mmɔ̀nnì kɛ tú Ebunɔɔ. 
\v 14 Kɛ̀ Kɑdɛbuu bɛti Anɑkiibɛ botí itɑ̃ɑ̃ti Sesɑii kɔku nɛ̀ Aimɑnni kɔku nɛ̀ Tɑdimɑii kɔku, 
\v 15 kɛ́ítɛ́ Ebunɔɔ kɛ́pi Debii. Bɛ̀ do yu Debii nɛ̀ dimɔ̀nnì kɛ tú Kidiyɑ-Sefɛɛ nwe. 
\v 16 Kɛ̀ Kɑdɛbu dɔ̀: Wèè bo nɑ Kidiyɑ-Sefɛɛ m bo ò duɔ́ n kóo sɑpɑ̀ɑ̀ nhAkisɑɑ kòo puokɛ. 
\v 17 Kɛ̀ Otinniyɛɛdi Kɑdɛbu yɔ̃fũ̀ɔ̃̀ kou Kenɑsi birɛɛ dì pɔ̀ntɛ, kɛ̀ Kɑdɛbuu ò duɔ́ nho kóo sɑpɑ̀ɑ̀. 
\v 18 Ò tùɔ̀koo dìì mɔ̀nnì Otinniyɛɛdi cĩ́ɛ̃̀tɛ̀ kóò nɑ̀kɛ́ kɛ dɔ̀: Wèe mɔɔ o cicɛ Kɑdɛbu kɛtenkɛ̀. Kòo cútɛ́ní o sɑ̃mmɑrímú ĩ́nkɛ̀ kòo cicɛ Kɑdɛbuu ò bekɛ kɛ dɔ̀: A yɛ̃ mbɑ? 
\v 19 Kòò dɔ̀: N dɑ bɑ́ɑmmu, n yɛ̃ nhɑ m pɑ̃ sibií nsi ɑ n duɔ́ nkɛ̀ɛ̀ tenkɛ̀ kubɑkù cɑ̃̀nku kɛ̀ i mɔkɛ mɛniɛ.
\p Kɛ̀ Kɑdɛbuu ò duɔ́ ndɛ ĩ́nkɛ̀ kó sibií nɛ̀ dɛ fũ̀ɔ̃̀ kpɛsi.
\p
\v 20 Bɛ̀ duɔ́ nkɛ̀ɛ̀ tenkɛ̀ Sudɑɑ botí kɔbɛ.
\p
\v 21 Yɛhɛkɛ̀ yɛ̀ɛ̀ bo kubɑkù cɑ̃̀nku Edɔmmu bɛ̀ duɔ́ nyɛ̀ Sudɑɑ Nɛkɛfu miɛkɛ tú: Kɑbuseyɛɛdi nɛ̀ Edɛɛ nɛ̀ Yɑkuu 
\v 22 nɛ̀ Kinɑ nɛ̀ Dimɔnɑ nɛ̀ Adɑdɑɑ 
\v 23 nɛ̀ Kedɛsi nɛ̀ Asɔɔ nɛ̀ Itinɑ 
\v 24 nɛ̀ Sifi nɛ̀ Tedɛmmu nɛ̀ Beɑdoti 
\v 25 nɛ̀ Asɔɔ-Adɑtɑ nɛ̀ Kediyɔti-Esinɔɔ dìì tú Asɔɔ 
\v 26 nɛ̀ Amɑmmu nɛ̀ Semɑɑ nɛ̀ Mɔdɑdɑ 
\v 27 nɛ̀ Asɑɑ-Kɑdɑɑ nɛ̀ Ɛsibonni nɛ̀ Bɛti-Pɑdɛti 
\v 28 nɛ̀ Asɑɑ-Suɑdi nɛ̀ Bɛɛrisebɑɑ nɛ̀ yɛhɛkɛ̀ tɛyɛ̀ yɛ̀ɛ̀ dɛ̀ tɔ̀kɛ́ 
\v 29 nɛ̀ Bɑdɑɑ nɛ̀ Iyimmu nɛ̀ Atisɛmmu 
\v 30 nɛ̀ Editodɑdi nɛ̀ Kesiidi nɛ̀ Ɔdimɑɑ 
\v 31 nɛ̀ Sikidɑki nɛ̀ Mɑdimɑnɑɑ nɛ̀ Sɑnnɑɑ 
\v 32 nɛ̀ Debɑoti nɛ̀ Sidimmu nɛ̀ Ainni nɛ̀ Dimɔɔ, kɛ̀ dɛ̀ɛ wɛ̃nnɛ́ yɛhɛkɛ̀ sipísìdɛ́ nɛ̀ yɛ̀wɛi nɛ̀ sihɛkɛsí sìì dɛ̀ tɔ̀kɛ́.
\p
\v 33 Kubiriku kó yɛyètɛ̀ tu: Esitɑɔdi nɛ̀ Sodɑɑ nɛ̀ Asenɑ 
\v 34 nɛ̀ Sɑnɔɑɑ nɛ̀ Ã-Kɑnimmu nɛ̀ Tɑpuɑ nɛ̀ Enɑmmu 
\v 35 nɛ̀ Yɑdimuti nɛ̀ Adudɑmmu nɛ̀ Sokoo nɛ̀ Asekɑɑ 
\v 36 nɛ̀ Sɑdɑimmu nɛ̀ Aditɑimmu nɛ̀ Kededɑɑ nɛ̀ Kedeotɑimmu, kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀nɑ̀ɑ̀ nɛ̀ sihɛkɛsí sìì dɛ̀ tɔ̀kɛ́. 
\v 37 Senɑɑ nɛ̀ Adɑsɑɑ nɛ̀ Mikidɑdi-Kɑdi 
\v 38 nɛ̀ Dideɑnni Misipee nɛ̀ Yokiteyɛɛdi 
\v 39 nɛ̀ Dɑkiisi nɛ̀ Bosikɑti nɛ̀ Ekunɔɔ 
\v 40 nɛ̀ Kɑbonni nɛ̀ Dɑmɑsu nɛ̀ Kitidiisi 
\v 41 nɛ̀ Kededoti nɛ̀ Bɛti-Dɑkɔ̃ɔ̃ nɛ̀ Dɑmɑɑsi nɛ̀ Mɑkedɑɑ. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛkuɔ̀ nɛ̀ sihɛkɛsí sìì dɛ̀ tɔ̀kɛ́. 
\v 42 Dibunɑɑ nɛ̀ Etɛɛ nɛ̀ Asɑ̃ɑ̃ 
\v 43 nɛ̀ Ifitɑ nɛ̀ Asenɑ nɛ̀ Nɛsibu 
\v 44 nɛ̀ Keidɑɑ nɛ̀ Akisibu nɛ̀ Mɑdesɑɑ. Kɛ̀ dɛ̀ɛ wɛ̃nnɛ́ yɛhɛkɛ̀ yɛ̀wɛi nɛ̀ sihɛkɛsí sìì dɛ̀ tɔ̀kɛ́. 
\v 45 Nɛ̀ Ekunɔɔ, nɛ̀ o cɛ̃kɑrɛ̀ nɛ̀ sihɛkɛsí sìì dɛ̀ tɔ̀kɛ́, 
\v 46 kɛ́túótɛ́ Asidɔti nɛ̀ yɛhɛkɛ̀ yɛ̀ɛ̀ ò tɔ̀kɛ́nɛ̀ kɛ sokɛ́ Ekunɔɔ nɛ̀ Mɛditedɑndee kóo dɑ̀mɛ́ɛ̀rì dɛ cuokɛ̀. 
\v 47 Asidɔti nɛ̀ Kɑsɑɑ dɛ kó yɛcɛ̃kɑrɛ̀ nɛ̀ sihɛkɛsí sìì dɛ̀ tɔ̀kɛ́ kɛ́tuɔkɛ Esibiti kó kukó nnɛ̀ dɑ̀mɛ́ɛ̀rì Mɛditedɑndee kou.
\p
\v 48 Yɛtɑ̃rɛ̀ kó yɛhɛkɛ̀ tu Sɑmii nɛ̀ Yɑtiidi nɛ̀ Sokoo 
\v 49 nɛ̀ Dɑnnɑ nɛ̀ Kidiyɑ-Sɑnnɑ, bɛ̀ do di nyu kɛ tú Debii. 
\v 50 Nɛ̀ Anɑbu nɛ̀ Ɛsitemmɔɑ nɛ̀ Animmu 
\v 51 nɛ̀ Kosɛnni nɛ̀ Onɔɔ nɛ̀ Kido. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ dìmɑ́ɑ̀ nɛ̀ sihɛkɛsí sìì dɛ̀ tɔ̀kɛ́. 
\v 52 Adɑbu nɛ̀ Dumɑɑ nɛ̀ Esehɑ̃ɑ̃ 
\v 53 nɛ̀ Yɑnummu nɛ̀ Bɛti-Tɑpuɑɑ nɛ̀ Afɛki 
\v 54 nɛ̀ Ummutɑ nɛ̀ Kidiyɑ-Adibɑ bɛ̀ do yu dì kɛ tú Ebunɔɔ nɛ̀ Siyɔɔ, kɛ̀ dɛ̀ɛ wɛ̃nnɛ́ yɛhɛkɛ̀ yɛ̀wɛi nɛ̀ sihɛkɛsí sìì dɛ̀ tɔ̀kɛ́. 
\v 55 Mɑɔ̃ɔ̃ nɛ̀ Kɑdimɛɛdi nɛ̀ Sifi nɛ̀ Yutɑ 
\v 56 nɛ̀ Sisedɛɛri Yokindeɑmmu nɛ̀ Sɑnɔɑɑ 
\v 57 nɛ̀ Kɑyɛ̃ɛ̃ nɛ̀ Kibeɑ nɛ̀ Timunɑ, kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ sihɛkɛsí sìì dɛ̀ tɔ̀kɛ́. 
\v 58 Adudi nɛ̀ Bɛti-Sudi nɛ̀ Kedɔɔri 
\v 59 nɛ̀ Mɑdɑti nɛ̀ Bɛti-Anɔti nɛ̀ Editekonni. Kɛ̀ dɛ̀ɛ wɛ̃nnɛ́ yɛhɛkɛ̀ yɛ̀kuɔ̀ nɛ̀ sihɛkɛsí sìì dɛ̀ tɔ̀kɛ́. 
\v 60 Kidiyɑ-Bɑɑdi, bɛ̀ do yu di Kidiyɑ-Yeɑdimmu nɛ̀ Dɑbɑɑ, kɛ̀ dɛ̀ɛ wɛ̃nnɛ́ yɛhɛkɛ̀ yɛ̀dɛ́ɛ̀ nɛ̀ sihɛkɛsí sìì dɛ̀ tɔ̀kɛ́.
\p
\v 61 Dikpɑ́ɑ̀ kó yɛhɛkɛ̀: Bɛti-Adɑbɑ nɛ̀ Midinni nɛ̀ Sekɑkɑ, 
\v 62 Nibesɑ̃ɑ̃ mukɔ́kúɔ́ nkó dihɛì nɛ̀ Ã-Kedii. Kɛ̀ dɛ̀ɛ wɛ̃nnɛ́ yɛhɛkɛ̀ yɛ̀kuɔ̀ nɛ̀ sihɛkɛsí sìì dɛ̀ tɔ̀kɛ́.
\p
\v 63 Sudɑɑ botí kɔbɛ do í nɑ kɛ́bɛti Sebusiibɛ bɛ̀ɛ̀ do bo Sedisɑdɛmmu, kɛ̀ bɛ̀ kpɑɑ́ bo bɛ cuokɛ̀ nɛ̀ yíenní.
\c 16
\s1 Bɛ̀ duɔ́mmɛ̀ Efɑdɑyimmu kɔbɛ bɛ kó kɛtenkɛ̀
\p
\v 1 Bɛ̀ do tɑ̃ɑ̃́ tɛ́tɛ́ kɛ́duɔ́ nkɛ̀ɛ̀ tenkɛ̀ Sosɛfu yɑɑ̀bí kɛ mɑ̀nku do tú: Suditɛ̃ɛ̃ kubɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀ Sedikoo tɑkɛ́ mɛniɛ nyiɛ̀ní dɛ̀ kɛ tɑɑ̀ dihɛì kɛ̀ kumɑ̀nkuu pɛ̃ɛ̃tɛ́ Sedikoo kɛ́tɑ dikpɑ́ɑ̀ Betɛɛdi tɑ̃rì tempɛ̃, 
\v 2 kɛ́pɛ̃ɛ̃tɛ́ kɛ́nwetí Duusi, kɛ́yɛ̀nnɛ̀ Atɑdoti, Adikiibɛ ciɛ, 
\v 3 kɛ́pɛ̃ɛ̃tɛ́ kɛ́cútɛ́ dɛ ììkɛ̀ Yɑfedetiibɛ ciɛ, kɛ́sĩ́nnɛ́ Bɛti-Onɔɔ nɛ̀ Kesɛɛ, kɛ́kɑ̃́ɑ̃́ mMɛditedɑndee. 
\v 4 Sosɛfu yɑɑ̀bí Mɑnɑnsee nɛ̀ Efɑdɑimmu bɛ kó kɛtenkɛ̀ nkɛ.
\p
\v 5 Efɑdɑimmu botí kɔbɛ tenkɛ̀ mɑ̀nku tú: Atɑdoti-Adɑɑ kubɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀, kɛ́tuɔkɛ Bɛti-Onɔɔ yuu. 
\v 6 Kuù pɛ̃ɛ̃tɛ́ kɛ tùɔ̀kɛ Mɛditedɑndee kubɑkù yoú bíɛ́kɛ̀, kɛ yɛ̀ Mikimbetɑɑ tɑkɛ́ diyiè yìɛ̀ní kɛ̀ɛ̀ bíɛ́kɛ̀, kɛ wetínnɛ́ Tɑɑnɑti-Sidoo kɛ pɛ̃ɛ̃tɛ́ kɛ kɔ̀tɛ Yɑnɑndoɑ, 
\v 7 Kɛ pɛ̃ɛ̃tɛ́ kɛ kɔ̀tɛ Atɑdoti nɛ̀ Nɑɑdɑ, kɛ yɛ̀ Sedikoo kɛ tùɔ̀kɛ Suditɛ̃ɛ̃. 
\v 8 Kuù ìtɛ́ Mikimbetɑɑ ììkɛ̀ Tɑpuɑ, kɛ tùɔ̀kɛ Kɑnɑ kó kukó nkɛ tɑ Mɛditedɑndee. Efɑdɑimmu botí kɔbɛ tenkɛ̀ nkɛ. 
\v 9 Kɛ̀ bɛ̀ɛ bɛ̀ yìɛ́ yɛhɛkɛ̀ nɛ̀ sihɛkɛsí sìì bo Mɑnɑnsee botí kɔbɛ tenkɛ̀ miɛkɛ. Yɛ mɑ̀nku do dìtɛ́ kukó nku kɛ̀ kumɑ̀nku tɛkù ntú dɑ̀mɛ́ɛ̀rì Mɛditedɑndee kou. 
\v 10 Bɛ̀ í mbɛ̀ti Kɑnnɑhɑ̃ɑ̃ kɔbɛ bɛ̀ɛ̀ bo Kesɛɛ, Efɑdɑimmu botí kɔbɛ cuokɛ̀ kɛ̀ bɛ̀ kpɑɑ́ bo nɛ̀ yíenní, kɛ pĩ́ muhɛikɛ̀ntɔ̃mmú.
\c 17
\s1 Bɛ̀ duɔ́mmɛ̀ Mɑnɑnsee kɔbɛ tɔbɛ̀ bɛ kó kɛtenkɛ̀
\p
\v 1 Bɛ̀ do duɔ́mmu Mɑnɑnsee Sosɛfu kóo po kɔbɛ bɛ kó kɛtenkɛ̀. Bɛ̀ do niitɛ́ kɛ́duɔ́mmu Mɑkii okpɑ̀rìteu, Mɑnɑnsee kóo po Kɑdɑɑdi cicɛ. Bɛ̀ do bɛ̀ duɔ́ nKɑdɑɑdi nwe nɛ̀ Bɑsɑ̃ɑ̃, Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀. 
\v 2 Bɛ̀ do duɔ́mmu Mɑnɑnsee botí kɔbɛ tɔbɛ̀ bɛ kó kɛtenkɛ̀. Bɛɛ̀ do tú Abiesɛɛ nɛ̀ Edɛki nɛ̀ Dɑsiidiyɛɛdi nɛ̀ Sisɛmmu nɛ̀ Efɛɛ nɛ̀ Semidɑɑ nɛ̀ Mɑnɑnsee Sosɛfu birɛ botí kɔbɛ.
\p
\v 3 Mɑnɑnsee birɛ do tú Mɑkiidi, kɛ̀ Mɑkiidi kpɛrɛ ntú Kɑdɑɑdi, kɛ̀ Kɑdɑɑdi kpɛrɛ ntú Efɛɛ, kɛ̀ Efɛɛ kpɛrɛ ntú Sodofɑdi. Sodofɑdi do piɛ́ initipobí mɑ́ɑ̀ ndi. Ntɛ i yetɛ̀: Mɑdɑ nɛ̀ Nɔɑ nɛ̀ Okudɑ nɛ̀ Midikɑɑ nɛ̀ Tidisɑɑ. 
\v 4 Kɛ̀ bɛ̀ɛ kɔtɛ kɛ́sɔ̃́ntɛ́ Edeɑsɑɑ, ikuɔ́ nìùtì nɛ̀ Nunni birɛ Sosuwee, nɛ̀ Isidɑyɛɛribɛ kó bɛkótíbɛ̀ kɛ dɔ̀: Ti Yiɛ̀ nKuyie ndo nɑ̀kɛ́mu Mɔyiisi kɛ dɔ̀ wè ti duɔ́ nti kó kɛtenkɛ̀ ò duɔ́mmɛ̀ ti botí kɔbɛ bɛnitidɑɑbɛ̀.
\p Kɛ̀ bɛ̀ɛ bɛ̀ duɔ́ mbɛ kó kɛtenkɛ̀ kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ Mɔyiisi. 
\v 5 Kɛ̀ bɛ̀ɛ duɔ́ Mɑnɑnsee botí kɔbɛ yɛhɛkɛ̀ tɛpíítɛ̀ kɛ́yíɛ́nɛ̀ Kɑdɑɑdi nɛ̀ Bɑsɑ̃ɑ̃ yɛ̀ɛ̀ bo Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀. 
\v 6 Bɛ̀ do í duɔ́ mMɑnɑnsee botí kɔbɛ bɛnitidɑɑbɛ̀ mɑ́ɑ̀ ndi kɛtenkɛ̀, bɛ̀ do duɔ́nnɛ̀mu bɛnitipòbɛ̀. Kɑdɑɑdi do tú Mɑnɑnsee yɑɑ̀bí tenkɛ̀ nkɛ.
\p
\v 7 Mɑnɑnsee kó kumɑ̀nku do ketɛ́ Asɛɛ nwe kɛ́tuɔkɛ Mikimbetɑɑ Sisɛmmu diyiè yìɛ̀ní kɛ̀ɛ̀ bíɛ́kɛ̀, kɛ́túótɛ́ Mikimbetɑɑ kɛ́tuɔkɛ Tɑpuɑ kubɑkù cɑ̃̀nku bíɛ́kɛ̀, 
\v 8 Dɛ kó kutempɛ̃ ndo tú Mɑnɑnsee botí kɔbɛ kɔku nku, kɛ̀ bɛ̀ nɛ́ duɔ́ nTɑpuɑ dihɛì dìì bo bɛ tenkɛ̀ mɑ̀nku Efɑdɑimiibɛ. 
\v 9 Kɛ̀ bɛ tenkɛ̀ mɑ̀nkuu pɛ̃ɛ̃tɛ́ kɛ́tuɔkɛ Kɑnɑ kó kukó. Yɛhɛkɛ̀ yɛ̀ɛ̀ do bo kukó mbɑkù cɑ̃̀nku bíɛ́kɛ̀ do tú Efɑdɑimiibɛ kpɛyɛ nyɛ, kɛ̀ yɛ̀ mbo Mɑnɑnsee kɔbɛ kó kɛtenkɛ̀ miɛkɛ, kɛ̀ yɛ mɑ̀nku ndírínɛ̀ kukó nkɛ́kɔtɛ kɛ́tɑ dɑ̀mɛ́ɛ̀rì. 
\v 10 Kɛ̀ Efɑdɑimiibɛ nte kubɑkù cɑ̃̀nku kɛ̀ Mɑnɑnsee kɔbɛ te kuyoú, kɛ̀ dɑ̀mɛ́ɛ̀rì Mɛditedɑndee tú bɛ mɑ̀nku diyiè yìɛ̀ní kɛ̀ɛ̀ bíɛ́kɛ̀ kɔku. Kɛ̀ Asɛɛ botí kɔbɛ te kuyoú diyiè tɑɑ̀ kɛ̀ɛ̀ bíɛ́kɛ̀. Kɛ̀ Isɑkɑɑ te kucɑ̃̀nku diyiè yìɛ̀ní kɛ̀ɛ̀ bíɛ́kɛ̀. 
\v 11 Kɛ̀ bɛ̀ɛ duɔ́ nyIsɑkɑɑ nɛ̀ Asɛɛ kó yɛhɛkɛ̀ mɑyɛ̀ Mɑnɑnsee yɛ̀ɛ̀ tú: Beti-Seɑnni, Ibedeɑmmu nɛ̀ Dɔɔ nɛ̀ Ã-Ndɔɔ nɛ̀ Tɑnɑki nɛ̀ Mɛkidoo nɛ̀ sihɛkɛsí sìì dɛ̀ tɔ̀kɛ́. Dɔɔ kó kutempɛ̃ nku. 
\v 12 Mɑnɑnsee kɔbɛ mɛ nyí nnɑ kɛ́bɛti Kɑnnɑhɑ̃ɑ̃ kɔbɛ bɛ̀ɛ̀ do bo dɛ kó yɛhɛkɛ̀ kɛ̀ bɛ̀ nkpɑɑ́ dɛ̀ bo. 
\v 13 Kɛ̀ Isidɑyɛɛribɛɛ kpenkɛ, bɛ̀ mɛ nyí nnɑ kɛ́bɛti Kɑnnɑhɑ̃ɑ̃ kɔbɛ kɛ nɛ́ bɛ̀ pĩ̀ńnɛ́ muhɛikɛ̀ntɔ̃mmú.
\p
\v 14 Kɛ̀ Sosɛfu botí kɔbɛɛ kɔtɛ Sosuwee borɛ̀ kóò bekɛ kɛ dɔ̀: Ti Yiɛ̀ nKuyie nti dɔ̀ɔ̀ mɛsɑ̀ɑ̀ nkɛ̀ ti sũ mɛdiɛ̀, dɛ̀ yĩ́mɛ kɑ̀ɑ ti duɔ́ nkutempɛ̃ nkùmɑ́ɑ̀?
\p
\v 15 Kɛ̀ Sosuwee bɛ̀ tɛ̃̀ńnɛ́ kɛ dɔ̀: Kɛ̀ di sũ̀ṹ nkɛ Efɑdɑimmu tɑ̃rì í di sɑ̀nnɛ̀, kɔtɛnɛ̀ Pedisiibɛ nɛ̀ Defɑiibɛ kó dikpɑ́ɑ̀ kɛ́kúútí.
\p
\v 16 Kɛ̀ Sosɛfu botí kɔbɛɛ ò tɛ̃̀ńnɛ́ kɛ dɔ̀: Ditɑ̃rì í ti sɑ̀nnɛ̀, Kɑnnɑhɑ̃ɑ̃ kɔbɛ bɛ̀ɛ̀ bo kubiriku bɛ̀ mɔ̀kɛmu sikpɑ̀rìsɛ̃ĩ́ timɑ́tì kpɛsi nɛ̀ Bɛti-Seɑnni kɔbɛ nɛ̀ sihɛkɛsí kɔbɛ nɛ̀ Sisedɛɛdi biriku kɔbɛ.
\p
\v 17 Kɛ̀ Sosuwee nɑ́kɛ́ Sosɛfu yɑɑ̀bí Efɑdɑimmu nɛ̀ Mɑnɑnsee botí kɔbɛ dikéè bɛ̀ɛ̀ bo diyiè tɑɑ̀ kɛ̀ɛ̀ bíɛ́kɛ̀ kɛ dɔ̀: Di sũmu kɛ kpeńnì di í dò nkɛ́mmɔkɛ kutempɛ̃ nkùmɑ́ɑ̀. 
\v 18 Di yóó tiekɛmu yɛtɑ̃rɛ̀ ĩ́nkɛ̀ kó titúútì kɛ́ tì kùútí, bɑ́ Kɑnnɑhɑ̃ɑ̃ kɔbɛ mɛ nkpeńnìmɛ̀ kɛ mɔkɛ sikpɑ̀rìsɛ̃ĩ́ timɑ́tì kpɛsi, di yóó bɛ̀ nɑmu kɛ́ bɛ̀ bɛ̀ti.
\c 18
\s1 Bɛ̀ tɑ̃ɑ̃́mɛ̀ tɛ́tɛ́ kɛ́duɔ́ nyibotí ìì kpɑɑ́ i kó kɛtenkɛ̀
\p
\v 1 Kɛ̀ Isidɑyɛɛribɛɛ nɑ ibotí kɛ́deè kɛ́tíí nSidoo kɛ́cónnɛ́ ti Yiɛ̀ nKuyie ntɑummɛ̀ tou. 
\v 2 Kɛ̀ ibotí ìyiekɛ̀ nkpɑɑ́ Isidɑyɛɛribɛ miɛkɛ ìì mu nyí pɛ̀tɛ́ i tenkɛ̀. 
\v 3 Kɛ̀ Sosuwee dɔ̀: Dɛ̀ yó nkɑ̃́ɑ̃́kɛ́ dɛ kɛ̀ dí tiekɛ ti Yiɛ̀ nKuyie ndi yɛ̀mbɛ̀ tũ nkù di duɔ́ nkɛ̀ɛ̀ tenkɛ̀? 
\v 4 Tɑ̃ɑ̃tɛ́nɛ̀ di botí miɛkɛ bɛnìtìbɛ̀ bɛ̀tɑ̃ɑ̃ti, bɛ̀tɑ̃ɑ̃ti, kɛ̀ m bɛ̀ tɔ̃ nkɛ̀ bɛ̀ɛ pɑɑtɛ́ yɛhɛkɛ̀ kɛ́yɑ̀ bɛ kɑrɛ̀ kɛ́wɛ̃tɛní kɛ́ n nɑ́kɛ́. 
\v 5 Bɛ̀ yóó yɛ̀ totɛ́ kucɛ mɛ̀yiekɛ̀ ndi. Kɛ̀ Sudɑɑ kɔbɛ nkpɑɑ́ bɛ tenkɛ̀ kubɑkù cɑ̃̀nku, kɛ̀ Sosɛfu kɔbɛ mbo kuyoú. 
\v 6 Kɛ̀ dí yɛ̀ wɑ̃̀ri yɛ̀ dòmmɛ̀ yɛyiekɛ̀ kɛ dèè dí kɔtɛní kɛ́ n nɑ́kɛ́, kɛ̀ n yɛ̀ tɑ̃ũ tɛ́tɛ́ ti Yiɛ̀ nKuyie nyììkɛ̀. 
\v 7 Defii wuɔ nkɔbɛ í yó mmɔkɛ kɛtenkɛ̀, bɛ̀ yó mpĩ́ ti Yiɛ̀ nKuyie ntɔ̃mmú mmu. Kɑdiibɛ nɛ̀ Dubɛnniibɛ nɛ̀ Mɑnɑnsee botí kɔbɛ dikéè, Mɔyiisi Kuyie nkóo tɔ̃ntì bɛ̀ duɔ́mmu bɛ tenkɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀.
\p
\v 8 Kɛ̀ bɛ̀ tɑ̃ɑ̃tɛ́ bɛ̀ɛ̀ nìtìbɛ̀ nkɔri kɛ̀ Sosuwee bɛ̀ nɑ̀kɛ́ kɛ dɔ̀: Kɔtɛnɛ̀ kɛ́pɑɑtɛ́ dihɛì weti weti kɛ́wɛ̃tɛní kɛ́ n nɑ́kɛ́ dì dòmmɛ̀. Kɛ̀ n tɑ̃ũ tɛ́tɛ́ ti Yiɛ̀ nKuyie nyììkɛ̀ diɛ nSidoo kɛ́ di totí kɛtenkɛ̀.
\p
\v 9 Kɛ̀ bɛ̀ɛ kɔtɛ kɛ́ce nyɛhɛkɛ̀ yɛmɔu kɛ́yɛ̀ wɑ̃̀ri yɛyiekɛ̀ kɛ́wɛ̃tɛní Sidoo Sosuwee borɛ̀. 
\v 10 Kɛ̀ Sosuwee tɑ̃ũ tɛ́tɛ́ ti Yiɛ̀ nKuyie nyììkɛ̀ kɛ́totí Isidɑyɛɛribɛ yɛhɛkɛ̀.
\s1 Bɛ̀ duɔ́mmɛ̀ Bɛnsɑmɛɛ kɔbɛ bɛ tenkɛ̀
\p
\v 11 Kɛ̀ bɛ̀ɛ tɑ̃ũ tɛ́tɛ́ kɛ́ketɛ́ kɛ́duɔ́ mBɛnsɑmɛɛ botí kɔbɛ bɛ tenkɛ̀ kɛ̀ bɛ̀ nsokɛ́ Sudɑɑ botí kɔbɛ nɛ̀ Sosɛfu botí kɔbɛ bɛ cuokɛ̀. 
\v 12 Kɛ̀ kumɑ̀nkuu ítɛ́ Suditɛ̃ɛ̃ bɑkù yoú bíɛ́kɛ̀ kɛ́tuɔkɛ Sedikoo bɑkù yoú, kɛ́yɛ̀nnɛ̀ yɛtɑ̃rɛ̀ diyiè tɑɑ̀ kɛ̀ɛ̀ bíɛ́kɛ̀, kɛ́pɛ̃ɛ̃tɛ́ kɛ́tuɔkɛ Bɛti-Afɛnni kpɑ́ɑ̀. 
\v 13 Kɛ̀ bɛ̀ɛ pɛ̃ɛ̃tɛ́ dɛ borɛ̀ kɛ́tuɔkɛ Duusi kubɑkù cɑ̃̀nku bíɛ́kɛ̀ bɛ̀ yu dɛ̀ kɛ tú Betɛɛdi, kɛ́nsɔkɛ́ kɛ́tuɔkɛ Atɑdɔoi-Adɑɑ ditɑ̃rì ĩ́nkɛ̀ Bɛti-Onɔɔ fũ̀ɔ̃̀ kubɑkù cɑ̃̀nku. 
\v 14 Kɛ̀ kumɑ̀nkuu kɔ́ntɛ́ ditɑ̃rì ììkɛ̀ kɛ́wetínnɛ́ kubɑkù cɑ̃̀nku, kɛ́tuɔkɛ Kidiyɑ-Bɑɑdi bɛ̀ tu dɛ̀ Kidiyɑ-Yeɑdimmu, Sudɑɑ botí kɔbɛ tenkɛ̀. Dɛ ììkɛ̀ kó kumɑ̀nku do dɛ nkɑ̃́ɑ̃́kɛ́.
\p
\v 15 Kɛ̀ kubɑkù cɑ̃̀nku bíɛ́kɛ̀ kó kumɑ̀nku kuu ítɛ́ Kidiyɑ-Yeɑdimmu kɛ́wetínnɛ́ Kɑsɛ̃ɛ̃ kɛ́tuɔkɛ Nɛfutoɑ sibií borɛ̀, 
\v 16 kɛ́pɛ̃ɛ̃tɛ́ kɛ́cútɛ́ Inɔmmu biriku tɑ̃rì pɛ̃ri. Defɑimmu biriku kubɑkù yoú bíɛ́kɛ̀, kɛ́pɛ̃ɛ̃tɛ́ Sebusiibɛ tɑ̃rɛ̀ kɛ́cútɛ́ kɛ́tuɔkɛ Ã-Dokɛdi, 
\v 17 kɛ́kɔ́ntɛ́ kɛ́wetínnɛ́ kubɑkù yoú Ã-Semɛsi, kɛ́tuɔkɛ Kedidoti Adumimmu tennì ììkɛ̀, kɛ́pɛ̃ɛ̃tɛ́ kɛ́cútɛ́ kɛ́tuɔkɛ Dubɛnni birɛ Bohɑ̃ɑ̃ tɑ̃rì. 
\v 18 Kɛ̀ kùu pɛ̃ɛ̃tɛ́ kɛ́dekɛ ditɑ̃rì kɛ́cútɛ́ Suditɛ̃ɛ̃ biriku, 
\v 19 kɛ́pɛ̃ɛ̃tɛ́ kɛ́kɔtɛ Bɛti-Okɑdɑɑ tɑ̃rì bɑkù yoú, kɛ́pɛ̃ɛ̃tɛ́ kɛ́tuɔkɛ dɑ̀mɛ́ɛ̀rì mukɔ́kúɔ́ nkou bɑkù yoú Suditɛ̃ɛ̃ ò tɑ dɛ̀. Kubɑkù cɑ̃̀nku bíɛ́kɛ̀ kó kumɑ̀nku nku. 
\v 20 Kukó nSuditɛ̃ɛ̃ kuù do tú kumɑ̀nku diyiè yìɛ̀ní kɛ̀ɛ̀ bíɛ́kɛ̀.
\p Bɛnsɑmɛɛ kɔbɛ tenkɛ̀ mɑ̀nku do dɛ ntú.
\p
\v 21 Bɛnsɑmɛɛ kɔbɛ ɛkɛ̀ do tú: Sedikoo, Bɛti-Okɑdɑɑ, Emɛki nɛ̀ Kɛsisi. 
\v 22 Bɛti-Adɑbɑ nɛ̀ Semɑdɑimmu nɛ̀ Betɛɛdi. 
\v 23 Afimmu nɛ̀ Pɑdɑɑ nɛ̀ Odidɑɑ 
\v 24 nɛ̀ Kefɑɑ-Amɔnɑi nɛ̀ Ofinii nɛ̀ Kebɑɑ kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀dɛ́ɛ̀ nɛ̀ sihɛkɛsí sìì dɛ̀ tɔ̀kɛ́. 
\v 25 Kɑbɑɔ̃ɔ̃ nɛ̀ Dɑmɑɑ nɛ̀ Bedɔti 
\v 26 nɛ̀ Misipee nɛ̀ Kefidɑɑ nɛ̀ Mɔsɑɑ 
\v 27 nɛ̀ Dekɛmmu nɛ̀ Idipeyɛɛdi nɛ̀ Tɑdɑdɑɑ 
\v 28 nɛ̀ Sedɑɑ nɛ̀ Edɛfu nɛ̀ Sebusiibɛɛ kó dihɛì, bɛ̀ yu dì kɛ tú Sedisɑdɛmmu nɛ̀ Kibeɑ nɛ̀ Kidiyɑ. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀nɑ̀ɑ̀ nɛ̀ sihɛkɛsí sìì dɛ̀ tɔ̀kɛ́.
\p Bɛnsɑmɛɛ kɔbɛ kó kɛtenkɛ̀ nkɛ mɛmmɛ.
\c 19
\s1 Bɛ̀ duɔ́mmɛ̀ Simmɛɔ̃ɔ̃ kɔbɛ bɛ tenkɛ̀
\p
\v 1 Kɛ̀ bɛ̀ɛ tɑ̃ũ tɛ́tɛ́ mɛdɛ́rímɛ̀ kɛ́duɔ́ nSimmɛɔ̃ɔ̃ kɔbɛ kɛtenkɛ̀ kɛ̀ kɛ̀ mbo Sudɑɑ kɔbɛ kɔkɛ cuokɛ̀. 
\v 2 Yɛɛ ɛkɛ̀ tu Bɛɛrisebɑɑ kpɛyɛ nɛ̀ Sebɑɑ nɛ̀ Mɔdɑdɑɑ 
\v 3 nɛ̀ Asɑɑ-Suɑdi nɛ̀ Bɑdɑ nɛ̀ Esɛmmu 
\v 4 nɛ̀ Editodɑdi nɛ̀ Betudi nɛ̀ Ɔdimɑɑ 
\v 5 nɛ̀ Sikidɑki nɛ̀ Bɛti-Mɑdikɑboti nɛ̀ Asɑ-Susɑ 
\v 6 nɛ̀ Bɛti nɛ̀ Debɑoti nɛ̀ Sɑduwɑ̃. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀tɑ̃ɑ̃ti nɛ̀ sihɛkɛsí sìì dɛ̀ tɔ̀kɛ́, 
\v 7 nɛ̀ Ainni nɛ̀ Ã-Dimɔnni nɛ̀ Etɛɛ nɛ̀ Asɑ̃ɑ̃. Kɛ̀ dɛ̀ɛ wɛ̃nnɛ́ yɛhɛkɛ̀ yɛ̀nɑ̀ɑ̀ nɛ̀ sihɛkɛsí sìì dɛ̀ tɔ̀kɛ́, 
\v 8 kɛ́tuɔkɛnɛ̀ Bɑdɑti-Bɛɛdi nɛ̀ Dɑmɑti-Nɛkɛfu. Simmɛɔ̃ɔ̃ kɔbɛ tenkɛ̀ nkɛ. 
\v 9 Simmɛɔ̃ɔ̃ kɔbɛ tenkɛ̀ do sokɛ́ Sudɑɑ kɔbɛ kɔkɛ cuokɛ̀ nkɛ, kɛ yɛ̃́ Sudɑɑ kɔbɛ tenkɛ̀ do bɛ̀ dɛummu mɛdiɛ̀.
\s1 Bɛ̀ duɔ́mmɛ̀ Sɑbunɔɔ kɔbɛ kɛtenkɛ̀
\p
\v 10 Kɛ̀ bɛ̀ɛ tɑ̃ũ tɛ́tɛ́ mɛtɑ̃ɑ̃́mmɛ̀ kɛ́duɔ́ nSɑbunɔɔ kɔbɛ kɛtenkɛ̀, kɛ̀ kɛ̀ɛ̀ ketɛ́ diyiè yìɛ̀ní kɛ̀ɛ̀ bíɛ́kɛ̀ kɛ́tuɔkɛ Sɑdidi. 
\v 11 Kɛ̀ kùu pɛ̃ɛ̃tɛ́ kɛ́cuó ndiyiè tɑɑ̀ kɛ̀ɛ̀ bíɛ́kɛ̀ kɛ́tuɔkɛ Mɑdeyɑdɑ, kɛ́pɛ̃ɛ̃tɛ́ kɛ́tuɔkɛ Dɑbibesɛti, kɛ́pɛ̃ɛ̃tɛ́ kɛ́tɑ kukó nYokindeɑmmu ììkɛ̀, 
\v 12 kɛ́ítɛ́ Sɑdidi kɛ́cuó ndiyiè yìɛ̀ní kɛ̀ɛ̀ bíɛ́kɛ̀, kɛ́tuɔkɛ Kisidɔti-Tɑbɔɔ temmɑ̀nku kɛ́yɛ̀nnɛ̀ Dɑbedɑti kɛ́dekɛ Yɑfiɑ, 
\v 13 kɛ́ítɛ́ dɛborɛ̀ kɛ bɑɑ nco diyiè yìɛ̀ní kɛ̀ɛ̀ bíɛ́kɛ̀, kɛ́tuɔkɛ Kɑti-Efɛɛ nɛ̀ Ɛti-Kɑsɛ̃ɛ̃, kɛ́tuɔkɛ Dimɔɔ kù dɛ nkɔ̀ńtɛ́ kɛ́wetínnɛ́ Nɛɑɑ. 
\v 14 Kɛ̀ kumɑ̀nkuu ítɛ́ dɛborɛ̀ kɛ́tuɔkɛ kukó nhAnɑtɔ̃ɔ̃ bɑkù cɑ̃̀nku, kɛ́tɑ Ifitɑ-Ɛdi kondɑɑ. 
\v 15 Kɛ̀ dɛ kó yɛhɛkɛ̀ɛ yíɛ́nɛ̀ Kɑtɑɑ nɛ̀ Nɑɑdɑdi nɛ̀ Simmudonni nɛ̀ Ideɑdɑɑ nɛ̀ Bɛtideɛmmu. Kɛ̀ yɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀dɛ́ɛ̀, nɛ̀ sihɛkɛsí sìì dɛ̀ tɔ̀kɛ́. 
\v 16 Bɛ̀ do duɔ́ nkɛ̀ɛ̀ tenkɛ̀ nkɛ Sɑbunɔɔ kɔbɛ nɛ̀ bɛ ɛkɛ̀ nɛ̀ sihɛkɛsí.
\s1 Bɛ̀ duɔ́mmɛ̀ Isɑkɑɑ kɔbɛ kɛtenkɛ̀
\p
\v 17 Kɛ̀ bɛ̀ɛ tɑ̃ũ tɛ́tɛ́ mɛnɑɑ̀mmɛ̀ kɛ́duɔ́ nyIsɑkɑɑ kɔbɛ kɛtenkɛ̀. 
\v 18 Bɛ̀ tenkɛ̀ do tú: Sisedɛɛdi, nɛ̀ Kesudɔti nɛ̀ Sunɛmmu 
\v 19 nɛ̀ Afɑdɑyimmu nɛ̀ Siyonni nɛ̀ Annɑɑdɑti 
\v 20 nɛ̀ Dɑbiti nɛ̀ Kisiyɔ̃ɔ̃ nɛ̀ Ebɛsi 
\v 21 nɛ̀ Demɛti nɛ̀ Ã-Kɑnimmu nɛ̀ Ã-Adɑɑ nɛ̀ Bɛti-Pɑsɛsi. 
\v 22 Kɛ̀ bɛ mɑ̀nkuu tuɔkɛ Tɑbɔɔ nɛ̀ Kɑsɑimmu nɛ̀ Bɛti-Semɛsi kɛ́tɑ Suditɛ̃ɛ̃. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀kuɔ̀ nɛ̀ sihɛkɛsí sìì dɛ̀ tɔ̀kɛ́. 
\v 23 Isɑkɑɑ kɔbɛ tenkɛ̀ nkɛ nɛ̀ bɛ ɛkɛ̀.
\s1 Bɛ̀ duɔ́mmɛ̀ Asɛɛ kɔbɛ kɛtenkɛ̀
\p
\v 24 Kɛ̀ bɛ̀ɛ tɑ̃ũ tɛ́tɛ́ mɛnummumɛ̀ kɛ́duɔ́ nhAsɛɛ kɔbɛ kɛtenkɛ̀. 
\v 25 Kɛ̀ bɛ tenkɛ̀ ntú Edikɑti nɛ̀ Adii nɛ̀ Betɛnni nɛ̀ Akisɑfi 
\v 26 nɛ̀ Adɑmɛdɛki nɛ̀ Amɑdi nɛ̀ Misɑdi. Kɛ̀ dɛ mɑ̀nku dɛ ììkɛ̀ kɔku ntú Kɑdimɛɛdi tɑ̃rì kɛ́ntũ nSiɔɔ-Dibunɑɑ kó kukó. 
\v 27 Kɛ̀ diyiè yìɛ̀ní kɛ̀ɛ̀ bíɛ́kɛ̀ kó kumɑ̀nkuu kɔ́ntɛ́ Bɛti-Dɑkɔ̃ɔ̃, kɛ́tuɔkɛ Sɑbunɔɔ tenkɛ̀ nɛ̀ Ifitɑ-Ɛdi biriku, kɛ́pɛ̃ɛ̃tɛ́ kubɑkù yoú bíɛ́kɛ̀ kɛ́tuɔkɛ Bɛti-Emɛki, nɛ̀ Nɛyɛɛdi kɛ́sɔɔtɛ́ kɛ́yɛ̀ Kɑbuudi. 
\v 28 Ebudonni nɛ̀ Deɔbu nɛ̀ Ammɔɔ nɛ̀ Kɑnɑ kɛ́tuɔkɛ Sidonni dihɛidiɛ̀. 
\v 29 Kɛ̀ kùu kɔ́ntɛ́ kɛ́yɛ̀ Dɑmɑɑ kɛ́tuɔkɛ Tiiti dihɛì iduotí fitɛ́ dì, kɛ́wetínnɛ́ Osɑɑ kɛ́yɛ̀ Mɑɑdɑbu nɛ̀ Akisibu kɛ́tɑ dɑ̀mɛ́ɛ̀rì Mɛditedɑndee. 
\v 30 Kɛ̀ yɛ̀ɛ yíɛ́nɛ̀ Umɑ nɛ̀ Afɛki nɛ̀ Deɔbu. Kɛ̀ dɛ̀ɛ wɛ̃nnɛ́ yɛhɛkɛ̀ tɛpíítɛ̀ nɛ̀ yɛ̀dɛ́ɛ̀ nɛ̀ sihɛkɛsí sìì dɛ̀ tɔ̀kɛ́. 
\v 31 Bɛ̀ do duɔ́ nkɛ̀ɛ̀ tenkɛ̀ nkɛ Asɛɛ kɔbɛ nɛ̀ bɛ ɛkɛ̀.
\s1 Bɛ̀ duɔ́mmɛ̀ Nɛfutɑdii kɔbɛ kɛtenkɛ̀
\p
\v 32 Kɛ̀ bɛ̀ɛ tɑ̃ũ tɛ́tɛ́ mɛkuɔ́mmɛ̀ kɛ́duɔ́ nNɛfutɑdii kɔbɛ kɛtenkɛ̀. 
\v 33 Kɛ̀ kubɑkù cɑ̃̀nku kó kumɑ̀nkuu ítɛ́ Edɛfu nɛ̀ Sɑnɑmimmu tɑ̃rì kɛ́yɛ̀ Adɑmi-Nɛkɛbu nɛ̀ Yɑbunnɛyɛɛri, kɛ́tuɔkɛ Dɑkummu kɛ́tɑ Suditɛ̃ɛ̃. 
\v 34 Kɛ̀ dɛ ììkɛ̀ bíɛ́kɛ̀ kó kumɑ̀nku ntú Asinɔti-Tɑbɔɔ, kɛ́tuɔkɛ Okoku, kɛ́mpɛkɛ́nɛ̀ Sɑbunɔɔ tempɛ̃ nkubɑkù cɑ̃̀nku kɛ̀ Asɛɛ kɔku mbo dɛ ììkɛ̀, kɛ̀ diyiè yìɛ̀ní kɛ̀ɛ̀ bíɛ́kɛ̀ kó kumɑ̀nku ntú Suditɛ̃ɛ̃. 
\v 35 Yɛhɛkɛ̀ diɛyɛ̀ iduotí fitɛ́ yɛ̀ tu Sidimmu nɛ̀ Sɛɛ nɛ̀ Ammɑti nɛ̀ Dɑkɑti nɛ̀ Kinnɛdɛti 
\v 36 nɛ̀ Adɑmɑ nɛ̀ Dɑmɑɑ nɛ̀ Asɔɔ 
\v 37 nɛ̀ Kedɛsi nɛ̀ Ideii nɛ̀ Ã-Asɔɔ 
\v 38 nɛ̀ Inɔɔ nɛ̀ Mikidɑdi-Ɛdi nɛ̀ Odɛmmu nɛ̀ Bɛti-Anɑti nɛ̀ Bɛti-Semɛsi. Kɛ̀ dɛ̀ɛ wɛ̃nnɛ́ yɛhɛkɛ̀ diɛyɛ̀ tɛpíítɛ̀ nɛ̀ yɛ̀wɛi nɛ̀ sihɛkɛsí sìì dɛ̀ tɔ̀kɛ́. 
\v 39 Bɛ̀ do duɔ́ nkɛ̀ɛ̀ tenkɛ̀ nkɛ Nɛfutɑdii kɔbɛ nɛ̀ kɛ ɛkɛ̀.
\s1 Bɛ̀ do duɔ́mmɛ̀ Dɑnni kɔbɛ kɛtenkɛ̀
\p
\v 40 Kɛ̀ bɛ̀ɛ tɑ̃ũ tɛ́tɛ́ mɛyiémmɛ̀ kɛ́duɔ́ nDɑnni kɔbɛ kɛtenkɛ̀. 
\v 41 Bɛ tenkɛ̀ tu Sodɑɑ nɛ̀ Esetɑɔdi nɛ̀ Idi-Semɛsi 
\v 42 nɛ̀ Sɑdɑbinni nɛ̀ Ayɑnɔɔ nɛ̀ Itidɑ 
\v 43 nɛ̀ Edonni nɛ̀ Timunɑ nɛ̀ Ekinɔɔ 
\v 44 nɛ̀ Editekee nɛ̀ Kibetɔ̃ɔ̃ nɛ̀ Bɑdɑti 
\v 45 nɛ̀ Yeudi nɛ̀ Bendee-Bedɑki nɛ̀ Kɑti-Dimɔɔ 
\v 46 nɛ̀ Yɑdikɔ̃ɔ̃ kó kukó nnɛ̀ Dɑkɔ̃ɔ̃ nɛ̀ Yɑfɑ kó kutempɛ̃. 
\v 47 Kɛ̀ Dɑnni kɔbɛɛ pɑɑ̀ bɛ tenkɛ̀ kɛ́kɔtɛ kɛ́dokɛ́nɛ̀ Desɛmmu kɔbɛ kɛ́ bɛ̀ kùɔ pɑ́íí, kɛ́kɑri. Kɛ̀ bɛ̀ɛ yú Desɛmmu kɛ dɔ̀: Dɑnni bɛ yɑ̀ɑ̀rì yètìrì. 
\v 48 Bɛ̀ do duɔ́ nyɛɛ̀ ɛkɛ̀ diɛyɛ̀ nɛ̀ siì ɛkɛsí Dɑnni kɔbɛ.
\s1 Bɛ̀ do duɔ́mmɛ̀ Sosuwee kɛtenkɛ̀
\p
\v 49 Isidɑyɛɛribɛ totí dìì mɔ̀nnì kɛtenkɛ̀ kɛ́deè kɛ́duɔ́ Nunni birɛ nSosuwee o kɔkɛ bɛ cuokɛ̀. 
\v 50 Bɛ̀ do dɔ̀ɔ̀ ti Yiɛ̀ nKuyie ndo bɛ́i ntì nti, kóò duɔ́ nhò dɔ́ dìì ɛì: Timinɑti-Sedɑɑ Efɑdɑimmu tɑ̃rì ĩ́nkɛ̀ kòo wɛ̃tɛ kɛ́ dɛ̀ mɑɑ́ dihɛì kɛ́mbo.
\p
\v 51 Ikuɔ́ nìùtì Edeɑsɑɑ nɛ̀ Nunni birɛ nSosuwee nɛ̀ Isidɑyɛɛribɛ kó bɛkótíbɛ̀ bɛ̀ do tɑ̃ũ tɛ́tɛ́ nwe Sidoo ti Yiɛ̀ nKuyie nyììkɛ̀ ku tou borɛ̀, kɛ́totí bɛnìtìbɛ̀ kɛtenkɛ̀ kɛ́deè.
\c 20
\s1 Bɛ̀ tɑ̃ɑ̃tɛ́mɛ̀ yɛsɔ̀rɛ̀ kó yɛhɛkɛ̀
\p
\v 1 Kɛ̀ ti Yiɛ̀ nKuyie nnɑ́kɛ́ Sosuwee kɛ dɔ̀: 
\v 2 Nɑ́kɛ́ Isidɑyɛɛribɛ kɛ̀ bɛ̀ɛ tɑ̃ɑ̃tɛ́ yɛsɔ̀rɛ̀ kó yɛhɛkɛ̀ n do nɑ̀kɛ́ Mɔyiisi yɛ̀ɛ̀ kpɛ́í nkòo di nɑ́kɛ́. 
\v 3 Kòò mɔù nɔ̀ùtɛ̀ ò yetɛ́nɛ̀ kòò kùɔ onìtì, wèe cokɛ́ kɛ́tɑ dɛ kó yɛhɛkɛ̀ kó dìmɑrì, kɛ́yentɛ́nɛ̀ wèè dɔ́ kɛ́pɛitɛ. 
\v 4 Wèè nɔ̀ùtɛ̀ ò yetɛ́nɛ̀ kòò tùɔ̀koo dɛ kó dihɛì wèe cómmú dibòrì kɛ́nɑ́kɛ́ bɛhɛikɛ̀nkótíbɛ̀ dɛ̀ɛ̀ dɔ̀ɔ̀, kɛ̀ bɛ̀ɛ ò cɔutɛ́ kóò bɛnkɛ ò yó mborɛ̀ bɛ cuokɛ̀. 
\v 5 Kòò kùɔ wèè kou ò bɛ̀ti kɛ bo pɛitɛ bɛ̀ bɑ́ɑ́ wè nhò duɔ́, kɛ yɛ̃́ o nɔ̀ùtɛ̀ tɛɛ̀ ò yetɛ́mmɛ̀, bɛ̀ do í mɔkɛ tìmɑtì. 
\v 6 Wè mbo dɛ kó dihɛì kɛ̀ ditĩ̀nnì yɑ̀ɑ ò bekɛ́nɛ̀, kòo mbo kɛ̀ ikuɔ́ nìùtì diɛwè wèè pĩ mmutɔ̃mmú dɛ kó dimɔ̀nnì kòò ku. Dɛ mɔ̀nnì ndi ò bo nɑmɛ̀ kɛ́wɛ̃tɛ o ɛì ò do cokɛ́ ndi, kɛ́mbo o cĩ́ɛ̃̀tɛ̀.
\p
\v 7 Kɛ̀ bɛ̀ɛ tɑ̃ɑ̃tɛ́ Kedɛsi Kɑdidee miɛkɛ nɛ̀ Nɛfutɑdii tɑ̃rì nɛ̀ Sisɛmmu Efɑdɑimmu tɑ̃rì, nɛ̀ Kidiyɑ-Adibɑ bɛ̀ tu dì Ebunɔɔ Sudɑɑ tɑ̃rì. 
\v 8 Kɛ̀ bɛ̀ɛ tɑ̃ɑ̃tɛ́ Suditɛ̃ɛ̃ yɑ́ɑ̀ Sedikoo diyiè yìɛ̀ní kɛ̀ɛ̀ bíɛ́kɛ̀: Besɛɛ Dubɛnni kɔbɛ tɑ̃dɑ̀nkù dikpɑ́ɑ̀, Dɑmɔɔ Kɑdɑɑdi miɛkɛ Kɑdi kɔbɛ tenkɛ̀ nɛ̀ Kodɑnni Bɑsɑ̃ɑ̃ miɛkɛ Mɑnɑnsee kɔbɛ tenkɛ̀. 
\v 9 Yɛhɛkɛ̀ yiɛ nyɛ bɛ̀ do tɑ̃nkɛ́mɛ̀ Isidɑyɛɛribɛ kpɛ́í nnɛ̀ bɛpɔ̀ɔ̀bɛ̀ bɛ̀ɛ̀ bo bɛ cuokɛ̀ bɛ kpɛ́í. Kòò mɔù nɔ̀ùtɛ̀ ò kpɛtɛ́nɛ̀ kòò kùɔ onìtì wèe cokɛ́ kɛ́tɑ kɛ́yentɛ́nɛ̀ wèè dɔ́ kɛ́pɛitɛ. Bɛ̀ bɑ́ɑ́ ò kùɔ kɛ̀ ditĩ̀nnì í ò bekɛ́nɛ̀.
\c 21
\s1 Bɛ̀ duɔ́mmɛ̀ yɛhɛkɛ̀ Defiibɛ
\p
\v 1 Kɛ̀ Defiibɛɛ kɔtɛ kɛ́yɑ̀ ikuɔ́ nìùtì diɛwè Edeɑsɑɑ nɛ̀ Nunni birɛ Sosuwee nɛ̀ Isidɑyɛɛribɛ kó bɛkótíbɛ̀, 
\v 2 kóò nɑ̀kɛ́ Sidoo Kɑnnɑhɑ̃ɑ̃ ɛì kɛ dɔ̀: Ti Yiɛ̀ nKuyie ndo nɑ̀kɛ́ Mɔyiisi kɛ dɔ̀: Dí ti duɔ́ nyɛhɛkɛ̀ ti yó mborɛ̀ nɛ̀ ti yó ncɛ̃mmù dɛ̀ ti wũɔ̃.
\p
\v 3 Kɛ̀ Isidɑyɛɛribɛɛ tɑ̃ɑ̃tɛ́ bɛ tenkɛ̀ miɛkɛ yɛhɛkɛ̀ mɑyɛ̀ nɛ̀ bɛ̀ yó ncɛ̃mmù dɛ̀ bɛ wũɔ̃ kɛ́ bɛ̀ duɔ́ nkɛ́ndònnɛ̀ ti Yiɛ̀ nKuyie ntì bɛ́immɛ̀.
\p
\v 4 Kɛ̀ bɛ̀ɛ tɑ̃ũ tɛ́tɛ́ Keɑtiibɛ Defiibɛ miɛkɛ, kɛ̀ Anɔɔ kɔbɛɛ pɛ́tɛ́ yɛhɛkɛ̀ tɛpíítɛ̀ nɛ̀ yɛ̀tɑ̃ɑ̃ti yɛ̀ɛ̀ bo Sudɑɑ nɛ̀ Simmɛɔ̃ɔ̃ nɛ̀ Bɛnsɑmɛɛ bɛ tenkɛ̀ miɛkɛ. 
\v 5 Kɛ̀ bɛ̀ɛ tɑ̃ũ tɛ́tɛ́ kɛ̀ Keɑtiibɛɛ pɛ́tɛ́ bɛ tenkɛ̀ Efɑdɑimmu nɛ̀ Dɑnni nɛ̀ Mɑnɑnsee kɔbɛ dikéè bɛ tenkɛ̀ miɛkɛ, diyiè tɑɑ̀ kɛ̀ɛ̀ bíɛ́kɛ̀. 
\v 6 Kɛ̀ bɛ̀ɛ tɑ̃ũ tɛ́tɛ́ kɛ̀ Kɛrisonni kɔbɛɛ pɛ́tɛ́ yɛhɛkɛ̀ tɛpíítɛ̀ nɛ̀ yɛ̀tɑ̃ɑ̃ti yɛ̀ɛ̀ bo Bɑsɑ̃ɑ̃ Isɑkɑɑ nɛ̀ Asɛɛ nɛ̀ Nɛfutɑdii nɛ̀ Mɑnɑnsee kɔbɛ dikéè bɛ tenkɛ̀ miɛkɛ. 
\v 7 Kɛ̀ Mɛdɑdi kɔbɛɛ pɛ́tɛ́ yɛhɛkɛ̀ tɛpíítɛ̀ nɛ̀ yɛ̀dɛ́ɛ̀ yɛ̀ɛ̀ bo: Dubɛnni, nɛ̀ Kɑdi nɛ̀ Sɑbunɔɔ bɛ tenkɛ̀ miɛkɛ. 
\v 8 Isidɑyɛɛribɛ do tɑ̃ũ tɛ́tɛ́ kɛ́duɔ́ nyɛ̀ɛ̀ ɛkɛ̀ nyɛ Defiibɛ nɛ̀ bɛ wũɔ̃ yó ncentì dɛ̀, kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ Mɔyiisi kòo bɛ̀ nɑ̀kɛ́.
\p
\v 9 Ntɛ bɛ̀ duɔ́ nyɛ̀ɛ̀ ɛkɛ̀ Sudɑɑ kɔbɛ nɛ̀ Simmɛɔ̃ɔ̃ kɔbɛ yɛ kó yɛyètɛ̀: 
\v 10 Bɛ̀ do tɑ̃ũ tɛ́tɛ́ Anɔɔ botí kɛ̀ Keɑtiibɛ Defii yɑɑ̀bí iì pɛ́tɛ́ kɛtenkɛ̀ mɛketimɛ̀. 
\v 11 Kɛ̀ bɛ̀ɛ bɛ̀ duɔ́ Kidiyɑ-Adibɑ bɛ̀ tu di Ebunɔɔ Sudɑɑ tɑ̃rì nɛ̀ bɛ wũɔ̃ yó ncentì dɛ̀. Adibɑ tu Anɑkiibɛ yɑ̀ɑ̀rì nwe. 
\v 12 Kɛ̀ Yefundee birɛ Kɑdɛbu nte dihɛì diɛrì kó dɛpɑɑ nnɛ̀ dɛ kó yɛhɛkɛ̀. 
\v 13 Kɛ̀ bɛ̀ɛ duɔ́ nyikuɔ́ nìùtì Anɔɔ kɔbɛ Ebunɔɔ ɛì kɛ̀ dì ntú di sɔ̀rɛ̀ kó dihɛì Dibunɑɑ, 
\v 14 Nɛ̀ Yɑtiidi nɛ̀ Esitemɔɑ 
\v 15 nɛ̀ Onɔɔ nɛ̀ Debii 
\v 16 nɛ̀ Ainni nɛ̀ Yutɑ nɛ̀ Bɛti-Semɛsi, kɛ̀ dɛ̀ɛ wɛ̃nnɛ́ yɛhɛkɛ̀ diɛyɛ̀ yɛ̀wɛi nɛ̀ bɛ wũɔ̃ yó ncentì dɛ̀, kɛ̀ yɛ̀ bo Sudɑɑ nɛ̀ Simmɛɔ̃ɔ̃ tenkɛ̀ miɛkɛ. 
\v 17 Bɛnsɑmɛɛ kó kɛtenkɛ̀ miɛkɛ, kɛ̀ bɛ̀ɛ bɛ̀ duɔ́ nKɑbɑɔ̃ nɛ̀ Kebɑɑ 
\v 18 nɛ̀ Anɑtɔti nɛ̀ Adimɔnni, kɛ̀ dɛ̀ɛ wɛ̃nnɛ́ yɛhɛkɛ̀ diɛyɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀. 
\v 19 Kɛ̀ Anɔɔ kɔbɛ ikuɔ́ nìùbɛ̀ ɛkɛ̀ diɛyɛ̀ɛ wɛ̃nnɛ́ yɛmɔu tɛpíítɛ̀ nɛ̀ yɛ̀tɑ̃ɑ̃ti nɛ̀ bɛ wũɔ̃ yó ncentì dɛ̀.
\p
\v 20 Kɛ̀ bɛ̀ɛ tɑ̃ũ tɛ́tɛ́ kɛ̀ Keɑtiibɛ tɔbɛ̀ɛ pɛ́tɛ́ yɛhɛkɛ̀ Efɑdɑimmu tenkɛ̀ miɛkɛ. 
\v 21 Kɛ̀ bɛ̀ɛ bɛ̀ duɔ́ nSisɛmmu nɛ̀ Kesɛɛ ditɑ̃rì ĩ́nkɛ̀ kó yɛhɛkɛ̀, kɛ̀ yɛ̀ ntú yɛsɔ̀rɛ̀ kpɛyɛ. 
\v 22 Kibusɑimmu nɛ̀ Bɛti-Onɔɔ, kɛ̀ dɛ̀ɛ wɛ̃nnɛ́ yɛhɛkɛ̀ diɛyɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀. 
\v 23 Dɑnni kó kɛtenkɛ̀ miɛkɛ, kɛ̀ bɛ̀ɛ bɛ̀ duɔ́ nyɛhɛkɛ̀ diɛyɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀: Editekee nɛ̀ Kibetɔ̃ɔ̃, 
\v 24 Ayɑnɔɔ nɛ̀ Kɑti-Dimɔɔ. 
\v 25 Mɑnɑnsee kɔbɛ dikéè kó kɛtenkɛ̀ miɛkɛ kɛ̀ bɛ̀ɛ pɛ́tɛ́ yɛhɛkɛ̀ diɛyɛ̀ yɛ̀dɛ́ɛ̀: Tɑnɑki nɛ̀ Ibedeɑmmu nɛ̀ bɛ wũɔ̃ yó ncentì dɛ̀. 
\v 26 Kɛ̀ dɛ̀ɛ wɛ̃nnɛ́ dɛmɔu yɛhɛkɛ̀ diɛyɛ̀ tɛpíítɛ̀ nɛ̀ bɛ wũɔ̃ yó ncentì dɛ̀. 
\v 27 Kɛ̀ bɛ̀ɛ duɔ́ nKɛrisonniibɛ yɛhɛkɛ̀ diɛyɛ̀ yɛ̀dɛ́ɛ̀ nɛ̀ bɛ wũɔ̃ yó ncentì dɛ̀, Mɑnɑnsee kɔbɛ dikéè kɔbɛ tenkɛ̀ miɛkɛ nkɛ bɛ̀ do yɛ̀ mbɛ̀ duɔ́mmɛ̀ yɛ̀ɛ̀ tu: Kodɑnni wèè bo Bɑsɑ̃ɑ̃ miɛkɛ kòo ntú disɔ̀rì kó dihɛì nɛ̀ Bɛsetedɑɑ. 
\v 28 Isɑkɑɑ kó kɛtenkɛ̀ miɛkɛ, kɛ̀ bɛ̀ɛ bɛ̀ duɔ́ nyɛhɛkɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀, yɛ̀ɛ̀ tu: Kisiyɔ̃ɔ̃ nɛ̀ Dɑbedɑti 
\v 29 nɛ̀ Yɑdimuti nɛ̀ Ã-Kɑnimmu. 
\v 30 Asɛɛ kó kɛtenkɛ̀ miɛkɛ kɛ̀ bɛ̀ɛ bɛ duɔ́ nyɛhɛkɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀ yɛ̀ɛ̀ tu: Misɑdi nɛ̀ Abudonni 
\v 31 nɛ̀ Edikɑki nɛ̀ Deɔbu. 
\v 32 Nɛfutɑdii kó kɛtenkɛ̀ miɛkɛ kɛ̀ bɛ̀ɛ pɛ́tɛ́ yɛhɛkɛ̀ diɛyɛ̀ yɛ̀tɑ̃ɑ̃ti yɛ̀ɛ̀ tu Kedɛsi dìì bo Kɑdidee kó kutempɛ̃ mmiɛkɛ nɛ̀ Amɔti-Dɔɔ nɛ̀ Kɑtɑnni kɛ̀ yɛ̀ ntú yɛsɔ̀rɛ̀ kpɛyɛ nɛ̀ bɛ wũɔ̃ yó ncentì dɛ̀. 
\v 33 Kɛ̀ Kɛrisonniibɛ kó yɛhɛkɛ̀ diɛyɛ̀ yɛmɔuu wɛ̃nnɛ́ tɛpíítɛ̀ nɛ̀ yɛ̀tɑ̃ɑ̃ti nɛ̀ bɛ wũɔ̃ yó ncentì dɛ̀.
\p
\v 34 Kɛ̀ Defii kɔbɛ sɔmbɛ, Mɛdɑdii kɔbɛ kɛ̀ bɛ̀ɛ bɛ̀ duɔ́ nyɛhɛkɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀ Sɑbunɔɔ tenkɛ̀ miɛkɛ yɛ̀ɛ̀ tu: Yokindeɑmmu nɛ̀ Kɑditɑɑ 
\v 35 nɛ̀ Dimunɑ nɛ̀ Nɑɑdɑdi. 
\v 36 Dubɛnni kó kɛtenkɛ̀ miɛkɛ kɛ̀ɛ̀ bo Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ kɛ wetí Sedikoo, kɛ̀ bɛ̀ɛ bɛ̀ duɔ́ nyɛhɛkɛ̀ yɛ̀nɑ̀ɑ̀ nɛ̀ bɛ wũɔ̃ yó ncentì dɛ̀ yɛ̀ɛ̀ tu: Besɛɛ ɛì dìì bo tɛdɔntɛ̀ kɛ tú disɔ̀rì kó dihɛì nɛ̀ Yɑɑsi ɛì, 
\v 37 nɛ̀ Kedemɔti nɛ̀ Mɛfɑɑ. 
\v 38 Kɑti kó kɛtenkɛ̀ miɛkɛ kɛ̀ bɛ̀ɛ bɛ̀ duɔ́ yɛhɛkɛ̀ diɛyɛ̀ yɛ̀nɑ̀ɑ̀ nɛ̀ bɛ̀ wũɔ̃ yó ncentì dɛ̀ yɛ̀ɛ̀ tu: Dɑmɔti dìì bo Kɑdɑɑdi tempɛ̃ nkɛ tú disɔ̀rì kó dihɛì nɛ̀ Mɑɑnɑimmu 
\v 39 nɛ̀ Ɛsibonni nɛ̀ Yɑsɛɛ. 
\v 40 Bɛ̀ tɑ̃ũ tɛ́tɛ́ kɛ́duɔ́ Mɛdɑdi kɔbɛ yɛ̀ɛ̀ ɛkɛ̀ wɛ̃nnɛ́ yɛmɔu tɛpíítɛ̀ nɛ̀ yɛ̀dɛ́ɛ̀ ndi.
\p
\v 41 Bɛ̀ duɔ́ nyɛ̀ɛ̀ ɛkɛ̀ Defiibɛ bɛ kɔbɛ cuokɛ̀ do bo yɛmɔu sipísìnɑ̀ɑ̀ nɛ̀ yɛ̀ni ndi, nɛ̀ bɛ wũɔ̃ yó ncentì dɛ̀. 
\v 42 Bɑ́ dìì ɛì do mɔkɛmu iwũɔ̃ yó ncentì dɛ̀.
\p
\v 43 Kɛ̀ ti Yiɛ̀ nKuyie nduɔ́ nyIsidɑyɛɛribɛ kù do yɛ̃ nkù yóó duɔ́ nkɛ̀ɛ̀ tenkɛ̀ bɛ yɛmbɛ̀. Kɛ̀ bɛ̀ɛ kɑri kɛ́mbo. 
\v 44 Kɛ̀ ti Yiɛ̀ nKuyie mbɛ̀ òmpùnnɛ kɛ́ndònnɛ̀ kù do nɑ̀kɛ́mɛ̀ bɛ yɛmbɛ̀ kɛ̀ bɛ̀ɛ nɑ bɛ dootitɔbɛ̀ bɛmɔu kɛ́nkɑri bɛ̀ dɔ́mɛ̀, bɑ́ òmɔù í mbɛ̀ dɑɑti 
\v 45 Ti Yiɛ̀ nKuyie ndo nɑ̀kɛ́ tìnti Isidɑyɛɛribɛ kɛ̀ tì dɔ̀ɔ̀ timɔu bɑ́ tìmɑtì í nsùɔ́.
\c 22
\s1 Kukó nSuditɛ̃ɛ̃ kó diyɑ́ɑ̀ kɔbɛ wɛ̃tɛnímɛ̀ bɛ tenkɛ̀
\p
\v 1 Kɛ̀ Sosuwee yú Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè, 
\v 2 kɛ́ bɛ̀ nɑ̀kɛ́ kɛ dɔ̀: Di yiemmu Mɔyiisi ti Yiɛ̀ nKuyie ntɔ̃ntì di nɑ̀kɛ́ tì, kɛ yie n kpɛti timɔu kɛ dɔ̀ɔ̀ n yɛ̃ mmù. 
\v 3 Di í yóu di kɔbɛ diyiè mɑrì nɛ̀ yíenní kɛ tũ̀nnɛ di Yiɛ̀ nKuyie ndi nɑ̀kɛ́ tì. 
\v 4 Di mmɔ̀nnì ti Yiɛ̀ nKuyie nhòmpùmmu di kɔbɛ kɛ́ndònnɛ̀ kù do bɛ̀ nɑ̀kɛ́mɛ̀, kònnɛ̀ di ɛkɛ̀ ti Yiɛ̀ nKuyie ndo nɑ̀kɛ́ ku tɔ̃ntì Mɔyiisi kòo di duɔ́ nyɛ̀ Suditɛ̃ɛ̃ yɑ́ɑ̀. 
\v 5 Mpĩ́nnɛ̀ ti Yiɛ̀ Kuyie ntɑnnɔ̀ mɛsɑ̀ɑ̀ nnɛ̀ ku kuɔ́, ku tɔ̃ntì Mɔyiisi do di nɑ̀kɛ́ tì. Ndɔ́nɛ̀ ti Yiɛ̀ nKuyie nkɛ́ntũ nku kó kucɛ, kɛ yíé nku kpɛti, kɛ kù tɑunɛ̀, kɛ pĩ́ nku tɔ̃mmú nɛ̀ di yɛ̀mmɛ̀ mɛmɔu nɛ̀ di wɛ̃rímú mumɔu.
\p
\v 6 Kɛ̀ Sosuwee bɛ̀ pɑ̃ Kuyie nkó mɛsɑ̀ɑ̀ nkɛ́duɔ́ nkɛ̀ bɛ̀ɛ kũṹ mbɛ cɛ̃́ĩ. 
\v 7 Mɔyiisi do duɔ́mmu Mɑnɑnsee kɔbɛ dikéè bɛ kó kɛtenkɛ̀ Bɑsɑ̃ɑ̃ miɛkɛ. Kɛ̀ Sosuwee duɔ́ mMɑnɑnsee kɔbɛ dikéè sɔnni bɛ tenkɛ̀ bɛ tebìí cuokɛ̀, Suditɛ̃ɛ̃ dɛ ììkɛ̀ bíɛ́kɛ̀. Kɛ̀ Sosuwee bɛ̀ pɑ̃ Kuyie nkó mɛsɑ̀ɑ̀ nkɛ́duɔ́ nkɛ̀ bɛ̀ bo kò. Kòo bɛ̀ nɑ̀kɛ́ kɛ dɔ̀: 
\v 8 Di ɛímu di dootitɔbɛ̀ kɛ̀ dɛ̀ sũ: Iwũɔ̃ pɛ́u, nɛ̀ mɛsɔɔ nɛ̀ timɑ́tì pɛ́ítì nɛ̀ mɛbiɛrimɛ nɛ̀ timɑ́tì nɛ̀ tiyɑ̀ɑ̀tì. Túótɛ́nɛ̀ dɛ kɛ́kònnɛ̀ nɛ̀ di tebìí kɛ̀ di totí.
\s1 Bɛ̀ mɑɑ́mɛ̀ diwũɔ̃tɔ̀nnì Suditɛ̃ɛ̃ tɑkɛ́
\p
\v 9 Kɛ̀ Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè ítɛ́ kɛ́yóu Isidɑyɛɛribɛ tɔbɛ̀ Sidoo Kɑnnɑhɑ̃ɑ̃ kɛ́wɛ̃tɛ Kɑdɑɑdi. Ti Yiɛ̀ nKuyie ndo nɑ̀kɛ́ ku tɔ̃ntì Mɔyiisi kòo bɛ̀ duɔ́ nkɛ̀ɛ̀ tenkɛ̀. 
\v 10 Bɛ̀ tùɔ̀kɛ dìì mɔ̀nnì Suditɛ̃ɛ̃ kɛ kpɑɑ́ bo Kɑnnɑhɑ̃ɑ̃ tempɛ̃ nkɛ́mɑɑ́ diwũɔ̃tɔ̀nnì diɛrì mɑrì Suditɛ̃ɛ̃ tɑkɛ́. 
\v 11 Kɛ̀ Isidɑyɛɛribɛ tɔbɛ̀ɛ keè bɛ̀ tumɛ̀ Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè mɑɑ́ diwũɔ̃tɔ̀nnì kukó nSuditɛ̃ɛ̃ bɛ kó diyɑ́ɑ̀ Kɑnnɑhɑ̃ɑ̃ tempɛ̃ mmiɛkɛ.
\p
\v 12 Isidɑyɛɛribɛ tɔbɛ̀ tì kèè mɛmmɛ kɛ́tíí nSidoo kɛ bo bɛ̀ dokɛ́nɛ̀. 
\v 13 Kɛ̀ bɛ̀ɛ tɔ̃ mPinɑɑsi ikuɔ́ nìùtì Edeɑsɑɑ birɛ, Kɑdɑɑdi Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè borɛ̀. 
\v 14 Kɛ̀ Isidɑyɛɛribɛ kó bɛkótíbɛ̀ tɛpíítɛ̀ɛ ò cíe, onìtì òmɑ́ɑ̀ òmɑ́ɑ̀ bɑ́ kùù wuɔ mmiɛkɛ. Bɑ́ wè ò do tú wèè bɑkɛ́ wènwe o wuɔ. 
\v 15 Kɛ̀ bɛ̀ɛ kɔtɛ Kɑdɑɑdi Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè borɛ̀ kɛ́ bɛ̀ nɑ̀kɛ́ kɛ dɔ̀: 
\v 16 Isidɑyɛɛribɛ tĩ̀nnì dimɔu tu: Dɛ̀ yĩ́mɛ kɛ̀ di cɑ̀ɑ̀rɛ̀ ti Yiɛ̀ nKuyie nyIsidɑyɛɛribɛ tũ nkù kɛ yetɛ ku kpɛti yíe nkɛ kù bùtínnɛ́ kɛ mɑɑ́ dimɑ́ɑ̀ diwũɔ̃tɔ̀nnì. 
\v 17 Ti do cɑ̀ɑ̀rɛ̀mɛ̀ ti Yiɛ̀ nKuyie mPeɔɔ kɛ̀ Kuyie mpotɛ́ kù nìtìbɛ̀, kɛ̀ dɛ kó mucɔ̃́ntimu kpɑɑ́ bo nɛ̀ yíenní, dɛ̀ í sɑ̀nnɑ̀ɑ̀? 
\v 18 Dɛ̀ dòmmɛ kɛ̀ di bùtínnɛ́ Kuyie nyíe nkɛ yetɛ ku kpɛti? Ku miɛkɛ nɑɑ yóó pɛikɛ Isidɑyɛɛribɛ bɛmɔu ndi. 
\v 19 Kɛ̀ di yɛ̀mmɛ̀ dò ti Yiɛ̀ nKuyie nyí pɛ́nsìrì di kó kɛtenkɛ̀, kɔtɛnní ti kɔkɛ miɛkɛ, ti Yiɛ̀ nKuyie ntou borɛ̀ kɛ́wɑɑ́ nkɛtenkɛ̀. Di bɑ́ɑ́ bútínnɛ́ ti Yiɛ̀ nKuyie nkɛ́ ti yɑtɛnɛ̀, kɛ́mɑɑ́ diwũɔ̃tɔ̀nnì tɛrì kɛ́ nti ɛ̃ɛ̃nnɛ̀. 
\v 20 Akɑ̃ɑ̃ Sedɑɑ yɑɑ̀birɛ dɔ̀ɔ̀ dìì mɔ̀nnì mɛyɛi nkɛ tùótɛ́ ti Yiɛ̀ nKuyie ndo yɛ̃ mbɛ̀ bɑ́ɑ́ túótɛ́ dɛ̀. Di yɛ̃́mu kɛ dò nku miɛkɛ do pɛikɛ Isidɑyɛɛribɛ bɛmɔu ndi, weè do í ku omɑ́ɑ̀ ò cɑ̀ɑ̀rɛ̀mɛ̀ kpɛ́í.
\p
\v 21 Kɛ̀ Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè tɛ̃́nnɛ́ Isidɑyɛɛribɛ tɔ̃nní bɛ̀ kɛ dɔ̀: 
\v 22 Ti Yiɛ̀ nKuyie nkùù bɑkɛ́ dɛmɔu, kù yɛ̃́mu mùù te kɛ̀ ti dɔ̀ɔ̀ miɛ nkɛ̀ Isidɑyɛɛribɛ yóó tì yĩ̀ɛ̃́tɛ́, kɛ̀ ti kù bùtínnɛ́mu kɛ kù cɑ̀ɑ̀rɛ̀ kù ti kuɔ yíe. 
\v 23 Kɛ̀ ti yetɛ ti Yiɛ̀ nKuyie nkpɛti nti kɛ mɑɑ́ timɑ́ɑ̀ diwũɔ̃tɔ̀nnì kɛ bo nkɔù iwũɔ̃ kɛ tuɔ̀ nkɛ pɑ̃ɑ̃ ntidiitì, kɛ kɔù iwũɔ̃ mɛtɑummɛ̀ kpɛyi, ti Yiɛ̀ nKuyie nti potɛ́. 
\v 24 Ti mɛ̀ dɔ̀ɔ̀ kɛ yɛ̃́ ti yĩɛ̃̀kùmɛ̀ di bí nɑɑ bo nɑ́kɛ́ mɛ̀mmɛ ti kpɛyi diyiè mɑrì kɛ dɔ̀: Ɔ̃̀mmɛ wɛ̃nnímɛ̀ bo díndi nɛ̀ ti Yiɛ̀ nKuyie nyIsidɑyɛɛribɛ tũ nkù di cuokɛ̀? 
\v 25 Ti Yiɛ̀ nKuyie nhɑ̃nnɛ́mu Suditɛ̃ɛ̃ kòò tu kumɑ̀nku, di í kɔkɛ́ ti Yiɛ̀ nKuyie nkó mutɔ̃mmú mɑmù miɛkɛ. Dɛ̀ bo nɑ kɛ́nte kɛ̀ ti bíí yóu ti Yiɛ̀ nKuyie. 
\v 26 Dɛɛ̀ te kɛ̀ ti mɑɑ́ diwũɔ̃tɔ̀nnì, ti í di mɑɑ́ kɛ bo nfeu iwũɔ̃ ti Yiɛ̀ nKuyie nyoo ti nkù pɑ̃ɑ̃ ntidiitì. 
\v 27 Ti dì mɑɑ́ kɛ̀ dì bo bɛnkɛ ti tɑumɛ̀ mmɛ nɛ̀ díndi, kɛ dò ntínti nɛ̀ dínni nɛ̀ ti yɑɑ̀bío ti mɔkɛ kucɛ kɛ bo mbɑ́ɑ́ nti Yiɛ̀ nKuyie, nkɛ nkù feu iwũɔ̃ kɛ tuɔ̀ nku wũɔ̃tɔ̀nnì ĩ́nkɛ̀, kɛ kù feu mɛtɑummɛ̀ kpɛyi. Dɛ mɔ̀nnì di bí bɑ́ɑ́ nɑ kɛ́nɑ́kɛ́ ti kpɛyi kɛ dɔ̀ ì í mɔkɛ kucɛ kɛ bo nkɔkɛ́ ti Yiɛ̀ nKuyie nkɔbɛ miɛkɛ. 
\v 28 Ti yɛ̀mmɛ̀ dò nkɛ̀ bɛ̀ nɑɑ tì bɛ́i nti borɛ̀ yoo ti yɑɑ̀bí bo dɛ̀, ti dɔ̀: Ntɛ ti cicɛbɛ̀ mɑɑ́ dìì wũɔ̃tɔ̀nnì ti Yiɛ̀ nKuyie. Bɛ̀ í dì mɑɑ́ kɛ bo nkɔù iwũɔ̃ Kuyie nkɛ tuɔ̀ nyoo bɛ̀ nkù pɑ̃ɑ̃ ntidiitì, bɛ̀ dì mɑɑ́ kɛ̀ dì bo bɛnkɛ ti tɑumɛ̀ mmɛ nɛ̀ díndi. 
\v 29 Ti í di mɑɑ́ kɛ bo yetɛ ti Yiɛ̀ nKuyie nkɛ kù bùtínnɛ́ yíe, ti í dì mɑɑ́ kɛ bo nkɔù iwũɔ̃ kɛ tuɔ̀ nkɛ kù pɑ̃ɑ̃ ntidiitì, yoo kɛ kù feu iwũɔ̃. Ti í dɔ́ kɛ́nfeu iwũɔ̃ kupíkù tɛkù mɑkù kɛ yóu ku wũɔ̃tɔ̀nnì dìì bo ku cĩ́ɛ̃̀tɛ̀.
\p
\v 30 Kɛ̀ ikuɔ́ nìùtì Pinɑsi nɛ̀ Isidɑyɛɛribɛ kó bɛkótíbɛ̀ nɛ̀ bɛ̀ɛ̀ bɑkɛ́ iwuɔ nkɛ̀ bɛ̀ɛ keè Dubɛnniibɛ nɛ̀ Kɑdiibɛ nɛ̀ Mɑnɑnsee kɔbɛ dikéè bɛ́i ntì kɛ̀ dɛ̀ɛ bɛ̀ nɑrikɛ. 
\v 31 Kɛ̀ Edeɑsɑɑ birɛ Pinɑsi ikuɔ́ nìùtìi bɛ́i nkɛ dɔ̀: Ti bɑntɛ́ di mmɔ̀nnì kɛ dò nti Yiɛ̀ nKuyie mbo ti cuokɛ̀ kɛ yɛ̃́ di í kù cɑ̀ɑ̀rɛ̀mɛ̀ kɛ kù miɛkɛ bo pɛikɛ Isidɑyɛɛribɛ.
\p
\v 32 Kɛ̀ Edeɑsɑɑ birɛ Pinɑsi ikuɔ́ nìùtì nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ cɑu nDubɛnniibɛ nɛ̀ Kɑdiibɛ kɛ́ítɛ́ Kɑdɑɑdi kɛ́kò nKɑnnɑhɑ̃ɑ̃ Isidɑyɛɛribɛ borɛ̀ kɛ́ bɛ̀ nɑ̀kɛ́. 
\v 33 Kɛ̀ Isidɑyɛɛribɛɛ keè bɛ̀ nɑ̀kɛ́ tì kɛ́sɑ̃ntɛ ti Yiɛ̀ nKuyie nkɛ tɛ̃́nkɛ í mbɑ̀ɑ́tí kɛ bo dokɛ́nɛ̀ Dubɛnniibɛ nɛ̀ Kɑdiibɛ. 
\v 34 Kɛ̀ Dubɛnniibɛ nɛ̀ Kɑdiibɛ dɔ̀: Diwũɔ̃tɔ̀nnì dii ndiì bɛnkú kɛdò nti Yiɛ̀ nKuyie ntu Kuyie nkɛ́ dì yu kɛ dɔ̀ Dibɛnkɛ̀rì.
\c 23
\s1 Sosuwee yɑ̀úkùnnɛmɛ̀ bɛnìtìbɛ̀ kɔ̃̀ntì mɛsɔmmɛ
\p
\v 1 Kɛ̀ ti Yiɛ̀ nKuyie nteennɛ̀ Isidɑyɛɛribɛ kɛ́ bɛ̀ dɛɛtɛ́nɛ̀ bɛ dootitɔbɛ̀ kɛ̀ dɛ̀ɛ mɔntɛ mɛdiɛ̀ nkɛ̀ Sosuwee kótɛ́ mɛdiɛ̀, 
\v 2 kɛ́yú Isidɑyɛɛribɛ kó bɛkótíbɛ̀ nɛ̀ bɛkpɑ̀ɑ̀tìbɛ̀ nɛ̀ bɛbeémbɛ̀ nɛ̀ bɛbɑɑtíbɛ̀, kɛ́ bɛ̀ nɑ̀kɛ́ kɛ dɔ̀: N kòtɛ́mu mɛdiɛ̀. 
\v 3 Di yɑ̀mu ti Yiɛ̀ nKuyie ndɔ̀ɔ̀ dɛ̀ ibotí imɔu, kù kpɑ ndíì kó dikpɑ̀nnì. 
\v 4 Di yɑ̀mu n tɑ̃ũmɛ̀ tɛ́tɛ́ n nɑ bɛ̀ kó kɛtenkɛ̀ nɛ̀ m mu nyí nɑ bɛ kɔkɛ, kɛ̀ɛ̀ tu Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ nɛ̀ Mɛditedɑndee dɛ ììkɛ̀ bíɛ́kɛ̀, kɛ kɛ̀ ndi totí di botí dòmmɛ̀. 
\v 5 Ti Yiɛ̀ nKuyie nkuù yóó bɛ̀ bɛ̀ti kumɔ́mmɔnku, kɛ̀ bɛ̀ɛ cokɛ́ kɛ́dɛ́tɛ́, kɛ̀ dí tiekɛ bɛ tenkɛ̀, kɛ́ndònnɛ̀ kù bɛ́immɛ̀. 
\v 6 Ntɛ̃ĩ́nɛ̀ kɛ́ndɔɔri Mɔyiisi di duɔ́ nyìì kuɔ́ yɛ̃mmɛ̀ imɔu, di bɑ́ɑ́ ì dɛ̀tɛ́nɛ̀. 
\v 7 Di bɑ́ɑ́ kɔɔrɛnɛ̀ ibotí ìì kpɑɑ́ di miɛkɛ, di bɑ́ nfeu bɛ bɔkɛ̀, di bɑ́ nyɛ̀ pɑ̀rìkunɛ̀, di bɑ́ nninku yɛ ììkɛ̀ kɛ yɛ̀ bɑ̀ɑ́. 
\v 8 Dí ntɑunɛ̀ ti Yiɛ̀ nKuyie, di kù tɑunɛ̀mɛ̀ nɛ̀ yíenní. 
\v 9 Ti Yiɛ̀ nKuyie nkuù bɛ̀ti ibotí diɛyì ìì kpeńnì, bɑ́ òmɔù í nɑ kɛ di bɑ̀ɑo nɛ̀ yíenní. 
\v 10 Di miɛkɛ onìtì òmɑ́ɑ̀ do ɔ̃ mbɛtì bɛnìtìbɛ̀ tɛkɔupíítɛ̀ ntɛ (1000), ti Yiɛ̀ nKuyie nkuù kpɑ ndi kpɛ́í, kɛ́ndònnɛ̀ kù bɛ́immɛ̀. 
\v 11 Ndɑkɛnɛ̀ dimɑ́ɑ̀ kpɛ́í nkɛ ndɔ́ ti Yiɛ̀ nKuyie. 
\v 12 Kɛ̀ di mɛ nkù bùtínnɛ́ kɛ tɑunɛ̀ ibotí ìì kpɑɑ́ di cuokɛ̀ kɛ puokɛ bɛ kó bɛsɑpɑ̀mbɛ̀, kɛ̀ bɛ̀ puokɛ di kɔbɛ, kɛ̀ di tɑunnɛ̀ ditɔbɛ̀. 
\v 13 Di nyɛ̃́ kɛ dò nti Yiɛ̀ nKuyie nyí yó nsɔkɛ́ kɛ bɛtì di dootitɔbɛ̀. Bɛ̀ yó ndò ndi kpɛ́í mmudìtìmù mmu nɛ̀ ntimɑ́tì dindííntì, kɛ́ndò nyɛdɑ́ kɛ di puotì, kɛ dò nyipo kɛ kũũ di nuɔ, kɛ̀ dí kú kɛ́pɑɑ̀ dihɛì sɑ̀ɑ̀rì ti Yiɛ̀ nKuyie ndi duɔ́ ndì. 
\v 14 M mɔ̀nnì diì tùɔ̀kɛ kɛ̀ m pɛ̃nkɛ́, dɛnɛnnɛ̀ dɛmɔu pɛ̃nkùmɛ̀. Di nyɛ̃́ nɛ̀ di yɛ̀mmɛ̀ mɛmɔu kɛ dò nti Yiɛ̀ nKuyie ndo nɑ̀kɛ́ tì, tìmɑtì í sùɔ́, timɔu tì dɔ̀ɔ̀mu. 
\v 15 Kù dɔ̀ɔ̀ mɛ̀ɛ̀ botí ku nɑ́ɑǹsɑ̀ɑ̀tì kù bɛ́i ntì kù yóó mɛ ndɔɔ̀ kù di cɑu ntìì kpɛ́í kɛ dí bɛti kɛ dí kuɔ dihɛì sɑ̀ɑ̀rì kù di duɔ́ ndì miɛkɛ. 
\v 16 Kɛ̀ nsɑ̀ kɛ̀ di yetɛ ku kpɛti, kɛ nìńkú yɛbɔkɛ̀ ììkɛ̀ kɛ yɛ̀ fìé iwũɔ̃, ti Yiɛ̀ nKuyie mmiɛkɛ yóó pɛikɛmu kɛ̀ kù di kuɔ bɑ̀mbɑ̀ ndihɛì sɑ̀ɑ̀rì kù di duɔ́ ndì miɛkɛ.
\c 24
\s1 Isidɑyɛɛribɛ tɑ̃ɑ̃tɛ́mɛ̀ kɛ bo ntũ nti Yiɛ̀ nKuyie
\p
\v 1 Kɛ̀ Sosuwee yú Isidɑyɛɛribɛ kó iwuɔ nyimɔu nɛ̀ bɛkótíbɛ̀ nɛ̀ bɛkpɑ̀ɑ̀tìbɛ̀ nɛ̀ bɛbeémbɛ̀ nɛ̀ bɛbɑɑtíbɛ̀, kɛ̀ bɛ̀ɛ kɔtɛ Sisɛmmu ti Yiɛ̀ nKuyie ncĩ́ɛ̃̀tɛ̀. 
\v 2 Kòo bɛ̀ nɑ̀kɛ́ kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù tu: Di yɛmbɛ̀ do bo kukó ndiɛkù Efɑdɑti yɑ́ɑ̀ ndi kɛ feu yɛbɔkɛ̀, kɛ kɑ̃́ɑ̃́ nTedɑɑ Abɑrɑhɑmmu nɛ̀ Nɑɔɔ bɛ cicɛ kó dimɔ̀nnì. 
\v 3 Kɛ̀ kùu dennɛní Abɑrɑhɑmmu kukó nyɑ́ɑ̀ kó dihɛì, kɛ́duɔ́ nkòo ce nKɑnnɑhɑ̃ɑ̃ omɔu, kɛ̀ kùu ò duɔ́ nyIsɑki kɛ dɔ̀: O botí bo sṹṹ. 
\v 4 Kɛ̀ kùu duɔ́ nyIsɑki Sɑkɔbu nɛ̀ Esɑyuu, kɛ́kɑnnɛ Esɑyuu Seii tɑ̃rì, Sɑkɔbu nɛ̀ o bí kɛ̀ bɛ̀ɛ kɔtɛ Esibiti. 
\v 5 Kɛ̀ dɛ̀ mboní kɛ̀ kùu tɔ̃nní Mɔyiisi nɛ̀ Anɔɔ, kɛ́dɔɔ̀ Esibiti kɔbɛ mɛyɛi nkɛ́dennɛ di kɔbɛ. 
\v 6 Kɛ̀ kùu dennɛní di yɛmbɛ̀ Esibiti, kɛ̀ bɛ̀ɛ tuɔkɛ dɑ̀mɛ́ɛ̀rì, kɛ̀ Esibiti kɔbɛɛ bɛ̀ tũ̀nnɛ nɛ̀ sinɑɑsɛ̃ĩ́ nɛ̀ si dèèbɛ̀, kɛ́ bɛ̀ nìntɛ tipèntì kóo dɑ̀mɛ́ɛ̀rì. 
\v 7 Kɛ̀ bɛ̀ɛ kuɔ́ nkɛ́yú ti Yiɛ̀ nKuyie nkɛ̀ kùu ɑ̃nnɛ́ dibiìnnì bɛmbɛ nɛ̀ Esibiti kɔbɛ bɛ cuokɛ̀, kɛ́duɔ́ nkɛ̀ Esibiti kɔbɛɛ pɔ̃ntɛ́ dɑ̀mɛ́ɛ̀rì. Di yɑ̀mu kù bɛ̀ dɔ̀ɔ̀mɛ̀. Dɛ kó difɔ̃nkúò kɛ̀ di yɛmbɛ̀ mbo dikpɑ́ɑ̀ miɛkɛ kɛ́mɔntɛ. 
\v 8 Kɛ̀ kù di kɔtɛnɛ̀ Amɔriibɛ tenkɛ̀ kɛ̀ bɛ̀ di dokɛ́nɛ̀, kɛ̀ kùu duɔ́ nkɛ̀ dí bɛ̀ nɑ, kɛ̀ kùu bɛ̀ kùɔ di nuɔ mmiɛkɛ, kɛ̀ di tiekɛ bɛ tenkɛ̀. 
\v 9 Kɛ̀ Mɔɑbu kpɑ̀ɑ̀tì Bɑdɑki Sipɔɔ birɛɛ ítɛ́ kɛ bo di dokɛ́nɛ̀ kɛ́yú Bɑdɑmmu Beɔɔ birɛ kòò bo di bɔntɛ́ kusĩ̀nkù. 
\v 10 Kɛ̀ ti Yiɛ̀ nKuyie nyetɛ kɛ́duɔ́ nkòo di dɔɔ̀ mɛsɑ̀ɑ̀, kɛ̀ kù di dɛɛtɛ́nɛ̀ Bɑdɑki. 
\v 11 Kɛ̀ di séntɛ́ní Suditɛ̃ɛ̃ kɛ́tuɔkɛ Sedikoo. Kɛ̀ Sedikoo kɔbɛ nɛ̀ Amɔriibɛ nɛ̀ Pedisiibɛ nɛ̀ Kɑnnɑhɑ̃ɑ̃ kɔbɛ nɛ̀ Itiibɛ nɛ̀ Kidikɑsiibɛ nɛ̀ Efiibɛ nɛ̀ Sebusiibɛ, kɛ̀ bɛ̀ɛ ítɛ́ kɛ bo di dokɛ́nɛ̀, kɛ̀ kùu duɔ́ nkɛ̀ dí bɛ̀ nɑ. 
\v 12 Kù do nií nyɛcɑ̃nkɛ̀ndèèsùɔ̀ nyɛ di ììkɛ̀, kɛ̀ yɛ̀ɛ bɛti Amɔriibɛ kpɑ̀ɑ̀tìbɛ̀ bɛdɛ́. Di í bɛ̀ kùɔ nɛ̀ di pie nyoo di se. 
\v 13 Kɛ̀ kù di duɔ́ nkɛtenkɛ̀ di í kùútí kɛ̀ kɛ fɛ̃̀ṹtɛ́, yɛhɛkɛ̀ di í mɑɑ́ yɛ̀, dɛtie nfínyĩ̀ nɛ̀ odìfíè di í fìíkú dɛ̀, kɛ̀ di cɑ́ɑ́ ndɛ bɛ.
\p
\v 14 Di mmɔ̀nnì ndénɛ̀ ti Yiɛ̀ nKuyie kɛ́mpĩ́ nku tɔ̃mmú nɛ̀ di yɛ̀mmɛ̀ mɛmɔu kɛ̀ dɛ̀ wenni, kɛ́yóu di yɛmbɛ̀ do feu yɛ̀ɛ̀ bɔkɛ̀ kukó nhEfɑdɑti yɑ́ɑ̀ nɛ̀ Esibiti miɛkɛ, kɛ́mpĩ́ ti Yiɛ̀ nKuyie ntɔ̃mmú. 
\v 15 Kɛ̀ di mɛ nyí dɔ́ kɛ́pĩ́ ti Yiɛ̀ nKuyie ntɔ̃mmú, tɑ̃ɑ̃tɛ́nɛ̀ yíe ndi dɔ́ dɛ̀. Kɛ̀ di dɔ́ di yɛmbɛ̀ do feu yɛ̀ɛ̀ bɔkɛ̀ nyɛ kukó nhEfɑdɑti yɑ́ɑ̀ yoo Amɔriibɛ di mɛ mbo bɛ̀ɛ̀ cuokɛ̀ bɛ kpɛyɛ. Mí nnɛ̀ n cĩ́ɛ̃̀tɛ̀ ti bo ntũ ti Yiɛ̀ nKuyie.
\p
\v 16 Kɛ̀ bɛnìtìbɛ̀ dɔ̀: Tínti bɑ́ɑ́ yóu ti Yiɛ̀ nKuyie nkɛ́fíé yɛbɔkɛ̀. 
\v 17 Kɛ yɛ̃́ ti Yiɛ̀ nKuyie nkuù ti dènnɛnímɛ̀ Esibiti tínti nɛ̀ ti yɛmbɛ̀ ti do pĩ́ nkɛ̀ mudɑɑtɔ̃mmú, kɛ ti tɔ kucɛ kɛ ti kɑ̃nkɛ́ kɛ dɔ̀ɔ̀ tidiɛtì kɛ̀ ti pɛ̃ɛ̃tɛ́ní ibotí. 
\v 18 Kuù bɛ̀ti ibotí imɔu ti nuɔ mmiɛkɛ, kɛ bɛ̀ti Amɔriibɛ ti mɛ̀ mbo bɛ̀ɛ̀ miɛkɛ. Ti yó ntũ nti Yiɛ̀ nKuyie nku.
\p
\v 19 Kɛ̀ Sosuwee dɔ̀: Di bɑ́ɑ́ nɑ kɛ́pĩ́ nti Yiɛ̀ nKuyie ntɔ̃mmú, kù í mɔkɛ mɛyɛi, kù dɔ́ kuù mɑ́ɑ̀ ndi te. Kɛ̀ di kù bùtínnɛ́ kɛ dɔ̀ɔ̀ mɛyɛi nkù í yóó di yóu. 
\v 20 Kɛ̀ di kù yóu kɛ fìé yɛbɔkɛ̀ kù yóó di dɔ̀ɔ̀ mɛyɛi mmɛ kɛ di kuɔ, bɑ́ kù mɛ ndi dɔ̀ɔ̀mɛ̀ mɛsɑ̀ɑ̀. 
\v 21 Kɛ̀ bɛ̀ɛ nɑ́kɛ́ Sosuwee kɛ dɔ̀: Bìtì! Ti yó ntũ nti Yiɛ̀ nKuyie nku.
\p
\v 22 Kɛ̀ Sosuwee dɔ̀: Díì bɛ́i nnɛ̀ di mɔ́mmɔmbɛ kɛ tú di yó ntũ nti Yiɛ̀ nKuyie. Kɛ̀ bɛ̀ dɔ̀: Ɛ̃ɛ̃, tíì bɛ́i! 
\v 23 Kɛ̀ Sosuwee dɔ̀: Dennɛnɛ̀ yɛbɔkɛ̀ di cuokɛ̀, kɛ́duɔ́ ndi yɛ̀mmɛ̀ ti Yiɛ̀ nKuyie.
\p
\v 24 Kɛ̀ bɛ̀ dɔ̀: Ti yó ntũ nti Yiɛ̀ nKuyie nku kɛ yíé nkuù kpɛti.
\p
\v 25 Kɛ̀ Sosuwee tɑunnɛ̀ bɛnìtìbɛ̀ ti Yiɛ̀ nKuyie ndɛ yiè Sisɛmmu, kɛ́ bɛ̀ duɔ́ nyikuɔ́ kɛ́ bɛ̀ nɑ̀kɛ́ bɛ̀ yó ndɔɔrimɛ̀, 
\v 26 kɛ́ tì wɑ̃̀ri Kuyie nkuɔ́ pɑ́tíri miɛkɛ, kɛ́fíí nditɑ̃́rì mutie diɛmù tɑkɛ́, mùù còḿmú dibòrì sɑ̀ɑ̀rì ti Yiɛ̀ nKuyie nkpɛri. 
\v 27 Kòo bɛ̀ nɑ̀kɛ́ kɛ dɔ̀: Ditɑ̃́rì dii, diì tu dibɛnkɛ̀rì, kɛ yɛ̃́ di kèèmɛ̀ ti Yiɛ̀ nKuyie nti nɑ̀kɛ́ tì. Di yó ndi nyɑu kɛ denniní kɛ bɑ́ɑ́ yetɛ́nɛ̀ ti Yiɛ̀ nKuyie.
\p
\v 28 Dɛ mɔ̀nnì kɛ̀ Sosuwee duɔ́ nkɛ̀ bɛ̀ɛ kũṹ mbɛ cɛ̃́ĩ.
\s1 Sosuwee kúmɛ̀
\p
\v 29 Dɛ kó difɔ̃nkúò kɛ̀ Nunni birɛ Sosuwee ti Yiɛ̀ nKuyie ntɔ̃ntì nyóó kú kɛ mɔkɛ yɛbie ntɛkɔ̀ùtɛ̀ nɛ̀ tɛpíítɛ̀ (110). 
\v 30 Kɛ̀ bɛ̀ɛ ò kũnnɛ́ bɛ̀ do ò duɔ́ nkɛ̀ɛ̀ tenkɛ̀ Efɑdɑimmu tɑ̃rɛ̀, Kɑɑsi tɑ̃rì bíɛ́kɛ̀. 
\v 31 Kɛ̀ Isidɑyɛɛribɛ ntũ nti Yiɛ̀ nKuyie nSosuwee kpɑɑ́ fòù dìì mɔ̀nnì, kòo kú kɛ̀ bɛkótíbɛ̀ tɔbɛ̀ bɛ̀ɛ̀ yɑ̀ ti Yiɛ̀ nKuyie ndɔ̀ɔ̀ mɛ̀ɛ̀ sɑ̀ɑ̀ nyIsidɑyɛɛribɛ kɛ̀ bɛ̀ nkpɑɑ́ fòù kɛ̀ bɛ̀ kù tũ.
\p
\v 32 Isidɑyɛɛribɛ do tɔmu Sosɛfu kṹɔ̃̀ kɛ́ yɛ̀ kũnnɛ́ Sisɛmmu, Sɑkɔbu do dontɛ́ kɛ̀ɛ̀ tenkɛ̀ nɛ̀ Amɔɔ bí mɛdítíbii ntɛkɔ̀ùtɛ̀ (100), kɛ̀ bɛ̀ɛ duɔ́ ndɛ kó kɛtenkɛ̀ Sosɛfu bí. Amɔɔ weè ketɛ́ Sisɛmmu.
\p
\v 33 Kɛ̀ Edeɑsɑɑ Amɔɔ birɛɛ kú kɛ̀ bɛ̀ɛ ò kũnnɛ́ o birɛ Pinɑsi tɑ̃tɛ̀ ĩ́nkɛ̀. Bɛ̀ do ò duɔ́ ndɛ kó kɛtenkɛ̀ Efɑdɑimmu tɑ̃rì ĩ́nkɛ̀ nkɛ.