\id JON di32.all Novembre 1998 BJ Parakou B{enin
\ide UTF-8
\h Sonɑɑsi
\toc1 Sonɑɑsi
\toc2 SONAASI
\mt1 Sonɑɑsi
\imt1 Di mpɑ́tíri tɔ tìì nɑ́ɑǹtì
\ip Sonɑɑsi kó dipɑ́tíri ti nɑ́ɑ́ nKuyie mpɑ̃ɑ̃nɑ́ɑǹtì nɑ́ɑǹtò mɔù kpɛ́í nkɛ.
\ip Kuyie ndo tɔ̃ nwè kɛ dɔ̀ wèe kɔtɛ Asidii kó dihɛidiɛ̀ kɛ́ bɛ̀ nɑ̀kɛ́ Kuyie nnɑ́ɑǹtì. Dɛ kóo nìtì yètìrì diì tu Sonɑɑsi. Kɛ̀ Sonɑɑsi nɛ́ yetɛ kɛ í ndɔ́ kɛ́ kɛ̀ kɔ̀tɛ kɛ yɛ̃́ Isidɑyɛɛribɛ do í nɑɑtinɛ̀mɛ̀ Asidii kɔbɛ. Nɛ̀ tìì ò tùɔ̀kɛní kucɛ ti kpɛ́í nkòo yóu kɛ́yie, mbɑ́ ò í ndɔ́. Kòo kɔtɛ kɛ́ bɛ̀ nɑ̀kɛ́ mɛyɛi mmɛ̀ɛ̀ dò nkɛ́ bɛ̀ tùɔ̀kɛní kɛ̀ nsɑ̀ kɛ̀ bɛ̀ í cèètɛ. Kɛ̀ bɛ̀ɛ bɑntɛ́ bɛ cɑɑ̀rìmɛ̀ kɛ́ceetɛ kɛ̀ dɛ̀ɛ wɛ̃tɛ kóò yonkɛ kòo ũũrɛ. Dɛɛ̀ bɛnkú kɛ dò nKuyie nkùù bɑkɛ́ kù dɔ̀ɔ̀ dɛ̀ kɛ nɛ́ ti dɔ́, kɛ ti kuɔ̀ mmɛsémmɛ̀, kɛ ɔ̃ɔ̃ cĩ́ɛ̃́ nku kɔbɛ dootitɔbɛ̀ kɛ́ bɛ̀ dɛɛtɛ́ kɛ́mbúútí kù bo bɛ̀ potɛ́mɛ̀ kɛ́ bɛ̀ kùɔ pɑ́íí.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie nyumɛ̀ Sonɑɑsi kòo yetɛ 1:1-17
\io1 2. Sonɑɑsi dèmmumɛ̀ o yɛi nkɛ cèètɛ kɛ̀ Kuyie nhò cĩ̀ɛ̃́ 2:1-10
\io1 3. Sonɑɑsi nɑ̀kɛ́ tì Ninifu ɛì kɔbɛ 3:1-10
\io1 4. Kuyie nkuɔ́mmɛ̀ Ninifu ɛì kɔbɛ mɛsémmɛ̀ 4:1-11
\c 1
\s1 Sonɑɑsi dɔ́mɛ̀ kɛ́cokɛ́ kɛ́dɛ́tɛ́nɛ̀ Kuyie
\p
\v 1 Diyiè mɑrì kɛ̀ Kuyie mbɛ́innɛ̀ Sonɑɑsi, Amitɑii birɛ kɛ dɔ̀: 
\v 2 Ítɛ́ kɛ́kɔtɛ Ninifu dihɛidiɛ̀ kɛ́ bɛ̀ cɑu. Bɛ yɛi mmɛɛ̀ sũ̀ṹ n tɛ̃́nkɛ í nɑ kɛ bo mmi.
\p
\v 3 Kɛ̀ Sonɑɑsii ítɛ́ kɛ nɛ́ cokɛ́ kɛ bo kɔtɛ Tɑsisi ɛì mɛdɛ́timɛ̀ kɛ́dɛ́tɛ́nɛ̀ Kuyie. Mɛm̀mɛ ò ìtɛ́mɛ̀ kɛ́kɔtɛ Sɑfɑɑ kɛ́yɑ̀ bɑ̀tóò wèè kɛ̀ kɔ̀ri, kɛ́yietí mucèmmu díítí kɛ́tɑ kɛ̀ bɛ̀ɛ kétɛ́ kɛ́nkɔri Tɑsisi. Ò do cokù kɛ bo dɛ́tɛ́nɛ̀ Kuyie nku.
\p
\v 4 Kɛ̀ Kuyie mmɛ nduɔnní kuyɑɑkperíkù kɛ̀ kù nfuuti dɑ̀mɛ́ɛ̀rì miɛkɛ, kɛ̀ bɑ̀tóò ndɔ́ kɛ́pɔntɛ. 
\v 5 Kɛ̀ kufɔ̃wɑɑ́ mpĩ́ mbɑ̀tóò yɛmbɛ̀ kɛ̀ bɛ̀ nyu bɛ bɔkɛ̀, bɛ bɔkɛ̀, kɛ dɛì tinɛntì bɑ̀tóò miɛkɛ kɛ buɔ̀nko dɑ̀mɛ́ɛ̀rì kɛ̀ dɛ̀ bo yɑukɛ. Kɛ̀ Sonɑɑsi yie cùtɛ́ bɑ̀tóò fũ̀ɔ̃̀ kɛ yɛ̃̀ nkɛ duɔ́. 
\v 6 Wèè bɑkɛ́ bɑ̀tóò kòo tɔ́ɔ́nko kɛ dɔ̀: A duɔ́mɑɑ̀? Ítɛ́ kɛ́kuɔ́nnɛ̀ ɑ kó Kuyie nkɛ̀ dɛ̀ nɑɑti kùu dɑɑtɛní ti kpɛ́í nkɛ ti bɑ́ɑ́ kú.
\p
\v 7 Kɛ̀ bɑ̀tóò yɛmbɛ̀ dɔ̀: Yóunɛ̀ kɛ̀ tí bɔ nyidíítí kɛ́yɑ̀ wèè ti tɔní dɛ kó mɛyɛi. Kɛ̀ bɛ̀ɛ ì bɔ nkɛ̀ ìi bɛnkɛ Sonɑɑsi. 
\v 8 Kɛ̀ bɛ̀ dɔ̀: Kɛ̀ fɔ̃́ɔ̃̀ mɛ̀nkɛ nwe, nɑ́kɛ́ ɑ yɛ̀nní dɛ̀ nɛ̀ ɑ ɛì nɛ̀ ɑ tɔ̃mmú tú mù nɛ̀ ɑ botí.
\p
\v 9 Kòò dɔ̀: N tú Ebedee nwe, kɛ dé n Yiɛ̀ nKuyie nkùù bɑkɛ́ kɛĩ́nkɛ̀, kùù dɔ̀ɔ̀ dɑ̀mɛ́ɛ̀rì nɛ̀ kɛtenkɛ̀.
\p
\v 10 Kɛ̀ Sonɑɑsii bɛ̀ nɑ̀kɛ́ ò cokùnɛ̀mɛ̀ Kuyie nku, kɛ̀ kufɔ̃wɑɑ́ mbɛ̀ ɑutɛ́ kɛ̀ bɛ̀ dɔ̀: A dɔ̀ɔ̀ bɑ mbotí nku? 
\v 11 Ti yóó dɑ yĩ́mɛ kɛ̀ dɑ̀mɛ́ɛ̀rìi bonkɛ?
\p Kɛ yɛ̃́ kuyɑɑkù do sɔkɛ́mɛ̀ kɛ dɔkɛ kpénkú. 
\v 12 Kòo bɛ̀ tɛ̃̀ńnɛ́ kɛ dɔ̀: N túótɛ́nɛ̀ kɛ́dootóo dɑ̀mɛ́ɛ̀rì miɛkɛ kòo bonkɛ. N yɛ̃́mu kɛ tú míì te kɛ̀ kuyɑɑkù dɛu.
\p
\v 13 Kɛ̀ bɛ̀ ncĩ́ɛ̃́kɛ́ kɛ pɑɑ̀tì mɛniɛ nnɛ̀ bɛ wɛ̃rímú mumɔu kɛ bo tuɔkɛ kɛtenkɛ̀ borɛ̀, kɛ̀ kuyɑɑkù dɔkɛ kpénkú kɛ̀ bɛ̀ɛ yĩɛ̃kɛ. 
\v 14 Mɛm̀mɛ kɛ̀ bɛ̀ɛ yóu kɛ́kuɔ́nnɛ̀ Kuyie nkɛ dɔ̀: Áú ti Yiɛ̀ nKuyie! Bɑ́ɑ́ ti kuɔ onìtì yie nkpɛ́í, ò bɑ́ɑ́ kú kɑ̀ɑ ti cɑɑ̀rɛ̀. Fɔ̃́ nKuyie nfɔ̃́ɔ̃̀ dɔ̀ɔ̀ ɑ dɔ́mɛ̀.
\p
\v 15 Dɛ mɔ̀nnì kɛ̀ bɛ̀ɛ̀ túótɛ́ Sonɑɑsi kɛ́dootóo mɛniɛ mmiɛkɛ kɛ̀ dɑ̀mɛ́ɛ̀rìi cómmú. 
\v 16 Kɛ̀ kufɔ̃wɑɑ́ mbɛ̀ ɑutɛ́ kɛ̀ bɛ̀ɛ yɔtɛ Kuyie nkɛ́ kù fèútɛ́ fɛɔ̃fɛ̀, kɛ́ kù cɑ̀nnɛnɛ̀ dinùù.
\s1 Sonɑɑsi bɑ̀ɑ́mmɛ̀ Kuyie ntɛyĩǹtɛ̀ miɛkɛ
\p
\v 17 Bɛ̀ dootóo mɛmmɛ Sonɑɑsi kɛ̀ Kuyie nduɔ́ nkɛ̀ tɛyĩndiɛtɛ̀ɛ ò mɑɑ́nko. Kòò dɔ̀ iyie nyìtɑ̃ɑ̃ti, dɛyènnɛ̀ dɛ̀tɑ̃ɑ̃ti tɛyĩǹtɛ̀ miɛkɛ.
\c 2
\p  
\v 1 Kɛ̀ Sonɑɑsi mbɑ́ɑ́ nho Yiɛ̀ nKuyie nkɛ tú:
\q1
\v 2 Dɛ̀ m pɑ̀kɛ́mu n Yiɛ̀ nKuyie nkɛ̀ n dɑ kuɔ́nnɛ̀ kɑ̀ɑ n dɛɛtɛ́!
\q1 N do bo kudɔnkù nku kɛ dɑ yu, kɑ̀ɑ kèè n tɑmmɛ̀.
\q1
\v 3 A do n dootóo dɑ̀mɛ́ɛ̀rì fũ̀ɔ̃̀ ndi dɛcũmpurɛ,
\q1 kɛ̀ mɛniɛ nni ndɑ̀tínnɛ́, kɛ̀ yɛnɛ́fĩ̀nfĩ̀rɛ̀ nni mpuotì.
\q1
\v 4 N yɛ̀mmɛ̀ do dò nhɑ n dootóomu,
\q1 bɑ́ nɛ̀ mɛmmɛ n do yɛ̃́mu kɛ dò m bo wɛ̃tɛ kɛ́yɑ̀ ɑ cɛ̃sɑ̀ɑ̀tɛ̀.
\q1
\v 5 N do dìumu kɛ́fiu, n do tɑ tɛbintuotɛ̀ ntɛ,
\q1 kɛ̀ dɑ̀mɛ́ɛ̀rì kó tipèntì nni kɔti.
\q1
\v 6 N do cùtɛ́ dɛ fũ̀ɔ̃̀ ndi kɛ́tɑ kudɔnkù sɑ̃́ɑ̃̀.
\q1 N Yiɛ̀ nKuyie nkɑ̀ɑ n dɛɛtɛ́ kɛ n dènnɛní kudɔnkù!
\q1
\v 7 N do fìumu kɛ̀ n yɛ̀mmɛ̀ɛ cuonní ɑ bíɛ́kɛ̀
\q1 kɛ̀ nní ndɑ bɑ́ɑ́ nkɛ tú m bɑ́ɑmmìi tuɔkoo ɑ cɛ̃sɑ̀ɑ̀tɛ̀ miɛkɛ.
\q1
\v 8 Bɛbɔɔféúbɛ̀ pɑ̀ɑ̀mu Kuyie nkó mɛsɑ̀ɑ̀.
\q1
\v 9 Mí m bo dɑ fíé iwũɔ̃, kɛ́ndiè nkɛ dɑ sɑ̃ntí,
\q1 kɛ dɔɔri m bɛ́i ntì, Kuyie nfɔ̃́ɔ̃̀ mɑ́ɑ̀ dɛɛrí.
\p
\v 10 Kɛ̀ Kuyie nduɔ́ nkɛ̀ tɛyĩ̀ntɛ̀ɛ tĩ́ṹtóo Sonɑɑsi dikonnɛ́bɛ̀nnì.
\c 3
\s1 Sonɑɑsi nɑ̀kɛ́mɛ̀ Kuyie nnɑ́ɑǹtì Ninifu
\p
\v 1 Kɛ̀ Kuyie nyíɛ́ kɛ́bɛ́innɛ̀ Sonɑɑsi mɛdɛ́rímɛ̀, 
\v 2 kɛ dɔ̀: Kɔtɛ Ninifu dihɛidiɛ̀ kɛ́ bɛ̀ nɑ̀kɛ́ n yóó dɑ nɑ́kɛ́ tì.
\p
\v 3 Kɛ̀ Sonɑɑsii ítɛ́ kɛ́kɔtɛ Ninifu kɛ́ndònnɛ̀ Kuyie nhò nɑ̀kɛ́mɛ̀. Dihɛidiɛ̀ do ndi, kɑ̀ɑ dɔ́ kɛ́ di ce, nhɑ mmɔkɛ yɛwe yɛ̀tɑ̃ɑ̃ti. 
\v 4 Kɛ̀ Sonɑɑsii yɛ̀ kɛ́nfirí diyiè ketirì dihɛì kɛ pĩɛ̃kù kɛ tú: Dɛ̀ kpɑɑ́ yɛwe sipísìnɑ̀ɑ̀ ndi kɛ̀ Ninifuu pɔntɛ. 
\v 5 Kɛ̀ Ninifu kɔbɛɛ yie nKuyie mbɛ̀ nɑ̀ɑ́ ntì kɛ dɑ́ɑ́tí tifɔ̀ɔ̀tɔ̃̀ntì, kɛ bo bɛnkɛ bɛ yɛ̀mmɛ̀ cɑ̀ɑ̀rɛ̀mɛ̀, kɛ̀ bɛ̀ɛ boú dinùù bɛnitidiɛbɛ̀ nɛ̀ bɛsɑ́mpɔ́bɛ̀. 
\v 6 Kɛ̀ Ninifu kóo kpɑ̀ɑ̀tìi tì kèè kɛ́ítɛ́ o kpɑ̀ɑ̀tìkɑ̀rì kɛ́dɑ́tɛ́ o kpɑ̀ɑ̀tìyɑ̀ɑ̀tì kɛ́dɑ́ɑ́tí kufɔ̀ɔ̀tɔ̃̀nkù kɛ́nkɑri ditɑ́pùò ĩ́nkɛ̀, 
\v 7 kɛ́duɔ́ nkɛ̀ bɛ̀ɛ pĩɛ̃kɛ́ dihɛì kɛ dɔ̀: Okpɑ̀ɑ̀tì nɛ̀ o tũ̀mbɛ̀ bɛ̀ tu bɛnìtìbɛ̀ nɛ̀ iwũɔ̃ dɛ̀ bɑ́ɑ́ dɛ́útɛ́ dɛ̀mɑrɛ̀ dɛ̀ mɛ mbɑ́ɑ́ yɑ̃̀ mɛniɛ. 
\v 8 Bɛnìtìbɛ̀ nɛ̀ iwũɔ̃ dɛ̀ɛ dɑ́ɑ́tí tifɔ̀ɔ̀tɔ̃̀ntì, bɑ́ wè kòò kuɔ́nnɛ̀ Kuyie nnɛ̀ o wɛ̃rímú mumɔu kɛ́yóu o yɛi nnɛ̀ kuyonku. 
\v 9 Kɛ̀ dɛ̀ nɑɑti Kuyie nyɛ̀mmɛ̀ɛ ceetɛ, kɛ̀ kùu bónkùnnɛ ku miɛkɛ kɛ̀ ti bɑ́ɑ́ kú.
\p
\v 10 Kɛ̀ Kuyie nyɑ̀ bɛnìtìbɛ̀ yóumɛ̀ bɛ yɛi nkɛ́yóu kù tɛ̃́nkɛ í mbɛ̀ potɛ́ kù do yɛ̃ nkù yóó bɛ̀ potɛ́mɛ̀.
\c 4
\s1 Sonɑɑsi sɛimmɛ̀ Kuyie nkù cĩ̀ɛ̃́mmɛ̀ Ninifu kɔbɛ
\p
\v 1 Dɛ mɔ̀nnì kɛ̀ dɛ̀ɛ yonkɛ Sonɑɑsi, kòo miɛkɛɛ pɛikɛ mɛdiɛ̀. 
\v 2 Kòo nɑ́kɛ́ Kuyie nkɛ dɔ̀: N Yiɛ̀ nKuyie n do ti nyɛ̃́ m bo dìì mɔ̀nnì nh ɛì, dɛɛ̀ do te kɛ̀ m pɑ̃̀nkɛɛ cokɛ́ kɛ́nkɔri Tɑsisi. N do yɛ̃́mu kɛ dò nhɑ sɑ̀ɑ̀ ndɛu ɑ í ɔɔtí ɑ bo yóumɛ̀ ɑ bo potɛ́mɛ̀ bɛnìtìbɛ̀. 
\v 3 N Yiɛ̀ nKuyie nyóu kɛ̀ n kú, m bo kúmɛ̀ tɔ̃ũnɛ̀ m bo nfòùmɛ̀. 
\v 4 Kɛ̀ ti Yiɛ̀ nKuyie ndɔ̀: Dɛ̀ wenni ɑ miɛkɛ bo pɛikɛmɑ̀ɑ̀?
\p
\v 5 Dɛ̀ do sɔ̃́ nSonɑɑsi yɛ̀mu dihɛì kɛ kɔ̀tɛ diyiè yìɛ̀ní kɛ̀ɛ̀ bíɛ́kɛ̀ kɛ dɔ̀ɔ̀ difii kɛ díɛ́kɛ́, kɛ bo yɑ̀ tìì yóó tuɔkɛní dihɛì. 
\v 6 Kɛ̀ Kuyie nduɔ́ nkɛ̀ mutie mɑmùu yɛ̀nní kɛ́ndònnɛ̀ munɑsińyɑ̀ɑ̀, kóò dɛ̀ɛ́ nkòo yɛ̀mmɛ̀ɛ cɑ́tɛ́, kɛ̀ mu dɛ́ɛ̀ nnɑ́ríkùnnɛ o yɛ̀mmɛ̀. 
\v 7 Kukṹnwentóo kɛ̀ Kuyie nduɔ́ nkɛ̀ dibɛù mɑrìi mù cɑ̀ɑ́kɛ́, kɛ̀ mùu kpeí. 
\v 8 Diyiè yɛ̀nní dìì mɔ̀nnì, kɛ̀ Kuyie nduɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu yɛ̀nní kɛ tonnì mɛdiɛ̀ nkɛ́potɛ́ Sonɑɑsi yuu, kòo fiu kɛ́bekɛ mukṹṹ nkɛ dɔ̀: Kɛ̀ n ku dɛ̀ ntɔ̃ũnɛ̀ m bo nfòùmɛ̀. 
\v 9 Kɛ̀ Kuyie nnɑ́kɛ́ Sonɑɑsi kɛ dɔ̀: A í nɑɑti ɑ miɛkɛ bo pɛikɛmɛ̀ mutie muu ǹkpɛ́í.
\p Kòò dɔ̀: N nɑɑtimu, m miɛkɛ pɛikɛmu kɛ̀ n dɔ́ mukṹṹ.
\p
\v 10 Kɛ̀ Kuyie ndɔ̀: A kuɔ́ mmutie mmu mɛsémmɛ̀ ɑ í dɔ̀ɔ̀ mùù kpɛ́í ndɛ̀mɑrɛ̀ ɑ í te kɛ̀ mùù kòtɛ́, mùù yɛ̀nní kɛyènkɛ̀ kɛ kpeío. 
\v 11 Kɛ nɛ́ yɛ̃ m bɑ́ɑ́ kuɔ́ mmɛsémmɛ̀ Ninifu dihɛidiɛ̀ bɛnìtìbɛ̀ bo dɛ̀ tɛkɔùpíkɔ̀ùtɛ̀ nɛ̀ sikɔùpísìdɛ́ (120000) kɛ í yɛ̃́ bɛ ììkɛ̀ nɛ̀ bɛ fɔ̃nkó kɛ iwũɔ̃ múnkɛ dɛ bo pɛ́uɑ̀?