\id JOL di29.all Novembre 1998 BJ Parakou B{enin
\ide UTF-8
\h Sowɛɛri
\toc1 Sowɛɛri
\toc2 SOWƐƐRI
\mt1 Sowɛɛri
\imt1 Di mpɑ́tíri tɔ tìì nɑ́ɑǹtì
\ip Sowɛɛri kó dipɑ́tíri nɑ́ɑ́ nKuyie nkó diyiè kpɛ́í nkɛ kɛ bɛnkú dì dòmmɛ̀. Kɛ nɑ́ɑ́ nKuyie mpuotìmɛ̀ Isidɑyɛɛribɛ bɛ borimɛ bɛ̀ mɔ̀kɛmɛ̀ kpɛ́í kɛ̀ dɛ̀ ntukúnɛ̀ bɛmbɛ nɛ̀ Kuyie mbɛ kó mɛtɑummɛ̀ bíɛ́kɛ̀. Kòo nɑ́kɛ́nɛ̀ múnkɛ Kuyie mpuotìmɛ̀ yɛbotɛ̀, bɛ̀ dɔ̀ɔ̀ri dɛ̀ Isidɑyɛɛribɛ dɛ kpɛ́í. Kòo bɛ̀ nɑ̀kɛ́ kɛ dɔ̀: Mɛyɛi mmɛɛ̀ bɛ̀ tùɔ̀kùní Kuyie nniinnímɛ̀ mmɛ kɛ̀ ku kó diyiè nɛ́ tũ̀nni, dɛ kó mɛyɛi mmɛɛ̀ tu fɛcofɛ nɛ̀ kutɑyiɛtí. O nɑ́ɑǹtì kũ̀nnì dò mpɑ́íí nwe diì tu: Kuyie nkɔbɛ tɑ tidɑwɑntì miɛkɛ nkɛ, kɛ dò nkɛ́wɛ̃tɛní Kuyie mborɛ̀ kɛ́ kù bɑ̀ńtɛ̀ kɛ̀ kùu bɛ̀ cĩ̀ɛ̃́ nkɛ́ bɛ̀ dɛɛtɛ́. Kuyie mmiɛkɛ bɛ̀ do kɛ̀ kù bɛ̀ potɛ́ tìì yɛ̃ĩti yóó deèmu, kɛ̀ bɛ̀ɛ wɛ̃tɛ kɛ́mɔɔtɛ bɛ kpɛrɛ, kɛ̀ Sowɛɛri dɔ̀ Kuyie nyóó kuɔmu yɛbotɛ̀ kɛ́mbonɛ̀ Isidɑyɛɛribɛ, Kuyie nkó mɛborimɛ bɛ cuokɛ̀, dɛɛ̀ dɔ̀ɔ̀ Pɑ̃̀ntikótì yiè Muyɑɑ́ nsɑ̀ɑ̀mù cùtɛ́ní dìì yiè bɛnìtìbɛ̀ ĩ́nkɛ̀ 3:1-2, Yesu tɔ̃rɛ̀. 2:16-21.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie mbɛ̀ potɛ́ tìì yɛ̃ĩti kó kumɑ̀nku 1:1-2:27
\io1 2. Kuyie nnɑ̀kɛ́mɛ̀ Muyɑɑ́nsɑ̀ɑ̀mù kpɛti 3:1-2
\io1 3. Kuyie nkó diyiè yóó tuɔkɛmɛ̀ kɛ̀ kùu dɛɛtɛ́ ku kɔbɛ 3:3-4:21
\c 1
\p
\v 1 Di m̀pɑ́tíri ti nɑ́ɑ́ nti Yiɛ̀ nKuyie mbɛ́innɛ̀ tìnti Petuyɛɛdi birɛ Sowɛɛri.
\s1 Mɛyɛi mmɛ̀ɛ̀ doti Isidɑyɛɛribɛ
\q1
\v 2 Díndi bɛkótíbɛ̀ kéntɛ́nɛ̀!
\q1 Díndi Sudɑɑ tenkɛ̀ kɔbɛ keènɛ̀!
\q1 Di yɑ̀ diɛ m̀botí diyiè mɑrì,
\q1 bɑ́ nɛ̀ di yɛmbɛ̀ do bomɑ̀ɑ̀?
\q1
\v 3 Nɑ́kɛ́nɛ̀ ti di bí, kɛ̀ ì múnkɛɛ tì nɑ́kɛ́ i kó ibí,
\q1 kɛ̀ ìi tì cɛ̃́ĩ nyi kó ibí,
\q1
\v 4 kɛ tú, yɛbiɛ̀ cɑ̀ɑ́kɛ́ kɛ sùɔ́ ndɛ̀ fɛcofɛ dɛ ncɑ̀ɑ́kɛ́,
\q1 fɛcofɛ cɑ̀ɑ́kɛ́ kɛ sùɔ́ ndɛ̀ sibɛi dɛ ncɑ̀ɑ́kɛ́,
\q1 sibɛi cɑ̀ɑ́kɛ́ kɛ sùɔ́ ndɛ̀ yɛcɑ́dúɔ̀ ndɛ ndèè.
\q1
\v 5 Díndi tinɑɑ̀yɑ̃̀kɛ́muɔ́ntì entɛnɛ̀ kɛ́kɔmmú!
\q1 Díndi tinɑɑ̀yɑ̃̀ɑ̃̀tì tiitɛ́nɛ̀ yɛdɑbùò, di pɑ̀ɑ̀mu mɛnɑɑ̀.
\q1
\v 6 Fɛcofɛ fɛɛ̀ ti do bɛhɑ̃ɑ̃pɔ̀nkperíbɛ̀ tɛ̃mɛ̀ kɛ sũ mɛdiɛ̀,
\q1 kɛ̀ fɛ nìì ndònnɛ̀ dicìrícìrìdɑɑ̀ kpɛyɛ dòmmɛ̀,
\q1 kɛ̀ fɛ̀ ninkpetɛ dònnɛ̀ dicìrícìrìniiri kpɛyɛ.
\q1
\v 7 Fɛɛ̀ yùo nfínyĩ̀ kó tifɑ̃ɑ̃̀tì,
\q1 kɛ kùɔ fìkíè tie pɑ́íí,
\q1 kɛ òrí dɛ wɛ́ɛ́tì kɛ̀ ibɑkɛ pɛikoo kɛ cómmú.
\q1
\v 8 Díndi n nìtìbɛ̀ kɔmmúnɛ̀
\q1 osɑpɑ̀ɑ̀ ndɑcɛ̃nnì ò yóó yenkɛ dì ɔ̃ɔ̃ kú kòo nkuɔ̀ mmɛ̀ɛ̀ botí,
\q1 kɛ dɑ́ɑ́tí kufɔ̀ɔ̀tɔ̃̀nkù, kɛ bo bɛnkɛ o yɛǹcɑɑ̀rìmɛ̀.
\q1
\v 9 Ti Yiɛ̀ nKuyie ncĩ́ɛ̃̀tɛ̀ pɑ̀ɑ̀mu mɛnɑɑ̀ nnɛ̀ tidiitì dɛ kó yɛpɑ̃rɛ̀,
\q1 dɛɛ̀ te kɛ̀ ikuɔ́ nìùbɛ̀ bɛ̀ɛ̀ tu ti Yiɛ̀ nKuyie ntɔ̃mbɛ̀ kɛ̀ bɛ̀ kuɔ̀.
\q1
\v 10 Dɛ̀mɑrɛ̀ tɛ̃́nkɛ í kpɑɑ́ dɛpɑɑ mmiɛkɛ,
\q1 kɛ̀ kɛtenkɛ̀ kuɔ̀,
\q1 tidiitì í kpɑɑ́ kɛ̀ mɛnɑɑ̀ ndèè,
\q1 mɛkɔpɑ̀mmɛ̀ tɛ̃́nkɛ í bo.
\q1
\v 11 Dɛ̀ dimu bɛtenkútíbɛ̀,
\q1 bɛ̀ɛ̀ fiiku fínyĩ̀ kó dɛtie
\q1 kɛ̀ bɛ̀ kuɔ̀ ntidiitì kpɛ́í,
\q1 tidiitì bɛ̀ nɑ ndɛ̀itɛ tì í pɛitɛ́.
\q1
\v 12 Fínyĩ̀ kó dɛtie nyootɛ́mu,
\q1 kɛ̀ fìkíè tie mmɔ̀tɛ́,
\q1 kɛ̀ dɛtie ntɛrɛ̀ bɛ̀ tu dɛ̀ kèdènɑ̀díè,
\q1 nɛ̀ dɛpuonnɛ nɛ̀ dɛ̀ɛ̀ pɛí yɛtebɛ bɛ̀ tu yɛ̀ pɔ́mmù kɛ̀ dɛ̀ kpeí,
\q1 bɛnìtìbɛ̀ tɛ̃́nkɛ í mɔkɛ diwɛ̀ì.
\s1 Kuyie mpɑ̃ɑ̃nɑ́ɑǹtì nɑ́ɑǹtò yɛ̃ mmɛ̀ bɛ̀ɛ boú dinùù kɛ́kuɔ́nnɛ̀ Kuyie
\q1
\v 13 Díndi ikuɔ́ nìùbɛ̀, dɑ́ɑ́tínɛ̀ tifɔ̀ɔ̀tɔ̃̀ntì
\q1 kɛ́kɔmmú yɛdɑbùò,
\q1 ndíndi ti Yiɛ̀ nKuyie ntɔ̃mbɛ̀ bɛ̀ɛ̀ pĩ nyikuɔ́ tɔ̃mmú,
\q1 tɑnnɛ̀ mɛyɛǹcɑɑ̀rìmɛ̀ miɛkɛ.
\q1 Wentɛ́nɛ̀ inuɔ nkɛ yɛ̃́ bɛ̀ tɛ̃́nkɛ í tɔunímɛ̀ tidiitì
\q1 nɛ̀ mɛnɑɑ̀ ndɛ kó yɛpɑ̃rɛ̀ ti Yiɛ̀ nKuyie ncĩ́ɛ̃̀tɛ̀ miɛkɛ.
\q1
\v 14 Ikúnɛ̀ mɛnùboúmmɛ̀, dɔúnnɛ̀ mɛtíímmɛ̀ kó diyiè,
\q1 tíínnɛ̀ bɛhɛikɛ̀nkótíbɛ̀ nɛ̀ dihɛì yɛmbɛ̀ bɛmɔu
\q1 ti Yiɛ̀ nKuyie ncĩ́ɛ̃̀tɛ̀ kɛ́ kù kuɔ́nnɛ̀.
\s1 Diyiè yɛiri
\q1
\v 15 Diyiè yɛiri diì tùɔ̀kɛní,
\q1 ti Yiɛ̀ nKuyie mbeéntì kó diyiè ndi,
\q1 Kuyie Mpɑkɛdɑɑ kó tiyɛ̃ĩti yiè ndi.
\q1
\v 16 Ti tɛ̃́nkɛ í kpɑɑ́ yɑu tidiitì nɛ̀ ti nuɔ.
\q1 Diwɛ̀ì tɛ̃́nkɛ í kpɑɑ́ bo Kuyie ncĩ́ɛ̃̀tɛ̀ miɛkɛ.
\q1
\v 17 Tidibotì kpeímu ipɛ̃ mmiɛkɛ,
\q1 bɑ́ tidiitì í kpɑɑ́ bɛ̀ tì sɔ̀rì dɛ̀,
\q1 kɛ̀ yɛbuɔ puɔ̀ ntidiitì í kpɑɑ́ mɛ̀ɛ̀ kpɛ́í nyɛ miɛkɛ.
\q1
\v 18 Keènɛ̀ iwũɔ̃ kuɔ̀mmɛ̀ kɛ̀ tinɑ̀ɑ̀tì ɑ̃́ɑ̃ntɛ
\q1 bɑ́ tì í piɛti timútì
\q1 kɛ̀ tipìètì mɔ̀ńtɛ́ mudiì kɛ kɔ̃.
\s1 Kuyie mpɑ̃ɑ̃nɑ́ɑǹtì nɑ́ɑǹtò kù kuɔ́nnɛ̀mɛ̀
\q1
\v 19 Ti Yiɛ̀ nKuyie, n kuɔ̀nnɛ̀ fɔ̃́ nwe,
\q1 muhɑ̃ɑ̃́ mmuù cɔ̀útɛ́ timútì dinɑɑcɛ̃nhòò
\q1 kɛ tɑunnɛ̀ titieti.
\q1
\v 20 Tikpɑsĩ̀ntì bùɔ́ fɔ̃́ nwe,
\q1 ikó nyiì kũ̀ṹ kɛ̀ muhɑ̃ɑ̃́ ncɔ̀útɛ́ timútì dinɑɑcɛ̃nni.
\c 2
\s1 Bɛ̀ nɑ̀kɛ́mɛ̀ Kuyie mbeéntì kó diyiè kpɛ́í
\q1
\v 1 Kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò bɛ́i nkɛ dɔ̀:
\q1 Eénɛ̀ ditɑ̃tɛheù, pĩɛ̃kɛ́nɛ̀, ti Yiɛ̀ nKuyie ntɑ̃sɑ̀ɑ̀rì Siyɔ̃ɔ̃ ĩ́nkɛ̀.
\q1 Dihɛì kɔbɛ di kɔ̃̀ntì dò nkɛ́kpeutɛmu,
\q1 kɛ yɛ̃́ ti Yiɛ̀ nKuyie mbeéntì yiè duunnímɛ̀,
\q1 dì tùɔ̀kɛnímu kɛ dèè.
\q1
\v 2 Dɛ yiè dɛ̀ yóó biitɛmu kɛ́sɔutɛ,
\q1 Dɛ yiè yɛwɛtɛ̀ bo dɑ́tínnɛ́ nɛ̀ kupɑ̃̀kù,
\q1 kubotí kperíkù kuù kèríní kɛ sũ mɛsɑ̀ɑ̀ nkɛ kpeńnì,
\q1 kɛ bo dɑ́tínnɛ́ kɛ̀ dɛ̀ɛ sɔutoo,
\q1 dɛ yiè dɛ̀ bo ndò ndiúrìkɛ̀pɑ̀nnì ɔ̃ɔ̃ ketɛ́mɛ̀ yɛtɑ̃rɛ̀ ĩ́nkɛ̀.
\q1 Dɛ kó diyiè botí mu nyí buotɛ́
\q1 dì mɛ nyí kpɑɑ́ kɛ bo buotɛ́ nɛ̀ ti bo mbomɛ̀, bìtì!
\q1
\v 3 Bɛ̀ kèríní mmuhɑ̃ɑ̃́ nkɔ̃mɛ mmɛ kɛ cɔ́untoo,
\q1 kɛ cɔ́u nfɛhɑ̃ɑ̃dɛɛ̀nfɛ̀ tɛ̃mɛ̀,
\q1 kɛtenkɛ̀ do dò nkupúú sɑ̀ɑ̀kù Edɛnni nwe bɛ̀ kèríní dìì mɔ̀nnì
\q1 kɛ̀ bɛ̀ yóó pɛ̃ɛ̃tɛ́ kɛ̀ kɛ̀ɛ nɑɑ́ ntɛdɔntɛ̀,
\q1 bɛ̀ í yóó súɔ́ ndɛ̀mɑrɛ̀.
\q1
\v 4 Bɛ̀ kèríní kɛ dònnɛ̀ sisɛ̃ĩ́ nsi,
\q1 kɛ̀ bɛ tɑ̀rɛ̀ dònnɛ̀ sikpɑ̀rìnɑɑsɛ̃ĩ́ kpɛyɛ,
\q1
\v 5 Bɛ̀ cokùmu kɛ cɑ̃́nnì yɛtɑ̃rɛ̀,
\q1 kɛ̀ bɛ nɔɔ̀roo dònnɛ̀ sikpɑ̀rìnɑɑsɛ̃ĩ́ kɔku,
\q1 kɛ uuti kɛ dònnɛ̀ muhɑ̃ɑ̃́ nhɔ̃ ncɔ́úmmɛ̀ dikpɑ́ɑ̀,
\q1 kɛ dònnɛ̀ bɛhɑ̃ɑ̃pɔ̀mbɛ̀ ɔ̃ɔ̃ bɑ́ɑ́tímɛ̀ kɛ́nkɔri dikpɑ̀nnì.
\q1
\v 6 Kɛ̀ bɛnìtìbɛ̀ɛ keè bɛ kpɛ́í kɛ̀ kufɔ̃wɑɑ́ mbɛ̀ ɑutɛ́
\q1 kɛ̀ bɛ ììkɛ̀ɛ ceetɛ.
\q1
\v 7 Bɛ̀ kèrí nɛ̀ dikɔ̃m̀bùɔ̀ ndi, kɛ séí iduotí bɛhɑ̃ɑ̃pɔ̀mbɛ̀ kɔ̃mɛ,
\q1 bɑ́ wè kòò tũ̀ nho cɛ,
\q1 bɑ́ òmɔù í dɑurí.
\q1
\v 8 Bɑ́ wè kòò tũ̀ nho cɛ bɑ́ òmɔù í kɔɔ́nnɛ̀ otɔù.
\q1 Bɑ́ kɛ̀ bɛ̀ tɑ̃ũ ipie, mbɛ̀ nhuróo bɛ̀ bɑ́ɑ́ yɑtɛnɛ̀ bɛtɔbɛ̀.
\q1
\v 9 Bɛ̀ ɔ̃ɔ̃ munnɛ́mu kɛ́do dihɛì,
\q1 kɛ séí iduotí kɛ dekù sicɛ̃́ĩ,
\q1 kɛ tɑɑ̀ sibòo bɛyóóbɛ̀ kɔ̃mɛ,
\q1
\v 10 Kɛtenkɛ̀ bɛ nyɑ̀ kɛ ɑu, kɛ̀ tiwɛtì sɑ̃̀nti,
\q1 diyiè nɛ̀ otɑ̃̀nkù kɛ̀ dɛ̀ sɔ̀ùtɛ,
\q1 bɑ́ siwɑ̃̀ɑ̃ tɛ̃́nkɛ í pɛ́ì.
\q1
\v 11 Kɛ̀ ti Yiɛ̀ nKuyie nni bɛ ììkɛ̀ kɛ pɛ́ú mɛtɑmmɛ̀,
\q1 ku ɑ̃ɑ̃pɔ̀mbɛ̀ í sénní,
\q1 wèè bɛ̀ ni o wɛ̃rímú í sénní,
\q1 ti Yiɛ̀ nKuyie mbeéntì kó diyiè diɛrì ndi
\q1 diyonkuri mɛdiɛ̀, we mbo nɑ kɛ́yentɛ́ dɛ yiè?
\s1 Kuyie nnɑ̀kɛ́mɛ̀ ti dòmmɛ̀ kɛ́ceètɛ
\q1
\v 12 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Mí ndi Yiɛ̀ nKuyie mmíì tu:
\q1 Wɛ̃tɛnɛ̀ní m borɛ̀ nɛ̀ di yɛ̀mmɛ̀ mɛmɔu,
\q1 boúnɛ̀ yɛnɔ̀ kɛ́kɔmmú yɛdɑbùò kɛ́ n sɑutɛnɛ̀.
\q1
\v 13 Ceetɛnɛ̀ di yɛ̀mmɛ̀ mmɛ kɛ́mbúútí di bo kɛ̃rímɛ̀ di yɑ̀ɑ̀tì,
\q1 wɛ̃tɛnɛ̀ní mí ndi Yiɛ̀ nKuyie m borɛ̀.
\q1 N sɑ̀ɑ̀ ndɛumu kɛ̀ m mɔ̀kɛ mɛsémmɛ̀,
\q1 kɛ̀ m miɛkɛ boo kɛ̀ n dɔ̀ɔ̀ri m bɛ́i ntì,
\q1 kɛ̀ n dɔ́ kɛ́dɔɔ̀ onìtì mɛyɛi n wɛ̃tɛ kɛ́yóu.
\q1
\v 14 Kɛ̀ dɛ̀ nɑɑti n ceetɛ n yɛ̀mmɛ̀
\q1 kɛ́ di dɔɔ̀ mɛsɑ̀ɑ̀ nkɛ̀ di diitìi piɛ́,
\q1 kɛ̀ di nɑ kɛ́wɛ̃tɛ kɛ́ m pɑ̃mmú tidiitì nɛ̀ mɛnɑɑ̀.
\s1 Bɛ̀ nɑ̀kɛ́mɛ̀ bɛ̀ dòmmɛ̀ kɛ́boú dinùù kɛ́bɑ́ntɛ̀ Kuyie
\q1
\v 15 Eénɛ̀ ditɑ̃tɛheù Siyɔ̃ɔ̃ tɑ̃rì,
\q1 ikúnɛ̀ mɛnùboúmmɛ̀ kó dikɑ̃̀tìrì,
\q1 dɔúnnɛ̀ mɛtíímmɛ̀ kó diyiè,
\q1
\v 16 Tíínnɛ̀ bɛnìtìbɛ̀, dɔúnnɛ̀ Kuyie mbɑ́ɑmmu kó diyiè,
\q1 tíínnɛ̀ bɛkótíbɛ̀ nɛ̀ bɛbɛ́mbɛ̀ nɛ̀ ibíbɛ́nní.
\q1 Wèè puokɛ bɑ̀mbɑ̀ nkòo yɛ̀nní,
\q1 kòo sɑpòmpɔ̀ɔ̀ yɛ̀nní o toutɛ.
\q1
\v 17 Díndi ikuɔ́ nìùbɛ̀ bɛ̀ɛ̀ pĩ nyikuɔ́ tɔ̃mmú,
\q1 cómmúnɛ̀ kukpɑ̃́nkpɑ̃́nkù nɛ̀ diwũɔ̃tɔ̀nnì dɛ cuokɛ̀,
\q1 kɛ́kuɔ́nnɛ̀ ti Yiɛ̀ nKuyie, nkɛ́ kù bɑ́ntɛ̀ kɛ dɔ̀:
\q1 Ti Yiɛ̀ nKuyie nhɑ́ ti cĩ́ɛ̃́ ntínti ɑ nìtìbɛ̀,
\q1 bɑ́ɑ́ yóu kɛ̀ tí tɑ ifɛi miɛkɛ yɛbotɛ̀ ììkɛ̀.
\q1 Yɛ̀ yɑ̀ɑ̀ bo ti dɑɑ́ kɛ dɔ̀:
\q1 Yé di Yiɛ̀ nKuyie ndi tũ nkù borɛ̀?
\s1 Kuyie ncɔutɛ́mɛ̀ bɛ bɑ́ɑmmìi
\q1
\v 18 Mɛm̀mɛ kɛ̀ ti Yiɛ̀ nKuyie mbɛnkɛ kù dɔ́mɛ̀ ku kɔbɛ tenkɛ̀ mɛdiɛ̀,
\q1 kɛ̀ mɛsémmɛ̀ kù mbɛ̀ bonɛ̀.
\q1
\v 19 Kɛ̀ kùu bɛ̀ nɑ̀kɛ́ kɛ dɔ̀:
\q1 N yóó di duɔ́nkomu tidiitì nɛ̀ mɛnɑɑ̀,
\q1 nɛ̀ mɛkɔpɑ̀mmɛ̀ kɛ̀ di mmɔkɛ kɛ̀ dɛ̀ di sɑnnɛ̀,
\q1 bɑ́ yɛbotɛ̀ tɛ̃́nkɛ bɑ́ ndi dɑú.
\q1
\v 20 Di dootitɔbɛ̀ kubɑkù yoú kɔbɛ,
\q1 n yóó bɛ̀ fũ̀ũ̀mmu, n yóó bɛ̀ bɛ̀timu,
\q1 kɛ́ bɛ̀ tɑnnɛ́ dikpɑ́ɑ̀ tɛdɔntɛ̀.
\q1 Bɛ̀ɛ̀ bɛ̀ ni m borɛ̀ bɛ̀too dɑ̀mɛ́ɛ̀rì diyiè yìɛ̀ní kɛ̀ɛ̀ bíɛ́kɛ̀ kou bíɛ́kɛ̀,
\q1 kɛ́bɛtoo bɛ̀ɛ̀ bɛ̀ tũ̀ ndɑ̀mɛ́ɛ̀rì diyiè tɑɑ̀ kɛ̀ kou bíɛ́kɛ̀,
\q1 kɛ̀ bɛ̀ɛ kú kɛ́pɑ̃ɑ̃kɛ kɛ̀ kunɔ́úu dɑ́tínnɛ́.
\q1 N yóó pĩ́ mmùù tɔ̃mmú dɛumu.
\q1
\v 21 Fɔ̃́ nkɛtenkɛ̀, ɑ bɑ́ nyĩɛ̃̀kù,
\q1 ɑ yɛ̀mmɛ̀ nnɑɑti kɑ̀ɑ nyɑ̃nku nɛ̀ diwɛ̀ì,
\q1 ti Yiɛ̀ nKuyie mpĩ mmùù tɔ̃mmú dɛumu.
\q1
\v 22 Díndi tiwɑnwɑntì di bɑ́ nyĩɛ̃̀kù!
\q1 Mɛmúpɑ̀mmɛ̀ bitírímu dinɑɑcɛ̃nhòò,
\q1 kɛ̀ dɛtie mpɛí,
\q1 fìkíè nɛ̀ fínyĩ̀ kpɛrɛ kɛ̀ dɛ̀ yùnnɛ yɛbɛ.
\q1
\v 23 Díndi Siyɔ̃ɔ̃ ɛì kɔbɛ dɛ̀ ndi nɑɑti kɛ̀ di nyɑ̃nku nɛ̀ diwɛ̀ì,
\q1 di Yiɛ̀ nKuyie nkó kucɛ miɛkɛ,
\q1 kuù di duɔ̀nní fɛtɑɑfɛ̀ fɛ mɔ̀nnì,
\q1 kɛ bo di dɛɛtɛ́,
\q1 kuù duɔ̀nní fɛtɑketifɛ̀ fɛ mɔ̀nnì
\q1 nɛ̀ diyɔ̃ɔ̃̀ kɔfɛ nɛ̀ fɛtɑdentifɛ̀,
\q1 dɛ̀ do dòmmɛ̀ nɛ̀ dimɔ̀nnì.
\q1
\v 24 Tidiitì píɛmmu iyiɛ́,
\q1 kɛ̀ mɛnɑɑ̀ nnɛ̀ mɛkɔpɑ̀mmɛ̀ kɛ̀ dɛ̀ píɛ nyɛconkuyɛ.
\q1
\v 25 Kuyie ntu kù yóó di yietímu,
\q1 kù do tɔ̃nní yɛbiɛ̀ nɛ̀ fɛcofɛ nɛ̀ sibɛi
\q1 nɛ̀ yɛcɑ́dúɔ̀ nkɛ̀ dɛ̀ɛ cɑ́ɑ́kɛ́ dɛ̀.
\q1
\v 26 Di yóó dimu kɛ́dɛ, nkɛ nkù sɑ̃ntí,
\q1 kunku kùù dɔ̀ɔ̀ tidiɛtì di kpɛ́í,
\q1 kù tu ku nìtìbɛ̀ tɛ̃́nkɛ bɑ́ɑ́ di ifɛi, bìtì!
\q1
\v 27 Di bo bɑntɛ́ kɛ dò nkù bo di cuokɛ̀,
\q1 díndi ku nìtìbɛ̀, kɛ̀ di kù tũ̀,
\q1 nkɛ̀ otɔù mɔù í bo kɛ kù mɑ̀nnɛ̀.
\q1 Kù tu ku nìtìbɛ̀ tɛ̃́nkɛ bɑ́ɑ́ di ifɛi bìtì nɛ̀ bɛ̀ bo mbomɛ̀.
\s1 Kuyie nnɑ̀kɛ́mɛ̀ kù yóó duɔnnímɛ̀ ku Yɑɑ́
\q1
\v 28 Kɛ̀ Kuyie mbɛ́i nkɛ dɔ̀:
\q1 Dɛ bo yíɛ́ mí di Yiɛ̀ nKuyie nkɛ̀ n cṹũnko n Yɑɑ́ mbɛnìtìbɛ̀ bɛmɔu ĩ́nkɛ̀
\q1 di kó bɛdɑpɑ̀mbɛ̀ nɛ̀ di kó bɛsɑpɑ̀mbɛ̀
\q1 bɛ̀ bo nɑɑ́ m pɑ̃ɑ̃nɑ́ɑǹtì nɑ́ɑm̀bɛ̀,
\q1 kɛ̀ bɛkótíbɛ̀ nyɑu n kó tidɔuǹtì,
\q1 kɛ̀ bɛbɛ́mbɛ̀ nyɑu n kó mɛbɛǹkùmɛ̀.
\q1
\v 29 Dɛ kó yɛwe miɛkɛ n yóó cṹũnkomu n Yɑɑ́ n tɔ̃mbɛ̀,
\q1 bɛnitidɑɑbɛ̀ nɛ̀ bɛnitipòbɛ̀ bɛ ĩ́nkɛ̀,
\q1 kɛ̀ bɛ̀ɛ nɑɑ́ m pɑ̃ɑ̃nɑ́ɑǹtì nɑ́ɑm̀bɛ̀.
\q1
\v 30 Dɛ yiè m bo ɑ̃nnɛ́ mɛbɛnkùmɛ̀ cɑ̀mmɛ̀ mɛ̀ɛ̀ tu,
\q1 kɛĩ́nkɛ̀ nɛ̀ kɛtenkɛ̀ dɛ̀ bo nɑɑ́mmɛ̀ mɛyĩ̀ĩ̀ nnɛ̀ muhɑ̃ɑ̃́,
\q1 kɛ̀ kuyukúu dɑ́tínnɛ́ diwɛtirì kɔ̃mɛ.
\q1
\v 31 Diyiè bo sɔutɛ, kòo tɑ̃̀nkùu wũɔ̃tɛ́ kɛ́ndò mmɛyĩ̀ĩ̀,
\q1 kɛ̀ ti Yiɛ̀ nKuyie nkó diyiè diɛrì nɛ́ nɑ kɛ́tuɔkɛní,
\q1 dìì dɛu kɛ duò tikɔ̃m̀bùɔ̀tì.
\q1
\v 32 Dɛ mɔ̀nnì wèè bo kuɔ́nnɛ̀ ti Yiɛ̀ nKuyie nhò bo cootɛ́.
\q1 Kɛ yɛ̃́ mɛdɛɛtímɛ̀ yó mbomɛ̀ Siyɔ̃ɔ̃ tɑ̃rì ĩ́nkɛ̀ nɛ̀ Sedisɑdɛmmu,
\q1 ti Yiɛ̀ nKuyie nkuù do tì bɛ́i.
\q1 Kù bo yú bɛ̀, bɛɛ̀ yó ntú bɛ̀ɛ̀ yentɛ́.
\c 3
\s1 Kuyie nyóó bekɛ́nɛ̀mɛ̀ yɛbotɛ̀
\q1
\v 1 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Mí ndi Yiɛ̀ nKuyie m bo wɛ̃tɛ kɛ́íi ndìì mɔ̀nnì n nìtìbɛ̀
\q1 Sudɑɑ kɔbɛ nɛ̀ Sedisɑdɛmmu kɔbɛ.
\q1
\v 2 M bo tíí nyɛbotɛ̀ kubiriku bɛ̀ tu kù Sosɑfɑti (dɛ̀ɛ̀ tu Kuyie mbekù),
\q1 n yóó dɛ̀ nyɛ bekɛ́nɛ̀ n nìtìbɛ̀ Isidɑyɛɛribɛ n tɑ̃ɑ̃tɛ́ bɛ̀ kɛ bɛ̀ te kpɛ́í,
\q1 kɛ yɛ̃́ yɛ̀ bɛ̀ cíɛmmɛ̀ kɛ̀ bɛ̀ tɑ ibotí tɛì miɛkɛ
\q1 kɛ yɛ̀ totí n tenkɛ̀.
\q1
\v 3 Bɛ̀ tɑ̃ɑ̃́ tɛ́tɛ́ nwe kɛ totí n nìtìbɛ̀
\q1 kɛ fiiti bɛ nitidɑbí kɛ yietì bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀,
\q1 kɛ fiiti bɛnitipobí kɛ donnɛ̀ mɛnɑɑ̀.
\q1
\v 4 Díndi Tiiri nɛ̀ Sitɔ̃ɔ̃ ɛì kɔbɛ nɛ̀ díndi Fidisitɛ̃ɛ̃bɛ,
\q1 di n dɔ́nɛ̀ ɔ̃̀nti? Di dɔ́ kɛ́pɛitɛmɑɑ̀?
\q1 Kɛ̀ di dɔ́ kɛ́pɛitɛmu di n nɑ́kɛ́!
\q1 Bɑ̀mbɑ̀ m bo duɔ́ nkɛ̀ dɛ kó mɛyɛi ndo di yɔ ĩ́nkɛ̀.
\q1
\v 5 Díndi bɛ̀ɛ̀ tɔ m mɑ́tìpɛ́ítì nɛ̀ n sɔɔ
\q1 kɛ tɔ n nɛntì sɑ̀ɑ̀tì kɛ kònnɛ̀
\q1 kɛ tɑnnɛ̀ di bɔkɛ̀ kó yɛtuo.
\q1
\v 6 Díndi bɛ̀ɛ̀ tùótɛ́ Sudɑɑ kó initidɑbí,
\q1 nɛ̀ Sedisɑdɛmmu kpɛyi kɛ fìtɛ́nɛ̀ Kɛrɛkibɛ
\q1 kɛ bɛ̀ dɛ́tìnnɛ bɛ ɛì.
\q1
\v 7 Mí ndi Yiɛ̀ nKuyie n yóó wɛ̃tɛ kɛ́ bɛ̀ yùnímu bɛ̀ do borɛ̀,
\q1 kɛ̀ di bɛ̀ fìtɛ́, kɛ di yietí di yɛi.
\q1
\v 8 M bo fitɛ́nɛ̀ di nitidɑbí nɛ̀ di nitipobí Sudɑɑ kɔbɛ,
\q1 kɛ̀ bɛ̀ɛ sɔɔtɛ́ kɛ́ ì fìtɛ́nɛ̀ Sɑbɑɑ ɛì kɔbɛ
\q1 bɛ ɛì dɛ́tirì.
\q1 Mí ndi Yiɛ̀ nKuyie mmíì bɛ́i.
\s1 Mudoò sɔmmu nɛ̀ tibeéntì sɔnti
\q1
\v 9 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Pĩɛ̃kɛ́nɛ̀ kɛ tú n yɛ̃ nyɛbotɛ̀ɛ bɑ́ɑ́tí mudoò,
\q1 duɔ́nnɛ̀ kɛ̀ di ɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ɛ bɑ́ɑ́tí kɛ́kétɛ́.
\q1
\v 10 Túótɛ́nɛ̀ di nɑɑkɑ̃ kɛ́mɑ́ yɛkpɑ̀rìse,
\q1 kɛ́túótɛ́ tinunseuti kɛ́mɑ́ yɛkpɑ̃ɑ̃̀.
\q1 Bɑ́ kufɔ̃wɑɑ́ nyiɛ̀ kòò dɔ̀ omɑ́ɑ̀ dikɔ̃m̀bùɔ̀ yiɛ̀.
\q1
\v 11 Díndi yɛbotɛ̀ tíínnɛ̀nní mɛcɑ̃ɑ̃ ndɛ kó kubiriku miɛkɛ,
\q1 mí ndi Yiɛ̀ nKuyie nkɛ̀ n cṹũnkoo nh ɑ̃ɑ̃pɔ̀mbɛ̀.
\q1
\v 12 Yɛbotɛ̀, pĩ́nnɛ̀ kucɛ kɛ́kɔtɛní kubiriku
\q1 bɛ̀ tu kù Sosɑfɑti,
\q1 n yóó dɛ nkɑri kɛ́bekɛ́nɛ̀ yɛbotɛ̀ yɛmɔu.
\q1
\v 13 Tidiitì bimu, túótɛ́nɛ̀ yɛse kɛ́ tì kɔ̃ṹ.
\q1 Fínyĩ̀ tie mbimu nɑunɛ̀ yɛbɛ diyɛtituò
\q1 kɛ́níú kɛ́píɛ nsicee kɛ̀ dɛ̀ ncou
\q1 yɛ yɛi mmɛɛ̀ sũ̀ṹ.
\q1
\v 14 Mí ndi Yiɛ̀ nKuyie mmíì tu,
\q1 bɛnìtìbɛ̀ɛ tíí nyɛtĩ̀rɛ̀ yɛtĩ̀rɛ̀ m beéntì kó kubiriku miɛkɛ,
\q1 kɛ yɛ̃́ m miɛkɛ kó diyiè duunnímɛ̀mu,
\q1 n yóó bekɛ́nɛ̀ dì bɛnìtìbɛ̀ m beéntì biriku miɛkɛ.
\q1
\v 15 Diyiè nɛ̀ otɑ̃̀nkù dɛ̀ tɛ̃́nkɛ í yó mpɛ́ì,
\q1 siwɑ̃̀ɑ̃ mɛ ntɛ̃́nkɛ í yó mmí.
\q1
\v 16 Mí ndi Yiɛ̀ nKuyie mmíì pɛ̀ú mɛtɑmmɛ̀ Siyɔ̃ɔ̃ tɑ̃rì ĩ́nkɛ̀,
\q1 n tɑmmɛ̀ yìɛ̀mu Sedisɑdɛmmu,
\q1 tiwɛtì nɛ̀ kɛtenkɛ̀ kɛ̀ dɛ̀ sɑ̃̀nti,
\q1 kɛ̀ n kɑ̃nkɛ́ n nìtìbɛ̀.
\q1 Isidɑyɛɛribɛ kó disɔ̀rì tu mí nwe.
\q1
\v 17 Díndi Isidɑyɛɛribɛ di bo bɑntɛ́
\q1 mí ndi Yiɛ̀ nKuyie, mmíì tumɛ̀ Kuyie,
\q1 kɛ bo Siyɔ̃ɔ̃ n tɑ̃sɑ̀ɑ̀rì ĩ́nkɛ̀.
\q1 Dɛ mɔ̀nnì Sedisɑdɛmmu bo nɑɑ́ ndikɑ̀rì sɑ̀ɑ̀rì,
\q1 bɑ́ bɛpɔ̀ɔ̀bɛ̀ tɛ̃́nkɛ bɑ́ ndɛ̀ pɛ̃nkù.
\s1 Isidɑyɛɛribɛ yóó wɛ̃tɛ kɛ́yɑ̀ mɛ̀ɛ̀ sɑ̀ɑ̀
\q1
\v 18 Kɛ̀ Kuyie mbɛ́i nkɛ dɔ̀:
\q1 Dɛ yiè bo tuɔkɛ dìì yiè,
\q1 mɛnɑɑ̀ mbo mpũɔ̃̀ nyɛtɑ̃rɛ̀ ĩ́nkɛ̀
\q1 kɛ̀ mɛnɑɑmiɛ̀ mpũɔ̃̀ nsitɑ̃ɑ̃́ ĩ́nkɛ̀
\q1 kɛ̀ Sudɑɑ tenkɛ̀ kó yɛkondɑkɛ yɛmɔuu ɑ̃nnɛ́ mɛniɛ nkɛ́mpũɔ̃̀
\q1 kɛ̀ dinɛ́bòrì nyiɛ̀ní ti Yiɛ̀ nKuyie ncĩ́ɛ̃̀tɛ̀ miɛkɛ kɛ yɔ́ɔ̀rì Sitimmu biriku.
\q1
\v 19 Dɛ mɔ̀nnì Esibiti bo dɔúnko,
\q1 kɛ̀ Edɔmmuu nɑɑ́ ntidobontì,
\q1 kɛ yɛ̃́ bɛ̀ pĩ̀ḿmɛ̀ Sudɑɑ kɔbɛ dɛtetìrɛ̀.
\q1
\v 20 Dɛ mɔ̀nnì kɛ̀ bɛnìtìbɛ̀ mbo Sudɑɑ tenkɛ̀
\q1 kɛ́nhɑ̃ Sedisɑdɛmmu bɛ borimɛ mɛmɔu.
\q1
\v 21 Mí ndi Yiɛ̀ nKuyie n yóó pɛitɛmu bɛ pɛ̀ì,
\q1 n yí yó nwúónko bɛ dootitɔbɛ̀,
\q1 mí ndi Yiɛ̀ nKuyie m bomu Siyɔ̃ɔ̃ tɑ̃rì ĩ́nkɛ̀.