\id JDG di07.all Novembre 1998 BJ Parakou B{enin
\ide UTF-8
\h BɛbaatÍbɛ̀
\toc1 Bɛbɑɑtíbɛ̀
\toc2 BƐBAATÍBƐ̀
\mt1 Bɛbɑɑtíbɛ̀
\imt1 Di mpɑ́tíri tɔ tìì nɑ́ɑǹtì
\ip Dɛ kó dipɑ́tíri ti nɑ́ɑ́ mbɛbɑɑtíbɛ̀ tɛpíítɛ̀ nɛ̀ bɛ̀dɛ́bɛ̀ nɛ̀ onitipòkù omɑ́ɑ̀ Kuyie ndo tɑ̃nkíí bɛ̀ kɛ̀ bɛ̀ bo ndɛɛrí Isidɑyɛɛribɛ nɛ̀ bɛ dootitɔbɛ̀. Bɛmɔu mɛmmɛ bɛ kóò mɔù í nnɑ kɛ́ bɛ̀ niitɛ́ Sosuwee do bɛ̀ nimɛ̀. Dɛ kó bɛbɑɑtíbɛ̀ kó mɛfíè mmiɛkɛ kɛ̀ Isidɑyɛɛribɛ nyetírí Kuyie nkpɛti kɛ tũ̀ũ̀ Kɑnnɑhɑ̃ɑ̃ tenkɛ̀ kɔbɛ kó yɛbɔkɛ̀, kɛ̀ Kuyie nníí bɛ̀ potɛ́, kɛ̀ bɛ̀ɛ ceetɛ kɛ́wɛ̃tɛní Kuyie mborɛ̀, kɛ̀ kùu bɛ̀ cĩ̀ɛ̃́ nkɛ́wɛ̃tɛ kɛ́ bɛ̀ còńnɛ́ bɛ fɔ̃̀tìrì.
\ip Dɛ kó dipɑ́tíri nɑ́ɑǹtì nɑ̀ɑ́ nkɛ kónnì mɛ̀ɛ̀ botí, bɑ́ wèè bɑɑtíwè nɛ̀ o kó mɛborimɛ do dòmmɛ̀.
\is1 Dipɑ́tíri nɑ́ɑǹtì duɔ́ kɛ dòmmɛ̀
\io1 1. Isidɑyɛɛribɛ tɑmɛ̀ Kɑnnɑhɑ̃ɑ̃ kɛ́ntɔ kɛ́tuɔkɛnɛ̀ Sosuwee kó mukṹṹ 1:1-2:10
\io1 2. Kuyie ndo ɑ̃nnɛ́mɛ̀ bɛbɑɑtíbɛ̀ kɛ̀ bɛ̀ɛ dɛɛtɛ́ Isidɑyɛɛribɛ 2:11-16:31
\io1 3. Dikɔnkɔɔ̀nnì dìì do tɑnní Isidɑyɛɛribɛ cuokɛ̀ 17-21
\c 1
\s1 Isidɑyɛɛribɛ kɑ̀rimɛ̀ Kuyie ndo yɛ̃ nkù yóó bɛ̀ duɔ́ ndìì ɛì
\p
\v 1 Sosuwee ku dìì mɔ̀nnì kɛ̀ Isidɑyɛɛribɛɛ bekɛ ti Yiɛ̀ nKuyie nkɛ bo yɑ̀ bɛ miɛkɛ bɛ̀ɛ̀ yóó ketɛ́ kɛ́kɔtɛ kɛ́dokɛ́nɛ̀ Kɑnnɑhɑ̃ɑ̃ kɔbɛ. 
\v 2 Kɛ̀ ti Yiɛ̀ nKuyie mbɛ̀ tɛ̃̀ńnɛ́ kɛ dɔ̀: Sudɑɑ botí kɔbɛ bɛɛ̀ dò nkɛ́ketɛ́ kɛ́kɔtɛ. M bɛ̀ duɔ́mmu dihɛì.
\p
\v 3 Kɛ̀ Sudɑɑ botí kɔbɛɛ nɑ́kɛ́ Simmɛɔ̃ɔ̃ Sudɑɑ kóo kótì yɑɑ̀bí kɛ dɔ̀: Kɔtɛnní kɛ̀ tí wɛ̃nnɛ́ kɛ́dokɛ́nɛ̀ Kɑnnɑhɑ̃ɑ̃ kɔbɛ, kɛ́fietɛ dihɛì bɛ̀ ti duɔ́ ndì. Kɛ̀ ti deè ti múnkɛɛ di nɛinɛ̀ kɛ̀ tí fietɛ di kpɛri.
\p Kɛ̀ Simmɛɔ̃ɔ̃ botí kɔbɛɛ ítɛ́ kɛ́wɛ̃nnɛ́nɛ̀ Sudɑɑ botí kɔbɛ. 
\v 4 Kɛ̀ bɛ̀ɛ kɔtɛ kɛ́ bɛ̀ do, kɛ̀ ti Yiɛ̀ nKuyie mbɛ̀ teennɛ̀ kɛ̀ bɛ̀ɛ nɑ Kɑnnɑhɑ̃ɑ̃ kɔbɛ nɛ̀ Pedisiibɛ, kɛ́kuɔ bɛnìtìbɛ̀ tɛkɔupíítɛ̀ (1000) Besɛki borɛ̀, 
\v 5 kɛ̀ bɛ̀ɛ yɑ̀ dɛ kó dihɛì kóo kpɑ̀ɑ̀tì Adoni-Besɛki kóò dokɛ́nɛ̀ kɛ́nɑ Kɑnnɑhɑ̃ɑ̃ kɔbɛ nɛ̀ Pedisiibɛ. 
\v 6 Kòo cokɛ́ kɛ̀ bɛ̀ɛ ò bɛ̀ti, kóò nìntɛ kɛ́pĩ́ nkɛ́kékɛ́ o nɔ́mbídɑkɛ̀ o nɔu kpɛyɛ nɛ̀ o nɑɑ̀cɛ̀i kpɛyɛ. 
\v 7 Kɛ̀ Adoni-Besɛkii bɛ́i nkɛ dɔ̀: Bɛkpɑ̀ɑ̀tìbɛ̀ sipísìyiekɛ̀ ti do kèkɛ́ bɛ̀ɛ̀ kó yɛnɔ́mbídɑkɛ̀ bɛ nɔu kpɛyɛ nɛ̀ bɛ nɑɑ̀cɛ̀i kpɛyɛ, kɛ̀ bɛ̀ níí nkou icɑbìri n yo nkɛ̀ ìì duò. Kuyie ndɛ nni nyietí yíe.
\p Kɛ̀ bɛ̀ɛ ò kònnɛ̀ Sedisɑdɛmmu, ò dɛ nku.
\p
\v 8 Kɛ̀ Sudɑɑ botí kɔbɛɛ do Sedisɑdɛmmu mudoò kɛ́cɔ bɛnìtìbɛ̀ yɛse kɛ́kuɔ, kɛ́cɔ́u ndihɛì. 
\v 9 Dɛ kó difɔ̃nkúò kɛ́kɔtɛ kɛ́do Kɑnnɑhɑ̃ɑ̃ kɔbɛ bɛ̀ɛ̀ bo Nɛkɛfu nɛ̀ bɛ̀ɛ̀ bo yɛtɑ̃rɛ̀ ĩ́nkɛ̀ nɛ̀ bɛ̀ɛ̀ bo kubiriku kó yɛhɛkɛ̀. 
\v 10 Bɛ̀ bɛ ndèè kɛ́do Ebunɔɔ kɔbɛ bɛ̀ do yu dìì ɛì nɛ̀ dimɔ̀nnì kɛ tú Kidiyɑ-Adibɑ, kɛ́kuɔ Sesɑii nɛ̀ Aimɑnni nɛ̀ Tɑdimɑii bɛ nɑɑ̀mùntì kɔbɛ. 
\v 11 Kɛ̀ bɛ̀ɛ deè bɛmbɛ, kɛ́sɔɔ́ nkɛ́do Debii kɔbɛ, bɛ̀ do yu dɛ̀ nɛ̀ dimɔ̀nnì kɛ tú Kidiyɑ-Sefɛɛ. 
\v 12 Kɛ̀ Kɑdɛbuu bɛ́i nkɛ dɔ̀: Kɛ̀ wèè dokɛ́nɛ̀ Kidiyɑ-Sefɛɛ kɔbɛ kɛ bɛ̀ nɑ kɛ fìètɛ bɛ ɛì m bo ò duɔ́ n kóo sɑpɑ̀ɑ̀ nhAkisɑɑ, kòo puokɛ. 
\v 13 Kɛ̀ Kɑdɛbu nɑntɛ̀ Kenɑsi birɛ Otinniyɛɛdi bɛ̀ dokɛ́nɛ̀ kɛ́ bɛ̀ nɑ, kɛ́fietɛ dihɛì, kɛ̀ Kɑdɛbuu ò duɔ́ nho kóo sɑpɑ̀ɑ̀ nkòo puokɛ. 
\v 14 Dɛ kóo nitìpòkù tùɔ̀koo dìì mɔ̀nnì Otinniyɛɛdi borɛ̀, kóò nɑ̀kɛ́ kɛ dɔ̀ wèe mɔɔ o cicɛ Kɑdɛbu kupɑku. Kɛ̀ bɛ̀ɛ tuɔkɛ Kɑdɛbu borɛ̀ kòo cútɛ́ní o sɑ̃mmɑrímú kɛ́nínkóo o ììkɛ̀ kòo ò bekɛ kɛ dɔ̀: A dɔ́ bɑ? 
\v 15 Kòò dɔ̀: N kuɔ́ mmɛsémmɛ̀ kɛ́ m pɑ̃ kɛtenkɛ̀ mɛniɛ mbo kɛ̀, kɛ yɛ̃́ mɛniɛ nyí bomɛ̀ Nɛkɛfu kó kɛtenkɛ̀ ɑ n duɔ́ nkɛ̀.
\p Kɛ̀ Kɑdɛbuu ò duɔ́ nkɛtenkɛ̀ kɛ̀ɛ̀ mɔ̀kɛ inɛ́cɛ idɑɑtíyì nɛ̀ icũmpuyi.
\p
\v 16 Dɛ mɔ̀nnì kɛ̀ Mɔyiisi cɔ̀kù kó iyɑɑ̀bí Keniibɛɛ ítɛ́ní Sedikoo ɛì, bɛ̀ tu dì dɛpuonnɛ ɛì, kɛ nɛínɛ̀ Sudɑɑ botí kɔbɛ kɛ̀ bɛ̀ɛ kɔtɛ Sudɑɑ tenkɛ̀, kubiriku kɔbɛ Adɑdi bɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀, kɛ́nwɛ̃ńnɛ̀ Amɑdesiibɛ kɛ bo.
\p
\v 17 Sudɑɑ nɛ̀ o kɔbɛ kɛ̀ bɛ̀ɛ ítɛ́ kɛ́wɛ̃nnɛ́nɛ̀ o kóo kótì Simmɛɔ̃ɔ̃, nɛ̀ o kɔbɛ kɛ̀ bɛ̀ɛ kpɑnnɛ̀ Kɑnnɑhɑ̃ɑ̃ kɔbɛ bɛ̀ɛ̀ bo Sefɑɑ, kɛ́ bɛ̀ nɑ kɛ́kuɔ, kɛ́pɔntɛ bɛ ɛì kɛ́dɛ́ítɛ́, kɛ́ dì yu kɛ dɔ̀ Didobonnì. 
\v 18 Dɛ kó difɔ̃nkúò kɛ̀ Sudɑɑ nɑɑ̀mùnkù kɔbɛɛ yíɛ́ kɛ́fietɛ Kɑsɑɑ ɛì, Asikɑnɔɔ kpɛri nɛ̀ Ekunɔɔ kpɛri, nɛ̀ yɛ tenkɛ̀. 
\v 19 Kɛ̀ ti Yiɛ̀ nKuyie nní mbɛ̀ bonɛ̀ kɛ̀ bɛ̀ɛ bɛ̀ nɑ, kɛ́fietɛ yɛtɑ̃rɛ̀ ĩ́nkɛ̀ kó yɛhɛkɛ̀, bɛ̀ mɛ nyí nnɑ kɛ́fietɛ kubiriku kpɛyɛ, bɛmbɛ do mɔkɛ sinɑɑsɛ̃ĩ́ timɑ́tì kpɛsi nsi. 
\v 20 Bɛ̀ do tũ̀nnɛ ti Yiɛ̀ nKuyie ndo nɑ̀kɛ́ tì nti Mɔyiisi, kɛ́duɔ́ nKɑdɛbu Ebunɔɔ tempɛ̃ nkòo bɛti Anɑkiibɛ kó iwuɔ nyìtɑ̃ɑ̃ti ìì do dɛ̀ bo, kɛ́kɑri. 
\v 21 Bɛnsɑmɛɛ kɔbɛ í nnɑ kɛ́bɛti Sebusiibɛ bɛ̀ɛ̀ do bo Sedisɑdɛmmu kɛ̀ bɛ̀ wɛ̃ nkɛ bo nɛ̀ yíenní.
\p
\v 22 Kɛ̀ Sosɛfu bí Efɑdɑimmu nɛ̀ Mɑnɑnsee yɑɑ̀bí nkɔri kɛ bo do Betɛɛdi, kɛ̀ ti Yiɛ̀ nKuyie nní mbɛ̀ bonɛ̀. 
\v 23 Kɛ̀ bɛ̀ɛ tɔ̃ mbɛnìtìbɛ̀ kɛ̀ bɛ̀ bo pɑɑtɛ́ dihɛì. Dɛ mɔ̀nnì bɛ̀ do di yu kɛ tú Duusi nwe. 
\v 24 Kɛ̀ bɛ̀ɛ tuɔkoo kɛ́nsɔ̃́ nhonìtì mɔù yɛ̀nní kɛ̀ bɛ̀ɛ ò nɑ̀kɛ́ kɛ dɔ̀: Tí bɛnkɛ ti bo yĩ́mɛ̀ kɛ́tɑ dihɛì, kɛ̀ tí dɑ yóu.
\p
\v 25 Kɛ̀ dɛ kóo nìtìi bɛ̀ bɛnkɛ. Mɛm̀mɛ Efɑdɑimmu nɛ̀ Mɑnɑnsee bɛ yɑɑ̀bí kùɔmɛ̀ dɛ kó dihɛì kɔbɛ, kɛ́yóu dɛ kóo nìtì nɛ̀ o kɔbɛ. 
\v 26 Kòo kɔtɛ Etiibɛ tenkɛ̀ kɛ́mɑɑ́ dihɛì, kɛ́ di yu kɛ dɔ̀ Duusi, kɛ̀ dì kpɑɑ́ tɔ dɛ kó diyètìrì nɛ̀ yíenní.
\p
\v 27 Mɑnɑnsee kɔbɛ í nnɑ kɛ́bɛti Bɛti-Seɑnni kɔbɛ, nɛ̀ Tɑnɑki kɔbɛ, nɛ̀ Dɔɔ kɔbɛ, nɛ̀ Ibedeɑmmu kɔbɛ, nɛ̀ Mɛkidoo kɔbɛ, nɛ̀ dɛ kó yɛhɛkɛ̀. Kɛ̀ Kɑnnɑhɑ̃ɑ̃ kɔbɛ nkpɑɑ́ bo dɛ kó kutempɛ̃ mmiɛkɛ. 
\v 28 Bɑ́ nɛ̀ Isidɑyɛɛribɛ kpenkɛ dìì mɔ̀nnì bɛ̀ í nnɑ kɛ́ bɛ̀ bɛ̀ti, kɛ nɛ́ bɛ̀ pĩ̀ńnɛ́ muhɛikɛ̀ntɔ̃mmú.
\p
\v 29 Efɑdɑimmu botí kɔbɛ í nnɑ kɛ́bɛti Kɑnnɑhɑ̃ɑ̃ kɔbɛ bɛ̀ɛ̀ do bo Kesɛɛ. Kɛ̀ bɛ̀ nwɛ̃ nkɛ bo.
\p
\v 30 Sɑbunɔɔ kɔbɛ í nnɑ kɛ́bɛti Kɑnnɑhɑ̃ɑ̃ kɔbɛ, bɛ̀ɛ̀ do bo Ketinɔɔ nɛ̀ Nɑɑɔdi kɛ̀ bɛ̀ nwɛ̃ nkɛ bo, kɛ̀ bɛ̀ɛ bɛ̀ pĩ̀ńnɛ́ muhɛikɛ̀ntɔ̃mmú.
\p
\v 31 Asɛɛ botí kɔbɛ í nnɑ kɛ́bɛti Akoo nɛ̀ Sidonni, nɛ̀ Adɑbu, nɛ̀ Akisibu nɛ̀ Edibɑ nɛ̀ Afɛki, nɛ̀ Deɔbu dɛ kɔbɛ. 
\v 32 Mɛm̀mɛ kɛ̀ Asɛɛ kɔbɛɛ wɛ̃nnɛ́nɛ̀ Kɑnnɑhɑ̃ɑ̃ kɔbɛ bɛ̀ɛ̀ do dɛ̀ bo kɛ̀ bɛ̀ nwɛ̃nko. Bɛ̀ í nɑ mɛ̀ɛ̀ kpɛ́í nkɛ bɛ̀ bɛ̀ti.
\p
\v 33 Nɛfutɑdii kɔbɛ í nnɑ kɛ́bɛti Kɑnnɑhɑ̃ɑ̃ kɔbɛ bɛ̀ɛ̀ do bo Bɛti-Semɛsi nɛ̀ Bɛti-Anɑti kɛ̀ bɛ̀ nwɛ̃ nkɛ bo kɛ̀ bɛ̀ɛ bɛ̀ pĩ̀ńnɛ́ muhɛikɛ̀ntɔ̃mmú.
\p
\v 34 Kɛ̀ Amɔriibɛɛ bɛti Dɑnni botí kɔbɛ, kɛ́ bɛ̀ dèe nyɛtɑ̃rɛ̀ kó itempɛ̃, mbɛ̀ í nyie nkɛ̀ bɛ̀ bo cútɛ́ní kubiriku. 
\v 35 Mɛm̀mɛ kɛ̀ Amɔriibɛ nkpɑɑ́ bo Adi-Edɛsi nɛ̀ Ayɑnɔɔ nɛ̀ Sɑdibimmu. Kɛ̀ dɛ̀ mboní kɛ̀ Efɑdɑimmu nɛ̀ Mɑnɑnsee kɔbɛɛ bɛ tiekɛ kɛ́ bɛ̀ pĩ̀ńnɛ́ muhɛikɛ̀ntɔ̃mmú. 
\v 36 Amɔriibɛ tenkɛ̀ mɑ̀nkɛ do tùótɛ́ Akɑdɑbimmu kɛ́ntɔ kɛ́yɛ̀nnɛ̀ Sedɑ kɛ́pɛ̃ɛ̃tɛ́ kɛ́ndeètì ditennì bɛ̀ tu dì inɑɑ́ nkó ditennì.
\c 2
\s1 Kuyie nkpɑnnɛ̀mɛ̀ ku nìtìbɛ̀
\p
\v 1 Kɛ̀ ti Yiɛ̀ nKuyie ntɔ̃nnìi ítɛ́ní Kidikɑɑdi kɛ́tuɔkɛní Bokimmu kɛ́nɑ́kɛ́ Isidɑyɛɛribɛ kɛ dɔ̀: Kuyie ntu, kuù di dènnɛní Esibiti, kɛ di tɔní kɛ tɑnnɛ̀ dihɛì kù do bɛ́i nkɛ́pɑrìkɛ̀ kɛ dɔ̀ kù yóó duɔ́ ndì di yɛmbɛ̀, kɛ́bɛ́i nkɛ dɔ̀ kù í yóó tɔ̃tɛ mɛtɑummɛ̀ mɛ̀ɛ̀ bo díndi nɛ̀ ku di cuokɛ̀. 
\v 2 Di mɛ mmúnkɛ í dò nkɛ́mɔɔtɛnɛ̀ dɛ kó dihɛì kɔbɛ mɛtɑummɛ̀, dí puɔ mbɛ bɔɔwũɔ̃tɔ̀rɛ̀. Di mɛ nyí nyie nku kpɛti! Dɛ̀ dòmmɛ kɛ̀ di mɛ ndɔ̀ɔ̀? 
\v 3 Kù nɛ́ di nɑ́ɑ́mmu di mmɔ̀nnì kɛ tú, kù tɛ̃́nkɛ í yóó bɛti Kɑnnɑhɑ̃ɑ̃ kɔbɛ, bɛ̀ yóó nɑɑ́ ndidíìntɑ̃́rì ndi di kpɛ́í nkɛ̀ bɛ bɔkɛ̀ nɑɑ́ ntimɑ́tì dindííntì kɛ di bɔ, kɛ̀ di fíé bɛ bɔkɛ̀.
\p
\v 4 Ti Yiɛ̀ nKuyie ntɔ̃nnì bɛ̀ nɑ̀kɛ́ dìì mɔ̀nnì dɛ kó tinɑ́ɑǹtì kɛ́deè, kɛ̀ bɛ̀ɛ tiitɛ́ yɛdɑbùò mbɛmɔu kɛ́nkuɔ̀. 
\v 5 Kɛ̀ bɛ̀ɛ yú dɛborɛ̀ kɛ dɔ̀ Bokimmu (dɛ̀ɛ̀ tu didɑbònkɔnnì), kɛ́ dɛ̀ fìé ti Yiɛ̀ nKuyie nyiwũɔ̃.
\s1 Sosuwee kumɛ̀
\p
\v 6 Kɛ̀ Sosuwee cɑu mbɛnìtìbɛ̀ kɛ̀ bɛ̀ɛ cíɛ́tɛ́ kɛ́kũṹ mbɑ́ wè kɛtenkɛ̀ bɛ̀ ò duɔ́ nkɛ̀ kɛ́ nkɛ̀ te. 
\v 7 Sosuwee kpɑɑ́ fòù dìì mɔ̀nnì kɛ̀ bɛ̀ ntũ nti Yiɛ̀ nKuyie. Kòo kú kɛ̀ bɛ̀ nkpɑɑ́ kɛ kù tũ̀ mbɛkótíbɛ̀ kpɑɑ́ fòù dìì mɔ̀nnì, bɛ̀ɛ̀ do yɑ̀ tidiɛtì ti Yiɛ̀ nKuyie ndɔ̀ɔ̀ tì Isidɑyɛɛribɛ cuokɛ̀. 
\v 8 Kɛ̀ ti Yiɛ̀ nKuyie nkóo tɔ̃ntì Sosuwee Nunni birɛ nyóó kú kɛ mɔkɛ yɛbie ntɛkɔ̀ùtɛ̀ nɛ̀ tɛpíítɛ̀ (110), 
\v 9 kɛ́kú kɛ̀ bɛ̀ɛ ò kũnnɛ́ Timunɑti-Edɛsi, bɛ̀ do totí kóò duɔ́ nkɛ̀ɛ̀ tenkɛ̀ Efɑdɑimmu tempɛ̃ nyɛtɑ̃rɛ̀ ĩ́nkɛ̀, Kɑɑsi tɑ̃rì kubɑkù cɑ̃̀nku bíɛ́kɛ̀. 
\v 10 Kɛ̀ bɛkótíbɛ̀ bɛmbɛ kó kutɔ̃nkùu kú, kɛ̀ kutɔ̃nkù pɑ̀nkùu yɛ̀nní, bɛ̀ tɛ̃́nkɛ í nyɛ̃́ ti Yiɛ̀ nKuyie kɛ́yɛ̃̀ ntidiɛtì kù do dɔ̀ɔ̀ tì Isidɑyɛɛribɛ cuokɛ̀.
\s1 Isidɑyɛɛribɛ do yetɛmɛ̀ Kuyie
\p
\v 11 Dɛ mɔ̀nnì kɛ̀ Isidɑyɛɛribɛɛ dɔɔ̀ ti Yiɛ̀ nKuyie nyí dɔ́ dɛ̀, kɛ́ketɛ́ kɛ́nfeu yɛbɔkɛ̀ bɛ̀ tu yɛ̀ Bɑɑdibɛ, 
\v 12 kɛ́yetɛ ti Yiɛ̀ nKuyie mbɛ yɛmbɛ̀ do tũ nkù, kùù bɛ̀ dènnɛní Esibiti, kɛ́fíé yɛbɔkɛ̀, bɛnìtìbɛ̀ bɛ̀ bo kɛ̀ɛ̀ tenkɛ̀ kɔbɛ do feu yɛ̀, kɛ́nninku yɛ ììkɛ̀ kɛ íinko ti Yiɛ̀ nKuyie mmiɛkɛ. 
\v 13 Bɛ̀ do kù yóumu kɛ́nfeu Bɑɑdibɛ nɛ̀ Asitɑditeebɛ. 
\v 14 Kɛ̀ ti Yiɛ̀ nKuyie mmiɛkɛ bɛ̀ pɛikɛ kɛ̀ kùu dɛitɛ ku nɔ̀ùtɛ̀ bɛ ĩ́nkɛ̀, kɛ̀ bɛfèèbɛ̀ nkɔrìní kɛ fekù bɛ kpɛrɛ kɛ̀ bɛ dootitɔbɛ̀ɛ bɛ̀ nɑ. Bɑ́ bɛ̀ níí í nnɑ kɛ bɛ̀ bɑ̀ɑo. 
\v 15 Mudoò bɛ̀ kɔ̀rì mùù kó dimɑ̀ɑ̀, kɛ̀ ti Yiɛ̀ nKuyie ndɛitɛ ku nɔ̀ùtɛ̀ bɛ ĩ́nkɛ̀ kɛ́ndònnɛ̀ kù tì mbɛ̀ nɑ̀kɛ́mɛ̀ kɛ pɑ̀rìkɛ̀. Kɛ̀ bɛ̀ɛ tɑ mɛyɛǹcɑɑ̀rìmɛ̀ diɛmɛ̀ miɛkɛ. 
\v 16 Mɛm̀mɛ kɛ̀ ti Yiɛ̀ nKuyie mbɛ̀ duɔ́ mbɛbɑɑtíbɛ̀, kɛ̀ bɛ̀ɛ bɛ̀ dɛɛtɛ́nɛ̀ bɛ dootitɔbɛ̀, bɛ̀ɛ̀ fèkù bɛ kpɛrɛ. 
\v 17 Isidɑyɛɛribɛ mɛ nyí nyie mbɛbɑɑtíbɛ̀ kpɛti, kɛ́nsɔkɛ́ kɛ feu yɛbɔkɛ̀ kɛ ninku yɛ ììkɛ̀, kɛ́bútínnɛ́ dɛndɛ bɑ̀mbɑ̀ mbɛ yɛmbɛ̀ do tũ nkùù cɛ, bɛ̀ tɛ̃́nkɛ í nyie ti Yiɛ̀ nKuyie nkuɔ́ bɛ yɛmbɛ̀ do í yiemmɛ̀. 
\v 18 Kɛ̀ ti Yiɛ̀ nKuyie mbɛ̀ duɔ́nní dìì mɔ̀nnì obɑɑtíwè kù nhò bonɛ̀ o fòmmu mumɔu miɛkɛ, kɛ dɛɛrínɛ̀ Isidɑyɛɛribɛ bɛ dootitɔbɛ̀. Mɛsémmɛ̀ do ɔ̃ɔ̃ í nyóu mɛ̀ bo pĩ́mmɛ̀ ti Yiɛ̀ nKuyie mbɛ dootitɔbɛ̀ bɛ̀ fɛ̃́ũnko dìì mɔ̀nnì kɛ̀ bɛ̀ kuɔ̀. 
\v 19 Kɛ̀ dɛ kóo bɑɑtíwè ku dìì mɔ̀nnì bɛ̀ɛ wɛ̃tɛ kɛ́tɑ mɛyɛi mmudɔɔ̀rìmù, kɛ̀ dɛ̀ɛ pɛ̃ɛ̃tɛ́ bɛ yɛmbɛ̀ kpɛrɛ do dòmmɛ̀, kɛ́nfeu yɛbɔkɛ̀ kɛ ninku yɛ ììkɛ̀ kɛ yɛ̀ bɑ̀ɑ́. Bɛ̀ í nyóu bɛ̀ bo ndɔɔrimɛ̀ mɛyɛi mbɛ yɛmbɛ̀ do dɔɔri mɛ̀.
\s1 Kuyie ndo yɑ̀ɑ́kɛ́mɛ̀ Isidɑyɛɛribɛ
\p
\v 20 Dɛ mɔ̀nnì kɛ̀ ti Yiɛ̀ nKuyie mmiɛkɛ pɛikɛ Isidɑyɛɛribɛ, kɛ̀ kùu bɛ́i nkɛ dɔ̀: Kubotí kuu ǹkɔbɛ mɛ̀ ncɑ̀kɛmɛ̀ mɛtɑummɛ̀ n do yɛ̃ mbɛ yɛmbɛ̀ n yɛ̃́ mɛ̀ɛ̀ kpɛ́í, kɛ yetɛ n kpɛti. 
\v 21 Di mmɔ̀nnì n tɛ̃́nkɛ í yóó yóu kɛ̀ bɛ̀ɛ bɛti kubotí bɑ́ kùmɑ́ɑ̀ ibotí tɛì Sosuwee do kpɑɑ́ kɛ í bɛ̀ti ì kɛ́kú. 
\v 22 Nɛ̀ dɛ kó bɛnìtìbɛ̀ borimɛ bɛ cuokɛ̀ ti Yiɛ̀ nKuyie ndo dɔ́ kɛ́ bɛ̀ yɑ̀ɑ́kɛ́mu kɛ́yɑ̀ kɛ̀ bɛ̀ bo yetɛ ku kpɛti yoo bɛ̀ bo ti yie mbɛ yɛmbɛ̀ do tì yiemmɛ̀.
\p
\v 23 Dɛɛ̀ do te kɛ̀ ti Yiɛ̀ nKuyie nyóu kɛ̀ ibotí Sosuwee mu ndo í bɛ̀ti ì kɛ́kú kɛ̀ ì ḿbo bɛ cuokɛ̀. Kù í mbɛ̀ bɛ̀ti mɛcɑ̃ɑ̃.
\c 3
\p
\v 1 Ntɛ ti Yiɛ̀ nKuyie ndo yóu kɛ̀ ìì botí ḿbo Isidɑyɛɛribɛ cuokɛ̀, kɛ̀ kù bo bɛ̀ yɑ̀ɑ́kɛ́, bɛmbɛ kutɔ̃nkù pɑ̀nkù kɔbɛ bɛ̀ɛ̀ do í kɔkɛ́ mudoò bɛ̀ tɑ dìì mɔ̀nnì Kɑnnɑhɑ̃ɑ̃ kɛ́dokɛ́ mù. 
\v 2 Kù do dɔ́ kutɔ̃nkù pɑ̀nkù kɔbɛ bɛ̀ɛ̀ mu nyí kɔ̀tɛ dikpɑ̀nnì bɛ̀ɛ dì bɛbíímu. 
\v 3 Fidisitɛ̃ɛ̃bɛ kó yɛkpɑ̀ɑ̀tìyɔ yɛnùmmù kɔbɛ mbɛ kù do yóumɛ̀ bɛɛ̀ tu Kɑnnɑhɑ̃ɑ̃ kɔbɛ bɛmɔu nɛ̀ Sidoniibɛ nɛ̀ Efiibɛ bɛ̀ɛ̀ bo Dimɑɑ kó yɛtɑ̃rɛ̀ ĩ́nkɛ̀ kɛ́túótɛ́ Bɑɑdi-Ɛdimɔɔ tɑ̃rì kɛ́tuɔkɛnɛ̀ Deboo-Amɑti. 
\v 4 Kù do dɔ́ kɛ́ bɛ̀ yɑ̀ɑ́kɛ́mu, kɛ́yɑ̀ kɛ nsɑ̀ kɛ̀ bɛ̀ bo yie nkù do duɔ́ nkɛ̀ Mɔyiisii duɔ́ nyìì kuɔ́ bɛ yɛmbɛ̀. 
\v 5 Mɛm̀mɛ kɛ̀ Isidɑyɛɛribɛ mbonɛ̀ Kɑnnɑhɑ̃ɑ̃ kɔbɛ nɛ̀ Etiibɛ nɛ̀ Amɔriibɛ nɛ̀ Pedisiibɛ nɛ̀ Ifiibɛ nɛ̀ Sebusiibɛ. 
\v 6 Kɛ̀ Isidɑyɛɛribɛɛ túókɛ́ bɛ kó bɛsɑpɑ̀mbɛ̀ kɛ́puokɛ, kɛ́ bɛ̀ duɔ́ mbɛ kó bɛsɑpɑ̀mbɛ̀ kɛ̀ bɛ̀ɛ puokɛ, kɛ̀ bɛ̀ɛ fíé iwũɔ̃ bɛ bɔkɛ̀.
\ms1 KUYIE MBƐ̀ DUƆNNÍMƐ̀ BƐBAATÍBƐ̀
\s1 Otinniyɛɛdi
\p
\v 7 Kɛ̀ Isidɑyɛɛribɛɛ dɔɔ̀ ti Yiɛ̀ nKuyie nyí dɔ́ dɛ̀ kɛ́ kù yóu, kɛ́nfeu iwũɔ̃ yɛbɔkɛ̀ kɛ bɑ́ɑ́ nsibɔɔtenkɑɑnìi bɛ̀ tu sì Bɑɑdi nɛ̀ Asedɑɑ. 
\v 8 Kɛ̀ ti Yiɛ̀ nKuyie mmiɛkɛɛ bɛ̀ pɛikɛ kɛ̀ kùu bɛ̀ yóu, kɛ̀ Mɛsopotɑmii kóo kpɑ̀ɑ̀tì Kusɑ̃ɑ̃-Disɑtɑimmuu bɛ̀ nɑ kɛ́ mbɛ̀ bɑkɛ́ yɛbie nyɛ̀ni. 
\v 9 Kɛ̀ bɛ̀ɛ kuɔ́nnɛ̀ ti Yiɛ̀ nKuyie kɛ̀ kùu bɛ̀ duɔ́nní Kɑdɛbu nɑntɛ̀ Kenɑsi birɛ Otinniyɛɛdi kòò bo bɛ̀ dɛɛtɛ́. 
\v 10 Kɛ̀ Kuyie nYɑɑ́ nní nhò bonɛ̀, kòo mbɑkɛ́ Isidɑyɛɛribɛ, kɛ́kɔtɛ kɛ́dokɛ́nɛ̀ Kusɑ̃ɑ̃-Disɑtɑimmu, kɛ̀ ti Yiɛ̀ nKuyie nduɔ́ nkòo ò nɑ. 
\v 11 Kɛ̀ bɛ ɛì ḿbo mɛom̀pùmɛ̀ miɛkɛ kɛ dɔ̀ nyɛbie nsipísìnɑ̀ɑ̀. Kɛ̀ Kenɑsi birɛ Otinniyɛɛdii kú.
\s1 Eudi
\p
\v 12 Kɛ̀ Isidɑyɛɛribɛɛ wɛ̃tɛ kɛ́dɔɔ̀ ti Yiɛ̀ nKuyie nyí dɔ́ dɛ̀ kɛ̀ kùu duɔ́ nkɛ̀ Mɔɑbu kóo kpɑ̀ɑ̀tì Ekunɔɔ bo bɛ̀ dokɛ́nɛ̀. 
\v 13 Kòo wɛ̃nnɛ́nɛ̀ Amɔniibɛ kou nɛ̀ Amɑdesii kou kɛ̀ bɛ̀ɛ do Isidɑyɛɛribɛ mudoò kɛ́ bɛ̀ nɑ, kɛ́fietɛ Sedikoo. 
\v 14 Kòo mbɛ̀ bɑkɛ́ kɛ dɔ̀ yɛbie ntɛpíítɛ̀ nɛ̀ yɛ̀ni. 
\v 15 Dɛ kó difɔ̃nkúò kɛ̀ bɛ̀ɛ kuɔ́nnɛ̀ ti Yiɛ̀ nKuyie nkɛ̀ kùu bɛ̀ duɔ́nní Kedɑ birɛ Eudi kòò bo bɛ̀ dɛɛtɛ́. Bɛnsɑmɛɛ botí kou do nwe kòò tu dicɑ̃̀nkurì.
\p Kɛ̀ Isidɑyɛɛribɛɛ ò duɔ́ ndɑ̀mpóò díítí kòò bo kɔtɛ kɛ ì duɔ́ mMɔɑbu kóo kpɑ̀ɑ̀tì Ekunɔɔ. 
\v 16 Kɛ̀ Eudii duɔ́ nkɛ̀ bɛ̀ɛ ò mɑ́ disiè mɛnɑtimɛ̀ mɛ̀dɛ́mɛ̀ kpɛri, kɛ̀ di okùmɛ̀ mmɑ̀nnɛ̀ mɛ́tìrì kó dikéè, kòo dì yì o kpèntɛ́nkpenkù youku, kɛ dɑ́ɑ́tí o yɑ̀ɑ̀tì. 
\v 17 Mɛm̀mɛ ò kɔ̀tɛmɛ̀ kɛ́duɔ́ nyidíítí okpɑ̀ɑ̀tì Ekunɔɔ. Ekunɔɔ do tú oniticɛ̃́ɛ̃́wè nwe. 
\v 18 Wè ò duɔ́ ndìì mɔ̀nnì dɑ̀mpóò díítí kɛ́deè, kɛ́wɛ̃tɛ kɛ́cíe mbɛ̀ɛ̀ do tɔní dɛ kó idíítí. 
\v 19 Bɛ̀ tùɔ̀kɛ dìì mɔ̀nnì Kidikɑɑdi, sitenkɑɑnìi yɛtɑ̃́rɛ̀ kpɛsi borɛ̀, kòo bɛ̀ yóu dɛborɛ̀ kɛ́wɛ̃tɛní okpɑ̀ɑ̀tì borɛ̀ kóò nɑ̀kɛ́ kɛ dɔ̀: Okpɑ̀ɑ̀tì m mɔkɛ tìmɑtì nti tidɛ́ kpɛti kɛ bo dɑ nɑ́kɛ́.
\p Kòo kpɑ̀ɑ̀tì duɔ́ nkòo tɔ̃mbɛ̀ɛ yɛ̀ kɛ̀ bɛ̀ nkpɑɑ́ bɛdɛ́ 
\v 20 kɛ kɑri muyɑɑ́ nkó kudieku kùù do tú omɑ́ɑ̀ kɔku. Kɛ̀ Eudi bɛ́innɛ̀ okpɑ̀ɑ̀tì kɛ dɔ̀: N tɔní tìì nɑ́ɑǹtì ti Yiɛ̀ nKuyie nkuù tì nni nduɔnní ɑ kpɛ́í.
\p Kòo kpɑ̀ɑ̀tìi ítɛ́ní o kɑ̀rì. 
\v 21 Kɛ̀ Eudii pĩ́ ndisiè nɛ̀ tɛcɑ̃̀nkutɛ̀ kɛ́kpɑtɛ kɛ́kṹṹ o pɔuniɛ. 
\v 22 Kɛ̀ dìi tɑroo dimɔu nɛ̀ di bɔo kɛ̀ mɛkùɔ̀ ndì dɑ̀tínnɛ́, kɛ̀ Euu yóu kɛ̀ dì nkpɑɑ́ okpɑ̀ɑ̀tì pɔutì miɛkɛ. 
\v 23 Ò yĩ mɛmmɛ kɛ́deè kɛ́yɛ̀ difɔ̃nkúò kɛ́kpetínnɛ́ kɛ́pɑ́ɑ́ nkɛ́dɛitɛ tɛkpetíntɛ̀ kɛ́ítɛ́. 
\v 24 Kòo kpɑ̀ɑ̀tì tɔ̃mbɛ̀ɛ tuɔkɛní kɛ́yɑ̀ dibòrì kpetímɛ̀ kɛ pɑ́kɛ́, kɛ̀ bɛ yɛ̀mmɛ̀ ndo nhokpɑ̀ɑ̀tì bo nyɛ̃́nkúmu dɛ miɛkɛ. 
\v 25 Kɛ̀ bɛ̀ ncómmú kɛ́bɑɑ okpɑ̀ɑ̀tì bo kpetɛ́mɛ̀ bɑ́ ò í kpetírí, kɛ̀ dɛ̀ɛ bɛ̀ di, kɛ̀ bɛ̀ɛ túótɛ́ tɛkpetíntɛ̀ kɛ́kpetɛ́ kɛ́nsɔ̃́ nhò ku kɛ duɔ́ kɛ cɑ̃ɑ̃nko. 
\v 26 Bɛ̀ do cómmú dìì mɔ̀nnì kɛ bɑɑ okpɑ̀ɑ̀tì bo kpetɛ́mɛ̀, kɛ̀ Eudi cokùmu kɛ pɛ̃ɛ̃tɛ́ yɛtɑ̃́rɛ̀ kó sitenkɑɑnìi kɛ tɑ Seidɑɑ tempɛ̃. 
\v 27-28 Ò tùɔ̀koo dìì mɔ̀nnì dɛborɛ̀ kɛ́heé ditɑ̃tɛheù Efɑdɑimmu tempɛ̃ nyɛtɑ̃rɛ̀ ĩ́nkɛ̀ kɛ̀ Isidɑyɛɛribɛɛ tíí nkòo bɛ̀ nɑ̀kɛ́ kɛ dɔ̀: Ti Yiɛ̀ nKuyie ndi duɔ́mmu di dootitɔbɛ̀ Mɔɑbiibɛ, n tũnnɛnɛ̀!
\p Ò yĩ mɛmmɛ kɛ́niitɛ́ kɛ̀ bɛ̀ɛ ò tũ̀nnɛ kɛ̀ bɛ̀ɛ do Mɔɑbiibɛ kukó nSuditɛ̃ɛ̃ tɛpurɛ, kɛ́ bɛ̀ pĩ mbɛmɔu bɑ́ òmɔù í sèńtɛ́. 
\v 29 Dɛ yiè kɛ̀ bɛ̀ɛ kuɔ Mɔɑbiibɛ yɛdɑkperɛ̀ nɛ̀ yɛkɔ̃m̀bɔ̀ yɛmbɛ̀ tɛkɔupípíítɛ̀ (10000) bɛ kóò mɔù í kpɑɑ́ bɑ́ òmɑ́ɑ̀ wèè fòù. 
\v 30 Dɛ mɔ̀nnì kɛ̀ Mɔɑbiibɛɛ bɔ́útɛ́ Isidɑyɛɛribɛ kɛ̀ dihɛì ḿbo mɛom̀pùmɛ̀ miɛkɛ kɛ dɔ̀ nyɛbie nsipísìni.
\s1 Sɑ̃nkɑɑ
\p
\v 31 Dɛ kó difɔ̃nkúò kɛ̀ Anɑti birɛ Sɑ̃nkɑɑ cɔutɛ́ Eudi, kɛ́kuɔ Fidisitɛ̃ɛ̃bɛ sikɔusìkuɔ̀ (600) nɛ̀ tɛkɑ̃̀ũ̀tɛ̀ bɛ̀ ɔ̃ɔ̃ kṹṹ tɛ̀ inɑ̀ɑ̀kɛ ìì dùɔ̀ kɛ múnkɛ dɛɛtɛ́ Isidɑyɛɛribɛ.
\c 4
\s1 Deborɑɑ nɛ̀ Bɑɑrɑki bɛ kó tinɑ́ɑǹtì
\p
\v 1 Eudi ku dìì mɔ̀nnì kɛ̀ Isidɑyɛɛribɛ wɛ̃tɛ kɛ́dɔɔ̀ ti Yiɛ̀ nKuyie nyí dɔ́ dɛ̀. 
\v 2 Kɛ̀ kùu bɛ̀ duɔ́ nKɑnnɑhɑ̃ɑ̃ kóo kpɑ̀ɑ̀tì Yɑmɛɛ Asɔɔ ɛì kou. Wèè bɑkɛ́ Yɑbinni ɑ̃ɑ̃pɔ̀mbɛ̀ kòo yètìrì tu Sisedɑɑ kòò bo Adosɛti-Koimmu. 
\v 3 Okpɑ̀ɑ̀tì Yɑbinni do mɔkɛ sinɑɑsɛ̃ĩ́ timɑ́tì kpɛsi sikɔusìwɛi (900) ndi, kɛ́nfɛ̃́ũnko Isidɑyɛɛribɛ kɛ dɔ̀ yɛbie nsipísìdɛ́ kɛ̀ bɛ̀ɛ kuɔ́nnɛ̀ ti Yiɛ̀ nKuyie.
\p
\v 4 Dɛ mɔ̀nnì dɛ̀ do sɔ̃́ nDeborɑɑ Dɑpidɔti pokù wèè nɑ̀ɑ́ nKuyie mpɑ̃ɑ̃nɑ́ɑǹtì kɛ̀ weè bɑkɛ́ Isidɑyɛɛribɛ. 
\v 5 Ò do bo mupuommu mɑmù yuu ndi Dɑmɑɑ nɛ̀ Betɛɛdi dɛ sɑku, Efɑdɑimmu tɑ̃rì ĩ́nkɛ̀. Isidɑyɛɛribɛ do dɛ nkɔròo koò bekù bɛ kpɛti. Kɛ̀ dɛ̀ mboní kɛ̀ bɛ̀ɛ yú dɛ kó mupuommu kɛ dɔ̀ Deborɑɑ puommu. 
\v 6 Kɛ̀ Deborɑɑ yú diyiè mɑrì Kedɛsi ɛì kou Abinnɔɑmmu birɛ Bɑɑrɑki, Nɛfutɑdii botí kou, kóò nɑ̀kɛ́ kɛ dɔ̀: Ti yiɛ̀ nKuyie nyIsidɑyɛɛribɛ tũ nkù dɑ nɑ́ɑ́ kɛ́ tú ɑ pĩ́mmú bɛhɑ̃ɑ̃pɔ̀mbɛ̀ Nɛfutɑdii nɛ̀ Sɑbunɔɔ botí miɛkɛ kɛ̀ bɛ̀ ḿbo tɛkɔupíítɛ̀ (1000) kɑ̀ɑ bɛ̀ kɔ̀tɛnɛ̀ Tɑbɔɔ tɑ̃rì. 
\v 7 Kù tu kuù yóó duɔ́ nkɛ̀ Sisedɑɑ wèè bɑkɛ́ Yɑmɛɛ ɑ̃ɑ̃pɔ̀mbɛ̀ kòo ítɛ́ní nɛ̀ o nɑɑsɛ̃ĩ́ nɛ̀ o ɑ̃ɑ̃pɔ̀mbɛ̀ kɛ̀ bɛ̀ di do mudoò kɛ̀ kùu duɔ́ nkɛ̀ dí bɛ̀ nɑ.
\p
\v 8 Kɛ̀ Bɑɑrɑkii tɛ̃́nnɛ́ Deborɑɑ kɛ dɔ̀: Kɑ̀ɑ bo n nɛinɛ̀ ń kɔtɛ, kɑ̀ɑ mɛ mbɑ́ n nɛinɛ̀ n yí kɔri. 
\v 9 Kɛ̀ Deborɑɑ dɔ̀: M bo dɑ nɛinɛ̀, ɑ mɛ ntɛ̃́nkɛ í yóó pɛ́tɛ́ disɑ̃nni mɑrì dɛ kó mudoò miɛkɛ, kɛ yɛ̃́ nɛ̀ onitipòkù borɛ̀ ndɛ ti Yiɛ̀ nKuyie nyóó duɔ́mmɛ̀ kɛ̀ di nɑ Sisedɑɑ.
\p Mɛm̀mɛ kɛ̀ Deborɑɑ nɛinɛ̀ Bɑɑrɑki kɛ̀ bɛ̀ɛ kɔtɛ Kedɛsi. 
\v 10 Kòo tíí nNɛfutɑdii nɛ̀ Sɑbunɔɔ botí kɔbɛ kɛ̀ bɛnìtìbɛ̀ tɛkɔupítɛ̀ɛ (1000) ò nɛinɛ̀ kɛ̀ Deborɑɑ múnkɛɛ ò nɛinɛ̀. 
\v 11 Kɛ sɔ̃́ nhonìtì mɔù bo Kedɛsi borɛ̀ Keniibɛ botí kou kòo yètìrì tu Ebɛɛ. Ò do yɑ̀tɛnɛ̀mu Keniibɛ tɔbɛ̀ Obɑbu Mɔyiisi cɔ̀kù yɑɑ̀bí, kɛ́kɔtɛ kɛ́cónnɛ́ o touku kɛ́ntɔ́kɛ́nɛ̀ Sɑdɑnimmu tɑ̃rì.
\p
\v 12 Mɛm̀mɛ kɛ̀ Sisedɑɑ keè Abinnɔɑmmu birɛ Bɑɑrɑki bomɛ̀ Tɑbɔɔ tɑ̃rì, 
\v 13 kɛ́tíí nho nɑɑsɛ̃ĩ́ sikɔusìwɛi (900) nɛ̀ o nìtìbɛ̀ Adosɛti-Koimmu borɛ̀, kɛ̀ bɛ̀ɛ nɛi kɛ́kɔtɛ Kisɔ̃ɔ̃ kó mborɛ̀. 
\v 14 Dɛ mɔ̀nnì kɛ̀ Deborɑɑ nɑ́kɛ́ Bɑɑrɑki kɛ dɔ̀: Bɑ́ɑ́tí kɛ́kɔtɛ! Ti Yiɛ̀ nKuyie nyóó dɑ duɔ́mmu yíe nSisedɑɑ, ti Yiɛ̀ nKuyie nkuù dɑ ni ku mɔ́mmɔnku.
\p Kɛ̀ Bɑɑrɑkii nɛinɛ̀ o nìtìbɛ̀ tɛkɔupípíítɛ̀ (10000) kɛ̀ bɛ̀ɛ cútɛ́ Tɑbɔɔ tɑ̃rì, 
\v 15 kɛ́do bɛ dootitɔbɛ̀ kɛ̀ ti Yiɛ̀ nKuyie nduɔ́ nkɛ̀ bɛ̀ɛ nɑ Sisedɑɑ nɛ̀ o kɔbɛ nɛ̀ bɛ nɑɑsɛ̃ĩ́, kɛ̀ bɛ̀ɛ bútínnɛ́ kɛ́cokɛ́, kɛ̀ Sisedɑɑ cútɛ́ní o nɑɑsɑ̃ntɛ̀ kɛ́cokɛ́ o nɑɑ̀cɛ̀i. 
\v 16 Kɛ̀ Bɑɑrɑki mbɛti o dootitɔbɛ̀ nɛ̀ bɛ nɑɑsɛ̃ĩ́ kɛ́tuɔkɛnɛ̀ Adosɛti Koimmu, kɛ̀ bɛ̀ɛ kuɔ Sisedɑɑ kɔbɛ bɛmɔu, bɑ́ òmɔù í nsùɔ́.
\p
\v 17 Kɛ̀ Sisedɑɑ ńcooti kɛ kɔri Keniibɛ kou mɔù, bɛ̀ tu wè Ebɛɛ, o pokù Yɑɛɛri cĩ́ɛ̃̀tɛ̀, kɛ yɛ̃́ Ebɛɛdi cĩ́ɛ̃̀tɛ̀ nɛ̀ okpɑ̀ɑ̀tì Yɑmɛɛ Asɔɔ ɛì kou bɛ̀ do nɑɑtimɛ̀mu. 
\v 18 Kɛ̀ Yɑɛɛrii yɛnní kóò co kɛ́bɛ́i nkɛ dɔ̀: Ohɑ̃ɑ̃pɔ̀nkótì tɑnní diɛ! Tɑnní kɛ bɑ́ nyĩɛ̃̀kù.
\p Kòò tɑroo o tou miɛkɛ kòo ò dɑ̀tínnɛ́ kuyɑ̀ɑ̀kù. 
\v 19 Kòo nɑ́kɛ́ onitipòkù kɛ dɔ̀: M pɑ̃ mɛniɛ nkɛ̀ n yɑ̃̀.
\p Kòo pootɛ mɛnɑɑmiɛ̀ nkó kudɔukù kóò duɔ́ nkòo yɑ̃̀, kòo wɛ̃tɛ kóò dɑ̀tínnɛ́ kuyɑ̀ɑ̀kù. 
\v 20 Kòo nɑ́kɛ́ onitipòkù kɛ dɔ̀: Nkɑri dibòrì, kòò mɔù kɔ̀tɛní kɛ dɑ bekɛ kɛ tú: Òmɔù kɔ̀tɛní diɛnɑɑ̀? A dɔ̀: Ɔ́ɔ̀.
\p
\v 21 Sisedɑɑ mɛ ncèmmɛ̀ kɛ ɔ̀u kòo yɛ̃̀ nkɛ́duɔ́ kòo nuɔ ncɛ̃ɛ̃kɛ. Kòo nitipòkùu túótɛ́ dimɑ̀ɑtóòrì nɛ̀ ditou kó fɛbɑɑfɛ, kɛ́bɑ́nnɛ́ kɛ́tɔ́ɔ́nko o borɛ̀ kɛ́ fɛ̀ bɑɑkɛ́ o yuu kɛ́dɑnnɛnko kɛtenkɛ̀ kòo kú. 
\v 22 Kɛ̀ Bɑɑrɑki ntũnní Sisedɑɑ kɛ́tuɔkɛní, kɛ̀ Yɑɛɛrii yɛnní kóò nɑ̀kɛ́ kɛ dɔ̀: Kɔtɛní kɛ̀ n dɑ́ bɛnkɛ onìtì ɑ wɑnti wè.
\p Kòo tɑroo ditou miɛkɛ kɛ sɔ̃́ nhò bɑɑkɛ́ Sisedɑɑ yuu fɛbɑɑfɛ kɛ dɑ̀nnɛnɛ̀ kɛtenkɛ̀ kòò duɔ́ kɛ ku.
\p
\v 23 Dɛ yiè ndi Kuyie nduɔ́mmɛ̀ kɛ̀ Isidɑyɛɛribɛɛ ɑutɛ́ Yɑmɛɛ Kɑnnɑhɑ̃ɑ̃ kóo kpɑ̀ɑ̀tì. 
\v 24 Kɛ̀ Isidɑyɛɛribɛɛ bɛti weti weti Kɑnnɑhɑ̃ɑ̃ kóo kpɑ̀ɑ̀tì Yɑmɛɛ kóò fɛ̃nnɛ́ kóò nìntɛ kɛ́kuɔ.
\c 5
\s1 Deborɑɑ nɛ̀ Bɑɑrɑki bɛ̀ dèntɛ̀mɛ̀ fɛyɛ̀nfɛ̀
\p
\v 1 Dɛ yiè Deborɑɑ nɛ̀ Abinnɔɑmmu birɛ Bɑɑrɑki kɛ̀ bɛ̀ɛ dentɛ̀ fɛ nyɛ̀nfɛ̀:
\q1
\v 2 Isidɑyɛɛribɛ bɑ́ wè wɑ̃kɛ́mu mudoò kpɛ́í,
\q1 bɛ̀ duɔ́mmu bɛmɑ́ɑ̀ pɑ́íí mudoò kpɛ́í!
\q1 Sɑ̃ntɛnɛ̀ ti Yiɛ̀ nKuyie!
\q1
\v 3 Díndi bɛkpɑ̀ɑ̀tìbɛ̀, díndi bɛ̀ɛ̀ bɑkɛ́,
\q1 kéntɛ́nɛ̀ mɛsɑ̀ɑ̀!
\q1 N yóó dentɛ̀mu kɛ́sɑ̃ntɛ ti Yiɛ̀ nKuyie.
\q1 N yóó dɛ́úkùnnɛ ti Yiɛ̀ nKuyie nyIsidɑyɛɛribɛ tũ nkù nku.
\q1
\v 4 Ti Yiɛ̀ nKuyie nhɑ yɛ̀ní dìì mɔ̀nnì Edɔmmu,
\q1 kɛ cùtɛ́ní Seii tɑ̃rì,
\q1 dɛ mɔ̀nnì ndi kɛtenkɛ̀ ɑɑ́mɛ̀,
\q1 kɛ̀ yɛwɛtɛ̀ɛ cóúnní mɛniɛ,
\q1 kɛ̀ fɛtɑɑfɛ̀ diɛfɛ̀ɛ cútɛ́ní tiwɛtì.
\q1
\v 5 Kɛ̀ yɛtɑ̃rɛ̀ɛ sɑ̃ǹtɛ̀,
\q1 Ti Yiɛ̀ nKuyie nyIsidɑyɛɛribɛ tũ nkù
\q1 kuù do bɛ̀ bɛnkɛ kumɑ́ɑ̀ Sinɑii, kù tùɔ̀kɛnímɛ̀.
\b
\q1
\v 6 Anɑti birɛ Sɑ̃nkɑɑ do bo dìì mɔ̀nnì,
\q1 nɛ̀ Yɑyɛɛri kó dimɔ̀nnì,
\q1 kɛ̀ bɛcièmbɛ̀ tɛ̃́nkɛ í nkeri dihɛì kó icɛ,
\q1 bɛ̀ do kɔ́nnìmu.
\q1
\v 7 Okpɑ̀ɑ̀tì tɛ̃́nkɛ do í bo dihɛì,
\q1 wèè bɑkɛ́ Isidɑyɛɛribɛ ò tɛ̃́nkɛ do í bo,
\q1 kɛ́nkémmúnɛ̀ mí nDeborɑɑ m bo buotɛ́mɛ̀,
\q1 kɛ́nɑɑ́ nyIsidɑyɛɛribɛ yɔ̃.
\q1
\v 8 Isidɑyɛɛribɛ do ɔ̃ nkɛ̀ bɛ̀ fìé iwũɔ̃ yɛbɔkɛ̀,
\q1 mudoò muù pɑ̃̀nkɛɛ ítɛ́.
\q1 Dɛ mɔ̀nnì kɛ̀ Isidɑyɛɛribɛ bo sikɔupísìnɑ̀ɑ̀ (4000)
\q1 ɑ bɑ́ɑ́ yɑ̀ dikpɑ̃nnì yoo disiè bɛ cuokɛ̀.
\b
\q1
\v 9 N yɛ̀mmɛ̀ nɑɑtinɛ̀ bɛ̀ɛ̀ bɑkɛ́ bɛ̀ mbɛ Isidɑyɛɛribɛ tĩ̀rɛ̀,
\q1 nɛ̀ bɛ̀ɛ̀ duɔ́ mbɛmɑ́ɑ̀ mudoò kpɛ́í.
\q1 Sɑ̃ntɛnɛ̀ ti Yiɛ̀ nKuyie!
\q1
\v 10 Díndi bɛ̀ɛ̀ dèkɛ sɑ̃mmɑrímúbɛ̀ pɛ́íbɛ̀,
\q1 díndi bɛ̀ɛ̀ kɑ̀ri tiyɑ̀ɑ̀tì ĩ́nkɛ̀,
\q1 nɛ̀ díndi bɛ̀ɛ̀ kérí icɛ miɛkɛ piɛtɛnɛ̀ ku!
\q1
\v 11 Bɛ̀ɛ̀ do mmɛniɛ nkɛ niinko bɛ wũɔ̃,
\q1 bɛ̀ sɑ̃ntímu ti Yiɛ̀ nKuyie,
\q1 kù do dɔ̀ɔ̀ mɛ̀ɛ̀ sɑ̀ɑ̀ nyIsidɑyɛɛribɛ kɛ̀ bɛ̀ tiekɛ dihɛì.
\b
\q1
\v 12 Deborɑɑ, entɛ, entɛ!
\q1 Ítɛ́, ítɛ́! Dentɛ̀ fɛkpɑ̀rìyɛ̀nfɛ̀.
\q1 Abinnɔɑmmu birɛ Bɑɑrɑki ítɛ́ kɛ́tɔ ɑ dɑɑtì kɛ́kònnɛ̀.
\q1
\v 13 Bɛ̀ɛ̀ kpɑɑ́ kɛ̀ bɛ̀ɛ tũnnɛ bɛkperíbɛ̀
\q1 kɛ̀ ti Yiɛ̀ nKuyie nkɔbɛɛ tíí m borɛ̀ nɛ̀ dikɔ̃m̀bùɔ̀ kɛ bo kɔtɛ mudoò.
\q1
\v 14 Kɛ̀ Efɑdɑimmu kó bɛkperíbɛ̀ bo kubiriku,
\q1 ɑ kó difɔ̃nkúò Bɛnsɑmɛɛ weè dɑ tũnko kɛ wɛ̃nnɛ̀ o kɔbɛ.
\q1 Mɑkiidi botí kɔbɛ bɛɛ̀ tu bɛkpɑ̀ɑ̀tìbɛ̀
\q1 kɛ̀ Sɑbunɔɔ kɔbɛ tɔ fɛkpɑ̀ɑ̀tìpɑ̀tìfɛ̀.
\q1
\v 15 Kɛ̀ Isɑkɑɑ kpɑ̀ɑ̀tìbɛ̀ nɛinɛ̀ Deborɑɑ,
\q1 kɛ̀ bɛsɔmbɛɛ nɛinɛ̀ Bɑɑrɑki,
\q1 kɛ bɛ̀ tũ̀nnɛ kɛ̀ bɛ̀ kɔ̀tɛ kubiriku.
\p Dubɛnni botí kɔbɛ biɛ í nyɑ̀ bɛ̀ bo tɑ̃ɑ̃tɛ́ tì.
\q1
\v 16 Dɛ̀ dòmmɛ kɛ̀ di kpɑɑ́ di nɑɑcɛ̃nhòò kɛ kémmú iwũɔ̃ kuɔ̀mmɛ̀?
\q1 Dubɛnni botí kɔbɛ do í yɑ̀ bɛ bo tɑ̃ɑ̃tɛ́ tì.
\q1
\v 17 Kɑdɑɑdi tempɛ̃ nkɔbɛ bɛ̀ɛ̀ bo kukó nSuditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ bɛmbɛ í nɑmpɛ.
\q1 Dɑnni kɔbɛ í cùtɛ́ní bɛ bɑ̀tóòbɛ̀ ĩ́nkɛ̀.
\q1 Asɛɛ kɔbɛ í ìtɛ́ bɑ̀tóò commu dɛ̀,
\q1 bɛ̀ dɛ mbo.
\b
\q1
\v 18 Sɑbunɔɔ kɔbɛ nɛ̀ Nɛfutɑdii kɔbɛ bɛɛ̀ yie nkɛ cĩ̀nnɛ bɛ bɔ
\q1 kɛ kɔ̀tɛ mudoò.
\q1
\v 19 Kɑnnɑhɑ̃ɑ̃ kó bɛkpɑ̀ɑ̀tìbɛ̀ domu Tɑnnɑki ɛì kɔbɛ mudoò,
\q1 bɛ̀ mɛ nyí nɑ kɛ́hɛí dɛ̀mɑrɛ̀ yoo bɛ̀ɛ pɛ́tɛ́ idíítí.
\q1
\v 20 Kɛ̀ siwɑ̃̀ɑ̃ bɛ wɛ̃nnɛ́nɛ̀ kɛ́mbo tiwɛtì miɛkɛ kɛ kpɑnnɛ̀nní Sisedɑɑ.
\q1
\v 21 Kukó nKisɔ̃ɔ̃ kó mɛnɛ́kperímɛ̀ mɛɛ̀ pɔ̃ntɛ́nɛ̀ ti dootitɔbɛ̀
\q1 kɛ bɛ̀ kɑ̀útɛ́.
\q1 Tí kétɛ́nɛ̀ kɛ bɑ́ nyĩɛ̃̀kù.
\q1
\v 22 Mɛm̀mɛ sisɛ̃ĩ́ potɛ́mɛ̀ yɛtɑ̀rɛ̀ kɛtenkɛ̀,
\q1 kɛ̀ si kpɛ̀ɛ̀tɛ̀ɛ kɛ̀ dɑmmú.
\b
\q1
\v 23 Ti Yiɛ̀ nKuyie ntɔ̃nnì bɛ́immu kɛ tú:
\q1 Mɛdosi ɛì bo yɑ̀!
\q1 Bɛ̀ɛ̀ bo bɛ kó dihɛì miɛkɛ bɛ̀ bo yɑ̀!
\q1 Kɛ yɛ̃́ bɛ̀ í wɛ̃nnɛ́mmɛ̀ yɛkɔ̃m̀bɔ̀ yɛmbɛ̀ dikpɑ̀nnì.
\q1 Bɛ̀ í tee nti Yiɛ̀ nKuyie.
\q1
\v 24 Bɛnitipòbɛ̀ miɛkɛ mɛsɑ̀ɑ̀ nní mbonɛ̀ Keniibɛ botí kou Ebɛɛri pokù Yɑɛɛri.
\q1 Bɛnitipòbɛ̀ bɛ̀ɛ̀ bo titouti miɛkɛ,
\q1 bɛ miɛkɛ mɛsɑ̀ɑ̀ nní mbonɛ̀ dɛ kóo nitipòkù.
\q1
\v 25 Sisedɑɑ we mmɔɔ mɛniɛ,
\q1 nkòò ò pɑ̃ mɛnɑɑmiɛ̀ nfɛkpɑ̀ɑ̀tìbòòfɛ̀ miɛkɛ,
\q1 kòò ɑ̃nnɛ́ mɛnɑɑmiɛ̀ mboomɛ koò duɔ́.
\q1
\v 26 Dɛ kó difɔ̃nkúò tɛ nnɔ̀ùtɛ̀ fɛbɑɑfɛ,
\q1 tɛtɛtɛ̀ dimɑ̀ɑtóòrì,
\q1 kɛ́bɑɑkɛ́ Sisedɑɑ tempɑ́ɑ́kù kɛ dùùtɛ o yuu.
\q1
\v 27 Kòò doroo kɛ duɔ́ kɛ cɑ̃ɑ̃nko kɛtenkɛ̀,
\q1 ò dɛ ndo kɛ́kú.
\b
\q1
\v 28 Kòo yɔ̃ nsíékɛ́ní tɛbòtɛ̀,
\q1 kuyɑ̀ɑ̀kù fíè nkɛ nkuɔ̀ nkɛ tú:
\q1 Bɑ nkpɛ́í nte kòo sɑ̃ntɛ̀ ɔɔtiní?
\q1 Dɛ̀ dòmmɛ kɛ̀ bɛ sɛ̃ĩ́ í konní mɛcɑ̃ɑ̃?
\q1
\v 29 Kòo pobɛ̀ bɛ̀ɛ̀ ciì kɛ̀ bɛ̀ nnɑ́ɑ́ nho yɔ̃ kɛ tú:
\q1
\v 30 Bɛ̀ bo mbɛ̀ pɔ̀ntɛmu kɛ ɛí kɛ totí tinɛntì,
\q1 bɛ̀ bo ntotí bɛsɑpɑ̀mbɛ̀ òmɔù mɔù yoo bɛ̀dɛ́bɛ̀ dɛ́bɛ̀.
\q1 Bɛ̀ bo nduɔ́ nSisedɑɑ tiyɑ̀ɑ̀tì tìì tò nkɛ kpɛ̃̀,
\q1 diyɑɑ̀bòrì dìì kpɛ̃̀ nkɛ kòńtɛ́ mɛ̀dɛ́mɛ̀
\q1 bɛ̀ yóó di nduɔ́ nwèè nɑ.
\b
\q1
\v 31 Sisedɑɑ ku mɛ̀ɛ̀ botí,
\q1 Ti Yiɛ̀ nKuyie nhɑ yóu kɑ̀ɑ dootitɔbɛ̀ɛ mɛ nkú,
\q1 nɛ̀ bɛ̀ di nɑɑti kɛ̀ bɛ̀ mmiɛti
\q1 kɛ dònnɛ̀ diyiè ɔ̃ nyɛtìní kɛ dòmmɛ̀.
\b
\m Mɛm̀mɛ kɛ̀ dihɛì ḿbo mɛom̀pùmɛ̀ miɛkɛ kɛ dɔ̀ yɛbie nsipísìnɑ̀ɑ̀.
\c 6
\s1 Mɑndiyɑ̃ɑ̃bɛ fɛ̃́ũmmɛ̀ Isidɑyɛɛribɛ
\p
\v 1 Kɛ̀ Isidɑyɛɛribɛ yíɛ́ kɛ́dɔɔ̀ ti Yiɛ̀ nKuyie nyí dɔ́ dɛ̀, kɛ̀ kùu duɔ́ nkɛ̀ Mɑndiyɑ̃ɑ̃bɛ mbɛ̀ fɛ̃́ũnko kɛ dɔ̀ yɛbie nyɛ̀yiekɛ̀. 
\v 2 Kɛ̀ bɛ̀ mbɛ̀ fɛ̃́ũnko mɛdiɛ̀ nkɛ̀ bɛ̀ cokù kɛ dekù yɛtɑ̃rɛ̀ kɛ tɑɑ̀ titɑ̃dèntì nɛ̀ itɑ̃fuɔ mmiɛkɛ. 
\v 3 Kɛ̀ bɛ̀ kùútí kɛ dèè Mɑndiyɑ̃ɑ̃bɛ nɛ̀ Amɑdesiibɛ nɛ̀ diyiè yìɛ̀ní kɛ̀ɛ̀ bíɛ́kɛ̀ kɔbɛ bɛ̀ɛ kɔtɛní kɛ́ bɛ̀ do. 
\v 4 Bɛ̀ do ɔ̃ɔ̃ bɑ́tɛ́ bɛ tenkɛ̀ kɛ́cɑkɛ bɛ pɑɑ ndɛ kɛ́tuɔkɛnɛ̀ Kɑsɑɑ kɛ́pĩ́mmú bɛ wũɔ̃: Inɑ̀ɑ̀kɛ nɛ̀ ipe nɛ̀ sɑ̃mmɑrímúbɛ̀ bɑ́ bɛ̀ bɑ́ɑ́ bɛ̀ sùɔ́ mmùmɑmù. 
\v 5 Bɛ̀ do ɔ̃ɔ̃ ítɛ́ní nɛ̀ bɛ wũɔ̃ nyi kɛ́ntɔnɛ̀ bɛ touti kó tiyɑ̀ɑ̀tì kɛ́nsũ kɛ dò nfɛcofɛ ɔ̃ ndòmmɛ̀ bɑ́ bɛ̀ bɑ́ ndò nkɛ́nɑ kɛ́kɑɑ nkɛ́deè, kɛ̀ bɛ̀ bɑ̀tɛ́ dìì ɛì bɛ̀ɛ dì pɔ̀ntɛ. 
\v 6 Kɛ̀ Mɑndiyɑ̃ɑ̃bɛɛ dií nyIsidɑyɛɛribɛ mɛsémmɛ̀ mɛdiɛ̀ nkɛ̀ bɛ̀ɛ kuɔ́nnɛ̀ ti Yiɛ̀ nKuyie.
\p
\v 7 Isidɑyɛɛribɛ kuɔ́nnɛ̀ dìì mɔ̀nnì ti Yiɛ̀ nKuyie nkɛ tú kùu bɛ̀ dɛɛtɛ́nɛ̀ Mɑndiyɑ̃ɑ̃bɛ. 
\v 8 Kɛ̀ kùu tɔ̃nní ku pɑ̃ɑ̃nɑ́ɑǹtì nɑ́ɑǹtò mɔù kòo bɛ̀ bɛ́innɛ̀ kɛ dɔ̀: Ti Yiɛ̀ nKuyie ndi tũ nkù tu kuù di dènnɛní Esibiti di do tú dɛ̀ tidɑɑtì. 
\v 9 Kɛ̀ kuù di dɛɛtɛ́nɛ̀ Esibiti kɔbɛ nɛ̀ bɛ̀ɛ̀ kó dimɑ̀ɑ̀ do di fɛ̃́ũnko, kɛ bɛ̀ bɛ̀ti kɛ di duɔ́ ndihɛì. 
\v 10 Kɛ di nɑ̀kɛ́ kɛ tú: Dí nyɛ̃́ kɛ bɑ́ɑ́ fíé Amɔdiibɛ di bo bɛ̀ɛ̀ cuokɛ̀ bɛ kó yɛbɔkɛ̀. Di mɛ nyí yie nku kpɛti.
\s1 Kuyie nyɛ̃mmɛ̀ Sedeɔ̃ɔ̃ dɛɛtɛ́ Isidɑyɛɛribɛ
\p
\v 11 Kɛ̀ ti Yiɛ̀ nKuyie ntɔ̃nnìi kɔtɛní Ofɑdɑɑ ɛì kɛ́nkɑri Abiesɛɛ botí kou mɔù bɛ̀ tu wè Soɑsi pɑku mutie mɑmù yuu, kɛ̀ dɛ yiɛ̀ nkóo dɑpɑ̀ɑ̀ nSedeɔ̃ɔ̃ puotì o diitì kupèrìkù mɑkù fíè, bɛ̀ do ɔ̃ɔ̃ ũtí dɛ̀ yɛtebɛ, kɛ́sɔrinɛ̀ Mɑndiyɑ̃ɑ̃bɛ. 
\v 12 Kòò nyóó dɑɑtɛní kɛ́yɑ̀ ti Yiɛ̀ nKuyie ntɔ̃nnì kɛ̀ dìi ò bɛ́innɛ̀ kɛ dɔ̀: Ti Yiɛ̀ nKuyie ndɑ bommu fɔ̃́ nhokpɑ̀rìteu!
\p
\v 13 Kɛ̀ Sedeɔ̃ɔ̃ dì tɛ̃̀ńnɛ́ kɛ dɔ̀: N yiɛ̀! N dɑ bɑ́ɑmmu, kɛ̀ ti Yiɛ̀ nKuyie nti bonɛ̀, bɑ nkpɛ́í nte kɛ̀ mɛhɑ́ɑ́rìmɛ̀ miɛ nti tuɔ̀kùní, tidiɛtì ti yɛmbɛ̀ do ti nɑ́ɑ́ ntìì kpɛ́í ntì kɔ̀tɛ kɛ? Bɛ̀ do ti nɑ́ɑ́mmu ti Yiɛ̀ nKuyie mbɛ̀ dènnɛmɛ̀ Esibiti. Ti Yiɛ̀ nKuyie nti dootóomu, dɛɛ̀ te kɛ̀ Mɑndiyɑ̃ɑ̃bɛ ti nɑ.
\p
\v 14 Kɛ̀ ti Yiɛ̀ nKuyie nwɛ̃ɛ̃tɛ o bíɛ́kɛ̀ kóò nɑ̀kɛ́ kɛ dɔ̀: Kɔtɛ nɛ̀ muwɛ̃rímú ɑ mɔkɛ mù kɛ́dɛɛtɛ́ Isidɑyɛɛribɛ Mɑndiyɑ̃ɑ̃bɛ nɔu miɛkɛ. Míì dɑ tũɔ̃̀. 
\v 15 Kɛ̀ Sedeɔ̃ɔ̃ dì tɛ̃̀ńnɛ́ kɛ dɔ̀: N Yiɛ̀ n dɑ bɑ́ɑmmu, n kó kunɑɑ̀mùnkù kuù tu ku sɑ́m̀pɔ́kù Mɑnɑnsee nɑɑ̀mùntì miɛkɛ, kɛ̀ míì wɛ̃̀tɛ kɛ tú tɛyɑ̃ɑ̃tɛ̀, m bo yĩ́mɛ kɛ́dɛɛtɛ́ Isidɑyɛɛribɛ.
\p
\v 16 Kɛ̀ ti Yiɛ̀ nKuyie nhò tɛ̃̀ńnɛ́ kɛ dɔ̀: N yó ndɑ bonɛ̀mu kɑ̀ɑ potɛ́ Mɑndiyɑ̃ɑ̃bɛ kɛ̀ dɛ̀ ndo nhɑ potɛ́ onìtì òmɑ́ɑ̀.
\p
\v 17 Kɛ̀ Sedeɔ̃ɔ̃ dɔ̀: N Yiɛ̀ nKuyie nkɑ̀ɑ m bonɛ̀mu m bɛnkɛ kɛ̀ m bɑntɛ́ kɛ dò nfɔ̃́ɔ̃̀ n nɑ̀ɑ́nnɛ̀. 
\v 18 Nkpɑɑ́ diɛ nkɛ̀ n wɛ̃tɛnɛ̀ní dipɑ̃nnì n dɔ́ kɛ dɑ pɑ̃ dì.
\p Kɛ̀ ti Yiɛ̀ nKuyie ndɔ̀: N yó nkpɑɑ́mu kɑ̀ɑ wɛ̃tɛnɛ̀ní. 
\v 19 Kɛ̀ Sedeɔ̃ɔ̃ kɔtɛ kɛ pĩ́ ndibɔsɛrì, kɛ́kuɔ kɛ́bénnɛ́, kɛ́wɑɑ́ mmuyuo ncìdóòbɛ̀ sipísìtɑ̃ɑ̃ti, kɛ́dɔɔ̀ pɛ̃́ɛ̃̀ ò í nkɔɔrɛnɛ̀ mutie mùù muuti, kɛ́túótɛ́ imɑɑ nkɛ́ɑ̃nnɛ́ tɛmɔ́mmùyɑ́ɑ́tɛ̀ miɛkɛ, kɛ́ɑ̃nnɛ́ mɛkṹmmɛ̀ dibuu, kɛ́tɔ kɛ́kɔtɛnɛ̀ mutie yuu kɛ́duɔ́ nKuyie ntɔ̃nnì. 
\v 20 Kɛ̀ dìi ò nɑ̀kɛ́ kɛ dɔ̀: Kɔtɛ kɛ́dɑɑ́ nyimɑɑ ndipèrì diì nyĩ́nkɛ̀, kɛ́yɔɔrɛ mɛkṹmmɛ̀ i ĩ́nkɛ̀.
\p Kɛ̀ Sedeɔ̃ɔ̃ mɛ ndɔ̀ɔ̀. 
\v 21 Kɛ̀ ti Yiɛ̀ nKuyie ntɔ̃nnìi youtɛ kupɑ̀ɑ̀ti dì do tɔ kù kɛ́kɑ́ɑ́kɛ́ imɑɑ nnɛ̀ pɛ̃́ɛ̃̀, kɛ̀ muhɑ̃ɑ̃́ nyɛnní dipèrì kɛ́ dɛ̀ cɔ̀útɛ́. Kɛ̀ Sedeɔ̃ɔ̃ mɔ́ntóo ti Yiɛ̀ nKuyie ntɔ̃nnì. 
\v 22 Dɛ mɔ̀nnì ndi Sedeɔ̃ɔ̃ bɑntɛ́mɛ̀ kɛ dò nti Yiɛ̀ nKuyie ntɔ̃nnì ndi, kɛ́kuɔ́nko kɛ dɔ̀: Áú! Ti Yiɛ̀ Kuyie mmɛyɛi mbɑ́ n tuɔkɛní m mɛ̀ nyɑ̀mɛ̀ ɑ tɔ̃nnì dò?
\p
\v 23 Kɛ̀ ti Yiɛ̀ nKuyie ndɔ̀: A bɑ́ nyĩɛ̃̀kù! A kɔ̃m̀bùɔ̀tì bɑ́ nduò, ɑ í yóó kú.
\p
\v 24 Kɛ̀ Sedeɔ̃ɔ̃ mɑɑ́ diwũɔ̃tɔ̀nnì dɛborɛ̀ ti Yiɛ̀ nKuyie nkɛ́ dì yu kɛ dɔ̀: Ti Yiɛ nKuyie ndɛì iyĩ̀ɛ̃̀kɛ. Dɛ kó diwũɔ̃tɔ̀nnì kpɑɑ́ bomu Ofidɑɑ Abiesɛɛ ɛì miɛkɛ.
\s1 Sedeɔ̃ɔ̃ pɔ̀ntɛmɛ̀ dibɔɔ̀ Bɑɑdi wũɔ̃tɔ̀nnì
\p
\v 25 Dɛ kó kɛyènkɛ̀ kɛ̀ ti Yiɛ̀ nKuyie nnɑ́kɛ́ Sedeɔ̃ɔ̃ kɛ dɔ̀: Túótɛ́ ɑ cicɛ kó dinɑɑdɑɑ̀ dìì mɔ̀kɛ yɛbie nyɛ̀yiekɛ̀, kɛ́pɔntɛ ɑ cicɛ bɔɔ̀ Bɑɑdi wũɔ̃tɔ̀nnì kɛ́kɔ̃ṹ kutewuó nkùù còḿmú di tɑkɛ́. 
\v 26 Kɑ̀ɑ dèè ɑ́ m mɑɑ́ n kpɛri dɛ kó ditennì ĩ́nkɛ̀, kɛ́túótɛ́ kutewuó nhɑ kɔ̃ṹ kù kó idɛí kɛ́tɔtìnnɛ, kɛ́ n kuɔ fɛnɑ̀ɑ̀fɛ̀ kɛ́tuɔ.
\p
\v 27 Kɛ̀ Sedeɔ̃ɔ̃ wɑɑ́ mbɛtɔ̃mbɛ̀ tɛpíítɛ̀ bɛ̀ɛ̀ yóó ò teennɛ̀ mutɔ̃mmú ti Yiɛ̀ nKuyie nyɛ̃ nwèe pĩ́ mmù. Kɛ̀ bɛ̀ɛ mù pĩ nkɛyènkɛ̀ kɛ yɛ̃́ ò do démɛ̀ o cĩ́ɛ̃̀tɛ̀ kɔbɛ nɛ̀ dihɛì kɔbɛ. 
\v 28 Kɛ̀ dɛ̀ɛ wentɛ́ kɛ̀ dihɛì kɔbɛɛ yɑ̀ Bɑɑdi wũɔ̃tɔ̀nnì pɔ̀ntɛmɛ̀ kɛ̀ kutewuó nkɔ̃ũ, kɛ̀ bɛ̀ mɑɑ́ diwũɔ̃tɔ̀nnì tɛrì dɛ ĩ́nkɛ̀, kɛ kùɔ fɛnɑ̀ɑ̀fɛ̀ kɛ tùɔ ndi ĩ́nkɛ̀. 
\v 29 Kɛ̀ bɛ̀ mbékú békú bɛtɔbɛ̀ wèè dɔ̀ɔ̀ mɛ kó kubotí.
\p Kɛ̀ bɛ̀ɛ bɛ̀ nɑ̀kɛ́ kɛ dɔ̀: Sedeɔ̃ɔ̃ nwe. 
\v 30 Kɛ̀ bɛ̀ɛ nɑ́kɛ́ Soɑsi Sedeɔ̃ɔ̃ cicɛ kɛ dɔ̀: Ti duɔ́ nhɑ kóo dɑpɑ̀ɑ̀ nkɛ̀ tí ò kùɔ, ò pùɔ mmɛ̀ɛ̀ kpɛ́í mBɑɑdi wũɔ̃tɔ̀nnì kɛ kɔ̃ṹ o tewuó.
\p
\v 31 Kɛ̀ Soɑsii bɛ̀ tɛ̃̀ńnɛ́ kɛ dɔ̀: Díì bo kpɑ mBɑɑdi kpɑ̀nnɑ̀ɑ? Díì bo pɛitɛ o pɛ̀ìɑ̀? Kɛ̀ wèè kpɑ mBɑɑdi kpɑ̀nnì dɛ̀ bɑ́ɑ́ ò wentɛ́. Kɛ̀ Bɑɑdi cɛ̃́nkɛ tú Bɑɑdi nwe weè yóó kpɑ nho kpɑ̀nnì, bɛ̀ pɔ̀ntɛ weè kó diwũɔ̃tɔ̀nnì.
\p
\v 32 Dɛ yiè ndi bɛ̀ yumɛ̀ Sedeɔ̃ɔ̃ kɛ dɔ̀ Yedubɑɑdi (dɛ̀ɛ̀ tu Bɑɑdii pɛitɛ). Bɛ̀ do ò yu dɛ kó diyètìrì o cicɛ do bɛ́i ntìì nɑ́ɑǹtì kpɛ́í nkɛ kɛ dɔ̀: Bɑɑdii kpɑ nho kpɑ̀nnì bɛ̀ pɔ̀ntɛ wèè wũɔ̃tɔ̀nnì.
\s1 Sedeɔ̃ɔ̃ bekɛmɛ̀ Kuyie mmɛbɛnkùmɛ̀
\p
\v 33 Kɛ̀ Mɑndiyɑ̃ɑ̃bɛ nɛ̀ Amɑdesiibɛ nɛ̀ diyiè yìɛ̀ní kɛ̀ɛ̀ bíɛ́kɛ̀ kɔbɛ kɛ̀ bɛ̀ɛ tíí nkɛ́sentɛ́ Suditɛ̃ɛ̃ kɛ́bɑ́tɛ́ Sisedɛɛdi biriku. 
\v 34 Kɛ̀ ti Yiɛ̀ nKuyie nYɑɑ́ mpíɛ nSedeɔ̃ɔ̃ kòo kɔnnɛ́ ditɑ̃tɛheù kɛ́yú Abiesɛɛ nɑɑ̀mùnkù kɔbɛ kɛ́ bɛ̀ bo ò nɛinɛ̀, 
\v 35 kɛ́tɔ̃ nkɛ̀ bɛ̀ɛ nɑ́kɛ́ Mɑnɑnsee kɔbɛ kɛ̀ bɛ̀ɛ kɔtɛní, kòo tɔ̃ mbɛtɔbɛ̀ Asɛɛ nɛ̀ Sɑbunɔɔ nɛ̀ Nɛfutɑdii nɑɑ̀mùntì miɛkɛ, kɛ̀ bɛnìtìbɛ̀ɛ yɛnní kɛ́ bɛ̀ wɛ̃nnɛ́nɛ̀.
\p
\v 36 Kɛ̀ Sedeɔ̃ɔ̃ nɑ́kɛ́ ti Yiɛ̀ nKuyie nkɛ dɔ̀: Ti Yiɛ̀ nKuyie nkɛ̀ fɔ̃́ɔ̃̀ bɛ́i nkɛ tú ɑ yóó dɛɛtɛ́ Isidɑyɛɛribɛ nɛ̀ n nɔ̀ùtɛ̀, 
\v 37 n yóó yennɛ́ m pecìtì nti kuyiɛ́, kɛ̀ dɛ̀ wenniní kɛ̀ tiì mɑ́ɑ̀ bùútɛ́, kɛ̀ kuyiɛ́ wɑɑ́nnì m bɑntɛ́ kɛ dò nhɑ mɛ̀nkɛ dɔ́ kɛ́ bɛ̀ dɛɛtɛ́ nɛ̀ míì kó tɛnɔ̀ùtɛ̀, kɛ́ndònnɛ̀ ɑ tì bɛ́immɛ̀.
\p
\v 38 Kɛ̀ dɛ̀ɛ wentɛ́ kɛ̀ Sedeɔ̃ɔ̃ kɔtɛ kɛ́nsɔ̃́ ndɛ̀ mɛ ndɔ̀ɔ̀, kòo koutɛ́ tipecìtì kɛ́níútɛ́ mɛniɛ mmɛ̀ɛ̀ mɑ̀ntɛ̀ kɛ̀ mɛ̀ɛ yɛ̀ kɛ́píɛ ndibuu. 
\v 39 Kòo nɑ́kɛ́ ti Yiɛ̀ nKuyie nkɛ dɔ̀: Ti Yiɛ̀ nKuyie nhɑ miɛkɛ bɑ́ m pɛikɛ, kucɛ mɛsɔmmɛ mmɛ n yóó yíɛ́ kɛ́ dɑ bekɛmɛ̀, n yóó wɛ̃tɛ kɛ yíɛ́ yennɛ́mu tipecìtì, di mmɔ̀nnì n dɔ́ kɛtenkɛ̀ kɛɛ̀ búútɛ́ kɛ̀ tì ńwɑɑ́nnì.
\p
\v 40 Kɛ̀ ti Yiɛ̀ nKuyie ndɔɔ̀ Sedeɔ̃ɔ̃ kù bekɛ tì, kɛ̀ dɛ̀ nwenniní kɛ̀ kɛtenkɛ̀ bùútɛ́ kɛ fitɛ́ kɛ̀ tipecìtì mɑ́ɑ̀ wɑɑ́nnì.
\c 7
\s1 Sedeɔ̃ɔ̃ kɔ̀tɛmɛ̀ mudoò nɛ̀ bɛnìtìbɛ̀ sikɔusìtɑ̃ɑ̃ti
\p
\v 1 Kɛ̀ dɛ̀ nkpɑɑ́ uu kɛ̀ Sedeɔ̃ɔ̃, bɛ̀ tu wè Yedubɑɑdi, kòo bɑ́ɑ́tínɛ̀ o ɑ̃ɑ̃pɔ̀mbɛ̀ bɛmɔu kɛ́bɑ́tɛ́ Adodi bintɛ borɛ̀, kɛ̀ Mɑndiyɑ̃ɑ̃bɛ mɛ ntó bɑ́tɛ́ kubɑkù cɑ̃̀nku bíɛ́kɛ̀ Mɔdee tɑ̃rì bíɛ́kɛ̀ kubiriku miɛkɛ.
\p
\v 2 Kɛ̀ ti Yiɛ̀ nKuyie nnɑ́kɛ́ Sedeɔ̃ɔ̃ kɛ dɔ̀: A nìtìbɛ̀ sũnɛ̀ m bo duɔ́mmɛ̀ kɛ̀ dí nɑ Mɑndiyɑ̃ɑ̃bɛ, kɛ̀ n duɔ́ nkɛ̀ di bɛ̀ nɑ, Isidɑyɛɛribɛ bo nɑ kɛ́sɑ̃ntɛ bɛmɑ́ɑ̀ kɛ dɔ̀ bɛɛ̀ bɛ̀ nɑ nɛ̀ bɛ kó muwɛ̃rímú, kɛ́cɔutɛ́ disɑ̃nni dìì nɑ ntú n kpɛri. 
\v 3 Á nɑ́kɛ́ ɑ nìtìbɛ̀ kɛ tú n yɛ̃ nkɛ̀ kufɔ̃wɑɑ́ mbo wè, kòo kɔ̃m̀bùɔ̀tì duò, wèe kò nho cĩ́ɛ̃̀tɛ̀.
\p Kɛ̀ Sedeɔ̃ɔ̃ tì bɛ́i nkɛ̀ bɛnìtìbɛ̀ sikɔupípísìdɛ́ nɛ̀ sikɔusìdɛ́ (22000) wɛ̃tɛ, kɛ̀ bɛ̀ nkpɑɑ́ tɛkɔupípíítɛ̀ (10000). 
\v 4 Kɛ̀ ti Yiɛ̀ nKuyie nnɑ́kɛ́ Sedeɔ̃ɔ̃ kɛ dɔ̀ ɑ nìtìbɛ̀ kpɑɑ́ sũmu, tɑnnɛ̀ bɛ kukó nkɛ̀ m bɛ̀ ndɑ bɑtɛ, kɛ́ dɑ nɑ́kɛ́ bɛ̀ɛ̀ yóó dɑ nɛinɛ̀ nɛ̀ bɛ̀ɛ̀ yó nkpɑɑ́.
\p
\v 5 Kɛ̀ Sedeɔ̃ɔ̃ bɛ̀ tɑnnɛ́ kukó nkɛ̀ ti Yiɛ̀ nKuyie nhò nɑ̀kɛ́ kɛ dɔ̀: Bɛ̀ɛ̀ bo nkɛì mɛniɛ nnɛ̀ bɛ nɔu kɛ yɔ̃̀ nhɑ́ bɛ̀ bɑ̀tɛ, kɛ́bɑtɛ bɛ̀ɛ̀ bo nínkú kɛ́sĩ́nnɛ́ kɛ́nyɔ̃nnɛ̀ bɛ nɔ̀.
\p
\v 6 Kɛ̀ bɛnìtìbɛ̀ sikɔusìtɑ̃ɑ̃ti (300) bɛɛ̀ nkɛìnɛ̀ bɛ nɔu kɛ yɔ̃, kɛ̀ bɛsɔmbɛɛ nínkú kɛ́nyɔ̃nnɛ̀ bɛ nɔ̀. 
\v 7 Kɛ̀ ti Yiɛ̀ nKuyie nnɑ́kɛ́ Sedeɔ̃ɔ̃ kɛ dɔ̀: Bɛ̀ɛ̀ nìńkú kɛ yɔ̃nnɛ̀ bɛ nɔ̀ bɛ̀ɛ kũṹ mbɛ cɛ̃́ĩ, sikɔu sìtɑ̃ɑ̃ti (300) bɛ̀ɛ̀ kɛ̀ìnɛ̀ bɛ nɔu kɛ yɔ̃, fɔ̃́ nnɛ̀ bɛ díì yóó kɔtɛ mudoò kɛ̀ n dí dɛɛtɛ́ kɛ́duɔ́ nkɛ̀ dí nɑ Mɑndiyɑ̃ɑ̃bɛ.
\p
\v 8 Kɛ̀ Sedeɔ̃ɔ̃ duɔ́ nkɛ̀ bɛ̀ɛ cuɔ́ bɛ diitì nɛ̀ bɛ tɑ̃tɛhe, kòo duɔ́ nkɛ̀ bɛ̀ɛ kũṹ mbɛ cɛ̃́ĩ, kòo nkpɑɑ́nɛ̀ bɛnìtìbɛ̀ sikɔusìtɑ̃ɑ̃ti (300).
\p Kɛ̀ Mɑndiyɑ̃ɑ̃bɛ mɛ mbɑ́tɛ́ dɛ fũ̀ɔ̃̀ kubiriku kɛ kɑri.
\s1 Kuyie mbɛnkɛ mɛ̀ Sedeɔ̃ɔ̃ ò yóó nɑmɛ̀ o dootitɔbɛ̀
\p
\v 9 Dɛ kó kɛyènkɛ̀ kɛ̀ ti Yiɛ̀ nKuyie nnɑ́kɛ́ Sedeɔ̃ɔ̃ kɛ dɔ̀: Ítɛ́ kɛ́kɔtɛ kɛ́do Mɑndiyɑ̃ɑ̃bɛ m bɛ̀ ndɑ duɔ́mmu. 
\v 10 Kɑ̀ɑ mɛ nyí dɑ̀ɑ́tí kɛ bo kɔtɛ kɛ́ bɛ̀ do, ɑ́ nɛinɛ̀ ɑ kóo tɔ̃ntì Pudɑɑ kɛ̀ di kɔtɛ. 
\v 11 Kɑ̀ɑ keè bɛ̀ nɑ̀ɑ́ ntì dɛ bíɛ́kɛ̀, dɛ mɔ̀nnì kɛ́mɔɔtɛ dikɔ̃m̀bùɔ̀, kɛ nɛ́ kɔtɛ kɛ́ bɛ̀ do.
\p Kɛ̀ Sedeɔ̃ɔ̃ nɛinɛ̀ o kóo tɔ̃ntì kɛ̀ bɛ̀ɛ kɔtɛ Mɑndiyɑ̃ɑ̃bɛ kɑrì dìì tɔ̀kɛ́ní. 
\v 12 Kɛ̀ Mɑndiyɑ̃ɑ̃bɛ nɛ̀ Amɑdesiibɛ nɛ̀ diyiè yìɛ̀ní kɛ̀ɛ̀ bíɛ́kɛ̀ kɔbɛ kɛ̀ bɛ̀ pitɛ́ kubiriku kɛ sũ kɛ mɑ̀nnɛ̀ fɛcofɛ bɑ́ yòyóbɛ̀ í dò nkɛ́nɑ kɛ́kɑɑ nkɛ́deè, kɛ mɛ̀nkɛ sũ kɛ dònnɛ̀ dɑ̀mɛ́ɛ̀rì nùù kó mubirímú. 
\v 13 Bɛ̀ tùɔ̀koo dìì mɔ̀nnì kɛ́nsɔ̃́ nhòmɔù nɑ̀ɑ́ nho nɛ́po tidɔuǹtì kɛ tú: N duɔ́ tidɔuǹtì nti kɛ̀ dɛ̀ dò mpɛ̃́ɛ̃̀ mɔù birimúní ditɑ̃rì ĩ́nkɛ̀, kɛ bɔ̀tɛ́ kutouku mɑkù kɛ̀ kù do kɛ kòńtɛ́ kóntɛ́.
\p
\v 14 Kòo nɛ́poo ò nɑ̀kɛ́ kɛ dɔ̀: Isidɑyɛɛribɛ kou Soɑsi birɛ Sedeɔ̃ɔ̃ kó disiè ndi, Kuyie nti ɑ̃nnɛ́ o nɔu miɛkɛ nkɛ tínti nɛ̀ ti kó ditĩ̀nnì dimɔu.
\p
\v 15 Kɛ̀ Sedeɔ̃ɔ̃ keè tidɔuǹtì nɛ̀ tì bɛnkú mù, kɛ́nínkú kɛ́sĩ́nnɔ́ɔ kɛtenkɛ̀, kɛ́dɔunnɛ̀ ti Yiɛ̀ nKuyie mmutɔ̃mmú, kɛ́deè kɛ́wɛ̃tɛní Isidɑyɛɛribɛ bɑ̀tɛ́ dɛ̀, kɛ́pĩɛ̃kɛ́ kɛ dɔ̀: Bɑ́ɑ́tínɛ̀ ti Yiɛ̀ nKuyie ndi duɔ́mmu Mɑndiyɑ̃ɑ̃bɛ.
\s1 Kuyie nkpɑmmɛ̀ Sedeɔ̃ɔ̃ kpɛ́í
\p
\v 16 Dɛ kó dimɔ̀nnì kòo totɛ́ bɛnìtìbɛ̀ sikɔusìtɑ̃ɑ̃ti (300) sinsi yɛtĩ̀rɛ̀ yɛ̀tɑ̃ɑ̃ti, kɛ́pií mbɑ́ wè ditɑ̃tɛheù nɛ̀ dɛfìtírɛ̀ nɛ̀ dɛ dúù, 
\v 17 kɛ́deè kɛ́ bɛ̀ nɑ̀kɛ́ kɛ dɔ̀: Dí nni nwúó nkɛ̀ n tùɔ̀kɛ bɛ kɑrì kɛ dɔ̀ɔ̀mɛ̀, dí mɛ ndɔɔ̀. 
\v 18 Mí nnɛ̀ n kó ditĩ̀nnì kɛ̀ ti eé dìì mɔ̀nnì yɛtɑ̃tɛhe di múnkɛ eé kɛ́fitɛ́ bɛ kɑrì, kɛ́mpĩɛ̃kù kɛ tú: Ti Yiɛ̀ nKuyie nnɛ̀ Sedeɔ̃ɔ̃ bɛɛ̀ nɑ.
\p
\v 19 Sedeɔ̃ɔ̃ nɛ̀ o nìtìbɛ̀ kɛ̀ bɛ̀ ntuɔ̀kòo Mɑndiyɑ̃ɑ̃bɛ kɑrì kɛ̀ kɛyènkɛ̀ dɔ́ kɛ́totɛ́ kɛ cuokɛ̀, kɛ̀ bɛ̀ bo kɛ ceeri bɛ̀ɛ̀ bɑ̀ɑ bɛ kɑrì. Kɛ̀ bɛ̀ɛ eé yɛtɑ̃tɛhe kɛ́pɔntɛ bɛ fìtídɔ́. 
\v 20 Kɛ̀ yɛtĩ̀rɛ̀ tɛyɛ̀ yɛ̀dɛ́ɛ̀ mɛ ndɔɔ̀ kɛ́ntɔ bɛ fìtíyì nɛ̀ sinɔu cɑ̃̀nkusì, kɛ tɔ yɛtɑ̃tɛhe siyoú, kɛ pĩɛ̃kù kɛ tú: Ti Yiɛ̀ nKuyie nnɛ̀ Sedeɔ̃ɔ̃ bɛɛ̀ nɑ!
\p
\v 21 Bɑ́ wè kòo cómmú o kó mɛfíè, kɛ̀ bɛ̀ɛ cɛ̃tinnɛ bɛ kɑrì, kɛ̀ bɛ̀ nkuɔ̀ ndɛ miɛkɛ kɛ cokù. 
\v 22 Kɛ̀ bɛnìtìbɛ̀ sikɔusìtɑ̃ɑ̃ti (300) ncómmú kɛ eu yɛtɑ̃tɛhe kɛ̀ ti Yiɛ̀ nKuyie nduɔ́ nkɛ̀ Mɑndiyɑ̃ɑ̃bɛ nkɔù bɛtɔbɛ̀ bɛ kɑrì dimɔu miɛkɛ. Kɛ̀ dɛ̀ nyóó dentɛnɛ̀ bɛ̀ɛ̀ kpɑɑ́ kɛ̀ bɛ̀ɛ cokɛ́ kɛ́tuɔkɛ Bɛti-Itɑ kɛ́nwetí Sededɑɑ kɛ yɑ̀ɑ tuɔkɛnɛ̀ Abɛdi-Mɛodɑɑ ɛì dìì tɔ̀kɛ́nɛ̀ Tɑbɑɑ.
\p
\v 23 Kɛ̀ bɛ̀ɛ yú Isidɑyɛɛribɛ sɔmbɛ Nɛfutɑdii nɑɑ̀mùnkù kɔbɛ nɛ̀ Asɛɛ kɔku nɛ̀ Mɑnɑnsee kɔku kɛ̀ bɛ̀ɛ kɔtɛní kɛ́bɛti Mɑndiyɑ̃ɑ̃bɛ. 
\v 24 Kɛ̀ Sedeɔ̃ɔ̃ tɔ̃ nkɛ̀ bɛ̀ɛ nɑ́kɛ́ Efɑdɑimmu tɑ̃rì kɔbɛ kɛ dɔ̀: Cútɛ́nɛ̀ní mɛcɑ̃ɑ̃ nkɛ́niitɛ́ kɛ́bɑɑ mɛniɛ ntɛpurɛ kɛ́túótɛ́ Suditɛ̃ɛ̃ kɛ́tuɔkɛnɛ̀ Bɛti-Bɑdɑɑ.
\p Mɛm̀mɛ kɛ̀ Efɑdɑimmu kɔbɛ bɛmɔu kɔtɛ kɛ́bɑɑ kukó nSuditɛ̃ɛ̃ kɛ́tuɔkɛnɛ̀ Bɛti-Bɑdɑɑ, 
\v 25 kɛ́pĩ́ mMɑndiyɑ̃ɑ̃bɛ kpɑ̀ɑ̀tìbɛ̀ bɛ̀dɛ́ Odɛbu nɛ̀ Sɛbu kɛ́kuɔ Odɛbu tɑ̃rì tɑkɛ́ kɛ́kuɔ Sɛbu dinɑ̀ɑ̀ bɛ̀ tú dì Sɛbu nɑ̀ɑ di tɑkɛ́, kɛ́sɔɔtɛ́ kɛ́mbɛti Mɑndiyɑ̃ɑ̃bɛ, kɛ́tɔnní Odɛbu nɛ̀ Sɛbu bɛ yɔ kɛ́séntɛ́nɛ̀ní Suditɛ̃ɛ̃, kɛ́ yɛ̀ duɔ́ nSedeɔ̃ɔ̃.
\c 8
\s1 Efɑdɑimmu kɔbɛ yɛ̀mmɛ̀ cɑ̀ɑ̀rɛ̀mɛ̀
\p
\v 1 Dɛ mɔ̀nnì kɛ̀ Efɑdɑimmu kɔbɛɛ bekɛ Sedeɔ̃ɔ̃ kɛ dɔ̀: Dɛ̀ yĩmɛ kɑ̀ɑ í ti yu kɛ̀ ti bo dɑ teennɛ̀ mudoò, kɛ kɔ̀tɛ ɑmɑ́ɑ̀ kɛ dokɛ́nɛ̀ Mɑndiyɑ̃ɑ̃bɛ?
\p Kɛ̀ bɛ̀ nhò kpɑ̀nnɛ̀ mɛdiɛ̀. 
\v 2 Kɛ̀ Sedeɔ̃ɔ̃ bɛ̀ tɛ̃̀ńnɛ́ kɛ dɔ̀: N dɔ̀ɔ̀ dɛ̀ bɑ́ɑ́ nɑ kɛ́tuɔkɛ di kpɛrɛ. Díndi Efɑdɑimmu kɔbɛ di dɔ̀ɔ̀ dɛ̀ pɛ̃ɛ̃tɛ́mu ti dɔ̀ɔ̀ dɛ̀ tínti Abiesɛɛ nɑɑ̀mùnkù kɔbɛ. 
\v 3 Kuyie nhɑ̃nnɛ́ díì nɔu miɛkɛ Mɑndiyɑ̃ɑ̃bɛ kpɑ̀ɑ̀tìbɛ̀ Odɛbu nɛ̀ Sɛbu kɛ̀ di bɛ̀ pĩ, n nɛ́ dɔ̀ɔ̀ bɑ kɛ dɛ̀ pɛ̃ɛ̃tɛ́ mɛmmɛ.
\p Sedeɔ̃ɔ̃ ti mbɛ́i nkɛ̀ Efɑdɑimmu kɔbɛ miɛkɛɛ do.
\s1 Sedeɔ̃ɔ̃ domɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ kɔbɛ
\p
\v 4 Sedeɔ̃ɔ̃ nɛ̀ o nìtìbɛ̀ sikɔusìtɑ̃ɑ̃ti (300) kɛ̀ bɛ̀ɛ tuɔkɛ Suditɛ̃ɛ̃, kóò sèńtɛ́ kɛ sɔ̃́ mbɛ̀ ɔ̀u, kɛ mɛ mbɑɑ nsɔkɛ́ kɛ bɛtì bɛ dootitɔbɛ̀, 
\v 5 kɛ́tuɔkɛ Sukɔti ɛì kɛ̀ Sedeɔ̃ɔ̃ nɑ́kɛ́ dɛ kó dihɛì kɔbɛ kɛ dɔ̀: Pɑ̃nɛ̀ n nìtìbɛ̀ mudiì bɛ̀ ɔ̀umu, m bɛtì Mɑndiyɑ̃ɑ̃bɛ kpɑ̀ɑ̀tìbɛ̀ mbɛ, Sebɑ nɛ̀ Sɑdimunɑ.
\p
\v 6 Kɛ̀ dihɛì kó bɛkótíbɛ̀ɛ ò tɛ̃̀ńnɛ́ kɛ dɔ̀: Ti di pɑ̃ mudiì bɑ nkpɛ́í? A nɑmu Sebɑ nɛ̀ Sɑdimunɑ kɛ dèèɑ̀? 
\v 7 Kɛ̀ Sedeɔ̃ɔ̃ bɛ̀ tɛ̃̀ńnɛ́ kɛ dɔ̀: Ti Yiɛ̀ nKuyie mbo n duɔ́ ndìì mɔ̀nnì Sebɑ nɛ̀ Sɑdimunɑ m bo di puotínɛ̀ dikpɑ́ɑ̀ kó tipotì, kɛ́ dí yɔ́rí ipo.
\p
\v 8 Kɛ̀ Sedeɔ̃ɔ̃ ítɛ́ dɛborɛ̀ kɛ́kɔtɛ Penniyɛɛdi, kɛ́ bɛ̀ mɔɔ ò bɑɑ do mɔɔ mɛ̀ɛ̀ botí Sukɔti ɛì kɔbɛ, kɛ̀ bɛ̀ɛ ò tɛ̃̀ńnɛ́ bɛtɔbɛ̀ bɑɑ do ò tɛ̃̀ńnɛ́ tì. 
\v 9 Kɛ̀ Sedeɔ̃ɔ̃ bɛ̀ nɑ̀kɛ́ kɛ dɔ̀: Kɛ̀ n nɑ n dootitɔbɛ̀ kɛ kũntiní n yóó pɔntɛmu dihɛì kó ditou kperì dii.
\p
\v 10 Sebɑ nɛ̀ Sɑdimunɑ bɛ̀ do bo Kɑɑdikɔɔdi nwe, nɛ̀ bɛhɑ̃ɑ̃pɔ̀mbɛ̀ tɛkɔupípíítɛ̀ nɛ̀ sikɔupísìnùmmù (15000), kɛ yɛ̃́ bɛ̀ do kùɔmɛ̀ diyiè yìɛ̀ní kɛ̀ɛ̀ bíɛ́kɛ̀ kó bɛhɑ̃ɑ̃pɔ̀mbɛ̀ tɛkɔupíkɔ̀ùtɛ̀ nɛ̀ sikɔupípísìdɛ́ (120000) kɛ̀ bɛɛ̀ nsúɔ́. 
\v 11 Kɛ̀ Sedeɔ̃ɔ̃ tũnnɛ bɛnɑɑcɛ̃mbɛ keri fɛ̀ɛ̀ cìɛ̀fɛ̀ fɛ̀ɛ̀ yìɛ̀nɛ̀ Nɔbɑ nɛ̀ Yokoɑ diyiè yìɛ̀ní kɛ̀ɛ̀ bíɛ́kɛ̀, kɛ́do o dootitɔbɛ̀ kɛ sɔ̃́ mbɛ yɛ̀mmɛ̀ dò mbɛ̀ sɔ̀ri kòò mɔù í yóó bɛ̀ yɑ̀. 
\v 12 Mɑndiyɑ̃ɑ̃ kpɑ̀ɑ̀tìbɛ̀ bɛdɛ́ Sebɑ nɛ̀ Sɑdimunɑ kɛ̀ bɛ̀ɛ cokɛ́. Kɛ̀ Sedeɔ̃ɔ̃ bɛ bɛ̀ti kɛ́pĩ́ nkɛ̀ bɛ̀ɛ nɑ bɛhɑ̃ɑ̃pɔ̀mbɛ̀ bɛmɔu kɛ́ bɛ̀ ɑutɛ́.
\p
\v 13 Kɛ̀ Sedeɔ̃ɔ̃ nkũntiní mudoò kɛ́yɛ̀nní Edɛsi tennì, 
\v 14 kɛ́pĩ́ nSukɔti kóo dɑpɑ̀ɑ̀ mmɔù kóò bekɛ kòo ò wɑ̃̀ri bɛkpɑ̀ɑ̀tìbɛ̀ nɛ̀ bɛhɛikɛ̀nkótíbɛ̀ yètɛ̀ kɛ̀ bɛ̀ ḿbo sipísìyiekɛ̀ nɛ̀ bɛ̀yiekɛ̀. 
\v 15 Dɛ kó difɔ̃nkúò kɛ̀ Sedeɔ̃ɔ̃ kɔtɛ kɛ́yɑ̀ Sukɔti ɛì kɔbɛ kɛ́ bɛ̀ bekɛ kɛ dɔ̀: Di kpɑɑ́ yɛ̃́ di sòò n sɑ̃̀ɑ̃́mmɛ̀ kɛ tú n nɑmu Sebɑ nɛ̀ Sɑdimunɑ kɛ dèè, kɛ tú n nìtìbɛ̀ ɔ̀u kɛ̀ di bɛ̀ pɑ̃ mudiɑ̀? M mɛ ndi tɔnímu Sebɑ nɛ̀ Sɑdimunɑ.
\p
\v 16 Mɛm̀mɛ ò tùótɛ́mɛ̀ dikpɑ́ɑ̀ kó tipotì nɛ̀ ipo kɛ́puotínɛ̀ Sukɔti ɛì kó bɛkótíbɛ̀, 
\v 17 kɛ́deè kɛ́pɔntɛ Penniyɛɛdi ɛì kó ditou kperì, kɛ́kuɔ dɛ kó dihɛì kɔbɛ.
\p
\v 18 Dɛ kó difɔ̃nkúò kɛ̀ Sedeɔ̃ɔ̃ bekɛ́ Sebɑ nɛ̀ Sɑdimunɑ kɛ dɔ̀: Di do kùɔ bɛ̀ɛ̀ nìtìbɛ̀ Tɑbɔɔ bɛ̀ do dòmmɛ? Kɛ̀ bɛ̀ɛ ò tɛ̃̀ńnɛ́ kɛ dɔ̀: Bɛ̀ do dɑ dònnɛ̀mu kɛ dò nyikpɑ̀ɑ̀tìbí. 
\v 19 Kɛ̀ Sedeɔ̃ɔ̃ bɛ̀ tɛ̃̀ńnɛ́ kɛ dɔ̀: N tebìí nsi ti yɔ̃ òmɑ́ɑ̀, kɛ́deè kɛ́bɛ́i nkɛ dɔ̀: Ti Yiɛ̀ nKuyie mbomu kɛ̀ m pɑ̀rìkɛ̀ nɛ̀ ku yètìrì kɛ tú kɛ̀ di do mbɛ̀ yóu kɛ̀ bɛ̀ nfòù n nɑ bɑ́ ndi kùɔ.
\p
\v 20 Ò bɛ́i mɛm̀mɛ kɛ́deè kɛ́pɛ́i nho kóo po Yetɛɛ kɛ dɔ̀: A pĩ́ mbɑ? Kuɔ bɛ̀!
\p Odɑpɑ̀ɑ̀ mmɛ nyí ndɑ̀ɑ́tí ò do kpɑɑ́ bɛmmu. Kɛ̀ dɛɛ̀ nte kòo yɔtɛ. 
\v 21 Sebɑ nɛ̀ Sɑdimunɑ kɛ̀ bɛ̀ɛ nɑ́kɛ́ Sedeɔ̃ɔ̃ kɛ dɔ̀: Ti kuɔ ɑ mɔ́mmuɔ, bɑ́ wè nɛ̀ o kó dikɔ̃m̀bùɔ̀ ndi.
\p Kɛ̀ Sedeɔ̃ɔ̃ ítɛ́ kɛ́ bɛ̀ kùɔ kɛ́túótɛ́ bɛ yòyóbɛ̀ do dúúkú tìì sɑ̃tì.
\s1 Sedeɔ̃ɔ̃ yetɛmɛ̀ tikpɑ̀tì
\p
\v 22 Kɛ̀ Isidɑyɛɛribɛɛ nɑ́kɛ́ Sedeɔ̃ɔ̃ kɛ dɔ̀: Fɔ̃́ɔ̃̀ yó nti bɑkɛ́, ɑ kó difɔ̃nkúò kɑ̀ɑ birɛɛ sɔɔtɛ́ kɛ́ nti bɑkɛ́, kɑ̀ɑ yɑɑ̀birɛɛ sɔɔtɛ́ kɛ́ nti bɑkɛ́. Fɔ̃́ɔ̃̀ ti dɛɛtɛ́nɛ̀ Mɑndiyɑ̃ɑ̃bɛ. 
\v 23 Kɛ̀ Sedeɔ̃ɔ̃ bɛ̀ tɛ̃̀ńnɛ́ kɛ dɔ̀: N yí yó ndi bɑkɛ́, m birɛ mɛ nyí yó ndi bɑkɛ́ ti Yiɛ̀ nKuyie nkuù yó ndi bɑkɛ́.
\p
\v 24 Dɛ kó difɔ̃nkúò kɛ́ bɛ̀ nɑ̀kɛ́ kɛ dɔ̀: N yóó di mɔɔ dɛ̀mɑrɛ̀ ndɛ, bɑ́ wè di miɛkɛ ò m pɑ̃ mumɑ́mɑ́ɑ́ ntinɛntì di ɛíní tì miɛkɛ.
\p Isimɑyɛɛribɛ do mɔkɛ dɛsɔɔmɑ́mɑ́nnɛ̀ ndɛ. Bɛ kó mɛborimɛ do mmɛ. 
\v 25 Kɛ̀ bɛ̀ɛ yienko kɛ dɔ̀: Ti bo dɛ̀ ndɑ pɑ̃. Kɛ̀ bɛ̀ɛ pitɛ́ kuyɑ̀ɑ̀kù kɛtenkɛ̀ kɛ́ndɛì bɛ̀ ɛí ntìì nɛntì miɛkɛ mumɑ́mɑ́ɑ́ mùmɑ́ɑ̀ mùmɑ́ɑ̀, kɛ dɔunko ku ĩ́nkɛ̀. 
\v 26 Dɛsɔɔmɑ́mɑ́nnɛ̀ bɛ̀ ò pɑ̃mmú dɛ̀, dɛ kó kucɛ̃́ɛ̃́kù do bo cìdóòbɛ̀ sipísìdɛ́ ndi, kɛ̀ bɛ̀ɛ yíɛ́ kóò pɑ̃mmú yɛtootɔ̃rɛ nɛ̀ tiyɑɑ̀sɑ̀ɑ̀tì tiwũɔ̃tì, Mɑndiyɑ̃ɑ̃bɛ kpɑ̀ɑ̀tìbɛ̀ do dɑɑti tì nɛ̀ tisɑ̃tì yòyóbɛ̀ do duuku tì. 
\v 27 Kɛ̀ Sedeɔ̃ɔ̃ túótɛ́ dɛ kó mɛsɔɔ nkɛ́dɔɔ̀nɛ̀ tɛtenkɑɑnìtɛ̀ kɛ́ tɛ̀ còńnɛ́ Ofidɑɑ o ɛì miɛkɛ, kɛ̀ Isidɑyɛɛribɛ mbɑ́ɑ́ ndɛ kó tɛtenkɑɑnìtɛ̀ kɛ̀ tɛ̀ɛ nɑɑ́ ndidíìntɑ̃́rì Sedeɔ̃ɔ̃ nɛ̀ o cĩ́ɛ̃̀tɛ̀ kɔbɛ kpɛ́í.
\p
\v 28 Mɛm̀mɛ Isidɑyɛɛribɛ nɑmɛ̀ Mɑndiyɑ̃ɑ̃bɛ, kɛ́ bɛ̀ bɔ mbɑ́ bɛ̀ tɛ̃́nkɛ í nnɑ kɛ ìtɛ́, kɛ̀ Isidɑyɛɛribɛ ɛì ḿbo mɛom̀pùmɛ̀ miɛkɛ kɛ dɔ̀ yɛbie nsipísìnɑ̀ɑ̀, Sedeɔ̃ɔ̃ fòmmu mumɔu miɛkɛ.
\p
\v 29 Dɛ kó difɔ̃nkúò kɛ̀ Soɑsi birɛ Yedubɑɑdi kò nkɛ́mbo o cĩ́ɛ̃̀tɛ̀. 
\v 30 Sedeɔ̃ɔ̃ do mɔkɛ initidɑbí sipísìyiekɛ̀ ndi ò pɛitɛ́mɛ̀, o pobɛ̀ do í sénní. 
\v 31 Kòo pocɛ̃nnì dìì bo Sisɛmmu kɛ̀ dìi ò pɛitɛ́ dɛnitidɑbirɛ kòo dɛ̀ yu kɛ dɔ̀: Abimɛdɛki. 
\v 32 Soɑsi birɛ Sedeɔ̃ɔ̃ do kòtɛ́mu mɛdiɛ̀ nkɛ̀ mɛborimɛ nhò nɑɑti kòò yɑ̀ɑ kúnɛ̀, kɛ̀ bɛ̀ɛ ò kũnnɛ́ o cicɛ Soɑsi fɔ̃ti, Ofidɑɑ Abiesɛɛ tempɛ̃ mmiɛkɛ.
\s1 Isidɑyɛɛribɛ wɛ̃̀tɛ kɛ domɛ̀
\p
\v 33 Sedeɔ̃ɔ̃ ku dìì mɔ̀nnì kɛ̀ Isidɑyɛɛribɛɛ wɛ̃tɛ kɛ́fíé yɛbɔkɛ̀ Bɑɑdibɛ kɛ́túótɛ́ dibɔɔ̀ Bɑɑdi Bediti kɛ́dɔɔ̀ bɛ kó kuyie. 
\v 34 Isidɑyɛɛribɛ tɛ̃́nkɛ í ndenniní ti Yiɛ̀ nKuyie nkpɛ́í kùù do bɛ̀ dɛɛtɛ́nɛ̀ bɛ dootitɔbɛ̀ bɛ̀ɛ̀ bɛ̀ fitɛ́. 
\v 35 Bɛ̀ tɛ̃́nkɛ í ndɑkɛ Yedubɑɑdi Sedeɔ̃ɔ̃ cĩ́ɛ̃̀tɛ̀ kpɛ́í, ò do bɛ̀ dɔ̀ɔ̀ mɛ̀ɛ̀ sɑ̀ɑ̀ ndo dò mbɛ̀ ndɑkɛmu tɛ kpɛ́í.
\c 9
\s1 Bɛ̀ pĩ̀ḿmɛ̀ Abimɛdɛki tikpɑ̀tì Sisɛmmu
\p
\v 1 Kɛ̀ Yedubɑɑdi birɛ Abimɛdɛkii kɔtɛ Sisɛmmu o mɑnnìkù kɛ́nɑ́kɛ́ o yɔ̃ tɑ̃bɛ̀ kó kunɑɑ̀mùnkù kumɔu kɛ dɔ̀: 
\v 2 Bekɛ́nɛ̀ Sisɛmmu ɛì kó bɛkótíbɛ̀ kɛ dɔ̀: Bɛ̀ dɔ́ Yedubɑɑdi bí sipísìyiekɛ̀ bo mbɛ̀ bɑkɛ́mɑ̀ɑ̀, kɛ̀ bɛ̀ dɔ́ onìtì òmɑ́ɑ̀ bo mbɛ̀ bɑkɛ́mɛ̀? Bɛ̀ nɛ́ bɑ́ɑ́ yɛ̃̀ n tumɛ̀ bɛ cĩ́ɛ̃̀tɛ̀ kou nwe!
\p
\v 3 Kɛ̀ bɛ̀ɛ kɔtɛ kɛ́ tì nɑ̀kɛ́ Sisɛmmu ɛì kó bɛkótíbɛ̀ kɛ̀ bɛ̀ɛ tɑ̃ɑ̃tɛ́ Abimɛdɛki ò tu mɛ̀ɛ̀ kpɛ́í mbɛ kou. 
\v 4 Kɛ̀ bɛ̀ɛ dɛitɛ Bɑɑdi-Bediti kó idíítí miɛkɛ mɛdítíbii nsipísìyiekɛ̀ kóò duɔ́, nkòo túótɛ́ dɛ kó idíítí kɛ́yietí bɛnititetìbɛ̀ nɛ̀ bɛcièmbɛ̀ kɛ̀ bɛ̀ɛ ò nɛinɛ̀.
\p
\v 5 Kɛ̀ bɛ̀ɛ kɔtɛ Ofidɑɑ o cicɛ Yedubɑɑdi cĩ́ɛ̃̀tɛ̀, kɛ́kuɔ o bí sipísìyiekɛ̀ dimɔ̀nnì dìmɑ́ɑ̀ miɛkɛ, kòo sɑ́m̀pɔ́ù Yotɑmmu weè mɑ́ɑ̀ nɑ kɛ́sɔri kɛ́yentɛ́. 
\v 6 Sisɛmmu ɛì kó bɛkótíbɛ̀ nɛ̀ dihɛì kɔbɛ nɛ̀ Bɛti-Midoo kɔbɛ kɛ̀ bɛ̀ɛ tíí nkɛ́kɔtɛ Sisɛmmu kó mutie borɛ̀ ditɑ̃rì còḿmú dɛ̀, bɛ̀ dɛ mpĩ nhAbimɛdɛki tikpɑ̀tì.
\s1 Yotɑmmu kó dinɑ́ɑǹhɑ̃ntirì
\p
\v 7 Yotɑmmu tì kèè dìì mɔ̀nnì kɛ́dekɛ Kɑrisimmu tɑ̃rì, kɛ́pĩɛ̃kɛ́ nɛ̀ o wɛ̃rímú mumɔu kɛ dɔ̀: Sisɛmmu ɛì kɔbɛ, n kéntɛ́nɛ̀ kɛ̀ Kuyie ndí kéntɛ́!
\p
\v 8 Dɛtie ndɛɛ̀ do yɛ̃ ndɛ̀ dɔ́ okpɑ̀ɑ̀tì, kɛ́nɑ́kɛ́ odìfíè kɛ dɔ̀: Á nti bɑkɛ́. 
\v 9 Kɛ̀ odìfíè dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ kɛ̀ bɛ̀ diinɛ̀ mɛkùɔ̀ yɛbɔkɛ̀ nɛ̀ bɛnìtìbɛ̀ dɛ̀ dɔ́mɛ̀, kɛ́kɔtɛ kɛ́ntú m bɑkɛ́ dɛtiennɑɑ̀? 
\v 10 Kɛ̀ dɛtie nnɑ́kɛ́ fìkíè kɛ dɔ̀: Fɔ̃́ nní nti bɑkɛ́! 
\v 11 Kɛ̀ fìkíè dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ yɛ̀ɛ̀ wɛ̀ɛ̀ti kɛ́kɔtɛ kɛ́ntú m bɑkɛ́ dɛtiennɑɑ̀? 
\v 12 Kɛ̀ dɛ̀ɛ sɔɔtɛ́ kɛ́nɑ́kɛ́ fínyĩ̀ kɛ dɔ̀: Fɔ̃́ ntũ nní nti bɑkɛ́. 
\v 13 Kɛ̀ fínyĩ̀ĩ dɛ̀ tɛ̃̀ńnɛ́ kɛ dɔ̀: M bo yóu m bo mpɛímɛ̀ yɛbɛ mɛnɑɑ̀ kpɛyɛ yɛbɔkɛ̀ nɛ̀ bɛnìtìbɛ̀ dɛ̀ dɔ́mɛ̀, kɛ́kɔtɛ kɛ́ntú m bɑkɛ́ dɛtiennɑɑ̀? 
\v 14 Kɛ̀ dɛtie nyóu kɛ́wɛ̃nnɛ́ kɛ́nɑ́kɛ́ tipotì kɛ dɔ̀: Fɔ̃́ nni nti bɑkɛ́! 
\v 15 Kɛ̀ tipotìi dɛ̀ tɛ̃̀ńnɛ́ kɛ dɔ̀: Kɛ̀ di mɛ̀nkɛ dɔ́mu m bo ntúmɛ̀ di kóo kpɑ̀ɑ̀tì kɔtɛnɛ̀ní kɛ́ndíɛ́kɛ́ n kó mɛdɛ́ɛ̀. Kɛ̀ di mɛ nyetɛ muhɑ̃ɑ̃́ mbo yɛ̀nní m miɛkɛ kɛ́ di cɔ́u nkɛ́tɑunnɛ̀ dɛtie ndiɛrɛ̀ ditɑ̃rì Dimɑɑ kpɛrɛ.
\p
\v 16 Kɛ̀ Yotɑmmu nsɔkɛ́ o nɑ́ɑǹtì kɛ́bɛ́i nkɛ dɔ̀: Díndi tɑ́? Di yɛ̀mmɛ̀ í di bekùnɛ̀ di pĩ̀ḿmɛ̀ Abimɛdɛki tikpɑ̀tɑ̀ɑ̀? Di dɔ̀ɔ̀ dɛ̀ Yedubɑɑdi cĩ́ɛ̃̀tɛ̀ dɛ̀ wennimɑɑ̀? Ò di dɔ̀ɔ̀ mɛ̀ɛ̀ sɑ̀ɑ̀ ndi mɛ nhò yietɑ́ɑ̀? 
\v 17 N cicɛ do cĩ̀nnɛ o buu ndi kɛ́kpɑ ndi kpɛ́í nkɛ di dɛɛtɛ́ nɛ̀ Mɑndiyɑ̃ɑ̃bɛ. 
\v 18 Kɛ̀ di nɛ́ ìtɛ́ yíe nkɛ dokùnɛ̀ o cĩ́ɛ̃̀tɛ̀ kɛ kùɔ o bí sipísìyiekɛ̀ dimɔ̀nnì dìmɑ́ɑ̀ kɛ pĩ nho pocɛ̃mbirɛ Abimɛdɛki tikpɑ̀tì ò tu mɛ̀ɛ̀ kpɛ́í ndi kou. 
\v 19 Kɛ̀ di yɛ̀mmɛ̀ í di bekùnnɛ̀ di dɔ̀ɔ̀ dɛ̀ Yedubɑɑdi nɛ̀ o cĩ́ɛ̃̀tɛ̀ dɛ kpɛ́í ndí yɑ̀ Abimɛdɛki kó mɛsɑ̀ɑ̀ nkòo yɑ̀ di kɔ̃mɛ. 
\v 20 Kɛ̀ mɛɛ̀ dɔkɛ Abimɛdɛkii tuɔ nSisɛmmu ɛì kɔbɛ nɛ̀ Bɛti-Midoo kɔbɛ muhɑ̃ɑ̃́ nkɛ̀ bɛ̀ múnkɛɛ ò tùɔ mmuhɑ̃ɑ̃́.
\p
\v 21 Dɛ kó difɔ̃nkúò kɛ̀ Yotɑmmuu cokɛ́ kɛ́kɔtɛ kɛ́nsɔri Bedɑɑ, ò do dé o tebitɛ Abimɛdɛki nwe.
\s1 Sisɛmmu kɔbɛ yetɛmɛ̀ Abimɛdɛki kpɛti
\p
\v 22 Mɛm̀mɛ kɛ̀ Abimɛdɛki mbɑkɛ́ Isidɑyɛɛribɛ kɛ dɔ̀ yɛbie nyɛ̀tɑ̃ɑ̃ti. 
\v 23 Dɛ kó difɔ̃nkúò kɛ̀ Kuyie nduɔnní mɛyɛ̀mmɛ̀ mɛ̀ɛ̀ bo nte kɛ̀ Sisɛmmu ɛì kó bɛkótíbɛ̀ nɛ̀ Abimɛdɛki kɛ̀ bɛ̀ɛ sĩntɛ, mɛm̀mɛ kɛ̀ bɛ̀ɛ yetɛ Abimɛdɛki kpɛti. 
\v 24 Yedubɑɑdi bí sipísìyiekɛ̀ Abimɛdɛki do kùɔ ì kó kusĩ̀nkù kuù ò tùɔ̀kɛní wenwe nɛ̀ Sisɛmmu ɛì kɔbɛ. Kɛ yɛ̃́ bɛɛ̀ do ò teennɛ̀mɛ̀ kòo bɛ̀ kùɔ. 
\v 25 Mɛm̀mɛ kɛ̀ Sisɛmmu ɛì kɔbɛɛ sɔri kɛ́hoo mbɛnìtìbɛ̀ ditɑ̃rì ĩ́nkɛ̀ kɛ̀ bɛ̀ ndimmù bɛ̀ɛ̀ pɛ̃nkù dɛborɛ̀ kɛ fekù bɛ kpɛrɛ kɛ̀ Abimɛdɛkii tì kèè.
\p
\v 26 Diyiè mɑrì kɛ̀ Ebɛɛdi birɛ Kɑɑdi tuɔkɛní Sisɛmmu kɛ nɛínɛ̀ o tebìí. Kɛ̀ Sisɛmmu ɛì kɔbɛ bɛmɔu ò duɔ́ mbɛ yɛ̀mmɛ̀, 
\v 27 kɛ́nkũɔ̃tì bɛ pɑɑ, kɛ́tɔ̃ũ fínyĩ̀ kó yɛbɛ, bɛ̀ dɔ̀ɔ̀rinɛ̀ yɛ̀ mɛnɑɑ̀, kɛ yɛ̀ nìú kɛ́dɔɔ̀ dibɑnni, kɛ́kɔtɛ bɛ kó dibɔɔ̀ tou kɛ́nyo nkɛ yɔ̃̀ nkɛ sɑ̃́ɑ̃́ nhAbimɛdɛki. 
\v 28 Dɛ mɔ̀nnì kɛ̀ Ebɛɛdi birɛ Kɑɑdi bɛ̀ bekɛ kɛ dɔ̀: Abimɛdɛki tu we kɛ̀ weè bo mbɑkɛ́ Sisɛmmu kɛ̀ ti ò bùɔ́? Yedubɑɑdi birɛ nɛ̀ o ɑ̃ɑ̃pɔ̀nkótì Sebuudi bɛɛ̀ dò nkɛ́mbúɔ́, Amɔɔ ɛì kɔbɛ bɛɛ̀ te Sisɛmmu, ti bo nhò bùɔ́ bɑ nkpɛ́í? 
\v 29 Kɛ̀ Ebɛɛri birɛ Kɑɑrii sɔɔtɛ́ kɛ dɔ̀: Kɛ̀ Sisɛmmu ɛì kɔbɛ do bo yie nkɛ́ n tũnnɛ n nɑ mbɔ nhAbimɛdɛki, n nɑ nhò nɑ̀kɛ́ kɛ dɔ̀: Fɔ̃́ nnɛ̀ ɑ ɑ̃ɑ̃pɔ̀mbɛ̀ bɑ́ɑ́tínɛ̀ kɛ̀ ti kpɑ!
\p
\v 30 Sebuudi weè do tú dɛ kó dihɛì kóo kùmɑ̀ndɑ́ɑ̀, kɛ́keè Ebɛɛdi birɛ Kɑɑdi nɑ̀ɑ́ ntì kɛ̀ dɛ̀ɛ ò yonkɛ. 
\v 31 Kòò tɔ̃ mbɛnìtìbɛ̀ disɔ̀rì kɛ̀ bɛ̀ɛ nɑ́kɛ́ Abimɛdɛki Ebɛɛdi birɛ Kɑɑdi tùɔ̀kɛnímɛ̀ kɛ sukii bɛnìtìbɛ̀ kɛ̀ bɛ̀ bo ò bɔ. 
\v 32 Kòo yíɛ́ kòo nùù dɔ̀ nɛ̀ dɛ kpɛ́í nwèe ítɛ́ kɛyènkɛ̀ nɛ̀ o kó bɛnìtìbɛ̀ kɛ́kɔtɛ dikpɑ́ɑ̀ kɛ́nhokɛ. 
\v 33 Kɛ̀ bɛ̀ɛ pikɛ yɛ̀ dikṹnweńnì sɛ̀ì kɛ́do dihɛì, kɛ̀ bɛ̀ yɛ̀nní kɛ bo ò dokɛ́nɛ̀ wèe bɛ̀ dɔ̀ɔ̀ ò dɔ́mɛ̀.
\p
\v 34 Mɛm̀mɛ Abimɛdɛki nɛ̀ o kɔbɛ kɛ̀ bɛ̀ɛ ítɛ́ kɛyènkɛ̀ kɛ́totɛ́ yɛtĩ̀rɛ̀ yɛ̀nɑ̀ɑ̀, kɛ́kɔtɛ kɛ́nhokɛ kɛ tɔ́kɛ́nɛ̀ Sisɛmmu. 
\v 35 Ebɛɛdi birɛ Kɑɑdi yɛ̀nní dìì mɔ̀nnì nɛ̀ o kɔbɛ, kɛ cómmɔ́ɔ dihɛì kó dibòrì, Abimɛdɛki nɛ̀ o kɔbɛ kɛ̀ bɛ̀ɛ ootɛní. 
\v 36 Kɑɑdi yɑ̀ dìì mɔ̀nnì ditĩ̀nnì kɛ́nɑ́kɛ́ Sebuudi kɛ dɔ̀: Dihɑ̃ɑ̃pɔ̀ntĩ̀nnì mɑrì diì cutiní ditɑ̃rì kɛ̀ Sebuudii ò tɛ̃̀ńnɛ́ kɛ dɔ̀: Ditɑ̃rì fènkù nku ɑ wúómmɛ̀ kɛ tú bɛnìtìbɛ̀.
\p
\v 37 Kɛ̀ Kɑɑdi nyetíróo kɛ tú, bɛnìtìbɛ̀ mbɛ kɛ̀ bɛ̀ cutiní ditɑ̃rì kɛ̀ bɛtɔbɛ̀ kèríní Mubɔɔtie mbíɛ́kɛ̀.
\p
\v 38 Kɛ̀ Sebuudii ò tɛ̃̀ńnɛ́ kɛ dɔ̀: Fɔ̃́ɔ̃̀ bɑɑ do nɑ́ɑ́ nkɛ tú Abimɛdɛki tu we kɛ̀ weè bo nti bɑkɑ́ɑ̀? A do sènkɛ̀rì wè weè tùɔ̀kɛní nɛ̀ o nìtìbɛ̀. Kɔtɛ kóò dokɛ́nɛ̀.
\p
\v 39 Mɛm̀mɛ kɛ̀ Kɑɑdi bɑ́ɑ́tí kɛ́niitɛ́ Sisɛmmu ɛì kɔbɛ kɛ̀ bɛ̀ bo dokɛ́nɛ̀ Abimɛdɛki. 
\v 40 Kɛ̀ Abimɛdɛki mbɛ bɛ̀tì kɛ̀ bɛ̀ɛ cokɛ́ kòo mbɛ̀ kɔ̀ùtì kɛ bií kɑ̃́ɑ̃́ ndihɛì kó dibòrì. 
\v 41 Mɛm̀mɛ kòo mbo Adumɑ kɛ̀ Sebuudi bɛ̀ti Kɑɑdi nɛ̀ o kɔbɛ bɑ́ bɛ̀ í nnɑ kɛ́mbo Sisɛmmu.
\p
\v 42 Kɛ̀ dɛ̀ɛ wentɛ́ kɛ̀ Sisɛmmu ɛì kɔbɛɛ yɛ̀ kɛ bo dokɛ́nɛ̀ Abimɛdɛki. 
\v 43 Kòo tì kèè kɛ́túótɛ́ o nìtìbɛ̀ kɛ́ bɛ̀ totɛ́ yɛtĩ̀rɛ̀ yɛ̀tɑ̃ɑ̃ti kɛ̀ bɛ̀ɛ kɔtɛ kɛ́nhokɛ, kɛ̀ bɛ̀ nyɛtìní dihɛì kɛ̀ bɛ̀ɛ bɛ̀ potɛ́. 
\v 44 Abimɛdɛki nɛ̀ o kɔbɛ kɛ̀ bɛ̀ɛ cɑ̃rikɛ kɛ́bɑɑ dihɛì kó dibòrì kɛ̀ yɛtĩ̀rɛ̀ tɛyɛ̀ yɛ̀dɛ́ɛ̀ yɛ̀ɛ̀ kpɑɑ́, kɛ̀ yɛnyɛ mɛ ntó puotì dikpɑ́ɑ̀ kɔbɛ kɛ kɔù. 
\v 45 Kɛ̀ Abimɛdɛki ntṹṹ kɛ́nkuuri dihɛì kɛ́ di pɔ̀ntɛ pɑ́íí kɛ́kuɔ di nìtìbɛ̀, kɛ́deè kɛ́ dì yɑɑ́ mukɔ́kúɔ́.
\p
\v 46 Mikidɑdi Sisɛmmu ɛì kɔbɛ tì kèè dìì mɔ̀nnì kɛ́kɔtɛ kɛ́tɑ dibɔɔ̀ Ɛdi-Bediti tɑ̃dènkù. 
\v 47 Kɛ̀ bɛ̀ɛ nɑ́kɛ́ Abimɛdɛki Mikidɑdi-Sisɛmmu ɛì kɔbɛ tìímmɛ̀ dɛborɛ̀. 
\v 48 Kòo túótɛ́ o pĩɛ̃tɛ̀ kɛ́dekɛ Sɑdimɔɔ tɑ̃rì, kɛ́kɔ̃ṹ kudɔú kɛ́buutɛ́, kɛ́nɑ́kɛ́ o nìtìbɛ̀ kɛ dɔ̀: Dɔɔ̀nɛ̀ n dɔ̀ɔ̀mɛ̀. 
\v 49 Bɑ́ wè kòo kɔ̃ṹ kudɔú kɛ́buutɛ́ kóò tũnnɛ kɛ̀ bɛ̀ɛ kɔtɛ kɛ́ ì còú mbɛ̀ bo kùù tɑ̃dènkù kɛ́cɔ́u nkɛ̀ dɛ̀ɛ cɔ́útɛ́ bɛ̀ɛ̀ bo dɛ miɛkɛ. Bɛ̀ bo ntùɔ̀kɛ tɛkɔupíítɛ̀ (1000), bɛnitidɑɑbɛ̀ nɛ̀ bɛnitipòbɛ̀.
\s1 Abimɛdɛki kumɛ̀
\p
\v 50 Dɛ kó difɔ̃nkúò kɛ̀ Abimɛdɛkii kɔtɛ kɛ́do Tebɛsi ɛì kɔbɛ kɛ́ bɛ̀ nɑ kɛ́ dì fìètɛ. 
\v 51 Ditou kperì mɑrì diì do bo dɛ kó dihɛì cuokɛ̀, kɛ mummu kɛ̀ bɛ̀ɛ di kpetínnɛ́ kɛ́dekɛ kudɑ̀nkù, bɛnìtìbɛ̀ bɛmɔu, bɛhɛikɛ̀nkótíbɛ̀ nɛ̀ bɛnitidɑɑbɛ̀ nɛ̀ bɛnitipòbɛ̀. 
\v 52 Kɛ̀ Abimɛdɛkii kɔtoo kɛ bo bɛ̀ pi, kɛ́tɔ́ɔ́nko ditou kó dibòrì borɛ̀ kɛ bo dì cɔ́u. 
\v 53 Dɛndɛ onitipòkù mɔù bɔntɛ́nímɛ̀ dinɑ̀ɑ̀ kɛ́bɔ́tɛ́ o yuu kɛ́pɔntɛ. 
\v 54 Mɛm̀mɛ Abimɛdɛki pɛ́immɛ̀ odɑpɑ̀ɑ̀ nwèè tɔ o kpɑ̀rìnɛntì kɛ dɔ̀: Kpɑtɛ ɑ siè kɛ́ n kuɔ bɛ̀ yɑ̀ɑ̀ bo nnɑ́ɑ́ nkɛ tú onitipòkù weè n kùɔ.
\p Kòo kóo tɔ̃ntìi ò kũ̀ṹ disiè kòo kú. 
\v 55 Isidɑyɛɛribɛ yɑ̀ dìì mɔ̀nnì Abimɛdɛki kumɛ̀ bɑ́ wè kòo kò nho cĩ́ɛ̃̀tɛ̀.
\p
\v 56 Mɛm̀mɛ Kuyie nyietímɛ̀ Abimɛdɛki mɛyɛi nhò dɔ̀ɔ̀mɛ̀ o cicɛ kɛ kùɔ o tebìí sipísìyiekɛ̀. 
\v 57 Sisɛmmu ɛì kɔbɛ kó kuyonku kpɛ́í ndo te kɛ̀ bɛ̀ɛ yɑ̀ mɛyɛi nYedubɑɑdi birɛ Yotɑmmu do yɛ̃ mmɛ̀ɛ̀ yóó bɛ̀ tùɔ̀kɛní, dɛmɔu kɛ̀ dɛ̀ɛ bɛ̀ tùɔ̀kɛní.
\c 10
\s1 Todɑɑ
\p
\v 1 Abimɛdɛki ku dìì mɔ̀nnì kɛ̀ Puɑ birɛ Todɑɑ, Dodo yɑɑ̀birɛ weè ò cɔutɛ́ kɛ́dɛɛtɛ́ Isidɑyɛɛribɛ. Todɑɑ do tú Isɑkɑɑ nɑɑ̀mùnkù kou nwe kɛ bo Sɑmii Efɑdɑimmu tɑ̃rì ĩ́nkɛ̀. 
\v 2 Kòo nni Isidɑyɛɛribɛ kɛ dɔ̀ yɛbie nsipísìdɛ́ nɛ̀ yɛ̀tɑ̃ɑ̃ti kɛ́kú kɛ̀ bɛ̀ɛ ò kũnnɛ́ Sɑmii.
\s1 Yɑii
\p
\v 3 Dɛ kó difɔ̃nkúò kɛ̀ Yɑii Kɑdɑɑdi ɛì kouu ò cɔutɛ́ kɛ́mbɑkɛ́ Isidɑyɛɛribɛ kɛ dɔ̀ yɛbie nsipísìdɛ́ nɛ̀ yɛ̀dɛ́ɛ̀, 
\v 4 kɛ́mmɔkɛ initidɑbí sipísìtɑ̃ɑ̃ti kɛ̀ ì dèkù sɑ̃mmɑrímúbɛ̀ sipísìtɑ̃ɑ̃ti kɛ mɔkɛ yɛhɛkɛ̀ sipísìtɑ̃ɑ̃ti Kɑdɑɑdi tenkɛ̀ miɛkɛ. Bɛ̀ kpɑɑ́ yu dɛ kó yɛhɛkɛ̀ nɛ̀ yíenní kɛ tú Yɑii ɛkɛsí nsi. 
\v 5 Kòo kú kɛ̀ bɛ̀ɛ ò kũnnɛ́ Kɑmɔnni.
\s1 Amɔniibɛ domɛ̀ Isidɑyɛɛribɛ mudoò
\p
\v 6 Kɛ̀ Isidɑyɛɛribɛɛ wɛ̃tɛ kɛ́dɔɔ̀ ti Yiɛ̀ nKuyie nyí dɔ́ dɛ̀, kɛ́fíé yɛbɔkɛ̀ Bɑɑdibɛ nɛ̀ Asitɑditeebɛ nɛ̀ Sidii kɔbɛ kpɛyɛ nɛ̀ Sidoniibɛ kpɛyɛ nɛ̀ Mɔɑbiibɛ kpɛyɛ nɛ̀ Amɔniibɛ kpɛyɛ nɛ̀ Fidisitɛ̃ɛ̃bɛ kpɛyɛ, kɛ́yóu ti Yiɛ̀ nKuyie mbɑ́ bɛ̀ tɛ̃́nkɛ í nkù tũ. 
\v 7 Kɛ̀ ti Yiɛ̀ nKuyie mmiɛkɛ bɛ̀ pɛikɛ, kɛ̀ kùu bɛ̀ ɑ̃nnɛ́ Fidisitɛ̃ɛ̃bɛ nɛ̀ Amɔniibɛ nɔu miɛkɛ, 
\v 8 kɛ́túótɛ́ dɛ kó dimɔ̀nnì kɛ́tuɔkɛnɛ̀ yɛbie ntɛpíítɛ̀ nɛ̀ yɛ̀ni kɛ̀ bɛ̀ nfɛ̃́ũnko Isidɑyɛɛribɛ, bɛ̀ɛ̀ kó dimɑ̀ɑ̀ bo kukó nSuditɛ̃ɛ̃ yɑ́ɑ̀, Amɔriibɛ tenkɛ̀ Kɑdɑɑdi tempɛ̃ nkɛ bɛ̀ diinko mɛsémmɛ̀. 
\v 9 Kɛ̀ Amɔniibɛ séntɛ́ní Suditɛ̃ɛ̃ kɛ bo dokɛ́nɛ̀ Sudɑɑ nɛ̀ Bɛnsɑmɛɛ nɛ̀ Efɑdɑimmu bɛ nɑɑ̀mùntì kɔbɛ. Kɛ̀ Isidɑyɛɛribɛ yɛ̀mmɛ̀ɛ cɑɑ̀rɛ̀ mɛdiɛ̀. 
\v 10 Kɛ̀ bɛ̀ɛ kuɔ́nnɛ̀ ti Yiɛ̀ nKuyie nkɛ dɔ̀: Ti cɑ̀ɑ̀rɛ̀mu mɛdiɛ̀ nti dɑ yóumɛ̀ fɔ̃́ nwèè ti te, kɛ feu yɛbɔkɛ̀ Bɑɑdibɛ.
\p
\v 11-12 Kɛ̀ ti Yiɛ̀ nKuyie mbɛ̀ tɛ̃̀ńnɛ́ kɛ dɔ̀: Esibiti kɔbɛ nɛ̀ Amɔdiibɛ nɛ̀ Amɔniibɛ nɛ̀ Fidisitɛ̃ɛ̃bɛ nɛ̀ Sidoniibɛ nɛ̀ Amɑdesiibɛ nɛ̀ Mɑɔ̃ɔ̃niibɛ bɛ̀ do di fɛ̃́ũnko kɛ̀ di n kuɔ́nnɛ̀ kɛ̀ n yí di dɛɛtɑ́ɑ̀? 
\v 13 Nɛ̀ mɛmmɛ kɛ̀ di n yóu kɛ feu yɛbɔkɛ̀, dɛɛ̀ te kɛ̀ n tɛ̃́nkɛ í yóó di dɛɛtɛ́. 
\v 14 Yɛbɔkɛ̀ nyɛ di tɑ̃ɑ̃tɛ́mɛ̀, yúnɛ̀ yɛ tũnkɛ́ kɛ̀ yɛ̀ di dɛɛtɛ́nɛ̀ mɛsémmɛ̀.
\p
\v 15 Kɛ̀ Isidɑyɛɛribɛɛ tɛ̃́nnɛ́ ti Yiɛ̀ nKuyie nkɛ dɔ̀: Ti cɑ̀ɑ̀rɛ̀mu, ti í dɔ̀ɔ̀ ɑ dɔ́mɛ̀! A nɛ́ ti dɛɛtɛ́ kuu.
\p
\v 16 Bɛ̀ mɛ nyĩ kɛ́píe nyɛbɔkɛ̀, ti Yiɛ̀ nKuyie ntɛ̃́nkɛ í nnɑ kɛ bo yóu kɛ̀ bɛ̀ nsɔkɛ́ kɛ bɛ̀ fɛ̃́ũnko.
\p
\v 17 Kɛ̀ Amɔniibɛɛ tíí nkɛ́bɑ́tɛ́ Kɑdɑɑdi, kɛ̀ Isidɑyɛɛribɛ tíí nkɛ́bɑ́tɛ́ Misipɑɑ. 
\v 18 Dɛ mɔ̀nnì Kɑdɑɑdi ɛì kɔbɛ nɛ̀ bɛhɛikɛ̀nkótíbɛ̀ kɛ̀ bɛ̀ mbékú bɛtɔbɛ̀ kɛ tú: We nsɑ̀ɑ̀ bo kɔtɛ kɛ́dokɛ́nɛ̀ Amɔniibɛ? Kɛ̀ wèè bɛ̀ dokɛ́nɛ̀ weè yóó nɑɑ́ nKɑɑdɑɑdi kóo kpɑ̀ɑ̀tì.
\c 11
\s1 Sɛfutee nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 1 Onìtì mɔù weè do bo Kɑdɑɑdi kɛ̀ bɛ̀ ò yu kɛ́ tú Kɑdɑɑdi, kòo duɔ́nɛ̀ onitipòkù mɔù wèè dɔuti dɔutinɛ̀ bɛnitidɑɑbɛ̀ kɛ̀ wèè ò pɛitɛ́nɛ̀ dɛnitidɑbirɛ, kòo dɛ̀ yu kɛ dɔ̀ Sɛfutee, kòo ntú okpɑ̀rìteu mɛdiɛ̀. 
\v 2 Kɛ̀ Kɑdɑɑdi pokù múnkɛɛ ò pɛitɛ́nɛ̀ ibí kɛ̀ ìì kótɛ́ní kɛ́bɛti Sɛfutee, kóò nɑ̀kɛ́ kɛ dɔ̀: A bɑ́ɑ́ ti wɛ̃nnɛ́nɛ̀ kɛ́tiekɛ ti cicɛ kpɛrɛ ti í wɛ̃ nti yɔ̃.
\p
\v 3 Mɛm̀mɛ kɛ̀ Sɛfutee ítɛ́ kɛ́dɛ́tɛ́nɛ̀ o tebìí kɛ́kɔtɛ kɛ́mbo Tobu tempɛ̃. Kɛ̀ itookperí yɛmbɛ̀ɛ ò sɔ̃̀ńkóo kɛ̀ bɛ̀ɛ wɛ̃nnɛ́ kɛ́nkɔrì dikpɑ̀nnì.
\p
\v 4 Kɛ̀ dɛ̀ɛ yíɛ́ kɛ́mɔntoo sɑ́m̀pɔ́ kɛ̀ Amɔniibɛɛ do Isidɑyɛɛribɛ mudoò. 
\v 5 Mudoò ìtɛ́ dìì mɔ̀nnì kɛ̀ Kɑdɑɑdi ɛì kó bɛkótíbɛ̀ɛ kɔtɛ Tobu tempɛ̃ nSɛfutee wɑmmù, 
\v 6 kóò yɑ̀, kóò nɑ̀kɛ́ kɛ dɔ̀: Kɔtɛní kɛ́niitɛ́ ti kó bɛhɑ̃ɑ̃pɔ̀mbɛ̀ kɛ̀ tí nɑ kɛ́dokɛ́nɛ̀ Amɔniibɛ. 
\v 7 Kɛ̀ Sɛfutee bɛ̀ tɛ̃̀ńnɛ́ kɛ dɔ̀: Dɛ̀ í tú díì do n yetɛ kɛ́ m bɛti n cicɛ cĩ́ɛ̃̀tɑ̀ɑ̀? Dɛ̀ yĩ́mɛ kɛ̀ di tɑ mɛsémmɛ̀ miɛkɛ kɛ cokɛ́ní m bíɛ́kɛ̀?
\p
\v 8 Kɛ̀ bɛ̀ɛ ò tɛ̃̀ńnɛ́ kɛ dɔ̀: Ti kɔ̀tɛní ɑ borɛ̀ kɛ dɔ́ ɑ kɔtoo kɛ̀ tí wɛ̃nnɛ́ kɛ́dokɛ́nɛ̀ Amɔniibɛ mbɛ kɑ̀ɑ ntú ti kóo kpɑ̀ɑ̀tì kɛ́mbɑkɛ́ Kɑdɑɑdi omɔu.
\p
\v 9 Kɛ̀ Sɛfutee dɔ̀: Kɛ̀ n di nɛinɛ̀ mudoò kɛ̀ ti Yiɛ̀ nKuyie nyie nkɛ̀ m bɛ̀ nɑ, míì yó ntú di kòo kpɑ̀ɑ̀tì.
\p
\v 10 Kɛ̀ Kɑdɑɑdi kó bɛkótíbɛ̀ɛ ò nɑ̀kɛ́ kɛ dɔ̀: Ti Yiɛ̀ nKuyie nti wúómmu, tíì bɛ́i nkɛ tú ti bo dɔɔ̀ ɑ bɛ́i ntì timɔu.
\p
\v 11 Kɛ̀ Sɛfutee nɛinɛ̀ Kɑdɑɑdi ɛì kó bɛkótíbɛ̀, kɛ̀ bɛ̀ɛ ò tùótɛ́ kòo mbɑkɛ́ bɛhɑ̃ɑ̃pɔ̀mbɛ̀, kɛ̀ bɛ̀ɛ kɔtɛ Misipɑɑ kɛ̀ Sɛfutee wɛ̃tɛ kɛ́bɛ́i ti Yiɛ̀ nKuyie nyììkɛ̀ ò do nɑ̀kɛ́ tì bɛkótíbɛ̀.
\s1 Sɛfutee nɑ̀kɛ́ tì Amɔniibɛ kpɑ̀ɑ̀tì
\p
\v 12 Kɛ̀ Sɛfutee tɔ̃ nkɛ̀ bɛ̀ɛ nɑ́kɛ́ Amɔniibɛ kpɑ̀ɑ̀tì kɛ dɔ̀: Sɛfutee tu, ɔ̃̀nti bo di cuokɛ̀ fɔ̃́ nnɛ̀ we kɑ̀ɑ bɑ̀ɑ́tí kɛ bo ò do mudoò?
\p
\v 13 Kɛ̀ Amɔniibɛ kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: Isidɑyɛɛribɛ yɛ̀nní dìì mɔ̀nnì Esibiti, dɛ mɔ̀nnì ndi bɛ̀ fìètɛmɛ̀ n tenkɛ̀, kɛ́túótɛ́ Adinɔ biriku kɛ́tuɔkɛnɛ̀ kukó nSɑbɔki kɛ́tuɔkɛnɛ̀ Suditɛ̃ɛ̃ biriku. Wè tí duɔ́ nti tenkɛ̀ mɛyɔɔ̀mmɛ̀.
\p
\v 14 Kɛ̀ Sɛfutee wɛ̃tɛ kɛ́tɔ̃ mbɛtɔbɛ̀ Amɔniibɛ kpɑ̀ɑ̀tì borɛ̀. 
\v 15 Kɛ̀ bɛ̀ bo ò nɑ̀kɛ́ kɛ tú: Isidɑyɛɛribɛ do í fìètɛ Mɔɑbiibɛ nɛ̀ Amɔniibɛ tenkɛ̀ mɑkɛ̀. 
\v 16 Bɛ̀ yɛ̀nní dìì mɔ̀nnì Esibiti kɛ́tɑ dikpɑ́ɑ̀ ndi dibiri miɛkɛ, kɛ́tuɔkɛ dɑ̀mɛ́ɛ̀rì tipèntì kou, kɛ́pɛ̃ɛ̃tɛ́ kɛ́kɔtɛ Kɑdɛɛsi. 
\v 17 Bɛ̀ do dɛ mbo kɛ́tɔ̃ nkɛ̀ bɛ̀ɛ nɑ́kɛ́ Edɔmmu kóo kpɑ̀ɑ̀tì kòò bo bɛ̀ pɑ̃ kucɛ kɛ̀ bɛ̀ɛ pɛ̃ɛ̃tɛ́ o ɛì miɛkɛ, kòo yetɛ kɛ̀ bɛ̀ɛ sɔɔtɛ́ kɛ́mɔɔ Mɔɑbu kou kucɛ kòo múnkɛɛ yetɛ, kɛ̀ bɛ̀ɛ yóu kɛ́mbo Kɑdɛɛsi. 
\v 18 Bɛ̀ dɛ nyìtɛ́ kɛ́kétɛ́ dikpɑ́ɑ̀, kɛ́mpɛkɛ́nɛ̀ Edɔmmu nɛ̀ Mɔɑbu ɛkɛ̀, kɛ́tuɔkɛ Mɔɑbu ɛì diyiè yìɛ̀ní kɛ̀ɛ̀ bíɛ́kɛ̀, kɛ́bɑ́tɛ́ kukó nhAdinɔ yɑ́ɑ̀ bɛ̀ í ntɑ dihɛì. Adinɔ weè do tú Mɔɑbiibɛ tenkɛ̀ mɑ̀nku. 
\v 19 Bɛ̀ dɛ mbo kɛ́tɔ̃ nkɛ̀ bɛ̀ɛ nɑ́kɛ́ Sionni Amɔdiibɛ kpɑ̀ɑ̀tì Ɛsibonni ɛì kou kɛ dɔ̀: Isidɑyɛɛribɛ tu ɑ bɛ̀ pɑ̃ kucɛ kɛ̀ bɛ̀ɛ pɛ̃ɛ̃tɛ́ ɑ ɛì miɛkɛ, kɛ́kɔtɛ bɛ̀ kɔ̀ri kɛ̀. 
\v 20 Bɑ́ Sionni í nhò tɑ̃́, kɛ́yetɛ kɛ́tíí nho ɑ̃ɑ̃pɔ̀mbɛ̀ Yɑɑsi ɛì kɛ́bɑ́ɑ́tí kɛ́do Isidɑyɛɛribɛ mudoò. 
\v 21 Kɛ̀ ti Yiɛ̀ nKuyie nyIsidɑyɛɛribɛ tũ nkùu duɔ́ nkɛ̀ bɛ̀ɛ nɑ Sionni nɛ̀ o nìtìbɛ̀, kɛ́fietɛ o tenkɛ̀ kɛmɔu, 
\v 22 kɛ́túótɛ́ Amɔriibɛ tenkɛ̀ kɛmɔu kɛ́ketɛ́ Adinɔ kubiriku kɛ́tuɔkɛnɛ̀ kukó nYɑɑbɔku, kɛ́túótɛ́ dibiri kó dikpɑ́ɑ̀ kɛ́tuɔkɛnɛ̀ Suditɛ̃ɛ̃. 
\v 23 Ti Yiɛ̀ nKuyie ntínti Isidɑyɛɛribɛ tũ nkù, kuù duɔ́ nkɛ̀ ti fìètɛ Amɔdiibɛ tenkɛ̀ kɛ̀ fɔ̃́ nnɛ́ dɔ́ kɛ́ kɛ̀ cɔutɑ́ɑ̀? 
\v 24 A kó dibɔɔ̀ Kemɔɔsi dɑ duɔ́mmu kɛtenkɛ̀ kɑ̀ɑ kɛ̀ te. Ti Yiɛ̀ nKuyie nti duɔ́ nkɛ̀, ti kɔkɛ nkɛ, kɛ̀ ti dò nkɛ́ nkɛ̀ te. 
\v 25 A yɛ̀mmɛ̀ dò nhɑ kpeńnìnɛ̀mu Sipɔɔ birɛ Bɑdɑki Mɔɑbu ɛì kóo kpɑ̀ɑ̀tɑ̀ɑ̀? Ò í wɑmmú nɛ̀ Isidɑyɛɛribɛ dikpɑ̀nnì, ò í bɛ̀ dokɛ́nɛ̀. 
\v 26 Nɛ̀ Isidɑyɛɛribɛ bomɛ̀ Ɛsibonni ɛì nɛ̀ di pɛɛ́mmɛ̀ nɛ̀ Adowɛɛ ɛì nɛ̀ di pɛɛ́mmɛ̀ nɛ̀ Adimɔɔ pɛɛ́mmɛ̀ kpɛyɛ dɛ̀ mɔ̀kɛ yɛbie nsikɔusìtɑ̃ɑ̃ti ndi (300), dɛ̀ yĩmɛ kɛ̀ di í cɔutɛ́ dɛ kó kɛtenkɛ̀ nɛ̀ yíenní? 
\v 27 N yí dɑ cɑ̀ɑ̀rɛ̀ mùmɑmù, fɔ̃́ɔ̃̀ n wɛ̃̀ńtɛ́ kɛ n dɔ́nɛ̀ dikpɑ̀nnì. Ti Yiɛ̀ nKuyie nkuù bo ti pútɛ́ yíe ntínti Isidɑyɛɛribɛ nɛ̀ díndi Amɔniibɛ.
\p
\v 28 Kɛ̀ Amɔniibɛ kpɑ̀ɑ̀tìi yetɛ Sɛfutee nɑ̀kɛ́ tì.
\s1 Sɛfutee dɔúnnɛ̀mɛ̀ Kuyie ndinùù
\p
\v 29 Dɛ mɔ̀nnì kɛ̀ ti Yiɛ̀ nKuyie nYɑɑ́ ncútɛ́ní Sɛfutee ĩ́nkɛ̀, kòo ítɛ́ kɛ́ce nKɑdɑɑdi tempɛ̃ nyimɔu, nɛ̀ Mɑnɑnsee kpɛyi kɛ́pɛ̃ɛ̃tɛ́ kɛ́kɔtɛ Misipee kɛ́sɔɔtɛ́nɛ̀ Amɔniibɛ tenkɛ̀, 
\v 30 kɛ́dɔúnnɛ̀ ti Yiɛ̀ nKuyie ndinùù kɛ dɔ̀: Ti Yiɛ̀ nKuyie nkɑ̀ɑ duɔ́ nkɛ̀ n nɑ Amɔniibɛ, 
\v 31 m bo nkũntiní kɛ̀ wèè niitɛ́ kɛ́yɛ̀nní oketiwè n cĩ́ɛ̃̀tɛ̀ kɛ́ n co, m bo wè ndɑ pɑ̃, kɛ wè ndɑ kuɔ kɛ́tuɔ.
\p
\v 32 Mɛm̀mɛ Sɛfutee tɑmɛ̀ Amɔniibɛ tenkɛ̀ kɛ́ bɛ̀ do, kɛ̀ ti Yiɛ̀ nKuyie nduɔ́ nkòo bɛ̀ nɑ. 
\v 33 Kɛ̀ kùu ò teennɛ̀ kòo bɛ̀ potɛ́ kɛ́fietɛ yɛhɛkɛ̀ sipísìdɛ́ kɛ́túótɛ́ Adowɛɛ, dihɛì dìì tɔ̀kɛ́nɛ̀ Miditi kɛ́ntɔ kɛ́tuɔkɛnɛ̀ Abɛdi-Kedɑmimmu kɛ́ bɛ̀ ɑutɛ́ mɛdiɛ̀, kɛ̀ Amɔniibɛɛ bɔ́útɛ́ Isidɑyɛɛribɛ.
\p
\v 34 Mudoò dèè dìì mɔ̀nnì kɛ̀ Sɛfutee nkũntiní o cĩ́ɛ̃̀tɛ̀ Misipɑɑ, kòo kóo sɑpɑ̀ɑ̀ nweè yɛ̀nní kóò co kɛ bie ndibɑ̀rì kɛ ɑuti. Ò do we mmɔkɛ omɑ́ɑ̀. 
\v 35 Sɛfutee ò yɑ̀ní dìì mɔ̀nnì kɛ́kɛ̃tɛ́ o yɑ̀ɑ̀tì kɛ́kuɔ́nko kɛ dɔ̀: M birɛ ɑ cɑ̀ɑ̀rɛ̀ n yɛ̀mmɛ̀ mmɛ kɛ n kɔ̀utɛ, n dɔúnnɛ̀ ti Yiɛ̀ nKuyie nku dinùù, n tɛ̃́nkɛ í yóó nɑ kɛ́ di kpɑ̀tɛ.
\p
\v 36 Kòo kóo sɑpɑ̀ɑ̀ nhò tɛ̃̀ńnɛ́ kɛ dɔ̀: Kɑ̀ɑ dɔúnnɛ̀ ti Yiɛ̀ nKuyie ndinùù n dɔɔ̀nɛ̀ ɑ dì nkù dɔúnnɛ̀ kɛ yɛ̃ mmù kɛ yɛ̃́ kuù dɑ teennɛ̀mɛ̀ kɑ̀ɑ nɑ ɑ dootitɔbɛ̀ Amɔniibɛ, 
\v 37 kɛ́yíɛ́ kɛ́bɛ́i nkɛ dɔ̀: A nɛ́ m pɑ̃ mɛfíè mbɛtɑ̃̀ɑ̃̀bɛ̀ bɛ̀dɛ́bɛ̀ kɛ̀ n dekɛ ditɑ̃rì ĩ́nkɛ̀ nɛ̀ n dúɔ̀bɛ̀ kɛ́kɔmmú n yóó kúmɛ̀ kɛ í yĩ̀ɛ̃́tɛ́ onitidɔ̀ù.
\p
\v 38 Kɛ̀ Sɛfutee ò pɑ̃ kucɛ kòo dekɛ ditɑ̃rì nɛ̀ o dúɔ̀bɛ̀, kɛ dɔ̀ bɛtɑ̃̀ɑ̃̀bɛ̀ bɛ̀dɛ́bɛ̀, kɛ kuɔ̀ nhò yóó kúmɛ̀ kɛ í yĩ̀ɛ̃́tɛ́ onitidɔ̀ù. 
\v 39 Bɛtɑ̃̀ɑ̃̀bɛ̀ bɛ̀dɛ́bɛ̀ dèè dìì mɔ̀nnì kòo wɛ̃tɛní o cicɛ borɛ̀ kòo ò dɔ̀ɔ̀nɛ̀ ò dɔúnnɛ̀ dìì nùù ti Yiɛ̀ nKuyie. Mɛm̀mɛ ò kumɛ̀ kɛ mu nyí yĩ̀ɛ̃́tɛ́ onitidɔ̀ù. Kɛ̀ dɛ̀ nɑɑ́ nyIsidɑyɛɛribɛ kó ikuɔ́. 
\v 40 Bɑ́ dìì benni kɛ̀ bɛnitipòbɛ̀ ɔ̃ɔ̃ kɔtɛ kɛ́kɔmmú Kɑdɑɑdi kou, Sɛfutee birɛ kpɛ́í nkɛ dɔ̀ yɛwe yɛ̀nɑ̀ɑ̀.
\c 12
\s1 Efɑdɑimmu kɔbɛ kpɑnnɛ̀mɛ̀ Sɛfutee
\p
\v 1 Diyiè mɑrì kɛ̀ Efɑdɑimmu kɔbɛɛ tíí nkɛ́nɛi, kɛ́séntɛ́ kukó nkɛ́kɔtɛ Sɑfɔ̃ɔ̃, kɛ́nɑ́kɛ́ Sɛfutee kɛ dɔ̀: Dɛ̀ dòmmɛ kɑ̀ɑ kɔ̀tɛ kɛ dokɛ́nɛ̀ Amɔniibɛ bɑ́ ɑ í ti yu kɛ̀ ti bo dɑ teennɛ̀? Ti yóó cɔ́ummu ɑ cĩ́ɛ̃̀tɛ̀ kɛ́ dɑ wɛ̃nnɛ́nɛ̀.
\p
\v 2 Kɛ̀ Sɛfutee bɛ̀ tɛ̃̀ńnɛ́ kɛ dɔ̀: Mí nnɛ̀ n nìtìbɛ̀ ti do mɔ̀ɔ̀tɛnɛ̀ Amɔniibɛ tinɑ́ɑǹtì kɛ̀ n di yúmu, di mɛ nyí nkɔ̀tɛní kɛ bo n dɛɛtɛ́. 
\v 3 M bɑntɛ́ dìì mɔ̀nnì di í kɔrinímɛ̀ kɛ bo n teennɛ̀, dɛ mɔ̀nnì ndi ncĩ̀nnɛmɛ̀ m buu kɛ kɔ̀tɛ kɛ bɛ̀ do, kɛ̀ ti Yiɛ̀ nKuyie mmɛ mbɛ̀ ɑ̃nnɛ́ n nɔu miɛkɛ. Dɛ̀ yĩ́mɛ̀ kɛ̀ di bɑ̀ɑ́tí yíe nkɛ bo n kpɑnnɛ̀?
\p
\v 4 Mɛm̀mɛ Sɛfutee tìímmɛ̀ Kɑdɑɑdi kɔbɛ bɛmɔu kɛ̀ bɛ̀ɛ do Efɑdɑimmu kɔbɛ mudoò kɛ́ bɛ̀ nɑ. Efɑdɑimmu kɔbɛ bɛ̀ɛ̀ do nɑ̀kɛ́ bɛ̀mbɛ Kɑdɑɑdi kɔbɛ kɛ dɔ̀: Di tú Efɑdɑimmu kɔbɛ mbɛ kɛ cokɛ́ kɛ kɔ̀tɛ kɛ bo Mɑnɑnsee kɔbɛ cuokɛ̀. 
\v 5 Dɛ kó difɔ̃nkúò kɛ̀ Kɑdɑɑdi kɔbɛɛ dintɛ́ Efɑdɑimmu kɔbɛ kɛ́mbɑɑ kukó nSuditɛ̃ɛ̃ tɛpurɛ kɛ̀ wèè cootiní kɛ dɔ́ kɛ́séntɛ́ bɛ̀ɛ ò bekɛ kɛ dɔ̀: A tú Efɑdɑimmu kou nweɑ̀?
\p Kòò yĩ: Áɑ̀. 
\v 6 Bɛ̀ dɔ̀ wèe bɛ́i nkɛ dɔ̀: Sibodɛɛ. Kòò yĩ: Cibodɛɛ. Kɛ í nɑ kɛ bɛ́i ndɛ kó ditɑnnùù weti weti bɛ̀ɛ ò pĩ nkɛ́féútɛ́ kukó nSuditɛ̃ɛ̃ borɛ̀. Kɛ̀ bɛ̀ɛ kuɔ Efɑdɑimmu kɔbɛ sikɔupípísìnɑ̀ɑ̀ nɛ̀ sikɔupísìdɛ́ (42000) dɛ mɔ̀nnì.
\p
\v 7 Kɛ̀ Sɛfutee Kɑdɑɑdi botí kou mbɑkɛ́ Isidɑyɛɛribɛ kɛ dɔ̀ yɛbie nyɛ̀kùɔ̀, kɛ́kú kɛ̀ bɛ̀ɛ ò kũnnɛ́ o ɛì Kɑdɑɑdi bɛ̀ ò pɛitɛ́ dì.
\s1 Bɛ̀ nɑ̀kɛ́mɛ̀ Ibusɑ̃ɑ̃ nɛ̀ Enɔɔ nɛ̀ Abunɔɔ bɛ kpɛ́í
\p
\v 8 Sɛfutee kó difɔ̃nkúò kɛ̀ Ibusɑ̃ɑ̃ Bɛtideɛmmu kou weè ò cɔutɛ́, kɛ́mbɑkɛ́ Isidɑyɛɛribɛ, 
\v 9 kɛ́pɛitɛ́ initidɑbí sipísìtɑ̃ɑ̃ti, initipobí sipísìtɑ̃ɑ̃ti, kɛ́duɔ́ nho sɑpɑ̀mbɛ̀ ibotí tɛì kɛ̀ ìi puokɛ, kòo túótɛ́ ibotí tɛì kó bɛsɑpɑ̀mbɛ̀ kɛ́puó nho bí, kɛ́mbɑkɛ́ Isidɑyɛɛribɛ kɛ dɔ̀ yɛbie nyɛ̀yiekɛ̀, 
\v 10 kɛ́kú kɛ̀ bɛ̀ɛ ò kũnnɛ́ Bɛtideɛmmu.
\p
\v 11 Ibusɑ̃ɑ̃ kó difɔ̃nkúò kɛ̀ Edonni Sɑbunɔɔ botí kouu bɑɑtɛ́ Isidɑyɛɛribɛ kɛ́ mbɛ̀ bɑkɛ́ kɛ dɔ̀ yɛbie ntɛpíítɛ̀, 
\v 12 kɛ́kú kɛ̀ bɛ̀ɛ ò kũnnɛ́ Ayɑnɔɔ Sɑbunɔɔ tempɛ̃ mmiɛkɛ.
\p
\v 13 O kó difɔ̃nkúò kɛ̀ Idɛɛdi birɛ Abudonni Pidɑtɔ̃ɔ̃ ɛì kouu ò cɔutɛ́ kɛ́mbɑkɛ́ Isidɑyɛɛribɛ, 
\v 14 kɛ́pɛitɛ́ initidɑbí sipísìnɑ̀ɑ̀ o yɑɑ̀bí sipísìtɑ̃ɑ̃ti kɛ̀ bɛ̀ ndekù sɑ̃mmɑrímúbɛ̀ sipísìyiekɛ̀ kòo mbɑkɛ́ Isidɑyɛɛribɛ kɛ dɔ̀ yɛbie nyɛ̀ni, 
\v 15 kɛ́kú kɛ̀ bɛ̀ɛ ò kũnnɛ́ Pidɑtɔ̃ɔ̃ Efɑdɑimmu tempɛ̃ mmiɛkɛ Amɑdesiibɛ tɑ̃rì.
\c 13
\s1 Bɛ̀ pɛitɛ́mɛ̀ Sɑ̃nsɔ̃ɔ̃
\p
\v 1 Dɛ mɔ̀nnì kɛ̀ Isidɑyɛɛribɛ tó dɔɔ̀ ti Yiɛ̀ nKuyie nyí dɔ́ dɛ̀, nɛ̀ dɛ kpɛ́í nkɛ̀ kùu bɛ̀ ɑ̃nnɛ́ Fidisitɛ̃ɛ̃bɛ nɔu miɛkɛ yɛbie nsipísìnɑ̀ɑ̀.
\p
\v 2 Kɛ sɔ̃́ nhonìtì mɔù bo Sodɑɑ ɛì miɛkɛ, Dɑnni nɑɑ̀mùnkù, kòo yètìrì tu Mɑndoɑ. Bɑ́ o pokù í mɔkɛ dɛbirɛ. 
\v 3 Diyiè mɑrì kɛ̀ ti Yiɛ̀ nKuyie ntɔ̃nnìi kɔtɛní dɛ kóo nitipòkù borɛ̀ kóò nɑ̀kɛ́ kɛ dɔ̀: N yɛ̃́mu kɛ dò nhɑ tú tɛhɑ̃ũntɛ kɛ í mɔkɛ dɛbirɛ. Nɛ̀ mɛmmɛ ɑ yóó púómmu kɛ́pɛitɛ́ dɛnitidɑbirɛ, 
\v 4 kɛ́túótɛ́ yíe nnɛ̀ yɛwe yɛ̀ɛ̀ kpɑɑní ɑ bɑ́ nyɔ̃ ndifɛ̃́ɛ̃̀ nɛ̀ mɛnɑɑ̀ nsɔmmɛ mɛ̀ɛ̀ muɔ̀, ɑ bɑ́ nyo ntidiitì ikuɔ́ yetɛ tì. 
\v 5 A yóó púómmu kɛ́pɛitɛ́ dɛnitidɑbirɛ, kuponkù bɑ́ɑ́ kɑ́ɑ́kɛ́ dɛ yuu, ɑ yó ndɛ̀ pɛiní kɛ̀ dɛ̀ pɑ̃̀nkɛ tú ti Yiɛ̀ nKuyie nkpɛrɛ ndɛ, weè yóó ketɛ́ ò bo dɛɛtɛ́mɛ̀ Isidɑyɛɛribɛ Fidisitɛ̃ɛ̃bɛ nɔu miɛkɛ.
\p
\v 6 Kòo nitipòkùu tɑ kɛ́nɑ́kɛ́ o dɔù kɛ dɔ̀: Ti Yiɛ̀ nKuyie nkóo nìtì mɔù weè kɔ̀tɛní m borɛ̀ kɛ donnɛ̀ ti Yiɛ̀ nKuyie ntɔ̃nnì kɛ̀ nh ò yɑ̀ kɛ̀ n kɔ̃m̀bùɔ̀tì dò n yí nɑ koò bekɛ́ ò yɛ̀nní dɛ̀ ò mɛ nyí n nɑ̀kɛ́ o yètìrì. 
\v 7 Ò n nɑ̀kɛ́ kɛ tú m bo púó nkɛ́pɛitɛ́ dɛnitidɑbirɛ, kɛ tú kɛ́túótɛ́ yíe nnɛ̀ yɛwe yɛ̀ɛ̀ kpɑɑní mbɑ́ nyɔ̃ ndifɛ̃́ɛ̃̀ nɛ̀ mɛnɑɑ̀ mmɛ̀ɛ̀ muɔ̀, m mɛ mbɑ́ nyo nyikuɔ́ yetɛ tìì diitì. Kɛ tú n yóó pɛitɛ́ dɛ̀ɛ̀ birɛ n yó ndɛ̀ pɛiní kɛ̀ dɛ̀ pɑ̃̀nkɛ tú ti Yiɛ̀ nKuyie nkpɛrɛ ndɛ, kɛ̀ kù ndɛ̀ te dɛ fòmmu mumɔu.
\p
\v 8 Dɛ mɔ̀nnì kɛ̀ Mɑndoɑ bɑ́ntɛ̀ ti Yiɛ̀ nKuyie nkɛ dɔ̀: N Yiɛ̀ nKuyie nyóu kòo nìtì ɑ tɔ̃nní wèe wɛ̃tɛní kɛ ti nɑ́kɛ́ ti dò nkɛ́dɔɔ̀mɛ̀ dɛbirɛ ti yóó pɛitɛ́ dɛ̀ kpɛ́í.
\p
\v 9 Mɛm̀mɛ kɛ̀ ti Yiɛ̀ nKuyie ndɔɔ̀ Mɑndoɑ kù mɔɔ́ tì, kɛ̀ ku kó ditɔ̃nnìi wɛ̃tɛní onitipòkù borɛ̀ kɛ́nsɔ̃́ nhò bo kupɑku bɑ́ o dɔù í dɛ̀ bo. 
\v 10 Kòo cokɛ́ mɛcɑ̃ɑ̃ nkɛ́nɑ́kɛ́ o dɔù kɛ dɔ̀: Onìtì wèè sòò kɔ̀tɛní m borɛ̀ ò wɛ̃̀tɛnímu.
\p
\v 11 Kɛ̀ Mɑndoɑ pɑ̃̀nkɛɛ nɛinɛ̀ o pòkù kɛ̀ bɛ̀ɛ kɔtɛ dɛ kóo nìtì borɛ̀ kòo ò bekɛ kɛ dɔ̀: Fɔ̃́ɔ̃̀ sòò bɛ́innɛ̀ we nnitipòkɑ̀ɑ̀? Kòò dɔ̀: Ɛ̃ɛ̃, mí nwe.
\p
\v 12 Kɛ̀ Mɑndoɑ dɔ̀: A bɛ́i ntì bo dɔɔ̀ dìì mɔ̀nnì ti dò nkɛ́dɔɔ̀ ɔ̃̀mmɛ dɛ kó dɛbirɛ kpɛ́í? Ti bo tũnnɛ ɔ̃̀nyi kuɔ́?
\p
\v 13 Kɛ̀ ti Yiɛ̀ nKuyie nkó ditɔ̃nnì dɔ̀: N yɛ̃ nhonitipòkùu yóu dɛ̀ɛ̀ kó dimɑ̀ɑ̀ wèe dɛ̀ yóu. 
\v 14 Ò bɑ́ nyo ndɛ̀mɑrɛ̀ bɛ̀ dɔ̀ɔ̀nɛ̀ dɛ̀ mutie bɛ̀ tu mù fínyĩ̀ mu bɛ, ò mɛ mbɑ́ nyɔ̃̀ mmu kó mɛnɑɑ̀ mbɛ̀ tu mɛ̀ difɛ̃́ɛ̃̀ yoo mɛnɑɑ̀ mmɛ̀ɛ̀ kó dimɑ̀ɑ̀ muɔ̀. Ò bɑ́ nyo ntidiitì ikuɔ́ yetɛ tì, ò ntũ n kuɔ́ mɛsɑ̀ɑ̀.
\p
\v 15 Kɛ̀ Mɑndoɑ nɑ́kɛ́ ti Yiɛ̀ nKuyie nkó ditɔ̃nnì kɛ dɔ̀: Nkpɑɑ́ kɛ̀ n dɑ dɔɔ̀ kupɔ̀ɔ̀kù kɛ dɑ kuɔ dibɔbii.
\p
\v 16 Kɛ̀ ti Yiɛ̀ nKuyie nkó ditɔ̃nnìi ò nɑ̀kɛ́ kɛ dɔ̀: Bɑ́ kɛ̀ n kpɑɑ́ kɑ̀ɑ n dɔ̀ɔ̀ kupɔ̀ɔ̀kù n yí yóó di, kɑ̀ɑ dɔ́ ɑ bo nɑ kɛ́ dɛ̀ pɑ̃ ti Yiɛ̀ nKuyie nkɛ́tuɔ.
\p Mɑndoɑ í mbɑntɛ́ kɛ dò ti Yiɛ̀ nKuyie ntɔ̃nnì ndi, 
\v 17 kóò bekɛ kɛ dɔ̀: A yètìrì tu bɑ? Kɛ̀ dɛ̀ɛ yie nkɛ̀ ti nɑ kɛ dɑ sɑ̃ntɛ ɑ bɛ́i ntì bo dɔɔ̀ dìì mɔ̀nnì.
\p
\v 18 Kòò dɔ̀: Dɛ̀ dòmmɛ kɑ̀ɑ bèkú n yètìrì? Dì tu diyetìdiɛrì ndi.
\p
\v 19 Kɛ̀ Mɑndoɑ ò kùɔ dibɔbii nɛ̀ dipɑ̃nnì tɛrì, kɛ́ dɛ̀ tɔní kɛ́dɑɑ́ nkupèrìkù ĩ́nkɛ̀, kɛ́ dɛ̀ pɑ̃ ti Yiɛ̀ nKuyie nkùù dɔ̀ɔ̀ri tidiɛtì, kɛ́ dɛ̀ tùɔ, wenwe nɛ̀ o pòkù kɛ̀ bɛ̀ ncómmú kɛ wúó, 
\v 20 nkɛ̀ fɛhɑ̃ɑ̃dɛɛ̀nfɛ̀ dèkù kɛĩ́nkɛ̀, kɛ̀ bɛ̀ɛ yɑ̀ ti Yiɛ̀ nKuyie ntɔ̃nnì ìtɛ́mɛ̀ kɛ deètì kɛĩ́nkɛ̀ fɛhɑ̃ɑ̃dɛɛ̀nfɛ̀ miɛkɛ, kɛ́nínkú kɛ́sĩ́nnɔ́ɔ kɛtenkɛ̀. 
\v 21 Kɛ̀ Mɑndoɑ bɑntɛ́ ti Yiɛ̀ nKuyie ntɔ̃nnì ndimɛ̀, dì mɛ ntɛ̃́nkɛ í nwɛ̃tɛní bɛ borɛ̀. 
\v 22 Kɛ̀ Mɑndoɑ nɑ́kɛ́ o pokù kɛ dɔ̀: Ti mɛ nyɑ̀mɛ̀ ti Yiɛ̀ nKuyie nti yóó kúmu, dɛ̀ í mɔkɛ kpɛ̀rɛ̀.
\p
\v 23 Kòo pokùu ò tɛ̃̀ńnɛ́ kɛ dɔ̀: Kɛ̀ ti Yiɛ̀ nKuyie ndo ndɔ́ kɛ ti kuɔ kù nɑ bɑ́ ncɔutɛ́ ti pɑ̃nnì, kù mɛ nnɑ bɑ́ nti bɛnkɛ ti mɛ nyɑ̀ dɛ̀, kù mɛ nnɑ bɑ́ nti nɑ̀kɛ́ kù mɛ nti nɑ̀kɛ́ tì.
\p
\v 24 Mɛm̀mɛ kɛ̀ Mɑndoɑ pokùu pɛitɛ́ dɛbirɛ kɛ́ dɛ̀ yu kɛ dɔ̀: Sɑ̃nsɔ̃ɔ̃. Kòo kótɛ́ kɛ̀ ti Yiɛ̀ nKuyie nkó mɛsɑ̀ɑ̀ nní nhò bonɛ̀. 
\v 25 Kòo ḿbo Dɑnni kɔbɛ kó dikɑrì Sodɑɑ nɛ̀ Esitɑɔdi dɛ cuokɛ̀. Ti Yiɛ̀ nKuyie nYɑɑ́ dɛ ncùtɛ́ní o ĩ́nkɛ̀, kòo ketɛ́ o tɔ̃mmú.
\c 14
\s1 Sɑ̃nsɔ̃ɔ̃ dɔ́mɛ̀ kɛ́túótɛ́ Fidisitɛ̃ɛ̃bɛ kóo sɑpɑ̀ɑ̀
\p
\v 1 Diyiè mɑrì kɛ̀ Sɑ̃nsɔ̃ɔ̃ kɔtɛ Timunɑ kɛ́yɑ̀ Fidisitɛ̃ɛ̃bɛ kóo sɑpɑ̀ɑ̀ mmɔù, 
\v 2 kɛ́konní kɛ́nɑ́kɛ́ o cicɛ nɛ̀ o yɔ̃ kɛ dɔ̀: N yɑ̀ Fidisitɛ̃ɛ̃bɛ ciɛ nkɛ osɑpɑ̀ɑ̀ mmɔù koò dɔ́. Kɔtɛnɛ̀ kóò yɑ̀, n dɔ́ kóò puokɛmu.
\p
\v 3 Kòo yɛmbɛ̀ɛ ò tɛ̃̀ńnɛ́ kɛ dɔ̀: A í pɛ̀tɛ́ osɑpɑ̀ɑ̀ nti nɑɑ̀mùnkù yoo ti botí miɛkɛ kɛ bo kɔtɛ Fidisitɛ̃ɛ̃bɛ itɑyéí yɛmbɛ̀ ciɛ nkɛ kɛ́wɑɑ́ nhonitipòkɑ̀ɑ̀?
\p Kɛ̀ Sɑ̃nsɔ̃ɔ̃ dɔ̀: N we mpɛ́nsìrì, kɔtɛnɛ̀ kóò yɑ̀ kɛ̀ ńh ò tùótɛ́.
\p
\v 4 O yɛmbɛ̀ do í yɛ̃́ kɛ dò ti Yiɛ̀ nKuyie nkuù ò ɑ̃nnɛ́ dɛ kó mɛyɛ̀mmɛ̀ kɛ bo nɑ kɛ́nintɛnɛ̀ Fidisitɛ̃ɛ̃bɛ. Dɛ mɔ̀nnì Fidisitɛ̃ɛ̃bɛ bɛɛ̀ do bɑkɛ́ Isidɑyɛɛribɛ.
\p
\v 5 Kɛ̀ Sɑ̃nsɔ̃ɔ̃ nkɔri Timunɑ kɛ nɛinɛ̀ o cicɛ nɛ̀ o yɔ̃ kɛ́mberínɛ̀ fínyĩ̀ kó dɛpɑɑ mmɑrɛ̀, kɛ̀ dicìrícìrìi ítɛ́ní kɛ́nhũntí koò wetí. 
\v 6 Kɛ̀ ti Yiɛ̀ nKuyie nYɑɑ́ ncútɛ́ní o ĩ́nkɛ̀ kòo dì nɛ̀tɛ́ nɛ́tɛ́ dɛbɔbirɛ tɛ̃mɛ̀, ò mɛ nyí nnɑ̀kɛ́ o cicɛ nɛ̀ o yɔ̃, 
\v 7 kɛ́kɔtɛ kɛ́mɑ́ɑ́nɛ̀ Fidisitɛ̃ɛ̃bɛ kóo sɑpɑ̀ɑ̀ nkóò pɛ́nsìrì mɛdiɛ̀. 
\v 8 Kɛ̀ dɛ̀ɛ yíɛ́ sɑ́m̀pɔ́ kòo nwɛ̃tiní Timunɑ kɛ bo túótɛ́ o pòkù, kɛ́nkérí kɛ́dɑutɛ́ kɛ bo yɑ̀ ò sòò kùɔ dìì cìrícìrì, kɛ́nsɔ̃́ nyice tɑɑ̀ dɛ kó kucirícìrìcíríkù kɛ̀ ticiètì ɑ̃ mɛkùɔ̀. 
\v 9 Kòo dɛi ticiètì kɛ́nkérí kɛ́cɑ́ɑntɛ kɛ bií pɑ̃ o cicɛ nɛ̀ o yɔ̃ kɛ̀ bɛ̀ɛ cɑ́ɑ́kɛ́, ò mɛ nyí mbɛ̀ nɑ̀kɛ́ ò dɛ̀imɛ̀ dɛ kó ticiètì kucirícìrìcíríkù miɛkɛ nkɛ.
\s1 Sɑ̃nsɔ̃ɔ̃ dɔ̀ɔ̀ wèè pɛ̀tɛ̀mpɛ̀ Fidisitɛ̃ɛ̃bɛ
\p
\v 10 Mɛm̀mɛ kɛ̀ Sɑ̃nsɔ̃ɔ̃ cicɛɛ tuɔkɛ Sɑ̃nsɔ̃ɔ̃ pocɛ̃nnì cĩ́ɛ̃̀tɛ̀, kɛ̀ Sɑ̃nsɔ̃ɔ̃ ɑ̃nnɛ́ dibɑnni kɛ bo túótɛ́ o pocɛ̃nnì, kɛ́ndònnɛ̀ bɛdɑpɑ̀mbɛ̀ bɛmɔu do mɔkɛmɛ̀ dɛ kó mɛmɑntímɛ̀. 
\v 11 Kɛ̀ Fidisitɛ̃ɛ̃bɛ tɑ̃ɑ̃tɛ́ bɛdɑpɑ̀mbɛ̀ sipísìtɑ̃ɑ̃ti kɛ̀ bɛ̀ bo ò cíe ndibɑnni. 
\v 12 Kɛ̀ Sɑ̃nsɔ̃ɔ̃ bɛ̀ nɑ̀kɛ́ kɛ dɔ̀: N yóó di dɔɔ̀ pɛ̀tɛ̀mpɛ̀ nwe, dibɑnni kó yɛwe yɛ̀yiekɛ̀ yiɛ mmiɛkɛ, kɛ̀ di n nɑ́kɛ́ ò tu mù, n di duɔ́ nsiyɑɑ̀bòo sipísìtɑ̃ɑ̃ti nɛ̀ dibɑnni kó yɛyɑɑ̀bòrɛ̀ sipísìtɑ̃ɑ̃ti. 
\v 13 Kɛ̀ di mɛ nyĩɛ̃kɛ díì yó n duɔ́ nsiyɑɑ̀bòo sipísìtɑ̃ɑ̃ti nɛ̀ dibɑnni kó yɛyɑbòrɛ̀ sipísìtɑ̃ɑ̃ti. Kɛ̀ bɛ̀ dɔ̀: Pɛtìrɛ̀! Ti dɑ kémmúmu.
\p
\v 14 Kɛ̀ Sɑ̃nsɔ̃ɔ̃ dɔ̀: Wèè cɑ̀ɑ́ nho miɛkɛ nkɛ bɛ̀ cɑ̀ɑ́ ndɛ̀ yɛ̀nnímɛ̀. Kɛ̀ dɛnɑtirɛ̀ yɛ̀nní dɛkperɛ̀ miɛkɛ.
\p Kɛ̀ yɛwe yɑ̀ɑ tuɔkɛnɛ̀ yɛ̀tɑ̃ɑ̃ti bɑ́ bɛ̀ mu nyí pɛ̀tɛ́ dɛ kóo pɛ̀tɛ̀mpɛ̀ tu mù. 
\v 15 Diyiè nɑɑnnì yiè kɛ̀ bɛ̀ɛ nɑ́kɛ́ Sɑ̃nsɔ̃ɔ̃ pokù kɛ dɔ̀: Yetoo kɑ̀ɑ dɔù ti nɑ́kɛ́ pɛ̀tɛ̀mpɛ̀ tu mù. Kɑ̀ɑ mɛ nyetɛ ti dɑ cɔ́u nfɔ̃́ nnɛ̀ ɑ cĩ́ɛ̃̀tɛ̀. Di ti yu kɛ bo fekɛ ti kpɛrɛ ndɛɑ̀?
\p
\v 16 Kɛ̀ Sɑ̃nsɔ̃ɔ̃ pokù nkɔnti kóò sɔ̃̀ńkɛ́ kóò nɑ̀kɛ́ kɛ dɔ̀: A í n dɔ́ bɑ́ sɑ́m̀pɔ́rɛ̀, ɑ n níímmu, dɛ̀ dòmmɛ kɑ̀ɑ dɔ̀ɔ̀ pɛ̀tɛ̀mpɛ̀ m botí kɔbɛ bɑ́ ɑ í n nɑ̀kɛ́ ò tu mù! Kɛ̀ Sɑ̃nsɔ̃ɔ̃ dɔ̀: N ketɛ́ kɛ í ò nɑ̀kɛ́ n cicɛ nɛ̀ n yɔ̃ kɛ bo ò nɑ̀kɛ́ fɔ̃́ nweɑ̀?
\p
\v 17 Kɛ̀ Sɑ̃nsɔ̃ɔ̃ pokù bɑɑ nkuɔ̀ ndibɑnni kó yɛwe yɛ̀yiekɛ̀ miɛkɛ, diyiè sɔnni yiè kɛ̀ Sɑ̃nsɔ̃ɔ̃ ò nɑ̀kɛ́ pɛ̀tɛ̀mpɛ̀ tu mù, kɛ̀ yɛ̃́ ò do ò ɔ̀unɛ̀mɛ̀. Kòo nitipòkù pɑ̃̀nkɛɛ kɔtɛ kɛ́nɑ́kɛ́ o kɔbɛ pɛ̀tɛ̀mpɛ̀ tu mù. 
\v 18 Diyiè yiénnì yiè kɛ̀ diyiè nkpɑɑ́ kɛ mu nyí tɑ kɛ̀ bɛ̀ tùɔ̀kɛní, kɛ́nɑ́kɛ́ Sɑ̃nsɔ̃ɔ̃ kɛ dɔ̀: Bɑ ntɛ̃́nkɛ nɑɑti kɛ pɛ̃ɛ̃tɛ́ mɛcekùɔ̀? Bɑ ntɛ̃́nkɛ kpeńnì kɛ pɛ̃ɛ̃tɛ́ dicìrícìrì? Kɛ̀ Sɑ̃nsɔ̃ɔ̃ dɔ̀: Kɛ̀ di do í dùɔnɛ̀ n nɑɑsɛrì, di nɑ bɑ́ mbɑntɛ́ dɛ kóo pɛ̀tɛ̀mpɛ̀ tu mù.
\p
\v 19 Dɛ mɔ̀nnì kɛ̀ ti Yiɛ̀ nKuyie nYɑɑ́ ncútɛ́ní Sɑ̃nsɔ̃ɔ̃ ĩ́nkɛ̀, kòo kɔtɛ Asikɑnɔɔ kɛ́kuɔ bɛnìtìbɛ̀ sipísìtɑ̃ɑ̃ti, kɛ́túótɛ́ bɛ yɑɑ̀bòrɛ̀ kɛ́duɔ́ mbɛ̀ɛ̀ bɑntɛ́ pɛ̀tɛ̀mpɛ̀ tu mù, kɛ̀ bɛ̀ɛ dɔɔ̀ tibɑnyɑ̀ɑ̀tì. Dɛ kó difɔ̃nkúò kɛ̀ Sɑ̃nsɔ̃ɔ̃ ítɛ́ nɛ̀ kɛmiɛkɛ kɛ́kò nho cicɛ borɛ̀. 
\v 20 Kɛ̀ bɛ̀ɛ túótɛ́ o pokù kɛ́duɔ́ nhodɑpɑ̀ɑ̀ nwèè do ni dibɑnni kó ikuɔ́.
\c 15
\s1 Sɑ̃nsɔ̃ɔ̃ kpɑnnɛ̀mɛ̀ Fidisitɛ̃ɛ̃bɛ
\p
\v 1 Kɛ̀ dɛ̀ɛ yíɛ́o sɑ́m̀pɔ́ mudidɛ̀ì mɔ̀nnì kɛ̀ Sɑ̃nsɔ̃ɔ̃ kɔtɛ kɛ bo yɑ̀ o pokù, kɛ tɔnɛ̀ dibɔsɛrì kɛ bo bɛ̀ pɑ̃, kɛ dɔ̀ ò bo tɑ o pokù dieku nkòo cɔ̀kù yetɛ. 
\v 2 Kɛ dɔ̀: N yɛ̀mmɛ̀ do dò nhɑ tɛ̃́nkɛ í ò dɔ́mu, koò tùótɛ́ kɛ duɔ́ nhodɑpɑ̀ɑ̀ nwèè sòò ni dibɑnni kó ikuɔ́. O nɑntɛ̀ mɛ nhò wenninɛ̀mu, tɛ ntúótɛ́.
\p
\v 3 Kɛ̀ Sɑ̃nsɔ̃ɔ̃ dɔ̀: Di mmɔ̀nnì kɛ̀ n dɔ̀ɔ̀ Fidisitɛ̃ɛ̃bɛ mɛyɛi nhòmɔù tɛ̃́nkɛ bɑ́ nsɛi.
\p
\v 4 Mɛm̀mɛ ò ìtɛ́mɛ̀ kɛ́kɔtɛ kɛ́pĩ́ nyiɑ̃nkɛ́ sikɔusìtɑ̃ɑ̃ti (300), kɛ níí wɛ̃nnɛ́ ìdɛ́ì kó iyéí kɛ́cĩnnɛ́ kɛ́wɛ̃nnɛ́ kɛ́boúnnɛ̀ timútì. 
\v 5 Kɛ mɛ nyĩ́ imɔu kɛ́deè kɛ́cɔ́u mmuhɑ̃ɑ̃́ nkɛ́fĩ́ĩ́nko kɛ̀ ìì tɑ dɛpɑɑ nkɛ̀ tidiitì cɔ́útɛ́, tìì kɛ̃ĩ́ kɛ cóú nɛ̀ tìì kpɑɑ́ cómmú, kɛ́tɑunnɛ̀ dɛtie mbɛ̀ tu dɛ̀ fínyĩ̀ nɛ̀ odìfíè kɛ́cɔ́útɛ́. 
\v 6 Kɛ̀ Fidisitɛ̃ɛ̃bɛɛ bekɛ wèè dɔ̀ɔ̀ mɛmmɛ, kɛ̀ bɛ̀ dɔ̀: Sɑ̃nsɔ̃ɔ̃ nwe. O cɔ̀kù Timunɑ ɛì kou weè ò yetɛnɛ̀ o pokù, koò duɔ́ nhodɑpɑ̀ɑ̀ nwèè sòò ni dibɑnni kó ikuɔ́.
\p Dɛ mɔ̀nnì kɛ̀ Fidisitɛ̃ɛ̃bɛɛ kɔtɛ kɛ́cɔ́u ndɛ kóo nitipòkù nɛ̀ o cicɛ. 
\v 7 Kɛ̀ Sɑ̃nsɔ̃ɔ̃ bɛ̀ nɑ̀kɛ́ kɛ dɔ̀: Di mɛ̀ ndɔ̀ɔ̀ dɛ̀, kɛ̀ n yí pɛ̀ìtɛ dɛ kó dipɛ̀ì, m bɑ́ɑ́ om̀pɛ̀!
\p
\v 8 Mɛm̀mɛ ò bɛ̀ potɛ́mɛ̀ kɛ́ bɛ nɑ, kɛ́ bɛ̀ ɑutɛ́ mɛdiɛ̀. Dɛ kó difɔ̃nkúò kɛ́kɔtɛ kɛ́mbo Etɑmmu tɑ̃dènkù.
\s1 Sɑ̃nsɔ̃ɔ̃ kùɔmɛ̀ bɛnìtìbɛ̀ nɛ̀ sɑ̃mmɑrímú kó muyɛ̀ì
\p
\v 9 Dɛ mɔ̀nnì kɛ̀ Fidisitɛ̃ɛ̃bɛɛ kɔtɛní kɛ́bɑ́tɛ́ Sudɑɑ tenkɛ̀ kɛ́pitɛ́ kɛ́tuɔkɛnɛ̀ Deii. 
\v 10 Kɛ̀ Sudɑɑ kɔbɛɛ bɛ̀ bekɛ kɛ dɔ̀: Dɛ̀ dòmmɛ kɛ̀ di kɔ̀tɛní kɛ bo ti kpɑnnɛ̀? Kɛ̀ Fidisitɛ̃ɛ̃bɛ dɔ̀: Ti kɔ̀tɛní kɛ bo pĩ́ nSɑ̃nsɔ̃ɔ̃ nwe kóò dɔ̀ɔ̀ ò ti dɔ̀ɔ̀mɛ̀.
\p
\v 11 Kɛ̀ Sudɑɑ kɔbɛ sikɔupísìtɑ̃ɑ̃tii (3000) kɔtɛ Etɑmmu tɑ̃dènkù Sɑ̃nsɔ̃ɔ̃ borɛ̀, kóò nɑ̀kɛ́ kɛ dɔ̀: A í yɛ̃́ kɛ dò nFidisitɛ̃ɛ̃bɛ bɛɛ̀ ti bɑkɑ́ɑ̀? A ti dɔ̀ɔ̀ bɑ mɛmmɛ nɑ́kɛ? Kòo bɛ̀ nɑ̀kɛ́ kɛ dɔ̀: Bɛ̀ n dɔ̀ɔ̀mɛ̀, m mɛ mbɛ̀ dɔ̀ɔ̀.
\p
\v 12 Kɛ̀ bɛ̀ɛ ò nɑ̀kɛ́ kɛ dɔ̀: Ti kɔ̀tɛní kɛ bo dɑ boúmu kɛ́kɔtɛ kɛ́ bɛ̀ duɔ́. Kɛ̀ Sɑ̃nsɔ̃ɔ̃ dɔ̀: Pɑrìkɛ̀nɛ̀ kɛ dɔ̀ di í yó n kuɔ di mɔ́mmɔmbɛ.
\p
\v 13 Kɛ̀ bɛ̀ dɔ̀: Áɑ̀ ti í yóó dɑ kuɔ, ti dɔ́ kɛ dɑ́ boúmu kɛ́kɔtɛ kɛ́ bɛ̀ duɔ́.
\p Mɛm̀mɛ bɛ̀ ò boúmɛ̀ iwɛ̃ĩ pɑ̀nyì ìdɛ́ì kóò dènnɛní kutɑ̃dènkù miɛkɛ. 
\v 14 Bɛ̀ tùɔ̀kɛní dìì mɔ̀nnì Deii kɛ̀ Fidisitɛ̃ɛ̃bɛɛ kɔtɛní kóò co kɛ íútí. Kɛ̀ ti Yiɛ̀ nKuyie nYɑɑ́ cútɛ́ní o ĩ́nkɛ̀ kɛ̀ iwɛ̃ĩ bɛ̀ do ò boú ìì nɑɑ́ mmutɑ́pɛí nkɛ́yotɛ. 
\v 15 Kòo yɑ̀ sɑ̃mmɑrímú bɛ̀ kùɔ wè bɑ̀mbɑ̀ nho kó muyɛ̀ì kɛ́túótɛ́ kɛ́kuɔnɛ̀ bɛnìtìbɛ̀ tɛkɔupíítɛ̀ (1000). 
\v 16 Ò mɛ ndèè kɛ́bɛ́i nkɛ dɔ̀:
\q1 Nɛ̀ sɑ̃mmɑrímú kó muyɛ̀ì mmu n kùɔnɛ̀mɛ̀ bɛnìtìbɛ̀ tɛkɔupíítɛ̀ (1000).
\q1 Nɛ̀ sɑ̃mmɑrímú kó muyɛ̀ì mmu m bɛ̀ mɛ̀nnɛ̀ mɛ̀nnɛ̀mɛ̀.
\p
\v 17 Dɛ kó difɔ̃nkúò kɛ́dootóo musɑ̃mmɑrínyɛ̀ì mmɛdɛ́timɛ̀. Kɛ̀ bɛ̀ɛ yú dɛborɛ̀ kɛ dɔ̀ Dɑmɑti-Deii (dɛ̀ɛ̀ tu Muyɛ̀ì kó ditɑ̃rì). 
\v 18 Kɛ sɔ̃́ nsinɛ́yɛ̃ĩ ò potɛ́ mɛdiɛ̀ nkòo kuɔ́nnɛ̀ ti Yiɛ̀ nKuyie nkɛ dɔ̀: Áú! Ti Yiɛ̀ nKuyie nfɔ̃́ɔ̃̀ duɔ́ nkɛ̀ n nɑ n dootitɔ̀bɛ̀, kɛ bɛ̀ ɑutɛ́ kɛ̀ sinɛ́yɛ̃ĩ nɛ́ bo wɛ̃tɛ kɛ́ m bɔ nkɛ̀ itɑyéí yɛmbɛ̀ n nɑɑ̀?
\p
\v 19 Dɛ mɔ̀nnì kɛ̀ ti Yiɛ̀ nKuyie nduɔ́ nkɛ̀ Deii tɑ̃rìi yɑtɛ́ kɛ̀ mɛniɛ nyɛnní kɛ̀ Sɑ̃nsɔ̃ɔ̃ pɛ́tɛ́ kɛ́yɑ̃̀, kɛ́pɛ́tɛ́ muwɛ̃rímú. Mɛm̀mɛ kɛ̀ bɛ̀ɛ yú dɛ kó tɛbintɛ kɛ dɔ̀: Ãɑ̃-Koodee, kɛ̀ tɛ̀ kpɑɑ́ bo nɛ̀ yíenní.
\p
\v 20 Kɛ̀ Sɑ̃nsɔ̃ɔ̃ mbɑkɛ́ Isidɑyɛɛribɛ dokùnɛ̀ dìì mɔ̀nnì Fidisitɛ̃ɛ̃bɛ kɛ dɔ̀ yɛbie nsipísìdɛ́.
\c 16
\s1 Sɑ̃nsɔ̃ɔ̃ kpetɛ́mɛ̀ Kɑsɑɑ kó dicɑ̀ù
\p
\v 1 Diyiè mɑrì kɛ̀ Sɑ̃nsɔ̃ɔ̃ kɔtɛ Kɑsɑɑ kɛ́yɑ̀ onitipòkù mɔù wèè dɔuti dɔutinɛ̀ bɛnitidɑɑbɛ̀ kɛ́tɑ o borɛ̀. 
\v 2 Kɛ̀ dihɛì yɛmbɛ̀ɛ keè Sɑ̃nsɔ̃ɔ̃ dɛ̀ bomɛ̀ kɛ́cɛ̃ɛ̃tɛ dihɛì kɛ́nyié nkɛ bɑɑ dibòrì, kɛ nɑ́ɑ́ nkɛ tú: Dɛ̀ bo wentɛ́ kòo nyɛtìní kɛ̀ ti ò kùɔ. 
\v 3 Sɑ̃nsɔ̃ɔ̃ mɛ nyí ndɛ wentɛ́, kɛyènkɛ̀ totɛ́ dìì mɔ̀nnì kɛ cuokɛ̀, kòo ítɛ́ kɛ́pĩ́ ndihɛì bòrì kó dicɑ̀ù kɛ́wɛ̃nnɛ́nɛ̀ di dɛí kɛ́uutɛ́, kɛ́buutɛ́, kɛ́dekɛnɛ̀ ditɑ̃rì dìì bo Ebunɔɔ ɛì ììkɛ̀ kɛ́cónnɛ́.
\s1 Dɑdidɑɑ fìtɛ́mɛ̀ Sɑ̃nsɔ̃ɔ̃
\p
\v 4 Kɛ̀ Sɑ̃nsɔ̃ɔ̃ dɔkɛ onitipòkù mɔù kòo yètìrì tu Dɑdidɑɑ kòò bo Sodɛki biriku. 
\v 5 Kɛ̀ Fidisitɛ̃ɛ̃bɛ kpɑ̀ɑ̀tìbɛ̀ bɛ̀nùmmùu kɔtɛ kɛ́yɑ̀ Dɑdidɑɑ kóò nɑ̀kɛ́ kɛ dɔ̀: Yetoo kɛ̀ Sɑ̃nsɔ̃ɔ̃ dɑ nɑ́kɛ́ ò pɛ̀tɛ́ dɛ̀ muwɛ̃rímú diɛmù ò mɛ mmɔkɛ mù, nɛ̀ ti bo yĩ́mɛ̀ kóò nɑ, kóò boú, kòo yɔkɛ̀, ti bo dɑ duɔ́ mbɑ́ wè mɛdítíbii tɛkɔupípíítɛ̀ nɛ̀ tɛkɔ̀ùtɛ̀ (10100).
\p
\v 6 Kɛ̀ Dɑdidɑɑ bekɛ Sɑ̃nsɔ̃ɔ̃ kɛ dɔ̀: N nɑ́kɛ́ ɑ wɛ̃rímú bonní dɛ̀ kɛ cɑ̃́ɑ̃́. Bɛ̀ bo dɑ boúnɛ̀ bɑ kɛ̀ mùu yɛ̀?
\p
\v 7 Kɛ̀ Sɑ̃nsɔ̃ɔ̃ dɔ̀: Kɛ̀ bɛ̀ m boúnɛ̀ itɑ̃nwɛ̃ĩ sũ̀ũ̀yì ìì mu nyí kpeí, n wɛ̃rímú yɛ̀mu mɛmmɛ, kɛ̀ n nɑɑ́nnɛ̀ bɛnìtìbɛ̀ tɔbɛ̀.
\p
\v 8 Kɛ̀ Fidisitɛ̃ɛ̃bɛ kpɑ̀ɑ̀tìbɛ̀ɛ wɑɑnní itɑ̃nwɛ̃ĩ sũ̀ũ̀ì ìì mu nyí kpeí, kɛ́duɔ́ nDɑdidɑɑ kòo ì nhò boúnɛ̀. 
\v 9 Ò yóó mɛ nyĩ́ kɛ́sɔnnɛ bɛnìtìbɛ̀ mbɛ o cĩ́ɛ̃̀tɛ̀ miɛkɛ, kɛ́deè kɛ́kuɔ́nko kɛ dɔ̀: Sɑ̃nsɔ̃ɔ̃ ɑ dootitɔbɛ̀ Fidisitɛ̃ɛ̃bɛ tùɔ̀kɛní!
\p Kòo tɔ̃tɛ itɑ̃nwɛ̃ĩ kɛ̀ dɛ̀ ndò mmuhɑ̃ɑ̃́ nhɔ̃ɔ̃ cɔ́útɛ́mɛ̀ kuhɔ̃ũ. Bɛ̀ í nnɑ kɛ́yĩ́ɛ̃́tɛ́ o wɛ̃rímú bonní dɛ̀.
\p
\v 10 Kɛ̀ Dɑdidɑɑ yíɛ́ kóò nɑ̀kɛ́ kɛ dɔ̀: A n dɑúmu kɛ n soú, n nɑ́kɛ́ di mmɔ̀nnì bɛ̀ bo dɑ boúnɛ̀ mù. 
\v 11 Kòo ò nɑ̀kɛ́ kɛ dɔ̀: Kɛ̀ bɛ̀ m boúnɛ̀ iwɛ̃ĩ pɑ̀nyì, bɛ̀ mu nyí pĩ̀ńnɛ̀ ì mutɔ̃mmú mɑmù, dɛ mɔ̀nnì n wɛ̃rímú yóó yɛ̀mu kɛ̀ n nɑɑ́nnɛ̀ bɛnìtìbɛ̀ tɔbɛ̀.
\p
\v 12 Kɛ̀ Dɑdidɑɑ wɑɑ́ nyiwɛ̃ĩ pɑ̀nyì, kóò boúnɛ̀, kɛ́deè kɛ́kuɔ́nko kɛ dɔ̀: Sɑ̃nsɔ̃ɔ̃ ɑ dootitɔbɛ̀ Fidisitɛ̃ɛ̃bɛ tùɔ̀kɛní.
\p Kɛ sɔ̃́ mbɛnìtìbɛ̀ tó sɔri o cĩ́ɛ̃̀tɛ̀ miɛkɛ, kɛ̀ Sɑ̃nsɔ̃ɔ̃ tɔ̃tɛ iwɛ̃ĩ ìì do ò boú o bɑɑ̀ nkɛ̀ dɛ̀ ndò mmupɑ̀ɑ̀kommú.
\p
\v 13 Kɛ̀ Dɑdidɑɑ dɔ̀: A sɔkɛ́ kɛ n dɑúmu kɛ n soúnnɑ́ɑ̀? Di mmɔ̀nnì n nɑ́kɛ́ weti weti bɛ̀ bo dɑ boúnɛ̀mu.
\p Kɛ̀ Sɑ̃nsɔ̃ɔ̃ dɔ̀: Kɑ̀ɑ boú n yùtì iyùpɑ̃ɑ̃tí ìyiekɛ̀ kɛ tɑunnɛ̀ kuyɑɑ̀dùɔ̀dɔú kɛ bɑɑkɛ́. Dɛ mɔ̀nnì n wɛ̃rímú yóó yɛ̀mu kɛ̀ n nɑɑ́nnɛ̀ bɛnìtìbɛ̀ tɔbɛ̀.
\p
\v 14 Kɛ̀ Dɑdidɑɑ dɔɔ̀ kɛ̀ Sɑ̃nsɔ̃ɔ̃ yɛ̃̀ nkɛ́duɔ́, kòo boú o yùtì iyùpɑ̃ɑ̃tí ìyiekɛ̀ kɛ́tɑunnɛ̀ kuyɑɑ̀dùɔ̀dɔú kɛ́bɑɑkɛ́, kɛ́deè kɛ́kuɔ́nko kɛ dɔ̀: Sɑ̃nsɔ̃ɔ̃ ɑ dootitɔbɛ̀ tùɔ̀kɛní!
\p Kɛ̀ Sɑ̃nsɔ̃ɔ̃ entɛ kɛ́huutɛ́nɛ̀ iyùpɑ̃ɑ̃tí kuyɑɑ̀dùɔ̀dɔú.
\p
\v 15 Kɛ̀ Dɑdidɑɑ dɔ̀: A bo yĩ́mɛ kɛ́ntú ɑ n dɔ́ kɛ tɛ̃́nkɛ nɛ́ í n tɑ̃́. Kucɛ mɛtɑ̃ɑ̃́mmɛ̀ mmɛ miɛ nkɑ̀ɑ n dɑú kɛ n soú, mbɑ́ ɑ í yie nkɛ n nɑ̀kɛ́ ɑ wɛ̃rímú bonní dɛ̀.
\p
\v 16 Kɛ bɑɑ ntì kòńnì yɛwe yɛmɔu Sɑ̃nsɔ̃ɔ̃ borɛ̀ koò kɔɔ́nnɛ̀, kòo ò ɔ̀unɛ̀, kɛ̀ dɛ̀ɛ ò bi. 
\v 17 Kòo ò nɑ̀kɛ́ kɛ dɔ̀: N tú ti Yiɛ̀ nKuyie nkou nwe nɛ̀ bɛ̀ m pɛítɛ́mɛ̀ kuponkù í kɑ̀ɑ́kɛ́ n yuu, kɛ̀ bɛ̀ nkuó n wɛ̃rímú yóó yɛ̀mu kɛ̀ n nɑɑ́nnɛ̀ bɛnìtìbɛ̀ tɔbɛ̀.
\p
\v 18 Dɛ mɔ̀nnì kɛ̀ Dɑdidɑɑ bɑntɛ́ wè ò nɑ̀kɛ́mɛ̀ o yɛ̀mmɛ̀ kpɛti nti, kɛ́tɔ̃ nkɛ̀ bɛ̀ɛ nɑ́kɛ́ Fidisitɛ̃ɛ̃bɛ kpɑ̀ɑ̀tìbɛ̀ kɛ dɔ̀: Dɑdidɑɑ tu di kɔtoo kɛ̀ Sɑ̃nsɔ̃ɔ̃ ò nɑ̀kɛ́mu o yɛ̀mmɛ̀ kpɛti.
\p Kɛ̀ bɛ̀ɛ kɔtɛ kɛ́ bɛ̀ nɑ̀kɛ́ kɛ̀ bɛ̀ nkɔroo kɛ tɔnɛ̀ idíítí bɛ̀ do yɛ̃ mbɛ̀ yóó ò duɔ́ nyì. 
\v 19 Mɛm̀mɛ Dɑdidɑɑ dɔ̀ɔ̀mɛ̀ kɛ̀ Sɑ̃nsɔ̃ɔ̃ yɛ̃̀ nkɛ́duɔ́ o kpèrɛ̀ ĩ́nkɛ̀, kòo duɔ́ nkòo nìtì mɔùu kɛ̃ĩ́ o yùpɑ̃ɑ̃tí iyiekɛ̀. Dɛ mɔ̀nnì kòo ketɛ́ ò bo cĩtɛmɛ̀, kòo wɛ̃rímúu yɛ̀. 
\v 20 Kɛ̀ Dɑdidɑɑ kuɔ́nko kɛ dɔ̀: Sɑ̃nsɔ̃ɔ̃ ɑ dootitɔbɛ̀ Fidisitɛ̃ɛ̃bɛ tùɔ̀kɛní!
\p Kòo entɛní kòo yɛ̀mmɛ̀ ndò nhò bo nɑ kɛ́piùrɛ̀ ò ɔ̃ɔ̃ yĩ́mɛ̀. Bɑ́ ò í nyɛ̃́ kɛ dò ti Yiɛ̀ nKuyie ndɛ̀ìtɛ ku wɛ̃rímú o ĩ́nkɛ̀. 
\v 21 Mɛm̀mɛ kɛ̀ Fidisitɛ̃ɛ̃bɛɛ ò pĩ nkɛ́kpɛ́kɛ́ o nuɔ nkóò kònnɛ̀ Kɑsɑɑ. Kóò boúnɛ̀ disɔɔwũɔ̃̀ kó mɛfĩmmɛ mɛ̀dɛ́mɛ̀, kòo mbo dikpetíntou miɛkɛ, kɛ fiinko dinɑ̀ɑ̀. 
\v 22 Kɛ̀ dɛ̀ɛ mɔntoo kòo yùtìi wɛ̃tɛ kɛ́ketɛ́ tì bo yɛ̀nnímɛ̀.
\s1 Sɑ̃nsɔ̃ɔ̃ pɛ̀itɛmɛ̀ o dootitɔbɛ̀ mɛsɔmmɛ kɛ ku
\p
\v 23 Diyiè mɑrì kɛ̀ Fidisitɛ̃ɛ̃bɛ kpɑ̀ɑ̀tìbɛ̀ɛ tíí nkɛ bo fíé bɛ bɔɔ̀ Dɑkɔ̃ɔ̃ kɛ̀ dɛ̀ ńdò ndibɑnni diɛrì, kɛ̀ bɛ̀ ndiè nkɛ tú:
\q1 Ti kó dibɔɔ̀ Dɑkɔ̃ɔ̃ weè ti dɛɛtɛ́nɛ̀ ti dootitɔù Sɑ̃nsɔ̃ɔ̃,
\q1 kɛ duɔ́ nkɛ̀ ti ò pĩ.
\p
\v 24 Kɛ nwúó mbɛ bɔɔ̀ kɛ di sɑ̃ntí kɛ tú:
\q1 Ti kó dibɔɔ̀ ti dɛɛtɛ́nɛ̀ ti dootitɔù,
\q1 wèè do ti puɔ nkɛ ti kɔù.
\p
\v 25 Bɛ̀ mɛ mbomɛ̀ dibɑnni miɛkɛ nkɛ kɛ̀ dɛ̀ bɛ̀ nɑɑti, nɛ̀ dɛ kpɛ́í nkɛ̀ bɛ̀ dɔ̀ bɛ̀ɛ tɔní Sɑ̃nsɔ̃ɔ̃, kòò yɑ̀ɑ ndɔɔri mudɑɑ́ nkpɛrɛ. Kɛ̀ bɛ̀ɛ kɔtɛ dikpetíntou, kɛ́tɔní Sɑnsɔ̃ɔ̃, kɛ́tuɔkɛní kɛ̀ bɛ̀ɛ ò tɑnnɛ̀ bɛ̀ bo dìì tou miɛkɛ, yɛsɑ̃ǹkɛ̀ borɛ̀. Kòò ndɔɔri mudɑɑ́ nkpɛrɛ bɛ ììkɛ̀. 
\v 26 Kɛ̀ Sɑ̃nsɔ̃ɔ̃ nɑ́kɛ́ dɛdɑpùmbirɛ dɛ̀ɛ̀ ò dɛ̀ri kɛ dɔ̀: N kɔtɛnɛ̀ ditou kó yɛsɑ̃ǹkɛ̀ borɛ̀ kɛ̀ n yɛ̀ kɑ̀ɑ́kɛ́, n dɔ́ kɛ́dírímu.
\p
\v 27 Bɛnìtìbɛ̀ bɛɛ̀ do píɛ́kɛ́ dɛ kó ditou miɛkɛ, bɛnitidɑɑbɛ̀ nɛ̀ bɛnitipòbɛ̀, kɛ̀ Fidisitɛ̃ɛ̃bɛ kpɑ̀ɑ̀tìbɛ̀ bɛmɔu dɛ bo. Bɛnìtìbɛ̀ bɛ̀ɛ̀ kɔ̀tɛní muwéìmù, kɛ̀ bɛ̀ bo kudɑ̀nkù. Bɛ̀ bo ntùɔ̀kɛ sikɔupísìtɑ̃ɑ̃ti (3000), bɛnitidɑɑbɛ̀ nɛ̀ bɛnitipòbɛ̀. 
\v 28 Dɛǹdɛ Sɑ̃nsɔ̃ɔ̃ kuɔ́nnɛ̀mɛ̀ Ti Yiɛ̀ nKuyie nkɛ dɔ̀: Ti Yiɛ̀ nKuyie n dɑ bɑ́ɑmmu ɑ bɑ́ m bɔnko, wɛ̃tɛ kɛ́ n duɔ́ mmuwɛ̃rímú dimɔ̀nnì dìmɑ́ɑ̀, kɛ̀ m pɛitɛ n dootitɔbɛ̀ Fidisitɛ̃ɛ̃bɛ bɛ̀ kpɛ̀kɛ́ mɛ̀ɛ̀ kpɛ́í n nuɔ.
\p
\v 29 Sɑ̃nsɔ̃ɔ̃ mɛ nyĩ kɛ́deè kɛ́bɑutɛ̀ yɛsɑ̃ǹkɛ̀ yɛ̀dɛ́ dɛ cuokɛ̀ kpɛyɛ yɛ̀ɛ̀ tɔ ditou, kɛ́ yɛ̀ dìdóo kɛ́kɔtínnɛ́ diì nho bɑkù yoú, ditɛrì kucɑ̃̀nku, 
\v 30 kɛ́bɛ́i nkɛ dɔ̀: Kɛ̀ n kunɛ̀ Fidisitɛ̃ɛ̃bɛ dɛ̀ n sɑ̀nnɛ̀.
\p Ò mɛ nyĩ kɛ́fukii nɛ̀ o wɛ̃rímú mumɔu yɛsɑ̃ǹkɛ̀ kɛ̀ ditouu do kɛ́yɑ̃kɛ Fidisitɛ̃ɛ̃bɛ kpɑ̀ɑ̀tìbɛ̀ nɛ̀ bɛnìtìbɛ̀ bɛ̀ɛ̀ kó dimɑ̀ɑ̀ dɛ̀ bo. Ò wɛ̃nnɛ́ nɛ̀ bɛ̀ɛ̀ nìtìbɛ̀ kɛ ku, kɛ̀ bɛ̀ nsũ kɛ́pɛ̃ɛ̃tɛ́ ò do kùɔ bɛ̀ ò kpɑɑ́ fòù dìì mɔ̀nnì.
\p
\v 31 O tebìí nɛ̀ o nɑɑ̀mùnkù kɔbɛ bɛmɔu kɛ̀ bɛ̀ɛ kɔtɛní kóò tùótɛ́ kɛ́kò nkɛ́kũnnɛ́ o cicɛ Mɑndoɑ fɔ̃ti, Sodɑɑ nɛ̀ Esetɑɔdi dɛ cuokɛ̀.
\p Sɑ̃nsɔ̃ɔ̃ do bɑkɛ́ Isidɑyɛɛribɛ kɛ dɔ̀ yɛbie nsipísìdɛ́ ndi.
\c 17
\s1 Mikɑɑ dɔ̀ɔ̀mɛ̀ sitenkɑɑnìi kɛ nsì bɑ́ɑ́
\p
\v 1 Onìtì mɔù weè do bo Efɑdɑimmu tempɛ̃ nditɑ̃rì ĩ́nkɛ̀, kòo yètìrì tu Mikɑɑ. 
\v 2 Diyiè mɑrì kòo nɑ́kɛ́ o yɔ̃ kɛ dɔ̀: N yɔ̃ ɑ kpɑɑ́ yɛ̃́ bɛ̀ sòò dɑ yùúkúmɛ̀ mɛdítíbii tɛkɔupípíítɛ̀ nɛ̀ tɛpíítɛ̀ (1010) kɑ̀ɑ ntú dɛ yiɛ̀ mbo yɑ̀, yɑ́ɑ bɑ? Míì do ì tùótɛ́ n kpɑɑ́ ì tɔmu.
\p Dɛ mɔ̀nnì kòo yɔ̃ dɔ̀: M birɛ ti Yiɛ̀ nKuyie ndɑ́ dɔɔ̀ mɛsɑ̀ɑ̀.
\p
\v 3 Kòo ò tɛ̃̀ńnɛ́ o díítí kòo yɔ̃ dɔ̀: N do pɑ̃ dɛ kó idíítí ti Yiɛ̀ nKuyie nku kɛ ì dɔú nhɑ kpɛ́í nkɛ bo dɑ dɔɔ̀ tɛtenkɑɑnìtɛ̀. Bɛ̀ yóó ì yìɛ̀mmu kɛ́utɛ́ kɛ̀ ìì nɑɑ́ ntɛtenkɑɑnìtɛ̀, n yì ndɑ duɔ́mmu, nto i.
\p
\v 4 Mɛm̀mɛ ò wɛ̃̀tɛmɛ̀ kɛ́ ì tɛ̃̀ńnɛ́ o yɔ̃ kòo dɛitɛ mɛdítíbii nsikɔusìdɛ́ (200) kɛ́duɔ́ nhomɑ́ɑ́tì, kòo ò dɔ̀ɔ̀nɛ̀ tɛtenkɑɑnìtɛ̀ kɛ́ tɛ̀ dɑ̀ri timɑ́tì, kɛ́ tɛ̀ còńnɛ́ Mikɑɑ cĩ́ɛ̃̀tɛ̀.
\p
\v 5 Kɛ sɔ̃́ nweè Mikɑɑ mɔ̀kɛ ò kɔ̀rì dɛ̀ kɛ bɑ́ɑ́ nti Yiɛ̀ nKuyie nnɛ̀ sitenkɑɑnìi kɛ́yíɛ́ kɛ́dɔɔ̀ tɛtenkɑɑnìtɛ̀ tɛtɛ̀ nɛ̀ sitenkɑɑnìi sɑ́m̀pɔ́sì, kɛ́túótɛ́ o birɛ kɛ́dɔɔ̀ ikuɔ́ nìùtì. 
\v 6 Dɛ kó dimɔ̀nnì Isidɑyɛɛribɛ do í mɔkɛ okpɑ̀ɑ̀tì, bɑ́ wè kòo ndɔɔri ò dɔ́mɛ̀.
\p
\v 7 Dɛ mɔ̀nnì dɛ̀ do sɔ̃́ nDefiibɛ botí kóo dɑpɑ̀ɑ̀ mmɔù weè bo Bɛtideɛmmu Sudɑɑ kɔbɛ ciɛ kɛ tú opɔ̀ɔ̀ bɛ cuokɛ̀. 
\v 8 Kòo ítɛ́ dɛborɛ̀ kɛ́nwɑnti dikɑrì kupíkù tɛkù, kɛ́nkérí kɛ́tuɔkɛ Mikɑɑ cĩ́ɛ̃̀tɛ̀ Efɑdɑimmu tempɛ̃ nyɛtɑ̃rɛ̀ ĩ́nkɛ̀. 
\v 9 Kɛ̀ Mikɑɑ ò bekɛ kɛ dɔ̀: A yɛ̀nní dɛ? Kòò dɔ̀: N tú Defii wuɔ nkou nwe, kɛ ìtɛ́ní Bɛtideɛmmu Sudɑɑ tempɛ̃. N wɑnti m bo mborɛ̀ ndɛ.
\p
\v 10 Kɛ̀ Mikɑɑ ò nɑ̀kɛ́ kɛ dɔ̀: Mbo m borɛ̀ kɛ́nɑɑ́ n cĩ́ɛ̃̀tɛ̀ kó ikuɔ́ nìùtì kɛ̀ n níí dɑ duɔ́ ndibenni kṹṹ mmɛdítíbii ntɛpíítɛ̀, kɛ́ ndɑ duɔ̀nnɛ̀ tiyɑ̀ɑ̀tì nɛ̀ tidiitì dɛ̀ dɑ békú mɛ̀ɛ̀ botí.
\p Kɛ̀ Defiibɛ botí kou tɑroo, 
\v 11 kɛ́yie nkɛ́mbo Mikɑɑ cĩ́ɛ̃̀tɛ̀, kòo ò dɔ̀ɔ̀ o birɛ. 
\v 12 Kóò dɔ̀ɔ̀ ikuɔ́ nìùtì, kòo mbo o cĩ́ɛ̃̀tɛ̀. 
\v 13 Kɛ̀ Mikɑɑ dɔ̀: Di mmɔ̀nnì n yɛ̃́mu kɛ dò nti Yiɛ̀ nKuyie mbo n dɔɔ̀ mɛsɑ̀ɑ̀ nDefii wuɔ nkou mɛ̀ nnɑɑ́mmɛ̀ n cĩ́ɛ̃̀tɛ̀ ikuɔ́ nìùtì.
\c 18
\s1 Dɑnniibɛ wɑntimɛ̀ bɛ kó kɛtenkɛ̀
\p
\v 1 Dɛ mɔ̀nnì Isidɑyɛɛribɛ do í mɔkɛ okpɑ̀ɑ̀tì. Mɛm̀mɛ kɛ̀ Dɑnni botí kɔbɛ nwɑnti bɛ kó kɛtenkɛ̀, bɛ̀ bo mborɛ̀. Bɛ̀ mu ndo í mɔkɛ kɛtenkɛ̀ Isidɑyɛɛribɛ cuokɛ̀. 
\v 2 Kɛ̀ bɛ̀ɛ tɑ̃ɑ̃tɛ́ bɛ botí miɛkɛ yɛkɔ̃m̀bɔ̀ yɛmbɛ̀ bɛ̀nùmmù, kɛ́tɔ̃ nSodɑɑ nɛ̀ Esitɑɔdi kɛ dɔ̀, bɛ̀ɛ kɔtɛ kɛ́pɑɑtɛ́ dihɛì kɛ́ dì yĩ̀ɛ̃́tɛ́. Kɛ̀ bɛ̀ɛ kétɛ́ kɛ́tuɔkɛ Efɑdɑimmu tempɛ̃ nditɑ̃rì ĩ́nkɛ̀, kɛ́bɑ́tɛ́ Mikɑɑ cĩ́ɛ̃̀tɛ̀ borɛ̀ kɛ bo yié. 
\v 3 Bɛ̀ mɛ ntɔ́kɛ́nɛ̀mɛ̀ Mikɑɑ cĩ́ɛ̃̀tɛ̀, kɛ̀ bɛ̀ɛ keè Defii wuɔ nkou tɑmmɛ̀ kɛ́ mɛ̀ bɑntɛ́, kɛ́tɔ́ɔ́nko kóò bekɛ kɛ dɔ̀: We ndɑ tɔní diɛ? A pĩ́ mbɑ diɛ? A kó mucɔ̃́ntimu tu ɔ̃̀mmu dɛborɛ̀?
\p
\v 4 Kòo bɛ̀ tɛ̃̀ńnɛ́ kɛ dɔ̀: Mikɑɑ weè yɛ̃ nní mbo o borɛ̀ kɛ tú ikuɔ́ nìùtì, kòò n yietì. 
\v 5 Kɛ̀ bɛ̀ dɔ̀: Tũ mbeé nti Yiɛ̀ nKuyie nkɛ́yɑ̀ kɛ̀ kucɛ ti kérí kù bo ntú kusɑ̀ɑ̀kù.
\p
\v 6 Kòò dɔ̀: Kɔtɛnɛ̀ kɛ bɑ́ nyĩɛ̃̀kù ti Yiɛ̀ nKuyie nyó ndi bonɛ̀mu.
\p
\v 7 Kɛ̀ dɛ kó bɛnìtìbɛ̀ bɛnùmmùu pɛ̃ɛ̃tɛ́ kɛ́tuɔkɛ Dɑiisi kɛ́nsɔ̃́ bɛ̀ɛ̀ dɛ̀ bo bɛ̀ tuɔ́mmu Sidoniibɛ tɛ̃mɛ̀, kɛ kɑri bɑ́ tìmɑtì í bɛ̀ kɔɔ́nnɛ̀. Bɛ̀ í yĩɛ̃̀kù dɛ̀mɑrɛ̀, òmɔù í bɛ̀ fɛ̃́ũnko, bɛ̀ mɛ nyí tɔ́kɛ́nɛ̀ Sidoniibɛ. Òmɔù do í bɛ̀ bɑkɛ́. 
\v 8 Kɛ̀ dɛ kó bɛnìtìbɛ̀ɛ wɛ̃tɛní Sodɑɑ nɛ̀ Esitɑɔdi kɔbɛ borɛ̀ kɛ̀ bɛ̀ɛ bɛ̀ bekɛ kɛ dɔ̀: Dɛ̀ dònnímɛ? 
\v 9 Kɛ̀ bɛ̀ dɔ̀: Tí kɔtɛnɛ̀ kɛ́ bɛ̀ do, ti kɔ̀tɛ kɛ yɑ̀mu dihɛì kɛ sɔ̃́ ndì wenni mɛdiɛ̀. Bɑ́ nkɑrinɛ̀ dɛtetìrɛ̀, bɑ́ nhɔɔtínɛ̀! Tí kɔtɛnɛ̀ kɛ́ bɛ̀ do kɛ́fietɛ dihɛì. 
\v 10 Kɛ̀ ti tùɔ̀koo di bo yɑ̀ di nìtìbɛ̀ tuɔ́mmɛ̀, bɑ́ bɛ ɛì í sénní dɛ̀ bèkú dɛ̀ɛ̀ kó dimɑ̀ɑ̀ onìtì dɛ̀mɑrɛ̀ í kpɑ dɛ kó dihɛì.
\p
\v 11 Mɛm̀mɛ kɛ̀ Dɑnniibɛɛ bɑ́ɑ́tí Sodɑɑ nɛ̀ Esetɑɔdi kɛ́mbo bɛnìtìbɛ̀ sikɔusìkuɔ̀ (600), 
\v 12 kɛ́kɔtɛ kɛ́bɑ́tɛ́ Kidiyɑ-Yeɑdimmu Sudɑɑ tenkɛ̀, dɛɛ̀ te kɛ̀ bɛ̀ yu dɛ kó dibòrì kɛ tú: Dɑnni kɔbɛ kɑrì, kɛ mɛ ndɛ̀ yu nɛ̀ yíenní, kɛ̀ dɛ̀ bo Kidiyɑ-Yeɑdimmu ɛì ììkɛ̀. 
\v 13 Bɛ̀ dɛ nyìtɛ́ kɛ́kɔtɛ Efɑdɑimmu tempɛ̃ nditɑ̃rì ĩ́nkɛ̀ kɛ́tuɔkɛ Mikɑɑ cĩ́ɛ̃̀tɛ̀. 
\v 14 Bɛnìtìbɛ̀ bɛ̀nùmmù bɛ̀ɛ̀ do kɔ̀tɛ kɛ́pɑɑtɛ́ Dɑiisi ɛì, kɛ̀ bɛ̀ɛ nɑ́kɛ́ bɛ tebìí kɛ dɔ̀: Tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì dɛɛ̀ bo diɛ ntɛcĩ́ɛ̃̀tɛ̀ mɑtɛ̀ miɛkɛ. Díì nɛ́ yɛ̃́ di dò nkɛ́dɔɔ̀mɛ̀.
\p
\v 15 Bɛ̀ mɛ nyĩ kɛ́deè, kɛ́tɑ Mikɑɑ cĩ́ɛ̃̀tɛ̀ kɛ́dɔu nDefii wuɔ nkou. 
\v 16 Dɛ mɔ̀nnì kɛ̀ Dɑnni botí kɔbɛ sikɔusìkuɔ̀ (600) bɛ̀ɛ̀ do bɑ̀ɑ́tí kɛ̀ bɛ̀ còḿmú dibòrì. 
\v 17 Kɛ̀ bɛ̀ɛ ò dɔu nkɛ́deè kɛ́pɛ̃ɛ̃tɛ́ kɛ́dekɛ kudɑ̀nkù kɛ́tɑ kudieku kɛ́túótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì. Dɛ mɔ̀nnì kɛ̀ bɛnìtìbɛ̀ sikɔusìkuɔ̀ (600) bo dibòrì kɛ̀ ikuɔ́ nìùtì bo bɛ borɛ̀. 
\v 18 Kɛ̀ ikuɔ́ nìùtìi yɑ̀ bɛ̀ tɑmɛ̀ o cĩ́ɛ̃̀tɛ̀ kɛ tùótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì, kòo bɛ̀ bekɛ kɛ dɔ̀: Di dɔɔri bɑ dɛndɛ? 
\v 19 Kɛ̀ bɛ̀ dɔ̀: Cĩ́ɛ̃́kɛ́ kɛ́yĩ́ ɑ nùù cɛ̃́ũ, kɛ́ tí tũnnɛ kɛ́nɑɑ́ nti botí kuɔ́ nìùtì. A bo ntúmɛ̀ Isidɑyɛɛribɛ botí mɑkù kuɔ́ nìùtì, dɛ̀ í tɔ̃ũnɛ̀ ɑ bo ntúmɛ̀ tɛcĩ́ɛ̃̀tɛ̀ tɛ̀mɑ́ɑ̀ kouɑ̀?
\p
\v 20 Kɛ̀ diwɛ̀ìi pĩ́ nyikuɔ́ nìùtì, kòo túótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì, kɛ́kɔɔrɛnko ditĩ̀nnì.
\p
\v 21 Mɛm̀mɛ kɛ̀ bɛ̀ɛ pɛ̃ɛ̃tɛ́ kɛ́sɔɔtɛ́ bɛ cɛ kɛ́nií nyibí nɛ̀ iwũɔ̃ nɛ̀ tinɛntì. 
\v 22 Mikɑɑ nɛ̀ o cɛ̃pɛɛtitɔbɛ̀ kɛ̀ bɛ̀ nyóó bɛ̀ yɑ̀ kɛ̀ bɛ̀ dɛ̀tɛ́ kɛ̀ bɛ̀ mbɛ̀ bɛ̀tì. 
\v 23 Kɛ̀ Dɑnni botí kɔbɛ keè bɛ̀ pɛ́ikomɛ̀ kɛ́wɛ̃ɛ̃tɛní kɛ́yɑ̀ Mikɑɑ kóò bekɛ kɛ dɔ̀: Dɛ̀ dòmmɛ? Bɑ nkó yɛùdìhurɛ nyɛ?
\p
\v 24 Kòo bɛ̀ tɛ̃̀ńnɛ́ kɛ dɔ̀: Di tùótɛ́ n tenkɑɑnìtɛ̀ nɛ̀ sisɑ́m̀pɔ́sì nɛ̀ tɛ̀ɛ̀ dɑ̀ri timɑ́tì kɛ kérínɛ̀ kɛ wɛ̃̀tɛ kɛ m békú dɛ̀ dòmmɑ̀ɑ̀?
\p
\v 25 Kɛ̀ Dɑnni botí kɔbɛ dɔ̀: Yíɛ́ kɛ́yĩ́ fĩ́ɛ̃́ũ̀, kɑ̀ɑ bo yɑ̀ ti yóó dɑ dɔɔ̀ dɛ̀! Kɑ̀ɑ í yɛ̃́ ɑ kú fɔ̃́ nnɛ̀ ɑ cĩ́ɛ̃̀tɛ̀ kɔbɛ.
\p
\v 26 Mɛm̀mɛ kɛ̀ Dɑnni botí kɔbɛ nsɔkɛ́ bɛ cɛ kɛ̀ Mikɑɑ bɑntɛ́ bɛ̀ ò kpeńnìnɛ̀mɛ̀mu kɛ́yóu kɛ́kò.
\s1 Dɑnniibɛ pɔ̀ntɛmɛ̀ Dɑiisi kɛ mɑɑ́ bɛ ɛì nɛ̀ Kuyie ntɑummɛ̀ tou
\p
\v 27 Mɛm̀mɛ Dɑnni botí kɔbɛ tɔmɛ̀ Mikɑɑ nɛntì nɛ̀ wèè do tú o kó ikuɔ́ nìùtì kɛ́pɛ̃ɛ̃tɛ́nɛ̀, kɛ́kɔtɛ kɛ́do Dɑiisi ɛì kɛ́kuɔ di nìtìbɛ̀ bɛ̀ɛ̀ do kɑri kɛ tuɔ́ nkɛ í yĩɛ̃̀kù, kɛ́deè kɛ́cɔ́u ndihɛì. 
\v 28 Bɑ́ òmɔù í mbɛ̀ dɛɛtɛ́ kɛ yɛ̃́ bɛ̀ do í tɔ́kɛ́nɛ̀mɛ̀ Sidonni, òmɔù mɛ ndo í bɛ̀ bɑkɛ́. Bɛ̀ do bo Bɛti-Deɔbu biriku nku. Kɛ̀ Dɑnni botí kɔbɛɛ bɛ̀ pɔ̀ntɛ kɛ́mɑɑ́ bɛ ɛì, 
\v 29 kɛ́ dì yu kɛ dɔ̀: Dɑnni. Bɛ yɑ̀ɑ̀rì weè do te dɛ kó diyètìrì, Sɑkɔbu birɛ mɑrɛ̀ kó diyètìrì do ndi. 
\v 30 Kɛ̀ Dɑnniibɛɛ fíí ntɛtenkɑɑnìtɛ̀ kɛ̀ Mɔyiisi birɛ Kɛdisɔmmu birɛ Yonnɑtɑ̃ɑ̃ ntú ikuɔ́ nìùtì kɛ́sɔɔtɛ́nɛ̀ bɛ kó ibío kɛ́tuɔkɛnɛ̀ bɛ dootitɔbɛ̀ bɛ̀ pĩ̀ḿmú dìì mɔ̀nnì kɛ kònnɛ̀. 
\v 31 Bɛ̀ do fìímmu Mikɑɑ do dɔ̀ɔ̀ tɛ̀ɛ̀ tenkɑɑnìtɛ̀ kɛ́ ntɛ̀ mɔ̀kɛ Kuyie ntɑummɛ̀ tou do bo yɛ̀ɛ̀ mɔ̀rɛ̀ Sidoo.
\c 19
\s1 Bɛnsɑmɛɛ botí kɔbɛ do dɔ̀ɔ̀ ìì sɔkɛ
\p
\v 1 Dɛ mɔ̀nnì Isidɑyɛɛribɛ do í mɔkɛ okpɑ̀ɑ̀tì, kòo nìtì mɔù mbo Efɑdɑimmu tempɛ̃ nditɑ̃rì ĩ́nkɛ̀ kó dihɛì, dìì dɛ́tirìnɛ̀ yɛtɛyɛ̀. Ò do tú Defiibɛ botí kou nwe kɛ dɛ̀ bo, kɛ́túótɛ́ o pocɛ̃nnì mɑrì Bɛtideɛmmu Sudɑɑ botí miɛkɛ. 
\v 2 Nɛ̀ di kɛ̀ bɛ̀ɛ kpɑ, kɛ̀ dìi ò yóu kɛ́kò ndi cicɛ cĩ́ɛ̃̀tɛ̀ kɛ́mbo kɛ dɔ̀ bɛtɑ̃̀ɑ̃̀bɛ̀ bɛ̀nɑ̀ɑ̀. 
\v 3 Kòo dɔùu ítɛ́ kɛ́tũnnɛ kɛ bo ò bɑ́mmú kɛ̀ bɛ̀ɛ̀ kò, kɛ́túótɛ́ sɑ̃mmɑrímúbɛ̀ bɛ̀dɛ́bɛ̀ kòo kóo tɔ̃ntìi ò nɛinɛ̀ kɛ̀ bɛ̀ɛ tuɔkoo, kòo pocɛ̃nnìi ò tɑnnɛ́ di cicɛ cĩ́ɛ̃̀tɛ̀, kòo ò cɔutɛ́ nɛ̀ diwɛ̀ì, 
\v 4 kɛ́duɔ́ nkòo mbo o cĩ́ɛ̃̀tɛ̀ miɛkɛ, kɛ dɔ̀ yɛwe yɛ̀tɑ̃ɑ̃ti. Nɛ̀ o kóo tɔ̃ntì kɛ̀ bɛ̀ nyo nkɛ yɔ̃̀ nkɛ dɔu. 
\v 5 Diyiè nɑɑnnì yiè kɛ̀ bɛ̀ɛ ítɛ́ dikṹnweńnì kɛ dɔ̀, bɛ̀ bo kò nkòo cɔ̀kùu yetɛ kɛ dɔ̀: Kɑrinɛ̀ kɛ́di kɛ́pɛ́tɛ́ muwɛ̃rímú kɛ nɛ́ nɑ kɛ́kétɛ́.
\p
\v 6 Kɛ̀ bɛ̀ɛ kɑroo kɛ̀ bɛ̀ɛ wɛ̃nnɛ́ kɛ́di kɛ́yɑ̃̀, kɛ́deè, kòo dɑpɑ̀ɑ̀ ncɔ̀kùu ò nɑ̀kɛ́ kɛ dɔ̀: Túótɛ́ mɛfíè kɛ́yíɛ́ kɛ́yie ndiɛ nkɑ̀ɑ yɛ̀mmɛ̀ɛ cɑ́tɛ́.
\p
\v 7 Kòo ndɔ́ kɛ́kò nkòo cɔ̀kù yetoo kòo yóu kɛ yíɛ́ kɛ́yié. 
\v 8 Diyiè nummurì yiè kɛ̀ dɛ̀ nkpɑɑ́ uu dikṹnweńnì sɛ̀ì kòo bɑ́ɑ́tí kɛ bo kò nkòo cɔ̀kùu yetɛ kɛ dɔ̀: Kɑri kɛ́di, kuyuoku kɛ nɛ́ kétɛ́.
\p Mɛm̀mɛ kòo kɑri kɛ̀ bɛ̀ɛ wɛ̃nnɛ́ kɛ́di. 
\v 9 Bɛ̀ di dìì mɔ̀nnì kɛ deè kòo ndɔ́ kɛ́túótɛ́ o pokù nɛ̀ o tɔ̃ntì kɛ̀ bɛ̀ɛ kò, kòo cɔ̀kù ò nɑ̀kɛ́ kɛ dɔ̀: Diyiè diɛ nkɛ dèè kɛ̀ dɛ̀ bìiri, túótɛ́ mɛfíè nkɛ́duɔ́ diɛ nkɑ̀ɑ yɛ̀mmɛ̀ɛ cɑ́tɛ́, kɛ̀ dɛ̀ nkpɑɑ́ uu kɑ̀ɑ kò.
\p
\v 10 Dɛ mɔ̀nnì odɑpɑ̀ɑ̀ mmɛ ntɛ̃́nkɛ í nyie nkɛ bo nkpɑɑ́, kɛ́túótɛ́ o pokù nɛ̀ o sɑ̃mmɑrímúbɛ̀ bɛdɛ́, kɛ́boú tinɛntì dɛ ĩ́nkɛ̀, kɛ́nkérí kɛ́tuɔkɛ Sebusii, dihɛì bɛ̀ tu dì di mmɔ̀nnì Sedisɑdɛmmu. 
\v 11 Bɛ̀ tùɔ̀koo dìì mɔ̀nnì dihɛì kɛ sɔ̃́ ndiyiè dèè, kòo kóo tɔ̃ntìi ò nɑ̀kɛ́ kɛ dɔ̀: Tí kɔtɛ Sebusiibɛ ciɛ kɛ́yié. 
\v 12 Kòo yetɛ kɛ dɔ̀: Ti bɑ́ɑ́ kɔtɛ dihɛì mɑrì Isidɑyɛɛribɛ í bo dì. Ti pɛ̃ɛ̃tɛ́ kɛ́kɔtɛ Kibeɑ.
\p
\v 13 Tí yetoo kɛ́tuɔkɛ Kibeɑ yoo Dɑmɑɑ, yɛɛ̀ ɛkɛ̀ kó dìmɑrì ndi ti dò nkɛ́yiémmɛ̀.
\p
\v 14 Kɛ̀ bɛ̀ɛ sɔɔtɛ́ bɛ cɛ, kɛ̀ diyiè nyóó tɑ kɛ̀ bɛ̀ tùɔ̀koo Kibeɑ, Bɛnsɑmɛɛ botí kɔbɛ ciɛ. 
\v 15 Bɛ̀ tùɔ̀koo dìì mɔ̀nnì dihɛì kɛ́tɑ kɛ bo yié nKibeɑ kɛ́bɑ́tɛ́, kɛ́nkɑri yɑɑ́rɛ̀, òmɔù mɛ nyí mbɛ̀ yu kɛ̀ bɛ̀ bo tɑ o cĩ́ɛ̃̀tɛ̀.
\p
\v 16 Kɛ̀ bɛ̀ nsɔ̃́ nhodɑkótì mɔù kũntiní kupɑku, o ciɛ do bo Efɑdɑimmu tempɛ̃ nditɑ̃rì ĩ́nkɛ̀ nkɛ, kòò kɔ̀tɛní kɛ bo Kibeɑ Bɛnsɑmɛɛ kɔbɛ ciɛ. 
\v 17 Kòo yɑ̀ opɔ̀ɔ̀ kòò kɑ̀ri yɑɑ́rɛ̀, kòo ò bekɛ kɛ dɔ̀: A yɛ̀nní dɛ? A kɔri kɛ?
\p
\v 18 Kòo ò tɛ̃̀ńnɛ́ kɛ dɔ̀: Ti bonní Bɛtideɛmmu nwe Sudɑɑ botí kɔbɛ ciɛ, kɛ kũnti Efɑdɑimmu ditɑ̃rì ĩ́nkɛ̀, dihɛì dìì í tɔ́kɛ́nɛ̀ yɛtɛyɛ̀. N do kɔ̀tɛ Bɛtideɛmmu nwe, kɛ kũntiní òmɔù mɛ nyí n yu kɛ̀ m bo yié nho cĩ́ɛ̃̀tɛ̀. 
\v 19 M mɛ ntɔmu timútì n sɑ̃mmɑrímúbɛ̀ kpɛ́í nkɛ mɔkɛ pɛ̃́ɛ̃̀ nɛ̀ mɛnɑɑ̀ mmí nnɛ̀ m pokù nɛ̀ n kóo tɔ̃ntì ti kpɛ́í, dɛ̀mɑrɛ̀ í ti dónnì.
\p
\v 20 Kòo dɑkótì dɔ̀: Diwɛ̀ì ndɑ bonɛ̀, míì yóó dɑ duɔ́ ndɛ̀ dɑ békú dɛ̀, ɑ bɑ́ɑ́ yié nyɑɑ́rɛ.
\p
\v 21 Ò yĩ mɛmmɛ, kóò tɑnnɛ́ o cĩ́ɛ̃̀tɛ̀ kɛ́duɔ́ ntimútì sɑ̃mmɑrímúbɛ̀ kɛ́deè kɛ̀ bɛ̀ɛ ɔ́ú bɛ nɑɑ̀cɛ̀i, kɛ́di kɛ́yɑ̃̀.
\p
\v 22 Bɛ̀ kpɑɑ́ mɛ nyo nnɛ̀ diwɛ̀ì, kɛ̀ dihɛì kó itookperí yɛmbɛ̀ɛ kɔtɛní, kɛ́cɛ̃ɛ̃tɛ tɛcĩ́ɛ̃̀tɛ̀, kɛ́bentɛ dicɑ̀ù, kɛ́nɑ́kɛ́ odɑkótì tɛcĩ́ɛ̃̀tɛ̀ yiɛ̀ nkɛ dɔ̀: Dennɛní onìtì wèè tɑ ɑ cĩ́ɛ̃̀tɛ̀, ti dɔ́ kóò duɔ́nɛ̀mu.
\p
\v 23 Kòo dɑkótìi yɛnní kɛ́ bɛ̀ nɑ̀kɛ́ kɛ dɔ̀: N kɔbɛ bɑ́ɑ́ dɔɔ̀nɛ̀ mɛyɛi mmɛmmɛ kó kubotí. Bɑ́ɑ́ dɔɔ̀nɛ̀ isɔkɛ inyi, nkóo pɔ̀ɔ̀ nwe. 
\v 24 M mɔkɛ osɑpɑ̀ɑ̀ mbɑ́ ò mu nyí yɛ̃́ onitidɔ̀ù, m bo wè ndi duɔ́ nkɛ̀ dí dɔ̀ɔ̀nɛ̀ di dɔ́mɛ̀. Di bɑ́ɑ́ dɔɔ̀nɛ̀ onìtì yiè nyisɔkɛ kpɛrɛ.
\p
\v 25 Dɛ kó bɛnìtìbɛ̀ í ndɔ́ kɛ́keè. Mɛm̀mɛ kɛ̀ Defii wuɔ nkouu dennɛní o pokù, kɛ̀ bɛ̀ɛ ò pĩ̀ńnɛ̀ muwɛ̃rímú, kɛ́nyié nkoò duɔ́nɛ̀ kɛyènkɛ̀ kɛmɔu, kóò fĩ́ĩnkoo kukṹnwentóo. 
\v 26 Dikṹnweńnì kòo nitipòkùu kɔtɛ odɑkótì cĩ́ɛ̃̀tɛ̀ o dɔù bo tɛ̀ɛ̀ miɛkɛ kɛ́doroo kɛ́nduɔ́ kɛ̀ diyiè yɑ̀ɑ yɛnnɛ̀nní. 
\v 27 Dɛ̀ wentɛ́ dìì mɔ̀nnì kòo dɔùu yɛnní kɛ bo sɔɔtɛ́ o cɛ, kɛ́nsɔ̃́ nho pokù duɔ́ dibòrì kɛ cɑ̃ɑ̃nko, kòo nɔu dɑkɛ́ dibòrì. 
\v 28 Kòò dɔ̀: Ítɛ́ kɛ̀ tí pɛ̃ɛ̃tɛ́!
\p Kòo nduɔ́ kɛ́cĩ́ɛ̃́kɛ́ kòo ò tùótɛ́ dicírì kɛ́dɑɑ́ nho sɑ̃mmɑrímú ĩ́nkɛ̀, kɛ́pɛ̃ɛ̃tɛ́ kɛ́kò nho ciɛ. 
\v 29 Ò tùɔ̀kɛ dìì mɔ̀nnì o ciɛ, kɛ́túótɛ́ disiè kɛ́kéétɛ́ ocíì yɛkékɛ̀ tɛpíítɛ̀ nɛ̀ yɛ̀dɛ́ɛ̀, kɛ́duɔ́ nyIsidɑyɛɛribɛ botí bɑ́ kù dikéè dìmɑ́ɑ̀. 
\v 30 Bɛ̀ɛ̀ kó dimɑ̀ɑ̀ dɛ̀ yɑ̀ kɛ̀ bɛ̀ nnɑɑ́ nkɛ tú: Ti mu nyí yɑ̀ diɛ̀ mbotí ti mɛ nyí dɛ̀ kèè nɛ̀ Isidɑyɛɛribɛ yɛ̀nnímɛ̀ Esibiti. Dɛ kó tinɑ́ɑǹtì dò nti tì wèńtɛ́mu kɛ́yɑ̀ ti bo yĩ́mɛ̀.
\c 20
\s1 Isidɑyɛɛribɛ dokɛ́nɛ̀mɛ̀ Bɛnsɑmɛɛ botí kɔbɛ kɛ bo pɛitɛ
\p
\v 1 Kɛ̀ Isidɑyɛɛribɛɛ wɛ̃nnɛ́ bɛmɔu kɛ́tíí mMisipɑɑ ti Yiɛ̀ nKuyie nyììkɛ̀ kɛ́túótɛ́ Dɑnni tenkɛ̀ kɛ́tuɔkɛnɛ̀ Bɛɛrisebɑɑ, kɛ́tuɔkɛnɛ̀ Kɑdɑɑdi kɔkoo. 
\v 2 Kɛ̀ ti Yiɛ̀ nKuyie nkó bɛnìtìbɛ̀ Isidɑyɛɛribɛ botí imɔu nɛ̀ bɛ kó bɛkótíbɛ̀ kɛ̀ bɛ̀ɛ tíí nditĩ̀nnì, kɛ́mbo sikɔupíkɔ̀ùsìnɑ̀ɑ̀ (400000) bɛ̀ɛ̀ nɔ mmudoò. 
\v 3 Kɛ̀ Bɛnsɑmɛɛ botí kɔbɛɛ keè Isidɑyɛɛribɛ tìímmɛ̀ Misipɑɑ.
\p Kɛ̀ Isidɑyɛɛribɛɛ bekɛ kɛ dɔ̀: Ti nɑ́kɛ́ dɛ kó mɛyɛi mpɛitɛ́ mɛ̀ɛ̀ botí?
\p
\v 4 Defiibɛ wuɔ kou bɛ̀ kùɔ wèè pokù, kòo bɛ̀ tɛ̃̀ńnɛ́ kɛ dɔ̀: N sòò tùɔ̀kɛní Bɛnsɑmɛɛ tempɛ̃ nku Kibeɑ, mí nnɛ̀ m pokù kɛ̀ ti ndɔ́ kɛ́yié. 
\v 5 Kɛ̀ Kibeɑ ɛì kɔbɛɛ kɔtɛní kɛ́cɛ̃ɛ̃tɛ m bo tɛ̀ɛ̀ cĩ́ɛ̃̀tɛ̀ kɛyènkɛ̀ kɛ́ndɔ́ kɛ́ n kuɔ, kɛ́duɔ́nɛ̀ m pokù muwɛ̃rímú kɛ tontɛ́ kóò kùɔ. 
\v 6 Kɛ̀ m mɛ nhò tùótɛ́ kɛ kèkɛ́, kɛ totí Isidɑyɛɛribɛ tenkɛ̀ duɔ́ kɛ mɑmɛ̀. Kɛ yɛ̃́ bɛ̀ dɔ̀ɔ̀mɛ̀ mɛyɛi ndiɛmɛ̀ mmɛ isɔkɛ Isidɑyɛɛribɛ cuokɛ̀. 
\v 7 Díndi Isidɑyɛɛribɛ di tìímmu diɛ ndimɔu. Nɑ́kɛ́nɛ̀ kɛ́yɑ̀ di bo yĩ́mɛ̀.
\p
\v 8 Kɛ̀ bɛ̀ɛ wɛ̃nnɛ́ bɛmɔu kɛ dɔ̀: Ti kóo mɔù í kũnti kɛ bo tɑ o fii yoo o cĩ́ɛ̃̀tɛ̀. 
\v 9 Ti yóó do Kibeɑ kɔbɛ mudoò mmu. Tí tɑ̃ũnnɛ̀ tɛ́tɛ́. 
\v 10 Isidɑyɛɛribɛ botí imɔu miɛkɛ kɛ̀ bɛnìtìbɛ̀ bo tɛkɔ̀ùtɛ̀ (100) tí dɛitɛ tɛpíítɛ̀, kɛ̀ bɛ̀ mɛ mbo tɛkɔupíítɛ̀ (1000) tí dɛitɛ tɛkɔ̀ùtɛ̀, kɛ̀ bɛ̀ bo tɛkɔupípíítɛ̀ (10000) tí dɛitɛ tɛkɔupíítɛ̀ (1000), bɛ̀ɛ̀ yó nwɑɑ̀nní tidiitì kɛ duɔ̀ mbɛ̀ɛ̀ kɔ̀ri kɛ bo do Kibeɑ kɛ́pɛitɛ Bɛnsɑmɛɛ botí kɔbɛ dɔ̀ɔ̀ ìì sɔkɛ Isidɑyɛɛribɛ cuokɛ̀.
\p
\v 11 Kɛ̀ Isidɑyɛɛribɛɛ wɛ̃nnɛ́ dinùù dìmɑ́ɑ̀ kɛ bo kɔtɛ kɛ́do Kibeɑ. 
\v 12 Kɛ̀ Isidɑyɛɛribɛ botí imɔu kɔbɛɛ tɔ̃ nkɛ̀ bɛ̀ɛ nɑ́kɛ́ Bɛnsɑmɛɛ botí kɔbɛ kɛ dɔ̀: Yé dɛ̀ yĩ́mɛ̀ kɛ̀ di dɔ̀ɔ̀ isɔkɛ iì mbotí di cuokɛ̀? 
\v 13 Tí duɔ́nnɛ̀ Kibeɑ ɛì kó itokperì yɛmbɛ̀, kɛ̀ ti bɛ̀ kùɔ, kɛ́dɛitɛ mɛyɛi nyIsidɑyɛɛribɛ cuokɛ̀.
\p Bɛnsɑmɛɛ botí kɔbɛ mɛ nyí nyie nkɛ kèńtɛ́ bɛ tebìí Isidɑyɛɛribɛ nɑ̀ɑ́ ntì, 
\v 14 kɛ́wɛ̃nnɛ́ bɛ ɛkɛ̀ yɛmɔu kɛ́tíí nKibeɑ, kɛ bo dokɛ́nɛ̀ Isidɑyɛɛribɛ. 
\v 15 Dɛ yiè kɛ́wɑɑ́ mbɛhɑ̃ɑ̃pɔ̀mbɛ̀ sikɔupípísìdɛ́ nɛ̀ sikɔupísìkuɔ̀ (26000) bɛ ɛkɛ̀ tɛyɛ̀ kɔbɛ kɛ́mbúútí Kibeɑ ɛì kɔbɛ, bɛ̀ɛ̀ nɔ mmudoò mɛsɑ̀ɑ̀ nkɛ̀ bɛmbɛ mbo sikɔusìyiekɛ̀ (700). 
\v 16 Dɛ kó bɛhɑ̃ɑ̃pɔ̀mbɛ̀ bɛmɔu kɛ̀ yɛcɑ̃̀nkuyɛ̀ mbo sikɔusìyiekɛ̀ (700) kɛ nɔ mmudoò mɛsɑ̀ɑ̀. Bɑ́ kɛ̀ kuyùrìkù bo kumɑ́ɑ̀ kòò dootɛ́ ditɑ̃́rì ò bɑ́ɑ́ kù nɔ̀ɔ̀. 
\v 17 Isidɑyɛɛribɛ kó ditĩ̀nnì kɛ̀ bɛmbɛ mɛ mbo bɛhɑ̃ɑ̃pɔ̀mbɛ̀ sikɔupíkɔ̀ùsìnɑ̀ɑ̀ (400000) bɛ̀ɛ̀ nɑ mudoò kɛ deè.
\p
\v 18 Kɛ̀ Isidɑyɛɛribɛɛ kɔtɛ Betɛɛdi kɛ bo beé nti Yiɛ̀ nKuyie nkɛ́yɑ̀ bɛ̀ botí miɛkɛ kùù dò nkɛ́niitɛ́ kɛ̀ bɛ̀ɛ kɔtɛ kɛ́dokɛ́nɛ̀ Bɛnsɑmɛɛ botí kɔbɛ. Kɛ̀ ti Yiɛ̀ nKuyie ndɔ̀: Sudɑɑ botí kɔbɛ bɛɛ̀ dò nkɛ́niitɛ́. 
\v 19 Kɛ̀ Isidɑyɛɛribɛ bɑ́ɑ́tí dikṹnweńnì sɛ̀ì kɛ́kɔtɛ kɛ́bɑ́tɛ́ Kibeɑ tɑkɛ́. 
\v 20 Mɛm̀mɛ bɛ̀ pèńnɛ́mɛ̀ Bɛnsɑmɛɛ botí kɔbɛ kudookɔti Kibeɑ borɛ̀. 
\v 21 Kɛ̀ Bɛnsɑmɛɛ botí kɔbɛɛ yɛnní kɛ́potɛ́ Isidɑyɛɛribɛ, kɛ́kuɔ sikɔupípísìdɛ́ nɛ̀ sikɔu sìdɛ́ dɛ yiè (2200). 
\v 22-23 Kɛ̀ Isidɑyɛɛribɛɛ kɔtɛ ti Yiɛ̀ nKuyie nyììkɛ̀, kɛ́nkuɔ̀ nnɛ̀ kuyuokoo kɛ kù bekù kɛ bo yɑ̀ kɛ̀ bɛ̀ bo wɛ̃tɛ kɛ́yíɛ́ dokɛ́nɛ̀ bɛ tebìí Bɛnsɑmɛɛ botí kɔbɛ. Kɛ̀ ti Yiɛ̀ nKuyie ndɔ̀: Ɛ̃ɛ̃ bɛ̀ɛ kɔtɛ. Kɛ̀ bɛ̀ɛ wɛ̃tɛ kɛ́túótɛ́ tikɔ̃nyɑuti kɛ́pénnɛ́ kudookɔti bɛ̀ bɑɑ wee kù pèńnɛ́ dɛ̀, 
\v 24-25 kɛ́wɛ̃tɛ kɛ́do Bɛnsɑmɛɛ botí kɔbɛ mudoò, kɛ̀ Bɛnsɑmɛɛ botí kɔbɛɛ yɛnní kɛ́potɛ́ Isidɑyɛɛribɛ kɛ́kuɔ bɛhɑ̃ɑ̃pɔ̀mbɛ̀ tɛkɔupípíítɛ̀ nɛ̀ sikɔupísìnì (18000). 
\v 26 Dɛ mɔ̀nnì kɛ̀ Isidɑyɛɛribɛ bɛmɔuu kɔtɛ Betɛɛdi kɛ́nkɑri ti Yiɛ̀ nKuyie nyììkɛ̀ kɛ kuɔ̀ nkɛ bou dinùù nɛ̀ kuyuokoo, kɛ kɔù ti Yiɛ̀ nKuyie nyiwũɔ̃ kɛ tuɔ̀, kɛ ku kɔ̀ù itɛì mɛtɑummɛ̀ kpɛyi. 
\v 27-28 Dɛ kó dimɔ̀nnì dɛ̀ do sɔ̃́ ti Yiɛ̀ nKuyie ntɑummɛ̀ tɔu dɛ mbo kɛ̀ Anɔɔ birɛ Edeɑsɑɑ kó dɛbirɛ Pinɑsi weè dì bɑ̀ɑ kɛ̀ Isidɑyɛɛribɛ beé ti Yiɛ̀ nKuyie nkɛ bo yɑ̀ bɛ̀ bo wɛ̃tɛ kɛ́dokɛ́nɛ̀ bɛ tebìí Bɛnsɑmɛɛ botí kɔbɛ yoo bɛ bo yóu. Kɛ̀ ti Yiɛ̀ nKuyie mbɛ̀ nɑ̀kɛ́ kɛ dɔ̀: Kɔtɛnɛ̀ nɑnkɛ n yóó duɔ́ nkɛ̀ di bɛ̀ nɑmu.
\p
\v 29 Mɛm̀mɛ kɛ̀ Isidɑyɛɛribɛɛ oo mbɛhɑ̃ɑ̃pɔ̀mbɛ̀ Kibeɑ kɛ́fitɛ́. 
\v 30 Diyiè tɑ̃ɑ̃́nnì kɛ̀ Isidɑyɛɛribɛɛ do Bɛnsɑmɛɛ botí kɔbɛ mudoò, bɛ̀ bɑɑ ɔ̃ɔ̃ mɑ́ɑ́ dɛ̀ Kibeɑ ɛì ììkɛ̀. 
\v 31 Kɛ̀ Bɛnsɑmɛɛ botí kɔbɛɛ yɛnní kɛ́ndokùnɛ̀ Isidɑyɛɛribɛ, kɛ́dɛ́tɛ́nɛ̀ dihɛì, kɛ tó ketɛ́ bɛ̀ bo mbɛ̀ kɔ̀ùmɛ̀ bɛ̀ bɑɑ ɔ̃ɔ̃ yĩ́mɛ̀ yɛwe tɛyɛ̀, kɛ́kuɔ bɛnìtìbɛ̀ sipísìtɑ̃ɑ̃ti Betɛɛdi nɛ̀ Kibeɑ dɛ kó icɛ ĩ́nkɛ̀. 
\v 32 Kɛ̀ bɛ yɛ̀mmɛ̀ ndò mbɛ̀ to nɑmu Isidɑyɛɛribɛ, bɛ̀ ɔ̃ɔ̃ bɛ̀ nɑ mɛ̀ɛ̀ botí. Kɛ yɛ̃́ bɑ? Kɛ̀ bɛ̀ dɔ́ kɛ́ bɛ̀ yũ̀ɔ̃́mmu kɛ́dɛ́tɛ́nɛ̀, kɛ́ bɛ̀ tɑnnɛ́ Kibeɑ kpɑ́ɑ̀ miɛkɛ. 
\v 33 Mɛm̀mɛ kɛ̀ Isidɑyɛɛribɛ tĩ̀rɛ̀ɛ wɛ̃nnɛ́ kɛ́mɑ́ɑ́ Bɑɑdi-Tɑmɑɑ bɛ̀ɛ̀ do okɛ dihɛì tɑkɛ́ kɛ̀ bɛ̀ɛ ootɛní Kibeɑ biriku bíɛ́kɛ̀. 
\v 34 Dɛ mɔ̀nnì kɛ̀ Isidɑyɛɛribɛ kó bɛhɑ̃ɑ̃pɔ̀mbɛ̀ bɛ̀ɛ̀ nɔ mmudoò mɛsɑ̀ɑ̀ nkɛ̀ bɛ̀ɛ tuɔkɛní Kibeɑ borɛ̀, kɛ bo tɛkɔupípíítɛ̀ (10000), kɛ̀ mudoò bintɛ́, Bɛnsɑmɛɛ botí kɔbɛ mɛ nyí ndɑkɛ kɛ dò ndɛ̀ yóó bɛ̀ di. 
\v 35 Kɛ̀ ti Yiɛ̀ nKuyie mbɛ̀ ɑ̃nnɛ́ Isidɑyɛɛribɛ nɔu miɛkɛ, kɛ̀ bɛ̀ɛ kuɔ dɛ yiè bɛhɑ̃ɑ̃pɔ̀mbɛ̀ sikɔupípísìdɛ́ nɛ̀ sikɔupísìnùmmù nɛ̀ tɛkɔ̀ùtɛ̀ (250100). 
\v 36 Dɛ mɔ̀nnì kɛ̀ Bɛnsɑmɛɛ botí kɔbɛɛ bɑntɛ́ bɛ̀ bɛ̀ nɑmɛ̀mu.
\p Kɛ̀ Isidɑyɛɛribɛɛ bɛ̀ yóu, kɛ yɛ̃́ bɛ̀ tɑ̃́mɛ̀ bɛ kɔbɛ bɛ̀ do òo mbɛ̀ Kibeɑ tɑkɛ́. 
\v 37 Bɛ̀ɛ̀ do okɛ kɛ̀ bɛ̀ɛ ootɛní mɛcɑ̃ɑ̃ nkɛ́do dihɛì kɛ́kuɔ bɛnìtìbɛ̀ bɛmɔu. 
\v 38 Bɛ̀ mɛ ndo nɑ̀kɛ́mu nɛ̀ Isidɑyɛɛribɛ tɔbɛ̀ kɛ tú bɛ̀ bo yɑ̀ kuyukú nku dihɛì kɛ́bɑntɛ́ bɛ̀ dì domɛ̀. 
\v 39 Bɛnsɑmɛɛ botí kɔbɛ yɑ̀ dìì mɔ̀nnì Isidɑyɛɛribɛ bótìrìmɛ̀, kɛ́kuɔ bɛnìtìbɛ̀ sipísìtɑ̃ɑ̃ti kɛ̀ bɛ yɛ̀mmɛ̀ ndò mbɛ̀ tó bɛ̀ nɑmu yɛwe tɛyɛ̀ kɔ̃mɛ. 
\v 40 Dɛ mɔ̀nnì ndi kuyukú fĩnnɛ́mɛ̀ dihɛì, kɛ̀ Bɛnsɑmɛɛ botí kɔbɛɛ wɛ̃ɛ̃tɛ kɛ́nsɔ̃́ mbɛ ɛì Kibeɑ diì pĩ mmuhɑ̃ɑ̃́ nkɛ̀ kuyukú fĩ. 
\v 41 Mɛm̀mɛ kɛ̀ Isidɑyɛɛribɛɛ wɛ̃ɛ̃tɛ kɛ́cuó mBɛnsɑmɛɛ botí kɔbɛ, kɛ̀ kufɔ̃wɑɑ́ mbɛ̀ ɑutɛ́, kɛ yɛ̃́ bɛ̀ yɑ̀mɛ̀ mɛyɛi mmɛ̀ɛ̀ bɛ̀ do. 
\v 42 Kɛ̀ bɛ̀ɛ cokɛ́ Isidɑyɛɛribɛ kɛ́wetínnɛ́ dikpɑ́ɑ̀, kɛ̀ bɛ̀ mbɛ̀ bɛ̀ti, bɛ̀ɛ̀ ìtɛ́ní dihɛì bíɛ́kɛ̀ kɛ̀ bɛ̀ nkéríní, kɛ̀ bɛ̀ɛ bɛ̀ soó ndɛ cuokɛ̀ kɛ́ mbɛ̀ puotì kɛ kɔù. 
\v 43 Kɛ̀ Isidɑyɛɛribɛɛ cɛ̃ɛ̃tɛ Bɛnsɑmɛɛ botí kɔbɛ kɛ́ bɛ̀ fɛ̃nnɛ́ kɛ́ mbɛ̀ kɔ̀ùtì, kɛ yɑ̀ɑ tuɔkɛnɛ̀ Kibeɑ diyiè yìɛ̀ní kɛ̀ɛ̀ bíɛ́kɛ̀ bɑ́ bɛ̀ í mbɛ̀ yóu kɛ̀ bɛ̀ bo wei. 
\v 44 Mɛm̀mɛ kɛ̀ bɛ̀ɛ kuɔ Bɛnsɑmɛɛ botí kó bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ mɑ́ɑ̀ tɛkɔupípíítɛ̀ nɛ̀ sikɔupísìni (18000). 
\v 45 Kɛ̀ bɛsɔmbɛɛ cokɛ́ kɛ́nwetí ditɑ̃rì Dimɔɔ, kɛ̀ bɛ̀ɛ nintɛ sikɔupísìnùmmù (5000) kɛ́kuɔ, kɛ́sɔɔtɛ́ kɛ́mbɛtì bɛsɔmbɛ kɛ́tuɔkɛnɛ̀ Kidommu kɛ́yíɛ́ kɛ́kuɔ sikɔupísìdɛ́ (2000). 
\v 46 Bɛnsɑmɛɛ botí kɔbɛ kó bɛhɑ̃ɑ̃pɔ̀mbɛ̀ bɛ̀ kùɔ bɛ̀ dɛ yiè, bɛmɔu bɛ̀ do bo sikɔupípísìdɛ́ nɛ̀ sikɔupísìnùmmù ndi (25000) yɛkɔ̃m̀bɔ̀ yɛmbɛ̀ mɑ́ɑ̀. 
\v 47 Bɛ̀ɛ̀ do cokɛ́ kɛ́nwetí ditɑ̃rì Dimɔɔ bɛ miɛkɛ kɛ̀ sikɔusìkuɔ̀ (600) nɑ kɛ́yentɛ́, kɛ́tuɔkɛ di borɛ̀ kɛ́ ndɛ̀ bo kɛ dɔ̀ bɛtɑ̃̀ɑ̃̀bɛ̀ bɛ̀nɑ̀ɑ̀. 
\v 48 Kɛ̀ Isidɑyɛɛribɛɛ wɛ̃ɛ̃tɛ Bɛnsɑmɛɛ botí kɔbɛ bɛ̀ɛ̀ kpɑɑ́ dɛ bíɛ́kɛ̀ kɛ́ mbɛ̀ tũ mbɛ̀ bo yɛ̀ɛ̀ ɛkɛ̀ miɛkɛ kɛ kɔù, kɛ kɔùnɛ̀ bɛ wũɔ̃, kɛ cɔ́unko yɛhɛkɛ̀ bɛ tempɛ̃ nkumɔu miɛkɛ.
\c 21
\s1 Bɛnsɑmɛɛ botí wɛ̃̀tɛ kɛ ketɛ́mɛ̀
\p
\v 1 Isidɑyɛɛribɛ do tìí ndìì mɔ̀nnì Misipɑɑ kɛ́pɑrìkɛ̀mu kɛ dɔ̀, bɛ miɛkɛ òmɔù bɑ́ɑ́ duɔ́ nho kóo sɑpɑ̀ɑ̀ mBɛnsɑmɛɛ botí kou kòo puokɛ. 
\v 2 Dɛ mɔ̀nnì kɛ̀ Isidɑyɛɛribɛɛ kɔtɛ Betɛɛdi, kɛ́ntṹṹ nkɛ kɑri ti Yiɛ̀ nKuyie nyììkɛ̀ nɛ̀ kuyuokoo, kɛ kuɔ̀ ntinɔnniɛti. 
\v 3 Kɛ nɑ́ɑ́ nkɛ tú: Ti Yiɛ̀ nKuyie mbɑ nkpɛ́í nte Isidɑyɛɛribɛ botí miɛkɛ kɛ̀ kùmɑkù kpɑ́nnɛ́?
\p
\v 4 Kɛ̀ dɛ̀ nkpɑɑ́ uu kɛ̀ Isidɑyɛɛribɛɛ ítɛ́ kɛ́mɑɑ́ diwũɔ̃tɔ̀nnì ti Yiɛ̀ nKuyie nkpɛ́í, kɛ́ kù fìé iwũɔ̃ kɛ́tuɔ, kɛ́ nkù feu itɛì mɛtɑummɛ̀ kpɛyi, 
\v 5 kɛ́bekɛ bɛtɔbɛ̀ kɛ dɔ̀: Ti botí miɛkɛ kùmɑkù bo kùù sòò í bo ti tíkú dɛ̀ Misipɑɑ?
\p Kɛ yɛ̃́ bɛ̀ sòò nɑ̀kɛ́mɛ̀mu kɛ dɔ̀: Kɛ̀ wèè í kɔ̀tɛní dɛ kó mɛtíímmɛ̀ bɛ̀ɛ ò kùɔ. 
\v 6 Kɛ̀ mɛsémmɛ̀ɛ bɛ̀ pĩ mbɛ tebìí Bɛnsɑmɛɛ botí kɔbɛ kpɛ́í nkɛ̀ bɛ̀ nnɑ́ɑ́ nkɛ tú: Isidɑyɛɛribɛ botí mɑkù dèèmu mɛmmɑɑ̀? 
\v 7 Ti bo yĩ́mɛ nɑ́kɛ bɛ̀ɛ̀ nɑ kɛ yentɛ́ mudoò miɛkɛ kɛ̀ bɛ̀ɛ pɛ́tɛ́ bɛ pobɛ̀? Ti sòò pɑ̀rìkɛ̀mu ti Yiɛ̀ nKuyie nyììkɛ̀ kɛ dɔ̀: Ti kóo mɔù bɑ́ɑ́ duɔ́ nho kóo sɑpɑ̀ɑ̀ mbɛ kóo mɔù kòo puokɛ.
\p
\v 8 Kɛ̀ bɛ̀ɛ bíékɛ́ bɛtɔbɛ̀ kɛ bo yɑ̀ bɛ botí miɛkɛ kɛ̀ kùmɑkù bo mbo kùù sòò í kɔkɛ́ bɛ̀ tìí ndɛ̀ Misipɑɑ ti Yiɛ̀ nKuyie nyììkɛ̀, kɛ́nsɔ̃́ nKɑdɑɑdi tempɛ̃ mmiɛkɛ Yɑbɛsi ɛì kɔbɛ sòò í bo dɛ kó mɛtíímmɛ̀. 
\v 9 Kɛ̀ bɛ̀ɛ bɑtɛ bɛ̀ɛ̀ sòò kɔ̀tɛní, kɛ í nyɑ̀ Kɑdɑɑdi tempɛ̃ nYɑbɛsi ɛì kou mɔù. 
\v 10 Bɛ̀ɛ̀ sòò bo dɛ kó mɛtíímmɛ̀ kɛ̀ bɛ̀ɛ dɛitɛ yɛkɔ̃m̀bɔ̀ yɛmbɛ̀, kɛ̀ bɛ̀ mbo tɛkɔupíítɛ̀ nɛ̀ sikɔusìdɛ́ (12000), kɛ̀ bɛ̀ɛ bɛ̀ tɔ̃ ndɛ kó dihɛì kɛ́ bɛ̀ nɑ̀kɛ́ kɛ dɔ̀: Kɔtɛnɛ̀ Kɑdɑɑdi tenkɛ̀ nYɑbɛsi ɛì kɛ́kuɔ di nìtìbɛ̀ nɛ̀ bɛnitipòbɛ̀ nɛ̀ ibí. 
\v 11 Dí kuɔ bɛnitidɑɑbɛ̀ nɛ̀ bɛnitipòbɛ̀ bɛ̀ɛ̀ yĩ̀ɛ̃́tɛ́ bɛnitidɑɑbɛ̀ kɛ́súɔ́ mbɛsɑpɑ̀mbɛ̀ bɛ̀ɛ̀ mu nyí yĩ̀ɛ̃́tɛ́ bɛnitidɑɑbɛ̀.
\p
\v 12 Kɛ̀ bɛ̀ɛ pɛ́tɛ́ Kɑdɑɑdi tenkɛ̀ Yɑbɛsi ɛì miɛkɛ bɛsɑpɑ̀mbɛ̀ sikɔusìnɑ̀ɑ̀ (400) bɛ̀ɛ̀ mu nyí yĩ̀ɛ̃́tɛ́ bɛnitidɑɑbɛ̀. Kɛ bɛ̀ kɔ̀tɛnní Sidoo Kɑnnɑhɑ̃ɑ̃, bɛ̀ borɛ̀.
\p
\v 13 Dɛ kó difɔ̃nkúò bɛ̀ɛ̀ sòò bo bɛ̀ tìí ndɛ̀, kɛ̀ bɛ̀ɛ tɔ̃ mbɛnìtìbɛ̀ Bɛnsɑmɛɛ botí kɔbɛ bɛ̀ɛ̀ sòò cokɛ́ kɛ́sɔri ditɑ̃rì Dimɔɔ bɛ̀ borɛ̀, kɛ bo bɛ̀ wɑmmúnɛ̀ mɛtɑummɛ̀. 
\v 14 Kɛ̀ Bɛnsɑmɛɛ botí kɔbɛɛ wɛ̃tɛ kɛ́konní mɛcɑ̃ɑ̃ nkɛ̀ bɛ̀ɛ bɛ̀ duɔ́ mbɛsɑpɑ̀mbɛ̀, bɛ̀ kùɔ Yɑbɛsi ɛì kɔbɛ kɛ sùɔ́ mbɛ̀. Bɛ̀ mɛ nyí mbɛ̀ cɛ̃̀tinɛ.
\p
\v 15 Kɛ̀ mɛsémmɛ̀ɛ pĩ́ nyIsidɑyɛɛribɛ Bɛnsɑmɛɛ botí kɔbɛ kpɛ́í nkɛ yɛ̃́ ti Yiɛ̀ nKuyie ndo duɔ́mmɛ̀ kɛ̀ dɛ kó kubotí fɔ̃̀tìrìi feitɛ́ Isidɑyɛɛribɛ botí miɛkɛ. 
\v 16 Kɛ̀ Isidɑyɛɛribɛ tĩ̀nnì kó bɛkótíbɛ̀ dɔ̀: Bɛnitipòbɛ̀ tɛ̃́nkɛ í bo Bɛnsɑmɛɛ botí miɛkɛ. Ti bo pɛ́tɛ́ dɛ bɛnitipòbɛ̀ kɛ́duɔ́ mbɛ̀ɛ̀ yentɛ́ mudoò miɛkɛ? 
\v 17 Bɛnsɑmɛɛ botí miɛkɛ bɛ̀ɛ̀ yentɛ́ bɛ fuku dò nkɛ́sɔɔtɛ́mu. Kɛ̀ dɛ̀ɛ yié nkɛ̀ dɛ kó kubotí bɑ́ɑ́ kú Isidɑyɛɛribɛ botí miɛkɛ. 
\v 18 Ti mɛ nyí yóó nɑ kɛ́ bɛ̀ duɔ́ nti kó bɛsɑpɑ̀mbɛ̀ kɛ̀ bɛ̀ɛ puokɛ. Ti sòò pɑ̀rìkɛ̀ mɛ̀ɛ̀ kpɛ́í nkɛ dɔ̀: Ti miɛkɛ kɛ̀ wèè bɛ̀ duɔ́ nho kóo sɑpɑ̀ɑ̀ nti Yiɛ̀ nKuyie nhò cɔ̃ɔ̃.
\p
\v 19 Kɛ̀ bɛ̀ dɔ̀: Ti Yiɛ̀ nKuyie mbɑnni ɔ̃ mmɛ mbomɛ̀ bɑ́ dìì benni Sidoo Betɛɛdi bɑkù yoú kucɛ kùù kɔ̀rìnɛ̀ Betɛɛdi nɛ̀ Sisɛmmu ku kó diyiè yìɛ̀ní kɛ̀ɛ̀ bíɛ́kɛ̀ Debonɑ bɑkù cɑ̃̀nku. 
\v 20 Mɛm̀mɛ kɛ̀ bɛ̀ɛ tié mBɛnsɑmɛɛ botí kɔbɛ kɛ dɔ̀: Kɔtɛnɛ̀ kɛ́nsɔri fínyĩ̀ kó dɛpɑɑ mmiɛkɛ, 
\v 21 kɛ́nwéí, kɛ̀ Sidoo ɛì kó bɛsɑpɑ̀mbɛ̀ yɛ̀nní dìì mɔ̀nnì kɛ kɔri tihɑutì di ítɛ́ní, bɑ́ wè kòo pĩ́ nhosɑpɑ̀ɑ̀ nhòmɑ́ɑ̀ kɛ̀ di kònnɛ̀ kɛ́puokɛ. 
\v 22 Bɛ cicɛbɛ̀ yoo bɛ tɑ̃bɛ̀ kɛ̀ bɛ̀ ti sɔ̃̀ńkɛ́nní dikpɑ̀nnì, ti bo bɛ̀ nɑ̀kɛ́ kɛ dɔ̀: Bɛ̀ di kuɔ́ mmɛsémmɛ̀ kɛ yɛ̃́ ti í nɑmɛ̀ kɛ pɛ̀tɛ́ní bɛsɑpɑ̀mbɛ̀ Yɑbɛsi ɛì kɛ̀ bɛ̀ di cɛ̃̀tinɛ. Bɛɛ̀ mɛ nyí yóó di duɔ́ mbɛ kó bɛsɑpɑ̀mbɛ̀ kɛ bo nyĩɛ̃̀kù bɛ̀ bo yĩ́mɛ bɛ̀ yetɛ́nɛ̀ dinùù bɛ̀ do dɔúnnɛ̀ dì ti Yiɛ̀ nKuyie.
\p
\v 23 Mɛm̀mɛ kɛ̀ Bɛnsɑmɛɛ botí kɔbɛɛ tũnnɛ bɛ̀ bɛ̀ duɔ́ nyìì tié Sidoo kó bɛsɑpɑ̀mbɛ̀ yɛ̀nní dìì mɔ̀nnì kɛ bo kɔtɛ tihɑutì, kɛ̀ bɛ̀ɛ pĩ́mmú bɛsɑpɑ̀mbɛ̀ dɛ̀ bɛ̀ bèkú mɛ̀ɛ̀ botí kɛ́kònnɛ̀ kɛ́mɑɑ́ bɛ ɛì kɛ́nkɑri. 
\v 24 Kɛ̀ Isidɑyɛɛribɛ sɔmbɛɛ cíɛ́tɛ́, bɑ́ wè kòo kɔtɛ o botí kɔbɛ borɛ̀, nɛ̀ o nɑɑ̀mùnkù kɔbɛ. Bɑ́ wè kòo mbo o tenkɛ̀.
\p
\v 25 Dɛ kó dimɔ̀nnì Isidɑyɛɛribɛ do í mɔkɛ okpɑ̀ɑ̀tì, bɑ́ wè kòo ndɔɔri ò dɔ́mɛ̀.