\id HOS di28.all Novembre 1998 BJ Parakou B{enin \ide UTF-8 \h Osee \toc1 Osee \toc2 OSEE \mt1 Osee \imt1 Di mpɑ́tíri tɔ tìì nɑ́ɑǹtì \ip Osee do tú Kuyie mpɑ̃ɑ̃nɑ́ɑǹtì nɑ́ɑǹtò nwe, kɛ̀ kùu ò tɔ̃nní Isidɑyɛɛri kó dikpɑ̀ɑ̀tìyuu kubɑkù yoú kpɛri miɛkɛ, kòo bo bɛ̀ nɑ̀kɛ́ kù ò nɑ̀kɛ́ tì bɛ kpɛ́í. Kòò ndɛ̀ bo kɛ dɔ̀ yɛbie nsipísìdɛ́ nɛ̀ yɛ̀nùmmù kɛ̀ Asidii kɔbɛ yɑ̀ɑ pɔntɛnɛ̀ dɛ kó dikpɑ̀ɑ̀tìyuu. \ip Dɛ kó dimɔ̀nnì dihɛì do bo mɛborimɛ yɛimɛ miɛkɛ nkɛ mɛdiɛ̀. Asidii kɔbɛ kó bɛhɑ̃ɑ̃pɔ̀mbɛ̀ bɛɛ̀ do bɛ̀ ɑ̃ mudoò. Kɛ̀ mufòmmu yɛimu mmɔ́mmú kɛ sṹṹmmu Isidɑyɛɛribɛ. Dɛ̀ɛ̀ nɛ́ do dɔkɛ ntú dɛyɛirɛ dɛɛ̀ tu bɛnìtìbɛ̀ do yóumɛ̀ bɛ̀ bo ntɑ̃́mɛ̀ Kuyie nkɛ nɛ́ ntũ̀ nKɑnnɑhɑ̃ɑ̃ kɔbɛ kó yɛbɔkɛ̀. Nɛ̀ dɛ kpɛ́í nkɛ̀ Kuyie nní ndɔ́ Osee puokɛ onitipòkù wèè dɔuti dɔutinɛ̀ bɛnitidɑɑbɛ̀ kɛ̀ dɛ̀ɛ bɛnkɛ mɛborimɛ yɛimɛ bɛ̀ kù dɔ̀ɔrimɛ̀. Kuyie nfɛ̃́ũrìmu ku nìtìbɛ̀ kpɛ́í mbɛ̀ í yíémmɛ̀ ku kpɛti. Kuyie nnɛ́ yɛ̃́mu kɛ dò nku nìtìbɛ̀ bo kù dɔkɛ. Osee nɛ́ nɑ́ɑ́ ntì bɛnìtìbɛ̀ tu bɛ̀ɛ dɔkɛ Kuyie. \is1 Di mpɑ́tíri nɑ́ɑǹtì duɔ́ kɛ dòmmɛ̀ \io1 1. Osee yɑ̀mɛ̀ dɛndɛ bɑ̀mbɑ̀ mmɛyĩ́ɛ̃́tímɛ̀ 1-3 \io1 2. Isidɑyɛɛribɛ sɛimmɛ̀ Osee 4-8 \io1 3. Kuyie nyóó potɛ́mɛ̀ Isidɑyɛɛribɛ 9-10 \io1 4. Kuyie ndɔ́mɛ̀ ku nìtìbɛ̀ kɛ̀ dɛ̀ í mɔkɛ kumɑ̀nku 11:1-13:8 \io1 5. Isidɑyɛɛribɛ yóó wɛ̃tɛ kɛ́kɑrimɛ̀ bɛ tenkɛ̀ 13:9-14:10 \c 1 \p \v 1 Sudɑɑ kpɑ̀ɑ̀tìbɛ̀ Osiɑsi nɛ̀ Yotɑmmu nɛ̀ Aɑsi nɛ̀ Esekiɑsi bɛ̀ do cɔú dìì mɔ̀nnì bɛtɔbɛ̀ dikpɑ̀ɑ̀tìyuu miɛkɛ Sudɑɑ kɔbɛ kó dikpɑ̀ɑ̀tìyuu miɛkɛ, kɛ̀ Soɑsi birɛ Sedoboɑmmu ntú Isidɑyɛɛribɛ kóo kpɑ̀ɑ̀tì. Kɛ̀ ti Yiɛ̀ nKuyie mbɛ́innɛ̀ Bedi birɛ Osee. \s1 Osee puokɛmɛ̀ onitipòkù wèè dɔuti dɔutinɛ̀ bɛnitidɑɑbɛ̀ \p \v 2 Kɛ̀ ti Yiɛ̀ nKuyie nni nyóó ketɛ́ kù bo bɛ́innɛ̀mɛ̀ ku nìtìbɛ̀ kɛ́nɑ́kɛ́ Osee kɛ dɔ̀: \b \q1 Osee! Kɔtɛ kɛ́túótɛ́ onitipòkù wèè dɔuti dɛutinɛ̀ bɛnitidɑɑbɛ̀ \q1 kɛ̀ dì dɑ piɛ́ idɑcɛ̃mbí, \q1 kɛ yɛ̃́ dihɛì diì nkɔbɛ duɔ́mmɛ̀ bɛmɑ́ɑ̀ mubɔɔféù, \q1 kɛ m bùtínnɛ́, mí ndi Yiɛ̀ nKuyie. \b \p \v 3 Kòo kɔtɛ kɛ́túótɛ́ Dibɑdɑimmu kóo sɑpɑ̀ɑ̀ nKomɛɛ, kóo puokɛ kɛ̀ wèe ò pɛitɛ́ dɛnitidɑbirɛ. \v 4 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: \b \q1 Yú dɛ kó dɛbirɛ kɛ dɔ̀: Sisedɛɛdi. \q1 Kɛ yɛ̃́ dɛ̀ kpɑɑ́ sɑ́m̀pɔ́ nwe kɛ̀ m potɛ́ Yeuu cĩ́ɛ̃̀tɛ̀, \q1 ò do còú mmɛ̀ɛ̀ nitiyĩ̀ĩ̀ nSisedɛɛdi ɛì miɛkɛ mɛ kpɛ́í, \q1 Isidɑyɛɛribɛ kpɑ̀ɑ̀tìyuu bo kpɑ́nnɛ́. \q1 \v 5 Dɛ yiè bo tuɔkɛ dìì yiè \q1 m bo kéétɛ́ Isidɑyɛɛribɛ kpɑ̀rìtɑ̃mmù \q1 Sisedɛɛdi biriku miɛkɛ. \b \p \v 6 Dɛ kó difɔ̃nkúò kòo yíɛ́ kɛ́púó nkɛ́pɛitɛ́ dɛnitipobirɛ, kɛ̀ ti Yiɛ̀ nKuyie nnɑ́kɛ́ Osee kɛ dɔ̀: \b \q1 A dɛ̀ yu kɛ dɔ̀: Mpɛ̃̀. \q1 Kɛ yɛ̃́ mɛsémmɛ̀ tɛ̃́nkɛ í yóó nni mbonɛ̀mɛ̀ Isidɑyɛɛribɛ, \q1 n tɛ̃́nkɛ í yóó bɛ̀ cĩ̀ɛ̃́. \b \p \v 7 Kɛ̀ Sudɑɑ kɔbɛ biɛ, n yóó bɛ̀ kuɔ́mmu mmɛsémmɛ̀ kɛ́ bɛ̀ dɛɛtɛ́, mí mbɛ Yiɛ̀ nKuyie mmíì bɛ̀ te. N yí yó ntɔ mutɑ̃mmù yoo disiè, yoo n dokɛ́ kɛ́ bɛ̀ dɛɛtɛ́, yoo n dekɛ sikpɑ̀rìsɛ̃ĩ́, yoo n wɑɑ́ mbɛsɑ̃ndèèbɛ̀. \b \p \v 8 Kɛ̀ weè Mpɛ̃̀ nkótɛ́ kòo ò cɑ̀tɛ́ kɛ yíɛ́ kɛ́púó nkɛ́pɛitɛ́ dɛnitidɑbirɛ. \v 9 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: \b \q1 Yú we kɛ dɔ̀: Okpɑ́kpɑ̀rì, \q1 kɛ yɛ̃́ díndi Isidɑyɛɛribɛ \q1 di tɛ̃́nkɛ í túmɛ̀ n kɔbɛ, \q1 m mɛ ntɛ̃́nkɛ í bo di kpɛ́í. \s1 Kuyie nnɑ̀kɛ́mɛ̀ Isidɑyɛɛribɛ yóó dimɛ̀ diwɛ̀ì \q1 \v 10 Kɛ̀ Kuyie mbɛ́i nkɛ dɔ̀: \q1 Diyiè mɑrì bo mbo kɛ̀ Isidɑyɛɛribɛɛ sṹṹ ndɑ̀mɛ́ɛ̀rì nùù kó mubirímú kɔ̃mɛ, \q1 kɛ bɑ́ ndò nkɛ́nɑ kɛ́kɑɑ nkɛ́deè. \q1 Bɛ̀ do bɛ̀ yu dɛ̀ kɛ tú bɛkpɑ́kpɑ̀rìbɛ̀, \q1 bɛ̀ bo bɛ̀ yu dɛ kɛ dɔ̀: \q1 Kuyie nfòùkù kó ibí. \q1 \v 11 Dɛ mɔ̀nnì Sudɑɑ kɔbɛ \q1 nɛ̀ Isidɑyɛɛribɛ bɛ̀ bo wɛ̃nnɛ́, \q1 kɛ́wɑɑ́ nhokpɑ̀ɑ̀tì omɑ́ɑ̀, \q1 kɛ́yɛ̀ bɛ tenkɛ̀, \q1 dɛ kó diyiè bo ndɛu, bɛ̀ di ntú Sisedɛɛdi. \c 2 \q1 \v 1 Nɑ́kɛ́nɛ̀ di tebìí bɛkpɑ́kpɑ̀rìbɛ̀ kɛ dɔ̀, \q1 bɛ̀ tu n kɔbɛ, kɛ́nɑ́kɛ́ di tɑ̃bɛ̀ bɛ̀ do tú bɛ̀ Mpɛ̃̀ \q1 kɛ dɔ̀ m bɛ̀ dɔ́mu. \s1 Kuyie ndònnɛnɛ̀mɛ̀ Isidɑyɛɛribɛ onitipòkù wèè dɔuti dɔutinɛ̀ bɛnitidɑɑbɛ̀ \p \v 2 Kɛ̀ Kuyie mbɛ́innɛ̀ Isidɑyɛɛribɛ kɛ dɔ̀: \q1 Sɛinnɛ̀ di yɔ̃. Sɛinnɛ̀ di yɔ̃, \q1 kɛ yɛ̃́ ò tɛ̃́nkɛ í túmɛ̀ m pokù, \q1 m mɛ n tɛ̃́nkɛ í tú o dɔù \f + \fr 2:4 \fr*\ft Dɛ kó yɛnɑ́ɑǹkékɛ̀ nɑ̀ɑ́ nyIsidɑyɛɛribɛ yóumɛ̀ mmɛ bɛ\ft*\f* Yiɛ̀ nKuyie nkɛ tũ̀nnɛ yɛbɔkɛ̀ (Wéntɛ́ Isɑii 1:21, 23:17, Esekiɛri 16:15-43, 23:22-49). \b \q1 Wèe dɛitɛ o ììkɛ̀ dɛ̀ɛ̀ bɛnkú ò dɔuti dɔutinɛ̀mɛ̀ bɛnitidɑɑbɛ̀ \q1 kɛ́dɛitɛ o mɛ sɑku mɛcɑnnimɛ̀ mɛ̀ɛ̀ bɛnkú ò yùúkúmɛ̀ bɛnìtìdɑɑbɛ̀. \q1 \v 3 Kɛ̀ mɛɛ̀ dɔkɛ m bo ò dɑ̀tɛ́ kɛ́cónnɔ́ɔ o tetìrì \q1 m bo duɔ́ nkòo nɑɑ́ mbɛ do ò pɛiní kòò dòmmɛ̀. \q1 M bo duɔ́ nkòo nɑɑ́ ntɛdɔntɛ̀, \q1 kòo feitóo tɛdɔntɛ̀ kɔ̃mɛ, \q1 kɛ̀ sinɛ́yɛ̃ĩ ò kùɔ. \b \q1 \v 4 O bí, mɛsémmɛ̀ í ì nni mbonɛ̀ \q1 kɛ yɛ̃́ ì tumɛ̀ onitipòkù wèè dɔuti dɔutinɛ̀ bɛnitidɑɑbɛ̀ o kó ibí nyi. \q1 \v 5 Bɛ yɔ̃ dɔuti dɔutinɛ̀ bɛnitidɑɑbɛ̀ mbɛ, \q1 wèè bɛ̀ pɛitɛ́ ò dɔ̀ɔ̀ri ifɛi kpɛrɛ ndɛ, \q1 kɛ nɑ́ɑ́ nkɛ tú: N dɔ́ kɛ́wɑmmú yɛdɑcĩɛ̃̀ \q1 kɛ̀ yɛ̀ nni nduɔ̀ mmudiì nɛ̀ mɛniɛ, \q1 kɛ n duɔ̀ ntipecìtì nɛ̀ mmupɑ̀ɑ̀konkperímù. \q1 Kɛ n duɔ̀ mmɛkùɔ̀ nnɛ̀ mɛnɑɑ̀. \b \q1 \v 6 Dɛɛ̀ te kɛ̀ n yóó pii nho cɛ tipotì, \q1 m bo pénnɛ́ kunɑɑ̀sìmperí kɛ́fitɛ́, \q1 bɑ́ ò tɛ̃́nkɛ bɑ́ɑ́ yɑ̀ o cɛ. \q1 \v 7 Ò bo ntũ̀ nho dɑcĩɛ̃̀ nkɛ́dóntɛ́, \q1 ò bo yɛ̀ wɑmmú kɛ́mɔ́ntɛ́. \q1 Dɛ mɔ̀nnì ò bo yĩ́: \q1 M bo wɛ̃tɛ n dɔù ketiwè borɛ̀, \q1 n do dɛ nyo ndiwɛ̀ì kɛ pɛ̃ɛ̃tɛ́ di mmɔ̀nnì. \b \q1 \v 8 Ò í bɑntɛ́ míì do ò duɔ̀mmɛ̀ mudiì \q1 nɛ̀ mɛnɑɑ̀ mpɑ̀mmɛ̀ nɛ̀ mɛkɔsɑ̀ɑ̀mɛ̀. \q1 Kɛ̀ míì nhò duɔ̀ ntimɑ́tì pɛ́ítì nɛ̀ mɛsɔɔ. \q1 Kòò dɛ̀ tòú kɛ dɔɔrinɛ̀ Bɑɑdi kó tibɔɔnɛntì. \q1 \v 9 Dɛɛ̀ kpɛ́í nte kɛ̀ n yóó fietɛ n diitì dididɛ̀ì mɔ̀nnì, \q1 kɛ̀ bɛ̀ tɔ̃ũ fínyĩ̀ kó yɛbɛ kɛ dɔ̀ɔ̀ mɛnɑɑ̀, \q1 n cɔutɛ́ n nɑɑ̀, kɛ́fietɛ m pecìtì nɛ̀ mupɑ̀ɑ̀konkperímù \q1 kó tiyɑ̀ɑ̀tì ò dɑɑti dɛ̀ kɛ kɑ̃nkù o fɛi. \q1 \v 10 M bo feinko o fɛi o dɑcĩɛ̃̀ nyììkɛ̀, \q1 bɛ kóo mɔù mɛ mbɑ́ɑ́ nɑ kóò fìetɛ. \q1 \v 11 M bo dɛitɛ o wɛ̀ì dimɔu nɛ̀ o bɑɑ nyɛmɔu, \q1 otɑ̃̀nkù pɑ̀nwè kpɛyɛ nɛ̀ siom̀pùsi kpɛyɛ nɛ̀ yɛbɑɑ ntɛyɛ̀. \q1 \v 12 Kòo pɑɑ nfínyĩ̀ nɛ̀ fìkíè kó dɛtie ndo borɛ̀ bo dɔúnko, \q1 ò do tú dɛ̀ɛ̀ tu ticuuti o dɑcĩɛ̃̀ nhò cu tì, \q1 dɛ kó dɛpɑɑ mbo nɑɑ́ ndikpɑ́ɑ̀ kɛ̀ tikpɑsĩ̀ntìi dɛ̀ cɑ̀ɑ́kɛ́. \q1 \v 13 Ò dɔ̀ɔ̀ dɛ̀, mɛfíè nhò do tùótɛ́ mɛ̀, \q1 kɛ́mpɑ̃ɑ̃ ndibɔɔ̀ Bɑɑdi yɛpɑ̃rɛ̀, \q1 kɛ ũ dɛmɑ́mɑ́nnɛ̀ kɛ duuku mɛdɛ̀ì, \q1 kɛ tũ̀ nho dɑcĩɛ̃̀ kɛ n yɛ̃̀. \q1 M bo dɛ̀ nhò yietí. \q1 Mí ndi Yiɛ̀ nKuyie mmíì bɛ́i. \q1 \v 14 N yóó ò nɑ mɛciì mmɛ, \q1 kóò tɑnnɛ̀ dikpɑ́ɑ̀ kɛ́wɛ̃tɛ kóò bɛí. \q1 \v 15 Dɛ mɔ̀nnì kɛ̀ n yu wèe yie nhò do dòmmɛ̀ ò bɛ ndìì mɔ̀nnì, \q1 o yɛ̀tìní dìì mɔ̀nnì Esibiti. \q1 Kɛ̀ n wɛ̃tɛ kóò tɛ̃̀ńnɛ́ o pɑɑ nfínyĩ̀ kpɛrɛ, \q1 kɛ mɛsɑ̀ɑ̀ nwɛ̃tɛ kɛ́yɛ̀nní Akɔɔ biriku. \s1 Kuyie nyóó wɛ̃tɛ kɛ́tɑunnɛ̀mɛ̀ Isidɑyɛɛribɛ \q1 \v 16 Kɛ̀ ti Yiɛ̀ nKuyie mbɛ́i nkɛ dɔ̀: \q1 Dɛ yiè kèrínímu kòò bo nni nyu kɛ tú: N dɔù, \q1 ò tɛ̃́nkɛ í yó nni ntú: N yiɛ̀ mBɑɑdi. \q1 \v 17 M bo dɛitɛ Bɑɑdi kó diyètìrì o nùù miɛkɛ, \q1 dɛ kó yɛbɔkɛ̀ botí bɛ̀ tɛ̃́nkɛ í yóó nyɛ̃́ yɛ yètɛ̀. \q1 \v 18 Dɛ yiè m bo bɛ̀ dɔ̀ɔ̀nɛ̀ mɛtɑummɛ̀, \q1 bɛmbɛ nɛ̀ dɛsĩ̀nnɛ nɛ̀ tikpɑsĩ̀ntì \q1 nɛ̀ tinɔ̀tì nɛ̀ dɛbɑmbɑɑ̀nnɛ̀ \q1 kɛ dɛ̀ɛ̀ yie nkɛ̀ m bɑ́ mbɛ̀ dɔ̀ɔ̀ri mɛyɛi. \q1 M bo kékɛ́ dɛkpɑ̀rìtɑ̃nnɛ̀ nɛ̀ yɛkpɑ̀rìse kɛ̀ mudoò deè, \q1 kɛ̀ n nìtìbɛ̀ níí nduɔ́ pɛ̀tɛ̀ìì, kɛ í yĩɛ̃̀kù. \q1 \v 19 Díndi Isidɑyɛɛribɛ míì yóó di puokɛ \q1 kɛ́ ndi po sɑ̃́ɑ̃̀, \q1 kɛ̀ di dɔɔri dɛ̀ bèkúmɛ̀, \q1 kɛ di nɑ́ɑ́ ntimɔ́mmɔnti \q1 kɛ di dɔ́. \q1 Kɛ di kuɔ̀ mmɛsémmɛ̀, \q1 \v 20 M bo ndi po kɛ di wetí \q1 kɛ̀ dí m bɑntɛ́ mí ndi Yiɛ̀ nKuyie. \q1 \v 21 Dɛ yiè m bo cɔutɛ́ n kɔbɛ bɑ́ɑmmìi, \q1 kɛ́duɔ́ nkɛĩ́nkɛ̀ yɛwɛtɛ̀, \q1 kɛ̀ kɛĩ́nkɛ̀ɛ duɔ́ nkɛtenkɛ̀ fɛtɑɑfɛ̀. \q1 Mí ndi Yiɛ̀ nKuyie mmíì bɛ́i. \q1 \v 22 Kɛ̀ kɛtenkɛ̀ɛ pɛitɛ́ tidiitì, \q1 kɛ̀ fínyĩ̀ĩ pɛitɛ́ yɛbɛ bɛ̀ dɔ̀ɔ̀rinɛ̀ yɛ̀ mɛnɑɑ̀. \q1 Kɛ̀ odìfíè pɛitɛ́ bɛ diinɛ̀ yɛ̀ mɛkùɔ̀. \q1 \v 23 Di bo sṹṹ ndihɛì, \q1 kɛ̀ mɛsémmɛ̀ m pĩ́nnɛ̀ wèè yètìrì do tú Mpɛ̃̀. \q1 Kɛ̀ n nɑ́kɛ́ wèè yètìrì do tú okpɑ́kpɑ̀rì kɛ dɔ̀: \q1 A tú nkou nwe. Kòò dɔ̀: \q1 Fɔ̃́ nKuyie nfɔ̃́ɔ̃̀ n te! \c 3 \s1 A bo tũntɛmɛ̀ mɛtɑummɛ̀ mɛ̀ɛ̀ tɔ̃̀tɛ dɛ̀ mɔ̀kɛ tiyeti nti \p \v 1 Kɛ̀ ti Yiɛ̀ nKuyie nni nnɑ́kɛ́ kɛ dɔ̀: Kɔtɛ kɛ́wɛ̃tɛ kɛ́túótɛ́ ɑ pokù, wèè dɑ yetɛ kɛ wɑɑ́ nyɛdɑcĩɛ̃̀. Dɔkɛ we mí ndi Yiɛ̀ nKuyie n dɔ́ mɛ̀ɛ̀ botí Isidɑyɛɛribɛ, bɑ́ nɛ̀ bɛ̀ mɛ nni mbùtínnɛ́mɛ̀ kɛ tũ̀ nyɛbɔkɛ̀ Bɑɑdibɛ, yɛ̀ɛ̀ nɔnnɛ̀ fínyĩ̀ \f + \fr 3:1 \fr*\fk Fínyĩ̀ kó yɛkɑ̀tìndɑ̀: \fk*\ft Ibɔɔkuɔ́ mɑì nyi. Bɛnitipòbɛ̀ bɛɛ̀ do ɔ̃ mpɑ̃ɑ̃ ndibɔɔ̀ bɛ̀ tu dì Asitɑritee dɛ kó yɛkɑ̀tìndɑ̀.\ft*\f* kó yɛkɑ̀tìndɑ̀. \v 2 Mɛm̀mɛ kɛ̀ n kɔtɛ kɛ́ bɛ̀ yietí mɛdítíbii ntɛpíítɛ̀ nɛ̀ mɛ̀nùmmù, muyuo cìdóò tɛkɔ̀ùtɛ̀ nɛ̀ sipísìnùmmù (150), \v 3 kɛ́deè kóò nɑ̀kɛ́ kɛ dɔ̀: Á mbo diɛ nkɛ́mɔntɛ, ɑ bɑ́ɑ́ ndɔuti dɔutinɛ̀ bɛnitidɑɑbɛ̀, ɑ bɑ́ɑ́ yie nhòmɔù, m múnkɛ í yóó ndɛ̀ dɔ̀ɔ̀ri. \b \p \v 4 Kɛ yɛ̃́ yɛbie mmɑyɛ̀ miɛkɛ Isidɑyɛɛribɛ yó mbomɛ̀, kɛ í mɔkɛ okpɑ̀ɑ̀tì yoo tɛkpɑ̀ɑ̀tìbitɛ, bɛ̀ í yó nni nfeu iwũɔ̃, bɛ̀ í yó nfiiku yɛtɑ̃́rɛ̀, kɛ bo ndenniní mí mbɛ Yiɛ̀ nKuyie nkpɛ́í, ikuɔ́ nìùtì í yó mbo, bɛ̀ í yó mmɔkɛ sitenkɑɑnìi. \v 5 Isidɑyɛɛribɛ bo wɛ̃tɛ, kɛ́ n wɑmmú mí mbɛ Yiɛ̀ nKuyie, mí nwèè bɛ̀ te, kɛ́wɑmmú bɛ kóo kpɑ̀ɑ̀tì Dɑfiti. Dɛ kó yɛwe bo pɛ̃ɛ̃tɛ́ kɛ̀ bɛ̀ nni nwɑnti kɛ kpeutí kɛ dɔ́ n kó mɛsɑ̀ɑ̀. \c 4 \s1 Kuyie nkpɑ̀nnɛ̀ tì Isidɑyɛɛribɛ \q1 \v 1 Kɛ̀ ti Yiɛ̀ nKuyie mbɛ́i nkɛ dɔ̀: \q1 Díndi Isidɑyɛɛribɛ kéntɛ́nɛ̀ kɛ́keè n dɔ́ kɛ́ di nɑ́kɛ́ tì, \q1 òmɔù tɛ̃́nkɛ í dɔɔri dɛ̀ɛ̀ sìɛ́, \q1 òmɔù tɛ̃́nkɛ í dɔ́ otɔù. \q1 Òmɔù tɛ̃́nkɛ í n yɛ̃́ dihɛì diì mmiɛkɛ. \q1 \v 2 Bɑ́ wè ò ɔ̃ mpɑrìkumu kɛ nɛ́ soú, \q1 kɛ kɔù kɛ yuuku, \q1 bɛmɔu kɛ̀ bɛ̀ dɔuti dɔutinɛ̀ bɛtɔbɛ̀ kɛ yóù mmɛdiɛ̀. \q1 Kɛ kɔù bɛnìtìbɛ̀. \q1 \v 3 Dɛɛ̀ kpɛ́í nte kɛ̀ dihɛì dimɔu kɑ̀ri mukṹṹ nkɛ̀ bɛnìtìbɛ̀ dèu \q1 kɛ tɑunnɛ̀ tikpɑsĩ̀ntì \q1 nɛ̀ tinɔ̀tì nɛ̀ siyĩĩ. \s1 Kuyie nkpɑ̀nnɛ̀ tì ikuɔ́ nìùbɛ̀ \q1 \v 4 Kɛ̀ Kuyie mbɛ́i nkɛ dɔ̀: \q1 Òmɔù í dò nkɛ́ n sɛi, \q1 yoo wè n kpɑnnɛ̀, \q1 fɔ̃́ nyikuɔ́ nìùtì diɛwè n sɛi fɔ̃́ nwe! \q1 \v 5 A bo nkérí kuyie ncuokɛ̀ kɛ́bétɛ́, \q1 kɛ̀ m pɑ̃ɑ̃nɑ́ɑǹtì nɑ́ɑǹtò nkérí kɛyènkɛ̀ kɛ́bétɛ́, \q1 kɛ̀ n kuɔ ɑ yɔ̃. \q1 \v 6 N nìtìbɛ̀ kɔ̃ mbɛ í yɛ̃́ mɛ̀ɛ̀ kpɛ́í nkɛ n nɑ́ɑǹtì. \q1 Fɔ̃́ n kuɔ́ nìùtì ɑ mɔ́mmuɔ nhɑ í dɔ́ kɛ́ n yĩ́ɛ̃́tɛ́. \q1 Nɛ̀ dɛ kpɛ́í n yóó dɑ dɛitɛmu n kuɔ́ tɔ̃mmú miɛkɛ. \q1 A mɛ̀ n yɛ̃̀mmɛ̀ mí nKuyie mmí nwèè dɑ te, \q1 n yóó yɛ̃̀mmu ɑ bí kpɛ́í. \b \q1 \v 7 Bɛ̀ dɔ̀ɔ̀ri mɛyɛi mmɛ nɛ̀ bɛ̀ bɑɑ bomɛ̀. \q1 M bo dɛitɛ bɛ sɑ̃nni kɛ̀ bɛ̀ɛ di ifɛi. \q1 \v 8 N nìtìbɛ̀ feu ìì wũɔ̃ mɛyɛi ntũntimù kpɛ́í mbɛ̀ dɛ nyonnɛ̀, \q1 dɛɛ̀ te kɛ̀ bɛ̀ dɔ́ bɛ̀ ndɔɔri mɛyɛi nkɛ̀ bɛ̀ pɛ̀ú kɛ yo. \q1 \v 9 Mɛ̀ɛ̀ yɛi ndoti n nìtìbɛ̀, \q1 mɛɛ̀ doti ikuɔ́ nìùbɛ̀, \q1 n yóó bɛ̀ yietímu bɛ yɛi nkɛ fɔ́ɔ́ \q1 mbɛ yɛi mbɛ̀ dɔ̀ɔ̀ mɛ̀. \q1 \v 10 Bɛ̀ yo nkɛ í diɛ̀, \q1 kɛ nyóu kɛ tũ̀nnɛ yɛbɔkɛ̀ bɑ́ bɛ̀ í sṹũnko. \q1 Bɑ nte? \q1 Bɛ̀ tɛ̃́nkɛ í n dé mɛ̀ɛ̀ kpɛ́í nkɛ mí mbɛ Yiɛ̀ nKuyie. \b \q1 \v 11 Bɛ̀ dɔuti dɔutinɛ̀ bɛtɔbɛ̀ mbɛ \q1 kɛ nɔnnɛ̀ yɛnɑcɛkotɛ nɛ̀ mɛnɑpɑ̀mmɛ̀, \q1 dɛɛ̀ bɛ̀ fèntɛ. \q1 \v 12 N nìtìbɛ̀ nɛ́ bekù bɛ pɑ̃ɑ̃dɔ̀ nyɛ \q1 idɛí iì bɛ̀ nɑ̀ɑ́ mbɛ kpɛti. \q1 Kɛ̀ mubɔɔyɑɑ́ mbɛ̀ tɑ kɛ bɛ̀ fétìnnɛ, \q1 kɛ̀ bɛ̀ dɛ̀tɛ́nɛ̀ Kuyie nkɛ tũ̀nnɛ yɛbɔkɛ̀, \q1 mí nKuyie mmí nwèè bɛ̀ te. \q1 \v 13 Yɛtɑ̃rɛ̀ ĩ́nkɛ̀ nkɛ bɛ̀ feumɛ̀ iwũɔ̃, \q1 kɛ tuɔ̀ mmɛkùɔ̀ nsitɑ̃ɑ̃́ ĩ́nkɛ̀ nɛ̀ yɛtɔ̀rɛ̀ kó dɛtediɛrɛ̀, \q1 kɛ nɔnnɛ̀ dɛ kó mɛdɛ́ɛ̀ nkó mukɑ̀rìmù, \q1 dɛɛ̀ te kɛ̀ bɛ kó bɛsɑpɑ̀mbɛ̀ nɛ̀ bɛ cɔ̀ɔ̀bɛ̀ kɛ̀ bɛ dɔ̀ɔ̀ri dɛbɔɔkpɛrɛ. \q1 \v 14 M mɛ nyí yóó bɛ̀ potɛ́ bɛ̀ dɔuti dɔutinɛ̀ mɛ̀ɛ̀ kpɛ́í bɛnitidɑɑbɛ̀, \q1 n yóó potɛ́ ikuɔ́ nìùbɛ̀ mbɛ, \q1 bɛmbɛ bɛ̀ɛ̀ ɔ̃ɔ̃ kɛntɛ́nɛ̀ bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ \q1 kɛ́ bɛ̀ totɛ́nɛ̀ n kó mudiì. \q1 Kubotí kuù nkɔbɛ í bɑɑ̀tì, bɛ̀ fetimu. \s1 Kuyie ncɑummɛ̀ Sudɑɑ kɔbɛ nɛ̀ Isidɑyɛɛribɛ \b \q1 \v 15 Kɛ̀ ti Yiɛ̀ nKuyie mbɛ́i nkɛ dɔ̀: \q1 Isidɑyɛɛribɛ dɔuti dɔutinɛ̀ bɛtɔbɛ̀ mbɛ, \q1 díndi Sudɑɑ kɔbɛ di bɑ́ɑ́ bɛ̀ teetɛ́ kɛ́dɔɔ̀ mɛyɛi, \q1 di bɑ́ɑ́ kɔtɛ Kidikɑɑdi, \q1 di bɑ́ɑ́ dekɛ Bɛti-Afɛnni. \q1 Mí nKuyie m bomu, \q1 òmɔù bɑ́ɑ́ pɑrìkɛ̀nɛ̀ n yètìrì. \b \p \v 16 Isidɑyɛɛribɛ to kpeńnì kunɑɑ̀wɑ̀ɑ́tíkù kpɛyɛ kɔ̃mɛ mmɛ. Mí ndi Yiɛ̀ nKuyie m bo bɛ̀ yóu kɛ̀ bɛ̀ ncentì bɛ̀ dɔ́mɛ̀ dipebii kɔ̃mɑɑ̀? \v 17 Kɛ̀ Isidɑyɛɛribɛ tɑunnɛ̀ yɛbɔkɛ̀ dí mbɛ̀ wùó. \v 18 Bɛ̀ ɔ̃ nyóó yɛ̀nní tinɑɑ̀yɑ̃̀kɛ́muɔ́ntì miɛkɛ kɛ tɑ munitipowɑmmù mmu, kɛ dɔ́ ifɛi kpɛrɛ kɛ̀ dɛ̀ pɛ̃ɛ̃tɛ́ bɛ kó disɑ̃nni. \v 19 Kuyɑɑkù kuù yóó bɛ̀ tùótɛ́ tɛfɔ̀dɔ́ntɛ̀ kɔ̃mɛ kɛ̀ ifɛii bɛ̀ pĩ̀ńnɛ̀ iwũɔ̃ bɛ̀ feu ì. \c 5 \s1 Kuyie nkpɑ̀nnɛ̀ tì ikuɔ́ nìùbɛ̀ nɛ̀ bɛkpɑ̀ɑ̀tìbɛ̀ \p \v 1 Kɛ̀ Kuyie mbɛ́innɛ̀ ikuɔ́ nìùbɛ̀ nɛ̀ Isidɑyɛɛribɛ kpɑ̀ɑ̀tìbɛ̀ kɛ dɔ̀: \q1 Díndi ikuɔ́ nìùbɛ̀, kéntɛ́nɛ̀ kɛ́keè! \q1 Dɔɔ̀nɛ̀ mɛyɔɔ̀mmɛ̀ díndi Isidɑyɛɛribɛ kpɑ̀ɑ̀tìbɛ̀, \q1 keènɛ̀ n yóó di nɑ́kɛ́ tì. \q1 Díì do dò nkɛ́bɛnkɛ bɛnìtìbɛ̀ dɛ̀ɛ̀ sìɛ́. \q1 Kɛ̀ díì nɛ́ nɑɑ́ mbɛ kpɛ́í timɑ́tì dindííntì Misipɑɑ ɛì miɛkɛ, \q1 kɛ nɑɑ́ nticùɔ̀tì Tɑbɔɔ tɑ̃rì. \q1 \v 2 Di keù difɔ̃̀tìrì cũmpuri ndi Sitimmu ɛì miɛkɛ \q1 kɛ̀ n yóó di potɛ́ dimɔu. \q1 Mí ndi Yiɛ̀ nKuyie mmíì bɛ́i. \b \q1 \v 3 Díndi Isidɑyɛɛribɛ n di yɛ̃́mu. \q1 Isidɑyɛɛribɛ n yí di biinninɛ̀, \q1 Isidɑyɛɛribɛ di tũ̀nnɛ yɛbɔkɛ̀ nyɛ, \q1 Isidɑyɛɛribɛ di sɑ̃ũ dimɑ́ɑ̀ ndi. \b \q1 \v 4 Isidɑyɛɛribɛ di dɔɔ̀rìmɛ̀ í yie \q1 kɛ di bo wɛ̃tɛní m borɛ̀, \q1 di bo ndɔutinɛ̀mɛ̀ ditɔbɛ̀ dɛ kó mɛyɛ̀mmɛ̀ mɛɛ̀ di tɔ, \q1 kɛ̀ di í nɑ kɛ m bɑntɛ́ mí ndi Yiɛ̀ nKuyie. \q1 \v 5 Isidɑyɛɛribɛ di kó tɛfentɛ̀ tɛɛ̀ nɑ̀kɛ́ di kpɛ́í \q1 Efɑdɑimmu kɔbɛ nɛ̀ Isidɑyɛɛribɛ di yɛi mɛɛ̀ di bɔ. \q1 Kɛ̀ Sudɑɑ kɔbɛ múnkɛ di tũ̀nnɛ kɛ do. \q1 \v 6 Di bo n wɑmmú kɛ fíé ipe nɛ̀ inɑ̀ɑ̀kɛ \q1 kɛ́ m mɔ́ntɛ́ kɛ yɛ̃́ n yìtɛ́mɛ̀ di cuokɛ̀. \q1 \v 7 Di n ciitɛ́mu mí ndi Yiɛ̀ nKuyie nkɛ dɔutinɛ̀ ditɔbɛ̀ nkɛ piɛ́ dɛ kó ibí, \q1 nɛ̀ dɛ kpɛ́í otɑ̃̀nkù pɑ̀nwè kó dibɑnni bo di nɛinɛ̀, \q1 díndi nɛ̀ di kpɛrɛ. \s1 Kuyie n nɑ̀kɛ́mɛ̀ Isidɑyɛɛri kɔbɛ nɛ̀ Sudɑɑ kɔbɛ mudoò kpɛ́í \q1 \v 8 Kɛ̀ ti Yiɛ̀ nKuyie nni mbɛ́innɛ̀ kɛ dɔ̀: \q1 Eénɛ̀ ditɑ̃tɛheù Kibeɑ ɛì miɛkɛ! \q1 Eénɛ̀ tɛkpɑ̀rìheutɛ̀ Dɑmɑɑ ɛì! \q1 Potɛ́nɛ̀ tɛíkòntɛ̀ Bɛti-Afɛnni ɛì. \q1 Bɛnsɑmɛɛ kɔbɛ! Nɛ̀ di ĩ́nkɛ̀ nkɛ. \q1 \v 9 M bo potɛ́ dìì yiè Efɑdɑimmu botí kɔbɛ, \q1 bɛ ɛì bo dɔúnko. \q1 N nɑ́ɑ́ ntì Isidɑyɛɛribɛ tì tu timɔ́mmɔnti nti. \q1 \v 10 Sudɑɑ kpɑ̀ɑ̀tìbɛ̀ tu bɛ̀ɛ̀ tɑɑ̀ bɛ̀mbɛ bɛtɔbɛ̀ kó sibɑɑ miɛkɛ, \q1 Nɛ̀ dɛ kpɛ́í m miɛkɛ bo bɛ̀ dɑ̀tínnɛ́ mɛniɛ nhɔ̃ɔ̃ tɑmɛ̀ kukó. \b \q1 \v 11 Isidɑyɛɛribɛ díndi bɛ̀ɛ̀ do fɛ̃́ũnko bɛtɔbɛ̀, \q1 di mmɔ̀nnì di fɛ̃́ṹrì mɛ̀ɛ̀ fɛ̃́ṹtímɛ̀ di mɛ̀ mɑ̀nnɛ̀mu, \q1 di tũ ndɛtetìrɛ̀ kpɛrɛ ndɛ sɑ̃́ɑ̃̀. \q1 \v 12 N yóó nɑɑ́ ndimɔnsĩ̀nnì ndi \q1 Isidɑyɛɛribɛ kpɛ́í, \q1 Sudɑɑ kɔbɛ bo yɑ̀, kùù yonku bo ndònnɛ̀ kuninyonku ɔ̃ ndòmmɛ̀, \q1 \v 13 Isidɑyɛɛribɛ bɑntɛ́mu bɛ mɔmmú, \q1 kɛ̀ Sudɑɑ kɔbɛ yɑ̀ bɛ yonku. \q1 Isidɑyɛɛribɛ biɛ nɛ́ kɔ̀tɛ Asidii nwe \q1 okpɑ̀ɑ̀tì diɛwè borɛ̀, ò mɛ mbɑ́ɑ́ nɑ kɛ́tɑɑ mbɛ mɔnni \q1 ò bɑ́ɑ́ nɑ kɛ́dɛitɛ bɛ yonku. \q1 \v 14 Mí nKuyie mmíì di do \q1 díndi Isidɑyɛɛribɛ dimɑnnì tɛ̃mɛ̀, \q1 míì do Sudɑɑ kɔbɛ dicìrícìrìbii kɔ̃mɛ \q1 kɛ̀ m pĩ nkɛ ɑɑkɛ́ kɛ kérí, \q1 we mbo nɑ kɛ́fietɛ? \b \q1 \v 15 N yóó bɛ̀ yóumu kɛ́kò nkɛ́nkémmú \q1 bɛ̀ bo bɑntɛ́mɛ̀ bɛ cɑɑ̀rìmɛ̀, kɛ́ n wɑmmú. \q1 Bɛ̀ bo tɑ dìì mɔ̀nnì mɛyɛǹcɑɑ̀rìmɛ̀ miɛkɛ bɛ̀ bo n wɑmmú. \c 6 \s1 Bɛ̀ dɔ̀ɔ̀mɛ̀ kɛ́ndò mbɛ̀ wɛ̃̀tɛ kɛ tɑunnɛ̀ Kuyie \q1 \v 1 Mɛm̀mɛ kɛ̀ bɛ̀ɛ nɑ́kɛ́ bɛtɔbɛ̀ kɛ dɔ̀: \q1 Tí wɛ̃tɛ ti Yiɛ̀ nKuyie mborɛ̀, \q1 kuù ti potɛ́ kuù mɛ nyóó ti miɛkùnnɛ, \q1 kuù ti kɔ̀utɛ kɛ̀ kuù yóó ti tɑɑ. \q1 \v 2 Dɛ̀ bo nyóó yĩ́ yɛwe yɛ̀dɛ́ɛ̀ \q1 kɛ̀ kù ti fòùkùnnɛmu, \q1 diyiè tɑ̃ɑ̃́nnì kɛ̀ kù ti íi nkɛ̀ tí nkù wɛ̃nnɛ́ kɛ fòù. \q1 \v 3 Ti bɑntɛ́mu kɛ dò nKuyie ntu Kuyie, \q1 yetɛnko kɛ tí kù bɑntɛ́. \q1 Ti yɛ̃́mu kɛ dò ndɛ̀ ɔ̃ɔ̃ biitɛ kɛ́wentɛ́ \q1 fɛĩ́nkɛ̀mbóntɑɑfɛ̀ ɔ̃ɔ̃ yɔɔrɛmɛ̀ kɛtenkɛ̀ \q1 fɛ̀ ɔ̃ɔ̃ kɔtɛnímɛ̀ ku kpɛrɛ yó mmɛ ndò \q1 kù í yóó pɑ̀ɑ̀ kù bo kɔtɛnímɛ̀. \b \q1 \v 4 Kɛ̀ ti Yiɛ̀ nKuyie mbɛ́i nkɛ dɔ̀: \q1 M bo di yĩ́mɛ díndi Isidɑyɛɛribɛ nɛ̀ Sudɑɑ kɔbɛ? \q1 Di n dɔ́ kɛ̀ dɛ̀ pɛ̃nkù mɛcɑ̃ɑ̃ mmɛ yɛkṹnwentɛ́wɛtɛ̀ tɛ̃mɛ̀, \q1 kɛ dò ntimɑɑ̀ntì dòmmɛ̀ kɛ ɔ̃ɔ̃ mɑ̀ntɛ̀ kɛ́yotɛ dɛndɛ bɑ̀mbɑ̀. \q1 \v 5 Dɛɛ̀ te kɛ̀ m pɑ̃ɑ̃nɑ́ɑǹtì nɑ́ɑm̀bɛ̀ di kɔùrì, \q1 kɛ̀ n di kùɔ pɑ́íí nɛ̀ tinɑ́ɑǹtì tìì yìɛ̀o n nùù miɛkɛ. \q1 M beéntì dò m̀pɑ́íí nwe diwennɛ́cɑ̀nnì kɔ̃mɛ. \q1 \v 6 Di bo nni ndɔ́mɛ̀ dɛɛ̀ n nɑɑti, \q1 dɛ̀ í tú di n feumɛ̀ iwũɔ̃ kɛ tuɔ̀. \q1 Di bo bɑntɛ́mɛ̀ kɛ dò n tú di Yiɛ̀ nKuyie ndɛɛ̀ n nɑɑti, \q1 kɛ pɛ̃ɛ̃tɛ́ di bo nni nfeumɛ̀ iwũɔ̃ kɛ tuɔ̀. \s1 Isidɑyɛɛribɛ dɔ̀ɔ̀ri mɛ̀ɛ̀ yɛi \q1 \v 7 Kɛ̀ Kuyie mbɛ́i nkɛ dɔ̀: \q1 Di tɔ̃ũ mɛ̀ɛ̀ botí mɛtɑummɛ̀ di dɔɔrinɛ̀mɛ̀ ditɔbɛ̀ \q1 mɛɛ̀ botí nku di tɔ̃̀tɛmɛ̀ n di dɔ̀ɔ̀nɛ̀ mɛ̀ɛ̀ tɑummɛ̀. \q1 \v 8 Kɑdɑɑdi ɛì tu mɛyɛi ndɔɔ̀rìbɛ̀ kpɛri ndi, \q1 mɛnitiyĩ̀ĩ̀ nníɛ́kɛ́ dì. \q1 \v 9 Kɛ̀ ikuɔ́ nìùbɛ̀ nɑɑ́ mbɛnitikɔ̀ùbɛ̀, \q1 kɛ okɛ Sisɛmmu kó kucɛ kɛ kɔù. \q1 Dɛ̀ɛ̀ dɔ̀ɔ̀ri Sisɛmmu kó kucɛ dɛ̀ í dò nkɛ́yɑ̀. \q1 \v 10 Isidɑyɛɛribɛ dɔɔri isɔkɛ kpɛrɛ ndɛ, \q1 bɛ̀ dɔuti dɔutinɛ̀ bɛtɔbɛ̀ mbɛ kɛ tònnɛ Isidɑyɛɛribɛ bɛmɔu. \b \q1 \v 11 Díndi Sudɑɑ kɔbɛ m bɑ̀ɑ́tímu kɛ bo di kɔ̃ũ tidiitì kɔ̃mɛ. \q1 M bo wɛ̃tɛ kɛ́tíí ndìì mɔ̀nnì n nìtìbɛ̀ bɛ̀ɛ̀ do cìɛ́tɛ́ kɛ́ntú tidɑɑtì. \c 7 \s1 Isidɑyɛɛribɛ dɔ̀ɔ̀ mɛ̀ɛ̀ yɛi mmɛɛ̀ yó nte kɛ̀ mɛyɛi mbɛ̀ tùɔ̀kɛní \q1 \v 1 Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀: \q1 N do dɔ́ dìì mɔ̀nnì kɛ́miɛkùnnɛ n nìtìbɛ̀, \q1 kɛ́miɛkùnnɛ Isidɑyɛɛribɛ, \q1 dɛ mɔ̀nnì ndi, bɛ yɛi nnɛ́ feitɛ́mɛ̀ \q1 nɛ̀ Sɑmmɑrii kɔbɛ kó kuyonku. \q1 Bɛ kpɛrɛ dɛmɔu do tú mɛsoùmmɛ̀ mmɛ, \q1 kɛ̀ bɛyóóbɛ̀ tɑɑ̀ sicɛ̃́ĩ kɛ̀ bɛnitiyɛibɛ firì icɛ. \q1 \v 2 Bɑ́ bɛ kóò mɔù yɛ̀mmɛ̀ í ò pɑ̃ kɛ dò n yɛ̃́ bɛ̀ dɔ̀ɔ̀ri mɛ̀ɛ̀ yɛi. \q1 Ntɛ bɛ di mmɔ̀nnì kɛ̀ bɛ yɛi mbɛ̀ pĩ, \q1 mmɛ̀ feitɛ́mu n yììkɛ̀. \q1 \v 3 Bɛ̀ dɔ̀ɔ̀ri mɛ̀ɛ̀ yɛi mbɛnìtìbɛ̀ kɛ̀ dɛ̀ nɑɑti bɛkpɑ̀ɑ̀tìbɛ̀ \q1 kɛ soú bɛnìtìbɛ̀ kɛ̀ dɛ̀ nɑɑti sikpɑ̀ɑ̀tìbìí \q1 \v 4 Bɛmɔu bɛ̀ dɔuti dɔutinɛ̀ bɛtɔbɛ̀ mbɛ, \q1 bɛ miɛkɛ dònnɛ̀ fɛpɛ̃́ɛ̃̀pṹnnɛ́tofɛ nfɛ bɛ̀ tɔ̀tìnnɛ fɛ̀, \q1 kɛ̀ fɛ̀ wũɔ̃tɛ́, kɛ̀ bɛ̀ yóu kɛ tɛ̃́nkɛ í tikii, \q1 kɛ bɑɑ̀ tipɛ̃́ɛ̃̀cootì bo múútímɛ̀. \q1 \v 5 Dikpɑ̀ɑ̀tìbɑnni yiè kɛ̀ sikpɑ̀ɑ̀tìbìí yɑ̃̀ kɛ́muɔ́, \q1 kɛ́duɔ́ mbɛmɑ́ɑ̀ bɛnitiyɛibɛ. \q1 \v 6 Kɛ̀ bɛ̀ dɔ́ kɛ́bɔ nhokpɑ̀ɑ̀tì, \q1 bɛ̀ ɔ̃ ntonnì fɛpɛ̃́ɛ̃̀pṹnnɛ́tofɛ kɔ̃mɛ mmɛ, \q1 kɛyènkɛ̀ kɛ níí bonkɛ, dikṹnweńnì kɛ́cɔ́útɛ́ mɛdiɛ̀, \q1 \v 7 kɛ́cɔ́útɛ́ fɛpɛ̃́ɛ̃̀pṹnnɛ́tofɛ kɔ̃mɛ kɛ́tuɔ mbɛ̀ɛ̀ bɛ̀ ni, \q1 kɛ̀ bɛkpɑ̀ɑ̀tìbɛ̀ duò bɛmɑ́ɑ̀ bɛmɑ́ɑ̀. \q1 Òmɔù mɛ nyí n kuɔ̀nnɛ̀. \b \q1 \v 8 Isidɑyɛɛribɛ kɔɔrɛnɛ̀ ibotí tɛì nyi, \q1 kɛ sɑ̃̀ɑ̃́tɛ́nɛ̀ kupɛ̃́mpɛ̃ńkù bɛ̀ í pèe nkù. \q1 \v 9 Kɛ̀ bɛpɔ̀ɔ̀bɛ̀ dèu bɛ wɛ̃rímú bɑ́ bɛ̀ í yɛ̃́, \q1 kɛ̀ tiyùpɛ́ítì ketɛ́ bɛ yɔ ĩ́nkɛ̀ bɑ́ bɛ̀ í dɑkɛ. \q1 \v 10 Isidɑyɛɛribɛ fentɛ̀ tɛɛ̀ nɑ̀kɛ́ bɛ kpɛ́í. \q1 Bɛ̀ mɛ nyí wɛ̃̀tɛní mí mbɛ Yiɛ̀ nKuyie m borɛ̀. \q1 Bɑ́ nɛ̀ tìì kó dimɑ̀ɑ̀ bɛ̀ tùɔ̀kɛní ti miɛkɛ, bɛ̀ í n wɑmmú. \q1 \v 11 Isidɑyɛɛribɛ yɛimmu kɛ dònnɛ̀ dikpɛtìnɔ́nkperi, \q1 bɛ̀ í mɔkɛ mɛyɛ̀mmɛ̀ bɛ̀ kɔ̀tɛ Esibiti nwe nɛ̀ Asidii \q1 kɛ wɑnti mɛteèmmɛ̀. \q1 \v 12 Kɛ̀ bɛ̀ dɔ́ bɛ̀ɛ cuó nkɛ̀ɛ̀ bíɛ́kɛ̀, \q1 m bo bɛ̀ bɔntɛ́ ticùɔ̀tì, \q1 kɛ̀ tìì bɛ̀ pĩ ntinɔ̀tì kɔ̃mɛ, \q1 kɛ̀ m bɛ̀ tié mbɛ̀ dɔ̀ɔ̀ mɛ̀ɛ̀ yɛi nkpɛ́í. \b \q1 \v 13 Di bo yɑ̀ díndi Isidɑyɛɛribɛ, \q1 di í mɛ ndɔ́mɛ̀ kɛ n tɔ́ɔ́nnɛ̀, \q1 di mɛ̀ nyetɛmɛ̀ n kpɛti, di kó dihɛì bo dɔúnko. \q1 Di yɛ̀mmɛ̀ dò ndi bo nni soú nkɛ̀ n di dɛɛtɑ́ɑ̀? \q1 \v 14 Di í n kuɔ̀nnɛ̀ di yɛ̀mmɛ̀ mɛmɔu, \q1 di ɔ̃ nkuɔ̀ nkɛ mítírì di dúɔ̀ ĩ́nkɛ̀ kɛ yɔ́ú dimɑ́ɑ̀, \q1 kɛ dɔ́ tidiitì nti nɛ̀ mɛnɑɑ̀, \q1 di í dɔ́ n kpɛti. \q1 \v 15 Míì do di tiè nkɛ di duɔ̀ mmuwɛ̃rímú, \q1 nɛ̀ mɛmmɛ kɛ̀ di dɔ́ kɛ́ndɔɔ̀ mɛyɛi. \q1 \v 16 Di wɛ̃tiní Bɑɑdi borɛ̀ ndɛ, dɛ̀ í tú m borɛ̀ \q1 di dònnɛ̀ mutɑ̃mmù mùù kèétɛ́ mùmmu kɛ díí, \q1 bɛ̀ yóó kuɔ di kó bɛkpɑ̀ɑ̀tìbɛ̀ nɛ̀ yɛsè nyɛ, \q1 tinɑ́ɑ́nyɛiti di n nɑ̀kɛ́ tì kpɛ́í, \q1 bɛ̀ bo di dɑɑ́ Esibiti ɛì miɛkɛ. \c 8 \s1 Kɑ̀ɑ buɔtí kuyɑɑkù ɑ yóó kɔ̃ṹ tɛfɔ̀dɔ́ntɛ̀ ntɛ \q1 \v 1 Kɛ̀ ti Yiɛ̀ nKuyie mbɛ́i nkɛ dɔ̀: \q1 Eénɛ̀ ditɑ̃tɛheù mɛyɛi mmɛɛ̀ doti n kɔbɛ ɛì fɛcĩrifɛ kɔ̃mɛ. \q1 Bɛ̀ cɑ̀ɑ̀rɛ̀ mɛ̀ɛ̀ kpɛ́í mmɛtɑummɛ̀ n do bɛ̀ dɔ̀ɔ̀nɛ̀ mɛ̀, kɛ yetɛ n tié. \q1 \v 2 Bɑ́ kɛ̀ bɛ̀ dɔ́ bɛ̀ n kuɔ́nnɛ̀ mɛ̀ɛ̀ botí kɛ dɔ̀: \q1 Áú! Kuyie, tínti Isidɑyɛɛribɛ ti dɑ yɛ̃́mu, \q1 fɔ̃́ɔ̃̀ ti te. \q1 \v 3 Isidɑyɛɛribɛ yetɛ mɛsɑ̀ɑ̀ mmɛ mudɔɔ̀rìmù, \q1 dɛɛ̀ te kɛ̀ bɛ dootitɔbɛ̀ bɛ̀ bɛ̀tì. \q1 \v 4 Bɛ̀ pĩ̀ḿmú bɛkpɑ̀ɑ̀tìbɛ̀, bɑ́ bɛ̀ í m beé, \q1 kɛ tɑ̃nkɛ́ bɛnìùbɛ̀, bɑ́ n yí yɛ̃́, \q1 kɛ tùótɛ́ bɛ mɑ́tì pɛ́ítì nɛ̀ bɛ sɔɔ nkɛ dɔɔrinɛ̀ sitenkɑɑnìi, \q1 kɛ̀ sì bɛ̀ fétinko. \q1 \v 5 Sɑmmɑrii kɔbɛ! \q1 Di kó fɛsɔɔmɑ́tìnɑ̀ɑ̀fɛ̀ fɛnfɛ n yí fɛ̀ dɔ́ fɛnɔ̀nfɛ̀, \q1 m miɛkɛ kɛɛ̀ di yɛ̀. \q1 Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑ̀rìmɛ̀? \q1 \v 6 Díndi Isidɑyɛɛribɛ díì dɔ̀ɔ̀ dɛ kó fɛsɔɔmɑ́tìnɑ̀ɑ̀fɛ̀, \q1 fɛ̀ɛ̀ bo Sɑmmɑrii fɛ̀ í tú Kuyie, \q1 fɛ̀ bo pɔntɛ kɛ́yɔurɛ yɔurɛ. \q1 \v 7 Di buɔtí kuyɑɑkù nku kɛ yóó kɔ̃ṹ fɛfɔ̀dɔ́nfɛ̀, \q1 Dikotinùù mɑrì dɛ ntú: \q1 kɛ̀ tiyòùtì í òtɛ mɛbii mbɛ̀ ɔ̃ɔ̃ í ntì nɑ̀ɑ mmuyuo. \q1 Bɑ́ kɛ̀ tì ketɛ́ kɛ dɔ́ tìi pɛitɛ́, bɛpɔ̀ɔ̀bɛ̀ bɛɛ̀ yóó tì di. \b \q1 \v 8 Ibotí tɛì iì tiekɛ Isidɑyɛɛribɛ, \q1 kɛ̀ bɛ̀ bo i miɛkɛ, \q1 kɛ dò nkunɛnkù bɛ tɛ̃́nkɛ í dɔ́ kù. \q1 \v 9 Nɛ̀ bɛmɑ́ɑ̀ ndi bɛ̀ kɔ̀tɛmɛ̀ Asidii. \q1 Bɛ̀ í tɔkunɛ̀ fɛsèfɛ̀ kɛ fɛ pĩĩ, \q1 kɛ̀ Isidɑyɛɛribɛ biɛ nɛ́ do ntinɛ́potì. \q1 \v 10 Kɛ̀ díndi bɑɑ dɔ́ dí mbɛ cu ticuuti, \q1 dɛ mɔ̀nnì tùɔ̀kɛmu kɛ̀ m bo di tíí, \q1 nkɛ Asidii kóo kpɑ̀ɑ̀tì di fɛ̃́ũ. \q1 \v 11 Isidɑyɛɛribɛ mɑɑ́ kɛ mɑɑ́ yɛwũɔ̃tɔ̀rɛ̀, \q1 kɛ̀ yɛ̀ nɛ́ dɔkɛ bɛ̀ tɑnnɛ́ mɛyɛi mmiɛkɛ. \q1 \v 12 Bɑ́ kɛ̀ m bɛ̀ wɑ̃̀ri n kuɔ́ pɛ́u pɛ́u, \q1 ì bo ndò ndɛ̀mɑrɛ̀ cɑ̀nnɛ̀ bɛ kpɛ́í. \q1 \v 13 Bɛ̀ n feu ìì wũɔ̃, bɛ̀ ì feu kɛ bo ncɑ́ɑ́ nyimɑɑ nyi. \q1 Mí mbɛ Yiɛ̀ nKuyie n yí cɔú dɛ kó yɛpɑ̃rɛ̀. \q1 N yí yóó yɛ̃̀ mbɛ yɛi nkpɛ́í, n yóó yṹɔ̃́mmu bɛ to, \q1 kɛ̀ bɛ̀ɛ wɛ̃tɛ Esibiti. \b \q1 \v 14 Isidɑyɛɛribɛ yɛ̃̀mmu wèè bɛ̀ dɔ̀ɔ̀, kɛ mɑɑ́ sikpɑ̀ɑ̀tìcɛ̃́ĩ, \q1 kɛ̀ Sudɑɑ kɔbɛ mɑɑ́ yɛhɛkɛ̀ diɛyɛ̀ pɛ́u kɛ̀ yɛ̀ fii nyiduotí. \q1 M bo cṹũnko muhɑ̃ɑ̃́ nkɛ̀ mùu cɔ́útɛ́ dɛ kó yɛhɛkɛ̀ nɛ̀ dɛ kó sicɛ̃sɑ̀ɑ̀sì. \c 9 \s1 Isidɑyɛɛribɛ yóó di mɛ̀ɛ̀ sémmɛ̀ bɛtɔbɛ̀ ɛì \q1 \v 1 Kɛ̀ ti Yiɛ̀ nKuyie mbɛ́i nkɛ dɔ̀: \q1 Díndi Isidɑyɛɛribɛ dɛ bɑ́ ndi nɑɑti \q1 kɛ̀ di nyɑ̃nku ibotí tɛì kɔ̃mɛ, \q1 kɛ yɛ̃́ mí ndi Yiɛ̀ nKuyie mmíì di temɛ̀ \q1 kɛ̀ di n yóu kɛ tũ̀nnɛ yɛbɔkɛ̀, \q1 kɛ́ndɔuti dɔutinɛ̀ ditɔbɛ̀ kɛ cɔú dɛ kó ticuuti di puotì dɛ̀ tidiitì. \q1 \v 2 Di dɔ́ tidiitì nti nɛ̀ mɛkùɔ̀, \q1 di mɛ mbɑ́ɑ́ dɛ̀ pɛ̀tɛ́, \q1 di dɔ́ mɛnɑɑ̀ mpɑ̀mmɛ̀ mmɛ, di bɑ́ɑ́ mɛ̀ yɑ̀. \q1 \v 3 Isidɑyɛɛribɛ di tɛ̃́nkɛ í yó mbo, \q1 mí ndi Yiɛ̀ nKuyie nhɛì miɛkɛ, \q1 di wɛ̃timu Esibiti yoo Asidii. \q1 Di yó nkɛ nyo ndi cìrìmù kɛ sɑ̃ũri dimɑ́ɑ̀. \q1 Ti diitì yó nsɑ̀nnɛ̀ bɛ̀ bo nyommɛ̀ mɑ́ɑ̀ ndi \q1 bɛ̀ í yóó pɛ́tɛ́ kɛ́tɑnnɛ̀ n cĩ́ɛ̃̀tɛ̀ miɛkɛ. \q1 \v 4 Isidɑyɛɛribɛ tɛ̃́nkɛ í yó nni \q1 m pɑ̃ɑ̃ ntidiitì bɛ̀ yɔɔrɛ tì mɛnɑɑ̀, \q1 yoo bɛ̀ n fíé iwũɔ̃ kɛ̀ n dɛ̀ cɔutɛ́, \q1 bɛ kó tidiitì yó ndò ntikúdiitì nti, \q1 kɛ̀ wèè tì di ò sĩ̀ntɛmu, \q1 bɛ̀ n yo mbɛ diitì bɛmɑ́ɑ̀ bɛ̀ bɑ́ɑ́ tì tɑnnɛ́ mí ndi Yiɛ̀ nKuyie ncĩ́ɛ̃̀tɛ̀. \b \q1 \v 5 Di nɛ́ bo nhɔ̃mmɛ yɛbɑɑ nkó yɛwe? \q1 Di bo yĩ́mɛ m bɑnni yiè? \q1 \v 6 Di cokɛ́ mɛyɛi mbo di domɛ̀ mmɛ yɑ́ɑ̀bɑ? \q1 Esibiti yóó di cɔ́útɛ́mu kɛ̀ Mɑnfisi ɛì ntú di kó kufɔ̃ti, \q1 tisɑ̃mpotì bo dɑ́tínnɛ́ di nɛntì sɑ̀ɑ̀tì, \q1 kɛ̀ tipotìi dɑ́tínnɛ́ di cɛ̃́ĩ. \q1 \v 7 Dɛ̀ tùɔ̀kɛmu mí ndi Yiɛ̀ nKuyie m bo yṹɔ̃́ ndɛ̀ di to, \q1 dɛ̀ tùɔ̀kɛmu m bo di bekɛ́nɛ̀ dɛ̀, \q1 di dò nkɛ́ tì bɑntɛ́mu díndi Isidɑyɛɛribɛ. \q1 Díndi bɛ̀ɛ̀ nɑ̀ɑ́ nkɛ tú m pɑ̃ɑ̃nɑ́ɑǹtì nɑ́ɑǹtò tu kuyɛìnkù, \q1 kòo yuwúoǹtì í yɛ̃́ o yɛ̀mmɛ̀. \q1 Di yɛi ndɛu kɛ mɑ̀mɛ̀ di yɛ̃ĩti yó mmɛ mmɑ̀. \q1 Di ò níí mmɛ̀ɛ̀ kpɛ́í nte kɛ̀ di nɑ́ɑ́ mmɛmmɛ. \q1 \v 8 Mí nKuyie mpɑ̃ɑ̃nɑ́ɑǹtì nɑ́ɑǹtò, \q1 Kuyie nkuù yɛ̃ n di cɑu ndíndi Efɑdɑyimmu kɔbɛ, \q1 kɛ̀ di n dii timɑ́tì n cɛ imɔu, \q1 kɛ n níínnɛ̀ Kuyie ncĩ́ɛ̃̀tɛ̀ miɛkoo. \q1 \v 9 Di fìíkú mɛyɛi mmiɛkɛ nkɛ weti weti, \q1 di do bo Kibeɑ kɛ dòmmɛ̀, kù í yɛ̃̀ ndi yɛi. \q1 Kuyie n yóó mɛ̀ ndi yietímu. \s1 Kuyie nyɛ̀mmɛ̀ cɑ̀ɑ̀rɛ̀nɛ̀mɛ̀ ku nìtìbɛ̀ \p \v 10 Kɛ̀ ti Yiɛ̀ nKuyie mbɛ́i nkɛ dɔ̀: \q1 N do yɑ̀ Isidɑyɛɛribɛ mɛketimɛ̀ mɔ̀nnì, \q1 kɛ̀ bɛ̀ ndònnɛ̀ fínyĩ̀ kó mutie mùù còḿmú dikpɑ́ɑ̀ mu kó yɛbɛ nyɛ. \q1 N do yɑ̀ bɛ yɛmbɛ̀ kɛ̀ bɛ̀ ndònnɛ̀ fìkíè kó yɛtebɛ yɛdɑɑyɛ̀ nyɛ, yɛ̀ɛ̀ bi kɛ̀ yɛ̀ mɔ̀nnì mu nyí tùɔ̀kɛ. \q1 Kɛ̀ bɛ̀ɛ tuɔkɛní Bɑɑdi-Peɔɔ, bɛ̀ dɛ nfìé dibɔɔ̀ yɛiri Bɑɑdi \q1 kɛ́dɔɔ̀ isɔkɛ kpɛrɛ, kɛ́nɑɑ́ mbɛ mɔ́mmɔmbɛ isɔkɛ, \q1 kɛ́dontɛnɛ̀ bɛ bɔɔ̀. \q1 \v 11 Díndi Isidɑyɛɛribɛ di kó disɑ̃nni bo puù tɛnɔ̀tɛ̀ tɛ̃mɛ̀ \q1 kupɛitóo tɛ̃́nkɛ í yó mbo, \q1 bɛ̀ bɑ́ɑ́ yɑ̀ opɔupómpúò ndi cuokɛ̀, \q1 onitipòkù bɑ́ɑ́ cɔ́útɛ́ tipɔutì. \q1 \v 12 Bɑ́ kɛ̀ bɛ̀ pɛitɛ́ ibí, \q1 m bo ì kùɔ bɑ́ ì mu nyí nɑɑ́ mbɛnìtìbɛ̀. \q1 M bo bɛ̀ dɛ̀tɛ́nɛ̀ dìì mɔ̀nnì, bɛ̀ bo yɑ̀. \q1 \v 13 Isidɑyɛɛribɛ do dònnɛ̀ mupuommu mùù fìíkú \q1 kɛtensɑ̀ɑ̀kɛ̀ mùmmu \q1 di mmɔ̀nnì kɛ̀ bɛɛ̀ nɛ́ kɔrìnɛ̀ bɛ bí bɛkɔ̀ùbɛ̀ borɛ̀. \b \q1 \v 14 Mɛm̀mɛ kɛ̀ ti Yiɛ̀ nKuyie npɑ̃ɑ̃nɑ́ɑǹtì nɑ́ɑǹtòo bɛ́i nkɛ dɔ̀: \q1 Ti Yiɛ̀ nKuyie nhɑ bo dɔɔ̀ bɑ Isidɑyɛɛribɛ? \q1 Duɔ́ nkɛ̀ bɛ pobɛ̀ mpuo nkɛ̀ tì duòní, \q1 mɔntɛ bɛ mɛmiɛ̀. \b \q1 \v 15 Kɛ̀ Kuyie nyíɛ́ kɛ́ bɛ́i nkɛ dɔ̀: \q1 N yɑ̀ bɛ yɛi mmɛmɔu Kidikɑɑdi nwe, \q1 dɛndɛ n ketɛ́mɛ̀ m bo bɛ̀ pɛ̃̀mmɛ̀, \q1 bɛ dɔɔ̀rìmɛ̀ yɛimɛ kpɛ́í, \q1 n yóó bɛ̀ bɛ̀timu n cĩ́ɛ̃̀tɛ̀, \q1 n tɛ̃́nkɛ í yó mbɛ̀ dɔ́. \q1 Bɛ kó bɛkpɑ̀ɑ̀tìbɛ̀ bɛmɔu òmɔù í yie n kpɛti. \q1 \v 16 Míì ɑ̃nnɛ́ tɛnɔ̀ùtɛ̀ Isidɑyɛɛribɛ, \q1 bɛ cĩ̀ɛ̃ nkpeímu, bɛ̀ tɛ̃́nkɛ bɑ́ɑ́ pɛitɛ́ yɛbɛ, \q1 bɑ́ kɛ̀ bɛ̀ pobɛ̀ piɛ́, \q1 m bo duɔ́nko mutenkṹṹ nkɛ̀ mùù kuɔ bɛ bí bɛ̀ dɔ́ ì i bɛ́ntì. \b \p \v 17 Ti Yiɛ̀ nKuyie m pĩ́ nkùù kó mutɔ̃mmú, \q1 kù bɛ̀ yetɛmu kɛ yɛ̃́ bɛ̀ í yiemmɛ̀ ku kpɛti, \q1 bɛ̀ yóó nhɑ̃́ɑ̃ntɛ ibotí tɛì miɛkɛ nkɛ. \c 10 \s1 Kuyie ncónnɛ́mɛ̀ Isidɑyɛɛribɛ kó mubɔɔféù kɛ pɔ̀ntɛ bɛ kpɑ̀ɑ̀tìyuu \q1 \v 1 Isidɑyɛɛribɛ do dònnɛ̀ fínyĩ̀ kó mutie sɑ̀ɑ̀mù mmu, \q1 kɛ pɛí mɛsɑ̀ɑ̀, bɛ̀ pɛitɛ́ dìì mɔ̀nnì kɛ sṹṹ, \q1 nkɛ mɑɑ́ yɛwũɔ̃tɔ̀rɛ̀ pɛ́u, \q1 bɛ̀ mɔ̀ɔ̀tɛ dìì mɔ̀nnì bɛ kpɛrɛ, \q1 kɛ fííkú yɛbɔɔtɑ̃́rɛ̀ kɛ́ nyɛ̀ sɑ̃̀rì. \q1 \v 2 Bɛ̀ tu mɛyɛ̀mmɛ̀ mɛ̀dɛ́mɛ̀ yɛmbɛ̀ mbɛ, \q1 bɛ̀ mɛ nyóó yɑ̀mu bɑ̀mbɑ̀ mbɛ yɛi nkó tiyeti, \q1 mí mbɛ Yiɛ̀ nKuyie míì mɔ́mmuɔ nyóó puɔ mbɛ bɔɔwũɔ̃tɔ̀rɛ̀ \q1 kɛ́bɔ́kɛ́ bɛ bɔɔtɑ̃́rɛ̀. \q1 \v 3 Dɛ mɔ̀nnì bɛ̀ bo yĩ́: Ti í mɔkɛ okpɑ̀ɑ̀tì, \q1 kɛ yɛ̃́ ti í mɔkɛmɛ̀ ti Yiɛ̀ nKuyie nkó kufɔ̃wɑɑ́. \q1 Bɑ́ kɛ̀ ti do mɔkɛ okpɑ̀ɑ̀tì ò bo ti dɔɔ̀ bɑ? \q1 \v 4 Bɛ̀ nɑ̀ɑ́ ndɛtetìrɛ̀ ndɛ kɛ pɑrìku kɛ nɛ́ soú, \q1 kɛ dɔɔ̀rinɛ̀ bɛtɔbɛ̀ mɛtɑummɛ̀. \q1 Kɛ̀ tiyɑ́ɑ̀bìsíbeéntì sũ̀ṹ kɛ kɔù \q1 fɛtùɔ̀rìfɛ̀ ɔ̃ɔ̃ yɛ̀mɛ̀ kupɛ̃ nyĩ́nkɛ̀ \q1 kɛ̀ fɛ dɔ̀mmɛ̀ɛ kuɔ mɛ̀ɛ̀ botí tidiitì. \b \q1 \v 5 Sɑmmɑrii ɛì kɔbɛ yĩ̀ɛ̃̀kù fɛsɔɔmɑ́tìnɑ̀ɑ̀fɛ̀, \q1 fɛ̀ɛ̀ bo Bɛti-Afɛnni fɛ kpɛ́í, \q1 kòo nìtìbɛ̀ kuɔ́ nyɛkúdɑbùò \q1 kɛ̀ ikuɔ́ nìùbɛ̀ɛ kuɔ́ ntinɔnniɛti. \q1 Fɛsɔɔmɑ́tìnɑ̀ɑ̀fɛ̀ wɛ̃rímú dɛ̀itɛmu kɛ̀ bɛ̀ fɛ̀ ìtɛ́nɛ̀. \q1 \v 6 Bɛ̀ bo fɛ̀ kònnɛ̀ Asidii kɛ́ fɛ̀ pɑ̃ okpɑ̀ɑ̀tì diɛwè. \q1 Ifɛi bo pĩ́ nhEfɑdɑimmu kɔbɛ dɛ mɔ̀nnì. \q1 Bɛmbɛ Isidɑyɛɛribɛ bɛ̀ bo demmu bɛ̀ borɛ̀ kɛ tũ̀nnɛ dɛ kó kucɛ. \q1 \v 7 Sɑmmɑrii ɛì kpɛrɛ dèèmu nɛ̀ di kóo kpɑ̀ɑ̀tì, \q1 o kpɛrɛ dònnɛ̀ ticɑ́dɛ̀ncɑ́útì ɔ̃ɔ̃ yɛntɛ́mɛ̀ mmɛ dibinni miɛkɛ. \q1 \v 8 Bɛti-Afɛnni kó yɛbɔɔwũɔ̃tɔ̀rɛ̀ yɛ̀ɛ̀ do te kɛ̀ bɛ̀ dɔ̀ɔ̀ri mɛyɛi, \q1 yɛ̀ bo puɔ ntipotì nɛ̀ tisɑ̃mpotì kɛ̀ dɛ̀ɛ yɛ̀ dɑ̀tínnɛ́, \q1 dɛ yiè bɛ̀ bo nnɑ́ɑ́ nyɛtɑ̃rɛ̀ kɛ tú: \q1 Ti kɑ̃ɑ̃́nnɛ̀, kɛ nnɑ́ɑ́ sitɑ̃ɑ̃́ kɛ tú: \q1 Donnɛ̀nní ti ĩ́nkɛ̀ kɛ tí yɑ̃kɛ. \s1 Isidɑyɛɛribɛ buɔtí dɛ̀, bɛ̀ yóó dɛ nkɔ̃ṹ \q1 \v 9 Mɛm̀mɛ kɛ̀ Kuyie nni mbɛ́innɛ̀ kɛ dɔ̀: \q1 Isidɑyɛɛribɛ do bo Kibeɑ nwe kɛ́dɔɔ̀ mɛyɛi. \q1 Nɛ̀ yíenní kɛ sɔkɛ́ kɛ mɛ̀ dɔ̀ɔ̀ri, \q1 dɛ̀ wennimu kɛ dò mbɛ̀ɛ̀ bɛ̀ do mudoò weè Kibeɑ miɛkɛ bɑkɛ. \q1 \v 10 N yìtɛ́ kɛ còḿmúmu kɛ bo bɛ̀ kpɑnnɛ̀. \q1 Ibotí imɔu bo wɛ̃nnɛ́ kɛ́ bɛ̀ tié mmɛyɛi mmɛdɛ́ bɛ̀ dɔ̀ɔ̀ mɛ̀ kpɛ́í. \b \q1 \v 11 Isidɑyɛɛribɛ dònnɛ̀ dinɑɑsɛrì ndi bɛ̀ tũ̀ntɛ di, \q1 kɛ di nɔ ndi tɔ̃mmú mɛsɑ̀ɑ̀ nkɛ puotì tidiitì, \q1 kɛ̀ n yɑ̀ dɛ kó dinɑɑsɛrì fɔ̃̀níí wennimɛ̀, \q1 kɛ̀ dì buú nyɛnɑɑkɑ̃ kó kudɔú, \q1 kɛ̀ Sudɑɑ kɔbɛ bo nduɔ̀ \q1 kɛ̀ Isidɑyɛɛribɛ pùɔ̀ nyɛdombiɛ. \q1 \v 12 Buɔtínɛ̀ dɛ̀ɛ̀ tu mɛwetímmɛ̀ kpɛrɛ, \q1 kɛ́kɔ̃ṹ yɛbɛ yɛ̀ɛ̀ tu n kó mɛsɑ̀ɑ̀. \q1 Sɛ̃ĩ́nɛ̀ kupɑku pɑ̀nkù, \q1 dɛ̀ tùɔ̀kɛmu kɛ dò di n wɑmmú mí ndi Yiɛ̀ nKuyie, \q1 kɛ́nkémmúnɛ̀ m bo cṹũnkomɛ̀ n kó mɛsɑ̀ɑ̀ ndi ĩ́nkɛ̀. \q1 \v 13 Di buɔtí kuyonku nku kɛ kɔ̃ṹ mɛyɛi, \q1 di yɑ́ɑ̀bìsí di pɛitɛ́ dɛ̀ di dɛ nyo. \b \q1 Di do tɑ̃́ di mɔ́mmɔmbɛ di kó muwɛ̃rímú mmu \q1 nɛ̀ di ɑ̃ɑ̃pɔ̀mbɛ̀ sũmɛ̀. \q1 \v 14 Nɛ̀ dɛ kpɛ́í nkunɔɔ̀ròo bo ɑ̃nnɛ́ di nìtìbɛ̀ cuokɛ̀. \q1 Kɛ̀ di ɛkɛ̀ yɛkperɛ̀ iduotí fitɛ́ yɛ̀ɛ puɔ. \q1 Sɑdimɑnni do pɔ̀ntɛ mɛ̀ɛ̀ botí Bɛti-Adibɛnni mudoò miɛkɛ, \q1 kɛ́kuɔ tibíyɔ̃tì nɛ̀ ti bí, di kpɛrɛ yó mmɛ ndò. \q1 \v 15 Dɛɛ̀ yóó di tuɔkɛní díndi Isidɑyɛɛribɛ, \q1 di yonku diɛkù di dɔ̀ɔ̀ dɛ̀ Betɛɛdi dɛ kpɛ́í nkɛ, \q1 dɛ̀ bo nyóó wentɛ́ kɛ di kóo kpɑ̀ɑ̀tì kpɛrɛ dèèmu. \c 11 \s1 Kuyie ndɔ́mɛ̀ ku kɔbɛ bɑ́ bɛ̀ í bɑntɛ́ \q1 \v 1 Kɛ̀ Kuyie mbɛ́i nkɛ dɔ̀: \q1 N dɔkɛ Isidɑyɛɛribɛ nɛ̀ bɛ bíkɛ́mbɛ́ntì nti, \q1 kɛ́ bɛ̀ yu bɛmbɛ bɛ̀ɛ̀ tu m bí, \q1 kɛ́ bɛ̀ dènnɛ Esibiti. \q1 \v 2 Kɛ̀ nní mbɛ̀ yu kɛ̀ bɛ̀ n dɛ́tirìnɛ̀, \q1 kɛ feu dibɔɔ̀ Bɑɑdi kɛ tuɔ̀ nsitenkɑɑnìi tihúúntì. \q1 \v 3 Míì mɔ́mmuɔ n do bɛnkɛ Isidɑyɛɛribɛ mucèmmu, \q1 kɛ́ mbɛ̀ ùúkú nɛ̀ m bɑɑ̀ \q1 bɛ̀ mɛ nyí bɑntɛ́ kɛ dò m bɛ̀ yùɔ̀ri. \q1 \v 4 Kɛ̀ m bɛ̀ ni mɛyɔɔ̀mmɛ̀ kɛ bɛ̀ dɔ́ mɛdiɛ̀. \q1 Kɛ bɛ̀ yùɔ̀ri obíyuɔ̀rì ɔ̃ ntɔmɛ̀ dɛbirɛ kɛ̀ dɛ̀ wɑ́ɑ̀rì, \q1 kɛ dɛ̀ duɔ̀ ntidiitì. \b \q1 \v 5 Isidɑyɛɛribɛ mɛ̀ nyetɛmɛ̀ bɛ̀ bo wɛ̃tɛnímɛ̀ m borɛ̀, \q1 bɛ̀ í wɛ̃ti Esibiti, Asidii kóo kpɑ̀ɑ̀tì weè yó mbɛ̀ te. \q1 \v 6 Mudoò muù yó mbo bɛ ɛì, \q1 dɛ̀mɑrɛ̀ í yó mbo dɛ̀ɛ̀ bo mù còńnɛ́, \q1 bɛ̀ tɑ̃ɑ̃tɛ́ ti kó mucɔ̃́ntimu mmu dɛndɛ. \q1 \v 7 N nìtìbɛ̀ m bùtínnɛ́mu pɑ́íí, \q1 kɛ̀ m bo kɛĩ́nkɛ̀ kɛ bɛ̀ yu \q1 bɑ́ bɛ̀ kóò mɔù í dɔ́ kɛ́ íinní o yuu, \b \q1 \v 8 M bɑ́ɑ́ nɑ kɛ́ di yóu díndi Isidɑyɛɛribɛ! \q1 Isidɑyɛɛribɛ m bɑ́ɑ́ nɑ kɛ́ di bɔntóo, \q1 m bɑ́ɑ́ nɑ kɛ́ di yóu n dɔ̀ɔ̀mɛ̀ Adimɑ, \q1 m bɑ́ɑ́ nɑ kɛ́ di dɔɔ̀ n yĩ́mɛ̀ Seboimmu kó yɛhɛkɛ̀, \q1 n yɛ̀mmɛ̀ mɛɛ̀ cɑ̀ɑ̀rɛ̀ kɛ̀ mɛsémmɛ̀ m pĩ ndi kpɛ́í. \q1 \v 9 N yí yóó yóu kɛ̀ m miɛkɛ di yɛ̀ díndi Isidɑyɛɛribɛ, \q1 n yɛ̀mmɛ̀ í yie m bo di kuɔmɛ̀, \q1 n tú Kuyie nku n yí tú onìtì, \q1 n tú Kuyie nku kɛ dò mpɑ́í pɑ́í, \q1 n yí yóó yóu kɛ̀ m miɛkɛɛ di yɛ̀ kɛ́tontɛ́. \q1 \v 10 N nìtìbɛ̀ bɛ̀ do pĩ̀ḿmú bɛ̀ kɛ́kònnɛ̀ yɛhɛkɛ̀ tɛyɛ̀, \q1 bɛ̀ wɛ̃tinímu, mí mbɛ Yiɛ̀ nKuyie nkɛ̀ m bo mbɛ̀ ni, \q1 kɛ kontí dicìrícìrì tɛ̃mɛ̀ kɛ̀ bɛ̀ tũ. \q1 Bɛ bí bo yɛ̀nní diyiè tɑɑ̀ kɛ̀ɛ̀ bíɛ́kɛ̀ \q1 kɛ́nkpeutí kɛ́kɔtɛní m borɛ̀. \q1 \v 11 Bɛ̀ itinímu Esibiti sikpɑ̃̀ncɛ́ndéi kɔ̃mɛ. \q1 Kɛ itiní Asidii yɛkpɛtìnɔ́nkperɛ tɛ̃mɛ̀, \q1 kɛ̀ m bo bɛ̀ tɑnnɛ̀ bɛ cɛ̃́ĩ miɛkɛ kɛ̀ bɛ̀ mbo. \q1 Mí ndi Yiɛ̀ nKuyie m míì bɛ́i. \s1 Isidɑyɛɛribɛ tumɛ̀ siyɑ́ɑ̀bìsí yɛmbɛ̀ \q1 \v 12 Kɛ̀ Kuyie mbɛ́i nkɛ dɔ̀: \q1 Isidɑyɛɛribɛ n sũ̀ṹnnɛ̀ siyɑ́ɑ̀bìsí nsi, \q1 Isidɑyɛɛribɛ n ciímmu, \q1 kɛ̀ Sudɑɑ kɔbɛ bɛɛ̀ kpɑɑ́ kɛ n tɑunɛ̀ \q1 kɛ dɔɔri n dɔ́ dɛ̀ sɑ̃́ɑ̃̀ mí nKuyie, \q1 kùù dò mpɑ́í pɑ́í. \c 12 \q1 \v 1 Isidɑyɛɛribɛ dii mɛkùɔ̀ nhEsibiti kɔbɛ \q1 kɛ wɑɑ̀ ntìì nɛ́potì dònnɛ̀ kuyɑɑkù nku, \q1 bɛ̀ dɔ̀ɔ̀rinɛ̀ Asidii kɔbɛ mɛ̀ɛ̀ tɑummɛ̀ \q1 dònnɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑtonnìkù nku. \q1 Bɛ̀ sũ̀ṹ nsiyɑ́ɑ̀bìsí nsi nɛ̀ mucɑɑ̀rìmù. \b \q1 \v 2 Mí ndi Yiɛ̀ nKuyie, nnɛ̀ Sudɑɑ kɔbɛ ti mɔkɛ tinɑ́ɑǹtì nti, \q1 m miɛkɛ kɛɛ̀ yɛ̀ Sɑkɔbu yɑɑ̀bí, \q1 kɛ̀ n yóó bɛ̀ potɛ́ kɛ́ bɛ̀ yietí bɛ yɛi. \q1 \v 3 Bɛ yɑ̀ɑ̀rì Sɑkɔbu do kpɑɑ́ o yɔ̃ pɔutì miɛkɛ nkɛ \q1 kɛ́cɔutɛ́ o kóo kótì fɔ̃̀tìrì. \q1 O kòtɛ́ dìì mɔ̀nnì kɛ́mɑnɛ̀ mí nKuyie, \q1 \v 4 kɛ́mɑnɛ̀ n tɔ̃nnì kɛ̀ dìi ò nɑ kòo kuɔ́ nkɛ́ dì bɑ̀ńtɛ̀ \q1 dɛ kó difɔ̃nkúò kòo m mɑ́ɑ́nɛ̀ Betɛɛdi kɛ̀ tí nnɑ́ɑ́. \q1 \v 5 Mí ndi Yiɛ̀ nKuyie m míì yètìrì tu Mpɑkɛdɑɑ. \q1 Bɛ̀ n yu kɛ tú ti Yiɛ̀ nKuyie nku. \q1 \v 6 Fɔ̃́ nSɑkɔbu ɑ wɛ̃tinímu m borɛ̀, \q1 ɑ́ nnitì kɛ dɔɔri dɛ̀ɛ̀ sìɛ́, \q1 kɛ́ nni mbuɔ́ mí nhɑ Yiɛ̀ nKuyie mmíì dɑ te. \b \q1 \v 7 Kɑnnɑhɑ̃ɑ̃ kɔbɛ tɔ siyɑ́ɑ̀bìsíbièpeé nsi, \q1 kɛ nɔnnɛ̀ bɛ̀ bo ciitɛ́mɛ̀ otɔù kɛ́di. \q1 \v 8 Kɛ̀ Isidɑyɛɛri kɔbɛ nɑ́ɑ́ nkɛ tú ti kpɑ̀rìkɛ̀mu \q1 kɛ mɔ̀ɔ̀tɛ ti kpɛrɛ mɛdiɛ̀. \q1 Ti pĩ mmutɔ̃mmú mmu kɛ cɔ̃ntɛ dɛ̀ í tú mɛyɛi. \q1 \v 9 Mí ndi Yiɛ̀ nKuyie mmíì di te nɛ̀ di do bomɛ̀ Esibiti, \q1 n wɛ̃ti kɛ bo di dɔɔ̀ bɛcièmbɛ̀ mbɛ. \q1 Kɛ̀ di nhɑ̃ titouti miɛkɛ, \q1 di do ɔ̃ ndòmmɛ̀ titouti kó yɛbɑɑ mmiɛkɛ. \q1 \v 10 Dɛ mɔ̀nnì m bo duɔ́ n nɑ́ɑǹtì m pɑ̃ɑ̃nɑ́ɑǹtì nɑ́ɑm̀bɛ̀, \q1 kɛ́ bɛ̀ bɛnkɛ mɛbɛnkùmɛ̀ pɛ́u \q1 m bo duɔ́ nkɛ̀ m pɑ̃ɑ̃nɑ́ɑǹtì nɑ́ɑm̀bɛ̀ nnɑ́ɑ́ nyɛnɑ́ɑǹhɑ̃ntíyɛ̀. \q1 \v 11 Kɑdɑɑdi ɛì kɔbɛ tú mɛyɛi ndɔɔ̀rìbɛ̀ mɔ́mmɔmbɛ mbɛ, \q1 dɛɛ̀ te kɛ̀ bɛ̀ nɑ̀ɑ́ ndɛtetìrɛ̀, \q1 bɛ̀ feu yɛnɑɑdɑkɛ̀ nyɛ sɑ̃́ɑ̃̀ Kidikɑɑdi, \q1 kɛ̀ bɛ wũɔ̃tɔ̀rɛ̀ nɑɑ́ nyɛkɔ̀tɛ̀ dòmmɛ̀ dɛpɑɑ mmiɛkɛ. \b \q1 \v 12 Sɑkɔbu do cokɛ́ kɛ́kɔtɛ Arɑmu nwe, \q1 Isidɑyɛɛri dɛ mpĩ mmutɔ̃mmú onitipòkù kpɛ́í, \q1 Onitipòkù kpɛ́í nkɛ ò dɔ̀ɔ̀mɛ̀ omɑ́ɑ̀ opecɛ̃nti. \q1 \v 13 Mí ndi Yiɛ̀ nKuyie n do tɔ̃nko m pɑ̃ɑ̃nɑ́ɑǹtì nɑ́ɑǹtò nwe \q1 kòo bɛ̀ dènnɛ Esibiti, \q1 kɛ̀ n duɔ́ nkɛ̀ wèe mbɛ̀ ni \q1 \v 14 Isidɑyɛɛribɛ n cɑ̀ɑ̀rɛ̀ mɛdiɛ̀ mmɛ mí mbɛ Yiɛ̀ nKuyie. \q1 N yóó bɛ̀ yietímu mɛnitiyĩ̀ĩ̀ bɛ̀ còúmmɛ̀, \q1 kɛ́ bɛ̀ fɔ̀ɔ́ mbɛ yɛi. \c 13 \s1 Kuyie mpotɛ́mɛ̀ ku nìtìbɛ̀ bɛ̀ kù yetɛ mɛ̀ɛ̀ kpɛ́í \q1 \v 1 Kɛ̀ ti Yiɛ̀ nKuyie mbɛ́i nkɛ dɔ̀: \q1 Efɑdɑimmu wuɔ nkɔbɛ do ɔ̃ nnɑ́ɑ́ nkɛ̀ bɛnìtìbɛ̀ kpeutímu, \q1 bɛ̀ do tú bɛnitidiɛbɛ̀ mbɛ Isidɑyɛɛribɛ miɛkɛ, \q1 kɛ nɛ́ sɑ̃ũ mbɛmɑ́ɑ̀ nɛ̀ dibɔɔ̀ Bɑɑdi kɛ ku. \q1 \v 2 Nɛ̀ yíenní kɛ̀ di kpɑɑ́ sɔkɛ́ kɛ dɔɔri mɛyɛi, \q1 kɛ yiɛnko timɑ́tì pɛ́ítì kɛ mɑ́ɑ́tí sitenkɑɑnìi, \q1 kɛ tóú timɑ́tì pɛ́ítì kɛ dɔɔri sitenkɑɑnìi di dɔ́mɛ̀, \q1 Dɛndɛ kó dimɑ̀ɑ̀ díì dɛ̀ dɔ̀ɔ̀nɛ̀ di nɔu kɛ nɛ́ sì wɑ́ɑ̀rì, \q1 kɛ nɑ́ɑ́ nditɔbɛ̀ kɛ si feu inɑ̀ɑ̀kɛ. \q1 \v 3 Dɛɛ̀ kpɛ́í nte kɛ̀ di yóó yotɛ timɑɑ̀ntì tɛ̃mɛ̀, \q1 kuyɑɑkù ɔ̃ɔ̃ túótɛ́ mɛ̀ɛ̀ botí kufɑ̃ɑ̃̀kperíkù, \q1 kuyukú ɔ̃ɔ̃ yɛ̀mɛ̀ tɛcɑ́dopòtɛ̀. \b \q1 \v 4 Díndi Isidɑyɛɛribɛ, nɛ̀ di yɛ̀mɛ̀ Esibiti míì di te, \q1 n kó difɔ̃nkúò di Yiɛ̀ nKuyie ntɛkù í bo di yĩ̀ɛ̃́tɛ́ kù, \q1 n kó difɔ̃nkúò odɛɛtíwè tɔù mɔù í bo. \q1 \v 5 Míì do di bonɛ̀ dikpɑ́ɑ̀ tɛdɔntɛ̀ miɛkɛ, \q1 kutɑyiɛtí miɛkɛ. \q1 \v 6 Di tùɔ̀kɛ dìì mɔ̀nnì kɛtensɑ̀ɑ̀kɛ̀ kɛ́di kɛ́nsɑ̀nnɛ̀, \q1 di di dìì mɔ̀nnì kɛ dɛ, \q1 kɛ mɔ̀ɔ̀tɛ tɛfentɛ̀ kɛ́ n yɛ̃̀. \q1 \v 7 Mɛm̀mɛ n nɑɑ́mmɛ̀ di kpɛ́í ndicìrícìrì, \q1 n sɑ̃̀ɑ̃́tɛ́nɛ̀ dimɑnnì ndi, \q1 kɛ okɛ kucɛ kɛ di díí. \q1 \v 8 N yóó di do kumuntonkù kùù mɔ̀ńtɛ́ ku bí ku kɔ̃mɛ mmɛ, \q1 m bo di kɛ̃tɛ́ kucìrícìrìyɔ̃kù tɛ̃mɛ̀. \q1 Musĩ̀mmù bo di yɔurɛ. \b \q1 \v 9 Isidɑyɛɛribɛ di kúmu, \q1 di í n dɔ́ mɛ̀ɛ̀ kpɛ́í \q1 míì mɑ́ɑ̀ nɑ nnɑ kɛ di teènnɛ̀. \q1 \v 10 Di kóo kpɑ̀ɑ̀tì í yie borɛ ò bo di teènnɛ̀mɛ̀? \q1 Yé di kó bɛ̀nìùbɛ̀ íbiɛ? \q1 Di do m békú kɛ tú n di duɔ́ nwèè kpɑ̀ɑ̀tì nɛ̀ bɛ̀ɛ̀ nìùbɛ̀? \q1 \v 11 M miɛkɛ kɛɛ̀ do yɛ̀nní kɛ̀ n di duɔ́ ndɛ kó bɛkpɑ̀ɑ̀tìbɛ̀ \q1 kɛ̀ bɛ̀ dɔ̀ɔ̀ dɛ̀ɛ̀ í wenni kɛ̀ dɛ̀ n yonkɛ kɛ̀ m bɛ̀ dɛ̀itɛ. \b \q1 \v 12 N cũɔ̃́ Isidɑyɛɛribɛ kó mɛyɛi n dɔukù nku, \q1 m mɛ sɔ̀nnɛ dìì sɔrì mɛ̀ bɑ́ɑ́ nɑ kɛ́yɛ̀. \q1 \v 13 Kuyonku kùù bo di pĩ́, \q1 kù bo ndònnɛ̀ kupɛitɛ́yonku ɔ̃ɔ̃ pĩ́mmɛ̀ onitipòkù. \q1 Dɛbirɛ di púó ndɛ̀ mɛ ntú dibíyɛìnnì ndi, \q1 dɛ̀ í dɔ́ kɛ́yɛ̀nní. \q1 \v 14 N yí yóó di dɛɛtɛ́nɛ̀ kudɔnkù, \q1 n yí yóó di dɛɛtɛ́nɛ̀ mukṹṹ. \q1 Mukṹṹ nyé ɑ kpɑ̀rìnɛntì? \q1 Kudɔukù yé ɑ wɛ̃rímú mùù kɔ̀ù? \q1 \v 15 Mɛsémmɛ̀ tɛ̃́nkɛ í n tɔ́kɛ́nɛ̀. \q1 Bɑ́ nɛ̀ Isidɑyɛɛri kɔbɛ kpɛrɛ mɛ nyiémmɛ̀ o kɔbɛ cuokɛ̀ \q1 diyiè yìɛ̀ní kɛ̀ɛ̀ bíɛ́kɛ̀ kó kuyɑɑkperíkù kɔ̀rinímu, \q1 kuyɑɑkù kùù tònnì ku kèrínímu \q1 dikpɑ́ɑ̀ tɛdɔntɛ̀ bíɛ́kɛ̀, \q1 kɛ̀ yɛnɛ́bòrɛ̀ bo kṹṹ, kɛ̀ di birɛɛ kpeí. \q1 Dɛ kó kuyɑɑkù bo kɑ́útɛ́ di kpɑ̀tì di mɔkɛ tì, \q1 di kpɛrɛ dɛsɑ̀ɑ̀rɛ̀ kó dimɑ̀ɑ̀. \q1 \v 16 Sɑmmɑrii kɔbɛ yóó yɑ̀mu bɛ yɛi nkó tiyeti, \q1 kɛ yɛ̃́ bɛ̀ n yetɛmɛ̀ mí mbɛ Yiɛ̀ nKuyie nkùù bɛ̀ te. \q1 Bɛ̀ bo bɛ̀ fìé kɛ́nɑu ibíbɛ́nní, \q1 kɛ́puoti bɛpɔupómpómbɛ̀. \c 14 \s1 Isidɑyɛɛribɛ yóó wɛ̃tɛ kɛ́yiémmɛ̀ Kuyie nɛ̀ bɛ̀ yɛ̀mmɛ̀ mɛmɔu \q1 \v 1 Kɛ̀ ti Yiɛ̀ nKuyie mbɛ́innɛ̀ ku pɑ̃ɑ̃nɑ́ɑǹtì nɑ́ɑǹtò kɛ dɔ̀: \q1 Díndi Isidɑyɛɛribɛ wɛ̃tɛnɛ̀ní mí ndi Yiɛ̀ nKuyie m borɛ̀, \q1 mí nwèè di te kɛ yɛ̃́ di yɛi mmɛɛ̀ di bɔmmɛ̀. \q1 \v 2 Wɛ̃tɛnɛ̀ní Kuyie mborɛ̀ kɛ́ kù nɑ̀kɛ́ kɛ dɔ̀: \q1 Kuyie nhɑ tú wèè dɛ̀ì wènwe mɛyɛi, \q1 dɛitɛ ti yɛi nkɛ́cɔutɛ́ ti pɑ̃rɛ̀ \q1 yɛ̀ɛ̀ tu yɛsɑ̃ɑ̃ nti dɑ duɔ̀ nyɛ̀, \q1 ti nɑ ndɑ fìé ìì nɑ̀ɑ̀kɛ kó difɔ̃̀tìrì. \q1 \v 3 Asidii weè í yóó ti dɛɛtɛ́, \q1 ti tɛ̃́nkɛ í yóó dekɛ sikpɑ̀rìsɛ̃ĩ́, \q1 ti mɛ ntɛ̃́nkɛ í yóó yĩ́ \q1 sitenkɑɑnìi ti dɔ̀ɔ̀ sì nɛ̀ ti nɔu \q1 sì tu Kuyie, \q1 Kuyie nfɔ̃́ɔ̃̀ mɑ́ɑ̀ ɔ̃ɔ̃ kuɔ́ ndɛciribirɛ mɛsémmɛ̀. \b \q1 \v 4 N yóó miɛkùnnɛmu Isidɑyɛɛribɛ \q1 bɛ kó mumɔmmú muù tu bɛ̀ bo n yetírímɛ̀ n kpɛti. \q1 M bo bɛ̀ dɔkɛ nɛ̀ n yɛ̀mmɛ̀ mɛmɔu, \q1 m miɛkɛ tɛ̃́nkɛ í yó mbɛ̀ pɛ́ì. \q1 \v 5 N yó ndò ntinɛ́mɑɑ̀ntì nti Isidɑyɛɛribɛ kpɛ́í, \q1 bɛ̀ bo pórí mutepóó tɛ̃mɛ̀, \q1 bɛ cĩ̀ɛ̃ m bo tɑ kɛtenkɛ̀ Dimɑɑ kó dɛtie nkpɛyi kɔ̃mɛ. \q1 \v 6 Bɛ bɑkɛ bo sɛntɛ̀ kɛ́nwenni odìfíè kó ibɑkɛ kɔ̃mɛ, \q1 kɛ̀ bɛ pórímú kó kufɔ̃ɔ̃ku ndònnɛ̀ Dimɑɑ kó dɛtie nkɔku. \q1 \v 7 Bɛ̀ wɛ̃tinímu kɛ bo díɛ́kɛ́ n kó mɛdɛ́ɛ̀, \q1 kɛ́kúútí dɛpɑɑ nkɛ̀ tidiitìi ɑ̃nnɛ́, \q1 kɛ̀ bɛ̀ɛ pórí fínyĩ̀ kó mutie nkɔ̃mɛ, \q1 kɛ̀ bɛ yètìrì feitɛ́ Dimɑɑ ɛì kó mɛnɑɑ̀ nkpɛri dòmmɛ̀. \q1 \v 8 Díndi Isidɑyɛɛribɛ, \q1 di kpɛti tɛ̃́nkɛ í bonɛ̀ yɛbɔkɛ̀, \q1 n cɔutɛ́mu di bɑ́ɑmmìi, kɛ dɑ̀ɑ̀tɛ di kpɛ́í, \q1 n dònnɛ̀ mutie bɛ̀ tu mù mmu sìpɛ̀rɛ́sì, \q1 n fɑ̃ɑ̃̀tì í yorì, míì borɛ̀ ndɛ di yó mpɛ́úmɛ̀ yɛbɛ. \b \q1 \v 9 Di mɔkɛmu mɛyɛ̀mmɛ̀ keènɛ̀ di m̀pɑ́tíri kó tinɑ́ɑǹtì, \q1 wèè ciì weè bo ti yĩ́ɛ̃́tɛ́, \q1 Kuyie nkó kucɛ síɛ́mu, bɛ̀ɛ̀ wetí kɛ̀ bɛ̀ kù tũ \q1 bɛ̀ɛ̀ yetírí Kuyie nkpɛti kɛ̀ bɛ̀ bètírí.