\id HAG di37.all Novembre 1998 BJ Parakou B{enin
\ide UTF-8
\h Asee
\toc1 Asee
\toc2 ASEE
\mt1 Asee
\imt1 Di mpɑ́tíri tɔ tìì nɑ́ɑǹtì
\ip Asee kó dipɑ́tíri kó tinɑ́ɑǹtì ti nɑ́ɑ́ nhAsee do dɔ̀ɔ̀ dɛ̀ɛ̀ kó dimɑ̀ɑ̀ ndi kɛ̀ dɛ̀ bo yie nkɛ̀ bɛnìtìbɛ̀ɛ mɑɑ́ Kuyie ncĩ́ɛ̃̀tɛ̀ Sedisɑdɛmmu dɛ̀ do sɔ̃́ mbɛ̀ ìtɛ́nímu Bɑbidɔnni bɛ̀ do bɛ̀ pĩ nkɛ́kònnɛ̀ kɛ̀ kɛ́dɔ̀ɔ̀ tidɑɑtì. Bɛ̀ do konní kɛ̀ dɛ̀ɛ mɔntɛmu bɛ̀ nɛ́ mu nyí ndɑ̀ɑ̀tɛ kɛ bo wɛ̃tɛ kɛ́mɑɑ́ Kuyie ncĩ́ɛ̃̀tɛ̀. Kɛ̀ Asee nyɑ́úkùnko bɛ kɔ̃̀ntì kɛ̀ bɛ̀ bo mɑɑ́ Kuyie ncĩ́ɛ̃̀tɛ̀, kòo mbɛ̀ nɑ̀ɑ́ nkɛ tú bɛ̀ yóu Kuyie ncĩ́ɛ̃̀tɛ̀ ntɛ kɛ̀ tɛ̀ do dɛɛ̀ te kɛ̀ bɛ̀ tɑ ticĩ̀tì miɛkɛ, kɛ̀ ɔ̃ɔ̃ kúútí mɛdiɛ̀ nkɛ́kɔ̃ṹ sɑ́m̀pɔ́, kɛ̀ Asee nyɑ́úkùnko bɛ kɔ̃̀ntì kɛ tú bɛ̀ɛ mɑɑ́ Kuyie ncĩ́ɛ̃̀tɛ̀ kɛ̀ bɛ̀ɛ yɑ̀ diwɛ̀ì Kuyie nkɔbɛ kù wèńkùnnɛ bɛ̀ do nkɛ́mmɔkɛ dì.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Asee yɛ̃mmɛ̀ bɛ̀ɛ wɛ̃tɛ kɛ́mɑɑ́ Kuyie ncĩ́ɛ̃̀tɛ̀ 1:1-15
\io1 2. Bɛ̀ yɑ̀úkùnnɛmɛ̀ bɛ kɔ̃̀ntì Kuyie ncĩ́ɛ̃̀tɛ̀ mɑrimù kpɛ́í 2:1-23
\c 1
\s1 Bɛ̀ dòmmɛ̀ kɛ́wɛ̃tɛ kɛ́mɑɑ́ Kuyie ncĩ́ɛ̃̀tɛ̀
\p
\v 1 Okpɑ̀ɑ̀tì Dɑriyuusi kpɑ̀tì benni didɛ́rì do ndi, otɑ̃̀nkù kuɔ́nwè kó diyiè ketirì, kɛ̀ ti Yiɛ̀ nKuyie nduɔ́ nkɛ̀ ku pɑ̃ɑ̃nɑ́ɑǹtì nɑ́ɑǹtò Asee bɛ́innɛ̀ Seditiɛri birɛ Sodobɑbɛɛdi Sudɑɑ kɔbɛ kó kùmɑ̀ndɑ́ɑ̀ nɛ̀ Yotisɑdɑki birɛ Sosuwee ikuɔ́ nìùtì diɛwè kɛ dɔ̀: 
\v 2-3 Ntɛ Kuyie Mpɑkɛdɑɑ tu mù, ku tu: Bɛnìtìbɛ̀ nɑ̀ɑ́ nkɛ tú dɛ̀ mu nyí tùɔ̀kɛ bɛ̀ bo mɑɑ́mɛ̀ n cĩ́ɛ̃̀tɛ̀. Dɛɛ̀ te kɛ̀ kù tu n di bekɛ kɛ dɔ̀: 
\v 4 Dɛ̀ nɛ́ tùɔ̀kɛmu díndi bo nhɑ̃mɛ̀ sicɛ̃sɑ̀ɑ̀sì miɛkɛ kɛ̀ ku cĩ́ɛ̃̀tɛ̀ doɑ̀? 
\v 5 Ntɛnɛ̀ tũnkɛ́ Kuyie Mpɑkɛdɑɑ tu mù, kù tu: Totínɛ̀ di yɛ̀mmɛ̀ tìì di tuɔ̀kùní ti ĩ́nkɛ̀,
\q1
\v 6 Di ɔ̃ɔ̃ kúútí mɛdiɛ̀ kɛ́dɛitɛ sɑ́m̀pɔ́
\q1 kɛ́di kɛ́ɑutɛ́,
\q1 kɛ́yɑ̃̀ mɛnɑɑ̀ nkɛ́ɑutɛ́,
\q1 kɛ ɔ̃ɔ̃ dɑ́ɑ́tí tiyɑ̀ɑ̀tì bɑ́ muséé mbɑ́ɑ́ yɛ̀,
\q1 kɛ̀ bɛ̀ yietí otɔ̃ntì ìi pɛ̃ɛ̃tóo kɛ́ndò nhò ì cũɔ̃́ diyɑɑ̀yɔ̀rì dìì dùùtɛ.
\q1
\v 7 Kɛ̀ Kuyie mbɛ́i nkɛ dɔ̀:
\q1 Totínɛ̀ di yɛ̀mmɛ̀ tìì di tuɔ̀kùní ti ĩ́nkɛ̀,
\q1
\v 8 kɛ́dekɛ ditɑ̃rì ĩ́nkɛ̀ kɛ́kɔ̃ũní idɛí
\q1 kɛ́mɑɑ́ n cĩ́ɛ̃̀tɛ̀ dɛ̀ yóó n nɑrikɛmu
\q1 kɛ̀ n dɛ́úkùnnɛ n yètìrì tɛ miɛkɛ.
\q1
\v 9 Kɛ̀ ti Yiɛ̀ nKuyie Mpɑkɛdɑɑ bɛ́i nkɛ dɔ̀:
\q1 Di ɔ̃ɔ̃ kúútí kɛ́nyɛ̃́ kɛ bo dɛitɛ mɛdiɛ̀ mmɛ,
\q1 kɛ nɛ́ dɛitɛ sɑ́m̀pɔ́,
\q1 kɛ̀ di dɛ̀ kpɛ̃nnɛ́ní tɛcĩ́ɛ̃̀tɛ̀ n fuutɛ kuyɑɑkù dɛ ĩ́nkɛ̀.
\q1 Bɑ nkpɛ́í nte?
\q1 N cĩ́ɛ̃̀tɛ̀ do mɛ̀ɛ̀ kpɛ́i nkɛ,
\q1 bɑ́ wè kòò dɑ̀kɛnɛ̀ o kpɛtɛ.
\b
\q1
\v 10 Dɛɛ̀ te kɛ̀ fɛtɑɑfɛ̀ yiɛtí
\q1 kɛ̀ tidiitì yetɛ.
\q1
\v 11 Míì duɔ́ nkɛ̀ fɛtɑɑfɛ̀ yiɛtí
\q1 di tenkɛ̀ kɛmɔu miɛkɛ nɛ̀ yɛtɑ̃rɛ̀ ĩ́nkòo,
\q1 kɛ̀ tidiitì nɛ̀ fínyĩ̀ kó dɛtie nnɛ̀ odìfíè kpɛrɛ kɛ̀ dɛ̀ kpeí
\q1 nɛ̀ tidiitì tìì kó dimɑ̀ɑ̀ pɛí kɛtenkɛ̀ ĩ́nkɛ̀ kɛ̀ tì kpeí. Bɛnìtìbɛ̀ nɛ̀ iwũɔ̃ kɛ̀ dɛ̀ di mɛsémmɛ̀,
\q1 di nɔu kó mutɔ̃mmú mumɔu kɛ̀ mù yetɛ.
\p
\v 12 Mɛm̀mɛ Seditiɛri birɛ Sodobɑbɛɛdi nɛ̀ Yotisɑdɑki birɛ Sosuwee ikuɔ́ nìùtì diɛwè, nɛ̀ bɛsɔmbɛ bɛmɔu kɛ̀ bɛ̀ɛ kéntɛ́ ti Yiɛ̀ nKuyie mbɛ̀ nɑ̀kɛ́ tì nɛ̀ ku pɑ̃ɑ̃nɑ́ɑǹtì nɑ́ɑǹtò Asee nùù miɛkɛ, kɛ́mɔɔtɛ ti Yiɛ̀ nKuyie nkó kufɔ̃wɑɑ́. 
\v 13 Kòo bɛ̀ nɑ̀kɛ́ kɛ dɔ̀: Kuyie ntu kù di bonɛ̀mu, kunku Kuyie nkuù bɛ́i!
\p
\v 14 Mɛm̀mɛ kɛ̀ ti Yiɛ̀ nKuyie nnɑmpɛ Seditiɛri birɛ Sodobɑbɛɛdi yɛ̀mmɛ̀ Sudɑɑ kɔbɛ kóò kùmɑ̀ndɑ́ɑ̀ nɛ̀ Yotisɑdɑki birɛ Sosuwee ikuɔ́ nìùtì diɛwè kɔ̃mɛ nɛ̀ bɛnìtìbɛ̀ bɛmɔu kɔ̃mɛ, kɛ̀ bɛ̀ɛ kɔtɛní kɛ́pĩ́ mmutɔ̃mmú ti Yiɛ̀ nKuyie mbɛ̀ tũ̀ nkù cĩ́ɛ̃̀tɛ̀ kunku Mpɑkɛdɑɑ. 
\v 15 Okpɑ̀ɑ̀tì Dɑriyuusi kpɑ̀tì benni didɛ́rì kóò tɑ̃̀nkù kuɔ́nwè kó diyiè sipísìdɛ́ nɛ̀ dinɑɑnnì do ndi.
\c 2
\s1 Kuyie nyóó wɛ̃tɛ kɛ́duɔ́mmɛ̀ ku cĩ́ɛ̃̀tɛ̀ diyetìdiɛrì
\p
\v 1 Okpɑ̀ɑ̀tì Dɑdiyuusi kpɑ̀tì benni dɛ́rì, otɑ̃̀nkù yiénwè kó diyiè sipísìdɛ́ nɛ̀ dimɑ́ɑ̀. Kɛ̀ ti Yiɛ̀ nKuyie nyíɛ́ kɛ́nɑ́kɛ́ ku pɑ̃ɑ̃nɑ́ɑǹtì nɑ́ɑǹtò Asee ò bo nɑ́kɛ́ tì bɛnìtìbɛ̀, 
\v 2 kóò bɛ́innɛ̀ kɛ dɔ̀: Nɑ́kɛ́ Seditiɛri birɛ Sodobɑbɛɛdi Sudɑɑ kɔbɛ kóò kùmɑ̀ndɑ́ɑ̀ nɛ̀ Yotisɑdɑki birɛ Sosuwee ikuɔ́ nìùtì diɛwè nɛ̀ bɛnìtìbɛ̀ sɔmbɛ kɛ dɔ̀:
\q1
\v 3 Di miɛkɛ we ndo yɑ̀ n kpetì do dòmmɛ̀ n cĩ́ɛ̃̀tɛ̀ miɛkɛ?
\q1 Di nɛ́ tɛ̀ wùómmɛ̀ yíe, ntɛ̀ dòmmɛ?
\q1 Tɛ̀ í nɑɑ́ ndɛtetìrɑ̀ɑ̀?
\q1
\v 4 Fɔ̃́ nSodobɑbɛɛdi nɛ̀ Yotisɑdɑki birɛ Sosuwee ikuɔ́ nìùtì diɛwè yɑ́úkùnnɛ di kɔ̃̀ntì,
\q1 dihɛì kó bɛnìtìbɛ̀ bɛmɔu, yɑ́úkùnnɛ di kɔ̃̀ntì kɛ pĩ́ n tɔ̃mmú.
\q1 N di bonɛ̀mu. Mí nKuyie Mpɑkɛdɑɑ míì bɛ́i!
\q1
\v 5 N do tì ndi nɑ̀kɛ́mu di yɛtì dìì mɔ̀nnì Esibiti.
\q1 N kó Muyɑɑ́ ndi bonɛ̀mu, di bɑ́ nyĩɛ̃̀kù!
\q1
\v 6 Mí nKuyie Mpɑkɛdɑɑ míì bɛ́i nkɛ tú:
\q1 Dɛ̀ kpɑɑ́ sɑ́m̀pɔ́ nwe,
\q1 kɛ̀ n sɑ̃ntɛ̀ tiwɛtì nɛ̀ kɛtenkɛ̀ nɛ̀ dɑ̀mɛ́ɛ̀rì, kɛtenkɛ̀ kɛmɔu.
\q1
\v 7 M bo sɑ̃ntɛ̀ yɛbotɛ̀ kɛ̀ yɛ kpɑ̀tì timɔu cóúnní m borɛ̀,
\q1 kɛ̀ n wɛ̃tɛ kɛ́duɔ́ n cĩ́ɛ̃̀tɛ̀ tɛyetìdiɛrì.
\q1 Mí nKuyie Mpɑkɛdɑɑ míì bɛ́i!
\q1
\v 8 Míì te mɛsɔɔ nnɛ̀ timɑ́tì pɛ́ítì,
\q1 mí nKuyie Mpɑkɛdɑɑ míì bɛ́i!
\q1
\v 9 N cĩ́ɛ̃̀tɛ̀ yètìrì bo dɛukɛ kɛ́pɛ̃ɛ̃tɛ́ di do dòmmɛ̀
\q1 n yóó di duɔ́mmu mɛom̀pùmɛ̀,
\q1 mí nKuyie Mpɑkɛdɑɑ míì bɛ́i!
\s1 Wèè í yie nKuyie nyɛ̃ mmù ò dɔ̀ɔ̀ri dɛ̀ dɛmɔu ɔ̃ nsĩ̀mmu
\p
\v 10 Dɑriyuusi kpɑ̀tì benni dɛ́rì otɑ̃̀nkù wɛínwè kó diyiè sipísìdɛ́ nɛ̀ dinɑɑnnì kɛ̀ ti Yiɛ̀ nKuyie mbɛ́innɛ̀ ku pɑ̃ɑ̃nɑ́ɑǹtì nɑ́ɑǹtò Asee kɛ dɔ̀: 
\v 11 Mí nKuyie Mpɑkɛdɑɑ míì tu: Bekɛ́ ikuɔ́ nìùbɛ̀ kɛ̀ bɛ̀ dɑ nɑ́kɛ́ ikuɔ́ yɛ̃ mmù, 
\v 12 bekɛ́ kɛ dɔ̀: Kɛ̀ dɛ̀ dò nyikuɔ́ nìùtì mɔù cũɔ̃́ imɑɑ bɛ̀ fèútɛ́ ì Kuyie nho yɑɑ̀yɔ̀rì miɛkɛ, kɛ̀ dì kɑ̀ɑ́kɛ́ pɛ̃́ɛ̃̀ yoo mudiì yoo mɛnɑɑ̀ nyoo mɛkùɔ̀, yoo tidiitì tɛtì mɑtì tì bo wenkɑɑ̀? Kòo bɛ̀ bekɛ. Kɛ̀ bɛ̀ɛ ò tɛ̃̀ńnɛ́ kɛ dɔ̀: Ɔ́ɔ̀! 
\v 13 Kɛ̀ Asee sɔɔtɛ́ kɛ́bɛ́i nkɛ dɔ̀: Kòo nìtì nɛ́ kɑ̀ɑ́kɛ́ ocíì kɛ sĩ̀ntɛ, kɛ kɑ̀ɑ́kɛ́ dɛndɛ kó dɛ̀mɑrɛ̀ dɛ̀ɛ sĩntɑɑ̀, kɛ̀ dɛ̀ bɑ́ɑ́ sĩntɛ? Kɛ̀ bɛ̀ɛ ò tɛ̃̀ńnɛ́ kɛ dɔ̀: Dɛ̀ bo sĩntɛ. 
\v 14 Dɛ mɔ̀nnì kɛ̀ Asee bɛ̀ nɑ̀kɛ́ kɛ dɔ̀:
\q1 Di kpɛrɛ mɛ ndò ndíndi ku mbotí
\q1 di kpɛrɛ mɛ ndò nti Yiɛ̀ nKuyie nyììkɛ̀,
\q1 di dɔɔri mùù tɔ̃mmú mɛ ndò,
\q1 di kù pɑ̃ɑ̃ ndɛ̀ɛ̀ kó dimɑ̀ɑ̀ sĩ̀mmu.
\s1 Wèè yie nKuyie o kpɛrɛ ɔ̃ nyíémmɛ̀
\p
\v 15 Kɛ̀ ti Yiɛ̀ nKuyie nyíɛ́ kɛ́ bɛ̀ bɛ́innɛ̀ kɛ dɔ̀:
\q1 yíe nnɛ̀ yɛwe yɛ̀ɛ̀ kpɑɑní,
\q1 totínɛ̀ di yɛ̀mmɛ̀ mɛsɑ̀ɑ̀ ntìì di tuɔ̀kùní ti ĩ́nkɛ̀.
\q1 Kɛ nɛ́ nɑ kɛ́pṹṹtɛ́ n cĩ́ɛ̃̀tɛ̀.
\q1
\v 16 Ɔ̃̀nti di tuɔ̀kùní?
\q1 Di ɔ̃ɔ̃ kɔ̃ṹ kùù pɑku kɛ́pɛ́tɛ́ mɛyòbii ntiyɔ̀tì tìdɛ́tì
\q1 Di ɔ̃ɔ̃ ku nkɔ̃ṹ di mmɔ̀nnì kɛ́pɛ́tɛ́ mɛyòbii nkuyɔ̀rìkù kùmɑ́ɑ̀
\q1 di ɔ̃ɔ̃ tɔ̃ũ kùù pɑku fínyĩ̀ kó yɛbɛ
\q1 kɛ́kuɔti mɛnɑɑ̀ nkɛ́píɛ ntɛcètɛ̀,
\q1 di ɔ̃ɔ̃ ku ntɔ̃ũ kɛ́kuɔti kɛ́utɛ́ tɛcètɛ̀ dikéè.
\b
\q1
\v 17 Kɛ̀ n duɔ́ nkɛ̀ tidiitì fɑ̃ũ ndɛpɑɑ nkɛ pũ̀ũ̀ti.
\q1 Kɛ̀ yɛmɑ́tɑ̃́rɛ̀ cɑ̀ɑ̀ri dɛsɔnnɛ
\q1 kɛ̀ di ɔù dɛtetìrɛ̀,
\q1 bɑ́ nɛ̀ mɛmmɛ di í wɛ̃̀tɛní m borɛ̀.
\b
\q1
\v 18 Totínɛ̀ di yɛ̀mmɛ̀ tìì yóó di tuɔkɛní nɛ̀ yɛwe yɛ̀ɛ̀ kpɑɑní yɛ kpɛ́í,
\q1 kɛ́túótɛ́ otɑ̃̀nkù wɛínwè yiè nkó diyiè sipísìdɛ́ nɛ̀ diwɛínnì yiè,
\q1 di pũ̀ṹtɛ́ dìì yiè n cĩ́ɛ̃̀tɛ̀,
\q1
\v 19 Dɛ̀mɑrɛ̀ kpɑɑ́ kɛ ɑ̃ di buɔ miɛkɑɑ̀?
\q1 Dɛtie mbɛ̀ tu dɛ̀ fínyĩ̀ nɛ̀ fìkíè
\q1 nɛ̀ kèdènɑ́tì nɛ̀ odìfíè dɛ̀ kpɑɑ́ pɛíɑ̀?
\q1 Kɛ túótɛ́ yíe nkó diyiè nɛ̀ yɛwe sɔnyoo
\q1 n yó ndi dɔɔrimu mɛsɑ̀ɑ̀.
\s1 Kuyie ndɔúnnɛ̀ dìì nùù Sodobɑbɛɛdi
\p
\v 20 Weè tɑ̃̀nkù yiè sipísìdɛ́ nɛ̀ dinɑɑnnì yiè, kɛ̀ ti Yiɛ̀ nKuyie nyíɛ́ kɛ́bɛ́innɛ̀ Asee kɛ dɔ̀: 
\v 21 Nɑ́kɛ́ Sodobɑbɛɛdi Sudɑɑ kɔbɛ kóò kùmɑ̀ndɑ́ɑ̀ kɛ dɔ̀: N tú n yóó yíɛ́ kɛ́sɑ̃ntɛ̀mu kɛĩ́nkɛ̀ nɛ̀ kɛtenkɛ̀.
\q1
\v 22 N yóó buɔ́mmu yɛkpɑ̀ɑ̀tìyɔ kó yɛkpɑ̀ɑ̀tìkɑ̀rɛ̀,
\q1 kɛ́dɛitɛ bɛkpɑ̀ɑ̀tìbɛ̀ kó muwɛ̃rímú.
\q1 N yóó buɔ́mmu sikpɑ̀rìnɑɑsɛ̃ĩ́ nɛ̀ si dèèbɛ̀,
\q1 kɛ́kuɔ bɛsɑ̃ndèèbɛ̀ nɛ̀ bɛ sɛ̃ĩ́.
\q1 N yóó duɔ́ mbɑ́ wè kòo kou weè ò kùɔ.
\q1
\v 23 Dɛ yiè m bo dɑ túótɛ́ fɔ̃́ nSeditiɛri birɛ
\q1 Sodobɑbɛɛdi n kóo tɔ̃ntì kɑ̀ɑ ndò n kó mumɑ́mɑ́ɑ́ mmɛcɑnnimɛ̀ kɔ̃mu \f + \fr 2:23 \fr*\fk mumɑ́mɑ́ɑ́ mmɛcɑnnimɛ̀ kɔ̃mu: \fk*\ft Okpɑ̀ɑ̀tì do ɔ̃ ndúúkú mù mmu\ft*\f* yoo ò mmù ũ kɛ̀ mù ntú o kó mɛcɑnnimɛ̀ kòo dɔ́ kɛ́cɑnnɛ dɛ̀mɑrɛ̀ wèe mù ĩkú dɛ ĩ́nkɛ̀. Kòo wɑ̃̀ri dipɑ́tíri wèe mù ĩkú di ĩ́nkɛ̀ kɛ̀ dɛ̀ɛ bɛnkɛ weè dì wɑ̃̀rimɛ̀.
\q1 N tɑ̃ɑ̃tɛ́ fɔ̃́ nwe mí nKuyie Mpɑkɛdɑɑ míì bɛ́i!