\id HAB di35.all Novembre 1998 BJ Parakou B{enin
\ide UTF-8
\h Abɑkuku
\toc1 Abɑkuku
\toc2 ABAKUKU
\mt1 Abɑkuku
\imt1 Di mpɑ́tíri tɔ tìì nɑ́ɑǹtì
\ip Abɑkuku do wɑ̃̀ri o pɑ́tíri Bɑbidɔnni kɔbɛ bɑkɛ́ dìì mɔ̀nnì ndi, kɛ̀ Isidɑyɛɛribɛ bèkú bɛmɑ́ɑ̀ tìì yóó bɛ̀ tùɔ̀kɛní, kɛ yĩɛ̃kù bɛ̀ í yɛ̃́ kɛ̀ nsɑ̀ kɛ̀ Kuyie nkpɑɑ́ kɛ yɛ̃́ bɛ kpɛ́í. Kɛ̀ bɛ̀ mbékú Kuyie nkɛ tú: Bɑ nte kɛ̀ bɛ̀ ti fɛ̃́ũnko kɑ̀ɑ bùútóo? kɛ̀ bɛyɛibɛ fɛ̃́ũnko bɛsɑ̀ɑ̀bɛ̀ kɑ̀ɑ cĩ̀ɛ̃́kɛ́? Kɛ̀ Kuyie nhò tɛ̃̀ńnɛ́ ditɑnnùù mɑrì dìì bo bɛnìtìbɛ̀ bɛmɔu kpɛ́í diì tu: Onìtì ɑ bo mbúɔ́mɛ̀ Kuyie ndɛɛ̀ bo nte kɑ̀ɑ nfòù kɛ̀ dɛ̀ dɑ nɑɑti bɑ́ kɑ̀ɑ bo tìì miɛkɛ ɑ mbúɔ́ Kuyie. Mukɑ̀mmù 3.
\ip Dɛ kó dipɑ́tíri dikéè didɛ́rì miɛkɛ Kuyie nnɑ̀ɑ́mmu ku nìtìbɛ̀ kɛ tú: Ntũ̀nnɛ̀ mí ndi Yiɛ̀ nKuyie n yɛ̃ mmù kɛ́nyɛ̃́ kɛ dò n yóó di teennɛ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie mpɑ̃ɑ̃nɑ́ɑǹtì nɑ́ɑǹtò í yɛ̃́mɛ̀ ò bo tɑ̃ɑ̃tɛ́ tì 1:1-2:1
\io1 2. Bɛ̀ɛ̀ bùtínnɛ́ Kuyie mbɛ̀ bo yɑ̀ 2:3-20
\io1 3. Kuyie nyɛ̃mmɛ̀ kɛ̀ wèè kù tɑ̃́ ò bo nɑ 3
\c 1
\p
\v 1 Di m̀pɑ́tíri ti nɑ́ɑ́ nKuyie mbɛnkɛ tiǹti ku pɑ̃ɑ̃nɑ́ɑǹtì nɑ́ɑǹtò Abɑkuku.
\s1 Abɑkuku kuɔ́nnɛ̀mɛ̀ Kuyie
\q1
\v 2 Ti Yiɛ̀ nKuyie!
\q1 Dɛ̀ yó nkɑ̃́ɑ̃́kɛ́ dɛ kɑ̀ɑ keè n dɑ kuɔ̀nnɛ̀mɛ̀?
\q1 A yóó n cɔ́útɛ́ ɔ̃̀ndɑɑ̀?
\q1 M bɑɑ dɑ kuɔ̀nnɛ̀ bɛnìtìbɛ̀ yonku dɛutɛ́mɛ̀ mmɛ
\q1 kɑ̀ɑ bùútóoɑ̀?
\q1
\v 3 Dɛ̀ dòmmɛ kɑ̀ɑ yóu kɛ̀ bɛnìtìbɛ̀ dɔ̀ɔ̀ri mɛyɛi?
\q1 Bɑ nte kɑ̀ɑ yóu kɛ̀ bɛ̀ ti fɛ̃́ũnko?
\q1 Mɛfɛ̃́ṹtímɛ̀ mɑ́ɑ̀ ndi nɛ̀ mufèè n wúómmɛ̀,
\q1 tinɛìtì tiì nɛ́ bo nɛ̀ yɛkpɑ̀rɛ̀.
\q1
\v 4 Bɛ̀ tɛ̃́nkɛ í tũ nyikuɔ́ yɛ̃mmɛ̀,
\q1 bɑ́ tibeéntì tɛ̃́nkɛ í bekù mɛsɑ̀ɑ̀,
\q1 oyɛiwe weè nɔ nhosɑ̀ù, dɛɛ̀ te kɛ̀ tibeéntì cɑ̀kɛ.
\s1 Kuyie nhò tɛ̃̀ńnɛ́ tì
\q1
\v 5 Kɛ̀ Kuyie nhò tɛ̃̀ńnɛ́ kɛ dɔ̀:
\q1 Wéntɛ́nɛ̀ kɛ́yɑ̀ yɛbotɛ̀ dɔ̀ɔ̀ dɛ̀,
\q1 kɛ̀ dɛ̀ di di, kɛ́ di kpeí.
\q1 N yóó pĩ́ mmùù tɔ̃mmú di mmɔ̀nnì,
\q1 kɛ̀ bɛ̀ do di nɑ̀kɛ́ kɛ tú mù bo dɔɔ̀
\q1 di bɑ́ɑ́ yie.
\q1
\v 6 N yóó íinní Bɑbidɔnni kó bɛnitiyonkubɛ mbɛ,
\q1 bɛnitidɔnnibɛ̀, bɛ̀ɛ̀ firì titentì timɔu,
\q1 kɛ feètì yɛhɛkɛ̀.
\q1
\v 7 Bɛ̀ kpeńnìmu kɛ duò tikɔ̃m̀bùɔ̀tì.
\q1 Kɛ ɑ̃ sifeí,
\q1 kɛ ɑ̃ɑ̃̀ bɛmɑ́ɑ̀ bɛ kó ikuɔ́.
\q1
\v 8 Bɛ sɛ̃ĩ́ cɑ̃ɑ̃mu kɛ pɛ̃ɛ̃tɛ́ yɛkpɑmɑɑ̀,
\q1 kɛ tonnì kɛ pɛ̃ɛ̃tɛ́ sikpɑmɔɔ́
\q1 ɔ̃ mbɛtì kuyuoku mɔ̀nnì kɛ bo pĩ́ nkɛ cɑ̃ɑ̃mɛ̀.
\q1 Bɛ sɛ̃ĩ́ boní dɛdɛ́tirɛ̀ ndɛ,
\q1 kɛ pùtìní kɛ cɑ̃ɑ̃ kɛ dò nfɛcĩrifɛ ɔ̃ɔ̃ yɑ̀ fɛ̀
\q1 dɔ́ kɛ́pĩ́ ndɛ̀, kɛ́fĩɛ̃̀tɛ̀ mɛ̀ɛ̀ botí.
\q1
\v 9 Bɛ̀ kèrínímu, kɛ pɔntì kɛ ɛiti,
\q1 kɛ wetí bɛ ììkɛ̀,
\q1 diyiè yìɛ̀ní kɛ̀ɛ̀ bíɛ́kɛ̀ kó kuyɑɑkù kɔ̃mɛ
\q1 kɛ kouti tidɑɑtì mubirímú kɔ̃mɛ.
\q1
\v 10 Bɛ̀ sènkumu bɛkpɑ̀ɑ̀tìbɛ̀, kɛ dɑú sikpɑ̀ɑ̀tìbìí,
\q1 bɛ̀ í bɔti dihɛì iduotí fitɛ́ dì kpɛti,
\q1 bɛ̀ ɔ̃ɔ̃ ì ɔnnɛ́ mutɑ̃́ɑ̃́ mmu kɛ́tɑ,
\q1 kɛ́pĩ́mmú bɛ̀ɛ̀ bo di miɛkɛ.
\q1
\v 11 Bɛ̀ pɛ̃nkùmu kuyɑɑkù tɛ̃mɛ̀,
\q1 kɛ dɔ́ mɛcɑ̃ɑ̃ nkɛ kɔri kupíkù tɛkù.
\q1 Bɛnitikɔ̀ùbɛ̀ mbɛ, bɛ̀ tɑ̃́ bɛ wɛ̃rímú mmu,
\q1 bɛ̀ nɑ ntɑ̃́ mɛ̀ɛ̀ botí Kuyie.
\s1 Abɑkuku kuɔ́nnɛ̀mɛ̀ Kuyie nkucɛ mɛdɛ́rímɛ̀
\q1
\v 12 Ti Yiɛ̀ nKuyie nhɑ tú ti Yiɛ̀ nKuyie nku nɛ̀ dimɔ̀nnì.
\q1 Fɔ̃́ɔ̃̀ ti te, ɑ dò mpɑ́í pɑ́í nwe kɛ bo sɑ̃́ɑ̃̀.
\q1 Fɔ̃́ n kó kupèrìkù.
\q1 Fɔ̃́ɔ̃̀ tɑ̃ɑ̃tɛ́ bɛ nnìtìbɛ̀ kɛ́duɔ́ nkɛ̀ bɛ̀ bo yṹɔ̃́ nti to,
\q1 ɑ bɛ̀ kpénkùnnɛ kɛ̀ bɛ̀ bo ti tiémmu.
\q1
\v 13 Kuyie nhɑ dò mpɑ́í pɑ́í nwe,
\q1 ɑ bɑ́ɑ́ nɑ kɛ́nwúó mmɛyɛi.
\q1 A bɑ́ɑ́ nɑ kɛ́nwúó nkɛ bɛ̀ ti fɛ̃́ũnko.
\q1 Dɛ̀ dòmmɛ kɑ̀ɑ wùó mbɛyɛibɛ kɛ í nɑ́ɑ́ ntìmɑtì?
\q1 Bɑ nte kɛ̀ bɛyɛibɛ nɑ bɛ̀ɛ̀ bɛ̀ wenninɛ̀ kɑ̀ɑ wúónko.
\q1
\v 14 Dɛ̀ yĩmɛ kɑ̀ɑ wùónko bɛnìtìbɛ̀,
\q1 kɛ̀ bɛ̀ bɛ̀ dɔ̀ɔ̀ri kɛ dò mbɛ̀ tu siyĩĩ,
\q1 kɛ do mbɛ̀ tu dɛsĩ́ntɛ́kpɛrɛ dɛ̀ɛ̀ í mɔkɛ onìùtì?
\q1
\v 15 Bɑbidɔnni kóo kpɑ̀ɑ̀tì bɛ̀ pĩ̀ḿmú nɛ̀ o yĩm̀pie nku,
\q1 bɛ̀ tɑ o dìtìmù miɛkɛ nkɛ,
\q1 kòò bɛ̀ ũrínɛ̀ kuyɑ́ɑ̀kù kɛ̀ dɛ̀ o nɑɑti, kòò yɑ̃̀nku.
\q1
\v 16 Ntɛ bɛ, kɛ feu bɛ dìtìrɛ̀ iwũɔ̃,
\q1 kɛ tuɔ̀ ntihúúntì bɛ yɑ́ɑ̀tì,
\q1 kɛ yɛ̃́ dɛɛ̀ bɛ̀ duɔ̀mmɛ̀ mudiì mɛdiɛ̀,
\q1 mudiì mùù sũ mɛsɑ̀ɑ̀.
\q1
\v 17 Bɛ̀ yo nsɔkɛ́mu kɛ kou yɛbotɛ̀,
\q1 nɛ̀ bɛ yĩǹdìtìrɛ̀ sɑ̃́ɑ̃̀ɑ̃̀?
\q1 Mɛsémmɛ̀ í yóó bɛ̀ pĩ̀nɑ́ɑ̀?
\c 2
\s1 Kuyie nyɛ̃mmɛ̀ kù yóó potɛ́ Bɑbidɔnni
\q1
\v 1 Dɛ mɔ̀nnì kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtòo bɛ́i nkɛ dɔ̀:
\q1 Mí nhohɛikɛ̀mbɑ̀rì n yóó cómmú n cónnì ndi.
\q1 N yó mbo n dènnì ĩ́nkɛ̀ nkɛ kɛ pɑkɛ́,
\q1 n yó nkémmúmu kɛ́yɑ̀ kù yó n nɑ́kɛ́ tì,
\q1 kɛ́yɑ̀ m mɛ̀ nkù kuɔ́nnɛ̀ kɛ̀ kù yóó n tɛ̃́nnɛ́ tì.
\b
\q1
\v 2 Mɛm̀mɛ ti Yiɛ̀ nKuyie nni ntɛ̃̀ńnɛ́mɛ̀ kɛ dɔ̀:
\q1 Wɑ̃ri n yóó dɑ bɛnkɛ tì, ɑ́ tì kèrí titɑ̃́píɛ̀tì ĩ́nkɛ̀,
\q1 kɛ̀ dɛ̀ɛ yie nkɛ̀ bɛ̀ɛ nɑ kɛ́ ntì kɑɑ̀ mmɛsɑ̀ɑ̀.
\q1
\v 3 N yóó dɑ bɛnkɛ tì tu yɛmɔ̀rɛ̀ yɛ̀ɛ̀ kpɑɑní yɛ kpɛti nti.
\q1 Dɛ̀ ɑutɛ́ kɛ bo dɔɔ̀mu, dɛ̀ í yóó pɑ̀ɑ̀.
\q1 Bɑ́ kɛ̀ dɛ̀ ɔɔtí n dɛ̀ bɑ̀ɑ̀mu,
\q1 tì yóó dɔɔ̀mu, dɛ̀ í mɔkɛ kpɛ̀rɛ̀.
\q1
\v 4 Wèè í dɔɔri dɛ̀ɛ̀ sìɛ́ kɛ mɔkɛ tɛfentɛ̀ ò yóó kúmu.
\q1 Wèè mɛ nwetí ò bo nfòù ò n tɑ̃́ mɛ̀ɛ̀ kpɛ́í \f + \fr 2:4 \fr*\ft Dɛ kó dinɑ́ɑǹkéè nɑ̀ɑ́ mmukṹṹ nnɛ̀ mufòmmu kpɛ́í kɛ\ft*\f* yɛ̃: Mufòmmu kó dikũ̀nnì tu ɑ bo ntɑ̃́mɛ̀ Kuyie, kɑ̀ɑ bo ɑ̃nnɛ́mɛ̀ tɛfentɛ̀ kɛ́yetɛ Kuyie nkɛ̀ dɛ̀ tɔuní mukṹṹ. Wéntɛ́ Odommu 1:17 nɛ̀ Kɑdɑsii 3:11 nɛ̀ Ebedeebɛ 10:38.
\q1
\v 5 Ti kpɑ̀tì soú nhonìtì nwe,
\q1 tɛpɔ̀tɛ̀ yiɛ̀ nyí mɔkɛ mɛom̀pùmɛ̀.
\q1 Bɛ pitɛ yɛɛ̀ dɛu kudɔnkù kpɛri dòmmɛ̀.
\q1 Kudɔnkù í diɛ̀ mmɛ̀ɛ̀ botí bɛcíríbɛ̀,
\q1 bɛ̀ í mɛ ndiɛ̀ ntikpɑ̀tì.
\q1 Bɛ̀ pɔ̀ntì yɛhɛkɛ̀ yɛmɔu ndi, kɛ bɑɑrí ibotí imɔu.
\s1 Mɛyɛi mmɛ̀nùmmù
\q1
\v 6 Dɛ kó yɛhɛkɛ̀ kɔbɛ bɛɛ̀ yóó wɛ̃nnɛ́,
\q1 kɛ́nnɑ́ɑ́ mBɑbidɔnni kɔbɛ kpɛ́í nyɛnɑ́ɑǹhɑ̃ntíyɛ̀ kɛ bɛ̀ dɑú kɛ tú:
\q1 Di bo yɑ̀ díndi bɛ̀ɛ̀ fèkù bɛtɔbɛ̀ kpɛrɛ!
\q1 Dɛ̀ yó nkɑ̃́ɑ̃́kɛ́ dɛ kɛ̀ di yóu di bo mpĩĩmmɛ̀ bɛnìtìbɛ̀,
\q1 nɛ̀ muwɛ̃rímú kɛ̀ bɛ̀ di yietì kɛ dò mbɛ̀ di mɔkɛnɛ̀ yɛbɑ̀ɑ̀?
\q1
\v 7 Di di bɛ̀ɛ̀ kpɛrɛ bɛ̀ itinímu di kpɛ́í.
\q1 Bɛ̀ yóó wɛ̃ɛ̃tɛnímu di kpɛ́í,
\q1 kɛ́ di do kɛ́fekɛ di kpɛrɛ múnkɛ.
\q1
\v 8 Di fèkɛmɛ̀ ibotí pɛ́u kpɛrɛ mɛɛ̀ botí nku
\q1 ibotí tɛì yóó fekɛmɛ̀ di kpɛrɛ,
\q1 Di còú mmɛ̀ɛ̀ nitiyĩ̀ĩ̀ nkpɛ́í,
\q1 nnɛ̀ di yonku dɛumɛ̀ kutenkù,
\q1 kɛ̀ di fɛ̃́ũnko bɛnìtìbɛ̀.
\b
\q1
\v 9 Di bo yɑ̀! Díndi bɛ̀ɛ̀ cií mbɛtɔbɛ̀,
\q1 kɛ yo mbɛ kpɛrɛ,
\q1 kɛ̀ di yɛ̀mmɛ̀ dò ndi bo ceé ndi yĩ́ɛ̃̀ntì,
\q1 kɛĩ́nkɛ̀ kɛ́yentɛ́nɛ̀ mɛyɛi.
\q1
\v 10 Di nɛ́ í yɛ̃́ kɛ dò ndi tɑnnɛ́ dimɑ́ɑ̀ ndi ifɛi,
\q1 di kùɔ kùù nitisṹkù, di kùɔ dimɑ́ɑ̀ ndi.
\q1
\v 11 Di cɛ̃́ĩ kó imɑrí yóó nɑ́kɛ́mu di kpɛ́í nkɛ̀ ticɑ́dɔɔti di bekɛ́nɛ̀.
\b
\q1
\v 12 Di bo yɑ̀! Díndi bɛ̀ɛ̀ mɑɑ́nɛ̀ mɛnitiyĩ̀ĩ̀ ndi ɛì,
\q1 di bo yɑ̀ díndi bɛ̀ɛ̀ kùɔ bɛnìtìbɛ̀ kɛ pũ̀ṹtɛ́nɛ̀ di ɛidiɛ̀.
\q1
\v 13 Di nyɛ̃́ kɛ dò mbɛnìtìbɛ̀ fɛ̃́ũ̀rì dɛ̀ɛ̀ kpɛ́í ndɛ̀ yóó cɔ́útɛ́mu
\q1 bɛ̀ fɛ̃́ũ̀rì dɛtetìrɛ̀ ndɛ.
\q1 Mí nKuyie Mpɑkɛdɑɑ míì tì bɛ́i.
\q1
\v 14 Mɛniɛ mpíɛ́kɛ́ mɛ̀ɛ̀ botí dɑ̀mɛ́ɛ̀rì,
\q1 kutenkù kumɔu kɔbɛ yóó mɛ mbɑntɛ́ ti Yiɛ̀ nKuyie nkó mɛsɑ̀ɑ̀
\q1 nnɛ̀ ku kó tikpetì.
\b
\q1
\v 15 Di bo yɑ̀ díndi bɛ̀ɛ̀ nììnko di kɔbɛ mɛnɑɑ̀,
\q1 kɛ bɛ̀ diinko dinɑɑdoò
\q1 kɛ̀ bɛ̀ bo muɔ́ nkɛ̀ dí nwéí bɛ fɛi,
\q1 yɑ̃̀nɛ̀ mɛ di mɔ́mmɔmbɛ.
\q1
\v 16 Dɛ̀ tu di kó ifɛi nyi, dɛ̀ í tú disɑ̃nni.
\q1 Dɛ̀ tùɔ̀kɛ di bo yɑ̃̀ dɛ̀ndɛ Kuyie mmiɛkɛ kó fɛbòòfɛ̀,
\q1 kɛ́muɔ́ nkɛ́fei ndi fɛi,
\q1 ti Yiɛ̀ nKuyie ndi yuo ku miɛkɛ kó fɛbòòfɛ̀ nfɛ.
\q1 Kɛ̀ di bo fɛ̀ yɑ̃̀ kɛ̀ ifɛii dɑ́tínnɛ́ di do mɔkɛ dìì sɑ̃nni.
\q1
\v 17 Di kɔ̃ṹ mɛ̀ɛ̀ botí Dimɑɑ tɑ̃rì tediɛrɛ̀ kɛ dɛ̀ dèè,
\q1 bɛ̀ yóó mɛ ndi deè
\q1 di do kɔù tìì kpɑsĩ̀ntì, di bo tì yɔ̀tɛ.
\q1 Di còú mmɛ̀ɛ̀ nitiyĩ̀ĩ̀, kɛ̀ di yonku dɛutɛ́,
\q1 kɛ̀ di fɛ̃́ũ mbɛnìtìbɛ̀ yɛhɛkɛ̀ miɛkɛ,
\q1 nɛ̀ dɛ kpɛ́í nkɛ bɛ̀ yóó yṹɔ̃́mmɛ̀ di to.
\b
\q1
\v 18 Sitenkɑɑnìi kpɛti tú bɑ?
\q1 Bɛnìtìbɛ̀ bɛɛ̀ sì cɛ̀ú,
\q1 di ɔ̃ɔ̃ yiɛ mmɛ̀ɛ̀ biɛrimɛ̀ kɛ́utɛ́,
\q1 mɛ̀ tu siyɑ́ɑ̀bìsí kpɛrɛ ndɛ.
\q1 Bɑ nte kòo niti ɔ̃ɔ̃ duɔ́ nhomɑ́ɑ̀ o mɔ́mmuɔ nhò dɔ̀ɔ̀ dɛ̀,
\q1 dɛ̀ɛ̀ í nɔ nkɛ nɑ́ɑ́?
\b
\q1
\v 19 Di bo yɑ̀ díndi bɛ̀ɛ̀ ɔ̃ nnɑ́ɑ́ nkudɔú kɛ tú: Entɛ!
\q1 Kɛ nnɑ́ɑ́ nditɑ̃́rì kɛ tú: Ítɛ́!
\q1 Dì mɛ nyí yóó nɑ kɛ́ bɛ́i,
\q1 bɑ́ kɛ̀ di dì dɑ̀ri mɛsɔɔ nnɛ̀ timɑ́tì pɛ́ítì,
\q1 mmufòmmu í bo di miɛkɛ.
\q1
\v 20 Ti Yiɛ̀ nKuyie nkunku mɛ mbo ku cɛ̃sɑ̀ɑ̀tɛ̀ miɛkɛ nkɛ,
\q1 kutenkù kumɔu kɔbɛ yĩ́nɛ̀ kɑ́rɛ́ ku ììkɛ̀.
\c 3
\s1 Abɑkuku sɑutɛnɛ̀ Kuyie nnɛ̀ fɛ̀ɛ̀ yɛ̀nfɛ̀
\q1
\v 1 Kɛ̀ Abɑkukuu dèntɛ̀ fɛyɛ̀nfɛ̀ kɛ́sɑutɛnɛ̀ Kuyie nkɛ dɔ̀:
\q1
\v 2 Ti Yiɛ̀ nKuyie, n kèèmu ɑ do pĩ mmùù tɔ̃mmú,
\q1 kɛ dɑ yɔ̀tɛ.
\q1 Wɛ̃tɛ kɛ́pĩ́ ndɛ kó mutɔ̃mmú ti kó yɛwe yiɛ mmiɛkɛ.
\q1 Dɔɔ̀ mu kɛ̀ ti yɑ̀.
\q1 A miɛkɛ mɛ nti pɛikɛmɛ̀ ɑ nɑɑtimu,
\q1 ɑ nɛ́ ti kuɔ́ mmɛsémmɛ̀.
\b
\q1
\v 3 Kuyie nyìtɛ́nímu Edɔmmu tempɛ̃, Temɑɑ ɛì,
\q1 kù ìtɛ́nímu Pɑnɑɑ tɑ̃rì ĩ́nkɛ̀,
\q1 kɛ̀ kuwenniku píɛ nkɛĩ́nkɛ̀ nɛ̀ kɛtenkɛ̀,
\q1 kɛ te kɛ̀ bɛ̀ kù sɑ̃ntí.
\q1
\v 4 Kù kèrínímu kɛ pĩnti di wennɛ́cɑ̀nnì kɔ̃mɛ,
\q1 kɛ̀ diyiè kpɛ̀rìmɛ̀ yìɛ̀ní ku nɔu miɛkɛ,
\q1 ku kpetì sɔ̀ri ku nɔu miɛkɛ nkɛ.
\q1
\v 5 Kuù niinní mutenkṹṹ,
\q1 kɛ kérí kɛ̀ mumɔmmú kù tũ.
\q1
\v 6 Kɛ̀ kù còḿmú dɛ̀ kɛtenkɛ̀ɛ ɑɑ́,
\q1 kɛ̀ kù wèńtɛ́, yɛbotɛ̀ yɛ̀ɛ kpeutɛ,
\q1 yɛtɑ̃rɛ̀ yɛ̀ɛ̀ do bo nɛ̀ dimɔ̀nnì kɛ̀ yɛ̀ pùɔ̀.
\q1 Kɛ̀ sitɑ̃ɑ̃́ sìì do bo nɛ̀ dimɔ̀nnì kɛ̀ sì yɑú,
\q1 kù do dɛ nkeri nɛ̀ dimɔ̀nnì.
\q1
\v 7 Kɛ̀ n yɑ̀ Kusɑ̃ɑ̃ ɛì kɔbɛ kɔ̃m̀bùɔ̀tì domɛ̀ bɛ touti miɛkɛ,
\q1 kɛ yɑ̀ kufɔ̃wɑɑ́ nhɑutɛ́mɛ̀ Mɑndiyɑ̃ɑ̃ ɛì kɔbɛ.
\b
\q1
\v 8 Ti Yiɛ̀ nKuyie mmiɛkɛ pɛikɛ ikó ndiɛyì nyiɑ̀?
\q1 Ikó nyi ɑ miɛkɛ cɔ́ú mmɑ̀ɑ̀?
\q1 Yɑ́ɑ̀ dɑ̀mɛ́ɛ̀rì nwe ɑ miɛkɛ pɛikɛmɛ̀?
\q1 Kɑ̀ɑ dèkɛ sikpɑ̀rìnɑɑsɛ̃ĩ́ òmɔù í yóó nɑ sì?
\q1
\v 9 Kuyie nhɑ fĩnnɛ́mu ɑ tɑ̃mmù,
\q1 kɑ̀ɑ pie ntu yɛnɔ̀ ɑ ti dɔúnnɛ̀ yɛ̀.
\q1 Kuyie, fɔ̃́ɔ̃̀ dɑmmù kɛtenkɛ̀
\q1 kɛ̀ mɛniɛ nyiɛ̀ní kɛ̀ dɛ̀ nɑɑ́ nyikó.
\q1
\v 10 Kuyie nyɛtɑ̃rɛ̀ dɑ yɑ̀ kɛ sɑ̃̀ntɛ̀mu,
\q1 kɛ̀ mɛniɛ ncòúní, kɛ̀ dɑ̀mɛ́ɛ̀rì ùùti,
\q1 kɛ̀ yɛnɛ́fĩ̀nfĩ̀rɛ̀ dèkù kɛĩ́nkɛ̀.
\q1
\v 11 A pie nnɛ̀ ɑ kpɑ̃nnì dɛ kó mɛkpɛ̀rìmɛ̀ nɛ̀ dɛ kó fɛpíɛ̀fɛ̀
\q1 dɛɛ̀ còńnɛ́ diyiè nɛ̀ otɑ̃̀nkù.
\q1
\v 12 Nɛ̀ kɛmiɛkɛ nkɛ ɑ ceǹtìmɛ̀ kɛtenkɛ̀,
\q1 nɛ̀ kumiɛpíɛ́ nku ɑ nɑùmɛ̀ yɛbotɛ̀.
\q1
\v 13 Kuyie nhɑ còḿmú kɛ bo dɛɛtɛ́ ɑ nìtìbɛ̀ mbɛ,
\q1 nɛ̀ ɑ kóò kpɑ̀ɑ̀tì ɑ tɑ̃ɑ̃tɛ́ wè.
\q1 A pɔ̀ntɛmu oyɛiwe cĩ́ɛ̃̀tɛ̀ kɛ feínko dipũũ.
\q1
\v 14 Ti dootitɔbɛ̀ pie nyi ɑ fìètɛmɛ̀
\q1 kɛ dùùtɛnɛ̀ bɛ kóo kpɑ̀ɑ̀tì yuu.
\q1 Bɛ̀ do uríní kuyɑɑkù kɔ̃mɛ mmɛ kɛ íútí,
\q1 kɛ bo ti do tínti bɛsénnìbɛ̀.
\q1 Dicìrícìrì ɔ̃ɔ̃ pĩ́mmɛ̀ kɛ́tɑnnɛ̀ di dènkù.
\q1
\v 15 Dɑ̀mɛ́ɛ̀rì nɛ̀ o kó yɛnɛ́fĩ̀nfĩ̀rɛ̀
\q1 dɛ kó kunɔɔ̀roo miɛkɛ nkɛ ɑ keutɛ́mɛ̀ kucɛ,
\q1 kɑ̀ɑ sɛ̃ĩ́ kètɛ́.
\b
\q1
\v 16 N dɛ nkèè kɛ̀ n kɔ̃m̀bùɔ̀tì do,
\q1 kɛ̀ n kɔ̃̀ntì ɑɑ́ kɛ̀ m bìɛ̀ nkpeutɛ,
\q1 n nɛ́ bɑɑ̀mu ti dootitɔbɛ̀ bo tuɔ̀kɛnímɛ̀ kɛ́ ti do.
\q1
\v 17 Fìkíè kó dɛtie ntɛ̃́nkɛ í pori,
\q1 fínyĩ̀ kpɛrɛ mɛ ntɛ̃́nkɛ í cɑ́ɑ́tí mùmɑmù,
\q1 dɛpɑɑ mmɛ ntɛ̃́nkɛ í pɛí,
\q1 fɛpìèfè tɛ̃́nkɛ í kpɑɑ́ dipedie miɛkɛ,
\q1 fɛnɑ̀ɑ̀fɛ̀ mɛ ntɛ̃́nkɛ í kɛ́rímú dinɑɑbɑɑkɛ̀rì.
\b
\q1
\v 18 Mí nyie dɛ̀ n nɑɑtimu ti Yiɛ̀ nKuyie nkpɛ́í,
\q1 kɛ̀ n yɑ̃̀nku, kuù n dɛɛrí,
\q1
\v 19 Ti Yiɛ̀ nKuyie nkuù tu n kó muwɛ̃rímú,
\q1 kuù kpénkùnko n tɑ̀ɑ̀kɛ tɛyúɔ́tɛ̀ kpɛyi kɔ̃mɛ,
\q1 kɛ̀ n dèètì ditennì kuù ɔ̃ mpĩ́ n tɑ̀ɑ̀kɛ.
\b
\m Bɛ̀ do ɔ̃ ndiè ndɛ kó fɛ̀yɛ̀nfɛ̀ kɛ biennɛ̀ kukùtìdùkù nku.