\id EZR di15.all Novembre 1998 BJ Parakou B{enin
\ide UTF-8
\h Ɛsitadasi
\toc1 Ɛsitɑdɑsi
\toc2 ƐSITADASI
\mt1 Ɛsitɑdɑsi
\imt1 Di mpɑ́tíri tɔ tìì nɑ́ɑǹtì
\ip Ɛsitɑdɑsi nɛ̀ Nɛemii dɛ kó yɛpɑ́tɛ yɛdɛ́ ti nɑ́ɑ́ nSifubɛ bɛ̀ do pĩ̀ḿmú bɛ̀ kɛ́kònnɛ̀ Bɑbidɔnni kɛ̀ bɛ̀ɛ konní bɛ ɛì Sedisɑdɛmmu, bɛ kó tinɑ́ɑǹtì nti.
\ip Tìì wɑ̃̀ri dɛ kó yɛpɑ́tɛ yɛdɛ́ yɛ miɛkɛ tìì dɔ̀ɔ̀ tìnti yɛbie ntɛkɔ̀ùtɛ̀ miɛkɛ. Ɛsitɑdɑsi kó dipɑ́tíri ti nɑ́ɑ́ mPɛrɛsi tenkɛ̀ kóo kpɑ̀ɑ̀tì Siduusi pɑ̃mɛ̀ mmɛ kucɛ mɛketimɛ̀ Sifubɛ kɛ̀ bɛ̀ konní Sedisɑdɛmmu. Bɛ̀ do konní kɛ́ketɛ́ kɛ́mɑɑ́ diwũɔ̃tɔ̀nnì ndi bɛ̀ do feu dɛ̀ iwũɔ̃ Kuyie, dɛ kó difɔ̃nkúò yɛbie mmɑyɛ̀ kɛ̀ bɛ̀ɛ mɑɑ́ Kuyie ncĩ́ɛ̃̀tɛ̀ Dɑdiyuusi tu dìì mɔ̀nnì okpɑ̀ɑ̀tì (5:1-2). Asee nɛ̀ Sɑkɑrii bɛ̀ tu dìì mɔ̀nnì ndi Kuyie mpɑ̃ɑ̃nɑ́ɑǹtì nɑ́ɑm̀bɛ̀. Kɛ̀ dɛndɛɛ pɛ̃ɛ̃tɛ́ kɛ̀ Pɛrɛsi tenkɛ̀ kóo kpɑ̀ɑ̀tì Aditɑkisɛsii tɔ̃ Ɛsitɑdɑsi wèè do tú ikuɔ́ nìùtì nɛ̀ i wɑ̃ɑ̃̀tì Sedisɑdɛmmu, kòo yɑ́úkùnnɛ bɛnìtìbɛ̀ kɔ̃̀ntì Kuyie mbɑ́ɑ́mmù bíɛ́kɛ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Okpɑ̀ɑ̀tì duɔ́mmɛ̀ dinùù Sifubɛ kɛ̀ bɛ̀ bo kò nkɛ́mɑɑ́ Kuyie ncĩ́ɛ̃̀tɛ̀ 1
\io1 2. Sifubɛ bɛ̀ɛ̀ kò nKuyie ncĩ́ɛ̃̀tɛ̀ kó mumɑrimù 2
\io1 3. Bɛ̀ íimmɛ̀ Kuyie mbɑ́ɑ́mmù 3
\io1 4. Bɛ dootitɔbɛ̀ kó tinɑ́ɑǹtì kɛ́ntɔ kɛ́tuɔkɛnɛ̀ bɛ̀ bɑɑ́mmɛ̀ diyentɛ́bɑnni 4-6
\io1 5. Ɛsitɑdɑsi pĩ mmùù tɔ̃mmú 7-10
\c 1
\s1 Okpɑ̀ɑ̀tì Siduusi duɔ́mmɛ̀ dinùù kɛ̀ Sifubɛ bo kò nkɛ́mɑɑ́ Kuyie ncĩ́ɛ̃̀tɛ̀
\p
\v 1 Pɛrɛsi tenkɛ̀ kóo kpɑ̀ɑ̀tì Siduusi kpɑ̀tì benni ketirì miɛkɛ kɛ̀ ti Yiɛ̀ nKuyie nní ndɔ́ kɛ́dɔɔ̀ kù do nɑ̀kɛ́ tì ku pɑ̃ɑ̃nɑ́ɑǹtì nɑ́ɑǹtò Sedemii kòò tì wɑ̃̀ri. Mɛm̀mɛ ti Yiɛ̀ nKuyie mbɛnkɛmɛ̀ okpɑ̀ɑ̀tì Siduusi ò dò nkɛ́dɔɔ̀ tì kòo tì wɑ̃̀ri, kɛ́pĩɛ̃kɛ́ kɛ dɔ̀: 
\v 2 Ti Yiɛ̀ nKuyie nkùù bo kɛĩ́nkɛ̀ kuù n duɔ́ nyɛkpɑ̀ɑ̀tìyɔ yɛmɔu kutenkù kɛ̀ n yɛ̀ bɑkɛ́. Kuù n nɑ̀kɛ́ kɛ tú n kù mɑɑ́ tɛcĩ́ɛ̃̀tɛ̀ Sedisɑdɛmmu Sudɑɑ tenkɛ̀ miɛkɛ. 
\v 3 Díndi bɛ̀ɛ̀ kó dimɑ̀ɑ̀ tu ku kɔbɛ kù ndi bonɛ̀ kɛ̀ di kɔtɛ Sedisɑdɛmmu Sudɑɑ tenkɛ̀ kɛ́ kù mɑɑ́ tɛcĩ́ɛ̃̀tɛ̀. Kuyie nyIsidɑyɛɛribɛ tũ nkù bo Sedisɑdɛmmu nwe. 
\v 4 Isidɑyɛɛribɛ bo yɛ̀ɛ̀ kɑ̀rɛ̀ kɔbɛɛ yíɛ́ timɑ́tì pɛ́ítì nɛ̀ mɛsɔɔ nɛ̀ tinɛntì nɛ̀ iwũɔ̃ kɛ́ bɛ̀ pɑ̃nɛ̀ yɛpɑ̃rɛ̀ bɛ yɛ̀mmɛ̀ kpɛyɛ ti Yiɛ̀ nKuyie ncĩ́ɛ̃̀tɛ̀ mɑrimù kpɛ́í nSedisɑdɛmmu.
\p
\v 5 Mɛm̀mɛ Sudɑɑ wuɔ nkɔbɛ kó bɛkótíbɛ̀ nɛ̀ Bɛnsɑmɛɛ kɔbɛ nɛ̀ ikuɔ́ nìùbɛ̀ nɛ̀ Defiibɛ Kuyie nnɑmpɛ bɛ̀ɛ kó mɛyɛ̀mmɛ̀ kɛ̀ bɛ̀ɛ ítɛ́ kɛ́bɑ́ɑ́tí kɛ bo kò nSedisɑdɛmmu kɛ́mɑɑ́ ti Yiɛ̀ nKuyie ncĩ́ɛ̃̀tɛ̀. 
\v 6 Kɛ̀ bɛ pɛɛtitɔbɛ̀ɛ bɛ̀ teennɛ̀ mɛsɑ̀ɑ̀ nkɛ́ bɛ̀ pɑ̃mmú timɑ́tì pɛ́ítì nɛ̀ mɛsɔɔ nnɛ̀ tinɛntì nɛ̀ iwũɔ̃ nɛ̀ tinɛntì tɛtì tìì donku yóù, bɛ̀ í nkɑ̀ɑnnɛ̀ ketíkɛ bɛ̀ɛ̀ dɔ́ kɛ́pɑ̃ nɛ̀ bɛ yɛ̀mmɛ̀ bɛ kó yɛpɑ̃rɛ̀.
\p
\v 7 Dɛ kó difɔ̃nkúò kòo kpɑ̀ɑ̀tì Siduusii duɔ́ nkɛ̀ bɛ̀ɛ dennɛní ti Yiɛ̀ nKuyie ncĩ́ɛ̃̀tɛ̀ kó tinɛntì okpɑ̀ɑ̀tì Nɛbukɑnnɛsɑɑ do tùótɛ́ tì kɛ́tɑnnɛ́ o bɔɔ̀cĩ́ɛ̃̀tɛ̀. 
\v 8 Kòo duɔ́ nkɛ̀ odítísɔnniwè Mitidedɑti tì dènnɛní kɛ́kɑɑ nkɛ́ tì duɔ́ nSudɑɑ kɔbɛ kóo kpɑ̀ɑ̀tì Sebɑsɑɑ. 
\v 9 Ntɛ bɛ̀ do kɑ̀ɑ ndɛ kó tinɛntì kɛ̀ tì mmɑ̀mɛ̀: Mɛsɔɔ nyɛbɔ sipísìtɑ̃ɑ̃ti, timɑ́tì pɛ́ítì yɛbɔ tɛkɔupíítɛ̀ (1000), yɛse sipísìdɛ́ nɛ̀ yɛ̀wɛi. 
\v 10 Isɔɔbòòkɛ sipísìtɑ̃ɑ̃ti, timɑ́tì pɛ́ítì ibòòkɛ isɑ̀ɑ̀yì tɛkɔupíítɛ̀ (1000), itɛì ìì kó kuwenniku í ì mɑ̀nnɛ̀ sikɔusìnɑ̀ɑ̀ nɛ̀ tɛpíítɛ̀ (410) nɛ̀ titɛtì tɛkɔupíítɛ̀ (1000). 
\v 11 Kɛ̀ bɛ̀ɛ tì bɑ̀tɛ tisɔɔnɛntì nɛ̀ timɑ́tì pɛ́ítì kpɛti kɛ̀ tì ḿbo sikɔupísìnùmmù nɛ̀ sikɔusìnɑ̀ɑ̀ (5400), kɛ̀ Sebɑsɑɑ ndɛ̀ tɔ dɛmɔu bɛ̀ iti dìì mɔ̀nnì kɛ kũnti Sedisɑdɛmmu.
\c 2
\s1 Sifubɛ bɛ̀ɛ̀ do kò nSedisɑdɛmmu bɛ̀ do mɑmɛ̀
\p
\v 1 Ntɛ Isidɑyɛɛribɛ do ìtɛ́ Bɑbidɔnni okpɑ̀ɑ̀tì Nɛbukɑnnɛsɑɑ do pĩ̀ḿmú bɛ̀ kɛ̀ bɛ̀ ntú tidɑɑtì o ciɛ, kɛ́ítɛ́ kɛ́konní Sedisɑdɛmmu Sudɑɑ tenkɛ̀ bɑ́ wè kòo kɑri o ɛì. 
\v 2 Ntɛ bɛ̀ɛ̀ do bɛ̀ ni bɛ yètɛ̀: Sodobɑbɛɛdi nɛ̀ Sosuwee nɛ̀ Nɛemii nɛ̀ Sedɑyɑɑ nɛ̀ Ededɑyɑɑ nɛ̀ Mɑɑdosee nɛ̀ Bidisɑnni nɛ̀ Misipɑɑdi nɛ̀ Bikibɑii nɛ̀ Deummu nɛ̀ Bɑɑnɑ.
\m Bɛɛ̀ nɑɑ̀mùntì tu tii:
\m
\v 3 Pɑdosi kó kunɑɑ̀mùnkù kɔbɛ do bo sikɔupísìdɛ́ nɛ̀ tɛkɔ̀ùtɛ̀ nɛ̀ sipísìyiekɛ̀ nɛ̀ bɛ̀dɛ́bɛ̀ mbɛ (2172).
\m
\v 4 Kɛ̀ Sefɑtiɑ nɑɑ̀mùnkù ḿbo sikɔusìtɑ̃ɑ̃ti nɛ̀ sipísìyiekɛ̀ nɛ̀ bɛ̀dɛ́bɛ̀ (372).
\m
\v 5 Kɛ̀ Adɑɑ nɑɑ̀mùnkù kɔbɛ ḿbo sikɔusìyiekɛ̀ nɛ̀ sipísìyiekɛ̀ nɛ̀ bɛ̀nùmmù (775).
\m
\v 6 Kɛ̀ Pɑsɑti-Mɔɑbu nɑɑ̀mùnkù kɔbɛ ḿbo sikɔupísìdɛ́ nɛ̀ sikɔusìni nɛ̀ tɛpíítɛ̀ nɛ̀ bɛ̀dɛ́bɛ̀ (2812), Sosuwee nɛ̀ Soɑbu bɛ yɑɑ̀bí nyi.
\m
\v 7 Kɛ̀ Edɑmmu nɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìdɛ́ nɛ̀ bɛ̀nɑ̀ɑ̀ (1254).
\m
\v 8 Kɛ̀ Sɑtuu nɑɑ̀mùnkù kɔbɛ ḿbo sikɔusìwɛi nɛ̀ sipísìnɑ̀ɑ̀ nɛ̀ bɛ̀nùmmù (945).
\m
\v 9 Kɛ̀ Sɑkɑii nɑɑ̀mùnkù kɔbɛ ḿbo sikɔusìyiekɛ̀ nɛ̀ sipísìkuɔ̀ (760).
\m
\v 10 Kɛ̀ Bɑni nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìnɑ̀ɑ̀ nɛ̀ bɛ̀dɛ́bɛ̀ (642).
\m
\v 11 Kɛ̀ Bɛbɑii nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìdɛ́ nɛ̀ bɛ̀tɑ̃ɑ̃ti (623).
\m
\v 12 Kɛ̀ Asikɑdi nɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìdɛ́ nɛ̀ sipísìdɛ́ nɛ̀ bɛ̀dɛ́bɛ̀ (1222).
\m
\v 13 Kɛ̀ Adonnikɑmmu nɑɑ̀mùnkù kɔbɛ ḿbo sikɔusìkuɔ̀ nɛ̀ sipísìkuɔ̀ nɛ̀ bɛ̀kuɔ̀ (666).
\m
\v 14 Kɛ̀ Bikibɑii nɑɑ̀mùnkù kɔbɛ ḿbo sikɔupísìdɛ́ nɛ̀ sipísìnùmmù nɛ̀ bɛ̀kuɔ̀ (256).
\m
\v 15 Kɛ̀ Adinni nɑɑ̀mùnkù kɔbɛ ḿbo sikɔusìnɑ̀ɑ̀ nɛ̀ sipísìnùmmù nɛ̀ bɛ̀nɑ̀ɑ̀ (454).
\m
\v 16 Kɛ̀ Atɛɛ nɑɑ̀mùnkù kɔbɛ Esekiɑsi yɑɑ̀bí ḿbo sipísìwɛi nɛ̀ bɛ̀ni.
\m
\v 17 Kɛ̀ Besɑii nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìdɛ́ nɛ̀ bɛ̀tɑ̃ɑ̃ti (323).
\m
\v 18 Kɛ̀ Yodɑ nɑɑ̀mùnkù kɔbɛ ḿbo tɛkɔ̀ùtɛ̀ nɛ̀ tɛpíítɛ̀ nɛ̀ bɛ̀dɛ́bɛ̀ (112).
\m
\v 19 Kɛ̀ Asummu nɑɑ̀mùnkù kɔbɛ ḿbo sikɔusìdɛ́ nɛ̀ sipísìdɛ́ nɛ̀ bɛ̀tɑ̃ɑ̃ti (223).
\m
\v 20 Kɛ̀ Kibɑɑ nɑɑ̀mùnkù kɔbɛ ḿbo sipísìwɛi nɛ̀ bɛ̀nùmmù.
\m
\v 21 Kɛ̀ Bɛtideɛmmu kó tɛhɛitɛ̀ kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀tɑ̃ɑ̃ti (123).
\m
\v 22 Kɛ̀ Nɛtofɑɑ kó tɛhɛitɛ̀ kɔbɛ ḿbo sipísìnùmmù nɛ̀ bɛ̀kuɔ̀.
\m
\v 23 Kɛ̀ Anɑtɔti kó tɛhɛitɛ̀ kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀ni (128).
\m
\v 24 Kɛ̀ Asimɑfɛti kó tɛhɛitɛ̀ kɔbɛ ḿbo sipísìnɑ̀ɑ̀ nɛ̀ bɛ̀dɛ́bɛ̀.
\m
\v 25 Kɛ̀ Kidiɑti-Yeɑdimmu nɛ̀ Kefidɑɑ nɛ̀ Bedɔti dɛ kó yɛhɛkɛ̀ kɔbɛ ḿbo sikɔusìyiekɛ̀ nɛ̀ sipísìnɑ̀ɑ̀ nɛ̀ bɛ̀tɑ̃ɑ̃ti (743).
\m
\v 26 Dɑmɑɑ nɛ̀ Kebɑɑ kɛ̀ dɛ kó yɛhɛkɛ̀ kɔbɛ ḿbo sikɔusìkuɔ̀ nɛ̀ sipísìdɛ́ nɛ̀ òmɑ́ɑ̀ (621).
\m
\v 27 Kɛ̀ Mikimɑsi ɛì kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀dɛ́bɛ̀ (122).
\m
\v 28 Betɛɛdi nɛ̀ Aii kɛ̀ dɛ kó yɛhɛkɛ̀ kɔbɛ ḿbo sikɔusìdɛ́ nɛ̀ sipísìdɛ́ nɛ̀ bɛ̀tɑ̃ɑ̃ti (223).
\m
\v 29 Kɛ̀ Nɛbo kó tɛhɛitɛ̀ kɔbɛ ḿbo sipísìnùmmù nɛ̀ bɛ̀dɛ́bɛ̀.
\m
\v 30 Kɛ̀ Mɑkibisi ɛì kɔbɛ ḿbo tɛkɔ̀ùtɛ̀ nɛ̀ sipísìnùmmù nɛ̀ bɛ̀kuɔ̀ (156).
\m
\v 31 Kɛ̀ Edɑmmu tɔù kó kunɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìdɛ́ nɛ̀ sipísìnùmmù nɛ̀ bɛ̀nɑ̀ɑ̀ (1254).
\m
\v 32 Kɛ̀ Adimmu nɑɑ̀mùnkù kɔbɛ ḿbo sikɔusìtɑ̃ɑ̃ti nɛ̀ sipísìdɛ́ (320).
\m
\v 33 Dɔdi ɛì nɛ̀ Adidi nɛ̀ Onɔɔ kɛ̀ dɛ kɔbɛ ḿbo sikɔusìyiekɛ̀ nɛ̀ sipísìdɛ́ nɛ̀ bɛ̀nùmmù (725).
\m
\v 34 Kɛ̀ Sedikoo ɛì kɔbɛ ḿbo sikɔusìtɑ̃ɑ̃ti nɛ̀ sipísìnɑ̀ɑ̀ nɛ̀ bɛ̀nùmmù (345).
\m
\v 35 Kɛ̀ Sennɑɑ ɛì kɔbɛ ḿbo sikɔupísìtɑ̃ɑ̃ti nɛ̀ sikɔusìkuɔ̀ nɛ̀ sipísìtɑ̃ɑ̃ti (3630).
\b
\m
\v 36 Kɛ̀ ikuɔ́ nìùbɛ̀ Yedɑyɑ nɑɑ̀mùnkù kɔbɛ Sosuwee yɑɑ̀bí ḿbo sikɔusìwɛi nɛ̀ sipísìyiekɛ̀ nɛ̀ bɛ̀tɑ̃ɑ̃ti (973).
\m
\v 37 Kɛ̀ Imɛɛ nɑɑ̀mùnkù kɔbɛ ḿbo tɛkɔupíítɛ̀ nɛ̀ sipísìnùmmù nɛ̀ bɛ̀dɛ́bɛ̀ (1052).
\m
\v 38 Kɛ̀ Pɑsuu nɑɑ̀mùnkù kɔbɛ ḿbo tɛkɔupíítɛ̀ nɛ̀ sikɔusìdɛ́ nɛ̀ sipísìnɑ̀ɑ̀ nɛ̀ bɛ̀yiekɛ̀ (1247).
\m
\v 39 Kɛ̀ Adimmu nɑɑ̀mùnkù kɔbɛ ḿbo tɛkɔupíítɛ̀ nɛ̀ tɛpíítɛ̀ nɛ̀ bɛ̀yiekɛ̀ (1017).
\b
\m
\v 40 Defiibɛ nɛ̀ Sosuwee nɛ̀ Kɑdimiɛdi Odɑfiɑ kɛ̀ bɛ yɑɑ̀bí ḿbo sipísìyiekɛ̀ nɛ̀ bɛ̀nɑ̀ɑ̀.
\b
\m
\v 41 Kɛ̀ Asɑfu nɑɑ̀mùnkù kɔbɛ ḿbo tɛkɔ̀ùtɛ̀ nɛ̀ sipísìdɛ́ nɛ̀ bɛ̀ni (128) bɛɛ̀ do tú bɛdèmbɛ̀ Kuyie ncĩ́ɛ̃̀tɛ̀ miɛkɛ.
\b
\m
\v 42 Sɑdummu nɛ̀ Atɛɛ nɛ̀ Tɑdimɔɔ nɛ̀ Akubu nɛ̀ Atitɑ nɛ̀ Sobɑii bɛɛ̀ kó ibí do tú bɛ̀ɛ̀ bɑ̀ɑ Kuyie ncĩ́ɛ̃̀tɛ̀ kó yɛbòrɛ̀ kɛ̀ bɛ̀ ḿbo tɛkɔ̀ùtɛ̀ nɛ̀ sipísìtɑ̃ɑ̃ti nɛ̀ bɛ̀wɛi (139).
\b
\m
\v 43 Tisisɑ nɛ̀ Asufɑ nɛ̀ Tɑbɑɔti bɛɛ̀ kó tinɑɑ̀mùntì kɔbɛ do pĩ́ mmutɔ̃nyɔɔ̀mmù Kuyie ncĩ́ɛ̃̀tɛ̀ miɛkɛ, 
\v 44 nɛ̀ Kedosi nɛ̀ Siyɑɑ nɛ̀ Pɑdonni bɛ nɑɑ̀mùntì kɔbɛ, 
\v 45 Debɑnnɑɑ nɛ̀ Akɑbɑ nɛ̀ Akubu bɛ nɑɑ̀mùntì kɔbɛ, 
\v 46 Akɑɑbu nɛ̀ Sɑmmudɑii nɛ̀ Annɑni bɛ nɑɑ̀mùntì kɔbɛ, 
\v 47 Kidɛdi nɛ̀ Kɑsɑɑ nɛ̀ Edɑyɑ bɛ nɑɑ̀mùntì kɔbɛ, 
\v 48 Edetisinni nɛ̀ Nɛkodɑ nɛ̀ Kɑsɑmmu bɛ nɑɑ̀mùntì kɔbɛ, 
\v 49 Usɑɑ nɛ̀ Pɑsiyɑɑ nɛ̀ Besɑii bɛ nɑɑ̀mùntì kɔbɛ, 
\v 50 Asinɑ nɛ̀ Mɛunimmu nɛ̀ Nɛfusimmu bɛ nɑɑ̀mùntì kɔbɛ, 
\v 51 Bɑkibuku nɛ̀ Akufɑ nɛ̀ Aduuri bɛ nɑɑ̀mùntì kɔbɛ, 
\v 52 Bɑsiduti nɛ̀ Mɛyidɑ nɛ̀ Adisɑ, 
\v 53 Bɑdikosi nɛ̀ Sisedɑɑ nɛ̀ Tɑmɑsi bɛ nɑɑ̀mùntì kɔbɛ, 
\v 54 Nɛsiɑsi nɛ̀ Atifɑ bɛ nɑɑ̀mùntì kɔbɛ.
\b
\m
\v 55 Sɑdomɔɔ kó bɛtɔ̃mbɛ̀ kó tinɑɑ̀mùntì kɔbɛ do tú: Sotɑii nɛ̀ Sofedɛti nɛ̀ Pedudɑ bɛ nɑɑ̀mùntì kɔbɛ, 
\v 56 Yɑɑdɑ nɛ̀ Dɑdikonni nɛ̀ Kidɛdi bɛ nɑɑ̀mùntì kɔbɛ, 
\v 57 Sefɑtiɑ nɛ̀ Atidi nɛ̀ Pokedɛti-Asebɑimmu nɛ̀ Ami bɛ nɑɑ̀mùntì kɔbɛ.
\b
\m
\v 58 Bɛmɔu kɛ̀ bɛ̀ɛ wɛ̃nnɛ́ kɛ́mbo sikɔusìtɑ̃ɑ̃ti nɛ̀ sipísìwɛi nɛ̀ bɛ̀dɛ́bɛ̀ (392).
\b
\p
\v 59 Bɛ̀ɛ̀ do ìtɛ́ Bɑbidɔnni kɛ́kò nSedisɑdɛmmu kɛ í nnɑ kɛ́nɑ́kɛ́ weti weti kɛ́bɛnkɛ bɛ̀ tumɛ̀ Isidɑyɛɛribɛ. Bɛ̀ɛ̀ do bonní bɛ̀ mbɛ Tɛdi-Mɛdɑɑ nɛ̀ Tɛdi-Adisɑɑ nɛ̀ Kedubu nɛ̀ Adɑnni nɛ̀ Imɛɛ. 
\v 60 Dedɑyɑ nɛ̀ Tobiyɑ nɛ̀ Nɛkodɑ bɛ nɑɑ̀mùntì kɔbɛ mbɛ kɛ̀ bɛ̀ ḿbo sikɔusìkuɔ̀ nɛ̀ sipísìnùmmù nɛ̀ bɛ̀dɛ́bɛ̀ (652).
\b
\p
\v 61 Ikuɔ́ nìùbɛ̀ miɛkɛ kɛ̀ bɛ̀mɑbɛ̀ ḿbo: Obɑyɑɑ nɛ̀ Akikoti nɛ̀ Bɑdisidɑii bɛ nɑɑ̀mùntì kɔbɛ. Bɑdisidɑii do tùótɛ́ onitipòkù mɔù nwe kòò tu Kɑdɑɑdi ɛì kou, kòo túótɛ́ dɛ kó diyètìrì. 
\v 62 Kɛ̀ bɛ̀ɛ wɑmmú o botí kó diyètìrì kɛ́mɔ́ntɛ́, kɛ́ bɛ̀ bɑ̀ɑ ikuɔ́ tɔ̃mmú. 
\v 63 Kɛ̀ kùmɑ̀ndɑ́ɑ̀ bɛ̀ bɑ̀ɑ kɛ dɔ̀ bɛ̀ bɑ́ɑ́ di bɛ̀ pɑ̃ mùù diì Kuyie kɛ́nkémmúnɛ̀ ikuɔ́ nìùtì bo beémmɛ̀ Kuyie nnɛ̀ ikuɔ́ nɛntì bɛ̀ tu tì udimmu nɛ̀ tumimmu.
\b
\p
\v 64 Bɛmɔu kɛ̀ bɛ̀ɛ wɛ̃nnɛ́ kɛ́mbo sikɔupípísìnɑ̀ɑ̀ nɛ̀ sikɔupísìdɛ́ nɛ̀ sikɔusìtɑ̃ɑ̃ti nɛ̀ sipísìkuɔ̀ (42360), 
\v 65 kɛ nɛ́ mbúútí tidɑɑtì nɛ̀ bɛnitipotɔ̃mbɛ̀ kɛ̀ bɛmbɛ ḿbo sikɔupísìyiekɛ̀ nɛ̀ sikɔusìtɑ̃ɑ̃ti nɛ̀ sipísìtɑ̃ɑ̃ti nɛ̀ bɛ̀yiekɛ̀, (7337) kɛ̀ bɛnitidɑdèmbɛ̀ nɛ̀ bɛnitipodèmbɛ̀, kɛ̀ bɛmbɛ ḿbo sikɔusìdɛ́ (200). 
\v 66 Kɛ̀ sisɛ̃ĩ́ ḿbo sikɔusìyiekɛ̀ nɛ̀ sipísìtɑ̃ɑ̃ti nɛ̀ sikuɔ̀ (736), sɑ̃mmɑrímú nɛ̀ sisɛ̃ĩ́ dɛ̀ wɛ̃nnɛ́ kɛ pɛitɛ́ sì kɛ̀ sì ḿbo sikɔusìdɛ́ nɛ̀ sipísìnɑ̀ɑ̀ nɛ̀ sìnùmmù (245). 
\v 67 Kɛ̀ yòyóbɛ̀ ḿbo sikɔusìnɑ̀ɑ̀ nɛ̀ sipísìtɑ̃ɑ̃ti nɛ̀ bɛ̀nùmmù (435) kɛ̀ sɑ̃mmɑrímúbɛ̀ ḿbo sikɔupísìkuɔ̀ nɛ̀ sikɔusìyiekɛ̀ nɛ̀ sipísìdɛ́ (6720).
\p
\v 68 Bɛ̀ tùɔ̀kɛ dìì mɔ̀nnì Sedisɑdɛmmu ti Yiɛ̀ nKuyie ncĩ́ɛ̃̀tɛ̀ kó dihɛì kɛ̀ bɛ cɛ̃́ĩ kó bɛkótíbɛ̀ mɑbɛ̀ɛ pɑ̃mmú bɛ yɛ̀mmɛ̀ kó yɛpɑ̃rɛ̀ kɛ̀ bɛ̀ bo wɛ̃tɛ kɛ́mɑɑ́nɛ̀ Kuyie ncĩ́ɛ̃̀tɛ̀ tɛ fɔ̃̀tìrì. 
\v 69 Kɛ̀ bɛ̀ɛ pɑ̃ bɛ wɛ̃rímú mɑ̀mɛ̀ kɛ̀ dɛ kó yɛpɑ̃rɛ̀ ḿbo yɛsɔɔwèrɛ̀ sikɔupípísìkuɔ̀ nɛ̀ tɛkɔupíítɛ̀ (61000), mɛdítíbii sikɔupísìnùmmù (5000), yɛkɔutɛ́yɑɑ̀bòrɛ̀ tɛkɔ̀ùtɛ̀ (100).
\p
\v 70 Ikuɔ́ nìùbɛ̀ nɛ̀ Defiibɛ nɛ̀ bɛtɔbɛ̀ bɛ̀ɛ̀ tu bɛdèmbɛ̀ nɛ̀ bɛ̀ɛ̀ bɑ̀ɑ Kuyie ncĩ́ɛ̃̀tɛ̀ kó yɛbòrɛ̀ nɛ̀ bɛ̀ɛ̀ tu bɛtɔ̃mbɛ̀ tɛ miɛkɛ, kɛ̀ bɛ̀ɛ kɑri yɛhɛkɛ̀ bɛ̀ bɛ̀ duɔ́ nyɛ̀ kɛ̀ Isidɑyɛɛribɛ sɔmbɛɛ kɑri bɛ ɛkɛ̀ bɛ̀ do te yɛ̀ nɛ̀ dimɔ̀nnì.
\c 3
\s1 Sosuwee nɛ̀ Sodobɑbɛɛdi bɛ̀ wɛ̃̀tɛ kɛ íimmɛ̀ Kuyie mbɑ́ɑ́mmù
\p
\v 1 Dibenni tɑ̃̀nkù yiénwè miɛkɛ kɛ sɔ̃́ nyIsidɑyɛɛribɛ kɑ̀ri bɛ ɛkɛ̀ kɛ dèè. Kɛ̀ bɛ̀ɛ wɛ̃nnɛ́ dinùù dìmɑ́ɑ̀ kɛ́tíí nSedisɑdɛmmu. 
\v 2 Kɛ̀ Yotisɑdɑki birɛ Sosuwee nɛ̀ o tebìí ikuɔ́ nìùbɛ̀ tɔbɛ̀ nɛ̀ Sodobɑbɛɛdi Seditiɛri birɛ nɛ̀ o tebìí kɛ̀ bɛ̀ɛ ítɛ́ kɛ́mɑɑ́ diwũɔ̃tɔ̀nnì Kuyie nyIsidɑyɛɛribɛ tũ nkù kpɛ́í nkɛ bo kù fìé iwũɔ̃ kù do duɔ́ nyìì kuɔ́ ku kóo tɔ̃ntì Mɔyiisi kòo ì wɑ̃̀ri ì yɛ̃ ndɛ̀ ndòmmɛ̀. 
\v 3 Bɑ́ nɛ̀ bɛ̀ do mɛ ndémɛ̀ dihɛì yɛmbɛ̀ kɛ̀ bɛ̀ɛ wɛ̃tɛ kɛ́mɑɑ́ ti Yiɛ̀ nKuyie ndiwũɔ̃tɔ̀nnì dì do bo dìì fɔ̃̀tìrì kɛ́fíé iwũɔ̃, dikṹnweńnì kpɛyi nɛ̀ kuyuoku kpɛyi. 
\v 4 Dɛ kó difɔ̃nkúò kɛ́bɑɑ́ ntitouti kó dibɑnni tì wɑ̃̀ri kɛ yɛ̃mmɛ̀ kɛ́fíé Kuyie nyiwũɔ̃ bɛ̀ do dò nkɛ́ ì fìémɛ̀, dibɑnni kó yɛwe miɛkɛ bɑ́ dìì yiè nɛ̀ di kó iwũɔ̃ ì dò nkɛ́mmɑ̀mɛ̀, 
\v 5 kɛ́fíé bɛ̀ ɔ̃ɔ̃ fíé ì bɑ́ dìì yiè kɛ́tuɔ, kɛ́fíénɛ̀ otɑ̃̀nkù pɑ̀nwè kó dibɑnni kpɛyi nɛ̀ ti Yiɛ̀ nKuyie nkó yɛbɑɑ ntɛyɛ̀ kpɛyi. Kɛ nɛ́ mbúútí bɛ yɛ̀mmɛ̀ kó yɛpɑ̃rɛ̀ bɛ̀ do kù pɑ̃mmú yɛ̀. 
\v 6 Otɑ̃̀nkù yiénwè kó diyiè ketirì kɛ̀ bɛ̀ɛ ketɛ́ bɛ̀ bo nfeumɛ̀ ti Yiɛ̀ nKuyie nyiwũɔ̃ kɛ tuɔ̀ mbɑ́ bɛ̀ mu nyí dɔú ti Yiɛ̀ nKuyie ncĩ́ɛ̃̀tɛ̀ kó dipũũ.
\b
\p
\v 7 Kɛ̀ bɛ̀ɛ yietí idíítí bɛtɑ̃́cíɛ̀bɛ̀ nɛ̀ bɛdɑyɑɑ̀bɛ̀, kɛ́duɔ́ ntidiitì nɛ̀ mɛnɑɑ̀ nnɛ̀ mɛkùɔ̀ nSitɔ̃ɔ̃ nɛ̀ Tiiri ɛì kɔbɛ kɛ̀ bɛ̀ bo kɔtɛ Dimɑɑ kɛ́wɑɑ́ ndɛtekperɛ̀ kó idɛí kɛ́ dɛ̀ tɑnnɛ́ní dɑ̀mɛ́ɛ̀rì, kɛ̀ dɛ̀ɛ cútɛ́ Sɑfɑɑ ɛì. Pɛrɛsi kóo kpɑ̀ɑ̀tì Siduusi weè do bɛ̀ duɔ́ ndinùù kɛ̀ bɛ̀ɛ mɛ̀ dɔ̀ɔ̀. 
\v 8 Dibenni dɛ́rínnì do ndi nɛ̀ bɛ̀ tùɔ̀kɛmɛ̀ Sedisɑdɛmmu Kuyie ncĩ́ɛ̃̀tɛ̀ borɛ̀ otɑ̃̀nkù odɛ́rì miɛkɛ. Kɛ̀ Sedobɑbɛɛdi Seditiɛri birɛ nɛ̀ Sosuwee Yotisɑdɑki birɛ nɛ̀ bɛ tebìí nɛ̀ ikuɔ́ nìùbɛ̀ nɛ̀ Defiibɛ nɛ̀ Isidɑyɛɛribɛ sɔmbɛ bɛ̀ɛ̀ do konní Sedisɑdɛmmu, kɛ̀ bɛ̀ɛ ketɛ́ mutɔ̃mmú. Bɛ̀ do tɑ̃ɑ̃tɛ́ Defiibɛ miɛkɛ nkɛ bɛdɑpɑ̀mbɛ̀ bɛ̀ɛ̀ mɔ̀kɛ yɛbie nsipísìdɛ́ sìdɛ́ kɛ́ntɔ kɛ deètìnko, kɛ̀ bɛ̀ nni ti Yiɛ̀ nKuyie ncĩ́ɛ̃̀tɛ̀ kó mutɔ̃mmú. 
\v 9 Mɛm̀mɛ Sosuwee nɛ̀ o bí nɛ̀ o tebìí Kɑdimiɛdi nɛ̀ o bí nɛ̀ Odɑyɑ kó ibí, kɛ̀ bɛ̀ɛ wɛ̃nnɛ́ dinùù dìmɑ́ɑ̀ kɛ́nni Kuyie ncĩ́ɛ̃̀tɛ̀ kó bɛtɔ̃mbɛ̀ kɛ̀ Enɑdɑdi nɑɑ̀mùnkù kɔbɛ Defiibɛ mbɛ̀ teénnɛ̀.
\p
\v 10 Bɛmɑribɛ̀ dɔú ndìì mɔ̀nnì ti Yiɛ̀ nKuyie ncĩ́ɛ̃̀tɛ̀ kó dipũũ kɛ̀ ikuɔ́ nìùbɛ̀ɛ dɑ́ɑ́tí ikuɔ́ yɑ̀ɑ̀tì kɛ́nheu siheú, kɛ̀ Defiibɛ Asɑfu nɑɑ̀mùnkù kɔbɛɛ túótɛ́ tikɑ̃penti kɛ bo sɑ̃ntɛnɛ̀ ti Yiɛ̀ nKuyie, Dɑfiti Isidɑyɛɛribɛ kóo kpɑ̀ɑ̀tì do tì wɑ̃̀ri kɛ yɛ̃ ndɛ̀ ndòmmɛ̀. 
\v 11 Kɛ̀ bɛ̀ ndiè kɛ sɑ̃ntí ti Yiɛ̀ nKuyie nkɛ kù dɔúnnɛ̀ mutɔ̃mmú kɛ̀ bɛtɔbɛ̀ cɔ̀ú nkɛ tú kù wennimu kɛ dɔ́ Isidɑyɛɛribɛ sɑ̃́ɑ̃̀. Kɛ̀ bɛnìtìbɛ̀ bɛmɔu yìútí kɛ sɑ̃ntí ti Yiɛ̀ nKuyie mbɛ̀ dɔú mmɛ̀ɛ̀ kpɛ́í ku cĩ́ɛ̃̀tɛ̀ kó dipũũ.
\p
\v 12 Kɛ̀ ikuɔ́ nìùbɛ̀ kusṹkù nɛ̀ Defiibɛ kusṹkù bɛ̀ɛ̀ kòtɛ́ kɛ do yɑ̀ Kuyie ncĩ́ɛ̃̀tɛ̀ ketitɛ̀, kɛ̀ bɛmbɛ nti yɛdɑbùò mbɛ̀ dɔunko dìì mɔ̀nnì ti Yiɛ̀ nKuyie ncĩ́ɛ̃̀tɛ̀ kó dipũũ, kɛ̀ bɛtɔbɛ̀ biɛ yíútí. 
\v 13 Bɛ̀ í nnɑ kɛ bɑ̀tɛ iyíutii nɛ̀ yɛdɑbùò, dɛ̀ do yiɛ̀ kɛ dɛ́tírí mɛdiɛ̀ mmɛ.
\c 4
\s1 Sifubɛ dootitɔbɛ̀ do dɔ́mɛ̀ kɛ́cónnɛ́ mutɔ̃mmú
\p
\v 1 Kɛ̀ Sudɑɑ kɔbɛ nɛ̀ Bɛnsɑmɛɛ kɔbɛ kɛ̀ bɛ dootitɔbɛ̀ɛ keè bɛ̀ɛ̀ konní Bɑbidɔnni bɛ̀ mɑɑ́mɛ̀ ti Yiɛ̀ nKuyie nyIsidɑyɛɛribɛ tũ nkù cĩ́ɛ̃̀tɛ̀, 
\v 2 kɛ́ítɛ́ kɛ́kɔtɛ kɛ́yɑ̀ Sodobɑbɛɛdi nɛ̀ Sosuwee nɛ̀ bɛhɛikɛ̀nkótíbɛ̀ mɑbɛ̀ kɛ́ bɛ̀ nɑ̀kɛ́ kɛ dɔ̀: Ti dɔ́ kɛ di wɛ̃nnɛ́nɛ̀mu kɛ̀ ti mɑɑ́ Kuyie ncĩ́ɛ̃̀tɛ̀, ti tũmmu di kó Kuyie. Nɛ̀ Asidii kóo kpɑ̀ɑ̀tì Ɛdi-Adonni ti tɔnímɛ̀ diɛ nti kù feumu iwũɔ̃.
\p
\v 3 Sodobɑbɛɛdi nɛ̀ Sosuwee nɛ̀ Isidɑyɛɛribɛ kó bɛkótíbɛ̀ kɛ̀ bɛ̀ɛ bɛ̀ nɑ̀kɛ́ kɛ dɔ̀: Dɛ̀ bɑ́ɑ́ yie nkɛ̀ tí wɛ̃nnɛ́ tínti nɛ̀ díndi kɛ́mɑɑ́ ti Yiɛ̀ nKuyie nti tũ nkù tɛcĩ́ɛ̃̀tɛ̀. Tíì dò nkɛ́ tɛ̀ mɑɑ́ timɑ́ɑ̀. Pɛrɛsi kóo kpɑ̀ɑ̀tì Siduusi weè ti duɔ́ ndinùù.
\p
\v 4 Kɛ̀ dihɛì kɔbɛ ítɛ́ kɛ́cómmú kɛ bo yɑ̃́ríkùnnɛ Sudɑɑ kɔbɛ kɔ̃̀ntì kɛ́ bɛ̀ ɑ̃nnɛ́ kufɔ̃wɑɑ́ nkɛ̀ bɛ̀ɛ yóu mumɑrimù. 
\v 5 Kɛ̀ bɛ̀ɛ yietí Pɛrɛsi kóo kpɑ̀ɑ̀tì tɔ̃mbɛ̀ kɛ̀ bɛ̀ bo cónnɛ́ nKuyie ncĩ́ɛ̃̀tɛ̀ mɑrimù kó mutɔ̃mmú. Kɛ̀ bɛ̀ mmɛ nhɔ̃ Siduusi kpɑ̀tì timɔu miɛkɛ kɛ́tɑnnɛ̀nko Dɑriyuusi kpɛti miɛkɛ.
\s1 Bɛ̀ nɑ̀kɛ́mɛ̀ okpɑ̀ɑ̀tì Aditɑkisɛsi Sifubɛ kpɛ́í
\p
\v 6 Okpɑ̀ɑ̀tì Siduusi kpɑ̀tì ketírí dìì mɔ̀nnì ndi Sifubɛ dootitɔbɛ̀ wɑ̃̀rimɛ̀ dipɑ́tíri kɛ́wɑ́tí Sudɑɑ tenkɛ̀ kɔbɛ nɛ̀ bɛ̀ɛ̀ bo Sedisɑdɛmmu.
\p
\v 7 Aditɑkisɛsi tu dìì mɔ̀nnì Pɛrɛsi kóo kpɑ̀ɑ̀tì, kɛ̀ Bisidɑmmu nɛ̀ Mitidedɑti nɛ̀ Tɑbɛɛdi nɛ̀ bɛ tɔ̃ntitɔbɛ̀ mɑbɛ̀, kɛ̀ bɛ̀ɛ ò wɑ̃̀ri dipɑ́tíri nɛ̀ Arɑmu ɛì kɔbɛ kó tinɑ́ɑǹtì.
\p
\v 8 Kɛ̀ Deummu kùmɑ̀ndɑ́ɑ̀ nɛ̀ opɑ́tíwɑ̃ɑ̃̀tì Simisɑii kɛ̀ bɛ̀ múnkɛ wɑ̃ri dipɑ́tíri okpɑ̀ɑ̀tì Aditɑkisɛsi bɛ̀ɛ̀ bo Sedisɑdɛmmu bɛ kpɛ́í nkɛ dɔ̀:
\p
\v 9 Mí nkùmɑ̀ndɑ́ɑ̀ Deummu nɛ̀ opɑ́tíwɑ̃ɑ̃̀tì nɛ̀ titɔ̃ntitɔbɛ̀ bɛ̀ɛ̀ bo Dinni ɛì nɛ̀ Afɑdisɑtɑki nɛ̀ Tɑdipedi nɛ̀ Afɑdɑsi nɛ̀ Ɛdɛsi nɛ̀ Bɑbidɔnni nɛ̀ Susi nɛ̀ Denɑ nɛ̀ Edɑmmu dɛ kó yɛhɛkɛ̀ kɔbɛ, 
\v 10 nɛ̀ ibotí tɛì okpɑ̀ɑ̀tì diɛwè Asinnɑpɑɑ do pĩ̀ḿmúní bɛ̀ kɛ́ bɛ̀ kɑ̀nnɛ Sɑmmɑrii nɛ̀ kukó nhEfɑdɑti yɑ́ɑ̀ kó yɛhɛkɛ̀ tɛyɛ̀.
\p
\v 11 Ntɛ bɛ̀ do wɑ̃̀ri dìì pɑ́tíri kɛ́duɔ́ nhokpɑ̀ɑ̀tì Aditɑkisɛsi kɛ tú: Tínti ɑ kó bɛtɔ̃mbɛ̀ nɛ̀ bɛ̀ɛ̀ bo kukó nyɑ́ɑ̀ nɛ̀ bɛtɔbɛ̀, tíì dɑ wɑ̃̀ri di mpɑ́tíri, 
\v 12 kɛ dɔ́ kɛ́ dɑ nɑ́kɛ́ kɛ́tú Sifubɛ bɛ̀ɛ̀ ìtɛ́ní ɑ ciɛ kɛ konní Sedisɑdɛmmu bɛ̀ wɛ̃̀tɛ kɛ mɑɑ́mu dihɛì dìì do yetɛ ɑ kpɛti, dihɛì yonkurì, bɛ̀ íinkomu iduotí kɛ dɑmmù kɛ bo dɔú ndipũũ. 
\v 13 Okpɑ̀ɑ̀tì, ɑ́ nyɛ̃́ kɛ dò nkɛ̀ bɛ̀ wɛ̃̀tɛ kɛ dì mɑɑ́ kɛ íi ndi duotí di nìtìbɛ̀ tɛ̃́nkɛ í yóó nyietì dɑ̀mpóò yoo dihɛì kó idíítí yoo tipotɑntì kpɛyi dɛ mɔ̀nnì ɑ nyɛ̃́ kɛ dò nhɑ ɛì cĩ̀tɛmu. 
\v 14 Dɛɛ̀ te tínti bɛ̀ɛ̀ tu ɑ kpɑ̀ɑ̀tìyuu kɔbɛ kɛ dɑ mɔkɛnɛ̀ mɛtɑummɛ̀ dɛ̀ í ti nɑɑti bɛ̀ bo dɑ sènkɛ̀rìmɛ̀, dɛɛ̀ te kɛ̀ ti dɔ́ kɛ́ tì ndɑ nɑ́kɛ́. 
\v 15 Kɑ̀ɑ fiɛ́ dihɛì kó yɛpɑ́tɛ dɛ kó bɛnìtìbɛ̀ kó tinɑ́ɑǹtì kɛ́yɑ̀ dɛ kó dihɛì do yetɛmu bɛkpɑ̀ɑ̀tìbɛ̀ kpɛti kɛ́ndɔɔri bɛ̀ í dɔ́ dɛ̀, bɛ̀ bɑɑ yetírímu bɛkpɑ̀ɑ̀tìbɛ̀ nɛ̀ bɛ̀ bomɛ̀, dɛɛ̀ do te kɛ̀ bɛ̀ɛ pɔntɛ bɛ ɛì. 
\v 16 Ti dɑ nɑ́ɑ́mmu kɛ tú kɑ̀ɑ yóu kɛ̀ bɛ̀ wɛ̃̀tɛ kɛ mɑɑ́ dihɛì kɛ íi nyiduotí ɑ tɛ̃́nkɛ í yó mmɔkɛ kɛtenkɛ̀ kukó nyɑ́ɑ̀.
\s1 Okpɑ̀ɑ̀tì Aditɑkisɛsi bɛ̀ tɛ̃̀ńnɛ́mɛ̀ dipɑ́tíri
\p
\v 17 Mɛm̀mɛ kòo kpɑ̀ɑ̀tìi wɑ̃ri kɛ́ bɛ̀ tɛ̃̀ńnɛ́ kɛ dɔ̀: Mí nhokpɑ̀ɑ̀tì míì wɑ̃̀ri di mpɑ́tíri kùmɑ̀ndɑ́ɑ̀ Deummu nɛ̀ opɑ́tíwɑ̃ɑ̃̀tì Simɛsɑii, nɛ̀ bɛtɔ̃ntitɔbɛ̀ bɛ̀ɛ̀ bo Sɑmmɑrii nɛ̀ bɛtɔbɛ̀ bɛ̀ɛ̀ bo kukó nyɑ́ɑ̀ míì di dɔunko.
\p
\v 18 Dipɑ́tíri di n duɔnní dì, bɛ̀ dì nni nkɑ̀ɑmmu kɛ n cɛ̃́ĩ. 
\v 19 Kɛ̀ n duɔ́ nkɛ̀ bɛ̀ fiɛ́ yɛpɑ́tɛ kɛ sɔ̃́ ndɛ kó dihɛì nɛ̀ dì bomɛ̀ di í yíé mbɛkpɑ̀ɑ̀tìbɛ̀ kpɛti, kɛ ɑ̃ɑ̃̀ yɛkpɑ̀rɛ̀ bɑ́ dìì mɔ̀nnì kɛ yetírí bɛkpɑ̀ɑ̀tìbɛ̀. 
\v 20 Bɛkpɑ̀ɑ̀tìdiɛbɛ̀ do buotɛ́mu Sedisɑdɛmmu kɛ́mbɑkɛ́ kukó nyɑ́ɑ̀ kó yɛhɛkɛ̀ kɛ̀ bɛ̀ mbɛ̀ yietì dɑ̀mpóò nɛ̀ ihɛikɛ̀ndíítí nɛ̀ tipotɑntì kpɛyi. 
\v 21 Nɛ̀ dɛ kpɛ́í duɔ́nnɛ̀ kɛ́ bɛ̀ɛ cónnɛ́ mutɔ̃mmú kɛ bɑ́ɑ́ sɔɔtɛ́ mumɑrimù kɛ́nkémmúnɛ̀ m bo wɛ̃tɛ kɛ́duɔ́mmɛ̀ dinùù. 
\v 22 Dí ndɑkɛ kɛ bɑ́ɑ́ wɑ́nnɛ̀ dɛ kó tinɑ́ɑǹtì kɛ̀ mɛɛ̀ dɔkɛ dɛ kó mɛcɑɑ̀rìmɛ̀ bo nsɔkɛ́ kɛ dɛ́úkú kɛ̀ dɛ̀ ti yonkɛnɛ̀ tínti bɛkpɑ̀ɑ̀tìbɛ̀.
\p
\v 23 Bɛ̀ kɑ̀ɑ ndìì mɔ̀nnì okpɑ̀ɑ̀tì Aditɑkisɛsi wɑ̃̀ri dìì pɑ́tíri kùmɑ̀ndɑ́ɑ̀ Deummu ììkɛ̀ nɛ̀ opɑ́tíwɑ̃ɑ̃̀tì Simɛsɑii nɛ̀ bɛtɔ̃ntitɔbɛ̀ kɛ̀ bɛ̀ɛ ítɛ́ mɛcɑ̃ɑ̃ kɛ́kɔtɛ Sedisɑdɛmmu Sifubɛ borɛ̀ kɛ nɛinɛ̀ bɛhɑ̃ɑ̃pɔ̀mbɛ̀ kɛ́cónnɛ́ mutɔ̃mmú nɛ̀ muwɛ̃rímú. 
\v 24 Mɛm̀mɛ Kuyie ncĩ́ɛ̃̀tɛ̀ mɑrimù kó mutɔ̃mmú còḿmúmɛ̀ Sedisɑdɛmmu, kɛ́ncómmú kɛ̀ dɛ̀ yɑ̀ɑ̀ tuɔkɛnɛ̀ Pɛrɛsi kóo kpɑ̀ɑ̀tì Dɑdiyuusi kpɑ̀tì benni dɛ́rì.
\c 5
\s1 Bɛ̀ wɛ̃̀tɛ kɛ́sɔɔtɛ́mɛ̀ Kuyie ncĩ́ɛ̃̀tɛ̀ kó mumɑrimù
\p
\v 1 Kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ Ido birɛ Sɑkɑrii nɛ̀ Asee, kɛ̀ bɛ̀ mbɛ̀ nɑ̀ɑ́ nKuyie mpɑ̃ɑ̃nɑ́ɑǹtì Sifubɛ bɛ̀ɛ̀ bo Sudɑɑ tenkɛ̀ nɛ̀ Sedisɑdɛmmu. Kɛ̀ bɛ̀ bɛ̀ nɑ̀ɑ́ nKuyie nyIsidɑyɛɛribɛ tũ nkù kùù bɛ̀ bɑkɛ́ kù bɛ̀ nɑ̀kɛ́ tì. 
\v 2 Mɛm̀mɛ Sodobɑbɛɛdi Seditiɛri birɛ nɛ̀ Sosuwee Yotisɑdɑki birɛ kɛ̀ bɛ̀ɛ ítɛ́ kɛ́pĩ́ nKuyie ncĩ́ɛ̃̀tɛ̀ mumɑrimù Sedisɑdɛmmu miɛkɛ, kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛ̀ bonɛ̀ kɛ bɛ̀ teénnɛ̀.
\p
\v 3 Dɛ mɔ̀nnì kɛ̀ kukó nyɑ́ɑ̀ kóo kùmɑ̀ndɑ́ɑ̀ Tɑtennɑii nɛ̀ Sedɑɑ-Bosinɑii nɛ̀ bɛtɔ̃ntitɔbɛ̀, kɛ̀ bɛ̀ɛ kɔtɛ kɛ́bekɛ Sifubɛ kɛ dɔ̀: We ndi duɔ́ ndinùù kɛ̀ di mɑɑ̀ Kuyie ncĩ́ɛ̃̀tɛ̀ kɛ íinko iduotí? 
\v 4 Di yètɛ̀ tu bɑ díndi bɛ̀ɛ̀ mɑɑ̀ dihɛì kɛ íinko iduotí?
\p
\v 5 Kɛ̀ Kuyie mmɛ nní ḿbonɛ̀ Sifubɛ kó bɛkótíbɛ̀ bɑ́ bɛ̀ í còńnɛ́ bɛ tɔ̃mmú, kɛ̀ bɛ̀ nsɔkɛ́ mutɔ̃mmú kɛ́kémmúnɛ̀ bɛ̀ bo duɔ́mmɛ̀ okpɑ̀ɑ̀tì Dɑriyuusi yɛpɑ́tɛ kòo bɛ̀ tɛ̃̀ńnɛ́ o kpɛri dɛ kó tinɑ́ɑǹtì ĩ́nkɛ̀.
\s1 Sifubɛ dootitɔbɛ̀ wɑ̃̀ri dìì pɑ́tíri kɛ duɔ́ nDɑriyuusi
\p
\v 6 Ntɛ dipɑ́tíri kukó nyɑ́ɑ̀ kóo kùmɑ̀ndɑ́ɑ̀ Tɑtennɑii nɛ̀ Sedɑɑ-Bosinɑii nɛ̀ bɛtɔ̃ntitɔbɛ̀ bɛ̀ do duɔ́ ndìì pɑ́tíri Dɑriyuusi. 
\v 7 Ntɛ bɛ̀ do dì wɑ̃̀ri mɛ̀ɛ̀ botí: Okpɑ̀ɑ̀tì diɛwè Dɑriyuusi ti dɑ dɔunkomu, ḿbo kɛ̀ dɛ̀ nɑɑti.
\p
\v 8 Okpɑ̀ɑ̀tì ti dɔ́ kɛ́ dɑ nɑ́kɛ́ kɛ tú: Ti kɔ̀tɛmu Sudɑɑ kɔbɛ kó dikɑrì Kuyie ncĩ́ɛ̃̀tɛ̀ borɛ̀ kɛ sɔ̃́ mbɛ̀ mɑɑ̀ Kuyie ncĩ́ɛ̃̀tɛ̀ nɛ̀ yɛtɑ̃́rɛ̀ kɛ commu yɛsɑ̃ǹkɛ̀ imɑrí cuokɛ̀ kɛ pĩ́ mmutɔ̃mmú mɛsɑ̀ɑ̀ nkɛ̀ mù kèrí. 
\v 9 Kɛ̀ ti bekɛ bɛ̀ɛ̀ ni mutɔ̃mmú, wèè bɛ̀ duɔ́ ndinùù kɛ̀ bɛ̀ mɑɑ̀ Kuyie ncĩ́ɛ̃̀tɛ̀ kɛ íinko dihɛì kó iduotí? 
\v 10 Kɛ̀ ti bɛ̀ bìékɛ́ bɛ yètɛ̀ kɛ yɛ̀ wɑ̃̀ri kɛ bo yɛ̀ ndɑ duɔ́. 
\v 11 Kɛ̀ bɛ̀ ti tɛ̃̀ńnɛ́ kɛ tú, bɛ̀ tu Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kɔbɛ mbɛ, kɛ̀ bɛ kóo kpɑ̀ɑ̀tì diɛwè mɔù weè do mɑɑ́ Kuyie ncĩ́ɛ̃̀tɛ̀ nɛ̀ dimɔ̀nnì. 
\v 12 Kɛ̀ bɛ yɛmbɛ̀ɛ cɑ̀ɑ̀rɛ̀ Kuyie nkùù bo kɛĩ́nkɛ̀ kɛ̀ ku miɛkɛɛ bɛ̀ yɛ̀, kɛ̀ kùu duɔ́ nkɛ̀ Kɑndee kɔbɛ kóo kpɑ̀ɑ̀tì Nɛbukɑnnɛsɑɑ wèè bo Bɑbidɔnni kòo bɛ̀ pɔ̀ntɛ kɛ tɑunnɛ̀ Kuyie ncĩ́ɛ̃̀tɛ̀ kɛ́ bɛ̀ kònnɛ̀ Bɑbidɔnni kɛ̀ bɛ̀ ntú tidɑɑtì. 
\v 13 Mɛm̀mɛ okpɑ̀ɑ̀tì Siduusi kpɑ̀tì benni ketirì miɛkɛ kòo duɔ́ ndinùù kɛ dɔ̀ bɛ̀ɛ wɛ̃tɛ kɛ́ tɛ̀ mɑɑ́. 
\v 14 Kòò tùótɛ́ Kuyie ncĩ́ɛ̃̀tɛ̀ nɛntì mɛsɔɔ nnɛ̀ timɑ́tì pɛ́ítì okpɑ̀ɑ̀tì Nɛbukɑnnɛsɑɑ do tùótɛ́ tì Kuyie ncĩ́ɛ̃̀tɛ̀ miɛkɛ Sedisɑdɛmmu kɛ́kònnɛ̀ Bɑbidɔnni kɛ́tɑnnɛ tɛbɔɔcĩ́ɛ̃̀tɛ̀, kòo tì duɔ́ Sesibɑsɑɑ wèè tu bɛ kóo kùmɑ̀ndɑ́ɑ̀. 
\v 15 Kòo ò nɑ̀kɛ́ kɛ tú wèe túótɛ́ dɛ kó tinɛntì kɛ́kɔtɛnɛ̀ Sedisɑdɛmmu Kuyie ncĩ́ɛ̃̀tɛ̀ borɛ̀ kɛ́wɛ̃tɛ kɛ́ tɛ̀ mɑɑ́ tɛ fɔ̃̀tìrì. 
\v 16 Mɛm̀mɛ kɛ̀ Sesibɑsɑɑ kɔtɛ kɛ pṹṹtɛ́ Kuyie ncĩ́ɛ̃̀tɛ̀ Sedisɑdɛmmu kɛ̀ bɛ̀ kpɑɑ́ kɛ tɛ̀ mɑɑ̀, bɑ́ tɛ̀ í dèè. 
\v 17 Okpɑ̀ɑ̀tì kɑ̀ɑ bo yie mbɛ̀ɛ fiɛ́ Bɑbidɔnni kóo kpɑ̀ɑ̀tì kó yɛpɑ́tɛ kɛ́yɑ̀ kɛ̀ nsɑ̀ kòo kpɑ̀ɑ̀tì Siduusi mɛ̀nkɛ do duɔ́ ndinùù kɛ dɔ̀ bɛ̀ɛ wɛ̃tɛ kɛ́mɑɑ́ Kuyie ncĩ́ɛ̃̀tɛ̀ Sedisɑdɛmmu. Kɛ̀ bɛ̀ dèè okpɑ̀ɑ̀tì, ɑ́ ti nɑ́kɛ́ ɑ yɛ̀mmɛ̀ dòmmɛ̀ dɛ kó tinɑ́ɑǹtì ĩ́nkɛ̀.
\c 6
\s1 Okpɑ̀ɑ̀tì Dɑriyuusi bɛ̀ tɛ̃̀ńnɛ́ tì
\p
\v 1 Mɛm̀mɛ kòo kpɑ̀ɑ̀tì Dɑriyuusii duɔ́ nkɛ̀ bɛ̀ɛ fiɛ́ Bɑbidɔnni ɛì kó tinɛntì nɛ̀ yɛpɑ́tɛ yɛ̀ɛ̀ tɔ dihɛì kó tinɑ́ɑǹtì duɔ́ duɔ́ sìì cɛ̃́ĩ miɛkɛ, 
\v 2 kɛ́yɑ̀ kupɑ́tíkɔ̃̀nkù mɑkù Mɛdii kó kutempɛ̃ Ekibɑtɑnni ɛì kó tɛcɛ̃kpetɛ̀ mɑtɛ̀ miɛkɛ, kɛ̀ kù cití kɛ wɑ̃̀ri kɛ tú: Ntɛ tìì dɔ̀ɔ̀.
\p
\v 3 Okpɑ̀ɑ̀tì Siduusi kpɑ̀tì benni ketirì miɛkɛ kòo duɔ́ ndinùù kɛ dɔ̀: Bɛ̀ɛ wɛ̃tɛ kɛ́mɑɑ́ Kuyie ncĩ́ɛ̃̀tɛ̀ Sedisɑdɛmmu tɛ fɔ̃̀tìrì tɛ pũũ borɛ̀, kɛ̀ bɛ̀ nfeu Kuyie nyiwũɔ̃ tɛ miɛkɛ, bɛ̀ɛ tɛ̀ mɑɑ́ kɛ̀ tɛ cómmɛ̀ ḿbo mɛ́tìrìbɛ̀ sipísìtɑ̃ɑ̃ti, mɛpɛ̃kùmɛ̀ mɛɛ̀ mɑ́ɑ̀. 
\v 4 Bɛ̀ɛ cónnɛ́ titɑ̃́píɛ̀tì icuɔ́ ìtɑ̃ɑ̃ti tidɑbɛɛtì kucuɔ́ kùmɑ́ɑ̀, okpɑ̀ɑ̀tì kó ditɔu kó idíítí iì yó nyietì tɛ mɑrimù kó idíítí. 
\v 5 Kɛ̀ dɛ̀ɛ̀ tukúnɛ̀ Kuyie ncĩ́ɛ̃̀tɛ̀ kó tinɛntì, mɛsɔɔ nkpɛti nɛ̀ timɑ́tì pɛ́ítì kpɛti okpɑ̀ɑ̀tì Nɛbukɑnnɛsɑɑ do tɔní tì Sedisɑdɛmmu kɛ́konnɛ̀nní Bɑbidɔnni bɛ̀ɛ tì tɛ̃̀ńnɛ́ Sedisɑdɛmmu Kuyie ncĩ́ɛ̃̀tɛ̀ bɑ́ kùù nɛnkù ku fɔ̃̀tìrì.
\p
\v 6 Dɛ kó difɔ̃nkúò kɛ̀ okpɑ̀ɑ̀tì Dɑriyuusii wɑ̃ri dipɑ́tíri kukó nyɑ́ɑ̀ kóo kùmɑ̀ndɑ́ɑ̀ Tɑtennɑii nɛ̀ Setɑɑ-Bosinnɑii nɛ̀ bɛtɔ̃ntitɔbɛ̀ kɛ́ bɛ̀ nɑ̀kɛ́ kɛ dɔ̀: Di bɑ́ mbɛ̀ kɔɔ́nnɛ̀. 
\v 7 Yóunɛ̀ Sifubɛ kóo kùmɑ̀ndɑ́ɑ̀bɛ̀ nɛ̀ Sifubɛ kó bɛkótíbɛ̀ kɛ̀ bɛ̀ mpĩ́ mbɛ tɔ̃mmú kɛ́mɑɑ́ Kuyie ncĩ́ɛ̃̀tɛ̀ tɛ fɔ̃̀tìrì. 
\v 8 Ntɛ di yó mpĩ́ mmɛ̀ɛ̀ botí mumɑrimù kó mutɔ̃mmú: Díndi kukó nyɑ́ɑ̀ kɔbɛ di kó dihɛì kó ditɔu di yietì dɑ̀mpóò kɛ̀ ìì tɑɑ̀, di yó nyi nyietì bɛtɔ̃mbɛ̀ kɛ bɑ́ɑ́ kṹntɛ́. 
\v 9 Kɛ̀ di ndɑkɛ kɛ́nduɔ̀ nyikuɔ́ nìùbɛ̀ dɛ̀ bɛ̀ bèkú dɛ̀ bɑ́ dìì yiè. Yɛnɑɑdɑpɑ̀ɑ̀ nnɛ̀ yɛpedɑkɛ̀ nɛ̀ yɛpedɑbɛ bɛ̀ yó nfeu dɛ̀ Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kɛ tuɔ̀, kɛ́ nkù pɑ̃ɑ̃nnɛ̀ tidiitì nɛ̀ mukɔ́kúɔ́ nnɛ̀ mɛnɑɑ̀ nnɛ̀ mɛkùɔ̀. 
\v 10 Kɛ̀ di nfeu Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ iwũɔ̃ kɛ tuɔ̀, ku dɔkɛ dɔ́ yɛ̀ɛ̀ pɑ̃rɛ̀ kufɔ̃ɔ̃ku kpɛyɛ kɛ́ nkù bɑ̀ɑ́nnɛ̀ okpɑ̀ɑ̀tì kpɛ́í, wenwe nɛ̀ o bí kɛ̀ bɛ̀ nfòù. 
\v 11 Kɛ̀ wèè yetɛ dɛ kó dinùù bɛ̀ɛ dɛitɛ o cĩ́ɛ̃̀tɛ̀ kó kudɔú kóò tɔ̃nnɛ́ kòo cĩ́ɛ̃̀tɛ̀ɛ nɑɑ́ nditɑ́pùò. 
\v 12 Kòo kpɑ̀ɑ̀tì mɔù yoo kubotí mɑkù yetɛ n dɔú ndìì nùù, kɛ dì pɛɛ́nnɛ̀ kɛ pɔ̀ntɛ Kuyie ncĩ́ɛ̃̀tɛ̀ Sedisɑdɛmmu bɛ̀ yu dɛ̀ ku yètìrì, Kuyie nku mɔ́mmɔnku kuù yóó ò potɛ́. Mí nhokpɑ̀ɑ̀tì Dɑriyuusi míì dɔú ndɛ kó dinùù kɛ di dò nkɛ́dɔɔ̀ weti weti.
\b
\p
\v 13 Mɛm̀mɛ kɛ̀ kukó nyɑ́ɑ̀ kóo kùmɑ̀ndɑ́ɑ̀ Tɑtennɑii nɛ̀ Setɑɑ-Bosinnɑii nɛ̀ bɛtɔ̃ntitɔbɛ̀ kɛ̀ bɛ̀ɛ tũnnɛ okpɑ̀ɑ̀tì Dɑriyuusi dɔú ndìì nùù weti weti.
\s1 Bɛ̀ do kpetɛ́mɛ̀ Kuyie ncĩ́ɛ̃̀tɛ̀ pɑ̀ntɛ̀
\p
\v 14 Kɛ̀ Sifubɛ kó bɛkótíbɛ̀ biɛ nsɔkɛ́ bɛ tɔ̃mmú kɛ́ntũ Kuyie mpɑ̃ɑ̃nɑ́ɑǹtì nɑ́ɑm̀bɛ̀ Ido birɛ Sɑkɑrii nɛ̀ Asee bɛ̀ do bɛ̀ nɑ̀kɛ́ tì, kɛ́deè Kuyie nyIsidɑyɛɛribɛ tũ nkù cĩ́ɛ̃̀tɛ̀ mumɑrimù kù do bɛ̀ nɑ̀kɛ́ kɛ yɛ̃ ndɛ̀ ndòmmɛ̀. Nɛ̀ Pɛrɛsi tenkɛ̀ kó bɛkpɑ̀ɑ̀tìbɛ̀ Siduusi nɛ̀ Dɑriyuusi nɛ̀ Aditɑkisɛsi bɛ̀ do bɛ̀ duɔ́ ndìì nùù. 
\v 15 Kɛ̀ bɛ̀ɛ deè Kuyie ncĩ́ɛ̃̀tɛ̀ mumɑrimù okpɑ̀ɑ̀tì Dɑriyuusi kpɑ̀tì benni dikuɔ́nnì, otɑ̃̀nkù bɛ̀ tu wè Adɑri \f + \fr 6:15 \fr*\fk Adɑri: \fk*\ft Bɛ̀ do kɑɑ mmɛ̀ɛ̀ botí bɛ kó bɛtɑ̃̀ɑ̃̀bɛ̀ nɛ̀ ti kɑɑmmɛ̀ yíe ndɛ̀ í wɛ̃. Bɛ kóo tɑ̃̀nkù Adɑdi berínɛ̀ ti kó bɛtɑ̃̀ɑ̃̀bɛ̀ odɛ́rì nɛ̀ tɑ̃ɑ̃́nwè dɛ cuokɛ̀ nkɛ (dɛwɑnnɛ̀ nɛ̀ tibéntì dɛ cuokɛ̀).\ft*\f* o yiè tɑ̃ɑ̃́nnì. 
\v 16 Isidɑyɛɛribɛ nɛ̀ ikuɔ́ nìùbɛ̀ nɛ̀ Defiibɛ sɔmbɛ nɛ̀ bɛtɔbɛ̀ bɛ̀ɛ̀ do ìtɛ́ Bɑbidɔnni kɛ́konní Sedisɑdɛmmu, kɛ̀ bɛ̀ɛ ɑ̃nnɛ́ dibɑnni, kɛ́nyɑ̃nkunɛ̀ diwɛ̀ì bɛ̀ mɑɑ́mɛ̀ Kuyie ncĩ́ɛ̃̀tɛ̀ kɛ dèè. 
\v 17 Kɛ̀ bɛ̀ɛ fíé ku cĩ́ɛ̃̀tɛ̀ kpetímù kpɛ́í yɛnɑɑdɑkɛ̀ tɛkɔ̀ùtɛ̀ (100) yɛpedɑkɛ̀ sikɔusìdɛ́, (200) yɛpedɑbɛ sikɔusìnɑ̀ɑ̀ (400), kɛ́yíɛ́nɛ̀ yɛbɔdɑkɛ̀ tɛpíítɛ̀ nɛ̀ yɛ̀dɛ́ɛ̀ Isidɑyɛɛribɛ bɑ́ kùù wuɔ kó mɛyɛi ncĩ́ɛ̃́mmɛ̀ kpɛ́í. 
\v 18 Kòo kɑnnɛ ikuɔ́ nìùbɛ̀ bɛ tɔ̃ntì bɛ tɔ̃ntì nɛ̀ Defiibɛ sɔmbɛ bɛ̀ dò nkɛ́mpĩ́ mmɛ̀ɛ̀ botí Kuyie ncĩ́ɛ̃̀tɛ̀ miɛkɛ mutɔ̃mmú Sedisɑdɛmmu. Kɛ̀ bɛ̀ ntũ nti wɑ̃̀ri Mɔyiisi pɑ́tɛ miɛkɛ kɛ yɛ̃ ndɛ̀ ndòmmɛ̀.
\s1 Bɛ̀ bɑɑ́mmɛ̀ diyentɛ́bɑnni
\p
\v 19 Dibenni pɑ̀nnì kóo tɑ̃̀nkù ketiwè kó diyiè tɛpíítɛ̀ nɛ̀ dinɑɑnnì bɛ̀ɛ̀ kó dimɑ̀ɑ̀ do konní Sedisɑdɛmmu kɛ̀ bɛ̀ɛ bɑɑ́ ndiyentɛ́bɑnni. 
\v 20 Ikuɔ́ nìùbɛ̀ nɛ̀ bɛ tebìí Defiibɛ kɛ̀ bɛ̀ɛ wɛ̃nnɛ́ kɛ́dɔɔ̀ mɛwénkùmɛ̀ kó ikuɔ́ kɛ́wénkùnnɛ bɛmɑ́ɑ̀ kɛ́fíé diyentɛ́bɑnni kó iwũɔ̃ bɛ̀ɛ̀ konní Bɑbidɔnni bɛ kpɛ́í nnɛ̀ bɛmɔ́mmɔmbɛ bɛ kpɛ́í, 
\v 21 kɛ̀ bɛ̀ɛ wɛ̃nnɛ́ kɛ́di diyentɛ́bɑnni kó mudiì nɛ̀ bɛ̀ɛ̀ do tú tidɑɑtì Bɑbidɔnni kɛ konní, nɛ̀ bɛ̀ɛ̀ do kpɑɑ́ dihɛì kɛ́yɑtɛnɛ̀ bɛmɑ́ɑ̀ yɛhɛkɛ̀ tɛyɛ̀ kɔbɛ dɔɔri mɛ̀ɛ̀ yɛi, kɛ́wɑmmú ti Yiɛ̀ nKuyie nyIsidɑyɛɛribɛ tũ nkù. 
\v 22 Kɛ̀ bɛ̀ɛ sɔɔtɛ́ kɛ́mbɑɑ̀ mpɛ̃́ɛ̃̀bɛ̀ bɛ̀ɛ̀ í kɔɔrɛnɛ̀ mutie mùù muuti bɛ kó dibɑnni kɛ nyɑ̃nkunɛ̀ diwɛ̀ì kɛ dɔ̀ yɛwe yɛ̀yiekɛ̀. Kɛ yɛ̃́ ti Yiɛ̀ nKuyie ndo bɛ̀ dɔ̀ɔ̀mɛ̀ mɛsɑ̀ɑ̀ nkɛ́kɑ́ɑ́kɛ́ Asidii kóo kpɑ̀ɑ̀tì yɛ̀mmɛ̀ kòo bo bɛ̀ teennɛ̀ Kuyie bɛmbɛ Isidɑyɛɛribɛ bɛ̀ tũ nkù cĩ́ɛ̃̀tɛ̀ mɑrimù.
\c 7
\s1 Ikuɔ́ nìùtì Ɛsitɑdɑsi kó tinɑ́ɑǹtì
\p
\v 1-6 Pɛrɛsi kóo kpɑ̀ɑ̀tì Aditɑkisɛsi kó tikpɑ̀tì miɛkɛ nkɛ onìtì bɛ̀ tu wè Ɛsitɑdɑsi ò konnímɛ̀ Bɑbidɔnni. Ò do tú ikuɔ́ nìùtì diɛwè Anɔɔ kó kufuku kou mɔù nwe. Weè pɛitɛ́ Pinɑsi kɛ̀ Pinɑsii pɛitɛ́ Abisuɑɑ kòo pɛitɛ́ Bukii kɛ̀ Bukii pɛitɛ́ Uusii kòò mɛ ntó pɛitɛ́ Sedɑyɑ kɛ̀ Sedɑyɑɑ pɛitɛ́ Mɛdɑyɔti kɛ̀ Mɛdɑyɔtii pɛitɛ́ Aitubu kɛ̀ Aitubuu pɛitɛ́ Sɑdɔki, kòo pɛitɛ́ Sɑdummu, kɛ̀ Sɑdummuu pɛitɛ́ Idikiyɑ, kɛ̀ Idikiyɑ pɛitɛ́ Asɑdiɑ, kɛ̀ Asɑdiɑɑ pɛitɛ́ Sedɑyɑ, kòo pɛitɛ́ Ɛsitɑdɑsi. Bɛ̀ do bɛ̀ pĩ̀ḿmú kɛ́kònnɛ̀ Bɑbidɔnni, kɛ̀ wèe wɛ̃tɛ kɛ́konní Sedisɑdɛmmu. Ɛsitɑdɑsi do tú wèè yɛ̃́ wènwe Kuyie nyIsidɑyɛɛribɛ tũ nkù kuɔ́, kù do duɔ́ nyì Mɔyiisi. Kɛ̀ Kuyie nní nhò bonɛ̀ kɛ́duɔ́ nkɛ̀ Pɛrɛsi kóo kpɑ̀ɑ̀tìi ò duɔ́ nwè ò bekɛ́ dɛ̀ɛ̀ kó dimɑ̀ɑ̀. 
\v 7 Dɛ̀ do tú okpɑ̀ɑ̀tì Aditɑkisɛsi kpɑ̀tì benni yiénnì ndi Isidɑyɛɛribɛ miɛkɛ, kɛ̀ ikuɔ́ nìùbɛ̀ mɑbɛ̀ nɛ̀ Defiibɛ nɛ̀ bɛdèmbɛ̀ nɛ̀ bɛ̀ɛ̀ bɑ̀ɑ yɛbòrɛ̀ nɛ̀ bɛ̀ɛ̀ tu bɛtɔ̃mbɛ̀ Kuyie ncĩ́ɛ̃̀tɛ̀ miɛkɛ bɛ̀ tùɔ̀kɛnímɛ̀ Sedisɑdɛmmu. 
\v 8 Dii benni yiénnì kóo tɑ̃̀nkù nummuwè miɛkɛ nkɛ Ɛsitɑdɑsi konnímɛ̀ Sedisɑdɛmmu. 
\v 9 Ò do ìtɛ́ Bɑbidɔnni dibenni tɑ̃̀nkù ketiwè kó diyiè ketirì ndi, kɛ̀ Kuyie nní nhò bonɛ̀ kòo tuɔkɛ Sedisɑdɛmmu nɛ̀ kusɑ̀ɑ̀kù otɑ̃̀nkù nummuwè kó diyiè ketirì. 
\v 10 Ɛsitɑdɑsi do duɔ́ nho yɛ̀mmɛ̀ mmɛ kɛ́nkɑɑ ti Yiɛ̀ nKuyie nkuɔ́ pɑ́tíri kɛ dɔɔri ì yɛ̃mmɛ̀, kɛ́tié nyIsidɑyɛɛribɛ Kuyie nkuɔ́ nɛ̀ ku tɑnnɔ̀.
\s1 Okpɑ̀ɑ̀tì Aditɑkisɛsi do duɔ́mmɛ̀ mutɔ̃mmú Ɛsitɑdɑsi
\p
\v 11 Ntɛ okpɑ̀ɑ̀tì Aditɑkisɛsi do duɔ́ ndìì pɑ́tíri Ɛsitɑdɑsi wèè do tú ikuɔ́ nìùtì, kɛ wɑ̃ũ Kuyie nkuɔ́ nɛ̀ ku tɑnnɔ̀ kɛ dɛ̀ tiè nyIsidɑyɛɛribɛ. 
\v 12 Kɛ̀ dɛ kó dipɑ́tíri wɑ̃̀ri kɛ tú: Mí nhokpɑ̀ɑ̀tì diɛwè Aditɑkisɛsi míì wɑ̃̀ri dipɑ́tíri kɛ dɑ dɔu nfɔ̃́ nhƐsitɑdɑsi Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku kuɔ́ nìùtì wèè ì wɑ̃̀ũ.
\p
\v 13 N duɔ́mmu dinùù kɛ tú bɛ̀ɛ̀ kó dimɑ̀ɑ̀ bo n kó dikpɑ̀ɑ̀tìyuu miɛkɛ kɛ tú Isidɑyɛɛribɛ, ikuɔ́ nìùbɛ̀ yoo Defiibɛ kɛ dɔ́ kɛ́kò nSedisɑdɛmmu bɛ̀ bo nɑ kɛ́ dɑ nɛinɛ̀. 
\v 14 Mí nhokpɑ̀ɑ̀tì nɛ̀ nh ɛì kó bɛtũ̀mbɛ̀ bɛ̀yiekɛ̀ tíì wɛ̃nnɛ́ kɛ dɑ duɔ́nko Sudɑɑ kɔbɛ tenkɛ̀ Sedisɑdɛmmu, kɑ̀ɑ bo yɑ̀ kɛ̀ nsɑ̀ kɛ̀ bɛ̀ tũ nKuyie nhɑ tũ nkù kuɔ́ pɑ́tíri ɑ tɔ dì yɛ̃mmɛ̀. 
\v 15 Kɑ̀ɑ bo ntɔ mí nhokpɑ̀ɑ̀tì nɛ̀ n kó bɛtũ̀mbɛ̀ ti yɛ̀mmɛ̀ kó yɛpɑ̃rɛ̀ mɛsɔɔ nnɛ̀ timɑ́tì pɛ́ítì ti pɑ̃ dɛ̀ Kuyie, kùù cĩ́ɛ̃̀tɛ̀ bo Sedisɑdɛmmu, Isidɑyɛɛribɛ tũ nkù. 
\v 16 A múnkɛɛ cuɔ́nɛ̀ Bɑbidɔnni kó kutempɛ̃ nkɔbɛ ikuɔ́ nìùbɛ̀ nɛ̀ cɛ̃́nkoo kɔbɛ duɔ́ nyɛ̀ɛ̀ pɑ̃rɛ̀ kɛ̀ yɛ̀ bo kò nSedisɑdɛmmu nKuyie ncĩ́ɛ̃̀tɛ̀ kpɛ́í, yɛ̀ɛ̀ tu timɑ́tì pɛ́ítì nɛ̀ mɛsɔɔ. 
\v 17 Nɛ̀ dɛ kó timɑ́tì pɛ́ítì nti, ɑ bii yóó dońnɛ̀mɛ̀ yɛnɑɑdɑkɛ̀ nɛ̀ yɛpedɑkɛ̀ nɛ̀ yɛpedɑpɑ̀ɑ̀ nnɛ̀ tidiitì nɛ̀ mɛnɑɑ̀ dɛ̀ɛ̀ ɔ̃ɔ̃ kɔɔrɛnɛ̀, kɑ̀ɑ dɛ̀ tùɔ ndiwũɔ̃tɔ̀nnì ĩ́nkɛ̀ Kuyie ncĩ́ɛ̃̀tɛ̀ miɛkɛ Sedisɑdɛmmu. 
\v 18 Timɑ́tì pɛ́ítì nɛ̀ mɛsɔɔ ndɛ̀ɛ̀ bo nkpɑɑ́ dí dɛ̀ dɔ̀ɔ̀nɛ̀ di dɔ́mɛ̀ fɔ̃́ nnɛ̀ ɑ tebìí kɛ́ntũ nKuyie di tũ nkù dɔ́mɛ̀. 
\v 19 Kuyie ncĩ́ɛ̃̀tɛ̀ nɛntì bɛ̀ dɑ duɔ́ ntì ku cĩ́ɛ̃̀tɛ̀ tɔ̃mmú kpɛ́í, ntɔ ti kɛ́ kù duɔ́ nku cĩ́ɛ̃̀tɛ̀ Sedisɑdɛmmu. 
\v 20 Kɛ̀ dɛ̀mɑrɛ̀ kpɑɑ́ kɛ dò nkɛ́dɔɔ̀ Kuyie ncĩ́ɛ̃̀tɛ̀ kpɛ́í ɑ bɑɑ́ okpɑ̀ɑ̀tì kó didítítɔu miɛkɛ kɛ́ dɛ̀ dɔ̀ɔ̀. 
\v 21 Mí nhokpɑ̀ɑ̀tì Aditɑkisɛsi m mɔ́mmuɔ, mmíì duɔ́ ndinùù kukó nyɑ́ɑ̀ kó sidítícɛ̃́ĩ simɔu kɛ tú kɛ̀ ikuɔ́ nìùtì Ɛsitɑdɑsi Kuyie nkùù bɑkɛ́ kɛĩ́nkɛ̀ ku kuɔ́ wɑ̃ɑ̃̀tì di bekɛ dɛ̀ɛ̀ kó dimɑ̀ɑ̀ dí dɛ̀ nhò duɔ́ nkɛ bɑ́ɑ́ ɔɔtɛ. 
\v 22 Dí ò duɔ́ ntimɑ́tì pɛ́ítì cìdóòbɛ̀ sikɔupísìtɑ̃ɑ̃ti (3000) tidiitì cìdóòbɛ̀ sikɔupípísìtɑ̃ɑ̃ti (30000), mɛnɑɑ̀ nyɛdíè nsikɔupísìnɑ̀ɑ̀ (4000), mmɛkùɔ̀ nyɛdíè nsikɔupísìtɑ̃ɑ̃ti (3000), di pɑ̃ mukɔ́kúɔ́ ndi dɔ́ dɛ̀ mmɑmɛ̀. 
\v 23 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kù bɛ́i ndìì nùù ku kó bɛnìtìbɛ̀ dò nkɛ́ dì dɔ̀ɔ̀mu nɛ̀ tikɔ̃nyɑuti, kɛ̀ dɛ̀ɛ yie nkɛ̀ ku miɛkɛ bɑ́ɑ́ ti do, mí nnɛ̀ m bí nɛ̀ n kpɑ̀ɑ̀tìyuu. 
\v 24 Ntɛ dinùù tɛrì n di duɔ́ ndì: Ikuɔ́ nìùbɛ̀ nɛ̀ Defiibɛ nɛ̀ bɛdèmbɛ̀ nɛ̀ bɛ̀ɛ̀ bɑ̀ɑ yɛbòrɛ̀ di bɑ́ mbɛ̀ cɔú dɑ̀mpóò nɛ̀ ihɛikɛ̀ndíítí nɛ̀ tipotɑntì kpɛyi, bɛ̀ɛ̀ kó dimɑ̀ɑ̀ pĩ́ mmutɔ̃mmú Kuyie ncĩ́ɛ̃̀tɛ̀.
\p
\v 25 Fɔ̃́ nhɑ mɔ́mmuɔ Ɛsitɑdɑsi, nɛ̀ Kuyie ndɑ duɔ́ mmɛ̀ɛ̀ ciì mmiɛkɛ ɑ́ ɑ̃nnɛ́ Kuyie nkuɔ́ wɑ̃ɑ̃̀bɛ̀ nɛ̀ bɛbeémbɛ̀ bɛ̀ɛ̀ yó mbekùnɛ̀ kukó nyɑ́ɑ̀ kó bɛnìtìbɛ̀ bɛmɔu. Bɛ̀ɛ̀ kó dimɑ̀ɑ̀ yɛ̃́ Kuyie nkuɔ́ kɛ̀ bɛ̀mɑbɛ̀ í ì yɛ̃́ dí ì mbɛ̀ tié. 
\v 26 Kɛ̀ wèè yetɛ kɛ í tũ̀nnɛ Kuyie nhɑ tũ nkù kó ikuɔ́ yoo mí nhokpɑ̀ɑ̀tì kpɛyi, bɛ̀ɛ yṹɔ̃́ nho to, kòò dò nkɛ́kuɔmu, bɛ̀ɛ ò kùɔ. Kɛ̀ bɛ̀ bo ò dènnɛ o kɔbɛ cuokɛ̀ bɛ̀ɛ ò dènnɛ, kòò bo yietímu wèe yietí, kɛ̀ bɛ̀ mɛ mbo ò kpetínnɛ́mu bɛ̀ɛ ò kpetínnɛ́.
\s1 Ɛsitɑdɑsi sɑ̃ntɛmɛ̀ Kuyie
\p
\v 27 Kɛ̀ Ɛsitɑdɑsii sɑ̃ntɛ ti Yiɛ̀ nKuyie nkɛ dɔ̀: Ti Yiɛ̀ nKuyie n yɛmbɛ̀ do tũ nkù yètìrì ńdɛu. Kuù ɑ̃nnɛ́ okpɑ̀ɑ̀tì mɛyɛ̀mmɛ̀ ò bo dɛ́úkùnnɛmɛ̀ ku cĩ́ɛ̃̀tɛ̀ tɛ̀ɛ̀ bo Sedisɑdɛmmuu. 
\v 28 Kuù duɔ́ nkòo kpɑ̀ɑ̀tì nɛ̀ bɛ̀ɛ̀ tu o kó bɛtũ̀mbɛ̀ nɛ̀ bɛ̀ɛ̀ tu bɛkperíbɛ̀ o kpɑ̀ɑ̀tìyuu miɛkɛ kɛ̀ bɛ̀ n dɔ̀ɔ̀ mɛsɑ̀ɑ̀. Mí m mɔ́mmuɔ nkɛ̀ m múnkɛɛ túótɛ́ tikɔ̃nyɑuti, kɛ yɛ̃́ ti Yiɛ̀ nKuyie nni mbonɛ̀mɛ̀. Mɛm̀mɛ kɛ̀ n tíí nyIsidɑyɛɛribɛ kó bɛkótíbɛ̀ kɛ̀ bɛ̀ n nɛinɛ̀ kɛ́konní.
\c 8
\s1 Bɛ̀ɛ̀ do nɛinɛ̀ Ɛsitɑdɑsi kɛ́kò nSedisɑdɛmmu
\p
\v 1 Kɛ̀ Ɛsitɑdɑsii bɛ́i nkɛ dɔ̀: Ntɛ tìì nɑɑ̀mùntì kɔbɛ do n nɛinɛ̀ n yìtɛ́ dìì mɔ̀nnì kɛ nkũnti Sedisɑdɛmmu okpɑ̀ɑ̀tì Aditɑkisɛsi kó dimɔ̀nnì. 
\v 2 Bɛɛ̀ tu:
\m Kɛdisɔmmu Findee nɑɑ̀mùnkou
\m nɛ̀ Etɑmɑɑ nɑɑ̀mùnkou,
\m Dɑnniyɛɛri nɛ̀ Atuusi Dɑfiti nɑɑ̀mùnkù kou,
\m
\v 3 nɛ̀ Sekɑnniyɑ nɛ̀ Pɑdosi nɑɑ̀mùnkù kɔbɛ nɛ̀ Sɑkɑrii kɔku kɛ̀ bɛ̀ ḿbo bɛmɔu bɛnitidɑɑbɛ̀ tɛkɔ̀ùtɛ̀ nɛ̀ sipísìnùmmù (150), 
\v 4 nɛ̀ Pɑsɑti-Mɔɑbu nɑɑ̀mùnkù kɔbɛ nɛ̀ Ediyoyennɑii nɑɑ̀mùnkù kɔbɛ nɛ̀ Sɑkɑrii nɑɑ̀mùnkù kɔbɛ kɛ̀ bɛ̀ ḿbo bɛnitidɑɑbɛ̀ sikɔusìdɛ́ (200).
\m
\v 5 Sekɑnniyɑ Yɑsiyɛɛdi nɑɑ̀mùnkù kou Sɑtuu yɑɑ̀bí kɛ̀ bɛ̀ ḿbo bɛmɔu sikɔusìtɑ̃ɑ̃ti (300).
\m
\v 6 Adinni nɑɑ̀mùnkù kɔbɛ, Ebɛɛdi Sonnɑtɑ̃ɑ̃ yɑɑ̀bí, kɛ̀ bɛ̀ ḿbo bɛnitidɑɑbɛ̀ sipísìnùmmù.
\m
\v 7 Edɑmmu nɑɑ̀mùnkù kɔbɛ Yesɑyɑɑ Atɑdii yɑɑ̀bí kɛ̀ bɛ̀ ḿbo bɛnitidɑɑbɛ̀ sipísìyiekɛ̀.
\m
\v 8 Sefɑtiɑ nɑɑ̀mùnkù kɔbɛ Sebɑdiɑ Mikɑyɛɛdi yɑɑ̀bí kɛ̀ bɛ̀ ḿbo bɛnitidɑɑbɛ̀ sipísìdɛ́.
\m
\v 9 Soɑbu nɑɑ̀mùnkù kɔbɛ Abudiɑsi Yeyɛɛdi yɑɑ̀bí kɛ̀ bɛ̀ ḿbo bɛnitidɑɑbɛ̀ sikɔusìdɛ́ nɛ̀ tɛpíítɛ̀ nɛ̀ bɛ̀ni (218).
\m
\v 10 Yedomiti nɑɑ̀mùnkù kɔbɛ Yosifiɑ yɑɑ̀bí kɛ̀ bɛ̀ ḿbo bɛnitidɑɑbɛ̀ tɛkɔ̀ùtɛ̀ nɛ̀ sipísìkuɔ̀ (160).
\m
\v 11 Bebɑii nɑɑ̀mùnkù kɔbɛ Bebɑii yɑɑ̀bí kɛ̀ bɛ̀ ḿbo bɛmɔu bɛnitidɑɑbɛ̀ sipísìdɛ́ nɛ̀ bɛ̀ni.
\m
\v 12 Asikɑdi nɑɑ̀mùnkù kou Akɑtɑnni yɑɑ̀bí kɛ̀ bɛ̀ ḿbo bɛnitidɑɑbɛ̀ tɛkɔ̀ùtɛ̀ nɛ̀ tɛpíítɛ̀ (110).
\m
\v 13 Adonnikɑmmu nɑɑ̀mùnkù kɔbɛ bɛ̀tɑ̃ɑ̃ti bɛ̀ɛ̀ do tú bɛsɑ́m̀pɔ́bɛ̀ Edifedee nɛ̀ Yeiyɛɛdi nɛ̀ Semmɑyɑ kɛ̀ bɛ̀ ḿbo bɛnitidɑɑbɛ̀ sipísìkuɔ̀.
\m
\v 14 Bikibɑii nɑɑ̀mùnkù kou Utɑii nɛ̀ Sɑbudi yɑɑ̀bí kɛ̀ bɛ̀ ḿbo bɛmɔu bɛnitidɑɑbɛ̀ sipísìyiekɛ̀.
\s1 Ɛsitɑdɑsi nɛ̀ o kɔbɛ bɛ̀ bɑ̀ɑ́tímɛ̀ kɛ bo wɛ̃tɛní Sedisɑdɛmmu
\p
\v 15 Mɛm̀mɛ kɛ̀ n tíí mbɛnìtìbɛ̀ kukó nkùù pũɔ̃̀ nkɛ kɔrì Aɑfɑ ɛì ku borɛ̀ kɛ̀ ti ndɛ̀ bo kɛ dɔ̀ yɛwe yɛ̀tɑ̃ɑ̃ti, kɛ̀ n wèí bɛnìtìbɛ̀ nɛ̀ ikuɔ́ nìùbɛ̀ bɑ́ n yí nyɑ̀ Defii wuɔ nkɔbɛ. 
\v 16 Mɛm̀mɛ kɛ̀ n tɔ̃ nkɛ̀ bɛ̀ɛ yúní bɛkótíbɛ̀ Ediesɛɛ nɛ̀ Adiyɛɛri nɛ̀ Semmɑyɑ nɛ̀ Edunɑtɑnni nɛ̀ Nɑtɑ̃ɑ̃ nɛ̀ Sɑkɑrii nɛ̀ Mɛsudɑmmu kɛ́yíɛ́nɛ̀ Yoyɑdibu nɛ̀ Edinɑtɑ̃ɑ̃ tɔù, bɛdɛ́ bɛɛ̀ do tiè nKuyie nkuɔ́. 
\v 17 Kɛ̀ m bɛ̀ tɔ̃ Kɑsifiɑ kóo kpɑ̀ɑ̀tì Ido borɛ̀ nɛ̀ o tebìí kɛ dɔ̀ bɛ̀ɛ bɛ̀ nɑ̀kɛ́ kɛ̀ bɛ̀ɛ duɔnní bɛtɔ̃mbɛ̀ bɛ̀ɛ̀ bo ti teennɛ̀ mutɔ̃mmú Kuyie nti tũ nkù cĩ́ɛ̃̀tɛ̀ miɛkɛ. 
\v 18 Kɛ̀ Kuyie nní nti bonɛ̀, kòo ti duɔnní Sedebiɑ, onìtì wèè mɔ̀kɛ mɛyɛ̀mmɛ̀. Ò do tú Mɑdi bí kó dɛ̀mɑrɛ̀ ndɛ Defii birɛ, Sɑkɔbu yɑɑ̀birɛ nɛ̀ o bí nɛ̀ o tebìí kɛ̀ bɛ̀ ḿbo bɛnitidɑɑbɛ̀ tɛpíítɛ̀ nɛ̀ bɛ̀ni. 
\v 19 Kɛ̀ bɛ̀ɛ yíɛ́nɛ̀ Asɑbiɑ nɛ̀ o nɑntɛ̀ Yesɑyɑ Mɛdidɑɑ birɛ nɛ̀ o yɑɑ̀bí, kɛ̀ bɛ̀ ḿbo bɛnitidɑɑbɛ̀ sipísìdɛ́. 
\v 20 Dɑfiti nɛ̀ bɛkpɑ̀ɑ̀tìbɛ̀ tɔbɛ̀ bɛ̀ do tɑ̃ɑ̃tɛ́ bɛ̀ kɛ̀ bɛ̀ ḿbo bɛnìtìbɛ̀ sikɔusìdɛ́ nɛ̀ sipísìdɛ́ (220) kɛ̀ bɛ̀ɛ bɛ̀ duɔ́ nDefiibɛ, kɛ̀ bɛ̀ bo mbɛ̀ teénnɛ̀ mutɔ̃mmú Kuyie ncĩ́ɛ̃̀tɛ̀ miɛkɛ kɛ̀ bɛ̀ɛ wɑ̃ri bɛ yètɛ̀.
\p
\v 21 Dɛǹdɛ Aɑfɑ kó kukó mborɛ̀ n dɔúmmɛ̀ mɛnùboúmmɛ̀ kó dikɑ̃̀tìrì kɛ̀ ti bo boú ndinùù kɛ́kɛ̃́kùnnɛ timɑ́ɑ̀ Kuyie nyììkɛ̀, kɛ̀ ti cèmmu nnɑɑti kɛ̀ tí tuɔkɛnɛ̀ diwɛ̀ì, tínti nɛ̀ ti cɛ̃́ĩ kɔbɛ nɛ̀ ti kpɛrɛ. 
\v 22 Ifɛi iì do m bonɛ̀ m bo bekɛmɛ̀ okpɑ̀ɑ̀tì bɛhɑ̃ɑ̃pɔ̀nsɑ̃ndèèbɛ̀ kɛ̀ bɛ̀ ti cíe, kɛ́ nti kɑ̃nkɛ́ ti dootitɔbɛ̀. Ti do diɛ nkɛ́nɑ́kɛ́mu okpɑ̀ɑ̀tì kɛ dɔ̀: Kuyie nhɔ̃ mbonɛ̀mu bɛ̀ɛ̀ kù wɑɑ̀, kɛ̀ bɛ̀ɛ̀ kù yetɛ ku miɛkɛ diɛkɛ̀ɛ do bɛ ĩ́nkɛ̀. 
\v 23 Mɛm̀mɛ kɛ̀ tí boú dinùù kɛ́kuɔ́nnɛ̀ Kuyie, kɛ̀ kùu cɔutɛ́ ti bɑ́ɑmmìi kɛ́ ti teennɛ̀.
\p
\v 24 Dɛ kó difɔ̃nkúò kɛ̀ n tɑ̃ɑ̃tɛ́ ikuɔ́ nìùbɛ̀ miɛkɛ bɛkótíbɛ̀ tɛpíítɛ̀ nɛ̀ bɛ̀dɛ́bɛ̀ kɛ́yíɛ́nɛ̀ Sedebiɑ nɛ̀ Asɑbiɑ nɛ̀ bɛ tebìí miɛkɛ bɛnìtìbɛ̀ tɛpíítɛ̀. 
\v 25 Dɛ̀ndɛ bɛ ììkɛ̀ m bennɛ́mɛ̀ timɑ́tì pɛ́ítì nɛ̀ mɛsɔɔ nnɛ̀ tinɛntì okpɑ̀ɑ̀tì nɛ̀ o tũ̀mbɛ̀ nɛ̀ o ɛì kó bɛkótíbɛ̀ nɛ̀ Isidɑyɛɛribɛ bɛ̀ɛ̀ dɛ̀ bo bɛ̀ do pɑ̃mmú yɛ̀ɛ̀ pɑ̃rɛ̀ Kuyie ncĩ́ɛ̃̀tɛ̀ kpɛ́í. 
\v 26 Kɛ̀ dɛ̀ ḿbo timɑ́tì pɛ́ítì tɔ́nnì sipísìdɛ́, timɑ́tì pɛ́ítì kó tinɛntì sɑ̀ɑ̀tì tɔ́nnìbɛ̀ bɛ̀tɑ̃ɑ̃ti mɛsɔɔ ntɔ́nnì bɛ̀tɑ̃ɑ̃ti. 
\v 27 Yɛsɔɔbɔ sipísìdɛ́ kɛ̀ yɛ̀ donku mɑ̀nnɛ̀ mɛdítíbii ntɛkɔupíítɛ̀ (1000) nɛ̀ disɔɔwũɔ̃̀ kó ibòòkɛ ìdɛ́ì kɛ̀ ì wenni kɛ miɛti kɛ dònnɛ̀ mɛsɔɔ nsɑ̀ɑ̀mɛ̀ kɛ̀ i donku kpeńnì. 
\v 28 Kɛ̀ m bɛ̀ nɑ̀kɛ́ kɛ dɔ̀: Bɛ̀ di cɑ̃̀ńnɛ́ mɛ̀ɛ̀ botí kɛ̀ di tú ti Yiɛ̀ nKuyie nkɔbɛ kɛ pĩ́ nku tɔ̃mmú, tinɛntì bɛ̀ múnkɛ ti cɑ̃̀ńnɛ́mu kɛ̀ tì tu ti Yiɛ̀ nKuyie nkpɛti, kɛ̀ bɛ̀ tì pĩ̀ńnɛ̀ Kuyie ndi yɛmbɛ̀ do tũ nkù tɔ̃mmú. 
\v 29 Dí ntì tɔ mɛsɑ̀ɑ̀ nkɛ́ tì tùɔ̀kɛnɛ̀ Sedisɑdɛmmu kɛ́ tì bennɛ́ ikuɔ́ nìùbɛ̀ diɛbɛ̀ nɛ̀ Defiibɛ nɛ̀ Isidɑyɛɛribɛ kó bɛkótíbɛ̀ ììkɛ̀, kɛ́ tì dɔú nSedisɑdɛmmu ti Yiɛ̀ nKuyie nti tũ nkù cĩ́ɛ̃̀tɛ̀ miɛkɛ.
\p
\v 30 Mɛm̀mɛ ikuɔ́ nìùbɛ̀ nɛ̀ Defiibɛ kɛ̀ bɛ̀ɛ túótɛ́ dɛ kó timɑ́tì pɛ́ítì nɛ̀ mɛsɔɔ nnɛ̀ tinɛntì bɛ̀ bennɛ́ tì kɛ́ ntì tɔ kɛ́tuɔkɛnɛ̀ Sedisɑdɛmmu Kuyie nti tũ nkù cĩ́ɛ̃̀tɛ̀.
\s1 Bɛ̀ kètɛ́mɛ̀ nɛ̀ bɛ̀ tùɔ̀kɛmɛ̀ Sedisɑdɛmmu
\p
\v 31 Dibenni tɑ̃̀nkù ketiwè kó diyiè tɛpíítɛ̀ nɛ̀ didɛ́rì yiè ndi ti do ìtɛ́mɛ̀ Aɑfɑ kó kukó mborɛ̀ kɛ́nkɔri Sedisɑdɛmmu. Kɛ̀ Kuyie nní nti bonɛ̀ kucɛ kɛ́ nti kɑ̃nkɛ́ ti dootitɔbɛ̀ nɛ̀ bɛyóóbɛ̀ bo ti dintɛ́mɛ̀ kucɛ, 
\v 32 kɛ̀ tí tuɔkɛní Sedisɑdɛmmu kɛ dɔ̀ yɛwe yɛ̀tɑ̃ɑ̃ti kɛ ompu. 
\v 33 Diyiè nɑɑnnì yiè kɛ̀ tí bennɛ́ timɑ́tì pɛ́ítì nɛ̀ mɛsɔɔ nnɛ̀ tinɛntì Kuyie ncĩ́ɛ̃̀tɛ̀ miɛkɛ, kɛ̀ tí dɛ̀ duɔ́ nyikuɔ́ nìùtì Odiɑ birɛ Mɛdimɔti, kɛ̀ Pinɑsi birɛ Edeɑsɑɑ ò bonɛ̀, Defiibɛ wuɔ nkɔbɛ Sosuwee birɛ Yosɑbɑti nɛ̀ Binnuii birɛ Nɔɑdiɑ kɛ̀ bɛ̀ bɛ̀ bonɛ̀. 
\v 34 Kɛ̀ ti dɛ̀ kɑ̀ɑ ndɛmɔu, kɛ́ dɛ̀ bennɛ́ kɛ̀ dɛ̀ cɛ̃́ɛ̃́kù mmɑ kù do mɑmɛ̀.
\b
\p
\v 35 Bɛ̀ɛ̀ kó dimɑ̀ɑ̀ ìtɛ́ Bɑbidɔnni kɛ konní Sedisɑdɛmmu kɛ̀ bɛ̀ɛ fíé iwũɔ̃ ti Yiɛ̀ nKuyie nyIsidɑyɛɛribɛ tũ nkù kɛ́tuɔ, yɛnɑɑdɑkɛ̀ sipísìdɛ́ nɛ̀ yɛ̀dɛ́ɛ̀ Isidɑyɛɛribɛ wuɔ nyimɔu kpɛ́í, yɛpedɑkɛ̀ sipísìwɛi nɛ̀ yɛ̀kuɔ̀ (96), yɛpedɑpɑ̀ɑ̀ nsipísìyiekɛ̀ nɛ̀ yɛ̀yiekɛ̀ (77), yɛbɔdɑkɛ̀ tɛpíítɛ̀ nɛ̀ yɛ̀dɛ́ɛ̀ mɛyɛi ncĩ́ɛ̃́mmɛ̀ kpɛ́í, dɛmɔu kɛ̀ bɛ̀ɛ dɛ̀ tùɔ. 
\v 36 Kɛ̀ bɛ̀ɛ deè kɛ̀ n nɑ́kɛ́ bɛhɛìkɛ̀nkótíbɛ̀ nɛ̀ kukó nyɑ́ɑ̀ kóò kùmɑ̀ndɑ́ɑ̀bɛ̀ kɛ̀ bɛ̀ bo ndɑkɛ kɛ́ n teénnɛ̀ Isidɑyɛɛribɛ bɛ̀ɛ̀ pĩ nKuyie ncĩ́ɛ̃̀tɛ̀ kó mutɔ̃mmú.
\c 9
\s1 Isidɑyɛɛribɛ do tùókɛ́mɛ̀ bɛnitipòbɛ̀ bɛ̀ɛ̀ í tũ nKuyie
\p
\v 1 Kɛ̀ Isidɑyɛɛribɛ kó bɛkpɑ̀ɑ̀tìbɛ̀ɛ kɔtɛní m borɛ̀ kɛ́ n nɑ́kɛ́ kɛ dɔ̀: Isidɑyɛɛribɛ bɛmɔu ikuɔ́ nìùbɛ̀ nɛ̀ Defiibɛ bɛ̀ɛ̀ í yɑ̀tɛnɛ̀ bɛmɑ́ɑ̀ ibotí tɛì, bɛ̀ teetɛ́ Kɑnnɑhɑ̃ɑ̃ kɔbɛ mbɛ nɛ̀ Itiibɛ nɛ̀ Pedisiibɛ nɛ̀ Sebusiibɛ nɛ̀ Amɔniibɛ nɛ̀ Mɔɑbiibɛ nɛ̀ Esibiti kɔbɛ nɛ̀ Amɔriibɛ bɛ̀ dɔ̀ɔ̀ri mɛ̀ɛ̀ yɛi mmɛ. 
\v 2 Bɛmbɛ nɛ̀ bɛ bí bɛ̀ tùókɛ́ ibotí tɛì kó bɛsɑpɑ̀mbɛ̀ mbɛ kɛ puokɛ, bɛmbɛ bɛ̀ɛ̀ tu Kuyie nkɔbɛ kɛ kɔkɛ́nɛ̀ bɛ̀ɛ̀ í tú Kuyie nkɔbɛ. Bɛkpɑ̀ɑ̀tìbɛ̀ nɛ̀ sikpɑ̀ɑ̀tìbìí bɛɛ̀ tu bɛketibɛ̀ kɛ tɑ dɛ kó mɛdɔɔ̀rìmɛ̀ yɛimɛ miɛkɛ.
\p
\v 3 N kèè dìì mɔ̀nnì dɛ kó tinɑ́ɑǹtì kɛ́kɛ̃rí n yɑ̀ɑ̀tì kɛ́fɔ̃ri n yùtì nɛ̀ n dɛɛ̀nfɛ̀, kɛ́nkɑri kɛ̀ n yɛ̀mmɛ̀ cɑ̀ɑ̀rɛ̀. 
\v 4 Kɛ̀ kufɔ̃wɑɑ́ nhɑutɛ́ bɛnìtìbɛ̀ mɑbɛ̀ Kuyie nyIsidɑyɛɛribɛ tũ nkù yɑ̀ɑ̀ bo bɛ̀ potɛ́mɛ̀ kɛ̀ bɛ̀ ntíkú m borɛ̀, kɛ̀ nní nkɑri dikṹnweńnì kɛ̀ dɛ̀ɛ tuɔkɛnɛ̀ bɛ̀ ɔ̃ɔ̃ fíé dìì mɔ̀nnì kuyuoku kó iwũɔ̃.
\s1 Ɛsitɑdɑsi bɑ̀ɑ́mmɛ̀ Kuyie nyIsidɑyɛɛribɛ bɛmɔu kpɛ́í
\p
\v 5 Dɛ̀ tùɔ̀kɛ dìì mɔ̀nnì bɛ̀ bo fíé dɛ̀ kuyuoku kó iwũɔ̃ kɛ̀ n yítɛ́ní n do kɑri dɛ̀ nɛ̀ mɛyɛǹcɑɑ̀rìmɛ̀ kɛ bɑɑ dɑ́ɑ́tí tiyɑɑ̀kɛ̃títì kɛ́doroo kɛ́nínkú kɛ́youtɛ n nɔu n Yiɛ̀ Kuyie mbíɛ́kɛ̀ kɛ́ kù bɑ́ntɛ̀ kɛ dɔ̀: 
\v 6 N Yiɛ̀ nKuyie, ifɛi iì m bo n yí dɑ̀ɑ́tí kɛ bo mbúɔ́ ɑ bíɛ́kɛ̀ ti cɑ̀ɑ̀rìmɛ̀ mɛɛ̀ dɛukɛ kɛ sèńtɛ́ ti yɔ, kɛ̀ ti yɛi nyotí kɛ kɑ́ɑ́ ntiwɛtì. 
\v 7 Nɛ̀ ti yɛmbɛ̀ kó dimɔ̀nnì nɛ̀ yíenní ti cɑɑ̀rìmɛ̀ í sénní dɛɛ̀ te kɛ̀ ti dootitɔbɛ̀ ti nɑ tínti nɛ̀ ti kó bɛkpɑ̀ɑ̀tìbɛ̀ nɛ̀ ti kó ikuɔ́ nìùbɛ̀, kɛ ti kɔù kɛ̀ ti nɑɑ́ ntidɑɑtì kɛ̀ bɛ̀ fèkù ti kpɛrɛ kɛ̀ ti tɑ ifɛi miɛkɛ, dɛ̀ mɛ̀ mbo kɛ ti dòmmɛ̀ yíe. 
\v 8 Kɛ̀ dɛ̀ í tú di mmɔ̀nnì ti Yiɛ̀ nKuyie ɑ mɛ nti kuɔ́mmɛ̀ mɛsémmɛ̀ kɛ duɔ́ nkɛ̀ bɛ̀mɑbɛ̀ yentɛ́, kɑ̀ɑ ti kɑ̀nnɛ ɑ cɑ̃̀ńnɛ́ dìì bòrì ti kpɛ́í ndimɔ̀nnì sɑ́m̀pɔ́rì miɛkɛ kɛ̀ ti yɛ̀mmɛ̀ cɑ̀tɛ́ kɑ̀ɑ ti om̀pùnnɛ. 
\v 9 Bɑ́ nɛ̀ ti mɛ ntúmɛ̀ tidɑɑtì, ti Yiɛ̀ nKuyie nhɑ í ti dootóo, fɔ̃́ɔ̃̀ duɔ́ nkɛ̀ ti mɔkɛ mɛtɑummɛ̀ sɑ̀ɑ̀mɛ̀ nɛ̀ Pɛrɛsi kóo kpɑ̀ɑ̀tì, kòò ti pɑ̃ kucɛ kɛ̀ ti bo íi nhɑ cĩ́ɛ̃̀tɛ̀ tɛ̀ɛ̀ do, kɛ́mɔɔtɛ ti bo mborɛ̀ Sedisɑdɛmmu Sudɑɑ tenkɛ̀ miɛkɛ.
\p
\v 10 Ti Yiɛ̀ nKuyie nkɛ̀ tiì nti tùɔ̀kɛní ti bo yĩ́ bɑ? Ti yetɛ mɛ̀ɛ̀ kpɛ́í nkɛ ɑ nùù 
\v 11 ɑ do nɑ̀kɛ́ dì ɑ pɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ɛ dì wɑ̃̀ri, dìì tu: Dihɛì di tɑti dì kɛ bo dì tiekɛ, dì tu dihɛì mɛyɛi mbo dì ndi, bɛnìtìbɛ̀ bɛ̀ɛ̀ dì bo bɛɛ̀ dɔ̀ɔri isɔkɛ dihɛì dimɔu miɛkɛ. 
\v 12 Nɛ̀ dɛ kpɛ́í di bɑ́ɑ́ bɛ̀ duɔ́ ndi kó bɛsɑmpɑ̀mbɛ̀ kɛ̀ bɛ̀ɛ puokɛ, di mɛ mbɑ́ɑ́ túókɛ́ bɛ kó bɛsɑpɑ̀mbɛ̀ kɛ́puó ndi bí. Di bɑ́ nwɑnti dɛ kó ibotí kó kuyɛǹnɑɑtí mɑkù bìtì, yoo bɛ kó mmɛsɑ̀ɑ̀ mmɑmɛ̀! Mɛm̀mɛ di bo kpenkɛmɛ̀ kɛ́nyo ndɛ̀ɛ̀ tu dɛsɑ̀ɑ̀rɛ̀ dɛ kó dihɛì miɛkɛ, kɛ̀ di bíi sɔɔtɛ́ kɛ́nyo dɛ kó dihɛì kó dɛsɑ̀ɑ̀rɛ̀ sɑ̃́ɑ̃̀. 
\v 13 Ti yɛi nnɛ̀ ti yetímɛ̀ dɛɛ̀ sũ̀ṹ ndɛɛ̀ te kɛ̀ tiì nti tùɔ̀kɛní, nɛ̀ mɛmmɛ ti Yiɛ̀ nKuyie mbɑ́ ɑ í yũ̀ɔ̃́ nti to ɑ do dò nkɛ́ yɛ̀ yũ̀ɔ̃́mmɛ̀, kɛ ti sùɔ́ mbɛ nnìtìbɛ̀. 
\v 14 Ti tɛ̃́nkɛ bɑ́ɑ́ yie nkɛ́cɑɑ̀rɛ̀ ɑ tɑnnɔ̀ kɛ́tɑunnɛ̀ timɑ́ɑ̀ bɛbɔɔféúbɛ̀ kɛ́ntóú bɛ kó bɛsɑpɑ̀mbɛ̀ kɛ puokú ɑ miɛkɛ yɑ̀ɑ̀ bo ti yɛ̀ kɑ̀ɑ ti kuɔ pɑ́íí bɑ́ ɑ bɑ́ɑ́ súɔ́ nhòmɔù. 
\v 15 A wetímu fɔ̃́ nti Yiɛ̀ nKuyie tínti Isidɑyɛɛribɛ ti tũ nkù, dɛɛ̀ te kɛ̀ ti kpɑɑ́ yíe nkɛ bo ɑ ììkɛ̀. Ti bɑntɛ́mu ti cɑɑ̀rìmɛ̀, ti kóo mɔù do í mɑ̀nnɛ̀ kɛ́nkpɑɑ́ kɛ fòù.
\c 10
\s1 Sifubɛ bɛ̀timɛ̀ bɛ̀ do tùókɛ́ bɛ̀ɛ̀ nitipòbɛ̀ ibotí tɛì miɛkɛ
\p
\v 1 Kɛ̀ Ɛsitɑdɑsi nnínkú Kuyie ncĩ́ɛ̃̀tɛ̀ ììkɛ̀ kɛ kuɔ̀ nkɛ kù bɑ̀ɑ́ nkɛ dɑ́ɑnko bɛ yɛi, kɛ̀ Isidɑyɛɛribɛ còḿmú o borɛ̀ ditĩ̀nnì pɛ́u bɛnitidɑɑbɛ̀ nɛ̀ bɛnitipòbɛ̀ nɛ̀ ibí, kɛ kuɔ̀ ntinɔǹniɛti. 
\v 2 Mɛm̀mɛ Edɑmmu birɛ Yeyɛɛdi kó dɛbirɛ Sekɑnniyɑ nɑ̀kɛ́mɛ̀ Ɛsitɑdɑsi kɛ dɔ̀: Kuyie, ti cɑ̀ɑ̀rɛ̀mu ti tùókɛ́mɛ̀ bɛnitipòbɛ̀ ibotí tɛì ìì bo di nhɛì miɛkɛ i cuokɛ̀ kɛ puokɛ, nɛ̀ mɛmmɛ kucɛ kpɑɑ́ bomu tínti Isidɑyɛɛribɛ ti kpɛ́í. 
\v 3 Ti dò nkɛ́túótɛ́ mɛtɑ̃ɑ̃tímɛ̀ mmɛ Kuyie nyììkɛ̀ kɛ́bɛti ti cuokɛ̀ ibotí tɛì kó bɛnitipòbɛ̀ ti tùókɛ́ bɛ̀ nɛ̀ bɛ bí kɛ́ntũ nhokótì Ɛsitɑdɑsi nɛ̀ bɛ̀ɛ̀ mɔ̀kɛ Kuyie nti tũ nkù kó kufɔ̃wɑɑ́ mbɛ̀ bo ti duɔ́ ndìì nùù. Ti yó ntũ Kuyie nkuɔ́ yɛ̃mmɛ̀ mmɛ. 
\v 4 Á ítɛ́ kɛ́cómmú! Fɔ̃́ɔ̃̀ te dɛ kó mutɔ̃mmú ɑ bɑ́ nyĩɛ̃̀kù ti bo ɑ fɔ̃nkúò ndi, pĩ́ mmutɔ̃mmú.
\p
\v 5 Kɛ̀ Ɛsitɑdɑsii ítɛ́ kɛ́cómmú kɛ́duɔ́ nkɛ̀ ikuɔ́ nìùbɛ̀ɛ pɑrìkɛ̀. Kɛ̀ Defiibɛɛ pɑrìkɛ̀ kɛ̀ Isidɑyɛɛribɛ bɛmɔuu pɑrìkɛ̀ kɛ dɔ̀, bɛ̀ yóó dɔɔ̀mu Sekɑnniyɑ do bɛ́i ntì. 
\v 6 Kɛ̀ Ɛsitɑdɑsi ítɛ́ Kuyie ncĩ́ɛ̃̀tɛ̀ borɛ̀, kɛ́kɔtɛ kɛ́tɑ Ediɑsibu birɛ Yoɑnɑnni dieku kɛ́yié mbɑ́ ò í ndi, ò mɛ nyí nyɑ̃̀ mɛniɛ, kòo yɛ̀mmɛ̀ cɑ̀ɑ̀rɛ̀ mɛyɛi nho kɔbɛ bɛ̀ɛ̀ yentɛ́ kɛ konní bɛ̀ dɔ̀ɔ̀ mɛ̀ kpɛ́í.
\p
\v 7 Kɛ̀ bɛ̀ɛ pĩɛ̃kɛ́ Sudɑɑ tenkɛ̀ miɛkɛ nɛ̀ Sedisɑdɛmmu Sifubɛ bɛ̀ɛ̀ kó dimɑ̀ɑ̀ konní bɛ kpɛ́í nkɛ dɔ̀, bɛ̀ɛ tíí nSedisɑdɛmmu. 
\v 8 Bɛkpɑ̀ɑ̀tìbɛ̀ nɛ̀ bɛhɛikɛ̀nkótíbɛ̀ kɛ̀ bɛ̀ɛ tɑ̃ɑ̃tɛ́ kɛ tú: Kɛ̀ yɛwe yɛ̀tɑ̃ɑ̃ti pɛ̃ɛ̃tɛ́ kɛ̀ wèè í kɔ̀tɛní mɛtíímmɛ̀ bɛ̀ɛ ò dènnɛ Isidɑyɛɛribɛ miɛkɛ kɛ́túótɛ́ o kpɛrɛ.
\p
\v 9 Dɛ mɔ̀nnì kɛ̀ Sudɑɑ kɔbɛ bɛmɔu nɛ̀ Bɛnsɑmɛɛ kɔbɛ kɛ̀ bɛ̀ɛ tíí nSedisɑdɛmmu yɛwe yɛ̀tɑ̃ɑ̃ti yɛnyɛ miɛkɛ otɑ̃̀nkù owɛínwè kó diyiè sipísìdɛ́, kɛ̀ bɛnìtìbɛ̀ bɛmɔu ntíkú Kuyie ncĩ́ɛ̃̀tɛ̀ kɛ kpeutí nɛ̀ dɛ kó tinɑ́ɑǹtì kpɛ́í nɛ̀ fɛtɑɑfɛ̀ nìumɛ̀. 
\v 10 Kɛ̀ ikuɔ́ nìùtì Ɛsitɑdɑsii ítɛ́ kɛ́ bɛ̀ nɑ̀kɛ́ kɛ dɔ̀: Di cɑ̀ɑ̀rɛ̀mu di tùótɛ́ dɛ̀ ibotí tɛì kó bɛnitipòbɛ̀ kɛ̀ dɛ kó mɛyɛi nyìɛ́ mɛtɛ̃mɛ̀ ĩ́nkɛ̀. 
\v 11 Di mmɔ̀nnì bɑntɛ́nɛ̀ di cɑɑ̀rìmɛ̀ ti Yiɛ̀ nKuyie ndi yɛmbɛ̀ do tũ nkù ììkɛ̀, kɛ́dɔɔ̀ kù dɔ́mɛ̀ kɛ́yɑtɛnɛ̀ dimɑ́ɑ̀ ibotí tɛì kɔbɛ bɛ̀ɛ̀ bo di nhɛì miɛkɛ kɛ́bɛti i kó bɛnitipòbɛ̀ di tùókɛ́ bɛ̀.
\p
\v 12 Bɛnìtìbɛ̀ bɛmɔu bɛ̀ɛ̀ do tíkú kɛ̀ bɛ̀ɛ pĩɛ̃kɛ́ kɛ dɔ̀: Ti dò nkɛ́dɔɔ̀mu ɑ bɛ́i ntì. 
\v 13 Ti nɛ́ sũmu kɛ̀ dɛ̀ wɛ̃̀tɛ kɛ tú diyɔ̃ɔ̃̀, ti bɑ́ɑ́ nɑ kɛ́mbo ditowɑɑ̀, dɛ̀ mɛ nyí tú diyiè dìmɑ́ɑ̀ kó mutɔ̃mmú yoo yɛ̀dɛ́ɛ̀, ti í sénní tínti bɛ̀ɛ̀ bo dɛ kó mɛyɛi mmiɛkɛ. 
\v 14 Ti kó bɛkpɑ̀ɑ̀tìbɛ̀ ḿbo diɛ nnɛ̀ ti kó yɛyètɛ̀, bɛ̀ɛ̀ kó dimɑ̀ɑ̀ tùókɛ́ bɛnitipòbɛ̀ ibotí tɛì miɛkɛ kɛ̀ bɛ̀ nkɔrìní di bɛ̀ kèétɛ́ yɛ̀ɛ̀ we, kɛ́nnɛínɛ̀ bɛ ɛkɛ̀ kó bɛkótíbɛ̀ nɛ̀ bɛbeémbɛ̀, kɛ̀ ti nkémmúnɛ̀ Kuyie ndo ti yɛ̀ kɛ̀ɛ̀ miɛkɛ dɛ kó mɛyɛi nkpɛ́í nkɛ̀ bo bonkɛmɛ̀.
\p
\v 15 Kɛ̀ Asɑyɛɛdi birɛ Yonnɑtɑnni nɛ̀ Tikifɑ birɛ Yɑsiɑ kɛ̀ bɛɛ̀ mɑ́ɑ̀ yetɛ dɛ kó tinɑ́ɑǹtì, kɛ̀ Mɛsudɑmmu nɛ̀ Sɑbetɑii Defii wuɔ nkou kɛ̀ bɛ̀ɛ bɛ̀ kòńnɛ́. 
\v 16 Bɑ́ nɛ̀ mɛmmɛ kɛ̀ Isidɑyɛɛribɛɛ dɔɔ̀ bɛ̀ do tɑ̃ɑ̃tɛ́ tì kɛ̀ ikuɔ́ nìùtì Ɛsitɑdɑsii tɑ̃ɑ̃tɛ́ sicɛ̃́ĩ kó bɛkótíbɛ̀ bɑ́ tɛ̀ɛ̀ cĩ́ɛ̃̀tɛ̀ kɛ́wɑ̃ri bɛ yètɛ̀, kɛ̀ bɛ̀ɛ kɑri otɑ̃̀nkù píínwè kó diyiè ketirì kɛ bo yɑ̀ dɛ kó tinɑ́ɑǹtì. 
\v 17 Dibenni tɛrì kóo tɑ̃̀nkù ketiwè kó diyiè ketirì do ndi bɛ̀ dèèmɛ̀ bɛ̀ɛ̀ do tùókɛ́ ibotí tɛì kó bɛnitipòbɛ̀ dɛ kó tinɑ́ɑǹtì.
\s1 Bɛ̀ bɑ̀tɛmɛ̀ bɛ̀ɛ̀ do tùókɛ́ ibotí tɛì kó bɛnitipòbɛ̀
\p
\v 18 Ikuɔ́ nìùbɛ̀ miɛkɛ ntɛ bɛ̀ɛ̀ do tùókɛ́ ibotí tɛì kó bɛnitipòbɛ̀ bɛ yètɛ̀: Sosuwee nɑɑ̀mùnkù miɛkɛ Yotisɑdɑki yɑɑ̀bí nɛ̀ bɛ tebìí, Mɑseyɑ nɛ̀ Ediesɛɛ nɛ̀ Yɑdibu nɛ̀ Kedɑdiɑ. 
\v 19 Kɛ̀ bɛ̀ɛ bɛ́i bɛnìtìbɛ̀ bɛmɔu ììkɛ̀ kɛ dɔ̀, bɛ̀ bo bɛti bɛ pobɛ̀, kɛ́féútɛ́ dipedɑɑ̀ mɛyɛi nhũtímù kpɛ́í. 
\v 20 Imɛɛ nɑɑ̀mùnkù kɔbɛ Anɑnni nɛ̀ Sebɑdiɑ 
\v 21 Adimmu nɑɑ̀mùnkù kɔbɛ Mɑseyɑ nɛ̀ Ediyɑ nɛ̀ Semmɑyɑ nɛ̀ Yeyɛɛdi nɛ̀ Usiyɑ 
\v 22 Pɑsuu nɑɑ̀mùnkù kɔbɛ Ediyoyennɑii nɛ̀ Mɑseyɑ nɛ̀ Isimɑyɛɛri nɛ̀ Nɑtɑnnɛyɛɛdi nɛ̀ Yosɑbɑdi nɛ̀ Edɑsɑɑ.
\p
\v 23 Defii nɑɑ̀mùnkù kɔbɛ: Yosɑbɑdi nɛ̀ Simmɛii nɛ̀ Kedɑyɑ kɛ̀ bɛtɔbɛ̀ ò yu kɛ tú Keditɑ yoo Petɑyɑɑ nɛ̀ Yeudɑ nɛ̀ Ediesɛɛ.
\p
\v 24 Kɛ̀ bɛdèmbɛ̀ kó kutɔ̃nkù kou ḿbo weè tu Ediɑsibu, bɛ̀ɛ̀ bɑ̀ɑ Kuyie ncĩ́ɛ̃̀tɛ̀, kɛ̀ bɛ kó kutɔ̃nkù kɔbɛ ḿbo bɛɛ̀ yètɛ̀ tu: Sɑdummu nɛ̀ Tedɛmmu nɛ̀ Uudi.
\p
\v 25 Isidɑyɛɛribɛ sɔmbɛ miɛkɛ ntɛ bɛ̀ɛ̀ do tùókɛ́ ibotí tɛì kó bɛnitipòbɛ̀ Pɑdosi nɑɑ̀mùnkù kɔbɛ Adɑmmiɑ nɛ̀ Isiyɑ Mɑdikiɑ Minyɑminni nɛ̀ Edeɑsɑɑ Mɑdikiɑ tɔu nɛ̀ Bennɑyɑ.
\m
\v 26 Edɑmmu nɑɑ̀mùnkù kɔbɛ: Mɑtɑnniyɑ nɛ̀ Sekɑnniyɑ nɛ̀ Yeyɛɛdi nɛ̀ Abudi nɛ̀ Yedemɔti nɛ̀ Edii.
\m
\v 27 Sɑtuu nɑɑ̀mùnkù kɔbɛ: Ediyoyennɑii nɛ̀ Ediɑsibu nɛ̀ Mɑtɑnniyɑ nɛ̀ Yedemɔti nɛ̀ Sɑbɑdi nɛ̀ Asisɑ.
\m
\v 28 Bebɑii nɑɑ̀mùnkù kɔbɛ Yeoɑnɑnni nɛ̀ Anɑnniyɑ nɛ̀ Bɑbɑii nɛ̀ Atidɑii.
\m
\v 29 Bɑni nɑɑ̀mùnkù kɔbɛ Mɛsudɑmmu nɛ̀ Mɑduki nɛ̀ Adɑyɑ nɛ̀ Yɑsubu nɛ̀ Seɑdi nɛ̀ Yedɑmɔti.
\m
\v 30 Pɑsɑti-Mɔɑbu nɑɑ̀mùnkù kɔbɛ Adinɑ nɛ̀ Kedɑdi nɛ̀ Bennɑyɑ nɛ̀ Mɑseyɑ nɛ̀ Mɑtɑnniyɑ nɛ̀ Besɑdɛdi Binnuii Mɑnɑnsee.
\m
\v 31 Adimmu nɑɑ̀mùnkù kou Ediesɛɛ nɛ̀ Isiɑ nɛ̀ Mɑdiɑ nɛ̀ Semmɑyɑ nɛ̀ Simmɛɔ̃ɔ̃,
\m
\v 32 nɛ̀ Bɛnsɑmɛɛ nɛ̀ Mɑduki tɔù nɛ̀ Semmɑdiɑ.
\m
\v 33 Asummu nɑɑ̀mùnkù kɔbɛ, Mɑtennɑii nɛ̀ Mɑtɑtɑ nɛ̀ Sɑbɑti. Edifedee nɛ̀ Yedemmɑii nɛ̀ Mɑnɑnsee nɛ̀ Simmɛii.
\m
\v 34 Bɑni nɑɑ̀mùnkù kɔbɛ, Mɑdɑii Amudɑmu nɛ̀ Uyɛɛdi,
\m
\v 35 nɛ̀ Bennɑyɑ Bedeiyɑ nɛ̀ Keduii.
\m
\v 36 Wɑnniyɑ nɛ̀ Mɛdimɔti nɛ̀ Ediɑsibu,
\m
\v 37 nɛ̀ Mɑtɑnniyɑ nɛ̀ Mɑtennɑii nɛ̀ Yɑsɑii,
\m
\v 38 nɛ̀ Bɑnni nɛ̀ Binnuii nɛ̀ Simmɛii,
\m
\v 39 nɛ̀ Sedemiɑ nɛ̀ Nɑtɑnni nɛ̀ Adɑyɑ.
\m
\v 40 Mɑkinɑdebɑii nɛ̀ Sɑsɑii nɛ̀ Sɑdɑii.
\m
\v 41 Asɑdɛɛdi nɛ̀ Sedemiɑ nɛ̀ Semmɑdiɑ.
\m
\v 42 Sɑdummu nɛ̀ Amɑdiɑ nɛ̀ Sosɛfu.
\m
\v 43 Nɛbo nɑɑ̀mùnkù kɔbɛ, Yeiyɛɛdi nɛ̀ Mɑtitiɑ nɛ̀ Sɑbɑdi nɛ̀ Sebinɑ nɛ̀ Yɑdɑii nɛ̀ Yoyɛɛdi nɛ̀ Bennɑyɑ.
\p
\v 44 Bɛmbɛ kó dimɑ̀ɑ̀ tu bɛ̀ɛ̀ do tùókɛ́ bɛmbɛ ibotí tɛì kó bɛnitipòbɛ̀. Kɛ̀ bɛ̀mɑbɛ̀ kɔbɛɛ bɛ̀ piɛ́nɛ̀ ibí.