\id EST di17.all Novembre 1998 BJ Parakou B{enin
\ide UTF-8
\h Ɛsitɛɛ
\toc1 Ɛsitɛɛ
\toc2 ƐSITƐƐ
\mt1 Ɛsitɛɛ
\imt1 Di mpɑ́tíri tɔ tìì nɑ́ɑǹtì
\ip Dɛ kó dipɑ́tíri ti nɑ́ɑ́ ntìì do dɔ̀ɔ̀ tì nti Pɛrisi kó kɛtenkɛ̀ bɛ kó dihɛì bɛ̀ tu dì Susi di miɛkɛ Sifubɛ do kɛ̀ tu dìì mɔ̀nnì tidɑɑtì. Onìtì mɔù bɛ̀ tu wè Amɑɑ kòò í ndɔ́ Sifubɛ kɛ́nwɑnti ò bo yĩ́mɛ̀ kɛ̀ bɛ̀ɛ kuɔ Sifubɛ bɛ̀ɛ̀ kɛ̀ bo.
\ip Sifubɛ kóò sɑpɑ̀ɑ̀ mmɔù bɛ̀ tu wè Ɛsitɛɛ kòo kɛ nɑɑ́ nhokpɑ̀ɑ̀tì pokù, weè do tì nɑ̀kɛ́ okpɑ̀ɑ̀tì kɛ́nte kɛ̀ bɛ̀ í nkùɔ Sifubɛ bɛ̀ɛ̀ do bo bɛ ɛì miɛkɛ. Nɛ̀ Kuyie nkó mɛteèmmɛ̀ kɛ̀ bɛ̀ɛ kuɔ Amɑɑ kɛ̀ Sifubɛɛ cootɛ́.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Bɛ̀ tɑ̃ɑ̃tɛ́mɛ̀ Ɛsitɛɛ kòo bo nɑɑ́ nhokpɑ̀ɑ̀tì pokù 1:1-2:20
\io1 2. Ɛsitɛɛ coommɛ̀ Sifubɛ 2:21-7:10
\io1 3. Sifubɛ pɛ̀itɛmɛ̀ bɛ dootitɔbɛ̀ 8-10
\c 1
\s1 Okpɑ̀ɑ̀tì Asuyeduusi ɑ̃nnɛ́mɛ̀ dibɑnni
\p
\v 1 Asuyeduusi tu dìì mɔ̀nnì okpɑ̀ɑ̀tì kɛ bɑkɛ́ Ɛ̃ndi nɛ̀ Etiopii itempɛ̃ ntɛkɔ̀ùtɛ̀ nɛ̀ sipísìdɛ́ nɛ̀ iyìekɛ̀ (127), 
\v 2 kɛ kɑri dihɛidiɛ̀ Susi miɛkɛ nkɛ. 
\v 3 O kpɑ̀tì benni tɑ̃ɑ̃́nnì kòo ɑ̃nnɛ́ dibɑnni, kɛ́yú bɛnitidiɛbɛ̀ nɛ̀ mìníísìbɛ̀ nɛ̀ iwɛ̃ĩ yɛmbɛ̀ Pɛrisi nɛ̀ Mɛdii kɔbɛ nɛ̀ kùmɑ̀ndɑ́ɑ̀bɛ̀, 
\v 4 kɛ́dennɛní tikpɑ̀ɑ̀tìnɛntì nɛ̀ tinɛntì tɛtì tìì mìɛ̀ti, kɛ̀ dɛ kó dibɑnnii mɔntɛ kɛ́mmɔkɛ bɛtɑ̃̀ɑ̃̀bɛ̀ bɛ̀kuɔ̀. 
\v 5 Dɛ kó difɔ̃nkúò kòo yú dihɛidiɛ̀ Susi kɔbɛ bɛmɔu, bɛkperíbɛ̀ nɛ̀ bɛcĩ̀rìbɛ̀, kɛ́ɑ̃nnɛ́ dibɑnni o cĩ́ɛ̃̀tɛ̀ towɑɑ̀ kɛ̀ dì mmɔkɛ yɛwe yɛ̀yiekɛ̀. 
\v 6 Kòo núnnɛ́ tiyɑɑ̀pɛ́ítì nɛ̀ tìì dò nnúúsí nɛ̀ tiwũɔ̃tì, kɛ́cɑ́tínnɛ́ dɛmɑ́mɑ́nnɛ̀ mɛsɔɔ nkpɛrɛ, kɛ́duɔ́ nkɛ̀ bɛ̀ɛ pítínnɛ́ yɛtɑ̃́kperɛ̀ kó yɛsɑ̃ǹkɛ̀, kɛ́dennɛní mɛsɔɔ nnɛ̀ timɑ́tì pɛ́ítì kó yɛdúɔ̀ kɛ́dɔú mbɛ ce dɛ̀ kɛ dɑ̀ri yɛtɑ̃́píɛ̀ nɛ̀ yɛwũɔ̃yɛ̀ nɛ̀ yɛsɔ̀ùyɛ̀. 
\v 7 Bɛ̀ do yɔ̃ǹnɛ̀ ìì bòòkɛ mɛnɑɑ̀ nyì do tú mɛsɔɔ nkpɛyi nyi kɛ cɑ̃́ɑ̃́ nyibotí ibotí, kɛ̀ mɛnɑɑ̀ nsũ kɛ̀ bɛ̀ toti bɛnìtìbɛ̀ bɛmɔu. 
\v 8 Bɑ́ wè kòo nyɔ̃̀ nhò dɔ́mɛ̀, kɛ yɛ̃́ okpɑ̀ɑ̀tì do nɑ̀kɛ́mɛ̀ o tɔ̃mbɛ̀ kɛ dɔ̀ bɛ̀ nduɔ̀ mbɑ́ wè ò dɔ́mɛ̀. 
\v 9 Kòo nitipokpɑ̀ɑ̀tì Fɑsitii mɛ ntó ɑ̃ɑ̃̀ bɛnitipòbɛ̀ dibɑnni okpɑ̀ɑ̀tì Asuyeduusi cĩ́ɛ̃̀tɛ̀.
\s1 Okpɑ̀ɑ̀tì pokù Fɑsitii yetɛmɛ̀ o dɔù kpɛti
\p
\v 10 Diyiè yiénnì yiè kòo kpɑ̀ɑ̀tìi yɑ̃̀ mɛnɑɑ̀ nkòo yɛ̀mmɛ̀ɛ cɑ́tɛ́, kòo yú bɛ̀ fɔ̃̀mmu bɛ̀ kɛ̀ bɛ̀ pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú, bɛ̀ɛ̀ tu: Mɛumɑɑ nɛ̀ Bisitɑɑ nɛ̀ Adibonɑ nɛ̀ Bikitɑɑ nɛ̀ Akɑkitɑɑ nɛ̀ Setɑɑ nɛ̀ Kɑdikɑsi. 
\v 11 Kɛ dɔ̀ bɛ̀ɛ kɔtɛ kɛ́yúní onitipokpɑ̀ɑ̀tì Fɑsitii kòo nhókɛ́ dikpɑ̀ɑ̀tìpìì kɛ́kɔtɛní kɛ́bɛnkɛ o wenniku bɛnìtìbɛ̀ nɛ̀ bɛnitidiɛbɛ̀ kɛ yɛ̃́ ò wennimɛ̀ mɛdiɛ̀. 
\v 12 Kòo kpɑ̀ɑ̀tì tɔ̃mbɛ̀ɛ kɔtɛ kɛ́nɑ́kɛ́ Fɑsitii kòo yetɛ kɛ í nkɔ̀tɛ, kòo kpɑ̀ɑ̀tì miɛkɛɛ pɛikɛ mɛdiɛ̀. 
\v 13 Kòo yú mɛciì nyɛmbɛ̀ bɛ̀ɛ̀ yɛ̃́ ikuɔ́ nɛ̀ tibeéntì kɛ̀ bɛ̀ɛ tíí nho borɛ̀. 
\v 14 Bɛ̀ɛ̀ tu Kɑsenɑ nɛ̀ Setɑɑ nɛ̀ Adimɑtɑ nɛ̀ Tɑsisi nɛ̀ Mɛdɛsi nɛ̀ Mɑɑseonɑɑ nɛ̀ Mɛmukɑ̃ɑ̃ bɛyiekɛ̀ bɛ̀ do tú Pɛrisi nɛ̀ Mɛdii kɔbɛ mbɛ, bɛɛ̀ do bɑkɛ́ dihɛì ììkɛ̀ kɛ tũ nhokpɑ̀ɑ̀tì. 
\v 15 Kòo kpɑ̀ɑ̀tìi bɛ̀ bekɛ kɛ dɔ̀: Ti dò nkɛ́dɔɔ̀ bɑ onitipokpɑ̀ɑ̀tì Fɑsitii wèè yetɛ n tɔ̃ nkɛ̀ bɛ̀ ò nɑ̀kɛ́ tì?
\p
\v 16 Kɛ̀ Mɛmukɑ̃ɑ̃ nɑ́kɛ́ okpɑ̀ɑ̀tì nɛ̀ mìníísìbɛ̀ kɛ dɔ̀: Onitipokpɑ̀ɑ̀tì í ɑ̃nnɛ́ okpɑ̀ɑ̀tì mɑ́ɑ̀ ndi ifɛi, wè ì ɑ̃nnɛ́mu mìníísìbɛ̀ nɛ̀ bɛnìtìbɛ̀ bɛmɔu, itempɛ̃ nyimɔu. 
\v 17 Bɛnitipòbɛ̀ bɛmɔu yóó keèmu okpɑ̀ɑ̀tì yumɛ̀ onitipokpɑ̀ɑ̀tì Fɑsitii kòò yetɛ kɛ múnkɛ nyetírí bɛ dɑɑbɛ̀ kpɛti, kɛ tú okpɑ̀ɑ̀tì do yu o pokù kòo yetɛmu. 
\v 18 Pɛrisi nɛ̀ Mɛdii kóò mìníísìbɛ̀ pobɛ̀ yóó tì kèèmu kɛ́túótɛ́ dɛ kó mɛborimɛ kɛ́nyetírí bɛ dɑɑbɛ̀ kpɛti, kɛ íinko bɛ miɛkɛ. 
\v 19 Okpɑ̀ɑ̀tì, kɑ̀ɑ bo yie nhɑ wɑ̃ri yɛpɑ́tɛ kɛ́dennɛ Fɑsitii kɛ́wɑɑ́ nhotɔù wèè ò pɛ̃ɛ̃tɛ́, kòo cɔutɛ́ o fɔ̃̀tìrì kɛ̀ dɛ kó tinɑ́ɑǹtìi wɑ̃ri Pɛrisi nɛ̀ Mɛdii kuɔ́ pɑ́tíri miɛkɛ bɑ́ òmɔù bɑ́ɑ́ nɑ kɛ́ tì cèètɛ. 
\v 20 A tenkɛ̀ diɛkɛ̀ kɛmɔu kɔbɛ bo keè dìì mɔ̀nnì ɑ dɔ̀ɔ̀ tì bɑ́ wèè nitipòkù bo nyíé nho dɔù kpɛti, bɑ́ kòò dɛu yoo ò kɛ̃ńnì.
\p
\v 21 Kɛ̀ dɛ kó tinɑ́ɑǹtìi nɑrikɛ okpɑ̀ɑ̀tì nɛ̀ mìníísìbɛ̀ kɛ̀ bɛ̀ɛ yie Mɛmukɑ̃ɑ̃ kpɛti. 
\v 22 Kòo wɑ̃ri yɛpɑ́tɛ itempɛ̃ nyimɔu bɑ́ kùù botí, ku wɑ̃rii dòmmɛ̀ nɛ̀ ku nɑ́ɑǹtì kɛ dɔ̀, bɑ́ wèè nitidɔ̀ù mbɑkɛ́ o cĩ́ɛ̃̀tɛ̀ kɛ tɛ̀ nɑ̀ɑ́ nho botí nɑ́ɑǹtì.
\c 2
\s1 Ɛsitɛɛ nɑɑ́mmɛ̀ onitipokpɑ̀ɑ̀tì
\p
\v 1 Kɛ̀ dɛ̀ɛ mɔntɛ kòo kpɑ̀ɑ̀tì miɛkɛɛ do, kòo dentɛní Fɑsitii do dɔ̀ɔ̀ dɛ̀ nɛ̀ bɛ̀ do ò nɑ̀kɛ́ tì. 
\v 2 Kòo kpɑ̀ɑ̀tì tɔ̃mbɛ̀ dɔ̀: Tí wɑɑ́nnɛ̀ okpɑ̀ɑ̀tì bɛsɑpɑ̀mbɛ̀ bɛ̀ɛ̀ wenni kɛ mu nyí yɛ̃́ bɛnitidɑɑbɛ̀. 
\v 3 Okpɑ̀ɑ̀tì ɑ́ dɛi bɛnìtìbɛ̀ ɑ tempɛ̃ nyimɔu, kɛ̀ bɛ̀ɛ tɑ̃ɑ̃tɛ́ bɛsɑpɑ̀mbɛ̀ bɛ̀ɛ̀ wenni kɛ́ bɛ̀ tɑnnɛ́ tɛnitipocĩ́ɛ̃̀tɛ̀ dihɛidiɛ̀ Susi, kɛ̀ Ekee ndɑkɛ bɛ kpɛ́í nkɛ bɛ̀ duɔ̀ ndɛ̀ɛ̀ bo wénkùnnɛ bɛ kɔ̃̀ntì. Ekee do tú bɛ̀ fɔ̃̀ntɛ wènwe kòò pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú kɛ bɑɑ bɛnitipòbɛ̀. 
\v 4 Kɛ̀ bɛ̀ dɔ̀: Okpɑ̀ɑ̀tì, ɑ bo pɛ́nsìrì wèè sɑpɑ̀ɑ̀ mbɛ miɛkɛ kòo cɔutɛ́ onitipokpɑ̀ɑ̀tì Fɑsitii fɔ̃̀tìrì.
\p Kòo kpɑ̀ɑ̀tìi yie ndɛ kó tinɑ́ɑǹtì.
\b
\p
\v 5 Kɛ sɔ̃́ nSifu mɔù bo Susi dihɛidiɛ̀ kòo yètìrì tu Mɑɑdosee Yɑii birɛ, Simmɛii nɛ̀ Kiisi bɛ yɑɑ̀birɛ Bɛnsɑmɛɛ wuɔ nkou. 
\v 6 Nɛbukɑnnɛsɑɑ do nɑ Sedisɑdɛmmu kɛ́pĩ́mmú bɛ̀mbɛ kɛ́kònnɛ̀. Bɛ̀ do pĩ mɛ̀mmɛ Yekonniyɑ Sudɑɑ kóo kpɑ̀ɑ̀tì. 
\v 7 Kɛ sɔ̃́ nhƐsitɛɛ yɛmbɛ̀ ku kɛ̀ bɛ tebitɛ Mɑɑdosee ò tùótɛ́ kɛ bonɛ̀. Ɛsitɛɛ do wenni mɛdiɛ̀ mmɛ.
\p
\v 8 Bɛ̀ duɔ́ ndìì mɔ̀nni tinɑ́ɑǹtì kɛ̀ bɛ̀ ntɔuní bɛsɑpɑ̀mbɛ̀ Susi dihɛidiɛ̀, kɛ̀ Ɛsitɛɛ nkɔkɛ́ dɛ miɛkɛ kɛ̀ bɛ̀ɛ bɛ̀ duɔ́ nhEkee wèè bɑ̀ɑ bɛnitipòbɛ̀, kòo ndɑkɛ bɛ kpɛ́í. 
\v 9 Kòo pɛ́nsìrì Ɛsitɛɛ mɛsɑ̀ɑ̀ nkóò duɔ́ ndɛ̀ɛ̀ bo wénkùnnɛ o kɔ̃̀ntì, kɛ́ nhò duɔ̀ mmudiì, kɛ́tɑ̃ɑ̃tɛ́ bɛnitipotɔ̃mbɛ̀ bɛ̀yiekɛ̀ tɛkpɑ̀ɑ̀tìcĩ́ɛ̃̀tɛ̀ kóò duɔ́, kóò tɑnnɛ́ tɛnitipocĩ́ɛ̃̀tɛ̀ sɑ̀ɑ̀tɛ̀. 
\v 10 Ɛsitɛɛ do í nɑ̀kɛ́ ò tumɛ̀ Sifu kɛ yɛ̃́ Mɑɑdosee do ò tiémmɛ̀ kɛ dɔ̀ ò bɑ́ɑ́ nɑ́kɛ́. 
\v 11 Yɛwe yɛmɔu kɛ̀ Mɑɑdosee níí nfirì tɛnitipocĩ́ɛ̃̀tɛ̀ kɛ bo yɑ̀ Ɛsitɛɛ kɔ̃nnɑɑtí nɛ̀ bɛ̀ ò dɔ̀ɔ̀rimɛ̀.
\p
\v 12 Dɛ kó bɛsɑpɑ̀mbɛ̀ do mɔkɛ dibenni ndi kɛ wuɔ̀ kɛ pɑnti. Bɛ̀ do ketɛ́ kɛ́ bɛ̀ duɔ́ mmíírì kó mɛkùɔ̀ mmɛ bɛtɑ̃̀ɑ̃̀bɛ̀ bɛ̀kuɔ̀ kpɛ́í, kɛ́ bɛ̀ yìɛ́ tùdɑ̀ɑ̀rí nɛ̀ dɛtɛrɛ̀ dɛ̀ɛ̀ wèńkùnko tikɔ̃̀ntì, bɑ́ wèè sɑpɑ̀ɑ̀ nkòo ndò nkɛ́kɔtɛ okpɑ̀ɑ̀tì Asuyeduusi borɛ̀, 
\v 13 kɛ̀ wèè sɑpɑ̀ɑ̀ nkɔ̀ri bɛ̀ɛ ò duɔ́ nhò dɔ́ kɛ́ntɔ dɛ̀ɛ̀ kó dimɑ̀ɑ̀. 
\v 14 Bɛ̀ do ɔ̃ɔ̃ kɔtɛ kuyuoku nku okpɑ̀ɑ̀tì borɛ̀, kɛ̀ dɛ̀ɛ wentɛ́ kɛ̀ bɛ̀ɛ bɛ̀ kɔ̀tɛnɛ̀ tɛnitipocĩ́ɛ̃̀tɛ̀ tɛtɛ̀ Sɑsikɑɑsi bɑ̀ɑ dɛ̀ okpɑ̀ɑ̀tì pocĩɛ̃̀. Sɑsikɑɑsi do tú bɛ̀ fɔ̃̀ntɛ wè nwe kòò pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú kɛ bɑɑ okpɑ̀ɑ̀tì pocĩɛ̃̀. Òmɔù ɔ̃ɔ̃ í nwɛ̃̀tɛ okpɑ̀ɑ̀tì borɛ̀ kɛ̀ dɛ̀ í tú okpɑ̀ɑ̀tì weè ò dɔ́ koò yu.
\p
\v 15 Dɛ̀ tùɔ̀kɛ dìì yiè Mɑɑdosee tebitɛ Abikɑii do ku kòo túótɛ́ dɛ̀ɛ̀ birɛ Ɛsitɛɛ bo kɔtɛmɛ̀ okpɑ̀ɑ̀tì borɛ̀, bɑ́ wenwe í mbekɛ dɛ̀mɑrɛ̀ kɛ̀ dɛ̀ í tú Ekee do yɛ̃ nhò ntɔ dɛ̀. Kɛ̀ bɛnìtìbɛ̀ bɛmɔuu pɛ́nsìrì Ɛsitɛɛ. 
\v 16 Kɛ̀ bɛ̀ɛ ò tùótɛ́ kɛ́kɔtɛnɛ̀ okpɑ̀ɑ̀tì Asuyeduusi borɛ̀ tɛkpɑ̀ɑ̀tìcĩ́ɛ̃̀tɛ̀ o kpɑ̀tì benni yiénnì, dibenni kóo tɑ̃̀nkù píínwè, bɛ̀ tu wèè tɑ̃̀nkù Kisideu\f + \fr 2:16 \fr*\fk Kisideu: \fk*\ft Bɛ̀ do kɑɑ mmɛ̀ɛ̀ botí bɛ kó bɛtɑ̃̀ɑ̃̀bɛ̀ nɛ̀ ti kɑɑmmɛ̀ yíe ndɛ̀ í wɛ̃. Bɛ kóo tɑ̃̀nkù Kisideu berínɛ̀ ti kó\ft*\f* bɛtɑ̃̀ɑ̃̀bɛ̀ tɛpíítɛ̀ nɛ̀ odɛ́rì nɛ̀ otɑ̃ɑ̃̀kètiwè dɛ cuokɛ̀ nkɛ (mɛwɑɑnɑɑ̀ nnɛ̀ tɑ̃ɑ̃̀pò dɛ cuokɛ̀). 
\v 17 Kòo kpɑ̀ɑ̀tìi pɛ́nsìrì Ɛsitɛɛ, kɛ́ nhò dɔ́ kɛ̀ dɛ̀ pɛ̃ɛ̃tɛ́ bɛnitipòbɛ̀ tɔbɛ̀ nɛ̀ bɛsɑpɑ̀mbɛ̀, kòo ò òó ndikpɑ̀ɑ̀tìpìì kòo cɔutɛ́ Fɑsitii fɔ̃̀tìrì. 
\v 18 Kòo kpɑ̀ɑ̀tìi ɑ̃nnɛ́ dibɑnni Ɛsitɛɛ kpɛ́í nkɛ́yú bɛnitidiɛbɛ̀ nɛ̀ mìníísìbɛ̀ kɛ́pɑɑ ndɑ̀mpóò o tempɛ̃ nyimɔu, kɛ́pɑ̃mmú yɛpɑ̃rɛ̀ nɛ̀ diwɛ̀ì.
\p
\v 19 Kɛ̀ bɛ̀ɛ wɛ̃tɛ kɛ́tíí mbɛsɑpɑ̀mbɛ̀ kucɛ mɛdɛ́rímɛ̀ kɛ̀ Mɑɑdosee mpĩ́ mmutɔ̃mmú tɛkpɑ̀ɑ̀tìcĩ́ɛ̃̀tɛ̀. 
\v 20 Ɛsitɛɛ do í nɑ̀kɛ́ ò bonní dɛ̀ nɛ̀ o botí kɛ́ndònnɛ̀ Mɑɑdosee do ò nɑ̀kɛ́mɛ̀, kòo tì yie nkɛ́ndò nhò kpɑɑ́ kɛ bo o cĩ́ɛ̃̀tɛ̀.
\s1 Bɛ̀ do dɔ́mɛ̀ kɛ́kuɔ okpɑ̀ɑ̀tì kɛ̀ Mɑɑdosee bɛ̀ dɑ́ɑ
\p
\v 21 Diyiè mɑrì kɛ̀ Mɑɑdosee mpĩ́ nho tɔ̃mmú tɛkpɑ̀ɑ̀tìcĩ́ɛ̃̀tɛ̀ kɛ̀ Bikitɑ̃ɑ̃ nɛ̀ Tɛdɛki bɛdɛ́ kɛ̀ bɛ̀ tu bɛ̀ fɔ̃̀mmu bɛ̀ kɛ̀ bɛ̀ pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú kɛ bɑɑ tɛkpɑ̀ɑ̀tìcĩ́ɛ̃̀tɛ̀ bòrɛ̀, kɛ̀ bɛ miɛkɛɛ pɛikɛ okpɑ̀ɑ̀tì kɛ̀ bɛ̀ ndɔ́ kóò kùɔ. 
\v 22 Kɛ̀ Mɑɑdosee tì kèè kɛ́nɑ́kɛ́ Ɛsitɛɛ, kɛ̀ Ɛsitɛɛ tì nɑ̀kɛ́ okpɑ̀ɑ̀tì nɛ̀ Mɑɑdosee kó diyètìrì. 
\v 23 Kɛ̀ bɛ̀ɛ fiɛ́ tinɑ́ɑǹtì kɛ nsɔ̃́ ntì tu timɔ́mmɔnti, kɛ̀ bɛ̀ɛ bɛ̀ pĩ mbɛdɛ́, kɛ́cɔ́ɔ́ nyidɛí, kɛ́wɑ̃ri dɛ kó tinɑ́ɑǹtì dihɛikɛ̀mpɑ́tíri miɛkɛ okpɑ̀ɑ̀tì ììkɛ̀.
\c 3
\s1 Amɑnni dɔ́mɛ̀ kɛ́kuɔ Sifubɛ
\p
\v 1 Kòo kpɑ̀ɑ̀tì Asuyeduusi dɛ́úkùnnɛ Amɑnni Amɛdɑtɑ birɛ, Akɑki yɑɑ̀birɛ, kóò nií ndɛyììkɛ̀ kòo mbɑkɛ́ mìníísìbɛ̀ bɛmɔu. 
\v 2 Kɛ̀ tɛkpɑ̀ɑ̀tìcĩ́ɛ̃̀tɛ̀ tɔ̃mbɛ̀ bɛmɔu nninku kɛ dɔuo Amɑnni ììkɛ̀, kɛ̀ Mɑɑdosee weè mɑ́ɑ̀ yetɛ. 
\v 3 Kɛ̀ bɛtɔ̃mbɛ̀ tɔbɛ̀ɛ ò bekɛ kɛ dɔ̀: Dɛ̀ dòmmɛ kɑ̀ɑ yetɛ okpɑ̀ɑ̀tì duɔ́ ndìì nùù? 
\v 4 Kɛ̀ bɛ̀ mbékú Mɑɑdosee yɛwe yɛmɔu. Kòò dɔ̀: N tú Sifu nwe, kɛ̀ bɛ̀ɛ tì nɑ̀kɛ́ Amɑnni kɛ bo yɑ̀ Mɑɑdosee bo nkpɑɑ́ sɔkɛ́. 
\v 5 Kɛ̀ Amɑnni yɑ̀ Mɑɑdosee yetɛmɛ̀ kɛ í ninku kɛ dɔuo o ììkɛ̀, kòo miɛkɛɛ pɛikɛ. 
\v 6 Kɛ̀ bɛ̀ɛ ò nɑ̀kɛ́ Mɑɑdosee túmɛ̀ Sifu, kòo nsɔ̃́ ndɛ̀ í sɑ̀nnɛ̀ ò bo wè nkuɔmɛ̀ omɑ́ɑ̀, kɛ́ndɔ́ kɛ́kuɔ Sifubɛ bɛmɔu bɛ̀ɛ̀ bo okpɑ̀ɑ̀tì Asuyeduusi tenkɛ̀. 
\v 7 Okpɑ̀ɑ̀tì Asuyeduusi kpɑ̀tì benni tɛpíítɛ̀ nɛ̀ didɛ́rì, otɑ̃̀nkù ketiwè, bɛ̀ tu wèè tɑ̃̀nkù Nisɑ̃ɑ̃\f + \fr 3:7 \fr*\fk Nisɑ̃ɑ̃: \fk*\ft Bɛ̀ do kɑɑ mmɛ̀ɛ̀ botí bɛ kó bɛtɑ̃̀ɑ̃̀bɛ̀ nɛ̀ ti kɑɑmmɛ̀ yíe ndɛ̀ í wɛ̃, bɛ kóo tɑ̃̀nkù Nisɑ̃ɑ̃ berínɛ̀ ti kó bɛtɑ̃̀ɑ̃̀bɛ̀ otɑ̃ɑ̃́nwè nɛ̀ onɑɑnwè dɛ cuokɛ̀ nkɛ (tibéntì nɛ̀ dinɔ́tɔ̃ɔ̃̀rì dɛ cuokɛ̀).\ft*\f*. Kɛ̀ Amɑnni bɔ nyipɑ̃ɑ̃díítí kɛ bo yɑ̀ wèè tɑ̃̀nkù nwe nɛ̀ dìì yiè ndi ò yóó pĩ́mmɛ̀ o tɔ̃mmú, kɛ̀ idíítí do dibenni tɑ̃̀nkù tɛpíítɛ̀ nɛ̀ odɛ́ríwè, bɛ̀ tu wèè tɑ̃̀nkù Adɑri\f + \fr 3:7 \fr*\fk Adɑri: \fk*\ft Bɛ kóo tɑ̃̀nkù Adɑri berínɛ̀ ti kó bɛtɑ̃̀ɑ̃̀bɛ̀ odɛ́rì nɛ̀ otɑ̃ɑ̃́nwe dɛ cuokɛ̀ nkɛ (dɛwɑnnɛ̀ nɛ̀ tibéntì dɛ cuokɛ̀).\ft*\f*
\s1 Amɑnni dɔ́mɛ̀ bɛ̀ɛ kuɔ Sifubɛ bɛmɔu
\p
\v 8 Kɛ̀ Amɑnni nɑ́kɛ́ Asuyeduusi kɛ dɔ̀: Kubotí mɑkù kuù bo ɑ ɛì kó itempɛ̃ nyimɔu kɛ̀ ku borimɛ cɑ̃́ɑ̃́, mɛ̀ í dònnɛ̀ ibotí tɛì kɔ̃mɛ, kù í yie nyikpɑ̀ɑ̀tìkuɔ́. Okpɑ̀ɑ̀tì bɑ́ɑ́ sɔ̃́ntɛ̃́ kɛ́yóu kɛ̀ dɛ̀ mbɛ̀ dò mbɑ̀mmùù. 
\v 9 Okpɑ̀ɑ̀tì kɑ̀ɑ tì pɛ́nsìrì wɑ̃ri dipɑ́tíri kɛ̀ bɛ̀ɛ bɛ̀ kùɔ. N yóó duɔ́mmu idíítí cìdóòbɛ̀ sikɔupíkɔusìtɑ̃ɑ̃ti (300000) kɛ̀ mìníísìbɛ̀ɛ ì tɑnnɛ́ dikpɑ̀ɑ̀tìtɔu.
\p
\v 10 Kòo kpɑ̀ɑ̀tìi ṹtɛ́ o mɑ́mɑ́ɑ́ nkɛ́duɔ́ nhAmɑnni Amɛdɑtɑ birɛ Akɑki yɑɑ̀birɛ Sifubɛ dootitɔù. 
\v 11 Kòo kpɑ̀ɑ̀tì dɔ̀: Bɑ́ n duɔ́ nyìdíítí, n dɑ duɔ́mmu dɛ kó bɛnìtìbɛ̀, dɔɔ̀ bɛ̀ ɑ dɔ́mɛ̀.
\p
\v 12 Kɛ̀ Amɑnni nɑ́kɛ́ kɛ̀ bɛ̀ɛ wɑ̃ri yɛpɑ́tɛ kɛ́duɔ́ nhokpɑ̀ɑ̀tì tũ̀mbɛ̀ nɛ̀ kùmɑ̀ndɑ́ɑ̀bɛ̀ bɛ̀ɛ̀ bɑkɛ́ itempɛ̃, nnɛ̀ ibotí kó bɛkpɑ̀ɑ̀tìbɛ̀, kɛ́wɑ̃ri bɑ́ kùù botí nɛ̀ ku nɑ́ɑǹtì nɛ̀ ku wɑ̃rii, bɛ̀ nɑ́ɑ́ ntì bɛ̀ ɛì miɛkɛ, kɛ́deè kɛ ĩkú bɛ nɔu nɛ̀ okpɑ̀ɑ̀tì yètìrì kɛ ĩkú o cɑnnimɛ̀, kɛ́duɔ́ mbɛ̀ɛ̀ bɑkɛ́ itempɛ̃ nyimɔu nɛ̀ ibotí kó bɛkpɑ̀ɑ̀tìbɛ̀. 
\v 13 Kɛ̀ bɛ̀ɛ tɔ̃ nyɛtɔ̃rɛ̀ kɛ̀ yɛ̀ɛ kɔtɛnɛ̀ yɛpɑ́tɛ itempɛ̃ nyimɔu kɛ̀ bɛ̀ bo kuɔ Sifubɛ bɛmɔu pɑ́íí, ibí nɛ̀ bɛkótíbɛ̀ nɛ̀ bɛnitipòbɛ̀ diyiè dìmɑ́ɑ̀, dibenni tɑ̃̀nkù tɛpíítɛ̀ nɛ̀ odɛ́ríwè diyiè tɛpíítɛ̀ nɛ̀ ditɑ̃ɑ̃́nnì ndi bɛ̀ yóó bɛ̀ kuɔmɛ̀ kɛ́hɛí bɛ kpɛrɛ. 
\v 14 Kɛ̀ bɛ̀ɛ cɔutɛ́ dipɑ́tíri bɑ́ kùù tempɛ̃ nkɛ́pĩɛ̃kɛ́ kɛ̀ bɛ̀ bo nyɛ̃́ dɛ kó diyiè kɛ́bɑ́ɑ́tí. 
\v 15 Kɛ̀ yɛtɔ̃rɛ̀ɛ ítɛ́ mɛcɑ̃ɑ̃ nkɛ́pitɛ́ tinɑ́ɑǹtì dihɛidiɛ̀ Susi miɛkɛ, kòo kpɑ̀ɑ̀tì nɛ̀ Amɑnni kɛ̀ bɛmbɛ kɑri kɛ yɔ̃̀, nkɛ̀ dihɛì dimɔu yɛ̀mmɛ̀ cɑ̀ɑ̀rɛ̀.
\c 4
\s1 Sifubɛ yɛ̀mmɛ̀ cɑ̀ɑ̀rɛ̀mɛ̀ kɛ̀ bɛ̀ɛ boú dinùù
\p
\v 1 Mɑɑdosee tì kèè dìì mɔ̀nnì kɛ́kɛ̃tɛ́ o yɑɑ̀bòrì kɛ́dɑ́ɑ́tí kufɔ̀ɔ̀tɔ̃̀nkù kɛ́pũ mmutɑ́pɛí nkɛ́nkuɔ̀ mmɛdiɛ̀ nkɛ firì dihɛì, 
\v 2 kɛ bii tuɔkɛ tɛkpɑ̀ɑ̀tìcĩ́ɛ̃̀tɛ̀ kɛ́ncómmú ditowɑɑ̀ kɛ yɛ̃́ bɛ̀ ɔ̃ɔ̃ í ndɑ́ɑ́tímɛ̀ mɛyɛǹcɑɑ̀rìmɛ̀ kó tiyɑ̀ɑ̀tì kɛ́tɑ tɛkpɑ̀ɑ̀tìcĩ́ɛ̃̀tɛ̀. 
\v 3 Dɛ kó tinɑ́ɑǹtì do tùɔ̀kɛ ìì tempɛ̃, nkɛ̀ Sifubɛɛ tì kèè bɛ yɛ̀mmɛ̀ do cɑ̀ɑ̀rɛ̀mu kɛ̀ bɛ̀ mboú yɛnɔ̀ kɛ dɑ́ɑ́tí tifɔ̀ɔ̀tɔ̃̀ntì kɛ́pũ mmutɑ́pɛí.
\p
\v 4 Kòo nitipokpɑ̀ɑ̀tì Ɛsitɛɛ nitipotɔ̃mbɛ̀ nɛ̀ bɛ̀ fɔ̃̀mmu bɛ̀ kɛ̀ pĩ nho tɔ̃mmú tɛkpɑ̀ɑ̀tìcĩ́ɛ̃̀tɛ̀ miɛkɛ kɛ̀ bɛ̀ɛ tì nhò nɑ̀kɛ́ kɛ̀ dɛ̀ɛ cɑɑ̀rɛ̀ o yɛ̀mmɛ̀ mɛdiɛ̀. Kòo wɑɑ́ ntiyɑ̀ɑ̀tì kɛ́duɔ́nko kɛ̀ Mɑɑdosee bo dɑ́ɑ́tí kɛ́yóu kufɔɔ̀tɔ̃̀nkù, kòo yetɛ. 
\v 5 Kɛ̀ Ɛsitɛɛ yu Atɑki bɛ̀ fɔ̃̀ntɛ wè kòò pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú, kòo kpɑ̀ɑ̀tì wè nhò duɔ́ nkòo bo mpĩ́ nho tɔ̃mmú, kóò tɔ̃ nkɛ dɔ̀ wèe bekɛ Mɑɑdosee kɛ́yɑ̀ dɛ̀ dòmmɛ̀ nɛ̀ mùù te. 
\v 6 Kɛ̀ Atɑkii yɛroo kɛ́yɑ̀ Mɑɑdosee tɛkpɑ̀ɑ̀tìcĩ́ɛ̃̀tɛ̀ towɑɑ̀. 
\v 7 Kɛ̀ Mɑɑdosee ò nɑ̀kɛ́ dɛmɔu nɛ̀ Amɑnni yɛ̃ nhò bo tɑnnɛ́ ìì díítí dikpɑ̀ɑ̀tìtɔu kɛ́nsɑ̀ kɛ̀ bɛ̀ kùɔ Sifubɛ bɛmɔu. 
\v 8 Kɛ̀ Mɑɑdosee duɔ́ nhAtɑki dipɑ́tíri bɛ̀ wɑ̃ri dì Susi kɛ bo kuɔ Sifubɛ kó dimɑ̀ɑ̀, kɛ dɔ̀ wèe dì duɔ́ nhƐsitɛɛ kóò nɑ̀kɛ́ dɛ̀ dòmmɛ̀. Kòo kɔtɛ kɛ́bɑ́ntɛ̀ okpɑ̀ɑ̀tì o botí kɔbɛ kpɛ́í. 
\v 9 Kɛ̀ Atɑkii wɛ̃tɛ kɛ́nɑ́kɛ́ Ɛsitɛɛ Mɑɑdosee ò nɑ̀kɛ́ tì. 
\v 10 Kɛ̀ Ɛsitɛɛ dɔ̀: Wɛ̃too kɛ́nɑ́kɛ́ Mɑɑdosee kɛ dɔ̀: 
\v 11 Bɛnìtìbɛ̀ bɛmɔu nɛ̀ okpɑ̀ɑ̀tì tɔ̃mbɛ̀ nɛ̀ bɛ̀ɛ̀ kó dimɑ̀ɑ̀ bo o tempɛ̃ nyimɔu bɛ̀ yɛ̃́mu ikuɔ́ túmɛ̀ òmɔù bɑ́ɑ́ tɑ okpɑ̀ɑ̀tì cĩ́ɛ̃̀tɛ̀ kòò í ò yu, kɛ̀ wèè tɑ bɛ̀ɛ ò kùɔ, okpɑ̀ɑ̀tì bo youtɛ wè kupɑ̀ɑ̀ti mɛsɔɔ nkɔku weè mɑ́ɑ̀ bo nfòù. Dɛ̀ mɔ̀kɛ yíe nhotɑ̃̀nkù nwe okpɑ̀ɑ̀tì n yumɛ̀. 
\v 12 Kɛ̀ bɛ̀ɛ nɑ́kɛ́ Mɑɑdosee Ɛsitɛɛ yɛ̃ mmù. 
\v 13 Kɛ̀ Mɑɑdosee tɛ̃́nnɔ́ɔ tinɑ́ɑǹtì kɛ dɔ̀: A yɛ̀mmɛ̀ bɑ́ ndò nhɑ bo cootɛ́ ɑmɑ́ɑ̀ ɑ bo mɛ̀ɛ̀ kpɛ́í nhokpɑ̀ɑ̀tì cĩ́ɛ̃̀tɛ̀. 
\v 14 Kɑ̀ɑ cĩ̀ɛ̃́kɛ́ kɛ í bɛ́i, nSifubɛ yóó pɛ́tɛ́mu mɛteèmmɛ̀ kupíkù tɛkù kɛ́cootɛ́, kɑ̀ɑ kú fɔ̃́ nnɛ̀ ɑ cĩ́ɛ̃̀tɛ̀. Kɛ̀ dɛ̀ yɛ̀mmɛ̀ mɛhɑ́ɑ́rìmɛ̀ miɛ nkpɛ́í nkɛ ɑ nɑɑ́mmɛ̀ okpɑ̀ɑ̀tìpokù. 
\v 15 Kɛ̀ Ɛsitɛɛ tɛ̃́nnɔ́ɔ Mɑɑdosee kɛ dɔ̀: 
\v 16 Kɔtɛ kɛ́tíí nSifubɛ bɛmɔu bɛ̀ɛ̀ bo Susi kɛ̀ dí boú dinùù n kpɛ́í nyɛwe yɛ̀tɑ̃ɑ̃ti, kɛyènkɛ̀ nɛ̀ kuyie, di bɑ́ɑ́ di muciɛ̀, di bɑ́ɑ́ yɑ̃̀ mɛniɛ. M múnkɛ yóó boúmu nɛ̀ n nitipotɔ̃mbɛ̀. Bɑ́ nɛ̀ ikuɔ́ mɛ mbomɛ̀ n yóó kɔtɛmu okpɑ̀ɑ̀tì borɛ̀, kɛ̀ m bo kú, n kú. 
\v 17 Kɛ̀ Mɑɑdosee kɔtɛ kɛ́dɔɔ̀ Ɛsitɛɛ ò nɑ̀kɛ́ tì.
\c 5
\s1 Ɛsitɛɛ kɔ̀tɛmɛ̀ okpɑ̀ɑ̀tì borɛ̀
\p
\v 1 Bɛ̀ boú mɛmmɛ dinùù kɛ́deè, diyiè tɑ̃ɑ̃́nnì yiè kɛ̀ Ɛsitɛɛ dɑ́ɑ́tí tikpɑ̀ɑ̀tìpoyɑ̀ɑ̀tì kɛ́tɑroo tɛkpɑ̀ɑ̀tìcĩ́ɛ̃̀tɛ̀ kudɑ̀nkù, kɛ́cómmú kɛ́wetínnɛ́ okpɑ̀ɑ̀tì kɑ̀rì kùù dieku bòrì kɛ sɔ̃́ nhokpɑ̀ɑ̀tì kɑ̀ri o kpɑ̀ɑ̀tìkɑ̀rì kɛ wetí dibòrì. 
\v 2 Kòo kpɑ̀ɑ̀tìi yɑ̀ onitipokpɑ̀ɑ̀tì Ɛsitɛɛ kòò còḿmú kudɑ̀nkù, kòo yie nkóò youtɛ kukpɑ̀ɑ̀tìpɑ̀ɑ̀ti mɛsɔɔ nkɔku, kɛ̀ Ɛsitɛɛ tɑroo kɛ́kɑ́ɑ́kɛ́ ku yómmɛ̀. 
\v 3 Kòo kpɑ̀ɑ̀tìi ò bekɛ kɛ dɔ̀: Ɛsitɛɛ, ɑ dɔ́ bɑ kɛ̀ n dɛ̀ ndɑ duɔ́, mbɑ́ n kpɑ̀tì kó dikéè! 
\v 4 Kɛ̀ Ɛsitɛɛ dɔ̀: Okpɑ̀ɑ̀tì n dɑ ɑ̃nnɛ́ dibɑnni ndi. Kɑ̀ɑ bo yie nɛ̀ Amɑnni dí kɔtɛní yíe n cĩ́ɛ̃̀tɛ̀ kɛ́di.
\p
\v 5 Kòo kpɑ̀ɑ̀tìi tɔ̃ nkɛ dɔ̀: Bɛ̀ɛ nɑ́kɛ́ Amɑnni kòo kɔtɛní mɛcɑ̃ɑ̃ nkɛ̀ bɛ̀ɛ kɔtɛ bɛdɛ́ Ɛsitɛɛ bɛ̀ yu dìì bɑnni. 
\v 6 Bɛ̀ di dìì mɔ̀nnì kɛ́deè kòo kpɑ̀ɑ̀tìi bekɛ Ɛsitɛɛ kɛ dɔ̀: A dɔ́ bɑ kɛ̀ n dɛ̀ ndɑ duɔ́? Bɑ́ n kpɑ̀tì kó dikéè m bo dɑ duɔ́. 
\v 7 Kɛ̀ Ɛsitɛɛ dɔ̀: Okpɑ̀ɑ̀tì n dɔ́ tì tu: 
\v 8 Kɑ̀ɑ yie nkɛ bo n dɔɔ̀ mɛsɑ̀ɑ̀ nhɑ nɑɑ wɛ̃tɛní nɛ̀ Amɑnni kɛ̀ dí di n cĩ́ɛ̃̀tɛ̀ kɛ̀ n dɑ nɑ́kɛ́ n dɔ́ tì.
\s1 Amɑnni cìɛ́kɛ́mɛ̀ kudɔú kɛ bo cɔ́ɔ́ mMɑɑdosee
\p
\v 9 Mɛm̀mɛ kɛ Amɑnni nyɛtìní Ɛsitɛɛ cĩ́ɛ̃̀tɛ̀ kɛ̀ diwɛ̀ì ò bo kòo yɛ̀mmɛ̀ nɑɑti mɛdiɛ̀ nkòo yɑ̀ Mɑɑdosee kòo kɑ̀ri tɛkpɑ̀ɑ̀tìcĩ́ɛ̃̀tɛ̀ towɑɑ̀, wè í nyìtɛ́ kɛ còḿmú, ò mɛ̀ nyí bɛnkɛ fɛdedíéfɛ̀ mɑfɛ̀, kɛ̀ Amɑnni miɛkɛɛ ò cɔ̀útɛ́ mɛsɑ̀ɑ̀. 
\v 10 Kòo minnɛ́ kɛ́kò nkɛ́tíí nho nɛ́posɑ̀ɑ̀bɛ̀ nɛ̀ o pokù Sedɛsi. 
\v 11 Kòo bɛ̀ kɑ̀mmu o kpɑ̀tì mɑ̀mɛ̀ nɛ̀ o bí nɛ̀ okpɑ̀ɑ̀tì ò tɑ̃ɑ̃tɛ́mɛ̀ kɛ nií mbɛtɔ̃mbɛ̀ nɛ̀ mìníísìbɛ̀ bɛmɔu ììkɛ̀ tikpɑ̀tì miɛkɛ. 
\v 12 Kɛ dɔ̀: Mí nwe onitipokpɑ̀ɑ̀tì Ɛsitɛɛ yumɛ̀ nɛ̀ okpɑ̀ɑ̀tì kɛ̀ ti wɛ̃nnɛ́ kɛ di o cĩ́ɛ̃̀tɛ̀, kòò wɛ̃̀tɛ kɛ n yu nɑnkɛ nɛ̀ okpɑ̀ɑ̀tì kɛ̀ ti kɔri. 
\v 13 Dɛndɛ kó dimɑ̀ɑ̀ í n nɑɑti kɛ̀ nsɑ̀ kɛ̀ Mɑɑdosee Sifu kpɑɑ́ kɛ pĩ́ ntɛkpɑ̀ɑ̀tìcĩ́ɛ̃̀tɛ̀ mutɔ̃mmú.
\p
\v 14 Kòo pokù Sedɛsi nɛ̀ o nɛ́pobɛ̀ bɛmɔuu ò nɑ̀kɛ́ kɛ dɔ̀: Cíɛ́kɛ́ kudɔú kɛ̀ ku okùmɛ̀ mbo mɛ́tìrìbɛ̀ sipísìdɛ́ nɛ̀ bɛ̀nùmmù, kɑ̀ɑ yɛ̀ dikṹnweńnì kɛ nɑ́kɛ́ okpɑ̀ɑ̀tì kɛ̀ dí cɔ́ɔ́ mMɑɑdosee ku ĩ́nkɛ̀, kɑ̀ɑ nɑ kɛ́kɔtɛ dibɑnni nɛ̀ diwɛ̀ì.
\p Kɛ̀ dɛ kó tinɑ́ɑǹtìi nɑrikɛ Amɑnni.
\c 6
\s1 Bɛ̀ dɛ̀úkùmmɛ̀ Mɑɑdosee kɛ kɛ̃́kùnnɛ Amɑnni
\p
\v 1 Dɛ̀ yiè kɛ̀ inuɔ nyetɛ okpɑ̀ɑ̀tì Asuyeduusi dɛ kó kɛyènkɛ̀, kòo duɔ́ nkɛ̀ bɛ̀ɛ túótɛ́ní dihɛikɛ̀mpɑ́tíri bɛ̀ wɑ̃̀ũ dìì miɛkɛ tìì kó dimɑ̀ɑ̀ dɔ̀ɔ̀ri. Kòo duɔ́ nkɛ̀ bɛ̀ɛ dì kɑ̀ɑ nho ììkɛ̀. 
\v 2 Kɛ̀ bɛ̀ɛ kɑɑ Bikitɑnɑ nɛ̀ Tedɛki bɛ̀ɛ̀ do tú bɛ̀ fɔ̃̀mmu bɛ̀ kɛ̀ bɛ̀ pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú, kɛ bɑɑ tɛkpɑ̀ɑ̀tìcĩ́ɛ̃̀tɛ̀ bòrɛ̀ kɛ́ndɔ́ kɛ́kuɔ okpɑ̀ɑ̀tì kɛ̀ Mɑɑdosee bɛ̀ dɑ́ɑ nkɛ̀ bɛ̀ɛ wɑ̃ri tì. 
\v 3 Kòo kpɑ̀ɑ̀tì dɔ̀: Kɛ̀ bɛ̀ nɛ́ ò dɔ̀ɔ̀ ɔ̃̀mmɛ sɑ̀ɑ̀ nkɛ dɛ̀úkùnnɛ o yètìrì dɛ kpɛ́í? Kɛ̀ bɛ̀ dɔ̀: Bɛ̀ í ò dɔ̀ɔ̀ mùmɑmù.
\p
\v 4 Kòo kpɑ̀ɑ̀tì dɔ̀: We mbo kudɑ̀nkù? Dɛ̀ do sɔ̃́ nhAmɑnni weè tɑroo kɛ bo nɑ́kɛ́ okpɑ̀ɑ̀tì kɛ̀ bɛ̀ɛ cɔ́ɔ́ mMɑɑdosee ò cìɛ́kɛ́ kùù dɔú. 
\v 5 Kòo kpɑ̀ɑ̀tì tɔ̃mbɛ̀ dɔ̀: Amɑnni nwe. Kòo kpɑ̀ɑ̀tì dɔ̀ wèe tɑnní.
\p
\v 6 Kɛ̀ Amɑnni tɑroo kòo kpɑ̀ɑ̀tìi ò bekɛ kɛ dɔ̀: Bɛ̀ ɔ̃ɔ̃ dɔɔ̀ bɑ onìtì okpɑ̀ɑ̀tì dɔ́ kɛ́dɛ́úkùnnɛ wè nɛ̀ o yɛ̀mmɛ̀ mɛmɔu? Kɛ̀ Amɑnni dɔ̀ nɛ̀ o yɛ̀mmɛ̀ miɛkɛ okpɑ̀ɑ̀tì yóó dɛ́úkùnnɛ wè kɛ̀ dɛ̀ í tú mí! 
\v 7 Kɛ dɔ̀: Kòo kpɑ̀ɑ̀tì dɔ́ kɛ́dɛ́úkùnnɛ onìtì 
\v 8 wèe ò dɑ̀tínnɛ́ dikpɑ̀ɑ̀tìyɑɑ̀bòrì ò dɑɑti dì, kóò dèe ntɛsɑ̃ntɛ̀ ò dèkù tɛ̀, kóò òó ndikpɑ̀ɑ̀tìpìì, 
\v 9 kɛ́duɔ́ nkɛ̀ mìníísì mɔùu dɑ́tínnɛ́ dɛ yiɛ̀ tikpɑ̀ɑ̀tìyɑ̀ɑ̀tì, kóò dèe ntɛsɑ̃ntɛ̀ kóò fitɛ́nɛ̀ dihɛì, kɛ́mpĩɛ̃kù kɛ tú: Kòo kpɑ̀ɑ̀tì dɔ́ kɛ́dɛ́úkùnnɛ onìtì ò ɔ̃ɔ̃ ò dɔ̀ɔ̀ miɛ mmɛ.
\p
\v 10 Kòo kpɑ̀ɑ̀tìi nɑ́kɛ́ Amɑnni kɛ dɔ̀: Mɛcɑ̃ɑ̃ nkɛ́túótɛ́ diyɑɑ̀bòrì nɛ̀ tɛsɑ̃ntɛ̀ kɛ́ mɛ̀ dɔ̀ɔ̀ Sifu Mɑɑdosee wèè bo tɛkpɑ̀ɑ̀tìcĩ́ɛ̃̀tɛ̀ towɑɑ̀, ɑ bɑ́ɑ́ súɔ́ ntìmɑtì ɑ bɛ́i ntì.
\p
\v 11 Kɛ̀ Amɑnni túótɛ́ diyɑɑ̀bòrì kɛ́dɑ́tínnɛ́ Mɑɑdosee kóò dèe ntɛsɑ̃ntɛ̀ kɛ́nfirínɛ̀ dihɛì kɛ tú: Kòo kpɑ̀ɑ̀tì dɔ́ kɛ́dɛ́úkùnnɛ onìtì ò ɔ̃ɔ̃ ò dɔ̀ɔ̀ miɛ mmɛ. 
\v 12 Dɛ kó difɔ̃nkúò kɛ̀ Mɑɑdosee kò ntɛkpɑ̀ɑ̀tìcĩ́ɛ̃̀tɛ̀, kɛ̀ Amɑnni nkũnti mɛcɑ̃ɑ̃ kɛ kɑ̃nkɛ́ kuyɑ̀ɑ̀kù o ììkɛ̀ nɛ̀ ifɛi, 
\v 13 kɛ́nɑ́kɛ́ o pokù Sedɛsi nɛ̀ o nɛ́pobɛ̀ dɛ̀ɛ̀ dɔ̀ɔ̀. Kɛ̀ bɛ̀ dɔ̀: Dɛ kóò Mɑɑdosee ɑ di wèè ììkɛ̀ ifɛi ò tu Sifu nwe, ɑ í yóó nɑ kɛ́dɔɔ̀ tìmɑtì, ɑ dɔkɛ yóó yíɛ́ kɛ́dimu ifɛi.
\p
\v 14 Bɛ̀ kpɑɑ́ kɛ mɛ nnɑ́ɑ́ nkɛ̀ bɛ̀ fɔ̃̀mmu bɛ̀ kɛ̀ bɛ̀ pĩ ntɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú kɛ̀ bɛ̀ɛ tuɔkoo kóò tùótɛ́ mɛcɑ̃ɑ̃ nkɛ́kɔtɛnɛ̀ Ɛsitɛɛ ciɛ, wenwe nɛ̀ okpɑ̀ɑ̀tì kɛ̀ bɛ̀ bo di Ɛsitɛɛ bɛ̀ bèńnɛ́ mùù diì.
\c 7
\s1 Bɛ̀ cɔ̀ɔ́mmɛ̀ Amɑnni kudɔú
\p
\v 1 Okpɑ̀ɑ̀tì nɛ̀ Amɑnni kɛ̀ bɛ̀ɛ kɔtɛ Ɛsitɛɛ ciɛ mudiì. 
\v 2 Diyiè dɛ́rì kɛ̀ bɛ̀ɛ di kɛ́deè kòo kpɑ̀ɑ̀tì dɔ̀: Onitipokpɑ̀ɑ̀tì Ɛsitɛɛ ɑ dɔ́ bɑ? Bɑ́ n kpɑ̀tì kó dikéè m bo tì ndɑ duɔ́.
\p
\v 3 Kɛ̀ Ɛsitɛɛ dɔ̀: Okpɑ̀ɑ̀tì kɑ̀ɑ bo yie nhɑ yóu kɛ̀ nní nfòù mí nnɛ̀ n kɔbɛ. 
\v 4 Bɛ̀ ti fìtɛ́mu mí nnɛ̀ n kɔbɛ kɛ yóó ti fíé. Kɛ̀ bɛ̀ do nti fìtɛ́ kɛ ti bo ntú ntidɑɑtì n nɑ bɑ́ mbɛ́i nkɛ́bennɛ́ kɛ́ ndɑ kɔɔ́nnɛ̀ fɔ̃́ nhokpɑ̀ɑ̀tì.
\p
\v 5 Kòo kpɑ̀ɑ̀tì Asuyeduusi dɔ̀: Wenninwe wèè totí mɛyɛ̀mmɛ̀ mɛmmɛ, dɛ yiɛ̀ mborɛ?
\p
\v 6 Kɛ̀ Ɛsitɛɛ dɔ̀: Ti kpɑntídɛ̀ntɔù, ti dootitɔù tu Amɑnni nwe onitiyonkuwe.
\p Kɛ̀ kufɔ̃wɑɑ́ nhɑutɛ́ Amɑnni okpɑ̀ɑ̀tì nɛ̀ o pokù bɛ ììkɛ̀. 
\v 7 Kòo kpɑ̀ɑ̀tì miɛkɛ pɛikɛ, kòo ítɛ́ dɛndɛ bɑ̀mbɑ̀ nkɛ́yɛ̀ tɛkpɑ̀ɑ̀tìcĩ́ɛ̃̀tɛ̀ towɑɑ̀, kɛ̀ Amɑnni nkpɑɑ́ kɛ bɑ́ɑ́ nhƐsitɛɛ kòo bo yóu kòo nfòù. 
\v 8 Kòo kpɑ̀ɑ̀tì nwɛ̃tiní bɛ̀ do yo ndɛ̀, kɛ́nsɔ̃́ nhAmɑnni do Ɛsitɛɛ duɔ́ dìì dɔ́ù ĩ́nkɛ̀. Kòo kpɑ̀ɑ̀tì kuɔ́nko kɛ dɔ̀: Dɛ kóo nìtì dɔ́ kɛ́pĩ́ m pokù nwe kɛ́duɔ́nɛ̀ n nɔ̀nfɛ̀ miɛkɛ n cĩ́ɛ̃̀tɛ̀!
\p Ò kpɑɑ́ kɛ mɛ nnɑ́ɑ́ nkòo tɔ̃mbɛ̀ɛ boú Amɑnni ììkɛ̀ kuyɑ̀ɑ̀kù. 
\v 9 Bɛ miɛkɛ kɛ̀ Adibonɑ dɔ̀: Okpɑ̀ɑ̀tì Amɑnni cìɛ́kɛ́ kudɔú nku kɛ bo cɔ́ɔ́ mMɑɑdosee wèè do dɑ dɛɛtɛ́, kɛ̀ ku okùmɛ̀ bo mɛ́tìrìbɛ̀ sipísìdɛ́ nɛ̀ mɛ̀nùmmù. Kòo kpɑ̀ɑ̀tì dɔ̀: Cɔ́ɔ́nnɛ̀ Amɑnni ku ĩ́nkɛ̀.
\p
\v 10 Kɛ̀ bɛ̀ɛ cɔ́ɔ́ nhAmɑnni kudɔú ò do cìɛ́kɛ́ kù, kòo kpɑ̀ɑ̀tì miɛkɛɛ do.
\c 8
\s1 Okpɑ̀ɑ̀tì duɔ́mmɛ̀ dinùù Sifubɛ
\p
\v 1 Dɛ kó diyiè ndi okpɑ̀ɑ̀tì Asuyeduusi duɔ́mmɛ̀ Ɛsitɛɛ Amɑnni Sifubɛ dootitɔù kpɛrɛ dɛmɔu, kɛ̀ Ɛsitɛɛ nɑ́kɛ́ okpɑ̀ɑ̀tì Mɑɑdosee tumɛ̀ o cĩ́ɛ̃̀tɛ̀ kou, kòo duɔ́ nkɛ̀ bɛ̀ɛ ò yùní. 
\v 2 Kòo kpɑ̀ɑ̀tìi túótɛ́ mumɑ́mɑ́ɑ́ nhò do duɔ́ mmù Amɑnni kɛ́duɔ́ mMɑɑdosee kɛ̀ Ɛsitɛɛ ò duɔ́ nhAmɑnni cĩ́ɛ̃̀tɛ̀ kòò mbɑkɛ́. 
\v 3 Kɛ̀ Ɛsitɛɛ wɛ̃tɛ okpɑ̀ɑ̀tì borɛ̀ kɛ́do kɛ́nínkú o ììkɛ̀ kɛ́ nhò bɑ̀ɑ́ nkɛ tú, wèe yetɛ Amɑnni Akɑki yɑɑ̀birɛ yɛ̃ mbɛ̀ɛ dɔɔ̀ mɛ̀ɛ̀ yɛi nSifubɛ. 
\v 4 Kòo kpɑ̀ɑ̀tìi youtɛ o pɑ̀ɑ̀tii mɛsɔɔ nkɔku, kɛ̀ Ɛsitɛɛ ítɛ́ kɛ́cómmú 
\v 5 kɛ dɔ̀: Okpɑ̀ɑ̀tì kɑ̀ɑ pɛ́nsìrì kɛ bo n dɔɔ̀ mɛsɑ̀ɑ̀ nkɛ n dɔ́, ɑ wɑ̃ri yɛpɑ́tɛ kɛ́pɑɑ nhAmɑnni Mɛmɛdɑtɑ birɛ Akɑki yɑɑ̀birɛ do wɑ̃̀ri tì kɛ bo kuɔ Sifubɛ ɑ tempɛ̃ nyimɔu miɛkɛ. 
\v 6 M bo yĩ́mɛ kɛ nwúónko kɛ̀ bɛ̀ɛ kuɔ n kɔbɛ? M bo yĩ́mɛ kɛ́nwúó mbɛ̀ kɔ̀ù dɛ̀ n kɔbɛ?
\p
\v 7 Kòo kpɑ̀ɑ̀tì Asuyeduusii nɑ́kɛ́ Ɛsitɛɛ nɛ̀ Sifu Mɑɑdosee kɛ dɔ̀: N duɔ́mmu Ɛsitɛɛ Amɑnni cĩ́ɛ̃̀tɛ̀ kɛ̀ bɛ̀ ò cɔ̀ɔ́ nkudɔú ò do dɔ́ mɛ̀ɛ̀ kpɛ́í nkɛ́kuɔ Sifubɛ. 
\v 8 Di bo nɑ kɛ́wɑ̃ri nɛ̀ n kó diyètìrì di dɔ́ tì, tìì yóó teennɛ̀ Sifubɛ, kɛ́ĩkú n cɑnnimɛ̀. Kɛ yɛ̃́ tìì wɑ̃̀ri kɛ ĩkú n cɑnnimɛ̀ nɛ̀ n kó diyètìrì tì ɔ̃ɔ̃ í ncèètɛmɛ̀.
\p
\v 9 Dɛ kó diyiè otɑ̃ɑ̃̀tɑ̃ɑ̃́nwè, otɑ̃̀nkù bɛ̀ tu we Sifɑ̃ɑ̃\f + \fr 8:9 \fr*\fk Sifɑ̃ɑ̃: \fk*\ft Bɛ̀ do kɑɑ mmɛ̀ɛ̀ botí bɛtɑ̃̀ɑ̃̀bɛ̀ ti í mɛ nkɑɑ nyíe. Wéntɛ́ 3:7. Bɛ kóo tɑ̃̀nkù Sifɑ̃ɑ̃ berínɛ̀ ti kó bɛtɑ̃̀ɑ̃̀bɛ̀ onummuwè nɛ̀ okuɔ́nwe dɛ cuokɛ̀ nkɛ (tipɔɔ̀dùtì nɛ̀ diyodɔ̀rì dɛ cuokɛ̀).\ft*\f*, diyiè sipísìdɛ́ nɛ̀ ditɑ̃ɑ̃́nnì kɛ̀ bɛ̀ɛ tíí nhokpɑ̀ɑ̀tì pɑ́tíwɑ̃ɑ̃̀bɛ̀ kɛ̀ Mɑɑdosee nɑ́kɛ́ kɛ̀ bɛ̀ɛ wɑ̃ri yɛpɑ́tɛ kɛ́duɔ́ nSifubɛ nɛ̀ okpɑ̀ɑ̀tì tũ̀mbɛ̀, nɛ̀ mìníísìbɛ̀ nɛ̀ kùmɑ̀ndɑ́ɑ̀bɛ̀ bɛ̀ɛ̀ bo itempɛ̃ ntɛkɔ̀ùtɛ̀ nɛ̀ sipísìdɛ́ nɛ̀ ìyiekɛ̀ (127) miɛkɛ, kɛ́túótɛ́ Ɛ̃ndi kɛ́tuɔkɛnɛ̀ Etiopii, kɛ́wɑ̃ri bɑ́ kùù botí nɛ̀ ku nɑ́ɑǹtì nɛ̀ ku wɑ̃rii, kɛ́wɑ̃ri Sifubɛ nɛ̀ bɛ nɑ́ɑǹtì. 
\v 10 Bɛ̀ do yɛ̀ wɑ̃̀ri nɛ̀ okpɑ̀ɑ̀tì yètìrì ndi kɛ́ĩkú o cɑnnimɛ̀, kɛ́ yɛ̀ duɔ́ mbɛsɑ̃ndèèbɛ̀ kɛ̀ bɛ̀ɛ dekɛ sisɛ̃ĩ́ sìì cɑ̃ɑ̃́ kɛ́kɔtɛ kɛ́ yɛ̀ totí, 
\v 11 kɛ wɑ̃̀ri yɛpɑ́tɛ miɛkɛ kɛ tú: Okpɑ̀ɑ̀tì duɔ́mmu dinùù Sifubɛ bɛ̀ɛ̀ bo o ɛkɛ̀ yɛmɔu kɛ tú bɛ̀ɛ tíí nkɛ́dɛɛtɛ́ bɛ fòmmu, ò bɛ̀ pɑ̃mu dinùù kɛ tú bɛ̀ɛ fíé itempɛ̃ nyimɔu kɔbɛ bɛ̀ɛ bo ndɔ́ kɛ́ bɛ̀ dokɛ́nɛ̀, bɛ̀ bo nɑ kɛ́kuɔ bɛnitipòbɛ̀ nɛ̀ ibí kɛ́hɛí bɛ kpɛrɛ. 
\v 12 Okpɑ̀ɑ̀tì Asuyeduusi do bɛ̀ duɔ́ ndìì nùù do dò nkɛ́dɔɔ̀ diyiè dìmɑ́ɑ̀ ndi, dibenni tɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ ditɑ̃ɑ̃́nnì. 
\v 13 Dɛ kó yɛpɑ́tɛ do mɔkɛ muwɛ̃rímú mmu bɛ̀ yɛ̀ duɔ́ nyìì tempɛ̃ mmiɛkɛ, kɛ nɑ́ɑ́ mbɛnìtìbɛ̀ bɛmɔu kɛ tú kɛ̀ dɛ̀ yiè tùɔ̀kɛní Sifubɛɛ bɑ́ɑ́tí kɛ́dokɛ́nɛ̀ bɛ̀ɛ̀ dɔ́ kɛ́ bɛ̀ kùɔ. 
\v 14 Okpɑ̀ɑ̀tì bɛ̀ duɔ́ ndìì mɔ̀nnì dinùù, kɛ̀ bɛsɑ̃ndèèbɛ̀ɛ dekɛ sisɛ̃ĩ́ cɑ̃ɑ̃si kɛ́cokɛ́ mɛcɑ̃ɑ̃ nkɛ́pitɛ́ tinɑ́ɑǹtì dihɛidiɛ̀ Susi.
\p
\v 15 Kɛ̀ Mɑɑdosee yɛnní tɛkpɑ̀ɑ̀tìcĩ́ɛ̃̀tɛ̀ kɛ dɑ́ɑ́tí dikpɑ̀ɑ̀tìyɑɑ̀bòrì dìì ɑ̃ mɛwũɔ̃̀ nnɛ̀ mɛpɛ́ì, kɛ́nɔ́ɔ́ ndiyɑ̀ɑ̀bòkperì dìì wũɔ̃ kɛ pɛ́ì. Kɛ̀ dɛ̀ɛ nɑrikɛ Susi kɔbɛ kɛ̀ bɛ̀ mpĩɛ̃kù kɛ pɛ́ú. 
\v 16 Kɛ̀ dɛ̀ɛ nɑrikɛ Sifubɛ, kɛ̀ diwɛ̀ì mbɛ̀ bo bɛ̀ bɛ̀ dɛ̀úkùnnɛmɛ̀. 
\v 17 Okpɑ̀ɑ̀tì duɔ́ ndìì nùù tùɔ̀kɛ dìì mɔ̀nnì yɛhɛkɛ̀ kɛ̀ dɛ̀ɛ nɑrikɛ Sifubɛ kɛ̀ diwɛ̀ì mbɛ̀ bo kɛ̀ bɛ̀ ɑ̃ɑ̃̀ yɛbɑɑ nkɛ yo ntidiitì, kɛ̀ kufɔ̃wɑɑ́ nhɑutɛ́ bɛnìtìbɛ̀, kɛ̀ bɛsṹkùbɛ̀ɛ nɑɑ́ nSifubɛ.
\c 9
\s1 Sifubɛ nɑmɛ̀ bɛ dootitɔbɛ̀
\p
\v 1 Dibenni tɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ ditɑ̃ɑ̃́nnì, okpɑ̀ɑ̀tì dɔú ndìì nùù do dò nkɛ́dɔɔ̀ dìì yiè, Sifubɛ dootitɔbɛ̀ yɛ̀mmɛ̀ do dò mbɛɛ̀ yóó bɛ̀ nɑ, kɛ̀ Sifubɛ bɛɛ̀ nɛ́ wɛ̃tɛ kɛ́ bɛ̀ nɑ. 
\v 2 Okpɑ̀ɑ̀tì Asuyeduusi tempɛ̃ nyimɔu miɛkɛ kɛ̀ Sifubɛɛ tíí nkɛ́bɑɑo bɛ̀ɛ̀ bɛ̀ dɔ́nɛ̀ mɛyɛi, nhòmɔù í ndɑ̀ɑ́tí kɛ́cómmú bɛ ììkɛ̀, kɛ yɛ̃́ kufɔ̃wɑɑ́ ndo bɛ̀ ɑutɛ́mɛ̀. 
\v 3 Kòo kpɑ̀ɑ̀tì tũ̀mbɛ̀ nɛ̀ kùmɑ̀ndɑ́ɑ̀bɛ̀ bɛ̀ɛ̀ bɑkɛ́ itempɛ̃, mìníísìbɛ̀ nɛ̀ okpɑ̀ɑ̀tì tɔ̃mbɛ̀ kɛ̀ bɛ̀ɛ kónnɛ́ Sifubɛ bɛ̀ dé mɛ̀ɛ̀ kpɛ́í mMɑɑdosee. 
\v 4 Mɛnkɛ Mɑɑdosee do dɛukɛmu tɛkpɑ̀ɑ̀tìcĩ́ɛ̃̀tɛ̀ miɛkɛ, kòo yètìrìi feitɛ́ itempɛ̃ nyimɔu kòò ndɛ́úkú.
\p
\v 5 Kɛ̀ Sifubɛɛ dɔɔ̀ bɛ dootitɔbɛ̀ bɛ̀ dɔ́mɛ̀, kɛ́ bɛ̀ kùɔnɛ̀ yɛse kɛ̀ bɛnìtìbɛ̀ɛ kú kɛ́nsũ mɛdiɛ̀. 
\v 6 Sifubɛ do kùɔ Susi dihɛidiɛ̀ miɛkɛ bɛnìtìbɛ̀ sikɔusìnùmmù (500) ndi. 
\v 7-10 Kɛ̀ bɛ̀ɛ kuɔ Amɑnni Amɛdɑtɑ birɛ Sifubɛ dootitɔù bí tɛpíítɛ̀: Pɑdisɑnnɛdɑtɑ nɛ̀ Dɑdifɔ̃ɔ̃ nɛ̀ Asipɑtɑ nɛ̀ Podɑtɑ nɛ̀ Adɑyɑ nɛ̀ Adidɑtɑ nɛ̀ Pɑdimɑsetɑ nɛ̀ Adisɑii nɛ̀ Adidɑdiɑ nɛ̀ Fɑyesɑtɑ. Bɛ̀ mɛ nyí nhɛí dɛ̀mɑrɛ̀.
\p
\v 11 Dɛ yiè mɔ́mmɔnni kɛ̀ bɛ̀ɛ nɑ́kɛ́ okpɑ̀ɑ̀tì bɛ̀ kùɔ bɛnìtìbɛ̀ kɛ̀ bɛ̀ mɑ̀mɛ̀ Susi dihɛidiɛ̀ miɛkɛ. 
\v 12 Kòo kpɑ̀ɑ̀tìi nɑ́kɛ́ Ɛsitɛɛ kɛ dɔ̀: Sifubɛ kùɔ Susi dihɛidiɛ̀ miɛkɛ bɛnìtìbɛ̀ sikɔusìnùmmù (500) ndi nɛ̀ Amɑnni bí tɛpíítɛ̀, bɛ̀ nɛ́ bo nkùɔ bɛ̀dɛ itempɛ̃ ntɛì miɛkɛ? Kɑ̀ɑ kpɑɑ́ dɔ́ tìmɑtì n nɑ́kɛ́ kɛ̀ n tì dɔɔ̀, ɑ dɔ́ ɔ̃̀nti? N yóó tì dɔ̀ɔ̀mu.
\p
\v 13 Kɛ̀ Ɛsitɛɛ dɔ̀: Okpɑ̀ɑ̀tì kɑ̀ɑ bo yie nhɑ duɔ́ ndinùù Sifubɛ kɛ̀ bɛ̀ nɑɑ yíɛ́ dɔɔ̀ bɛ̀ dɔ̀ɔ̀mɛ̀ yíe nSusi kó dihɛì kɛ́cɔ́ɔ́ nhAmɑnni bí tɛpíítɛ̀ idɛí ĩ́nkɛ̀.
\p
\v 14 Kòo kpɑ̀ɑ̀tìi yie nkɛ̀ bɛ̀ɛ pitɛ́ dɛ kó tinɑ́ɑǹtì dihɛì kɛ́cɔ́ɔ́ nhAmɑnni bí tɛpíítɛ̀ idɛí ĩ́nkɛ̀. 
\v 15 Kɛ̀ Sifubɛ bɛ̀ɛ̀ bo Susi kɛ̀ bɛ̀ɛ tíí ndibenni tɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ dinɑɑnnì, kɛ́kuɔ bɛnìtìbɛ̀ sikɔusìtɑ̃ɑ̃ti (300), bɛ̀ mɛ̀ nyí nhɛí dɛ̀mɑrɛ̀.
\p
\v 16 Sifubɛ bɛ̀ɛ̀ bo itempɛ̃ ntɛì kɛ̀ bɛ̀ɛ tíí nkɛ́bɑɑo bɛ dootitɔbɛ̀ kɛ́dɛɛtɛ́ bɛ fòmmu, kɛ́kuɔ bɛnìtìbɛ̀ sikɔupípísìyiekɛ̀ nɛ̀ sikɔupísìnùmmù (75000), bɛ̀ mɛ nyí nhɛí dɛ̀mɑrɛ̀. 
\v 17 Dɛ do dɔ̀ɔ̀ dibenni tɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ ditɑ̃ɑ̃́nnì yiè ndi. Diyiè tɛpíítɛ̀ nɛ̀ dinɑɑnnì yiè kɛ̀ bɛ̀ɛ yóu kɛ́ɑ̃nnɛ́ dibɑnni kɛ́nyɑ̃nku nɛ̀ diwɛ̀ì. 
\v 18 Sifubɛ bɛ̀ɛ̀ bo Susi bɛmbɛ do kpɑ ntɛpíítɛ̀ nɛ̀ ditɑ̃ɑ̃́nnì nɛ̀ dinɑɑnnì ndi, kɛ́om̀pɛ̀ nɛ̀ dinummurì, kɛ́ɑ̃nnɛ́ dibɑnni kɛ́nyɑ̃nku nɛ̀ diwɛ̀ì. 
\v 19 Kɛ̀ Sifubɛ bɛ̀ɛ̀ bo yɛhɛkɛ̀ sɑ́m̀pɔ́yɛ̀ kɛ̀ bɛmbɛɛ bɑɑ́ ndibenni tɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ dinɑɑnnì kɛ́pɑ̃mmú bɛtɔbɛ̀ yɛpɑ̃rɛ̀.
\s1 Sifubɛ ɑ̃ɑ̃̀mɛ̀ dibɑnni kɛ denniní bɛ̀ nɑmɛ̀ bɛ dootitɔbɛ̀
\p
\v 20 Kɛ̀ Mɑɑdosee wɑ̃ri dɛ kó tinɑ́ɑǹtì yɛpɑ́tɛ kɛ́duɔ́ nSifubɛ bɛ̀ɛ̀ bo Asuyeduusi tempɛ̃ nyimɔu, ìì tɔ̀kɛ́ nɛ̀ ìì dɛ́tirì. 
\v 21 Kɛ dɔ̀ bɛ̀ níí ɑ̃nnɛ́ dibɑnni bɑ́ dìì benni otɑ̃̀nkù tɛpíítɛ̀ nɛ̀ odɛ́rì diyiè tɛpíítɛ̀ nɛ̀ dinɑɑnnì nɛ̀ dinummurì. 
\v 22 Dɛ kó yɛwe nyɛ Sifubɛ nɑmɛ̀ bɛ dootitɔbɛ̀, kɛ̀ mɛyɛǹcɑɑ̀rìmɛ̀ɛ nɑɑ́ ndiwɛ̀ì, kɛ̀ mɛyɛi nnɑɑ́ mmɛsɑ̀ɑ̀ mbɛ̀ do dò nkɛ́mbɑɑ̀mmu kɛ́ndenniní dɛ kó yɛwe kpɛ́í nkɛ pɑ̃ɑ̃ mbɛtɔbɛ̀ yɛpɑ̃rɛ̀, kɛ pɑ̃ɑ̃ nnɛ̀ bɛcĩ̀rìbɛ̀ yɛpɑ̃rɛ̀. 
\v 23 Kɛ̀ Sifubɛɛ yie mMɑɑdosee bɛ́i ntì, kɛ̀ dɛ kó dibɑnnii nɑɑ́ mbɛ kó ikuɔ́.
\p
\v 24 Kɛ yɛ̃́ Amɑnni Amɛdɑtɑ birɛ Akɑki yɑɑ̀birɛ do dɔ́mɛ̀ kɛ́kuɔ Sifubɛ kɛ́bɔ nyipɑ̃ɑ̃díítí kɛ bo yɑ̀ dìì yiè ndi ò yóó bɛ̀ kùɔmɛ̀. 
\v 25 Kɛ̀ Ɛsitɛɛ kɔtɛ kɛ́yɑ̀ okpɑ̀ɑ̀tì, kòo yie nkɛ́wɑ̃ri kɛ dɔ̀: Bɛ̀ɛ kuɔ Amɑnni wèè dɔ́ kɛ́kuɔ Sifubɛ. Mɛm̀mɛ bɛ̀ cɔ̀ɔ́mmɛ̀ Amɑnni nɛ̀ o bí idɛí. 
\v 26 Dɛɛ̀ te kɛ̀ bɛ̀ yu dɛ kó dibɑnni kɛ tú mudítíbɔmmù.
\p Kɛ̀ Sifubɛɛ yie mMɑɑdosee bɛ́i ntì kɛ yɛ̃́ bɛ̀ yɑ̀mɛ̀ bɛmɔ́mmɔmbɛ dɛ̀ɛ̀ dɔ̀ɔ̀. 
\v 27 Kɛ̀ bɛ̀ɛ dɔú ndɛ kó ikuɔ́ bɛ kpɛ́í nnɛ̀ bɛ yɑɑ̀bí kpɛ́í nnɛ̀ bɛ̀ɛ̀ yóó nɑɑ́ nSifubɛ bɛ kpɛ́í nkɛ̀ bɛ̀ bo mbɑɑ̀ ndɛ kó yɛwe yɛdɛ́ bɑ́ dìì benni kɛ́ndònnɛ̀ Mɑɑdosee bɛ́immɛ̀. 
\v 28 Dɛ kó dibɑnni dò nkɛ́mbomu sɑ̃́ɑ̃̀, bɑ́ tɛ̀ɛ̀ cĩ́ɛ̃̀tɛ̀, bɑ́ kùù tempɛ̃ mbɑ́ dìì ɛì, bɛ̀ mbɑɑ̀ mmudítíbɔmmù bɑnni kɛ denniní dɛ kó yɛwe, bɛ̀ bɑ́ɑ́ yɛ̀ yɛ̃̀ mbɛ̀ bɑ́ɑ́ yɛ̀ yóu.
\p
\v 29 Kòo nitipokpɑ̀ɑ̀tì Ɛsitɛɛ nɛ̀ Sifu Mɑɑdosee, kɛ̀ bɛ̀ɛ yíɛ́ kɛ́wɑ̃ri yɛpɑ́tɛ kɛ yíɛ́ kɛ́cɛ̃́ɛ̃́kùnnɛ mudítíbɔmmù bɑnni. 
\v 30 Kɛ̀ bɛ̀ɛ wɑ̃ri yɛpɑ́tɛ Sifubɛ bɛ̀ɛ̀ bo Asuyeduusi tempɛ̃ nyimɔu miɛkɛ kɛ dɔ̀ diwɛ̀ì mbɛ̀ bo nɛ̀ kunɑɑtí. 
\v 31 Kɛ̀ bɛ̀ɛ bɛ̀ nɑ̀kɛ́ kɛ dɔ̀ bɛ̀ mbɑɑ̀ mmudítíbɔmmù bɑnni dɛ kó yɛwe. Onitipokpɑ̀ɑ̀tì Ɛsitɛɛ nɛ̀ Mɑɑdosee bɛɛ̀ do dɔú ndɛ kó ikuɔ́ kɛ́ ì mbo bɛ kpɛ́í nnɛ̀ bɛ yɑɑ̀bío, kɛ dònnɛ̀ mɛnùboúmmɛ̀ nɛ̀ yɛdɑbùò nkpɛyi. 
\v 32 Kɛ̀ Ɛsitɛɛ yíɛ́ kɛ́cɛ̃́ɛ̃́kùnnɛ mudítíbɔmmù bɑnni, kɛ̀ bɛ̀ɛ wɑ̃ri dɛ kó tinɑ́ɑǹtì dipɑ́tíri miɛkɛ.
\c 10
\s1 Mɑɑdosee dɛukɛmɛ̀
\p
\v 1 Kòo kpɑ̀ɑ̀tì Asuyeduusii duɔ́ nkòò tenkɛ̀ kɛmɔu kɔbɛ mpĩ́ mmutɔ̃mmú nɛ̀ muwɛ̃rímú nɛ̀ dɑ̀mɛ́ɛ̀rì tɑkɛ́ kɔboo. 
\v 2 Okpɑ̀ɑ̀tì wɛ̃rímú diɛmù nɛ̀ o kɔ̃m̀bɔ̀tɔ̃mmú nɛ̀ ò dèe mmɛ̀ɛ̀ botí Mɑɑdosee, tì wɑ̃̀rimu Mɛdiibɛ nɛ̀ Pɛrisiibɛ kpɑ̀ɑ̀tìbɛ̀ dɔɔ̀rìmɛ̀ pɑ́tɛ miɛkɛ. 
\v 3 Mɑɑdosee weè do tũ nhokpɑ̀ɑ̀tì Asuyeduusi o tenkɛ̀ miɛkɛ, kɛ tú onitidiɛwè, kòò kɔbɛ ò dé koò dɔ́, kòò wɑnti bɛ kó mɛsɑ̀ɑ̀ nkɛ dɔ́ bɛ̀ bo mbomɛ̀ kɛ̀ dɛ̀ nɑɑti.