\id EPH di50.all F{evrier 1999 BJ Parakou B{enin
\ide UTF-8
\h Efɛɛsi
\toc1 Pɔɔri wɑ̃̀ri dìì pɑ́tíri Kirisi kɔbɛ bɛ̀ɛ̀ bo Efɛɛsi
\toc2 Efɛɛsi
\mt1 Pɔɔri wɑ̃̀ri dìì pɑ́tíri Kirisi kɔbɛ bɛ̀ɛ̀ bo Efɛɛsi
\imt1 Di mpɑ́tíri tɔ tìì nɑ́ɑǹtì
\ip Pɔɔri do bo wɑ̃̀ri di mpɑ́tíri kɛ̀ bɛ̀ ò kpetí Odommu nwe. O pɑ́tíri nɑ́ɑǹtì yuu tú: Kuyie nwɛ̃nnɛ́ kɛĩ́nkɛ̀ kpɛrɛ nɛ̀ kɛtenkɛ̀ kpɛrɛ kɛ̀ Kirisi dɛ̀ bɑkɛ́.
\ip O pɑ́tíri miɛkɛ ò ketɛ́ kɛ bɛnkɛ ti wɛ̃ mmɛ̀ɛ̀ botí nku nɛ̀ Kirisi, kɛ bɛnkɛ Kuyie nti yumɛ̀ kɛ̀ ti bo ntú ku kɔbɛ, kɛ bɛnkɛ kù ti dɛɛtɛ́mɛ̀ nɛ̀ ti yɛi nɛ̀ ku Birɛ Yesu Kirisi borɛ̀ nɛ̀ kù ti cɑ̀nnɛmɛ̀ nɛ̀ Muyɑɑ́nsɑ̀ɑ̀mù.
\ip Mɛdɛ́rímɛ̀ kɛ nɑ́ɑ́ nti dò nkɛ́ntɑunɛ̀ mɛ̀ɛ̀ botí Kirisi. Nɛ̀ mɛdonnimɛ̀ mɛ̀pɛ́u miɛkɛ kòò bɛnkɛ kɛ tú Kirisi kɔbɛ tĩ̀nnì dònnɛ̀ onìtì kó tikɔ̃̀ntì nti, kɛ̀ Kirisi tu diyuu, kɛ bɛnkɛ kɛ tú Kirisi kɔbɛ tĩ̀nnì dò ntɛcĩ́ɛ̃̀tɛ̀ kɛ̀ Yesu tu dipũũ. Kɛ̀ bɛ̀ wɛ̃̀tɛ kɛ donnɛ̀ onitipòkù kɛ̀ Kirisi tu o dɔù.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kirisi nɛ̀ o kɔbɛ tĩ̀nnì 1-3
\io1 2. Mufòmmu mupɑ̀mmù nɛ̀ Kirisi 4-6
\c 1
\s1 Pɔɔri dɔummɛ̀ Efɛɛsi kɔbɛ
\p
\v 1 Mí mPɔɔri Kuyie ntɑ̃ɑ̃tɛ́ wè, kɛ̀ n tú Yesu Kirisi kó ditɔ̃nnì, míì di wɑ̃̀ri dipɑ́tíri díndi Kirisi kɔbɛ bɛ̀ɛ̀ bo Efɛɛsi kɛ tɑunnɛ̀ Yesu. 
\v 2 Ti cicɛ Kuyie nnɛ̀ ti Yiɛ̀ nYesu Kirisi bɛ̀ di dɔɔ̀ mɛsɑ̀ɑ̀ kɛ di duɔ́ ndiwɛ̀ì.
\s1 Nɛ̀ Kirisi kpɛ́í nkɛ Kuyie nti dɔ̀ɔ̀mɛ̀ mɛsɑ̀ɑ̀
\p
\v 3 Ti sɑ̃ntímu Kuyie nti Yiɛ̀ nYesu Kirisi cicɛ, wèè ti dɔ̀ɔ̀ kɛĩ́nkɛ̀ kó mɛsɑ̀ɑ̀ mmɛbotí mɛbotí, ti tɑunnɛ̀ mɛ̀ɛ̀ kpɛ́í nYesu Kirisi. 
\v 4 Nɛ̀ Kirisi kpɛ́í nkɛ Kuyie nti tɑ̃ɑ̃tɛ́mɛ̀ kɛ̀ mu nyí dɔ̀ɔ̀ kutenkù, kɛ̀ ti bo nwenni pɑ́íí kɛ̀ dɛ̀ kù nɑɑti kù ti dɔ́ mɛ̀ɛ̀ kpɛ́í. 
\v 5 Nɛ̀ Yesu kpɛ́í nkɛ Kuyie nti dɔ́mɛ̀ kɛ mɛ̀ tɑ̃ɑ̃tɛ́ nɛ̀ dimɔ̀nnì, kɛ ti dɔ̀ɔ̀ ku bí, kuù mɛ̀ dɔ́ kɛ mɛ̀ dɔ̀ɔ̀. 
\v 6 Kɛ̀ ti sɑ̃ntí Kuyie nkù ti kuɔ́ mmɛ̀ɛ̀ kpɛ́í mmɛsémmɛ̀ mɛdiɛ̀, nti tɑunnɛ̀ mɛ̀ɛ̀ kpɛ́í nku Birɛ kù dɔ́ dɛ̀ mɛsɑ̀ɑ̀.
\p
\v 7 Kuyie nti dontɛ́nɛ̀ wèè kó mɛyĩ̀ĩ̀ nkɛ tì cĩ̀ɛ̃́ nti yɛi nku sɑ̀ɑ̀ ndɛu mɛ̀ɛ̀ kpɛ́í, 
\v 8 kɛ̀ kù ti duɔ́ mmɛciì nnɛ̀ mɛyĩ́ɛ̃́tímɛ̀ mɛdiɛ̀. 
\v 9 Kù ti bɛnkɛ dɛ̀ɛ̀ do sɔri dɛ̀ndɛ, kù do tɑ̃ɑ̃tɛ́mɛ̀ nɛ̀ dimɔ̀nnì nɛ̀ Yesu Kirisi kpɛ́í nkɛ bo mɛ̀ dɔ̀ɔ̀. 
\v 10 Kù do dɔ́ kɛ̀ dɛ mɔ̀nnì tùɔ̀kɛ kùu wɛ̃nnɛ́ dɛnɛnnɛ̀ dɛmɔu ndi, kɛĩ́nkɛ̀ kpɛrɛ nɛ̀ kɛtenkɛ̀ kpɛrɛ kɛ̀ Kirisi ndɛ̀ bɑkɛ́.
\p
\v 11 Nɛ̀ Yesu kpɛ́í nkɛ kù ti tɑ̃ɑ̃tɛ́mɛ̀ kɛ ti cɑ̃̀ńnɛ́. Kù do mɛ ndɔ́ nɛ̀ dimɔ̀nnì, kù ɔ̃ nkɛ̀ kù tɑ̃ɑ̃tɛ́ tì kù ti ndɔɔ̀. 
\v 12 Kù dɔ́ tìnti bɛ̀ɛ̀ tɑ̃́ Kirisi nɛ̀ dimɔ̀nnì ti nkù sɑ̃ntímu kù dɛu mɛ̀ɛ̀ kpɛ́í.
\p
\v 13 Díndi múnkɛ di kèè dìì mɔ̀nnì timɔ́mmɔnti, Tinɑ́ɑǹsɑ̀ɑ̀tì kɛ tɑ̃́ Kirisi kòo di dɛɛtɛ́, dɛ mɔ̀nnì ndi Kuyie ndi cɑ̀nnɛmɛ̀ kɛ di duɔ́ Muyɑɑ́nsɑ̀ɑ̀mù kù do yɛ̃ nkù yóó di duɔ́ mmù. 
\v 14 Muù ti bɛnkú ti yóó tiekɛmɛ̀ mɛsɑ̀ɑ̀ nKuyie mbɑɑnɛ̀mɛ̀ ku kɔbɛ, muù ti nɑ́ɑ́ nti yóó tiekɛmɛ̀ dɛ kó mɛsɑ̀ɑ̀ nkù bo ti dɛɛtɛ́ dìì yiè pɑ́íí, ti nkù sɑ̃ntí kù dɛu mɛ̀ɛ̀ kpɛ́í.
\s1 Pɔɔri bɑ̀ɑ́mmɛ̀ Kuyie nhEfɛɛsi kɔbɛ kpɛ́í
\p
\v 15 N kèèmu di tɑ̃́ mɛ̀ɛ̀ botí Yesu, nɛ̀ di dɔ́ mɛ̀ɛ̀ botí di kɔbɛ tɔbɛ̀. 
\v 16 Dɛɛ̀ kpɛ́í nte kɛ̀ n yí yóu m bo nsɑ̃ntímɛ̀ Kuyie ndi kpɛ́í, kɛ denniní di kpɛ́í m bɑ́ɑ́mmu miɛkɛ sɑ̃́ɑ̃̀. 
\v 17 Kɛ̀ dɛ̀ bo yie nkɛ̀ Kuyie nti Yiɛ̀ nYesu Kirisi cicɛ di duɔ́ mmɛciì kɛ̀ di bɑntɛ́ Yesu, kɛ́yĩ́ɛ̃́tɛ́ ò dɔ̀ɔ̀ dɛ̀ di kpɛ́í. 
\v 18 N kù bɑ̀ɑ́mmu kɛ tú kù di duɔ́ mmɛciì nkɛ̀ di bɑntɛ́ kù di yu mùù kpɛ́í, kù bɑ̀ɑnɛ̀ dɛ̀ bɛ̀ɛ̀ tu ku kɔbɛ, 
\v 19 kɛ́bɑntɛ́ muwɛ̃rímú diɛmù kù ti duɔ́ mmù tínti bɛ̀ɛ̀ tɑ̃́ Kirisi mù dɛu kɛ mɑmɛ̀. 
\v 20 Nɛ̀ muù wɛ̃rímú mmu Kuyie nduɔ́mmɛ̀ kɛ̀ Kirisi yɑ̃̀ńtɛ́, kɛ̀ kù ò kɑ̀nnɛ ku borɛ̀ kɛĩ́nkɛ̀ dikɑ̀rì sɑ̀ɑ̀rì, ku bɑkù yoú. 
\v 21 Kòò bɑkɛ́ muwɛ̃rímú yɛmbɛ̀, nɛ̀ kɛtenkɛ̀ yɛmbɛ̀ nɛ̀ kɛĩ́nkɛ̀ kɔbɛ, dɛ̀ɛ̀ kó dimɑ̀ɑ̀ bo bɑ̀mbɑ̀, di mmɔ̀nnì nɛ̀ dɛ̀ɛ̀ kpɑɑní, Kirisi weè dɛ̀ bɑkɛ́. 
\v 22 Kuyie nwe n duɔ́ ndɛmɔu, weè tu Kirisi kɔbɛ tĩ̀rɛ̀ yɛmɔu kó diyuu, 
\v 23 diì tú o kɔ̃̀ntì ò bo dìì miɛkɛ, kɛ bo kutenkù kumɔu.
\c 2
\s1 Ti do kumɛ̀ kɛ yɑ̃̀ńtɛ́
\p
\v 1 Di yɛi nnɛ̀ di cɑɑ̀rìmɛ̀ dɛɛ̀ do te kɛ̀ di ntú bɛ̀ɛ̀ ku Kuyie nkó mufòmmu bíɛ́kɛ̀. 
\v 2 Di do fòù kutenkù kuù nkɔbɛ kɔ̃mɛ mmɛ, kɛ yíé nku kóo kpɑ̀ɑ̀tì wèè bo kɛtenkɛ̀ nɛ̀ kɛĩ́nkɛ̀ dɛ cuokɛ̀ o kpɛti, wèè bɑkɛ́ bɛ̀ɛ̀ kó dimɑ̀ɑ̀ yetɛ Kuyie nkpɛti. 
\v 3 Ti múnkɛ do bɛ ntú, kɛ dɔɔ̀ri ti kɔ̃̀ntì nɛ̀ ti yɛ̀mmɛ̀ dɔ́ dɛ̀, nɛ̀ dɛ kpɛ́í nkɛ̀ Kuyie mmiɛkɛ ńdò nkɛ́do ti ĩ́nkɛ̀ kɛ̀ doti mɛ̀ɛ̀ botí bɛtɔbɛ̀ ĩ́nkɛ̀.
\p
\v 4 Kuyie nsémmɛ̀ nɛ́ mɛ ndɛumɛ̀ kɛ̀ kù ti dɔkɛ mɛdiɛ̀. 
\v 5 Ti yɛi nnɛ̀ ti cɑɑ̀rìmɛ̀ dɛɛ̀ do te kɛ̀ ti ntú bɛ̀ɛ̀ ku Kuyie nkó mufòmmu bíɛ́kɛ̀ kɛ̀ Kuyie nti dɔ̀ɔ̀ mɛsɑ̀ɑ̀ nkɛ ti duɔ́ mmufòmmu nɛ̀ Kirisi ti kó mɛwɛ̃nnímɛ̀, ku sɑ̀ɑ̀ mmɛɛ̀ te kɛ̀ kù ti coo. 
\v 6 Kɛ̀ ti wɛ̃nnɛ́nɛ̀ Yesu Kirisi kɛ fòù, kɛ wɛ̃ nkɛ kɑri kɛĩ́nkɛ̀ ku borɛ̀. 
\v 7 Kuyie ndɔ̀ɔ̀ mɛmmɛ kɛ bo bɛnkɛ kù ti dɔ̀ɔ̀ mɛ̀ɛ̀ sɑ̀ɑ̀ ndɛu mɛ̀ mmɛ, kɛ yó mbo sɑ̃́ɑ̃̀ kù mɛ̀ nti dɔ̀ɔ̀ nɛ̀ Yesu Kirisi borɛ̀ ndɛ. 
\v 8 Kuù di dɔ̀ɔ̀ mɛsɑ̀ɑ̀ nkɛ di dɛɛtɛ́ di tɑ̃́ mɛ̀ɛ̀ kpɛ́í Yesu, dɛ̀ í tú nɛ̀ di mɔ́mmɔmbɛ kó muwɛ̃rímú, Kuyie nkó dipɑ̃nnì ndi. 
\v 9 Òmɔù bɑ́ nsɑ̃ntí omɑ́ɑ̀, kòo yɛ̀mmɛ̀ dò nhò dɔ̀ɔ̀ dɛ̀mɑrɛ̀ kɛ̀ dɛɛ̀ te kɛ̀ kù ò dɛɛtɛ́. 
\v 10 Kuyie nkuù ti dɔ̀ɔ̀, nɛ̀ Yesu Kirisi ti kó mɛtɑummɛ̀ miɛkɛ nkɛ kù ti dɔ̀ɔ̀mɛ̀, kɛ̀ ti bo ndɔɔri mutɔ̃mmú sɑ̀ɑ̀mù kù tũ̀ntɛmu nɛ̀ dimɔ̀nnì kɛ̀ ti bo mmù dɔ̀ɔ̀ri.
\s1 Yesu temɛ̀ kɛ̀ Sifubɛ nɛ̀ bɛ̀ɛ̀ í tú Sifubɛ kɛ̀ bɛ̀ wɛ̃nnɛ́ onìtì omɑ́ɑ̀
\p
\v 11 Dentɛnɛ̀ní di do tú bɛ̀ nɛ̀ dimɔ̀nnì, di do í tũ nKuyie, nkɛ̀ Sifubɛ di yu kɛ tú bɛ̀ɛ̀ í cɑ̃mmù, kɛ tú bɛmɑ́ɑ̀ bɛ̀ɛ̀ cɑ̃mmù, dɛ kó mucɑ̃mmù nɛ́ do í tú mùmɑmù. 
\v 12 Dentɛnɛ̀ní di do í túmɛ̀ Kirisi kɔbɛ, di do tú bɛpɔ̀ɔ̀bɛ̀ mbɛ, di do í wɛ̃ńnɛ̀ Kuyie nkɔbɛ, di do í mɔkɛ di bɑɑ dɛ̀, di do í tũ nKuyie. 
\v 13 Di do í tɔ́kɛ́nɛ̀ Kuyie, di mmɔ̀nnì kɛ kù tɔ̀ɔ́nnɛ̀, Yesu Kirisi duɔ́ mmɛ̀ɛ̀ kpɛ́í nhomɑ́ɑ̀ kɛ̀ bɛ̀ ò kùɔ. 
\v 14 Kòò kùɔ mɛníímmɛ̀ mɛ̀ɛ̀ do dò nkuduotí kɛ yɑɑ̀tì Sifubɛ nɛ̀ bɛ̀ɛ̀ í tú Sifubɛ, kɛ̀ bɛ̀ nɑrikɛ kɛ wɛ̃nnɛ́ onìtì omɑ́ɑ̀. 
\v 15 Kɛ pɑ̀ɑ nSifubɛ kó ikuɔ́ yɛ̃ mbɛ̀ nci dɛ̀ nɛ̀ ì yɛ̃ mbɛ̀ ndɔɔri dɛ̀, kɛ wɛ̃nnɛ́ ibotí ìdɛ́, ìì do kpɑ nkɛ̀ ì nɑɑ́ nkubotí kumɑ́ɑ̀, kɛ nɑrikɛ. 
\v 16 Bɛ̀ ò kùɔmu kòò dɛ̀itɛ mɛníímmɛ̀ dɛ kó ibotí idɛ́ do mɔkɛ mɛ̀, kɛ ì tɑunnɛ̀ Kuyie, nkɛ̀ ì nɑɑ́ nhonìtì omɑ́ɑ̀. 
\v 17 Ò pĩ mmuù tɔ̃mmú kɛ nɑ̀kɛ́ Tinɑ́ɑǹsɑ̀ɑ̀tì, diwɛ̀ì kpɛti, díndi bɛ̀ɛ̀ í tú Sifubɛ kɛ dɛ́tìrinɛ̀ Kuyie, nnɛ̀ Sifubɛ bɛ̀ɛ̀ do kù tɔ̀kɛ́nɛ̀. 
\v 18 Timɔu Sifubɛ nɛ̀ bɛ̀ɛ̀ í tú Sifubɛ, Kirisi weè ti niitɛ́ Kuyie mborɛ̀ nɛ̀ Muyɑɑ́nsɑ̀ɑ̀mù kó mɛteèmmɛ̀.
\p
\v 19 Di tɛ̃́nkɛ í tú bɛpɔ̀ɔ̀bɛ̀, yoo dihɛì mɑrì kɔbɛ, di tú Kuyie nkó dihɛì kɔbɛ mbɛ, ku cĩ́ɛ̃̀tɛ̀ kɔbɛ. 
\v 20 Yesu Kirisi weè tu dipũũ, o tɔ̃rɛ̀ nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ yɑ̃̀ɑ̃ nkɛ̀ di sɔkɛ́. 
\v 21 Kirisi weè te kɛ̀ tɛ̀ kpeńnì, kɛ kótírí, kɛ nɑɑ́ Kuyie ncĩ́ɛ̃̀tɛ̀ sɑ̀ɑ̀tɛ̀. 
\v 22 Nɛ̀ Yesu kpɛ́í di tú tɛcĩ́ɛ̃̀tɛ̀ ntɛ Kuyie mbo tɛ̀ nɛ̀ Muyɑɑ́nsɑ̀ɑ̀mù.
\c 3
\s1 Pɔɔri nɑ̀kɛ́mɛ̀ bɛ̀ɛ̀ í tú Sifubɛ Kuyie nnɑ́ɑǹtì
\p
\v 1 Mí mPɔɔri Yesu Kirisi kóo tɔ̃ntì, bɛ̀ n kpetí n nɑ̀kɛ́ mɛ̀ɛ̀ kpɛ́í nkɛ díndi bɛ̀ɛ̀ í tú Sifubɛ Kuyie nnɑ́ɑǹtì. 
\v 2 Di yɛ̃́mu Kuyie nni nkuɔ́mmɛ̀ mɛsémmɛ̀ kɛ n dɔ̀ɔ̀ mɛsɑ̀ɑ̀ kɛ yɛ̃ n nɑ̀kɛ́ Tinɑ́ɑǹsɑ̀ɑ̀tì, díndi bɛ̀ɛ̀ í tú Sifubɛ. 
\v 3 Tìì do sɔri Kuyie nti nni mbɛnkɛ, kɛ̀ n yĩ̀ɛ̃́tɛ́ ku kó disɔ̀rì kpɛti, m mɛ̀ mbo kɛ ti nwɑ̃ũní. 
\v 4 Kɛ̀ di ti kɑ̀ɑ ndi bo bɑntɛ́ Kuyie nni mbɛnkɛmɛ̀ Kirisi kpɛti tìì do sɔri. 
\v 5 Kù do í bɛnkɛ dɛ kó disɔ̀rì kpɛti dimɔ̀nnì kɔbɛ, kù mɛ̀ ntì bɛnkɛmɛ̀ di mmɔ̀nnì Yesu tɔ̃rɛ̀ nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɛ̀ Muyɑɑ́nsɑ̀ɑ̀mù kó muwɛ̃rímú. 
\v 6 Dɛ kó disɔ̀rì tu: Sifubɛ nɛ̀ bɛ̀ɛ̀ í tú Sifubɛ bɛ̀ wɛ̃nnɛ́mɛ̀ onìtì omɑ́ɑ̀, kɛ yóó di tikpɑ̀tì, kù yɛ̃ nkù yóó duɔ́ ntì bɛ̀ɛ̀ yie nYesu Kirisi kó Tinɑ́ɑǹsɑ̀ɑ̀tì.
\p
\v 7 Kù duɔ́ nkɛ̀ n nɑ̀ɑ́ ntì, kù n dɔ̀ɔ̀ mɛsɑ̀ɑ̀ mmɛ kɛ n duɔ́ ndɛ kó mutɔ̃mmú kɛ bɛnkú nɛ̀ n tɔ̃mmú miɛkɛ ku wɛ̃rímú dɛumɛ̀. 
\v 8 Bɑ́ nɛ̀ m mɛ ntumɛ̀ Kirisi kɔbɛ bɛmɔu kó bɛsɑ́m̀pɔ́bɛ̀ kóo sɑ́m̀pɔ́ù, kɛ̀ kù duɔ́ nkɛ̀ m bo nɑ́kɛ́ Tinɑ́ɑǹsɑ̀ɑ̀tì bɛ̀ɛ̀ í tú Sifubɛ, Kirisi kpɑ̀tì dɛumɛ̀ kɛ í mɔkɛ kumɑ̀nku, 
\v 9 kɛ bɛ̀ bɛnkɛ Kuyie nkó disɔ̀rì kpɛti, kunku kùù dɔ̀ɔ̀ dɛmɔu kuù mɛ̀ dɔ́ nɛ̀ dimɔ̀nnì, 
\v 10 kɛ dɔ́ bɛ̀ɛ̀ bɑkɛ́ kɛĩ́nkɛ̀ nɛ̀ bɛ kó bɛkperíbɛ̀ɛ yɑ̀ Kirisi kɔbɛ tĩ̀nnì, kɛ́bɑntɛ́ Kuyie nciì ndɛumɛ̀ mɛdiɛ̀ kɛ í mɔkɛ kumɑ̀nku. 
\v 11 Kuyie ndɔ̀ɔ̀ kù dɔ́mɛ̀ mmɛ nɛ̀ dimɔ̀nnì ti Yiɛ̀ nYesu Kirisi kpɛ́í. 
\v 12 Di mmɔ̀nnì ti bo nɑ kɛ́ kù tɔ̀ɔ́nnɛ̀ kɛ bɑ́ nyĩɛ̃̀kù, ti tɑ̃́ mɛ̀ɛ̀ kpɛ́í nYesu, koò tɑunnɛ̀. 
\v 13 N di nɑ́ɑ́mmu kɛ tú di kɔ̃̀ntì bɑ́ɑ́ yɑ̃rikɛ, bɑ́ kɛ̀ n fɛ̃́ṹrì, n fɛ̃́ṹrì díì kpɛ́í nkɛ̀ dɛ̀ bo di dɔɔ̀ mɛsɑ̀ɑ̀.
\s1 Kirisi ti dɔ́ mɛ̀ɛ̀ botí
\p
\v 14 Dɛɛ̀ kpɛ́í nte kɛ̀ n nínkú n núù ti cicɛ Kuyie nyììkɛ̀. 
\v 15 Kunku kùù te kɛ̀ kɛĩ́nkɛ̀ kɔbɛ nɛ̀ kɛtenkɛ̀ kɔbɛ kɛ̀ bɛ̀ bo. 
\v 16 N kù bɑ̀ɑ́mmu kɛ tú kù di duɔ́ nku kpɑ̀tì diɛtì, kɛ̀ Muyɑɑ́nsɑ̀ɑ̀mù di kpénkùnnɛ, 
\v 17 kɛ̀ Kirisi mbo di miɛkɛ, kɛ̀ di nfííkú tei tei, Kuyie nkó mɛdɔ́kùmɛ̀ miɛkɛ, 
\v 18 kɛ́wɛ̃nnɛ́nɛ̀ Kirisi kɔbɛ tɔbɛ̀ kɛ́bɑntɛ́ Kirisi ti dɔ́ kɛ̀ dɛ̀ dɛu mɛ̀ɛ̀ botí kɛ okù mɛ̀ɛ̀ botí kɛ cũmpúrì mɛ̀ɛ̀ botí bɑ́ kɛ í mɔkɛ kumɑ̀nku, 
\v 19 kɛ́yĩ́ɛ̃́tɛ́ Kirisi ti dɔ́mɛ̀ kɛ̀ dɛ̀ pɛ̃ɛ̃tɛ́ ti yĩ́ɛ̃́tímɛ̀, kɛ́pɛ́tɛ́ Kuyie nkpɛrɛ dɛmɔu.
\p
\v 20 Ti sɑ̃ntímu Kuyie nkùù wɛ̃rímú diɛmù bo ti miɛkɛ, kɛ bo nɑ kɛ́dɔɔ̀ kɛ̀ dɛ̀ɛ pɛ̃ɛ̃tɛ́ ti kù mɔ̀ú dɛ̀ nɛ̀ ti toti tì ti yɛ̀mmɛ̀. 
\v 21 Ku yètìrì ndɛu Yesu Kirisi kɔbɛ cuokɛ̀ sɑ̃́ɑ̃̀ Kirisi pĩ mmùù tɔ̃mmú kpɛ́í. Kɛ̀ dɛ̀ mmɛ̀ ndò.
\c 4
\s1 Kirisi kɔbɛ wɛ̃ mmɛ̀ɛ̀ botí
\p
\v 1 N di nɑ́ɑ́mmu, mí mPɔɔri bɛ̀ kpetí wè Yesu kpɛ́í, nkɛ tú di ńdò nKuyie ndi yu kɛ dɔ́ di ndòmmɛ̀, 
\v 2 kɛ̃́kùnnɛ dimɑ́ɑ̀ kɛ́nyɔɔ̀, kɛ́mmi, kɛ́ndɔ́ ditɔbɛ̀, kɛ́nteénnɛ̀ ditɔbɛ̀. 
\v 3 Yetɛnko kɛ̀ Muyɑɑ́nsɑ̀ɑ̀mù di tɑu, kɛ̀ di mmɔkɛ Kuyie nkó diwɛ̀ì. 
\v 4 Ti mɔkɛ Muyɑɑ́nsɑ̀ɑ̀mù mumɑ́ɑ̀ ndi, kɛ dò nhonìtì omɑ́ɑ̀, kɛ bɑɑ dɛ̀mɑrɛ̀ mɑ́ɑ̀, Kuyie nti yu dɛ̀ɛ̀ kpɛ́í. 
\v 5 Ti Yiɛ̀ mbo omɑ́ɑ̀ ndi, kɛ̀ ti tũ nkucɛ kumɑ́ɑ̀, kɛ̀ bɑ̀tɛ́mmù bo omɑ́ɑ̀. 
\v 6 Kuyie mbo kumɑ́ɑ̀ ndi, timɔu ti cicɛ wèè bɑkɛ́ dɛmɔu, kɛ ti pĩ́nnɛ̀ mutɔ̃mmú timɔu, kɛ bo timɔu ti miɛkɛ.
\p
\v 7 Kuyie nti pɑ̃mu bɑ́ wè dipɑ̃nnì kɛ̀ Kirisi yɛ̀ nti toti bɑ́ wè ò dɔ́ mɛ̀. 
\v 8 Ti wɑ̃̀rimu kɛ tú: Ò wɛ̃̀tɛ kɛ deètì dìì mɔ̀nnì kɛĩ́nkɛ̀ kɛ nɛinɛ̀ bɛcíríbɛ̀ kó yɛwɛ̃rɛ̀ yɛ̀ɛ̀ do kpetí, kɛ pɑ̃ bɛnìtìbɛ̀ yɛpɑ̃rɛ̀.
\m
\v 9 Bɑ ntú ò wɛ̃̀tɛ kɛ deètì? Dɛ̀ bɛnkú kɛ tú ò ketɛ́ kɛ cùtɛ́mu kɛ tɑ kɛtenkɛ̀ miɛkoo dɛcũmpurɛ. 
\v 10 Wèè cùtɛ́ní, weè wɛ̃̀tɛ kɛ dèkɛ, kɛ bo kɛĩ́nkɛ̀ kɛ píɛ́kɛ́ tipíìtì timɔu. 
\v 11 Weè duɔ́ nkɛ̀ bɛ̀mɑbɛ̀ tu o tɔ̃rɛ̀, kɛ̀ bɛtɔbɛ̀ tú Kuyie mpɑ̃ɑ̃nɑ́ɑǹtì nɑ́ɑm̀bɛ̀, kɛ̀ bɛtɔbɛ̀ tu bɛ̀ɛ̀ nɑ́ɑntɛ Tinɑ́ɑǹsɑ̀ɑ̀tì, kɛ̀ bɛtɔbɛ̀ tu bɛ̀ɛ̀ ni Kirisi kɔbɛ tĩ̀rɛ̀, kɛ̀ bɛtɔbɛ̀ tu bɛ̀ɛ̀ tiè nKuyie nnɑ́ɑǹtì. 
\v 12 Ò bɛ̀ duɔ́ ndɛ kó mutɔ̃mmú kɛ̀ bɛ̀ bo tũntɛ o kɔbɛ mbɛ, kɛ̀ bɛ̀ɛ nɑ kɛ pĩ́ nKuyie ntɔ̃mmú, kɛ̀ Kirisi kɔbɛ tĩ̀nnì dìì tu Kirisi kɔ̃̀ntì kɛ̀ dìi dɛukɛ. 
\v 13 Kɛ̀ ti nwɛ̃ ntimɔu ti kérí kùù cɛ, kɛ kótírí kɛ́kpenkɛ, kɛ́nɑɑ́ mpɑ́íí Kirisi dòmmɛ̀. 
\v 14 Kɛ bɑ́ ndònnɛ̀ ibí ìì mu nyí ciì, kɛ tũ mbɛniticiìmbɛ̀ bɛ̀ɛ̀ tiè nyiyɑ́ɑ̀bísítié kɛ ì ti tɔu kuyɑɑkù tɔumɛ̀ tifɔ̃kpɛ̃ti. 
\v 15 Ti dò nkɛ́nnɑ́ɑ́ ntimɔ́mmɔnti nti, kɛ́ndɔ́ titɔbɛ̀, mɛmmɛ ti bo nkótírímɛ̀ kuwedɔuncɛ miɛkɛ, kɛ nɑɑ́nnɛ̀ Kirisi wèè tu diyuu. 
\v 16 Kirisi weè te kòo kɔbɛ bɛmɔu wɛ̃ nkɛ dò nhonìtì omɑ́ɑ̀ nɛ̀ itùòti, kɛ kpeńnì, bɑ́ kùù tùòti kɛ̀ kù pĩ nku tɔ̃mmú kù dò nkɛ́mpĩ́ mmù, kɛ̀ tikɔ̃̀ntì timɔu kòtírí, kɛ kpénkú Kuyie nkó mɛdɔ́kùmɛ̀ miɛkɛ.
\s1 Mɛborimɛ pɑ̀mmɛ̀ dò kɛ́ndòmmɛ̀
\p
\v 17 Ntɛnɛ̀ n dɔ́ kɛ́ di nɑ́kɛ́ tì, nɛ̀ ti Yiɛ̀ nkó diyètìrì, di bɑ́ ntũ mbɛ̀ɛ̀ í bɑ́ɑ́ nKuyie mbɛ kó mɛborimɛ, bɛ̀ tũ mmɛ̀ɛ̀ yɛ̀mmɛ̀ tú dɛtetìrɛ̀ kɔ̃mɛ mmɛ. 
\v 18 Bɛ̀ toti dibiìnnì kó iyɛntotí nyi, bɛ̀ í yɛ̃́ Kuyie nduɔ̀ mmùù fòmmu, bɛ̀ í bɑntɛ́ mɛ̀ɛ̀ kpɛ́í nkɛ̀ bɛ to kpeńnì. 
\v 19 Bɛ̀ tɛ̃́nkɛ í bɑɑ̀tì mɛyɛi nnɛ̀ mɛsɑ̀ɑ̀ kɛ dɔɔ̀ri dɛ̀ɛ̀ í wenni kɛ í diɛ̀ ntikpɑ̀tì, kɛ dɔɔri dɛsĩ́ntɛ́kpɛrɛ dɛmɔu botí nɛ̀ mɛyɛi mmɛmɔu bɛ yɛ̀mmɛ̀ dɔ́mɛ̀ kɛ í yĩɛ̃̀kù.
\p
\v 20 Díndi bɛ̀ í mɛ ndi bɛnkɛ Kirisi kɛ̀ di ò yĩ̀ɛ̃́tɛ́. 
\v 21 Díndi biɛ bɛ̀ di tiémmu o kpɛti kɛ̀ di yĩ̀ɛ̃́tɛ́ o kó timɔ́mmɔnti, dɛ̀ɛ̀ tu: 
\v 22 Di bo yóumɛ̀ mɛborimɛ kótímɛ̀ di do tũ mmɛ̀, di do mɔkɛ mɛdɔ́kùmɛ̀ yɛimɛ mmɛ kɛ̀ mɛ̀ di soú nkɛ di fétìnko. 
\v 23 Yóunɛ̀ kɛ̀ di yɛ̀mmɛ̀ɛ ceetɛ nɛ̀ di yɛǹtotí, 
\v 24 kɛ̀ di nɑɑ́ mbɛnitipɑ̀mbɛ̀ Kuyie ndɔ̀ɔ̀ bɛ̀ kɛ dònnɛnɛ̀ kumɑ́ɑ̀, kɛ̀ di borimɛɛ wenkɛ kɛ̀ di ntũ ntimɔ́mmɔnti.
\p
\v 25 Di yóu siyɑ́ɑ̀bìsí, kɛ́nnɑ́ɑ́ nditɔbɛ̀ timɔ́mmɔnti kɛ yɛ̃́ ti túmɛ̀ Yesu kɔ̃̀ntì kó itùòti nyi. 
\v 26 Kɛ̀ di miɛkɛ pɛikɛ di bɑ́ɑ́ yóu kɛ̀ kɛ̀ɛ ɔɔtɛ kɛ di cé mmɛyɛi, di bɑ́ɑ́ yie nkɛ̀ diyiè tɑ kɛ̀ kɛ̀ kpɑɑ́ pɛ́i. 
\v 27 Di bɑ́ɑ́ pɑ̃ dibɔɔ̀ kucɛ. 
\v 28 Wèè do yuuku wèe yóu muyóò kɛ pĩ́ mmutɔ̃mmú kɛ́mɔɔtɛ o kpɛrɛ kɛ́pɑ̃ bɛcĩ̀rìbɛ̀. 
\v 29 Di bɑ́ nnɑ́ɑ́ ntinɑ́ɑnyɛiti, kɛ̀ di pɛ̀tɛ́ mɛfíè nnɑ́ɑ́nnɛ̀ tìì bo teennɛ̀ bɛtɔbɛ̀ kɛ̀ bɛ̀ɛ kpenkɛ Kuyie nkó kucɛ miɛkɛ, tìì bo teennɛ̀ bɑ́ wè ò bo dìì fɔ̃̀tìrì. 
\v 30 Di bɑ́ ncɑɑri Muyɑɑ́nsɑ̀ɑ̀mù yɛ̀mmɛ̀, muù tu mɛcɑnnimɛ̀ Kuyie nti cɑ̀nnɛ mɛ̀, muù te kɛ̀ ti yɛ̃́ kɛ dò nKuyie nyóó ti dɛɛtɛ́ pɑ́íí diyiè sɔnni. 
\v 31 Bɑ́ mpoonnɛ̀ ditɔbɛ̀, bɑ́ nníínnɛ̀ ditɔbɛ̀, di miɛkɛ bɑ́ mpɛ́ì ditɔbɛ̀, di bɑ́ mmɔkɛ yɛkpɑ̀rɛ̀, di bɑ́ nsĩnkùnko ditɔbɛ̀ yètɛ̀, di bɑ́ ndɔɔri mɛyɛi. 
\v 32 Ndɔɔrinɛ̀ ditɔbɛ̀ mɛsɑ̀ɑ̀, nkɛ ndɔ́ ditɔbɛ̀, kɛ ncĩ́ɛ̃nko ditɔbɛ̀ Kuyie nti cĩ̀ɛ̃́ mmɛ̀ɛ̀ botí nɛ̀ Kirisi kpɛ́í.
\c 5
\s1 Ti bo nyɛ̃́mɛ̀ Kuyie ndɔ́ dɛ̀
\p
\v 1 Ntũnnɛ Kuyie nkó mɛborimɛ, kɛ yɛ̃́ di túmɛ̀ ku bí nyi, kù dɔ́ ì. 
\v 2 Ndɔ́nɛ̀ ditɔbɛ̀ Kirisi ti dɔ́ mɛ̀ɛ̀ botí kɛ duɔ́ nhomɑ́ɑ̀ kɛ̀ bɛ̀ ò kùɔ kòò dò ndipɑ̃nnì kufɔ̃ɔ̃ku nɑtikù kpɛri Kuyie ndɔ́ dì.
\p
\v 3 Di tú Kuyie nkɔbɛ mbɛ, di bɑ́ ndɔuti dɔutinɛ̀ ditɔbɛ̀ di bɑ́ nsĩnkùnko dimɑ́ɑ̀, di bɑ́ duɔ́ ndi yɛ̀mmɛ̀ tikpɑ̀tì. Dɛ̀ ketɛ́ kɛ í dò mbɛ̀ nyo dɛ kó tinɑ́ɑǹtì di cuokɛ̀. 
\v 4 Di bɑ́ nnɑ́ɑntɛ ifɛi kpɛti nɛ̀ tiyɛìnnɑ́ɑǹtì nɛ̀ tinɑ́ɑnyɛiti, dɛ̀ í wenni. Petìnkɛ nsɑ̃ntínɛ̀ Kuyie nku sɑ̀ɑ̀ nkpɛ́í. 
\v 5 Nyɛ̃́nɛ̀ kɛ dò nwèè dɔuti dɔutinɛ̀ bɛtɔbɛ̀ nɛ̀ wèè sĩ̀nkùnko omɑ́ɑ̀, nɛ̀ wèè í diɛ̀ ntikpɑ̀tì, dɛ̀ í cɑ̃́ɑ̃́nnɛ̀ wèè feu yɛbɔkɛ̀. Dɛ yiɛ̀ mbotí í tɑti Kirisi nɛ̀ Kuyie mbɛ kpɑ̀ɑ̀tìyuu miɛkɛ.
\p
\v 6 Di bɑ́ɑ́ yie nkòò mɔù di soutɛ́ nɛ̀ dɛtetìrɛ̀ kó tinɑ́ɑǹtì: Dɛɛ̀ te kɛ̀ Kuyie mmiɛkɛ cɔ́ú bɛ̀ɛ̀ yetɛ ku kpɛti. 
\v 7 Di bɑ́ mmɔkɛnɛ̀ dɛ kó bɛnìtìbɛ̀ botí mɛtɑummɛ̀ mɑmɛ̀. 
\v 8 Di do tú dibiìnnì kɔbɛ mbɛ di mmɔ̀nnì kɛ tɑunnɛ̀ ti Yiɛ̀ kɛ tú kuwenniku kɔbɛ. Nfòùnɛ̀ kɛ dò mmɛnɑ́ɑ̀ nkó ibí. 
\v 9 Kuwenniku kó mutɔ̃mmú tú: Tinìtì, mɛwetímmɛ̀, nɛ̀ timɔ́mmɔnti. 
\v 10 Mbɑɑ̀tìnɛ̀ ti Yiɛ̀ ndɔ́ dɛ̀. 
\v 11 Di bɑ́ nkɔkɛ́ dibiìnnì kɔbɛ kó mutɔ̃mmú miɛkɛ, mù tú mutetìmù mmu, di petìnkɛ mmù dɑ́ɑmmu mmu. 
\v 12 A bo nɑ́kɛ́mɛ̀ bɛ̀ dɔ̀ɔ̀ri dɛ̀ disɔ̀rì dɛ̀ mɔ̀kɛ ifɛi nyi. 
\v 13 Dɛ kó mutɔ̃mmú yɛ̀nní dìì mɔ̀nnì kuwenniku miɛkɛ, kuwenniku ɔ̃ɔ̃ mù feimmu. 
\v 14 Mɔ́mmuɔ nwe bɛ̀ dènnɛní dɛ̀ kuwenniku dɛ̀ ɔ̃ɔ̃ wenkɛmu. Tì wɑ̃̀rimu kɛ tú:
\q1 Entɛ,
\q1 fɔ̃́ nwèè duɔ́ bɛcíríbɛ̀ miɛkɛ!
\q1 Kɛ̀ Kirisi dɑ míítɛ́.
\p
\v 15 Ndɑkɛnɛ̀ mɛsɑ̀ɑ̀ di fòù mɛ̀ɛ̀ botí. Di bɑ́ɑ́ ndò tiyɛìntì, ntúnɛ̀ mɛciì nyɛmbɛ̀. 
\v 16 Bɑ́ nfétìnkonɛ̀ di fíè, ti bo yɛmɔ̀rɛ̀ yɛiyɛ nyɛ. 
\v 17 Di bɑ́ ndò ntiyɛìntì, yetɛnko kɛ́yĩ́ɛ̃́tɛ́ Kuyie ndɔ́ dɛ̀.
\p
\v 18 Di bɑ́ mmuɔ̀ mmɛnɑɑ̀, mɛ̀ di tɑnnìnko mɛyɛi mmiɛkɛ nkɛ. Yóunɛ̀ kɛ̀ Muyɑɑ́nsɑ̀ɑ̀mù di píɛ. 
\v 19 Kɛ̀ di nwɛ̃ nkɛ yɑ́úkùnko ditɔbɛ̀ kɔ̃̀ntì, kɛ́ndiè nKuyie nkó yɛsɑ̃ɑ̃, nnɛ̀ ku kó iyiɛ, kɛ diè Muyɑɑ́nsɑ̀ɑ̀mù di duɔ́ nyìì yiɛ, kɛ́nsɑ̃ntí Kuyie nnɛ̀ di yɛ̀mmɛ̀ mɛmɔu, 
\v 20 nsɑ̃ntínɛ̀ ti cicɛ Kuyie dɛmɔu kpɛ́í nsɑ̃́ɑ̃̀ nɛ̀ ti Yiɛ̀ nYesu Kirisi kó diyètìrì.
\s1 Onìtì nɛ̀ o pokù bɛ̀ dò kɛ́ntɑumɛ̀
\p
\v 21 Nyíénnɛ̀ ditɔbɛ̀ kpɛti, di dé mɛ̀ɛ̀ kpɛ́í nKirisi.
\p
\v 22 Bɛnitipòbɛ̀ nyíénnɛ̀ di dɑɑbɛ̀ kpɛti, di yie mmɛ̀ɛ̀ botí ti Yiɛ̀ nkpɛti. 
\v 23 Kɛ yɛ̃́ onitidɔ̀ù weè bɑkɛ́mɛ̀ o pokù Kirisi bɑkɛ́ mɛ̀ɛ̀ botí o kɔbɛ tĩ̀nnì dìì tú o kɔ̃̀ntì kɛ dì dɛɛrí. 
\v 24 Dɛɛ̀ te kɛ̀ bɛnitipòbɛ̀ dò nkɛ́nyíé mbɛ dɑɑbɛ̀ kpɛti timɔu, Kirisi kɔbɛ tĩ̀nnì yíé mmɛ̀ɛ̀ botí Kirisi kpɛti.
\p
\v 25 Bɑ́ wèè nitidɔ̀ù kòo ndɔ́ o pokù Kirisi dɔ́ mɛ̀ɛ̀ botí o kɔbɛ tĩ̀nnì kɛ ku di kpɛ́í, 
\v 26 kɛ dì ɔ̀útɛ́ nɛ̀ mɛniɛ nnɛ̀ Kuyie nnɑ́ɑǹtì. 
\v 27 Ò dɔ̀ɔ̀ mɛmmɛ kɛ dɔ́ dì ntú o kpɛri ndi kɛ́nwenni, kɛ́nkpɑ kuyɛ̀nkù, kɛ́nkpɑ mɛyɔ̃́ɔ̃̀, kɛ́nkpɑ mɛyɛi mmɛmɔu, kɛ́ndò mpɑ́íí kɛ í mmɔkɛ bɛ̀ bo dì sɛi ntìì ĩ́nkɛ̀. 
\v 28 Mɛɛ̀ botí nku bɑ́ wèè nitidɔ̀ù dò nkɛ́ndɔ́mɛ̀ o pokù ò dɔ́ mɛ̀ɛ̀ botí omɑ́ɑ̀. Wèè dɔ́ o pokù ò dɔ́ omɑ́ɑ̀ ndi. 
\v 29 Òmɔù ɔ̃ɔ̃ í mpóó nhomɑ́ɑ̀, ò ɔ̃ nyɑ́rímu omɑ́ɑ̀, kɛ piú omɑ́ɑ̀. Kirisi mɛ ndɔɔri o kɔbɛ tĩ̀nnì. 
\v 30 Kɛ yɛ̃́ ti túmɛ̀ o kɔ̃̀ntì kó itùòti nyi. 
\v 31 Tì wɑ̃̀rimu kɛ tú: Onìtì bo yóu o cicɛ nɛ̀ o yɔ̃ kɛ́tɑunnɛ̀ o pokù, kɛ̀ bɛ̀ɛ nɑɑ́ ntikɔ̃̀ntì timɑ́ɑ̀. 
\v 32 Ti nnɑ́ɑǹtì tú disɔ̀rì diɛrì kpɛti nti, tì tú Kirisi nwe nɛ̀ o kɔbɛ tĩ̀nnì, 
\v 33 kɛ múnkɛ tú di kpɛti. Bɑ́ wèè nitidɔ̀ù wè ndɔ́ o pokù ò dɔ́ mɛ̀ɛ̀ botí omɑ́ɑ̀, kòo nitipòkù ndé o dɔù.
\c 6
\s1 Ibí nɛ̀ i yɛmbɛ̀ kó tinɑ́ɑǹtì
\p
\v 1 Díndi ibí nyíénnɛ̀ di yɛmbɛ̀ kpɛti. Kuyie mmɛ ndɔ́. 
\v 2 Ndé ɑ cicɛ nɛ̀ ɑ yɔ̃. Kuyie ndɔú nyìì kuɔ́ kɛ bɛ́i nkɛ tú: 
\v 3 Kɛ̀ dɛ̀ɛ yie nkɛ̀ dɛ̀ ndɑ nɑɑti, kɑ̀ɑ fòmmuu okɛ̀ kɛtenkɛ̀ ĩ́nkɛ̀.
\p
\v 4 Díndi ibí yɛmbɛ̀, di bɑ́ mpɛ́íkùnko ibí miɛkɛ, ńtiènnɛ̀ i kɛ ì tũ̀nni ti Yiɛ̀ ndɔ́ mɛ̀ɛ̀ botí.
\s1 Tidɑɑtì nɛ̀ ti yɛmbɛ̀ bɛ kó tinɑ́ɑǹtì
\p
\v 5 Díndi tidɑɑtì, nyíénnɛ̀ bɛ̀ɛ̀ di te diɛ nkɛtenkɛ̀ ĩ́nkɛ̀ bɛ kpɛti, kɛ́ mbɛ̀ dé mɛdiɛ̀, kɛ́mpĩ́ mbɛ tɔ̃mmú nɛ̀ mɛyɛ̀mmɛ̀ mɛmɑ́ɑ̀, kɛ́ndò ndi pĩ́ nKirisi kɔ̃mu. 
\v 6 Di níí bɑ́ mpĩ́ mmutɔ̃mmú bɛ̀ bo dìì mɔ̀nnì mɑ́ɑ̀ kɛ̀ dɛ̀ bo bɛ̀ nɑrikɛ, dɔɔ̀nɛ̀ dimɑ́ɑ̀ Kirisi kó tidɑɑtì, kɛ́ mmù pĩ nnɛ̀ di yɛ̀mmɛ̀ mɛmɔu Kuyie ndɔ́mɛ̀. 
\v 7 Di mpĩ́ mbɛ tɔ̃mmú kɛ dò ndi pĩ́ nti Yiɛ̀ nkɔ̃mu, dɛ̀ bɑ́ ndò ndi pĩ mbɛnìtìbɛ̀ kɔ̃mu. 
\v 8 Nyɛ̃́nɛ̀ kɛ dò nkɑ̀ɑ tú kudɑɑkù yoo ɑ í kù tu, Kuyie nyóó yietí bɑ́ wè ò dɔ̀ɔ̀ mɛ̀ɛ̀ sɑ̀ɑ̀ nkó tiyeti nti.
\p
\v 9 Kɛ̀ díndi tidɑɑtì yɛmbɛ̀ di nti pĩ mmɛsɑ̀ɑ̀ ndi bɑ́ nti pɛ́inko, nyɛ̃́nɛ̀ kɛ dò nwèè di te dimɔu ò bo kɛĩ́nkɛ̀ nkɛ, o borɛ̀ òmɔù í cɑ̃́ɑ̃́.
\s1 Kirisi kɔbɛ dò nkɛ́mmɔkɛ tìì kpɑ̀rìnɛntì
\p
\v 10 Tisɔnti tú di bo ntɑunnɛ̀mɛ̀ Yesu kɛ́kpenkɛ, kɛ́pɛ́tɛ́ o wɛ̃rímú diɛmù. 
\v 11 Bɑ́ɑ́tínɛ̀ Kuyie nkpɑ̀rìnɛntì timɔu kɛ cómmú tei tei, kɛ́bɑɑo dibɔɔ̀ kó mɛsoùmmɛ̀. 
\v 12 Ti í kpɑnnɛ̀ bɛnìtìbɛ̀, ti kpɑnnɛ̀ yɛbɔkɛ̀ nyɛ, yɛ̀ɛ̀ bo muyɑɑ́ mmiɛkɛ, yɛ̀ɛ̀ kpeńnì, bɛbɔɔkpɑ̀ɑ̀tìbɛ̀ bɛ̀ɛ̀ te dibiìnnì kó kutenkù. 
\v 13 Nɛ̀ dɛ kpɛ́í, túótɛ́nɛ̀ Kuyie nkó tikpɑ̀rìnɛntì timɔu, kɛ̀ diyiè yɛiri tùɔ̀kɛní di nɑ kɛ kpɑ nkɛ̀ di kpɑ nkɛ dèè, di nkpɑɑ́ yɛ̃́ kɛ́nwɑ̃kɛ́.
\p
\v 14 Nyinɛ̀ timɔ́mmɔnti di kɑ fɛnɑɑ̀kɔ̃̀nfɛ̀ kɔ̃mɛ, kɛ́nkɑ̃nkɛ́ mɛwetímmɛ̀ di cĩ̀ncĩ̀rɛ̀ dimɑ́tìyɑɑ̀bòrì kɔ̃mɛ. 
\v 15 Ãnnɛ́nɛ̀ tikɔ̃nyɑuti tinɛùtì kɔ̃mɛ, kɛ nɑ́kɛ́ Tinɑ́ɑǹsɑ̀ɑ̀tì tìì duɔ̀ mmɛom̀pùmɛ̀. 
\v 16 Ntɔnɛ̀ mɛtɑ̃́kùmɛ̀ kɛ̀ mɛ̀ ndò nkudɔpìkù sɑ̃́ɑ̃̀ kùù yó nte kɛ̀ di nɑ kɛ́kuɔ dibɔɔ̀ kó ipie nyìì cɔ̀ú. 
\v 17 Túótɛ́nɛ̀ mɛdɛɛtímɛ̀ kɛ́dɔɔ̀ dipìì, kɛ́túótɛ́ Muyɑɑ́nsɑ̀ɑ̀mù kó disiè dìì tú Kuyie nɑ́ɑǹtì. 
\v 18 Muyɑɑ́nsɑ̀ɑ̀mù ndi bonɛ̀ kɛ̀ di mbɑ́ɑ́ nKuyie nsɑ̃́ɑ̃̀, di nkù bɑ́ɑ́ nyibɑ́ɑmìi imɔu botí kɛ kù sɑ̀útínɛ̀. Mbɑ́ɑ́nnɛ̀ ku Kirisi kɔbɛ bɛmɔu kpɛ́í. 
\v 19 Kɛ́ nkù bɑ́ɑ́ n kpɛ́í, kɛ̀ dɛ̀ɛ yie nkɛ̀ nh ɑ̀ɑ̀tɛ n nùù nni nnɑ́ɑ́ nTinɑ́ɑǹsɑ̀ɑ̀tì tìì do sɔri kɛ í yĩɛ̃̀kù, tìì tu Kuyie ndɛɛrí bɛ̀ɛ̀ í tú Sifubɛ. 
\v 20 Mbɑ́ɑ́nnɛ̀ ku, kɛ̀ kù n teennɛ̀ kɛ̀ n nɑ kɛ́nnɑ́ɑ́ Tinɑ́ɑǹsɑ̀ɑ̀tì, bɑ́ nɛ̀ bɛ̀ mɛ nni nkpetímɛ̀.
\s1 Mucɑummu
\p
\v 21 N tɔ̃nko ti nɛ́po sɑ̀ù Tisiki, ti Yiɛ̀ nkóo tɔ̃ntì sɑ̀ɑ̀wè, kòo bo di nɑ́kɛ́ dɛ ndòmmɛ̀ mmɛ, 
\v 22 kɛ́ di nɑ́kɛ́ tìì kó dimɑ̀ɑ̀ bo ti ciɛ, kɛ́yɑ́úkùnnɛ di kɔ̃̀ntì.
\p
\v 23 Ti cicɛ Kuyie nnɛ̀ Yesu Kirisi bɛ̀ di duɔ́ mmɛom̀pùmɛ̀, nɛ̀ mɛdɔ́kùmɛ̀ nɛ̀ mɛtɑ̃́kùmɛ̀. 
\v 24 Mɛsɑ̀ɑ̀ nni mbonɛ̀ díndi bɛ̀ɛ̀ kó dimɑ̀ɑ̀ dɔ́ ti Yiɛ̀ nYesu Kirisi kɛ fííkú teii.