\id AMO di30.all Novembre 1998 BJ Parakou B{enin
\ide UTF-8
\h Amɔɔsi
\toc1 Amɔɔsi
\toc2 AMƆƆSI
\mt1 Amɔɔsi
\imt1 Di mpɑ́tíri tɔ tìì nɑ́ɑǹtì
\ip Amɔɔsi do wɑ̃̀ri o pɑ́tíri yɛbie nsikɔùsìyiekɛ̀ nɛ̀ sipísìkuɔ̀ (760) kó kɛmiɛkɛ nkɛ kɛ̀ Yesu nɛ́ nɑ kɛ́kɔtɛní.
\ip Dɛ kó yɛbie mmiɛkɛ nkɛ ò ìtɛ́mɛ̀ o ɛì Tekoɑ kɛ́kɔtɛ Isidɑyɛɛribɛ kó dikpɑ̀ɑ̀tìyuu Kuyie nhò tɔ̃ nkɛ̀. Dɛ kó yɛmɔ̀rɛ̀ miɛkɛ Sedoboɑmmu weè do bɑkɛ́ Isidɑyɛɛribɛ. Kɛ̀ dɛ̀ ndò mbɛ kpɛrɛ dɛmɔu kèrí sɛ́i. Kɛ̀ Amɔɔsi mbɛ̀ nɑ̀ɑ́nnɛ̀ tikɔ̃nyɑuti nɛ̀ dikɔ̃m̀bùɔ̀ kɛ tú: Kuyie ndi duɔ́mmu ikuɔ́ kɛ̀ di nɛ́ ì cɑ̀ɑri kɛ̀ bɛkperíbɛ̀ fɛ̃́ũnko bɛcĩ̀rìbɛ̀, Kuyie nnɛ́ yóó dɛɛtɛ́mu bɛcĩ̀rìbɛ̀, kù tu kù yóó di potɛ́mu. Nɛ̀ dɛ kpɛ́í nkɛ̀ bɛ̀ɛ̀ ò dènnɛ bɛ cuokɛ̀ bɑ́ dɛ̀ í nhɔɔtɛ 7:10-17.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kuyie nkpɑnnɛ̀mɛ̀ Isidɑyɛɛribɛ kó dikpɑ̀ɑ̀tìyuu nɛ̀ yɛhɛkɛ̀ yɛ̀ɛ̀ bɛ̀ tɔ̀kɛ́nɛ̀ 1-2
\io1 2. Dɛ̀ɛ̀ kònnɛ Kuyie nnɛ̀ ku kɔbɛ 3-6
\io1 3. Kuyie nhò bɛnkɛmɛ̀ mɛbɛnkùmɛ̀ mɛ̀ɛ̀ bɛnkú Kuyie nhɑutɛ́mɛ̀ kɛ bo bɛ̀ dɛɛtɛ́ 7-9
\c 1
\p
\v 1 Di m̀pɑ́tíri nɑ́ɑ́ nhAmɔɔsi nɑ̀kɛ́ tì nti. Amɔɔsi do tú Tekoɑ ɛì kou nwe kɛ cɛ̃mmù o wũɔ̃. Kɛ̀ ti Yiɛ̀ nKuyie nhò bɛnkɛ ku nɑ́ɑǹtì Isidɑyɛɛribɛ kpɛ́í. Dɛ̀ do sɔ̃́ nhOsiɑsi weè tɔ tikpɑ̀tì Sudɑɑ tenkɛ̀. Kɛ̀ Soɑsi birɛ Sedoboɑmmu tu Isidɑyɛɛribɛ kóo kpɑ̀ɑ̀tì. Kɛ̀ ti Yiɛ̀ nKuyie ntì nhò nɑ̀kɛ́ kɛ̀ dɛ̀ mmɔkɛ yɛbie nyɛ̀dɛ́ɛ̀, kɛ̀ kɛtenkɛ̀ nɛ́ ɑɑ́ Osiɑsi nɛ̀ Sodoboɑmmu bɛ kpɑ̀tì miɛkɛ. 
\v 2 Kɛ̀ Amɔɔsii bɛ́i nkɛ dɔ̀:
\q1 Ti Yiɛ̀ nKuyie nkuù kontí Siyɔ̃ɔ̃
\q1 kɛ pɛ́ú mɛtɑmmɛ̀ Sedisɑdɛmmu,
\q1 kɛ̀ timútì mɔ̀tírí yɛnɑɑcɛ̃nhò
\q1 kɛ̀ Kɑdimɛɛri tɑ̃rì yómmɛ̀ kpɛti kpeí.
\s1 Kuyie nkpɑ̀nnɛ̀ tì Isidɑyɛɛribɛ nɛ̀ yɛhɛkɛ̀ yɛ̀ɛ̀ bɛ̀ tɔ̀kɛ́nɛ̀
\sp (Kuyie nkpɑ̀nnɛ̀ ti Sidii ɛì kɔbɛ)
\q1
\v 3 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Dɑmɑɑsi ɛì kɔbɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì,
\q1 bɛ̀ pɔ̀ntɛ mɛ̀ɛ̀ kpɛ́í Kɑdɑɑdi ɛì kɔbɛ
\q1 kɛ bɛ̀ nɑ̀ntɛ muyuo nkɔ̃mɛ.
\q1
\v 4 N yóó cṹũnko muhɑ̃ɑ̃́ mmu,
\q1 kɛ̀ mùu cɔ́útɛ́ Asɑyɛɛdi cĩ́ɛ̃̀tɛ̀,
\q1 mù bo cɔ́útɛ́ Bɛnni-Adɑdi kpɑ̀ɑ̀tìcĩ́ɛ̃̀tɛ̀.
\q1
\v 5 N yóó uutɛ́mu Dɑmɑɑsi ɛì kó dimɑ́tìcɑ̀ù
\q1 kɛ́kuɔ bɛ̀ɛ̀ bo dɛ kó mɛyɛi mbiriku miɛkɛ,
\q1 kɛ́kuɔ wèè kù bɑkɛ́,
\q1 kɛ̀ bɛ̀ɛ bɛ̀ pĩ̀ḿmú kɛ́kònnɛ̀ Kiidi.
\q1 Mí ndi Yiɛ̀ nKuyie mmíì bɛ́i.
\sp (Kuyie nkpɑ̀nnɛ̀ tì Fidisii tenkɛ̀ kɔbɛ)
\q1
\v 6 Dɛ kó difɔ̃nkúò kɛ̀ ti Yiɛ̀ nKuyie mbɛ́i nkɛ dɔ̀:
\q1 Kɑsɑɑ ɛì kɔbɛ kó mɛyɛi mmɛɛ̀ sũ̀ṹ nkɛ tontɛ́
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì.
\q1 Bɛ̀ pĩ̀ḿmú mɛ̀ɛ̀ kpɛ́í mbɛnìtìbɛ̀ pɛ́u
\q1 kɛ duɔ́ nhEdɔmmu ɛì kɔbɛ.
\q1
\v 7 N yóó cṹũnko muhɑ̃ɑ̃́ mmu Kɑsɑɑ ɛì miɛkɛ
\q1 kɛ̀ mùu cɔ́útɛ́ sikpɑ̀ɑ̀tìcɛ̃́ĩ.
\q1
\v 8 M bo kuɔ Asidɔti ɛì kɔbɛ bɛmɔu,
\q1 kɛ́dɛitɛ wèè pikú fɛkpɑ̀ɑ̀tìpɑ̀tìfɛ̀ Asikɑnɔɔ ɛì,
\q1 kɛ́dɑɑ́ n nɔ̀ùtɛ̀ Ekunɔɔ ɛì kɛ́kuɔ Fidisii kɔbɛ sɔmbɛ.
\q1 Mí ndi Yiɛ̀ nKuyie mmíì bɛ́i.
\sp (Kuyie nkpɑ̀nnɛ̀ tì Fennisii tenkɛ̀ kɔbɛ)
\q1
\v 9 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Tiiri ɛì kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì,
\q1 bɛ̀ pĩ̀ḿmú mɛ̀ɛ̀ kpɛ́í mbɛnìtìbɛ̀ pɛ́u
\q1 kɛ duɔ́ nhEdɔmmu ɛì kɔbɛ,
\q1 bɑ́ bɛ̀ í dentɛní n do yɛ̃ mmɛtɑummɛ̀
\q1 mɛ̀ɛ̀ bo bɛmbɛ nɛ̀ bɛ tebìí bɛ cuokɛ̀.
\q1
\v 10 N yóó cṹũnko muhɑ̃ɑ̃́ mmu Tiiri ɛì miɛkɛ
\q1 kɛ̀ mùu cɔ́útɛ́ sikpɑ̀ɑ̀tìcɛ̃́ĩ.
\sp (Kuyie nkpɑ̀nnɛ̀ tì Edɔmmu ɛì kɔbɛ)
\q1
\v 11 Kɛ̀ ti Yiɛ̀ nKuyie nsɔɔtɛ́ ku nɑ́ɑǹtì kɛ bɛ́i nkɛ dɔ̀:
\q1 Edɔmmu ɛì kɔbɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì.
\q1 Bɛ̀ bɛ̀ti mɛ̀ɛ̀ kpɛ́í mbɛ tebìí Isidɑyɛɛribɛ
\q1 bɑ́ mɛsémmɛ̀ í bɛ̀ bo,
\q1 kɛ̀ bɛ miɛkɛ bɛ̀ cɔ̀ú nsɑ̃́ɑ̃̀ kɛ̀ bɛ̀ bɛ̀ u mɛdɔ̀mmɛ̀.
\q1
\v 12 N yóó cṹũnko muhɑ̃ɑ̃́ mmu kɛ̀ mùu cɔ́u Temɑɑ ɛì
\q1 nɛ̀ Bosedɑɑ ɛì kó sikpɑ̀ɑ̀tìcɛ̃́ĩ.
\sp (Kuyie nkpɑ̀nnɛ̀ tì Amɔniibɛ)
\q1
\v 13 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Amɔniibɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì.
\q1 Bɛ̀ pùòti mɛ̀ɛ̀ kpɛ́í Kɑdɑɑdi ɛì kó bɛpɔupómpómbɛ̀
\q1 kɛ bo pɛ̃kùnnɛ bɛ tenkɛ̀.
\q1
\v 14 N yóó cṹũnko muhɑ̃ɑ̃́ mmu Dɑbɑɑ ɛì miɛkɛ
\q1 kɛ̀ mùu cɔ́útɛ́ bɛ cɛ̃́ĩ sɑ̀ɑ̀sì mudoò kó kunɔɔ̀roo miɛkɛ.
\q1 Fɛfɔ̀dɔ́nfɛ̀ nɛ̀ kuyɑɑkù diɛkù mɔ̀nnì.
\q1
\v 15 Kɛ̀ bɛ̀ɛ pĩ́ nhokpɑ̀ɑ̀tì kóò kònnɛ̀
\q1 kɛ́wɛ̃nnɛ́nɛ̀ sikpɑ̀ɑ̀tìbìío.
\q1 Mí ndi Yiɛ̀ nKuyie mmíì bɛ́i.
\c 2
\sp (Kuyie nkpɑ̀nnɛ̀ tì Mɔɑbu kɔbɛ)
\q1
\v 1 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Mɔɑbu ɛì kɔbɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì,
\q1 bɛ̀ cɔ́u mmɛ̀ɛ̀ kpɛ́í nhEdɔmmu kóo kpɑ̀ɑ̀tì kṹɔ̃̀
\q1 kɛ̀ yɛ̀ cɔ̀útɛ́ fṹkṹfṹkṹ.
\q1
\v 2 N yóó cṹũnko muhɑ̃ɑ̃́ mmu
\q1 kɛ̀ mùu cɔ́útɛ́ sikpɑ̀ɑ̀tìcɛ̃́ĩ sìì bo Kediyɔti.
\q1 Mɔɑbu kɔbɛ bo kú mudoò kó kunɔɔ̀roo
\q1 nɛ̀ yɛtɑ̃tɛhe kó yɛdɑbùò mmiɛkɛ.
\q1
\v 3 M bo kuɔ bɛnìùbɛ̀ o ciɛ pɑ́íí
\q1 kɛ́kuɔ sikpɑ̀ɑ̀tìbìí kóò wɛ̃nnɛ́nɛ̀.
\q1 Mí ndi Yiɛ̀ nKuyie mmíì bɛ́i.
\sp (Kuyie nkpɑ̀nnɛ̀ tì Sudɑɑ kɔbɛ)
\q1
\v 4 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Sudɑɑ kɔbɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì,
\q1 bɛ̀ yetɛ mɛ̀ɛ̀ kpɛ́í n tié,
\q1 bɑ́ bɛ̀ í tũ̀nnɛ n kuɔ́ kɛ tũ̀nnɛ siyɑ́ɑ̀bìsí kpɛrɛ,
\q1 bɛ yɛmbɛ̀ do tũ ndɛ̀ kɛ̀ dɛ̀ bɛ̀ fétìnnɛ.
\q1
\v 5 N yóó cṹũnko muhɑ̃ɑ̃́ mmu
\q1 kɛ̀ mùu cɔ́útɛ́ sikpɑ̀ɑ̀tìcɛ̃́ĩ sìì bo Sedisɑdɛmmu.
\sp (Kuyie nkpɑ̀nnɛ̀ ti Isidɑyɛɛribɛ)
\q1
\v 6 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Isidɑyɛɛribɛ kó mɛyɛi mmɛɛ̀ sũ̀ṹ nkɛ tontɛ́,
\q1 n yí yóó yóu n tɑ̃ɑ̃tɛ́ kɛ bo dɔɔ̀ tì.
\q1 Bɛ̀ fiiti mɛ̀ɛ̀ kpɛ́í mbɛnitisɑ̀ɑ̀bɛ̀
\q1 kɛ cɔú idíítí bɛ̀ í yietí mɛ̀ɛ̀ kpɛ́í mbɛ bɑ̀ɑ̀,
\q1 kɛ ɔ̃ɔ̃ fítɛ́ ocĩ̀rì tinɛùtì mɛhɑ̃nnímɛ̀ mɛ̀mɑ́ɑ̀ kó dibɑ̀nnì kpɛ́í.
\q1
\v 7 Kɛ nɑù bɛcĩ̀rìbɛ̀ kɛ tĩntí bɛ yɔ mutɑ̃́ɑ̃́
\q1 bɑ́ bɛ̀ ɔ̃ɔ̃ í nkèńtɛ́ bɛcĩ̀rìbɛ̀ kpɛti kubeéndieku,
\q1 cicɛ nɛ̀ dɛbirɛ kɛ̀ bɛ̀ wɛ̃ nhonitipòkù
\q1 kɛ cɑɑ̀ri n yètìrì.
\q1
\v 8 Bɛ̀ fèkù tìì yɑ̀ɑ̀tì bɛcĩ̀rìbɛ̀ borɛ̀
\q1 bɛ̀ í yietí mɛ̀ɛ̀ kpɛ́í mbɛ bɑ̀ɑ̀,
\q1 bɛ̀ ti mpitírí bɛ bɔkɛ̀ kó yɛtuo miɛkɛ,
\q1 kɛ yɔ̃̀ mbɛ̀ fèkɛ mɛ̀ɛ̀ nɑɑ̀ mbɛcĩ̀rìbɛ̀ borɛ̀.
\q1
\v 9 Di yɛ̃́mu míì kùɔmɛ̀ Amɔriibɛ
\q1 bɛ̀ɛ̀ okùmɛ̀ do mɑnnɛ̀ dɛtie ndiɛrɛ̀
\q1 kɛ̀ bɛ̀ kpeńnì kɛ̀ m bɛ̀ uutɛ́nɛ̀ bɛ cĩɛ̃ nnɛ̀ bɛ bɛ.
\q1
\v 10 Dɛndɛ kó difɔ̃̀nkúò,
\q1 di bɑ́ɑ́ yɛ̃̀ mmíì do di dènnɛnímɛ̀ Esibiti
\q1 kɛ́ ndi tɔ dikpɑ́ɑ̀ miɛkɛ kɛ dɔ̀ yɛbie nsipísìnɑ̀ɑ̀
\q1 kɛ̀ di mɛ ntiekɛ Amɔriibɛ ɛì.
\q1
\v 11 Dɛ kó difɔ̃nkúò
\q1 kɛ̀ nh ɑ̃nnɛ́ m pɑ̃ɑ̃nɑ́ɑǹtì nɑ́ɑm̀bɛ̀ di cuokɛ̀
\q1 kɛ́tɑ̃nkɛ́ di cuokɛ̀ bɛ̀ɛ̀ yó ncɑ̃́ɑ̃́ nkɛ́tú n kɔbɛ.
\q1 Yɑ́ɑ̀ n soúmmu? Díndi Isidɑyɛɛribɛ n di békúmu.
\q1
\v 12 Dɛ̀ dòmmɛ kɛ̀ di niinko mɛnɑɑ̀,
\q1 bɛ̀ɛ̀ cɑ̃́ɑ̃́ nkɛ tú n kɔbɛ kɛ í dò nkɛ mmɛ̀ yɔ̃̀?
\q1 Kɛ pɑɑnko m pɑ̃ɑ̃nɑ́ɑǹtì nɑ́ɑm̀bɛ̀,
\q1 bɑ́ bɛ̀ tɛ̃́nkɛ í nɑ́ɑ́ m pɑ̃ɑ̃nɑ́ɑǹtì.
\b
\q1
\v 13 Nɛ̀ dɛ kpɛ́í
\q1 n yóó di nɑntɛmu pɑ́íí kɛ́ũtirɛ
\q1 tɛnɑɑsɑ̃ntɛ̀ tɛ̀ɛ̀ tɔ dɛcɛ̃́ɛ̃́rɛ̀ tɛ̀ ɔ̃ɔ̃ nɑ kɛ̀ dɛ̀ ndòmmɛ̀.
\q1
\v 14 Bɑ́ wèè nɔ mmuceé nhò bɑ́ɑ́ nɑ kɛ́yentɛ́.
\q1 Muwɛ̃rímú yiɛ̀ mmɛ mbɑ́ɑ́ nɑ kɛ́bɛnkɛ o wɛ̃rímú.
\q1 Okɔ̃m̀bɔ̀teu mɛ mbɑ́ɑ́ nɑ kɛ́dɛɛtɛ́ omɑ́ɑ̀.
\q1
\v 15 Bɛ̀ bo kuɔ otɑ̃nnuɔnti,
\q1 wèè nɔ mmuceé ò bɑ́ɑ́ nɑ kɛ́yentɛ́.
\q1 Osɑ̃ndèètì mɛ mbɑ́ɑ́ nɑ kɛ́cokɛ́nɛ̀ o sɑ̃ntɛ̀ kɛ́dɛɛtɛ́ omɑ́ɑ̀.
\q1
\v 16 Okɔ̃m̀bɔ̀teu mɔ́mmuɔ
\q1 bo cokɛ́ dɛ yiè difɔ̃kperì.
\q1 Mí ndi Yiɛ̀ nKuyie mmíì bɛ́i.
\c 3
\s1 Kuyie ncɑummɛ̀ ku kɔbɛ Isidɑyɛɛribɛ
\p
\v 1 Díndi Isidɑyɛɛribɛ kéntɛ́nɛ̀ mí ndi Yiɛ̀ nKuyie ndi nɑ́ɑ́ ntì, díndi n dènnɛní bɛ̀ Esibiti:
\q1
\v 2 Ibotí imɔu miɛkɛ n tɑ̃ɑ̃tɛ́ dím̀bɛ,
\q1 dɛɛ̀ te kɛ̀ n yóó yṹɔ̃́ ndi to
\q1 mɛyɛi ndi dɔɔri mɛ̀ɛ̀ kó dimɑ̀ɑ̀ kpɛ́í.
\s1 Kuyie mpɑ̃ɑ̃nɑ́ɑǹtì nɑ́ɑǹtò bɑ́ɑ́ nɑ kɛ í mbɛ́i Kuyie nhò nɑ̀kɛ́ tì
\q1
\v 3 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Kɛ̀ bɛnìtìbɛ̀ bɛ̀dɛ́bɛ̀ í wɛ̃nnɛ́ dinùù
\q1 bɛ̀ bo nnɛíɑ̀?
\q1
\v 4 Dicìrícìrì ɔ̃ɔ̃ í nhũntɛ kutúúkù miɛkɛ
\q1 kɛ í yɑ̀ dì bo pĩ́ ndɛ̀.
\q1 Dicìrícìrìbii bɑ́ɑ́ kuɔ́ nkutɑ̃dènkù miɛkɛ
\q1 kɛ í pĩ mmùmɑmù.
\q1
\v 5 Tɛnɔ̀tɛ̀ í yóó sɔ̃́ntɛ́ kɛ́tɑ ticùɔ̀tì miɛkɛ
\q1 kɛ í yɑ̀ mudiì.
\q1 Timɑ́tì í yóó sɔ̃́ntɛ́ kɛ́tɑ̃ũ
\q1 kɛ̀ dɛ̀mɑrɛ̀ í nɑ ti miɛkɛ.
\q1
\v 6 Ditɑ̃tɛheù bo kuɔ́ ndihɛì miɛkɛ kɛ̀ kufɔ̃wɑɑ́
\q1 mbɑ́ɑ́ pĩ́ mbɛnìtìbɑ̀ɑ̀?
\q1 Mɛyɛi mbo tuɔ̀kɛní dihɛì mɑrì
\q1 kɛ̀ ti Yiɛ̀ nKuyie nyí mɛ̀ duɔ́nnɑ́ɑ̀?
\b
\p
\v 7 Mí ndi Yiɛ̀ nKuyie nhɔ̃ɔ̃ í ndɔ̀ɔ̀ tìmɑtì kɛ í ketɛ́ kɛ duɔ́ nkɛ̀ m pɑ̃ɑ̃nɑ́ɑǹtì nɑ́ɑm̀bɛ̀ tì nɑ̀kɛ́.
\b
\q1
\v 8 Kɛ̀ dicìrícìrì ũntɛ
\q1 we mbo yĩ́ kufɔ̃wɑɑ́ nyí ò pĩ?
\q1 Kɛ̀ ti Yiɛ̀ nKuyie nyĩ: Bɛ́i!
\q1 We mbo ncĩ́ɛ̃́kɛ́ kɛ bɑ́ɑ́ bɛ́i nku pɑ̃ɑ̃nɑ́ɑǹtì?
\s1 Kuyie nnɑ̀kɛ́mɛ̀ Sɑmmɑrii ɛì yóó pɔntɛmɛ̀
\q1
\v 9 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Pĩɛ̃kɛ́nɛ̀ Asidɔti kó sikpɑ̀ɑ̀tìcɛ̃́ĩ nɛ̀ Esibiti kpɛsi,
\q1 kɛ́duɔ́ nkɛ̀ bɛ̀ɛ tíí nSɑmmɑrii tɑ̃rɛ̀ ĩ́nkɛ̀,
\q1 kɛ́yɑ̀ dikɔnkɔɔ̀nnì dìì bo o miɛkɛ
\q1 nɛ̀ bɛ fɛ̃́ũnko mɛ̀ɛ̀ botí bɛtɔbɛ̀.
\q1
\v 10 Sɑmmɑrii ɛì kɔbɛ í dɔɔri dɛ̀ɛ̀ sìɛ́,
\q1 bɛ̀ dɔ̀rimu
\q1 kɛ yoti bɛ kpɑ̀ɑ̀tìcɛ̃́ĩ miɛkɛ bɛ̀ fèkɛ dɛ̀.
\q1 Mí ndi Yiɛ̀ nKuyie, mmíì mɛ nyɛ̃.
\q1
\v 11 Nɛ̀ dɛ kpɛ́í ndi dootitɔbɛ̀ yóó di cɛ̃tinnɛmu
\q1 kɛ́pɔntɛ di wɛ̃rímú
\q1 kɛ́hɛí dɛ̀ɛ̀ bo di kpɑ̀ɑ̀tìcɛ̃́ĩ miɛkɛ.
\s1 Isidɑyɛɛribɛ bɛ̀ɛ̀ bo Sɑmmɑrii bɛ kó mɛdɛɛtímɛ̀ bo nyóù
\q1
\v 12 Dicìrícìrì ɔ̃ɔ̃ pĩ́ nfɛpìèfɛ̀
\q1 kòo pecɛ̃nti fietɛ mɛ̀ɛ̀ botí yɛkpɑ́ɑ̀ nyoo ditoò kũ̀nnì,
\q1 n yóó mɛ ndɛɛtɛ́ Isidɑyɛɛribɛ bɛ̀ɛ̀ bo Sɑmmɑrii
\q1 kɛ kɑri yɛkɑ̀rɛ̀ diɛyɛ̀ ĩ́nkɛ̀ yoo dɛ tɛ̃ĩ̀ mbìɛ̀.
\s1 Kuyie ncɑummɛ̀ Betɛɛdi ɛì kɔbɛ
\q1
\v 13 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Mí ndi Yiɛ̀ nKuyie Mpɑkɛdɑɑ míì bɛ́i nkɛ tú:
\q1 Nɑ́kɛ́ Sɑkɔbu yɑɑ̀bí kɛ tú:
\q1
\v 14 N yɛ̃ ndɛ yiè
\q1 m bo yṹɔ̃́ nyIsidɑyɛɛribɛ to bɛ yɛi nkpɛ́í.
\q1 M bo ítɛ́ kɛ́cómmú
\q1 kɛ́pɔntɛ yɛwũɔ̃tɔ̀rɛ̀ yɛ̀ɛ̀ bo Betɛɛdi,
\q1 kɛ bɔ́kɛ́ yɛ kó yɛbɑ̀kɛ̀
\q1 kɛ́ yɛ̀ buɔ́ nkɛtenkɛ̀.
\q1
\v 15 M bo puɔ mbɛ cɛ̃́ĩ
\q1 bɛ̀ ɔ̃ nhɑ̃ sì diyɔ̃ɔ̃̀ nɛ̀ bɛ̀ ɔ̃ nhɑ̃ sì dipɑɑ̀,
\q1 sìì dɑ̀ri yɛpɑ́pɑ́nìì nkó tisɑ̃tì,
\q1 kɛ́buɔ́ nsicɛ̃diɛsì.
\q1 Mí ndi Yiɛ̀ nKuyie mmíì bɛ́i.
\c 4
\s1 Kuyie nkpɑ̀nnɛ̀mɛ̀ Sɑmmɑrii kó bɛnitipòbɛ̀
\q1
\v 1 Mɛm̀mɛ ti Yiɛ̀ nKuyie mbɛ́immɛ̀ kɛ tú:
\q1 Díndi Sɑmmɑrii ɛì kó tinitipòtì
\q1 tìì dùnnɛ Bɑsɑ̃ɑ̃ ɛì kó inɑɑni tɛ̃mɛ̀,
\q1 dínni bɛ̀ɛ̀ yo mbɛsénnìbɛ̀ kpɛrɛ,
\q1 kɛ fɛ̃́ũnko bɛcĩ̀rìbɛ̀,
\q1 díndi bɛ̀ɛ̀ nɑ̀ɑ́ ndi dɑɑbɛ̀ kɛ tú,
\q1 bɛ̀ ndi duɔ̀ nkɛ̀ dì yɔ̃̀,
\q1 kéntɛ́nɛ̀ kɛ́keè.
\q1
\v 2 Mí ndi Yiɛ̀ nKuyie n dò mpɑ́í pɑ́í nwe kɛ̀ míì bɛ́i,
\q1 dɛ yiè kpɑɑnímu
\q1 kɛ̀ bɛ̀ bo di tɔ̃nnɛ́ iyĩmpie ndiɛyì
\q1 kɛ́tɔ̃nnɛ́ isɑ́m̀pɔ́ì di kó iyɑɑ̀bí
\q1 kɛ dí dɛtɛ kɛ́dennɛ dimɔu.
\q1
\v 3 Di bo yiɛ iduotí kó mɛfíè dimɑ́ɑ̀ dimɑ́ɑ̀,
\q1 bɑ́ wè kòò nwetí o ììkɛ̀,
\q1 bɛ̀ bo di kɛi nkɛ dí dee nhEsimɔɔ tɑ̃rì ĩ́nkɛ̀.
\q1 Mí ndi Yiɛ̀ nKuyie mmíì bɛ́i.
\s1 Mubɑ́ɑmmu tetìrɛ̀ kɔ̃mu
\q1
\v 4 Kɛ̀ Kuyie mbɛ́i nkɛ dɔ̀:
\q1 Tũ nkɔtɛnɛ̀ Betɛɛdi kɛ́dɔɔ̀ mɛyɛi,
\q1 kɔtɛnɛ̀ Kidikɑɑdi kɛ́dɔkɛ dɔɔ̀ mɛyɛi.
\q1 Fíénɛ̀ di wũɔ̃ dikṹnweńnì sɛ̀ì,
\q1 diyiè tɑ̃ɑ̃́nnì yiè
\q1 kɛ́dɛitɛ di mɔkɛ dɛ̀ɛ̀ kó dimɑ̀ɑ̀ miɛkɛ
\q1 dɛ̀ɛ̀ tu dɛpííndɛ̀ kɛ́ n duɔ́.
\q1
\v 5 Cɔ́unnɛ̀ disɑ̃nni kó yɛpɑ̃rɛ̀
\q1 yɛ̀ɛ̀ kɔkɛ́nɛ̀ mutie mùù muuti,
\q1 ikúnɛ̀ yɛpɑ̃rɛ̀ kó dikɑ̃̀tìrì
\q1 kɛ yɛ̃́ díndi Isidɑyɛɛribɛ di mɛ ndɔ́mɛ̀.
\q1 Mí ndi Yiɛ̀ nKuyie mmíì bɛ́i.
\s1 Isidɑyɛɛribɛ to kpeńnìmɛ̀
\q1
\v 6 Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀:
\q1 Mí ndi Yiɛ̀ nKuyie míì di bɔntɛ́ dikònnì,
\q1 míì duɔ́ nkɛ̀ di pɑ̀ɑ̀ tidiitì sihɛkɛsí simɔu miɛkɛ,
\q1 nɛ̀ mɛmmɛ bɑ́ di í wɛ̃̀tɛní m borɛ̀.
\b
\q1
\v 7 Míì duɔ́ nkɛ̀ fɛtɑɑfɛ̀ dòńtɛ́ tidiitì bɛtɑ̃̀ɑ̃̀bɛ̀ bɛ̀tɑ̃ɑ̃ti,
\q1 míì duɔ́ nkɛ̀ fɛ̀ ɔ̃ɔ̃ ni di nhɛì kɛ́soó nditɛrì,
\q1 kɛ́nniu ku mpɑku kɛ̀ kutɛkù kó tidiitì kpeí.
\q1
\v 8 Yɛhɛkɛ̀ yɛ̀dɛ́ɛ̀ yoo yɛ̀tɑ̃ɑ̃ti níí bo nhɑ̃́ɑ̃́nnɛ̀ sinɛ́yɛ̃ĩ
\q1 kɛ kɔrì dihɛì dìmɑ́ɑ̀ miɛkɛ kɛ bo pɛ́tɛ́ mɛniɛ nkɛ́yɑ̃̀,
\q1 bɛ̀ mɛ mbɑ́ɑ́ pɛ́tɛ́ kɛ́yɑ̃̀ kɛ́nsɑ̀nnɛ̀.
\q1 Nɛ̀ mɛmmɛ di mɛ nyí wɛ̃̀tɛní m borɛ̀.
\q1 Mí ndi Yiɛ̀ nKuyie mmíì tì ndi denni.
\b
\q1
\v 9 Míì duɔ́ nkɛ̀ tidiitì fɑ̃ũ ndɛpɑɑ
\q1 nkɛ̀ fɛtùɔ̀rìfɛ̀ tì pĩ,
\q1 kɛ̀ fɛcofɛ cɑ̀ɑ́kɛ́ di pénnɛ̀ nɛ̀ titebiiti.
\q1 Nɛ̀ mɛmmɛ di í wɛ̃̀tɛní m borɛ̀.
\q1 Mí ndi Yiɛ̀ nKuyie mmíì tì ndi denni.
\q1
\v 10 Kɛ̀ n duɔ́ nkɛ̀ di wũɔ̃ muɔkɛ kɛ ku,
\q1 Esibiti kɔbɛ kpɛyi do kumɛ̀,
\q1 kɛ duɔ́ nkɛ̀ bɛ̀ kùɔ di kó bɛdɑpɑ̀mbɛ̀ mudoò miɛkɛ
\q1 kɛ pĩ̀ḿmú di sɛ̃ĩ́,
\q1 kɛ̀ bɛ̀ɛ̀ ku di kó dihɑ̃ɑ̃pɔ̀nkɑrì kɛ̀ bɛ nɔ́ú dɑ̀tínnɛ́.
\q1 Nɛ̀ mɛmmɛ di í wɛ̃̀tɛní m borɛ̀.
\q1 Mí ndi Yiɛ̀ nKuyie mmíì tì ndi denni.
\b
\q1
\v 11 Kɛ̀ di dɛ̀ítɛ́
\q1 n do dɛ̀ítɛ́ mɛ̀ɛ̀ botí Sodɔmmu nɛ̀ Komɔɔ,
\q1 kɛ̀ di yentɛ́ tɛcĩ́ɛ̃̀tɛ̀ ɔ̃ ncɔ́ú
\q1 kɛ̀ bɛ̀ɛ pṹtɛ́ mɛ̀ɛ̀ botí kudɑkɛ̀mpùu.
\q1 Nɛ̀ mɛmmɛ di í wɛ̃̀tɛní m borɛ̀.
\q1 Mí ndi Yiɛ̀ nKuyie mmíì tì ndi denni.
\b
\q1
\v 12 N yóó mɛ ndi dɔɔ̀ díndi Isidɑyɛɛribɛ,
\q1 kɛ̀ n yóó di dɔɔ̀ mɛmmɛ,
\q1 tũntɛnɛ̀ dimɑ́ɑ̀ kɛ̀ ti mɑ́útɛ́ mí nnɛ̀ díndi.
\b
\q1
\v 13 Ti Yiɛ̀ nKuyie nkuù dɔ̀ɔ̀ yɛtɑ̃rɛ̀ kɛ ɑ̃nnɛ́ kuyɑɑkù,
\q1 kɛ nɑ́ɑ́ mbɛnìtìbɛ̀ kù dɔ́ kɛ́dɔɔ̀ tì,
\q1 kuù ɔ̃ɔ̃ ceetɛ kuwenniku kɛ̀ dɛ̀ɛ nɑɑ́ ndibiìnnì,
\q1 kù cèntì yɛtɑ̃rɛ̀ yómmɛ̀ mmɛ,
\q1 kuù yètìrì tu Mpɑkɛdɑɑ.
\c 5
\s1 Kuyie mpɑ̃ɑ̃nɑ́ɑǹtì nɑ́ɑǹtò sɑutɛ fɛ̀ɛ̀ sɑ́útìfɛ̀ Isidɑyɛɛribɛ kpɛ́í
\p
\v 1 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtòo bɛ́i nkɛ dɔ̀: Díndi Isidɑyɛɛribɛ kéntɛ́nɛ̀ fɛsɑ́útìfɛ̀ n sɑutɛ fɛ̀ di kpɛ́í.
\q1
\v 2 Isidɑyɛɛribɛ tu dɛsɑpùmbirɛ ndɛ
\q1 kɛ do kɛ duɔ́
\q1 kɛ cɑ̃ɑ̃nko kɛ dò ndɛ̀ kú,
\q1 wèè borɛ̀ íi nhò í bo.
\b
\q1
\v 3 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Isidɑyɛɛribɛ ɛkɛ̀ miɛkɛ
\q1 dìì kó bɛhɑ̃ɑ̃pɔ̀mbɛ̀ do bo tɛkɔùpíítɛ̀,
\q1 bɛ̀ tɛ̃́nkɛ bɑ́ɑ́ pɛ̃ɛ̃tɛ́ tɛkɔ̀ùtɛ̀ (100).
\q1 Bɛ̀ɛ̀ do bo tɛkɔ̀ùtɛ̀ (1000),
\q1 bɛ̀ tɛ̃́nkɛ bɑ́ɑ́ pɛ̃ɛ̃tɛ́ tɛpíítɛ̀.
\s1 Isidɑyɛɛribɛ dòmmɛ̀ kɛ́tɑ̃ɑ̃tɛ́ Kuyie kɛ́nfòù
\q1
\v 4 Mí ndi Yiɛ̀ nKuyie mmíì di nɑ́ɑ́ ndíndi Isidɑyɛɛribɛ kɛ tú:
\q1 N wɑmmúnɛ̀ kɛ̀ dɛ̀ɛ yie nkɛ̀ di nfòù.
\q1
\v 5 Dɛ̀ nɛ̀ í tú n yɛ̃ ndi kɔtɛ Betɛɛdi
\q1 kɛ n tú di n wɑnti
\q1 Betɛɛdi yóó dɔúnkomu,
\q1 di mɛ mbɑ́ɑ́ kɔtɛ Kidikɑɑdi
\q1 bɛ̀ yóó ò pɔ̀ntɛmu,
\q1 di bɑ́ ntú di bo kɔtɛ Bɛɛrisebɑɑ.
\b
\q1
\v 6 N wɑmmúnɛ̀ mí ndi Yiɛ̀ nKuyie,
\q1 kɛ̀ dɛ̀ɛ yie nkɛ̀ di nfòù,
\q1 kɛ̀ dɛ̀ í dò mmɛmmɛ muhɑ̃ɑ̃́ mbo cútóo
\q1 kɛ dí do díndi Sosɛfu yɑɑ̀bí,
\q1 dɛ yiɛ̀ mmɛ nyí bo Betɛɛdi wèè bo nɑ kɛ mù kùɔ.
\q1
\v 7 Di yónkùnnɛ tibeéntì nti,
\q1 di í bekù kɛ̀ dɛ̀ sìɛ́.
\b
\q1
\v 8 Mí ndi Yiɛ̀ nKuyie mmíì dɔ̀ɔ̀ siwɑ̃̀ɑ̃,
\q1 míì ɔ̃ɔ̃ ceetɛ kɛyensɔ̀ùkɛ̀
\q1 kɛ̀ dɛ̀ɛ nɑɑ́ ndiwennɛ́cɑ̀nnì,
\q1 míì ɔ̃ɔ̃ tíí ndɑ̀mɛ́ɛ̀rì kó mɛniɛ
\q1 nkɛ́ mɛ̀ yɑɑtóo kɛtenkɛ̀.
\q1 Míì tu di Yiɛ̀ nKuyie.
\q1
\v 9 Míì ɔ̃ɔ̃ duɔ́ nkɛ̀ bɛ̀ɛ pɔntɛ onìtì kperì,
\q1 kɛ́tɑ o cɛ̃kpetɛ̀ kɛ́hɛí o kpɛrɛ.
\b
\q1
\v 10 Di níímmu wèè bekùnɛ̀ timɔ́mmɔnti,
\q1 di í dɔ́ wèè nɑ̀ɑ́ ntimɔ́mmɔnti.
\q1
\v 11 Di fɛ̃́ũnko mɛ̀ɛ̀ kpɛ́í mbɛcĩ̀rìbɛ̀
\q1 kɛ duɔ́ nkɛ̀ bɛ̀ di dokìi dididɛ̀ì mɔ̀nnì.
\q1 Nɛ̀ dɛ kpɛ́í di í tɑti sicɛ̃sɑ̀ɑ̀sì
\q1 di mɑɑ́ sì nɛ̀ yɛtɑ̃́sɑ̀ɑ̀yɛ̀,
\q1 di mɛ nyí yóó yɑ̃̀ fínyĩ̀ kó dɛtie ndi fìíkú dɛ̀ kó mɛnɑɑ̀.
\q1
\v 12 N yɛ̃́mu di cɑɑ̀rìmɛ̀ mɑ̀mɛ̀,
\q1 di yɛi nyí sénní,
\q1 díndi bɛ̀ɛ̀ fɛ̃́ũnko bɛ̀ɛ̀ í cɑ̀ɑ̀rɛ̀ mùmɑmù
\q1 kɛ cɔú ticuuti tibeéntì miɛkɛ,
\q1 bɑ́ di í kommu bɛcĩ̀rìbɛ̀.
\b
\q1
\v 13 Dɛɛ̀ kpɛ́í nte yɛmɔ̀rɛ̀ yɛiyɛ yiɛ mmiɛkɛ
\q1 kɑ̀ɑ bo ncĩ́ɛ̃́kɛ́mɛ̀ tɔ̃ũ.
\s1 Kuyie mpɑ̃ɑ̃nɑ́ɑǹtì nɑ́ɑǹtò yɑ́úkùnnɛmɛ̀ bɛnìtìbɛ̀ kɔ̃̀ntì
\q1
\v 14 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò bɛ́i nkɛ dɔ̀:
\q1 Wɑmmúnɛ̀ mɛsɑ̀ɑ̀ nkɛ yóu mɛyɛi,
\q1 nkɛ̀ dɛ̀ɛ yie nkɛ̀ di nfòù,
\q1 mɛmmɛ Mpɑkɛdɑɑ m bo ndi bonɛ̀mɛ̀
\q1 kɛ ndònnɛ̀ n di nɑ́ɑ́mmɛ̀.
\q1
\v 15 Nníínnɛ̀ mɛyɛi kɛ́dɔkɛ mɛsɑ̀ɑ̀,
\q1 tũntɛnɛ̀ tibeéntì kɛ́mbekù dɛ̀ bèkúmɛ̀,
\q1 kɛ̀ dɛ̀ɛ yie nkɛ̀ Mpɑkɛdɑɑ kuɔ́ mmɛsémmɛ̀
\q1 Sosɛfu yɑɑ̀bí ìì kpɑɑ́.
\b
\q1
\v 16 Ntɛ Mpɑkɛdɑɑ,
\q1 Kuyie nkùù bɑkɛ́ dɛmɔu kù tu mù,
\q1 kù tu isɑ́útìi bo dɑ́tínnɛ́ dihɛì dimɔu miɛkɛ,
\q1 bɛnìtìbɛ̀ bo nkuɔ̀ ntipíìtì timɔu kɛ tú: Eeyoo! Eeyoo!
\q1 Kɛ̀ bɛ̀ ńyu dɛpɑɑ nyɛmbɛ̀ kɛ̀ bɛ̀ bo kɑri mukṹṹ.
\q1 Bɛnìtìbɛ̀ bo nwɑnti bɛ̀ɛ̀ nɔ mmukúdɑbònkɔmmù.
\q1
\v 17 Yɛkúdɑbùò mbo dɑ́tínnɛ́ dɛpɑɑ ndɛmɔu miɛkɛ
\q1 kɛ yɛ̃́ n yóó di síékɛ́mɛ̀,
\q1 mí ndi Yiɛ̀ nKuyie mmíì bɛ́i.
\s1 Kuyie nkó diyiè yó ndòmmɛ̀
\q1
\v 18 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Di bo yɑ̀ díndi bɛ̀ɛ̀ bɑ̀ɑ̀ n kó diyiè,
\q1 di yɛ̀mmɛ̀ dò ndɛ kó diyiè yóó di tɔnní bɑ?
\q1 Dì yó ntú dibiìnnì ndi,
\q1 di í yó ntú kuwenniku.
\q1
\v 19 Dɛ kó diyiè kpɛrɛ yó ndònnɛ̀
\q1 onìtì wèè cokù wenwe dicìrícìrì
\q1 kɛ conɛ̀ kumuntonkù,
\q1 kɛ kò nkɛ tɑ o cĩ́ɛ̃̀tɛ̀,
\q1 kɛ ĩkú kumɑrí kɛ̀ fɛwɑ̀ɑ̀fɛ̀ ò dɔntɛ́.
\q1
\v 20 Di yɛ̀mmɛ̀ bɑ́ ndò
\q1 nKuyie nkó diyiè yó ntú kuwenniku kpɛri,
\q1 dì yó ntú dibiìnnì ndi.
\s1 Kuyie nyí dɔ́mɛ̀ bɛ̀ nkù dɔúnnɛ̀ mɛmɑntímɛ̀
\q1
\v 21 Kɛ̀ ti Yiɛ̀ nKuyie mbɛ́i nkɛ dɔ̀:
\q1 M pɛ̃̀mmu di kó mubɑ́ɑmmu,
\q1 n dɛ̀ sènkɛ̀rìmu,
\q1 n tɛ̃́nkɛ í dɔ́ kɛ́keè di tĩ̀rɛ̀ di tiku yɛ̀ kó kunɔ́ú.
\q1
\v 22 N yí dɔ́ di n feu ìì wũɔ̃ kɛ tuɔ̀
\q1 nɛ̀ di m pɑ̃ɑ̃ nyɛ̀ɛ̀ pɑ̃rɛ̀.
\q1 Yɛnɑɑdɑkɛ̀ mɛkùɔ̀ nkpɛyɛ di n feu yɛ̀,
\q1 n yí dɛ̀ wùó!
\q1
\v 23 Dí fũtɛnɛ̀ m borɛ̀,
\q1 kutoweku di wékíí kù kɛ tú iyiɛ,
\q1 n yí dɔ́ kɛ́keè di kutìdùùtì kó yɛdɑbùò.
\q1
\v 24 N dɔ́ tibeéntì sɑ̀ɑ̀tì tiì mbo di cuokɛ̀,
\q1 kɛ pũɔ̃̀ mmɛniɛ nkɔ̃mɛ,
\q1 kɛ́ndò ndinɛ́bòrì ɔ̃ ndòmmɛ̀, kɛ bɑ́ɑ́ kṹṹ.
\b
\p
\v 25 Isidɑyɛɛribɛ di do n feumu iwũɔ̃ yɛbie nsipísìnɑ̀ɑ̀ di do dɔ̀ɔ̀ yɛ̀ dikpɑ́ɑ̀ miɛkɑɑ̀? 
\v 26 Di do dɔ̀ɔ̀ dibɔɔ̀ Mɔdɔki nɛ̀ Defɑ̃ɑ̃ kó tɛwɑ̃̀tɛ̀ ntɛ kɛ́ ndɛ̀ bɑ̀ɑ́.
\q1
\v 27 Dɛɛ̀ te kɛ̀ n yóó di dennɛ
\q1 kɛ dí pɛ̃ɛ̃ mBɑbidɔnni,
\q1 mí ndi Yiɛ̀ nKuyie mmí nwèè yètìrì tu Mpɑkɛdɑɑ míì bɛ́i.
\c 6
\s1 Kuyie nkpɑ̀nnɛ̀ tì Siyɔ̃ɔ̃ kɔbɛ
\q1
\v 1 Mɛm̀mɛ kɛ̀ ti Yiɛ̀ nKuyie mbɛ́i nkɛ dɔ̀:
\q1 Di bo yɑ̀ díndi bɛ̀ɛ̀ kɑ̀ri bɛ̀tɛ̀ì Siyɔ̃ɔ̃ ɛì miɛkɛ,
\q1 bɛ̀ɛ̀ tɑ̃́ bɛmɑ́ɑ̀ Sɑmmɑrii tɑ̃rɛ̀ ĩ́nkɛ̀,
\q1 díndi bɛ̀ɛ̀ yɛ̀mmɛ̀ dò ndi tú bɛketibɛ̀ ibotí tɛì miɛkɛ,
\q1 Isidɑyɛɛribɛ cokóo díì borɛ̀ yɑ́ɑ̀bɑ?
\b
\q1
\v 2 Kɔtɛnɛ̀ Kɑndee kɛ́yɑ̀
\q1 kɛ̀ di dèè mɛmmɛ di kɔtɛ Amɑti dihɛidiɛ̀,
\q1 kɛ́pɛ̃ɛ̃tɛ́ kɛ́kɔtɛ Kɑti Fidisitɛ̃ɛ̃bɛ ɛì,
\q1 di yɛ̀mmɛ̀ dò ndi pɛ̃ɛ̃tɛ́mu dɛ kó yɛkpɑ̀ɑ̀tìyɔɑ̀?
\q1 Di kó dikpɑ̀ɑ̀tìyuu pɛ̃ɛ̃tɛ́mu bɛ kpɛyɑɑ̀?
\b
\q1
\v 3 Di yɛ̀mmɛ̀ dò ndi dɛ́tinkomu mɛyɛi,
\q1 di nɛ́ í yɛ̃́ kɛ dò ndi yũɔ̃nní kuyonku nku di cuokɛ̀.
\q1
\v 4 Díndi bɛ̀ɛ̀ duɔ́ yɛdúɔ̀ sɑ̀ɑ̀yɛ̀
\q1 bɛ̀ dɔ̀ɔ̀ yɛ̀ nɛ̀ yɛpɑ́pɑ́nìì,
\q1 kɛ yɑɑ nyɑɑ ndi kɑ̀rɛ̀ ĩ́nkɛ̀,
\q1 kɛ cɑ́ɑ́ nyɛpedɑkɛ̀ nɛ̀ yɑnɑɑdɑbɛ,
\q1
\v 5 kɛ diè, nkɛ wékíí mɛdiɛ̀, nkɛ bie ntikùtìdùùtì
\q1 kɛ tekíí Dɑfiti kɛ dɔɔri tikùtìdùùtì.
\q1
\v 6 Kɛ yɔ̃ mmɛnɑɑ̀ nnɛ̀ ibòòkɛ pɛ̃kùyì
\q1 kɛ pe mmɛkɔsɑ̀ɑ̀mɛ̀
\q1 bɑ́ di í yĩɛ̃̀kù mɛyɛi
\q1 mmɛ̀ɛ̀ doti Sosɛfu yɑɑ̀bí ĩ́nkɛ̀.
\b
\q1
\v 7 Dɛɛ̀ kpɛ́í nte kɛ̀ bɛ̀ bo di pĩ́ ndi mmɔ̀nnì
\q1 kɛ di nií ntidɑɑtì kó fɛnɑfɛ ììkɛ̀ kɛ di kònnɛ̀,
\q1 dɛ mɔ̀nnì kɛ̀ mɛtuɔ̀ nkó yɛbɑɑ ndeè.
\s1 Kuyie nnɑ̀kɛ́mɛ̀ kù yóó pɔntɛmɛ̀ Sɑmmɑrii
\q1
\v 8 Kɛ̀ ti Yiɛ̀ nKuyie mbɛ́i nkɛ́pɑrìkɛ̀ nɛ̀ ku yètìrì kɛ dɔ̀:
\q1 Mí nKuyie Mpɑkɛdɑɑ míì bɛ́i nkɛ tú:
\q1 M pɛ̃̀mmu Isidɑyɛɛribɛ kó dikpɑ̀ɑ̀tìyuu kó tɛfentɛ̀
\q1 n yí dɔ́ kɛ́nwúó mbɛ kpɑ̀ɑ̀tìcɛ̃́ĩ,
\q1 n yóó dɛitɛmu n nɔ̀ùtɛ̀ dɛ kó dihɛì ĩ́nkɛ̀
\q1 kɛ̀ bɛ̀ɛ dì pɔ̀ntɛ.
\b
\p
\v 9 Bɑ́ kɛ̀ bɛnìtìbɛ̀ sùɔ́ ntɛcĩ́ɛ̃̀tɛ̀ mɑtɛ̀ miɛkɛ tɛpíítɛ̀ dɛ kó dihɛì miɛkɛ bɛ̀ bo kú. 
\v 10 Kɛ̀ dɛ̀ dò nhòmɔù yentɛ́ tɛcĩ́ɛ̃̀tɛ̀ mɑtɛ̀ miɛkɛ kufɑ̃́ɑ̃́, nkòo tebitɛ kɔ̀tɛní kɛ bo tɔ bɛcíríbɛ̀ kɛ́cɔ́u, koò bekɛ́ kɛ yĩ: Òmɔù kpɑɑ́mu kɛnkɛ kufɑ̃ɑ̃́ miɛkɛ ɑ borɑ̀ɑ̀? Ò bo ò tɛ̃̀ńnɛ́ kɛ dɔ̀: Ɔ́ɔ̀! Kóò yèkìì tɛnɔ̀ùtɛ̀ kɛ dɔ̀: Yé yé yé bɑ́ɑ́ bɛ́i, dɛ̀ í dò nkɛ́yú ti Yiɛ̀ nKuyie nyètìrì di mmɔ̀nnì.
\b
\q1
\v 11 Ti Yiɛ̀ nKuyie nkùù bɑkɛ́
\q1 kɛ̀ kùu bɛ́i nkɛ tú kù bo potɛ́ tɛcɛ̃diɛtɛ̀
\q1 kɛ̀ tɛ̀ɛ do kɛ́yɔurɛ yɔurɛ,
\q1 kɛ̀ tɛsɑ́mpɔ́tɛ̀ pɑ́ɑ́ iyiɛ.
\s1 Di bɑ́ mpɔtìnɛ̀ di wɛ̃rímú
\q1
\v 12 Sisɛ̃ĩ́ í cokù tipètì ĩ́nkɛ̀,
\q1 bɛ̀ í duɔ̀nɛ̀ inɑ̀ɑ̀kɛ dɑ̀mɛ́ɛ̀rì miɛkɛ.
\q1 Kɛ̀ díndi nɛ́ cèètɛ tibeéntì kɛ̀ tì tiikɛ
\q1 kɛ nɑɑ́ mmɛdɔ̀mmɛ̀ kɛ yɛ̃ ntóróó kɛ dòntɛnɛ̀ diyĩ́ɛ̃̀nnì.
\b
\p
\v 13 Kɛ̀ di yɛ̀mmɛ̀ nɑɑtinɛ̀ Dodebɑɑ ɛì \f + \fr 6:13 \fr*\fk Dodebɑɑ ɛì: \fk*\ft Dodebɑɑ ɛì bɛnkú kɛ tú: Dɛtetìrɛ̀ ndɛ.\ft*\f* kɛ̀ di pɔtì kɛ tú: Nɛ̀ ti kó muwɛ̃rímú mmu ti fìetɛmɛ̀ Kɑdinɑimmu ɛì \f + \fr 6:13 \fr*\fk Kɑdinɑimmu ɛì: \fk*\ft Kɛ̀ Kɑdinɑimmu kpɛri bɛnkú kɛ tú:\ft*\f* Diyènnì dɛ̀ɛ̀ bɛnkú muwɛ̃rímú, Tenketɛ́ 14:5 bɛ̀ nɑ̀ɑ́mmu dɛ kóò Kɑrinɑimmu kpɛ́í. 
\v 14 Dɛɛ̀ te mí ndi Yiɛ̀ nKuyie Mpɑkɛdɑɑ kɛ̀ n yóó duɔ́ nkɛ̀ ibotí tɛì kɔbɛɛ di fɛ̃́ũ nkɛ́túótɛ́ Debo-Amɑti ɛì kɛ́ntɔ kɛ́tuɔkɛnɛ̀ Adɑbɑ kó kukó.
\c 7
\s1 Kuyie mbɛnkɛmɛ̀ Amɔɔsi fɛcofɛ
\p
\v 1 Kɛ̀ ti Yiɛ̀ nKuyie nni mbɛnkɛ mɛbɛnkùmɛ̀ mɑmɛ̀, kɛ̀ n yɑ̀ fɛcofɛ dɑ̀tínnɛ́mɛ̀ kɛ dò ndiwɛtirì kɛ sɔ̃́ mbɛ̀ kɛ̃ĩ́ okpɑ̀ɑ̀tì sɑ̃mmútì kɛ̀ tì bo kɛ dɔ́ kɛ́puku. 
\v 2 Kɛ̀ fɛɛcofɛɛ dɛ́útóo timútì kɛ́ndɔ́ kɛ́ tì dèè kɛ̀ n kuɔ́nko kɛ dɔ̀: Áú! Ti Yiɛ̀ nKuyie nti kuɔ́ mmɛsémmɛ̀ kɛ̀ mɛɛ̀ dɔkɛ Sɑkɔbu kó kufuku í sũ bɛ̀ í yó nkpɑɑ́. 
\v 3 Kɛ̀ ti Yiɛ̀ nKuyie nceetɛ ku yɛ̀mmɛ̀ kɛ bɛ́i nkɛ dɔ̀: Dɛ̀ í yóó tuɔ̀kɛní.
\s1 Kuyie nyìɛ́ kɛ bɛnkɛmɛ̀ Amɔɔsi muhɑ̃ɑ̃́
\p
\v 4 Kɛ̀ ti Yiɛ̀ nKuyie nni mbɛnkɛ muhɑ̃ɑ̃́, kɛ́ mù yùní kɛ̀ mùu cɔ́útɛ́ kɛtenkɛ̀ miɛkɛ kó mɛniɛ, kɛ́ mɛ̀ sũ̀ɔ̃̀too, kɛ̀ dɛpɑɑ ncɔ́útóo. 
\v 5 Kɛ̀ n kuɔ́nko kɛ dɔ̀: Áú! Ti Yiɛ̀ nKuyie nti kuɔ́ mmɛsémmɛ̀ kɛ̀ mɛɛ̀ dɔkɛ Sɑkɔbu kó kufuku í sũ kù bɑ́ nkpɑɑ́. 
\v 6 Kɛ̀ ti Yiɛ̀ nKuyie nceètɛ ku yɛ̀mmɛ̀ kɛ bɛ́i nkɛ dɔ̀: Dɛndɛ múnkɛ í yóó tuɔ̀kɛní.
\s1 Kuyie mbɛnkɛmɛ̀ Amɔɔsi kuhɔ̃ũ kùù cɑ̀ɑ́tí dibiɛrìmínnì
\p
\v 7 Kɛ̀ n yɑ̀ ti Yiɛ̀ nKuyie nkɛ̀ kù còḿmú kuduotí mɑkù ĩ́nkɛ̀ kɛ pikú kuhɔ̃ũ kɛ̀ kù cɑ̀ɑ́tí dibiɛrìmínnì. 
\v 8 Kɛ̀ kù m bekɛ kɛ dɔ̀: Amɔɔsi ɑ yɑ̀ bɑ? Kɛ̀ n dɔ̀: N yɑ̀ kuhɔ̃ũ kùù cɑ̀ɑ́tí dibiɛrìmínnì. Kɛ̀ kù dɔ̀: N yóó tɑ̃ũ kuhɔ̃ũ nku kùù cɑ̀ɑ́tí dibiɛrìmínnì n kɔbɛ Isidɑyɛɛribɛ ĩ́nkɛ̀ kɛ́yɑ̀ kɛ̀ bɛ̀ sìɛ́. N tɛ̃́nkɛ í yóó bɛ̀ cĩ̀ɛ̃́, mbìtì!
\q1
\v 9 Isɑki yɑɑ̀bí kó yɛwũɔ̃tɔ̀rɛ̀ bo dɔúnko,
\q1 kɛ̀ Isidɑyɛɛribɛ kó yɛtɔ̀rɛ̀ɛ nɑɑ́ ntidobontì.
\q1 Kɛ̀ n cómmú nɛ̀ disiè kɛ́wetínnɛ̀ Sedoboɑmmu cĩ́ɛ̃̀tɛ̀.
\s1 Amɑsiɑ nɛ̀ Amɔɔsi bɛ̀ pètɛmɛ̀ kɛ̀ bɛ̀ɛ bɛti Amɔɔsi Betɛɛdi
\p
\v 10 Mɛm̀mɛ kɛ̀ Amɑsiɑ ikuɔ́ nìùtìi tɔ̃ nkɛ̀ bɛ̀ɛ nɑ́kɛ́ Isidɑyɛɛribɛ kóo kpɑ̀ɑ̀tì Sedoboɑmmu kɛ dɔ̀: Amɔɔsi dɔ́ kɛ́ dɑ bɔmmu kɑ̀ɑ tɛ̃́nkɛ bɑ́ ntú Isidɑyɛɛribɛ kóo kpɑ̀ɑ̀tì. Ti í dɔ́ kɛ́nyo ò nɑ̀ɑ́ ntì. 
\v 11 Ò nɑ̀ɑ́ nkɛ tú:
\q1 Fɔ̃́ nSedoboɑmmu ɑ bo kú mudoò miɛkɛ
\q1 kɛ̀ bɛ̀ɛ pĩ́mmú Isidɑyɛɛribɛ
\q1 kɛ́kònnɛ̀ dɛdɛ́tirɛ̀.
\b
\p
\v 12 Mɛm̀mɛ kɛ̀ Amɑsiɑɑ nɑ́kɛ́ Amɔɔsi kɛ dɔ̀: Oyuwúoǹtì fɔ̃́! Kò nSudɑɑ tenkɛ̀ kɛ́nnɑ́ɑ́ nKuyie mpɑ̃ɑ̃nɑ́ɑǹtì kɛ pɛ́únɛ̀ mudiì. 
\v 13 A tɛ̃́nkɛ bɑ́ mbo diɛ mBetɛɛdi kɛ́nɑ́ɑ́ nKuyie mpɑ̃ɑ̃nɑ́ɑǹtì kɛ yɛ̃́ okpɑ̀ɑ̀tì kó ditɔ̀nnì ndimɛ̀, tɛkpɑ̀ɑ̀tìcĩ́ɛ̃̀tɛ̀ kpɛri ndi.
\b
\p
\v 14 Kɛ̀ Amɔɔsii ò tɛ̃̀ńnɛ́ kɛ dɔ̀: N do í tú ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò, n ketɛ́ kɛ do í tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ kó kufuku kou. N do tú onɑɑcɛ̃nti nwe kɛ fiiku dɛtie mbɛ̀ tu dɛ̀ sikomɔɔ. 
\v 15 N do cɛ̃mmú n wũɔ̃ nyi, kɛ̀ ti Yiɛ̀ nKuyie nni nyú kɛ n nɑ́kɛ́ kɛ dɔ̀: Kɔtɛ kɛ́nɑ́kɛ́ n nìtìbɛ̀ Isidɑyɛɛribɛ m pɑ̃ɑ̃nɑ́ɑǹtì, 
\v 16 di m̀mɔ̀nnì kéntɛ́ ti Yiɛ̀ nKuyie ntu n dɑ nɑ́kɛ́ tì: Fɔ̃́ nwèè tu m bɑ́ nnɑ́ɑ́ nKuyie mpɑ̃ɑ̃nɑ́ɑǹtì Isidɑyɛɛribɛ kpɛ́í, kɛ tú m bɑ́ nnɑ́ɑ́ nyIsɑki yɑɑ̀bí n kó tiyɛinnɑ́ɑǹtì. 
\v 17 Nɛ̀ dɛ kpɛ́í ti Yiɛ̀ nKuyie ntu:
\b
\q1 ɑ pokù bo yĩ́ onitipòkù wèè dɔuti dɔutinɛ̀ bɛnitidɑɑbɛ̀
\q1 kɛ̀ bɛ̀ nhò dɔutinɛ̀ kupììti dihɛì miɛkɛ,
\q1 kɛ̀ bɛ̀ɛ kuɔ ɑ bí
\q1 initidɑɑì nɛ̀ initipòì mudoò miɛkɛ,
\q1 kɛ́berí ɑ tenkɛ̀ kɛ totí,
\q1 kɛ̀ bɛ̀ dɑ kuɔ bɛtɔbɛ̀ tenkɛ̀ bɛ̀ í tũ ndɛ̀ Kuyie,
\q1 kɛ́pĩ́mmú Isidɑyɛɛribɛ kɛ́kònnɛ̀ dɛdɛ́tirɛ̀ \f + \fr 7:17 \fr*\ft Kuyie nkuù kpɑ̀nnɛ̀ ku nìtìbɛ̀ Isidɑyɛɛribɛ kɛ\ft*\f* dònninkonɛ̀ onitipòkù wèè yóu o dɔù kɛ dɔuti dɔutinɛ̀ bɛnitidɑɑbɛ̀.
\c 8
\s1 Kuyie mbɛnkɛmɛ̀ Amɔɔsi kuhɔnku kùù ɑ̃ yɛtebɛ
\p
\v 1 Kɛ̀ ti Yiɛ̀ nKuyie nni mbɛnkɛ kuhɔnku kɛ̀ kù pìɛ́kɛ́ yɛtebɛ yɛ̀ɛ̀ bi. 
\v 2 Kɛ̀ kù m bekɛ kɛ dɔ̀: Amɔɔsi ɑ yɑ̀ bɑ? Kɛ̀ n dɔ̀: N yɑ̀ kuhɔnku nɛ̀ yɛtebɛ yɛ̀ɛ̀ bi. Kɛ̀ kù n nɑ́kɛ́ kɛ dɔ̀:
\q1 N nìtìbɛ̀ Isidɑyɛɛribɛ bimu,
\q1 bɛ̀ deèmù mɔ̀nnì diì tùɔ̀kɛ,
\q1 n tɛ̃́nkɛ í yóó bɛ̀ cĩ̀ɛ̃́.
\q1
\v 3 Dɛ yiè iyiɛ nyìì dìè ntɛkpɑ̀ɑ̀tìcĩ́ɛ̃̀tɛ̀ miɛkɛ
\q1 ì bo nɑɑ́ nyɛkúdɑbùò,
\q1 kɛ̀ bɛcíríbɛ̀ɛ sṹṹ nkɛ́ncóú cóú tipíìtì timɔu,
\q1 tinɑ́ɑǹtì í yó mbo dɛ yiè.
\q1 Mí ndi Yiɛ̀ nKuyie mmíì bɛ́i.
\s1 Kuyie nkpɑ̀nnɛ̀mɛ̀ bɛ̀ɛ̀ cií mbɛtɔbɛ̀ kɛ yo mbɛ kpɛrɛ
\q1
\v 4 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Díndi bɛ̀ɛ̀ fɛ̃́ũnko bɛcĩ̀rìbɛ̀
\q1 kɛ dɔ́ kɛ́deè bɛsénnìbɛ̀,
\q1 kéntɛ́nɛ̀ kɛ́keè.
\q1
\v 5 Díndi bɛ̀ɛ̀ ɔ̃ nnɑ́ɑ́ nkɛ tú,
\q1 otɑ̃̀nkù pɑ̀nwè kó dibɑnnii mɔ́nnɛ́ kɛ́pɛ̃ɛ̃tɛ́
\q1 kɛ̀ tì fítɛ́ ti diitì,
\q1 tɛom̀pùtɛ̀ɛ mɔ́nnɛ́ kɛ́pɛ̃ɛ̃tɛ́
\q1 kɛ̀ ti óótɛ́ ti buɔ kɛ́cṹũnní tidiitì,
\q1 kɛ́yɑɑtɛ sibièpeé, kɛ́yíɛ́ idíítí,
\q1 kɛ́yɑɑtɛ cìdóò kó kucɛ̃́ɛ̃́kù.
\q1
\v 6 Kɛ do mbɛcĩ̀rìbɛ̀,
\q1 kɛ fiiti bɛsénnìbɛ̀ tinɛùtì mɛhɑ̃nnímɛ̀ mɛ̀mɑ́ɑ̀ kó dibɑ̀nnì kpɛ́í,
\q1 kɛ fiitinɛ̀ tiyofùtì bɛnìtìbɛ̀.
\b
\q1
\v 7 Mɛm̀mɛ kɛ̀ ti Yiɛ̀ nKuyie mbɛ́i nkɛ́pɑrìkɛ̀ kɛ dɔ̀:
\q1 Mí ndi Yiɛ̀ nKuyie m bɛ́immu kɛ tú:
\q1 Nɛ̀ Isidɑyɛɛribɛ kó tɛfentɛ̀ kpɛ́í
\q1 n yí yóó yɛ̃̀ mbɛ dɔɔ̀rìmɛ̀ mɑmɛ̀.
\q1
\v 8 Nɛ̀ dɛ kpɛ́í kɛtenkɛ̀ bo ɑɑ́,
\q1 bɛ̀ɛ̀ bo kɛ miɛkɛ kɛ̀ bɛ̀ɛ kɔmmú yɛkúdɑbùò,
\q1 kɛtenkɛ̀ bo ítɛ́ní kɛ́doroo mɛniɛ
\q1 nhɔ̃ɔ̃ tɑ Esibiti kó kukó nNiiri kɛ́ yĩ́mɛ̀.
\b
\q1
\v 9 Dɛ kó diyiè,
\q1 diyiè bo tɑ kuyie ncuokɛ̀
\q1 dɛ̀ bo nɑɑ́ nkɛyènkɛ̀ kuyie ncuokɛ̀.
\q1 Mí ndi Yiɛ̀ nKuyie mmíì bɛ́i.
\q1
\v 10 Di bɑɑ mbo nɑɑ́ nyɛkúdɑbùò,
\q1 nkɛ̀ di yiɛ nnɑɑ́ nyisɑ́útìi,
\q1 bɛnìtìbɛ̀ bɛmɔu bo dɑ́ɑ́tí tifɔ̀ɔ̀tɔ̃̀ntì
\q1 kɛ́kuó mɛyùbii,
\q1 kutenkù kumɔu bɛnìtìbɛ̀ bo nkuɔ̀,
\q1 wèè mɔ̀kɛ dɛbirɛ dɛmɑ́ɑ̀ dɛ̀ ɔ̃ɔ̃ kú kòò nkuɔ̀mmɛ̀.
\q1 Dɛ kó dihɛì borimɛ bo tiikɛ mɛdɔ̀mmɛ̀ kɔ̃mɛ.
\s1 Kuyie nnɑ́ɑǹtì kó dikònnì nɛ̀ ti kó sinɛ́yɛ̃ĩ yóó pĩ́mmɛ̀ bɛnìtìbɛ̀
\q1
\v 11 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Dɛ yiè kpɑɑnímu
\q1 kɛ̀ m bo duɔ́ nkɛ̀ dikònnì nɛ̀ sinɛ́yɛ̃ĩ kɛ̀ dɛ̀ɛ tɑnní.
\q1 Dɛ̀ í tú dikònnì dìì ɔ̃ɔ̃ dɑ pĩ́ nkɑ̀ɑ di muciɛ̀
\q1 nɛ̀ sinɛ́yɛ̃ĩ sìì ɔ̃ɔ̃ dɑ pĩ́ nkɑ̀ɑ yɑ̃̀ mɛniɛ.
\q1 N nɑ́ɑǹtì kó dikònnì ndi nɛ̀ ti kó sinɛ́yɛ̃ĩ.
\q1
\v 12 Bɛnìtìbɛ̀ bo nhɑ̀rì tipíìtì timɔu,
\q1 kubɑkù yoú nɛ̀ kucɑ̃̀nku,
\q1 diyiè yìɛ̀ kɛ̀ɛ̀ bíɛ́kɛ̀ nɛ̀ dì tɑɑ̀ kɛ̀ɛ̀ bíɛ́kɛ̀,
\q1 kɛ wɑnti kɛ bo keè n nɑ́ɑǹtì bɛ̀ mɛ mbɑ́ɑ́ tì pɛ̀tɛ́.
\b
\q1
\v 13 Dɛ yiè bɛsɑpùnsɑ́ɑ́tìbɛ̀ nɛ̀ bɛdɑpùnsɑ́ɑ́tìbɛ̀
\q1 bɛ̀ bo mɔ́tɛ́nɛ̀ sinɛ́yɛ̃ĩ.
\q1
\v 14 Bɛ̀ɛ̀ kó dimɑ̀ɑ̀ pɑ̀rìkunɛ̀
\q1 tɛbɔɔtenkɑɑnìtɛ̀ tɛ̀ɛ̀ bo Sɑmmɑrii
\q1 nɛ̀ Dɑnni kɔbɛ kó dibɔɔ̀ nɛ̀ Bɛɛrisebɑɑ kó ditɔ̀nnì,
\q1 bɛ̀ bo do bɑ́ bɛ̀ tɛ̃́nkɛ bɑ́ɑ́ ítɛ́ bìtì!
\c 9
\s1 Kuyie nnɑ̀kɛ́mɛ̀ kù yóó pɔntɛmɛ̀ bɛ̀ kù mɑɑ́ tɛ̀ɛ̀ cĩ́ɛ̃̀tɛ̀
\q1
\v 1 Kɛ̀ n yɑ̀ ti Yiɛ̀ nKuyie
\q1 kɛ̀ kù còḿmú diwũɔ̃tɔ̀nnì ĩ́nkɛ̀ kɛ nɑ́ɑ́ nkɛ tú:
\q1 Potɛ́ yɛsɑ̃ǹkɛ̀ kó yɛtɛitiyɛ̀ kɛ̀ yɛbòrɛ̀ɛ sɑ̃ntɛ̀,
\q1 kɛ wɛ́rí kɛ́duoní bɛ yɔ ĩ́nkɛ̀ kɛ̀ bɛ̀ɛ̀ kpɑɑ́
\q1 kɛ̀ m bɛ̀ kùɔ nɛ̀ disiè,
\q1 òmɔù í yó mbo wèè bo cokɛ́ kɛ́yentɛ́
\q1 òmɔù mɛ nyí yóó nɑ kɛ́sɔri kɛ́cootɛ́.
\q1
\v 2 Kɛ̀ bɛ̀ tɑ kɛtenkɛ̀ m bo bɛ̀ dɛ̀itɛní,
\q1 kɛ̀ bɛ̀ dèkɛ kɛĩ́nkɛ̀ m bo bɛ̀ cṹũnní.
\q1
\v 3 Kɛ̀ bɛ̀ dèkɛ Kɑdimɛɛdi tɑ̃rì kɛ sɔ̀ri
\q1 ḿ bɛ̀ wɑmmú kɛ́ bɛ̀ sɔ̀tɛní,
\q1 kɛ̀ bɛ̀ mɛ ntɑ dɑ̀mɛ́ɛ̀rì fũ̀ɔ̃̀ kɛ sɔ̀ri
\q1 n duɔ́ nkɛ̀ dɑ̀mɛ́ɛ̀rì kó musĩ̀mmù mbɛ̀ dɔmmù.
\q1
\v 4 Kɛ̀ bɛ̀ duɔ́ mbɛmɑ́ɑ̀ bɛ dootitɔbɛ̀ kɛ bo nɑɑ́ ntidɑɑtì,
\q1 n duɔ́ nkɛ̀ bɛ̀ mbɛ̀ feu dɛ bíɛ́kɛ̀.
\q1 N nɔ̀nfɛ̀ yóó mbomu bɛ ĩ́nkɛ̀
\q1 dɛ̀ nɛ̀ í tú kɛ̀ m̀ bɛ̀ dɔ̀ɔ̀ri mɛsɑ̀ɑ̀,
\q1 n yó mbɛ̀ dɔɔri mɛyɛi mmɛ.
\b
\q1
\v 5 Kɛ̀ ti Yiɛ̀ nKuyie Mpɑkɛdɑɑ
\q1 kɑ̀ɑ́kɛ́ kɛ̀ɛ̀ tenkɛ̀ o nɔ́mbii kɛ̀ sɑ̃̀ntɛ̀mu,
\q1 kɛ̀ bɛnìtìbɛ̀ bɛ̀ɛ̀ kɛ̀ bo kɛ̀ bɛ̀ɛ kɔmmú yɛkúdɑbùò,
\q1 kɛ̀ kù kɑ̀ɑ́kɛ́ kɛtenkɛ̀ kɛ̀ɛ ítɛ́ní kɛ́doroo
\q1 mɛniɛ nhɔ̃ɔ̃ tɑ Esibiti kó kukó nNiidi kɛ́yĩ́mɛ̀.
\q1
\v 6 Kuyie ncĩ́ɛ̃̀tɛ̀ bo kɛĩ́nkɛ̀ nkɛ,
\q1 kɛ̀ tɛ ɑ̃̀nhɑ̃̀nkù còḿmú kɛtenkɛ̀.
\q1 Kuù ɔ̃ɔ̃ yú dɑ̀mɛ́ɛ̀rì kó mɛniɛ
\q1 nkɛ mɛ̀ yɑɑtɛ́ní kɛtenkɛ̀.
\q1 Kuù yètìrì tu ti Yiɛ̀ nKuyie.
\s1 Kuyie nyóó bekɛ́nɛ̀mɛ̀ bɛyɛibɛ
\q1
\v 7 Kɛ̀ ti Yiɛ̀ nKuyie mbɛ́i nkɛ dɔ̀:
\q1 Díndi Isidɑyɛɛribɛ
\q1 mí ndi wúómmɛ̀ di í pɛ̃ɛ̃tɛ́ Kuusi ɛì kɔbɛ.
\q1 Míì di dènnɛní Esibiti,
\q1 kɛ̀ míì dènnɛní Fidisitɛ̃ɛ̃bɛ Kɑfutɔɔ,
\q1 kɛ dènnɛní Asidii kɔbɛ Kiidi.
\b
\q1
\v 8 Mí ndi Yiɛ̀ nKuyie
\q1 n wúómmu Isidɑyɛɛribɛ kpɑ̀ɑ̀tìyuu cɑ̀kɛmɛ̀
\q1 kɛ yóó dì kùɔ pɑ́íí kɛ̀ di kɔ̃mɛɛ deè kɛtenkɛ̀ ĩ́nkɛ̀.
\q1 N nɛ́ í yóó deè Sɑkɔbu yɑɑ̀bí imɔu.
\q1 Mí nKuyie mmíì bɛ́i.
\q1
\v 9 Mí nKuyie Mpɑkɛdɑɑ
\q1 n yóó duɔ́ nkɛ̀ ibotí tɛìi mɛɛ̀rɛ̀mu Isidɑyɛɛribɛ,
\q1 bɛ̀ ɔ̃ɔ̃ mɛɛ̀rɛ̀ mɛ̀ɛ̀ botí tidiitì
\q1 kɛ́bɑtɛ mɛbii nnɛ̀ tifùtì.
\q1 Bɑ́ mɛbii mmɑmɛ̀ bɑ́ɑ́ do kɛtenkɛ̀.
\q1
\v 10 N kó bɛnìtìbɛ̀ bɛɛ̀ cɑ̀ɑ̀rɛ̀,
\q1 bɛɛ̀ nɑ̀ɑ́ nkɛ tú:
\q1 Mɛyɛi nyí yóó ti tɔ́ɔ́nnɛ̀,
\q1 mɛyɛi nyí yóó ti kɑ́ɑ́kɛ́
\q1 bɛ̀ yóó kú mudoò miɛkɛ nkɛ.
\s1 Kuyie nnɑ̀kɛ́mɛ̀ kù yóó wɛ̃tɛ kɛ́íimmɛ̀ Isidɑyɛɛribɛ
\q1
\v 11 Mɛm̀mɛ kɛ̀ Kuyie mbɛ́i nkɛ dɔ̀:
\q1 Dɛ yiè m bo íi nDɑfiti kó difii dìì dɔ́ kɛ́do,
\q1 kɛ́ĩ́tínɛ́ iyiɛ kɛ́íi nyiduotí,
\q1 m bo wɛ̃tɛ kɛ́mɑɑ́ Dɑfiti cĩ́ɛ̃̀tɛ̀ tɛ̀ do dòmmɛ̀.
\q1
\v 12 Kɛ̀ Isidɑyɛɛribɛɛ wɛ̃tɛ kɛ́tiekɛ Edɔmmu tenkɛ̀
\q1 nɛ̀ ibotí tɛì ìì do tú n kpɛyi i kɔkɛ.
\q1 Mí nKuyie mmíì bɛ́i nkɛ yóó dɛ̀ dɔ̀ɔ̀.
\b
\q1
\v 13 Kɛ̀ Kuyie mbɛ́i nkɛ dɔ̀:
\q1 Dɛ yiè kèrínímu
\q1 kɛ̀ yiè nníí bo ndɔtì kɛ bɔti
\q1 kòo tɔù ò tũ̀ nkɛ dɛìtì tidiitì.
\q1 Kɛ̀ yiè nníí mbɔti dɛtie
\q1 nkòo tɔù ò tũ̀ nkɛ tɔ̃ũ̀tì yɛtebɛ.
\q1 Dɛ yiè fínyĩ̀ kó mɛnɑɑ̀ mbo mpũɔ̃̀ nyɛtɑ̃rɛ̀ ĩ́nkɛ̀,
\q1 kɛ̀ sitɑ̃ɑ̃́ simɔuu sɑ̃ɑ̃kɛ.
\q1
\v 14 Dɛ yiè m bo wɛ̃tɛ kɛ́cónnɛ́
\q1 n nìtìbɛ̀ Isidɑyɛɛribɛ bɛ fɔ̃̀tɛ̀
\q1 kɛ̀ bɛ̀ɛ wɛ̃tɛ kɛ́mɑɑ́ bɛ ɛkɛ̀ yɛ̀ɛ̀ do pùɔ kɛ́mbo,
\q1 kɛ́nfiiku fínyĩ̀ kó dɛtie
\q1 kɛ yɔ̃̀ ndɛ nɑɑ̀ kɛ fiiku dɛtie mbɛ pénnɛ̀
\q1 kɛ́ntɔ̃ũ dɛ bɛ.
\q1
\v 15 M bo wɛ̃tɛ kɛ́ bɛ̀ fìí
\q1 mbɛ tenkɛ̀ n do bɛ̀ duɔ́ nkɛ̀,
\q1 bɑ́ òmɔù tɛ̃́nkɛ bɑ́ɑ́ bɛ̀ uutɛ́.
\q1 Mí nKuyie mmíì bɛ̀ te kɛ̀ míì bɛ́i.