\id ACT di45.all F{evrier 1999 BJ Parakou B{enin
\ide UTF-8
\h Yesu Tɔ̃rɛ̀
\toc1 Yesu Tɔ̃rɛ̀ tɔ̃mmú pɑ́tíri
\toc2 Yesu Tɔ̃rɛ̀
\mt1 Yesu Tɔ̃rɛ̀ tɔ̃mmú pɑ́tíri
\imt1 Di mpɑ́tíri tɔ tìì nɑ́ɑǹtì
\ip Yesu tɔ̃rɛ̀ kó dipɑ́tíri sɔɔtɛ́nɛ̀ tinɑ́ɑǹsɑ̀ɑ̀tì kpɛyɛ kó tinɑ́ɑǹtì nti. Duku dòòtórì diɛwè Pɔɔri nɛ́po, ò do nɛitinɛ̀ wè weè wɑ̃̀ri dɛ kó dipɑ́tíri (Kɔdɔɔsi 4:14). Dɛ kó dipɑ́tíri miɛkɛ yɛnɑ́ɑǹkékɛ̀ yɛ̀ɛ̀ ti nɑ́ɑ́ mMuyɑɑ́nsɑ̀ɑ̀mù pĩ mmùù tɔ̃mmú yɛ̀ sũmu.
\ip Dɛ kó dipɑ́tíri diì ti nɑ́ɑ́ nKirisi kɔbɛ tĩ̀rɛ̀ ketɛ́ mɛ̀ɛ̀ botí Sifubɛ cuokɛ̀ kɛ́ketɛ́nɛ̀ Sedisɑdɛmmu bɛ̀ɛ̀ tu Sifubɛ. Nɛ̀ bɛ̀ɛ̀ í tú Sifubɛ: Kɔdɛnti nɛ̀ Ãntiyɔsi nɛ̀ Fidipu. Dɛ kó dipɑ́tíri diì ti nɑ́ɑ́ mbɛ̀ do mɑ̀ɑ́nɛ̀ ìì dìèti mɛsɑ̀ɑ̀ nKirisi kɔbɛ tĩ̀rɛ̀ yɛpɑ̀nyɛ̀ miɛkɛ, nɛ̀ Muyɑɑ́nsɑ̀ɑ̀mù do bɛ̀ niitɛ́ kɛ̀ bɛ̀ɛ tì tũ̀ntɛ mɛ̀ɛ̀ botí.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Muyɑɑ́nsɑ̀ɑ̀mu cùtɛ́nímɛ̀ nɛ̀ Kirisi kɔbɛ tĩ̀nnì ketɛ́mɛ̀ Sedisɑdɛmmu 1-12
\io1 2. Pɔɔri ìtɛ́mɛ̀ Kuyie nnɑ́ɑǹtì nɑ́ɑmmù 13-28
\c 1
\p
\v 1 N nɛ́po Teofiiri, m pɑ́tíri ketirì miɛkɛ n dɑ nɑ̀kɛ́mu Yesu pĩ mmùù tɔ̃mmú mumɔu nɛ̀ ò tié ntì bɛnìtìbɛ̀ nɛ̀ ò ketɛ́ ndìì yiè o tɔ̃mmú, 
\v 2 kɛ́ntɔ kɛ́tuɔkɛnɛ̀ Muyɑɑ́nsɑ̀ɑ̀mù ò niitɛ́mɛ̀ kòò duɔ́ nho tɑnnɔ̀ o tɑncɔ́ùmbɛ̀ ò tɑ̃ɑ̃tɛ́ bɛ̀ kɛ ítɛ́ kɛ́dekɛ kɛĩ́nkɛ̀. 
\v 3 O kṹṹ nkó difɔ̃nkúò kòo mbɛ̀ bɛnkú omɑ́ɑ̀ nɛ̀ mɛbɛnkùmɛ̀ pɛ́u mɛ̀ɛ̀ bɛnkú ò fòùtɛmɛ̀, kɛ dɔ̀ yɛwe sipísìnɑ̀ɑ̀ kɛ bɛ̀ nɑ̀ɑ́ nKuyie nkpɑ̀ɑ̀tìyuu kpɛti. 
\v 4 Diyiè mɑrì kɛ sɔ̃́ mbɛ̀ yo nkɛ Yesu bɛ̀ nɑ̀kɛ́ kɛ dɔ̀: Di bɑ́ɑ́ dɛ́tɛ́nɛ̀ Sedisɑdɛmmu, dí nkɑri kɛ bɑɑ n cicɛ do yɛ̃ nhò yóó di pɑ̃ dɛ̀, n di nɑ̀kɛ́ dɛ̀ɛ̀ kpɛ́í. 
\v 5 Isɑ̃ɑ̃ do di ɑ̃ɑ̃̀ bɑ̀tɛ́mmù, nɛ̀ mɛniɛ mmɛ yɛwe sɑ́m̀pɔ́ miɛkɛ bɛ̀ bo di ɑ̃nnɛ́ bɑ̀tɛ́mmù nɛ̀ Muyɑɑ́nsɑ̀ɑ̀mù.
\s1 Yesu dèkɛmɛ̀ kɛĩ́nkɛ̀
\p
\v 6 Kɛ̀ bɛ̀ɛ ò bekɛ kɛ dɔ̀: Dɛ mɔ̀nnì ndi ɑ yóó fíímmɛ̀ Isidɑyɛɛribɛ kó dikpɑ̀ɑ̀tìyuuɑ̀? 
\v 7 Kɛ̀ Yesu bɛ̀ tɛ̃̀ńnɛ́ kɛ dɔ̀: Di kpɛti dɔkɛ, di bo yĩ́ɛ̃́tɛ́mɛ̀ dɛ kó yɛmɔ̀rɛ̀ nɛ̀ dɛ kó yɛwe, n cicɛ Kuyie nkumɔ́mmɔnku kuù dɔú ndɛ kó yɛmɔ̀rɛ̀ nɛ̀ dɛ kó yɛwe. 
\v 8 Kù bo di duɔ́ mmuwɛ̃rímú, kù bo cṹũnní Muyɑɑ́nsɑ̀ɑ̀mù di ĩ́nkɛ̀ kɛ̀ di nɑɑ́ mbɛ̀ɛ̀ yo nnɑ́ɑ́ n kpɛ́í nSedisɑdɛmmu miɛkɛ nɛ̀ Sudee nɛ̀ Sɑmmɑrii dɛ kó kɛtenkɛ̀ kɛmɔu miɛkɛ nɛ̀ itemmɑ̀nkɛ imɔu miɛkoo.
\p
\v 9 Ò tì mbɛ̀ nɑ̀kɛ́ dìì mɔ̀nnì kɛ́deè kɛ́ítɛ́ kɛ́ndeètì kɛĩ́nkɛ̀, kɛ̀ bɛ̀ nhò bùɔ́ kɛ̀ diwɛtirì mɑrìi ò dɑ̀tínko.
\p
\v 10 Kɛ̀ bɛ̀ nkpɑɑ́ búɔ́, kɛ́yɑ̀ bɛnìtìbɛ̀ bɛ̀dɛ́bɛ̀ kɛ̀ bɛ̀ dɑ̀ɑ́tí tiyɑɑ̀pɛ́ítì kɛ́kɔtɛní bɛ borɛ̀ kɛ́bɛ́i nkɛ dɔ̀: 
\v 11 Kɑdidee kó bɛnìtìbɛ̀ dɛ̀ dòmmɛ kɛ̀ di cómmú kɛ búɔ́ kɛĩ́nkɛ̀? Yesu ìtɛ́ mɛ̀ɛ̀ botí di cuokɛ̀ kɛ dèkɛ kɛĩ́nkɛ̀ ò yóó wɛ̃tɛní mɛɛ̀ botí.
\p
\v 12 Mɛm̀mɛ kɛ̀ bɛ̀ɛ ítɛ́ Odìfíè tɑ̃rì kɛ́wɛ̃tɛní Sedisɑdɛmmu. Dɛ kó ditɑ̃rì do í dɛ́tirìnɛ̀ Sedisɑdɛmmu, dɛ̀ do bo mbo cìdòmɛ́tìrì òmɑ́ɑ̀ ndi. 
\v 13 Bɛ̀ tùɔ̀kɛní dìì mɔ̀nnì kɛ́dekɛ tɛcĩ́ɛ̃̀tɛ̀ bɛ̀ ɔ̃ɔ̃ tíi ntɛ̀ɛ̀ miɛkɛ. Ntɛ o tɑncɔ́ùmbɛ̀ bɛ̀ɛ̀ do mbɛ bɛ yètɛ̀: Piɛri nɛ̀ Isɑ̃ɑ̃ nɛ̀ Isɑku nɛ̀ Ãntidee nɛ̀ Fidipu nɛ̀ Bɑtidemii nɛ̀ Mɑtie nɛ̀ Isɑku Adifee kó dɛbirɛ nɛ̀ Simɔɔ Sedɔtibɛ kó ditĩ̀nnì kou nɛ̀ Sudi Isɑku kó dɛbirɛ. 
\v 14 Kɛ̀ bɛnitipòbɛ̀ mɑbɛ̀ múnkɛ ndɛ̀ bo nɛ̀ Mɑɑri Yesu yɔ̃ nɛ̀ Yesu nɛí, bɛmɔu kɛ̀ bɛ̀ nwɛ̃ nkɛ bɑ́ɑ́ nKuyie nɛ̀ mɛyɛ̀mmɛ̀ mɛ̀mɑ́ɑ̀.
\s1 Wèè cɔutɛ́ Sudɑɑsi kó difɔ̃̀tìrì
\p
\v 15 Diyiè mɑrì kɛ sɔ̃́ mbɛ̀ tó tíkú, kɛ bo ntùɔ̀kɛ tɛkɔ̀ùtɛ̀ nɛ̀ sipísìdɛ́ (120), kɛ̀ Piɛrii bɛ́i nkɛ dɔ̀: 
\v 16 N kɔbɛ Muyɑɑ́nsɑ̀ɑ̀mù do niitɛ́ Dɑfitii kòo wɑ̃ri tì Sudɑɑsi kpɛ́í, nwèè niitɛ́ní bɛ̀ɛ̀ pĩ nYesu tì dò nkɛ́dɔɔ̀mu. 
\v 17 Sudɑɑsi do tú ti kou nwe kɛ̀ ti wɛ̃ nkɛ pĩ́ mmutɔ̃mmú.
\p ( 
\v 18 Kòò yɛ̀ kɛ dontɛ́nɛ̀ kupɑku o yɛi nkó idíítí, ò nùńnɛ́ dɛ̀ omɑ́ɑ̀, kɛ donní kɛ pɔ̀ntɛ, kòo nɑutì cìɛ́tɛ́ cíɛ́tɛ́. 
\v 19 Kɛ̀ Sedisɑdɛmmu kɔbɛ bɛmɔuu yĩ̀ɛ̃́tɛ́ dɛ kó tinɑ́ɑǹtì kɛ yu dɛ kó kupɑku kɛ tú: Mukṹṹ nkó kupɑku. Nɛ̀ bɛ kó tinɑ́ɑǹtì Akɛdidɑmɑɑ.)
\p
\v 20 Tì wɑ̃̀rimu Yɛsɑ̃ɑ̃ mpɑ́tíri miɛkɛ kɛ tú:
\q1 O cĩ́ɛ̃̀tɛ̀ bo nɑɑ́ nkudobonkù,
\q1 bɑ́ òmɔù tɛ̃́nkɛ bɑ́ ntɛ̀ ɑ̃,
\q1 kòo tɔù mɔùu cɔutɛ́ o fɔ̃̀tìrì.
\p
\v 21 Dɛ̀ dò ntí yɑ̀ onìtì mɔù nwe wèè do ti bonɛ̀ Isɑ̃ɑ̃ ɑ̃ɑ̃̀ dìì mɔ̀nnì bɑ̀tɛ́mmù, 
\v 22 kɛ́ntɔ kɛ́tuɔkɛnɛ̀ Yesu dèkɛmɛ̀ kɛĩ́nkɛ̀, kòo ti wɛ̃nnɛ́nɛ̀ kɛ̀ ti nnɑ́ɑ́ nYesu kumɛ̀ kɛ yɑ̃̀ńtɛ́.
\b
\p
\v 23 Kɛ̀ bɛ̀ɛ dɛitɛ bɛnìtìbɛ̀ bɛ̀dɛ́bɛ̀, Sosɛfu bɛ̀ do tú wè Bɑɑdisɑbɑsi kóò yu kɛ dɔ̀ Susituusi nɛ̀ otɔù mɔù bɛ̀ tu wè Mɑtiɑsi. 
\v 24 Kɛ́deè kɛ́bɑ́ntɛ̀ Kuyie nkɛ dɔ̀: Ti Yiɛ̀ nfɔ̃́ɔ̃̀ yɛ̃́ bɛnìtìbɛ̀ yɛ̀mmɛ̀, ɑ tí bɛnkɛ ɑ tɑ̃ɑ̃tɛ́ wè bɛnìtìbɛ̀ biɛ mmiɛkɛ, 
\v 25 kòo cɔutɛ́ Sudɑɑsi fɔ̃̀tìrì, ò yóu dì, kɛ kɔ̀tɛ o kó kucɛ.
\p
\v 26 Kɛ̀ bɛ̀ɛ tɑ̃ũ tɛ́tɛ́ kɛ̀ tɛ́tɛ́ɛ do Mɑtiɑsi ĩ́nkɛ̀, kòo wɛ̃nnɛ́nɛ̀ Yesu tɔ̃rɛ̀ tɛpíítɛ̀ nɛ̀ dimɑ́ɑ̀.
\c 2
\s1 Muyɑɑ́nsɑ̀ɑ̀mù cùtɛ́nímɛ̀
\p
\v 1 Kɛ̀ Pɑ̃ntikoti kó diyiè nyóó tuɔkɛ, kɛ sɔ̃́ mbɛ̀ tìkú dibòrì dìmɑ́ɑ̀. 
\v 2 Kɛ́ nyóó dɑɑtɛ kɛ́keè kutoweku mɑkù kɛ̀ kù cutiní kɛĩ́nkɛ̀ kɛ donnɛ̀ kuyɑɑkperíkù, kɛ́ bɛ̀ kpɛ̀ɛ́tɛ́ bɛmɔu bɛ̀ kɑ̀ri tɛ̀ɛ̀ cĩ́ɛ̃̀tɛ̀ miɛkɛ. 
\v 3 Kɛ̀ bɛ̀ɛ yɑ̀ ihɑ̃ɑ̃dɛɛm̀bìi kɛ̀ ì dònnɛ̀ inɔ́ndiɛ nkɛ́ńtotírí kɛ commu bɛ ĩ́nkɛ̀. 
\v 4 Kɛ̀ Muyɑɑ́nsɑ̀ɑ̀mùu bɛ̀ píɛ, kɛ̀ bɛ̀ɛ ketɛ́ kɛ́nnɑ́ɑ́ ntinɑ́ɑǹcɑ̀ǹtì.
\p
\v 5 Dɛ̀ do sɔ̃́ nSifubɛ bɛɛ̀ ìtɛ́ní titentì timɔu kɛ kɔ̀tɛní kɛ bo Sedisɑdɛmmu. Bɛ̀ do tú bɛ̀ɛ̀ dé bɛ̀mbɛ Kuyie. 
\v 6 Bɛ̀ kèè dìì mɔ̀nnì kutoweku kɛ tíínní, kɛ̀ dɛ̀ɛ bɛ̀ di mɛdiɛ̀ nkɛ yɛ̃́ bɑ́ wè ò do yomɛ̀ kɛ̀ bɛ̀ nɑ̀ɑ́ nho kó tinɑ́ɑǹtì mɔ́mmɔnti. 
\v 7 Kɛ̀ dɛ̀ɛ bɛ̀ kpeí mɛdiɛ̀, kɛ̀ bɛ̀ mbɛ̀ wùó nkɛ tú: Dɛ̀ í dò nKɑdidee kɔbɛ mbɛ bɛmɔuɑ̀? 
\v 8 Dɛ̀ nɛ́ dòmmɛ bɑ́ wè kòò yo bɛ̀ nɑ̀ɑ́mmɛ̀ o kó tinɑ́ɑǹtì? 
\v 9 Ti miɛkɛ kɛ̀ bɛ̀mɑbɛ̀ bonní Pɑditi kó kɛtenkɛ̀: Mɛdii nɛ̀ Mɛdɑmmu Mɛsopotɑmii nɛ̀ Sudee nɛ̀ Kɑpɑdoosi nɛ̀ Pɔ̃ɔ̃ Asii kó kɛtenkɛ̀ miɛkɛ. 
\v 10 Nɛ̀ Fidisii nɛ̀ Pɑ̃nfidii nɛ̀ Esibiti nɛ̀ Dibii kɔbɛ mɑbɛ̀ bɛ̀ɛ̀ tɔ̀kɛ́nɛ̀ Sidɛnni, kɛ̀ bɛ̀mɑbɛ̀ bonní Odommu, kɛ̀ bɛtɔbɛ̀ tu Sifubɛ mɔ́mmɔmbɛ nɛ̀ bɛ̀ɛ̀ tũ nSifubɛ kó kuwedɔuncɛ nɛ̀ Kɛrɛti kɔbɛ nɛ̀ Adɑbii kɔbɛ. 
\v 11 Nɛ̀ mɛmmɛ kɛ̀ ti yo bɛ̀ nɑ̀ɑ́mmɛ̀ bɑ́ wè o kó tinɑ́ɑǹtì kɛ sɑ̃ntí Kuyie nku diɛtì kpɛ́í.
\p
\v 12 Kɛ̀ dɛ̀ɛ bɛ̀ di mɛdiɛ̀, bɛ̀ í nyɑ̀ bɛ̀ bo bɛ́i ntì, kɛ́mbékú bɛtɔbɛ̀ kɛ tú: Bɑ mbotí nku diɛ?
\p
\v 13 Kɛ̀ bɛ̀mɑbɛ̀ mbɛ̀ dɑú kɛ tú: Bɛ̀ muɔ́ mmɛnɑɑ̀ nnɑtimɛ̀ mmɛ.
\s1 Piɛri nɑ̀kɛ́ tì Muyɑɑ́nsɑ̀ɑ̀mù cùtɛ́ní dìì yiè
\p
\v 14 Kɛ̀ Yesu tɔ̃rɛ̀ tɛpíítɛ̀ nɛ̀ yɛ̀dɛ́ɛ̀ ítɛ́ kɛ́cómmú, kɛ̀ Piɛri nnɑ́ɑ́nnɛ̀ ditĩ̀nnì mɛkperímɛ̀ kɛ tú: Díndi Kɑdidee kɔbɛ nɛ̀ bɛ̀ɛ̀ kó dimɑ̀ɑ̀ kɔ̀tɛní Sedisɑdɛmmu miɛkɛ! Kéntɛ́nɛ̀ kɛ́keè n yóó di nɑ́kɛ́ tì. 
\v 15 Di yɛ̀mmɛ̀ bɑ́ ndò mbɛnìtìbɛ̀ biɛ mmuɔ́ mmɛnɑɑ̀, diyiè kpɑɑ́ kɛ bɛmmu. 
\v 16 Kuyie pɑ̃ɑ̃nɑ́ɑǹtì nɑ́ɑǹtò Sowɛɛri do nɑ̀kɛ́ tì tiì dɔ̀ɔ̀. Tìì tu:
\q1
\v 17 Yɛwe sɔnyɛ mmiɛkɛ m bo cṹũnní Muyɑɑ́nsɑ̀ɑ̀mù
\q1 bɛnìtìbɛ̀ bɛmɔu ĩ́nkɛ̀,
\q1 di kó bɛdɑpɑ̀mbɛ̀ nɛ̀ di kó bɛsɑpɑ̀mbɛ̀
\q1 bo nɑɑ́ m pɑ̃ɑ̃nɑ́ɑǹtì nɑ́ɑm̀bɛ̀.
\q1 Kɛ̀ bɛbɛ́mbɛ̀ ńyɑu mɛbɛnkùmɛ̀.
\q1 Kɛ̀ bɛkótíbɛ̀ ńyɑu tidɔùntì.
\q1
\v 18 Dɛ kó yɛwe miɛkɛ
\q1 m mɛ̀nkɛ yóó cṹũnkomu n Yɑɑ́
\q1 n kó bɛnìtìbɛ̀ bɛmɔu ĩ́nkɛ̀,
\q1 bɛnitidɑɑbɛ̀ nɛ̀ bɛnitipòbɛ̀
\q1 kɛ̀ bɛ̀ɛ nɑɑ́ m pɑ̃ɑ̃nɑ́ɑntì nɑ́ɑm̀bɛ̀.
\q1
\v 19 M bo dɔɔ̀ tidiɛtì kɛĩ́nkɛ̀ nɛ̀ kɛtenkɛ̀,
\q1 mɛyĩ̀ĩ̀ nnɛ̀ muhɑ̃ɑ̃́ nɛ̀ kuyukú diɛkù
\q1 dɛ̀ bo mbo dɛ kó diyiè.
\q1
\v 20 Diyiè bo sɔutɛ,
\q1 kòo tɑ̃̀nkùu wũɔ̃tɛ́ kɛ́ndò mɛyĩ̀ĩ̀,
\q1 kɛ̀ ti Yiɛ̀ nkó diyiè diɛrì nɛ́ nɑ kɛ́tuɔkɛní,
\q1 dìì duò tikɔ̃m̀bùɔ̀tì.
\q1
\v 21 Dɛ mɔ̀nnì wèè bo kuɔ́nnɛ̀
\q1 ti Yiɛ̀ nKuyie nhò bo cootɛ́.
\p
\v 22 Díndi Isidɑyɛɛribɛ kéntɛ́nɛ̀ kɛ́keè n yóó di nɑ́kɛ́ tì. Yesu Nɑnsɑrɛti kou Kuyie ndi bɛnkɛ wèè miɛkɛ ku wɛ̃rímú, kòò dɔ̀ɔ̀ tidiɛtì, di mɔ́mmɔmbɛ kɛ̀ di yɑ̀. 
\v 23 Bɛ̀ we ndi fìtɛ́nɛ̀ Kuyie ndo tì yɛ̃́mu nɛ̀ dimɔ̀nnì, kuù duɔ́ nkɛ̀ tì dɔ̀ɔ̀, kɛ̀ di ò duɔ́ mbɛ̀ɛ̀ í yɛ̃́ Kuyie nkɛ̀ bɛ̀ ò bɑɑkɛ́ koò kùɔ. 
\v 24 Kɛ̀ Kuyie nduɔ́ nkòò yɑ̃̀ńtɛ́, kɛ̀ kù ò dɛɛtɛ́nɛ̀ mukṹṹ nkó iwɛ̃ĩ, kɛ yɛ̃́ mukṹṹ ndo í dommɛ̀ mù bo nɑ kóò pĩ̀ńnɛ́ muwɛ̃rímú. 
\v 25 Dɑfiti do nɑ̀kɛ́ weè kpɛ́í nkɛ dɔ̀:
\q1 M búɔ́ n Yiɛ̀ sɑ̃́ɑ̃̀,
\q1 kɛ yɛ̃́ we m bonɛ̀mɛ̀ m bɑ́ɑ́ kpeutɛ.
\q1
\v 26 Dɛɛ̀ te kɛ̀ n yɛ̀mmɛ̀ nɑɑti,
\q1 kɛ̀ n dìènnɛ̀ diwɛ̀ì.
\q1
\v 27 Kɛ yɛ̃́ kɛ dò mbɑ́ kɛ̀ n ku,
\q1 m bɑ́ nkpɑɑ́ kufɔ̃ti miɛkɛ.
\q1 Kɛ yɛ̃́ ɑ í yóó yóumɛ̀ ɑ kou kòo pɑ̃ɑ̃kɛ.
\q1
\v 28 A m bɛnkɛmu mufòmmu kó kucɛ,
\q1 kɛ yóó nni mbonɛ̀ kɛ n duɔ̀ diwɛ̀ì.
\p
\v 29 N kɔbɛ n dɔ́ kɛ di nɑ́kɛ́ ti yɑ̀ɑ̀rì Dɑfiti kpɛ́í nkɛ, ò kúmu, kɛ̀ bɛ̀ ò kũnnɛ́ kòo fɔ̃ti kpɑɑ́ bo nɛ̀ yíenní. 
\v 30 Ò do tú Kuyie mpɑ̃ɑ̃nɑ́ɑǹtì nɑ́ɑǹtò nwe kɛ nyɛ̃́ kɛ dò nKuyie mbɛ́i kɛ tú kù yóó kɑnnɛ o yɑɑ̀birɛ mɑrɛ̀ o kpɑ̀ɑ̀tìkɑ̀rì ĩ́nkɛ̀. 
\v 31 Dɑfiti do nɑ́ɑ́ nKirisi yóó yɑ̃́ntɛ́mɛ̀ mmɛ kɛ tú:
\q1 Ò í yó nkpɑɑ́ kufɔ̃ti miɛkɛ.
\q1 Ò í yóó pɑ̃ɑ̃kɛ.
\m
\v 32 Weè Yesu nwe Kuyie nduɔ́mmɛ̀ kòò yɑ̃̀ńtɛ́ timɔu kɛ̀ ti ò yɑ̀. 
\v 33 Kɛ̀ Kuyie nhò tùótɛ́ koò kɑ̀nnɛ kubɑkù you, koò duɔ́ Muyɑɑ́nsɑ̀ɑ̀mù kù do nɑ̀kɛ́ mùù kpɛ́í, kòò mù nti duɔnní, dɛndɛ di kèèmɛ̀ kɛ dɛ̀ yɑ̀. 
\v 34 Dɑfiti í dèkɛ kɛĩ́nkɛ̀ kɛ nɛ́ bɛ́i nkɛ dɔ̀:
\q1 Kuyie nnɑ̀kɛ́mu n Yiɛ̀ nkɛ tú:
\q1 Nkɑri m bɑkù yoú,
\q1
\v 35 kɛ̀ n yɑ̀ɑ dɑ duɔ́ nhɑ kpɑntídɛ̀ntɔbɛ̀
\q1 kɑ̀ɑ bɛ̀ cùùti.
\p
\v 36 Isidɑyɛɛribɛ di tũ mbɑntɛ́ kɛ dò nYesu di bɑɑkɛ́ wè kudɑpɑ̃ɑ̃tí ĩ́nkɛ̀, Kuyie nwe ndɔ̀ɔ̀ ti Yiɛ̀ nti dɛɛtíwè.
\p
\v 37 Bɛ̀ kèè dìì mɔ̀nnì dɛ kó tinɑ́ɑǹtì kɛ̀ tìi bɛ̀ kɑ̀ɑ́kɛ́ mɛsɑ̀ɑ̀, nkɛ̀ bɛ̀ɛ bekɛ Piɛri nɛ̀ Yesu tɔ̃rɛ̀ tɛyɛ̀ kɛ dɔ̀: Ti kɔbɛnɛ̀ ti dò nkɛ́dɔɔ̀ bɑ? 
\v 38 Kɛ̀ Piɛrii bɛ̀ nɑ̀kɛ́ kɛ dɔ̀: Ceetɛnɛ̀ kɛ̀ bɛ̀ di ɑ̃nnɛ́ bɑ̀tɛ́mmù nɛ̀ Yesu kó diyètìrì, kɛ̀ Kuyie ndi cĩ́ɛ̃́ ndi yɛi nkɛ di pɑ̃ Muyɑɑ́nsɑ̀ɑ̀mù. 
\v 39 Kɛ yɛ̃́ kù bɛ́immɛ̀ dɛ kó tinɑ́ɑǹtì díì kpɛ́í, nɛ̀ di bí, bɛ̀ɛ̀ bo diɛ nnɛ̀ bɛ̀ɛ̀ dɛ́tirì. Nɛ̀ bɛtɔbɛ̀ ti Yiɛ̀ nKuyie nyóó yu bɛ̀.
\p
\v 40 Kɛ̀ Piɛri mbɛ̀ nɑ̀ɑ́ ntinɑ́ɑǹtì tɛtì pɛ́u kɛ yɑ́úkùnko bɛ kɔ̃̀ntì kɛ bɛ̀ tiè nkɛ tú: Yiénnɛ̀ Tinɑ́ɑǹsɑ̀ɑ̀tì kɛ́yɑtɛnɛ̀ dimɑ́ɑ̀ bɛnitiyɛibɛ biɛ.
\p
\v 41 Bɛ̀ɛ̀ yie nho nɑ́ɑǹtì kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù kɛ̀ bɛ̀ nsũ, bɛ bo ntùɔ̀kɛ sikɔupísìtɑ̃ɑ̃ti (3000), kɛ̀ bɛ̀ɛ wɛ̃ńnɛ́nɛ̀ Yesu kɔbɛ dɛ kó diyiè. 
\v 42 Kɛ níí nkémmú Yesu tɔ̃rɛ̀ bɛ̀ nɑ̀ɑ́ ntì nɛ̀ bɛ yɛ̀mmɛ̀ mɛmɔu, kɛ́nwɛ̃ nkɛ yo nkɛ yonnɛ̀ Mudisɑ̀ɑ̀mù, kɛ bɑ́ɑ́ nKuyie.
\s1 Kirisi kɔbɛ ketibɛ̀ kó mufòmmu
\p
\v 43 Kɛ̀ Yesu tɔ̃rɛ̀ ndɔɔri tidiɛtì nɛ̀ mɛbɛnkùmɛ̀ pɛ́u nɛ̀ dɛ kpɛ́í nkɛ̀ bɛnìtìbɛ̀ɛ yɔtɛ Kuyie. 
\v 44 Kɛ̀ Kuyie nkɔbɛ ntiku sɑ̃́ɑ̃̀, kɛ̀ wèè mɔ̀kɛ dɛ̀ bɛ̀ ndɛ wɛ̃ mbɛmɔu. 
\v 45 Kɛ̀ bɛ̀ nfiiti bɛ kpɛrɛ nɛ̀ bɛ pɑɑ nkɛ totírí nɛ̀ bɛ̀ɛ̀ kpɑ bɑ́ wè dɛ̀ ò bèkúmɛ̀. 
\v 46 Kɛ níí ntíkú kɛ bo Kuyie ncĩ́ɛ̃̀tɛ̀ kɛ bɑ́ɑ́ nKuyie, kɛ wɛ̃ mmɛyɛ̀mmɛ̀ mɛmɑ́ɑ̀ kɛ yo mbɛtɔbɛ̀ cɛ̃́ĩ, kɛ yonnɛ̀ Mudisɑ̀ɑ̀mù. 
\v 47 Kɛ sɑ̃ntí Kuyie, nkɛ̀ bɛnìtìbɛ̀ bɛmɔu bɛ dɔ́ kɛ̀ ti Yiɛ̀ mbɛ̀ yɛ̀útí yɛwe yɛmɔu ò dɛɛtɛ́ bɛ̀.
\c 3
\s1 Piɛri nɛ̀ Isɑ̃ɑ̃ bɛ̀ miɛkùnnɛmɛ̀ kuhɔ̀ùkù
\p
\v 1 Diyiè mɑrì, diyiè tũ̀ntɛ dìì mɔ̀nnì Piɛri nɛ̀ Isɑ̃ɑ̃ kɛ̀ bɛ̀ nkɔri mubɑ́ɑmmu. 
\v 2 Kɛ nsɔ̃́ nhonìtì mɔù kɑ̀ri kɛ tú kuhɔ̀ùkù nɛ̀ bɛ̀ ò pɛitɛ́mɛ̀, kɛ̀ kù kɑ̀ri Kuyie ncĩ́ɛ̃̀tɛ̀ kó dibòrì bɛ̀ tú dì disɑ̀ɑ̀rì. Bɛ̀ do kù tɔunímu yɛwe yɛmɔu kɛ kɑnnìnko dɛborɛ̀ kɛ̀ kù bo mmɔ́ú idíítí bɛ̀ɛ̀ tɑɑ̀ mubɑ́ɑmmu. 
\v 3 Piɛri nɛ̀ Isɑ̃ɑ̃ kɛ̀ bɛ̀ ntɑti kɛ̀ kùu bɛ̀ mɔɔ idíítí. 
\v 4 Piɛri nɛ̀ Isɑ̃ɑ̃ kɛ̀ bɛ̀ nkù wùó nkɛ̀ Piɛrii kù nɑ̀kɛ́ kɛ dɔ̀: Ti wéntɛ́.
\p
\v 5 Kɛ̀ kùu bɛ̀ wèńtɛ́ kɛ̀ ku yɛ̀mmɛ̀ ńdò mbɛ̀ yóó kù pɑ̃ dɛ̀mɑrɛ̀ ndɛ. 
\v 6 Kɛ̀ Piɛrii kù nɑ̀kɛ́ kɛ dɔ̀: N yí mɔkɛ idíítí kɛ bo dɑ pɑ̃, m mɔkɛ dɛ̀, m bo dɛ̀ ndɑ pɑ̃. Nɛ̀ Yesu Nɑnsɑrɛti kou kó di yètìrì ítɛ́ kɛ́kétɛ́!
\p
\v 7 Kɛ pĩ́ nku nɔ̀ùtɛ̀ youtɛ, kɛ́yíinní, dɛndɛ bɑ̀mbɑ̀ nkɛ̀ ku nɑɑ̀cɛ̀i nɛ̀ ku bɑ́ɑ́ nkɛ̀ dɛ̀ɛ kpenkɛ. 
\v 8 Kɛ̀ kùu puu kɛ́cómmú, kɛ́nɛinɛ̀ Yesu tɔ̃rɛ̀, kɛ̀ bɛ̀ɛ tɑ Kuyie ncĩ́ɛ̃̀tɛ̀, kòo ncentì kɛ yɑ̃nku, kɛ sɑ̃ntí Kuyie. 
\v 9 Kɛ̀ bɛnìtìbɛ̀ bɛmɔu nhò wùó, kòò cèntì kɛ sɑ̃ntí Kuyie. 
\v 10 Bɛ̀ bɑntɛ́ dìì mɔ̀nnì kɛ dò nwèè do kɑri wenwe Kuyie ncĩ́ɛ̃̀tɛ̀ kó dibòrì sɑ̀ɑ̀rì kɛ mɔ́ú, kɛ̀ dɛ̀ɛ bɛ̀ di bɛmɔu kɛ̀ kufɔ̃wɑɑ́ mbɛ̀ pĩ nkɛ̀ bɛ̀ɛ mɔ́ntɛ́ ò yĩ́mɛ̀ kɛ miɛtɛ́.
\s1 Piɛri do nɑ̀kɛ́ tì
\p
\v 11 Kɛ̀ dɛ kóo nìtì bɑɑ ntũ Piɛri nɛ̀ Isɑ̃ɑ̃, kɛ̀ dɛ̀ɛ di bɛnìtìbɛ̀ bɛmɔu, kɛ̀ bɛ̀ ncokòo bɛ borɛ̀ kufiiku bɛ̀ tú kù Sɑdomɔɔ kó kufiiku miɛkɛ. 
\v 12 Kɛ̀ Piɛrii bɛ̀ bekɛ kɛ dɔ̀: Isidɑyɛɛribɛ dɛ̀ dòmmɛ kɛ̀ dɛ̀ di di? Kɛ̀ di ti wúó nkɛ donnɛ̀ tíì kó muwɛ̃rímú mmu yoo ti kpɑ mɛ̀ɛ̀ kpɛ́í mɛyɛi nte nkɛ̀ onìtì yie mmiɛtɛ́? 
\v 13 Kuyie nti yɛmbɛ̀, Abɑrɑhɑmmu nɛ̀ Isɑki nɛ̀ Sɑkɔbu do tũ nkù kuù miɛkùnnɛ dɛ kóo nìtì, kɛ dɛ́úkùnnɛ ku kóo tɔ̃ntì Yesu yètìrì di pĩ nwè, kɛ duɔ́ ndihɛì yɛmbɛ̀, Odommu kɔbɛ, kɛ̀ di ò yetɛ Pidɑti ììkɛ̀, kɛ sɔ̃́ nhò do dɔ́ kóò fĩ́ĩ. 
\v 14 Kɛ̀ di yetɛ wèè dɔ̀ɔ̀ri Kuyie ndɔ́mɛ̀ kɛ kpɑ mɛyɛi, nkɛ bɑ̀ńtɛ̀ okpɑ̀ɑ̀tì Pidɑti kɛ dɔ̀ wèe fĩ́ĩ onitikɔ̀ùtì. 
\v 15 Kɛ̀ di kùɔ mufòmmu yiɛ̀, kɛ̀ Kuyie nduɔ́ nkòò yɑ̃̀ńtɛ́. Kɛ̀ ti ò yɑ̀ kɛ nɑ́ɑ́. 
\v 16 Yesu ti tɑ̃́ wè kó diyètìrì dii te, onìtì di mɛ nwúó nwè koò yɛ̃́ ò miɛtɛ́mɛ̀ pɑ́íí. Ti tɑ̃́ mɛ̀ɛ̀ kpɛ́í nkɛ Yesu dɛɛ̀ te kòo kpenkɛ.
\p
\v 17 N kɔbɛ n yɛ̃́mu kɛ dò ndɛ kó dimɔ̀nnì díndi nɛ̀ di kó bɛkótíbɛ̀ di do í yɛ̃́ di dɔɔ̀ri dɛ̀. 
\v 18 Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu do ti nɑ̀kɛ́mu nɛ̀ dimɔ̀nnì kɛ tú: Odɛɛtíwè dò nkɛ́fɛ̃́ṹtɛ́. 
\v 19 Ceetɛnɛ̀ tũ̀nkɛ kɛ́cuó nKuyie mbíɛ́kɛ̀ kɛ̀ kùu ũtɛ́ di yɛi. 
\v 20 Kɛ̀ dɛ̀ɛ yie nkɛ̀ ti Yiɛ̀ nKuyie di pɑ̃ mɛom̀pùmɛ̀, kɛ di duɔnní Odɛɛtíwè Yesu kù nɑ̀kɛ́ wèè kpɛ́í nnɛ̀ dimɔ̀nnì. 
\v 21 Yesu yó mbo kɛĩ́nkɛ̀ nkɛ kɛ̀ Muyɑɑ́nsɑ̀ɑ̀mù tũntɛnɛ̀ dɛmɔu kɛ̀ dɛ̀ɛ nɑɑ́ ndɛpɑ̀nnɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ do tì nɑ̀kɛ́ mɛ̀mmɛ. 
\v 22 Mɔyiisi do nɑ́ɑ́ nweè kpɛ́í kɛ tú: Kuyie mbo di duɔnní ku pɑ̃ɑ̃nɑ́ɑǹtì nɑ́ɑǹtò kòò nni ndònnɛ̀. Di nyíé nho kpɛti timɔu. 
\v 23 Wèè bo yetɛ o kpɛti bɛ̀ bo ò dènnɛ Kuyie nkó bɛnìtìbɛ̀ miɛkɛ kóò kùɔ. 
\v 24 Kuyie mpɑ̃ɑ̃nɑ́ɑǹtì nɑ́ɑm̀bɛ̀, kɛ́ketɛ́nɛ̀ Sɑmmuyɛɛri nɛ̀ o fɔ̃nkúò kɔbɛ bɛ̀ nɑ̀kɛ́mu bɛmɔu ti mɛ̀ mbo yɛ̀ɛ̀ we kpɛ́í. 
\v 25 Dɛ kó yɛwe bo díì kpɛ́í nkɛ, kɛ̀ di kɔkɛ Kuyie nkó mɛtɑummɛ̀ miɛkɛ, kɛ yɛ̃́ kù do nɑ́ɑ́nnɛ̀ díì yɛmbɛ̀ kù nɑ̀ɑ́ ndìì mɔ̀nnì Abɑrɑhɑmmu kɛ tú kù bo dɔɔ̀ mɛsɑ̀ɑ̀ nyibotí imɔu kɛtenkɛ̀ miɛkɛ nɛ̀ o kpɛ́í. 
\v 26 Kuyie nduɔnní ku Birɛ díì kpɛ́í nkɛ mɛketimɛ̀, kɛ̀ dɛ̀ bo di dɔɔ̀ mɛsɑ̀ɑ̀ nkɛ di teennɛ̀ kɛ̀ dí yóu di dɔɔ̀ri mɛ̀ɛ̀ yɛi.
\c 4
\s1 Bɛ̀ pĩ̀ḿmɛ̀ Piɛri nɛ̀ Isɑ̃ɑ̃ kɛ kpetínnɛ́
\p
\v 1 Piɛri nɛ̀ Isɑ̃ɑ̃ kɛ̀ bɛ̀ nkpɑɑ́ kɛ nɑ́ɑ́nnɛ̀ bɛnìtìbɛ̀, kɛ̀ ikuɔ́ nìùbɛ̀ kó bɛkótíbɛ̀ nɛ̀ Sɑdusĩɛ̃bɛ nɛ̀ tihɑ̃ɑ̃pɔ̀ntì tìì bɑ̀ɑ Kuyie ncĩ́ɛ̃̀tɛ̀ ti kóo kótì kɛ̀ bɛ̀ɛ tuɔkɛní. 
\v 2 Kɛ̀ bɛ miɛkɛɛ pɛikɛ Yesu tɔ̃rɛ̀ nɑ̀ɑ́mmɛ̀ bɛnìtìbɛ̀ kɛ tú: Yesu yɑ̃̀ńtɛ́ kɛ̀ bɛcíríbɛ̀ múnkɛ bo yɑ̃́ntɛ́. 
\v 3 Kɛ̀ bɛ̀ɛ bɛ̀ pĩ nkɛ sɔ̃́ ndɛ̀ dɔ́ kɛ́biitɛ kɛ̀ bɛ̀ɛ bɛ̀ kpetínnɛ́ dikpetíntou kɛ́mbɑɑnɛ̀ dɛ̀ bo wentɛ́mɛ̀. 
\v 4 Bɑ́ nɛ̀ mɛmmɛ bɛ̀ɛ̀ kèè dɛ kó tinɑ́ɑǹtì, kɛ̀ bɛ̀mɑbɛ̀ɛ tì yie nkɛ́nsũ, bɛ̀ bo ntùɔ̀kɛ sikɔupísìnùmmù (5000).
\p
\v 5 Kɛ̀ dɛ̀ɛ wentɛ́, Sifubɛ kó bɛkótíbɛ̀ nɛ̀ dihɛì kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ɛ tíí nSedisɑdɛmmu. 
\v 6 Kɛ̀ ikuɔ́ nìùtì diɛwè Anni ndɛ̀ bo nɛ̀ o cĩ́ɛ̃̀tɛ̀ kɔbɛ: Kɑyifu nɛ̀ Isɑ̃ɑ̃ nɛ̀ Adɛkisɑ̃ntiri nɛ̀ ikuɔ́ nìùtì diɛwè cĩ́ɛ̃̀tɛ̀ kɔbɛ sɔmbɛ, 
\v 7 kɛ́duɔ́ nkɛ̀ bɛ̀ɛ kɔtɛnní Piɛri nɛ̀ Isɑ̃ɑ̃ kɛ̀ bɛ̀ɛ bɛ̀ bekɛ kɛ dɔ̀: We ndi duɔ́ mmuwɛ̃rímú? Nɛ̀ we nkó diyètìrì ndi di ò miɛkùnnɛmɛ̀?
\p
\v 8 Kɛ̀ Muyɑɑ́nsɑ̀ɑ̀mù pìɛ́kɛ́ Piɛri kòo bɛ̀ nɑ̀kɛ́ kɛ dɔ̀: 
\v 9 Isidɑyɛɛribɛ kó bɛkpɑ̀ɑ̀tìbɛ̀ nɛ̀ bɛkótíbɛ̀, ti dɔ̀ɔ̀ mɛ̀ɛ̀ sɑ̀ɑ̀ nkuhɔ̀ùkù kpɛ́í nte kɛ̀ di ti békú kɛ tú ti nɑ́kɛ́ dɛ̀ yĩ́mɛ̀ kɛ̀ kù miɛtɛ́. 
\v 10 Bɛnìtìbɛ̀ bɛmɔu nɛ̀ Isidɑyɛɛribɛ bɑntɛ́nɛ̀ tũnkɛ́ weti weti kɛ do nnɛ̀ Yesu Kirisi Nɑnsɑrɛti kou di bɑɑkɛ́ wè kudɑpɑ̃ɑ̃tí, kɛ̀ Kuyie nduɔ́ nkòò yɑ̃̀ńtɛ́, weè kó diyètìrì te kòo nìtì yie mmiɛtɛ́ pɑ́íí kɛ cómmú di ììkɛ̀. 
\v 11 Yesu di yetɛ wè, Kuyie nnɑ́ɑǹtì nɑ̀ɑ́ nweè kpɛ́í kɛ tú:
\q1 Bɛ̀ɛ̀ mɑɑ̀ bɛ̀ dootóo dìì tɑ̃́rì,
\q1 diì nɑɑ́ ndipũũ kó ditɑ̃́rì mɔ́mmɔnni.
\m
\v 12 Bɑntɛ́nɛ̀ kɛ dò nkutenkù kumɔu miɛkɛ òmɔù tɔù bɑ́ɑ́ nɑ kɛ́dɛɛtɛ́, Kuyie nti duɔ́ nYesu nwe, weè ti dɛɛrí.
\b
\p
\v 13 Kɛ̀ bɛbeémbɛ̀ɛ yɑ̀ Piɛri nɛ̀ Isɑ̃ɑ̃ bɛ mɔ̀kɛ dìì kɔ̃m̀bùɔ̀ kɛ̀ dɛ̀ɛ bɛ̀ di mɛdiɛ̀, nkɛ yɛ̃́ bɛ̀ do yɛ̃́mɛ̀ kɛ dò mbɛ̀ í bɛbíí yɛpɑ́tɛ mɛdiɛ̀, bɛ̀ do yɛ̃́ bɛ̀ nɛitinɛ̀mɛ̀ mmɛ Yesu. 
\v 14 Bɛ̀ nɛ́ mɛ nwúómmɛ̀ wèè miɛtɛ́ kòò còḿmú bɛ borɛ̀ bɛ̀ í nyɑ̀ bɛ̀ bo tɛ̃́nnɛ́ tì. 
\v 15 Kɛ̀ bɛ̀ɛ bɛ̀ dènnɛ kɛ nɑ́kɛ́ bɛmɑ́ɑ̀ kɛ dɔ̀: Ti bo yĩ́mɛ bɛnìtìbɛ̀ biɛ? 
\v 16 Sedisɑdɛmmu kɔbɛ bɛmɔu yɛ̃́mu bɛɛ̀ dɔ̀ɔ̀mɛ̀ tidiɛtì tii, ti bɑ́ɑ́ nɑ kɛ́ tì nɛ̀nni. 
\v 17 Kɛ̀ ti nɛ́ dɔ́ kɛ̀ dɛ kó tinɑ́ɑǹtì dɔkɛ bɑ́ɑ́ pitɛ́, ti bɛ̀ kpɑ̀nnɛ, kɛ́ bɛ̀ bɑ̀ɑ kɛ̀ bɛ̀ tɛ̃́nkɛ bɑ́ɑ́ bɛ́innɛ̀ òmɔù Yesu kó diyètìrì.
\p
\v 18 Kɛ̀ bɛ̀ɛ wɛ̃tɛ kɛ́ bɛ̀ yùní kɛ́ mbɛ̀ kpɑ̀nnɛ̀ kɛ tú: Di yɔ bɑ́ɑ́ kú kɛ̀ di wɛ̃tɛ kɛ́yú Yesu yètìrì òmɔù borɛ̀ yoo dí ò nɑ̀kɛ́ o nɑ́ɑǹtì. 
\v 19 Piɛri nɛ̀ Isɑ̃ɑ̃ kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Wéntɛ́nɛ̀ di mɔ́mmɔmbɛ Kuyie nyììkɛ̀ nsɑ kɛ̀ dɛ̀ wenni, ti bo yiemmɛ̀ díì kpɛti kɛ́yetɛ Kuyie nkpɛti. 
\v 20 Tínti bɑ́ɑ́ nɑ kɛ í mbɛ́i ti yɑ̀ dɛ̀ nɛ̀ ti kèè tì.
\p
\v 21 Kɛ̀ bɛbeémbɛ̀ɛ wɛ̃tɛ kɛ́ bɛ̀ yùní bɛ̀ í nyɑ̀ bɛ̀ bo yĩ́mɛ̀ kɛ́ bɛ̀ puotí, kɛ yóu, kɛ́ bɛ̀ kpɑnnɛ̀, kɛ́ bɛ̀ fĩ́ĩnko, kɛ yɛ̃́ bɛnìtìbɛ̀ bɛmɔu do sɑ̃ntímɛ̀ Kuyie nnɛ̀ dɛ̀ɛ̀ dɔ̀ɔ̀ dɛ kpɛ́í. 
\v 22 Kɛ yɛ̃́ kuhɔ̀ùkù bɛ̀ miɛkùnnɛ kù bie do pɛ̃ɛ̃tɛ́mɛ̀ sipísìnɑ̀ɑ̀.
\s1 Yesu tɔ̃rɛ̀ mɔɔmɛ̀ Kuyie ndikɔ̃m̀bùɔ̀
\p
\v 23 Bɛ̀ fĩ́ĩ ndìì mɔ̀nnì Piɛri nɛ̀ Isɑ̃ɑ̃ kɛ̀ bɛ̀ pɑ̃̀nkɛɛ kɔtɛ bɛ kɔbɛ borɛ̀, kɛ́ bɛ̀ nɑ̀kɛ́ ikuɔ́ nìùbɛ̀ kó bɛkótíbɛ̀ nɛ̀ bɛkótíbɛ̀ bɛ̀ bɛ̀ nɑ̀kɛ́ tì. 
\v 24 Bɛ̀ tì kèè dìì mɔ̀nnì kɛ́wɛ̃nnɛ́ kɛ́bɑ́ntɛ̀ Kuyie nkɛ dɔ̀: Ti Yiɛ̀ nfɔ̃́ nwèè dɔ̀ɔ̀ kɛtenkɛ̀ nɛ̀ kɛĩ́nkɛ̀ nɛ̀ dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ. 
\v 25 Fɔ̃́ɔ̃̀ do duɔ́ Muyɑɑ́nsɑ̀ɑ̀mù ti yɑ̀ɑ̀rì Dɑfiti ɑ kóo tɔ̃ntì kòo bɛ́i nkɛ dɔ̀:
\q1 Bɑ nte kɛ̀ ibotí miɛkɛ cɔ́u?
\q1 Bɑ nte kɛ̀ yɛbotɛ̀ dɑ̀kii
\q1 mɛyɛi nkpɛ́í ndɛtetìrɛ̀?
\q1
\v 26 Kɛ̀ kutenkù yɛmbɛ̀ bɑɑti dikpɑ̀nnì,
\q1 kɛ̀ sikpɑ̀ɑ̀tìbìí wɛ̃nnɛ́
\q1 kɛ kpɑnnɛ̀ Kuyie nnɛ̀ kù tɑ̃ɑ̃tɛ́ wè.
\m
\v 27 Mɔ́mmuɔ Edɔti nɛ̀ Pɔ̃nsi Pidɑti bɛ̀ wɛ̃nnɛ́mu dihɛì miɛkɛ nɛ̀ bɛpɔ̀ɔ̀bɛ̀ nɛ̀ Isidɑyɛɛribɛ kɛ bo dɔɔ̀ mɛyɛi nhɑ kóo tɔ̃ntì Yesu ɑ tɑ̃ɑ̃tɛ́ wè wèè dò mpɑ́íí. 
\v 28 Dɛ̀ dɔ̀ɔ̀ ɑ dɔ́ tìnti nɛ̀ dimɔ̀nnì kɛ tì tɑ̃ɑ̃tɛ́. 
\v 29 Ti Yiɛ̀ nwéntɛ́ bɛ̀ ti kpɑnnɛ̀mɛ̀, kɛ́duɔ́ nhɑ kó bɛtɔ̃mbɛ̀ dikɔ̃m̀bùɔ̀ kɛ̀ bɛ̀ nnɑ́ɑ́ nhɑ nɑ́ɑǹtì. 
\v 30 Bɛnkɛ ɑ wɛ̃rímú kɛ́mmiɛkùnko bɛmuɔmbɛ, kɛ́ndɔɔ̀ri tidiɛtì nɛ̀ mɛbɛnkùmɛ̀ nɛ̀ ɑ kóo tɔ̃ntì Yesu yètìrì wèè dò mpɑ́íí.
\p
\v 31 Bɛ̀ bɑ́ntɛ̀ dìì mɔ̀nnì Kuyie nkɛ́deè, kɛ̀ kɛtenkɛ̀ɛ sɑ̃ntɛ̀ bɛ̀ tìkú dɛ̀ kɛ̀ Muyɑɑ́nsɑ̀ɑ̀mù bɛ̀ píɛ nkɛ̀ bɛ̀ nnɑ́ɑ́ Kuyie nnɑ́ɑǹtì nɛ̀ dikɔ̃m̀bùɔ̀.
\s1 Yesu kɔbɛ kó mɛwɛ̃nnímɛ̀
\p
\v 32 Bɛ̀ɛ̀ kó dimɑ̀ɑ̀ do tɑ̃́ Yesu kɛ̀ bɛ̀ nwɛ̃ mmɛyɛ̀mmɛ̀ mɛ̀mɑ́ɑ̀, òmɔù í ntú ò te o kpɛrɛ omɑ́ɑ̀, bɛ̀ do dɛ̀ wɛ̃ḿmu bɛmɔu. 
\v 33 Kɛ̀ Yesu tɔ̃rɛ̀ nnɑ́ɑ́ mbɛnìtìbɛ̀ nɛ̀ muwɛ̃rímú Yesu yɑ̃̀ńtɛ́mɛ̀, kɛ̀ Kuyie mbɛ̀ bonɛ̀ kɛ bɛ̀ dɔ̀ɔ̀ri mɛsɑ̀ɑ̀. 
\v 34 Òmɔù í mmɔ́nnì dɛ̀mɑrɛ̀ bɛ miɛkɛ, bɛ̀ɛ̀ mɔ̀kɛ dɛpɑɑ nyoo sicɛ̃́ĩ kɛ̀ bɛ̀ ndɛ̀ fiiti kɛ tɔuní idíítí 
\v 35 kɛ duɔ̀ nYesu tɔ̃rɛ̀ kɛ̀ bɛ̀ toti bɑ́ wè dɛ̀ ò bèkúmɛ̀.
\p
\v 36 Onìtì mɔù kɛ̀ bɛ̀ ò tu Sosɛfu Defii kó kuwuɔ kou, kɛ̀ bɛ̀ ò pɛitɛ́ Sipiri kó kutempɛ̃ mmiɛkɛ, kɛ̀ Yesu tɔ̃rɛ̀ɛ ò yu kɛ dɔ̀: Tikɔ̃nyɑuti yiɛ̀. Nɛ̀ bɛ kó tinɑ́ɑǹtì Bɑnnɑbɑɑsi. 
\v 37 Kòo fítɛ́ o pɑku kɛ́tɔní idíítí kɛ́ ì duɔ́ nYesu tɔ̃rɛ̀.
\c 5
\s1 Anɑnniyɑɑsi nɛ̀ o pokù Sɑfidɑɑ
\p
\v 1 Anɑnniyɑɑsi nɛ̀ o pokù Sɑfidɑɑ kɛ̀ bɛ múnkɛɛ fítɛ́ bɛ pɑku, 
\v 2 kɛ́yɑɑtɛ kɛ́sɔnnɛ, kòo ńkɔrinɛ̀ isɔnyi kɛ bo duɔ́ nYesu tɔ̃rɛ̀ kòo pokù yɛ̃́. 
\v 3 Kɛ̀ Piɛrii o bekɛ kɛ dɔ̀: Anɑnniyɑɑsi! Dɛ̀ dòmmɛ kɑ̀ɑ yóu kɛ̀ dibɔɔ̀ dɑ tɑ kɑ̀ɑ soutɛ́ Muyɑɑ́nsɑ̀ɑ̀mù, kɛ fìtɛ́ ɑ pɑku kɛ yɑ̀ɑ̀tɛ idíítí kɛ sɔ̀nnɛ? 
\v 4 A í kù fìtɛ́ dìì mɔ̀nnì kɛ̀ kù í tú ɑ kɔkɑɑ̀? A kù fìtɛ́ dìì mɔ̀nnì kɛ í nte idíítɑ́ɑ̀? Dɛ̀ dòmmɛ kɑ̀ɑ yóu kɛ̀ mɛyɛ̀mmɛ̀ mɛmmɛ dɑ tɑ? Dɛ̀ í tú bɛnìtìbɛ̀ mbɛ ɑ soutɛ́mɛ̀, ɑ soutɛ́ Kuyie nku.
\p
\v 5 Kɛ̀ Anɑnniyɑɑsii kèè tiì nɑ́ɑǹtì kɛ́do kɛ́kú. Kɛ̀ bɛnìtìbɛ̀ɛ dɛ̀ kèè kɛ̀ kufɔ̃wɑɑ́ mbɛ̀ pĩ mmɛdiɛ̀. 
\v 6 Kɛ̀ bɛdɑpɑ̀mbɛ̀ɛ ítɛ́ kóò tùótɛ́ kɛ́kɔtɛ kɛ́kũnnɛ́.
\p
\v 7 Kɛ̀ dɛ̀ mmɔkɛ tɛwebiètɛ̀ mɛfitímɛ̀ mɛ̀tɑ̃ɑ̃ti kòo pokùu tɑroo bɑ́ ò í yɛ̃́ dɛ̀ɛ̀ dɔ̀ɔ̀. 
\v 8 Kɛ̀ Piɛrii ò bekɛ kɛ dɔ̀: Di fìtɛ́ di pɑku i ndíítí nyiɑ̀? Kòò dɔ̀: Ɛ̃ɛ̃ inyi.
\p
\v 9 Kɛ̀ Piɛri dɔ̀: Dɛ̀ dòmmɛ kɛ̀ di dɑ̀kɛ kɛ bo yɑ́ɑ́kɛ́ Muyɑɑ́nsɑ̀ɑ̀mù? Ntɛ bɛ̀ɛ̀ kũnnɛ́ ɑ dɔù kɛ bo dibòrì kɛ bo dɑ túótɛ́.
\p
\v 10 Kòò pɑ̃̀nkɛɛ do Piɛri ììkɛ̀ kɛ́kú. Kɛ̀ bɛdɑpɑ̀mbɛ̀ɛ tɑroo kɛ sɔ̃́ nhò ku, kɛ̀ bɛ̀ɛ ò tùótɛ́ kɛ́kɔtɛ kɛ́kũnnɛ́ kɛ́pɛ́ɛ́nnɛ̀ o dɔù. 
\v 11 Kɛ̀ kufɔ̃wɑɑ́ mpĩ́ Kirisi kɔbɛ nɛ̀ bɛ̀ɛ̀ kó dimɑ̀ɑ̀ tì kèè.
\s1 Yesu tɔ̃rɛ̀ dɔ̀ɔ̀mɛ̀ tidiɛtì pɛ́u
\p
\v 12 Yesu kɔbɛ do wɛ̃ḿmu mɛyɛ̀mmɛ̀ mɛmɑ́ɑ̀, kɛ tiku Sɑdomɔɔ fiiku miɛkɛ, kɛ̀ Yesu tɔ̃rɛ̀ dɔ̀ɔ̀ri tidiɛtì pɛ́u. 
\v 13 Bɑ́ bɛtɔbɛ̀ í ndɑ̀ɑ́tí kɛ bo bɛ̀ wɛ̃ńnɛ́nɛ̀ kɛ̀ bɛnìtìbɛ̀ mbɛ̀ sɑ̃ntí. 
\v 14 Bɛ̀ɛ̀ tɑ̃́ ti Yiɛ̀ nYesu bɛnitidɑɑbɛ̀ nɛ̀ bɛnitipòbɛ̀ kɛ̀ bɛ̀ nyɛ́útí kɛ sṹũnko. 
\v 15 Kɛ bɛnìtìbɛ̀ ntɔuní bɛmuɔmbɛ nɛ̀ bɛ mìɛ̀tì nɛ̀ bɛ tɛ̃ĩ̀ kɛ dɔùnko kucɛ nùù, kɛ̀ Piɛri bo mpɛ̃nkɛ́ kòo fènkù dɑ́tínnɛ́ bɛ miɛkɛ òmɔù. 
\v 16 Kɛ̀ Sedisɑdɛmmu kó sihɛkɛsí kɔbɛ ntɔuní bɛmuɔmbɛ nɛ̀ yɛbɔkɛ̀ tɑ bɛ̀, bɛmɔu kɛ̀ bɛ̀ɛ miɛtɛ́.
\s1 Bɛ̀ fɛ̃́ũmmɛ̀ Yesu tɔ̃rɛ̀
\p
\v 17 Ikuɔ́ nìùtì diɛwè nɛ̀ o kɔbɛ Sɑdusĩɛ̃bɛ kɛ̀ bɛ̀ɛ ítɛ́ nɛ̀ kɛmiɛkɛ, 
\v 18 kɛ́pĩ́ nYesu tɔ̃rɛ̀ kɛ́kpetínnɛ́ dikpetíntou. 
\v 19 Kɛyènkɛ̀ mɔ̀nnì kɛ̀ Kuyie ntɔ̃nnìi kɔtɛní kɛ́kpetɛ́ dikpetíntou kó yɛcɑ̀kɛ̀ kɛ́ bɛ̀ dènnɛ, kɛ́ bɛ̀ nɑ̀kɛ́ kɛ dɔ̀: 
\v 20 Kɔtɛnɛ̀ Kuyie ncĩ́ɛ̃̀tɛ̀ kɛ́nnɑ́ɑ́ mbɛnìtìbɛ̀ mufòmmu kó tinɑ́ɑǹtì.
\p
\v 21 Kɛ̀ bɛ̀ɛ yie nkɛ́kɔtɛ dikṹnweńnì sɛ̀ì Kuyie ncĩ́ɛ̃̀tɛ̀, kɛ nnɑ́ɑ́ nKuyie nnɑ́ɑǹtì.
\p Kɛ̀ ikuɔ́ nìùtì diɛwè nɛ̀ o kɔbɛ kɛ̀ bɛ̀ɛ yú bɛbeémbɛ̀ nɛ̀ Sifubɛ kó bɛkótíbɛ̀ kɛ́tɔ̃ nkɛ̀ bɛ̀ bo yúní Yesu tɔ̃rɛ̀ dikpetíntou. 
\v 22 Kɛ̀ tihɑ̃ɑ̃pɔ̀ntìi kɔtɛ kɛ́ bɛ̀ mɔ̀ńtɛ́, kɛ́wɛ̃tɛní kɛ́ bɛ̀ nɑ̀kɛ́ kɛ dɔ̀: 
\v 23 Ti sɔ̃́ ndikpetíntou kpetímu tɑ́u kɛ̀ tihɑ̃ɑ̃pɔ̀ntì bɑ̀ɑ, kɛ̀ ti kpetɛ́ kɛ tɑ ti mɛ nyí yɑ̀ òmɔù.
\p
\v 24 Kɛ̀ dɛ̀ɛ di tihɑ̃ɑ̃pɔ̀ntì tìì bɑ̀ɑ Kuyie ncĩ́ɛ̃̀tɛ̀ kóo kótì nɛ̀ ikuɔ́ nìùtì diɛwè kɛ̀ bɛ̀ɛ mɔ́ntɛ́ dɛ kó tinɑ́ɑǹtì tu mù. 
\v 25 Dɛ mɔ̀nnì kòò mɔùu kɔtɛní kɛ́ bɛ̀ nɑ̀kɛ́ kɛ dɔ̀: Di mɛ nkpetínnɛ́ bɛ̀ɛ̀ nìtìbɛ̀ bo Kuyie ncĩ́ɛ̃̀tɛ̀ kɛ nɑ́ɑ́ nKuyie nnɑ́ɑǹtì.
\p
\v 26 Kɛ̀ tihɑ̃ɑ̃pɔ̀ntì kóo kótìi nɛinɛ̀ o tɔ̃mbɛ̀ kɛ̀ bɛ̀ɛ bɛ̀ pĩ̀ńní mɛyɔɔ̀mmɛ̀ kɛ yɛ̃́ bɛ̀ do démɛ̀ bɛnìtìbɛ̀ yɑ̀ɑ̀ bo bɛ̀ bùɔ́tímɛ̀ yɛtɑ̃́rɛ̀ kɛ́kuɔ. 
\v 27 Kɛ̀ bɛ̀ɛ bɛ̀ kɔ̀tɛnɛ̀ bɛbeémbɛ̀ borɛ̀ kɛ̀ ikuɔ́ nìùtì diɛwèe bɛ bekɛ kɛ dɔ̀: 
\v 28 Ti di nɑ̀kɛ́mu kɛ tú: Di bɑ́ nnɑ́ɑ́ nhonìtì yie nkpɛ́í. Dɛ̀ dòmmɛ kɛ̀ di pitɛ́ dɛ kó tinɑ́ɑǹtì Sedisɑdɛmmu omɔu miɛkɛ, kɛ dɔ́ dɛ̀ ndò tíì te kɛ̀ bɛ̀ ò kùɔ?
\p
\v 29 Piɛri nɛ̀ Yesu tɔ̃rɛ̀ tɛyɛ̀ kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Ti dò nkɛ́yie Kuyie nkpɛti nti kɛ̀ dɛ̀ɛ pɛ̃ɛ̃tɛ́ bɛnìtìbɛ̀ kpɛti. 
\v 30 Kuyie nti yɛmbɛ̀ do tũ nkù kuù te kɛ̀ Yesu yɑ̃̀ńtɛ́ wenwe, di bɑɑkɛ́ wè kudɑpɑ̃ɑ̃tí koò kùɔ. 
\v 31 Kuyie nwe ndɛ́úkùnnɛ koò dɔ̀ɔ̀ okpɑ̀ɑ̀tì, Odɛɛtíwè, kɛ̀ Isidɑyɛɛribɛ bo ceetɛ kɛ̀ Kuyie mbɛ̀ cĩ̀ɛ̃́ mbɛ yɛi. 
\v 32 Ti ti nyɛ̃́ kɛ̀ Muyɑɑ́nsɑ̀ɑ̀mù tì yɛ̃́ mummu Kuyie duɔ́ mmù bɛ̀ɛ̀ yie nku nɑ́ɑǹtì.
\p
\v 33 Bɛbeémbɛ̀ tì kèè dìì mɔ̀nnì kɛ̀ bɛ miɛkɛɛ pɛikɛ, kɛ̀ bɛ̀ ndɔ́ kɛ́kuɔ Yesu tɔ̃rɛ̀. 
\v 34 Kɛ̀ Fɑdisĩɛ̃ mɔù dɛ̀ bo kòo yètìrì tu Kɑmɑdiyɛɛri kòo yɛ̃́ Kuyie nkuɔ́ mɛsɑ̀ɑ̀ nkɛ̀ bɛnìtìbɛ̀ ò dé, kòo ítɛ́ kɛ́duɔ́ nkɛ̀ bɛ̀ɛ mu ndennɛ Yesu tɔ̃rɛ̀. 
\v 35 Kòo bɛ́i nkɛ dɔ̀: Isidɑyɛɛribɛ, dɔɔ̀nɛ̀ mɛyɔɔ̀mmɛ̀ bɛnìtìbɛ̀ biɛ. 
\v 36 Dɛ̀ í mɔ̀ntɛ onìtì mɔù ɑ̃nnɛ́mɛ̀ kɛ̀ bɛ̀ ò tu Tedɑɑsi kòo yɛ̀mmɛ̀ ndo nhò tú òmɔù, kɛ̀ bɛnìtìbɛ̀ sikɔusìnɑ̀ɑ̀ (400) nhò tũ̀. Kɛ̀ bɛ̀ɛ ò kùɔ kɛ̀ bɛ̀ɛ cíɛ́tɛ́ kɛ̀ dɛ̀ dèè. 
\v 37 Dɛ kó difɔ̃nkúò kɛ̀ Sidɑɑsi Kɑdidee kouu ɑ̃nnɛ́, kɛ̀ kunitisṹkùu ò tũ̀nnɛ kòo múnkɛɛ kú kɛ̀ bɛ̀ɛ cíɛ́tɛ́. 
\v 38 N di nɑ́ɑ́mmu di tɛ̃́nkɛ bɑ́ ndɑkɛ bɛnìtìbɛ̀ biɛ nkpɛti, kɛ̀ bɛ tɔ̃mmú bɛ̀ pĩ mmù tú bɛnìtìbɛ̀ kɔ̃mu mmu mù yóó deèmu. 
\v 39 Kɛ̀ mù mɛ ntú Kuyie nkɔ̃mu mmu di bɑ́ɑ́ nɑ kɛ́ mù pɑ̀ɑ. Dɔɔ̀nɛ̀ mɛyɔɔ̀mmɛ̀ kɛ̀ di bɑ́ɑ́ dokɛ́nɛ̀ Kuyie.
\p
\v 40 Kɛ̀ bɛ̀ɛ yie nho kpɛti kɛ yúní Yesu tɔ̃rɛ̀ kɛ́duɔ́ nkɛ̀ bɛ̀ɛ yɛ̀ puotí yɛdɑ́ kɛ̀ bɛ̀ dɔ̀ yɛ̀ tɛ̃́nkɛ bɑ́ nnɑ́ɑ́ nYesu kpɛ́í kɛ́deè kɛ́ yɛ̀ fĩ́ĩnko. 
\v 41 Kɛ̀ Yesu tɔ̃rɛ̀ɛ ítɛ́ bɛbeémbɛ̀ borɛ̀ nɛ̀ kuyɛǹnɑɑtí, kɛ yɛ̃́ Kuyie nsɔ̃́mmɛ̀ bɛ̀ mɑ̀nnɛ̀ bɛ̀ɛ bɛ̀ fɛ̃́ũ nYesu kó diyètìrì kpɛ́í. 
\v 42 Kɛ̀ bɛ̀ nsɔkɛ́ yɛwe yɛmɔu Kuyie ncĩ́ɛ̃̀tɛ̀ nɛ̀ sicɛ̃́ĩ miɛkɛ kɛ nɑ́ɑ́ nTinɑ́ɑǹsɑ̀ɑ̀tì Yesu Kirisi Odɛɛtíwè kpɛti.
\c 6
\s1 Yesu kɔbɛ tɑ̃ɑ̃tɛ́ bɛ̀ bɛ̀yiekɛ̀
\p
\v 1 Dɛ mɔ̀nnì kɛ̀ Yesu kɔbɛɛ sṹṹ nkɛ̀ Sifubɛ bɛ̀ɛ̀ nɑ̀ɑ́ nkɛ̀rɛ́kì kɛ̀ bɛ̀ nkpɑnnɛ̀ Sifubɛ bɛ̀ɛ̀ nɑ̀ɑ́ nhebedee kɛ tú: Di í toti ti kó bɛkúpobɛ̀ mudiì mɛsɑ̀ɑ̀. 
\v 2 Kɛ̀ Yesu tɔ̃rɛ̀ tɛpíítɛ̀ nɛ̀ yɛ̀dɛ́ɛ̀ tíí nYesu kɔbɛ tĩ̀nnì, kɛ́ bɛ̀ nɑ̀kɛ́ kɛ dɔ̀: Dɛ̀ í wenni ti bo yóumɛ̀ Kuyie nnɑ́ɑǹtì kɛ́ndɑkɛnɛ̀ mudiì kó mutotimù. 
\v 3 Tɑ̃ɑ̃tɛ́nɛ̀ di miɛkɛ bɛnìtìbɛ̀ bɛ̀yiekɛ̀, bɛ̀ɛ̀ borimɛ wenni, kɛ̀ Muyɑɑ́nsɑ̀ɑ̀mù bɛ̀ pìɛ́kɛ́, kɛ̀ bɛ̀ mɔ̀kɛ mɛciì, kɛ̀ tí bɛ̀ duɔ́ ndɛ kó mutɔ̃mmú. 
\v 4 Dɛ mɔ̀nnì kɛ̀ ti pɛ́tɛ́ mɛfíè nkɛ mbɑ́ɑ́ nKuyie nkɛ nnɑ́ɑ́ ku nɑ́ɑǹtì.
\p
\v 5 Kɛ̀ Yesu kɔbɛ tĩ̀nnìi yie ndɛ kó tinɑ́ɑǹtì kɛ́tɑ̃ɑ̃tɛ́ Etiɛnni wèè tɑ̃́ Kuyie mmɛsɑ̀ɑ̀ kɛ̀ Muyɑɑ́nsɑ̀ɑ̀mù ò pìɛ́kɛ́ nɛ̀ Fidipu nɛ̀ Podokɔɔ nɛ̀ Nikɑnnɔɔ nɛ̀ Timɔɔ nɛ̀ Pɑdimɛnɑɑ nɛ̀ Nikodɑɑ Ãntiyɔsi ɛì kou wèè do tũ nSifubɛ kó kuwedɔuncɛ, 
\v 6 kɛ́ bɛ̀ kɔ̀tɛnɛ̀ Yesu tɔ̃rɛ̀ borɛ̀, kɛ̀ yɛ̀ɛ nɔ́ɔ́ nyɛ nɔu bɛ ĩ́nkɛ̀ kɛ́bɑ́ntɛ̀ Kuyie mbɛ kpɛ́í.
\p
\v 7 Kɛ̀ Kuyie nnɑ́ɑǹtì dɔkɛ mpitírí, kɛ̀ Yesu kɔbɛ nsṹũnko Sedisɑdɛmmu miɛkɛ, kɛ̀ ikuɔ́ nìùbɛ̀ pɛ́uu yie nkɛ́ntɑ̃́ Yesu.
\s1 Bɛ̀ pĩ̀ḿmɛ̀ Etiɛnni
\p
\v 8 Kɛ̀ Kuyie nni mbonɛ̀ Etiɛnni kóò duɔ́ mmuwɛ̃rímú kòò ndɔɔri tidiɛtì nɛ̀ mɛbɛnkùmɛ̀ cɑ̀mmɛ̀ bɛnìtìbɛ̀ cuokɛ̀. 
\v 9 Kɛ̀ sifubɛ bɛ̀ɛ̀ do kɔrì kutííntouku bɛ̀ tú kù tidɑɑtì bɛ̀ fĩ́ĩ ntì kɔku nɛ̀ Sifubɛ tɔbɛ̀, Sidɛnni ɛì kɔbɛ, Adɛkisɑ̃ntiri ɛì kɔbɛ, Sidisii nɛ̀ Asii ɛkɛ̀ kɔbɛ kɛ̀ bɛ̀ɛ yetɛ Etiɛnni kpɛti kɛ́ nhò nɛ̀ìnɛ̀. 
\v 10 Bɛ̀ mɛ nyí nhò nɑ kɛ yɛ̃́ ò do nɑ́ɑ́nnɛ̀mɛ̀ mɛciì Muyɑɑ́nsɑ̀ɑ̀mù ò duɔ́ mmɛ̀. 
\v 11 Kɛ̀ bɛ̀ɛ yóu kɛ́yietí bɛnìtìbɛ̀ kɛ̀ bɛ̀ dɔ̀: Ti kèèmu ò sɑ̃̀ɑ̃́mmɛ̀ Mɔyiisi nɛ̀ Kuyie. 
\v 12 Kɛ̀ bɛ̀ɛ íi mbɛnìtìbɛ̀ miɛkɛ, dihɛì kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀, kɛ̀ bɛ̀ɛ pĩ́ nhEtiɛnni kóò kɔ̀tɛnɛ̀ bɛbeéndiɛbɛ̀ borɛ̀, 
\v 13 kɛ́nnɛínɛ̀ bɛnìtìbɛ̀ kɛ̀ bɛ̀ɛ soutɛ́ kɛ dɔ̀: Onìtì yie nsɑ̃̀ɑ̃́ nKuyie ncĩ́ɛ̃̀tɛ̀ ntɛ kɛ sɑ̃̀ɑ̃́nnɛ̀ Mɔyiisi kó ikuɔ́. 
\v 14 Ti kèèmu kòò tu Yesu Nɑnsɑrɛti kou bo pɔntɛ Kuyie ncĩ́ɛ̃̀tɛ̀ kɛ́ceetɛ Mɔyiisi dɔú nyìì kuɔ́.
\p
\v 15 Kɛ̀ dibeéntĩ̀nnì diɛrì nwúó nhEtiɛnni kòo ììkɛ̀ cèètɛ kɛ dò Kuyie ntɔ̃nnì kɔkɛ.
\c 7
\s1 Etiɛnni nɑ̀kɛ́ tì
\p
\v 1 Kɛ̀ Ikuɔ́ nìùtì diɛwèe bekɛ Etiɛnni kɛ dɔ̀: Bɛ̀ nɑ̀ɑ́ mɔ́mmuɔ nwɑɑ̀? 
\v 2 Kɛ̀ Etiɛnnii bɛ́i nkɛ dɔ̀: N tebìí nɛ̀ n cicɛbɛ̀ kéntɛ́nɛ̀ kɛ́keè, Kuyie nnɛ̀ ku kó tikpetì kuù do bɛnkɛ kumɑ́ɑ̀ ti yɑ̀ɑ̀rì Abɑrɑhɑmmu ò kpɑɑ́ bo dìì mɔ̀nnì Mɛsopotɑmii kɛ mu nyí kò Anɑɑ, 
\v 3 kóò nɑ̀kɛ́ kɛ dɔ̀: Yóu ɑ cĩ́ɛ̃̀tɛ̀ kɔbɛ nɛ̀ ɑ ɛì kɛ́kɔtɛ dihɛì n yóó dɑ bɛnkɛ dì. 
\v 4 Mɛm̀mɛ kɛ̀ Abɑrɑhɑmmuu ítɛ́ Kɑndee kɛ́kò Anɑɑ, kòo cicɛɛ kú. Kɛ̀ Kuyie nhò sɔɔ́nnɛ̀nní di mɛ̀ mbo dìì ɛì miɛkɛ yíe. 
\v 5 Kuyie nyí nhò duɔ́ nkɛtenkɛ̀ dɛborɛ̀ bɑ́ sɑ́m̀pɔ́, kɛ nɛ́ ò nɑ̀kɛ́ kɛ dɔ̀ kù bo ò duɔ́ ndɛ kó dihɛì kòo yɑɑ̀bí di tiekɛ kɛ sɔ̃́ nhò nyí mɔkɛ dɛbirɛ. 
\v 6 Kɛ̀ Kuyie nhò nɑ̀kɛ́ kɛ dɔ̀: A yɑɑ̀bí bo kɔtɛ bɛtɔbɛ̀ ciɛ kɛ́nɑɑ́ ntidɑɑtì kɛ̀ bɛ̀ɛ ì fɛ̃́ũ nyɛbie sikɔusìnɑ̀ɑ̀ (400) miɛkɛ. 
\v 7 Kɛ̀ n fɛ̃́ũ ndɛ kó bɛnìtìbɛ̀ kɛ̀ ìi ítɛ́ kɛ pĩ́ n tɔ̃mmú diɛ ndi nhɛì miɛkɛ. 
\v 8 Kɛ̀ Kuyie ntɑunnɛ̀ kumɑ́ɑ̀ Abɑrɑhɑmmu kɛ dɔ̀ bɛ̀ ncɑ̃mmù. Mɛm̀mɛ kɛ̀ Abɑrɑhɑmmuu pɛitɛ́ Isɑki kóò cɑ̃ntɛ́ diyiè niínnì yiè, kɛ̀ bɛ̀ɛ mɛ nsɔɔtɛ́. Kɛ̀ Isɑkii pɛitɛ́ Sɑkɔbu kóò cɑ̃ntɛ́ kɛ̀ Sɑkɔbuu cɑ̃mmú ti yɑ̀ɑ̀rìbɛ̀ tɛpíítɛ̀ nɛ̀ bɛ̀dɛ́bɛ̀.
\p
\v 9 Kɛ̀ ti yɑ̀ɑ̀rìbɛ̀ miɛkɛ mpɛ́ì bɛ tèbitɛ Sosɛfu, kɛ̀ bɛ̀ɛ ò fìtɛ́ kòò bo nɑɑ́ nkudɑɑkù Esibiti miɛkɛ. 
\v 10 Kɛ̀ Kuyie mɛ nní nhò bonɛ̀, koò dɛɛrí kóò duɔ́ mmɛciì nkòo kpɑ̀ɑ̀tìi ò pɛ́nsìrì, kóò duɔ́ nho cĩ́ɛ̃̀tɛ̀ tɛmɔu kòò mbɑkɛ́. 
\v 11 Kɛ̀ dikònnì diɛrìi tɑnní Esibiti omɔu nɛ̀ Kɑnnɑhɑ̃ɑ̃ kɛ̀ dɛ̀ nyóù, bɑ́ ti yɛmbɛ̀ í mpɛ̀tɛ́ bɛ̀ bo di mù. 
\v 12 Kɛ̀ Sɑkɔbuu keè tidiitì bomɛ̀ Esibiti kɛ́tɔ̃ nti yɑ̀ɑ̀rìbɛ̀ mɛketimɛ̀. 
\v 13 Kɛ̀ bɛ̀ɛ wɛ̃tɛ mɛdɛ́rímɛ̀ kɛ̀ Sosɛfuu bɛ̀ bɛnkɛ omɑ́ɑ̀, kòo kpɑ̀ɑ̀tìi bɑntɛ́ ò kɔbɛ tú bɛ̀. 
\v 14 Kɛ̀ Sosɛfuu tɔ̃ nkɛ̀ bɛ̀ bo yúní o cicɛ Sɑkɔbu nɛ̀ o cĩ́ɛ̃̀tɛ̀ kɔbɛ bɛmɔu sipísìyiekɛ̀ nɛ̀ bɛ̀nùmmù. 
\v 15 Mɛm̀mɛ kɛ̀ bɛ̀ɛ kò nhEsibiti Sɑkɔbu dɛ nku, kɛ̀ ti yɛmbɛ̀ múnkɛ dɛ nku. 
\v 16 Kɛ̀ bɛ̀ɛ bɛ̀ tɔ kɛ́kũnnɛ́ Sisɛmmu Abɑrɑhɑmmu do dontɛ́ kùù fɔ̃ti nɛ̀ idíítí Emɔɔ bí borɛ̀.
\p
\v 17 Kɛ̀ dɛ̀ɛ tuɔkɛ Kuyie ndo nɑ̀kɛ́ tì Abɑrɑhɑmmuu ti bo dɔɔ̀mɛ̀, kɛ̀ ti kó kubotíi sṹṹ mmɛdiɛ̀ Esibiti miɛkɛ. 
\v 18 Kòo kpɑ̀ɑ̀tì pɑ̀nwè mɔùu buotɛ́ wèè í yɛ̃́ Sosɛfu, 
\v 19 kɛ́nyóù mɛdiɛ̀ nkɛ sénnìnnɛ ti yɛmbɛ̀, kɛ́ n duɔ̀ nkɛ̀ bɛ̀ mbuɔ̀nko bɛ bí kɛ̀ ì kɔ̃. 
\v 20 Dɛ mɔ̀nnì ndi bɛ̀ pɛitɛ́mɛ̀ Mɔyiisi kòo nwenni, kɛ̀ Kuyie nni nhò dɔ́, kɛ̀ bɛ̀ nhò yùɔ̀ri o cicɛ cĩ́ɛ̃̀tɛ̀ miɛkɛ, kòò mmɔkɛ bɛtɑ̃̀ɑ̃̀bɛ̀ bɛ̀tɑ̃ɑ̃ti 
\v 21 kɛ̀ bɛ̀ɛ ò bɔntóo, kɛ̀ Esibiti kóo kpɑ̀ɑ̀tì kóo sɑpɑ̀ɑ̀ nhò tùótɛ́ kɛ́ nhò yùɔ̀ri kɛ dò nho birɛ mɔ́mmɔndɛ. 
\v 22 Kɛ̀ Mɔyiisi bɛbíí Esibiti kó mɛciì mmɛmɔu kɛ́nnɔ mmutɔ̃mmú kɛ yɛ̃́ tinɑ́ɑǹtì.
\p
\v 23 Ò tùɔ̀kɛ dìì mɔ̀nnì yɛbie nsipísìnɑ̀ɑ̀ kɛ́tɑ̃ɑ̃tɛ́ kɛ́kɔtɛ kɛ bo yɑ̀ o kɔbɛ Isidɑyɛɛribɛ, 
\v 24 kɛ́nsɔ̃́ Esibiti kou puotì Isidɑyɛɛribɛ kou, kòo kónnɛ́ o botí kou, kɛ́potɛ́ Esibiti kou kɛ́kuɔ. 
\v 25 Kòo yɛ̀mmɛ ńdò nho kɔbɛ bo bɑntɛ́ Kuyie nyóó duɔ́mmɛ̀ kɛ̀ weè bɛ̀ dɛɛtɛ́. Bɛ̀ mɛ nyí mbɑntɛ́. 
\v 26 Kɛ̀ dɛ̀ɛ wentɛ́ kòo tó nsɔ̃́ Isidɑyɛɛribɛ mɑ́ɑ̀ kpɑ̀, kòo mbɛ̀ pɑ̀ɑ̀tì kɛ dɔ̀: N kɔbɛ dɛ̀ yĩ́mɛ kɛ̀ di kpɑ díndi kubotí kùmɑ́ɑ̀ kɔbɛ? 
\v 27 Wèè do dɔ́ kɛ́nɑ otɔù kòo bɑɑo kɛ dɔ̀: We ndɑ pĩ ntikpɑ̀tì kɑ̀ɑ bo nti bekùnɛ̀? 
\v 28 A dɔ́ kɛ́ n kuɔ ɑ wee kùɔmɛ̀ mmɛ Esibiti kouɑ̀? 
\v 29 Kɛ̀ Mɔyiisi tì kèè kɛ́cokɛ́ kɛ́kɔtɛ Mɑndiyɑ̃ɑ̃ kó kɛtenkɛ̀ kɛ́ nkɛ mbo kɛ́mɔɔtɛ ibí ìdɛ́ì.
\p
\v 30 Yɛbie sipísìnɑ̀ɑ̀ kó difɔ̃nkúò kɛ̀ Kuyie ntɔ̃nnìi kɔtɛní o borɛ̀ Sinɑii kó ditɑ̃rì tɑkɛ́, dikpɑ́ɑ̀ cuokɛ̀ difɑ̃pèù mɑrì miɛkɛ kɛ̀ di cɔ̀ú. 
\v 31 Kɛ̀ Mɔyiisi dɛ̀ yɑ̀ kɛ̀ dɛ̀ɛ ò di kòò ntɔ́ɔntoo kɛ bo dɔ̀kɛ wéntɛ́, kɛ́keè ti Yiɛ̀ nKuyie ntɑmmɛ̀ kɛ̀ mɛ̀ tu: 
\v 32 Míì tu Kuyie nhɑ yɛmbɛ̀ Abɑrɑhɑmmu, Isɑki nɛ̀ Sɑkɔbu bɛ̀ do tũ nkù, kɛ̀ Mɔyiisi kɔ̃̀ntì ńhɑu ò í ndɑ̀ɑ́tí kɛ́wéntɛ́. 
\v 33 Kɛ̀ Ti Yiɛ̀ nKuyie nhò nɑ̀kɛ́ kɛ dɔ̀: Dɛitɛ ɑ nɛùtì ɑ cómmú kɛ̀ɛ̀ tenkɛ̀ tú Kuyie nkɔkɛ nkɛ. 
\v 34 N yɑ̀ n kó ibí fɛ̃́ṹrìmɛ̀ mmɛ Esibiti ɛì miɛkɛ, kɛ kèè i dɑbùò nkɛ cùtɛ́ní kɛ bo ì dɛɛtɛ́ kɛ yóó dɑ tɔ̃ nhEsibiti.
\p
\v 35 Mɔyiisi Isidɑyɛɛribɛ do yetɛ wè kɛ dɔ̀: We ndɑ pĩ ntikpɑ̀tì kɑ̀ɑ ti bekùnɛ̀, Kuyie nwɛ̃̀tɛ kɛ we ntɔ̃nní kòo nɑɑ́ mbɛ kóo kpɑ̀ɑ̀tì, bɛ dɛɛtíwè nɛ̀ Kuyie ntɔ̃nnì ò do yɑ̀ dì difɑ̃pèù miɛkɛ di kó mɛteèmmɛ̀. 
\v 36 Weè bɛ̀ dènnɛ tidɑɑtì miɛkɛ, kɛ dɔ̀ɔ̀ tidiɛtì Esibiti miɛkɛ nɛ̀ dɑ̀mɛ́ɛ̀rì wũɔ̃wè miɛkɛ nɛ̀ dikpɑ́ɑ̀ miɛkɛ yɛbie nsipísìnɑ̀ɑ̀. 
\v 37 Weè do bɛ̀ nɑ̀kɛ́ kɛ dɔ̀: Kuyie mbo di duɔnní ku pɑ̃ɑ̃nɑ́ɑǹtì nɑ́ɑǹtò mɔù, di botí kou, kòo nni ndònnɛ̀. 
\v 38 Weè do bonɛ̀ Isidɑyɛɛribɛ ti yɛmbɛ̀ dikpɑ́ɑ̀ cuokɛ̀ bɛ̀ do tíkù dɛ̀ Sinɑii tɑ̃rì, kɛ̀ Kuyie ntɔ̃nnì ò nɑ̀ɑ́nnɛ̀, Kuyie nwe nduɔ́ mmufòmmu kó tinɑ́ɑǹtì, kòò tì nti tùo.
\p
\v 39 Kɛ̀ ti yɛmbɛ̀ɛ yetɛ o kpɛti kóò bɑ̀ɑ̀o kɛ́ndɔ́ kɛ́wɛ̃tɛ Esibiti. 
\v 40 Kɛ nɑ́kɛ́ Anɔɔ kɛ dɔ̀: Ti í yɛ̃́ tìì tùɔ̀kɛní Mɔyiisi wèè ti dènnɛní Esibiti. Tí dɔɔ̀ Kuyie nkùù nti dònnɛ̀. 
\v 41 Kɛ̀ bɛ̀ɛ dɔɔ̀ mɛsɔɔ nkɛ̀ dɛ̀ ndò nkunɑɑbiiku, kɛ̀ bɛ̀ɛ kù fìé iwũɔ̃, kɛ́nyɑ̃nku nɛ̀ bɛ̀ dɔ̀ɔ̀ dɛ̀ bɛ mɔ́mmɔmbɛ dɛ kpɛ́í. 
\v 42 Mɛm̀mɛ kɛ̀ Kuyie mbɛ̀ yóu kɛ̀ bɛ̀ mbɑ́ɑ́ ndiyiè nɛ̀ otɑ̃̀nkù nɛ̀ siwɑ̃̀ɑ̃, kɛ́ndònnɛ̀ tì wɑ̃̀rimɛ̀ Kuyie mpɑ̃ɑ̃nɑ́ɑǹtì nɑ́ɑǹtò pɑ́tíri miɛkɛ kɛ tú:
\q1 Isidɑyɛɛribɛ,
\q1 di do n feumu iwũɔ̃ yɛbie nsipísìnɑ̀ɑ̀
\q1 di do dɔ̀ɔ̀ yɛ̀ dikpɑ́ɑ̀ miɛkɑɑ̀?
\q1
\v 43 Di do dɔ̀ɔ̀ dibɔɔ̀ Mɔdɔki tenkɑɑnìtɛ̀ ntɛ
\q1 nɛ̀ Defɑ̃ɑ̃ kó tɛwɑ̃̀tɛ̀ kɛ̀ ndɛ bɑ́ɑ́.
\q1 Dɛɛ̀ te kɛ̀ n yóó di dennɛ
\q1 kɛ di pɛ̃ɛ̃ mBɑbidɔnni.
\p
\v 44 Ti yɛmbɛ̀ do mɔkɛ Kuyie nkó ditou ndi dikpɑ́ɑ̀ cuokɛ̀, Mɔyiisi do dɔ̀ɔ̀ dì kɛ̀ di ndònnɛ̀ Kuyie nyɛ̃ nwèe dì dɔ̀ɔ̀ kɛ̀ dì ndòmmɛ̀ kù do dì nhò bɛnkɛ kɛ̀ dì ndòmmɛ̀. 
\v 45 Kɛ̀ bɛ̀ ndi tɔuti kɛ̀ Sosuwee yɑ̀ɑ̀ bɛ̀ tɑnnɛ́ dihɛì Kuyie ndo bɛ̀ti dìì miɛkɛ bɛ̀ɛ̀ í kù tũ̀. Kɛ̀ dì mbo kɛ́tuɔkɛnɛ̀ Dɑfiti kó dimɔ̀nnì. 
\v 46 Kòò dɔ̀: Ò bo mɑɑ́ Kuyie nSɑkɔbu do tũ nkù tɛcĩ́ɛ̃̀tɛ̀ kɛ yɛ̃́ kù ò dɔ̀ɔ̀mɛ̀ mɛsɑ̀ɑ̀. 
\v 47 Nɛ̀ mɛmmɛ kòo birɛ Sɑdomɔɔ weè nɛ́ kù mɑɑ́ tɛcĩ́ɛ̃̀tɛ̀.
\p
\v 48 Kuyie nkùù bo kɛĩ́nkɛ̀ kù í ɑ̃ bɛnìtìbɛ̀ mɑɑ́ sìì cɛ̃́ĩ miɛkɛ, Kuyie mpɑ̃ɑ̃nɑ́ɑǹtì nɑ́ɑǹtò bɛ́immu kɛ yĩ: 
\v 49 Kuyie ntu:
\q1 Kɛĩ́nkɛ̀ tu n kpɑ̀ɑ̀tìkɑ̀rì,
\q1 kɛ̀ kɛtenkɛ̀ tu n nɑcɛ̀dɑɑ́nnì.
\q1 Ɔ̃ndi bòrì ndi n dò nkɛ́om̀pɛ̀mɛ̀?
\q1
\v 50 Dɛ̀ í tú míì dɛ̀ dɔ̀ɔ̀ dɛmɔuɑ̀?
\p
\v 51 Kɛ̀ Etiɛnnii sɔɔtɛ́ kɛ́bɛ́i nkɛ dɔ̀: Di to yɛɛ̀ kpeńnì di yɛmbɛ̀ kpɛyɛ do dòmmɛ̀, di í dɔ́ kɛ́keè Kuyie nkpɛti, kɛ yetírí Muyɑɑ́nsɑ̀ɑ̀mù yɛ̃ mmù sɑ̃́ɑ̃̀. 
\v 52 Di yɛmbɛ̀ do fɛ̃́ũmmu Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu, kɛ́kuɔ bɛ̀ɛ̀ nɑ̀ɑ́ nhowenniwe kɔrinímɛ̀, kòò kɔ̀tɛní, kɛ̀ di ò fìtɛ́ koò kùɔ. 
\v 53 Kuyie ntɔ̃rɛ̀ di duɔ́mmu Kuyie nkó ikuɔ́ bɑ́ di í yie nkɛ ì tũ̀nnɛ.
\s1 Bɛ̀ bùɔ́tímɛ̀ Etiɛnni yɛtɑ̃́rɛ̀ kɛ kùɔ
\p
\v 54 Kɛ̀ bɛbeémbɛ̀ɛ tì kèè kɛ̀ bɛ miɛkɛɛ pɛikɛ Etiɛnni kɛ̀ bɛ̀ɛ mɑɑ́ nyɛbìɛ̀ nhEtiɛnni kpɛ́í. 
\v 55 Kɛ̀ Muyɑɑ́nsɑ̀ɑ̀mù mpíɛ́kɛ́ Etiɛnni kòò bùɔ́ kɛĩ́nkɛ̀, kɛ́yɑ̀ Kuyie nkó tikpetì kɛ̀ Yesu cómmú Kuyie mbɑkù yoú. 
\v 56 Kòo bɛ́i nkɛ dɔ̀: Kɛĩ́nkɛ̀ kpetɛ́mu kɛ̀ n wùó nhOnìtìbirɛ kɛ̀ dɛ̀ còḿmú Kuyie mbɑkù yoú.
\p
\v 57 Kɛ̀ bɛ̀ɛ pi bɛ to kɛ́wekii mɛdiɛ̀, kɛ́bunnɔ́ɔ bɛmɔu o bíɛ́kɛ̀. 
\v 58 Kóò dènnɛ dihɛì mɑ̀nku kóò bùɔ́tí yɛtɑ̃́rɛ̀ kɛ́bɑnnɛ bɛ yɑ̀ɑ̀tì odɑpɑ̀ɑ̀ mmɔù kòo yètìrì tu Sɔɔri. 
\v 59 Kɛ̀ bɛ̀ mbuɔti Etiɛnni yɛtɑ̃́rɛ̀, kòo bɑ́ntɛ̀ Kuyie nkɛ dɔ̀: N Yiɛ̀ nYesu cɔutɛ́ n wɛ̃nnì.
\p
\v 60 Kɛ́deè kɛ́do kɛ́nínkú kɛ́pĩɛ̃kɛ́ kɛ dɔ̀: N Yiɛ̀ mbɑ́ɑ́ bɛ̀ yietí bɛ yɛi!
\p Ò bɛ́i mmɛmmɛ kɛ́kú.
\c 8
\p
\v 1 Sɔɔri do wɛ̃ńnɛ̀mu bɛ̀ɛ̀ kɔ̀ù Etiɛnni.
\s1 Bɛ̀ fɛ̃́ũmmɛ̀ Kirisi kɔbɛ
\p Dɛ kó diyiè kɛ̀ bɛ̀ɛ fɛ̃́ũ nKirisi kɔbɛ Sedisɑdɛmmu miɛkɛ. Kɛ̀ bɛ̀ɛ cíɛ́tɛ́ bɛmɔu kɛ́kɔtɛ Sudee nɛ̀ Sɑmmɑrii kó kɛtenkɛ̀ kɛ̀ Yesu tɔ̃rɛ̀ yɛɛ̀ mɑ́ɑ̀ ńkpɑɑ́. 
\v 2 Bɛ̀ɛ̀ dé Kuyie nkɛ̀ bɛ̀ɛ kũnnɛ́ Etiɛnni kɛ́kɔmmú o kṹṹ mmɛdiɛ̀.
\p
\v 3 Kɛ̀ Sɔɔri nkɔrì Kirisi kɔbɛ cɛ̃́ĩ kɛ pĩĩ mbɛnitidɑɑbɛ̀ nɛ̀ bɛnitipòbɛ̀ kɛ kpetì.
\s1 Fidipu nɑ̀kɛ́mɛ̀ Tinɑ́ɑǹsɑ̀ɑ̀tì Sɑmmɑrii
\p
\v 4 Bɛ̀ɛ̀ cìɛ́tɛ́ kɛ̀ bɛ̀ nkɔrì yɛhɛkɛ̀ yɛmɔu kɛ nɑ́ɑntɛ Tinɑ́ɑǹsɑ̀ɑ̀tì. 
\v 5 Kɛ̀ Fidipuu kɔtɛ Sɑmmɑrii kó dihɛì mɑrì kɛ́ bɛ̀ nɑ̀kɛ́ Kirisi kpɛ́í. 
\v 6 Kɛ̀ bɛnìtìbɛ̀ bɛmɔuu yie, kɛ́nkémmú o nɑ́ɑǹtì, kɛ wúó nhò dɔ̀ɔ̀rimɛ̀ tidiɛtì. 
\v 7 Kɛ̀ yɛbɔkɛ̀ kuɔ̀ nkɛ yiɛ̀ bɛnìtìbɛ̀ miɛkɛ, kɛ̀ tihɔ̀ùtì pɛ́u nɛ̀ yɛcĩɛ̃̀ nkɛ̀ dɛ̀ miɛrí. 
\v 8 Kɛ̀ kuyɛǹnɑɑtí diɛkù ḿbo dɛ kó dihɛì miɛkɛ.
\p
\v 9 Kɛ sɔ̃́ nhonìtì mɔù dɛ̀ bo kòo yètìrì tu Simɔɔ, kòò níí ndɔɔri tidiɛtì kɛ̀ dɛ̀ɛ di Sɑmmɑrii kɔbɛ, kòo yɛ̀mmɛ̀ ńdò nhò tú òmɔù. 
\v 10 Kɛ̀ bɛnìtìbɛ̀ nhò tũ̀, nyibí nɛ̀ bɛkótíbɛ̀ kɛ tú onìtì yie mmɔ̀kɛ Kuyie nkó muwɛ̃rímú diɛmù.
\p
\v 11 Bɛ̀ do ò tũ nkɛ yɛ̃́ ò dɔ̀ɔ̀rimɛ̀ tidiɛtì sɑ̃́ɑ̃̀. 
\v 12 Bɛ̀ yie ndìì mɔ̀nnì kɛ́ntɑ̃́ Fidipu bɛ̀ nɑ̀ɑ́ ntìì nɑ́ɑǹsɑ̀ɑ̀tì, Kuyie nkpɑ̀ɑ̀tìyuu kpɛti, nɛ̀ Yesu kó diyètìrì kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù bɛnitidɑɑbɛ̀ nɛ̀ bɛnitipòbɛ̀. 
\v 13 Kɛ̀ Simɔɔ múnkɛɛ yie nkɛ́ntɑ̃́ Yesu kɛ̀ bɛ̀ɛ ò ɑ̃nnɛ́ bɑ̀tɛ́mmù kòò mbonɛ̀ Fidipu kɛ wúó nho dɔ̀ɔ̀rimɛ̀ tidiɛtì nɛ̀ mɛdɔɔ̀rìmɛ̀ cɑ̀mmɛ̀ kɛ̀ dɛ̀ɛ ò di.
\p
\v 14 Yesu tɔ̃rɛ̀ yɛ̀ɛ̀ bo Sedisɑdɛmmu miɛkɛ kɛ̀ yɛ̀ɛ keè Sɑmmɑrii kɔbɛ yiemmɛ̀ Yesu, kɛ́ bɛ̀ duɔ́nko Piɛri nɛ̀ Isɑ̃ɑ̃. 
\v 15 Kɛ̀ bɛ̀ɛ tuɔkoo kɛ́ bɛ̀ bɑ́ntɛ̀nɛ̀ Kuyie nkɛ̀ bɛ̀ bo pɛ́tɛ́ Muyɑɑ́nsɑ̀ɑ̀mù. 
\v 16 Kɛ yɛ̃́ mù mu ndo í cùtɛ́nímɛ̀ bɛ kóò mɔù ĩ́nkɛ̀, bɛ̀ do bɛ̀ ɑ̃nnɛ́ bɑ̀tɛ́mmù nɛ̀ Yesu kó diyètìrì mɑ́ɑ̀ ndi. 
\v 17 Piɛri nɛ̀ Isɑ̃ɑ̃ kɛ̀ bɛ̀ɛ bɛ̀ nɔ̀ɔ́ nsinɔu kɛ̀ bɛ̀ɛ pɛ́tɛ́ Muyɑɑ́nsɑ̀ɑ̀mù.
\p
\v 18 Kɛ̀ Simɔɔ yɑ̀ bɛ̀ bɛ̀ nɔ̀ɔ́mmɛ̀ sinɔu kɛ̀ Muyɑɑ́nsɑ̀ɑ̀mù cùtɛ́ní kɛ́tɔní idíítí kɛ dɔ̀: 
\v 19 N duɔ́nnɛ̀ dɛ kó muwɛ̃rímú, kɛ̀ n nɔ̀ɔ́ nwè sinɔu wèe pɛ́tɛ́ Muyɑɑ́nsɑ̀ɑ̀mù.
\p
\v 20 Kɛ̀ Piɛrii ò nɑ̀kɛ́ kɛ dɔ̀: Feti nɛ̀ ɑ díítí, kɛ yɛ̃́ ɑ yɛ̀mmɛ̀ dòmmɛ̀ bɛ̀ do nKuyie nkó dipɑ̃nnì nɛ̀ idíítí. 
\v 21 A í kɔkɛ́ dɛ kó mutɔ̃mmú miɛkɛ, ɑ bɑ́ɑ́ pɛ́tɛ́ dɛ kó dipɑ̃nnì, kɛ yɛ̃́ ɑ toti mɛ̀ɛ̀ yɛ̀mmɛ̀ í wennimɛ̀. 
\v 22 Yóu mɛyɛ̀mmɛ̀ yɛimɛ kɛ́ceetɛ kɛ́mɔɔ Kuyie mmɛcĩ́ɛ̃́mmɛ̀ kɛ̀ dɛ̀ nɑɑti kù dɑ cĩ́ɛ̃́ nhɑ toti mɛ̀ɛ̀ yɛ̀mmɛ̀ yɛimɛ. 
\v 23 M bɑntɛ́mu kɛ dò nhɑ mɔkɛ mɛyɛ̀mmɛ̀ yɛimɛ kɛ tú mɛyɛi nkó kudɑɑkù.
\p
\v 24 Kɛ̀ Simɔɔ nɑ́kɛ́ Piɛri nɛ̀ Isɑ̃ɑ̃ kɛ dɔ̀: Di mɔ́mmɔmbɛ bɑ́ntɛ̀nɛ̀ ti Yiɛ̀ nKuyie n kpɛ́í nkɛ̀ di nɑ̀kɛ́ tì bɑ́ n tuɔkɛní.
\p
\v 25 Piɛri nɛ̀ Isɑ̃ɑ̃ kɛ̀ bɛ̀ɛ nɑ́kɛ́ bɛ̀ yɑ̀ dɛ̀ kɛ nɑ́kɛ́ Tinɑ́ɑǹsɑ̀ɑ̀tì kɛ́deè, kɛ́nwɛ̃ti Sedisɑdɛmmu kɛ nɑ́ɑntoo Tinɑ́ɑǹsɑ̀ɑ̀tì Sɑmmɑrii kó yɛhɛkɛ̀ pɛ́u yɛ̀ɛ̀ tɔ̀kɛ́nɛ̀ kucɛ.
\s1 Fidipu nɛ̀ Etiopii kou
\p
\v 26 Kɛ Kuyie ntɔ̃nnìi nɑ́kɛ́ Fidipu kɛ dɔ̀: Ítɛ́ kɛ́kɔtɛ diyiè yìɛ̀ kɛ̀ɛ̀ bíɛ́kɛ̀. Sedisɑdɛmmu kó kucɛ, kùù yìɛ̀ dikpɑ́ɑ̀ cuokɛ̀ kɛ kɔrìnɛ̀ Kɑsɑɑ.
\p
\v 27 Kɛ̀ Fidipuu ítɛ́ kɛ́kɔtɛ kɛ́yɑ̀ Etiopii ɛì kóo nitipokpɑ̀ɑ̀tì Kɑ̃ndɑɑsi kpɑ̀ɑ̀tìcĩ́ɛ̃̀tɛ̀ kóo kótì. Bɛ̀ do ò fɔ̃̀ntɛmu kòo mbɑɑ̀ tikpɑ̀tì. Dɛ̀ do sɔ̃́ nhò boní Sedisɑdɛmmu nwe kɛ kũnti o ciɛ, 
\v 28 kɛ kɑri o nɑɑ̀sɑ̃ntɛ̀ miɛkɛ kɛ kɑɑ̀ nKuyie mpɑ̃ɑ̃nɑ́ɑǹtì nɑ́ɑǹtò Esɑii kó dipɑ́tíri. 
\v 29 Kɛ̀ Muyɑɑ́nsɑ̀ɑ̀mùu nɑ́kɛ́ Fidipu kɛ dɔ̀: Kétóo kɛ́nintɛ dɛ kó tɛnɑɑsɑ̃ntɛ̀.
\p
\v 30 Kɛ̀ Fidipuu cokɛ́ kɛ́tɔ́ɔ́nkoo, kɛ́keè ò kɑ̀ɑ̀mmɛ̀ Kuyie mpɑ̃ɑ̃nɑ́ɑǹtì nɑ́ɑǹtò kó dipɑ́tíri, kòo ò bekɛ kɛ dɔ̀: A bɑntɛ́ ɑ kɑɑ̀ ntɑ̀ɑ̀? 
\v 31 Kòo tɛ̃́nnɛ́ Fidipu kɛ dɔ̀: M bo yĩ́mɛ kɛ́bɑntɛ́ kòò mɔù í n nɑ̀kɛ́ tì tu mù? Kɛ́duɔ́ nkɛ̀ Fidipuu dekoo o nɑɑ̀sɑ̃ntɛ̀ miɛkɛ kɛ́kɑri kóò pɛ̀ɛ́nnɛ̀. 
\v 32 Ò do kɑɑ̀ ntìì nɑ́ɑǹtì tu:
\q1 Ò do dò nfɛpìèfɛ̀ bɛ̀ kɔ̀rinɛ̀ fɛ̀nfɛ mukɔ̀ù,
\q1 dipebii bɛ̀ kɛ̃ĩ́ dìì cìtì kɛ̀ dì cĩ̀ɛ̃́kɛ́,
\q1 ò í ɑ̀ɑ̀tɛ o nùù.
\q1
\v 33 Kɛ kɛ̃kùnnɛ omɑ́ɑ̀ kɛ̀ bɛ̀ ò sènkɛ̀rì,
\q1 koò dɔ̀ɔ̀ bɛ̀ do í dò nkóò dɔ̀ɔ̀ dɛ̀,
\q1 òmɔù bɑ́ɑ́ nɑ kɛ́nɑ́kɛ́ o wuɔ nnɑ ndòmmɛ̀.
\q1 Kɛ yɛ̃́ bɛ̀ ò kùɔmɛ̀mu kɛtenkɛ̀ ĩ́nkɛ̀.
\p
\v 34 Kɛ̀ dɛ kóo ɑ̃ɑ̃pɔ̀nkótìi bekɛ Fidipu kɛ dɔ̀: N dɑ bɑ́ɑ́mmu n nɑ́kɛ́, Kuyie mpɑ̃ɑ̃nɑ́ɑǹtì nɑ́ɑǹtò nɑ̀ɑ́ nhomɑ́ɑ̀ kpɛ́ínɑ́ɑ̀ kòò mɔù kpɛ́í?
\p
\v 35 Dɛ mɔ̀nnì kɛ̀ Fidipuu ò tũ̀ntɛ dɛ kó tinɑ́ɑǹtì, kóò nɑ̀kɛ́ Tinɑ́ɑǹsɑ̀ɑ̀tì, Yesu kpɛti. 
\v 36 Kɛ̀ bɛ̀ nkérí kɛ́tuɔkɛ mɛniɛ mmɑmɛ̀, kɛ̀ weè nìtì dɔ̀: Ntɛ mɛniɛ, bɑ́ ndìítí ɑ bo nhɑ̃nnɛ́mɛ̀ bɑ̀tɛ́mmù? [ 
\v 37 Kɛ̀ Fidipu dɔ̀: Kɑ̀ɑ tɑ̃́ nɛ̀ ɑ yɛ̀mmɛ̀ mɛmɔu dɛ̀ í yóù. Kòò dɔ̀: N tɑ̃́mu kɛ dò nYesu Kirisi tu Kuyie mBirɛ.]
\p
\v 38 Kòo cónnɛ́ tɛnɑɑsɑ̃ntɛ̀ kɛ̀ bɛ̀ɛ tɑ mɛniɛ mmiɛkɛ bɛdɛ́, kɛ̀ Fidipuu ò ɑ̃nnɛ́ bɑ̀tɛ́mmù. 
\v 39 Bɛ̀ yɛ̀nní dìì mɔ̀nnì mɛniɛ mmiɛkɛ, kɛ̀ Muyɑɑ́nsɑ̀ɑ̀mùu túótɛ́ Fidipu, kɛ̀ weè nìtìi ò mɔ̀ńtóo, kɛ́nsɔkɛ́ o cɛ nɛ̀ kuyɛǹnɑɑtí. 
\v 40 Kɛ̀ Fidipu nyóó dɑɑtɛ kɛ bo Asoo, kɛ́sɔɔtɛ́ kɛ́nnɑ́ɑntoo Tinɑ́ɑǹsɑ̀ɑ̀tì yɛhɛkɛ̀ yɛmɔu kɛ yɑ̀ɑ tuɔkɛnɛ̀ Sesɑdee.
\c 9
\s1 Sɔɔri cèètemɛ̀
\r (Yesu Tɔ̃rɛ̀ 22:6-16, 26:12-18)
\p
\v 1 Dɛ kó yɛmɔ̀rɛ̀ kɛ̀ Sɔɔri bɑɑ kpɑɑ́ fɛ̃́ũnko Yesu kɔbɛ kɛ bɛ̀ kɔ̀ù, kɛ́kɔtɛ ikuɔ́ nìùtì diɛwè borɛ̀, 
\v 2 kóò bekɛ yɛpɑ́tɛ kɛ bo kɔtɛ Dɑmɑɑsi kó titííntouti, kɛ́pĩ́mmú Yesu kɔbɛ bɛnitidɑɑbɛ̀ nɛ̀ bɛnitipòbɛ̀ kɛ́boú kɛ́kònnɛ̀ Sedisɑdɛmmu.
\p
\v 3 Mɛm̀mɛ kòò nkérí kɛ́hɑutóo Dɑmɑɑsi kɛ́ nyóó dɑɑtɛ kɛ̀ kuwenniku mɑkù cùtɛ́ní o ĩ́nkɛ̀ kɛ pĩnti. 
\v 4 Kòo do kɛtenkɛ̀, kɛ́keè mɛtɑmmɛ̀ mɑmɛ̀ kɛ̀ mɛ̀ tu: Sɔɔri, Sɔɔri, dɛ̀ yĩ́mɛ kɑ̀ɑ nfɛ̃́ũnko? 
\v 5 Kɛ̀ Sɔɔrii bekɛ kɛ dɔ̀: Fɔ̃́ nwe nni nwe kɛ̀ mɛ̀ɛ ò tɛ̃̀ńnɛ́ kɛ dɔ̀: Mí nYesu nwe ɑ fɛ̃́ũnkomɛ̀. 
\v 6 A nɛ́ ítɛ́ kɛ́tɑ dihɛì kɛ̀ bɛ̀ dɑ nɑ́kɛ́ ɑ dò nkɛ́dɔɔ̀mɛ̀.
\p
\v 7 Bɛ̀ɛ̀ ò nɛínɛ̀ kɛ̀ bɛ̀ɛ keè mɛtɑmmɛ̀ bɛ̀ mɛ nyí nyɑ̀ wèè nɑ̀ɑ́, kɛ̀ dɛ̀ɛ bɛ̀ di kɛ̀ bɛ̀ ndò nyúóó. 
\v 8 Kɛ̀ Sɔɔrii ítɛ́ní kɛ́wéntɛ́ ò í nnɑ kɛ́yɑ̀ dɛ̀mɑrɛ̀, kɛ̀ bɛ̀ɛ ò dɛ̀tɛ kɛ́kɔtɛnɛ̀ Dɑmɑɑsi. 
\v 9 Kòo mbo, kɛ dɔ̀ yɛwe yɛ̀tɑ̃ɑ̃ti bɑ́ ò í wúó, nhò í yo, nhò mɛ nyí yɔ̃̀.
\p
\v 10 Kɛ sɔ̃́ nYesu kou mɔù dɛ̀ bo kòo yètìrì tu Anɑnniyɑɑsi, kɛ̀ Kuyie nhò yu kɛ dɔ̀: Anɑnniyɑɑsi! Kòò dɔ̀: N Yiɛ̀ ntɛ mí! 
\v 11 Kɛ̀ kùu ò nɑ̀kɛ́ kɛ dɔ̀: Ítɛ́ kɛ́kɔtɛ kucɛ bɛ̀ tu kù kucɛ kùù sìɛ́, Sudɑɑsi cĩ́ɛ̃̀tɛ̀, kɛ́bekɛ bɛ̀ tú wè Sɔɔri Tɑɑsi kou, kòò m bɑ̀ɑ́. 
\v 12 Kɛ̀ nh ò bɛnkɛ òmɔù kòo yètìrì tu Anɑnniyɑɑsi, kòò kɔ̀too koò nɔ̀ɔ́ sinɔu kɛ bɑ́ntɛ̀ Kuyie nkòò bo wɛ̃tɛ kɛ́wéntɛ́. 
\v 13 Kɛ̀ Anɑnniyɑɑsii bɛ́i nkɛ dɔ̀: N Yiɛ̀! Bɛnìtìbɛ̀ pɛ́u n nɑ̀kɛ́mu dɛ kóo nìtì dɔ̀ɔ̀ mɛ̀ɛ̀ yɛi nhɑ kɔbɛ Sedisɑdɛmmu miɛkɛ. 
\v 14 Kɛ̀ ikuɔ́ nìùbɛ̀ kó bɛkótíbɛ̀ ò duɔ́ ndinùù kòò bo pĩ́mmú bɛ̀ɛ̀ tu ɑ kɔbɛ kɛ́boú. 
\v 15 Kɛ̀ ti Yiɛ̀ nhò nɑ̀kɛ́ kɛ dɔ̀: Kɔtɛ kɛ̀ míì ò tɑ̃ɑ̃tɛ́ kòò bo nɑ́kɛ́ n kpɛ́í nyɛbotɛ̀ nɛ̀ bɛkpɑ̀ɑ̀tìbɛ̀ nɛ̀ Isidɑyɛɛribɛ. 
\v 16 N yóó ò bɛnkɛmu ò dò nkɛ́fɛ̃́ṹtɛ́ mɛ̀ɛ̀ botí n kpɛ́í.
\p
\v 17 Kɛ̀ Anɑnniyɑɑsii kɔtɛ kɛ́nɔ́ɔ́ sinɔu Sɔɔri ĩ́nkɛ̀ kɛ dɔ̀: N tebitɛ Sɔɔri! Ti Yiɛ̀ nwèè dɑ bɛnkɛ omɑ́ɑ̀ kucɛ weè n tɔ̃nní kɑ̀ɑ bo wɛ̃tɛ kɛ́wéntɛ́ kɛ̀ Muyɑɑ́nsɑ̀ɑ̀mù dɑ píɛ.
\p
\v 18 Dɛ mɔ̀nnì kɛ̀ dɛ̀mɑrɛ̀ɛ yɛnní o nuɔ kɛ donnɛ̀ yɛyĩnyìɛ́ɛ́kɛ̀ kɛ́do, kòò wɛ̃tɛ kɛ́wéntɛ́, kɛ̀ bɛ̀ɛ ò ɑ̃nnɛ́ bɑ̀tɛ́mmù. 
\v 19 Kòo di, kɛ́wɛ̃tɛ kɛ́pɛ́tɛ́ muwɛ̃rímú.
\s1 Sɔɔri nɑ̀kɛ́mɛ̀ Yesu kpɛ́í Dɑmɑɑsi
\p Kòò nkpɑɑ́ Dɑmɑɑsi kɛ dɔ̀ yɛwe sɑ́m̀pɔ́ kɛ bonɛ̀ Yesu kɔbɛ. 
\v 20 Kɛ pɑ̃̀nkɛ nnɑ́ɑ́ titííntouti miɛkɛ Yesu túmɛ̀ Kuyie mBirɛ. 
\v 21 Kɛ̀ dɛ̀ɛ di bɛ̀ɛ̀ kó dimɑ̀ɑ̀ tì kèè kɛ̀ bɛ̀ ntú: Dɛ̀ í do nwèè do fɛ̃́ũnko wènwe Yesu kɔbɛ Sedisɑdɛmmɑɑ? Ò í kɔ̀tɛní kɛ bo bɛ̀ pĩ̀ḿmúmu kɛ́boú kɛ́duɔ́ nyikuɔ́ nìùbɑ̀ɑ̀?
\p
\v 22 Kɛ̀ Sɔɔri dɔkɛ ńkpénkú Kuyie nnɑ́ɑǹtì miɛkɛ, kɛ nɑ́ɑ́ nSifubɛ bɛ̀ɛ̀ bo Dɑmɑɑsi miɛkɛ Yesu túmɛ̀ Kirisi.
\p
\v 23 Kɛ̀ dɛ̀ɛ yíɛ́ kɛ́mɔntɛ sɑ́m̀pɔ́ kɛ̀ Sifubɛɛ dɑkɛ kɛ bo kuɔ Sɔɔri, 
\v 24 kɛ́mbɑɑ yɛbòrɛ̀ kɛyènkɛ̀ nɛ̀ kuyie nkɛ̀ dɛ̀ bo yie nkɛ̀ bɛ̀ɛ̀ ò kùɔ. 
\v 25 Kɛ̀ Yesu kɔbɛɛ ò tùótɛ́ nɛ̀ dimɑ́mmùyɑ́ɑ̀ kɛyènkɛ̀ mɑkɛ̀ kɛ́sée nkuduotí.
\s1 Sɔɔri wɛ̃nnɛ́mmɛ̀ Yesu tɔ̃rɛ̀
\p
\v 26 Kɛ̀ Sɔɔrii tuɔkɛ Sedisɑdɛmmu kɛ́ndɔ́ kɛ́wɛ̃nnɛ́nɛ̀ Yesu kɔbɛ, kɛ̀ bɛ̀ nhò dé, bɛ̀ í ntɑ̃́ kɛ dò nhò mɛ̀nkɛ cɔutɛ́ Yesu. 
\v 27 Kɛ̀ Bɑnnɑbɑɑsii ò niitɛ́ Yesu tɔ̃rɛ̀ borɛ̀, kɛ́ bɛ̀ nɑ̀kɛ́ ò yɑ̀ mɛ̀ɛ̀ botí ti Yiɛ̀ nnɛ̀ ti Yiɛ̀ nhò nɑ̀kɛ́ tì, nɛ̀ ò nɑ̀kɛ́ mɛ̀ɛ̀ botí ti Yiɛ̀ nkpɛ́í Dɑmɑɑsi miɛkɛ nɛ̀ dikɔ̃m̀bùɔ̀. 
\v 28 Kɛ̀ bɛ̀ɛ ò cɔutɛ́, kɛ̀ bɛ̀ nwɛ̃ nkɛ ceǹtì Sedisɑdɛmmu kɛ nɑ́ɑ́ nYesu kpɛ́í nɛ̀ dikɔ̃m̀bùɔ̀. 
\v 29 Kòò múnkɛ nnɑ́ɑ́ Sifubɛ bɛ̀ɛ̀ nɑ̀ɑ́ kɛrɛki, kɛ̀ bɛ̀ nɛ̀i kɛ̀ bɛ̀ nwɑnti kɛ bo ò kùɔ. 
\v 30 Kòo kɔbɛɛ tì kèè, kóò kɔ̀tɛnɛ̀ Sesɑdee kòò bo kò nTɑɑsi.
\p
\v 31 Dɛ kó yɛmɔ̀rɛ̀ miɛkɛ Kirisi kɔbɛ bɛ̀ɛ̀ bo Sudee nɛ̀ Kɑdidee nɛ̀ Sɑmmɑrii dɛ kó itempɛ̃ mmiɛkɛ kɛ̀ bɛ̀ɛ om̀pɛ̀, kɛ́nkpénkú Kuyie nnɑ́ɑǹtì miɛkɛ kɛ sṹũnko kɛ̀ Muyɑɑ́nsɑ̀ɑ̀mù bɛ̀ bonɛ̀.
\s1 Piɛri miɛkùnnɛmɛ̀ Endee
\p
\v 32 Kɛ̀ Piɛri ńceǹtì tipíìtì timɔu kɛ síètɛ Yesu kɔbɛ, kɛ́kɔtɛ Didɑɑ ɛì kɔbɛ borɛ̀. 
\v 33 Kɛ nsɔ̃́ nhonìtì mɔù bɛ̀ tú wè Endee nɑɑ́ kuhɔ̀ùkù, yɛbie nyɛ̀ni kɛ dɔu. 
\v 34 Kɛ̀ Piɛrii ò nɑ̀kɛ́ kɛ dɔ̀: Endee Yesu Kirisi dɑ miɛkùnnɛmu! Ítɛ́ kɛ́túótɛ́ ɑ dɔ́ù!
\p Dɛndɛ bɑ̀mbɑ̀ nkòo ítɛ́. 
\v 35 Kɛ̀ Didɑɑ ɛì kɔbɛ bɛmɔu nɛ̀ Sɑnɔɔ ɛì kó kutempɛ̃ nkɔbɛ kɛ̀ bɛ̀ɛ ò yɑ̀ kɛ́yie nYesu.
\s1 Piɛri fòùkùnnɛmɛ̀ Dɔrikɑɑsi
\p
\v 36 Onitipòkù mɔù weè do bo Sopee kòo yètìrì tu: Tɑbitɑɑ, nɛ̀ kɛrɛki kó tinɑ́ɑǹtì Dɔrikɑɑsi, kòò dɔ̀ɔ̀ri mɛsɑ̀ɑ̀ kɛ teénnɛ̀ bɛcĩ̀rìbɛ̀, 
\v 37 kɛ́muɔkɛ kɛ́kú kɛ̀ bɛ̀ɛ ò wùɔ kɛ́dɔú nkudɑ̀nkù kudieku. 
\v 38 Kɛ̀ Yesu kɔbɛɛ keè Piɛri bomɛ̀ Didɑɑ kɛ tɔ́kɛ́nɛ̀ Sopee, kɛ́tɔ̃ mbɛnìtìbɛ̀ bɛ̀dɛ́bɛ̀, kɛ̀ bɛ̀ bo ò bɑ́ntɛ̀ kòo kɔtɛní mɛcɑ̃ɑ̃. 
\v 39 Kɛ̀ Piɛri pɑ̃̀nkɛɛ ítɛ́ kɛ́ bɛ̀ nɛinɛ̀ kɛ̀ bɛ̀ɛ tuɔkɛ kɛ́dekɛ kudɑ̀nkù kudieku, kɛ̀ bɛkúpobɛ̀ kɑ̀ri kɛ kuɔ̀, nkóò bɛnkɛ Dɔrikɑɑsi do kpɑɑ́ kɛ fòù kɛ́ bɛ̀ dùɔ̀kɛ yɛ̀ɛ̀ yɑɑ̀bòrɛ̀. 
\v 40 Kɛ̀ Piɛrii dennɛ bɛnìtìbɛ̀ bɛmɔu kɛ́nínkú kɛbɑ́ntɛ̀ nKuyie kɛ́wɛ̃ɛ̃tɛ ocíì bíɛ́kɛ̀ kɛ dɔ̀: Tɑbitɑɑ, ítɛ́!
\p Kòo wéntɛ́ní kóò yɑ̀, kɛ ítɛ́, kɛ́kɑri. 
\v 41 Kɛ̀ Piɛrii pĩ́ nho nɔ̀ùtɛ̀ kóò teennɛ̀ kòo ítɛ́ kɛ́cómmú, kòo yu Yesu kɔbɛ nɛ̀ bɛkúpobɛ̀ kɛ́ wè mbɛ̀ bɛnkɛ kòo fòùtɛ. 
\v 42 Kɛ̀ Sopee kɔbɛ bɛmɔuu tì kèè kɛ̀ kusṹkùu yie nYesu. 
\v 43 Kɛ̀ Piɛri mbo Sopee kɛ́mɔntɛ. Ò do bo okɔ̃nnuurìwè mɔù cĩ́ɛ̃̀tɛ̀ ntɛ kɛ̀ bɛ̀ ò tú Simɔɔ.
\c 10
\s1 Kɔrinɛi yumɛ̀ Piɛri
\p
\v 1 Onìtì mɔù weè do bo Sesɑdee kòo yètìrì tu Kɔrinɛi, kòo tu ohɑ̃ɑ̃pɔ̀nkótì, kɛ ni Odommu kó tihɑ̃ɑ̃pɔ̀ntì tɛkɔ̀ùtɛ̀ (100), 
\v 2 kɛ dɔ́ Kuyie nnɛ̀ o cĩ́ɛ̃̀tɛ̀ tɛmɔu, kɛ kù dé, kɛ kù bɑ̀ɑ́ nsɑ̃́ɑ̃̀ kɛ pɑ̃ɑ̃ nyɛpɑ̃rɛ̀ Sifubɛ kó bɛcĩ̀rìbɛ̀. 
\v 3 Diyiè mɑrì kuyuoku tɛwebiètɛ̀ mɛ̀tɑ̃ɑ̃ti mɔ̀nnì kɛ̀ Kuyie ntɔ̃nnìi tɑroo o cĩ́ɛ̃̀tɛ̀ kòo di yɑ̀ weti weti, kɛ̀ dìi ò yu kɛ dɔ̀: Kɔrinɛi.
\p
\v 4 Kòo dì wèńtɛ́ kɛ̀ kufɔ̃wɑɑ́ nhò ɑutɛ́ kòò dɔ̀: N Yiɛ̀ ndɛ̀ dòmmɛ? Kɛ̀ dìi ò nɑ̀kɛ́ kɛ dɔ̀: Kuyie ncɔutɛ́mu ɑ bɑ́ɑ́mmu, kɛ pɛ́nsìrì ɑ pɑ̃rɛ̀ ɑ pɑ̃ɑ̃ nyɛ̀ bɛcĩ̀rìbɛ̀, kɛ dɑ̀ɑ̀tɛní ɑ kpɛ́í. 
\v 5 Tɔ̃ mbɛnìtìbɛ̀ Sopee kɛ̀ bɛ̀ɛ yúní Simɔɔ bɛ̀ tu wè Piɛri. 
\v 6 Ò bo Simɔɔ okɔ̃nnuurìwè cĩ́ɛ̃̀tɛ̀ ntɛ dɑ̀mɛ́ɛ̀rì tɑkɛ́.
\p
\v 7 Kuyie ntɔ̃nnì ò nɑ̀kɛ́ kɛ́deè kɛ́ítɛ́, kòo yú o tɔ̃mbɛ̀ bɛ̀dɛ́bɛ̀ nɛ̀ kuhɑ̃ɑ̃pɔ̀nkù ò tɑ̃́ kù, kɛ̀ kù dɔ́ Kuyie, 
\v 8 kɛ́ bɛ̀ nɑ̀kɛ́ dɛ̀ dɔ̀ɔ̀ mɛ̀ɛ̀ botí kɛ́deè kɛ́ bɛ̀ tɔ̃ nSopee.
\s1 Kuyie mbɛnkɛmɛ̀ Piɛri dɛ̀mɑrɛ̀
\p
\v 9 Kɛ̀ dɛ̀ɛ wentɛ́ kɛ̀ bɛ̀ nkérí kɛ tɔ́ɔ́nnɛ̀nko Sopee, kɛ̀ Piɛri dèkɛ kudɑ̀nkù kɛ bo dɔu nKuyie kɛ̀ diyiè còḿmú yɛyɔ. 
\v 10 Kɛ̀ dikònnìi ò pĩ nkɛ̀ bɛ̀ nhò bèrí mudiì, kɛ̀ Kuyie nhò bɛnkɛ dɛ̀mɑrɛ̀. 
\v 11 Kòo yɑ̀ tiwɛtì kpetɛ́mɛ̀ kɛ̀ dɛ̀mɑrɛ̀ cutiní kɛĩ́nkɛ̀ kɛ dònnɛ̀ kuyɑ̀ɑ̀kù, kɛ píítí dɛ píìtì tìnɑ̀ɑ̀ kɛ tɔ́ɔntɛnì kɛtenkɛ̀. 
\v 12 Kɛ̀ iwũɔ̃ imɔu botí bo dɛ miɛkɛ: Itɑ̀ɑ̀kɛ ìnɑ̀ɑ̀ kpɛyi nɛ̀ iwɑ̀ɑ̀kɛ nɛ̀ tinɔ̀tì tibotí tibotí. 
\v 13 Kòo keè mɛtɑmmɛ̀ mɑmɛ̀ kɛ̀ mɛ̀ tu: Piɛri ítɛ́ kɛ́kuɔ kɛ́cɑ́ɑ́kɛ́. 
\v 14 Kɛ̀ Piɛrii yetɛ kɛ dɔ̀: Áɑ̀ n Yiɛ̀! N yí di diyiè mɑrì ikuɔ́ yetɛ dɛ̀ nɛ̀ dɛ̀ɛ̀ í wenni. 
\v 15 Kɛ̀ mɛtɑmmɛ̀ɛ yíɛ́ kɛ dɔ̀: Bɑ́ nwúó nKuyie nyĩ dɛ̀ɛ̀ wenni kɛ tú dɛ̀ sĩ̀.
\p
\v 16 Kɛ̀ dɛ̀ mmɛ nhɔ̃ kɛ dɔ̀ kucɛ mɛ̀tɑ̃ɑ̃ti kɛ́wɛ̃too kɛĩ́nkɛ̀.
\p
\v 17 Kɛ̀ Piɛri ntoti o yɛ̀mmɛ̀ kɛ bo yɑ̀ Kuyie ndɔ́ kóò nɑ̀kɛ́ tì kɛ dɛ̀ nhò bɛnkɛ, kɛ̀ Kɔrinɛi tɔ̃nní bɛ̀ tùɔ̀kɛní kɛ cómmú dibòrì, 
\v 18 kɛ́bekɛ kɛ dɔ̀: Diɛ ndɛ Simɔɔ bɛ̀ tú wè Piɛri ò bomɑ̀ɑ̀?
\p
\v 19 Kɛ̀ Piɛri bɑɑ nkpɑɑ́ toti o yɛ̀mmɛ̀ kɛ̀ Muyɑɑ́nsɑ̀ɑ̀mùu ò nɑ̀kɛ́ kɛ dɔ̀: Bɛnìtìbɛ̀ bɛtɑ̃ɑ̃ti biɛ nkɔ̀tɛní ɑ borɛ̀ ndɛ. 
\v 20 Cútóo kɛ́ bɛ̀ nɛinɛ̀, kɛ bɑ́ nyĩɛ̃̀kù, míì bɛ̀ tɔ̃nní.
\p
\v 21 Kɛ̀ Piɛrii cútóo kɛ́ bɛ̀ nɑ̀kɛ́ kɛ dɔ̀: Míì tú onìtì di wɑɑ̀ nwè, di yɛ̃ mbɑ? 
\v 22 Kɛ̀ bɛ̀ dɔ̀: Ohɑ̃ɑ̃pɔ̀nkótì Kɔrinɛi wèè dɔ̀ɔ̀ri Kuyie ndɔ́ dɛ̀, kɛ kù dé, kɛ̀ Sifubɛ bɛmɔu ò dɔ́, Kuyie ntɔ̃nnì we nnɑ̀kɛ́ kòò ti tɔ̃nní kɛ tú ɑ kɔtoo kóò nɑ̀kɛ́ ɑ mɔkɛ tì.
\p
\v 23 Kɛ̀ Piɛrii bɛ̀ cɔutɛ́, kɛ̀ bɛ̀ɛ yié.
\p Kɛ̀ dɛ̀ɛ wentɛ́ kɛ̀ bɛ̀ɛ nɛi, kɛ̀ Yesu kɔbɛ bɛ̀ɛ̀ bo Sopee kɛ̀ bɛ kó bɛ̀mɑbɛ̀ɛ ò cíe. 
\v 24 Di wentírì kɛ̀ bɛ̀ ntuɔ̀kòo Sesɑdee kɛ sɔ̃́ nKɔrinɛi yu o cĩ́ɛ̃̀tɛ̀ kɔbɛ bɛmɔu nɛ̀ o nɛ́posɑ̀ɑ̀bɛ̀ kɛ̀ bɛ̀ ò bɑ̀ɑ. 
\v 25 Kɛ̀ Piɛri ńtɑtoo kɛ̀ Kɔrinɛii ítɛ́ kóò co kɛ́nínkóo o ììkɛ̀. 
\v 26 Kɛ̀ Piɛrii ò íinní kɛ dɔ̀: N tú ɑ nititɔù nwe.
\p
\v 27 Kɛ̀ bɛ̀ nnɑ́ɑntɛ kɛ́tɑroo kɛ̀ bɛnìtìbɛ̀ tìkú pɛ́u. 
\v 28 Kɛ̀ Piɛrii bɛ̀ nɑ̀kɛ́ kɛ dɔ̀: Di yɛ̃́mu kɛ dò nSifubɛ ci bɛ̀ bo tɑmɛ̀ wèè í tú Sifu o cĩ́ɛ̃̀tɛ̀, mí nKuyie nnɛ́ n nɑ̀kɛ́mu kɛ tú m bɑ́ nwúó nhòmɔù osĩ̀nwè. 
\v 29 Dɛɛ̀ te kɛ̀ di n yu kɛ̀ n yie nkɛ kɔ̀tɛní, n nɑ́kɛ́nɛ̀ di n yu mùù kpɛ́í.
\p
\v 30 Kɛ̀ Kɔrinɛi dɔ̀: Dɛ̀ mɔ̀kɛ yíe nyɛwe yɛ̀nɑ̀ɑ̀ n sòò bɑ́ɑ́mmɛ̀ Kuyie, kɛ̀ tɛwebiètɛ̀ bo mɛ̀tɑ̃ɑ̃ti, kɛ̀ nní nyóó dɑɑtɛ kɛ́yɑ̀ onìtì mɔù kòò còḿmú n yììkɛ̀ kɛ ɑ̃ tiyɑ̀ɑ̀tì kɛ̀ tì mìɛ̀ti, 
\v 31 kɛ n nɑ́kɛ́ kɛ dɔ̀: Kɔrinɛi, Kuyie ncɔutɛ́mu ɑ bɑ́ɑ́mmu, kù í yɛ̃̀ nhɑ pɑ̃rɛ̀, ɑ pɑ̃ɑ̃ nyɛ̀ bɛcĩ̀rìbɛ̀. 
\v 32 Tɔ̃ mbɛnìtìbɛ̀ Sopee kɛ̀ bɛ̀ɛ yúní Simɔɔ bɛ̀ tú wè Piɛri, ò bo okɔ̃nnuurìwè mɔù cĩ́ɛ̃̀tɛ̀ kɛ̀ bɛ̀ ò tu Simɔɔ, kòò bo dɑ̀mɛ́ɛ̀rì tɑkɛ́. 
\v 33 Mɛm̀mɛ kɛ̀ m pɑ̃̀nkɛɛ tɔ̃ mbɛnìtìbɛ̀ kɛ̀ bɛ̀ bo dɑ yúní, kɑ̀ɑ yie nkɛ kɔ̀tɛní. Ti tíkú diɛ nKuyie nyììkɛ̀ kɛ bo keè Kuyie ndɑ duɔ́ ntìnti kɑ̀ɑ bo ti nɑ́kɛ́.
\s1 Piɛri nɑ̀kɛ́mɛ̀ Kuyie nnɑ́ɑǹtì Kɔrinɛi cĩ́ɛ̃̀tɛ̀
\p
\v 34 Kɛ̀ Piɛrii bɛ́i nkɛ dɔ̀: M bɑntɛ́mu di mmɔ̀nnì kɛ dò nKuyie nyí bɑɑ̀tì òmɔù. 
\v 35 Bɑ́ kùù botí miɛkɛ wèè kù dé kɛ dɔɔ̀ri kù dɔ́mɛ̀ kù we ndɔ́. 
\v 36 Kuù tu bɛnìtìbɛ̀ bɛmɔu Yiɛ̀, kɛ duɔ́ nkɛ̀ bɛ̀ nɑ̀kɛ́ Isidɑyɛɛribɛ Tinɑ́ɑǹsɑ̀ɑ̀tì tìì bo tɑunnɛ̀ bɛnìtìbɛ̀ Kuyie nnɛ̀ Yesu Kirisi kpɛ́í. 
\v 37 Di yɛ̃́mu tìì dɔ̀ɔ̀ Sudee omɔu nɛ̀ Kɑdidee Isɑ̃ɑ̃ ɑ̃nnɛ́ dìì mɔ̀nnì bɛnìtìbɛ̀ bɑ̀tɛ́mmù kɛ́deè. 
\v 38 Di yɛ̃́mu Kuyie ntɑ̃ɑ̃tɛ́mɛ̀ Yesu Nɑnsɑrɛti kou, kóò duɔ́ Muyɑɑ́nsɑ̀ɑ̀mù nɛ̀ muwɛ̃rímú kòo ncentì tipíìtì timɔu kɛ miɛkùnko dibɔɔ̀ fɛ̃́ũnko bɛ̀, kɛ yɛ̃́ Kuyie nhò bonɛ̀mɛ̀. 
\v 39 Kɛ̀ ti yɑ̀ ò dɔ̀ɔ̀ dɛ̀ dɛmɔu Sifubɛ kó kɛtenkɛ̀ Sedisɑdɛmmu nɛ̀ yɛhɛkɛ̀ yɛmɔu. Kɛ̀ bɛ̀ ò bɑɑkɛ́ kudɑpɑ̃ɑ̃tí kɛ kùɔ. 
\v 40 Kɛ̀ Kuyie nhò fòùkùnnɛ diyiè tɑ̃ɑ̃́nnì yiè kɛ duɔ́ nkòò ti bɛnkɛ omɑ́ɑ̀. 
\v 41 Tínti kù tɑ̃ɑ̃tɛ́ bɛ̀ nɛ̀ dimɔ̀nnì kɛ̀ ti bo nɑ́kɛ́ o kpɛ́í, kɛ̀ ti ò wɛ̃nnɛ́nɛ̀ kɛ di kɛ yɑ̃̀. 
\v 42 Kòò yɛ̃ nti nnɑ́ɑ́ mbɛnìtìbɛ̀, weè túmɛ̀ Kuyie ntɑ̃ɑ̃tɛ́ wè kòò bo bekɛ́nɛ̀ bɛfòùbɛ̀ nɛ̀ bɛcíríbɛ̀. 
\v 43 Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu nɑ̀kɛ́ weè kpɛ́í nkɛ tú wèè ò tɑ̃́ kùu ò cĩ̀ɛ̃́ nho yɛi nnɛ̀ o kó diyètìrì kpɛ́í.
\s1 Muyɑɑ́nsɑ̀ɑ̀mù cùtɛ́nímɛ̀ bɛ̀ɛ̀ í tú Sifubɛ bɛ ĩ́nkɛ̀
\p
\v 44 Piɛri kpɑɑ́ kɛ nɑ́ɑ́ mɛmmɛ kɛ̀ Muyɑɑ́nsɑ̀ɑ̀mùu cútɛ́ní ò nɑ̀ɑ́nnɛ̀ bɛ̀ ĩ́nkɛ̀. 
\v 45 Kɛ̀ dɛ̀ɛ di Sifubɛ bɛ̀ɛ̀ tu Yesu kɔbɛ kɛ nɛínɛ̀ Piɛri, Muyɑɑ́nsɑ̀ɑ̀mù Kuyie nduɔ̀ mmù cùtɛ́nímɛ̀ bɛ̀ɛ̀ í tú Sifubɛ bɛ ĩ́nkɛ̀. 
\v 46 Kɛ yɛ̃́ bɛ̀ do yomɛ̀ kɛ̀ bɛ̀ nɑ̀ɑ́ ntinɑ́ɑǹcɑ̀ntì kɛ sɑ̃ntí Kuyie nkù dɛumɛ̀. 
\v 47 Kɛ̀ Piɛri dɔ̀: Ti bo nɑ kɛ́yetɛ ti bo bɛ̀ ɑ̃nnɛ́mɛ̀ bɑ̀tɛ́mmù mɛniɛ nkou, bɛmbɛ Muyɑɑ́nsɑ̀ɑ̀mù cùtɛ́ní bɛ̀ɛ̀ ĩ́nkɛ̀ mù cùtɛ́ní mɛ̀ɛ̀ botí ti ĩ́nkɑ̀ɑ̀?
\p
\v 48 Mɛm̀mɛ kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù nɛ̀ Yesu Kirisi kó diyètìrì, kɛ́deè kɛ̀ bɛ̀ɛ ò bɑ́ntɛ̀ kɛ dɔ̀ ò nkpɑɑ́ bɛ borɛ̀ yɛwe sɑ́m̀pɔ́.
\c 11
\s1 Bɛ̀ kpɑnnɛ̀mɛ̀ Piɛri ò kɔ̀tɛmɛ̀ Kɔrinɛi cĩ́ɛ̃̀tɛ̀
\p
\v 1 Yesu tɔ̃rɛ̀ nɛ̀ Yesu kɔbɛ bɛ̀ɛ̀ bo Sudee kɛ̀ bɛ̀ɛ keè bɛ̀ɛ̀ í tú Sifubɛ bɛ̀ cɔutɛ́mɛ̀ Kuyie nnɑ́ɑǹtì. 
\v 2 Piɛri wɛ̃̀too dìì mɔ̀nnì Sedisɑdɛmmu, kɛ̀ Sifubɛ bɛ̀ɛ̀ tu Yesu kɔbɛ kɛ̀ bɛ̀ nhò kpɑ̀nnɛ̀ kɛ tú: 
\v 3 Dɛ̀ dòmmɛ kɑ̀ɑ kɔ̀tɛ bɛ̀ɛ̀ í cɑ̃mmù bɛ ciɛ kɛ di wɛ̃nnɛ́ kɛ di?
\p
\v 4 Kɛ̀ Piɛrii tuú nkɛ́ bɛ̀ nɑ̀kɛ́ dɛ̀ɛ̀ dɔ̀ɔ̀ dɛmɔu kɛ dɔ̀: 
\v 5 N sòò bo Sopee ɛì miɛkɛ nkɛ, kɛ́ mbɑ́ɑ́ nKuyie, nkɛ̀ kù m bɛnkɛ dɛ̀mɑrɛ̀ kɛ̀ dɛ̀ dònnɛ̀ kuyɑ̀ɑ̀kù kɛ píítí tipíìtì tìnɑ̀ɑ̀, kɛ cutiní kɛĩ́nkɛ̀ kɛ n tɔ́ɔntɛnní kɛ̀ dɛ̀ n di. 
\v 6 Kɛ̀ n wéntɛ́ dɛ miɛkɛ kɛ́yɑ̀ iwũɔ̃ itɑ̀ɑ̀kɛ ìnɑ̀ɑ̀ kpɛyi nɛ̀ iwɑ̀ɑ̀kɛ nɛ̀ tinɔ̀tì timɔu botí, 
\v 7 kɛ́keè mɛtɑmmɛ̀ mɑmɛ̀ túmɛ̀: Piɛri ítɛ́ kɛ́kuɔ kɛ́cɑ́ɑ́kɛ́. 
\v 8 Kɛ̀ n dɔ̀: Áɑ̀ n Yiɛ̀! N yí di diyiè mɑrì ikuɔ́ ci dɛ̀ nɛ̀ dɛ̀ɛ̀ í wenni. 
\v 9 Kɛ̀ mɛtɑmmɛ̀ɛ yíɛ́ kɛ dɔ̀: Bɑ́ nwúó ndɛ̀mɑrɛ̀ Kuyie nyĩ dɛ̀ɛ̀ wenni kɛ tú dɛ̀ sĩ̀. 
\v 10 Kɛ̀ dɛ mmɛ nhɔ̃ kɛ dɔ̀ kucɛ mɛ̀tɑ̃ɑ̃ti kɛ́wɛ̃too kɛĩ́nkɛ̀. 
\v 11 Dɛ mɔ̀nnì kɛ̀ bɛnìtìbɛ̀ bɛ̀tɑ̃ɑ̃ti tùɔ̀kɛní kɛ boní Sesɑdee kɛ̀ bɛ̀ bɛ̀ tɔ̃nní m borɛ̀. 
\v 12 Kɛ̀ Muyɑɑ́nsɑ̀ɑ̀mù n nɑ́kɛ́ kɛ dɔ̀: Kɔtɛ kɛ bɑ́ nyĩɛ̃̀kù. Kɛ̀ ti kɔbɛ bɛkuɔ̀ biɛ nni ncíe nkɛ̀ tí kɔtɛ kɛ́tɑ Kɔrinɛi cĩ́ɛ̃̀tɛ̀. 
\v 13 Kòo ti nɑ́kɛ́ ò yɑ̀mɛ̀ Kuyie ntɔ̃nnì o cĩ́ɛ̃̀tɛ̀ miɛkɛ, kɛ̀ dì ò nɑ̀kɛ́ kɛ tú: Wèe tɔ̃ mbɛnìtìbɛ̀ Sopee kɛ̀ bɛ̀ɛ yúní Simɔɔ bɛ̀ tú wè Piɛri. 
\v 14 Kòo ò nɑ̀kɛ́ tinɑ́ɑǹtì tìì bo ò dɛɛtɛ́ wenwe nɛ̀ o cĩ́ɛ̃̀tɛ̀ kɔbɛ. 
\v 15 Kɛ̀ nní ntì mbɛ̀ nɑ̀ɑ́ nkɛ̀ Muyɑɑ́nsɑ̀ɑ̀mùu cútɛ́ní bɛ ĩ́nkɛ̀ kɛ́ndònnɛ̀ mù cùtɛ́nímɛ̀ ti ĩ́nkɛ̀ mɛketimɛ̀ mɔ̀nnì. 
\v 16 Kɛ̀ n dentɛní ti Yiɛ̀ ndo bɛ́i ntì kɛ tú: Isɑ̃ɑ̃ do ɑ̃ɑ̃̀ bɑ̀tɛ́mmù nɛ̀ mɛniɛ mmɛ, díndi bɛ̀ bo di ɑ̃nnɛ́ bɑ̀tɛ́mmù nɛ̀ Muyɑɑ́nsɑ̀ɑ̀mù. 
\v 17 Kɛ̀ Kuyie mbɛ̀ pɑ̃ dipɑ̃nnì kù pɑ̃ di tínti bɛ̀ɛ̀ cɔutɛ́ Yesu Kirisi, yé n tú wè kɛ̀ míì bo pɑɑ nKuyie nkó mutɔ̃mmú!
\p
\v 18 Bɛ̀ kèè dìì mɔ̀nnì dɛ kó tinɑ́ɑǹtì kɛ̀ bɛ miɛkɛɛ do kɛ̀ bɛ̀ nsɑ̃ntí Kuyie nkɛ tú: Kuyie ntũ nkpetɛ́mu kucɛ bɛ̀ɛ̀ í tú Sifubɛ kɛ̀ bɛ̀ bo ceetɛ kɛ́pɛ́tɛ́ mufòmmu mùù bo sɑ̃́ɑ̃̀.
\s1 Mɛfɛ̃́ṹtímɛ̀ mɛ̀ɛ̀ cíɛ nYesu kɔbɛ
\p
\v 19 Bɛ̀ do kùɔ Etiɛnni kɛ́deè kɛ̀ mɛfɛ̃́ṹtímɛ̀ mɛɛ̀ tɑnní kɛ̀ Yesu kɔbɛɛ cíɛ́tɛ́ tipíìtì timɔu, kɛ́kɔtɛ Fenisii nɛ̀ Sipiri nɛ̀ Ãntiyɔsi kɛ́nnɑ́ɑntɛ Tinɑ́ɑǹsɑ̀ɑ̀tì Sifubɛ mɑ́ɑ̀. 
\v 20 Dɛ mɔ̀nnì Yesu kɔbɛ bɛ̀ɛ̀ bo Sipiri nɛ̀ Sidɛnni kɛ̀ bɛ̀ɛ kɔtɛ Ãntiyɔsi, kɛ́nnɑ́ɑ́ Kɛrɛkibɛ Tinɑ́ɑǹsɑ̀ɑ̀tì ti Yiɛ̀ nYesu kpɛti. 
\v 21 Kɛ̀ ti Yiɛ̀ nkó muwɛ̃rímú mbɛ̀ bonɛ̀ kɛ̀ bɛnìtìbɛ̀ pɛ́uu yie nkɛ́ceetɛ, kɛ́tũnnɛ ti Yiɛ̀.
\p
\v 22 Kɛ̀ Sedisɑdɛmmu kó Kuyie ncĩ́ɛ̃̀tɛ̀ kɔbɛɛ tì kèè kɛ́tɔ̃ mBɑnnɑbɑɑsi Ãntiyɔsi. 
\v 23 Kòo tuɔkoo kɛ́yɑ̀ Kuyie mpĩ̀ḿmɛ̀ mutɔ̃mmú, kɛ̀ dɛ̀ɛ ò nɑrikɛ kòo yɑ́úkùnnɛ bɛ kɔ̃̀ntì kɛ dɔ̀, bɛ̀ dɔ̀kɛ duɔ́ mbɛmɑ́ɑ̀ ti Yiɛ̀ nkɛ nhò tɑ̀unɛ̀ bɛ yɛ̀mmɛ̀ mɛmɔu. 
\v 24 Bɑnnɑbɑɑsi do tú onitisɑ̀ù nwe, kɛ dɔ́ Kuyie nkɛ̀ Muyɑɑ́nsɑ̀ɑ̀mù nhò pìɛ́kɛ́ kɛ̀ bɛnìtìbɛ̀ pɛ́uu yie nYesu.
\p
\v 25 Kɛ̀ Bɑnnɑbɑɑsii sɔɔtɛ́ kɛ́kɔtɛ Tɑɑsi Sɔɔri wɑmmù. 
\v 26 Ò ò yɑ̀ dìì mɔ̀nnì kɛ̀ bɛ̀ɛ wɛ̃tɛ Ãntiyɔsi kɛ́mbo kɛ tiè Kirisi kɔbɛ kɛ dɔ̀ dibenni. Bɛ̀ dɛ nyú mɛketimɛ̀ bɛ̀ɛ̀ tũ nYesu kɛ dɔ̀ Kirisi kɔbɛ.
\p
\v 27 Dɛ mɔ̀nnì kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ɛ ítɛ́ Sedisɑdɛmmu kɛ́kɔtɛ Ãntiyɔsi. 
\v 28 Kɛ̀ Muyɑɑ́nsɑ̀ɑ̀mùu píɛ bɛ kóò mɔù kòo yètìrì tu Akɑbuusi kòo ítɛ́ kɛ́bɛ́i nkɛ dɔ̀, dikònnì diɛrì bo tɑnní kɛtenkɛ̀ kɛmɔu miɛkɛ. Kɛ̀ dì mɛ̀nkɛɛ tɑnní Kododi kó tikpɑ̀tì mɔ̀nnì. 
\v 29 Kɛ̀ Yesu kɔbɛɛ wɛ̃nnɛ́ kɛ́nɑ́kɛ́ kɛ dɔ̀ bɑ́ wè wèe pɑ̃ ò pɛ̀tɛ́ kɛ̀ dɛ̀ mɑ̀mɛ̀ kɛ́teennɛ̀ Yesu kɔbɛ bɛ̀ɛ̀ bo Sudee. 
\v 30 Bɛ̀ mɛ ndɔ̀ɔ̀ kɛ́duɔ́ ndɛ kó yɛpɑ̃rɛ̀ Bɑnnɑbɑɑsi, nɛ̀ Sɔɔri kɛ̀ bɛ̀ɛ kɔtɛ kɛ́duɔ́ nSedisɑdɛmmu kó bɛwedɔunkótíbɛ̀.
\c 12
\s1 Bɛ̀ kùɔmɛ̀ Isɑku
\p
\v 1 Dɛ kó dimɔ̀nnì kòo kpɑ̀ɑ̀tì Edɔti nfɛ̃́ũnko Kirisi kɔbɛ mɑbɛ̀, 
\v 2 kɛ́duɔ́ nkɛ̀ bɛ̀ɛ kuɔ Isɑku Isɑ̃ɑ̃ nɑntɛ̀ nɛ̀ disiè, 
\v 3 kɛ́yɑ̀ dɛ̀ nɑrikɛmɛ̀ Sifubɛ kòo yíɛ́ kɛ́duɔ́ nkɛ̀ bɛ̀ɛ pĩ́ mPiɛri, kɛ sɔ̃́ ndɛ̀ tu pɛ̃́ɛ̃̀bɛ̀ bɛ̀ɛ̀ í kɔɔrɛnɛ̀ mutie mùù muuti bɛ kó dibɑnni miɛkɛ. 
\v 4 Kòo duɔ́ nkɛ̀ bɛ̀ɛ ò kpetínnɛ́ kɛ́bɑnnɛ tihɑ̃ɑ̃pɔ̀ntì tɛpíítɛ̀ nɛ̀ tìkuɔ̀, tìnɑ̀ɑ̀ tìnɑ̀ɑ̀, kɛ̀ diyentɛ́bɑnni bo pɛ̃ɛ̃tɛ́ kɛ̀ bɛ̀ɛ ò bekɛ́nɛ̀. 
\v 5 Kɛ̀ Piɛri ḿbo dikpetíntou kɛ̀ Kirisi kɔbɛ bɑ́ɑ́ nKuyie nho kpɛ́í sɑ̃́ɑ̃̀.
\s1 Kuyie ntɔ̃nnì dɛɛtɛ́mɛ̀ Piɛri
\p
\v 6 Bɛ̀ do boúmu Piɛri mɛfĩmmɛ mɛ̀dɛ́mɛ̀ kòo nduɔ́ tihɑ̃ɑ̃pɔ̀ntì tìdɛ́tì cuokɛ̀ kɛ̀ titɛtì bɑ̀ɑ dibòrì, kɛ̀ɛ̀ yènkɛ̀ nɑ nwentɛ́ kɛ̀ Edɔtii duɔ́ nkɛ̀ bɛ̀ɛ ò bekɛ́nɛ̀, 
\v 7 kɛ̀ Kuyie ntɔ̃nnìi tɑroo kɛ̀ kuwenniku mɑkùu míítɛ́ kufɑ̃́ɑ̃́, kɛ̀ dìi bɑùtɛ̀ Piɛri.
\p Kɛ̀ mɛfĩmmɛɛ tɔ̃ũ. 
\v 8 Kɛ̀ dìi ò nɑ̀kɛ́ kɛ dɔ̀: Yì ɑ nɑɑ̀kɔ̃̀nfɛ̀ kɛ́ɑ̃nnɛ́ ɑ nɛùtì.
\p Kɛ̀ Piɛrii mɛ ndɔɔ̀. Kɛ̀ dì dɔ̀: Dɑɑ́tí ɑ yɑɑ̀bòrì kɛ́ n tũnnɛ.
\p
\v 9 Kɛ̀ Piɛrii dì tũ̀nnɛ kɛ̀ bɛ̀ nyɛtì kɛ̀ dɛ̀ ò dò ntidɔuǹtì bɑ́ ò í yɛ̃́ kɛ dò ndɛ̀ tu mɔ́mmuɔ. 
\v 10 Kɛ̀ bɛ̀ɛ pɛ̃ɛ̃tɛ́ dibòrì ketirì kɛ́pɛ̃ɛ̃tɛ́ didɛ́rì, kɛ́tuɔkɛ timɑ́tì kpɛri, bɛ̀ yìɛ̀ dì, kɛ kɔrì dihɛì, kɛ̀ dìi kpetɛ́nɛ̀ dimɑ́ɑ̀ kɛ̀ bɛ̀ɛ yɛ̀, kɛ́dɛ́tóo sɑ́m̀pɔ́ kɛ̀ Piɛrii mɔ́ntóo Kuyie ntɔ̃nnì.
\p
\v 11 Dɛ mɔ̀nnì kɛ̀ Piɛrii bɑntɛ́ kɛ dɔ̀, Kuyie kuù tɔ̃nní ku tɔ̃nnì kɛ̀ dì ò dɛɛtɛ́nɛ̀ Edɔti nɛ̀ Sifubɛ do ò dɔ́nɛ̀ mɛ̀ɛ̀ yɛi.
\p
\v 12 Kòo totíní o yɛ̀mmɛ̀, kɛ́kɔtɛ Isɑ̃ɑ̃ bɛ̀ tu wè Mɑriki, o yɔ̃ Mɑɑri cĩ́ɛ̃̀tɛ̀, kɛ nsɔ̃́ mbɛnìtìbɛ̀ tìkú pɛ́u kɛ bɑ́ɑ́ nKuyie. 
\v 13 Kòo bentɛ dicɑ̀ù kòo sɑpɑ̀ɑ̀ mmɔù bɛ̀ tu wè Odotii ítɛ́ní kɛ́bekɛ kɛ dɔ̀: Wenni nwe? 
\v 14 Kɛ́bɑntɛ́ Piɛri tɑmmɛ̀ kɛ̀ diwɛ̀ìi ò pĩ nkòo yóu ò bo kpetɛ́mɛ̀ kɛ́wɛ̃too kɛ́ bɛ̀ nɑ̀kɛ́ kɛ dɔ̀: Piɛri còḿmú dibòrì. 
\v 15 Kɛ̀ bɛ̀ dɔ̀: A yɛ̀mmɛ̀ í nɑɑtɑɑ̀?
\p Kòò dɔ̀: N yí so, kɛ̀ bɛ̀ dɔ̀: A dɔú ntidɔuntì nti.
\p
\v 16 Kɛ̀ Piɛri bɑɑ ḿbie ndicɑ̀ù, kɛ̀ bɛ̀ɛ kpetɛ́ kóò yɑ̀, kɛ̀ dɛ̀ɛ bɛ̀ di. 
\v 17 Kɛ̀ Piɛrii bɛ̀ yèkìì tɛnɔ̀ùtɛ̀ kɛ̀ bɛ̀ dɔ̀ yúóó, kòo bɛ̀ nɑ̀kɛ́ Kuyie ntɔ̃nnì ò dènnɛ mɛ̀ɛ̀ botí dikpetíntou miɛkɛ, kɛ dɔ̀: Nɑ́kɛ́nɛ̀ ti Isɑku nɛ̀ Yesu kɔbɛ tɔbɛ̀.
\p Ò mɛ nyĩ kɛ́yɛ̀ kɛ́kɔtɛ kupíkù tɛkù.
\p
\v 18 Kɛ̀ dɛ̀ɛ wentɛ́ kɛ̀ tihɑ̃ɑ̃pɔ̀ntì ńkpeutí kɛ békú titɔbɛ̀ Piɛri kɔ̀tɛ kɛ̀? 
\v 19 Kɛ̀ Edɔtii duɔ́ nkɛ̀ bɛ̀ɛ wɑmmú Piɛri kɛ mɔ́ntɛ́. Kòo bekɛ́nɛ̀ tihɑ̃ɑ̃pɔ̀ntì kɛ̀ dɔ̀ bɛ̀ɛ tì kùɔ, kɛ́deè kɛ́kɔtɛ Sesɑdee kɛ́mbo.
\s1 Kuyie ntɔ̃nnì potɛ́mɛ̀ Edɔti
\p
\v 20 Edɔti do í nɑɑtinɛ̀ Tiiri nɛ̀ Sitɔ̃ɔ̃ ɛkɛ̀ kɔbɛ, kɛ̀ bɛ̀ nɛ́ wɛ̃nnɛ́ dinùù kɛ́kɔtɛ kɛ́yɑ̀ Edɔti kó ditɔ̃nnì, Bɑdɑsitusi kɛ bo tɑunnɛ̀ Edɔti kɛ yɛ̃́ bɛ diitì do yiɛ̀nímɛ̀ weè ɛì miɛkɛ.
\p
\v 21 Kɛ̀ Edɔtii dɔú mmɛtɑummɛ̀ kó diyiè. Kɛ̀ dìi tuɔkɛ kòo ɑ̃nnɛ́ o kpɑ̀ɑ̀tìyɑ̀ɑ̀tì kɛ́nkɑri okpɑ̀ɑ̀tì kɑ̀rì ĩ́nkɛ̀ kɛ nɑ́ɑ́nnɛ̀ bɛnìtìbɛ̀. 
\v 22 Kɛ̀ bɛ̀ pĩɛ̃kù kɛ tú: Kuyie nkuù nɑ̀ɑ́ ndɛ̀ í tú onìtì.
\p
\v 23 Dɛndɛ bɑ̀mbɑ̀ kɛ̀ Kuyie ntɔ̃nnìi ò potɛ́ kɛ̀ yɛbiɛ̀ɛ ò cɑ̀ɑ́kɛ́ kòo kú kɛ yɛ̃́ ò do cɔutɛ́mɛ̀ Kuyie nkó disɑ̃nni.
\p
\v 24 Kɛ̀ Kuyie nnɑ́ɑǹtì dɔkɛ mpitírí tipíìtì timɔu.
\p
\v 25 Bɑnnɑbɑɑsi nɛ̀ Sɔɔri kɛ̀ bɛ̀ɛ duɔ́ nyɛpɑ̃rɛ̀ bɛ̀ do bɛ̀ tɔ̃nnɛ̀ yɛ̀ Sedisɑdɛmmu kɛ́nwɛ̃ti Sesɑdee kɛ nnɛínɛ̀ Isɑ̃ɑ̃ bɛ̀ tu wè Mɑriki.
\c 13
\s1 Muyɑɑ́nsɑ̀ɑ̀mù tɑ̃ɑ̃ɑ̃tɛ́mɛ̀ Bɑnnɑbɑɑsi nɛ̀ Sɔɔri
\p
\v 1 Kirisi kɔbɛ tĩ̀nnì dìì bo Ãntiyɔsi di miɛkɛ Kuyie mpɑ̃ɑ̃nɑ́ɑǹtì nɑ́ɑm̀bɛ̀ do bomu nɛ̀ bɛ̀ɛ̀ tiè mbɛnìtìbɛ̀ Kuyie nnɑ́ɑǹtì: Bɑnnɑbɑɑsi nɛ̀ Simmɛɔ̃ɔ̃ osɔ̀ùwè nɛ̀ Dusiyu Sidɛnni kou nɛ̀ Mɑnnɑɑ wèè do bìíkú nɛ̀ okpɑ̀ɑ̀tì Edɔti nɛ̀ Sɔɔri. 
\v 2 Diyiè mɑrì kɛ̀ bɛ̀ mboú dinùù kɛ bɑ́ɑ́ nKuyie nkɛ̀ Muyɑɑ́nsɑ̀ɑ̀mùu bɛ̀ nɑ̀kɛ́ kɛ dɔ̀: Cɑ̃́nnɛ́nɛ̀ Bɑnnɑbɑɑsi nɛ̀ Sɔɔri kɛ̀ bɛ̀ɛ pĩ́ mmutɔ̃mmú m bɛ̀ yu mùù kpɛ́í.
\p
\v 3 Mɛm̀mɛ kɛ̀ bɛ̀ nsɔkɛ́ kɛ boú dinùù kɛ́deè kɛ́ bɛ̀ nɔ̀ɔ́ nsinɔu kɛ́bɑ́ntɛ̀ Kuyie, kɛ́ bɛ̀ yóu kɛ̀ bɛ̀ɛ ítɛ́ kɛ́kɔtɛ.
\s1 Sɔɔri nɛ̀ onitinɔ̀ntì Edimɑɑsi
\p
\v 4 Kɛ̀ Muyɑɑ́nsɑ̀ɑ̀mùu bɛ̀ niitɛ́ kɛ̀ bɛ̀ɛ kɔtɛ Sedisii kɛ́tɑ bɑ̀tóò kɛ́nkɔri Sipiri kó kɛtenkɛ̀ kɛ̀ɛ̀ sokɛ́ mɛniɛ mmiɛkɛ, 
\v 5 kɛ́tuɔkɛ Sɑdɑminni kɛ́nnɑ́ɑ́ nSifubɛ Kuyie nnɑ́ɑǹtì titííntouti miɛkɛ, kɛ̀ Isɑ̃ɑ̃ Mɑriki bɛ̀ teénnɛ̀.
\p
\v 6 Kɛ̀ bɛ̀ nnɑ́ɑntɛ Kuyie nnɑ́ɑǹtì kɛ́tuɔkɛ kumɑ̀nku tɛkù Pɑfoosi, kɛ mɑ́ɑ́nɛ̀ Sifu mɔù kòò tú onitinɔ̀ntì, kòo yètìrì tú Bɑɑri-Yesu, kòò tu omɑ́ɑ̀ Kuyie mpɑ̃ɑ̃nɑ́ɑǹtì nɑ́ɑǹtò. 
\v 7 Kɛ bo dɛ kó dihɛì kóo kùmɑ̀ndɑ́ɑ̀ Sɛɛsuusi Poduusi borɛ̀, wèè tu mɛciì nyiɛ̀, kɛ́duɔ́ nkɛ̀ bɛ̀ɛ yúní Bɑnnɑbɑɑsi nɛ̀ Sɔɔri kɛ̀ bɛ̀ bo ò nɑ̀kɛ́ Kuyie nnɑ́ɑǹtì. 
\v 8 Kɛ̀ weè nitinɔ̀ntì Edimɑɑsi, ò yètìrì mɛ ntú nɛ̀ kɛrɛki, kòò ndɔ́ kɛ́pɑɑnnɛ̀ kùmɑ̀ndɑ́ɑ̀ Kuyie nnɑ́ɑǹtì. 
\v 9 Dɛ mɔ̀nnì kɛ̀ Muyɑɑ́nsɑ̀ɑ̀mù pìɛ́kɛ́ Sɔɔri, bɛ̀ yu wè Pɔɔri, kòo ò wèńtɛ́, 
\v 10 kɛ́bɛ́i nkɛ dɔ̀: Fɔ̃́ ndibɔɔ̀ birɛ, onitisountì, ociiǹtì, ɑ í yóó yóu ɑ bo ncɑɑ̀rimɛ̀ Kuyie nkó mutɔ̃mmɑ́ɑ̀? 
\v 11 Kuyie mbo dɑ potɛ́ bɑ̀mbɑ̀ nkɑ̀ɑ yɛ̃ĩ kɛ tɛ̃́nkɛ bɑ́ nwúó ndiyiè yɛmɔ̀rɛ̀ mɑyɛ̀ miɛkɛ.
\p Dɛndɛ bɑ̀mbɑ̀ kɛ̀ Edimɑɑsi yɛ̃ĩ kɛ́nhɑ̃́ɑ̃́ nkɛ wɑnti wèè bo ò dɛ̀tɛ. 
\v 12 Kɛ̀ kùmɑ̀ndɑ́ɑ̀ dɛ̀ yɑ̀ kɛ̀ dɛ̀ɛ ò di, kɛ̀ Kuyie nnɑ́ɑǹtìi kɑ́ɑ́kɛ́ o yɛ̀mmɛ̀ kòo yie nYesu.
\s1 Pɔɔri do nɑ̀kɛ́ tì Ãntiyɔsi
\p
\v 13 Pɔɔri nɛ̀ o nɛ́pobɛ̀ kɛ̀ bɛ̀ɛ tɑ bɑ̀tóò Pɑfoosi kɛ́kɔtɛ Pɛdisi Pɑ̃nfidii kó kɛtenkɛ̀, Isɑ̃ɑ̃ Mɑriki dɛ mbɛ̀ yóu kɛ́wɛ̃tɛ Sedisɑdɛmmu. 
\v 14 Kɛ̀ bɛ̀ nsɔkɛ́ kɛ́tuɔkɛ Ãntiyɔsi Pisidii kó kutempɛ̃ miɛkɛ, tɛom̀pùtɛ̀ yiè kɛ́tɑ kutííntouku kɛ́nkɑri. 
\v 15 Bɛ̀ kɑ̀ɑ̀ ndìì mɔ̀nnì Kuyie nkuɔ́ pɑ́tɛ nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kpɛyɛ, kɛ̀ kutííntouku kó bɛnìùbɛ̀ɛ duɔ́ nkɛ̀ bɛ̀ɛ nɑ́kɛ́ Pɔɔri kɛ dɔ̀: Ti kɔbɛ kɛ̀ di mɔkɛ tìmɑtì kɛ bo ti teennɛ̀ di bo nɑ kɛ́bɛ́i.
\p
\v 16 Kɛ̀ Pɔɔrii youtɛ o nɔ̀ùtɛ̀ kɛ̀ bɛ̀ dɔ̀ yúóó kòo bɛ́i nkɛ dɔ̀: Isidɑyɛɛribɛ nɛ̀ díndi bɛ̀ɛ̀ dé Kuyie nkémmúnɛ̀ kɛ́keè. 
\v 17 Kuyie nyIsidɑyɛɛribɛ tũ nkù, kuù tɑ̃ɑ̃tɛ́ ti yɛmbɛ̀ kɛ duɔ́ nkɛ̀ bɛ̀ sũ̀ṹ mbɛ̀ bo dìì mɔ̀nnì Esibiti, dɛ kó difɔ̃nkúò kɛ̀ kùu bɛ̀ dènnɛ nɛ̀ ku kó muwɛ̃rímú. 
\v 18 Kɛ́ mbɛ̀ tɔ yɛbie nsipísìnɑ̀ɑ̀ dikpɑ́ɑ̀ cuokɛ̀, 
\v 19 kɛ́kuɔ ibotí ìyiekɛ̀ Kɑnnɑhɑ̃ɑ̃ kó kɛtenkɛ̀ kɛ́ kɛ̀ duɔ́ nku kɔbɛ kɛ̀ bɛ̀ɛ kɛ̀ tiekɛ, 
\v 20 kɛ̀ dɛ̀ mmɔkɛ yɛbie sikɔusìnɑ̀ɑ̀ nɛ̀ sipísìnùmmù (450).
\p Kɛ̀ Kuyie mbɛ̀ duɔ́ mbɛbɑɑtíbɛ̀ kɛ̀ bɛ̀ ḿbo kɛ́tuɔkɛnɛ̀ Sɑmmuyɛɛri kó dimɔ̀nnì. 
\v 21 Kɛ̀ bɛ̀ dɔ̀ bɛ̀ dɔ́ okpɑ̀ɑ̀tì, kɛ̀ Kuyie mbɛ̀ duɔ́ Sɑuri Kiisi kó dɛbirɛ, Bɛnsɑmɛɛ kó kufuku kou, kóo ńtɔ tikpɑ̀tì kɛ dɔ̀ yɛbie nsipísìnɑ̀ɑ̀. 
\v 22 Kɛ̀ Kuyie nhò dènnɛ kɛ́duɔ́ nDɑfiti tikpɑ̀tì, kɛ bɛ́i nkɛ dɔ̀: M pɛ̀tɛ́ onìtì n yɛ̀mmɛ̀ kou, wèè yó ndɔɔri n dɔ́mɛ̀ mɛmɔu. 
\v 23 Nɛ̀ Dɑfiti kó kufuku miɛkɛ nkɛ Kuyie nduɔnnímɛ̀ Yesu Odɛɛtíwè, kù yɛ̃ nkù yóó duɔnní wè, kòo dɛɛtɛ́ Isidɑyɛɛribɛ. 
\v 24 Yesu mu ndo í kɔ̀tɛní kɛ̀ Isɑ̃ɑ̃ nɑ́kɛ́mu Isidɑyɛɛribɛ kɛ dɔ̀ bɛ̀ɛ ceetɛ kòo bɛ̀ ɑ̃nnɛ́ bɑ̀tɛ́mmù. 
\v 25 Isɑ̃ɑ̃ dèu dìì mɔ̀nnì o tɔ̃mmú kɛ nnɑ́ɑ́ nkɛ tú: Míì í tú di bɑɑ wè, ò kèrínímu, n ketɛ́ kɛ í sɑnnɛ̀ m bo sɛutɛmɛ̀ o nɛùtì kó iwɛ̃ĩ.
\p
\v 26 N kɔbɛ díndi Abɑrɑhɑmmu kó kufuku kɔbɛ nɛ̀ bɛtɔbɛ̀ bɛ̀ɛ̀ dé Kuyie, tímbɛ Kuyie nduɔnnímɛ̀ mɛdɛɛtímɛ̀ kó tinɑ́ɑǹtì tii. 
\v 27 Sedisɑdɛmmu kɔbɛ nɛ̀ bɛ kó bɛkpɑ̀ɑ̀tìbɛ̀ mɛ nyí bɑntɛ́ Yesu, koò kùɔ kɛ nɛ́ dɔ̀ɔ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ wɑ̃̀ri tì kɛ̀ bɛ̀ tì kɑ̀ɑ nsiom̀pùu simɔu. 
\v 28 Bɛ̀ í nyɑ̀ mɛyɛi mmɑmɛ̀ Yesu dɔ̀ɔ̀ mɛ̀ kɛ ncĩ́ɛ̃́kɛ́ kɛ nɑ́kɛ́ Pidɑti kɛ dɔ̀ wèe ò kùɔ. 
\v 29 Bɛ̀ dɔ̀ɔ̀ dìì mɔ̀nnì tìì wɑ̃̀ri o kpɛ́í tì yɛ̃mmɛ̀, kóò cṹũnní kudɑpɑ̃ɑ̃tí kɛ́dɔú nkufɔ̃ti miɛkɛ. 
\v 30 Kɛ̀ Kuyie mmɛ nduɔ́ nkòo yɑ̃́ntɛ́. 
\v 31 Kòo bɛnkɛ omɑ́ɑ̀ yɛwe pɛ́u miɛkɛ bɛ̀ɛ̀ do ò nɛínɛ̀ Kɑdidee kɛ́kɔtɛ Sedisɑdɛmmu, bɑ̀mbɑ̀ nkɛ nɑ́ɑ́ nyIsidɑyɛɛribɛ o kpɛ́í. 
\v 32 Ti di nɑ́ɑ́ tìì nɑ́ɑǹsɑ̀ɑ̀tì Kuyie ndo nɑ̀kɛ́ ti yɛmbɛ̀ tiì kpɛ́í. 
\v 33 Kɛ̀ tì dɔ̀ɔ̀ tínti bɛ yɑɑ̀bí ti kpɛ́í, kɛ duɔ́ nkɛ̀ Yesu yɑ̃̀ńtɛ́ tì wɑ̃̀ri kɛ yɛ̃mmɛ̀ Yɛsɑ̃ɑ̃ mmiɛkɛ mukɑ̀mmù mudɛ́rímù kɛ tú:
\q1 A tú m birɛ ndɛ
\q1 kɛ̀ n dɑ pɛitɛ́ yíe.
\m
\v 34 Kuyie ndo nɑ̀kɛ́ weè kpɛ́í nkɛ dɔ̀:
\q1 M bo duɔ́ nkòo yɑ̃́ntɛ́
\q1 m bɑ́ɑ́ yóu kòo pɑ̃ɑ̃kɛ.
\q1 M bo di dɔɔ̀ mɛsɑ̀ɑ̀
\q1 n do yɛ̃ n yóó dɔɔ̀mɛ̀ Dɑfiti.
\m
\v 35 Tì wɑ̃̀rimu Yɛsɑ̃ɑ̃ mmiɛkɛ kupíkù tɛkù kɛ tú:
\q1 A í yóó yóu kɑ̀ɑ kou pɑ̃ɑ̃kɛ.
\m
\v 36 Dɑfiti do dɔ̀ɔ̀mu Kuyie nyɛ̃ nwèe dɔɔ̀mɛ̀, kɛ ku, kɛ̀ bɛ̀ ò kũnnɛ́ o yɛmbɛ̀ borɛ̀ kòò pɑ̃̀ɑ̃̀kɛ. 
\v 37 Kuyie mɛ nduɔ́ nkɛ̀ wèè yɑ̃̀ńtɛ́ ò í pɑ̃̀ɑ̃̀kɛ. 
\v 38 N kɔbɛ bɑntɛ́nɛ̀ tũ̀nkɛ kɛ dò nnɛ̀ Yesu borɛ̀ ndɛ Kuyie mbo di cĩ́ɛ̃́mmɛ̀ di yɛi. 
\v 39 Kɛ̀ wèè ò tɑ̃́, wèe ũtɛ́ o yɛi mmɛmɔu, Mɔyiisi kó ikuɔ́ do í yóó nɑ kɛ́ũtɛ́ mɛ̀. 
\v 40 Ndɑkɛnɛ̀ tũnkɛ́ kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì bɑ́ɑ́ di tuɔkɛní. Tìì tu:
\q1
\v 41 Wéntɛ́nɛ̀ díndi sifeí yɛmbɛ̀,
\q1 kɛ̀ dɛ̀ di di kɛ̀ di kú.
\q1 N yóó pĩ́ mmutɔ̃mmú mɑmù mmu
\q1 di kó yɛwe miɛkɛ
\q1 di do í yóó yie nkɛ dò mmùù bo dɔɔ̀
\q1 bɑ́ kɛ̀ bɛ̀ di nɑ̀kɛ́.
\p
\v 42 Bɛ̀ yɛ̀nní dìì mɔ̀nnì kutííntouku kɛ̀ bɛ̀ dɔ̀: Pɔɔri nɛ̀ Bɑnnɑbɑɑsi bɛ̀ɛ wɛ̃tɛní tɛom̀pùtɛ̀ tɛtɛ̀ yiè kɛ yíɛ́ kɛ́ bɛ̀ nɑ́kɛ́ dɛ kó tinɑ́ɑǹtì. 
\v 43 Bɛ̀ cìɛ́tɛ́ dìì mɔ̀nnì kɛ̀ bɛnìtìbɛ̀ pɛ́u, Sifubɛ nɛ̀ bɛ̀ɛ̀ í Sifubɛ kɛ tũ̀nnɛ Sifubɛ kó kuwedɔuncɛ kɛ̀ bɛ̀ɛ cíe mPɔɔri nɛ̀ Bɑnnɑbɑɑsi kɛ̀ bɛ̀ɛ yɑ́ukùnnɛ bɛ kɔ̃̀ntì kɛ dɔ̀, bɛ̀ ntɑunɛ̀ Kuyie nkù bɛ̀ dɔ̀ɔ̀ mɛ̀ɛ̀ sɑ̀ɑ̀ nkpɛ́í.
\s1 Pɔɔri nɛ̀ Bɑnnɑbɑɑsi bɛ̀ kpɑ̃ɑ̃tɛ́mɛ̀ bɛ nɑcɛ̀tɑ̃́ɑ̃́
\p
\v 44 Tɛom̀pùtɛ̀ tɛtɛ̀ yiè kɛ̀ dihɛì kɔbɛ bɛmɔuu sɑ̃́kɛɛ tíí nkɛ bo keè Kuyie nnɑ́ɑǹtì. 
\v 45 Kɛ̀ Sifubɛɛ yɑ̀ bɛnìtìbɛ̀ tìímmɛ̀ kɛ sũ kɛ̀ dɛ̀ɛ bɛ̀ yonkɛ. Kɛ̀ Pɔɔri nnɑ́ɑ́ ntii kɛ̀ bɛ̀ nɑ̀ɑ́ ntitɛtì koò sɑ̃̀ɑ̃́. 
\v 46 Pɔɔri nɛ̀ Bɑnnɑbɑɑsi kɛ̀ bɛ̀ɛ bɛ̀ nɑ̀kɛ́ weti weti kɛ dɔ̀: Dɛ̀ do dò mbɛ̀ɛ ketɛ́ kɛ́nɑ́kɛ́ dímbɛ Kuyie nnɑ́ɑǹtì. Di nɛ́ mɛ ntì yetɛmɛ̀ kɛ bɛnkɛ di mɔ́mmɔmbɛ di í dòmmɛ̀ kɛ pɛ́tɛ́ mufòmmu mùù bo sɑ̃́ɑ̃̀. Di mmɔ̀nnì ti bo kɔtɛ bɛ̀ɛ̀ í tú Sifubɛ bɛ borɛ̀. 
\v 47 Kɛ yɛ̃́ tì wɑ̃̀rimɛ̀ kɛ tú:
\q1 N dɑ tɑ̃ɑ̃tɛ́mu,
\q1 kɑ̀ɑ bo ntú yɛbotɛ̀ yɛmɔu kó kuwenniku
\q1 kɛ́nɑ́kɛ́ titentì timɔu kɔbɛ
\q1 mɛdɛɛtímɛ̀ kó tinɑ́ɑǹtì.
\p
\v 48 Bɛ̀ɛ̀ í tú Sifubɛ kɛ̀ bɛ̀ɛ keè dɛ kó tinɑ́ɑǹtì kɛ̀ dɛ̀ɛ bɛ̀ nɑrikɛ mɛsɑ̀ɑ̀, bɛ̀ɛ̀ tú mufòmmu mùù bo sɑ̃́ɑ̃̀ mu kɔbɛ kɛ̀ bɛ̀ɛ yie nYesu.
\p
\v 49 Kɛ̀ Kuyie nnɑ́ɑǹtìi pitɛ́ dɛ kó kɛtenkɛ̀ kɛmɔu. 
\v 50 Kɛ̀ Sifubɛɛ sukú bɛnitipodiɛbɛ̀ bɛ̀ɛ̀ tũ̀nnɛ Yesu nɛ̀ dihɛì kó bɛnitidiɛbɛ̀, kɛ̀ bɛ̀ɛ fɛ̃́ũ mPɔɔri nɛ̀ Bɑnnɑbɑɑsi kɛ́ bɛ̀ dènnɛ bɛ tenkɛ̀. 
\v 51 Pɔɔri nɛ̀ Bɑnnɑbɑɑsi kɛ̀ bɛ̀ɛ kpɑ̃́ɛ̃́ bɛ nɑcɛ̀tɑ̃́ɑ̃́\f + \fr 13:51 \fr*\fk kpɑ̃́ɑ̃́tɛ́ bɛ nɑcɛ̀tɑ̃́ɑ̃́: \fk*\ft Dɛ̀ bɛnkú kɛ dò mbɛ kpɛti tɛ̃́nkɛ í bɛ̀ bonɛ̀ kɛ yɛ̃́ bɛ̀ yetɛmɛ̀ bɛ̀ bɛ̀ tɔní tìì nɑ́ɑǹtì.\ft*\f*, kɛ́deè kɛ́kɔtɛ Ikɔnni. 
\v 52 Kɛ̀ diwɛ̀ì ḿbo Yesu kɔbɛ bɛ̀ɛ̀ dɛ̀ bo, kɛ̀ Muyɑɑ́nsɑ̀ɑ̀mù bɛ̀ pìɛ́kɛ́.
\c 14
\s1 Pɔɔri nɛ̀ Bɑnnɑbɑɑsi bɛ̀ do bomɛ̀ Disiri
\p
\v 1 Pɔɔri nɛ̀ Bɑnnɑbɑɑsi kɛ̀ bɛ̀ tó tɑ Ikɔnni kó kutííntouku, kɛ nnɑ́ɑ́ nKuyie nnɑ́ɑǹtì kɛ̀ dɛ̀ɛ nɑrikɛ Sifubɛ nɛ̀ bɛ̀ɛ̀ í tú Sifubɛ, kɛ̀ bɛnìtìbɛ̀ pɛ́uu yie nYesu. 
\v 2 Bɛ̀ɛ̀ tu Sifubɛ kɛ̀ bɛ̀ɛ sukú bɛ̀ɛ̀ í tú Sifubɛ kɛ̀ bɛ̀ bo dɔɔ̀ mɛyɛi mPɔɔri nɛ̀ Bɑnnɑbɑɑsi. 
\v 3 Pɔɔri nɛ̀ Bɑnnɑbɑɑsi kɛ̀ bɛ̀ mbo Ikɔnni kɛ́mɔntɛ, kɛ́nnɑ́ɑ́ Kuyie nɑ́ɑǹtì nɛ̀ dikɔ̃m̀bùɔ̀, kɛ nɑ́ɑ́ nKuyie mbɛ̀ dɔ̀ɔ̀ mɛ̀ɛ̀ sɑ̀ɑ̀, kɛ̀ ti Yiɛ̀ nkó muwɛ̃rímú bɛ̀ bonɛ̀ kɛ̀ bɛ̀ dɔ̀ɔ̀ri tidiɛtì pɛ́u. 
\v 4 Kɛ̀ dɛ kó dihɛì kɔbɛɛ totɛ́ mɛ̀dɛ́mɛ̀, kɛ biɛ nni ndɔ́ Sifubɛ kɛ̀ bɛtɔbɛ̀ dɔ́ Yesu tɔ̃rɛ̀.
\p
\v 5 Sifubɛ nɛ̀ bɛ̀ɛ̀ í tú Sifubɛ nɛ̀ dɛ kó bɛkpɑ̀ɑ̀tìbɛ̀ kɛ̀ bɛ̀ɛ dɑkɛ kɛ bo fɛ̃́ũ mPɔɔri nɛ̀ Bɑnnɑbɑɑsi, kɛ bo bɛ̀ bùɔ́tí yɛtɑ̃́rɛ̀ kɛ́kuɔ. 
\v 6 Kɛ̀ bɛ̀ɛ tì kèè kɛ́cokɛ́ kɛ́kɔtɛ Dikɑonii kó yɛhɛkɛ̀: Disiri nɛ̀ Dɛribu nɛ̀ yɛhɛkɛ̀ tɛyɛ̀ yɛ̀ɛ̀ dɛ̀ tɔ̀kɛ́, 
\v 7 kɛ́nnɑ́ɑ́ Tinɑ́ɑǹsɑ̀ɑ̀tì.
\s1 Bɛ̀ do dɔ́mɛ̀ kɛ́fíé Pɔɔri nɛ̀ Bɑnnɑbɑɑsi inɑ̀ɑ̀kɛ
\p
\v 8 Kòo nìtì mɔù bo Disiri kɛ tú kuhɔ̀ùkù nɛ̀ bɛ̀ ò pɛitɛ́mɛ̀ ò í nɔ nkɛ ceǹtì. 
\v 9 Kɛ̀ Pɔɔri nnɑ́ɑ́ nkɛ̀ kù kèḿmú kɛ̀ Pɔɔrii wéntɛ́ kɛ́bɑntɛ́ kù tɑ̃́mɛ̀ kɛ do nKuyie mbo kù miɛkùnnɛ. 
\v 10 Kɛ bɛ́i mmɛkperímɛ̀ kɛ dɔ̀: Ítɛ́ kɛ cómmú, kɛ̀ kùu puuní mɛcɑ̃ɑ̃ nkɛ́kétɛ́. 
\v 11 Kɛ̀ bɛnìtìbɛ̀ɛ dɛ̀ yɑ̀ kɛ́wekii nɛ̀ Dikɑonii kó tinɑ́ɑǹtì kɛ dɔ̀: Kuyie nnɑɑ́ mbɛnìtìbɛ̀ kɛ cùtɛ́ní ti borɛ̀!
\p
\v 12 Kɛ̀ bɛ̀ɛ bɛ̀ yú bɛ kó yɛbɔkɛ̀ yètɛ̀, kɛ yú Bɑnnɑbɑɑsi kɛ dɔ̀: Seyuusi, kɛ yú Pɔɔri kɛ dɔ̀: Edimɛsi, kɛ yɛ̃́ weè do nɑ́ɑ́mmɛ̀. 
\v 13 Kɛ̀ bɛ kóo bɔɔyiɛ̀ nwèè kó dibɔɔ̀tou do bo dihɛì kó dibòrì borɛ̀ kòo tɔní yɛnɑɑdɑkɛ̀ yɛ̀dɛ́ɛ̀, kɛ̀ yɛ̀ dùúkú mutepóó, nɛ̀ bɛnìtìbɛ̀ kɛ̀ bɛ̀ bo wɛ̃nnɛ́ kɛ́ yɛ̀ fìé Pɔɔri nɛ̀ Bɑnnɑbɑɑsi. 
\v 14 Pɔɔri nɛ̀ Bɑnnɑbɑɑsi kɛ̀ bɛ̀ɛ tì kèè kɛ̀ bɛ yɛ̀mmɛ̀ɛ cɑɑ̀rɛ̀, kɛ̀ bɛ̀ɛ kɛ̃rí bɛ yɑɑ̀bòrɛ̀ kɛ́cokóo ditĩ̀nnì miɛkɛ kɛ́kuɔ́nko kɛ dɔ̀: 
\v 15 Ti kɔbɛ dɛ̀ dòmmɛ kɛ̀ di dɔɔ̀ri mɛmmɛ? Ti tú bɛnìtìbɛ̀ mbɛ kɛ di dònnɛ̀, ti di tɔní Tinɑ́ɑǹsɑ̀ɑ̀tì nti, kɛ tú di yóu yɛbɔkɛ̀ kɛ́tũnnɛ Kuyie kùù fòù, kùù dɔ̀ɔ̀ kɛĩ́nkɛ̀ nɛ̀ kɛtenkɛ̀ nɛ̀ dɑ̀mɛ́ɛ̀rì nɛ̀ dɛ̀ɛ̀ kó dimɑ̀ɑ̀ bo o miɛkɛ. 
\v 16 Kuù do yóu yɛbotɛ̀ bɑ́ wè kòo ntũ ò dɔ́ kùù cɛ. 
\v 17 Nɛ̀ mɛmmɛ kɛ̀ kù bɑɑ di bɛnkú kù bomɛ̀, kɛ di dɔɔ̀ri mɛsɑ̀ɑ̀, nkɛ di duɔ̀nní fɛtɑɑfɛ̀, kɛ̀ di pɑɑ mpɛí kɛ̀ di mɔkɛ kɛ yo nkɛ̀ di yɛ̀mmɛ̀ nɑɑti.
\p
\v 18 Kɛ̀ dɛ̀ɛ ɑri mɛsɑ̀ɑ̀ nkɛ̀ bɛ̀ nɛ́ nɑ kɛ́ bɛ̀ bɑ̀ɑ bɛ̀ bo bɛ̀ fìémɛ̀ dɛ kó inɑ̀ɑ̀kɛ.
\p
\v 19 Kɛ̀ Sifubɛɛ yɛ̀nní Ãntiyɔsi nɛ̀ Ikɔnni, kɛ́sukú bɛnìtìbɛ̀, kɛ̀ bɛ̀ɛ búɔ́tí Pɔɔri yɛtɑ̃́rɛ̀, kɛ nyɛ̃́ kɛ tú ò ku, kóò fũrí kɛ́dennɛ dihɛì mɑ̀nku. 
\v 20 Kɛ̀ Yesu kɔbɛɛ tíí nho borɛ̀ kòo ítɛ́ kɛ́tɑ dihɛì, kɛ̀ dɛ̀ɛ wentɛ́ nɛ̀ Bɑnnɑbɑɑsi kɛ̀ bɛ̀ɛ kɔtɛ Dɛribu.
\s1 Pɔɔri nɛ̀ Bɑnnɑbɑɑsi bɛ̀ wɛ̃̀tɛmɛ̀ Ãntiyɔsi
\p
\v 21 Pɔɔri nɛ̀ Bɑnnɑbɑɑsi kɛ̀ bɛ̀ɛ nɑ́kɛ́ Tinɑ́ɑǹsɑ̀ɑ̀tì Dɛribu kɛ̀ bɛnìtìbɛ̀ pɛ́uu tì yie nkɛ̀ bɛ̀ɛ ítɛ́ kɛ́wɛ̃tɛ Disiri nɛ̀ Ikɔnni nɛ̀ Ãntiyɔsi, 
\v 22 kɛ́nyɑ́úkùnko Yesu kɔbɛ kɔ̃̀ntì kɛ bɛ̀ nɑ̀ɑ́ nkɛ tú bɛ̀ nyɛ̃́ kɛ dò nti dò nkɛ́fɛ̃́ṹtɛ́mu kɛ nɛ́ tɑ Kuyie nkpɑ̀ɑ̀tìyuu miɛkɛ.
\p
\v 23 Kɛ kɑnnìnko Kirisi kɔbɛ tĩ̀rɛ̀ yɛmɔu bɛwedɔunkótíbɛ̀, kɛ bou yɛnɔ̀ kɛ bɑ́ɑ́ nKuyie, kɛ bɛ̀ nɑ̀ɑ́ nkɛ tú ti Yiɛ̀ ndi dɔ́ wè di teennɛ̀.
\p
\v 24 Kòo deè kɛ́yɛ̀ Pisidii kó kutempɛ̃ nkɛ́tɑ Pɑ̃nfidii kɔku, 
\v 25 kɛ́nɑ́kɛ́ Pɛdisi Kuyie nnɑ́ɑǹtì kɛ́deè kɛ́kɔtɛ Atɑdii. 
\v 26 Bɛ̀ dɛ ndèkɛ bɑ̀tóò, kɛ́wɛ̃tɛ Ãntiyɔsi, bɛ̀ do bɛ̀ bɑ́ntɛ̀nɛ̀ dɛ̀ Kuyie nkɛ̀ bɛ̀ɛ kɔtɛ kɛ pĩ́ mmutɔ̃mmú bɛ̀ bo kɛ deu mù.
\p
\v 27 Kòo bɛ̀ nɑ̀kɛ́ Kuyie mpĩ mmɛ̀ɛ̀ botí mutɔ̃mmú kɛ kpetɛ́ kucɛ bɛ̀ɛ̀ í tú Sifubɛ kɛ̀ bɛ̀ yie nYesu. 
\v 28 Kɛ̀ bɛ̀ ndɛ̀ bo nɛ̀ Kirisi kɔbɛ kɛ̀ dɛ̀ɛ mɔntɛ.
\c 15
\s1 Bɛ̀ nɛ̀nnimɛ̀ Sedisɑdɛmmu
\p
\v 1 Kɛ̀ bɛ̀mɑbɛ̀ɛ yɛ̀nní Sudee kɛ́kɔtɛ Ãntiyɔsi kɛ́nnɑ́ɑ́ mbɛ̀ɛ̀ yie nYesu kɛ tú: Kɛ̀ bɛ̀ í di cɑ̃mmú Mɔyiisi kó ikuɔ́ yɛ̃mmɛ̀ Kuyie mbɑ́ɑ́ di cɔutɛ́. 
\v 2 Pɔɔri nɛ̀ Bɑnnɑbɑɑsi kɛ̀ bɛ̀ɛ yetɛ kɛ̀ bɛ̀ɛ nɛnni mɛdiɛ̀, nkɛ̀ Yesu kɔbɛ dɔ̀: Pɔɔri nɛ̀ Bɑnnɑbɑɑsi nɛ̀ Ãntiyɔsi kɔbɛ mɑbɛ̀ bɛ̀ɛ kɔtɛ Sedisɑdɛmmu kɛ́yɑ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ nɑ́kɛ́ dɛ kó tinɑ́ɑǹtì.
\p
\v 3 Kɛ̀ bɛ̀ɛ bɛ̀ cíe nkɛ́dennɛ dihɛì, kɛ̀ bɛ̀ nkérí kɛ́yɛ̀nnɛ̀ Fenisii nɛ̀ Sɑmmɑrii kó kɛtenkɛ̀ kɛ́nnɑ́ɑntɛ bɛ̀ɛ̀ í tú Sifubɛ bɛ̀ cɔutɛ́mɛ̀ Yesu, kɛ̀ dɛ kó tinɑ́ɑǹtì nnɑ́rìnkùnko Kirisi kɔbɛ bɛmɔu yɛ̀mmɛ̀. 
\v 4 Bɛ̀ tùɔ̀koo dìì mɔ̀nnì Sedisɑdɛmmu Kirisi kɔbɛ nɛ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ co Pɔɔri nɛ̀ Bɑnnɑbɑɑsi kɛ̀ bɛ̀ɛ bɛ̀ nɑ̀kɛ́ Kuyie mbɛ̀ pĩ̀ńnɛ́ mùù tɔ̃mmú. 
\v 5 Kɛ̀ Fɑdisĩɛ̃bɛ mɑbɛ̀ bɛ̀ɛ̀ yie nYesu kɛ̀ bɛ̀ɛ bɛ́i nkɛ dɔ̀: Bɛ̀ɛ̀ í tú Sifubɛ kɛ yie nYesu bɛ̀ dò nkɛ́cɑ̃mmúmu kɛ́tũnnɛ Mɔyiisi kó ikuɔ́.
\p
\v 6 Kɛ̀ Yesu tɔ̃rɛ̀ nɛ̀ bɛwedɔunkótíbɛ̀ kɛ̀ bɛ̀ɛ tíí nkɛ bo yɑ̀ dɛ kó tinɑ́ɑǹtì, 
\v 7 kɛ́nnɛì kɛ̀ dɛ̀ɛ mɔntɛ, kɛ̀ Piɛrii ítɛ́ kɛ bɛ́i nkɛ dɔ̀: N kɔbɛ, di yɛ̃́mu Kuyie nni ntɑ̃ɑ̃tɛ́mɛ̀ nɛ̀ dimɔ̀nnì kɛ̀ m bo nɑ́kɛ́ Tinɑ́ɑǹsɑ̀ɑ̀tì bɛ̀ɛ̀ í tú Sifubɛ kɛ yie nYesu. 
\v 8 Kuyie nkùù yɛ̃́ bɛnìtìbɛ̀ bɛmɔu yɛ̀mmɛ̀ kɛ̀ kù bɛ̀ duɔ́ Muyɑɑ́nsɑ̀ɑ̀mù kù ti duɔ́ mmù, kɛ bɛnkɛ kù bɛ̀ cɔutɛ́mɛ̀. 
\v 9 Mɛcɑ̃́nnímɛ̀ mɑmɛ̀ í bo tínti nɛ̀ bɛ ti cuokɛ̀, bɛ yie ndìì mɔ̀nnì Yesu kɛ̀ Kuyie nhũtɛ́ bɛ yɛi. 
\v 10 Dɛ̀ dòmmɛ kɛ̀ di dɔ́ kɛ́yíi nKuyie mmiɛkɛ kɛ́toú mbɛ̀ɛ̀ yie nYesu ditɔu tínti nɛ̀ ti yɛmbɛ̀ ti í nɑ kɛ tɔ dì. 
\v 11 Di í yɛ̃́ kɛ dò nnɛ̀ ti Yiɛ̀ nYesu kó mɛsɑ̀ɑ̀ mmɛ timɔu ti cootɛ́mɛ̀ tínti nɛ̀ bɛɑ̀ɑ̀?
\p
\v 12 Kɛ̀ bɛnìtìbɛ̀ dɔ̀ yúóó, Bɑnnɑbɑɑsi nɛ̀ Pɔɔri kɛ̀ bɛ̀ɛ bɛ̀ nɑ̀kɛ́ Kuyie ndɔ̀ɔ̀ tìì diɛtì bɛ̀ɛ̀ í tú Sifubɛ bɛ cuokɛ̀. 
\v 13 Bɛ̀ nɑ̀kɛ́ dìì mɔ̀nnì kɛ dèè kɛ̀ Isɑku dɔ̀: N kɔbɛ kémmúnɛ̀! 
\v 14 Simɔɔ nɑ̀kɛ́mu Kuyie ndɑ̀ɑ̀tɛnímɛ̀ bɛ̀ɛ̀ í tú Sifubɛ bɛ kpɛ́í nkɛ tɑ̃nkíí ku kɔbɛ. 
\v 15 Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì dɛ̀ wɛ̃ḿmu tiì tú:
\q1
\v 16 M bo wɛ̃tɛní kɛ́mɑɑ́ Dɑfiti cĩ́ɛ̃̀tɛ̀,
\q1 kɛ́yíi nho dobuò.
\q1
\v 17 Kɛ̀ bɛnìtìbɛ̀ bɛmɔu
\q1 nɛ̀ bɛ̀ɛ̀ í tú Sifubɛ
\q1 n yu bɛ̀ kɛ̀ bɛ̀ bo n tú n kɔbɛ
\q1 kɛ̀ bɛ̀ɛ wɑmmú Kuyie.
\p
\v 18 Kuyie nti nnɑ̀kɛ́ kunku kùù tì nti bɛnkɛ nɛ̀ dimɔ̀nnì.
\m
\v 19 Kɛ̀ Isɑku dɔ̀: N yɛ̀mmɛ̀ í dò nti duɔ́ mbɛ̀ɛ̀ í tú Sifubɛ kɛ yie nYesu dɛ kó ikuɔ́ kɛ̀ bɛ̀ nhɑ́ɑ̀rì. 
\v 20 Yóunɛ̀ kɛ̀ tí bɛ̀ wɑ̃̀ri kɛ dɔ̀: Bɛ̀ bɑ́ nyo iwũɔ̃ bɛ̀ fìé ì yɛbɔkɛ̀, kɛ́mɛntɛ́nɛ̀ bɛmɑ́ɑ̀ bɛ̀ bo ndɔutinɛ̀mɛ̀ bɛtɔbɛ̀, kɛ bɑ́ɑ́ cɑ́ɑ́kɛ́ fɛhɔ̃̀fɛ̀ bɛ̀ í fèútɛ́ fɛ̀ yoo mɛyĩ̀ĩ̀. 
\v 21 Kɛ yɛ̃́ Mɔyiisi kó ikuɔ́ bomɛ̀ nɛ̀ dimɔ̀nnì kɛ̀ bɛ̀ ì kɑ̀ɑ siom̀pùu simɔu titííntouti miɛkɛ.
\s1 Bɛ̀ do wɑ̃̀ri dìì pɑ́tíri mucɑ̃mmù kpɛ́í
\p
\v 22 Yesu tɔ̃rɛ̀ nɛ̀ bɛwedɔùnkótíbɛ̀ nɛ̀ Kirisi kɔbɛ bɛmɔu kɛ̀ bɛ̀ɛ pɛ́nsìrì dɛ kó ikuɔ́, kɛ́tɑ̃ɑ̃tɛ́ Sudi bɛ̀ tú wè Bɑɑrisɑbɑɑsi nɛ̀ Sidɑɑsi bɛnìtìbɛ̀ bɛmɔu tɑ̃ bɛ̀, kɛ́ bɛ̀ nɛínnɛ̀ Pɔɔri nɛ̀ Bɑnnɑbɑɑsi kɛ̀ bɛ̀ɛ kɔtɛ Ãntiyɔsi, 
\v 23 kɛ́ bɛ̀ duɔ́ ndipɑ́tíri kɛ̀ dì tu: Di kɔbɛ tínti Yesu tɔ̃rɛ̀ nɛ̀ bɛwedɔunkótíbɛ̀, ti di dɔunko díndi bɛ̀ɛ̀ í tú Sifubɛ kɛ bo Ãntiyɔsi nɛ̀ Sidii kó itempɛ̃. 
\v 24 Ti kèè ti kɔbɛ mɑbɛ̀ kɔ̀toomɛ̀ kɛ di kɔkɛ́nɛ̀ kɛ cɑ̀ɑ̀rɛ̀ di yɛ̀mmɛ̀, tíì í bɛ̀ duɔ́ ndɛ kó dinùù. 
\v 25 Dɛɛ̀ te kɛ̀ ti wɛ̃nnɛ́ kɛ tɑ̃ɑ̃tɛ́ bɛ̀mɑbɛ̀ kɛ bɛ̀ nɛínnɛ̀nko ti nɛ́pobɛ̀ sɑ̀ɑ̀bɛ̀ Bɑnnɑbɑɑsi nɛ̀ Pɔɔri. 
\v 26 Bɛ̀ɛ̀ duɔ́ mbɛmɑ́ɑ̀ kɛ kɑ̀ɑ́tɛ́ mukṹṹ kucɛ mɛ̀pɛ́u ti Yiɛ̀ nYesu kó mutɔ̃mmú kpɛ́í. 
\v 27 Ti tɔ̃nko Sudi nɛ̀ Sidɑɑsi kɛ̀ bɛ̀ bo di tuo ntìì wɑ̃̀ri tìnti dipɑ́tíri miɛkɛ. 
\v 28 Muyɑɑ́nsɑ̀ɑ̀mù muù ti niitɛ́ kɛ̀ ti yɛ̃ nti bɑ́ɑ́ di sṹũ mmucìrìmù kɛ̀ dɛ̀ í tú ikuɔ́ ìì í dò nkɛ́yóu. 
\v 29 Iì tu di bɑ́ nyo iwũɔ̃ bɛ̀ fìé ì yɛbɔkɛ̀ nɛ̀ mɛyĩ̀ĩ̀ nɛ̀ iwũɔ̃ bɛ̀ í fìé ì, kɛ́mɛntɛ́nɛ̀ dimɑ́ɑ̀ di bo ndɔutinɛ̀mɛ̀ ditɔbɛ̀, kɛ̀ di dɔɔ̀ri mɛmmɛ dɛ̀ bo nwenni. Dɛ̀ nsúɔ́nnɛ̀ diyiè mɑrì.
\p
\v 30 Kɛ̀ bɛ̀ɛ cɑu mbɛtɔbɛ̀ kɛ́deè kɛ̀ bɛ̀ɛ kɔtɛ Ãntiyɔsi kɛ́tíí nYesu kɔbɛ pɛ́u, kɛ́ bɛ̀ duɔ́ ndipɑ́tíri. 
\v 31 Kɛ̀ bɛ̀ɛ dì kɑ̀ɑ nkɛ́keè, kɛ̀ dɛ̀ɛ bɛ̀ nɑrikɛ bɛmɔu. 
\v 32 Sudi nɛ̀ Sidɑɑsi bɛ̀ mɛ ntúmɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ mbɛ, kɛ̀ bɛ̀ɛ bɛ̀ duɔ́ nyitié mpɛ́u kɛ́yɑ́úkùnnɛ bɛ kɔ̃̀ntì. 
\v 33 Kɛ́ mbɛ̀ bonɛ̀ kɛ̀ dɛ̀ɛ mɔntɛ, kɛ̀ bɛ̀ɛ bɛ̀ cɑu nkɛ́wɛ̃tɛ bɛ̀ɛ̀ sòò bɛ̀ tɔ̃nní bɛ borɛ̀ nɛ̀ kunɑɑtí. [ 
\v 34 Kɛ̀ Sidɑɑsi yie dɔ̀ ò bo nkpɑɑ́.]
\p
\v 35 Pɔɔri nɛ̀ Bɑnnɑbɑɑsi nɛ̀ bɛtɔbɛ̀ kɛ̀ bɛ̀ ḿbo Ãntiyɔsi kɛ tiè nYesu kɔbɛ kɛ bɛ̀ nɑ̀ɑ́ Tinɑ́ɑǹsɑ̀ɑ̀tì Yesu kpɛti pɛ́u.
\s1 Bɑnnɑbɑɑsi nɛ̀ Pɔɔri bɛ̀ yɑ̀tɛmɛ̀
\p
\v 36 Kɛ̀ dɛ̀ɛ mɔntɛ kɛ̀ Pɔɔrii nɑ́kɛ́ Bɑnnɑbɑɑsi kɛ dɔ̀: Tí wɛ̃tɛ yɛhɛkɛ̀ yɛmɔu kɛ́síékɛ́ ti sòò nɑ̀kɛ́ bɛ̀ Kuyie nnɑ́ɑǹtì, kɛ́yɑ̀ bɛ̀ bo kɛ̀ dɛ̀ dòmmɛ̀.
\p
\v 37 Kɛ̀ Bɑnnɑbɑɑsi ndɔ́ Isɑ̃ɑ̃ bɛ̀ yu wè Mɑriki ḿbɛ̀ nɛínɛ̀. 
\v 38 Kɛ̀ Pɔɔrii yetɛ kɛ dɔ̀: Ò bɑ́ nti nɛínɛ̀ kɛ yɛ̃́ ò do ti yóunɛ̀mɛ̀ mutɔ̃mmú Pɑ̃nfidii kɛ́ítɛ́. 
\v 39 Kɛ̀ dɛ̀ɛ nɑɑ́ tinɛìtì mɛdiɛ̀ nkɛ̀ bɛ̀ɛ yɑtɛ, kɛ̀ Bɑnnɑbɑɑsii túótɛ́ Mɑriki kɛ̀ bɛ̀ɛ tɑ kudɑbɛkù kɛ́kɔtɛ Sipiri. 
\v 40 Kɛ̀ Pɔɔrii tɑ̃ɑ̃tɛ́ Sidɑɑsi kɛ̀ bɛ̀ɛ bɛ̀ bɑ́ntɛ̀nɛ̀ Kuyie nkɛ̀ bɛ̀ɛ ítɛ́. 
\v 41 Kòo kɔtɛ Sidii nɛ̀ Sidisii kɛ́nkpénkùnko Kirisi kɔbɛ Kuyie nkó kucɛ miɛkɛ.
\c 16
\s1 Pɔɔri do tùótɛ́mɛ̀ Timɔntee
\p
\v 1 Kɛ̀ Pɔɔrii kɔtɛ Dɛribu kɛ́pɛ̃ɛ̃tɛ́ kɛ́kɔtɛ Disiri, kɛ́yɑ̀ odɑpɑ̀ɑ̀ mmɔù bɛ̀ tú wè Timɔntee, kòò tu Yesu kou, kòo yɔ̃ tú Sifu kɛ tũ nYesu, kòo cicɛ tú Kɛrɛki. 
\v 2 Kɛ̀ Yesu kɔbɛ bɛ̀ɛ̀ bo Disiri nɛ̀ Ikɔnni kɛ̀ bɛ̀ ò sɑ̃ntí. 
\v 3 Kɛ̀ Pɔɔri ndɔ́ Timɔntee ò nɛinɛ̀, kóò tùótɛ́ kɛ́cɑ̃ntɛ́ Sifubɛ bɛ̀ɛ̀ dɛ̀ bo bɛ kpɛ́í, kɛ yɛ̃́ bɛ̀ do yɛ̃́mɛ̀ bɛmɔu o cicɛ túmɛ̀ Kɛrɛki. 
\v 4 Kɛ̀ bɛ̀ nkɔrì yɛhɛkɛ̀ kɛ nɑ́ɑntɛ Yesu tɔ̃rɛ̀ nɛ̀ bɛwedɔunkótíbɛ̀ bɛ̀ tɑ̃ɑ̃tɛ́ tì Sedisɑdɛmmu, kɛ tú bɛ̀ɛ tì yie. 
\v 5 Mɛm̀mɛ kɛ̀ Kirisi kɔbɛ ńkpénkú Kuyie nnɑ́ɑǹtì miɛkɛ kɛ sṹũnko yɛwe yɛmɔu.
\s1 Kuyie nyúmɛ̀ Pɔɔri Mɑseduɔnni
\p
\v 6 Kɛ̀ Muyɑɑ́nsɑ̀ɑ̀mùu yetɛ bɛ̀ bo nɑ̀kɛ́mɛ̀ Kuyie nnɑ́ɑǹtì Asii kɛ̀ bɛ̀ɛ pɛ̃ɛ̃tɛ́ Fidisii nɛ̀ Kɑdɑsii, 
\v 7 kɛ́tuɔkɛ Misii kó kutemmɑ̀nku kɛ ndɔ́ kɛ́kɔtɛ Bitinnii kɛ̀ Muyɑɑ́nsɑ̀ɑ̀mùu yetɛ. 
\v 8 Kɛ̀ bɛ̀ɛ yóu kɛ́tɑ Misii kɛ́pɛ̃ɛ̃tɛ́ kɛ́kɔtɛ Todowɑɑsi. 
\v 9 Kɛ̀ Pɔɔri nduɔ́ kɛyènkɛ̀ kɛ̀ Kuyie nhò bɛnkɛ mɛbɛnkùmɛ̀ kòo yɑ̀ Mɑseduɔnni kou mɔù, kòò còḿmú koò bɑ̀ɑ́ nkɛ tú: Kɔtɛní ti ciɛ kɛ́ ti teennɛ̀! 
\v 10 Kɛ̀ ti bɑntɛ́ kɛ dò nKuyie nkuù kɛ̀ n ti yu kɛ̀ ti bo nɑ́kɛ́ Tinɑ́ɑǹsɑ̀ɑ̀tì, kɛ̀ ti pɑ̃̀nkɛɛ ítɛ́ Todowɑɑsi, 
\v 11 kɛ́tɑ bɑ̀tóò kɛ́kɔtɛ Sɑmmutɑɑsi dihɛì dìì sokɛ́ mɛniɛ mmiɛkɛ. Kɛ̀ dɛ̀ɛ wentɛ́ kɛ̀ ti kɔtɛ Nɛɑpodii. 
\v 12 Kɛ ítɛ́ dɛborɛ̀ kɛ́kɔtɛ Fidipu Mɑseduɔnni kó kutempɛ̃ nkó dihɛì kètirì kɛ̀ Odommu kɔbɛ dì bɑkɛ́, kɛ̀ tí nkɛ mbo kɛ dɔ̀ yɛwe sɑ́m̀pɔ́.
\s1 Didii tũnnɛmɛ̀ Yesu
\p
\v 13 Tɛom̀pùtɛ̀ yiè kɛ̀ ti yɛ̀, kɛ́tɑ kukó nkɛ bo yɑ̀ Sifubɛ bo nkɛ bɑ̀ɑ́ nKuyie. Kɛ sɔ̃́nkɛ́ bɛnitipòbɛ̀ mɑbɛ̀ dɛborɛ̀ kɛ́kɑroo kɛ́ mbɛ̀ nɑ̀ɑ́ Kuyie nnɑ́ɑǹtì, 
\v 14 kɛ́yɑ̀ onitipòkù mɔù bɛ̀ tú wè Didii kòò bonní Tiyɑtiiri, kɛ fiiti tiyɑɑ̀kpetì tiwũɔ̃tì kɛ tũ nKuyie, kɛ̀ Kuyie nkpetɛ́ o yɛ̀mmɛ̀ kòò nkémmú Pɔɔri nɑ̀ɑ́ ntì. 
\v 15 Kɛ̀ tí ò ɑ̃nnɛ́ bɑ̀tɛ́mmù nɛ̀ o cĩ́ɛ̃̀tɛ̀ kɔbɛ.
\p Kòo nyetíróo kɛ tú: Kɛ̀ di yie nkɛ dò m mɛ̀nkɛ cɔutɛ́ Yesu kɔtɛnɛ̀ní kɛ́mbo n cĩ́ɛ̃̀tɛ̀.
\s1 Pɔɔri bɛ̀timɛ̀ onipopɑ̃ũ̀ kó dibɔɔ̀
\p
\v 16 Diyiè mɑrì kɛ ti nkɔri mubɑ́ɑmmu kɛ́conɛ̀ osɑpɑ̀ɑ̀ mmɔù kòò tu kudɑɑkù, kɛ̀ dibɔɔ̀ ò tɑ, kòò pɑ̃ũ̀ kòo yɛmbɛ̀ pɛ̀ú idíítí. 
\v 17 Kòo nti tũ nkɛ wékíí kɛ tú: Bɛnìtìbɛ̀ biɛ ntú Kuyie ndiɛkù tɔ̃mbɛ̀ mbɛ, kɛ di nɑ́ɑ́ mmɛdɛɛtímɛ̀ kó tinɑ́ɑǹtì.
\p
\v 18 Kòo mmɛ nhɔ̃ nyɛwe yɛmɔu kɛ̀ dɛ̀ɛ ɔu Pɔɔri kòo wɛ̃ɛ̃tɛ kɛ́pɛ́i ndibɔɔ̀ kɛ dɔ̀: Nɛ̀ Yesu Kirisi kó diyètìrì yɛ̀ onitipòkù yie mmiɛkɛ! Dɛndɛ bɑ̀mbɑ̀ nkɛ̀ dìi yɛ̀. 
\v 19 Onitipòkù yɛmbɛ̀ sɔ̃́ ndìì mɔ̀nnì bɛ̀ tɛ̃́nkɛ í yó mpɛ́ú idíítí, kɛ pĩ́ mPɔɔri nɛ̀ Sidɑɑsi kɛ́kɔtɛnɛ̀ bɛbeémbɛ̀ borɛ̀. 
\v 20 Kɛ dɔ̀: Bɛnìtìbɛ̀ biɛ ntú Sifubɛ mbɛ kɛ kɔ̀tɛnní diɛ mmɛkɔɔ̀mmɛ̀. 
\v 21 Kɛ bɛnkú bɛ kó ikuɔ́ tínti Odommu kɔbɛ ti í dò nkɛ́ntũ nyì.
\p
\v 22 Kɛ̀ ditĩ̀nnìi tì yie nkɛ̀ bɛbeémbɛ̀ɛ duɔ́ nkɛ̀ podíìsìbɛ̀ɛ dɑ́tɛ́ Pɔɔri nɛ̀ Sidɑɑsi bɛ yɑɑ̀bòrɛ̀ kɛ́ bɛ̀ puotí yɛdɑ́, 
\v 23 kɛ́deè kɛ́ bɛ̀ kpetínnɛ́ kɛ́duɔ́ nkɛ̀ kuhɑ̃ɑ̃pɔ̀nkù mbɛ̀ bɑ̀ɑ mɛsɑ̀ɑ̀, 
\v 24 kɛ́ bɛ̀ tɑ́ú nkɛ́tɑnnɛ́ kufɑ̃́ɑ̃́ ndɛ́tikù.
\p
\v 25 Kɛyènkɛ̀ cuokɛ̀ kɛ̀ Pɔɔri nɛ̀ Sidɑɑsi kɛ̀ bɛ̀ bɑ̀ɑ́ nKuyie nkɛ diè nkɛ kù sɑ̃ntí, kɛ̀ tikpetíntì tɛtì kèḿmú. 
\v 26 Kɛ̀ bɛ̀ nyóó dɑɑtɛ kɛ̀ kɛtenkɛ̀ɛ sɑ̃̀ntɛ̀, kɛ̀ dikpetíntouu sɑ̃ntɛ̀ kɛ̀ yɛbòrɛ̀ɛ kpetɛ́, kɛ̀ bɛ̀ boú mɛ̀ɛ̀ fĩmmɛ tikpetíntì nɛ̀ bɛ̀ bɛ̀ tɑ́ú nnɛ̀ dɛ̀ kɛ̀ dɛ̀ɛ duó. 
\v 27 Kɛ̀ kuhɑ̃ɑ̃pɔ̀nkùu entɛní kɛ́yɑ̀ yɛbòrɛ̀ kpetɛ́mɛ̀ kɛ nyɛ̃́ kɛ tú bɛ̀ cokɛ́, kɛ́kpɑtɛ disiè kɛ bo kuɔ kumɑ́ɑ̀. 
\v 28 Kɛ̀ Pɔɔrii pɛ́i nkɛ dɔ̀: Bɑ́ɑ́ dɔɔ̀ ɑmɑ́ɑ̀ mɛyɛi. Ti bomu timɔu.
\p
\v 29 Kɛ̀ ku kɔ̃̀ntì ɑu kɛ̀ kùu duɔ́ nkɛ̀ bɛ̀ɛ míítɛ́ kɛ̀ kùu cokóo Pɔɔri nɛ̀ Sidɑɑsi bɛ borɛ̀ kɛ́nínkóo bɛ ììkɛ̀, 
\v 30 kɛ́ bɛ̀ dènnɛní kɛ́ bɛ̀ bekɛ kɛ dɔ̀: Bɛkótíbɛ̀, n dò nkɛ́yĩ́mɛ̀ kɛ̀ Kuyie nni ndɛɛtɛ́? 
\v 31 Kɛ̀ bɛ̀ɛ kù tɛ̃̀ńnɛ́ kɛ dɔ̀: N tɑ̃́ ti Yiɛ̀ nYesu ɑ bo cootɛ́ fɔ̃́ nnɛ̀ ɑ cĩ́ɛ̃̀tɛ̀ kɔbɛ.
\p
\v 32 Kɛ̀ bɛ̀ɛ kù nɑ̀kɛ́ Kuyie nnɑ́ɑǹtì nɛ̀ bɛ̀ɛ̀ kó dimɑ̀ɑ̀ bo ku cĩ́ɛ̃̀tɛ̀. 
\v 33 Kɛ̀ kùu bɛ̀ tùótɛ́ kɛ ɔ́ú bɛ muɔ, nkɛ̀ bɛ̀ pɑ̃̀nkɛɛ kù ɑ̃nnɛ́ bɑ̀tɛ́mmù dɛ kó kɛyènkɛ̀ nɛ̀ ku cĩ́ɛ̃̀tɛ̀ kɔbɛ. 
\v 34 Kɛ̀ kùu yú Pɔɔri nɛ̀ Sidɑɑsi kɛ́konnɛ̀ kɛ́ bɛ̀ duɔ́ mmudiì, kɛ̀ diwɛ̀ì nkù bo nɛ̀ ku cĩ́ɛ̃̀tɛ̀ kɔbɛ bɛ̀ cɔutɛ́mɛ̀ Kuyie.
\p
\v 35 Kɛ̀ dɛ̀ɛ wentɛ́ kɛ̀ bɛbeémbɛ̀ɛ tɔ̃ mpòdíìsìbɛ̀, kɛ̀ bɛ̀ɛ kù nɑ̀kɛ́ kɛ dɔ̀ kùu bɛ̀ fĩ́ĩ.
\p
\v 36 Kɛ̀ kuhɑ̃ɑ̃pɔ̀nkùu nɑ́kɛ́ Pɔɔri kɛ dɔ̀: Bɛbeémbɛ̀ tɔ̃nní kɛ tú n di fĩ́ĩ, di mmɔ̀nnì yɛ̀nnɛ̀ kɛ́pɛ̃ɛ̃tɛ́ kɛ bɑ́ nyĩɛ̃̀kù.
\p
\v 37 Kɛ̀ Pɔɔrii nɑ́kɛ́ pòdíìsìbɛ̀ kɛ dɔ̀: Tínti Odommu kɔbɛ bɛ̀ ti puotí bɛnìtìbɛ̀ ììkɛ̀ bɑ́ bɛ̀ í ti bekɛ́nɛ̀ kɛ nɛ́ dɔ́ kɛ ti fĩ́ĩ ndisɔrɑ̀ɑ̀? Ti bɑ́ɑ́ yie. Bɛ̀ɛ kɔtɛní bɛ mɔ́mmɔmbɛ kɛ́ ti dennɛ.
\p
\v 38 Kɛ̀ pòdíìsìbɛ̀ɛ kɔtɛ kɛ́nɑ́kɛ́ bɛbeémbɛ̀ Pɔɔri nɛ̀ o kɔbɛ bɛ̀ tumɛ̀ Odommu kɔbɛ kɛ̀ kufɔ̃wɑɑ́ mbɛ̀ pĩ. 
\v 39 Kɛ̀ bɛ̀ɛ kɔtɛ kɛ́ bɛ̀ mɔɔ mɛcĩ́ɛ̃́mmɛ̀, kɛ́ bɛ̀ dènnɛ dikpetíntou, kɛ́ bɛ̀ bɑ́ntɛ̀ kɛ dɔ̀ bɛ̀ɛ yɛ̀ dihɛì. 
\v 40 Kɛ̀ bɛ̀ɛ yɛ̀ dikpetíntou kɛ́kɔtɛ Didii cĩ́ɛ̃̀tɛ̀, kɛ́yɑ̀ Yesu kɔbɛ kɛ yɑ́úkùnnɛ bɛ kɔ̃̀ntì, kɛ́pɛ̃ɛ̃tɛ́.
\c 17
\s1 Bɛ̀ pĩ̀ḿmɛ̀ Sɑsɔ̃ɔ̃ nɛ̀ o kɔbɛ kɛ kɔ̀tɛnɛ̀ bɛbeémbɛ̀ borɛ̀
\p
\v 1 Kɛ̀ bɛ̀ɛ pɛ̃ɛ̃tɛ́ Ãnfipodii nɛ̀ Apodonii kɛ́tuɔkɛ Tɛsɑdoniki, kɛ̀ Sifubɛ kó kutííntouku dɛ̀ bo. 
\v 2 Kɛ̀ Pɔɔri tó tɑ Sifubɛ kó kutííntouku kɛ dɔ̀ siom̀pùu sìtɑ̃ɑ̃ti kɛ nɑ́ɑ́ Kuyie nnɑ́ɑǹtì. 
\v 3 Kɛ́ mbɛ̀ nɑ̀ɑ́ nkɛ tú: Kirisi do dò nkɛ́fɛ̃́ṹtɛ́mu kɛ́kú kɛ́yɑ̃́ntɛ́, Yesu n di nɑ́ɑ́ nwèè kpɛ́í weè tu Kirisi.
\p
\v 4 Bɛ miɛkɛ kɛ̀ Kɛrɛkibɛ bɛ̀ɛ̀ do dé Kuyie bɛnitipodiɛbɛ̀ kɛ̀ bɛ̀ɛ yie mPɔɔri nɛ̀ Sidɑɑsi kpɛti kɛ́nsũ mɛsɑ̀ɑ̀.
\p
\v 5 Kɛ̀ dɛ̀ɛ yonkɛ Sifubɛ kɛ̀ bɛ̀ɛ yú bɛcièmbɛ̀ kɛ̀ bɛ̀ɛ wɛ̃nnɛ́ kɛ́ɑ̃nnɛ́ dikpɑ̀nnì kɛ́ítɛ́nɛ̀ kɛmiɛkɛ kɛ́nwɑnti Pɔɔri nɛ̀ Sidɑɑsi, kɛ́kɔtɛ Sɑsɔ̃ɔ̃ cĩ́ɛ̃̀tɛ̀ kɛ bo bɛ̀ kɔ̀tɛnɛ̀ ditĩ̀nnì borɛ̀, 
\v 6 kɛ́ bɛ̀ mɔ̀ńtɛ́, kɛ́pĩ́ nSɑsɔ̃ɔ̃ nɛ̀ Yesu kɔbɛ mɑbɛ̀ kɛ́kɔtɛnɛ̀ bɛbeémbɛ̀ borɛ̀ kɛ́nwékíí kɛ tú: Dɛ kó bɛnìtìbɛ̀ cɑ̀ɑ̀ri kutenkù kumɔu kó ikuɔ́ nyi kɛ tùɔkɛní diɛ nkɛ̀ Sɑsɔ̃ɔ̃ bɛ̀ cɔutɛ́. 
\v 7 Kɛ sènkɛ̀rì okpɑ̀ɑ̀tì Sesɑɑ kɛ nɑ́ɑ́ nkɛ tú okpɑ̀ɑ̀tì mɔù bo kɛ̀ bɛ̀ ò tu Yesu.
\p
\v 8 Kɛ̀ dɛ̀ɛ yonkɛ bɛbeémbɛ̀ nɛ̀ dihɛì kɔbɛ. 
\v 9 Sɑsɔ̃ɔ̃ nɛ̀ o kɔbɛ kɛ̀ bɛ̀ɛ yietí idíítí dihɛì yɛmbɛ̀ kɛ̀ bɛ̀ nɛ́ nɑ kɛ́ bɛ̀ fĩ́ĩ.
\s1 Pɔɔri nɛ̀ o kɔbɛ bɛ̀ nɑ̀kɛ́mɛ̀ Kuyie nnɑ́ɑǹtì Bedee
\p
\v 10 Kɛ̀ kɛyènkɛ̀ɛ biitɛ kɛ̀ Yesu kɔbɛɛ duɔ́ nkɛ̀ Pɔɔri nɛ̀ Sidɑɑsi kɛ̀ bɛ̀ɛ kɔtɛ Bedee, bɛ̀ tùɔ̀kɛ dìì mɔ̀nnì kɛ́tɑ Sifubɛ kó kutííntouku. 
\v 11 Kɛ̀ bɛmbɛ ndɔ́ Kuyie nnɑ́ɑǹtì kɛ́pɛ̃ɛ̃tɛ́ Tɛsɑdoniki kɔbɛ, kɛ níí ntì kɑ̀ɑ̀ nyɛwe yɛmɔu kɛ bo yɑ̀ kɛ̀ nsɑ̀ kɛ̀ bɛ̀ nɑ̀ɑ́ ntì tu timɔ́mmɔnti. 
\v 12 Bɛ miɛkɛ kɛ̀ bɛnìtìbɛ̀ pɛ́uu yie nYesu, Kɛrɛki kó bɛnitipòbɛ̀ nɛ̀ bɛnitidɑɑbɛ̀ pɛ́u. 
\v 13 Sifubɛ bɛ̀ɛ̀ bo Tɛsɑdoniki kɛ̀ bɛ̀ɛ keè Pɔɔri nɑ̀ɑ́mmɛ̀ Kuyie nnɑ́ɑǹtì Bedee kɛ́kɔtoo kɛ́sukú bɛnìtìbɛ̀. 
\v 14 Kɛ̀ Yesu kɔbɛɛ kɔtɛnɛ̀ Pɔɔri dɑ̀mɛ́ɛ̀rì kòò bo tɑ bɑ̀tóò, kɛ̀ Sidɑɑsi nɛ̀ Timɔntee kɛ̀ bɛɛ̀ nkpɑɑ́ Bedee. 
\v 15 Kɛ̀ bɛ̀ɛ ò cíe nkɛ́tuɔkɛ Atɛnni kɛ́wɛ̃tɛ Bedee kɛ́nɑ́kɛ́ Sidɑɑsi nɛ̀ Timɔntee kɛ dɔ̀: Pɔɔri tu bɛ̀ɛ kɔtoo mɛcɑ̃ɑ̃.
\s1 Pɔɔri kɔ̀tɛmɛ̀ Atɛnni
\p
\v 16 Kɛ̀ Pɔɔri mbɑɑ Sidɑɑsi nɛ̀ Timɔntee Atɛnni, kɛ́yɑ̀ yɛbɔkɛ̀ sũmɛ̀ dɛ kó dihɛì kòo yɛ̀mmɛ̀ɛ cɑɑ̀rɛ̀ mɛdiɛ̀. 
\v 17 Kòò nnɑ́ɑ́nnɛ̀ Sifubɛ nɛ̀ bɛ̀ɛ̀ í tú Sifubɛ kɛ tũ nSifubɛ kó kuwedɔuncɛ titííntouti miɛkɛ, yɛwe yɛmɔu kɛ nnɑ́ɑ́nnɛ̀ ò mɑunɛ̀ bɛ̀. 
\v 18 Kɛ múnkɛ mmɑunɛ̀ mɛciì nyɛmbɛ̀ bɛ̀ tu bɛ̀ Epikudiyɛ̃bɛ, nɛ̀ Sitoyisĩɛ̃bɛ, kɛ̀ bɛ̀mɑbɛ̀ ntú onìtì yie nnɑ̀ɑ́ nhɔ̃̀nti? Kɛ̀ bɛtɔbɛ̀ tu dɛ dò nhò nɑ̀ɑ́ nKuyie ncɑ̀nkù mɑkù kpɛ́í nkɛ, kɛ yɛ̃́ ò do nɑ́ɑ́mmɛ̀ Yesu kumɛ̀ mmɛ kɛ yɑ̃̀ńtɛ́.
\p
\v 19 Kɛ̀ bɛ̀ɛ ò kɔ̀tɛnɛ̀ dihɛì kó bɛkótíbɛ̀ ɔ̃ɔ̃ tíí ndɛ̀ kóò bekɛ kɛ dɔ̀: Dɔɔ̀ kɛ ti nɑ́kɛ́ tinɑ́ɑm̀pɑ̀ntì ɑ nɑ́ɑ́ ntì tú mù. 
\v 20 Ti mu nyí kèè dɛ kó tinɑ́ɑǹtì diyiè mɑrì kɛ dɔ́ kɛ́bɑntɛ́ tì tu mù.
\p
\v 21 Atɛnni kɔbɛ bɛmɔu nɛ̀ bɛpɔ̀ɔ̀bɛ̀ bɛ̀ɛ̀ bo dɛ kó dihɛì, bɛ̀ do ɔ̃ ntṹṹ kɛ nɑ́ɑ́mmu kɛ kémmú tinɑ́ɑm̀pɑ̀ntì tìì yìɛ̀ní.
\p
\v 22 Kɛ̀ Pɔɔrii ítɛ́ kɛ́cómmú bɛnìtìbɛ̀ ììkɛ̀ kɛ dɔ̀: Díndi Atɛnni kɔbɛ n yɑ̀mu kɛ dò ndi wɑnti Kuyie mmɛdiɛ̀. 
\v 23 N cè ndihɛì kɛ yɑ̀ di bɑ́ɑ́ ndɛ̀ kɛ tú Kuyie nkɛ wɑ̃̀ri dɛ̀mɑrɛ̀ ĩ́nkɛ̀ kɛ tú: Kuyie nti í yɛ̃́ kù. Di bɑ́ɑ́ nkùù yie nkɛ í kù yɛ̃́, n kɔ̀tɛní kɛ bo di nɑ́kɛ́ kuù kpɛ́í. 
\v 24 Kuù dɔ̀ɔ̀ kɛtenkɛ̀ nɛ̀ dɛ̀ɛ̀ kó dimɑ̀ɑ̀ bo, kuù bɑkɛ́ kɛĩ́nkɛ̀ nɛ̀ kɛtenkɛ̀, kù í ɑ̃ bɛnìtìbɛ̀ mɑɑ́ tìì touti miɛkɛ. 
\v 25 Kù í yɛ̃ nti nkù duɔ̀ ndɛ̀mɑrɛ̀ kɛ yɛ̃́ kuù duɔ̀mmɛ̀ mufòmmu dɛnɛnnɛ̀ dɛmɔu. 
\v 26 Kuyie ndɔ̀ɔ̀ wèè nìtì borɛ̀ ndɛ ibotí imɔu sũ̀ṹmmɛ̀ kutenkù kumɔu. Kɛ̀ kù yɛ̃́ bɑ́ wè ò yó mborɛ̀ nɛ̀ o we mɑ̀mɛ̀. 
\v 27 Kù mɛ̀ dɔ̀ɔ̀ kɛ dɔ́ bɛnìtìbɛ̀ɛ kù wɑmmúmu, kɛ̀ bɛ̀ kù wɑɑ́ mbɑ́ kɛ í yɛ̃́ bɛ̀ bo kù wɑmmúmɛ̀ bɛ̀ bo kù yɑ̀, kɛ yɛ̃́ kù í ti dɛ́tirìnɛ̀mɛ̀. 
\v 28 Kɛ yɛ̃́ kuù temɛ̀ kɛ̀ ti fòù kɛ bo, kɛ ɔ̃ɔ̃ nɑ kɛ́dɔɔ̀ dɛ̀mɑrɛ̀. Di kó bɛpɑ́tiwɑ̃ɑ̃̀bɛ̀ mɑbɛ̀ ti nwɑ̃̀ri kɛ tú: Ti tú kuù kó ibí. 
\v 29 Kɛ̀ ti tú ku bí, ti yɛ̀mmɛ̀ bɑ́ ndò Kuyie ndònnɛ̀ tɛtenkɑɑnìtɛ̀ mɛsɔɔ nkpɛtɛ, yoo mɛbiɛrimɛ kpɛtɛ, yoo ditɑ̃́rì onìtì dɔ̀ɔ̀ dɛ̀ nɛ̀ o kó mɛciì. 
\v 30 Kuyie mbùútóomu mɛyɛi nti í kù yɛ̃́ dìì mɔ̀nnì kɛ dɔɔ̀ri mɛ̀ kɛ nɑ́ɑ́ ndi mmɔ̀nnì bɛnìtìbɛ̀ kɛ tú: Bɛ̀ɛ cèètɛ mɛborimɛ. 
\v 31 Kɛ yɛ̃́ kù tɑ̃ɑ̃tɛ́mɛ̀ diyiè kɛ yóó duɔ́ nkɛ̀ Yesu bekɛ́nɛ̀ bɛnìtìbɛ̀ bɛmɔu. Kù dɛ mbɛnkɛ kɛ duɔ́ nkɛ̀ Yesu yɑ̃̀ńtɛ́
\p
\v 32 Kɛ̀ bɛ̀ɛ keè Pɔɔri nɑ̀ɑ́mmɛ̀ mukúkɛ́yɑ̃́ntímù kpɛ́í kɛ̀ bɛ̀mɑbɛ̀ nhò dɑú kɛ̀ bɛtɔbɛ̀ tu: Diyiè mɑrì ndi ɑ bo tì nti nɑ́kɛ́mɛ̀.
\p
\v 33 Mɛm̀mɛ kɛ̀ Pɔɔrii ítɛ́ dɛborɛ̀. 
\v 34 Nɛ̀ mɛmmɛ kɛ̀ bɛ̀mɑbɛ̀ nhò tũ̀ nkɛ́yie nYesu. Bɛɛ̀ kóò mɔù tu: Deniisi dibeéntĩ̀nnì kou, nɛ̀ onitipòkù mɔù bɛ̀ tú wè Dɑmmɑriisi nɛ̀ bɛtɔbɛ̀ mɑbɛ̀.
\c 18
\s1 Bɛ̀ pĩ̀ḿmɛ̀ Pɔɔri Kɔdɛnti
\p
\v 1 Kɛ̀ Pɔɔrii ítɛ́ Atɛnni kɛ́kɔtɛ Kɔdɛnti 
\v 2 kɛ mɑ́ɑ́nɛ̀ Sifu mɔù bɛ̀ tú wè Akidɑɑsi Pɔ̃ɔ̃ ɛì kou, kòò boní Itɑdii nɛ̀ o pokù Pirisiidi kɛ tùɔkɛní bɑ̀mbɑ̀. Kɛ yɛ̃́ okpɑ̀ɑ̀tì diɛwè Kododi do duɔ́mmɛ̀ kɛ̀ Sifubɛɛ yɛ̀ Odommu kɛ̀ Pɔɔrii kɔtɛ kɛ́ bɛ̀ yɑ̀. 
\v 3 Pɔɔri do mɛ nnɔmmɛ̀ muyɑɑ̀dùɔ̀ kɛ̀ bɛ̀ɛ wɛ̃ńnɛ́ kɛ́nduɔ̀kù tiyɑ̀ɑ̀tì bɛ̀ dɔ̀ɔ̀rinɛ̀ tì titouti. 
\v 4 Kɛ̀ Pɔɔri nnɑ́ɑ́ nKuyie nnɑ́ɑǹtì siom̀pùu simɔu kutííntouku miɛkɛ kɛ yɑ́úkùnko Sifubɛ nɛ̀ Kɛrɛkibɛɛ kɔ̃̀ǹtì kɛ̀ bɛ̀ yié nKuyie nnɑ́ɑǹtì.
\p
\v 5 Sidɑɑsi nɛ̀ Timɔntee kɛ̀ bɛ̀ɛ ítɛ́ní Mɑseduɔnni kɛ́tuɔkɛní, kɛ̀ Pɔɔrii pɛ́tɛ́ mɛfíè nkɛ nnɑ́ɑ́ nSifubɛ Kuyie nnɑ́ɑǹtì kɛ tú Yesu weè tu Odɛɛtíwè, Kuyie nnɑ̀kɛ́ wèè kpɛ́í. 
\v 6 Kɛ̀ Sifubɛɛ yetɛ kɛ́ nhò nsɑ̃̀ɑ̃́, nkɛ̀ Pɔɔrii piùrɛ̀ o yɑ̀ɑ̀tì kɛ dɔ̀: Kɛ̀ di feti dɛ̀ í tú n kpɛti, di yɛi ndo di yɔ ĩ́nkɛ̀ nkɛ, di mmɔ̀nnì n kɔri bɛ̀ɛ̀ í tú Sifubɛ bɛ bíɛ́kɛ̀ nkɛ.
\p
\v 7 Kòo yɛ̀ kɛ́tɑ onìtì mɔù cĩ́ɛ̃̀tɛ̀ bɛ̀ tú wè Tituusi Susituusi kòo tũ nKuyie, kòo cĩ́ɛ̃̀tɛ̀ pɛ̀kɛ́nɛ̀ kutííntouku. 
\v 8 Kɛ̀ Kirisipusi kutííntouku kóo kótì nɛ̀ o cĩ́ɛ̃̀tɛ̀ kɔbɛ bɛmɔu kɛ̀ bɛ̀ɛ yie nYesu kɛ̀ Kɔdɛnti kɔbɛ pɛ́uu keè Pɔɔri nɑ̀ɑ́mmɛ̀ kɛ múnkɛɛ yie nYesu kɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù.
\p
\v 9 Kɛyènkɛ̀ mɑkɛ̀ kɛ̀ ti Yiɛ̀ mbɛnkɛ omɑ́ɑ̀ Pɔɔrii kóò nɑ̀kɛ́ kɛ dɔ̀: Bɑ́ nyĩɛ̃̀kù, sɔɔtɛ́ kɛ́nnɑ́ɑ́, bɑ́ɑ́ yóu ɑ bo nnɑ́ɑ́mmɛ̀. 
\v 10 N dɑ bonɛ̀mu, òmɔù bɑ́ɑ́ nɑ kɛ dɑ dɔɔ̀ mɛyɛi, kɛ yɛ̃́ n kɔbɛ sũmɛ̀ dihɛì dii mmiɛkɛ.
\p
\v 11 Mɛmmɛ kɛ̀ Pɔɔri ḿbo Kɔdɛnti kɛ dɔ̀ dibenni nɛ̀ dikéè kɛ bɛ̀ nɑ̀ɑ́ Kuyie nnɑ́ɑǹtì.
\p
\v 12 Kɑyɔ̃ɔ̃ nɑɑ́ ndìì mɔ̀nnì kùmɑ̀ndɑ́ɑ̀ Akɑyii kó kutempɛ̃ nkɛ̀ Sifubɛɛ wɛ̃nnɛ́ kɛ́pĩ́ mPɔɔri kɛ́kɔtɛnɛ̀ kubeéndieku. 
\v 13 Kɛ dɔ̀: Onìtì yie ndɔ́ bɛnìtìbɛ̀ mbɑ́ɑ́ nKuyie mɛ̀mɑmɛ̀ botí nku ikuɔ́ yetɛmɛ̀.
\p
\v 14 Kɛ̀ Pɔɔri ndɔ́ kɛ nɑ mbɛ́i nkɛ̀ Kɑyɔ̃ɔ̃ nɑ́kɛ́ Sifubɛ kɛ dɔ̀: Kòò do nyetɛ́nɛ̀ dihɛì kó ikuɔ́ nyi, yoo ò dɔ̀ɔ̀ mɛyɛi ndiɛmɛ̀ mɑmɛ̀, n nɑ nkèèmu di tú mù. 
\v 15 Dɛ̀ nɛ́ mɛ ntúmɛ̀ tinɑ́ɑǹtì nɛ̀ yɛyètɛ̀ dɛ̀ɛ̀ tu di kó ikuɔ́ kpɛrɛ, dɛ̀ tu di kpɛti nti, m bɑ́ɑ́ nɑ kɛ́ tì bekɛ́.
\p
\v 16 Dɛ mɔ̀nnì kɛ́ bɛ̀ bɛ̀ti kubeéndieku. 
\v 17 Kɛ̀ bɛ̀ɛ pĩ Sositɛnni, kutííntouku kóo kótì kubeéndieku borɛ̀, kɛ́mpuotì, kɛ̀ Kɑyɔ̃ɔ̃ bùútóo.
\s1 Pɔɔri wɛ̃̀tɛmɛ̀ Ãntiyɔsi
\p
\v 18 Kɛ̀ Pɔɔri nkpɑɑ́ Kɔdɛnti kɛ́mɔntɛ kɛ́cɑu nYesu kɔbɛ kɛ́nɛinɛ̀ Pirisiidi nɛ̀ Akidɑɑsi kɛ bo kɔtɛ Sidii, kɛ́tuɔkɛ bɑ̀tóò commu dɛ̀ Sɑ̃nkidee kɛ́kuó kɛ yɛ̃́ ò do cɑ̀nnɛnɛ̀mɛ̀ dinùù Kuyie. 
\v 19 Kɛ̀ bɛ̀ɛ tuɔkɛ Efɛɛsi kɛ̀ Pɔɔrii yóu Akidɑɑsi nɛ̀ Pirisiidi kɛ́tɑ kutííntouku kɛ́nnɑ́ɑ́nnɛ̀ Sifubɛ. 
\v 20 Kɛ̀ bɛ̀ dɔ̀ wè nkpɑɑ́ kòo yetɛ, 
\v 21 kɛ́ bɛ̀ cɑu nkɛ dɔ̀: Kɛ̀ Kuyie ndɔ́ m bo wɛ̃tɛní diyiè mɑrì. Ò mɛ nyĩ kɛ́tɑ bɑ̀tóò kɛ́pɛ̃ɛ̃tɛ́, 
\v 22 kɛ́cútɛ́ Sesɑdee kɛ́pɛ̃ɛ̃tɛ́ Sedisɑdɛmmu kɛ́dɔu Kirisi kɔbɛ kɛ́deè kɛ́kɔtɛ Ãntiyɔsi, 
\v 23 kɛ́mɔntɛ sɑ́m̀pɔ́ kɛ́pɛ̃ɛ̃tɛ́, kɛ́kɔtɛ Kɑdɑsii nɛ̀ Fidisii dɛ kó itempɛ̃ mmiɛkɛ kɛ́ nyɑ́úkùnko Yesu kɔbɛ kɔ̃̀ntì.
\s1 Apodoosi nɑ̀ɑ́mmɛ̀ Kuyie nnɑ́ɑǹtì Efɛɛsi
\p
\v 24 Kɛ̀ Sifu mɔù bɛ̀ tu wè Apodoosi, Adɛkisɑ̃ntiri ɛì kouu tuɔkɛní Efɛɛsi. Ò do tú onìtì nwe wèè yɛ̃́ Kuyie nnɑ́ɑǹtì mɛsɑ̀ɑ̀, kɛ nɔ nkɛ nɑ́ɑ́. 
\v 25 Ò do tì bɛbíí mɛsɑ̀ɑ̀ mmɛ, kɛ́nnɑ́ɑ́ Yesu kpɛti weti weti nɛ̀ tikɔ̃nyɑuti, bɑ́ ò mɛ nyɛ̃́mɛ̀ Isɑ̃ɑ̃ kóo bɑ̀tɛ́mmù mɑ́ɑ̀. 
\v 26 Kòo nnɑ́ɑ́ nkutííntouku miɛkɛ kɛ í yĩɛ̃̀kù kɛ̀ Pirisiidi nɛ̀ Akidɑɑsi kɛ̀ bɛ̀ nkémmú, kɛ́deè kóò yu bɛ cĩ́ɛ̃̀tɛ̀ kóò bɛnkɛ dɛ̀ɛ̀ ò dónnì Kuyie nnɑ́ɑǹtì miɛkɛ. 
\v 27 Kòò ndɔ́ kɛ́kɔtɛ Akɑyii, kɛ̀ Yesu kɔbɛɛ yɑ́úkùnnɛ o kɔ̃̀ntì kɛ́wɑ̃ri dipɑ́tíri Kirisi kɔbɛ bɛ̀ɛ̀ kɛ̀ bo, kɛ̀ bɛ̀ bo ò cɔutɛ́. Kòo kɔtoo kɛ̀ Kuyie nkó mɛsɑ̀ɑ̀ nní nhò bonɛ̀, kòo teénnɛ̀ bɛ̀ɛ̀ cɔutɛ́ Yesu. 
\v 28 Kòo nnɑ́ɑ́ Sifubɛ weti weti bɑ́ kɛ í sɔrì, kɛ bɛ̀ bɛnkú nɛ̀ Kuyie nnɑ́ɑǹtì miɛkɛ Yesu túmɛ̀ Odɛɛtíwè.
\c 19
\s1 Efɛɛsi kɔbɛ pɛ̀tɛ́mɛ̀ Muyɑɑ́nsɑ̀ɑ̀mù
\p
\v 1 Apodoosi bo dìì mɔ̀nnì Kɔdɛnti kɛ̀ Pɔɔri ńceǹtì Asii kó yɛhɛkɛ̀ yɛ̀ɛ̀ bo yɛtɑ̃rɛ̀ ĩ́nkɛ̀, kɛ́tuɔkɛ Efɛɛsi kɛ́yɑ̀ bɛ̀mɑbɛ̀ kɛ̀ bɛ̀ tú Yesu kɔbɛ. 
\v 2 Kòo bɛ̀ bekɛ kɛ dɔ̀: Di pɛ̀tɛ́ Muyɑɑ́nsɑ̀ɑ̀mù nnɛ̀ di tũ̀nnɛmɛ̀ Kuyienɑɑ̀? Kɛ̀ bɛ̀ dɔ̀: Ti ketɛ́ kɛ í kèè Muyɑɑ́nsɑ̀ɑ̀mù kpɛ́í diyiè mɑrì. 
\v 3 Kɛ̀ Pɔɔrii bɛ̀ bekɛ kɛ dɔ̀: Bɛ̀ di ɑ̃nnɛ́ we mbɑ̀tɛ́mmù? Kɛ̀ bɛ̀ dɔ̀: Isɑ̃ɑ̃ kou. 
\v 4 Kɛ̀ Pɔɔrii bɛ̀ nɑ̀kɛ́ kɛ dɔ̀: Isɑ̃ɑ̃ do ɑ̃ɑ̃̀ bɑ̀tɛ́mmù bɛ̀ɛ̀ dɔ́ kɛ́ceetɛ bɛ̀mbɛ bɛ borimɛ, kɛ bɛ̀ nɑ̀ɑ́ nkɛ tú bɛ̀ɛ tũnnɛ wèè kèríní o kó difɔ̃nkúò, wèè tu Yesu.
\p
\v 5 Kɛ̀ bɛ̀ɛ keè dɛ kó tinɑ́ɑǹtì kɛ́duɔ́ nkɛ̀ bɛ̀ɛ bɛ̀ ɑ̃nnɛ́ bɑ̀tɛ́mmù nɛ̀ ti Yiɛ̀ nYesu kó diyètìrì. 
\v 6 Kɛ̀ Pɔɔrii nɔ́ɔ́ nho nɔu bɛ ĩ́nkɛ̀, kɛ́bɑ́ntɛ̀ Kuyie nkɛ̀ Muyɑɑ́nsɑ̀ɑ̀mùu cútɛ́ní, kɛ̀ bɛ̀ nnɑ́ɑ́ tinɑ́ɑǹcɑ̀ntì, kɛ nɑ́ɑ́ Kuyie mpɑ̃ɑ̃nɑ́ɑǹtì. 
\v 7 Dɛ kó bɛnìtìbɛ̀ do bo tɛpíítɛ̀ nɛ̀ bɛ̀dɛ́bɛ̀ mbɛ.
\p
\v 8 Kɛ̀ Pɔɔri ńtɑɑ̀ kutííntouku kɛ dɔ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti kɛ nɑ́ɑ́ Kuyie nkpɑ̀ɑ̀tìyuu kpɛti bɑ́ kɛ í yĩɛ̃̀kù, kɛ dɔ́ bɛ̀ɛ tì yie. 
\v 9 Kɛ̀ itookperí yɛmbɛ̀ɛ yetɛ kɛ́nsɑ̃́ɑ̃́ nYesu, bɛnìtìbɛ̀ ììkɛ̀. Kɛ̀ Pɔɔrii túótɛ́ Yesu kɔbɛ kɛ́kɔtɛnɛ̀ Tidɑnuusi kóo dɑ̀kɔ́ɔ̀rì kɛ́ mbɛ̀ nɑ̀ɑ́ Kuyie nnɑ́ɑǹtì yɛwe yɛmɔu. 
\v 10 Kɛ dɔ̀ yɛbie nyɛ̀dɛ́ɛ̀ kɛ̀ Asii kɔbɛ bɛmɔu Sifubɛ nɛ̀ bɛ̀ɛ̀ í tú Sifubɛ kɛ̀ bɛ̀ɛ keè Kuyie nnɑ́ɑǹtì.
\s1 Dibɔɔ̀ puotímɛ̀ Sefɑ bí
\p
\v 11 Kɛ̀ Kuyie nkó muwɛ̃rímú ḿbonɛ̀ Pɔɔri kòò dɔ̀ɔ̀ri tidiɛtì. 
\v 12 Kɛ̀ bɛ̀ ntɔu tiyɑ̀ɑ̀tì tìì kɑ̀ɑ́kɛ́ Pɔɔri kɛ nɔnku bɛmuɔmbɛ kɛ̀ bɛ̀ miɛrí kɛ̀ yɛbɔkɛ̀ yìɛ̀ yɛ̀ tɑ bɛ̀. 
\v 13 Sifubɛ mɑbɛ̀ bɛ̀ɛ̀ do centì kɛ bɛtì yɛbɔkɛ̀ kɛ̀ bɛ̀ múnkɛ ndɔ́ kɛ́bɛti dibɔɔ̀ nɛ̀ Yesu kó diyètìrì kɛ dɔ̀: Nɛ̀ Yesu, Pɔɔri nɑ̀ɑ́ nwèè kpɛ́í kó diyètìrì míì tu ɑ yɛ̀ onìtì yie mmiɛkɛ.
\p
\v 14 (Ikuɔ́ kóo nìùtì diɛwè Sefɑ kó ibí iyiekɛ̀ iì do dɔ̀ɔ̀ mɛmmɛ.) 
\v 15 Kɛ̀ dibɔɔ̀ dɔ̀: N yɛ̃́mu Yesu! Kɛ yɛ̃́ Pɔɔri! Díndi nɛ́ tú ɔ̃mbɛ?
\p
\v 16 Kɛ̀ dibɔɔ̀ tɑ wèe bunnɔ́ɔ, kɛ́ bɛ̀ puotí kɛ́ bɛ̀ kɔ̀utɛ kɔutɛ, kɛ́kɛ̃rí bɛ yɑ̀ɑ̀tì, kɛ̀ bɛ̀ɛ yɛ̀ kɛ́cokɛ́ mɛbii. 
\v 17 Kɛ̀ Efɛɛsi kɔbɛ bɛmɔu Sifubɛ nɛ̀ bɛ̀ɛ̀ í tú Sifubɛ kɛ̀ bɛ̀ɛ keè dɛ kó tinɑ́ɑǹtì, kɛ̀ kufɔ̃wɑɑ́ mbɛ̀ pĩ nkɛ̀ bɛ̀ ndɛ́úkùnko ti Yiɛ̀ nYesu kó diyètìrì. 
\v 18 Bɛnìtìbɛ̀ pɛ́u bɛ̀ɛ̀ yie nYesu kɛ̀ bɛ̀ nkɔrìní kɛ dɑ́ɑnko bɛ yɛi. 
\v 19 Kɛ̀ bɛtetiebɛ ntɔunní bɛtetepɑ́tɛ kɛ cɔ́unko bɛnìtìbɛ̀ ììkɛ̀, dɛ kó yɛpɑ́tɛ díítí bo ntùɔ̀kɛ mɛdítíbii nsikɔupísìnùmmù (5000). 
\v 20 Mɛm̀mɛ kɛ̀ Kuyie nkó muwɛ̃rímú mbɛ̀ bonɛ̀ kɛ̀ Kirisi kɔbɛ sṹũnko.
\s1 Bɛ̀ kpɑmmɛ̀ Diɑnni kpɛ́í
\p
\v 21 Kɛ̀ Pɔɔri dɔ̀: M bo nkɔri dìì mɔ̀nnì Sedisɑdɛmmu kɛ́yɛ̀ Mɑseduɔnni nɛ̀ Akɑyii kó itempɛ̃. Kɛ̀ n dèè mɛmmɛ nkɔtɛ Odommu.
\p
\v 22 Mɛmmɛ ò duɔ́mmɛ̀ kɛ̀ Timɔntee nɛ̀ Edɑsiti bɛ̀ɛ̀ do ò teénnɛ̀ mutɔ̃mmú, kɛ̀ bɛ̀ɛ niitɛ́ kɛ́kɔtɛ Mɑseduɔnni kòo nkpɑɑ́ Asii kɛ dɔ̀ yɛwe sɑ́m̀pɔ́.
\p
\v 23 Dɛ mɔ̀nnì ndi dikɔnkɔɔ̀nnì diɛrì tɑnnímɛ̀ Kuyie nnɑ́ɑǹtì kpɛ́í. 
\v 24 Kòo nìtì mɔù bɛ̀ tu wè Demɛtiriyuusi kòò mɑ̀ɑ́tí mɛsɔɔ kɛ donnìkonɛ̀ Diɑnni kó kudieku, kɛ yietì o tɔ̃mbɛ̀ mɛsɑ̀ɑ̀. 
\v 25 Kòo tíí ndiyiè mɑrì bɛtɔbɛ̀ bɛ̀ɛ̀ múnkɛ pĩ́ ndɛ kó mutɔ̃mmú, kɛ́ bɛ̀ nɑ̀kɛ́ kɛ dɔ̀: N kɔbɛ di yɛ̃́mu kɛ dò mmu ntɔ̃mmú muù te kɛ̀ ti mɔkɛ ti kpɛrɛ. 
\v 26 Di wúómmu kɛ yo dɛ̀ í tú Efɛɛsi mɑ́ɑ̀, Asii kó kɛtenkɛ̀ kɛmɔu ndi Pɔɔri nɑ̀ɑ́mmɛ̀ bɛnìtìbɛ̀ kɛ tú bɛnìtìbɛ̀ dɔ̀ɔ̀ri sìì tenkɑɑnìi í tú Kuyie, kɛ̀ kusṹkù yìé nho kpɛti. 
\v 27 Dɛ̀ í dò ndɛ̀ yóó cɑɑ̀rɛ̀ ti kó mutɔ̃mmú mɑ́ɑ̀, dɛ̀ bo cɑkɛ nɛ̀ ti kó dibɔɔ̀ diɛrì Diɑnni Aditemiisi kòo yètìrìi kɛ̃kɛ, Asii kɔbɛ nɛ̀ kutenkù kumɔu kɔbɛ tũ ndì bo nɑɑ́ dɛtetìrɛ̀.
\p
\v 28 Kòo kɔbɛɛ ti kèè kɛ̀ bɛ miɛkɛɛ pɛikɛ kɛ̀ bɛ̀ nwékíí kɛ tú: Efɛɛsi kó dibɔɔ̀ Diɑnni dɛumu!
\p
\v 29 Kɛ̀ kutowekuu dɑ́tínnɛ́ dihɛì dimɔu kɛ̀ bɛ̀ɛ pĩ́ Kɑyuusi nɛ̀ Adisitɑki Mɑseduɔnni kɔbɛ bɛ̀ɛ̀ cíenní Pɔɔri, kɛ́kɔtɛnɛ̀ bɛ̀ ɔ̃ɔ̃ tíí ndɛ̀. 
\v 30 Kɛ̀ Pɔɔri dɔ̀ ò bo kɔtɛ, kɛ̀ Yesu kɔbɛɛ yetɛ. 
\v 31 Kòo nɛ́pobɛ̀ Asii kó bɛnitidiɛbɛ̀ mɑbɛ̀ɛ tɔ̃nní òmɔù kɛ dɔ̀ ò bɑ́ɑ́ kɔtoo. 
\v 32 Kɛ̀ bɛnìtìbɛ̀ɛ sɔ̃́ntɛ́ kɛ́nwékíí bɛ bíɛ́kɛ̀ bɛ bíɛ́kɛ̀, bɛsṹkùbɛ̀ ketɛ́ kɛ í yɛ̃́ bɛ̀ tìí mmùù kpɛ́í. 
\v 33 Kɛ̀ bɛ̀ɛ nɑ́kɛ́ Adɛkisɑ̃ntiri ditĩ̀nnì miɛkɛ dɛ̀ dòmmɛ̀, kɛ̀ Sifubɛ dɔ̀ wèe bɛ́i, kóò tèntoo dɛyììkɛ̀, kòò dɔ̀: Kémmúnɛ̀! 
\v 34 Kɛ̀ bɛ̀ɛ bɑntɛ́ ò túmɛ̀ Sifu nwe kɛ́nwékíí bɛmɔu kɛ tú: Efɛɛsi kóo Diɑnni Aditemiisi dɛumu kɛ̀ dɛ̀ mmɔkɛ tɛwebiètɛ̀ mɛfitímɛ̀ mɛ̀dɛ́mɛ̀.
\p
\v 35 Kɛ̀ dihɛì kóo pɑ́tíwɑ̃ɑ̃̀tìi bónkùnnɛ bɛnìtìbɛ̀ yɛ̀mmɛ̀, kɛ́bɛ́i nkɛ dɔ̀: Bɑ́ wè ò yɛ̃́mu kɛ do ntínti Efɛɛsi kɔbɛ tíì bɑ̀ɑ Diɑnni kó kutouku nɛ̀ tɛtenkɑɑnìtɛ̀ tɛ̀ɛ̀ donní kɛĩ́nkɛ̀. 
\v 36 Òmɔù bɑ́ɑ́ nɑ kɛ́ tì nɛ̀nni, di dò nkɛ́totí di yɛ̀mmɛ̀ mmɛ kɛ bɑ́ɑ́ sɔ̃́ntɛ́ kɛ́dɔɔ̀ tìmɑtì mɛcɑ̃ɑ̃. 
\v 37 Di pĩ̀ńní bɛnìtìbɛ̀ biɛ mbɛ̀ mɛ nyí yùúkú dɛ̀mɑrɛ̀ ti kó kubɔɔtouku miɛkɛ, bɛ̀ mɛ nyí sɑ̃̀ɑ̃́ ti kó tɛtenkɑɑnìtɛ̀ Diɑnni. 
\v 38 Kɛ̀ nsɑ̀ kɛ̀ Demɛtiriyuusi nɛ̀ o kɔbɛ kɛ̀ bɛ̀ mɔ̀kɛ nɛ̀ òmɔù tìmɑtì nti, yɛbeénwe bomu, kɛ̀ bɛbeémbɛ̀ bo, bɛ̀ dò nkɛ́nyu yɛ̀ bɛtɔbɛ̀. 
\v 39 Kɛ̀ di mɔkɛ titɛtì mɑtì di bo nɑ kɛ́ tì tũ̀ntɛ bɛbeémbɛ̀ borɛ̀. 
\v 40 Kɛtenkɛ̀ yɛmbɛ̀ bo nɑ kɛ dɔ̀ ti dɔ́ kɛ́yetɛ bɛ kpɛti nɛ̀ tìì dɔ̀ɔ̀ yíe nti kpɛ́í nkɛ yɛ̃́ ti í yóó nɑmɛ̀ kɛ́nɑ́kɛ́ mùù te kɛ̀ bɛnìtìbɛ̀ tìí.
\p
\v 41 Ò bɛ́i mɛmmɛ kɛ́deè kɛ́cíɛ mbɛnìtìbɛ̀.
\c 20
\s1 Pɔɔri kɔ̀tɛmɛ̀ Mɑseduɔnni nɛ̀ Kɛrɛsi
\p
\v 1 Dikɔnkɔɔ̀nnì dèè dìì mɔ̀nnì kɛ̀ Pɔɔrii tíí nYesu kɔbɛ kɛ́yɑ́úkùnnɛ bɛ kɔ̃̀ntì kɛ́ bɛ̀ cɑu nkɛ́ítɛ́ kɛ́nkɔri Mɑseduɔnni. 
\v 2 Kɛ́nyɑ́úkùnko Yesu kɔbɛ kɔ̃̀ntì yɛhɛkɛ̀ pɛ́u miɛkɛ kɛ́kɔtɛ Kɛrɛsi. 
\v 3 Kɛ́mmɔkɛ bɛtɑ̃̀ɑ̃̀bɛ̀ bɛ̀tɑ̃ɑ̃ti kɛ́ndɔ́ kɛ nɑ nkɔ̀tɛ Sidii kɛ́keè Sifubɛ ò dìímɛ̀ kɛ́yóu kɛ́wɛ̃tɛ Mɑseduɔnni. 
\v 4 Ntɛ bɛ̀ɛ̀ do ò cíe mbɛ yètɛ̀: Piduusi Bedee ɛì kou birɛ nɛ̀ Sopɑtɛɛ Adisitɑki nɛ̀ Sikunduusi Tɛsɑdoniki ɛì kou nɛ̀ Kɑyuusi Dɛribu kou nɛ̀ Timɔntee nɛ̀ Tisiki nɛ̀ Todofimmu Asii kó kutempɛ̃ nkou. 
\v 5 Kɛ̀ bɛ̀ɛ niitɛ́ kɛ́ nti bɑɑ Todowɑɑsi. 
\v 6 Kɛ̀ pɛ̃́ɛ̃̀bɛ̀ bɛ̀ɛ̀ í kɔɔrɛnɛ̀ mutie mùù muuti dɛ kó dibɑnnii pɛ̃ɛ̃tɛ́ kɛ̀ ti tɑ bɑ̀tóò Fidipu ɛì kɛ́mmɔkɛ yɛwe yɛ̀nùmmù kɛ́ bɛ̀ sɔ̃̀ńtóo Todowɑɑsi, kɛ̀ tí mbo kɛ dɔ̀ yɛwe yɛ̀yiekɛ̀.
\s1 Pɔɔri duɔ́mmɛ̀ kɛ̀ Etiisi yɑ̃̀ńtɛ́
\p
\v 7 Dìmɑ́ɑ̀sì yiè kɛ̀ ti tíí ntɛcĩ́ɛ̃̀tɛ̀ tɛ̀ɛ̀ mùmmu, kɛ bo di kɛ́dinɛ̀ Mudisɑ̀ɑ̀mù, kɛ̀ Pɔɔri nnɑ́ɑ́ nKuyie nnɑ́ɑǹtì kɛ̀ kɛyènkɛ̀ yɑ̀ɑ totɛ́ kɛ cuokɛ̀, kɛ yɛ̃́ ò nɑɑ itimɛ̀. 
\v 8 Ti do tíkú kudɑ̀nkù tɑ̃ɑ̃́nkù nku, kɛ̀ ifìtíyì cɔ̀ú mpɛ́u. 
\v 9 Kɛ̀ Pɔɔri nnɑ́ɑ́ nkɛ̀ dɛ̀ɛ mɔntɛ mɛdiɛ̀, kɛ̀ dɛdɑpùmbirɛ mɑrɛ̀ kɑrì kudieku kó tɛbòtɛ̀ ĩ́nkɛ̀ kɛ̀ dɛ yètìrì tu Etiisi, kɛ yɛ̃̀ nkɛ duɔ́ kɛ́donní, kɛ̀ bɛ̀ dɔ̀ bɛ̀ bo dɛ̀ íi nkɛ sɔ̃́ ndɛ̀ kú. 
\v 10 Kɛ̀ Pɔɔrii cútɛ́ní kɛ́ dɛ̀ tùótɛ́ kɛ́bɛ́i nkɛ dɔ̀: Di bɑ́ nyĩɛ̃̀kù dɛbirɛ fòùmu.
\p
\v 11 Kɛ́wɛ̃tɛ kɛ́dekɛ kɛ̀ bɛ̀ɛ̀ di kɛ́dinɛ̀ Mudisɑ̀ɑ̀mù. Kòo sɔɔtɛ́ kɛ́nnɑ́ɑ́ nkɛ̀ diyiè yɑ̀ɑ yɛ̀nní, kòo pɛ̃ɛ̃tɛ́. 
\v 12 Kɛ̀ bɛ̀ɛ kpɛ̃nnɛ́ dɛ kó dɛdɑpùmbirɛ kɛ̀ dɛ̀ fòù kɛ̀ bɛnìtìbɛ̀ bɛmɔu yɛ̀mmɛ̀ɛ nɑrikɛ.
\s1 Pɔɔri ítɛ́mɛ̀ Todowɑɑsi kɛ́kɔtɛ Midɛti
\p
\v 13 Kɛ̀ ti tɑ kudɑbɛkù kɛ́niitɛ́ Asoo kɛ́mbɑɑ mPɔɔri, kɛ yɛ̃́ ò kèrímɛ̀ o nɑɑ̀cɛ̀i. 
\v 14 Kòo ti sɔ̃́ntɛ́ní kɛ̀ ti pɛ̃ɛ̃tɛ́ kɛ́kɔtɛ Mitɛdɔnni. 
\v 15 Kɛ̀ dɛ̀ɛ wentɛ́ kɛ̀ tí tuɔkɛ Kiyo, diyiè tɛrì kɛ́tuɔkɛ Sɑmɔɔsi kɛ cómmú, kɛ́pɛ̃ɛ̃tɛ́ kɛ́kɔtɛ Midɛti. 
\v 16 Kɛ̀ Pɔɔri ndɔ́ kɛ́mbo Sedisɑdɛmmu pɑ̃ntikoti kó diyiè kɛ́ nsɑ̀ kɛ̀ dɛ̀ bo yie, kɛ̀ dɛ̀ nte kòò í ndɔ́ kɛ́cómmú Efɛɛsi Asii kó kutempɛ̃ mmiɛkɛ.
\s1 Pɔɔri cɑummɛ̀ Efɛɛsi kɔbɛ mɛsɔmmɛ
\p
\v 17 Kɛ̀ Pɔɔrii mbo Midee kɛ́tɔ̃ nkɛ̀ bɛ̀ɛ yúní Efɛɛsi kó bɛwedɔunkótíbɛ̀. 
\v 18 Kòo bɛ̀ nɑ̀kɛ́ kɛ dɔ̀: Di yɛ̃́mu mɛborimɛ do dòmmɛ̀ nɛ̀ n tùɔ̀kɛnímɛ̀ di borɛ̀ Asii kó kutempɛ̃ mmiɛkɛ kɛ n yɑ̀ɑ̀ ítɛ́nɛ̀. 
\v 19 Di yɛ̃́mu n kɛ̃́kùnkomɛ̀ mmɑ́ɑ̀ kɛ pĩ́ Kuyie ntɔ̃mmú nɛ̀ tinɔnniɛti, kɛ̀ Sifubɛ n díí kɛ n fɛ̃́ũnko. 
\v 20 Di yɛ̃́mu n di nɑ̀kɛ́ tì timɔu, mɛtíímmɛ̀ miɛkɛ nɛ̀ sicɛ̃́ĩ miɛkɛ, n yí di sɔ̀nnɛ tìmɑtì tìì dò nkɛ́ di teennɛ̀. 
\v 21 N nɑ̀kɛ́mu Sifubɛ nɛ̀ bɛ̀ɛ̀ í tú Sifubɛ kɛ tú bɛ̀ɛ̀ ceetɛ bɛ borimɛ kɛ́tũnnɛ Kuyie nkɛ́yie nti Yiɛ̀ nYesu. 
\v 22 Di mmɔ̀nnì Muyɑɑ́nsɑ̀ɑ̀mù muù yɛ̃ n kɔtɛ Sedisɑdɛmmu, m mɛ nyí yɛ̃́ dɛ̀ yó nni ndòmmɛ̀ dɛ bíɛ́kɛ̀. 
\v 23 Bɑ́ dìì ɛì Muyɑɑ́nsɑ̀ɑ̀mù ɔ̃ n nɑ́kɛ́mu dikpetíntou nɛ̀ mɛfɛ̃́ṹtímɛ̀ dɛ̀ m bɑ̀ɑmɛ̀. 
\v 24 N kpɛti í bonɛ̀ n fòmmu, n dɔ́ n deè ti Yiɛ̀ nYesu n duɔ́ mmùù tɔ̃mmú mmu kɛ yɛ̃ n nɑ́kɛ́ Kuyie nkó Tinɑ́ɑǹsɑ̀ɑ̀tì bɛnìtìbɛ̀.
\p
\v 25 Di mmɔ̀nnì n yɛ̃́mu kɛ dò ndi tɛ̃́nkɛ í yó n yɑ̀, díndi n nɑ̀kɛ́ bɛ̀ Kuyie nkpɑ̀ɑ̀tìyuu kpɛti. 
\v 26 Dɛɛ̀ te kɛ̀ n di nɑ́ɑ́ nyíe nkɛ tú: Kɛ̀ tìì di tùɔ̀kɛní dɛ̀ í tú n kpɛti. 
\v 27 N di nɑ̀kɛ́mu dɛmɔu Kuyie ndɔ́ dɛ̀, n yí di sɔ̀nnɛ dɛ̀mɑrɛ̀. 
\v 28 N dɑkɛnɛ̀ di mɔ́mmɔmbɛ kpɛ́í nnɛ̀ Muyɑɑ́nsɑ̀ɑ̀mù di duɔ́ mbɛ̀ kpɛ́í. Mbɑɑnɛ̀ Kuyie ndontɛ́ bɛ̀ nɛ̀ ku Birɛ kṹṹ. 
\v 29 N yɛ̃́mu kɛ dò m bo ítɛ́ dìì mɔ̀nnì, bɛnitiyɛibɛ bo kɔtɛní kɛ́ndò yɛkpɑmɑɑ̀ nkɛ́ ndi dɔɔ̀ri mɛyɛi, mbɑ́ mɛsémmɛ̀ í mbɛ̀ bo. 
\v 30 Bɛnìtìbɛ̀ yóó yɛ̀mu di cuokɛ̀ kɛ́ n nɑ̀ɑ́ nsiyɑ́ɑ̀bísí kɛ bo yṹɔ̃́ nYesu kɔbɛ bɛ bíɛ́kɛ̀. 
\v 31 Dentɛnní tũ̀nkɛ n di tiémmɛ̀ yɛbie nyɛ̀tɑ̃ɑ̃ti miɛkɛ, kɛyènkɛ̀ nɛ̀ kuyie nnɛ̀ tinɔnniɛti.
\p
\v 32 Di mmɔ̀nnì n di duɔ́ nKuyie nku, kɛ̀ ku kó mɛsɑ̀ɑ̀ nkó tinɑ́ɑǹtì bo ndi bɑɑ̀. Kuù yóó nɑ kɛ di kpénkùnnɛ, kɛ di duɔ́ ndɛmɔu kù yɛ̃ nkù yóó duɔ́ ndɛ̀ ku kɔbɛ. 
\v 33 N yí bekɛ òmɔù idíítí yoo tiyɑ̀ɑ̀tì. 
\v 34 Di yɛ̃́mu kɛ dò nnɛ̀ n nɔu sii nsi m pĩ́mmɛ̀ mutɔ̃mmú kɛ teénnɛ̀ mmɑ́ɑ̀ nɛ̀ n kɔbɛ nɛ̀ bɛ̀ ti nɛiti. 
\v 35 Kɛ di bɛnkɛ di dò nkɛ́mpĩ́ mmɛ̀ɛ̀ botí mutɔ̃mmú, kɛ teénnɛ̀ bɛcĩ̀rìbɛ̀, kɛ̀ n dènniní ti Yiɛ̀ nYesu bɛ́i ntì kɛ tú: Dɛ̀ ɔ̃ɔ̃ ndɑ nɑɑti ɑ pɑ̃ dìì mɔ̀nnì kɛ pɛ̃ɛ̃tɛ́ bɛ̀ dɑ pɑ̃ dìì mɔ̀nnì.
\p
\v 36 Pɔɔri nɑ̀kɛ́ mɛmmɛ kɛ́deè kɛ nínkú kɛ̀ bɛ̀ɛ wɛ̃nnɛ́ kɛ bɑ́ntɛ̀ Kuyie. 
\v 37 Kɛ̀ bɛ̀ɛ ò cɑu nkóò ɔrí kɛ́kuɔ́ mbɛmɔu. 
\v 38 Kɛ̀ bɛ yɛ̀mmɛ̀ cɑ̀ɑ̀rɛ̀ mɛdiɛ̀ nhò bɛ́i ntìì kpɛ́í nkɛ tú, bɛ̀ tɛ̃́nkɛ í yóó ò yɑ̀. Kɛ̀ bɛ̀ɛ ò cíe nkɛ́kɔtɛnɛ̀ bɑ̀tóò commu dɛ̀.
\c 21
\s1 Muyɑɑ́nsɑ̀ɑ̀mù tumɛ̀ Pɔɔri bo fɛ̃́ṹtɛ́ Sedisɑdɛmmu
\p
\v 1 Kɛ̀ tí cɑu ntitɔbɛ̀ kɛ́deè, kɛ̀ tí tɑ bɑ̀tóò kɛ́tuɔkɛ Koosi, kɛ̀ dɛ̀ɛ wentɛ́ kɛ̀ tí tuɔkɛ Odoti kɛ́pɛ̃ɛ̃tɛ́ kɛ́kɔtɛ Pɑtɑdɑɑ. 
\v 2 Ti dɛ mpɛ̀tɛ́ bɑ̀tóò wèè kɔ̀ri Fenisii kɛ́tɑ kɛ́pɛ̃ɛ̃tɛ́. 
\v 3 Kɛ́tɔ́ɔ́nnɛ̀ Sipiri, kóò yóu kubɑkù cɑ̃̀nku kɛ́wetínnɛ́ Sidii kó kutempɛ̃, kɛ́tuɔkɛ Tiiri, bɑ̀tóò dò nkɛ́cṹũ ndɛ̀ tinɛntì. 
\v 4 Ti dɛ nyɑ̀ Yesu kɔbɛ, kɛ́ mbɛ̀ bonɛ̀ kɛ dɔ̀ yɛwe yɛ̀yiekɛ̀ kɛ̀ Muyɑɑ́nsɑ̀ɑ̀mùu bɛ̀ niitɛ́ kɛ̀ bɛ̀ɛ nɑ́kɛ́ Pɔɔri kɛ dɔ̀ ò bɑ́ɑ́ kɔtɛ Sedisɑdɛmmu. 
\v 5 Dɛ kó difɔ̃nkúò kɛ̀ bɛ̀ ti cíe mbɛmɔu, bɛnitidɑɑbɛ̀ nɛ̀ bɛ pobɛ̀ nɛ̀ bɛ bí, kɛ ti dennɛ dihɛì mɑ̀nku, kɛ̀ tí nínkú dɑ̀mɛ́ɛ̀rì tɑkɛ́ kɛ́wɛ̃nnɛ́ kɛ́bɑ́ntɛ̀ Kuyie. 
\v 6 Kɛ́cɑu ntitɔbɛ̀ kɛ̀ tí ntɑti bɑ̀tóò, kɛ̀ bɛ kũnti.
\p
\v 7 Kɛ̀ tí ítɛ́ Tiiri kɛ́tuɔkɛ Potodemɑyiisi kɛ dɔ̀ diyiè dìmɑ́ɑ̀ kɛ dɔú nti kɔbɛ Yesu kɔbɛ. 
\v 8 Kɛ̀ dɛ̀ɛ wentɛ́ kɛ̀ tí pɛ̃ɛ̃tɛ́ kɛ́tuɔkɛ Sesɑdee kɛ́tɑ Fidipu cĩ́ɛ̃̀tɛ̀, bɛ̀ do tɑ̃ɑ̃tɛ́ bɛ̀ bɛyiekɛ̀ kɛ̀ bɛ̀ bo nteénnɛ̀ Yesu tɔ̃rɛ̀ kóò mɔù nwe. 
\v 9 Kòò mɔ̀kɛ bɛsɑpɑ̀mbɛ̀ bɛ̀nɑ̀ɑ̀ bɑ́ bɛ̀ í ye, kɛ tú Kuyie mpɑ̃ɑ̃nɑ́ɑǹtì nɑ́ɑm̀bɛ̀. 
\v 10 Kɛ̀ tí ndɛ mbo kɛ dɔ̀ yɛwe sɑ́m̀pɔ́, kɛ̀ Kuyie mpɑ̃ɑ̃nɑ́ɑǹtì nɑ́ɑǹtò mɔù bɛ̀ tú wè Akɑbuusi boní Sudee kɛ́tuɔkɛní. 
\v 11 Kɛ́kɔtoo ti borɛ̀ kɛ́túótɛ́ Pɔɔri nɑɑ̀kɔ̃̀nfɛ̀ kɛ́boú omɑ́ɑ̀ o nɔu nɛ̀ o nɑɑ̀cɛ̀i kɛ dɔ̀: Ntɛ Muyɑɑ́nsɑ̀ɑ̀mù n nɑ̀kɛ́ tì, wèè te fɛnɑɑ̀kɔ̃̀nfɛ̀ fiɛ, Sifubɛ yóó ò boú miɛ mbotí nku Sedisɑdɛmmu kɛ́duɔ́ mbɛ̀ɛ̀ í tú Sifubɛ.
\p
\v 12 Ti kèè dìì mɔ̀nnì dɛ kó tinɑ́ɑǹtì, nɛ̀ Sesɑdee kɔbɛ kɛ̀ tí bɑ́ntɛ̀ Pɔɔri kɛ dɔ̀ ò bɑ́ɑ́ kɔtɛ Sedisɑdɛmmu. 
\v 13 Kòo bɛ́i nkɛ dɔ̀: Di kuɔ̀nnɛ̀ bɑ kɛ cɑɑri n yɛ̀mmɛ̀? N wɑ̃kɛ́mu kɛ̀ bɛ̀ bo n kpetínnɛ́ Sedisɑdɛmmu bɑ́ bɛ̀ n kuɔ ti Yiɛ̀ nYesu kó diyètìrì kpɛ́í.
\p
\v 14 Ti í nnɑ kɛ bo ò bɑ̀ɑ kɛ́yóu kɛ dɔ̀: Kuyie ńdɔɔ̀ kù dɔ́mɛ̀.
\p
\v 15 Kɛ̀ tí mmɔkɛ yɛwe sɑ́m̀pɔ́ kɛ bɑ́ɑ́tí kɛ́kɔtɛ Sedisɑdɛmmu. 
\v 16 Kɛ̀ Yesu kɔbɛ bɛ̀ɛ̀ bo Sesɑdee kɛ̀ bɛ̀ ti cíe nkɛ̀ ti bií bɑ́tɛ́ onìtì mɔù cĩ́ɛ̃̀tɛ̀ bɛ̀ tu wè Mɑnɑsɔ̃ɔ̃, Sipiri ɛì kou, kòò tu wèè cɔutɛ́ Yesu nɛ̀ dimɔ̀nnì.
\s1 Pɔɔri dɔ̀ɔ̀mɛ̀ Kuyie nkó ikuɔ́ Sedisɑdɛmmu
\p
\v 17 Ti tùɔ̀kɛ dìì mɔ̀nnì Sedisɑdɛmmu kɛ̀ Yesu kɔbɛɛ ti cɔutɛ́ nɛ̀ diwɛ̀ì. 
\v 18 Kɛ̀ dɛ̀ɛ wentɛ́, kɛ̀ Pɔɔri ti kɔtɛnɛ̀ Isɑku cĩ́ɛ̃̀tɛ̀, kɛ bɛwedɔunkótíbɛ̀ bɛmɔuu tíí. 
\v 19 Kɛ̀ Pɔɔrii bɛ̀ dɔu nkɛ́deè, kɛ́ bɛ̀ nɑ̀kɛ́ dɛmɔu Kuyie nhò pĩ̀ńnɛ̀ mɛ̀ɛ̀ botí mutɔ̃mmú bɛ̀ɛ̀ í tú Sifubɛ bɛ miɛkɛ. 
\v 20 Kɛ̀ bɛ̀ɛ sɑ̃ntɛ Kuyie nkɛ́deè kɛ nɛ́ ò nɑ̀kɛ́ kɛ dɔ̀: Wéntɛ́ Sifubɛ cɔutɛ́ Yesu kɛ sũ mɛ̀ɛ̀ botí, kɛ nɛ́ kpɑɑ́ tũ mbɛ kó ikuɔ́ weti weti. 
\v 21 Bɛ̀ kèè kɛ̀ bɛ̀ tu ɑ yɛ̃ nSifubɛ bɛ̀ɛ̀ bo ibotí tɛì miɛkɛ bɛ̀ɛ yóu Mɔyiisi kó ikuɔ́, kɛ bɑ́ ncɑ̃mmù bɛ bí, bɛ̀ mɛ mbɑ́ ntũ Sifubɛ kó mɛdɔɔ̀rìmɛ̀. 
\v 22 Kɛ̀ bɛ̀ kèè ɑ tùɔ̀kɛnímɛ̀ kɛ kɔ̀tɛní ti yĩ́mɛ? 
\v 23 Dɔɔ̀ ti yóó mɛ ndɑ nɑ́kɛ́ tì: Ti mɔkɛ diɛ mbɛnìtìbɛ̀ bɛ̀nɑ̀ɑ̀ ndi bɛ̀ɛ̀ cɑ̀nnɛnɛ̀ Kuyie ndinùù. 
\v 24 Nɛinɛ̀ bɛ kɛ̀ dí dɔɔ̀ Kuyie nkó ikuɔ́ kɛ́wenkɛ, kɑ̀ɑ yietí bɛ kó tiyeti kɛ̀ bɛ̀ɛ bɛ̀ kuó, kɛ̀ bɛnìtìbɛ̀ɛ bɑntɛ́ ɑ tũmmɛ̀ Mɔyiisi kó ikuɔ́, kɛ̀ bɛ̀ kèè tì, í tú timɔ́mmɔnti. 
\v 25 Ti wɑ̃̀rimu dipɑ́tíri bɛ̀ɛ̀ í tú Sifubɛ, kɛ cɔutɛ́ Yesu, ti tɑ̃ɑ̃tɛ́ tì, kɛ tú bɛ̀ bɑ́ nyo nyiwũɔ̃ bɛ̀ fìé ì yɛbɔkɛ̀ nɛ̀ mɛyĩ̀ĩ̀ nɛ̀ iwũɔ̃ bɛ̀ í fìé ì kɛ̀ mɛyĩ̀ĩ̀ nyɛ̀, kɛ́mɛntɛ́nɛ̀ bɛmɑ́ɑ̀ bɛ̀ bo ndɔutinɛ̀mɛ̀ bɛtɔbɛ̀.
\p
\v 26 Kɛ̀ Pɔɔrii bɛ̀ nɛinɛ̀ kɛ̀ bɛ̀ɛ dɔɔ̀ ikuɔ́ kɛ́wenkɛ, kɛ̀ dɛ̀ɛ wentɛ́ kɛ̀ bɛ̀ɛ tɑ Kuyie ncĩ́ɛ̃̀tɛ̀ miɛkɛ kɛ́nɑ́kɛ́ kɛ dɔ̀ yɛwe yɛ̀yiekɛ̀ ikuɔ́ bo deè, bɑ́ wè kòo tɔní o wũɔ̃ kɛ́fíé.
\s1 Bɛ̀ pĩ̀ḿmɛ̀ Pɔɔri Kuyie ncĩ́ɛ̃̀tɛ̀ miɛkɛ
\p
\v 27 Kɛ̀ dɛ kó yɛwe yɛyiekɛ̀ ndɔ́ kɛ́deè, kɛ̀ Sifubɛ bɛ̀ɛ̀ bonní Asii kó kutempɛ̃ kɛ̀ bɛ̀ɛ yɑ̀ Pɔɔri Kuyie ncĩ́ɛ̃̀tɛ̀ kɛ́sukú bɛnìtìbɛ̀, kɛ̀ bɛ̀ɛ ò pĩ, 
\v 28 kɛ́kuɔ́nko kɛ dɔ̀: Isidɑyɛɛribɛ ti dɛɛtɛ́nɛ̀! Onìtì yie, nweè nɑ́ɑntɛ tipíìtì timɔu Isidɑyɛɛribɛ kpɛ́í, kɛ yetɛ Mɔyiisi kó ikuɔ́, kɛ dɑ̀ɑ́tí kɛ tɑnnɛ́ bɛ̀ɛ̀ í tú Sifubɛ Kuyie ncĩ́ɛ̃̀tɛ̀, kɛ tɛ̀ sĩ̀nkùnnɛ.
\p
\v 29 (Bɛ̀ do nɑ́ɑ́ mɛmmɛ kɛ yɛ̃́ bɛ̀ yɑ̀mɛ̀ Todofimmu Efɛɛsi ɛì kou wèè tu Kirisi kou dihɛì miɛkɛ kòò nɛínɛ̀ Pɔɔri kɛ̀ bɛ yɛ̀mmɛ̀ ndò mPɔɔri ò tɑnnɛ́ Kuyie ncĩ́ɛ̃̀tɛ̀.) 
\v 30 Kɛ̀ dɛ̀ɛ yonkɛ bɛnìtìbɛ̀ kɛ̀ bɛ̀ɛ yɛ̀nní bɛmɔu dihɛì kɛ́pĩ́ mPɔɔri Kuyie ncĩ́ɛ̃̀tɛ̀ miɛkɛ kɛ́dɛtɛ kɛ́yɛ̀nnɛ̀, kɛ́kpetínnɛ́ yɛbòrɛ̀ mɛcɑ̃ɑ̃. 
\v 31 Kɛ̀ bɛ̀ nwékíí kɛ dɔ́ kóò kùɔ, kɛ̀ bɛ̀ɛ nɑ́kɛ́ Odommu kó bɛhɑ̃ɑ̃pɔ̀mbɛ̀ kóo kótì kɛ dɔ̀: Dikpɑ̀nnì bo dihɛì miɛkɛ. 
\v 32 Kòo yú bɛhɑ̃ɑ̃pɔ̀mbɛ̀ nɛ̀ iwɛ̃ĩ yɛmbɛ̀ kɛ̀ bɛ̀ɛ kɔtɛ mɛcɑ̃ɑ̃. Bɛ̀ bɛ̀ yɑ̀ní dìì mɔ̀nnì kɛ́yóu bɛ̀ bo mpuotimɛ̀ Pɔɔri. 
\v 33 Kɛ̀ bɛhɑ̃ɑ̃pɔ̀mbɛ̀ kóo kótìi tɔ́ɔ́nko kɛ́duɔ́ nkɛ̀ bɛhɑ̃ɑ̃pɔ̀mbɛ̀ɛ boú Pɔɔri mɛfĩmmɛ mɛ̀dɛ́mɛ̀ kɛ́deè kòo bekɛ bɛnìtìbɛ̀ Pɔɔri tú wè nɛ̀ ò cɑ̀kɛ mù. 
\v 34 Kɛ̀ biɛ nni nnɑ́ɑ́ ntii, kɛ̀ bɛtɔbɛ̀ nɑ̀ɑ́ ntitɛtì, bɑ́ ò í mbɑntɛ́ kɛ́duɔ́ nkɛ̀ bɛ̀ɛ ò kɔ̀tɛnɛ̀ tɛhɑ̃ɑ̃pɔ̀ncĩ́ɛ̃̀tɛ̀, 
\v 35 kɛ́ndeètì yɛdɛtìsɑ̀kɛ̀ kɛ̀ tihɑ̃ɑ̃pɔ̀ntìi ò buutɛ́ bɛnìtìbɛ̀ miɛkɛ ò pɛ́i mɛ̀ɛ̀ kpɛ́í. 
\v 36 Kɛ yɛ̃́ kunitisṹkù do tũmmɛ̀ kɛ wékíí kɛ tú: Kuɔnɛ̀ we!
\s1 Pɔɔri beémmɛ̀ o kpɛti
\p
\v 37 Kɛ̀ bɛ̀ nhò tɑnnìnkoo kudieku kòo bekɛ bɛhɑ̃ɑ̃pɔ̀mbɛ̀ kóo kótì kɛ dɔ̀: A bo yie nkɛ̀ n dɑ nɑ́kɛ́ tìmɑtɑ̀ɑ̀? Kòo ɑ̃ɑ̃pɔ̀nkótì dɔ̀: A yomu kɛrɛkìɑ̀ɑ̀? 
\v 38 Fɔ̃́ɔ̃̀ í tú Esibiti kou wèè yetɛ dihɛì kpɛti kɛ wɑɑ́ mbɛkpɑ̀rìbɛ̀ sikɔupísìnɑ̀ɑ̀ (4000) kɛ̀ dí tɑ dikpɑ́ɑ̀ miɛkɑɑ̀? 
\v 39 Kɛ̀ Pɔɔri dɔ̀: N tú Sifu nwe kɛ̀ bɛ̀ m pɛitɛ́ Tɑɑsi dihɛì diɛ, Sidisii kó kutempɛ̃, n dɑ bɑ́ɑmmu yóu kɛ̀ m bɛ́i.
\p
\v 40 Kòo ɑ̃ɑ̃pɔ̀nkótìi yie nkɛ̀ Pɔɔrii ncómmú yɛdɛtìsɑ̀kɛ̀ kɛ́yekìi o nɔ̀ùtɛ̀ bɛnìtìbɛ̀ kɛ̀ bɛ̀ dɔ̀ kɑ́rɛ́. Kɛ̀ Pɔɔri bɛ́innɛ̀ Ebedeebɛ kó tinɑ́ɑǹtì kɛ dɔ̀:
\c 22
\p
\v 1 N nɛ́pobɛ̀ nɛ̀ n cicɛbɛ̀ kémmúnɛ̀ kɛ̀ n di nɑ́kɛ́ kɛ̀ di bɑntɛ́ n yí cɑ̀ɑ̀rɛ̀mɛ̀ mùmɑmù.
\p
\v 2 Kɛ̀ bɛ̀ɛ keè ò bɛ̀ nɑ̀ɑ́nnɛ̀mɛ̀ Ebedeebɛ kó tinɑ́ɑǹtì kɛ dɔkɛ dɔ̀ kɑ́rɛ́. 
\v 3 Kòò dɔ̀: N tú Sifu nwe, kɛ̀ bɛ̀ m pɛitɛ́ Tɑɑsi, Sidisii kó kutempɛ̃, kɛ̀ m bìíkú diɛ Sedisɑdɛmmu, kɛ̀ Kɑmɑdiyɛɛri m bɛnkɛ ti yɛmbɛ̀ kó ikuɔ́ weti weti, kɛ̀ n kɔ̃̀ntì ńyɑunɛ̀ Kuyie nkó mutɔ̃mmú kɛ dò ndi kpɛti mɛ̀ ndòmmɛ̀ yíe. 
\v 4 Kɛ̀ nní nfɛ̃́ũnko Yesu kɔbɛ, bɛnitidɑɑbɛ̀ nɛ̀ bɛnitipòbɛ̀, kɛ bɛ̀ pĩĩ nkɛ kpetì bɛtɔbɛ̀. 
\v 5 Ikuɔ́ nìùtì diɛwè nɛ̀ o kɔbɛ bɛ̀ yɛ̃́mu, bɛɛ̀ do n duɔ́ yɛpɑ́tɛ kɛ̀ m bo kɔtɛ Dɑmɑɑsi kɛ pĩ́mmú Yesu kɔbɛ kɛ́konnɛ̀nní Sedisɑdɛmmu kɛ́fɛ̃́ũ.
\s1 Pɔɔri nɑ̀kɛ́mɛ̀ ò cèètɛ mɛ̀ɛ̀ botí
\r (Yesu Tɔ̃rɛ̀ 9:1-19, 26:12-18)
\p
\v 6 Kɛ̀ nní nkeri kɛ tɔ́ɔ́nko Dɑmɑɑsi kɛ̀ diyiè còḿmú yɛyɔ, kɛ̀ kuwenniku mɑkùu cútɛ́ní kɛĩ́nkɛ̀ kɛ́ n fitɛ́. 
\v 7 Kɛ̀ n do kɛtenkɛ̀ kɛ́keè mɛtɑmmɛ̀ mɑmɛ̀ tumɛ̀: Sɔɔri! Sɔɔri! Dɛ̀ dòmmɛ kɑ̀ɑ n fɛ̃́ũnko? 
\v 8 Kɛ̀ n dɔ̀: Fɔ̃́ nwennìnwe n Yiɛ̀? Kòò dɔ̀: Mí nYesu Nɑnsɑrɛti kou nwe ɑ fɛ̃́ũnkomɛ̀. 
\v 9 Nɛ̀ bɛ̀ ti nɛi kɛ̀ bɛ̀ɛ yɑ̀ kuwenniku bɛ̀ mɛ nyí nkèè mɛtɑmmɛ̀. 
\v 10 Kɛ̀ n dɔ̀: N Yiɛ̀ n dò nkɛ́dɔɔ̀ bɑ? Kòò dɔ̀: Ítɛ́, kɛ́kɔtɛ Dɑmɑɑsi, bɛ̀ yóó kɛ ndɑ nɑ́kɛ́ ɑ dò nkɛ́dɔɔ̀ tì. 
\v 11 Dɛ mɔ̀nnì kɛ sɔ̃́ ndɛ kó kuwenniku n tiitɛ́ bɑ́ n yí wúó, kɛ̀ n nɛínɛ̀ bɛ̀ n dɛtɛ kɛ́tɑnnɛ́ Dɑmɑɑsi.
\p
\v 12 Kòo nìtì mɔù dɛ̀ bo bɛ̀ tú wè Anɑnniyɑɑsi kòò dé Kuyie nkɛ yíe nku kuɔ́, kɛ̀ Sifubɛ bɛmɔu ò dɔ́. 
\v 13 Kòo kɔtɛní m borɛ̀ kɛ dɔ̀: N tebitɛ Pɔɔri, wɛ̃tɛ kɛ́wéntɛ́, dɛ mɔ̀nnì kɛ̀ n nɑ kɛ́wéntɛ́ kóò yɑ̀. 
\v 14 Kòo bɛ́i nkɛ dɔ̀: Kuyie nti yɛmbɛ̀ tũ nkù kuù dɑ tɑ̃ɑ̃tɛ́ kɑ̀ɑ yɑ̀ wèè dɔ̀ɔ̀ri kù dɔ́mɛ̀ kòò bɛ́i nkɑ̀ɑ kèè kɛ bo bɑntɛ́ o dɔ́ dɛ̀. 
\v 15 Fɔ̃́ɔ̃̀ yóó nɑ́kɛ́ o kpɛ́í bɛnìtìbɛ̀ bɛmɔu ɑ kèè tì nɛ̀ ɑ yɑ̀ dɛ̀. 
\v 16 A tɛ̃́nkɛ bɑɑ bɑ? Ítɛ́ kɛ̀ bɛ̀ dɑ ɑ̃nnɛ́ bɑ̀tɛ́mmù kɑ̀ɑ duɔ́ nhɑmɑ́ɑ̀ ti Yiɛ̀, nkòò dɑ ɔ́útɛ́ ɑ yɛi.
\s1 Pɔɔri nɑ̀kɛ́mɛ̀ ò kɔ̀tɛmɛ̀ bɛ̀ɛ̀ í tú Sifubɛ bɛ ciɛ
\p
\v 17 Kɛ̀ n wɛ̃tɛní Sedisɑdɛmmu, kɛ́mbɑ́ɑ́ nKuyie nku cĩ́ɛ̃̀tɛ̀ miɛkɛ. 
\v 18 Kɛ̀ ti Yiɛ̀ nni mbɛnkɛ omɑ́ɑ̀ kɛ́ n nɑ́kɛ́ kɛ dɔ̀: Ítɛ́ kɛ́yɛ̀ Sedisɑdɛmmu mɛcɑ̃ɑ̃ nkɛ yɛ̃́ bɛ̀ í yóó yiemmɛ̀ ɑ bɛ̀ nɑ̀ɑ́ ntì n kpɛ́í. 
\v 19 Kɛ̀ n dɔ̀: N Yiɛ̀, mbɛ̀ yɛ̃́mu bɛ mɔ́mmɔmbɛ míì do kɔrìmɛ̀ titííntouti kɛ pĩĩ nhɑ kɔbɛ kɛ bɛ̀ puotì, kɛ bɛ̀ kpetì. 
\v 20 Bɛ̀ do kɔù ɑ kóo tɔ̃ntì Etiɛnni kɛ̀ m bomu kɛ wɛ̃nnɛ̀ bɛ̀ɛ̀ ò kɔ̀ù, kɛ bɑɑ bɛ yɑ̀ɑ̀tì. 
\v 21 Kɛ̀ ti Yiɛ̀ nni nnɑ́kɛ́ kɛ dɔ̀: N yóó dɑ tɔ̃ ndɛdɛ́tirɛ̀ ndɛ bɛ̀ɛ̀ í tú Sifubɛ bɛ borɛ̀.
\s1 Pɔɔri nɛ̀ Odommu kó kuhɑ̃ɑ̃pɔ̀nkù
\p
\v 22 Pɔɔri do nɑ́ɑ́ kɛ̀ bɛ̀ kèḿmúmu, bɛ̀ nɛ́ kèè dìì mɔ̀nnì bɛ̀ɛ̀ í tú Sifubɛ bɛ kpɛti kɛ́wekíí kɛ dɔ̀: Kuɔnɛ̀ onìtì yie, nwè í dò nkɛ́nfòù.
\p
\v 23 Kɛ̀ bɛ̀ nwékíí kɛ buɔǹkoo bɛ yɑ̀ɑ̀tì kɛ dɛ́i mutɑ̃́ɑ̃́. 
\v 24 Kɛ̀ bɛhɑ̃ɑ̃pɔ̀mbɛ̀ kóo kótìi duɔ́ nkɛ̀ bɛ̀ɛ tɑnnɛ́ Pɔɔri tɛhɑ̃ɑ̃pɔ̀ncĩ́ɛ̃̀tɛ̀, kɛ bo ò puotí yɛdɑ́, kòo nɑ́kɛ́ mùù te kɛ̀ bɛnìtìbɛ̀ miɛkɛ ò cɔ̀ú. 
\v 25 Kóò tɑ̀ú nkɛ bo ò puotí, kòo bekɛ kuhɑ̃ɑ̃pɔ̀nkù kùù do bɛ̀ bɑ̀ɑ dɛ kó diyiè kɛ dɔ̀: Di mɔkɛ kucɛ kɛ bo puotí Odommu kou kɛ í ò bekɛ́nɑ̀ɑ̀?
\p
\v 26 Kɛ̀ kùu cokɛ́ kɛ́nɑ́kɛ́ bɛ kóo kótì kɛ dɔ̀: A bo yĩ́mɛ onìtì yie? Ò tu Odommu kou nwe.
\p
\v 27 Kòo ɑ̃ɑ̃pɔ̀nkótìi kɔtɛní kɛ́bekɛ Pɔɔri kɛ dɔ̀: A mɛ̀nkɛ tú Odommu kou nweɑ̀? Kòò dɔ̀: Ɛ̃ɛ̃, n we ntú.
\p
\v 28 Kòo ɑ̃ɑ̃pɔ̀nkótì dɔ̀: Mí n yietí idíítí nyi mɛdiɛ̀ nkɛ nɑɑ́ nhOdommu kou. Kɛ̀ Pɔɔri dɔ̀: Mí nhò tu nɛ̀ bɛ̀ m pɛitɛ́mɛ̀ mmɛ.
\p
\v 29 Bɛ̀ɛ̀ do dɔ́ kóò puotí kɛ̀ bɛ̀ɛ ítɛ́, kɛ̀ kufɔ̃wɑɑ́ mpĩ́ nhohɑ̃ɑ̃pɔ̀nkótì ò duɔ́mmɛ̀ kɛ̀ bɛ̀ boú mɛfĩmmɛ Odommu kou.
\s1 Pɔɔri nɛ̀ bɛbeémbɛ̀ diɛbɛ̀
\p
\v 30 Kɛ̀ dɛ̀ɛ wentɛ́ kòo ɑ̃ɑ̃pɔ̀nkótì ndɔ́ kɛ́yɑ̀ mùù te kɛ̀ bɛ̀ pĩ mPɔɔri, kɛ tíí nyikuɔ́ nìùbɛ̀ kó bɛkótíbɛ̀ nɛ̀ bɛbeémbɛ̀ kɛ́boutɛ́ Pɔɔri mɛfĩmmɛ kɛ́cṹũnní kɛ́cónnɛ́ bɛ cuokɛ̀.
\c 23
\p
\v 1 Kɛ̀ Pɔɔri nwúó mbɛbeémbɛ̀ kɛ́bɛ́i nkɛ dɔ̀: Kuyie nni nwúómu, nɛ̀ m bomɛ̀ tìmɑtì í kɔɔ́nnɛ̀ n yɛ̀mmɛ̀.
\p
\v 2 Kɛ̀ ikuɔ́ nìùtì diɛwè Anɑnniyɑɑsii duɔ́ nkɛ̀ bɛ̀ɛ̀ tɔ̀kɛ́nɛ̀ Pɔɔri kɛ̀ bɛ̀ɛ potɛ́ o nùù. 
\v 3 Kɛ̀ Pɔɔri dɔ̀: Kuyie nyóó potɛ́ fɔ̃́ nwe, ɑ dò nnɛ̀ ditou sĩ̀nnì bɛ̀ bi dì mumɔ̀mmu pɛ́ímù. A kɑri diɛ nkɛ bo m bekɛ́nɛ̀ ikuɔ́ yɛ̃mmɛ̀ kɛ wɛ̃̀tɛ kɛ ì yetɛ́nɛ̀, kɛ duɔ́ nkɛ̀ bɛ̀ m potɛ́.
\p
\v 4 Bɛ̀ɛ̀ tɔ̀kɛ́nɛ̀ Pɔɔri kɛ̀ bɛ̀ɛ ò nɑ̀kɛ́ kɛ dɔ̀: Ikuɔ́ nìùtì diɛwè nwe ɑ sɑ̃́ɑ̃́mmɑ̀ɑ̀? 
\v 5 Kɛ̀ Pɔɔri dɔ̀: N kɔbɛ n do í yɛ̃́ kɛ do ikuɔ́ nìùtì diɛwè nwe, kɛ yɛ̃́ tì wɑ̃̀rimɛ̀ kɛ tú: A bɑ́ɑ́ sɑ̃́ɑ̃́ nwèè ni ɑ kó kubotí.
\p
\v 6 Kɛ̀ Pɔɔrii bɑntɛ́ bɛbeémbɛ̀ bomɛ̀ ibotí ìdɛ́ì, Sɑdusĩɛ̃bɛ nɛ̀ Fɑdisĩɛ̃bɛ, kɛ bɛ́i nkɛ dɔ̀: N tú Fɑdisĩɛ̃ nwe kɛ̀ n cicɛ tú Fɑdisĩɛ̃, n tɑ̃́ mɛ̀ɛ̀ kpɛ́í nkɛ dò mukúkɛ́yɑ̃́ntímù bo, dɛɛ̀ te kɛ̀ di m bekùnɛ̀.
\p
\v 7 Ò bɛ́i mɛmmɛ Fɑdisĩɛ̃bɛ nɛ̀ Sɑdusĩɛ̃bɛ kɛ̀ bɛ̀ɛ ítɛ́ tinɛìtì kɛ́yɑtɛ. 
\v 8 Kɛ̀ Sɑdusĩɛ̃bɛ ntú mukúkɛ́yɑ̃́ntímù í bo, Kuyie ntɔ̃rɛ̀ mɛ nyí bo, yoo muyɑɑ́ ntɛ̃mù mɑmù mɛ nyí bo, kɛ̀ Fɑdisĩɛ̃bɛ biɛ nyɛ̃́ kɛ dò dɛndɛ kó dimɑ̀ɑ̀ bo. 
\v 9 Kɛ̀ kutowekuu dɛukɛ kɛ̀ ikuɔ́ wɑ̃ɑ̃̀bɛ̀ bɛ̀ɛ̀ tu Fɑdisĩɛ̃bɛ kɛ̀ bɛ̀ɛ kónnɛ́ Pɔɔri kɛ dɔ̀: Ti í yɑ̀ onìtì yie ndɔ̀ɔ̀ mɛ̀ɛ̀ yɛi, kɛ̀ dɛ̀ yɛ̀mmɛ Kuyie ntɔ̃nnì mɑrì diì bo nhò bɛ́innɛ̀, yoo muyɑɑ́ ntɛ̃mù mɑmù.
\p
\v 10 Kɛ̀ dikpɑ̀nnìi dɛukɛ, kòo ɑ̃ɑ̃pɔ̀nkótì ńyĩɛ̃̀kù bɛ̀ bo kuɔmɛ̀ Pɔɔri, kɛ́duɔ́ nkɛ̀ bɛhɑ̃ɑ̃pɔ̀mbɛ̀ɛ cútóo kóò tùótɛ́ ditĩ̀nnì miɛkɛ kɛ́tɑnnɛ́ tɛhɑ̃ɑ̃pɔ̀ncĩ́ɛ̃̀tɛ̀.
\p
\v 11 Dɛ kó kɛyènkɛ̀ kɛ̀ ti Yiɛ̀ nkɔtɛní kɛ́nɑ́kɛ́ Pɔɔri kɛ dɔ̀: A kɔ̃̀ntì bɑ́ɑ́ yɑ̃rikɛ, ɑ nɑ̀kɛ́ mɛ̀ɛ̀ botí nkpɛ́í Sedisɑdɛmmu kɔbɛ ɑ yóó mɛ nnɑ́kɛ́ Odommu kɔbɛ n kpɛ́í.
\s1 Sifubɛ dɑ̀kɛmɛ̀ kɛ bo kuɔ Pɔɔri
\p
\v 12 Kɛ̀ dɛ̀ɛ wentɛ́ kɛ̀ Sifubɛɛ wɛ̃nnɛ́ kɛ dɔ̀ bɛ̀ bɑ́ɑ́ di, bɛ̀ mɛ mbɑ́ɑ́ yɑ̃̀ dɛ̀mɑrɛ̀ kɛ í kùɔ Pɔɔri. 
\v 13 Bɛ̀ɛ̀ do wɛ̃nnɛ́ kɛ bo ò kùɔ bɛ̀ do bo mbo sipísìnɑ̀ɑ̀, 
\v 14 kɛ́kɔtɛ kɛ́yɑ̀ ikuɔ́ nìùbɛ̀ kó bɛkótíbɛ̀ nɛ̀ bɛkótíbɛ̀ kɛ́ bɛ̀ nɑ̀kɛ́ kɛ dɔ̀: Ti yetɛmu kɛ tú ti bɑ́ɑ́ di dɛ̀mɑrɛ̀ kɛ í kùɔ Pɔɔri. 
\v 15 Bekɛnɛ̀ ohɑ̃ɑ̃pɔ̀nkótì kɛ̀ dɛ̀ ndò ndi dɔ́ kɛ́yɑ̀ Pɔɔri kɛ wéntɛ́ o nɑ́ɑǹtì mɛsɑ̀ɑ̀, kɛ̀ bɛ̀ ò kɔ̀rinní, ti bo mbo dɛ mɔ̀nnì kucɛ kóò kùɔ kòo mu nyí tùɔ̀kɛní.
\p
\v 16 Kɛ̀ Pɔɔri tɑ̃ũ̀ birɛɛ keè bɛ̀ dɑ̀kɛmɛ̀ kɛ bo kuɔ Pɔɔri, kɛ́kɔtɛ tɛhɑ̃ɑ̃pɔ̀ncĩ́ɛ̃̀tɛ̀ kɛ́tɑ kóò nɑ̀kɛ́. 
\v 17 Kɛ̀ Pɔɔrii yú kuhɑ̃ɑ̃pɔ̀nkù mɑkù kɛ dɔ̀: Niitɛ́ we ndɑpɑ̀ɑ̀ nhOkótì borɛ̀, ò mɔ̀kɛ tìmɑtì nti kɛ dɔ́ kóò nɑ̀kɛ́.
\p
\v 18 Kɛ̀ kuhɑ̃ɑ̃pɔ̀nkùu ò nɛinɛ̀ kɛ̀ bɛ̀ɛ kɔtɛ ohɑ̃ɑ̃pɔ̀nkótì borɛ̀, kɛ̀ kùu ò nɑ̀kɛ́ kɛ dɔ̀: Kukpetínkù Pɔɔri weè yɛ̃ n kɔtɛnní we ndɑpɑ̀ɑ̀ nhɑ borɛ̀ kòò dɑ nɑ́kɛ́ tìmɑtì.
\p
\v 19 Kòo ɑ̃ɑ̃pɔ̀nkótìi dɛtɛ weè dɑpɑ̀ɑ̀ nkɛ̀ bɛ̀ɛ kɛntɛ́ kòò dɔ̀: A yɛ̃ mbɑ? 
\v 20 Kòò dɔ̀: Sifubɛ bɛɛ̀ dɑ̀kɛ kɛ duɔ́ nkɛ̀ bɛbeémbɛ̀ bo dɑ bekɛ kɑ̀ɑ nɑɑ nkɔriǹko Pɔɔri kɛ̀ dɛ̀ ndò mbɛ̀ dɔ́ kɛ wéntɛ́ o nɑ́ɑǹtì mɛsɑ̀ɑ̀. 
\v 21 Bɑ́ɑ́ yie mbɛ kpɛti! Bɛ̀ɛ̀ dɔ́ kóò kùɔ bɛ̀ bo mbo sipísìnɑ̀ɑ̀ ndi kɛ tú bɛ̀ bɑ́ɑ́ di, bɛ̀ mɛ mbɑ́ɑ́ yɑ̃̀ dɛ̀mɑrɛ̀ kɛ í ò kùɔ. Bɛ̀ bɑ̀ɑ́tímu kɛ bɑɑ̀ fɔ̃́ nwe.
\p
\v 22 Kòo ɑ̃ɑ̃pɔ̀nkótì dɔ̀: Kò, ɑ nɛ́ bɑ́ɑ́ nɑ́kɛ́ òmɔù ɑ tì nni nnɑ̀kɛ́mɛ̀.
\s1 Bɛ̀ kɔ̀tɛmmɛ̀ Pɔɔri Fediisi borɛ̀
\p
\v 23 Kɛ̀ bɛhɑ̃ɑ̃pɔ̀mbɛ̀ kóo kótìi yú iwɛ̃ĩ yɛmbɛ̀ bɛ̀dɛ́bɛ̀ kɛ dɔ̀: Duɔ́nnɛ̀ kɛ̀ bɛhɑ̃ɑ̃pɔ̀mbɛ̀ sikɔusìnɑ̀ɑ̀ nɛ̀ sipísìyiekɛ̀ɛ (470) bɑ́ɑ́tí. Kɛ̀ sikɔusìdɛ́ (200) ńtɔ tikpɑ̀rìnɛntì, kɛ̀ sipísìyiekɛ̀ ńdekɛ sisɛ̃ĩ́, kɛ̀ sikɔusìdɛ́ tɛsìi bɑ́ɑ́tí, kɛ̀ di ítɛ́ kɛyènkɛ̀ tɛwebiètɛ̀ mɛ̀wɛi mɔ̀nnì kɛ́kɔtɛ Sesɑdee. 
\v 24 Wɑɑ́nnɛ̀ sisɛ̃ĩ́ sìì yó ńtɔ Pɔɔri kòo tuɔkɛ kùmɑ̀ndɑ́ɑ̀ Fediisi borɛ̀ nɛ̀ kusɑ̀ɑ̀kù.
\p
\v 25 Ò bɛ́i mmɛmmɛ kɛ́wɑ̃ri dipɑ́tíri kɛ dɔ̀:
\p
\v 26 Kudodi Disiyɑsi míì dɔunko kùmɑ̀ndɑ́ɑ̀ Fediisi. 
\v 27 M mɛ̀ ndɑ duɔ́nko wèè nìtì Sifubɛ bɛɛ̀ sòò ò pĩ nkɛ́ndɔ́ kóò kùɔ, kɛ̀ n kɔtoo nɛ̀ nh ɑ̃ɑ̃pɔ̀mbɛ̀. Kɛ́keè ò túmɛ̀ Odommu kou kóò fìètɛ, 
\v 28 kɛ́ndɔ́ kɛ́yɑ̀ bɛ̀ ò pĩ mmùù kpɛ́í, kóò kɔ̀tɛnɛ̀ bɛbeéndiɛbɛ̀ borɛ̀. 
\v 29 Kɛ sɔ̃́ mbɛ̀ ò pĩ mbɛ kó iwedɔunkuɔ́ kpɛ́í nkɛ, ò mɛ nyí dɔ̀ɔ̀ mɛyɛi mmɑmɛ̀ mɛ̀ɛ̀ dò mbɛ̀ɛ ò kùɔ yoo bɛ̀ɛ ò kpetínnɛ́. 
\v 30 N kèè bɛ̀ dɑ̀kɛmɛ̀ mmɛ kɛ dɔ́ kóò kùɔ, kɛ pɑ̃̀nkɛ wè ndɑ duɔ́nko kɛ̀ bɛ̀ bo kɔtoo kɑ̀ɑ yɑ̀ o kpɛti.
\p
\v 31 Kɛ̀ bɛhɑ̃ɑ̃pɔ̀mbɛ̀ɛ dɔɔ̀ bɛ kóo kótì bɛ̀ nɑ̀kɛ́ tì, kɛ́túótɛ́ Pɔɔri dɛ kó kɛyènkɛ̀ kɛ́kɔtɛnɛ̀ Ãntipɑtirisi. 
\v 32 Kɛ̀ dɛ̀ɛ wentɛ́ kɛ̀ bɛhɑ̃ɑ̃pɔ̀mbɛ̀ bɛ̀ɛ̀ cèntì bɛ nɑɑ̀cɛ̀i kɛ̀ bɛ̀ɛ kpɛ́ntɛ́ kɛ̀ bɛ̀ɛ̀ dèkɛ sisɛ̃ĩ́ kɛ̀ bɛ̀ nhò sɔkɛ́nɛ̀. 
\v 33 Kɛ́tuɔkɛ Sesɑdee kɛ́duɔ́ nkùmɑ̀ndɑ́ɑ̀ dipɑ́tíri nɛ̀ Pɔɔri. 
\v 34 Kɛ̀ kùmɑ̀ndɑ́ɑ̀ kɑɑ̀ ndipɑ́tíri, kɛ́bekɛ Pɔɔri ò tu kùù tempɛ̃ nkou, kòò dɔ̀: Sidisii. 
\v 35 Kòò dɔ̀: N yóó wɛ̃tɛ kɛ dɑ bekɛ́mu bɛ̀ɛ̀ dɑ pĩ bɛ̀ bo tuɔkɛní dìì mɔ̀nnì kɛ́deè kóò tɑnnɛ́ Edɔti do mɑɑ́ tɛ̀ɛ̀ cĩ́ɛ̃̀tɛ̀ miɛkɛ.
\c 24
\s1 Bɛ̀ bekùnnɛ̀mɛ̀ Pɔɔri Fediisi borɛ̀
\p
\v 1 Yɛwe yɛ̀nùmmù kó difɔ̃nkúò kɛ̀ ikuɔ́ nìùtì diɛwè Anɑnniyɑɑsii tuɔkɛní nɛ̀ dihɛì kó bɛkótíbɛ̀ nɛ̀ opútíwè Tɛtiduusi, kɛ bo nɑ́kɛ́ kùmɑ̀ndɑ́ɑ̀ Pɔɔri kó mɛyɛi. 
\v 2 Kɛ̀ bɛ̀ɛ yúní Pɔɔri, kɛ̀ Tɛtiduusi nyóó ò wɑ̀tí kɛ́sɑ̃ntɛ kùmɑ̀ndɑ́ɑ̀ kɛ dɔ̀: Kùmɑ̀ndɑ́ɑ̀ diɛwè Fediisi, 
\v 3 fɔ̃́ɔ̃̀ te kɛ̀ ti òmpɛ̀, kɛ̀ ti ɛì cèètɛ kɛ wenkɛ. Ti dɑ sɑ̃ntí sɑ̃́ɑ̃̀ tipíìtì timɔu ɑ sɑ̀ɑ̀ nkpɛ́í. 
\v 4 N nɛ́ dɑ bɑ́ɑmmu nɛ̀ ɑ sɑ̀ɑ̀ nkpɛ́í, yóu kɛ̀ n dɑ nɑ́kɛ́ onìtì yiè nkpɛti sɑ́m̀pɔ́. 
\v 5 Ò tú onitiyɛiwe nwe, kɛ yɑɑ̀ɑ́tì Sifubɛ tipíìtì timɔu, ò tu Nɑnsɑrɛti kɔbɛ kó ditĩ̀nnì kóo nìùtì nwe. 
\v 6 Ò dɔ́ kɛ́sĩnkùnnɛ Kuyie ncĩ́ɛ̃̀tɛ̀ ntɛ kɛ ti ò pĩ, [kɛ nɑ nhò bekɛ́nɛ̀ ti kó ikuɔ́ yɛ̃mmɛ̀. 
\v 7 Kɛ̀ bɛhɑ̃ɑ̃pɔ̀mbɛ̀ kóo kótì Disiyɑsi ò fìètɛ nɛ̀ muwɛ̃rímú, 
\v 8 kɛ́duɔ́ nkɛ̀ bɛ̀ɛ̀ ò pĩ nkɛ̀ bɛ̀ ò kɔ̀tɛnɛ̀ní ɑ borɛ̀.] Bekɛ we ɑ mɔ́mmuɔ nkòò dɑ nɑ́kɛ́.
\p
\v 9 Kɛ̀ Sifubɛɛ yie mbɛmɔu nkɛ dɔ̀: Ò nɑ̀ɑ́ mɔ́mmuɔ nwe.
\s1 Pɔɔri nɑ̀kɛ́mɛ̀ o kpɛti Fediisi borɛ̀
\p
\v 10 Kɛ̀ kùmɑ̀ndɑ́ɑ̀ dɔ̀ Pɔɔrii bɛ́i, kɛ̀ Pɔɔri dɔ̀: Kùmɑ̀ndɑ́ɑ̀ diɛwè Fediisi, n yɛ̃́mu kɛ dò nti kó kɛtenkɛ̀ kɛmɔu kɔbɛ bekù fɔ̃́ nwe yɛbie mpɛ́u miɛkɛ, n yí yĩɛ̃̀kù m bo dɑ nɑ́kɛ́mɛ̀ n kpɛti. 
\v 11 A bo nɑ kɛ́ bɛ̀ bekɛ. Nɛ̀ n tùɔ̀kɛnnímɛ̀ Sedisɑdɛmmu kɛ bo bɑ́ntɛ̀ Kuyie dɛ̀ í pɛ̃ɛ̃tɛ́ yɛwe tɛpíítɛ̀ nɛ̀ yɛ̀dɛ́ɛ̀. 
\v 12 Òmɔù í n yɑ̀ Kuyie ncĩ́ɛ̃̀tɛ̀ miɛkɛ yoo titííntouti yoo dihɛì kɛ̀ n nɛínɛ̀ òmɔù yoo n sukíí bɛnìtìbɛ̀. 
\v 13 Bɛ nnìtìbɛ̀ bɑ́ɑ́ nɑ kɛ́nɑ́kɛ́ tìmɑtì bɛ̀ m pĩ tìì kpɛ́í. 
\v 14 Tìmɑtì mɑ́ɑ̀ ndi n yɛ̃́mɛ̀. N tũ ti yɛmbɛ̀ kó kucɛ nku mɛborimɛ pɑ̀mmɛ̀ miɛkɛ, bɛmbɛ yɛ̃ mmɛ̀ɛ̀ í wenni, m mɛ nyí yetɛ tìì wɑ̃̀ri ikuɔ́ kó yɛpɑ́tɛ nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ kpɛyɛ miɛkɛ. 
\v 15 N tɑ̃́mu bɛ̀ tɑ̃́mɛ̀ kɛ dò nKuyie mbo duɔ́ nkɛ̀ bɛnitisɑ̀ɑ̀bɛ̀ nɛ̀ bɛnitiyɛibɛ kɛ̀ bɛ̀ɛ yɑ̃́ntɛ́. 
\v 16 Dɛɛ̀ te kɛ̀ n yetíróo kɛ í dɔ́ kɛ́yetɛ́nɛ̀ Kuyie nɛ̀ bɛnìtìbɛ̀.
\p
\v 17 Dɛ̀ mɔ̀kɛ yɛbie mpɛ́u n yìtɛ́mɛ̀ Sedisɑdɛmmu, kɛ wɛ̃̀tɛní kɛ tɔ idíítí kɛ bo pɑ̃ n kɔbɛ kɛ́pɑ̃ Kuyie nyɛpɑ̃rɛ̀. 
\v 18 Nsòò yɛ mpɑ̃ɑ̃ Kuyie ncĩ́ɛ̃̀tɛ̀ miɛkɛ bɑ́ kutoweku í bo. 
\v 19 Kɛ̀ Sifubɛ mɑbɛ̀ bɛ̀ɛ̀ ɔ̃ mboní Asii kɛ̀ bɛ̀ n sɔ̃́ntɛ́, bɛɛ̀ dò nkɛ nɑ mbo diɛ, kɛ̀ n cɑ̀ɑ̀rɛ̀ dɛ̀mɑrɛ̀ ndɛ bɛ̀ɛ bɛ́i. 
\v 20 Yoo bɛ̀ɛ̀ bo diɛ mbɛ̀ɛ bɛ́i mbɛ̀ sòò m bekùnɛ̀ kɛ́yɑ̀ mɛ̀ɛ̀ yɛi. 
\v 21 Kɛ̀ dɛ̀ í tú n sòò bɛ́i ntì mɛkperímɛ̀ bɛ ììkɛ̀ kɛ dɔ̀: N tɑ̃́ mɛ̀ɛ̀ kpɛ́í nkɛ dò mukúkɛ́yɑ̃́ntímù bo, dɛɛ̀ kpɛ́í nte kɛ̀ di m bekùnɛ̀ yíe.
\p
\v 22 Fediisi wèè yɛ̃ Yesu kó kucɛ do mmɛ̀ɛ̀ botí, kòo tentɛ dikɑ̃̀tìrì kɛ dɔ̀: Bɛhɑ̃ɑ̃pɔ̀mbɛ̀ kóo kótì Disiyɑsi bo tuɔkɛní dìì mɔ̀nnì m bo dɔɔ̀ kɛ́wéntɛ́ dɛ kó tinɑ́ɑǹtì.
\p
\v 23 Ò bɛ́i mɛmmɛ kɛ́nɑ́kɛ́ kuhɑ̃ɑ̃pɔ̀nkù kɛ dɔ̀ kùu kpetínnɛ́ Pɔɔri, kɛ nɛ́ ò pɑ̃ mɛfíè kɛ yóu kòo kɔbɛ nhò teénnɛ̀.
\s1 Pɔɔri nɑ̀kɛ́mɛ̀ o kpɛti Fedikisi nɛ̀ o pokù Turisiiri
\p
\v 24 Kɛ̀ dɛ̀ dɔ̀ yɛwe sɑ́m̀pɔ́ kɛ̀ Fedikisii nɛinɛ̀ o pokù Turisiiri wèè tu Sifu, kɛ́kɔtɛ, kɛ́duɔ́ nkɛ̀ bɛ̀ɛ yúní Pɔɔri kòo mbɛ̀ nɑ̀ɑ́ nYesu Kirisi kpɛti kɛ̀ bɛ̀ kèḿmú. 
\v 25 Kɛ̀ Pɔɔri nnɑ́ɑ́ onìtì dòmmɛ̀ kɛ́ndɔɔri Kuyie ndɔ́ dɛ̀, kɛ́nnɔ nkɛ pĩĩ nhomɑ́ɑ̀. Nɛ̀ Kuyie nyóó bekɛ́nɛ̀mɛ̀ bɛnìtìbɛ̀. Kɛ̀ kufɔ̃wɑɑ́ mpĩ́ Fediisi kòò dɔ̀: Kɛ̀ m pɛ̀tɛ́ mɛfíè m bo wɛ̃tɛ kɛ dɑ yú.
\p
\v 26 Ò do dɔ́ Pɔɔri bo ò pɑ̃mɛ̀ mmɛ idíítí kɛ̀ dɛɛ̀ nte kòo nhò yu sɑ̃́ɑ̃̀ kɛ̀ bɛ̀ nɑ̀ɑ́.
\p
\v 27 Kɛ̀ yɛbie nyɛ̀dɛ́ɛ̀ pɛ̃ɛ̃tɛ́, kɛ̀ Pɔdisuusi Fɛsituusii cɔutɛ́ tikpɑ̀tì kɛ̀ Fediisi ndɔ́ kɛ́nnɑɑtinɛ̀ Sifubɛ kɛ yóu kɛ̀ Pɔɔri ńkpetí.
\c 25
\s1 Pɔɔri dɔ́mɛ̀ kɛ́yɑ̀ okpɑ̀ɑ̀tì diɛwè Sesɑɑ
\p
\v 1 Kɛ̀ Fɛsituusii tuɔkɛní Sesɑdee kɛ́mmɔkɛ yɛwe yɛ̀tɑ̃ɑ̃ti kɛ́kɔtɛ Sedisɑdɛmmu. 
\v 2 Kɛ̀ ikuɔ́ nìùbɛ̀ kó bɛkótíbɛ̀ nɛ̀ Sifubɛ kó bɛkótíbɛ̀ɛ kɔtɛní o borɛ̀ kɛ́ nhò nɑ̀ɑ́ mPɔɔri kó mɛyɛi. 
\v 3 Koò bɑ̀ɑ́ nkɛ tú wèe duɔ́ nkɛ̀ Pɔɔrii kɔtɛní Sedisɑdɛmmu. Bɛ̀ do dɑ̀kɛmu kɛ bo ò kùɔ kucɛ miɛkɛ. 
\v 4 Kɛ̀ Fɛsituusii bɛ̀ nɑ̀kɛ́ kɛ dɔ̀: Pɔɔri kpetí Sesɑdee nwe. Mí mmɔ́mmuɔ nkɛ̀ n kũnti bɑ̀mbɑ̀. 
\v 5 Di kó bɛkótíbɛ̀ bo nɑ kɛ́ n nɛinɛ̀ Sesɑdee, kòò dɔ̀ɔ̀ mɛyɛi mmɑmɛ̀ mmɛ bɛ̀ɛ nɑ́kɛ́.
\p
\v 6 Kɛ̀ Fɛsituusi mbɛ̀ bonɛ̀ kɛ dɔ̀ yɛwe yɛ̀ni yoo tɛpíítɛ̀, kɛ́wɛ̃tɛ Sesɑdee. Kɛ̀ dɛ̀ɛ wentɛ́ kòo tɑ kubeéndieku kɛ́duɔ́ nkɛ̀ bɛ̀ɛ yúní Pɔɔri. 
\v 7 Kòo tuɔkɛní, kɛ̀ Sifubɛɛ yɛ̀nní Sedisɑdɛmmu kóò kɛ̀ńnɛ́, kɛ nnɑ́ɑ́ ò nu ndɔ̀ɔ̀ mɛ̀ɛ̀ yɛi mpɛ́u, bɛ̀ mɛ nyí mpɛ̀tɛ́ dɛ̀ɛ̀ bɛnkú kɛ dò mbɛ̀ nɑ̀ɑ́ ntì tú timɔ́mmɔnti. 
\v 8 Kɛ̀ Pɔɔrii yetɛ kɛ dɔ̀: N yí yetɛ Sifubɛ kó ikuɔ́ mɑì, m mɛ nyí yetɛ́nɛ̀ Kuyie ncĩ́ɛ̃̀tɛ̀, m mɛ nyí yetɛ kɛtenkɛ̀ yiɛ̀ nkpɛti mɑtì.
\p
\v 9 Kɛ̀ Fɛsituusi ndɔ́ kɛ́nnɑɑtinɛ̀ Sifubɛ kɛ́bekɛ Pɔɔri kɛ dɔ̀: A dɔ́ kɛ́kɔtɛ Sedisɑdɛmmu kɛ̀ bɛ̀ ndɑ bekùnɛ̀ kɛ̀ m boɑ̀ɑ̀? 
\v 10 Kɛ̀ Pɔɔrii ò tɛ̃̀ńnɛ́ kɛ dɔ̀: N dɔ́ kɛ́kɔtɛ okpɑ̀ɑ̀tì diɛwè Sesɑɑ borɛ̀ ndɛ kɛ̀ wèe m bekɛ́nɛ̀, n yí dɔ̀ɔ̀ Sifubɛ mɛyɛi mmɑmɛ̀ kɛ́ndònnɛ̀ ɑ yɛ̃́mɛ̀ ɑ mɔ́mmuɔ. 
\v 11 Kɛ̀ n do ncɑ̀ɑ̀rɛ̀mu yoo n dɔ̀ɔ̀ mɛyɛi mɛ̀ɛ̀ dò mbɛ̀ n kuɔ, n yí yetírí m bo kúmɛ̀, kɛ̀ bɛ̀ mɛ nsɔ̃̀ńtɛ́ kɛ n níímmu òmɔù í mɔkɛ kucɛ kɛ bo m pĩ́ nkɛ́ bɛ̀ duɔ́. N dɔ́ kɛ́yɑ̀ okpɑ̀ɑ̀tì diɛwè Sesɑɑ nwe.
\p
\v 12 Fɛsituusi nɛ̀ o kɔbɛ kɛ̀ bɛ̀ɛ nɑ́kɛ́ bɛmɑ́ɑ̀ kɛ́deè kòo nɑ́kɛ́ Pɔɔri kɛ dɔ̀: Kɑ̀ɑ dɔ́ kɛ́yɑ̀ Sesɑɑ nwe ɑ yóó ò yɑ̀mu.
\s1 Akiripɑɑ dɔ́mɛ̀ kɛ́keè Pɔɔri nɑ̀ɑ́mmɛ̀
\p
\v 13 Kɛ̀ dɛ̀ dɔ̀ yɛwe sɑ́m̀pɔ́ kóo kpɑ̀ɑ̀tì Akiripɑɑ nɛ̀ Bɛriniisi kɛ̀ bɛ̀ɛ kɔtɛ Sesɑdee kɛ bo dɔu Fɛsituusi, 
\v 14 kɛ́mbo kɛ̀ dɛ̀ɛ mɔntɛ sɑ́m̀pɔ́ kɛ̀ Fɛsituusii ò nɑ̀kɛ́ kɛ dɔ̀: Fediisi n yóunɛ̀ onìtì mɔù kòò kpɑɑ́ kpetí. 
\v 15 Kɛ̀ n sòò kɔ̀tɛ Sedisɑdɛmmu kɛ̀ ikuɔ́ nìùbɛ̀ kó bɛkótíbɛ̀ nɛ̀ Sifubɛ kó bɛkótíbɛ̀ kɛ̀ bɛ̀ n nɑ̀kɛ́ o kpɛ́í nkɛ dɔ̀ nh ò kùɔ. 
\v 16 Kɛ̀ m bɛ̀ tɛ̃̀ńnɛ́ kɛ dɔ̀: Odommu kɔbɛ ɔ̃ɔ̃ í nduɔ́ nhonìtì o kpɑntídɛ̀ntɔbɛ̀ kɛ̀ bɛ̀ í bekɛ́, kòò nɑ̀kɛ́ o kpɛti. 
\v 17 Mɛm̀mɛ kɛ̀ bɛ̀ɛ kɔtɛní diɛ, kɛ̀ dɛ̀ɛ wentɛ́ kɛ̀ m pɑ̃̀nkɛɛ tɑ kubeéndieku kɛ́duɔ́ nkɛ̀ bɛ̀ɛ yúní dɛ kóo nìtì. 
\v 18 Bɛ̀ɛ̀ ò pĩ mbɛ̀ mɛ nyí nɑ̀kɛ́ mɛyɛi mmɑmɛ̀ n yɛ̀mmɛ̀ do dò mbɛ̀ yɛ̃ nh ò dɔ̀ɔ̀mɛ̀. 
\v 19 Bɛ̀ do nɛì bɛ kó muwedɔummu kpɛ́í nkɛ nɛ̀ Yesu mɔù wèè ku kɛ̀ Pɔɔri tu ò fòù. 
\v 20 Bɑ́ n yí mbɑntɛ́ m bo bekɛ mɛ̀ɛ̀ botí dɛ kó tinɑ́ɑǹtì, kɛ́bekɛ Pɔɔri kòò bo ndɔ́ kɛ́kɔtɛ Sedisɑdɛmmu kɛ̀ bɛ̀ɛ kɛ́ mbekɛ́. 
\v 21 Kɛ̀ Pɔɔri yetɛ kɛ tú: Ò dɔ́ okpɑ̀ɑ̀tì diɛwè weè ò bekɛ́nɛ̀, kɛ̀ m mɛ nyóu kòò kpetí kɛ kémmúnɛ̀ m bo ò duɔ́nkomɛ̀ Sesɑɑ.
\p
\v 22 Kɛ̀ Akiripɑɑ dɔ̀: M múnkɛ dɔ́ kɛ́keèmu dɛ kóo nìtì nɑ̀ɑ́ ntì. Kɛ̀ Fɛsituusi dɔ̀: A nɑɑ bo ò yɑ̀ kɛ́keè ò nɑ̀ɑ́mmɛ̀.
\p
\v 23 Kɛ̀ dɛ̀ɛ wentɛ́ Akiripɑɑ nɛ̀ Bɛriniisi kɛ̀ bɛ̀ nkɔri kɛ̀ bɛnìtìbɛ̀ bɛ̀ urí, kɛ̀ bɛ̀ɛ tɑ kubeéndieku kɛ nɛinɛ̀ iwɛ̃ĩ yɛmbɛ̀ nɛ̀ dihɛì kó bɛkótíbɛ̀, kɛ̀ Fɛsituusii duɔ́ nkɛ̀ bɛ̀ɛ yúní Pɔɔri. 
\v 24 Kɛ̀ Fɛsituusii bɛ́i nkɛ dɔ̀: Okpɑ̀ɑ̀tì Akiripɑɑ nɛ̀ díndi bɛ̀ɛ̀ bo diɛ, ǹtɛnɛ̀ onìtì Sifubɛ bɛmɔu Sedisɑdɛmmu kɔbɛ nɛ̀ Sesɑdee kɔbɛ yɛ̃ n kuɔ wè. 
\v 25 Mí n yí yɑ̀ ò dɔ̀ɔ̀ mɛ̀ɛ̀ yɛi nkɛ dò nti ò kùɔ, ò nɛ́ mɛ nyɛ̃mmɛ̀ ò dɔ́ kɛ́yɑ̀ okpɑ̀ɑ̀tì diɛwè, kɛ̀ m mɛ nyie kɛ bo wè nhò duɔ́nko. 
\v 26 N yí yɑ̀ m bo wɑ̃ri tì, dɛɛ̀ te kɛ̀ nh ò yùní, fɔ̃́ nhokpɑ̀ɑ̀tì Akiripɑɑ ɑ ììkɛ̀ nɛ̀ bɛtɔbɛ̀, kɛ̀ ti bo nɑ́kɛ́ dɛ kó tinɑ́ɑǹtì kɛ̀ n yɑ̀ m bo wɑ̃ri tì kɛtenkɛ̀ yiɛ̀. 
\v 27 Mí m borɛ̀ dɛ̀ í wenni m bo duɔ́nkomɛ̀ kukpetínkù okótì kɛ í nɑ̀kɛ́ kù cɑ̀kɛmu.
\c 26
\s1 Pɔɔri beémmɛ̀ okpɑ̀ɑ̀tì Akiripɑɑ
\p
\v 1 Kɛ̀ Akiripɑɑ nɑ́kɛ́ Pɔɔri kɛ dɔ̀: Ti dɑ duɔ́mmu dinùù. Nɑ́kɛ́ bɛ̀ yɛ̃ nhɑ cɑ̀kɛmu.
\p Kɛ̀ Pɔɔri youtɛ o nɔ̀ùtɛ̀ kɛ bo beé nho kpɛti kɛ bɛ́i nkɛ dɔ̀: 
\v 2 Okpɑ̀ɑ̀tì Akiripɑɑ dɛ̀ n nɑɑtimu yíe mmɛsɑ̀ɑ̀ n yóó bɛ́immɛ̀ ɑ ììkɛ̀ Sifubɛ m bekùnɛ̀ tìì kpɛ́í. 
\v 3 A yɛ̃́mu Sifubɛ kó ikuɔ́ nɛ̀ bɛ̀ mɔ̀kɛmɛ̀ tinɛìtì, n dɑ bɑ́ɑmmu ɑ minnɛ́ kɛ́ n kéntɛ́.
\p
\v 4 M bìíkú Sedisɑdɛmmu n kɔbɛ cuokɛ̀ nkɛ kɛ̀ Sifubɛ bɛmɔu yɛ̃́. 
\v 5 Bɛ̀ n yɛ̃́mu nɛ̀ dimɔ̀nnì kɛ̀ bɛ̀ dɔ́ bɛ̀ bo nɑ kɛ́nɑ́kɛ́ n do túmɛ̀ Fɑdisĩɛ̃ wèè tũ nti kó ikuɔ́ kperíyì. 
\v 6 Bɛ̀ m bekùnɛ̀ yíe n tɑ̃́ mɛ̀ɛ̀ kpɛ́í nkɛ Kuyie ndo nɑ̀kɛ́ tì ti yɛmbɛ̀. 
\v 7 Kɛ̀ ti kó iwuɔ tɛpíítɛ̀ nɛ̀ idɛ́ì pĩ nKuyie nkó mutɔ̃mmú kɛ bɑɑ tì bo dɔɔ̀mɛ̀. Okpɑ̀ɑ̀tì, n ti ntɑ̃́ kɛ̀ Sifubɛ m bekùnɛ̀. 
\v 8 Dɛ̀ dòmmɛ díndi Sifubɛ kɛ̀ di í tɑ̃́ kɛ dò bɛcíríbɛ̀ bo yɑ̃́ntɛ́?
\p
\v 9 Mí m mɔ́mmuɔ n do yɛ̃́ kɛ tú dɛsɑ̀ɑ̀rɛ̀ ndɛ kɛ́mmɑu kɛ bo pɑɑ mbɛ̀ bo nyumɛ̀ Yesu Nɑnsɑrɛti kou kó diyètìrì. 
\v 10 Kɛ̀ ikuɔ́ nìùbɛ̀ kó bɛkótíbɛ̀ n duɔ́ ndinùù kɛ̀ m pĩ̀ḿmú Yesu kɔbɛ pɛ́u Sedisɑdɛmmu miɛkɛ kɛ kpetínnɛ́, kɛ̀ bɛ̀ mbɛ̀ kɔ̀ù kɛ̀ n dɔ́, 
\v 11 kɛ́ m bɛ̀ pĩĩ titííntouti miɛkɛ kɛ puotì, kɛ̀ bɛ̀ bo yetɛ Yesu, kɛ̀ m miɛkɛ mbɛ̀ cɔ̀ú mmɛsɑ̀ɑ̀ kɛ̀ m bɛ̀ fɛ̃́ũnko nɛ̀ yɛhɛkɛ̀ tɛyɛ̀ miɛkoo.
\s1 Pɔɔri nɑ̀kɛ́mɛ̀ ò cèètɛ mɛ̀ɛ̀ botí
\p
\v 12 Mɛm̀mɛ kɛ̀ ikuɔ́ nìùbɛ̀ n duɔ́ ndinùù kɛ̀ nní nkɔri Dɑmɑɑsi kɛ nɛínɛ̀ n kɔbɛ. 
\v 13 Okpɑ̀ɑ̀tì! Kɛ́nkɑ̃́ɑ̃́kɛ́ kucɛ kɛ̀ diyiè còḿmú yɛyɔ, kɛ̀ kuwenniku mɑkùu cútɛ́ní ti ĩ́nkɛ̀ kɛ́pɛ̃ɛ̃tɛ́ diyiè kɔku. 
\v 14 Kɛ̀ ti duó timɔu kɛtenkɛ̀, kɛ̀ n keè mɛtɑmmɛ̀ mɑmɛ̀ nɛ̀ Ebedeebɛ kó tinɑ́ɑǹtì kɛ̀ mɛ̀ tu: Sɔɔri! Sɔɔri bɑ nte kɑ̀ɑ n fɛ̃́ũnko, dɛ̀ bo ndɑ yóùnɛ̀ ɑ bo m bɑɑomɛ̀. 
\v 15 Kɛ̀ m bekɛ kɛ dɔ̀: Fɔ̃́ wenni nwe? Kɛ̀ mɛ̀ dɔ̀: Mínwe Yesu ɑ fɛ̃́ũnkomɛ̀. 
\v 16 A nɛ́ ítɛ́ kɛ́cómmú, n dɑ bɛnkɛ m mɑ́ɑ̀ ndi kɑ̀ɑ bo nɑɑ́ n kóo tɔ̃ntì, kɛ́nnɑ́ɑntɛ ɑ mɛ nyɑ̀ dɛ̀ yíe nɛ̀ n yóó yíɛ́ dɑ bɛnkɛ dɛ̀. 
\v 17 N dɑ tɑ̃ɑ̃tɛ́ Sifubɛ nɛ̀ bɛ̀ɛ̀ í tú Sifubɛ bɛ cuokɛ̀ nkɛ, kɛ bo dɑ tɔ̃ mbɛ̀ borɛ̀. 
\v 18 Kɑ̀ɑ bɛ̀ wéi, kɛ́ bɛ̀ duɔ́ nKuyie, kɛ̀ bɛ̀ɛ yie nkɛ̀ kùu bɛ̀ cĩ̀ɛ̃́ nkɛ̀ bɛ̀ɛ wɛ̃nnɛ́nɛ̀ ku kɔbɛ ku cĩ́ɛ̃̀tɛ̀.
\s1 Pɔɔri ketɛ́ yɛ̀ɛ̀ ɛkɛ̀ Kuyie nnɑ́ɑǹtì
\p
\v 19 Mɛm̀mɛ okpɑ̀ɑ̀tì Akiripɑɑ n yí nyetɛ Kuyie nni mbɛnkɛ dɛ. 
\v 20 N ketɛ́ kɛ́nɑ́kɛ́ Kuyie nnɑ́ɑǹtì Dɑmɑɑsi nwe nɛ̀ Sedisɑdɛmmu nɛ̀ Sudee kó yɛhɛkɛ̀ yɛmɔu nɛ̀ bɛ̀ɛ̀ í tú Sifubɛ, kɛ tú bɛ̀ɛ ceetɛ kɛ́ndɔɔ̀ri Kuyie ndɔ́mɛ̀. 
\v 21 Dɛɛ̀ te kɛ̀ Sifubɛ m pĩ́ Kuyie ncĩ́ɛ̃̀tɛ̀ miɛkɛ kɛ́ndɔ́ kɛ́ n kuɔ. 
\v 22 Kɛ̀ Kuyie nni ndɛɛtɛ́ kɛ̀ n kpɑɑ́ fòù, kɛ nɑ́ɑ́ ku nɑ́ɑǹtì bɛsɑ́m̀pɔ́bɛ̀ nɛ̀ bɛnitidiɛbɛ̀. N yí nɑ́ɑ́ ntìmɑtì kɛ̀ dɛ̀ í tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɛ̀ Mɔyiisi bɛ̀ do nɑ̀kɛ́ tì kɛ dɔ̀: 
\v 23 Kirisi dò nkɛ́fɛ̃́ṹtɛ́mu kɛ́kú, kɛ́ntú oketiwè wèè yɑ̃̀ńtɛ́, kɛ́míítɛ́ ti kó kubotí nɛ̀ ibotí tɛì kuwenniku.
\s1 Pɔɔri nɑ̀ɑ́mmɛ̀ Kuyie nnɑ́ɑǹtì Akiripɑɑ
\p
\v 24 Kɛ̀ Pɔɔri nkpɑɑ́ nɑ́ɑ́ kɛ̀ Fɛsituusi ò pɛ́i nkɛ dɔ̀: A bɛbíí yɛpɑ́tɛ kɛ̀ yɛ̀ dɑ wɑ́ɑmmɑɑ̀? 
\v 25 Kɛ̀ Pɔɔri dɔ̀: Okpɑ̀ɑ̀tì, n yí wɑ̀ɑ́tɛ́, n nɑ́ɑ́ timɔ́mmɔnti nti. 
\v 26 Okpɑ̀ɑ̀tì Akiripɑɑ tì yɛ̃́mu timɔu, dɛɛ̀ te kɛ̀ n nɑ̀ɑ́ kɛ í yĩɛ̃̀kù, kɛ yɛ̃́ ti í dɔ̀ɔ̀mɛ̀ disɔ̀rì. 
\v 27 Okpɑ̀ɑ̀tì Akiripɑɑ, n yɛ̃́mu kɛ dò nhɑ yie Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɑ̀kɛ́ tì. 
\v 28 Kɛ̀ Akiripɑɑ dɔ̀: Pɔɔri ɑ yóó duɔ́ kɛ̀ nní mbo kɛ nɑɑ́ nYesu kou nwe. 
\v 29 Kɛ̀ Pɔɔri dɔ̀: Kɛ̀ dɛ̀ cɑ̃rikɛ yoo dɛ̀ ɔɔtɛ, mbɑ́ɑ́ nKuyie nku fɔ̃́ nnɛ̀ bɛtɔbɛ̀ biɛ ndi kpɛ́í, kɛ̀ di bo nɑɑ́ nYesu kɔbɛ, kɛ́ nni ndònnɛ̀, bɛ̀ nɛ́ bɑ́ɑ́ di boú mɛfĩmmɛ bɛ̀ m boúmɛ̀.
\p
\v 30 Okpɑ̀ɑ̀tì Akiripɑɑ nɛ̀ kùmɑ̀ndɑ́ɑ̀ nɛ̀ Bɛriniisi nɛ̀ bɛtɔbɛ̀ bɛmɔu, kɛ̀ bɛ̀ɛ ítɛ́. 
\v 31 Kɛ́nkérí kɛ nɑ́ɑntɛ kɛ tú onìtì yie nyí dɔ̀ɔ̀ mɛyɛi mmɑmɛ̀ kɛ dò mbɛ̀ɛ ò kùɔ yoo bɛ̀ɛ ò kpetínnɛ́.
\p
\v 32 Kɛ̀ Akiripɑɑ nɑ́kɛ́ Fɛsituusi kɛ dɔ̀: Ti nɑ nhò fĩ́ĩmmu kòò do í yɛ̃ nhò dɔ́ kɛ́yɑ̀ kɛtenkɛ̀ yiɛ̀.
\c 27
\s1 Pɔɔri kɔ̀rimɛ̀ Odommu
\p
\v 1 Bɛ̀ yĩ dìì mɔ̀nnì ti dò nkɛ́kɔtɛ Itɑdii kɛ́duɔ́ mPɔɔri nɛ̀ tikpetíntì tɛtì kuhɑ̃ɑ̃pɔ̀nkù, kùù ni kɛtenkɛ̀ yiɛ̀ nkó fɛhɑ̃ɑ̃pɔ̀nnɑfɛ bɛ̀ tú kù Sidiyusi. 
\v 2 Kɛ̀ ti tɑ Atidɑmiti kóo bɑ̀tóò kòò kɔ̀ri Asii, kɛ̀ Adisitɑki Mɑseduɔnni kó kutempɛ̃ nkou kòo ɛì tu Tɛsɑdoniki kòo nti nɛínɛ̀. 
\v 3 Kɛ̀ dɛ̀ɛ wentɛ́ kɛ̀ tí tuɔkɛ Sitɔ̃ɔ̃. Sidiyusi wèè dɔ́ Pɔɔri kòo yóu kòo kɔtɛ kɛ́yɑ̀ o kɔbɛ, kɛ̀ bɛ̀ɛ ò cɔutɛ́ mɛsɑ̀ɑ̀. 
\v 4 Kɛ̀ ti ítɛ́ dɛborɛ̀ kɛ̀ kuyɑɑkùu yetɛ kɛ ti kɔ́ntɛ́ kɛ́yɛ̀ Sipiri bɑkù yoú. 
\v 5 Kɛ̀ ti séntɛ́ dɑ̀mɛ́ɛ̀rì wèè pɛkɛ́nɛ̀ Sidisii nɛ̀ Pɑ̃nfidii kó itempɛ̃ nkɛ́tuɔkɛ Midɑɑ Disii kó kutempɛ̃. 
\v 6 Dɛǹdɛ kuhɑ̃ɑ̃pɔ̀nkù yɑ̀mɛ̀ Adɛkisɑ̃ntiri kóo bɑ̀tóò kòò kɔ̀ri Itɑdii kɛ̀ kù ti tɑnnɛ̀.
\p
\v 7 Kɛ̀ ti nkérí kɛ dɔ̀ yɛwe pɛ́u kɛ fɛ̃́ṹtɛ́ mɛdiɛ̀ nkɛ nɛ́ nɑ kɛ́tuɔkɛ Kinidi, bɑ́ kuyɑɑkù í nyie kɛ̀ ti kɔ́ntɛ́ kɛ́yɛ̀ Sɑdomɔnni kɛ́tuɔkɛ Kɛrɛti. 
\v 8 Kɛ́ nhò pɛkɛ́ kɛ ɑ́ɑ̀rì, kɛ́tuɔkɛ dibòrì mɑrì kɛ̀ bɛ̀ dì tu: Dicónnì sɑ̀ɑ̀rì, kɛ̀ dì tɔ̀kɛ́nɛ̀ Dɑsee kó dihɛì.
\p
\v 9 Kɛ̀ bɑ̀tóò kó mucèmmu dɔ̀kɛ yónkú kɛ ti mɔntɛ kucɛ mɛdiɛ̀ dɛ̀ do sɔ̃́ mmɛnùboúmmɛ̀ kó dimɔ̀nnì pɛ̃ɛ̃tɛ́mu. 
\v 10 Kɛ̀ Pɔɔrii bɛ́i nkɛ dɔ̀: N kɔbɛ, ti kó kucɛ kuù nyó nyóumu, bɑ̀tóò bo cɑkɛ nɛ̀ tinɛntì, kɛ̀ ti í yɛ̃́ ti kú.
\p
\v 11 Kɛ̀ kuhɑ̃ɑ̃pɔ̀nkù ntɑ̃́ wèè piú bɑ̀tóò nɛ̀ wèè ò te kɛ̀ dɛ̀ pɛ̃ɛ̃tɛ́ Pɔɔri bɛ́i ntì. 
\v 12 Bɑ̀tóòbɛ̀ commu dɛ̀ í wenni diyɔ̃ɔ̃̀, kɛ̀ bɛ̀mɑbɛ̀ dɔ̀ bɛ̀ɛ pɛ̃ɛ̃tɛ́ kɛ́kɔtɛ Fennikisi, Kɛrɛti kóo bɑ̀tóòbɛ̀ commu dɛ̀ kɛ wetí diyiè tɑɑ̀ kɛ̀ɛ̀ bíɛ́kɛ̀, dɛ̀ɛ̀ do dò ɑ́ ndɛ mbo diyɔ̃ɔ̃̀.
\s1 Kuyɑɑkù diɛkù ìtɛ́mɛ̀ dɑ̀mɛ́ɛ̀rì miɛkɛ kɛ́nfuu
\p
\v 13 Kɛ̀ kuyɑɑkù mɑkùu ítɛ́ní kubɑkù cɑ̃̀nku bíɛ́kɛ̀ kɛ́nfuuti mɛyɔɔ̀mmɛ̀, kɛ̀ bɛ yɛ̀mmɛ̀ ndò bɛ̀ bo tuɔkɛ bɛ̀ dɔ́ dɛ̀, kɛ́dɛitɛ bɑ̀tóò cónnírì, kɛ́mpɛ́kɛ́nɛ̀ Kɛrɛti kó kɛtenkɛ̀. 
\v 14 Kɛ̀ dɛ̀ nyóó yíɛ́ kɛ̀ kutɛkù mɑkùu ítɛ́ní kubɑkùu yoú diyiè yìɛ̀ní kɛ̀ɛ̀ bíɛ́kɛ̀ kó kuyɑɑkù kɛ kpeńnì. 
\v 15 Bɑ́ ti í nnɑ kɛ kù kɛ̃tɛ́, kɛ yóu kɛ̀ kù nti tɔ. 
\v 16 Kɛ̀ ti pɛ̃ɛ̃tɛ́ Kodɑɑ, dihɛì dìì sokɛ́ dɑ̀mɛ́ɛ̀rì miɛkɛ kɛ̀ di nti kɑ̃nkɛ́ sɑ́m̀pɔ́rɛ̀, kɛ̀ ti ɑ́kɛ́ kɛ nɛ́ nɑ kɛ́deè mbɑ̀tóò sɑ́m̀pɔ́ù. 
\v 17 Kóò boú iwɛ̃ĩ kɛ́nyĩɛ̃̀kù ò bo tɑmɛ̀ mubirímú kɛ́cṹũ ntiyɑ̀ɑ̀tì, kɛ yóu kɛ̀ kuyɑɑkù ńti tɔ. 
\v 18 Kɛ̀ dɛ̀ɛ wentɛ́ kɛ̀ kuyɑɑkù bɑɑ nkpɑɑ́ ti kóonko mɛkperímɛ̀, kɛ̀ tí ńdɛì tinɛntì kɛ buɔǹko dɑ̀mɛ́ɛ̀rì miɛkɛ. 
\v 19 Kɛ̀ dɛ̀ tó wentɛ́ kɛ̀ bɑ̀tóò yɛmbɛ̀ mɔ́mmɔmbɛ ńdɛì tipotɑntì kɛ dokòo dɑ̀mɛ́ɛ̀rì miɛkɛ. 
\v 20 Yɛwe pɛ́u miɛkɛ kɛ̀ kuyɑɑkù bɑɑ kpɑɑ́ kpeńnì, bɑ́ ti í nwúó diyiè nɛ̀ siwɑ̃̀ɑ̃, ti tɛ̃́nkɛ í nyɛ̃́ kɛ dò nti bo cootɛ́.
\p
\v 21 Yɛwe pɛ́u miɛkɛ òmɔù í ndi dɛ̀mɑrɛ̀, kɛ̀ Pɔɔrii cómmú kɛ́bɛ́i nkɛ dɔ̀: N kɔbɛ kɛ̀ di sòò do nyie n kpɛti kɛ̀ tí nkpɑɑ́ Kɛrɛti ti nɑ bɑ́ nyɑ̀ mɛhɑ́ɑ́rìmɛ̀ miɛ nkɛ̀ ti kpɛrɛɛ cɑkɛ. 
\v 22 Di mmɔ̀nnì dí cɑ́tìnnɛ di yɛ̀mmɛ̀, òmɔù í yóó kú, bɑ̀tóò weè mɑ́ɑ̀ yóó yɛi. 
\v 23 Kuyie nkùù n te kɛ̀ m pĩ ku tɔ̃mmú ku tɔ̃nnì kɔ̀tɛnímu kɛ nyènkɛ̀ kɛ n nɑ̀kɛ́ kɛ tú: 
\v 24 Pɔɔri bɑ́ nyĩɛ̃̀kù ɑ dò nkɛ́tuɔkɛmu kɛtenkɛ̀ yiɛ̀ mborɛ̀, Kuyie ndɑ dɔ́ mɛ̀ɛ̀ kpɛ́í nte kɛ̀ kù yóó dɛɛtɛ́ ɑ nɛínɛ̀ bɛ̀. 
\v 25 Dɛɛ̀ te kɛ̀ n tú cɑ́tìnnɛ̀ di yɛ̀mmɛ̀, n yɛ̃́mu weti weti dɛ̀ yó ndòmmɛ̀ Kuyie nni nnɑ̀kɛ́mɛ̀ mmɛ. 
\v 26 Ti nɛ́ yóó fṹṹkúmu dibòrì mɑrì dihɛì diì sokɛ́ dɑ̀mɛ́ɛ̀rì miɛkɛ di borɛ̀.
\b
\p
\v 27 Kɛyènkɛ̀ tɛpíítɛ̀ nɛ̀ kɛnɑɑnkɛ̀ do nkɛ, kɛ̀ kuyɑɑkù kpɑɑ́ ti kóonko kɛ̀ ti bɑɑ bo dɑ̀mɛ́ɛ̀rì miɛkɛ, kɛ̀ bɑ̀tóò yɛmbɛ̀ yɛ̀mmɛ̀ ndò ti tɔ̀ɔ́nnɛ̀ kɛtenkɛ̀, 
\v 28 kɛ́bɔ nkuhɔ̃ũ kɛ̀ mɛcũmpumɛ ḿbo mɛ́tìrì sipísìtɑ̃ɑ̃ti nɛ̀ mɛ̀yiekɛ̀, kɛ̀ bɛ̀ɛ yíɛ́ dɛ́tóo kɛ́bɔ nkɛ̀ mɛ̀ ḿbo sipísìdɛ́ nɛ̀ mɛ̀ni. 
\v 29 Kɛ̀ bɛ̀ nyĩɛ̃̀kù bɑ̀tóò bo bootɛmɛ̀ dipèrì mɑrì, kɛ́bɔ mbɑ̀tóò còńníyɛ̀ yɛ̀nɑ̀ɑ̀ o fɔ̃nkúò bíɛ́kɛ̀, kɛ́mbɑɑ dɛ̀ bo wentɛ́mɛ̀ kɛ̀ dɛ̀ bɛ̀ ɔɔtí. 
\v 30 Kɛ̀ bɑ̀tóò yɛmbɛ̀ ndɔ́ kɛ́cokɛ́ kɛ́ncṹũnko bɑ̀tóò sɑ́m̀pɔ́ù kɛ dɔɔ̀ri kɛ dò mbɛ̀ pitírí bɑ̀tóò cònnírì. 
\v 31 Kɛ̀ Pɔɔrii nɑ́kɛ́ iwɛ̃ĩ yiɛ̀ nnɛ̀ tihɑ̃ɑ̃pɔ̀ntì tɛtì kɛ dɔ̀: Kɛ̀ bɛ nnìtìbɛ̀ í kpɑɑ́ bɑ̀tóò miɛkɛ òmɔù bɑ́ɑ́ cootɛ́.
\p
\v 32 Kɛ̀ tihɑ̃ɑ̃pɔ̀ntìi kéétɛ́ iwɛ̃ĩ ìì pìítí bɑ̀tóò sɑ́m̀pɔ́ù kòo pɔ̃ntɛ́.
\p
\v 33 Kɛ̀ dɛ̀ɛ ɑutɛ́ kɛ bo wentɛ́ kɛ̀ Pɔɔrii bɛ̀ nɑ̀kɛ́ kɛ dɔ̀: Dɛ̀ mɔ̀kɛ yíe nyɛwe tɛpíítɛ̀ nɛ̀ yɛnɑ̀ɑ̀ di í dimɛ̀ mùmɑmù. 
\v 34 Dinɛ̀ kɛ́nfòù, di kóo mɔù kó kunɔ́nkúókù í yóó feti.
\p
\v 35 Pɔɔri bɛ́i mɛmmɛ kɛ́túótɛ́ pɛ̃́ɛ̃̀ kɛ́sɑ̃ntɛ Kuyie mbɛ ììkɛ̀ kɛ wɛ́tɛ́ kɛ́ncɑ́ɑ́. 
\v 36 Bɛmɔu, kɛ̀ bɛ yɛ̀mmɛ̀ɛ cɑ́tɛ́, kɛ̀ bɛ̀ɛ di. 
\v 37 Timɔu ti do bo sikɔusìdɛ́ nɛ̀ sipísìyiekɛ̀ nɛ̀ bɛ̀kuɔ̀ (276) ndi bɑ̀tóò miɛkɛ. 
\v 38 Kɛ̀ bɛ̀ɛ di kɛ́deè kɛ́dootóo tidiitì sɔnti dɑ̀mɛ́ɛ̀rì miɛkɛ kɛ̀ bɑ̀tóò bo yɑukɛ.
\s1 Bɛ̀ dìunɛ̀mɛ̀ bɑ̀tóò
\p
\v 39 Dɛ̀ wentɛ́ dìì mɔ̀nnì bɑ́ bɛ̀ í mbɑntɛ́ kɛtenkɛ̀, kɛ́yɑ̀ kubinkɛnkɛnkù mɑkù kɛ̀ mubirímú dɛ bo, kɛ̀ bɛ yɛ̀mmɛ̀ ńdò kɛ̀ bɛ̀ bo nɑ, bɛ̀ɛ kɔtɛnɛ̀ bɑ̀tóò dɛborɛ̀. 
\v 40 Kɛ kéétɛ́ bɑ̀tóò cònníyɛ̀ kɛ́pítɛ́ dɛ̀ɛ̀ piúnɛ̀ bɑ̀tóò kɛ́deè kɛ́cónnɛ́ kuyɑ̀ɑ̀kù, kɛ̀ kuyɑɑkù mbɛ̀ tèmmù kɛ̀ bɛ̀ kɔ̀ri dɛborɛ̀. 
\v 41 Kɛ́tɑ mubirímú kó kupɛ̃ mmɑkù, kɛ̀ bɑ̀tóò fṹṹkú o ììkɛ̀ kɛ̀ mɛniɛ nní mpuotì o fɔ̃nkúò koò wɛ́ú.
\p
\v 42 Kɛ̀ tihɑ̃ɑ̃pɔ̀ntì ńyĩɛ̃̀kù tikpetíntì bo dɛimɛ̀ kɛ̀ kùmɑkùu cokɛ́, kɛ́ndɔ́ kɛ́ tì kùɔ timɔu. 
\v 43 Kɛ̀ iwɛ̃ĩ yiɛ̀ nní ndɔ́ kɛ́dɛɛtɛ́ Pɔɔri kɛ́yetɛ kɛ dɔ̀, bɛ̀ɛ̀ nɔ nkɛ dɛì bɛ̀ɛ dɛi kɛ́niitɛ́ kɛ́séntɛ́. 
\v 44 Kɛ̀ bɛtɔbɛ̀ mbɛ tũ kɛ dɛitínɛ̀ tidɑbɛɛtì yoo bɑ̀tóò kó yɛwɛ́tiyɛ̀. Mɛm̀mɛ kɛ̀ bɛ̀ɛ séntɛ́ bɛmɔu bɑ́ dɛ̀mɑrɛ̀ í bɛ̀ dɔ̀ɔ̀.
\c 28
\s1 Fɛwɑ̀ɑ̀fɛ̀ dɔntɛ́mɛ̀ Pɔɔri
\p
\v 1 Ti sèńtɛ́ dìì mɔ̀nnì nɛ̀ kukɔ̃ǹnɑɑtí kɛ́keè dɛ kó dihɛì yètìrì túmɛ̀ Mɑriti. Dì do sokɛ́ dɑ̀mɛ́ɛ̀rì miɛkɛ nkɛ. 
\v 2 Kɛ̀ dɛ kó dihɛì yɛmbɛ̀ ti dɔɔ̀ mɛsɑ̀ɑ̀. Kɛ sɔ̃́ nfɛtɑɑfɛ̀ nìu kɛ̀ muséé mbo, kɛ̀ bɛ̀ɛ tɔtìnnɛ muhɑ̃ɑ̃́ mmɛdiɛ̀. 
\v 3 Kɛ̀ Pɔɔrii otɛ́ tidɑbiti kɛ bo ɑ̃nnɛ́ muhɑ̃ɑ̃́ mmiɛkɛ, kɛ̀ fɛwɑ̀ɑ̀fɛ̀ ɑ̃ ti miɛkɛ kɛ́keè kuhɑ̃ɑ̃yiìnkù kɛ́yɛ̀nní kɛ́dɔntɛ́ o nɔ̀ùtɛ̀ kɛ́ncɑ́ɑ́tí. 
\v 4 Kɛ̀ dɛ kó dihɛì kɔbɛɛ yɑ̀ fɛwɑ̀ɑ̀fɛ̀ cɑ̀ɑ́tímɛ̀ Pɔɔri nɔ̀ùtɛ̀ kɛ́nnɑ́ɑ́ mbɛmɑ́ɑ̀ kɛ tú: Onìtì yie mmɛ̀nkɛ tú onitikɔ̀ùti nwe, bɑ́ ò mɛ ncootɛ́mɛ̀ dɑ̀mɛ́ɛ̀rì miɛkɛ mɛyɛi mbɑɑ ò tũ̀mmu.
\p
\v 5 Kɛ̀ Pɔɔrii míɛ́tóo fɛwɑ̀ɑ̀fɛ̀ muhɑ̃ɑ̃́ mmiɛkɛ bɑ́ ò í nkèè kuyonku. 
\v 6 Kɛ̀ bɛ̀ nkémmú dɛ̀ bo múútímɛ̀ yoo wèe doroo bɑ̀mbɑ̀ nkɛ́kú. Kɛ̀ dɛ̀ɛ mɔntɛ bɑ́ dɛ̀mɑrɛ̀ í dɔ̀ɔ̀, kɛ̀ bɛ̀ɛ ceetɛ tinɑ́ɑǹtì kɛ dɔ̀ ò dò nKuyie nku.
\p
\v 7 Kɛ sɔ̃́ nkùmɑ̀ndɑ́ɑ̀ bɛ̀ tú wè Pibidiyuusi, wèè te dihɛì kòo bɑ̀tɛ̀ dɛ̀ bo, kòo ti cɔutɛ́nɛ̀ diwɛ̀ì. Kɛ̀ tí mbo kɛ dɔ̀ yɛwe yɛ̀tɑ̃ɑ̃ti. 
\v 8 Kɛ̀ timíɛ́tì bo o cicɛ kòò yɛ̃́nkú mɛyĩ̀ĩ̀ kɛ duɔ́ kɛ̀ Pɔɔrii ò nɔ̀ɔ́ nsinɔu, kɛ bɑ́ntɛ̀ Kuyie nkòo miɛtɛ́. 
\v 9 Kɛ̀ bɛmuɔmbɛ tɔbɛ̀ ńkɔrìní kòò bɛ̀ miɛkùnko. 
\v 10 Kɛ̀ bɛ̀ ti dɔɔ̀ mɛsɑ̀ɑ̀. Kɛ̀ ti pɛ̃ɛ̃tímùu tuɔkɛní dìì mɔ̀nnì kɛ̀ bɛ̀ ti pɑ̃mmú dɛ̀ ti békú dɛ̀.
\s1 Odommu kɔbɛ do dɔ́mɛ̀ Pɔɔri
\p
\v 11 Bɛtɑ̃̀ɑ̃̀bɛ̀ bɛ̀tɑ̃ɑ̃ti kó difɔ̃nkúò kɛ̀ ti tɑ bɑ̀tóò mɔù wèè do dɛ̀ bo diyɔ̃ɔ̃̀ miɛkɛ, kɛ bonní Adɛkisɑ̃ntiri, kɛ mɔkɛ sitenkɑɑnìi sìdɛ́sì kɛ̀ bɛ̀ sì tu itɑ́ɑ́tɛ́bí. 
\v 12 Kɛ̀ ti tuɔkɛ Sidɑkii kɛ cómmú kɛ dɔ̀ yɛwe yɛ̀tɑ̃ɑ̃ti. 
\v 13 Kɛ ítɛ́ dɛborɛ̀ kɛ́mpɛkɛ́nɛ̀ kɛtenkɛ̀ kɛ̀ dɛ̀ɛ wentɛ́ kɛ̀ ti tuɔkɛ Desiyo kɛ̀ kubɑkù cɑ̃̀nku kó kuyɑɑkù ḿbo, kɛ̀ ti mmɔkɛ yɛwe yɛ̀dɛ́ɛ̀ kɛ́tuɔkɛ Pusɔɔri. 
\v 14 Kɛ dɛ̀ yɑ̀ Yesu kɔbɛ kɛ̀ bɛ̀ dɔ̀ ti mbɛ̀ bonɛ̀ kɛ dɔ̀ yɛwe yɛ̀yiekɛ̀. Kɛ̀ ti mbɛ̀ bonɛ̀ kɛ́pɛ̃ɛ̃tɛ́ kɛ́nkɔri Odommu. 
\v 15 Kɛ̀ Yesu kɔbɛ bɛ̀ɛ̀ bo Odommu kɛ̀ bɛ̀ɛ keè ti kpɛ́í, kɛ́kɔtɛní Dɑpiyusi bɛ̀ tɑɑ̀ dɛ̀ dikɑ̃̀tìrì kɛ ti co, kɛ̀ bɛtɔbɛ̀ɛ kɔtɛní bɛ̀ tu dɛ̀ titouti tìtɑ̃ɑ̃ti bɛpɔ̀ɔ̀bɛ̀ kpɛti. Kɛ̀ Pɔɔrii bɛ̀ yɑ̀ kòo yɛ̀mmɛ̀ɛ nɑrikɛ kòo sɑ̃ntɛ Kuyie. 
\v 16 Ti tùɔ̀kɛ dìì mɔ̀nnì Odommu kɛ̀ bɛ̀ɛ duɔ́ mPɔɔri kudieku kòo mbo kɛ̀ kuhɑ̃ɑ̃pɔ̀nkù ò bɑ̀ɑ.
\s1 Pɔɔri nɑ̀ɑ́mmɛ̀ Kuyie nnɑ́ɑǹtì Odommu
\p
\v 17 Yɛwe yɛ̀tɑ̃ɑ̃ti kó difɔ̃nkúò kɛ̀ Pɔɔrii yú Sifubɛ kó bɛkótíbɛ̀ bɛ̀ɛ̀ bo Odommu kɛ̀ bɛ̀ɛ tíínní kòo bɛ̀ nɑ̀kɛ́ kɛ dɔ̀, ti kɔbɛ n yí yetɛ́nɛ̀ ti yɛmbɛ̀ kó ikuɔ́, kɛ̀ bɛ̀ m pĩ Sedisɑdɛmmu kɛ duɔ́ nhOdommu kɔbɛ. 
\v 18 Kɛ̀ bɛ̀ m bìékɛ́ kɛ́ndɔ́ kɛ́ n fĩ́ĩ kɛ yɛ̃́ bɛ̀ í yɑ̀mɛ̀ mɛyɛi n dɔ̀ɔ̀mɛ̀ kɛ dò mbɛ̀ n kuɔ. 
\v 19 Kɛ̀ Sifubɛ nɛ́ yetɛ, kɛ̀ dɛɛ̀ nte kɛ̀ n dɔ̀: M bo yɑ̀ kɛtenkɛ̀ yiɛ̀, dɛ̀ nɛ́ í tú n yɛ̃ m bo ò yɑ̀ kóò nɑ̀kɛ́ bɛ kó mɛyɛi mmɑmɛ̀. 
\v 20 Dɛɛ̀ te kɛ̀ n dɔ́ kɛ di nɑ́kɛ́, Isidɑyɛɛribɛ bɑɑ wè kpɛ́í ntemɛ̀ kɛ̀ m boú mɛfĩmmɛ.
\p
\v 21 Kɛ̀ bɛ̀ɛ ò tɛ̃̀ńnɛ́ kɛ dɔ̀: Bɛ̀ í wɑ̃̀ri ɑ kpɛti mɑtì Sudee kɛ ti duɔnní, ti kou mɔù mɛ nyí kɛ yɛ̀nní kɛ ti nɑ̀kɛ́ ɑ cɑ̀ɑ̀rɛ̀ mù. 
\v 22 Ti yɛ̃́mu kɛ dò ntipíìtì timɔu bɛ̀ í dɔ́ ɑ tũ nkùù wedɔuncɛ̀, ɑ ti nɑ́kɛ́ ɑ mɔ́mmuɔ ndɛ kó tinɑ́ɑǹtì.
\p
\v 23 Kɛ̀ bɛ̀ɛ dɔú ndikɑ̃̀tìrì kɛ́kɔtɛní dɛ yiè Pɔɔri borɛ̀ kɛ́nsũnɛ̀ bɛ̀ sòò mɑ̀mɛ̀. Kɛ̀ Pɔɔri ntṹṹ nkɛ bɛ̀ nɑ̀ɑ́ Kuyie nkpɑ̀ɑ̀tìyuu kpɛti, kɛ bɛ̀ bɛnkú Mɔyiisi nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì, kɛ yetíróo kɛ dɔ́ bɛ̀ɛ bɑntɛ́ Yesu túmɛ̀ Odɛɛtíwè. 
\v 24 Kɛ̀ bɛ̀mɑbɛ̀ɛ yie nkɛ̀ bɛtɔbɛ̀ɛ yetɛ. 
\v 25 Kɛ̀ bɛ̀ nyiti kɛ nɛì bɛmɑ́ɑ̀, kɛ̀ Pɔɔrii bɛ́i nkɛ dɔ̀: Muyɑɑ́nsɑ̀ɑ̀mù nɑɑtimu mù do mɛ nnɑ̀kɛ́mɛ̀ Kuyie mpɑ̃ɑ̃nɑ́ɑǹtì nɑ́ɑǹtò Esɑii kɛ dɔ̀: 
\v 26 Kɔtɛ kɛ́nɑ́kɛ́ ku mbotí kɔbɛ kɛ dɔ̀:
\q1 Di bo nyo,
\q1 di mɛ mbɑ́ɑ́ bɑntɛ́,
\q1 kɛ́nwúó, di mɛ mbɑ́ɑ́ yɑ̀.
\q1
\v 27 Kɛ yɛ̃́ dɛ kó kubotí kɔbɛ yɛ̀mmɛ̀ kpeńnìmɛ̀,
\q1 bɛ̀ í yíé ntìmɑtì,
\q1 kɛ ĩtínnɛ́ bɛ to, kɛ bɑ́ɑ́ keè,
\q1 kɛ ũ̀ṹ nkɛ bɑ́ɑ́ yɑ̀,
\q1 bɛ̀ yɑ̀ɑ̀ bo ceetɛ mɛ̀ɛ̀ kpɛ́í
\q1 kɛ̀ m bɛ̀ miɛkùnnɛ.
\m
\v 28 N yɛ̃́nɛ̀ kɛ dò mɛdɛɛtímɛ̀ kó tinɑ́ɑǹtì kɔ̀tɛmu bɛ̀ɛ̀ í tú Sifubɛ bɛ borɛ̀ kɛ̀ bɛmbɛ yóó tì cɔutɛ́.
\p [ 
\v 29 Pɔɔri bɛ́i mɛmmɛ kɛ̀ Sifubɛɛ ítɛ́ tinɛìtì bɛmɑ́ɑ̀ kɛ́nkũnti.]
\p
\v 30 Kɛ̀ Pɔɔri dɔ̀ yɛbie nyɛ̀dɛ́ɛ̀ kɛ yietì ò bo kùù dieku, kɛ cɔú bɛ̀ɛ̀ kɔ̀riní o borɛ̀. 
\v 31 Kɛ nɑ́ɑ́ Kuyie nkpɑ̀ɑ̀tìyuu kpɛti nɛ̀ Yesu túmɛ̀ Odɛɛtíwè bɑ́ kɛ í yĩɛ̃̀kù, òmɔù mɛ nyí nhò kɔɔ́nnɛ̀.