\id 2TI di56.all F{evrier 1999 BJ Parakou B{enin
\ide UTF-8
\h 2 Timɔntee
\toc1 Pɔɔri wɑ̃̀ri dìì pɑ́tíri dɛ́rì Timɔntee
\toc2 2 Timɔntee
\mt1 Pɔɔri wɑ̃̀ri dìì pɑ́tíri dɛ́rì Timɔntee
\imt1 Di mpɑ́tíri tɔ tìì nɑ́ɑǹtì
\ip Pɔɔri do yóó wɑ̃ri Timɔntee dipɑ́tíri dɛ́rì kɛ bo Odommu nwe. Ò do wɑ̃̀ri dɛ kó dipɑ́tíri Timɔntee nwe kɛ bo o duɔ́ nyitié, kɛ̀ dɛ̀ɛ yie nkɛ̀ mɛbennímɛ̀ ò tùɔ̀kɛní ò nwɛ̃́ɛ̃́rì kɛ́ntié nKuyie ntié nyì dò nti nyì tièmmɛ̀.
\ip Kòo ò nɑ̀kɛ́ kɛ dɔ̀ ò dò nkɛ́ndɑkɛmu bɛ̀ɛ̀ ce ntinɛìtì dɛtetìrɛ̀ kpɛti, yɛtɑnnɔ̀ ĩ́nkɛ̀ dɛtetìrɛ̀ kɛ̀ dɛ̀ bɛ̀ dɛ́tìnkonɛ̀ Kuyie nkuɔ́. Dɛmɔu dɛ miɛkɛ kɛ tié Timɔntee kɛ tú wè nyɛ̃́ wenwe Pɔɔri ò fɛ̃̀ṹtɛ́ mɛ̀ɛ̀ botí, nɛ̀ mɛminnímɛ̀ ò mɔ̀ɔ̀tɛmɛ̀ mɛfɛ̃́ṹtímɛ̀ miɛkɛ nɛ̀ ò dɔ́ mɛ̀ɛ̀ botí Kirisi kɔbɛ.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Pɔɔri sɑ̃ntɛmɛ̀ Kuyie, nɛ̀ ò yɑ́úkùnnɛmɛ̀ Timɔntee kɔ̃̀ntì kɛ dɔ̀ ò ntɛ̃ĩ́ 1:1-18
\io1 2. Pɔɔri duɔ́ nyìì tié nTimɔntee 2:14-4:5
\io1 3. Pɔɔri ò mɔ́mmuɔ nhò do bo tìì miɛkɛ 4:6-22
\c 1
\s1 Mudɔummu
\p
\v 1 Mí mPɔɔri Yesu Kirisi kó ditɔ̃nnì, Kuyie nkuù n tɑ̃ɑ̃tɛ́ kɛ̀ m bo nɑ́kɛ́ bɛnìtìbɛ̀ tinɑ́ɑǹtì tìì duɔ̀ mmufòmmu kù do nɑ̀kɛ́ tìì kpɛ́í. Onìtì ɔ̃ɔ̃ tɑunnɛ̀ Yesu nwe kɛ́pɛ́tɛ́ dɛ kó mufòmmu. 
\v 2 Míì dɑ wɑ̃̀ri di mpɑ́tíri, fɔ̃́ nTimɔntee n kóo dɑpɑ̀ɑ̀ n tɑ̃́ wè. Kuyie nti cicɛ nɛ̀ ti Yiɛ̀ nYesu Kirisi, bɛ̀ dɑ kuɔ́ mmɛsémmɛ̀ kɛ dɑ dɔɔ̀ mɛsɑ̀ɑ̀ nkɛ dɑ duɔ́ ndiwɛ̀ì!
\s1 Pɔɔri yɑ́úkùnkomɛ̀ Timɔntee kɔ̃̀ntì
\p
\v 3 N sɑ̃ntímu Kuyie kunku n yɛmbɛ̀ do tũ nkù, m pĩ́ nkùù tɔ̃mmú bɑ́ n yɛ̀mmɛ̀ í m bekùnɛ̀. N kù bɑ̀ɑ́mmu kɛyènkɛ̀ nɛ̀ kuyie nhɑ kpɛ́í. 
\v 4 Nh ɔ̃ɔ̃ dentɛnímu ti sòò yóó yɑtɛ dìì mɔ̀nnì kɑ̀ɑ kuɔ́ mmɛ̀ɛ̀ botí tinɔnniɛti, kɛ́ndɔ́ kɛ dɑ yɑ̀ kɛ̀ dɛ̀ n nɑrikɛ. 
\v 5 N yɛ̃́mu ɑ tɑ̃́mɛ̀ Kuyie mmɛsɑ̀ɑ̀, ɑ yɔ̃ kótì Doyiisi nɛ̀ ɑ yɔ̃ Enniisi bɛ̀ do kù tɑ̃́ mɛ̀ɛ̀ botí. 
\v 6 A bɑ́ɑ́ yɛ̃̀ n dɑ nɔ̀ɔ́ ndìì mɔ̀nnì sinɔu kɛ bɑ́ntɛ̀ Kuyie nkɛ̀ kù dɑ pɑ̃ dìì pɑ̃nnì kpɛ́í. 
\v 7 Muyɑɑ́nsɑ̀ɑ̀mù í ti bónkùnko, mù ti duɔ̀ mmuwɛ̃rímú mmu, kɛ te kɛ̀ ti dɔ́ titɔbɛ̀, kɛ nɔ nkɛ pĩĩ ntimɑ́ɑ̀.
\p
\v 8 Ifɛi bɑ́ ndɑ bonɛ̀ ɑ bo nɑ́kɛ́mɛ̀ ti Yiɛ̀ nYesu Kirisi kpɛ́í nnɛ̀ bɛ̀ n kpetímɛ̀ o kpɛ́í. N wɛ̃nnɛ́nɛ̀ kɛ́fɛ̃́ṹtɛ́ Tinɑ́ɑǹsɑ̀ɑ̀tì ɑ nɑ́ɑ́ ntì kpɛ́í nnɛ̀ Kuyie ndɑ duɔ́ mmùù wɛ̃rímú. 
\v 9 Kuù ti yu kɛ ti dɛɛtɛ́, dɛ̀ í tú kù yɛ̃ nti dɔɔ̀rìmɛ̀ mɛɛ̀ wenni, kuù mɛ̀ dɔ́ nɛ̀ dimɔ̀nnì kɛ mu nyí dɔ̀ɔ̀ kutenkù, kɛ mɛ̀ dɔ̀ɔ̀ nɛ̀ Yesu Kirisi kpɛ́í. 
\v 10 Bɑ̀mbɑ̀ nkɛ̀ ti yɑ̀ ku sɑ̀ɑ̀ nkù duɔnnímɛ̀ Yesu Kirisi kòò ti dɛɛtɛ́, kɛ nɑ mukṹṹ nkɛ mù dèè, kɛ ti nɑ̀kɛ́ Tinɑ́ɑǹsɑ̀ɑ̀tì kɛ̀ ti pɛ̀tɛ́ mufòmmu mùù bo sɑ̃́ɑ̃̀.
\p
\v 11 Kuyie nni ndɔ̀ɔ̀ ku kó ditɔ̃nnì kɛ̀ m bo nɑ́kɛ́ tiì nɑ́ɑǹsɑ̀ɑ̀tì bɛ̀ɛ̀ í tú Sifubɛ kɛ́ ti mbɛ̀ tié. 
\v 12 Tiì nɑ́ɑǹsɑ̀ɑ̀tì te kɛ̀ n fɛ̃́ũ̀rì bɑ́ ifɛi í m bo, n yɛ̃́ mɛ̀ɛ̀ kpɛ́í n tɑ̃́ wè, kɛ yɛ̃́ kɛ dò nhò bo m bɑɑ ò n duɔ́ ndɛ̀ kɛ́tuɔkɛnɛ̀ tibeéntì yiè. 
\v 13 A mpĩ́ nTinɑ́ɑǹsɑ̀ɑ̀tì n dɑ nɑ̀kɛ́ tì, kɛ dɔkɛ duɔ́ nhɑmɑ́ɑ̀ Kuyie, kɛ ndɔ́ bɛtɔbɛ̀ nɛ̀ muwɛ̃rímú ti mɔkɛ mù ti Yiɛ̀ nYesu kó mɛtɑummɛ̀ miɛkɛ.
\p
\v 14 Mpĩ́ mmɛsɑ̀ɑ̀ mMuyɑɑ́nsɑ̀ɑ̀mù mùù bo ti miɛkɛ mù dɑ duɔ́ ndɛ̀. 
\v 15 A yɛ̃́mu kɛ dò nhAsii kɔbɛ bɛ̀ɛ̀ do m bonɛ̀, Fisɛɛri nɛ̀ Edimɔsɛnni bɛ̀ n yóumu. 
\v 16 Kuyie ndɔɔ̀ mɛsɑ̀ɑ̀ Onnɛsifɔɔ cĩ́ɛ̃̀tɛ̀ kɔbɛ, kɛ yɛ̃́ bɛ̀ n kpetímɛ̀ bɑ́ ifɛi í ò bo, kòò kɔ̀rìní kɛ n dɔu nkɛ yɑ́úkùnko n kɔ̃̀ntì. 
\v 17 Ò tùɔ̀kɛní dìì mɔ̀nnì Odommu miɛkɛ kɛ́ n wɑmmú weti weti nwe kɛ́nɑ kɛ́ n yɑ̀. 
\v 18 Ti Yiɛ̀ nYesu ò kuɔ́ mmɛsémmɛ̀, kòo pɛ́tɛ́ mɛsɑ̀ɑ̀ nKuyie mbeéntì yiè. A yɛ̃́mu wè n teennɛ̀ mɛ̀ɛ̀ botí Efɛɛsi.
\c 2
\s1 Kirisi ɑ̃ɑ̃pɔ̀ntì sɑ̀ɑ̀wè wèè dɔ̀ɔ̀ri Kirisi dɔ́mɛ̀
\p
\v 1 Timɔntee n kóo dɑpɑ̀ɑ̀ n tɑ̃́ wè mɛsɑ̀ɑ̀, yetoo kɛ̀ ti Yiɛ̀ nYesu Kirisi dɑ duɔ́ mmùù wɛ̃rímú dɑ kpénkùnnɛ. 
\v 2 A kèè kɛ̀ n nɑ̀ɑ́ ntì bɛnìtìbɛ̀, tuo nti bɛtɔbɛ̀ bɛ̀ɛ̀ borimɛ wenni, bɛ̀ɛ̀ yóó nɑ kɛ ti tùo mbɛtɔbɛ̀.
\p
\v 3 N wɛ̃nnɛ́nɛ̀ kɛ̀ ti fɛ̃́ṹtɛ́ ɑ tú mɛ̀ɛ̀ kpɛ́í Yesu Kirisi kóo ɑ̃ɑ̃pɔ̀ntì sɑ̀ɑ̀wè. 
\v 4 Ohɑ̃ɑ̃pɔ̀ntì wèè dɔ̀ɔ̀ri wèè ò bɑkɛ́ ò dɔ́mɛ̀, ò ɔ̃ɔ̃ í ndɔɔri dɛtɛrɛ̀ mɑrɛ̀ kɛ̀ dɛ̀ í tú muhɑ̃ɑ̃pɔ̀ntɔ̃mmú. 
\v 5 Kòo nìtì mɛ ndɔ́ kɛ́cokɛ́ kɛ́diɛ́ nhò ɔ̃ ntũmmu muceé nkó ikuɔ́ kòo í ì tũ̀nnɛ ò bɑ́ɑ́ nɑ kɛ́niitɛ́ kɛ́pɛ́tɛ́ tiyeti. 
\v 6 Wèè kùútí mɛsɑ̀ɑ̀ nweè ɔ̃ ndò nkɛ́niitɛ́ kɛ́kɔ̃ṹ tidiitì. 
\v 7 Totí ɑ yɛ̀mmɛ̀ ti nnɑ́ɑǹtì ĩ́nkɛ̀, ti Yiɛ̀ nyóó dɑ teènnɛ̀mu kɑ̀ɑ tì bɑntɛ́ timɔu.
\p
\v 8 Á bɑ́ɑ́ yɛ̃̀ nYesu Kirisi wèè ku kɛ yɑ̃̀ńtɛ́ o kpɛ́í. Bɛ̀ pɛitɛ́ wè Dɑfiti kó kufuku miɛkɛ. Tinɑ́ɑǹsɑ̀ɑ̀tì n nɑ́ɑ́ ntì nɑ̀ɑ́ nweè kpɛ́í. 
\v 9 N nɑ́ɑ́ mmɛ̀ɛ̀ kpɛ́í nTinɑ́ɑǹsɑ̀ɑ̀tì dɛɛ̀ te kɛ̀ n fɛ̃́ũ̀rì, kɛ̀ bɛ̀ n kpetí kɛ dò n tú onitikɔ̀ùtì, bɛ̀ mɛ nyí yóó nɑ kɛ́pɑɑ nKuyie nnɑ́ɑǹtì. 
\v 10 Dɛɛ̀ te kɛ̀ m mi nkɛ fɛ̃́ũ̀rì Kuyie ntɑ̃ɑ̃tɛ́ bɛ̀ kpɛ́í, kɛ̀ Yesu Kirisi bo bɛ̀ dɛɛtɛ́ kɛ̀ bɛ̀ɛ nintɛ tikpetì tìì bo sɑ̃́ɑ̃̀. 
\v 11 Tinɑ́ɑǹtì tii ntú timɔ́mmɔnti nti:
\q1 Kɛ̀ ti wɛ̃nnɛ́nɛ̀ Yesu Kirisi kɛ ku,
\q1 ti bo ò wɛ̃nnɛ́nɛ̀ kɛ́nfòù.
\q1
\v 12 Kɛ̀ ti wɛ̃́ɛ̃̀rì koò tũ̀,
\q1 ti bo ò wɛ̃nnɛ́nɛ̀ o kpɑ̀tì miɛkɛ,
\q1 kɛ̀ ti mɛ nhò yetɛ
\q1 ò bo ti yetɛ múnkɛ.
\q1
\v 13 Kɛ̀ ti í dɔɔri Kuyie ndɔ́mɛ̀,
\q1 wenwe dɔɔrimu kù dɔ́mɛ̀.
\q1 Kɛ yɛ̃́ wè í yóó nɑmɛ̀ kɛ yóu ò dòmmɛ̀.
\s1 Otɔ̃ntì sɑ̀ɑ̀wè bo ndòmmɛ̀
\p
\v 14 Dentɛ bɛ ti nnɑ́ɑǹtì, kɛ́ tí mbɛ̀ nɑ̀kɛ́ weti weti Kuyie nyììkɛ̀ kɛ tú bɛ̀ɛ yóu tisĩ́ntɛ́nɛìtì, tì í dɔɔri mɛsɑ̀ɑ̀, tì pètìnkɛ buɔ̀mmu bɛ̀ɛ̀ tì kèḿmú. 
\v 15 Yetoo kɛ́ndò nhotɔ̃ntì sɑ̀ɑ̀wè Kuyie nyììkɛ̀, kɛ bɑ́ mmɔkɛ tìi bo dɑ pĩ́ nyifɛi ɑ tɔ̃mmú ĩ́nkɛ̀, kɑ̀ɑ nnɑ́ɑ́ ntinɑ́ɑǹsɑ̀ɑ̀tì dɛ̀ bèkúmɛ̀. 
\v 16 Nyennínɛ̀ tinɛìtì sɔ̃́ntíkɛ kpɛti tìì pìetinɛ̀ Kuyie nkó kucɛ, bɛ̀ɛ̀ dɔ́ dɛ kó tisĩ́ntɛ́nɛìtì tì bɛ̀ dɛ́tìnkonɛ̀ Kuyie nku. 
\v 17 Dɛ kó tinɛìtì dònnɛ̀ dimɔnsĩ̀nnì ndi kɛ dɔmmù, bɛ̀ɛ̀ tì mɔ̀kɛ bɛ kó bɛ̀mɑbɛ̀ tu: Imindee nɛ̀ Fidɛti. 
\v 18 Bɛ̀ yóu timɔ́mmɔnti nti kɛ dɛ́tinnɛ̀ bɛ̀mɑbɛ̀ Kuyie, kɛ bɛ̀ nɑ̀ɑ́ nkɛ tú Kuyie nduɔ́ nkɛ̀ bɛcíríbɛ̀ yɑ̃̀ńtɛ́ kɛ dèèmu. 
\v 19 Nɛ̀ mɛmmɛ Kuyie ndɔú nyɛ̀ɛ̀ pũkɛ kɛ̀ yɛ̀ fìíkú teii, kɛ̀ ku nɑ́ɑǹtì wɑ̃̀ri yɛ ĩ́nkɛ̀ kɛ tú: Ti Yiɛ̀ nKuyie nyɛ̃́mu ku kɔbɛ. Kɛ̀ titɛtì wɑ̃̀ri kɛ tú: Kɛ̀ wèè yĩ ò tú ti Yiɛ̀ nkou wèe yóu mɛyɛi.
\p
\v 20 Tɛcĩ́ɛ̃̀tɛ̀ diɛtɛ̀ miɛkɛ tinɛntì ɔ̃ mbomu tibotí tibotí: Mɛsɔɔ kpɛti nɛ̀ timɑ́tì pɛ́ítì kpɛti nɛ̀ tiyɑɑtì kpɛti nɛ̀ idɛí kpɛti. Kɛ̀ bɛ̀ pĩĩnnɛ̀ tìmɑtì mutɔ̃mmú yɛbɑɑ mmiɛkɛ, kɛ pĩĩnnɛ̀ titɛtì yɛwe yɛmɔu, kɛ kounɛ̀ titɛtì tiyontì. 
\v 21 Wèè yóu mɛyɛi n nɑ́ɑ́ mmɛ̀ɛ̀ kpɛ́í ndiɛ nhò bo ntú ti Yiɛ̀ nkou, kɛ́ntú kunɛnkù sɑ̀ɑ̀kù bɛ̀ pĩĩnnɛ̀ kù mutɔ̃mmú sɑ̀ɑ̀mù. 
\v 22 Pĩ́ nhɑmɑ́ɑ̀ kɛ̀ tidɑpɑ̀ntì bɑ́ɑ́ dɑ tɑnnɛ́ mɛyɛi mmiɛkɛ, kɛ́mbɛtì timɔ́mmɔnti, kɛ́nyetíroo kɛ tɑ̃́ Kuyie, kɛ́nwɑɑ̀ mmɛdɔ́kùmɛ̀, kɛ́mbɛtì diwɛ̀ì, kɛ́nwɛ̃nnɛ̀ bɛ̀ɛ̀ tũ̀ nKuyie nnɛ̀ bɛ yɛ̀mmɛ̀ mɛmɔu. 
\v 23 Bɑ́ nyíé ntiyɛinnɛìtì dɛtetìrɛ̀ kpɛti, tì ce nyɛkpɑ̀rɛ̀ nyɛ. 
\v 24 Kuyie nkóo tɔ̃ntì í dò nkɛ́ndɔ́ yɛkpɑ̀rɛ̀, ò dò nkɛ́ndɔ́ bɛnìtìbɛ̀ bɛmɔu ndi, kɛ́nnɔ nkɛ bɛ̀ tiè, kɛ́nnɔ nkɛ mi. 
\v 25 Kɛ tiè mbɛ̀ɛ̀ í dɔ́ o nɑ́ɑǹtì mɛyɔɔ̀mmɛ̀, kɛ̀ dɛ̀ yɛ̀mmɛ̀ Kuyie mbo bɛ̀ teennɛ̀ kɛ̀ bɛ̀ɛ bɑntɛ́ timɔ́mmɔnti kɛ́ceetɛ kɛ̀ bɛ borimɛɛ wenkɛ. 
\v 26 Kɛ̀ bɛ̀ɛ yɛ̀ dibɔɔ̀ dìì do bɛ̀ pĩ ndi nɔ̀ùtɛ̀ miɛkɛ, kɛ́nɑɑ́ mbɛsɑ̀ɑ̀bɛ̀ kɛ́ndɔɔri Kuyie ndɔ́mɛ̀.
\c 3
\s1 Bɛnìtìbɛ̀ yó ndòmmɛ̀ yɛwe sɔnyɛ
\p
\v 1 Timɔntee, ɑ́ nyɛ̃́ kɛ dò ndɛ̀ yóó yonkɛmu yɛwe sɔnyɛ miɛkɛ. 
\v 2 Kɛ̀ bɛnìtìbɛ̀ɛ nɑɑ́ nsinɔutɛ̃ĩ yɛmbɛ̀, kɛ́duɔ́ mbɛ yɛ̀mmɛ̀ idíítí, kɛ́nhɑ̃ yɛpɔ̀rɛ̀, kɛ́mmɔkɛ sifeí, kɛ́nsɑ̃́ɑ̃́ nKuyie. Kɛ í sɑ̃ntí bɛ̀ bɛ̀ pɑ̃ɑ̃ ndɛ̀ kpɛ́í, kɛ sènku dɛ̀ɛ̀ tu Kuyie nkpɛrɛ. 
\v 3 Kɛ̀ bɛ toò kpenkɛ, kɛ̀ bɛ̀ nkpɑ mɛsémmɛ̀, kɛ nɑ́ɑntɛ bɛtɔbɛ̀ kpɛ́í, kɛ mɔkɛ kɛmiɛyonkɛ, kɛ yóù, kɛ níí mbɛnìtìbɛ̀ bɛ̀ɛ̀ dɔ̀ɔ̀ri dɛ̀ɛ̀ wenni. 
\v 4 Bɛ̀ bo nfiiti bɛtɔbɛ̀, kɛ mɔkɛ kɛmiɛkɛ nɛ̀ sifeí, kɛ dɔɔri bɛ yɛ̀mmɛ̀ dɔ́mɛ̀ kɛ í dɔ́ Kuyie, 
\v 5 kɛ́ndɔɔri kɛ dò mbɛ̀ tũ̀ nKuyie nkó kucɛ kɛ nɛ́ yetírí dɛ̀ɛ̀ tu bɛ̀ɛ̀ tɑ̃́ bɛ kó muwɛ̃rímú, ɑ́ yɑtɛnɛ̀ ɑmɑ́ɑ̀ dɛ kó bɛnìtìbɛ̀. 
\v 6 Bɛɛ̀ kó bɛ̀mɑbɛ̀ tɑɑ̀ bɛnitipòbɛ̀ bɛ̀ɛ̀ mu nyí kpenkɛ Kuyie nkó kucɛ bɛ cɛ̃́ĩ. Dɛ kó bɛnitipòbɛ̀ mɔ̀kɛ mɛyɛi mmɛ pɛ́u kɛ í nɔ nkɛ pĩĩ mbɛmɑ́ɑ̀, 
\v 7 kɛ tú bɛ̀ wɑnti timɔ́mmɔnti bɛ̀ mɛ nyí nɑ kɛ tì bɑntɛ́. 
\v 8 Bɛ̀ɛ̀ mɛ ntɑɑ̀ bɛnitipòbɛ̀ cɛ̃́ĩ bɛ̀ yetɛ timɔ́mmɔnti nti, kɛ dònnɛ̀ Esibiti kó bɛnitinɔ̀mbɛ̀ Sɑnnɛsi nɛ̀ Sɑ̃mbɛɛsi \f + \fr 3:8 \fr*\fk Sɑnnɛsi nɛ̀ Sɑ̃mbɛɛsi: \fk*\ft Dɛ kó bɛnitinɔ̀mbɛ̀ bɛ̀ nɑ̀ɑ́ mbɛ̀ɛ̀ kpɛ́í Mudennimù 7:11-22 bɛ̀ mɛ nyí kɛ̀ wɑ̃̀ri bɛ yètɛ̀.\ft*\f* bɛ̀ do yetɛmɛ̀ Mɔyiisi kpɛti, kɛ̀ bɛ yɛ̀mmɛ̀ɛ sĩntɛ kɛ̀ bɛ̀ɛ bútínnɛ́ Kuyie nkó kucɛ. 
\v 9 Bɛ dɔɔ̀rìmɛ̀ mɛ nyí yó nhɑ̃ kɛ sɔri, mɛ̀ yóó feitɛ́mu kɛ́ndònnɛ̀ dɛ kó bɛnitinɔ̀mbɛ̀ kɔ̃mɛ do feitɛ́mɛ̀.
\s1 Pɔɔri nɑ̀kɛ́mɛ̀ Timɔntee ò dò nkɛ́ndòmmɛ̀
\p
\v 10 Fɔ̃́ nTimɔntee, ɑ kèèmu n tié, kɛ yɑ̀ m borimɛ dòmmɛ̀ kɛ yĩ̀ɛ̃́tɛ́ m bɛtì mù kɛ yɑ̀ n tɑ̃́ mɛ̀ɛ̀ botí Kuyie nnɛ̀ m minnímɛ̀ nɛ̀ n dɔ́ mɛ̀ɛ̀ botí Kuyie nnɛ̀ bɛnìtìbɛ̀, nɛ̀ n fííkúmɛ̀ Kuyie nkó kucɛ miɛkɛ. 
\v 11 A yɛ̃́mu bɛ̀ n fɛ̃́ũ mmɛ̀ɛ̀ botí nɛ̀ nh ɑ̀kɛ́ mɛ̀ɛ̀ botí. A yɛ̃́mu tìì n tùɔ̀kɛní Ãntiyɔsi nɛ̀ Ikɔnni nɛ̀ Disiri. N yɑ̀mu mɛfɛ̃́ṹtímɛ̀ mɛmɔu botí kɛ̀ Kuyie mmɛ nni dɛɛtɛ́. 
\v 12 Bɛ̀ɛ̀ dɔ́ kɛ́ndɔɔri Kuyie ndɔ́mɛ̀ kɛ tũ nYesu Kirisi bɛ̀ yóó bɛ̀ fɛ̃́ũmmu. 
\v 13 Kɛ̀ bɛnitiyonkubɛ biɛ nɛ̀ iyɑ́ɑ̀bìsítié nyɛmbɛ̀ bɛ̀ yó nsɔkɛ́mu kɛ tɑti mɛyɛi mmiɛkɛ, kɛ fétìnko bɛnìtìbɛ̀ nɛ̀ bɛmɔ́mmɔmbɛ. 
\v 14 Fɔ̃́ nni mpĩ́ mbɛ̀ dɑ tié ntì kɑ̀ɑ ti yie nnɛ̀ ɑ yɛ̀mmɛ̀ mɛmɔu, ɑ yɛ̃́mu wèè tì ndɑ tié. 
\v 15 A yɛ̃́mu Kuyie nnɑ́ɑǹtì nɛ̀ ɑ bɛmmɛ̀, tiì dɑ duɔ́ mmɛciì nkɑ̀ɑ yie nYesu kòò dɑ dɛɛtɛ́. 
\v 16 Kuyie nkuù niitɛ́ bɛ̀ɛ̀ wɑ̃̀ri ku nɑ́ɑǹtì, kɛ̀ bɛ̀ tì wɑ̃̀ri kɛ̀ tì wenni, kɛ ti bɛnkú timɔ́mmɔnti nɛ̀ ti yɛi nnɛ̀ ti yetímɛ̀ nɛ̀ ti bo mbo mɛ̀ɛ̀ botí kɛ dɔɔri Kuyie ndɔ́mɛ̀. 
\v 17 Kù mɛ̀ dɔ̀ɔ̀ kɛ̀ dɛ̀ bo yie nkɛ̀ ku kóo nìtì weè tũntɛ omɑ́ɑ̀ mɛsɑ̀ɑ̀ nkɛ́pĩ́ mmutɔ̃mmú sɑ̀ɑ̀mù.
\c 4
\p
\v 1 N dɑ nɑ́ɑ́mmu nɛ̀ Kuyie nkó diyètìrì nɛ̀ Yesu Kirisi kpɛri, wenwe wèè wɛ̃tiní kɛ bo bɑɑtɛ́ kutenkù kɛ́bekɛ́nɛ̀ bɛfòùbɛ̀ nɛ̀ bɛcíríbɛ̀ kɛ̀ n tú: 
\v 2 A yetoo kɛ́nnɑ́ɑ́ Kuyie nnɑ́ɑǹtì sɑ̃́ɑ̃̀, kɛ̀ yɛmɔ̀rɛ̀ wenni yoo yɛ̀ sĩ̀. Kɛ̀ wèè yetɛ́ ɑ ò tié nkòo bɑntɛ́ o yetímɛ̀, kɛ̀ wèè dò nhɑ ò kpɑnnɛ̀ ɑ ò kpɑnnɛ̀, kɛ̀ dɛ̀ dò nhɑ yɑ́úkùnnɛ wèè kɔ̃̀ntì, ɑ́ tì yɑ́úkùnnɛ, ɑ́ mmi nkɛ́ mbɛ̀ tiè nnɛ̀ mɛyɛ̀mmɛ̀ mɛmɑ́ɑ̀. 
\v 3 Yɛmɔ̀rɛ̀ kpɑɑnímu kɛ̀ bɛnìtìbɛ̀ yóó yetɛ itié nsɑ̀ɑ̀yì, kɛ́wɑmmú bɛ̀ɛ̀ bo mbɛ̀ ni kɛ bɛ̀ nɑ̀ɑ́ mbɛ̀ dɔ́ tì. 
\v 4 Kɛ̀ bɛ̀ɛ bútínnɛ́ Kuyie nnɑ́ɑǹtì kɛ́ntũnnɛ iyɑ́ɑ̀bìsítié. 
\v 5 A nnɔ nkɛ pĩĩ nhɑmɑ́ɑ̀, kɛ́mmɔkɛ mɛminnímɛ̀ mɛfɛ̃́ṹtímɛ̀ miɛkɛ kɛ́nnɑ́ɑ́ nTinɑ́ɑǹsɑ̀ɑ̀tì kɛ pĩ́ nhɑ tɔ̃mmú weti weti.
\p
\v 6 N dɑ nɑ́ɑ́ mmiɛ nkɛ yɛ̃́ n duɔ́mmɛ̀mu n fòmmu kɛ yóó kú. N kṹṹ mmɔ̀nnì diì tùɔ̀kɛ. 
\v 7 M mɑ̀mu dɛ̀ bèkúmɛ̀, kɛ tɑ̃́ Kuyie nkɛ tùɔ̀kɛ kumɑ̀nku. 
\v 8 Kɛ bɑɑ ticuuti obeéntì sɑ̀ɑ̀wè yó n duɔ́ ntì tibeéntì yiè, wè í yóó tì duɔ́ mmíì mmɑ́ɑ̀. Ò yóó tì duɔ́ mbɛ̀ɛ̀ kó dimɑ̀ɑ̀ ò bɑ̀ɑ bɛ̀mbɛ nɛ̀ diwɛ̀ì ò yóó wɛ̃tɛní dìì yiè.
\s1 Pɔɔri do yɛ̃ Timɔntee bɑ́ɑ́ yɛ̃̀ ndɛ̀
\p
\v 9 Yetoo kɛ́kɔtɛní mɛcɑ̃ɑ̃ nkɛ́ n yɑ̀. 
\v 10 Demɑɑsi dɔ́ kutenkù kuù nkpɛrɛ ndɛ kɛ n yóu kɛ kɔ̀tɛ Tɛsɑdoniki, kɛ̀ Kɛresɑ̃ɑ̃ kɔ̀tɛ Kɑdɑsii, kɛ̀ Titi kɔ̀tɛ Dɑdimɑsii. 
\v 11 Duku weè mɑ́ɑ̀ kpɑɑ́ kɛ m bonɛ̀. Kɑ̀ɑ kɔ̀riní ɑ nnɛinní Mɑriki kòo n teennɛ̀ mutɔ̃mmú. 
\v 12 Tisiki yie nh ò tɔ̃ nhEfɛɛsi nwe. 
\v 13 Kɑ̀ɑ kɔ̀riní ɑ n tɔní n yɑɑ̀bòrì n yóu dì Todowɑɑsi, Kɑpuusi cĩ́ɛ̃̀tɛ̀, kɛ́ntɔnní m pɑ́tɛ, ɑ bɑ́ɑ́ yɛ̃̀ nhɑ bo n tɔnnímɛ̀ Kuyie nnɑ́ɑǹtì kpɛyɛ.
\p
\v 14 Adɛkisɑ̃ntiri omɑ́ɑ́tì n dɔ̀ɔ̀ mɛyɛi mmɛdiɛ̀, ti Yiɛ̀ nyóó mɛ̀ nhò yietímu. 
\v 15 Á nyɛ̃́ o kpɛ́í, ò cɑ̀ɑ̀rimu ti nɑ́ɑ́ ntìì kó dimɑ̀ɑ̀.
\p
\v 16 Bɛ̀ do m bekùnɛ̀ dìì mɔ̀nnì mɛketimɛ̀ kɛ̀ bɛ̀ n yóumu bɛmɔu, Kuyie mbɑ́ɑ́ bɛ̀ yietí bɛ cɑɑ̀rìmɛ̀. 
\v 17 Kɛ̀ Kuyie mmɛ nní nni mbonɛ̀, kɛ́ n dɛɛtɛ́nɛ̀ yɛcìrícìrɛ̀, kɛ́ n duɔ́ mmuwɛ̃rímú kɛ̀ n nɑ̀kɛ́ Tinɑ́ɑǹsɑ̀ɑ̀tì bɛ̀ɛ̀ í tú Sifubɛ. 
\v 18 Ti Yiɛ̀ mbo nni ndɛɛrí nɛ̀ mɛyɛi mmɛmɔu, kɛ́ n tɑnnɛ́ o kpɑ̀ɑ̀tìyuu, o yètìrì ndɛu sɑ̃́ɑ̃̀. Kɛ̀ dɛ̀ mmɛ ndò.
\s1 Mucɑummu
\p
\v 19 A dɔu Pirisiidi nɛ̀ o dɔù Akidɑɑsi nɛ̀ Onnɛsifɔɔ cĩ́ɛ̃̀tɛ̀ kɔbɛ. 
\v 20 Edɑsiti kpɑɑ́ Kɔdɛnti nwe, kɛ̀ Todofimmu mɔ nkɛ̀ nh ò yóu Midɛti. 
\v 21 Yetoo kɛ́kɔtɛní kɛ̀ diyɔ̃ɔ̃̀ kpɑɑní.
\p Ebuduusi nɛ̀ Pitɑ̃ɑ̃ nɛ̀ Dinuusi Kododiyɑ nɛ̀ ti kɔbɛ tɔbɛ̀ bɛ̀ dɑ dɔunko.
\p
\v 22 Ti Yiɛ̀ nni ndɑ bonɛ̀!
\p Kuyie nkó mɛsɑ̀ɑ̀ nní ndɑ bonɛ̀.