\id 2TH di54.all F{evrier 1999 BJ Parakou B{enin
\ide UTF-8
\h 2 Tɛsɑdoniki
\toc1 Pɔɔri wɑ̃̀ri dìì pɑ́tíri dɛ́rì Kirisi kɔbɛ bɛ̀ɛ̀ bo Tɛsɑdoniki
\toc2 2 Tɛsɑdoniki
\mt1 Pɔɔri wɑ̃̀ri dìì pɑ́tíri dɛ́rì Kirisi kɔbɛ bɛ̀ɛ̀ bo Tɛsɑdoniki
\imt1 Di mpɑ́tíri tɔ tìì nɑ́ɑǹtì
\ip Pɔɔri do wɑ̃̀ri o pɑ́tíri ketirì Tɛsɑdoniki kɔbɛ, kɛ̀ dɛ̀ í mmɔ̀ntɛ kòo bɛ̀ wɑ̃̀ri didɛ́rì, kɛ́wɛ̃tɛ kɛ́ bɛ̀ dèntɛ Yesu kó muwɛ̃timù kó tinɑ́ɑǹtì, kɛ yɛ̃́ Yesu kó muwɛ̃timù kó tinɑ́ɑǹtì do tɔnímɛ̀ dikɔnkɔɔ̀nnì Kirisi kɔbɛ cuokɛ̀. Kɛ̀ bɛ̀mɑbɛ̀ bɛ miɛkɛ ntú: Kirisi wɛ̃tɛnímu kɛ dèè, kɛ̀ bɛ̀mɑbɛ̀ yetɛ mutɔ̃mmú kɛ tú Kirisi wɛ̃timù duunní kɛ kotìri bɛtɔbɛ̀. Dɛɛ̀ do te kɛ̀ Pɔɔri bɛ̀ wɑ̃̀ri dipɑ́tíri, kɛ bo tũntɛ iyɛntotí yɛiyi ìì tɑnní bɛ cuokɛ̀ kɛ bɛ̀ kɔɔ́nnɛ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Mudɔummu nɛ̀ ò yɑ̀úkùnnɛmɛ̀ bɛ kɔ̃̀ntì 1
\io1 2. Ò nɑ̀kɛ́mɛ̀ osoùntì kpɛ́í nnɛ̀ Yesu wɛ̃timù kpɛ́í 2:1-12
\io1 3. Ti bo ndɛ́úkùnkomɛ̀ Kuyie nyètìrì nɛ̀ ti dɔɔ̀rìmɛ̀ miɛkɛ 2:13-3:15
\io1 4 Pɔɔri bɛ̀ pɑ̃mɛ̀ Kuyie nkó mɛsɑ̀ɑ̀ nnɛ̀ Yesu kó diyètìrì nɛ̀ mudɔummu sɔmmu 3:16-18
\c 1
\s1 Pɔɔri dɔummɛ̀ Tɛsɑdoniki kɔbɛ
\p
\v 1 Mí mPɔɔri nɛ̀ Sidifɛ̃ɛ̃ nɛ̀ Timɔntee, tíì di wɑ̃̀ri di mpɑ́tíri díndi Kirisi kɔbɛ bɛ̀ɛ̀ bo Tɛsɑdoniki, ti cicɛ Kuyie nnɛ̀ ti Yiɛ̀ nYesu Odɛɛtíwè kɔbɛ. 
\v 2 Ti cicɛ Kuyie nnɛ̀ ti Yiɛ̀ nYesu Kirisi bɛ̀ di dɔɔ̀ mmɛsɑ̀ɑ̀ kɛ́ di duɔ́ ndiwɛ̀ì.
\s1 Kirisi wɛ̃tinímɛ̀ kɛ bo bekɛ́nɛ̀ bɛnìtìbɛ̀
\p
\v 3 N kɔbɛ ti sɑ̃ntímu Kuyie ndi kpɛ́í nsɑ̃́ɑ̃̀, kɛ yɛ̃́ di kótírímɛ̀ ku kó kucɛ miɛkɛ kɛ dɔ́ ditɔbɛ̀ kɛ̀ dɛ̀ dɛ̀úkú sɑ̃́ɑ̃̀. 
\v 4 Dɛɛ̀ te kɛ̀ dɛ̀ ti nɑɑti, kɛ̀ ti nɑ́ɑntɛ di kpɛ́í Kirisi kɔbɛ tĩ̀rɛ̀ yɛmɔu, di tɑ̃́mɛ̀ kɛ mi nkɛ tɑ̃rì mɛfɛ̃́ṹtímɛ̀ nɛ̀ mɛhɑ́ɑ́rìmɛ̀ miɛkɛ.
\p
\v 5 Kuyie ntu kùù bekù kùnku weti weti, kɛ yóó di tɑnnɛ̀ ku kpɑ̀ɑ̀tìyuu miɛkɛ di fɛ̃́ũ̀rì dìì kpɛ́í, 
\v 6 kɛ́fɛ̃́ũ mbɛ̀ɛ̀ di fɛ̃́ũnko. 
\v 7 Mɔ́mmuɔ nwe kù yóó ti om̀pùnnɛmɛ̀, Yesu bo cútɛ́ní dìì yiè kɛĩ́nkɛ̀ kɛ́nnɛínɛ̀ Kuyie ntɔ̃rɛ̀ diɛyɛ̀, 
\v 8 kɛ bo fɛhɑ̃ɑ̃dɛɛ̀nfɛ̀ miɛkɛ kɛ́kpetínnɛ́ bɛ̀ɛ̀ yetɛ Kuyie nkɛ yetɛ Tinɑ́ɑǹsɑ̀ɑ̀tì. 
\v 9 Kɛ̀ bɛ kó tiyɛ̃ĩti bɛ̀ mɑ̀nnɛ̀ tì ntú bɛ̀ bo yɑtɛnɛ̀mɛ̀ sɑ̃́ɑ̃̀ kɛ dɛ́tɛ́nɛ̀ Kuyie mborɛ̀ nɛ̀ ku wɛ̃rímú nɛ̀ ku kpetì diɛtì. 
\v 10 Ò bo wɛ̃tɛní dìì yiè di yóó wɛ̃nnɛ́nɛ̀mu o kɔbɛ bɛmɔu kɛ́ nhò sɑ̃ntí koò dɛ̀úkùnko, kɛ yɛ̃́ di yiemmɛ̀ Tinɑ́ɑǹsɑ̀ɑ̀tì ti di nɑ̀kɛ́ tì.
\p
\v 11 Dɛɛ̀ kpɛ́í nte kɛ̀ ti bɑ́ɑ́ nKuyie nsɑ̃́ɑ̃̀ di kpɛ́í, kɛ tú kù di tũntɛ kɛ̀ di mɑɑtɛnɛ̀ mufòmmu pɑ̀mmù kù di yu mùù kpɛ́í kɛ́nɑ kɛ́dɔɔ̀ mɛsɑ̀ɑ̀ nkɛ pĩ́ mmutɔ̃mmú di dɔ́ kɛ́pĩ́ mmù di tɑ̃́ mɛ̀ɛ̀ kpɛ́í nKuyie. 
\v 12 Mɛmmɛ di bo dɛ́úkùnnɛmɛ̀ ti Yiɛ̀ nYesu yètìrì, kòo múnkɛɛ dɛ́úkùnnɛ di kpɛyɛ, Kuyie nnɛ̀ Yesu bɛɛ̀ kó mɛsɑ̀ɑ̀ nyó nte kɛ̀ dɛ̀ɛ dɔɔ̀.
\c 2
\s1 Dɛ̀ɛ̀ yóó dɔɔ̀ kɛ̀ Kirisi nɛ́ nɑ kɛ́wɛ̃tɛní
\p
\v 1 Ti kɔbɛ di bɑɑmu ti Yiɛ̀ mbo wɛ̃tɛnímɛ̀ kɛ̀ tí tíí nho borɛ̀, di kɔ̃̀ntì ńyɑu di bɑɑ dɛ̀ kpɛ́í, 
\v 2 kɛ̀ bɛnìtìbɛ̀ nɑ̀ɑ́ nkɛ tú ti Yiɛ̀ nduunní yoo ò tùɔ̀kɛní yoo bɛ̀ dɔ̀ tíì tì wɑ̃̀ri dipɑ́tíri mɑrì miɛkɛ, di bɑ́ɑ́ yie nkɛ̀ dɛ kó tinɑ́ɑǹtì di kɔkɛ́nɛ̀. 
\v 3 Di bɑ́ɑ́ yie nkòò mɔù di soutɛ́. Ti Yiɛ̀ mbo nyóó wɛ̃tɛní kɛ̀ bɛnìtìbɛ̀ bɛɛ̀ yetɛ Kuyie nkpɛti kòo yɛiwe wèè feti kòo yɛ̀nní 
\v 4 kɛ́pɑɑ nKuyie mbɑ́ɑ́mmu nɛ̀ mubɔɔféù, kɛ́tɑ kɛ́kɑri Kuyie ncĩ́ɛ̃̀tɛ̀ kɛ dɔ̀ weè tu Kuyie.
\p
\v 5 Di í kpɑɑ́ yɛ̃́ n sòò di nɑ̀kɛ́mɛ̀ m bo dìì mɔ̀nnì di ciɛɑ̀? 
\v 6 Di yɛ̃́mu mùù ò dìítí kòò í kɔ̀tɛní, kɛ̀ dɛ mɔ̀nnì tùɔ̀kɛ ò bo kɔtɛní. 
\v 7 Oyɛiwe bomu bɑ̀mbɑ̀ mmiɛ, kɛ pĩ́ nho tɔ̃mmú disɔ̀rì nɛ̀ mɛciì nkɛ bo feitɛ́ní dɛ̀ɛ̀ ò dìítí dɛ̀ bo ítɛ́ dìì mɔ̀nnì. 
\v 8 Oyɛiwe yóó yɛ̀nnímu, kɛ̀ ti Yiɛ̀ nYesu nwɛ̃tiní nɛ̀ tikpetì kóò kùɔ, kóò nɑ̀ntɛ. 
\v 9 Obɔɔkpɑ̀ɑ̀tì weè yóó duɔ́ nhoyɛiwe muwɛ̃rímú, kòo ndɔɔri tidiɛtì pɛ́u nɛ̀ dɛ̀mɑrɛ̀ cɑ̀nnɛ̀, 
\v 10 kɛ́soutɛ́ bɛ̀ɛ̀ feti kɛ í yie nkɛ bo tũnnɛ timɔ́mmɔnti kɛ̀ Kuyie mbɛ̀ dɛɛtɛ́. 
\v 11 Dɛɛ̀ te kɛ̀ Kuyie nyóu kɛ̀ bɛ̀ yie nsiyɑ́ɑ̀bìsí. 
\v 12 Kù yóó kpetinɛ́mu bɛ̀ɛ̀ í yie ntimɔ́mmɔnti, kɛ dɔ́ siyɑ́ɑ̀bìsí kɛ sì tũ̀.
\s1 Kuyie nti tɑ̃ɑ̃tɛ́mɛ̀ kɛ bo ti dɛɛtɛ́
\p
\v 13 Ti dò nkɛ́sɑ̃ntímu Kuyie nsɑ̃́ɑ̃̀, kùù di dɔ́ kɛ di tɑ̃ɑ̃tɛ́, kɛ̀ di tú bɛketibɛ̀ bɛ̀ɛ̀ cootɛ́, kɛ̀ Muyɑɑ́nsɑ̀ɑ̀mù di cɑ̃̀ńnɛ́ kɛ̀ di tú Kuyie nkɔbɛ di yie mmɛ̀ɛ̀ kpɛ́í ntimɔ́mmɔnti. 
\v 14 Nɛ̀ Tinɑ́ɑǹsɑ̀ɑ̀tì ti di nɑ̀kɛ́ tìnti Kuyie ndi yumɛ̀ kɛ̀ di bo mmɔkɛ tikpetì ti Yiɛ̀ nYesu mɔkɛ tì. 
\v 15 Ti kɔbɛ nfííkúnɛ̀ Kuyie nkó kucɛ miɛkɛ, kɛ mpĩ́ nyitié ti di nɑ̀kɛ́ ì nɛ̀ ti di wɑ̃̀ri ì.
\p
\v 16 Ti Yiɛ̀ nYesu Kirisi mɔ́mmuɔ nɛ̀ ti cicɛ Kuyie nkùù ti dɔ́ kɛ ti dɔɔ̀ mɛsɑ̀ɑ̀ nkɛ yɑ́úkùnko ti kɔ̃̀ntì sɑ̃́ɑ̃̀, kɛ ti teénnɛ̀ kɛ ti bɑɑ mɛsɑ̀ɑ̀ nkù yɛ̃ nkù yóó ti dɔɔ̀mɛ̀, 
\v 17 bɛ̀ɛ di kpénkùnnɛ, kɛ́ di duɔ́ mmuwɛ̃rímú, kɛ̀ di borimɛ nɛ̀ di nɑ́ɑǹtì kɛ̀ dɛ̀ nwenni.
\c 3
\s1 Pɔɔri bekɛmɛ̀ mubɑ́ɑmmu
\p
\v 1 Ti kɔbɛ mbɑ́ɑ́nnɛ̀ Kuyie nti kpɛ́í nkɛ̀ tí nɑ kɛ́nsɔkɛ́ kɛ pitírí ti Yiɛ̀ nkó tinɑ́ɑǹtì, kɛ̀ bɛ̀ ntì yìé ndi ti yie mmɛ̀ɛ̀ botí, 
\v 2 kɛ́ nkù bɑ̀ɑ́ kɛ̀ kù nti dɛɛrínɛ̀ bɛnitiyɛibɛ nɛ̀ bɛnitidɔnnibɛ̀. Di yɛ̃́mu kɛ tú bɛnìtìbɛ̀ bɛmɔu bɛɛ̀ í tɑ̃́ Kuyie.
\p
\v 3 Kuyie nyí soú, kù yóó ti duɔ́mu muwɛ̃rímú kɛ́ nti bɑɑ osoùntì. 
\v 4 Ti Yiɛ̀ nKuyie nti teénnɛ̀mu, kɛ ti yɛ̃́ weti weti di dɔɔrimɛ̀ ti di nɑ̀kɛ́ tì, kɛ̀ yó nsɔkɛ́ kɛ tì dɔ̀ɔ̀ri.
\p
\v 5 Ti Yiɛ̀ nKuyie ndi teennɛ̀ kɛ̀ dí mmɔkɛ ku kó mɛdɔ́kùmɛ̀, kɛ mɔkɛ Kirisi kó mɛminnímɛ̀.
\s1 Ti dòmmɛ̀ kɛ́mpĩ́ mmutɔ̃mmú
\p
\v 6 Ti kɔbɛ di bɑ́ ntɔkunɛ̀ bɛ̀ɛ̀ kó dimɑ̀ɑ̀ mɔ̀kɛ mɛtɔ̃nnɛ́deciì nkɛ í tũ nyitié ti di duɔ́ nyì. 
\v 7 Ti í tú bɛtɔ̃nnɛ́díébɛ̀, di yɛ̃́mu ti do bo di ciɛ kɛ dòmmɛ̀, mmɛ ntũnnɛ. 
\v 8 Òmɔù do í ti piú, ti do pĩ́ mmutɔ̃mmú mmu kɛyènkɛ̀ nnɛ̀ kuyie kɛ yonnɛ̀, ti do í tú òmɔù kó ditɔu. 
\v 9 Dɛ̀ í tú ti do í dò ndi nti tɔ, ti do dɔ́ kɛ́ di bɛnkɛ di dò nkɛ́ndòmmɛ̀ mmɛ. 
\v 10 Ti do bo dìì mɔ̀nnì di ciɛ kɛ́ di nɑ́kɛ́mu kɛ dɔ̀: Kɛ̀ wèè í dɔ́ mutɔ̃mmú ò bɑ́ nyo.
\p
\v 11 Ti nɑ́ɑ́ mɛmmɛ kɛ yɛ̃́ ti kèèmɛ̀ kɛ̀ bɛ̀mɑbɛ̀ di miɛkɛ í dɔ́ mutɔ̃mmú, kɛ tɑɑ̀ tìì í tú bɛ kpɛti ti miɛkɛ. 
\v 12 Dɛ kó bɛnìtìbɛ̀ ti bɛ̀ nɑ̀ɑ́mmu nɛ̀ ti Yiɛ̀ nYesu Kirisi kó diyètìrì kɛ tú bɛ̀ɛ pĩ́ mmutɔ̃mmú kɛ́pɛ́tɛ́ kɛ́di.
\p
\v 13 Díndi ti kɔbɛ, di bɑ́ɑ́ yóu di bo ndɔɔrimɛ̀ mɛsɑ̀ɑ̀. 
\v 14 Kòò mɔù yetɛ i ntié ndi nɑ̀kɛ́ o kpɛ́í kóò yɑ̀tɛnɛ̀, kɛ ifɛii ò pĩ. 
\v 15 Di nɛ́ bɑ́ nhò wùó ndi kpɑntídɛ̀ntɔù, di ò tié nhonìtì ɔ̃ɔ̃ tiémmɛ̀ o kou.
\s1 Pɔɔri mɔɔmɛ̀ Kuyie nkó mɛsɑ̀ɑ̀ nTɛsɑdoniki kɔbɛ kpɛ́í
\p
\v 16 Ti Yiɛ̀ nKuyie nkùù duɔ̀ ndiwɛ̀ì kù ndì ndi duɔ̀ nyɛmɔ̀rɛ̀ yɛmɔu mɛborimɛ mɛmɔu miɛkɛ. Ti Yiɛ̀ nKuyie ni ndi bonɛ̀.
\p
\v 17 Mí mPɔɔri, míì di wɑ̃̀ri mu ndɔumu nɛ̀ n nɔ̀ùtɛ̀. Ntɛ nh ɔ̃ɔ̃ wɑ̃ri mpɑ́tíri kɛ́ dì cɑ̀nnɛmɛ̀.
\p
\v 18 Ti Yiɛ̀ nYesu Kirisi kó mɛsɑ̀ɑ̀ nní ndi bonɛ̀ dimɔu.