\id 2SA di10.all Novembre 1998 BJ Parakou B{enin
\ide UTF-8
\h 2 Sammuyɛɛri
\toc1 Sɑmmuyɛɛri pɑ́tíri didɛ́rì
\toc2 2 SAMMUYƐƐRI
\mt1 Sɑmmuyɛɛri pɑ́tíri didɛ́rì
\imt1 Di mpɑ́tíri tɔ tìì nɑ́ɑǹtì
\ip Bɛ̀ yu dɛ kó dipɑ́tíri kɛ tú Sɑmmuyɛɛri pɑ́tíri dɛ́rì ndi, kɛ yɛ̃́ yɛ nɑ́ɑǹtì tũ̀mmɛ̀ titɔbɛ̀ mbɛ nɛ̀ diketirì kpɛti, kɛ nɑ́ɑ́ nDɑfiti do tɔmɛ̀ tikpɑ̀tì. Ò do túmɛ̀ Sudɑɑ kɔbɛ kóo kpɑ̀ɑ̀tì. Dɛ kó difɔ̃nkúò kɛ́bɑɑtɛ́ Isidɑyɛɛribɛ bɛmɔu bɛ wuɔ ntɛpíítɛ̀ nɛ̀ ìdɛ́ì.
\ip Sɑmmuyɛɛri pɑ́tíri dɛ́rì diì ti nɑ́ɑ́ nDɑfiti dokɛ́nɛ̀mɛ̀ o dootitɔbɛ̀ o cĩ́ɛ̃̀tɛ̀ kɔbɛ nɛ̀ ditowɑɑ̀ kɔbɛ, kɛ̀ dɛ̀ bo yie nkòo fíí nho kpɑ̀tì kɛ́dɛ́úkùnnɛ o kpɑ̀ɑ̀tìyuu. Dɛ kó dipɑ́tíri diì ti nɑ́ɑ́ nDɑfiti do túmɛ̀ onìtì wèè tɑ̃́ Kuyie, wèè do nɑ kɛ́yṹɔ̃́ mbɛnìtìbɛ̀ yɛ̀mmɛ̀ o ĩ́nkɛ̀ kɛ̀ bɛ̀ nhò dɔ́. Diì pɑ́tíri ti nɑ́ɑ́ nDɑfiti do túmɛ̀ okpɑ̀ɑ̀tì diɛwè kɛ kpeńnì. Dì mɛ mmúnkɛ í yóu di bo nɑ́kɛ́mɛ̀ mɛyɛi nhò dɔ̀ɔ̀mɛ̀.
\ip Kuyie ndo pɛ́nsìrì Dɑfiti dɛ̀ɛ̀ ĩ́nkɛ̀ dɛɛ̀ tu ò do bɑntɛ́mɛ̀ o cɑɑ̀rìmɛ̀ kɛ́mɔɔ Kuyie mmɛcĩ́ɛ̃́mmɛ̀. Kɛ̀ Isidɑyɛɛribɛ bɛmɔu pɛ́nsìrì Dɑfiti dɔ̀ɔ̀ dɛ̀ nɛ̀ ò bɛ̀ dɛɛtɛ́nɛ̀mɛ̀ bɛ dootitɔbɛ̀ do bɛ̀ fɛ̃́ũnko dìì mɔ̀nnì.
\ip Kuyie nnɛ́ do ò dɔúnnɛ̀mu dinùù kɛ dɔ̀ o kó kunɑɑ̀mùnkù miɛkɛ okpɑ̀ɑ̀tì í yóó pɑ̀ɑ̀ o kó difɔ̃nkúò.
\ip Kuyie ntɔ̃nní Odɛɛtíwè Yesu o kó kunɑɑ̀mùnkù miɛkɛ nkɛ, dɛɛ̀ te mɛtɑummɛ̀ pɑ̀mmɛ̀ kó dipɑ́tíri miɛkɛ kupíkù mɑkù kɛ̀ bɛ̀ yu Yesu kɛ tú: Dɑfiti kó dɛbirɛ (Mɑtie mukɑ̀mmù 20:29-34, 21:9).
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Kɛ́túótɛ́ Sɑudi kṹṹ nkɛ́tuɔkɛnɛ̀ Dɑfiti kpɑ̀tì kó diketírì 1-4
\io1 2. Bɛ̀ pĩ̀ḿmɛ̀ Dɑfiti tikpɑ̀tì kòo bo mbɑkɛ́ Isidɑyɛɛri bɛmɔu, kɛ́ntɔ kɛ́tuɔkɛnɛ̀ Abusɑdɔmmu yetɛmɛ̀ o kpɛti 5-14
\io1 3. Abusɑdɔmmu yetɛmɛ̀ Dɑfiti kpɛti kɛ́ntɔ kɛ́tuɔkɛ bɛ̀ kɑɑ̀mmɛ̀ Isidɑyɛɛribɛ 15-24
\c 1
\s1 Dɑfiti kèèmɛ̀ Sɑuri kṹṹ
\p
\v 1 Dɑfiti do pɔ̀ntɛ Amɑdesiibɛ kɛ́konní Sikidɑɑ kɛ sɔ̃́ nSɑuri kumu, kòo bɑ́tɛ́ kɛ́mmɔkɛ yɛwe yɛ̀dɛ́ɛ̀. 
\v 2 Ditɑ̃ɑ̃́nnì yiè kòo dɑpɑ̀ɑ̀ mmɔùu tuɔkɛní kɛ bonní Sɑuri ɑ̃ɑ̃pɔ̀nkɑrì kòo yɑ̀ɑ̀tì kɛ̃rí kòò pũ nho yuu mutɑ̃́ɑ̃́, kɛ́tuɔkɛní Dɑfiti borɛ̀ kɛ́nínkú kɛ́sĩ́nnɔ́ɔ o ììkɛ̀. 
\v 3 Kɛ̀ Dɑfitii ò bekɛ kɛ dɔ̀: A bonní dɛ? Kòò dɔ̀: N cokɛ́ní Isidɑyɛɛribɛ ɑ̃ɑ̃pɔ̀nkɑrì ndi. 
\v 4 Kɛ̀ Dɑfiti dɔ̀: N nɑ́kɛ́ dɛ̀ dònnímɛ̀ dɛ bíɛ́kɛ̀. Kòò dɔ̀: Isidɑyɛɛribɛ kó bɛhɑ̃ɑ̃pɔ̀mbɛ̀ cokɛ́mu kɛ̀ bɛ̀ kùɔ bɛsṹkùbɛ̀, kɛ kùɔnɛ̀ Sɑuri nɛ̀ o birɛ Sonnɑtɑ̃ɑ̃. 
\v 5 Kɛ̀ Dɑfiti dɔ̀: A yĩmɛ kɛ yɛ̃́ Sɑuri nɛ̀ o birɛ Sonnɑtɑ̃ɑ̃ bɛ̀ kumɛ̀? 
\v 6 Kɛ̀ dɛ kóo dɑpɑ̀ɑ̀ ndɔ̀: Dɛ̀ do sɔ̃́ m bo Kidiboɑ tɑ̃rì ndi, kɛ̀ Sɑurii ĩkú o kpɑ̃nnì ĩ́nkɛ̀ kòo dootitɔbɛ̀ ò cɛ̃̀ɛ̃tɛ kɛ dekɛ sikpɑ̀rìsɛ̃ĩ́ nɛ̀ sisɛ̃ĩ́. 
\v 7 Kòo wɛ̃ɛ̃tɛ kɛ́ n yɑ̀, kɛ́ n yú kɛ̀ n dɔ̀: Okpɑ̀ɑ̀tì, ntɛ mí! 
\v 8 Kòo m bekɛ n tú wè, kɛ̀ nh ò nɑ̀kɛ́ kɛ dɔ̀: N tú Amɑdesii nwe. 
\v 9 Kòò dɔ̀ n kɔtoo kóò kùɔ kɛ yɛ̃́ kuyonku do ò ɑutɛ́mɛ̀ kòo wemmu nɛ́ kpɑɑ́. 
\v 10 Kɛ̀ nní nwúó nhò yĩɛ̃kɛmɛ̀ kɛ í yóó foutɛ kɛ́kɔtoo kóò kùɔ kɛ́túótɛ́ dikpɑ̀ɑ̀tìpìì nɛ̀ o nɛitɛ kɛ dɛ̀ ndɑ tɔní fɔ̃́ n yiɛ̀.
\p
\v 11 Kɛ̀ Dɑfitii kɛ̃tɛ́ o yɑ̀ɑ̀tì kòo kɔbɛ múnkɛɛ kɛ̃rí bɛ kpɛti. 
\v 12 Kɛ̀ bɛ̀ nkuɔ̀ mmukṹṹ ndikṹnweńnì nɛ̀ kuyuokoo kɛ boú dinùù Sɑuri nɛ̀ o birɛ Sonnɑtɑ̃ɑ̃ kpɛ́í nnɛ̀ Isidɑyɛɛribɛ bɛmɔu, ti Yiɛ̀ nKuyie nkó bɛnìtìbɛ̀ bɛ̀ɛ̀ ku dikpɑ̀nnì miɛkɛ bɛ kpɛ́í. 
\v 13 Kɛ̀ Dɑfitii bekɛ dɛ kóo dɑpɑ̀ɑ̀ nkɛ dɔ̀: A tú we? Kòò dɔ̀: N cicɛ tú Amɑdesii nwe kɛ konní diɛ ndi nhɛì miɛkɛ kɛ m pɛitɛ́. 
\v 14 Kɛ̀ Dɑfiti dɔ̀: Bɑ́ ɑ nɛ́ í yɔ̀tɛ ɑ bo kuɔmɛ̀ okpɑ̀ɑ̀tì Kuyie ntɑ̃ɑ̃tɛ́ wèɑ̀?
\p
\v 15 Kɛ̀ Dɑfitii yú o tɔ̃mbɛ̀ kóò mɔù kɛ dɔ̀: A bɑ́ɑ́ ò yóu, kuɔ we!
\p Kòo tɔ̃ntìi potɛ́ Amɑdesiibɛ botí kou wenwe kɛ́kuɔ. 
\v 16 Kɛ̀ Dɑfitii bɛ́i nkɛ dɔ̀: A kùɔ ɑmɑ́ɑ̀ ndi kɛ yɛ̃́ fɔ̃́ɔ̃̀ bɛ́immɛ̀ nɛ̀ ɑ nùù kɛ tú fɔ̃́ɔ̃̀ kùɔ okpɑ̀ɑ̀tì ti Yiɛ̀ nKuyie ntɑ̃ɑ̃tɛ́ wè.
\s1 Dɑfiti kuɔ̀mmɛ̀ Sɑudi kṹṹ
\p
\v 17 Kɛ̀ Dɑfitii dentɛ̀ Sɑuri nɛ̀ o birɛ Sonnɑtɑ̃ɑ̃ bɛ kṹṹ nkó fɛyɛ̀nfɛ̀, 
\v 18 kɛ́duɔ́ nkɛ̀ bɛ̀ɛ fɛ̀ bɛnkɛ Sudɑɑ ɛì kɔbɛ. Bɛ̀ fɛ ntú Mutɑ̃mmù kó fɛyɛnfɛ̀ kɛ̀ fɛ̀ wɑ̃̀ri Owenniwe\f + \fr 1:18 \fr*\fk Owenniwe pɑ́tíri: \fk*\ft Wéntɛ́ Sosuwe 10:13 nɛ̀ bɛ̀ wénkùnnɛ tì dɛborɛ̀.\ft*\f* pɑ́tíri miɛkɛ. Fɛɛ̀ tu:
\b
\q1
\v 19 Isidɑyɛɛribɛ yé dɛ̀ dòmmɛ̀ kɛ̀ di kó sinitidɑbíí ku ditɑ̃rì ĩ́nkɛ̀?
\q1 Bɑ nte kɛ̀ bɛkpɑ̀rìtiebɛ yɛyètɛ̀ diɛyɛ̀ yɛmbɛ̀ duɔ́ sitɑ̃ɑ̃́ ĩ́nkɛ̀?
\b
\q1
\v 20 Di bɑ́ɑ́ yie nkɛ̀ Kɑti ɛì kɔbɛɛ keè ti!
\q1 Di bɑ́ɑ́ yie nkɛ́ tì yèè Asikɑnɔɔ kó icɛ miɛkɛ
\q1 Fidisitɛ̃ɛ̃bɛ kó bɛsɑpɑ̀mbɛ̀ yɑ̀ɑ̀ bo tì bɑntɛ́ kɛ̀ diwɛ̀ìi bɛ̀ ɑutɛ́.
\q1 Itɑyéí yɛmbɛ̀ kó bɛsɑpɑ̀mbɛ̀ yɑ̀ɑ̀ bo ntì nyɑ̃̀nkunɛ̀.
\b
\q1
\v 21 Fɛtɑɑfɛ̀ tɛ̃́nkɛ bɑ́ɑ́ dúótɛ́ Kidiboɑ tɑ̃rì,
\q1 dì tɛ̃́nkɛ bɑ́ɑ́ mɑntɛ̀
\q1 dɛpɑɑ ndɛ̀ɛ̀ bo di pɛ̃ri dɛ̀ tɛ̃́nkɛ bɑ́ɑ́ pɛitɛ́.
\q1 Bɛ̀ dɛ nsɑ̃ṹ bɛkpɑ̀rìnuɔmbɛ diɛbɛ̀ dɔpììtì.
\b
\q1
\v 22 Sɑuri kó tidɔpììtì nɛ̀ o siè dɛ̀ do ɔ̃ɔ̃ í ndò nkɛ́wɑɑrɛ mɛkùɔ̀.
\q1 Dɛ̀ do ɔ̃ mpũɔ̃̀ nho dootitɔbɛ̀ yĩ̀ĩ̀ mmɛ nɛ̀ bɛ kùɔ̀ nhɔ̀rì ɔ̀rì.
\q1 Sonnɑtɑ̃ɑ̃ tɑ̃mmù múnkɛ do í mɔkɛ botirɛ bìtì bìtì.
\q1 Sɑuri kó disiè do ɔ̃ɔ̃ í nkonní dɛkperɛ̀ bìtì bìtì!
\b
\q1
\v 23 Sɑuri nɛ̀ Sonnɑtɑ̃ɑ̃ bɛ̀ do nɑɑtimu kɛ dɔ́ bɛtɔbɛ̀,
\q1 kɛ́ntɑu bɛ fòmmu miɛkɛ nɛ̀ bɛ kṹṹ mmiɛkoo,
\q1 kɛ toǹnì kɛ dò nyicĩrí,
\q1 kɛ̀ bɛ kɔ̃m̀bɔ̀ dɛu yɛcìrícìrɛ̀ kpɛyɛ dòmmɛ̀.
\b
\q1
\v 24 Isidɑyɛɛribɛ kó bɛnitipòbɛ̀ kɔmmúnɛ̀ Sɑuri kpɛ́í,
\q1 Wèè do di dɑɑti tiyɑɑ̀wũɔ̃tì mupɑ̀ɑ̀kònkperímù kpɛti
\q1 kɛ cɑɑti mɛsɔɔ nkó tisɑ̃tì timɔu botí di yɑ̀ɑ̀tì ĩ́nkɛ̀.
\b
\q1
\v 25 Dɛ̀ yĩ́mɛ kɛ̀ bɛkpɑ̀rìtiebɛ ku mudoò miɛkɛ?
\q1 Bɑ nte kɛ̀ Sonnɑtɑ̃ɑ̃ ku ditɑ̃rì ĩ́nkɛ̀?
\b
\q1
\v 26 N tebitɛ Sonnɑtɑ̃ɑ̃ n kèè ɑ kṹṹ nkɛ̀ n yɛ̀mmɛ̀ cɑ̀ɑ̀rɛ̀ mmɛdiɛ̀ mmɛ,
\q1 m mɛ̀nkɛ do dɑ dɔ́mu.
\q1 N do dɑ dɔ́ kɛ̀ dɛ̀ pɛ̃ɛ̃tɛ́mu m bo ndɔ́mɛ̀ onitipòkù.
\b
\q1
\v 27 Bɑ nte kɛ̀ bɛ kpɑ̀rìtiebɛ ku?
\q1 Bɑ nte kɛ̀ bɛkpɑ̀rìtiebɛ nɛntì mɛ nyɛinko dikpɑ́ɑ̀?
\c 2
\s1 Sudɑɑ kɔbɛ pĩ̀ḿmɛ̀ Dɑfiti tikpɑ̀tì Ebunɔɔ
\p
\v 1 Mɛm̀mɛ kɛ̀ Dɑfitii beé nti Yiɛ̀ nKuyie nkɛ dɔ̀: N dò nkɛ́kɔtɛ Sudɑɑ kɔbɛ ɛkɛ̀ kó dìmɑrɑ̀ɑ̀? Kɛ̀ ti Yiɛ̀ nKuyie ndɔ̀: Ɛ̃ɛ̃. Kòò dɔ̀: Ɔ̃̀ndi? Kɛ̀ kù dɔ̀: Ebunɔɔ.
\p
\v 2 Kɛ̀ Dɑfitii nɛinɛ̀ o pobɛ̀ bɛdɛ́ Ainɔɑmmu Sisedɛɛdi ɛì kou nɛ̀ Abikɑyɛɛdi Nɑbɑɑdi Kɑdimɛɛdi ɛì kou do po wè kɛ kú, kòo ò tùótɛ́. 
\v 3 Dɑfiti kɔbɛ nɛ̀ bɛ cɛ̃́ĩ kɔbɛ kɛ̀ bɛ̀ múnkɛɛ ò nɛinɛ̀ kɛ̀ bɛ̀ɛ kɔtɛ kɛ́mbo Ebunɔɔ ɛì nɛ̀ yɛ̀ɛ̀ dì tɔ̀kɛ́nɛ̀. 
\v 4 Kɛ̀ Sudɑɑ kɔbɛɛ kɔtoo Ebunɔɔ kɛ́pĩ́ nDɑfiti tikpɑ̀tì kóò còú mmɛkùɔ̀ nkòò bo mbɛ̀ bɑkɛ́.
\p Kɛ̀ bɛ̀ɛ nɑ́kɛ́ Yɑbɛsi Kɑdɑsii tenkɛ̀ kɔbɛ sòò kũnnɛ́mɛ̀ Sɑuri. 
\v 5 Kòo tɔ̃ nkɛ̀ bɛ̀ɛ bɛ̀ nɑ̀kɛ́ kɛ dɔ̀: Ti Yiɛ̀ nKuyie ndi dɔɔ̀ mɛsɑ̀ɑ̀ ndí kũnnɛ́ mɛ̀ɛ̀ kpɛ́í nhokpɑ̀ɑ̀tì Sɑuri kɛ bɛnkɛ di ò dɔ́mɛ̀. 
\v 6 Ti Yiɛ̀ nKuyie ndí yietí mɛsɑ̀ɑ̀ ndi dɔ̀ɔ̀ mɛ̀, m mɔ́mmuɔ m múnkɛ yóó mɛ̀ ndi dɔɔ̀mu, di mɛ̀ dɔ̀ɔ̀ mɛ̀ɛ̀ botí. 
\v 7 Di mmɔ̀nnì yɑ́úkùnnɛ di kɔ̃̀ntì, ntúnɛ̀ yɛkɔ̃m̀bɔ̀ yɛmbɛ̀, okpɑ̀ɑ̀tì Sɑuri kumu, mí nwe Sudɑɑ nɑɑ̀mùnkù kɔbɛ còúmmɛ̀ mɛkùɔ̀ kɛ m pĩ ntikpɑ̀tì kɛ̀ m bo mbɛ̀ bɑkɛ́.
\s1 Bɛ̀ pĩ̀ḿmɛ̀ Isibosɛti tikpɑ̀tì
\p
\v 8 Diyiè mɑrì kɛ̀ Nɛɛ birɛ Abunɛɛ Sɑuri ɑ̃ɑ̃pɔ̀mbɛ̀ kóo kótìi tɔ Sɑuri birɛ Isibosɛti kɛ́kɔtɛnɛ̀ Mɑɑnɑimmu, 
\v 9 kóò pĩ ntikpɑ̀tì kòò bo mbɑkɛ́ Kɑdɑɑdi nɛ̀ Asɛɛ nɛ̀ Sisedɛɛdi nɛ̀ Efɑdɑimmu nɛ̀ Bɛnsɑmɛɛ Isidɑyɛɛribɛ tenkɛ̀ kɛmɔu. 
\v 10 Isibosɛti do mɔkɛ yɛbie nsipísìnɑ̀ɑ̀ ndi kɛ di tikpɑ̀tì, kɛ́mbɑkɛ́ Isidɑyɛɛribɛ kɛ dɔ̀ yɛbie nyɛ̀dɛ́ɛ̀. Sudɑɑ kó kunɑɑ̀mùnkù kɔbɛ bɛɛ̀ mɑ́ɑ̀ do tũ nDɑfiti. 
\v 11 Dɑfiti do bɑkɛ́ Sudɑɑ kɔbɛ mɑ́ɑ̀ ndi kɛ bo Ebunɔɔ kɛ dɔ̀ yɛbie nyɛ̀yiekɛ̀ nɛ̀ bɛtɑ̃̀ɑ̃̀bɛ̀ bɛ̀kuɔ̀.
\s1 Sudɑɑ kɔbɛ nɛ̀ Isidɑyɛɛribɛ bɛ̀ kpɑmmɛ̀ Kɑbɑɔ̃ɔ̃
\p
\v 12 Nɛɛ birɛ Abunɛɛ nɛ̀ Sɑuri birɛ Isibosɛti ɑ̃ɑ̃pɔ̀mbɛ̀ bɛ̀ɛ̀ ò bɑ̀ɑ kɛ̀ bɛ̀ɛ ítɛ́ Mɑɑnɑimmu kɛ́nwetí Kɑbɑɔ̃ɔ̃. 
\v 13 Kɛ̀ Seduyɑ birɛ Soɑbu nɛ̀ Dɑfiti ɑ̃ɑ̃pɔ̀mbɛ̀ bɛ̀ɛ̀ ò bɑ̀ɑ kɛ̀ bɛ̀ múnkɛɛ pĩ́ nkucɛ kɛ̀ dɛ kó yɛtĩ̀rɛ̀ɛ mɑ́ɑ́ Kɑbɑɔ̃ɔ̃ binku kɛ́bɑ́tɛ́ biɛ ku mpíkù bɛtɔbɛ̀ kutɛkù. 
\v 14 Kɛ̀ Abunɛɛ nɑ́kɛ́ Soɑbu kɛ dɔ̀: Yóu kɛ̀ bɛhɑ̃ɑ̃pɔ̀mbɛ̀ɛ yɑ́ɑ́kɛ́ bɛtɔbɛ̀ bɛ̀dɛ́bɛ̀ dɛ́bɛ̀ ti ììkɛ̀. Kɛ̀ Soɑbu dɔ̀: Dɛ̀ wenni, bɛ̀ɛ kpɑ.
\p
\v 15 Kɛ̀ bɛhɑ̃ɑ̃pɔ̀mbɛ̀ɛ ítɛ́ kɛ́cómmú kɛ̀ bɛ̀ɛ kɑɑ mBɛnsɑmɛɛ nɑɑ̀mùnkù kou Isibosɛti kɔbɛ kɛ̀ bɛ̀ mbo tɛpíítɛ̀ nɛ̀ bɛ̀dɛ́bɛ̀, kɛ̀ Dɑfiti kɔbɛ mbo tɛpíítɛ̀ nɛ̀ bɛ̀dɛ́bɛ̀. 
\v 16 Kɛ̀ bɛhɑ̃ɑ̃pɔ̀mbɛ̀ɛ pĩ́ mbɛtɔbɛ̀, bɑ́ wè kòo kṹṹ o nɛ́po píkù disiè, kɛ̀ bɛ̀ɛ duó bɛmɔu dimɔ̀nnì dìmɑ́ɑ̀ miɛkɛ kɛ̀ bɛ̀ɛ yú dɛborɛ̀ kɛ dɔ̀ Kɑbɑɔ̃ɔ̃ (dɛ̀ɛ̀ tu Yɛse kó dikpɑ́ɑ̀).
\p
\v 17 Kɛ̀ mudoò bintɛ́ dɛ yiè kɛ̀ Dɑfiti kó bɛhɑ̃ɑ̃pɔ̀mbɛ̀ɛ nɑ Abunɛɛ kɔbɛ. 
\v 18 Kɛ̀ Seduyɑ bí itɑ̃ɑ̃ti dɛ kɔkɛ́ Soɑbu nɛ̀ Abikɑii nɛ̀ Asɑyɛɛdi. Asɑyɛɛdi do cɑ̃ɑ̃ muceé mmu kɛ dò ntɛhontɛ̀. 
\v 19 Kòo bɛti Abunɛɛ kóò fɛ̃nnɛ́ fɛ̃nfɛ̃. 
\v 20 Kɛ̀ Abunɛɛ wɛ̃ɛ̃tɛ kóò bekɛ kɛ dɔ̀: Asɑyɛɛdi fɔ̃́ nweɑ̀? Kòò dɔ̀: Ɛ̃ɛ̃, mí nwe. 
\v 21 Kɛ̀ Abunɛɛ ò nɑ̀kɛ́ kɛ dɔ̀: Wɛ̃ɛ̃tɛ ɑ bɑkù yoú yoo kucɑ̃̀nku kɛ́bɛti bɛhɑ̃ɑ̃pɔ̀mbɛ̀ kóò mɔù kɛ́fietɛ o nɛntì.
\p Asɑyɛɛdi mɛ nyí nyie nkɛ yóu ò bo nhò bɛ̀timɛ̀. 
\v 22 Kɛ̀ Abunɛɛ yíɛ́ kɛ dɔ̀: Asɑyɛɛdi bɑ́ nni mbɛti, bɑ́ɑ́ duɔ́ nkɛ̀ n dɑ kuɔ bɑ́ nɛ̀ ɑ kóo kótì Soɑbu ti nuɔ mbɑ́ɑ́ mɑ́ɑ́.
\p
\v 23 Asɑyɛɛdi mɛ nyí nyie nkɛ bo ò yóu mubɛ̀tìmù. Mɛm̀mɛ kɛ̀ Abunɛɛ ò tɑ̃ dikpɑ̃nnì o pɔutì kɛ̀ dìi yɛ̀roo o fɔ̃nkúò kòo do kɛ́kú. Bɛ̀ɛ̀ kó dimɑ̀ɑ̀ keriní kɛ̀ bɛ̀ ncommu ò duɔ́ dɛ̀.
\p
\v 24 Soɑbu nɛ̀ Abikɑii kɛ̀ bɛ̀ mɛ ntó fɛ̃nnɛ́ Abunɛɛ fɛ̃nfɛ̃. Kɛ̀ diyiè nyóó tɑ kɛ̀ bɛ̀ berínɛ̀ Kibeɑ Ammɑ Kiyɑɑ donfũ̀ɔ̃̀ kucɛ kùù yìɛ̀nɛ̀ Kɑbɑɔ̃ɔ̃ kpɑ́ɑ̀ bíɛ́kɛ̀ ku borɛ̀. 
\v 25 Kɛ̀ Abunɛɛ Bɛnsɑmɛɛ botí kou ɑ̃ɑ̃pɔ̀mbɛ̀ nhò kɛ̀rí ditɑ̃rì ĩ́nkɛ̀. 
\v 26 Kɛ̀ Abunɛɛ yú Soɑbu kɛ dɔ̀: Ti yó nsɔkɛ́ kɛ kɔùmu titɔbɛ̀ nɛ̀ yɛseɑ̀? A í yɛ̃́ kɛ dò ndɛ̀ bo ti dentɛnɛ̀ mɛyɛinɑɑ̀? A bɑɑ bɑ? Nɑ́kɛ́ ɑ nìtìbɛ̀ kɛ̀ bɛ̀ɛ yóu bɛ̀ bo nkɔùmɛ̀ bɛ tebìí. 
\v 27 Kɛ̀ Soɑbu dɔ̀: Kuyie mbomu, kɑ̀ɑ do í bɛ́i n kɔbɛ nɑ nsɔkɛ́ kɛ di bɛtìmu bɑ́ wè o tebitɛ nɛ̀ nɑnkoo dikṹnweńnì.
\p
\v 28 Kɛ̀ Soɑbuu eé ditɑ̃tɛheù kòo ɑ̃ɑ̃pɔ̀mbɛ̀ɛ kṹnnɛ́ bɛ̀ bo mbɛtìmɛ̀ Isidɑyɛɛribɛ kɛ̀ dikpɑ̀nnìi deè. 
\v 29 Abunɛɛ nɛ̀ o kɔbɛ kɛ̀ bɛ̀ nyié nkɛ kérí kɛyènkɛ̀ kɛmɔu Suditɛ̃ɛ̃ kó kubiriku, kɛ́séntɛ́ kukó nkɛ́pɛ̃ɛ̃tɛ́ Bitinɔɔ kɛ́tuɔkɛ Mɑɑnɑimmu. 
\v 30 Soɑbu yóu dìì mɔ̀nnì ò bo mbɛtìmɛ̀ Abunɛɛ kɛ́tíí nho ɑ̃ɑ̃pɔ̀mbɛ̀ kɛ́mɔ́ntɛ́ Dɑfiti kó bɛhɑ̃ɑ̃pɔ̀mbɛ̀ miɛkɛ tɛpíítɛ̀ nɛ̀ bɛ̀wɛi kɛ́yíɛ́nɛ̀ Asɑyɛɛdi. 
\v 31 Kɛ̀ Dɑfiti kó bɛhɑ̃ɑ̃pɔ̀mbɛ̀ mɛ nkùɔ Bɛnsɑmɛɛ botí kó bɛhɑ̃ɑ̃pɔ̀mbɛ̀ nɛ̀ Abunɛɛ kɔbɛ sikɔusìtɑ̃ɑ̃ti nɛ̀ sipísìkuɔ̀ (360). 
\v 32 Kɛ̀ bɛ̀ɛ túótɛ́ Asɑyɛɛdi kɛ́ntɔ kɛ bií kũnnɛ́ o cicɛ fɔ̃ti Bɛtideɛmmu. Soɑbu nɛ̀ o kɔbɛ kɛ̀ bɛ̀ɛ sɔɔtɛ́ kɛ́nyié nkɛ kérí kɛ́tuɔkoo Ebunɔɔ kukṹnwentóo kɛ̀ diyiè yɛ̀tìní.
\c 3
\p
\v 1 Mɛm̀mɛ kɛ̀ dikpɑ̀nnì ḿbo Sɑuri kɔbɛ nɛ̀ Dɑfiti kɔbɛ cuokɛ̀ kɛ́mɔntɛ, kɛ̀ Dɑfiti nsɔkɛ́ kɛ kpénkú kɛ̀ Sɑuri kɔbɛ cĩtiri.
\s1 Dɑfiti pɛitɛ́ ìì bí Ebunɔɔ i yètɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 3:1-4)
\p
\v 2 Dɑfiti do piɛ́ ibí pɛ́u nwe Ebunɔɔ. O kóo po do tú Amunɔɔ o pokù Ainɔɑmmu Sisedɛɛdi ɛì kou pɛitɛ́ wè. 
\v 3 Kòo dɛ́rì ntú Kidiɑbu Abikɑyɛɛdi Nɑbɑɑdi Kɑdimɛɛdi kou ò pɛitɛ́ wè. Kòo tɑ̃ɑ̃́nwè ntú Abusɑdɔmmu Tɑmɑi Kesuu kpɑ̀ɑ̀tì kóo sɑpɑ̀ɑ̀ mMɑɑkɑ ò pɛitɛ́ wè. 
\v 4 Kòo nɑɑnwè ntú Adonniyɑ Akiti birɛ. Kòo nummuwè ntú Sefɑtiɑ Abitɑdi birɛ. 
\v 5 Kòo kuɔ́nwè ntú Itedeɑmmu Ekidɑɑ birɛ. Dɑfiti piɛ́ ìì bí nyi Ebunɔɔ.
\s1 Abunɛɛ nɛ̀ Ibosɛti bɛ̀ pètɛmɛ̀
\p
\v 6 Sɑuri kɔbɛ nɛ̀ Dɑfiti kɔbɛ bɛ kpɑ̀nnì miɛkɛ kɛ̀ Abunɛɛ yètìrì mmɔ́nkɛ́ feirí Sɑuri tĩ̀nnì miɛkɛ. 
\v 7 Sɑuri do mɔkɛ o pocɛ̃nnì mɑrì ndi kɛ̀ di yètìrì ntú Disipɑɑ Ayɑ kóo sɑpɑ̀ɑ̀. Diyiè mɑrì kɛ̀ Isibosɛtii bekɛ́ Abunɛɛ kɛ dɔ̀: Dɛ̀ yĩmɛ kɑ̀ɑ duɔ́nɛ̀ n cicɛ pocɛ̃nnì?
\p
\v 8 Kɛ̀ Abunɛɛ keè dɛ kó tinɑ́ɑǹtì kɛ̀ dɛ̀ɛ ò yonkɛ mɛdiɛ̀, kòo bɛ́i nkɛ dɔ̀: N tú Sudɑɑ kɔbɛ kó tɛmɔtɛ̀ ntɑɑ̀? M bɛnkɛmu n dɔ́mɛ̀ Sɑuri cĩ́ɛ̃̀tɛ̀ nɛ̀ o tebìí nɛ̀ o nɛ́pobɛ̀ kpɛsi kɛ bɛ̀ tɑunɛ̀ nɛ̀ yíenní kɛ dɑ kɑ̃nkɛ́ bɑ́ ɑ í do Dɑfiti nɔu miɛkɛ, kɑ̀ɑ nɛ́ dɔ́ kɛ́ n kpɑnnɛ̀ yíe, we nnitipòkù kpɛ́ínɑ́ɑ̀? 
\v 9 Kuyie nní ndɔɔ̀ kù dɔ́mɛ̀ kɛ̀ nsɑ̀ kɛ̀ n yí dɔ̀ɔ̀ Dɑfiti Kuyie nyɛ̃ nkù yóó ò dɔ̀ɔ̀ dɛ̀. 
\v 10 Kù bɛ́immu kɛ tú kù bo fietɛ tikpɑ̀tì Sɑuri borɛ̀ kɛ́ tì duɔ́ nDɑfiti, kòo mbɑkɛ́ Isidɑyɛɛribɛ bɛmɔu nɛ̀ Sudɑɑ kɔbɛ bɛ tenkɛ̀ duɔ́ kɛ mɑmɛ̀. Dɑnni tenkɛ̀ kɛ́ntɔ kɛ́tuɔkɛ Bɛɛrisebɑɑ.
\p
\v 11 Isibosɛti í ndɑ̀ɑ́tí kɛ tɛ̃̀ńnɛ́ Abunɛɛ tìmɑtì ò wè dé mɛ̀ɛ̀ kpɛ́í.
\s1 Abunɛɛ tɑunnɛ̀mɛ̀ Dɑfiti
\p
\v 12 Mɛm̀mɛ kɛ̀ Abunɛɛ tɔ̃ nkɛ̀ bɛ̀ɛ nɑ́kɛ́ Dɑfiti kɛ dɔ̀: Ti yɛ̃́mu fɔ̃́ɔ̃̀ temɛ̀ dihɛì, yóu mí nnɛ̀ fɔ̃́ nkɛ̀ ti tɑu nkɛ̀ n dɑ teennɛ̀ kɛ́yũɔ̃nní Isidɑyɛɛribɛ bɛmɔu ɑ borɛ̀. 
\v 13 Kɛ̀ Dɑfiti dɔ̀: N yiemmu kɛ̀ ti bo tɑu, n nɛ́ dɑ békú tìmɑtì mɑ́ɑ̀ ndi, kɑ̀ɑ kɔ̀riní ɑ nnɛínní m pokù Mikɑɑdi Sɑuri kóo sɑpɑ̀ɑ̀. Kɑ̀ɑ í nɛínní wenwe ɑ bɑ́ɑ́ kɔtɛní. 
\v 14 Dɛ kó difɔ̃nkúò kɛ̀ Dɑfitii tɔ̃ nkɛ̀ bɛ̀ɛ nɑ́kɛ́ Isibosɛti kɛ dɔ̀: Dɑfiti tu ɑ tɛ̃́nnɔ́ɔ o pokù Mikɑɑdi ò do yietí Fidisitɛ̃ɛ̃bɛ kó itɑyéí tɛkɔ̀ùtɛ̀ (100) kɛ́puokɛ wè. 
\v 15 Kɛ̀ Isibosɛtii tɔ̃ nkɛ̀ bɛ̀ɛ túótɛ́ní Mikɑɑdi o dɔù Pɑditiyɛdi Dɑiisi birɛ borɛ̀. 
\v 16 Kɛ̀ Pɑditiyɛdi nhò tũ̀ nkɛ kɔnti kɛ́tuɔkɛnɛ̀ Bɑudimmu. Dɛndɛ Abunɛɛ ò nɑ̀kɛ́mɛ̀ kɛ dɔ̀ wèe wɛ̃tɛ. Kòo wɛ̃tɛ.
\b
\p
\v 17 Kɛ̀ Abunɛɛ tíí nyIsidɑyɛɛribɛ kó bɛkótíbɛ̀ kɛ́ bɛ̀ bekɛ kɛ dɔ̀: Dɛ̀ mɔ̀ntɛ di dɔ́mɛ̀ Dɑfiti bo nɑɑ́mmɛ̀ di kóo kpɑ̀ɑ̀tì yɑ́ɑ bɑ? 
\v 18 Dɛ mɔ̀nnì diì tùɔ̀kɛ ti Yiɛ̀ nKuyie ndo bɛ́immu kɛ tú nɛ̀ Dɑfiti borɛ̀ ndɛ kù yóó dɛɛtɛ́mɛ̀ ku nìtìbɛ̀ Isidɑyɛɛribɛ Fidisitɛ̃ɛ̃bɛ nɔu miɛkɛ, nɛ̀ bɛ bɛdootitɔbɛ̀ bɛmɔu.
\p
\v 19 Kɛ múnkɛɛ nɑ́kɛ́nɛ̀ Bɛnsɑmɛɛ botí kɔbɛ kɛ́deè kɛ́nkɔri Ebunɔɔ kɛ bo nɑ́kɛ́ Dɑfiti ò tũ̀ntɛmɛ̀ tinɑ́ɑǹtì Bɛnsɑmɛɛ botí kɔbɛ nɛ̀ Isidɑyɛɛribɛ sɔmbɛ borɛ̀. 
\v 20 Kòo tuɔkoo Dɑfiti borɛ̀ kɛ nɛinɛ̀ bɛnìtìbɛ̀ sipísìdɛ́ kɛ̀ Dɑfitii bɛ dɔ̀ɔ̀ kupɔ̀ɔ̀kù. 
\v 21 Kɛ̀ Abunɛɛ nɑ́kɛ́ Dɑfiti kɛ dɔ̀: Okpɑ̀ɑ̀tì n yóó kòmmu kɛ́tíí nyIsidɑyɛɛribɛ bɛmɔu ɑ borɛ̀, kɛ̀ dí tɑunnɛ̀ ditɔbɛ̀. Dɛ mɔ̀nnì kɑ̀ɑ mbɛ̀ bɑkɛ́ ɑ dɔ́ mɛ̀ɛ̀ botí.
\p Mɛm̀mɛ Dɑfiti cɑummɛ̀ Abunɛɛ kòo kò nnɛ̀ diwɛ̀ì.
\s1 Soɑbu kùɔmɛ̀ Abunɛɛ
\p
\v 22 O kò mɛm̀mɛ Dɑfiti ɑ̃ɑ̃pɔ̀mbɛ̀ nɛ̀ Soɑbu kɛ̀ bɛ̀ nkũntiní mudoò kɛ ɛí tinɛntì pɛ́u kɛ́nsɔ̃́ nhAbunɛɛ ìtɛ́, kɛ yɛ̃́ Dɑfiti do ò yóumu kòo ítɛ́ nɛ̀ diwɛ̀ì. 
\v 23 Soɑbu tùɔ̀kɛní dìì mɔ̀nnì nɛ̀ dihɑ̃ɑ̃pɔ̀ntĩ̀nnì kɛ̀ bɛ̀ɛ ò nɑ̀kɛ́ kɛ dɔ̀: Nɛɛ birɛ Abunɛɛ kɔ̀tɛní diɛ nhokpɑ̀ɑ̀tì borɛ̀, kòo kpɑ̀ɑ̀tì ò yóu kòò kònnɛ̀ diwɛ̀ì. 
\v 24 Kɛ̀ Soɑbuu tɑ okpɑ̀ɑ̀tì borɛ̀ kóò bekɛ kɛ dɔ̀: A dɔ̀ɔ̀ bɑ mbotí nku! Abunɛɛ weè kɔ̀tɛní ɑ borɛ̀ kɑ̀ɑ ò yóu kòò kònnɑ̀ɑ̀? 
\v 25 A yɛ̃́mu Nɛɛ birɛ Abunɛɛ mɛsɑ̀ɑ̀, ò kɔ̀tɛní kɛ bo dɑ soutɛ́mu, ò dɔ́ kɛ́ dɑ pɑɑtɛ́mu.
\b
\p
\v 26 Soɑbu yɛ̀nní dìì mɔ̀nnì okpɑ̀ɑ̀tì borɛ̀ kɛ́duɔ́ nkɛ̀ bɛ̀ɛ tũnnɛ Abunɛɛ, bɑ́ okpɑ̀ɑ̀tì í yɛ̃́. Kɛ̀ bɛ̀ɛ ò nìntɛ Siidɑ kó tɛbintɛ borɛ̀, kóò wɛ̃̀tɛnní. 
\v 27 Abunɛɛ tùɔ̀kɛní dìì mɔ̀nnì Ebunɔɔ kɛ̀ Soɑbuu ò yu kɛ́tɑnnɛ̀ dihɛì kó dibòrì bɛdɛ́ borɛ̀ kɛ́ndò nhò dɔ́ kóò nɑ̀kɛ́ tìmɑtì disɔ̀rì, ò dɛ nhò kũ̀ṹ disiè o pɔutì kɛ́kuɔ, kɛ́pɛitɛ ò do kùɔmɛ̀ o nɑntɛ̀ Asɑyɛɛdi.
\p
\v 28 Dɑfiti kèè dìì mɔ̀nnì Abunɛɛ kṹṹ nkɛ́kuɔ́nko kɛ dɔ̀: Ti Yiɛ̀ nKuyie nyɛ̃́mu kɛ dò mmí nnɛ̀ n nìtìbɛ̀ tíì í te kɛ̀ bɛ̀ kùɔ Nɛɛ birɛ Abunɛɛ. 
\v 29 Wèe kɑ̃nkiri Soɑbu nɛ̀ o cĩ́ɛ̃̀tɛ̀, o cĩ́ɛ̃̀tɛ̀ miɛkɛ bɛ̀ bo mmuɔkú yɛfɔtɛ̀ nɛ̀ tikɔ̀ntì, kɛ̀ bɛcĩ̀rìbɛ̀ mbo kɛ̀ bɛtɔbɛ̀ nkɔ̃ ndikpɑ̀nnì miɛkɛ, kɛ̀ dikònnì mbo o cĩ́ɛ̃̀tɛ̀.
\p
\v 30 Mɛm̀mɛ Soɑbu nɛ̀ o nɑntɛ̀ Abikɑii bɛ̀ kùɔmɛ̀ Abunɛɛ ò do kùɔ mɛ̀ɛ̀ kpɛ́í mbɛ nɑntɛ̀ Asɑyɛɛdi dikpɑ̀nnì dìì do ɑ̃nnɛ́ Kɑbɑɔ̃ɔ̃ di miɛkɛ.
\b
\p
\v 31 Kòo kpɑ̀ɑ̀tì Dɑfitii nɑ́kɛ́ Soɑbu nɛ̀ bɛ̀ɛ̀ ò nɛínɛ̀ kɛ dɔ̀: Kɛ̃rínɛ̀ di yɑ̀ɑ̀tì kɛ́dɑ́ɑ́tí tifɔ̀ɔ̀tɔ̃̀ntì kɛ̀ tí kɔutɛ́ Abunɛɛ.
\p Dɑfiti o mɔ́mmuɔ nkòo ntũ nho dɛɛnkù fɔ̃nkúò. 
\v 32 Kɛ̀ bɛ̀ɛ kũnnɛ́ Abunɛɛ Ebunɔɔ, kòo kpɑ̀ɑ̀tì Dɑfitii kuɔ́ nho fɔ̃ti ĩ́nkɛ̀ kɛ̀ ditĩ̀nnì dimɔu múnkɛɛ kuɔ́. 
\v 33 Dɛ kó difɔ̃nkúò kòo kpɑ̀ɑ̀tì kuɔ́ ndikúdɑbònnì dii nhAbunɛɛ kpɛ́í nkɛ dɔ̀:
\b
\q1 Abunɛɛ ɑ do í dò nkɛ́kú onitisĩ́ntíwè kɔ̃mɛ.
\q1
\v 34 Bɛ̀ do í boú ɑ nɔu,
\q1 ɑ nɑɑ̀cɛ̀i do í tɑ́ú mɛfĩmmɛ.
\q1 Kɛ̀ bɛ nɛ́ dɑ kùɔ bɛ̀ kɔ̀ù mɛ̀ɛ̀ botí bɛnitiyɛibɛ.
\b
\p Bɛ̀ɛ̀ kó dimɑ̀ɑ̀ dɛ̀ bo kɛ̀ bɛ̀ɛ yíɛ́ kɛ́kuɔ́. 
\v 35 Kɛ̀ bɛ̀ɛ tɔ́ɔ́nní okpɑ̀ɑ̀tì Dɑfiti borɛ̀ kɛ bo o duɔ́ mmudiì kòo pɑrìkɛ̀ kɛ dɔ̀: Kɛ̀ n di bɑ́ sɑ́m̀pɔ́ kɛ̀ diyiè kpɑɑ́ feí Kuyie nni ndɔɔ̀ kù dɔ́mɛ̀.
\p
\v 36 Kɛ̀ bɛnìtìbɛ̀ bɛmɔuu ti kèè kɛ́ tì pɛ́nsìrì. Bɛ̀ do ɔ̃ɔ̃ pɛ́nsìrìmu ò dɔ̀ɔ̀ri tìì kó dimɑ̀ɑ̀. 
\v 37 Kɛ̀ Sudɑɑ kɔbɛ bɛmɔu nɛ̀ Isidɑyɛɛribɛ bɛmɔu kɛ̀ bɛ̀ɛ bɑntɛ́ dɛ yiè Dɑfiti weè ì duɔ́mmɛ̀ dinùù kɛ̀ bɛ̀ kùɔ Nɛɛ birɛ Abunɛɛ. 
\v 38 Kɛ̀ Dɑfitii nɑ́kɛ́ o tũ̀mbɛ̀ kɛ dɔ̀: Yíe ndi nyɛ̃́ kɛ dò nhonìtì diɛwè iwɛ̃ĩ yiɛ̀ nwèè ku yíe nyIsidɑyɛɛribɛ cuokɛ̀. 
\v 39 Bɑ́ mí nnɛ̀ n kó tikpɑ̀tì m mu nyí pɛ̀tɛ́ dɛ kó muwɛ̃rímú mùù bo dɔɔ̀nɛ̀ bɛnìtìbɛ̀ biɛ mmɛ̀ ndɔ̀ɔ̀ dɛ̀ Seduyɑ kó ibí, ti Yiɛ̀ nKuyie nkuù bo ì yietí mɛyɛi nyì dɔ̀ɔ̀ mɛ̀.
\c 4
\s1 Bɛ̀ kùɔmɛ̀ Isibosɛti
\p
\v 1 Kɛ̀ Isibosɛti Sɑuri birɛɛ keè Abunɛɛ kumɛ̀ kɛ̀ dɛ̀ɛ ò kpeí kɛ̀ Isidɑyɛɛribɛ bɛmɔu kɔ̃m̀bùɔ̀tìi do.
\b
\p
\v 2 Kɛ sɔ̃́ nwee Isibosɛti mɔ̀kɛ bɛnìtìbɛ̀ bɛ̀dɛ́bɛ̀ bɛ̀ɛ̀ bɑkɛ́ yɛhɑ̃ɑ̃pɔ̀ntĩ̀rɛ̀. Kòò mɔù yètìrì tu Bɑɑnɑ kòo tɔù kpɛri tú Dekɑbu Dimɔɔ Bedɔti ɛì kou, Bɛnsɑmɛɛ botí kou bí dò nyi. 
\v 3 Bɛ yɛmbɛ̀ do dɛ ncokɛ́ kɛ́kò nKitɑimmu, kɛ̀ bɛ yɑɑ̀bí kpɑɑ́ kɛ dɛ̀ bo nɛ̀ yíenní. 
\v 4 Kɛ sɔ̃́ nSonnɑtɑ̃ɑ̃ Sɑuri birɛ tɛrɛ̀ ku kɛ yóu dɛbirɛ mɑrɛ̀ kɛ̀ dɛ yètìrì tu Mɛfibosɛti kɛ̀ dɛ̀ tu kuhɔ̀ùkù. Dɛ̀ do mɔkɛ yɛbie nyɛ̀nùmmù ndi bɛ̀ bɛ̀ nɑ̀kɛ́ dìì mɔ̀nnì Sɑuri nɛ̀ Sonnɑtɑ̃ɑ̃ kṹṹ nSisedɛdi kɛ̀ dɛ yuɔrì ncooti kɛ dɔ́ mɛcɑ̃ɑ̃ nkɛ̀ dɛ̀ɛ fitɛ́ kɛ́do kɛ́nɑɑ́ nkuhɔ̀ùkù.
\b
\p
\v 5 Dimɔɔ Bedɔti ɛì kou kó ìbí Dekɑbu nɛ̀ Bɑɑnɑ kɛ̀ bɛ̀ɛ kɔtɛ Isibosɛti cĩ́ɛ̃̀tɛ̀ kɛ́ntuɔ̀koo kuyie ncuokɛ̀ kɛ sɔ̃́ nhò duɔ́ kɛ om̀pu. 
\v 6-7 Kɛ̀ bɛ̀ɛ tɑ o cĩ́ɛ̃̀tɛ̀ kɛ́ndò mbɛ̀ ò tɔo tidiitì kɛ sɔ̃́ Isibosɛti duɔ́ kɛ̀ bɛ̀ɛ ò potɛ́ o pɔutì kóò kùɔ kɛ́deè kɛ́féútɛ́ o yuu kɛ́cokɛ́ kɛ́yɛ̀nnɛ̀ kɛ́nyié nkɛ kérí Suditɛ̃ɛ̃ biriku kó kucɛ, 
\v 8 kɛ́tuɔkɛ Ebunɔɔ kɛ́duɔ́ nhokpɑ̀ɑ̀tì Dɑfiti Isibosɛti yuu kɛ dɔ̀: Okpɑ̀ɑ̀tì ntɛ ɑ dootitɔù Sɑuri wèè do dɔ́ ɑ kṹṹ nho birɛ Isibosɛti yuu. Ti Yiɛ̀ nKuyie mpɛ̀ìtɛmu yíe nhɑ pɛ̀ì Sɑuri ĩ́nkɛ̀ nɛ̀ o yɑɑ̀bío. 
\v 9 Kɛ̀ Dɑfitii bɛ̀ tɛ̃̀ńnɛ́ kɛ dɔ̀: Ti Yiɛ̀ nKuyie nkùù n dɛɛtɛ́ nɛ̀ mɛhɑ́ɑ́rìmɛ̀ mɛmɔu, kù bomu. 
\v 10 Wèè do n nɑ̀kɛ́ Sɑuri kṹṹ nho yɛ̀mmɛ̀ do dò nhò n nɑ̀ɑ́ ntinɑ́ɑǹsɑ̀ɑ̀tì nti, kɛ̀ n duɔ́ nkɛ̀ bɛ̀ɛ ò pĩ nkɛ́kuɔ Sikidɑɑ. O kṹṹ mmuù do tú tinɑ́ɑǹsɑ̀ɑ̀tì ò yɛ̃ nhò tɔní tì kó ticuuti. 
\v 11 Bɛ̀ɛ̀ nɛ́ kùɔ onitisɑ̀ù wèè í bɛ̀ dɔ̀ɔ̀ dɛ̀mɑrɛ̀ o dɔ́ù ĩ́nkɛ̀ tɑ́? M bo di kuɔ kɛ́fɔ́ɔ́ mmɛyɛi ndi dɔ̀ɔ̀ mɛ̀, di tɛ̃́nkɛ bɑ́ nkpɑɑ́ kɛtenkɛ̀ ĩ́nkɛ̀.
\p
\v 12 Ò bɛ́i mɛm̀mɛ kɛ́pɛ́i nho ɑ̃ɑ̃pɔ̀mbɛ̀ kɛ̀ bɛ̀ɛ bɛ̀ pĩ nkɛ́kuɔ kɛ kékɛ́ bɛ nɔu nɛ̀ bɛ nɑɑ̀cɛ̀i kɛ́núnnɛ́ Ebunɔɔ kó kubinku tɑkɛ́, kɛ́túótɛ́ Isibosɛti yuu kɛ́kũnnɛ́ Abunɛɛ fɔ̃ti Ebunɔɔ.
\c 5
\s1 Bɛ̀ do pĩ̀ḿmɛ̀ Dɑfiti tikpɑ̀tì kòo mbɑkɛ́ Isidɑyɛɛribɛ bɛmɔu
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 11:1-3)
\p
\v 1 Kɛ̀ Isidɑyɛɛri wuɔ nyimɔu kɔbɛɛ tíí nDɑfiti borɛ̀ Ebunɔɔ kóò nɑ̀kɛ́ kɛ dɔ̀: Ti tú ɑ botí kɔbɛ mbɛ, mɛyĩ̀ĩ̀ mmɛmɑ́ɑ̀. 
\v 2 Sɑuri do tɔ dìì mɔ̀nnì tikpɑ̀tì kɛ̀ fɔ̃́ɔ̃̀ niù Isidɑyɛɛribɛ mudoò, ti Yiɛ̀ nKuyie ndɑ nɑ̀kɛ́mu nɛ̀ dimɔ̀nnì kɛ tu fɔ̃́ɔ̃̀ yó mbɑkɛ́ ku nìtìbɛ̀ Isidɑyɛɛribɛ kɛ tú bɛ kóo kpɑ̀ɑ̀tì.
\p
\v 3 Kɛ̀ Isidɑyɛɛribɛ kó bɛkótíbɛ̀ bɛmɔuu kɔtɛ Dɑfiti borɛ̀ Ebunɔɔ. Kɛ̀ Dɑfitii bɛ̀ dɔ̀ɔ̀nɛ̀ mɛtɑummɛ̀ ti Yiɛ̀ nKuyie nyììkɛ̀, kɛ̀ bɛ̀ɛ ò cóú mmɛkùɔ̀ kóò pĩ ntikpɑ̀tì. 
\v 4 Dɛ̀ do sɔ̃́ nhò mɔ̀kɛ yɛbie nsipísìtɑ̃ɑ̃ti ndi, kɛ́ di tikpɑ̀tì kɛ dɔ̀ yɛbie nsipísìnɑ̀ɑ̀. 
\v 5 Ò do mɔkɛ yɛbie nyɛ̀yiekɛ̀ ndi nɛ̀ bɛtɑ̃̀ɑ̃̀bɛ̀ bɛ̀kuɔ̀ kɛ bo Ebunɔɔ kɛ kpɑ̀ɑtirì Sudɑɑ kɔbɛ. Dɛ kó difɔ̃nkúò kɛ dɔ̀ Sedisɑdɛmmu yɛbie nsipísìtɑ̃ɑ̃ti nɛ̀ yɛ̀tɑ̃ɑ̃ti kɛ kpɑ̀ɑtirì Isidɑyɛɛribɛ bɛmɔu nɛ̀ Sudɑɑ kɔbɛ.
\s1 Dɑfiti tiekɛmɛ̀ Sedisɑdɛmmu
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 11:4-9. 14:1-2)
\p
\v 6 Sebusiibɛ bɛɛ̀ do ɑ̃ Sedisɑdɛmmu kɛ̀ Dɑfiti nɛ̀ o kɔbɛ kɛ̀ bɛ̀ɛ bɑ́ɑ́tí kɛ bo bɛ̀ pɔ̀ntɛ kɛ̀ bɛ̀ɛ ò nɑ̀kɛ́ kɛ dɔ̀: Tiyũ̀ɔ̃̀ntì nɛ̀ yɛkpĩɛ̃̀ ndɛɛ̀ yóó dɑ bɑɑo.
\p Nɛ̀ dɛ kó tinɑ́ɑǹtì miɛkɛ bɛ̀ do dɔ́ kɛ dɔ̀ Dɑfiti í tɑtimu bɛ ɛì. 
\v 7 Nɛ̀ mɛmmɛ kɛ̀ Dɑfiti ncĩ́ɛ̃́kɛ́ kɛ́fietɛ dihɛì kperì Siyɔ̃ɔ̃ kɛ̀ dɛ̀ mboní kɛ̀ bɛ̀ɛ dì yú kɛ dɔ̀ Dɑfiti ɛì.
\p
\v 8 Dɛ yiè ndi Dɑfiti bɛ́immɛ̀ kɛ dɔ̀: Kɛ̀ wèè dɔ́ kɛ́kpɑnnɛ̀ Sebusiibɛ wèe tɔ̃ɔ̃ ndikondɑɑ kɛ́ bɛ̀ tùɔ̀kɛ. Dɛ kó yɛkpĩɛ̃̀ nnɛ̀ tiyũ̀ɔ̃̀ntì n yí dɛ̀ dɔ́ fɛnɔ̀nfɛ̀. Dɛɛ̀ te kɛ̀ bɛ̀ do ɔ̃ nnɑ́ɑ́ nkɛ tú yɛkpĩɛ̃̀ nɛ̀ tiyũ̀ɔ̃̀ntì bɛ̀ í tɑɑ̀ Kuyie ncĩ́ɛ̃̀tɛ̀\f + \fr 5:8 \fr*\ft Dɛ̀ bɛnkú kɛ dò ndɛ kó bɛnìtìbɛ̀ do tú Dɑfiti dootitɔbɛ̀ mbɛ, dɛɛ̀ te kɛ̀ Dɑfiti bɛ̀ dònnɛnɛ̀ ikuɔ́ nìùbɛ̀ pɑ́tíri nɑ́ɑ́ mbɛ̀ɛ̀ kɔ̃mɛ. (Ikuɔ́ nìùbɛ̀ pɑ́tíri 21:17-23).\ft*\f*.
\b
\p
\v 9 Kɛ̀ Dɑfitii kɑri dihɛì kperì kɛ́ dì yu kɛ dɔ̀: Dɑfiti ɛì kperì. Kɛ yíɛ́ kɛ́mɑɑ́ iduotí kɛ́ketɛ́ bɛ̀ do ĩ̀tínnɛ́ kùù tɑ̃dɛ̀ìkù borɛ̀ kɛ́tɑnnɛ̀nko dɛ miɛkɛ.
\p
\v 10 Kɛ̀ ti Yiɛ̀ nKuyie Mpɑkɛdɑɑ mbonɛ̀ Dɑfiti kòo yètìrì feirí.
\b
\p
\v 11 Kɛ̀ Idɑmmu Tiiri kóo kpɑ̀ɑ̀tìi tɔ̃nnɛ̀ bɛnìtìbɛ̀ tidɑbɛɛkpetì Dɑfiti borɛ̀ kóò duɔ́nnɛ̀ bɛdɑbɛɛsṹɔ̃̀bɛ̀ nɛ̀ bɛtɑ̃́cíɛ̀bɛ̀ kɛ̀ bɛ̀ bo ò mɑɑ́ tɛkpɑ̀ɑ̀tìcĩ́ɛ̃̀tɛ̀. 
\v 12 Kɛ̀ Dɑfitii bɑntɛ́ kɛ dò nti Yiɛ̀ nKuyie kuù ò duɔ́ ntikpɑ̀tì, kɛ̀ kuù tì dɛ́úkùnnɛ ku nìtìbɛ̀ Isidɑyɛɛribɛ kpɛ́í.
\s1 Dɑfiti pɛitɛ́ ìì bí Sedisɑdɛmmu i yètɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 3:5-9. 14:3-7)
\p
\v 13 Kɛ̀ Dɑfitii ítɛ́ Ebunɔɔ kɛ́kò nSedisɑdɛmmu kɛ́túókɛ́ bɛnitipòbɛ̀ tɔbɛ̀ nɛ̀ yɛpocĩɛ̃̀ nkɛ̀ bɛ̀ɛ ò piɛ́ initidɑbí nɛ̀ initipobí. 
\v 14 Ntɛ ibí ò piɛ́ ì Sedisɑdɛmmu i yètɛ̀: Sɑmmuɑ nɛ̀ Sobɑbu nɛ̀ Nɑtɑ̃ɑ̃ nɛ̀ Sɑdomɔɔ, 
\v 15 nɛ̀ Ibɑdi nɛ̀ Edisuɑ nɛ̀ Nɛfɛki nɛ̀ Yɑfiyɑ, 
\v 16 nɛ̀ Edisɑmɑɑ nɛ̀ Ediɑdɑ nɛ̀ Edifedee.
\s1 Dɑfiti nɑmɛ̀ Fidisitɛ̃ɛ̃bɛ
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 14:8-16)
\p
\v 17 Kɛ̀ Fidisitɛ̃ɛ̃bɛ keè Isidɑyɛɛribɛ còúmmɛ̀ mɛkùɔ̀ nDɑfiti koò pĩ ntikpɑ̀tì kòo bo mbɛ̀ bɑkɛ́ kɛ̀ Fidisisitɛ̃ɛ̃bɛ bɛmɔu ítɛ́ kɛ bo o pì, kɛ̀ Dɑfitii tì kèè kɛ́tɑ kutɑ̃dènkù kɛ́sɔri. 
\v 18 Kɛ̀ Fidisitɛ̃ɛ̃bɛɛ tuɔkoo kɛ́pitɛ́ Defɑiibɛ biriku miɛkɛ. 
\v 19 Kɛ̀ Dɑfitii beé nti Yiɛ̀ nKuyie nkɛ dɔ̀: Kuyie n dò nkɛ́kɔtɛ kɛ́kpɑnnɛ̀ Fidisitɛ̃ɛ̃bɑɑ? A bo bɛ̀ ɑ̃nnɛ́ n nɔu miɛkɑɑ̀? Kɛ̀ ti Yiɛ̀ nKuyie ndɔ̀: Kɔtɛ n yóó bɛ̀ ɑ̃nnɛ́mu ɑ nɔu miɛkɛ.
\p
\v 20 Kɛ̀ Dɑfitii kɔtɛ Bɑɑdi-Pedɑsimmu kɛ́nɑ Fidisitɛ̃ɛ̃bɛ kɛ́bɛ́i nkɛ dɔ̀: Ti Yiɛ̀ nKuyie nkpɛ̃̀tɛ́ n dootitɔbɛ̀ mɛniɛ nhɔ̃ɔ̃ kpɛ̃́tɛ́ mɛ̀ɛ̀ botí kukpɛ̃́roo.
\p Dɛɛ̀ te kɛ̀ bɛ̀ yu dɛ kó dibòrì kɛ tú Bɛkpɛ̃tíbɛ̀ yiɛ̀. 
\v 21 Kɛ̀ Fidisitɛ̃ɛ̃bɛɛ cokɛ́ kɛ́yóu bɛ bɔkɛ̀, Dɑfiti nɛ̀ o kɔbɛ kɛ̀ bɛ̀ɛ yɛ̀ tùótɛ́.
\b
\p
\v 22 Kɛ̀ Fidisitɛ̃ɛ̃bɛɛ wɛ̃tɛ kɛ́bɑ́ɑ́tí kucɛ mɛdɛ́rímɛ̀ kɛ bo dokɛ́nɛ̀ Isidɑyɛɛribɛ, kɛ tó bɑ́tɛ́ Defɑiibɛ biriku kɛ́pitɛ́. 
\v 23 Kɛ̀ Dɑfiti tó beé nti Yiɛ̀ nKuyie nkɛ̀ kù dɔ̀: A bɑ́ɑ́ bɛ̀ wetínnɛ́, tũnnɛ bɛ fɔ̃nkúò ɑ bo bɛ̀ nìntɛ dɛtediɛrɛ̀ túúkù borɛ̀. 
\v 24 Kɑ̀ɑ kèè dìì mɔ̀nnì kunɑmpoo dɛtie nyómmɛ̀ ɑ́ tonkùnnɛ ɑmɑ́ɑ̀ míì tùɔ̀koo kɛ bo potɛ́ Fidisitɛ̃ɛ̃bɛ ɑ̃ɑ̃pɔ̀mbɛ̀.
\p
\v 25 Kɛ̀ Dɑfitii dɔɔ̀ ti Yiɛ̀ nKuyie nhò nɑ̀kɛ́ tì kɛ́potɛ́ Fidisitɛ̃ɛ̃bɛ kɛ́ bɛ̀ bɛ̀ti Kebɑɑ kɛ́tuɔkɛnɛ̀ Kesɛɛ borɛ̀.
\c 6
\s1 Dɑfiti dɔ́mɛ̀ kɛ́kpɛ̃nnɛ́ Kuyie ntɑummɛ̀ tɔu Sedisɑdɛmmu
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 13:4-14)
\p
\v 1 Kɛ̀ Dɑfiti tó tíí nyIsidɑyɛɛribɛ kó bɛhɑ̃ɑ̃pɔ̀nkperíbɛ̀ bɛmɔu kɛ̀ bɛ̀ mbo sikɔupípísìtɑ̃ɑ̃ti (30000). 
\v 2 Kɛ̀ bɛ̀ɛ nɛinɛ̀ Dɑfiti kɛ̀ bɛ̀ɛ kɔtɛ Bɑɑdɑ-Sudɑɑ tempɛ̃ mmiɛkɛ kòò bo túótɛ́ní Kuyie ntɑummɛ̀ tɔu. Diì borɛ̀ ndɛ bɛ̀ do ɔ̃ɔ̃ yúmɛ̀ ti Yiɛ̀ nKuyie Mpɑkɛdɑɑ yètìrì, Kuyie ntɔ̃rɛ̀ yɛ̀dɛ́ɛ̀ bɛ̀ tu yɛ̀ bɛĩ́nkɛ̀mbɑ̀rìbɛ̀ yɛ fèntì ĩ́nkɛ̀. 
\v 3-4 Dɛ kó ditɔu do bo Abinnɑdɑbu cĩ́ɛ̃̀tɛ̀ ntɛ ditɑ̃rì ĩ́nkɛ̀. Kɛ̀ bɛ̀ɛ dì dɑɑ́ ntɛnɑɑsɑ̃ntɛ̀ pɑ̀ntɛ̀ ĩ́nkɛ̀, kɛ̀ Abinnɑdɑbu bí Usɑɑ nɛ̀ Aiyo kɛ̀ bɛ̀ ntɛ̀ nɛínɛ̀ kɛ̀ Usɑɑ bo tɛ píkù kɛ̀ Aiyo tɛ̀ dɛ̀ri kɛ̀ bɛ̀ kèrí. 
\v 5 Dɑfiti nɛ̀ Isidɑyɛɛribɛ bɛmɔu kɛ̀ bɛ̀ yɑ̃̀nku ti Yiɛ̀ nKuyie ntɑummɛ̀ tɔu ììkɛ̀, kɛ bie ntikùtìdùùtì tibotí tibotí, nɛ̀ yɛbɑ̀rɛ̀ kɛ sɑ́ɑ́rì yɛcírɛ̀. 
\v 6 Bɛ̀ tùɔ̀kɛ dìì mɔ̀nnì Nɑkɔ̃ɔ̃ yiɛ́ borɛ̀, kɛ̀ inɑ̀ɑ̀kɛ ndɔ́ kɛ́bɔ nKuyie ntɑummɛ̀ tɔu, kɛ̀ Usɑɑ youtɛ o nɔ̀ùtɛ̀ kɛ bo dì cɔ̀útɛ́, 
\v 7 kɛ̀ ti Yiɛ̀ nKuyie mmiɛkɛɛ ò pɛikɛ kɛ̀ kùu ò potɛ́ dɛndɛ bɑ̀mbɑ̀ o yetímɛ̀ kpɛ́í, kòo kú Kuyie ntɑummɛ̀ tɔu borɛ̀.
\p
\v 8 Kɛ̀ dɛ̀ɛ yonkɛ Dɑfiti ti Yiɛ̀ nKuyie mpotɛ́ mɛ̀ɛ̀ kpɛ́í nhUsɑɑ. Kòò yú dɛborɛ̀ kɛ dɔ̀. Pedɛsi-Usɑɑ, kɛ̀ dɛ kó diyètìrì kpɑɑ́ bo nɛ̀ yíenní. 
\v 9 Kɛ̀ Dɑfitii yɔtɛ ti Yiɛ̀ nKuyie ndɛ yiè kɛ dɔ̀: M bɑ́ɑ́ dɑ́ɑ́tí kɛ̀ ti Yiɛ̀ nKuyie ntɑummɛ̀ tɔuu tɑ n cĩ́ɛ̃̀tɛ̀.
\p
\v 10 Mɛm̀mɛ kòo yetɛ bɛ̀ bo di tɑnnɛ́mɛ̀ o cĩ́ɛ̃̀tɛ̀ kɛ́duɔ́ nkɛ̀ bɛ̀ɛ di tɑnnɛ́ Obɛdi-Edɔmmu Kɑti kó dihɛì kou cĩ́ɛ̃̀tɛ̀. 
\v 11 Kɛ̀ dì mbo o cĩ́ɛ̃̀tɛ̀ kɛ dɔ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti, kɛ̀ ti Yiɛ̀ nKuyie nhò dɔ̀ɔ̀ mɛsɑ̀ɑ̀ nwenwe nɛ̀ o cĩ́ɛ̃̀tɛ̀ tɛmɔu.
\s1 Kuyie ntɑummɛ̀ tɔu tùɔ̀kɛmɛ̀ Sedisɑdɛmmu
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 15:25-16:3)
\p
\v 12 Kɛ̀ bɛ̀ɛ nɑ́kɛ́ Dɑfiti kɛ dɔ̀ ti Yiɛ̀ nKuyie ndɔ̀ɔ̀ Obɛdi-Edɔmmu mɛsɑ̀ɑ̀ nkòo kpɛrɛ dɛmɔu kèrí sɛ́i, Kuyie ntɑummɛ̀ tɔu bo mɛ̀ɛ̀ kpɛ́í nho cĩ́ɛ̃̀tɛ̀, kɛ̀ Dɑfitii kɔtɛ Obɛdi-Edɔmmu ciɛ kɛ̀ bɛ̀ bo dì tùótɛ́ kɛ́konnɛ̀nní o ciɛ kɛ̀ bɛ̀ ndi tɔ kɛ̀ dɛ̀ dò ndibɑnni mɛdiɛ̀. 
\v 13 Bɛ̀ɛ̀ tɔ ti Yiɛ̀ nKuyie ntɑummɛ̀ tɔu kɛ̀ bɛ̀ dɔ̀ yɛnɑcɛ̀nɑ̀ yɛ̀kuɔ̀ kɛ̀ Dɑfitii féútɛ́ dinɑɑdɑpɑ̀nnì nɛ̀ dipedɑɑ̀ dɛ̀ɛ̀ ɑ̃ mɛkùɔ̀, 
\v 14 kɛ́deè kɛ́nhɑu nɛ̀ o wɛ̃rímú mumɔu kɛ dɛ́úkùnko ti Yiɛ̀ nKuyie nyètìrì kɛ dɑ́ɑ́tí ikuɔ́ yɑɑ̀bòrì. 
\v 15 Kɛ̀ bɛ̀ ntɔní ti Yiɛ̀ nKuyie ntɑummɛ̀ tɔu kɛ íútí nɛ̀ diwɛ̀ì kɛ eu siheú kɛ kũntiní Sedisɑdɛmmu.
\p
\v 16 Ti Yiɛ̀ nKuyie ntɑummɛ̀ tɔu tùɔ̀kɛní dìì mɔ̀nnì Dɑfiti cĩ́ɛ̃̀tɛ̀, kɛ̀ Sɑuri kóo sɑpɑ̀ɑ̀ mMikɑɑdi síékɛ́ní tɛbòtɛ̀ kɛ́yɑ̀ Dɑfiti ɑumɛ̀ ti Yiɛ̀ nKuyie ntɑummɛ̀ tɔu ììkɛ̀, kóò sènkɛ̀rì. 
\v 17 Kɛ̀ bɛ̀ɛ tɑnnɛ́ ti Yiɛ̀ nKuyie ntɑummɛ̀ tɔu ditou Dɑfiti do dì mɑɑ́ dì, kɛ́ĩ́nnɛ́ dɛ cuokɛ̀ dì do dò nkɛ́nyĩ́ĩ́kú dɛ̀, kɛ́fíé iwũɔ̃ ti Yiɛ̀ nKuyie nkɛ́tuɔ kɛ́fíé itɛì mɛtɑummɛ̀ kpɛyi. 
\v 18 Ò fìé dìì mɔ̀nnì iwũɔ̃ kɛ́deè nkɛ́yú ti Yiɛ̀ nKuyie Mpɑkɛdɑɑ Isidɑyɛɛribɛ bɑ̀ɑ́ nkù yètìrì kɛ́ bɛ̀ pɑ̃ mɛsɑ̀ɑ̀, 
\v 19 kɛ́deè kɛ́totí Isidɑyɛɛribɛ bɛmɔu tidiitì bɛnitidɑɑbɛ̀ nɛ̀ bɛnitipòbɛ̀, kɛ́duɔ́ mbɑ́ wè pɛ̃́ɛ̃̀ nɛ̀ dikɑ̀tìndɑ̀ɑ̀ bɛ̀ dɔ̀ɔ̀nɛ̀ dì ditebii bɛ̀ tu dì dɑ́tì nɛ̀ ditɛrì bɛ̀ dɔ̀ɔ̀nɛ̀ dì fínyĩ̀ kó yɛbɛ kperɛ̀. Dɛ kó difɔ̃nkúò bɑ́ wè kòo kò nho cĩ́ɛ̃̀tɛ̀.
\p
\v 20 Mɛm̀mɛ Dɑfiti tɑmɛ̀ o cĩ́ɛ̃̀tɛ̀ kɛ bo dɔu nho kɔbɛ, kɛ̀ Mikɑɑdii yɛ̀nní kóò co kɛ dɔ̀: Isidɑyɛɛribɛ kpɑ̀ɑ̀tì wɑɑ́ nhomɑ́ɑ̀ disɑ̃nni yíe nkɛ feí nho kɔ̃̀ntì tidɑɑtì bɛnitidɑɑbɛ̀ nɛ̀ bɛnitipòbɛ̀ ììkɛ̀, dɛnitisĩ́ntɛ́kpɛrɛ tɛ̃mɛ̀.
\p
\v 21 Kɛ̀ Dɑfiti dɔ̀: N dɔ̀ɔ̀ mɛmmɛ kɛ dɛ́úkùnko ti Yiɛ̀ nKuyie nyètìrì ndi, kunku kùù yóu ɑ cicɛ nɛ̀ ɑ cĩ́ɛ̃̀tɛ̀ tɛmɔu kɛ n tɑ̃ɑ̃tɛ́ kɛ̀ n tú Isidɑyɛɛribɛ kpɑ̀ɑ̀tì, n yóó dɔkɛ bɛnkɛmu n wɛ̀ì ku ììkɛ̀. 
\v 22 N yóó yíɛ́ kɛ dɔkɛ kɛ̃́kùnnɛmu m mɑ́ɑ̀ ku ììkɛ̀, kɛ́cɛ̃̀ m mɑ́ɑ̀, mɛmmɛ bɛtɔ̃mbɛ̀ ɑ nɑ́ɑ́ mbɛ̀ɛ kpɛ́í nɛ́ yó n dɛ́úkùnɛmɛ̀.
\p
\v 23 Sɑuri kóo sɑpɑ̀ɑ̀ mMikɑɑdi í mpɛitɛ́ kɛ yɑ̀ɑ kúnɛ̀.
\c 7
\s1 Kuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ nɑ̀kɛ́ tì Dɑfiti
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 17:1-15)
\p
\v 1 Kɛ̀ Dɑfiti mbo o cĩ́ɛ̃̀tɛ̀ kɛ̀ ti Yiɛ̀ nKuyie nkɛi nho dootitɔbɛ̀ bɛ̀ɛ̀ ò fitɛ́ kóò òmpùnnɛ. 
\v 2 Diyiè mɑrì kòo nɑ́kɛ́ Kuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ kɛ dɔ̀: Mí nh ɑ̃ tɛcĩ́ɛ̃̀tɛ̀ idɛí kperí kpɛtɛ kɛ̀ Kuyie ntɑummɛ̀ tɔu nɛ́ bo ditou dìì dɔ̀ɔ̀nɛ̀ tiyɑ̀ɑ̀tì di miɛkɛ. A yɛ̀mmɛ̀ dòmmɛ? 
\v 3 Kɛ̀ Nɑtɑ̃ɑ̃ ò nɑ̀kɛ́ kɛ dɔ̀: Okpɑ̀ɑ̀tì kɑ̀ɑ yɛ̀mmɛ̀ dòmmɛ̀, dɔɔ̀ mɛ, ti Yiɛ̀ nKuyie ndɑ bonɛ̀mu.
\p
\v 4 Dɛ kó kɛyènkɛ̀ kɛ̀ ti Yiɛ̀ nKuyie nnɑ́kɛ́ Nɑtɑ̃ɑ̃ kɛ dɔ̀: 
\v 5 Kɔtɛ kɛ́nɑ́kɛ́ n kóo tɔ̃ntì Dɑfiti kɛ dɔ̀ weè í yó m mɑɑ́ tɛcĩ́ɛ̃̀tɛ̀ n yó mbo tɛ̀ɛ̀ miɛkɛ. 
\v 6 M mu nyí buotɛ́ tɛcĩ́ɛ̃̀tɛ̀ mɑtɛ̀ miɛkɛ nɛ̀ n dènnɛ dìì yiè Isidɑyɛɛribɛ Esibiti miɛkɛ nɛ̀ yíenní, n do bɛ̀ nɛínɛ̀ kɛ bo kutouku miɛkɛ nkɛ. 
\v 7 Nɛ̀ m bonɛ̀ dìì dɑɑ̀ Isidɑyɛɛribɛ bɛ cèmmu miɛkɛ m bɑ́ mbekɛ onìtì mɔù kɛ tú wè m mɑɑ́ tɛcĩ́ɛ̃̀tɛ̀ nɛ̀ idɛí kperí.
\p
\v 8 Á nɑ́kɛ́ n kóo tɔ̃ntì Dɑfiti kɛ dɔ̀: Mí ndi Yiɛ̀ nKuyie Mpɑkɛdɑɑ míì tu ò do cɛ̃mmù ipe nyi kɛ̀ nh ò tɑ̃ɑ̃tɛ́ kòò nɑɑ́ nyIsidɑyɛɛribɛ kóo kpɑ̀ɑ̀tì. 
\v 9 Kɛ̀ nni nhò bonɛ̀ ò kɔ̀rì yɛ̀ɛ̀ borɛ̀, kɛ́kuɔ o dootitɔbɛ̀ bɛmɔu, kɛ dɛ́úkùnnɛ o yètìrì kɛ̀ dì mɑ̀ɑ̀tɛnɛ̀ kutenkù kó bɛnitidiɛbɛ̀ kpɛyɛ. 
\v 10 N yóó duɔ́mmu n nìtìbɛ̀ Isidɑyɛɛribɛ dikɑrì bɛ̀ yó mborɛ̀ kɛ í yĩɛ̃̀kù tìmɑtì. Kubotí yɛiku tɛkù mɑkù kɔbɛ tɛ̃́nkɛ bɑ́ɑ́ nɑ kɛ́ mbɛ̀ fɛ̃́ũnko bɛ̀ do bɛ̀ fɛ̃́ũnko mɛ̀ɛ̀ botí, 
\v 11 nh ɑ̃nnɛ́ dìì mɔ̀nnì bɛbɑɑtíbɛ̀ kɛ̀ bɛ̀ nni n nìtìbɛ̀ Isidɑyɛɛribɛ. Di mmɔ̀nnì n fũ̀ũ̀mmu ɑ dootitɔbɛ̀ kɛ dɑ om̀pùnnɛ, n nɛ́ dɑ nɑ́ɑ́mmu kɛ tú mí ndi Yiɛ̀ nKuyie m bo dɑ duɔ́ ntɛcĩ́ɛ̃̀tɛ̀. 
\v 12 Kɑ̀ɑ yiè tùɔ̀kɛ dìì mɔ̀nnì kɑ̀ɑ kò nhɑ yɛmbɛ̀ kũũ̀ nkɛ̀ m bo tɑ̃ɑ̃tɛ́ ɑ bí ɑ pɛitɛ́ ì miɛkɛ òmɔù kɛ́fíí nho kpɑ̀tì. 
\v 13 Weè yó m mɑɑ́ tɛcĩ́ɛ̃̀tɛ̀, mí mmɔ́mmuɔ nkɛ̀ n fíí nho kpɑ̀tì teii, kɛ̀ tì mbo yɛmɔ̀rɛ̀ yɛmɔu. 
\v 14 M bo ntú o cicɛ kòò tu m birɛ, kòò dɔ̀ɔ̀ dɛ̀ɛ̀ í wenni nh ò potɛ́ onìtì ɔ̃ɔ̃ potɛ́ mɛ̀ɛ̀ botí o birɛ. 
\v 15 N nɛ́ í yóó dɛitɛ n kó mɛsɑ̀ɑ̀ nho ĩ́nkɛ̀ kɛ́ndònnɛ̀ m mɛ̀ dɛ̀itɛmɛ̀ Sɑuri ĩ́nkɛ̀, nh ò yóu dìì mɔ̀nnì kɛ dɑ tùótɛ́. 
\v 16 Tikpɑ̀tì yó mbomu ɑ cĩ́ɛ̃̀tɛ̀ sɑ̃́ɑ̃̀ kɑ̀ɑ yɑɑ̀bí ntì sɔkɛ́.
\p
\v 17 Kɛ̀ Nɑtɑ̃ɑ̃ kɔtɛ kɛ́nɑ́kɛ́ Dɑfiti Kuyie nhò nɑ̀kɛ́ tì nɛ̀ kù ò bɛnkɛ tì timɔu.
\s1 Dɑfiti bɑ̀ɑ́mmɛ̀ Kuyie
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 17:16-27)
\p
\v 18 Kɛ̀ Dɑfitii kɔtɛ ti Yiɛ̀ nKuyie ntɑummɛ̀ tou kɛ́ kù bɑ́ntɛ̀ kɛ dɔ̀: N Yiɛ̀ nKuyie, n tú we! N cĩ́ɛ̃̀tɛ̀ tu ɔ̃̀ntɛ kɑ̀ɑ n dɔ̀ɔ̀ mɛsɑ̀ɑ̀ nhɑ mɛ̀ nni dɔ̀ɔ̀ mɛ̀. 
\v 19 Bɑ́ dɛ̀ nɛ́ mu nyí dɑ sɑ̀nnɛ̀ kɑ̀ɑ sɔkɛ́ kɛ nɑ́ɑ́ ndɛ̀ yó mboní kɑ̀ɑ dɔɔ̀ dɛ̀ mí nhɑ kóo tɔ̃ntì n cĩ́ɛ̃̀tɛ̀ kɛ tì nni nnɑ́ɑ́ mmí nhonìtì. 
\v 20 Ti Yiɛ̀ nKuyie, m bo yíɛ́ kɛ dɔ̀ bɑ tɛ̃́nkɛ, ɑ n yɛ̃́mɛ̀mu mí nhɑ kóo tɔ̃ntì. 
\v 21 A n dɔ́mu dɛɛ̀ te kɑ̀ɑ n nɑ̀kɛ́ dɛ̀ yó mboní kɑ̀ɑ n dɔɔ̀ tì kɛ ti nni mbɛnkɛ mí nhɑ kóo tɔ̃ntì. 
\v 22 Ti Yiɛ̀ nKuyie nhɑ dɛumu òmɔù í dɑ mɑ̀nnɛ̀, ti kèèmu nɛ̀ ti to bɛ̀ nɑ̀ɑ́mmɛ̀ kɛ tú, kɛ̀ dɛ̀ í tú fɔ̃́ nhòmɔù í dɑ dònnɛ̀. 
\v 23 Kubotí mɑkù mɛ nyí bo kùù dònnɛ̀ Isidɑyɛɛribɛ, ɑ kɔ̀tɛní kɛ dɛɛtɛ́ bɛ̀ Esibiti kɔbɛ nɔu miɛkɛ nɛ̀ bɛ kó yɛbɔkɛ̀, kɛ bɛ̀ dɔ̀ɔ̀ ɑ bí, kɛ fei mbɛ yètìrì, kɛ pĩ mmutɔ̃mmú diɛmù ɑ bɛ̀ duɔ́ ndìì ɛì miɛkɛ, kɛ mù duò tikɔ̃m̀bùɔ̀tì. 
\v 24 Kɑ̀ɑ tɑ̃ɑ̃tɛ́ Isidɑyɛɛribɛ kɛ̀ bɛ̀ bo ntú ɑ kɔbɛ sɑ̃́ɑ̃̀ kɑ̀ɑ bɛ̀ te. 
\v 25 Ti Yiɛ̀ nKuyie nhɑ bɛ́i ntìì kó dimɑ̀ɑ̀ mí nhɑ kóo tɔ̃ntì n kpɛ́í nnɛ̀ n cĩ́ɛ̃̀tɛ̀ kpɛ́í, m pĩ nti kɛ́dɔɔ̀ kɛ́ndònnɛ̀ ɑ bɛ́immɛ̀. 
\v 26 A sɑ̃nni ńdɛu sɑ̃́ɑ̃̀ kɛ̀ bɛnìtìbɛ̀ ntú ti Yiɛ̀ nKuyie Mpɑkɛdɑɑ Isidɑyɛɛribɛ bɑ̀ɑ́ nkù kuù tu Kuyie. Mí nhɑ kóo tɔ̃ntì kɛ̀ n cĩ́ɛ̃̀tɛ̀ mbo sɑ̃́ɑ̃̀. 
\v 27 Fɔ̃́ nKuyie Mpɑkɛdɑɑ Isidɑyɛɛribɛ bɑ̀ɑ́ nkù, fɔ̃́ɔ̃̀ bɛ́i nnɛ̀ ɑ nùù kɛ tú ɑ bo n duɔ́ nyibí kɛ̀ ìi sɔɔtɛ́ n kpɑ̀tì, dɛɛ̀ te kɛ̀ n dɑ̀ɑ́tí kɛ dɑ bɛ́innɛ̀ miɛ mbotí mí nhɑ kóo tɔ̃ntì. 
\v 28 Á tú Kuyie nku, kɑ̀ɑ bɛ́i ntì tìi dɔɔ̀, fɔ̃́ɔ̃̀ bɛ́i nkɛ tú ɑ bo n dɔɔ̀ mɛsɑ̀ɑ̀. 
\v 29 A dɔɔ̀ n cĩ́ɛ̃̀tɛ̀ mɛsɑ̀ɑ̀, kɛ̀ n yɑɑ̀bí ii ntú bɛkpɑ̀ɑ̀tìbɛ̀ sɑ̃́ɑ̃̀, ti Yiɛ̀ nKuyie nkɛ́ndònnɛ̀ ɑ bɛ́immɛ̀ ɑ kó mɛsɑ̀ɑ̀ nni mbonɛ̀ n cĩ́ɛ̃̀tɛ̀ sɑ̃́ɑ̃̀.
\c 8
\s1 Dɑfiti nɑmɛ̀ ibotí tɛì
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 18:1-13)
\p
\v 1 Kɛ̀ Dɑfitii nɑ Fidisitɛ̃ɛ̃bɛ kɛ̀ bɛ̀ɛ ò bɔ̀útɛ́, kɛ tɛ̃́nkɛ í mmɔkɛ muwɛ̃rímú mɑmù dɛ kó kutempɛ̃ mmiɛkɛ. 
\v 2 Kɛ múnkɛɛ nɑ Moɑbiibɛ, kɛ́ mbɛ̀ tɑ̃ũnko kɛtenkɛ̀, kɛ níí bennɛ́ kuhɔ̃ũ mɛ̀dɛ́mɛ̀ kɛ́kuɔ kɛ́bennɛ́ mɛ̀mɑ́ɑ̀ kɛ́fĩ́ĩ, nkɛ̀ Moɑbiibɛɛ nɑɑ́ nDɑfiti kó bɛtɔ̃mbɛ̀ kɛ́ nhò yietì dɑ̀mpóò. 
\v 3 Kòo yíɛ́ kɛ́nɑ Adɑdesɛɛ Deɔbu birɛ Tisobɑ kpɑ̀ɑ̀tì kɛ sɔ̃́ nhò dɔ́ kɛ́cɔutɛ́ Efɑdɑti kó kutempɛ̃. 
\v 4 Kɛ̀ Dɑfitii pĩ́ mbɛsɑ̃ndèèbɛ̀ tɛkɔupíítɛ̀ nɛ̀ sikɔusìyiekɛ̀ (1700) kɛ́pĩ́ mbɛhɑ̃ɑ̃pɔ̀mbɛ̀ sikɔupípísìdɛ́ (20000) kɛ́kékɛ́ sikpɑ̀rìsɛ̃ĩ́ sìì dɛ̀rì sinɑɑsɛ̃ĩ́ si duɔti, kɛ́súɔ́ nhòmɑ́ɑ̀ sikpɑ̀rìsɛ̃ĩ́ nɛ̀ dɛ kó sinɑɑsɛ̃ĩ́ tɛkɔ̀ùtɛ̀ (100). 
\v 5 Kɛ̀ Sidii kɔbɛ bɛ̀ɛ̀ bo Dɑmɑɑsi kɛ̀ bɛ̀ɛ ítɛ́ní kɛ́tee nhAdɑdesɛɛ Tisobɑ kóo kpɑ̀ɑ̀tì kɔbɛ, kɛ̀ Dɑfitii kuɔ Sidii kɔbɛ sikɔupípísìdɛ́ nɛ̀ sikɔupísìdɛ́ (22000), 
\v 6 kɛ́tiekɛ Sidii kó kɛtenkɛ̀ kɛ́kɑnnɛ kùmɑ̀ndɑ́ɑ̀bɛ̀ Dɑmɑɑsi ɛì kɛ̀ Sidii kɔbɛ nhò yietì dɑ̀mpóò. Kɛ̀ ti Yiɛ̀ nKuyie nhò duɔ́ mmuwɛ̃rímú kòo nnɔ nho dootitɔbɛ̀ ò kɔ̀rì kɛ̀ɛ̀ bíɛ́kɛ̀ mudoò. 
\v 7 Kɛ̀ Dɑfitii fietɛ Adɑdesɛɛ ɑ̃ɑ̃pɔ̀mbɛ̀ sɔɔdɔpììtì kɛ́kònnɛ̀ Sedisɑdɛmmu, 
\v 8 kɛ́túótɛ́ disɔɔwũɔ̃̀ mɛdiɛ̀ ndìì do bo Betɑɑ nɛ̀ Bedotɑi Adɑdesɛɛ kó yɛhɛkɛ̀ miɛkɛ.
\p
\v 9 Kɛ̀ Amɑti ɛì kóo kpɑ̀ɑ̀tì Touu keè Dɑfiti nɑmɛ̀ Adɑdesɛɛ ɑ̃ɑ̃pɔ̀mbɛ̀ 
\v 10 kɛ́tɔ̃nní o birɛ Yodɑmmu kòò bo dɔu nDɑfiti kóò sɑ̃ntɛ ò kɔ̀tɛmɛ̀ mudoò kɛ nɑ Adɑdesɛɛ. Tou dootitɔù múnkɛ do tú weè Adɑdesɛɛ. Kɛ̀ Yodɑmmu nkérí kɛ tɔ disɔɔwũɔ̃̀ nɛ̀ mɛsɔɔ nnɛ̀ timɑ́tì pɛ́ítì bɛ̀ dɔ̀ɔ̀rinɛ̀ tì idíítí dɛ kó tinɛntì kɛ́duɔ́ nDɑfiti. 
\v 11-12 Kòo dɛ̀ duɔ́ nti Yiɛ̀ nKuyie nhò do duɔ́ mmɛ̀ɛ̀ botí dɛketirɛ̀ ò do nɑ Sidii kɔbɛ nɛ̀ Mɔɑbiibɛ nɛ̀ Amɔniibɛ nɛ̀ Fidisitɛ̃ɛ̃bɛ kɛ́hɛí dɛ̀, kɛ nɛ́ yíɛ́nɛ̀ ò do nɑ Adɑdesɛɛ kɛ́ɛí dɛ̀. 
\v 13 Mɛm̀mɛ Dɑfiti yètìrì dɛukɛmɛ̀.
\p Ò nɑ dìì mɔ̀nnì Sidii kɔbɛ kɛ́konní kɛ́nɑmu Edomiibɛ kubiriku bɛ̀ tu kù Kukɔ́kɛ́biriku ku miɛkɛ kɔbɛ kɛ́kuɔ bɛnìtìbɛ̀ tɛkɔupípíítɛ̀ nɛ̀ sikɔupísìni (18000), 
\v 14 kɛ́tiekɛ Edɔmmu kɛ́kɑnnɛ kùmɑ̀ndɑ́ɑ̀bɛ̀ kɛ̀ ti Yiɛ̀ nKuyie nhò duɔ́ mmuwɛ̃rímú, kòò kɔ̀tɛ kùù píkù weè nɑ.
\s1 Dɑfiti kó bɛtɔ̃mbɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 18:14-17)
\p
\v 15 Kɛ̀ Dɑfiti mbɑkɛ́ Isidɑyɛɛribɛ bɛmɔu, kɛ́mbekùnɛ̀ bɛnìtìbɛ̀ bɛmɔu kɛ̀ dɛ̀ wenni. 
\v 16 Kɛ̀ Soɑbu Seduyɑ birɛ mbɑkɛ́ bɛhɑ̃ɑ̃pɔ̀mbɛ̀ kɛ̀ Aidudi birɛ Yosɑfɑti ntú wèè tɔ dihɛì kó yɛpɑ́tɛ. 
\v 17 Kɛ̀ Aitubu birɛ Sɑdɔki nɛ̀ Abiɑtɑɑ birɛ Aimmɛdɛki kɛ̀ bɛ̀ ntú ikuɔ́ nìùbɛ̀. Kɛ̀ Seduyɑɑ tu opɑ́tíwɑ̃ɑ̃̀tì. 
\v 18 Kɛ̀ Yoyɑdɑ birɛ Bennɑyɑ mbɑkɛ́ Kedetiibɛ nɛ̀ Pedesiibɛ bɛ̀ɛ̀ bɑ̀ɑ tɛkpɑ̀ɑ̀tìcĩ́ɛ̃̀tɛ̀. Kɛ̀ Dɑfiti bí nhò tũ̀nko.
\c 9
\s1 Dɑfiti cɔutɛ́mɛ̀ Mɛfibosɛti o cĩ́ɛ̃̀tɛ̀ miɛkɛ
\p
\v 1 Diyiè mɑrì kɛ̀ Dɑfitii bekɛ kɛ dɔ̀: Òmɔù í kpɑɑ́ fòù Sɑuri nɑɑ̀mùnkù miɛkɛ kɛ̀ nh ò dɔ̀ɔ̀ mɛsɑ̀ɑ̀ nnɛ̀ Sonnɑtɑ̃ɑ̃ kpɛ́ínɑ́ɑ̀?
\p
\v 2 Kɛ sɔ̃́ nSɑuri mɔ̀kɛ otɔ̃ntì mɔù kòo yètìrì tu Sibɑɑ kòo kɔtɛní Dɑfiti borɛ̀ kòo ò bekɛ kɛ dɔ̀: Fɔ̃́ nwe Sibɑɑ? Kòò dɔ̀: Ɛ̃ɛ̃, mínwe ɑ kóo tɔ̃ntì. 
\v 3 Kòo kpɑ̀ɑ̀tì Dɑfiti dɔ̀: Sɑuri nɑɑ̀mùnkù miɛkɛ òmɔù í kpɑɑ́ fòù kɛ̀ nh ò dɔ̀ɔ̀ mɛsɑ̀ɑ̀ nKuyie nkpɛ́ínɑ́ɑ̀? Kòo tɔ̃ntì dɔ̀: Sonnɑtɑ̃ɑ̃ birɛ kpɑɑ́mu kɛ tu kuhɔ̀ùkù. 
\v 4 Kòo kpɑ̀ɑ̀tì dɔ̀: Ò borɛ? Kòo tɔ̃ntì dɔ̀: Ò bo Doo-Dɑbɑɑ nwe Mɑkiiri Amiyɛɛdi birɛ cĩ́ɛ̃̀tɛ̀.
\p
\v 5 Kɛ̀ Dɑfitii tɔ̃ nhòmɔù kɛ̀ bɛ̀ɛ kɔtɛ Mɑkiiri cĩ́ɛ̃̀tɛ̀ kɛ́tɔní Mɛfibosɛti. 
\v 6 Sɑuri kóo dɑpɑ̀ɑ̀ Sonnɑtɑ̃ɑ̃ birɛ, ò tùɔ̀kɛní dìì mɔ̀nnì okpɑ̀ɑ̀tì Dɑfiti borɛ̀ kɛ́nínkú kɛ́sĩ́nnɔ́ɔ o ììkɛ̀ kòo ò bekɛ kɛ dɔ̀: Fɔ̃́ɔ̃̀ tu Mɛfibosɛtɑɑ? Kòò dɔ̀: Ɛ̃ɛ̃, mínwe ɑ kóo tɔ̃ntì. 
\v 7 Kòo kpɑ̀ɑ̀tì Dɑfiti dɔ̀: A bɑ́ nyĩɛ̃̀kù n yóó dɑ dɔɔ̀mu mɛsɑ̀ɑ̀ nhɑ cicɛ Sonnɑtɑ̃ɑ̃ kpɛ́í, n yóó dɑ tɛ̃́nnɛ́mu ɑ yɑ̀ɑ̀kù Sɑuri tenkɛ̀ kɛmɔu kɑ̀ɑ nyo m borɛ̀ yɛwe yɛmɔu.
\p
\v 8 Kɛ̀ Mɛfibosɛtii nínkú kɛ́sĩ́nnɔ́ɔ kɛ dɔ̀: Okpɑ̀ɑ̀tì, dɛ̀ dòmmɛ kɑ̀ɑ dɑ̀kɛ n kpɛ́í mmí ndɛmɔcírɛ̀?
\p
\v 9 Kòo kpɑ̀ɑ̀tìi duɔ́ nkɛ̀ bɛ̀ɛ yúní Sibɑɑ Sɑuri kóo tɔ̃ntì kòo ò nɑ̀kɛ́ kɛ dɔ̀: Sɑuri kpɛrɛ dɛmɔu nɛ̀ o cĩ́ɛ̃̀tɛ̀ kɔbɛ kpɛrɛ, n dɛ̀ duɔ́ nho yɑɑ̀birɛ Mɛfibosɛti nwe. 
\v 10 Fɔ̃́ nnɛ̀ ɑ bí díì yó nhò kuuti, kɛ tɔuní ò bo nyo mmù. Mɛfibosɛti yó nyo m borɛ̀ ndɛ sɑ̃́ɑ̃̀.
\p Sibɑɑ do mɔkɛ initidɑbí tɛpíítɛ̀ nɛ̀ ìnùmmù ndi, bɛtɔ̃mbɛ̀ sipísìdɛ́. 
\v 11 Kòo nɑ̀kɛ́ okpɑ̀ɑ̀tì Dɑfiti kɛ dɔ̀: N yóó dɔɔ̀mu ɑ n nɑ̀kɛ́ tìì kó dimɑ̀ɑ̀. Mɛm̀mɛ kɛ̀ Mɛfibosɛti nyo nhokpɑ̀ɑ̀tì Dɑfiti borɛ̀ kɛ dònnɛ̀ o bí.
\b
\p
\v 12 Mɛfibosɛti do mɔkɛ dɛdɑpùmbirɛ dɛ̀mɑ́ɑ̀ ndi kɛ̀ dɛ yètìrì tu Mikɑɑ, kɛ̀ Sibɑɑ cĩ́ɛ̃̀tɛ̀ kɔbɛ bɛmɔu tu Mɛfibosɛti kó bɛtɔ̃mbɛ̀. 
\v 13 Kɛ̀ Mɛfibosɛti mbo Sedisɑdɛmmu kɛ́nkɔrì kɛ yo nhokpɑ̀ɑ̀tì Dɑfiti borɛ̀. Ò do tú kuhɔ̀ùkù nku.
\c 10
\s1 Amɔniibɛ fɛikùnnɛmɛ̀ Dɑfiti tũ̀mbɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 19:1-5)
\p
\v 1 Kɛ̀ dɛ̀ mmɔkɛ yɛwe mɑyɛ̀ kɛ̀ Amɔniibɛ kóo kpɑ̀ɑ̀tìi kú, kòo birɛ Anunnii cɔutɛ́ tikpɑ̀tì. 
\v 2 Kɛ̀ Dɑfiti dɔ̀: M bo dɔɔ̀ Nɑɑsi birɛ Anunni mɛsɑ̀ɑ̀ nho cicɛ do mɛ nni ndɔ̀ɔ̀ mɛ̀. Mɛm̀mɛ kɛ̀ Dɑfitii tɔ̃ nho tũ̀mbɛ̀ kɛ̀ bɛ̀ bo dɔu nhAnunni nɛ̀ o cicɛ kó mukṹṹ. O tũ̀mbɛ̀ tùɔ̀koo dìì mɔ̀nnì Amɔniibɛ ciɛ, 
\v 3 kɛ̀ Amɔniibɛ kpɑ̀ɑ̀tì tũ̀mbɛ̀ɛ ò nɑ̀kɛ́ kɛ dɔ̀: A yɛ̀mmɛ̀ dò nDɑfiti tɔ̃nní o tũ̀mbɛ̀ kɛ̀ bɛ̀ bo dɑ dɔu nhɑ cicɛ kṹṹ mɑ́ɑ̀ ndi yɑ́ɑ bɑ? Ò bɛ̀ tɔ̃nní kɛ̀ bɛ̀ bo pɑɑtɛ́ dihɛì ndi kɛ́wɛ̃tɛní kɛ́ dì pɔ̀ntɛ.
\p
\v 4 Dɛ mɔ̀nnì kɛ̀ Anunnii duɔ́ nkɛ̀ bɛ̀ɛ bɛ̀ pĩ, kɛ́kuó bɛ̀ dɛɛ̀mbìi dikéè, kɛ́kékɛ́ bɛ yɑɑ̀bòrɛ̀ kɛ́bennɛ́nɛ̀ bɛ fɔ̃̀, kɛ́deè kòo bɛ̀ bɛ̀ti. 
\v 5 Kɛ̀ bɛ̀ɛ nɑ́kɛ́ okpɑ̀ɑ̀tì Dɑfiti, kòo tɔ̃ mbɛnìtìbɛ̀ kɛ̀ bɛ̀ɛ bɛ̀ co kɛ yɛ̃́ ifɛi do bɛ̀ kùɔmɛ̀. Kɛ̀ Dɑfitii bɛ̀ nɑ̀kɛ́ kɛ dɔ̀, bɛ̀ nkpɑɑ́ Sedikoo kɛ̀ bɛ dɛɛ̀mbìi yɛ̀nní kɛ̀ bɛ̀ nɛ́ nɑ kɛ́konní.
\s1 Isidɑyɛɛribɛ kpɑnnɛ̀mɛ̀ Amɔniibɛ nɛ̀ Sidii kɔbɛ
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 19:6-19)
\p
\v 6 Kɛ̀ Amɔniibɛɛ bɑntɛ́ bɛ̀ wɛ̃̀ńtɛ́mɛ̀ Dɑfiti kɛ́yietí Sidii kó bɛhɑ̃ɑ̃pɔ̀mbɛ̀ Bɛti-Deɔbu nɛ̀ Tisobɑ kɔbɛ sikɔupípísìdɛ́ (20000), okpɑ̀ɑ̀tì Mɑɑkɑ kɔbɛ tɛkɔupíítɛ̀ (1000), Tobu kɔbɛ tɛkɔupípíítɛ̀ nɛ̀ sikɔupísìdɛ́ (12000). 
\v 7 Dɑfiti tì kèè dìì mɔ̀nnì kɛ́tɔ̃ nSoɑbu nɛ̀ bɛhɑ̃ɑ̃pɔ̀mbɛ̀ bɛ̀ɛ̀ yɛ̃ dikpɑ̀nnì weti weti. 
\v 8 Kɛ̀ Amɔniibɛɛ yíɛ́ kɛ́pénnɛ́ bɛ kó kudookɔti dihɛì kó dibòrì borɛ̀, kɛ̀ Sidii kɔbɛ nɛ̀ Tisobɑ kɔbɛ nɛ̀ Bɛti-Deɔbu kɔbɛ nɛ̀ Tobu kɔbɛ nɛ̀ Mɑɑkɑ kɔbɛ kɛ̀ bɛmbɛ ḿbo kupíkù tɛkù dikpɑ́ɑ̀ miɛkɛ. 
\v 9 Kɛ̀ Soɑbuu yɑ̀ ò dòmmɛ̀ kɛ́bootɛ o dootitɔbɛ̀ tipíìtì tidɛ́tì nti, biɛ nho fɔ̃nkúò bɛtɔbɛ̀ o ììkɛ̀. Kòo tɑ̃ɑ̃tɛ́ bɛhɑ̃ɑ̃pɔ̀mbɛ̀ sɑ̀ɑ̀bɛ̀ Isidɑyɛɛribɛ cuokɛ̀ kɛ̀ bɛ̀ɛ wetínnɛ́ Sidii kɔbɛ. 
\v 10 Kòo túótɛ́ bɛhɑ̃ɑ̃pɔ̀mbɛ̀ sɔmbɛ kɛ́duɔ́ nho nɑntɛ̀ Abikɑii, kɛ̀ bɛ̀ɛ wetínnɛ́ Amɔniibɛ. 
\v 11 Kòo ò nɑ̀kɛ́ kɛ dɔ̀: Kɑ̀ɑ sɔ̃́ nkɛ̀ Sidii kɔbɛ dɔ́ kɛ́ n nɑ ɑ kɔtɛní kɛ́ n teennɛ̀, kɛ̀ Amɔniibɛ bɛɛ̀ mɛ ndɔ́ kɛ dɑ nɑ n kɔtoo kɛ́ dɑ teennɛ̀. 
\v 12 Yɑ́úkùnnɛ ɑ kɔ̃̀ntì, kɛ̀ tí kpɑnnɛ̀ dikɔ̃m̀bùɔ̀ kɛ́dɛɛtɛ́ ti nìtìbɛ̀ nɛ̀ Kuyie nti bɑ́ɑ́ nku ɛì. Kuyie ndɔɔ̀ kù dɔ́mɛ̀.
\p
\v 13 Soɑbu nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ kétɛ́ kɛ bo dokɛ́nɛ̀ Sidii kɔbɛ kɛ̀ bɛ̀ɛ cokɛ́. 
\v 14 Amɔniibɛ yɑ̀ dìì mɔ̀nnì Sidii kɔbɛ cokɛ́mɛ̀ kɛ múnkɛɛ cokɛ́ Abikɑii kɛ́kò mbɛ ɛì. Kɛ̀ Soɑbuu yóu Amɔniibɛ mubɛ̀tìmù kɛ́kò nSedisɑdɛmmu.
\b
\p
\v 15 Kɛ̀ Sidii kɔbɛɛ yɑ̀ Isidɑyɛɛribɛ bɛ̀ nɑmɛ̀ kɛ tíí mbɛhɑ̃ɑ̃pɔ̀mbɛ̀ bɛmɔu. 
\v 16 Kɛ̀ Adɑdesɛɛ tɔ̃ nkɛ̀ bɛ̀ɛ nɑ́kɛ́ Sidii kɔbɛ bɛ̀ɛ̀ bo kukó nhEfɑdɑti yɑ́ɑ̀, kɛ̀ bɛ̀ɛ tuɔkɛní Edɑmmu, kɛ̀ Sobɑki wèè bɑkɛ́ Adɑdesɛɛ ɑ̃ɑ̃pɔ̀mbɛ̀ kòò bɛ̀ ni. 
\v 17 Kɛ̀ Dɑfitii tì kèè kɛ́tíí nyIsidɑyɛɛribɛ ɑ̃ɑ̃pɔ̀mbɛ̀ kɛ́séntɛ́ Suditɛ̃ɛ̃ kɛ́tuɔkɛ Edɑmmu, kɛ̀ Sidii kɔbɛɛ ò pèńnɛ́ kudookɔti kɛ̀ bɛ̀ɛ tɑ mudoò. 
\v 18 Dɑfiti nɛ̀ o kɔbɛ kɛ̀ bɛ̀ɛ bɛ̀ nɑ kɛ́kuɔ sinɑɑsɛ̃ĩ́ sikɔusìyiekɛ̀ (700), sisɛ̃ĩ́ sikɔupípísìnɑ̀ɑ̀ (40000) nɛ̀ sì dèèbɛ̀ kɛ́kɔutɛ bɛ kóo kótì Sobɑki kòo kú dɛborɛ̀.
\p
\v 19 Adɑdesɛɛ kó bɛhɑ̃ɑ̃pɔ̀mbɛ̀ bɛmɔu sɔ̃́ ndìì mɔ̀nnì Isidɑyɛɛribɛ bɛ̀ nɑ kɛ́yóu kɛ́ bɛ̀ nɑrikɛnɛ̀, kɛ́mpĩ́ mbɛ tɔ̃mmú. Sidii kɔbɛ tɛ̃́nkɛ í ndɑ̀ɑ́tí kɛ bo teennɛ̀ Amɔniibɛ mudoò.
\c 11
\s1 Dɑfiti duɔ́nɛ̀mɛ̀ Bɑtisebɑɑ
\p
\v 1 Dibenni pɑ̀nnì bɛ̀ ɔ̃ɔ̃ ketɛ́ dìì mɔ̀nnì mudoò, kòo kpɑ̀ɑ̀tì Dɑfitii tɔ̃ nSoɑbu wèè bɑkɛ́ Isidɑyɛɛribɛ ɑ̃ɑ̃pɔ̀mbɛ̀, nɛ̀ bɛhɑ̃ɑ̃pɔ̀mbɛ̀ kɛ̀ bɛ̀ bo dokɛ́nɛ̀ Amɔniibɛ kɛ́ bɛ̀ pɔ̀ntɛ kɛ́pi bɛ ɛidiɛ̀ Dɑbɑɑ. Wenwe Dɑfiti kɛ̀ wenwe nkpɑɑ́ Sedisɑdɛmmu.
\p
\v 2 Kuyuoku mɑkù kɛ sɔ̃́ nhò òmpɛ̀ kɛ́ítɛ́ní kɛ́dekɛ kudɑ̀nkù kɛ́ncentì tɛkpɑ̀ɑ̀tìcĩ́ɛ̃̀tɛ̀ ĩ́nkɛ̀ kɛ́yɑ̀ onitipòkù mɔù kòò wùɔ̀ kɛ wenni mɛdiɛ̀. 
\v 3 Kɛ̀ Dɑfitii bíékɛ́ kɛ bo yɑ̀ wèè nitipòkù nwe, kɛ̀ bɛ̀ɛ ò nɑ̀kɛ́ kɛ dɔ̀: Bɑtisebɑɑ Udii Itiibɛ botí kou pokù nwe Ediɑmmu kóo sɑpɑ̀ɑ̀. 
\v 4 Kòo tɔ̃ nkɛ̀ bɛ̀ɛ ò yuní, kòo kɔtɛní o cĩ́ɛ̃̀tɛ̀ kɛ sɔ̃́ nho yɔ́ntì dèè kòò wèńkùnnɛ òmɑ́ɑ̀ bɑ̀mbɑ̀, kòo ò duɔ́nɛ̀ kɛ́deè kòo kò.
\p
\v 5 Kɛ̀ dɛ kóo nitipòkù púó nkɛ́tɔ̃ nkɛ̀ bɛ̀ɛ nɑ́kɛ́ Dɑfiti ò pùómmɛ̀.
\p
\v 6 Kɛ̀ Dɑfiti pɑ̃̀nkɛɛ duɔ́ ntinɑ́ɑǹtì bɛhɑ̃ɑ̃pɔ̀mbɛ̀ kóo kótì Soɑbu kɛ dɔ̀: Duɔ́ nkɛ̀ Itiibɛ botí kou Udii konní.
\p Kɛ̀ Soɑbu duɔ́ nkòo konní. 
\v 7 Kɛ̀ Udii tuɔkɛní okpɑ̀ɑ̀tì Dɑfiti borɛ̀, kòo ò bekɛ Soɑbu kɔ̃nnɑɑtí dòmmɛ̀ nɛ̀ bɛhɑ̃ɑ̃pɔ̀mbɛ̀ kɔku nɛ̀ mudoò cèntì mɛ̀ɛ̀ botí. 
\v 8 Ò ò bekɛ mɛmmɛ kɛ́deè kóò nɑ̀kɛ́ kɛ dɔ̀: Kò nhɑ cĩ́ɛ̃̀tɛ̀ kɛ́om̀pɛ̀ sɑ́m̀pɔ́.
\p Kɛ̀ Udii ítɛ́ okpɑ̀ɑ̀tì cĩ́ɛ̃̀tɛ̀, kòo ò pɑ̃ dipɑ̃nnì kɛ́duɔ́nko. 
\v 9 Udii mɛ nyí nkò nho cĩ́ɛ̃̀tɛ̀, kɛ́kɔtɛ kɛ́duɔ́ mbɛhɑ̃ɑ̃pɔ̀mbɛ̀ bɛ̀ɛ̀ bɑ̀ɑ okpɑ̀ɑ̀tì cĩ́ɛ̃̀tɛ̀ bɛ borɛ̀ ditowɑɑ̀. 
\v 10 Dɑfiti tì kèè dìì mɔ̀nnì, kɛ́bekɛ Udii kɛ dɔ̀: A bonní kupɔ̀ɔ̀kù dɛ́tíkù nku dɛ̀ dòmmɛ kɑ̀ɑ í kò nhɑ cĩ́ɛ̃̀tɛ̀? 
\v 11 Kɛ̀ Udii ò tɛ̃̀ńnɛ́ kɛ dɔ̀: Okpɑ̀ɑ̀tì, Kuyie ntɑummɛ̀ tɔu nɛ̀ Isidɑyɛɛribɛ nɛ̀ Sudɑɑ kɔbɛ kó bɛhɑ̃ɑ̃pɔ̀mbɛ̀ bɑ́ mbo titouti miɛkɛ, ti kóo kótì Soɑbu nɛ̀ iwɛ̃ĩ yɛmbɛ̀ bɑ́ mbo dikpɑ́ɑ̀ miɛkɛ kɛ̀ mí nnɛ́ bo n cĩ́ɛ̃̀tɛ̀ kɛ yo nkɛ yɔ̃ nkɛ dɔunɛ̀ m pokù, okpɑ̀ɑ̀tì nɛ̀ ɑ yètìrì kpɛ́í n yetɛmu m bɑ́ɑ́ dɔɔ̀ dɛ kó kubotí, míì bɛ́i! 
\v 12 Kòo kpɑ̀ɑ̀tì Dɑfiti dɔ̀: Dɛ̀ wenni nkpɑɑ́ diɛ nyíe nkɛ̀ dɛ̀ wentɛ́ n nɛ́ duɔ́ nkɑ̀ɑ wɛ̃tɛ.
\p Kɛ̀ Udii nkpɑɑ́ Sedisɑdɛmmu kɛ̀ dɛ̀ yɑ̀ɑ wentɛ́nɛ̀. 
\v 13 Kɛ̀ Dɑfitii ò yu kɛ̀ bɛ̀ɛ wɛ̃nnɛ́ kɛ́di kɛ́yɑ̃̀ mɛnɑɑ̀ nkòo ò duɔ́ mmɛnɑɑ̀ nkòo yɑ̃̀ kɛ́muɔ́, nɛ̀ mɛmmɛ kuyuoku mɔ̀nnì kɛ̀ Udii kɔtɛ kɛ́wɛ̃nnɛ́nɛ̀ bɛhɑ̃ɑ̃pɔ̀mbɛ̀ bɛ̀ɛ̀ bɑ̀ɑ okpɑ̀ɑ̀tì cĩ́ɛ̃̀tɛ̀ kɛ́duɔ́ ò í nkò nho cĩ́ɛ̃̀tɛ̀.
\p
\v 14 Kɛ̀ dɛ̀ɛ wentɛ́ kɛ̀ Dɑfitii wɑ̃ri dipɑ́tíri Soɑbu kɛ́ dì duɔ́ nhUdii. 
\v 15 Kɛ̀ dì tú: Niínnɛ̀ Udii fɛkpɑ̀rìnɑfɛ ììkɛ̀ mudoò cɛ̃́ɛ̃̀ dɛ̀ kɛ́wɛ̃tɛ difɔ̃nkúò kóò yóu dɛ ììkɛ̀ òmɑ́ɑ̀ kɛ̀ dɛ̀ɛ yie nkɛ̀ di dootitɔbɛ̀ɛ ò kɔ̀ùtɛ kòo kú.
\s1 Udii Bɑtisebɑɑ dɔù kumɛ̀
\p
\v 16 Soɑbu wèè pɑkɛ́ dihɛì kɛ yɛ̃́ bɛ dootitɔbɛ̀ kperíbɛ̀ bo dìì bòrì, kòo túótɛ́ Udii kɛ́nií ndɛ ììkɛ̀. 
\v 17 Kɛ̀ dihɛì kɔbɛɛ yɛ̀nní kɛ́do Soɑbu, kɛ́kuɔ Isidɑyɛɛribɛ miɛkɛ bɛnìtìbɛ̀ kɛ́kuɔnɛ̀ Dɑfiti kó bɛhɑ̃ɑ̃pɔ̀mbɛ̀ kɛ́kuɔ Udii Itiibɛ botí kou. 
\v 18 Kɛ̀ Soɑbuu tɔ̃ nkɛ̀ bɛ̀ bo nɑ́kɛ́ Dɑfiti dɛ̀ wũɔ̃kɛ́mɛ̀ mudoò miɛkɛ, 
\v 19 kɛ́nɑ́kɛ́ ò tɔ̃ nwè kɛ dɔ̀: Kɑ̀ɑ nɑ̀kɛ́ okpɑ̀ɑ̀tì dɛ̀ wũɔ̃kɛ́mɛ̀ mudoò miɛkɛ kɛ dèè, 
\v 20 kɛ sɔ̃́ nkòo miɛkɛ pɛikɛ kòò tu dɛ̀ yĩmɛ kɛ̀ di tɔ̀ɔ́nnɛ̀ dihɛì, di í yɛ̃́ kɛ dò mbɛ̀ bo nɑ kɛ́mbo kuduotí ĩ́nkɛ̀ kɛ́tɑ̃ũnɑ́ɑ̀? 
\v 21 We ndo kùɔ Abimɛdɛki Yedubɑɑdi birɛ Tebɛsi ɛì kou? Onitipòkù weè do bɔntɛ́ní kupèrìkù kuduotí ĩ́nkɛ̀ kɛ̀ kùu donní kóò yɑ̃̀kɛ kɛ́kuɔ, dɛ̀ dòmmɛ kɛ̀ di tɔ̀ɔ́nnɛ̀ kuduotí mɛdiɛ̀? Kɛ̀ nsɑ̀ kòo kpɑ̀ɑ̀tì dɑ bɛ́innɛ̀ mɛ kóo botí ɑ́ ò nɑ̀kɛ́ kɛ dɔ̀: A kóo tɔ̃ntì Udii Itiibɛ botí kou kumu múnkɛ mudoò miɛkɛ.
\p
\v 22 Kɛ̀ ditɔ̃nnìi kétɛ́ kɛ́kò nkɛ́nɑ́kɛ́ Dɑfiti Soɑbu ò nɑ̀kɛ́ tì timɔu. 
\v 23 Kɛ dɔ̀ bɛ̀ɛ̀ bɑ̀ɑ dihɛì bɛ̀ kpeńnìmu kɛ ti pɛ̃ɛ̃tɛ́. Bɛɛ̀ yɛ̀nní kɛ ti dintɛ́ dikpɑ́ɑ̀ kɛ̀ ti yetoo kɛ bɛ̀ bɛ̀ti kɛ tùɔ̀kɛnɛ̀ dihɛì kó dibòrì borɛ̀. 
\v 24 Dɛndɛ dɛtɑ̃nnɛ̀ yɛmbɛ̀ còḿmúmɛ̀ kuduotí ĩ́nkɛ̀ kɛ ti tɑ̃ũní kɛ kùɔ bɛhɑ̃ɑ̃pɔ̀mbɛ̀ mɑbɛ̀ kɛ̀ ɑ kóo tɔ̃ntì Udii Itiibɛ botí kou kɔkɛ́ bɛ miɛkɛ.
\p
\v 25 Kòo kpɑ̀ɑ̀tìi tɛ̃́nnɛ́ ditɔ̃nnì kɛ dɔ̀: Wɛ̃tɛ kɛ́yɑ́úkùnnɛ Soɑbu kɔ̃̀ntì kɛ dɔ̀, o yɛ̀mmɛ̀ bɑ́ɑ́ cɑɑ̀rɛ̀ nɛ̀ dɛ̀ɛ̀ dɔ̀ɔ̀ dɛ kpɛ́í. Mudoò miɛkɛ bɛnìtìbɛ̀ í yóó pɑɑ̀ mukṹṹ, wèe yetoo kɛ́pɔntɛ dɛ kó dihɛì.
\p
\v 26 Bɑtisebɑɑ kèè dìì mɔ̀nnì o dɔù kumɛ̀ kɛ́kɔmmú o kṹṹ. 
\v 27 Mukṹṹ nkó yɛwe pɛ̃ɛ̃tɛ́ dìì mɔ̀nnì kɛ̀ Dɑfitii tɔ̃ nkɛ̀ bɛ̀ɛ ò yuní kòo ò puokɛ kòo pɛitɛ́ dɛnitidɑbirɛ. Dɛ̀ í nnɑrikɛ ti Yiɛ̀ nKuyie nnɛ̀ Dɑfiti dɔ̀ɔ̀ dɛ̀ kpɛ́í.
\c 12
\s1 Dɑfiti duɔ́nɛ̀mɛ̀ Bɑtisebɑɑ kɛ̀ Kuyie nhò kpɑnnɛ̀
\p
\v 1 Kɛ̀ ti Yiɛ̀ nKuyie ntɔ̃ nku pɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ Dɑfiti borɛ̀, kɛ̀ Nɑtɑ̃ɑ̃ tuɔkoo kóò nɑ̀kɛ́ kɛ dɔ̀: Bɛnìtìbɛ̀ bɛɛ̀ do bo bɛ̀dɛ́bɛ̀ dihɛì mɑrì, kòo mɔù mɔ̀kɛ o kpɛrɛ kòò tɔù tu ocĩ̀rì. 
\v 2 Kɛ̀ tikpɑ̀tì yiɛ̀ mmɔ̀kɛ iwũɔ̃ pɛ́u. 
\v 3 Kòo cĩ̀rì mɔ̀kɛ fɛpìèfɛ̀ fɛ̀mɑ́ɑ̀ ò dontɛ́mɛ̀ kɛ fɛ̀ piú kɛ̀ fɛ̀ wɛ̃ńnɛ̀ o bí kɛ bo, kɛ kótírí kɛ yo nhò yo mmùù diì, kɛ yɔ̃̀ nhò yɔ̃̀ mmɛ̀ɛ̀ niɛ, kɛ dɔu o borɛ̀ kɛ dò nho birɛ. 
\v 4 Diyiè mɑrì kɛ̀ opɔ̀ɔ̀ nɛ́ tuɔkɛní okpɑ̀ɑ̀tì wenwe cĩ́ɛ̃̀tɛ̀ kòo yóu ò bo pĩ́mmɛ̀ o wũɔ̃ miɛkɛ fɛ̀mɑfɛ̀ kɛ nɛ́ kɔtɛ kɛ́túótɛ́ òcĩ̀rì wenwe kó fɛpìèfɛ̀ fɛmɑ́ɑ̀ kɛ́kuɔ kɛ́bénnɛ́ opɔ̀ɔ̀.
\p
\v 5 Kɛ̀ dɛ̀ɛ yonkɛ Dɑfiti mɛdiɛ̀ okpɑ̀ɑ̀tì wenwe dɔ̀ɔ̀ dɛ̀ kpɛ́í nkòo nɑ́kɛ́ Nɑtɑ̃ɑ̃ kɛ dɔ̀: Nɛ̀ Kuyie, wèè dɔ̀ɔ̀ mɛmmɛ dɛ yiɛ̀ ndò nkɛ́kúmu. 
\v 6 Nɛ̀ ò í kuɔ́ mmɛ̀ɛ̀ kpɛ́í nhocĩ̀rì wenwe mɛsémmɛ̀, ò bo yietí ocĩ̀rì fɛpìèfɛ̀ ò tùótɛ́ fɛ̀ ipe ìnɑ̀ɑ̀. 
\v 7 Kɛ̀ Nɑtɑ̃ɑ̃ nɛ́ ò nɑ̀kɛ́ kɛ dɔ̀: Fɔ̃́ nwe dɛ kóo nìtì. Nɛ́ ntɛ ti Yiɛ̀ nKuyie nyIsidɑyɛɛribɛ tũ nkù tu mù: Kù tu kuù dɑ pĩ ntikpɑ̀tì kɑ̀ɑ bɑkɛ́ Isidɑyɛɛribɛ kɛ̀ kù dɑ dɛɛtɛ́nɛ̀ Sɑuri. 
\v 8 Kɛ duɔ́ nkɑ̀ɑ nɑ Sɑuri nɛ̀ o cĩ́ɛ̃̀tɛ̀ kɛ̀ kù tùótɛ́ o pobɛ̀ kɛ dɑ duɔ́, kɛ duɔ́ nkɑ̀ɑ bɑkɛ́ Isidɑyɛɛribɛ nɛ̀ Sudɑɑ kɔbɛ, kɛ̀ dɛ̀ í dɑ sɑ̀nnɛ̀ kù nɑ ndɑ yìɛ́mu. 
\v 9 Bɑ nkpɛ́í nnɛ́ te kɑ̀ɑ sènkɛ̀rì ku nùù, kɛ dɔ̀ɔ̀ kù í dɔ́ dɛ̀, kɛ dɔ̀ɔ̀ dɛ̀ bo yiennɛ̀mɛ̀ kɛ̀ Amɔniibɛɛ kuɔ Udii, kɛ̀ bɛ̀ ò kùɔ kɑ̀ɑ tùótɛ́ o pokù kɛ puokɛ? 
\v 10 Di mmɔ̀nnì mudoò í yóó fũtɛnɛ̀ ɑ cĩ́ɛ̃̀tɛ̀, ɑ mɛ nkù sènkɛ̀rìmɛ̀ kɛ tùótɛ́ Udii Itiibɛ botí kou pokù kɛ puokɛ. 
\v 11 Kéntɛ́ kɛ́keè ti Yiɛ̀ nKuyie ntu mù. Kù tu kù bo duɔ́ nkɛ̀ mɛyɛi ndɑ tuɔkɛní, mɛ̀ yóó yɛ̀nní ɑ cĩ́ɛ̃̀tɛ̀ mɔ́mmɔntɛ ntɛ. Kù bo túótɛ́ ɑ pobɛ̀ ɑ nuɔ mmiɛkɛ kɛ́duɔ́ nhɑ tebìí kɛ̀ sìi bɛ̀ duɔ́nɛ̀ kuyie ncuokɛ̀. 
\v 12 A dɔ̀ɔ̀ dɛ̀ disɔ̀rì, kunku bo dɛ̀ dɔɔ̀ kuyie ncuokɛ̀ kupììti miɛkɛ Isidɑyɛɛribɛ bɛmɔu ììkɛ̀.
\p
\v 13 Kɛ̀ Dɑfiti dɔ̀: N cɑ̀ɑ̀rɛ̀mu. Kɛ̀ Nɑtɑ̃ɑ̃ dɔ̀: Ti Yiɛ̀ nKuyie mmúnkɛ dɑ cĩ̀ɛ̃́mmu ɑ í yóó kú. 
\v 14 Dɛ miɛkɛ nɑ́kɛ ɑ cɑ̀ɑ̀rɛ̀mu ti Yiɛ̀ nKuyie, nɛ̀ dɛ kpɛ́í nhɑ birɛ bɛ̀ pɛitɛ́nɛ̀ dɛ̀ bɑ̀mbɑ̀ ndɛ̀ yóó kúmu.
\p
\v 15 Nɑtɑ̃ɑ̃ ò nɑ̀kɛ́ mɛmmɛ kɛ́deè kɛ́kò nho cĩ́ɛ̃̀tɛ̀.
\s1 Bɑtisebɑɑ birɛ kumɛ̀
\p Kɛ̀ ti Yiɛ̀ nKuyie mpotɛ́ Udii pokù Bɑtisebɑɑ pɛitɛ́ dɛ̀ɛ̀ birɛ Dɑfiti kɛ̀ dɛ̀ɛ muɔkɛ kɛ̀ dɛ̀ ncɛ̃́ɛ̃̀ mɛdiɛ̀. 
\v 16 Kɛ̀ Dɑfitii bɑ́ntɛ̀ ti Yiɛ̀ nKuyie ndɛ kó dɛbirɛ kpɛ́í nkɛ́boú dinùù, kɛ ntṹṹnko kɛ́konní kuyuoku kɛ́nyié nkɛ duɔ́ kɛtenkɛ̀. 
\v 17 Kòo kó bɛtɔ̃mbɛ̀ kótíbɛ̀ɛ ò bɑ̀ńtɛ̀ kɛ dɔ̀ wèe ítɛ́. Kòo yetɛ, ò ketɛ́ kɛ í nyie nkɛ bo bɛ̀ wɛ̃nnɛ́nɛ̀ kɛ́di. 
\v 18 Kɛ̀ dɛbirɛ mmɔkɛ yɛwe yɛ̀yiekɛ̀ nɛ̀ dɛ muɔkɛmɛ̀ kɛ́kú. Kɛ̀ Dɑfiti tɔ̃mbɛ̀ ńyĩɛ̃̀kù bɛ̀ bo tì nhò nɑ̀kɛ́mɛ̀ kɛ́nnɑ́ɑ́ mbɛ mɑ́ɑ̀ kɛ wɛ́ú kɛ tú: Dɛbirɛ sòò kpɑɑ́ kɛ fòùmu kɛ̀ tí nhò nɑ̀ɑ́nnɛ̀ ò í nti kémmú, ti bo yĩ́mɛ kɛ dɑ́ɑ́tí kóò nɑ̀kɛ́ dɛbirɛ kumɛ̀ ò yɑ̀ɑ̀ bo dɔɔ̀ omɑ́ɑ̀ mɛyɛi. 
\v 19 Kɛ̀ Dɑfitii yɑ̀ bɛ̀ nɑ́ɑ́ nnɑ́ɑ́mmɛ̀ bɛmɑ́ɑ̀ kɛ wɛ́ú kɛ́bɑntɛ́ tìì tùɔ̀kɛní kɛ́ bɛ̀ bekɛ kɛ dɔ̀: M birɛ kumɑ́ɑ̀? Kɛ̀ bɛ̀ dɔ̀: Ɛ̃ɛ̃, dɛ̀ kumu.
\p
\v 20 Dɛ mɔ̀nnì kɛ̀ Dɑfitii ítɛ́ kɛtenkɛ̀ kɛ́wuɔ, kɛ́ɑ̃nnɛ́ tùdɑ̀ɑ̀rí, kɛ́ceetɛ tiyɑ̀ɑ̀tì, kɛ́tɑ ti Yiɛ̀ nKuyie ncĩ́ɛ̃̀tɛ̀ kɛ́bɑ́ntɛ̀ Kuyie. Ò konní dìì mɔ̀nnì o cĩ́ɛ̃̀tɛ̀ kɛ́duɔ́ nkɛ̀ bɛ̀ɛ ò wɑɑ́ mmudiì kòo di. 
\v 21 Kòo kó bɛtɔ̃mbɛ̀ɛ ò bekɛ kɛ dɔ̀: Okpɑ̀ɑ̀tì ɑ dɔɔri bɑ mbotí nku? A birɛ sòò kpɑɑ́ fòù kɑ̀ɑ boú dinùù kɛ́nkuɔ̀, kɛ̀ dɛ̀ nɛ́ ku kɑ̀ɑ ìtɛ́ kɛ yonnɑɑ̀? 
\v 22 Kòò dɔ̀: M birɛ sòò kpɑɑ́ fòù kɛ̀ m boú dinùù kɛ́nkuɔ̀nnɛ̀ Kuyie nku kɛ tú kɛ̀ dɛ̀ nɑɑti kù n kuɔ́ mmɛsémmɛ̀ kɛ̀ dɛ̀ bɑ́ɑ́ kú. 
\v 23 Dɛ̀ nɛ́ mɛ nkumɛ̀mu kɛ dèè n nɛ́ bo mboú dinùù bɑ nkpɛ́í? N yí kpɑɑ́ bo nɑ kɛ́ dɛ̀ fòùkùnnɛ, míì sɑ̀ɑ̀ bo dɛ̀ sɔ̃̀ńkóo dɛ̀ í wɛ̃tiní m borɛ̀.
\s1 Bɛ̀ pɛitɛ́mɛ̀ Sɑdomɔɔ
\p
\v 24 Kɛ̀ Dɑfitii kɔtɛ kɛ́bɑ́mmú o pokù Bɑtisebɑɑ o borɛ kṹṹ nkpɛ́í, kóò duɔ́nɛ̀ kòo pɛitɛ́ dɛnitidɑbirɛ kòo dɛ̀ yu kɛ dɔ̀ Sɑdomɔɔ, kɛ̀ ti Yiɛ̀ nKuyie nní ndɛ̀ dɔ́, 
\v 25 kɛ́tɔ̃ nku pɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ kòo nɑ́kɛ́ Dɑfiti Kuyie ndɔ́mɛ̀ dɛ kó dɛbirɛ, kɛ́ dɛ̀ yú kɛ dɔ̀ Yedidiɑ, dɛ̀ɛ̀ bɛnkú kɛ tú Kuyie ndɔ́ wè.
\s1 Dɑfiti pɔ̀ntɛmɛ̀ Adɑbɑ
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 20:1-3)
\p
\v 26 Dɛ mɔ̀nnì kɛ̀ bɛhɑ̃ɑ̃pɔ̀mbɛ̀ kóo kótì Soɑbu do Adɑbɑ Amɔniibɛ ɛì diɛrì kɛ́fietɛ okpɑ̀ɑ̀tì kó dicɛ̃kɑrì, 
\v 27 kɛ́tɔ̃ nkɛ̀ bɛ̀ɛ nɑ́kɛ́ Dɑfiti kɛ dɔ̀: Soɑbu tu ò pɔ̀ntɛmu Adɑbɑɑ kɛ fìètɛ mɛniɛ mbo dìì ɛikɑrì. 
\v 28 Kɑ̀ɑ túótɛ́ bɛhɑ̃ɑ̃pɔ̀mbɛ̀ kɛ̀ di kɔtoo kɛ́pɔntɛ dihɛì kɑ̀ɑ dì fìètɛ ò í ndɔ́ wèe dì tùótɛ́ o mɔ́mmuɔ nkɛ̀ dì ntɔ weè kó diyètìrì. 
\v 29 Kɛ̀ Dɑfitii túótɛ́ bɛhɑ̃ɑ̃pɔ̀mbɛ̀ sɔmbɛ kɛ̀ bɛ̀ɛ kɔtɛ kɛ́do dihɛì kɛ́ dì pɔ̀ntɛ kòo dì tiekɛ, 
\v 30 Kɛ̀ bɛ̀ɛ túótɛ́ bɛ kóo kpɑ̀ɑ̀tì òkɛ́ dìì sɔɔpìì, kɛ̀ di cɛ̃́ɛ̃́kù tùɔ̀kɛ cìdóòbɛ̀ bɛ̀kuɔ̀, kɛ̀ dì dɑ̀ri ditɑ̃sɑ̀ɑ̀rì dìì donku kpeńnì kɛ́ di òó nDɑfiti kɛ́ɛínɛ̀ tinɛntì tɛtì pɛ́u. 
\v 31 Kɛ̀ Dɑfitii pĩ́mmú bɛnìtìbɛ̀ kɛ́kònnɛ̀ kɛ́ bɛ̀ pĩ̀ńnɛ́ muhɛikɛ̀ntɔ̃mmú, kɛ̀ bɛ̀ nsɔ̃́ṹ tidɑbɛɛtì, kɛ cɛ́ú yɛtɑ̃́rɛ̀. Kɛ kɔ̃ũ idɛí, kɛ piiku yɛdombiɛ kɛ múnkɛ mɛ̀ dɔ̀ɔ̀ Amɔniibɛ ɛkɛ̀ tɛyɛ̀. Dɛ kó difɔ̃nkúò Dɑfiti nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ kò nSedisɑdɛmmu.
\c 13
\s1 Amunɔɔ duɔ́nɛ̀mɛ̀ Tɑmɑɑ
\p
\v 1 Dɑfiti kóo dɑpɑ̀ɑ̀ nhAbusɑdɔmmu do mɔkɛ o tɑ̃ũ̀ mɔù nwe, oposɑ́ɑ́tì mɛsɑ̀ɑ̀, kòo yètìrì tu Tɑmɑɑ. Dɑfiti kóo dɑpɑ̀ɑ̀ ntɔù mɔù bɛ̀ tu wè Amunɔɔ. Kòo dɔkɛ dɛ kóo sɑpɑ̀ɑ̀ mmɛdiɛ̀. 
\v 2 Kɛ mɛ̀nkɛɛ ò dɔkɛ kɛ̀ dɛ̀ɛ tontɛ́ kóò dɔ̀ɔ̀ mumɔmmú. Ò í nyɑ̀ ò bo yĩ́mɛ̀ kóò nìntɛ kɛ yɛ̃́ ò mu ndo í yĩ̀ɛ̃́tɛ́mɛ̀ onitidɔ̀ù. 
\v 3 Kɛ̀ Amunɔɔ nɛ́ mɔkɛ o nɛ́po mɔù Dɑfiti kóo kótì Simɛɑ birɛ, kòo yètìrì tu Yonnɑdɑbu kòò ciì mɛdiɛ̀, 
\v 4 kɛ́bekɛ Amunɔɔ kɛ dɔ̀: Bɑ nkpɛ́í nte fɔ̃́ nhokpɑ̀ɑ̀tì birɛ kɑ̀ɑ ììkɛ̀ ɔ̃ nsɔ̀ù yɛkṹnwerɛ̀ yɛmɔu? A bɑ́ n nɑ́kɛ́ mùù teɑ̀? Kɛ̀ Amunɔɔ dɔ̀: N tebitɛ Abusɑdɔmmu tɑ̃ũ̀ Tɑmɑɑ nwe n dɔ́mɛ̀. 
\v 5 Kɛ̀ Yonnɑdɑbuu ò nɑ̀kɛ́ kɛ dɔ̀: Dɔɔ̀ kɛ́ndò nhɑ mɔ nkɛ́nduɔ́ ɑ dɔ́ù ĩ́nkɛ̀ kɑ̀ɑ cicɛ kɔtɛní kɛ bo dɑ síékɛ́ ɑ́ ò nɑ̀kɛ́ kɛ dɔ̀: Duɔ́ nkɛ̀ n tɑ̃ũ̀ Tɑmɑɑ kɔtɛní kɛ́ n yɛ̃ntɛ́. Wèe kɔtɛní kɛ́mbérí diɛ m borɛ̀, kòò dèè wèe tɔní o mɔ́mmuɔ nkɛ́ n duɔ́ nkɛ̀ n di.
\p
\v 6 Kɛ̀ Amunɔɔ dɔɔ̀ kɛ́ndò nhò mɔ, kòo cicɛɛ kɔtɛní kɛ bo ò sìékɛ́, kòo ò nɑ̀kɛ́ kɛ dɔ̀: Duɔ́ nkɛ̀ n tɑ̃ũ̀ Tɑmɑɑ kɔtɛní kɛ́ n kɑkɛ yɛkɑ̀tìndɑ̀ yɛ̀dɛ́ɛ̀ kɛ́ n duɔ́ nkɛ̀ n cɑ́ɑ́kɛ́.
\p
\v 7 Kɛ̀ Dɑfitii tɔ̃ nkɛ̀ bɛ̀ɛ nɑ́kɛ́ Tɑmɑɑ kɛ dɔ̀: Kɔtɛ kɛ́bénnɛ́ ɑ tɑ̃ũ̀ Amunɔɔ kòo di.
\p
\v 8 Kɛ̀ Tɑmɑɑ kɔtɛ kɛ́nsɔ̃́ nhò duɔ́ o dɔ́ù ĩ́nkɛ̀, kòo ɑ̃ntɛ ticootì kɛ́nkɑɑti kɛ̀ Amunɔɔ wùó. 
\v 9 Kòo yɛ̀ tùótɛ́ kɛ́ĩ́nnɛ́ Amunɔɔ ììkɛ̀, kòo yetɛ kɛ dɔ̀ bɛ̀ɛ dennɛ bɛnìtìbɛ̀ bɛmɔu, kɛ̀ bɛ̀ɛ yie nkɛ́yɛ̀. 
\v 10 Dɛ mɔ̀nnì kòo nɑ́kɛ́ Tɑmɑɑ kɛ dɔ̀: Tɔní dɛ kó yɛkɑ̀tìndɑ̀ n dɔ́ù borɛ̀, fɔ̃́ɔ̃̀ yóó yɛ̀ nni nduɔ́ nhɑ mɔ́mmuɔ nkɛ̀ n cɑ́ɑ́kɛ́. Kɛ̀ Tɑmɑɑ yɛ̀ tùótɛ́ kɛ́kɔtɛnko ò duɔ́ dɛ̀. 
\v 11 Ò yɛ̀ nhò yòutoo dìì mɔ̀nnì kòò bo cɑ́ɑ́kɛ́, kòo ò pĩ nkɛ dɔ̀: Kɔtɛní n tɑ̃ũ̀ kɛ̀ tí duɔ́. 
\v 12 Kɛ̀ Tɑmɑɑ yetɛ kɛ́kuɔ́nko kɛ dɔ̀: Bɑ́ m pĩ́nnɛ̀ muwɛ̃rímú Isidɑyɛɛribɛ í dɔɔri mɛmmɛ, bɑ́ n dɔɔ̀nɛ̀ isɔkɛ inyi botí. 
\v 13 M bo cuónnɛ̀ kɛ dɛ kó ifɛi, fɔ̃́ nhɑ mɔ́mmuɔ mbɛ̀ yóó dɑ wéntɛ́ onitiyɛiwe nwe Isidɑyɛɛribɛ cuokɛ̀. Bɛ́innɛ̀ okpɑ̀ɑ̀tì ò í yóó yetɛ ɑ bo m puokɛmɛ̀.
\p
\v 14 Amunɔɔ í nyie nkɛ bo kéntɛ́, kóò pĩ̀ńnɛ̀ muwɛ̃rímú kɛ́duɔ́nɛ̀. 
\v 15 Dɛ kó difɔ̃nkúò ò tɛ̃́nkɛ í ndɔ́ kóò yɑ̀ fɛnɔ̀nfɛ̀ kóò sènkɛ̀rì kɛ̀ dɛ̀ɛ pɛ̃ɛ̃tɛ́ ò do ò dɔ́ mɛ̀ɛ̀ botí kòo ò bɛ̀ti kɛ dɔ̀: Yɛ̀! 
\v 16 Kòo yetɛ kɛ dɔ̀: Kɑ̀ɑ m bɛ̀ti dɛ kó mɛyɛi mbo ndɛu kɛ́pɛ̃ɛ̃tɛ́ mɛketimɛ̀ ɑ n dɔ̀ɔ̀ mɛ̀.
\p Amunɔɔ mɛ nyí nkèńtɛ́, 
\v 17 kɛ́pɛ́i nho kóo tɔ̃ntì kɛ dɔ̀: Dennɛ we nsɑpɑ̀ɑ̀ nkɛ́kpetínnɛ́ dicɑ̀ù kɛ́pɑ́ɑ́. 
\v 18 Kòo tɔ̃ntìi ò dènnɛ kɛ́kpetínnɛ́ kɛ́pɑ́ɑ́.
\b
\p Tɑmɑɑ do dɑ́ɑ́tí disɑpùnyɑɑ̀bòrì sɑ̀ɑ̀rì ndi, dɛ mɔ̀nnì kó bɛkpɑ̀ɑ̀tìsɑpɑ̀mbɛ̀ mu ndo ɔ̃ɔ̃ í nyɛ̃́ onitidɔ̀ù kɛ́ndɑ́ɑ́tí yɛ̀. 
\v 19 Kòo pũ nhomɑ́ɑ̀ mutɑ́pɛí nkɛ́kɛ̃rí o yɑɑ̀bòrì kɛ́mpi o ììkɛ̀ kɛ kérí kɛ kɔnti. 
\v 20 Kòo tɑ̃ũ̀ Abusɑdɔmmuu ò bekɛ kɛ dɔ̀: Amunɔɔ dɑ duɔ́nɛ̀mɑɑ̀? Cĩ́ɛ̃́kɛ́ ɑ tɑ̃ũ̀ nwe ɑ bɑ́ ndɑkɛ dɛ kpɛti.
\p Kɛ túótɛ́ dɛ kó diyiè kɛ̀ Tɑmɑɑ ḿbo o tɑ̃ũ̀ Abusɑdɔmmu cĩ́ɛ̃̀tɛ̀, bɑ́ òmɔù í ndɑkɛ o kpɛti. 
\v 21 Kòo kpɑ̀ɑ̀tì Dɑfitii keè dɛ̀ɛ̀ dɔ̀ɔ̀ kɛ̀ dɛ̀ɛ ò yonkɛ mɛdiɛ̀ nhò mɛ nyí mbɛ́i ntìmɑtì, kɛ yɛ̃́ Amunɔɔ do túmɛ̀ Mpo nwe kòo ò dɔ́ mɛdiɛ̀. 
\v 22 Kɛ̀ Abusɑdɔmmu miɛkɛ ḿpɛ́ì Amunɔɔ ò cɑ̀kɛ mɛ̀ɛ̀ kpɛ́í nho tɑ̃ũ̀, bɑ́ ò tɛ̃́nkɛ í nhò nɑ́ɑ́nnɛ̀.
\s1 Abusɑdɔmmu duɔ́mmɛ̀ kɛ̀ bɛ̀ɛ kuɔ Amunɔɔ
\p
\v 23 Kɛ̀ dɛ̀ mmɔkɛ yɛbie nyɛ̀dɛ́ɛ̀ kɛ̀ bɛ̀ nkɛ̃ĩ Abusɑdɔmmu pe cìtì Bɑɑ-Aso Efɑdɑimmu tenkɛ̀ mɑ̀nku, kòo yú okpɑ̀ɑ̀tì dɑpɑ̀mbɛ̀ bɛmɔu mudiì, 
\v 24 kɛ́kɔtɛ okpɑ̀ɑ̀tì cĩ́ɛ̃̀tɛ̀ kóò nɑ̀kɛ́ kɛ dɔ̀: N cicɛ n dɑ bɑ́ɑ́mmu, n yikú m pecìtì kɛ̃ĩ̀ mmu, kɛ dɔ́ fɔ̃́ nnɛ̀ ɑ tũ̀mbɛ̀ di kɔtɛní dɛ kó dibɑnni. 
\v 25 Kòo kpɑ̀ɑ̀tì dɔ̀: M birɛ kɛ̀ ti kɔ̀tɛ timɔu ditɔu yɑ̀ɑ̀ bo dɑ cɛ̃ɛ̃kɛ, ti bɑ́ɑ́ nɑ kɛ́kɔtɛ timɔu.
\p Kɛ̀ Abusɑdɔmmu nyetíróo, kòo kpɑ̀ɑ̀tìi yetɛ kɛ́bekɛ Kuyie nkó mɛsɑ̀ɑ̀ mmɑ́ɑ̀ o ĩ́nkɛ̀ bɑ́ wenwe í nkɔ̀tɛ o mɔ́mmuɔ. 
\v 26 Kɛ̀ Abusɑdɔmmu dɔ̀: Kɑ̀ɑ í kɔri ɑ mɔ́mmuɔ nyóu kɛ̀ ń tebitɛ Amunɔɔ n nɛinɛ̀, kòo kpɑ̀ɑ̀tì dɔ̀: Ò dɑ nɛinɛ̀ bɑ nkpɛ́í?
\p
\v 27 Kɛ̀ Abusɑdɔmmu bɑɑ nyetíróo kòo kpɑ̀ɑ̀tì ḿbo kɛ́yóu kòo kó bɛdɑpɑ̀mbɛ̀ɛ ò nɛinɛ̀ kɛ́kɔtɛ.
\b
\p
\v 28 Kɛ̀ Abusɑdɔmmu nɑ́kɛ́ o kò bɛtɔ̃mbɛ̀ kɛ dɔ̀: Dí ńwéí kɛ̀ Amunɔɔ muɔ́ ndìì mɔ̀nnì mɛnɑɑ̀ nkòo ììkɛ̀ kɔɔrɛ, kɛ̀ m pɛ́i nkɛ yĩ potɛ́nɛ̀ we, di ò kùɔ kɛ bɑ́ nyĩɛ̃̀kù, míì mɛ nyɛ̃. Di kɔ̃m̀bùɔ̀tì bɑ́ nduò, dɔɔ̀nɛ̀ dinitidɑɑ̀.
\p
\v 29 Kòo tɔ̃mbɛ̀ɛ dɔɔ̀ ò bɛ̀ nɑ̀kɛ́ tì kɛ́kuɔ Amunɔɔ, kòo kpɑ̀ɑ̀tì dɑpɑ̀mbɛ̀ sɔmbɛɛ cíɛ́tɛ́ bɑ́ wè kòo dekɛ o sɑ̃ntɛ̀ kɛ́cokɛ́.
\p
\v 30 Kɛ̀ bɛ̀ nkpɑɑ́ kɛ mu nyí tùɔ̀koo kɛ̀ Dɑfiti tì kèè kɛ̀ bɛ̀ tu: Abusɑdɔmmu kùɔ okpɑ̀ɑ̀tì dɑpɑ̀mbɛ̀ bɛmɔu bɑ́ òmɔù í kpɑɑ́ bɑ́ omɑ́ɑ̀. 
\v 31 Kòo kpɑ̀ɑ̀tì yɛ̀mmɛ̀ɛ cɑɑ̀rɛ̀ kòo kɛ̃tɛ́ o yɑɑ̀bòrì, kɛ́doroo kɛtenkɛ̀, kòo kó bɛtũ̀mbɛ̀ múnkɛ kɛ̃rí bɛ kpɛyɛ kɛ́ nhò murí. 
\v 32 Kɛ̀ Dɑfiti kóo kótì birɛ Yonnɑdɑbuu bɛ́i nkɛ dɔ̀: Okpɑ̀ɑ̀tì ɑ yɛ̀mmɛ̀ bɑ́ ndò nhɑ kó bɛdɑpɑ̀mbɛ̀ ku bɛmɔu, Amunɔɔ mɑ́ɑ̀ ndi bɛ̀ kùɔmɛ̀, nɛ̀ ò cɑ̀kɛ dìì yiè ndi Tɑmɑɑ dɛ kó mɛyɛ̀mmɛ̀ tɑmɛ̀ Abusɑdɔmmu. 
\v 33 Tũ mbɑ́ ntoti ɑ yɛ̀mmɛ̀ kɛ tú ɑ kó bɛdɑpɑ̀mbɛ̀ bɛmɔu ndi bɛ̀ kùɔmɛ̀, Amunɔɔ mɑ́ɑ̀ ndi bɛ̀ kùɔmɛ̀. 
\v 34 Kɛ̀ Abusɑdɔmmuu cokɛ́.
\p Odɑpɑ̀ɑ̀ nwèè pɑkɛ́ dihɛì kòo yɑ̀ ditĩ̀nnì mɑrì cootinímɛ̀ Odonnɑimmu tɑ̃rì pɛ̃ri, kɛ́kɔtɛ kɛ́nɑ́kɛ́ okpɑ̀ɑ̀tì kɛ dɔ̀: N yɑ̀ bɛnìtìbɛ̀ mɑbɛ̀ mbɛ kɛ̀ bɛ̀ cootiní Odonnɑimmu tɑ̃rì pɛ̃ri.
\p
\v 35 Kɛ̀ Yonnɑdɑbuu nɑ́kɛ́ okpɑ̀ɑ̀tì kɛ dɔ̀: A bí iì kèríní. N dɑ nɑ̀kɛ́ tìnti.
\p
\v 36 Yonnɑdɑbu kpɑɑ́ mɛ nnɑ́ɑ́ nkòo kpɑ̀ɑ̀tì dɑpɑ̀mbɛ̀ɛ tuɔkɛní, kɛ́tiitɛ́ yɛdɑbùò, okpɑ̀ɑ̀tì nɛ̀ o tũ̀mbɛ̀ kɛ̀ bɛ̀ múnkɛɛ tiitɛ́ yɛdɑbùò.
\b
\p
\v 37-38 Kɛ̀ Abusɑdɔmmu yie cokɛ́ kɛ́kɔtɛ Tɑmɑi Ammiudi Kesuu kpɑ̀ɑ̀tì ciɛ kɛ́ nkɛ mbo kɛ dɔ̀ yɛbie nyɛ̀tɑ̃ɑ̃ti, dɛ kó yɛmɔ̀rɛ̀ kɛ̀ Dɑfiti kuɔ̀ nho birɛ Amunɔɔ kṹṹ. 
\v 39 Kɛ̀ bɛ̀ɛ ò bɑ̀ńtɛ̀ Amunɔɔ kṹṹ nkpɛ́í mbɑ́ o miɛkɛ tɛ̃́nkɛ í mpɛ́í Abusɑdɔmmu.
\c 14
\s1 Abusɑdɔmmu wɛ̃̀tɛnímɛ̀ Sedisɑdɛmmu
\p
\v 1 Kɛ̀ Seduyɑɑ birɛ Soɑbuu bɑntɛ́ Dɑfiti yɛ̀mmɛ̀ bomɛ̀ Abusɑdɔmmu bíɛ́kɛ̀, 
\v 2 kɛ́tɔ̃ nkɛ̀ bɛ̀ɛ yúní onitipòkù mɔù Tekoɑ ɛì, kòò ciì mɛdiɛ̀, kòo ò nɑ̀kɛ́ kɛ dɔ̀: Dɔɔ̀ kɛ̀ dɛ̀ ńdò nhɑ tɔ tiyɔ̃́ɔ̃́tì, ɑ bɑ́ɑ́ yɔɔrɛ ɑmɑ́ɑ̀ tùdɑ̀ɑ̀rí, dɔɔ̀ kɛ́ndò nhɑ tɔ tiyɔ̃́ɔ̃́tì kɛ̀ dɛ̀ mɔ̀ntɛ, 
\v 3 kɛ́kɔtɛ kɛ́yɑ̀ okpɑ̀ɑ̀tì kóò nɑ̀kɛ́ n yóó mɛ ndɑ nɑ́kɛ́ tì.
\p Mɛm̀mɛ kɛ̀ Soɑbuu ò nɑ̀kɛ́ ò dò nkɛ bií nɑ́kɛ́ tì. 
\v 4 Kòo nitipòkùu kɔtɛ kɛ́yɑ̀ okpɑ̀ɑ̀tì kɛ́nínkú kɛ́sĩ́nnɛ́ o ììkɛ̀, kóò nɑ̀kɛ́ kɛ dɔ̀: N dɔ́ ɑ n teennɛ̀mu. 
\v 5 Kòo kpɑ̀ɑ̀tìi ò bekɛ kɛ dɔ̀: A dɔ́ bɑ? Kòò dɔ̀: Okpɑ̀ɑ̀tì n tú okúpokù nwe, n dɔù weè ku, 
\v 6 kɛ sɔ̃́ m mɔkɛ ibí ìdɛ́ì, kɛ̀ ì nɛ́ kpɑ nkupɑku bɑ́ òmɔù í dɛ̀ bo kɛ bo ì pɑ̀tɛ, kɛ̀ dɛ̀mɑ́ɑ̀ kùɔ dɛ̀tɛrɛ̀. 
\v 7 Kɛ̀ n dɔù nɑɑ̀mùnkù kɔbɛ nɛ́ ìtɛ́ kɛ bo ò kùɔ, kɛ tú m bɛ̀ duɔ́ nhonitikɔ̀ùtì, kɛ̀ bɛ̀ɛ ò kùɔ kɛ́pɛitɛ ò kùɔmɛ̀ o nɑntɛ̀. Bɛ̀ dɔ́ kɛ́kuɔmu osɔnwe n kpɑɑ́ wúó nwe kɛ̀ n dɔù kó kufukuu kpɑ́nnɛ́.
\p
\v 8 Kòo kpɑ̀ɑ̀tì dɔ̀: Kò nhɑ cĩ́ɛ̃̀tɛ̀, n yóó yɑ̀mu ɑ kpɛti. 
\v 9 Kòo nitipòkù dɔ̀: Okpɑ̀ɑ̀tì, kɛ̀ tìmɑtì tùɔ̀kɛní, dɛ kó tinɑ́ɑǹtì ĩ́nkɛ̀, mí nnɛ̀ n cĩ́ɛ̃̀tɛ̀ kɔbɛ ti bo ti tɔ, ti í yó ntú ɑ kpɛti yoo ɑ kpɑ̀ɑ̀tìyuu kpɛti. 
\v 10 Kòo kpɑ̀ɑ̀tì dɔ̀: Kòò mɔù dɑ kpɑnnɛ̀, ɑ wè nni ntɔní ò tɛ̃́nkɛ bɑ́ɑ́ dɛ̀ yìɛ́ nɛ̀ ò bo mbomɛ̀. 
\v 11 Kòo nitipòkùu yíɛ́ kɛ́bɛ́i nkɛ dɔ̀: Okpɑ̀ɑ̀tì, bɛ́i nkɛ́yú Kuyie nhɑ bɑ́ɑ́ nkù yètìrì, wèè dɔ́ kɛ́pɛitɛ kòò bɑ́ɑ́ kuɔ m birɛ sɔnnɛ. Kòo kpɑ̀ɑ̀tì dɔ̀: Kuyie mbomu kɛ̀ n yú ku yètìrì kɛ bɛ́i nkɛ tú ɑ birɛ kó kuyùrìkù mɑkù í doti kɛtenkɛ̀ bɑ́ kùmɑ́ɑ̀.
\p
\v 12 Kòo nitipòkù dɔ̀: Okpɑ̀ɑ̀tì yóu kɛ̀ n yíɛ́ kɛ dɑ bɛ́innɛ̀ tìmɑtì. Kòo dɔ̀: Bɛ́i. 
\v 13 Kòo nitipòkù dɔ̀: A dɔ̀ɔ̀ dɛ̀ í yóó dɔɔ̀ Kuyie nkɔbɛ mɛsɑ̀ɑ̀, kɛ́ndònnɛ̀ ɑ bo kɛ nɑ́ɑ́mmɛ̀, nɛ̀ ɑ nɑ́ɑǹtì miɛkɛ ɑ bɛnkɛ kɛ dò nhɑ cɑ̀ɑ̀rɛ̀mu, ɑ í yóumɛ̀ kɛ̀ bɛ̀ bɛ̀ti wè bo wɛ̃tɛní. 
\v 14 Timɔu ti yóó kúmu. Ti dònnɛ̀ mɛkùɔ̀ mmɛ, kɛ̀ mɛkùɔ̀ ncòú nkoutɛ́ í bo, mɛɛ̀ botí nku Kuyie nyí yóó fòùkùnnɛ wèè ku. Okpɑ̀ɑ̀tì, Kuyie nnɛ́ í dɔ́ bɛ̀ bɛ̀ti we bo yɛinkoomɛ̀. 
\v 15 Bɛnìtìbɛ̀ bɛɛ̀ donnɛ́ n kɔ̃m̀bùɔ̀tì dɛɛ̀ te kɛ̀ n kɔ̀tɛní kɛ dɑ yɑ̀, kɛ tú kɛ̀ dɛ̀ bo yie n yiɛ̀ nhokpɑ̀ɑ̀tì ɑ́ dɔɔ̀ mí nhɑ kóo tɔ̃ntì sɑ́m̀pɔ́ù n dɑ bekɛ tì. 
\v 16 Okpɑ̀ɑ̀tì n yɛ̃́mu kɛ dò nhɑ yó n dɛɛtɛ́nɛ̀ wèè dɔ́ kɛ ti kuɔ mí nnɛ̀ m birɛ kɛ̀ ti kpɛrɛɛ deè dihɛì Kuyie nduɔ́ ndì ku kó bɛnìtìbɛ̀ di miɛkɛ. 
\v 17 Nɛ̀ n yɛ̀mmɛ̀ miɛkɛ n do yɛ̃́mu kɛ dò nfɔ̃́ nhokpɑ̀ɑ̀tì ɑ bo nɑ́ríkùnnɛ n yɛ̀mmɛ̀, kɛ yɛ̃́ ɑ í cɑ̃́ɑ̃́nnɛ̀mɛ̀ Kuyie ntɔ̃nnì! A yɛ̃́mu mɛsɑ̀ɑ̀ nnɛ̀ mɛyɛi. Ti Yiɛ̀ nKuyie nhɑ tũ nkù ńdɑ bonɛ̀.
\p
\v 18 Kòo kpɑ̀ɑ̀tìi nɑ́kɛ́ onitipòkù kɛ dɔ̀: N yóó dɑ bekɛ tìmɑtì nti, kɛ̀ m mɛ ntì ndɑ bekɛ ɑ bɑ́ n sɔnnɛ. Kòo nitipòkù dɔ̀: Okpɑ̀ɑ̀tì bɛ́i. 
\v 19 Kòo kpɑ̀ɑ̀tìi ò bekɛ kɛ dɔ̀: Soɑbu nɔ̀ùtɛ̀ í kɔkɛ́ dɛ miɛkɑɑ̀? Kòo nitipòkù dɔ̀: Okpɑ̀ɑ̀tì ɑ bomu! Weti weti nwe ɑ bɛ́immɛ̀, ɑ kóo tɔ̃ntì Soɑbu weè n nɑ̀kɛ́ n dò nkɛ́nɑ́kɛ́ tì timɔu. 
\v 20 Ò mɛ dɔ̀ɔ̀ kɛ bo pentɛ tinɑ́ɑǹtì nti mɛ̀tɛ̃mɛ̀, kɛ̀ n yiɛ̀ mmɛ nciì kɛ dònnɛ̀ ti Yiɛ̀ nKuyie ntɔ̃nnì kɛ yɛ̃́ dɛmɔu dɛ̀ɛ̀ dɔ̀ɔ̀ri kɛtenkɛ̀ ĩ́nkɛ̀.
\b
\p
\v 21 Kòo kpɑ̀ɑ̀tìi kɔtɛ kɛ́nɑ́kɛ́ Soɑbu kɛ dɔ̀: N yiemmu kɛ bo dɔɔ̀ ɑ m bekɛ tì, kɔtɛ kɛ́yúní odɑpɑ̀ɑ̀ nhAbusɑdɔmmu kɛ̀ di konní.
\p
\v 22 Kɛ̀ Soɑbuu nínkú okpɑ̀ɑ̀tì ììkɛ̀ kɛ́sĩ́nnɔ́ɔ kɛtenkɛ̀ kóò dɔunnɛ̀ mutɔ̃mmú kɛ dɔ̀: Okpɑ̀ɑ̀tì n yɛ̃́mu kɛ dò m pɛ̀tɛ́ ɑ kó mɛsɑ̀ɑ̀, ɑ mɛ̀ nyiemmɛ̀ kɛ dɔ̀ɔ̀ mí nhɑ kóo tɔ̃ntì n dɑ bekɛ tì.
\p
\v 23 Kɛ̀ Soɑbuu ítɛ́ kɛ́pĩ́ nkucɛ kɛ́kɔtɛ Kesuu kɛ́tɔní Abusɑdɔmmu, kɛ̀ bɛ̀ɛ konní Sedisɑdɛmmu. 
\v 24 Kòo kpɑ̀ɑ̀tìi bɛ́i nkɛ dɔ̀: Wèe kò nho cĩ́ɛ̃̀tɛ̀ n yí dɔ́ kóò yɑ̀.
\p Mɛm̀mɛ kɛ̀ Abusɑdɔmmuu kò mbɑ́ ò í yɑ̀ okpɑ̀ɑ̀tì.
\s1 Dɑfiti nɛ̀ Abusɑdɔmmu bɛ̀ wɛ̃̀tɛ kɛ tɑummɛ̀
\p
\v 25 Isidɑyɛɛribɛ miɛkɛ òmɔù do í bo wèè wenni kɛ dònnɛ̀ Abusɑdɔmmu, kɛ́túótɛ́ o nɑɑ̀cɛ̀i kɛ́dekɛnɛ̀ o yuu dɛ̀mɑrɛ̀ do í bo ɑ bo yĩ́ dɛ̀ɛ̀ yetɛ́. Dɛɛ̀ do te kɛ̀ bɛ̀ nhò sɑ̃ntí. 
\v 26 Bɑ́ dìì benni kó mukṹṹ nkòò níí kɛ̃ĩ́ o yùtì, kɛ yɛ̃́ tì ɔ̃ɔ̃ cɛ̃ɛ̃kɛmɛ̀ mɛdiɛ̀ nkòò níí tì kɛ̃ĩ́ kɛ́cɔ̃nnɛ́ okpɑ̀ɑ̀tì kó tɛbiètɛ̀ kɛ̀ tì mbo cìdóò bɛ̀dɛ́bɛ̀. 
\v 27 Abusɑdɔmmu do mɔkɛ initidɑbí itɑ̃ɑ̃ti ndi dɛnitipobirɛ dɛ̀mɑ́ɑ̀, kɛ̀ dɛ yètìrì tú Tɑmɑɑ kɛ̀ dɛ̀ wenni mɛdiɛ̀.
\b
\p
\v 28 Kɛ̀ Abusɑdɔmmu mbo Sedisɑdɛmmu kɛ dɔ̀ yɛbie nyɛ̀dɛ́ɛ̀ bɑ́ ò í kɔ̀tɛ okpɑ̀ɑ̀tì cĩ́ɛ̃̀tɛ̀. 
\v 29 Diyiè mɑrì kòo yú Soɑbu kɛ bo ò tɔ̃ nhokpɑ̀ɑ̀tì borɛ̀ kɛ̀ Soɑbuu yetɛ kɛ í nkɔ̀tɛní. Kòò yíɛ́ kɛ́tɔ̃nko otɔù kɛ̀ Soɑbu bɑɑ yetɛ, ò í nkɔ̀tɛní. 
\v 30 Dɛ mɔ̀nnì kɛ̀ Abusɑdɔmmuu nɑ́kɛ́ o kó bɛtɔ̃mbɛ̀ kɛ dɔ̀: Kupɑku kùù mɛ mbo n kɔku borɛ̀ dí kù cɔ́u. Kòo kó bɛtɔ̃mbɛ̀ɛ dɔɔ̀ ò bɛ̀ nɑ̀kɛ́ tì. 
\v 31 Kɛ̀ Soɑbuu kɔtɛ dɛndɛ bɑ̀mbɑ̀ nhAbusɑdɔmmu borɛ̀ kóò bekɛ kɛ dɔ̀: Dɛ̀ yĩ́mɛ kɑ̀ɑ kó bɛtɔ̃mbɛ̀ cɔ́u m pɑku? 
\v 32 Kɛ̀ Abusɑdɔmmu dɔ̀: N dɑ yumu kɑ̀ɑ yetɛ, n do dɔ́ kɛ dɑ tɔ̃ nhokpɑ̀ɑ̀tì borɛ̀ ndɛ kɑ̀ɑ ò bekɛ kɛ tú, n yɛ̃ mbɑ nte kɛ̀ n yìtɛ́ní Kesuu? Kɛ̀ n do nkpɑɑní dɛ̀ nɑ ntɔ̃ũ. Di mmɔ̀nnì n dɔ́ kɛ́kɔtɛmu okpɑ̀ɑ̀tì borɛ̀, kɛ̀ n cɑ̀ɑ̀rɛ̀mu kòò bo n kuɔ wè n kuɔ.
\p
\v 33 Kɛ̀ Soɑbuu kɔtɛ kɛ́nɑ́kɛ́ okpɑ̀ɑ̀tì Abusɑdɔmmu ò nɑ̀kɛ́ tì timɔu. Kòo kpɑ̀ɑ̀tìi duɔ́ nkɛ̀ bɛ̀ɛ ò yùní kòo cokɛ́ní kɛ́nínkóo o ììkɛ̀ kòo ò kɔúnnɛ̀.
\c 15
\s1 Abusɑdɔmmu dɔ́mɛ̀ kɛ́cɔutɛ́ tikpɑ̀tì
\p
\v 1 Kɛ̀ Abusɑdɔmmuu wɑɑ́ ntɛkpɑ̀rìnɑɑsɑ̃ntɛ̀ nɛ̀ bɛnìtìbɛ̀ sipísìnùmmù kɛ̀ bɛ̀ nni o ììkɛ̀ kɛ cokù. 
\v 2 Kɛ níí pikɛ cutɛ dikṹnweńnì sɛ̀ì kɛ́nkɑri kucɛ nùù kùù kɔ̀rìnɛ̀ dihɛì kó dibòrì, kòò mɔù mɔ̀kɛ tìmɑtì kɛ kɔri kɛ bo beé nhokpɑ̀ɑ̀tì, Abusɑdɔmmuu ò yu kɛ́bekɛ́ ò yɛ̀nní dɛ̀, kòò ĩ́: Okpɑ̀ɑ̀tì dɑpɑ̀ɑ̀ m bonní Isidɑyɛɛribɛ botí miɛkɛ nkɛ. 
\v 3 Abusɑdɔmmu dɔ̀: Dɛ̀ wenni, fɔ̃́ɔ̃̀ nɑɑti òmɔù mɛ nyí yóó dɑ keènɛ̀ ɑ tɛtì okpɑ̀ɑ̀tì borɛ̀.
\p
\v 4 Kòò dèè mɛmmɛ ò dɔ̀: Kɛ̀ míì nɛ́ do ntú obeéntì di nhɛì, bɛ̀ɛ̀ kɔ̀rìní tibeéntì n nɑ mbɛ̀ bekùnɛ̀ weti weti nwe.
\p
\v 5 Kɛ̀ dɛ yiɛ̀ nkɔ̀tɛní kɛ bo nínkú o ììkɛ̀ wèe ò íinní kóò kɔúnnɛ̀.
\b
\p
\v 6 Mɛm̀mɛ Abusɑdɔmmu do dɔɔrimɛ̀ bɛ̀ɛ̀ kó dimɑ̀ɑ̀ kɔ̀rìní tibeéntì okpɑ̀ɑ̀tì borɛ̀, kɛ yũɔ̃ nyIsidɑyɛɛribɛ bɛmɔu yɛ̀mmɛ̀ o bíɛ́kɛ̀.
\b
\p
\v 7 Yɛbie nyɛ̀nɑ̀ɑ̀ kó difɔ̃nkúò kɛ̀ Abusɑdɔmmuu nɑ́kɛ́ okpɑ̀ɑ̀tì kɛ dɔ̀ okpɑ̀ɑ̀tì m pɑ̃ kucɛ kɛ̀ n kɔtɛ Ebunɔɔ kɛ́dɔɔ̀ ti Yiɛ̀ nKuyie nkó ikuɔ́, n do kù dɔúnnɛ̀ dinùù ndi 
\v 8 n do bo dìì mɔ̀nnì Kesuu Sidii tempɛ̃ mmiɛkɛ kɛ́dɔúnnɛ̀ Kuyie nku dinùù kɛ dɔ̀ kɛ̀ kù yie nkɛ n kpɛ̃nnɛ́ní Sedisɑdɛmmu m bo kù fìé iwũɔ̃ Ebunɔɔ. 
\v 9 Kòo kpɑ̀ɑ̀tì dɔ̀: Kɔtɛ kɛ̀ dɛ̀ nnɑɑti.
\p Mɛm̀mɛ kɛ̀ Abusɑdɔmmuu kɔtɛ Ebunɔɔ. 
\v 10 Ò kɛ mbo kɛ́tɔ̃ nho kó bɛnìtìbɛ̀ disɔ̀rì Isidɑyɛɛribɛ bɛmɔu borɛ̀ kɛ̀ bɛ̀ɛ bɛ̀ nɑ̀kɛ́ kɛ dɔ̀: Kɛ̀ di kèè dìì mɔ̀nnì ditɑ̃tɛheù kuɔ́mmɛ̀, dimɔu di pĩɛ̃kɛ́ kɛ dɔ̀: Abusɑdɔmmu nɑɑ́ nhokpɑ̀ɑ̀tì Ebunɔɔ. 
\v 11 Bɛnìtìbɛ̀ sikɔupísìdɛ́ (2000) bɛ̀ɛ̀ do ò nɛínɛ̀ Sedisɑdɛmmu kɛ́kɔtɛ Ebunɔɔ bɛ̀ mɛ ndo í yɛ̃́ kɛ dò nhò dɔ́ kɛ́dɔɔ̀ tìmɑtì.
\p
\v 12 Bɛ̀ feu dìì mɔ̀nnì Kuyie nyiwũɔ̃, kɛ̀ Abusɑdɔmmuu tɔ̃ nkɛ̀ bɛ̀ɛ yúní Aitofɛɛdi wèè do ɔ̃ nduɔ̀ nyitié nDɑfiti, kòò bo Kido o ɛì miɛkɛ. Kɛ̀ Abusɑdɔmmu kó bɛnìtìbɛ̀ mmɔ́ nkɛ sṹũnko, kòo bo bɔmmɛ̀ okpɑ̀ɑ̀tì kó mɛyɛ̀mmɛ̀ mmɔ́ nkɛ dɛ́úkú o miɛkɛ.
\s1 Dɑfiti yɛ̀mɛ̀ Sedisɑdɛmmu
\p
\v 13 Dɛ mɔ̀nnì kɛ̀ bɛ̀ɛ nɑ́kɛ́ Dɑfiti kɛ dɔ̀: Isidɑyɛɛribɛ bɛmɔu tũ̀nnɛ Abusɑdɔmmu nwe. 
\v 14 Kɛ̀ Dɑfiti pɑ̃̀nkɛɛ nɑ́kɛ́ o kó bɛtũ̀mbɛ̀ bɛ̀ɛ̀ ò bonɛ̀ Sedisɑdɛmmu kɛ dɔ̀: Tí cokɛ́nɛ̀, Abusɑdɔmmu yɑ̀ɑ̀ bo ti kuɔ, tí cɑ̃rikɛ kòò yɑ̀ɑ̀ bo ti sɔ̃́nkɛ́ kɛ̀ mɛyɛi mpɛitɛ́ dihɛì kòo kuɔ kubotí kumɔu. 
\v 15 Kòo tũ̀mbɛ̀ɛ ò tɛ̃̀ńnɛ́ kɛ dɔ̀: Kɑ̀ɑ tɑ̃ɑ̃tɛ́ tì ti bo ɑ fɔ̃nkúò ndi.
\p
\v 16 Dɛ mɔ̀nnì okpɑ̀ɑ̀tì nɛ̀ o kɔbɛ kɛ̀ bɛ̀ɛ ítɛ́ tɛkpɑ̀ɑ̀tìcĩ́ɛ̃̀tɛ̀ nɛ̀ sinɑɑ̀cɛ̀i, kòo yóu o pocĩɛ̃̀ ntɛpíítɛ̀ mɑ́ɑ̀ kɛ̀ yɛ̀ mbɑɑ o cĩ́ɛ̃̀tɛ̀.
\p
\v 17 Okpɑ̀ɑ̀tì nɛ̀ o kɔbɛ bɛ̀ yɛ̀nní dìì mɔ̀nnì dihɛì kɛ́cómmú tɛcĩ́ɛ̃̀tɛ̀ sɔntɛ tɑkɛ́, 
\v 18 kòo kó bɛtũ̀mbɛ̀ ḿpɛ̃nkù. Kɛdɛtiibɛ nɛ̀ Pedɛsiibɛ kɛ̀ bɛ̀ ḿpɛ̃nkù nɛ̀ Itɑii nɛ̀ Kɑti kó bɛhɑ̃ɑ̃pɔ̀mbɛ̀ sikɔusìkuɔ̀ (600) bɛ̀ɛ̀ do tũ̀nnɛ Dɑfiti kɛ̀ bɛ̀ɛ dɔ́ɔ́tɛ́ kɛ́mpɛ̃nkù o ììkɛ̀. 
\v 19 Kòo nɑ́kɛ́ Itɑii Kɑti ɛì kó bɛhɑ̃ɑ̃pɔ̀mbɛ̀ kóo kótì kɛ dɔ̀: Dɛ̀ yĩ́mɛ kɑ̀ɑ dɔ́ kɛ́ nti nɛínɛ̀? Wɛ̃tɛ dihɛì kɛ́mbonɛ̀ okpɑ̀ɑ̀tì pɑ̀nwè, ɑ tú opɔ̀ɔ̀ nwe kɛ kɔ̀tɛní kɛ ompu diɛ. 
\v 20 A tùɔ̀kɛní ti ciɛ dɛ̀ í mɔ̀ntɛ pɑ̃̀nkɛ bɑ́ɑ́ ti nɛinɛ̀, m mɛ nkètɛ́ kɛ í yɛ̃́ n kɔri kɛ̀. Nɛinɛ̀ ɑ kɔbɛ kɛ̀ dí wɛ̃tɛ dihɛì kɛ̀ Kuyie nní ndi bonɛ̀ kɛ́ di dɔɔ̀ mɛsɑ̀ɑ̀.
\p
\v 21 Kɛ̀ Itɑii ò tɛ̃̀ńnɛ́ kɛ dɔ̀: Okpɑ̀ɑ̀tì, ti Yiɛ̀ nKuyie mbomu kɑ̀ɑ bo, ɑ yó mborɛ̀ n yó ndɛ mbo, kɛ̀ mukṹṹ mmu tí kú, kɛ̀ mufòmmu mmu tí nfòù. 
\v 22 Kɛ̀ Dɑfiti dɔ̀: Dɛ̀ wenni niitɛ́, kòo niitɛ́ nɛ̀ bɛhɑ̃ɑ̃pɔ̀mbɛ̀ nɛ̀ bɛ cɛ̃́ĩ kɔbɛ nɛ̀ bɛ bí. 
\v 23 Kɛ̀ bɛnìtìbɛ̀ bɛmɔuu tiitɛ́ yɛdɑbùò nkɛ́mpɛ̃nkù Dɑfiti ììkɛ̀. O mɔ́mmuɔ nkòo séntɛ́ kukó nSetinɔɔ, kòo kɔbɛ nhò tũ̀ nkɛ̀ bɛ̀ kèrí kucɛ kùù dìrínɛ̀ dikpɑ́ɑ̀. 
\v 24 Kɛ̀ ikuɔ́ nìùtì Sɑdɔki dɛ̀ bo nɛ̀ Defiibɛ bɛ̀ɛ̀ tɔ Kuyie ntɑummɛ̀ tɔu, kɛ̀ bɛ̀ɛ dì dɔú nyikuɔ́ nìùtì Abiɑtɑɑ borɛ̀ kɛ́mbɑɑnɛ̀ bɛnìtìbɛ̀ bo yɛ̀mɛ̀ dihɛì bɛmɔu. 
\v 25 Kɛ̀ bɛ̀ɛ pɛ̃ɛ̃tɛ́ kɛ́deè, kòo kpɑ̀ɑ̀tìi nɑ́kɛ́ Sɑdɔki kɛ dɔ̀: Kpɛ̃nnɛ́ Kuyie ntɑummɛ̀ tɔu dihɛì, kɛ̀ Kuyie nni ndɔ́nɛ̀ mɛsɑ̀ɑ̀ nkù yóó duɔ́mmu kɛ̀ n wɛ̃tɛní kɛ́yɑ̀ ku cĩ́ɛ̃̀tɛ̀ nɛ̀ ku tɑummɛ̀ tɔu. 
\v 26 Kɛ̀ kù mɛ ndɔ́ kɛ́ m mɔntɛ ku kó mɛsɑ̀ɑ̀ nkùu dɔɔ̀ kù dɔ́mɛ̀.
\p
\v 27 Kòo yíɛ́ nɑ́kɛ́ ikuɔ́ nìùtì Sɑdɔki kɛ dɔ̀: Wɛ̃tɛ dihɛì nɛ̀ ɑ birɛ Ayimɑsi nɛ̀ Abiɑtɑɑ nɛ̀ o birɛ Yonnɑtɑ̃ɑ̃ kɛ̀ dɛ̀ nnɑɑti. 
\v 28 Mí n yó mbo kukó nSuditɛ̃ɛ̃ pɛɛ́mmɛ̀ mmɛ kɛ yɑ̀ɑ keènɛ̀ di kpɛti dòmmɛ̀.
\p
\v 29 Mɛm̀mɛ Sɑdɔki nɛ̀ Abiɑtɑɑ kɛ̀ bɛ̀ɛ kpɛ̃nnɛ́ Kuyie ntɑummɛ̀ tɔu Sedisɑdɛmmu kɛ́ nkɛ mbo.
\s1 Dɑfiti tɔ̃mmɛ̀ Usɑii kòò bo pɑɑtɛ́ Abusɑdɔmmu
\p
\v 30 Kɛ̀ Dɑfiti ńdeètì Odìfíè tɑ̃rì kɛ kɔnti, kɛ dɑ́ɑ́tí o yuu kuyɑ̀ɑ̀kù, kɛ kérí mɛnɑcɛ̀bii, bɛ̀ɛ̀ ò nɛínɛ̀ kɛ̀ bɛ̀ múnkɛ dɑ́ɑ́tí bɛ yɔ tiyɑ̀ɑ̀tì kɛ kɔnti. 
\v 31 Kɛ̀ bɛ̀ɛ nɑ́kɛ́ Dɑfiti Aitofɛɛdi kɔkɛ́mɛ̀ bɛ̀ɛ̀ dɔ́ kóò bɔ mbɛ miɛkɛ, kɛ wɛ̃nnɛ́ Abusɑdɔmmu. Kɛ̀ Dɑfitii kuɔ́nko kɛ dɔ̀: Ti Yiɛ̀ nKuyie, n dɑ bɑ́ɑ́mmu! Yóu kɛ̀ Aitofɛɛdi kó itié nnɑɑ́ nyisĩ́ntɛ́kpɛyi. 
\v 32 Dɑfiti tùɔ̀kɛ dìì mɔ̀nnì ditɑ̃rì yómmɛ̀, bɛ̀ bɑ̀ɑ́ ndɛ̀ Kuyie, kɛ́yɑ̀ní Usɑii Adikɛ̃ɛ̃ ɛì kou wèè do ɔ̃ nhò duɔ̀ nyitié nkòò kèríní o ììkɛ̀, kòo yɑɑ̀bòrì kɛ̃rí kɛ̀ mutɑ̃́ɑ̃́ ndɑ́ɑ́tí o yuu. 
\v 33 Kɛ̀ Dɑfitii ò nɑ̀kɛ́ kɛ dɔ̀: A bɑ́ n tũnnɛ ɑ yó ntú ditɔu ndi n kpɛ́í. 
\v 34 Wɛ̃tɛ dihɛì kɛ́nɑ́kɛ́ Abusɑdɔmmu kɛ dɔ̀: Okpɑ̀ɑ̀tì n dɔ́ kɛ́mpĩ́ nhɑ tɔ̃mmú mmu, n do ɔ̃ mpĩ́ nhɑ cicɛ kɔ̃mu mmu. Dɛ mɔ̀nnì ɑ bo nɑ kɛ́ n teennɛ̀ kɛ́dítínnɛ́ Aitofɛɛdi tié. 
\v 35 Kɑ̀ɑ ntɔ́kɛ́nɛ̀ ikuɔ́ nìùbɛ̀ Sɑdɔki nɛ̀ Abiɑtɑɑ, bɛ̀ kɛ mbo, kɑ̀ɑ kèè tìì kó dimɑ̀ɑ̀ okpɑ̀ɑ̀tì cĩ́ɛ̃̀tɛ̀ ɑ bɛ̀ nɑ̀kɛ́. 
\v 36 Sɑdɔki birɛ Ayimɑsi nɛ̀ Abiɑtɑɑ birɛ Yonɑtɑ̃ɑ̃ bɛ̀ kɛ mbo, ɑ yó mbɛ ntũɔ̃̀nní kɛ̀ bɛ̀ n nɑ̀ɑ́ nhɑ yo tìì kó dimɑ̀ɑ̀.
\p
\v 37 Usɑii wèè do ɔ̃ nduɔ̀ nDɑfiti itié nkòo ntùɔ̀koo Sedisɑdɛmmu kɛ mɑ̀nnɛ̀ Abusɑdɔmmu tùɔ̀koomɛ̀.
\c 16
\s1 Dɑfiti dɔ̀ɔ̀mɛ̀ mɛsɑ̀ɑ̀ nSibɑɑ
\p
\v 1 Dɑfiti pɛ̃ɛ̃tɛ́ dìì mɔ̀nnì ditɑ̃rì yómmɛ̀ sɑ́m̀pɔ́ kɛ̀ Mɛfibosɛti kóo tɔ̃ntì Sibɑɑ tuɔkoo kɛ kpɑɑkɛ sɑ̃mmɑrímúbɛ̀ bɛ̀dɛ́bɛ̀ kɛ̀ bɛ̀ tɔ pɛ̃́ɛ̃̀bɛ̀ sikɔusìdɛ́ (200), fínyĩ̀ kó yɛbɛ kperɛ̀ siyùu ntɛkɔ̀ùtɛ̀ (100) yɛsũ̀ũ̀yɛ̀ tɛkɔ̀ùtɛ̀ (100) nɛ̀ mɛnɑɑ̀ nkudɔukù kumɑ́ɑ̀. 
\v 2 Kòo kpɑ̀ɑ̀tì Dɑfitii ò bekɛ kɛ dɔ̀: A dɔ́ kɛ́ dɛ̀ dɔ̀ɔ̀nɛ̀ bɑ? Kɛ̀ Sibɑɑ ò tɛ̃̀ńnɛ́ kɛ dɔ̀: Okpɑ̀ɑ̀tì ɑ cĩ́ɛ̃̀tɛ̀ kɔbɛ bo ndekù sɑ̃mmɑrímúbɛ̀, kɑ̀ɑ ɑ̃ɑ̃pɔ̀mbɛ̀ɛ cɑ́ɑ́kɛ́ pɛ̃́ɛ̃̀bɛ̀ nɛ̀ yɛtebɛ, bɛ̀ɛ̀ ce ndikpɑ́ɑ̀ miɛkɛ kɛ ɔ̀u kɛ̀ bɛ̀ɛ yɑ̃ mɛnɑɑ̀.
\p
\v 3 Kòo kpɑ̀ɑ̀tì dɔ̀: Mɛfibosɛti ɑ yiɛ̀ nSɑuri yɑɑ̀birɛ borɛ? Kɛ̀ Sibɑɑ dɔ̀: Ò kpɑɑ́ Sedisɑdɛmmu nwe kòo yɛ̀mmɛ̀ dò ndi mmɔ̀nnì Isidɑyɛɛribɛ bo ò duɔ́ nho yɑ̀ɑ̀kù kpɑ̀tì. 
\v 4 Kòo kpɑ̀ɑ̀tì dɔ̀: M bo dɑ duɔ́ mMɛfibosɛti kpɛrɛ dɛmɔu kɛ̀ Sibɑɑ nínkóo okpɑ̀ɑ̀tì ììkɛ̀ kɛ dɔ̀: Okpɑ̀ɑ̀tì fɔ̃́ nnɛ̀ mutɔ̃mmú ɑ nsɔkɛ́ kɛ́ nni nkuɔ̀ mmɛsémmɛ̀.
\s1 Simɛii nɔɔsìrìmɛ̀ Dɑfiti
\p
\v 5 Dɑfiti tùɔ̀kɛ dìì mɔ̀nnì Bɑudimmu ɛì kɛ̀ Sɑuri nɑɑ̀mùnkù kou mɔù Kedɑ birɛ, kòo yètìrì tu Simɛii, kòo yɛ̀nní kɛ́mbuɔ̀ nDɑfiti kusĩ̀nkù. 
\v 6 Koò bɔmmu yɛtɑ̃́rɛ̀ koò uuti mutɑ̃́ɑ̃́, bɑ́ nɛ̀ Dɑfiti kò bɛtũ̀mbɛ̀ nɛ̀ bɛhɑ̃ɑ̃pɔ̀mbɛ̀ do mɛ nhò murímɛ̀. 
\v 7 Kòo nhò sɑ̃̀ɑ̃́ nkɛ pĩɛ̃kù kɛ tú: Fũtɛ, fũtɛ dɛsĩ̀nnɛ̀ fɔ̃́ nhonitikɔ̀ùtì! 
\v 8 Ti Yiɛ̀ nKuyie ndɑ kpetínnɛ́ ɑ kùɔ mɛ̀ɛ̀ kpɛ́í nkɛ Sɑuri cĩ́ɛ̃̀tɛ̀ ɑ yùúkúmu Sɑuri kpɑ̀tì dɛɛ̀ te kɛ̀ ti Yiɛ̀ nKuyie nti duɔ́ nhɑ birɛ Abusɑdɔmmu, kɑ̀ɑ tɑ mɛhɑ́ɑ́rìmɛ̀ miɛkɛ ɑ tú onitikɔ̀ùtì nwe.
\p
\v 9 Kɛ̀ Seduyɑɑ birɛ Abikɑii nɑ́kɛ́ okpɑ̀ɑ̀tì kɛ dɔ̀: Dɛmɔcírɛ̀ diɛ mbɑ́ ntṹṹ nkɛ dɑ sɑ̃́ɑ̃́, yóu kɛ̀ n kɔtɛ kɛ́ dɛ̀ fèútɛ́. 
\v 10 Kòo kpɑ̀ɑ̀tì Dɑfiti dɔ̀: Di bɑ́ɑ́ ti tɑ fɔ̃́ nnɛ̀ ɑ kóo kótì Soɑbu kòò n sɑ̃̀ɑ̃́ ti Yiɛ̀ nKuyie nkuù yɛ̃ nhò nni nsɑ̃́ɑ̃́ nhòmɔù bɑ́ɑ́ nɑ kóò bɑ̀ɑ. 
\v 11 Kɛ̀ Dɑfitii nɑ́kɛ́ o tũ̀mbɛ̀ nɛ̀ Abikɑii kɛ dɔ̀: Mí m birɛ mɔ́mmɔnnɛ m pɛitɛ́ dɛ̀ dɔ́ kɛ́ n kuɔ, kɛ̀ Bɛnsɑmɛɛ botí kou weè nɛ́ bo n yóuɑ̀? Yóunɛ̀ we kòo nni nsɑ̃́ɑ̃́, ti Yiɛ̀ nKuyie nkuù yɛ̃ nhò nni nsɑ̃́ɑ̃́. 
\v 12 Kɛ̀ dɛ̀ yɛ̀mmɛ ti Yiɛ̀ nKuyie mbo wéntɛ́ n sémmɛ̀ kɛ́duɔ́ nkɛ̀ mɛyɛi nhò n dɔ́nɛ̀ mɛ̀ɛ nɑɑ́ mmɛsɑ̀ɑ̀.
\b
\p
\v 13 Dɑfiti nɛ̀ o kɔbɛ kɛ̀ bɛ̀ nsɔkɛ́ bɛ cɛ kɛ̀ Simɛii bɛ̀ dirínɛ̀ ditɑ̃rì pɛ̃ri kɛ bɛ̀ bɔmmù kusĩ̀nkù kɛ tú bɛ̀ bo yɑ̀, kɛ bɛ̀ bɔmmù yɛtɑ̃́rɛ̀ kɛ bɛ̀ uuti mutɑ̃́ɑ̃́. 
\v 14 Dɑfiti nɛ̀ o kɔbɛ kɛ̀ bɛ̀ɛ ntuɔkoo kukó nSuditɛ̃ɛ̃ pɛɛ́mmɛ̀, kɛ ɔ̀u mmucèmmu kɛ́kɑroo kɛ́nhompu dɛborɛ̀.
\s1 Usɑii kɔ̀tɛmɛ̀ Abusɑdɔmmu borɛ̀
\p
\v 15 Dɛ mɔ̀nnì Abusɑdɔmmu nɛ̀ Isidɑyɛɛribɛ kɛ̀ bɛ̀ɛ kò nSedisɑdɛmmu kɛ̀ Aitofɛɛdi mbɛ̀ nɛínɛ̀. 
\v 16 Usɑii Adikiti ɛì kou wèè do ɔ̃ nduɔ̀ nDɑfiti itié nhò tùɔ̀koo dìì mɔ̀nnì Abusɑdɔmmu borɛ̀ kɛ dɔ̀: Okpɑ̀ɑ̀tì ḿbo sɑ̃́ɑ̃̀!
\p
\v 17 Kɛ̀ Abusɑdɔmmuu ò bekɛ kɛ dɔ̀: Nɛ̀ ɑ nɛ́po Dɑfiti di nɛ́potì dèèmu dɛndɑɑ̀? Dɛ̀ dòmmɛ kɑ̀ɑ í nɛínɛ̀ ɑ nɛ́po. 
\v 18 Kɛ̀ Usɑii ò tɛ̃̀ńnɛ́ kɛ dɔ̀: Ti Yiɛ̀ nKuyie nnɛ̀ Isidɑyɛɛribɛ bɛmɔu tɑ̃ɑ̃tɛ́ wè n we ndɔ́ n yó nwe mbonɛ̀. 
\v 19 Kɑ̀ɑ wɛ̃̀tɛ kɛ tú n nɛ́po birɛ, n yí sɔ̃̀ńtɛ́ kɛ tũ mbɑ́ wè, n do pĩ́ mmɛ̀ɛ̀ botí ɑ cicɛ tɔ̃mmú n yó mmɛ mpĩ́ nhɑ kɔ̃mu.
\s1 Abusɑdɔmmu duɔ́nɛ̀mɛ̀ Dɑfiti pocĩɛ̃̀
\p
\v 20 Kɛ̀ Abusɑdɔmmuu nɑ́kɛ́ Aitofɛɛdi kɛ dɔ̀: Nɑ́kɛ́nɛ̀ kɛ́yɑ̀ ti dò nkɛ́dɔɔ̀mɛ̀.
\p
\v 21 Kɛ̀ Aitofɛɛdi pɑ̃̀nkɛɛ ò tɛ̃̀ńnɛ́ kɛ dɔ̀: Kɔtɛ kɛ́duɔ́nɛ̀ ɑ cicɛ pocĩɛ̃̀ nhò yóu yɛ̀ kɛ̀ yɛ̀ bɑ̀ɑ tɛkpɑ̀ɑ̀tìcĩ́ɛ̃̀tɛ̀. Isidɑyɛɛribɛ yóó tì kèèmu kɛ́bɑntɛ́ ɑ cicɛ dɑ yĩɛ̃kɛmɛ̀ kɑ̀ɑ kɔbɛ kɔ̃̀ntìi yɑukɛ.
\p
\v 22 Kɛ̀ bɛ̀ɛ cónnɛ́ kutouku tiyɑ̀ɑ̀tì kɔku Abusɑdɔmmu kpɑ̀ɑ̀tìcĩ́ɛ̃̀tɛ̀ kudɑ̀nkù, kòo tɑ kɛ́ndɔunɛ̀ o cicɛ pocĩɛ̃̀ nyIsidɑyɛɛribɛ bɛmɔu ììkɛ̀.
\b
\p
\v 23 Dɛ kó dimɔ̀nnì Aitofɛɛdi do ɔ̃ nkòò bɛ́i ntì bɛ̀ɛ tì yienkomu kɛ́ndò nKuyie nkuù tì bɛ́i, Dɑfiti nɛ̀ Abusɑdɔmmu bɛ̀ do tì yìémmu bɛmɔu.
\c 17
\s1 Abusɑdɔmmu yiemmɛ̀ itié nyɛiyi
\p
\v 1 Kɛ̀ Aitofɛɛdii nɑ́kɛ́ Abusɑdɔmmu kɛ dɔ̀: M pɑ̃ kucɛ kɛ̀ n tɑ̃ɑ̃tɛ́ bɛnìtìbɛ̀ tɛkɔ̀ùpípíítɛ̀ nɛ̀ sikɔupísìdɛ́ (12000), kɛ̀ tí kɔtɛ Dɑfiti wɑmmù kɛ nyènkɛ̀. 
\v 2 Ti yóó ò nìntɛmu ò bo ɔu dìì mɔ̀nnì kòo wɛ̃rímúu deè, kɛ̀ tí bɛ̀ cùtɛ bɛ̀ɛ̀ kó dimɑ̀ɑ̀ ò nɛínɛ̀ kɛ̀ bɛ̀ɛ cokɛ́ kɛ̀ tí ò kùɔ omɑ́ɑ̀. 
\v 3 N yóó mɛ nyĩ́ kɛ́tɛ̃́nnɛ́ní Isidɑyɛɛribɛ bɛmɔu ɑ borɛ̀. Kɑ̀ɑ nìntɛ ɑ do wɑɑ̀ nwè kɛ dèè, bɛnìtìbɛ̀ bɛmɔu yóó wɛ̃tɛní ɑ borɛ̀ ndɛ kɛ́pɛ́tɛ́ mɛom̀pùmɛ̀.
\p
\v 4 Abusɑdɔmmu nɛ̀ Isidɑyɛɛribɛ kó bɛkótíbɛ̀ bɛmɔu kɛ̀ bɛ̀ɛ pɛ́nsìrì dɛ kó tinɑ́ɑǹtì. 
\v 5 Nɛ̀ mɛmmɛ kɛ̀ Abusɑdɔmmuu duɔ́ nkɛ̀ bɛ̀ɛ yúní Usɑii Adikiti ɛì kou kòò múnkɛɛ ò bekɛ kɛ bo yɑ̀ wenwe kó mɛyɛ̀mmɛ̀ dòmmɛ̀.
\p
\v 6 Kòo tuɔkoo kɛ̀ Abusɑdɔmmuu ò nɑ̀kɛ́ Aitofɛɛdi ò nɑ̀kɛ́ tì timɔu kɛ́deè kóò bekɛ kɛ dɔ̀: Ti dò nkɛ́dɔɔ̀ ò bɛ́i ntɑ̀ɑ kɛ̀ tí yóu? Ti nɑ́kɛ́ fɔ̃́ nkó mɛyɛ̀mmɛ̀ dòmmɛ̀.
\p
\v 7 Kɛ̀ Usɑii nɑ́kɛ́ Abusɑdɔmmu kɛ dɔ̀: Aitofɛɛdi mɛ nduɔ́ nyìì tié nyíe nyì í tú isɑ̀ɑ̀yì. 
\v 8 A yɛ̃́mu ɑ cicɛ nɛ̀ o nìtìbɛ̀ bɛ̀ dòmmɛ̀, bɛ̀ tu bɛkpɑ̀rìnuɔmbɛ mbɛ bɛ kpɛti yóumu, kɛ dò ndicìrícìrì dìì birɛ feti dikpɑ́ɑ̀. Ketíkɛ ɑ cicɛ wèè yɛ̃ dikpɑ̀nnì dòmmɛ̀, ò í yóó yie nkɛ́wɛ̃nnɛ́nɛ̀ bɛnìtìbɛ̀ kɛyènkɛ̀ kɛ́duɔ́. 
\v 9 Kɛ̀ dɛ̀ yɛ̀mmɛ̀ nɛ̀ miɛ nhò sɔ̀ri kutɑ̃dènkù mɑkù nku yoo kupíkù tɛkù, kɛ̀ bɛ̀ ketɛ́ ti kɔbɛ mukɔ̀ù bɛnìtìbɛ̀ yóó tì kèèmu kɛ dɔ̀: Abusɑdɔmmu kɔbɛ yĩɛ̃kɛ. 
\v 10 Dɛ mɔ̀nnì bɑ́ bɛ̀ɛ̀ mɔ̀kɛ yɛkɔ̃m̀bɔ̀ yɛcìrícìrɛ̀ kɔ̃mɛ bɛ kɔ̃̀ntì yóó yɑ̃rikɛmu, kɛ yɛ̃́ Isidɑyɛɛribɛ bɛmɔu yɛ̃́mɛ̀mu kɛ dò nhɑ cicɛ tú okpɑrìnuɔnti kòo kó bɛhɑ̃ɑ̃pɔ̀mbɛ̀ tu yɛkɔ̃m̀bɔ̀ yɛmbɛ̀. 
\v 11 Ntɛ n yóó dɑ nɑ́kɛ́ tì: Túótɛ́ Isidɑyɛɛribɛ tenkɛ̀ kɛmɔu miɛkɛ bɛhɑ̃ɑ̃pɔ̀mbɛ̀ kɛ̀ bɛ̀ nsũ kɛ mɑnnɛ̀ dɑ̀mɛ́ɛ̀rì nùù kó mubirímú, kɑ̀ɑ bɛ̀ nɛinɛ̀ ɑ mɔ́mmuɔ nkɛ̀ dí kɔtɛ kɛ bɛ̀ kpɑnnɛ̀. 
\v 12 Ti yóó nintɛmu Dɑfiti bɑ́ kòò dɔ́ wèe sɔri kɛ̀ tí ò do timɑɑ̀ntì ɔ̃ɔ̃ domɛ̀ kɛtenkɛ̀, wenwe nɛ̀ o kɔbɛ bɑ́ òmɔù bɑ́ɑ́ cootɛ́. 
\v 13 Kòò sɔ̀ri dihɛì mɑrì miɛkɛ bɛhɑ̃ɑ̃pɔ̀mbɛ̀ bo wɑɑ́ nyiwɛ̃ĩ kɛ̀ ti dì dɛ̀tɛ kɛ́tɑnnɛ́ kukó mmiɛkɛ bɑ́ ti bɑ́ɑ́ súɔ́ nditɑ̃́rì mɑrì.
\p
\v 14 Abusɑdɔmmu nɛ̀ Isidɑyɛɛribɛ kɛ̀ bɛ̀ɛ pɛ́nsìrì Usɑɑii kó itié nkɛ bɛ́i nkɛ dɔ̀: Usɑii kó itié nwenninɛ̀ Aitofɛɛdi kpɛyi.
\p Aitofɛɛdi kó itié nyii do tú isɑ̀ɑ̀yì kɛ̀ ti Yiɛ̀ nKuyie nkuù ndɔ́ ì bɑ́ɑ́ di, kɛ̀ dɛ̀ bo yie nkɛ̀ kùu tɑnnɛ́ Abusɑdɔmmu mɛyɛi mmiɛkɛ.
\s1 Dɑfiti sèńtɛ́mɛ̀ Suditɛ̃ɛ̃
\p
\v 15 Kɛ̀ Usɑii yĩ́ mɛmmɛ kɛ́nɑ́kɛ́ ikuɔ́ nìùtì Sɑdɔki nɛ̀ Abiɑtɑɑ Aitofɛɛdi duɔ́ nyìì tié Abusɑdɔmmu nɛ̀ Isidɑyɛɛribɛ kó bɛkótíbɛ̀, kɛ̀ wenwe nɛ́ yɛ̃ mmù. 
\v 16 Ò dèè mɛmmɛ kɛ́ bɛ̀ nɑ̀kɛ́ kɛ dɔ̀: Kɔtɛnɛ̀ mɛcɑ̃ɑ̃ nkɛ́nɑ́kɛ́ Dɑfiti kòò bɑ́ɑ́ duɔ́ Suditɛ̃ɛ̃ kó kubiriku borɛ̀, wèe yetoo kɛ́ kù séntɛ́ bɛ̀ yɑ̀ɑ̀ bo bɛ̀ kùɔ wenwe nɛ̀ o kɔbɛ.
\p
\v 17 Abiɑtɑɑ birɛ Yonɑtɑ̃ɑ̃ nɛ̀ Sɑdɔki birɛ Ayimɑsi kɛ̀ bɛ̀ bo Ã-Dokɛdi kɛ̀ bɛ̀ɛ tɔ̃nko onitipòkù mɔù kòò bo bɛ̀ nɑ̀kɛ́, kɛ̀ bɛ̀ɛ kɔtɛ kɛ tì nɑ̀kɛ́ Dɑfiti. Bɛ̀ do í dò nkɛ́tɑ dihɛì bɛ̀ yɑ̀ɑ̀ bo bɛ̀ yɑ̀. 
\v 18 Nɛ̀ mɛmmɛ kòo dɑpɑ̀ɑ̀ mmɔùu bɛ̀ yɑ̀ kɛ́kɔtɛ kɛ́nɑ́kɛ́ Abusɑdɔmmu, kɛ̀ bɛ̀ɛ cokɛ́ mɛcɑ̃ɑ̃ nkɛ́tɑ onìtì mɔù cĩ́ɛ̃̀tɛ̀ Bɑudimmu ɛì, kɛ̀ tɛbintɛ mɑtɛ̀ bo dɛ yiɛ̀ ncĩ́ɛ̃̀tɛ̀ kɛ̀ bɛ̀ɛ tɑ tɛ miɛkɛ kɛ́sɔri. 
\v 19 Kɛ̀ tɛcĩ́ɛ̃̀tɛ̀ kóo nitipòkùu túótɛ́ diyɑɑ̀kɔ̃̀nnì kɛ́pitɛ́ dɛĩ́nkɛ̀ kɛ́yennɛ́ tidiitì bɑ́ bɛ̀ í mbɑntɛ́ kɛ dò mbɛnìtìbɛ̀ bo dɛ miɛkɛ. 
\v 20 Kɛ̀ Abusɑdɔmmu tɔ̃rɛ̀ɛ tuɔkoo dɛ kóo nitipòkù cĩ́ɛ̃̀tɛ̀ kóò bekɛ kɛ dɔ̀: Yé Ayimɑsi nɛ̀ Yonɑtɑ̃ɑ̃ bɛ̀ borɛ̀? Kòo nitipòkù dɔ̀: Bɛ̀ pɛ̃ɛ̃tɛ́ kɛ tɑ mɛniɛ.
\p Kɛ̀ bɛ̀ɛ bɛ̀ wɑmmú kɛ́mɔ́ntɛ́ kɛ́kò nSedisɑdɛmmu. 
\v 21 Bɛ̀ ìtɛ́ dìì mɔ̀nnì, Ayimɑsi nɛ̀ Yonɑtɑ̃ɑ̃ kɛ̀ bɛ̀ɛ yɛ̀nní tɛbintɛ miɛkɛ, kɛ́kɔtɛ kɛ́nɑ́kɛ́ okpɑ̀ɑ̀tì Dɑfiti Aitofɛɛdi nɑ̀kɛ́ tì bɛnìtìbɛ̀, kɛ́deè kóò nɑ̀kɛ́ kɛ dɔ̀, bɛ̀ɛ cokɛ́ mɛcɑ̃ɑ̃ nkɛ́sentɛ́ Suditɛ̃ɛ̃.
\p
\v 22 Dɑfiti nɛ̀ o kɔbɛ bɛmɔu kɛ̀ bɛ̀ɛ ítɛ́ pɑ́íí kɛ́séntɛ́ kukó nSuditɛ̃ɛ̃, kɛ̀ dɛ̀ nyóó wentɛ́ bɑ́ òmɔù í kpɑɑ́ wèè í sèńtɛ́.
\b
\p
\v 23 Kɛ̀ Aitofɛɛdii bɑntɛ́ bɛ̀ í dɔ̀ɔ̀mɛ̀ ò bɛ̀ nɑ̀kɛ́ tì, kɛ́boú o nɛntì o sɑ̃mmɑrímú kɛ́kò nho ɛì kɛ́nɑ́kɛ́ o kɔbɛ o kpɛti, kɛ́deè kɛ́núnnɛ́ omɑ́ɑ̀, kɛ̀ bɛ̀ɛ ò kũnnɛ́ o cicɛ kó kufɔ̃ti.
\s1 Dɑfiti kɔ̀tɛmɛ̀ Mɑɑnɑimmu
\p
\v 24 Abusɑdɔmmu nɛ̀ o kɔbɛ Isidɑyɛɛribɛ kɛ̀ bɛ̀ ḿpɛ̃nkɛ́ Suditɛ̃ɛ̃ kɛ sɔ̃́ nDɑfiti tùɔ̀kɛ Mɑɑnɑimmu. 
\v 25 Abusɑdɔmmu do tɑ̃ɑ̃tɛ́ Amɑsɑ nwe kòò mbɑkɛ́ o ɑ̃ɑ̃pɔ̀mbɛ̀, weè do cɔutɛ́ Soɑbu fɔ̃̀tìrì. Amɑsɑ cicɛ do tú Itirɑ nwe, kɛ̀ bɛ̀ ò tu Isidɑyɛɛri, kòo puokɛ Abikɑyɛɛdi. Abikɑyɛɛdi cicɛ tu Nɑɑsi, kòo kóo kótì tu Seduyɑ tɑ̃ũ̀ Soɑbu yɔ̃.
\p
\v 26 Abusɑdɔmmu nɛ̀ Isidɑyɛɛribɛ kɛ̀ bɛ̀ɛ bɑ́tɛ́ Kɑdɑɑdi ɛì.
\p
\v 27-29 Dɑfiti tùɔ̀kɛ dìì mɔ̀nnì Mɑɑnɑimmu kɛ̀ bɛ̀ɛ ò tɔo yɛdúɔ̀ nɛ̀ tipecìtì kó tiyɑ̀ɑ̀tì nɛ̀ yɛbɔ nɛ̀ tidiitì nɛ̀ muyuo nnɛ̀ tidiitì tìì cìe nnɛ̀ itũ nɛ̀ itũ bɛ̀ tu ì Soyɑɑ nɛ̀ mɛcekùɔ̀ nnɛ̀ yɛnɑɑkɑ̃ɑ̃̀. Nɛ̀ bɛ yɛ̀mmɛ̀ miɛkɛ kɛ tú dɛ kó bɛnìtìbɛ̀ bo nhɔ̀unɛ̀ dikònnì nɛ̀ sinɛ́yɛ̃ĩ. Bɛ̀ɛ̀ do dɛ̀ mbɛ̀ tɔo bɛɛ̀ yètɛ̀ tú: Sobii Nɑɑsi birɛ Adɑbɑ Amɔniibɛ ɛì diɛrì kou, nɛ̀ Mɑkiiri Amiyɛɛdi birɛ Dodɑbɑɑ ɛì kou nɛ̀ Bɑdisidɑii Dokɛdimu ɛì kou kòò bonní Kɑdɑɑdi tempɛ̃ mmiɛkɛ.
\c 18
\s1 Bɛ̀ nɑmɛ̀ Abusɑdɔmmu nɛ̀ o kɔbɛ
\p
\v 1 Kɛ̀ Dɑfitii kɑɑ̀ mbɛnìtìbɛ̀ bɛ̀ɛ̀ ò bonɛ̀, kɛ́tɑ̃ɑ̃tɛ́ bɛ̀ɛ̀ yó mbɛ̀ bɑkɛ́, yie nsikɔùpí otɔù sikɔu, 
\v 2 kɛ́totɛ́ bɛhɑ̃ɑ̃pɔ̀mbɛ̀ yɛtĩ̀rɛ̀ yɛ̀tɑ̃ɑ̃ti kɛ́duɔ́ ndìmɑ́ɑ̀ Soɑbu kɛ́duɔ́ nditɛrì Seduyɑ birɛ Abikɑii Soɑbu nɑntɛ̀ kɛ́duɔ́ nditɛrì Itɑii Kɑdi kou, kɛ́deè kɛ́ bɛ̀ nɑ̀kɛ́ kɛ dɔ̀: N dɔ́ kɛ́ ndi nɛínɛ̀mu m mɔ́mmuɔ. 
\v 3 Kɛ̀ bɛhɑ̃ɑ̃pɔ̀mbɛ̀ dɔ̀: A í dò nkɛ́ nti nɛínɛ̀, bɑ́ kɛ̀ tínti cokɛ́ ti dootitɔbɛ̀ í yó mbɔti ti kpɛti, bɑ́ kɛ̀ bɛ̀ ti kùɔ dikéè, bɛ kpɛti í ti bonɛ̀. Fɔ̃́ mmɛ mmɑ̀nnɛ̀ bɛhɑ̃ɑ̃pɔ̀mbɛ̀ tɛkɔupípíítɛ̀ (10000) ntɛ ɑmɑ́ɑ̀. A dò nkɛ́nkpɑɑ́ dihɛì ndi, kɛ̀ dɛ̀ dòmmɛ̀ ɑ ti teennɛ̀. 
\v 4 Kòo kpɑ̀ɑ̀tì dɔ̀: Dɛ̀ wenni m bo dɔɔ̀ di dɔ́mɛ̀.
\p Mɛm̀mɛ kòò nkpɑɑ́ dihɛì kó dibòrì borɛ̀ kɛ̀ bɛhɑ̃ɑ̃pɔ̀mbɛ̀ dɔku inɑú bɛ tɔ̃ntì bɛ tɔ̃ntì dòmmɛ̀, biɛ nsikɔupí bɛtɔbɛ̀ sikɔu. 
\v 5 Kòo kpɑ̀ɑ̀tìi nɑ́kɛ́ Soɑbu nɛ̀ Abikɑii nɛ̀ Itɑii kɛ dɔ̀: N di bɑ́ɑ́mmu, di bɑ́ɑ́ kɔutɛ m birɛ Abusɑdɔmmu dò! Kɛ̀ bɛhɑ̃ɑ̃pɔ̀mbɛ̀ bɛmɔuu keè ò tì nɑ̀ɑ́mmɛ̀ bɛ̀ɛ̀ bɑkɛ́.
\b
\p
\v 6 Kɛ̀ Dɑfiti kó bɛhɑ̃ɑ̃pɔ̀mbɛ̀ɛ bɑ́ɑ́tí kɛ bo kɔtɛ kɛ́dokɛ́nɛ̀ Abusɑdɔmmu kɔbɛ, kɛ́pénnɛ́ kudookɔti Efɑdɑimmu kó kutúúkù. 
\v 7 Kɛ̀ Dɑfiti kó bɛhɑ̃ɑ̃pɔ̀mbɛ̀ɛ nɑ Abusɑdɔmmu kɔbɛ kɛ́ bɛ̀ ɑutɛ́ mɛdiɛ̀ mmɔ́mmɔmmɛ dɛ yiè, kɛ̀ bɛnìtìbɛ̀ɛ duó kɛtenkɛ̀ sikɔupípísìdɛ́ (20000). 
\v 8 Kɛ̀ mudoò pitɛ́ dɛ kó kutempɛ̃ mmiɛkɛ, bɛ̀ɛ̀ ku kutúúkù miɛkɛ kɛ̀ bɛ̀ ńsũnɛ̀ bɛ̀ kùɔ bɛ̀ mudoò miɛkɛ.
\s1 Soɑbu kùɔmɛ̀ Abusɑdɔmmu
\p
\v 9 Kɛ̀ Abusɑdɔmmu nyóó dɑɑtɛ kɛ̀ Dɑfiti kó bɛhɑ̃ɑ̃pɔ̀mbɛ̀ ò dùtì kòo sɑ̃ntɛ̀ɛ dɑutɛ́ kutúúkù tidɑbiti miɛkɛ, kòò yuu sɑkɛ tidɑbiti kɛ̀ tɛsɑ̃ntɛ̀ɛ pɛ̃ɛ̃tɛ́ kòo nsɑkɛ dɛndɛ kɛ núú. 
\v 10 Kɛ̀ Dɑfiti kó bɛhɑ̃ɑ̃pɔ̀mbɛ̀ kóò mɔùu ò yɑ̀ kɛ́kɔtɛ kɛ́nɑ́kɛ́ Soɑbu kɛ dɔ̀: N yɑ̀ Abusɑdɔmmu kòò sĩɛ̃kɛ́ mutie mɑmù. 
\v 11 Kɛ̀ Soɑbu dɔ̀: A mɛ nhò yɑ̀ kɛ̀ dɛ̀ yĩmɛ, ɑ pɑ̃̀nkɛ nɑ nhò potɛ́mɛ̀ kɛ kùɔ! N nɑ ndɑ cu mɛdítíbii ntɛpíítɛ̀ ntɛ nɛ̀ fɛnɑɑ̀kɔ̃̀nfɛ̀.
\p
\v 12 Kɛ̀ kuhɑ̃ɑ̃pɔ̀nkùu ò tɛ̃̀ńnɛ́ kɛ dɔ̀: Bɑ́ kɑ̀ɑ n duɔ́ mɛdítíbii ntɛkɔùpíítɛ̀ (1000) m bɑ́ɑ́ yie nkɛ́kɔutɛ okpɑ̀ɑ̀tì kóo dɑpɑ̀ɑ̀. Ti do yomu timɔu ò di nɑ́ɑ́mmɛ̀ fɔ̃́ nnɛ̀ Abikɑii nɛ̀ Itɑii kɛ tú: N di bɑ́ɑ́mmu di bɑ́ɑ́ kɑ́ɑ́kɛ́ m birɛ Abusɑdɔmmu. 
\v 13 Kɛ̀ n do nhò kùɔ bɑ́ kɛ soutɛ́ kɛ tú n yí kèè, okpɑ̀ɑ̀tì yó m bɑntɛ́mu, bɑ́ fɔ̃́ nhɑ mɔ́mmuɔ nhɑ tɛ̃́nkɛ bɑ́ n kónnɛ́.
\p
\v 14 Kɛ̀ Soɑbu dɔ̀: N díítí bɑ mmɑ́ɑ̀ ɑ borɛ̀!
\p Kɛ̀ Soɑbuu túótɛ́ ikpɑ̃mbɔkɛ́ ìtɑ̃ɑ̃ti kɛ́kɔtɛ kɛ́ ì kũ̀ṹ o píkù o dinni berí ndɛ̀, kɛ sɔ̃́ nhò kpɑɑ́ fòù kɛ sĩɛ̃kɛ́ titieti miɛkɛ. 
\v 15 Kɛ̀ Soɑbu ɑ̃ɑ̃pɔ̀mbɛ̀ tɛpíítɛ̀ bɛ̀ɛ̀ tɔu o kpɑ̀rìnɛntì kɛ̀ bɛ̀ɛ munnɛ́ní kóò dèè.
\p
\v 16 Kɛ̀ Soɑbuu eé ditɑ̃tɛheù, kɛ́duɔ́ nkɛ̀ bɛ̀ɛ yóu mudoò kɛ yóu bɛ̀ bo mbɛtìmɛ̀ Abusɑdɔmmu kó bɛhɑ̃ɑ̃pɔ̀mbɛ̀. 
\v 17 Kɛ̀ bɛ̀ɛ túótɛ́ Abusɑdɔmmu kɛ́dootóo difɔ̃̀tìrì mɑrì miɛkɛ kutúúkù cuokɛ̀, kóò yɑ̃̀ɑ̃̀ nyɛtɑ̃́rɛ̀ kɛ̀ dɛ̀ɛ nɑɑ́ nditɑ̃́ntɛ́nkou. Dɛ mɔ̀nnì kɛ̀ Abusɑdɔmmu ɑ̃ɑ̃pɔ̀mbɛ̀ cokù bɛmɑ́ɑ̀ bɛmɑ́ɑ̀ kɛ kũũ̀ mbɛ cɛ̃́ĩ.
\b
\p
\v 18 Abusɑdɔmmu do kpɑɑ́ fòù kɛ cónnɛ́ ditɑ̃́rì mɑrì ndi dibòrì mɑrì bɛ̀ tu dì okpɑ̀ɑ̀tì kó kubiriku, kɛ́ ndì commu kɛ nɑ́ɑ́ nkɛ tú ò í mɔkɛ dɛbirɛ dɛ̀ɛ̀ bo sɔɔtɛ́ o yètìrì, kɛ yú dɛ kó ditɑ̃́rì ò yètìrì. Dɛɛ̀ te kòò còńnɛ́ dɛ kó ditɑ̃́rì dìì bo nte kɛ̀ bɛ̀ ndenniní o kpɛ́í nkɛ́ dì yu o yètìrì, kɛ̀ bɛ̀ kpɑɑ́ mɛ ndì yu nɛ̀ yíenní, kɛ tú Abusɑdɔmmu tɑ̃́rì.
\s1 Bɛ̀ nɑ̀kɛ́mɛ̀ Dɑfiti o birɛ kṹṹ
\p
\v 19 Kɛ̀ Sɑdɔki birɛ Ayimɑsi nɑ́kɛ́ Soɑbu kɛ dɔ̀: Yóu kɛ̀ n cokɛ́ kɛ́nɑ́kɛ́ okpɑ̀ɑ̀tì Kuyie nhò kòńnɛ́mɛ̀ koò pɑ̀tɛnɛ̀ o dootitɔbɛ̀. 
\v 20 Kɛ̀ Soɑbuu yetɛ kɛ dɔ̀: A yóó ò nɑ̀kɛ́ tì yíe ntì í yóó ò nɑrikɛ. Yóu ɑ bo ò nɑ̀kɛ́ titɛtì mɑtì diyiè mɑrì, o birɛ kṹṹ mmu yíe.
\p
\v 21 Kɛ̀ Soɑbuu nɑ́kɛ́ o kó kudɑɑkù Etiopii ɛì kou kɛ dɔ̀: Kɔtɛ kɛ́nɑ́kɛ́ okpɑ̀ɑ̀tì ɑ yɑ̀ dɛ̀!
\p Kɛ̀ kudɑɑkùu nínkóo o ììkɛ̀ kɛ́deè kɛ́kétɛ́. 
\v 22 Kɛ̀ Ayimɑsi bɑɑ nyetíróo kɛ tú: M bɑɑ dɔ́ kɛ́kɔtɛmu, yóu kɛ̀ n tũnnɛ Etiopii kou, bɑ́ kɛ̀ dɛ̀ bo ndòmmɛ̀, dɛ̀ mmɛ ndò. Kɛ̀ Soɑbu dɔ̀: Bɑ nte kɑ̀ɑ dɔ́ kɛ́kɔtɛ? M birɛ ò í yóó dɑ duɔ́ nticuuti mɑtì dɛ kpɛ́í. 
\v 23 Kɛ̀ Ayimɑsi dɔ̀: Kɛ̀ dɛ̀ bo ndòmmɛ̀ n dɔ́ kɛ́kɔtɛmu. Kɛ̀ Soɑbu dɔ̀: Kɔtɛ!
\p Kɛ̀ Ayimɑsi cokɛ́ kɛ́yɛ̀ Suditɛ̃ɛ̃ biriku kɛ́diɛ́nnɛ̀ Etiopii kou.
\b
\p
\v 24 Kɛ sɔ̃́ nDɑfiti bo dihɛì kó dibòrì nɛ̀ ditowɑɑ̀ kpɛri dɛ cuokɛ̀ kòo bɑ̀rì kɑ̀ri kuduotí ĩ́nkɛ̀ kɛ pɑkɛ́ mɛdɛ́timɛ̀. Kɛ nyóó dɑɑtɛ kɛ́yɑ̀ onìtì mɔù omɑ́ɑ̀ kòò cootiní. 
\v 25 Kòo pĩɛ̃kɛ́ kɛ́nɑ́kɛ́ okpɑ̀ɑ̀tì, kòò dɔ̀: Kòò bo omɑ́ɑ̀ ò tɔ tinɑ́ɑǹsɑ̀ɑ̀tì nti.
\p Kɛ̀ dɛ yiɛ̀ mmɔ nkɛ tɔ́ɔ́ntɛní. 
\v 26 Kòo bɑ̀rìi yɑ̀ otɔù mɔù kòò kèríní kòò bɛ́i nkɛ dɔ̀: Ntɛ otɔù mɔù kɛ cootiní kɛ bo omɑ́ɑ̀. Kòo kpɑ̀ɑ̀tì dɔ̀: Ò múnkɛ tɔ tinɑ́ɑǹsɑ̀ɑ̀tì nti.
\p
\v 27 Kòo bɑ̀rìi yíɛ́ kɛ dɔ̀: M bɑntɛ́mu oketiwè kó muceé, Sɑdɔki birɛ Ayimɑsi nwe. Kòo kpɑ̀ɑ̀tì dɔ̀: Onitisɑ̀ɑ̀wè nwe, ò bo ntɔní tinɑ́ɑǹsɑ̀ɑ̀tì nti.
\p
\v 28 Kɛ̀ Ayimɑsi tuɔkɛní kɛ́nɑ́kɛ́ okpɑ̀ɑ̀tì kɛ dɔ̀: Dɛmɔu dɛ̀ wennimu kɛ́do kɛ́nínkú kɛ́sĩ́nnɔɔ okpɑ̀ɑ̀tì ììkɛ̀, kɛ dɔ̀: Ti Yiɛ̀ nKuyie nhɑ tũ nkù yètìrì ndɛu! Kuù duɔ́ nkɑ̀ɑ nɑ bɛ̀ɛ̀ do dɔ́ ɑ kɔ̀u. 
\v 29 Kòo kpɑ̀ɑ̀tì dɔ̀: Odɑpɑ̀ɑ̀ nhAbusɑdɔmmu kɔ̃̀ntì nɑɑtɑɑ̀?
\p Kɛ̀ Ayimɑsi dɔ̀: Soɑbu do yóó ti tɔ̃ ndìì mɔ̀nnì mí nnɛ̀ ɑ kóo tɔ̃ntì tɔù kɛ̀ n yomu kunɔɔ̀roo, m mɛ nnɛ́ í yɛ̃́ mùù dɔ̀ɔ̀ri. 
\v 30 Kòo kpɑ̀ɑ̀tì dɔ̀: Ítɛ́, ɑ nɛ́ bɑ́ɑ́ dɛ́tɛ́.
\p Kɛ̀ Ayimɑsi fũtɛ kɛ́nkémmú. 
\v 31 Kɛ̀ Etiopii kouu tuɔkɛní kɛ dɔ̀: Okpɑ̀ɑ̀tì n dɑ tɔní tinɑ́ɑǹsɑ̀ɑ̀tì nti. Ti Yiɛ̀ nKuyie n dɑ kòńnɛ́mu yíe nkɛ dɑ dɛɛtɛ́nɛ̀ ɑ dootitɔbɛ̀. 
\v 32 Kòo kpɑ̀ɑ̀tì dɔ̀: Kɛ̀ n kóo dɑpɑ̀ɑ̀ nhAbusɑdɔmmu kɔ̃̀ntì nɑɑtɑɑ̀? Kɛ̀ Etiopii kou dɔ̀: Bɛ̀ɛ̀ kó dimɑ̀ɑ̀ dɔ́nɛ̀ n yiɛ̀ nhokpɑ̀ɑ̀tì mɛyɛi ndɛ̀ɛ bɛ̀ dɔ̀ɔ̀ bɛ̀ dɔ̀ɔ̀mɛ̀ dɛ kóo dɑpɑ̀ɑ̀.
\s1 Dɑfiti kuɔ̀mmɛ̀ o birɛ Abusɑdɔmmu kpɛ́í
\p
\v 33 Dɛ mɔ̀nnì kòo kpɑ̀ɑ̀tì yɛ̀mmɛ̀ɛ cɑɑ̀rɛ̀ mɛdiɛ̀ nkòò tɑ kudieku kùù bo dihɛì kó kuduotí dibòrì ĩ́nkɛ̀ kɛ́nkérí kɛ kɔnti kɛ tú: Áú yoo! Áú yoo! M birɛ Abusɑdɔmmu. M birɛ Abusɑdɔmmu! Kɛ̀ míì do nku dɛ̀ ntɔ̃ũ. Áú yoo! M birɛ Abusɑdɔmmu. M birɛ!
\c 19
\p
\v 1 Kɛ̀ bɛ̀ɛ nɑ́kɛ́ Soɑbu kɛ dɔ̀: Dɑfiti kuɔ̀mu Abusɑdɔmmu kpɛ́í nkɛ í dɔ́ kɛ́cĩ́ɛ̃́kɛ́. 
\v 2 Diwɛ̀ì dìì do bɛ̀ bo bɛ̀ nɑmɛ̀ bɛ dootitɔbɛ̀, kɛ̀ dì nɛ́ nɑɑ́ ndidɑbònnì Isidɑyɛɛribɛ bɛmɔu kpɛ́í ndɛ yiè, kɛ yɛ̃́ bɛnìtìbɛ̀ bɛmɔu do kèèmɛ̀ okpɑ̀ɑ̀tì yɛ̀mmɛ̀ cɑ̀ɑ̀rɛ̀mɛ̀ o birɛ Abusɑdɔmmu kpɛ́í. 
\v 3 Kɛ̀ Isidɑyɛɛribɛɛ konní dɛ yiè disɔ̀rì kɛ́ndònnɛ̀ bɛ dootitɔbɛ̀ bɛ̀ nɑ, kɛ̀ bɛ̀ kũntinní nɛ̀ ifɛi, 
\v 4 kòo kpɑ̀ɑ̀tì kɑ̃nkɛ́ o ììkɛ̀ kuyɑ̀ɑ̀kù, kɛ ti didɑbònnì kɛ tú: Áú yoo! M birɛ Abusɑdɔmmu. M birɛ!
\b
\p
\v 5 Kɛ̀ Soɑbuu kɔtɛ kɛ́yɑ̀ okpɑ̀ɑ̀tì o dieku miɛkɛ kóò nɑ̀kɛ́ kɛ dɔ̀: A ɑ̃ɑ̃̀ ɑ ɑ̃ɑ̃pɔ̀mbɛ̀ mbɛ ifɛi, bɛmbɛ bɛ̀ɛ̀ dɛɛtɛ́ ɑ ɔ̃nnì, nɛ̀ ɑ bí nɛ̀ ɑ kó bɛsɑpɑ̀mbɛ̀ nɛ̀ ɑ pobɛ̀ nɛ̀ ɑ pocĩɛ̃̀ ndɛ kpɛyɛ. 
\v 6 A dɔ́ bɛ̀ɛ̀ dɑ níí mbɛm̀bɛ kɛ níí mbɛ̀ɛ̀ dɑ dɔ́, ɑ bɛnkɛmu yíe nkɛ dò nhɑ kpɛti í bonɛ̀ bɛ̀ɛ̀ bɑkɛ́ ɑ ɑ̃ɑ̃̀pɔ̀mbɛ̀ nɛ̀ ɑ kó bɛtɔ̃mbɛ̀. M bɑntɛ́mu yíe nkɛ dò mbɑ́ kɛ̀ ti do nku timɔu kɛ̀ Abusɑdɔmmu nkpɑɑ́ dɛɛ̀ nɑ ndɑ nɑɑti. 
\v 7 N dɑ nɑ́ɑ́mmu, cĩ́ɛ̃́kɛ́ kɛ́kɔtɛ kɛ́yɑ́úkùnnɛ bɛhɑ̃ɑ̃pɔ̀mbɛ̀ kɔ̃̀ntì, kɑ̀ɑ í kɔ̀tɛ òmɔù tɛ̃́nkɛ í yóó ndɑ bonɛ̀, bɛmɔu bɛ̀ bo cíɛ́tɛ́ kɛ nyènkɛ̀. Kɛ̀ dɛ̀ nɛ́ dɔkɛ dɑ yonkɛnɛ̀ kɛ́pɛ̃ɛ̃tɛ́ dɛ̀ mɛ̀ ndòmmɛ̀ kɛ́pɛ̃ɛ̃tɛ́ ɑ yɑ̀ mɛ̀ɛ̀ yɛi nnɛ̀ bɛ̀ dɑ pɛitɛ́mɛ̀.
\p
\v 8 Kòo kpɑ̀ɑ̀tìi ítɛ́ kɛ́kɔtɛ dihɛì kó dibòrì kɛ́nkɑri kɛ̀ bɛ̀ɛ nɑ́kɛ́ bɛnìtìbɛ̀ kɛ dɔ̀: Okpɑ̀ɑ̀tì kɑ̀ri dihɛì kó dibòrì. Kɛ̀ bɛ̀ ńkɔròo o borɛ̀.
\s1 Bɛ̀ duɔ́mmɛ̀ kɛ̀ Dɑfitii wɛ̃tɛní
\p Dɛ mɔ̀nnì kɛ̀ sɔ̃́ Abusɑdɔmmu ɑ̃ɑ̃pɔ̀mbɛ̀ɛ cokɛ́ kɛ́kũṹ mbɛ cɛ̃́ĩ. 
\v 9 Isidɑyɛɛribɛ kó ibotí imɔu miɛkɛ kɛ̀ bɛnìtìbɛ̀ɛ ketɛ́ kɛ́nsɛ́í mbɛtɔbɛ̀ kɛ tú: Okpɑ̀ɑ̀tì Dɑfiti wèè do ti dɛɛtɛ́nɛ̀ ti dootitɔbɛ̀ kɛ ti fìètɛ Fidisitɛ̃ɛ̃bɛ nɔu miɛkɛ, weè cokɛ́ Abusɑdɔmmu kɛ yɛ̀ dihɛì. 
\v 10 Ntɛ weè Abusɑdɔmmu ti do pĩ nwè tikpɑ̀tì kɛ ku mudoò miɛkɛ. Ti tɛ̃́nkɛ bɑɑ bɑ? Ti duɔ́nnɛ̀ kòo kpɑ̀ɑ̀tì Dɑfitii konní.
\p
\v 11 Kɛ̀ Dɑfitii keè Isidɑyɛɛribɛ nɑ̀ɑ́ ntì, kɛ́tɔ̃ nkɛ̀ bɛ̀ɛ nɑ́kɛ́ ikuɔ́ nìùbɛ̀ Sɑdɔki nɛ̀ Abiɑtɑɑ kɛ̀ bɛ̀ bo bekɛ́ Sudɑɑ nɑɑ̀mùnkù kó bɛkótíbɛ̀ kɛ dɔ̀: Dɛ̀ yĩmɛ̀, kɛ̀ díì yó ntú bɛsɔmbɛ bɛ̀ɛ̀ tu bɛ̀ɛ yuní okpɑ̀ɑ̀tì? 
\v 12 Di tú n tebìí nsi kɛ̀ ti wɛ̃ nti yɔ̃ miɛ̀. Dɛ̀ yĩmɛ kɛ̀ díì yó ntú bɛdentibɛ̀ bɛ̀ɛ̀ dɔ́ n wɛ̃timù? 
\v 13 Kòo yíɛ́ kɛ dɔ̀: Kɛ̀ di dèè di kɔtɛ kɛ́nɑ́kɛ́ Amɑsɑ kɛ dɔ̀ n yɛ̃ nhò tu n tebitɛ ntɛ, kɛ̀ ti wɛ̃ nti yɔ̃ miɛ, kòò í cɔutɛ́ Soɑbu fɔ̃̀tìrì kɛ bɑkɛ́ bɛhɑ̃ɑ̃pɔ̀mbɛ̀, Kuyie nní mpotɛ́.
\p
\v 14 Kɛ̀ Sudɑɑ kɔbɛɛ yie nDɑfiti bɛ̀ nɑ̀kɛ́ tì kɛ́wɛ̃nnɛ́ bɛmɔu dinùù dìmɑ́ɑ̀ kɛ dɔ̀: Okpɑ̀ɑ̀tì wɛ̃tɛní diɛ nnɛ̀ ɑ tɔ̃mbɛ̀ bɛmɔu.
\s1 Dɑfiti coommɛ̀ Simɛii
\p
\v 15 Mɛm̀mɛ kòo kpɑ̀ɑ̀tìi ítɛ́ kɛ́nkũnti, kɛ́ nyóó tuɔkoo Suditɛ̃ɛ̃, kɛ sɔ̃́ nSudɑɑ kɔbɛ kɔ̀tɛní Kidikɑɑdi kɛ bo ò co kóò teennɛ̀ kòo séntɛ́. 
\v 16 Kɛ̀ Simɛii Kedɑ birɛ Bɛnsɑmɛɛ botí kou, wèè bonní Bɑudimmu, kòo ítɛ́ mɛcɑ̃ɑ̃ nkɛ́ bɛ̀ nɛinɛ̀ kɛ́nkɔrì kɛ̀ bo co okpɑ̀ɑ̀tì. 
\v 17 Kɛ nɛínɛ̀ Bɛnsɑmɛɛ kɔbɛ tɛkɔupíítɛ̀ (1000) nɛ̀ Sibɑɑ wèè do pĩ nSɑuri cĩ́ɛ̃̀tɛ̀ mutɔ̃mmú nɛ̀ o bí tɛpíítɛ̀ nɛ̀ ìnùmmù nɛ̀ o tɔ̃mbɛ̀ sipísìdɛ́ kɛ̀ bɛ̀ bo kɔtɛ mɛcɑ̃ɑ̃ nSuditɛ̃ɛ̃ kɛ́co okpɑ̀ɑ̀tì. 
\v 18 Bɛ̀ sée ndìì mɔ̀nnì o cĩ́ɛ̃̀tɛ̀ kɔbɛ nɛ̀ kudɑbɛkù kɛ́dɔɔ̀ ò dɔ́mɛ̀.
\p Okpɑ̀ɑ̀tì senti dìì mɔ̀nnì kɛ̀ Sebɑɑ birɛ Simɛii nínkóo o ììkɛ̀, 
\v 19 kóò nɑ̀kɛ́ kɛ dɔ̀: N yiɛ̀ nhokpɑ̀ɑ̀tì, ɑ bɑ́ n tɛ̃́nnɛ́ n yɛi. Bɑ́ɑ́ dentɛní ɑ kóo tɔ̃ntì do dɑ dɔ̀ɔ̀ mɛ̀ɛ̀ yɛi nhɑ iti dìì mɔ̀nnì Sedisɑdɛmmu, okpɑ̀ɑ̀tì bɑ́ ntì ɑ̃ ɑ miɛkɛ. 
\v 20 Okpɑ̀ɑ̀tì n yɛ̃́mu kɛ dò n do dɑ cɑ̀ɑ̀rɛ̀, kɛ mɛ n niitɛ́nní yíe nyIsidɑyɛɛribɛ sɔmbɛ kɛ bo dɑ co.
\p
\v 21 Kɛ̀ Abikɑii Seduyɑ birɛ nɑ́kɛ́ okpɑ̀ɑ̀tì kɛ dɔ̀: Dɛɛ̀ bɑ́ nte kɛ̀ ti yóu ti bo kuɔmɛ̀ Simɛii wèè do buɔ̀ nkusĩ̀nkù okpɑ̀ɑ̀tì ti Yiɛ̀ nKuyie ntɑ̃ɑ̃tɛ́ wè.
\p
\v 22 Kɛ̀ Dɑfitii nɑ́kɛ́ Abikɑii nɛ̀ o tebitɛ Soɑbu kɛ dɔ̀: Di kpɛti tú bɑ dɛ miɛkɛ Seduyɑ bí díndi? Dɛ̀ dòmmɛ kɛ̀ di dɔ́ tí nɛnni, n yí dɔ́ n cɔú dìì yiè tikpɑ̀tì bɛ̀ɛ kuɔ Isidɑyɛɛribɛ kóo mɔù, we nyí yɛ̃́ yíe nkɛ dò mmíì tu Isidɑyɛɛribɛ kóo kpɑ̀ɑ̀tì?
\p
\v 23 Kòo kpɑ̀ɑ̀tìi nɑ́kɛ́ Simɛii kɛ dɔ̀: Bɛ̀ í yóó dɑ kuɔ, míì bɛ́i.
\s1 Mɛfibosɛti wɛ̃̀tɛ kɛ tɑunnɛ̀mɛ̀ okpɑ̀ɑ̀tì
\p
\v 24 Dɛ kó dimɔ̀nnì kɛ̀ Sɑuri yɑɑ̀birɛ Mɛfibosɛti múnkɛɛ kɔtɛ kɛ bo co okpɑ̀ɑ̀tì, kɛ́túótɛ́ okpɑ̀ɑ̀tì ìtɛ́ dìì yiè Sedisɑdɛmmu kɛ́tuɔkɛnɛ̀ dɛ yiè, ò do í kuó o dɛɛ̀nfɛ̀, ò mɛ ndo í ɔ̀útɛ́ o nɑɑ̀cɛ̀i yoo o yɑ̀ɑ̀tì kòo kpɑ̀ɑ̀tì yɑ̀ɑ końnɛ̀nní kukɔ̃ǹnɑɑtí. 
\v 25 Ò tùɔ̀koo dìì mɔ̀nnì okpɑ̀ɑ̀tì borɛ̀ kòo ò bekɛ kɛ dɔ̀: Mɛfibosɛti dɛ sòò yĩ́mɛ kɑ̀ɑ í nni nɛinɛ̀? 
\v 26 Kòò dɔ̀: Okpɑ̀ɑ̀tì n kóo tɔ̃ntì weè sòò n soutɛ́, n sòò nɑ̀ɑ́mmu kɛ tú: N yí mɛ̀ nnɔmmɛ̀ mucèmmu yóu kɛ̀ m boú sɑ̃mmɑrímú kɛ́dekɛ kɛ́nɛinɛ̀ okpɑ̀ɑ̀tì. 
\v 27 Kòo kɔtoo kɛ́cɑkɛ n yètìrì ɑ borɛ̀, n yiɛ̀ nhokpɑ̀ɑ̀tì ɑ í cɑ̃́ɑ̃́nnɛ̀ Kuyie ntɔ̃nnì, dɔɔ̀ ɑ dɔ́mɛ̀. 
\v 28 N yɑ̀ɑ̀rì Sɑuri cĩ́ɛ̃̀tɛ̀ kɔbɛ bɛmɔu do dò nhɑ bɛ̀ kùɔ̀mu nɛ̀ mɛmmɛ kɑ̀ɑ n dɔ̀ɔ̀ mɛsɑ̀ɑ̀ nkɛ n wɛ̃nnɛ́nɛ̀ bɛ̀ɛ̀ dò nkɛ́nyo nhɑ borɛ̀. N tɛ̃́nkɛ bo dɑ bekɛ bɑ? 
\v 29 Kòo kpɑ̀ɑ̀tì dɔ̀: Dɛ̀ wenni ɑ nɑ̀kɛ́ kɛ̀ dɛ̀ sɑ̀nnɛ̀mu, n tɑ̃ɑ̃tɛ́mu kɛ tú fɔ̃́ nnɛ̀ Sibɑɑ díì yóó totɛ́ Sɑuri tenkɛ̀. 
\v 30 Kɛ̀ Mɛfibosɛti dɔ̀: Sibɑɑ bo nɑ kɛ́túótɛ́ dɛmɔu. N yiɛ̀ nhɑ cɛ̃́nkɛ mɛ̀ nkonnímɛ̀ nɛ̀ kukɔ̃ǹnɑɑtí.
\s1 Dɑfiti cumɛ̀ Bɑdisidɑii
\p
\v 31 Kɑdɑɑdi tempɛ̃ Edokedimmu ɛì kou Bɑdisidɑii múnkɛ do cíemmu okpɑ̀ɑ̀tì kɛ́sée nSuditɛ̃ɛ̃ kɛ nɛ́ nɑ kɛ́kpɛ́ntɛ́. 
\v 32 Odɑkótì do nwe mɛsɑ̀ɑ̀ nkɛ mɔkɛ yɛbie nsipísìni, kɛ mɔkɛ o kpɛrɛ mɛdiɛ̀. Okpɑ̀ɑ̀tì do bo dìì mɔ̀nnì Mɑɑnɑimmu kòo nhò pĩ nkɛ̀ dɛ̀ wennimu. 
\v 33 Kòo kpɑ̀ɑ̀tìi ò nɑ̀kɛ́ kɛ dɔ̀: Á n nɛinɛ̀ kɛ̀ ti kò nSedisɑdɛmmu kɛ̀ nní ndɑkɛ ɑ kpɛ́í. 
\v 34 Kɛ̀ Bɑdisidɑii nɑ́kɛ́ okpɑ̀ɑ̀tì kɛ dɔ̀: M bie nkpɑɑ́ yɛ̀dɛ kɛ̀ m bo bennɛ́ kɛ dɑ nɛinɛ̀ Sedisɑdɛmmu? 
\v 35 Yɛbie nsipísìni kóo nìtì tɛ̃́nkɛ kpɑɑ́ yɛ̃́ dɛ̀ɛ̀ nɑɑti nɛ̀ dɛ̀ɛ̀ sɛɛɑ̀? M bo nɑ kɛ́nsɑ̃ntí tidiitì n yo ntì nɛ̀ mɛnɑɑ̀ n yɔ̃mmɑ̀ɑ̀? N tɛ̃́nkɛ í yo bɛdèmbɛ̀ bɛnitidɑɑbɛ̀ nɛ̀ bɛnitipòbɛ̀ kó mɛtɑmmɛ̀. Okpɑ̀ɑ̀tì m bɑ́ɑ́ bennɛ́ kɛ́yóu kɑ̀ɑ nni ntɔ. 
\v 36 A kóo tɔ̃ntì mí, n dɔ́ kɛ dɑ cíe nkɛ́sée nkukó nku, n yí mɑ̀nnɛ̀ ticuuti tii nketíkɛ. 
\v 37 Yóu mí nhɑ kóo tɔ̃ntì kɛ̀ n wɛ̃tɛ kɛ́kú n kɔbɛ borɛ̀, kɛ̀ bɛ̀ n kũnnɛ́ kɛ́pɛ́ɛ́nɛ̀ n cicɛ nɛ̀ n yɔ̃. Nɛ́ ntɛ ɑ kóo tɔ̃ntì Kimmɑmmu, yóu kɛ̀ weè dɑ nɛinɛ̀, kɑ̀ɑ we ndɔɔ̀ ɑ pɛ́nsìrìmɛ̀. 
\v 38 Kòo kpɑ̀ɑ̀tì dɔ̀: Kimmɑmmu tũ n kɔtɛní kɛ̀ ti kò nkɛ̀ nh ò dɔ̀ɔ̀ ɑ dɔ́mɛ̀. Kɑ̀ɑ dɔ́ tìì kó dimɑ̀ɑ̀ m bo tì ndɑ dɔɔ̀.
\p
\v 39 Kɛ̀ ditĩ̀nnì dimɔuu séntɛ́ kukó nkɛ́deè, kòo kpɑ̀ɑ̀tìi séntɛ́ kɛ́kɔúnnɛ̀ Bɑdisidɑii kóò pɑ̃ Kuyie nkó mɛsɑ̀ɑ̀, kòò wɛ̃tɛ kɛ́kò nho ciɛ.
\s1 Sudɑɑ kɔbɛ nɛ̀ Isidɑyɛɛribɛ bɛ̀ pètɛmɛ̀
\p
\v 40 Kòo kpɑ̀ɑ̀tìi kɔtɛ Kidikɑɑdi kɛ nɛínɛ̀ Kimmɑmmu, kɛ̀ Sudɑɑ kɔbɛ bɛmɔu nɛ̀ Isidɑyɛɛribɛ dikéè ò nɛínɛ̀. 
\v 41 Kɛ̀ bɛ̀ɛ ò bekɛ kɛ dɔ̀: Dɛ̀ yĩ́mɛ kɛ̀ Sudɑɑ kɔbɛ bɛɛ̀ mɑ́ɑ̀ dɑ sée nkukó, timɔu kɛ̀ ti nɛ́ do dɑ cíenko?
\p
\v 42 Kɛ̀ Sudɑɑ kɔbɛɛ bɛ̀ tɛ̃̀ńnɛ́ kɛ dɔ̀: Ti tú mɛ̀mmɛ kubotí kùmɑ́ɑ̀ kɔbɛ, dɛ̀ di yonkɛ bɑ nkpɛ́í? Okpɑ̀ɑ̀tì weè ti piúɑ̀? Yɑ́ɑ̀ ò ti cumu dɛ̀mɑrɛ̀?
\p
\v 43 Kɛ̀ Isidɑyɛɛribɛɛ pĩɛ̃kɛ́ kɛ dɔ̀: Ti temu okpɑ̀ɑ̀tì kɛ di pɛ̃ɛ̃tɛ́ kucɛ tɛpíítɛ̀. Bɑ́ kòò tu di botí kou tíì ò te. Di í dò nkɛ ti senkɛ̀rì mɛmmɛ. Kɛ̀ dɛ̀ tu mùmɑmù tíì sòò niitɛ́ kɛ́nnɑ́ɑ́ nkɛ tú: Tɛ̃́nnɛ́ní okpɑ̀ɑ̀tì.
\p Kɛ̀ Sudɑɑ kɔbɛ kó mɛtɑmmɛ̀ bɑɑ yetɛ kɛ́nkpeńnìnɛ̀ Isidɑyɛɛribɛ kɔ̃mɛ.
\c 20
\s1 Sebɑɑ yetɛmɛ̀ Dɑfiti kpɛti
\p
\v 1 Kɛ sɔ̃́ nhonitidɔnniwè mɔù bo Kidikɑɑdi, Bɛnsɑmɛɛ botí kou Bikidi birɛ kòo yètìrì tu Sebɑɑ, kòo eé ditɑ̃tɛheù kɛ́pĩɛ̃kɛ́ kɛ dɔ̀:
\q1 Ti kpɛti í bonɛ̀ Dɑfiti,
\q1 ti í kɔkɛ́ Sɛsee birɛ kpɛti!
\q1 Isidɑyɛɛribɛ bɑ́ wè wèe kò nho cĩ́ɛ̃̀tɛ̀.
\b
\p
\v 2 Kɛ̀ Isidɑyɛɛribɛ bɛmɔuu yóu Dɑfiti kɛ́tũnnɛ Bikidi birɛ Sebɑɑ, kɛ̀ Sudɑɑ kɔbɛ bɛɛ̀ mɑ́ɑ̀ nkpɑɑ́ nɛ̀ bɛ kóo kpɑ̀ɑ̀tì kóò nɛinɛ̀ Suditɛ̃ɛ̃ borɛ̀ kɛ̀ bɛ̀ɛ kò nSedisɑdɛmmu.
\p
\v 3 Okpɑ̀ɑ̀tì Dɑfiti tùɔ̀kɛ dìì mɔ̀nnì o cĩ́ɛ̃̀tɛ̀ kɛ́duɔ́ nkɛ̀ bɛ̀ɛ yúní o pocĩɛ̃̀ ntɛpíítɛ̀ ò do yóu yɛ̀ kɛ́ítɛ́. Kòo yɛ̀ tɑnnɛ̀ tɛcĩ́ɛ̃̀tɛ̀ bɛ̀ bɑ̀ɑ tɛ̀, kɛ́ nyɛ̀ duɔ̀ ntidiitì, ò mɛ nyí nyɛ̀ duɔ́nɛ̀, kɛ̀ yɛ̀ ḿbo bɛkúpobɛ̀ kɔ̃mɛ kɛ̀ bɛ̀ nyɛ̀ kpetí kɛ̀ yɛ̀ yɑ̀ɑ kúnɛ̀.
\s1 Soɑbu kuɔmɛ̀ Amɑsɑ
\p
\v 4 Kòo kpɑ̀ɑ̀tì Dɑfitii nɑ́kɛ́ Amɑsɑ kɛ dɔ̀: Tíí nSudɑɑ kó bɛhɑ̃ɑ̃pɔ̀mbɛ̀ yɛwe yɛ̀tɑ̃ɑ̃ti miɛkɛ kɛ̀ n di yɑ̀ diɛ.
\p
\v 5 Kɛ̀ Amɑsɑ kɔtɛ kɛ́dɔɔ̀ okpɑ̀ɑ̀tì ò nɑ̀kɛ́ tì, ò mɛ nyí nkonní, kòo kpɑ̀ɑ̀tì Dɑfiti ò dɔú nyɛ̀ɛ̀ we yɑ̀ɑ pɛ̃ɛ̃tɛ́. 
\v 6 Kòo kpɑ̀ɑ̀tì Dɑfitii nɑ́kɛ́ Abikɑii kɛ dɔ̀: Bikidi birɛ Sebɑɑ bo ti dɔɔ̀ mɛ̀ɛ̀ yɛi mbo pɛ̃ɛ̃tɛ́ Abusɑdɔmmu kɔ̃mɛ. Túótɛ́ nkó tihɑ̃ɑ̃pɔ̀ntì kɛ̀ di ò tũ̀nnɛ kòò mu nyí dɛ̀tɛ́, kòo yɑ̀ɑ bo tɑ dihɛì kperì mɑrì kɛ́sɔri kɛ̀ tí ò mɔ̀ńtɛ́.
\p
\v 7 Soɑbu kɔbɛ nɛ̀ Kedetiibɛ nɛ̀ Pediisibɛ yɛkɔ̃m̀bɔ̀ yɛmbɛ̀ kɛ̀ bɛ̀ɛ yɛ̀nní kɛ́tũnnɛ Abikɑii kɛ̀ bɛ̀ɛ ítɛ́ Sedisɑdɛmmu kɛ́mbɛti Bikidi birɛ Sebɑɑ. 
\v 8 Kɛ̀ bɛ̀ɛ kétɛ́ kɛ́mberínɛ̀ Kɑbɑɔ̃ɔ̃ kó kupèrìkù borɛ̀, kɛ̀ Amɑsɑ kɔtɛní bɛ borɛ̀ kɛ sɔ̃́ nSoɑbu dɑ̀ɑ́tí tihɑ̃ɑ̃pɔ̀nyɑ̀ɑ̀tì kɛ yinɛ̀ o nɑɑkɔ̃̀nfɛ̀ o siè, kɛ́ketɛ́ní kɛ̀ dìi kpɑtɛ kɛ́do. 
\v 9 Kòo dɔu nhAmɑsɑ kɛ dɔ̀: A kpeńnɑ̀ɑ n nɛ́po? Kɛ́pĩ́ nho dɛɛ̀nfɛ̀ nɛ̀ o nɔ̀ùtɛ̀ youtɛ kɛ́ndò nhò yóó ò kɔúnnɛ̀. 
\v 10 Bɑ́ Amɑsɑ í ndɑkɛ Soɑbu tùótɛ́mɛ̀ o siè nɛ̀ o nɔ̀ùtɛ̀ cɑ̃̀nkutɛ̀ kɛ́ dì nhò kũ̀ṹ o pɔuniɛ mmiɛkɛ kɛ̀ tinɑutìi cóúnní kòo doroo kɛ́kú bɑ́ bɛ̀ í nhò yìɛ́ kuyɛ̃ĩku.
\s1 Bɛ̀ nɑmɛ̀ Sebɑɑ
\p Soɑbu nɛ̀ o nɑntɛ̀ Abikɑii kɛ̀ bɛ̀ɛ sɔɔtɛ́ kɛ́mbɛti Sebɑɑ. 
\v 11 Kɛ̀ Soɑbu kó kuhɑ̃ɑ̃pɔ̀nkù mɑkù ńkpɑɑ́ ocíì borɛ̀ kɛ nɑ́ɑ́ nkɛ tú bɛ̀ɛ̀ kó dimɑ̀ɑ̀ tu Soɑbu kɔbɛ nɛ̀ Dɑfiti kɔbɛ bɛ̀ ntũ nSoɑbu.
\p
\v 12 Kɛ sɔ̃́ nhocíì kpɑɑ́ duɔ́ kucɛ cuokɛ̀ kɛ mùɔ̀ti mɛyĩ̀ĩ̀. Kɛ̀ bɛnìtìbɛ̀ bɛ̀ɛ̀ keriní kɛ̀ bɛ̀ ncommu kɛ wéí, kɛ̀ kuhɑ̃ɑ̃pɔ̀nkùu dɛ̀ yɑ̀, kóò fũtɛ́ kɛ́tɑnnɛ́ dikpɑ́ɑ̀ kupɑku mɑkù miɛkɛ kóò dɑ̀tínnɛ́ diyɑɑ̀bòrì. 
\v 13 Dɛ mɔ̀nnì kɛ̀ tihɑ̃ɑ̃pɔ̀ntì nkeriní kɛ pɛ̃nkù kɛ tũũ̀ nSoɑbu kɛ̀ bɛ̀ bɛ̀ti Bikidi birɛ Sebɑɑ.
\p
\v 14 Kɛ̀ Soɑbuu pɛ̃ɛ̃tɛ́ Isidɑyɛɛribɛ kó yɛhɛkɛ̀ yɛmɔu kɛ́tuɔkɛ Abɛdi-Bɛti-Mɑɑkɑ kɛ̀ yɛhɛkɛ̀ yɛ̀ɛ̀ dɛ̀ tɔ̀kɛ́ yɛ kɔbɛ bɛmɔuu ítɛ́ní kóò tũ̀nnɛ. 
\v 15 Soɑbu nɛ̀ o kɔbɛ kɛ̀ bɛ̀ɛ cɛ̃tinnɛ Sebɑɑ tɑ dìì ɛì, kɛ́dɑmmú mutɑ̃́ɑ̃́ nkɛ́ɔnnɛ́ dihɛì kó kuduotí ketikù kɛ́tɑ kɛ́ndɑmmù kudɛ́ríkù kɛ bo bɔ.
\p
\v 16 Kɛ̀ dɛ kó dihɛì kóo nitipòkù mɔù dɛ̀ bo kɛ ciì mɛdiɛ̀ nkɛ pɛ́inní kɛ dɔ̀: Kémmúnɛ̀! Nɑ́kɛ́nɛ̀ Soɑbu kòo kɔtɛní, kɛ̀ m mɔ̀kɛ tìmɑtì nti kɛ dɔ́ kóò bɛ́innɛ̀.
\p
\v 17 Kɛ̀ Soɑbuu tɔ́ɔ́nní kòo nitipòkù dɔ̀: Fɔ̃́ Soɑbu nweɑ̀? Kòò dɔ̀: Ɛ̃ɛ̃, mínwe. Kòo nitipòkù dɔ̀: Okpɑ̀ɑ̀tì n dɔ́ kɛ dɑ nɑ́kɛ́ tìmɑtì nti, kéntɛ́! Kɛ̀ Soɑbu dɔ̀: Bɛ́i!
\p
\v 18 Kòo nitipòkù dɔ̀: Nɛ̀ ti bomɛ̀ kɛ̀ dɛ̀ dòmmɛ̀ ti ɔ̃ɔ̃ yĩ́ ti bo beé nhAbɛɛdi nwe kɛ̀ tinɑ́ɑǹtìi deè. 
\v 19 Ti kó dihɛì í wɑntinɛ̀ òmɔù tinɑ́ɑǹtì Isidɑyɛɛribɛ bɛ̀ɛ̀ dɛ̀ bo bɛ̀ í dɔ́ dɛsĩ́ntɛ́kpɛrɛ kɑ̀ɑ nɛ́ dɔ́ kɛ́pɔntɛ dɛ kó dihɛì dimɔuɑ̀? Dì tú Isidɑyɛɛribɛ ɛkɛ̀ diɛyɛ̀ kó dìmɑrì ndi. Bɑ nkpɛ́í nte kɑ̀ɑ dɔ́ kɛ́pɔntɛ ti Yiɛ̀ nKuyie nkɔbɛ ɛì? 
\v 20 Kɛ̀ Soɑbu dɔ̀: Nɛ̀ Kuyie, n yí dɔ́ kɛ́pɔntɛ dihɛì yoo n dì cɑ̀ɑ̀rɛ̀. 
\v 21 N wɑnti onìtì òmɑ́ɑ̀ ndi wèè yɛ̀nní yɛtɑ̃rɛ̀ ĩ́nkɛ̀ kó kutempɛ̃ mmiɛkɛ, Efɑdɑimmu botí kou Bikidi birɛ Sebɑɑ wèè dɔ́ kɛ́bɔ nhokpɑ̀ɑ̀tì. N duɔ́nnɛ̀ we omɑ́ɑ̀ kɛ̀ n yóu dihɛì. Kòo nitipòkù dɔ̀: Dɛ̀ wenni ti bo dootɛ́ní o yuu kuduotí.
\p
\v 22 Kòo nitipòkùu wɛ̃too kɛ́nɑ́kɛ́ o kɔbɛ itié nsɑ̀ɑ̀yì, kɛ̀ bɛ̀ɛ féútɛ́ Sebɑɑ kɛ́dootɛ́ní Soɑbu o yuu kuduotí. Kòo eé ditɑ̃tɛheù kɛ̀ bɛhɑ̃ɑ̃pɔ̀mbɛ̀ɛ yóu dihɛì kɛ́ítɛ́ kɛ́kũṹ mbɛ cɛ̃́ĩ. Soɑbu mɔ́mmuɔ nkòo wɛ̃tɛ okpɑ̀ɑ̀tì borɛ̀ Sedisɑdɛmmu.
\s1 Dɑfiti kó bɛtũ̀mbɛ̀ yètɛ̀
\p
\v 23 Soɑbu weè do bɑkɛ́ Isidɑyɛɛribɛ kó bɛhɑ̃ɑ̃pɔ̀mbɛ̀ bɛmɔu, kɛ̀ Yoyɑdɑɑ birɛ Bennɑyɑ bɑkɛ́ Kedetiibɛ nɛ̀ Pedɛsiibɛ. 
\v 24 Kɛ̀ Adodɑmmu bɑkɛ́ bɛnuntɔ̃mbɛ̀ bɛ̀ pĩ̀ńnɛ́ bɛ̀ mutɔ̃mmú. Kɛ̀ Aidudi birɛ Yosɑfɑti ntú wèè tɔ dihɛì kó yɛpɑ́tɛ. 
\v 25 Kɛ̀ Sewɑɑ tu opɑ́tíwɑ̃ɑ̃̀tì, Sɑdɔki nɛ̀ Abiɑtɑɑ kɛ̀ bɛ̀ tu ikuɔ́ nìùbɛ̀. 
\v 26 Kɛ̀ Yɑii yɑɑ̀birɛ Idɑɑ múnkɛ tú ikuɔ́ nìùtì kɛ bonɛ̀ Dɑfiti.
\c 21
\s1 Kɑbɑoniibɛ nɛ̀ Sɑuri yɑɑ̀bí bɛ kó tinɑ́ɑǹtì
\p
\v 1 Dɑfiti kó tikpɑ̀tì miɛkɛ kɛ̀ dikònnì mɑrìi tɑnní kɛ dɔ̀ yɛbie nyɛ̀tɑ̃ɑ̃ti. Kɛ̀ Dɑfitii beé nti Yiɛ̀ nKuyie nkɛ̀ kùu ò tɛ̃̀ńnɛ́ kɛ dɔ̀: Dɛ̀ di tùɔ̀kɛní, Sɑuri nɛ̀ o cĩ́ɛ̃̀tɛ̀ bɛ̀ tu mɛ̀ɛ̀ kpɛ́í nkɛ bɛnitikɔ̀ùbɛ̀ kɛ kùɔ Kɑbɑoniibɛ.
\p
\v 2 Kɛ̀ okpɑ̀ɑ̀tì Dɑfitii yú Kɑbɑoniibɛ kɛ bo bɛ̀ nɑ̀kɛ́. Bɛ̀ do í tú Isidɑyɛɛribɛ, Amɔriibɛ bɛ̀ɛ̀ do sùɔ́ bɛ̀mbɛ, kɛ̀ Isidɑyɛɛribɛ dɔ̀ bɛ̀ í yóó bɛ̀ kùɔ. Nɛ̀ mɛmmɛ kɛ̀ Sɑuri ndɔ́ kɛ́ bɛ̀ kùɔ ò dɔ́ mɛ̀ɛ̀ kpɛ́í nkɛ́nkɑ̃nkɛ́ Isidɑyɛɛribɛ nɛ̀ Sudɑɑ kɔbɛ mɛyɛi. 
\v 3 Kɛ̀ Dɑfitii bekɛ Kɑbɑoniibɛ kɛ dɔ̀: N do nkɛ́dɔɔ̀ bɑ di kpɛ́í? M bo yĩ́mɛ mɛyɛi mmɛ̀ɛ̀ di do kɛ̀ mɛ̀ɛ nɔ́ɔ́tɛ́ di ĩ́nkɛ̀, kɛ̀ di pɑ̃ ti Yiɛ̀ nKuyie nkɔbɛ mɛsɑ̀ɑ̀?
\p
\v 4 Kɛ̀ Kɑbɑoniibɛɛ ò tɛ̃̀ńnɛ́ kɛ dɔ̀: Ti kó dipɛ̀ì tínti nɛ̀ Sɑuri cĩ́ɛ̃̀tɛ̀ í yóó yietí nɛ̀ idíítí yoo nɛ̀ mɛsɔɔ nyoo ti kuɔ Isidɑyɛɛribɛ miɛkɛ òmɔù. Kɛ̀ Dɑfiti dɔ̀: N nɑ́kɛ́nɛ̀ di dɔ́ tì, kɛ̀ n yóó tì dɔ̀ɔ̀mu.
\p
\v 5 Kɛ̀ bɛ̀ dɔ̀: Sɑuri do dɔ́ kɛ tí deèmu bɑ́ ti kou mɔù bɑ́ nkpɑɑ́ Isidɑyɛɛribɛ tenkɛ̀ miɛkɛ. 
\v 6 Ti duɔ́nnɛ̀ bɛnìtìbɛ̀ bɛyiekɛ̀ Sɑuri yɑɑ̀bí miɛkɛ kɛ̀ ti bɛ̀ nùńnɛ́ okpɑ̀ɑ̀tì ti Yiɛ̀ nKuyie ntɑ̃ɑ̃tɛ́ wè ɛì, Kibeɑ, kɛ̀ Kuyie nyɑ̀. Kòo kpɑ̀ɑ̀tì dɔ̀ n yóó bɛ̀ ndi duɔ́mmu.
\p
\v 7 Kɛ̀ Dɑfitii coo nSɑuri birɛ Sonnɑtɑ̃ɑ̃ birɛ Mɛfibosɛti ò do dɔúnnɛ̀ mɛ̀ɛ̀ kpɛ́í nho nɛ́po Sonnɑtɑ̃ɑ̃ dinùù kɛ yú ti Yiɛ̀ nKuyie nyètìrì. 
\v 8 Kɛ duɔ́ nkɛ̀ bɛ̀ɛ yúní Adimɔnni nɛ̀ Mɛfibosɛti Disipɑɑ Ayɑ kóo sɑpɑ̀ɑ̀ mbí idɛ́ ò do pɛitɛ́nɛ̀ ì Sɑuri, nɛ̀ Sɑuri kóo sɑpɑ̀ɑ̀ mmɔù kó initidɑbí ìnùmmù ò do pɛitɛ́nɛ̀ ì Bɑdisidɑii birɛ Adidiɛdi Abɛdi-Mɛodɑɑ ɛì kou. 
\v 9 Kòo bɛ̀ duɔ́ nKɑbɑoniibɛ kɛ̀ bɛ̀ɛ bɛ̀ nùńnɛ́ kɛ̀ bɛ̀ɛ kú bɛmɔu bɛyiekɛ̀ ti Yiɛ̀ nKuyie nyììkɛ̀. Bɛ̀ do yóó bɛ̀ kùɔ kɛ sɔ̃́ mbɛ̀ ketírí mudidɛ̀ì mmu.
\p
\v 10 Kɛ̀ Disipɑɑ Ayɑ kóo sɑpɑ̀ɑ̀ ntúótɛ́ kufɔ̀ɔ̀tɔ̃̀nkù kɛ́pitɛ́ dipèrì ĩ́nkɛ̀ kɛ ndɛ mbo, kɛ́túótɛ́ mudidɛ̀ì ketírí dìì mɔ̀nnì kɛ́tuɔkɛnɛ̀ fɛtɑɑfɛ̀ bo domɛ̀ kɛ bɛ̀ nì. Kòò níí ntṹṹ nkɛ bɛ̀ bɑ̀ɑ tinɔ̀tì kɛ́nyié nkɛ bɛ̀ bɑ̀ɑ tikpɑsĩ̀ntì.
\p
\v 11 Mɛm̀mɛ kɛ̀ bɛ̀ɛ nɑ́kɛ́ Dɑfiti Disipɑɑ Sɑuri pocɛ̃nnì Ayɑ birɛ dɔ̀ɔ̀ dɛ̀. 
\v 12 Kòo kɔtɛ Kɑdɑɑdi tempɛ̃ Yɑbɛsi ɛì kɔbɛ borɛ̀ kɛ́cɔutɛ́ Sɑuri nɛ̀ Sonnɑtɑ̃ɑ̃ bɛ kṹɔ̃̀. Kɛ yɛ̃́ Fidisitɛ̃ɛ̃bɛ do nɑ dìì mɔ̀nnì Sɑuri Kidiboɑ ɛì kɛ́ bɛ̀ kùɔmu wenwe nɛ̀ Sonnɑtɑ̃ɑ̃ Bɛti-Seɑ̃ tentɛ́mbii kɛ́sɑɑ nkɛ̀ Yɑbɛsi ɛì kɔbɛɛ sɔri kɛ́ bɛ̀ tùótɛ́. 
\v 13 Kɛ̀ Dɑfitii túótɛ́ Yɑbɛsi ɛì Sɑuri nɛ̀ Sonnɑtɑ̃ɑ̃ bɛ kṹɔ̃̀, kɛ́tíí mbɛtɔbɛ̀ bɛ̀ múnkɛ kùɔ bɛ̀ kɛ sɑ̀ɑ̀ mbɛ kpɛyɛ, 
\v 14 kòo bɛ̀ wɛ̃nnɛ́ kɛ́kũnnɛ́ Sɑuri cicɛ Kiisi fɔ̃ti Sedɑɑ ɛì Bɛnsɑmɛɛ tempɛ̃ miɛkɛ.
\p Bɛ̀ dɔ̀ɔ̀ dìì mɔ̀nnì okpɑ̀ɑ̀tì yɛ̃ mmù kɛ́deè kɛ̀ ti Yiɛ̀ nKuyie mmiɛkɛɛ do.
\s1 Isidɑyɛɛribɛ wɛ̃̀tɛ kɛ́dokɛ́nɛ̀mɛ̀ Fidisitɛ̃ɛ̃bɛ
\r (1 Bɛkpɑ̀ɑ̀tìbɛ̀ tɔ̃mmú 20:4-8)
\p
\v 15 Kɛ̀ mudoò wɛ̃tɛ kɛ́ɑ̃nnɛ́ Isidɑyɛɛribɛ nɛ̀ Fidisitɛ̃ɛ̃bɛ bɛ cuokɛ̀. Dɑfiti nɛ̀ o kɔbɛ kɛ̀ bɛ̀ ndokùnɛ̀ Fidisitɛ̃ɛ̃bɛ kòo ɔu. 
\v 16 Kɛ̀ Benɔdi Adɑfɑɑ yɑɑ̀birɛ nnɑ́ɑ́ nkɛ tú ò bo kuɔ Dɑfiti, kɛ bɑ́ɑ́tí disiè pɑ̀nnì kòo kpɑ̃mbii ntú disɔɔwũɔ̃̀ kɛ̀ mɛ cɛ̃́ɛ̃́kù bo cìdóò bɛ̀tɑ̃ɑ̃ti. 
\v 17 Kɛ̀ Abikɑii Seduyɑ birɛɛ teennɛ̀ Dɑfiti kɛ́potɛ́ Fidisitɛ̃ɛ̃ kɛ́kuɔ. Dɛ mɔ̀nnì kɛ̀ bɛhɑ̃ɑ̃pɔ̀mbɛ̀ɛ yetɛ kɛ dɔ̀: Dɑfiti bɑ́ mbɛ̀ niɛ̀nɛ̀ mudoò, weè tu Isidɑyɛɛribɛ kó fɛmíìnfɛ̀ bɛ̀ mɛ nyí dɔ́ fɛ kó muhɑ̃ɑ̃́ nkú.
\p
\v 18 Kɛ̀ dɛ̀ɛ yíɛ́ kɛ̀ mudoò tɛ̃mùu wɛ̃tɛ kɛ́ɑ̃nnɛ́ Isidɑyɛɛribɛ nɛ̀ Fidisitɛ̃ɛ̃bɛ bɛ cuokɛ̀ Kɔbu tempɛ̃. Muù miɛkɛ nkɛ Sibekɑii Usɑɑ ɛì kou kùɔmɛ̀ Sɑfu Adɑɑ yɑɑ̀birɛ tɛrɛ̀. 
\v 19 Kɛ̀ mudoò tɛ̃mùu wɛ̃tɛ kɛ yíɛ́ ɑ̃nnɛ́ Kɔbu tempɛ̃ mmiɛkɛ bɑkɛ kɛ̀ Yɑdi Bɛtideɛmmu tempɛ̃ kou birɛ Edɑnɑnni kuɔ Kodiyɑti tɔù mɔù Kɑti ɛì kou, kòo kpɑ̃nnì kó kudɔú cɛ̃́ɛ̃́kù mɑ̀nnɛ̀ kuyɑɑ̀dùɔ̀dɔú. 
\v 20 Kɛ̀ mudoò tɛ̃mùu wɛ̃tɛ kɛ́ɑ̃nnɛ́ Kɑti, Isidɑyɛɛribɛ dootitɔbɛ̀ miɛkɛ kɛ̀ kuhɑ̃ɑ̃pɔ̀nkù mɑkù mbo kɛ nɔ ndikpɑ̀nnì mɛdiɛ̀. Kɛ mɔkɛ inɔ́mbí ikuɔ̀ o nɔu nɛ̀ o nɑɑ̀cɛ̀i, imɔu kɛ̀ ìì wɛ̃nnɛ́ sipísìdɛ́ nɛ̀ ìnɑ̀ɑ̀. Adɑfɑɑ kó dɛyɑɑ̀birɛ mɑrɛ̀ tó ndɛ. 
\v 21 Kòò nsɑ̃́ɑ̃́ nyIsidɑyɛɛribɛ, kɛ̀ Dɑfiti tɑ̃ũ̀ Sɑmmɑ birɛ Yonnɑtɑ̃ɑ̃ ò kùɔ.
\p
\v 22 Dɑfiti nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ kuɔ Fidisitɛ̃ɛ̃bɛ kó bɛhɑ̃ɑ̃pɔ̀mbɛ̀ bɛ̀nɑ̀ɑ̀, bɛmɔu Adɑfɑɑ nɑɑ̀mùnkù kɔbɛ do mbɛ.
\c 22
\s1 Dɑfiti dèntɛ̀mɛ̀ kɛ sɑ̃ntɛ Kuyie
\r (Wéntɛ́ Yɛsɑ̃ɑ̃ 18)
\p
\v 1 Dɑfiti do dèntɛ̀ fɛ nyɛ̀nfɛ̀ ti Yiɛ̀ nKuyie nhò dɛɛtɛ́nɛ̀ dìì mɔ̀nnì ndi o dootitɔbɛ̀, dɔ̀kɛ Sɑuri.
\b
\q1
\v 2 Kòò dɔ̀: Ti Yiɛ̀ nKuyie nkuù tu n kó dipèrì dìì n kɑ̃nkɛ́,
\q1 n kó tɛcɛ̃kpetɛ̀ n sɔri tɛ̀ɛ̀ miɛkɛ, n dɛɛtíwè.
\q1
\v 3 Kuù n te, n sɔri kuù borɛ̀,
\q1 kuù tu n kó kupèrìkù kùù n kɑ̃nkɛ́,
\q1 kuù tu n kó kudɔpìkù, kuù tu okperì wèè n dɛɛrí,
\q1 kuù tu n kó tɛcɛ̃kpetɛ̀ n sɔri tɛ̀ɛ̀ miɛkɛ,
\q1 kuù tu n dɛɛtíwè wèè n dɛɛtɛ́nɛ̀ bɛyɛibɛ,
\q1
\v 4 Nh ɔ̃ɔ̃ yĩ́ ti Yiɛ̀ nKuyie nyètìrì ńdɛu nwe,
\q1 kɛ̀ kù n dɛɛtɛ́nɛ̀ n dootitɔbɛ̀.
\q1
\v 5 Mukṹṹ ndo n cɛ̃̀ɛ̃̀tɛmu mɛniɛ nkɔ̃mɛ,
\q1 kɛ́donnɛ́ n kɔ̃m̀bùɔ̀tì mɛnɛ́yɛimɛ kɔ̃mɛ.
\q1
\v 6 Kudɔnkù kó iwɛ̃ĩ iì do n cɛ̃̀ɛ̃̀tɛ,
\q1 kɛ̀ mukṹṹ nkó ticùɔ̀tì nduɔ́ n yììkɛ̀.
\q1
\v 7 Dɛ̀ do n di kɛ̀ n yú ti Yiɛ̀ nKuyie nku kɛ́ ku nkuɔ́nnɛ̀,
\q1 kɛ̀ kùu kèè n tɑmmɛ̀ ku cĩ́ɛ̃̀tɛ̀ miɛkɛ kɛ̀ m bɑ́ɑmìi tuɔ̀koo ku borɛ̀.
\b
\q1
\v 8 Dɛ mɔ̀nnì kɛ̀ ku miɛkɛɛ pɛikɛ,
\q1 kɛ̀ kɛtenkɛ̀ɛ ɑɑ́, kɛ́sɑ̃ntɛ̀,
\q1 kɛ̀ kɛĩ́nkɛ̀ kó dipũũ ɑɑ́ kɛ́sɑ̃ntɛ̀.
\q1
\v 9 Kɛ̀ kuyukú nyiɛ̀ní Kuyie nwũɔ̃̀,
\q1 kɛ̀ fɛhɑ̃ɑ̃dɛɛ̀nfɛ̀ yìɛ̀ní ku nùù nɛ̀ ihɑ̃ɑ̃pɛ́m̀pɛ́rí.
\q1
\v 10 Kɛ̀ kùu kpɛ́ú ntiwɛtì kɛ́cútɛ́ní,
\q1 kɛ́ncutiní kɛ nɑ yɛwɛtìsùɔ̀.
\q1
\v 11 Kɛ dekɛ oĩ́nkɛ̀mbɑ̀rì, kɛ puù,
\q1 kɛ́mputì kuyɑɑkù miɛkɛ.
\q1
\v 12 Kɛ̀ dibiìnnì kù fitɛ́
\q1 kɛ̀ yɛwɛtɛ̀ diɛyɛ̀ kù cɛ̃̀ɛ̃̀tɛ
\q1 kɛ̀ dɛ̀ sɔ̀ù kɛ dò ndibinni cũmpuri.
\q1
\v 13 Kɛ̀ kuwenniku diɛkù yìɛ̀ní ku ììkɛ̀
\q1 Kɛ̀ ihɑ̃ɑ̃pɛ́m̀pɛ́rí yiɛ̀.
\q1
\v 14 Kɛ̀ ti Yiɛ̀ nKuyie mpɛ̀ú mɛtɑmmɛ̀,
\q1 Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ kɛ̀ kù pɛ̀ú mɛtɑmmɛ̀
\q1
\v 15 Kɛ̀ fɛtɑɑfɛ̀ nwéí tipíìtì timɔu kɛ̀ bɛ̀ sɔ̀rì
\q1 kɛ̀ Kuyie ntɑ̃ũ ku pie ntipíìtì timɔu kɛ́ bɛ̀ cíɛ.
\q1
\v 16 Kɛ̀ kùu pɛɛ kɛ̀ dɑ̀mɛ́ɛ̀rì fũ̀ɔ̃̀ feitɛ́,
\q1 kɛ̀ kùu wei kɛ̀ kɛtenkɛ̀ miɛkɛɛ feitɛ́.
\b
\q1
\v 17 Kɛ̀ kùu youtɛní ku nɔ̀ùtɛ̀ kɛĩ́nkɛ̀,
\q1 kɛ́ n yṹɔ̃́ mmɛniɛ mmiɛkɛ kɛ́dennɛní.
\q1
\v 18 Kuù n dɛɛrínɛ̀ n dootitɔbɛ̀,
\q1 nɛ̀ n sĩ̀mbɛ̀ bɛ̀ɛ̀ wɛ̃rímú pɛ̃ɛ̃tɛ́ n kɔ̃mu.
\q1
\v 19 N do bo mɛsémmɛ̀ miɛkɛ nkɛ kɛ̀ bɛ̀ n cɛ̃̀ɛ̃̀tɛ.
\q1 Kɛ̀ ti Yiɛ̀ nKuyie mmɛ nní nni mbonɛ̀.
\q1
\v 20 Kɛ n dènnɛní difɔ̃̀tìrì miɛkɛ,
\q1 kɛ nh òmpùnnɛ kù n dɔ́ mɛ̀ɛ̀ kpɛ́í.
\b
\q1
\v 21 Ti Yiɛ̀ nKuyie nni nyietí n dɔɔri mɛ̀mmɛ dɛ̀ɛ̀ sìɛ́
\q1 N wennimu kɛ̀ kù n yietí mɛsɑ̀ɑ̀.
\q1
\v 22 N tũmmu ti Yiɛ̀ nKuyie nkó kucɛ,
\q1 n yí yetɛ ku kpɛti mɑtì.
\q1
\v 23 N yí yetɛ ku kuɔ́ mɑì,
\q1 m mɛ n yí yetɛ ku tɑnnùù mɑrì.
\q1
\v 24 N dɔɔrimu kù dɔ́mɛ̀.
\q1 N dɑkɛmu n yɑ̀ɑ̀ bo yetɛ́ mɛ̀ɛ̀ kpɛ́í.
\q1
\v 25 Ti Yiɛ̀ nKuyie nni nyietí n wetí kɛ̀ dɛ̀ mɑmɛ̀ mmɛ,
\q1 n wennimu kɛ̀ kù n yietí mɛsɑ̀ɑ̀.
\b
\q1
\v 26 Ti Yiɛ̀ nKuyie nwèè dɑ dɔɔri dɛ̀ɛ̀ wenni, ɑ we ndɔɔri dɛ̀ɛ̀ wenni.
\q1 Wèè tu onìtì mɔ́mmuɔ ɑ we ndɔɔri timɔ́mmɔnti.
\q1
\v 27 Kɛ̀ wèè dò mpɑ́íí, ɑ́ ɔ̃ɔ̃ ò bɛnkɛmu ɑmɑ́ɑ̀ pɑíí.
\q1 Kòò tu onìtì ciiǹti ɑ nyɛ̃́ ɑ bo ò yĩmɛ̀.
\q1
\v 28 Fɔ̃́ɔ̃̀ dɛɛrí bɛsénnìbɛ̀
\q1 fɔ̃́ɔ̃̀ ɔ̃ɔ̃ wéntɛ́ sifeí yɛmbɛ̀ kɛ bɛ̀ɛ kɛ̃kɛ
\q1
\v 29 N Yiɛ̀ nfɔ̃́ɔ̃̀ tu n fìtírɛ̀,
\q1 fɔ̃́ɔ̃̀ m mí dibiìnnì miɛkɛ.
\q1
\v 30 Fɔ̃́ɔ̃̀ te kɛ̀ n do n dootitɔbɛ̀.
\q1 Fɔ̃́ɔ̃̀ te kɛ̀ n sèńtɛ́ kuduotí.
\b
\q1
\v 31 Kuyie nkó kucɛ dò mpɑ́íí nwe,
\q1 kɛ̀ ku nɑ́ɑǹtì tu timɔ́mmɔnti,
\q1 kɛ̀ kù dò nkudɔpìkù kɛ kɑ̃nkù bɛ̀ɛ̀ sɔ̀ri ku borɛ̀.
\q1
\v 32 We ntu Kuyie nkɛ̀ dɛ̀ í tú fɔ̃́ nti Yiɛ̀.
\q1 We ntu ti kó dipèrì dìì ti kɑ̃nkɛ́ kɛ̀ dɛ̀ í tú fɔ̃́ nKuyie.
\q1
\v 33 Kuyie nkuù tu n kó tɛcɛ̃kpetɛ̀,
\q1 kuù wèńkùnko n cɛ.
\q1
\v 34 Kuù kpénkùnko n tɑ̀ɑ̀kɛ tɛhontɛ̀ kpɛyi kɔ̃mɛ.
\q1 Kuù te kɛ̀ n còḿmú ditennì ĩ́nkɛ̀.
\q1
\v 35 Kuù m bɛnkú dikpɑ̀nnì,
\q1 kɛ n teénnɛ̀ kɛ̀ n nɔ nkɛ yũɔ̃ ndisɔɔwũɔ̃̀ kó mutɑ̃mmù.
\q1
\v 36 N Yiɛ̀ nhɑ nɔ̀ùtɛ̀ youtɛ tɛɛ̀ n tɔ,
\q1 kɛ n kɑ̃nkɛ́ kudɔpìkù kɔ̃mɛ, kɛ n dɛɛrí,
\q1 nh ɔ̃ɔ̃ dɑ yú kɑ̀ɑ yiemmu kɛ n kpénkùnnɛ.
\q1
\v 37 Fɔ̃́ɔ̃̀ te kɛ̀ n kèrí mɛcɑ̃ɑ̃,
\q1 bɑ́ n tɑ̀ɑ̀kɛ í seití.
\q1
\v 38 M bɛ̀ti n dootitɔbɛ̀ mbɛ kɛ bɛ̀ nìntɛ,
\q1 kɛ̀ n yí bɛ̀ kùɔ bɛmɔu m bɑ́ɑ́ wɛ̃tɛ.
\q1
\v 39 M bɛ̀ kèétɛ́ kéétɛ́mu kɛ̀ bɛ̀ còú,
\q1 kɛ̀ m bɛ̀ nɑ̀ù bɛ̀ bɑ́ɑ́ nɑ kɛ́ítɛ́, m bɛ̀ nɑmu.
\q1
\v 40 Kuù n duɔ̀ mmukpɑ̀rìwɛ̃rímú,
\q1 kɛ te kɛ̀ n dootitɔbɛ̀ m bɔ̀útɛ́.
\q1
\v 41 Fɔ̃́ɔ̃̀ te kɛ̀ n dootitɔbɛ̀ bùtínnɛ́ kɛ cokɛ́,
\q1 kɛ̀ nh ɑutɛ́ n sĩ̀mbɛ̀ kɛ bɛ̀ kɔ̀ù.
\q1
\v 42 Kɛ̀ bɛ̀ kuɔ̀ mbɑ́ òmɔù í bɛ̀ teénnɛ̀,
\q1 kɛ̀ bɛ̀ kuɔ̀nnɛ̀ ti Yiɛ̀ nKuyie mbɑ́ kù í bɛ̀ cɔ̀ú.
\q1
\v 43 M bɛ̀ nɑ̀ntɛmu kɛ̀ bɛ̀ nɑɑ́ nkutɑ̃ɑ̃yukú,
\q1 kɛ̀ m bɛ̀ nɑ̀ù kucɛ kó tisɑ̃sɑ̃̀ɑ̃̀tì kɔ̃mɛ.
\b
\q1
\v 44 Kuù n dɛɛtɛ́nɛ̀ m botí kɔbɛ bɛ̀ɛ̀ yetɛ n kpɛti,
\q1 kɛ n nií nyibotí ììkɛ̀,
\q1 kɛ̀ kubotí n yí yɛ̃́ kù nɑɑ́ n kó tidɑɑtì.
\q1
\v 45 Kɛ̀ bɛpɔ̀ɔ̀bɛ̀ n sɑ̃ntí,
\q1 kɛ̀ m bɛ́i mmɛ̀mɑ́ɑ̀ bɛ̀ɛ yie n kpɛti,
\q1
\v 46 Bɛ̀ cĩ̀tɛmu kɛ kpeutí,
\q1 kɛ yiɛ̀ní bɛ sɔ̀rɛ̀ miɛkɛ.
\b
\q1
\v 47 N Yiɛ̀ nKuyie mbomu, kuù tu n kó dipèrì,
\q1 ndɛ́úkùnkonɛ̀ ku yètìrì, kuù tu n dɛɛtíwè.
\q1
\v 48 Kuyie nkuù m pɛ̀iri,
\q1 kɛ te kɛ̀ ibotí m bɔ̀útɛ́.
\q1
\v 49 Kuù n dɛɛrínɛ̀ n dootitɔbɛ̀,
\q1 kɛ te kɛ̀ n nɔ n dootitɔbɛ̀,
\q1 kɛ n dɛɛrínɛ̀ bɛnitiyonkubɛ.
\q1
\v 50 Dɛɛ̀ kpɛ́í nte kɛ̀ n yó nkù sɑ̃ntí ibotí cuokɛ̀,
\q1 kɛ́ndiè nkɛ dɛ́úkùnko ku yètìrì.
\q1
\v 51 Kuù dɛɛrí ku kóo kpɑ̀ɑ̀tì kù tɑ̃ɑ̃tɛ́ wè,
\q1 koò dɔ̀ɔ̀ri mɛsɑ̀ɑ̀,
\q1 kuù dɔ̀ɔ̀ri mɛsɑ̀ɑ̀ nDɑfiti nɛ̀ o yɑɑ̀bío sɑ̃́ɑ̃̀.
\c 23
\s1 Dɑfiti kó tinɑ́ɑǹtì sɔnti
\q1
\v 1 Kéntɛ́nɛ̀ Isɑii birɛ Dɑfiti kó tinɑ́ɑǹtì sɔnti,
\q1 keènɛ̀ dɛ kóo nitidiɛwè nɑ́ɑǹtì,
\q1 weè tu okpɑ̀ɑ̀tì Kuyie nSɑkɔbu do tũ nkù tɑ̃ɑ̃tɛ́ wè,
\q1 Isidɑyɛɛribɛ kóò dèntì bɛ̀ dɔ́ wè.
\q1
\v 2 Ti Yiɛ̀ nKuyie nYɑɑ́ muù nɑ̀ɑ́ m miɛkɛ,
\q1 Kuyie nkuù ɑ̃ɑ̃̀ ku nɑ́ɑǹtì n nùù miɛkɛ.
\q1
\v 3 Kuyie nyIsidɑyɛɛribɛ tũ nkù bɛ́immu,
\q1 Kuyie nkùù kɑ̃nkɛ́ Isidɑyɛɛribɛ kuù bɛ́i nkɛ tú
\q1 wèè bɑkɛ́ bɛnìtìbɛ̀ nɛ̀ Kuyie nkó kufɔ̃wɑɑ́.
\q1 Wèè kó tikpɑ̀tì wenni.
\q1
\v 4 Ò dò ndiwennɛ́cɑ̀nnì kó kuwenniku nku,
\q1 dikṹnweńnì dìì cɑɑ́nnì di kó kuwenniku.
\q1 Fɛtɑɑfɛ̀ ɔ̃ɔ̃ ni kɛ́deè kɛ̀ kùù wennikuu míítɛ́,
\q1 kɛ̀ tifɑ̃ɑ̃̀tìi yɛ̀nní.
\b
\q1
\v 5 Mí nDɑfiti n cĩ́ɛ̃̀tɛ̀ kpɛrɛ mɛ ndò,
\q1 kɛ̀ kù n dɔ̀ɔ̀nɛ̀ mɛtɑummɛ̀ mɛ̀ɛ̀ yó mbo sɑ̃́ɑ̃̀
\q1 kɛ dɔú nyikuɔ́ ìì yó mmɛ nkɑ̃nkɛ́,
\q1 kuù te kɛ̀ n nɔ ndɛmɔu,
\q1 kuù yó n dɛɛtɛ́ kɛ́ndɔɔri n yɛ̀mmɛ̀ dɔ́ dɛ̀.
\q1
\v 6 Bɛ̀ɛ̀ borimɛ í wenni bɛ̀ dònnɛ̀ tipotì nti,
\q1 kɛ̀ bɛ̀ bɛ̀ píenko,
\q1 bɛ̀ mɛ nyí bɛ̀ pĩĩnnɛ̀ sinɔu kperí.
\q1
\v 7 Wèè dɔ́ kɛ́ tì pĩ́ nhò ɔ̃ ntɔ tɛmɑ́tìdùɔ̀tɛ̀ ntɛ,
\q1 yoo kukpɑ̃ndɔú.
\q1 Kòò dèè wèe ti cɔ́ú mpɑ̃̀nkɛ.
\s1 Dɑfiti kó bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 11:10-47)
\p
\v 8 Ntɛ Dɑfiti ɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ kó yɛyètɛ̀: Oketiwè kpɛri tú Isebɑɑdi Akimɔniibɛ kou, weè do bɑkɛ́ bɛhɑ̃ɑ̃pɔ̀mbɛ̀ kó ditĩ̀nnì. Weè do kùɔ bɛnìtìbɛ̀ sikɔusìni (800) dimɔ̀nnì dìmɑ́ɑ̀.
\p
\v 9 O kó difɔ̃nkúò kɛ̀ Aoɑ birɛ Dodo kó dɛbirɛ Edeɑsɑɑ nhò pòkoo. Yɛkɔ̃m̀bɔ̀ yɛmbɛ̀ bɛ̀tɑ̃ɑ̃ti kóò mɔù nwe wèè do nɛínɛ̀ Dɑfiti Fidisitɛ̃ɛ̃bɛ bɛ̀ dintɛ́mɛ̀ kɛ̀ Isidɑyɛɛribɛɛ bótí. 
\v 10 Kɛ̀ Edɑsɑɑ ncómmú kɛ́bɑɑo Fidisitɛ̃ɛ̃bɛ kɛ pikú o siè kòo nɔ̀ùtɛ̀ yɑ̀ɑ tɑ̃tɛ́ kòo sonnɛ́ kɛ́ ndì pikú. Kɛ̀ ti Yiɛ̀ nKuyie nduɔ́ nkɛ̀ Isidɑyɛɛribɛ nɑ bɛ dootitɔbɛ̀ mɛdiɛ̀ ndɛ̀ yiè. Kɛ̀ bɛhɑ̃ɑ̃pɔ̀mbɛ̀ tɔbɛ̀ɛ wɛ̃tɛní kɛ́ m bɛ̀ tũ nkɛ ɛiti mɑ́ɑ̀.
\p
\v 11 O kó difɔ̃nkúò kɛ̀ Adɑɑ kou Akee birɛ Sɑmɑɑ mbɛ̀ pòkoo. Fidisitɛ̃ɛ̃bɛ do tìí ndìì mɔ̀nnì Deii itũ mɑì kó kupɑku borɛ̀ kɛ̀ Isidɑyɛɛribɛɛ cokɛ́. 
\v 12 Kɛ̀ Sɑmɑɑ cómmú kɛ́bɑɑo, kɛ̀ ti Yiɛ̀ nKuyie nduɔ́ nkòo potɛ́ Fidisitɛ̃ɛ̃bɛ kɛ́kuɔ. Kɛ̀ Isidɑyɛɛribɛɛ bɛ̀ nɑ mɛdiɛ̀.
\b
\p
\v 13 Diyiè mɑrì mudidɛ̀ì mɔ̀nnì kɛ̀ bɛnìtìbɛ̀ bɛ̀tɑ̃ɑ̃tii yɛ̀nní bɛhɑ̃ɑ̃pɔ̀nsɑ̃ndèèbɛ̀ tĩ̀nnì miɛkɛ, kɛ́kɔtɛ kɛ́yɑ̀ Dɑfiti Adudɑmmu tɑ̃dènkù miɛkɛ, kɛ yɛ̃́ Fidisitɛ̃ɛ̃bɛ do bɑ̀tɛ́mɛ̀ Defɑii biriku. 
\v 14 Kɛ̀ Dɑfiti ḿbo o sɔ̀rì, kɛ̀ Fidisitɛ̃ɛ̃bɛ bo Bɛtideɛmmu. 
\v 15 Kɛ̀ Dɑfitii dɔkɛ Bɛtideɛmmu kó mɛniɛ, kɛ dɔ̀: We mbo kɔtɛ Bɛtideɛmmu tɛbintɛ tɛ̀ɛ̀ bo dihɛì bòrì kɛ n dónní kɛ̀ n yɑ̃̀?
\p
\v 16 Kɛ̀ bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ bɛ̀tɑ̃ɑ̃tii ítɛ́ kɛ́kɛ̃tɛ́ Fidisitɛ̃ɛ̃bɛ cuokɛ̀ bɛ̀ kɑ̀ri dɛ̀, kɛ́kɔtɛ Bɛtideɛmmu kó tɛbintɛ kɛ́dónní mɛniɛ nkɛ́kɔtɛnní kóò duɔ́, ò mɛ nyí nyie nkɛ́ mɛ̀ yɑ̃̀, kɛ́ mɛ̀ pɑ̃ Kuyie nkɛ́cóúnko kɛtenkɛ̀ 
\v 17 kɛ dɔ̀: N Yiɛ̀ nKuyie, m bɑ́ɑ́ yɑ̃̀ dɛ kó mɛniɛ, mɛ̀ dònnɛ̀ bɛnìtìbɛ̀ bɛ̀ɛ̀ duɔ́ mbɛ fòmmu kɛ kɔ̀tɛ kɛ donní dɛ kó mɛniɛ mbɛ kó mɛyĩ̀ĩ̀ mmɛ.
\p Ò í nyie nkɛ́ mɛ̀ yɑ̃̀.
\p Bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ bɛ̀tɑ̃ɑ̃ti bɛɛ̀ do pĩ ndɛ kó mutɔ̃mmú.
\b
\p
\v 18 Kɛ̀ Seduyɑɑ birɛ Abikɑii, Soɑbu nɑntɛ̀ mbɑkɛ́ bɛhɑ̃ɑ̃pɔ̀mbɛ̀ sipísìtɑ̃ɑ̃ti tĩ̀nnì. Weè do kùɔnɛ̀ o kpɑ̃nnì o dootitɔbɛ̀ sikɔusìtɑ̃ɑ̃ti (300). Mɛm̀mɛ kòo yètìrìi feitɛ́ bɛhɑ̃ɑ̃pɔ̀mbɛ̀ sipísìtɑ̃ɑ̃ti miɛkɛ. 
\v 19 Kòo nɑɑ́ nhodiɛwè bɛ cuokɛ̀, kɛ́ bɛ̀ bɑɑtɛ́, ò mɛ nnɛ́ í nnɑ kɛ́mɑɑtɛnɛ̀ bɛ̀tɑ̃ɑ̃ti tĩ̀nnì kɔbɛ bɛmbɛ.
\p
\v 20 Yoyɑdɑɑ birɛ Bennɑyɑ Kɑbusɛɛdi ɛì kou, ohɑ̃ɑ̃pɔ̀nkperì mɔù kó dɛbirɛ, kòò kpɑ nkɛ́nɑ o dootitɔbɛ̀ mɛdiɛ̀. Weè do kùɔ Adiyɛɛdi bí idɛ́ Mɔɑbu ɛì kɔbɛ. Weè do tɑ yɛcìrícìrɛ̀ fɔ̃̀tìrì nɛ̀ muséé nkɛ́kuɔ dicìrícìrì. 
\v 21 Weè múnkɛ do kùɔ Esibiti kɔbɛ kóo nitikperì mɔù, kɛ sɔ̃́ nkòò tɔ dikpɑ̃nnì kòo kɔtɛnko kupɑ̀ɑ̀ti kɛ́ dì fìètɛ kóò kùɔnɛ̀. 
\v 22 Bennɑyɑ do kpɑ ndiì kpɑ̀nnì kɛ́pɛ́tɛ́ diyètìrì sipísìtɑ̃ɑ̃ti kɔbɛ tĩ̀nnì miɛkɛ. 
\v 23 Kòo yètìrìi feitɛ́ mɛdiɛ̀ nsipísìtɑ̃ɑ̃ti kɔbɛ tĩ̀nnì miɛkɛ, ò mɛ nyí nnɑ kɛ tùɔ̀kɛ bɛ̀tɑ̃ɑ̃ti tĩ̀nnì kɔbɛ. Kɛ̀ Dɑfitii ò tɑ̃ɑ̃tɛ́ kòò mbɑkɛ́ tihɑ̃ɑ̃pɔ̀ntì tìì ò bɑ̀ɑ.
\b
\p
\v 24 Sipísìtɑ̃ɑ̃ti tĩ̀nnì kɔbɛ do tú: Asɑyɛɛdi Soɑbu nɑntɛ̀ nɛ̀ Dodo Bɛtideɛmmu ɛì kou birɛ Edɑnɑnni. 
\v 25 Nɛ̀ Sɑmɑɑ nɛ̀ Edikɑɑ Adodi ɛì kɔbɛ. 
\v 26 Edɛsi Pedɛti ɛì kou Ikɛsi birɛ Idɑɑ Tekoɑ ɛì kou. 
\v 27 Abiesɛɛ Anɑtɔti ɛì kou nɛ̀ Mɛbunnɑii Usɑɑ ɛì kou. 
\v 28 Sɑdimɔɔ Aoɑ ɛì kou nɛ̀ Mɑdɑii Nɛtofɑɑ ɛì kou. 
\v 29 Bɑɑnɑ birɛ Edɛbu Nɛtofɑɑ ɛì kou tókɛ nɛ̀ Dibɑii birɛ Itɑii Kibeɑ ɛì kou, Bɛnsɑmɛɛ tempɛ̃ miɛkɛ. 
\v 30 Nɛ̀ Bennɑyɑ Pidɑtɔ̃ɔ̃ ɛì kou nɛ̀ Itɑii Kɑɑsi ɛì kou. 
\v 31 Nɛ̀ Abi-Adinɔɔ Bɛti-Adɑbɑ ɛì kou nɛ̀ Asimɑfɛti Bɑudimmu ɛì kou. 
\v 32 Ediɑbɑ Sɑdimɔɔ ɛì kou, Yɑsenni bí kó dɛ̀mɑrɛ̀, kɛ̀ dɛ yètìrì tu Yonnɑtɑ̃ɑ̃. 
\v 33 Sɑmɑɑ Adɑɑ ɛì kou nɛ̀ Sɑdɑdi birɛ Aiyɑmmu Adɑɑ ɛì kou. 
\v 34 Nɛ̀ Edifedee Akɑsibɑii birɛ Mɑɑkɑ ɛì kou nɛ̀ Aitofɛɛdi Kido ɛì kou birɛ Ediyɑmmu. 
\v 35 Esidɑii Kɑdimɛɛdi ɛì kou nɛ̀ Pɑdɑii Adɑbu ɛì kou, 
\v 36 nɛ̀ Nɑtɑ̃ɑ̃ birɛ Ikɑdi Tisobɑ ɛì kou nɛ̀ Bɑni Kɑdi nɑɑ̀mùnkù kou. 
\v 37 Sedɛki Amɔniibɛ botí kou nɛ̀ Nɑdɑii Bedɔti ɛì kou wèè do tɔu Seduyɑ birɛ Soɑbu kpɑ̀rìnɛntì, 
\v 38 nɛ̀ Idɑɑ Yetɛɛ nɑɑ̀mùnkù kou nɛ̀ Kɑɑrɛbu, tɛɛ̀ cĩ́ɛ̃̀tɛ̀ tɛmɑ́ɑ̀ kou. 
\v 39 Nɛ̀ Udii Itiibɛ botí kou, kɛ̀ bɛ̀ɛ wɛ̃nnɛ́ bɛmɔu sipísìtɑ̃ɑ̃ti nɛ̀ bɛ̀yiekɛ̀.
\c 24
\s1 Dɑfiti kɑ̀ɑmmɛ̀ Isidɑyɛɛribɛ kɛ̀ ti Yiɛ̀ nKuyie mmiɛkɛ bɛ̀ pɛikɛ
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 21:1-6)
\p
\v 1 Diyiè mɑrì kɛ̀ ti Yiɛ̀ nKuyie mmiɛkɛɛ yɛ̀nní Isidɑyɛɛribɛ, kɛ̀ kùu nɑmpɛ Dɑfiti yɛ̀mmɛ̀ kòo dɔɔ̀ dɛ̀ɛ̀ yóó bɛ̀ tɔní mɛyɛi, kòò dɔ̀ bɛ̀ɛ kɑɑ nyIsidɑyɛɛribɛ nɛ̀ Sudɑɑ kɔbɛ. 
\v 2 Kòo nɑ́kɛ́ bɛhɑ̃ɑ̃pɔ̀mbɛ̀ kóo kótì Soɑbu wèè ò bonɛ̀ kɛ dɔ̀: Ce nyIsidɑyɛɛribɛ tenkɛ̀ kɛmɔu kɛ́kɑɑ mbɛnitidɑɑbɛ̀ n dɔ́ kɛ́nyɛ̃́ bɛ̀ mɑ̀mɛ̀ mmɛ.
\p
\v 3 Kɛ̀ Soɑbuu ò tɛ̃̀ńnɛ́ kɛ dɔ̀: Okpɑ̀ɑ̀tì n dɔ́mu ti Yiɛ̀ nKuyie nduɔ́ nkɛ̀ Isidɑyɛɛribɛɛ sṹṹ nkɛ́pɛ̃ɛ̃tɛ́ miɛ nkucɛ tɛkɔ̀ùtɛ̀ (100), kɑ̀ɑ bɛ̀ yɑ̀ nɛ̀ ɑ nɔ̀nfɛ̀. Dɛ̀ nɛ́ dòmmɛ kɑ̀ɑ dɔ́ kɛ́pĩ́ ndɛ kó mutɔ̃mmú botí?
\p
\v 4 Kòo kpɑ̀ɑ̀tì bɑɑ mpĩ́ nho bɛ́i ntì Soɑbu nɛ̀ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ tɔbɛ̀. Kɛ̀ bɛ̀ɛ yóu kɛ́dɔɔ̀ okpɑ̀ɑ̀tì yɛ̃mmɛ̀, kɛ́ítɛ́ o cĩ́ɛ̃̀tɛ̀ kɛ́kɔtɛ bɛnìtìbɛ̀ kɑ̀mmù, 
\v 5 kɛ́séntɛ́ Suditɛ̃ɛ̃ kɛ́ketɛ́ Adowɛɛ ɛì dìì bo Kɑdi kó kubiriku cuokɛ̀, kɛ́deè kɛ́kɔtɛ Yɑsɛɛ. 
\v 6 Kɛ̀ bɛ̀ɛ tɑ Kɑdɑɑdi kɛ́pɛ̃ɛ̃tɛ́ kɛ́kɔtɛ Itiibɛ ɛì Kɑdɛɛsi nɛ̀ Tɑ̃ɑ̃-Yɑɑni nɛ̀ dɛ kó sihɛkɛsí nɛ̀ Sitɔ̃ɔ̃, 
\v 7 kɛ́pɛ̃ɛ̃tɛ́ kɛ́kɔtɛ Tiiri kó dihɛì kperì kuduotí fitɛ́ dì, Itiibɛ nɛ̀ Kɑnnɑhɑ̃ɑ̃ kɔbɛ do te yɛ̀, kɛ́pɛ̃ɛ̃tɛ́ kɛ́tuɔkɛ Bɛɛrisebɑɑ Sudɑɑ tempɛ̃ nkubɑkù cɑ̃̀nku bíɛ́kɛ̀. 
\v 8 Bɛ̀ dèè dìì mɔ̀nnì bɛ tenkɛ̀ kɛmɔu kɛ́wɛ̃tɛ Sedisɑdɛmmu kɛ sɔ̃́ ndɛ̀ mɔ̀kɛ bɛtɑ̃̀ɑ̃̀bɛ̀ bɛ̀wɛi nɛ̀ yɛwe sipísìdɛ́ nɛ̀ bɛ̀ ketɛ́mɛ̀ mukɑ̀mmù. 
\v 9 Kɛ̀ Soɑbuu nɑ́kɛ́ okpɑ̀ɑ̀tì bɛ̀ kɑ̀ɑ nyIsidɑyɛɛribɛ kó bɛhɑ̃ɑ̃pɔ̀mbɛ̀ kɛ̀ bɛ̀ mɑ̀mɛ̀ sikɔupíkɔ̀ùsìni (800000), Sudɑɑ kɔbɛ sikɔupíkɔ̀ùsìnùmmù (500000).
\s1 Kuyie mpotɛ́mɛ̀ Dɑfiti ò kɑ̀ɑ mmɛ̀ɛ̀ kpɛ́í mbɛnìtìbɛ̀
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 21:7-17)
\p
\v 10 Kɛ̀ Dɑfitii bɑntɛ́ ò cɑ̀ɑ̀rɛ̀mɛ̀ kòo kɔ̃m̀bùɔ̀tìi do, kòo nɑ́kɛ́ ti Yiɛ̀ nKuyie nkɛ dɔ̀: N Yiɛ̀ nKuyie n cɑ̀ɑ̀rɛ̀mu mɛdiɛ̀ n kɑ̀ɑmmɛ̀ bɛnìtìbɛ̀. M bɑntɛ́mu n cɑ̀ɑ̀rɛ̀mɛ̀, n dɔ̀ɔ̀ tiyɛìntì nti, ɑ́ n cĩ́ɛ̃́. 
\v 11 Ò yĩ mɛm̀mɛ kɛ́nhenniní dikṹnweńnì kɛ sɔ̃́ ti Yiɛ̀ nKuyie mbɛ́innɛ̀ ku pɑ̃ɑ̃nɑ́ɑǹtì nɑ́ɑǹtò Kɑdi wèè do ò bonɛ̀ kɛ tú: 
\v 12 Kɔtɛ kɛ́nɑ́kɛ́ Dɑfiti kɛ dɔ̀: N tú nh ò duɔ́ ntiyɛ̃ĩti tìtɑ̃ɑ̃ti ndi, kɛ tú wèe tɑ̃ɑ̃tɛ́ ò dɔ́ kù kɛ̀ n kù nhò potɛ́. 
\v 13 Kɛ̀ Kɑdii kɔtɛ kɛ́yɑ̀ Dɑfiti kóò nɑ̀kɛ́ Kuyie nhò nɑ̀kɛ́ tì kɛ dɔ̀: Kɑ̀ɑ dɔ́ dikònnì bo tɑnnímɛ̀ ɑ ɛì kɛ dɔ̀ yɛbie nyɛ̀yiekɛ̀ ɑ́ tɑ̃ɑ̃tɛ́. Kɑ̀ɑ mɛ ndɔ́ ɑ dootitɔbɛ̀ bo ndɑ bɛtìmɛ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti miɛkɛ, ɑ́ tɑ̃ɑ̃tɛ́. Kɑ̀ɑ mɛ ndɔ́ mukṹṹ mbo tɑnnímɛ̀ mmɛ kɛ̀ bɛnìtìbɛ̀ nkɔ̃ nkɛ dɔ̀ yɛwe yɛ̀tɑ̃ɑ̃ti, ɑ́ tɑ̃ɑ̃tɛ́. Totí ɑ yɛ̀mmɛ̀ kɛ́ n nɑ́kɛ́ n dò nkɛ́nɑ́kɛ́ tì wèè n tɔ̃nní.
\p
\v 14 Kɛ̀ Dɑfitii nɑ́kɛ́ Kɑdi kɛ dɔ̀: N yɛ̀mmɛ̀ mɛɛ̀ cɑ̀ɑ̀rɛ̀ mɛdiɛ̀. Kɛ̀ ti do ti Yiɛ̀ nKuyie nnɔ̀ùtɛ̀ miɛkɛ dɛ̀ tɔ̃ũmu, kɛ yɛ̃́ kù sémmɛ̀ dɛumɛ̀. M bɑ́ɑ́ do n nititɔù nɔu miɛkɛ.
\p
\v 15 Mɛm̀mɛ kɛ̀ ti Yiɛ̀ nKuyie nduɔnní mumɔmmú mùù kɔ̀ù Isidɑyɛɛribɛ cuokɛ̀. Dɛ kó dikṹnweńnì kɛ́tuɔkɛnɛ̀ kù dɔú ndìì mɔ̀nnì Isidɑyɛɛribɛ tenkɛ̀ kɛmɔu miɛkɛ kɛ̀ bɛnìtìbɛ̀ɛ kú sikɔupípísìyiekɛ̀ (70000) dɛ yiè. 
\v 16 Kuyie ntɔ̃nnì yòutɛ dìì mɔ̀nnì di nɔ̀ùtɛ̀ Sedisɑdɛmmu ĩ́nkɛ̀ kɛ bo bɛ̀ potɛ́ kuyɛ̃ĩku, kɛ̀ ti Yiɛ̀ nKuyie n nɑ́kɛ́ ku tɔ̃nnì kɛ dɔ̀: Dɛ̀ sɑ̀nnɛ̀mu mɛmmɛ, ɑ tɛ̃́nkɛ bɑ́ɑ́ potɛ́.
\p Kɛ sɔ̃́ ndì berínɛ̀ Sebusiibɛ kou mɔù bɛ̀ tu wè Adɑfunɑɑ o kó kuyiɛ́ borɛ̀. 
\v 17 Kɛ̀ Dɑfitii yɑ̀ ti Yiɛ̀ nKuyie ntɔ̃nnì kɔ̀ùmɛ̀ kɛ́kuɔ́nnɛ̀ Kuyie nkɛ dɔ̀: N cɑ̀ɑ̀rɛ̀mu. Míì yetɛ́! Bɛnìtìbɛ̀ biɛ nyí cɑ̀ɑ̀rɛ̀ mùmɑmù, mí nnɛ̀ n cĩ́ɛ̃̀tɛ̀ tíì dò nhɑ ti potɛ́.
\s1 Dɑfiti mɑɑ́mɛ̀ diwũɔ̃tɔ̀nnì Kuyie nkpɛ́í
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 21:18-26)
\p
\v 18 Dɛ kó diyiè dimɑ́ɑ̀ miɛkɛ kɛ̀ Kɑdii kɔtɛ kɛ́yɑ̀ Dɑfiti kóò nɑ̀kɛ́ kɛ dɔ̀: Dekɛ Adɑfunɑɑ yiɛ́ borɛ̀ kɛ́mɑɑ́ diwũɔ̃tɔ̀nnì ti Yiɛ̀ nKuyie.
\p
\v 19 Kɛ̀ Dɑfiti kɔtɛ kɛ́ndònnɛ̀ ti Yiɛ̀ nKuyie ntì nɑ̀kɛ́mɛ̀ ku pɑ̃ɑ̃nɑ́ɑǹtì nɑ́ɑǹtò Kɑti kòò ò nɑ̀kɛ́. 
\v 20 Kɛ̀ Adɑfunɑɑ sĩ́nnɛ́ní kɛ́yɑ̀ okpɑ̀ɑ̀tì Dɑfiti kòo kèróo, kòo cokɛ́ní kɛ́nínkú kɛ́sĩ́nnɔ́ɔ o ììkɛ̀. 
\v 21 Kóò bekɛ kɛ dɔ̀: Okpɑ̀ɑ̀tì dɛ̀ dòmmɛ̀ kɑ̀ɑ kɔ̀riní m borɛ̀? Kɛ̀ Dɑfiti dɔ̀: N dɔ́ ɑ n fítɛ́nɛ̀ ɑ yiɛ́ nku kɛ̀ m mɑɑ́ ti Yiɛ̀ nKuyie ndiwũɔ̃tɔ̀nnì kɛ̀ dɛ̀ɛ yie nkɛ̀ kù potɛ́ kùù yɛ̃ĩku Isidɑyɛɛribɛ kɛ̀ kùu deè. 
\v 22 Kɛ̀ Adɑfunɑɑ dɔ̀: Okpɑ̀ɑ̀tì túótɛ́ ɑ dɔ́ dɛ̀ɛ̀ kó dimɑ̀ɑ̀ kɛ́pɑ̃ Kuyie. Ntɛ inɑ̀ɑ̀kɛ, túótɛ́ i kɛ́féútɛ́, túótɛ́ tɛnɑɑsɑ̃ntɛ̀ kó idɛí kɛ́tuɔnnɛ̀. 
\v 23 Okpɑ̀ɑ̀tì, n dɑ pɑ̃mu dɛmɔu, kɛ tú ɑ Yiɛ̀ nKuyie ncɔutɛ́ ɑ pɑ̃nnì, kɛ́ dɑ dɔɔ̀ mɛsɑ̀ɑ̀.
\p
\v 24 Kòo kpɑ̀ɑ̀tì Dɑfitii ò tɛ̃̀ńnɛ́ kɛ dɔ̀: Yóu kɛ̀ n dɛ̀ dontɛ́ kɛ dɑ yietí, n yí dɔ́ kɛ́pɑ̃ n Yiɛ̀ nKuyie ndɛ̀mɑrɛ̀ n yí fɛ̃̀ṹtɛ́ dɛ̀ɛ̀ kpɛ́í.
\p Mɛm̀mɛ kɛ̀ Dɑfitii dontɛ́ kuyiɛ́ nɛ̀ inɑ̀ɑ̀kɛ mɛdítíbii nsipísìnùmmù, 
\v 25 kɛ́mɑɑ́ diwũɔ̃tɔ̀nnì dɛborɛ̀ kɛ́fíé ti Yiɛ̀ nKuyie nyiwũɔ̃ kɛ́tuɔ kɛ́fíénɛ̀ mɛtɑummɛ̀ kpɛyi. Dɛ mɔ̀nnì kɛ̀ ti Yiɛ̀ nKuyie mbɛ̀ wèńtɛ́ fɛnɔnsɑ̀ɑ̀fɛ̀, kɛ̀ kuyɛ̃ĩku kù do bɛ̀ potɛ́ kùu deè.