\id 2PE di62.all F{evrier 1999 BJ Parakou B{enin
\ide UTF-8
\h 2 Piɛri
\toc1 Piɛri wɑ̃̀ri dìì pɑ́tíri dɛ́rí
\toc2 2 Piɛri
\mt1 Piɛri wɑ̃̀ri dìì pɑ́tíri dɛ́rí
\imt1 Di mpɑ́tíri tɔ tìì nɑ́ɑǹtì
\ip Piɛri do wɑ̃̀ri o pɑ́tíri dɛ́rì Kirisi kɔbɛ bɛmɔu ndi bɑ́ kɛ̀ bɛ̀ bo kùù píkù. Ò do bɛ̀ wɑ̃̀ri kɛ bo bɛ̀ nɑ̀kɛ́mu kɛ̀ bɛ̀ ndɑkɛ kɛ́bɑɑo bɛ̀ɛ̀ tiè nyiyɑ́ɑ̀bìsítié nkɛ̀ ì cɑ̀ɑ̀ri bɛnìtìbɛ̀ kɛ bɛ̀ tɑnnìnko mɛyɛi mmiɛkɛ.
\ip Piɛri do dɔkɛ yĩkú tìì ĩ́nkɛ̀ tiì tú: Kirisi í ɔɔtí ò bo wɛ̃tɛnímɛ̀. Kɛ̀ Piɛri nɑ̀kɛ́ dɛ yɛmbɛ̀ kɛ tú, kɛ̀ Kirisi ɔɔtí ò í dɔ́mɛ̀ mmɛ kòò mɔùu feti, ò dɔ́ timɔu ti bɑntɛ́mu kɛ́ceetɛ kɛ yóu ti yɛi.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Mudɔummu 1:1-2
\io1 2. Kirisi kou kó mufòmmu dò nkɛ́ndòmmɛ̀ 1:3-21
\io1 3. Piɛri tumɛ̀ bɛ̀ ndɑkɛ iyɑ́ɑ̀bìsítié nyɛmbɛ̀ kpɛ́í 2:1-22
\io1 4. Piɛri nɑ̀kɛ́mɛ̀ Kirisi kó muwɛ̃timù nɛ̀ Kuyie nkó diyiè dɛ kpɛ́í 3
\c 1
\s1 Mudɔummu
\p
\v 1 Mí nSimɔɔ Piɛri m pĩ́ nYesu Kirisi kó mutɔ̃mmú mmu kɛ tú o kó ditɔ̃nnì. Míì wɑ̃̀ri di mpɑ́tíri díndi bɛ̀ɛ̀ tɑ̃́ Kuyie nti kù tɑ̃́ mɛ̀ɛ̀ botí. Kuyie nnɛ̀ Yesu Kirisi Odɛɛtíwè bɛ̀ wetímu dɛɛ̀ te kɛ̀ bɛ̀ di duɔ́ mmɛtɑ̃́kùmɛ̀ kɛ̀ mɛ̀ dònnɛ̀ ti kɔ̃mɛ. 
\v 2 Kuyie ndi teennɛ̀ kɛ́ di dɔɔ̀ mɛsɑ̀ɑ̀ mmɛdiɛ̀ nkɛ́ di duɔ́ ndiwɛ̀ì, di kù yĩ̀ɛ̃́tɛ́ mɛ̀ɛ̀ kpɛ́í nnɛ̀ ti Yiɛ̀ nYesu Kirisi.
\s1 Kuyie nti tɑ̃ɑ̃tɛ́mɛ̀ kɛ ti yu
\p
\v 3 Kuyie nnɛ̀ ku wɛ̃rímú miɛkɛ kù ti duɔ́mmu dɛ̀ ti békú dɛ̀ɛ̀ kó dimɑ̀ɑ̀ kɛ̀ ti bo nfòù kɛ kù sɑ̃ntí. Kuù te kɛ̀ ti yĩ̀ɛ̃́tɛ́ wèè ti yu, kɛ̀ ti bo ò totɛ́nɛ̀ o kó tikpetì nɛ̀ o kó mɛsɑ̀ɑ̀. 
\v 4 Nɛ̀ dɛɛ̀ miɛkɛ nkɛ Kuyie nti dɔunnɛ́mɛ̀ yɛnɔ̀ yɛdiɛyɛ̀ yɛsɑ̀ɑ̀yɛ̀ kɛ̀ dɛ̀ bo yie nkɛ̀ ti pɛ̀tɛ́ kù yɛ̃ nkù yóó ti dɔɔ̀ dɛ̀ kɛ̀ ti nɑ kɛ́yentɛ́nɛ̀ kutenkù kuù nkó mɛyɛi mmɛ̀ɛ̀ mɔ̀kɛ mɛdɔ́kùmɛ̀ mɛ̀ɛ̀ kɔ̀ù, kɛ́dontɛnɛ̀ Kuyie. 
\v 5 Nɛ̀ dɛ kpɛ́í nyetɛnko kɛ́yíɛ́ mɛborimɛ sɑ̀ɑ̀mɛ̀ di tɑ̃́kùmɛ̀ ĩ́nkɛ̀, kɛ́yíɛ́ mɛyĩ́ɛ̃́tímɛ̀ di borimɛ sɑ̀ɑ̀mɛ̀ ĩ́nkɛ̀, 
\v 6 kɛ́nnɔ nkɛ pĩĩ ndimɑ́ɑ̀ kɛ̀ dɛ̀ɛ yíɛ́nɛ̀ di yĩ́ɛ̃́tímɛ̀ ĩ́nkɛ̀, kɛ̀ di nɔ nkɛ pĩĩ ndimɑ́ɑ̀ di yetoo kɛ́mɔɔtɛ mɛwɛ̃́ɛ̃́rìmɛ̀, kɛ́yíɛ́ Kuyie nkó disɑ̃nni mɛwɛ̃́ɛ̃́rìmɛ̀ ĩ́nkɛ̀, 
\v 7 kɛ́yetoo kɛ́ndɔ́ Kirisi kɔbɛ kɛ́mɔɔtɛ mɛdɔ́kùmɛ̀. 
\v 8 Kɛ̀ di mɔkɛ dɛndɛ kó dimɑ̀ɑ̀ kɛ dɛ̀ yɛ́útí dɛ̀ bo nte kɛ̀ di tɔ̃mmú ndɛ́úkú kɛ̀ di dɔkɛ yĩ́ɛ̃́tɛ́ ti Yiɛ̀ Yesu Kirisi. 
\v 9 Wèè í mɔkɛ dɛndɛ ò tu kuyũ̀ɔ̃̀nkù nku, wè í wúó, kɛ í kpɑɑ́ yɛ̃́ Kuyie nhò ɔ̀útɛ́mɛ̀ o yɛi.
\p
\v 10 Yetɛnko kɛ́tɑunnɛ̀ dimɑ́ɑ̀ weti weti Kuyie nkùù di tɑ̃ɑ̃tɛ́ kɛ di yu. Kɛ̀ di dɔɔri mɛmmɛ di bo nɑ kɛ́tuɔkɛ kumɑ̀nku. 
\v 11 Kɛ̀ Kuyie ndi kpetɛ́ dibòrì mɛsɑ̀ɑ̀ nkɛ̀ di tɑ ti Yiɛ̀ nYesu Odɛɛtíwè kpɑ̀ɑ̀tìyuu miɛkɛ, dìì yó mbo sɑ̃́ɑ̃̀.
\p
\v 12 Dɛɛ̀ te kɛ̀ n dɔ́ kɛ́ ndi denni dɛ kó tinɑ́ɑǹtì sɑ̃́ɑ̃̀ bɑ́ nɛ̀ di mɛ ndiɛ́ nkɛ tì yɛ̃́mɛ̀ kɛ̀ di dɔkɛ fííkú timɔ́mmɔnti di tɑ̃́ tì miɛkɛ. 
\v 13 Kɛ̀ n kpɑɑ́ fòù, n dɔ́ kɛ́ ndi dennimu dɛ kó tinɑ́ɑǹtì kɛ̀ di bɑ́ɑ́ yɛ̃̀ nkɛ́duɔ́. 
\v 14 Ti Yiɛ̀ nYesu Kirisi n nɑ̀kɛ́mu kɛ tú m mɔ̀nnì tùɔ̀kɛ. 
\v 15 Dɛɛ̀ te kɛ̀ n yetíróo kɛ bɑɑ tì ndi nɑ́ɑ́ nkɛ bo kú kɛ̀ di nkpɑɑ́ kɛ tì yɛ̃́.
\s1 Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɑ̀kɛ́ tì tumɛ̀ timɔ́mmɔnti
\p
\v 16 Ti nɑ́ɑ́ ntìì nɑ́ɑǹtì kɛ di bɛnkú ti Yiɛ̀ nYesu Kirisi wɛ̃tinímɛ̀ nɛ̀ muwɛ̃rímú í tú pɛ̀tɛ̀m̀pɛ̀ bɛnìtìbɛ̀ keú wè nɛ̀ mɛciì. Ti yɑ̀mu nɛ̀ ti nuɔ nhò kpeńnìmɛ̀. 
\v 17 Ti do bomu ditɑ̃sɑ̀ɑ̀rì ĩ́nkɛ̀ kɛ̀ ti cicɛ Kuyie nhò sɑ̃ntɛ kóò dɛ́úkùnnɛ nɛ̀ ku kpetì diɛtì miɛkɛ kóò bɛ́innɛ̀ kɛ dɔ̀: Yie nweè tú m birɛ kɛ̀ nh ò dɔ́ mɛsɑ̀ɑ̀ koò tɑ̃́ mɛdiɛ̀. 
\v 18 Ti do ò bonɛ̀ ditɑ̃sɑ̀ɑ̀rì ĩ́nkɛ̀ nkɛ kɛ́keè dɛ kó mɛtɑmmɛ̀.
\p
\v 19 Dɛɛ̀ te kɛ̀ ti yie nkɛ dò Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì yóó dɔɔ̀. Di dò nkɛ́ tì yiemmu, tiì dò nfìtírɛ̀ dɛ̀ɛ̀ mí kɛyènkɛ̀ kɛ wentɛ́, kɛ̀ tɛkṹnwentɛ́wɑ̃̀tɛ̀ yɛ̀nní kɛ mìítɛ́ di yɛ̀mmɛ̀ miɛkɛ. 
\v 20 Nyɛ̃́nɛ̀ kɛ dò nKuyie mpɑ̃ɑ̃nɑ́ɑǹtì nɑ́ɑǹtò mɔù í nɑ̀kɛ́ tìmɑtì tìì tu o kpɛti. 
\v 21 Onìtì bɑ́ɑ́ nɑ nɛ̀ omɑ́ɑ̀ kɛ́nɑ́kɛ́ Kuyie mpɑ̃ɑ̃nɑ́ɑǹtì, Muyɑɑ́nsɑ̀ɑ̀mù muù do bɛ̀ bonɛ̀ kɛ̀ bɛ̀ nnɑ́ɑ́ nKuyie mbɛ̀ duɔ́ ntì kɛ̀ bɛ̀ bo nɑ́kɛ́ bɛnìtìbɛ̀.
\c 2
\s1 Iyɑ́ɑ̀bìsítié nyɛmbɛ̀ kó tinɑ́ɑǹtì
\p
\v 1 Bɛnìtìbɛ̀ do bomu bɛ̀ɛ̀ tu bɛmɑ́ɑ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ soú. Mɛɛ̀ botí nku bɛnìtìbɛ̀ buotɛ́mɛ̀ di cuokɛ̀ kɛ nɑ́ɑ́ mbɛnìtìbɛ̀ tìì í tú Kuyie nkpɛti kɛ bɛ̀ soú kɛ yetɛ ti Yiɛ̀ nwèè bɛ̀ dɛɛtɛ́ o kpɛti kɛ feti kɛ̀ Kuyie nyóó bɛ̀ kùɔ mɛcɑ̃ɑ̃. 
\v 2 Kusṹkù bo tũnnɛ bɛ borimɛ kɛ̀ bɛ̀ ndɔutinɛ̀ bɛtɔbɛ̀ kɛ̀ dɛ̀ nte kɛ̀ bɛnìtìbɛ̀ɛ senkɛ̀rì Kuyie nkó kucɛ kùù tu timɔ́mmɔnti kɔku. 
\v 3 Bɛ̀ yó ndi soú nkɛ dɔ́ idíítí nyi, Kuyie mmɛ nyóó bɛ̀ kpetínnɛ́mu bɑ̀mbɑ̀.
\p
\v 4 Kuyie nyí yóu ku tɔ̃rɛ̀ yɛ̀ɛ̀ yetɛ ku kpɛti, kù yɛ̀ tɑnnɛ́ difɔ̃̀tìrì cũmpuri ndi dibiìnnì miɛkɛ kɛ bɑɑnɛ̀ tibeéntì yiè. 
\v 5 Kuyie ndo í yóu Nɔwee kó dimɔ̀nnì kɔbɛ. Kù do cṹũnní fɛtɑɑfɛ̀ nfɛ kɛ̀ fɛ̀ɛ kuɔ bɛnitiyɛibɛ, kɛ́yóu Nɔwee nɛ̀ o cĩ́ɛ̃̀tɛ̀ kɔbɛ bɛyiekɛ̀. Nɔwee do nɑ̀kɛ́mu bɛnìtìbɛ̀ kɛ dɔ̀ bɛ̀ɛ dɔɔ̀ Kuyie ndɔ́mɛ̀. 
\v 6 Kuyie ndo cɔ́u nSodɔmmu nɛ̀ Komɔɔ kɛ̀ bɛnìtìbɛ̀ɛ kú pɑ́íí, kɛ̀ dɛ̀ bɛnkú kù yóó kpetínnɛ́mɛ̀ mmɛ bɛnitiyɛibɛ, 
\v 7 kɛ́dɛɛtɛ́ Dɔti onitisɑ̀ù wèè yɛ̀mmɛ̀ do cɑɑri nɛ̀ bɛ̀ dɔ̀ɔ̀ri mɛ̀ɛ̀ yɛi. 
\v 8 Ò do tú onitisɑ̀ù nwe kɛ bo bɛ̀ cuokɛ̀ kɛ wúó mbɛ̀ dɔ̀ɔ̀ri mɛ̀ɛ̀ yɛi nkɛ yo bɛ nɑ́ɑnyɛiti kòo yɛ̀mmɛ̀ cɑ̀ɑ̀ri. 
\v 9 Kuyie nyɛ̃́mu kù yóó dɛɛtɛ́ mɛ̀ɛ̀ botí ku kɔbɛ bɛ̀ɛ̀ fɛ̃́ũ̀rì, kɛ yɛ̃́ kù yóó kpetínnɛ́ mɛ̀ɛ̀ botí bɛnitiyɛibɛ ku beéntì yiè. 
\v 10 Kù dɔ̀kɛ yóó kpetínnɛ́ bɛ̀ɛ̀ dɔ̀ɔ̀ri bɛ̀mbɛ mɛyɛi mbɛ yɛ̀mmɛ̀ dɔ́mɛ̀ kɛ kù sènku.
\p Iyɑ́ɑ̀bìsítié nyɛmbɛ̀, n di nɑ́ɑ́ mbɛ̀ɛ̀ kpɛ́í mmɔkɛ yɛkɔ̃m̀bɔ̀ nyɛ nɛ̀ sifeí, bɛ̀ í dé kɛĩ́nkɛ̀ kó bɛkperíbɛ̀ kɛ bɛ̀ sɑ̃̀ɑ̃́. 
\v 11 Bɑ́ Kuyie ntɔ̃rɛ̀ yɛ̀ɛ̀ kpeńnì kɛ bɛ̀ pɛ̃ɛ̃tɛ́, yɛ̀ í dɑ̀ɑ́tí kɛ bo sɑ̃́ɑ̃́ nkɛĩ́nkɛ̀ kó bɛkperíbɛ̀ Kuyie mborɛ̀ kɛ dɔ̀ bɛ̀ cɑ̀ɑ̀rɛ̀. 
\v 12 Dɛ kó bɛnìtìbɛ̀ í yɛ̃́ bɛ̀ dɔ̀ɔ̀ri dɛ̀, bɛ̀ dò nyiwũɔ̃ nyi ìì pɛí kɛ̀ bɛ̀ pĩĩ nkɛ kɔù. Bɛ̀ sɑ̃̀ɑ̃́ mbɛ̀ í yɛ̃́ dɛ̀ndɛ kɛ̀ Kuyie nyóó bɛ̀ kùɔ iwũɔ̃ tɛ̃mɛ̀. 
\v 13 Bɛ̀ dɔ̀ɔ̀ mɛ̀ɛ̀ yɛi nKuyie nyóó mɛ mbɛ̀ yietí. Bɛ̀ dɔ̀ɔ̀ri mɛyɛi mbɛ̀ dɔ́mɛ̀ mmɛ kuyie ncuokɛ̀, kɛ̀ ɔ̃ mbo di yo ndɛ̀ kɛ̀ dɛ̀ dò nyisíɛ́ kɛ di sĩnkùnko, kɛ̀ dɛ̀ bɛ̀ nɑɑtinɛ̀ bɛ̀ dɔ̀ɔ̀ri mɛ̀ɛ̀ yɛi. 
\v 14 Kɛ dɔ́ bɛnitipòbɛ̀ mɑ́ɑ̀ kɛ dɔɔri mɛyɛi nsɑ̃́ɑ̃̀ kɛ buɔ̀ mbɛ̀ɛ̀ í kpeńnì Kuyie nkó kucɛ, kɛ duɔ́ mbɛ yɛ̀mmɛ̀ idíítí kɛ yɛ̃́ bɛ̀ ɔ̃mmɛ̀ kɛ ì pɛ́u. Kuyie nyóó bɛ̀ bɔntɛ́mu kusĩ̀nkù. 
\v 15 Bɛ̀ yóu kucɛ sɑ̀ɑ̀kù nku kɛ tũ mmɛyɛi nkɔku. Bɑdɑmmu Beɔɔ birɛ do tũ nkù kɛ́ndɔɔri mɛyɛi nkɛ dɔ́ idíítí. 
\v 16 Kɛ̀ Kuyie nhò kpɑnnɛ̀ o tookperí kpɛ́í nkɛ̀ sɑ̃mmɑrímú ò dèkɛ wèe bɛ́i nhonìtì kɔ̃mɛ, kóò pɛ̀ítɛ́ ò dɔ́ kɛ́dɔɔ̀ mɛ̀ɛ̀ yɛi nkpɛ́í.
\p
\v 17 Dɛ kó bɛnìtìbɛ̀ dò nsibií sìì kũ̀ṹ sìnsi, kɛ dò nyɛwɛtɛ̀ kuyɑɑkù tɔu yɛ̀. Kuyie mbo bɛ̀ kpetínnɛ́ difɔ̃̀tìrì cũmpuri dibiìnnì miɛkɛ. 
\v 18 Bɛ̀ nɑ́ɑntɛ sifeí kó tinɑ́ɑǹtì nti nɛ̀ tiyɛinnɑ́ɑǹtì, kɛ soú mbɛnìtìbɛ̀ nɛ̀ mufòmmu yɛimu, kɛ yũɔ̃ mbɛ̀ɛ̀ bo kɛ yɛtìní bɛ̀ɛ̀ feti bɛ miɛkɛ. 
\v 19 Kɛ bɛ̀ nɑ̀ɑ́ nkɛ tú bɛ̀ɛ yɛ̀ tidɑɑtì miɛkɛ, kɛ nɛ́ tú bɛmɔ́mmɔmbɛ mɛyɛi nkó tidɑɑtì, kɛ̀ mɛ̀ yóó bɛ̀ kùɔ kɛ yɛ̃́ dɛ̀ɛ̀ nɔ nhonìtì dɛɛ̀ ò bɑkɛ́mɛ̀. 
\v 20 Kòo nìtì cɔutɛ́ ti Yiɛ̀ nYesu Kirisi Odɛɛtíwè kɛ yóu kutenkù kó mɛborimɛ kɛ wɛ̃̀tɛ kɛ mɛ̀ tũ̀nnɛ, o borimɛ ɔ̃ɔ̃ sĩntɛmu kɛ́pɛ̃ɛ̃tɛ́ ò sòò í tũ nKuyie nkɛ̀ mɛ̀ dòmmɛ̀. 
\v 21 Kòo do í yĩ̀ɛ̃́tɛ́ kucɛ sɑ̀ɑ̀kù dɛ̀ nɑ ntɔ̃ũ kɛ́pɛ̃ɛ̃tɛ́ ò bo kù yĩ̀ɛ̃́tɛ́mɛ̀ kɛ́wɛ̃tɛ kɛ́ kù yetɛ, kɛ́yetɛ Kuyie ntié nsɑ̀ɑ̀yì bɛ̀ ò tié nyì. 
\v 22 Dikotinùù mɑrì nɑ̀ɑ́ ntì kɛ tú: Tɛmɔtɛ̀ tɔ̃́ kɛ wɛ̃̀tɛ kɛ yo ntɛ̀ tɔ̃́ dɛ̀, kɛ̀ dɛfɔ̃̀nkùrɛ̀ wùɔ kɛ wɛ̃̀tɛ kɛ muɔ̀tì mɛsɑ̃̀mmɛ̀. Tiì ò tùɔ̀kɛ.
\c 3
\s1 Ti Yiɛ̀ nYesu yó nwɛ̃tiní kɛ̀ dɛ̀ ndòmmɛ̀
\p
\v 1 N kɔbɛ n dɔ́ bɛ̀, n di wɑ̃̀ri di mpɑ́tíri dɛ́ríndi kɛ dɔ́ kɛ́yíɛ́ di dentɛmu kɛ̀ di ndɑkɛ di kèè tì Kuyie nkó kucɛ miɛkɛ ti kpɛ́í. 
\v 2 Dentɛnɛ̀ní Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì nɛ̀ ti Yiɛ̀ nYesu Kirisi Odɛɛtíwè duɔ́ nyìì tié nkòo tɔ̃rɛ̀ ì ndi tùo. 
\v 3 Di nyɛ̃́ kɛ dò nyɛwe sɔnyɛ bɛnìtìbɛ̀ bo buotɛ́ kɛ́ndɔɔri bɛ̀ dɔ́mɛ̀ kɛ di dɑú kɛ tú: 
\v 4 Yesu yɛ̃ nhò wɛ̃tiní, yé we? Ti yɛmbɛ̀ do bomu kɛ ku, nɛ̀ Kuyie ndɔ̀ɔ̀mɛ̀ kɛtenkɛ̀ dɛmɔu dɛ̀ í cèètɛ. 
\v 5 Bɛ̀ í yóó yie nKuyie nkuù bɛ́immɛ̀ kɛ̀ kɛtenkɛ̀ nɛ̀ kɛĩ́nkɛ̀ kɛ̀ dɛ̀ buotɛ́, kɛ̀ kuù yìɛ́ kɛ́bɛ́i nkɛ̀ mɛniɛ mbɑ̀tɛ kɛ cɑ̃̀ńnɛ́ nɛ̀ kɛtenkɛ̀. 
\v 6 Mɛɛ̀ niɛ ndo wɛ̃̀tɛ kɛ́píɛ nkɛtenkɛ̀ kɛ́kuɔ bɛnìtìbɛ̀. 
\v 7 Mɛɛ̀ botí nku kù yóó bɛ́immɛ̀ kɛĩ́nkɛ̀ nɛ̀ kɛtenkɛ̀ kɛ̀ dɛ̀ɛ cɔ́útɛ́, kɛ̀ kùu bekɛ́nɛ̀ bɛnitiyɛibɛ kɛ́ bɛ̀ kpetínnɛ́.
\p
\v 8 N kɔbɛ nyɛ̃́nɛ̀ kɛ dò nti Yiɛ̀ mborɛ̀ yɛbie ntɛkɔupíítɛ̀ (1000) dò ndiyiè dimɑ́ɑ̀ ndi kɛ̀ diyiè dimɑ́ɑ̀ dò nyɛbie ntɛkɔupíítɛ̀. 
\v 9 Ti Yiɛ̀ nyí ɔɔtí, ò bo dɔɔ̀mɛ̀ ò bɛ́i ntì, bɛnìtìbɛ̀ bɛɛ̀ yɛ̀mmɛ̀ mɛ̀ dò, nhò í dɔ́ òmɔùu feti, ò miḿmu kɛ dɔ́ bɑ́ wè wèe ceetɛ kɛ yóu mɛyɛi.
\p
\v 10 Ti Yiɛ̀ nyóó wɛ̃tɛní oyúókù kɔ̃mɛ mmɛ. Dɛ yiè kɛ̀ kɛĩ́nkɛ̀ɛ uutɛ̀ mɛdiɛ̀ nkɛ́pɛ̃ɛ̃tóo kɛ̀ muhɑ̃ɑ̃́ ncɔ́útɛ́ siwɑ̃̀ɑ̃ nɛ̀ kɛtenkɛ̀ nɛ̀ kɛ kpɛrɛ dɛmɔu. 
\v 11 Dɛmɔu kɛ̀ dɛ̀ yóó cɔ̀útɛ́ mɛmmɛ, di tũ ndò nkɛ́ceetɛ di borimɛ mmɛ kɛ́ndɔɔri Kuyie ndɔ́mɛ̀. 
\v 12 Mpĩ́nnɛ̀ ku tɔ̃mmú nɛ̀ di yɛ̀mmɛ̀ mɛmɔu kɛ̀ dɛ kó diyièe cɑ̃rikɛ kɛ́tuɔkɛní, kɛ̀ muhɑ̃ɑ̃́ ncɔ́útɛ́ kɛĩ́nkɛ̀ kpɛrɛ kɛ̀ dɛ̀ɛ yiɛtɛ. 
\v 13 Ti bɑɑ kɛĩ́nkɛ̀ pɑ̀nkɛ̀ nkɛ nɛ̀ kɛtenkɛ̀ pɑ̀nkɛ̀, Kuyie nti dɔúnnɛ̀ dɛ̀ɛ̀ kpɛ́í ndinùù, mɛyɛi nyí yó mbo dɛ̀ bɑ́ wè ò yó ndɔɔri dɛ̀ Kuyie ndɔ́mɛ̀.
\p
\v 14 N kɔbɛ n dɔ́ bɛ̀, yetɛnko kɛ́ndò mpɑ́íí kɛ kpɑ mɛyɛi, kɛ́ntɑunɛ̀ Kuyie, kɛ́mbɑɑ dɛ kó diyiè. 
\v 15 Nyɛ̃́nɛ̀ kɛ dò nkɛ̀ ti Yiɛ̀ nyí wɛ̃̀tɛní mɛcɑ̃ɑ̃ nhò mimmu kɛ dɔ́ kɛ́ di dɛɛtɛ́. Kuyie nduɔ́mmu mɛciì ntì tebitɛ Pɔɔri kòò tì ndi wɑ̃̀ri. 
\v 16 Kɛ̀ tì bo o pɑ́tɛ miɛkɛ, kɛ̀ tìmɑtì yóù, bɛ̀ɛ̀ í bɑntɛ́ nɛ̀ bɛ̀ɛ̀ í kpenkɛ, kɛ̀ bɛ̀ cèèri tì tu mù bɛ̀ ɔ̃mmɛ̀ Kuyie nnɑ́ɑǹtì tɛtì, bɛ̀ ce mbɛmɑ́ɑ̀ ndi Kuyie mbeéntì.
\p
\v 17 N kɔbɛ n tì ndi nɑ̀kɛ́mu, nyɛ̃́nɛ̀ kɛ̀ bɛnitiyɛibɛ bɑ́ɑ́ di soutɛ́ kɛ̀ di yóu di fííkú nkùù cɛ miɛkɛ. 
\v 18 Nsɔkɛ́nɛ̀ kɛ kótírí Kuyie nkó kucɛ miɛkɛ, kɛ dɔkɛ yĩ́ɛ̃́tɛ́ ti Yiɛ̀ nYesu Kirisi Odɛɛtíwè, kòo yètìrì ndɛu sɑ̃́ɑ̃̀. Kɛ̀ dɛ̀ mmɛ̀ ndò.