\id 2KI di12.all Novembre 1998 BJ Parakou B{enin
\ide UTF-8
\h 2 Bɛkpɑ̀ɑ̀tìbɛ̀
\toc1 Bɛkpɑ̀ɑ̀tìbɛ̀ pɑ́tíri dɛ́rì
\toc2 2 BƐKPÀÀTÌBƐ̀
\mt1 Bɛkpɑ̀ɑ̀tìbɛ̀ pɑ́tíri dɛ́rì
\imt1 Di mpɑ́tíri tɔ tìì nɑ́ɑǹtì
\ip Bɛkpɑ̀ɑ̀tìbɛ̀ pɑ́tíri dɛ́rì sɔɔtɛ́ diketirì kó tinɑ́ɑǹtì nti. Kɛ ti nɑ́ɑ́ nSudɑɑ kɔbɛ nɛ̀ Isidɑyɛɛri kɔbɛ dɛ kó bɛkpɑ̀ɑ̀tìbɛ̀ sɔmbɛ kó tinɑ́ɑǹtì.
\ip Dɛ kó dipɑ́tíri kó diwɛ́tirì ketirì ti nɑ́ɑ́ nyIsidɑyɛɛribɛ kó bɛkpɑ̀ɑ̀tìbɛ̀ do bùtínnɛ́mɛ̀ mmɛ Kuyie nkɛ̀ kùu pɔntɛ bɛ kó dikpɑ̀ɑ̀tìyuu. Asidii kóo kpɑ̀ɑ̀tì weè do bɛ̀ do mudoò kɛ́ bɛ̀ nɑ kɛ́pĩ́mmú bɛnìtìbɛ̀ mɑbɛ̀ kɛ́kònnɛ̀ o ciɛ.
\ip Dɛ kó dipɑ́tíri ketirì miɛkɛ nkɛ bɛ̀ nɑ̀kɛ́mɛ̀ Edisee pĩ mmùù tɔ̃mmú. Edisee do tú Kuyie mpɑ̃ɑ̃nɑ́ɑǹtì nɑ́ɑǹtò nwe wèè do sɔɔtɛ́ Edii fɔ̃̀tìrì.
\ip Dɛ kó dipɑ́tíri kó diwɛ́tirì diketirì mukɑ̀mmù 18-25 ti nɑ́ɑ́ nSudɑɑ kó dikpɑ̀ɑ̀tìyuu do kpɑɑ́mɛ̀ dimɑ́ɑ̀ kɛ́mɔntɛ mɛdiɛ̀ nkɛ́tuɔkɛ yɛbie ntɛkɔ̀ùtɛ̀ nɛ̀ sipísìtɑ̃ɑ̃ti (130) kɛ̀ Bɑbidɔnni kóo kpɑ̀ɑ̀tì Nɛbukɑnnɛsɑɑ yɑ̀ɑ̀ bɛ̀ donɛ̀ mudoò kɛ́fietɛ Sedisɑdɛmmu ɛì, kɛ́pɔntɛ Kuyie ncĩ́ɛ̃̀tɛ̀, kɛ́pĩ́mmú bɛnìtìbɛ̀ mɑbɛ̀ kɛ́kònnɛ̀ Bɑbidɔnni.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Edii tɔ̃mmú kó kumɑ̀nku 1-2
\io1 2. Edisee kó mutɔ̃mmú kɛ́ntɔ kɛ́tuɔkɛnɛ̀ Isidɑyɛɛri kó dikpɑ̀ɑ̀tìyuu pɔ̀ntɛmɛ̀ 3-17
\io1 4. Sudɑɑ kpɑ̀ɑ̀tìyuu kó tinɑ́ɑǹtì kɛ́túótɛ́ Esekiɑsi tɔmɛ̀ tikpɑ̀tì kɛ́ntɔ kɛ́tuɔkɛnɛ̀ bɛ dootitɔbɛ̀ bɛ̀ pĩ̀ḿmúmɛ̀ kɛ kònnɛ̀ 18-25
\c 1
\s1 Okpɑ̀ɑ̀tì Aɑsiɑ beémmɛ̀ dibɔɔ̀ Bɑɑdi-Sebuudi
\p
\v 1 Okpɑ̀ɑ̀tì Akɑbu kṹṹ nkó difɔ̃nkúò kɛ̀ Mɔɑbu kɔbɛɛ yetɛmu Isidɑyɛɛribɛ kpɛti.
\b
\p
\v 2 Diyiè mɑrì kòo kpɑ̀ɑ̀tì Aɑsiɑ ḿbo Sɑmmɑrii okpɑ̀ɑ̀tì cĩ́ɛ̃̀tɛ̀ kudɑ̀nkù ĩ́nkɛ̀ kɛ́donní kɛ́kɔutɛ mɛdiɛ̀ nkɛ́tɔ̃ nyɛtɔ̃rɛ̀ kɛ́ yɛ̀ nɑ̀kɛ́ kɛ dɔ̀: Kɔtɛnɛ̀ Ekunɔɔ kɛ́beé ndibɔɔ̀ Bɑɑdi-Sebuudi kɛ́yɑ̀ kɛ̀ m bo miɛtɛ́. 
\v 3 Kɛ̀ ti Yiɛ̀ nKuyie ntɔ̃nní ku tɔ̃nnì mɑrì kɛ̀ dìi nɑ́kɛ́ Edii Tisibiti ɛì kou kɛ dɔ̀: Ítɛ́ kɛ́kɔtɛ kɛ́conɛ̀ Sɑmmɑrii kóo kpɑ̀ɑ̀tì kó yɛtɔ̃rɛ̀ kɛ́ yɛ̀ bekɛ kɛ dɔ̀: Kuyie nyí bomu Isidɑyɛɛribɛ tenkɛ̀ kòò duɔ́ nkɛ̀ di kɔ̀tɛ Ekunɔɔ kɛ bo beé mbɛ bɔɔ̀ Bɑɑdi-Sebuudɑɑ? 
\v 4 Nɛ̀ dɛ kpɛ́í nti Yiɛ̀ nKuyie ntu nh ò nɑ̀kɛ́ kɛ tú ò mɛ̀ nduɔ́ dìì dɔ́ù ò tɛ̃́nkɛ í iti, ò yóó kúmu.
\p Edii ti mbɛ̀ nɑ̀kɛ́ kɛ́pɛ̃ɛ̃tɛ́. 
\v 5 Kòo kpɑ̀ɑ̀tì Aɑsiɑ do tɔ̃ mbɛ̀ɛ wɛ̃too o borɛ̀ kòo bɛ̀ bekɛ kɛ dɔ̀: Dɛ̀ dòmmɛ kɛ̀ di wɛ̃̀tɛní? 
\v 6 Kɛ̀ bɛ̀ɛ ò tɛ̃̀ńnɛ́ kɛ dɔ̀: Onìtì mɔù weè ti conɛ̀ kɛ tú tí wɛ̃tɛní kɛ dɑ bekɛ kɛ tú, ti Yiɛ̀ nKuyie nyí bomu Isidɑyɛɛribɛ tenkɛ̀ kɑ̀ɑ duɔ́ nkɛ̀ ti kɔ̀tɛ Ekunɔɔ kɛ beé mbɛ bɔɔ̀ Bɑɑdi-Sebuudɑɑ? Ò tu nɛ̀ dɛ kpɛ́í nhɑ mɛ̀ nduɔ́ dìì dɔ́ù ɑ í yóó ítɛ́, ɑ yóó kúmu.
\p
\v 7 Kòo bɛ̀ bekɛ kɛ dɔ̀: Onìtì wèè di conɛ̀ kɛ di nɑ̀kɛ́ dɛ kó tinɑ́ɑǹtì ò dòmmɛ?
\p
\v 8 Kɛ̀ bɛ̀ɛ ò tɛ̃̀ńnɛ́ kɛ dɔ̀: Onìtì nwe kɛ dɑ́ɑ́tí diyɑɑ̀bòrì bɛ̀ dùɔ̀kɛ́nɛ̀ dì yòyó kó ticìtì kɛ boú fɛnɑɑ̀kɔ̃̀nfɛ̀ o kɑ.
\p Kòo kpɑ̀ɑ̀tì dɔ̀: Edii nwe Tisibiti ɛì kou.
\s1 Aɑsiɑ dɔ́mɛ̀ kɛ́pĩ́ nhEdii
\p
\v 9 Kòo kpɑ̀ɑ̀tìi dɛitɛ kuhɑ̃ɑ̃pɔ̀nkù nɛ̀ bɛhɑ̃ɑ̃pɔ̀mbɛ̀ sipísìnùmmù kɛ̀ bɛ̀ɛ dekoo Edii kɑ̀ri dɛ̀ ditɑ̃rì ĩ́nkɛ̀ kóò nɑ̀kɛ́ kɛ dɔ̀: Kuyie nkóo nìtì, okpɑ̀ɑ̀tì tu ɑ cútɛ́ní!
\p
\v 10 Kɛ̀ Edii bɛ̀ tɛ̃̀ńnɛ́ kɛ dɔ̀: Kɛ̀ mɛ̀nkɛ nwe n túmɛ̀ Kuyie nkóo nìtì, muhɑ̃ɑ̃́ ncútɛ́ní kɛĩ́nkɛ̀ kɛ dɑ cɔ́útɛ́ fɔ̃́ nnɛ̀ ɑ kɔbɛ.
\p Kɛ̀ muhɑ̃ɑ̃́ ncútɛ́ní kóò cɔ̀útɛ́ wenwe nɛ̀ o kɔbɛ. 
\v 11 Kòo kpɑ̀ɑ̀tìi yíɛ́ kɛ́tɔ̃nko kuhɑ̃ɑ̃pɔ̀nkù tɛkù nɛ̀ bɛhɑ̃ɑ̃pɔ̀mbɛ̀ tɔbɛ̀ sipísìnùmmù kɛ̀ bɛ̀ɛ dekoo kóò nɑ̀kɛ́ kɛ dɔ̀: Kuyie nkóo nìtì, okpɑ̀ɑ̀tì tu ɑ cútɛ́ní.
\p
\v 12 Kòo bɛ̀ tɛ̃̀ńnɛ́ kɛ dɔ̀: Kɛ̀ mɛ̀nkɛ nwe n túmɛ̀ Kuyie nkóo nìtì muhɑ̃ɑ̃́ ncútɛ́ní kɛĩ́nkɛ̀ kɛ́ dɑ cɔ́útɛ́ fɔ̃́ nnɛ̀ ɑ kɔbɛ!
\p Kɛ̀ muhɑ̃ɑ̃́ ncútɛ́ní kóò cɔ̀útɛ́ wenwe nɛ̀ o kɔbɛ. 
\v 13 Kòo kpɑ̀ɑ̀tìi Aɑsiɑ yíɛ́ kɛ́tɔ̃nko kuhɑ̃ɑ̃pɔ̀nkù tɑ̃ɑ̃́nkù nɛ̀ bɛhɑ̃ɑ̃pɔ̀mbɛ̀ tɔbɛ̀ sipísìnùmmù. Kɛ̀ bɛ̀ɛ tuɔkoo Edii borɛ̀ kɛ́nínkóo o ììkɛ̀ kuhɑ̃ɑ̃pɔ̀nkù kùù bɛ̀ ni kɛ̀ kùu ò bɑ̀ńtɛ̀ kɛ dɔ̀: Kuyie nkóo nìtì, dontɛ́ ti wũɔ̃̀, mmí nnɛ̀ bɛ nnìtìbɛ̀ sipísìnùmmù ti tú ɑ kó bɛtɔ̃mbɛ̀ mbɛ, ɑ bɑ́ɑ́ ti kuɔ, 
\v 14 kɛ́ndònnɛ̀ muhɑ̃ɑ̃́ ncùtɛ́nímɛ̀ kɛ cɔ̀útɛ́ titɔ̃ntì ketitì tidɛ́tì nɛ̀ ti kó bɛnìùbɛ̀ bɛmɔu. Di mmɔ̀nnì dontɛ́ nh ɔ̃nnì kɛ bɑ́ n kuɔ!
\p
\v 15 Dɛ mɔ̀nnì kɛ̀ ti Yiɛ̀ nKuyie ntɔ̃nnìi nɑ́kɛ́ Edii kɛ dɔ̀: Nɛinɛ̀ we kɛ̀ dí cútɛ́, ɑ bɑ́ nhò yĩ̀ɛ̃̀kù.
\p Kɛ̀ Edii ítɛ́ kóò nɛinɛ̀ kɛ̀ bɛ̀ɛ cútɛ́, kɛ́kɔtɛ okpɑ̀ɑ̀tì borɛ̀. 
\v 16 Kɛ̀ Edii ò nɑ̀kɛ́ kɛ dɔ̀: Ti Yiɛ̀ nKuyie ntu ɑ mɛ̀ nkɔ̀tɛmɛ̀ Ekunɔɔ kɛ beé mbɛ bɔɔ̀ Bɑɑdi-Sebuudi, nɛ̀ dɛ kpɛ́í nhɑ tɛ̃́nkɛ í iti ɑ mɛ̀ nduɔ́ dìì dɔ́ù ĩ́nkɛ̀. A yóó kúmu.
\p
\v 17 Kɛ̀ Aɑsiɑ mɛ̀nkɛɛ kú ti Yiɛ̀ nKuyie nti nɑ̀kɛ́mɛ̀ Edii, kòò ti bɛ́i. Ò ku mɛmmɛ kòo tebitɛ Yodɑmmu sɔɔtɛ́ tikpɑ̀tì kɛ yɛ̃́ Aɑsiɑ do í mɔkɛmɛ̀ dɛbirɛ. Dɛ̀ do sɔ̃́ nSosɑfɑti birɛ Yodɑmmu tɔù Sudɑɑ kɔbɛ kóo kpɑ̀ɑ̀tì bo o kpɑ̀tì benni dɛ́rì ndi.
\p
\v 18 Aɑsiɑ dɔɔ̀rìmɛ̀ tɛ̃mɛ̀ nɛ̀ o tɔ̃mmú dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\c 2
\s1 Kuyie ntùótɛ́mɛ̀ Edii
\p
\v 1 Ntɛ dɛ̀ do wũɔ̃kɛ́mɛ̀ ti Yiɛ̀ Kuyie ndɔ́ kɛ́túótɛ́ dìì mɔ̀nnì Edii nɛ̀ tɛfɔ̀dɔ́ntɛ̀ kɛ́dekɛnɛ̀ kɛĩ́nkɛ̀.
\p Edii nɛ̀ Edisee bɛ̀ do iti Kidikɑɑdi nwe, 
\v 2 kɛ̀ Edii nɑ́kɛ́ Edisee kɛ dɔ̀: Nkpɑɑ́ diɛ, ti Yiɛ̀ nKuyie nni ntɔ̃ mBetɛɛdi nwe.
\p Kɛ̀ Edisee pɑrìkɛ̀ kɛ dɔ̀: Ti Yiɛ̀ nKuyie mbomu kɑ̀ɑ bo, n yí yóó dɑ yóu!
\p Mɛm̀mɛ kɛ̀ bɛ̀ɛ nɛi kɛ́kɔtɛ Betɛɛdi. 
\v 3 Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ bɛ̀ɛ̀ tikú Betɛɛdi kɛ̀ bɛ̀ɛ yɛ̀nní kɛ́co Edisee kóò bekɛ kɛ dɔ̀: A yɛ̃́ kɛ dò nKuyie nyóó túótɛ́ yíe nhɑ cicɛ kɛ́dekɛnɛ̀ kɛĩ́nkɑ̀ɑ̀? Kòo bɛ̀ tɛ̃̀ńnɛ́ kɛ dɔ̀: N yɛ̃́mu, yĩ́nɛ̀ yúóó.
\p
\v 4 Kɛ̀ Edii yíɛ́ kɛ́nɑ́kɛ́ Edisee kɛ dɔ̀: Nkpɑɑ́ diɛ, ti Yiɛ̀ nKuyie nni ntɔ̃ nSedikoo nwe.
\p Kɛ̀ Edisee pɑrìkɛ̀ kɛ dɔ̀: Ti Yiɛ̀ nKuyie mbomu kɑ̀ɑ bo, n yí yóó dɑ yóu! Kɛ̀ bɛ̀ɛ nɛi kɛ́kɔtɛ Sedikoo. 
\v 5 Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ bɛ̀ɛ̀ bo Sedikoo kɛ̀ bɛ̀ɛ yɛ̀nní kɛ́co Edisee kóò bekɛ kɛ dɔ̀: A í yɛ̃́ kɛ dò nti Yiɛ̀ nKuyie mbo túótɛ́ yíe nhɑ cicɛ kɛ́dekɛnɛ̀ kɛĩ́nkɑ̀ɑ̀? Kòo bɛ̀ tɛ̃̀ńnɛ́ kɛ dɔ̀: N yɛ̃́mu, yĩ́nɛ̀ yúóó.
\p
\v 6 Kɛ̀ Edii ò nɑ̀kɛ́ kɛ dɔ̀: Nkpɑɑ́ diɛ, ti Yiɛ̀ nKuyie nni ntɔ̃ nSuditɛ̃ɛ̃ nwe.
\p Kɛ̀ Edisee pɑrìkɛ̀ kɛ dɔ̀: Ti Yiɛ̀ nKuyie mbomu kɑ̀ɑ bo, n yí yóó dɑ yóu.
\p Kɛ̀ bɛ̀ɛ sɔɔtɛ́ kɛ́nnɛí bɛdɛ́. 
\v 7 Kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ sipísìnùmmùu kɔtɛní kɛ́ncómmú mɛdɛ́timɛ̀, Edii nɛ̀ Edisee kɛ̀ bɛ̀ bo kukó nSuditɛ̃ɛ̃ tɑkɛ́. 
\v 8 Kɛ̀ Edii dɑ́tɛ́ o yɑɑ̀bòrì kɛ́ dì kpɛ̀ú nkɛ́potɛ́ Suditɛ̃ɛ̃ kó mmɛniɛ nkɛ̀ mɛ̀ɛ kéétɛ́ kɛ́cómmú tipíìtì tìdɛ́ kɛ̀ bɛ̀ɛ nɑ dɛkperɛ̀ kɛ́séntɛ́.
\p
\v 9 Bɛ̀ sèńtóo dìì mɔ̀nnì kɛ̀ Edii bekɛ Edisee kɛ dɔ̀: A dɔ́ bɑ? Kɛ̀ n dɛ̀ ndɑ dɔɔ̀ kɛ̀ Kuyie nnɛ́ nɑ kɛ́ n túótɛ́ kɛ́dekɛnɛ̀ kɛĩ́nkɛ̀?
\p Kɛ̀ Edisee dɔ̀: N dɔ́ kɛ́pɛ́tɛ́ Kuyie nYɑɑ́ mmùù dɑ bonɛ̀ mùmmu kucɛ mɛ̀dɛ́mɛ̀. 
\v 10 Kɛ̀ Edii dɔ̀: A m békú dɛ̀ yóumu, kɑ̀ɑ ǹ wùó n yiti dìì mɔ̀nnì kɛ deètì kɛĩ́nkɛ̀ ɑ bo dɛ̀ pɛ̀tɛ́, kɛ̀ mɛɛ̀ dɔkɛ ɑ bɑ́ɑ́ dɛ̀ pɛ̀tɛ́.
\p
\v 11 Bɛ̀ nɛí mɛmmɛ kɛ nɑ́ɑntɛ kɛ́ nyóó dɑɑtɛní kɛ́yɑ̀ tɛkpɑ̀rìsɑ̃ntɛ̀ mɑtɛ̀ kɛ̀ tɛ̀ cɔ̀ú mmuhɑ̃ɑ̃́ nkɛ̀ sisɛ̃ĩ́ sìì tɛ̀ dɛ̀ri kɛ̀ sì cɔ̀ú mmuhɑ̃ɑ̃́. Kɛ̀ sìi tuɔkɛní bɛ borɛ̀ kɛ́cómmɔ́ɔ bɛ cuokɛ̀, kɛ̀ fɛfɔ̀dɔ́nfɛ̀ɛ túótɛ́ Edii nɛ̀ tɛkpɑ̀rìsɑ̃ntɛ̀ kɛ́dekɛnɛ̀ kɛĩ́nkɛ̀. 
\v 12 Kɛ̀ Edisee ndɛ̀ wùó nkɛ́kuɔ́nko kɛ dɔ̀: N cicɛ! N cicɛ! Isidɑyɛɛribɛ kpɑ̀rìsɛ̃ĩ́ nɛ̀ si dèèbɛ̀ tu fɔ̃́ nwe.
\p Ò mɛ nyĩ kóò mɔ̀ńtóo kɛ pĩ́ nho yɑɑ̀bòrì kɛ́kɛ̃tɛ́ yɛkɛ̃tíyɛ̀ yɛ̀dɛ́ɛ̀, 
\v 13 kɛ́túótɛ́ Edii yɑɑ̀bòrì ò bɔntɛ́ní dì kɛ́wɛ̃tɛ kɛ́ncómmú kukó nSuditɛ̃ɛ̃ bɛ̀nnì, 
\v 14 kɛ tɔ Edii yɑɑ̀bòrì ò tùótɛ́ dì, kɛ́ dì potɛ́ mɛniɛ nkɛ dɔ̀: Ti Yiɛ̀ nKuyie nhEdii tũ nkù borɛ? Kɛ́yíɛ́ kɛ́potɛ́ mɛniɛ kɛ̀ mɛ̀ɛ kéétɛ́, kòo séntɛ́. 
\v 15 Kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ bɛmbɛ bɛ̀ɛ̀ do tíkú mɛdɛ́timɛ̀, kɛ̀ bɛ̀ɛ ò yɑ̀ kɛ́bɛ́i nkɛ dɔ̀: Kuyie nYɑɑ́ mmùù do bonɛ̀ Edii, muù bonɛ̀ Edisee, kɛ́kétóo kóò conɛ̀ kɛ́nínkú kɛ́sĩ́nnɔ́ɔ o ììkɛ̀. 
\v 16 Kóò nɑ̀kɛ́ kɛ dɔ̀: Tínti ɑ kó bɛtɔ̃mbɛ̀ ti miɛkɛ yɛkɔ̃m̀bɔ̀ yɛmbɛ̀ bomu sipísìnùmmù, duɔ́ nkɛ̀ bɛ̀ɛ kɔtɛ kɛ́wɑmmú ɑ cicɛ kɛ́yɑ̀ ti Yiɛ̀ nKuyie nYɑɑ́ mbɑ́ nhò tùótɛ́ kɛ kɔ̀tɛ kɛ dootóo ditɑ̃rì mɑrì ĩ́nkɛ̀ yoo kubiriku mɑkù miɛkɛ.
\p Kɛ̀ Edisee yetɛ kɛ dɔ̀: Bɑ́ɑ́ tɔ̃nnɛ̀ òmɔù. 
\v 17 Kɛ̀ bɛ̀ɛ yetoo kɛ bɑɑ nhò kɔɔ́nnɛ̀ kòo mbo kɛ dɔ̀: Tɔ̃nnɛ̀ bɛ! Kɛ̀ bɛ̀ɛ tɔ̃ mbɛnìtìbɛ̀ sipísìnùmmù, kɛ̀ bɛ̀ɛ kɔtɛ kɛ́nwɑɑ̀ nhEdii kɛ dɔ̀ yɛwe yɛ̀tɑ̃ɑ̃ti bɑ́ bɛ̀ í nhò yɑ̀, 
\v 18 kɛ́wɛ̃tɛní Edisee borɛ̀ Sedikoo, kòo bɛ̀ nɑ̀kɛ́ kɛ dɔ̀: N do di nɑ̀kɛ́mu kɛ̀ n dɔ̀ di bɑ́ɑ́ kɔtɛ!
\s1 Edisee wèńkùnnɛmɛ̀ Sedikoo kó mɛniɛ
\p
\v 19 Kɛ̀ Sedikoo ɛì kɔbɛɛ nɑ́kɛ́ Edisee kɛ dɔ̀: Okótì, ɑ wúómmu ɑ mɔ́mmuɔ nti ɛì wennimɛ̀, mɛniɛ nnɛ́ í wenni dɛ̀mɑrɛ̀ í pɛí ti tenkɛ̀ miɛkɛ. 
\v 20 Kòo bɛ̀ nɑ̀kɛ́ kɛ dɔ̀: Wɑɑ́nnɛ̀nní dibúpɑ̀nnì, kɛ́ɑ̃nnɛ́ mukɔ́kúɔ́ nkɛ́ n duɔ́.
\p Kɛ̀ bɛ̀ɛ dɛ̀ nhò duɔ́. 
\v 21 Kòo kɔtɛ dinɛ́bòrì kɛ́ɑ̃nnɛ́ mukɔ́kúɔ́ ndi miɛkɛ kɛ́bɛ́i nkɛ dɔ̀: Ti Yiɛ̀ nKuyie ntu kù wèńkùnnɛmu mɛ nniɛ, mmɛ̀ tɛ̃́nkɛ í yó ntɔuní mukṹṹ nyoo dɛ̀mɑrɛ̀ í mpɛí di tenkɛ̀ miɛkɛ.
\p
\v 22 Mɛm̀mɛ kɛ̀ mɛniɛ nwenkɛ kɛ́ndònnɛ̀ Edisee bɛ́immɛ̀, kɛ kpɑɑ́ wenni nɛ̀ yíenní.
\s1 Ibí dɑɑ́mɛ̀ Edisee kòo ì bɔntɛ́ kusĩ̀nkù
\p
\v 23 Kɛ̀ Edisee ítɛ́ dɛ borɛ̀ kɛ́ndeètì Betɛɛdi, dɛ kó dihɛì do bo ditennì ndi. Ò kèrí dìì mɔ̀nnì kɛ deètì Betɛɛdi kɛ̀ idɑpùmbíi yɛ̀nní Betɛɛdi kɛ́ nhò sɑ̃̀ɑ̃́ nkɛ tú: Dekɛní ɑ yukũɔ̃tikù! Dekɛní ɑ yukũɔ̃tikù!
\p
\v 24 Kɛ̀ Edisee wɛ̃ɛ̃tɛ kɛ́ nyì wùó nkɛ́ ì bɔntɛ́ kusĩ̀nkù nɛ̀ ti Yiɛ̀ nKuyie nyètìrì kɛ̀ dɛpĩ́mpĩ́nnɛ̀ɛ yɛ̀nní dɛ̀dɛ́rɛ̀ kɛ́pĩ́mmú iì dɑpùmbí sipísìnɑ̀ɑ̀ nɛ̀ ìdɛ́ì kɛ́tɔ̃tɛ tɔ̃tɛ. 
\v 25 Ò dɛ nyìtɛ́ kɛ́dekɛ Kɑdimɛɛdi tɑ̃rì, kɛ́ítɛ́ dɛndɛ kɛ́wɛ̃tɛ Sɑmmɑrii.
\c 3
\s1 Yodɑmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 1 Sosɑfɑti Sudɑɑ kɔbɛ kóo kpɑ̀ɑ̀tì kpɑ̀tì benni tɛpíítɛ̀ nɛ̀ diniínnì miɛkɛ nkɛ Akɑbu birɛ Yodɑmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́mbo Sɑmmɑrii kɛ bɑkɛ́ Isidɑyɛɛribɛ kɛ dɔ̀ yɛbie ntɛpíítɛ̀ nɛ̀ yɛ̀dɛ́ɛ̀. 
\v 2 Kɛ̀ Yodɑmmuu dɔɔ̀ ti Yiɛ̀ nKuyie nyí dɔ́ dɛ̀, o yɛi nnɛ́ í ntùɔ̀kɛ o cicɛ nɛ̀ o yɔ̃ bɛ̀ do dɔ̀ɔ̀ mɛ̀. Weè do pùɔ ndibɔɔ̀ Bɑɑdi kó diwũɔ̃tɔ̀nnì o cicɛ do mɑɑ́ dì. 
\v 3 Kɛ nɛ́ nkpɑɑ́ tɑunɛ̀ mɛyɛi nNɑbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ. Ò do í mɛ̀ yóu.
\s1 Isidɑyɛɛribɛ do domɛ̀ Mɔɑbu kɔbɛ mudoò
\p
\v 4 Dɛ mɔ̀nnì kɛ̀ Mɔɑbu kóo kpɑ̀ɑ̀tì Mɛsɑ tu opecɛ̃nti, kɛ níí ndò nkɛ́duɔ́ mbɑ́ dìì benni Isidɑyɛɛribɛ kóo kpɑ̀ɑ̀tì ipeni tɛkɔupíkɔ̀ùtɛ̀ (100000), nɛ̀ yɛpedɑkɛ̀ yɛ̀ɛ̀ cìtì òkù tɛkɔupíkɔ̀ùtɛ̀ (100000). 
\v 5 Kɛ̀ Akɑbuu kú kòo yetɛ Isidɑyɛɛribɛ kpɛti. 
\v 6 Dɛ yiè kòo kpɑ̀ɑ̀tì Yodɑmmuu yɛ̀nní Sɑmmɑrii kɛ́kɑɑ nyIsidɑyɛɛribɛ bɛmɔu, 
\v 7 kɛ́tɔ̃ nkɛ̀ bɛ̀ɛ nɑ́kɛ́ Sudɑɑ kɔbɛ kóo kpɑ̀ɑ̀tì kɛ dɔ̀: Okpɑ̀ɑ̀tì Yodɑmmu tu Mɔɑbu kóo kpɑ̀ɑ̀tì weè yetɛ o kpɛti, kòò tu kɑ̀ɑ bo yie nhɑ́ kɔtoo kɛ̀ di ò dokɛ́nɛ̀. Kɛ̀ Sudɑɑ kɔbɛ kóo kpɑ̀ɑ̀tìi bɛ̀ tɛ̃̀ńnɛ́ kɛ dɔ̀: N kɔroomu, mí nnɛ̀ we ti tú onìtì òmɑ́ɑ̀ ndi. N nìtìbɛ̀ tu o kɔbɛ mbɛ kɛ̀ n sɛ̃ĩ́ tú o kpɛsi. 
\v 8 Kɛ̀ Yodɑmmuu yíɛ́ kóò bekɛ kɛ dɔ̀: Ɔ̃̀nkucɛ nku ti yóó kétɛ́mɛ̀? Kòò dɔ̀: Edɔmmu kó kucɛ kùù yìɛ̀ dikpɑ́ɑ̀.
\b
\p
\v 9 Mɛm̀mɛ kɛ̀ bɛ̀ɛ wɛ̃nnɛ́ Isidɑyɛɛribɛ kóo kpɑ̀ɑ̀tì nɛ̀ Sudɑɑ kɔbɛ kou nɛ̀ Edɔmmu kou kɛ́kétɛ́, kɛ dɔ̀ kucɛ yɛwe yɛ̀yiekɛ̀ kɛ̀ mɛniɛ ndóntɛ́ bɛhɑ̃ɑ̃pɔ̀mbɛ̀ nɛ̀ iwũɔ̃ ìì tɔ bɛ nɛntì. 
\v 10 Dɛ mɔ̀nnì kɛ̀ Isidɑyɛɛribɛ kóo kpɑ̀ɑ̀tìi kuɔ́nko kɛ dɔ̀: Ti pɑ̀kɛ́mu! Ti Yiɛ̀ nKuyie nkuù ti tìí ntínti bɛ nkpɑ̀ɑ̀tìbɛ̀ titɑ̃ɑ̃ti kɛ bo ti ɑ̃nnɛ́ Mɔɑbu kɔbɛ nɔu miɛkɛ.
\p
\v 11 Kɛ̀ Sudɑɑ kɔbɛ kóo kpɑ̀ɑ̀tì dɔ̀: Ti Yiɛ̀ nKuyie m pɑ̃ɑ̃nɑ́ɑǹtì nɑ́ɑǹtò mɔù í bo diɛ nkɛ dò ntí kɔtɛ o borɛ̀ kòo beé nKuyie nti kpɛ́ínɑ́ɑ̀? Kɛ̀ Isidɑyɛɛribɛ kóo kpɑ̀ɑ̀tì kóo tɔ̃ntì mɔù dɔ̀: Sɑfɑti birɛ Edisee bomu diɛ nwèè do ɑ̃ɑ̃̀ Edii mɛniɛ nkòò nììtì. 
\v 12 Kɛ̀ Sudɑɑ kɔbɛ kóo kpɑ̀ɑ̀tì dɔ̀, ò yóó ti nɑ́kɛ́mu ti Yiɛ̀ nKuyie nti dɔ́nɛ̀ tì.
\p Mɛm̀mɛ kɛ̀ bɛ̀ɛ nɛi bɛtɑ̃ɑ̃ti, Isidɑyɛɛribɛ kóo kpɑ̀ɑ̀tì nɛ̀ Sudɑɑ kɔbɛ kou nɛ̀ Edɔmmu kou kɛ́kɔtɛ kɛ́yɑ̀ Edisee. 
\v 13 Kɛ̀ Edisee nɑ́kɛ́ Isidɑyɛɛribɛ kóo kpɑ̀ɑ̀tì kɛ dɔ̀: Kɛ̀ n kpɛti nɛ́ dɑ dònnɛ̀ mɛ? Kɔtɛ kɛ́yɑ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ ɑ cicɛ nɛ̀ ɑ yɔ̃ bɛ kɔbɛ, kɛ̀ Isidɑyɛɛribɛ kóo kpɑ̀ɑ̀tì dɔ̀: Dɛ̀ í tú ti Yiɛ̀ nKuyie nkuù ti tìí ndiɛ ntínti bɛ nkpɑ̀ɑ̀tìbɛ̀ titɑ̃ɑ̃ti kɛ bo ti ɑ̃nnɛ́ mMɔɑbu kɔbɛ nɔu miɛkɑɑ̀?
\p
\v 14 Kɛ̀ Edisee ò tɛ̃̀ńnɛ́ kɛ dɔ̀: Ti Yiɛ̀ nKuyie Mpɑkɛdɑɑ, n tú kùù kóo tɔ̃ntì, kɛ̀ dɛ̀ í tú ku kpɛ́í nnɛ̀ Sudɑɑ kɔbɛ kóo kpɑ̀ɑ̀tì Sosɑfɑti kpɛ́í, n nɑ bɑ́ ndɑkɛ ɑ kpɛti, n ketɛ́ kɛ nɑ bɑ́ ndɑ wèńtɛ́ bɑ́ sɑ́m̀pɔ́. 
\v 15 Kòo deè kɛ dɔ̀: Wɑɑ́nnɛ̀nní wèè bie nkukùtìdùkù.
\p Kɛ̀ bɛ̀ɛ ò wɑɑnní, kòo bentɛ, kɛ̀ ti Yiɛ̀ nKuyie nYɑɑ́ ncútɛ́ní Edisee ĩ́nkɛ̀. 
\v 16 Kòo bɛ́i nkɛ dɔ̀: Ti Yiɛ̀ nKuyie ntu dí dɑmmú yɛfɔ̃̀tɛ̀ yɛfɔ̃̀tɛ̀ dikondɑɑ dii mmiɛkɛ. 
\v 17 Ti Yiɛ̀ nKuyie mbɛ́immu kɛ tú: Di í yóó keè kuyɑɑkù, di mɛ nyí yóó yɑ̀ fɛtɑɑfɛ̀ nɛ̀ mɛmmɛ kɛ̀ mɛniɛ nnɛ́ píɛ ndikondɑɑ dimɔu, kɛ̀ di yɑ̃̀ díndi nɛ̀ di ɑ̃ɑ̃pɔ̀mbɛ̀ nɛ̀ di wũɔ̃ ìì tɔ di nɛntì. 
\v 18 Dɛndɛ ketɛ́ kɛ nɛ́ tú dɛsɑ́m̀pɔ́rɛ̀ ndɛ ti Yiɛ̀ nKuyie mborɛ̀, kù yóó ɑ̃nnɛ́mu Mɔɑbu kɔbɛ di nɔu miɛkɛ. 
\v 19 Kɛ̀ di puɔ mbɛ ɛkɛ̀ diɛyɛ̀ nɛ̀ iduotí fitɛ́ yɛ̀, kɛ́kɔ̃ṹ dɛtie ndɛmɔu bɛ̀ yo ndɛ̀ɛ̀ bɛ, kɛ́ĩ́tínnɛ́ bɛ nɛ́bòrɛ̀ yɛmɔu, kɛ́píɛ mbɛ pɑɑ ndɛmɔu yɛtɑ̃́rɛ̀ kɛ̀ dɛ̀ɛ cɑkɛ.
\p
\v 20 Kɛ̀ dɛ̀ɛ wentɛ́ dikṹnweńnì bɛ̀ ɔ̃ɔ̃ fíé dìì mɔ̀nnì iwũɔ̃ Kuyie. Kɛ̀ mɛniɛ nyɛ̀nní Edɔmmu bíɛ́kɛ̀, kɛ́píɛ mbɛ tenkɛ̀ kɛmɔu.
\b
\p
\v 21 Kɛ sɔ̃́ mMɔɑbu ɛì kɔbɛ kèè bɛkpɑ̀ɑ̀tìbɛ̀ bɛ̀tɑ̃ɑ̃ti bɑ̀ɑ́tímɛ̀ kɛ yóó bɛ̀ do mudoò, kɛ̀ bɛ̀ɛ tíí mbɛ̀ɛ̀ kó dimɑ̀ɑ̀ dò nkɛ́nɑ kɛ́kɔtɛ mudoò kɛ̀ bɛ̀ɛ kɔtɛ kɛ́okɛ bɛ temmɑ̀nku. 
\v 22 Dɛ̀ wentɛ́ dìì mɔ̀nnì kɛ̀ diyiè yɛ̀nní, kɛ̀ diwennɛ́cɑ̀nnìi tiitɛ́ mɛniɛ nyĩ́nkɛ̀ kɛ̀ Mɔɑbu kɔbɛɛ yɑ̀ mɛniɛ nkó kuwũɔ̃kù, kɛ̀ kù ndò mmɛyĩ̀ĩ̀. 
\v 23 Kɛ̀ bɛ̀ dɔ̀: Mɛyĩ̀ĩ̀ mmɛ, bɛɛ̀ kpɑ̀ɑ̀tìbɛ̀ bɛɛ̀ kòńtɛ́ kɛ kùɔ bɛmɑ́ɑ̀, tí kɔtɛnɛ̀ kɛ́hɛí bɛ kpɛrɛ.
\p
\v 24 Bɛ̀ tùɔ̀kɛní dìì mɔ̀nnì Isidɑyɛɛribɛ kɑrì, kɛ̀ bɛ̀ɛ ootɛní kɛ́ bɛ̀ do tiyɛ̃ĩti, kɛ̀ bɛ̀ɛ cokɛ́ kɛ́tɑ bɛ tenkɛ̀, kɛ̀ bɛ̀ɛ bɛ̀ dintɛ́ kɛ́ bɛ̀ bɛ̀ítɛ́ bɛ́ítɛ́, 
\v 25 kɛ́puɔ mbɛ ɛkɛ̀ kɛ́dootɛ́ dootɛ́ bɑ́ wè ditɑ̃́rì bɛ pɑɑ nsɑ̀ɑ̀rɛ̀ miɛkɛ kɛ́ dɛ̀ píɛ nyɛtɑ̃́rɛ̀, kɛ́ĩ́tínnɛ́ sibií simɔu kɛ́kɔ̃ṹ dɛtie mbɛ̀ yo ndɛ̀ɛ̀ kó yɛbɛ.
\p Kɛ̀ dɛ̀ nkpɑɑ́ Kiidi-Adesɛti ɛì mɑ́ɑ̀ ndi, kɛ̀ dɛtɑ̃́ntɛ̀ndìtìrɛ̀ yɛmbɛ̀ɛ di cɛ̃̀ɛ̃̀tɛ kɛ́ dì bùɔ́tí yɛtɑ̃́rɛ̀ kɛ́puɔ. 
\v 26 Dɛ mɔ̀nnì kɛ̀ Mɔɑbu kóo kpɑ̀ɑ̀tìi yɑ̀ dɛ̀ ò fuutɛnɛ̀mɛ̀ kɛ́túótɛ́ bɛhɑ̃ɑ̃pɔ̀mbɛ̀ yɛsebɑ́bɑ́tɛ̀ yɛmbɛ̀ sikɔusìyiekɛ̀ (700) kɛ bo kɛ̃tɛ́ bɛnìtìbɛ̀ kɛ́kɔtɛ Edɔmmu kóo kpɑ̀ɑ̀tì borɛ̀ kɛ́yĩɛ̃kɛ. 
\v 27 Ò yĩɛ̃kɛ mɛmmɛ kɛ́yóu kɛ́túótɛ́ o kóo po wèè nɑ nsɔɔtɛ́ o kpɑ̀tì, kóò fèútɛ́ dihɛì kó kuduotí ĩ́nkɛ̀ kɛ́tuɔ, kɛ̀ dɛ̀ɛ yonkɛ Isidɑyɛɛribɛ, kɛ̀ bɛ̀ɛ ò yóu kɛ́kò.
\c 4
\s1 Edisee dɔ̀ɔ̀ tìì diɛtì okúpokù kpɛ́í
\p
\v 1 Diyiè mɑrì kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ miɛkɛ kóò mɔù kóo pokùu kɔtɛ kɛ́yɑ̀ Edisee kóò bɑ̀ńtɛ̀ kɛ dɔ̀: A yɛ̃́mu ɑ kóo tɔ̃ntì n dɔù wèè ku, ò do túmɛ̀ ti Yiɛ̀ nKuyie nkóo nìtì nwe. Ò ku kɛ̀ ti bɑnteu weè kɔ̀tɛní kɛ dɔ́ kɛ́túótɛ́ m bí idɛ́ kɛ́dɔɔ̀ o dɑɑtì.
\p
\v 2 Kɛ̀ Edisee dɔ̀: M bo nɑ kɛ́dɔɔ̀ bɑ ɑ kpɛ́í? Kɛ́deè kɛ dɔ̀: Kɑ̀ɑ mɔ̀kɛ mù tɛcĩ́ɛ̃̀tɛ̀ ɑ n nɑ́kɛ́. Kòo nitipòkùu ò tɛ̃̀ńnɛ́ kɛ dɔ̀: A kóo tɔ̃ntì mí, n yí mɔkɛ dɛ̀mɑrɛ̀, kɛ̀ dɛ̀ í tú mɛkùɔ̀, mɛɛ̀ kpɑɑ́ sɑ́m̀pɔ́rɛ̀ tɛdéntɛ̀ miɛkɛ. 
\v 3 Kɛ̀ Edisee ò nɑ̀kɛ́ kɛ dɔ̀: Kɔtɛ ɑ cɛ̃pɛɛtitɔbɛ̀ borɛ̀ kɛ́pentɛ yɛmɑ́tìdíè mpɛ́u ɑ bo nɑ kɛ́pɛ́tɛ́ kɛ̀ yɛ̀ mmɑmɛ̀. 
\v 4 Kɑ̀ɑ dèè dí tɑ kudieku fɔ̃́ nnɛ̀ ɑ bí, kɑ̀ɑ kpetínnɛ́ dibòrì, kɛ́nhuti mɛkùɔ̀ mmɛmmɛ yɛdíè nkɛ̀ dìì níí píɛ nhɑ́ dì kɛi nkɛ́ĩ́nnɛ́.
\p
\v 5 Kòo nitipòkùu ítóo kɛ́kò nkɛ́tɑ o dieku wenwe nɛ̀ o nitidɑbí kɛ́kpetínnɛ́ dicɑ̀ù, kòo bí nhò duɔ̀ nyɛdíè nkòò uti mɛkùɔ̀. 
\v 6 Yɛdíè mpíɛ ndìì mɔ̀nnì kɛ́deè kòo nɑ́kɛ́ o birɛ mɑrɛ̀ kɛ dɔ̀: N duɔnní didénnì!
\p Kòo birɛ dɔ̀: Didénnì í kpɑɑ́. Dɛ mɔ̀nnì ndi mɛkùɔ̀ ncòḿmúmɛ̀. 
\v 7 Kòo kɔtɛ kɛ́ tì nɑ̀kɛ́ Kuyie nkóo nìtì Edisee. Kòo dɔ̀: Kɔtɛ kɛ́fítɛ́ dɛ kó mɛkùɔ̀ nkɛ́yietí ɑ bɑ̀nnì! Kɛ̀ ìì sùɔ́ ndí nyo nfɔ̃́ nnɛ̀ ɑ bí.
\s1 Edisee nɑ̀kɛ́mɛ̀ Sunɛmmu kóo nitipòkù ò yóó pɛitɛ́mɛ̀
\p
\v 8 Kɛ̀ Edisee mpɛ̃nkɛ́ diyiè mɑrì Sunɛmmu ɛì, kòo nitipòkù mɔù dɛ̀ bo kɛ mɔkɛ o kpɛrɛ mɛsɑ̀ɑ̀ nkɛ́yú Edisee kɛ dɔ̀ wèe di, kɛ́túótɛ́ dɛ kó diyiè nɛ̀ yɛwe tɛyɛ̀ yɛ̀ɛ̀ kpɑɑní kɛ̀ Edisee níí dɛ mbɑ́tɛ́ kɛ́di.
\p
\v 9 Diyiè mɑrì kòo nitipòkùu nɑ́kɛ́ o dɔù kɛ dɔ̀: N yɛ̃́mu kɛ dò nKuyie nkóo nitisɑ̀ù weè bɑ̀tírí ti cĩ́ɛ̃̀tɛ̀, 
\v 10 yóu kɛ̀ tí ò ɑ̃nnɛ́ kudieku kóò dɔú mmutɛ̃ĩ̀ nɛ̀ dikɑ̀rì nɛ̀ tɑ́bùrì nɛ̀ fìtírɛ̀, kòò níí pɛ̃nkɛ́ wèe dɛ mbɑ́tɛ́.
\p
\v 11 Mɛm̀mɛ diyiè mɑrì kɛ̀ Edisee mpɛ̃nkɛ́ dɛ borɛ̀ kɛ́bɑ́tɛ́ kɛ́tɑ kudieku kɛ́nduɔ́, 
\v 12 kɛ́nɑ́kɛ́ o kóo tɔ̃ntì Keɑsii kɛ dɔ̀: N yúní tɛ ncĩ́ɛ̃̀tɛ̀ kóo nitipòkù. Kòo o yúní, kòo kɔtɛní kɛ́cómmɔ́ɔ o ììkɛ̀. 
\v 13 Kɛ̀ Edisee duɔ́ nkòo kóo tɔ̃ntìi nɑ́kɛ́ onitipòkù kɛ dɔ̀: A dɔ̀ɔ̀ dɛ̀ ti kpɛ́í ndɛ̀ dɛumu, ɑ dɔ́ ti dɔɔ̀ bɑ ɑ kpɛ́í? A dɔ́ tí nɑ́kɛ́ okpɑ̀ɑ̀tì yoo ohɑ̃ɑ̃pɔ̀nkótì ɑ kpɛ́ínɑ́ɑ̀? Kòo nitipòkùu tɛ̃̀ńnɛ́ kɛ dɔ̀: M bo n kɔbɛ cuokɛ̀ kɛ̀ dɛ̀ n nɑɑtimu.
\p
\v 14 Kɛ̀ Edisee nɑ́kɛ́ Keɑsii kɛ dɔ̀: Ti nɛ́ bo dɔɔ̀ bɑ o kpɛ́í? Kɛ̀ Keɑsii dɔ̀: Ò í mɔkɛ dɛbirɛ, kòo dɔù mɛ nkòtɛ́. 
\v 15 Kɛ̀ Edisee dɔ̀: Yúní we! Kòo ò yúní. Kòo cómmɔ́ɔ o dieku bòrì, 
\v 16 kɛ̀ Edisee dɔ̀: Dɛ̀ yɑ̀ɑ bo nkɑ̃́ɑ̃́kɛ́ miɛ nkɑ̀ɑ ùúkú dɛnitidɑbirɛ ndɛ.
\p Kòo nitipòkù dɔ̀: Áɑ̀ okótì, Kuyie nkóo nìtì ɑ bɑ́ n soutɛ́, mí nhɑ kóo tɔ̃ntì dò!
\p
\v 17 Mɛm̀mɛ kòo nitipòkùu púó nkɛ́pɛitɛ́ dɛnitidɑbirɛ Edisee bɑɑ do ò bennɛ́nɛ̀ dìì mɔ̀nnì.
\s1 Edisee fòùkùnnɛmɛ̀ dɛbirɛ
\p
\v 18 Kɛ̀ dɛbirɛɛ kótɛ́. Diyiè mɑrì kɛ́kɔ̃tɛ́ dɛ cicɛ nɛ̀ bɛtɔ̃mbɛ̀ bɛ̀ dɛ̀ì dɛ̀ tidiitì. 
\v 19 Bɛ̀ dɛ mbo kɛ̀ dɛbirɛ kuɔ́nko kɛ dɔ̀: N yuu diì yóù! N yuu diì yóù!
\p Kɛ̀ dɛ cicɛɛ nɑ́kɛ́ otɔ̃ntì kɛ dɔ̀: Túótɛ́ dɛbirɛ kɛ́kɔtɛnɛ̀ dɛ yɔ̃ borɛ̀.
\p
\v 20 Kòo dɛ̀ tùótɛ́ kɛ́kɔtɛ kɛ́duɔ́ ndɛ yɔ̃, kòo ndɛ̀ ùúkú kɛ̀ diyiè nyóó cónnɛ́ yɛyɔ kɛ̀ dɛ̀ɛ kú. 
\v 21 Kòo dɛ̀ dèe nkudɑ̀nkù kɛ́tɑnnɛ́ Kuyie nkóo nìtì dieku kɛ́dɔú nho dɔ́ù ĩ́nkɛ̀ kɛ́yɛ̀nní kɛ́kpetínnɛ́, 
\v 22 kɛ́yú o dɔù kɛ dɔ̀: N duɔ́ nhotɔ̃ntì mɔù nɛ̀ sɑ̃mmɑrímú n dɔ́ kɛ́cokóo Kuyie nkóo nìtì borɛ̀ ndɛ kɛ́wɛ̃tɛní.
\p
\v 23 Kòo ò bekɛ kɛ dɔ̀ dɛ̀ dòmmɛ? Kɑ̀ɑ kɔ̀ri o borɛ̀ yíe? Otɑ̃̀nkù pɑ̀nwè dɔkɛ yíe, dɛ̀ mɛ nyí tú tɛom̀pùtɛ̀. Kòo dɔ̀: Dɛ̀mɑrɛ̀ í dò.
\p
\v 24 Kòo duɔ́ nkɛ̀ bɛ̀ɛ boú o sɑ̃mmɑrímú dikɑ̀rì, kòo nɑ́kɛ́ otɔ̃ntì kɛ dɔ̀: Kétɛ́! A bɑ́ɑ́ cómmú kucɛ! Kɛ̀ míì sɑ̀ɑ̀ í yĩ ɑ́ cómmú.
\b
\p
\v 25 Mɛm̀mɛ ò kètɛ́mɛ̀ kɛ́kɔtɛ Kuyie nkóo nìtì borɛ̀ Kɑdimɛɛdi tɑ̃rì ĩ́nkɛ̀. Kɛ́nkpɑɑ́ díɛtirì kɛ̀ Kuyie nkóo nìtìi ò yɑ̀ní kɛ́nɑ́kɛ́ o kóo tɔ̃ntì Keɑsi kɛ dɔ̀: Sunɛmmu kóo nitipòkù wenwe kéríní. 
\v 26 Cokóo kóò co, kóò bekɛ kɛ dɔ̀: Kunɑɑtí nku bɑkɑɑ̀? A dɔù kpeńnɑ̀ɑ̀? A birɛ kpeńnɑ̀ɑ̀?
\p Kòo nitipòkùu ò tɛ̃̀ńnɛ́ kɛ dɔ̀: Dɛ̀mɑrɛ̀ í dò. 
\v 27 Kòo nitipòkùu tuɔkoo Kuyie nkóo nìtì borɛ̀ kɛ́nínkóo kɛ́pĩ́ nho nɑɑ̀cɛ̀i, kɛ̀ Keɑsi ndɔ́ kóò bɛ̀ti. Kɛ̀ ti Yiɛ̀ nKuyie nkóo nìtìi ò nɑ̀kɛ́ kɛ dɔ̀: Yóu we! Ò bo mɛyɛǹcɑɑ̀rìmɛ̀ miɛkɛ nkɛ. Ti Yiɛ̀ nKuyie mmɛ nyí n nɑ̀kɛ́ o yɛ̀mmɛ̀ cɑ̀ɑ̀rɛ̀nɛ̀ tì.
\p
\v 28 Kòo nitipòkù dɔ̀: Okótì n sòò dɑ mɔɔmu dɛbirɑɑ̀? N sòò ti n dɑ nɑ̀kɛ́ kɛ̀ n tú ɑ bɑ́ n soutɛ́ mí nhɑ kóo tɔ̃ntì.
\p
\v 29 Mɛm̀mɛ kɛ̀ Edisee nɑ́kɛ́ Keɑsii kɛ dɔ̀: Bɑ́ɑ́tí kɛ́túótɛ́ m pɑ̀ɑ̀ti kɛ́kétɛ́, kɑ̀ɑ kèrí kɛ conɛ̀ òmɔù ɑ bɑ́ɑ́ ò dɔu. Kòò mɔù mɛ ndɑ dɔu nhɑ bɑ́ɑ́ yie. Kɑ̀ɑ tùɔ̀koo ɑ nɔ́ɔ́ m pɑ̀ɑ̀ti dɛbirɛ ììkɛ̀.
\p
\v 30 Kɛ̀ dɛbirɛ yɔ̃ dɔ̀: Kuyie mbomu kɑ̀ɑ bo, n yí yóó wɛ̃tɛ kɛ í dɑ nɛínɛ̀.
\p Mɛm̀mɛ kɛ̀ Edisee ò nɛinɛ̀. 
\v 31 Kɛ sɔ̃́ nKeɑsii ò niitɛ́nɛ̀ kɛ nɔ̀ɔ́ nkupɑ̀ɑ̀ti dɛbirɛ ĩ́nkɛ̀ bɑ́ tìmɑtì í dɔ̀ɔ̀. Dɛbirɛ í bɛ́i ndɛ̀ mmɛ nyí nɑmpɛ. Kòo wɛ̃tɛní kɛ́co Edisee kóò nɑ̀kɛ́ kɛ dɔ̀: Dɛbirɛ í èntɛ.
\p
\v 32 Kɛ̀ Edisee tuɔkoo, kɛ́tɑ o dieku kɛ sɔ̃́ ndɛbirɛ duɔ́ o dɔ́ù ĩ́nkɛ̀ kɛ ku. 
\v 33 Kòo tɑroo kɛ́kpetínnɛ́ kɛ̀ bɛ̀ mbo bɛdɛ́ dɛ miɛkɛ, wenwe nɛ̀ dɛbirɛ, kòo bɑ́ntɛ̀ ti Yiɛ̀ nKuyie. 
\v 34 Kɛ níí okɛ dɛbirɛ ĩ́nkɛ̀ kɛ́tuú nho nùù dɛ kpɛri, o nuɔ ndɛ kpɛyi, kɛ nɔ́ɔ́ nho nɔu dɛ kpɛsi ĩ́nkɛ̀, kɛ́nhokɛ dɛbirɛ ĩ́nkɛ̀ kɛ̀ dɛ̀ɛ wɛ̃tɛ kɛ́tonkɛ̀. 
\v 35 Kɛ̀ Edisee cútɛ́ní kudieku kɛ́centɛ, centɛ, kɛ́wɛ̃tɛ kɛ́dekɛ kɛ́okɛ dɛbirɛ ĩ́nkɛ̀ kɛ dɔ̀ kucɛ mɛ̀yiekɛ̀ kɛ̀ dɛ̀ɛ cĩɛ̃ nkɛ́wéntɛ́ní. 
\v 36 Kɛ̀ Edisee yú Keɑsii kɛ dɔ̀: Yúní weè nitipòkù!
\p Kɛ̀ Keɑsi ò yùní. Koò kɔtoo Edisee borɛ̀. Kɛ̀ Edisee dɔ̀: Túótɛ́ ɑ birɛ.
\p
\v 37 Kòo tɑroo kɛ́nínkóo Edisee ììkɛ̀ kɛ́sĩ́nnɔ́ɔ, kɛ́deè kɛ́túótɛ́ o birɛ kɛ́yɛ̀.
\s1 Edisee do nɑ̀ríkùnnɛmɛ̀ tikṹntì tìì tii
\p
\v 38 Kɛ̀ Edisee wɛ̃tɛ Kidikɑɑdi, dɛ̀ do sɔ̃́ ndikònnì diì bo dihɛì. Kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ kɔ̀tɛní kɛ bo o borɛ̀, kòo nɑ́kɛ́ o kóo tɔ̃ntì kɛ dɔ̀: Sɑɑ ntɛkṹmbotɛ̀ diɛtɛ̀ kɛ̀ ti bénnɛ́ tikṹntì kɛ́sori.
\p
\v 39 Kɛ̀ bɛ kou mɔùu yɛ̀ kɛ́tɑ dikpɑ́ɑ̀ mukũnwɑmmù kɛ́yɑ̀ dikpɑ́ɑ̀ kó yɛyɑɑ̀ mmɑyɛ̀ bɑ́ ò í nyɛ̀ bɑntɛ́ kɛ́ yɛ̀ tɔ̃̀ũ kɛ́cũɔ̃́ o yɑɑ̀yɔ̀rì kɛ́konnɛ̀nní kɛ́cɔ kɛ́utɛ́ tɛkṹmbotɛ̀. 
\v 40 Bɛ̀ ɑ̃nnɛ́ dìì mɔ̀nnì kɛ̀ bɛ̀ bo di kɛ̀ bɛ̀ɛ sotɛ kɛ́kuɔ́nko kɛ dɔ̀: Kuyie nkóo nìtì mukṹṹ mmuù ɑ̃ dɛ miɛkɛ bɑ́ dɛ̀ í dò nkɛ́di. 
\v 41 Kɛ̀ Edisee dɔ̀: Wɑɑ́nnɛ̀nní muyuo. Kɛ̀ bɛ̀ɛ mù wɑɑnní. Kòo ɑ̃nnɛ́ tɛkṹmbotɛ̀ kɛ dɔ̀: Ãnnɛ́nɛ̀ kɛ́ bɛ̀ duɔ́.
\p Kɛ̀ bɛ̀ɛ ɑ̃nnɛ́ kɛ́ bɛ̀ duɔ́ mbɑ́ tì tɛ̃́nkɛ í dò mmɛ̀mɑmɛ̀.
\s1 Edisee piímɛ̀ bɛnìtìbɛ̀ tɛkɔ̀ùtɛ̀
\p
\v 42 Diyiè mɑrì kòo nìtì mɔùu yɛ̀nní Bɑɑdi-Sɑdisɑ ɛì kɛ tɔní pɛ̃́ɛ̃̀bɛ̀ bɛ̀ dɔ̀ɔ̀nɛ̀ bɛ̀ tidipɑ̀ntì kɛ̀ bɛ̀ bo sipísìdɛ́, kɛ tɔnɛ̀ tidipɑ̀ntì tɛyɑ̀ɑ̀tɛ̀ kɛ́kɔtɛní kɛ́ dɛ̀ duɔ́ nKuyie nkóo nìtì Edisee kòò dɔ̀: Totínɛ̀ kɛ̀ bɛ̀ɛ di. 
\v 43 Kòo kóo tɔ̃ntì dɔ̀: M bo dɛ̀ totí ɔ̃̀mmɛ botí bɛnìtìbɛ̀ tɛkɔ̀ùtɛ̀ (100)? Kɛ̀ Edisee dɔ̀: Totí bɛ kɛ̀ bɛ̀ɛ di, ti Yiɛ̀ nKuyie nni nnɑ̀kɛ́mu kɛ tú bɛ̀ yóó di kɛ̀ dɛ̀ɛ súɔ́.
\p
\v 44 Mɛm̀mɛ kòo bɛ̀ totí kɛ̀ bɛ̀ɛ di kɛ dɛ̀ɛ súɔ́ nkɛ́ndònnɛ̀ ti Yiɛ̀ nKuyie ntì nhò nɑ̀kɛ́mɛ̀.
\c 5
\s1 Nɑɑmɑɑ miɛtɛ́mɛ̀
\p
\v 1 Nɑɑmɑɑ do tú Sidii kɔbɛ kóo ɑ̃ɑ̃pɔ̀nkótì nwe kɛ̀ bɛ kóo kpɑ̀ɑ̀tì ò tɑ̃́ mɛdiɛ̀, kɛ yɛ̃́ nɛ̀ weè borɛ̀ ndɛ ti Yiɛ̀ nKuyie ndo duɔ́mmɛ̀ kɛ̀ bɛ̀ɛ nɑ bɛ dootitɔbɛ̀ kɛ̀ weè nni fɛhɑ̃ɑ̃pɔ̀nnɑfɛ, kɛ nɛ́ mɔ ntikɔ̀ntì. 
\v 2 Dɛ̀ do sɔ̃́ nSidii kɔbɛ bɛɛ̀ kɔ̀tɛ kɛ pɔ̀ntɛ Isidɑyɛɛribɛ kɛ pĩ̀ńní dɛsɑpùmbirɛ mɑrɛ̀ kɛ konní kɛ dɛ̀ duɔ́ nNɑɑmɑɑ pokù, kɛ̀ dɛ̀ ò pĩ mmutɔ̃mmú. 
\v 3 Diyiè mɑrì kɛ̀ dɛsɑpùmbirɛɛ nɑ́kɛ́ Nɑɑmɑɑ pokù kɛ dɔ̀: Kɛ̀ n yiɛ̀ ndo bo nɑ kɛ́tuɔkɛ Sɑmmɑrii Kuyie mpɑ̃ɑ̃nɑ́ɑǹtì nɑ́ɑǹtò borɛ̀ ò nɑ nhò miɛkùnnɛmu.
\p
\v 4 Kɛ̀ Nɑɑmɑɑ kɔtɛ kɛ́ tì nɑ̀kɛ́ okpɑ̀ɑ̀tì kɛ dɔ̀: Ntɛ Isidɑyɛɛribɛ kó dɛsɑpùmbirɛ yɛ̃ mmù. 
\v 5 Kɛ̀ Sidii kóo kpɑ̀ɑ̀tì dɔ̀: Bɑ́ɑ́tí! N yóó wɑ̃rimu dipɑ́tíri Isidɑyɛɛribɛ kóo kpɑ̀ɑ̀tì kɛ́ dɑ duɔ́ nkɑ̀ɑ bií ò duɔ́.
\p Kɛ̀ Nɑɑmɑɑ túótɛ́ timɑ́tì pɛ́ítì cìdóòbɛ̀ sikɔusìtɑ̃ɑ̃ti (300) mɛsɔɔ ncìdóòbɛ̀ sipísìkuɔ̀, tiyɑ̀ɑ̀tì mɛɑ̃nnímɛ̀ tɛpíítɛ̀, 
\v 6 kɛ́tuɔkoo kɛ́duɔ́ nyIsidɑyɛɛribɛ kóo kpɑ̀ɑ̀tì dipɑ́tíri kɛ̀ dì tu: Míì duɔ́nko n kóo tɔ̃ntì Nɑɑmɑɑ dipɑ́tíri kɛ tú ɑ́ ò miɛkùnnɛ o kɔ̀ntì. 
\v 7 Isidɑyɛɛribɛ kóo kpɑ̀ɑ̀tì kɑ̀ɑ ndìì mɔ̀nnì dipɑ́tíri kɛ́kɛ̃tɛ́ o yɑ̀ɑ̀tì kɛ́kuɔ́nko kɛ dɔ̀: N tú Kuyie nku, kɛ nɔ nkɛ kɔù kɛ nɔ nkɛ fòùkùnkoɑ̀? Dɛ̀ dòmmɛ kòò n duɔnní onìtì kɛ tú nh ò miɛkùnnɛ? Bɑntɛ́nɛ̀ kɛ dò nhò n wɑntinɛ̀ dikpɑ̀nnì ndi.
\b
\p
\v 8 Kuyie mpɑ̃ɑ̃nɑ́ɑǹtì nɑ́ɑǹtò Edisee kèè dìì mɔ̀nnì okpɑ̀ɑ̀tì kɛ̃tɛ́mɛ̀ o yɑ̀ɑ̀tì kɛ́tɔ̃ nkɛ̀ bɛ̀ɛ ò nɑ̀kɛ́ kɛ dɔ̀: Bɑ nkpɛ́í nte kɑ̀ɑ kɛ̃rí ɑ yɑ̀ɑ̀tì? Yóu kòo kɔtɛní m borɛ̀ kɛ́bɑntɛ́ Kuyie mpɑ̃ɑ̃nɑ́ɑǹtì nɑ́ɑǹtò bomɛ̀ Isidɑyɛɛribɛ tenkɛ̀.
\p
\v 9 Kɛ̀ Nɑɑmɑɑ tuɔkoo nɛ̀ o sɛ̃ĩ́ nɛ̀ o nɑɑsɑ̃ntɛ̀ kɛ́cómmɔ́ɔ Kuyie mpɑ̃ɑ̃nɑ́ɑǹtì nɑ́ɑǹtò Edisee cĩ́ɛ̃̀tɛ̀ bòrì nùù. 
\v 10 Kɛ̀ Edisee tɔ̃nní kɛ̀ bɛ̀ɛ ò nɑ̀kɛ́ kɛ dɔ̀: Ò yɛ̃ nhɑ tɑ kukó nSuditɛ̃ɛ̃ kɛ́nduò kɛ kurì kɛ dɔ̀ kucɛ mɛ̀yiekɛ̀, ɑ yóó miɛtɛ́mu kɑ̀ɑ kɔ̃̀ntìi wenkɛ!
\p
\v 11 Kɛ̀ Nɑɑmɑɑ miɛkɛɛ pɛikɛ kòò nkérí kɛ kpɑntì kɛ tú: N yɛ̀mmɛ̀ do dò nhò yóó yɛ̀nnímu o mɔ́mmuɔ nkɛ́cómmú kɛ́bɑ́ntɛ̀ o Yiɛ̀ nKuyie nkɛ n kɑ́ɑ́kɛ́ o nɔ̀ùtɛ̀ kɛ́ m miɛkùnnɛ. 
\v 12 Dɑmɑɑsi kó ikó nhAbɑnɑ nɛ̀ Pɑdipɑɑ ì í pɛ̃ɛ̃tɛ́ Isidɑyɛɛribɛ kondɑkɛ́síɑ̀? Kɛ̀ n do nyì tɑ kɛ́wuɔ mbɑ́ɑ́ wenkɑɑ̀?
\p Ò mɛ nyĩ́ kɛ́kóntɛ́nɛ̀ o nɑɑsɑ̃ntɛ̀ nɛ̀ kɛmiɛkɛ kɛ bo kò. 
\v 13 Kòo kó bɛtɔ̃mbɛ̀ɛ cokóo kóò nɑ̀kɛ́ kɛ dɔ̀: Okótì! Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò do ndɑ bekɛ dɛ̀mɑrɛ̀ dɛ̀ɛ̀ yóù ɑ nɑ bɑ́ ndɛ̀ dɔ̀ɔ̀ɑ̀? Bɑ nnɛ́ te kɑ̀ɑ bɑ́ɑ́ dɔɔ̀ ò dɑ nɑ̀kɛ́ tì kɛ tú ɑ wuɔ kɛ́miɛtɛ́?
\p
\v 14 Mɛm̀mɛ kòo tɑ kukó nSuditɛ̃ɛ̃, Edisee ò nɑ̀kɛ́mɛ̀ kɛ́nduò kɛ kurì, kɛ dɔ̀ kucɛ mɛ̀yiekɛ̀, kòo kɔ̃̀ntìi wɛ̃tɛ kɛ́wenkɛ kɛ́nɑɑ́nnɛ̀ dɛbíbɛ́nnɛ̀ kpɛti, kòo wenkɛ. 
\v 15 Dɛ mɔ̀nnì kɛ̀ Nɑɑmɑɑ wɛ̃tɛní Kuyie mpɑ̃ɑ̃nɑ́ɑǹtì nɑ́ɑǹtò borɛ̀ wenwe nɛ̀ o tũ̀mbɛ̀, kɛ́tɑroo kɛ́cómmɔ́ɔ Edisee ììkɛ̀ kóò nɑ̀kɛ́ kɛ dɔ̀: M bɑntɛ́mu di mmɔ̀nnì kɛ dò nkɛtenkɛ̀ kɛmɔu miɛkɛ Kuyie nyí bo dɛ̀mɑrɛ̀ kɛ̀ dɛ̀ í tú Isidɑyɛɛribɛ tenkɛ̀. Mí nhɑ kóo tɔ̃ntì n dɑ bɑ́ɑ́mmu, cɔutɛ́ dipɑ̃nnì diì.
\p
\v 16 Kɛ̀ Edisee dɔ̀: M pɑ̀rìkɛ̀mu kɛ tú: Ti Yiɛ̀ nKuyie mbomu kɛ̀ n tú ku kóo tɔ̃ntì, n yí yóó cɔutɛ́ dɛ̀mɑrɛ̀.
\p Kɛ̀ Nɑɑmɑɑ yetoo, kòo yetɛ. 
\v 17 Kɛ̀ Nɑɑmɑɑ dɔ̀: Kɑ̀ɑ yetɛmu m pɑ̃rɛ̀ ɑ́ yóu kɛ̀ bɛ̀ m pɑ̃ ɑ tenkɛ̀ kó mutɑ̃́ɑ̃́ mmùù bo nsɑ̀nnɛ̀ sinɑɑsɛ̃ĩ́ sìdɛ́sì kɛ yɛ̃́ mí nhɑ kóo tɔ̃ntì n tɛ̃́nkɛ í yóó féútɛ́mɛ̀ fɛɔ̃̀fɛ̀ kɛ́tuɔ nyoo mɛtɑummɛ̀ kpɛyi dibɔɔ̀ mɑrì kɛ̀ dɛ̀ í tú ti Yiɛ̀ nKuyie nyIsidɑyɛɛribɛ tũ nkù. 
\v 18 N nɛ́ kù bèkú tì tiì tu: Kɛ̀ n kònko, kɛ̀ nh ɛì kóo kpɑ̀ɑ̀tì kɔ̀ri kɛ bo fíé iwũɔ̃ dibɔɔ̀ Dimɔɔ, kòò ǹ nɛinɛ̀ kɛ̀ n nìńkú dibɔɔ̀ Dimɔɔ ììkɛ̀ ti Yiɛ̀ nKuyie nhɑ́ n cĩ́ɛ̃́.
\p
\v 19 Kɛ̀ Edisee dɔ̀: Kɔtɛ kɛ̀ dɛ̀ nnɑɑti. Kòo ítóo kɛ́dɛ́tɛ́ sɑ́m̀pɔ́.
\s1 Nɑɑmɑɑ kó mumɔmmú cɑ̃̀ńtɛ́mɛ̀ Keɑsi
\p
\v 20 Kɛ̀ Edisee kóo tɔ̃ntì Keɑsii totí o yɛ̀mmɛ̀ kɛ dɔ̀: N cicɛ Edisee mɛ̀ nyetɛmɛ̀ Nɑɑmɑɑ Sidii tenkɛ̀ kou kó yɛpɑ̃rɛ̀, ti Yiɛ̀ nKuyie mbomu, m bo cokɛ́ kóò nìntɛ kɛ́yɑ̀ ò bo m pɑ̃ dɛ̀mɑrɛ̀. 
\v 21 Ò mɛ nyĩ kɛ́cokɛ́ kɛ́mbɛti Nɑɑmɑɑ, kɛ̀ Nɑɑmɑɑ ò yɑ̀ní kɛ́cútɛ́ mɛcɑ̃ɑ̃ nho nɑɑsɑ̃ntɛ̀ ĩ́nkɛ̀ kɛ́kétóo kóò co kɛ dɔ̀: Kusɑ̀ɑ̀kù bɑkɑɑ̀? 
\v 22 Kɛ̀ Keɑsii dɔ̀: Dɛ̀mɑrɛ̀ í dòmmɛ̀. N cicɛ weè n tɔ̃nní kɛ tú n dɑ nɑ́kɛ́ kɛ tú Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ bɛɛ̀ bo kɛ tuɔ̀kùní bɛ̀dɛ́bɛ̀ kɛ bonní Efɑdɑimmu tɑ̃rì, kòò tu kɑ̀ɑ bo yie nhɑ́ ò duɔ́nko timɑ́tì pɛ́ítì cìdóòbɛ̀ sipísìtɑ̃ɑ̃ti nɛ̀ tiyɑ̀ɑ̀tì mɛɑ̃nnímɛ̀ mɛ̀dɛ́mɛ̀, kòo bɛ̀ duɔ́. 
\v 23 Kɛ̀ Nɑɑmɑɑ dɔ̀: Nto timɑ́tì pɛ́ítì cìdóòbɛ̀ sipísìkuɔ̀, kɛ́nyetíróo kɛ́ tì cũɔ̃́ siyɑ̀kɛ̀si sìdɛ́sì kɛ́boú kóò duɔ́nnɛ̀ tiyɑ̀ɑ̀tì mɛɑ̃nnímɛ̀ mɛ̀dɛ́mɛ̀ kɛ́duɔ́ nkɛ̀ bɛdɑpɑ̀mbɛ̀ bɛ̀dɛ́bɛ̀ɛ dɛ̀ tɔ kóò cíennɛ̀. 
\v 24 Bɛ̀ tùɔ̀kɛ dìì mɔ̀nnì Ofɛdi ɛì kɛ̀ Keɑsii dɛ̀ cɔutɛ́ dɛmɔu kɛ́tɑnnɛ́ tɛcĩ́ɛ̃̀tɛ̀ kɛ́deè kɛ́ bɛ̀ cɑu nkɛ̀ bɛ̀ɛ ítɛ́.
\p
\v 25 O mɔ́mmuɔ nkòo kɔtɛ o yiɛ̀ nhEdisee borɛ̀, kòo ò bekɛ kɛ dɔ̀: Keɑsii ɑ bonní dɛ? Kòò dɔ̀: Mí nhɑ kóo tɔ̃ntì n yí kɔ̀tɛmɛ̀ dɛ̀mɑrɛ̀.
\p
\v 26 Kɛ̀ Edisee nɛ́ ò nɑ̀kɛ́ kɛ dɔ̀: N wɛ̃nnì do dɛ̀ bomu onìtì mɔù cùtɛ́ní dɛ̀ tɛnɑɑsɑ̃ntɛ̀ kɛ dɑ co. A í dò nkɛ́cɔutɛ́ di mmɔ̀nnì ndi tiyɑ̀ɑ̀tì, kɛ̀ n nɛ́ bɑ́ɑ́ buɔ́nɛ̀ ɑ bo cɔutɛ́mɛ̀ idíítí kɛ́donnɛ̀ odìfíè kó dɛpɑɑ nnɛ̀ fínyĩ̀ kpɛrɛ nɛ̀ iwũɔ̃ nɛ̀ bɛtɔ̃mbɛ̀ bɛnitidɑɑbɛ̀ nɛ̀ bɛnitipòbɛ̀. 
\v 27 Nɑɑmɑɑ kó mumɔmmú yóó cɑ̃́ntɛ́ fɔ̃́ nwe nɛ̀ ɑ yɑɑ̀bío sɑ̃́ɑ̃̀.
\p Kɛ̀ Keɑsii ńyɛ̀tì Edisee borɛ̀ kɛ̀ tikɔ̀ntì ò pĩ nkoò kɔ̃̀ntìi pɛikɛ kɛ́nɑɑ́nnɛ̀ tikóntì.
\c 6
\s1 Tɛpĩɛ̃tɛ̀ domɛ̀ dibinni
\p
\v 1 Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ bɛ̀ɛ̀ bonɛ̀ Edisee, kɛ̀ bɛ̀ɛ ò nɑ̀kɛ́ diyiè mɑrì kɛ dɔ̀: Mɛfíè ntɛ̃́nkɛ í ti sɑ̀nnɛ̀ ɑ borɛ̀. 
\v 2 Yóu kɛ̀ tí kɔtɛ Suditɛ̃ɛ̃ kɛ́kɔ̃ṹ bɑ́ wè kudɔú kɛ́dɔɔ̀ titouti kɛ́mbo. Kòo dɔ̀: Kɔtɛnɛ̀!
\p
\v 3 Kɛ̀ bɛ kóò mɔù dɔ̀: A bɑ́ nti nɛínɛ̀ tínti ɑ kó bɛtɔ̃mbɑ̀ɑ̀? Kòo dɔ̀: Ɛ̃ɛ̃, n kɔrimu.
\p
\v 4 Kɛ̀ bɛ̀ɛ nɛi kɛ́tuɔkɛ Suditɛ̃ɛ̃ kɛ́nkɔ̃ṹ idɛí. 
\v 5 Kɛ̀ bɛ kóò mɔù ńkɔ̃ũ, kòo pĩɛ̃tɛ̀ɛ feutɛ́ kɛ́doroo dibinni miɛkɛ, kòo kuɔ́nko kɛ dɔ̀: Áú yoo n yiɛ̀! Dɛ̀ n dimu. M mɛ ntɛ̀ yɑ̃ũtɛ́nímu.
\p
\v 6 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtòo ò bekɛ kɛ dɔ̀: Yé tɛ̀ do dɛ̀?
\p Kòo ò bɛnkɛ tɛ̀ do dɛ̀, kòo kéétɛ́ kudɔú kɛ́dootóo dɛ borɛ̀, kɛ̀ tɛ̀ɛ nɔ́ɔ́nní. 
\v 7 Kòo nɑ́kɛ́ dɛ yiɛ̀ nkɛ dɔ̀: Dɛitɛní tɛ!
\p Kòo youtoo o nɔ̀ùtɛ̀ kɛ́ tɛ̀ dɛ̀itɛní.
\s1 Edisee dɔummɛ̀ Kuyie nkɛ̀ kùu bɔntɛ́ Sidii kɔbɛ tiyũ̀ɔ̃̀ntì
\p
\v 8 Sidii kɔbɛ kóo kpɑ̀ɑ̀tì nɛ̀ Isidɑyɛɛribɛ kou kɛ̀ bɛ̀ mmɔkɛ mudoò, kɛ̀ Sidii kɔbɛ kóo kpɑ̀ɑ̀tìi tíí mbɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ́ bɛ̀ nɑ̀kɛ́ kɛ dɔ̀: Kɛ̀ di kètɛ́ dí bɑ́tɛ́ diɛ nnɛ̀ diɛ. 
\v 9 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Edii nɑ́kɛ́ Isidɑyɛɛribɛ kóo kpɑ̀ɑ̀tì kɛ dɔ̀: Á ndɑkɛ, kɛ bɑ́ɑ́ kétɛ́ ku mpíkù Sidii kɔbɛ bɛɛ̀ kɛ̀ bo.
\p
\v 10 Kòò níí ò nɑ̀kɛ́ kòo dɛitɛ bɛnìtìbɛ̀ kɛ́tɔ̃ nhEdisee ò bennɛ́ dìì bòrì.
\p Weè do ɔ̃ɔ̃ ò nɑ̀kɛ́ kòo yentɛ́, dɛ̀ í tú kucɛ mɛ̀mɑ́ɑ̀ yoo mɛ̀dɛ́mɛ̀. 
\v 11 Kɛ̀ dɛ̀ɛ di Sidii kɔbɛ kóo kpɑ̀ɑ̀tì, kòo yú o ɑ̃ɑ̃pɔ̀mbɛ̀ iwɛ̃ĩ yɛmbɛ̀, kɛ́ bɛ̀ bekɛ kɛ dɔ̀: N nɑ́kɛ́nɛ̀ di miɛkɛ wèè kòḿmú Isidɑyɛɛribɛ kóo kpɑ̀ɑ̀tì! Koò nɑ̀ɑ́ nti kpɛti.
\p
\v 12 Kòo tɔ̃mbɛ̀ kóò mɔù dɔ̀: Okpɑ̀ɑ̀tì, tínti ɑ kó bɛtɔ̃mbɛ̀ ti kóò mɔù dɔkɛ, Isidɑyɛɛribɛ kou, Kuyie mpɑ̃ɑ̃nɑ́ɑǹtì nɑ́ɑǹtò Edisee weè dɑ́ɑnko Isidɑyɛɛribɛ kóo kpɑ̀ɑ̀tì ɑ nɑ́ɑ́ ntì ɑ dieku kufɑ̃́ɑ̃́ mmiɛkɛ.
\p
\v 13 Kɛ̀ Sidii kɔbɛ kóo kpɑ̀ɑ̀tì dɔ̀: Kɔtɛnɛ̀ kɛ́yɑ̀ ò borɛ̀, kɛ̀ n tɔ̃ nkɛ̀ bɛ̀ɛ ò pĩ̀ńní.
\p Kɛ̀ bɛ̀ɛ ò nɑ̀kɛ́ kɛ dɔ̀: Ò bo Dotɑ̃ɑ̃ nwe. 
\v 14 Kòo tɔ̃ mbɛhɑ̃ɑ̃pɔ̀mbɛ̀ pɛ́u nɛ̀ sisɛ̃ĩ́ nɛ̀ sikpɑ̀rìnɑɑsɛ̃ĩ́ kɛ̀ bɛ̀ɛ tuɔkoo kɛyènkɛ̀ kɛ́cɛ̃tinnɛ dihɛì.
\p
\v 15 Kɛ̀ dɛ̀ɛ wentɛ́ kɛ̀ Kuyie mpɑ̃ɑ̃nɑ́ɑǹtì nɑ́ɑǹtò kóo tɔ̃ntìi yɛ̀nní sɛ̀ì kɛ́nsɔ̃́ mbɛhɑ̃ɑ̃pɔ̀mbɛ̀ cɛ̃̀ɛ̃̀tɛ dihɛì nɛ̀ sisɛ̃ĩ́ nɛ̀ sikpɑ̀rìnɑɑsɛ̃ĩ́, kòo nɑ́kɛ́ Edisee kɛ dɔ̀: Áú n yiɛ̀! Yé ti yóó yĩ́mɛ̀? 
\v 16 Kòo ò tɛ̃̀ńnɛ́ kɛ dɔ̀: A bɑ́ nyĩɛ̃̀kù, bɛ̀ɛ̀ ti bonɛ̀ bɛ̀ sũmu kɛ pɛ̃ɛ̃tɛ́ bɛ̀ɛ̀ bɛ̀ bonɛ̀.
\p
\v 17 Edisee mɛ nyĩ kɛ́bɑ́ntɛ̀ ti Yiɛ̀ nKuyie nkɛ dɔ̀: Kuyie nkpetɛ́ o nuɔ nkòo yɑ̀.
\p Kɛ̀ Kuyie nyì kpetɛ́, kòo yɑ̀ sisɛ̃ĩ́ nɛ̀ sikpɑ̀rìnɑɑsɛ̃ĩ́ kɛ̀ dɛ̀ pìɛ́kɛ́ ditɑ̃rì kɛ bɛ̀ fitɛ́ kɛ́cɔ́u mmuhɑ̃ɑ̃́.
\b
\p
\v 18 Sidii kɔbɛ tɔ̀ɔ́nní dìì mɔ̀nnì Edisee borɛ̀ kòo bɑ́ntɛ̀ Kuyie nkɛ dɔ̀: Ti Yiɛ̀ nKuyie nfentɛ bɛ.
\p Kɛ̀ Kuyie mbɛ̀ fèntɛ kɛ́ndònnɛ̀ ò bɛ́immɛ̀. 
\v 19 Dɛ mɔ̀nnì kɛ̀ Edisee bɛ̀ nɑ̀kɛ́ kɛ dɔ̀: Di yetɛ́ kucɛ nku, dɛ̀ í tú dihɛì di dɔ́ dì, n tũnnɛnɛ̀ kɛ̀ n dí bɛnkɛ onìtì di wɑɑ̀ nwè.
\p Mɛm̀mɛ ò bɛ̀ kɔ̀tɛnɛ̀mɛ̀ Sɑmmɑrii. 
\v 20 Bɛ̀ tɑ dìì mɔ̀nnì Sɑmmɑrii kɛ̀ Edisee bɑ́ntɛ̀ ti Yiɛ̀ nKuyie nkɛ dɔ̀: Ti Yiɛ̀ nKuyie ntɛ̃́nnɛ́ bɛ bɛ yɛ̀mmɛ̀.
\p Kɛ̀ Kuyie mmɛ mbɛ̀ tɛ̃̀ńnɛ́, kɛ bɛ̀ nsɔ̃́ mbɛ̀ bo Sɑmmɑrii ɛì.
\p
\v 21 Kɛ̀ Isidɑyɛɛribɛ kóo kpɑ̀ɑ̀tìi bɛ̀ yɑ̀ kɛ́bekɛ Edisee kɛ dɔ̀: n cicɛ, m bɛ̀ kùɔɑ̀? 
\v 22 Kɛ̀ Edisee dɔ̀: Bɑ́ɑ́ bɛ̀ kùɔ, bɛ̀ ɔ̃ɔ̃ í nkùɔ bɛ̀ pĩ̀ḿmú bɛ̀ mudoò miɛkɛ, duɔ́ mbɛ kɛ̀ bɛ̀ɛ di, kɑ̀ɑ bɛ̀ duɔ́ mmɛniɛ nkɛ̀ bɛ̀ɛ yɑ̃̀ kɛ́kò mbɛ yiɛ̀ mborɛ̀.
\p
\v 23 Kòo kpɑ̀ɑ̀tìi duɔ́ nkɛ̀ bɛ̀ɛ bénnɛ́ tidiitì kɛ̀ bɛ̀ɛ di kɛ́yɑ̃̀ kɛ́deè kòo bɛ̀ yóu kɛ̀ bɛ̀ɛ kò nSidii bɛ kóo kpɑ̀ɑ̀tì borɛ̀. Bɛ̀ tɛ̃́nkɛ í nwɛ̃tɛní Isidɑyɛɛribɛ tenkɛ̀.
\s1 Dikònnì tɑnnímɛ̀ Sɑmmɑrii
\p
\v 24 Kɛ̀ Sidii kóo kpɑ̀ɑ̀tì Bɛnni-Adɑdii tíí nho ɑ̃ɑ̃pɔ̀mbɛ̀ bɛmɔu kɛ̀ bɛ̀ɛ kɔtɛ kɛ́pi Sɑmmɑrii ɛì, 
\v 25 kɛ́ ndì pi weti weti kɛ̀ dikònnì diɛrìi tɑnní kɛ̀ bɛ̀ nfiiti disɑ̃mmɑrínyuu mɛdítíbii nsipísìdɛ́. Kɛ níí bennɛ́ dibuu sɑ́m̀pɔ́rì yɛ̀dìmɑ́sɛ̀ koò mbo mɛdítíbii mmɛ̀nùmmù.
\p
\v 26 Diyiè mɑrì kɛ̀ Isidɑyɛɛribɛ kóo kpɑ̀ɑ̀tì mpɛ̃nkɛ́ kuduotí ĩ́nkɛ̀ kòo nitipòkù mɔùu ò yɑ̀ kɛ́kuɔ́nko kɛ dɔ̀: Áú! Okpɑ̀ɑ̀tì n dɛɛtɛ́!
\p
\v 27 Kòo kpɑ̀ɑ̀tìi ò tɛ̃̀ńnɛ́ kɛ dɔ̀: Kɛ̀ ti Yiɛ̀ nKuyie nyí dɑ dɛɛtɛ́, míì bɑ́ɑ́ nɑ kɛ́ dɑ dɛɛtɛ́! Tidiitì í kpɑɑ́, yɛtebɛ mɛ nyí kpɑɑ́.
\p
\v 28 Kòo ò bekɛ kɛ dɔ̀: Bɑ ndɑ kɔɔ́nnɛ̀?
\p Kòo dɔ̀: Onitipòkù yie nweè sòò yɛ̃ ntí cɑ́ɑ́kɛ́ m birɛ kɛ nɑɑ cɑ́ɑ́kɛ́ o kpɛrɛ. 
\v 29 Kɛ̀ ti bèńnɛ́ n kpɛrɛ kɛ cɑ̀ɑ́kɛ́, kɛ̀ dɛ̀ wentɛ́ kɛ̀ n yɛ̃ nwèe duɔnní o kpɛrɛ kɛ̀ tí cɑ́ɑ́kɛ́, kòò dɛ̀ sɔ̀nnɛ.
\p
\v 30 Okpɑ̀ɑ̀tì tì kèè dìì mɔ̀nnì kɛ́kɛ̃tɛ́ o yɑ̀ɑ̀tì kɛ́ndɑ́ɑ́tí kufɔ̀ɔ̀tɔ̃̀nkù, kɛ centì kuduotí ĩ́nkɛ̀ kɛ̀ bɛ̀ɛ ò yɑ̀, kòò dɑ̀ɑ́tí kufɔɔ̀tɔ̃̀nkù. 
\v 31 Mɛm̀mɛ ò bɛ́immɛ̀ kɛ dɔ̀: Kɛ̀ diyiè yóó tɑ yíe nkɛ̀ Sɑfɑti birɛ Edisee kpɑɑ́nɛ̀ o yuu Kuyie nni ndɔɔ̀ kù dɔ́mɛ̀.
\s1 Edisee do nɑ̀kɛ́mɛ̀ dikònnì yóó deèmɛ̀
\p
\v 32 Dɛ̀ do sɔ̃́ nhEdisee kɑ̀ri o cĩ́ɛ̃̀tɛ̀ ntɛ nɛ̀ dihɛì kó bɛkótíbɛ̀. Kòo kpɑ̀ɑ̀tìi tɔ̃nko o kóo tɔ̃ntì mɔù Edisee borɛ̀ kòò nkpɑɑ́ kɛ í tùɔ̀koo kɛ̀ Edisee nɑ̀kɛ́ dihɛì kó bɛkótíbɛ̀ kɛ dɔ̀: Di yɛ̃́nɑ̀ɑ̀? Weè nitikɔ̀ùtì weè tɔ̃nní kɛ tú bɛ̀ n féútɛ́. N wɑ̃kɛ́nɛ̀! Kòò tùɔ̀kɛní di kpetínnɛ́ dibòrì, di bɑ́ɑ́ yie nkòò tɑnní. N yo kɛ̀ dɛ̀ dò nhokpɑ̀ɑ̀tì kó kunɑmpoo kérínímu dɛ yiɛ̀ nfɔ̃nkúò.
\p
\v 33 Ò kpɑɑ́ kɛ mɛ nnɑ́ɑ́ nkòo kpɑ̀ɑ̀tìi tuɔkɛní o borɛ̀ kɛ́bɛ́i nkɛ dɔ̀: Ti Yiɛ̀ nKuyie nkuù te kɛ̀ mɛyɛi mmiɛ nkó dimɑ̀ɑ̀ ti tùɔ̀kɛní. N tɛ̃́nkɛ nɛ́ kù dɔ́ bɑ nkpɛ́í?
\c 7
\p
\v 1 Kɛ̀ Edisee dɔ̀: Kéntɛ́nɛ̀ kɛ́keè ti Yiɛ̀ nKuyie nni nnɑ̀kɛ́ tì: Ti Yiɛ̀ nKuyie ntu dɛ̀ nɑɑ bo mmɛ̀ nkɑ̃̀ɑ̃́kɛ́ kɛ̀ bɛ̀ do mmuyuo ncìdóòbɛ̀ tɛpíítɛ̀ nɛ̀ bɛ̀dɛ́bɛ̀ mɛdítíbii mmɛ̀mɑ́ɑ̀ ndi dihɛì kó dibòrì. Kɛ̀ mɛdibii ncìdóòbɛ̀ sipísìdɛ́ nɛ̀ bɛ̀dɛ́bɛ̀ do mmɛdítíbii mmɛ̀mɑ́ɑ̀ múnkɛ.
\p
\v 2 Kòo kpɑ̀ɑ̀tì kóo tɔ̃ntì wèè tɔu o kpɑ̀rìnɛntì, kòo bekɛ Kuyie mpɑ̃ɑ̃nɑ́ɑǹtì nɑ́ɑǹtò kɛ dɔ̀: Bɑ́ kɛ̀ ti Yiɛ̀ nKuyie nkpetɛ́ yɛwɛtibòrɛ̀ ɑ mɛ̀ nnɑ̀kɛ́ tì bo nɑ kɛ́dɔɔ̀ɑ̀? Kɛ̀ Edisee dɔ̀: A yóó dɛ̀ yɑ̀mu nɛ̀ ɑ nuɔ nhɑ mɛ mbɑ́ɑ́ dɛ̀ di.
\s1 Sidii kɔbɛ cokɛ́mɛ̀ kɛ yóu bɛ ɑ̃ɑ̃pɔ̀nkɑrì
\p
\v 3 Dɛ̀ do sɔ̃́ mbɛnìtìbɛ̀ mɑbɛ̀ bɛɛ̀ mɔ ntikɔ̀ntì bɛ̀nɑ̀ɑ̀, kɛ bo dihɛì kó dibòrì, kɛ̀ bɛ̀ɛ nɑ́kɛ́ bɛmɑ́ɑ̀ kɛ dɔ̀: Bɑ nte kɛ̀ ti yó mbo diɛ nkɛ yɑ̀ɑ̀ kúnɛ̀? 
\v 4 Kɛ̀ ti tú ti bo tɑ dihɛì dikònnì diì kɛ̀ bo, kɛ̀ ti mɛ nkɑ̀ri diɛ nti bɑɑ yóó kúmu. Yóunɛ̀ kɛ̀ ti kɔtɛ Sidii kɔbɛ kó dihɑ̃ɑ̃pɔ̀nkɑrì kɛ̀ bɛ̀ ti yóu tí nfòù, kɛ̀ bɛ̀ mɛ nti kùɔ dɛ̀ nsɑ̀nnɛ̀.
\p
\v 5 Mɛm̀mɛ kɛ̀ bɛ̀ɛ ítɛ́ dihuri kɛ́ntuɔ̀koo Sidii kɔbɛ ɑ̃ɑ̃pɔ̀nkɑrì mɑ̀nku kɛ sɔ̃́ nhòmɔù í dɛ̀ bo.
\b
\p
\v 6 Ti Yiɛ̀ nKuyie nkuù do duɔ́ nkɛ̀ bɛ̀ɛ keè kunɑmpoo mɑkù, kɛ̀ dɛ̀ ndò nsisɛ̃ĩ́ nɛ̀ sikpɑ̀rìnɑɑsɛ̃ĩ́ nɛ̀ bɛhɑ̃ɑ̃pɔ̀mbɛ̀ pɛ́u dɛ kɔku. Kɛ̀ bɛ̀ɛ nɑ́kɛ́ bɛmɑ́ɑ̀ kɛ dɔ̀: Isidɑyɛɛribɛ kóo kpɑ̀ɑ̀tì weè yietí Itiibɛ kpɑ̀ɑ̀tìbɛ̀ nɛ̀ Esibiti kɔbɛ kɛ̀ bɛ̀ bo ti dokɛ́nɛ̀. 
\v 7 Kɛ̀ bɛ̀ɛ ítɛ́ dihuri kɛ́cokɛ́ kɛ́yóu bɛ touti nɛ̀ bɛ sɛ̃ĩ́ nɛ̀ bɛ sɑ̃mmɑrímúbɛ̀ kɛ̀ dɛ̀ mpíítí. Bɛ̀ cɛ̃́nkɛ do ìtɛ́ kɛ́cokɛ́ mɑ́ɑ̀ ndi kɛ bo dɛɛtɛ́ bɛ fòmmu. Bɛ̀ do yóu bɛ ɑ̃ɑ̃pɔ̀nkɑrì kɛ̀ dì mmɛ ndò.
\b
\p
\v 8 Mɛm̀mɛ kɛ̀ bɛɛ̀ nìtìbɛ̀ɛ tuɔkoo bɛ ɑ̃ɑ̃pɔ̀nkɑrì mɑ̀nku kɛ́tɑ kutouku mɑkù kɛ́di kɛ́yɑ̃̀, kɛ́tɔ mɛsɔɔ nnɛ̀ timɑ́tì pɛ́ítì nɛ̀ mɛsɔɔ nnɛ̀ tiyɑ̀ɑ̀tì kɛ́kɔtɛ kɛ́sɔnnɛ. Bɛ̀ sɔ̀nnɛ mɛmmɛ kɛ́wɛ̃tɛní kɛ́tɑ kutouku tɛkù kɛ́tɔ bɛ̀ yɑ̀ dɛ̀ɛ̀ kó dimɑ̀ɑ̀ kɛ́kɔtɛ kɛ́sɔnnɛ.
\s1 Sidii kɔbɛ ìtɛ́mɛ̀ kɛ yóu Sɑmmɑrii kɛ̀ dikònnìi yɛ̀
\p
\v 9 Bɛnìtìbɛ̀ bɛ̀ɛ̀ mɛ mmɔ ntikɔ̀ntì kɛ̀ bɛ̀ɛ nɑ́kɛ́ bɛmɑ́ɑ̀ kɛ dɔ̀: Ti dɔɔri dɛ̀ í wenni, yíe ntu tinɑ́ɑǹsɑ̀ɑ̀tì kó diyiè ndi, kɛ̀ ti cĩ́ɛ̃́kɛ́nɛ̀ dɛ kó tinɑ́ɑǹtì kɛ̀ dɛ̀ yɑ̀ɑ wentɛ́nɛ̀ Kuyie mbo ti potɛ́. Yóunɛ̀ kɛ̀ ti kɔtɛ kɛ́ tì nɑ̀kɛ́ okpɑ̀ɑ̀tì.
\p
\v 10 Mɛm̀mɛ bɛ̀ kɔ̀tɛmɛ̀ dihɛì kɛ́yú wèè bɑ̀ɑ dibòrì kóò nɑ̀kɛ́ kɛ dɔ̀: Ti kɔ̀tɛ Sidii kɔbɛ kó dihɑ̃ɑ̃pɔ̀nkɑrì ti í yɑ̀ òmɔù, onìtì kó kunɑmpoo ketɛ́ kɛ í bo, sisɛ̃ĩ́ nɛ̀ sɑ̃mmɑrímú dɛɛ̀ bo kɛ píítí kɛ̀ titouti duɔ́o dɛtetìrɛ̀.
\p
\v 11 Bɛ̀ɛ̀ bɑ̀ɑ dibòrì kɛ̀ bɛ̀ɛ pĩɛ̃kɛ́, kɛ̀ bɛ̀ɛ tì nɑ̀kɛ́ okpɑ̀ɑ̀tì o cĩ́ɛ̃̀tɛ̀ miɛkɛ.
\b
\p
\v 12 Kòo kpɑ̀ɑ̀tìi ítɛ́ kɛyènkɛ̀ kɛ́nɑ́kɛ́ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ dɔ̀: N di nɑ́ɑ́mmu Sidii kɔbɛ yɛ̃́mu kɛ dò ndikònnì ti bo, kɛ dɔ̀ɔ̀ kɛ dò mbɛ̀ ìtɛ́ kɛ kɔ̀tɛ kɛ sɔri, kɛ̀ ti bo yɛroo kɛ̀ bɛ̀ ti pĩ́mmú kɛ́tɑ ti ɛì.
\p
\v 13 Kòo kpɑ̀ɑ̀tì tɔ̃mbɛ̀ kóo mɔù dɔ̀: Sisɛ̃ĩ́ sìì kpɑɑ́ dihɛì si miɛkɛ ti dɛitɛ sìnùmmù kɛ́tɔ̃nnɛ̀ bɛnìtìbɛ̀ kɛ̀ bɛ̀ɛ kɔtɛ kɛ́yɑ̀. Bɑ́ kɛ̀ sì kpɑɑ́ tìì tùɔ̀kɛní bɛnìtìbɛ̀ tiì yóó sì tùɔ̀kɛní.
\p
\v 14 Kɛ̀ bɛ̀ɛ túótɛ́ sikpɑ̀rìnɑɑsɛ̃ĩ́ sìdɛ́sì nɛ̀ si dèèbɛ̀ bɛ̀dɛ́bɛ̀ kɛ́ bɛ̀ tɔ̃ nkɛ dɔ̀: Tũnnɛnɛ̀ Sidii kó bɛhɑ̃ɑ̃pɔ̀mbɛ̀ kɛ́yɑ̀. 
\v 15 Kɛ̀ bɛ̀ ntũ mbɛ nɑcɛ̀nɑ̀ kɛ́tuɔkɛnɛ̀ Suditɛ̃ɛ̃ tiyɑ̀ɑ̀tì nɛ̀ tinɛntì Sidii kɔbɛ cooti kɛ buɔ̀nko dɛ̀, kɛ̀ dɛ̀ nɛnkoo kucɛ. Kɛ̀ bɛ̀ do tɔ̃ mbɛ̀ɛ wɛ̃tɛní kɛ́ tì nɑ̀kɛ́ okpɑ̀ɑ̀tì.
\b
\p
\v 16 Kɛ̀ bɛnìtìbɛ̀ɛ yɛ̀ kɛ́kɔtɛ kɛ́hɛí dɛ̀ɛ̀ bo Sidii kɔbɛ kó dihɑ̃ɑ̃pɔ̀nkɑrì kɛ́nfiiti muyuo ncìdóòbɛ̀ tɛpíítɛ̀ nɛ̀ bɛ̀dɛ́bɛ̀ mɛdítíbii mmɛ̀mɑ́ɑ̀. Mɛdibii ncìdóòbɛ̀ sipísìdɛ́ nɛ̀ bɛ̀nɑ̀ɑ̀ mɛdítíbii mmɛmɑ́ɑ̀ múnkɛ, kɛ́ndònnɛ̀ ti Yiɛ̀ nKuyie ndo tì mbɛ̀ nɑ̀kɛ́mɛ̀. 
\v 17 Dɛ̀ do sɔ̃́ nhokpɑ̀ɑ̀tì duɔ́ nkòo kó ditɔ̃nnì dìì tɔu o kpɑ̀rìnɛntì kɛ̀ dì kɔ̀tɛ kɛ bɑɑ dibòrì ndi. Bɛ̀ dɛ ndì nɑ̀u kɛ́kuɔ kɛ́ndònnɛ̀ Kuyie mpɑ̃ɑ̃nɑ́ɑǹtì nɑ́ɑǹtò do nɑ̀kɛ́ tì okpɑ̀ɑ̀tì ò do kɔ̀tɛní dìì mɔ̀nnì o borɛ̀.
\p
\v 18 Kòo ò nɑ̀kɛ́ tì kɛ dɔ̀: Dɛ̀ nɑɑ bo mmɛ̀ nkɑ̃̀ɑ̃́kɛ́, kɛ̀ bɛ̀ do mmuyuo ncìdóòbɛ̀ tɛpíítɛ̀ nɛ̀ bɛ̀dɛ́bɛ̀ mɛdítíbii mmɛ̀mɑ́ɑ̀ ndi dihɛì kó dibòrì, kɛ̀ mɛdibii ncìdóòbɛ̀ sipísìdɛ́ nɛ̀ bɛ̀nɑ̀ɑ̀ do mmɛdítíbii mmɛ̀mɑ́ɑ̀ múnkɛ. 
\v 19 Wèè do bekɛ Kuyie mpɑ̃ɑ̃nɑ́ɑǹtì nɑ́ɑǹtò kɛ dɔ̀: Bɑ́ kɛ̀ ti Yiɛ̀ nKuyie nkpetɛ́ yɛwɛtibòrɛ̀ ɑ mɛ̀ nnɑ̀kɛ́ tì bo nɑ kɛ́dɔɔ̀ɑ̀? Kòo ò nɑ̀kɛ́ kɛ dɔ̀: A yóó dɛ̀ yɑ̀mu nɛ̀ ɑ nuɔ nhɑ mɛ mbɑ́ɑ́ dɛ̀ di. 
\v 20 Tiì do tùɔ̀kɛní kɛ̀ bɛ̀ɛ ò nɑ̀u dihɛì kó dibòrì borɛ̀ kòo kú.
\c 8
\s1 Okpɑ̀ɑ̀tì duɔ́mmɛ̀ kɛ̀ bɛ̀ɛ tɛ̃́nnɛ́ Sunɛmmu kóo nitipòkù o kpɛrɛ
\p
\v 1 Dimɔ̀nnì mɑrì miɛkɛ kɛ̀ Edisee nɑ́kɛ́ Sunɛmmu kóo nitipòkù ò do fòùkùnnɛ wèè birɛ kɛ dɔ̀: Ítɛ́ fɔ̃́ nnɛ̀ ɑ cĩ́ɛ̃̀tɛ̀ kɔbɛ kɛ́kɔtɛ dihɛì tɛrì mɑrì ɑ dɔ́ dì kɛ́mbo, ti Yiɛ̀ nKuyie nkuù yùní dikònnì kɛ̀ di kɔ̀riní dihɛì kɛ bo mbo kɛ dɔ̀ yɛbie nyɛ̀yiekɛ̀.
\p
\v 2 Kòo nitipòkùu dɔɔ̀ Kuyie mpɑ̃ɑ̃nɑ́ɑǹtì nɑ́ɑǹtò ò nɑ̀kɛ́ tì, kɛ́ítɛ́ wenwe nɛ̀ o cĩ́ɛ̃̀tɛ̀ kɔbɛ, kɛ́kɔtɛ kɛ́mbo Fidisitɛ̃ɛ̃bɛ tenkɛ̀ kɛ dɔ̀ yɛbie nyɛ̀yiekɛ̀. 
\v 3 Yɛbie nyɛ̀yiekɛ̀ kó difɔ̃nkúò kɛ̀ dɛ kóò nitipòkùu konní kɛ́kɔtɛ kɛ bo yɑ̀ okpɑ̀ɑ̀tì, kóò beé nho cĩ́ɛ̃̀tɛ̀ nɛ̀ o pɑku kpɛti.
\p
\v 4 Kɛ sɔ̃́ nhokpɑ̀ɑ̀tì nɑ̀ɑ́nnɛ̀ Kuyie mpɑ̃ɑ̃nɑ́ɑǹtì nɑ́ɑǹtò Edisee kóo tɔ̃ntì Keɑsii kóò bekɛ kɛ tú: N nɑ́kɛ́ Edisee dɔ̀ɔ̀ tìì diɛtì timɔu. 
\v 5 Kɛ̀ Keɑsii nhò nɑ̀ɑ́ nhEdisee do fòùkùnnɛmɛ̀ dɛbirɛ. Dɛ mɔ̀nnì ndi onitipòkù ò do fòùkùnnɛ wèè birɛ ò tùɔ̀koomɛ̀ kɛ bo beé nhokpɑ̀ɑ̀tì o cĩ́ɛ̃̀tɛ̀ nɛ̀ o pɑku kpɛti. Kɛ̀ Keɑsii dɔ̀: Okpɑ̀ɑ̀tì ntɛ dɛ kóo nitipòkù nɛ̀ o birɛ Edisee do fòùkùnnɛ dɛ̀.
\p
\v 6 Kòo kpɑ̀ɑ̀tìi bekɛ onitipòkù, kòo ò nɑ̀kɛ́ dɛ̀ wũɔ̃kɛ́mɛ̀. Kòo kpɑ̀ɑ̀tìi ò nɛínnɛ̀ tɛkpɑ̀ɑ̀tìcĩ́ɛ̃̀tɛ̀ kóo kótì kɛ dɔ̀: Kɔtɛ kɛ́duɔ́ nkɛ̀ bɛ̀ɛ ò tɛ̃̀ńnɛ́ o kpɛrɛ nɛ̀ bɛ̀ dɛ̀itɛ dɛ̀ɛ̀ kó dimɑ̀ɑ̀ o pɑku miɛkɛ nɛ̀ ò ìtɛ́mɛ̀ nɛ̀ yíenní.
\s1 Edisee nɑ̀kɛ́mɛ̀ Asɑyɛɛdi yóó nɑɑ́mmɛ̀ okpɑ̀ɑ̀tì
\p
\v 7 Kɛ̀ Edisee kɔtɛ Dɑmɑɑsi kɛ sɔ̃́ nSidii kóo kpɑ̀ɑ̀tì Bɛnni-Adɑdi mɔ nkɛ̀ bɛ̀ɛ ò nɑ̀kɛ́ kɛ dɔ̀: Kuyie mpɑ̃ɑ̃nɑ́ɑǹtì nɑ́ɑǹtò kɔ̀tɛní ti ciɛ. 
\v 8 Kòo kpɑ̀ɑ̀tìi nɑ́kɛ́ Asɑyɛɛdi kɛ dɔ̀: Túótɛ́ yɛpɑ̃rɛ̀ kɛ́kɔtɛ kɛ́yɑ̀ Kuyie mpɑ̃ɑ̃nɑ́ɑǹtì nɑ́ɑǹtò kòo beé nti Yiɛ̀ nKuyie nkɛ́yɑ̀ kɛ̀ nsɑ̀ kɛ̀ m bo miɛtɛ́.
\p
\v 9 Kòo kɔtɛ kɛ́kpéé nDɑmɑɑsi kpɛrɛ dɛmɔu dɛ̀ɛ̀ kó dimɑ̀ɑ̀ tu dɛsɑ̀ɑ̀rɛ̀ kɛ́toú nyòyóbɛ̀ sipísìnɑ̀ɑ̀ kɛ́kɔtɛnɛ̀ Kuyie mpɑ̃ɑ̃nɑ́ɑǹtì nɑ́ɑǹtò borɛ̀ kɛ́cómmɔ́ɔ o ììkɛ̀ kɛ dɔ̀: A kóo dɑpɑ̀ɑ̀ mBɛnni-Adɑdi Sidii kɔbɛ kóo kpɑ̀ɑ̀tì weè n tɔ̃nní kɛ tú: N dɑ bekɛ kɛ̀ nsɑ̀ kòò bo miɛtɛ́ mumɔmmú ò mɛ̀ mmɔ mmù.
\p
\v 10 Kɛ̀ Edisee dɔ̀: Kɔtɛ kóò nɑ̀kɛ́ kɛ tú ò yóó miɛtɛ́, ti Yiɛ̀ nKuyie nnɛ́ n nɑ̀kɛ́mu kɛ tú ò yóó kú.
\p
\v 11 Ò mɛ nyĩ́ kɛ dɔ̀ só kɛ́nwúó nfù! Kɛ̀ tinɔnniɛtii yɛ̀nní. 
\v 12 Kɛ̀ Asɑyɛɛdi dɔ̀: Bɑ nte okótì kɑ̀ɑ kuɔ̀?
\p Kɛ̀ Edisee dɔ̀: N yɑ̀ mɛyɛi nhɑ yóó dɔɔ̀ mɛ̀mmɛ Isidɑyɛɛribɛ. A yóó cɔ́ummɛ̀ bɛ ɛkɛ̀ iduotí fitɛ́ yɛ̀, kɛ́fíé bɛ kó bɛkpɑ̀rìtiebɛ kɛ nɑu ibíbɛ́nní, kɛ́puoti bɛpɔupómpómbɛ̀. 
\v 13 Kɛ̀ Asɑyɛɛdi dɔ̀: Yé n tú wè mí nhɑ kóo tɔ̃ntì? Mí ndɛmɔcírɛ̀ kɛ bo pĩ́ mmutɔ̃mmú diɛmù mummu? Kɛ̀ Edisee dɔ̀: Ti Yiɛ̀ nKuyie ntì nni nnɑ̀kɛ́mu kɛ tú: A yóó nɑɑ́ nSidii kɔbɛ kóo kpɑ̀ɑ̀tì.
\b
\p
\v 14 Mɛm̀mɛ kɛ̀ Asɑyɛɛdii ítɛ́ Edisee borɛ̀ kɛ́kò nho kóo kpɑ̀ɑ̀tì Bɛnni-Adɑdi borɛ̀. Kòo ò bekɛ kɛ dɔ̀: Edisee dɑ nɑ̀kɛ́ ɔ̃̀nti? Kòo ò tɛ̃̀ńnɛ́ kɛ dɔ̀: Ò tu ɑ yóó miɛtɛ́mu.
\p
\v 15 Kɛ̀ dɛ̀ɛ wentɛ́ kɛ̀ Asɑyɛɛdii túótɛ́ kuyɑ̀ɑ̀kù kɛ́pɔɔ̀tɛ̀ mɛniɛ nkɛ́nɔ́ɔ́ nhomuɔnti ììkɛ̀ kòo kú. Kòo cɔutɛ́ tikpɑ̀tì.
\s1 Yodɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 21:2-20)
\p
\v 16 Akɑbu birɛ Yodɑmmu Isidɑyɛɛribɛ kóo kpɑ̀ɑ̀tì kpɑ̀tì benni nummurì ndi Sosɑfɑti birɛ Yodɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 17 Ò do yóó di tikpɑ̀tì kɛ mɔkɛ yɛbie nsipísìtɑ̃ɑ̃ti nɛ̀ yɛ̀dɛ́ɛ̀ ndi, kɛ́ntɔ tikpɑ̀tì kɛ́mbo Sedisɑdɛmmu kɛ dɔ̀ yɛbie nyɛ̀ni, 
\v 18 kɛ́tũnnɛ Isidɑyɛɛribɛ kpɑ̀ɑ̀tìbɛ̀ kó icɛ, Akɑbu cĩ́ɛ̃̀tɛ̀ kɔbɛ do dɔ̀ɔ̀mɛ̀. Kɛ yɛ̃́ ò do puokɛmɛ̀ Akɑbu kóo sɑpɑ̀ɑ̀ nwe kɛ́dɔɔ̀ ti Yiɛ̀ nKuyie nyí dɔ́ dɛ̀. 
\v 19 Bɑ́ nɛ̀ mɛmmɛ ti Yiɛ̀ nKuyie nyí ndɔ́ kɛ́kuɔ Sudɑɑ kó kubotí ku kóo tɔ̃ntì Dɑfiti kpɛ́í. Kù do bɛ́immu kɛ dɔ̀: O cĩ́ɛ̃̀tɛ̀ bɑ́ɑ́ pɑɑ̀ okpɑ̀ɑ̀tì dimɔ̀nnì mɑrì.
\b
\p
\v 20 Yodɑmmu kpɑ̀tì miɛkɛ nkɛ Edɔmmu kɔbɛ yetɛmɛ̀ Sudɑɑ kɔbɛ bo mbɛ̀ bɑkɛ́mɛ̀, kɛ́wɑɑ́ mbɛ kóo kpɑ̀ɑ̀tì. 
\v 21 Kɛ̀ Yodɑmmuu ítɛ́ nɛ̀ sikpɑ̀rìnɑɑsɛ̃ĩ́ simɔu nɛ̀ si dèèbɛ̀ kɛ́kɔtɛ Sɑii. Kɛ̀ bɛ̀ɛ ítɛ́ kɛyènkɛ̀ wenwe nɛ̀ bɛ̀ɛ̀ bɑkɛ́ sikpɑ̀rìnɑɑsɛ̃ĩ́ kɛ́potɛ́ Edɔmmu kɔbɛ bɛ̀ɛ̀ do bɛ̀ cɛ̃̀ti. Kɛ̀ Sudɑɑ kɔbɛ kó bɛhɑ̃ɑ̃pɔ̀mbɛ̀ sɔmbɛ biɛ cokɛ́ kɛ́kũṹ mbɛ cɛ̃́ĩ. 
\v 22 Mɛm̀mɛ Edɔmmu kɔbɛ fìètɛmɛ̀ bɛmɑ́ɑ̀ Sudɑɑ kɔbɛ nɔu miɛkɛ nɛ̀ yíenní.
\p Diì mɔ̀nnì dimɑ́ɑ̀ miɛkɛ nkɛ, Dibunɑɑ ɛì kɔbɛ múnkɛ yetɛmɛ̀ Sudɑɑ kɔbɛ kóo kpɑ̀ɑ̀tì kpɛti.
\b
\p
\v 23 Yodɑmmu tɔ̃mmú sɔmmu ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 24 Kòo kú kɛ̀ bɛ̀ɛ ò kũnnɛ́ Dɑfiti ɛì o yɛmbɛ̀ fɔ̃ti. Kòo birɛ Aɑsiɑ sɔɔtɛ́ o kpɑ̀tì.
\s1 Aɑsiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 22:1-6)
\p
\v 25 Akɑbu birɛ Yodɑmmu Isidɑyɛɛribɛ kóo kpɑ̀ɑ̀tì kpɑ̀tì benni tɛpíítɛ̀ nɛ̀ didɛ́rì ndi Sudɑɑ kɔbɛ kóo kpɑ̀ɑ̀tì Yodɑmmu birɛ Aɑsiɑ nɑɑ́mmɛ̀ okpɑ̀ɑ̀tì. 
\v 26 Ò do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀dɛ́ɛ̀ ndi, kɛ́ntɔ tikpɑ̀tì kɛ dɔ̀ dibenni kɛ bo Sedisɑdɛmmu. O yɔ̃ yètìrì do tú Atɑdii Omidi Isidɑyɛɛribɛ kóo kpɑ̀ɑ̀tì kóo sɑpɑ̀ɑ̀. 
\v 27 Kɛ̀ Aɑsiɑ tũnnɛ Akɑbu cĩ́ɛ̃̀tɛ̀ kɔbɛ kó mɛborimɛ kɛ́dɔɔ̀ ti Yiɛ̀ nKuyie nyí dɔ́ dɛ̀, Akɑbu cĩ́ɛ̃̀tɛ̀ kɔbɛ bɑɑ do dɔ̀ɔ̀ dɛ̀, kɛ yɛ̃́ ò do tùótɛ́mɛ̀ bɛ kóo sɑpɑ̀ɑ̀ nwe kɛ́puokɛ.
\b
\p
\v 28 Mɛm̀mɛ Aɑsiɑ nɛinɛ̀mɛ̀ Akɑbu birɛ Yodɑmmu kɛ̀ bɛ̀ɛ kɔtɛ Dɑmɔti Kɑdɑɑdi tempɛ̃ nkɛ bo dokɛ́nɛ̀ Sidii kɔbɛ kóo kpɑ̀ɑ̀tì Asɑyɛɛdi, kɛ̀ Sidii kɔbɛɛ kɔutɛ Yodɑmmu. 
\v 29 Kòo wɛ̃tɛní Sisedɛɛdi kɛ bo tɑɑ̀ nhomɑ́ɑ̀ Sidii kɔbɛ ò kɔ̀ùtɛ yɛ̀ɛ̀ muɔ mbɛ̀ kpɑ̀ ndìì mɔ̀nnì wenwe nɛ̀ Sidii kɔbɛ kóo kpɑ̀ɑ̀tì Asɑyɛɛdi. Ò dɛ mbo kɛ̀ Yodɑmmu birɛ Aɑsiɑ Sudɑɑ kɔbɛ kóo kpɑ̀ɑ̀tìi kɔtɛ Sisedɛɛdi kɛ bo ò dɔu nwenwe nɛ̀ kuyonku.
\c 9
\s1 Bɛ̀ pĩ̀ḿmɛ̀ Yeu tikpɑ̀tì
\p
\v 1 Diyiè mɑrì kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Edisee yú Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɔbɛ̀ miɛkɛ odɑpɑ̀ɑ̀ mmɔù kóò nɑ̀kɛ́ kɛ dɔ̀: Bɑ́ɑ́tí kɛ́túótɛ́ tɛdéntɛ̀ nɛ̀ mɛkùɔ̀ nkɛ́kɔtɛ Dɑmɔti Kɑdɑɑdi tempɛ̃. 
\v 2 Kɑ̀ɑ tùɔ̀koo ɑ́ yɑ̀ Nimmusi birɛ Sosɑfɑti birɛ Yeu, kóò yu kɛ́kɛntɛ́nɛ̀ o kɔbɛ, kɛ̀ dí tɑ kudieku dimɑ́ɑ̀ borɛ̀. 
\v 3 Kɑ̀ɑ cóú nho yuu mɛkùɔ̀ nkóò nɑ̀kɛ́ kɛ dɔ̀: Ti Yiɛ̀ nKuyie ntu ku dɑ tɑ̃ɑ̃tɛ́mu kɑ̀ɑ yó ntú Isidɑyɛɛribɛ kóo kpɑ̀ɑ̀tì, kɑ̀ɑ dèè ɑ́ yɛ̀ kɛ́cokɛ́, ɑ bɑ́ɑ́ dɛ̀ ɔɔtɛ.
\p
\v 4 Kɛ̀ weè dɑpɑ̀ɑ̀ nkɔtɛ Dɑmɔti Kɑdɑɑdi tempɛ̃, 
\v 5 kɛ́tuɔkoo kɛ sɔ̃́ mbɛhɑ̃ɑ̃pɔ̀nkótíbɛ̀ wɛ̃ nkɛ kɑri dibòrì dìmɑ́ɑ̀. Kòo dɔ̀: Okótì m mɔkɛ tìmɑtì nti kɛ bo dɑ nɑ́kɛ́, kɛ̀ Yeuu o bekɛ kɛ dɔ̀: A dɔ́ kɛ́yɑ̀ we ti miɛkɛ? Kòò dɔ̀: Okótì fɔ̃́ nwe n dɔ́ kɛ́yɑ̀mɛ̀.
\p
\v 6 Kɛ̀ Yeuu ítɛ́ kɛ́tɑ kudieku, kòo dɑpɑ̀ɑ̀ nhò còú mmɛkùɔ̀ nho yuu kóò nɑ̀kɛ́ kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù tu kuù dɑ tɑ̃ɑ̃tɛ́ kɑ̀ɑ bo ntú ku nìtìbɛ̀ Isidɑyɛɛribɛ kóo kpɑ̀ɑ̀tì. 
\v 7 Fɔ̃́ɔ̃̀ yóó potɛ́ Akɑbu ɑ kóo kpɑ̀ɑ̀tì cĩ́ɛ̃̀tɛ̀ kɛ́pɛitɛ ku kó bɛtɔ̃mbɛ̀ nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ Sesɑbɛɛdi kùɔ bɛ̀. 
\v 8 Kù tu kù yóó kuɔmu Akɑbu cĩ́ɛ̃̀tɛ̀ bɛnitidɑɑbɛ̀ bɛmɔu, tidɑɑtì nɛ̀ bɛ̀ɛ̀ í tú tidɑɑtì, 
\v 9 kɛ́dɔɔ̀ Akɑbu cĩ́ɛ̃̀tɛ̀ kù do dɔ̀ɔ̀mɛ̀ Nɛbɑti birɛ Sedoboɑmmu kpɛtɛ nɛ̀ Aiyɑ birɛ Bɑsɑɑ kpɛtɛ. 
\v 10 Kɛ̀ Sesɑbɛɛdi yie, simɔɔ́ siì yóó ò cɑ̀ɑ́kɛ́ kupɑku bɛ̀ tu kù Sisedɛɛdi ku miɛkɛ, òmɔù í yóó ò kũnnɛ́.
\p Ò ti nhò nɑ̀kɛ́ kɛ́kpetɛ́ dicɑ̀ù kɛ́yɛ̀ kɛ́cokɛ́.
\b
\p
\v 11 Kɛ̀ Yeuu yɛ̀nní bɛhɑ̃ɑ̃pɔ̀mbɛ̀ tɔbɛ̀ borɛ̀, kɛ̀ bɛ̀ɛ ò bekɛ kɛ dɔ̀: Kusɑ̀ɑ̀kù bɑkɑɑ̀? Dɛ kó kuwɑ́ɑ́tíkù dɑ yɛ̃ mbɑ? Kòo bɛ̀ tɛ̃̀ńnɛ́ kɛ dɔ̀: Di yɛ̃́mu dɛ kóo nìtì botí bo nɑ kɛ́nɑ́kɛ́ tì. 
\v 12 Kɛ̀ bɛ̀ɛ yetɛ kɛ dɔ̀: A soúmmu, tí nɑ́kɛ́ ò yɛ̃ mmù! Kɛ̀ Yeu dɔ̀: Ò n nɑ̀kɛ́ kɛ yɛ̃ mmuu mmu nɛ̀ muu nkɛ n còú mmɛkùɔ̀ nkɛ tú ti Yiɛ̀ nKuyie nni ntɑ̃ɑ̃tɛ́ kɛ̀ m bo ntú Isidɑyɛɛribɛ kóo kpɑ̀ɑ̀tì.
\p
\v 13 Bɑ́ wè kòo pɑ̃̀nkɛɛ túótɛ́ o yɑɑ̀bòrì kɛ́dɔú ndikpɑ̀ɑ̀tìkɑ̀rì ĩ́nkɛ̀ kɛ̀ Yeuu kɑri, kɛ̀ bɛ̀ɛ eé ditɑ̃tɛheù kɛ́pĩɛ̃kɛ́ kɛ dɔ̀: Yeu weè tu okpɑ̀ɑ̀tì!
\s1 Yeu fìètɛmɛ̀ tikpɑ̀tì Yodɑmmu borɛ̀
\p
\v 14 Mɛm̀mɛ Nimmusi birɛ Sosɑfɑti birɛ Yeu còḿmúmɛ̀ kɛ bo bɔ nhokpɑ̀ɑ̀tì Yodɑmmu. Dɛ̀ do sɔ̃́ nYodɑmmu nɛ̀ Isidɑyɛɛribɛ bɛmɔu bɛ̀ bo Dɑmɔti nwe Kɑdɑɑdi tempɛ̃ nkɛ bɑɑ dihɛì, Sidii kɔbɛ kóo kpɑ̀ɑ̀tì Asɑyɛɛdi kpɛ́í, 
\v 15 kɛ̀ Yodɑmmu yie kɔtɛ Sisedɛɛdi kɛ bo tɑɑ̀ nho muɔ mbɛ̀ ò kɔ̀ùtɛ yɛ̀ bɛ̀ kpɑ̀ ndìì mɔ̀nnì wenwe nɛ̀ Sidii kɔbɛ kóo kpɑ̀ɑ̀tì Asɑyɛɛdi.
\p Dɛ mɔ̀nnì ndi Yeu bɛ̀ nɑ̀kɛ́mɛ̀ kɛ dɔ̀: Kɛ̀ di yiemmu kɛ n kómmú, òmɔù bɑ́ɑ́ yɛ̀ dihɛì kɛ́kɔtɛnɛ̀ dɛ kó tinɑ́ɑǹtì Sisedɛɛdi ɛì.
\p
\v 16 Ò mɛ nyĩ kɛ́deè kɛ́dekɛ o kpɑrìnɑɑsɑ̃ntɛ̀ kɛ́kɔtɛ Sisedɛɛdi Yodɑmmu mɔ nkɛ duɔ́ dɛ̀, kɛ̀ Aɑsiɑ kɔ̀tɛ kɛ bo ò dɔu. 
\v 17 Wèè bɑ̀ɑ Sisedɛɛdi ɛì kòo ḿbo didènnì ĩ́nkɛ̀, Yeu nɛ̀ o tĩ̀nnì kɛ̀ bɛ̀ nkéróo, kòo pĩɛ̃kɛ́ kɛ dɔ̀: N wúó nditĩ̀nnì mɑrì ndi kɛ̀ dì kèríní, kɛ̀ Yodɑmmu dɔ̀: Tɔ̃ nhonìtì nɛ̀ tɛsɑ̃ntɛ̀ kòo bɛ̀ co, kɛ́ bɛ̀ bekɛ kɛ́yɑ̀ kɛ̀ bɛ̀ kèríní kusɑ̀ɑ̀kù.
\p
\v 18 Kòo tuɔkoo Yeu borɛ̀ kɛ dɔ̀: Okpɑ̀ɑ̀tì tu n dɑ bekɛ kɛ́yɑ̀ kɑ̀ɑ kèrínínɛ̀ kusɑ̀ɑ̀kù? Kɛ̀ Yeu dɔ̀: Kɑ̀ɑ kpɛti nɛ́ tú bɑ dɛ miɛkɛ? Wɛ̃tɛ n fɔ̃nkúò!
\p Wèè bɑ̀ɑ dihɛì kòo pĩɛ̃kɛ́ kɛ dɔ̀: Ditɔ̃nnì tùɔ̀koomu bɛ borɛ̀, dì mɛ nyí wɛ̃̀tɛní.
\p
\v 19 Kòo kpɑ̀ɑ̀tìi yíɛ́ kɛ́tɔ̃ nditɔ̃nnì tɛrì kɛ̀ dìì tuɔkoo kɛ dɔ̀: Okpɑ̀ɑ̀tì weè n tɔ̃nní kɛ tú n dɑ bekɛ kɛ́yɑ̀ kɑ̀ɑ kèróo nɛ̀ kusɑ̀ɑ̀kù. Kòo dɔ̀: A kpɛti nɛ̀ tú bɑ dɛ miɛkɛ? Wɛ̃tɛ n fɔ̃nkúò!
\p
\v 20 Wèè bɑ̀ɑ dibòrì, kòo pĩɛ̃kɛ́ kɛ dɔ̀: Ditɔ̃nnì tùɔ̀kɛmu, di mɛ nyí wɛ̃̀tɛní. Dɛ yiɛ̀ nceé ndonnɛ̀ Nimmusi yɑɑ̀birɛ Yeu kɔ̃mu mmu. Ò fĩmmúnímu!
\p
\v 21 Kɛ̀ Yodɑmmu dɔ̀: Pítínnɛ́ sisɛ̃ĩ́ n nɑɑsɑ̃ntɛ̀! Kɛ̀ bɛ̀ɛ pítínnɛ́, wenwe Yodɑmmu Isidɑyɛɛribɛ kóo kpɑ̀ɑ̀tì nɛ̀ Aɑsiɑ Sudɑɑ kɔbɛ kou, kɛ̀ bɛ̀ɛ kɔtɛ kɛ́co Yeu Nɑbɔti Sisedɛɛdi kou pɑku miɛkɛ.
\s1 Bɛ̀ kùɔmɛ̀ Yodɑmmu
\p
\v 22 Yodɑmmu yɑ̀ dìì mɔ̀nnì Yeu, kóò bekɛ kɛ dɔ̀: Kunɑɑtí bɑkɑɑ̀? Kòo ò tɛ̃̀ńnɛ́ kɛ dɔ̀: Kunɑɑtí bo yĩ́mɛ kɛ́mbo kɑ̀ɑ yɔ̃ Sesɑbɛɛdi bùtínnɛ́ Kuyie nkɛ feu yɛbɔkɛ̀ kɛ dɔɔri munitinɔ̀ntɔ̃mmù.
\p
\v 23 Yodɑmmu ti nkèè kɛ́nɑ́kɛ́ Aɑsiɑ kɛ dɔ̀: Bɛ̀ ti fìtɛ́mu! Kɛ́kóntɛ́nɛ̀ o kpɑ̀rìnɑɑsɑ̃ntɛ̀ kɛ bo cokɛ́.
\p
\v 24 Kɛ sɔ̃́ nYeu sɛ̀u nkupie nkɛ́tɑ̃ũ kɛ́tɑ̃ Yodɑmmu cĩ̀ncĩ̀nnì, kɛ̀ kupie ntɑ kɛ́pĩ́ nho dinni, kòo do ò kpɑrìnɑɑsɑ̃ntɛ̀ miɛkɛ. 
\v 25 Kɛ̀ Yeuu nɑ́kɛ́ Bidikɑɑ wèè tɔ o kpɑ̀rìnɛntì kɛ dɔ̀: Dɛitɛnɛ̀ we, kɛ́dootóo Nɑbɔti Sisedɛɛdi kou pɑku miɛkɛ! Dentɛní ti do tũ ndìì mɔ̀nnì o cicɛ Akɑbu kɛ̀ ti Yiɛ̀ nKuyie nnɑ̀kɛ́ tì o kpɛ́í. 
\v 26 Kù do ò nɑ̀kɛ́ tì kɛ dɔ̀: Mí ndi Yiɛ̀ nKuyie n yɑ̀mu ɑ kùɔmɛ̀ Nɑbɔti nɛ̀ o bí, n yóó dɛ ndɑ fɔ́ɔ́ ndɛ mɔ́mmɔnnɛ dɛ kó kupɑku miɛkɛ. Mí nKuyie mmíì bɛ́i! Dɛitɛ we tũ̀nkɛ́, kɛ́dootóo dɛ kó kupɑku miɛkɛ kɛ́ndònnɛ̀ ti Yiɛ̀ nKuyie ndo tì bɛ́immɛ̀.
\s1 Bɛ̀ kùɔmɛ̀ Okosiɑ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 22:7-9)
\p
\v 27 Sudɑɑ kɔbɛ kóo kpɑ̀ɑ̀tì Aɑsiɑ dɛ̀ yɑ̀ dìì mɔ̀nnì kɛ́cokɛ́ kɛ́tũnnɛ Bɛti-Akɑ̃ɑ̃ kó kucɛ kɛ̀ Yeuu ò bɛ̀ti kɛ dɔ̀: Potɛ́nɛ̀ we! Kɛ̀ bɛ̀ɛ ò potɛ́ kóò kɔ̀ùtɛ o kpɑ̀rìnɑɑsɑ̃ntɛ̀ miɛkɛ, Kuudi tennì ĩ́nkɛ̀ dìì tɔ̀kɛ́nɛ̀ Ibedeɑmmu ɛì, kòo cokɛ́ kɛ́kɔtɛ Mɛkidoo ɛì, ò dɛ nku, 
\v 28 kòo kó bɛtɔ̃mbɛ̀ɛ ò tùótɛ́ kɛ́kɔtɛnɛ̀ Sedisɑdɛmmu kóò kũnnɛ́ o yɛmbɛ̀ fɔ̃ti Dɑfiti ɛì miɛkɛ.
\p
\v 29 Akɑbu birɛ Yodɑmmu kpɑ̀tì benni tɛpíítɛ̀ nɛ̀ dìmɑ́ɑ̀ miɛkɛ do nkɛ Aɑsiɑ nɑɑ́mɛ̀ Sudɑɑ kɔbɛ kóo kpɑ̀ɑ̀tì.
\s1 Bɛ̀ kùɔmɛ̀ Sesɑbɛɛdi
\p
\v 30 Dɛ kó difɔ̃nkúò kɛ̀ Yeuu kɔtɛ Sisedɛɛdi kɛ̀ Sesɑbɛɛdii tì kèè kɛ́ɑ̃nnɛ́ còdóò kɛ́sɑ̃ri o yùtì kɛ́nsíékɛ́ní o dieku kó tɛbòtɛ̀. 
\v 31 Yeu nɑ dìì mɔ̀nnì dihɛì kó dibòrì kòò dɔ̀: Kusɑ̀ɑ̀kù bɑkɑɑ̀? Fɔ̃́ nnɛ̀ Simmidi wèè kùɔ o kóo kpɑ̀ɑ̀tì di pókù nku.
\p
\v 32 Kɛ̀ Yeuu bɔ́útɛ́ tɛbòtɛ̀ bíɛ́kɛ̀ kɛ́pɛ́i nkɛ dɔ̀: We ntú n kou? We nni nkómmú!
\p Kɛ̀ bɛnìtìbɛ̀ bɛ̀dɛ́bɛ̀ yoo bɛtɑ̃ɑ̃tii síékɛ́ní, kɛ tú bɛ̀ fɔ̃̀mmu bɛ̀ kɛ̀ tu tɛkpɑ̀ɑ̀tìcĩ́ɛ̃̀tɛ̀ kó bɛkótíbɛ̀. 
\v 33 Kɛ̀ Yeu dɔ̀: Tentɛnɛ̀ní we!
\p Kɛ̀ bɛ̀ɛ ò tèntɛní, kòo donní kòo yĩ̀ĩ̀ nsɛri kuduotí kɛ̀ bɛ̀ɛ̀ nɑ o ĩ́nkɛ̀ nɛ̀ tɛnɑɑsɑ̃ntɛ̀.
\p
\v 34 Kɛ̀ bɛ̀ɛ pɛ̃ɛ̃tɛ́ kɛ́tɑ tɛkpɑ̀ɑ̀tìcĩ́ɛ̃̀tɛ̀ kɛ́di kɛ́yɑ̃̀, kòo nɑ́kɛ́ o kɔbɛ kɛ dɔ̀: Túótɛ́nɛ̀ dɛ kóo nitipòkù isɔkɛ yiɛ̀ nkɛ́kũnnɛ́ bɑ́ nɛ̀ mɛmmɛ ò tu okpɑ̀ɑ̀tì kóo sɑpɑ̀ɑ̀ nwe.
\p
\v 35 Kɛ̀ bɛ̀ɛ kɔtɛ kɛ bo ò tùótɛ́ kɛ́kũnnɛ́, kɛ́sɔ̃́ntɛ́ kuyukɔ̃́ṹ nɛ̀ sinɑɑ̀cɛ̀i nɛ̀ sinɔu mɑ́ɑ̀. 
\v 36 Kɛ̀ bɛ̀ɛ wɛ̃tɛní kɛ́ tì nɑ̀kɛ́ Yeu. Kòò dɔ̀: Ti Yiɛ̀ nKuyie ndo nɑ̀kɛ́ tì nɛ̀ ku pɑ̃ɑ̃nɑ́ɑǹtì nɑ́ɑǹtò Edii Tisibiti ɛì kou nùù miɛkɛ, tiì dɔ̀ɔ̀. Ò do bɛ́immu kɛ dɔ̀ simɔɔ́ siì yóó cɑ́ɑ́kɛ́ Sesɑbɛɛdi kupɑku bɛ̀ tu kù Sisedɛɛdi pɑku ku miɛkɛ. 
\v 37 Kòò nɑɑ́ ntikùtì Sisedɛɛdi pɑku miɛkɛ, òmɔù tɛ̃́nkɛ ketɛ́ kɛ bɑ́ɑ́ yie nkɛ dɔ̀ Sesɑbɛɛdi nwe.
\c 10
\s1 Bɛ̀ kùɔmɛ̀ Akɑbu cĩ́ɛ̃̀tɛ̀ kɔbɛ bɛmɔu
\p
\v 1 Dɛ̀ do sɔ̃́ nhAkɑbu bí iì bo Sɑmmɑrii sipísìyiekɛ̀, kɛ̀ Yeuu wɑ̃ri dipɑ́tíri kɛ́duɔ́nko Sɑmmɑrii kóo kùmɑ̀ndɑ́ɑ̀ nɛ̀ dihɛì kó bɛkótíbɛ̀ nɛ̀ Akɑbu bí inyi bo bɛ̀ɛ̀ cɛ̃́ĩ, kɛ́ bɛ̀ nɑ̀kɛ́ kɛ dɔ̀: 
\v 2 Díì mɛ̀ mbonɛ̀mɛ̀ di kóo kpɑ̀ɑ̀tì bí, kɛ̀ di yɑ̀ dìì mɔ̀nnì di mpɑ́tíri di mɔkɛmu sisɛ̃ĩ́ nɛ̀ sikpɑ̀rìnɑɑsɛ̃ĩ́ nɛ̀ dihɛì kuduotí fitɛ́ dì nɛ̀ tikpɑ̀rìnɛntì. 
\v 3 Dí yɑ̀ di kóo kpɑ̀ɑ̀tì bí miɛkɛ dɛ̀ɛ̀ mɑ̀nnɛ̀ tikpɑ̀tì kɛ̀ tì ndɛ̀ pĩ nkɛ̀ dí kpɑ ndi cicɛ kpɑ̀ɑ̀tìyuu kpɛ́í.
\p
\v 4 Kɛ̀ bɛ̀ɛ yɑ̀ dipɑ́tíri kɛ̀ kufɔ̃wɑɑ́ mbɛ̀ ɑutɛ́ kɛ̀ bɛ̀ dɔ̀: Bɛkpɑ̀ɑ̀tìbɛ̀ bɛ̀dɛ́bɛ̀ í nɑ kɛ còḿmú o ììkɛ̀ kɛ̀ tíì bo nɑɑ̀? 
\v 5 Wèè bɑkɛ́ tɛkpɑ̀ɑ̀tìcĩ́ɛ̃̀tɛ̀ nɛ̀ dihɛì kó bɛkótíbɛ̀ nɛ̀ kùmɑ̀ndɑ́ɑ̀ nɛ̀ Akɑbu bí bonɛ̀ bɛ̀, kɛ̀ bɛ̀ɛ tɛ̃́nnɛ́ Yeu dipɑ́tíri kɛ dɔ̀: Ti tú ɑ kó bɛtɔ̃mbɛ̀ mbɛ, ɑ́ ti nɑ̀kɛ́ tì ti yóó ti ndɔɔ̀, ti í yóó wɑɑ́ nhokpɑ̀ɑ̀tì mɔù, dɔɔ̀ ɑ dɔ́mɛ̀.
\p
\v 6 Kɛ̀ Yeuu wɛ̃tɛ kɛ́wɑ̃ri dipɑ́tíri tɛrì kɛ́ bɛ̀ nɑ̀kɛ́ kɛ dɔ̀: Kɛ̀ di tũ nni nwɛ̃nnɛ̀mu kɛ bo nyíé n kpɛti, dɛ̀ nɑɑ nkɑ̃́ɑ̃́kɛ́ miɛ nkɛ̀ di tùɔ̀kɛní Sisedɛɛdi nɛ̀ di kóo kpɑ̀ɑ̀tì bí yɔ.
\p Bɛ kóo kpɑ̀ɑ̀tì bí do bo sipísìyiekɛ̀ ndi kɛ̀ dihɛì kó bɛkótíbɛ̀ ì tɔ.
\b
\p
\v 7 Bɛ̀ kɑ̀ɑ ndìì mɔ̀nnì dipɑ́tíri kɛ́pĩ́mmú bɛ kóo kpɑ̀ɑ̀tì bí sipísìyiekɛ̀ kɛ́fíé kɛ́ɑ̃nnɛ́ i yɔ yɛmɔ́mmùyɑ́kɛ̀ kɛ́ yɛ̀ nhò duɔ́nko Sisedɛɛdi ɛì.
\p
\v 8 Kɛ̀ ditɔ̃nnìi tuɔkoo kɛ́nɑ́kɛ́ Yeu kɛ dɔ̀: N tɔnímu okpɑ̀ɑ̀tì bí yɔ. Kòo dɔ̀: Cóúnɛ̀ yɛ yɛcúò yɛ̀dɛ́ɛ̀ dihɛì bòrì kɛ̀ dɛ̀ɛ wentɛ́. 
\v 9 Kɛ̀ dɛ̀ɛ wentɛ́ kòo yɛ̀nní kɛ́cómmɔ́ɔ bɛnìtìbɛ̀ bɛmɔu ììkɛ̀ kɛ́bɛ́i nkɛ dɔ̀: Díndi mɛ nwennimɛ̀mu kɛ̀ míì dɔ̀ri kɛ bɔ n kóo kpɑ̀ɑ̀tì Yodɑmmu koò kùɔ! We nnɛ́ kùɔ bɛnìtìbɛ̀ biɛ? 
\v 10 Bɑntɛ́nɛ̀ tũ̀nkɛ́ kɛ dò nti Yiɛ̀ nKuyie nhɔ̃ í mbɛ́i nkɛ̀ ku nùù do kɛtenkɛ̀. Kù do nɑ̀kɛ́ tì nɛ̀ ku pɑ̃ɑ̃nɑ́ɑǹtì nɑ́ɑǹtò Edii nùù miɛkɛ, tiì dɔ̀ɔ̀.
\p
\v 11 Mɛm̀mɛ ò kùɔmɛ̀ Akɑbu cĩ́ɛ̃̀tɛ̀ kɔbɛ bɛ̀ɛ̀ do kpɑɑ́ Sisedɛɛdi ɛì miɛkɛ kɛ tú bɛnitidiɛbɛ̀, o cĩ́ɛ̃̀tɛ̀ kɔbɛ kó dimɑ̀ɑ̀ nɛ̀ bɛ̀ɛ̀ tú ikuɔ́ nìùbɛ̀, òmɔù í nsùɔ́ nwèè tu Akɑbu cĩ́ɛ̃̀tɛ̀ kou.
\s1 Bɛ̀ kùɔmɛ̀ Sudɑɑ tenkɛ̀ kó sikpɑ̀ɑ̀tìbìí
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 22:8)
\p
\v 12 Kɛ̀ Yeuu ítɛ́ dɛborɛ̀ kɛ́kò nkɛ́nkɔri Sɑmmɑrii kɛ́kétɛ́ kɛ́mberínɛ̀ Bɛti-Ekɛdi dinɑɑcɛ̃nhòò. 
\v 13 Ò dɛ nyɑ̀ Aɑsiɑ Sudɑɑ kɔbɛ kóo kpɑ̀ɑ̀tì tebìí kɛ́ bɛ̀ bekɛ kɛ dɔ̀: Di tú ɔ̃mbɛ? Kɛ̀ bɛ̀ dɔ̀: Ti tú Aɑsiɑ tebìí nsi ti kɔri kɛ bo dɔu nhokpɑ̀ɑ̀tì Akɑbu bí nyi nɛ̀ onitipokpɑ̀ɑ̀tì Sesɑbɛɛdi kpɛyi. 
\v 14 Kòo pɛ́i nkɛ̀ bɛ̀ɛ bɛ̀ pĩ̀ḿmú kòo bɛ̀ fìé Bɛti-Ekɛdi tɛbintɛ borɛ̀ bɛmɔu.
\p Bɛ̀ do bo bɛnìtìbɛ̀ sipísìnɑ̀ɑ̀ nɛ̀ bɛ̀dɛ́bɛ̀ ndi. Ò í nsùɔ́ nhòmɔù.
\s1 Yeu nɛ̀ Yonnɑdɑbu bɛ̀ mɑ̀útɛ́mɛ̀
\p
\v 15 Kɛ̀ Yeuu ítɛ́ dɛborɛ̀ kɛ́conɛ̀ Dekɑbu birɛ Yonnɑdɑbu kóò bekɛ kɛ dɔ̀: A yɛ̀mmɛ̀ n nɑɑtinɛ̀ n kɔ̃mɛ dɑ nɑɑtinɛ̀mɑ̀ɑ̀? Kɛ̀ Yonnɑdɑbu dɔ̀: N yɛ̀mmɛ̀ dɑ nɑɑtinɛ̀mu. Kòo dɔ̀: Kɑ̀ɑ yɛ̀mmɛ̀ n nɑɑtinɛ̀mu, youtɛní ɑ nɔ̀ùtɛ̀!
\p Kɛ̀ Yonnɑdɑbuu youtoo kòo ò dèenko o kpɑrìnɑɑsɑ̃ntɛ̀ miɛkɛ, 
\v 16 kóò nɑ̀kɛ́ kɛ dɔ̀: Yóu kɛ̀ tí nɛi kɑ̀ɑ yɑ̀ m mɔkɛ tìì kɔ̃nyɑuti ti Yiɛ̀ nKuyie nkpɛ́í.
\p Mɛm̀mɛ kɛ̀ bɛ̀ɛ nɛi. 
\v 17 Bɛ̀ tùɔ̀kɛ dìì mɔ̀nnì Sɑmmɑrii kɛ́potɛ́ Akɑbu cĩ́ɛ̃̀tɛ̀ kɔbɛ kɛ́ bɛ̀ dèè, kɛ́ndonnɛ̀ ti Yiɛ̀ nKuyie ndo tì nɑ̀kɛ́mɛ̀ ku pɑ̃ɑ̃nɑ́ɑǹtì nɑ́ɑǹtò Edii kòo tì bɛ́i.
\s1 Bɛ̀ kùɔmɛ̀ dibɔɔ̀ Bɑɑdi yɛmbɛ̀ kɛ pùɔ mbɛ kó dibɔɔ̀ tou
\p
\v 18 Kɛ̀ Yeuu tíí nyIsidɑyɛɛribɛ bɛmɔu kɛ́ bɛ̀ nɑ̀kɛ́ kɛ dɔ̀: Akɑbu do fìé dibɔɔ̀ Bɑɑdi sɑ́m̀pɔ́ nwe, kɛ̀ m bo dì fìé kɛ̀ dɛ̀ɛ pɛ̃ɛ̃tɛ́ mɛmmɛ. 
\v 19 N yúǹní dibɔɔ̀ Bɑɑdi kó bɛpɑ̃ɑ̃bɛ̀ bɛmɔu nɛ̀ bɛ̀ɛ̀ kó dimɑ̀ɑ̀ dì tũ̀. N yóó ɑ̃nnɛ́ dibɑnni diɛrì ndi, òmɔù bɑ́ nkpɑ, kɛ̀ wèè kpɑ bɛ̀ɛ ò kùɔ.
\p Ò do dɔɔrinɛ̀ mɛciì mmɛ kɛ bo kuɔ Bɑɑdi kɔbɛ bɛmɔu. 
\v 20 Kòo bɛ́i nkɛ dɔ̀: Ikúnɛ̀ dibɔɔ̀ Bɑɑdi kó muféù kó diyiè. Kɛ̀ bɛ̀ɛ ikú. 
\v 21 Kòo tɔ̃ nkɛ̀ bɛ̀ɛ nɑ́kɛ́ dihɛì dimɔu bɛ̀ɛ̀ kó dimɑ̀ɑ̀ tũ ndibɔɔ̀ Bɑɑdi, kɛ̀ bɛ̀ɛ kɔtɛní, bɑ́ òmɔù í nkpɑ. Kɛ̀ bɛ̀ɛ tɑ Bɑɑdi kó kudieku kɛ́píɛ nfɛ́i fɛ́i. 
\v 22 Kɛ̀ Yeuu nɑ́kɛ́ wèè ni dibɑnni kó ikuɔ́ kɛ dɔ̀: Dennɛní dibɔɔ̀ Bɑɑdi kó tiyɑ̀ɑ̀tì kɛ́duɔ́ mbɛnìtìbɛ̀. Kòo tì dènnɛní kɛ́ bɛ̀ duɔ́. 
\v 23 Yeu nɛ̀ Nɑkɑbu birɛ Yonnɑdɑbu kɛ̀ bɛ̀ɛ tɑ Bɑɑdi kó kudieku kɛ́nɑ́kɛ́ Bɑɑdi kɔbɛ kɛ dɔ̀: Wéntɛ́nɛ̀ kɛ́yɑ̀ kɛ̀ Bɑɑdi kɔbɛ bɛɛ̀ mɑ́ɑ̀ bo diɛ nkɛ̀ ti Yiɛ̀ nKuyie nkou mɔù bɑ́ ndɛ̀ kɔkɛ́.
\p
\v 24 Mɛm̀mɛ bɛ̀ tɑmɛ̀ kɛ bo fíé dibɔɔ̀ Bɑɑdi iwũɔ̃ kɛ́tuɔ.
\p Dɛ̀ do sɔ̃́ nYeu òo mbɛnìtìbɛ̀ mbɛ sipísìni kɛ bɛ̀ nɑ̀kɛ́ kɛ tú: Kɛ̀ wèè yóu kòo mɔù yentɛ́ nɛ̀ omɑ́ɑ̀ ndi! Bɛ̀ yóó we nkuɔ dɛ yiɛ̀ nkó difɔ̃̀tìrì. 
\v 25 Bɛ̀ fìé dìì mɔ̀nnì iwũɔ̃ kɛ́tuɔ nkɛ̀ Yeuu nɑ́kɛ́ bɛhɑ̃ɑ̃pɔ̀mbɛ̀ nɛ̀ bɛ̀ɛ̀ bɛ̀ bɑ̀ɑ kɛ dɔ̀: Tɑnnɛ̀nní kɛ́ bɛ̀ potɛ́ kɛ́kuɔ, di bɑ́ɑ́ yóu koò mɔùu yɛ̀.
\p Kɛ̀ bɛ̀ɛ tɑ kɛ́ bɛ̀ kùɔ kɛ́dokóo ditowɑɑ̀ kɛ́tɑ dibɔɔ̀ Bɑɑdi kó kudieku dì borɛ̀, 
\v 26 kɛ́uutɛ́ kutedɔú kùù dɛ̀ bo kɛ́cɔ́u, 
\v 27 kɛ́pɔntɛ dibɔɔ̀ Bɑɑdi tenkɑɑnìtɛ̀ kɛ́pɔntɛ dɛ kó dibɔɔ̀ tou, kɛ́dɔɔ̀ dɛ borɛ̀ ditɑ́pùò kɛ̀ dì kpɑɑ́ bo nɛ̀ yíenní.
\s1 Yeuu do bɑkɛ́mɛ̀ Isidɑyɛɛribɛ
\p
\v 28 Mɛm̀mɛ Yeu dènnɛmɛ̀ dibɔɔ̀ Bɑɑdi Isidɑyɛɛribɛ tenkɛ̀ miɛkɛ. 
\v 29 Kɛ nɛ́ tɑunnɛ̀ Nɛbɑti birɛ Sedoboɑmmuu do tɑnnɛ́ Isidɑyɛɛribɛ mɛ̀ɛ̀ yɛi miɛkɛ. Isɔɔmɑ́tìnɑ̀ɑ̀kɛ ìì do bo Bɛtɛɛdi ɛì nɛ̀ Dɑnni kpɛri.
\p
\v 30 Kɛ̀ ti Yiɛ̀ nKuyie nnɑ́kɛ́ Yeu kɛ dɔ̀: A dɔ̀ɔ̀ mɛ̀ɛ̀ kpɛ́í nkɛ̀ m̀ pɛ́nsìrì, kɑ̀ɑ dɔ̀ɔ̀ Akɑbu cĩ́ɛ̃̀tɛ̀ n do dɔ́ kɛ́ tɛ̀ dɔɔ̀mɛ̀, ɑ yɑɑ̀bí nɛ̀ ɑ yɑɑ̀bíyúóó bo ntú bɛkpɑ̀ɑ̀tìbɛ̀.
\p
\v 31 Yeu mɛ nyí ndɑ̀ɑ̀tɛ kɛ bo tũnnɛ ti Yiɛ̀ nKuyie nyIsidɑyɛɛribɛ tũ nkù nɛ̀ o yɛ̀mmɛ̀ mɛmɔu. Ò í nyóu mmɛyɛi nSedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.
\b
\p
\v 32 Dɛ mɔ̀nnì kɛ̀ ti Yiɛ̀ nKuyie nketɛ́ kù bo yɑɑtɛmɛ̀ Isidɑyɛɛribɛ tenkɛ̀, kɛ́duɔ́ nkɛ̀ Asɑyɛɛdii bɛ̀ potɛ́ kɛ́dennɛ bɛ tenkɛ̀ kɛmɔu miɛkɛ. 
\v 33 Mɛm̀mɛ bɛ̀ pɑ̀ɑ̀mɛ̀ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀ kó kutempɛ̃ nnɛ̀ Adinɔɔ-Adowɛɛ bɑkù cɑ̃̀nku Kɑdɑɑdi kó yɛhɛkɛ̀ nɛ̀ Bɑsɑ̃ɑ̃ kpɛyɛ nɛ̀ Dubɛnni nɛ̀ Kɑti nɛ̀ Mɑnɑnsee botí kɔbɛ bo yɛ̀.
\b
\p
\v 34 Yeu kó mɛdɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀ nɛ̀ dikɔ̃m̀bùɔ̀ ò do mɔkɛ dì, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 35 Kòo kú kɛ̀ bɛ̀ɛ ò kũnnɛ́ Sɑmmɑrii kòo birɛ Yoɑkɑsi sɔɔtɛ́ o kpɑ̀tì. 
\v 36 Ò do tɔ tikpɑ̀tì kɛ dɔ̀ yɛbie nsipísìdɛ́ nɛ̀ yɛ̀ni ndi kɛ bo Sɑmmɑrii.
\c 11
\s1 Atɑdii dimɛ̀ tikpɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 22:10-12)
\p
\v 1 Aɑsiɑ yɔ̃ Atɑdii kèè dìì mɔ̀nnì ò kumɛ̀ kɛ́ítɛ́ kɛ́cómmú kɛ bo kuɔ Sudɑɑ kpɑ̀ɑ̀tìcĩ́ɛ̃̀tɛ̀ kɔbɛ bɛmɔu. 
\v 2 Mɛm̀mɛ Yodɑmmu kóo sɑpɑ̀ɑ̀ nYeosebɑ Aɑsiɑ tɑ̃ũ̀ tùótɛ́mɛ̀ o tɑ̃ũ̀ Aɑsiɑ birɛ Soɑsi ikpɑ̀ɑ̀tìbí tɛì bɛ̀ do dɔ́ kɛ́kuɔ ì miɛkɛ kɛ́kɔtɛ kóò sɔ̀nnɛ Kuyie ncĩ́ɛ̃̀tɛ̀ kó kufɑ̃́ɑ̃́ mmɑkù yɛdúɔ̀ borɛ̀ wenwe nɛ̀ o yuɔ̀rì. Bɑ́ Atɑdii í nhò nìntɛ kɛ́kuɔ. 
\v 3 Kɛ̀ Soɑsi nsɔri ti Yiɛ̀ nKuyie ncĩ́ɛ̃̀tɛ̀ miɛkɛ kɛ dɔ̀ yɛbie nyɛ̀kuɔ̀, dɛ mɔ̀nnì kɛ̀ Atɑdii weè ntú okpɑ̀ɑ̀tì Isidɑyɛɛribɛ tenkɛ̀ miɛkɛ.
\s1 Bɛ̀ pĩ̀ḿmɛ̀ Soɑsi tikpɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 23:1-21)
\p
\v 4 Soɑsi kpɑ̀tì benni yiénnì miɛkɛ nkɛ ikuɔ́ nìùtì Yeoyɑdɑɑ tɔ̃mmɛ̀ kɛ̀ bɛ̀ɛ yúní Asii kó bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ nɛ̀ tihɑ̃ɑ̃pɔ̀ntì tìì bɑ̀ɑ tɛkpɑ̀ɑ̀tìcĩ́ɛ̃̀tɛ̀. Kɛ̀ bɛ̀ɛ kɔtɛní o borɛ̀ ti Yiɛ nKuyie ncĩ́ɛ̃̀tɛ̀. Kòo bɛ̀ dɔ̀ɔ̀nɛ̀ mɛtɑummɛ̀ kɛ́ bɛ̀ bɛnkɛ okpɑ̀ɑ̀tì birɛ, 
\v 5 kɛ́ bɛ̀ nɑ̀kɛ́ kɛ dɔ̀: Ntɛnɛ̀ di yóó yĩ́mɛ̀: Díndi bɛ̀ɛ̀ bɑ̀ɑ tɛom̀pùtɛ̀ yiè. Dí totɛ́ bɛhɑ̃ɑ̃pɔ̀mbɛ̀ yɛtĩ̀rɛ̀ yɛ̀tɑ̃ɑ̃ti, ditĩ̀nnì dìì te mubɑ̀rìmù tɛom̀pùtɛ̀ yiè, bɛ̀ mbɑɑ okpɑ̀ɑ̀tì cĩ́ɛ̃̀tɛ̀. 
\v 6 Kɛ̀ ditĩ̀nnì dɛ́rì mbɑɑ dibòrì bɛ̀ tu di dipũũ kó dibòrì, kɛ̀ ditĩ̀nnì tɑ̃ɑ̃́nnì mbo kuhɑ̃ɑ̃pɔ̀nkù kùù bɑ̀ɑ okpɑ̀ɑ̀tìcĩ́ɛ̃̀tɛ̀ ku cĩ́ɛ̃̀tɛ̀ fɔ̃nkúò, kɛ̀ di ncɔú ditɔbɛ̀. 
\v 7 Yɛtĩ̀rɛ̀ ketiyɛ̀ yɛ̀dɛ́ɛ̀ yɛ̀ɛ̀ cuti mutɔ̃mmú tɛom̀pùtɛ̀ yiè kɛ̀ yɛ̀ mbɑɑ ti Yiɛ̀ nKuyie ncĩ́ɛ̃̀tɛ̀ okpɑ̀ɑ̀tì kpɛ́í. 
\v 8 Kɛ̀ dí cɛ̃ɛ̃tɛ okpɑ̀ɑ̀tì, bɑ́ wè kòò mpikú o kpɑ̀rìnɛntì, kɛ̀ wèè tɑ kukɔriku miɛkɛ di ò kùɔ, kɛ̀ di mmurí okpɑ̀ɑ̀tì bɑ́ kòo kɔ̀ri kùù píkù, dí nhò nɛínɛ̀.
\p
\v 9 Kɛ̀ bɛ̀ɛ̀ bɑkɛ́ bɛnìtìbɛ̀ tɛkɔ̀ùtɛ̀ (100) kɔ̀ùtɛ̀ kɛ̀ bɛ̀ɛ dɔɔ̀ ikuɔ́ nìùtì Yeoyɑdɑ bɛ̀ nɑ̀kɛ́ tì, bɑ́ wè kòo tíí nho kó bɛnìtìbɛ̀ bɛ̀ɛ̀ dèètì mubɑ̀rìmù tɛom̀pùtɛ̀ yiè, nɛ̀ bɛ̀ɛ̀ cuti, kɛ̀ bɛ̀ɛ kɔtɛní ikuɔ́ nìùtì Yeoyɑdɑ borɛ̀. 
\v 10 Kɛ̀ ikuɔ́ nìùtìi duɔ́ mbɛhɑ̃ɑ̃pɔ̀mbɛ̀ bɛ̀ɛ̀ bɑkɛ́ bɛnìtìbɛ̀ tɛkɔ̀ùtɛ̀ kɔ̀ùtɛ̀ Dɑfiti kó tikpɑ̀rìnɛntì, yɛkpɑ̃ɑ̃̀ nnɛ̀ tidɔpììtì dɛ̀ɛ̀ do bo ti Yiɛ̀ nKuyie ncĩ́ɛ̃̀tɛ̀ miɛkɛ. 
\v 11 Kɛ̀ bɛ̀ mpikú tikpɑ̀rìnɛntì kɛ cómmú Kuyie ncĩ́ɛ̃̀tɛ̀ bɑkù yoú nɛ̀ kucɑ̃̀nku, kɛ fitɛ́ Kuyie ncĩ́ɛ̃̀tɛ̀ nɛ̀ diwũɔ̃tɔ̀nnì. 
\v 12 Dɛ mɔ̀nnì kɛ̀ Yeoyɑdɑɑ dennɛní okpɑ̀ɑ̀tì birɛ kɛ́ dɛ̀ ìńnɛ́ fɛsɔɔyítòòdɑ́fɛ̀, kɛ́ dɛ̀ duɔ́ nKuyie ntɑnnɔ̀ pɑ́tíri, kɛ́ dɛ̀ còú mmɛkùɔ̀ nkɛ̀ bɛ̀ mpĩɛ̃kù kɛ tú: Soɑɑsi weè tu okpɑ̀ɑ̀tì!
\b
\p
\v 13 Kɛ̀ Atɑdii keè ditĩ̀nnì ùúmɛ̀ kɛ́cokóo ti Yiɛ̀ nKuyie ncĩ́ɛ̃̀tɛ̀ bɛnìtìbɛ̀ tìkú dɛ̀. 
\v 14 Ò tùɔ̀koo kɛ́nsɔ̃́ nhokpɑ̀ɑ̀tì còḿmú diwũɔ̃tɔ̀nnì ĩ́nkɛ̀, kɛ́ndònnɛ̀ bɛ̀ ɔ̃ mmɔkɛmɛ̀ dɛ kó mɛmɑntímɛ̀. Kɛ̀ dihɛì kó bɛkótíbɛ̀ nɛ̀ bɛ̀ɛ̀ eu siheú kɛ̀ bɛ̀ ò murí kɛ eu siheú, kɛ̀ bɛnìtìbɛ̀ bɛmɔu yɛ̀mmɛ̀ nɑɑti. Kɛ̀ Atɑdii kɛ̃tɛ́ o yɑ̀ɑ̀tì kɛ́kuɔ́nko kɛ dɔ̀: Bɛ̀ m bɔmmu! Bɛ̀ m bɔmmu!
\p
\v 15 Kɛ̀ ikuɔ́ nìùtì Yeoyɑdɑɑ nɑ́kɛ́ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ kɛ dɔ̀: Dennɛnɛ̀ we ditĩ̀nnì miɛkɛ, kòo mɔù ò tũ̀ ndí ò kùɔ. Ikuɔ́ nìùtì do í dɔ́ bɛ̀ɛ ò kùɔ ti Yiɛ̀ nKuyie ncĩ́ɛ̃̀tɛ̀ miɛkɛ.
\p
\v 16 Bɛ̀ɛ̀ ò pĩ mbɛ̀ ò tùɔ̀kɛnɛ̀ dìì mɔ̀nnì tɛkpɑ̀ɑ̀tìcĩ́ɛ̃̀tɛ̀ kó dibòrì bɛ̀ tu dì sisɛ̃ĩ́ kó dibòrì kɛ́ dɛ̀ nhò kùɔ.
\b
\p
\v 17 Mɛm̀mɛ Yeoyɑdɑ duɔ́mmɛ̀ kɛ̀ bɛnìtìbɛ̀ɛ dɔúnnɛ̀ ti Yiɛ̀ nKuyie ndinùù kɛ bo ntú ku kɔbɛ. Dɛ kó difɔ̃nkúò kɛ múnkɛɛ dɔúnnɛ̀ okpɑ̀ɑ̀tì dinùù. 
\v 18 Kɛ̀ bɛ̀ɛ wɛ̃nnɛ́ bɛmɔu kɛ́kɔtɛ dibɔɔ̀ Bɑɑdi cĩ́ɛ̃̀tɛ̀, kɛ́ tɛ̀ pɔ̀ntɛ, kɛ́puɔnnɛ̀ yɛwũɔ̃tɔ̀rɛ̀ nɛ̀ sitenkɑɑnìi pɑ́íí, kɛ́kuɔnɛ̀ o bɔɔyiɛ̀ mMɑtɑ̃ɑ̃ Bɑɑdi wũɔ̃tɔ̀rɛ̀ tɑkɛ́. Kɛ̀ ikuɔ́ nìùtì Yeoyɑdɑ wɑɑ́ mbɛ̀ɛ̀ yó mbɑɑ ti Yiɛ̀ nKuyie ncĩ́ɛ̃̀tɛ̀.
\p
\v 19 Kɛ̀ Yeoyɑdɑ tíí mbɛhɑ̃ɑ̃pɔ̀mbɛ̀ bɛ̀ɛ̀ bɑkɛ́ bɛnìtìbɛ̀ tɛkɔ̀ùtɛ̀ kɔ̀ùtɛ̀ nɛ̀ dihɛì tɛrì Asii kó tihɑ̃ɑ̃pɔ̀ntì tìì bɑ̀ɑ okpɑ̀ɑ̀tì ti Yiɛ̀ nKuyie ncĩ́ɛ̃̀tɛ̀, kóò yɛ̀nnɛ̀ dibòrì bɛ̀ɛ̀ bɑ̀ɑ tɛkpɑ̀ɑ̀tìcĩ́ɛ̃̀tɛ̀ bɛ̀ bɑ̀ɑ dì, kóò tɑnnɛ̀ tɛkpɑ̀ɑ̀tìcĩ́ɛ̃̀tɛ̀ kòo nkɑri dikpɑ̀ɑ̀tìkɑ̀rì. 
\v 20 Kɛ̀ bɛnìtìbɛ̀ bɛmɔu bo diwɛ̀ì miɛkɛ.
\p Bɛ̀ do kùɔ dìì mɔ̀nnì Atɑdii bɑ́ kunɑmpoo tɛ̃́nkɛ í mbo dihɛì miɛkɛ.
\s1 Soɑsi do túmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 24:1-3)
\p
\v 21 Soɑsi do yóó di tikpɑ̀tì kɛ mɔkɛ yɛbie nyɛ̀yiekɛ̀ ndi.
\c 12
\p  
\v 1 Yeu kpɑ̀tì benni diyiénnì miɛkɛ nkɛ ò do nɑɑ́mmɛ̀ okpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nsipísìnɑ̀ɑ̀ kɛ bo Sedisɑdɛmmu. O yɔ̃ yètìrì do tú Sibiɑ nwe Bɛɛrisebɑɑ ɛì kou. 
\v 2 Kɛ̀ Soɑsi ndɔɔri Kuyie ndɔ́ dɛ̀ o fòmmu mumɔu miɛkɛ, kɛ yɛ̃́ ikuɔ́ nìùtì Yeoyɑdɑ do ò tièmmɛ̀ mɛsɑ̀ɑ̀. 
\v 3 Nɛ̀ mɛmmɛ bɛ̀ í nyóu yɛwũɔ̃tɔ̀rɛ̀ muféù, kɛ̀ bɛnìtìbɛ̀ nkpɑɑ́ feu iwũɔ̃ yɛtɔ̀rɛ̀ kó yɛwũɔ̃tɔ̀rɛ̀ ĩ́nkɛ̀, kɛ tuɔ̀ ntihúúntì.
\s1 Soɑsi tũ̀ntɛmɛ̀ Kuyie ncĩ́ɛ̃̀tɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 24:4-14)
\p
\v 4 Diyiè mɑrì kɛ̀ Soɑsii nɑ́kɛ́ ikuɔ́ nìùtì Yeoyɑdɑ kɛ dɔ̀: Idíítí ìì tu Kuyie nkpɛyi, kɛ̀ bɛnìtìbɛ̀ ì tɔuní Kuyie ncĩ́ɛ̃̀tɛ̀ nɛ̀ bɛ̀ bèkú ì bɑ́ wè yuu ĩ́nkɛ̀ nɛ̀ yɛpɑ̃rɛ̀. 
\v 5 Di níí ì cɔutɛ́ ikuɔ́ nìùtì bɑ́ wè ò yɛ̃́ bɛ̀ɛ̀ nìtìbɛ̀, kɛ̀ dí túótɛ́ dɛ kó idíítí kɛ́tũntɛnɛ̀ Kuyie ncĩ́ɛ̃̀tɛ̀ dɛ̀ɛ̀ cɑ̀kɛ.
\p
\v 6 Soɑsi do bo o kpɑ̀tì benni sipísìdɛ́ nɛ̀ ditɑ̃ɑ̃́nnì ndi, bɑ́ ikuɔ́ nìùbɛ̀ mu nyí tũ̀ntɛ Kuyie ncĩ́ɛ̃̀tɛ̀. 
\v 7 Mɛm̀mɛ kɛ̀ Soɑsii yú ikuɔ́ nìùtì Yeoyɑdɑ nɛ̀ ikuɔ́ nìùbɛ̀ tɔbɛ̀ kɛ́ bɛ̀ bekɛ kɛ dɔ̀: Bɑ nkpɛ́í nte kɛ̀ di í tũ̀ntɛ Kuyie ncĩ́ɛ̃̀tɛ̀? Di tũ mbɑ́ nsɔkɛ́ kɛ cɔú idíítí bɛnìtìbɛ̀ borɛ̀. Di níí ì duɔ́ nKuyie ncĩ́ɛ̃̀tɛ̀ tũntimù kpɛ́í.
\p
\v 8 Kɛ̀ ikuɔ́ nìùbɛ̀ɛ yie nhò bɛ́i ntì bɑ́ bɛ̀ tɛ̃́nkɛ í ncɔú idíítí bɛnìtìbɛ̀ borɛ̀. Bɛɛ̀ tɛ̃́nkɛ í nte ti Yiɛ̀ nKuyie ncĩ́ɛ̃̀tɛ̀ kó mutũntimù.
\p
\v 9 Kɛ̀ ikuɔ́ nìùtì Yeoyɑdɑ wɑɑ́ ntɛtɔutɛ kɛ́ tɛ̀ dùùtɛ tɛ pòkù kɛ́ tɛ̀ ĩ̀ńnɛ́ ɑ bo ntɑtoomɛ̀ Kuyie ncĩ́ɛ̃̀tɛ̀ kubɑkù yoú diwũɔ̃tɔ̀nnì tɑkɛ́. Bɛ̀ɛ̀ bɑ̀ɑ ti Yiɛ̀ nKuyie ncĩ́ɛ̃̀tɛ̀ kɛ̀ bɛ̀ ncɔú Kuyie ncĩ́ɛ̃̀tɛ̀ kó idíítí kɛ ɑ̃ɑ̃̀ tɛ miɛkɛ. 
\v 10 Kɛ̀ bɛ̀ sɔ̃́ nyì sũ̀ṹ nhokpɑ̀ɑ̀tì kóo pɑ́tíwɑ̃ɑ̃̀tì nɛ̀ ikuɔ́ nìùtì diɛwè bɛ̀ɛ kɔtɛ kɛ́ ì kɑ̀ɑ, 
\v 11 kɛ̀ bɛ̀ kɑ̀ɑ nkɛ dèè bɛ̀ɛ ì duɔ́ mbɛ̀ɛ̀ ni mumɑrimù nɛ̀ bɛ̀ɛ̀ yóó pĩ́ ndɛ kó mutɔ̃mmú, kɛ̀ bɛ̀ɛ yietí bɛdɑbɛɛsṹɔ̃̀bɛ̀ nɛ̀ bɛtɔ̃mbɛ̀, 
\v 12 nɛ̀ bɛmɑribɛ̀ nɛ̀ bɛtɑ̃́cíɛ̀bɛ̀, kɛ̀ bɛ̀ɛ dońnɛ̀ idɛí nɛ̀ yɛtɑ̃́okùyɛ̀ bɛ̀ yóó dɔɔ̀nɛ̀ yɛ̀ ti Yiɛ̀ nKuyie ncĩ́ɛ̃̀tɛ̀. Dɛ̀ɛ̀ kó dimɑ̀ɑ̀ dò nkɛ́tũntɛ ti Yiɛ̀ nKuyie ncĩ́ɛ̃̀tɛ̀ miɛkɛ.
\p
\v 13 Bɛ̀ mɛ nyí ndɔ̀ɔ̀nɛ̀ tì Yiɛ̀ nKuyie ncĩ́ɛ̃̀tɛ̀ kó tinɛntì timɑ́tì pɛ́ítì yoo mɛsɔɔ. Yɛbɔ nɛ̀ yɛse, nɛ̀ yɛbɔ bɛ̀ yó mmɛ́ínɛ̀ yɛ̀ mɛyĩ̀ĩ̀ nnɛ̀ siheú. Kunɛnkù tɛkù mɑkù do í dɔ̀ɔ̀nɛ̀ timɑ́tì pɛ́ítì yoo mɛsɔɔ mbɛ̀ cuɔ́ dɛ̀ Kuyie ncĩ́ɛ̃̀tɛ̀ kpɛ́í. 
\v 14 Bɛ̀ do ɔ̃ɔ̃ duɔ́ ndɛ kó idíítí bɛ̀ɛ̀ ni bɛ̀mbɛ mumɑrimù, kɛ̀ bɛ̀ɛ ì tùótɛ́ kɛ́tũntɛnɛ̀ Kuyie ncĩ́ɛ̃̀tɛ̀. 
\v 15 Bɛ̀ duɔ́ mbɛ̀ dɛ kó idíítí kɛ̀ bɛ̀ bo nyietì bɛtɔ̃mbɛ̀. Bɛ̀ do ɔ̃ɔ̃ í mbekɛ bɛ kóò mɔù kɛ dɔ̀ wèe nɑ́kɛ́ ò pĩ̀ńnɛ̀ mɛ̀ɛ̀ botí idíítí mutɔ̃mmú. Kɛ yɛ̃́ bɛ̀ do ì pĩ̀ńnɛ̀mɛ̀ kɛ̀ dɛ̀ wennimu mɛsɑ̀ɑ̀.
\p
\v 16 Bɛ̀ duɔ̀ nyì mɛyɛi ncĩ́ɛ̃́mmɛ̀ kpɛ́í nnɛ̀ mɛyɛi nhũtímù kpɛ́í, bɛ̀ do í ì duɔ̀ nKuyie ncĩ́ɛ̃̀tɛ̀ tũntimù kpɛ́í, ì do tú ikuɔ́ nìùbɛ̀ kpɛyi nyi.
\s1 Soɑsi kó tikpɑ̀tì kó kumɑ̀nku
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 24:23-27)
\p
\v 17 Dɛ kó dimɔ̀nnì ndi Asɑyɛɛdi Sidii kóo kpɑ̀ɑ̀tì domɛ̀ Kɑti kɔbɛ mudoò kɛ́ bɛ̀ nɑ, kɛ́mbɑɑti kɛ bo do Sedisɑdɛmmu. 
\v 18 Kɛ̀ Soɑsi Sudɑɑ kɔbɛ kóo kpɑ̀ɑ̀tìi túótɛ́ dɛ̀ɛ̀ tu Kuyie nkpɛrɛ. O yɛmbɛ̀ Sosɑfɑti nɛ̀ Yodɑmmu nɛ̀ Aɑsiɑ Sudɑɑ kpɑ̀ɑ̀tìbɛ̀ do cɑ̃̀ńnɛ́ dɛ̀ Kuyie nkpɛ́í nnɛ̀ o mɔ́mmuɔ nhò do cɑ̃̀ńnɛ́ dɛ̀, nɛ̀ mɛsɔɔ mmɛ̀ɛ̀ kó dimɑ̀ɑ̀ do bo Kuyie ncĩ́ɛ̃̀tɛ̀ kó ditɔu miɛkɛ, kɛ́ dɛ̀ duɔ́nko Sidii kóo kpɑ̀ɑ̀tì Asɑyɛɛdii, kòo yóu Sedisɑdɛmmu kɛ́ítɛ́ ò tɛ̃́nkɛ í mbɛ̀ do mudoò.
\p
\v 19 Soɑsi dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 20 Kòo kó bɛtũ̀mbɛ̀ɛ yetɛ o kpɛti kɛ́dɑkɛ kɛ bo ò bɔ. Mɛm̀mɛ kòo nkɔri Sidɑ ɛì kɛ̀ bɛ̀ɛ ò potɛ́ Bɛti-Midoo borɛ̀. 
\v 21 Simmɛɑ birɛ Sosɑkɑɑ nɛ̀ Somɛɛ birɛ Sosɑbɑti bɛɛ̀ do ò pòtɛ́ kɛ́kuɔ, kɛ̀ bɛ̀ɛ ò kũnnɛ́ o yɛmbɛ̀ fɔ̃ti Dɑfiti ɛì. Kòo birɛ Amɑsiɑ sɔɔtɛ́ o kpɑ̀tì.
\c 13
\s1 Yoɑkɑsi nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 1 Aɑsiɑ birɛ Soɑsi Sudɑɑ kɔbɛ kóo kpɑ̀ɑ̀tì kpɑ̀tì benni sipísìdɛ́ nɛ̀ ditɑ̃ɑ̃́nnì ndi Yeu birɛ Yoɑkɑsi nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀yiekɛ̀ kɛ bo Sɑmmɑrii. 
\v 2 Kòo ndɔɔri ti Yiɛ̀ nKuyie nyí dɔ́ dɛ̀ kɛ́tũnnɛ Nɛbɑti birɛ Sedoboɑmmu borimɛ, ò do tɑnnɛ́ Isidɑyɛɛribɛ mɛ̀ɛ̀ miɛkɛ, ò í mmɛ̀ yóu. 
\v 3 Mɛm̀mɛ ti Yiɛ̀ nKuyie mmiɛkɛ bɛ̀ yɛ̀mɛ̀ kɛ̀ kùu bɛ̀ tɑnnɛ́ Asɑyɛɛdi Sidii kɔbɛ kóo kpɑ̀ɑ̀tì nɛ̀ o birɛ Bɛnni-Adɑdi bɛ nɔu miɛkɛ bɛ fòmmu mumɔu.
\p
\v 4 Dɛ kó difɔ̃nkúò kɛ̀ Yoɑkɑsii bɑ́ntɛ̀ ti Yiɛ̀ nKuyie nkɛ̀ kùu yie nkɛ́bónkùnnɛ ku miɛkɛ kɛ yɛ̃́ kù do yɑ̀mɛ̀ Sidii kɔbɛ kóo kpɑ̀ɑ̀tì bɛ̀ fɛ̃́ũnkomɛ̀. 
\v 5 Kɛ̀ ti Yiɛ̀ nKuyie mbɛ̀ duɔ́ nwèè bo bɛ̀ fìètɛ Sidii kóo kpɑ̀ɑ̀tì nɔu miɛkɛ kɛ̀ Isidɑyɛɛribɛ sɔɔtɛ́ kɛ́nhɑ̃ bɛ touti miɛkɛ bɛ̀ bɑɑ ɔ̃ ndòmmɛ̀. 
\v 6 Bɛ̀ mɛ nyi nyóu mɛyɛi nSedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ. Kɛ̀ kutedɔú Akɑbu do fìí nkù nkpɑɑ́ fííkú Sɑmmɑrii ɛì miɛkɛ.
\b
\p
\v 7 Yoɑkɑsi do kpɑɑ́nɛ̀ bɛsɑ̃ndèèbɛ̀ sipísìnùmmù ndi, sikpɑ̀rìnɑɑsɛ̃ĩ́ tɛpíítɛ̀, bɛhɑ̃ɑ̃pɔ̀mbɛ̀ tɛkɔupípíítɛ̀ (10000) Sidii kóo kpɑ̀ɑ̀tì weè do bɛ̀ nɑ kɛ́ bɛ̀ ɑutɛ́ kɛ́ mbɛ̀ nɑ̀u mutɑ̃́ɑ̃́ nkɔ̃mɛ.
\b
\p
\v 8 Yoɑkɑsi dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 9 Kòo kú kɛ̀ bɛ̀ɛ ò kũnnɛ́ Sɑmmɑrii o yɛmbɛ̀ fɔ̃ti, kòo birɛ Soɑsi sɔɔtɛ́ o kpɑ̀tì.
\s1 Soɑsi nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 10 Sudɑɑ kɔbɛ kóo kpɑ̀ɑ̀tì Soɑsi kpɑ̀tì benni sipísìtɑ̃ɑ̃ti nɛ̀ diyiénnì ndi Yoɑkɑsi birɛ Soɑsi nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀kuɔ̀ kɛ bo Sɑmmɑrii, 
\v 11 kɛ́dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ, kɛ́ mmɛ̀ sɔkɛ́.
\p
\v 12 Soɑsi dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì nɛ̀ ò do dokɛ́nɛ̀ mɛ̀ɛ̀ botí Sudɑɑ kɔbɛ kóo kpɑ̀ɑ̀tì Amɑsiɑ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 13 Kòo kú kɛ̀ bɛ̀ɛ ò kũnnɛ́ Sɑmmɑrii Isidɑyɛɛribɛ kpɑ̀ɑ̀tìbɛ̀ fɔ̃ti. Kɛ̀ Sedoboɑmmuu cɔutɛ́ tikpɑ̀tì.
\s1 Edisee kumɛ̀
\p
\v 14 Kɛ̀ Edisee muɔkɛ kɛ́duúnnɛ̀ mukṹṹ nkɛ̀ Soɑsi Isidɑyɛɛribɛ kóo kpɑ̀ɑ̀tì kɔtoo o borɛ̀ kɛ́nkuɔ̀ nkɛ tú: Áú n cicɛ! Áú n cicɛ! Isidɑyɛɛribɛ kpɑrìsɛ̃ĩ́ nɛ̀ si dèèbɛ̀ tu fɔ̃́ nwe.
\p
\v 15 Kɛ̀ Edisee ò nɑ̀kɛ́ kɛ dɔ̀: Kɔtɛ kɛ́wɑɑnní mutɑ̃mmù nɛ̀ ipie.
\p Kòo kɔtɛ kɛ́ dɛ̀ wɑɑnní. 
\v 16 Kɛ̀ Edisee dɔ̀: Sɛu nkupie nkòo kù sɛ̀u. Kɛ̀ Edisee nɔ́ɔ́ nho nɔu o kpɛsi ĩ́nkɛ̀, 
\v 17 kóò nɑ̀kɛ́ kɛ dɔ̀: Kpetɛ́ tɛbòtɛ̀ diyiè yìɛ̀ní kɛ̀ɛ̀ bíɛ́kɛ̀.
\p Kòo tɛ̀ kpetɛ́. Kɛ̀ Edisee dɔ̀: Tɑ̃ũ!
\p Kòo tɑ̃ũ. Kɛ̀ Edisee dɔ̀: Kupie nkuu nkuù bɛnkú ti Yiɛ̀ nKuyie nyóó duɔ́mmɛ̀ kɑ̀ɑ nɑ Sidii kɔbɛ kɛ́ bɛ̀ potɛ́ Afɛki kɛ́kuɔ bɛmɔu pɑ́íí.
\p
\v 18 Kɛ̀ Edisee deè kɛ dɔ̀: Tùótɛ́ ɑ pie!
\p Kòo ì tùótɛ́. Kòò dɔ̀: Potɛ́ kɛtenkɛ̀!
\p Kòo kɛ̀ potɛ́ kɛ dɔ̀ kucɛ mɛ̀tɑ̃ɑ̃ti kɛ́yóu. 
\v 19 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Edisee miɛkɛɛ ò pɛikɛ. Kòò dɔ̀: A nɑ nkɛ̀ potɛ́ kucɛ mɛ̀nùmmù ndi yoo mɛ̀kuɔ̀. A nɑ nnɑmu Sidii kɔbɛ kɛ́ bɛ̀ kùɔ kɛ́deè pɑ́íí. Di mmɔ̀nnì ɑ nɛ́ yóó bɛ̀ nɑ kucɛ mɛ̀tɑ̃ɑ̃ti mɑ́ɑ̀ ndi.
\b
\p
\v 20 Kɛ̀ Edisee kú kɛ̀ bɛ̀ɛ ò kũnnɛ́. Dɛ do sɔ̃́ mMɔɑbu kɔbɛ bɛɛ̀ do ɔ̃ɔ̃ dɔ́ɔ́tɛ́ bɑ́ dìì benni kɛ́ bɛ̀ do mudoò kɛ́fekɛ bɛ kpɛrɛ. 
\v 21 Kɛ̀ bɛ̀mɑbɛ̀ɛ tɔ ocíì kɛ́kɔtɛ kɛ bo kũnnɛ́, kɛ̀ bɛ̀ɛ bɛ̀ yɑ̀ní kɛ́dootóo ocíì Edisee fɔ̃ti miɛkɛ. Kòo cíì kɑ̀ɑ́kɛ́ Edisee kṹɔ̃̀ kɛ́yɑ̃́ntɛ́ kɛ́ítɛ́ kɛ́cómmú.
\s1 Isidɑyɛɛribɛ nɑmɛ̀ Asɑyɛɛdi
\p
\v 22 Isidɑyɛɛribɛ kóo kpɑ̀ɑ̀tì Yoɑkɑsi kpɑ̀tì timɔu miɛkɛ kɛ̀ Asɑyɛɛdi Sidii kóo kpɑ̀ɑ̀tì mbɛ̀ fɛ̃́ũnko mɛdiɛ̀. 
\v 23 Kɛ̀ ti Yiɛ̀ nKuyie mmɛ mbɛ̀ kuɔ́ mmɛsémmɛ̀ kɛ́ bɛ̀ dɔ̀ɔ̀ mɛsɑ̀ɑ̀ nkɛ́wɛ̃ɛ̃tɛní bɛ bíɛ́kɛ̀ mɛtɑummɛ̀ kù do dɔ̀ɔ̀nɛ̀mɛ̀ bɛ yɛmbɛ̀ Abɑrɑhɑmmu nɛ̀ Isɑki nɛ̀ Sɑkɔbu mɛ kpɛ́í. Kù í ndɔ́ kɛ́ bɛ̀ dèè, kù mu ndo í bɛ̀ dootóo.
\b
\p
\v 24 Kɛ̀ Sidii kɔbɛ kóo kpɑ̀ɑ̀tì Asɑyɛɛdii kú kòo kóo dɑpɑ̀ɑ̀ mBɛnni-Adɑdi sɔɔtɛ́ o kpɑ̀tì. 
\v 25 Mɛm̀mɛ Yoɑkɑsi birɛ Soɑsii wɛ̃̀tɛ kɛ́cɔ́útɛ́mɛ̀ Asɑyɛɛdi birɛ Bɛnni-Adɑdi borɛ̀ yɛhɛkɛ̀ Asɑyɛɛdi do bɛ̀ pɔ̀ntɛ kɛ́fekɛ yɛ̀ o cicɛ Yoɑkɑsi borɛ̀, kɛ̀ Soɑsii wɛ̃tɛ kɛ́ bɛ̀ nɑ kucɛ mɛ̀tɑ̃ɑ̃ti kɛ́cɔutɛ́ Isidɑyɛɛribɛ ɛkɛ̀.
\c 14
\s1 Amɑsiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 25:1-4, 11-12, 17-28. 26:1-2)
\p
\v 1 Isidɑyɛɛribɛ kóo kpɑ̀ɑ̀tì Yoɑkɑsi birɛ Soɑsi kpɑ̀tì benni dɛ́rì miɛkɛ nkɛ Soɑsi birɛ Amɑsiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 2 Ò do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀nùmmù ndi, kɛ́ntɔ tikpɑ̀tì kɛ dɔ̀ yɛbie nsipísìdɛ́ nɛ̀ yɛ̀wɛi kɛ bo Sedisɑdɛmmu. Kòo yɔ̃ yètìrì tu Yeoyɑdɑnni Sedisɑdɛmmu ɛì kou. 
\v 3 Kòo ndɔɔri ti Yiɛ̀ nKuyie ndɔ́ dɛ̀, ò nɛ́ í ntùɔ̀kɛ o yɑ̀ɑ̀rì Dɑfiti, ò do tũ nho cicɛ Soɑsi borimɛ mmɛ weti weti. 
\v 4 Kɛ̀ yɛbɔɔwũɔ̃tɔ̀rɛ̀ nɛ́ nkpɑɑ́ bo kɛ̀ bɛnìtìbɛ̀ nfeu iwũɔ̃ kɛ tuɔ̀ ntihúúntì yɛ ĩ́nkɛ̀.
\b
\p
\v 5 O kpɑ̀tì fìíkú dìì mɔ̀nnì kɛ́deè kòo kuɔ bɛkperíbɛ̀ bɛ̀ɛ̀ do kùɔ o cicɛ wèè do tú bɛ kóo kpɑ̀ɑ̀tì. 
\v 6 Ò mɛ nyí nkùɔ bɛ̀ɛ̀ do kùɔ o cicɛ bɛ bí, kɛ́ndònnɛ̀ tì wɑ̃̀rimɛ̀ ti Yiɛ̀ nKuyie nkuɔ́ pɑ́tíri Mɔyiisi wɑ̃̀ri dì miɛkɛ. Kuyie ndo bɛ́immu di miɛkɛ kɛ dɔ̀: Bɛ̀ bɑ́ɑ́ kuɔ dɛbirɛ cicɛ dɛbirɛ yɛi nkpɛ́í, bɛ̀ mɛ mbɑ́ɑ́ kuɔ dɛbirɛ dɛ cicɛ yɛi nkpɛ́í. Bɑ́ wè ò dò nkɛ́kú o yɛi nkpɛ́í nkɛ. 
\v 7 Weè Amɑsiɑ do potɛ́ Edɔmmu kɔbɛ kubiriku bɛ̀ tu kù kukɔ́kɛ́biriku ku miɛkɛ, kɛ́kuɔ bɛnìtìbɛ̀ tɛkɔupípíítɛ̀ (10000). Mudoò tɛ̃mù mɑmù miɛkɛ kòo fietɛ Sedɑɑ ɛì kɛ́ dì yu kɛ dɔ̀: Yokɛtɛɛdi, kɛ̀ dɛ kó diyètìrì kpɑɑ́ bo nɛ̀ yíenní.
\b
\p
\v 8 Mɛm̀mɛ Amɑsiɑ tɔ̃mmɛ̀ kɛ̀ bɛ̀ɛ nɑ́kɛ́ Isidɑyɛɛribɛ kóo kpɑ̀ɑ̀tì Yoɑkɑsi birɛ Soɑsi Yeu yɑɑ̀birɛ kɛ dɔ̀: Amɑsiɑ tu ɑ kɔtoo kɛ̀ dí yɑ́ɑ́kɛ́ ditɔbɛ̀. 
\v 9 Kɛ̀ Sudɑɑ kɔbɛ kóo kpɑ̀ɑ̀tì Soɑsii bɛ̀ tɛ̃̀ńnɛ́ kɛ dɔ̀: Ditɑ̃rì Dimɑɑ kó tipotì tiì do nɑ̀kɛ́ diyiè mɑrì Dimɑɑ kó dɛtediɛrɛ̀ kɛ dɔ̀ dɛ̀ɛ tì duɔ́ ndɛ kóo sɑpɑ̀ɑ̀ nkɛ̀ tìi puó nti kóo dɑpɑ̀ɑ̀. Kɛ̀ mupĩ́mpĩ́mmùu yɛ̀nní Dimɑɑ kɛ́ tì nɑ kɛ́ũtiroo. 
\v 10 Ò bɛ́i mmɛmmɛ kɛ́deè kɛ dɔ̀: N yɛ̃́mu ɑ nɑmɛ̀ Edɔmmu kɔbɛ mbɛ kɛ̀ dɛɛ̀ kó tɛfentɛ̀ dɑ bo. Nɛ́ mbo ɑ cĩ́ɛ̃̀tɛ̀ kɛ sɑ̃ntí ɑmɑ́ɑ̀, bɑ́ɑ́ dɑ́ntɛ́ mudoò mùù yóó dɑ dɔɔ̀ mɛyɛi nkɛ́nte kɛ̀ bɛ̀ dɑ nɑ fɔ̃́ nnɛ̀ Sudɑɑ kɔbɛ bɛmɔu.
\p
\v 11 Amɑsiɑ mɛ nyí nyie. Dɛ mɔ̀nnì kɛ̀ Isidɑyɛɛribɛ kóo kpɑ̀ɑ̀tì Soɑsi bɑ́ɑ́tí kɛ̀ bɛ̀ɛ yɑ́ɑ́kɛ́ bɛtɔbɛ̀ Bɛti-Semɛsi Sudɑɑ kɔbɛ tenkɛ̀ miɛkɛ. 
\v 12 Kɛ̀ Isidɑyɛɛribɛɛ nɑ Sudɑɑ kɔbɛ, kɛ bɛ̀ɛ cíɛ́tɛ́ kɛ́kũṹ mbɛ cɛ̃́ĩ. 
\v 13 Kɛ̀ Isidɑyɛɛribɛɛ pĩ́ nSoɑsi birɛ Amɑsiɑ Aɑsiɑ yɑɑ̀birɛ Sudɑɑ kɔbɛ kóo kpɑ̀ɑ̀tì. Bɛ̀ do ò pĩ mBɛti-Semɛsi nwe kóò kònnɛ̀ o ciɛ Sedisɑdɛmmu, kɛ́pɔntɛ Sedisɑdɛmmu ɛì kó kuduotí, ku okùmɛ̀ bo ntùɔ̀kɛ mɛ́tìrì sikɔusìdɛ́ (200), kɛ́túótɛ́ Efɑdɑimmu kó dibòrì kɛ́ntɔ kɛ́tuɔ̀kɛnɛ̀ kuduotí kéntímɛ̀ kó dibòrì. 
\v 14 Kɛ̀ bɛ̀ɛ túótɛ́ ti Yiɛ̀ nKuyie ncĩ́ɛ̃̀tɛ̀ kó mɛsɔɔ mmɛmɔu nɛ̀ timɑ́tì pɛ́ítì nɛ̀ tinɛntì tìì kó dimɑ̀ɑ̀ bo tɛ miɛkɛ nɛ̀ dɛ̀ɛ̀ bo tɛkpɑ̀ɑ̀tìcĩ́ɛ̃̀tɛ̀, kɛ́túótɛ́nɛ̀ bɛ̀ pĩ̀ḿmú bɛ̀ mudoò miɛkɛ kɛ́wɛ̃tɛ kɛ́kònnɛ̀ Sɑmmɑrii.
\b
\p
\v 15 Soɑsi kó mɛdɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì nɛ̀ ò dokɛ́nɛ̀ mɛ̀ɛ̀ botí Amɑsiɑ Sudɑɑ kɔbɛ kóo kpɑ̀ɑ̀tì, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 16 Kòo kú kɛ̀ bɛ̀ɛ ò kũnnɛ́ Sɑmmɑrii Isidɑyɛɛribɛ kpɑ̀ɑ̀tìbɛ̀ fɔ̃ti. Kòo birɛ Sedoboɑmmuu sɔɔtɛ́ o kpɑ̀tì.
\b
\p
\v 17 Isidɑyɛɛribɛ kóo kpɑ̀ɑ̀tì Yoɑkɑsi birɛ Soɑsi ku dìì mɔ̀nnì kɛ́deè kɛ̀ Sudɑɑ kɔbɛ kóo kpɑ̀ɑ̀tì Soɑsi birɛ Amɑsiɑ nkpɑɑ́ fòùmu kɛ dɔ̀ yɛbie ntɛpíítɛ̀ nɛ̀ yɛ̀nùmmù. 
\v 18 Amɑsiɑ dɔɔ̀rìmɛ̀ sɔmmɛ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\p
\v 19 Kɛ̀ bɛ̀ɛ dɑkɛ kɛ bo ò bɔ nkóò pi Sedisɑdɛmmu, kòo cokɛ́ kɛ́kɔtɛ Dɑkiisi kɛ̀ bɛ̀ɛ tɔ̃nko bɛnìtìbɛ̀ kɛ̀ bɛ̀ɛ kɛ̀ nhò kùɔ. 
\v 20 Kɛ̀ bɛ̀ɛ ò tùótɛ́nnɛ̀ sisɛ̃ĩ́ kɛ́konnɛ̀nní Sedisɑdɛmmu, kóò kũnnɛ́ o yɛmbɛ̀ fɔ̃ti Dɑfiti ɛì miɛkɛ. 
\v 21 Kɛ̀ Sudɑɑ kɔbɛɛ túótɛ́ Asɑdiɑ kɛ́duɔ́ nkòo sɔɔtɛ́ o cicɛ kpɑ̀tì, dɛ̀ do sɔ̃́ nhò mɔ̀kɛ yɛbie ntɛpíítɛ̀ nɛ̀ yɛ̀kuɔ̀ ndi. 
\v 22 Weè do wɛ̃̀tɛ kɛ́mɑɑ́ Edɑti ɛì kɛ́ dì tɛ̃̀ńnɛ́ Sudɑɑ kɔbɛ o cicɛ kṹṹ nkó difɔ̃nkúò.
\s1 Sedoboɑmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 23 Sudɑɑ kɔbɛ kóo kpɑ̀ɑ̀tì Soɑsi birɛ Amɑsiɑ kpɑ̀tì benni tɛpíítɛ̀ nɛ̀ dinummurì ndi Soɑsi birɛ Sedoboɑmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nsipísìnɑ̀ɑ̀ nɛ̀ dìmɑ́ɑ̀ kɛ bo Sɑmmɑrii, 
\v 24 kɛ́dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ. 
\v 25 Weè do wɛ̃̀tɛ kɛ́cɔutɛ́ Isidɑyɛɛribɛ tenkɛ̀ kɛ́túótɛ́ Amɑti kɛ́ntɔ kɛ́tuɔkɛnɛ̀ Adɑbɑ. Kɛ́ndònnɛ̀ ti Yiɛ̀ nKuyie nyIsidɑyɛɛribɛ tũ nkù do tì nɑ̀kɛ́mɛ̀ nɛ̀ ku pɑ̃ɑ̃nɑ́ɑǹtì nɑ́ɑǹtò Amitɑii birɛ Sonɑɑsi Kɑti-Efɛɛ ɛì kou nùù miɛkɛ. 
\v 26 Ti Yiɛ̀ nKuyie ndo yɑ̀ Isidɑyɛɛribɛ yo mmɛ̀ɛ̀ sémmɛ̀ dɛummɛ̀ mmɛ. Onìtì tɛ̃́nkɛ do í kpɑɑ́ bɑ́ omɑ́ɑ̀ Isidɑyɛɛribɛ tenkɛ̀ wèè bo bɛ̀ teennɛ̀. 
\v 27 Ti Yiɛ̀ nKuyie ndo í dɔ́ Isidɑyɛɛribɛ bo kúmɛ̀ kɛ́deè kɛ̀ bɛ yètìrìi kpɑ́nnɛ́ kɛtenkɛ̀ ĩ́nkɛ̀, dɛɛ̀ do te kɛ̀ kùu duɔ́ nkɛ̀ Soɑsi birɛ Sedoboɑmmuu bɛ̀ dɛɛtɛ́.
\b
\p
\v 28 Sedoboɑmmu dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀, nɛ̀ dikɔ̃m̀bùɔ̀ ò do mɔkɛ dì nɛ̀ ò dokɛ́ mɛ̀ɛ̀ botí kɛ wɛ̃̀tɛ kɛ fìètɛ Dɑmɑɑsi nɛ̀ Amɑti ɛkɛ̀ kɛ yɛ̀ tɛ̃̀ńnɛ́ Isidɑyɛɛribɛ, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 29 Kòo kú kɛ̀ bɛ̀ɛ ò kũnnɛ́ Sɑmmɑrii Isidɑyɛɛribɛ kpɑ̀ɑ̀tìbɛ̀ fɔ̃ti, kòo birɛ Sɑkɑrii sɔɔtɛ́ o kpɑ̀tì.
\c 15
\s1 Asɑdiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 26:3-4, 21-23)
\p
\v 1 Isidɑyɛɛribɛ kóo kpɑ̀ɑ̀tì Sedoboɑmmu kpɑ̀tì benni sipísìdɛ́ nɛ̀ diyiénnì miɛkɛ nkɛ Amɑsiɑ birɛ Asɑdiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 2 Ò do yóó di tikpɑ̀tì kɛ mɔkɛ yɛbie ntɛpíítɛ̀ nɛ̀ yɛ̀kuɔ̀ ndi kɛ́ntɔ tikpɑ̀tì kɛ dɔ̀ yɛbie nsipísìnùmmù nɛ̀ yɛ̀dɛ́ɛ̀ kɛ bo Sedisɑdɛmmu. O yɔ̃ yètìrì do tú: Yekodiyɑuu nwe Sedisɑdɛmmu ɛì kou. 
\v 3 Kòo ndɔɔri ti Yiɛ̀ nKuyie ndɔ́ dɛ̀ o cicɛ Amɑsiɑ do dɔɔ̀rìmɛ̀. 
\v 4 Kɛ̀ yɛtɔ̀rɛ̀ nɛ́ nkpɑɑ́ bo kɛ̀ bɛnìtìbɛ̀ feu iwũɔ̃ kɛ tuɔ̀ ntihúúntì yɛ ĩ́nkɛ̀.
\p
\v 5 Kɛ̀ ti Yiɛ̀ nKuyie nhò potɛ́ kòo muɔkɛ tikɔ̀ntì kɛ̀ bɛ̀ɛ ò cɑ̃̀ńnɛ́ kòo mbo omɑ́ɑ̀ borɛ̀ kòo birɛ Yotɑmmu weè mbɑkɛ́ tɛkpɑ̀ɑ̀tìcĩ́ɛ̃̀tɛ̀ kɛ ni bɛnìtìbɛ̀, kòo mmɛ ndò nkɛ yɑ̀ɑ kúnɛ̀.
\p
\v 6 Asɑdiɑ dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 7 Kòo kú kɛ̀ bɛ̀ɛ ò kũnnɛ́ o yɛmbɛ̀ fɔ̃ti Dɑfiti ɛì miɛkɛ. Kòo birɛ Yotɑmmuu sɔɔtɛ́ tikpɑ̀tì.
\s1 Sɑkɑrii nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 8 Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìtɑ̃ɑ̃ti nɛ̀ diniínnì miɛkɛ nkɛ Sedoboɑmmu birɛ Sɑkɑrii nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ bɛtɑ̃̀ɑ̃̀bɛ̀ bɛ̀kuɔ̀ kɛ bo Sɑmmɑrii. 
\v 9 Kòo ndɔɔri ti Yiɛ̀ nKuyie nyí dɔ́ dɛ̀ o yɛmbɛ̀ do dɔɔ̀rìmɛ̀, ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ. 
\v 10 Kɛ̀ Yɑbɛsi birɛ Sɑdummuu cómmú kɛ bo ò bɔ. Mɛm̀mɛ kóo ò potɛ́ Ibedeɑmmu ɛì kɛ́kuɔ, kɛ́fietɛ tikpɑ̀tì.
\p
\v 11 Sɑkɑrii kó tinɑ́ɑǹtì sɔnti wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\p
\v 12 Ti Yiɛ̀ nKuyie ndo nɑ̀kɛ́ tì nti Yeu kɛ dɔ̀: A yɑɑ̀bí nɛ̀ ɑ yɑɑ̀bíyúó bo nkɑ̀rì Isidɑyɛɛribɛ kpɑ̀ɑ̀tìkɑ̀rì ĩ́nkɛ̀.
\s1 Sɑdummu nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 13 Sudɑɑ kɔbɛ kóo kpɑ̀ɑ̀tì Osiɑsi kpɑ̀tì benni sipísìtɑ̃ɑ̃ti nɛ̀ diwɛínnì miɛkɛ nkɛ Yɑbɛsi birɛ Sɑdummu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́tɔ tikpɑ̀tì kɛ dɔ̀ otɑ̃̀nkù òmɑ́ɑ̀ kɛ bo Sɑmmɑrii. 
\v 14 Mɛm̀mɛ Kɑdi birɛ Mɛnnɑɛmmu ìtɛ́mɛ̀ Tidisɑɑ kɛ́kɔtɛ kɛ́tɑ Sɑmmɑrii kɛ́potɛ́ okpɑ̀ɑ̀tì kɛ́kuɔ kɛ́fietɛ tikpɑ̀tì.
\p
\v 15 Sɑdummu kó tinɑ́ɑǹtì sɔnti ò bɔ mmɛ̀ɛ̀ botí okpɑ̀ɑ̀tì dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\p
\v 16 Mɛm̀mɛ Mɛnnɑɛmmu domɛ̀ Tɑpuɑ ɛì kɛ́potɛ́ bɛ̀ɛ̀ kó dimɑ̀ɑ̀ bo di miɛkɛ nɛ̀ di tempɛ̃ nyimɔu kɔbɛ kɛ́tɑunnɛ̀ Tifisɑ kɛ́puotí bɛpɔupómpómbɛ̀ bɛ̀ɛ̀ kó dimɑ̀ɑ̀ dɛ̀ bo. Dɛ kó dihɛì kɔbɛ í yiemmɛ̀ koò kpetɛ́ yɛbòrɛ̀.
\s1 Mɛnnɑɛmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 17 Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìtɑ̃ɑ̃ti nɛ̀ diwɛínnì miɛkɛ nkɛ Kɑdi birɛ Mɛnnɑɛmmu nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie ntɛpíítɛ̀ kɛ bo Sɑmmɑrii. 
\v 18 Kòo dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi Nɛbɑti birɛ nSedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.
\p
\v 19 Weè kó dimɔ̀nnì ndi Asidii kóo kpɑ̀ɑ̀tì Pudi bɛ̀ domɛ̀ kɛ̀ Mɛnnɑɛmmuu ò duɔ́ ntimɑ́tì pɛ́ítì tɔ́nnì sipísìtɑ̃ɑ̃ti kòò bo ò teennɛ̀ kɛ́kpénkùnnɛ o kpɑ̀tì. 
\v 20 Mɛnnɑɛmmu do cuɔ́ dɛ kó timɑ́tì pɛ́ítì Isidɑyɛɛribɛ kó bɛkotibɑɑbɛ̀ borɛ̀ ndɛ bɑ́ wè yuu ĩ́nkɛ̀ mɛdítíbii nsipísìnùmmù kɛ́ dɛ̀ wɛ̃nnɛ́ kɛ́duɔ́ nhAsidii kóo kpɑ̀ɑ̀tì kòo bɛ̀ yóu kɛ́wɛ̃tɛ.
\p
\v 21 Mɛnnɑɛmmu dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 22 Kɛ̀ Mɛnnɑɛmmuu ku, kòo birɛ Pekɑyɑɑ sɔɔtɛ́ o kpɑ̀tì.
\s1 Pekɑyɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 23 Sudɑɑ kóo kpɑ̀ɑ̀tì Asɑdiɑ kpɑ̀tì benni sipísìnùmmù kpɛri miɛkɛ nkɛ Mɛnnɑɛmmu birɛ Pekɑyɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nyɛ̀dɛ́ɛ̀ kɛ bo Sɑmmɑrii. 
\v 24 Kòo dɔɔ̀ ti Yiɛ̀ nKuyie nyí dɔ́ dɛ̀ ò í nyóu mɛyɛi nNɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ. 
\v 25 Mɛm̀mɛ Demɑdiɑ birɛ Pekɑɑ wèè tɔu o kpɑ̀rìnɛntì, kòo cómmú kɛ bo ò bɔ, kòo mbo Sɑmmɑrii tɛkpɑ̀ɑ̀tìcĩ́ɛ̃̀tɛ̀ kó kudieku mɑkù, kòo ò potɛ́ kɛ́kuɔ, kɛ́kuɔnɛ̀ Adikɔbu nɛ̀ Adiyee, kɛ́nɛinɛ̀ Kɑdɑɑdi ɛì kɔbɛ sipísìnùmmù, ò mɛ nhò kùɔ kɛ́fietɛ tikpɑ̀tì.
\p
\v 26 Pekɑyɑɑ borimɛ sɔmmɛ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\s1 Pekɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 27 Sudɑɑ kɔbɛ kóo kpɑ̀ɑ̀tì Asɑdiɑ kpɑ̀tì benni sipísìnùmmù nɛ̀ didɛ́rínnì miɛkɛ nkɛ Demɑdiɑ birɛ, Pekɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́ntɔ tikpɑ̀tì kɛ dɔ̀ yɛbie nsipísìdɛ́ kɛ bo Sɑmmɑrii. 
\v 28 Kòo dɔɔ̀ ti Yiɛ̀ nKuyie nyí dɔ́ dɛ̀, ò í nyóu mɛyɛi Nɛbɑti birɛ Sedoboɑmmu do tɑnnɛ́ Isidɑyɛɛribɛ mɛ̀ɛ̀ miɛkɛ.
\p
\v 29 Isidɑyɛɛribɛ kóo kpɑ̀ɑ̀tì Pekɑɑ kpɑ̀tì miɛkɛ nkɛ Tekɑdɑti-Fɑdɑsɑɑ Asidii kóo kpɑ̀ɑ̀tì bɛ̀ domɛ̀ kɛ́fietɛ Nɛfutɑdii tenkɛ̀ kɛmɔu: Iyɔ̃ɔ̃ nɛ̀ Abɛdi-Bɛti-Mɑɑkɑ nɛ̀ Yɑnnɔɑ nɛ̀ Kedɛsi nɛ̀ Asɔɔ nɛ̀ yɛhɛkɛ̀ diɛyɛ̀ Kɑdɑɑdi nɛ̀ Kɑdidee, kɛ́pĩ́mmú bɛnìtìbɛ̀ kɛ́kònnɛ̀ Asidii. 
\v 30 Kɛ̀ Edɑɑ birɛ Osee cómmú kɛ bo bɔ nDemɑdiɑ birɛ Pekɑɑ kóò potɛ́ kɛ́kuɔ, kɛ́fietɛ tikpɑ̀tì.
\p
\v 31 Pekɑɑ dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\s1 Yotɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 27:1-3,7-9)
\p
\v 32 Isidɑyɛɛribɛ kpɑ̀ɑ̀tì Demɑdiɑ kpɑ̀tì benni dɛ́rì miɛkɛ nkɛ Osiɑsi birɛ Yotɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 33 Ò do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀nùmmù ndi, kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀kuɔ̀ kɛ bo Sedisɑdɛmmu. O yɔ̃ do tú Sɑdɔki kóo sɑpɑ̀ɑ̀ nwe kòo yètìrì tu Yedusɑɑ. 
\v 34 Kòo dɔɔ̀ ti Yiɛ̀ nKuyie ndɔ́ dɛ̀, ò do tũ̀nnɛ o cicɛ Osiɑsi borimɛ mmɛ weti weti. 
\v 35 Kɛ̀ yɛtɔ̀rɛ̀ nɛ́ nkpɑɑ́ bo, kɛ̀ bɛnìtìbɛ̀ feu iwũɔ̃ kɛ tuɔ̀ ntihúúntì yɛ borɛ̀.
\p Weè do keutɛ́ ti Yiɛ̀ nKuyie ncĩ́ɛ̃̀tɛ̀ kó dibòrì bɛ̀ tu dì Dibòrì diɛrì.
\p
\v 36 Yotɑmmu dɔɔ̀rìmɛ̀ sɔmmɛ, ò dɔ̀ɔ̀ dɛ̀ɛ̀ kó dimɑ̀ɑ̀, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 37 Dɛ kó yɛmɔ̀rɛ̀ miɛkɛ nkɛ ti Yiɛ̀ nKuyie nduɔ́mmɛ̀ kɛ̀ Sidii kóo kpɑ̀ɑ̀tì Desinni nɛ̀ Demɑdiɑ birɛ Pekɑɑ Isidɑyɛɛribɛ kóo kpɑ̀ɑ̀tì kɛ̀ bɛ̀ bo dokɛ́nɛ̀ Sudɑɑ kɔbɛ. 
\v 38 Kɛ̀ Yotɑmmuu kú kɛ̀ bɛ̀ɛ ò kũnnɛ́ o yɛmbɛ̀ fɔ̃ti Dɑfiti ɛì miɛkɛ. Kòo birɛ Aɑsii sɔɔtɛ́ o kpɑ̀tì.
\c 16
\s1 Aɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 28:1-27)
\p
\v 1 Demɑdiɑ birɛ Pekɑɑ kpɑ̀tì benni tɛpíítɛ̀ nɛ̀ diyiénnì miɛkɛ nkɛ Yotɑmmu birɛ Aɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 2 Aɑsi do yóó di tikpɑ̀tì kɛ mɔkɛ yɛbie nsipísìdɛ́ ndi kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀kuɔ̀ kɛ bo Sedisɑdɛmmu, bɑ́ ò í ndɔɔri ti Yiɛ̀ nKuyie ndɔ́ dɛ̀, ò í ntũ̀nnɛ o yɑ̀ɑ̀rì Dɑfiti kó mɛborimɛ. 
\v 3 Ò do tũ̀nnɛ Isidɑyɛɛribɛ kpɑ̀ɑ̀tìbɛ̀ borimɛ mmɛ kɛ́féútɛ́nɛ̀ ketíkɛ o birɛ kɛ́tuɔ, ibotí ti Yiɛ̀ nKuyie ndo bɛ̀ti ì kɛ́ bɛ̀ kɑ̀nnɛ, ì do dɔɔri ìì sɔkɛ botí. 
\v 4 Kòo nkɔù iwũɔ̃ kɛ tuɔ̀ ntihúúntì yɛtɑ̃rɛ̀ ĩ́nkɛ̀ nɛ̀ dɛtie nyɔ.
\p
\v 5 Mɛm̀mɛ Sidii kóo kpɑ̀ɑ̀tì Desinni nɛ̀ Demɑdiɑ birɛ Pekɑɑ Isidɑyɛɛribɛ kóo kpɑ̀ɑ̀tì bɛ̀ domɛ̀ Sedisɑdɛmmu ɛì kɛ́ dì pì, bɛ̀ mɛ nyí ndì nɑ. 
\v 6 Diì mɔ̀nnì dimɑ́ɑ̀ miɛkɛ nkɛ Sidii kóo kpɑ̀ɑ̀tì tɛ̃̀ńnɛ́mɛ̀ Edɔmmu kɔbɛ bɛ ɛì Edɑɑ, kɛ́bɛti Sudɑɑ kɔbɛ di miɛkɛ, kɛ̀ Edɔmmu kɔbɛɛ dì tɑ kɛ bo nɛ̀ yíenní.
\p
\v 7 Dɛ mɔ̀nnì kɛ̀ Aɑsii tɔ̃ nkɛ̀ bɛ̀ɛ nɑ́kɛ́ Asidii kóo kpɑ̀ɑ̀tì Tekɑdɑti-Fɑdɑsɑɑ kɛ dɔ̀ Sidii kóo kpɑ̀ɑ̀tì nɛ̀ Isidɑyɛɛribɛ kou bɛɛ̀ do mí nhɑ birɛ, ɑ kóo tɔ̃ntì, kɛ̀ n tu ɑ́ kɔtɛní kɛ́ n dɛɛtɛ́. 
\v 8 Ò mɛ nyĩ kɛ́túótɛ́ timɑ́tì pɛ́ítì nɛ̀ mɛsɔɔ nnɛ̀ dɛ̀ɛ̀ bo ti Yiɛ̀ nKuyie ncĩ́ɛ̃̀tɛ̀ kó ditɔu miɛkɛ nɛ̀ dɛ̀ɛ̀ bo tɛkpɑ̀ɑ̀tìcĩ́ɛ̃̀tɛ̀ miɛkɛ kɛ́duɔ́nko Asidii kóo kpɑ̀ɑ̀tì kɛ dɔ̀ wè ò pɑ̃mu. 
\v 9 Kɛ̀ Asidii kóo kpɑ̀ɑ̀tìi yie nkɛ́kɔtɛ kɛ́do Dɑmɑɑsi ɛì kɛ́ dì pɔ̀ntɛ kɛ́pĩ́mmú di nìtìbɛ̀ kɛ́kònnɛ̀ Kiidi, kɛ́kuɔ okpɑ̀ɑ̀tì Desinni.
\p
\v 10 Dɛ kó difɔ̃nkúò kòo kpɑ̀ɑ̀tì Aɑsii kɔtɛ Dɑmɑɑsi kɛ bo yɑ̀ Asidii kóo kpɑ̀ɑ̀tì Tekɑdɑti-Fɑdɑsɑɑ. Mɛm̀mɛ ò yɑ̀mɛ̀ diwũɔ̃tɔ̀nnì dìì bo Dɑmɑɑsi kɛ́wɑ̃ri dì dòmmɛ̀ weti weti, kɛ́duɔ́nko ikuɔ́ nìùtì Udii wèè bo Sedisɑdɛmmu. 
\v 11 Kòo mɑɑ́ diwũɔ̃tɔ̀nnì kɛ̀ dì ndò nhokpɑ̀ɑ̀tì Aɑsi ò duɔnní itié nDɑmɑɑsi kɛ yɛ̃ nwè dì mɑɑ́ kɛ̀ dì ndòmmɛ̀, kɛ́ dì mɑɑ́ kɛ́deè bɑ́ okpɑ̀ɑ̀tì Aɑsi mu nyí kònko. 
\v 12 Kòo ítɛ́ Dɑmɑɑsi kɛ́kònko kɛ́yɑ̀ diwũɔ̃tɔ̀nnì kɛ́dekɛ di ĩ́nkɛ̀, 
\v 13 kɛ́féútɛ́ o ɔ̃̀fɛ̀ kɛ́tuɔ nkɛ́tuɔnnɛ̀ tihúúntì nɛ̀ muyuo nkɛ cóú mmɛnɑɑ̀ mbɛ̀ tu mɛ̀ dìfɛ̃́ɛ̃̀ mu ĩ́nkɛ̀ kɛ́míɛ́tɛ́ diwũɔ̃tɔ̀nnì iwũɔ̃ ò fìé ì mɛtɑummɛ̀ kpɛyi i kó mɛyĩ̀ĩ̀, 
\v 14 kɛ́túótɛ́ disɔɔwũɔ̃̀ kó diwũɔ̃tɔ̀nnì dìì bo ti Yiɛ̀ nKuyie ncĩ́ɛ̃̀tɛ̀ ììkɛ̀ kɛ́kɔtɛ kɛ́ dì còńnɛ́ diwũɔ̃tɔ̀nnì pɑ̀nnì bɑkù yoú bíɛ́kɛ̀, 
\v 15 kɛ́deè kɛ́nɑ́kɛ́ ikuɔ́ nìùtì Udii kɛ dɔ̀: Diwũɔ̃tɔ̀nnì diɛrì ĩ́nkɛ̀ nkɛ ɑ yó ntuɔ̀mmɛ̀ di feu ìì wũɔ̃ dikṹnweńnì nɛ̀ kuyuoku, okpɑ̀ɑ̀tì kó iwũɔ̃ nɛ̀ o kó yɛpɑ̃rɛ̀ nɛ̀ kubotí kó iwũɔ̃ nɛ̀ ku kó yɛpɑ̃rɛ̀, muyuo nkpɛyɛ nɛ̀ dìfɛ̃́ɛ̃̀ bɛ̀ ɔ̃ɔ̃ yɔɔrɛ wè yɛpɑ̃rɛ̀ ĩ́nkɛ̀. A níí yóó di mmíɛ́tɛ́ iwũɔ̃ di kù feu ì kó mɛyĩ̀ĩ̀, kɛ̀ disɔɔwũɔ̃̀ kó diwũɔ̃tɔ̀nnì dii, míì yó nyɛ̃́ di kpɛti.
\p
\v 16 Kɛ̀ ikuɔ́ nìùtì Udii dɔ̀ɔ̀ okpɑ̀ɑ̀tì Aɑsi ò nɑ̀kɛ́ tì timɔu. 
\v 17 Dɛ kó difɔ̃nkúò kòo kpɑ̀ɑ̀tì Aɑsii kékɛ́ sinɑɑsɛ̃ĩ́ bɛ̀ do dɔ̀ɔ̀ sìì kó tifèntì Kuyie ncĩ́ɛ̃̀tɛ̀ kpɛ́í si kó yɛtɑ̀rɛ̀ kɛ́dɛi yɛbɔ yɛ̀ɛ̀ còḿmú sì ĩ́nkɛ̀, kɛ́cɔ̃ntɛ́ disɔɔwũɔ̃̀ kó kunɑnkú diɛkù isɔɔmɑ́tìnɑ̀ɑ̀kɛ kɔku, kɛ́ kù ĩ̀ńnɛ́ kɛtenkɛ̀ bɛ̀ cè kɛ̀ nɛ̀ yɛtɑ̃́rɛ̀, 
\v 18 kɛ́pɔntɛ diwũɔ̃tɔ̀nnì Kuyie ncĩ́ɛ̃̀tɛ̀ okpɑ̀ɑ̀tì do dɔunko dɛ̀ o kpɑ̀ɑ̀tìkɑ̀rì kɛ́kpetínnɛ́ okpɑ̀ɑ̀tì kó dibòrì.
\b
\p
\v 19 Aɑsi dɔɔ̀rìmɛ̀ sɔmmɛ ò dɔ̀ɔ̀ mɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 20 Kòo kú kɛ̀ bɛ̀ɛ ò kũnnɛ́ o yɛmbɛ̀ fɔ̃ti Dɑfiti ɛì miɛkɛ, kòo birɛ Esekiɑsii sɔɔtɛ́ o kpɑ̀tì.
\c 17
\s1 Osee nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 1 Sudɑɑ kóo kpɑ̀ɑ̀tì Aɑsi kpɑ̀tì benni tɛpíítɛ̀ nɛ̀ didɛ́rì miɛkɛ nkɛ Edɑɑ birɛ Osee nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛbie nyɛ̀wɛi kɛ bo Sɑmmɑrii, 
\v 2 kɛ́dɔ̀ɔ̀ ti Yiɛ̀ nKuyie nyí dɔ́ dɛ̀ ò nɛ́ í ntùɔ̀kɛ Isidɑyɛɛribɛ kpɑ̀ɑ̀tìbɛ̀ bɛ̀ɛ̀ ò niitɛ́nɛ̀ kɛ di tikpɑ̀tì. 
\v 3 Dɛ mɔ̀nnì kɛ̀ Asidii kóo kpɑ̀ɑ̀tì Sɑdimɑnɑsɑɑ kɔtɛní kɛ́do Osee kóò nɑ, kòo ò bɔ̀útɛ́ kɛ́ nhò yietì dɑ̀mpóò. 
\v 4 Kɛ̀ Asidii kóo kpɑ̀ɑ̀tìi bɑntɛ́ Osee dɑmmùmɛ̀ o cĩɛ̃ nyi, ò sɔ̃́ ndìì mɔ̀nnì Osee tɔ̃ mbɛnìtìbɛ̀ Sɑii ɛì Esibiti kóo kpɑ̀ɑ̀tì borɛ̀. Ò mɛ nyí yietí dɛ benni Asidii kóo kpɑ̀ɑ̀tì dɑ̀mpóò ò ɔ̃ nhò yietì mɛ̀ɛ̀ botí yɛbie ntɛyɛ̀. Mɛm̀mɛ Asidii kóo kpɑ̀ɑ̀tì duɔ́mmɛ̀ kɛ̀ bɛ̀ɛ pĩ́ nhOsee kɛ́boú mɛfĩmmɛ kɛ́kpetínnɛ́. 
\v 5 Kɛ̀ Asidii kɔbɛɛ ítɛ́ kɛ́pitɛ́ kɛtenkɛ̀ kɛmɔu, kɛ́kɔtɛ kɛ́pi Sɑmmɑrii ɛì kɛ́ ndì pi kɛ dɔ̀ yɛbie nyɛ̀tɑ̃ɑ̃ti. 
\v 6 Osee kpɑ̀tì benni wɛínnì miɛkɛ nkɛ Asidii kóo kpɑ̀ɑ̀tì nɑmɛ̀ Sɑmmɑrii kɛ́pĩ́mmú bɛnìtìbɛ̀ kɛ́kònnɛ̀ Asidii kɛ́ bɛ̀ kɑ̀nnɛ Adɑɑ ɛì nɛ̀ Abɔɔ kó mpɛɛ́mmɛ̀ Kosɑ̃ɑ̃ tempɛ̃ nnɛ̀ Mɛdii ɛkɛ̀.
\s1 Dɛ̀ɛ̀ te kɛ̀ Isidɑyɛɛribɛ kpɑ̀ɑ̀tìyuu pɔ̀ntɛ
\p
\v 7 Isidɑyɛɛribɛ yetɛ mɛ̀ɛ̀ kpɛ́í mbɛ Yiɛ̀ nKuyie nkùù bɛ̀ dènnɛní Esibiti miɛkɛ kɛ dɔ̀ɔ̀ mɛyɛi ndɛɛ̀ te kɛ̀ tiì mbɛ̀ tùɔ̀kɛní. Kuyie ndo bɛ̀ fìètɛnɛ̀ Esibiti kóo kpɑ̀ɑ̀tì nwe kɛ́ bɛ̀ dènnɛ kɛ̀ bɛ̀ɛ kù yóu kɛ́fíé yɛbɔkɛ̀. 
\v 8 Bɛ̀ do tũ̀nnɛ ibotí ti Yiɛ̀ nKuyie ndo bɛ̀ti ì kɛ́ bɛ̀ kɑ̀nnɛ i borimɛ mmɛ, 
\v 9 kɛ́ndɔɔri ti Yiɛ̀ nKuyie nyɛ̃ mbɛ̀ bɑ́ɑ́ dɔɔ̀ dɛ̀ kɛ́mɑɑ́ yɛtɔ̀rɛ̀ yɛhɛkɛ̀ yɛmɔu miɛkɛ kɛ́túótɛ́ bɛ̀ɛ̀ bɑ̀ɑ dihɛì bɛ kó yɛtuo kɛ́ntɔ kɛ́tuɔkɛnɛ̀ yɛhɛkɛ̀ diɛyɛ̀ iduotí fitɛ́ yɛ̀, 
\v 10 kɛ́fííkú yɛtɑ̃́rɛ̀, kɛ́fííkú itedɛí sitɑ̃ɑ̃́ simɔu ĩ́nkɛ̀ nɛ̀ yɛteyɔ yɛmɔu. 
\v 11 Kɛ̀ bɛ̀ nfeu iwũɔ̃ yɛtɔ̀rɛ̀ ibotí ti Yiɛ̀ nKuyie ndo bɛ̀ti ì kɛ́ bɛ̀ kɑ̀nnɛ, ì do dɔɔ̀rìmɛ̀, kɛ́dɔɔ̀ dɛ̀ɛ̀ í wenni kɛ̀ ti Yiɛ̀ nKuyie miɛkɛɛ bɛ̀ yɛ̀. 
\v 12 Bɛ̀ do feu yɛbɔkɛ̀ nyɛ ti Yiɛ̀ nKuyie mmɛ ndo bɛ̀ nɑ̀kɛ́mu kɛ dɔ̀ bɛ̀ bɑ́ɑ́ dɔɔ̀ dɛ kó kubotí.
\p
\v 13 Ti Yiɛ̀ nKuyie ndo duɔ́ nkɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ bɛ̀ cɑummu weti weti bɛmbɛ Isidɑyɛɛribɛ nɛ̀ Sudɑɑ kɔbɛ kɛ́ bɛ̀ nɑ́kɛ́ kɛ dɔ̀: Ceetɛnɛ̀ kɛ́yóu di yɛi nkɛ́tũnnɛ n tɑnnɔ̀ nɛ̀ n tié nnɛ̀ n kuɔ́ n duɔ́ nkɛ̀ m pɑ̃ɑ̃nɑ́ɑǹtì nɑ́ɑm̀bɛ̀ bɛmɔu duɔ́ ndɛ̀ di yɛmbɛ̀.
\p
\v 14 Bɛ̀ mɛ nyí nyie, kɛ̀ bɛ̀ɛ kpénkùnnɛ bɛ to kɛ̀ dɛ̀ɛ pɛ̃ɛ̃tɛ́ bɛ yɛmbɛ̀ do kpénkùnnɛ mɛ̀ɛ̀ botí bɛ kpɛyɛ, kɛ̀ bɛ̀ɛ yetɛ ti Yiɛ̀ nKuyie nkpɛti. 
\v 15 Bɛ̀ dootóo ti Yiɛ̀ nKuyie nkuɔ́ nyi nɛ̀ mɛtɑummɛ̀ kù do dɔ̀ɔ̀nɛ̀ mɛ̀ bɛ yɛmbɛ̀ nɛ̀ kù do bɛ̀ nɑ̀kɛ́ yɛ̀ɛ̀ tɑnnɔ̀, kɛ tũ̀nnɛ dɛtetìrɛ̀ kpɛrɛ, kɛ nɑɑ́ mbɛ mɔ́mmɔmbɛ dɛtetìrɛ̀. Bɛ̀ tũ̀nnɛ ibotí tɛì kó mɛborimɛ mmɛ Kuyie ndo yɛ̃ mbɛ̀ bɑ́ɑ́ tũnnɛ mɛ̀. 
\v 16 Bɛ̀ do dootóomu ti Yiɛ̀ nKuyie ntɑnnɔ̀ pɑ́íí, kɛ́dɔɔ̀ isɔɔmɑ́tìnɑ̀ɑ̀kɛ ìdɛ́ì kɛ́fíí nkutedɔú kɛ́nninku kɛ dɔu ndiyiè nɛ̀ otɑ̃̀nkù nɛ̀ siwɑ̃̀ɑ̃ kɛ feu iwũɔ̃ dibɔɔ̀ Bɑɑdi. 
\v 17 Kɛ tuɔ̀ mbɛ bí initidɑɑì nɛ̀ initipòì kɛ pɑ̃ũ̀ kɛ dɔɔri munitinɔ̀ntɔ̃mmú, kɛ́duɔ́ mbɛmɑ́ɑ̀ mɛyɛi ndɔɔ̀rìmù miɛkɛ, kɛ̀ ti Yiɛ̀ nKuyie mmiɛkɛɛ bɛ̀ yɛ̀. 
\v 18 Kɛ mɛ̀nkɛɛ bɛ̀ yɛ̀ mɛdiɛ̀ nkɛ̀ kùu bɛ̀ kɛi nku borɛ̀ kɛ̀ dɛ̀ nkpɑɑ́ Sudɑɑ botí kɔbɛ mɑ́ɑ̀ ndi.
\p
\v 19 Weè Sudɑɑ kɔbɛ múnkɛ í ntũ̀nnɛ ti Yiɛ̀ nKuyie ntɑnnɔ̀, kɛ́tũnnɛ Isidɑyɛɛribɛ do mɔkɛ mɛ̀ɛ̀ mɑntímɛ̀ bɛ kó dikpɑ̀ɑ̀tìyuu miɛkɛ. 
\v 20 Nɛ̀ dɛ kpɛ́í nkɛ̀ ti Yiɛ̀ nKuyie ndootóo Isidɑyɛɛribɛ bɛmɔu kɛ́ bɛ̀ ɑ̃nnɛ́ ifɛi, kɛ́duɔ́ nkɛ̀ ibotí tɛìi bɛ̀ nɑ kɛ́nfekù bɛ kpɛrɛ, kɛ̀ kùu bɛ̀ kɛi nku ììkɛ̀.
\b
\p
\v 21 Ti Yiɛ̀ nKuyie nkuù do bɛ̀ totɛ́ kɛ́dɛitɛ Isidɑyɛɛribɛ kɛ́cɑ̃́nnɛ́nɛ̀ Dɑfiti kó tɛcĩ́ɛ̃̀tɛ̀, kɛ̀ Isidɑyɛɛribɛɛ pĩ́ nNɑbɑti birɛ Sedoboɑmmu tikpɑ̀tì, kòo fétìnnɛ Isidɑyɛɛribɛ kɛ́ bɛ̀ tɑnnɛ́ mɛyɛi ndiɛmɛ̀ miɛkɛ. 
\v 22 Kɛ̀ Isidɑyɛɛribɛ ntũ nSedoboɑmmu do dɔ̀ɔ̀ mɛ̀ɛ̀ yɛi, bɛ̀ í mmɛ̀ yóu. 
\v 23 Kɛ̀ ti Yiɛ̀ nKuyie nYɑɑ́ mbɛ̀ kɛinnɛ̀ ku borɛ̀ kɛ́ndònnɛ̀ kù do tì nɑ̀kɛ́mɛ̀ nɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ nɔ̀ miɛkɛ. Mɛm̀mɛ kù bɛ̀ cíɛmmɛ̀ ku tenkɛ̀ ĩ́nkɛ̀ kɛ̀ bɛ̀ɛ kɔtɛ Asidii kɛ kɛ mbo nɛ̀ yíenní.
\s1 Kuyie ndènnɛmɛ̀ Isidɑyɛɛribɛ kɛ̀ ibotí tɛì kɑri bɛ tenkɛ̀
\p
\v 24 Kɛ̀ Asidii kóo kpɑ̀ɑ̀tìi duɔ́ nkɛ̀ Bɑbidɔnni kɔbɛ nɛ̀ Kutɑɑ kɔbɛ nɛ̀ Awɑ kɔbɛ nɛ̀ Amɑti kɔbɛ nɛ̀ Sefɑwɑyimmu kɔbɛ kɛ̀ bɛ̀ɛ kɔtɛní kɛ́mbo Sɑmmɑrii kó yɛhɛkɛ̀ miɛkɛ kɛ́fietɛ Isidɑyɛɛribɛ ɛkɛ̀ bɛ̀ do bo yɛ̀ Sɑmmɑrii kɛ́mbo. 
\v 25 Bɛ̀ kɑ̀ri dìì mɔ̀nnì dɛ kó yɛhɛkɛ̀ miɛkɛ kɛ í ntũ nti Yiɛ̀ nKuyie nkɛ̀ kùu duɔ́ nkɛ̀ yɛcìrícìrɛ̀ mbɛ̀ pĩĩ. 
\v 26 Kɛ̀ bɛ̀ɛ tɔ̃ nkɛ̀ bɛ̀ɛ nɑ́kɛ́ Asidii kóo kpɑ̀ɑ̀tì kɛ dɔ̀: A tɔ bɛ̀ɛ̀ nìtìbɛ̀ kɛ kɑ̀nnɛ Sɑmmɑrii bɛ̀ í yɛ̃́ bɛ̀ bɑ̀ɑ́mmɛ̀ Kuyie dɛɛ̀ te kɛ̀ kù duɔnní yɛcìrícìrɛ̀ kɛ̀ yɛ̀ bɛ̀ pĩĩ. 
\v 27 Dɛ mɔ̀nnì kɛ̀ Asidii kóo kpɑ̀ɑ̀tìi duɔ́ ndinùù kɛ dɔ̀: Túótɛ́nɛ̀ m pĩ̀ḿmúní bɛ̀ɛ̀ nìtìbɛ̀ Sɑmmɑrii bɛ miɛkɛ Kuyie nkuɔ́ nìùtì mɔù kóò tɛ̃̀ńnɔ́ɔ kóo nkɛ̀ bo kɛ́ bɛ̀ bɛnkɛ bɛ̀ bɑ̀ɑ́mmɛ̀ Kuyie. 
\v 28 Mɛm̀mɛ kɛ̀ bɛ̀ɛ dɛitɛ ti Yiɛ̀ nKuyie nkuɔ́ nìùbɛ̀ miɛkɛ òmɔù kɛ́duɔ́nko kòo mbo Betɛɛdi kɛ bɛ̀ bɛnkú bɛ̀ bɑ̀ɑ́mmɛ̀ Kuyie.
\b
\p
\v 29 Bɑ́ kùù botí kù do dɔ̀ɔ̀ tɛbɔɔtenkɑɑnìtɛ̀ ntɛ kɛ́fíí nyɛtuo bɛ̀ do mɑɑ́ yɛ̀ Sɑmmɑrii kó yɛtɔ̀rɛ̀ yɛ miɛkɛ. Bɑ́ kùù botí kù do mɛ ndɔ̀ɔ̀ ku ɛì kù bo dìì miɛkɛ. 
\v 30 Kɛ̀ Bɑbidɔnni kɔbɛ mmɔkɛ bɛ kpɛtɛ kɛ̀ tɛ̀ tú Sukɔti-Bɛnnɔti, kɛ̀ Kutɑ ɛì kɔbɛ kpɛtɛ ntú Nɛdikɑdi, kɛ̀ Amɑti ɛì kɔbɛ kpɛtɛ tú Asimɑti. 
\v 31 Kɛ̀ Awɑ ɛì kɔbɛ kpɛsi tú Nibɑsi nɛ̀ Tɑditɑki, kɛ̀ Sefɑwɑyimmu ɛì kɔbɛ kpɛsi ntú Adɑdɑmɑdɛki nɛ̀ Annɑmmɛdɛki, kɛ̀ bɛ̀ sì kɔ̀ù ibí kɛ tuɔ̀. 
\v 32 Kɛ̀ bɛ̀ ntũ mbɑkɛ ti Yiɛ̀ nKuyie nkɛ nɛ́ wɑɑ́ mbɛ botí miɛkɛ ikuɔ́ nìùbɛ̀ bɛ̀ɛ̀ yó mbo bɛ̀ mɑɑ́ yɛ̀ɛ̀ tuo kɛ pĩ́ mmubɔɔtɔ̃mmú nɛ̀ bɛ kpɛ́í. 
\v 33 Kɛ̀ bɛ̀ ntũ nti Yiɛ̀ nKuyie nkɛ feunɛ̀ bɛ bɔkɛ̀ bɛ̀ do yɛ̀ feu mɛ̀ɛ̀ botí bɛ ciɛ bɛ̀ do boní kɛ̀, kɛ̀ bɛ̀ bɛ̀ tɔní.
\p
\v 34 Nɛ̀ yíenní bɛ̀ kpɑɑ́ tũ mmɛɛ̀ mɑntímɛ̀, bɛ̀ í tũ nti Yiɛ̀ nKuyie nsɛ́i bɛ̀ mɛ nyí tũ mbɛ kó ikuɔ́, bɛ̀ mɛ nyí tũ nti Yiɛ̀ nKuyie nkuɔ́ kù do duɔ́ nyì Sɑkɔbu bí, kù do yu ì kɛ dɔ̀ Isidɑyɛɛribɛ. 
\v 35 Ti Yiɛ̀ nKuyie ndo bɛ̀ dɔ̀ɔ̀nɛ̀ mɛtɑummɛ̀ mmɛ kɛ́ bɛ̀ nɑ̀kɛ́ ku nùù kɛ dɔ̀: Di bɑ́ mmɔkɛ yɛbɔkɛ̀, di bɑ́ nninku yɛ ììkɛ̀, di bɑ́ nyɛ̀ dɔú ndi mɛ mbɑ́ nyɛ̀ feu iwũɔ̃. 
\v 36 Di dò nkɛ́mbɑ́ɑ́ mmí ndi Yiɛ̀ nKuyie nku, mí nwèè di dènnɛní Esibiti nɛ̀ muwɛ̃rímú. Di dò nkɛ́ndé míì mɑ́ɑ̀ ndi, kɛ nni ntũ nkɛ n feu iwũɔ̃. 
\v 37 Dí mpĩ́ n di nɑ̀kɛ́ tì nɛ̀ n tié, nnɛ̀ n tɑnnɔ̀ nɛ̀ n kuɔ́ kɛ́ ndɛ̀ tũ nsɑ̃́ɑ̃̀, di bɑ́ɑ́ fíé yɛbɔkɛ̀. 
\v 38 Di bɑ́ɑ́ yɛ̃̀ mmɛtɑummɛ̀ n di dɔ̀ɔ̀nɛ̀ mɛ̀, kɛ́fíé yɛbɔkɛ̀. 
\v 39 Di ntũ mmí ndi Yiɛ̀ nKuyie m mɑ́ɑ̀ ndi kɛ̀ nní ndi dɛɛrí nɛ̀ di dootitɔbɛ̀.
\p
\v 40 Bɛ̀ mɛ nyí nyie nkɛ̀ bɛ̀ bɑɑ nkpɑɑ́ kɛ tũ mbɛ̀ do mɔkɛ mɛ̀ɛ̀ mɑntímɛ̀ nɛ̀ dimɔ̀nnì. 
\v 41 Mɛm̀mɛ kɛ̀ bɛ̀ ntũ nti Yiɛ̀ nKuyie nkɛ feunɛ̀ yɛbɔkɛ̀, kɛ̀ bɛ bíi mɛ nsɔɔtɛ́ nɛ̀ bɛ yɑɑ̀bío. Kɛ mɛ ndɔɔri nɛ̀ yíenní.
\c 18
\s1 Esekiɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 29:1-2. 31:1)
\p
\v 1 Isidɑyɛɛribɛ kpɑ̀ɑ̀tì Edɑɑ birɛ Osee kpɑ̀tì benni tɑ̃ɑ̃́nnì miɛkɛ nkɛ Aɑsi birɛ Esekiɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì. 
\v 2 Ò do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀nùmmù ndi, kɛ́ntɔ tikpɑ̀tì kɛ dɔ̀ yɛbie nsipísìdɛ́ nɛ̀ yɛ̀wɛi kɛ bo Sedisɑdɛmmu. Sɑkɑrii birɛ Abi weè do tú o yɔ̃. 
\v 3 Kòo ndɔɔri ti Yiɛ̀ nKuyie ndɔ́ dɛ̀ o yɑ̀ɑ̀rì Dɑfiti do dɔɔ̀rìmɛ̀ sósó. 
\v 4 Weè do pùɔ nyɛtɔ̀rɛ̀ kɛ́puɔ nsitenkɑɑnìi kɛ́kɔ̃ṹ Asedɑɑ kutedɔú kɛ́bɔ́kɛ́ fɛsɔɔmɑ́tìwɑ̀ɑ̀fɛ̀ Mɔyiisi do dɔ̀ɔ̀ fɛ̀, Isidɑyɛɛribɛ do kpɑɑ́ kɛ fɛ̀ tùɔ̀mmu ntihúúntì kɛ́tuɔkɛnní dɛ mɔ̀nnì, kɛ̀ bɛ̀ fɛ̀ yu kɛ tú fɛsɔɔmɑ́tìwɑ̀ɑ̀fɛ̀. 
\v 5 Esekiɑsi do dɔ́mu mɛdiɛ̀ ti Yiɛ̀ nKuyie nyIsidɑyɛɛribɛ tũ nkù kɛ́pɛ̃ɛ̃tɛ́ Sudɑɑ kpɑ̀ɑ̀tìbɛ̀ sɔmbɛ, bɛ̀ɛ̀ ò niitɛ́nɛ̀ nɛ̀ bɛ̀ɛ̀ ò tũ̀nní. 
\v 6 Kòo ntɑunɛ̀ ti Yiɛ̀ nKuyie nweti weti, ò í nkù yɑtɛnɛ̀ kɛ́ntũ nKuyie ntɑnnɔ̀ kù do duɔ́ nyɛ̀ Mɔyiisi. 
\v 7 Kɛ̀ ti Yiɛ̀ nKuyie nni nhò bonɛ̀ kòò dɔɔri dɛ̀ dɛmɔu yie. Kòo yetɛ Asidii kóo kpɑ̀ɑ̀tì kpɛti kɛ tɛ̃́nkɛ í nhò bùɔ́. 
\v 8 Weè do potɛ́ Fidisitɛ̃ɛ̃bɛ kɛ́fietɛ bɛ tenkɛ̀ kɛ́túótɛ́ bɛ̀ɛ̀ bɑɑ dihɛì bɛ kó yɛtuo kɛ́ntɔ kɛ́tuɔkɛnɛ̀ yɛhɛkɛ̀ iduotí fitɛ́ yɛ̀.
\s1 Sidii kóo kpɑ̀ɑ̀tì Sɑdimɑnɑsɑɑ pimɛ̀ Sɑmmɑrii
\p
\v 9 Sudɑɑ kɔbɛ kóo kpɑ̀ɑ̀tì Esekiɑsi kpɑ̀tì benni nɑɑnnì miɛkɛ nkɛ Isidɑyɛɛribɛ kóo kpɑ̀ɑ̀tì Edɑɑ birɛ Osee kó tikpɑ̀tì benni yiénnì miɛkɛ dò nkɛ, Asidii kóo kpɑ̀ɑ̀tì Sɑdimɑnɑsɑɑ domɛ̀ Sɑmmɑrii ɛì kɛ́ dì pi. 
\v 10 Kɛ̀ dɛ̀ mmɔkɛ yɛbie nyɛ̀tɑ̃ɑ̃ti kòo di nɑ kɛ sɔ̃́ nhEsekiɑsi bo o kpɑ̀tì benni kuɔ́nnì, kɛ̀ Isidɑyɛɛribɛ kóo kpɑ̀ɑ̀tì Osee bo o kpɑ̀tì benni wɛínnì. Dɛ benni ndi bɛ̀ pɔ̀ntɛmɛ̀ Sɑmmɑrii. 
\v 11 Mɛm̀mɛ Asidii kóo kpɑ̀ɑ̀tì pĩ̀ḿmúmɛ̀ Isidɑyɛɛribɛ kɛ́kònnɛ̀ Asidii kɛ́ bɛ̀ kɑ̀nnɛ Adɑɑ, Abɔɔ kó mpɛɛ́mmɛ̀ Kosɑ̃ɑ̃ tempɛ̃ nnɛ̀ Mɛdii ɛkɛ̀. 
\v 12 Bɛ̀ do í yie mmɛ̀ɛ̀ kpɛ́í nkɛ ti Yiɛ̀ nKuyie nnɑ́ɑǹtì, kɛ́tɔ̃tɛ mɛtɑummɛ̀ kù do nɑ̀kɛ́ tìì kó dimɑ̀ɑ̀ ku kóo tɔ̃ntì Mɔyiisi bɛ̀ do í kèńtɛ́ tìmɑtì, bɛ̀ mɛ nyí nyie nkɛ dɔ̀ɔ̀ tìmɑtì.
\s1 Asidii kóo kpɑ̀ɑ̀tì Sɑ̃nsedibu domɛ̀ Sudɑɑ kɔbɛ tenkɛ̀
\r (Wéntɛ́ Esɑii 36:1 nɛ̀ 2 Bɛkpɑ̀ɑ̀tìbɛ̀ tɔ̃mmú 32:1)
\p
\v 13 Sudɑɑ kɔbɛ kóo kpɑ̀ɑ̀tì Esekiɑsi kpɑ̀tì benni tɛpíítɛ̀ nɛ̀ dinɑɑnnì miɛkɛ nkɛ Asidii kóo kpɑ̀ɑ̀tì Sɑ̃nsedibu domɛ̀ Sudɑɑ ɛkɛ̀ iduotí fitɛ́ yɛ̀ kɛ́ yɛ̀ fìètɛ.
\p
\v 14 Dɛ mɔ̀nnì kɛ̀ Sudɑɑ kɔbɛ kóo kpɑ̀ɑ̀tìi tɔ̃ mbɛnìtìbɛ̀ Dɑkiisi ɛì kɛ̀ bɛ̀ɛ nɑ́kɛ́ Asidii kóo kpɑ̀ɑ̀tì kɛ dɔ̀: Okpɑ̀ɑ̀tì tu ò cɑ̀ɑ̀rɛ̀mu ɑ ò yóu kɛ tɛ̃́nkɛ bɑ́ɑ́ ò dokɛ́nɛ̀, kɑ̀ɑ ò bekɛ tì, ò yóó tì dɔ̀ɔ̀mu.
\p Kɛ̀ Asidi kóo kpɑ̀ɑ̀tì dɔ̀, wèe ò duɔ́ ntimɑ́tì pɛ́ítì cìdóòbɛ̀ sikɔupísìwɛi (9000), mɛsɔɔ ncìdóòbɛ̀ sikɔusìwɛi (900). 
\v 15 Kɛ̀ Esekiɑsii túótɛ́ timɑ́tì pɛ́ítì tìì do bo ti Yiɛ̀ nKuyie ncĩ́ɛ̃̀tɛ̀ kó ditɔu miɛkɛ nɛ̀ tɛkpɑ̀ɑ̀tìcĩ́ɛ̃̀tɛ̀ miɛkɛ timɔu. 
\v 16 Kòo pɔntɛ ti Yiɛ̀ nKuyie ncĩ́ɛ̃̀tɛ̀ kó yɛcɑ̀kɛ̀ kɛ́dɑtɛ mɛsɔɔ nwenwe Esekiɑsi o mɔ́mmuɔ nhò do dɑ̀nnɛmɛ̀ tidɑbɛɛtì tìì pĩ̀ńnɛ̀ yɛcɑ̀kɛ̀. Kòo dɛ̀ duɔ́ ndɛmɔu Asidii kóo kpɑ̀ɑ̀tì.
\s1 Wèè ni Senɑkedibɛ ɑ̃ɑ̃pɔ̀mbɛ̀ nɑ̀kɛ́ tì
\r (Wéntɛ́ Esɑii 36:2-22 nɛ̀ 2 Bɛkpɑ̀ɑ̀tìbɛ̀ tɔ̃mmú 32:9-16)
\p
\v 17 Kɛ̀ Asidii kóo kpɑ̀ɑ̀tì mbo Dɑkiisi kɛ́dɛitɛ wèè bɑkɛ́ o kó fɛhɑ̃ɑ̃pɔ̀nnɑfɛ nɛ̀ wèè bɑkɛ́ tɛkpɑ̀ɑ̀tìcĩ́ɛ̃̀tɛ̀, nɛ̀ wèè bɑ̀ɑ wenwe okpɑ̀ɑ̀tì o mɔ́mmuɔ, nɛ̀ bɛhɑ̃ɑ̃pɔ̀mbɛ̀ pɛ́u, kɛ́ bɛ̀ tɔ̃nko Sedisɑdɛmmu okpɑ̀ɑ̀tì Esekiɑsi borɛ̀. Kɛ̀ bɛ̀ɛ tuɔkoo kɛ́bɑ́tɛ́ kɛ́ntɔ́kɛ́nɛ̀ diyɑɑ̀hɔ́útɑ̃́rì kó kucɛ, mɛniɛ mpũɔ̃̀ nkùù nɛ́cɛ kɛ tɑɑ̀ dihɛì kubiriku. 
\v 18 Bɛ̀ dɛ mbo kɛ dɔ̀ bɛ̀ dɔ́ kɛ́yɑ̀ okpɑ̀ɑ̀tì kɛ̀ Idikiyɑ birɛ Ediɑkimmu wèè kòtí tɛkpɑ̀ɑ̀tìcĩ́ɛ̃̀tɛ̀ miɛkɛ kɛ̀ weè nɛ́ yɛ̀nní nɛ̀ Sebunɑ opɑ́tíwɑ̃ɑ̃̀tì nɛ̀ Asɑfu birɛ Soɑɑ wèè tɔu dihɛì kó yɛpɑ́tɛ. 
\v 19 Wèè bɑkɛ́ fɛhɑ̃ɑ̃pɔ̀nnɑfɛ kòo bɛ̀ nɑ̀kɛ́ kɛ dɔ̀: Nɑ́kɛ́nɛ̀ okpɑ̀ɑ̀tì Esekiɑsi kɛ dɔ̀ okpɑ̀ɑ̀tì diɛwè Asidii kóo kpɑ̀ɑ̀tì tu ti dɑ bekɛ kɛ dɔ̀: A tɑ̃́ bɑ kɛ kɑri? 
\v 20 Yɑ́ɑ̀ ɑ yɛ̀mmɛ̀ dò ntinɑ́ɑǹtì dɛtetìrɛ̀ kpɛti tú itié nyi nɛ̀ dikɔ̃m̀bùɔ̀ ɑ kpɛ́í nkɑ̀ɑ bo ò dòkɛ́nɛ̀? Yɑ́ɑ̀ ɑ yɛ̀mmɛ̀ nɑɑtinɛ̀ we, kɑ̀ɑ dɑ̀ɑ́tí kɛ yetɛ wenwe Asidii kóo kpɑ̀ɑ̀tì kpɛti? 
\v 21 Ò tu ò yɛ̃́mu kɛ dò nhɑ yɛ̀mmɛ̀ nɑɑtinɛ̀ Esibiti nwe ɑ nɛ́ í yɛ̃́ kɛ dò nhEsibiti dò ndipènnì dìì pɔ̀ntɛ dìndi, kɛ̀ wèè di pĩ ndìì ò kɔ̀utɛ. Esibiti kóo kpɑ̀ɑ̀tì mɛ ndɔɔri bɛ̀ɛ̀ ò duɔ́ mbɛ yɛ̀mmɛ̀.
\p
\v 22 Kɛ̀ dɛ̀ yɛ̀mmɛ̀ di bo yĩ́ di yɛ̀mmɛ̀ nɑɑtinɛ̀ di Yiɛ̀ nKuyie ndi tũ nkù dɛ̀ nɛ́ í tú kuù kó yɛtɔ̀rɛ̀ nyɛ nɛ̀ yɛwũɔ̃tɔ̀rɛ̀ Esekiɑsi pùɔmmɛ̀ o mɔ́mmuɔ nkɛ nɑ̀kɛ́ Sudɑɑ kɔbɛ nɛ̀ Sedisɑdɛmmu kɔbɛ kɛ tú bɛ̀ nfeu bɛ wũɔ̃ diwũɔ̃tɔ̀nnì dìì bo Sedisɑdɛmmu mɑ́ɑ̀? 
\v 23 Kɑ̀ɑ yɛ̀mmɛ̀ dò nnɛ̀ n cicɛ Asidii kóo kpɑ̀ɑ̀tì di mɑ̀, ɑ dɔ̀ fĩ́ɛ̃́ũ̀! Kòo dɑ duɔ́ nsisɛ̃ĩ́ sikɔupísìdɛ́ (2000) kɛ̀ nsɑ̀ kɑ̀ɑ bo pɛ́tɛ́ bɛ̀ɛ̀ bo sì dèkɛ! 
\v 24 A í yóó nɑ kɛ́bɑɑo n kóo kpɑ̀ɑ̀tì kó bɛtɔ̃mbɛ̀ miɛkɛ bɑ́ omɑ́ɑ̀ bɑ́ ketíkɛ wèè tu osɑ́m̀pɔ́ù bɛ miɛkɛ. Kɑ̀ɑ yɛ̀mmɛ̀ nɛ́ nɑɑtinɛ̀ Esibiti yóó dɑ duɔ́mmɛ̀ sisɛ̃ĩ́ nɛ̀ si dèèbɛ̀! 
\v 25 Di yɛ̀mmɛ̀ dò nhò kɔ̀tɛní nɛ̀ omɑ́ɑ̀ ndi kɛ bo pɔntɛ di nhɛì bɑ́ di Yiɛ̀ nKuyie nyí dɔ́ɑ̀ɑ̀? Kuù ò nɑ̀kɛ́ kɛ tú ò dò nkɛ́ dì pɔ̀ntɛ.
\p
\v 26 Dɛ mɔ̀nnì Idikiyɑ birɛ Ediɑkimmu nɛ̀ Sebunɑɑ nɛ̀ Soɑɑ, kɛ̀ bɛ̀ɛ nɑ́kɛ́ wèè ni Asidii kó fɛhɑ̃ɑ̃pɔ̀nnɑfɛ kɛ dɔ̀: Ti dɑ bɑ́ɑ́mmu nti nɑ́ɑ́nnɛ̀ Arɑmu ɛì kɔbɛ kó tinɑ́ɑǹtì, bɛ̀ɛ̀ bo kuduotí ĩ́nkɛ̀ kɛ̀ bɛ̀ bɑ́ nyo.
\p
\v 27 Wèè bɑkɛ́ Asidii kó bɛhɑ̃ɑ̃pɔ̀mbɛ̀ kòo dɔ̀: N kóo kpɑ̀ɑ̀tì í n tɔ̃nní kɛ̀ m bo tì nɑ̀kɛ́ fɔ̃́ nnɛ̀ ɑ kóo kpɑ̀ɑ̀tì díì mɑ́ɑ̀. Ò pètinkɛ n tɔ̃nní kɛ̀ m̀ bo tì nɑ̀kɛ́ bɛnìtìbɛ̀ mbɛ bɛ̀ɛ̀ bo kuduotí ĩ́nkɛ̀, díndi nɛ̀ bɛ̀, di yóó di di míntì kɛ́yɑ̃̀ di yɛ̃́nkúmɛ̀.
\p
\v 28 Mɛm̀mɛ wèè ni Asidii kó fɛhɑ̃ɑ̃pɔ̀nnɑfɛ ò còḿmúmɛ̀ kɛ́pĩɛ̃kɛ́ nɛ̀ Sudɑɑ kɔbɛ kó tinɑ́ɑǹtì kɛ dɔ̀: Kéntɛ́nɛ̀ Asidii kóo kpɑ̀ɑ̀tì diɛwè tu mù: 
\v 29 Ò tu Esekiɑsi bɑ́ɑ́ bennɛ́ kɛ́ ndi soú nhò í yóó nɑ kɛ́ di fietɛ o nɔu miɛkɛ. 
\v 30 Esekiɑsi bɑ́ ndi soú nkɛ tú di duɔ́ ndi yɛ̀mmɛ̀ di Yiɛ̀ nKuyie nkɛ̀ kù yóó di dɛɛtɛ́. Bɑ́ Asidii kɔbɛ bɑ́ɑ́ pɔntɛ dihɛì. 
\v 31 Asidii kóo kpɑ̀ɑ̀tì tu dí bɑ́ɑ́ yie nhEsekiɑsi kpɛti, di tɑunnɛ̀ wenwe Asidii kóo kpɑ̀ɑ̀tì, kɛ̀ dɛ̀ɛ yie nkɛ̀ di nyo mbɑ́ wè o pɑku kó tidiitì kɛ cɑ́ɑ́ fínyĩ̀ nɛ̀ fìkíè dɛ bɛ kɛ yɔ̃ mbɑ́ wè o bintɛ niɛ, 
\v 32 kɛ kémmúnɛ̀ ò bo tuɔkɛnímɛ̀ kɛ́ di túótɛ́ kɛ́kònnɛ̀ kɛ́kɑnnɛ dihɛì dìì dònnɛ̀ di kpɛri, kɛ̀ tidiitì nɛ̀ dɛtie mbɛ̀ tu dɛ̀ fínyĩ̀ nɛ̀ bɛ̀ tu dɛ̀ odìfíè bɛ̀ dii dɛ̀ɛ̀ bɛ mɛkɔsɑ̀ɑ̀mɛ̀ kɛ̀ dɛ̀ bo, kɛ̀ mɛcekùɔ̀ mmúnkɛ bo di miɛkɛ, kɛ̀ dí mbo dɛborɛ̀ kɛ bɑ́ɑ́ kú diɛ ndɛtetìrɛ̀. Di bɑ́ɑ́ kéntɛ́ Esekiɑsi di nɑ́ɑ́ ntì kɛ tú Kuyie nyóó di dɛɛtɛ́. Ò di fétìnkomu. 
\v 33 Yɛhɛkɛ̀ tɛyɛ̀ kó yɛbɔkɛ̀ nɑ kɛ bɛ̀ dɛɛtɛ́ kɛ̀ Asidii kóo kpɑ̀ɑ̀tì í bɛ̀ pĩ̀ńnɑ́ɑ̀? 
\v 34 Amɑti nɛ̀ Adipɑdi kó yɛbɔkɛ̀ borɛ? Sefɑdifɑimmu nɛ̀ Enɑɑ nɛ̀ Iwɑ dɛ kpɛyɛ borɛ? Yɛ̀ dɛɛtɛ́ Sɑmmɑrii kɔbɛ kòò í bɛ̀ nɑɑ̀? 
\v 35 Ɔ̃̀ndi ɛì kó dibɔɔ̀ nɑ kɛ dɛɛtɛ́ di kó kɛtenkɛ̀ kòò kɛ̀ yóu kɛ̀ di Yiɛ̀ nKuyie nnɛ́ bo nɑ kɛ́dɛɛtɛ́ Sedisɑdɛmmu?
\b
\p
\v 36 Kɛ̀ bɛ̀ ndò nkɑ́rɛ́ bɑ́ òmɔù í mbɛ̀ tɛ̃̀ńnɛ́ tìmɑtì. Kɛ yɛ̃́ okpɑ̀ɑ̀tì Esekiɑsi do bɛ̀ nɑ̀kɛ́mɛ̀ kɛ tú bɛ̀ bɑ́ɑ́ ò tɛ̃̀ńnɛ́ tìmɑtì. 
\v 37 Kɛ̀ Ikidiyɑ birɛ Ediɑkimmu wèè kòtí tɛkpɑ̀ɑ̀tìcĩ́ɛ̃̀tɛ̀ nɛ̀ opɑ́tíwɑ̃ɑ̃̀tì Sebunɑ nɛ̀ Asɑfu birɛ Soɑɑ wèè tɔu dihɛì kó yɛpɑ́tɛ kɛ̀ bɛ̀ɛ kɛ̃rí bɛ yɑ̀ɑ̀tì kɛ́wɛ̃too Esekiɑsi borɛ̀, kóò nɑ̀kɛ́ wèè bɑkɛ́ Asidii kó fɛhɑ̃ɑ̃pɔ̀nnɑfɛ ò bɛ̀ nɑ̀kɛ́ tì.
\c 19
\s1 Esekiɑsi beémmɛ̀ Kuyie mpɑ̃ɑ̃nɑ́ɑǹtì nɑ́ɑǹtò Esɑii o kpɛti
\r (Wéntɛ́ Esɑii 37:1-7)
\p
\v 1 Okpɑ̀ɑ̀tì Esekiɑsi ti kèè dìì mɔ̀nnì kòo yɛ̀mmɛ̀ɛ cɑɑ̀rɛ̀ kòo kɛ̃rí o yɑ̀ɑ̀tì kɛ dɑ́ɑ́tí kufɔ̀ɔ̀tɔ̃̀nkù kɛ́ntɑti ti Yiɛ̀ nKuyie ncĩ́ɛ̃̀tɛ̀, 
\v 2 kɛ́tɔ̃ nhEdiɑkimmu wèè kòtí tɛkpɑ̀ɑ̀tìcĩ́ɛ̃̀tɛ̀ nɛ̀ o pɑ́tíwɑ̃ɑ̃̀tì Sebunɑ nɛ̀ ikuɔ́ nìùbɛ̀ bɛ̀ɛ̀ tu bɛkótíbɛ̀ kɛ dɔ̀ bɛ̀ ndɑ́ɑ́tí tifɔ̀ɔ̀tɔ̃̀ntì kɛ́kɔtɛ Amɔti birɛ Esɑii Kuyie mpɑ̃ɑ̃nɑ́ɑǹtì nɑ́ɑǹtò borɛ̀. 
\v 3 Kóò nɑ̀kɛ́ kɛ dɔ̀: Okpɑ̀ɑ̀tì Esekiɑsi tu tí dɑ nɑ́kɛ́ kɛ dɔ̀: Yíe nkó diyiè tu mɛyɛǹcɑɑ̀rìmɛ̀ kpɛri ndi, ti pɑ̀kɛ́mu, Kuyie nkuù ti potɛ́ kɛ ti di ifɛi. Ti kpɛrɛ dònnɛ̀ kupɛitɛ́yonku ɔ̃ɔ̃ ítɛ́ mɛ̀mmɛ onitipòkù kɛ̀ muwɛ̃rímú nɛ́ ò dòńtɛ́ ò bo nɔrímɛ̀ kɛ̀ dɛbirɛɛ yɛ̀nní. 
\v 4 Kɛ̀ dɛ̀ nɑɑti ti Yiɛ̀ nKuyie nhɑ tũ nkù bo nkeè Asidii kóo kpɑ̀ɑ̀tì tɔ̃nní wèè ni o ɑ̃ɑ̃pɔ̀mbɛ̀, kòo kù sɑ̃̀ḿmú mɛ̀ɛ̀ botí kɛ bo ò potɛ́ yɛsɑ̃́ɑ̃̀mbɛ̀ ò kù sɑ̃̀ḿmú yɛ̀ɛ̀ kpɛ́í. A nɛ́ kù bɑ̀ńtɛ̀ ku kɔbɛ bɛ̀ɛ kpɑɑ́ bɛ kpɛ́í.
\p
\v 5 Kòo kpɑ̀ɑ̀tì Esekiɑsi kó yɛtɔ̃rɛ̀ɛ tuɔkoo Esɑii borɛ̀. 
\v 6 Kòo yɛ̀ nɑ̀kɛ́ kɛ dɔ̀: Ti Yiɛ̀ nKuyie ntu dí nɑ́kɛ́ okpɑ̀ɑ̀tì Esekiɑsi kɛ dɔ̀ o kɔ̃m̀bùɔ̀tì bɑ́ nduò ò kèè tìì nɑ́ɑǹtì nɛ̀ yɛsɑ̃́ɑ̃̀mbɛ̀ Asidii kóo kpɑ̀ɑ̀tì tɔ̃nní kɛ̀ bɛ̀ kù sɑ̃̀ḿmú yɛ̀ kpɛ́í. 
\v 7 Ti Yiɛ̀ nKuyie ntu kuù mɔ́mmɔnku yóó ò ɑ̃nnɛ́ mɛyɛ̀mmɛ̀ mɛ̀ɛ̀ bo nte kòo keè tinɑ́ɑǹtì mɑtì kɛ́kò nho ciɛ kɛ̀ kùu duɔ́ nkɛ̀ bɛ̀ɛ kɛ̀ nhò kùɔ.
\s1 Asidii kóo kpɑ̀ɑ̀tì wɑ̃̀ri dìì pɑ́tíri kɛ bo donnɛ́ Sedisɑdɛmmu kɔbɛ kɔ̃m̀bùɔ̀tì
\r (Wéntɛ́ Esɑii 37:8-13 nɛ̀ 2 Bɛkpɑ̀ɑ̀tìbɛ̀ tɔ̃mmú 32:17)
\p
\v 8 Mɛm̀mɛ wèè ni Asidii kó bɛhɑ̃ɑ̃pɔ̀mbɛ̀ ò kèèmɛ̀ Asidii kóo kpɑ̀ɑ̀tì ìtɛ́mɛ̀ Dɑkiisi kɛ kɔ̀tɛ kɛ do Dibunɑ mudoò, kòo kɛ nhò sɔ̃̀ńtóo. 
\v 9 Asidii kóo kpɑ̀ɑ̀tì do kèè Etiopii kóo kpɑ̀ɑ̀tì Tiidɑkɑɑ kɔ̀riní mɛ̀mmɛ kɛ bo ò do mudoò. Kòo yíɛ́ tɔ̃ nkɛ dɔ̀ bɛ̀ɛ nɑ́kɛ́ Esekiɑsi kɛ dɔ̀: 
\v 10 Asidii kóo kpɑ̀ɑ̀tì tu ti dɑ nɑ́kɛ́ kɛ dɔ̀: Kuyie nhɑ duɔ́ nkù ɑ yɛ̀mmɛ̀ kù bɑ́ɑ́ dɑ soutɛ́ kɑ̀ɑ yɛ̀mmɛ̀ ndò nhò í yóó pɔntɛ Sedisɑdɛmmu. 
\v 11 A mɔ́mmuɔ nhɑ kèèmu wenwe Asidii kóo kpɑ̀ɑ̀tì ò dɔ̀ɔ̀ dɛ̀ yɛhɛkɛ̀ tɛyɛ̀, ò yɛ̀ kùɔmɛ̀ yɛmɔu pɑ́íí, kɛ̀ fɔ̃́ nyɛ̀mmɛ̀ nɛ́ dò nkù bo dɑ coonnɑɑ̀? 
\v 12 Kosɑ̃ɑ̃ nɛ̀ Anɑɑ kpɛri nɛ̀ Desɛfu kpɛri nɛ̀ Edennibɛ bɛ̀ɛ̀ do bo Tedɑsɑɑ dɛ kó ibotí yɛmbɛ̀ ò kùɔ ì i bɔkɛ̀ nɑ kɛ ì dɛɛtɑ́ɑ̀? 
\v 13 Amɑti nɛ̀ Adipɑdi nɛ̀ Dɑyii nɛ̀ Sefɑdifɑimmu nɛ̀ Enɑɑ nɛ̀ Ifɑ yɛ kpɑ̀ɑ̀tìbɛ̀ bo dɛ?
\s1 Esekiɑsi bɑ́ntɛ̀mɛ̀ Kuyie
\r (Wéntɛ́ Esɑii 37:14-20)
\p
\v 14 Kɛ̀ Esekiɑsii cɔutɛ́ dipɑ́tíri yɛtɔ̃rɛ̀ nɔu miɛkɛ kɛ́kɑɑ nkɛ́deè kɛ́tɑ ti Yiɛ̀ nKuyie ncĩ́ɛ̃̀tɛ̀ kɛ́ dì pĩ̀ntɛ ti Yiɛ̀ nKuyie nyììkɛ̀, 
\v 15 kɛ́ kù bɑ́ntɛ̀ kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù, fɔ̃́ nwèè kɑ̀ri ɑ tɑummɛ̀ tɔu bɛĩ́nkɛ̀mbɑ̀rìbɛ̀ fèntì ĩ́nkɛ̀, fɔ̃́ɔ̃̀ bɑkɛ́ yɛkpɑ̀ɑ̀tìyɔ yɛmɔu yɛ̀ɛ̀ bo kɛtenkɛ̀. Fɔ̃́ nwèè dɔ̀ɔ̀ kɛtenkɛ̀ nɛ̀ kɛĩ́nkɛ̀. 
\v 16 Ti Yiɛ̀ nKuyie n dɑ bɑ́ɑ́mmu kéntɛ́ kɛ́keè! Sĩ́nnɛ́ní kɛ́yɑ̀! A bomu fɔ̃́ nti Yiɛ̀ nKuyie, keè Sennɑkedibu dɑ sɑ̃́ɑ̃́mmɛ̀. 
\v 17 Ti Yiɛ̀ nKuyie! Mɔ́mmuɔ nwe nhAsidii kó bɛkpɑ̀ɑ̀tìbɛ̀ dèèmɛ̀ ibotí tɛì kó yɛhɛkɛ̀ yɛmɔu. 
\v 18 Kɛ cɔ́u mbɛ bɔɔtenkɑɑnìi, bɛnìtìbɛ̀ bɛɛ̀ sì dɔ̀ɔ̀, sì í dɑ dònnɛ̀ fɔ̃́ nKuyie. Sì tu idɛí nyi nɛ̀ yɛtɑ̃́rɛ̀. 
\v 19 Ti Yiɛ̀ nKuyie nhɑ ti dɛɛtɛ́nɛ̀ Sennɑkedibu kɛ̀ dɛ̀ɛ yie nkɛ̀ kɛtenkɛ̀ kó yɛkpɑ̀ɑ̀tìyɔ yɛmɔuu bɑntɛ́ fɔ̃́ɔ̃̀ tumɛ̀ ti Yiɛ̀ nKuyie nhɑmɑ́ɑ̀.
\s1 Esɑii nɑ̀kɛ́mɛ̀ Esekiɑsi ò bɑ̀ńtɛ̀ Kuyie nkɛ̀ kù ò tɛ̃̀ńnɛ́ tì
\r (Wéntɛ́ Esɑii 37:21-35)
\p
\v 20 Mɛm̀mɛ Amɔti birɛ Esɑii tɔ̃mmɛ̀ kɛ bɛ̀ɛ nɑ́kɛ́ Esekiɑsi kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù tu kù kèèmu ɑ kù kuɔ́nnɛ̀mɛ̀ Asidii kóo kpɑ̀ɑ̀tì Sennɑkedibu kpɛ́í. 
\v 21 Ntɛ kù n nɑ̀kɛ́ tì o kpɛ́í:
\q1 Mí ndi Yiɛ̀ nKuyie mmíì tu:
\q1 Siyɔ̃ɔ̃ kó dɛsɑpùmbirɛ dɑ sènkɛ̀rìmu,
\q1 kɛ dɑ dɑú kɛ dɑ cokù,
\q1 kɛ̀ Sedisɑdɛmmu kó dɛsɑpùmbirɛ dɑ cɔ̃́ṹ.
\q1
\v 22 Wenninwe ɑ sɑ̃̀ḿmúmɛ̀?
\q1 Wenninwe ɑ ommúmɛ̀?
\q1 Wenninwe ɑ sèémmɛ̀ fɛnɔ̀nfɛ̀?
\q1 Kuyie nyIsidɑyɛɛribɛ tũ nkùɑ̀?
\q1
\v 23 A bɑɑ tɔ̃nní ɑ tɔ̃rɛ̀ kɛ̀ yɛ̀ sɑ̃̀ḿmú mí ndi Yiɛ̀ nKuyie nkuɑ̀?
\q1 Kɛ nɑ̀kɛ́ kɛ́ tú ɑ nɑɑsɛ̃ĩ́ kpeńnì mɛ̀ɛ̀ kpɛ́í nte kɑ̀ɑ dèkɛ Dimɑɑ tɑ̃rì yómmɛ̀,
\q1 kɛ tɑ Dimɑɑ túúkù cuokɛ̀ kɛ kɔ̃ũ dɛtekperɛ̀ nɛ̀ bɛ̀ tu dɛ̀ sìpɛ̀rɛ́sì.
\q1 Kɛ tùɔ̀kɛnɛ̀ ditɑ̃rì yóntɛ́nyómmɛ̀ dɛtie nsũdɑɑ̀?
\q1
\v 24 Kɛ bɛ́i nkɛ tú ɑ keúmu sibií bɛtɔbɛ̀ ciɛ,
\q1 kɛ yɑ̃̀ bɛtɔbɛ̀ tenkɛ̀ kó mɛniɛ,
\q1 kɛ nɑ ɑ nɑɑ̀cɛ̀tɛ̀ mɛmɑ́ɑ̀ kɛ ĩ̀tínnɛ́ Esibiti kó ikó nyìì tukúnɛ̀ kukó ndiɛkù Niiriɑ̀?
\q1
\v 25 A nɛ́ í yɛ̃́ kɛ dò mmí nKuyie mmíì pĩ́ ndɛ kó mutɔ̃mmú.
\q1 Nɛ̀ dimɔ̀nnì kótírì miɛkɛ nkɛ
\q1 n tɑ̃ɑ̃tɛ́mɛ̀ kɛ yɛ̃́ n dò nkɛ́dɔɔ̀mɛ̀,
\q1 kɛ yóó mɛ̀ dɔɔ̀ di mmɔ̀nnì.
\q1 Míì do dɑ tɑ̃ɑ̃tɛ́,
\q1 kɑ̀ɑ bo puɔ nyɛhɛkɛ̀ iduotí fitɛ́ yɛ̀ kɛ́ yɛ̀ dɛ̀ítɛ̀.
\q1
\v 26 Kɛ̀ dɛ kó yɛhɛkɛ̀ kɔbɛɛ dóntɛ́ muwɛ̃rímú,
\q1 kɛ̀ dɛ̀ɛ bɛ̀ kpeí kɛ̀ bɛ̀ɛ di ifɛi,
\q1 kɛ́sɑ̃́ɑ̃́tɛ́nɛ̀ timútì,
\q1 bɛ̀ í yó ncɑ̃̀ɑ̃́nnɛ̀ mɛmúyɔɔ̀mmɛ̀,
\q1 bɛ̀ yóó dòntɛnɛ̀ tiyoyiɛnti nti,
\q1 nɛ̀ timútì tìì ɔ̃ɔ̃ yɛ̀ tɛcɑ́dopòtɛ̀ ĩ́nkɛ̀ kɛ kpeío bɑ́ ti mɔ̀nnì í tùɔ̀kɛ.
\q1
\v 27 A kpɛti mɑtì í bo tìì m biininɛ̀, mí nKuyie.
\q1 Kɑ̀ɑ kɑ̀ri n yɛ̃́mu,
\q1 kɑ̀ɑ yɛ̀tì n yɛ̃́mu,
\q1 kɑ̀ɑ mɛ ntɑti n yɛ̃́mu,
\q1 kɑ̀ɑ miɛkɛ m pɛikɛ n yɛ̃́mu.
\q1
\v 28 A n yɛ̀ mɛ̀ɛ̀ kpɛ́í nkɛmiɛkɛ,
\q1 kɛ̀ tɛpɔ̀tɛ̀ dɑ dɛutɛ́,
\q1 dɛɛ̀ te kɛ̀ n yóó tɔ̃nnɛ́ ɑ ɔ̃nnì mumɑ́mɑ́ɑ́
\q1 kɛ́ɑ̃nnɛ́ ɑ nùù tisɑ̃ndɑ́ntì,
\q1 kɛ́ dɑ dɛtɛ kɛ́poonnɛ̀ ɑ nɑcɛfɔ̃̀tɛ̀ kɛ́kpɛ̃nnɛ́ ɑ ciɛ.
\b
\p
\v 29 Fɔ̃́ nhEsekiɑsi, ntɛ dɛ̀ɛ̀ yó ntú mɛbɛnkùmɛ̀: Di mbenni di yóó di tidiitì tìì ɛ̃nkɛ́ tìnti, dibenni tɛrì kɛ́di tididenti, dibenni tɑ̃ɑ̃́nnì kɛ́buɔtí kɛ́kɔ̃ṹ, kɛ́fííkú dɛtie mbɛ̀ tu dɛ̀ fínyĩ̀ kɛ́tɔ̃ũ dɛ bɛ. 
\v 30 Dɛ mɔ̀nnì Sudɑɑ kɔbɛ bɛ̀ɛ̀ bo nkpɑɑ́, bɛ cĩ̀ɛ̃ mbo tɑ kɛtenkɛ̀ kɛ̀ bɛ bɑkɛɛ pɛitɛ́ yɛbɛ. 
\v 31 Sedisɑdɛmmu nwe bɛ̀ɛ̀ bo yentɛ́ bɛ̀ yɛ̀tìnímɛ̀ Siyɔ̃ɔ̃ tɑ̃rì ndi bɛ̀ yɛ̀tìnímɛ̀ ti Yiɛ̀ nKuyie Mpɑkɛdɑɑ ti dɔ́ mɛ̀ɛ̀ kpɛ́í nkɛ̀ dɛ̀ dɛu te, kòò yóó mɛ̀ dɔ̀ɔ̀. 
\v 32 Kɛ̀ tìì tukúnɛ̀ Asidii kóo kpɑ̀ɑ̀tì, ntɛ ti Yiɛ̀ nKuyie nnɑ̀kɛ́ tì o kpɛ́í. Kù tu ò í tɑti di nhɛì, ò bɑ́ɑ́ dì tɑ̃ũ ipie, ò mɛ mbɑ́ɑ́ di do nɛ̀ tidɔpììtì, yoo wèe ɔnnɛ́ di duotí mutɑ̃́ɑ̃́ nkɛ́nɑ kɛ́tɑ. 
\v 33 Mí ndi Yiɛ̀ nKuyie mbɛ́immu kɛ tú ò í tɑti di nhɛì. Ò wɛ̃ti kɛ bo poo nhò kètɛ́ní kùù cɛ nku kɛ́kònnɛ̀. 
\v 34 N yó nkɑ̃nkɛ́mu di nhɛì kɛ́ dì dɛɛtɛ́ n yètìrì kpɛ́í nnɛ̀ n kóo tɔ̃ntì Dɑfiti kpɛ́í.
\s1 Sennɑkedibu yĩɛ̃kɛmɛ̀ dikpɑ̀nnì kɛ kò
\r (Wéntɛ́ Esɑii 37:36-38 nɛ̀ 2 Bɛkpɑ̀ɑ̀tìbɛ̀ tɔ̃mmú 32:21-22)
\p
\v 35 Dɛ kó kɛyènkɛ̀ kɛ̀ ti Yiɛ̀ nKuyie nkó ditɔ̃nnìi kɔtɛní Asidii kɔbɛ kó dihɑ̃ɑ̃pɔ̀nkɑrì, kɛ́kuɔ bɛnìtìbɛ̀ tɛkɔupípíítɛ̀ nɛ̀ sikɔupísìni (18000). Kɛ̀ dɛ̀ɛ wentɛ́ kɛ̀ bɛ̀ nsɔ̃́ mbɛcíríbɛ̀ bɛɛ̀ mɑ́ɑ̀ duɔ́ duɔ́. 
\v 36 Dɛ mɔ̀nnì kɛ̀ Asidii kóo kpɑ̀ɑ̀tì Sennɑkedibuu uutɛ́ o ɑ̃ɑ̃pɔ̀nkɑrì kɛ́ítɛ́ kɛ́kò nkɛ́mbo Ninifu. 
\v 37 Mɛm̀mɛ ò tɑmɛ̀ diyiè mɑrì o bɔɔ̀ Nisidɔki tou kɛ́nnínkú di ììkɛ̀, kòo bí Adɑdɑmɑdɛki nɛ̀ Sɑdetisɛɛ, kɛ̀ bɛ̀ɛ ò kɔ̃ṹ disiè kɛ́kuɔ kɛ́cokɛ́ kɛ́kɔtɛ Adɑdɑti ɛì, kòo birɛ Ɛdɑ-Adonnii sɔɔtɛ́ o kpɑ̀tì.
\c 20
\s1 Esekiɑsi muɔkɛmɛ̀ kɛ̀ Kuyie nhò miɛkùnnɛ
\r (Wéntɛ́ Esɑii 38:1-8 nɛ̀ 2 Bɛkpɑ̀ɑ̀tìbɛ̀ tɔ̃mmú 32:24)
\p
\v 1 Dɛ kó dimɔ̀nnì ndi Esekiɑsii muɔkɛmɛ̀ kɛ́duúnnɛ̀ mukṹṹ nkɛ̀ Kuyie mpɑ̃ɑ̃nɑ́ɑǹtì nɑ́ɑǹtò Amɔti birɛ Esɑii kɔtɛ o borɛ̀, kóò nɑ̀kɛ́ kɛ dɔ̀: Ti Yiɛ̀ nKuyie ntú ɑ tũntɛ ɑ cĩ́ɛ̃̀tɛ̀ kpɛti, ɑ í yóó foutɛ ɑ yóó kúmu.
\p
\v 2 Kɛ̀ Esekiɑsii tũntɛ o ììkɛ̀ kɛ́cuó nkumɑrí, kɛ́kuɔ́nnɛ̀ ti Yiɛ̀ nKuyie nkɛ dɔ̀: 
\v 3 Áú! Ti Yiɛ̀ nKuyie. N dɑ bɑ́ɑ́mmu, n kuɔ́ mmɛsémmɛ̀. A yɛ̃́mu n dɑ tũmmɛ̀ nɛ̀ n yɛ̀mmɛ̀ mɛmɔu kɛ dɔɔri ɑ dɔ́mɛ̀.
\p Ò mɛ nyĩ́ kɛ́kuɔ́.
\p
\v 4 Kɛ̀ Esɑii nkpɑɑ́ kɛ mu nyí yɛ̀ tɛkpɑ̀ɑ̀tìcĩ́ɛ̃̀tɛ̀ kó kudɑ̀nkù, kɛ̀ ti Yiɛ̀ nKuyie nhò bɛ́innɛ̀ kɛ dɔ̀: 
\v 5 Wɛ̃tɛ kɛ́nɑ́kɛ́ n nìtìbɛ̀ kóo kpɑ̀ɑ̀tì Esekiɑsi kɛ tú: N yɛ̃ mmí ndi Yiɛ̀ nKuyie nho yɑ̀ɑ̀rì Dɑfiti do tũ nkù, n kèèmu ò n kuɔ́nnɛ̀mɛ̀ kɛ yɑ̀ o nɔnniɛti, kɛ yóó ò miɛkùnnɛ diyiè tɑ̃ɑ̃́nnì yiè, kòo tɑ n cĩ́ɛ̃̀tɛ̀ miɛkɛ. 
\v 6 M bo ò yìɛ́ yɛbie ntɛpíítɛ̀ nɛ̀ yɛ̀nùmmù, kóò dɛɛtɛ́ wenwe nɛ̀ di nhɛì, kɛ̀ Asidii kóo kpɑ̀ɑ̀tì bɑ́ɑ́ dì nɑ. N yó nkɑ̃nkɛ́mu di nhɛì n yètìrì kpɛ́í nnɛ̀ n kóo tɔ̃ntì Dɑfiti kpɛ́í.
\b
\p
\v 7 Kɛ̀ Esɑii dɔ̀, bɛ̀ɛ nɑntɛ fìkíè kó yɛbɛ kɛ́wɑɑrɛ okpɑ̀ɑ̀tì mɔ ndɛ̀, kòo miɛtɛ́.
\p
\v 8 Dɛ̀ do sɔ̃́ nhEsekiɑsi bekɛmu Esɑii ò yóó yɑ̀ mù kɛ́bɑntɛ́ kɛ dɔ̀ ti Yiɛ̀ nKuyie nyóó ò miɛkùnnɛ diyiè tɑ̃ɑ̃́nnì yiè kòo wɛ̃tɛ kɛ́tɑ ku cĩ́ɛ̃̀tɛ̀.
\p
\v 9 Kɛ̀ Esɑii dɔ̀: Ntɛ ɑ yóó yɑ̀ dɛ̀ kɛ́bɑntɛ́ kɛ dò nti Yiɛ̀ nKuyie nyóó dɔɔ̀ kù bɛ́i ntì, mɛdɛ́ɛ̀ mbo totɛ yɛdɛtìsɑ̀kɛ̀ tɛpíítɛ̀ tɛ̃mɛ̀. A dɔ́ mɛ̀ɛ̀ ketɛ́ dɛ ììkɑ̀ɑ kɛ̀ dɛ fɔ̃nkúò? 
\v 10 Kɛ̀ Esekiɑsi dɔ̀: Dɛ̀ í yóùnɛ̀ mɛdɛ́ɛ̀ mmɛ̀ bo kétɛ́mɛ̀ dɛ ììkɛ̀, n dɔ́ mɛ̀ɛ̀ botí difɔ̃nkúò ndi.
\p
\v 11 Mɛm̀mɛ Esɑii bɑ̀ńtɛ̀mɛ̀ ti Yiɛ̀ nKuyie nkɛ̀ mɛdɛ́ɛ̀ mbotirɛ kɛ́tuɔkɛ yɛdɛtìsɑ̀kɛ̀ tɛpíítɛ̀.
\s1 Esekiɑsi cɔutɛ́mɛ̀ Bɑbidɔnni kó yɛhɛikɛ̀ntɔ̃rɛ̀
\r (Wéntɛ́ Esɑii 39)
\p
\v 12 Dɛ kó yɛmɔ̀rɛ̀ miɛkɛ nkɛ Bɑbidɔnni kóo kpɑ̀ɑ̀tì Bɑdɑdɑnni birɛ Mɛdodɑki-Bɑdɑnni tɔ̃nnɛ̀nnímɛ̀ bɛnìtìbɛ̀ yɛpɑ̃rɛ̀ kɛ̀ bɛ̀ bo dɔu nhEsekiɑsi o muɔkɛ mɛ̀ɛ̀ kpɛ́í. 
\v 13 Kɛ̀ Esekiɑsi bɛ̀ cɔutɛ́ kɛ́ bɛ̀ bɛnkɛ o kpɑ̀tì sɔ̀ri kùù dieku nɛ̀ timɑ́tì pɛ́ítì nɛ̀ mɛsɔɔ nnɛ̀ tihúúntì tibotí tibotí nɛ̀ mɛkɔsɑ̀ɑ̀mɛ̀, kɛ́ bɛ̀ bɛnkɛnɛ̀ o kpɑ̀rìnɛntì sɔ̀ri dɛ̀. Ò kó yɛsɔ̀rɛ̀ yɛmɔu cɛ̃́nkɛ, dɛ̀mɑrɛ̀ í nsùɔ́ nhò í bɛ̀ bɛnkɛ dɛ̀ tɛkpɑ̀ɑ̀tìcĩ́ɛ̃̀tɛ̀ miɛkɛ, yoo o mɔ́mmuɔ nho cĩ́ɛ̃̀tɛ̀.
\p
\v 14 Dɛ̀ yĩ mɛmmɛ kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Esɑii kɔtoo o cĩ́ɛ̃̀tɛ̀ kóò bekɛ kɛ dɔ̀: Bɛnìtìbɛ̀ bɛ̀ɛ̀ kɔ̀tɛní ɑ cĩ́ɛ̃̀tɛ̀ bɛ̀ yɛ̃ mbɑ? Bɛ̀ yɛ̀nní dɛ? Kɛ̀ Esekiɑsi dɔ̀: Bɛ̀ bonní dihɛì dɛ́tirì ndi Bɑbidɔnni. 
\v 15 Kɛ̀ Esɑii dɔ̀: Bɛ̀ yɑ̀ bɑ ɑ kpɑ̀ɑ̀tìcĩ́ɛ̃̀tɛ̀ miɛkɛ? Kɛ̀ Esekiɑsi dɔ̀: Dɛ̀mɑrɛ̀ í sùɔ́ n yí bɛ̀ bɛnkɛ dɛ̀ n sɔ̀rɛ̀ yɛmɔu miɛkɛ.
\p
\v 16 Dɛ mɔ̀nnì kɛ̀ Esɑii dɔ̀: Kéntɛ́ ti Yiɛ̀ nKuyie ntu n dɑ nɑ́kɛ́ tì. 
\v 17 Ti Yiɛ̀ nKuyie ntu: Dɛ̀ kpɑɑnímu kɛ̀ bɛ̀ bo túótɛ́ dɛ̀ɛ̀ kó dimɑ̀ɑ̀ bo ɑ kpɑ̀ɑ̀tìcĩ́ɛ̃̀tɛ̀ miɛkɛ kɛ́kònnɛ̀ Bɑbidɔnni, kɛ́túótɛ́ ɑ yɛmbɛ̀ do koú dɛ̀, kɛ́ntɔ kɛ́tuɔkɛnɛ̀ní yíe ndɛ̀mɑrɛ̀ í yó nkpɑɑ́. 
\v 18 A mɔ́mmuɔ nhɑ bí ɑ pɛitɛ́ ì bɛ̀ bo ì pĩ̀ḿmú kɛ́kònnɛ̀ Bɑbidɔnni, kɛ́ bɛ̀ fɔ̃̀mmu kɛ́ bɛ̀ pĩ̀ńnɛ̀ tɛkpɑ̀ɑ̀tìcĩ́ɛ̃̀tɛ̀ miɛkɛ mutɔ̃mmú.
\p
\v 19 Kɛ̀ Esekiɑsi dɔ̀: Ti Yiɛ̀ nKuyie nduɔ́ nkɑ̀ɑ n nɑ̀ɑ́ ntì wennimu. Nɛ̀ o yɛ̀mmɛ̀ miɛkɛ kɛ nɛ́ tú: Kɛ̀ kunɑɑtí cɛ̃́nkɛ bo n kó dimɔ̀nnì kɛ̀ tìmɑtì í n kɔɔ́nnɛ̀.
\b
\p
\v 20 Esekiɑsi dɔɔ̀rìmɛ̀ sɔmmɛ, ò dɔ̀ɔ̀ dɛ̀ɛ̀ kó dimɑ̀ɑ̀, ò do mɔkɛ dìì kɔ̃m̀bùɔ̀ nɛ̀ ò mɑɑ́ mɛ̀ɛ̀ botí kubinku dihɛì kɛ́keú kukondɔú kɛ́kpɛ̃nnɛ́ní mɛniɛ ndihɛì, dɛndɛ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 21 Kòo kú kòo birɛ Mɑnɑnsee sɔɔtɛ́ o kpɑ̀tì.
\c 21
\s1 Mɑnɑnsee nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 33:1-10,18-20)
\p
\v 1 Mɑnɑnsee do yóó di tikpɑ̀tì kɛ mɔkɛ yɛbie ntɛpíítɛ̀ nɛ̀ yɛ̀dɛ́ɛ̀ ndi kɛ́ntɔ tikpɑ̀tì kɛ dɔ̀ yɛbie nsipísìnùmmù nɛ̀ yɛ̀nùmmù kɛ bo Sedisɑdɛmmu, o yɔ̃ yètìrì do tú Efisibɑ nwe. 
\v 2 Kòo dɔɔ̀ ti Yiɛ̀ nKuyie nyí dɔ́ dɛ̀. Ò do tũ̀nnɛ ibotí kù do bɛ̀ti ì kɛ́ bɛ̀ kɑ̀nnɛ ì do dɔɔri ìì sɔkɛ nyi, 
\v 3 kɛ́wɛ̃tɛ kɛ́mɑɑ́ o cicɛ Esekiɑsi do pùɔ nyɛ̀ɛ̀ wũɔ̃tɔ̀rɛ̀, yɛtɔ̀rɛ̀ borɛ̀ kɛ́mɑɑ́ dibɔɔ̀ Bɑɑdi yɛtɔ̀rɛ̀ kɛ́cíɛ́kɛ́ Asedɑɑ tedɔú kɛ́fíí, kɛ́nninku kɛ dɔu ndiyiè nɛ̀ otɑ̃̀nkù nɛ̀ siwɑ̃̀ɑ̃ Isidɑyɛɛribɛ kóo kpɑ̀ɑ̀tì Akɑbu do dɔ̀ɔ̀mɛ̀. 
\v 4 Kòo mɑɑ́ yɛbɔɔwũɔ̃tɔ̀rɛ̀ ti Yiɛ̀ nKuyie ncĩ́ɛ̃̀tɛ̀ miɛkɛ Sedisɑdɛmmu, kù do bɛ̀ nɑ̀kɛ́ kɛ dɔ̀ kù dɔ́ ku yètìrì mborɛ̀. 
\v 5 Kòo mɑɑ́ ti Yiɛ̀ nKuyie nkó tidɑ̀ntì tidɛ́ miɛkɛ yɛwũɔ̃tɔ̀rɛ̀, diyiè nɛ̀ otɑ̃̀nkù nɛ̀ siwɑ̃̀ɑ̃ dɛ kpɛ́í, 
\v 6 kɛ́kuɔ o birɛ kɛ́tuɔ, kɛ́nkɔrì tipɑ̃ɑ̃tì kɛ nɑ́ɑ́nnɛ̀ yɛbɔkɛ̀, kɛ wɑɑ̀ mbɛnitinɔ̀mbɛ̀ bɛ̀ɛ̀ yu bɛcíríbɛ̀, nɛ̀ bɛ̀ɛ̀ bourí tinùbootì kɛ́ndɔɔri mɛdɔɔ̀rìmɛ̀ pɛ́u ti Yiɛ̀ nKuyie nyí dɔ́ dɛ̀ kɛ̀ ku miɛkɛɛ ò yɛ̀. 
\v 7 Kòo tɑnnɛ́ tɛbɔɔtenkɑɑnìtɛ̀ Asedɑɑ Kuyie ncĩ́ɛ̃̀tɛ̀ miɛkɛ. Ti Yiɛ̀ nKuyie ndo nɑ̀kɛ́mu ku kóo tɔ̃ntì Dɑfiti nɛ̀ o birɛ Sɑdomɔɔ kɛ dɔ̀ Isidɑyɛɛribɛ tenkɛ̀ miɛkɛ kù tɑ̃ɑ̃tɛ́ kɛ dɔ́ ku yètìrì mbo Sedisɑdɛmmu nwe nɛ̀ ku cĩ́ɛ̃̀tɛ̀ miɛkɛ. 
\v 8 Kɛ̀ dɛ̀ bo yie nkɛ̀ ku nìtìbɛ̀ Isidɑyɛɛribɛ tɛ̃́nkɛ bɑ́ nhɑ̃́ɑ̃́ ntipíìtì timɔu kɛ́dɛ́tɛ́nɛ̀ kɛtenkɛ̀ kù duɔ́ nkɛ̀ bɛ yɛmbɛ̀, kɛ̀ bɛ̀ cɛ̃́nkɛ dɔɔri kù bɛ̀ nɑ̀kɛ́ tì timɔu ku kuɔ́ imɔu ku kóo tɔ̃ntì Mɔyiisi bɛ̀ wɑ̃̀ri ì. 
\v 9 Sudɑɑ kɔbɛ mɛ nyí nyie ti Yiɛ̀ nKuyie nkpɛti kɛ̀ Mɑnɑnsee bɛ̀ fétìnnɛ kɛ̀ bɛ̀ɛ dɔɔ̀ mɛyɛi nkɛ́pɛ̃ɛ̃tɛ́ ibotí Kuyie ndo kùɔ ì kɛ́ bɛ̀ kɑ̀nnɛ ì do dɔɔ̀rìmɛ̀.
\p
\v 10 Mɛm̀mɛ kɛ̀ ti Yiɛ̀ nKuyie nní mbɛ̀ nnɑ̀ɑ́nnɛ̀ kɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ tùònko. 
\v 11 Sudɑɑ kɔbɛ kóo kpɑ̀ɑ̀tì Mɑnɑnsee mɛ ndɔɔ̀rìmɛ̀ isɔkɛ kpɛrɛ, kɛ́dɔɔ̀ mɛyɛi nkɛ dɛ̀ pɛ̃ɛ̃tɛ́ Amɔriibɛ bɛ̀ɛ̀ do dɛ̀ bo nɛ̀ dimɔ̀nnì bɛ̀ do dɔɔrimɛ̀, weè tɑnnɛ́ Sudɑɑ kɔbɛ bɛmɔu mubɔɔféù miɛkɛ. 
\v 12 Ntɛ ti Yiɛ̀ nKuyie nyIsidɑyɛɛribɛ tũ nkù tu mù: Kù tu kù yóó duɔnní mɛ̀ɛ̀ yɛi nSedisɑdɛmmu nɛ̀ Sudɑɑ kɔbɛ tenkɛ̀, bɛ̀ɛ̀ kó dimɑ̀ɑ̀ bo tì kèè tì bo kpɛ́ɛ́tɛ́ bɛ to. 
\v 13 Kù tu kù bennɛ́nɛ̀ Sɑmmɑrii kùù ɔ̃ũ kù yóó ku mbennɛ́nɛ̀ Sedisɑdɛmmu. Kù ɑntɛ́nɛ̀ fɛ̀ɛ̀ nuɔfɛ̀ Akɑbu cĩ́ɛ̃̀tɛ̀, kù yóó fɛ nhɑntɛ́nɛ̀ Sedisɑdɛmmu, kóò ɛitɛ́ bɛ̀ ɔ̃ɔ̃ ɛitɛ́ mɛ̀ɛ̀ botí dibuu kɛ́kóntɛ́nɛ̀ di ĩ́nkɛ̀. 
\v 14 Ku nìtìbɛ̀ bɛ̀ɛ̀ bo nkpɑɑ́, kù bo bɛ̀ ùtóo. Kù bo duɔ́ nkɛ̀ bɛ dootitɔbɛ̀ mbɛ̀ pĩĩ nkɛ fekù bɛ kpɛrɛ. 
\v 15 Kɛ yɛ̃́ nɛ̀ bɛ yɛmbɛ̀ yɛ̀mɛ̀ Esibiti bɛ̀ bɑɑ dɔɔri kù í dɔ́ dɛ̀ ndɛ kɛ́yíinko ku miɛkɛ nɛ̀ yíenní.
\b
\p
\v 16 Sudɑɑ kɔbɛ kóo kpɑ̀ɑ̀tì Mɑnɑnsee do kùɔnɛ̀mu bɛnìtìbɛ̀ pɛ́u bɛ̀ɛ̀ í cɑ̀kɛ mùmɑmù, kɛ̀ bɛ yĩ̀ĩ̀ mpíɛ nSedisɑdɛmmu ɛì. Kɛ nɛ́ yíɛ́nɛ̀ mɛyɛi nhò tɑnnɛ́ Sudɑɑ kɔbɛ mɛ̀ɛ̀ miɛkɛ, kɛ̀ bɛ̀ ndɔɔri ti Yiɛ̀ nKuyie nyí dɔ́ dɛ̀.
\b
\p
\v 17 Mɑnɑnsee kó mɛdɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ nɛ̀ ò dɔ̀ɔ̀ mɛ̀ɛ̀ yɛi ndɛmɔu dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 18 Kòo kú kɛ̀ bɛ̀ɛ ò kũnnɛ́ okpɑ̀ɑ̀tì cĩ́ɛ̃̀tɛ̀ kó mupérímù bɛ̀ tú mù Usɑɑ mu miɛkɛ. Kòo birɛ Amɔɔ sɔɔtɛ́ o kpɑ̀tì.
\s1 Amɔɔ nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 33:21-25)
\p
\v 19 Amɔɔ do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀dɛ́ɛ̀ ndi, kɛ́ntɔ tikpɑ̀tì kɛ dɔ̀ yɛbie nyɛ̀dɛ́ɛ̀ kɛ bo Sedisɑdɛmmu. Kòo yɔ̃ yètìrì tu: Mɛsudemɛti Adusi birɛ, Yotibɑ ɛì kou. 
\v 20 Kòò dɔɔ̀ ti Yiɛ̀ nKuyie nyí dɔ́ dɛ̀ o cicɛ Mɑnɑnsee bɑɑ do dɔ̀ɔ̀mɛ̀ mɛmɔ́mmɔmmɛ, 
\v 21 kɛ́tũnnɛ o cicɛ borimɛ weti weti kɛ́nfeu yɛbɔkɛ̀ o cicɛ do feu yɛ̀ kɛ ninku yɛ ììkɛ̀, 
\v 22 kɛ́dootóo ti Yiɛ̀ nKuyie nho yɛmbɛ̀ do tũ nkù, ò í ntũ̀nnɛ ku kó kucɛ.
\p
\v 23 Mɛm̀mɛ kòo tũ̀mbɛ̀ɛ cómmú kɛ bo ò bɔ nkóò kùɔ o cĩ́ɛ̃̀tɛ̀ miɛkɛ. 
\v 24 Kɛ̀ dihɛì kó bɛnìtìbɛ̀ɛ bɛ̀ potɛ́ kɛ́kuɔ, kɛ́duɔ́ nkòo birɛ Sosiɑsii sɔɔtɛ́ o kpɑ̀tì.
\p
\v 25 Amɔɔ dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 26 Kòo kú kɛ̀ bɛ̀ɛ ò kũnnɛ́ o cicɛ fɔ̃ti miɛkɛ Usɑɑ pérímù. Kòo birɛ Sosiɑsii sɔɔtɛ́ tikpɑ̀tì.
\c 22
\s1 Sosiɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:1-2)
\p
\v 1 Sosiɑsi do yóó di tikpɑ̀tì kɛ mɔkɛ yɛbie nyɛ̀ni ndi kɛ́ntɔ tikpɑ̀tì kɛ dɔ̀ yɛbie nsipísìtɑ̃ɑ̃ti nɛ̀ dìmɑ́ɑ̀, kɛ bo Sedisɑdɛmmu kòo yɔ̃ yètìrì tu Sedidɑ Adɑyɑ birɛ Bosikɑti ɛì kou. 
\v 2 Kòo ndɔɔri ti Yiɛ̀ nKuyie ndɔ́ dɛ̀, ò do tũ̀nnɛ o yɑ̀ɑ̀rì Dɑfiti borimɛ mmɛ weti weti, ò í nyóu mɛ̀mɑmɛ̀.
\s1 Sosiɑsi pɛ̀tɛ́mɛ̀ Kuyie nkuɔ́ pɑ́tíri ku cĩ́ɛ̃̀tɛ̀ miɛkɛ
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:8-18)
\p
\v 3 Sosiɑsi do bo o kpɑ̀tì benni tɛpíítɛ̀ nɛ̀ diniínnì miɛkɛ nkɛ kɛ́tɔ̃ nho kóo pɑ́tíwɑ̃ɑ̃̀tì Sɑfɑ̃ɑ̃ Asɑdiɑ birɛ, Mɛsudɑmmu yɑɑ̀birɛ, kɛ dɔ̀ bɛ̀ɛ kɔtɛ ti Yiɛ̀ nKuyie ncĩ́ɛ̃̀tɛ̀, 
\v 4 kɛ́nɑ́kɛ́ ikuɔ́ nìùtì diɛwè Idikiyɑ kòo yɑ timɑ́tì pɛ́ítì bɛ̀ tɔní tì ti Yiɛ̀ nKuyie ncĩ́ɛ̃̀tɛ̀ kpɛ́í, mbɛ̀ɛ̀ tɛ̀ bɑ̀ɑ kɛ̀ bɛ̀ tì cuɔ́ tì mɑ̀mɛ̀, 
\v 5 kɛ́ tì tùótɛ́ kɛ́duɔ́ mbɛ̀ɛ̀ bɑkɛ́ ti Yiɛ̀ nKuyie ncĩ́ɛ̃̀tɛ̀ tũntimù kó mutɔ̃mmú, kɛ̀ bɛ̀ɛ yietí bɛ̀ɛ̀ pĩ mmutɔ̃mmú ku cĩ́ɛ̃̀tɛ̀ miɛkɛ kɛ tũnni dɛ̀ɛ̀ cɑ̀kɛ. 
\v 6 Bɛdɑbɛɛsṹɔ̃̀bɛ̀, nɛ̀ bɛ̀ɛ̀ ni mumɑrimù, nɛ̀ bɛmɑribɛ̀, kɛ donnɛ̀ idɛí nɛ̀ yɛtɑ̃́diɛyɛ̀ kɛ́tũntɛnɛ̀ Kuyie ncĩ́ɛ̃̀tɛ̀. 
\v 7 Kɛ̀ bɛ̀ bɛ̀ duɔ́ mbɛ̀ bɑ́ mbékú kɛ tú bɛ̀ɛ nɑ́kɛ́ bɛ̀ tì pĩ̀ńnɛ̀ mɛ̀ɛ̀ botí mutɔ̃mmú, kɛ yɛ̃́ bɛ̀ pĩ̀ḿmɛ̀ kɛ̀ dɛ̀ wennnimu.
\p
\v 8 Kɛ̀ ikuɔ́ nìùtì diɛwè Idikiyɑ nɑ́kɛ́ opɑ́tíwɑ̃ɑ̃̀tì Sɑfɑ̃ɑ̃ ò pɛ̀tɛ́mɛ̀ ti Yiɛ̀ nKuyie nkuɔ́ pɑ́tíri ku cĩ́ɛ̃̀tɛ̀ miɛkɛ, kɛ́ dì nhò duɔ́ nkòo kɑɑ̀. 
\v 9 Ò kɑ̀ɑ̀ mmɛmmɛ kɛ́deè kɛ́kɔtɛ kɛ́nɑ́kɛ́ okpɑ̀ɑ̀tì kɛ dɔ̀: Tínti ɑ kó bɛtɔ̃mbɛ̀ ti tùótɛ́mu timɑ́tì pɛ́ítì kɛ duɔ́ mbɛ̀ɛ̀ ni ti Yiɛ̀ nKuyie ncĩ́ɛ̃̀tɛ̀ kó mutɔ̃mmú.
\p
\v 10 Kòo nɑ́kɛ́ okpɑ̀ɑ̀tì kɛ dɔ̀: Ikuɔ́ nìùtì Idikiyɑ weè n duɔ́ ndipɑ́tíri mɑrì, kɛ́ dì nhò kɑ̀ɑ.
\s1 Osiɑsi beémmɛ̀ onitipòkù wèè nɑ́ɑ́ nKuyie mpɑ̃ɑ̃nɑ́ɑǹtì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:19-28)
\p
\v 11 Okpɑ̀ɑ̀tì kèè mɛmmɛ Kuyie nkuɔ́ bɛ̀ ò kɑ̀ɑ nyì kɛ́kɛ̃tɛ́ o yɑ̀ɑ̀tì, 
\v 12 kɛ́nɑ́kɛ́ ikuɔ́ nìùtì Idikiyɑ nɛ̀ Sɑfɑ̃ɑ̃ birɛ Ayikɑmmu nɛ̀ Misee birɛ Akibɔɔ nɛ̀ opɑ́tíwɑ̃ɑ̃̀tì Sɑfɑ̃ɑ̃ nɛ̀ okpɑ̀ɑ̀tì kóo tũ̀ntì Asɑyɑ kɛ dɔ̀: 
\v 13 Kɔtɛnɛ̀ kɛ́beé nti Yiɛ̀ nKuyie n kpɛ́í nnɛ̀ bɛnìtìbɛ̀ kpɛ́í, Sudɑɑ botí kumɔu kpɛ́í nkɛ́yɑ̀ dipɑ́tíri bɛ̀ mɛ̀ mpɛ̀tɛ́ dì tɔ tì! Ti Yiɛ̀ nKuyie mmiɛkɛ ti yɛ̀ mɛdiɛ̀ mmɛ̀ ti yɛmbɛ̀ í yie mmɛ̀ɛ̀ kpɛ́í nkɛ tũ̀nnɛ dipɑ́tíri dii ntɔ tì, bɛ̀ í yie nkɛ dɔ̀ɔ̀ dì yɛ̃ mmù.
\p
\v 14 Mɛm̀mɛ ikuɔ́ nìùtì Idikiyɑ nɛ̀ Ayikɑmmu nɛ̀ Akibɔɔ nɛ̀ Sɑfɑ̃ɑ̃ nɛ̀ Asɑyɑ bɛ̀ kɔ̀tɛmɛ̀ onitipòkù Udidɑ borɛ̀ wèè nɑ̀ɑ́ nKuyie mpɑ̃ɑ̃nɑ́ɑǹtì. Kòo dɔù yètìrì tu Sɑdummu Tikifɑ birɛ, Adɑsi yɑɑ̀birɛ kòò bɑ̀ɑ ikuɔ́ yɑ̀ɑ̀tì. Dɛ kóo nitipòkù do bo Sedisɑdɛmmu nwe, dicɛ̃kɑrì bɛ̀ tu dì: Dihɛì pɑ̀nnì kɛ̀ bɛ̀ɛ ò nɑ̀kɛ́ bɛ̀ tɔ tì. 
\v 15 Kòo bɛ̀ tɛ̃̀ńnɛ́ kɛ dɔ̀: Kɔtɛnɛ̀ kɛ́nɑ́kɛ́ onìtì wèè di tɔ̃nní m borɛ̀ kɛ dɔ̀: Ti Yiɛ̀ nKuyie ntu 
\v 16 Sudɑɑ kɔbɛ kóo kpɑ̀ɑ̀tì kɑ̀ɑ ndìì pɑ́tíri nɑ́ɑ́ mmɛ̀ɛ̀ yɛi nkpɛ́í mɛ̀ yóó bɔ́tɛ́ Sedisɑdɛmmu nwe nɛ̀ o nìtìbɛ̀. 
\v 17 Bɛ̀ kù bɔntóo mɛ̀ɛ̀ kpɛ́í nkɛ tuɔ̀ ntihúúntì yɛbɔkɛ̀ kɛ̀ bɛ dɔɔ̀rìmɛ̀ íinko ku miɛkɛ. Dɛɛ̀ te kɛ̀ ku miɛkɛ yɛ̀ di nhɛì, kɛ í yóó bonkɛ. 
\v 18 Dí nɑ́kɛ́ Sudɑɑ kɔbɛ kóo kpɑ̀ɑ̀tì wèè di tɔ̃nní kɛ̀ di bo beé nti Yiɛ̀ nKuyie nyIsidɑyɛɛribɛ tũ nkù kɛ tú ò kèè tìì nɑ́ɑǹtì yóó dɔɔ̀mu. 
\v 19 Ò nɛ́ mɛ̀ ntì kèèmɛ̀ kòo yɛ̀mmɛ̀ cɑ̀ɑ̀rɛ̀, kòo kɛ̃́kùnnɛ omɑ́ɑ̀. Kù nɑ̀kɛ́ tì di nhɛì kpɛ́í nnɛ̀ di yɛmbɛ̀ kpɛ́í. Mɛyɛi ndiɛmɛ̀ mɛɛ̀ yóó bɛ̀ tùɔ̀kɛní kɛ̀ bɛ tenkɛ̀ɛ nɑɑ́ Kuyie ncɔ̃ɔ̃ kɛ̀. Ò mɛ̀ nkɛ̃rímɛ̀ o yɑ̀ɑ̀tì kɛ kɔmmú ku ììkɛ̀ kù tu kù kèèmu. 
\v 20 Nɛ̀ dɛ kpɛ́í nkù tu kù bo ò òmpùnnɛ o yɛmbɛ̀ borɛ̀ bɑ̀mmùù, o nɔ̀nfɛ̀ bɑ́ɑ́ yɑ̀ mɛyɛi nkù yóó bɔntɛ́nímɛ̀ Sedisɑdɛmmu. Mɛm̀mɛ kɛ̀ bɛ̀ɛ kɔtɛ kɛ tì nhò nɑ̀kɛ́.
\c 23
\s1 Okpɑ̀ɑ̀tì Sosiɑsi kɑɑ̀mmɛ̀ bɛnìtìbɛ̀ Kuyie nkuɔ́ pɑ́tíri
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:29-32)
\p
\v 1 Kòo kpɑ̀ɑ̀tìi tíí nSudɑɑ nɑɑ̀mùnkù kó bɛkótíbɛ̀, nɛ̀ Sedisɑdɛmmu ɛì kɔbɛ, 
\v 2 kɛ́kɔtɛ ti Yiɛ̀ nKuyie ncĩ́ɛ̃̀tɛ̀ kɛ nɛínɛ̀ Sudɑɑ ɛì kɔbɛ nɛ̀ Sedisɑdɛmmu ɛì kɔbɛ bɛmɔu, ikuɔ́ nìùbɛ̀ nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ nɛ̀ bɛnitidiɛbɛ̀ nɛ̀ cɛ̃́nkoo kɔbɛ, bɛnìtìbɛ̀ bɛmɔu. Kòo bɛ̀ kɑ̀ɑ nyikuɔ́ pɑ́tíri bɛ̀ pɛ̀tɛ́ dì ti Yiɛ̀ nKuyie ncĩ́ɛ̃̀tɛ̀ miɛkɛ dimɔu. 
\v 3 Kòò nkpɑɑ́ cómmú diwũɔ̃tɔ̀nnì ĩ́nkɛ̀, kɛ́dɔúnnɛ̀ ti Yiɛ̀ nKuyie ndinùù dìì tu bɛ̀ ntũ bɛ Yiɛ̀ nKuyie kɛ́nyie nku tɑnnɔ̀ nɛ̀ ku kuɔ́ nɛ̀ ku tié nɛ̀ bɛ yɛ̀mmɛ̀ mɛmɔu, kɛ́ndɔɔri tìì kó dimɑ̀ɑ̀ wɑ̃̀ri ikuɔ́ pɑ́tíri miɛkɛ ti yɛ̃ mmù. Kɛ̀ bɛnìtìbɛ̀ bɛmɔu dɔ̀: Ti yiemmu kɛ bo ntɑunnɛ̀ Kuyie.
\s1 Bɛ̀ wɛ̃̀tɛ kɛ tũ̀ntɛmɛ̀ Kuyie mbɑ́ɑ́mmù Sudɑɑ tenkɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:3-5)
\p
\v 4 Kòo kpɑ̀ɑ̀tìi nɑ́kɛ́ ikuɔ́ nìùtì diɛwè Idikiyɑ nɛ̀ bɛ̀ɛ̀ ò tũ̀nko nɛ̀ bɛ̀ɛ̀ bɑ̀ɑ ti Yiɛ̀ nKuyie ncĩ́ɛ̃̀tɛ̀ kɛ dɔ̀ bɛ̀ɛ dennɛ tinɛntì bɛ̀ do pĩ̀ńnɛ̀ tì dibɔɔ̀ Bɑɑdi nɛ̀ Asedɑɑ nɛ̀ diyiè nɛ̀ otɑ̃̀nkù nɛ̀ siwɑ̃̀ɑ̃ dɛ tɔ̃mmú ti Yiɛ̀ nKuyie ncĩ́ɛ̃̀tɛ̀ miɛkɛ. Kɛ̀ bɛ̀ɛ dɛ̀ dènnɛ Sedisɑdɛmmu kɛ́ dɛ̀ tùɔ nSetinɔɔ biriku, kɛ́tɔ dɛ tɑ́pɛí nkɛ́kɔtɛnɛ̀ Betɛɛdi. 
\v 5 Kɛ̀ bɛ̀ɛ bɛti bɛ̀ɛ̀ do ni ibɔɔkuɔ́ Sudɑɑ kpɑ̀ɑ̀tìbɛ̀ do ɑ̃nnɛ́ bɛ̀ kɛ̀ bɛ̀ ntùɔ̀ ntihúúntì yɛtɔ̀rɛ̀ yɛ̀ɛ̀ bo Sudɑɑ tempɛ̃ mmiɛkɛ nɛ̀ yɛhɛkɛ̀ yɛ̀ɛ̀ tɔ̀kɛ́nɛ̀ Sedisɑdɛmmu nɛ̀ bɛ̀ɛ̀ do tuɔ̀ ndibɔɔ̀ Bɑɑdi nɛ̀ otɑ̃̀nkù nɛ̀ siwɑ̃̀ɑ̃ simɔu botí tihúúntì. 
\v 6 Kɛ̀ bɛ̀ɛ uutɛ́ Asedɑɑ tedɔú ti Yiɛ̀ nKuyie ncĩ́ɛ̃̀tɛ̀ miɛkɛ, kɛ́dennɛ Sedisɑdɛmmu, kɛ́kɔtɛnɛ̀ Setinɔɔ kubiriku kɛ́ kù tuɔ nkɛ̀ kùu nɑɑ́ mmutɑ́pɛí nkɛ̀ bɛ̀ɛ mù útóo ifɔ̃ti miɛkɛ. 
\v 7 Kɛ̀ bɛ̀ɛ puɔ nyɛtuo bɛ̀ do mɑɑ́ yɛ̀ kɛ́tɑnnɛ́ bɛnitipòbɛ̀ bɛ̀ do soó mbɛ̀ kɛ́nkɔrì kɛ bɛ̀ dɔunɛ̀ bɛ kó ikuɔ́ yɛ̃mmɛ̀. Nɛ̀ bɛnitipòbɛ̀ do ɔ̃ɔ̃ nkɑ̀ri dɛ̀ kɛ duɔ̀kù tiyɑ̀ɑ̀tì bɛ̀ ɔ̃ nhɑ̃ tì kɛ dɔúnnɛ̀ tɛbɔɔtenkɑɑnìtɛ̀ Asedɑɑ.
\p
\v 8 Kɛ̀ Soɑsii duɔ́ nkɛ̀ bɛ̀ɛ yúní ikuɔ́ nìùbɛ̀ Sudɑɑ tenkɛ̀ kɛmɔu miɛkɛ kɛ̀ bɛ̀ɛ sĩnkùnnɛ yɛtɔ̀rɛ̀ bɛ̀ do tuɔ̀ nyɛ̀ɛ̀ ĩ́nkɛ̀ tihúúntì kɛ́ketɛ́ Kebɑɑ kɛ́ntɔ kɛ́tuɔkɛnɛ̀ Bɛrisebɑɑ yɛ̀ɛ̀ bo dibòrì bɛ̀ do tú dì dihɛì yiɛ̀ nSosuwee kó dibòrì borɛ̀. Kɛ̀ bɛ̀ɛ puɔ nyɛtɛyɛ̀ yɛ̀ɛ̀ bo ɑ bo ntɑtoomɛ̀ dihɛì kó dibòrì kubɑkù cɑ̃̀nku. 
\v 9 Ikuɔ́ nìùbɛ̀ bɛ̀ɛ̀ do tuɔ̀ ntihúúntì yɛbɔɔwũɔ̃tɔ̀rɛ̀ ĩ́nkɛ̀ bɛ̀ í ndò mbɛ̀ bo nɑ kɛ́kɔtɛ ti Yiɛ̀ nKuyie nkó diwũɔ̃tɔ̀nnì borɛ̀ Sedisɑdɛmmu. Bɛ̀ nɛ́ bo nɑ kɛ́wɛ̃nnɛ́nɛ̀ bɛ kɔbɛ tɔbɛ̀ kɛ́cɑ́ɑ́kɛ́ pɛ̃́ɛ̃̀ wèè í kɔɔrɛnɛ̀ mutie mùù muuti.
\p
\v 10 Kɛ̀ bɛ̀ɛ sĩnkùnnɛ ditɔ̀nnì dìì bo Bɛnni-Inɔmmu Biriku bɛ̀ tu dì Tofɛti, bɛ̀ do ɔ̃ ntuɔ̀ ndìì ĩ́nkɛ̀ ibí, kòo mɔù tɛ̃́nkɛ bɑ́ɑ́ tuɔ ndɛnitidɑbirɛ yoo dɛnitipobirɛ dibɔɔ̀ Mɔdɔki. 
\v 11 Kɛ̀ bɛ̀ɛ kuɔ sisɛ̃ĩ́ Sudɑɑ kpɑ̀ɑ̀tìbɛ̀ do duɔ́ nsì kɛ̀ bɛ̀ bo ndɔúnnɛ̀ diyiè kɛ̀ sì mbo ti Yiɛ̀ nKuyie ncĩ́ɛ̃̀tɛ̀ kó dibòrì tɑkɛ́, kɛ tɔ́kɛ́nɛ̀ tɛkpɑ̀ɑ̀tìcĩ́ɛ̃̀tɛ̀ kóo kótì Mɛdɑnni-Mɛdɛki cĩ́ɛ̃̀tɛ̀. O cĩ́ɛ̃̀tɛ̀ do tɔ́kɛ́nɛ̀ bɛ̀ do mɑɑ́ kùù dieku nku kɛ́kpeénnɛ̀ Kuyie ncĩ́ɛ̃̀tɛ̀, kɛ́tuɔ nnɛ̀ sinɑɑsɛ̃ĩ́ bɛ̀ do pɑ̃ sì kɛ̀ bɛ̀ bo ndɔúnnɛ̀ diyiè. 
\v 12 Kòo puɔ nyɛbɔɔwũɔ̃tɔ̀rɛ̀ Sudɑɑ kpɑ̀ɑ̀tìbɛ̀ do mɑɑ́ yɛ̀ Aɑsi kó kudɑ̀nkù ĩ́nkɛ̀ nɛ̀ Mɑnɑnsee do mɑɑ́ yɛ̀ ti Yiɛ̀ nKuyie ncĩ́ɛ̃̀tɛ̀ kó dɛdɑ̀nnɛ̀ dɛdɛ́ miɛkɛ, kòo yɛ̀ pɔ̀ntɛ kɛ́dɛ́ítɛ́ kɛ́útóo yɛ tɑ̃́ɑ̃́ nSetinɔɔ biriku miɛkɛ. 
\v 13 Kòo cɑkɛ yɛbɔɔwũɔ̃tɔ̀rɛ̀ Sɑdomɔɔ do mɑɑ́ yɛ̀ Sedisɑdɛmmu kó yɛtɔ̀rɛ̀ odìfíè tɑ̃rì bɑkù cɑ̃̀nku Sidoniibɛ bɔɔyɛiri Asitɑditee kpɛ́í nnɛ̀ Mɔɑbiibɛ bɔɔyɛiri Kemɔɔsi kpɛ́í nnɛ̀ Amɔniibɛ bɔɔyɛiri Midikɔmmu kpɛ́í nkòo yɛ̀ sĩ̀nkùnnɛ yɛmɔu, 
\v 14 kɛ́puɔ nyɛbɔɔtɑ̃́rɛ̀ bɛ̀ do fìíkú yɛ̀ kɛ́u itedɛí kɛ́tɔní bɛcíríbɛ̀ kṹɔ̃̀ kɛ́píɛ ndɛ̀ do bo yɛ̀ɛ̀ borɛ̀.
\s1 Isidɑyɛɛribɛ wɛ̃̀tɛ kɛ tũ̀ntɛmɛ̀ mubɑ́ɑmmu
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 34:6-7)
\p
\v 15 Kɛ̀ Sosiɑsii puɔ nNɛbɑti birɛ Sedoboɑmmu do mɑɑ́ dìì wũɔ̃tɔ̀nnì Betɛɛdi kó ditɔ̀nnì borɛ̀ kɛ́tɑnnɛ́ Isidɑyɛɛribɛ mɛyɛi mmiɛkɛ. Kòo dì pùɔ kɛ́cɔ́u nditɔ̀nnì nɛ̀ kutedɔú, dɛmɔu kɛ̀ dɛ̀ɛ nɑɑ́ mmutɑ̃́ɑ̃́.
\p
\v 16 Mɛm̀mɛ ò wèńtɛ́mɛ̀ kɛ́yɑ̀ ifɔ̃ti ìì do bo dɛborɛ̀ ditɑ̃rì ĩ́nkɛ̀ kɛ́tɔ̃ nkɛ̀ bɛ̀ɛ̀ kũtɛ́ní bɛ kṹɔ̃̀ kòò yɛ cɔ́u ndiwũɔ̃tɔ̀nnì ĩ́nkɛ̀, kɛ́ dì sĩ̀nkùnnɛ kɛ́ndònnɛ̀ ti Yiɛ̀ nKuyie ndo tì nɑ̀kɛ́mɛ̀ ku pɑ̃ɑ̃nɑ́ɑǹtì nɑ́ɑǹtò kòo tì bɛ́i, Sedoboɑmmu dèkɛ dìì mɔ̀nnì diwũɔ̃tɔ̀nnì ĩ́nkɛ̀ dibɑnni yiè. Ò dɛ mbo kɛ́wéntɛ́ kɛ́yɑ̀ Kuyie mpɑ̃ɑ̃nɑ́ɑǹtì nɑ́ɑǹtò wèè do nɑ̀kɛ́ dɛ kó tipɑ̃ɑ̃nɑ́ɑǹtì o fɔ̃ti. 
\v 17 Kɛ̀ Sosiɑsii bekɛ kɛ dɔ̀: Difɔ̃titɑ̃́rì dii we nkó kufɔ̃ti kpɛri ndi?
\p Kɛ̀ dihɛì yɛmbɛ̀ɛ ò tɛ̃̀ńnɛ́ kɛ dɔ̀: Kuyie mpɑ̃ɑ̃nɑ́ɑǹtì nɑ́ɑǹtò wèè do ìtɛ́ní Sudɑɑ tenkɛ̀ kɛ́kɔtɛní kɛ́nɑ́kɛ́ ɑ mɛ mbo kɛ dɔɔri tì yíe, nho fɔ̃titɑ̃́rì ndi.
\p
\v 18 Kɛ̀ Sosiɑsi dɔ̀: Yóunɛ̀ dɛ kó kufɔ̃ti, di bɑ́ɑ́ kù kɑ̀ɑ́kɛ́! Mɛm̀mɛ kɛ̀ bɛ̀ɛ yóu o kṹɔ̃̀ òmɔù í nyɛ̀ kũtɛ́, kɛ́yóunɛ̀ múnkɛ Kuyie mpɑ̃ɑ̃nɑ́ɑǹtì nɑ́ɑǹtò wèè do yɛ̀nní Sɑmmɑrii tenkɛ̀ o kpɛyɛ.
\b
\p
\v 19 Kɛ̀ Sosiɑsi múnkɛɛ puɔ nyɛbɔɔtuo bɛ̀ do mɑɑ́ yɛ̀ Sɑmmɑrii ɛkɛ̀ miɛkɛ Isidɑyɛɛribɛ kpɑ̀ɑ̀tìbɛ̀ do mɑɑ́ yɛ̀ kɛ́íi ti Yiɛ̀ nKuyie mmiɛkɛ. Kòo yɛ̀ pùɔ mpɑ́íí ò pùɔ mmɛ̀ɛ̀ botí Betɛɛdi kpɛyɛ. 
\v 20 Kòo pĩ́mmú bɛbɔɔyɛmbɛ̀ bɛ̀ɛ̀ dɛ̀ bo kɛ́ bɛ̀ fìé bɛ bɔɔwũɔ̃tɔ̀rɛ̀ ĩ́nkɛ̀, kɛ́cɔ́unnɛ̀ yɛnitikṹɔ̃̀ dɛ kó yɛwũɔ̃tɔ̀rɛ̀ ĩ́nkɛ̀.
\p Ò mɛ nyĩ kɛ́deè kɛ́wɛ̃tɛ Sedisɑdɛmmu.
\s1 Sosiɑsi duɔ́mmɛ̀ kɛ̀ bɛ̀ɛ bɑɑ ndiyentɛ́bɑnni
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 35:1, 18-19)
\p
\v 21 Dɛ kó difɔ̃nkúò kòo kpɑ̀ɑ̀tì Sosiɑsii nɑ́kɛ́ bɛnìtìbɛ̀ kɛ dɔ̀: Bɑɑ́nnɛ̀ diyentɛ́bɑnni kɛ́dɛ́úkùnnɛ ti Yiɛ̀ nKuyie nyètìrì, kɛ́ntũ ntìì wɑ̃̀ri ku kuɔ́ pɑ́tíri miɛkɛ. 
\v 22 Nɛ̀ bɛbɑɑtíbɛ̀ kó dimɔ̀nnì, kɛ́ntɔ kɛ́tuɔkɛnní bɛkpɑ̀ɑ̀tìbɛ̀ kó dimɔ̀nnì Isidɑyɛɛribɛ nɛ̀ Sudɑɑ kɔbɛ, bɛ̀ do í bɑɑ̀ ndiyentɛ́bɑnni mɛbotí. 
\v 23 Okpɑ̀ɑ̀tì Sosiɑsi kpɑ̀tì benni tɛpíítɛ̀ nɛ̀ diniínnì ndi bɛ̀ wɛ̃̀tɛ kɛ́bɑɑ́mmɛ̀ diyentɛ́bɑnni mɛbotí Sedisɑdɛmmu kɛ bo dɛ́úkùnnɛ ti Yiɛ̀ nKuyie nyètìrì.
\s1 Sosiɑsi kpɑ̀tì mɑ̀nku
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 35:20-27. 36:1)
\p
\v 24 Kɛ̀ Sosiɑsii pɑɑ mpɑ́íí Sudɑɑ tenkɛ̀ kɛmɔu miɛkɛ nɛ̀ Sedisɑdɛmmu òmɔù miɛkɛ bɛ̀ɛ̀ yu bɛcíríbɛ̀ nɛ̀ bɛ̀ɛ̀ bourí tinùbootì, nɛ̀ bɛ̀ɛ̀ fìíkú bɛcíríbɛ̀, nɛ̀ sibɔɔtenkɑɑnìi, nɛ̀ isɔkɛ ìì kó dimɑ̀ɑ̀ do dɔɔri Sudɑɑ tenkɛ̀, nɛ̀ Sedisɑdɛmmu omɔu miɛkɛ. Sosiɑsi do tũ̀nnɛ ikuɔ́ nìùtì Idikiyɑ do pɛ̀tɛ́ ti Yiɛ̀ nKuyie nkuɔ́ pɑ́tíri dì ku cĩ́ɛ̃̀tɛ̀ miɛkɛ di yɛ̃ mmù mmu, kɛ́kɑ́útɛ́ dɛndɛ kó dimɑ̀ɑ̀ pɑ́íí.
\p
\v 25 Bɛkpɑ̀ɑ̀tìbɛ̀ bɛ̀ɛ̀ do ò niitɛ́nɛ̀ kɛ́di tikpɑ̀tì nɛ̀ bɛ̀ɛ̀ ò tũ̀nnɛní òmɔù do í bo wèè ò dònnɛ̀, weè duɔ́ nhomɑ́ɑ̀ Kuyie nnɛ̀ o yɛ̀mmɛ̀ mɛmɔu nɛ̀ o wɛ̃rímú mumɔu, kɛ́ndɔɔri ti Yiɛ̀ nKuyie ndo duɔ́ nyìì kuɔ́ Mɔyiisi kòò ì wɑ̃̀ri ì yɛ̃ mmù.
\p
\v 26 Bɑ́ nɛ̀ mɛmmɛ kɛ̀ Kuyie mmiɛkɛ nkpɑɑ́ pɛ́ì Sudɑɑ kɔbɛ bɛ kóo kpɑ̀ɑ̀tì Mɑnɑnsee, weè do cɑ̀ɑ̀rɛ̀ ti Yiɛ̀ nKuyie nkɛ̀ ku miɛkɛɛ bɛ̀ yɛ̀ bɑ́ kɛ̀ í nyie nkɛ bo do. 
\v 27 Mɛm̀mɛ kɛ̀ ti Yiɛ̀ nKuyie mbɛ̀ nɑ̀kɛ́ kɛ dɔ̀: M bo kɛi nSudɑɑ kɔbɛ m borɛ̀, n kɛi mmɛ̀ɛ̀ botí Isidɑyɛɛribɛ. N yóó dootóomu Sedisɑdɛmmu dihɛì n tɑ̃ɑ̃tɛ́ dì, nɛ̀ n cĩ́ɛ̃̀tɛ̀ n do bɛ́i nkɛ dɔ̀ n yètìrì yó mbo tɛ̀ɛ̀ miɛkɛ.
\b
\p
\v 28 Sosiɑsi dɔɔ̀rìmɛ̀ sɔmmɛ ò dɔ̀ɔ̀ dɛ̀ɛ̀ kó dimɑ̀ɑ̀ dɛ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 29 O kó tikpɑ̀tì miɛkɛ nkɛ Esibiti kóo kpɑ̀ɑ̀tì Nɛkoo kɔ̀rimɛ̀ kɛ bo tee nhAsidii kóo kpɑ̀ɑ̀tì mudoò kukó nhEfɑdɑti borɛ̀. Kɛ̀ Sosiɑsii ò dintɛ́, kɛ̀ Nɛkoo ò kùɔ Mɛkidoo kó mudoò ketimù miɛkɛ. 
\v 30 Kòo kó bɛtɔ̃mbɛ̀ɛ ò tùótɛ́ nɛ̀ tɛkpɑ̀rìnɑɑsɑ̃ntɛ̀ Mɛkidoo kɛ́kònnɛ̀ Sedisɑdɛmmu, kóò kũnnɛ́ Sudɑɑ kpɑ̀ɑ̀tìbɛ̀ fɔ̃ti miɛkɛ. Kɛ̀ dihɛì yɛmbɛ̀ɛ pĩ́ nYoɑkɑsi tikpɑ̀tì, kóò còú mmɛkùɔ̀ nkòo sɔɔtɛ́ o cicɛ Sosiɑsi kpɑ̀tì.
\s1 Yoɑkɑsi nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 36:2-4)
\p
\v 31 Yoɑkɑsi do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀tɑ̃ɑ̃ti ndi kɛ́ntɔ tikpɑ̀tì kɛ dɔ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti kɛ bo Sedisɑdɛmmu. O yɔ̃ yètìrì do tú Amitɑdi Yedimɛyɑu birɛ, Dibunɑ ɛì kou. 
\v 32 Kòo dɔɔ̀ ti Yiɛ̀ nKuyie nyí dɔ́ dɛ̀ o yɛmbɛ̀ do dɔ̀ɔ̀ mɛ̀ɛ̀ botí weti weti. 
\v 33 Mɛm̀mɛ Esibiti kóo kpɑ̀ɑ̀tì Nɛkoo ò pĩ̀ḿmɛ̀ kɛ́kpetínnɛ́ Dibudɑ Amɑti tenkɛ̀ miɛkɛ bɑ́ ò tɛ̃́nkɛ í ntú Sedisɑdɛmmu kóo kpɑ̀ɑ̀tì. Kòo duɔ́ nkɛ̀ bɛ̀ nhò yietì dɑ̀mpóò bɑ́ dìì benni timɑ́tì pɛ́ítì cìdóòbɛ̀ sikɔupísìtɑ̃ɑ̃ti (3000), mɛsɔɔ ncìdóòbɛ̀ sikɔusìtɑ̃ɑ̃ti (300).
\p
\v 34 Kɛ̀ weè kpɑ̀ɑ̀tì Esibiti kouu túótɛ́ Sosiɑsi birɛ Ediɑkimmu kɛduɔ́ nkòo sɔɔtɛ́ o cicɛ kpɑ̀tì, kòo ò cèètɛ diyètìrì kóò yú kɛ dɔ̀: Sosɑkimmu, kɛ́túótɛ́ Yoɑkɑsi kɛ́kònnɛ̀ Esibiti kòo kɛ nkú. 
\v 35 Kɛ̀ Sosɑkimmuu kéétɛ́ o nìtìbɛ̀ bɑ́ wè o wɛ̃rímú mɑmɛ̀ ò bo duɔ́mmɛ̀ timɑ́tì pɛ́ítì, nɛ̀ mɛsɔɔ nkɛ̀ dɛ̀ nsɑ̀nnɛ̀ Esibiti kóo kpɑ̀ɑ̀tì bekɛ dɛ̀. Kɛ̀ bɛ̀ níí dɛ̀ nhò duɔ́ nkòò dɛ̀ duɔ́ nhokpɑ̀ɑ̀tì Nɛkoo.
\s1 Sosɑkimmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 36:5-8)
\p
\v 36 Sosɑkimmu do yóó di tikpɑ̀tì kɛ mɔkɛ yɛbie nsipísìdɛ́ nɛ̀ yɛ̀nùmmù ndi, kɛ́ntɔ tikpɑ̀tì kɛ dɔ̀ yɛbie tɛpíítɛ̀ nɛ̀ dìmɑ́ɑ̀ kɛ bo Sedisɑdɛmmu, kòo yɔ̃ yètìrì tu: Sebidɑ Pedɑyɑ birɛ Dumɑɑ ɛì kou. 
\v 37 Kòo dɔɔ̀ ti Yiɛ̀ nKuyie nyí dɔ́ dɛ̀ o yɛmbɛ̀ do dɔ̀ɔ̀ mɛ̀ɛ̀ botí weti weti.
\c 24
\p
\v 1 Sosɑkimmu kpɑ̀tì miɛkɛ nkɛ Bɑbidɔnni kóo kpɑ̀ɑ̀tì Nɛbukɑnnɛsɑɑ ò domɛ̀ kóò nɑ, kòo ò bɔ̀útɛ́ kɛ́ nhò bùɔ́ kɛ dɔ̀ yɛbie nyɛ̀tɑ̃ɑ̃ti kɛ́wɛ̃tɛ kɛ́yetɛ o kpɛti. 
\v 2 Mɛm̀mɛ kɛ̀ ti Yiɛ̀ nKuyie nduɔ́ nkɛ̀ bɛfèèbɛ̀ Bɑbidɔnni kɔbɛ nɛ̀ Asidii kɔbɛ nɛ̀ Mɔɑbu kɔbɛ nɛ̀ Amɔniibɛ, kɛ̀ bɛ̀ɛ do Sudɑɑ kó dikpɑ̀ɑ̀tìyuu kɛ bo di dèè pɑ́íí kɛ́ndònnɛ̀ ti Yiɛ̀ nKuyie ndo ti nɑ̀kɛ́mɛ̀ ku kó bɛtɔ̃mbɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ɛ tì bɛ́i. 
\v 3 Ti Yiɛ̀ nKuyie ndo duɔ́ nkɛ̀ dɛndɛ kó dimɑ̀ɑ̀ bɛ̀ tùɔ̀kɛní kɛ bo bɛ̀ kɛi nku borɛ̀ ndɛ, Mɑnɑnsee kó mɛyɛi nkpɛ́í nnɛ̀ ò dɔ̀ɔ̀ dɛ̀ɛ̀ kó dimɑ̀ɑ̀, 
\v 4 nɛ̀ ò do kùɔ bɛ̀ɛ̀ nìtìbɛ̀ kɛ̀ bɛ yĩ̀ĩ̀ ncóú nkɛ́píɛ nSedisɑdɛmmu bɑ́ bɛ̀ í cɑ̀ɑ̀rɛ̀ mùmɑmù, mɛɛ̀ do te kɛ̀ ti Yiɛ̀ nKuyie nyetɛ kù bo bɛ̀ cĩ̀ɛ̃́mmɛ̀.
\p
\v 5 Sosɑkimmu dɔɔ̀rìmɛ̀ sɔmmɛ ò do dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 6 Kòo kú kɛ̀ bɛ̀ɛ ò kũnnɛ́ o yɛmbɛ̀ fɔ̃ti. Kòo birɛ Sosɑkinni sɔɔtɛ́ o kpɑ̀tì.
\b
\p
\v 7 Esibiti kóo kpɑ̀ɑ̀tì tɛ̃́nkɛ í nyɛ̀ o ɛì kɛ yɛ̃́ Bɑbidɔnni kóo kpɑ̀ɑ̀tì do fìètɛmɛ̀ o tenkɛ̀ ò do te kɛ̀ kɛ́túótɛ́ Esibiti kó kukó nkɛ́tuɔkɛnɛ̀ kukó nhEfɑdɑti.
\s1 Bɛ̀ pĩ̀ḿmúmɛ̀ Sudɑɑ kɔbɛ kɛ kònnɛ̀ Bɑbidɔnni
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 36:9-10)
\p
\v 8 Sosɑkinni do yóó di tikpɑ̀tì kɛ mɔkɛ yɛbie ntɛpíítɛ̀ nɛ̀ yɛ̀ni ndi, kɛ́ntɔ tikpɑ̀tì kɛ dɔ̀ bɛtɑ̃̀ɑ̃̀bɛ̀ bɛ̀tɑ̃ɑ̃ti kɛ bo Sedisɑdɛmmu. Kòò yɔ̃ yètìrì tu Nɛusitɑɑ Edinɑtɑ̃ɑ̃ birɛ Sedisɑdɛmmu ɛì kou. 
\v 9 Kòo dɔɔ̀ ti Yiɛ̀ nKuyie nyí dɔ́ dɛ̀. Ò do tũ̀nnɛ o yɛmbɛ̀ borimɛ mmɛ weti weti.
\p
\v 10 Dɛ mɔ̀nnì ndi Bɑbidɔnni kóo kpɑ̀ɑ̀tì Nɛbukɑnnɛsɑɑ domɛ̀ Sedisɑdɛmmu kóò pi. 
\v 11 Kɛ̀ Nɛbukɑnnɛsɑɑ o mɔ́mmuɔ nkɔtɛní kɛ́do dihɛì o ɑ̃ɑ̃pɔ̀mbɛ̀ pi dì. 
\v 12 Mɛm̀mɛ Sosɑkinni Sudɑɑ kɔbɛ kóo kpɑ̀ɑ̀tì yɛ̀nnímɛ̀ kɛ́kɔtɛ kóò duɔ́ nhomɑ́ɑ̀ kɛ́nɛinɛ̀ o yɔ̃ nɛ̀ o kó bɛtũ̀mbɛ̀ nɛ̀ bɛ̀ fɔ̃̀mmu bɛ̀ kɛ̀ tu tɛkpɑ̀ɑ̀tìcĩ́ɛ̃̀tɛ̀ kó bɛkótíbɛ̀. Kɛ̀ Bɑbidɔnni kóo kpɑ̀ɑ̀tìi bɛ̀ pĩ̀ḿmú kɛ́dɔɔ̀ tidɑɑtì. O kpɑ̀tì benni diniínnì miɛkɛ do nkɛ ò bɛ̀ pĩ̀ḿmúmɛ̀.
\p
\v 13 Mɛm̀mɛ ò tɔmɛ̀ ti Yiɛ̀ nKuyie ncĩ́ɛ̃̀tɛ̀ kó tinɛntì timɔu tìì do bo tɛ miɛkɛ nɛ̀ tɛkpɑ̀ɑ̀tìcĩ́ɛ̃̀tɛ̀ miɛkɛ kpɛti. Kɛ̀ bɛ̀ɛ puɔ mmɛsɔɔ nkó tinɛntì timɔu Isidɑyɛɛribɛ kóo kpɑ̀ɑ̀tì Sɑdomɔɔ do dɔ̀ɔ̀ tì ti Yiɛ̀ nKuyie ncĩ́ɛ̃̀tɛ̀ kpɛ́í, nkù do tì nɑ̀kɛ́ kɛ yɛ̃mmɛ̀. 
\v 14 Kòo pĩ́mmú okpɑ̀ɑ̀tì kó bɛ̀tũ̀mbɛ̀ nɛ̀ bɛ̀ɛ̀ tu bɛnitidiɛbɛ̀, kɛ̀ bɛ̀ mbo tɛkɔupípíítɛ̀ (10000), kɛ́pĩ́mmúnɛ̀ bɛmɑ́ɑ́bɛ̀ nɛ̀ bɛ̀ɛ̀ dɔ̀ɔ̀ri yɛcɑukpetínyɛ̀, kɛ̀ cɛ̃́nkoo kɔbɛ bɛɛ̀ nkpɑɑ́ dihɛì. 
\v 15 Kòo tɔ Sosɑkinni nɛ̀ o yɔ̃ nɛ̀ o pobɛ̀ nɛ̀ iwɛ̃ĩ yɛmbɛ̀ nɛ̀ bɛ̀ fɔ̃̀mmu bɛ̀ kɛ̀ bɛ̀ tu tɛkpɑ̀ɑ̀tìcĩ́ɛ̃̀tɛ̀ kó bɛkótíbɛ̀, kɛ́ bɛ̀ kònnɛ̀ Bɑbidɔnni. 
\v 16 Bɛ̀ɛ̀ kó dimɑ̀ɑ̀ nɔ mmudoò kɛ̀ bɛ̀ mbo sikɔupísìyiekɛ̀ (7000) bɛmɑ́ɑ́bɛ̀ nɛ̀ bɛ̀ɛ̀ dɔ̀ɔ̀ri yɛcɑukpetínyɛ̀ kɛ̀ bɛmbɛ mbo tɛkɔupíítɛ̀ (1000), kɛ́pĩ́mmú bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛmbɛ̀ kɛ́kònnɛ̀ Bɑbidɔnni.
\p
\v 17 Kɛ̀ Bɑbidɔnni kóo kpɑ̀ɑ̀tìi túótɛ́ Sosɑkinni yɔ̃ tɑ̃ũ̀ Mɑtɑnniyɑ kɛ́dɔɔ̀ okpɑ̀ɑ̀tì kòo sɔɔtɛ́ Sosɑkinni kpɑ̀tì. Kòo ò cèètɛ diyètìrì kóò yu kɛ dɔ̀: Sedesiɑ.
\s1 Sedesiɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ Sedemii 52:1-3 nɛ̀ 2 Bɛkpɑ̀ɑ̀tìbɛ̀ tɔ̃mmú 36:11-12)
\p
\v 18 Sedesiɑ do yóó di tikpɑ̀tì kɛ mɔkɛ yɛbie nsipísìdɛ́ nɛ̀ dìmɑ́ɑ̀ ndi kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ dìmɑ́ɑ̀ kɛ bo Sedisɑdɛmmu. Kòo yɔ̃ yètìrì tu Amitɑdi Sedemii birɛ Dibunɑ ɛì kou. 
\v 19 Kòo dɔɔ̀ ti Yiɛ̀ nKuyie nyí dɔ́ dɛ̀, ò do tũ̀nnɛ Sosɑkimmu borimɛ mmɛ weti weti.
\p
\v 20 Ti Yiɛ̀ nKuyie nkuù miɛkɛ do yɛ̀ Sedisɑdɛmmu nɛ̀ Sudɑɑ kɔbɛ kɛ̀ dɛndɛ kó dimɑ̀ɑ̀ bɛ̀ tùɔ̀kɛní, kɛ̀ Kuyie mbɛ̀ kɛi nku borɛ̀.
\p Kɛ̀ dɛ̀ mboní kɛ̀ Sedesiɑ yetɛ Bɑbidɔnni kóo kpɑ̀ɑ̀tì kpɛti.
\c 25
\s1 Bɑbidɔnni kóo kpɑ̀ɑ̀tì pimɛ̀ Sedisɑdɛmmu
\r (Wéntɛ́ Sedemii 39:1-7. 52:3-11)
\p
\v 1 Sedesiɑ kpɑ̀tì benni diwɛínnì miɛkɛ do nkɛ otɑ̃̀nkù píínwè miɛkɛ diyiè píínnì Nɛbukɑnnɛsɑɑ Bɑbidɔnni kóo kpɑ̀ɑ̀tì domɛ̀ Sedisɑdɛmmu mudoò nɛ̀ o ɑ̃ɑ̃pɔ̀ntĩ̀nnì dimɔu kɛ́cɛ̃ɛ̃tɛ Sedisɑdɛmmu ɛì kɛ́pénnɛ́ kudookɔti kɛ́ ndì pi. 
\v 2 Kɛ̀ dɛ̀ɛ tuɔkɛ Sedesiɑ kpɑ̀tì benni tɛpíítɛ̀ nɛ̀ dìmɑ́ɑ̀.
\b
\p
\v 3 Dibenni tɑ̃̀nkù nɑɑnwè diyiè wɛínnì kɛ sɔ̃́ ndikònnì dɛukɛ bɑ́ bɛnìtìbɛ̀ tɛ̃́nkɛ í pɛ́ú mudiì. 
\v 4 Kɛ̀ bɛ̀ɛ duutɛ kuduotí kɛyènkɛ̀, kòo kpɑ̀ɑ̀tìi yɛ̀ nɛ̀ o ɑ̃ɑ̃pɔ̀mbɛ̀ kɛ́tũnnɛ Adɑbɑ kó kucɛ, dibòrì kɔku iduotí idɛ́ sɑku, kùù tɔ̀kɛ́nɛ̀ okpɑ̀ɑ̀tì pérímù. Kɛ̀ Bɑbidɔnni kɔbɛɛ fitɛ́ dihɛì. 
\v 5 Kɛ̀ Bɑbidɔnni kɔbɛɛ bɛti okpɑ̀ɑ̀tì kóò nìntɛ Sedikoo biriku kòo ɑ̃ɑ̃pɔ̀mbɛ̀ɛ cíɛ́tɛ́ kóò yóu. 
\v 6 Kɛ̀ bɛ̀ɛ ò pĩ nkɛ́kɔtɛnɛ̀ Dibunɑ Bɑbidɔnni kóo kpɑ̀ɑ̀tì borɛ̀ kóò nɑ̀kɛ́ bɛ dɔ́ kóò dɔ̀ɔ̀mɛ̀. 
\v 7 Kɛ̀ Bɑbidɔnni kóo kpɑ̀ɑ̀tìi fíé okpɑ̀ɑ̀tì Sedesiɑ bí o nuɔ mmiɛkɛ, kɛ́dokɛ́ Sedesiɑ nuɔ nkóò boú timɑ́tì kɛ́kònnɛ̀ Bɑbidɔnni.
\s1 Bɛ̀ wɛ̃̀tɛ kɛ pĩ̀ḿmúmɛ̀ Sedisɑdɛmmu kɔbɛ kɛ kònnɛ̀ Bɑbidɔnni
\r (Wéntɛ́ Sedemii 39:8-10. 52:12-30 nɛ̀ 2 Bɛkpɑ̀ɑ̀tìbɛ̀ tɔ̃mmú 36:17-21)
\p
\v 8 Bɑbidɔnni kóo kpɑ̀ɑ̀tì Nɛbukɑnnɛsɑɑ kpɑ̀tì benni tɛpíítɛ̀ nɛ̀ diwɛínnì miɛkɛ nkɛ Nɛbusɑdɑdɑnni tihɑ̃ɑ̃pɔ̀ntì tìì bɑ̀ɑ okpɑ̀ɑ̀tì ti kóo kótì wèè tũ nhokpɑ̀ɑ̀tì, ò tùɔ̀kɛnímɛ̀ Sedisɑdɛmmu, 
\v 9 kɛ́duɔ́ nkɛ̀ bɛ̀ɛ cɔ́u nti Yiɛ̀ nKuyie ncĩ́ɛ̃̀tɛ̀ nɛ̀ tɛhɑ̃ɑ̃pɔ̀ncĩ́ɛ̃̀tɛ̀ nɛ̀ Sedisɑdɛmmu kó sicɛ̃́ĩ simɔu, kɛ cɔ́unnɛ̀ bɛnitidiɛbɛ̀ kó sicɛ̃́ĩ simɔu. 
\v 10 Kɛ̀ Bɑbidɔnni kó bɛhɑ̃ɑ̃pɔ̀mbɛ̀ bɛ̀ɛ̀ cíenní tihɑ̃ɑ̃pɔ̀ntì tìì bɑ̀ɑ okpɑ̀ɑ̀tì ti kóo kótì kɛ̀ tìi puɔ nkuduotí kùù fitɛ́ Sedisɑdɛmmu.
\p
\v 11 Kɛ̀ Nɛbusɑdɑdɑnni wèè bɑkɛ́ tihɑ̃ɑ̃pɔ̀ntì tìì bɑ̀ɑ okpɑ̀ɑ̀tì, kòo pĩ́mmú bɛ̀ɛ̀ nìtìbɛ̀ do kpɑɑ́ dihɛì nɛ̀ bɛ̀ɛ̀ do yɛ̀ kóò tũ̀nnɛ nɛ̀ bɛnìtìbɛ̀ tɔbɛ̀ pɛ́u kɛ́kònnɛ̀ o ciɛ. 
\v 12 Kɛ súɔ́ mbɛtenkútíbɛ̀ mɑ́ɑ̀ bɛ̀ɛ̀ bo nkuuti nɛ̀ bɛ̀ɛ̀ bo nhò fiiku dɛtie mbɛ̀ tu dɛ̀ fínyĩ̀.
\b
\p
\v 13 Kɛ̀ Bɑbidɔnni kó bɛhɑ̃ɑ̃pɔ̀mbɛ̀ɛ bɔ́kɛ́ disɔɔwũɔ̃̀ kó yɛsɑ̃ǹkɛ̀ ti Yiɛ̀ nKuyie ncĩ́ɛ̃̀tɛ̀ kpɛyɛ nɛ̀ yɛ kó yɛtɛitiyɛ̀ nɛ̀ disɔɔwũɔ̃̀ kó kunɑnkú diɛkù kùù bo ti Yiɛ̀ nKuyie ncĩ́ɛ̃̀tɛ̀ kɛ́tɔ disɔɔwũɔ̃̀ kɛ́kònnɛ̀ Bɑbidɔnni. 
\v 14 Kòo túótɛ́nɛ̀ yɛsɔɔbɔ bɛ̀ do ɔ̃ nkounɛ̀ yɛ̀ mutɑ́pɛí nnɛ̀ dɛ kó tikɑ̃penti nɛ̀ dɛ kó yɛse nɛ̀ dɛ kó ihɑɑkɛ́ nɛ̀ sibúkúsí. Dɛ̀ɛ̀ kó dimɑ̀ɑ̀ cɛ̃́nkɛ tú disɔɔwũɔ̃̀ kó tinɛntì bɛ̀ do pĩ́nnɛ̀ tì ti Yiɛ̀ nKuyie cĩ́ɛ̃̀tɛ̀ miɛkɛ mutɔ̃mmú. 
\v 15 Kuhɑ̃ɑ̃pɔ̀nkù kùù bɑkɛ́ tìì bɑ̀ɑ̀ okpɑ̀ɑ̀tì kɛ̀ kùu túótɛ́ sisɔɔbúkúsí nɛ̀ yɛbɔ bɛ̀ do mɛ́únɛ̀ yɛ̀ mɛyĩ̀ĩ̀ ndɛ̀ɛ̀ kó dimɑ̀ɑ̀ cɛ̃́nkɛ tú mɛsɔɔ nkpɛrɛ nɛ̀ timɑ́tì pɛ́ítì kpɛrɛ.
\p
\v 16 Sɑdomɔɔ do dɔ̀ɔ̀nɛ̀ dìì sɔɔwũɔ̃̀ ti Yiɛ̀ nKuyie ncĩ́ɛ̃̀tɛ̀ kó tinɛntì ti cɛ̃́ɛ̃́kù do í mɔkɛ kù mɑ̀mɛ̀. Yɛsɑ̃ǹkɛ̀ diɛyɛ̀ yɛ̀dɛ́ nɛ̀ kunɑnkú diɛkù nɛ̀ tɛnɑɑsɑ̃ntɛ̀ tɛ̀ɛ̀ kù tɔ nɛ̀ yɛcɛ̃̀ɛ̃̀tiyɛ̀. 
\v 17 Dɛ kó yɛsɑ̃ǹkɛ̀ yɛdɛ́, dìmɑ́ɑ̀ kó mɛokùmɛ̀ do bo mɛ́tìrì bɛ̀wɛi ndi, bɑ́ dì kɛ̀ dì mɔ̀kɛ ditɛitirì di yómmɛ̀ kɛ̀ di okùmɛ̀ bo mɛ́tìrì mɛ̀dɛ́mɛ̀ nɛ̀ dikéè. Bɑ́ dìì tɛitirì ĩ́nkɛ̀ kɛ̀ bɛ̀ kpɛ̃ mmɛsɔɔ nkɛ fitɛ́ kɛ̀ dɛ̀ dò nyɛtebɛ bɛ̀ tu yɛ̀ kèdènɑ́tì. Dɛmɔu kɛ̀ dɛ̀ wɛ̃ nkɛ tú disɔɔwũɔ̃̀ mɑ́ɑ̀, kɛ mɛ ndò nyɛdɛ́.
\b
\p
\v 18 Kɛ̀ dɛ kó kuhɑ̃ɑ̃pɔ̀nkùu pĩ́ nyikuɔ́ nìùtì diɛwè Sedɑyɑ nɛ̀ Sofonii wèè ò pòkoo, nɛ̀ bɛtɔbɛ̀ bɛ̀tɑ̃ɑ̃ti bɛ̀ɛ̀ bɑ̀ɑ ti Yiɛ̀ nKuyie ncĩ́ɛ̃̀tɛ̀, kɛ́ bɛ̀ kpetínnɛ́. 
\v 19 Kɛ̀ kùu pĩ́nnɛ̀ bɛ̀ fɔ̃̀ntɛ wè kòò tu tɛkpɑ̀ɑ̀tìcíɛ̃̀tɛ̀ kóo kótì nɛ̀ bɛtɔbɛ̀ mɑbɛ̀ bɛ̀nùmmù bɛ̀ɛ̀ wɛ̃ńnɛ̀ okpɑ̀ɑ̀tì kɛ bo dihɛì miɛkɛ. Nɛ̀ wèè bɑkɛ́ bɛhɑ̃ɑ̃pɔ̀mbɛ̀ o kóo pɑ́tíwɑ̃ɑ̃̀tì, wèè pĩĩ mbɛhɑ̃ɑ̃pɔ̀mbɛ̀ nɛ̀ dihɛì kó bɛnìtìbɛ̀ tɔbɛ̀ mɑbɛ̀ sipísìkuɔ̀. 
\v 20 Nɛbusɑdɑdɑnni wèè bɑkɛ́ Bɑbidɔnni kó tihɑ̃ɑ̃pɔ̀ntì weè do bɛ̀ pĩ̀ḿmú kɛ́kònnɛ̀ Dibudɑ ɛì Bɑbidɔnni kóo kpɑ̀ɑ̀tì borɛ̀. 
\v 21 Kòò kɛ̀ mbɛ̀ kùɔ Dibudɑ ɛì Amɑti tenkɛ̀.
\b
\p Mɛm̀mɛ Sudɑɑ kɔbɛ yɛ̀mɛ̀ bɛ tenkɛ̀.
\s1 Kedɑyɑ nɑɑ́mmɛ̀ kùmɑ̀ndɑ́ɑ̀ Sudɑɑ tenkɛ̀
\r (Wéntɛ́ Sedemii 40:7-41:18)
\p
\v 22 Kɛ̀ Nɛbukɑnnɛsɑɑ túótɛ́ Ayikɑmmu yɑɑ̀birɛ Kedɑdiɑ Sɑfɑnni birɛ kɛ́dɔɔ̀ kùmɑ̀ndɑ́ɑ̀ kòò bo mbɑkɛ́ bɛnìtìbɛ̀ ò pĩ̀ḿmú kɛ sùɔ́ mbɛ̀ Sudɑɑ tenkɛ̀ miɛkɛ. 
\v 23 Kɛ̀ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ mɑbɛ̀ nɛ̀ bɛ kó tihɑ̃ɑ̃pɔ̀ntì kɛ̀ bɛ̀ɛ keè Bɑbidɔnni kóo kpɑ̀ɑ̀tì dɔ̀ɔ̀mɛ̀ Kedɑdiɑ kùmɑ̀ndɑ́ɑ̀ kɛ́kɔtɛ o borɛ̀ Misipɑɑ. Ntɛ dɛ yɛmbɛ̀ yètɛ̀: Isimɑyɛɛri nɛ̀ Nɛtɑnniyɑ birɛ nɛ̀ Soɑnɑnni Kɑdeyɑ birɛ nɛ̀ Kedɑdiɑ Tɑnnɛumɛti birɛ Nɛtofɑɑ ɛì kou nɛ̀ Yɑsɑnniyɑu Mɑɑkɑ birɛ, bɛɛ̀ do mbɛ nɛ̀ bɛ kó bɛhɑ̃ɑ̃pɔ̀mbɛ̀. 
\v 24 Kɛ̀ Kedɑdiɑ bɛ dɔúnnɛ̀ dinùù kɛ dɔ̀: Di bɑ́ nyĩɛ̃̀kù Bɑbidɔnni kɔbɛ kɛ̀ di kɔ̃m̀bùɔ̀tì bɛ̀ duò, mbonɛ̀ dihɛì miɛkɛ kɛ pĩ́ mBɑbidɔnni kóo kpɑ̀ɑ̀tì tɔ̃mmú, di yó mbomu kɛ̀ dɛ̀ di nɑɑti tìmɑtì í yóó di kɔkɛ́nɛ̀.
\p
\v 25 Mɛm̀mɛ otɑ̃̀nkù oyiénwè miɛkɛ Isimɑyɛɛri Nɛtɑnniyɑ birɛ nɛ̀ Edisɑmɑɑ wèè do tú tɛkpɑ̀ɑ̀tìcĩ́ɛ̃̀tɛ̀ kou, kɛ́yíɛ́nɛ̀ bɛtɔbɛ̀ mɑbɛ̀ tɛpíítɛ̀, kɛ̀ bɛ̀ɛ kɔtɛ kɛ́potɛ́ Kedɑdiɑ kɛ́kuɔ, kɛ́wɛ̃nnɛ́nɛ̀ Sudɑɑ kɔbɛ nɛ̀ Bɑbidɔnni kɔbɛ bɛ̀ɛ̀ do o bonɛ̀ Misipɑɑ. 
\v 26 Mɛm̀mɛ bɛnìtìbɛ̀ bɛmɔu yɔ̀tɛmɛ̀ Bɑbidɔnni kɔbɛ, kɛ́túótɛ́ bɛsɑ́m̀pɔ́bɛ̀ nɛ̀ bɛdiɛbɛ̀ nɛ̀ bɛ̀ɛ̀ bɑkɛ́ bɛhɑ̃ɑ̃pɔ̀mbɛ̀ kɛ̀ bɛ̀ɛ cokɛ́ bɛmɔu kɛ́kɔtɛ Esibiti.
\s1 Bɑbidɔnni kóo kpɑ̀ɑ̀tì dɔ̀ɔ̀mɛ̀ Sosɑkinni mɛsɑ̀ɑ̀
\r (Wéntɛ́ Sedemii 52:31-34)
\p
\v 27 Bɛ̀ mɛ mpĩ nSudɑɑ kóo kpɑ̀ɑ̀tì Sosɑkinni kɛ́kònnɛ̀ Bɑbidɔnni, kɛ̀ dɛ̀ mmɔkɛ yɛbie nsipísìtɑ̃ɑ̃ti nɛ̀ yɛ̀yiekɛ̀, otɑ̃̀nkù tɛpíítɛ̀ nɛ̀ odɛ́ríwè, diyiè sipísìdɛ́ nɛ̀ diyiénnì yiè kɛ̀ Bɑbidɔnni kóo kpɑ̀ɑ̀tì Efidi-Mɛdodɑkii di tikpɑ̀tì, kóò kuɔ́ mmɛsémmɛ̀ kóò kpetɛ́ kóò dènnɛ dikpetíntou, 
\v 28 kóò nɑ̀kɛ́ tinɑ́ɑǹsɑ̀ɑ̀tì, kóò nií nkoò mbɑkɛ́ bɛkpɑ̀ɑ̀tìbɛ̀ tɔbɛ̀ nɛ̀ bɛ̀ bɛ̀ do wɛ̃ nkɛ bo Bɑbidɔnni. 
\v 29 Kòo duɔ́ nkɛ̀ Sosɑkinnii dɑ́tɛ́ tikpetínyɑ̀ɑ̀tì, kɛ́nyo nwenwe Bɑbidɔnni kóo kpɑ̀ɑ̀tì borɛ̀ o fòmmu mumɔu miɛkɛ. 
\v 30 Kòo kpɑ̀ɑ̀tì weè nyɛ̃́ o kpɛ́í nsɑ̃́ɑ̃̀, yɛwe yɛmɔu duɔ́mɛ̀, o fòmmu mumɔu miɛkɛ.