\id 2CO di48.all F{evrier 1999 BJ Parakou B{enin
\ide UTF-8
\h 2 Kɔdɛnti
\toc1 Pɔɔri wɑ̃̀ri dìì pɑ́tíri dɛ́rì Kirisi kɔbɛ bɛ̀ɛ̀ bo Kɔdɛnti
\toc2 2 Kɔdɛnti
\mt1 Pɔɔri wɑ̃̀ri dìì pɑ́tíri dɛ́rì Kirisi kɔbɛ bɛ̀ɛ̀ bo Kɔdɛnti
\imt1 Di mpɑ́tíri tɔ tìì nɑ́ɑǹtì
\ip Pɔɔri wɑ̃̀ri dìì pɑ́tíri dɛ́rì Kɔdɛnti kɔbɛ, kɛ̀ ti dì kɑ̀ɑ nti bo yɑ̀ Pɔɔri do bòòtɛnɛ̀ mɛ̀ɛ̀ ɑ́ɑ̀rìmɛ̀, Kɔdɛnti kɔbɛ nɛ̀ wenwe bɛ kó mɛtɑummɛ̀ do dòmmɛ̀. Kɔdɛnti kɔbɛ do cɑ̀ɑ̀rɛ̀mu Pɔɔri timɔ́mmɔnti bɛ̀ í yiemmɛ̀ kɛ dò mPɔɔri mɛ̀nkɛ tú Kuyie nkóo tɔ̃ntì. Kɛ̀ Pɔɔri bɛ̀ wɑ̃̀ri kɛ bo bɛ̀ bɛnkɛ ò tumɛ̀ Kuyie nkóo tɔ̃ntì. Mukɑ̀mmù niímmù miɛkɛ kɛ̀ Pɔɔri nyɑ́úkùnko Kɔdɛnti kɔbɛ kɔ̃̀ntì kɛ tú bɛ̀ nniti.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Pɔɔri do bòòtɛnɛ̀ mɛ̀ɛ̀ ɑ́ɑ̀rìmɛ̀ Kɔdɛnti 1-7
\io1 2. Pɔɔri duɔ́mmɛ̀ kɛ̀ bɛ̀ pɑ̃mmú idíítí Sedisɑdɛmmu ɛì kó bɛcĩ̀rìbɛ̀ kpɛ́í 8-9
\io1 3. Pɔɔri nɑ̀kɛ́mɛ̀ ò tú wè 10-13
\c 1
\s1 Mudɔummu
\p
\v 1 Mí mPɔɔri Kuyie nkuù dɔ́ kɛ̀ n nɑɑ́ nYesu Kirisi kó ditɔ̃nnì nɛ̀ ti nɛ́po Timɔntee, tíì di wɑ̃̀ri di m̀pɑ́tíri, díndi Kirisi kɔbɛ bɛmɔu bɛ̀ɛ̀ bo Kɔdɛnti nɛ̀ Akɑyii omɔu miɛkɛ. 
\v 2 Kuyie nti cicɛ nɛ̀ ti Yiɛ̀ nYesu Kirisi bɛ̀ di duɔ́ mmɛsɑ̀ɑ̀ nnɛ̀ diwɛ̀ì.
\s1 Kuyie nnɑ́rìkùnkomɛ̀ ti yɛ̀mmɛ̀
\p
\v 3 Ti sɑ̃ntí Kuyie nti Yiɛ̀ nYesu Kirisi cicɛ, ti cicɛ wèè mɔ̀kɛ mɛsémmɛ̀ kɛ nɑ́ríkùnko ti yɛ̀mmɛ̀ mɛborimɛ mɛmɔu miɛkɛ. 
\v 4 Ò nɑ́ríkùnko ti yɛ̀mmɛ̀ kɛ̀ dɛ̀ bo yie nkɛ̀ ti nɑ kɛ́nɑ́ríkùnnɛ bɛ̀ɛ̀ bo mɛyɛǹcɑɑ̀rìmɛ̀ miɛkɛ bɛ kɔ̃mɛ mmɛ nɛ̀ kù ti duɔ́ mmùù wɛ̃rímú. 
\v 5 Kɛ́ndònnɛ̀ ti fɛ̃́ũ̀rìmɛ̀ Kirisi kpɛ́í mmɛdiɛ̀, mɛɛ̀ botí nku ò nɑ́ríkùnkomɛ̀ ti yɛ̀mmɛ̀ mɛdiɛ̀. 
\v 6 Ti fɛ̃́ũ̀rì kɛ̀ dɛ̀ bo nɑ́ríkùnnɛ di yɛ̀mmɛ̀ mmɛ, kɛ̀ dí pɛ́tɛ́ mɛdɛɛtímɛ̀. Kirisi nɑ́ríkùnnɛ ti yɛ̀mmɛ̀ kɛ̀ dɛ̀ bo nɑ́ríkùnnɛ díì kɔ̃mɛ, kɛ̀ dí mmi ndi fɛ̃́ũ̀rì dìì mɔ̀nnì ti fɛ̃́ũ̀rì mɛɛ̀ fɛ̃́ṹtímɛ̀. 
\v 7 Ti yɛ̃́ kɛ dò ndi ti wɛ̃ńnɛ̀ mɛ̀ɛ̀ botí kɛ fɛ̃́ũ̀rì, di yóó mɛ nti wɛ̃nnɛ́nɛ̀ ti kó kuyɛǹnɑɑtí miɛkɛ.
\p
\v 8 N kɔbɛ ti dɔ́ dí yĩ́ɛ̃́tɛ́mu ti fɛ̃̀ṹtɛ́ mɛ̀ɛ̀ botí Asii tempɛ̃ mmiɛkɛ, kɛ̀ dɛ̀ɛ cĩɛ̃kɛ kɛ́ ti yɔ̃ntɛ, kɛ̀ tí ketɛ́ kɛ í nyɛ̃́ kɛ dò nti bo nfòù. 
\v 9 Ti mɛ̀nkɛ sòò í yɛ̃́ kɛ dò nti bo nfòù, kɛ bútínko kɛ́nkémmú Kuyie mmɑ́ɑ̀, kunku kùù ɔ̃ɔ̃ duɔ́ nkɛ̀ bɛcíríbɛ̀ɛ yɑ̃́ntɛ́. 
\v 10 Kuù ti dɛɛtɛ́nɛ̀ mukṹṹ, nkɛ yóó nti dɛɛrí, ti ku mbúɔ́, kuù yó nti dɛɛrí sɑ̃́ɑ̃̀. 
\v 11 Kɛ yɛ̃́ di yóó nti wɛ̃ńnɛ̀mɛ̀ kɛ bɑ́ɑ́ nKuyie, nkɛ̀ kùu cɔutɛ́ di bɑ́ɑmmu kɛ́ ti dɔɔ̀ mɛsɑ̀ɑ̀, nkɛ̀ dí kù sɑ̃ntɛ dɛ kpɛ́í.
\s1 Pɔɔri do dɔ́mɛ̀ kɛ́kɔtɛ Kɔdɛnti kɛ́wɛ̃tɛ kɛ́yóu
\p
\v 12 Ntɛ dɛ̀ ti nɑɑtinɛ̀ tì: Ti yɛ̀mmɛ̀ ti nɑ́ɑ́mmu ti borimɛ wennimɛ̀ kɛ̀ ti dò mpɑ́íí kutenkù miɛkɛ, kɛ nɛ́ dɔkɛ wenni di borɛ̀, dɛ̀ í tú nɛ̀ onìtì kó mɛciì, ndɛ̀ bonní Kuyie nkó mɛsɑ̀ɑ̀ mborɛ̀ ndɛ. 
\v 13 Ti di wɑ̃ũ tì í cɑ̃́ɑ̃́nnɛ̀ di kɑɑ̀ ntì kɛ tì yo. Ti yɛ̀mmɛ̀ dòmmɛ̀ ti ti ndi wɑ̃̀ri, kɛ̀ n yɛ̃́ kɛ dò ndi bo tì kɑ̀ɑ nkɛ́keè timɔu pɑ́íí. 
\v 14 Di yĩ̀ɛ̃́tɛ́mu bɑ̀mbɑ̀ ndikéè tiì tú ti Yiɛ̀ nYesu Kirisi yóó wɛ̃tɛnímɛ̀ kɛ̀ di yɛ̀mmɛ̀ ti nɑrikɛnɛ̀ ti kɔ̃mɛ di nɑɑtinɛ̀mɛ̀.
\p
\v 15 Nɛ̀ dɛ kó kuyɛǹnɑɑtí kpɛ́í nkɛ n do dɔ́mɛ̀ kɛ́ketɛ́ kɛ́kɔtɛ di ciɛ, kɛ́yíɛ́ kɛ́nɑ́ríkùnnɛ di yɛ̀mmɛ̀, 
\v 16 kɛ́pɛ̃ɛ̃tɛ́ kɛ́kɔtɛ Mɑseduɔnni kɛ́nwɛ̃tiní kɛ̀ dí n teennɛ̀ kɛ̀ n kɔtɛ Sudee. 
\v 17 N do tú dìì mɔ̀nnì m bo kɔtoo kɛ wɑ́ntímɑ́ɑ̀? N do sɔ̃̀ńtɛ́ kɛ́nnɑ́ɑ́ m mɑ́ɑ̀? Kɛ níí bo yĩ́ ɛ̃ɛ̃ kɛ́wɛ̃tɛ kɛ dɔ̀ ɑ́ɑ̀? 
\v 18 Kuyie nyɛ̃́mu n do í soúmmɛ̀, n nɔ̀ í bo yɛ̀dɛ́ɛ̀. 
\v 19 Timɔntee nɛ̀ Sidifɛ̃ɛ̃ nɛ̀ mí mmɔ́mmuɔ, ti di nɑ̀kɛ́ Kuyie mBirɛ dɛ̀ɛ̀ kpɛ́í, nYesu Kirisi ɔ̃ɔ̃ í nyĩ ɛ̃ɛ̃, kɛ́wɛ̃tɛ kɛ dɔ̀ ɑ́ɑ̀. 
\v 20 Yesu Kirisi kɔtɛnímɛ̀ dɛɛ̀ bɛnkú kɛ dò nKuyie ɔ̃ɔ̃ í mbɛ́i nkɛ́ceetɛ. Dɛɛ̀ te kɛ̀ ti ɔ̃ɔ̃ yĩ́ nɛ̀ Yesu yètìrì: Kɛ̀ dɛ̀ mmɛ ndò. Kɛ́dɛ́úkùnnɛ Kuyie nyètìrì. 
\v 21 Kuyie nkumɔ́mmɔnku kuù ti tɑ̃ɑ̃tɛ́ timɔu nɛ̀ dínni, kɛ ti kpénkùnnɛ Kirisi kó mɛtɑummɛ̀ miɛkɛ. 
\v 22 Kuù ti cɑ̀nnɛ kɛ ti duɔ́ mMuyɑɑ́nsɑ̀ɑ̀mù mùù bɛnkú kù ti bɑɑnɛ̀ mɛ̀ɛ̀ sɑ̀ɑ̀.
\p
\v 23 Kɛ̀ n soúmmu Kuyie nni nkuɔ! N yí dɔ́ kɛ́cɑɑ̀rɛ̀ di yɛ̀mmɛ̀ dɛɛ̀ te kɛ̀ n yí wɛ̃̀too di ciɛ Kɔdɛnti. 
\v 24 N yí dɔ́ kɛ́ di nɑ́kɛ́ nɛ̀ muwɛ̃rímú di dò nkɛ́ntũ mmɛ̀ɛ̀ botí Kirisi. Di kpenkɛmu kɛ̀ n dɔ́ kɛ́nɑ́ríkùnnɛ di yɛ̀mmɛ̀.
\c 2
\p
\v 1 Dɛɛ̀ te kɛ̀ n tɑ̃ɑ̃tɛ́ kɛ í dɔ́ kɛ́wɛ̃too di ciɛ kɛ́yíɛ́ kɛ́cɑɑ̀rɛ̀ di yɛ̀mmɛ̀. 
\v 2 M mɛ nwúómmɛ̀ dímbɛ kɛ̀ n yɛ̀mmɛ̀ nɑɑti, kɛ̀ n cɑ̀ɑ̀rɛ̀ di yɛ̀mmɛ̀, n yɛ̀mmɛ̀ tɛ̃́nkɛ nɛ́ nnɑɑtinɛ̀ ɔ̃̀mbɛ? 
\v 3 Dɛɛ̀ te kɛ̀ n di wɑ̃̀ri n sòò di wɑ̃̀ri tì. N do í dɔ́ n kɔtoo kɛ̀ n yɛ̀mmɛ̀ɛ cɑɑ̀rɛ̀nɛ̀ n nɑ nwúó mbɛ̀ kɛ̀ mɛ̀ nɑɑti. N yɛ̃́mu kɛ dò nkɛ̀ n yɛ̀mmɛ̀ nɑɑti, di kɔ̃mɛ múnkɛ bo nnɑɑti. 
\v 4 N sòò yó ndi wɑ̃ũ nɛ̀ tinɔnniɛti nti nɛ̀ mɛyɛǹcɑɑ̀rìmɛ̀, dɛ̀ í dò n dɔ́ kɛ́cɑɑ̀rɛ̀ di yɛ̀mmɛ̀, n dɔ́ dí bɑntɛ́ n di dɔ́ mɛ̀ɛ̀ botí nku.
\s1 Ti bo cĩ́ɛ̃́mmɛ̀ wèè dɔ̀ɔ̀ mɛyɛi
\p
\v 5 Kòò mɔù te kɛ̀ n yɛ̀mmɛ̀ cɑ̀ɑ̀rɛ̀, míì mɑ́ɑ̀ kɔ̃mɛ í cɑ̀ɑ̀rɛ̀, timɔu ndi, yoo bɛ̀mɑbɛ̀ di miɛkɛ kɛ̀ n dɔ̀kɛ bɑ́ɑ́ dɛ̀ sũ̀ṹ. 
\v 6 Kusṹkù di miɛkɛ ò còńnɛ́ mɛ̀ɛ̀ cónnímɛ̀ sɑ̀nnɛ̀mu. 
\v 7 Di mmɔ̀nnì di dò nkɛ́ ò cĩ̀ɛ̃́mmu kɛ́nɑ́ríkùnnɛ o yɛ̀mmɛ̀ kɛ̀ mɛ̀ dɔ̀kɛ bɑ́ɑ́ cɑɑ̀rɛ̀. 
\v 8 N di nɑ́ɑ́mmu kɛ tú dɔɔ̀nɛ̀ dɛ̀mɑrɛ̀ kòo bɑntɛ́ di ò dɔ́mɛ̀. 
\v 9 Dɛɛ̀ te kɛ̀ n di wɑ̃̀ri dipɑ́tíri kɛ bo di yɑ́ɑ́kɛ́ kɛ́yɑ̀ kɛ̀ di yíé n kó itié nyimɔu. 
\v 10 Kɛ̀ di ò cĩ̀ɛ̃́ nho yɛi, m múnkɛ ò cĩ̀ɛ̃́mmu. N dò nkɛ́cĩ́ɛ̃́ nwè, nh ò cĩ̀ɛ̃́mmu di kó mɛsɑ̀ɑ̀ nkpɛ́í kɛ̀ Kirisi yɛ̃́. 
\v 11 Dɛ̀ bo yiennɛ̀mɛ̀ kɛ̀ dibɔɔ̀ bɑ́ɑ́ pɛ́tɛ́ mɛfíè nkɛ yɛ̃́ di yɛ̃́mɛ̀mu dibɔɔ̀ yɛ̀mmɛ̀ dòmmɛ̀.
\p
\v 12 N tùɔ̀kɛ dìì mɔ̀nnì Todowɑɑsi kɛ̀ Kuyie nkpetɛ́ kucɛ kɛ̀ m bo pĩ́ mmutɔ̃mmú. 
\v 13 N yí nyɑ̀ n nɛ́po Titi kɛ̀ n yɛ̀mmɛ̀ɛ cɑɑ̀rɛ̀ kɛ̀ m bɛ̀ cɑu nkɛ́pɛ̃ɛ̃tɛ́ Mɑseduɔnni.
\s1 Fɛkperínɑfɛ kɔbɛ
\p
\v 14 Kuyie nyètìrì ndɛu, kunku kùù ti tɑnnɛ́ fɛkperínɑfɛ miɛkɛ, nɛ̀ Yesu Kirisi kpɛ́í. Kɛ̀ ti dò tùdɑ̀ɑ̀rí kufɔ̃ɔ̃ku kunɑtikù kou tipíìtì timɔu, kɛ bo nte kɛ̀ bɛnìtìbɛ̀ɛ bɑntɛ́ Kirisi. 
\v 15 Kirisi ti dɔ̀ɔ̀ tùdɑ̀ɑ̀rí wèè fɔ̃ɔ̃ku nɑɑti wè nwe Kuyie nkpɛ́í, bɛ̀ɛ̀ coorí nɛ̀ bɛ̀ɛ̀ fieti kɛ̀ bɛ̀ bo nkù yo. 
\v 16 Kɛ̀ ti tú bɛ̀ɛ̀ í coorí bɛ borɛ̀ kufɔ̃ɔ̃ku kùù kɔ̀ù. Kɛ tú bɛ̀ɛ̀ coorí bɛ borɛ̀ kufɔ̃ɔ̃ku kùù duɔ̀ mmufòmmu. We mbo nɑ kɛ́pĩ́ ndɛ kó mutɔ̃mmú? 
\v 17 Ti í dònnɛ̀ bɛtɔbɛ̀ bɛ̀ɛ̀ dɔ̀ɔ̀ Kuyie nnɑ́ɑǹtì kupotɑɑ́, tínti nɑ́ɑ́ nKuyie nnɑ́ɑǹtì weti weti nwe, kɛ yɛ̃́ kuù ti tɔ̃mmɛ̀ kɛ̀ ti tú Kirisi kó bɛtɔ̃mbɛ̀.
\c 3
\s1 Mɛtɑummɛ̀ pɑ̀mmɛ̀ kó bɛtɔ̃mbɛ̀ dò nkɛ́ndòmmɛ̀
\p
\v 1 Ti mɛ̀ mbɛ́i ntì ti sɑ̃ntí timɑ́ɑ̀ ndɑɑ̀? Yɑ́ɑ̀ ti dò nkɛ́ntɔ yɛpɑ́tɛ nyɛ yɛ̀ɛ̀ bɛnkú ti tú bɛ̀, kɛ́ndònnɛ̀ bɛ̀mɑbɛ̀ dɔ̀ɔ̀rimɛ̀? Yoo di ti duɔnní di kó yɛpɑ́tɛ? 
\v 2 Díì tú yɛpɑ́tɛ yɛ̀ɛ̀ bɛnkú ti tú bɛ̀, kɛ̀ bɛnìtìbɛ̀ bo ndi wúó nkɛ́bɑntɛ́ ti pĩ́ mmùù tɔ̃mmú. 
\v 3 Dɛɛ̀ bɛnkú di túmɛ̀ dipɑ́tíri Kirisi wɑ̃̀ri dì kɛ dì nti duɔ́ ti di nɑ̀kɛ́ dìì mɔ̀nnì Kuyie nnɑ́ɑǹtì. Dɛ kó dipɑ́tíri í wɑ̃̀rinɛ̀ mɛwɑ̃ɑ̃niɛ, dì wɑ̃̀rinɛ̀ Muyɑɑ́nsɑ̀ɑ̀mù mmu, dì í wɑ̃̀ri titɑ̃́píɛ́tì ĩ́nkɛ̀, dì wɑ̃̀ri mɛnitiyɛ̀mmɛ̀ miɛkɛ nkɛ.
\p
\v 4 Ti nɑ́ɑ́ mmiɛ nkɛ í yĩɛ̃̀kù Kuyie mborɛ̀ ti tɑ̃́ mɛ̀ɛ̀ kpɛ̀í nKirisi. 
\v 5 Ti í yɛ̃ ntíì pĩ ndɛ kó mutɔ̃mmú nɛ̀ ti kó muwɛ̃rímú ti dɔɔri dɛ̀ɛ̀ kó dimɑ̀ɑ̀ bonní Kuyie mborɛ̀ ndɛ. 
\v 6 Kɛ yɛ̃́ kù ti duɔ́mmɛ̀ muwɛ̃rímú kɛ̀ ti nɑɑ́ mmɛtɑummɛ̀ pɑ̀mmɛ̀ kó bɛtɔ̃mbɛ̀. Dɛ kó mɛtɑummɛ̀ pɑ̀mmɛ̀ í bonní ikuɔ́ ìì wɑ̃̀ri i borɛ̀. Ikuɔ́ kɔumu kɛ̀ Muyɑɑ́nsɑ̀ɑ̀mù fòùkùnko.
\p
\v 7 Ikuɔ́ bɛ̀ do wɑ̃ũ ì yɛtɑ̃́rɛ̀ ĩ́nkɛ̀ ì do kɔùmu. Nɛ̀ mɛmmɛ kɛ nnɛínɛ̀ Kuyie nkó kuwenniku diɛkù, bɑ́ kù mɛ ntúmɛ̀ kùù pɛ̃nkɛ́, kɛ̀ Mɔyiisi ììkɛ̀ mpĩnti bɑ́ Isidɑyɛɛribɛ í nnɑ kɛ bo nhò wùó. 
\v 8 Kɛ̀ Kuyie nkó kuwenniku diɛkù do bonɛ̀ ikuɔ́ ìì kɔ̀ù, kù bo mbonɛ̀ Muyɑɑ́nsɑ̀ɑ̀mù mùù duɔ́ mufòmmu kɛ́pɛ̃ɛ̃tɛ́ kù do dòmmɛ̀. 
\v 9 Kɛ̀ kuwenniku do bonɛ̀ ikuɔ́ ìì kɔ̀ù, kù bo mbonɛ̀ Muyɑɑ́nsɑ̀ɑ̀mù mùù wénkùnko bɛnìtìbɛ̀ kɛ́pɛ̃ɛ̃tɛ́ kù do dòmmɛ̀. 
\v 10 Ti bɑ́ɑ́ nɑ kɛ́túótɛ́ Kuyie nkó kuwenniku di mmɔ̀nnì kɔku kɛ́hɛnnɛnɛ̀ kùù do pĩnti, di mmɔ̀nnì kɔku kù pɛ̃ɛ̃tɛ́mu. 
\v 11 Kɛ̀ Kuyie nkó kuwenniku do bonɛ̀ dɛ̀ɛ̀ í yóó mɔntɛ, kù bo mbonɛ̀ dɛ̀ɛ̀ yó mbo sɑ̃́ɑ̃̀ kɛ́pɛ̃ɛ̃tɛ́ kù do dòmmɛ̀.
\p
\v 12 Ti mɛ nyɛ̃́mɛ̀ kɛ dò nkù í yóó deè, dɛɛ̀ te kɛ̀ ti nɑ́ɑ́ nkɛ í yĩɛ̃̀kù. 
\v 13 Ti í dònnɛ̀ Mɔyiisi wèè do ɔ̃ɔ̃ kɑ̃ɑ̃́ nho ììkɛ̀ kuyɑ̀ɑ̀kù bɑ́ Isidɑyɛɛribɛ í nyɑ̀ Kuyie nkó kuwenniku dèè dìì mɔ̀nnì. 
\v 14 Mɛmmɛ kɛ̀ dɛ kó kuyɑ̀ɑ̀kù kpɑɑ́ kɑ̃nkɛ́ bɛ yɛ̀mmɛ̀, kɛ̀ bɛ̀ kɑ̀ɑ̀ mmɛtɑummɛ̀ kótímɛ̀ kó dipɑ́tíri kɛ í bɑnní. Kɑ̀ɑ í wɛ̃nnɛ́nɛ̀ Kirisi dɛ̀ ɔ̃ɔ̃ í ndɑ kɑ̃ɑ̃tɛ́. 
\v 15 Nɛ̀ yíenní kɛ dɛ̀ bɑɑ kpɑɑ́ kɛ bɛ̀ kɑ̃nkɛ́, kɛ̀ bɛ̀ kɑ̀ɑ̀ mMɔyiisi kó yɛpɑ́tɛ kɛ í bɑnní. 
\v 16 Onìtì cɔutɛ́ dìì mɔ̀nnì ndi Yesu, dɛ kó kuyɑ̀ɑ̀kù ɔ̃ɔ̃ kɑ̃ɑ̃tɛ́mɛ̀. 
\v 17 Kɛ yɛ̃́ ti Yiɛ̀ ntúmɛ̀ Muyɑɑ́nsɑ̀ɑ̀mù. Muyɑɑ́nsɑ̀ɑ̀mù borɛ̀ kunɑɑtí dɛ mbo. 
\v 18 Tínti bɛ̀ɛ̀ cɔutɛ́ Yesu, kɛ̀ dɛ kó kuyɑ̀ɑ̀kù kɑ̃ɑ̃tɛ́, ti mɔkɛmu Kuyie nkó kuwenniku kɛ̀ kù ti ceeri kɛ̀ ti nɑɑ̀ nnɛ̀ ti Yiɛ̀ nyɛwe yɛmɔu duɔ́mɛ̀ kɛ mɔɔri o kpetì. Ti Yiɛ̀ nkó muyɑɑ́ mmuù pĩ ndɛ kó mutɔ̃mmú.
\c 4
\s1 Tikpɑ̀tì tìì bo tiyɑɑmɑtì miɛkɛ
\p
\v 1 Kuyie nkuù ti dɔ̀ɔ̀ mɛsɑ̀ɑ̀ nkɛ tì duɔ́ nku kó mutɔ̃mmú, dɛɛ̀ te kɛ̀ ti mù pĩ nkɛ̀ ti kɔ̃̀ntì í yɑ̃́ríkú. 
\v 2 Ti yóumu mɛdɔɔ̀rìmɛ̀ disɔ̀rì kɔ̃mɛ, ti dɔɔ̀rìmɛ̀ mɛmɔu síɛ́mu, ti í cií nhòmɔù, ti í ceeri Kuyie nnɑ́ɑǹtì. Ti nɑ́ɑ́ ntimɔ́mmɔnti nti bɛnìtìbɛ̀ kɛ̀ Kuyie nwúó, bɛ̀ɛ̀ dɔ́ timɔ́mmɔnti bɛ̀ bo nɑ kɛ́bɑntɛ́. 
\v 3 Bɑ́ kɛ̀ Tinɑ́ɑǹsɑ̀ɑ̀tì ti nɑ́ɑ́ ntì kpɑɑ́ kɛ sɔ̀ù, ti sɔ̀ùnɛ̀ bɛ̀ɛ̀ fieti bɛ̀mbɛ. 
\v 4 Bɛ̀ í yie nkɛ yɛ̃́ kutenkù kuù nkóo kpɑ̀ɑ̀tì dibɔɔ̀ bɛ̀ yɛ̃̀ĩ̀kùnnɛmɛ̀ kɛ bɛ̀ dìítí bɑ́ bɛ̀ í yɑu Tinɑ́ɑǹsɑ̀ɑ̀tì kó kuwenniku, Kirisi kɔku kùù ti bɛnkú Kuyie ndòmmɛ̀. 
\v 5 Ti í nɑ́ɑ́ nti mɔ́mmɔmbɛ kpɛ́í, ti nɑ́ɑ́ nYesu Kirisi kpɛ́í nkɛ, wèè tú ti Yiɛ̀, ti tú díì kó bɛtɔ̃mbɛ̀ Kirisi kó mɛtɑummɛ̀ miɛkɛ. 
\v 6 Kuyie nkùù yĩ kuwennikuu míítɛ́ dibiìnnì miɛkɛ kuù míítɛ́ ti yɛ̀mmɛ̀ miɛkɛ, kɛ ti bɛnkɛ ku kpetì nɛ̀ Kirisi borɛ̀.
\p
\v 7 Ti dònnɛ̀ tiyɑɑmɑtì nti kɛ̀ dɛ̀mɑrɛ̀ sɑ̀ɑ̀rɛ̀ bo ti miɛkɛ, kɛ̀ bɛnìtìbɛ̀ bo bɑntɛ́ dɛ kó muwɛ̃rímú í túmɛ̀ ti kɔ̃mu kɛ̀ Kuyie nkɔ̃mu mmu. 
\v 8 Bɛ̀ ti fɛ̃́ṹkomu bɛ̀ mɛ nyí ti nɑ, kɛ ti ɑ̃ɑ̃̀ iyĩ̀ɛ̃̀kɛ ti kɔ̃̀ntì mɛ nyí yɑ̃rikɛ. 
\v 9 Bɛ̀ ti fɛ̃́ṹkomu kɛ̀ Kuyie nti bonɛ̀ kɛ̀ bɛ̀ ti buɔ̀ nkɛ̀ ti iiti. 
\v 10 Kɛ̀ bɛ̀ ti wɑntinɛ̀ mukṹṹ mbɛ̀ do mù wɑntinɛ̀mɛ̀ Yesu, kɛ̀ bɛ̀ bo bɑntɛ́ Kirisi fòùmɛ̀ ti miɛkɛ, 
\v 11 kɛ ti wɑntinɛ̀ mukṹṹ nsɑ̃́ɑ̃̀ Yesu kpɛ́í, kɛ̀ bɛ̀ bo bɑntɛ́ Yesu fòùmɛ̀ ti kó tikɔ̃̀ntì tìì yóó kú ti miɛkɛ. 
\v 12 Ti nɑ́ɑ́ ntìì nɑ́ɑǹsɑ̀ɑ̀tì kɛ̀ di pɛ́u mufòmmu tiì te kɛ̀ bɛ̀ dɔ́ kɛ́ ti kuɔ.
\p
\v 13 Ti wɑ̃̀rimu kɛ tú: N yiemmu dɛɛ̀ te kɛ̀ n nɑ̀ɑ́. Ti múnkɛ yiemmu dɛɛ̀ te kɛ̀ ti nɑ́ɑ́. 
\v 14 Ti yɛ̃́mu kɛ dò nKuyie nkùù te kɛ̀ ti Yiɛ̀ nYesu yɑ̃̀ńtɛ́ kuù yó nte kɛ̀ ti yɑ̃́ntɛ́ nɛ̀ díndi kɛ̀ ti wɛ̃nnɛ́ kɛ́kɔtɛ kɛ́mbo ku borɛ̀. 
\v 15 Ti fɛ̃́ṹrì díì kpɛ́í nkɛ kusṹkù di miɛkɛ bo pɛ́tɛ́ Kuyie nkó mɛsɑ̀ɑ̀ kɛ̀ ku kó yɛsɑ̃ɑ̃ ndɔkɛ dɛukɛ.
\s1 Tikɔ̃̀ntì tìì yóó kú
\p
\v 16 Dɛɛ̀ te kɛ̀ ti kɔ̃̀ntì í yɑ̃́ríkú, bɑ́ kɛ̀ tikɔ̃̀ntì cĩ̀tiri ti wɛ̃rɛ̀ yiɛ pɛ́úmu muwɛ̃rímú yɛwe yɛmɔu. 
\v 17 Ti fɛ̃́ũ̀rì sɑ́m̀pɔ́ nwe kɛ̀ dɛ kó mɛfɛ̃́ṹtímɛ̀ yóó pɛ̃ɛ̃tɛ́, dɛɛ̀ ti tũnni kɛ bo ti tɑnnɛ́ Kuyie nkó tikpetì miɛkɛ tìì dɛu kɛ í sénní kɛ yóó mbo sɑ̃́ɑ̃̀, tì pɛ̃ɛ̃tɛ́mu ti mɛ̀ nyo mmɛ̀ɛ̀ sémmɛ̀. 
\v 18 Ti í wɑnti ti nuɔ nwúó ndɛ̀, ti wɑnti ti í wúó ndɛ̀ ndɛ, onìtì wùó ndɛ̀ ɔ̃ɔ̃ í nhɔɔtɛ, ti í wúó ndɛ̀ dɛɛ̀ bo sɑ̃́ɑ̃̀.
\c 5
\p
\v 1 Ti yɛ̃́mu kɛ dò nti kó tikɔ̃̀ntì tii ntú yɛfɛ nyɛ kɛ̀ ti bo yɛ miɛkɛ, kɛ̀ yɛ̀ ku dìì yiè, Kuyie nti duɔ́mmu sicɛ̃kperí kɛĩ́nkɛ̀ kumɔ́mmɔnku kù mɑɑ́ sì, sìì yó mbo sɑ̃́ɑ̃̀. Sì í mɑɑ́nɛ̀ sinitinɔ̀u. 
\v 2 Dɛɛ̀ te di mmɔ̀nnì kɛ̀ ti fɛ̃́ũ̀rì dɛ kó yɛfɛ miɛkɛ kɛ dɔ́ Kuyie nti duɔ́ nkɛĩ́nkɛ̀ kó sicɛ̃́ĩ. 
\v 3 Ti mɛ nyóó tɑmɛ̀ dɛ kó sicɛ̃́ĩ ti í yóó nfeío. 
\v 4 Ti mɔkɛ tìì kɔ̃̀ntì kɛtenkɛ̀ kiɛ nti ti fɛ̃́ṹkomu, kɛ̀ ti ɑ́ɑ̀rì, ti mɛ nyí dɔ́ kɛ kú kɛ́nkpɑ tikɔ̃̀ntì, ti dɔ́ kɛ́pɛ́tɛ́ kɛĩ́nkɛ̀ kpɛti nti kɛ̀ dɛ̀ɛ yie nkɛ̀ mufòmmuu mɑɑ́nko mukṹṹ. 
\v 5 Kuyie nkuù dɛ̀ dɔ̀ɔ̀ ti kpɛ́í nkɛ ti duɔ́ Muyɑɑ́nsɑ̀ɑ̀mù mùù bɛnkú kù ti bɑɑnɛ̀mɛ̀ mɛsɑ̀ɑ̀.
\p
\v 6 Ti kpɑɑ́ bo dìì mɔ̀nnì tikɔ̃̀ntì tiì mmiɛkɛ ti í tɔ́kɛ́nɛ̀ ti Yiɛ̀ ncĩ́ɛ̃̀tɛ̀ ti kɔ̃m̀bùɔ̀tì mɛ nyí duò. 
\v 7 Ti kérí nɛ̀ mɛtɑ̃́kùmɛ̀ mmɛ dɛ̀ í tú ti dɛ̀ wùó. 
\v 8 Ti kɔ̃m̀bùɔ̀tì í duò, ti pètìnkɛ dɔ́ kɛ́yɛ̀mu ti nkɔ̃̀ntì miɛkɛ kɛ́kɔtɛ ti Yiɛ̀ mborɛ̀. 
\v 9 Dɛɛ̀ te kɛ̀ ti wɑnti kɛ̀ ti ku yoo ti fòù Kuyie nti pɛ́nsìrì. 
\v 10 Kɛ yɛ̃́ ti yóó cómmúmɛ̀ diyiè mɑrì Kirisi ììkɛ̀ kòo yietí bɑ́ wè dɔɔ̀rìmɛ̀ do dòmmɛ̀, mɛsɑ̀ɑ̀ nyoo mɛyɛi nhò dɔ̀ɔ̀ mɛ̀ ò kpɑɑ́ fòù dìì mɔ̀nnì.
\s1 Onitipɑ̀nwè
\p
\v 11 Ti dé ti Yiɛ̀ nwe kɛ pĩ́ nho tɔ̃mmú, kɛ yũɔ̃nní bɛnìtìbɛ̀ o borɛ̀. Kuyie nyɛ̃́mu ti yɛ̀mmɛ̀, kɛ̀ n yɛ̀mmɛ̀ dò ndi múnkɛ n yɛ̃́. 
\v 12 Ti í dɔ́ kɛ́sɑ̃ntɛ timɑ́ɑ̀, ti dɔ́ kɛ́ di nɑ́kɛ́ ti nɑ́ɑ́mmɛ̀ mmɛ timɔ́mmɔnti kɛ̀ di yɛ̀mmɛ̀ nti nɑɑtinɛ̀, kɛ̀ di níí nɑ kɛ́tɛ̃́nnɛ́ bɛ̀ɛ̀ di nɑ́ɑ́nnɛ̀ sipɔɔ bɑ́ dɛ̀ í bonní bɛ yɛ̀mmɛ̀ miɛkɛ. 
\v 13 Kɛ̀ ti wɑ̀ɑ́tɛ́, ti wɑ̀ɑ́tɛ́ Kuyie nkpɛ́í nkɛ, kɛ̀ ti yɛ̀mmɛ̀ mɛ nwenni mɛ̀ wenni díì kpɛ́í. 
\v 14 Kirisi kó mɛdɔ́kùmɛ̀ mɛɛ̀ ti tem̀mù, kɛ̀ ti yɛ̃́ kɛ dò nhonìtì omɑ́ɑ̀ kú dìì mɔ̀nnì bɛnìtìbɛ̀ bɛmɔu kpɛ́í, timɔu ti kumu. 
\v 15 Ò ku timɔu ti kpɛ́í nkɛ, ti tɛ̃́nkɛ í te timɑ́ɑ̀, ti dò nkɛ́nfòù wèè kú kɛ yɑ̃̀ńtɛ́ ti kpɛ́í o kpɛ́í nkɛ.
\p
\v 16 Kɛ̀ dɛ̀ dò mɛmmɛ ti tɛ̃́nkɛ í wúó nhòmɔù nɛ̀ mɛnitiyɛ̀mmɛ̀, ti mɛ ntɛ̃́nkɛ í wúó nKirisi nɛ̀ mɛnitiyɛ̀mmɛ̀. 
\v 17 Kòò mɔù tɑ̀unnɛ̀ Kirisi ò nɑɑ́ nhonitipɑ̀nwè nwe kɛ̀ dɛ̀ kótírɛ̀ dɛmɔu pɛ̃ɛ̃tɛ́, dɛmɔu kɛ̀ dɛ̀ nɑɑ́ ndɛpɑ̀nnɛ̀. 
\v 18 Dɛmɔu Kuyie nkuù dɛ̀ dɔ̀ɔ̀ri, kunku kùù ti tɑunnɛ̀ kumɑ́ɑ̀ nɛ̀ Kirisi borɛ̀, kɛ ti duɔ́ mmutɔ̃mmú kɛ̀ ti bo nyũɔ̃ní bɛnìtìbɛ̀ ku borɛ̀ kɛ̀ bɛ̀ɛ kù tɑunnɛ̀. 
\v 19 Kuyie ntɑukonɛ̀ kumɑ́ɑ̀ bɛnìtìbɛ̀ nɛ̀ Kirisi borɛ̀ ndɛ kɛ bɛ̀ cĩ̀ɛ̃́nko bɛ yɛi nkɛ ti duɔ́ ndɛ kó mutɔ̃mmú kɛ tú tí nɑ́kɛ́ mɛtɑummɛ̀ kpɛ́í.
\p
\v 20 Ti cómmú Kirisi kó difɔ̃̀tìrì ndi kɛ di nɑ́ɑ́nnɛ̀, Kuyie ndi nɑ́ɑ́nnɛ̀ ti nɔ̀ miɛkɛ nkɛ, ti di bɑ́ɑ́mmu kɛ tú dí yie nkɛ tɑunnɛ̀ dimɑ́ɑ̀ Kuyie. 
\v 21 Kirisi do í mɔkɛ mɛyɛi mmɑmɛ̀, kɛ̀ Kuyie nhò toú nti kó mɛyɛi mmɛmɔu kɛ̀ dɛ̀ bo yie nkɛ̀ kù ti sɑɑ̀kùnnɛ.
\c 6
\p
\v 1 Tínti bɛ̀ɛ̀ wɛ̃ńnɛ̀ Kuyie nkɛ pĩ́ nku tɔ̃mmú, ti di nɑ́ɑ́mmu kɛ tú di bɑ́ɑ́ yóu kɛ̀ Kuyie ndi duɔ́ mmɛ̀ɛ̀ sɑ̀ɑ̀ nyɛ̀ dɛtetìrɛ̀. 
\v 2 Ti wɑ̃̀rimu kɛ tú:
\q1 N kèèmu ɑ bɑ́ɑmmìi dimɔ̀nnì sɑ̀ɑ̀rì,
\q1 kɛ ì cɔutɛ́, kɛ dɑ teénnɛ̀,
\q1 n dɔ́ kɛ dɑ dɛɛtɛ́ dìì mɔ̀nnì.
\m Tóò, dimɔ̀nnì sɑ̀ɑ̀rì tú dii. Yíe nwe Kuyie ndɔ́mɛ̀ kɛ́ dɑ dɛɛtɛ́!
\p
\v 3 Ti í dɔ́ ti dɔɔ̀rìmɛ̀ɛ bɔ nhòmɔù, kɛ̀ bɛ̀ɛ wɑ́tí ti tɔ̃mmú. 
\v 4 Ti dɔ́ bɛ̀ɛ bɑntɛ́mu ti dɔɔ̀rìmɛ̀ mɛmɔu miɛkɛ ti túmɛ̀ Kuyie nkó bɛtɔ̃mbɛ̀. Dɛɛ̀ te kɛ̀ ti fɛ̃́ũ̀rì kɛ ɑ́ɑ̀rì, kɛ̀ ti yɛ̀mmɛ̀ cɑ̀ɑ̀ri, kɛ ti mi. 
\v 5 Kɛ̀ bɛ̀ ti puotì, kɛ ti kpetì, kɛ sukú bɛnìtìbɛ̀ kɛ̀ bɛ miɛkɛ ti pɛikɛ, kɛ̀ ti pĩ mutɔ̃nyonkumu, kɛ wentɛ́ inuɔ, kɛ wentɛ́ dikònnì. 
\v 6 Kɛ̀ Muyɑɑ́nsɑ̀ɑ̀mù ti teénnɛ̀ kɛ̀ ti borimɛ wenni, kɛ ti yɛ̃́ Kuyie nnɑ́ɑǹtì, kɛ mɔkɛ mɛminnímɛ̀, kɛ nitì, kɛ dɔ́ titɔbɛ̀ mɔ́mmuɔ. 
\v 7 Ti nɑ́ɑ́ nKuyie nnɑ́ɑǹtì weti weti nwe kɛ̀ Kuyie nwɛ̃rímú ti bonɛ̀, ti kó tikpɑ̀rìnɛntì tu ti bo dɔɔ̀mɛ̀ Kuyie ndɔ́mɛ̀. 
\v 8 Kɛ̀ biɛ nti sɑ̃ntí, bɛtɔbɛ̀ nti sɑ̃́ɑ̃́, kɛ̀ biɛ nti wɑ́tìrì, kɛ̀ bɛtɔbɛ̀ nɑ́ɑ́ nti kó mɛsɑ̀ɑ̀ nkpɛ́í, kɛ ti wúó nsiyɑ́ɑ̀bìsí yɛmbɛ̀ kɛ̀ ti nɛ́ nɑ́ɑ́ ntimɔ́mmɔnti. 
\v 9 Kɛ dɔɔri kɛ dò mbɛ̀ í ti yɛ̃́ kɛ nɛ́ ti yɛ̃́, kɛ̀ ti wúó mbɛ̀ɛ̀ yóó kú kɛ̀ ti nɛ́ fòù, kɛ ti kpetì, bɛ̀ mɛ nyí ti kɔ̀ù. 
\v 10 Kɛ cɑɑ̀ri ti yɛ̀mmɛ̀ kɛ̀ diwɛ̀ì nɛ́ ti bo sɑ̃́ɑ̃̀, kɛ ti wúó nyidɑwɑɑ́ nkɛ̀ ti nɛ́ kpɑrikùnko bɛnìtìbɛ̀ pɛ́u, kɛ ti wúó mbɛ̀ɛ̀ í mɔkɛ dɛ̀mɑrɛ̀ kɛ̀ ti nɛ́ mɔkɛ dɛmɔu.
\p
\v 11 Ti kɔbɛ, Kɔdɛnti kɔbɛ ti í di sɔ̀nnɛ tìmɑtì, ti di dɔ́mu nɛ̀ ti yɛ̀mmɛ̀ mɛmɔu. 
\v 12 Ti di duɔ́mmu ti yɛ̀mmɛ̀, díì í ti duɔ́ ndi kɔ̃mɛ. 
\v 13 N di nɑ́ɑ́nnɛ̀ kɛ dò m bí nyi, ti duɔ́nnɛ̀ di yɛ̀mmɛ̀ ti di duɔ́mmɛ̀ ti kɔ̃mɛ.
\s1 Kuwenniku í wɛ̃nnɛ́ dibiìnnì
\p
\v 14 Di bɑ́ɑ́ tɑunnɛ̀ dimɑ́ɑ̀ bɛ̀ɛ̀ í yɛ̃́ Kuyie. Dɛwennirɛ í wɛ̃ńnɛ̀ dɛsĩ̀nnɛ̀, kuwenniku í wɛ̃ńnɛ̀ dibiìnnì. 
\v 15 Kirisi í wɛ̃ńnɛ̀ dibɔɔ̀, Kirisi kou í wɛ̃ńnɛ̀ wèè í tú Kirisi kou. 
\v 16 Bɛ̀ í fiiku yɛbɔkɛ̀ Kuyie ncĩ́ɛ̃̀tɛ̀. Ti tú Kuyie ncĩ́ɛ̃̀tɛ̀ ntɛ kù bo tɛ̀ɛ miɛkɛ, kɛ́ndònnɛ̀ tì wɑ̃̀rimɛ̀ kɛ tu:
\q1 M bo mbo bɛ cuokɛ̀ kɛ bɛ wɛ̃nnɛ́,
\q1 kɛ bɛ te kɛ bɛ̀ tu n kɔbɛ.
\q1
\v 17 Dɛɛ̀ te kɛ̀ ti Yiɛ̀ nKuyie mbɛ́i nkɛ tú:
\q1 Yɛ̀nnɛ̀ bɛ miɛkɛ kɛ́cɑ̃́nnɛ́.
\q1 Di bɑ́ɑ́ kɑ́ɑ́kɛ́ dɛ̀ɛ̀ sĩ̀,
\q1 kɛ̀ dɛ̀ɛ yie nkɛ̀ n di cɔutɛ́,
\q1
\v 18 kɛ́ n tú di cicɛ, kɛ̀ di tú m bí.
\q1 Mí nKuyie Mpɑkɛdɑɑ míì mɛ nyɛ̃.
\c 7
\p
\v 1 N kɔbɛ Kuyie nti dɔúnnɛ̀ yɛ̀ɛ̀ nɔ̀ kó dimɑ̀ɑ̀ tú yɛsɑ̀ɑ̀yɛ̀ nyɛ, yóunɛ̀ kɛ̀ ti mɛntɛ́nɛ̀ timɑ́ɑ̀ dɛ̀ɛ̀ sĩ̀nkùnko tikɔ̃̀ntì nɛ̀ mɛyɛ̀mmɛ̀, kɛ́yetoo kɛ́ndò mpɑ́í pɑ́í kɛ́ndé Kuyie.
\s1 Kɔdɛnti kɔbɛ cèètɛmɛ̀ kɛ̀ dɛ̀ nɑrikɛ Pɔɔri
\p
\v 2 N duɔ́nnɛ̀ di yɛ̀mmɛ̀ mɛmɔu, n yí cɑ̀ɑ̀rɛ̀ òmɔù dɛ̀mɑrɛ̀, n yí tɑnnɛ́ òmɔù tidɑwɑntì miɛkɛ, n yí ciitɛ́ òmɔù kɛ di o kpɛrɛ. 
\v 3 Dɛ̀ í tú m bɛ́i mɛmmɛ kɛ di kpɑnnɛ̀, n di nɑ̀kɛ́mu kɛ̀ n tú n di duɔ́ n yɛ̀mmɛ̀ mɛmɔu kɛ ti wɛ̃nnɛ́, kɛ yó nwɛ̃ mmufòmmu miɛkɛ nɛ̀ mukṹṹ mmiɛkoo. 
\v 4 N di tɑ̃́ mɛdiɛ̀ mmɛ kɛ̀ n yɛ̀mmɛ̀ di nɑɑtinɛ̀, kɛ̀ m mɔ̀kɛ dikɔ̃m̀bùɔ̀ kɛ̀ diwɛ̀ì m bo mɛsɑ̀ɑ̀ ndi kpɛ́í bɑ́ nɛ̀ ti mɛ nfɛ̃́ũ̀rìmɛ̀.
\p
\v 5 N tùɔ̀kɛ dìì mɔ̀nnì Mɑseduɔnni kɛ mɑ́ɑ́nɛ̀ mɛhɑ́ɑ́rìmɛ̀ tipíìtì timɔu, n yí nnɑ kɛ om̀pɛ̀, kɛ́nhɑrìnɛ̀ biɛ nkɛ yĩɛ̃̀kù bɛtɔbɛ̀. 
\v 6 Kuyie nkùù ɔ̃ɔ̃ bɑ́ntɛ̀ wèè yɛ̀mmɛ̀ cɑ̀ɑ̀rɛ̀, kɛ̀ kù m bɑ́ntɛ̀ kɛ̀ Titii tuɔkɛní. 
\v 7 Dɛ̀ í tú dɛ̀ n nɑrikɛ ò tùɔ̀kɛnímɛ̀ mɑ́ɑ̀ kpɛ́í, nɛ̀ di sòò nɑ́ríkùnnɛ mɛ̀ɛ̀ botí o yɛ̀mmɛ̀ ò n nɑ̀kɛ́mu di dɔ́mɛ̀ kɛ́ n yɑ̀ nɛ̀ di yɛ̀mmɛ̀ sòò cɑ̀ɑ̀rɛ̀mɛ̀ nɛ̀ di mɔkɛ tìì kɔ̃nyɑuti n kpɛ́í dɛɛ̀ te kɛ̀ diwɛ̀ì dɔ̀kɛ m pĩ.
\p
\v 8 N sòò di wɑ̃̀ri dipɑ́tíri kɛ́cɑɑ̀rɛ̀ di yɛ̀mmɛ̀ n yí dèmmu, bɑ́ kɛ̀ ǹ dèmmu dɛ kó idebìi í ɔɔtɛ, kɛ yɛ̃́ di yɛ̀mmɛ̀ cɑ̀ɑ̀rɛ̀mɛ̀ dimɔ̀nnì sɑ́m̀pɔ́ nwe. 
\v 9 Dɛ̀ n nɑɑtimu di m̀mɔ̀nnì n di wɑ̃̀rimɛ̀ dɛ kó dipɑ́tíri dɛ̀ nɛ́ í tú n yɛ̃ ndi yɛ̀mmɛ̀ cɑ̀ɑ̀rɛ̀ mɛ̀ɛ̀ kpɛ́í, dɛ kó mɛyɛǹcɑɑ̀rìmɛ̀ di tee mmɛ̀ɛ̀ kpɛ́í nkɛ kɛ̀ di cèètɛ kɛ tũ̀nnɛ Kuyie nkù dɔ́ ku kɔbɛ mmɔkɛ mɛɛ̀ yɛǹcɑɑ̀rìmɛ̀ botí. N tũ n yí di cɑ̀ɑ̀rɛ̀ dɛ̀mɑrɛ̀. 
\v 10 Mɛyɛǹcɑɑ̀rìmɛ̀ mɛ̀ɛ̀ tu Kuyie nkɔ̃mɛ mɛ̀ teénnɛ̀ onìtì nwe koò cèèri. Dɛ kó mɛyɛǹcɑɑ̀rìmɛ̀ botí bɛ̀ ɔ̃ɔ̃ í ǹdèmmu mɛ kpɛ́í. Kutenkù kuù nkó mɛyɛǹcɑɑ̀rìmɛ̀ í ceeri onìtì mɛ̀ ò kɔ̀ùmu. 
\v 11 Wéntɛ́nɛ̀ kɛ́yɑ̀ dɛ kó mɛyɛǹcɑɑ̀rìmɛ̀ miɛkɛ Kuyie mpĩ mmùù tɔ̃mmú, kɛ̀ dɛ̀ di yonkɛ, kɛ̀ di kɔ̃m̀bùɔ̀tìi do, kɛ̀ dí ndɔ́ kɛ́ n yɑ̀, kɛ́ítɛ́ kɛ́cómmú kɛ́dɛitɛ wèè dɔ̀ɔ̀ mɛyɛi, kɛ bɛnkɛ kɛ dò ndi í ò kòḿmú.
\p
\v 12 N sòò í di wɑ̃̀ri dipɑ́tíri wèè dɔ̀ɔ̀ mɛyɛi nhò kpɛ́í nyoo ò cɑ̀ɑ̀rɛ̀ wè kpɛ́í. N di wɑ̃̀ri kɛ di bo dɔ̀ɔ̀ kɛ̀ dɛ̀ɛ bɛnkɛ di ti dɔ́mɛ̀ mmɛ. 
\v 13 Di dɔ̀ɔ̀ kɛ̀ dɛ̀ n nɑrikɛmu, kɛ yìɛ́ kɛ n nɑrikɛ di sòò cɔutɛ́mɛ̀ Titi kɛ́nɑ́ríkùnnɛ o yɛ̀mmɛ̀. 
\v 14 N sòò di sɑ̃ntɛmu Titi borɛ̀ kɛ sɔ̃́ nhò mu nyí kɔ̀too, kòò kɔ̀too kɛ sɔ̃́ ndɛ̀ mɛ̀nkɛ mɛ ndò. Nh ɔ̃ ndi nɑ́ɑ́ mɔ́mmuɔ nwe, kɛ́ndonnɛ̀ n sòò sɑ̃ntɛmɛ̀ Titi di borɛ̀ kɛ̀ di mɛ̀nkɛ dɛ nyɑ̀. 
\v 15 Ò di dɔ́ mɛdiɛ̀ mmɛ, kɛ í yĩɛ̃ ndi sòò ò cɔutɛ́mɛ̀ kɛ́yie nho tié nkɛ́ nhò dé mɛdiɛ̀. 
\v 16 N yɛ̀mmɛ̀ di nɑɑtinɛ̀mu, n yí di yĩɛ̃̀kù tìmɑtì miɛkɛ.
\c 8
\s1 Mɑseduɔnni kɔbɛ kó yɛpɑ̃rɛ̀
\p
\v 1 N kɔbɛ n dɔ́ kɛ́ di nɑ́kɛ́ Kuyie ndɔ̀ɔ̀ mɛ̀ɛ̀ sɑ̀ɑ̀ mmɛ Kirisi kɔbɛ tĩ̀rɛ̀ yɛ̀ɛ̀ bo Mɑseduɔnni. 
\v 2 Bɑ́ nɛ̀ mɛfɛ́ṹtímɛ̀ mɛ nti sɔ̃̀nkɛ́mɛ̀ mɛdiɛ̀ nɛ̀ mɛmmɛ kɛ̀ ti mmɔ̀kɛ diwɛ̀ì mɛdiɛ̀, kɛ pɑ̃ mɛdiɛ̀, bɑ́ nɛ̀ ti mɛ ncĩĩnnìmɛ̀. 
\v 3 Kɛ̀ tìi ndɔ́ nɛ̀ timɑ́ɑ̀ tì bo pɑ̃mɛ̀, kɛ́pɑ̃ kɛ̀ dɛ̀ɛ pɛ̃ɛ̃tɛ́ ti wɛ̃rímú. 
\v 4 Tiì do yetíróo kɛ ti bɑ́ɑ́ nkɛ tú tí yóu kɛ̀ tì múnkɛɛ pɑ̃ ti kpɛrɛ Kirisi kɔbɛ bɛ̀ɛ̀ bo Sudee kó kutempɛ̃ mmiɛkɛ. 
\v 5 Tì do ketɛ́ kɛ́duɔ́ ntimɑ́ɑ̀ ndi Kuyie nkɛ́ndònnɛ̀ Kuyie ndɔ́mɛ̀, kɛ nɛ́ ti duɔ́ timɑ́ɑ̀, kɛ pɑ̃ kɛ̀ dɛ̀ɛ pɛ̃ɛ̃tɛ́ ti yɛ̀mmɛ̀ do dò ntì yóó pɑ̃ kɛ̀ dɛ̀ mmɑmɛ̀. 
\v 6 Dɛɛ̀ te kɛ̀ ti bɑ́ntɛ̀ Titi kɛ tú wèe wɛ̃too kɛ́sɔɔtɛ́ kɛ́yɑ́úkùnnɛ di kɔ̃̀ntì, kɛ́deè mutɔ̃mmú ò ketɛ́ mù. 
\v 7 Díì tú bɛketibɛ̀ dɛmɔu dɛ miɛkɛ, kɛ dɔ́ Kuyie mmɛdiɛ̀, nkɛ mɔkɛ bɛ̀ɛ̀ nɔ nkɛ nɑ́ɑ́ Kuyie nnɑ́ɑǹtì, nɛ̀ bɛ̀ɛ̀ nɔ nkɛ tì tié nkɛ̀ di kɔ̃̀ntì yɑu, kɛ̀ di ti dɔ́ mɛdiɛ̀. Kɛ̀ n yɛ̃́ kɛ dò ndi bo ntú bɛketibɛ̀ bɛ̀ɛ̀ pɑ̃ɑ̃ mbɛ miɛkɛ.
\p
\v 8 N yí yɛ̃ ndi pɑ̃ nɛ̀ muwɛ̃rímú, n dɔ́ kɛ́ di nɑ́kɛ́ bɛtɔbɛ̀ pɑ̃ɑ̃ mmɛ̀ɛ̀ botí nku, kɛ̀ dɛ̀ɛ yɑ́úkùnnɛ di kɔ̃̀ntì kɛ di bɛnkɛ di dɔ́mɛ̀ Kuyie. 
\v 9 Di yɛ̃́mu ti Yiɛ̀ nYesu di dɔ̀ɔ̀ mɛ̀ɛ̀ sɑ̀ɑ̀, wenwe wèè do tú okpɑ̀ɑ̀tì kɛ yie nticĩ̀tì kɛ di kpɑ̀rìkùnnɛ.
\p
\v 10 N di nɑ́ɑ́ n yɛ̀mmɛ̀ dòmmɛ̀ mmɛ, dɛ̀ wennimu kɛ dò ndi sɔɔtɛ́ kɛ́mpɑ̃ɑ̃, kɛ yɛ̃́ díì yɑ̀ɑ̀ yɑ̀mɛ̀ dɛ kó mɛyɛ̀mmɛ̀ kɛ́ketɛ́ di bo pɑ̃mɛ̀. 
\v 11 Di ketɛ́ dɛ kó mutɔ̃mmú nɛ̀ tikɔ̃nyɑuti nti, sɔɔtɛ́nɛ̀ kɛ́ mù dèè nɛ̀ diwɛ̀ì, kɛ́mpɑ̃ɑ̃ ndi bo nɑ kɛ́pɑ̃mɛ̀. 
\v 12 Kɑ̀ɑ pɑ̃ nɛ̀ ɑ yɛ̀mmɛ̀ mɛmɔu, bɑ́ kɛ̀ dɛ̀ í dɛu Kuyie nhɔ̃ɔ̃ cɔutɛ́mu, Kuyie nwèí ɑ mɔkɛ kɛ̀ dɛ̀ mɑ̀mɛ̀ mmɛ.
\p
\v 13 Bɛ̀ í yɛ̃ ndí pɑ̃ bɛtɔbɛ̀ kɛ́mɔntɛ di mɔ́mmɔmbɛ, bɛ yɛ̃ ndi totɛ́mu. 
\v 14 Di mɔkɛmu yíe, dí nteennɛ̀ bɛ̀ɛ̀ kpɑ, kɛ̀ bɛ̀ nɑɑ mɔkɛ kɛ̀ di kpɑ bɛ̀ di teennɛ̀. Bɛ̀ dɛ ntú di totɛ́. 
\v 15 Kɛ́ndònnɛ̀ ti wɑ̃̀rimɛ̀ kɛ tú:
\q1 Wèè do ɔ̃ɔ̃ koú pɛ́u
\q1 o kpɛrɛ do ɔ̃ í nsùɔ́,
\q1 wèè kou sɑ́m̀pɔ́
\q1 o kpɛrɛ mɛ ndo ɔ̃ɔ̃ í nhò dòńtɛ́.
\s1 Pɔɔri tɔ̃mmɛ̀ Titi nɛ̀ o nɛ́pobɛ̀
\p
\v 16 Ti sɑ̃ntí Kuyie nkuù teennɛ̀ Titi kòò di dɔ́ ti di dɔ́mɛ̀. 
\v 17 Ò yiemmu kɛ bo kɔtoo di ciɛ, dɛ̀ í tú ti ò nɑ̀kɛ́mɛ̀ mɑ́ɑ̀, ò do dɔ́mu o mɔ́mmuɔ kɛ́ di yɑ̀. 
\v 18 Ti ò nɛínnɛ̀nko ti nɛ́po wèè nɑ̀ɑ́ Tinɑ́ɑǹsɑ̀ɑ̀tì kɛ̀ Kirisi kɔbɛ bɛmɔu ò sɑ̃ntí. 
\v 19 Kirisi kɔbɛ bɛɛ̀ ò tɑ̃ɑ̃tɛ́ kòò bo ti cíe nkɛ̀ ti kɔtɛnɛ̀ yɛpɑ̃rɛ̀ Sedisɑdɛmmu. Kɛ̀ yɛ̀ɛ dɛ́úkùnnɛ Kuyie nyètìrì kɛ bɛnkɛ ti dɔ́mɛ̀ kɛ́nteénnɛ̀ titɔbɛ̀.
\p
\v 20 N yí dɔ́ kɛ́ntɔ dɛ kó idíítí diɛyì m mɑ́ɑ̀ bɛ̀ yɑ̀ɑ̀ bo n wɑ́tí mɛ̀ɛ̀ kpɛ́í. 
\v 21 Ti í wɑnti dɛ̀ɛ̀ wenni Kuyie nyììkɛ̀ mɑ́ɑ̀, ti dɔ́ dɛ̀ɛ̀ wenni dɛ̀ndɛ Kuyie nnɛ̀ bɛnìtìbɛ̀ ììkɛ̀.
\p
\v 22 Ti yìɛ́ kɛ tɔ̃nko ti nɛ́po wè, ti ò yɑ̀ɑ́kɛ́mu kucɛ mɛ̀pɛ́u kɛ sɔ̃́ nho kɔ̃̀ntì yɑu, kɛ nɛ́ dɔkɛ yɑukɛ di mmɔ̀nnì ò tɑ̃́ mɛ̀ɛ̀ kpɛ́í. 
\v 23 Mí nnɛ̀ Titi tíì wɛ̃ nkɛ pĩ́ mmutɔ̃mmú di kpɛ́í, kɛ̀ bɛtɔbɛ̀, Kirisi kɔbɛ bɛɛ̀ bɛ̀ tɑ̃ɑ̃tɛ́, kɛ̀ bɛ̀ pĩ mmutɔ̃mmú kɛ dɛ́úkùnko ti Yiɛ̀ nYesu Kirisi yètìrì. 
\v 24 Bɛnkɛnɛ̀ bɛ, di bɛ̀ dɔ́mɛ̀, kɛ̀ Kirisi kɔbɛ tĩ̀rɛ̀ɛ bɑntɛ́ mùù te kɛ ti di sɑ̃ntí.
\c 9
\s1 Kuyie nti pɑ̃ɑ̃ nkɛ̀ ti bo mpɑ̃ɑ̃mmu
\p
\v 1 Dɛ̀ tɛ̃́nkɛ í békú n di wɑ̃ri yɛpɑ̃rɛ̀ bɛ̀ pɑ̃ɑ̃ nyɛ̀ Kirisi kɔbɛ bɛ̀ɛ̀ bo Sudee yɛ kpɛ́í. 
\v 2 N yɛ̃́mu di dɔ́mɛ̀ kɛ́ bɛ̀ teennɛ̀, kɛ di sɑ̃ntɛ Mɑseduɔnni kɔbɛ borɛ̀, kɛ bɛ̀ nɑ̀kɛ́ kɛ tú nɛ̀ yɑ̀kɛní nwe Akɑyii kɔbɛ dɔ́mɛ̀ kɛ́pɑ̃. Di kó tikɔ̃nyɑuti tiì yɑ́úkùnnɛ bɛsṹkúbɛ̀ kɔ̃̀ntì. 
\v 3 N tɔ̃nko ti kɔbɛ biɛ nkɛ dɔ́ nni nsɔ̃́ ndi bɑ̀ɑ́tí kɛ dèèmu, kɛ̀ n di sɑ̃ntɛ dìì sɑ̃nni ntú dimɔ́mmɔnni. 
\v 4 Kɛ̀ dɛ̀ dò Mɑseduɔnni kɔbɛ mɑbɛ̀ bo n nɛinɛ̀ kɛ̀ bɛ̀ sɔ̃́ ndɛ̀ í dò mbɛ̀ nɑ̀kɛ́mɛ̀ dɛ̀ bo nɑɑ́ nti kó ifɛi kɛ̀ m bɑ́ɑ́ yĩ́ di kpɛyi. 
\v 5 Dɛɛ̀ te kɛ̀ n tɔ̃nko ti kɔbɛ kɛ̀ di bo tíí nyɛpɑ̃rɛ̀ di ti nɑ̀kɛ́ yɛ̀ɛ̀ kpɛ́í. Nɛ̀ di pɑ̃rɛ̀ miɛkɛ nkɛ bɛ̀ bo bɑntɛ́mɛ̀ di pɑ̃mɛ̀ nɛ̀ mɛyɛ̀mmɛ̀ mɛmɑ́ɑ̀.
\p
\v 6 Di yɛ̃́mu kɛ dò nkɑ̀ɑ buɔtí sɑ́m̀pɔ́ ɑ ɔ̃ɔ̃ kɔ̃ṹ sɑ́m̀pɔ́ nwe, kɑ̀ɑ buɔtí mɛdiɛ̀ nhɑ kɔ̃ṹ mɛdiɛ̀. 
\v 7 Bɑ́ wè wèe pɑ̃ o yɛ̀mmɛ̀ dò nwèe pɑ̃ kɛ̀ dɛ̀ mmɑmɛ̀, kɛ bɑ́ɑ́ pɑ̃ kɛ́deè kɛ́demmu yoo dɛ̀ ndònnɛ̀ muwɛ̃rímú, kɛ yɛ̃́ Kuyie ndɔ́mɛ̀ wèè pɑ̃ wènwe nɛ̀ o yɛ̀mmɛ̀ mɛmɔu. 
\v 8 Kuyie mmɔ̀kɛmu muwɛ̃rímú kɛ bo di pɑ̃ kɛ̀ dɛ̀ nsũ kɛ́ ndi sɑ̀nnɛ̀ kɛ́súɔ́ nkɛ di dɔɔ̀ bɛtɔbɛ̀ mɛsɑ̀ɑ̀. 
\v 9 Kɛ́ndònnɛ̀ ti wɑ̃̀rimɛ̀ kɛ tú:
\q1 Kù nitimu kɛ pɑ̃ɑ̃ mbɛcĩ̀rìbɛ̀ sɑ̃́ɑ̃̀.
\m
\v 10 Kuyie nkùù ɔ̃ɔ̃ duɔ́ nhotenkútì tidibotì kɛ́nte kòo kɔ̃ṹ mɛdiɛ̀ kɛ́pɛ́tɛ́ kɛ́nyo, kù bo ndi yɛ́útí tidibotì kɛ́nte kɛ̀ dɛ̀ kòtírí kɛ di nìtì dɔ̀kɛ dɛukɛ. 
\v 11 Kuyie nyóó di pɑ̃mu mɛdiɛ̀, nkɛ̀ di múnkɛɛ pɑ̃ mɛdiɛ̀. Kɛ̀ ti kɔtɛnɛ̀ di pɑ̃rɛ̀ Sudee kɛ̀ bɛ̀ɛ sɑ̃ntɛ Kuyie nyɛ kpɛ́í. 
\v 12 Kɛ yɛ̃́ yɛpɑ̃rɛ̀ di pɑ̃ɑ̃ nyɛ̀ í teénnɛ̀ Kirisi kɔbɛ mɑ́ɑ̀, yɛ̀ yó ntemu kɛ̀ bɛ̀ɛ sɑ̃ntɛ Kuyie. 
\v 13 Di pɑ̃rɛ̀ yɛɛ̀ yóó bɛnkɛ di tú bɛ̀, kɛ́nte kɛ̀ kusṹkùu dɛ́úkùnnɛ Kuyie nyètìrì, di yié mmɛ̀ɛ̀ kpɛ́í nTinɑ́ɑǹsɑ̀ɑ̀tì kɛ totírínɛ̀ di kpɛrɛ bɛtɔbɛ̀. 
\v 14 Bɛ yɛ̀mmɛ̀ bo ndi nɑɑtinɛ̀ kɛ̀ bɛ̀ ndi bɑ́ɑ́nnɛ̀ Kuyie nkù di dɔ̀ɔ̀ mɛ̀ɛ̀ sɑ̀ɑ̀ ndiɛmɛ̀ kpɛ́í. 
\v 15 Nsɑ̃ntínɛ̀ Kuyie ku pɑ̃nnì diɛrì kpɛ́í.
\c 10
\s1 Pɔɔri nɑ̀kɛ́ tì bɛ̀ɛ̀ ò wɑ̀tìrì
\p
\v 1 Mí Pɔɔri míì dɔ́ kɛ́ di bɛ́innɛ̀. Mí nwèè yɔ̀ɔ̀ nKirisi n dɔ̀ɔ̀ mɛ̀ɛ̀ sɑ̀ɑ̀ nkpɛ́í, kɛ́ndònnɛ̀ di miɛkɛ bɛ̀mɑbɛ̀ tumɛ̀ nh ɔ̃ nyɔɔ̀ n di bonɛ̀ dìì mɔ̀nnì kɛ́dɛ́tɛ́ kɛ́kpenkɛ. 
\v 2 Bɑ́ɑ́ duɔ́nnɛ̀ kɛ̀ n kɔtoo dìì yiè di ciɛ kɛ̀ n nɑ́ɑǹtì ńkpeńnì, n yí yó nnɑ́ɑ́nnɛ̀ bɛ̀ɛ̀ yɛ̀mmɛ̀ dò n dɔɔri nɛ̀ onìtì kó mɛciì nkɛ yĩɛ̃̀kù. 
\v 3 Ti tú bɛnìtìbɛ̀ mbɛ, ti nɛ́ í mɑù nɛ̀ onìtì kó mɛciì. 
\v 4 Ti kó tikpɑ̀rìnɛntì í tú kutenkù kuù nkpɛti, ti tú Kuyie nkpɛti nti kɛ kpeńnì, kɛ bo nɑ kɛ́pɔntɛ sicɛ̃kperí. 
\v 5 Ti ti nkɔùnɛ̀ mɛyɑ́ɑ̀bìsíyɛ̀mmɛ̀ nɛ̀ sifeí kɔ̃mɛ, dɛ̀ɛ̀ ti dítìnko Kuyie mbíɛ́kɛ̀. Ti ti mpĩĩnnɛ̀ mɛnitiyɛ̀mmɛ̀ kɛ mɛ niù Kirisi borɛ̀, kɛ̀ mɛ̀ yìé nho kpɛti. 
\v 6 Kɛ̀ di yie ndìì mɔ̀nnì ti kpɛti ti bo kpetínnɛ́ bɛ̀ɛ̀ yetírí Kuyie nkpɛti.
\p
\v 7 Bɛ̀ wèí dɛ̀ɛ̀ wenni dɛ̀ndɛ fɛnɔ̀nfɛ̀. Kòò mɔù yɛ̀mmɛ̀ dò nhò tu Kirisi kou, wè nyɛ̃́ kɛ dò nti múnkɛ bɛ ntú. 
\v 8 Di yɛ̀mmɛ̀ dò m pɔtì Kuyie nni niímmɛ̀ kpɛ́í nkɛ. N do dòmmu kɛ́mpɔtì kɛ̀ dɛ̀ɛ pɛ̃ɛ̃tɛ́ mɛmmɛ bɑ́ ifɛi bɑ́ nni mbo, kɛ yɛ̃́ Kuyie kuù n niímmɛ̀ kɛ̀ m bo pĩ́ mmutɔ̃mmú kɛ di kpénkùnnɛ, dɛ̀ í tú n yóó di bɔ. 
\v 9 N yí di wɑ̃ũ yɛpɑ́tɛ kɛ̀ bo donnɛ́ di kɔ̃m̀bùɔ̀tì. 
\v 10 Bɛ̀mɑbɛ̀ nɑ̀ɑ́ nkɛ tú: M pɑ́tɛ nɑ́ɑǹtì ɔ̃ nkpeńnì kɛ yóù, kɛ̀ n nɛ́ kɔ̀too nni ncĩ̀ĩ̀nnì kɛ nɑ́ɑ́ nkɛ kɔɔ́ nkɔɔ́ nkɛ̀ dɛ̀ dò mmɛsémmɛ̀ kpɛrɛ. 
\v 11 Wèè nɑ̀ɑ́ mmɛmmɛ wè nyɛ̃́ kɛ dò n di wɑ̃ũ tì nɛ̀ nh ɔ̃ɔ̃ kɔtoo kɛ́nnɑ́ɑ́ ntì dɛ̀ í cɑ̃́ɑ̃́.
\p
\v 12 M bɑ́ɑ́ nɑ kɛ́mbeúnɛ̀ m mɑ́ɑ̀ bɛ̀ɛ̀ yɛ̀mmɛ̀ dò mbɛ̀ dɛu. Bɛ̀ tu tiyɛìntì nti kɛ ɛrìnɛ̀ bɛmɑ́ɑ̀ bɛtɔbɛ̀. 
\v 13 M bɑ́ɑ́ nɑ kɛ́nsɑ̃ntí m mɑ́ɑ̀ kɛ̀ dɛ̀ɛ pɛ̃ɛ̃tɛ́ Kuyie nni mbennɛ́ nɛ̀ dɛ̀, n yó nsɑ̃ntí m mɑ́ɑ̀ Kuyie nni mbennɛ́nɛ̀ dɛ̀ ndɛ. Dɛ̀ɛ̀ tú m bo kɔtoomɛ̀ di ciɛ. 
\v 14 N nɑ nyĩ n dɔ̀ɔ̀ n do í dò nkɛ́dɔɔ̀ dɛ̀ ndɛ kɛ̀ n do í kɔ̀too di ciɛ, míì mɛ nkɔ̀too di ciɛ kɛ di nɑ̀kɛ́ Kirisi kó Tinɑ́ɑǹsɑ̀ɑ̀tì. 
\v 15 Ti í dɔ́ kɛ́mpɔtìnɛ̀ bɛtɔbɛ̀ pĩ mmùù tɔ̃mmú. Ti dɔ́ di tɑ̃́kùmɛ̀ mɛɛ̀ kpenkɛ, kɛ̀ n tɔ̃mmúu yíɛ́ kɛ́dɛukɛ di cuokɛ̀, mù nɛ́ bɑ́ɑ́ pɛ̃ɛ̃tɛ́ Kuyie nyɛ̃ mmù ḿberínɛ̀ dɛ̀. 
\v 16 Dɛ kó difɔ̃nkúò m bo nɑ kɛ́nɑ́kɛ́ Tinɑ́ɑǹsɑ̀ɑ̀tì yɛhɛkɛ̀ tɛyɛ̀ òmɔù mu nyí nɑ̀kɛ́ yɛ̀, n yí dɔ́ n sɔɔtɛ́ òmɔù pĩ ndɛ̀ mutɔ̃mmú.
\p
\v 17 Wèè dɔ́ kɛ́mpɔtì wè mpɔtì nɛ̀ Kuyie nhò dɛɛtɛ́mɛ̀. 
\v 18 Kuyie nsɑ̃ntí wè weè tu onìtì dɛ̀ í tú wèè sɑ̃ntí omɑ́ɑ̀.
\c 11
\s1 Pɔɔri nɛ̀ bɛsoùmbɛ̀
\p
\v 1 Kɛ̀ di bo nɑ kɛ́minnɛ́ kɛ̀ n nɑ̀kɛ́ kuyɛìnkù tɛ̃mɛ̀ di minnɛ́. 
\v 2 N di dɔ́ mɛdiɛ̀ mmɛ kɛ̀ dɛ̀ n yóù, kɛ̀ dɛ kó kuyonku tú Kuyie nkɔku. Di dònnɛ̀ isɑpùmbí nyi, kɛ̀ n di wɑɑ́ ndi dɔù Kirisi, kɛ dɔ́ di nwe nwetí omɑ́ɑ̀. 
\v 3 Kɛ nɛ́ yĩɛ̃̀kù bɛ̀ bo di sukúmɛ̀ kɛ̀ di ò yóu. Kɛ́ndònnɛ̀ fɛwɑ̀ɑ̀fɛ̀ do soutɛ́mɛ̀ Ɛfu kóò fétìnnɛ. 
\v 4 Di í yetírí tìmɑtì, bɑ́ kɛ̀ bɛ̀ di nɑ̀kɛ́ Kirisi tɔù mɔù kpɛti, di ɔ̃ɔ̃ yiemmu, kɛ̀ bɛ̀ di nɑ̀kɛ́ dibɔɔ̀ kpɛti di bɑɑ yienko, kɛ̀ bɛ̀ di nɑ̀kɛ́ tìì cɑ̃̀ɑ̃́nnɛ̀ Muyɑɑ́nsɑ̀ɑ̀mù nɛ̀ Tinɑ́ɑǹsɑ̀ɑ̀tì kpɛti, di bɑɑ tó yienko.
\p
\v 5 N yɛ̀mmɛ̀ í dò n kɛ̃ńnìnɛ̀ di tú bɛ̀ Kirisi kó yɛtɔ̃rɛ̀ diɛyɛ̀. 
\v 6 Kɛ̀ dɛ̀ yɛ̀mmɛ̀ n yí nɔ nkɛ nɑ́ɑ́, n nɛ́ yɛ̃́mu Kuyie nnɑ́ɑǹtì pɑ́íí kɛ tì ndi nɑ̀kɛ́.
\p
\v 7 Mɛyɛi mmɛ n kɛ̃kùnnɛmɛ̀ m mɑ́ɑ̀ kɛ di nɑ̀kɛ́ Kuyie nnɑ́ɑǹtì fɑ̀ɑ̀rɛ̀ kɛ di bo kpenkɑɑ̀? 
\v 8 N yóu kɛ̀ Kirisi kɔbɛ n tɔ, kɛ̀ m bɛ̀ kòtɛ, kɛ bo teénnɛ̀ dímbɛ. 
\v 9 N sòò bo di ciɛ kòò mɔù í n tɔ. N kpɛrɛ dèè dìì mɔ̀nnì, kɛ̀ ti kɔbɛ Mɑseduɔnni kɔbɛ bɛɛ̀ kɔtɛní kɛ́ m pɑ̃ dɛ̀ɛ̀ kó dimɑ̀ɑ̀ n dòńtɛ́. Di kóò mɔù sòò í n tɔ, m mɛ nyí dɔ́ òmɔù n tɔ. 
\v 10 Nɛ̀ Kirisi timɔ́mmɔnti yiɛ̀ nwèè bo m miɛkɛ ò kpɛ́í, m bɑ́ɑ́ yie nkɛ̀ dɛ kó disɑ̃nnii nɔ́ɔ́tɛ́ n yĩ́nkɛ̀ Akɑyii kó kutempɛ̃ nkumɔu miɛkɛ. 
\v 11 N yí di dɔ́mu dɛɛ̀ te kɛ̀ m bɛ́i mɛmmɑɑ̀? Kuyie nyɛ̃́mu n di dɔ́mɛ̀.
\p
\v 12 N dɔ̀ɔ̀mɛ̀ n yóó nsɔkɛ́ kɛ mɛ ndɔɔri. Dɛ mɔ̀nnì bɛ̀ɛ̀ wɑnti kɛ́mpɔtì bɛ̀ pĩ̀ḿmɛ̀ mutɔ̃mmú kɛ ti dònnɛ̀, bɛ̀ bɑ́ɑ́ pɛ́tɛ́ bɛ̀ bo mpɔtìnɛ̀ mù. 
\v 13 Dɛ kó bɛnìtìbɛ̀ tú bɛsoùmbɛ̀ mbɛ kɛ dɔ̀ɔ̀ bɛmɑ́ɑ̀ Yesu tɔ̃rɛ̀. 
\v 14 Dɛ̀ í dò nkɛ ti di, dibɔɔ̀ mɔ́mmɔnni ɔ̃ɔ̃ nɑmu kɛ́dɔɔ̀ dimɑ́ɑ̀ Kuyie ntɔ̃nnì. 
\v 15 Dɛ̀ í yóù dibɔɔ̀ kó bɛtɔ̃mbɛ̀ bo dɔɔ̀mɛ̀ bɛmɑ́ɑ̀ Kuyie nkó bɛtɔ̃mbɛ̀, bɛ̀ nɛ́ yóó yɑ̀mu dɛ kó mucɔ̃́ntimu diyiè mɑrì.
\s1 Pɔɔri fɛ̃̀ṹtɛ́mɛ̀
\p
\v 16 M bo yíɛ́ kɛ́bɛ́i nkɛ dɔ̀: Òmɔù bɑ́ nni nhwúó nkuyɛìnkù, kɛ̀ di mɛ nni nhwúó nkuyɛìnkù nku, yóunɛ̀ kɛ̀ nnɑ́kɛ́ tiyɛìnnɑ́ɑǹtì, kɛ múnkɛɛ fómmú sɑ́m̀pɔ́. 
\v 17 N dɔ́ kɛ bɛ́i ntì í tú ti Yiɛ̀ nkpɛti, tiyɛìnnɑ́ɑǹtì nti. Dɛ̀ dò n fómmúmu kɛ̀ n yóó fómmú. 
\v 18 Bɛtɔbɛ̀ fuommu, kɛ̀ bɛ yɛ̀mmɛ̀ dò mbɛ̀ yɛ̃́ dɛ̀mɑrɛ̀, m múnkɛ bo fómmú. 
\v 19 Díndi bɛ̀ɛ̀ yɛ̀mmɛ̀ dò ndi ciì, di yie tiyɛìnnɑ́ɑǹtì, 
\v 20 kɛ yie nkɛ tú bɛ kó tidɑɑtì, kɛ yie nkɛ̀ bɛ̀ di soú nkɛ tóú di kpɛrɛ, kɛ yie nkɛ̀ bɛ̀ di senku, kɛ yie nkɛ̀ bɛ̀ di bemmù. 
\v 21 Di nɑɑtimu di túmɛ̀ n cĩĩ̀nnì, ifɛi iì tì nni mbonɛ̀ n yí nɑmɛ̀ kɛ dɔ̀ɔ̀ bɛtɔbɛ̀ dɔ̀ɔ̀rimɛ̀.
\p Mùù te kɛ̀ bɛtɔbɛ̀ fuo m múnkɛ mù mɔ̀kɛmu. N nɑ́ɑ́ tiyɛìnnɑ́ɑǹtì nti. 
\v 22 Kɛ̀ bɛ̀ tu Ebedeebɛ mbɛ m múnkɛ we ntú, kɛ̀ bɛ̀ tu Isidɑyɛɛribɛ mbɛ, m múnkɛ we ntú, kɛ̀ bɛ̀ tú Abɑrɑhɑmmu kó iyɑɑ̀bí nyi, m múnkɛ dɛ ntú. 
\v 23 M bo yíɛ́ kɛ́nɑ́kɛ́ tiyɛìnnɑ́ɑǹtì. Kɛ̀ bɛ̀ tu Kirisi kó bɛtɔ̃mbɛ̀ mbɛ, m múnkɛ we ntú kɛ pĩ́ mmutɔ̃mmú kɛ bɛ̀ pɛ̃ɛ̃tɛ́, kɛ̀ bɛ̀ n kpetínnɛ́ kucɛ mɛ̀pɛ́u, kɛ m puotí kucɛ mɛ̀pɛ́u, kɛ̀ n kɑ̀ɑ́tɛ́ mukṹṹ nkucɛ mɛ̀pɛ́u. 
\v 24 Kɛ̀ Sifubɛ m puotí kucɛ mɛ̀nùmmù didɑ́ù sipísìtɑ̃ɑ̃ti nɛ̀ mɛ̀wɛi. 
\v 25 Kɛ̀ Odommu kɔbɛ m puotí kucɛ mɛ̀tɑ̃ɑ̃ti, kɛ m bùɔ́tí yɛtɑ̃́rɛ̀ kucɛ mɛ̀nɑ̀ɑ̀. Kɛ̀ n dìu nɛ̀ bɑ̀tóò kucɛ mɛ̀tɑ̃ɑ̃ti, kɛ́mmɔkɛ mɛniɛ mmiɛkɛ kuyie nku mɑ́ɑ̀, kɛyènkɛ̀ kɛmɑ́ɑ̀ kɛ dɛitínɛ̀ kudɑbɛkù kó diwɛ́tirì. 
\v 26 N cemmu miɛkɛ kɛ̀ n kɑ̀ɑ́tɛ́ mukṹṹ nyikó mmiɛkɛ, Sifubɛ nɛ̀ bɛ̀ɛ̀ í tú Sifubɛ bɛ miɛkɛ, yɛhɛkɛ̀ miɛkɛ nɛ̀ dɛpɑɑ mmiɛkɛ, dɑ̀mɛ́ɛ̀rì miɛkɛ nɛ̀ bɛ̀ɛ̀ soú nkɛ tú bɛ̀ tu Kirisi kɔbɛ bɛ miɛkɛ. 
\v 27 Kɛ pĩ mmutɔ̃nyonkumu kɛ fɛ̃̀ṹtɛ́, kɛ wentɛ́ inuɔ, kɛ̀ dikònnì m pĩ nkɛ̀ sinɛ́yɛ̃ĩ m potɛ́, kɛ̀ m mɔ̀ńtɛ́ tidiitì kɛ boú dinùù, kɛ mɔ̀ńtɛ́ tiyɑ̀ɑ̀tì kɛ̀ muséé nni mpotɛ́. 
\v 28 Kɛ̀ nní mmɛ ndò nkɛ wɛ̃̀tɛ kɛ́totí n yɛ̀mmɛ̀ Kirisi kɔbɛ bɛmɔu kpɛ́í. 
\v 29 Kòò mɔù í kpeńnì muwedɔummu miɛkɛ n yɛ̀mmɛ̀ɛ cɑɑ̀rɛ̀, kòò mɔù do mɛyɛi mmiɛkɛ dɛ̀ nni yóù.
\p
\v 30 Kɛ̀ m bo mpɔtì nni mpɔtìnɛ̀ n cĩ̀tì nti. 
\v 31 Kuyie nti Yiɛ̀ nYesu Kirisi cicɛ wèè tu mɛsɑ̀ɑ̀ nyiɛ̀ nsɑ̃́ɑ̃̀, ò yɛ̃́mu n yí soúmmɛ̀. 
\v 32 Okpɑ̀ɑ̀tì Adɛtɑɑsi kó dimɔ̀nnì, kɛ̀ nni mbo Dɑmɑɑsi kɛ̀ kùmɑ̀ndɑ́ɑ̀ duɔ́ nkɛ̀ bɛ̀ɛ̀ bɑ̀ɑ dihɛì kó yɛbòrɛ̀ kɛ bo m pĩ́. 
\v 33 Kɛ̀ bɛ̀ mɛ̀ nni n cṹũnnɛ̀ dimɑ́mmùyɑ́ɑ̀ kuduotí kó tɛbòtɛ̀, kɛ̀ m bɛ̀ yentɛ́nɛ̀.
\c 12
\s1 Kuyie mbɛnkɛ dɛ̀ Pɔɔri
\p
\v 1 Dɛ̀ í wenni ɑ bo nfuommɛ̀. N nɛ́ dɔ́ kɛ́yíɛ́ tìmɑtì nti Kuyie nni mbɛnkɛ dɛ̀ nɛ̀ kù n dɑ́ɑ ntì. 
\v 2 N yɛ̃́ Kirisi kou mɔù nwe Kuyie ndo tùótɛ́ wè kɛ dèkɛnɛ̀ kɛĩ́nkɛ̀, dɛ̀ mɔ̀kɛ yíe nyɛbie ntɛpíítɛ̀ nɛ̀ yɛ̀nɑ̀ɑ̀. Kù mɛ̀nkɛ do ò tùótɛ́mɑ́ɑ̀, dɛ̀ ò dɔ̀ɔ̀ tidɔuǹtì ntɑɑ̀, n yí yɛ̃́, Kuyie nkuù mɑ́ɑ̀ yɛ̃́. 
\v 3 N yɛ̃́mu kɛ dò nkù ò tùótɛ́ kɛ kònnɛ̀ diwɛ̀ìhɛì. Kù mɛ̀nkɛ ò tùótɛ́mɑ́ɑ̀, dɛ̀ ò dɔ̀ɔ̀ tidɔuǹtì ntɑɑ̀, n yí yɛ̃́, Kuyie nkuù mɑ́ɑ̀ yɛ̃́. 
\v 4 Dɛborɛ̀ kòo keè tinɑ́ɑǹsɑ̀ɑ̀tì mɑtì, onìtì í yóó nɑ kɛ bɛ́i ntì, onìtì ketɛ́ kɛ í dò nkɛ́ tì bɛ́i. 
\v 5 Míì tu dɛ kóo nìtì, kɛ nɑ nnɑ kɛ́mpɔtì. N nɛ́ dɔ́ kɛ́mpɔtìnɛ̀ n cĩ̀tì nti. 
\v 6 Kɛ̀ n do dɔ́ n nɑ mpɔtìmu, dɛ̀ mɛ nɑ bɑ́ ntú siyɑ́ɑ̀bísí, kɛ yɛ̃́ n nɑ́ɑ́mmɛ̀ mɔ́mmuɔ nwe. N nɛ́ yóumu kɛ́dɔ́ n dɔɔ̀rìmɛ̀ nɛ̀ n nɑ́ɑǹtì dɛɛ̀ bɛnkɛ n tú wè, kòò mɔù bɑ́ nni nwúó nkɛ dò n dɛu.
\p
\v 7 Kuyie nyóu kɛ̀ dibɔɔ̀ nh ɑ̃nnɛ́ mumɔmmú yonkumu, kɛ̀ m bɑ́ mmɔkɛ tɛfentɛ̀ nɛ̀ kù m bɛnkɛ dɛ̀ kpɛ́í. 
\v 8 Kɛ̀ n kù bɑ́ntɛ̀ kucɛ mɛ̀tɑ̃ɑ̃ti kɛ tú kù m miɛkùnnɛ. 
\v 9 Kɛ̀ kù ǹ tɛ̃̀ńnɛ́ kɛ dɔ̀: N kó mɛsɑ̀ɑ̀ ndɑ bonɛ̀ kɛ̀ dɛ̀ sɑ̀nnɛ̀mù, nh ɔ̃ɔ̃ pĩ́ mmutɔ̃mmú onìtì cĩ̀ĩnnì dìì mɔ̀nnì ndi. Dɛɛ̀ te kɛ̀ dɛ̀ n nɑɑti n cĩ̀ĩnnìmɛ̀ kɛ̀ Kirisi kó muwɛ̃rímú bo nni mbonɛ̀. 
\v 10 Dɛ̀ n nɑɑtimu n cĩ̀ĩnnìmɛ̀, kɛ̀ bɛ̀ n sɑ̃̀ɑ̃́, kɛ n fɛ̃́ũnko, kɛ cɑɑri n yɛ̀mmɛ̀ Kirisi kpɛ́í, kɛ yɛ̃́ n cĩĩnnì dìì mɔ̀nnì ndi n kpeńnìmɛ̀.
\s1 Pɔɔri dɔ́mɛ̀ kɛ́kɔtɛ Kɔdɛnti mɛtɑ̃ɑ̃́mmɛ̀
\p
\v 11 Díì te kɛ̀ ǹ nɑ̀kɛ́ tiyɛìnnɑ́ɑǹtì kɛ fòḿmú, díì do dò nkɛ nni nkómmú. Bɑ́ kɛ̀ n yí tú òmɔù di yɛ̃ mbɛ̀ɛ̀ tu Yesu tɔ̃rɛ̀ diɛyɛ̀, bɛ̀ í mpɛ̃ɛ̃tɛ́ mmùmɑmù. 
\v 12 N fɛ̃́ũ̀rì kɛ mi nkɛ dɔ̀ɔ̀ tìì diɛtì di cuokɛ̀ tiì bɛnkú n túmɛ̀ Yesu tɔ̃nnì. 
\v 13 N dɔ̀ɔ̀ bɑ Kirisi kɔbɛ tĩ̀rɛ̀ tɛyɛ̀ kɛ í mɛ ndi dɔ̀ɔ̀? Kɛ̀ n cɑ̀ɑ̀rɛ̀ di í n tɔmɛ̀ mmɛ, n cĩ́ɛ̃́nnɛ̀.
\p
\v 14 N kɔ̀too di ciɛ kucɛ mɛtɑ̃ɑ̃́mmɛ̀ mmɛ, n yí dɔ́ di kpɛrɛ mɑrɛ̀, n dɔ́ dímbɛ di mɔ́mmɔmbɛ ibí iì ɔ̃ɔ̃ í mpií i yɛmbɛ̀, i yɛmbɛ̀ bɛɛ̀ ɔ̃ɔ̃ ì pií. 
\v 15 Dɛ̀ n nɑɑtimu m bo di duɔ́mmɛ̀ n kpɛrɛ dɛmɔu kɛ́duɔ́ m mɑ́ɑ̀ kɛ di teennɛ̀. M mɛ ndi dɔ́mɛ̀ mɛdiɛ̀ di bo nni ndɔ́ sɑ́m̀pɔ́ɑ̀ɑ̀?
\p
\v 16 Di yɛ̃́mu kɛ dò ndi í n tɔ, kɛ̀ bɛ̀mɑbɛ̀ yɛ̀mmɛ̀ dò n dɔ̀ɔ̀ mɛciì nkɛ di di kpɛrɛ. 
\v 17 Yɑ́ɑ̀ n nɑ̀kɛ́ n tɔ̃nko bɛ̀mbɛ kɛ̀ bɛ̀ di ciitɛ́? 
\v 18 N tɔ̃nko Titi nwe nɛ̀ ti kou di yɛ̃́ wè bɛɛ̀ di ciitɑ́ɑ̀? Mí nnɛ̀ bɛ̀ ti wɛ̃ mmɛyɛ̀mmɛ̀ mɛmɑ́ɑ̀ ndi nɛ̀ ti pĩ́ mmɛ̀ɛ̀ botí mutɔ̃mmú.
\p
\v 19 Kɛ̀ dɛ yɛ̀mmɛ̀ di yɛ̀mmɛ̀ ndò n nɑ́ɑ́ mmiɛ nkɛ dɔ́ kɛ́bɛnkɛ n wennimɛ̀ mmɛ. Dɛ̀ í dò mmɛmmɛ, Kuyie nyɛ̃́mu n nɑ́ɑ́mmɛ̀ Kirisi dɔ́mɛ̀ mmɛ, kɛ bo di kpénkùnnɛ di tɑ̃́kùmɛ̀ miɛkɛ. 
\v 20 N yĩɛ̃̀kù m bo tuɔkoomɛ̀ kɛ́nsɔ̃́ ndi í dɔɔ̀ri n dɔ́mɛ̀, kɛ̀ m múnkɛ dɔɔ̀ di í dɔ́mɛ̀. N yĩɛ̃̀kù m bo nsɔ̃́mmɛ̀ di kpɑɑ́ kɛ ɛ̃ɛ̃nnɛ̀ ditɔbɛ̀, kɛ̀ di miɛkɛ pɛ́i ditɔbɛ̀, kɛ̀ di sɑ̃́ɑ̃́ nditɔbɛ̀, kɛ nɑ́ɑ́ ntisĩ́ntɛ́nɑ́ɑǹtì, kɛ mɔkɛ sifeí kɛ kɔɔ́nnɛ̀ ditɔbɛ̀. 
\v 21 N yĩɛ̃̀kù m bo tuɔkoomɛ̀ kɛ́nsɔ̃́ mbɛ̀ɛ̀ dɔ̀ɔ̀ mɛyɛi mbɛ̀ kpɑɑ́ sɔkɛ́ mufòmmu yɛimu miɛkɛ kɛ dɔɔri di dɔ́mɛ̀. Kɛ̀ Kuyie nni ndií nyifɛi kɛ̀ n yɛ̀mmɛ̀ɛ cɑɑ̀rɛ̀ kɛ n kɔmmú bɛ kpɛ́í.
\c 13
\s1 Pɔɔri wɑ̃̀rimɛ̀ Kɔdɛnti kɔbɛ kɛ tú bɛ̀ɛ wéntɛ́ bɛmɑ́ɑ̀
\p
\v 1 Kucɛ mɛtɑ̃ɑ̃́mmɛ̀ mmɛ n kɔroomɛ̀ di ciɛ. Ti wɑ̃̀rimu kɛ tú kɛ̀ bɛ̀ wɑ́tìrì òmɔù dí tì tũ̀ntɛ bɛnìtìbɛ̀ bɛ̀dɛ́bɛ̀ yoo bɛ̀tɑ̃ɑ̃ti ììkɛ̀ bɛ̀ɛ̀ yɑ̀. 
\v 2 N sòò bo dìì mɔ̀nnì di ciɛ kucɛ mɛdɛ́rímmɛ̀ kɛ́cɑummu bɛ̀ɛ̀ dɔ̀ɔ̀ mɛyɛi, nkɛ́wɛ̃tɛ kɛ́ bɛ̀ cɑu bɑ́ n yí mɛ mbɛ̀ bonɛ̀mɛ̀ bɛmbɛ nɛ̀ bɛtɔbɛ̀ kɛ tú n tɛ̃́nkɛ í yóó cĩ́ɛ̃́ nhòmɔù m bo tuɔkoo dìì mɔ̀nnì di ciɛ. 
\v 3 Kɛ̀ di dɔ́ kɛ́yɑ̀ dɛ̀ɛ̀ bɛnkú dɛ̀ndɛ kɛ dò nKirisi nɑ́ɑ́ m miɛkɛ di bo dɛ̀ yɑ̀. Kirisi í cĩĩnnì ò bɛnkúmu o wɛ̃rímú di cuokɛ̀. 
\v 4 Ò do cĩĩnnìmu kɛ̀ bɛ̀ɛ ò bɑɑkɛ́ kudɑpɑ̃ɑ̃tí kòo yɑ̃̀ńtɛ́ nɛ̀ Kuyie nkó muwɛ̃rímú, ti múnkɛ cĩĩnnìmu ò do dòmmɛ̀, kɛ̀ Kuyie nkó muwɛ̃rímú nɛ́ ti bonɛ̀ mù do ò bonɛ̀ mɛ̀ɛ̀ botí, kɛ̀ ti pĩ́ mmutɔ̃mmú di cuokɛ̀.
\p
\v 5 Wéntɛ́nɛ̀ dimɑ́ɑ̀ kɛ́yɑ̀ kɛ̀ di tɑ̃́kùmɛ̀ fìíkú, kɛ́yɑ́ɑ́kɛ́ dimɑ́ɑ̀ kɛ́yɑ̀ kɛ̀ Kirisi bo di miɛkɛ, kɛ̀ di yɑ̀ɑ́kɛ́ kɛ sɔ̃́ nhò í bo di miɛkɛ di yĩɛ̃kɛmu. 
\v 6 N yɛ̀mmɛ̀ dò ndi yɛ̃́mu n yɑ̀ɑ́kɛ́mɛ̀ m mɑ́ɑ̀ kɛ yɑ̀ Kirisi bomɛ̀ m miɛkɛ kɛ̀ n tu o kou. 
\v 7 M bɑ́ɑ́mmu Kuyie nkɛ di bɑ́ɑ́ dɔɔ̀ mɛyɛi, n yí dɔ́ m bɛnkɛ n nɔmmɛ̀, bɑ́ kɛ̀ n yí tú òmɔù di ndɔɔri mɛsɑ̀ɑ̀. 
\v 8 M bɑ́ɑ́ nɑ kɛ́yetɛ timɔ́mmɔnti tìì tu Kuyie nkpɛti, n ti ndɔ́. 
\v 9 Dɛ̀ ɔ̃ nni nnɑɑtimu n cĩ̀ĩnnì dìì mɔ̀nnì kɛ̀ di kpeńnì. M bɑ́ɑ́mmu Kuyie nkɛ tú kù dɔ̀kɛ di kpénkùnnɛ ku kó kucɛ miɛkɛ. 
\v 10 Dɛɛ̀ te kɛ̀ n di wɑ̃̀ri dipɑ́tíri kɛ kpɑɑ́o, kɛ̀ dɛ̀ bo yie nkɛ̀ n tùɔ̀koo m bɑ́ɑ́ di kpɑnnɛ̀. Kuyie nyí n duɔ́ mmuwɛ̃rímú kɛ̀ m bo di fɛ̃́ũ, kù mù nni nduɔ́ nkɛ̀ m bo di kpénkùnnɛmu ku kó kucɛ miɛkɛ.
\p
\v 11 N kɔbɛ dɛ̀ ndi nɑɑti, kɛ̀ di nkótírí Kuyie nkó kucɛ miɛkɛ, kɛ nyɑ́úkùnko ditɔbɛ̀ kɔ̃̀ntì, kɛ́nwɛ̃ ndinùù, kɛ́nnɑɑtinɛ̀ ditɔbɛ̀. Kuyie nkùù ti dɔ́ kɛ ti duɔ́ ndiwɛ̀ì kù ndi bonɛ̀.
\p
\v 12 Dɔunɛ̀ ditɔbɛ̀ mɛsɑ̀ɑ̀. Kirisi kɔbɛ bɛmɔu bɛ̀ɛ̀ bo diɛ mbɛ̀ di dɔunkoo.
\p
\v 13 Ti Yiɛ̀ nYesu Kirisi kó mɛsɑ̀ɑ̀ nní ndi bonɛ̀, kɛ̀ Kuyie nni ndi dɔ́, kɛ̀ Muyɑɑ́nsɑ̀ɑ̀mù mùù ti tɑunko kɛ̀ mù ndi bonɛ̀ dimɔu.