\id 1TI di55.all F{evrier 1999 BJ Parakou B{enin
\ide UTF-8
\h 1 Timɔntee
\toc1 Pɔɔri wɑ̃̀ri dìì pɑ́tíri ketirì Timɔntee
\toc2 1 Timɔntee
\mt1 Pɔɔri wɑ̃̀ri dìì pɑ́tíri ketirì Timɔntee
\imt1 Di mpɑ́tíri tɔ tìì nɑ́ɑǹtì
\ip Timɔntee yɔ̃ do tú Sifu nwe kòo cicɛ tú Kɛrɛki. Timɔntee do yóó cɔutɛ́ Kuyie nkɛ kpɑɑ́ tú odɑpɑ̀ɑ̀ nwe. Pɔɔri do wɑ̃̀ri Timɔntee dipɑ́tíri ketirì kɛ bo ò cɑu nyitié nyɛiyi kpɛ́í nkɛ. Dɛ kó itié nyɛiyi do tú: Dɛ̀ɛ̀ kó dimɑ̀ɑ̀ tu tikɔ̃̀ntì kpɛrɛ dɛ̀ í wenni. Kɑ̀ɑ dɔ́ kɛ́cootɛ́ ɑ dò nkɛ́yóu tidiitì mɑtì, ɑ mɛ mbɑ́ɑ́ puokɛ yoo ɑ yenkɛ. Dɛ kó dipɑ́tíri ketirì miɛkɛ nkɛ bɛ̀ nɑ̀kɛ́mɛ̀ mubɑ́ɑmmu yó ndòmmɛ̀.
\ip Kɛ̀ Pɔɔri ò duɔ́nnɛ̀ itié nhò bo ndòmmɛ̀ otɔ̃ntì sɑ̀ɑ̀wè kɛ́ndò ndibɛnkɛ̀rì sɑ̀ɑ̀rì bɛtɔbɛ̀ kpɛ́í nkɛ́nyɛ̃́ ò bo mpĩ́mmɛ̀ Kuyie nkɔbɛ kó ditĩ̀nnì.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Mudɔummu 1:1-2
\io1 2. Itié nyìì tukúnɛ̀ Kirisi kɔbɛ tĩ̀nnì nɛ̀ di kó bɛtɔ̃mbɛ̀ 1:3-3:16
\io1 3. Pɔɔri duɔ́mmɛ̀ itié Timɔntee kɛ̀ dɛ̀ ntukúnɛ̀ o mɔ́mmuɔ nho tɔ̃mmú. 4:1-6:21
\c 1
\s1 Pɔɔri dɔummɛ̀ Timɔntee
\p
\v 1 Mi mPɔɔri, Kuyie nhOdɛɛtíwè yu wè kɛ n dɔ̀ɔ̀ Yesu Kirisi ti bɑɑ wè kó ditɔ̃nnì, míì wɑ̃̀ri di mpɑ́tíri, 
\v 2 Timɔntee, m birɛ mɔ́mmɔndɛ Kuyie nkó kucɛ miɛkɛ. Ti cicɛ Kuyie nnɛ̀ ti Yiɛ̀ nYesu Kirisi bɛ̀ dɑ kuɔ́ mmɛsémmɛ̀ kɛ dɑ dɔɔ̀ mɛsɑ̀ɑ̀ nkɛ dɑ duɔ́ ndiwɛ̀ì.
\s1 Ti bo nyɛ̃́mɛ̀ iyɑ́ɑ̀bìsítié nyɛmbɛ̀ kpɛ́í
\p
\v 3 N sòò kɔ̀ri Mɑseduɔnni kɛ dɑ nɑ́kɛ́mu kɛ dɔ̀ ɑ nkpɑɑ́ Efɛɛsi kɛ́bɑɑ bɛ̀ɛ̀ tiè nyiyɑ́ɑ̀bìsítié nkɛ̀ bɛ̀ɛ ì yóu, 
\v 4 kɛ́ bɛ̀ nɑ̀kɛ́ kɛ̀ bɛ̀ɛ yóu bɛ̀ bo ntũmmɛ̀ tinɑ́ɑǹtì dɛtetìrɛ̀ kpɛti, kɛ́yóu bɛ̀ bo nfɛímmɛ̀ ifukɛ, dɛ̀ ce tinɛìtì nti. Dɛ̀ í yóó bɛ̀ teennɛ̀ kɛ̀ Kuyie mbɛ̀ dɛɛtɛ́, kù dɛɛrí wèè kù tɑ̃́ wènwe. 
\v 5 N yɛ̃ nhɑ́ tì mbɛ̀ tié nkɛ̀ bɛ̀ ndɔ́ Kuyie nku nɛ̀ bɛ yɛ̀mmɛ̀ mɛmɔu kɛ̀ tìmɑtì bɑ́ mbɛ̀ bekùnɛ̀ kɛ̀ bɛ̀ tɑ̃́ Kuyie nweti weti. 
\v 6 Bɛ̀mɑbɛ̀ bùtínnɛ́mu dɛ kó itié nkɛ dɔ́ tinɛìtì sɔ̃́ntíkɛ kpɛti. 
\v 7 Kɛ dɔ́ kɛ́ntú bɛ̀ɛ̀ bɛnkú Kuyie nkuɔ́, bɛ̀ nɛ́ í yɛ̃́ ì tú mù weti weti.
\p
\v 8 Ti yɛ̃́mu kɛ tú ikuɔ́ wennimu kɛ̀ nsɑ̀ kɑ̀ɑ dɔ̀ɔ̀ri ì yɛ̃mmɛ̀. 
\v 9 Ikuɔ́ í bo bɛ̀ɛ̀ dɔ̀ɔ̀ri mɛsɑ̀ɑ̀ mbɛ kpɛ́í, nyì bo itookperí yɛmbɛ̀ kpɛ́í nkɛ nɛ̀ bɛ̀ɛ̀ yetɛ Kuyie nkpɛti nɛ̀ bɛnitiyonkubɛ nɛ̀ bɛ̀ɛ̀ dɔ̀ɔ̀ri mɛyɛi nnɛ̀ bɛ̀ɛ̀ sènku Kuyie nnɛ̀ bɛ̀ɛ̀ kɔ̀ù bɛ cicɛbɛ̀ nɛ̀ bɛ yɔ̃bɛ̀, kɛ tú bɛnitikɔ̀ùbɛ̀. 
\v 10 Ikuɔ́ bo bɛ̀ɛ̀ dɔuti dɔutinɛ̀ bɛtɔbɛ̀ bɛ kpɛ́í nkɛ nɛ̀ bɛnitidɑɑbɛ̀ bɛ̀ɛ̀ dɔutinɛ̀ bɛnitidɑtɔbɛ̀ nɛ̀ bɛnitipòbɛ̀ bɛ̀ɛ̀ dɔutinɛ̀ bɛnitipotɔbɛ̀, nɛ̀ bɛ̀ɛ̀ fiiti bɛnìtìbɛ̀ kɛ yonnɛ̀ nɛ̀ bɛyɑ́ɑ̀bìsítiebɛ nɛ̀ bɛ̀ɛ̀ ɔ̃ mpɑriku kɛ nɛ́ soú nnɛ̀ bɛ̀ɛ̀ dɔ̀ɔ̀ri dɛtɛrɛ̀ dɛtɛrɛ̀ Kuyie nnɑ́ɑǹtì kó itié nyetɛ dɛ̀. 
\v 11 Dɛ kó itié mbo Kuyie nkùù kpeńnì kɛ dɔɔri mɛsɑ̀ɑ̀ ku kó Tinɑ́ɑǹsɑ̀ɑ̀tì miɛkɛ nkɛ. Kù ti nni nduɔ́.
\s1 Pɔɔri sɑ̃ntímɛ̀ Kuyie nku sɑ̀ɑ̀ nkpɛ́í
\p
\v 12 N sɑ̃ntímu Yesu Kirisi ò n dɔ́mɛ̀, kɛ n tɑ̃ɑ̃tɛ́ kɛ n duɔ́ muwɛ̃rímú, kɛ̀ m pĩ nho tɔ̃mmú. 
\v 13 N do ò sɑ̃̀ɑ̃́mmu, kɛ fɛ̃́ũnko o kɔbɛ, kɛ̀ m miɛkɛ bɛ̀ cɔ̀ú mbɑ́ nɛ̀ mɛmmɛ kɛ̀ kù n kuɔ́ mmɛsémmɛ̀ kɛ yɛ̃́ n do í yɛ̃́mɛ̀ n dɔɔri dɛ̀. 
\v 14 Kɛ̀ ti Yiɛ̀ nni ndɔɔ̀ mɛsɑ̀ɑ̀ mmɛdiɛ̀ kɛ n teennɛ̀ kɛ̀ n tɑ̃́ Kuyie kɛ kù dɔ́ n tɑ̀unnɛ̀ mɛ̀ɛ̀ kpɛ́í nYesu Kirisi. 
\v 15 Tinɑ́ɑǹtì tii ntú timɔ́mmɔnti nti, kɛ dò mbɑ́ wè wèe tì yie, Yesu Kirisi kɔ̀tɛní kutenkù kɛ bo dɛɛtɛ́ bɛnitiyɛibɛ mbɛ, kɛ̀ n tu bɛyɛibɛ kóo ketiwè. 
\v 16 Kòò n kuɔ́ mmɛsémmɛ̀ mí mbɛyɛibɛ kóo ketiwè, kɛ bo bɛnkɛ o minnímɛ̀ dɛumɛ̀ bɛ̀ɛ̀ yó nhò tɑ̃́ bɛ̀ yóó nɑmɛ̀ kɛ́pɛ́tɛ́ mufòmmu mùù bo sɑ̃́ɑ̃̀. 
\v 17 Kuyie nyètìrì ndɛu sɑ̃́ɑ̃̀. Kunku kuù tu okpɑ̀ɑ̀tì kɛ bo sɑ̃́ɑ̃̀, kɛ í kɔ̃, ti í wúó nkù. Kuù mɑ́ɑ̀ tú Kuyie nkɛ̀ ti yó nkù sɑ̃ntí sɑ̃́ɑ̃̀. Kɛ̀ dɛ̀ mmɛ ndò.
\p
\v 18 N kóo dɑpɑ̀ɑ̀ Timɔntee, n dɑ nɑ̀kɛ́ tìì nɑ́ɑǹtì wɛ̃nnɛ́mu Kuyie mpɑ̃ɑ̃nɑ́ɑǹtì nɑ́ɑm̀bɛ̀ do nɑ̀kɛ́ tì ɑ kpɛ́í. Mpĩ́ ndɛ kó tinɑ́ɑǹtì kɛ̀ ti dɑ teénnɛ̀ kɑ̀ɑ nɑ kɛ́mɑ dimɑ̀ù sɑ̀ɑ̀rì, 
\v 19 kɛ́ntɑ̃́ Kuyie, kɛ yíé nkù dɑ nɑ́ɑ́nnɛ̀ tì ɑ yɛ̀mmɛ̀ miɛkɛ. A bɑ́ɑ́ dɔɔ̀ bɛ̀mɑbɛ̀ dɔ̀ɔ̀mɛ̀ kɛ yetɛ Kuyie mbɛ̀ nɑ́ɑ́ ntì bɛ yɛ̀mmɛ̀ miɛkɛ kɛ fétìnnɛ bɛ tɑ̃́kùmɛ̀. 
\v 20 Bɛ kó bɛ̀mɑbɛ̀ tu Imindee nɛ̀ Adɛkisɑ̃ntiri. N duɔ́ mbɛ̀ dibɔɔ̀, kɛ̀ dì bo bɛ̀ fɛ̃́ũ nkɛ̀ bɛ̀ɛ yɔtɛ bɛ̀ bo nsɑ̃́ɑ̃́mmɛ̀ Kuyie.
\c 2
\s1 Ti bo mbɑ́ɑ́ mmɛ̀ɛ̀ botí Kuyie
\p
\v 1 Mɛketimɛ̀, n dɔ́ di mbɑ́ɑ́mmu Kuyie mbɛnìtìbɛ̀ bɛmɔu kpɛ́í, kɛ́ nkù bɑ̀ɑ́ nkɛ kù mɔ̀ú di kpɑ dɛ̀, kɛ kù sɑ̃ntí, 
\v 2 kɛ́ nkù bɑ̀ɑ́ mbɛkpɑ̀ɑ̀tìbɛ̀ kpɛ́í nnɛ̀ bɛ̀ɛ̀ bɑkɛ́ bɛmɔu bɛ kpɛ́í kɛ̀ ti mbo bɑ̀mmùù kɛ̀ dikɔnkɔɔ̀nnì bɑ́ mbo, kɛ̀ ti nkù tũ nkɛ kù dé kɛ dɔɔri kù dɔ́mɛ̀. 
\v 3 Kuyie mmɛ ndɔ́, kunku kùù tu ti dɛɛtíwè. 
\v 4 Kù dɔ́mu bɛnìtìbɛ̀ bɛmɔuu cootɛ́, kɛ yĩ́ɛ̃́tɛ́ timɔ́mmɔnti. 
\v 5 Kuyie mbo kumɑ́ɑ̀ ndi, wèè tɑ̀unko Kuyie nnɛ̀ bɛnìtìbɛ̀ kòò bo omɑ́ɑ̀, weè tu Yesu Kirisi wèè tùótɛ́ tinitikɔ̃̀ntì. 
\v 6 Wèè duɔ́ nhomɑ́ɑ̀ kɛ nɑɑ́ ntiyeti kɛ̀ bɛ̀ ò kùɔ kòò bo dɛɛtɛ́ bɛnìtìbɛ̀ bɛmɔu. Kuyie mmɔ̀nnì diì do tùɔ̀kɛ kòò mɛ̀ dɔ̀ɔ̀. 
\v 7 Kuyie nkuù n tɑ̃ɑ̃tɛ́ kɛ n dɔ̀ɔ̀ ku tɔ̃nnì, kɛ̀ m bo nɑ́kɛ́ bɛ̀ɛ̀ í tú Sifubɛ timɔ́mmɔnti kɛ̀ bɛ̀ ntɑ̃́ Kuyie. N nɑ́ɑ́ mmɔ́mmuɔ nwe, n yí soú.
\p
\v 8 N dɔ́ bɑ́ wè wè mbɑ́ɑ́ nKuyie nhò berínɛ̀ kɛ̀ɛ̀ bíɛ́kɛ̀ nɛ̀ o yɛ̀mmɛ̀ mɛmɔu ndi, kɛ dò mpɑ́íí kɛ bɑ́ mmɔkɛ mɛkpɑ̀rìyɛ̀mmɛ̀ yoo kɛmiɛkɛ.
\p
\v 9 Bɛnitipòbɛ̀ níí nyi tiyɑ̀ɑ̀tì mɛsɑ̀ɑ̀, bɛ̀ bɑ́ nwɑnti idíítí ikperí kpɛti nɛ̀ mɛfĩmmɛ mɛsɔɔ nkɔ̃mɛ nɛ̀ yɛtootɔ̃rɛ nɛ̀ mɛdɛ̀ì nkɛ pɑ̃ɑ̃tì tiyùtì kɛ bo bɛnkɛ bɛmɑ́ɑ̀. 
\v 10 Bɛ kó tisɑ̃tì ntú bɛ̀ bo ndɔɔrimɛ̀ mɛsɑ̀ɑ̀ nkɛ dé Kuyie. 
\v 11 Onitipòkù níí nkémmú itié mbɛ́u, kɛ́yie nyì yɛ̃ mmù. 
\v 12 N yí dɔ́ onitipòkù ntiè nhonitidɔ̀ù yoo wè nhò bɑkɛ́. 
\v 13 Kɛ yɛ̃́ Kuyie nketɛ́ kɛ dɔ̀ɔ̀mɛ̀ Adɑmmu nwe kɛ dèntɛ Ɛfu. 
\v 14 Dɛ̀ í tú Adɑmmu nwe dibɔɔ̀ soutɛ́mɛ̀, Ɛfu nwe dì soutɛ́mɛ̀, kòò yetɛ Kuyie nkpɛti. 
\v 15 Kuyie nnɛ́ yóó dɛɛtɛ́mu onitipòkù ò mɔ̀kɛ dìì mɔ̀nnì ibí, kɛ̀ nsɑ̀ nkòò kù tɑ̃́ kɛ kù dɔ́, kɛ kpɑ mɛyɛi, kòo yɛ̀mmɛ̀ wenni.
\c 3
\s1 Kirisi kɔbɛ tĩ̀nnì kó bɛnìùbɛ̀ bo ndòmmɛ̀
\p
\v 1 Ti nnɑ́ɑǹtì tu timɔ́mmɔnti nti, kòò mɔù dɔ́ kɛ́nni Kirisi kɔbɛ tĩ̀nnì ò dɔ́ mutɔ̃mmú sɑ̀ɑ̀mù mmu. 
\v 2 Wèè ni Kirisi kɔbɛ tĩ̀nnì o borimɛ dò nkɛ́nwennimu, kòo mpo onitipòkù òmɑ́ɑ̀, kɛ́nnɔ kɛ pĩĩ nhomɑ́ɑ̀, kɛ́nciì kɛ dɔɔri dɛ̀ɛ̀ wenni, kɛ cɔú bɛpɔ̀ɔ̀bɛ̀, kɛ́nnɔ nkɛ tiè mbɛnìtìbɛ̀ Kuyie nnɑ́ɑǹtì. 
\v 3 Ò bɑ́ ntú kunɑɑ̀yɑ̃̀ɑ̃̀kù, o miɛkɛ bɑ́ ntonnì, wè nwenni kɛ bɑ́ nwɑnti yɛkpɑ̀rɛ̀, ò bɑ́ɑ́ duɔ́ nho yɛ̀mmɛ̀ idíítí. 
\v 4 Ò mpĩ́ nho cĩ́ɛ̃̀tɛ̀ mɛsɑ̀ɑ̀, kòo bí nhò dé kɛ yíé nho kpɛti. 
\v 5 Kòo nìtì í nɑ kɛ pĩ́ nho cĩ́ɛ̃̀tɛ̀ ò bo yĩ́mɛ kɛ́ndɑkɛ Kirisi kɔbɛ tĩ̀nnì kpɛ́í? 
\v 6 Ò bɑ́ ntú wèè cɔutɛ́ Kuyie mbɑ̀mbɑ̀, ò yɑ̀ɑ̀ bo mɔɔtɛ tɛfentɛ̀ kɛ̀ Kuyie nhò kpetínnɛ́, dibɔɔ̀ tɛ̀ mɔ̀ɔ̀tɛ mɛ̀ɛ̀ botí kɛ̀ kù dì kpetínnɛ́. 
\v 7 Bɛ̀ɛ̀ í tũ nKuyie kɛ̀ bɛ̀ bɑ́ɑ́ pɛ́tɛ́ bɛ̀ bo ò wɑ̀tí tíì kpɛ́í, ò yɑ̀ɑ̀ bo tɑ dibɔɔ̀ kó timɑ́tì miɛkɛ.
\s1 Bɛwedɔuntɔ̃mbɛ̀ dò nkɛ́ndòmmɛ̀
\p
\v 8 Bɛwedɔuntɔ̃mbɛ̀ borimɛ múnkɛ dò nkɛ́nwennimu kɛ̀ bɛ̀ bɛ̀ dé, bɛ̀ bɑ́ mmɔkɛ yɛnɔ̀ yɛ̀dɛ́, bɛ̀ bɑ́ ntú tinɑɑyɑ̃̀ɑ̃̀tì, bɛ̀ bɑ́ ndɔɔri mɛciì nkpɛrɛ kɛ yo nyidíítí. 
\v 9 Bɛ̀ ntũ ntimɔ́mmɔnti, kɛ bɑ́ ncɑɑri Kuyie nyètìrì. 
\v 10 Bɛ̀ níí ketɛ́ kɛ́ bɛ̀ yɑ̀ɑ́kɛ́, kɛ̀ bɛ̀ nɑ dɛ kó mutɔ̃mmú bɛ̀ nɛ́ bɛ̀ dɔ̀ɔ̀ bɛwedɔuntɔ̃mbɛ̀. 
\v 11 Bɛnitipòbɛ̀ bɛ̀ɛ̀ tu bɛwedɔuntɔ̃mbɛ̀ bɛ borimɛ múnkɛ dò nkɛ́nwennimu, bɛ̀ bɑ́ nnɑ́ɑntɛ bɛtɔbɛ̀ kpɛ́í nkɛ́nnɔ nkɛ pĩĩ mbɛmɑ́ɑ̀, kɛ̀ bɛ dɔɔ̀rìmɛ̀ nwenni dɛmɔu dɛ miɛkɛ. 
\v 12 Owedɔuntɔ̃ntì dò nkɛ́mpo onitipòkù omɑ́ɑ̀ ndi, kɛ pĩ́ nho cĩ́ɛ̃̀tɛ̀ mɛsɑ̀ɑ̀, kòo bí nyíé nho kpɛti. 
\v 13 Bɛwedɔuntɔ̃mbɛ̀ bɛ̀ɛ̀ pĩ mbɛ tɔ̃mmú mɛsɑ̀ɑ̀ mbɛ̀ ɔ̃ mbɛ̀ dému, kɛ̀ bɛ̀ nɑ̀ɑ́ nYesu Kirisi kpɛ́í nnɛ̀ dikɔ̃m̀bùɔ̀ bɛ borimɛ wenni mɛ̀ɛ̀ kpɛ́í.
\s1 Yesu weè tu ti tɑ̃́kùmɛ̀ kó dikũ̀nnì
\p
\v 14 N dɑ wɑ̃̀ri di mpɑ́tíri kɛ dɔ́ kɛ́kɔtoomu bɑ̀mbɑ̀ nkɛ dɑ yɑ̀. 
\v 15 Kɛ̀ mmɛ n yí cɑ̃rikɛ kɛ kɔ̀too, di mpɑ́tíri bo dɑ teennɛ̀ kɑ̀ɑ nyɛ̃́ ɑ bo mpĩ́ mmɛ̀ɛ̀ botí Kuyie nkɔbɛ cuokɛ̀ mutɔ̃mmú. Kuyie mbomu kɛ̀ kuù tɔ timɔ́mmɔnti yɛsɑ̃ǹkɛ̀ ɔ̃ ntɔ mɛ̀ɛ̀ botí tɛcĩ́ɛ̃̀tɛ̀. 
\v 16 Timɔ́mmɔnti disɔ̀rì kpɛti Kuyie nti duɔ́ ntì kɛ̀ ti tì nɑ̀ɑ́ ntì dɛumu, tìì tu:
\q1 Kirisi nɑɑ́ nhonìtì nwe kɛ kɔ̀tɛní,
\q1 Muyɑɑ́nsɑ̀ɑ̀mù bɛ́immu
\q1 ò tumɛ̀ timɔ́mmɔnti yiɛ̀,
\q1 kɛ̀ Kuyie ntɔ̃rɛ̀ ò yɑ̀,
\q1 kɛ̀ bɛ̀ nɑ̀kɛ́ o kpɛ́í nyɛbotɛ̀,
\q1 kɛ̀ kutenkù kumɔu kɔbɛ ò yie,
\q1 kòò dèkɛ kɛĩ́nkɛ̀ nɛ̀ diyetidiɛrì.
\c 4
\s1 Kuyie ndɔ̀ɔ̀ dɛ̀ɛ̀ kó dimɑ̀ɑ̀ wennimɛ̀
\p
\v 1 Muyɑɑ́nsɑ̀ɑ̀mù ti nɑ́ɑ́mmu nweti weti kɛ tú yɛwe sɔnyɛ bɛnìtìbɛ̀ bo yetɛ Kuyie nkó kucɛ kɛ́tũnnɛ mɛyɑ́ɑ̀bìsíyɛ̀mmɛ̀ nɛ̀ yɛbɔkɛ̀ kó itié. 
\v 2 Mɛyɛ̀mmɛ̀ mɛ̀dɛ́mɛ̀ yɛmbɛ̀ nɛ̀ siyɑ́ɑ̀bìsí yɛmbɛ̀ bo mbɛ̀ soú. Dɛ kó siyɑ́ɑ̀bìsí yɛmbɛ̀ dɛ̀mɑrɛ̀ í kɑ́ɑ́ mbɛ yɛ̀mmɛ̀ bɛ̀ dò mbɛ̀ bɛ̀ tùɔnnɛ̀ timɑ́tì wũɔ̃tì nti. 
\v 3 Dɛ kó bɛnìtìbɛ̀ bo nnɑ́ɑ́ nkɛ tú dipopuò í wenni, kɛ tú bɛ̀ nci mudiì mɑmù. Kuyie ndɛ̀ dɔ̀ɔ̀ kɛ̀ dɛ̀ tu onìtì kó mɛsɑ̀ɑ̀ mmɛ, bɛ̀ɛ̀ yie nKuyie mbɛ̀ yĩ̀ɛ̃́tɛ́mu timɔ́mmɔnti, kɛ ɔ̃ɔ̃ kù dɔunnɛ̀ mutɔ̃mmú kɛ́di. 
\v 4 Kuyie ndɔ̀ɔ̀ dɛ̀ɛ̀ kó dimɑ̀ɑ̀ wennimu, dɛ̀mɑrɛ̀ í dò nkɛ́yóu. Ti nɛ́ dò nkɛ níí kù dɔunnɛ̀ mutɔ̃mmú mmu kɛ́ dɛ̀ di. 
\v 5 Kuyie nnɑ́ɑǹtì nɛ̀ mubɑ́ɑmmu dɛɛ̀ wénkùnko dɛmɔu.
\s1 Kuyie nkóo tɔ̃ntì sɑ̀ɑ̀wè dò nkɛ́ndòmmɛ̀
\p
\v 6 A ntiè nti Kirisi kɔbɛ. Mɛm̀mɛ ɑ bo ntúmɛ̀ Yesu Kirisi kóo tɔ̃ntì sɑ̀ɑ̀wè, wèè bɛbíí Kuyie nnɑ́ɑǹtì sɑ̃́ɑ̃̀ kɛ̀ tì dònnɛ̀ o kó mudiì kɛ tũ nKuyie nnɑ́ɑǹtì kó itié nweti weti ɑ ì bɛbíí mɛ̀ɛ̀ botí. 
\v 7 Bútínnɛ́ tiyɑ̀ɑ̀rìnɛìtì sɔ̃́ntíkɛ kpɛti, tì í yóó dɑ teennɛ̀ Kuyie nkó kucɛ, kɛ́yetoo kɛ́ndɔɔri Kuyie ndɔ́mɛ̀. 
\v 8 A bo fɛ̃́ũmmɛ̀ ɑ kɔ̃̀ntì dɛ̀ wennimu yie, ɑ nɛ́ bo yetoomɛ̀ Kuyie nkó kucɛ dɛɛ̀ pɛ̃ɛ̃tɛ́. Kɛ yɛ̃́ dɛ̀ í túmɛ̀ mufòmmu muù mmɑ́ɑ̀ kpɛ́í nnɛ̀ mùù kpɑɑní mu kpɛ́í nkɛ. 
\v 9 Tinɑ́ɑǹtì mɔ́mmɔnti nti bɛnìtìbɛ̀ bɛmɔu dò nkɛ́ntɑ̃́ tì. 
\v 10 Dɛɛ̀ te kɛ̀ ti pĩ́ mmutɔ̃mmú kɛ mɑù, kɛ yɛ̃́ ti tɑ̃́mɛ̀ Kuyie, kunku kùù bo sɑ̃́ɑ̃̀ kɛ dɛɛrí bɛnìtìbɛ̀ bɛmɔu, dɔ̀kɛ bɛ̀ɛ̀ kù tɑ̃́.
\p
\v 11 Á dò nkɛ́ ntì mbɛ̀ nɑ̀ɑ́mmu, kɛ tì mbɛ̀ tiè. 
\v 12 Á bɑ́ɑ́ yóu kɛ̀ bɛ̀ dɑ senkɛ̀rì ɑ tú mɛ̀ɛ̀ kpɛ́í nhodɑpɑ̀ɑ̀. A nɑ́ɑǹtì nɛ̀ ɑ dɔɔ̀rìmɛ̀ dɛ̀ nwenni, kɑ̀ɑ ndɔ́ bɛtɔbɛ̀, kɛ́ntɑ̃́ Kuyie mmɛsɑ̀ɑ̀ nkɛ dɔɔri dɛ̀ɛ̀ wenni, kɛ̀ bɛ̀ ndɑ wúó nkɛ tũ. 
\v 13 Á nkɑɑ̀ Kuyie nnɑ́ɑǹtì bɛnìtìbɛ̀, kɛ tì mbɛ̀ tũ̀nni, kɛ ti mbɛ̀ tiè nkɛ kémmú m bo tuɔkoomɛ̀. 
\v 14 A bɑ́ɑ́ yɛ̃̀ nKuyie ndɑ pɑ̃ dìì pɑ̃nnì, kɛ̀ ku pɑ̃ɑ̃nɑ́ɑǹtì nɑ́m̀bɛ̀ tì bɛ́i mbɛwedɔunkótíbɛ̀ dɑ nɔ̀ɔ́ ndìì mɔ̀nnì sinɔu kɛ bɑ̀ńtɛ̀ Kuyie. 
\v 15 Totí ɑ yɛ̀mmɛ̀ dɛ kó dipɑ̃nnì ĩ́nkɛ̀, kɛ duɔ́ nhɑmɑ́ɑ̀ dɛ kó mutɔ̃mmú, kɛ̀ bɛ̀ nwùó nhɑ kérímɛ̀ dɛ ììkɛ̀. 
\v 16 Ndɑkɛ ɑmɑ́ɑ̀ kpɛ́í nkɛ́ mbɛ̀ tiè nkɛ̀ dɛ̀ wenni, kɛ́nfííkú teii. Kɑ̀ɑ dɔ̀ɔ̀ri mɛmmɛ ɑ bo dɛɛtɛ́ ɑmɑ́ɑ̀, kɛ́dɛɛtɛ́nɛ̀ ɑ tiè mbɛ̀.
\c 5
\s1 A bo nni mɛ̀ɛ̀ botí bɛnìtìbɛ̀
\p
\v 1 A níí bɑ́ nnɑ́ɑ́nnɛ̀ wèè dɑ kótí mɛkperímɛ̀, ɑ nhò nɑ̀ɑ́nnɛ̀ kɛ dò nhɑ cicɛ, kɛ́nnɑ́ɑ́nnɛ̀ bɛdɑpɑ̀mbɛ̀ kɛ dò nhɑ nɛí, 
\v 2 kɛ́ndɔɔri bɛpokótíbɛ̀ kɛ dò nhɑ yɔ̃bɛ̀, kɛ́ndɔɔri bɛsɑpɑ̀mbɛ̀ kɛ dò nhɑ tɑ̃bɛ̀, kɛ tìmɑtì bɑ́ mbo di cuokɛ̀.
\s1 Kirisi kɔbɛ dò nkɛ́ndɑkɛ bɛ̀ɛ̀ kúpobɛ̀ kpɛ́í
\p
\v 3 Á ndɑkɛ bɛkúpobɛ̀ bɛ̀ɛ̀ í mɔkɛ bɛ̀ɛ̀ bɛ̀ teénnɛ̀ bɛ kpɛ́í, kɛ́ mbɛ̀ dé kɛ dò nhɑ yɔ̃bɛ̀. 
\v 4 Kòo kúpokù mɔù mɛ mmɔ̀kɛ ibí yoo o yɑɑ̀bí, iì dò nkɛ́ nhò tɔ ò do ì tɔ mɛ̀ɛ̀ botí kɛ́bɛnkɛ ì tumɛ̀ Kirisi kɔbɛ. Kuyie mmɛ ndɔ́. 
\v 5 Okúpokù wèè í mɔkɛ wèè ò teénnɛ̀ ò ɔ̃ mbúɔ́ Kuyie nku, kɛ kù mmɔ́ú mɛteèmmɛ̀ sɑ̃́ɑ̃̀. 
\v 6 Okúpokù wèè dɔ̀ɔ̀ri ò dɔ́mɛ̀ ò kumu, kòo yɛ̀mmɛ̀ nɛ́ dò nhò fòù. 
\v 7 A dò nkɛ́ tì mbɛ̀ nɑ̀kɛ́mu kɛ̀ bɛ̀ ndɔɔri dɛ̀ɛ̀ wenni. 
\v 8 Kòò mɔù í dɑkɛ o kɔbɛ kpɛ́í, dɔ̀kɛ o cĩ́ɛ̃̀tɛ̀ kpɛ́í, wè í tú Kirisi kou. Wèè í tũ nKuyie nho kɔ̃mɛ ò tɔ̃ũnɛ̀mu.
\p
\v 9 Ntɛ ɑ dò nkɛ́wɑ̃ri bɛ̀ɛ̀ kúpobɛ̀ yètɛ̀ kɛ́ mbɛ̀ tɔ, wèè yenkɛ onitidɔ̀ù omɑ́ɑ̀ kɛ mɔkɛ yɛbie sipísìkuɔ̀. 
\v 10 Kɛ tiè nho bí mɛsɑ̀ɑ̀, kɛ cɔú bɛpɔ̀ɔ̀bɛ̀, kɛ yɑ́rí Kirisi kɔbɛ, kɛ dɑkɛ bɛsénnìbɛ̀ kpɛ́í. Kòo tɔ̃mmú mumɔu wenni.
\p
\v 11 A bɑ́ɑ́ wɑ̃ri bɛkúpobɛ̀ bɛ̀ɛ̀ kpɑɑ́ bɛ, Kirisi kɔbɛ dò nkɛ́tɔ bɛ̀ bɛ kó yɛyètɛ̀ miɛkɛ. Kɛ̀ dɛ̀ yɛ̀mmɛ̀ bɛ̀ bo bútínnɛ́ bɛ̀ dɔúnnɛ̀ dìì nùù Kirisi kɛ́wɛ̃tɛ kɛ́ndɔ́ kɛ́yenkɛ, 
\v 12 kɛ́tɔ̃tɛ bɛ̀ do dɔúnnɛ̀ dìì nùù Kirisi, kɛ́yetɛ́nɛ̀ Kuyie, 
\v 13 kɛ́nɑɑ́ mbɛtɔ̃nnɛ́diebɛ̀, kɛ́ncentì centì sicɛ̃́ĩ, kɛ nɑ́ɑntɛ nɑ́ɑntɛ tìì í tú bɛ kpɛti. 
\v 14 Dɛɛ̀ te kɛ̀ n dɔ́ bɛkúpobɛ̀ bɛ̀ɛ̀ kpɑɑ́ kɛ bɛ bɛ̀ nyenkú, kɛ́piɛ́ ibí, kɛ́ndɑkɛ bɛ cɛ̃́ĩ kpɛ́í, kɛ̀ ti kpɑntídɛ̀ntɔbɛ̀ bɑ́ɑ́ nɑ kɛ ti wɑ́tí. 
\v 15 Kɛ yɛ̃́ bɛkúpobɛ̀ mɑbɛ̀ yóumɛ̀ Kuyie nkó kucɛ kɛ tũnnɛ obɔɔ̀kpɑ̀ɑ̀tì kɔku. 
\v 16 Kòo kúpokù mɔù mɔ̀kɛ o kɔbɛ bɛ̀ɛ̀ tũ̀ nKuyie bɛ̀ nhò tɔ, kòò bɑ́ ntú Kirisi kɔbɛ kó ditɔu kɛ̀ bɛ̀ ntɔ bɛ̀ɛ̀ í mɔkɛ bɛ kɔbɛ.
\s1 Bɛ̀ dò nkɛ́ntɔmɛ̀ wèè nɑ̀ɑ́ Kuyie nnɑ́ɑǹtì nɛ̀ ò dò kɛ́ndòmmɛ̀
\p
\v 17 Wèè nɑ̀ɑ́ Kuyie nnɑ́ɑǹtì kɛ ni Kirisi kɔbɛ tĩ̀nnì di nhò yietì kɛ̀ dɛ̀ɛ pɛ̃ɛ̃tɛ́ di duɔ́ ndɛ̀ bɛkúpobɛ̀ kucɛ mɛ̀dɛ́mɛ̀. 
\v 18 Tì wɑ̃̀rimu kɛ tú: A bɑ́ɑ́ tɑ́ú nfɛnɑ̀ɑ̀fɛ̀ nùù fɛ̀ puotì dìì mɔ̀nnì tidiitì. Kɛ wɑ̃̀ri kupíkù tɛkù kɛ tu: Bɛ̀ dò nkɛ́nyietìmu otɔ̃ntì. 
\v 19 Kɛ̀ bɛ̀ wɑ́tìrì owedɔunkótì ɑ bɑ́ɑ́ yie nkɛ̀ nsɑ̀ kɛ̀ bɛ̀dɛ́bɛ̀ yoo bɛ̀tɑ̃ɑ̃ti bɛɛ̀ í yɑ̀ kɛ bɛ́i. 
\v 20 Kòò mɔù dɔ̀ɔ̀ mɛyɛi, nhɑ ò kpɑnnɛ̀ bɛnìtìbɛ̀ ììkɛ̀ kɛ̀ kufɔ̃wɑɑ́ mbɛ̀ pĩ nkɛ̀ bɛ̀ɛ yɔtɛ mɛyɛi nkó mudɔɔ̀rìmù.
\p
\v 21 N dɑ bɑ́ɑ́mmu Kuyie nyììkɛ̀ nɛ̀ Yesu Kirisi kɔkɛ nɛ̀ Kuyie ntɔ̃rɛ̀ kù tɑ̃ɑ̃tɛ́ yɛ̀ ììkɛ̀, kɛ tú ɑ ntũ ndɛ kó itié kɛ bɑ́ mmɔkɛ yɛnɔ̀ yɛ̀dɛ́ɛ̀, kɛ bɑ́ mbɑɑ̀tì òmɔù. 
\v 22 A bɑ́ ncɑ̃ɑ̃́ ɑ bo tɑ̃ɑ̃tɛ́mɛ̀ onìtì, kóò nɔ̀ɔ́ nsinɔu, kóò duɔ́ mmutɔ̃mmú, kɑ̀ɑ mɛ̀ dɔ̀ɔ̀, kòo do, ɑ múnkɛ kɔkɛ́mu dɛ kó mɛyɛi mmiɛkɛ, fɔ̃́ nní nwenni pɑ́íí.
\p
\v 23 Á bɑ́ nyɔ̃̀ mmɛniɛ mmɑ́ɑ̀, nyɔ̃̀ ndìfɛ̃́ɛ̃̀ sɑ́m̀pɔ́ ɑ pɔutì yonku kpɛ́í.
\p
\v 24 Bɛ̀mɑbɛ̀ kó mɛyɛi mpɑ̃̀nkɛ ɔ̃ nfeímu, kɛ̀ bɛtɔbɛ̀ kɔ̃mɛ ɔ̃ɔ̃ dentɛ kɛ́feitɛ́. 
\v 25 Mɛsɑ̀ɑ̀ nkpɛrɛ mɛ ndò, bɛ̀mɑbɛ̀ kɔ̃mɛ ɔ̃ɔ̃ nfeímu kɛ̀ bɛtɔbɛ̀ kɔ̃mɛ ɔ̃ɔ̃ dentɛ kɛ́feitɛ́.
\c 6
\p
\v 1 Bɛ̀ɛ̀ tu Kirisi kɔbɛ kɛ tú tidɑɑtì bɛ̀ ndé bɛ yɛmbɛ̀, kɛ̀ dɛ̀ɛ yie nkɛ̀ bɛ̀ bɑ́ɑ́ sɑ̃́ɑ̃́ nKuyie nkɛ́senkɛ̀rì ku nɑ́ɑǹtì. 
\v 2 Tidɑɑtì tìì yɛmbɛ̀ tu Kirisi kɔbɛ, tì bɑ́ɑ́ yóu tì bo mbɛ̀ démɛ̀ kɛ dɔ̀ bɛ̀ tu bɛmɔu Kirisi kɔbɛ. Tì petìnkɛ dò ntì mpĩ mbɛ tɔ̃mmú mmu, kɛ̀ dɛ̀ɛ pɛ̃ɛ̃tɛ́ dɛ̀ nɑ ndòmmɛ̀.
\s1 Iyɑ́ɑ̀bìsítié nnɛ̀ tikpɑ̀tì mɔ́mmɔnti dɛ kó tinɑ́ɑǹtì
\p Ntɛ ɑ dò nkɛ́ mbɛ̀ tiè ntì kɛ yɑ́úkùnko bɛ kɔ̃̀ntì. 
\v 3 Kòò mɔù tié nyitié mmɑì ìì cɑ̃̀ɑ̃́nnɛ̀ Kirisi kpɛyi, ò yetɛ Kuyie nkó kucɛ kpɛti nti, 
\v 4 kɛ mɔkɛ tɛfentɛ̀, wè í yɛ̃́ dɛ̀mɑrɛ̀, kɛ mɔkɛ tinɛìtì sɔ̃́ntíkɛ kpɛti, tìì ce nyɛkpɑ̀rɛ̀ nɛ̀ yɛsɑ̃́ɑ̃̀mbɛ̀, kɛ mɔkɛ mɛhɛ̃ɛ̃mmɛ̀, kɛ wúó mbɛtɔbɛ̀ bɛyɛibɛ. 
\v 5 Bɛ̀ɛ̀ mɔ̀kɛ dɛ kó tinɛìtì botí bɛ̀ tɛ̃́nkɛ í yɛ̃́ timɔ́mmɔnti, kɛ̀ bɛ yɛ̀mmɛ̀ dò nkuwedɔuncɛ tu kuditikɔku.
\p
\v 6 Kuwedɔuncɛ kó tikpɑ̀tì tu dɛ̀ bo ndɑ nɑɑtinɛ̀mɛ̀ ɑ mɔkɛ dɛ̀. 
\v 7 Ti yɛ̃́mu kɛ dò nti í tɔní dɛ̀mɑrɛ̀ bɛ̀ ti pɛí dìì mɔ̀nnì, ti mɛ nyí yó ntɔ dɛ̀mɑrɛ̀ ti kṹṹ nyiè. 
\v 8 Kɛ̀ ti mɔkɛ ti yo mmù, kɛ mɔkɛ tiyɑ̀ɑ̀tì dɛ̀ ti sɑ̀nnɛ̀mu. 
\v 9 Bɛ̀ɛ̀ dɔ́ kɛ́nɑɑ́ mbɛdítíkpɑ̀ɑ̀tìbɛ̀, bɛ̀ ɔ̃ɔ̃ do mɛbennímɛ̀ miɛkɛ nkɛ kɛ̀ iyɛntotí yɛiyii bɛ̀ soutɛ́ kɛ̀ bɛ̀ɛ tɑ mɛyɛi mmiɛkɛ, kɛ́feti kɛ̀ dɛ̀ɛ deè. 
\v 10 A bo duɔ́mmɛ̀ ɑ yɛ̀mmɛ̀ idíítí dɛ̀ tu mɛyɛi nkó dikũ̀nnì ndi, bɛ̀mɑbɛ̀ i ndɔkɛ kɛ dɛ́tɛ́nɛ̀ Kuyie nkɛ fɛ̃́ũ̀rì.
\s1 Pɔɔri tiémmɛ̀ Timɔntee
\p
\v 11 Fɔ̃́ nKuyie nkóo nìtì, mɛntɛ́nɛ̀ ɑmɑ́ɑ̀ dɛ kó mɛyɛi nkɛ́ntũ Kuyie nkɛ dɔɔri kù dɔ́ dɛ̀, kɛ́nyíé nku kpɛti, kɛ́ nkù dɔ́, kɛ́nnɔ nkɛ mi nkɛ bɑ́ ndɔri. 
\v 12 Mɑ̀ dimɑ̀ù sɑ̀ɑ̀rì ɑ tɑ̃́ mɛ̀ɛ̀ kpɛ́í nKuyie nkɛ́pɛ́tɛ́ mufòmmu mùù bo sɑ̃́ɑ̃̀ Kuyie ndɑ yu mùù kpɛ́í nkɑ̀ɑ nɑ̀kɛ́ bɛnìtìbɛ̀ pɛ́u ììkɛ̀ ɑ kù tɑ̃́mɛ̀. 
\v 13 Nɛ̀ Kuyie nkùù duɔ̀ mmufòmmu dɛnɛnnɛ̀ dɛmɔu ku yètìrì nɛ̀ Yesu Kirisi wèè do í yɔ̀tɛ ò bo nɑ́kɛ́mɛ̀ Pɔ̃nsi Pidɑti ììkɛ̀ ò tu wè o kpɛri, n dɑ nɑ́ɑ́mmu kɛ̀ n tú: 
\v 14 A mpĩ́ nKuyie ntɑnnùù kɑ̀ɑ fòmmu nwenni pɑ́íí, kòò mɔù bɑ́ɑ́ dɑ wɑ́tí, kɛ̀ ti Yiɛ̀ nYesu Kirisi yɑ̀ɑ wɛ̃tɛnní. 
\v 15 Kuyie ndiɛkù kùù mɑ́ɑ̀ mɔ̀kɛ muwɛ̃rímú mumɔu, bɛkpɑ̀ɑ̀tìbɛ̀ kóo kpɑ̀ɑ̀tì, kùù bɑkɛ́ bɛ̀ɛ̀ bɑkɛ́, kɛ̀ ku mɔ̀nnì tùɔ̀kɛ ò bo wɛ̃tɛní. 
\v 16 Kuù mɑ́ɑ̀ fòù sɑ̃́ɑ̃̀, kɛ ɑ̃ kuwenniku diɛkù miɛkɛ kùù kɔ̀ù inuɔ, òmɔù í yóó nɑ kɛ tɔ́ɔ́nko kùù borɛ̀. Òmɔù í yɑ̀ Kuyie, òmɔù mɛ mbɑ́ɑ́ nɑ kɛ́ kù yɑ̀. Ku yètìrì ndɛu, kɛ̀ kù nkpeńnì sɑ̃́ɑ̃̀. Kɛ̀ dɛ̀ mmɛ ndò.
\p
\v 17 Nɑ́kɛ́ bɛ̀ɛ̀ mɔ̀kɛ ku ntenkù kó tikpɑ̀tì kɛ̀ bɛ̀ bɑ́ mmɔkɛ sifeí, bɛ̀ bɑ́ɑ́ duɔ́ mbɛ yɛ̀mmɛ̀ tikpɑ̀tì, kɛ yɛ̃́ bɛ̀ í yɛ̃́mɛ̀ tì pɛ̃nkɛ́ dìì mɔ̀nnì. Bɛ̀ɛ̀ duɔ́ mbɛ yɛ̀mmɛ̀ Kuyie nkùù ti duɔ̀ ndɛmɔu, kɛ dɔ́ dɛ̀ nti nɑɑti. 
\v 18 Nɑ́kɛ́ bɛ kɛ̀ bɛ̀ ndɔɔri dɛ̀ɛ̀ wenni, kɛ̀ bɛ borimɛ nwenni, kɛ̀ bɛ̀ nnitì kɛ pɑ̃ɑ̃ mbɛ kpɛrɛ. 
\v 19 Mɛmmɛ bɛ̀ bo pɛ́tɛ́mɛ̀ tikpɑ̀tì kɛĩ́nkɛ̀ kpɛti, tìì yó mbo sɑ̃́ɑ̃̀, kɛ́mmɔkɛ mufòmmu sɑ̃́ɑ̃̀.
\p
\v 20 Timɔntee ɑ bɑ́ɑ́ yóu ɑ bo mpĩ́mmɛ̀ Kuyie ndɑ duɔ́ mmùù tɔ̃mmú, mɛntɛ́nɛ̀ ɑmɑ́ɑ̀ bɛ̀ɛ̀ yɛ̀mmɛ̀ dò mbɛ̀ ciì, kɛ dɔ́ tinɛìtì sɔ̃́ntíkɛ kpɛti. 
\v 21 Bɛ̀mɑbɛ̀ yɛ̀mmɛ̀ dò mbɛ̀ ciìmu kɛ dɛ́tɛ́nɛ̀ Kuyie nkó kucɛ.
\p Kuyie nkó mɛsɑ̀ɑ̀ nní ndi bonɛ̀!