\id 1TH di53.all F{evrier 1999 BJ Parakou B{enin
\ide UTF-8
\h 1 Tɛsɑdoniki
\toc1 Pɔɔri wɑ̃̀ri dìì pɑ́tíri ketirì Kirisi kɔbɛ bɛ̀ɛ̀ bo Tɛsɑdoniki
\toc2 1 Tɛsɑdoniki
\mt1 Pɔɔri wɑ̃̀ri dìì pɑ́tíri ketirì Kirisi kɔbɛ bɛ̀ɛ̀ bo Tɛsɑdoniki
\imt1 Di mpɑ́tíri tɔ tìì nɑ́ɑǹtì
\ip Tɛsɑdoniki do tú Mɑseduɔnni tempɛ̃ nkó dihɛidiɛ̀ ndi. Pɔɔri do nɑ̀kɛ́ Kuyie nnɑ́ɑǹtì Fidipu ɛì kɔbɛ kɛ́deè kɛ́kɔtɛ kɛ̀, kɛ́ kɛ̀ ketɛ́ Kirisi kɔbɛ tĩ̀nnì kɛ nɛ́ í nkɛ mɔ̀ntɛ kɛ yɛ̃́ Sifubɛ mɑbɛ̀ do yetɛmɛ̀ o kpɛti kɛ́nkɔɔ́ kóò bɛ̀ti.
\ip Mɛm̀mɛ kòo dɛ̀ ìtɛ́ kɛ́kɔtɛ Bedee (Yesu Tɔ̃rɛ̀ 17:1-10). Ò kɛ mbo kɛ̀ Timɔntee wèè do kpɑɑ́ Tɛsɑdoniki kòo ò sɔ̃̀ńkóo kóò nɑ̀kɛ́ dɛ̀ kɛ̀ dòmmɛ̀. Kòo yɛ̀mmɛ̀ nɑrikɛ mɛsɑ̀ɑ̀ nkòò sɑ̃ntɛ Kuyie mbɛ̀ kù yie mmɛ̀ɛ̀ kpɛ́í nkɛ kù dɔ́. Kòò bɛ̀ dèntɛní ò do dɔ̀ɔ̀ mùù tɔ̃mmú bɛ ciɛ mu kpɛ́í kɛ́yɑ́úkùnnɛ bɛ kɔ̃̀ntì Kirisi kó kucɛ kpɛ́í. Kɛ múnkɛ bɛ̀ tɛ̃̀ńnɛ́ tìì do bɛ̀ kɔɔ́nnɛ̀ mukúkɛ́yɑ̃́ntímù ĩ́nkɛ̀ nɛ̀ Yesu bo nyóó wɛ̃tɛní kɛ̀ dɛ̀ dòmmɛ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Pɔɔri sɑ̃ntɛmɛ̀ Kuyie Tɛsɑdoniki kɔbɛ kpɛ́í 1-3
\io1 2. Pɔɔri tièmmɛ̀ Tɛsɑdoniki kɔbɛ kɛ tú bɛ̀ nfòù mufòmmu sɑ̀ɑ̀mù 4:1-12
\io1 3. Pɔɔri bɛ̀ tié ntì Yesu yóó wɛ̃tɛní mɛ̀ɛ̀ botí 4:13-5:11
\io1 4. Itié nsɔnyi 5:12-28
\c 1
\s1 Pɔɔri dɔummɛ̀ Tɛsɑdoniki kɔbɛ
\p
\v 1 Mí mPɔɔri nɛ̀ Sidifɛ̃ɛ̃ nɛ̀ Timɔntee, tíì di wɑ̃̀ri di mpɑ́tíri díndi Kirisi kɔbɛ bɛ̀ɛ̀ bo Tɛsɑdoniki kɛ tɑunɛ̀ ti cicɛ Kuyie nnɛ̀ ti Yiɛ̀ nYesu Kirisi kɔbɛ. Kuyie ndi dɔɔ̀ mɛsɑ̀ɑ̀ nkɛ́ di duɔ́ ndiwɛ̀ì.
\s1 Tɛsɑdoniki kɔbɛ yie mmɛ̀ɛ̀ botí Tinɑ́ɑǹsɑ̀ɑ̀tì
\p
\v 2 N kɔbɛ ti sɑ̃ntímu Kuyie ndi kpɛ́í nkɛ kù bɑ̀ɑ́ ndi kpɛ́í nsɑ̃́ɑ̃̀. 
\v 3 Ti í yĩɛ̃̀ ndi pĩ́ mmɛ̀ɛ̀ botí mutɔ̃mmú di tɑ̃́ mɛ̀ɛ̀ kpɛ́í nKuyie kɛ kù dɔ́ nɛ̀ di tɛ̃ĩ́mɛ̀ kɛ bɑɑ ti Yiɛ̀ nYesu Kirisi bo wɛ̃tɛnímɛ̀. 
\v 4 N kɔbɛ ti yɛ̃́mu kɛ dò nKuyie nkuù di dɔkɛ kɛ di tɑ̃ɑ̃tɛ́, kɛ̀ di tú ku kɔbɛ. 
\v 5 Ti kɔ̀tɛnko dìì mɔ̀nnì Tinɑ́ɑǹsɑ̀ɑ̀tì, di do í tì dɔ̀ɔ̀ dɛkpɛìtìkpɛrɛ, Kuyie nkó muwɛ̃rímú do ti bonɛ̀mu kɛ̀ Muyɑɑ́nsɑ̀ɑ̀mù ti teénnɛ̀ kɛ̀ tí nnɑ́ɑ́ nkɛ í yĩɛ̃̀kù. Di yɛ̃́mu kɛ dò nti dɔ̀ɔ̀ dɛ̀ɛ̀ kó dimɑ̀ɑ̀ dɛ̀ tu di kó mɛsɑ̀ɑ̀ mmɛ. 
\v 6 Di do cɔutɛ́ Tinɑ́ɑǹsɑ̀ɑ̀tì kɛ̀ bɛ̀ di fɛ̃́ũmmu mɛdiɛ̀ nkɛ̀ Muyɑɑ́nsɑ̀ɑ̀mù mɛ ndi duɔ́ ndiwɛ̀ì, kɛ̀ di tũ nti Yiɛ̀ nYesu kɛ tũnnɛ̀ ti kó mɛborimɛ. 
\v 7 Kɛ̀ di borimɛ wenni kɛ̀ Mɑseduɔnni nɛ̀ Akɑyii kó itempɛ̃ nkɔbɛ mɛ tũ̀. 
\v 8 Nɛ̀ di borɛ̀ ndɛ Tinɑ́ɑǹsɑ̀ɑ̀tì pitɛ́mɛ̀, kɛ sèńtɛ́ Mɑseduɔnni nɛ̀ Akɑyii kó itempɛ̃ nkɛ̀ bɛnìtìbɛ̀ ti kèè, bɛ̀ kèèmu tipíìtì timɔu di tɑ̃́ mɛ̀ɛ̀ botí Kuyie, dɛ̀ ketɛ́ kɛ í dò ntí ntì mbɛ̀ nɑ̀ɑ́. 
\v 9 Kɛ̀ ti kɔ̀tɛ kɛ̀ɛ̀ bíɛ́kɛ̀ bɛ̀ ɔ̃ nnɑ́ɑ́mmu ti kɔ̀too kɛ̀ dí ti cɔutɛ́mɛ̀ nɛ̀ diwɛ̀ì nɛ̀ di ùtóomɛ̀ yɛbɔkɛ̀, kɛ tũ̀nnɛ Kuyie mmɔ́mmɔnku kùù duɔ̀ mmufòmmu. 
\v 10 Kɛ bɑɑ ku Birɛ Yesu kù duɔ́ nkɛ̀ wèè yɑ̃̀ńtɛ́, wèè ti dɛɛrí nɛ̀ Kuyie mbeéntì tìì kèríní.
\c 2
\s1 Pɔɔri ketɛ́mɛ̀ o tɔ̃mmú Tɛsɑdoniki
\p
\v 1 N kɔbɛ di yɛ̃́mu kɛ dò nti kɔ̀too di ciɛ nɛ̀ mùù tɔ̃mmú í yɛ̀ dɛtetìrɛ̀. 
\v 2 Di yɛ̃́mu bɛ̀ ti sɑ̃̀ḿmú mɛ̀ɛ̀ botí Fidipu kɛ ti fɛ̃́ũ nkɛ̀ ti nɛ́ nɑ kɛ kɔ̀too di ciɛ, kɛ̀ Kuyie mmɛ nti duɔ́ ndikɔ̃m̀bùɔ̀ kɛ̀ ti nɑ́ɑ́ nku nɑ́ɑǹtì bɑ́ bɛ̀ɛ̀ do ti yetɛ kɛ́ nti mɑunɛ̀ bɛ̀ do mɛ nsũmɛ̀. 
\v 3 Ti í nɑ́ɑ́ nTinɑ́ɑǹsɑ̀ɑ̀tì kɛ dɔ́ kɛ́soutɛ́ òmɔù, ti mɛ nyí wɑnti timɑ́ɑ̀ kó mɛsɑ̀ɑ̀ nyoo ti ciitɛ́ òmɔù. 
\v 4 Ti í nɑ́ɑ́ nTinɑ́ɑǹsɑ̀ɑ̀tì kɛ dɔ́ bɛnìtìbɛ̀ bɛɛ̀ nti nɑɑtinɛ̀, ti dɔ́ Kuyie nkùù yɛ̃́ onìtì yɛ̀mmɛ̀ kuù nti nɑɑtinɛ̀, kuù ti wèńtɛ́ kɛ sɔ̃́ ndɛ̀ dò ntí nɑ́kɛ́ ku nɑ́ɑǹtì. 
\v 5 Kuyie nyɛ̃́mu kɛ dò nti í di nɑ́ɑ́ nkɛ di kpɛnti, yoo ti dɔ́ kɛ́ di nɑrikɛnɛ̀ kɛ́di di díítí. 
\v 6 Kù yɛ̃́mu kɛ dò nti do í dɔ́ òmɔù ti sɑ̃ntɛ, díndi yoo bɛtɔbɛ̀ mɑbɛ̀. 
\v 7 Ti tú Yesu tɔ̃rɛ̀ nyɛ, kɛ do dò ntí ndi békú di bo nti tɔmɛ̀, kɛ̀ tíì nɛ́ petìnkɛ yɔɔ̀, kɛ di yuɔri dɛbirɛ yɔ̃ ɔ̃ ndɛ̀ yùɔ̀ri mɛ̀ɛ̀ botí. 
\v 8 Ti do di dɔ́ mɛdiɛ̀ mmɛ, dɛ̀ í tú ti dɔ́ kɛ́ di nɑ́kɛ́ Tinɑ́ɑǹsɑ̀ɑ̀tì mɑ́ɑ̀, ti do í yetɛ ti bo kúmɛ̀ di kpɛ́í. 
\v 9 Ti kɔbɛ di yɛ̃́mu ti do di nɑ́ɑ́ ndìì mɔ̀nnì Tinɑ́ɑǹsɑ̀ɑ̀tì kɛ pĩ́ mmɛ̀ɛ̀ botí mutɔ̃mmú kuyie nnɛ̀ kɛyènkɛ̀, ti í dɔ́ mɛ̀ɛ̀ kpɛ́í nkɛ́ntú òmɔù kó ditɔu.
\p
\v 10 Di yɛ̃́mu kɛ̀ Kuyie nyɛ̃́ ti borimɛ do wennimɛ̀, kɛ̀ ti í nwɑnti timɑ́ɑ̀ kó mɛsɑ̀ɑ̀, òmɔù í nyɑ̀ ti cɑɑ̀rìmɛ̀. 
\v 11 Di yɛ̃́mu dimɔu kɛ dò nti do di pĩ́ nhonìtì ɔ̃ mpĩ́ mmɛ̀ɛ̀ botí nku o bí, 
\v 12 kɛ yɑ́úkùnko di kɔ̃̀ntì, kɛ di bɑ́ɑ́ nkɛ di tiè nkɛ yetíróo kɛ dɔ́ dí ndɔɔri Kuyie ndɔ́mɛ̀ kuù di yu kɛ dɔ́ dí tɑ ku kpɑ̀ɑ̀tìyuu nɛ̀ ku kpetì miɛkɛ.
\s1 Ti bo ndɔɔrimɛ̀ Kuyie ndɔ́mɛ̀ mɛhɑ́ɑ́rìmɛ̀ mɔ̀nnì
\p
\v 13 Ti sɑ̃ntímu Kuyie nsɑ̃́ɑ̃̀ ti di nɑ̀kɛ́mɛ̀ ku nɑ́ɑǹtì kɛ̀ di tì cɔutɛ́. Di í tì cɔutɛ́ bɛnìtìbɛ̀ kpɛti kɔ̃mɛ, di do tì cɔutɛ́ tì tu mɛ̀ɛ̀ kpɛ́í nkɛ Kuyie nnɑ́ɑǹtì kɛ pĩ́ mmutɔ̃mmú di miɛkɛ, díndi bɛ̀ɛ̀ tì yie. 
\v 14 Kɛ̀ di nɑɑ́ nYesu Kirisi kɔbɛ kɛ dònnɛ̀ Sudee Kuyie nnɑ́ɑǹtì ketɛ́ dɛ̀ kɔbɛ, kɛ̀ di ciɛ kɔbɛ di fɛ̃́ũ, Sifubɛ do fɛ̃́ũ mmɛ̀ɛ̀ botí Sudee kɔbɛ. 
\v 15 Sifubɛ bɛɛ̀ kùɔ ti Yiɛ̀ nYesu, kɛ kùɔ Kuyie mpɑ̃ɑ̃nɑ́ɑǹtì nɑ́ɑm̀bɛ̀, kɛ íimmu Kuyie mmiɛkɛ kɛ níí mbɛnìtìbɛ̀ bɛmɔu. 
\v 16 Kɛ̀ bɛ̀ ti pɑɑnkonɛ̀ ti bo nnɑ́ɑ́mmɛ̀ bɛnìtìbɛ̀ Kuyie nnɑ́ɑǹtì kɛ̀ kùu bɛ̀ dɛɛtɛ́, kɛ dɔkɛ yɛ́útí bɛmɑ́ɑ̀ mɛyɛi kɛ̀ Kuyie mmiɛkɛ bɛ̀ do.
\s1 Pɔɔri dɔ́mɛ̀ kɛ́wɛ̃tɛ kɛ́yɑ̀ Tɛsɑdoniki kɔbɛ
\p
\v 17 Nɛ̀ ti ìtɛ́mɛ̀ di ciɛ, dɛ̀ mɔ̀ntɛ sɑ́m̀pɔ́, ti yɛ̀mmɛ̀ kpɑɑ́mu di borɛ̀, kɛ̀ ti mɑù mmɛdiɛ̀ nkɛ dɔ́ kɛ́wɛ̃too kɛ́ di yɑ̀. 
\v 18 Ti sòò dɔ́mu kɛ nɑ nkɔ̀too di ciɛ. Mí mPɔɔri kɛ̀ m bɑ́ɑ́tí kucɛ mɛ̀pɛ́u kɛ bo kɔtoo. Kɛ̀ dibɔɔ̀ diì ti dìtínnɛ́ kɛ̀ ti í kɔ̀too. 
\v 19 Ti yɛ̀mmɛ̀ nɑɑtinɛ̀ dímbɛ kɛ̀ diwɛ̀ì ti bo, díì yó nte kɛ̀ ti yètɛ̀ ncɛ̃́ɛ̃̀ Yesu bo wɛ̃tɛní dìì mɔ̀nnì. 
\v 20 Díì tu ti kó diyetìcɛ̃́ɛ̃̀rì, diwɛ̀ì ti bo díì kpɛ́í.
\c 3
\s1 Pɔɔri tɔ̃mmɛ̀ Timɔntee Tɛsɑdoniki
\p
\v 1 Mɛmmɛ̀ ti í nɑmɛ̀ kɛ bo pĩ́ ntimɑ́ɑ̀, ti í yɛ̃́ mɛ̀ɛ̀ kpɛ́í ndi bo kɛ̀ dɛ̀ dòmmɛ̀, kɛ̀ ti nkpɑɑ́ Atɛnni, 
\v 2 kɛ́tɔ̃nko Timɔntee nɛ̀ wè ti wɛ̃ nkɛ pĩ́ nKuyie ntɔ̃mmú kòò bo yɑ́úkùnnɛ di kɔ̃̀ntì, kɛ̀ di kpenkɛ Kuyie nkó kucɛ miɛkɛ, 
\v 3 kɛ̀ mɛfɛ̃́ṹtímɛ̀ bɑ́ɑ́ di nɑ. Di yɛ̃́mu kɛ dò nKuyie nkuù dɔ́ dɛ̀ mmɛ ndò. 
\v 4 Ti do bo di ciɛ kɛ di nɑ́kɛ́mu kɛ dɔ̀, bɛ̀ yóó di fɛ̃́ũ, ndɛɛ̀ tùɔ̀kɛní di mmɔ̀nnì. 
\v 5 Dɛɛ̀ te kɛ̀ n yĩ̀ɛ̃̀kù dibɔɔ̀ bo di soutɛ́mɛ̀, kɛ̀ ti tɔ̃mmúu nɑɑ́ ndɛtetìrɛ̀. Kɛ tɔ̃nkoo Timɔntee kòò bo yɑ̀ di kérí kɛ̀ dɛ̀ dòmmɛ̀.
\p
\v 6 Kɛ̀ Timɔntee wɛ̃̀tɛní di ciɛ bɑ̀mbɑ̀ kɛ ti nɑ̀kɛ́ di tũ mmɛ̀ɛ̀ botí Kuyie nkó kucɛ kɛ̀ dɛ̀ wenni, kɛ dɔ́ ditɔbɛ̀, kɛ dɔ́ kɛ́ ti yɑ̀ kɛ́ndònnɛ̀ ti dɔ́mɛ̀ kɛ́ di yɑ̀. 
\v 7 Kɛ̀ dɛ kó tinɑ́ɑǹtì yɑ́úkùnnɛ ti kɔ̃̀ntì mɛhɑ́ɑ́rìmɛ̀ nɛ̀ mɛfɛ̃́ṹtímɛ̀ miɛkɛ. 
\v 8 Di mmɔ̀nnì ti yɛ̀mmɛ̀ nɑrikɛmu di tũmmɛ̀ ti Yiɛ̀ nkó kucɛ weti weti. 
\v 9 Ti mɔkɛ dìì wɛ̀ì di kpɛ́í ndi dɛumu ti í yɛ̃́ ti bo sɑ̃ntɛ mɛ̀ɛ̀ botí Kuyie. 
\v 10 Ti kù bɑ́ɑmmu kɛyènkɛ̀ nɛ̀ kuyie nkɛ tú kù ti pɑ̃ kucɛ kɛ̀ tí kɔtoo kɛ́ di teennɛ̀, kɛ̀ di kpenkɛ weti weti ku kó kucɛ miɛkɛ.
\p
\v 11 Ti cicɛ Kuyie nnɛ̀ ti Yiɛ̀ nYesu Kirisi ti pɑ̃ kucɛ, kɛ̀ tí kɔtoo kɛ́ di yɑ̀. 
\v 12 Ti Yiɛ̀ ndi teennɛ̀ kɛ̀ di dɔkɛ ndɔ́ ditɔbɛ̀ nɛ̀ bɛnìtìbɛ̀ bɛmɔu ti di dɔ́ mɛ̀ɛ̀ botí, 
\v 13 kɛ̀ di kpenkɛ mɛtɑ̃́kùmɛ̀ miɛkɛ, kɛ̀ ti Yiɛ̀ nYesu nwɛ̃tiní nɛ̀ o kɔbɛ kɛ sɔ̃́ ndi wenni pɑ́íí, kɛ kpɑ mɛyɛi.
\c 4
\s1 Mɛborimɛ Kuyie ndɔ́ mɛ̀
\p
\v 1 Ti kɔbɛ ti di nɑ̀kɛ́mu di dò nkɛ́ndɔɔri mɛ̀ɛ̀ botí kɛ̀ dɛ̀ nnɑɑti Kuyie nkɛ̀ di mɛ̀ dɔ̀ɔ̀ri. Ti nɛ́ di bɑ́ɑ́mmu nɛ̀ Yesu kó diyètìrì kɛ tú dí nsɔkɛ́ kɛ dɔɔri kɛ̀ dɛ̀ɛ pɛ̃ɛ̃tɛ́ mɛmmɛ. 
\v 2 Di yɛ̃́mu ti Yiɛ̀ nYesu kó itié nti di duɔ́ nyì. 
\v 3 Kuyie ndɔ́ di nwenni pɑ́íí nwe, kɛ bɑ́ ndɔuti dɔuti nɛ̀ ditɔbɛ̀. 
\v 4 Bɑ́ wè ò nwetí o pokù mɑ́ɑ̀ kɛ́nwenni, Kuyie nnɛ̀ bɛnìtìbɛ̀ bɛ̀ mɛ ndɔ́. 
\v 5 Di bɑ́ɑ́ duɔ́ ndi yɛ̀mmɛ̀ mɛdɔ́kùmɛ̀ yɛimɛ, bɛ̀ɛ̀ í yɛ̃́ Kuyie mbɛ kɔ̃mɛ. 
\v 6 Òmɔù bɑ́ɑ́ kɑ́ɑ́kɛ́ otɔù kpɛrɛ, ò mɛ mbɑ́ɑ́ kɑ́ɑ́kɛ́ otɔù pokù, ti tì ndi nɑ̀kɛ́mu kɛ yìɛ́ kɛ di nɑ́ɑ́, Kuyie nyóó kpetínnɛ́mu bɛ̀ɛ̀ dɔ̀ɔ̀ri dɛ kó mɛyɛi. 
\v 7 Kuyie nyí ti yu kɛ̀ ti bo ndɔuti nɛ̀ titɔbɛ̀, kù ti yu kɛ̀ ti bo ndɔɔri dɛ̀ɛ̀ wenni dɛ̀ndɛ. 
\v 8 Wèè yetɛ ti nnɑ́ɑǹtì, wè í yetɛ onìtì kpɛti, ò yetɛ Kuyie nkpɛti nti kùù di duɔ́ mMuyɑɑ́nsɑ̀ɑ̀mù.
\p
\v 9 Dɛ̀ í dò ntí wɑ̃ri kɛ di nɑ́kɛ́ di bo ndɔ́ mɛ̀ɛ̀ botí ditɔbɛ̀, Kuyie ntì ndi nɑ̀kɛ́mu. 
\v 10 Ti yɛ̃́mu kɛ dò ndíndi Mɑseduɔnni kɔbɛ di dɔ́ ditɔbɛ̀, kɛ nɛ́ di bɑ́ɑ́ nkɛ tú di dɔkɛ ndɔ́ ditɔbɛ̀ kɛ̀ dɛ̀ɛ pɛ̃ɛ̃tɛ́ mɛmmɛ. 
\v 11 Ti di nɑ̀kɛ́mu kɛ tú dí yóu tinɛìtì kɛ́ndɑkɛnɛ̀ di kpɛti mɑ́ɑ̀, kɛ́mpĩ́ mmutɔ̃mmú kɛ yonnɛ̀, 
\v 12 kɛ bɑ́ ntú òmɔù kó ditɔu, mɛmmɛ bɛ̀ɛ̀ í tú Kirisi kɔbɛ bɛ̀ bo ndi démɛ̀.
\s1 Bɛcíríbɛ̀ yóó yɑ̃ntɛ́mɛ̀
\p
\v 13 Ti kɔbɛ ti dɔ́ di nyɛ̃́mu Kirisi kɔbɛ bɛ̀ɛ̀ ku bɛ kpɛti yó ndòmmɛ̀ kɛ bɑ́ nyĩɛ̃̀kù bɛ̀ɛ̀ í tũ nKuyie nkɛ í bɑɑ dɛ̀mɑrɛ̀ bɛ kɔ̃mɛ. 
\v 14 Ti yɛ̃́mu kɛ dɔ̀ Kirisi ku kɛ yɑ̃̀ńtɛ́ kɛ yɛ̃́ kɛ dò nKuyie mbo duɔ́ nkɛ̀ bɛ̀ɛ̀ tú o kɔbɛ kɛ ku kɛ̀ bɛ̀ɛ yɑ̃́ntɛ́.
\p
\v 15 Ntɛ ti Yiɛ̀ nYesu ti nɑ̀kɛ́ tì kɛ̀ ti tì ndi nɑ́ɑ́, ò bo nwɛ̃tiní kɛ̀ tínti bɛ̀ɛ̀ kpɑɑ́ fòù ti í yóó niitɛ́nɛ̀ bɛ̀ɛ̀ ku. 
\v 16 Kuyie mbo duɔ́ ndìì mɔ̀nnì kɛ̀ ku tɔ̃nnì diɛrìi pĩɛ̃kɛ́, kɛ̀ ditɛrìi eé kutenkù deèmù kó tɛheutɛ̀, kɛ̀ ti Yiɛ̀ ncútɛ́ní kɛĩ́nkɛ̀, kòo kɔbɛ bɛ̀ɛ̀ ku kɛ̀ bɛɛ̀ ketɛ́ kɛ́yɑ̃́ntɛ́. 
\v 17 Tínti bɛ̀ɛ̀ kpɑɑ́ fòù kɛ̀ ti bɛ̀ nɛinɛ̀, kɛ́dekɛ kɛ́co ti Yiɛ̀ nYesu yɛwɛtɛ̀ miɛkɛ, kɛ̀ ti mbo sɑ̃́ɑ̃̀. 
\v 18 Nyɑ́úkùnkonɛ̀ ditɔbɛ̀ kɔ̃̀ntì nɛ̀ dɛ kó tinɑ́ɑǹtì.
\c 5
\p
\v 1 Dɛ̀ í dò nti ketɛ́ kɛ́ di wɑ̃ri kɛ́ di nɑ́kɛ́ ti Yiɛ̀ nwɛ̃tiní dìì mɔ̀nnì. 
\v 2 Di yɛ̃́mu di mɔ́mmɔmbɛ ti Yiɛ̀ wɛ̃tinímɛ̀ bɛnìtìbɛ̀ í dɑkɛ dìì mɔ̀nnì ndi, oyúókù ɔ̃ɔ̃ kɔtɛní mɛ̀ɛ̀ botí kɛyènkɛ̀. 
\v 3 Bɛnìtìbɛ̀ bo yĩ́ dìì mɔ̀nnì: Bɑ̀mbɑ̀ nkutenkù nɑrikɛ, ti tɛ̃́nkɛ í yĩɛ̃̀kù dɛ̀mɑrɛ̀. Dɛ mɔ̀nnì ndi mɛyɛi ndiɛmɛ̀ yóó bɛ̀ domɛ̀, bɑ́ bɛ̀ bɑ́ɑ́ nɑ kɛ́yentɛ́, onitipòkù wèè pùó nhò ɔ̃ɔ̃ í nnɑmɛ̀ kɛ́yentɛ́nɛ̀ kupɛitɛ́yonku. 
\v 4 Ti kɔbɛ, di í tú dibiìnnì kɔbɛ kɛ dò ndɛ kó diyiè di dɛ́ɛ́tɛ́ oyúókù kɔ̃mɛ. 
\v 5 Di í tú dibiìnnì kɔbɛ, di tú kuwenniku kɔbɛ mbɛ. 
\v 6 Ndɑkɛnɛ̀ kɛ́nnɔ nkɛ pĩĩ ndimɑ́ɑ̀, kɛ bɑ́ɑ́ yɛ̃̀ nkɛ́duɔ́ bɛ̀ɛ̀ í tũ nKuyie mbɛ kɔ̃mɛ. 
\v 7 Bɛ̀ dɔu kɛyènkɛ̀ nkɛ, kɛ muɔ̀ mmɛnɑɑ̀ nkɛyènkɛ̀. 
\v 8 Tínti tú kuwenniku kɔbɛ mbɛ kɛ dò nkɛ́ndɑkɛ kɛ́mpĩĩ ntimɑ́ɑ̀, kɛ́mmɔkɛ mɛdɔ́kùmɛ̀ nɛ̀ mɛtɑ̃́kùmɛ̀ kɛ̀ dɛ̀ nti dɑ́ɑ́tí dimɑ́tìyɑɑ̀bòrì kɔ̃mɛ, kɛ́mbɑɑ Kuyie mbo ti dɛɛtɛ́mɛ̀, kɛ̀ dɛ̀ nti kɑ̃nkɛ́ dipìì kɔ̃mɛ. 
\v 9 Kuyie nyí ti dɔ̀ɔ̀ kɛ bo ti kpetínnɛ́, kù ti dɔ̀ɔ̀ kɛ̀ Yesu bo ti dɛɛtɛ́mu. 
\v 10 Kirisi ku kɛ bo ti duɔ́ mmufòmmu mmu, kòò wɛ̃tiní kɛ sɔ̃́ nti ku yoo ti kpɑɑ́ fòù ò yóó mù nti duɔ́mmu. 
\v 11 Nyɑ́úkùnkonɛ̀ ditɔbɛ̀ kɔ̃̀ntì, kɛ kpénkùnko ditɔbɛ̀ ti Yiɛ̀ nkó kucɛ miɛkɛ, di dɔɔri mɛ̀ɛ̀ botí.
\s1 Kirisi kɔbɛ kó mɛborimɛ dò kɛ́ndòmmɛ̀
\p
\v 12 Ndénɛ̀ bɛ̀ɛ̀ pĩ nKuyie ntɔ̃mmú di cuokɛ̀ ti Yiɛ̀ nkó kucɛ miɛkɛ, kɛ di ni, kɛ di tiè. 
\v 13 Di bɑ́ɑ́ mbɛ̀ sènku, ndɔ́nɛ̀ bɛ nɛ̀ di yɛ̀mmɛ̀ mɛmɔu. Yɛkpɑ̀rɛ̀ bɑ́ mbo di cuokɛ̀.
\p
\v 14 Ti kɔbɛ, ti di nɑ́ɑ́mmu kɛ tú di ncɑú mbɛ̀ɛ̀ fòù mufòmmu yɛimu, kɛ́nyɛ́útí yɛkɔ̃m̀bɔ̀ bɛ̀ɛ̀ yɛ̀mmɛ̀ cɑ̀ɑ̀rɛ̀, kɛ teénnɛ̀ bɛ̀ɛ̀ í kpeńnì Kuyie nkó kucɛ miɛkɛ, kɛ́mmɔkɛ mɛminnímɛ̀ nɛ̀ bɛnìtìbɛ̀ bɛmɔu. 
\v 15 Nyɛ̃́nɛ̀ kòò mɔù bɑ́ nfɔku bɛ̀ ò dɔ̀ɔ̀ mɛ̀ɛ̀ yɛi, nwɑɑ̀nnɛ̀ di bo ndɔɔrinɛ̀ mɛsɑ̀ɑ̀ nsɑ̃́ɑ̃̀ Kirisi kɔbɛ nɛ̀ bɛ̀ɛ̀ í tú Kirisi kɔbɛ.
\p
\v 16 Mmɔkɛnɛ̀ diwɛ̀ì sɑ̃́ɑ̃̀. 
\v 17 Mbɑ́ɑ́nnɛ̀ Kuyie nsɑ̃́ɑ̃̀. 
\v 18 Díndi Yesu Kirisi kɔbɛ bɑ́ kɛ̀ di bo tìì miɛkɛ, nsɑ̃ntínɛ̀ Kuyie, kù mɛ ndɔ́.
\p
\v 19 Di bɑ́ɑ́ dítínnɛ́ Muyɑɑ́nsɑ̀ɑ̀mù kó mutɔ̃mmú. 
\v 20 Di bɑ́ nsenku Kuyie mpɑ̃ɑ̃nɑ́ɑǹtì. 
\v 21 Di ndɛ̀ wèí dɛmɔu kɛ yíé ndɛ̀ɛ̀ wenni, 
\v 22 kɛ mɛnnínɛ̀ dimɑ́ɑ̀ dɛ̀ɛ̀ í wenni dɛmɔu.
\p
\v 23 Kuyie nkùù duɔ̀ ndiwɛ̀ì kù di wénkùnnɛ pɑ́íí: Di yɛ̀mmɛ̀ nɛ̀ di wɛ̃rɛ̀ nɛ̀ di kɔ̃̀ntì. Kɛ̀ ti Yiɛ̀ nYesu Kirisi nwɛ̃tiní kɛ sɔ̃́ ndi dò mpɑ́íí kɛ í dò nkɛ́sɛi. 
\v 24 Kuyie nkùu í soú nkuù di yu kɛ bo dɛ̀ dɔɔ̀.
\p
\v 25 Ti kɔbɛ mbɑ́ɑ́nnɛ̀ Kuyie nti kpɛ́í.
\p
\v 26 Di dɔu nKirisi kɔbɛ bɛmɔu nɛ̀ diwɛ̀ì.
\p
\v 27 N di bɑ́ɑ́mmu nɛ̀ ti Yiɛ̀ nkó diyètìrì kɛ tú di kɑɑ ndi mpɑ́tíri Kirisi kɔbɛ bɛmɔu.
\p
\v 28 Ti Yiɛ̀ nYesu Kirisi kó mɛsɑ̀ɑ̀ nní ndi bonɛ̀.