\id 1SA di09.all Novembre 1998 BJ Parakou B{enin
\ide UTF-8
\h 1 Sammuyɛɛri
\toc1 Sɑmmuyɛɛri pɑ́tíri ketirì
\toc2 1 SAMMUYƐƐRI
\mt1 Sɑmmuyɛɛri pɑ́tíri ketirì
\imt1 Di mpɑ́tíri tɔ tìì nɑ́ɑǹtì
\ip Dɛ kó dipɑ́tíri ti nɑ́ɑ́ nSɑmmuyɛɛri kpɛ́í nkɛ, wèè do tú Kuyie ndo tɑ̃ɑ̃tɛ́ bɛ̀ɛ̀ bɑɑtíbɛ̀ Isidɑyɛɛribɛ miɛkɛ bɛ kóo sɔnwe. Weè do tũnni dihɛì kó tinɑ́ɑǹtì, kɛ tú Kuyie mpɑ̃ɑ̃nɑ́ɑǹtì nɑ́ɑǹtò kɛ̀ weè tu ikuɔ́ nìùtì Kuyie ncĩ́ɛ̃̀tɛ̀. Kɛ̀ dɛ̀ mboní kɛ̀ Isidɑyɛɛribɛ tɛ̃́nkɛ í ndɔ́ bɛbɑɑtíbɛ̀ bɛɛ̀ mbɛ̀ bɑkɛ́, kɛ́ndɔ́ kɛ́wɑɑ́ nhokpɑ̀ɑ̀tì wèè yó mbɛ̀ bɑkɛ́ ibotí tɛì kɔ̃mɛ.
\ip Kɛ̀ Kuyie mbɛ̀ duɔ́ nhokpɑ̀ɑ̀tì ketiwè wèè tu Sɑuri. Sɑuri mɛ nyí nhɔɔtɛ ò bo dɔ̀ɔ̀mɛ̀ Kuyie nyí ndɔ́ dɛ̀ kɛ̀ kùu ò dootóo kɛ́tɑ̃ɑ̃tɛ́ Dɑfiti. Mɛm̀mɛ kɛ̀ Sɑuri nkɛ̃́kú kɛ̀ Dɑfiti dɛ̀úkú.
\ip Dɛ kó dipɑ́tíri ti nɑ́ɑ́ ntì tu: Kuyie nkuù mɑ́ɑ̀ tu ku kɔbɛ kóo kpɑ̀ɑ̀tì. Nɛ̀ dɛ kpɛ́í nkù bɑ́ɑ́ nɑ kɛ́pĩ́nnɛ̀ mutɔ̃mmú wèè í kù duɔ́ nhomɑ́ɑ̀.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Sɑmmuyɛɛri kó tinɑ́ɑǹtì o bíkɛ́mbɛ́ntì nɛ̀ o tɔ̃mmú ò do ni mɛ̀ɛ̀ botí Isidɑyɛɛribɛ 1-8
\io1 2. Sɑuri nɑɑ́ mmɛ̀ɛ̀ botí okpɑ̀ɑ̀tì nɛ̀ Kuyie nho dootóomɛ̀ 9-15
\io1 3. Dɑfiti kó tinɑ́ɑǹtì nɛ̀ o do ɔ̃ɔ̃ yentɛ́nɛ̀mɛ̀ Sɑuri nɛ̀ Sɑuri kó mukṹṹ 16-31
\c 1
\s1 Anni mɔɔmɛ̀ Kuyie ndɛbirɛ
\p
\v 1 Onìtì mɔù weè do bo Dɑmɑɑ ɛì, Efɑdɑimmu tempɛ̃ nyɛtɑ̃rɛ̀ ĩ́nkɛ̀ kɔku, kòo yètìrì tu Ɛdikɑnɑɑ. Ò do tú Efɑdɑimmu kó kuwuɔ nkou nwe. Sufu weè do pɛitɛ́ Tou, kɛ̀ Touu pɛitɛ́ Ediu, kɛ̀ Ediuu pɛitɛ́ Yedokɑmmu kòo nɛ́ pɛitɛ́ Ɛdikɑnɑɑ. 
\v 2 Kòo ḿpo bɛnitipòbɛ̀ bɛ̀dɛ́bɛ̀, kòò mɔù yètìrì ntú Anni, kòo tɔù kpɛri tú Peninnɑ. Kɛ̀ Peninnɑ mmɔkɛ ibí bɑ́ Anni yie í mɔkɛ.
\p
\v 3 Bɑ́ dìì benni kɛ̀ Ɛdikɑnɑɑ níí ítɛ́ Dɑmɑɑ, kɛ́kɔtɛ Sidoo ti Yiɛ̀ nKuyie ncĩ́ɛ̃̀tɛ̀ kɛ bo nínkú kɛ́ kù bɑ̀ńtɛ́ kunku Mpɑkɛdɑɑ kɛ́ kù fìé iwũɔ̃. Dɛ̀ do sɔ̃́ nhEdii bí idɛ́ Ɔfinii nɛ̀ Findee bɛɛ̀ tu ti Yiɛ̀ nKuyie nkuɔ́ nìùbɛ̀. 
\v 4 Kɛ̀ Ɛdikɑnɑɑ níí féútɛ́ o ɔ̃̀fɛ̀ ti Yiɛ̀ nKuyie nkɛ́pɑ̃ kumɑɑ nkùmɑ́ɑ̀ Peninnɑ nɛ̀ o bí, 
\v 5 kɛ́pɑ̃ Anni yie ò pɑ̃ Peninnɑ kɛ̀ dɛ̀ mɑ̀mɛ̀ kucɛ mɛ̀dɛ́mɛ̀. Ò do we ndɔ́ mɛdiɛ̀ mbɑ́ ti Yiɛ̀ nKuyie nyí mɛ nhò pɑ̃mɛ̀ ibí. 
\v 6 Kɛ̀ Peninnɑ Anni yɑnti nhò cɛ̃ĩ́ kɛ cɑɑ̀ri o yɛ̀mmɛ̀, koò ɑ̃ɑ̃̀ ifɛi ò í mɔkɛ mɛ̀ɛ̀ kpɛ́í nyibí. 
\v 7 Bɑ́ dìì benni kɛ̀ bɛ̀ kɔ̀tɛ ti Yiɛ̀ nKuyie ncĩ́ɛ̃̀tɛ̀ kɛ bo fíé iwũɔ̃ ti Yiɛ̀ nKuyie, Peninnɑ nwɑnti kɛ bo cɑɑ̀rɛ̀ Anni yɛ̀mmɛ̀, kɛ̀ dɛ̀ɛ nyóù Anni kòo nkuɔ̀ nkɛ́yetɛ mudiì. 
\v 8 Kòo dɔù Edikɑnɑ ò bɑ̀ńtɛ̀ kɛ dɔ̀: Anni dɛ̀ dòmmɛ kɑ̀ɑ kuɔ̀ nkɛ yetɛ mudiì, kɑ̀ɑ yɛ̀mmɛ̀ cɑ̀ɑ̀rɛ̀? A mɛ nni nte kɛ̀ dɛ̀ í pɛ̃ɛ̃tɛ́ initidɑbí tɛpíítɑ̀ɑ̀?
\p
\v 9 Kɛ̀ Annii ítɛ́ bɛ̀ di dìì mɔ̀nnì kɛ dèè kɛ́tɑ ti Yiɛ̀ nKuyie ncĩ́ɛ̃̀tɛ̀, kɛ sɔ̃́ ti Yiɛ̀ nKuyie nkuɔ́ nìùtì Edii kɑ̀ri ti Yiɛ̀ nKuyie ncĩ́ɛ̃̀tɛ̀ bòrì. 
\v 10 Kɛ̀ Anni yɛ̀mmɛ̀ cɑ̀ɑ̀rɛ̀, kòò kuɔ̀ nkɛ̀ ntinɔnniɛti yiɛ̀ kòo bɑ́ɑ́ nti Yiɛ̀ nKuyie nkɛ tú: 
\v 11 N Yiɛ̀ nKuyie nfɔ̃́ Mpɑkɛdɑɑ, n kuɔ́ mmɛsémmɛ̀, n wéntɛ́ fɛnɔnsɑ̀ɑ̀fɛ̀ mí nhɑ kóo tɔ̃ntì sɑ́mpɔ́ù kɛ́ m pɑ̃ dɛnitidɑbirɛ, kɑ̀ɑ dɛ̀ nni mpɑ̃, m bo dɛ̀ n dɑ duɔ́ nkɛ̀ dɛ̀ mpĩ́ nhɑ tɔ̃mmú sɑ̃́ɑ̃̀ bɑ́ kuponkù bɑ́ɑ́ kɑ́ɑ́kɛ́ dɛ yuu. 
\v 12 Kɛ̀ Anni mbɑ́ɑ́ ti Yiɛ̀ nKuyie nkɛ̀ dɛ̀ɛ mɔntɛ kɛ̀ Edii ò wùó nkɛ wúó nho bìɛ̀ mmɑ́ɑ̀ yɛɛ̀ nɑmpúmɛ̀. 
\v 13 Ò mɛ nyí yo ò nɑ̀ɑ́ nkɛ tú mù, ò bɑɑ do bɑ́ɑ́ nti Yiɛ̀ nKuyie nnɛ̀ o yɛ̀mmɛ̀ mmɛ, kɛ̀ Edii yɛ̀mmɛ̀ ndò nhò muɔ́ mmɛnɑɑ̀ mmɛ, 
\v 14 kóò nɑ̀kɛ́ kɛ dɔ̀: Dɛ̀ yó nkɑ̃́ɑ̃́kɛ́ dɛ kɑ̀ɑ nɑɑ̀ mmɔntɛ́? Diɛ ndɔkɛ ɑ yóó dennɛmɛ̀ ɑ nɑɑ̀. 
\v 15 Kɛ̀ Annii ò tɛ̃̀ńnɛ́ kɛ dɔ̀: Okótì, n yí muɔ́ mmɛnɑɑ̀, mɛyɛǹcɑɑ̀rìmɛ̀ mɛɛ̀ ǹ dɛutɛ́, kɛ̀ ǹ kuɔ̀nnɛ̀ ti Yiɛ̀ nKuyie. 
\v 16 Bɑ́ n wéntɛ́ mufòmmu yɛimu yiɛ̀, iyɛntotí nɛ̀ mɛyɛǹcɑɑ̀rìmɛ̀ dɛɛ̀ ǹ dɛutɛ́, dɛɛ̀ te kɛ̀ m bɑ̀ɑ́ nti Yiɛ̀ nKuyie nkɛ̀ dɛ̀ mɔ̀ntɛ.
\p
\v 17 Kɛ̀ Edii ò tɛ̃̀ńnɛ́ kɛ dɔ̀: Kɔtɛ kɛ bɑ́ nyĩɛ̃̀kù, kɛ̀ ti Yiɛ̀ nKuyie nyIsidɑyɛɛribɛ tũ nkù dɑ pɑ̃ ɑ kù mɔɔ dɛ̀. 
\v 18 Kɛ̀ Annii ò tɛ̃̀ńnɛ́ kɛ dɔ̀: N wéntɛ́ fɛnɔnsɑ̀ɑ̀fɛ̀ mí nhɑ kóo tɔ̃ntì.
\p Dɛ mɔ̀nnì kɛ̀ Anni yɛ̀mmɛ̀ɛ cɑ́tɛ́, kòo kò nkɛ́di.
\p
\v 19 Kɛ̀ dɛ̀ɛ wentɛ́ Ɛdikɑnɑɑ nɛ̀ o cĩ́ɛ̃̀tɛ̀ kɔbɛ kɛ̀ bɛ̀ɛ pikɛ́ cutɛ kɛ́nínkú kɛ́bɑ́ntɛ̀ ti Yiɛ̀ nKuyie nkɛ́deè kɛ́kò nDɑmɑɑ.
\s1 Bɛ̀ pɛitɛ́mɛ̀ Sɑmmuyɛɛri kóò duɔ́ ti Yiɛ̀ nKuyie
\p Ɛdikɑnɑ nɛ̀ o pokù Anni kɛ̀ bɛ̀ɛ duɔ́, kɛ̀ ti Yiɛ̀ nKuyie nduɔ́ nhAnni ò kù mɔɔ dɛ̀. 
\v 20 Kòo púó nkɛ́pɛitɛ́ dɛnitidɑbirɛ, kɛ́ dɛ̀ yu kɛ dɔ̀ Sɑmmuyɛɛri (dɛ̀ɛ̀ tu Kuyie nkèè).
\p
\v 21 Mɛm̀mɛ kɛ̀ dibenni tɛrì ḿboní, kɛ̀ Ɛdikɑnɑɑ nwɛ̃ti Sidoo nɛ̀ o cĩ́ɛ̃̀tɛ̀ kɔbɛ kɛ bo féútɛ́ fɛɔ̃̀fɛ̀ ti Yiɛ̀ nKuyie, kɛ́féútɛ́nɛ̀ ò kù cɑ̀nnɛnɛ̀ dìì nùù kɔfɛ. 
\v 22 Anni í nnɛínɛ̀ o dɔù, kóò nɑ̀kɛ́ kɛ dɔ̀: N dɔ́ dɛbirɛ dɛɛ̀ cɑ́tɛ́ kɛ̀ nní nkɔri kɛ́ ndɛ̀ nɛínɛ̀ kɛ́ dɛ̀ duɔ́ ti Yiɛ̀ nKuyie nSidoo kɛ̀ dɛ̀ nkɛ mbo sɑ̃́ɑ̃̀. 
\v 23 Kɛ̀ Ɛdikɑnɑɑ ò tɛ̃̀ńnɛ́ kɛ dɔ̀: Kɑ̀ɑ mɛ ndɔ́ dɛ̀ wenni, nkpɑɑ́ diɛ nkɛ̀ dɛbirɛ yɑ̀ɑ cɑ́tɛ́nɛ̀. Ti Yiɛ̀ nKuyie ndɔɔ̀ kù bɛ́i ntì.
\p Mɛm̀mɛ kɛ̀ Anni nkpɑɑ́ kɛ̀ dɛbirɛ yɑ̀ɑ cɑ́tɛ́nɛ̀.
\p
\v 24 Dɛbirɛ cɑ̀tɛ́ dìì mɔ̀nnì kɛ́nkpɑɑ́ kɛ̃ńnì, kòo dɛ̀ kɔ̀tɛnɛ̀ ti Yiɛ̀ nKuyie ncĩ́ɛ̃̀tɛ̀ Sidoo, wenwe nɛ̀ o dɔù, kɛ̀ bɛ̀ ńtɔ dinɑɑdɑɑ̀\f + \fr 1:24 \fr*\fk dinɑɑdɑɑ̀: \fk*\ft Yɛpɑ́tɛ mɑyɛ̀ miɛkɛ bɛ̀ wɑ̃̀ri yɛnɑɑdɑkɛ̀ yɛ̀tɑ̃ɑ̃ti, yɛtɛyɛ̀ kɛ wɑ̃ri dinɑɑdɑɑ̀ dìmɑ́ɑ̀ dìì mɔkɛ yɛbie nyɛ̀tɑ̃ɑ̃ti.\ft*\f* yɛbie nyɛ̀tɑ̃ɑ̃ti kpɛri nɛ̀ muyuo nnɛ̀ nɛ̀ mɛnɑɑ̀ nkudɔukù. 
\v 25 Kòo féútɛ́ fɛnɑ̀ɑ̀fɛ̀ ti Yiɛ̀ nKuyie, kɛ́deè kɛ́kɔtɛnɛ̀ dɛbirɛ Edii borɛ̀. 
\v 26 Kɛ̀ Anni bɛ́innɛ̀ Edii kɛ dɔ̀: N yiɛ̀ nhɑ bomu, dentɛní onitipòkù wèè yɑ̀ɑ̀ còḿmú diɛ nhɑ ììkɛ̀ kɛ bɑ́ɑ́ nho Yiɛ̀ nKuyie, míì yɑ̀ɑ̀ nwe. 
\v 27 Ntɛ dɛbirɛ n yɑ̀ɑ̀ sèńní dɛ̀ kɛ́ ndɛ̀ mɔ̀ú n Yiɛ̀ nKuyie kù dɛ̀ nni mpɑ̃mu. 
\v 28 N yóó dɛ̀ nkù duɔ́mmu kɛ̀ kù ndɛ̀ te dɛ fòmmu mumɔu.
\p Kɛ̀ bɛ̀ɛ nínkú ti Yiɛ̀ nKuyie nyììkɛ̀ kɛ sĩ́nnɔ́ɔ.
\c 2
\s1 Anni sɑ̃ntɛmɛ̀ ti Yiɛ̀ nKuyie
\p
\v 1 Kɛ̀ Annii sɑ̃ntɛ ti Yiɛ̀ nKuyie nkɛ dɔ̀:
\q1 Ti Yiɛ̀ nKuyie nkuù te kɛ̀ m pɛ̀tɛ́ diwɛ̀ì,
\q1 kuù m̀ pɑ̃ dikɔ̃m̀bùɔ̀ kɛ̀ m bo ndɑú n dootitɔbɛ̀,
\q1 kuù ǹ teennɛ̀ dɛɛ̀ te kɛ̀ n yɛ̀mmɛ̀ nɑɑti.
\q1
\v 2 Ti Yiɛ̀ Kuyie nkuù mɑ́ɑ̀ kpɑ mɛyɛi,
\q1 kuù mɑ́ɑ̀ tu dipèrì dìì n kɑ̃nkɛ́,
\q1 òmɔù tɔù í kù dònnɛ̀ kɛ kpɑ mɛyɛi.
\q1
\v 3 Di bɑ́ nsṹũnko sipɔɔ kó tinɑ́ɑǹtì,
\q1 tisĩ̀ntɛ́nɑ́ɑǹtì tɛ̃́nkɛ bɑ́ nyiɛ̀ní di nɔ̀ miɛkɛ,
\q1 Ti Yiɛ̀ nKuyie nyɛ̃́mu dɛmɔu,
\q1 kù yóó bekɛ́nɛ̀ bɛnìtìbɛ̀ bɛ dɔɔ̀rìmɛ̀ dòmmɛ̀ mmɛ.
\q1
\v 4 Kuù keku bɛkpɑ̀rìtiebɛ tɑ̃nnɛ̀,
\q1 bɛ̀ɛ̀ do cĩĩnnì kɛ̀ bɛ̀ kpenkɛ.
\q1
\v 5 Bɛ̀ɛ̀ do yo nkɛ diɛ̀ nkɛ̀ bɛ̀ wɑnti bɛ̀ bo di mù kɛ mɔ̀ńtɛ́.
\q1 Bɛ̀ɛ̀ do fɛ̃́ũ̀rìnɛ̀ dikònnì kɛ̀ bɛ̀ òmpu.
\q1 Kɛ̀ tɛhɑ̃ũntɛ pɛitɛ́ kucɛ mɛ̀yiekɛ̀,
\q1 wèè do pɛí kòò nɑɑ́ ntɛhɑ̃ũntɛ.
\q1
\v 6 Ti Yiɛ̀ nKuyie nkuù ɔ̃ɔ̃ kuɔ kɛ̀ kuù fòùkùnnɛ,
\q1 kuù ɔ̃ɔ̃ tɑnnɛ́ onìtì kudɔnkù kɛ̀ kuù ò dènnɛní kudɔnkù.
\q1
\v 7 Ti Yiɛ̀ nKuyie nkuù ɔ̃ɔ̃ dɔɔ̀ onìtì fɛdɑwɑnfɛ̀ kɛ̀ kuù ò kpɑrìkùnnɛ,
\q1 kuù ɔ̃ɔ̃ kɛ̃́kùnnɛ onìtì kɛ̀ kuù ò dɛ́úkùnnɛ.
\q1
\v 8 Kuù ɔ̃ɔ̃ íi nhocĩ̀rì mutɑ̃́ɑ̃́ mmiɛkɛ,
\q1 kɛ́dennɛ osénnìwè mɛsémmɛ̀ miɛkɛ,
\q1 kɛ́ bɛ̀ wɛ̃nnɛ́nɛ̀ bɛnitidiɛbɛ̀ kɛ̀ bɛ̀ nkɑri,
\q1 kɛ́ bɛ̀ duɔ́ ndikpɑ̀ɑ̀tìkɑ̀rì.
\q1 Ti Yiɛ̀ nKuyie nkuù te kɛtenkɛ̀,
\q1 kuù ɑ̃nnɛ́ yɛsɑ̃ǹkɛ̀ yɛ̀ɛ̀ kɛ̀ tɔ.
\q1
\v 9 Kuù dɑ̀kɛ bɛ̀ɛ̀ kù dé bɛ fòmmu kpɛ́í,
\q1 kɛ̀ bɛnitiyɛibɛ kɔ̃ ndibiìnnì miɛkɛ
\q1 kɛ yɛ̃́ onìtì ɔ̃ɔ̃ í nnɑmɛ̀ nɛ̀ omɑ́ɑ̀ kó muwɛ̃rímú.
\q1
\v 10 Ti Yiɛ̀ nKuyie nyóó pɔntɛmu ku dootitɔbɛ̀,
\q1 fɛtɑɑfɛ̀ bo bɛ̀ pɛɛ,
\q1 Ti Yiɛ̀ nKuyie nkuù yóó bekɛ́nɛ̀ kutenkù kumɔu,
\q1 kɛ́duɔ́ nku kóo kpɑ̀ɑ̀tì kù tɑ̃ɑ̃tɛ́ wè muwɛ̃rímú,
\q1 kɛ́dɛ́úkùnnɛ kù tɑ̃ɑ̃tɛ́ wè.
\b
\p
\v 11 Mɛm̀mɛ Ɛdikɑnɑɑ nɛ̀ o kɔbɛ kɛ̀ bɛ̀ɛ kò nho ciɛ Dɑmɑɑ, kɛ̀ dɛbirɛ nkpɑɑ́nɛ̀ Kuyie nkuɔ́ nìùtì Edii kɛ pĩ́ nti Yiɛ̀ nKuyie ntɔ̃mmú.
\s1 Edii bí kó mɛborimɛ
\p
\v 12 Edii bí borimɛ í nwenni, ì do í dɑkɛ ti Yiɛ̀ nKuyie nkpɛti, 
\v 13 bɑ́ nɛ̀ bɛ̀ do mɛ ntúmɛ̀ ikuɔ́ nìùbɛ̀. Ntɛ bɛ̀ do dɔɔri mɛ̀ɛ̀ botí: Bɛ̀ do ɔ̃ nkòò mɔù fèútɛ́ fɛɔ̃̀fɛ̀ ti Yiɛ̀ nKuyie nkɛ kpɑɑ́ bérí, bɛ kóo tɔ̃ntìi tuɔkɛní kɛ tɔ tɛmɑ́tìkũmpetɛ yɛnìì nyɛ̀tɑ̃ɑ̃ti kpɛtɛ, 
\v 14 kɛ́mbɑuntɛ sinɑkɛsí nɛ̀ sikṹmboó nɛ̀ sidɔ́u nɛ̀ tikɑ̀dɑ̀ɑ̀buuti miɛkɛ. Kòò nìntɛ dɛ̀ɛ̀ kó dimɑ̀ɑ̀ bɛ kpɛrɛ ndɛ. Bɛ̀ do mɛ ndɔɔri Isidɑyɛɛribɛ bɛmɔu bɛ̀ɛ̀ kɔ̀roo Sidoo.
\p
\v 15 Bɑ́ kɛ̀ bɛ̀ mu nyí tùɔ mmɛkùɔ̀ nyikuɔ́ nìùtì tɔ̃ntìi kɔtɛní, kɛ́nɑ́kɛ́ wèè fèútɛ́ fɛɔ̃̀fɛ̀ kɛ dɔ̀: Ikuɔ́ nìùtì tu ɑ ò pɑ̃ imɑɑ nhò yóó pṹnnɛ́ ì, ò í yóó cɔutɛ́ ibirí, ò dɔ́ ibɛ́nní nyi. 
\v 16 Kòò yĩ: N dò nkɛ́tuɔ mmɛkùɔ̀ mmɛ kɛ́deè kɑ̀ɑ túótɛ́ ɑ dɔ́ ì. Otɔ̃ntì dɔ̀: Bɑ̀mbɑ̀ nwe ɑ dò nkɛ́ n duɔ́ mmɛ̀, kɑ̀ɑ yetɛ n yì fìètɛ. 
\v 17 Kɛ̀ Edii bí ndɔɔri ti Yiɛ̀ nKuyie nyí dɔ́ dɛ̀, bɑ́ bɛ̀ í nwúó mbɛ̀ kù pɑ̃ɑ̃ nyɛ̀ɛ̀ pɑ̃rɛ̀ kɛ dò nyɛ̀ tu ku kpɛyɛ.
\s1 Sɑmmuyɛɛri bomɛ̀ Sidoo
\p
\v 18 Kɛ̀ Sɑmmuyɛɛri ḿbo Sidoo kɛ dɑɑti dikɔutɛ́yɑɑ̀bòrì kɛ pĩ́ ti Yiɛ̀ nKuyie ntɔ̃mmú. 
\v 19 Bɑ́ dìì benni o yɔ̃ nɛ̀ o cicɛ kɛ̀ bɛ̀ kɔ̀ri Sidoo kɛ bo fíé iwũɔ̃ ti Yiɛ̀ nKuyie, nho yɔ̃ ò dùɔ̀kɛ diyɑɑ̀bòrì kɛ́ntɔ. 
\v 20 Kɛ̀ Edii níí pɑ̃ Ɛdikɑnɑɑ nɛ̀ o pokù ti Yiɛ̀ nKuyie nkó mɛsɑ̀ɑ̀ nkɛ dɔ̀: Ti Yiɛ̀ nKuyie nyóu kòo nitipòkù yie nyíɛ́ kɛ́piɛ́ ibí, kɛ̀ ìì ĩ́tínnɛ́ ò mɛ nkù pɑ̃ dɛ̀ kó difɔ̃̀tìrì. Kòo deè kɛ̀ bɛ̀ɛ kò. 
\v 21 Kɛ̀ ti Yiɛ̀ nKuyie ndɔ̀ɔ̀ mɛsɑ̀ɑ̀ nhAnni kòo yíɛ́ kɛ́pɛitɛ́ initidɑbí ìtɑ̃ɑ̃ti nɛ̀ initipobí ìdɛ́ì.
\b
\p Kɛ̀ ti Yiɛ̀ nKuyie nní mbonɛ̀ Sɑmmuyɛɛri kòò kòtírí.
\s1 Edii do kpɑnnɛ̀mɛ̀ o bí
\p
\v 22 Dɛ mɔ̀nnì Kuyie nkuɔ́ nìùtì Edii do kòtɛ́mu mɛdiɛ̀ nkɛ́keè o bí dɔɔri dɛ̀ Isidɑyɛɛribɛ cuokɛ̀ nɛ̀ bɛ̀ dɔutinɛ̀mɛ̀ bɛnitipòbɛ̀ bɛ̀ɛ̀ do ɔ̃ ntíkú ti Yiɛ̀ nKuyie ncĩ́ɛ̃̀tɛ̀ bòrì nùù. 
\v 23 Kòo bɛ̀ bekɛ kɛ dɔ̀: Di dɔɔri bɑ mbotí nku? Bɛnìtìbɛ̀ bɛmɔu nɑ̀ɑ́mmu di borimɛ í wennimɛ̀. 
\v 24 M bí yóunɛ̀ dɛndɛ! Bɛnìtìbɛ̀ nɑ̀ɑ́ ntì di kpɛ́í ntì í wenni. 
\v 25 Kòo nìtì yetɛ́nɛ̀ onìtì ti Yiɛ̀ nKuyie nkuù ɔ̃ɔ̃ bɛ̀ pùtɛ́. Kòò nɛ́ yetɛ́nɛ̀ ti Yiɛ̀ nKuyie nwe mbo ò pùtɛ́?
\p Bɛ̀ mɛ nketɛ́ kɛ í ndɑkɛ bɛ cicɛ bɛ̀ nɑ̀ɑ́ ntì. Ti Yiɛ̀ nKuyie nkuù do dɔ́ kɛ́ bɛ̀ kùɔ.
\b
\p
\v 26 Kɛ̀ Sɑmmuyɛɛri bɑɑ kótírí, ti Yiɛ̀ nKuyie nnɛ̀ bɛnìtìbɛ̀ kɛ̀ bɛ̀ ò dɔ́.
\s1 Kuyie nnɑ̀kɛ́mɛ̀ Edii kù yóó ò dɔɔ̀ dɛ̀ wenwe nɛ̀ o bí
\p
\v 27 Diyiè mɑrì kɛ̀ Kuyie mpɑ̃ɑ̃nɑ́ɑǹtì nɑ́ɑǹtò mɔùu kɔtɛní Edii borɛ̀ kóò nɑ̀kɛ́ kɛ dɔ̀: A yɛ̃́mu ɑ yɛmbɛ̀ do bo dìì mɔ̀nnì Esibiti kɛ tú tidɑɑtì, kɛ̀ ti Yiɛ̀ nKuyie mbɛ̀ bɛnkɛmɛ̀ kumɑ́ɑ̀, 
\v 28 kɛ́tɑ̃ɑ̃tɛ́ Isidɑyɛɛribɛ bɛmɔu miɛkɛ ɑ yɑ̀ɑ̀rì Anɔɔ kòo ntú ikuɔ́ nìùtì, kɛ dɑɑti dikɔutɛ́yɑɑ̀bòrì, kɛ tóú iwũɔ̃ bɛ̀ kù feu ì kɛ tuɔ̀ ndiwũɔ̃tɔ̀nnì ĩ́nkɛ̀ kɛ tuɔ̀nnɛ̀ tihúúntì, kɛ kù nɑ̀ɑ́nnɛ̀ kɛ kù dɔ̀, kɛ̀ bɛ̀ níí kù fèútɛ́ fɛɔ̃̀fɛ̀ bɛ̀ bo mmɔkɛ bɛ kó kumɑɑ. 
\v 29 Bɑ nkpɛ́í nnɛ́ te kɛ̀ di cɑɑ̀ri kù yɛ̃ mbɛ̀ nkù feu ìì wũɔ̃ nɛ̀ yɛpɑ̃rɛ̀ kù yɛ̃ mbɛ̀ nkù pɑ̃ɑ̃ nyɛ̀ ku cĩ́ɛ̃̀tɛ̀ miɛkɛ? Dɛ̀ yĩ́mɛ kɛ̀ di tɑ̃nkíí imɑɑ nsɑ̀ɑ̀yì, Isidɑyɛɛribɛ kù feu ìì wũɔ̃ miɛkɛ nɛ̀ bɛ̀ kù pɑ̃ɑ̃ nyɛ̀ɛ̀ pɑ̃rɛ̀, kɛ cũɔ̃̀ di kɔ̃̀ntì? Dɛ̀ dòmmɛ kɑ̀ɑ yɑ̀rí ɑ bí nyi kɛ kù pɛ̃ɛ̃tɛ́? 
\v 30 Nɛ̀ dɛ kpɛ́í, ti Yiɛ̀ nKuyie nyIsidɑyɛɛribɛ tũ nkù tu kuù do dɔúnnɛ̀ dinùù ɑ nɑɑ̀mùnkù kɔbɛ kɛ dɔ̀ bɛ̀ bo ntú ikuɔ́ nìùbɛ̀ sɑ̃́ɑ̃̀. Di mmɔ̀nnì mɛɛ̀ tɛ̃́nkɛ dɔkɛ kù yetɛmu kɛ tú wèè kù dɛ́úkùnnɛ kù ɔ̃ɔ̃ we ndɛ́úkùnnɛ, kɛ̀ wèè kù sènkɛ̀rì kù múnkɛɛ o sènkɛ̀rì. 
\v 31 Dɛ̀ tùɔ̀kɛ kɛ dèèmu kù bo duɔ́mmɛ̀ kɑ̀ɑ kɔbɛ nkɔ̃ mmunɑntɛ́kṹṹ, okótì tɛ̃́nkɛ í yó mbo ɑ cĩ́ɛ̃̀tɛ̀. Kɛ̀ kùu dɔɔ̀ mɛsɑ̀ɑ̀ nyIsidɑyɛɛribɛ. 
\v 32 Otɔù mɔù bo cɔutɛ́ ku cĩ́ɛ̃̀tɛ̀. A cĩ́ɛ̃̀tɛ̀ miɛkɛ okótì mɛ mbɑ́ ndɛ̀ kpɑɑ́. 
\v 33 Kù nɛ́ yóó súɔ́ nhòmɔù nwe ɑ yɑɑ̀bí miɛkɛ kòo ntɔ́kɛ́nɛ̀ ku wũɔ̃tɔ̀nnì, kɛ wúó nhò nɑ mborɛ̀ kɛ̀ dɛ̀ ò yóù kɛ cɑɑ̀ri o yɛ̀mmɛ̀, kɛ̀ bɛsɔmbɛ nkɔ̃ mmunɑntɛ́kṹṹ.
\p
\v 34 A bí idɛ́ Ofinii nɛ̀ Findee bɛ̀ yóó kú diyiè dìmɑ́ɑ̀ ndi kɑ̀ɑ bɑntɛ́ kù bɛ́i ntì yóó dɔɔ̀mɛ̀. 
\v 35 Dɛ kó difɔ̃nkúò kɛ̀ kùu tɑ̃ɑ̃tɛ́ ikuɔ́ nìùtì kòo mpĩ́ nku tɔ̃mmú kɛ̀ dɛ̀ wenni kɛ dɔɔri kù dɔ́mɛ̀. Kɛ̀ kùu duɔ́ nkòo yɑɑ̀bí ntú ikuɔ́ nìùbɛ̀ sɑ̃́ɑ̃̀, kɛ́mbo okpɑ̀ɑ̀tì kù yóó tɑ̃ɑ̃tɛ́ wè borɛ̀. 
\v 36 A kɔbɛ bɛ̀ɛ̀ bo yentɛ́, kɛ̀ bɛ̀ɛ kɔtɛní kɛ́nninku o borɛ̀ kɛ bo pɛ́tɛ́ dɑ́rɛ̀ yoo mudiì sɑ́m̀pɔ́, kɛ́ nhò bɑ̀ɑ́ nkɛ tú: Ti duɔ́ mbɑ́ mùù tɔ̃mmú ti Yiɛ̀ nKuyie ncĩ́ɛ̃̀tɛ̀ miɛkɛ kɛ̀ ti pɛ́tɛ́ kɛ́dinɛ̀.
\c 3
\p
\v 1 Kɛ̀ Sɑmmuyɛɛri ḿbo Edii borɛ̀ kɛ pĩ́ nti Yiɛ̀ nKuyie ntɔ̃mmú.
\s1 Kuyie nyumɛ̀ Sɑmmuyɛɛri
\p Dɛ mɔ̀nnì ti Yiɛ̀ nKuyie ndo í nɑ́ɑ́nnɛ̀ bɛnìtìbɛ̀ mɛcɑ̃ɑ̃ mmɛcɑ̃ɑ̃ nyoo nɛ̀ mɛbɛnkùmɛ̀ miɛkɛ.
\p
\v 2 Kɛyènkɛ̀ mɑkɛ̀ kòo kótì Edii nduɔ́ o dɔ́ù. Ò do kòtɛ́mu kòo nuɔ ntɛ̃́nkɛ í nnɑɑti. 
\v 3 Kɛ̀ Sɑmmuyɛɛri nduɔ́ ti Yiɛ̀ nKuyie ncĩ́ɛ̃̀tɛ̀ ku tɑummɛ̀ tɔu tɑkɛ́, kɛ sɔ̃́ nku cĩ́ɛ̃̀tɛ̀ fìtírɛ̀ mu nyí ku. 
\v 4 Kɛ̀ ti Yiɛ̀ nKuyie nhò yu kɛ dɔ̀: Sɑmmuyɛɛri! Sɑmmuyɛɛri! Kòò dɔ̀: Ntɛ mí. 
\v 5 Kòo cokóo Edii borɛ̀ kɛ dɔ̀: N kɔ̀tɛnímu. Kɛ̀ Edii dɔ̀: N yí dɑ yu, kɔtɛ kɛ́duɔ́. Kòo wɛ̃tɛ kɛ́duɔ́. 
\v 6 Kɛ̀ ti Yiɛ̀ nKuyie nyíɛ́ kɛ́yú Sɑmmuyɛɛri kucɛ mɛdɛ́rímɛ̀, kòo kɔtoo Edii borɛ̀ kɛ dɔ̀: N kɔ̀tɛnímu, n kèè ɑ n yumɛ̀ mmɛ kɛ kɔ̀tɛní. Kɛ̀ Edii dɔ̀: M birɛ n yí dɑ yu, kɔtɛ kɛ́duɔ́.
\p
\v 7 Sɑmmuyɛɛri mu ndo í yɛ̃́ kɛ dò nti Yiɛ̀ nKuyie nkuù ò yu, kù mu ndo í ò bɛ́innɛ̀ diyiè mɑrì.
\p
\v 8 Kɛ̀ ti Yiɛ̀ nKuyie nyíɛ́ kɛ́yú Sɑmmuyɛɛri mɛtɑ̃ɑ̃́mmɛ̀, kòo ítɛ́ kɛ́kɔtoo Edii borɛ̀ kɛ dɔ̀: N kèè ɑ n yumɛ̀ mmɛ kɛ kɔ̀tɛní.
\p Kɛ̀ Edii bɑntɛ́ ti Yiɛ̀ nKuyie nkuù ò yumɛ̀, 
\v 9 kóò nɑ̀kɛ́ kɛ dɔ̀: Wɛ̃tɛ kɛ́duɔ́, kɛ̀ bɛ̀ wɛ̃̀tɛ kɛ dɑ yu ɑ dɔ̀: N yiɛ̀, bɛ́i nkɑ̀ɑ kóo tɔ̃ntì kèḿmúmu.
\p Kɛ̀ Sɑmmuyɛɛrii wɛ̃tɛ kɛ́duɔ́.
\b
\p
\v 10 Kɛ̀ ti Yiɛ̀ nKuyie nwɛ̃tɛní kɛ́cómmú o borɛ̀ kɛ́yíɛ́ kóò yu kɛ dɔ̀: Sɑmmuyɛɛri! Sɑmmuyɛɛri! Kòò dɔ̀: Bɛ́i nkɑ̀ɑ kóo tɔ̃ntì kèḿmúmu.
\p
\v 11 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: N yóó potɛ́ Edii cĩ́ɛ̃̀tɛ̀ ntɛ kuyɛ̃ĩku mɑkù, kɛ̀ Isidɑyɛɛribɛɛ tì kèè kɛ̀ dɛ̀ɛ kpɛ́ɛ́tɛ́ bɛ to. 
\v 12 Dɛ kó dimɔ̀nnì ndi n yóó dɔɔ̀mɛ̀ Edii cĩ́ɛ̃̀tɛ̀, n nɑ̀kɛ́ kɛ yɛ̃ n yóó tɛ̀ dɔ̀ɔ̀mɛ̀ bɑ́ m bɑ́ɑ́ íntɛ́ tìmɑtì. 
\v 13 M bɛ́immu kɛ tú: M bo potɛ́ Edii cĩ́ɛ̃̀tɛ̀ sɑ̃́ɑ̃̀ nɛ̀ o bí dɔɔri mɛ̀ɛ̀ yɛi nkpɛ́í nkɛ cɑɑ̀ri n yètìrì kòò yɛ̃́ kɛ cĩ́ɛ̃́kɛ́. 
\v 14 Mí nKuyie m bɛ́immu kɛ tú dɛ̀mɑrɛ̀ í bo dɛ̀ɛ̀ bo ũtɛ́ Edii cĩ́ɛ̃̀tɛ̀ yɛi mbɑ́ kɛ̀ bɛ̀ nfìé iwũɔ̃ kɛ m pɑ̃mmú yɛpɑ̃rɛ̀.
\p
\v 15 Kɛ̀ Sɑmmuyɛɛri nduɔ́, kɛ̀ dɛ̀ɛ wentɛ́ kòo kpetɛ́ ti Yiɛ̀ nKuyie ncĩ́ɛ̃̀tɛ̀ kó yɛbòrɛ̀. Ò í ndɑ̀ɑ́tí kɛ bo nɑ́kɛ́ Edii ti Yiɛ̀ nKuyie nhò nɑ̀kɛ́ tì. 
\v 16 Kɛ̀ Edii yú Sɑmmuyɛɛri kóò nɑ̀kɛ́ kɛ dɔ̀: Sɑmmuyɛɛri n kóo dɑpɑ̀ɑ̀! Kòò dɔ̀: Ntɛ mí. 
\v 17 Kɛ̀ Edii dɔ̀: Ti Yiɛ̀ nKuyie ndɑ nɑ̀kɛ́ ɔ̃nti? Bɑ́ n sɔnnɛ tìmɑtì bɑ́ tìmɑ́ɑ̀, kɑ̀ɑ n sɔ̀nnɛ tìmɑtì ti Yiɛ̀ nKuyie ndɑ potɛ́.
\p
\v 18 Kɛ̀ Sɑmmuyɛɛrii ò nɑ̀kɛ́ ti Yiɛ̀ nKuyie nhò nɑ̀kɛ́ tì timɔu bɑ́ ò í nsùɔ́ ntìmɑtì, kɛ̀ Edii dɔ̀: Kuù tu ti Yiɛ̀ nKuyie, nkùu dɔɔ̀ kù dɔ́mɛ̀.
\b
\p
\v 19 Kɛ̀ Sɑmmuyɛɛrii kótɛ́ kɛ̀ ti Yiɛ̀ nKuyie nní nhò bonɛ̀. Kù ò nɑ̀ɑ́ ntìì nɑ́ɑǹtì kó dimɑ̀ɑ̀ kòò nɑ̀ɑ́ mbɛnìtìbɛ̀ tìmɑtì í nduò kɛtenkɛ̀. 
\v 20 Mɛm̀mɛ Isidɑyɛɛribɛ kó kɛtenkɛ̀ kɛmɔu, kɛ́túótɛ́ Dɑnni kó kutempɛ̃ nkɛ́tuɔkɛnɛ̀ Bɛɛrisebɑɑ, kɛ̀ bɛ̀ɛ bɑntɛ́ kɛ dò nSɑmmuyɛɛri mɛ̀nkɛ tú ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò. 
\v 21 Kɛ̀ ti Yiɛ̀ nKuyie nsɔɔtɛ́ kɛ́mbɛnkú kumɑ́ɑ̀ Sɑmmuyɛɛri Sidoo, kòo nnɑ́ɑ́ nku nɑ́ɑǹtì.
\c 4
\p
\v 1 Mɛm̀mɛ kɛ̀ Sɑmmuyɛɛri ntuonko Isidɑyɛɛribɛ bɛmɔu ti Yiɛ̀ nKuyie nnɑ̀ɑ́ ntì.
\s1 Isidɑyɛɛribɛ dootitɔbɛ̀ tùótɛ́mɛ̀ ti Yiɛ̀ nKuyie ntɑummɛ̀ tɔu
\p Diyiè mɑrì kɛ̀ Isidɑyɛɛribɛɛ dintɛ́ Fidisitɛ̃ɛ̃bɛ mudoò kɛ́bɑ́tɛ́ Ɛbɛnni-Ɛsɛɛ, kɛ̀ Fidisitɛ̃ɛ̃bɛ bɑ́tɛ́ Afɛki. 
\v 2 Kɛ̀ mudoò bintɛ́ mɛdiɛ̀ nkɛ̀ Fidisitɛ̃ɛ̃bɛɛ ɑutɛ́ Isidɑyɛɛribɛ, kɛ́kuɔ bɛnìtìbɛ̀ sikɔupísìnɑ̀ɑ̀ (4000) dɛ kó mudoò miɛkɛ. 
\v 3 Bɛ̀ɛ̀ yentɛ́ kɛ̀ bɛ̀ɛ cokɛ́ kɛ́konní bɛ̀ do bɑ̀tɛ́ dɛ̀, kɛ̀ Isidɑyɛɛribɛ kó bɛkótíbɛ̀ dɔ̀: Bɑ nkpɛ́í nte kɛ̀ Fidisitɛ̃ɛ̃bɛ ti ɑutɛ́ miɛ mbotí? Tí kɔtɛnɛ̀ Sidoo kɛ́túótɛ́ní ti Yiɛ̀ nKuyie ntɑummɛ̀ tɔu, kɛ̀ dì mbo ti borɛ̀ kɛ́ ti dɛɛtɛ́nɛ̀ ti dootitɔbɛ̀.
\p
\v 4 Kɛ̀ bɛ̀ɛ tɔ̃ nkɛ̀ bɛ̀ɛ túótɛ́ní ti Yiɛ̀ nKuyie ntɑummɛ̀ tɔu, ti Yiɛ̀ nKuyie Mpɑkɛdɑɑ kɑri dɛ̀ bɛĩ́nkɛ̀mbɑ̀rìbɛ̀ bɛ̀dɛ́bɛ̀ sɑ̀ku. Kɛ̀ Edii bí idɛ́ Ɔfinii nɛ̀ Findee kɛ̀ bɛ̀ dɛ̀ bo. 
\v 5 Bɛ̀ tùɔ̀kɛnɛ̀ dìì mɔ̀nnì ti Yiɛ̀ nKuyie ntɑummɛ̀ tɔu Isidɑyɛɛribɛ kɑrì, kɛ̀ Isidɑyɛɛribɛɛ iitɛ kɛ̀ kɛtenkɛ̀ɛ sɑ̃ntɛ̀.
\p
\v 6 Kɛ̀ Fidisitɛ̃ɛ̃bɛɛ keè bɛ̀ iitɛmɛ̀ Isidɑyɛɛribɛ kɑrì kɛ dɔ̀: Bɑ nte kɛ̀ bɛ̀ ìítí Ebedeebɛ kɑrì?
\p Bɛ̀ kèè dìì mɔ̀nnì kɛ dò ti Yiɛ̀ nKuyie ntɑummɛ̀ tɔu tùɔ̀kɛní bɛ borɛ̀, 
\v 7 kɛ̀ kufɔ̃wɑɑ́ mpĩ́ nFidisitɛ̃ɛ̃bɛ kɛ̀ bɛ̀ nnɑ́ɑ́ nkɛ tú: Ti Yiɛ̀ nKuyie nkuù tùɔ̀kɛní bɛ kɑrì, ti pɑ̀kɛ́mu! Kù do í bɛ̀ bonɛ̀, bɑ̀mbɑ̀ nkɛ tùɔ̀kɛní. 
\v 8 Dɛ̀ ti dimu, we nyóó ti dɛɛtɛ́nɛ̀ Kuyie nkperíkù kùù do potɛ́ Esibiti kɔbɛ tiyɛ̃ĩti tibotí tibotí dikpɑ́ɑ̀ cuokɛ̀. 
\v 9 Fidisitɛ̃ɛ̃bɛ yetɛnko kɛ̀ ti bɛ̀ bɑ̀ɑo nɛ̀ dikɔ̃m̀bùɔ̀, kɛ̀ mɛɛ̀ dɔkɛ ti yóó nɑɑ́ mbɛ kó tidɑɑtì nti kɛ́ndònnɛ̀ bɛ̀ do túmɛ̀ ti kó tidɑɑtì. Ítɛ́nɛ̀ kɛ̀ ti bɛ̀ bɑ̀ɑo nɛ̀ muwɛ̃rímú.
\p
\v 10 Mɛm̀mɛ Fidisitɛ̃ɛ̃bɛ nɛ̀ Isidɑyɛɛribɛ bɛ̀ tɑmɛ̀ bɛtɔbɛ̀ mudoò kɛ̀ bɛ̀ɛ nɑ Isidɑyɛɛribɛ, kɛ̀ bɛ̀ɛ cokɛ́ kɛ́kũṹ mbɛ cɛ̃́ĩ, kɛ̀ bɛ̀ɛ bɛ̀ ɑutɛ́ mɛdiɛ̀ nkɛ́kuɔ bɛnìtìbɛ̀ sikɔupípísìtɑ̃ɑ̃ti (30000), 
\v 11 kɛ́túótɛ́ ti Yiɛ̀ nKuyie ntɑummɛ̀ tɔu. Edii bí idɛ́ Ɔfinii nɛ̀ Findee kɛ̀ bɛ̀ɛ kú.
\s1 Edii kumɛ̀
\p
\v 12 Kɛ̀ Bɛnsɑmɛɛ nɑɑ̀mùnkù kou mɔùu kɛ̃rí o yɑ̀ɑ̀tì, kɛ́pũ nho yuu mutɑ̃́ɑ̃́ nkɛ́cokɛ́ kɛ́tuɔkɛ Sidoo dɛ kó diyiè dimɑ́ɑ̀ miɛkɛ. 
\v 13 Kɛ sɔ̃́ nkɛ̀ Edii kɑ̀ri o kɑ̀rì ĩ́nkɛ̀ kucɛ nùù kɛ pɑkɛ́ kɛ yɛ̃́ o kɔ̃m̀bùɔ̀tì duòmɛ̀ ti Yiɛ̀ nKuyie ntɑummɛ̀ tɔu kpɛ́í. Kɛ̀ dɛ kóo nìtìi nɑ́kɛ́ tìì bɛ̀ tùɔ̀kɛní kɛ̀ bɛnìtìbɛ̀ bɛmɔuu kuɔ́nko. 
\v 14 Kɛ̀ Edii keè yɛdɑbùò nkɛ́bekɛ mùù dɔ̀ɔ̀ri, kɛ̀ weè nìtìi cokóo mɛcɑ̃ɑ̃ nkóò nɑ̀kɛ́ dɛ̀ dɔ̀ɔ̀mɛ̀. 
\v 15 Dɛ̀ do sɔ̃́ nhEdii mɔ̀kɛ yɛbie nsipísìwɛi nɛ̀ yɛ̀ni ndi, bɑ́ ò tɛ̃́nkɛ í wúó mbɑ́ sɑ́m̀pɔ́. 
\v 16 Kɛ̀ dɛ kóo nìtìi ò nɑ̀kɛ́ kɛ dɔ̀: M boní mudoò borɛ̀ ndɛ yíe nkɛ cokɛ́ní. Kɛ̀ Edii dɔ̀: N kóo dɑpɑ̀ɑ̀ ndɛ̀ dònnímɛ? 
\v 17 Kòò dɔ̀: Ti dootitɔbɛ̀ ti bɛ̀timu kɛ ti ɑutɛ́, dɛ̀ɛ̀ nɛ́ dɔkɛ yóù dɛɛ̀ tu ɑ bí idɛ́ Ɔfinii nɛ̀ Findee bɛ̀ kumɛ̀, kɛ̀ bɛ̀ tùótɛ́ ti Yiɛ̀ nKuyie ntɑummɛ̀ tɔu.
\p
\v 18 Dɛ kóo nìtì yu dìì mɔ̀nnì ti Yiɛ̀ nKuyie ntɑummɛ̀ tɔu kó diyètìrì, kɛ sɔ̃́ nhEdii kɑ̀ri o kɑ̀rì ĩ́nkɛ̀, kɛ́donní diyɑ̀nyɑ̀nnì ti Yiɛ̀ nKuyie ntou borɛ̀ kɛ kèétɛ́ o fɔ̃̀níí kɛ́kú. Ò do kòtɛ́mu mɛsɑ̀ɑ̀ nkɛ́ncɛ̃́ɛ̃̀. Ò do bɑkɛ́ Isidɑyɛɛribɛ kɛ dɔ̀ yɛbie nsipísìnɑ̀ɑ̀ ndi.
\b
\p
\v 19 Edii cɔ̀kù, o birɛ Findee pokù do púómmu kɛ duúnnɛ̀ ò bo pɛitɛ́mɛ̀. Ò kèè dìì mɔ̀nnì Fidisitɛ̃ɛ̃bɛ tùótɛ́mɛ̀ ti Yiɛ̀ nKuyie ntɑummɛ̀ tɔu, kòo cɔ̀kù nɛ̀ o dɔù kɛ̀ bɛ̀ kú kɛ̀ kuyonkuu ò ɑutɛ́ kòo kũũ kɛ́pɛitɛ́, 
\v 20 kɛ́mmɑùnɛ̀ mukṹṹ, bɛ̀ɛ̀ ò teénnɛ̀ kɛ̀ bɛ̀ dɔ̀: Bɑ́ nyĩɛ̃̀kù! A pɛitɛ́ dɛnitidɑbirɛ ndɛ. Ò í mbɛ̀ tɛ̃̀ńnɛ́ tìmɑtì. Ò ketɛ́ kɛ í ndɑkɛ bɛ tɛrɛ̀ kpɛ́í. 
\v 21 Kòo bɛ́i nkɛ dɔ̀: Ti Yiɛ̀ nKuyie ntɛ̃́nkɛ í bonɛ̀ Isidɑyɛɛribɛ, kɛ́ yú o birɛ kɛ dɔ̀ Ikɑbɔdi.
\p Dɛ kó diyètìrì do tukúnɛ̀ bɛ̀ tùótɛ́ mɛ̀mmɛ ti Yiɛ̀ nKuyie ntɑummɛ̀ tɔu nɛ̀ o cɔ̀kù Edii kó mukṹṹ nnɛ̀ o dɔù kɔ̃mu. 
\v 22 Kòo bɛ́i nkɛ dɔ̀: Isidɑyɛɛribɛ pɑ̀ɑ̀mu muwɛ̃rímú kɛ yɛ̃́ bɛ dootitɔbɛ̀ tùótɛ́mɛ̀ ti Yiɛ̀ nKuyie ntɑummɛ̀ tɔu.
\c 5
\s1 Fidisitɛ̃ɛ̃bɛ kònnɛ̀mɛ̀ ti Yiɛ̀ nKuyie ntɑummɛ̀ tɔu
\p
\v 1 Kɛ̀ Fidisitɛ̃ɛ̃bɛɛ túótɛ́ ti Yiɛ̀ nKuyie ntɑummɛ̀ tɔu Ebɛni-Ɛsɛɛ kɛ́kònnɛ̀ Asidɔdi. 
\v 2 Kɛ bii dì tɑnnɛ́ bɛ bɔɔ̀ Dɑkɔ̃ɔ̃ tou kɛ́ĩ́nnɛ́ di tɑkɛ́. 
\v 3 Kɛ̀ dɛ̀ɛ wentɛ́ kɛ̀ Asidɔdi kɔbɛɛ entɛ kɛ́nsɔ̃́ nDɑkɔ̃ɔ̃ do kɛ duɔ́ ti Yiɛ̀ nKuyie ntɑummɛ̀ tɔu ììkɛ̀ kɛ̀ bɛ̀ɛ íi mbɛ bɔɔ̀ kɛ́cónnɛ́ dì do borɛ̀. 
\v 4 Di wentírì kɛ̀ bɛ̀ nsɔ̃́ nDɑkɔ̃ɔ̃ tó do kɛ duɔ́ ti Yiɛ̀ nKuyie ntɑummɛ̀ tɔu ììkɛ̀, di yuu nɛ̀ di nɔu kɛ̀ dɛ̀ bɔ̀kɛ́ kɛ cóú dɛ kó kudieku bòrì. 
\v 5 Dɛɛ̀ te nɛ̀ yíenní kɛ̀ dɛ kó bɛbɔɔyɛmbɛ̀ nɛ̀ Asidɔdi ɛì kɔbɛ bɛ̀ɛ̀ tɑɑ̀ dɛ kó kudieku kɛ̀ bɛ̀ í nɑù ku bòrì.
\p
\v 6 Kɛ̀ ti Yiɛ̀ nKuyie mbɛnkɛ ku wɛ̃rímú Asidɔdi kɔbɛ, kɛ́ bɛ̀ potɛ́ fɔ̃kúùkúùrɛ̀ kɛ̀ bɛ kɔ̃m̀bùɔ̀tìi do, bɛmbɛ nɛ̀ yɛhɛkɛ̀ yɛ̀ɛ̀ bɛ̀ tɔ̀kɛ́nɛ̀ yɛ kɔbɛ. 
\v 7 Bɛ̀ yɑ̀ dìì mɔ̀nnì tìì bɛ̀ tùɔ̀kɛní, kɛ́kuɔ́ nkɛ dɔ̀: Ti í dɔ́ ti Yiɛ̀ nKuyie nyIsidɑyɛɛribɛ tũ nkù tɑummɛ̀ tɔu mbo ti ciɛ, kù ti potɛ́mu, tínti nɛ̀ ti bɔɔ̀ Dɑkɔ̃ɔ̃.
\p
\v 8 Kɛ̀ bɛ̀ɛ yú Fidisitɛ̃ɛ̃bɛ kpɑ̀ɑ̀tìbɛ̀ bɛmɔu kɛ́ bɛ̀ bekɛ kɛ dɔ̀: Ti yóó yĩ́mɛ Kuyie nyIsidɑyɛɛribɛ tũ nkù tɑummɛ̀ tɔu? Kɛ̀ bɛ̀ dɔ̀: Tɔnɛ̀ di kɛ́kɔtɛnɛ̀ Kɑti kó dihɛì.
\p Kɛ̀ bɛ̀ɛ dì tɔ kɛ́kɔtɛnɛ̀ Kɑti ɛì. 
\v 9 Bɛ̀ dì tùɔ̀kɛnko dìì mɔ̀nnì Kɑti, kɛ̀ ti Yiɛ̀ nKuyie mpotɛ́ dɛ kó dihɛì kɔbɛ bɛmɔu, ibí nɛ̀ bɛkótíbɛ̀ kɛ̀ fɔ̃kúùkúùrɛ̀ɛ bɛ̀ pĩ nkɛ̀ bɛ kɔ̃m̀bùɔ̀tìi do. 
\v 10 Kɛ̀ bɛ̀ɛ dì tɔ kɛ́sɔɔ́nnɛ̀ Ekinɔɔ. Ekinɔɔ kɔbɛ dì yɑ̀ dìì mɔ̀nnì kɛ́kuɔ́nko kɛ dɔ̀: Bɛ̀ tɔní Kuyie nyIsidɑyɛɛribɛ tũ nkù tɑummɛ̀ tɔu kɛ bo ti kuɔ timɔu.
\p
\v 11 Kɛ múnkɛɛ yú Fidisitɛ̃ɛ̃bɛ kpɑ̀ɑ̀tìbɛ̀ kɛ́ bɛ̀ nɑ̀kɛ́ kɛ dɔ̀: Kpɛ̃nnɛ́nɛ̀ Kuyie nyIsidɑyɛɛribɛ tũ nkù tɑummɛ̀ tɔu, kɛ̀ mɛɛ̀ dɔkɛ ti yóó kú timɔu ndi.
\p Kufɔ̃wɑɑ́ nkuù do ɑutɛ́ bɛnìtìbɛ̀ dihɛì miɛkɛ, kɛ yɛ̃́ ti Yiɛ̀ nKuyie ndo bɛ̀ potɛ́mɛ̀. 
\v 12 Bɛ̀ɛ̀ kpɑɑ́ kɛ í ku kɛ̀ bɛ̀ɛ muɔkɛ fɔ̃kúùkúùrɛ̀, kɛ́nkuɔ̀nnɛ̀ kuyonku, kɛ̀ yɛdɑbùò ndèkù kɛĩ́nkɛ̀.
\c 6
\s1 Fidisitɛ̃ɛ̃bɛ kpɛ̃nnɛ́mɛ̀ ti Yiɛ̀ nKuyie ntɑummɛ̀ tɔu Isidɑyɛɛribɛ ciɛ
\p
\v 1 Kɛ̀ ti Yiɛ̀ nKuyie ntɑummɛ̀ tɔu mbo Fidisitɛ̃ɛ̃bɛ ciɛ, kɛ dɔ̀ bɛtɑ̃̀ɑ̃̀bɛ̀ bɛ̀yiekɛ̀. 
\v 2 Kɛ̀ Fidisitɛ̃ɛ̃bɛɛ yú bɛ kó bɛbɔɔyɛmbɛ̀ nɛ̀ bɛ pɑ̃ɑ̃bɛ̀ kɛ́ bɛ̀ bekɛ kɛ dɔ̀: Ti yóó yĩ́mɛ bɛ Yiɛ̀ nKuyie ntɑummɛ̀ tɔu? Ti nɑ́kɛ́nɛ̀ ti bo yĩ́mɛ̀ kɛ́ dì kpɛ̃nnɛ́ dì yɛ̀nní dɛ̀. 
\v 3 Kɛ̀ bɛ̀ɛ bɛ̀ nɑ̀kɛ́ kɛ dɔ̀: Kɛ̀ di dɔ́ kɛ́kpɛ̃nnɛ́ Kuyie nyIsidɑyɛɛribɛ tũ nkù tɑummɛ̀ tɔu, di bɑ́ɑ́ dì kpɛ̃nnɛ́ dɛtetìrɛ̀, di pɑ̃ dɛ̀mɑrɛ̀ Kuyie nyIsidɑyɛɛribɛ tũ nkù di yɛi nhũtímù kpɛ́í, dɛ mɔ̀nnì ndi di yóó miɛtɛ́mɛ̀ kɛ́bɑntɛ́ mùù do te kɛ̀ Kuyie nni ndi puotì. 
\v 4 Kɛ̀ Fidisitɛ̃ɛ̃bɛɛ bekɛ kɛ dɔ̀: Bɑ mbotí nku ti dò nkɛ́pɑ̃mɛ̀ Kuyie nkɛ́fɔ́ɔ́?
\p Bɛbɔɔyɛmbɛ̀ nɛ̀ bɛpɑ̃ɑ̃bɛ̀ kɛ̀ bɛ̀ dɔ̀: Dí kù pɑ̃ yɛsɔɔwèrɛ̀ kɛ̀ yɛ̀ mmɑ̀nnɛ̀ Fidisitɛ̃ɛ̃bɛ kpɑ̀ɑ̀tìbɛ̀ mɑ̀mɛ̀ kɛ̀ dí mɑ́ mɛsɔɔ nkɛ̀ dɛ̀ ndò nyiti kɛ́mbo dɛ̀nùmmù kɛ yɛ̃́ mɛyɛi mmɛmɑ́ɑ̀ mɛɛ̀ di tùɔ̀kɛní díndi nɛ̀ di kó bɛkpɑ̀ɑ̀tìbɛ̀. 
\v 5 Dɔɔ̀nɛ̀ yɛnúútɛ̀ yɛ̀ɛ̀ do di yiɛ̀ yɛ kó mɛbɛnkùmɛ̀ nɛ̀ iti ìì do cɑɑ̀ri di pɑɑ nyi kó mɛbɛnkùmɛ̀ kɛ́bɑntɛ́ Kuyie nyIsidɑyɛɛribɛ tũ nkù dɛumɛ̀. Kɛ̀ dɛ̀ nɑɑti kùu yóu kù bo ndi dɔɔrimɛ̀ mɛyɛi nnɛ̀ di bɔkɛ̀ nɛ̀ di ɛì. 
\v 6 Di bɑ́ɑ́ kpénkùnnɛ di to Esibiti kóo kpɑ̀ɑ̀tì nɛ̀ o kɔbɛ bɛ̀ do dɔ̀ɔ̀mɛ̀, di yɛ̃́mu kù do bɛ̀ dɔ̀ɔ̀mɛ̀ kɛ̀ bɛ̀ yɑ̀ɑ yóunɛ̀ Isidɑyɛɛribɛ kɛ̀ bɛ̀ɛ yɛ̀. 
\v 7 Dɔɔ̀nɛ̀ tɛnɑɑsɑ̃ntɛ̀ pɑ̀ntɛ̀, kɛ́yɑ̀ inɑɑni ìdɛ́ì ìì tɔ tibiiti, ìì mu nyí buutɛ́ kudɔú, kɛ̀ ìi dɛtɛ tɛnɑɑsɑ̃ntɛ̀, kɛ̀ dí pítínnɛ́ i biiti tɛcĩ́ɛ̃̀tɛ̀. 
\v 8 Kɛ̀ dí túótɛ́ bɛ Yiɛ̀ nKuyie ntɑummɛ̀ tɔu kɛ́ɑ̃nnɛ́ tɛnɑɑsɑ̃ntɛ̀ miɛkɛ kɛ́wɑɑ́ nditɔu mɑrì kɛ́ĩ́nnɛ́ kɛ́pɛ́ɛ́nnɛ̀ bɛ Yiɛ̀ nKuyie ntɑummɛ̀ tɔu, di yóó ɑ̃nnɛ́ diì miɛkɛ di pɑ̃ mɛ̀ɛ̀ sɔɔ bɛ Yiɛ̀ nKuyie nkɛ fɔ̀ɔ́. Kɛ̀ di dèè mɛmmɛ dí yóu kɛ̀ tɛnɑɑsɑ̃ntɛ̀ɛ kétɛ́. 
\v 9 Kɛ̀ di yɑ̀ kɛ̀ ì kètɛ́ Isidɑyɛɛribɛ ciɛ kó kucɛ kɛ wetí Bɛti-Semɛsi dí bɑntɛ́ kɛ dò nKuyie nkuù do di dɔɔri dɛ kó mɛyɛi. Kɛ̀ ì mɛ nkètɛ́ kupíkù mɑkù dí bɑntɛ́ kɛ do nkuù í mɛ̀ ndi dɔ̀ɔ̀ kɛ̀ dɛ̀ bɑɑ di tùɔ̀kɛnímu.
\p
\v 10 Kɛ̀ bɛ̀ɛ dɔɔ̀ bɛ̀ bɛ̀ nɑ̀kɛ́ tì timɔu, kɛ́wɑɑ́ nyinɑɑni ìdɛ́ì ìì tɔ tibiiti kɛ́ ì buú nkudɔú kɛ̀ ìì dɛtɛ tɛnɑɑsɑ̃ntɛ̀, kɛ̀ bɛ̀ɛ pítínnɛ́ i biiti tɛcĩ́ɛ̃̀tɛ̀, 
\v 11 kɛ́tɑnnɛ́ ditɔu mɛsɔɔ nkó iti ɑ̃ dì nɛ̀ yɛsɔɔwèrɛ̀, yɛ̀ɛ̀ bɛnkú fɔ̃̀kúùkúùrɛ̀ dɛ̀ɛ̀ do bɛ̀ pĩ.
\p
\v 12 Kɛ̀ inɑ̀ɑ̀kɛ pɑ̃̀nkɛɛ kétɛ́ Bɛti-Semɛsi kó kucɛ kɛ́mmunti bɑ́ ì í wɛ̃kii i fɔ̃nkúò bíɛ́kɛ̀ yoo kubɑkù yoú yoo kucɑ̃̀nku kɛ̀ Fidisitɛ̃ɛ̃bɛ kpɑ̀ɑ̀tìbɛ̀ ntɛ̀ tũ̀ nkɛ́tuɔkɛnɛ̀ Bɛti-Semɛsi temmɑ̀nku. 
\v 13 Kɛ̀ dɛ kó dihɛì kɔbɛ bo kubiriku kɛ kɔ̃ũ bɛ diitì, kɛ́yɑ̀ ti Yiɛ̀ nKuyie ntɑummɛ̀ tɔu kɛ̀ diwɛ̀ìi bɛ̀ pĩ mmɛdiɛ̀. 
\v 14 Tɛnɑɑsɑ̃ntɛ̀ tùɔ̀koo dìì mɔ̀nnì Sosuwee pɑku kɛcómmɔ́ɔ kupèrìkù diɛkù mɑkù tɑkɛ́ bɛ̀ɛ̀ dɛ̀ bo kɛ̀ bɛ̀ɛ kékɛ́ tɛnɑɑsɑ̃ntɛ̀ kó idɛí kɛ fíé ti Yiɛ̀ nKuyie nyinɑ̀ɑ̀kɛ ìì do tɛ̀ dɛ̀ri kɛ́tuɔ.
\b
\p
\v 15 Kɛ̀ Defiibɛɛ cṹũ ti Yiɛ̀ nKuyie ntɑummɛ̀ tɔu nɛ̀ ditɔu mɛsɔɔ nnɛntì do ɑ̃ dì kɛ́dɔú ndɛmɔu kupèrìkù ĩ́nkɛ̀. Dɛ kó diyiè kɛ̀ Bɛti-Semɛsi kɔbɛɛ fíé iwũɔ̃ nKuyie nkɛ́tuɔ nkɛ́kuɔ itɛì, mɛtɑummɛ̀ kpɛ́í. 
\v 16 Fidisitɛ̃ɛ̃bɛ kpɑ̀ɑ̀tìbɛ̀ dɛ̀ yɑ̀ dìì mɔ̀nnì dɛmɔu kɛ́kò ndɛ kó diyiè.
\p
\v 17 Ntɛ bɛ̀ do totí mɛ̀ɛ̀ botí Fidisitɛ̃ɛ̃bɛ do pɑ̃ yɛ̀ɛ̀ sɔɔwèrɛ̀ ti Yiɛ̀ nKuyie nkɛ bo fɔ́ɔ́. Kɛ̀ bɛ̀ɛ duɔ́ nhAsidɔri dìmɑ́ɑ̀, Asikɑnɔɔ dìmɑ́ɑ̀, Kɑti dìmɑ́ɑ̀, Ekinɔɔ dìmɑ́ɑ̀. 
\v 18 Kɛ̀ bɛ̀ mɑ́ dɛ̀ mɛsɔɔ nkɛ̀ dɛ̀ dò nyiti kɛ̀ dɛ̀ nsũ kɛ mɑ̀nnɛ̀ Fidisitɛ̃ɛ̃bɛ kpɑ̀ɑ̀tìbɛ̀ ɛkɛ̀ mɑ̀mɛ̀, yɛdiɛyɛ̀ iduotí fitɛ́ yɛ̀ nɛ̀ yɛsɑ́m̀pɔ́yɛ̀, Fidisitɛ̃ɛ̃bɛ kpɑ̀ɑ̀tìbɛ̀ bɛnùmmù bɑkɛ́ yɛ̀. Dɛ kó kupèrìkù bɛ̀ do ĩ̀ńnɛ́ kùù ĩ́nkɛ̀ ti Yiɛ̀ nKuyie ntɑummɛ̀ tɔu Sosuwee Bɛti-Semɛsi kou pɑku, kù kpɑɑ́ kɛ bomu nɛ̀ yíenní.
\p
\v 19 Kɛ̀ ti Yiɛ̀ nKuyie mpotɛ́ Bɛti-Semɛsi kɔbɛ, kɛ̀ bɛnìtìbɛ̀ɛ kú sipísìyiekɛ̀, bɛ̀ wèńtɛ́ mɛ̀ɛ̀ kpɛ́í nku tɑummɛ̀ tɔu, kɛ̀ bɛsɔmbɛ yɛ̀mmɛ̀ɛ cɑɑ̀rɛ̀ Kuyie mbɛ̀ potɛ́ mɛ̀ɛ̀ kpɛ́í nkuyɛ̃ĩku diɛkù.
\p
\v 20 Kɛ̀ bɛ̀ dɔ̀: Òmɔù í yó nkpɑɑ́ fòù, ti bo cuó nkɛ kɛ́dɛ́tɛ́nɛ̀ ti Yiɛ̀ nKuyie nkùù nkpɑ mɛyɛi nku tɑummɛ̀ tɔu?
\p
\v 21 Kɛ̀ bɛ̀ɛ tɔ̃ nkɛ̀ bɛ̀ɛ nɑ́kɛ́ Kidiyɑ-Yeɑdimmu ɛì kɔbɛ kɛ dɔ̀: Fidisitɛ̃ɛ̃bɛ kpɛ̃nnɛ́nímu ti Yiɛ̀ nKuyie ntɑummɛ̀ tɔu, kɔtɛnní kɛ́ dì tùótɛ́ kɛ́kònnɛ̀ di ciɛ.
\c 7
\s1 Isidɑyɛɛribɛ do wɛ̃̀tɛnímɛ̀ Kuyie mborɛ̀ kɛ̀ kùu bɛ̀ dɛɛtɛ́
\p
\v 1 Kɛ̀ Kidiyɑ-Yeɑdimmu kɔbɛɛ kɔtɛ kɛ́túótɛ́ ti Yiɛ̀ nKuyie ntɑummɛ̀ tɔu kɛ́kònnɛ̀ kɛ́tɑnnɛ́ Abinnɑdɑbu cĩ́ɛ̃̀tɛ̀ ditɑ̃rì ĩ́nkɛ̀ kɛ́tɑ̃ɑ̃tɛ́ o birɛ Edeɑsɑɑ kòo ntɛ̀ bɑ̀ɑ.
\p
\v 2 Bɛ̀ kpɛ̃nnɛ́ ti Yiɛ̀ nKuyie ntɑummɛ̀ tɔu Kidiyɑ-Yeɑdimmu kɛ̀ dɛ̀ɛ mɔntɛ mɛsɑ̀ɑ̀ nkɛ́mmɔkɛ yɛbie nsipísìdɛ́. Kɛ̀ Isidɑyɛɛribɛɛ wɛ̃tɛ kɛ́kuɔ́nnɛ̀ ti Yiɛ̀ nKuyie nkɛ́ kù wɑmmú. 
\v 3 Kɛ̀ Sɑmmuyɛɛrii bɛ̀ nɑ̀kɛ́ kɛ dɔ̀: Kɛ̀ di mɛ̀nkɛ dɔ́ nɛ̀ di yɛ̀mmɛ̀ mɛmɔu ndi kɛ́wɛ̃tɛní ti Yiɛ̀ nKuyie mborɛ̀, dootɛ́nko dibɔɔ̀ Asitɑditee nɛ̀ yɛtɛyɛ̀ yɛmɔu kó kubotí, kɛ́tɑunnɛ̀ dimɑ́ɑ̀ ti Yiɛ̀ nKuyie nkɛ́mpĩ́ nkuù mɑ́ɑ̀ tɔ̃mmú kɛ̀ kù di dɛɛtɛ́nɛ̀ Fidisitɛ̃ɛ̃bɛ.
\p
\v 4 Kɛ̀ Isidɑyɛɛribɛɛ útóo yɛbɔkɛ̀ yɛmɔu Bɑɑdibɛ nɛ̀ Asitɑditeebɛ kɛ́ntũ ti Yiɛ̀ nKuyie mmɑ́ɑ̀. 
\v 5 Dɛ mɔ̀nnì kɛ̀ Sɑmmuyɛɛri dɔ̀, Isidɑyɛɛribɛ bɛmɔuu tíí mMisipɑɑ, kòo bɑ́ntɛ̀ ti Yiɛ̀ nKuyie mbɛ kpɛ́í.
\p
\v 6 Kɛ̀ Isidɑyɛɛribɛ tíí Misipɑɑ kɛ́yɛ̃ntɛ́ mɛniɛ nkɛ́cóúnko ti Yiɛ̀ nKuyie nyììkɛ̀, kɛ́boú dinùù kɛ́dɑ́ɑ mbɛ yɛi nkɛ dɔ̀: Ti yetɛ́nɛ̀mu ti Yiɛ̀ nKuyie. Dɛǹdɛ Misipɑɑ Sɑmmuyɛɛri bekɛ́nɛ̀mɛ̀ Isidɑyɛɛribɛ.
\b
\p
\v 7 Kɛ̀ Fidisitɛ̃ɛ̃bɛɛ keè Isidɑyɛɛribɛ tìímmɛ̀ Misipɑɑ, kɛ́bɑ́ɑ́tí yɛkpɑ̀ɑ̀tìyɔ yɛ̀nùmmù kɛ bo dokɛ́nɛ̀ Isidɑyɛɛribɛ, kɛ̀ bɛ̀ɛ ti kèè kɛ̀ kufɔ̃wɑɑ́ mbɛ̀ pĩ. 
\v 8 Kɛ̀ bɛ̀ɛ nɑ́kɛ́ Sɑmmuyɛɛri kɛ dɔ̀: Bɑ́ɑ́ ti bɔntóo bɑ́ntɛ̀ ti Yiɛ̀ nKuyie nkɛ̀ kù ti dɛɛtɛ́nɛ̀ Fidisitɛ̃ɛ̃bɛ.
\p
\v 9 Kɛ̀ Sɑmmuyɛɛri túótɛ́ dipedɑbii dìì kpɑɑ́ yɑ̃ɑ̃́ nkɛ́ dì fèútɛ́ ti Yiɛ̀ nKuyie nkɛ́tuɔ, kɛ́ kù bɑ́ntɛ̀ Isidɑyɛɛribɛ kpɛ́í nkɛ̀ kùu cɔutɛ́ o bɑ́ɑmmu. 
\v 10 Sɑmmuyɛɛri kpɑɑ́ tuɔ̀ nfɛɛ̀ pìèfɛ̀ kɛ̀ Fidisitɛ̃ɛ̃bɛ kèríní kɛ bo bɛ̀ dokɛ́nɛ̀. Kɛ̀ ti Yiɛ̀ nKuyie nduɔ́ nkɛ̀ fɛtɑɑfɛ̀ mpɛ́ú mɛdiɛ̀ nkɛ̀ kufɔ̃wɑɑ́ mpĩ́ Fidisitɛ̃ɛ̃bɛ kɛ̀ bɛ̀ɛ cokɛ́, kɛ̀ Isidɑyɛɛribɛɛ bɛ̀ nɑ. 
\v 11 Kɛ̀ bɛ̀ɛ ítɛ́ Misipɑɑ kɛ́ bɛ̀ bɛ̀ti kɛ́tuɔkɛnɛ̀ Bɛti-Kɑɑ kɛ́ bɛ̀ kùɔ. 
\v 12 Kɛ̀ Sɑmmuyɛɛrii túótɛ́ ditɑ̃́rì kɛ́fíí mMisipɑɑ nɛ̀ Sɛnni dɛ cuokɛ̀ kɛ́ dì yu kɛ dɔ̀: Mɛteèmmɛ̀-tɑ̃́rì, kɛ́bɛ́i nkɛ dɔ̀: Ti Yiɛ̀ nKuyie nti teennɛ̀nní kɛ kɑ̃̀ɑ̃́ ndiɛ ndɛ.
\p
\v 13 Kɛ̀ Fidisitɛ̃ɛ̃bɛɛ yɔtɛ Isidɑyɛɛribɛ, bɛ̀ tɛ̃́nkɛ í ndɑ̀ɑ́tí kɛ́tɑnní bɛ tenkɛ̀ miɛkɛ, kɛ̀ ti Yiɛ̀ nKuyie nni mbɛnkú ku wɛ̃rímú Fidisitɛ̃ɛ̃bɛ Sɑmmuyɛɛri fòmmu mumɔu miɛkɛ. 
\v 14 Kɛ̀ Fidisitɛ̃ɛ̃bɛɛ tɛ̃́nnɛ́ Isidɑyɛɛribɛ bɛ ɛkɛ̀ bɛ̀ do fèkɛ yɛ̀, yɛ̀ɛ̀ sokɛ́ Ekinɔɔ nɛ̀ Kɑti dɛ cuokɛ̀, kɛ̀ Isidɑyɛɛribɛɛ wɛ̃tɛ kɛ́tiekɛ bɛ tenkɛ̀. Amɔriibɛ nɛ̀ Isidɑyɛɛribɛ kɛ̀ bɛ̀ɛ nɑrikɛ.
\b
\p
\v 15 Kɛ̀ Sɑmmuyɛɛri ntú Isidɑyɛɛribɛ kóo beéntì o fòmmu mumɔu miɛkɛ. 
\v 16 Bɑ́ dìì benni kɛ níí fitɛ́ Betɛɛdi nɛ̀ Kidikɑɑdi nɛ̀ Misipɑɑ kó yɛhɛkɛ̀ kɛ́bekɛ́nɛ̀ Isidɑyɛɛribɛ. 
\v 17 Kòò dèè wèe kò nho cĩ́ɛ̃̀tɛ̀ Dɑmɑɑ kɛ́mbekùnɛ̀ Isidɑyɛɛribɛ. Ò do dɛ mmɑɑ́ ti Yiɛ̀ nKuyie ndiwũɔ̃tɔ̀nnì.
\c 8
\s1 Isidɑyɛɛribɛ bekɛ́mɛ̀ okpɑ̀ɑ̀tì
\p
\v 1-2 Sɑmmuyɛɛri kòtɛ́ dìì mɔ̀nnì kɛ́túótɛ́ o bí ìdɛ́, o kóo po Sowɛɛri nɛ̀ Abiyɑ, kɛ́ bɛ̀ kɑ̀nnɛ Bɛɛrisebɑɑ kɛ̀ bɛ̀ bo mbekùnɛ̀ Isidɑyɛɛribɛ. 
\v 3 Bɛ̀ mɛ nyí ntũnnɛ wenwe bɛ cicɛ o kó mɛborimɛ kɛ́ndɔ́ idíítí kɛ cɔú ticuuti kɛ cɑɑ̀ri tibeéntì. 
\v 4 Kɛ̀ Isidɑyɛɛribɛ kó bɛkótíbɛ̀ɛ tíí nkɛ́kɔtɛ kɛ́yɑ̀ Sɑmmuyɛɛri Dɑmɑɑ, 
\v 5 kóò nɑ̀kɛ́ kɛ dɔ̀: A kòtɛ́mu, ɑ bí mɛ nyí tũ nhɑ borimɛ, ɑ́ ti pĩ́ nhokpɑ̀ɑ̀tì kòo nti bekùnɛ̀ ibotí tɛì kpɛrɛ dòmmɛ̀.
\p
\v 6 Dɛ̀ í nnɑrikɛ Sɑmmuyɛɛri bɛ̀ ò bekɛ́mɛ̀ okpɑ̀ɑ̀tì, kòo tì beé ti Yiɛ̀ nKuyie. 
\v 7 Kɛ̀ kùu ò tɛ̃̀ńnɛ́ kɛ dɔ̀: Yie mbɛ̀ dɑ bekɛ tì. Dɛ̀ í tú fɔ̃́ nwe bɛ̀ yetɛmɛ̀, bɛ̀ yetɛ mí nwe, kɛ tɛ̃́nkɛ í dɔ́ nní mbɛ̀ bɑkɛ́. 
\v 8 Nɛ̀ m bɛ̀ dènnɛmɛ̀ Esibiti nɛ̀ yíenní bɛ̀ n yetírímu kɛ feu yɛbɔkɛ̀, bɛ̀ n dɔ̀ɔ̀mɛ̀ bɛ̀ mɛ ndɑ dɔɔri. 
\v 9 Nɛ̀ dɛ kpɛ́í nyie bɛ̀ dɑ bekɛ tì, kɛ nɛ́ bɛ̀ cɑu nweti weti kɛ́ bɛ̀ nɑ́kɛ́ okpɑ̀ɑ̀tì wèè yó mbɛ̀ bɑkɛ́ ò yó mbɛ̀ dɔ̀ɔ̀rimɛ̀.
\s1 Bɛkpɑ̀ɑ̀tìbɛ̀ yó ndɔɔrimɛ̀
\p
\v 10 Kɛ̀ Sɑmmuyɛɛrii nɑ́kɛ́ bɛ̀ɛ̀ ò bekɛ okpɑ̀ɑ̀tì ti Yiɛ̀ nKuyie nhò nɑ̀kɛ́ tì kɛ dɔ̀: 
\v 11 Ntɛ okpɑ̀ɑ̀tì wèè yó ndi bɑkɛ́ ò yó ndi dɔɔrimɛ̀: Ò bo tɑ̃nkɛ́ di miɛkɛ bɛdɑpɑ̀mbɛ̀ kɛ̀ bɛ̀ nniù o kpɑ̀rìnɑɑsɛ̃ĩ́, kɛ́tɑ̃nkɛ́ bɛsɑ̃ndèèbɛ̀ bɛ̀ɛ̀ níí yó nni o kpɑ̀rìnɑɑsɑ̃ntɛ̀ ììkɛ̀. 
\v 12 Kòo bɑɑ́ mbɛtɔbɛ̀ bɛnìtìbɛ̀ tɛkɔupíítɛ̀ (1000), kɛ́bɑɑ́ mbɛtɔbɛ̀ bɛnìtìbɛ̀ sipísìnùmmù, kɛ̀ bɛ̀ nhò kuuti kɛ kɔ̃ũ o diitì, koò mɑ̀ɑ́tí tikpɑ̀rìnɛntì nɛ̀ sinɑɑsɛ̃ĩ́ kó tinɛntì. 
\v 13 Ò bo túókɛ́ di kó bɛsɑpɑ̀mbɛ̀ kɛ̀ bɛ̀ nhò dɔ̀ɔ̀ri tùdɑ̀ɑ̀rí, koò beri, koò pũũ pɛ̃́ɛ̃̀. 
\v 14 Weè níí yó nte di pɑɑ nsɑ̀ɑ̀rɛ̀ nɛ̀ fínyĩ̀ kó dɛtie nsɑ̀ɑ̀rɛ̀ nɛ̀ odìfíè kpɛrɛ sɑ̀ɑ̀rɛ̀ kɛ́nduɔ̀ ndɛ bɛ mbɛhɑ̃ɑ̃pɔ̀mbɛ̀. 
\v 15 Kɛ̀ di kɔ̃ṹ tidiitì yoo di tɔ̃̀ũ fínyĩ̀ kó yɛbɛ, wèe bennɛ́ kɛ́dɛitɛ dɛpíínnɛ̀ kɛ́duɔ́ nho kpɑ̀ɑ̀tìcĩ́ɛ̃̀tɛ̀ kó bɛkótíbɛ̀ nɛ̀ o ɑ̃ɑ̃pɔ̀mbɛ̀. 
\v 16 Ò níí bo tɑ̃nkɛ́ di tɔ̃mbɛ̀ miɛkɛ bɛnitidɑɑbɛ̀ nɛ̀ bɛnitipòbɛ̀ nɛ̀ di miɛkɛ yɛdɑkperɛ̀ nɛ̀ yɛsɑpùnkperɛ̀ kɛ́tɑunnɛ̀ di sɑ̃mmɑrímúbɛ̀ kɛ̀ bɛ̀ mpĩ́ nho tɔ̃mmú. 
\v 17 Kɑ̀ɑ wũɔ̃ bo tɛpíítɛ̀ wèe dɛitɛ fɛ̀mɑ́ɑ̀, ipe nɛ̀ sibɔɔ́ dɛmɔu. Nɛ̀ díndi di mɔ́mmɔmbɛ kɛ̀ dí ntú o kó tidɑɑtì. 
\v 18 Dɛ mɔ̀nnì kɛ̀ di kuɔ́nnɛ̀ ti Yiɛ̀ nKuyie ndi tɑ̃ɑ̃tɛ́ wèè kpɑ̀ɑ̀tì kpɛ́í, nkù mɛ mbɑ́ɑ́ di tɛ̃́nnɛ́.
\p
\v 19 Kɛ̀ Isidɑyɛɛribɛɛ yetɛ Sɑmmuyɛɛri bɛ̀ nɑ̀kɛ́ tì kɛ dɔ̀: Ti bɑɑ dɔ́mu okpɑ̀ɑ̀tì. 
\v 20 Ti dɔ́ kɛ́ndònnɛ̀ ibotí tɛì nyi, kɛ́mmɔkɛ okpɑ̀ɑ̀tì kòo nti bekùnɛ̀ kɛ́nni ti kó fɛkpɑ̀rìnɑfɛ.
\p
\v 21 Kɛ̀ Sɑmmuyɛɛrii keè Isidɑyɛɛribɛ nɑ̀kɛ́ tì timɔu kɛ́ tì beé nti Yiɛ̀ nKuyie. 
\v 22 Kɛ̀ kùu ò tɛ̃̀ńnɛ́ kɛ dɔ̀: Duɔ́ mbɛ bɛ̀ dɑ békú dɛ̀, pĩ́ mbɛ okpɑ̀ɑ̀tì.
\p Dɛ kó difɔ̃nkúò kɛ̀ Sɑmmuyɛɛrii nɑ́kɛ́ Isidɑyɛɛribɛ kɛ dɔ̀: Bɑ́ wè wèe kò nho cĩ́ɛ̃̀tɛ̀.
\c 9
\s1 Sɑuri wɑntimɛ̀ o cicɛ sɑ̃mmɑrímúbɛ̀
\p
\v 1-2 Onìtì mɔù weè do bo Bɛnsɑmɛɛ kó dihɛì kɛ tú Bɛnsɑmɛɛ kó kuwuɔ kou, kòo yètìrì tu Afiyɑ kòo pɛitɛ́ Bekodɑ, kòo pɛitɛ́ Sedo, kòo pɛitɛ́ Abiyɛɛdi, kòo pɛitɛ́ Kiisi, kòo mmɔkɛ o kpɛrɛ kɛ̀ bɛ̀ ò dé, kòo pɛitɛ́ o birɛ kɛ́ dɛ̀ yu kɛ dɔ̀: Sɑuri, kɛ̀ dɛ̀ ntú odɑsɑ́ɑ́tì, òmɔù do í wenni Isidɑyɛɛribɛ miɛkɛ kɛ tùɔ̀kɛ Sɑuri, kòo mpɛ̃nkù bɛnìtìbɛ̀ bɛmɔu mɛokùmɛ̀.
\p
\v 3 Diyiè mɑrì kɛ̀ Kiisi sɑ̃mmɑrímúbɛ̀ɛ feti kòo nɑ́kɛ́ o birɛ Sɑuri kɛ dɔ̀: Túótɛ́ otɔ̃ntì òmɑ́ɑ̀ kɛ̀ dí kɔtɛ kɛ́wɑmmú sɑ̃mmɑrímúbɛ̀. 
\v 4 Sɑuri nɛ̀ o tɔ̃ntì kɛ̀ bɛ̀ɛ kɔtɛ kɛ́ketɛ́nɛ̀ Efɑdɑimmu tɑ̃rɛ̀, kɛ́deè kɛ́tɑ Sɑdisɑɑ tempɛ̃ mbɛ̀ mɛ nyí nyɑ̀ mùmɑmù, kɛ́pɛ̃ɛ̃tɛ́ kɛ́tɑ Sɑdimmu kɔku kɛ́mɔ́ntɛ́ kɛ́tɑ Bɛnsɑmɛɛ kɔku bɛ̀ mɛ mbɑɑ í nyɑ̀ mùmɑmù. 
\v 5 Bɛ̀ tùɔ̀kɛ dìì mɔ̀nnì Sufu tempɛ̃ nkɛ̀ Sɑurii nɑ́kɛ́ o tɔ̃ntì kɛ dɔ̀: Ti kò ntɛcĩ́ɛ̃̀tɛ̀ n cicɛ yɑ̀ɑ̀ bo ti mɔ́ntɛ́ kɛ́yɛ̃̀ nsɑ̃mmɑrímúbɛ̀ kpɛ́í kɛ́nyĩɛ̃̀kù tíì kpɛ́í.
\p
\v 6 Kòo tɔ̃ntìi ò tɛ̃̀ńnɛ́ kɛ dɔ̀: Dihɛì dìì mɛ̀ mbo ti ììkɛ̀ Kuyie nkóo nìtì mɔù weè kɛ̀ bo, kòo yètìrì feí, kòò bɛ́i ntì tìi dɔɔ̀, yóu kɛ̀ tí kɔtɛ kóò yɑ̀, kɛ̀ dɛ̀ yɛ̀mmɛ̀ ò ti nɑ́kɛ́ ti bo kɔtɛ kɛ̀ɛ̀ bíɛ́kɛ̀ muwɑmmù. 
\v 7 Kɛ̀ Sɑuri dɔ̀: Kɛ̀ ti nɛ́ kɔri ti bo ntɔ bɑ kóò pɑ̃? Ntɛ pɛ̃́ɛ̃̀ í kpɑɑ́ ti yɔ̀rɛ̀ miɛkɛ. Ti mɛ nyí mɔkɛ dɛtɛrɛ̀ mɑrɛ̀ kɛ bo ò pɑ̃. 
\v 8 Kòo tɔ̃ntìi ò tɛ̃̀ńnɛ́ kɛ dɔ̀: M mɔkɛmu fɛdífɛ̀ diɛ nti bo fɛ̀ nhò duɔ́ nkòò ti bɛnkɛ ti bo cuó nkɛ̀.
\p
\v 9-11 Kɛ̀ Sɑurii ò tɛ̃̀ńnɛ́ kɛ dɔ̀: Dɛ̀ wenni, tí kɔtɛ. Kɛ̀ bɛ̀ɛ kétɛ́ kɛ́nkɔri dihɛì Kuyie nkóo nìtì bo dì, kɛ́conɛ̀ bɛsɑpɑ̀mbɛ̀ kɛ̀ bɛ̀ tɑti kukó mmudúò kɛ̀ bɛ̀ɛ bɛ̀ bekɛ kɛ dɔ̀: Oyuwúoǹtì bo diɛnɑɑ̀? (Dɛ mɔ̀nnì Isidɑyɛɛribɛ do ɔ̃ nkɛ̀ bɛ̀ dɔ́ kɛ́beé ntìmɑtì ti Yiɛ̀ nKuyie mbɛ̀ do ɔ̃ɔ̃ yĩ́: Ti kɔtɛnɛ̀ oyuwúoǹti borɛ̀. Ti yu wè yíe nKuyie mpɑ̃ɑ̃ nɑ́ɑǹtì nɑ́ɑǹtò, bɛ do we ntú oyuwúoǹtì.)
\p
\v 12 Kɛ̀ bɛsɑpɑ̀mbɛ̀ɛ bɛ̀ nɑ̀kɛ́ kɛ dɔ̀: Ò bo kɛ tuɔ̀kùnímu, ò kɔ̀tɛní ti ciɛ nkɛ yíe nkɛ yɛ̃́ yíe ntumɛ̀ diyiè ndi bɛnìtìbɛ̀ ɔ̃ɔ̃ fíé dì iwũɔ̃ ditɔ̀nnì ĩ́nkɛ̀. Cɑ̃rikɛnɛ̀ mɛcɑ̃ɑ̃. 
\v 13 Di yóó ò yɑ̀mu, di bo ntɑti dihɛì kòò mu nyí tùɔ̀kɛ ditɔ̀nnì bɛ̀ yóó di dɛ̀. Òmɔù í yóó di kòò mu nyí tùɔ̀koo. Weè ɔ̃ɔ̃ mɔɔ ti Yiɛ̀ nKuyie nkó mɛsɑ̀ɑ̀ mbɛ̀ kù fìé ìì wũɔ̃ ĩ́nkɛ̀ kɛ̀ bɛnìtìbɛ̀ nɛ́ nɑ kɛ́di. Kɔtɛnɛ̀ miɛ mbɑ̀mbɑ̀ ndi yóó ò yɑ̀mu.
\s1 Sɑuri mɑ̀ɑ́nɛ̀mɛ̀ Sɑmmuyɛɛri
\p
\v 14 Kɛ̀ bɛ̀ɛ sɔɔtɛ́ bɛ cɛ, bɛ̀ tɑtoo dìì mɔ̀nnì dihɛì kɛ sɔ̃́ nSɑmmuyɛɛri yɛ̀nní kɛ kɔri ditɔ̀nnì borɛ̀ kɛ́ bɛ̀ conɛ̀.
\b
\p
\v 15 Kɛ mɛ nsɔ̃́ ti Yiɛ̀ nKuyie nwee nɑ̀kɛ́ Sɑmmuyɛɛri kɛ dɔ̀: 
\v 16 Dɛ̀ nɑɑ bo nkɑ̃́ɑ̃́kɛ́ miɛ nkɛ̀ n duɔ́ nkɑ̀ɑ mɑ́ɑ́nɛ̀ onìtì mɔù Bɛnsɑmɛɛ kó kuwuɔ kou, ɑ ò pĩ ntikpɑ̀tì kòo mbɑkɛ́ n kó bɛnìtìbɛ̀ Isidɑyɛɛribɛ, kɛ́ bɛ̀ dɛɛtɛ́nɛ̀ Fidisitɛ̃ɛ̃bɛ, bɛ̀ n kuɔ̀nnɛ̀mu kɛ̀ n yɑ̀ bɛ sémmɛ̀. 
\v 17 Sɑmmuyɛɛri yɑ̀ dìì mɔ̀nnì Sɑuri kɛ̀ ti Yiɛ̀ nKuyie nhò nɑ̀kɛ́ kɛ dɔ̀: Ntɛ onìtì n wee dɑ nɑ́ɑ́ nwèè kpɛ́í, weè yó mbɑkɛ́ n nìtìbɛ̀ Isidɑyɛɛribɛ.
\b
\p
\v 18 Kɛ̀ Sɑurii tɔ́ɔ́nko Sɑmmuyɛɛri borɛ̀ dihɛì kó dibòrì borɛ̀ kóò bekɛ kɛ dɔ̀: N dɑ bɑ́ɑ́mmu n nɑ́kɛ́ oyuwúoǹtì borɛ̀? 
\v 19 Kɛ̀ Sɑmmuyɛɛrii ò tɛ̃̀ńnɛ́ kɛ dɔ̀: Míì tú ɑ wɑnti wè ti kɔtɛ ditɔ̀nnì borɛ̀, yíe nti yóó wɛ̃nnɛ́ kɛ́dimu, nɑnkɛ dikṹnweńnì kɛ̀ n dɑ nɑ́kɛ́ tìì dɑ tɔ, kɑ̀ɑ kò. 
\v 20 Sɑ̃mmɑrímúbɛ̀ bɛ̀ɛ̀ feti kɛ̀ dɛ̀ mɔ̀kɛ yíe nyɛwè yɛ̀tɑ̃ɑ̃ti, ɑ bɑ́ nyĩɛ̃̀kù, bɛ̀ bɛ̀ yɑ̀mu. Dɛ̀mɑrɛ̀ nɛ́ bomu dɛ̀ɛ̀ pɛ̃ɛ̃tɛ́ mɛmmɛ, Isidɑyɛɛribɛ bùɔ́ fɔ̃́ nwe nɛ̀ ɑ cĩ́ɛ̃̀tɛ̀.
\p
\v 21 Kɛ̀ Sɑuri dɔ̀: Mí nwèè tu Bɛnsɑmɛɛ kó kuwuɔ kunɑɑ̀mùnkù sɑ́m̀pɔ́kù kou, kɛ̀ n cĩ́ɛ̃̀tɛ̀ tu tɛsɑ́m̀pɔ́tɛ̀. Dɛ̀ yĩmɛ kɑ̀ɑ n nɑ̀ɑ́nnɛ̀ dɛ kó tinɑ́ɑǹtì?
\b
\p
\v 22 Mɛm̀mɛ kɛ̀ Sɑmmuyɛɛrii túótɛ́ Sɑuri nɛ̀ o kóo tɔ̃ntì kɛ̀ bɛ̀ɛ tɑ kucɑdiitidieku, kòo bɛ̀ kɑ̀nnɛ yɛkotikɑ̀rɛ̀ nɛ̀ bɛtɔbɛ̀ ò yu bɛ̀ sipísìtɑ̃ɑ̃ti. 
\v 23 Kòo deè kɛ́nɑ́kɛ́ ocɑbénníwè kɛ dɔ̀: Túótɛ́ní kumɑɑ n do dɑ duɔ́ nkù kɑ̀ɑ cɑ̃́nnɛ́. 
\v 24 Kòo kɔtɛ kɛ́túótɛ́ní dikpèrì nɛ̀ kudiiku kɛ́ĩ́nnɛ́ Sɑuri ììkɛ̀, kɛ̀ Sɑmmuyɛɛrii nɑ́kɛ́ Sɑuri kɛ dɔ̀: Ntɛ kumɑɑ nti dɑ sùɔ́ nkù yíe nkó diyiè kpɛ́í, túótɛ́ ku kɛ̀ dí cɑ́ɑ́kɛ́ fɔ̃́ nnɛ̀ n yu bɛ̀.
\p Mɛm̀mɛ kɛ̀ Sɑurii wɛ̃nnɛ́nɛ̀ Sɑmmuyɛɛri kɛ̀ bɛ̀ɛ di dɛ yiè. 
\v 25 Kɛ̀ bɛ̀ɛ deè kɛ́ítɛ́ ditɔ̀nnì borɛ̀ kɛ́konní dihɛì. Bɛ̀ kɑ̀ri dìì mɔ̀nnì kudɑ̀nkù, Sɑmmuyɛɛri nɛ̀ Sɑuri kɛ̀ bɛ̀ nnɑ́ɑ́.
\s1 Sɑmmuyɛɛri pĩ̀ḿmɛ̀ Sɑuri tikpɑ̀tì
\p
\v 26 Mɛm̀mɛ kɛ̀ dɛ̀ɛ wentɛ́ Sɑuri nɛ̀ o kóo tɔ̃ntì kɛ̀ bɛ̀ɛ pikɛ́ entɛ. Diyiè yɛ̀nní dìì mɔ̀nnì kɛ̀ Sɑmmuyɛɛrii yú Sɑuri kudɑ̀nkù ĩ́nkɛ̀ kɛ dɔ̀: Kétɛ́! N dɔ́ kɛ́ dɑ cíemmu.
\p Mɛm̀mɛ kɛ̀ bɛ̀ɛ nɛí kɛ́kétɛ́. 
\v 27 Bɛ̀ tùɔ̀kɛ dìì mɔ̀nnì dihɛì mɑ̀nku kɛ̀ Sɑmmuyɛɛrii nɑ́kɛ́ Sɑuri kɛ dɔ̀: Duɔ́ nkɑ̀ɑ kóo tɔ̃ntìi niitɛ́.
\p Kòo tɔ̃ntìi niitɛ́ kɛ̀ Sɑmmuyɛɛri dɔ̀: Fɔ̃́ nni nkpɑɑ́ diɛ̀ nkɛ̀ n dɑ tuo ti Yiɛ̀ nKuyie nní n nɑ̀kɛ́ tì.
\c 10
\p
\v 1 Mɛm̀mɛ kɛ̀ Sɑmmuyɛɛrii túótɛ́ mɛkùɔ̀ nnɛ̀ tɛdéntɛ̀ kɛ́cóú nSɑuri yuu kóò ɔrí kɛ́bɛ́i nkɛ dɔ̀: Ti Yiɛ̀ nKuyie nkuù dɑ tɑ̃ɑ̃tɛ́ yíe nkɑ̀ɑ bo nkpɑ̀ɑ̀tirì ku nìtìbɛ̀ kɛ́ bɛ̀ dɛɛtɛ́nɛ̀ bɛ dootitɔbɛ̀ bɛ̀ɛ̀ bɛ̀ fitɛ́. Ntɛ dɛ̀ɛ̀ yóó bɛnkɛ ti Yiɛ̀ nKuyie ndɑ tɑ̃ɑ̃tɛ́mɛ̀ kɑ̀ɑ bo nkpɑ̀ɑ̀tirì ku kɔbɛ. 
\v 2 A yóó ítóo yíe m borɛ̀, ɑ bo mberínɛ̀ Sedisɑɑ kɛ́conɛ̀ bɛnìtìbɛ̀ bɛ̀dɛ́bɛ̀ Dɑsɛɛdi fɔ̃ti borɛ̀, Bɛnsɑmɛɛ ɛì mɑ̀nku, kɛ̀ bɛ̀ dɑ nɑ́kɛ́ kɛ dɔ̀: Bɛ̀ yɑ̀mu ɑ cicɛ sɑ̃mmɑrímúbɛ̀ ɑ do wɑɑ̀ mbɛ̀. A cicɛ tɛ̃́nkɛ í buɔ̀ bɛ kpɛti ò nɛ́ yĩɛ̃̀kù fɔ̃́ nwe kɛ mɔ̀ńtɛ́ ò bo yĩ́mɛ̀ kɛ́ dɑ yɑ̀. 
\v 3 Kɑ̀ɑ pɛ̃ɛ̃tɛ́ dɛndɛ kɛ́tuɔkɛ bɛ̀ tu dɛ̀ Tɑbɔɔ-tie borɛ̀, bɛnìtìbɛ̀ bɛ̀tɑ̃ɑ̃ti bo dɛ̀ ndɑ conɛ̀ kɛ kɔri ti Yiɛ̀ nKuyie ncĩ́ɛ̃̀tɛ̀ Betɛɛdi. Kòò mɔù tɔ yɛbɔbɛ yɛ̀tɑ̃ɑ̃ti, kòo dɛ́rì tɔ pɛ̃́ɛ̃̀bɛ̀ bɛ̀tɑ̃ɑ̃ti, kòo tɑ̃ɑ̃́nwè tɔ mɛnɑɑ̀ nnɛ̀ kudɔukù. 
\v 4 Kɛ̀ bɛ̀ dɑ dɔu nkɛ dɑ pɑ̃ pɛ̃́ɛ̃̀bɛ̀ bɛ̀dɛ́bɛ̀ ɑ cɔutɛ́. 
\v 5 Kɑ̀ɑ dèè ɑ pɛ̃ɛ̃tɛ́ Kibeɑ Kuyie ntɑ̃tɛ̀ Fidisitɛ̃ɛ̃bɛ ɑ̃ɑ̃pɔ̀mbɛ̀ kɑrì. Kɑ̀ɑ tɔɔ́nnɛ̀nko dìì mɔ̀nnì dihɛì ɑ bo conɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ mɑbɛ̀ ditĩ̀nnì kɛ̀ bɛ̀ cutiní ditɔ̀nnì bíɛ́kɛ̀, bɛ̀ɛ̀ ni kɛ̀ bɛ̀ bie ntikùtìdùùtì nɛ̀ yɛbɑ̀rɛ̀ kɛ eu siheú nɛ̀ itɑ̃rí, kɛ̀ mɛpɑ̃ɑ̃yɛ̀mmɛ̀ bɛ̀ bo kɛ̀ bɛ̀ dìè nkɛ ɑu. 
\v 6 Dɛ mɔ̀nnì ti Yiɛ̀ nKuyie nYɑɑ́ mbo dɑ tɑ kɑ̀ɑ yɛ̀mmɛ̀ɛ dontɛnɛ̀ bɛ kɔ̃mɛ kɑ̀ɑ ceetɛ kɛ́ bɛ̀ nɑɑ́nnɛ̀. 
\v 7 Kɛ̀ dɛndɛ kó dimɑ̀ɑ̀ dɔ̀ɔ̀ dìì mɔ̀nnì ɑ́ dɔɔ̀ ɑ wúó ntì, ti Yiɛ̀ nKuyie ndɑ bommu. 
\v 8 A niitɛ́ kɛ́kɔtɛ Kidikɑɑdi, n yóó tũnnɔɔmu kɛ́fíé iwũɔ̃ ti Yiɛ̀ nKuyie nyìì bo tuɔ nnɛ̀ mɛtɑummɛ̀ kpɛyi, ɑ nni mbɑɑ yɛwe yɛ̀yiekɛ̀ miɛkɛ, n yóó kɔtoomu kɛ dɑ nɑ́kɛ́ ɑ dò nkɛ́dɔɔ̀ dɛ̀.
\p
\v 9 Sɑuri ìtɛ́ dìì mɔ̀nnì Sɑmmuyɛɛri borɛ̀ kɛ̀ ti Yiɛ̀ nKuyie nceetɛ o yɛ̀mmɛ̀. Sɑmmuyɛɛri do nɑ̀kɛ́ tìì kó dimɑ̀ɑ̀ kɛ̀ tìì dɔ̀ɔ̀ dɛ yiè. 
\v 10 Ò tùɔ̀kɛ dìì mɔ̀nnì Kibeɑ, kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ mɑbɛ̀ pɛ́uu kɔtɛní kóò co, kɛ̀ Kuyie nYɑɑ́ nhò tɑ, kòo bɛ̀ nɑɑ́nnɛ̀ kɛ́tɑ Kuyie mpɑ̃ɑ̃nɑ́ɑǹtì nɑ́ɑm̀mù. 
\v 11 Bɛ̀ɛ̀ do ò yɛ̃́ nɛ̀ dimɔ̀nnì kɛ̀ bɛ̀ɛ yɑ̀ ò nɑ̀ɑ́mmɛ̀ Kuyie mpɑ̃ɑ̃nɑ́ɑǹtì nɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀, kɛ́mbékú bɛtɔbɛ̀ kɛ tú: Ɔ̃nti tùɔ̀kɛní Kiisi birɛ, Sɑuri múnkɛ nɑɑ́mmu Kuyie mpɑ̃ɑ̃nɑ́ɑǹtì nɑ́ɑǹtòɑ̀? 
\v 12 Kɛ̀ dɛ kó dihɛì kou mɔùu bɛ́i nkɛ dɔ̀? Bɛ kóo nìùtì nɛ́ tú we? Dɛǹdɛ dinɑ́ɑǹhɑ̃ntírì diì nyɛ̀nnímɛ̀ dìì tú: Sɑuri múnkɛ nɑɑ́mmu Kuyie mpɑ̃ɑ̃nɑ́ɑǹtì nɑ́ɑǹtòɑ̀?
\p
\v 13 Sɑuri yɛ̀mmɛ̀ tɛ̃̀ńnɛ́ní dìì mɔ̀nnì kòo kɔtɛ ditɔ̀nnì bo kɛ̀. 
\v 14 Kòo cicɛ sɑ́m̀pɔ́ùu ò bekɛ kɛ dɔ̀: Di kɔ̀tɛ kɛ fɔ̃́ nnɛ̀ ɑ kóo tɔ̃ntì? Kɛ̀ Sɑuri dɔ̀: Ti kɔ̀tɛ sɑ̃mmɑrímúbɛ̀ wɑmmù mmu, kɛ mɔ̀ńtɛ́ kɛ yóu kɛ kɔ̀tɛ Sɑmmuyɛɛri borɛ̀ tipɑ̃ɑ̃tì. 
\v 15 Kòo cicɛ dɔ̀: N nɑ́kɛ́ Sɑmmuyɛɛri di nɑ̀kɛ́ tì. 
\v 16 Kɛ̀ Sɑuri dɔ̀: Ò ti nɑ̀kɛ́ kɛ tú bɛ̀ yɑ̀mu sɑ̃mmɑrímúbɛ̀.
\p Ò mɛ nyí nhò nɑ̀kɛ́ tìmɑtì tìì tukúnɛ̀ tikpɑ̀tì.
\s1 Sɑuri nɑɑ́mmɛ̀ okpɑ̀ɑ̀tì
\p
\v 17 Kɛ̀ Sɑmmuyɛɛrii tíí nyIsidɑyɛɛribɛ bɛmɔu Misipɑɑ ti Yiɛ̀ nKuyie mborɛ̀, 
\v 18 kɛ́ bɛ̀ nɑ̀kɛ́ kɛ dɔ̀: Ntɛnɛ̀ ti Yiɛ̀ nKuyie ntínti Isidɑyɛɛribɛ ti tũ nkù bɛ́i ntì: Ti Yiɛ̀ nKuyie ntú kuù di dènnɛ Esibiti kɛ di dɛɛtɛ́nɛ̀ Esibiti kɔbɛ nɛ̀ di dootitɔbɛ̀ bɛ̀ɛ̀ do di fɛ̃́ũnko. 
\v 19 Yíe nkó diyiè kɛ̀ di kù yetɛ kunku kùù di dɛɛtɛ́nɛ̀ mɛfɛ̃́ṹtímɛ̀ nɛ̀ mɛyɛǹcɑɑ̀rìmɛ̀, kɛ yɛ̃ n di pĩ́ nhokpɑ̀ɑ̀tì! Kɔtɛnní tũnkɛ́ kɛ́tíí ti Yiɛ̀ nKuyie nyììkɛ̀ di wuɔ ndòmmɛ̀ nɛ̀ di nɑɑ̀mùntì dòmmɛ̀.
\p
\v 20 Mɛm̀mɛ kɛ̀ Sɑmmuyɛɛrii tíí nyIsidɑyɛɛribɛ bɛ wuɔ ndòmmɛ̀ kɛ́tɑ̃ũ tɛ́tɛ́. Kɛ̀ ti Yiɛ̀ nKuyie ntɑ̃ɑ̃tɛ́ Bɛnsɑmɛɛ kó kuwuɔ. 
\v 21 Kòo mbɛ̀ yu bɛ nɑɑ̀mùntì dòmmɛ̀ kɛ̀ ti Yiɛ̀ nKuyie ntɑ̃ɑ̃tɛ́ Mɑtidi kɔku, kɛ̀ bɛ̀ mbɛ̀ bɑ̀ɑ̀tì onìtì omɑ́ɑ̀ omɑ́ɑ̀ kɛ̀ Kuyie n tɑ̃ɑ̃tɛ́ Sɑuri Kiisi birɛ. Kɛ̀ bɛ̀ɛ ò wɑmmú kɛ́mɔ́ntɛ́. 
\v 22 Kɛ̀ bɛ̀ɛ yóu kɛ́wɛ̃tɛ kɛ́bekɛ ti Yiɛ̀ nKuyie nkɛ dɔ̀: Dɛ kóo nìtì bɑɑ kɔ̀tɛnímu diɛnɑɑ̀? Kɛ̀ ti Yiɛ̀ nKuyie ndɔ̀: Ntɛ we kɛ sɔri tinɛntì miɛkɛ.
\p
\v 23 Kɛ̀ bɛ̀ɛ kɔtɛ kóò tùótɛ́ní, kɛ́cónnɛ́ bɛnìtìbɛ̀ cuokɛ̀, kòo mbɛ̀ òkùnɛ̀ bɛmɔu.
\p
\v 24 Kɛ̀ Sɑmmuyɛɛrii nɑ́kɛ́ bɛnìtìbɛ̀ kɛ dɔ̀: Ntɛnɛ̀ ti Yiɛ̀ nKuyie ntɑ̃ɑ̃tɛ́ wè, ò í mɑ̀nnɛ̀ òmɔù Isidɑyɛɛribɛ miɛkɛ.
\p Bɛmɔu kɛ̀ bɛ̀ɛ pĩɛ̃kɛ́ kɛ dɔ̀: Okpɑ̀ɑ̀tì mbo sɑ̃́ɑ̃̀. 
\v 25 Kɛ̀ Sɑmmuyɛɛri nɛ́ bɛ̀ nɑ̀kɛ́ bɛ̀ dò nkɛ́ndɔɔrimɛ̀ okpɑ̀ɑ̀tì, kɛ́ ti wɑ̃̀ri dipɑ́tíri miɛkɛ, kɛ́dɔú nti Yiɛ̀ nKuyie ncĩ́ɛ̃̀tɛ̀ miɛkɛ, kɛ́deè kɛ́cíɛ nyIsidɑyɛɛribɛ bɛmɔu kɛ̀ bɛ̀ɛ kũṹ mbɛ cɛ̃́ĩ. 
\v 26 Kɛ̀ Sɑuri múnkɛɛ kò nho cĩ́ɛ̃̀tɛ̀ Kibeɑ kɛ nɛínɛ̀ bɛnìtìbɛ̀ mɔ́mmɔmbɛ ti Yiɛ̀ nKuyie nkɑ̀ɑ́kɛ́ bɛ̀ɛ̀ yɛ̀mmɛ̀. 
\v 27 Nɛ̀ mɛmmɛ kɛ̀ itookperí yɛmbɛ̀ ḿbo bɛ̀ɛ̀ tu: Onìtì yiè mbo yĩ́mɛ kɛ́ ti dɛɛtɛ́? Bɛ̀ do ò sènkɛ̀rìmu bɑ́ bɛmbɛ í nhò pɑ̃ yɛpɑ̃rɛ̀. Sɑuri mɛ nyí mbɛ́i ntìmɑtì.
\c 11
\s1 Sɑuri nɑmɛ̀ Amɔriibɛ
\p
\v 1 Kɛ̀ Nɑɑsi Amɔdiibɛ kpɑ̀ɑ̀tìi kɔtɛní kɛ́pi Yɑbɛsi ɛì kɔbɛ kɛ bo bɛ̀ dokɛ́nɛ̀ Kɑdɑɑdi tempɛ̃ mmiɛkɛ, kɛ̀ Yɑbɛsi ɛì kɔbɛɛ ò nɑ̀kɛ́ kɛ dɔ̀: Tí dɔɔ̀nɛ̀ mɛtɑummɛ̀, ti yó nyíémmu ɑ kpɛti. 
\v 2 Kɛ̀ Nɑɑsi Amɔriibɛ kpɑ̀ɑ̀tìi bɛ̀ nɑ̀kɛ́ kɛ dɔ̀: N yiemmu kɛ bo di dɔɔ̀nɛ̀ mɛtɑummɛ̀, n nɛ́ dò nkɛ́kpɛ́kɛ́ di nuɔ nyouyi nyi kɛ́ɑ̃nnɛ́ ifɛi Isidɑyɛɛribɛ bɛmɔu.
\p
\v 3 Kɛ̀ Yɑbɛsi ɛì kó bɛkótíbɛ̀ dɔ̀: Tí pɑ̃ yɛwe yɛ̀yiekɛ̀ kɛ̀ ti tɔ̃ mbɛnìtìbɛ̀ kɛ̀ bɛ̀ɛ ce nyIsidɑyɛɛribɛ tenkɛ̀ kɛmɔu kɛ́ bɛ̀ nɑ̀kɛ́. Kòò mɔù í bo wèè bo ti teennɛ̀ ti nɛ́ dɑ duɔ́ ntimɑ́ɑ̀.
\p
\v 4 Kɛ̀ bɛ̀ɛ tɔ̃ nkɛ̀ bɛ̀ɛ kɔtɛ Kibeɑ Sɑuri ɛì kɛ́nɑ́kɛ́ bɛnìtìbɛ̀ tìì tùɔ̀kɛní, kɛ̀ bɛ̀ɛ tiitɛ́ bɛmɔu yɛdɑbùò. 
\v 5 Kɛ sɔ̃́ ndɛ mɔ̀nnì Sɑuri kũntinní o nɑ̀ɑ̀kɛ kupɑku kɛ́bekɛ́ mùù te kɛ̀ bɛnìtìbɛ̀ bɛmɔu kuɔ̀, kɛ̀ bɛ̀ɛ ò nɑ̀kɛ́ Yɑbɛsi kɔbɛ bɛ̀ nɑ̀kɛ́ tì. 
\v 6 Sɑuri tì kèè dìì mɔ̀nnì kɛ̀ Kuyie nYɑɑ́ nhò pìɛ́ nkɛ̀ dɛ̀ɛ ò yonkɛ mɛdiɛ̀, 
\v 7 kòo pĩ́ nyinɑ̀ɑ̀kɛ ìdɛ́ì kɛ́kuɔ, kɛ́kékɛ́, kɛ́duɔ́ mbɛnìtìbɛ̀ kɛ̀ bɛ̀ɛ cennɛ̀ Isidɑyɛɛribɛ tenkɛ̀ kɛmɔu, kɛ nɑ́ɑ́ nkɛ́tú wèè bo yetɛ kɛ í nnɛinɛ̀ Sɑmmuyɛɛri nɛ̀ Sɑuri mudoò, bɛ̀ yóó dɔɔ̀ miɛ̀ mbotí nku o nɑ̀ɑ̀kɛ.
\p Kɛ̀ ti Yiɛ̀ nKuyie ndonnɛ́ bɛ kɔ̃m̀bùɔ̀tì kɛ̀ bɛ̀ɛ tíí nkɛ́ndò nhonìtì òmɑ́ɑ̀. 
\v 8 Kɛ̀ Sɑurii bɛ̀ kɑ̀ɑ mBesɛki kɛ̀ bɛ̀ mbo sikɔupíkɔùsìtɑ̃ɑ̃ti (300000), Sudɑɑ kɔbɛ sikɔupípísìtɑ̃ɑ̃ti (30000). 
\v 9 Kɛ̀ bɛ̀ɛ nɑ́kɛ́ bɛ̀ tɔ̃nní bɛ̀ kɛ dɔ̀: Kɔtɛnɛ̀ kɛ́nɑ́kɛ́ Yɑbɛsi kɔbɛ kɛ dɔ̀: Nɑnkɛ diyiè bo nyóó cónnɛ́ yɛyɔ kɛ̀ di pɛ́tɛ́ mɛdɛɛtímɛ̀. Kɛ̀ yɛtɔ̃rɛ̀ɛ kɔtɛ kɛ́nɑ́kɛ́ Yɑbɛsi kɔbɛ kɛ̀ diwɛ̀ìi bɛ̀ pĩ. 
\v 10 Kɛ̀ bɛ̀ɛ nɑ́kɛ́ Amɔriibɛ kɛ dɔ̀: Nɑnkɛ ti yóó di duɔ́mmu timɑ́ɑ̀ kɛ̀ dí ti dɔɔ̀nɛ̀ di dɔ́mɛ̀.
\p
\v 11 Kɛ̀ dɛ̀ɛ wentɛ́ kɛ̀ Sɑurii totɛ́ Isidɑyɛɛribɛ yɛtĩ̀rɛ̀ yɛ̀tɑ̃ɑ̃ti, kɛ̀ bɛ̀ɛ pikɛ cutɛ kɛ́tɑ Amɔriibɛ kɑrì kɛ́ bɛ̀ potɛ́, kɛ̀ diyiè nyóó cónnɛ́ yɛyɔ kɛ̀ bɛ̀ bɛ̀ ɑutɛ́, bɛ̀ɛ̀ yentɛ́ kɛ̀ bɛ̀ɛ cíɛ́tɛ́ bɛmɑ́ɑ̀ bɛmɑ́ɑ̀. 
\v 12 Kɛ̀ Isidɑyɛɛribɛɛ nɑ́kɛ́ Sɑmmuyɛɛri kɛ dɔ̀: Ɔ̃̀mbɛ do tú: Sɑuri bɑ́ ntú ti kóo kpɑ̀ɑ̀tì? Ti bɛnkɛnɛ̀ bɛ kɛ̀ tí bɛ̀ kùɔ.
\p
\v 13 Kɛ̀ Sɑurii yetɛ kɛ dɔ̀: Yíe nwe ti Yiɛ̀ nKuyie ndɛɛtɛ́mɛ̀ Isidɑyɛɛribɛ, ti í yóó kuɔ òmɔù.
\p
\v 14 Dɛ kó difɔ̃nkúò kɛ̀ Sɑmmuyɛɛrii nɑ́kɛ́ Isidɑyɛɛribɛ kɛ dɔ̀: Tí kɔtɛnɛ̀ Kidikɑɑdi kɛ́dɔɔ̀ kɛ́fíí nSɑuri kpɑ̀tì.
\p
\v 15 Kɛ̀ Isidɑyɛɛribɛ bɛmɔuu kɔtɛ Kidikɑɑdi ti Yiɛ̀ nKuyie tɑummɛ̀ tou borɛ̀ kɛ́dɔɔ̀ kɛ́kɑnnɛ Sɑuri tikpɑ̀tì kɛ́fíé iwũɔ̃ ti Yiɛ̀ nKuyie mmɛtɑummɛ̀ kpɛyi. Sɑuri nɛ̀ Isidɑyɛɛribɛ bɛmɔu kɛ̀ bɛ̀ nyɑ̃nku.
\c 12
\s1 Sɑmmuyɛɛri cɑummɛ̀ Isidɑyɛɛribɛ
\p
\v 1 Kɛ̀ Sɑmmuyɛɛrii nɑ́kɛ́ Isidɑyɛɛribɛ bɛmɔu kɛ dɔ̀: N dɔ̀ɔ̀mu di m bekɛ tì kɛ di pĩ nhokpɑ̀ɑ̀tì. 
\v 2 Di mmɔ̀nnì weè yó ndi ni. Mí nkòtɛ́mu kɛ̀ n yùtì pɛikɛ, kɛ̀ n kó bɛdɑpɑ̀mbɛ̀ di bonɛ̀. N di niitɛ́ nɛ̀ m bíkɛ́mbɛ́ntì nti kɛ tùɔ̀kɛnní yíe. 
\v 3 N cómmú yíe ti Yiɛ̀ nKuyie nyììkɛ̀ nkɛ nɛ̀ okpɑ̀ɑ̀tì kù tɑ̃ɑ̃tɛ́ wè ììkɛ̀, kɛ̀ di m mɔkɛnɛ̀ tì, dí tì nɑ̀kɛ́. Kɛ̀ ǹ cɔutɛ́ òmɔù nɑ̀ɑ̀fɛ̀ yoo o sɑ̃mmɑrímú, kɛ̀ n ciitɛ́ òmɔù kɛ di o kpɛrɛ, yoo n fɛ̃́ũ nhòmɔù, kɛ̀ m̀ mɛ ncɔutɛ́ òmɔù kó idíítí nyi kòo kòńnɛ́, kɛ̀ ǹ dɛ̀ dɔ̀ɔ̀ m bo dɛ̀ ndi yietí.
\p
\v 4 Kɛ̀ Isidɑyɛɛribɛɛ ò tɛ̃̀ńnɛ́ kɛ dɔ̀: Ɔ́ɔ̀, ɑ í ciitɛ́ òmɔù kɛ di o kpɛrɛ, ɑ mɛ nyí fɛ̃́ũ nhòmɔù, ɑ í cɔutɛ́ òmɔù kó ticuuti.
\p
\v 5 Kɛ̀ Sɑmmuyɛɛrii bɛ́i nkɛ dɔ̀: Ti Yiɛ̀ nKuyie nnɛ̀ okpɑ̀ɑ̀tì bɛ̀ yɑ̀mu di í yɑ̀mɛ̀ n kó mɛyɛi mmɑmɛ̀. Kɛ̀ bɛ̀ dɔ̀: Ɛ̃ɛ̃, kù yɑ̀mu.
\p
\v 6 Kɛ̀ Sɑmmuyɛɛrii yíɛ́ kɛ́bɛ́i nkɛ dɔ̀: Ti Yiɛ̀ nKuyie nyɑ̀mu kunku kùù do tɑ̃ɑ̃tɛ́ Mɔyiisi nɛ̀ Anɔɔ kɛ̀ bɛ̀ɛ dennɛ di yɛmbɛ̀ Esibiti. 
\v 7 Di mmɔ̀nnì tíínnɛ̀nní ti Yiɛ̀ nKuyie mborɛ̀ kɛ̀ n di bɛnkɛ kù di dɔ̀ɔ̀ mɛ̀ɛ̀ sɑ̀ɑ̀ ndíndi nɛ̀ di yɛmbɛ̀. 
\v 8 Sɑkɔbu do kɔ̀tɛ Esibiti kɛ̀ bɛ̀ nfɛ̃́ũnko di yɛmbɛ̀ kɛ̀ bɛ̀ɛ kuɔnnɛ̀ ti Yiɛ̀ nKuyie, kɛ̀ kùu bɛ̀ duɔ́nní Mɔyiisi nɛ̀ Anɔɔ, kɛ̀ bɛ̀ɛ bɛ̀ dènnɛ kɛ́ bɛ̀ kɔ̀tɛnɛ̀ di mɛ̀ mbo dìì ɛì. 
\v 9 Kɛ̀ dɛ̀ mboní kɛ̀ di yɛmbɛ̀ɛ yɛ̃̀ nti Yiɛ̀ nKuyie, nɛ̀ dɛ kpɛ́í nkɛ̀ ti Yiɛ̀ nKuyie nduɔ́ nkɛ̀ Sisedɑɑ Asɔɔ Fidisitɛ̃ɛ̃bɛ kóo ɑ̃ɑ̃pɔ̀nkótì nɛ̀ Mɔɑbu kóo kpɑ̀ɑ̀tì kɛ̀ bɛ̀ɛ bɛ̀ kpɑ̀nnɛ kɛ́ bɛ̀ nɑ. 
\v 10 Kɛ̀ di yɛmbɛ̀ tó kuɔ́nnɛ̀ ti Yiɛ̀ nKuyie nkɛ́bɛ́i nkɛ dɔ̀: Ti Yiɛ̀ nKuyie, ti cɑ̀ɑ̀rɛ̀mu, ti dɑ yóu mɛ̀ɛ̀ kpɛ́í nkɛ tũ nyɛbɔkɛ̀ Bɑɑdibɛ nɛ̀ Asitɑditeebɛ, ti dɛɛtɛ́nɛ̀ ti dootitɔbɛ̀ kɛ̀ tí mpĩ́ nhɑ tɔ̃mmú. 
\v 11 Mɛm̀mɛ kɛ̀ ti Yiɛ̀ nKuyie nduɔnní Sedeɔ̃ɔ̃ nɛ̀ Edɑnni nɛ̀ Sɛfutee nɛ̀ mí nSɑmmuyɛɛri, kɛ̀ tí di dɛɛtɛ́nɛ̀ di dootitɔbɛ̀ bɛ̀ɛ̀ do di fitɛ́, kɛ̀ di nɑ kɛ bonɛ̀ diwɛ̀ì di nhɛì miɛkɛ. 
\v 12 Di yɑ̀ dìì mɔ̀nnì Nɑɑsi, Amɔriibɛ kpɑ̀ɑ̀tì kòò kèríní kɛ bo di dòkɛ́nɛ̀ kɛ dɔ̀ di dɔ́ okpɑ̀ɑ̀tì kɛ yɛ̃̀ nti Yiɛ̀ nKuyie ntumɛ̀ di kóo kpɑ̀ɑ̀tì. 
\v 13 Di mmɔ̀nnì ntɛnɛ̀ okpɑ̀ɑ̀tì di tɑ̃ɑ̃tɛ́ wè, díì yɛ̃ ndi ò dɔ́ kɛ̀ ti Yiɛ̀ nKuyie mmɛ nwè ndi duɔ́. 
\v 14 Kɛ̀ di dé ti Yiɛ̀ nKuyie nkɛ pĩ́ nku tɔ̃mmú, kɛ yíe nku kpɛti, kɛ í yetɛ tìmɑtì, mɛmmɛ díndi nɛ̀ di kóo kpɑ̀ɑ̀tì di bo ntɑunɛ̀mɛ̀ ti Yiɛ̀ nKuyie. 
\v 15 Kɛ̀ di mɛ nyí yie nku kpɛti kɛ̀ di yetɛ ku kuɔ́, kù bo di bɛnkɛ ku wɛ̃rímú kù do mù bɛnkɛ mɛ̀ɛ̀ botí di yɛmbɛ̀. 
\v 16 Nkpɑɑ́nɛ̀ diɛ̀ nkɛ́yɑ̀ tidiɛtì ti Yiɛ̀ nKuyie nyóó dɔɔ̀ tì. 
\v 17 Dɛ̀ í dò ndididɛ̀ì ndi ti bomɑ̀ɑ̀? N yó mbɑ́ɑ́mmu ti Yiɛ̀ nKuyie nkɛ̀ fɛtɑɑfɛ̀ɛ kperi kɛ́ni, kɛ̀ dí bɑntɛ́ di cɑ̀kɛmɛ̀ mɛdiɛ̀, di yɛ̃mmɛ̀ di dɔ́ okpɑ̀ɑ̀tì.
\p
\v 18 Kɛ̀ Sɑmmuyɛɛri mbɑ́ɑ́ nti Yiɛ̀ nKuyie nkɛ̀ fɛtɑɑfɛ̀ɛ kperi kɛ́ni dɛ kó diyiè, kɛ̀ Isidɑyɛɛribɛɛ yɔtɛ ti Yiɛ̀ nKuyie nnɛ̀ Sɑmmuyɛɛri. 
\v 19 Kɛ̀ bɛ̀ɛ nɑ́kɛ́ Sɑmmuyɛɛri kɛ dɔ̀: Bɑ́ntɛ̀ ɑ Yiɛ̀ nKuyie nhɑ tũ nkù ti kpɛ́í nkɛ̀ ti bɑ́ɑ́ kú, kɛ yɛ̃́ ti yɛi nyí sénnímɛ̀, kɛ̀ ti wɛ̃̀tɛ kɛ yìɛ́ kɛ cɑ̀ɑ̀rɛ̀ kɛ yɛ̃ nti dɔ́ okpɑ̀ɑ̀tì. 
\v 20 Kɛ̀ Sɑmmuyɛɛrii bɛ̀ nɑ̀kɛ́ kɛ dɔ̀: Di cɑ̀ɑ̀rɛ̀mu yie mɛdiɛ̀, di tɛ̃́nkɛ nɛ́ bɑ́ɑ́ yie nkɛ́bútínnɛ́ ti Yiɛ̀ nKuyie, mpĩ́nnɛ̀ ku tɔ̃mmú nɛ̀ di yɛ̀mmɛ̀ mɛmɔu. 
\v 21 Di yóó kù bùtínnɛ́ kɛ́ntũ nyɛbɔkɛ̀ nyɛ yɛ̀ɛ̀ í yóó nɑ kɛ di teennɛ̀ yoo yɛ̀ di dɛɛtɛ́, yɛ̀ tu dɛtetìrɛ̀ ndɛ. 
\v 22 Ti Yiɛ̀ nKuyie ntu Kuyie nku, kù í yóó di yóu kɛ yɛ̃́ kuù dɔ́mɛ̀ kɛ di dɔɔ̀ ku kɔbɛ. 
\v 23 Mí mmɔ́mmuɔ nyí yóó yie nkɛ́yetɛ́nɛ̀ ti Yiɛ̀ nKuyie nkɛ́yóu m bo nsɔkɛ́mɛ̀ kɛ di bɛnkú kucɛ sɑ̀ɑ̀kù. 
\v 24 Dí ndé ti Yiɛ̀ nKuyie kɛ́mpĩ́ nku tɔ̃mmú mɛsɑ̀ɑ̀ nnɛ̀ di yɛ̀mmɛ̀ mɛmɔu, di yɑ̀mɛ̀mu kù dɔ̀ɔ̀ tìì diɛtì di cuokɛ̀. 
\v 25 Kɛ̀ di mɛ ndɔ̀ɔ̀ri mɛyɛi ndi bo kú díndi nɛ̀ di kóo kpɑ̀ɑ̀tì.
\c 13
\s1 Bɛ̀ dɔ́mɛ̀ kɛ́dokɛ́nɛ̀ Fidisitɛ̃ɛ̃bɛ kɛ̀ Sɑuri yetɛ́nɛ̀ Kuyie
\p
\v 1 Sɑuri do yóó di tikpɑ̀tì kɛ mɔkɛ yɛbie... \f + \fr 13:1 \fr*\fk yɛbie...: \fk*\ft Bɛ̀ wɑ̃̀ri Sɑmmuyɛɛri kó dipɑ́tíri kɛ̀ wèè dì cɛ̃́ĩ, kòò nyóó di cɛ̃́ĩ nkɛ sɔ̃́ nSɑuri bie nkó fɛwɑ̃rìfɛ̀ ũtɛ́mu, ò yí nnɑ kɛ bɑntɛ́ mɛsɑ̀ɑ̀ nkɛ nɛ́ yóu kɛ́soó ndɛ kó mɛfíè.\ft*\f* kɛ́di tikpɑ̀tì kɛ́mbɑkɛ́ Isidɑyɛɛribɛ kɛ dɔ̀ yɛbie nyɛ̀dɛ́ɛ̀, 
\v 2 kɛ́tɑ̃ɑ̃tɛ́ Isidɑyɛɛribɛ cuokɛ̀ bɛhɑ̃ɑ̃pɔ̀mbɛ̀ sikɔupísìtɑ̃ɑ̃ti (3000), kɛ̀ sikɔupísìdɛ́ (2000) nhò bonɛ̀ Mikimɑsi Betɛɛdi tɑ̃rì ĩ́nkɛ̀, kɛ̀ tɛkɔùpíítɛ̀ (1000) tɛtɛ̀ mbonɛ̀ o birɛ Sonnɑtɑ̃ɑ̃ Kibeɑ Bɛnsɑmɛɛ kó kutempɛ̃ mmiɛkɛ. Kɛ̀ Sɑurii kpɛ̃nnɛ́ Isidɑyɛɛribɛ tɔbɛ̀ bɑ́ wè o cĩ́ɛ̃̀tɛ̀.
\b
\p
\v 3-4 Diyiè mɑrì kɛ̀ Sonnɑtɑ̃ɑ̃ do mudoò Fidisitɛ̃ɛ̃bɛ kóò kùmɑ̀ndɑ́ɑ̀ wèè bo Kibeɑ kóò kùɔ. Kɛ̀ Fidisitɛ̃ɛ̃bɛɛ tì kèè kɛ̀ bɛ miɛkɛ ncɔ́ú nyIsidɑyɛɛribɛ kɛ̀ Sɑurii kɔnnɛ́ ditɑ̃tɛheù kɛ dɔ̀ Isidɑyɛɛribɛ bɛmɔuu tì kèè. Kɛ̀ bɛ̀ɛ keè Sɑuri kùɔmɛ̀ Fidisitɛ̃ɛ̃bɛ kóò kùmɑ̀ndɑ́ɑ̀. Kɛ̀ bɛhɑ̃ɑ̃pɔ̀mbɛ̀ bɛmɔu tíí nSɑuri borɛ̀ Kidikɑɑdi. 
\v 5 Kɛ̀ Fidisitɛ̃ɛ̃bɛ múnkɛɛ bɑ́ɑ́tí kɛ bo dokɛ́nɛ̀ Isidɑyɛɛribɛ, kɛ́mmɔkɛ sikpɑ̀rìnɑɑsɛ̃ĩ́ sikɔupísìtɑ̃ɑ̃ti (3000) nɛ̀ sisɛ̃ĩ́ sikɔupísìkuɔ̀ (6000) nɛ̀ si dèèbɛ̀, kɛ̀ bɛhɑ̃ɑ̃pɔ̀mbɛ̀ nsũ kɛ mɑ̀nnɛ̀ dɑ̀mɛ́ɛ̀rì kó mubirímú, kɛ́bɑ́tɛ́ Mikimɑsi Bɛti-Afɛnni diyiè yiɛ̀ kɛ̀ɛ̀ bíɛ́kɛ̀. 
\v 6 Isidɑyɛɛribɛ yɑ̀ dìì mɔ̀nnì dɛ̀ bɛ̀ pɑ̀kɛ́mɛ̀mu kɛ́ncokù kɛ tɑɑ̀ titɑ̃dèntì nɛ̀ yɛfɔ̃̀tɛ̀ miɛkɛ nɛ̀ yɛpèrɛ̀ fíè nnɛ̀ yɛbèmbíè nkó ifɔ̃ti kɛ yɛ̃́ bɛ̀ do bɛ̀ ɛ̃̀ṹtɛ́mɛ̀. 
\v 7 Kɛ̀ bɛ̀mɑbɛ̀ sei Suditɛ̃ɛ̃ kɛ bo sɔri Kɑdi nɛ̀ Kɑdɑɑdi bɛ kó kutempɛ̃ mmiɛkɛ.
\p Kɛ̀ Sɑuri bɑɑ bo Kidikɑɑdi kòo ɑ̃ɑ̃pɔ̀mbɛ̀ bɛmɔu kpeutí nɛ̀ kufɔ̃wɑɑ́. 
\v 8 Kɛ̀ bɛ̀ mbɑɑ Sɑmmuyɛɛri kɛ dɔ̀ yɛwe yɛ̀yiekɛ̀, kòò bɛ̀ bennɛ́ dìì mɔ̀nnì ndɔ́ kɛ́pɛ̃ɛ̃tɛ́, kòo mu nyí tùɔ̀kɛní Kidikɑɑdi, kɛ̀ tihɑ̃ɑ̃pɔ̀ntìi ketɛ́ kɛ́ncíɛ́rì kɛ yóu Sɑuri. 
\v 9 Kɛ̀ Sɑuri dɔ̀: Tɔnɛ̀ní iwũɔ̃ kɛ̀ n fíé Kuyie nkɛ́tuɔ nkɛ́fíénɛ̀ mɛtɑummɛ̀ kpɛyi. Mɛm̀mɛ ò ì fìémɛ̀ Kuyie. 
\v 10 Ò tùɔ ndìì mɔ̀nnì dɛ kó iwũɔ̃ kɛ́deè kɛ̀ Sɑmmuyɛɛrii tuɔkɛní kɛ̀ Sɑurii yɛ̀nní kóò co kɛ bo ò dɔu. 
\v 11 Kɛ̀ Sɑmmuyɛɛrii ò bekɛ kɛ dɔ̀: A dɔ̀ɔ̀ bɑ? Kɛ̀ Sɑuri dɔ̀: N yɑ̀ Isidɑyɛɛribɛ n yóumɛ̀ mmɛ kɛ cíɛ̀rì, ɑ mɔ́mmuɔ nhɑ mɛ nyí tùɔ̀kɛní ɑ m bennɛ́ dìì mɔ̀nnì, kɛ̀ Fidisitɛ̃ɛ̃bɛ tìkú Mikimɑsi. 
\v 12 Kɛ̀ n yĩ̀ɛ̃̀kù Fidisitɛ̃ɛ̃bɛ yɑ̀ɑ̀ bo kɔtɛnímɛ̀ kɛ́ ti do Kidikɑɑdi bɑ́ ti mu nyí beé ti Yiɛ̀ nKuyie, dɛɛ̀ te kɛ̀ n yóu kɛ fìé m mɔ́mmuɔ nKuyie nyiwũɔ̃ kɛ tùɔ. 
\v 13 Kɛ̀ Sɑmmuyɛɛrii ò nɑ̀kɛ́ kɛ dɔ̀: A dɔ̀ɔ̀ dɛyɛinkpɛrɛ ndɛ bɑ́ ɑ í pĩ nti Yiɛ̀ nKuyie ndɑ nɑ̀kɛ́ dìì nùù, kɑ̀ɑ do tũ̀nnɛ ti Yiɛ̀ nKuyie ndɑ nɑ̀kɛ́ dìì nùù, ɑ cĩ́ɛ̃̀tɛ̀ tɛɛ̀ nɑ ntú tɛkpɑ̀ɑ̀tìcĩ́ɛ̃̀tɛ̀ sɑ̃́ɑ̃̀ Isidɑyɛɛribɛ cuokɛ̀. 
\v 14 Di mmɔ̀nnì ɑ kpɑ̀tì tɛ̃́nkɛ í yóó mɔntɛ, ti Yiɛ̀ nKuyie ntɑ̃ɑ̃tɛ́mu ku yɛ̀mmɛ̀ kóo nìtì kòò bo ntú ku nìtìbɛ̀ kóo kpɑ̀ɑ̀tì ɑ í tũ̀nnɛ mɛ̀ɛ̀ kpɛ́í nti Yiɛ̀ nKuyie ndɑ nɑ̀kɛ́ tì.
\p
\v 15 Kɛ̀ Sɑmmuyɛɛrii ítɛ́ Kidikɑɑdi kɛ́kɔtɛ Kibeɑ Bɛnsɑmɛɛ kó kutempɛ̃. Kɛ̀ Sɑurii kɑɑ mbɛnìtìbɛ̀ ò kpɑɑ́nɛ̀ bɛ̀ kɛ̀ bɛ̀ mbo sikɔusìkuɔ̀ (600) kɛ bo kɔtɛ kɛ́mɑ́útɛ́nɛ̀ bɛ dootitɔbɛ̀ Kibeɑ Bɛnsɑmɛɛ tempɛ̃ mmiɛkɛ. 
\v 16 Sɑuri nɛ̀ o birɛ Sonnɑtɑ̃ɑ̃ nɛ̀ bɛnìtìbɛ̀ bɛ̀ɛ̀ do ò kpɑɑ́nɛ̀ kɛ̀ bɛ̀ mbo Kibeɑ Bɛnsɑmɛɛ tempɛ̃ nkɛ̀ Fidisitɛ̃ɛ̃bɛ bɑ̀tɛ́ kɛ bo Mikimɑsi. 
\v 17 Kɛ̀ Fidisitɛ̃ɛ̃bɛ kó bɛhɑ̃ɑ̃pɔ̀mbɛ̀ɛ totɛ́ yɛtĩ̀rɛ̀ yɛ̀tɑ̃ɑ̃ti kɛ̀ diketirìi kétɛ́ kɛ́nwetí Ɔfidɑɑ Suɑdi ɛì bíɛ́kɛ̀. 
\v 18 Kɛ̀ didɛ́rìi wetínnɛ́ Bɛti-Onɔɔ kɛ̀ ditɑ̃ɑ̃́nnì mbo ditɑ̃rì ĩ́nkɛ̀ kɛ wetí bɛ tenkɛ̀ mɑ̀nku bɛ̀ tu dɛ̀ Yɛkoutɛ kó kubiriku dikpɑ́ɑ̀ bíɛ́kɛ̀.
\p
\v 19 Bɛmɑ́ɑ́bɛ̀ do í bo Isidɑyɛɛribɛ ɛì dimɔu miɛkɛ kɛ yɛ̃́ Fidisitɛ̃ɛ̃bɛ do yetɛmɛ̀ kɛ dɔ̀: Di bɑ́ɑ́ yie nkɛ̀ Isidɑyɛɛribɛ mmɑ́ɑ́tí yɛse nɛ̀ yɛkpɑ̃ɑ̃̀. 
\v 20 Kɛ̀ Isidɑyɛɛribɛ nkɔrì Fidisitɛ̃ɛ̃bɛ borɛ̀ ndɛ kɛ nɛtírí bɛ nɑɑkɑ̃ nɛ̀ bɛ tũ̀kusi nɛ̀ bɛ pɛ̃ɛ̃́. 
\v 21 Kɛ̀ bɛ̀ níí ndò nkɛ́yietí idíítí mɑì kɛ nɛ́ nɑ kɛ́nɛtɛ́ bɛ tɔ̃nnɛntì: Yɛnɑɑkɑ̃ nɛ̀ sipɛ̃ɛ̃́ nɛ̀ sitũ̀kusi nɛ̀ sikɑ̃ũ. 
\v 22 Mudoò kó diyiè kɛ̀ bɛ̀ɛ mɔ́ntɛ́ tikpɑ̀rìnɛntì, Sɑuri nɛ̀ Sonnɑtɑ̃ɑ̃ kɛ̀ bɛɛ̀ nkpɑɑ́ mɔkɛ yɛse nɛ̀ yɛkpɑ̃ɑ̃̀.
\p
\v 23 Kɛ̀ Fidisitɛ̃ɛ̃bɛ kó dihɑ̃ɑ̃pɔ̀ntĩ̀nnì mɑrìi kɔtɛ kɛ́bɑ́tɛ́ Mikimɑsi tɑ̃rì.
\c 14
\s1 Sonnɑtɑ̃ɑ̃ nɑmɛ̀ Fidisitɛ̃ɛ̃bɛ
\p
\v 1 Diyiè mɑrì kɛ̀ Sonnɑtɑ̃ɑ̃ nɑ́kɛ́ o kóo tɔ̃ntì wèè tɔ o kpɑ̀rìnɛntì kɛ dɔ̀: Kɔtɛní kɛ̀ tí kɔtɛ Fidisitɛ̃ɛ̃bɛ kó bɛhɑ̃ɑ̃pɔ̀mbɛ̀ kɑrì dìì mɛ̀ mbo ciɛ ndi borɛ̀.
\p Ò mɛ nyí nnɑ̀kɛ́ o cicɛ Sɑuri. 
\v 2 Dɛ̀ do sɔ̃́ nSɑuri bo Kibeɑ nwe kɛ kɑri mutie bɛ̀ tú mù kèdènɑ̀díè mùù bo Mikinɔɔ mu yuu nɛ̀ bɛhɑ̃ɑ̃pɔ̀mbɛ̀ sikɔusìkuɔ̀ (600). 
\v 3 Kɛ̀ Aiyɑ Aitubu birɛ, Ikɑbɔdi tebitɛ, Edii Kuyie nkuɔ́ nìùtì wèè do bo Sidoo o birɛ Findee kó dɛbirɛ dɛɛ̀ do bo kɛ tɔ ikuɔ́ nɛntì. Isidɑyɛɛribɛ do í yɛ̃́ Sonnɑtɑ̃ɑ̃ kɔ̀tɛ kɛ̀.
\p
\v 4 Kɛ̀ Sonnɑtɑ̃ɑ̃ ndɔ́ kɛ́pi Fidisitɛ̃ɛ̃bɛ, kɛ́kétɛ́ yɛtɑ̃rɛ̀ mɑyɛ̀ cuokɛ̀, kɛ̀ dìmɑrì yètìrì tu Bosɛɛ, kɛ̀ ditɛrì kpɛri tú Sendee. 
\v 5 Kɛ̀ dìmɑrì bo kubɑkù cɑ̃̀nku kɛ wetí Mikimɑsi kɛ̀ ditɛrì bo kuyoú kɛ wetí Kebɑɑ. 
\v 6 Kɛ̀ Sonnɑtɑ̃ɑ̃ nɑ́kɛ́ o kóo tɔ̃ntì kɛ dɔ̀: Tí kɔtɛ Fidisitɛ̃ɛ̃bɛ itɑyéí yɛmbɛ̀ borɛ̀ kɛ́yɑ̀ ti Yiɛ̀ nKuyie mbo bɛ̀ nti duɔ́, kù í yĩɛ̃kú dɛ̀mɑrɛ̀, kɛ̀ kù dɔ́ tí bɛ̀ nɑ, ti yóó bɛ̀ nɑmu bɑ́ ti í mɛ̀ nsũmɛ̀. 
\v 7 Kòo kóo tɔ̃ntìi ò tɛ̃̀ńnɛ́ kɛ dɔ̀: Dɔɔ̀ ɑ yɛ̀mmɛ̀ dɑ pɑ̃ tì, m bo ɑ fɔ̃nkúò ndi, n dɑ tũ̀mmu. 
\v 8 Kɛ̀ Sonnɑtɑ̃ɑ̃ ò nɑ̀kɛ́ kɛ dɔ̀: Ti yóó kɔtɛmu kɛ́ bɛ̀ bɛnkɛ timɑ́ɑ̀. 
\v 9 Kɛ̀ bɛ̀ ti nɑ̀kɛ́ kɛ tú: Ncómmúnɛ̀, kɛ̀ ti di sɔ̃́nkóo! Ti ncómmú. 
\v 10 Kɛ̀ bɛ̀ mɛ nyĩ: Dekɛnɛ̀ní! Tí dekoo, dɛɛ̀ yóó bɛnkɛ ti Yiɛ̀ nKuyie mbɛ̀ nti duɔ́mmɛ̀.
\p
\v 11 Kɛ̀ bɛ̀ɛ kɔtɛ kɛ́bɛnkɛ bɛmɑ́ɑ̀ Fidisitɛ̃ɛ̃bɛ kɛ̀ bɛ̀ dɔ̀: Ntɛnɛ̀ Ebedeebɛ kɛ yiɛ̀ní yɛfɔ̃̀tɛ̀ miɛkɛ bɛ̀ do sɔri dɛ̀. 
\v 12 Kɛ̀ bɛ̀ɛ yú Sonnɑtɑ̃ɑ̃ nɛ̀ o kóo tɔ̃ntì kɛ́ bɛ̀ nɑ̀kɛ́ kɛ dɔ̀: Dekɛnní kɛ̀ tí di bɛnkɛ.
\p Kɛ̀ Sonnɑtɑ̃ɑ̃ nɑ́kɛ́ o kóo tɔ̃ntì kɛ dɔ̀: A ntũ n fɔ̃nkúò kɛ̀ tí dekɛ, ti Yiɛ̀ nKuyie mbɛ̀ duɔ́mmu Isidɑyɛɛribɛ.
\p
\v 13 Kɛ̀ Sonnɑtɑ̃ɑ̃ ndeètòo kɛ ĩkú nɛ̀ o nɑɑ̀cɛ̀i nɛ̀ o nɔu, kòo kóo tɔ̃ntì ò tũ, kɛ̀ Sonnɑtɑ̃ɑ̃ mbɛ̀ puotì kɛ̀ bɛ̀ duò, kòo kóo tɔ̃ntì bɛ̀ dèu. 
\v 14 Sonnɑtɑ̃ɑ̃ nɛ̀ o kóo tɔ̃ntì kɛ̀ bɛ̀ɛ kuɔ bɛnìtìbɛ̀ sipísìdɛ́ tɛpɛ̃kpɛ̃̀ntɛ̀ sɑ́m̀pɔ́tɛ̀ miɛkɛ. 
\v 15 Kɛ̀ kufɔ̃wɑɑ́ mpĩ́ nFidisitɛ̃ɛ̃bɛ bɛmɔu nɛ̀ bɛhɑ̃ɑ̃pɔ̀mbɛ̀ bɛ̀ɛ̀ kpɑɑ́ dikɑrì nɛ̀ bɛ̀ɛ̀ kɔ̀tɛ dikpɑ̀nnì, kɛ̀ kɛtenkɛ̀ nhɑu kɛ̀ dɛ̀ɛ kpeí bɛnìtìbɛ̀ mɛdiɛ̀ nkɛ̀ bɛ kɔ̃̀ntì nhɑu.
\p
\v 16 Sɑuri kó bɛhɑ̃ɑ̃pɔ̀mbɛ̀ bɛ̀ɛ̀ pɑkɛ́ kɛ̀ bɛ̀ mbo Kibeɑ kɛ́wéntɛ́ kɛ́yɑ̀ Fidisitɛ̃ɛ̃bɛ cìɛ́tɛ́mɛ̀ tipíìtì timɔu. 
\v 17 Kɛ̀ Sɑurii nɑ́kɛ́ bɛhɑ̃ɑ̃pɔ̀mbɛ̀ kɛ dɔ̀: Kɑɑnnɛ̀ bɛnìtìbɛ̀ kɛ́yɑ̀ bɛ̀ɛ̀ kpɑ ti cuokɛ̀.
\p Kɛ̀ bɛ̀ɛ kɑɑ nkɛ́mɔ́ntɛ́ Sonnɑtɑ̃ɑ̃ nɛ̀ o kóo tɔ̃ntì. 
\v 18 Kɛ̀ Sɑurii nɑ́kɛ́ ikuɔ́ nìùtì Aiyɑ kɛ dɔ̀: Tɔní ti Yiɛ̀ nKuyie ntɑummɛ̀ tɔu.
\p Dɛ̀ do sɔ̃́ ti Yiɛ̀ nKuyie ntɑummɛ̀ tɔu bo Isidɑyɛɛribɛ kɑrì ndi.
\p
\v 19 Kɛ̀ Sɑurii nkpɑɑ́ kɛ nɑ́ɑ́nnɛ̀ ikuɔ́ nìùtì, kɛ̀ kutoweku dɔkɛ dɛ́úkú Fidisitɛ̃ɛ̃bɛ kɑrì, kɛ̀ Sɑuri nɑ́kɛ́ Aiyɑɑ kɛ dɔ̀: Bɑ́ɑ́ bennɛ́ kɛ́beé ntìmɑtì ti Yiɛ̀ nKuyie.
\p
\v 20 Kòò tíí nho ɑ̃ɑ̃pɔ̀mbɛ̀ kɛ̀ bɛ̀ɛ kɔtɛ mudoò kɛ́nsɔ̃́ mbɛ̀ dootitɔbɛ̀ kpɑ̀ mbɛmɑ́ɑ̀ kɛ ɑ̃nti kɛ̀ kunɔɔ̀roo dɑ́ɑ́tí mɛdiɛ̀. 
\v 21 Isidɑyɛɛribɛ bɛ̀ɛ̀ do wɛ̃nnɛ́nɛ̀ Fidisitɛ̃ɛ̃bɛ kɛ́nkɔrì dikpɑ̀nnì, kɛ̀ bɛ̀ɛ kóntɛ́ kɛ́wɛ̃nnɛ́nɛ̀ Sɑuri nɛ̀ Sonnɑtɑ̃ɑ̃ bɛ tĩ̀nnì.
\p
\v 22 Isidɑyɛɛribɛ sɔmbɛ bɛ̀ɛ̀ do sɔri Efɑdɑimmu tɑ̃rì ĩ́nkɛ̀ kɛ̀ bɛ̀ɛ keè Fidisitɛ̃ɛ̃bɛ cokɛ́mɛ̀ kɛ́ítɛ́ní kɛ́ bɛ̀ bɛ̀ti kɛ́kuɔ. 
\v 23 Kɛ̀ ti Yiɛ̀ nKuyie nduɔ́ nkɛ̀ Isidɑyɛɛribɛɛ bɛ̀ nɑ dɛ kó diyiè kɛ́ mbɛ̀ bɛ̀tì kɛ́séntɛ́nɛ̀ Bɛti-Afɛnni.
\s1 Isidɑyɛɛribɛ dɛɛtɛ́mɛ̀ Sonnɑtɑ̃ɑ̃
\p
\v 24 Dɛ kó diyiè kɛ̀ Isidɑyɛɛribɛɛ fɛ̃́ṹtɛ́ mɛdiɛ̀ nkɛ yɛ̃́ Sɑuri do bɛ́immɛ̀ kɛ dɔ̀: Wèè bo dɛ́útɛ́ dɛ̀mɑrɛ̀ kɛ̀ diyiè mu nyí tɑ, kòò mu nyí nɑ o doootitɔbɛ̀ kɛ pɛ̀itɛ, dɛ yiɛ̀ mbo yɑ̀! Nɛ̀ dɛ kpɛ́í nhòmɔù í ndi dɛ̀mɑrɛ̀ dɛ yiè. 
\v 25 Kɛ̀ bɛ̀ɛ tuɔkɛ dikpɑ́ɑ̀ mɑrì kɛ̀ mɛcekùɔ̀ mpìɛ́kɛ́ kɛ counɛ̀ kɛtenkɛ̀. 
\v 26 Kɛ̀ bɛhɑ̃ɑ̃pɔ̀mbɛ̀ɛ tɑ dɛ kó dikpɑ́ɑ̀ kɛ́yɑ̀ mɛcekùɔ̀ nhòmɔù mɛ nyí ndɑ̀ɑ́tí kɛ́kɑ́ɑ́kɛ́ kɛ yɛ̃́ bɛ̀ démɛ̀ Sɑuri bɛ́i ndìì nùù. 
\v 27 Sonnɑtɑ̃ɑ̃ mɛ nyí nyɛ̃́ kɛ dò nho cicɛ bɛ́i ndinùù mɑrì kɛ́yɑ̀ ticiètì, kɛ́kṹṹ kupɑ̀ɑ̀ti yómmɛ̀ kɛ́dɛ́útɛ́ kòo ììkɛ̀ɛ wenkɛ. 
\v 28 Kɛ̀ kuhɑ̃ɑ̃pɔ̀nkù mɑkùu ò nɑ̀kɛ́ kɛ dɔ̀: A cicɛ bɛ́i nkɛ tú kɛ̀ wèè di dɛ̀mɑrɛ̀ yíe nhò bo yɑ̀. Dɛɛ̀ te kɛ̀ muwɛ̃rímú dòńtɛ́ bɛnìtìbɛ̀.
\p
\v 29 Kɛ̀ Sonnɑtɑ̃ɑ̃ dɔ̀: N cicɛ kɔɔ́nnɛ̀ bɛnìtìbɛ̀ mbɛ, wéntɛ́ ndɛ̀útɛ́mɛ̀ mɛcekùɔ̀ nkɛ̀ n yììkɛ̀ wenkɛ, 
\v 30 kɛ́ndò nkɛ̀ bɛnìtìbɛ̀ nɛ́ do ndi bɛ̀ ɛí dɛ̀ bɛ̀ nɑ nnɑmu bɛ dootitɔbɛ̀ kɛ̀ dɛ̀ pɛ̃ɛ̃tɛ́ dɛ̀ mɛ̀ ndòmmɛ̀.
\p
\v 31 Dɛ kó diyiè kɛ̀ Isidɑyɛɛribɛ mbɛtì Fidisitɛ̃ɛ̃bɛ kɛ kɔù, kɛ́ bɛ̀ bɛ̀ti Mikimɑsi kɛ́tuɔkɛnɛ̀ Ayɑnɔɔ kɛ́ɔu mɛdiɛ̀ nkɛ́cĩrimɛ. 
\v 32 Kɛ̀ bɛ̀ɛ pĩ́mmú bɛ̀ nɑ bɛ̀ kó ipe nɛ̀ bɛ nɑ̀ɑ̀kɛ, kɛ́ nyì feu kɛ cɑ́ɑ́ ndɛndɛ mɛyĩ̀ĩ̀ ncóú dɛ̀. 
\v 33 Kɛ̀ bɛ̀ɛ nɑ́kɛ́ Sɑuri kɛ dɔ̀: Isidɑyɛɛribɛ dɔ̀ɔ̀ mɛyɛi mmɛ kɛ feu iwũɔ̃ kɛ cɑ́ɑ́ mbɛ̀ ì fìé dɛ̀, mɛyĩ̀ĩ̀ ncòú dɛ̀, kɛ̀ Sɑurii kuɔ́nkoo kɛ dɔ̀: Di cɑ̀ɑ̀rɛ̀mu! Biennɛ̀ní ditɑ̃́rì mɑrì diɛ. 
\v 34 Kɛ̀ bɛ̀ɛ kɔtɛ kɛ́nɑ́kɛ́ bɛnìtìbɛ̀ kɛ dɔ̀: Bɑ́ wè wèe tɔní o nɑ̀ɑ̀fɛ̀ yoo o pièfɛ̀ dɛborɛ̀ kɛ́kuɔ kɛ́cɑ́ɑ́kɛ́, kɛ̀ di bɑ́ nyì cɑ̀ɑ́ nyi yĩ̀ĩ̀ ncòú dɛ̀ kɛ́yetɛ́nɛ̀ ti Yiɛ̀ nKuyie.
\p Dɛ kó kuyuoku kɛ̀ bɑ́ wèe tɔní o ɔ̃fɛ̀ kɛ́ fɛ̀ fèútɛ́ dɛborɛ̀. 
\v 35 Mɛm̀mɛ Sɑuri mɑɑ́mɛ̀ ti Yiɛ̀ nKuyie ndiwũɔ̃tɔ̀nnì ketirì kɛ́bɛ́i nkɛ dɔ̀: 
\v 36 Ti sɔɔtɛ́ kɛ nyènkɛ̀ kɛ́mpuɔ̀ Fidisitɛ̃ɛ̃bɛ kɛ́ bɛ̀ kùɔ pɑ́íí kɛ́hɛí bɛ kpɛrɛ, bɑ́ ti bɑ́ɑ́ súɔ́ nhòmɔù. Kɛ̀ tihɑ̃ɑ̃pɔ̀ntì dɔ̀: Dɔɔ̀ ɑ dɔ́mɛ̀.
\p Kɛ̀ ikuɔ́ nìùtì dɔ̀: Ti ketɛ́nɛ̀ kɛ́beé ti Yiɛ̀ nKuyie.
\p
\v 37 Kɛ̀ Sɑurii beé nti Yiɛ̀ nKuyie nkɛ dɔ̀: Kuyie nti kɔtɛ kɛ́dokɛ́nɛ̀ Fidisitɛ̃ɛ̃bɑɑ? A bo duɔ́ nkɛ̀ ti bɛ̀ nɑɑ̀?
\p Ti Yiɛ̀ nKuyie mɛ nyí nhò tɛ̃̀ńnɛ́ tìmɑtì dɛ yiè. 
\v 38 Kɛ̀ Sɑurii tíí nyIsidɑyɛɛribɛ kó bɛkótíbɛ̀ kɛ dɔ̀: Wéntɛ́nɛ̀ kɛ́yɑ̀ mɛyɛi mmɛ̀ɛ̀ dɔ̀ɔ̀ yíe. 
\v 39 Ti Yiɛ̀ nKuyie mbomu kɛ dɛɛrí Isidɑyɛɛribɛ, m bɛ́i ntì yóó dɔɔ̀mu. Wèè te dɛ kó mɛyɛi nhò yóó kúmu bɑ́ kɛ̀ m birɛ Sonnɑtɑ̃ɑ̃ nwe.
\p Ditĩ̀nnì miɛkɛ òmɔù í nhò tɛ̃̀ńnɛ́ tìmɑtì. 
\v 40 Kɛ̀ Sɑurii nɑ́kɛ́ Isidɑyɛɛribɛ kɛ dɔ̀: Di cómmú kupíkù kùmɑ́ɑ̀, mí nnɛ̀ m birɛ Sonnɑtɑ̃ɑ̃ kɛ̀ ti cómmú kutɛkù. Kɛ̀ ditĩ̀nnìi nɑ́kɛ́ Sɑuri kɛ dɔ̀: Dɔɔ̀ ɑ dɔ́mɛ̀.
\p
\v 41 Kɛ̀ Sɑuri dɔ̀: N Yiɛ̀ nKuyie nyIsidɑyɛɛribɛ tũ nkù dɛ̀ dòmmɛ̀ kɑ̀ɑ í n tɛ̃̀ńnɛ́ yíe ntìmɑtì? Kɛ̀ mɛcɑɑ̀rìmɛ̀ bo mí n nɛ̀ m birɛ Sonnɑtɑ̃ɑ̃ tíì ĩ́nkɛ̀ yoo ɑ nìtìbɛ̀ Isidɑyɛɛribɛ ĩ́nkɛ̀, kɛ̀ ti bɔ nyipɑ̃ɑ̃díítí ìi bɛnkɛ.
\p Mɛm̀mɛ kɛ̀ bɛ̀ɛ̀ bɔ nyipɑ̃ɑ̃díítí kɛ̀ ìi bɛnkɛ Sɑuri nɛ̀ Sonnɑtɑ̃ɑ̃. Kɛ̀ bɛhɑ̃ɑ̃pɔ̀mbɛ̀ɛ yɛ̀. 
\v 42 Kɛ̀ Sɑuri dɔ̀: Tɑ̃ũnɛ̀ tɛ́tɛ́ mí nnɛ̀ m birɛ Sonnɑtɑ̃ɑ̃ ti ĩ́nkɛ̀, kɛ̀ bɛ̀ɛ tɑ̃ũ kòo do Sonnɑtɑ̃ɑ̃ ĩ́nkɛ̀. 
\v 43 Dɛ mɔ̀nnì kɛ̀ Sɑuri dɔ̀: N nɑ́kɛ́ ɑ dɔ̀ɔ̀ mù.
\p Kɛ̀ Sonnɑtɑ̃ɑ̃ dɔ̀: N kɑ́ɑ́kɛ́ m pɑ̀ɑ̀ti yómmɛ̀ mmɛ mɛcekùɔ̀ nkɛ dɛ̀útɛ́. N yiemmu kɛ bo kú. 
\v 44 Kɛ̀ Sɑurii bɛ́i nkɛ dɔ̀: Kuyie nni mpotɛ́ kɛ̀ nsɑ̀ kɛ̀ Sonnɑtɑ̃ɑ̃ í ku.
\p
\v 45 Kɛ̀ tihɑ̃ɑ̃pɔ̀ntì dɔ̀: Sonnɑtɑ̃ɑ̃ bɑ́ɑ́ kú, weè te kɛ̀ Isidɑyɛɛribɛ ɑutɛ́ bɛ dootitɔbɛ̀. Ti Yiɛ̀ nKuyie mbomu! Dɛndɛ bɑ́ɑ́ dɔɔ̀, ti bɑ́ɑ́ yie nkòo yùrìkù bɑ́ kùmɑ́ɑ̀ do kɛtenkɛ̀. Nɛ̀ Kuyie nkó mɛteèmmɛ̀ mmɛ ò pĩ̀ḿmɛ̀ mutɔ̃mmú yíe.
\p Mɛm̀mɛ kɛ̀ tihɑ̃ɑ̃pɔ̀ntìi dɛɛtɛ́ Sonnɑtɑ̃ɑ̃ bɑ́ ò í nku dɛ kó mukṹṹ. 
\v 46 Mɛm̀mɛ kɛ̀ Sɑurii yóu Fidisitɛ̃ɛ̃bɛ mubɛtìmù kɛ̀ bɛ̀ɛ kũṹ mbɛ cɛ̃́ĩ.
\s1 Bɛ̀ nɑ̀kɛ́ tì Sɑuri kpɑ̀tì ĩ́nkɛ̀
\p
\v 47 Sɑuri nɑɑ́ ndìì mɔ̀nnì Isidɑyɛɛribɛ kóo kpɑ̀ɑ̀tì kɛ́ pɑ̃̀nkɛɛ dokɛ́nɛ̀ o dootitɔbɛ̀ bɛ̀ɛ̀ ò fitɛ́: Mɔɑbiibɛ nɛ̀ Amɔdiibɛ nɛ̀ Edomiibɛ nɛ̀ Tisobɑ kó dikpɑ̀ɑ̀tìyuu nɛ̀ Fidisitɛ̃ɛ̃bɛ. Kòò cuó nkɛ̀ɛ̀ bíɛ́kɛ̀ wèe nɑ. 
\v 48 Weè do dokɛ́nɛ̀ dikɔ̃m̀bùɔ̀ Amɑdesiibɛ bɛmbɛ bɛ̀ɛ̀ do fekù Isidɑyɛɛribɛ kpɛrɛ kòo bɛ̀ nɑ, kɛ́dɛɛtɛ́ Isidɑyɛɛribɛ.
\b
\p
\v 49 Sɑuri kó ibí do tú Sonnɑtɑ̃ɑ̃ nɛ̀ Isefii nɛ̀ Mɑdikisinɑ nɛ̀ initipobí ìdɛ́ì, kɛ̀ dɛketirɛ̀ ntú Mɛdɑbu kɛ̀ dɛdɛ́rɛ̀ tu Mikɑɑdi. 
\v 50 Kòo pokù yètìrì tu Ainɔɑmmu, Aimɑsi birɛ. Wèè bɑkɛ́ bɛhɑ̃ɑ̃pɔ̀mbɛ̀ kòo yètìrì ntú Abunɛɛ, kòo cicɛ kpɛri tú Nɛɛ, Sɑuri tebitɛ kó dɛbirɛ. 
\v 51 Kiisi Sɑuri cicɛ nɛ̀ Nɛɛ nɛ̀ Abunɛɛ cicɛ, bɛ cicɛ do tú Abiyɛɛdi.
\b
\p
\v 52 Sɑuri kpɑ̀tì timɔu miɛkɛ ò do dokùnɛ̀ Fidisitɛ̃ɛ̃bɛ mbɛ kɛ̀ dɛ̀ tònnì, kòò yɑ̀ onìtì wèè mɔ̀kɛ dikɔ̃m̀bùɔ̀ yoo ò kpeńnì wèe ò pĩ ntihɑ̃ɑ̃pɔ̀ntì.
\c 15
\s1 Sɑuri yetɛmɛ̀ Kuyie nkpɛti
\p
\v 1 Kɛ̀ Sɑmmuyɛɛrii nɑ́kɛ́ Sɑuri kɛ dɔ̀: Ti Yiɛ̀ nKuyie ndo tɔ̃nní mí nwe kɛ̀ n dɑ pĩ́ ntikpɑ̀tì kɑ̀ɑ bo mbɑkɛ́ Isidɑyɛɛribɛ, kéntɛ́ kù yɛ̃ n dɑ nɑ́kɛ́ tì: 
\v 2 Ti Yiɛ̀ nKuyie Mpɑkɛdɑɑ tu kù yóó potɛ́mu Amɑdesiibɛ kɛ́fɔ́ɔ́ mbɛ̀ do dintɛ́mɛ̀ Isidɑyɛɛribɛ bɛ̀ yɛ̀nní dìì mɔ̀nnì Esibiti kɛ́ bɛ̀ potɛ́. 
\v 3 Kɔtɛ kɛ́ bɛ̀ dokɛ́nɛ̀ kɛ́ bɛ̀ kùɔ bɛmɔu pɑ́íí! A bɑ́ɑ́ kuɔ́ nhòmɔù mɛsémmɛ̀, ɑ́ kuɔ dɛ̀ɛ̀ kó dimɑ̀ɑ̀ weí, bɛnitidɑɑbɛ̀ nɛ̀ bɛnitipòbɛ̀, ibí nɛ̀ ibíbɛ́nní, inɑ̀ɑ̀kɛ nɛ̀ ipe nɛ̀ yòyóbɛ̀ nɛ̀ sɑ̃mmɑrímúbɛ̀.
\p
\v 4 Kɛ̀ Sɑurii tíí mbɛhɑ̃ɑ̃pɔ̀mbɛ̀ Tedɑimmu, kɛ́ bɛ̀ kɑɑ nkɛ̀ bɛ̀ mbo sikɔupíkɔ̀ùpísìdɛ́ (200000). Sudɑɑ kɔbɛ tɛkɔupípíítɛ̀ (10000). 
\v 5 Kɛ̀ bɛ̀ɛ tuɔkɛ Amɑdesiibɛ ɛì kɛ dɛ́kɛ́ kɛ́nhokɛ kudúókù 
\v 6 Kɛ̀ Sɑurii nɑ́kɛ́ Keniibɛ kɛ dɔ̀: Yɛ̀nnɛ̀ Amɑdesiibɛ cuokɛ̀ kɛ́dɛ́tɛ́. N yí dɔ́ kɛ́ di wɛ̃nnɛ́ kunɑsɑ̃́ɑ̃ kɛ yɛ̃́ di do dɔ̀ɔ̀mɛ̀ Isidɑyɛɛribɛ mɛsɑ̀ɑ̀ mbɛ̀ yɛ̀nní dìì mɔ̀nnì Esibiti. Mɛm̀mɛ kɛ̀ Keniibɛɛ yɛ Amɑdesiibɛ cuokɛ̀. 
\v 7 Kɛ̀ Sɑurii potɛ́ Amɑdesiibɛ, kɛ́túótɛ́ Afidɑɑ kɛ́tuɔkɛnɛ̀ Suudi Esibiti tenkɛ̀ diyiè yìɛ̀ní kɛ̀ɛ̀ bíɛ́kɛ̀, 
\v 8 kɛ́kuɔ bɛnìtìbɛ̀ bɛmɔu kɛ́súɔ́ mbɛ kóo kpɑ̀ɑ̀tì Akɑki kóò pĩ nhofòùwè. 
\v 9 Sɑuri nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ yóu Akɑki nɛ̀ iwũɔ̃ ìì kó dimɑ̀ɑ̀ tu isɑ̀ɑ̀yì: Inɑ̀ɑ̀kɛ nɛ̀ ipe. Iwũɔ̃ ìì kó dimɑ̀ɑ̀ cɛ̃́nkɛ tu isɑ̀ɑ̀yì, kɛ́kuɔ dɛ̀ɛ̀ tu dɛsĩ́ntɛ́kpɛrɛ, dɛ̀ɛ̀ í dò nkɛ́dɔɔ̀nɛ̀ mùmɑmù.
\p
\v 10 Mɛm̀mɛ kɛ̀ ti Yiɛ̀ nKuyie mbɛ́innɛ̀ Sɑmmuyɛɛri kɛ dɔ̀: 
\v 11 N dèmmumu dɛ̀ yĩ́mɛ̀ kɛ̀ n tɑ̃ɑ̃tɛ́ Sɑuri kòo bo ntú Isidɑyɛɛribɛ kóo kpɑ̀ɑ̀tì. Ntɛ we kɛ m bùtínnɛ́, ò í yie nkɛ tũ̀nnɛ nh ò nɑ̀kɛ́ tì.
\p Kɛ̀ Sɑmmuyɛɛri yɛ̀mmɛ̀ɛ cɑɑ̀rɛ̀ kòo nyie nkɛ kuɔ̀nnɛ̀ ti Yiɛ̀ nKuyie.
\p
\v 12 Kɛ̀ dɛ̀ɛ wentɛ́ dikṹnweńnì sɛ̀ì kòo kɔtɛ kɛ bo yɑ̀ Sɑuri, kɛ̀ bɛ̀ɛ ò nɑ̀kɛ́ kɛ dɔ̀: Sɑuri kɔtɛ Kɑdimɛɛdi kɛ bo mɑɑ́ dicɔ̃̀ncɔ̃̀nnì kɛ́ndenniní ò nɑmɛ̀ Amɑdesiibɛ, kɛ dèè kɛ pɛ̃ɛ̃tɛ́ kɛ kɔ̀tɛ Kidikɑɑdi. 
\v 13 Kɛ̀ Sɑmmuyɛɛri ntùɔ̀koo Sɑuri borɛ̀, kòo ò nɑ̀kɛ́ kɛ dɔ̀: Ti Yiɛ̀ nKuyie ndɑ dɔ̀ɔ̀ mɛsɑ̀ɑ̀, n dɔ̀ɔ̀mu kù n nɑ̀kɛ́ tì timɔu. 
\v 14 Kɛ̀ Sɑmmuyɛɛrii ò bekɛ kɛ dɔ̀: M mɛ n yo yɛ̀ɛ̀ pedɑbùò nnɛ̀ inɑ̀ɑ̀kɛ kpɛyɛ, yɛ̀ bonní dɛ? 
\v 15 Kɛ̀ Sɑurii ò tɛ̃̀ńnɛ́ kɛ dɔ̀: Tihɑ̃ɑ̃pɔ̀ntì tiì soó nhAmɑdesiibɛ wũɔ̃ sɑ̀ɑ̀yì kɛ ì tɔní, kɛ ti bo fíé ti Yiɛ̀ nKuyie nhɑ tũ nkù. Dɛsɔnnɛ̀ kó dimɑ̀ɑ̀ ti dɛ̀ kùɔmu pɑ́íí. 
\v 16 Kɛ̀ Sɑmmuyɛɛri dɔ̀: Dɛ̀ sɑ̀nnɛ̀mu mɛmmɛ. N yóó dɑ nɑ́kɛ́ ti Yiɛ̀ nKuyie nni nnɑ̀kɛ́ tìnti kɛyènkɛ̀. Kɛ̀ Sɑuri dɔ̀: Bɛ́i.
\p
\v 17 Kɛ̀ Sɑmmuyɛɛri dɔ̀: A do cĩɛ̃̀ ndìì mɔ̀nnì ɑmɑ́ɑ̀ kɛ̀ ti Yiɛ̀ nKuyie nkuù dɑ tɑ̃ɑ̃tɛ́, di mmɔ̀nnì kɑ̀ɑ bɑkɛ́ Isidɑyɛɛribɛ. 
\v 18 Kuù dɑ tɔ̃ nkɛ tú: A kɔtɛ kɛ́dokɛ́nɛ̀ Amɑdesiibɛ dɛ kó bɛnitiyɛibɛ, kɛ́ bɛ̀ kuɔ pɑ́íí kɛ bɑ́ɑ́ súɔ́ ndɛ̀mɑrɛ̀. 
\v 19 Dɛ̀ yĩ́mɛ kɑ̀ɑ í yie nkù dɑ nɑ̀kɛ́ tì, kɛ ɛí bɛ kpɛrɛ kɛ dɔ̀ɔ̀ kù í dɔ́ dɛ̀? 
\v 20 Kɛ̀ Sɑuri dɔ̀: N yiemmɛ̀mu kù n nɑ̀kɛ́ tì kɛ kùɔ Amɑdesiibɛ bɛmɔu, kɛ sùɔ́ mbɛ kóo kpɑ̀ɑ̀tì Akɑki mɑ́ɑ̀ ndi koò tɔní diɛ. 
\v 21 Kɛ̀ n kó bɛhɑ̃ɑ̃pɔ̀mbɛ̀ soó nyiwũɔ̃ sɑ̀ɑ̀yì kɛ ì tɔní diɛ nKidikɑɑdi kɛ̀ ti bo ì fìé ti Yiɛ̀ nKuyie nhɑ tũ nkù.
\p
\v 22 Kɛ̀ Sɑmmuyɛɛrii ò tɛ̃̀ńnɛ́ kɛ dɔ̀: Ti Yiɛ̀ nKuyie ndɔ́ di bo nkù feumɛ̀ mmɛ iwũɔ̃ kɛ pɛ̃ɛ̃tɛ́ di bo nyíémmɛ̀ ku nɑ́ɑǹtɑ̀ɑ̀? Kɑ̀ɑ yie nti Yiɛ̀ nKuyie mbɛ́i ntì dɛɛ̀ kù nɑɑti kɛ pɛ̃ɛ̃tɛ́ ɑ bo kù fìémɛ̀ iwũɔ̃ mɛkùɔ̀ nkpɛyi. 
\v 23 A bo yetɛmɛ̀ ti Yiɛ̀ nKuyie nkpɛti dɛ̀ í cɑ̃́ɑ̃́nnɛ̀ ɑ bo pɑ̃ɑ̃́mɛ̀, itookperí mɛ nyí cɑ̃́ɑ̃́nnɛ̀ ɑ bo fíémɛ̀ yɛbɔkɛ̀. A mɛ̀ nyetɛmɛ̀ ti Yiɛ̀ nKuyie nkpɛti, kù múnkɛ dɑ yetɛmu yíe. A tɛ̃́nkɛ í yó ntú ku nìtìbɛ̀ kóo kpɑ̀ɑ̀tì. 
\v 24 Kɛ̀ Sɑurii kuɔ́nko kɛ dɔ̀: N cɑ̀ɑ̀rɛ̀mu! N yetɛ ti Yiɛ̀ nKuyie nkpɛti nti kɛ yetɛ ɑ kó itié. N yɔ̀tɛ tihɑ̃ɑ̃pɔ̀ntì nti kɛ dɔ̀ɔ̀ tì yɛ̃ mmù. 
\v 25 Di mmɔ̀nnì n dɑ bɑ́ɑmmu! N cɑ̀ɑ̀rɛ̀mu, ncĩ́ɛ̃́ n yɛi, nkɛ́wɛ̃tɛní kɛ̀ ti kɔtɛ kɛ̀ m bɑ́ntɛ̀ ti Yiɛ̀ nKuyie. 
\v 26 Kɛ̀ Sɑmmuyɛɛri dɔ̀: Mí nnɛ̀ fɔ̃́ nti bɑ́ɑ́ nɛí, ɑ yetɛ ti Yiɛ̀ nKuyie nkpɛti nti kɛ̀ kù mɛ ndɑ yetɛ, ɑ tɛ̃́nkɛ í yó ntú Isidɑyɛɛribɛ kóo kpɑ̀ɑ̀tì.
\p
\v 27 Kɛ̀ Sɑmmuyɛɛrii bútínnɛ́ kɛ bo ítɛ́, kɛ̀ Sɑurii pĩ́ nho yɑɑ̀bòrì kɛ̀ dìi kɛ̃tɛ́. 
\v 28 Kɛ̀ Sɑmmuyɛɛrii ò nɑ̀kɛ́ kɛ dɔ̀: Ti Yiɛ̀ nKuyie mmúnkɛ kɛ̃tɛ́mu ɑ kpɑ̀tì yíe nyIsidɑyɛɛribɛ cuokɛ̀, kɛ tì duɔ́ nhotɔù mɔù wèè wenni kɛ dɑ pɛ̃ɛ̃tɛ́. 
\v 29 Isidɑyɛɛribɛ kó muwɛ̃rímú tú ti Yiɛ̀ nKuyie nku, kù í soú nkù í tú onìtì kɛ bo bɛ́i nkɛ́wɛ̃tɛ kɛ́ceetɛ. 
\v 30 Kɛ̀ Sɑurii yíɛ́ kɛ́bɛ́i nkɛ dɔ̀: N cɑ̀ɑ̀rɛ̀mu, ɑ n cĩ́ɛ̃́ nkɛ́ n dɛ́úkùnnɛ bɛhɛikɛ̀nkótíbɛ̀ nɛ̀ Isidɑyɛɛribɛ bɛmɔu ììkɛ̀ kɛ́wɛ̃tɛní kɛ̀ m bɑ́ntɛ̀ ti Yiɛ̀ nKuyie.
\p
\v 31 Kɛ̀ Sɑmmuyɛɛrii wɛ̃tɛní kóò tũ̀nnɛ kɛ̀ bɛ̀ɛ kɔtɛ kɛ̀ Sɑurii bɑ́ntɛ̀ ti Yiɛ̀ nKuyie.
\p
\v 32 Kɛ̀ Sɑmmuyɛɛri dɔ̀: Tɔní diɛ nhAkɑki Amɑdesiibɛ kpɑ̀ɑ̀tì n yììkɛ̀. Kɛ̀ Akɑki nkéríní kòo yɛ̀mmɛ̀ nɑɑti, nɛ̀ o yɛ̀mmɛ̀ miɛkɛ kòò tu mukṹṹ nkó kunɔ́ú dɛ̀tɛ́mu di mmɔ̀nnì. 
\v 33 Kɛ̀ Sɑmmuyɛɛri nɛ́ ò nɑ̀kɛ́ kɛ dɔ̀:
\q1 A siè diì te kɛ̀ tibíyɔ̃tì pɑ̀ɑ̀ ti bí,
\q1 ɑ kóo yɔ̃ múnkɛ yóó pɑ̀ɑ̀mu o birɛ.
\p Dɛǹdɛ Sɑmmuyɛɛri ò kùɔmɛ̀ Kidikɑɑdi ti Yiɛ̀ nKuyie ntɑummɛ̀ tou ììkɛ̀.
\b
\p
\v 34 Dɛ kó difɔ̃nkúò kɛ̀ Sɑmmuyɛɛrii kò nDɑmɑɑ, kɛ̀ Sɑurii kò nKibeɑ. 
\v 35 Kɛ̀ Sɑmmuyɛɛri yɛ̀mmɛ̀ɛ cɑɑ̀rɛ̀ mɛdiɛ̀ nSɑuri kpɛ́í nkòò yɑ̀ɑ kúnɛ̀ ò tɛ̃́nkɛ í ò yɑ̀. Kɛ̀ ti Yiɛ̀ nKuyie nyɛ̀mmɛ̀ múnkɛɛ cɑɑ̀rɛ̀ kù tɑ̃ɑ̃tɛ́ mɛ̀ɛ̀ kpɛ́í Sɑuri kòò bo ntú Isidɑyɛɛribɛ kpɑ̀ɑ̀tì.
\c 16
\s1 Bɛ̀ pĩ̀ḿmɛ̀ Dɑfiti tikpɑ̀tì
\p
\v 1 Kɛ̀ ti Yiɛ̀ nKuyie nnɑ́kɛ́ Sɑmmuyɛɛri kɛ dɔ̀: Dɛ̀ yó nkɑ̃́ɑ̃́kɛ́ dɛ kɑ̀ɑ yóu ɑ bo nkuɔ̀mmɛ̀ Sɑuri kpɛ́í? Nh ò dootóomu, ò tɛ̃́nkɛ í yó ntú Isidɑyɛɛribɛ kpɑ̀ɑ̀tì, ítɛ́ kɛ́túótɛ́ ɑ nɑɑ̀yènnì, kɛ́ dì cũɔ̃́ mɛkùɔ̀ nkɛ́kɔtɛ Sɛsee ciɛ Bɛtideɛmmu. O bí miɛkɛ nkɛ n tɑ̃ɑ̃tɛ́mɛ̀ okpɑ̀ɑ̀tì n yɛ̀mmɛ̀ kou. 
\v 2 Kɛ̀ Sɑmmuyɛɛri dɔ̀: Yé mbo yĩ́mɛ̀? Kɛ̀ n kɔ̀tɛ Sɑuri yóó keèmu kɛ́ n kuɔ. Kɛ̀ ti Yiɛ̀ nKuyie ndɔ̀: Ítɛ́ kɛ́ntɔ fɛnɑ̀ɑ̀fɛ̀, kɑ̀ɑ tùɔ̀koo ɑ dɔ̀: N kɔ̀tɛní kɛ bo féútɛ́ fɛɔ̃̀fɛ̀ nfɛ ti Yiɛ̀ nKuyie. 
\v 3 A yú Sɛsee kòò ndɑ nɛínɛ̀, míì yóó dɑ bɛnkɛ ɑ dò nkɛ́dɔɔ̀mɛ̀, kɑ̀ɑ pĩ́ n dɑ bɛnkɛ wè tikpɑ̀tì.
\p
\v 4 Kɛ̀ Sɑmmuyɛɛrii dɔɔ̀ ti Yiɛ̀ nKuyie nhò nɑ̀kɛ́ tì kɛ́kɔtɛ Bɛtideɛmmu, kɛ́tuɔkoo kɛ̀ dihɛì kó bɛkótíbɛ̀ɛ ò yɑ̀, kɛ̀ dɛ̀ɛ bɛ̀ di kɛ̀ bɛ kɔ̃̀ntì nhɑu, kɛ̀ bɛ̀ɛ kɔtɛní kóò co kɛ dɔ̀: Kusɑ̀ɑ̀kù bɑkɑɑ̀? 
\v 5 Kòo bɛ̀ tɛ̃̀ńnɛ́ kɛ dɔ̀: N kɔ̀tɛní kɛ bo féútɛ́ fɛɔ̃̀fɛ̀ nfɛ ti Yiɛ̀ nKuyie. Wénkùnnɛ dimɑ́ɑ̀ kɛ̀ ti nɛi kɛ́féútɛ́ fɛɔ̃̀fɛ̀.
\p Kɛ̀ Sɑmmuyɛɛrii duɔ́ nkɛ̀ Sɛsee nɛ̀ o bí kɛ̀ bɛ̀ɛ wénkùnnɛ bɛmɑ́ɑ̀, kóò nɛinɛ̀ kɛ̀ bɛ̀ bo fíé iwũɔ̃. 
\v 6 Bɛ̀ tùɔ̀koo dìì mɔ̀nnì kɛ̀ Sɑmmuyɛɛrii yɑ̀ Ediɑbu, nɛ̀ o yɛ̀mmɛ̀ miɛkɛ kɛ dɔ̀: Ntɛ ti Yiɛ̀ nKuyie ntɑ̃ɑ̃tɛ́ wè mɛ̀nkɛ. 
\v 7 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: Bɑ́ nwúó nho dòmmɛ̀ nɛ̀ o okùmɛ̀, nyí we ntɑ̃ɑ̃tɛ́, n yí wúó mbɛnìtìbɛ̀ wùó ndɛ̀, bɛnìtìbɛ̀ wèí tikɔ̃̀ntì nti kɛ̀ mí nwéí mɛyɛ̀mmɛ̀.
\p
\v 8 Kɛ̀ Sɛsee yúní Abinnɑdɑbu, kòo tuɔkɛní, kɛ̀ Sɑmmuyɛɛri dɔ̀: Ti Yiɛ̀ nKuyie nyí tɑ̃ɑ̃tɛ́ yie.
\p
\v 9 Kɛ̀ Sɛsee yúní Sɑmɑɑ, kɛ̀ Sɑmmuyɛɛri dɔ̀: Ti Yiɛ̀ nKuyie nyí tɑ̃ɑ̃tɛ́ yie.
\p
\v 10 Kɛ̀ Sɛsee nyuní o bí kɛ́tuɔkɛnɛ̀ ìyiekɛ̀, ti Yiɛ̀ nKuyie nyí ntɑ̃ɑ̃tɛ́ bɛ kóò mɔù.
\p
\v 11 Kɛ̀ Sɑmmuyɛɛrii bekɛ Sɛsee kɛ dɔ̀: Bɛdɑpɑ̀mbɛ̀ bɛmɔu ndɑɑ̀? Kòò dɔ̀: Osɑ́m̀pɔ́ù weè kpɑɑní kɛ cɛ̃mmú ipe. Kɛ̀ Sɑmmuyɛɛri dɔ̀: Tɔ̃ nkɛ̀ bɛ̀ɛ ò yuní, kòò í tùɔ̀kɛní ti í yóó di ikuɔ́ diì.
\p
\v 12 Kɛ̀ Sɛsee tɔ̃ nkɛ̀ bɛ̀ɛ ò yuní. Ò do tú onitiwũɔ̃wè nwe kòo ììkɛ̀ wenni, kòo yɛ̀mmɛ̀ duɔ́ cɑ́tirɛ. Kɛ̀ ti Yiɛ̀ nKuyie nnɑ́kɛ́ Sɑmmuyɛɛri kɛ dɔ̀: Weǹwe, pĩ́ nwe tikpɑ̀tì. 
\v 13 Kɛ̀ Sɑmmuyɛɛrii ítɛ́ kɛ́túótɛ́ o nɑɑ̀yènnì kɛ́cóú mmɛkùɔ̀ nDɑfiti yuu ĩ́nkɛ̀, o tebìí ììkɛ̀, kɛ̀ ti Yiɛ̀ nKuyie nYɑɑ́ ncútɛ́ní dɛ kó diyiè Dɑfiti ĩ́nkɛ̀ kɛ́ nhò bonɛ̀.
\p Dɛ kó difɔ̃nkúò kɛ̀ Sɑmmuyɛɛrii kò nho ciɛ Dɑmɑɑ.
\p
\v 14 Kɛ̀ ti Yiɛ̀ nKuyie nkó muyɑɑ́ nyítɛ́ Sɑuri ĩ́nkɛ̀, kɛ̀ kùu ò duɔnní mɛyɛ̀mmɛ̀ yɛimɛ kɛ̀ mɛ̀ nhò kɔɔ́nnɛ̀. 
\v 15 Kòo tɔ̃mbɛ̀ɛ ò nɑ̀kɛ́ kɛ dɔ̀: Ti Yiɛ̀ nKuyie nkuù dɑ duɔnní mɛyɛ̀mmɛ̀ yɛimɛ kɛ̀ mɛ̀ dɑ kɔɔ́nnɛ̀. 
\v 16 Ti yiɛ̀ nkɑ̀ɑ ti pɑ̃ dinùù tínti ɑ kó bɛtɔ̃mbɛ̀ ti yóó wɑɑ́mmu onìtì wèè nɔ nkɛ bie nkukùtìdùkù, kɛ̀ mɛyɛ̀mmɛ̀ yɛimɛ Kuyie nduɔ̀nní mɛ̀ níí dɑ ìtɛ́ dìì mɔ̀nnì wèe bentɛ kukùtìdùkù kɛ̀ dɛ̀ dɑ tɔ̃ũkɛ. 
\v 17 Kɛ̀ Sɑuri dɔ̀: Yɑ̀nɛ̀ onìtì wèè nɔ nkɛ bie nkukùtìdùkù mɛsɑ̀ɑ̀ nkòò kɔtɛní.
\p
\v 18 Kòo kóo tɔ̃ntì mɔùu bɛ́i nkɛ dɔ̀: N yɛ̃́mu onìtì mɔù, Sɛsee Bɛtideɛmmu ɛì kou kó dɛbirɛ kòò nɔ nkɛ bie nkukùtìdùkù mɛsɑ̀ɑ̀, onìtì mɔ́mmuɔ nwe kòò tu onitidɔ̀ù kɛ nɑ́ɑ́nnɛ̀ mɛciì, kɛ tú odɑsɑ́ɑ́tì kɛ̀ ti Yiɛ̀ nKuyie nhò bonɛ̀.
\p
\v 19 Kɛ̀ Sɑurii tɔ̃ nkɛ̀ bɛ̀ɛ nɑ́kɛ́ Sɛsee kɛ dɔ̀: Sɑuri tu ɑ ò duɔ́nko ɑ birɛ Dɑfiti wèè cɛ̃mmù ipe. 
\v 20 Kɛ̀ Sɛsee wɑɑ́ mpɛ̃́ɛ̃̀ nɛ̀ mɛnɑɑ̀ nkɛ́cũɔ̃́ kudɔukù miɛkɛ, kɛ́pĩ́ ntɛbuɔtɛ̀ kɛ́ dɛ̀ toú nsɑ̃mmɑrímú, kɛ̀ Dɑfiti bii bo dɛ̀ duɔ́ nSɑuri. 
\v 21 Kɛ̀ Dɑfitii tuɔkɛ Sɑuri cĩ́ɛ̃̀tɛ̀ kɛ́mpĩ́ nho tɔ̃mmú, kɛ̀ Sɑurii ò pɛ́nsìrì, kóò tɑ̃ɑ̃tɛ́ kòò ntɔu o kpɑ̀rìnɛntì. 
\v 22 Kɛ̀ Sɑurii tɔ̃ nkɛ̀ bɛ̀ɛ nɑ́kɛ́ Sɛsee kɛ dɔ̀: Sɑuri tu ò dɔ́ Dɑfiti mbo o cĩ́ɛ̃̀tɛ̀ ntɛ kɛ pĩ́ nho tɔ̃mmú kɛ yɛ̃́ wè ò pɛ́nsìrìmɛ̀ mɛdiɛ̀.
\p
\v 23 Kɛ̀ dɛ̀ɛ yie nkɛ̀ mɛyɛ̀mmɛ̀ yɛimɛ Kuyie nduɔ̀nnímɛ̀ níí ò ìtɛ́, Dɑfitii túótɛ́ kukùtìdùkù kɛ́bentɛ kɛ̀ dɛ̀ɛ tɔ̃ũkɛ Sɑuri, kòo yɛ̀mmɛ̀ɛ bonkɛ kɛ̀ mɛyɛ̀mmɛ̀ yɛimɛɛ ítɛ́.
\c 17
\s1 Dɑfiti kpɑnnɛ̀mɛ̀ Kodiyɑti
\p
\v 1 Kɛ̀ Fidisitɛ̃ɛ̃bɛɛ tíí mbɛ kó bɛhɑ̃ɑ̃pɔ̀mbɛ̀ mudoò kpɛ́í nSokoo Sudɑɑ tempɛ̃ mmiɛkɛ, kɛ́kɑri Efɛɛsi-Dɑmimmu, Sokoo nɛ̀ Asekɑɑ dɛ cuokɛ̀. 
\v 2 Sɑuri nɛ̀ Isidɑyɛɛribɛ kɛ̀ bɛmbɛ múnkɛɛ bɑ́tɛ́ kubiriku bɛ̀ tu kù Tedemɛntì biriku kɛ́mbɑɑti kɛ bo dokɛ́nɛ̀ Fidisitɛ̃ɛ̃bɛ. 
\v 3 Fidisitɛ̃ɛ̃bɛ nɛ̀ Isidɑyɛɛribɛ kɛ̀ bɛ̀ ndekɛ yɛtɑ̃rɛ̀ kɛ wetí bɛtɔbɛ̀, kɛ̀ kubiriku sokɛ́ bɛ cuokɛ̀.
\p
\v 4 Kòo nìtì mɔù yìɛ̀ní Fidisitɛ̃ɛ̃bɛ kó bɛhɑ̃ɑ̃pɔ̀mbɛ̀ miɛkɛ Kɑti nɑɑ̀mùnkù kou, kòo yètìrì tu Kodiyɑti, o okùmɛ̀ bo ntùɔ̀kɛ mɛ́tìrì mɛ̀tɑ̃ɑ̃ti nɛ̀ sɑ̃ntimɛ́tìrì sipísìdɛ́ nɛ̀ mɛ̀nùmmù. 
\v 5 Kòò òkɛ́ disɔɔwũɔ̃̀ kó dipìì kɛ̀ disɔɔwũɔ̃̀ kó kupenku pi o cĩ̀ncĩ̀nnì kɛ̀ ku cɛ̃́ɛ̃́kù bo cìdóò sipísìkuɔ̀. 
\v 6 Kòò kɑ̃nkɛ́ o tɑ̀ɑ̀kɛ disɔɔwũɔ̃̀ kó kupenku, kɛ bɑ́ɑ́tí disɔɔwũɔ̃̀ kó dikpɑ̀rìsiè. 
\v 7 Kòo kpɑ̃nnì kó kudɔú mɑ̀nnɛ̀ kucuudɔú kɛ̀ mɛkpɑ̃mbii nkó kucɛ̃́ɛ̃́kù bo cìdóò bɛ̀yiekɛ̀. Wèè tɔ o dɔpìkù kòò ni o ììkɛ̀. 
\v 8 Kòo cómmú kɛ́pĩɛ̃kɛ́ kɛ dɔ̀: Di bennɛ́ kɛ yɛ̀nnímu kɛ bo ti dokɛ́nɛ̀, n tú Fidisitɛ̃ɛ̃ nwe kɛ̀ díndi tú Sɑuri kó tidɑɑtì. Tɑ̃ɑ̃tɛ́nɛ̀ di miɛkɛ onìtì òmɑ́ɑ̀ kòo kɔtɛní kɛ̀ tí kpɑ! 
\v 9 Kòò n nɑ tí nɑɑ́ ndi kó tidɑɑtì, kɛ̀ m mɛ nhò nɑ dí nɑɑ́ nti kó tidɑɑtì kɛ́mpĩ́ nti tɔ̃mmú. 
\v 10 N yí di wúó nfɛnɔ̀nfɛ̀ kɛ̀ di yetɛ, dí dɛitɛní di miɛkɛ onìtì òmɑ́ɑ̀ kɛ̀ tí kpɑ.
\p
\v 11 Kɛ̀ Sɑuri nɛ̀ Isidɑyɛɛribɛ kɛ̀ bɛ̀ɛ keè dɛ kóo nìtì nɑ̀ɑ́mmɛ̀, kɛ̀ kufɔ̃wɑɑ́ mbɛ̀ ɑutɛ́.
\b
\p
\v 12 Dɑfiti cicɛ do tú Sɛsee Efɑdɑtɑɑ kó dihɛì kou nwe kɛ bo Bɛtideɛmmu Sudɑɑ tempɛ̃ mmiɛkɛ kɛ mɔkɛ ibí ìyiekɛ̀. Sɑuri kó dimɔ̀nnì do sɔ̃́ nhò kòtɛ́mu mɛdiɛ̀. 
\v 13-14 Kòo bí ikótí itɑ̃ɑ̃ti niɛ̀nɛ̀ Sɑuri dikpɑ̀nnì, bɛ kóo po Ediɑbu nɛ̀ Abinnɑdɑbu nɛ̀ Sɑmɑɑ. Dɑfiti weè do tú tɛyɑ̃ɑ̃tɛ̀. 
\v 15 Kɛ̀ Dɑfiti níí mbo Sɑuri cĩ́ɛ̃̀tɛ̀ kɛ kũũ̀nní o cicɛ cĩ́ɛ̃̀tɛ̀ Bɛtideɛmmu kɛ cɛ̃mmù o pe.
\b
\p
\v 16 Kɛ̀ weè Fidisitɛ̃ɛ̃ nyiitiní dikṹnweńnì nɛ̀ kuyuoku kɛ dɔ̀ yɛwe sipísìnɑ̀ɑ̀.
\p
\v 17 Dɛ kó yɛwe miɛkɛ nkɛ Sɛsee nɑ̀kɛ́mɛ̀ o birɛ Dɑfiti kɛ dɔ̀: Túótɛ́ tidiitì tii nnɛ̀ kuyɔ̀rìkù ti cìe ntì nɛ̀ pɛ̃́ɛ̃̀bɛ̀ biɛ ntɛpíítɛ̀, kɛ́kɔtɛ kɛ́duɔ́ nhɑ kó bɛkótíbɛ̀ bɛ̀ bɑ̀tɛ́ dɛ̀. 
\v 18 Á ntonɛ̀ yɛnɑɑkɑ̃ɑ̃̀ ntɛpíítɛ̀ tiɛ kɛ́ntɔ kɛ bií duɔ́ nwèè bɛ̀ bɑkɛ́. Kɑ̀ɑ dɔu nhɑ kó bɛkótíbɛ̀ kɛ wɛ̃tiní bɛ̀ dɑ duɔnní dɛ̀mɑrɛ̀ dɛ̀ɛ̀ bɛnkú bɛ kɔ̃̀ntì nɑɑtimɛ̀. 
\v 19 Bɛmbɛ nɛ̀ Sɑuri nɛ̀ Isidɑyɛɛribɛ tɔbɛ̀, bɛ̀ bo kubiriku bɛ̀ tu kù Tedimɛnti biriku nku kɛ dokùnɛ̀ Fidisitɛ̃ɛ̃bɛ.
\p
\v 20 Dikṹnweńnì sɛ̀ì kɛ̀ Dɑfitii pikɛ cutɛ kɛ́bɑnnɛ ipe onìtì mɔù kɛ́túótɛ́ ò dò nkɛ́ntɔ dɛ̀, kɛ́kétɛ́, kɛ́ndònnɛ̀ o cicɛ do ò nɑ̀kɛ́ dìì nùù. Ò tùɔ̀koo dìì mɔ̀nnì bɛ̀ bɑ̀tɛ́ dɛ̀, kɛ sɔ̃́ mbɛ̀ dɔ́ kɛ́bootɛ bɛ dootitɔbɛ̀ kɛ́uu dikpɑ̀nnì kó fɛhúùfɛ̀. 
\v 21 Fidisitɛ̃ɛ̃bɛ nɛ̀ Isidɑyɛɛribɛ kɛ̀ bɛ̀ɛ wetínnɛ́ bɛtɔbɛ̀. 
\v 22 Kɛ̀ Dɑfitii dɔúnko o nɛntì o nɛmbɑ̀rì borɛ̀ kɛ́kɔtɛ mudoò borɛ̀ kɛ́ndɔu nho kó bɛkótíbɛ̀. 
\v 23 Bɛ̀ kpɑɑ́ kɛ mɛ nnɑ́ɑ́ nkɛ̀ Kodiyɑti Fidisitɛ̃ɛ̃, Kɑti nɑɑ̀mùnkù kouu ítɛ́ní o ɑ̃ɑ̃pɔ̀mbɛ̀ ììkɛ̀ kɛ́wɛ̃tɛ kɛ́bɛ́i ò bɑɑ ɔ̃ nnɑ́ɑ́ ntì, kɛ̀ Dɑfitii keè. 
\v 24 Kɛ̀ Isidɑyɛɛribɛɛ ò yɑ̀ní kɛ̀ kufɔ̃wɑɑ́ mbɛ̀ ɑutɛ́ kɛ̀ bɛ̀ ncokù, 
\v 25 kɛ nnɑ́ɑ́ nkɛ tú: Dɛ kòo nìtì dɔ́ kɛ ti wɛ̃́ntɛ́mu, dɛɛ̀ te kòò iitiní miɛ̀ mbotí, kòò mɔù nɑ koò kùɔ okpɑ̀ɑ̀tì bo ò pɑ̃ tikpɑ̀tì pɛ́u kóò duɔ́ nho kóo sɑpɑ̀ɑ̀ nkòo puokɛ, kɛ́dɔɔ̀ dɛ yiɛ̀ ncĩ́ɛ̃̀tɛ̀ mɛsɑ̀ɑ̀ nyIsidɑyɛɛribɛ cuokɛ̀.
\p
\v 26 Kɛ̀ Dɑfitii bekɛ bɛhɑ̃ɑ̃pɔ̀mbɛ̀ bɛ̀ɛ̀ ò tɔ̀kɛ́nɛ̀ kɛ dɔ̀: Kòò mɔù kùɔ Fidisitɛ̃ɛ̃ yie nkɛ dènnɛ Isidɑyɛɛribɛ ifɛi bɛ̀ bo ò yietí bɑ? O yɛ̀mmɛ̀ dò nhò tu we dɛ kóo Fidisitɛ̃ɛ̃, kutɑyóú yiɛ̀, kòo bo nsɑ̃́ɑ̃́ Kuyie nkɔbɛ.
\p
\v 27 Kɛ̀ bɛ̀ɛ ò tɛ̃̀ńnɛ́ kóò nɑ̀kɛ́ bɛ̀ bɑɑ do yɛ̃ mbɛ̀ yóó yietí dɛ̀ wèè bo nɑ dɛ kóo nìtì. 
\v 28 Kòo kóo kótì Ediɑbuu keè bɛ̀ nɑ̀ɑ́mmɛ̀, kòo miɛkɛ pɛikɛ kòò dɔ̀: We nyɛ̃ nhɑ kɔtɛní diɛ! A yóunɛ̀ we ipe dikpɑ́ɑ̀ miɛkɛ? N dɑ yɛ̃́mu ɑ í yo ditoò, N yɛ̃́mu ɑ yɛ̀mmɛ̀ dòmmɛ̀. A kɔ̀tɛní kɛ bo yɑ̀ dikpɑ̀nnì ndi. 
\v 29 Kɛ̀ Dɑfitii ò tɛ̃̀ńnɛ́ kɛ dɔ̀: N dɔ̀ɔ̀ bɑ dɛ̀ɛ̀ tu dɛyɛirɛ? N nɑ bɑ́ mbekɑɑ̀?
\p
\v 30 Kɛ̀ Dɑfitii ítɛ́ onìtì wenwe borɛ̀ kɛ́kɔtɛ kɛ́bekɛ́ otɔù mɔù kòò bɑɑ ò tɛ̃̀ńnɛ́ bɛtɔbɛ̀ do ò nɑ̀kɛ́ tì nti.
\p
\v 31 Kɛ̀ bɛnìtìbɛ̀ bɛmɔuu keè dɛ kó tinɑ́ɑǹtì, dɛndɛ bɑ̀mbɑ̀ nkɛ̀ tìi tuɔkɛ Sɑuri kòo duɔ́ nkɛ̀ bɛ̀ɛ yúní Dɑfiti. 
\v 32 Kɛ̀ Dɑfitii ò nɑ̀kɛ́ kɛ dɔ̀: Okpɑ̀ɑ̀tì, ɑ yɛ̀mmɛ̀ bɑ́ɑ́ cɑɑ̀rɛ̀nɛ̀ dɛ kóo Fidisitɛ̃ɛ̃. A kóo tɔ̃ntì, mí, m bo kɔtɛ kóò kpɑnnɛ̀. 
\v 33 Kɛ̀ Sɑuri dɔ̀: A bɑ́ɑ́ nɑ kɛ́kpɑnnɛ̀ dɛ kóo nìtì, ɑ kpɑɑ́ bɛmmu, wenwe mɛ ntu okpɑ̀rì nwe nɛ̀ o bíkɛ́mbɛ́ntì. 
\v 34 Kɛ̀ Dɑfiti dɔ̀: Mí nhɑ kóo tɔ̃ntì n tú opecɛ̃nti nwe n cicɛ cĩ́ɛ̃̀tɛ̀, kɛ ɔ̃ ncɛ̃mmú ipe, kɛ̀ dicìrícìrì kɔ̀tɛní yoo mupĩ́mpĩ́mmù mɑmù kɛ bo pĩ́ m pìèfɛ̀ mɑfɛ̀, 
\v 35 N fɛ̀ pɑ̀tɛ kɛ́ dɛ̀ bɛ̀ti, kɛ́fietɛ m pìèfɛ̀, kɛ̀ dɛ̀ wɛ̃̀ɛ̃tɛní m bíɛ́kɛ̀, m pĩ́ dɛ fɔ̃̀níí kɛ́ dɛ̀ potɛ́ kɛ́kuɔ. 
\v 36 N kɔù mɛ̀ɛ̀ botí yɛcìrícìrɛ̀ nɛ̀ dɛpĩ́mpĩ́nnɛ̀, n yóó mɛ ndɔɔ̀ Fidisitɛ̃ɛ̃ yie nwenwe kutɑyóú yiɛ̀ nkɛ yɛ̃́ ò sɑ̃̀ɑ̃́mmɛ̀ Kuyie nkɔbɛ. 
\v 37 Ti Yiɛ̀ nKuyie nkùù n dɛɛtɛ́nɛ̀ dicìrícìrì nɛ̀ mupĩ́mpĩ́mmù kù yó n dɛɛtɛ́nɛ̀mu Fidisitɛ̃ɛ̃ yie. Kɛ̀ Sɑuri dɔ̀: Kɔtɛ kɛ̀ ti Yiɛ̀ nKuyie ndɑ teennɛ̀.
\p
\v 38 Mɛm̀mɛ Sɑurii duɔ́mmɛ̀ Dɑfiti o kpɑ̀rìnɛntì kóò òó ndisɔɔwũɔ̃̀ kó dipìì kóò dɑ̀tínnɛ́ dicĩ̀ncĩ̀nkɔ̃̀nnì. 
\v 39 Kɛ̀ Dɑfiti túótɛ́ Sɑuri siè kɛ́bɑ́ɑ́tí dicĩ̀ncĩ̀nkɔ̃̀nnì ĩ́nkɛ̀, ò í nnɑ kɛ bo centɛ kɛ yɛ̃́ ò do í dɛ̀ mɑntɛ́nɛ̀mɛ̀, kɛ́nɑ́kɛ́ Sɑuri kɛ dɔ̀: N yĩɛ̃kɛmu! Kɛ̀ bɛ̀ɛ dɛ̀ dɑ̀tɛ́. 
\v 40 Kòo túótɛ́ mutɑ̃́ntɛ̀ndìtìmù kɛ́tɑ kukó mpɛɛ́mmɛ̀ kɛ́tɑ̃ɑ̃tɛ́ yɛtɑ̃́rɛ̀ yɛ̀nùmmù kɛ́cũɔ̃́ o yɔ̀rì miɛkɛ kɛ́pikú o tɑ̃́ntɛ̀ndìtìmù kɛ́kétɛ́ kɛ́nwetí Kodiyɑti. 
\v 41 Kɛ̀ Kodiyɑti múnkɛ mmɔ́ nkɛ tɔ́ɔ́ntɛnɛ̀ Dɑfiti, wèè tɔ o dɔpìkù kòò ni o ììkɛ̀. 
\v 42 Kòo wéntɛ́ Dɑfiti kóò sènkɛ̀rì. Dɑfiti do tú dɛdɑpùmbirɛ ndɛ kɛ wũɔ̃ kòo ììkɛ̀ wenni. 
\v 43 Kɛ̀ Kodiyɑtii nɑ́kɛ́ Dɑfiti kɛ dɔ̀: A n wúó ntɛmɔtɛ̀ ntɛ kɛ tɔ kupɑ̀ɑ̀ti kɛ kéríní m borɑ̀ɑ̀? Kɛ̀ Kodoyɑtii pɑrìkɛ̀ kɛ́yú Fidisitɛ̃ɛ̃bɛ kó yɛbɔkɛ̀ yɛmɔu yètɛ̀ kɛ̀ dɔ̀: A bo yɑ̀! 
\v 44 Kɔtɛní kɛ̀ n duɔ́ nhɑ mɑɑ ndɛĩ́nkɛ̀ kó tinɔ̀tì nɛ̀ tikpɑsĩ̀ntì. 
\v 45 Kɛ̀ Dɑfiti dɔ̀: Fɔ̃́ nkéríní m borɛ̀ nɛ̀ disiè ndi nɛ̀ kukpɑ̃nseú nɛ̀ dikpɑ̃nnì, mí mmɛ nkéróo ɑ borɛ̀ nɛ̀ ti Yiɛ̀ nKuyie nyètìrì ndi, Mpɑkɛdɑɑ Isidɑyɛɛribɛ tũ nwè, ɑ sɑ̃́ɑ̃́ nwè. 
\v 46 Ti Yiɛ̀ nKuyie ndɑ ɑ̃nnɛ́ n nɔ̀ùtɛ̀ ntɛ yíe, kɛ̀ m bo dɑ kuɔ kɛ́kéétɛ́ ɑ yuu. Yíe ntinɔ̀tì nɛ̀ tikpɑsĩ̀ntì dɛɛ̀ yóó pɛ́tɛ́ Fidisitɛ̃ɛ̃bɛ kó bɛhɑ̃ɑ̃pɔ̀mbɛ̀ kɛ́cɔ. Kɛ̀ kutenkù kumɔu kɔbɛɛ bɑntɛ́ Isidɑyɛɛribɛ tũmmɛ̀ Kuyie. 
\v 47 Kɛ̀ Isidɑyɛɛribɛɛ bɑntɛ́ kɛ dò ti Yiɛ̀ nKuyie nyí dɛɛrínɛ̀ disiè yoo dikpɑ̃nnì, ti Yiɛ̀ nKuyie nkuù bɑkɛ́ dikpɑ̀nnì kɛ di ɑ̃nnɛ́ ti nɔu miɛkɛ yíe.
\p
\v 48 Kodiyɑti kètɛ́ dìì mɔ̀nnì kɛ́wetínnɛ́ Dɑfiti, kɛ̀ Dɑfitii cokóo mɛcɑ̃ɑ̃ nho ììkɛ̀ kɛ bo ò dokɛ́nɛ̀, 
\v 49 kɛ́dɛitɛ ditɑ̃́rì dìmɑ́ɑ̀ o yɔ̀rì miɛkɛ kɛ́ɑ̃nnɛ́ o tɑ̃́ntɛ̀ndìtìmù kɛ́dootɛ́ kɛ́bɔ́tɛ́ Kodiyɑti tĩ́nnì kɛ̀ ditɑ̃́rìi tɑroo, kòò do o nùù ĩ́nkɛ̀.
\p
\v 50 Mɛm̀mɛ Dɑfiti nɑmɛ̀ Fidisitɛ̃ɛ̃ nɛ̀ ditɑ̃́ntɛ̀ndìtìtɑ̃́rì kóò kùɔ bɑ́ ò í tɔ disiè.
\p
\v 51 Kɛ̀ Dɑfitii cokóo Kodiyɑti duɔ́ dɛ̀ kɛ́kpɑtɛ Kodiyɑti siè kóò fèútɛ́nɛ̀. Kɛ̀ Fidisitɛ̃ɛ̃bɛɛ yɑ̀ bɛ kóo kperì kumɛ̀ kɛ́cokɛ́. 
\v 52 Isidɑyɛɛribɛ nɛ̀ Sudɑɑ kɔbɛ kɛ̀ bɛ̀ɛ yɑ̀ Fidisitɛ̃ɛ̃bɛ cokɛ́mɛ̀, kɛ́uu fɛkpɑ̀rìhúùfɛ̀, kɛ́ bɛ̀ bɛ̀ti kɛ́tuɔkɛnɛ̀ Kɑti ɛì nɛ̀ Ekinɔɔ dɛ ɛkɛ̀. Kɛ̀ Fidisitɛ̃ɛ̃bɛ kó bɛcíríbɛ̀ nnɛnkóo Sɑdɑimmu kó kucɛ kɛ́tuɔkɛnɛ̀ Kɑti nɛ̀ Ekinɔɔ.
\p
\v 53 Isidɑyɛɛribɛ do bɛ bɛ̀tì kɛ̀ dɛ̀ fuutímu, kɛ̀ bɛ̀ɛ yóu kɛ́wɛ̃tɛní kɛ́hɛí tinɛntì Fidisitɛ̃ɛ̃bɛ kó dikɑrì. 
\v 54 Kɛ̀ Dɑfitii túótɛ́ Kodiyɑti yuu kɛ́kònnɛ̀ Sedisɑdɛmmu kɛ́túótɛ́ kudɑdiɛkù kpɑ̀rìnɛntì kɛ́tɑnnɛ o touku miɛkɛ.
\s1 Bɛ̀ bɛnkɛmɛ̀ Dɑfiti Sɑuri
\p
\v 55 Dɑfiti do kɔri dìì mɔ̀nnì kɛ bo kpɑnnɛ̀ Kodiyɑti kɛ̀ Sɑurii ò yɑ̀mu kɛ́bekɛ Abunɛɛ wèè bɑkɛ́ bɛhɑ̃ɑ̃pɔ̀mbɛ̀ kɛ dɔ̀: We nte odɑpɑ̀ɑ̀ nyie? Kɛ̀ Abunɛɛ ò tɛ̃̀ńnɛ́ kɛ dɔ̀: Okpɑ̀ɑ̀tì, n yí yɛ̃́ wèè ò te. 
\v 56 Kòo kpɑ̀ɑ̀tì dɔ̀: Bekɛ́ kɛ́yɑ̀ wèè te dɛ kóo dɑpɑ̀ɑ̀.
\p
\v 57 Dɑfiti kùɔ dìì mɔ̀nnì Kodiyɑti kɛ́deè, kɛ́nwɛ̃tiní, kɛ̀ Abunɛɛ ò kɔ̀tɛnɛ̀ Sɑuri borɛ̀, kɛ̀ Dɑfiti kpɑɑ́ tɔ Kodiyɑti yuu. 
\v 58 Kɛ̀ Sɑurii ò bekɛ kɛ dɔ̀: N kóo dɑpɑ̀ɑ̀ nhɑ tú we nkó dɛbirɛ? Kɛ̀ Dɑfiti dɔ̀: N tú ɑ kóo tɔ̃ntì Sɛsee wèè bo Bɛtideɛmmu o birɛ ndɛ.
\c 18
\s1 Dɑfiti nɛ̀ Sonnɑtɑ̃ɑ̃ bɛ̀ dɑpɛmɛ̀
\p
\v 1 Dɑfiti nɑ̀kɛ́nɛ̀ Sɑuri dìì mɔ̀nnì kɛ́deè kɛ̀ Sonnɑtɑ̃ɑ̃ wɛ̃nnìi pĩ́nnɛ̀ Dɑfiti kpɛri, kòo yɛ̀mmɛ̀ɛ ò tɑ, kòo ò dɔkɛ kɛ́ndònnɛ̀ ò dɔ́mɛ̀ omɑ́ɑ̀. 
\v 2 Nɛ̀ dɛ kó diyiè Sɑuri tɛ̃́nkɛ í nyie nkɛ̀ Dɑfitii wɛ̃tɛ o cĩ́ɛ̃̀tɛ̀ o cicɛ borɛ̀. 
\v 3 Dɛ mɔ̀nnì kɛ̀ Sonnɑtɑ̃ɑ̃ tɑunnɛ̀ Dɑfiti kɛ yɛ̃́ wè ò dɔ́mɛ̀ kɛ dònnɛ̀ ò dɔ́mɛ̀ omɑ́ɑ̀. 
\v 4 Kɛ̀ Sonnɑtɑ̃ɑ̃ dɑ́tɛ́ o yɑɑ̀bòrì kɛ́duɔ́ nDɑfiti, kóò duɔ́nnɛ̀ o ɑ̃ɑ̃pɔ̀nyɑ̀ɑ̀tì nɛ̀ o siè nɛ̀ o tɑ̃mmù nɛ̀ o nɑɑ̀kɔ̃̀nnì.
\p
\v 5 Tipíìtì timɔu kɛ̀ Sɑuri bɛ̀ tɔ̃ nkɛ̀ɛ̀ bíɛ́kɛ̀ mudoò Dɑfitii nɑ kɛ̀ Sɑurii ò bɑɑ́ nkòo mbɑkɛ́ bɛhɑ̃ɑ̃pɔ̀mbɛ̀ kɛ̀ bɛnìtìbɛ̀ bɛmɔu ò dɔ́ nɛ̀ bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀.
\s1 Sɑuri miɛkɛ do yonkɛmɛ̀ Dɑfiti bɛ̀ ò sɑ̃ntɛ mɛ̀ɛ̀ kpɛ́í
\p
\v 6 Dɑfiti do kùɔ dìì mɔ̀nnì Kodiyɑti kɛ́konní kɛ̀ bɛnitipòbɛ̀ yɛhɛkɛ̀ yɛmɔu kɔbɛɛ yɛ̀nní kɛ́co Sɑuri, kɛ́ndiè nkɛ ɑu kɛ bie nyɛbɑ̀rɛ̀ nɛ̀ dɛbémbénnɛ̀ tɛrɛ̀. 
\v 7 Kɛ̀ bɛnitipòbɛ̀ dìè nkɛ cɔ́ú mbɛtɔbɛ̀ kɛ tú:
\q1 Sɑuri kùɔ sikɔupí,
\q1 kɛ̀ Dɑfiti kùɔ sikɔupípí.
\p
\v 8 Kɛ̀ Sɑuri miɛkɛɛ pɛikɛ mɛdiɛ̀, ò í mpɛ́nsìrì dɛ kó tinɑ́ɑǹtì kɛ dɔ̀: Bɛ̀ mɛ nhò duɔ̀ nsikɔupípí kɛ n duɔ̀ sikɔupí, dɛ̀ kpɑɑ́ sɑ́m̀pɔ́ nwe kɛ̀ bɛ̀ɛ ò duɔ́ ntikpɑ̀tì. 
\v 9 Nɛ̀ dɛ kó diyiè ndi Sɑurii wèńtɛ́mɛ̀ Dɑfiti fɛnɔnsĩ̀nfɛ̀.
\p
\v 10 Kɛ̀ dɛ̀ɛ wentɛ́ kɛ̀ mɛyɛ̀mmɛ̀ yɛimɛ Kuyie ntɔ̃nní mɛ̀ɛ pĩ́ nSɑuri, kòo ítɛ́ kɛ́nhɑrì o cĩ́ɛ̃̀tɛ̀ miɛkɛ kɛ pikú o kpɑ̃nnì, kɛ̀ Dɑfiti tó nhò bie nkukùtìdùkù ò ɔ̃ mbie mmɛ̀ɛ̀ botí, 
\v 11 kòo youtɛ o kpɑ̃nnì, nɛ̀ o yɛ̀mmɛ̀ miɛkɛ kɛ dɔ̀: M bo tɑ̃ Dɑfiti kɛ́dɑnnɛnɛ̀ fɛmɑrifɛ, kɛ̀ Dɑfitii yentɛ́nɛ̀ dikpɑ̃nnì kucɛ mɛ̀dɛ́mɛ̀. 
\v 12 Kɛ̀ Sɑurii ò yɔ̀tɛ kɛ yɛ̃́ ti Yiɛ̀ nKuyie ndo ò yóumɛ̀ kɛ́mbonɛ̀ Dɑfiti. 
\v 13 Kòo túótɛ́ Dɑfiti kɛ́nií mbɛhɑ̃ɑ̃pɔ̀mbɛ̀ tɛkɔùpíítɛ̀ kɛ bo ò dɛ́tinnɛnɛ̀ omɑ́ɑ̀. Mɛm̀mɛ kɛ̀ Dɑfiti nni bɛhɑ̃ɑ̃pɔ̀mbɛ̀ kɛ̀ bɛ̀ nkɔrì mudoò. 
\v 14 Mudoò ò kɔ̀rì mùù kó dimɑ̀ɑ̀ kɛ̀ weè nɔ nkɛ yɛ̃́ ti Yiɛ̀ nKuyie nho bonɛ̀mɛ̀. 
\v 15 Sɑuri yɑ̀ dìì mɔ̀nnì Dɑfiti nɔmmɛ̀ o dootitɔbɛ̀ kóò depɛ mɛdiɛ̀. 
\v 16 Isidɑyɛɛribɛ biɛ bɛmɔu nɛ̀ Sudɑɑ kɔbɛ kɛ̀ bɛ̀ ndɔ́ Dɑfiti kɛ yɛ̃́ weè bɛ̀ nimɛ̀ mudoò miɛkɛ.
\s1 Dɑfiti puokɛmɛ̀ Mikɑɑdi Sɑuri kóo sɑpɑ̀ɑ̀
\p
\v 17 Dɛ kó difɔ̃nkúò kɛ̀ Sɑurii nɑ́kɛ́ Dɑfiti kɛ dɔ̀: Ntɛ n kóo sɑpɑ̀ɑ̀ mMɛdɑbu, n wè ndɑ duɔ́mmu kɑ̀ɑ bo puokɛ, mpĩ́ n tɔ̃mmú nɛ̀ dikɔ̃m̀bùɔ̀ kɛ́nkpɑ nti Yiɛ̀ nKuyie nkó dikpɑ̀nnì. Ò do í dɔ́ kóò kùɔ o mɔ́mmuɔ nkɛ nɛ́ ndɔ́ Fidisitɛ̃ɛ̃bɛ bɛɛ̀ ò kùɔ. 
\v 18 Kɛ̀ Dɑfiti dɔ̀: N yí tú òmɔù, ti nɑɑ̀mùnkù í tú kùmɑkù, ti wuɔ nyí tú kùmɑkù Isidɑyɛɛribɛ miɛkɛ, kɛ̀ míì bo puokɛ okpɑ̀ɑ̀tì kóo sɑpɑ̀ɑ̀nɑ̀ɑ̀?
\p
\v 19 Dɛ̀ tùɔ̀kɛ dìì mɔ̀nnì Mɛdɑbu bo yenkɛmɛ̀ Dɑfiti kɛ̀ Sɑurii ò duɔ́ nhAdidiɛdi Abɛti Mɛodɑɑ ɛì kou.
\p
\v 20 Kɛ̀ Sɑuri kóo sɑpɑ̀ɑ̀ ntɔù Mikɑɑdii dɔkɛ Dɑfiti kɛ̀ bɛ̀ɛ tì nɑ̀kɛ́ Sɑuri, kɛ̀ dɛ̀ɛ o nɑrikɛ. 
\v 21 Nɛ̀ o yɛ̀mmɛ̀ miɛkɛ kòò dɔ̀: M bo wè nhò duɔ́ kóò dìí nkɛ̀ Fidisitɛ̃ɛ̃bɛɛ ò nìntɛ. Kucɛ mɛdɛ́rímmɛ̀ mmɛ Sɑuri nɑ̀kɛ́mɛ̀ Dɑfiti kɛ dɔ̀ wèe puokɛ o kóo sɑpɑ̀ɑ̀. 
\v 22 Kɛ̀ Sɑurii nɑ́kɛ́ o kó bɛtũ̀mbɛ̀ kɛ dɔ̀: Nɑ́kɛ́nɛ̀ Dɑfiti didɛ́ borɛ̀ kɛ dɔ̀: Okpɑ̀ɑ̀tì tu ò dɑ dɔ́mu, tínti o kó bɛtũ̀mbɛ̀ kɛ̀ ti múnkɛ dɑ dɔ́, yie nkɛ́puokɛ o kóo sɑpɑ̀ɑ̀.
\p
\v 23 Kòo kpɑ̀ɑ̀tì tũ̀mbɛ̀ɛ tì nɑ̀kɛ́ Dɑfiti, kòò dɔ̀: Di yɛ̀mmɛ̀ dò ndɛ̀ tu diwɑ́ntìrì ndi ɑ bo puokɛmɛ̀ okpɑ̀ɑ̀tì kóo sɑpɑ̀ɑ̀nɑ̀ɑ̀? Ntɛ mí nkɛ í mɔkɛ mùmɑmù m mɛ nyí tú òmɔù.
\p
\v 24 Kòo kpɑ̀ɑ̀tì tũ̀mbɛ̀ɛ wɛ̃too kɛ́nɑ́kɛ́ okpɑ̀ɑ̀tì Sɑuri Dɑfiti yɛ̃ mmù. 
\v 25 Kòò dɔ̀: Kɔtɛnɛ̀ kóò nɑ̀kɛ́ kɛ tú: N yí wɑnti ò n yietí tipocòntì, n dɔ́ wèe kuɔ Fidisitɛ̃ɛ̃bɛ mbɛ kɛ́pɛitɛ kɛ́tɔní bɛ tɑyéí tɛkɔ̀ùtɛ̀ (100).
\p Sɑuri do dɔ́ Fidisitɛ̃ɛ̃bɛ bɛɛ̀ nintɛ Dɑfiti. 
\v 26 Kòo kpɑ̀ɑ̀tì tũ̀mbɛ̀ɛ kɔtɛ kɛ́ tì nɑ̀kɛ́ Dɑfiti, kòo ti yie. Bɑ́ dɛ kó diyiè mu nyí tùɔ̀kɛ, 
\v 27 kɛ̀ Dɑfiti nɛ̀ o kɔbɛ kɛ̀ bɛ̀ɛ kɔtɛ kɛ́kuɔ Fidisitɛ̃ɛ̃bɛ sikɔusìdɛ́ (200), kɛ́tɔní bɛ tɑyéí kɛ́duɔ́ nhokpɑ̀ɑ̀tì, kòo ì kɑ̀ɑ. Dɛ mɔ̀nnì kòo ò duɔ́ nho kóo sɑpɑ̀ɑ̀ nkòo puokɛ.
\p
\v 28 Kɛ̀ Sɑurii bɑntɛ́ kɛ dò ti Yiɛ̀ nKuyie nkuù bonɛ̀ Dɑfiti kɛ̀ Mikɑɑdi o kóo sɑpɑ̀ɑ̀ nhò dɔ́. 
\v 29 Kɛ̀ Sɑuri dɔkɛɛ yɔtɛ Dɑfiti, kɛ́ nhò nìí mmɛdiɛ̀.
\p
\v 30 Fidisitɛ̃ɛ̃bɛ kpɑ̀ɑ̀tìbɛ̀ dokɛ́ mùù doò kó dimɑ̀ɑ̀ nɛ̀ Isidɑyɛɛribɛ kɛ̀ weè nnɔ mmudoò kɛ́pɛ̃ɛ̃tɛ́ Sɑuri kó bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀. Kòo yètìrìi feitɛ́ mɛdiɛ̀.
\c 19
\s1 Sonnɑtɑ̃ɑ̃ kòńnɛ́mɛ̀ Dɑfiti
\p
\v 1 Diyiè mɑrì kɛ̀ Sɑurii nɑ́kɛ́ o kóo dɑpɑ̀ɑ̀ nSonnɑtɑ̃ɑ̃ nɛ̀ o kó bɛtũ̀mbɛ̀ ò dɔ́mɛ̀ kɛ́kuɔ Dɑfiti. Sonnɑtɑ̃ɑ̃ nɛ́ do mɛ ndɔ́mɛ̀ Dɑfiti mɛdiɛ̀ nkòo ò nɑ̀kɛ́ kɛ dɔ̀: 
\v 2 N cicɛ Sɑuri dɔ́ kɛ dɑ kuɔmu, ɑ́ ndɑkɛ nɑnkɛ dikṹnweńnì, ɑ bɑ́ɑ́ yie nkòo dɑ yɑ̀, ɑ́ nsɔri. 
\v 3 Kɛ̀ nh ò nɛinɛ̀ kɛ tí kɔtɛ ɑ sɔri kɛ̀ɛ̀ bíɛ́kɛ̀, kɛ̀ ńh ò bɛ́innɛ̀ ɑ kpɛ́í, kɛ́yɑ̀ ò yóó yĩ́mɛ̀, kɛ̀ n dɑ nɑ́kɛ́.
\p
\v 4 Kɛ̀ dɛ̀ɛ wentɛ́ kɛ̀ Sonnɑtɑ̃ɑ̃ nsɑ̃ntí Dɑfiti o cicɛ Sɑuri borɛ̀, koò nɑ̀ɑ́ nkɛ tú: Fɔ̃́ nhokpɑ̀ɑ̀tì ɑ bɑ́ɑ́ dɔ̀ɔ̀ mɛyɛi mmɑmɛ̀ Dɑfiti, ò í dɑ dɔ̀ɔ̀ mɛyɛi mmɑmɛ̀, ò pètìnkɛ dɔɔri dɛ̀ tu ɑ kó mɛsɑ̀ɑ̀ mmɛ. 
\v 5 Weè kɑ̀ɑ́tɛ́ mukṹṹ nkɛ kùɔ Fidisitɛ̃ɛ̃ kɛ̀ ti Yiɛ̀ nKuyie nduɔ́ nkɛ̀ Isidɑyɛɛribɛ bɛ̀ nɑ, kɑ̀ɑ dɛ̀ yɑ̀ kɛ̀ dɛ̀ dɑ nɑrikɛ. Bɑ nkpɛ́í nte kɑ̀ɑ bo dɔɔ̀ mɛyɛi nkɛ́kuɔ onitisɑ̀ù? Bɑ nte kɑ̀ɑ sɔ̃̀ńtɛ́ kɛ dɔ́ kɛ́kuɔ Dɑfiti dɛtetìrɛ̀?
\p
\v 6 Kɛ̀ Sɑurii yie nSonnɑtɑ̃ɑ̃ kpɛti kɛ́bɛ́i nkɛ́yú ti Yiɛ̀ nKuyie nyètìrì kɛ dɔ̀: M bɑ́ɑ́ kuɔ Dɑfiti.
\p
\v 7 Kɛ̀ Sonnɑtɑ̃ɑ̃ kɔtɛ kɛ́yɑ̀ Dɑfiti kóò nɑ̀kɛ́ bɛ̀ nɑ̀kɛ́ tìì kó dimɑ̀ɑ̀, kóò tɔ kɛ́kpɛ̃nnɛ́ní tɛcĩ́ɛ̃̀tɛ̀, kòo wɛ̃tɛ kɛ́sɔɔtɛ́ o tɔ̃mmú ò ɔ̃ mmù pĩ mmɛ̀ɛ̀ botí.
\s1 Mikɑɑdi dɛɛtɛ́mɛ̀ Dɑfiti
\p
\v 8 Kɛ̀ bɛ̀ɛ wɛ̃tɛ kɛ́sɔɔtɛ́ mudoò kɛ̀ Dɑfitii ɑutɛ́ o dootitɔbɛ̀ kɛ̀ bɛ̀ɛ cokɛ́.
\p
\v 9 Diyiè mɑrì kɛ̀ mɛyɛ̀mmɛ̀ yɛimɛ Kuyie ntɔ̃nní mɛ̀ɛ pĩ́ nSɑuri o cĩ́ɛ̃̀tɛ̀ miɛkɛ kɛ sɔ̃́ nhò tɔ o kpɑ̃nnì kɛ̀ Dɑfiti ò bie nkukùtìdùkù. 
\v 10 Kɛ̀ Sɑurii tɑ̃ũ dikpɑ̃nnì kɛ bo wɛ̃nnɛ́nɛ̀ Dɑfiti kumɑrí kɛ́dɑnnɔɔ, kɛ̀ Dɑfitii yentɛ́ kɛ̀ dikpɑ̃nnìi tɑ̃ kumɑrí kɛ́nfṹṹkú kɛ̀ Dɑfitii yɛ̀ kɛ́cokɛ́ dɛ kó kɛyènkɛ̀ kɛ́sɔri. 
\v 11 Kɛ̀ Sɑurii tɔ̃ mbɛnìtìbɛ̀ dɛ kó kɛyènkɛ̀ kɛ̀ bɛ̀ mbɑɑ Dɑfiti cĩ́ɛ̃̀tɛ̀ kɛ bo ò kùɔ dikṹnweńnì, kɛ̀ Dɑfiti pokù Mikɑɑdii ò nɑ̀kɛ́ kɛ dɔ̀: Kɑ̀ɑ í cokɛ́ kɛ sɔ̀ri kɛyènkɛ̀ kiɛ mbɛ̀ nɑɑ yóó pikɛ dɑ kuɔmu.
\p
\v 12 Ò yĩ mɛmmɛ kóò cṹũ nfenɛ́tì, kòo cokɛ́ kɛ́dɛɛtɛ́ o fòmmu. 
\v 13 Kɛ̀ Mikɑɑdi túótɛ́ tɛtenkɑɑnìtɛ̀ kɛ́dɔú nDɑfiti dɔ́ù ĩ́nkɛ̀ kɛ́dɑ́tínnɛ́ kubɔkɔ̃̀nkù tɛ yuu kɛ́ tɛ̀ dɑ̀tínnɛ́ kuyɑ̀ɑ̀kù. 
\v 14 Sɑuri tɔ̃ mbɛ̀ kɛ̀ bɛ̀ bo pĩ́ nDɑfiti bɛ̀ tùɔ̀koo dìì mɔ̀nnì kòo pokùu bɛ̀ nɑ̀kɛ́ kɛ dɔ̀: O kɔ̃̀ntì í nɑɑti.
\p
\v 15 Kɛ̀ Sɑurii yíɛ́ kɛ́ bɛ̀ tɔ̃ nkɛ dɔ̀: Kɔtɛnko kóò tùótɛ́ní o dɔ́ù ĩ́nkɛ̀ kɛ̀ nh ò kùɔ.
\p
\v 16 Kɛ̀ bɛ̀ ntùɔ̀koo kɛ sɔ̃́ ntɛtenkɑɑnìtɛ̀ tɛɛ̀ duɔ́ o dɔ́ù ĩ́nkɛ̀ kɛ̀ kubɔkɔ̃̀nkù dɑ̀ɑ́tí tɛ yuu. 
\v 17 Kɛ̀ Sɑurii bekɛ Mikɑɑdi kɛ dɔ̀: Dɛ̀ yĩ́mɛ kɑ̀ɑ n soutɛ́ mɛmmɛ botí kɛ yóu kɛ̀ n dootitɔù cokɛ́. Kɛ̀ Mikɑɑdi dɔ̀: Weè yĩ nh ò yóu, kɛ̀ n yí ò yóu ò bo n kuɔ.
\s1 Sɑuri tũ̀nnɛmɛ̀ Dɑfiti Nɑyɔti
\p
\v 18 Mɛm̀mɛ Dɑfiti nɑmɛ̀ kɛ́cokɛ́ kɛ́kɔtɛ Dɑmɑɑ Sɑmmuyɛɛri borɛ̀, kóò nɑ̀kɛ́ Sɑuri ò dɔ̀ɔ̀ dɛ̀ɛ̀ kó dimɑ̀ɑ̀. Kɛ̀ bɛ̀ɛ kɔtɛ kɛ́mbo Nɑyɔti Dɑmɑɑ tempɛ̃ mmiɛkɛ. 
\v 19 Kɛ̀ bɛ̀ɛ nɑ́kɛ́ Sɑuri kɛ dɔ̀: Dɑfiti bo Nɑyɔti Dɑmɑɑ tempɛ̃ mmiɛkɛ. 
\v 20 Kɛ̀ Sɑurii tɔ̃ nkɛ̀ bɛ̀ bo ò pĩ̀ńní. Bɛ̀ tùɔ̀koo dìì mɔ̀nnì kɛ́yɑ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɛ̀ bɛ kóo kótì Sɑmmuyɛɛri kɛ̀ bɛ̀ nnɑ́ɑ́ nKuyie mpɑ̃ɑ̃nɑ́ɑǹtì kɛ̀ Kuyie nYɑɑ́ mbɛ̀ pĩ nkɛ̀ bɛ̀ɛ tɑ Kuyie mpɑ̃ɑ̃nɑ́ɑǹtì nɑ́ɑm̀mù. 
\v 21 Kɛ̀ Sɑurii tì kèè kɛ́yíɛ́ kɛ́tɔ̃ mbɛtɔbɛ̀ kɛ̀ Kuyie nYɑɑ́ mbɛ̀ pĩ nkɛ̀ bɛ̀ɛ tɑ nKuyie mpɑ̃ɑ̃nɑ́ɑǹtì nɑ́ɑm̀mù, kòò yíɛ́ kɛ́tɔ̃ mbɛtɔbɛ̀ mɛɛ̀ mɑ́ɑ̀. 
\v 22 Kòo yóu kɛ́pĩ́ nkucɛ o mɔ́mmuɔ nkɛ́kɔtɛ Dɑmɑɑ kɛ́tuɔkoo tɛbintɛ diɛtɛ̀ tɛ̀ɛ̀ bo Seku kɛ́bekɛ kɛ dɔ̀: Sɑmmuyɛɛri nɛ̀ Dɑfiti bɛ̀ borɛ? Kɛ̀ bɛ̀ dɔ̀: Bɛ̀ bo Nɑyɔti nwe Dɑmɑɑ ɛì tɑkɛ́.
\p
\v 23 Kòo kétɛ́ kɛ́mberínɛ̀ kucɛ cuokɛ̀ kɛ̀ Kuyie nYɑɑ́ nhò pĩ nkòo sɔɔtɛ́ kɛ́nnɑ́ɑntoo Kuyie mpɑ̃ɑ̃nɑ́ɑǹtì kɛ́tuɔkɛnɛ̀ Nɑyɔti Dɑmɑɑ tɑkɛ́. 
\v 24 Kɛ múnkɛɛ dɑ́tɛ́ o yɑ̀ɑ̀tì kɛ́nnɑ́ɑ́ nKuyie mpɑ̃ɑ̃nɑ́ɑǹtì Sɑmmuyɛɛri ììkɛ̀, kɛ́do kɛ́nduɔ́ kɛtenkɛ̀ o tetìrì kuyie nkumɔu nɛ̀ kɛyènkɛ̀ kɛmɔu. Dɛɛ̀ te kɛ̀ bɛ̀ nɑ̀ɑ́ ndɛ kó dikotinùù kɛ tú: Sɑuri múnkɛ kɔkɛ́mu Kuyie mpɑ̃ɑ̃nɑ́ɑǹtì nɑ́ɑm̀bɛ̀ miɛkɑɑ̀?
\c 20
\s1 Sonnɑtɑ̃ɑ̃ teemɛ̀ Dɑfiti
\p
\v 1 Diyiè mɑrì kɛ̀ Dɑfitii ítɛ́ Nɑyɔti Dɑmɑɑ tɑkɛ́ kɛ́kɔtɛ Sɑuri birɛ Sonnɑtɑ̃ɑ̃ borɛ̀ kóò bekɛ kɛ dɔ̀: N cɑ̀ɑ̀rɛ̀ bɑ? N dɔ̀ɔ̀ ɔ̃̀mmɛ yɛi nhɑ cicɛ kòo dɔ́ kɛ́ n kuɔ? 
\v 2 Kɛ̀ Sonnɑtɑ̃ɑ̃ dɔ̀: Dɛndɛ bɑ́ɑ́ dɔɔ̀, ɑ í yóó kú, n cicɛ ɔ̃ɔ̃ í ndɔ̀ɔ̀ dɛ̀mɑrɛ̀ kɛ í n nɑ̀kɛ́, bɑ nte kòò bo n sɔnnɛ tii? Dɛ̀ í bo! 
\v 3 Kɛ̀ Dɑfitii bɛ́i nkɛ dɔ̀: Nɛ̀ ti Yiɛ̀ nKuyie nkó diyètìrì m bɛ́immu kɛ tú ɑ cicɛ yɛ̀mmɛ̀ tì bomu, ò nɛ́ yɛ̃́mu kɛ dò nti dɑ́pú, dɛɛ̀ te kòò í dɔ́ kɛ́yóu kɑ̀ɑ tì keè, ɑ yɛ̀mmɛ̀ yɑ̀ɑ̀ bo cɑɑ̀rɛ̀. N dɑ nɑ́ɑ́ ntimɔ́mmɔnti nti nɛ̀ mukṹṹ nti tɔ́kɛ́ kɛ dò fɛnɔ̀nfɛ̀ nɛ̀ diɔ̃nnì ndi. 
\v 4 Kɛ̀ Sonnɑtɑ̃ɑ̃ nɑ́kɛ́ Dɑfiti kɛ dɔ̀: Kɑ̀ɑ dɔ́ n dɔɔ̀ dɛ̀ n yóó dɛ̀ dɔɔ̀mu. 
\v 5 Kɛ̀ Dɑfiti dɔ̀: Nɑnkɛ tú otɑ̃̀nkù pɑ̀nwè nwe n dò nkɛ́mbomu okpɑ̀ɑ̀tì cĩ́ɛ̃̀tɛ̀ kɛ̀ tí wɛ̃nnɛ́ kɛ́di. A nɛ́ m pɑ̃ dinùù kɛ̀ n tɑ dikpɑ́ɑ̀ kɛ́nsɔri, nɑnkɛ nɛ̀ diyiè tɛrì kuyuoku. 
\v 6 A cicɛ yó m mɔ́ntɛ́mu, kòò bekɛ, ɑ ò nɑ̀kɛ́ kɛ tú n yɑ̃ũtɛ́ fɔ̃́ nwe kucɛ kɛ kɔ̀tɛ Bɛtideɛmmu n ciɛ, kɛ bo wɛ̃nnɛ́nɛ̀ n cĩ́ɛ̃̀tɛ̀ kɔbɛ kɛ̀ ti fíé iwũɔ̃ dibenni kó mukṹṹ nkpɛyi. 
\v 7 Kòò yĩ dɛ̀ wenni, tìmɑtì í bo. Kòò miɛkɛ mɛ mpɛikɛ, ɑ bɑntɛ́ kɛ dò nhò n dɔ́nɛ̀ mukṹṹ mmu. 
\v 8 Bɛnkɛ ɑ n dɔ́mɛ̀ mí nhɑ kóo tɔ̃ntì, kɛ yɛ̃́ ɑ n dɔ̀ɔ̀nɛ̀mɛ̀ mɛtɑummɛ̀ kɛ yu ti Yiɛ̀ nKuyie nyètìrì. Kɛ̀ m mɛ ncɑ̀ɑ̀rɛ̀mu ɑ n kuɔ ɑ mɔ́mmuɔ nhɑ bɑ́ n duɔ́ nhɑ cicɛ.
\p
\v 9 Kɛ̀ Sonnɑtɑ̃ɑ̃ kuɔ́nko kɛ dɔ̀: Kuyie mbɑ́ɑ́ dɛ̀ tɔní! Kɛ̀ n kèè kɛ̀ n cicɛ dɔ́ kɛ́ dɑ dɔɔ̀ mɛyɛi m bɑ́ɑ́ dɑ sɔnnɛ, míì bɛ́i. 
\v 10 Kɛ̀ Dɑfitii bekɛ Sonnɑtɑ̃ɑ̃ kɛ dɔ̀: Kɑ̀ɑ bɛ́i nkɑ̀ɑ cicɛ bɑ̀ɑní we mbo n nɑ́kɛ́? 
\v 11 Kɛ̀ Sonnɑtɑ̃ɑ̃ nɑ́kɛ́ Dɑfiti kɛ dɔ̀: Kɔtɛní kɛ̀ tí kɔtɛ dikpɑ́ɑ̀.
\p Kɛ̀ bɛ̀ɛ nɛi bɛdɛ́ kɛ́kɔtɛ. 
\v 12 Kɛ̀ Sonnɑtɑ̃ɑ̃ nɑ́kɛ́ Dɑfiti kɛ dɔ̀: Nɛ̀ Kuyie nyIsidɑyɛɛribɛ tũ nkù yètìrì, nɑnkɛ yoo diyiè tɛrì dɛ̀ bo nkɑ̃́ɑ̃́kɛ́ miɛ nkɛ̀ n yɑ́ɑ́kɛ́ n cicɛ kɛ́yɑ̀ o yɛ̀mmɛ̀ dòmmɛ̀. Kɛ̀ tìmɑtì í bo fɔ̃́ nnɛ̀ we di cuokɛ̀ ɑ bɑ́ɑ́ keè tìmɑtì. 
\v 13 Kɛ̀ n cicɛ mɛ ndɔ́ kɛ́ dɑ dɔɔ̀ mɛyɛi, kɛ̀ n yí dɑ nɑ̀kɛ́ ti Yiɛ̀ nKuyie nni mpotɛ́ mɛdiɛ̀. N yóó dɑ pɑ̃mu kucɛ kɑ̀ɑ ítɛ́, ɑ bɑ́ nyĩɛ̃̀kù, ti Yiɛ̀ nKuyie nni ndɑ bonɛ̀ kù do bonɛ̀mɛ̀ n cicɛ. 
\v 14 Kɛ̀ ǹ kpɑɑ́ fòù ɑ nyɛ̃́ ti Yiɛ̀ nKuyie ndɑ dɔ̀ɔ̀ mɛ̀ɛ̀ sɑ̀ɑ̀ nkpɛ́í nkɛ́ n dɔ̀ɔ̀ mɛsɑ̀ɑ̀ nkɛ̀ m bɑ́ɑ́ kú. 
\v 15 Dɛ kó difɔ̃nkúò ɑ́ nsɔkɛ́ kɛ dɔɔri n yɑɑ̀bí mɛsɑ̀ɑ̀ nkɛ̀ ti Yiɛ̀ nKuyie nduɔ́ nkɑ̀ɑ nkɔù ɑ dootitɔbɛ̀ omɑ́ɑ̀ omɑ́ɑ̀ kɛtenkɛ̀ ĩ́nkɛ̀.
\p
\v 16 Kɛ̀ ti Yiɛ̀ nKuyie nduɔ́ nkɑ̀ɑ nɑ ɑ dootitɔbɛ̀ bɛmɔu, ɑ bɑ́ɑ́ tɔ̃tɛ mɛtɑummɛ̀ mɛ̀ɛ̀ bo ti cuokɛ̀ mí nnɛ̀ fɔ̃́, kɑ̀ɑ mɛ̀ tɔ̃̀tɛ ti Yiɛ̀ nKuyie ndɑ potɛ́. 
\v 17 Kɛ̀ Sonnɑtɑ̃ɑ̃ duɔ́ nkɛ̀ Dɑfitii bɛ́i nkɛ́yú Kuyie nyètìrì kɛ́bɛnkɛ wè ò dɔ́mɛ̀ kɛ yɛ̃́ wenwe Sonnɑtɑ̃ɑ̃ ò dɔ́mɛ̀ Dɑfiti nɛ̀ o yɛ̀mmɛ̀ mɛmɔu ndi.
\p
\v 18 Kɛ̀ Sonnɑtɑ̃ɑ̃ ò nɑ̀kɛ́ kɛ dɔ̀: Nɑnkɛ tú otɑ̃̀nkù pɑ̀nwè kó dibɑnni ndi. A fíè nnɑɑ yóó nfeímu kɛ̀ bɛ̀ dɑ mɔ́ntɛ́. 
\v 19 Nɑnkɛ diyiè tɛrì bɛ̀ yóó dɑ mɔ́ntɛ́mu, ɑ kɔtɛní ɑ sòò sɔ̀ri dɛ̀ diyiè tɛrì kɛ́ncómmú ditɑ̃rì Esɛdi tɑkɛ́. 
\v 20 N nɑɑ yóó tɑ̃ũmu ipie nyìtɑ̃ɑ̃ti ii ndɛ bíɛ́kɛ̀ kɛ́fietí n dɔ́ dɛ̀, 
\v 21 kɛ́tɔ̃ n kóo tɔ̃ntì odɑpɑ̀ɑ̀ nkòò nyóó ì tùótɛ́ní, kɛ̀ nh ò nɑ̀kɛ́ kɛ yĩ: Ipie nyí dɑ dɛ́tirìnɛ̀, wɛ̃tɛní diɛ nkɛ́ ì tùótɛ́! Á bɑntɛ́ kɛ dò ntìmɑtì í bo kɛ́wɛ̃tɛní. Ti Yiɛ̀ nKuyie mbomu míì bɛ́i. 
\v 22 Kɛ̀ mmɛ nnɑ̀kɛ́ n kóo tɔ̃ntì kɛ yĩ: Ipie nyí tɔ́kɛ́ dɛndɛ, ì bo dɛ ììkɛ̀ nkɛ, ɑ́ dɛ́tɛ́, ti Yiɛ̀ nKuyie ndɔ́ ɑ́ ítɛ́mu. 
\v 23 Mɛtɑummɛ̀ ti dɔ̀ɔ̀mɛ̀ mí nnɛ̀ fɔ̃́, ti Yiɛ̀ nKuyie nti wúómmu kɛ yó nyɛ̃́ mɛ kpɛ́í nsɑ̃́ɑ̃̀.
\p
\v 24 Kɛ̀ Dɑfiti nsɔri dikpɑ́ɑ̀.
\b
\p Kòo tɑ̃̀nkù pɑ̀nwèe yɛ̀nní kɛ̀ bɛ̀ɛ ɑ̃nnɛ́ dibɑnni kòo kpɑ̀ɑ̀tìi kɑri kɛ bo di dibɑnni, 
\v 25 kɛ́nkɑri o kɑ̀rì kɛ dírí kumɑrí, kɛ̀ bɛhɑ̃ɑ̃pɔ̀mbɛ̀ kóo kótì Abunɛɛ kɑ̀ri o tɑkɛ́, kɛ̀ Sonnɑtɑ̃ɑ̃ kɑ̀ri o ììkɛ̀, kɛ̀ Dɑfiti kó mɛfíè nfeí. 
\v 26 Sɑuri í mbɛ́i ntìmɑtì dɛ yiè kòo yɛ̀mmɛ̀ ndò nkɛ̀ dɛ̀ yɛ̀mmɛ̀ ò bo nsɑ̃ũ omɑ́ɑ̀ ndi, kɛ̀ dɛɛ̀ te kòò í kɔ̀tɛní. 
\v 27 Otɑ̃̀nkù yiè dɛ́rì kòo kpɑ̀ɑ̀tì wɛ̃tɛ kɛ́yɑ̀ Dɑfiti kɑ̀rì feímɛ̀ kɛ́bekɛ Sonnɑtɑ̃ɑ̃ kɛ dɔ̀: Dɛ̀ yĩ́mɛ kɛ̀ Dɑfiti wee í kɔ̀tɛní kɛ wɛ̃̀tɛ kɛ í kɔ̀tɛní yíe?
\p
\v 28 Kɛ̀ Sonnɑtɑ̃ɑ̃ dɔ̀: Dɑfiti n yɑ̃ũtɛ́mu kɛ tú nh ò pɑ̃ kucɛ kòò dɔ́ kɛ́kɔtɛ Bɛtideɛmmu nwe, kɛ yetoo, 
\v 29 ò m mɔɔmu kɛ tú nh ò yóu kòo kɔtɛ kɛ̀ bɛ̀ mɔ̀kɛ ikuɔ́ nyi bɛ cĩ́ɛ̃̀tɛ̀, kòo kóo kótì yɛ̃ nwèe kɔtoo. Ntɛ dɛ̀ɛ̀ te kɛ̀ Dɑfiti í nɑ kɛ kɔ̀tɛní okpɑ̀ɑ̀tì bɑnni.
\p
\v 30 Kòo kpɑ̀ɑ̀tì Sɑuri miɛkɛɛ pɛikɛ Sonnɑtɑ̃ɑ̃ kòo ò sɑ̃̀ɑ̃́ nkɛ dɔ̀: Tɛmɔtɛ̀ kó dɛbirɛ fɔ̃́! N yɛ̃́mu kɛ dò nhɑ tùótɛ́ Sɛsee kó dɛbirɛ ndɛ kɛ dɔ̀ɔ̀ ɑ nɛ́po! A fɛi ĩ́nkɛ̀ nkɛ nɛ̀ ɑ yɔ̃ kpɛyi. 
\v 31 A nyɛ̃́ kɛ dò nkɛ̀ dɛ kóo nìtì kpɑɑ́ fòù ɑ í yóó nɑ kɛ́di tikpɑ̀tì, tɔ̃ nkɛ̀ bɛ̀ɛ we nni mpĩ́nní, ò dò nkɛ́kuɔmu. 
\v 32 Kɛ̀ Sonnɑtɑ̃ɑ̃ tɛ̃́nnɛ́ o cicɛ Sɑuri kɛ dɔ̀: Bɑ nkpɛ́í nte kòò dò nkɛ́kú? Ò cɑ̀ɑ̀rɛ̀ bɑ?
\p
\v 33 Kɛ̀ Sɑuri youtɛ o kpɑ̃nnì kɛ bo ò tɑ̃, kɛ̀ Sonnɑtɑ̃ɑ̃ bɑntɛ́ o cicɛ bɑɑ dɔ́mɛ̀mu kɛ́kuɔ Dɑfiti. 
\v 34 Kòo miɛkɛɛ pɛikɛ kòo ítɛ́, bɑ́ ò tɛ̃́nkɛ í ndi tibɑndiitì, diyiè dɛ́rì kpɛti. Kòo yɛ̀mmɛ̀ɛ cɑɑ̀rɛ̀ mɛdiɛ̀ nho cicɛ sɑ̃̀ḿmúmɛ̀ Dɑfiti.
\p
\v 35 Kɛ̀ dɛ̀ɛ wentɛ́ kɛ̀ Sonnɑtɑ̃ɑ̃ yɛ̀ kɛ́kɔtɛ bɛ̀ wee bennɛ́ dɛ̀ bɛtɔbɛ̀ wenwe nɛ̀ Dɑfiti kɛ nɛínɛ̀ dɛdɑpùmbirɛ, 
\v 36 kɛ́ dɛ̀ nɑ̀kɛ́ kɛ dɔ̀: Cokɛ́ kɛ́túótɛ́ní ipie n yóó tɑ̃ũ ì.
\p Kòo dɑpɑ̀ɑ̀ ncokɛ́ kɛ̀ Sonnɑtɑ̃ɑ̃ tɑ̃ũ kupie nkɛ̀ kùu ò sèńtɛ́. 
\v 37 Odɑpɑ̀ɑ̀ tùɔ̀kɛ dìì mɔ̀nnì kupie mborɛ̀ kɛ̀ Sonnɑtɑ̃ɑ̃ pĩɛ̃kɛ́ kɛ dɔ̀: Kupie nyí pɛ̃ɛ̃tɛ́ dɛndɑɑ̀? 
\v 38 Cokɛ́ mɛcɑ̃ɑ̃ mbɑ́ cómmú!
\p Kòo dɑpɑ̀ɑ̀ ntúótɛ́ kupie nkɛ́wɛ̃tɛní. 
\v 39 Odɑpɑ̀ɑ̀ nyí nyɛ̃́ tìmɑtì, Sonnɑtɑ̃ɑ̃ nɛ̀ Dɑfiti kɛ̀ bɛmbɛ mɛ nyɛ̃.
\p
\v 40 Kɛ̀ Sonnɑtɑ̃ɑ̃ duɔ́ nho duokɛ̀ nɛ̀ o tɑ̃mmù odɑpɑ̀ɑ̀ nkɛ dɔ̀: Kpɛ̃nnɛ́ dɛ tɛcĩ́ɛ̃̀tɛ̀. 
\v 41 Kòo dɑpɑ̀ɑ̀ nkò nkɛ̀ Dɑfitii yɛ̀nní ò do sɔri dɛ̀ ditɑ̃rì píkù, kubɑkù cɑ̃̀nku bíɛ́kɛ̀, kɛ́nínkú kɛ́sĩ́nnɔ́ɔ Sonnɑtɑ̃ɑ̃ ììkɛ̀ kucɛ mɛ̀tɑ̃ɑ̃ti, kɛ̀ bɛ̀ɛ kɔúnnɛ̀ bɛtɔbɛ̀ kɛ́kuɔ́ mmɛdiɛ̀.
\p
\v 42 Kɛ̀ Sonnɑtɑ̃ɑ̃ nɑ́kɛ́ Dɑfiti kɛ dɔ̀: Kɔtɛ kɛ̀ dɛ̀ nnɑɑti, ɑ bɑ́ɑ́ yɛ̃̀ nti dɔ̀ɔ̀ mɛ̀ɛ̀ tɑummɛ̀ kɛ yu ti Yiɛ̀ nKuyie nyètìrì, kù yɛ̃́mu dɛ kó mɛtɑummɛ̀ kpɛ́í nkɛ̀ mɛ̀ yó mbo sɑ̃́ɑ̃̀ nɛ̀ ti yɑɑ̀bío.
\p Mɛm̀mɛ kɛ̀ Dɑfitii ítɛ́ kɛ̀ Sonnɑtɑ̃ɑ̃ kò.
\c 21
\s1 Dɑfiti kɔ̀tɛmɛ̀ Nɔbu ɛì
\p
\v 1 Kɛ̀ Dɑfitii kɔtɛ Nɔbu ikuɔ́ nìùtì Aimmɛdɛki borɛ̀. Kɛ̀ Aimmɛdɛkii ò yɑ̀ kɛ́cokóo o borɛ̀ nɛ̀ iyĩ̀ɛ̃̀kɛ kóò bekɛ kɛ dɔ̀: Dɛ̀ dòmmɛ kɑ̀ɑ bo ɑmɑ́ɑ̀ bɑ́ òmɔù í dɑ nɛínɛ̀?
\p
\v 2 Kɛ̀ Dɑfiti dɔ̀: Okpɑ̀ɑ̀tì weè n duɔ́ mmutɔ̃mmú kɛ yɛ̃ m bɑ́ɑ́ yie nkòò mɔù nyɛ̃́ ò yɛ̃ n dɔɔ̀ dɛ̀. Dɛɛ̀ te kɛ̀ n yĩ n kó bɛtɔ̃mbɛ̀ nni mbɑɑ dibòrì mɑrì. 
\v 3 A mɔkɛ mudiì mɑmɑ̀ɑ̀? M pɑ̃ pɛ̃́ɛ̃̀bɛ̀ bɛ̀nùmmù yoo dɛtɛrɛ̀ mɑrɛ̀ ɑ mɔkɛ dɛ̀. 
\v 4 Kɛ̀ ikuɔ́ nìùtì dɔ̀: N yí mɔkɛ pɛ̃́ɛ̃̀bɛ̀ sɔ̃́ntíkɛ kɔbɛ, bɛ̀ɛ̀ bo, bɛ̀ bɛ̀ pɑ̃ Kuyie nku, m bo nɑ kɛ́ bɛ̀ n dɑ duɔ́ nkɛ́ nsɑ̀ kɑ̀ɑ yɛ̃́ kɛ dò nhɑ kɔbɛ í duɔ́nɛ̀ bɛnitipòbɛ̀.
\p
\v 5 Kɛ̀ Dɑfitii tɛ̃́nnɛ́ ikuɔ́ nìùtì kɛ dɔ̀: Ti ɔ̃ nkɛ̀ ti kɔri mudoò bɛ̀ ti bɑɑmu bɛnitipòbɛ̀, yíe nkó kucɛ tu cɛ̃́nkoo kɔku nku yie, kɛ nɛ́ cɑ̃́ɑ̃́ nkɛ yɛ̃́ bɛ̀ tɔ tìì kpɑ̀rìnɛntì bɛ̀ tì wénkùnnɛmɛ̀ ikuɔ́ yɛ̃mmɛ̀. Bɑ́ kɛ̀ dɛ kó kucɛ do í tú kusɑ̀ɑ̀kù kù yóó wenkɛmu bɛ̀ tɔ tìì kpɑ̀rìnɛntì kpɛ́í.
\p
\v 6 Dɛ mɔ̀nnì kɛ̀ ikuɔ́ nìùtìi ò duɔ́ mpɛ̃́ɛ̃̀bɛ̀ bɛ̀ do pɑ̃ bɛ̀ Kuyie, kɛ̀ bɛ̀ ndɑkɛ́ tɑ́bùrì ti Yiɛ̀ nKuyie ncĩ́ɛ̀tɛ̀ miɛkɛ, kɛ̀ bɛ̀ɛ bɛ̀ dɑɑtɛ́ní kɛ́ceètɛ bɛpɑ̀mbɛ̀.
\p
\v 7 Kɛ sɔ̃́ nSɑuri kóo nìtì mɔù dɛ̀ bo ti Yiɛ̀ nKuyie ntɑummɛ̀ tou miɛkɛ kɛ dɔɔri Kuyie nkuɔ́, kòo yètìrì tu Dowɛki, kòo tu Edomiibɛ botí kou, weè do bɑkɛ́ Sɑuri kó bɛpecɛ̃mbɛ.
\p
\v 8 Kɛ̀ Dɑfitii yíɛ́ kɛ́bekɛ Aimmɛdɛki kɛ dɔ̀: A í mɔkɛ dikpɑ̃nnì mɑrì yoo disièɑ̀? Okpɑ̀ɑ̀tì m̀ pɛ́i mmɛcɑ̃ɑ̃ mmɛcɑ̃ɑ̃ mmɛ n yí nɑ kɛ tùótɛ́ n siè yoo kukpɑ̀rìnɛnkù tɛkù mɑkù. 
\v 9 Kɛ̀ ikuɔ́ nìùtì dɔ̀: Kodiyɑti ɑ kùɔ wè kubiriku bɛ̀ tu kù Tedimɛnti biriku o kó disiè diì bo, kɛ duɔ́ ikuɔ́ nɛntì fɔ̃nkúò, kɛ pũɔ̃́ kuyɑ̀ɑ̀kù, kɑ̀ɑ dɔ́ ɑ bo di ntúótɛ́, ditɛrì mɑrì í bo. Kɛ̀ Dɑfiti dɔ̀: Duɔnní di, n yí yóó pɛ́tɛ́ dìmɑrì dìì pɛ̃ɛ̃tɛ́ dii.
\s1 Dɑfiti kɔ̀tɛmɛ̀ Fidisitɛ̃ɛ̃bɛ ɛì
\p
\v 10 Dɛ kó diyiè kɛ̀ Dɑfitii sɔɔtɛ́ kɛ́ncokù Sɑuri kɛ́tuɔkɛnɛ̀ Kɑti kóo kpɑ̀ɑ̀tì Akiisi ciɛ. 
\v 11 Kɛ̀ Akiisi tɔ̃mbɛ̀ɛ ò bekɛ kɛ dɔ̀: Dɛ̀ í dò nDɑfiti nwe Isidɑyɛɛribɛ kpɑ̀ɑ̀tì bɛnitipòbɛ̀ sòò dìè nkɛ sɑ̃ntí wè kɛ tú:
\q1 Sɑuri kùɔ sikɔupí,
\q1 kɛ̀ Dɑfiti kùɔ sikɔupípíɑ̀?
\m
\v 12 Kɛ̀ dɛ kó tinɑ́ɑǹtì pĩ́ nDɑfiti kɛ̀ kufɔ̃wɑɑ́ nhò ɑutɛ́ Akiisi Kɑti kóo kpɑ̀ɑ̀tì ììkɛ̀. 
\v 13 Kòò dɔɔ̀ omɑ́ɑ̀ wèè yɛ̀mmɛ̀ í nɑɑti kɛ́nnɑ́ɑntɛ nɑ́ɑntɛ kɛ kɔ́ú kɔ́ú dicɑ̀ù kó idɛí ĩ́nkɛ̀ kɛ̀ tinɔ́ntɔ̃ũtì yìɛ̀ kɛ ɔrì o dɛɛ̀nfɛ̀. 
\v 14 Kɛ̀ Akiisii nɑ́kɛ́ o kó bɛtũ̀mbɛ̀ kɛ dɔ̀: Di yɑ̀mu onìtì yie nyɛ̀mmɛ̀ í nɑɑtimɛ̀, dɛ̀ yĩ́mɛ kɛ̀ di ò kɔ̀tɛnní m borɛ̀? 
\v 15 M mɔ̀ńtɛ́ tiwɑ́ɑ́títì nti kɛ̀ di n tɔní yie mbotí kòò bo ndɔɔri dɛwɑ́ɑ́tɛ́kpɛrɛ n yììkɑ̀ɑ̀? Yie mbotí bɑ́ɑ́ tɑ n cĩ́ɛ̃̀tɛ̀!
\c 22
\s1 Dɑfiti ketɛ́mɛ̀ muceé
\p
\v 1 Kɛ̀ Dɑfitii ítɛ́ Kɑti kɛ́kɔtɛ kɛ́nsɔri Adudɑmmu kó kutɑ̃dènkù. O kó bɛkótíbɛ̀ nɛ̀ o kɔbɛ bɛmɔu bɛ̀ tì kèè dìì mɔ̀nnì kɛ́kɔtoo kóò sɔ̃̀ńkɛ́. 
\v 2 Bɛ̀ɛ̀ kó dimɑ̀ɑ̀ bo mɛsémmɛ̀ miɛkɛ nɛ̀ yɛbɑ̀ɑ̀ nyɛmbɛ̀ nɛ̀ dɛ̀ í nɑɑti bɛ̀, kɛ̀ bɛ̀ɛ wɛ̃nnɛ́ bɛmɔu kɛ́mbo sikɔusìnɑ̀ɑ̀ (400) kɛ̀ weè bɛ̀ bɑkɛ́.
\p
\v 3 Kɛ̀ Dɑfitii ítɛ́ dɛborɛ̀ kɛ́kɔtɛ Misipɑɑ Mɔɑbu tenkɛ̀ miɛkɛ kɛ́nɑ́kɛ́ Mɔɑbu kpɑ̀ɑ̀tì kɛ dɔ̀: Yóu n cicɛ nɛ̀ n yɔ̃ kɛ̀ bɛ̀ɛ kɔtɛní kɛ́mbo ɑ borɛ̀ kɛ bɑɑnɛ̀ m bo bɑntɛ́mɛ̀ Kuyie nni ndɔ́nɛ̀ tì.
\p
\v 4 Kòo bɛ̀ niitɛ́ Mɔɑbu kóo kpɑ̀ɑ̀tì cĩ́ɛ̃̀tɛ̀, kɛ̀ bɛ̀ ndɛ̀ bo kòò sɔri.
\p
\v 5 Diyiè mɑrì kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Kɑdii nɑ́kɛ́ Dɑfiti kɛ dɔ̀: Bɑ́ nsɔri dɛndɛ, kò nhɑ cĩ́ɛ̃̀tɛ̀ Sudɑɑ tenkɛ̀.
\p Kɛ̀ Dɑfiti ítɛ́ kɛ́kɔtɛ Edɛti kó dikpɑ́ɑ̀.
\s1 Sɑuri kùɔmɛ̀ Kuyie nkuɔ́ nìùbɛ̀ Nɔbu kó dihɛì
\p
\v 6 Kɛ̀ Sɑurii mbo Kibeɑ kɛ kɑri tɛtɑ̃tɛ̀ ĩ́nkɛ̀ mutie mɑmù dɛ́ɛ̀ nkɛ pikú o kpɑ̃nnì kòo kó bɛtɔ̃mbɛ̀ bɛmɔu ò murí kòo keè bɛ̀ yɑ̀mɛ̀ Dɑfiti nɛ̀ o kɔbɛ. 
\v 7 Kɛ̀ Sɑurii bɛ́i nkɛ dɔ̀: Kéntɛ́nɛ̀ díndi Bɛnsɑmɛɛ wuɔ nkɔbɛ! Sɛsee kó dɛbirɛ bo di duɔ́ ndɛpɑɑ nnɛ̀ fínyĩ̀ kó dɛpɑɑnɑɑ̀? Di yɛ̀mmɛ̀ bɑ́ ndò nhò yóó duɔ́ ndímbɛ kɛ̀ di mbɑkɛ́ o tenkɑrɛ̀, kòo di bɑɑti iwɛ̃ĩ? Mpútì! 
\v 8 Dɛ̀ dòmmɛ kɛ̀ di dɔ́ kɛ́ m bɔ ndimɔu? Bɑ́ di mɔù í n nɑ́ɑ́ nkóo dɑpɑ̀ɑ̀ nnɛ̀ Dɑfiti bɛ̀ tɑummɛ̀. Dɛ̀ dòmmɛ kɛ̀ di mɔù í dɑ̀ɑ̀tɛ n kpɛ́í nkɛ bo n nɑ́kɛ́ m birɛ wɛ̃nnɛ́nɛ̀mɛ̀ dɛ kóo nìtì kɛ̀ bɛ̀ bo m bɔ, yɑ́ɑ dɛ̀ í mɛ ndò nyíe?
\p
\v 9 Dɛ mɔ̀nnì kɛ̀ Dowɛki Edomiibɛ botí kou dɛ bo, kɛ bɛ́i nkɛ dɔ̀: N sòò yɑ̀mu diyiè mɑrì Sɛsee birɛ kɛ̀ dɛ̀ kɔ̀too Nɔbu Aimmɛdɛki Aitubu birɛ borɛ̀. 
\v 10 Kòo beé nKuyie nho kpɛ́í nkóò pɑ̃ tidiitì, kóò duɔ́ nKodiyɑti, Fidisitɛ̃ɛ̃ kou kó disiè.
\p
\v 11 Kɛ̀ Sɑurii tɔ̃ nkɛ̀ bɛ̀ɛ pĩ́nní ikuɔ́ nìùtì, Aimmɛdɛki Nɔbu kou nɛ̀ o nɑɑ̀mùnkù kɔbɛ bɛ̀ɛ̀ tu ikuɔ́ nìùbɛ̀, kɛ bɛ̀ kɔ̀tɛnní bɛmɔu okpɑ̀ɑ̀tì borɛ̀. 
\v 12 Kɛ̀ Sɑurii nɑ́kɛ́ Aimmɛdɛki kɛ dɔ̀: Fɔ̃́ nhAitubu birɛ, kéntɛ́ kɛ́keè. Kòò dɔ̀: Okpɑ̀ɑ̀tì, ntɛ mí. 
\v 13 Kɛ̀ Sɑuri dɔ̀: Bɑ nkpɛ́í nte kɛ̀ di dɔ́ kɛ́ m bɔ nfɔ̃́ nnɛ̀ Sɛsee birɛ, kɑ̀ɑ ò duɔ́ ntidiitì, koò duɔ́ ndikpɑ̃nnì, kɛ beé nKuyie nho kpɛ́í nkòò bo m bɔ? Mɛɛ̀ dɔkɑɑ̀?
\p
\v 14 Kɛ̀ Aimmɛdɛkii ò tɛ̃̀ńnɛ́ kɛ dɔ̀: Òmɔù bomu ɑ tɔ̃mbɛ̀ miɛkɛ wèè tu onitisɑ̀ù kɛ dònnɛ̀ Dɑfitɑɑ? Ò tu ɑ cɔ̀kù nwe kɛ weè bɑkɛ́ bɛ̀ɛ̀ dɑ bɑɑ bɛmɔu kɛ̀ bɛ̀ ò sɑ̃ntí ɑ cĩ́ɛ̃̀tɛ̀. 
\v 15 Dɛ yiè dɔkɛ ǹ ketɛ́mɛ̀ m bo beémmɛ̀ Kuyie nho kpɛ́í. N yí dɔ́ kɛ dɑ bɔ. Okpɑ̀ɑ̀tì bɑ́ n tou ntìmɑtì, mí nyoo n cĩ́ɛ̃̀tɛ̀ kou mɔù, n do í yɛ̃́ kɛ dò ntìmɑtì bo di cuokɛ̀, bɑ́ sɑ́m̀pɔ́. 
\v 16 Kòo kpɑ̀ɑ̀tì dɔ̀: Fɔ̃́ nhAimmɛdɛki ɑ yóó kúmu, fɔ̃́ nnɛ̀ ɑ cĩ́ɛ̃̀tɛ̀ tɛmɔu.
\p
\v 17 Kòo nɑ́kɛ́ bɛhɑ̃ɑ̃pɔ̀mbɛ̀ bɛ̀ɛ̀ ò bɑ̀ɑ kɛ dɔ̀: Kuɔnɛ̀ Kuyie nkuɔ́ nìùbɛ̀ bɛmɔu, bɛ̀ mɛ nwɛ̃nnɛ́mɛ̀ Dɑfiti nwe koò teennɛ̀. Bɛ̀ do yɛ̃́mu Dɑfiti cootimɛ̀mu, bɛ̀ mɛ nyí n nɑ̀kɛ́.
\p Bɛhɑ̃ɑ̃pɔ̀mbɛ̀ miɛkɛ òmɔù í ndɑ̀ɑ́tí kɛ bo kɑ́ɑ́kɛ́ ikuɔ́ nìùbɛ̀ kɛ́ bɛ̀ kùɔ. 
\v 18 Kòo kpɑ̀ɑ̀tìi nɑ́kɛ́ Dowɛki Edomiibɛ botí kou kɛ dɔ̀: Kuɔ bɛ! A bɑ́ɑ́ bɛ̀ yóu.
\p Kɛ̀ Dowɛkii bɛ wetínnɛ́ kɛ́kuɔ ikuɔ́ nìùbɛ̀ sipísìni nɛ̀ bɛ̀nùmmù kɛ̀ bɛ̀ ɑ̃ ikuɔ́ yɑ̀ɑ̀tì. 
\v 19 Kɛ̀ Sɑurii kuɔ ikuɔ́ nìùbɛ̀ Nɔbu ɛì miɛkɛ, bɛnitidɑɑbɛ̀ nɛ̀ bɛnitipòbɛ̀ nɛ̀ ibí nɛ̀ ibíbɛ́nni, inɑ̀ɑ̀kɛ nɛ̀ sɑ̃mmɑrímúbɛ̀, ipe nɛ̀ sibɔɔ́ kɛ́ dɛ̀ fèútɛ́ dɛmɔu pɑ́íí. 
\v 20 Kɛ̀ Aimmɛdɛki Aitubu birɛ kó dɛbirɛ Abiɑtɑɑ weè mɑ́ɑ̀ yentɛ́ kɛ́cokɛ́ kɛ́sɔ̃́nkóo Dɑfiti, 
\v 21 kóò nɑ̀kɛ́ Sɑuri kùɔmɛ̀ ikuɔ́ nìùbɛ̀ bɛmɔu. 
\v 22 Kɛ̀ Dɑfitii nɑ́kɛ́ Abiɑtɑɑ kɛ dɔ̀: N sòò yɛ̃́mu Edomiibɛ botí kou Dowɛki dɛ̀ bomɛ̀ kɛ yóó nɑ́kɛ́ Sɑuri. Míì te kɛ̀ bɛ̀ kùɔ ɑ kɔbɛ bɛmɔu. 
\v 23 Mbo diɛ m borɛ̀ ɑ bɑ́ nyĩɛ̃̀kù, ti dootitɔù omɑ́ɑ̀ ndi Sɑuri weè dɔ́ kɛ́ ti kuɔ mí nnɛ̀ fɔ̃́. M borɛ̀ dɛ̀mɑrɛ̀ í yóó dɑ dɔɔ̀.
\c 23
\s1 Dɑfiti dɛɛtɛ́mɛ̀ Keidɑɑ ɛì kɔbɛ
\p
\v 1 Diyiè mɑrì kòò mɔùu nɑ́kɛ́ Dɑfiti kɛ dɔ̀: Fidisitɛ̃ɛ̃bɛ do Keidɑɑ kɛ ɛí bɛ diitì. 
\v 2 Kɛ̀ Dɑfitii beé nti Yiɛ̀ nKuyie nkɛ dɔ̀: Kuyie, n dò nkɛ́kɔtɛ kɛ́ bɛ̀ dokɛ́nɑ́ɑ̀? Kɛ̀ ti Yiɛ̀ nKuyie ndɔ̀: Kɔtɛ kɛ́dokɛ́nɛ̀ bɛ kɛ́fietɛ Keidɑɑ.
\p
\v 3 Bɛ̀ɛ̀ nɛínɛ̀ Dɑfiti kɛ̀ bɛ̀ɛ ò nɑ̀kɛ́ kɛ dɔ̀: Ti bo diɛ nSudɑɑ ɛì kɛ̀ kufɔ̃wɑɑ́ nti bo, ti bo dɑ́ɑ́tí Fidisitɛ̃ɛ̃bɛ mbɑɑ̀?
\p
\v 4 Kòò yíɛ́ kɛ́beé nti Yiɛ̀ nKuyie nkɛ̀ kù dɔ̀: Kɔtɛ kɛ̀ n yóó bɛ̀ ndɑ duɔ́mmu kɑ̀ɑ bɛ̀ nɑ.
\p
\v 5 Dɑfiti nɛ̀ o kɔbɛ kɛ̀ bɛ̀ɛ kɔtɛ Keidɑɑ kɛ́tɑ Fidisitɛ̃ɛ̃bɛ mudoò kɛ́fietɛ bɛ wũɔ̃, kɛ́ bɛ̀ ɑutɛ mɛdiɛ̀ nkɛ́dɛɛtɛ́ Keidɑɑ ɛì kɔbɛ.
\p
\v 6 Aimmɛdɛki birɛ Abiɑtɑɑ do yóó cokɛ́ dìì mɔ̀nnì kɛ bo kɔtɛ Dɑfiti borɛ̀ kɛ́ntɔmu ikuɔ́ nɛntì bɛ̀ ɔ̃ɔ̃ beénnɛ̀ tì Kuyie.
\p
\v 7 Kɛ̀ Sɑurii keè Dɑfiti tɑmɛ̀ Keidɑɑ kɛ́bɛ́i nkɛ dɔ̀: Kuyie nwe nni nduɔ́mmu, ò pĩ nhomɑ́ɑ̀ ndi, ò mɛ̀ nyiémmɛ̀ kɛ tɑ dihɛì dìì kó yɛbòrɛ̀ kpetí kɛ pɑ́kɛ́.
\p
\v 8 Kɛ̀ Sɑurii bɑ́ɑ́tí nɛ̀ bɛhɑ̃ɑ̃pɔ̀mbɛ̀ kɛ bo kɔtɛ kɛ́pi Dɑfiti nɛ̀ o kɔbɛ Keidɑɑ ɛì miɛkɛ. 
\v 9 Kɛ̀ Dɑfitii keè Sɑuri bɑ̀ɑ́tímɛ̀ kɛ bo ò pĩ kɛ́nɑ́kɛ́ ikuɔ́ nìùtì Abiɑtɑɑ kɛ dɔ̀: Tɔní ikuɔ́ nɛntì kɛ̀ m beénnɛ̀ Kuyie. 
\v 10 Kòo beé nKuyie nkɛ dɔ̀: N Yiɛ̀ nKuyie nyIsidɑyɛɛribɛ tũ nkù, n kèè kɛ̀ bɛ̀ tú Sɑuri bɑ̀ɑ́tí kɛ bo pi Keidɑɑ ɛì kɛ di pɔ̀ntɛ nɛ̀ n kpɛ́í. 
\v 11 Kòò kɔ̀tɛní, dihɛì yɛmbɛ̀ bo m pĩ́ nkóò duɔ́nnɑɑ̀? Ò bo kɔtɛní kɛ́ndònnɛ̀ n yo kɛ̀ bɛ̀ nɑ̀ɑ́mmɑ̀ɑ̀? N Yiɛ̀ nKuyie nyIsidɑyɛɛribɛ tũ nkù n dɑ bɑ́ɑmmu ɑ́ n nɑ́kɛ́. Kɛ̀ ti Yiɛ̀ nKuyie ndɔ̀: Ɛ̃ɛ̃ ò kɔ̀rinímu. 
\v 12 Kɛ̀ Dɑfiti dɔ̀: Kòò kɔ̀tɛní, dihɛì yɛmbɛ̀ bo m pĩ́ nkóò duɔ́nɑ́ɑ̀? Kɛ̀ ti Yiɛ̀ nKuyie ndɔ̀: Ɛ̃ɛ̃, bɛ̀ yóó dɑ pĩ́mmu kóò duɔ́.
\p
\v 13 Dɛ mɔ̀nnì kɛ̀ Dɑfitii ítɛ́ nɛ̀ o kɔbɛ, bɛ̀ bo ntùɔ̀kɛ sikɔusìkuɔ̀ (600) kɛ̀ bɛ̀ɛ ítɛ́ kɛ́tɑ dikpɑ́ɑ̀ kɛ̀ Sɑurii keè Dɑfiti ìtɛ́mɛ̀ kɛ́yóu ò tɛ̃́nkɛ í mpì dihɛì.
\p
\v 14 Kɛ̀ Dɑfiti mbo Sifi kpɑ́ɑ̀ yɛtɑ̃rɛ̀ ĩ́nkɛ̀, kɛ̀ Sɑuri nhò wɑnti yɛwe yɛmɔu duɔ́mɛ̀, Kuyie mmɛ nyí nwè nhò duɔ́. 
\v 15 Kɛ̀ Dɑfiti nyɛ̃́ Sɑuri ò wɑɑ̀mmɛ̀ kɛ bo ò kùɔ kɛ́mbo Odisɑɑ Sifi kpɑ́ɑ̀ miɛkɛ.
\p
\v 16 Diyiè mɑrì kɛ̀ Sonnɑtɑ̃ɑ̃, Sɑuri kóo dɑpɑ̀ɑ̀ nkɔtoo Dɑfiti borɛ̀ Odisɑɑ kɛ́yɑ́úkùnnɛ o kɔ̃̀ntì kɛ dɔ̀, ò ntɛ̃ĩ́ Kuyie mbíɛ́kɛ̀. 
\v 17 Kóò nɑ̀kɛ́ kɛ dɔ̀: Bɑ́ nyĩɛ̃̀kù n cicɛ Sɑuri í yóó dɑ nintɛ, fɔ̃́ɔ̃̀ yóó nɑɑ́ nyIsidɑyɛɛribɛ kpɑ̀ɑ̀tì, kɛ̀ nni ntú wèè dɑ tũ, n cicɛ ti yɛ̃́mu o mɔ́mmuɔ.
\p
\v 18 Kɛ̀ bɛ̀ɛ yú ti Yiɛ̀ nKuyie nyètìrì kɛ́tɑu, kɛ̀ Sonnɑtɑ̃ɑ̃ kò nho cĩ́ɛ̃̀tɛ̀ kɛ̀ Dɑfiti nkpɑɑ́ Odisɑɑ.
\s1 Sɑuri bɛ̀timɛ̀ Dɑfiti
\p
\v 19 Mɛm̀mɛ kɛ̀ Sifi ɛì kɔbɛɛ kɔtɛ Sɑuri borɛ̀ Kibeɑ kóò nɑ̀kɛ́ kɛ dɔ̀: Dɑfiti sɔ̀ri ti ciɛ nkɛ yɛtɑ̃rɛ̀ ĩ́nkɛ̀ Odisɑɑ borɛ̀ Akidɑɑ tɑ̃rɛ̀, kubiriku kubɑkù cɑ̃̀nku bíɛ́kɛ̀. 
\v 20 Okpɑ̀ɑ̀tì, kɑ̀ɑ dɔ́ kɛ bo ò pĩ nhɑ kɔtɛní, tíì yóó ò pĩ nkɛ dɑ duɔ́. 
\v 21 Kɛ̀ Sɑuri dɔ̀: Ti Yiɛ̀ nKuyie ndi dɔɔ̀ mɛsɑ̀ɑ̀ ndíndi bɛ̀ɛ̀ n kuɔ́ mmɛsémmɛ̀. 
\v 22 Kɔtɛnɛ̀ kɛ́yíɛ́ kɛ́wénní mɛsɑ̀ɑ̀, kɛ́yɑ̀ ò borɛ̀ weti weti nɛ̀ wèè ò yɑ̀, bɛ̀ n nɑ́ɑ́ nkɛ́tú ò ciìmu mɛdiɛ̀. 
\v 23 Di yɑ̀ o sɔ̀rɛ̀ yɛmɔu ò bo nɑ kɛ́sɔri yɛ̀, kɛ́wɛ̃tɛní kɛ́ n nɑ́kɛ́ weti weti kɛ̀ tí nnɛí kɛ́kɔtɛ, kòò bo dihɛì ndi tí fiɛ́ Sudɑɑ botí kumɔu miɛkɛ kóò yɑ̀.
\p
\v 24 Dɛ kó difɔ̃nkúò kɛ̀ Sifi ɛì kɔbɛɛ ítɛ́ Sɑuri borɛ̀ kɛ́niitɛ́ kɛ́kò mbɛ ciɛ. Dɛ mɔ̀nnì Dɑfiti nɛ̀ o kɔbɛ kɛ̀ bɛ̀ bo Mɑɔ̃ɔ̃ kó dikpɑ́ɑ̀ kubiriku kubɑkù cɑ̃̀nku diyiè yìɛ̀ní kɛ̀ɛ̀ bíɛ́kɛ̀. 
\v 25 Sɑuri nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ kɛ̀ kɔ̀tɛ o wɑmmù kɛ̀ bɛ̀ɛ nɑ́kɛ́ Dɑfiti kòo dekɛ Mɑɔ̃ɔ̃ kpɑ́ɑ̀ tɑ̃rì kɛ́nsɔri. Kɛ̀ Sɑurii keè kɛ́ kɛ̀ tũ̀nnɛ o wɑmmù. 
\v 26 Sɑuri nɛ̀ o kɔbɛ kɛ̀ bɛ̀ mbo ditɑ̃rì píkù kuu, Dɑfiti nɛ̀ o kɔbɛ kɛ̀ bɛ̀ bo kutɛkù, kɛ̀ Dɑfiti ndɔ́ mɛcɑ̃ɑ̃ nkɛ bo yentɛ́nɛ̀ Sɑuri. Sɑuri nɛ̀ o kɔbɛ kɛ̀ bɛ̀ ò duúnnɛ̀ kɛ dèè kɛ dɔ́ kóò cɛ̃̀ɛ̃̀tɛ kɛ́pĩ́. 
\v 27 Kòò mɔùu tuɔkɛní kɛ́nɑ́kɛ́ Sɑuri kɛ dɔ̀: Kɔtɛ mɛcɑ̃ɑ̃ nFidisitɛ̃ɛ̃bɛ bɛɛ̀ do dihɛì.
\p
\v 28 Kɛ̀ Sɑurii kṹnnɔ́ɔ Dɑfiti kó mubɛ̀tìmù kɛ́cuó nFidisitɛ̃ɛ̃bɛ. Dɛɛ̀ te kɛ̀ bɛ̀ yu dɛ kó dibòrì kɛ tú Dipɑtɛtɑ̃rì.
\s1 Dɑfiti yetɛmɛ̀ ò bo kuɔmɛ̀ Sɑuri
\p
\v 29 Kɛ̀ Dɑfitii ítɛ́ dɛborɛ̀ kɛ́kɔtɛ kɛ́mbo Ãnkedii yɛtɑ̃rɛ̀ ĩ́nkɛ̀.
\c 24
\p  
\v 1 Kɛ̀ Sɑurii bɛti Fidisitɛ̃ɛ̃bɛ kɛ́deè kɛ́konní kɛ̀ bɛ̀ɛ ò nɑ̀kɛ́ kɛ dɔ̀: Dɑfiti bo Ãnkedii kó dikpɑ́ɑ̀. 
\v 2 Kòo tɑ̃ɑ̃tɛ́ Isidɑyɛɛribɛ miɛkɛ bɛnitidɑɑbɛ̀ mɔ́mmɔmbɛ kɛ̀ bɛ̀ mbo sikɔupísìtɑ̃ɑ̃ti (3000) kɛ̀ bɛ̀ɛ kɔtɛ Dɑfiti nɛ̀ o kɔbɛ bɛ wɑmmù kɛ sɔ̃́ mbɛ̀ bo ditɑ̃rì bɛ̀ tu dì Sitɑ̃bɔɔ́ kó ditɑ̃rì ììkɛ̀. 
\v 3 Kɛ̀ bɛ̀ɛ tuɔkɛ dibòrì mɑrì bɛ̀ tu dì Dipebɑɑkɛ̀rì kucɛ nùù kɛ̀ kutɑ̃dènkù mɑkù dɛ̀ bo, kɛ̀ Sɑurii tɑ ku miɛkɛ kɛ bo yɛ̃nkɛ kɛ sɔ̃́ nDɑfiti nɛ̀ o kɔbɛ kɛ̀ bɛ̀ bo kutɑ̃dènkù fũ̀ɔ̃̀. 
\v 4 Kɛ̀ Dɑfiti kɔbɛɛ ò nɑ̀kɛ́ kɛ dɔ̀: Ti Yiɛ̀ nKuyie ndɑ nɑ̀kɛ́ dìì yiè kpɛ́í diì tùɔ̀kɛ, kù do yɛ̃ nkù yóó dɑ duɔ́ ndì ɑ dootitɔù kɑ̀ɑ ò dɔ̀ɔ̀nɛ̀ ɑ dɔ́mɛ̀.
\p Kɛ̀ Dɑfiti ítɛ́ mɛyɔɔ̀mmɛ̀ kɛ́kéétɛ́ Sɑuri yɑɑ̀bòrì fũ̀ɔ̃̀, 
\v 5 ò dì kèétɛ́ mɛmmɛ kɛ́deè kòo kɔ̃m̀bùɔ̀tìi do mɛdiɛ̀ nhò kèétɛ́ mɛ̀ɛ̀ kpɛ́í nSɑuri yɑɑ̀bòrì. 
\v 6 Kòo nɑ́kɛ́ o kɔbɛ kɛ dɔ̀: Ti Yiɛ̀ nKuyie mbɑ́ɑ́ yie kɛ̀ n dɑɑ́ n nɔ̀ùtɛ̀ n yiɛ̀ nyĩ́nkɛ̀! Ti Yiɛ̀ nKuyie nkuù ò tɑ̃ɑ̃tɛ́ kòò tu okpɑ̀ɑ̀tì.
\p
\v 7 Dɑfiti bɛ́i mɛmmɛ kɛ́pɛ́ítɛ́ o kɔbɛ bɑ́ bɛ̀ í ndɔ̀ɔ̀ mɛyɛi mmɑmɛ̀ Sɑuri.
\p Kɛ̀ Sɑurii yɛ̀ kutɑ̃dènkù kɛ́sɔɔtɛ́ o cɛ. 
\v 8 Dɛ kó difɔ̃nkúò kɛ̀ Dɑfitii yɛ̀nní kutɑ̃dènkù miɛkɛ kɛ́pĩɛ̃kɛ́ kɛ dɔ̀: N yiɛ̀ nhokpɑ̀ɑ̀tì!
\p Kɛ̀ Sɑurii wɛ̃ɛ̃tɛní kɛ̀ Dɑfitii nínkú kɛ́sĩ́nnɔ́ɔ, 
\v 9 kɛ́nɑ́kɛ́ Sɑuri kɛ dɔ̀: Dɛ̀ yĩ́mɛ kɑ̀ɑ yie mbɛ̀ɛ̀ tu n wɑnti ɑ kó mɛyɛi mbɛ kpɛti? 
\v 10 A yɑ̀mu yíe nnɛ̀ ɑ nuɔ ti Yiɛ̀ nKuyie ndɑ pĩ̀ḿmɛ̀ kɛ n duɔ́, bɛ̀ do n tiémmu kutɑ̃dènkù miɛkɛ kɛ tú n dɑ kuɔ kɛ̀ n dɑ coo nkɛ tú m bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀ kɛ yɛ̃́ ti Yiɛ̀ nKuyie nkuù dɑ tɑ̃ɑ̃tɛ́mɛ̀ kɑ̀ɑ tu okpɑ̀ɑ̀tì. 
\v 11 Okpɑ̀ɑ̀tì wéntɛ́ n kèétɛ́mɛ̀ ɑ yɑɑ̀bòrì kɛ pikú, m mɛ nkèétɛ́mɛ̀ ɑ yɑɑ̀bòrì mɑ́ɑ̀ kɛ í dɑ kùɔ, ɑ yɑ̀mu n yí dɔ́mɛ̀ kɛ́ dɑ kuɔ yoo n dɑ dɔɔ̀ mɛyɛi, n yí dɑ cɑ̀ɑ̀rɛ̀ dɛ̀mɑrɛ̀, fɔ̃́ɔ̃̀ n wɑnti kɛ bo n kuɔ. 
\v 12 Ti Yiɛ̀ nKuyie nkuù bo ti pútɛ́ mí nnɛ̀ fɔ̃́ nkuù bo kpɑ n kpɑ̀nnì, m bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀. 
\v 13 Dikotinùù mɑrì tu: Kuyonku bonní bɛnitiyonkubɛ borɛ̀ ndɛ. Mí mmɛ bɑ́ɑ́ dɑɑ́ n nɔ̀ùtɛ̀ ɑ ĩ́nkɛ̀. 
\v 14 Isidɑyɛɛribɛ kpɑ̀ɑ̀tì wɑnti we? Weninwe ɑ bɛtìmɛ̀ mí ndɛmɔcírɛ̀, mí nfɛnɑcɛ́kɔ̀fɑ̀ɑ̀? 
\v 15 Ti Yiɛ̀ nKuyie nkuù bo ti pútɛ́, kuù bo ti wéntɛ́, kù n kónnɛ́ kɛ́ m pɑtɛ nɛ̀ fɔ̃́!
\p
\v 16 Dɑfiti bɛ́i ndìì mɔ̀nnì kɛ́deè kɛ̀ Sɑuri dɔ̀: M birɛ Dɑfiti fɔ̃́ɔ̃̀ n nɑ̀ɑ́nɑ́ɑ̀? Kɛ́kuɔ́ mmɛdiɛ̀, 
\v 17 kɛ́nɑ́kɛ́ Dɑfiti kɛ dɔ̀: A tú onitisɑ̀ù nwe kɛ m pɛ̃ɛ̃tɛ́, ɑ n wɑntinɛ̀ mɛsɑ̀ɑ̀ mmɛ kɛ̀ n dɑ wɑntinɛ̀ mɛyɛi. 
\v 18 A m bɛnkɛmu yíe nhɑ n dɔ́nɛ̀mɛ̀ mɛsɑ̀ɑ̀, ti Yiɛ̀ nKuyie nni nhɑ̃nnɛ́mu ɑ nɔ̀ùtɛ̀ miɛkɛ yíe, ɑ mɛ nyí n kùɔ. 
\v 19 Òmɔù ɔ̃ɔ̃ í nyɑ̀ o dootitɔù kóò yóu kòo ítɛ́. Ti yiɛ̀ nKuyie ndɑ yietí mɛsɑ̀ɑ̀ nhɑ n dɔ̀ɔ̀ mɛ̀ yíe. 
\v 20 N yɛ̃́mu kɛ dò nfɔ̃́ɔ̃̀ yóó di Isidɑyɛɛribɛ kpɑ̀tì, fɔ̃́ɔ̃̀ yóó tì tiekɛ. 
\v 21 Di mmɔ̀nnì bɛ́i nkɛ́yú nti Yiɛ̀ nKuyie nyètìrì kɛ dɔ̀, ɑ í yóó kuɔ n cĩ́ɛ̃̀tɛ̀ kɔbɛ nɛ̀ n yɑɑ̀bí n kṹṹ nkó difɔ̃nkúò kɛ̀ n yètìrìi kpɑ́nnɛ́.
\p
\v 22 Kɛ̀ Dɑfitii pɑrìkɛ̀ nɛ̀ ti Yiɛ̀ nKuyie nyètìrì, kɛ́deè kɛ̀ Sɑurii kò. Dɑfiti nɛ̀ o kɔbɛ kɛ̀ bɛ̀ɛ wɛ̃tɛ bɛ̀ do sɔri dɛ̀ ditɑ̃rì ĩ́nkɛ̀.
\c 25
\s1 Nɑbɑɑdi yetɛmɛ̀ o bo teennɛ̀mɛ̀ Dɑfiti
\p
\v 1 Kɛ̀ Sɑmmuyɛɛrii kú kɛ̀ Isidɑyɛɛribɛ bɛmɔu tíí nkóò kɔmmú kɛ́deè kóò kũnnɛ́ o ciɛ Dɑmɑɑ. Kɛ̀ bɛ̀ɛ deè kɛ̀ Dɑfitii tɑ Pɑnɑɑ kó dikpɑ́ɑ̀.
\b
\p
\v 2 Kɛ̀ Mɑɔ̃ɔ̃ ɛì miɛkɛ kóo nìtì mɔù dɛ̀ bo kɛ mɔkɛ o kpɛrɛ mɛdiɛ̀: Ipe sikɔupísìtɑ̃ɑ̃ti (3000) nɛ̀ sibɔɔ́ tɛkɔupíítɛ̀ (1000) kɛ sɔ̃́ nhò bo Kɑdimɛɛdi o pecìtì kɛ̃ĩ̀ kó dibɑnni. 
\v 3 Dɛ kóo nìtì yètìrì do tú Nɑbɑɑdi, kòo pokù kpɛri tú Abikɑyɛɛdi kòò ciì kɛ tú oposɑ́ɑ́tì, kòo dɔù yie yóù bɑ́ ò í yo ditoò kɛ tú Kɑdɛbu nɑɑ̀mùnkù kou.
\p
\v 4 Kɛ̀ Dɑfitii keè ò bomɛ̀ Kɑdimɛɛdi o pecìtì kɛ̃ĩ̀, 
\v 5 kɛ́tɔ̃ mbɛdɑpɑ̀mbɛ̀ tɛpíítɛ̀ kɛ́ bɛ̀ nɑ̀kɛ́ kɛ dɔ̀: Kɔtɛnɛ̀ Kɑdimɛɛdi kɛ̀ di yɑ̀ Nɑbɑɑdi dí wè nni ndɔu. 
\v 6 Di ò dɔu nkɛ dɔ̀: Dibenni ntú disɑ̀ɑ̀rì o kpɛ́í. O kpɛrɛ dɛmɔu kɛ̀ dɛ̀ɛ yie nnɛ̀ o cĩ́ɛ̃̀tɛ̀ tɛmɔu dɛ̀ɛ̀ kó dimɑ̀ɑ̀ tu o kpɛrɛ. 
\v 7 Di ò nɑ̀kɛ́ kɛ dɔ̀: Dɑfiti tu ò kèè o pecìtì kɛ̃ibɛ̀ bomɛ̀ o cĩ́ɛ̃̀tɛ̀. O pecɛ̃mbɛ do ti bonɛ̀ dìì mɔ̀nnì Kɑdimɛɛdi, ti do í bɛ̀ dɔ̀ɔ̀ mɛyɛi mmɑmɛ̀, bɛ kpɛrɛ mɑrɛ̀ do í feti. 
\v 8 Bekɛ bɛ kɛ̀ bɛ̀ bo dɑ nɑ́kɛ́, ti dɑ bɑ́ɑmmu kɛ tú ɑ ti cɔutɛ́ tínti ɑ kó bɛtɔ̃mbɛ̀ kɛ́ ti pɑ̃ ɑ mɔkɛ dɛ̀ ti kpɛ́í nnɛ̀ o kpɛ́í. Ti kɔ̀tɛní dibɑnni ndi ɑ cĩ́ɛ̃̀tɛ̀.
\p
\v 9 Kɛ̀ Dɑfiti tɔ̃mbɛ̀ɛ kɔtɛ kɛ́nɑ́kɛ́ Nɑbɑɑdi Dɑfiti yɛ̃ mmù, kɛ́deè kɛ́ nhò kèḿmú. 
\v 10 Kɛ̀ Nɑbɑɑdii bɛ̀ tɛ̃̀ńnɛ́ kɛ dɔ̀: Dɑfiti Sɛsee birɑɑ̀? We mmɛ ntú? Tidɑɑtì í sénní yíe ntìì iiti ti yɛmbɛ̀ borɛ̀. 
\v 11 Kɛ̀ n nɛ́ bo túótɛ́ n kóo pɛ̃́ɛ̃̀ nɛ̀ n kó mɛniɛ nnɛ̀ n kó imɑɑ n wɑɑ́ ndɛ̀ n tɔ̃mbɛ̀ kpɛ́í nkɛ́duɔ́ mbɛ̀mɑbɛ̀ n yí yɛ̃́ bɛ̀ɛ̀ yɛ̀nní dɑ̀ɑ̀?
\p
\v 12 Kɛ̀ Dɑfiti tɔ̃mbɛ̀ɛ wɛ̃tɛní o borɛ̀ kóò nɑ̀kɛ́ Nɑbɑɑdi bɛ̀ nɑ̀kɛ́ tì timɔu. 
\v 13 Kɛ̀ Dɑfitii nɑ́kɛ́ o tɔ̃mbɛ̀ kɛ dɔ̀: Bɑ́ wè wèe bɑ́ɑ́tí o siè.
\p Kɛ̀ bɛ̀ɛ bɑ́ɑ́tí, kòò múnkɛ túótɛ́ o kpɛri, kɛ̀ bɛnìtìbɛ̀ sikɔusìnɑ̀ɑ̀ (400) bɑ́ɑ́tí kóò nɛinɛ̀ kɛ̀ sikɔusìdɛ́ (200) nkpɑɑ́ kɛ bɑɑ tinɛntì.
\s1 Abikɑyɛɛdi teemmɛ̀ Dɑfiti
\p
\v 14 Kɛ̀ Nɑbɑɑdi kó bɛtɔ̃mbɛ̀ kóò mɔùu kɔtɛ kɛ́nɑ́kɛ́ Abikɑyɛɛdi Nɑbɑɑdi pokù kɛ dɔ̀: Dɑfiti bo dikpɑ́ɑ̀ ndi kɛ tɔ̃nní bɛnìtìbɛ̀ kɛ̀ bɛ̀ dɔu nti cicɛ kòò bɛ̀ bɑ̀ɑo. 
\v 15 Dɛ kó bɛnìtìbɛ̀ mɛ ndo ti dɔ̀ɔ̀ mɛsɑ̀ɑ̀ mmɛ ti do bɛ̀ bonɛ̀ dìì mɔ̀nnì dikpɑ́ɑ̀, bɛ̀ í ti dɔ̀ɔ̀ mɛyɛi mmɑmɛ̀. Ti kpɛrɛ mɑrɛ̀ mɛ nyí feti. 
\v 16 Kɛyènkɛ̀ nɛ̀ kuyie mbɛ̀ do ɔ̃ ndò nti kó kuduotí nku kɛ́ nti kɑ̃nkɛ́ sɑ̃́ɑ̃̀, ti do bɛ̀ bonɛ̀ yɛ̀ɛ̀ mɔ̀rɛ̀ kɛ cɛ̃mmú ti pe. 
\v 17 Dɔɔ̀ ɑ yóó nɑmɛ̀, ti yɛ̃́mu kɛ dò mmɛyɛi nyóó tuɔkɛní ti cicɛ nɛ̀ o cĩ́ɛ̃̀tɛ̀ tɛmɔu. Ò mɛ nyóùmu bɑ́ ò í yo ditoò, ti í yóó dɑ́ɑ́tí kóò nɑ̀kɛ́ tìmɑtì.
\p
\v 18 Kɛ̀ Abikɑyɛɛdii cokɛ́ mɛcɑ̃ɑ̃ nkɛ́túótɛ́ní pɛ̃́ɛ̃̀ sikɔusìdɛ́ (200), mɛnɑɑ̀ nkó tidɔutì tìdɛ́tì, ipe inùmmù ìì bèńnɛ́, tidiitì tìì cìe nkuyɔ̀rìkù, fínyĩ̀ kó yɛbɛ yɛkperɛ̀, siyuu tɛkɔ̀ùtɛ̀ (100), fìkíè kó yɛbɛ kó yɛkɑ̀tìndɑ̀ sikɔusìdɛ́ (200), kɛ́ dɛ̀ toú nsɑ̃mmɑrímú. 
\v 19 Kòo nɑ́kɛ́ o tɔ̃mbɛ̀ kɛ dɔ̀: Niitɛ́nɛ̀ kɛ̀ n yó ndi tũmmu.
\p Bɑ́ ò í n nɑ̀kɛ́ tìmɑtì o dɔù Nɑbɑɑdi. 
\v 20 Kòo dekɛ o sɑ̃mmɑrímú kɛ́nkérí ditɑ̃rì fũ̀ɔ̃̀, Dɑfiti nɛ̀ o kɔbɛ kɛ̀ bɛ̀ kérí koò wetíní, kòo bɛ̀ conɛ̀.
\p
\v 21 Kɛ sɔ̃́ nDɑfiti nɑ̀ɑ́ nhomɑ́ɑ̀ kɛ tú: Dɛtetìrɛ̀ ndɛ n sòò bɑ̀ɑmɛ̀ onìtì yie nkó iwũɔ̃ dikpɑ́ɑ̀ miɛkɛ bɑ́ fɛ̀mɑfɛ̀ í nfetɑɑ̀? Nh ò dɔ̀ɔ̀ mɛ̀ɛ̀ sɑ̀ɑ̀ nhò mɛ nni nyietí mɛyɛi. 
\v 22 Kɛ̀ dɛ̀ nɑɑ yóó wentɛ́ kòo nìtì kpɑɑ́ bɑ́ omɑ́ɑ̀ Nɑbɑɑdi cĩ́ɛ̃̀tɛ̀ miɛkɛ kɛ fòù Kuyie nni mpotɛ́ mɛdiɛ̀.
\p
\v 23 Abikɑyɛɛdi yɑ̀ní dìì mɔ̀nnì Dɑfiti kɛ́cútɛ́ní mɛcɑ̃ɑ̃ nho sɑ̃mmɑrímú ĩ́nkɛ̀ kɛ́do Dɑfiti ììkɛ̀ kɛ́nínkú kɛ́sĩ́nnɔ́ɔ o ììkɛ̀, 
\v 24 kɛ bɛ́i nkɛ dɔ̀: N yiɛ̀ mmíì te mɛyɛi! N yiɛ̀, yóu mí nhɑ kóo tɔ̃ntì kɛ̀ n dɑ bɛ́innɛ̀, kéntɛ́ n nɑ́ɑǹtì. 
\v 25 A bɑ́ ndɑkɛ Nɑbɑɑdi kpɛti, kuyɛìnkù nku, kɛ́ndònnɛ̀ o yètìrì tumɛ̀ Nɑbɑɑdi, o yuu í bo. N yiɛ̀ mí nhɑ kóo tɔ̃ntì n do í yɛ̃́ ɑ tɔ̃nnímɛ̀ bɛnìtìbɛ̀ ti borɛ̀. 
\v 26 Ti Yiɛ̀ nKuyie mbomu kɑ̀ɑ bo, ti Yiɛ̀ nKuyie nyí yóu kɑ̀ɑ kùɔ onìtì kɛ pɛ̀itɛ ɑ dootitɔbɛ̀ nɛ̀ bɛ̀ɛ̀ kó dimɑ̀ɑ̀ dɔ́ ɑ kó mɛyɛi nnɛ̀ Nɑbɑɑdi bɛ̀ nwɛ̃ nkunɑsɑ̃́ɑ̃ kùmɑ́ɑ̀. 
\v 27 N yiɛ̀ cɔutɛ́ yɛpɑ̃rɛ̀ n dɑ tɔní yɛ̀ kɛ̀ dí totí fɔ̃́ nnɛ̀ ɑ tɔ̃mbɛ̀. 
\v 28 N dɑ bɑ́ɑmmu ɑ n cĩ́ɛ̃́ n yɛi, n yɛ̃́mu kɛ dò nti Yiɛ̀ nKuyie nyóó dɑ duɔ́ ntikpɑ̀tì fɔ̃́ nnɛ̀ ɑ cĩ́ɛ̃̀tɛ̀ kɛ yɛ̃́ ɑ kpɑmmɛ̀ kuù kpɑ̀nnì nɛ̀ mɛwetímmɛ̀. Òmɔù í yóó yɑ̀ ɑ kó mɛyɛi nhɑ fòmmu mumɔu miɛkɛ. 
\v 29 Kòò mɔù ìtɛ́ kɛ dɑ bɛtì kɛ bo dɑ kuɔ, ɑ Yiɛ̀ nKuyie nyó nkɑ̃nkɛ́mu ɑ fòmmu sɑ̃́ɑ̃̀ kɛ́ mmù sɔ̀ri ku borɛ̀, kɛ́dootóo mɛdɛ́timɛ̀ ɑ dootitɔbɛ̀ fòmmu bɛ̀ ɔ̃ɔ̃ dootóo mɛ̀ɛ̀ botí ditɑ̃́rì nɛ̀ mutɑ̃́ntɛ̀ndìtìmù. 
\v 30 Kɛ̀ ti Yiɛ̀ nKuyie ndɑ dɔ̀ɔ̀ dìì mɔ̀nnì mɛsɑ̀ɑ̀ nkù yɛ̃ nkù yóó dɑ dɔɔ̀ mɛ̀, kɑ̀ɑ di Isidɑyɛɛribɛ kpɑ̀tì. 
\v 31 Kuyie mbɑ́ɑ́ yóu kɛ̀ tìmɑtì ndɑ kɔɔ́nnɛ̀ ɑ yɛ̀mmɛ̀ miɛkɛ, yoo dɛ̀ nsɔ̃́ nhɑ kùɔ òmɔù kɛ bo pɛitɛ. N yiɛ̀, kɛ̀ ti Yiɛ̀ nKuyie ndɑ dɔ̀ɔ̀ dìì yiè mɛsɑ̀ɑ̀ nhɑ yɛ̃́ n kpɛ́í.
\p
\v 32 Kɛ̀ Dɑfitii tɛ̃́nnɛ́ Abikɑyɛɛdi kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù yètìrì ndɛu, kuù dɑ íinní kɑ̀ɑ n conɛ̀. 
\v 33 M múnkɛ dɑ dɔummu nɛ̀ mutɔ̃mmú fɔ̃́ nwèè pɛ̀tɛ́ mɛyɛ̀mmɛ̀ sɑ̀ɑ̀mɛ̀ kɛ m pɛ̀ítɛ́ n nɑ nkùɔmɛ̀ bɛnìtìbɛ̀ kɛ pɛ̀ìtɛ! 
\v 34 Ti Yiɛ̀ nKuyie nyIsidɑyɛɛribɛ tũ nkù bomu, kuù m bɑ̀ɑ, kɛ̀ n yí dɑ dɔ̀ɔ̀ mɛyɛi. Kɑ̀ɑ do í kɔ̀tɛní mɛcɑ̃ɑ̃ nkɛ́ n co, diyiè nɑ nyóó yɛ̀nní kòo mɔù í kpɑɑ́ bɑ́ òmɑ́ɑ̀ Nɑbɑɑdi cĩ́ɛ̃̀tɛ̀ kɛ fòù.
\p
\v 35 Kòo cɔutɛ́ Abikɑyɛɛdì do pɑ̃ní yɛ̀ɛ̀ pɑ̃rɛ̀ kóò nɑ̀kɛ́ kɛ dɔ̀: Kò nkɛ dɛ̀ nnɑɑti n kèèmu ɑ bɑ́ɑmmìi kɛ ì cɔutɛ́ nɛ̀ diwɛ̀ì.
\s1 Nɑbɑɑdi kumɛ̀ kɛ̀ Dɑfiti puokɛ Abikɑyɛɛdi
\p
\v 36 Abikɑyɛɛdi tùɔ̀kɛ dìì mɔ̀nnì o cĩ́ɛ̃̀tɛ̀ kɛ́nsɔ̃́ nNɑbɑɑdi dɔ̀ɔ̀ri dibɑnni diɛrì mɔ́mmɔnni dikpɑ̀ɑ̀tìbɑnni. Kɛ̀ diwɛ̀ì ò bo mɛdiɛ̀ nkòò yɑ̃̀ mɛnɑɑ̀ nkɛ muɔ́ nhò í nhò nɑ̀kɛ́ tìmɑtì. 
\v 37 Kòò mbɑɑ kòo nɑɑ̀ mmɔntɛ́ dikṹnweńnì kòò nɛ́ ò nɑ̀kɛ́. Nɑbɑɑdi kèè dìì mɔ̀nnì dɛ kó tinɑ́ɑǹtì kɛ̀ dɛ̀ɛ ò kpeí mɛdiɛ̀ mbɑ́ ò í nnɑ kɛ nɑmpɛ. 
\v 38 Kɛ̀ dɛ̀ mmɔkɛ yɛwe tɛpíítɛ̀ kɛ̀ ti Yiɛ̀ nKuyie nhò potɛ́ kòo kú.
\p
\v 39 Dɑfiti kèè dìì mɔ̀nnì Nɑbɑɑdi kumɛ̀ kɛ́sɑ̃ntɛ Kuyie nkɛ dɔ̀: ti Yiɛ̀ nKuyie n dɑ sɑ̃ntí fɔ̃́ nwèè ti pɑ̀tɛ mí nnɛ̀ Nɑbɑɑdi wèè do n sɑ̃́ɑ̃́. Fɔ̃́ nwèè m pɛ̀ítɛ́ kɛ̀ n yí ò dɔ̀ɔ̀ mɛyɛi, fɔ̃́ɔ̃̀ duɔ́ nkòo yɛi ndo o yuu ĩ́nkɛ̀.
\p Kɛ̀ Dɑfitii deè kɛ́tɔ̃ mbɛnìtìbɛ̀ kɛ̀ bɛ̀ bo nɑ́kɛ́ Abikɑyɛɛdi kɛ dɔ̀ ò dɔ́ kóò puokɛ. 
\v 40 Kɛ̀ bɛ̀ɛ tuɔkɛ o ciɛ Kɑdimɛɛdi kóò nɑ̀kɛ́ kɛ dɔ̀: Dɑfiti weè ti tɔ̃nní kɛ tú ɑ́ kɔtoo kòò dɑ puokɛ.
\p
\v 41 Kɛ̀ Abikɑyɛɛdii nínkú kɛ́sĩ́nnɔ́ɔ bɛ ììkɛ̀ kɛ́ bɛ̀ nɑ̀kɛ́ kɛ dɔ̀: Mí nho kóo tɔ̃ntì n yiemmu kɛ bo nɑɑ́ nho dɑɑkù kɛ́nhɔu o tɔ̃mbɛ̀ nɑɑ̀cɛ̀i.
\p
\v 42 Kòo ítɛ́ mɛcɑ̃ɑ̃ nkɛ́dekɛ o sɑ̃mmɑrímú kòo kó bɛnitipotɔ̃mbɛ̀ bɛ̀nùmmùu ò cíe. Mɛm̀mɛ kɛ̀ Dɑfitii ò puokɛ.
\p
\v 43 Kɛ sɔ̃́ nDɑfiti po Ainɔɑmmu Sisedɛɛdi kou, bɛdɛ́ kɛ̀ bɛ̀ɛ nɑɑ́ nho pobɛ̀. 
\v 44 Dɑfiti pokù ketiwè Mikɑɑdi Sɑuri kóo sɑpɑ̀ɑ̀, Sɑudi do ò duɔ́ mPɑditi nwe Dɑkɑisi birɛ Kɑdimmu kou.
\c 26
\s1 Dɑfiti coommɛ̀ kucɛ mɛdɛ́rímɛ̀ Sɑuri
\p
\v 1 Mɛm̀mɛ kɛ̀ Sifi ɛì kɔbɛɛ kɔtɛ kɛ́yɑ̀ Sɑuri Kibeɑ kóò nɑ̀kɛ́ kɛ dɔ̀: Dɑfiti bo Akidɑɑ tɑ̃rì ĩ́nkɛ̀ kubiriku tɑkɛ́.
\p
\v 2 Kɛ̀ Sɑurii bɑ́ɑ́tí kɛ́nɛinɛ̀ bɛhɑ̃ɑ̃pɔ̀mbɛ̀ kperíbɛ̀ sikɔupísìtɑ̃ɑ̃ti (3000), kɛ̀ bɛ̀ɛ kɔtɛ Sifi kpɑ́ɑ̀ Dɑfiti wɑmmù. 
\v 3 Kɛ bii bɑ́tɛ́ Adidɑɑ tɑ̃rì ĩ́nkɛ̀ kucɛ tɑkɛ́. Kɛ̀ Dɑfiti mbo dikpɑ́ɑ̀ kɛ́keè Sɑuri kèróomɛ̀ kɛ bo ò bɛ̀ti, 
\v 4 kɛ̀ Dɑfitii tɔ̃ mbɛnìtìbɛ̀ kɛ̀ bɛ̀ɛ pɑɑtɛ́ kɛ́bɑntɛ́ Sɑuri kèróomɛ̀ weti weti. 
\v 5 Kòo kɔtɛ bɛ̀ bɑ̀tɛ́ dɛ̀ kɛ́pɑɑtɛ́ Sɑuri nɛ̀ Abunɛɛ Nɛɛ birɛ bɛhɑ̃ɑ̃pɔ̀mbɛ̀ kóo kótì bɛ̀ dɔu dɛ̀, kɛ̀ Sɑuri dɔu dɛ cuokɛ̀ kɛ̀ bɛnìtìbɛ̀ ò cɛ̃̀ɛ̃̀tɛ.
\p
\v 6 Aimmɛdɛki Itiibɛ botí kou nɛ̀ Abikɑii Dɑfiti tɑ̃ũ̀ Seduyɑ birɛ Soɑbu nɑntɛ̀ kɛ̀ bɛ̀ nɛínɛ̀ Dɑfiti kòo bɛ̀ bekɛ kɛ dɔ̀: Di miɛkɛ we mbo n nɛinɛ̀ kɛ̀ tí kɔtɛ Sɑuri kɑrì? Kɛ̀ Abikɑii dɔ̀: M bo dɑ nɛinɛ̀ kɛ̀ tí kɔtɛ.
\p
\v 7 Kɛ̀ bɛ̀ɛ nɛi kɛ́kɔtɛ Sɑuri kɑrì kɛyènkɛ̀ kɛ̀ Sɑuri duɔ́ dɛ cuokɛ̀, kòo kpɑ̃nnì cùɔ́kɛ́ o yuu tɑkɛ́ Abunɛɛ nɛ̀ ditĩ̀nnì kɛ̀ bɛ̀ duɔ́ koò fitɛ́.
\p
\v 8 Kɛ̀ Abikɑii nɑ́kɛ́ Dɑfiti kɛ dɔ̀: Kuyie nkuù dɑ duɔ́ nyíe nhɑ dootitɔù yóu kɛ̀ n kɔtɛ kɛ́túótɛ́ o kpɑ̃nnì kóò tɑ̃ kɛ́dɑnnɛnɛ̀ kɛtenkɛ̀ kucɛ mɛ̀mɑ́ɑ̀ sɑ̀nnɛ̀mu m bɑ́ɑ́ yíɛ́ mɛdɛ́rímɛ̀. 
\v 9 Kɛ̀ Dɑfiti dɔ̀: Yóu we, bɑ́ɑ́ ò kùɔ, ti Yiɛ̀ nKuyie nyí yóó yóu wèè kùɔ okpɑ̀ɑ̀tì kù tɑ̃ɑ̃tɛ́ wè. 
\v 10 N dɑ nɑ́ɑ́mmu ti Yiɛ̀ nKuyie mbomu, kuù yɛ̃ o mɔ̀nnì ò yóó kúmu, o kɔ̃mu yoo wèe kú dikpɑ̀nnì mɑrì miɛkɛ. 
\v 11 Ti Yiɛ̀ nKuyie mbɑ́ɑ́ yóu kɛ̀ n kuɔ okpɑ̀ɑ̀tì kù tɑ̃ɑ̃tɛ́ wè, yóu kɛ̀ tí túótɛ́ o kpɑ̃nnì dìì cùɔ́kɛ́ o yuu tɑkɛ́ nɛ̀ mɛniɛ nkó didénnì dìì duɔ́ o tɑkɛ́ dɛmɑ́ɑ̀ kɛ́ítɛ́.
\p
\v 12 Kɛ̀ Dɑfitii túótɛ́ Sɑuri kpɑ̃nnì o yuu tɑkɛ́ nɛ̀ mɛniɛ ǹdénnì kɛ́ítɛ́nɛ̀, òmɔù í nhèntɛ, òmɔù í mbɛ̀ yɑ̀, òmɔù í ndɑkɛ dɛ̀ɛ̀ dɔ̀ɔ̀ri. Ti Yiɛ̀ nKuyie nkuù do bɛ̀ bɔntɛ́ munɔndɔmmú cɛ̃́ɛ̃́mù. 
\v 13 Kɛ̀ Dɑfitii ítɛ́ kɛ́séntɛ́ kubiriku kɛ́dekɛ kɛ́ncómmú ditɑ̃rì ĩ́nkɛ̀ mɛdɛ́timɛ̀, 
\v 14 kɛ́pĩɛ̃kɛ́ Sɑuri tĩ̀nnì bíɛ́kɛ̀ kɛ́yú Abunɛɛ Nɛɛ birɛ. Kɛ̀ Abunɛɛ ò tɛ̃̀ńnɛ́ kɛ dɔ̀: Weninwe wèè wèkíí mɛmmɛ kɛ kɔɔ́nnɛ̀ okpɑ̀ɑ̀tì? 
\v 15 Kɛ̀ Dɑfitii o tɛ̃̀ńnɛ́ kɛ dɔ̀: Dɛ̀ í do nfɔ̃́ɔ̃̀ tu onitidɔ̀ùɑ̀? Isidɑyɛɛribɛ miɛkɛ we ndɑ dònnɛ̀? Dɛ̀ yĩ́mɛ kɑ̀ɑ í bɑɑ ɑ yiɛ̀ nhokpɑ̀ɑ̀tì mɛsɑ̀ɑ̀? Òmɔù weè kɔ̀tɛní kɛ bo ò kùɔ. 
\v 16 A dɔ̀ɔ̀ dɛ̀ í wenni, ti Yiɛ̀ nKuyie mbomu di dò nkɛ́kúmu dimɔu di í bɑɑ mɛ̀ɛ̀ kpɛ́í mmɛsɑ̀ɑ̀ ndi yiɛ̀ nhokpɑ̀ɑ̀tì ti Yiɛ̀ nKuyie ntɑ̃ɑ̃tɛ́ wè. Wéntɛ́ okpɑ̀ɑ̀tì yuu tɑkɛ́ o kpɑ̃nnì nɛ̀ o dénnì dɛ̀ borɛ?
\p
\v 17 Kɛ̀ Sɑurii bɑntɛ́ Dɑfiti tɑmmɛ̀ kɛ dɔ̀: Fɔ̃́ɔ̃̀ n nɑ̀ɑ́nɑ́ɑ̀? Kɛ̀ Dɑfiti dɔ̀: Mínwe okpɑ̀ɑ̀tì.
\p
\v 18 Kòo bɛ́i nkɛ dɔ̀: Okpɑ̀ɑ̀tì, dɛ̀ yĩ́mɛ kɑ̀ɑ m bɛ̀tì? N dɑ cɑ̀ɑ̀rɛ̀ bɑ? 
\v 19 Okpɑ̀ɑ̀tì n dɑ bɑ́ɑmmu kéntɛ́ n dɔ́ kɛ́ dɑ nɑ́kɛ́ tì. Kɛ̀ ti Yiɛ̀ nKuyie nkuù yɛ̃ nhɑ nni m bɛtì kuù cɔutɛ́ m pɑ̃nnì kɛ́bónkùnnɛ ku miɛkɛ, kɛ̀ bɛnìtìbɛ̀ mɛ nni mbɛ ti Yiɛ̀ nKuyie mbɛ̀ cɔ̃ɔ̃. Bɛ̀ m bɛ̀timu yíe ndihɛì ti Yiɛ̀ nKuyie nduɔ́ ndì ku kɔbɛ, kɛ bo duɔ́ nkɛ̀ n fíé yɛbɔkɛ̀. 
\v 20 N yí dɔ́ kɛ́kú dikpɑ́ɑ̀ kɛ́ndɛ́tirìnɛ̀ n Yiɛ̀ nKuyie. Okpɑ̀ɑ̀tì dɛ̀ dòmmɛ kɑ̀ɑ m bɛ̀ti opɑɑwɑɑ̀ nhɔ̃ mbɛtìmɛ̀ tɛnɑhɛ̃́ĩ́tɛ̀ yɛtɑ̃rɛ̀ ĩ́nkɛ̀ mí nfɛnɑcɛ́kɔ̀fɛ̀.
\p
\v 21 Kɛ̀ Sɑuri dɔ̀: Wɛ̃tɛní m birɛ n tɛ̃́nkɛ í yóó dɑ dɔɔ̀ mɛyɛi, ɑ mɛ̀ nni ncoommɛ̀ kɛ nyènkɛ̀. N dɔ̀ɔ̀ kɛ dò nwèè yɛ̀mmɛ̀ í nɑɑti wènwe. N yetɛ́mu mɛdiɛ̀.
\p
\v 22 Kɛ̀ Dɑfiti dɔ̀: Okpɑ̀ɑ̀tì ntɛ ɑ kpɑ̃nnì diɛ, ɑ tɔ̃mbɛ̀ kóò mɔù bo nɑ kɛ́kɔtɛní kɛ́ dì tùótɛ́. 
\v 23 Ti Yiɛ̀ nKuyie nyietí bɑ́ wè o dɔɔ̀rìmɛ̀ nɛ̀ o sɑ̀ɑ̀. Ti Yiɛ̀ nKuyie ndɑ ɑ̃nnɛ́mu n nɔ̀ùtɛ̀ miɛkɛ yíe kɛ̀ n yetɛ m bo dɑ dɑɑ́mmɛ̀ tɛnɔ̀ùtɛ̀ kɛ yɛ̃́ ti Yiɛ̀ nKuyie nkuù dɑ tɑ̃ɑ̃tɛ́mɛ̀. 
\v 24 N wèńtɛ́ mɛ̀ɛ̀ botí ɑ fòmmu dɛ̀mɑrɛ̀ diɛrɛ̀, ti Yiɛ̀ nKuyie mmɛ nwéntɛ́ n kɔ̃mu kɛ́ nni ndɛɛrí nɛ̀ mɛyɛi mɛmɔu.
\p
\v 25 Kɛ̀ Sɑurii bɛ́i nkɛ dɔ̀: Kuyie ndɑ dɔɔ̀ mɛsɑ̀ɑ̀ m birɛ Dɑfiti kɑ̀ɑ dɔ̀ɔ̀ dɛ̀ dɛ̀ɛ yie. Ò bɛ́i mɛmmɛ kɛ́deè kɛ̀ Dɑfiti sɔɔtɛ́ o cɛ, kɛ̀ Sɑuri kò nho cĩ́ɛ̃̀tɛ̀.
\c 27
\s1 Dɑfiti cokɛ́mɛ̀ kɛ kɔ̀tɛ Fidisitɛ̃ɛ̃bɛ ciɛ
\p
\v 1 Kɛ̀ Dɑfiti ntotí o yɛ̀mmɛ̀ kɛ tú bɑ́ nɛ̀ dìì yiè Sɑuri yó n nintɛmu, n yí mɔkɛ m bo yĩ́mɛ kɛ̀ n yí cokɛ́mu kɛ kɔtɛ Fidisitɛ̃ɛ̃bɛ ciɛ koò yentɛ́nɛ̀, kòò n yóu mubɛ̀tìmù Isidɑyɛɛribɛ tenkɛ̀. 
\v 2 Mɛm̀mɛ kɛ̀ Dɑfitii ítɛ́ nɛ̀ o kɔbɛ sikɔusìkuɔ̀ (600) kɛ́kɔtɛ Mɑɔki birɛ Akiisi Kɑti kpɑ̀ɑ̀tì borɛ̀. 
\v 3 Kɛ bií bɑ́tɛ́ kɛ́mbo Kɑti Akiisi borɛ̀ bɑ́ wè nɛ̀ o cĩ́ɛ̃̀tɛ̀ kɔbɛ, Dɑfiti nɛ̀ o pobɛ̀ bɛdɛ́ Ainnɔɑmmu Sisedɛɛdi ɛì kou nɛ̀ Abikɑyɛɛdi Nɑbɑɑdi Kɑdimɛɛdi kou wèè ku o pokù. 
\v 4 Kɛ̀ Sɑurii keè Dɑfiti bo mɛ̀ Kɑti kɛ́yóu, ò tɛ̃́nkɛ í nhò bɛ̀tì.
\p
\v 5 Diyiè mɑrì kɛ̀ Dɑfitii nɑ́kɛ́ Akiisi kɛ dɔ̀: Okpɑ̀ɑ̀tì kɑ̀ɑ yiemmu kɛ n cɔutɛ́ m pɑ̃ kɛtenkɛ̀ tɛhɛitɛ̀ mɑtɛ̀ kɛ̀ nní mbo, bɑ nte kɛ̀ ti bo nwɛ̃ nkɛ bo dikpɑ̀ɑ̀tìhɛì miɛkɛ.
\p
\v 6 Dɛ kó diyiè kɛ̀ Akiisii ò duɔ́ nSikidɑɑ ɛì. Dɛɛ̀ te kɛ̀ dɛ kó dihɛì nɑɑ́ nSudɑɑ kpɑ̀ɑ̀tìbɛ̀ kpɛri nɛ̀ yíenní.
\p
\v 7 Kɛ̀ Dɑfiti mbo Fidisitɛ̃ɛ̃bɛ tenkɛ̀ kɛ dɔ̀ dibenni dìmɑ́ɑ̀ nɛ̀ bɛtɑ̃̀ɑ̃̀bɛ̀ bɛ̀nɑ̀ɑ̀. 
\v 8 Kɛ bo Sikidɑɑ kɛ dokùnɛ̀ bɛ̀ɛ̀ do bo dɛ kó kɛtenkɛ̀, kɛ́pɔntɛ Kesuriibɛ nɛ̀ Kidisiibɛ yoo Amɑdesiibɛ bɛ̀ɛ̀ do dɛ̀ bo nɛ̀ dimɔ̀nnì Suudi bíɛ́kɛ̀ kɛ bií tuɔkɛnɛ̀ Esibiti ɛì. 
\v 9 Kɛ̀ Dɑfiti nkɔù bɛnìtìbɛ̀ bɛmɔu, bɛnitidɑɑbɛ̀ nɛ̀ bɛnitipòbɛ̀ bɑ́ ò í nsùɔ́ nhòmɔù kɛ́hɛí iwũɔ̃ sɑ́m̀pɔ́ì nɛ̀ idiɛyì, sɑ̃mmɑrímúbɛ̀ nɛ̀ yòyóbɛ̀ nɛ̀ tiyɑ̀ɑ̀tì. Kòo konní wèe kɔtɛ Akiisi borɛ̀. 
\v 10 Kɛ̀ Akiisi ò bekɛ kɛ yĩ ɑ pɔ̀ntɛ ɔ̃mbɛ yíe? Ò dɔ̀: Sudɑɑ ɛì kubɑkù yoú, kòo mɛ ndɔ́ ò dɔ̀: Yedɑmɛdiibɛ yoo ò dɔ̀: Keniibɛ ɛì kubɑkù yoú. 
\v 11 Dɑfiti do ɔ̃ɔ̃ í nkonnɛ̀nní Kɑti òmɔù ofòùwè, onitidɔ̀ù yoo onitipòkù bɛ̀ yɑ̀ɑ̀ bo nɑ́kɛ́ Akiisi tìmɑtì kɛ dɔ̀: Ntɛ Dɑfiti dɔ̀ɔ̀mɛ̀. Dɑfiti borimɛ do mɛ ndò nhò bo dìì mɔ̀nnì Fidisitɛ̃ɛ̃bɛ tenkɛ̀. 
\v 12 Kɛ̀ Akiisi nhò tɑ̃́ mɛdiɛ̀ nkɛ́ntú nɛ̀ o yɛ̀mmɛ̀ miɛkɛ Dɑfiti kɔbɛ Isidɑyɛɛribɛ tɛ̃́nkɛ bɑ́ nhò dɔ́, ò bo ntú o kóo tɔ̃ntì sɑ̃́ɑ̃̀.
\c 28
\p
\v 1 Diyiè mɑrì kɛ̀ Fidisitɛ̃ɛ̃bɛɛ wɛ̃nnɛ́ dihɑ̃ɑ̃pɔ̀ntĩ̀nnì dìmɑ́ɑ̀ kɛ bo dokɛ́nɛ̀ Isidɑyɛɛribɛ, kɛ̀ Akiisii nɑ́kɛ́ Dɑfiti kɛ dɔ̀: Fɔ̃́ nnɛ̀ ɑ kɔbɛ di bo n nɛinɛ̀ mudoò. 
\v 2 Kɛ̀ Dɑfiti dɔ̀: Okpɑ̀ɑ̀tì n yiemmu, ɑ mɔ́mmuɔ nhɑ bo yɑ̀ m bo dɔɔ̀ dɛ̀. Kɛ̀ Akiisi dɔ̀: Dɛ̀ wenni fɔ̃́ɔ̃̀ yó ntú n kóo bɑ̀rì sɑ̃́ɑ̃̀.
\s1 Sɑuri yumɛ̀ onitipòkù wèè bourí kunùbokù
\p
\v 3 Dɛ̀ do sɔ̃́ nSɑmmuyɛɛri kumu, kɛ̀ Isidɑyɛɛribɛ bɛmɔu kɑ̀ri o kṹṹ nkɛ dèè koò kũnnɛ́ Dɑmɑɑ. Kɛ̀ Sɑurii kuɔ bɛ̀ɛ̀ bourí tinùbootì Isidɑyɛɛribɛ miɛkɛ.
\p
\v 4 Diyiè mɑrì kɛ̀ Fidisitɛ̃ɛ̃bɛɛ tíí mbɛhɑ̃ɑ̃pɔ̀ntĩ̀nnì kɛ́bɑ́tɛ́ Sunɛmmu, kɛ̀ Sɑurii tíí nho kɔbɛ kɛ̀ bɛ̀ɛ kɑri Kidiboɑ. 
\v 5 Kɛ̀ Sɑurii yɑ̀ Fidisitɛ̃ɛ̃bɛ ɑ̃ɑ̃pɔ̀ntĩ̀nnì kɛ̀ kufɔ̃wɑɑ́ nhò ɑutɛ́ kòo kɔ̃m̀bùɔ̀tì nduò. 
\v 6 Kòo beé nti Yiɛ̀ nKuyie, kù mɛ nyí nhò tɛ̃̀ńnɛ́ bɑ́ nɛ̀ tidɔuǹtì miɛkɛ yoo bɑ́ nɛ̀ idíítí kó mubɔmmù yoo kùu duɔ́ nkɛ̀ ku pɑ̃ɑ̃nɑ́ɑǹtì nɑ́ɑǹtò mɔù ò bɛ́innɛ̀. 
\v 7 Kɛ̀ Sɑurii nɑ́kɛ́ o ɑ̃ɑ̃pɔ̀mbɛ̀ kɛ dɔ̀: Wɑɑ́nnɛ̀nní onitipòkù wèè bourí kunùbokù kɛ̀ n kɔtɛ kòò m pɑ̃ɑ̃́. Kɛ̀ bɛ̀ɛ ò nɑ̀kɛ́ kɛ dɔ̀: Òmɔù bo Ã-Ndɔɔ.
\p
\v 8 Kɛ̀ Sɑurii ceetɛ tiyɑ̀ɑ̀tì kɛ́nɛinɛ̀ o tɔ̃mbɛ̀ bɛ̀dɛ́bɛ̀, kɛ̀ bɛ̀ɛ kɔtɛ Ã-Ndɔɔ, kɛ́tuɔkoo kɛyènkɛ̀ kòo nɑ́kɛ́ onitipòkù kɛ dɔ̀: N dɔ́ ɑ n yú ocíì mɔù nwe kɛ̀ nh ò bekɛ tìmɑtì, kɛ̀ n dɑ nɑ̀kɛ́ kɛ yĩ́ ɑ yú wè, ɑ we nyú. 
\v 9 Kòo nitipòkùu ò tɛ̃̀ńnɛ́ kɛ dɔ̀: A yɛ̃́mu ɑ mɔ́mmuɔ nSɑuri kùɔmɛ̀ bɛnìtìbɛ̀ bɛ̀ɛ̀ yu bɛcíríbɛ̀ Isidɑyɛɛribɛ tenkɛ̀ miɛkɛ, yɑ́ɑ ɑ dɔ́ kɛ́ n díímmu kɛ́ n kuɔ? 
\v 10 Kɛ̀ Sɑurii ò tɛ̃̀ńnɛ́ kɛ dɔ́: Ti Yiɛ̀ nKuyie mbomu, míì bɛ́i nkɛ tú ɑ bɑ́ nyĩɛ̃̀kù tìmɑtì. 
\v 11 Kòo nitipòkù dɔ̀: N dò nkɛ́ dɑ yú we? Kòò dɔ̀: Á n yú Sɑmmuyɛɛri.
\p
\v 12 Onitipòkù yɑ̀ní dìì mɔ̀nnì Sɑmmuyɛɛri kɛ́kuɔ́nko kɛ dɔ̀: Dɛ̀ yĩ́mɛ kɑ̀ɑ n soutɛ́? Fɔ̃́ nSɑuri. 
\v 13 Kɛ̀ Sɑuri dɔ̀: Bɑ́ nyĩɛ̃̀kù, fɔ̃́ ncɛ̃́nkɛ n nɑ́kɛ́ ɑ yɑ̀ mù. Kòò dɔ̀: N yɑ̀ kukúkɛ́yɑ̃́ntíkù mɑkù nku kɛ̀ kù yɛ̀nní kɛtenkɛ̀ miɛkɛ. 
\v 14 Kɛ̀ Sɑuri dɔ̀: Ò dòmmɛ? Kòo nitipòkù dɔ̀: N yɑ̀ odɑkótì nwe kòò dɑ̀ɑ́tí kuyɑɑ̀bòrìkù.
\p Kɛ̀ Sɑurii bɑntɛ́ Sɑmmuyɛɛri nwe mɛ̀, kɛ́nínkú kɛ́sĩ́nnɔ́ɔ o ììkɛ̀. 
\v 15 Kɛ̀ Sɑmmuyɛɛri nɑ́kɛ́ Sɑuri kɛ dɔ̀: A n kɔɔ́nnɛ̀ bɑ nkpɛ́í, kɛ duɔ́ nkɛ̀ bɛ̀ n yuní? Kɛ̀ Sɑuri dɔ̀: Dɛ̀ n dimu mɛdiɛ̀, Fidisitɛ̃ɛ̃bɛ bɛɛ̀ ǹ do mudoò, kɛ̀ Kuyie nni ndɛ̀tɛ́nɛ̀, kù í duɔ́ nkɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ kóo mɔù bo m bɛ́innɛ̀ yoo kù m bɛ́innɛ̀ tidɔuǹtì, kɛ̀ n nɛ́ dɑ yùní kɑ̀ɑ bo n nɑ́kɛ́ n dò nkɛ́dɔɔ̀mɛ̀. 
\v 16 Kɛ̀ Sɑmmuyɛɛri dɔ̀: A nɛ́ m bekù kɛ yɛ̃ mbɑ, kɛ̀ nsɑ̀ kɛ̀ ti Yiɛ̀ nKuyie ndɑ bùtínnɛ́ kɛ nɑɑ́ nhɑ dootitɔù. 
\v 17 Ti Yiɛ̀ nKuyie ndɔ̀ɔ̀ kù sòò n nɑ̀kɛ́ tì nti, kɛ̀ n dɑ nɑ́kɛ́ kɛ tú kù cɔutɛ́ tikpɑ̀tì ɑ borɛ̀ kɛ duɔ́ nDɑfiti. 
\v 18 A í yie nkù yɛ̃ mmù kɛ bo kuɔ Amɑdesiibɛ bɛmɔu, dɛɛ̀ te kɛ̀ ti Yiɛ̀ nKuyie ndɑ dɔ̀ɔ̀ mɛmmɛ yíe. 
\v 19 Fɔ̃́ nnɛ̀ ɑ nìtìbɛ̀ di bo Fidisitɛ̃ɛ̃bɛ nɔu miɛkɛ nkɛ, nɑnkɛ fɔ̃́ nnɛ̀ ɑ bí di bo konní m borɛ̀ kudɔnkù, kɛ̀ Fidisitɛ̃ɛ̃bɛɛ nɑ Isidɑyɛɛribɛ kó dihɑ̃ɑ̃pɔ̀ntĩ̀nnì.
\p
\v 20 Sɑuri kèè tiì nɑ́ɑǹtì kɛ̀ kufɔ̃wɑɑ́ nhò ɑutɛ́ kòò do. Ò tɛ̃́nkɛ do í mɔkɛ muwɛ̃rímú kɛ yɛ̃́ ò do tṹṹmmɛ̀ kɛ yɑ̀ɑ̀ yiénnɛ̀ ò í di mùmɑmù. 
\v 21 Kòo nitipòkùu kɔtɛní o borɛ̀ kɛ́yɑ̀ kufɔ̃wɑɑ́ nhò ɑutɛ́mɛ̀ kóò nɑ̀kɛ́ kɛ dɔ̀: Mí nhɑ kóo tɔ̃ntì n yiemmu kɛ cĩ̀nnɛ m buu kɛ dɔ̀ɔ̀ ɑ m bekɛ tì. 
\v 22 Múnkɛɛ kéntɛ́ mí nhɑ kóo tɔ̃ntì n dɔ́ kɛ dɑ nɑ́kɛ́ tì, yóu kɛ̀ n dɑ wɑɑnní mudiì sɑ́m̀pɔ́ kɑ̀ɑ di kɛ́pɛ́tɛ́ muwɛ̃rímú kɛ́nɑ kɛ́kétɛ́ kucɛ.
\p
\v 23 Kɛ̀ Sɑurii yetɛ kɛ dɔ̀ ò bɑ́ɑ́ di, o tɔ̃mbɛ̀ nɛ̀ onitipòkù kɛ̀ bɛ̀ɛ yetoo, kòo mbo kɛ́yie nkɛ́ítɛ́ kɛtenkɛ̀ kɛ́kɑri dikɑ̀rì ĩ́nkɛ̀. 
\v 24 Kòo nitipòkùu cokɛ́ mɛcɑ̃ɑ̃ nkɛ́kuɔ dinɑɑdɑbii ò do dùnnɛ dì kɛ́wɑɑ́ mmuyuo nkɛ́ɑ̃ntɛ kɛ́kɑkɛ yɛkɑ̀tìndɑ̀, 
\v 25 kɛ́duɔ́ nSɑuri nɛ̀ o tɔ̃mbɛ̀ kɛ̀ bɛ̀ɛ cɑ́ɑ́kɛ́ kɛ́deè, kɛ́kò ndɛ kó kɛyènkɛ̀.
\c 29
\s1 Fidisitɛ̃ɛ̃bɛ bɛ̀timɛ̀ Dɑfiti
\p
\v 1 Kɛ̀ Fidisitɛ̃ɛ̃bɛɛ tíí mbɛhɑ̃ɑ̃pɔ̀mbɛ̀ bɛmɔu kɛ́nkɑri Afɛki kɛ̀ Sɑuri kɑ̀ri Sisedɛɛdi kɛ tɔ́kɛ́nɛ̀ tɛbintɛ. 
\v 2 Kɛ̀ Fidisitɛ̃ɛ̃bɛ kpɑ̀ɑ̀tìbɛ̀ mɑbɛ̀ ni yɛtĩ̀rɛ̀ sikɔupí kpɛyɛ kɛ̀ bɛtɔbɛ̀ ni sikɔu kpɛyɛ. Dɑfiti nɛ̀ o kɔbɛ bɛ̀ɛ̀ cíenko okpɑ̀ɑ̀tì Akiisi kɛ̀ bɛ̀ tũ̀nní. 
\v 3 Kɛ̀ Fidisitɛ̃ɛ̃bɛ ɑ̃ɑ̃pɔ̀mbɛ̀ɛ bekɛ kɛ dɔ̀: Ebedeebɛ biɛ nkpɛti dòmmɛ? Kɛ̀ Akiisii bɛ̀ tɛ̃̀ńnɛ́ kɛ dɔ̀: Dɑfiti nwe Isidɑyɛɛribɛ kpɑ̀ɑ̀tì Sɑuri kóo tɔ̃ntì, nɛ̀ ti bomɛ̀ yɛbie mbo ntùɔ̀kɛ yɛ̀dɛ́ɛ̀, m mɛ nyí yɑ̀ mɛyɛi mmɑmɛ̀ ò dɔ̀ɔ̀ mɛ̀.
\p
\v 4 Kɛ̀ Fidisitɛ̃ɛ̃bɛ ɑ̃ɑ̃pɔ̀mbɛ̀ iwɛ̃ĩ yɛmbɛ̀ miɛkɛɛ pɛikɛ Akiisi kɛ̀ bɛ̀ dɔ̀: Bɛti dɛ kóo nìtì kòò kɔtɛ kɛ́mbo ɑ ò duɔ́ ndìì ɛì miɛkɛ, ò bɑ́ɑ́ ti nɛinɛ̀ dikpɑ̀nnì, ò yɑ̀ɑ̀ bo kóntɛ́ kɛ́nɑɑ́ nti dootitɔù. Ò yóó yĩ́mɛ nɛ̀ o yiɛ̀ nkɛ̀ bɛ̀ɛ wɛ̃tɛ kɛ́nɑrikɛ? Dɛ̀ í tú ò kùɔ dìì mɔ̀nnì ndi ti kó bɛnìtìbɑ̀ɑ̀? 
\v 5 Di bɑ́ɑ́ yɛ̃̀ nweè Dɑfiti nwemɛ̀ bɛnitipòbɛ̀ sòò cɛ̃̀ɛ̃̀tɛmɛ̀ kɛ́ndiè nkɛ ɑu kɛ tú:
\q1 Sɑuri kùɔ sikɔupí,
\q1 kɛ̀ Dɑfiti kùɔ sikɔupípí.
\p
\v 6 Kɛ̀ Akiisii yú Dɑfiti kɛ dɔ̀: Ti Yiɛ̀ nKuyie mbomu, ɑ dɔɔ̀rìmɛ̀ mɛɛ̀ sìɛ́ kɛ̀ n dɑ pɛ́nsìrì kɛ dɔ́ ɑ nɑ nni nnɛínɛ̀ dikpɑ̀nnì kɛ yɛ̃́ nɛ̀ ɑ tùɔ̀kɛní dìì yiè m borɛ̀ m mu nyí yɑ̀ ɑ kó mɛyɛi mmɑmɛ̀. Fidisitɛ̃ɛ̃bɛ kpɑ̀ɑ̀tìtũ̀mbɛ̀ mɛ nyí dɑ dɔ́. 
\v 7 Nɛ̀ dɛ kpɛ́í nkò nkɛ̀ dɛ̀ nnɑɑti, kɑ̀ɑ bɑ́ɑ́ íi mbɛ miɛkɛ.
\p
\v 8 Kɛ̀ Dɑfitii ò bekɛ kɛ dɔ̀: N cɑ̀kɛ bɑ okpɑ̀ɑ̀tì? Nɛ̀ n kɔ̀tɛnímɛ̀ ɑ borɛ̀ ndɑ dɔ̀ɔ̀ bɑ? Dɛɛ̀ te kɑ̀ɑ tu m bɑ́ɑ́ dɑ nɛinɛ̀ kɛ̀ tí kɔtɛ kɛ́kpɑnnɛ̀ ɑ dootitɔbɛ̀. 
\v 9 Kɛ̀ Akiisi dɔ̀: N yɛ̃́mu kɛ dò nhɑ í cɑ̀kɛ dɛ̀mɑrɛ̀, mí nkpɛ́í nhɑ dò nKuyie ntɔ̃nnì ndi kɛ̀ n dɑ dɔ́. Fidisitɛ̃ɛ̃bɛ kpɑ̀ɑ̀tìtũ̀mbɛ̀ bɛɛ̀ yetɛ kɛ tú ɑ bɑ́ɑ́ bɛ̀ nɛinɛ̀ dikpɑ̀nnì. 
\v 10 Nɑnkɛ dikṹnweńnì sɛ̀ì dí bɑ́ɑ́tí fɔ̃́ nnɛ̀ ɑ kɔbɛ bɛ̀ɛ̀ dɑ cíenní, kɛ̀ diyiè yɛ̀nní dí kétɛ́.
\p
\v 11 Kɛ̀ Dɑfitii bɑ́ɑ́tí dikṹnweńnì sɛ̀ì nɛ̀ o kɔbɛ kɛ́kétɛ́ kɛ́nkũnti Fidisitɛ̃ɛ̃bɛ ɛì, kɛ̀ Fidisitɛ̃ɛ̃bɛ biɛ kɔri Sisedɛɛdi.
\c 30
\s1 Dɑfiti dokɛ́nɛ̀mɛ̀ Amɑdesiibɛ
\p
\v 1 Diyiè tɑ̃ɑ̃́nnì yiè Dɑfiti nɛ̀ o kɔbɛ kɛ̀ bɛ̀ɛ tuɔkoo Sikidɑɑ Sudɑɑ tempɛ̃ ndiyiè yìɛ̀ní kɛ̀ɛ̀ bíɛ́kɛ̀, kɛ́nsɔ̃́ nhAmɑdesiibɛ bɛ̀ do kɛ pɔ̀ntɛ dihɛì kɛ dɛ̀ítɛ́ kɛ cɔ́u, 
\v 2 kɛ pĩ̀ḿmú bɛnitipòbɛ̀ nɛ̀ ibí nɛ̀ bɛ̀ɛ̀ tú bɛ̀ɛ̀ mɔ̀kɛ bɛ kpɛrɛ nɛ̀ bɛ̀ɛ̀ tu bɛcĩ̀rìbɛ̀ bɛ̀ do í kuɔ́ nhòmɔù mɛsémmɛ̀ bɛ̀ do bɛ̀ pĩ̀ḿmú mɑ́ɑ̀ ndi kɛ́pɛ̃ɛ̃tɛ́nɛ̀. 
\v 3 Dɑfiti nɛ̀ o kɔbɛ kɛ̀ bɛ̀ ntùɔ̀koo kɛ sɔ̃́ mbɛ̀ pɔ̀ntɛ dihɛì kɛ pĩ̀ḿmú bɛ pobɛ̀ nɛ̀ bɛ bí initidɑɑì nɛ̀ initipòì. 
\v 4 Dɑfiti nɛ̀ o kɔbɛ kɛ̀ bɛ̀ɛ tiitɛ́ didɑbònnì kɛ́nkuɔ̀ nkɛ́cĩrimɛ. 
\v 5 Bɛ̀ múnkɛ do pĩ̀ńnɛ̀mu Dɑfiti pobɛ̀ bɛdɛ́ Ainɔɑmmu Sisedɛɛdi kou nɛ̀ Abikɑyɛɛdi Nɑbɑɑdi Kɑdimɛɛdi kou kóo kúpokù.
\p
\v 6 Kɛ̀ Dɑfiti kɔbɛ bɛ̀ pĩ̀ḿmú bɛ̀ɛ̀ kó ibí initidɑɑì nɛ̀ initipòì kɛ̀ bɛ miɛkɛɛ ò pɛikɛ, kɛ̀ bɛ̀ ndɔ́ kóò bùɔ́tí yɛtɑ̃́rɛ̀ kɛ́kuɔ, kòo kɔ̃m̀bùɔ̀tì nduò mɛdiɛ̀ nkɛ̀ ti Yiɛ̀ nKuyie nhò duɔ́ ndikɔ̃m̀bùɔ̀.
\p
\v 7 Kòo nɑ́kɛ́ ikuɔ́ nìùtì Abiɑtɑɑ Aimmɛdɛki birɛ kɛ dɔ̀: Tɔní ikuɔ́ nɛntì bɛ̀ ɔ̃ɔ̃ beénnɛ̀ tì Kuyie.
\p Kɛ̀ Abiɑtɑɑ ti nhò duɔ́. 
\v 8 Kɛ̀ Dɑfitii beé nti Yiɛ̀ nKuyie nkɛ dɔ̀: Kuyie nkɛ̀ n tũ̀nnɛ dɛ kó bɛnìtìbɛ̀ bɛ̀ɛ̀ mɛ nti pɔ̀ntɛ m bɛ̀ nìntɑɑ̀? Kɛ̀ ti Yiɛ̀ nKuyie ndɔ̀: Tũnnɛ bɛ kɑ̀ɑ yóó bɛ̀ nìntɛmu kɛ́dɛɛtɛ́ ɑ kɔbɛ.
\p
\v 9 Kɛ̀ Dɑfitii pĩ́ nkucɛ nɛ̀ o kɔbɛ sikɔusìkuɔ̀ (600) kɛ́tuɔkɛ kukó mBesɔɔ. 
\v 10 Kɛ̀ bɛnìtìbɛ̀ sikɔusìdɛ́ (200) ɔ̀u kɛ í nɑ kɛ bo séntɛ́ kukó kɛ́ nkpɑɑ́ kɛ̀ Dɑfitii sɔɔtɛ́ nɛ̀ bɛsɔmbɛ sikɔusìnɑ̀ɑ̀ (400). 
\v 11 Kɛ̀ bɛhɑ̃ɑ̃pɔ̀mbɛ̀ɛ yɑ̀ Esibiti kóo dɑpɑ̀ɑ̀ mmɔù dikpɑ́ɑ̀ miɛkɛ, kóò tɔní Dɑfiti borɛ̀, kɛ̀ bɛ̀ɛ ò duɔ́ mpɛ̃́ɛ̃̀ nɛ̀ fínyĩ̀ kó yɛbɛ nɛ̀ mɛniɛ 
\v 12 nɛ̀ fínyĩ̀ kó yɛbɛ kperɛ̀ siyɔɔ sìdɛ́sì, kòo cɑ́ɑ́kɛ́ kɛ́yɑ̃̀ kɛ́pɛ́tɛ́ muwɛ̃rímú. Ò do í di dɛ̀mɑrɛ̀ iyie nyìtɑ̃ɑ̃ti, dɛyènnɛ̀ dɛ̀tɑ̃ɑ̃ti. 
\v 13 Kɛ̀ Dɑfitii ò bekɛ kɛ dɔ̀: A tú ɔ̃̀nkubotí kou? A bonní dɛ? Kòò dɔ̀: N tú Esibiti kou nwe, Amɑdesiibɛ botí kou mɔù kó kudɑɑkù, kɛ muɔkɛ kòò n dootóo, dɛ̀ mɔ̀kɛ yíe nyɛwè yɛ̀tɑ̃ɑ̃ti. 
\v 14 Tíì sòò pɔ̀ntɛ Sudɑɑ tempɛ̃ ndiyiè yìɛ̀ní kɛ̀ɛ̀ bíɛ́kɛ̀ Kɛdɛtiibɛ nɛ̀ Kɑdɛbu botí kɔbɛ kɛ́cɔ́u nSikidɑɑ kó dihɛì. 
\v 15 Kɛ̀ Dɑfiti dɔ̀: A bo yie nkɛ́ n niitɛ́ dɛ kó bɛnìtìbɛ̀ borɑ̀ɑ̀?
\p Kɛ̀ dɛ kóo nìtìi ò tɛ̃̀ńnɛ́ kɛ dɔ̀: Kɑ̀ɑ bɛ́i nkɛ yu Kuyie nyètìrì kɛ yĩ ɑ í yó n kuɔ, ɑ mɛ mbɑ́ n duɔ́ n yiɛ̀, n dɑ niitɛ́ bɛ borɛ̀.
\s1 Dɑfiti kùɔmɛ̀ Amɑdesiibɛ
\p
\v 16 Mɛm̀mɛ kɛ̀ weè nìtìi niitɛ́ Dɑfiti Amɑdesiibɛ borɛ̀ kɛ̀ bɛ̀ ntuɔkoo kɛ sɔ̃́ mbɛ̀ pitɛ́ dɛ kó kutempɛ̃ nkumɔu miɛkɛ kɛ ɑ̃nnɛ́ dibɑnni nɛ̀ bɛ̀ ɛíní dɛ̀ Fidisitɛ̃ɛ̃bɛ ciɛ nɛ̀ Sudɑɑ ciɛ kɛ yo nkɛ yɔ̃̀. 
\v 17 Kɛ̀ Dɑfitii bɛ̀ potɛ́ weti weti kɛ́ bɛ̀ ɑutɛ́ dɛ kó diyiè kɛ́ntɔ kɛ́tuɔkɛnɛ̀ diwentírì tɛrì kó kuyuoku, òmɔù í nnɑ kɛ cootɛ́ kɛ̀ dɛ̀ í tú bɛdɑpɑ̀mbɛ̀ bɛ̀ɛ̀ do dèkɛ yòyóbɛ̀ kɛ́cokɛ́. 
\v 18 Kɛ̀ Dɑfitii fietɛ Amɑdesiibɛ do ɛí dɛ̀ kó dimɑ̀ɑ̀ kɛ́fietɛnɛ̀ o pobɛ̀ bɛdɛ́. 
\v 19 Bɛ̀ í mmɔ̀ńtɛ́ bɛ kóò mɔù, ibí nɛ̀ bɛkótíbɛ̀, initidɑbí nɛ̀ initipobí, bɛ̀ mu ndo í nɑmpɛ bɛ̀ ɛí dɛ̀ kó dɛ̀mɑrɛ̀. Kɛ̀ Dɑfitii dɛ̀ tɔní dɛmɔu. 
\v 20 Kɛ̀ Dɑfiti tɔ̃mbɛ̀ɛ kpɑɑkɛnɛ̀ Amɑdesiibɛ kó iwũɔ̃ iyɔɔnyì nɛ̀ idiɛyì kɛ́ nyì cɛ̃mmù kɛ tú: Ntɛ Dɑfiti ɛí dɛ̀.
\p
\v 21 Kɛ̀ Dɑfitii wɛ̃tɛ o kɔbɛ sikɔusìdɛ́ (400) bɛ̀ɛ̀ do ɔ̀u kɛ kpɑɑ́ kukó mBesɔɔ borɛ̀, kɛ̀ bɛ̀ɛ kɔtɛní kóò co nɛ̀ o kɔbɛ bɛ̀ɛ̀ do ò nɛínɛ̀, kɛ̀ Dɑfitii tɔ́ɔ́nko kɛ́ bɛ̀ dɔu. 
\v 22 Kɛ̀ bɛhɑ̃ɑ̃pɔ̀mbɛ̀ bɛ̀ɛ̀ do ò nɛínɛ̀ bɛ miɛkɛ kɛ̀ bɛnitiyonkubɛ nɛ̀ itookperí yɛmbɛ̀ kɛ̀ bɛ̀ dɔ̀: Bɛ̀ do í mɛ̀ nti nɛinɛ̀mɛ̀ ti bɑ́ɑ́ bɛ̀ pɑ̃ ti ɛíní dɛ̀ kó dɛ̀mɑrɛ̀, tí bɛ̀ duɔ́ mbɛ pobɛ̀ nɛ̀ bɛ bí mɑ́ɑ̀ kɛ̀ bɛ̀ɛ ítɛ́.
\p
\v 23 Kɛ̀ Dɑfiti dɔ̀: N kɔbɛ bɑ́ɑ́ dɔɔ̀nɛ̀ mɛmmɛ ti Yiɛ̀ nKuyie nti duɔ́ ndɛ̀, kuù ti kɑ̃nkɛ́ kɛ ti dɛɛtɛ́nɛ̀ ti dootitɔbɛ̀ bɛ̀ɛ̀ pɔ̀ntɛ Sikidɑɑ. 
\v 24 Òmɔù í yóó yie ndi kpɛti.
\q1 Wèè kɔ̀tɛ dikpɑ̀nnì nɛ̀ wèè bɑ̀ɑ tinɛntì
\q1 bɛ̀ yóó bɛ̀ totí kɛ̀ dɛ̀ mmɑ̀mu,
\q1 bɛ̀ yóó wɛ̃nnɛ́ kɛ́totímu.
\p
\v 25 Nɛ̀ dɛ yiè ndi Dɑfiti duɔ́mmɛ̀ dɛ kó ikuɔ́ Isidɑyɛɛribɛ kɛ̀ ì kpɑɑ́ bo nɛ̀ yíenní.
\b
\p
\v 26 Kɛ̀ bɛ̀ɛ konní Sikidɑɑ kɛ̀ Dɑfitii dɛitɛ bɛ̀ ɛí dɛ̀ bɛ dootitɔbɛ̀ ciɛ kɛ́pɑ̃ o nɛ́pobɛ̀ Sudɑɑ botí kó bɛkótíbɛ̀ kɛ dɔ̀: Ntonɛ̀ ti dɛ̀itɛ ti ɛí dɛ̀ɛ̀ miɛkɛ nkɛ kɛ di pɑ̃. 
\v 27 Kòo pɑ̃nɛ̀ Betɛɛdi ɛì kó bɛkótíbɛ̀ nɛ̀ Dɑmɔti ɛì kɔbɛ bɛ̀ɛ̀ bo Nɛkɛfu tempɛ̃ nnɛ̀ Yɑtiidi ɛì kɔbɛ. 
\v 28 Nɛ̀ Adoɛɛ ɛì kɔbɛ nɛ̀ Sifɛmɔti ɛì kɔbɛ nɛ̀ Ɛsitimɔɔ ɛì kɔbɛ, 
\v 29 nɛ̀ Dɑkɑdii ɛì kɔbɛ nɛ̀ Yedɑmɛdiibɛ nɛ̀ Keniibɛ, 
\v 30 nɛ̀ Odimɑɑ ɛì kɔbɛ nɛ̀ Bɔɔ-Asɑ̃ɑ̃ ɛì kɔbɛ nɛ̀ Atɑki ɛì kɔbɛ, 
\v 31 kɛ́pɑ̃ Ebunɔɔ ɛì kɔbɛ kɛ́pɑ̃mmúnɛ̀ yɛhɛkɛ̀ yɛmɔu kɔbɛ bɛ̀ do kètɛ́ yɛ̀ɛ̀ miɛkɛ.
\c 31
\s1 Bɛ̀ kùɔmɛ̀ Sɑuri
\p
\v 1 Kɛ̀ Fidisitɛ̃ɛ̃bɛɛ do Isidɑyɛɛribɛ mudoò Kidiboɑ tɑ̃rì kɛ̀ bɛ̀ɛ cokɛ́, kɛ̀ bɛ̀ɛ kuɔ bɛsṹkùbɛ̀. 
\v 2 Kɛ̀ Fidisitɛ̃ɛ̃bɛ fɛ̃nnɛ́ Sɑuri kɛ́nɑ, kɛ́kuɔ o bí Sonnɑtɑ̃ɑ̃ nɛ̀ Abinnɑdɑbu nɛ̀ Mɑdikisuɑ. 
\v 3 Mɛm̀mɛ kɛ̀ bɛtɑ̃ntɑ̃ũbɛ̀ɛ yɑ̀ Sɑuri kɛ̀ mudoò fuutɛ kɛ̀ bɛ̀ɛ ò kɔ̀ùtɛ. 
\v 4 Kòo nɑ́kɛ́ wèè tɔ o kpɑ̀rìnɛntì kɛ dɔ̀: Túótɛ́ ɑ kpɑ̃nnì kɛ́ n kuɔ, n yí dɔ́ Fidisitɛ̃ɛ̃bɛ itɑyéí yɛmbɛ̀ n kuɔ kɛ́ nni ndɑú.
\p Wèè tɔ o kpɑ̀rìnɛntì kòo yɔtɛ kɛ́yetɛ, kɛ̀ Sɑurii túótɛ́ o kpɑ̃nnì kɛ́fíí nkɛ́do di ĩ́nkɛ̀. 
\v 5 Wèè tɔ o kpɑ̀rìnɛntì ò yɑ̀ dìì mɔ̀nnì o yiɛ̀ nkúmɛ̀, kɛ fíí nho kó dikpɑ̃nnì kɛ́do di ĩ́nkɛ̀ kɛ múnkɛɛ kú.
\p
\v 6 Mɛm̀mɛ kɛ̀ Sɑuri nɛ̀ o bí itɑ̃ɑ̃ti nɛ̀ wèè tɔu o kpɑ̀rìnɛntì nɛ̀ o ɑ̃ɑ̃pɔ̀mbɛ̀ bɛ̀ kumɛ̀ bɛmɔu diyiè dìmɑ́ɑ̀.
\p
\v 7 Isidɑyɛɛribɛ bɛ̀ɛ̀ kó dimɑ̀ɑ̀ bo kubiriku kɛ̀ bɛ̀ɛ yɑ̀ Isidɑyɛɛribɛ ɑ̃ɑ̃pɔ̀mbɛ̀ cokɛ́mɛ̀ kɛ̀ mudoò kònnɛ̀ Sɑuri nɛ̀ o bí, kɛ́ítɛ́ kɛ́cokɛ́ kɛ́yóu bɛ ɛkɛ̀, kɛ̀ Fidisitɛ̃ɛ̃bɛɛ kɔtɛní kɛ́kɑri.
\p
\v 8 Kɛ̀ dɛ̀ɛ wentɛ́ kɛ̀ Fidisitɛ̃ɛ̃bɛɛ kɔtɛní kɛ bo fiɛ bɛcíríbɛ̀ kɛ́yɑ̀ Sɑuri nɛ̀ o bí itɑ̃ɑ̃ti kɛ̀ bɛ̀ ku kɛ duɔ́ Kidiboɑ tɑ̃rì ĩ́nkɛ̀. 
\v 9 Kɛ̀ bɛ̀ɛ kéétɛ́ Sɑuri yuu kɛ́túótɛ́ o kpɑ̀rìnɛntì kɛ́fitɛ́nɛ̀ bɛ ɛkɛ̀ yɛmɔu nɛ̀ bɛ bɔkɛ̀ kó yɛtuo miɛkɛ kɛ nɑ́ɑntɛ bɛ̀ bɛ̀ nɑmɛ̀. 
\v 10 Dɛ kò difɔ̃nkúò kɛ́dɔú nho kpɑ̀rìnɛntì bɛ bɔɔ̀ bɛ̀ tu dì Asitɑditee kó ditou miɛkɛ, kɛ́túótɛ́ Sɑuri kɛ́dɑnnɛ Bɛti-Seɑ̃ kó kuduotí kɛ́bɑɑkɛ́.
\p
\v 11 Kɛ̀ Yɑbɛsi nɛ̀ Kɑdɑɑdi ɛì kɔbɛɛ keè Fidisitɛ̃ɛ̃bɛ dɔ̀ɔ̀ dɛ̀ Sɑuri. 
\v 12 Kɛ̀ bɛnitidɑɑbɛ̀ yɛkɔ̃m̀bɔ̀ yɛmbɛ̀ɛ ítɛ́ kɛ́pĩ́ nkucɛ kɛ́nyié nkɛ kérí kɛyènkɛ̀ kɛmɔu kɛ́tuɔkɛ Bɛti-Seɑ̃ kɛ́bɑɑtɛ́ Sɑuri nɛ̀ o bí kɛ́kònnɛ̀ Yɑbɛsi kɛ́ bɛ̀ cɔ́u, 
\v 13 kɛ́koutɛ́ bɛ kṹɔ̃̀ kɛ́kũnnɛ́ mutie mɑmù yuu bɛ̀ tu mù Esɛdi Yɑbɛsi ɛì miɛkɛ, kɛ́boú dinùù yɛwe yɛ̀yiekɛ̀.