\id 1KI di11.all Novembre 1998 BJ Parakou B{enin
\ide UTF-8
\h 1 Bɛkpɑ̀ɑ̀tìbɛ̀
\toc1 Bɛkpɑ̀ɑ̀tìbɛ̀ pɑ́tíri ketirì
\toc2 1 BƐKPÀÀTÌBƐ̀
\mt1 Bɛkpɑ̀ɑ̀tìbɛ̀ pɑ́tíri ketirì
\imt1 Di mpɑ́tíri tɔ tìì nɑ́ɑǹtì
\ip Mɛketimɛ̀ mɔ̀nnì Bɛkpɑ̀ɑ̀tìbɛ̀ pɑ́tíri ketirì nɛ̀ di dɛ́rì dɛ kó yɛpɑ́tɛ yɛdɛ́ do wɛ̃ ndìmɑrì mɑ́ɑ̀ ndi. Bɛkpɑ̀ɑ̀tìbɛ̀ pɑ́tíri ketirì ti nɑ́ɑ́ nSɑdomɔɔ kó tikpɑ̀tì kpɛ́í nkɛ nɛ̀ bɛtɔbɛ̀ bɛ̀ɛ̀ ò tũ̀nnɛní bɛ kpɛti, Sɑdomɔɔ kó tikpɑ̀tì kpɛti tiì nɛ́ dɔkɛ feí nɛ̀ ò mɑɑ́mɛ̀ Kuyie ncĩ́ɛ̃̀tɛ̀ nɛ̀ tɛkpɑ̀ɑ̀tìcĩ́ɛ̃̀tɛ̀. O fòmmu kó kumɑ̀nku, kòo nɛ́ wɛ̃tɛ kɛ́tɑ mubɔɔféù, nɛ̀ mufòmmu yɛimu miɛkɛ, kɛ́túókɛ́ bɛnitipòbɛ̀ kɛ̀ dɛ̀ɛ tontɛ́.
\ip Mɛm̀mɛ kɛ̀ Kuyie nyóu kɛ̀ bɛ kpɑ̀ɑ̀tìyuu totɛ́ iwuɔ nyìì do bo kubɑkù yoú bíɛ́kɛ̀ ì tɛ̃́nkɛ í nyie nkɛ bo mbúɔ́ Sɑdomɔɔ birɛ, kɛ́wɑɑ́ mbɛ kóo kpɑ̀ɑ̀tì. Mɛm̀mɛ kɛ̀ dɛ̀ɛ dɔɔ̀ yɛkpɑ̀ɑ̀tìyɔ yɑ̀tɛ yɛ̀dɛ́ɛ̀, Sudɑɑ kɔbɛ kó dikpɑ̀ɑ̀tìyuu nɛ̀ Isidɑyɛɛribɛ kpɛri kɛ̀ yɛ̀ níí nnɑɑti di mmɔ̀nnì ditɛrì kɛ́sĩntɛ.
\ip Diì pɑ́tíri ti nɑ́ɑ́ nhokpɑ̀ɑ̀tì dòmmɛ̀ kɛ́ndé Kuyie. Wèè kpɑ̀ɑ̀tì dé Kuyie nweè ɔ̃ ntɔ dihɛì kɛ̀ dɛ̀ nɑɑti. Kɑ̀ɑ bo yetɛmɛ̀ Kuyie nkɛ́fíé yɛbɔkɛ̀ kɛ̀ dɛ̀ tɔuní dihɛì kó mucɑɑ̀rìmù. Kuyie ndo duɔnnímu ku pɑ̃ɑ̃nɑ́ɑǹtì nɑ́ɑm̀bɛ̀ pɛ́u kɛ̀ bɛ̀ bo ndenni bɛkpɑ̀ɑ̀tìbɛ̀ ku nɑ́ɑǹtì, wèè nɛ́ do dɔkɛ ńfeí mbɛ miɛkɛ weè tu Edii 17-19:21
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Dɑfiti kó yɛwe sɔnyɛ kó tinɑ́ɑǹtì 1:1-2:12
\io1 2. Sɑdomɔɔ kó tikpɑ̀tì 2:13-11:43
\io1 3. Yɛkpɑ̀ɑ̀tìyɔ totɛ́mɛ̀ Odoboɑmmu nɛ̀ Sodoboɑmmu bɛ kó dimɔ̀nnì 12:1-14:31
\io1 4. Sudɑɑ kɔbɛ kó dikpɑ̀ɑ̀tìyuu nɛ̀ Isidɑyɛɛribɛ kpɛri yɛ kó tinɑ́ɑǹtì kɛ́ntɔ kɛ́tuɔkɛnɛ̀ Akɑbu kó dimɔ̀nnì 15:1-16:28
\io1 5. Akɑbu kó tikpɑ̀tì 16:29-22:40
\io1 6. Sosɑfɑti nɛ̀ Sodɑmmu nɛ̀ Asɑdiɑ 22:41-54
\c 1
\s1 Adonniyɑ dɔ́mɛ̀ kɛ́cɔutɛ́ tikpɑ̀tì
\p
\v 1 Dɛ mɔ̀nnì kɛ sɔ̃́ nhokpɑ̀ɑ̀tì Dɑfiti kòtɛ́ kɛ mɛ̀nkɛ kòtɛ́, bɑ́ kɛ̀ bɛ̀ ò dɑ̀tínnɛ́ tiyɑ̀ɑ̀tì ò bɑ́ɑ́ keè kuyiìnkù. 
\v 2 Kòo kó bɛtɔ̃mbɛ̀ɛ ò nɑ̀kɛ́ kɛ dɔ̀: Okpɑ̀ɑ̀tì yóu kɛ̀ tí dɑ wɑɑ́ nhosɑpɑ̀ɑ̀ nkòo ndɑ pĩ́ mmutɔ̃mmú kɛ́ntú ɑ pokù kɛ̀ dí nwɛ̃ nkɛ dɔu kòò ndɑ dɛì muséé.
\p
\v 3-4 Mɛm̀mɛ kɛ̀ bɛ̀ɛ ítɛ́ Isidɑyɛɛribɛ tenkɛ̀ kɛmɔu miɛkɛ osɑpɑ̀ɑ̀ nsɑ̀ɑ̀wè wɑmmù, kɛ́pɛ́tɛ́ Sunɛmmu ɛitɛ̀ miɛkɛ osɑpɑ̀ɑ̀, kòò mɛ̀nkɛ wenni mɛdiɛ̀, nkòo yètìrì tu Abisɑki, kɛ̀ bɛ̀ɛ ò kɔ̀tɛnní kóò duɔ́ nhokpɑ̀ɑ̀tì kòò mpĩ́ nho tɔ̃mmú. Ò mɛ nyí nhò duɔ́nɛ̀.
\b
\p
\v 5-6 Abusɑdɔmmu do ku kɛ̀ Adonniyɑɑ Akiti do pɛitɛ́nɛ̀ wè Dɑfiti. Kɛ̀ wèe nɑɑ́ Mpo, kɛ́ntú odɑsɑ́ɑ́tì, o cicɛ do í ò bɔnnɛ̀ tìmɑtì, kòò mpɔtì ò túmɛ̀ okpɑ̀ɑ̀tì kóo dɑpɑ̀ɑ̀ nkɛ́nnɑ́ɑ́ nkɛ tú: Míì yóó nɑɑ́ nhokpɑ̀ɑ̀tì. Kòo wɑɑ́ ntɛnɑɑsɑ̃ntɛ̀ nɛ̀ tɛ dèèbɛ̀ nɛ̀ bɛhɑ̃ɑ̃pɔ̀mbɛ̀ sipísìnùmmù, 
\v 7 kɛ́dɑkɛnɛ̀ Seduyɑ birɛ Soɑbu nɛ̀ ikuɔ́ nìùtì Abiɑtɑɑ kɛ̀ bɛ̀ɛ ò tũ̀nnɛ. 
\v 8 Ikuɔ́ nìùtì Sɑdɔki nɛ̀ Yoyɑdɑ birɛ Bennɑyɑ nɛ̀ Nɑtɑ̃ɑ̃ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò nɛ̀ Simmɛi kɛ́yíɛ́nɛ̀ Dei nɛ̀ Dɑfiti kó bɛhɑ̃ɑ̃pɔ̀mbɛ̀ bɛmbɛ í nyie nkóò tũ̀nnɛ.
\s1 Nɑtɑ̃ɑ̃ nɛ̀ Bɑtisebɑɑ bɛ̀ kòńnɛ́mɛ̀ Sɑdomɔɔ
\p
\v 9 Diyiè mɑrì kɛ̀ Adonniyɑɑ ɑ̃nnɛ́ dibɑnni diyɑɑ̀hɔ́útɑ̃́rì borɛ̀, Ã-Dokɛdi bintɛ tɑkɛ́, kɛ́fíé ipe nɛ̀ inɑ̀ɑ̀kɛ nɛ̀ iwũɔ̃ ìì ɑ̃ mɛkùɔ̀, kɛ́yú o tebìí nɛ̀ Sudɑɑ tempɛ̃ nkó bɛkótíbɛ̀ bɛ̀ɛ̀ do pĩ́ nhokpɑ̀ɑ̀tì Dɑfiti tɔ̃mmú. 
\v 10 Ò mɛ nyí nyu ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ nɛ̀ Bɛnnɑyɑ nɛ̀ bɛhɑ̃ɑ̃pɔ̀mbɛ̀ yɛkɔ̃m̀bɔ̀ yɛ̀mbɛ̀ nɛ̀ o tebitɛ Sɑdomɔɔ.
\p
\v 11 Dɛ mɔ̀nnì kɛ̀ Nɑtɑ̃ɑ̃ kɔtɛ kɛ́yɑ̀ Bɑtisebɑɑ Sɑdomɔɔ yɔ̃, kóò nɑ̀kɛ́ kɛ dɔ̀: A kèè Akiti birɛ Adonniyɑ dɔ̀ɔ̀rimɛ̀ kɛ dò nhò tu okpɑ̀ɑ̀tì, bɑ́ n yiɛ̀ nhokpɑ̀ɑ̀tì mɛ nyí tì yɛ̃́ɑ̀? 
\v 12 N yóó dɑ duɔ́ nyitié nyi, kɑ̀ɑ yie nkɛ ì tũ̀nnɛ ɑ dɛɛtɛ́ ɑmɑ́ɑ̀ nɛ̀ ɑ kóo dɑpɑ̀ɑ̀ nSɑdomɔɔ. 
\v 13 Kɔtɛ kɛ́yɑ̀ okpɑ̀ɑ̀tì Dɑfiti kóò nɑ̀kɛ́ kɛ dɔ̀: Okpɑ̀ɑ̀tì ɑ do n nɑ̀kɛ́mu kɛ dɔ̀ n kóo dɑpɑ̀ɑ̀ nweè yóó nɑɑ́ nhokpɑ̀ɑ̀tì ɑ kó difɔ̃nkúò kɛ́kɑri ɑ kpɑ̀ɑ̀tìkɑ̀rì, dɛ̀ nɛ́ yĩmɛ kɛ̀ Adonniyɑ weè nɑɑ́ nhokpɑ̀ɑ̀tì?
\p
\v 14 A yó nkpɑɑ́ koò nɑ̀ɑ́nnɛ̀ kɛ̀ n kɔtoomu m mɔ́mmuɔ nkɛ́yíɛ́ kónnɛ́ ɑ nùù.
\p
\v 15 Mɛm̀mɛ kɛ̀ Bɑtisebɑɑ kɔtɛ okpɑ̀ɑ̀tì borɛ̀, ò do mɛ nkòtɛ́mɛ̀mu, kɛ́nsɔ̃́ nho bo kudieku kɛ̀ Abisɑki Sunɛmmu kou dɛ bo kɛ pĩ́ nho tɔ̃mmú. 
\v 16 Kɛ̀ Bɑtisebɑɑ nínkú kɛ́sĩ́nnɔ́ɔ okpɑ̀ɑ̀tì ììkɛ̀, kòo kpɑ̀ɑ̀tì ò bekɛ kɛ dɔ̀: A yɛ̃ mbɑ? 
\v 17 Kòò dɔ̀: Okpɑ̀ɑ̀tì ɑ do bɛ́immu kɛ́yú ti Yiɛ̀ nKuyie nyètìrì kɛ dɔ̀, n kóo dɑpɑ̀ɑ̀ nweè yóó nɑɑ́ nhokpɑ̀ɑ̀tì ɑ kó difɔ̃nkúò, kɛ́kɑri ɑ kpɑ̀ɑ̀tìkɑ̀rì. 
\v 18 N nɛ́ bo kɛ yo kɛ̀ bɛ̀ tu Adonniyɑ weè nɑɑ́ nhokpɑ̀ɑ̀tì bɑ́ ɑ í yɛ̃́. 
\v 19 Ò ɑ̃nnɛ́ dibɑnni ndi kɛ kùɔ inɑ̀ɑ̀kɛ pɛ́u nɛ̀ iwũɔ̃ ìì ɑ̃ mɛkùɔ̀ nnɛ̀ ipe, kɛ yu ɑ kó bɛdɑpɑ̀mbɛ̀ bɛmɔu nɛ̀ ikuɔ́ nìùtì Abiɑtɑɑ nɛ̀ bɛhɑ̃ɑ̃pɔ̀mbɛ̀ kóo kótì Soɑbu, ò mɛ nyí yu ɑ kóo dɑpɑ̀ɑ̀ nSɑdomɔɔ. 
\v 20 Okpɑ̀ɑ̀tì, Isidɑyɛɛribɛ bɛmɔu dɑ kémmúmu ɑ bo bɛ̀ nɑ̀kɛ́mɛ̀ wèè yóó sɔɔtɛ́ ɑ kpɑ̀tì. 
\v 21 Kɛ̀ mɛɛ̀ dɔkɛ ɑ bo kú dìì mɔ̀nnì bɛ̀ bo ti wéntɛ́ bɛyɛibɛ mí nnɛ̀ m birɛ.
\p
\v 22 Kɛ̀ Bɑtisebɑɑ nkpɑɑ́ mɛ nnɑ́ɑ́nnɛ̀ okpɑ̀ɑ̀tì, kɛ̀ Nɑtɑ̃ɑ̃ tuɔkoo. 
\v 23 Kɛ̀ bɛ̀ɛ nɑ́kɛ́ okpɑ̀ɑ̀tì kɛ dɔ̀: Nɑtɑ̃ɑ̃ kɔ̀tɛní. Kɛ̀ Nɑtɑ̃ɑ̃ tɑroo kɛ́nínkú kɛ́sĩ́nnɔ́ɔ okpɑ̀ɑ̀tì ììkɛ̀, 
\v 24 kóò bekɛ kɛ dɔ̀: Okpɑ̀ɑ̀tì, fɔ̃́ɔ̃̀ yɛ̃ nhAdonniyɑɑ nɑɑ́ nhokpɑ̀ɑ̀tì kɛ́kɑri ɑ kpɑ̀ɑ̀tìkɑ̀rɑ̀ɑ̀? 
\v 25 Ò kɔ̀tɛmu yíe nDokɛɛdi bintɛ borɛ̀, kɛ ɑ̃nnɛ́ dibɑnni diɛrì, kɛ kùɔ inɑ̀ɑ̀kɛ pɛ́u nɛ̀ yɛnɑɑdɑbɛ yɛ̀ɛ̀ ɑ̃ mɛkùɔ̀ nnɛ̀ ipe, kɛ yu ɑ kó bɛdɑpɑ̀mbɛ̀ bɛmɔu nɛ̀ bɛhɑ̃ɑ̃pɔ̀mbɛ̀ kó bɛkótíbɛ̀ nɛ̀ ikuɔ́ nìùtì Abiɑtɑɑ. Bɛmɔu kɛ̀ bɛ̀ wɛ̃ nkɛ yo nkɛ yɔ̃̀ mmɛnɑɑ̀ nkɛ pĩɛ̃kù kɛ tú: Okpɑ̀ɑ̀tì Adonniyɑ mbo sɑ̃́ɑ̃̀! 
\v 26 Ò mɛ nyí yu ikuɔ́ nìùtì Sɑdɔki nɛ̀ Yeoyɑdɑ birɛ Bɛnnɑyɑ, bɑ́ ɑ birɛ Sɑdomɔɔ nɛ̀ mí m mɔ́mmuɔ. 
\v 27 Okpɑ̀ɑ̀tì fɔ̃́ɔ̃̀ yie nkɛ tɑ̃ɑ̃tɛ́ wèè yóó sɔɔtɛ́ ɑ kpɑ̀tì, bɑ́ ɑ í ti nɑ̀kɛ́ tínti ɑ kó bɛtɔ̃mbɑ̀ɑ̀?
\s1 Dɑfiti tɑ̃ɑ̃tɛ́mɛ̀ wèè yóó sɔɔtɛ́ o kpɑ̀tì
\p
\v 28 Dɛ mɔ̀nnì kòo kpɑ̀ɑ̀tì Dɑfiti duɔ́ nkɛ̀ bɛ̀ɛ yúní Bɑtisebɑɑ kòo wɛ̃tɛní kɛ́cómmɔ́ɔ okpɑ̀ɑ̀tì ììkɛ̀. 
\v 29 Kòo kpɑ̀ɑ̀tìi bɛ́i nkɛ dɔ̀: Ti Yiɛ̀ nKuyie mbomu! M bɛ́immu kɛ yu ku yètìrì, kuù do n dɛɛtɛ́ m bo dìì mɔ̀nnì mɛhɑ́ɑ́rìmɛ̀ miɛkɛ. 
\v 30 M bɛ́immu kɛ tú n yóó dɔɔ̀mu yíe n dɑ dɔúnnɛ̀ dìì nùù, kɛ tú ɑ birɛ Sɑdomɔɔ bo sɔɔtɛ́ n kpɑ̀tì kɛ́kɑri n kpɑ̀ɑ̀tìkɑ̀rì.
\p
\v 31 Kɛ̀ Bɑtisebɑɑ nínkóo kɛ́sĩ́nnɔ́ɔ okpɑ̀ɑ̀tì ììkɛ̀ kɛ́bɛ́i nkɛ dɔ̀: Okpɑ̀ɑ̀tì, ḿbo sɑ̃́ɑ̃̀!
\p
\v 32 Dɛ kó difɔ̃nkúò kòo kpɑ̀ɑ̀tì Dɑfitii duɔ́ nkɛ̀ bɛ̀ɛ̀ yúní ikuɔ́ nìùtì Sɑdɔki nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃, nɛ̀ Yeoyɑdɑɑ birɛ Bɛnnɑyɑ kɛ̀ bɛ̀ɛ tuɔkɛní. 
\v 33 Kòo bɛ̀ nɑ̀kɛ́ kɛ dɔ̀: Túótɛ́nɛ̀ nh ɑ̃ɑ̃pɔ̀mbɛ̀ bɛ̀ɛ̀ n kpɑɑ́nɛ̀ kɛ̀ dí kɔtɛ kɛ́dee m birɛ Sɑdomɔɔ sɑ̃mmɑrímú kóò kɔtɛnnɛ̀ Kiyɔ̃ɔ̃. 
\v 34 Kɛ̀ ikuɔ́ nìùtì Sɑdɔki nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃, kɛ̀ bɛ̀ɛ ò cóú mmɛkùɔ̀ nkóò cɑ̃̀ńnɛ́, kòò ntú Isidɑyɛɛribɛ kóo kpɑ̀ɑ̀tì. Kɛ̀ bɛ̀ dèè dí eé ditɑ̃tɛheù kɛ́huu kɛ dɔ̀: Okpɑ̀ɑ̀tì Sɑdomɔɔ mbo sɑ̃́ɑ̃̀! 
\v 35 Dɛ kó difɔ̃nkúò kɛ̀ di ò tũ̀nnɛ kɛ́konní dihɛì, kòo kɑri n kpɑ̀ɑ̀tìkɑ̀rì, weè yóó sɔɔtɛ́ n kpɑ̀tì, n we ntɑ̃ɑ̃tɛ́ kòò bo mbɑkɛ́ Isidɑyɛɛribɛ bɛmɔu nɛ̀ Sudɑɑ kɔbɛ.
\p
\v 36 Kɛ̀ Bennɑyɑ tɛ̃́nnɛ́ okpɑ̀ɑ̀tì kɛ dɔ̀: Okpɑ̀ɑ̀tì, dɛ̀ wennimu mɛdiɛ̀, ti Yiɛ̀ nKuyie nhɑ tũ nkù kuù bɛ́i nnɛ̀ ɑ kó dinùù miɛkɛ. 
\v 37 Kù do dɑ bonɛ̀ mɛ̀ɛ̀ botí, kù mmɛ mbonɛ̀ okpɑ̀ɑ̀tì Sɑdomɔɔ, kɛ́dɛ́úkùnnɛ o kpɑ̀tì kɛ̀ tìì pɛ̃ɛ̃tɛ́ fɔ̃́ n yiɛ̀ nDɑfiti ɑ kpɛti.
\s1 Bɛ̀ pĩ̀ḿmɛ̀ Sɑdomɔɔ tikpɑ̀tì
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 29:21-25)
\p
\v 38 Kɛ̀ ikuɔ́ nìùtì Sɑdɔki nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ nɛ̀ Yeyoyɑdɑ birɛ Bennɑyɑ nɛ̀ Kɛdɛtiibɛ nɛ̀ Pedɛsiibɛ, kɛ̀ bɛ̀ɛ kɔtɛ Sɑdomɔɔ borɛ̀, kóò dèe nhokpɑ̀ɑ̀tì kóò sɑ̃mmɑrímú, kóò kɔ̀tɛnɛ̀ Kiyɔ̃ɔ̃. 
\v 39 Kɛ̀ ikuɔ́ nìùtì Sɑdɔkii tɑ ti Yiɛ̀ nKuyie ntou kɛ́túótɛ́ dinɑɑ̀yènnì kɛ di cũɔ̃́ mɛkùɔ̀, kɛ́ mɛ̀ còú nSɑdomɔɔ yuu ĩ́nkɛ̀, kóò cɑ̃̀ńnɛ́ kòò bo ntú okpɑ̀ɑ̀tì. Ò dèè mɛm̀mɛ kɛ̀ bɛ̀ɛ eé ditɑ̃tɛheù kɛ́huu kɛ dɔ̀: Okpɑ̀ɑ̀tì, Sɑdomɔɔ ḿbo sɑ̃́ɑ̃̀! 
\v 40 Dɛ kó difɔ̃nkúò kɛ̀ bɛ̀ɛ ò tũ̀nnɛ kɛ̀ bɛ̀ɛ wɛ̃tɛní dihɛì. Kɛ̀ bɛnìtìbɛ̀ eu itɑ̃rí kɛ̀ diwɛ̀ì bɛ̀ bo mɛdiɛ̀ nkɛ̀ bɛ̀ ùú kɛ̀ kɛtenkɛ̀ sɑ̃̀nti.
\s1 Adonniyɑ yĩɛ̃kɛmɛ̀ ò do dɔ́ kɛ́dɔɔ̀ tì
\p
\v 41 Dɛ mɔ̀nnì kɛ sɔ̃́ nhAdonniyɑ nɛ̀ ò do yu bɛ̀ kɛ̀ bɛ̀ di kɛ dèè, kɛ́keè kutoweku, kɛ̀ Soɑbuu bɑntɛ́ ditɑ̃tɛheù dɑbònnì kɛ dɔ̀: Bɑ nkó kutoweku dɑ́ɑ́tí dihɛì?
\p
\v 42 Ò kpɑɑ́ mɛ nnɑ́ɑ́ nkɛ̀ ikuɔ́ nìùtì Abiɑtɑɑ birɛ Yonnɑtɑ̃ɑ̃ tùɔ̀kɛní, kɛ̀ Adonniyɑ dɔ̀: A tú onìtì mɔ́mmuɔ nwe, tɑnní! N yɛ̃́mu kɛ dò nhɑ ti tɔní tinɑ́ɑǹsɑ̀ɑ̀tì nti. 
\v 43 Kòò dɔ̀: Áɑ̀, m pètìnkɛ dɔ́ kɛ dɑ nɑ́kɛ́ okpɑ̀ɑ̀tì Dɑfiti tɑ̃ɑ̃tɛ́mɛ̀ mmɛ Sɑdomɔɔ kòò bo sɔɔtɛ́ o kpɑ̀tì. 
\v 44 Ò duɔ́ nkɛ̀ ikuɔ́ nìùtì Sɑdɔki nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ nɛ̀ Yeyoyɑdɑ birɛ Bennɑyɑ nɛ̀ Kedetiibɛ nɛ̀ Pedɛsiibɛ nɛ̀ okpɑ̀ɑ̀tì kó tihɑ̃ɑ̃pɔ̀ntì kɛ̀ bɛ̀ɛ dee nSɑdomɔɔ wenwe okpɑ̀ɑ̀tì o kóò sɑ̃mmɑrímú koò cíe Kiyɔ̃ɔ̃ bintɛ borɛ̀. 
\v 45 Kiyɔ̃ɔ̃ bintɛ borɛ̀ kɛ̀ ikuɔ́ nìùtì Sɑdɔki nɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Nɑtɑ̃ɑ̃ kɛ̀ bɛ̀ ò còú mmɛkùɔ̀ nkoò pĩ ntikpɑ̀tì. Kɛ dèè kɛ̀ bɛnìtìbɛ̀ bɛmɔu ò cíenní nɛ̀ diwɛ̀ì, di do yo dɛɛ̀ kó kutoweku. 
\v 46 Kòo tùɔ̀kɛní, kɛ dɑ̀ɑ́tí kɛ kɑ̀ri dikpɑ̀ɑ̀tìkɑ̀rì. 
\v 47 Kòo kpɑ̀ɑ̀tì tũ̀mbɛ̀ kɔ̀tɛní kɛ sɑ̃ntí okpɑ̀ɑ̀tì Dɑfiti kɛ tú: Ti Yiɛ̀ nKuyie nhɑ tũ nkùu dɛ́úkùnnɛ Sɑdomɔɔ kpɑ̀tì kɛ̀ tìi pɛ̃ɛ̃tɛ́ ɑ kpɛti do dòmmɛ̀, kɛ́ ntì cɛ̃́ɛ̃̀nɛ̀. Bɛ̀ yĩ mɛm̀mɛ kòo kpɑ̀ɑ̀tìi sĩ́nnɔ́ɔ o dɔ́ù ĩ́nkɛ̀, 
\v 48 kɛ́bɛ́i nkɛ dɔ̀, ò sɑ̃ntí o Yiɛ̀ nKuyie nyIsidɑyɛɛribɛ tũ nkù kùù ò duɔ́ nwèè yóó sɔɔtɛ́ o kpɑ̀tì, kòò yɑ̀ nɛ̀ o nɔ̀nfɛ̀ dɛ̀ dɔ̀ɔ̀mɛ̀.
\p
\v 49 Kɛ̀ Adonniyɑ kɔbɛɛ tì kèè kɛ̀ bɛ kɔ̃̀ntìi ɑɑ́, kɛ̀ bɛ̀ɛ cíɛ́tɛ́ bɛmɑ́ɑ̀ bɛmɑ́ɑ̀ bɑ́ wè o kó kupíkù. 
\v 50 Kɛ̀ kufɔ̃wɑɑ́ nhɑutɛ́ Adonniyɑ kòo cokɛ́ Sɑdomɔɔ kɛ́kɔtɛ diwũɔ̃tɔ̀nnì borɛ̀, kɛ́ncómmú kɛ́pĩ́ ndi bɑ̀kɛ̀. 
\v 51 Kɛ̀ bɛ̀ɛ nɑ́kɛ́ Sɑdomɔɔ kɛ dɔ̀: Adonniyɑ cokɛ́ fɔ̃́ nwe kɛ kɔ̀tɛ kɛ cómmú kɛ pĩ́ ndiwũɔ̃tɔ̀nnì kó yɛbɑ̀kɛ̀, kɛ nɑ́ɑ́ nkɛ́tú ò í iti kɑ̀ɑ í pɑ̀rìkɛ̀ kɛ tú ɑ í yóó ò kùɔ.
\p
\v 52 Kɛ̀ Sɑdomɔɔ bɛ̀ tɛ̃̀ńnɛ́ kɛ dɔ̀: Kòò dɔɔri kɛ̀ dɛ̀ wenni m bɑ́ɑ́ ò kɑ̀ɑ́kɛ́, kòò mɛ nyí dɔɔri kɛ̀ dɛ̀ sìɛ́ ò dò nkɛ́kúmu.
\p
\v 53 Mɛm̀mɛ kɛ̀ Sɑdomɔɔ tɔ̃ nkɛ̀ bɛ̀ɛ yúní Adonniyɑ diwũɔ̃tɔ̀nnì borɛ̀, kòo kɔtɛní kɛ nínkóo okpɑ̀ɑ̀tì Sɑdomɔɔ ììkɛ̀. Kòo ò nɑ̀kɛ́ kɛ dɔ̀: Kò nhɑ cĩ́ɛ̃̀tɛ̀.
\c 2
\s1 Dɑfiti duɔ́mmɛ̀ o tié nsɔnyi Sɑdomɔɔ
\p
\v 1 Dɑfiti bɑntɛ́ dìì mɔ̀nnì ò duúnnɛ̀mɛ̀ mukṹṹ nkɛ́duɔ́ nyitié nsɔnyi o birɛ Sɑdomɔɔ, 
\v 2 kóò nɑ̀kɛ́ kɛ dɔ̀: N tɔ̀ɔ́nnɛ̀ m bo tũnnɛ mɛ̀mmɛ ti yɛmbɛ̀ kó kucɛ. Túótɛ́ tikɔ̃nyɑuti ɑ kòtɛ́mu. 
\v 3 Á ndɔɔri ti Yiɛ̀ nKuyie nhɑ tũ nkù dɔ́mɛ̀, ɑ́ ntũ nku kó kucɛ, kɛ́ntũ nku kuɔ́ nɛ̀ ku tɑnnɔ̀, kɛ́ntũ nku bɛ́i ntì nɛ̀ ku kuɔ́ ìì wɑ̃̀ri Mɔyiisi pɑ́tɛ miɛkɛ. Mɛm̀mɛ ɑ dɔɔri dɛ̀ dɛmɔu bo nyíémmɛ̀. 
\v 4 Mɛm̀mɛ ti Yiɛ̀ nKuyie mbo dɔɔ̀mɛ̀ kù do n nɑ̀kɛ́ tì kɛ dɔ̀: Kɑ̀ɑ yɑɑ̀bí dɔɔri n dɔ́mɛ̀ kɛ tũ n kó kucɛ nɛ̀ timɔ́mmɔnti kɛ n tũnnɛ̀ bɛ yɛ̀mmɛ̀ mɛmɔu, ɑ cĩ́ɛ̃̀tɛ̀ bɑ́ɑ́ pɑɑ̀ okpɑ̀ɑ̀tì.
\p
\v 5 Dɛ kó difɔ̃nkúò ɑ bɑ́ɑ́ yɛ̃̀ nYeduyɑ birɛ Soɑbu n dɔ̀ɔ̀ dɛ̀, weè kùɔ Isidɑyɛɛribɛ kó bɛhɑ̃ɑ̃pɔ̀mbɛ̀ iwɛ̃ĩ yɛmbɛ̀ bɛ̀dɛ́, Nɛɛ birɛ Abunɛɛ nɛ̀ Yetɛɛ birɛ Amɑsɑ. Bɛ̀ do kɑri bɑ̀mmùù nwe bɑ́ mudoò í bo, kòo bɛ̀ kùɔ. Dɛ kó mɛdɔɔ̀rìmɛ̀ dònnɛ̀ ò tɛí mɛyĩ̀ĩ̀ mmɛ n nɛùtì nɛ̀ n nɑɑ̀kɔ̃̀nfɛ̀. Dɛ kó mɛyɛi mbo o yuu ĩ́nkɛ̀ nkɛ. 
\v 6 Dɔɔ̀ mɛciì nhɑ bɑ́ɑ́ ò yóu kòo kótɛ́ kɛ́kú. 
\v 7 Á nyɛ̃́ Bɑdisidɑii bí nKɑdɑɑdi ɛì kɔbɛ kpɛ́í. N do cokù ɑ kóo kótì Abusɑdɔmmu kɛ̀ bɛɛ̀ kɔtɛní kɛ́ n teennɛ̀. Nɛ̀ dɛ kpɛ́í nhɑ́ bɛ̀ dɔ̀ɔ̀ mɛsɑ̀ɑ̀. 
\v 8 A múnkɛ bɑ́ɑ́ yɛ̃̀ mBɛnsɑmɛɛ botí kou Kedɑɑ birɛ Simɛii kpɛ́í mBɑudimmu ɛì kou. N do cooti dìì mɔ̀nnì kɛ kɔri Mɑɑnnɑimmu kɛ̀ weè ní nni mbɔmmù kusĩ̀nkù kɛ tú m bo yɑ̀! Kɛ n wɛ̃tɛ kɛ́nkũntiní kòo kɔtɛní Suditɛ̃ɛ̃ kɛ́ n co. N dɛ nhò dɔúnnɛ̀ dinùù ti Yiɛ̀ nKuyie nyììkɛ̀ kɛ dɔ̀: M bɑ́ɑ́ ò kùɔ. 
\v 9 A tú mɛciì nyiɛ̀ nwe ɑ bɑ́ nhò wùó nhosɑ̀ɑ̀wè bɑ́ ò mɛ nkòtɛ́mɛ̀, ɑ nyɛ̃́ ɑ bo yĩ́mɛ̀ kóò dɛ̀itɛ.
\s1 Dɑfiti kumɛ̀ kɛ̀ Sɑdomɔɔ nsɔkɛ́nɛ̀ o kpɑ̀tì
\r (Wéntɛ́ 1 Bɛkpɑ̀ɑ̀tìbɛ̀ tɔ̃mmú 29:26-28)
\p
\v 10 Kɛ̀ Dɑfitii kú kɛ̀ bɛ̀ɛ ò kũnnɛ́ o ɛì Sedisɑdɛmmu. 
\v 11 Ò do bɑkɛ́ Isidɑyɛɛribɛ kɛ dɔ̀ yɛbie nsipísìnɑ̀ɑ̀ ndi. Ò do bo Ebunɔɔ kɛ dɔ̀ yɛbie nyɛ̀yiekɛ̀ ndi kɛ́mbo Sedisɑdɛmmu kɛ dɔ̀ yɛbie nsipísìtɑ̃ɑ̃ti nɛ̀ yɛ̀tɑ̃ɑ̃ti. 
\v 12 Mɛm̀mɛ kɛ̀ Sɑdomɔɔ sɔɔtɛ́ o cicɛ Dɑfiti kó tikpɑ̀tì, kòo kpɑ̀tìì dɛukɛ mɛdiɛ̀.
\s1 Sɑdomɔɔ kùɔmɛ̀ Adonniyɑ
\p
\v 13 Dɛ mɔ̀nnì kɛ̀ Adonniyɑɑ, Dɑfiti pokù Akiti do ò pɛitɛ́nɛ̀ wèe kɔtɛ kɛ́yɑ̀ Bɑtisebɑɑ Sɑdomɔɔ yɔ̃, kòo ò bekɛ kɛ dɔ̀: A kɔ̀tɛnní kusɑ̀ɑ̀kù nku bɑkɑɑ̀? Kòo ò tɛ̃̀ńnɛ́ kɛ dɔ̀: Ɛ̃ɛ̃, 
\v 14 kɛ́deè kɛ dɔ̀: M mɔkɛ tìmɑtì nti kɛ bo dɑ nɑ́kɛ́. Kòò dɔ̀: Bɛ́i!
\p
\v 15 Kɛ̀ Adonniyɑ dɔ̀: A yɛ̃́mu ɑ mɔ́mmuɔ, mmíì do dòmmɛ̀ kɛ́di tikpɑ̀tì. Isidɑyɛɛribɛ bɛmɔu do bɑɑ míì bo nɑɑ́mmɛ̀ okpɑ̀ɑ̀tì. Dɛ̀ mɛ nyí yie nkɛ mɛ̀ dɔ̀ɔ̀. Kɛ̀ n tebitɛ Sɑdomɔɔ weè tì di, ti Yiɛ̀ nKuyie nkuù mɛ nyɛ̃. 
\v 16 N dɔ́ ɑ n dɔɔ̀ tìmɑtì nti, ɑ bɑ́ɑ́ yetɛ! Kɛ̀ Bɑtisebɑɑ dɔ̀: Bɛ́i! 
\v 17 Kɛ̀ Adonniyɑ dɔ̀: N dɑ bɑ́ɑ́mmu, mɔɔ okpɑ̀ɑ̀tì Sɑdomɔɔ kòo n duɔ́ nhAbisɑki Sunɛmmu ɛì kou kɛ̀ m puokɛ, n yɛ̀mmɛ̀ dò nhò bɑ́ɑ́ wè ndɑ yetɛnɛ̀. 
\v 18 Kɛ̀ Bɑtisebɑɑ dɔ̀: Dɛ̀ wenni, m bo kɔtɛ kɛ́yɑ̀ okpɑ̀ɑ̀tì, kóò bɛ́innɛ̀ ɑ kpɛ́í.
\p
\v 19 Mɛm̀mɛ kòo kɔtɛ kɛ́yɑ̀ Sɑdomɔɔ kɛ bo ò bɛ́innɛ̀ Adonniyɑ kpɛ́í. Kòo kpɑ̀ɑ̀tìi Sɑdomɔɔ ítɛ́ o kɑ̀rì ĩ́nkɛ̀ kɛ́kétɛ́ní o bíɛ́kɛ̀ kɛ́nínkú kɛ́sĩ́nnɔ́ɔ kɛ́wɛ̃tɛ kɛ́kɑri, kɛ́duɔ́ nkɛ̀ bɛ̀ɛ dɔú ndikpɑ̀ɑ̀tìkɑ̀rì tɛrì o bɑkù yoú, kòo yɔ̃ɔ̃ kɑri kóò pɛ̀ɛ́nnɛ̀, 
\v 20 kóò nɑ̀kɛ́ kɛ dɔ̀: N dɔ́ kɛ dɑ mɔɔ tìmɑtì nti sɑ́m̀pɔ́rɛ̀ ɑ bɑ́ɑ́ yetɛ dò! Kòo kpɑ̀ɑ̀tìi ò tɛ̃̀ńnɛ́ kɛ dɔ̀: N yɔ̃ mɔɔ ɑ dɔ́ dɛ̀ n yí yóó dɛ̀ ndɑ yetɛnɛ̀. 
\v 21 Kòo yɔ̃ dɔ̀: Ti bɑ́ɑ́ duɔ́ nhAbisɑki Sunɛmmu kou Adonniyɑ kòo puokɑɑ̀?
\p
\v 22 Kɛ̀ Sɑdomɔɔ ò tɛ̃̀ńnɛ́ kɛ dɔ̀: Dɛ̀ yĩ́mɛ kɑ̀ɑ tu n duɔ́ nhAbisɑki Sunɛmmu kou Adonniyɑ kòo puokɛ? A pɑ̃̀nkɛ nɑ nyĩ nh ò duɔ́ ntikpɑ̀tì, weè mɛ ntúmɛ̀ Mpo. Duɔ́ nkɛ̀ nh ò duɔ́ ntikpɑ̀tì wenwe nɛ̀ o kɔbɛ nɛ̀ ikuɔ́ nìùtì Abiɑtɑɑ nɛ̀ bɛhɑ̃ɑ̃pɔ̀mbɛ̀ kóo kótì Soɑbu.
\p
\v 23 Kɛ̀ Sɑdomɔɔ pɑrìkɛ̀ nɛ̀ ti Yiɛ̀ nKuyie nyètìrì kɛ dɔ̀: Adonniyɑ mɛ ndɑ̀ɑ́tí kɛ bekɛ tì, kɛ̀ n yí ò kùɔ ti Yiɛ̀ nKuyie nni mpotɛ́! 
\v 24 Nɛ̀ ti Yiɛ̀ nKuyie nkùù n kɑ̀nnɛ n cicɛ Dɑfiti kó dikpɑ̀ɑ̀tìkɑ̀rì, kɛ fìí n kpɑ̀tì, kɛ bɛ́i nkɛ yĩ́: Tikpɑ̀tì bo mbo n cĩ́ɛ̃̀tɛ̀ sɑ̃́ɑ̃̀. M pɑ̀rìkɛ̀mu nɛ̀ ku yètìrì kɛ tú Adonniyɑ bo kú yíe, 
\v 25 kɛ́tɔ̃ nYeoyɑdɑ birɛ Bennɑyɑ kòo ò kùɔ. Mɛm̀mɛ Adonniyɑ kumɛ̀.
\s1 Sɑdomɔɔ bɛ̀timɛ̀ Abiɑtɑɑ Sedisɑdɛmmu
\p
\v 26 Kòo kpɑ̀ɑ̀tì Sɑdomɔɔ nɑ́kɛ́ ikuɔ́ nìùtì Abiɑtɑɑ kɛ dɔ̀: Ítɛ́ diɛ nkɛ́kò nhAnɑtɔti ɑ ciɛ. A dò nkɛ́kuɔmu. M mɛ nyí dɔ́ kɛ dɑ kuɔ kɛ yɛ̃́ fɔ̃́ɔ̃̀ do tɔumɛ̀ ti Yiɛ̀ nKuyie ntɑummɛ̀ tɔu n cicɛ Dɑfiti kó dimɔ̀nnì, kɛ̀ di wɛ̃nnɛ́ kɛ tɑ mɛhɑ́ɑ́rìmɛ̀ miɛkɛ.
\p
\v 27 Mɛm̀mɛ Sɑdomɔɔ ò bɛ̀timɛ̀ bɑ́ ò tɛ̃́nkɛ í ntú ikuɔ́ nìùtì. Dɛ mɔ̀nnì kɛ̀ dɛ̀ɛ dɔɔ̀ ti Yiɛ̀ nKuyie ndo nɑ̀kɛ́ tì Sidoo ɛì kɛ dɔ̀ tì yóó tuɔkɛní Edii cĩ́ɛ̃̀tɛ̀.
\s1 Sɑdomɔɔ kùɔmɛ̀ Soɑbu
\p
\v 28 Kɛ̀ Soɑbuu keè tìì tùɔ̀kɛní Adonniyɑ nɛ̀ Abiɑtɑɑ kɛ́cokɛ́ kɛ́tɑ ti Yiɛ̀ nKuyie ntɑummɛ̀ tou kɛ́ncómmú kɛ́pĩ́ ndiwũɔ̃tɔ̀nnì bɑ̀kɛ̀. Soɑbu do kómmúmu Adonniyɑ nɛ̀ dimɔ̀nnì, ò mɛ ndo í kómmú Abusɑdɔmmu. 
\v 29 Kɛ̀ bɛ̀ɛ nɑ́kɛ́ okpɑ̀ɑ̀tì Sɑdomɔɔ kɛ dɔ̀: Soɑbu cokɛ́ kɛ kɔ̀tɛ ti Yiɛ̀ nKuyie ntɑummɛ̀ tou kɛ cómmú kɛ́pĩ́ ndiwũɔ̃tɔ̀nnì bɑ̀kɛ̀. Kɛ̀ Sɑdomɔɔ tɔ̃ nYeoyɑdɑ birɛ Bennɑyɑ kɛ dɔ̀: Kɔtɛ kóò kùɔ.
\p
\v 30 Kɛ̀ Bennɑyɑ kɔtɛ kɛ́nɑ́kɛ́ Soɑbu kɛ dɔ̀: Okpɑ̀ɑ̀tì tu ɑ yɛ̀nní dɛndɛ, kòo yetɛ kɛ dɔ̀: N yí yɛtì! N dɔ́ kɛ́kú diɛ ndɛ.
\p Kɛ̀ Bennɑyɑ wɛ̃tɛ kɛ́nɑ́kɛ́ okpɑ̀ɑ̀tì Soɑbu nɑ̀kɛ́ tì. 
\v 31 Kòo kpɑ̀ɑ̀tì dɔ̀: Dɛ̀ wenni, kuɔ we dɛborɛ̀ kɛ́ndònnɛ̀ ò bɛ́i ntì, kóò kũnnɛ́. Kòò kùɔ bɛ̀ɛ̀ nitisɑ̀ɑ̀bɛ̀ bɑ́ɑ́ ti bɔntɛ́ kukúsĩ̀nkù, mí nnɛ̀ n cicɛ cĩ́ɛ̃̀tɛ̀. 
\v 32 Nɛɛ birɛ Abunɛɛ Isidɑyɛɛribɛ ɑ̃ɑ̃pɔ̀mbɛ̀ kóo kótì nɛ̀ Amɑsɑ Sudɑɑ ɑ̃ɑ̃pɔ̀mbɛ̀ kóo kótì. Bɛ̀ do tú bɛnitisɑ̀ɑ̀bɛ̀ mbɛ koò pɛ̃ɛ̃tɛ́, kòo bɛ̀ kùɔ disɔ̀rì bɑ́ n cicɛ í yɛ̃́. Dɛ kó mɛyɛi mbo do o yuu ĩ́nkɛ̀. 
\v 33 Bɛ̀ɛ ò bɔntɛ́ kusĩ̀nkù wenwe nɛ̀ o cĩ́ɛ̃̀tɛ̀ kɔboo sɑ̃́ɑ̃̀. Kɛ̀ ti Yiɛ̀ nKuyie nkó mɛsɑ̀ɑ̀ nní mbonɛ̀ Dɑfiti nɛ̀ o yɑɑ̀bío ìì yó nsɔkɛ́ o kpɑ̀tì sɑ̃́ɑ̃̀.
\p
\v 34 Mɛm̀mɛ kɛ̀ Yeoyɑdɑ birɛ Bennɑyɑ kɔtɛ kóò kùɔ kɛ̀ bɛ̀ɛ o kũnnɛ́ o cĩ́ɛ̃̀tɛ̀. O cĩ́ɛ̃̀tɛ̀ do bo dikpɑ́ɑ̀ ndi. 
\v 35 Dɛ mɔ̀nnì kòo kpɑ̀ɑ̀tìi túótɛ́ Bennɑyɑ kɛ́cónnɛ́ Soɑbu fɔ̃̀tìrì kòò mbɑkɛ́ bɛhɑ̃ɑ̃pɔ̀mbɛ̀, kɛ́túótɛ́ Sɑdɔki kɛ́cónnɛ́ Abiɑtɑɑ fɔ̃̀tìrì kòo ntú ikuɔ́ nìùtì.
\s1 Sɑdomɔɔ kùɔmɛ̀ Simɛii
\p
\v 36 Kɛ̀ Sɑdomɔɔ duɔ́ nkɛ̀ bɛ̀ɛ yúní Simɛii, kòo ò nɑ̀kɛ́ kɛ dɔ̀: Mɑɑ́ ɑ cĩ́ɛ̃̀tɛ̀ Sedisɑdɛmmu kɛ́mbo, ɑ bɑ́ɑ́ yɛ̀ kɛ́ntú ɑ bo kɔtɛ dɛ̀mɑrɛ̀. 
\v 37 Kɑ̀ɑ yɛ̀ diyiè mɑrì kɛ sèńtɛ́ kukó nSetinɔɔ ɑ nyɛ̃́ kɛ dò nhɑ kumu, dɛ̀ mɛ mbɑ́ ntú n kpɛti, nɛ̀ ɑ yuu ndi. 
\v 38 Kɛ̀ Simɛii dɔ̀: Dɛ̀ wenni okpɑ̀ɑ̀tì, n yóó dɔɔ̀mu ɑ bɛ́i ntì. Mɛm̀mɛ kɛ̀ Simɛii mbo Sedisɑdɛmmu kɛ́mɔntɛ. 
\v 39 Yɛbie nyɛ̀tɑ̃ɑ̃ti kó difɔ̃nkúò kòo kó tidɑɑtì mɑtì tidɛ́tìi cokɛ́, kɛ́kɔtɛ Mɑɑkɑ birɛ Akiisi Kɑti kóo kpɑ̀ɑ̀tì borɛ̀. Kɛ̀ bɛ̀ɛ nɑ́kɛ́ Simɛii kɛ dɔ̀: A dɑɑtì bo Kɑti nwe. 
\v 40 Kòo dekɛ o sɑ̃mmɑrímú kɛ́kɔtɛ Kɑti, kɛ́cɔutɛ́ o dɑɑtì Akiisi borɛ̀, kɛ́wɛ̃tɛ kɛ́kònnɛ̀ Sedisɑdɛmmu. 
\v 41 Kɛ̀ bɛ̀ɛ nɑ́kɛ́ okpɑ̀ɑ̀tì Sɑdomɔɔ kɛ dɔ̀: Simɛii kɔ̀tɛ Kɑti kɛ wɛ̃̀tɛ kɛ kò nSedisɑdɛmmu. 
\v 42 Kòo duɔ́ nkɛ̀ bɛ̀ɛ ò yùní kòo ò nɑ̀kɛ́ kɛ dɔ̀: N sòò duɔ́ nkɑ̀ɑ pɑrìkɛ̀ ti Yiɛ̀ nKuyie nyììkɛ̀ kɛ dɔ̀: A í yɛ̀tì dihɛì, kɛ̀ n dɑ nɑ́kɛ́ kɛ dɔ̀: Kɑ̀ɑ yɛ̀ bɑ́ kɛ kɔ̀tɛ kupíkù mɑkù, ɑ kumu. Kɑ̀ɑ dɔ̀: Ɛ̃ɛ̃, ɑ kèèmu. 
\v 43 Dɛ̀ yĩ́mɛ kɑ̀ɑ nɛ́ í pĩ́ nhɑ dɔúnnɛ̀ dìì nùù ti Yiɛ̀ nKuyie? Dɛ̀ dòmmɛ kɑ̀ɑ yetɛ n sòò dɑ nɑ̀kɛ́ dìì nùù? 
\v 44 Kòo yíɛ́ kɛ́nɑ́kɛ́ Simɛii kɛ dɔ̀: A mɔ́mmuɔ nhɑ yɛ̃́mu, ɑ yɛ̀mmɛ̀ dɑ nɑ́ɑ́mmu mɛyɛi nhɑ dɔ̀ɔ̀ mɛ̀ n cicɛ Dɑfiti, mɛɛ̀ do ɑ yuu ĩ́nkɛ̀, 
\v 45 ti Yiɛ̀ nKuyie mmɛ nyó nni ndɔɔrimu mɛsɑ̀ɑ̀ nkɛ̀ Dɑfiti kpɑ̀tì nfííkú sɑ̃́ɑ̃̀.
\p
\v 46 Mɛm̀mɛ okpɑ̀ɑ̀tì duɔ́mmɛ̀ kɛ̀ Yeoyɑdɑ birɛ Bennɑyɑ dennɛ Simɛii kóò kùɔ.
\p Dɛ mɔ̀nnì kɛ̀ Sɑdomɔɔ kpɑ̀tì nɛ́ dɔkɛ fííkú.
\c 3
\s1 Sɑdomɔɔ puokɛmɛ̀ Esibiti kóo kpɑ̀ɑ̀tì kóo sɑpɑ̀ɑ̀
\p
\v 1 Kòo kpɑ̀ɑ̀tì Sɑdomɔɔ puokɛ Esibiti kóo kpɑ̀ɑ̀tì kóo sɑpɑ̀ɑ̀, nnɛ̀ okpɑ̀ɑ̀tì kɛ̀ bɛ̀ɛ mɔɔtɛ mɛtɑummɛ̀, kɛ̀ Sɑdomɔɔ konnɛ̀nní o pokù Dɑfiti ɛì Sedisɑdɛmmu, kɛ́mbɑɑnɛ̀ ò bo mɑɑ́mmɛ̀ o kó tɛkpɑ̀ɑ̀tìcĩ́ɛ̃̀tɛ̀ nɛ̀ ti Yiɛ̀ nKuyie nkpɛtɛ, kɛ́mɑɑ́nɛ̀ kuduotí kɛ́fitɛ́ Sedisɑdɛmmu.
\p
\v 2 Dɛ kó dimɔ̀nnì bɛ̀ do feu iwũɔ̃ ti Yiɛ̀ nKuyie nyɛtɑ̃rɛ̀ ĩ́nkɛ̀ nkɛ yɛtɔ̀rɛ̀ borɛ̀. Kɛ yɛ̃́ bɛ̀ mu ndo í mɑɑ́mɛ̀ tɛcĩ́ɛ̃̀tɛ̀ ti Yiɛ̀ nKuyie nkpɛtɛ. 
\v 3 Kɛ̀ Sɑdomɔɔ ndɔ́ ti Yiɛ̀ nKuyie nkɛ́ntũ nho cicɛ Dɑfiti do nɑ̀kɛ́ tì, kɛ nɛ́ nkpɑɑ́ feu iwũɔ̃ ti Yiɛ̀ nKuyie nyɛtɑ̃rɛ̀ ĩ́nkɛ̀ kó yɛtɔ̀rɛ̀ kɛ tuɔ̀nnɛ̀ tihúúntì.
\s1 Sɑdomɔɔ mɔɔmɛ̀ ti Yiɛ̀ nKuyie mmɛciì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 1:2-13)
\p
\v 4 Diyiè mɑrì kòo kpɑ̀ɑ̀tì Sɑdomɔɔ kɔtɛ Kɑbɑɔ̃ɔ̃ kɛ bo fíé iwũɔ̃ ti Yiɛ̀ nKuyie. Diwũɔ̃tɔ̀nnì didiɛrì do kɛ mbo kòo fíé iwũɔ̃ ti Yiɛ̀ nKuyie ntɛkɔupíítɛ̀ (1000) kɛ́tuɔ ndɛ ĩ́nkɛ̀. 
\v 5 Kɛ̀ ti Yiɛ̀ nKuyie nkɔtɛní Kɑbɑɔ̃ɔ̃ Sɑdomɔɔ borɛ̀ kɛyènkɛ̀. Kóò bɛ́innɛ̀ tidɔuǹtì miɛkɛ kɛ dɔ̀: M mɔɔ́ ɑ dɔ́ dɛ̀ kɛ̀ n dɛ̀ ndɑ pɑ̃.
\p
\v 6 Kɛ̀ Sɑdomɔɔ dɔ̀: N Yiɛ̀ nKuyie, ɑ dɔ̀ɔ̀mu ɑ kóo tɔ̃ntì n cicɛ Dɑfiti mɛsɑ̀ɑ̀ nkɛ yɛ̃́ ò do tũmmɛ̀ ɑ kó kucɛ nɛ̀ timɔ́mmɔnti, kɛ dɔɔri dɛ̀ɛ̀ wenni kòo borimɛ síɛ́. Kɑ̀ɑ ò dɔ̀ɔ̀ mɛsɑ̀ɑ̀ nkɛ duɔ́ nkòo bí kó dɛ̀mɑrɛ̀ kɑ̀ri yíe nho kpɑ̀ɑ̀tìkɑ̀rì ĩ́nkɛ̀. 
\v 7 Ti Yiɛ̀ nKuyie nfɔ̃́ɔ̃̀ n dɔ̀ɔ̀ okpɑ̀ɑ̀tì kɛ̀ ǹ sɔɔtɛ́ n cicɛ Dɑfiti kpɑ̀tì. M mɛ nkpɑɑ́ tú odɑpɑ̀ɑ̀ nwe, n yí yɛ̃́ m bo niitɛ́ mɛ̀ɛ̀ botí bɛnìtìbɛ̀. 
\v 8 Ntɛ mí nkɛ dò nkɛ́niitɛ́ ɑ nìtìbɛ̀ ɑ tɑ̃ɑ̃tɛ́ bɛ̀ kɛ̀ bɛ̀ sũ, kɛ í dò nkɛ́kɑɑ nkɛ́deè. 
\v 9 N Yiɛ̀ nKuyie duɔ́ mí nhɑ kóo tɔ̃ntì mɛciì kɛ̀ n nɑ kɛ́niitɛ́ ɑ nìtìbɛ̀, kɛ́nɑ kɛ́mbɑɑ̀tì mɛyɛi nnɛ̀ mɛsɑ̀ɑ̀, kɛ̀ dɛ̀ í dò mmɛmmɛ we mbo nɑ kɛ́niitɛ́ ɑ nìtìbɛ̀, kunitisṹkù kuu.
\p
\v 10 Kɛ̀ ti Yiɛ̀ nKuyie mpɛ́nsìrì Sɑdomɔɔ kù mɔɔ́ tì, 
\v 11 kóò nɑ̀kɛ́ kɛ dɔ̀: A í mɛ mmɔɔmɛ̀ ɑ fòmmu bo mɔntɛmɛ̀, ɑ mɛ nyí mɔɔ́ tikpɑ̀tì yoo ɑ dootitɔbɛ̀ bo kúmɛ̀, kɛ m mɔɔ mɛciì, kɛ bo nɑ kɛ́mbekùnɛ̀ n nìtìbɛ̀, 
\v 12 n yóó dɑ duɔ́mmu ɑ m mɔɔ dɛ̀, mɛyɛ̀mmɛ̀ nɛ̀ mɛciì nhòmɔù mu nyí dɛ̀ mɔ̀ɔ̀tɛ, òmɔù mɛ nyí kpɑɑ́ kɛ bo dɛ̀ mɔ̀ɔ̀tɛ. 
\v 13 M bo dɑ pɑ̃nɛ̀ ɑ í m mɔɔ dɛ̀, n yóó dɑ duɔ́mmu tikpɑ̀tì mɛdiɛ̀ nkɑ̀ɑ yètìrì ncɛ̃́ɛ̃̀, kɛ́pɛ̃ɛ̃tɛ́ bɛkpɑ̀ɑ̀tìbɛ̀ bɛmɔu. 
\v 14 Kɑ̀ɑ tũ n kó kucɛ kɛ dɔɔri n kuɔ́ nɛ̀ n tɑnnɔ̀ dɛ̀ yɛ̃mmɛ̀, ɑ cicɛ Dɑfiti do dòmmɛ̀, m bo duɔ́ nkɑ̀ɑ fòmmuu okɛ̀.
\p
\v 15 Kɛ̀ Sɑdomɔɔ entɛní kɛ́nsɔ̃́ nti Yiɛ̀ nKuyie nhò bɛ́innɛ̀ tidɔuǹtì nti. Kòo konní Sedisɑdɛmmu, kɛ́kɔtɛ ti Yiɛ̀ nKuyie ntɑummɛ̀ tɔu borɛ̀, kɛ́fíé iwũɔ̃ Kuyie nkɛ́tuɔ nkɛ́ kù fìé mɛtɑummɛ̀ kpɛyi, kɛ́yú o tũ̀mbɛ̀ kɛ́ bɛ̀ ɑ̃nnɛ́ dibɑnni.
\s1 Sɑdomɔɔ bekɛ́mɛ̀ mɛciì nkó tibeéntì
\p
\v 16 Diyiè mɑrì kɛ̀ bɛnitipòbɛ̀ mɑbɛ̀ bɛ̀dɛ́bɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ɛ kɔtɛní okpɑ̀ɑ̀tì Sɑdomɔɔ borɛ̀. 
\v 17 Kòo ketiwè dɔ̀: Okpɑ̀ɑ̀tì n dɑ bɑ́ɑ́mmu kéntɛ́ kɛ́keè n dɔ́ kɛ́ dɑ nɑ́kɛ́ tì. Mí nnɛ̀ onitipòkù yie ntíì bo tɛcĩ́ɛ̃̀tɛ̀ tidɛ́, kɛ̀ m pɛitɛ́ m birɛ. 
\v 18 Kɛ̀ dɛ̀ mɔ̀kɛ yɛwe yɛ̀tɑ̃ɑ̃ti kòo pɛitɛ́ o kpɛrɛ. Ti mɛ mbo tɛcĩ́ɛ̃̀tɛ̀ tidɛ́ ndi, otɔù mɔù í dɛ̀ bo. 
\v 19 Kɛyènkɛ̀ mɔ̀nnì kòò duɔ́ kɛ yɑ̃̀kɛ o birɛ kɛ̀ dɛ̀ ku. 
\v 20 Kòò ìtɛ́ kɛ̀ n kpɑɑ́ duɔ́, kòò tùótɛ́ m birɛ kɛ dɔú nho kó didɔ́ù kɛ tùótɛ́ní o kpɛrɛ dɛ̀ɛ̀ ku kɛ dɔu m borɛ̀. 
\v 21 Kɛ̀ nh èntɛní dikṹnweńnì kɛ bo yɑ̃ɑ̃́ m birɛ, kɛ sɔ̃́ ndɛ̀ ku. Kɛ̀ dɛ̀ wenkɛ kɛ̀ n dɛ̀ wèńtɛ́ mɛsɑ̀ɑ̀ nkɛ sɔ̃́ n kpɛrɛ dɔkɛ.
\p
\v 22 Kòo nitipòkù tɔù dɔ̀: Ò soúmmu míì kpɛrɛ fòù, o kpɛrɛ dɛɛ̀ ku.
\p Kòò tɔù dɔ̀: Bìtì! N kpɛrɛ dɛɛ̀ fòù, ɑ kpɛrɛ dɛɛ̀ ku.
\p Kɛ̀ bɛ̀ ńnɛì okpɑ̀ɑ̀tì Sɑdomɔɔ ììkɛ̀. 
\v 23 Dɛ mɔ̀nnì kòo kpɑ̀ɑ̀tì Sɑdomɔɔ dɔ̀: Yie nhɔ̃ɔ̃ mɛ̀ nyĩmɛ̀: Míì kpɛrɛ fòù kɑ̀ɑ kpɛrɛ dɛɛ̀ ku. Kòo tɔù dɔ̀: Míì kpɛrɛ fòù, kɑ̀ɑ kpɛrɛ dɛɛ̀ ku. Ti yóó yɑ̀mu. 
\v 24 Túótɛ́nní disiè! Kɛ̀ bɛ̀ɛ dì tùótɛ́ní. 
\v 25 Kòò dɔ̀: Yɑtɛ́nɛ̀ dɛbirɛ dɛ̀ɛ̀ fòù! Kɛ́duɔ́ nwe nnitipòkù diyɑrì otɔù ditɛrì.
\p
\v 26 Kɛ̀ mɛsémmɛ̀ɛ pĩ́ ndɛbirɛ dɛ̀ɛ̀ fòù dɛ yɔ̃ kòò dɔ̀: Okpɑ̀ɑ̀tì n dɑ bɑ́ɑ́mmu! Bɑ́ɑ́ kuɔnɛ̀ dɛbirɛ, duɔ́nnɛ̀ we dɛ kɛ̀ dɛ̀ nfòù. Kòo nitipòkù tɔù yie tú: Yɑtɛ́nɛ̀ dɛ kɛ̀ tí pɑɑ̀ tidɛ́.
\p
\v 27 Dɛ mɔ̀nnì kòo kpɑ̀ɑ̀tì dɔ̀: Bɑ́ɑ́ kuɔnɛ̀ dɛbirɛ, duɔ́nnɛ̀ dɛ onitipòkù ketiwè dɛ yɔ̃ we ntú.
\p
\v 28 Kɛ̀ Isidɑyɛɛribɛ bɛmɔu keè Sɑdomɔɔ bekɛ́ mɛ̀ɛ̀ botí dɛ kó tibeéntì, kóò depɛ, kɛ́bɑntɛ́ ti Yiɛ̀ nKuyie nkuù ò duɔ́mmɛ̀ mɛciì nkòò bekɛ́ dɛ kó tibeéntì.
\c 4
\s1 Bɛ̀ɛ̀ tu bɛkótíbɛ̀ Sɑdomɔɔ kpɑ̀tì miɛkɛ
\p
\v 1 Kòo kpɑ̀ɑ̀tì Sɑdomɔɔ mbɑkɛ́ Isidɑyɛɛribɛ bɛmɔu. 
\v 2 Ntɛ bɛ̀ɛ̀ do ni o kpɑ̀tì miɛkɛ bɛ yètɛ̀: Sɑdɔki birɛ Asɑdiɑ, weè do tú ikuɔ́ nìùtì. 
\v 3 Kɛ̀ Sisɑɑ bí Ediodɛfu nɛ̀ Aiyɑ, kɛ̀ bɛ̀ ntú bɛpɑ́tíwɑ̃ɑ̃̀bɛ̀. Kɛ̀ Aidudi birɛ Yoyɑfɑti ntú dikpɑ̀ɑ̀tìtɔ̃nnì. 
\v 4 Kɛ̀ Yeyoyɑdɑ birɛ Bennɑyɑ mbɑkɛ́ bɛhɑ̃ɑ̃pɔ̀mbɛ̀. Sɑdɔki nɛ̀ Abiɑtɑɑ kɛ̀ bɛ̀ ntú ikuɔ́ nìùbɛ̀. 
\v 5 Kɛ̀ Nɑtɑ̃ɑ̃ birɛ Asɑdiɑ mbɑkɛ́ kùmɑ̀ndɑ́ɑ̀bɛ̀. Kɛ̀ Nɑtɑ̃ɑ̃ birɛ tɛrɛ̀ Sɑbudi ntú ikuɔ́ nìùtì, okpɑ̀ɑ̀tì nɛ́po, wèè ò duɔ̀ nyitié. 
\v 6 Kɛ̀ Aisɑɑ mbɑkɛ́ okpɑ̀ɑ̀tì cĩ́ɛ̃̀tɛ̀ miɛkɛ. Kɛ̀ Abudɑ birɛ Adonnidɑmmu bɑkɛ́ muhɛikɛ̀ntɔ̃mmú.
\b
\p
\v 7 Sɑdomɔɔ do mɔkɛ kùmɑ̀ndɑ́ɑ̀bɛ̀ tɛpíítɛ̀ nɛ̀ bɛ̀dɛ́bɛ̀ ndi o kpɑ̀ɑ̀tìyuu miɛkɛ, kɛ̀ bɛɛ̀ nte bɛ̀ bo nduɔ̀mmɛ̀ tidiitì okpɑ̀ɑ̀tì nɛ̀ o cĩ́ɛ̃̀tɛ̀ tɛmɔu, bɑ́ wèè kùmɑ̀ndɑ́ɑ̀ kòò níí nte otɑ̃̀nkù òmɑ́ɑ̀ dibenni miɛkɛ ò bo nduɔ̀mmɛ̀ okpɑ̀ɑ̀tì nɛ̀ o cĩ́ɛ̃̀tɛ̀ kɔbɛ tidiitì. 
\v 8 Ntɛ dɛ kóo kùmɑ̀ndɑ́ɑ̀bɛ̀ yètɛ̀: Uuri birɛ dɛɛ̀ do te Efɑdɑimmu tempɛ̃ nyɛtɑ̃rɛ̀ ĩ́nkɛ̀. 
\v 9 Kɛ̀ Dekɛri birɛ nte Mɑkɑɑ tempɛ̃ nɛ̀ Sɑdibimmu kɔku nɛ̀ Bɛti-Semɛsi kɔku nɛ̀ Edonni Bɛti-Anɑnni kɔku. 
\v 10 Kɛ̀ Esɛti birɛ nte Adibɔti Sokoo tempɛ̃ nnɛ̀ Efɛɛ kó kɛtenkɛ̀ kɛmɔu. 
\v 11 Kɛ̀ Abinnɑdɑbu birɛ nte Dɔɔ tempɛ̃ nyɛtɑ̃rɛ̀ kɔku, kɛ́puokɛ Sɑdomɔɔ birɛ Tɑfɑti. 
\v 12 Kɛ̀ Aidudi birɛ Bɑɑnɑ nte Tɑnɑki ɛì nɛ̀ Mɛkidoo kpɛri nɛ̀ Bɛti-Seɑnni kó kutempɛ̃ nkumɔu kùù tɔ̀kɛ́nɛ̀ Sɑditɑnni Sisedɛɛdi bɑkù cɑ̃̀nku kɛ́tuɔkɛnɛ̀ Abɛdi-Mɛodɑɑ nɛ̀ Yokindeɑmmu. 
\v 13 Kɛ̀ Kebɛɛ birɛ nte Dɑmɔti ɛì dìì bo Kɑdɑɑdi tempɛ̃ nnɛ̀ Yɑii Mɑnɑnsee birɛ kó sihɛkɛsí, kɛ̀ weè nte Adikɔbu Bɑsɑ̃ɑ̃ tempɛ̃, ndɛ kó kutempɛ̃ ndo mɔkɛ yɛhɛkɛ̀ sipísìkuɔ̀ ndi kɛ̀ iduotí yɛ̀ fitɛ́ kɛ̀ yɛcɑ̀kɛ̀ kpetí kɛ pɑ́kɛ́ nɛ̀ disɔɔwũɔ̃̀ kó imɑ́tìdɛí. 
\v 14 Kɛ̀ Ido birɛ Ainnɑdɑbu nte Mɑɑnnɑimmu tempɛ̃. 
\v 15 Kɛ̀ Ayimɑsi nte Nɛfutɑdii tempɛ̃. Ò múnkɛ do po Sɑdomɔɔ kóo sɑpɑ̀ɑ̀ nwe, kòo yètìrì tu Bɑsimɑti. 
\v 16 Kɛ̀ Usɑii birɛ Bɑɑnɑ nte Asɛɛ tempɛ̃ nnɛ̀ Beɑdoti ɛì. 
\v 17 Kɛ̀ Pɑduyɑɑ Yosɑfɑti birɛ nte Isɑkɑɑ tempɛ̃. 
\v 18 Kɛ̀ Edɑɑ birɛ Simɛii nte Bɛnsɑmɛɛ tempɛ̃. 
\v 19 Kɛ̀ Uudi birɛ Kebɛɛ nte Kɑdɑɑdi tempɛ̃ nnɛ̀ Amɔriibɛ kpɑ̀ɑ̀tì Sionni ɛì nɛ̀ Bɑsɑ̃ɑ̃ kɔbɛ kpɑ̀ɑ̀tì Ɔku kpɛri. Kɛ̀ kùmɑ̀ndɑ́ɑ̀ diɛwè mbo òmɑ́ɑ̀ wèè bɑkɛ́ dɛ kó yɛhɛkɛ̀ tɛpíítɛ̀ nɛ̀ yɛ̀dɛ́ɛ̀.
\p
\v 20 Sudɑɑ kɔbɛ nɛ̀ Isidɑyɛɛribɛ bɛ̀ do sũ kɛ dònnɛ̀ dɑ̀mɛ́ɛ̀rì nùù kó mubirímú mmu kɛ mɔkɛ kɛ yo nkɛ yɔ̃ nkɛ̀ dɛ̀ bɛ̀ nɑɑti.
\p
\v 21 Sɑdomɔɔ weè do bɑkɛ́ kukó ndiɛkù Efɑdɑti kó yɛkpɑ̀ɑ̀tìyɔ yɛmɔu kɛ́ntɔ kɛ́tuɔkɛnɛ̀ Fidisitɛ̃ɛ̃bɛ tenkɛ̀ Esibiti kó kutempɛ̃ mmɑ̀nku. Kɛ̀ dɛ kó yɛkpɑ̀ɑ̀tìyɔ yɛmɔuu ò bɔ̀útɛ́, kɛ́ nhò yietì dɑ̀mpóò.
\p
\v 22 Kɛ̀ bɛ̀ ndò nkɛ́ nhò duɔ̀ mbɑ́ dìì yiè muyuo mmùù nɑ̀ɑ nkɛ í yɔ̀kɛ̀ mɛsɑ̀ɑ̀ ncìdóòbɛ̀ sikɔupísìwɛi (9000), mùù yɔ̀kɛ̀ mɛsɑ̀ɑ̀ ncìdóòbɛ̀ tɛkɔupípíítɛ̀ nɛ̀ sikɔùpísìni (18000), 
\v 23 yɛnɑɑdɑkɛ̀ bɛ̀ soó nyɛ̀ kɛ yɛ̀ duɔ̀ ntidisɑ̀ɑ̀tì tɛpíítɛ̀, cɛ̃́nkoo kpɛyɛ sipísìdɛ́, ipe tɛkɔ̀ùtɛ̀ (100). Bɛ̀ í kɑ̀ɑnnɛ̀ iwũɔ̃ tɛì, siweí iwɑurìi nɛ̀ ipɛrí nɛ̀ sikoó bɛ̀ soó nsì kɛ sì duɔ̀ ntidisɑ̀ɑ̀tì.
\p
\v 24 Sɑdomɔɔ weè do bɑkɛ́ diyiè yìɛ̀ní kɛ̀, kubɑkù cɑ̃̀nku bíɛ́kɛ̀ kó kutempɛ̃ nkumɔu kɛ́túótɛ́ Tifisɑɑ kɛ́tuɔkɛnɛ̀ Kɑsɑɑ, kɛ̀ dɛ kó bɛkpɑ̀ɑ̀tìbɛ̀ bɛmɔuu ò bɔ̀útɛ́. Mudoò í mbo bɛ cuokɛ̀ wenwe nɛ̀ yɛhɛkɛ̀ yɛ̀ɛ̀ ò tɔ̀kɛ́nɛ̀, kɛ̀ bɛ̀ mbo kɛ̀ dɛ̀ bɛ̀ nɑɑti. 
\v 25 Sɑdomɔɔ kpɑ̀tì bie mmiɛkɛ Sudɑɑ kɔbɛ nɛ̀ Isidɑyɛɛribɛ kɛ̀ bɛ̀ mbo bɑ́ bɛ̀ í yĩɛ̃̀kù bɛ tenkɛ̀ kɛmɔu miɛkɛ. Bɑ́ wè kòo fiiku o tie mbɛ̀ tu dɛ̀ fínyĩ̀ nɛ̀ fìkíè.
\p
\v 26 Sɑdomɔɔ do mɔkɛ sisɛ̃ĩ́ nɛ̀ si dèèbɛ̀ tɛkɔupípíítɛ̀ nɛ̀ sikɔupísìdɛ́ ndi (12000) nɛ̀ yɛtuo sisɛ̃ĩ́ sikɔupísìnɑ̀ɑ̀ bo nɑ kɛ tɑ yɛ̀ (4000).
\p
\v 27 Kùmɑ̀ndɑ́ɑ̀bɛ̀ bɛ̀ tɑ̃ɑ̃tɛ́ bɛ̀ kɛ̀ bɛ̀ bo nhò duɔ̀ ntidiitì bɑ́ wè otɑ̃̀nkù òmɑ́ɑ̀ òmɑ́ɑ̀ dibenni miɛkɛ, kɛ̀ bɛ̀ ndɑkɛ kɛ́ ntì nhò duɔ̀ mbɑ́ dɛ̀mɑrɛ̀ í nhò dónnì, wenwe nɛ̀ o nɛ́pobɛ̀, 
\v 28 kɛ́ nhò tɔuní sisɛ̃ĩ́ kó tidiitì nɛ̀ timútì o sɛ̃ĩ́ kpɛ́í nnɛ̀ inɑ̀ɑ̀kɛ ìì dùɔ̀, kɛ̀ bɛ̀ ndɛ̀ tɔuní bɑ́ wè o kó mɛfíè nnɛ̀ dɛ̀ dò nkɛ́mmɑ̀mɛ̀.
\s1 Ti Yiɛ̀ nKuyie ndo duɔ́mmɛ̀ Sɑdomɔɔ mɛciì
\p
\v 29 Ti Yiɛ̀ nKuyie ndo duɔ́ nSɑdomɔɔ mɛ̀ɛ̀ yɛ̀mmɛ̀ nɛ̀ mɛciì ndɛ do í sénní, kòo nyɛ̃́ kɛ̀ dɛ̀ sũ kɛ dònnɛ̀ dɑ̀mɛ́ɛ̀rì kó mubirímú. 
\v 30 Sɑdomɔɔ ciì ndo pɛ̃ɛ̃tɛ́mu diyiè yìɛ̀ní kɛ̀ɛ̀ bíɛ́kɛ̀ kɔbɛ kó mɛciì nyɛmbɛ̀ nɛ̀ Esibiti kɔbɛ bɛmɔu kɔ̃mɛ. 
\v 31 Ò do pɛ̃nkùmu bɛnìtìbɛ̀ bɛmɔu mɛciì, nkɛ́mpɛ̃nkùnɛ̀ Etɑ̃ɑ̃ mɔ́mmuɔ nhEdɑɑsi ɛì kou, kɛ́mpɛ̃nkù mɛciì mMɑodii kó ibí, Emɑɑ nɛ̀ Kɑdikɔɔdi nɛ̀ Dɑdidɑɑ. Nɛ̀ dɛ kpɛ́í nkòo yètìrìi feitɛ́ yɛhɛkɛ̀ yɛmɔu miɛkɛ yɛ̀ɛ̀ bɛ̀ fitɛ́. 
\v 32 Kòo ɑ̃nnɛ́ yɛkotinɔ̀ sikɔupísìtɑ̃ɑ̃ti (3000) iyiɛ tɛkɔupíítɛ̀ nɛ̀ ìnùmmù (1005). 
\v 33 Kòo nɑ́kɛ́ dɛtie nkpɛ́í, kɛ́túótɛ́ dɛtie ndiɛrɛ̀ Dimɑɑ kpɛrɛ, kɛ́tɑunnɛ̀ tifɑ̃pèùtì tìì yìɛ̀ imɑrí ĩ́nkɛ̀, kɛ́nɑ́kɛ́ tiwɑnwɑntì itɑ̀ɑ̀kɛ ìnɑ̀ɑ̀ kpɛti kpɛ́í nɛ̀ sinɔɔ nɛ̀ dɛbɑmbɑɑ̀nnɛ̀ nɛ̀ siyĩĩ. 
\v 34 Kɛ̀ bɛnìtìbɛ̀ nyiitiní ibotí imɔu miɛkɛ kɛ kɔrìní kɛ bo keè mɛciì nkó tinɑ́ɑǹtì Sɑdomɔɔ nɑ̀ɑ́ ntì. Kɛ̀ bɛkpɑ̀ɑ̀tìbɛ̀ bɛmɔu keè o kpɛ́í kɛ́ntũɔ̃̀nní bɛnìtìbɛ̀ kɛ̀ bɛ̀ kɔ̀rìní kɛ yo o nɑ́ɑǹtì.
\c 5
\s1 Sɑdomɔɔ bɑ̀ɑ́tímɛ̀ ti Yiɛ̀ nKuyie ncĩ́ɛ̃̀tɛ̀ mɑrimù
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 2:2-15)
\p
\v 1 Idɑmmu Tiiri kóo kpɑ̀ɑ̀tì do ɔ̃ ndɑ́púnɛ̀mu Dɑfiti. Ò kèè dìì mɔ̀nnì bɛ̀ pĩ̀ḿmɛ̀ Sɑdomɔɔ tikpɑ̀tì kòo bo sɔɔtɛ́ o cicɛ Dɑfiti kpɑ̀tì kɛ́dɛitɛ bɛnìtìbɛ̀ kɛ́tɔ̃ nkɛ̀ bɛ̀ bo ò dɔu nSɑdomɔɔ. 
\v 2 Kɛ̀ Sɑdomɔɔ múnkɛɛ tɔ̃ nkɛ̀ bɛ̀ bo ò nɑ̀kɛ́ kɛ dɔ̀:
\p
\v 3 A yɛ̃́mu kɛ dò n cicɛ Dɑfiti do í nɑ nɛ̀ o dootitɔbɛ̀ kɛ́mɑɑ́ ti Yiɛ̀ nKuyie ncĩ́ɛ̃̀tɛ̀. Kɛ̀ kù mɛ nduɔ́ nkòò bɛ̀ nɑ. 
\v 4 Di mmɔ̀nnì ti Yiɛ̀ nKuyie mmɛ nni nhòmpùmmu, dɛ̀mɑrɛ̀ tɛ̃́nkɛ í n kɔɔ́nnɛ̀. 
\v 5 N yɛ̀mmɛ̀ dò ndi mmɔ̀nnì m mɑɑ́mu ti Yiɛ̀ nKuyie ntɛcĩ́ɛ̃̀tɛ̀ bɛ̀ yó nkù bɑ̀ɑ́ ntɛ̀ɛ̀ miɛkɛ kɛ́ndònnɛ̀ kù do ti nɑ̀kɛ́mɛ̀ n cicɛ Dɑfiti kɛ dɔ̀: A birɛ dɛ̀ɛ̀ bo sɔɔtɛ́ ɑ kpɑ̀tì dɛɛ̀ yó m mɑɑ́ tɛcĩ́ɛ̃̀tɛ̀. 
\v 6 N dɑ bɑ́ɑ́mmu duɔ́ nkɑ̀ɑ kó bɛtɔ̃mbɛ̀ n kɔ̃ṹ Dimɑɑ tɑ̃rì kó dɛtekperɛ̀. N yóó duɔ́nkomu n kó bɛtɔ̃mbɛ̀ kɛ̀ bɛ̀ɛ teènnɛ̀ ɑ kɔbɛ, kɑ̀ɑ yĩ́ n yietí ìdɛ̀ ɑ tɔ̃mbɛ̀, m bɛ̀ yietí. A yɛ̃́mu kɛ dò mbɛ̀mɑbɛ̀ í bo n ciɛ bɛ̀ɛ̀ nɔ mmutekɔ̃ũ̀ kɛ dònnɛ̀ ɑ kɔbɛ Sidonniibɛ.
\p
\v 7 Kɛ̀ Idɑmmuu keè dɛ kó tinɑ́ɑǹtì kɛ̀ dɛ̀ɛ o nɑrikɛ, kòo sɑ̃ntɛ ti Yiɛ̀ nKuyie nkɛ dɔ̀: Ti Yiɛ̀ nKuyie nyètìrì ndɛu kunku kùù duɔ́ nDɑfiti dɛbirɛ dɛ̀ɛ̀ ciì, kɛ̀ dɛ̀ bɑkɛ́ kubotí kudiɛkù Isidɑyɛɛribɛ. 
\v 8 Dɛ kó difɔ̃nkúò kɛ́tɔ̃ nkɛ̀ bɛ̀ɛ nɑ́kɛ́ Sɑdomɔɔ kɛ dɔ̀: Okpɑ̀ɑ̀tì tu ò kèèmu ɑ yɛ̃ mmù, kɛ tú ò bo dɑ pɑ̃ dɛtekperɛ̀ nɛ̀ bɛ̀ tu dɛ̀ sɛ́tìrì ɑ dɔ́ dɛ̀ mmɑmɛ̀. 
\v 9 O tɔ̃mbɛ̀ yóó dɛ̀ cṹũnkomu ditɑ̃rì Dimɑɑ kɛ́kɔtɛnɛ̀ dɑ̀mɛ́ɛ̀rì, kɛ́ dɛ̀ boú kɛ́tɑnnɛ́ dɑ̀mɛ́ɛ̀rì, kɛ̀ dɛ̀ɛ tuɔkɛ ɑ dɔ́ dɛ̀ kɛ̀ bɛ̀ɛ dɛ̀ cṹũ kɑ̀ɑ dɛ̀ tùótɛ́. Ò dɔ́ tìì yeti tú: A bo nhò duɔ̀mmɛ̀ tidiitì kòo piúnɛ̀ o cĩ́ɛ̃̀tɛ̀.
\p
\v 10 Mɛm̀mɛ kɛ̀ Idɑmmuu duɔ́ nSɑdomɔɔ dɛtekperɛ̀ nɛ̀ bɛ̀ tu dɛ̀ sìpɛ̀rɛ́sì, ò dɔ́ dɛ̀ mmɑ̀mɛ̀. 
\v 11 Kɛ̀ Sɑdomɔɔ mɛ nni nhò duɔ̀ ntidiitì bɑ́ dìì benni tɔ́nnì sikɔupísìkuɔ̀ (6000), dɛtie mbɛ̀ tu dɛ̀ odìfíè dɛ kó mɛkɔsɑ̀ɑ̀mɛ̀ dítìrìbɛ̀ sikɔupísìni (8000). Sɑdomɔɔ do dɛ nhò duɔ̀ mbɑ́ dìì benni.
\p
\v 12 Kɛ̀ ti Yiɛ̀ nKuyie nduɔ́ nSɑdomɔɔ mɛciì nkɛ́ndònnɛ̀ kù do tì nhò nɑ̀kɛ́mɛ̀. Kɛ̀ bɛ̀ nnɑɑti wenwe nɛ̀ Idɑmmu kɛ́dɔɔ̀nɛ̀ bɛtɔbɛ̀ mɛtɑummɛ̀.
\s1 Sɑdomɔɔ do pĩ̀ńnɛ́ bɛ̀ɛ̀ nìtìbɛ̀ muhɛikɛ̀ntɔ̃mmú
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 1:18. 2:1, 16-17)
\p
\v 13 Kɛ̀ Sɑdomɔɔ pĩ́nnɛ́ Isidɑyɛɛribɛ sikɔupípísìtɑ̃ɑ̃ti (30000) muhɛikɛ̀ntɔ̃mmú, 
\v 14 kɛ́ mbɛ̀ duɔ̀nko ditɑ̃rì Dimɑɑ bɑ́ wèè tɑ̃̀nkù bɛnìtìbɛ̀ tɛkɔupípíítɛ̀ (10000). Bɑ́ dìì tĩ̀nnì kɛ̀ dì níí dɔ̀ otɑ̃̀nkù òmɑ́ɑ̀ ditɑ̃rì Dimɑɑ, bɛ̀dɛ́bɛ̀ tɛcĩ́ɛ̃̀tɛ̀. Adonidɑmmu weè do bɛ̀ bɑkɛ́ bɛ̀ pĩ ndɛ̀ muhɛikɛ̀ntɔ̃mmú. 
\v 15 Bɛ̀ɛ̀ te mutɔù kɛ̀ bɛmbɛ mbo sikɔupípísìyiekɛ̀ (70000). Bɛ̀ɛ̀ pùɔ̀ nyɛtɑ̃́rɛ̀ ditɑ̃rì ĩ́nkɛ̀ kɛ̀ bɛmbɛ mbo sikɔupípísìni (80000). 
\v 16 Kɛ nɛ́ mbúútí bɛ̀ do tɑ̃ɑ̃tɛ́ bɛ̀, kɛ̀ bɛ̀ mpokoo bɛ̀ɛ̀ bɑkɛ́ bɛtɔ̃mbɛ̀, bɛmbɛ do bo sikɔupípísìtɑ̃ɑ̃ti nɛ̀ sikɔusìtɑ̃ɑ̃ti ndi (3300). 
\v 17 Kòo kpɑ̀ɑ̀tìi duɔ́ nkɛ̀ bɛ̀ ndɛì yɛtɑ̃́sɑ̀ɑ̀yɛ̀ yɛ̀ɛ̀ kpeńnì kɛ̀ yɛ̀ ncɑ̃́ɑ̃́ nkɛ dɛu, bɛ̀ bo pṹṹtɛ́nɛ̀ yɛ̀ ti Yiɛ̀ nKuyie ncĩ́ɛ̃̀tɛ̀. 
\v 18 Mɛm̀mɛ Sɑdomɔɔ kó bɛtɔ̃mbɛ̀ nɛ̀ Idɑmmu kɔbɛ nɛ̀ Bibudo ɛì kɔbɛ, bɛ̀ɛ̀ yɛ̃ yɛtɑ̃́rɛ̀ tɔ̃mmú, kɛ̀ bɛ̀ ndɔɔri yɛtɑ̃́rɛ̀ nɛ̀ idɛí kɛ dɛ̀ tũ̀nni ti Yiɛ̀ nKuyie ncĩ́ɛ̃̀tɛ̀ mɑrimù kpɛ́í.
\c 6
\s1 Sɑdomɔɔ mɑɑ́mɛ̀ ti Yiɛ̀ nKuyie ncĩ́ɛ̃̀tɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 3:1-14)
\p
\v 1 Okpɑ̀ɑ̀tì Sɑdomɔɔ do yóó ketɛ́ ti Yiɛ̀ nKuyie ncĩ́ɛ̃̀tɛ̀ mumɑrimù, kɛ̀ dɛ̀ mɔ̀kɛ yɛbie nsikɔusìnɑ̀ɑ̀ nɛ̀ sipísìni ndi nɛ̀ bɛ̀ yɛ̀mɛ̀ Esibiti o kpɑ̀tì benni nɑɑnnì, otɑ̃̀nkù odɛ́rì bɛ̀ do tú wè Sifi\f + \fr 6:1 \fr*\fk Sifi: \fk*\ft Bɛ̀ do kɑɑ̀ mmɛ̀ɛ̀ botí bɛtɑ̃̀ɑ̃̀bɛ̀ nɛ̀ ti kɑɑ̀mmɛ̀ yíe ndɛ̀ í wɛ̃, bɛ kóo tɑ̃̀nkù sifi berínɛ̀ tínti kó bɛtɑ̃̀ɑ̃̀bɛ̀ onɑɑnwè nɛ̀ onummuwè dɛ cuokɛ̀ nkɛ (dinɔ́tɔ̃ɔ̃̀rì nɛ̀ tipɔɔ̀dùtì dɛ cuokɛ̀).\ft*\f*.
\p
\v 2 Sɑdomɔɔ do mɑɑ́ ti Yiɛ̀ nKuyie ntɛ̀ɛ̀ cĩ́ɛ̃̀tɛ̀ okùmɛ̀ do bo mɛ́tìrì sipísìtɑ̃ɑ̃ti ndi, mɛpɛ̃kùmɛ̀ mɛ́tìrì tɛpíítɛ̀, mɛcómmɛ̀ mɛ́tìrì tɛpíítɛ̀ nɛ̀ mɛ̀nùmmù. 
\v 3 Kòo mɑɑ́ kukpɑ̃́nkpɑ̃́nkù bɛ̀ ɔ̃ɔ̃ tɑ kù kɛ nɛ́ tuɔkɛ kudieku diɛkù, Kuyie ncĩ́ɛ̃̀tɛ̀ kɔku. Kɛ̀ dɛ kó kukpɑ̃́nkpɑ̃́nkù okùmɛ̀ mbo mɛ́tìrì tɛpíítɛ̀, kudieku okùmɛ̀ bíɛ́kɛ̀ mɛ́tìrì mɛ̀nùmmù, kudieku pɛ̃kùmɛ̀ bíɛ́kɛ̀, mɛ́tìrì mɛ̀nùmmù. 
\v 4 Kòo keú sibòo kɛ́ɑ̃nnɛ́ simɑ́tìdìi, 
\v 5 kɛ́mɑɑ́ ditou mɑrì kɛ́kpeénnɛ̀ kudieku diɛkù nɛ̀ dɛ fũ̀ɔ̃̀ kɔku kɛ́ kù mùnnɛ mɛ̀tɑ̃ɑ̃ti. 
\v 6 Kɛ̀ kudieku dɛ fũ̀ɔ̃̀ kɔku mmɔkɛ mɛpɛ̃kùmɛ̀ mɛ́tìrì mɛ̀dɛ́mɛ̀ nɛ̀ dikéè, kɛ̀ dɛ cuokɛ̀ kɔku mɔkɛ mɛ́tìrì mɛ̀tɑ̃ɑ̃ti nɛ̀ dikéè, kutɑ̃ɑ̃́nkù mɛ́tìrì mɛ̀tɑ̃ɑ̃ti nɛ̀ dikéè. Kɛ yɛ̃́ ti Yiɛ̀ nKuyie ncĩ́ɛ̃̀tɛ̀ kó imɑrí cɛ̃́ɛ̃̀ ndo í mɑmɛ̀ imɔu dɛ fũ̀ɔ̃̀ nɛ̀ dɛ ĩ́nkɛ̀. Fɛmɑrifɛ mɑfɛ̀ do í mɑ̀nnɛ̀ fɛtɛfɛ̀ mɛcɛ̃́ɛ̃̀ nnɛ̀ dɛ kpɛ́í mbɛ̀ kpeé nkùù dieku ku kó tipĩ́mpĩ́ntì í nkɑ́ɑ́ nKuyie ncĩ́ɛ̃̀tɛ̀ kó imɑrí. 
\v 7 Bɛ̀ do dɔ̀ɔ̀ yɛtɑ̃́rɛ̀ pɑ́íí nwe, kɛ́deè kɛ nɛ́ nɑ kɛ́ketɛ́ mumɑrimù, bɛ̀ mɑɑ̀ dìì mɔ̀nnì dihenkɛ̀rì yoo tɛtũ̀ũ̀tɛ̀ kó kunɑmpoo í mbo, yoo timɑ́tì kó kutɔ̃nnɛnkù tɛkù mɑkù. 
\v 8 Ditou dìì kpekɛ́ dɛfũ̀ɔ̃̀ kó kudieku kó dibòrì do bo Kuyie ncĩ́ɛ̃̀tɛ̀ bɑkù cɑ̃̀nku nku. Kɛ̀ yɛdɛtìsɑ̀kɛ̀ bo ku miɛkɛ yɛ̀ɛ̀ dèkùnɛ̀ kudɛ́ríkù, kɛ pɛ̃ɛ̃tɛ́ kɛ tùɔ̀kɛ kutɑ̃ɑ̃́nkù. 
\v 9 Bɛ̀ mɑɑ́ dìì mɔ̀nnì kɛ́deè, kɛ̀ Sɑdomɔɔ tɛ̀ mùnnɛ nɛ̀ dɛtekperɛ̀ kó imundɛí nɛ̀ dɛ kó tidɑbɛɛtì. 
\v 10 Bɛ̀ do mɑɑ́ dìì tou kɛ́kpeénnɛ̀ ti Yiɛ̀ nKuyie ncĩ́ɛ̃̀tɛ̀ kɛ́ dì mùmmu kɛ́sɔɔ́ ntidieti, bɑ́ kùù dieku kɛ̀ ku cómmɛ̀ mbo mɛ́tìrì mɛ̀dɛ́mɛ̀ nɛ̀ dikéè, kɛ̀ bɛ̀ɛ tì mùnnɛ nɛ̀ dɛtekperɛ̀ kó imundɛí, kɛ́tɑunnɛ̀ ti Yiɛ́ nKuyie ncĩ́ɛ̃̀tɛ̀.
\p
\v 11 Kɛ̀ ti Yiɛ̀ nKuyie mbɛ́innɛ̀ Sɑdomɔɔ kɛ dɔ̀: 
\v 12 A mɛ̀ nni mmɑɑ́mɛ̀ tɛcĩ́ɛ̃̀tɛ̀, kɑ̀ɑ tũ̀ n kuɔ́ kɛ dɔɔri n dɑ nɑ̀kɛ́ tì kɛ dɑkɛ kɛ yíé n tɑnnɔ̀ yɛmɔu, m bo dɑ dɔɔ̀ n do nɑ̀kɛ́ tì ɑ cicɛ Dɑfiti ɑ kpɛ́í. 
\v 13 M bo mbo n kɔbɛ Isidɑyɛɛribɛ cuokɛ̀, m bɑ́ɑ́ bɛ̀ yóu.
\s1 Bɛ̀ sɑ̃̀rimɛ̀ ti Yiɛ̀ nKuyie ncĩ́ɛ̃̀tɛ̀ tɛ miɛkɛ
\p
\v 14 Sɑdomɔɔ mɑɑ́ dìì mɔ̀nnì ti Yiɛ̀ nKuyie ncĩ́ɛ̃̀tɛ̀ kɛ́deè, 
\v 15 kɛ́cónnɛ́ dɛtekperɛ̀ kó tidɑbɛɛtì kɛ̀ dɛɛ̀ ntú kumɑrí, dɛ miɛkɛ kɛtenkɛ̀ kɛ́tuɔkɛnɛ̀ timùmmùntì, kɛ́deè kɛ́nɛɛ́ ndɛtekperɛ̀ bɛ̀ tu dɛ̀ sìpɛ̀rɛ́sì dɛ kó tidɑbɛɛtì kɛtenkɛ̀, 
\v 16 kɛ́dínnɛ́ dɛtekperɛ̀ kó tidɑbɛɛtì dɛ miɛkɛ kó kufɑ̃́ɑ̃́ nkɛ̀ ku okùmɛ̀ ḿbo mɛ́tìrì tɛpíítɛ̀ kɛ̀ bɛ̀ɛ kù dɑ̀ri tidɑɑbɛɛtì dɛ fũ̀ɔ̃̀ nɛ̀ dɛ ĩ́nkɛ̀. Dɛ kó kufɑ̃́ɑ̃́ nku bɛ̀ do túmɛ̀ ikuɔ́ nɛntì dieku. 
\v 17 Bɛ̀ do totɛ́ kutempìèti kɛ́deè, kɛ̀ kùù dieku nkpɑɑ́ ku okùmɛ̀ do bo mɛ́tìrì sipísìdɛ́ ndi. 
\v 18 Kɛ̀ bɛ̀ɛ kù dɑ̀ri tidɑbɛɛtì, kɛ́kerí tifèntì ti ĩ́nkɛ̀, kɛ̀ tì ndònnɛ̀ yɛyɑɑ̀ nnɛ̀ yɛ póó, tì do dɑ̀ri kufɑ̃́ɑ̃́ nkumɔu ndi bɑ́ kumɑrí í nfeí. 
\v 19 Kɛ̀ bɛ̀ɛ dɔɔ̀ kɛ́tũntɛ kufɑ̃́ɑ̃́ nkɛ́ kù wèńkùnnɛ kɛ́tɑnnɛ́ ti Yiɛ̀ nKuyie ntɑummɛ̀ tɔu. 
\v 20-21 Dɛ kó kufɑ̃́ɑ̃́ mpɛ̃kùmɛ̀ do bo mɛ́tìrì tɛpíítɛ̀ ntɛ, mɛokùmɛ̀ mɛɛ̀ mɑ́ɑ̀, mɛcómmɛ̀ mɛɛ̀ mɑ́ɑ̀, kɛ̀ bɛ̀ɛ kù dɑ̀ri mɛsɔɔ nsɑ̀ɑ̀mɛ̀, kɛ́dɔɔ̀ diwũɔ̃tɔ̀nnì nɛ̀ dɛtekperɛ̀ kó idɛí, kɛ́ dì dɑ̀ri mɛsɔɔ nsɑ̀ɑ̀mɛ̀, kɛ́dɔɔ̀ isɔɔwɛ̃ĩ kɛ núnnɛ́ ikuɔ́ nɛntì dieku kó dibòrì. 
\v 22 Mɛm̀mɛ bɛ̀ do dɑ̀rimɛ̀ ti Yiɛ̀ nKuyie ncĩ́ɛ̃̀tɛ̀ tɛmɔu mɛsɔɔ, tɛmɔu pɑ́í pɑ́í nɛ̀ diwũɔ̃tɔ̀nnì dìì bo kufɑ̃́ɑ̃́ mbòrì.
\p
\v 23 Dɛ kó difɔ̃nkúò kɛ́cíɛ́kɛ́ odìfíè, dikpɑ́ɑ̀ kou kó idɛí sitenkɑɑnìi, kɛ̀ sì ndò mbɛĩ́nkɛ̀mbɑ̀rìbɛ̀, kɛ̀ si okùmɛ̀ mbo mɛ́tìrì mɛ̀nùmmù. 
\v 24 Kɛ̀ tɛketitɛ̀ fìɛ̀ti okùmɛ̀ mbo bɑ́ kù mɛ́tìrì mɛ̀dɛ́mɛ̀ nɛ̀ dikéè, kɛ̀ ì wɛ̃nnɛ́ ì mbo mɛ́tìrì mɛ̀nùmmù. 
\v 25 Kɛ̀ tɛtɛtɛ̀ kó ifìɛ̀ti okùmɛ̀ múnkɛ mmɛ mmɑ̀, mɛokùmɛ̀ mɛ̀mɑ́ɑ̀ mɛpɛ̃kùmɛ̀ mɛ̀mɑ́ɑ̀. 
\v 26 Sidɛ́ kɛ̀ si okùmɛ̀ mmɑ kɛ bo mɛ́tìrì mɛ̀nùmmù. 
\v 27 Kòo sì tɑnnɛ́ kufɑ̃́ɑ̃́ nkɛ́cónnɛ́ dɛ cuokɛ̀ kɛ̀ tiɛ̀ nkó kufìɛ̀ti nkɑ́ɑ́ nkummɑrí, kɛ̀ tɛtɛtɛ̀ kɔku nkɑ́ɑ́ nkutɛkù kɛ̀ ì kɔ̀tɛní kɛ mɑ̀ɑ́ dɛ cuokɛ̀ 
\v 28 kòo sì dɑ̀ri mɛsɔɔ.
\p
\v 29 Ti Yiɛ̀ nKuyie ncĩ́ɛ̃̀tɛ̀ kó tidieti tidɛ́ miɛkɛ, kɛ́dɔɔ̀ tifèntì kɛ̀ dɛ kó tifèntì ndònnɛ̀ tipuonti nɛ̀ mutepóó mmùù tìtɛ. 
\v 30 Kòo dɑri mɛsɔɔ nfɛcɑ̀rìfɛ̀ ti Yiɛ̀ nKuyie ncĩ́ɛ̃̀tɛ̀ dieti tidɛ́, kuketikù nɛ̀ kufɑ̃́ɑ̃́.
\p
\v 31 Kɛ̀ bɛ̀ɛ dɔɔ̀ dicɑ̀ù dìì kpetírí mɛ̀dɛ́mɛ̀ kɛ bo kpetínnɛ́ ti Yiɛ̀ nKuyie ntɑummɛ̀ tɔu bo kùù dieku, kɛ́ dì dɔ̀ɔ̀nɛ̀ dɛtie mbɛ̀ tu dɛ̀ odìfíè dikpɑ́ɑ̀ kou kó tidɑbɛɛtì, kɛ́dɔɔ̀ tidɑbɛɛtì tìì pĩ̀ńnɛ̀ dicɑ̀ù kɛ̀ tì pɛ̃kùmɛ̀ mmɑ̀nnɛ̀ bɛ̀ bo yɑrímɛ̀ kudieku kó kumɑrí mɛ̀nùmmù diyɑrì dìmɑ́ɑ̀ kó mɛcɛ̃́ɛ̃̀. 
\v 32 Kɛ̀ bɛ̀ɛ cíɛ́kɛ́ tifèntì yɛcɑ̀kɛ̀ yɛ̀dɛ́ kó tidɑbɛɛtì ĩ́nkɛ̀, kɛ̀ ti ndònnɛ̀ bɛĩ́nkɛ̀mbɑ̀rìbɛ̀ nɛ̀ tipuonti nɛ̀ mutepóó mmùù tìtɛ, kɛ́deè kòò dɛ̀ dɑ̀ri mɛsɔɔ. 
\v 33 Kɛ múnkɛɛ dɑri kudieku kó dicɑ̀ù nɛ̀ iì dɛí mɑ́ɑ̀. Kɛ̀ di kó tidɑbɛɛtì tìì dì pĩ̀ńnɛ̀, kɛ̀ tinti kó mɛpɛ̃kùmɛ̀ mmɑ̀nnɛ̀ bɛ̀ bo yɑrímɛ̀ kudieku kó kumɑrí mɛ̀nɑ̀ɑ̀ diyɑrì dìmɑ́ɑ̀ kó mɛcɛ̃́ɛ̃̀. 
\v 34 Kɛ̀ dɛ kó yɛcɑ̀kɛ̀ ntú idɛí bɛ̀ tu ì sìpɛ̀rɛ́sì i kó tidɑbɛɛtì, kɛ̀ bɛ̀ɛ yɛ̀ dɔ̀ɔ̀ kɛ̀ yɛ̀ ntɑu nyɛ̀dɛ́ɛ̀ yɛ̀dɛ́ɛ̀ bɑ́ kùù píkù, kɛ́ yɛ̀ pĩ̀ńnɛ́nɛ̀ yɛcɑubɛ kɛ̀ yɛ̀ nyɛ̀ fiinko. 
\v 35 Kɛ̀ bɛ̀ɛ cíɛ́kɛ́ dɛ kó yɛcɑ̀kɛ̀ ĩ́nkɛ̀ tifèntì kɛ̀ tì ndònnɛ̀ bɛĩ́nkɛ̀mbɑ̀rìbɛ̀ nɛ̀ tipuonti nɛ̀ mutepóó mmùù tìtɛ. Kòo dɛ̀ dɑ̀ri mɛsɔɔ.
\p
\v 36 Dɛ kó difɔ̃nkúò kɛ́mɑɑ́ kuduotí kɛ́fii nKuyie ncĩ́ɛ̃̀tɛ̀, kɛ́ kù mɑɑ́nɛ̀ yɛtɑ̃́rɛ̀ diɛyɛ̀, kɛ̀ yɛ̀ ndɔ́kɛ́ inɑú ìtɑ̃ɑ̃ti kɛ sɔkɛ́ sɔkɛ́ yɛtɔbɛ̀ ĩ́nkɛ̀, kɛ́deè kɛ́cónnɛ́ dɛtekperɛ̀ kó tidɑbɛɛtì yɛ ĩ́nkɛ̀.
\b
\p
\v 37 Sɑdomɔɔ kpɑ̀tì benni dinɑɑnnì miɛkɛ do nkɛ, otɑ̃̀nkù bɛ̀ tu wè Sifi\f + \fr 6:37 \fr*\fk Sifi: \fk*\ft Wentɛ́ 6:1 nɛ̀ tìì wèńkùnnɛ dɛfũ̀ɔ̃̀ dɛ kóo tɑ̃̀nkù kpɛ́í.\ft*\f* o miɛkɛ, bɛ̀ pũ̀ṹtɛ́mɛ̀ ti Yiɛ̀ nKuyie ncĩ́ɛ̃̀tɛ̀. 
\v 38 O kpɑ̀tì benni tɛpíítɛ̀ nɛ̀ dìmɑ́ɑ̀ miɛkɛ, dɛ kó dibenni otɑ̃̀nkù oniínwè bɛ̀ tu wè Buudi\f + \fr 6:38 \fr*\fk Buudi: \fk*\ft Bɛ̀ do kɑɑ̀ mmɛ̀ɛ̀ botí bɛ kó bɛtɑ̃̀ɑ̃̀bɛ̀ nɛ̀ ti kɑɑ̀mmɛ̀ dɛ̀ í wɛ̃, bɛ̀ kóo tɑ̃̀nkù Buudi berínɛ̀ ti kó bɛtɑ̃̀ɑ̃̀bɛ̀ opíínwè nɛ̀ tɛpíítɛ̀ nɛ̀ oketiwè dɛ cuokɛ̀ nkɛ (tipɛɛ̀ntì nɛ̀ diyosɛ́ɛ̀ dɛ cuokɛ̀).\ft*\f*, kɛ́ tɛ̀ dèè tɛmɔu pɑ́íí ti Yiɛ̀ nKuyie ndo bɛ̀ nɑ̀kɛ́ kɛ dɔ̀ tɛ̀ ndòmmɛ̀.
\p Bɛ̀ do tɛ̀ mɑɑ́ kɛ dɔ̀ yɛbie nyɛ̀yiekɛ̀ ndi.
\c 7
\s1 Sɑdomɔɔ mɑɑ́mɛ̀ okpɑ̀ɑ̀tì cĩ́ɛ̃̀tɛ̀
\p
\v 1 Kɛ̀ Sɑdomɔɔ mɑɑ́ tɛkpɑ̀ɑ̀tìcĩ́ɛ̃̀tɛ̀, kɛ́ ntɛ̀ mɑɑ̀ kɛ dɔ̀ yɛbie ntɛpíítɛ̀ nɛ̀ yɛ̀tɑ̃ɑ̃ti kɛ nɛ́ nɑ kɛ́ tɛ̀ dèè tɛmɔu pɑ́íí, 
\v 2-3 kɛ́mɑɑ́ kudieku kɛ̀ ku okùmɛ̀ mbo mɛ́tìrì sipísìnùmmù, mɛpɛ̃kùmɛ̀ mɛ́tìrì sipísìdɛ́ nɛ̀ mɛ̀nùmmù, mɛcómmɛ̀ mɛ́tìrì tɛpíítɛ̀ nɛ̀ mɛ̀nùmmù. Ò do còńnɛ́ Dimɑɑ kó dɛtekperɛ̀ kó yɛsɑ̃ǹkɛ̀ nyɛ kɛ́ yɛ̀ dɔ́ɔ́ nyinɑú ìnɑ̀ɑ̀, kɛ́pɑ̃́nnɛ́ dɛ kó yɛsɑ̃ǹkɛ̀ ĩ́nkɛ̀ dɛtekperɛ̀ kó imundɛí sipísìnɑ̀ɑ̀ nɛ̀ ìnùmmù, bɑ́ kùù cuɔ́ tɛpíítɛ̀ nɛ̀ ìnùmmù. Iì do pĩ̀ńnɛ̀ timùmmùntì. Dɛɛ̀ do te kɛ̀ bɛ̀ɛ kù yu kɛ dɔ̀: Dimɑɑ túúkù. 
\v 4 Kɛ̀ sibòo mbo tipíìtì timɔu icuɔ́ ìtɑ̃ɑ̃ti ìtɑ̃ɑ̃ti kɛ wetí sitɔbɛ̀. 
\v 5 Dɛ kó sibòo kó tidɑbɛɛtì tìì yɛ̀ pĩ̀ńnɛ̀ kɛ̀ ti okùmɛ̀ mmɑ tipíìtì tidɛ́, kɛ̀ tì tɔ̃nkɛ́ bɑ́ dìì cɑ̀ù kɛ̀ dì wetí ditɛrì yɛ̀dɛ́ɛ̀ yɛ̀dɛ́ɛ̀ kucɛ mɛ̀tɑ̃ɑ̃ti.
\p
\v 6 Dɛ kó difɔ̃nkúò kɛ́cónnɛ́ kudieku tɛkù yɛsɑ̃ǹkɛ̀ kɛ́munnɛ, kɛ̀ ku okùmɛ̀ mbo mɛ́tìrì sipísìdɛ́ nɛ̀ mɛ̀nùmmù, mɛpɛ̃kùmɛ̀ mɛ́tìrì tɛpíítɛ̀ nɛ̀ mɛ̀nùmmù, kòo keutɛ́ dibòrì diɛrì kɛ́ɑ̃nnɛ́ kuhɑ̃̀nhɑ̃̀nkù kɛ́ kù cɔ̀útɛ́nɛ̀ yɛsɑ̃ǹkɛ̀.
\p
\v 7 Kòo ɑ̃nnɛ́ dikpɑ̀ɑ̀tìkɑ̀rì kó kudieku ò yó nkɑri dɛ̀ kɛ bekù, kɛ́cónnɛ́ Dimɑɑ kó dɛtekperɛ̀ kó tidɑbɛɛtì kɛ́dínnɛ́ kumɑrí, kɛ́ketɛ́ kɛtenkɛ̀ kɛ́tuɔkɛnɛ̀ timùmmùntì.
\p
\v 8 Sɑdomɔɔ o mɔ́mmuɔ nhò yó nhɑ̃ tɛ̀ɛ̀ cĩ́ɛ̃̀tɛ̀ tɛntɛ do cɑ̃́ɑ̃́ ntɛmɑ́ɑ̀ borɛ̀ ndɛ, tɛ̀ do í wɛ̃nnɛ́ kubeéndieku. Sì nɛ́ do mɑɑ́ kɛ́ndòmmu sidɛ́.
\p Dɛ kó difɔ̃nkúò kòo mɑɑ́ o pokù Esibiti kóo kpɑ̀ɑ̀tì kóo sɑpɑ̀ɑ̀ nho kpɛtɛ kɛ̀ tɛ̀ mmɛ ndò.
\b
\p
\v 9 Dɛ kó sicɛ̃́ĩ simɔu bɛ̀ sì mɑɑ́nɛ̀ yɛtɑ̃́sɑ̀ɑ̀yɛ̀ nyɛ yɛdiɛyɛ̀, bɛ̀ cìɛ́kɛ́ yɛ̀, kɛ yɛ̀ kèkɛ́ kɛ ɛ̀nnɛ yɛ píìtì tidɛ́. Kɛ̀ bɛ̀ɛ yɛ mpṹṹtɛ́nɛ̀, kɛ yɛ ndeènɛ̀, kɛ́ yɛ mmɑɑ́nɛ̀ kuduotí kùù fitɛ́ tɛcĩ́ɛ̃̀tɛ̀. 
\v 10 Dipũũ mɔ́mmɔnni dii, bɛ̀ do di pũ̀ṹtɛ́nɛ̀ yɛtɑ̃́sɑ̀ɑ̀yɛ̀ nyɛ yɛdiɛyɛ̀, yɛ̀ɛ̀ okùmɛ̀ bo mɛ́tìrì mɛ̀nɑ̀ɑ̀ yoo mɛ̀nùmmù. 
\v 11 Kɛ̀ bɛ̀ɛ deè kɛ́sɔɔ́ nyɛtɑ̃́sɑ̀ɑ̀yɛ̀, bɛ̀ bennɛ́ yɛ̀ kɛ̀ yɛ̀ mɑ̀, kɛ́deè kɛ́cónnɛ́ yɛ ĩ́nkɛ̀ Dimɑɑ kó dɛtekperɛ̀ kó yɛsɑ̃ǹkɛ̀. 
\v 12 Kuduotí kùù fitɛ́ tɛcĩ́ɛ̃̀tɛ̀ ku kó yɛtɑ̃́rɛ̀ do bo icuɔ́ nyìtɑ̃ɑ̃ti ndi, kɛ sɔkɛ́ yɛtɔbɛ̀ ĩ́nkɛ̀. Nɛ̀ Dimɑɑ kó dɛtekperɛ̀ kó tidɑbɛɛtì, kucuɔ́ nkùmɑ́ɑ̀. Kɛ́ndònnɛ̀ kuduotí ti Yiɛ̀ nKuyie ncĩ́ɛ̃̀tɛ̀ kɔku nɛ̀ dɛ kó kuhɑ̃̀nhɑ̃̀nkù.
\s1 Bɛ̀ do duɔ́ mmùù tɔ̃mmú Idɑmmu
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 2:12-13)
\p
\v 13-14 Onìtì mɔù weè do bo Tiiri, kòo yètìrì tu Idɑmmu, kòo cicɛ tú dɛ kó dihɛì kou, kòo yɔ̃ tú Nɛfutɑdii kó kuwuɔ nkou kɛ tú okúpokù. Kòò ciì kɛ nɔ nkɛ mɑ́ɑ́tí dɛmɔu nɛ̀ disɔɔwũɔ̃̀. Kòo kpɑ̀ɑ̀tì Sɑdomɔɔ duɔ́ nkɛ̀ bɛ̀ɛ ò yúní, kòo duɔ́ nkòò bo dɔɔ̀ disɔɔwũɔ̃̀ kó tinɛntì timɔu.
\s1 Bɛ̀ dɔ̀ɔ̀mɛ̀ disɔɔwũɔ̃̀ kó yɛsɑ̃ǹkɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 3:15-17)
\p
\v 15 Mɛm̀mɛ ò yìɛmmɛ̀ disɔɔwũɔ̃̀ kɛ́utɛ́ kɛ̀ dɛ̀ɛ nɑɑ́ nyɛsɑ̃ǹkɛ̀ yɛ̀dɛ́ɛ̀, kɛ̀ dìmɑrì kó mɛokùmɛ̀ mbo mɛ́tìrì mɛ̀wɛi kɛ̀ di cɛ̃́ɛ̃́kù bo mɛ́tìrì mɛ̀kuɔ̀. 
\v 16 Kòo dɔɔ̀ kɛ́utɛ́ kɛ̀ dɛ̀ɛ nɑɑ́ disɔɔwũɔ̃̀ kó yɛtɛitiyɛ̀ yɛ̀dɛ́yɛ̀ kɛ́ yɛ̀ òó nyɛsɑ̃ǹkɛ̀ yómmɛ̀, kɛ̀ dɛ kó yɛtɛitiyɛ̀ okùmɛ̀ mbo mɛ́tìrì mɛ̀dɛ́mɛ̀ nɛ̀ dikéè bɑ́ dì. 
\v 17 Dɛ kó difɔ̃nkúò kòo dɔɔ̀ disɔɔwũɔ̃̀ kó mɛfĩmmɛ kɛ́ mɛ̀ sɛ̀u mmɛtɛ̃mɛ̀, bɑ́ dìì tɛitirì ĩ́nkɛ̀ mɛ̀yiekɛ̀ mɛ̀yiekɛ̀. 
\v 18 Kòo sɛu ndɛ kó yɛtɛitiyɛ̀ disɔɔwũɔ̃̀ icuɔ́ ìdɛ́ì kɛ́fitɛ́ kɛ̀ dɛ̀ ndònnɛ̀ yɛtebɛ bɛ̀ tu yɛ̀ kèdènɑ́tì. 
\v 19 Kòo yíɛ́ sɔɔ́ ndɛ kó yɛtɛitiyɛ̀ yómmɛ̀ yɛtɛyɛ̀ kɛ̀ yɛ̀ ndònnɛ̀ mutepóó mbɛ̀ tu mù díísì kɛ̀ yɛ okùmɛ̀ mbo mɛ́tìrì mɛ̀dɛ́mɛ̀. 
\v 20 Dɛ kó yɛtɛitiyɛ̀ mɛfĩmmɛ sɛ̀u yɛ̀ɛ̀ ĩ́nkɛ̀, kɛ́dɔɔ̀ kɛ̀ dɛ̀ ndò nyɛbìɛ̀ nkɛ́fitɛ́. Kɛ̀ bɛ̀ɛ yɛ̀ kpɛ̃ ndisɔɔwũɔ̃̀ kɛ́fitɛ́ kɛ̀ dɛ̀ ndò nyɛtebɛ bɛ̀ tu yɛ̀ kèdènɑ́tì, kɛ́mbo sikɔusìdɛ́ bɑ́ kùù cuɔ́ ĩ́nkɛ̀. 
\v 21 Kòo deè kɛ́ yɛ̀ còńnɛ́ ti Yiɛ̀ nKuyie ncĩ́ɛ̃̀tɛ̀ kó kuhɑ̃̀nhɑ̃̀nkù ììkɛ̀, dii nkubɑkù yoú ditɛrì kucɑ̃̀nku, kɛ́yú kuyoú kpɛri kɛ dɔ̀: Ti Yiɛ̀ nKuyie nkpénkùnko, kɛ́yú kucɑ̃̀nku kpɛri kɛ dɔ̀: Ti Yiɛ̀ nKuyie ntu muwɛ̃rímú.
\p
\v 22 Kòo sɔɔ́ diì tɛitirì ĩ́nkɛ̀ yɛtɛitiyɛ̀ tɛyɛ̀ kɛ̀ yɛ̀ ndò mmutepóó. Mɛm̀mɛ bɛ̀ dèèmɛ̀ yɛsɑ̃ǹkɛ̀ kó mutɔ̃mmú.
\s1 Bɛ̀ dɔ̀ɔ̀mɛ̀ disɔɔwũɔ̃̀ kó kunɑnkú
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 4:2-5)
\p
\v 23 Kɛ̀ Idɑmmuu dɔɔ̀nɛ̀ disɔɔwũɔ̃̀ kunɑnkú pɛ̃kùkù mɑkù, kɛ̀ ku pɛ̃kùmɛ̀ mbo mɛ́tìrì mɛ̀nùmmù, mɛcómmɛ̀ mɛ́tìrì mɛ̀dɛ́mɛ̀ nɛ̀ dikéè. Kɑ̀ɑ bo kù bennɛ́ kɛ́fitɛ́ dɛ̀ mbo mɛ́tìrì tɛpíítɛ̀ nɛ̀ mɛ̀nùmmù. 
\v 24 Kɛ̀ bɛ̀ɛ kpɛ̃ ndɛ kó kunɑnkú bìɛ̀ nkɛ́fitɛ́, kɛ̀ dɛ̀ ndò nyɛyɑɑ̀, kɛ́mbo bɑ́ wèè mɛ́tìrì miɛkɛ sipísìdɛ́, mɛ́tìrìbɛ̀ tɛpíítɛ̀ nɛ̀ bɛ̀nùmmù bɛmbɛ miɛkɛ, dɛ kó kunɑnkú nɛ̀ dɛ kó yɛyɑɑ̀ mbɛ̀ do dɛ̀ wɛ̃nnɛ́ kɛ́utɛ́nɛ̀ dii sɔɔwũɔ̃̀ mɑ́ɑ̀ ndi. 
\v 25 Kòo di ndɔɔ̀nɛ̀ inɑ̀ɑ̀kɛ tɛpíítɛ̀ nɛ̀ ìdɛ́ì, kɛ́ ì còńnɛ́ kɛ̀ ìtɑ̃ɑ̃ti nwetí kubɑkù yoú bíɛ́kɛ̀, kɛ̀ ìtɑ̃ɑ̃ti wetí diyiè yìɛ̀ní kɛ̀ɛ̀ bíɛ́kɛ̀ kɛ̀ ìtɑ̃ɑ̃ti wetí kubɑkù cɑ̃̀nku, kɛ̀ ìtɑ̃ɑ̃ti wetí diyiè tɑɑ̀ kɛ̀ɛ̀ bíɛ́kɛ̀, kɛ̀ i fɔ̃̀ bíɛ́kɛ̀ mɑ́ɑ́ dɛ cuokɛ̀. Kɛ̀ bɛ̀ɛ cɔ̃nnɛ́ dɛ kó kunɑnkú i ĩ́nkɛ̀. 
\v 26 Kɛ̀ ku bìɛ̀ ncɛ̃́ɛ̃́kù mɑ̀nnɛ̀ tɛnɔ̀ùtɛ̀ kó mɛpɛ̃kùmɛ̀, kɛ yɑɑ nkɛ dò mmutepóó. Kɛ̀ bɛ̀ ɑntɛ́ ku bìɛ̀ nfɛbòòfɛ̀ kpɛyɛ kɔ̃mɛ, kɑ̀ɑ kù píɛ mmɛniɛ, mɛ̀ mbo dítìrìbɛ̀ sikɔupípísìni (80000).
\s1 Bɛ̀ dɔ̀ɔ̀nɛ̀mɛ̀ disɔɔwũɔ̃̀ sikpɑ̀rìnɑɑsɛ̃ĩ́ nɛ̀ si bɔ
\p
\v 27 Kòo dɔɔ̀nɛ̀ disɔɔwũɔ̃̀ sinɑɑsɛ̃ĩ́ tɛpíítɛ̀, bɑ́ tɛ̀ kɛ̀ tɛ̀ mmɔkɛ mɛokùmɛ̀ mɛ́tìrì mɛ̀dɛ́mɛ̀. Kɛ̀ mɛpɛ̃kùmɛ̀ mmɛ mmɑ, mɛcómmɛ̀ mɛ́tìrì òmɑ́ɑ̀ nɛ̀ dikéè. 
\v 28 Bɛ̀ do sì dɔ̀ɔ̀ kɛ́munnɛnɛ̀ disɔɔwũɔ̃̀ ndi, kɛ́tɔ̃nnɛ́ ipɑ̀ɑ̀ti. 
\v 29 Kɛ̀ bɛ̀ɛ dɛ̀ kpɛ̃ ndisɔɔwũɔ̃̀ kɛ̀ dɛ̀ ndò nyɛcìrícìrɛ̀ nɛ̀ inɑ̀ɑ̀kɛ nɛ̀ bɛĩ́nkɛ̀mbɑ̀rìbɛ̀. Dɛ kó dɛnɛnnɛ̀ dɛtɑ̃ɑ̃ti dɛndɛ bɑ́ dɛ̀ kɛ̀ dɛ fũ̀ɔ̃̀ mmɔkɛ ditɑ̀rì, kɛ̀ bɛ̀ɛ sì cɑ́tínnɛ́ tisɑ̃tì dɛ ĩ́nkɛ̀ nɛ̀ dɛ fũ̀ɔ̃̀. 
\v 30 Bɑ́ tɛ̀ɛ̀ nɑɑsɑ̃ntɛ̀ kɛ̀ tɛ̀ mmɔkɛ yɛcɛ̃̀ɛ̃̀tiyɛ̀ yɛ̀nɑ̀ɑ̀ nɛ̀ yɛbɑ̀kɛ̀ yɛ̀ɛ̀ pĩ̀ńnɛ̀ imɑ̀nkɛ ìnɑ̀ɑ̀ bɛ̀ dɔ̀ɔ̀nɛ̀ yɛ̀ disɔɔwũɔ̃̀, kumɑ́tìdɔú pĩ́nnɛ̀ yɛ̀ɛ̀ cɛ̃̀ɛ̃tiyɛ̀ kɛ̀ dɛ̀ wɛ̃ nkɛ utɛ́ kɛ tú disɔɔwũɔ̃̀ mɑ́ɑ̀. 
\v 31 Kɛ cɔ̃nnɛ́ dɛ̀mɑrɛ̀ tɛ miɛkɛ kɛ̀ dɛ̀ ntɔ̃nkɛ kɛ tɛ̀ dònnɛ̀, kɛ tɛ̀ sèńtɛ́ mɛ́tìrì kó dikéè, kɛ̀ bɛ̀ɛ cirimɛ dɛ nùù bɛ̀ níí bo nɑ mɛ̀ɛ̀ kpɛ́í nkɛ́tɔ dɛ̀ɛ̀ dò ncírícírí kɛ̀ di pɛ̃kùmɛ̀ mbo sɑ̃ntimɛ́tìrì sipísìyiekɛ̀ nɛ̀ mɛ̀nùmmù kɛ̀ bɛ̀ɛ dɛ̀ kerí. 
\v 32 Kɛ̀ dɛ kó yɛcɛ̃̀ɛ̃̀tiyɛ̀ yɛnɑ̀ɑ̀ mbo tɛnɑɑsɑ̃ntɛ̀ fũ̀ɔ̃̀. Kumɑ́tìdɔú kùù yɛ̀ pĩ̀ńnɛ̀ kɛ̀ kù tɑ̀unɛ̀ tɛnɑɑsɑ̃ntɛ̀, kɛ̀ tɛ cɛ̃̀ɛ̃̀tiyɛ̀ cómmɛ̀ mbo bɑ́ dì sɑ̃ntimɛ́tìrì sipísìyiekɛ̀ nɛ̀ mɛ̀nùmmù. 
\v 33 Bɛ̀ do yɛ̀ dɔ̀ɔ̀ kɛ̀ yɛ̀ ndònnɛ̀ tɛkpɑ̀rìnɑɑsɑ̃ntɛ̀ kpɛyɛ ɔ̃ ndòmmɛ̀ mmɛ, kɛ̀ dɛ̀ nwɛ̃ ndɛ kó ticɛ̃̀ɛ̃̀titì nɛ̀ dɛ kó idɑbí nɛ̀ dɛ kó yɛdɔ́ idɑbí tũɔ̃́ yɛ̀ kɛ̀ dɛ̀ wɛ̃ nkɛ utɛ́ disɔɔwũɔ̃̀ mɑ́ɑ̀. 
\v 34 Yɛbɑ̀kɛ̀ yɛ̀nɑ̀ɑ̀ imɑ̀nkɛ kpɛyɛ kɛ dɛ̀ wɛ̃nnɛ́nɛ̀ tɛnɑɑsɑ̃ntɛ̀ kɛ utɛ́ disɔɔwũɔ̃̀ dimɑ́ɑ̀. 
\v 35 Kɛ̀ kukɑ̃kú mɑkù mbo bɑ́ tɛ̀ɛ̀ nɑɑsɑ̃ntɛ̀ bìɛ̀, kɛ̀ ku cómmɛ̀ bo sɑ̃ntimɛ́tìrì sipísìdɛ́ nɛ̀ mɛ̀nùmmù kɛ fitɛ́. Kɛ̀ tɛ̀ mɔ̀kɛ yɛbɑ̀kɛ̀ kɛ̀ yɛ̀ wɛ̃ nkɛ utɛ́ disɔɔwũɔ̃̀ mɑ́ɑ̀. 
\v 36 Kɛ̀ bɛ̀ɛ dɔɔ̀ tidɑbɛɛtì tipíìtì kpɛti, nɛ̀ yɛbɑ̀kɛ̀ ĩ́nkɛ̀ tifèntì kɛ̀ tì ndònnɛ̀ bɛĩ́nkɛ̀mbɑ̀rìbɛ̀, nɛ̀ yɛcìrícìrɛ̀, nɛ̀ tipuonti, kɛ mɛ nyĩ́ kɛ́cɑ́tíncɑ́tínnɛ́ tisɑ̃tì kɛ́fitɛ́. 
\v 37 Dɛ kó sinɑɑsɛ̃ĩ́ tɛpíítɛ̀ bɛ̀ do sì dɔ̀ɔ̀ kɛ̀ sì ndòmmu, bɑ́ tɛ̀ kɛ̀ tɛ̀ nwɛ̃ nkɛ utɛ́nɛ̀ disɔɔwũɔ̃̀ mɑ́ɑ̀, kɛ mɑ̀ simɔu kɛ dò nsimɔu.
\p
\v 38 Kɛ̀ bɛ̀ɛ deè kɛ́dɔɔ̀ disɔɔwũɔ̃̀ kó inɑnkɛ́ tɛpíítɛ̀, bɑ́ kù kɛ̀ ku cómmɛ̀ mbo mɛ́tìrì mɛ̀dɛ́mɛ̀ bɛ̀ bo nɑ kɛ́ɑ̃nnɛ́ bɑ́ kùù miɛkɛ dítìrìbɛ̀ tɛkɔupíítɛ̀ nɛ̀ sikɔusìkuɔ̀ (1600). Kòo cɔ̃nnɛ́ dɛ kó inɑnkɛ́ sinɑɑsɛ̃ĩ́ ĩ́nkɛ̀ bɑ́ tɛ̀ kùmɑ́ɑ̀. 
\v 39 Ò dèè mɛm̀mɛ kɛ́cónnɛ́ sikpɑ̀rìnɑɑsɛ̃ĩ́ sìnùmmù ti Yiɛ̀ nKuyie ncĩ́ɛ̃̀tɛ̀ bɑkù yoú, sìnùmmù tɔù kucɑ̃̀nku, diyiè yìɛ̀ní kɛ̀ɛ̀ bíɛ́kɛ̀ kɛ́ĩ́nnɛ́ kunɑnkú diɛkù ti Yiɛ̀ nKuyie ncĩ́ɛ̃̀tɛ̀ diyiè yìɛ̀ní kɛ̀ɛ̀ bíɛ́kɛ̀, kɛ́tɔ́ɔ́nnɛ̀ ti Yiɛ̀ nKuyie ncĩ́ɛ̃̀tɛ̀.
\s1 Bɛ̀ bɑ̀tɛmɛ̀ tinɛntì bɛ̀ yó mpĩĩnnɛ̀ tì mutɔ̃mmú ti Yiɛ̀ nKuyie ncĩ́ɛ̃̀tɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 4:7-5:1)
\p
\v 40 Idɑmmu dɔ̀ɔ̀ dìì mɔ̀nnì yɛnɑɑbɔ, nɛ̀ tikɑ̃penti, nɛ̀ yɛbɔ bɛ̀ yó mmɛ́ínɛ̀ yɛ̀ mɛyĩ̀ĩ̀. Mɛm̀mɛ ò dèèmɛ̀ Sɑdomɔɔ do yɛ̃ nwèe dɔɔ̀ tìì nɛntì ti Yiɛ̀ nKuyie ncĩ́ɛ̃̀tɛ̀ kpɛ́í. Tìì tú:
\q1
\v 41 Yɛmɑ́tìsɑ̃ǹkɛ̀ yɛ̀dɛ́ɛ̀
\q1 nɛ̀ yɛtɛitiyɛ̀ yɛ̀dɛ́ɛ̀ bɛ̀ yóó sɛu nyɛ̀ɛ̀ yómmɛ̀ mɛsɔɔfĩmmɛ yɛtɛitiyɛ̀ ĩ́nkɛ̀.
\q1
\v 42 Nɛ̀ bɛ̀ do dɔ̀ɔ̀ dɛ̀ kɛ̀ dɛ̀ ndò nyɛtebɛ bɛ̀ tú yɛ̀ kèdènɑ́tìbɛ̀ kɛ́mbo sikɔusìnɑ̀ɑ̀, kɛ̀ bɛ̀ɛ dɛ̀ cɑ̀tínnɛ́ mɛsɔɔfĩmmɛ sɛu dɛ̀ icuɔ́ ìdɛ́ì kɛ́fitɛ́.
\q1
\v 43 Sinɑɑsɛ̃ĩ́ tɛpíítɛ̀ nɛ̀ dɛ kó yɛbɔ yɛ̀ɛ̀ cɔ̃mmú si ĩ́nkɛ̀ tɛpíítɛ̀.
\q1
\v 44 Kunɑnkú diɛkù nɛ̀ disɔɔwũɔ̃̀ kó inɑ̀ɑ̀kɛ tɛpíítɛ̀ nɛ̀ ìdɛ́ì, kù cɔ̃mmú ìì ĩ́nkɛ̀.
\q1
\v 45 Bɛ̀ yó nkounɛ̀ tìì nɛntì mutɑ́pɛí nnɛ̀ tikɑ̃penti nɛ̀ yɛbɔ bɛ̀ yó mmɛ́ínɛ̀ yɛ̀ mɛyĩ̀ĩ̀.
\m Dɛ kó tinɛntì timɔu Sɑdomɔɔ do yɛ̃ nwèe dɔɔ̀ tì, ò do tì dɔ̀ɔ̀nɛ̀ disɔɔwũɔ̃̀ ndi kɛ́ tì ɑntɛ́ mɛsɑ̀ɑ̀. 
\v 46 Suditɛ̃ɛ̃ kó kubiriku miɛkɛ nkɛ bɛ̀ do yìɛmmɛ̀ disɔɔwũɔ̃̀, kɛ́ dɛ̀ mɑ́ Sukɔti ɛì nɛ̀ Sɑditɑnni kpɛri dɛ cuokɛ̀. 
\v 47 Kɛ̀ bɛ̀ɛ deè kɛ̀ Sɑdomɔɔ tì tɑnnɛ́ ti Yiɛ̀ nKuyie ncĩ́ɛ̃̀tɛ̀. Tì do sũ mɛdiɛ̀ mmɛ, bɑ́ bɛ̀ í nnɑ kɛ bo bɑtɛ disɔɔwũɔ̃̀ bɛ̀ tì dɔ̀ɔ̀nɛ̀ dì kó kucɛ̃́ɛ̃́kù.
\b
\p
\v 48 Kɛ̀ Sɑdomɔɔ dɔɔ̀nɛ̀ mɛsɔɔ nsɑ̀ɑ̀mɛ̀ tinɛntì tɛtì bɛ̀ yó mpĩĩnnɛ̀ tì ti Yiɛ̀ nKuyie ncĩ́ɛ̃̀tɛ̀ miɛkɛ mutɔ̃mmú. Tìì tú:
\q1 Dihúúntɔ̀nnì,
\q1 nɛ̀ tɑ́bùrì bɛ̀ yó ndɑkù wèè ĩ́nkɛ̀ pɛ̃́ɛ̃̀bɛ̀ bɛ̀ pɑ̃ɑ̃ mbɛ̀ ti Yiɛ̀ nKuyie.
\q1
\v 49 Sifitíkɛ̀kɛ̀ɛ tɛpíítɛ̀ sìì do ĩ́ĩ́kú kɛ wetí ikuɔ́ nɛntì kó kudieku,
\q1 sìnùmmù kubɑkù yoú,
\q1 sìnùmmù kubɑkù cɑ̃̀nku.
\q1 Bɛ̀ do sì dɔ̀ɔ̀nɛ̀ mɛsɔɔ nsɑ̀ɑ̀mɛ̀ mmɛ nɛ̀ si tòkɛ̀ yɛ̀ɛ̀ dò mmutepóó
\q1 nɛ̀ sibúkúsí bɛ̀ yóó ɑ̃nnɛ́ sìì miɛkɛ ifitíwɛ̃ĩ
\q1 nɛ̀ dɛ kó ihɑɑkɛ́,
\q1 dɛmɔu mɛsɔɔ nsɑ̀ɑ̀mɛ̀ mɑ́ɑ̀.
\q1
\v 50 Nɛ̀ yɛnɑɑbɔ nɛ̀ siseú,
\q1 nɛ̀ yɛbɔ bɛ̀ yó mmɛ́ínɛ̀ yɛ̀ mɛyĩ̀ĩ̀,
\q1 nɛ̀ ibòòkɛ nɛ̀ tikɑ̀dɑ̀ɑ̀buuti bɛ̀ yó ntuɔ̀ ntìì miɛkɛ tihúúntì,
\q1 kɛ̀ dɛ̀ ntú mɛsɔɔ nsɑ̀ɑ̀mɛ̀.
\q1 Timɑ́tì tìì pĩ̀ńnɛ̀ yɛcɑ̀kɛ̀ yɛ̀ɛ̀ kpetí ikuɔ́ nɛntì kó kudieku nɛ̀ ikuɔ́ dieku kpɛyɛ.
\q1 Dɛmɔu kɛ̀ dɛ̀ ntú mɛsɔɔ.
\p
\v 51 Okpɑ̀ɑ̀tì Sɑdomɔɔ dèè dìì mɔ̀nnì ti Yiɛ̀ nKuyie ncĩ́ɛ̃̀tɛ̀ kó mutɔ̃mmú, kɛ́tɔní o cicɛ Dɑfiti do cɑ̃̀ńnɛ́ dɛ̀ Kuyie nkpɛ́í: Timɑ́tì pɛ́ítì nɛ̀ mɛsɔɔ nnɛ̀ tinɛntì tɛtì tibotí tibotí, kɛ́ dɛ̀ tɑnnɛ́ ti Yiɛ̀ nKuyie ncĩ́ɛ̃̀tɛ̀ kó tinɛntì do dò kɛ́mbo kùù dieku.
\c 8
\s1 Bɛ̀ tɑnnɛ́mɛ̀ ti Yiɛ̀ nKuyie ntɑummɛ̀ tɔu ku cĩ́ɛ̃̀tɛ̀ miɛkɛ
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 5:2-6:2)
\p
\v 1 Kɛ̀ Sɑdomɔɔ tíí nyIsidɑyɛɛribɛ kó bɛkótíbɛ̀ nɛ̀ bɛ̀ɛ̀ bɑkɛ́ iwuɔ nnɛ̀ tinɑɑ̀mùntì kɛ̀ bɛ̀ bo kɔtɛ Dɑfiti ɛì bɛ̀ tu dì Siyɔ̃ɔ̃ kɛ́túótɛ́ní ti Yiɛ̀ nKuyie ntɑummɛ̀ tɔu. 
\v 2 Kɛ̀ Isidɑyɛɛribɛ bɛmɔuu tíínní okpɑ̀ɑ̀tì Sɑdomɔɔ borɛ̀. Dɛ kó dibenni tɑ̃̀nkù oyiénwè do nwe bɛ̀ tu wè Etɑnimmu\f + \fr 8:2 \fr*\fk Etɑnimmu: \fk*\ft Bɛ̀ do kɑɑ̀ mmɛ̀ɛ̀ botí bɛ kó bɛtɑ̃̀ɑ̃̀bɛ̀ nɛ̀ ti kɑɑmmɛ̀ yíe ndɛ̀ í wɛ̃, bɛ kóo tɑ̃̀nkù Etɑnimmu berínɛ̀ ti kó bɛtɑ̃̀ɑ̃̀bɛ̀ owɛínwè nɛ̀ opíínwe dɛ cuokɛ̀ nkɛ (kupɔɔsɛ̃ĩkù nɛ̀ tipɛɛ̀ntì dɛ cuokɛ̀).\ft*\f*, kɛ̀ bɛ̀ mɔkɛ dibɑnni. 
\v 3-4 Isidɑyɛɛribɛ kó bɛkótíbɛ̀ bɛmɔu tíí ndìì mɔ̀nnì kɛ dèè, kɛ̀ ikuɔ́ nìùbɛ̀ɛ túótɛ́ ti Yiɛ̀ nKuyie ntɑummɛ̀ tɔu kɛ́tɔ, kɛ́túótɛ́nɛ̀ ti Yiɛ̀ nKuyie ntɑummɛ̀ tou nɛ̀ tikɔutɛ́nɛntì tìì bo di miɛkɛ. 
\v 5 Okpɑ̀ɑ̀tì Sɑdomɔɔ nɛ̀ Isidɑyɛɛribɛ kɛ̀ bɛ̀ɛ tíí nKuyie ntɑummɛ̀ tɔu borɛ̀ kɛ́fíé inɑ̀ɑ̀kɛ nɛ̀ ipe kɛ̀ dɛ̀ nsũ kɛ í dò nkɛ́nɑ kɛ́kɑɑ nkɛ́deè.
\p
\v 6 Kɛ̀ ikuɔ́ nìùbɛ̀ɛ di tɑnnɛ́ ti Yiɛ̀ nKuyie ncĩ́ɛ̃̀tɛ̀ miɛkɛ kɛ́ĩ́nnɛ́ di kó kufɑ̃́ɑ̃́ mbɛ̀ tú kù ikuɔ́ nɛntì dieku, bɛ̀ dɔ̀ɔ̀ tìì fèntì kɛ donnɛnɛ̀ bɛĩ́nkɛ̀mbɑ̀rìbɛ̀ ti fìɛ̀ti dɛ́ɛ̀. 
\v 7 Bɛ̀ do ti dɔ̀ɔ̀ tìdɛ́ kɛ̀ ti fìɛ̀ti nyuo kɛ kɑ̃nkɛ́ ti Yiɛ̀ nKuyie ntɑummɛ̀ tɔu ndi nɛ̀ di pɑ̀ɑ̀ti. 
\v 8-9 Dɛ kó ipɑ̀ɑ̀ti do dɛumu, kɑ̀ɑ tɑ ti Yiɛ̀ nKuyie ncĩ́ɛ̃̀tɛ̀ kudieku diɛkù, ɑ nyì wùó, nkɑ̀ɑ mɛ mbo ditowɑɑ̀ ɑ bɑ́ nyì wùó. Titɑ̃́píɛ̀tì tìdɛ́tì mɑ́ɑ̀ tiì do bo ti Yiɛ̀ nKuyie ntɑummɛ̀ tɔu miɛkɛ, kù do bɛ̀ dènnɛ Esibiti kɛ́duɔ́ ntì Mɔyiisi, kù bɛ̀ tɑ̀unnɛ̀ dìì mɔ̀nnì kumɑ́ɑ̀ ditɑ̃rì Odɛbu kɛ̀ tì kpɑɑ́ bo nɛ̀ yíenní.
\p
\v 10 Ikuɔ́ nìùbɛ̀ yɛ̀nní dìì mɔ̀nnì ti Yiɛ̀ nKuyie ncĩ́ɛ̃̀tɛ̀ kɛ̀ diwɛtirìi tɛ̀ píɛ. 
\v 11 Bɑ́ bɛ̀ í nnɑ kɛ́sɔɔtɛ́ bɛ tɔ̃mmú. Ti Yiɛ̀ nKuyie nkó tikpetì tiì do píɛ nku cĩ́ɛ̃̀tɛ̀. 
\v 12 Dɛ mɔ̀nnì kɛ̀ Sɑdomɔɔ bɛ́i nkɛ dɔ̀: Ti Yiɛ̀ nKuyie nhɑ dɔ́ kɛ́mbo diwɛtisɔ̀ùrì miɛkɛ nkɛ. 
\v 13 Kɛ̀ n nɛ́ dɑ mɑɑ́ tɛkpɑ̀ɑ̀tìcĩ́ɛ̃̀tɛ̀ ɑ yó mbo tɛ̀ sɑ̃́ɑ̃̀!
\s1 Sɑdomɔɔ nɑ̀kɛ́ tì bɛnìtìbɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 6:3-11)
\p
\v 14 Kòo kpɑ̀ɑ̀tì Sɑdomɔɔ wɛ̃ɛ̃tɛ Isidɑyɛɛribɛ tĩ̀nnì còḿmú dɛ̀ kɛ́mɔɔ ti Yiɛ̀ nKuyie nkó mɛsɑ̀ɑ̀ mbɛ kpɛ́í, kɛ́deè kɛ dɔ̀: 
\v 15 Ti Yiɛ̀ nKuyie nyètìrì ndɛu tínti Isidɑyɛɛribɛ ti tũ nkù, kuù dɔ̀ɔ̀ nɛ̀ ku wɛ̃rímú kù do nɑ̀kɛ́ tì n cicɛ Dɑfiti kɛ dɔ̀: 
\v 16 Nɛ̀ ǹ dènnɛ dìì yiè n nìtìbɛ̀ Isidɑyɛɛribɛ Esibiti, n yí tɑ̃ɑ̃tɛ́ diyiè mɑrì Isidɑyɛɛribɛ ɛkɛ̀ miɛkɛ dìmɑrì, kɛ tú bɛ̀ m mɑɑ́ tɛcĩ́ɛ̃̀tɛ̀ n yó mbo tɛ̀ɛ̀ miɛkɛ. N tɑ̃ɑ̃tɛ́ Dɑfiti nwe kòo bo mbɑkɛ́ n nìtìbɛ̀ Isidɑyɛɛribɛ. 
\v 17 Kɛ̀ n cicɛ Dɑfiti yɛ̀mmɛ̀ɛ ò pɑ̃ kɛ́ndò nwèe mɑɑ́ tɛcĩ́ɛ̃̀tɛ̀ ti Yiɛ̀ nKuyie ntínti Isidɑyɛɛribɛ tũ nkù. 
\v 18 Kɛ̀ kùu ò nɑ̀kɛ́ kɛ dɔ̀: A yɛ̀mmɛ̀ mɛ̀ ndɑ pɑ̃mɛ̀ kɛ dò nhɑ́ m mɑɑ́ tɛcĩ́ɛ̃̀tɛ̀ dɛ̀ wennimu. 
\v 19 Dɛ̀ nɛ́ í tú fɔ̃́ɔ̃̀ yóó tɛ̀ nni mmɑɑ́, ɑ yóó pɛitɛ́ dɛ̀ɛ̀ birɛ dɛɛ̀ yóó tɛ̀ nni mmɑɑ́. 
\v 20 Kù ti ndɔ̀ɔ̀ kɛ duɔ́ nkɛ̀ n sɔɔtɛ́ n cicɛ Dɑfiti kpɑ̀tì, kɛ kɑ̀ri o kpɑ̀ɑ̀tìkɑ̀rì, kɛ bɑkɛ́ Isidɑyɛɛribɛ, kɛ́ndònnɛ̀ kù do ti nhò nɑ̀kɛ́mɛ̀. M mɑɑ́ tɛ ncĩ́ɛ̃̀tɛ̀ nɛ̀ ti Yiɛ̀ nKuyie nyIsidɑyɛɛribɛ tũ nkù kó diyètìrì kpɛ́í nkɛ, 
\v 21 kɛ ɑ̃nnɛ́ kudieku ditɔu ti Yiɛ̀ nKuyie ndo tɑ̀unnɛ̀ kumɑ́ɑ̀ Isidɑyɛɛribɛ kù bɛ̀ dènnɛ dìì mɔ̀nnì Esibiti kɛ́ bɛ̀ duɔ́ nyìì kuɔ́ ɑ̃ dìì miɛkɛ.
\s1 Sɑdomɔɔ bɑ́ntɛ̀mɛ̀ ti Yiɛ̀ nKuyie nku cĩ́ɛ̃̀tɛ̀ kpetímù yiè
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 6:12-40)
\p
\v 22 Kɛ̀ Sɑdomɔɔ cómmú diwũɔ̃tɔ̀nnì ììkɛ̀ nɛ̀ Isidɑyɛɛribɛ bɛmɔu ììkɛ̀, kɛ́youtɛ o nɔu kɛĩ́nkɛ̀ bíɛ́kɛ̀ kɛ́bɑ́ntɛ̀ ti Yiɛ̀ nKuyie nkɛ dɔ̀: 
\v 23 Ti Yiɛ̀ nKuyie nyIsidɑyɛɛribɛ tũ nkù, otɔù mɔù í bo kɛ dɑ dònnɛ̀ bɑ́ kɛĩ́nkɛ̀ miɛkɛ bɑ́ kɛtenkɛ̀ ĩ́nkɛ̀. Fɔ̃́ nwèè pĩ mmɛtɑummɛ̀ ɑ dɔ̀ɔ̀nɛ̀mɛ̀ ɑ tɔ̃mbɛ̀ kɛ dɔɔri mɛsɑ̀ɑ̀ mbɛ̀ɛ̀ dɑ tũ nnɛ̀ bɛ yɛ̀mmɛ̀ mɛmɔu. 
\v 24 A dɔ̀ɔ̀mu ɑ kóo tɔ̃ntì n cicɛ Dɑfiti ɑ do ò nɑ̀kɛ́ tì. A ti ndɔ̀ɔ̀ yíe nnɛ̀ ɑ wɛ̃rímú. 
\v 25 Ti Yiɛ̀ nKuyie nyIsidɑyɛɛribɛ tũ nkù ɑ bɑ́ɑ́ yɛ̃̀ nhɑ do nɑ̀kɛ́ tì ɑ kóo tɔ̃ntì n cicɛ Dɑfiti kɛ dɔ̀: Kòo bí yie nkɛ tũ nhɑ kó kucɛ ò kù tũ̀ mmɛ̀ɛ̀ botí, iì yó nsɔkɛ́ o kpɑ̀tì kɛ́mbɑkɛ́ ɑ nìtìbɛ̀ Isidɑyɛɛribɛ. 
\v 26 Ti Yiɛ̀ nKuyie nyIsidɑyɛɛribɛ tũ nkù, dɔɔ̀ di mmɔ̀nnì ɑ do nɑ̀kɛ́ tì ɑ kóo tɔ̃ntì n cicɛ Dɑfiti.
\p
\v 27 Kɛ̀ Sɑdomɔɔ sɔɔtɛ́ kɛ́bɛ́i nkɛ dɔ̀: Ti Yiɛ̀ nKuyie mmɛ̀nkɛ bo nɑ kɛ́mbonɛ̀ bɛnìtìbɛ̀ kɛtenkɑ̀ɑ̀? Kɛĩ́nkɛ̀ kiɛ dɛu kɛ í nɑ kɛ tɔ ti Yiɛ̀ nKuyie nkɛ̀ m mɛ̀ mmɑɑ́ tɛ̀ɛ̀ cĩ́ɛ̃̀tɛ̀ tɛɛ̀ bo nɑ kɛ́ kù tɔɑ̀? 
\v 28 Ti Yiɛ̀ nKuyie nkéntɛ́ kɛ́keè mí nhɑ kóo tɔ̃ntì n dɑ bɑ́ɑ́mmɛ̀ yíe! 
\v 29 A nɔ̀nfɛ̀ bɑ́ɑ́ ṹṹ nkɛyènkɛ̀ nɛ̀ kuyie ntɛ ncĩ́ɛ̃̀tɛ̀ ĩ́nkɛ̀, ɑ bɛ́i nkɛ tú ɑ yètìrì yó mbo tɛ̀ɛ̀ miɛkɛ. Kéntɛ́ ɑ kóo tɔ̃ntì yóó dɑ bɑ́ntɛ̀ ìì bɑ́ɑmmìi tɛ miɛkɛ. 
\v 30 Ti Yiɛ̀ nKuyie, n kéntɛ́ mí nnɛ̀ ɑ nìtìbɛ̀ Isidɑyɛɛribɛ, kɛ̀ ti dɑ bɑ̀ńtɛ̀ tɛ ncĩ́ɛ̃̀tɛ̀ miɛkɛ, ɑ́ mboní kɛĩ́nkɛ̀ kɛ́keè kɛ́ ti cĩ́ɛ̃́.
\b
\p
\v 31 Kòo nìtì cɑ̀ɑ̀rɛ̀ otɔù, kɛ̀ dɛ yiɛ̀ nyĩ wèe pɑrìkɛ̀, kòò kɔ̀tɛní ɑ cĩ́ɛ̃̀tɛ̀ kɛ pɑ̀rìkɛ̀ ɑ wũɔ̃tɔ̀nnì ììkɛ̀, 
\v 32 ti Yiɛ̀ nKuyie nhɑ́ mboní kɛĩ́nkɛ̀ kɛ́keè, kɛ́ bɛ̀ pùtɛ́, kɛ́kpetínnɛ́ osĩ̀nwè kɛ́dɛɛtɛ́ wèè nɑɑti.
\p
\v 33 Kɑ̀ɑ nìtìbɛ̀ Isidɑyɛɛribɛ dɑ yetɛ́nɛ̀, kɛ̀ bɛ dootitɔbɛ̀ bɛ̀ nɑ, kɛ̀ bɛ̀ wɛ̃̀ɛ̃̀tɛní ɑ cĩ́ɛ̃̀tɛ̀ bíɛ́kɛ̀ kɛ dɑ mɔɔ mɛcĩ́ɛ̃́mmɛ̀, kɛ dɑ sɑ̃ntɛ, kɛ dɑ bɑ̀ńtɛ̀. 
\v 34 Ti Yiɛ̀ nKuyie nhɑ́ mboní kɛĩ́nkɛ̀ kɛ́keè kɛ́cĩ́ɛ̃́ nhɑ nìtìbɛ̀ Isidɑyɛɛribɛ, kɛ́wɛ̃tɛ kɛ́ bɛ̀ kpɛ̃nnɛ́ní dihɛì ɑ do duɔ́ ndì bɛ yɛmbɛ̀.
\p
\v 35 Kɛ̀ bɛ̀ mɛ mbo dɑ yetɛ́nɛ̀mu, kɑ̀ɑ kpetínnɛ́ iwɛtibori kɛ̀ fɛtɑɑfɛ̀ tɛ̃́nkɛ í nniu, kɛ̀ bɛ̀ bɑntɛ́ bɛ̀ yetɛ́mɛ̀ ɑ bɛ̀ potɛ́ mɛ̀ɛ̀ kpɛ́í, kɛ kɔ̀tɛní tɛ ncĩ́ɛ̃̀tɛ̀ miɛkɛ kɛ dɑ bɑ̀ńtɛ̀ kɛ dɑ sɑ̃ntɛ. 
\v 36 Ti Yiɛ̀ nKuyie nhɑ́ mboní kɛĩ́nkɛ̀, kɛ́cĩ́ɛ̃́ nhɑ kóo tɔ̃ntì nɛ̀ ɑ nìtìbɛ̀ Isidɑyɛɛribɛ, kɛ́ bɛ̀ bɛnkɛ kucɛ sɑ̀ɑ̀kù bɛ̀ dò nkɛ́tũnnɛ kù, kɛ́yɔɔrɛ mɛniɛ nkɛtenkɛ̀ ɑ duɔ́ nkɛ̀ ɑ kɔbɛ kɛ̀ bɛ̀ kɛ̀ te.
\p
\v 37 Kɛ̀ dikònnì diì mɛ ntɑnní dihɛì yoo mutenkṹṹ, kɛ̀ tidiitì tiì mɛ nfɑ̃ũ ndɛpɑɑ nyoo kɛ̀ fɛtùɔ̀rìfɛ̀ fɛɛ̀ mɛ ntì pĩ. Kɛ̀ yɛcɑ́dúɔ̀ nyɛɛ̀ mɛ ntɑnní yoo fɛcofɛ. Kɛ̀ Isidɑyɛɛribɛ dootitɔbɛ̀ bɛɛ̀ mɛ mbo bɛ̀ pi bɛ ɛì kɛ́ mbɛ̀ fɛ̃́ũnko. Kɛ̀ mɛyɛi mmɑmɛ̀ tɑnní yoo mumɔmmú bɑ́ mù. 
\v 38 Kɑ̀ɑ nìtìbɛ̀ Isidɑyɛɛribɛ yɛ̀mmɛ̀ cɑ̀ɑ̀rɛ̀ bɛ yɛi nkpɛ́í, kɛ̀ bɛ̀ wèe wɛ̃̀ɛ̃̀tɛní ɑ cĩ́ɛ̃̀tɛ̀ bíɛ́kɛ̀ kɛ dɑ bɑ̀ńtɛ̀, bɑ́ kòò dɑ mɔɔ mù, yoo ò dɑ bɑ̀ńtɛ̀ tìmɑtì kpɛ́í. 
\v 39 Ti Yiɛ̀ nKuyie nhɑ́ mboní kɛĩ́nkɛ̀ ɑ kɑrì, kɛ́keè, kɛ́cĩ́ɛ̃́, nkɛ́teennɛ̀, kɛ́dɔɔ̀ bɑ́ wè o borimɛ dòmmɛ̀, kɛ yɛ̃́ ɑ yɛ̃́mɛ̀mu o yɛ̀mmɛ̀. Fɔ̃́ɔ̃̀ mɑ́ɑ̀ yɛ̃́ bɛnìtìbɛ̀ bɛmɔu yɛ̀mmɛ̀. 
\v 40 Ǹdɔɔri mɛmmɛ kɛ̀ dɛ̀ɛ yie nkɛ̀ Isidɑyɛɛribɛ ndɑ dé bɛ fòmmu mumɔu, bɛ̀ yó nfòù mù dihɛì ɑ duɔ́ ndì bɛ yɛmbɛ̀ di miɛkɛ.
\p
\v 41-42 Bɛnìtìbɛ̀ yóó keèmu ɑ yetidiɛrì nɛ̀ ɑ kpeńnìmɛ̀ kɛ pĩ́ mmutɔ̃mmú nɛ̀ muwɛ̃rímú. Bɑ́ opɔ̀ɔ̀ wèè í tú Isidɑyɛɛri, kòò ìtɛ́ní dɛdɛ́tirɛ̀ kɛ kɔ̀tɛní ɑ cĩ́ɛ̃̀tɛ̀ nɛ̀ ɑ yètìrì kpɛ́í nkɛ dɑ bɑ́ɑ́. 
\v 43 Ti Yiɛ̀ nKuyie nhɑ mboní kɛĩ́nkɛ̀ kɛ́keè kɛ́dɔɔ̀ o yɛ̃ mmù. Mɛm̀mɛ kutenkù kumɔu kɔbɛ bo bɑntɛ́mɛ̀, kɛ dɑ depɛ ɑ nìtìbɛ̀ Isidɑyɛɛribɛ dɑ dé mɛ̀ɛ̀ botí. Kɛ̀ bɛ̀ɛ bɑntɛ́ kɛ dò n dɑ mɑɑ́ tɛ̀ɛ̀ cĩ́ɛ̃̀tɛ̀ mɛ̀nkɛ tú ɑ kpɛtɛ.
\p
\v 44 Kɑ̀ɑ duɔ́ nkɑ̀ɑ kɔbɛ dokɛ́nɛ̀ bɛ dootitɔbɛ̀, kɛ̀ bɛ̀ bo ɑ bɛ tɔ̃ nkɛ̀ kɛ wɛ̃̀ɛ̃̀tɛní ɑ ɛì ɑ tɑ̃ɑ̃tɛ́ dì, n dɑ mɑɑ́ dì tɛcĩ́ɛ̃̀tɛ̀ di bíɛ́kɛ̀ kɛ dɑ bɑ̀ńtɛ̀, 
\v 45 Ti Yiɛ̀ nKuyie nhɑ́ mboní kɛĩ́nkɛ̀ kɛ́keè bɛ bɑ́ɑmmìi kɛ́ bɛ̀ teennɛ̀.
\p
\v 46 Kɛ̀ Isidɑyɛɛribɛ bɛɛ̀ mɛ ndɑ yetɛ́nɛ̀, kɛ yɛ̃́ òmɔù í bomɛ̀ wèè bo yĩ́ ò bɑ́ɑ́ yetɛ́. Kɛ̀ dɛ̀ dò mbɛ̀ dɑ yetɛ́nɛ̀, kɑ̀ɑ miɛkɛ bɛ̀ pɛikɛ, kɑ̀ɑ yóu kɛ̀ bɛ dootitɔbɛ̀ bɛ̀ pĩ̀ḿmú kɛ kònnɛ̀ dɛdɛ́tirɛ̀ yoo dɛ tɔ́ɔ́nnɛ̀, kɛ bɛ̀ dɔ̀ɔ̀ tidɑɑtì, 
\v 47 kɛ̀ bɛ̀ kɛ̀ bo kɛ totí bɛ yɛ̀mmɛ̀ kɛ dɑ bɑ́ntɛ̀ kɛ tú: Tíì do kpénkùnnɛ ti to, ti yetɛ́mu, ti cɑ̀ɑ̀rɛ̀mu. 
\v 48 Kɛ̀ bɛ̀ kɛ̀ bo kɛ dɑ mɔɔ mɛcĩ́ɛ̃́mmɛ̀ nɛ̀ bɛ yɛ̀mmɛ̀ mɛmɔu kɛ wɛ̃̀ɛ̃̀tɛní dihɛì ɑ duɔ́ ndì bɛ yɛmbɛ̀ di bíɛ́kɛ̀, ɑ tɑ̃ɑ̃tɛ́ dì, n dɑ mɑɑ́ dì tɛcĩ́ɛ̃̀tɛ̀, kɛ̀ bɛ̀ dɑ bɑ́ɑ́, 
\v 49 ti Yiɛ̀ nKuyie nhɑ mboní kɛĩ́nkɛ̀ kɛ́keè bɛ bɑ́ɑmmìi kɛ́ bɛ̀ teennɛ̀. 
\v 50 Á bɛ̀ cĩ̀ɛ̃́ mbɛ̀ dɑ yetɛ́nɛ̀mɛ̀, nɛ̀ bɛ yetɛmɛ̀ ɑ kpɛti, ɑ́ duɔ́ nkɛ̀ bɛ̀ dootitɔbɛ̀ɛ bɛ̀ kuɔ́ mmɛsémmɛ̀. 
\v 51 Bɛ̀ tú ɑ kɔbɛ mbɛ, kɑ̀ɑ bɛ̀ te, kɛ bɛ̀ dènnɛ Esibiti mɛhɑ́ɑ́rìmɛ̀ miɛkɛ.
\p
\v 52 A nɔ̀nfɛ̀ bɑ́ɑ́ ítɛ́ mí nhɑ kóo tɔ̃ntì nɛ̀ ɑ nìtìbɛ̀ Isidɑyɛɛribɛ ti ĩ́nkɛ̀. Nyo ti bɑ́ɑmmìi, ti yóó nkuɔ̀ nkɛ dɑ bɑ́ɑ́ nyì. 
\v 53 Ti Yiɛ̀ nKuyie nfɔ̃́ɔ̃̀ ti tɑ̃ɑ̃tɛ́ ibotí tɛì miɛkɛ kɛ̀ ti bo ntú ɑ kɔbɛ, kɛ́ndònnɛ̀ ɑ do tì nɑ̀kɛ́mɛ̀ ɑ kóo tɔ̃ntì Mɔyiisi, ɑ dènnɛ dìì mɔ̀nnì ti yɛmbɛ̀ Esibiti.
\s1 Sɑdomɔɔ mɔɔmɛ̀ ti Yiɛ̀ nKuyie nkɛ tú kùu bɛ̀ dɔ̀ɔ̀ mɛsɑ̀ɑ̀
\p
\v 54 Sɑdomɔɔ kuɔ́nnɛ̀ dìì mɔ̀nnì ti Yiɛ̀ nKuyie nkɛ kù sɑutɛnɛ̀, kɛ́deè kɛ́ítɛ́ ò do nínkú dɛ̀ diwũɔ̃tɔ̀nnì ììkɛ̀ kɛ yuo o nɔu kɛĩ́nkɛ̀ bíɛ́kɛ̀, 
\v 55 kɛ́cómmú kɛ́mɔɔ ti Yiɛ̀ nKuyie nkó mɛsɑ̀ɑ̀ nyIsidɑyɛɛribɛ bɛmɔu ĩ́nkɛ̀ kɛ dɔ̀: 
\v 56 N sɑ̃ntímu ti Yiɛ̀ nKuyie nkùù òmpùnnɛ ku nìtìbɛ̀ Isidɑyɛɛribɛ kɛ́ndònnɛ̀ kù do ti nɑ̀kɛ́mɛ̀ ku kóo tɔ̃ntì Mɔyiisi. Timɔu ti tì dɔ̀ɔ̀mu tìmɑtì í sùɔ́. 
\v 57 Ti Yiɛ̀ nKuyie nhɑ nti bonɛ̀ ɑ do bonɛ̀ mɛ̀ɛ̀ botí ti yɛmbɛ̀, ɑ bɑ́ɑ́ ti bɔntóo! A bɑ́ɑ́ ti yóu! 
\v 58 Yṹɔ̃́nní ti yɛ̀mmɛ̀ ɑ bíɛ́kɛ̀, kɛ̀ ti ndɔɔri ɑ dɔ́mɛ̀, kɛ́ntũ nhɑ kuɔ́ nɛ̀ ɑ tɑnnɔ̀ ɑ duɔ́ nyɛ̀ ti yɛmbɛ̀. 
\v 59 Ti Yiɛ̀ nKuyie nhɑ bɑ́ɑ́ yɛ̃̀ n dɑ bɑ́ɑ́ nyìì bɑ́ɑmmìi, yóu kɛ̀ ì mbo ɑ yɛ̀mmɛ̀ kɛyènkɛ̀ nɛ̀ kuyie, kɛ̀ dɛ̀ɛ yie nkɑ̀ɑ nteénnɛ̀ ɑ nìtìbɛ̀ Isidɑyɛɛribɛ nɛ̀ mí nhɑ kóo tɔ̃ntì yɛwe yɛmɔu. 
\v 60 Mɛm̀mɛ ibotí imɔu bo bɑntɛ́mɛ̀ kɛ dò nfɔ̃́ nti Yiɛ̀ nKuyie nfɔ̃́ɔ̃̀ tu Kuyie, kòò mɔù í bo kɛ dɑ dònnɛ̀. 
\v 61 Díndi Isidɑyɛɛribɛ kɛ̀ di duɔ́ ndi yɛ̀mmɛ̀ mɛmɔu ti Yiɛ̀ nKuyie kɛ́nyíé nku kuɔ́ nɛ̀ ku tɑnnɔ̀, kɛ́ndònnɛ̀ dɛ̀ mɛ̀ ndòmmɛ̀ yíe.
\s1 Bɛ̀ do fìé ìì wũɔ̃ ti Yiɛ̀ nKuyie nku ncĩ́ɛ̃̀tɛ̀ kpetímù yiè
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 7:4-10)
\p
\v 62 Okpɑ̀ɑ̀tì Sɑdomɔɔ bɑ̀ńtɛ̀ mɛmmɛ ti Yiɛ̀ nKuyie nkɛ́deè, wenwe nɛ̀ Isidɑyɛɛribɛ bɛmɔu kɛ̀ bɛ̀ɛ fíé ti Yiɛ̀ nKuyie nyiwũɔ̃. 
\v 63 Bɛ̀ kpetírí dìì yiè ti Yiɛ̀ nKuyie ncĩ́ɛ̃̀tɛ̀ kɛ̀ Sɑdomɔɔ fíé ti Yiɛ̀ nKuyie nyiwũɔ̃ mɛtɑummɛ̀ kpɛyi. Yɛnɑɑdɑkɛ̀ sikɔupípísìdɛ́ nɛ̀ sikɔupísìdɛ́ (22000) ipe tɛkɔupíkɔ̀ùtɛ̀ nɛ̀ sikɔupípísìdɛ́ (120000). 
\v 64 Disɔɔwũɔ̃̀ kó diwũɔ̃tɔ̀nnì í nsɑ̀nnɛ̀, kɛ̀ Sɑdomɔɔ duɔ́ nkɛ̀ bɛ̀ɛ túótɛ́ ti Yiɛ̀ nKuyie ncĩ́ɛ̃̀tɛ̀ kó kudɑ̀nkù, kɛ́ dɛ ntùɔ nyiwũɔ̃ ìì dò nkɛ́tuɔ nnɛ̀ yɛpɑ̃rɛ̀ yɛ̀ɛ̀ tú tidiitì nɛ̀ bɛ̀ fìé ìì wũɔ̃ mɛtɑummɛ̀ kpɛyi kó mɛkùɔ̀ mmɛkùɔ̀ nkpɛrɛ.
\p
\v 65 Sɑdomɔɔ nɛ̀ Isidɑyɛɛribɛ bɛ̀ do tíkú ditĩ̀nnì diɛrì ndi, kɛ bɑɑ̀ ndɛ kó dibɑnni. Bɛnìtìbɛ̀ do ìtɛ́ní Debo-Amɑti nwe kɛ́ntɔ kɛ́tuɔkɛnɛ̀ Esibiti kó kukó nkɛ̀ bɛ̀ mbɑɑ̀ ndɛ kó dibɑnni kɛ dɔ̀ yɛwe yɛ̀yiekɛ̀. 
\v 66 Diyiè niínnì yiè kòo kpɑ̀ɑ̀tìi cɑu mbɛnìtìbɛ̀, kɛ̀ bɛ̀ɛ kɔtɛní kɛ́mɔɔ Kuyie nkó mɛsɑ̀ɑ̀ nho ĩ́nkɛ̀ bɑ́ wè kòo kò nho cĩ́ɛ̃̀tɛ̀. Kɛ̀ diwɛ̀ì mbɛ̀ bo ti Yiɛ̀ nKuyie ndɔ̀ɔ̀mɛ̀ mɛsɑ̀ɑ̀ nku kóo tɔ̃ntì Dɑfiti nɛ̀ ku nìtìbɛ̀ Isidɑyɛɛribɛ.
\c 9
\s1 Ti Yiɛ̀ nKuyie nyìɛ́ kɛ bɛnkɛmɛ̀ kumɑ́ɑ̀ Sɑdomɔɔ
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 7:11-22)
\p
\v 1 Sɑdomɔɔ mɑɑ́ dìì mɔ̀nnì ti Yiɛ̀ nKuyie ncĩ́ɛ̃̀tɛ̀ nɛ̀ tɛkpɑ̀ɑ̀tìcĩ́ɛ̃̀tɛ̀ kɛ́deè nɛ̀ ò dɔ́ dɛ̀ɛ̀ kó dimɑ̀ɑ̀. 
\v 2 Kɛ̀ ti Yiɛ̀ nKuyie nyíɛ́ kóò bɛnkɛ kumɑ́ɑ̀ kù do o bɛnkɛ mɛ̀ɛ̀ botí kumɑ́ɑ̀ Kɑbɑɔ̃ɔ̃, 
\v 3 kóò nɑ̀kɛ́ kɛ dɔ̀: N kèèmu ɑ m bɑ́ɑ́mmɛ̀ kɛ n kuɔ̀nnɛ̀. N cɑ̃̀ńnɛ́mu tɛcĩ́ɛ̃̀tɛ̀ ɑ m mɑɑ́ tɛ̀ n yó mbomu tɛ miɛkɛ, n yɛ̀mmɛ̀ nɛ̀ n nuɔ ndɛ̀ í yóó ítɛ́ tɛ ĩ́nkɛ̀ bìtì! 
\v 4 Fɔ̃́ nhɑ mɔ́mmuɔ nhɑ cɛ̃́nkɛ ntũ n kó kucɛ nɛ̀ ɑ yɛ̀mmɛ̀ mɛmɔu, kɑ̀ɑ dɔ̀ɔ̀ri dɛ̀ɛ̀ sìɛ́, kɛ dɔɔri n dɑ nɑ̀kɛ́ tì timɔu, kɛ tũ n kuɔ́ nɛ̀ n tɑnnɔ̀ ɑ cicɛ Dɑfiti do dòmmɛ̀. 
\v 5 A kpɑ̀tì yó mbomu sɑ̃́ɑ̃̀ kɛ́ndònnɛ̀ n do tì nɑ̀kɛ́mɛ̀ ɑ cicɛ Dɑfiti kɛ dɔ̀ o bí iì yó nsɔkɛ́ o kpɑ̀tì sɑ̃́ɑ̃̀ kɛ́mbɑkɛ́ Isidɑyɛɛribɛ. 
\v 6 Fɔ̃́ nnɛ̀ ɑ bí kɛ̀ di mɛ nni mbùtínnɛ́, kɛ̀ di í pĩ́ n tɑnnɔ̀ nɛ̀ n kuɔ́ n di duɔ́ ndɛ̀, kɛ̀ di kɔ̀tɛ kɛ nìńkú yɛbɔkɛ̀ ììkɛ̀ kɛ yɛ̀ fìé. 
\v 7 Dɛ mɔ̀nnì m bo di bɛti díndi Isidɑyɛɛribɛ kɛtenkɛ̀ n di duɔ́ nkɛ̀ miɛkɛ, kɛ́dootóo tɛcĩ́ɛ̃̀tɛ̀ ɑ m mɑɑ́ tɛ̀, kɛ́ di wɑ́mpùnnɛ, kɛ̀ ibotí tɛì di dɑɑ́, 
\v 8 dɛ mɔ̀nnì bɛ̀ɛ̀ bo mpɛ̃nkù tɛcɛ̃diɛtɛ̀ tiɛ mborɛ̀, dɛ̀ bo bɛ̀ di, kɛ̀ bɛ̀ mbékú mùù kpɛ́í nte kɛ̀ n dɔ̀ɔ̀ mɛbotí dɛ kó dihɛì nɛ̀ dɛ kó tɛcĩ́ɛ̃̀tɛ̀ tɛ̀ɛ̀ do dɛu kɛ wenni. 
\v 9 Kɛ̀ bɛ̀ɛ bɛ̀ tɛ̃̀ńnɛ́ kɛ dɔ̀: Bɛ̀ dootóo bɛ Yiɛ̀ nKuyie nku, kùù do dènnɛ bɛ yɛmbɛ̀ Esibiti kɛ ninku kɛ feu iwũɔ̃ yɛbɔkɛ̀ kɛ pĩ́ nyɛ tɔ̃mmú. Dɛɛ̀ te kɛ̀ kù yóu kɛ̀ dɛ kó mɛyɛi mmɛmɔu bɛ̀ tùɔ̀kɛní.
\s1 Sɑdomɔɔ pĩ mmùù tɔ̃mmú
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 8:1-18)
\p
\v 10-11 Idɑmmu Tiiri kóo kpɑ̀ɑ̀tì weè do duɔ́ nSɑdomɔɔ dɛtekperɛ̀ nɛ̀ bɛ̀ tu dɛ̀ sìpɛ̀rɛ́sì nɛ̀ mɛsɔɔ nhò dɔ́ mɛ̀ɛ̀ botí, kòò yɑ̀ɑ mɑɑ́nɛ̀ ti Yiɛ̀ nKuyie ncĩ́ɛ̃̀tɛ̀ nɛ̀ tɛkpɑ̀ɑ̀tìcĩ́ɛ̃̀tɛ̀ yɛbie nsipísìdɛ́ miɛkɛ. Sɑdomɔɔ dèè dìì mɔ̀nnì mumɑrimù kɛ́pɑ̃ Idɑmmu yɛhɛkɛ̀ sipísìdɛ́, yɛ̀ɛ̀ bo Kɑdidee kó kutempɛ̃ mmiɛkɛ. 
\v 12 Kɛ̀ Idɑmmuu ítɛ́ Tiiri kɛ́kɔtɛ kɛ́yɑ̀ dɛ kó yɛhɛkɛ̀, ò mɛ nyí nyɛ̀ pɛ́nsìrì, 
\v 13 kɛ́bɛ́i nkɛ dɔ̀: N nɛ́po Sɑdomɔɔ, ɑ mɛ̀ nni mpɑ̃ yɛ̀ɛ̀ ɛkɛ̀ í tú yɛ̀mɑyɛ̀. Kɛ̀ bɛ̀ɛ yɛ̀ yu kɛ dɔ̀ Kɑbudi ɛkɛ̀. Nɛ̀ yíenní kɛ̀ bɛ̀ yɛ̀ yu kɛ tú Kɑbudi ɛkɛ̀. 
\v 14 Kɛ̀ Idɑmmuu pɑ̃ Sɑdomɔɔ mɛsɔɔ ntɔ́nnì bɛ̀tɑ̃ɑ̃ti nɛ̀ dikéè.
\p
\v 15 Ntɛ okpɑ̀ɑ̀tì Sɑdomɔɔ do pĩ̀ńnɛ́ mɛ̀ɛ̀ botí bɛnìtìbɛ̀ muhɛikɛ̀ntɔ̃mmú kɛ̀ bɛ̀ɛ mɑɑ́ ti Yiɛ̀ nKuyie ncĩ́ɛ̃̀tɛ̀, nɛ̀ tɛkpɑ̀ɑ̀tìcĩ́ɛ̃̀tɛ̀, nɛ̀ kudɑ̀nkù bɛ̀ do tú kù Midoo, nɛ̀ Sedisɑdɛmmu kó iduotí, nɛ̀ Asɔɔ nɛ̀ Mɛkidoo nɛ̀ Kesɛɛ kó yɛhɛkɛ̀. 
\v 16 Esibiti kóo kpɑ̀ɑ̀tì weè do bɛ̀ do kɛ́pɔntɛ Kesɛɛ, kɛ́cɔ́u ndihɛì kɛ́kuɔ Kɑnnɑhɑ̃ɑ̃ kɔbɛ bɛ̀ɛ̀ do dɛ̀ bo, kɛ́pɑ̃ dɛ kó dihɛì o kóo sɑpɑ̀ɑ̀ nhò yɛ̀tì dìì mɔ̀nnì o dɔù Sɑdomɔɔ. 
\v 17 Dɛɛ̀ te kɛ̀ Sɑdomɔɔ do wɛ̃̀tɛ kɛ́mɑɑ́ Kesɛɛ ɛì kɛ́wɛ̃tɛ kɛ́mɑɑ́nɛ̀ Bɛti-Onɔɔ ɛkɛ̀ dɛfũ̀ɔ̃̀ kpɛyɛ. 
\v 18 Nɛ̀ Bɑdɑti kpɛri, nɛ̀ Tɑmɑɑ kpɛri yɛ̀ɛ̀ bo bɛ tenkɛ̀ tempɛ̃ ntɛdɔntɛ̀ kɔku. 
\v 19 Nɛ̀ yɛhɛkɛ̀ o diitì do ɑ̃ yɛ̀ nɛ̀ o kpɑ̀rìnɑɑsɛ̃ĩ́ do bo yɛ̀ nɛ̀ o sɛ̃ĩ́. Kòo mɑɑ́nɛ̀ ò dɔ́ dɛ̀ɛ̀ kó dimɑ̀ɑ̀ Sedisɑdɛmmu, nɛ̀ ditɑ̃rì Dimɑɑ, o tenkɛ̀ kɛmɔu miɛkɛ cɛ̃́nkɛ. 
\v 20 Bɛnìtìbɛ̀ mɑbɛ̀ bɛɛ̀ do kpɑɑ́ bɛ tenkɛ̀ miɛkɛ bɛ̀ɛ̀ í tú Isidɑyɛɛribɛ: Amɔriibɛ nɛ̀ Itiibɛ nɛ̀ Pedisiibɛ nɛ̀ Efiibɛ nɛ̀ Sebusiibɛ. 
\v 21 Dɛ kó ibotí do kpɑɑ́ bɛ cuokɛ̀ kɛ yɛ̃́ Isidɑyɛɛribɛ do í nɑmɛ̀ kɛ́ bɛ̀ kùɔ bɛmɔu. Sɑdomɔɔ do bɛ mpĩ̀ńnɛ́ muhɛikɛ̀ntɔ̃mmú, kɛ̀ bɛ̀ kpɑɑ́ kɛ mù pĩ nnɛ̀ yíenní. 
\v 22 Kɛ̀ Sɑdomɔɔ soó nyIsidɑyɛɛribɛ kɛ́ bɛ ndɔɔ̀ bɛhɑ̃ɑ̃pɔ̀mbɛ̀ nɛ̀ tihɑ̃ɑ̃pɔ̀ntì tìì ò bɑ̀ɑ, iwɛ̃ĩ yɛmbɛ̀ nɛ̀ bɛ̀ɛ̀ tɔu bɛhɑ̃ɑ̃pɔ̀mbɛ̀ bɛ̀ɛ̀ dèkù sikpɑ̀rìnɑɑsɛ̃ĩ́ bɛ kpɑ̀rìnɛntì nɛ̀ bɛ̀ɛ̀ bɛ̀ bɑkɛ́. 
\v 23 Kɛ̀ kùmɑ̀ndɑ́ɑ̀bɛ̀ɛ wɑɑ́ mbɛ̀ɛ̀ yó mbɑkɛ́ muhɛikɛ̀ntɔ̃mmú kɛ̀ bɛ̀ mbo sikɔusìnùmmù nɛ̀ sipísìnùmmù (550) kɛ̀ bɛɛ̀ nni ditĩ̀nnì dìì pĩ mmutɔ̃mmú.
\p
\v 24 Esibiti kóo kpɑ̀ɑ̀tì kóo sɑpɑ̀ɑ̀ nyìtɛ́ dìì yiè Dɑfiti ɛì kɛ́tɑ Sɑdomɔɔ mɑɑ́ tɛ̀ɛ̀ cĩ́ɛ̃̀tɛ̀, dɛ mɔ̀nnì ndi Sɑdomɔɔ mɑɑ́mɛ̀ kudɑ̀nkù bɛ̀ tu kù Midoo.
\p
\v 25 Kɛ̀ Sɑdomɔɔ níí fíé iwũɔ̃ ti Yiɛ̀ nKuyie kucɛ mɛ̀tɑ̃ɑ̃ti dibenni miɛkɛ. Kɛ níí fíé ii nkɛ́tuɔ nkɛ́fíé itɛì mɛtɑummɛ̀ kpɛyi kɛ́mpĩ́ nti Yiɛ̀ nKuyie ncĩ́ɛ̃̀tɛ̀ kɛ̀ dɛ̀ wenni.
\p
\v 26 Okpɑ̀ɑ̀tì Sɑdomɔɔ do dɔ̀ɔ̀mu bɑ̀tóòbɛ̀, kɛ̀ bɛ̀ mbo Esiyonni-Kebɛɛ Edɔti borɛ̀, tipèntì kóo dɑ̀mɛ́ɛ̀rì tɑkɛ́ Edɔmmu tenkɛ̀. 
\v 27 Kɛ̀ Idɑmmuu duɔ́ nSɑdomɔɔ bɛnìtìbɛ̀ bɛ̀ɛ̀ nɔ mmɛniɛ mmɛsɑ̀ɑ̀ nkɛ pĩ́ ndɑ̀mɛ́ɛ̀rì miɛkɛ mutɔ̃mmú kɛ̀ bɛ̀ɛ nɛinɛ̀ Sɑdomɔɔ kó bɛtɔ̃mbɛ̀. 
\v 28 Kɛ̀ bɛ̀ɛ kɔtɛ Ofii ɛì kɛ́wɑɑ́ mmɛsɔɔ ntɔ́nnìbɛ̀ tɛpíítɛ̀ nɛ̀ bɛ̀dɛ́bɛ̀ kɛ́tɔ kɛ́duɔ́ nSɑdomɔɔ.
\c 10
\s1 Sebɑɑ kóo nitipokpɑ̀ɑ̀tì kɔ̀tɛmɛ̀ kɛ dɔu nSɑdomɔɔ
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 9:1-12)
\p
\v 1 Mɛm̀mɛ kɛ̀ Sebɑɑ tenkɛ̀ kóo nitipokpɑ̀ɑ̀tìi keè Sɑdomɔɔ ciì nkpɛ́í nkɛ́kɔtɛ kɛ bo ò yɑ̀ɑ́kɛ́ nɛ̀ yɛnɑ́ɑǹhɑ̃ntíyɛ̀, 
\v 2 kɛ́tuɔkoo Sedisɑdɛmmu kɛ nɛinɛ̀ bɛtɔ̃mbɛ̀ pɛ́u nɛ̀ yòyóbɛ̀ kɛ̀ bɛ̀ ntɔ mɛsɔɔ mpɛ́u nɛ̀ yɛtɑ̃́sɑ̀ɑ̀yɛ̀ yɛ̀ɛ̀ donku dɛu, kɛ́tuɔkɛ Sɑdomɔɔ borɛ̀ kóò bìékɛ́ tinɑ́ɑǹtì o tɔní tì pɛ́u. 
\v 3 Kɛ̀ Sɑdomɔɔ ò tɛ̃̀ńnɛ́ ti timɔu ò tɔnní tì, kɛ í nyĩɛ̃kɛ tìmɑtì. 
\v 4 Kòo nitipokpɑ̀ɑ̀tìi keè Sɑdomɔɔ nɑ́ɑǹtì mɛciì nkpɛti, kɛ́yɑ̀nɛ̀ tɛkpɑ̀ɑ̀tìcĩ́ɛ̃̀tɛ̀ ò mɑɑ́ tɛ̀, 
\v 5 nɛ̀ tidiitì ò yo ntì, nɛ̀ o tũ̀mbɛ̀ ɑ̃ sìì cɛ̃́ĩ nɛ̀ o tɔ̃mbɛ̀ pĩ mmɛ̀ɛ̀ botí mutɔ̃mmú, nɛ̀ bɛ̀ ɑ̃ tìì yɑ̀ɑ̀tì, nɛ̀ bɛ̀ɛ̀ ò duɔ̀ mmɛnɑɑ̀, kɛ́yɑ̀nɛ̀ bɛ̀ feu ìì wũ̀ɔ̃ ti Yiɛ̀ nKuyie kɛ tuɔ̀ nkɛ̀ dɛ̀ɛ ò di mɛdiɛ̀ nkóò kpeí.
\p
\v 6 Kòo nɑ́kɛ́ okpɑ̀ɑ̀tì kɛ dɔ̀: N do kpɑɑní n ciɛ kɛ̀ bɛ̀ n nɑ̀kɛ́mu ɑ kpɛ́í nnɛ̀ ɑ ciìmɛ̀. Kɛ̀ ǹ tùɔ̀kɛní kɛ mɛ̀nkɛ sɔ̃́ ndɛ̀ mɛ ndo. 
\v 7 M mu ndo í yie, nkɛ̀ n do í mɛ̀ ntùɔ̀kɛní kɛ yɑ̀ nɛ̀ n nɔ̀nfɛ̀. N yɑ̀mu ɑ ciì ndɛumɛ̀ nɛ̀ ɑ mɔkɛ dɛ̀ nɛ̀ ɑ yetìdiɛrì, kɛ sɔ̃́ mbɛ̀ do n nɑ̀kɛ́ tì í tùɔ̀kɛ n yɑ̀ dɛ̀ kó dikéè. 
\v 8 A kɔbɛ nɛ̀ ɑ tɔ̃mbɛ̀ bɛ̀ɛ̀ dɑ bonɛ̀ sɑ̃́ɑ̃̀ kɛ kémmú ɑ nɑ́ɑǹtì tì bɛ̀ duɔ́ diwɛ̀ì ndi. 
\v 9 A Yiɛ̀ nKuyie nyètìrì ndɛu, kùù dɑ dɔ̀ɔ̀ mɛsɑ̀ɑ̀ nkɛ dɑ dɔ̀ɔ̀ okpɑ̀ɑ̀tì kɑ̀ɑ bɑkɛ́ Isidɑyɛɛribɛ. Kù dɔ́mu Isidɑyɛɛribɛ sɑ̃́ɑ̃̀ dɛɛ̀ te kɛ̀ kù dɑ tɑ̃ɑ̃tɛ́ kɑ̀ɑ bo mbɛ̀ bekùnɛ̀ kɛ̀ dɛ̀ wenni.
\p
\v 10 Mɛm̀mɛ kɛ̀ Sebɑɑ kóo nitipokpɑ̀ɑ̀tìi pɑ̃ Sɑdomɔɔ mɛsɔɔ mmɛ̀ bo ntùɔ̀kɛ tɔ́nnìbɛ̀ bɛ̀tɑ̃ɑ̃ti nɛ̀ dikéè, nɛ̀ tùdɑ̀ɑ̀rí kɛ̀ dɛ̀ í mmɔkɛ dɛ̀ mɑ̀mɛ̀, nɛ̀ yɛtɑ̃́sɑ̀ɑ̀yɛ̀ yɛ̀ɛ̀ donku dɛu. Dɛ kó difɔ̃nkúò tùdɑ̀ɑ̀rí tɛ̃́nkɛ í tùɔ̀kɛní mɛbotí Isidɑyɛɛribɛ tenkɛ̀.
\b
\p
\v 11 Okpɑ̀ɑ̀tì Idɑmmu kóò bɑ̀tóòbɛ̀ bɛ̀ɛ̀ do kɔ̀tɛ Ofii ɛì kɛ́tɔní mɛsɔɔ, bɛ̀ múnkɛ do tɔnímu idɛí pɛ́u bɛ̀ tú ì sɑ̃̀ntɑ́dì nɛ̀ yɛtɑ̃́sɑ̀ɑ̀yɛ̀ yɛ̀ɛ̀ donku dɛu. 
\v 12 Kòo kpɑ̀ɑ̀tì Sɑdomɔɔ túótɛ́ iì dɛí kɛ́dɔɔ̀nɛ̀ ti Yiɛ̀ nKuyie ncĩ́ɛ̃̀tɛ̀ kó yɛsɑ̃ǹkɛ̀ tɛkpɑ̀ɑ̀tìcĩ́ɛ̃̀tɛ̀, nɛ̀ tikùtìdùùtì nɛ̀ tibómbonti bɛyɛndèmbɛ̀ kpɛ́í. Nɛ̀ dɛ kó diyiè idɛí bɛ̀ tu ì sɑ̃̀ntɑ́dì ì tɛ̃́nkɛ í tùɔ̀kɛní Isidɑyɛɛribɛ tenkɛ̀ mɛ kó kubotí.
\b
\p
\v 13 Dɛ kó difɔ̃nkúò kòo kpɑ̀ɑ̀tì Sɑdomɔɔ pɑ̃mmú Sebɑɑ kóo nitipokpɑ̀ɑ̀tì ò yɛ̃ nhò dɔ́ dɛ̀ɛ̀ kó dimɑ̀ɑ̀, kɛ́deè kóò pɑ̃mmú yɛpɑ̃rɛ̀ òmɔù tɔù í yóó nɑ kɛ́pɑ̃ yɛ̀, kɛ̀ dɛ̀ í tú wenwe Sɑdomɔɔ. Dɛ kó difɔ̃nkúò kòo kò nho ciɛ nɛ̀ o tɔ̃mbɛ̀.
\s1 Sɑdomɔɔ do mɔkɛ tìì kpɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 1:14-17. 9:13-28)
\p
\v 14 Mɛsɔɔ mmɛ̀ɛ̀ do ɔ̃ɔ̃ tuɔkɛní Sɑdomɔɔ borɛ̀ dibenni dìmɑ́ɑ̀ miɛkɛ mɛ cɛ̃́ɛ̃́kù do ɔ̃ mbo tɔ́nnì sipísìdɛ́ ndi. 
\v 15 Kɛ nɛ́ yíɛ́nɛ̀ bɛpotɑmbɛ̀ diɛbɛ̀ nɛ̀ bɛsɑ́m̀pɔ́bɛ̀ do ɔ̃ nyietì ìì dìítí bɛ potɑntì kpɛ́í nnɛ̀ Adɑbii kó bɛkpɑ̀ɑ̀tìbɛ̀ do ɔ̃ɔ̃ cuɔ́ wèè dɑ̀mpóò kóò duɔ́.
\p
\v 16 Kòo kpɑ̀ɑ̀tì Sɑdomɔɔ dɔɔ̀ tidɔpììtì diɛtì sikɔusìdɛ́ (200) kɛ̀ tì ntú mɛsɔɔ mmɑ́ɑ̀ bɛ̀ yìɛmmɛ̀ kɛ utɛ́, bɑ́ kùù dɔpìkù kó mɛsɔɔ ncɛ̃́ɛ̃́kù do bo cìdóò bɛ̀kuɔ̀ ndi. 
\v 17 Tidɔpììtì sɑ́m̀pɔ́tì sikɔusìtɑ̃ɑ̃ti (300) bɛ̀ dɔ̀ɔ̀nɛ̀ tì mɛsɔɔ mmɑ́ɑ̀, bɑ́ kùù dɔpìkù mɛsɔɔ ncìdóò òmɑ́ɑ̀ nɛ̀ dikéè. Kɛ̀ bɛ̀ɛ deè kɛ́ tì tɑnnɛ́ kudieku bɛ̀ tu kù Dimɑɑ kó kutúúkù.
\p
\v 18 Dɛ kó difɔ̃nkúò kɛ́dɔɔ̀nɛ̀ dikpɑ̀ɑ̀tìkɑ̀rì yɛpɑ́pɑ́nìì nkɛ́ dì dɑ̀ri mɛsɔɔ nsɑ̀ɑ̀mɛ̀. 
\v 19 Kɛ̀ dì mmɔkɛ yɛdɛtìsɑ̀kɛ̀ yɛ̀kuɔ̀ kòò níí yó nkɑri kɛ dírí dɛ̀ ndò ncírícírí, kɛ mɔkɛ o bɑɑ̀ nníí yó nyĩkú dɛ̀ kɛ̀ bɛ̀ɛ cíɛ́kɛ́ yɛcìrícìrɛ̀ kó tifèntì tìdɛ́tì, kɛ́cónnɛ́ kuu nho bɑkù yoú kutɛkù kucɑ̃̀nku. 
\v 20 Kɛ̀ yɛtɛyɛ̀ ndɔ́kɛ́ diwũɔ̃tɔ̀nnì dɛtìsɑ̀kɛ̀ kɛ cútóo, ku mpíkù yɛ̀kuɔ̀ kutɛkù yɛ̀kuɔ̀, kɛ̀ tìi wɛ̃nnɛ́ tɛpíítɛ̀ nɛ̀ tìdɛ́tì. Bɛ̀ í dɔ̀ɔ̀ mɛ kó kubotí dikpɑ̀ɑ̀tìyuu tɛrì mɑrì miɛkɛ.
\p
\v 21 Okpɑ̀ɑ̀tì Sɑdomɔɔ kó ibòòkɛ do tú mɛsɔɔ mmɑ́ɑ̀ ndi kɛ̀ yɛbɔ yɛ̀ɛ̀ bo tɛcĩ́ɛ̃̀tɛ̀ bɛ̀ tu tɛ̀ Dimɑɑ kó kutúúkù, kɛ̀ yɛ̀ ntú mɛsɔɔ nsɑ̀ɑ̀mɛ̀. Dɛ̀mɑrɛ̀ do í tú timɑ́tì pɛ́ítì kpɛrɛ, kɛ yɛ̃́ Sɑdomɔɔ kó dimɔ̀nnì bɛ̀ dɔ̀kɛ do í wúó ntimɑ́tì pɛ́ítì dɛ̀mɑrɛ̀ sɑ̀ɑ̀rɛ̀. 
\v 22 Ò do mɔkɛmu bɑ̀tóòbɛ̀ pɛ́u kɛ̀ bɛ̀ niɛ̀nɛ̀ okpɑ̀ɑ̀tì Idɑmmu kɔbɛ kɛ̀ bɛ̀ kɔ̀ri dɛdɛ́tirɛ̀, kɛ níí dɔ̀ yɛbie nyɛ̀tɑ̃ɑ̃ti kɛ́nwɛ̃tiní kɛ tɔ mɛsɔɔ nsɑ̀ɑ̀mɛ̀ nɛ̀ timɑ́tì pɛ́ítì, nɛ̀ yɛpɑ́pɑ́nìì, nnɛ̀ iwɑɑ́ nnɛ̀ sinɔɔ sɑ̀ɑ̀sì.
\p
\v 23 Okpɑ̀ɑ̀tì Sɑdomɔɔ do pɛ̃nkùmu bɛkpɑ̀ɑ̀tìbɛ̀ sɔmbɛ mɛciì nnɛ̀ tikpɑ̀tì. 
\v 24 Ti Yiɛ̀ nKuyie nkuù mɛ̀nkɛ do ò duɔ́ mmɛciì mmɛdiɛ̀, nnɛ̀ dɛ kpɛ́í nkɛ̀ bɛnìtìbɛ̀ nyiitiní tipíìtì timɔu kɛ kɔrìní o borɛ̀, kɛ kemmu mɛciì nKuyie nhò duɔ́mɛ̀. 
\v 25 Mɛm̀mɛ kɛ̀ bɛ̀ nhò tɔuní yɛbie yɛmɔu duɔ́mɛ̀ tinɛntì mɛsɔɔ nkpɛti, nɛ̀ timɑ́tì pɛ́ítì kpɛti, nɛ̀ tiyɑɑ̀sɑ̀ɑ̀tì nɛ̀ tikpɑ̀rìnɛntì, nɛ̀ tihúúntì nɛ̀ sisɛ̃ĩ́, nɛ̀ sisɛ̃ĩ́ tɛsì mɑsì, sisɛ̃ĩ́ dekɛ sɑ̃mmɑrímúbɛ̀ kɛ̀ dɛ̀ pɛitɛ́ sì.
\p
\v 26 Kɛ̀ Sɑdomɔɔ tíí nsikpɑ̀rìnɑɑsɛ̃ĩ́ nɛ̀ sisɛ̃ĩ́ kɛ̀ dɛ̀ mbo sikpɑ̀rìnɑɑsɛ̃ĩ́ tɛkɔupíítɛ̀ nɛ̀ sikɔusìnɑ̀ɑ̀ (1400) bɛsɑ̃ndèèbɛ̀ tɛkɔupípíítɛ̀ nɛ̀ sikɔupísìdɛ́ (12000) kòo dɛitɛ sìmɑsì kɛ̀ sì mbo o borɛ̀. Kòo totí sitɛsì yɛhɑ̃ɑ̃pɔ̀nkɑrɛ̀ tɛyɛ̀. 
\v 27 Nɛ̀ Sɑdomɔɔ kpɛ́í nkɛ̀ timɑ́tì pɛ́ítì mbo Sedisɑdɛmmu kɛ sũ kɛ dònnɛ̀ yɛtɑ̃́rɛ̀, kɛ̀ dɛtekperɛ̀ nsũ kɛ mɑnnɛ̀ dɛtie mbɛ̀ tu dɛ̀ sikomɔɔ, dɛ̀ɛ̀ yìɛ̀ dɑ̀mɛ́ɛ̀rì Mɛditedɑndee pɛɛ́mmɛ̀. 
\v 28 Sɑdomɔɔ kó sisɛ̃ĩ́ do bonní Esibiti nɛ̀ Sidisii nwe, o kó bɛpotɑmbɛ̀ do kɛ nkɔrì kɛ sì nhò donní. 
\v 29 Bɛ̀ do fiiti dɛ kó sikpɑ̀rìnɑɑsɛ̃ĩ́ tɛ̀mɑ́ɑ̀ mɛdítíbii nsikɔusìkuɔ̀ ndi (600), tɛsɑ̃ntɛ̀ tɛ̀mɑ́ɑ̀ mɛdítíbii ntɛkɔ̀ùtɛ̀ nɛ̀ sipísìnùmmù (150). Bɛpotɑmbɛ̀ bɛɛ̀ do sì tɔu kɛ múnkɛ fiitinɛ̀ Itiibɛ kpɑ̀ɑ̀tìbɛ̀ nɛ̀ Sidii kɔbɛ.
\c 11
\s1 Sɑdomɔɔ yetɛ́nɛ̀mɛ̀ ti Yiɛ̀ nKuyie
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 11:18-12:1)
\p
\v 1 Kòo kpɑ̀ɑ̀tì Sɑdomɔɔ yíɛ́ kɛ́túókɛ́ bɛnitipòbɛ̀ tɔbɛ̀ pɛ́u bɛ̀ɛ̀ í tú Isidɑyɛɛribɛ, kɛ́mbúútí Esibiti kóo kpɑ̀ɑ̀tì kóo sɑpɑ̀ɑ̀. Ntɛ ò do tùókɛ́ ìì botí kɔbɛ: Mɔɑbiibɛ nɛ̀ Amɔniibɛ nɛ̀ Edɔmiibɛ nɛ̀ Sidoniibɛ nɛ̀ Itiibɛ. 
\v 2 Ti Yiɛ̀ nKuyie mmɛ ndo nɑ̀kɛ́mu Isidɑyɛɛribɛ kɛ dɔ̀ bɛ̀ bɑ́ɑ́ túótɛ́ dɛ kó ibotí miɛkɛ bɛnitipòbɛ̀. Kù do bɛ̀ nɑ̀kɛ́mu weti weti kɛ dɔ̀: Di bɑ́ɑ́ tɑ bɛ miɛkɛ, bɛ̀ mɛ mbɑ́ɑ́ tɑ di miɛkɛ. Kɛ̀ mɛɛ̀ dɔkɛ bɛ̀ bo di yṹɔ̃́ nkɛ̀ di fíé bɛ bɔkɛ̀. Bɑ́ nɛ̀ mɛmmɛ kɛ̀ Sɑdomɔɔ bɛ dɔkɛ kɛ́ bɛ̀ tɑ̀unnɛ̀. 
\v 3 Kòo mmɔkɛ o pobɛ̀ sikɔusìyiekɛ̀ (700) bɛ̀ɛ̀ tu bɛkpɑ̀ɑ̀tìbɛ̀ kó bɛsɑpɑ̀mbɛ̀ o pocĩɛ̃̀ nsikɔusìtɑ̃ɑ̃ti (300), kɛ́tũnnɛ bɛ yɛ̀mmɛ̀. 
\v 4 Ò kòtɛ́ dìì mɔ̀nnì kɛ̀ bɛ̀ɛ yṹɔ̃́ nho yɛ̀mmɛ̀ kóò tɑnnɛ́ mubɔɔféù miɛkɛ. Ò tɛ̃́nkɛ í ntũ nti Yiɛ̀ nKuyie nhò cicɛ Dɑfiti do kù tũ mmɛ̀ɛ̀ botí. 
\v 5 Kòo fíé Sidoniibɛ bɔɔ̀ Asitɑditee nɛ̀ Amɔniibɛ kó dibɔɔ̀ yɛiri Midikɔmmu, 
\v 6 kɛ́dɔɔ̀ ti Yiɛ̀ nKuyie nyí dɔ́ dɛ̀, ò tɛ̃́nkɛ í nkù tũ nsɛi o cicɛ Dɑfiti do kù tũmmɛ̀. 
\v 7 Yɛɛ̀ mɔ̀rɛ̀ miɛkɛ nkɛ Sɑdomɔɔ mɑɑ́mɛ̀ ditɔ̀nnì Sedisɑdɛmmu ììkɛ̀ dɛ kó ditɑ̃rì ĩ́nkɛ̀ Mɔɑbiibɛ kó dibɔɔ̀ yɛiri Kemɔɔsi kpɛ́í, kɛ múnkɛɛ mɑɑ́nɛ̀ ditɔ̀nnì Amɔniibɛ kó dibɔɔ̀ yɛiri Midikɔmmu kpɛ́í. 
\v 8 Ò do mɛ ndɔ̀ɔ̀ kɛ mɑɑ́ o pobɛ̀ bɛ̀ɛ̀ í tú Isidɑyɛɛribɛ yɛtɔ̀rɛ̀ kɛ̀ bɛ̀ ntuɔ̀ ntihúúntì kɛ feu iwũɔ̃. 
\v 9 Kɛ̀ ti Yiɛ̀ nKuyie mmiɛkɛɛ pɛikɛ Sɑdomɔɔ ò kù bùtínnɛ́mɛ̀ kunku ti Yiɛ̀ nKuyie nyIsidɑyɛɛribɛ tũ nkù, kunku kùù ò bɛnkɛ kumɑ́ɑ̀ kucɛ mɛ̀dɛ́mɛ̀, 
\v 10 kóò nɑ̀kɛ́ weti weti kɛ dɔ̀ ò bɑ́ɑ́ tũnnɛ yɛbɔkɛ̀. Sɑdomɔɔ mɛ nyí nyie nkɛ tũ̀nnɛ ti Yiɛ̀ nKuyie nhò nɑ̀kɛ́ tì. 
\v 11 Kɛ̀ kùu ò nɑ̀kɛ́ kɛ dɔ̀: A í mɛ̀ nyiemmɛ̀ kɛ pĩ́ mmɛtɑummɛ̀ n dɑ dɔ̀ɔ̀nɛ̀ mɛ̀, ɑ mɛ nyí yie nyitié n dɑ duɔ́ nyì, n yóó cɔutɛ́mu ɑ kpɑ̀tì kɛ́duɔ́ nhɑ tɔ̃mbɛ̀ kóò mɔù. 
\v 12 A cicɛ Dɑfiti kpɛ́í nte kɛ̀ n yí yóó mɛ̀ dɔ̀ɔ̀ kɑ̀ɑ kpɑɑ́ fòù, n yóó ti cɔutɛ́ ɑ birɛ nɔu miɛkɛ nkɛ. 
\v 13 N yí yóó cɔutɛ́ tikpɑ̀tì timɔu, n yóó súɔ́mmu kubotí kùmɑ́ɑ̀ ɑ cicɛ Dɑfiti kpɛ́í nnɛ̀ Sedisɑdɛmmu dihɛì n tɑ̃ɑ̃tɛ́ dì kpɛ́í.
\s1 Sɑdomɔɔ dootitɔbɛ̀
\p
\v 14 Kɛ̀ ti Yiɛ̀ nKuyie nduɔ́ nkɛ̀ Sɑdomɔɔ mɔɔtɛ o dùɔ̀ntɔù Edɔmiibɛ kó tɛkpɑ̀ɑ̀tìcĩ́ɛ̃̀tɛ̀ kou, kòo yètìrì tu Adɑdi.
\p
\v 15 Dɑfiti do pɔ̀ntɛ dìì mɔ̀nnì Edɔmmu, ohɑ̃ɑ̃pɔ̀nkótì Soɑbu nɛ̀ bɛhɑ̃ɑ̃pɔ̀mbɛ̀ kɛ̀ bɛ̀ɛ kɔtɛ kɛ bo kũnnɛ́ bɛcíríbɛ̀, mɛmmɛ bɛ̀ kùɔmɛ̀ Edɔmmu ɛì kó bɛnitidɑɑbɛ̀ bɛmɔu. 
\v 16 Bɛ̀ do kɛ̀ bo kɛ dɔ̀ bɛtɑ̃̀ɑ̃̀bɛ̀ bɛ̀kuɔ̀ ndi kɛ bɛ̀ kɔ̀ù kɛ yɑ̀ɑ bɛ̀ dèènɛ̀ bɛmɔu pɑ́íí. 
\v 17 Dɛ mɔ̀nnì ndi Adɑdi do cokɛ́mɛ̀ kɛ́nɛinɛ̀ Edɔmiibɛ mɑbɛ̀ bɛ̀ɛ̀ do tú o cicɛ kó bɛtɔ̃mbɛ̀, kɛ̀ bɛ̀ɛ kɔtɛ Esibiti, dɛ mɔ̀nnì kòo kpɑɑ́ tú dɛdɑpùmbirɛ. 
\v 18 Bɛ̀ do ìtɛ́ Mɑndiyɑ̃ɑ̃ nwe kɛ́tuɔkɛ Pɑdɑnni kɛ́túótɛ́ dɛ kó dihɛì kɔbɛ mɑbɛ̀ kɛ̀ bɛ̀ɛ nɛi kɛ́tuɔkɛ Esibiti kóo kpɑ̀ɑ̀tì borɛ̀. Kòo duɔ́ nhAdɑdi tɛcĩ́ɛ̃̀tɛ̀ kɛ́ nhò piú kóò pɑ̃ kɛtenkɛ̀. 
\v 19 Kɛ̀ dɛ kóo kpɑ̀ɑ̀tìi pɛ́nsìrì Adɑdi mɛdiɛ̀ nkóò duɔ́ nho pokù Tɑpenɛsi nɑntɛ̀ kòo puokɛ. 
\v 20 Kòo kpɑ̀ɑ̀tì pokù Tɑpenɛsi nɑntɛ̀ɛ pɛitɛ́ Adɑdi dɛnitidɑbirɛ kòo dɛ̀ yu kɛ dɔ̀ Kennubɑti. Kɛ̀ Tɑpenɛsi ndɛ̀ piú okpɑ̀ɑ̀tì cĩ́ɛ̃̀tɛ̀, kɛ̀ dɛ̀ ńwɛ̃ńnɛ̀ okpɑ̀ɑ̀tì bí kɛ bo.
\p
\v 21 Adɑdi kèè dìì mɔ̀nnì kɛ dò nDɑfiti ku kɛ̀ ohɑ̃ɑ̃pɔ̀nkótì Soɑbu múnkɛ ku, kòo nɑ́kɛ́ okpɑ̀ɑ̀tì kɛ dɔ̀: Yóu kɛ̀ n kò n tenkɛ̀.
\p
\v 22 Kòo kpɑ̀ɑ̀tì dɔ̀: Bɑ ndɑ dòńtɛ́ n cĩ́ɛ̃̀tɛ̀ kɑ̀ɑ dɔ́ kɛ́kò? Kòò dɔ̀: Dɛ̀mɑrɛ̀ í n dòńtɛ́, m bɑɑ dɔ́ kɛ́kòmmu.
\b
\p
\v 23 Dɛ kó difɔ̃nkúò kɛ̀ ti Yiɛ̀ nKuyie nyíɛ́ kɛ́duɔ́ nkɛ̀ Desɔ̃ Ediɑdɑ birɛɛ nɑɑ́ nSɑdomɔɔ dootitɔù. Desɔ̃ do tú Tisobɑ ɛì kóo kpɑ̀ɑ̀tì Adɑdesɛɛ kó kudɑɑkù nku kɛ́cokɛ́, 
\v 24 kɛ́wɑɑ́ nho kó dihɑ̃ɑ̃pɔ̀ntĩ̀nnì kɛ̀ Dɑfiti mbɛ̀ kɔù kòo kɔtɛ Dɑmɑɑsi kɛ́mbo kɛ yɑ̀ɑ kɛ̀ nɑɑ́nnɛ̀ okpɑ̀ɑ̀tì. 
\v 25 Ò do dokùnɛ̀mu Isidɑyɛɛribɛ Sɑdomɔɔ fòmmu mumɔu miɛkɛ.
\s1 Sedoboɑmmu yetɛmɛ̀ okpɑ̀ɑ̀tì Sɑdomɔɔ kpɛti
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 9:29-31)
\p
\v 26 Sedoboɑmmu do tú Nɛbɑti birɛ ndɛ Efɑdɑimmu nɑɑ̀mùnkù kou, Sededɑ ɛì kou. Kòo yɔ̃ ntú okúpokù, kòo yètìrì tu Seduyɑ. Sedoboɑmmu do tú Sɑdomɔɔ kóo tɔ̃ntì nwe, kɛ́yetɛ o kpɛti. 
\v 27 Ntɛ dɛ̀ wũɔ̃kɛ́mɛ̀ kòo yɑ̀ɑ yetɛnɛ̀ Sɑdomɔɔ kpɛti: Okpɑ̀ɑ̀tì Sɑdomɔɔ do mɑɑ́ dìì mɔ̀nnì kudɑ̀nkù bɛ̀ tu kù Midoo kɛ́nfiɛti o cicɛ Dɑfiti ɛì kuduotí kó iyiɛ. 
\v 28 Kɛ̀ Sedoboɑmmu ntú wèè kpeńnì kòo kɔ̃̀ntì nɑɑti kòo nɔ mmutɔ̃mmú kɛ mù pĩ́ nkɛ̀ dɛ̀ wenni. Kɛ̀ Sɑdomɔɔ ò pɛ́nsìrì kóò tɑ̃ɑ̃tɛ́ kòo mbɑkɛ́ Efɑdɑimmu nɛ̀ Mɑnɑnsee bɛ nɑɑ̀mùntì kɔbɛ bɛ̀ɛ̀ pĩ mmutɔ̃mmú. 
\v 29 Diyiè mɑrì kɛ̀ Sedoboɑmmuu yɛ̀ Sedisɑdɛmmu mucèmmu, kɛ̀ Kuyie mpɑ̃ɑ̃nɑ́ɑǹtì nɑ́ɑǹtò Aiyɑ Sidoo ɛì kouu ò conɛ̀ dikpɑ́ɑ̀ bɛdɛ́ borɛ̀, kɛ sɔ̃́ nhAiyɑ dɑ̀ɑ́tí diyɑɑ̀bòrì pɑ̀nnì mɑrì. 
\v 30 Kòo dì dɑ̀tɛ́ kɛ́kɛ̃tɛ́ yɛkɛ̃tíyɛ̀ tɛpíítɛ̀ nɛ̀ yɛ̀dɛ́ɛ̀, 
\v 31 kɛ́nɑ́kɛ́ Sedoboɑmu kɛ dɔ̀: Túótɛ́ yɛyɑɑ̀bòkɛ̃tíyɛ̀ tɛpíítɛ̀, ti Yiɛ̀ nKuyie nyIsidɑyɛɛribɛ tũ nkù tu, kù yóó fietɛmu dikpɑ̀ɑ̀tìyuu Sɑdomɔɔ borɛ̀, kɛ́ dɑ bɑɑ́ nyibotí tɛpíítɛ̀. 
\v 32 Ti Yiɛ̀ nKuyie ntu ku yóó súɔ́ nkubotí kùmɑ́ɑ̀ ndi ku kóo tɔ̃ntì Dɑfiti kpɛ́í nnɛ̀ Sedisɑdɛmmu dihɛì kù tɑ̃ɑ̃tɛ́ dì ibotí imɔu miɛkɛ di kpɛ́í. 
\v 33 Bɛ̀ kù bùtínnɛ́ mɛ̀ɛ̀ kpɛ́í nkɛ fìé yɛbɔkɛ̀ Sidoniibɛ bɔɔ̀ Asitɑditee nɛ̀ Mɔɑbiibɛ kpɛri Kemɔɔsi nɛ̀ Amɔniibɛ kpɛri Midikɔmmu, bɑ́ bɛ̀ í tũ̀nnɛ ku kó kucɛ, bɛ̀ í dɔɔri dɛ̀ɛ̀ sìɛ́, bɛ̀ í tũ nku kuɔ́ nɛ̀ ku tɑnnɔ̀ bɛ cicɛ Dɑfiti do yɛ̀ tũ̀mmɛ̀. 
\v 34 Dɛ̀ nɛ́ í tú kù yóó fietɛnɛ̀ Sɑdomɔɔ nwe tikpɑ̀tì, ò yó nkpɑɑ́ kɛ tì tɔmu o fòmmu mumɔu miɛkɛ ku kóo tɔ̃ntì Dɑfiti kù tɑ̃ɑ̃tɛ́ wè, kòò yìé nku kuɔ́ nɛ̀ ku tɑnnɔ̀ o kpɛ́í. 
\v 35 O birɛ ndɛ kù yóó fietɛnɛ̀mɛ̀ tikpɑ̀tì kɛ́duɔ́ nfɔ̃́ nSedoboɑmmu ibotí tɛpíítɛ̀ kɑ̀ɑ mbɑkɛ́. 
\v 36 Kù yóó yóumu kubotí kùmɑ́ɑ̀ kòo nkù bɑkɛ́, kɛ̀ ku kóo tɔ̃ntì Dɑfiti fuku bɑ́ɑ́ pɑɑ̀ okpɑ̀ɑ̀tì wèè bo mbo Sedisɑdɛmmu ku ɛì kù tɑ̃ɑ̃tɛ́ dì kɛ bo mbo.
\p
\v 37 Fɔ̃́ nSedoboɑmmu kù yóó dɑ duɔ́mmu tikpɑ̀tì ɑ dɔ́ mɛ̀ɛ̀ botí kɑ̀ɑ mbɑkɛ́ Isidɑyɛɛribɛ. 
\v 38 Kɑ̀ɑ yie nkù dɑ nɑ́ɑ́ ntì timɔu, kɛ tũ̀ nku kó kucɛ kɛ dɔɔri dɛ̀ɛ̀ sìɛ́, kɛ dɔɔri ku kuɔ́ yɛ̃mmɛ̀, kɛ tũ nkù tɑnnɔ̀ ku kóo tɔ̃ntì Dɑfiti do dòmmɛ̀. Kù yó ndɑ bonɛ̀mu kɑ̀ɑ yɑɑ̀bí ntú bɛkpɑ̀ɑ̀tìbɛ̀ sɑ̃́ɑ̃̀ Dɑfiti kó iyɑɑ̀bí dòmmɛ̀, kɛ̀ kù dɑ duɔ́ nyIsidɑyɛɛribɛ, kɑ̀ɑ mbɛ̀ bɑkɛ́, 
\v 39 kɛ̀ kùu yɑ́úkùnnɛ Dɑfiti yɑɑ̀bí kpɑ̀tì, dɛ̀ nɛ́ í yó ntú sɑ̃́ɑ̃̀.
\p
\v 40 Mɛm̀mɛ kɛ̀ Sɑdomɔɔ nwɑnti kɛ bo kuɔ Sedoboɑmmu, kòo cokɛ́ kɛ́kɔtɛ Esibiti, kɛ́mbo bɛ kóo kpɑ̀ɑ̀tì Sisɑki borɛ̀ kɛ̀ Sɑdomɔɔ yɑ̀ɑ kúnɛ̀.
\b
\p
\v 41 Sɑdomɔɔ tɔ̃mmú tɛ̃mù nɛ̀ o ciì ndɛ̀ wɑ̃̀rimu o tɔ̃mmú pɑ́tíri miɛkɛ. 
\v 42 Sɑdomɔɔ do bo Sedisɑdɛmmu nwe kɛ bɑkɛ́ Isidɑyɛɛribɛ bɛmɔu kɛ dɔ̀ yɛbie nsipísìnɑ̀ɑ̀, 
\v 43 kɛ́kú kɛ̀ bɛ̀ɛ ò kũnnɛ́ o cicɛ Dɑfiti ɛì, kòo birɛ Odoboɑmmuu sɔɔtɛ́ o kpɑ̀tì.
\c 12
\s1 Bɛ̀ tìímmɛ̀ Sisɛmmu
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 10:1-15)
\p
\v 1 Kɛ̀ Odoboɑmmuu kɔtɛ Sisɛmmu kɛ̀ Isidɑyɛɛribɛɛ tíí nkɛ bo ò pĩ ntikpɑ̀tì. 
\v 2 Dɛ̀ do sɔ̃́ nNɛbɑti birɛ Sedoboɑmmu kpɑɑní Esibiti nwe ò do cokɛ́nɛ̀ okpɑ̀ɑ̀tì Sɑdomɔɔ nwe kɛ́ kɛ̀ kɔtɛ. Ò do kɛ mbo kɛ́keè bɛ̀ tìímmɛ̀ kɛ́konní. 
\v 3 Kɛ̀ bɛ̀ɛ ò yu kòo kɔtɛní Isidɑyɛɛribɛ tìí ndɛ̀ kɛ̀ bɛ̀ɛ wɛ̃nnɛ́ kɛ́nɑ́kɛ́ Odoboɑmmu kɛ dɔ̀: 
\v 4 A cicɛ do ti fɛ̃́ũ mudɑɑtɔ̃mmú mmu kɛ̀ mù ti kɛ̀itɛ ɑ mù nti yɑɑtɛ kɛ̀ ti mpĩ́ nhɑ tɔ̃mmú. 
\v 5 Kɛ̀ Odoboɑmmuu bɛ̀ tɛ̃̀ńnɛ́ kɛ dɔ̀: Cíɛ́tɛ́nɛ̀, yɛwe yɛ̀tɑ̃ɑ̃ti kó difɔ̃nkúò kɛ́wɛ̃tɛní.
\p Kɛ̀ bɛ̀ɛ cíɛ́tɛ́. 
\v 6 Kòo tíí mbɛkótíbɛ̀ bɛ̀ɛ̀ do bonɛ̀ o cicɛ Sɑdomɔɔ kɛ́ bɛ̀ bekɛ kɛ dɔ̀: Di yɛ̀mmɛ̀ dò n tɛ̃̀ńnɛ́ ɔ̃̀nti bɛ nnìtìbɛ̀.
\p
\v 7 Kɛ̀ bɛkótíbɛ̀ɛ ò nɑ̀kɛ́ kɛ dɔ̀: Kɑ̀ɑ yie nkɛ dɔ̀ɔ̀ ɑmɑ́ɑ̀ bɛ kóo tɔ̃ntì kɛ bɛ̀ nɑ̀ɑ́nnɛ̀ tinɑ́ɑǹsɑ̀ɑ̀tì, bɛ̀ yó mpĩ́mmu ɑ tɔ̃mmú sɑ̃́ɑ̃̀.
\p
\v 8 Okpɑ̀ɑ̀tì mɛ nyí nyie mbɛkótíbɛ̀ ò duɔ́ nyìì tié, kɛ́bekɛ bɛdɑpɑ̀mbɛ̀, o kó kutɔ̃nkù kɔbɛ bɛ̀ɛ̀ ò bonɛ̀ kɛ dɔ̀: 
\v 9 Bɛ nnìtìbɛ̀ tu m bɛ̀ yɑ̀ɑ̀tɛ ditɔu n cicɛ bɛ̀ toú ndì cɛ̃́ɛ̃́kù, di yɛ̀mmɛ̀ dò m bɛ̀ nɑ̀kɛ́ ɔ̃̀nti?
\p
\v 10 Kɛ̀ bɛdɑpɑ̀mbɛ̀ o kó kutɔ̃nkù kɔbɛɛ ò tɛ̃̀ńnɛ́ kɛ dɔ̀: Bɛnìtìbɛ̀ bɛ̀ɛ̀ tu ɑ cicɛ bɛ̀ toú ndìì tɔu cɛ̃́ɛ̃̀, kɛ tú ɑ́ bɛ̀ yɑ̀ɑ̀tɛ di cɛ̃́ɛ̃́kù, nɑ́kɛ́ bɛ kɛ dɔ̀ ɑ nɔ́mbíyɑ̃ɑ̃rɛ cɛ̃́ɛ̃̀nɛ̀mu ɑ cicɛ kɑ. 
\v 11 Kɑ̀ɑ cicɛ do bɛ̀ toú ndìì tɔu cɛ̃́ɛ̃̀, ɑ kpɛri bo pɛ̃ɛ̃tɛ́ mɛmmɛ. A cicɛ do bɛ̀ tiènnɛ̀ idɑ́ nyi, kɛ̀ fɔ̃́ mbo mbɛ̀ tiènnɛ̀ yɛdɑ́ yɛ̀ɛ̀ ɑ̃ timɑ́tì yɛ yómmɛ̀.
\p
\v 12 Diyiè tɑ̃ɑ̃́nnì yiè, Sedoboɑmmu nɛ̀ bɛnìtìbɛ̀ kɛ̀ bɛ̀ɛ wɛ̃tɛní Odoboɑmmu borɛ̀, ò sòò bɛ̀ nɑ̀kɛ́ kɛ yɛ̃mmɛ̀. 
\v 13 Kòo sènkɛ̀rì bɛkótíbɛ̀ do ò duɔ́ nyìì tié nkɛ́bɑɑo bɛnìtìbɛ̀ nɛ̀ mɛtɑnkperímɛ̀, 
\v 14 kɛ́tũnnɛ o kó kutɔ̃nkù kɔbɛ ò tié ntì nti, kɛ́bɛ́i nkɛ dɔ̀: N cicɛ do di toú nditɔu cɛ̃́ɛ̃́rì kɛ̀ n kpɛri bo pɛ̃ɛ̃tɛ́ mɛmmɛ, n cicɛ do di tiènnɛ̀ idɑ́ nyi, kɛ̀ mí m bo di tiénnɛ̀ yɛdɑ́ yɛ̀ɛ̀ ɑ̃ timɑ́tì yɛ yómmɛ̀.
\p
\v 15 Mɛm̀mɛ okpɑ̀ɑ̀tì yetɛmɛ̀ bɛnìtìbɛ̀ ò bekɛ tì. Ti Yiɛ̀ nKuyie nkuù do dɔ̀ɔ̀ mɛmmɛ dɛ̀ bo yiemmɛ̀ kɛ̀ kù do nɑ̀kɛ́ tì Nɛbɑti birɛ Sedoboɑmmu nɛ̀ ku kóo tɔ̃ntì Aiyɑ Sidoo kou nùù miɛkɛ kɛ̀ tiì dɔɔ̀.
\s1 Dikpɑ̀ɑ̀tìyuu totɛ́mɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 10:16-11:4)
\p
\v 16 Isidɑyɛɛribɛ sɔ̃́ ndìì mɔ̀nnì okpɑ̀ɑ̀tì í yie mbɛ kpɛti kóò nɑ̀kɛ́ kɛ dɔ̀:
\q1 Ti kpɛti tú nɛ̀ bɑ Dɑfiti Sɛsee birɛ?
\q1 Ti múú mbɑ tínti nɛ̀ we?
\q1 Tínti Isidɑyɛɛribɛ tí kònnɛ̀,
\q1 kɛ̀ Dɑfiti birɛ mbɑkɛ́ dɛ cĩ́ɛ̃̀tɛ̀.
\m Mɛm̀mɛ kɛ̀ bɛ̀ɛ cíɛ́tɛ́ kɛ́kũṹ. 
\v 17 Dɛ mɔ̀nnì kɛ̀ Odoboɑmmu nkpɑɑ́ bɑkɛ́ Sudɑɑ tempɛ̃ nkɔbɛ mɑ́ɑ̀, 
\v 18 kɛ́tɔ̃ nhAdodɑmmu wèè bɑkɛ́ muhɛikɛ̀ntɔ̃mmú Isidɑyɛɛribɛ borɛ̀, kɛ̀ bɛ̀ɛ ò bùɔ́tí bɛmɔu yɛtɑ̃́rɛ̀ kɛ́kuɔ. Kɛ̀ Odoboɑmmu nsɔ̃́ ndɛ̀ fuutɛ, kòo dekɛ o nɑɑsɑ̃ntɛ̀ mɛcɑ̃ɑ̃ nkɛ́cokɛ́ kɛ́kɔtɛ Sedisɑdɛmmu. 
\v 19 Mɛm̀mɛ Isidɑyɛɛribɛ yɑtɛnɛ̀mɛ̀ Dɑfiti cĩ́ɛ̃̀tɛ̀ nɛ̀ yíenní.
\p
\v 20 Isidɑyɛɛribɛ kèè dìì mɔ̀nnì Sedoboɑmmu konnímɛ̀, kɛ́tíí nkɛ́tɔ̃ nkɛ̀ bɛ̀ɛ ò yùní. Kòo tuɔkɛní kɛ̀ bɛ̀ɛ ò pĩ ntikpɑ̀tì. Kɛ̀ Sudɑɑ nɑɑ̀mùnkù kɔbɛ mɑ́ɑ̀ bɛɛ̀ nkpɑɑ́ tũ nDɑfiti cĩ́ɛ̃̀tɛ̀ kóo kpɑ̀ɑ̀tì.
\p
\v 21 Mɛm̀mɛ Odoboɑmmu tùɔ̀kɛmɛ̀ Sedisɑdɛmmu kɛ́tíí nSudɑɑ wuɔ nkɔbɛ nɛ̀ Bɛnsɑmɛɛ wuɔ nkɔbɛ kó bɛhɑ̃ɑ̃pɔ̀mbɛ̀ bɛ̀ɛ̀ nɔ mmudoò, kɛ̀ bɛ̀ mbo tɛkɔupíkɔ̀ùtɛ̀ nɛ̀ sikɔupípísìni (180000) kɛ̀ bɛ̀ɛ kɔtɛ kɛ bo pɔntɛ Isidɑyɛɛribɛ kó dikpɑ̀ɑ̀tìyuu kòò mbɛ̀ bɑkɛ́ wenwe Sɑdomɔɔ kó dɛbirɛ. 
\v 22 Kɛ̀ ti Yiɛ̀ nKuyie mbɛ́innɛ̀ ku kóo nìtì Semmɑyɑ kɛ dɔ̀: 
\v 23 Nɑ́kɛ́ Sudɑɑ kɔbɛ kóo kpɑ̀ɑ̀tì Sɑdomɔɔ birɛ Odoboɑmmu nɛ̀ o kɔbɛ nɛ̀ Bɛnsɑmɛɛ wuɔ nkɔbɛ nɛ̀ bɛsɔmbɛ kɛ dɔ̀: 
\v 24 N tú di bɑ́ɑ́ kɔtɛ kɛ́kpɑnnɛ̀ di tebìí Isidɑyɛɛribɛ. Bɑ́ wè, wèe kò nho cĩ́ɛ̃̀tɛ̀, míì yɛ̃ ndɛ̀ɛ̀ dɔ̀ɔ̀ dɛ̀ɛ dɔɔ̀.
\p Kòo ti mbɛ̀ nɑ̀kɛ́ kɛ̀ bɛ̀ɛ tì kèè kɛ tì yie mbɑ́ wè kòo kò nho cĩ́ɛ̃̀tɛ̀.
\p
\v 25 Mɛm̀mɛ kɛ̀ Sedoboɑmmuu mɑɑ́ kuduotí kɛ́fii nSisɛmmu Efɑdɑimmu tɑ̃rì kó dihɛì kɛ́mbo. Ò dɛ nyìtɛ́ kɛ́kɔtɛ kɛ́mɑɑ́ kuduotí kɛ́fii mPenniyɛɛdi.
\s1 Sedoboɑmmu dɔ̀ɔ̀mɛ̀ mɛyɛi
\p
\v 26 Kɛ̀ Sedoboɑmmuu totí o yɛ̀mmɛ̀ kɛ dɔ̀: Kɛ̀ dɛ̀ sɔkɛ́ miɛ mbotí n kpɑ̀ɑ̀tìyuu wɛ̃ti kɛ bo tũnnɛ Dɑfiti cĩ́ɛ̃̀tɛ̀ kɔbɛ mbɛ. 
\v 27 Kɛ̀ bɛnìtìbɛ̀ kpɑɑ́ kɔrì Sedisɑdɛmmu ti Yiɛ̀ nKuyie ncĩ́ɛ̃̀tɛ̀ iwũɔ̃ féù, bɛ yɛ̀mmɛ̀ bo wɛ̃tɛ kɛ́tũnnɛ Odoboɑmmu Sudɑɑ kɔbɛ kóo kpɑ̀ɑ̀tì kɛ̀ bɛ̀ n kuɔ. 
\v 28 Ò totí dìì mɔ̀nnì o yɛ̀mmɛ̀ kɛ́dɔɔ̀ isɔɔnɑ̀ɑ̀kɛ ìdɛ́ì, kɛ́nɑ́kɛ́ Isidɑyɛɛribɛ kɛ dɔ̀: Di sũ̀ṹ nSedisɑdɛmmu nwe mukɔtimù. Di mmɔ̀nnì ntɛnɛ̀ kuyie nkùù ti dènnɛní Esibiti.
\p
\v 29 Ò mɛ nyĩ kɛ́cónnɛ́ fɛsɔɔnɑ̀ɑ̀fɛ̀ mɑfɛ̀ Betɛɛdi, fɛtɛfɛ̀ Dɑnni tenkɛ̀. 
\v 30 Mɛm̀mɛ ò tɑnnɛ́mɛ̀ Isidɑyɛɛribɛ mɛyɛi mmiɛkɛ kɛ̀ bɛ̀ɛ tɔ fɛsɔɔnɑ̀ɑ̀fɛ̀ tɛfɛ̀ kɛ́ndentì kɛ́ fɛ̀ kɔ̀tɛnɛ̀ Dɑnni ɛì.
\b
\p
\v 31 Kòo mɑɑ́ yɛwũɔ̃tɔ̀rɛ̀ yɛtɑ̃rɛ̀ ĩ́nkɛ̀ kɛ́dɛi bɛ cuokɛ̀ ikuɔ́ nìùbɛ̀, bɛ̀ tɛ̃́nkɛ í ntú Defii botí kɔbɛ. 
\v 32 Mɛm̀mɛ Sedoboɑmmu dɔ̀ɔ̀mɛ̀ dibɑnni otɑ̃̀nkù niínwè yiè tɛpíítɛ̀ nɛ̀ dinummurì Sudɑɑ kɔbɛ do bɑɑ̀ mmɛ̀ɛ̀ botí, kɛ́dekɛ o mɔ́mmuɔ ndiwũɔ̃tɔ̀nnì ĩ́nkɛ̀ kɛ́fíé iwũɔ̃ isɔɔnɑ̀ɑ̀kɛ ò do dɔ̀ɔ̀ ì, kɛ́wɑɑ́ nyikuɔ́ nìùbɛ̀ kɛ́kɑnnɛ Betɛɛdi ò mɑɑ́ yɛ̀ɛ̀ wũɔ̃tɔ̀rɛ̀ kpɛ́í. 
\v 33 Ò do dèkɛ ò mɑɑ́ dìì wũɔ̃tɔ̀nnì Betɛɛdi di ĩ́nkɛ̀ otɑ̃̀nkù niínwè ò do tɑ̃ɑ̃tɛ́ wè kó diyiè tɛpíítɛ̀ nɛ̀ dinummurì ndi. Dɛ yiè ndi ò duɔ́mmɛ̀ kɛ̀ Isidɑyɛɛribɛɛ ɑ̃nnɛ́ dibɑnni, kòo dekɛ kɛ bo tuɔ nyɛpɑ̃rɛ̀.
\c 13
\s1 Ti Yiɛ̀ nKuyie nkpɑ̀nnɛ̀mɛ̀ Sedoboɑmmu Betɛɛdi
\p
\v 1 Kɛ̀ ti Yiɛ̀ Kuyie ntɔ̃nní ku kóo nìtì mɔù, kòo ítɛ́ Sudɑɑ tenkɛ̀ kɛ́tuɔkɛ Betɛɛdi, kɛ sɔ̃́ nSedoboɑmmu bo kɛ tuɔ nyɛpɑ̃rɛ̀ diwũɔ̃tɔ̀nnì ĩ́nkɛ̀. 
\v 2 Kɛ̀ ti Yiɛ̀ nKuyie nduɔ́ nkɛ̀ ku kóo tɔ̃ntìi bɛ́innɛ̀ diwũɔ̃tɔ̀nnì kɛ dɔ̀: Fɔ̃́ ndiwũɔ̃tɔ̀nnì, keè ti Yiɛ̀ nKuyie ntu mù. Ti Yiɛ̀ nKuyie ntu bɛ̀ yóó pɛitɛ́ dɛbirɛ mɑrɛ̀ ndɛ Dɑfiti nɑɑ̀mùnkù miɛkɛ kɛ́ dɛ̀ yu kɛ dɔ̀: Sosiɑsi, kɛ̀ dɛ kó dɛbirɛɛ dɑ fíé ikuɔ́ nìùbɛ̀ bɛ̀ɛ̀ tùɔ̀ nyiwũɔ̃ ɑ ĩ́nkɛ̀, kɛ́tuɔ nyɛnitikṹɔ̃̀ ɑ ĩ́nkɛ̀.
\p
\v 3 Kòo deè kɛ dɔ̀: Ntɛ di bo bɑntɛ́ dɛ̀ kɛ dò nti Yiɛ̀ nKuyie nkuù bɛ́i. Diwũɔ̃tɔ̀nnì bo yɑtɛ́ kɛ̀ mɛkùɔ̀ nkó mutɑ́pɛí mmùù còú di ĩ́nkɛ̀ kɛ̀ mùu nuntɛ́.
\p
\v 4 Kòo kpɑ̀ɑ̀tìi keè ò kpɑ̀nnɛ̀mɛ̀ diwũɔ̃tɔ̀nnì kɛ pĩɛ̃kù kóò fietí fɛnɔ́mbifɛ kɛ dɔ̀: Pĩ́nnɛ̀ we!
\p Kɛ̀ dɛ kó tɛnɔ̀ùtɛ̀ɛ kpeío ò tɛ̃́nkɛ í nnɑ kɛ́ tɛ̀ tɛ̃̀ńnɛ́ní. 
\v 5 Kɛ̀ diwũɔ̃tɔ̀nnìi yɑtɛ́, kɛ̀ mutɑ́pɛí nnuntɛ́ kù tì nɑ̀kɛ́mɛ̀ ku kóo nìtì kòo tì bɛ́i. 
\v 6 Kòo kpɑ̀ɑ̀tìi nɑ́kɛ́ Kuyie nkóo nìtì kɛ dɔ̀: N dɑ bɑ́ɑ́mmu bɑ́ntɛ̀ ti Yiɛ̀ nKuyie nhɑ tũ nkù kɛ̀ n nɔ̀ùtɛ̀ɛ wɛ̃tɛ kɛ́tɛ̃́nnɛ́.
\p Kɛ̀ Kuyie nkóo nìtì bɑ́ntɛ̀ ti Yiɛ̀ nKuyie nkɛ̀ tɛ̀ɛ wɛ̃tɛ kɛ́nɑɑ́ ntɛ̀ do dòmmɛ̀. 
\v 7 Kòo kpɑ̀ɑ̀tìi nɑ́kɛ́ Kuyie nkóo nìtì kɛ dɔ̀: Kɔtɛní kɛ̀ ti kò n cĩ́ɛ̃̀tɛ̀ kɑ̀ɑ di kɛ̀ n dɑ cú.
\p
\v 8 Kɛ̀ Kuyie nkóo nìtìi nɑ́kɛ́ okpɑ̀ɑ̀tì kɛ dɔ̀: Bɑ́ kɑ̀ɑ bo n duɔ́ nhɑ kpɑ̀tì kó dikéè n yí kɔri ɑ cĩ́ɛ̃̀tɛ̀ kɛ bo di yoo n yɑ̃̀ dɛ̀mɑrɛ̀ diɛ. 
\v 9 Ti Yiɛ̀ nKuyie nni n nɑ̀kɛ́mu kɛ tú m bɑ́ɑ́ di dɛ̀mɑrɛ̀, m mɛ mbɑ́ɑ́ yɑ̃̀, m mɛ mbɑ́ɑ́ wɛ̃tɛ kɛ́tũnnɛ n kètɛ́ní kùù cɛ kɛ́kò.
\p
\v 10 Ò mɛ nyĩ kɛ́tũnnɛ kucɛ tɛkù, ò tɛ̃́nkɛ í ntũ̀nnɛ ò kɔ̀tɛnní kù Betɛɛdi.
\s1 Kuyie mpɑ̃ɑ̃nɑ́ɑǹtì nɑ́ɑǹtò yetɛmɛ̀ ku kpɛti
\p
\v 11 Dɛ do sɔ̃́ nti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò mɔù weè bo Betɛɛdi kɛ tú odɑkótì, kòo bíi kɔtɛ kóò nɑ̀kɛ́ Kuyie nkóo nìtì dɔ̀ɔ̀ dɛ̀ Betɛɛdi nɛ̀ ò nɑ̀kɛ́ tìì nɑ́ɑǹtì okpɑ̀ɑ̀tì, kɛ tì nɑ̀kɛ́ timɔu bɛ cicɛ. 
\v 12 Kòo bekɛ kɛ dɔ̀: Ò kètɛ́ ɔ̃̀nkucɛ?
\p Kɛ̀ bɛ̀ɛ ò bɛnkɛ Kuyie nkóo nìtì wèè yɛ̀nní Sudɑɑ tenkɛ̀ ò tũ̀nnɛ kùù cɛ. 
\v 13 Kòo nɑ́kɛ́ o bí kɛ dɔ̀: Boúnɛ̀ n sɑ̃mmɑrímú kɑ̀rì.
\p Kɛ̀ bɛ̀ɛ dì boú kòo dekɛ, 
\v 14 kɛ́tũnnɛ Kuyie nkóo nìtì, kóò nìntɛ kɛ sɔ̃́ nhò dìɛ́kɛ́ mutie diɛmù mɑmù kó mɛdɛ́ɛ̀. Kòo ò bekɛ kɛ dɔ̀: Fɔ̃́ɔ̃̀ tu Kuyie nkóo nìtì wèè yɛ̀nní Sudɑɑ tenkɑ̀ɑ̀? Kòò dɔ̀: Ɛ̃ɛ̃, mí nwe.
\p
\v 15 Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò dɔ̀: Kɔtɛní kɛ̀ ti kò nkɑ̀ɑ di. 
\v 16 Kɛ̀ Kuyie nkóo nìtì dɔ̀: N yí yóó dɑ nɛinɛ̀ kɛ̀ ti kò nkɛ̀ ǹ di dɛ̀mɑrɛ̀ yoo n yɑ̃̀ diɛ. 
\v 17 Ti Yiɛ̀ nKuyie nni nnɑ̀kɛ́mu kɛ tú m bɑ́ɑ́ di dɛ̀mɑrɛ̀ diɛ m mɛ mbɑ́ɑ́ yɑ̃̀, m mɛ mbɑ́ɑ́ wɛ̃tɛ kɛ́tũnnɛ ǹ kètɛ́ní kùù cɛ kɛ́kò.
\p
\v 18 Kòo nɛ́poo ò tɛ̃̀ńnɛ́ kɛ dɔ̀: M múnkɛ tú Kuyie mpɑ̃ɑ̃nɑ́ɑǹtì nɑ́ɑǹtò nwe kɛ dɑ dònnɛ̀. Ti Yiɛ̀ nKuyie nkuù tɔ̃nní ku tɔ̃nnì kɛ̀ dì ǹ nɑ̀kɛ́ kɛ tú n dɑ yúní kɛ̀ ti kò nkɑ̀ɑ di kɛ́yɑ̃̀.
\p Kɛ yɛ̃́ kòò soúmmu! 
\v 19 Mɛm̀mɛ kɛ̀ Kuyie nkóo nìtìi ò nɛinɛ̀ kɛ̀ bɛ̀ɛ kò nkɛ bo di kɛ́yɑ̃̀.
\s1 Kuyie nkpɑ̀nnɛ̀mɛ̀ ku pɑ̃ɑ̃nɑ́ɑǹtì nɑ́ɑǹtò
\p
\v 20 Bɛ̀ kɑ̀ri dìì mɔ̀nnì kɛ yo nkɛ̀ ti Yiɛ̀ nKuyie mbɛ́innɛ̀ ku pɑ̃ɑ̃nɑ́ɑǹtì nɑ́ɑǹtò, wèè mɛ ntũ̀nnɛ koò yùní, 
\v 21 kòo nɑ́kɛ́ Kuyie nkóo nìtì kɛ dɔ̀: ti Yiɛ̀ nKuyie ntu ɑ mɛ̀ nyetɛmɛ̀ ku nɑ́ɑǹtì, bɑ́ ɑ í tũ̀nnɛ kù do dɑ nɑ̀kɛ́ tì. 
\v 22 Kɛ wɛ̃tɛní kɛ di kɛ yɑ̃̀, kù do yɛ̃ nhɑ bɑ́ɑ́ di dɛ̀, ɑ mɛ mbɑ́ɑ́ yɑ̃̀. A yóó nɑɑ́ nhokpɑdɔutì nwe. Bɛ̀ í yóó dɑ kũnnɛ́ ɑ yɛmbɛ̀ fɔ̃ti.
\p
\v 23 Bɛ̀ di dìì mɔ̀nnì kɛ yɑ̃̀ kɛ dèè, kɛ̀ Kuyie mpɑ̃ɑ̃nɑ́ɑǹtì nɑ́ɑǹtò wèè do ò tɛ̃̀ńnɛ́ní kòo boú o nɛ́po sɑ̃mmɑrímú kɑ̀rì, 
\v 24 kòo dekɛ kɛ́nkũnti. Kɛ̀ dicìrícìrìi ò dintɛ́ kucɛ kɛ́kuɔ kɛ́dɔúnko, kòo nduɔ́ kɛ̀ sɑ̃mmɑrímú còḿmú kɛ̀ dicìrícìrì còḿmú. 
\v 25 Kɛ̀ bɛcɛpɛ̃̀mbɛ̀ mpɛ̃nkù koò yɑ̀u kòò duɔ́ kɛ̀ dicìrícìrì còḿmú, kɛ̀ bɛ̀ɛ kɔtɛ kɛ tì nɑ̀kɛ́ Kuyie mpɑ̃ɑ̃nɑ́ɑǹtì nɑ́ɑǹtò wenwe kó dihɛì. 
\v 26 Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò wèè do ò tɛ̃̀ńnɛ́ní, ò tì kèè dìì mɔ̀nnì kɛ́bɛ́i nkɛ dɔ̀: Kuyie nkóo nìtì weè yetɛ kù do ò nɑ̀kɛ́ tì, kɛ̀ kù duɔ́nní dicìrícìrì kɛ̀ dì ò kùɔ, kɛ́ndònnɛ̀ kù do tì nhò nɑ̀kɛ́mɛ̀.
\p
\v 27 Ò bɛ́i mɛmmɛ kɛ́deè kɛ dɔ̀ o bíi boú o sɑ̃mmɑrímú kɑ̀rì.
\p Kɛ̀ ìi dì boú, 
\v 28 kòò kɔtɛ kɛ́nsɔ̃́ nti Yiɛ̀ nKuyie nkóo nìtì duɔ́ kɛ cɑ̃ɑ̃nko kucɛ miɛkɛ, dicìrícìrì nɛ̀ sɑ̃mmɑrímú kɛ̀ dɛ̀ còḿmú, bɑ́ dicìrícìrì í ò cɑ̀ɑ́kɛ́, dì mɛ nyí kùɔ sɑ̃mmɑrímú. 
\v 29 Kòo ò tùótɛ́ kɛ́dɑɑ́ nsɑ̃mmɑrímú ĩ́nkɛ̀ kɛ́kònnɛ̀ kɛ bo ò sié, kóò kũnnɛ́. 
\v 30 Wè ò sié dìì mɔ̀nnì kɛ́deè kóò kũnnɛ́ kufɔ̃ti ò do keú kù o mɔ́mmuɔ nho kpɛ́í, kɛ́ nhò kũrì kɛ sɑ́útí kɛ tú: Áú! Ti nɛ́po kumu.
\p
\v 31 Bɛ̀ ò kũnnɛ́ dìì mɔ̀nnì kɛ́deè kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtòo nɑ́kɛ́ o bí kɛ dɔ̀: Kɛ̀ ǹ ku dìì yiè dí n kũnnɛ́ di mɛ nkũnnɛ́ kùù fɔ̃ti Kuyie nkóo nìtì kɛ́ n dɔú nkɛ́pɛ́ɛ́nnɛ̀ o kṹɔ̃̀. 
\v 32 Ti Yiɛ̀ nKuyie nhò duɔ́ ntìì nɑ́ɑǹtì kòo tì bɛ́i ntì yóó dɔɔ̀mu, ò nɑ̀kɛ́ tì Betɛɛdi kó diwũɔ̃tɔ̀nnì kpɛ́í nnɛ̀ yɛ̀ɛ̀ bo Sɑmmɑrii tempɛ̃ nyɛ kpɛ́í.
\p
\v 33 Nɛ̀ mɛmmɛ Sedoboɑmmu í ncèètɛ, kòo bɑɑ nsɔkɛ́ kɛ wɑɑ̀ nyikuɔ́ nìùbɛ̀, kɛ̀ wèè dɔ́ wèe ò dɔ̀ɔ̀ ikuɔ́ nìùtì, kòò nfeu iwũɔ̃ yɛwũɔ̃tɔ̀rɛ̀ yɛ̀ɛ̀ bo yɛtɔ̀rɛ̀ ĩ́nkɛ̀. 
\v 34 Dɛ kó mɛborimɛ mɛɛ̀ do tɑnnɛ́ Sedoboɑmmu cĩ́ɛ̃̀tɛ̀ tɛmɔu mɛyɛi mmiɛkɛ, kɛ́nte kɛ̀ bɛ̀ɛ tɛ̀ kùɔ pɑ́íí kɛ̀ tɛ yètìrìi kpɑ́nnɛ́.
\c 14
\s1 Kuyie mpɑ̃ɑ̃nɑ́ɑǹtì nɑ́ɑǹtò Aiyɑ nɑ̀kɛ́mɛ̀ Sedoboɑmmu birɛ yóó kúmɛ̀
\p
\v 1 Kɛ̀ Sedoboɑmmu birɛ Abiyɑ muɔkɛ. 
\v 2 Kòo nɑ́kɛ́ o pokù kɛ dɔ̀: Ítɛ́ kɛ́kɔtɛ Sidoo ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò Aiyɑ borɛ̀. Weè do n nɑ̀kɛ́ kɛ dɔ̀ n yóó di tikpɑ̀tì. Á ceetɛ ɑmɑ́ɑ̀ kòò bɑ́ɑ́ bɑntɛ́ ɑ túmɛ̀ m pokù. 
\v 3 Ntɔ pɛ̃́ɛ̃̀bɛ̀ tɛpíítɛ̀, nɛ̀ yɛkɑ̀tìndɑ̀, nɛ̀ mɛcekùɔ̀ ndidénnì, kɛ́kɔtɛ kóò yɑ̀ kòo dɑ nɑ́kɛ́ tìì yóó tuɔkɛní dɛbirɛ.
\p
\v 4 Kòo pokùu dɔɔ̀ ò ò nɑ̀kɛ́ tì, kɛ́ítɛ́ kɛ́nkɔri Sidoo Aiyɑ cĩ́ɛ̃̀tɛ̀. Aiyɑ do kòtɛ́mu kɛ tɛ̃́nkɛ í nkpɑɑ́ wúó. 
\v 5 Kɛ̀ ti Yiɛ̀ nKuyie mmɛ ndiɛ nkóò nɑ̀kɛ́ kɛ tú: Sedoboɑmmu birɛ dɛɛ̀ mɔ nkòo pokù kɔ̀riní ɑ borɛ̀ kɛ bo pɑ̃ɑ̃́, kòò tùɔ̀kɛní ɑ́ ò nɑ̀kɛ́ kɛ dɔ̀ muu, ò í yó ndɔ́ ɑ́ ò bɑntɛ́.
\p
\v 6 Aiyɑ kèè dìì mɔ̀nnì o nɑcɛ̀nɑ̀ dibòrì kɛ́bɛ́i nkɛ dɔ̀: Tɑnní fɔ̃́ nSedoboɑmmu pokù. Dɛ̀ dòmmɛ kɑ̀ɑ í dɔ́ bɛ̀ dɑ bɑntɛ́? N yóó dɑ nɑ́kɛ́ tìì nɑ́ɑǹtì cɛ̃́ɛ̃̀mu. 
\v 7 Kɔtɛ kɛ́nɑ́kɛ́ Sedoboɑmmu kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù tu kuù ò dɛ̀itɛ Isidɑyɛɛribɛ miɛkɛ koò dɔ̀ɔ̀ okpɑ̀ɑ̀tì. 
\v 8 Kuù fìètɛ Dɑfiti kó tikpɑ̀tì kɛ tì nhò duɔ́, ò mɛ nyí yie nkɛ tũ nku kóo tɔ̃ntì Dɑfiti yɛ̀mmɛ̀, ò do tũmmu ku tɑnnɔ̀ yɛmɔu, kɛ kù tũnnɛ̀ o yɛ̀mmɛ̀ mɛmɔu kɛ dɔɔri kù dɔ́mɛ̀ mɑ́ɑ̀. 
\v 9 Kɛ̀ wenwe mɛ ndɔ̀ɔ̀ri mɛyɛi nkɛ̀ dɛ̀ pɛ̃ɛ̃tɛ́ bɛ̀ɛ̀ ò niitɛ́nɛ̀ kɛ di tikpɑ̀tì, kɛ dɔɔ̀ yɛbɔkɛ̀, kɛ mɑɑ́ sitenkɑɑnìi, kɛ́yíi nti Yiɛ̀ nKuyie mmiɛkɛ kɛ kù bùtínnɛ́. 
\v 10 Dɛɛ̀ te kɛ̀ kù yóó yóu kɛ̀ mɛyɛi ndo o cĩ́ɛ̃̀tɛ̀. Kù tu kù yóó kuɔmu o fuku kó bɛnitidɑɑbɛ̀, bɛkótíbɛ̀ nɛ̀ ibí bɛmɔu, tidɑɑtì nɛ̀ bɛ̀ɛ̀ í tú tidɑɑtì kɛ́kɑ́útɛ́ o cĩ́ɛ̃̀tɛ̀ bɛ̀ ɔ̃ɔ̃ kɑ́útɛ́ mɛ̀ɛ̀ botí tiyontì nɛ̀ kuhɑɑ. 
\v 11 Sedoboɑmmu cĩ́ɛ̃̀tɛ̀ kɔbɛ bɛ̀ɛ̀ bo kú dihɛì simɔɔ́ siì yóó bɛ̀ cɑ̀ɑ́kɛ́, kɛ̀ bɛ̀ɛ̀ ku dikpɑ́ɑ̀ tinɔ̀tìi bɛ̀ cɔ̀. Ti Yiɛ̀ nKuyie nkuù bɛ́i.
\p
\v 12 Onitipòkù fɔ̃́ nyítɛ́ kɛ́kò. A nɑɑ̀cɛ̀tɛ̀ bo nɑ dìì mɔ̀nnì dihɛì kó dibòrì dɛbirɛ yóó kú diì mɔ̀nnì. 
\v 13 Kɛ̀ Isidɑyɛɛribɛ bɛmɔuu kɔmmú dɛ kṹṹ nkɛ́ dɛ̀ kũnnɛ́, dɛǹdɛ dɛmɑ́ɑ̀ Sedoboɑmmu cĩ́ɛ̃̀tɛ̀ miɛkɛ bɛ̀ yóó kũnnɛ́mɛ̀. Dɛɛ̀ miɛkɛ nkɛ dɛmɑ́ɑ̀ ti Yiɛ̀ nKuyie nyIsidɑyɛɛribɛ tũ nkù yɑ̀mɛ̀ mɛborimɛ kù pɛ́nsìrì mɛ̀. 
\v 14 Ti Yiɛ̀ nKuyie nyóó wɑɑ́mmu okpɑ̀ɑ̀tì Isidɑyɛɛribɛ miɛkɛ, wèè yóó kuɔ Sedoboɑmmu cĩ́ɛ̃̀tɛ̀ tɛmɔu. Dɛ̀ yóó dɔɔ̀mu bɑ̀mbɑ̀. 
\v 15 Ti Yiɛ̀ nKuyie nyóó potɛ́mu Isidɑyɛɛribɛ kɛ̀ bɛ̀ɛ sɑ̃ntɛ̀ tipèntì ɔ̃ɔ̃ sɑ̃ntɛ̀mɛ̀ mɛniɛ mmiɛkɛ, kuyɑɑkù nɑmpɛ dìì mɔ̀nnì. Kɛ̀ kùu bɛ̀ bɛ̀ti ku ɛì sɑ̀ɑ̀rì kù duɔ́ ndì bɛ yɛmbɛ̀, kɛ́ bɛ̀ ciɛ nkɛ̀ bɛ̀ɛ séntɛ́ kukó nyɑ́ɑ̀ bɛ̀ fìíkú mɛ̀ɛ̀ kpɛ́í ndibɔɔ̀ Asedɑɑ kó itedɛí kɛ íi nku miɛkɛ. 
\v 16 Ti Yiɛ̀ nKuyie mbo dootóo Isidɑyɛɛribɛ Sedoboɑmmu dɔ̀ɔ̀ mɛ̀ɛ̀ yɛi nkpɛ́í nkɛ te kɛ̀ bɛ múnkɛ dɔ̀ɔ̀ mɛyɛi.
\p
\v 17 Kɛ̀ Sedoboɑmmu pokùu ítɛ́ kɛ́nkũnti kɛ́tuɔkɛ Tidisɑɑ, ò nɑ̀ dìì mɔ̀nnì o cĩ́ɛ̃̀tɛ̀ kó dibòrì kɛ̀ dɛbirɛɛ kú. 
\v 18 Kɛ̀ bɛ̀ɛ dɛ̀ kũnnɛ́ kɛ̀ Isidɑyɛɛribɛ bɛmɔu kɔmmú dɛ kṹṹ nkɛ́ndònnɛ̀ ti Yiɛ̀ nKuyie ndo ti nɑ̀kɛ́mɛ̀ ku pɑ̃ɑ̃nɑ́ɑǹtì nɑ́ɑǹtò Aiyɑ kòo tì bɛ́i.
\p
\v 19 Sedoboɑmmu pĩ mmùù tɔ̃mmú tɛmù, ò dokɛ́ mɛ̀ɛ̀ botí nɛ̀ ò di mɛ̀ɛ̀ botí tikpɑ̀tì dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔrimɛ̀ pɑ́tíri miɛkɛ. 
\v 20 Sedoboɑmmu do tú okpɑ̀ɑ̀tì kɛ dɔ̀ yɛbie nsìpísìdɛ́ nɛ̀ yɛ̀dɛ́ɛ̀ ndi kɛ́kú kòo birɛ Nɑdɑbuu sɔɔtɛ́ o kpɑ̀tì.
\s1 Odoboɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 12:1-16)
\p
\v 21 Dɛ mɔ̀nnì kɛ sɔ̃́ nSɑdomɔɔ birɛ Odoboɑmmu tu Sudɑɑ kɔbɛ kóo kpɑ̀ɑ̀tì. Ò do yóó di tikpɑ̀tì kɛ mɔkɛ yɛbie nsìpísìnɑ̀ɑ̀ nɛ̀ dìmɑ́ɑ̀ ndi, kɛ́ntɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀yiekɛ̀, kɛ́mbo Sedisɑdɛmmu ti Yiɛ̀ nKuyie ntɑ̃ɑ̃tɛ́ dìì ɛì Isidɑyɛɛribɛ botí imɔu miɛkɛ kɛ̀ ku yètìrì bo ndì bo. O yɔ̃ yètìrì do tú Nɑɑmɑ kòò tu Amɔniibɛ botí kou. 
\v 22 Kɛ̀ Odoboɑmmuu dɔɔ̀ ti Yiɛ̀ nKuyie nyí dɔ́ dɛ̀, kɛ́yíi nku miɛkɛ kɛ̀ dɛ̀ɛ pɛ̃ɛ̃tɛ́ o yɛmbɛ̀ kpɛrɛ do dòmmɛ̀. 
\v 23 Bɛmbɛ bɛ̀ɛ̀ do mɑɑ́ yɛtɔ̀rɛ̀ kɛ fííkú yɛtɑ̃́rɛ̀ nɛ̀ dibɔɔ̀ Asedɑɑ kó itedɛí yɛtɑ̃rɛ̀ yɛmɔu ĩ́nkɛ̀ nɛ̀ dɛtie ndɛmɔu tɑkɛ́. 
\v 24 Kòo tontɛ́ kɛ́dɔɔ̀nɛ̀ titouti kɛ́tɑnnɛ́ bɛnitipòbɛ̀ bɛ̀ yó nkɔrì kɛ dɔunɛ̀ bɛ̀ bɛ kó ibɔɔkuɔ́ yɛ̃mmɛ̀. Bɛ̀ do tekíí ibotí ti Yiɛ̀ nKuyie ndo duɔ́ nkɛ̀ bɛ̀ɛ bɛti ì kó isɔkɛ nyi.
\b
\p
\v 25 Mɛm̀mɛ Odoboɑmmu kpɑ̀tì benni nummurì miɛkɛ Sisɑki Esibiti kóo kpɑ̀ɑ̀tì domɛ̀ Sedisɑdɛmmu kɛ́ bɛ̀ pɔ̀ntɛ, 
\v 26 kɛ́túótɛ́ ti Yiɛ̀ nKuyie ncĩ́ɛ̃̀tɛ̀ kó tinɛntì, nɛ̀ tɛkpɑ̀ɑ̀tìcĩ́ɛ̃̀tɛ̀ kpɛti timɔu pɑ́íí, kɛ́túótɛ́nɛ̀ tisɔɔdɔpììtì Sɑdomɔɔ do dɔ̀ɔ̀ tì. 
\v 27 Kòo kpɑ̀ɑ̀tì Odoboɑmmuu dɔɔ̀ disɔɔwũɔ̃̀ kó tidɔpììtì kɛ́fɔ́ɔ́ ndɛ kó difɔ̃̀tìrì, kɛ́ tì duɔ́ ntihɑ̃ɑ̃pɔ̀ntì tìì bɑ̀ɑ tɛkpɑ̀ɑ̀tìcĩ́ɛ̃̀tɛ̀ kó dibòrì. 
\v 28 Kòo kpɑ̀ɑ̀tì níí nkɔri ti Yiɛ̀ nKuyie ncĩ́ɛ̃̀tɛ̀ kɛ̀ bɛ̀ tì tɔ, kòo kò mbɛ̀ɛ tì kɔ̀tɛnɛ̀ tihɑ̃ɑ̃pɔ̀ntì tìì bɑ̀ɑ tɛkpɑ̀ɑ̀tìcĩ́ɛ̃̀tɛ̀ ti kó kudieku.
\p
\v 29 Odoboɑmmu dɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀, dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 30 Odoboɑmmu nɛ̀ Sedoboɑmmu bɛ̀ do dokùmu sɑ̃́ɑ̃̀. 
\v 31 Kɛ̀ Odoboɑmmuu kú kɛ̀ bɛ̀ɛ ò kũnnɛ́ o ciɛ Dɑfiti ɛì, o yɔ̃ yètìrì do tú Nɑɑmɑ Amɔniibɛ ɛì kou, kòo birɛ Abiyɑmmuu sɔɔtɛ́ o kpɑ̀tì.
\c 15
\s1 Abiyɑmmu tumɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 13:1-3, 22-23)
\p
\v 1 Nɛbɑti birɛ Sedoboɑmmu kpɑ̀tì benni tɛpíítɛ̀ nɛ̀ diniínnì miɛkɛ nkɛ Abiyɑmmu nɑɑ́mmɛ̀ Sudɑɑ kɔbɛ kóo kpɑ̀ɑ̀tì, 
\v 2 kɛ́ntɔ tikpɑ̀tì kɛ dɔ̀ yɛbie nyɛ̀tɑ̃ɑ̃ti kɛ bo Sedisɑdɛmmu. Abusɑdɔmmu kóo sɑpɑ̀ɑ̀ mMɑɑkɑ weè do ò pɛitɛ́. 
\v 3 Kòo tũnnɛ o cicɛ do dɔ̀ɔ̀ mɛ̀ɛ̀ yɛi mbɑ́ ò í nduɔ́ nho yɛ̀mmɛ̀ mɛmɔu ti Yiɛ̀ nKuyie nho yɑ̀ɑ̀rì Dɑfiti kɔ̃mɛ. 
\v 4 Nɛ̀ Dɑfiti kpɛ́í nkɛ̀ ti Yiɛ̀ nKuyie nyóu kòo yɑɑ̀birɛ bɑɑ sɔɔtɛ́ tikpɑ̀tì kòo fuku bɑ́ɑ́ pɑɑ̀ tikpɑ̀tì, nɛ̀ Sedisɑdɛmmu bo ntúmɛ̀ bɛ kó dihɛidiɛ̀. 
\v 5 Dɑfiti do dɔɔri ti Yiɛ̀ nKuyie ndɔ́ mɛ̀mmɛ, ò do í yóu ti Yiɛ̀ nKuyie nhò nɑ̀kɛ́ yɛ̀ɛ̀ nɔ̀ kó dìmɑrì mudɔɔ̀rìmù, kɛ̀ dɛ̀ í tú Udii Itiibɛ botí kou kpɛti.
\b
\p
\v 6 Odoboɑmmu fòmmu mumɔu miɛkɛ ò do dokùnɛ̀mu Sedoboɑmmu.
\b
\p
\v 7 Abiyɑmmu dɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. Abiyɑmmu nɛ̀ Sedoboɑmmu bɛ̀ do dokùmu o fòmmu mumɔu miɛkɛ. 
\v 8 Dɛ kó difɔ̃nkúò kɛ̀ Abiyɑmmuu kú kɛ̀ bɛ̀ɛ ò kũnnɛ́ Dɑfiti ɛì, kòo birɛ Asɑɑ sɔɔtɛ́ o kpɑ̀tì.
\s1 Asɑɑ tumɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 14:1-2. 15:16-19. 16:1-6,11-14)
\p
\v 9 Isidɑyɛɛribɛ kpɑ̀ɑ̀tì Sedoboɑmmu kpɑ̀tì benni sìpísìdɛ́ kpɛri miɛkɛ nkɛ Asɑɑ nɑɑ́mmɛ̀ Sudɑɑ kɔbɛ kóo kpɑ̀ɑ̀tì, 
\v 10 kɛ́ntɔ tikpɑ̀tì kɛ dɔ̀ yɛbie nsipísìnɑ̀ɑ̀ nɛ̀ dìmɑ́ɑ̀ kɛ bo Sedisɑdɛmmu. O yɔ̃ kóo yɔ̃ yètìrì do tú Mɑɑkɑ Abusɑdɔmmu kóo sɑpɑ̀ɑ̀. 
\v 11 Kɛ̀ Asɑɑ ndɔɔri ti Yiɛ̀ nKuyie ndɔ́mɛ̀ kɛ́ndònnɛ̀ ò yɑ̀ɑ̀rì Dɑfiti, 
\v 12 kɛ́dennɛ o ɛì bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ bɛ kó ibɔɔkuɔ́ yɛ̃mmɛ̀, kɛ́dɛitɛ sibɔɔtenkɑɑnìi o yɛmbɛ̀ do dɔ̀ɔ̀ sì, 
\v 13 kɛ́dennɛnɛ̀ ketíkɛ o yɔ̃ kótì tinitipokpɑ̀tì, kɛ yɛ̃́ ò do cìɛ́kɛ́mɛ̀ isɔkɛ kó tɛbɔɔtenkɑɑnìtɛ̀ bɛ̀ tu tɛ̀ Asitɑditee, kɛ̀ Asɑɑ tɛ kɔ̃ṹ kɛ́bɔ nkɛ́ tɛ̀ cɔ́u nSetinɔɔ biriku miɛkɛ. 
\v 14 Kɛ̀ yɛtɔ̀rɛ̀ bɑɑ nɛ̀ nkpɑɑ́, bɑ́ nɛ̀ mɛmmɛ kɛ̀ Asɑɑ duɔ́ nho yɛ̀mmɛ̀ mɛmɔu ti Yiɛ̀ nKuyie nho fòmmu mumɔu miɛkɛ. 
\v 15 Kòo tɑnnɛ́ ti Yiɛ̀ nKuyie ncĩ́ɛ̃̀tɛ̀ miɛkɛ o cicɛ ku pɑ̃ yɛ̀ɛ̀ pɑ̃rɛ̀ nɛ̀ o mɔ́mmuɔ nhò kù pɑ̃ yɛ̀, yɛ̀ɛ̀ tu timɑ́tì pɛ́ítì nɛ̀ mɛsɔɔ nnɛ̀ tinɛntì.
\p
\v 16 Mudoò muù do bo Asɑɑ nɛ̀ Bɑsɑɑ bɛ cuokɛ̀ bɛ fòmmu mumɔu miɛkɛ. 
\v 17 Kɛ̀ Bɑsɑɑ Isidɑyɛɛribɛ kpɑ̀ɑ̀tìi do Sudɑɑ kɔbɛ mudoò, kɛ́mɑɑ́ kuduotí kɛ́fitɛ́ Dɑmɑɑ kɛ bo pénnɛ́ kucɛ Asɑɑ Sudɑɑ kɔbɛ kóo kpɑ̀ɑ̀tì. 
\v 18 Mɛm̀mɛ kɛ̀ Asɑɑ túótɛ́ timɑ́tì pɛ́ítì timɔu nɛ̀ mɛsɔɔ mmɛmɔu ndɛ̀ɛ̀ do kpɑɑ́ ti Yiɛ̀ nKuyie ncĩ́ɛ̃̀tɛ̀ nɛ̀ tɛkpɑ̀ɑ̀tìcĩ́ɛ̃̀tɛ̀ kɛ́ dɛ̀ toú nho kó bɛtɔ̃mbɛ̀, kɛ̀ bɛ̀ bo kɔtɛ Dɑmɑɑsi kɛ́ dɛ̀ duɔ́ nTɑbidimɔɔ birɛ Esiyɔ̃ɔ̃ birɛ Bɛnni-Adɑdi, Sidii kóo kpɑ̀ɑ̀tì, kóò nɑ̀kɛ́ kɛ dɔ̀, 
\v 19 wèe yóu kɛ̀ bɛ̀ɛ mɔɔtɛ mɛtɑummɛ̀ bɛ nnɛ̀ we, bɛ yɛmbɛ̀ do mɛ̀ mɔ̀kɛ mɛ̀ɛ̀ botí, dɛɛ̀ te kòò ò pɑ̃ dɛ kó dipɑ̃nnì kɛ tú wèe tɔ̃tɛnɛ̀ Bɑsɑɑ Isidɑyɛɛribɛ kpɑ̀ɑ̀tì mɛtɑummɛ̀, kòo tɛ̃́nkɛ bɑ́ɑ́ ò do mudoò. 
\v 20 Kɛ̀ Bɛnni-Adɑdii yie nhokpɑ̀ɑ̀tì Asɑɑ ò nɑ̀kɛ́ tì, kɛ́dɛitɛ bɛ̀ɛ̀ ni okpɑ̀ɑ̀tì ɑ̃ɑ̃pɔ̀mbɛ̀ kɛ́tɔ̃ nkɛ̀ bɛ̀ɛ kɔtɛ kɛ́pɔntɛ Isidɑyɛɛribɛ ɛkɛ̀, Iyɔ̃ɔ̃ ɛì nɛ̀ Dɑnni kpɛri nɛ̀ Abɛdi-Bɛti-Mɑɑkɑ kpɛri nɛ̀ Kinnɛdoti kó kutempɛ̃ nkumɔu, kɛ́pɔntɛnɛ̀ Nɛfutɑdii ɛì dimɔu. 
\v 21 Bɑsɑɑ tì kèè dìì mɔ̀nnì kɛ́kṹnnɛ́ kuduotí mɑrimù Dɑmɑɑ kɛ́wɛ̃tɛ Tidisɑɑ. 
\v 22 Kòo kpɑ̀ɑ̀tì Asɑɑ tíí nSudɑɑ kɔbɛ bɛmɔu pɑ́íí, ò í nsùɔ́ nhòmɔù, kɛ̀ bɛ̀ɛ túótɛ́ yɛtɑ̃́rɛ̀ yɛmɔu nɛ̀ idɛí Bɑsɑɑ do mɑɑ́nɛ̀ dɛ̀ kuduotí kɛ́fii Dɑmɑɑ ɛì, kɛ́mɑɑ́nɛ̀ kuduotí Kebɑɑ ɛì Bɛnsɑmɛɛ tempɛ̃ mmiɛkɛ nɛ̀ Misipɑɑ kpɛri.
\p
\v 23 Asɑɑ dɔɔ̀rìmɛ̀ tɛ̃mɛ̀, o kɔ̃m̀bùɔ̀, nɛ̀ ò dɔ̀ɔ̀ dɛ̀ɛ̀ kó dimɑ̀ɑ̀, dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. Asɑɑ kòtɛ́ dìì mɔ̀nnì kɛ́muɔkɛ sinɑɑ̀cɛ̀i. 
\v 24 Ò do ku kɛ̀ bɛ̀ɛ ò kũnnɛ́ o yɑ̀ɑ̀rì Dɑfiti ɛì ndi, kòo birɛ Sosɑfɑtii weè sɔɔtɛ́ o kpɑ̀tì.
\s1 Nɑdɑbu nɑɑ́mmɛ̀ Isidɑyɛɛribɛ kpɑ̀ɑ̀tì
\p
\v 25 Sedoboɑmmu birɛ Nɑdɑbu do nɑɑ́ nyIsidɑyɛɛribɛ kpɑ̀ɑ̀tì Asɑɑ Sudɑɑ kɔbɛ kóo kpɑ̀ɑ̀tì kpɑ̀tì benni dɛ̀rínnì ndi, kɛ́ntɔ tikpɑ̀tì kɛ dɔ̀ yɛbie nyɛ̀dɛ́ɛ̀, 
\v 26 kɛ́dɔɔ̀ ti Yiɛ̀ nKuyie nyí dɔ́ dɛ̀, kɛ́tũnnɛ o cicɛ do dɔ̀ɔ̀ mɛ̀ɛ̀ yɛi nkɛ́tɑnnɛ́ Isidɑyɛɛribɛ mɛyɛi mmiɛkɛ. 
\v 27 Kɛ̀ Isɑkɑɑ nɑɑ̀mùnkù kou Aiyɑ birɛ Bɑsɑɑ ndɔ́ kɛ́bɔ nNɑdɑbu kɛ sɔ̃́ nyIsidɑyɛɛribɛ pi Kibetɔ̃ɔ̃ Fidisitɛ̃ɛ̃bɛ ɛì, bɛ̀ dɛ nhò kùɔ. 
\v 28 Bɑsɑɑ do kùɔ Nɑdɑbu Asɑɑ Sudɑɑ kɔbɛ kóo kpɑ̀ɑ̀tì kpɑ̀tì benni tɑ̃ɑ̃́nnì ndi, kɛ́fietɛ tikpɑ̀tì. 
\v 29 Ò cɔutɛ́ dìì mɔ̀nnì tikpɑ̀tì kɛ́kuɔ Sedoboɑmmu cĩ́ɛ̃̀tɛ̀ tɛmɔu pɑ́í, ò í nsùɔ́ nhòmɔù, kɛ́ndònnɛ̀ ti Yiɛ̀ nKuyie ndo tì bɛ́immɛ̀ Sidoo ɛì miɛkɛ nɛ̀ ku pɑ̃ɑ̃nɑ́ɑǹtì nɑ́ɑǹtò Aiyɑ nùù miɛkɛ. 
\v 30 Sedoboɑmmu do dɔ̀ɔ̀ mɛ̀ɛ̀ yɛi nkɛ́tɑnnɛ́ Isidɑyɛɛribɛ bɛmɔu mɛyɛi mmiɛkɛ mɛɛ̀ do íi nti Yiɛ̀ nKuyie nyIsidɑyɛɛribɛ tũ nkù miɛkɛ, mɛɛ̀ do te kɛ̀ tìi bɛ̀ tùɔ̀kɛní.
\p
\v 31 Nɑdɑbu dɔɔ̀rimɛ̀ tɛ̃mɛ̀ ò dɔ̀ɔ̀ mɛ̀ɛ̀ kó dimɑ̀ɑ̀, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\b
\p
\v 32 Asɑɑ do dokùnɛ̀mu Isidɑyɛɛribɛ kpɑ̀ɑ̀tì Bɑsɑɑ sɑ̃́ɑ̃̀.
\s1 Bɑsɑɑ nɑɑ́mmɛ̀ Isidɑyɛɛribɛ kpɑ̀ɑ̀tì
\p
\v 33 Sudɑɑ kɔbɛ kpɑ̀ɑ̀tì Asɑɑ kpɑ̀tì benni tɑ̃ɑ̃́nnì ndi Aiyɑ birɛ Bɑsɑɑ nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́mbo Tidisɑɑ kɛ dɔ̀ yɛbie nsipísìdɛ́ nɛ̀ yɛ̀nɑ̀ɑ̀, 
\v 34 kɛ́dɔɔ̀ ti Yiɛ̀ nKuyie nyí dɔ́ dɛ̀, ò do tũ̀nnɛ o cicɛ Sedoboɑmmu kó mɛyɛi mmɛ ò do dɔ̀ɔ̀ mɛ̀ kɛ́tɑnnɛ́ Isidɑyɛɛribɛ mɛyɛi mmiɛkɛ.
\c 16
\p
\v 1 Kɛ̀ ti Yiɛ̀ nKuyie mbɛ́innɛ̀ Anɑnni birɛ Seuu kɛ dɔ̀ wèe nɑ́kɛ́ Bɑsɑɑ kɛ dɔ̀: 
\v 2 Mí ndi Yiɛ̀ nKuyie mmíì ò kũtɛ́ní mutɑ̃́ɑ̃́ mmiɛkɛ koò dɔ̀ɔ̀ okpɑ̀ɑ̀tì, kòò bɑkɛ́ n nìtìbɛ̀ Isidɑyɛɛribɛ, kɛ tũ̀nnɛ Sedoboɑmmu kó mɛborimɛ, kɛ tɑnnɛ́ n nìtìbɛ̀ Isidɑyɛɛribɛ mɛyɛi mmiɛkɛ kɛ íi mmiɛkɛ. 
\v 3 N yóó kɑ́útɛ́mu o cĩ́ɛ̃̀tɛ̀ kɛ̀ tɛ̀ɛ dontɛnɛ̀ Nɛbɑti birɛ Sedoboɑmmu kpɛtɛ. 
\v 4 Á ò nɑ̀kɛ́ kɛ tú n yɛ̃ nho cĩ́ɛ̃̀tɛ̀ kou wèè bo kú dihɛì simɔɔ́ siì yóó ò cɑ̀ɑ́kɛ́, kɛ̀ wèè ku dikpɑ́ɑ̀ tinɔ̀tìi ò cɔ.
\p
\v 5 Bɑsɑɑ dɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀ nɛ̀ ò dokɛ́ mùù doò. Dɛmɔu dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 6 Kɛ̀ Bɑsɑɑ kú kɛ̀ bɛ̀ɛ ò kũnnɛ́ Tidisɑɑ. Kòo birɛ Edɑɑ sɔɔtɛ́ o kpɑ̀tì.
\b
\p
\v 7 Ti Yiɛ̀ nKuyie ndo duɔ́ nkɛ̀ Anɑnni birɛ ku pɑ̃ɑ̃nɑ́ɑǹtì nɑ́ɑǹtò Seuu bɛ́innɛ̀ Bɑsɑɑ nɛ̀ o cĩ́ɛ̃̀tɛ̀ ò dɔ̀ɔ̀ mɛ̀ɛ̀ kpɛ́í mmɛyɛi kɛ íi nti Yiɛ̀ nKuyie mmiɛkɛ nSedoboɑmmu do dɔ̀ɔ̀mɛ̀, nɛ̀ ò kùɔmɛ̀ Sedoboɑmmu cĩ́ɛ̃̀tɛ̀ tɛmɔu.
\s1 Edɑɑ tumɛ̀ Isidɑyɛɛribɛ kpɑ̀ɑ̀tì
\p
\v 8 Asɑɑ Sudɑɑ kɔbɛ kóo kpɑ̀ɑ̀tì kpɑ̀tì benni sipísìdɛ́ nɛ̀ dikuɔ́nnì miɛkɛ nkɛ Bɑsɑɑ birɛ Edɑɑ nɑɑ́mmɛ̀ Isidɑyɛɛribɛ kpɑ̀ɑ̀tì kɛ́mbo Tidisɑɑ kɛ dɔ̀ yɛbie nyɛ̀dɛ́ɛ̀. 
\v 9-10 Kòo kóo ɑ̃ɑ̃pɔ̀nkótì Simmidi wèè do bɑkɛ́ okpɑ̀rìnɑɑsɛ̃ĩ́ dikéè kòo ndɔ́ kóo bɔ. Asɑɑ Sudɑɑ kóo kpɑ̀ɑ̀tì benni sipísìdɛ́ nɛ̀ diyiennì miɛkɛ do nkɛ. Diyiè mɑrì kɛ̀ Edɑɑ mbo Tidisɑɑ wèè bɑkɛ́ tɛkpɑ̀ɑ̀tìcĩ́ɛ̃̀tɛ̀ o cĩ́ɛ̃̀tɛ̀ miɛkɛ kɛ́yɑ̃̀ mɛnɑɑ̀ nkɛ́muɔ́. Kɛ̀ Simmidii tɑroo kóò potɛ́ kɛ́kuɔ kɛ́cɔutɛ́ tikpɑ̀tì. 
\v 11 Ò nɑ dìì mɔ̀nnì kɛ́kɑri dikpɑ̀ɑ̀tìkɑ̀rì kɛ́kuɔ Bɑsɑɑ cĩ́ɛ̃̀tɛ̀ tɛmɔu pɑ́íí ò í nsùɔ́ nhonitidɔ̀ù mɔù o cĩ́ɛ̃̀tɛ̀ miɛkɛ yoo o cɛ̃dɛ́tɛ̀ kou, yoo òmɔù wèè tɑunɛ̀ Bɑsɑɑ. 
\v 12 Kɛ̀ Simmidii kuɔ Bɑsɑɑ cĩ́ɛ̃̀tɛ̀ tɛmɔu kɛ́ndònnɛ̀ ti Yiɛ̀ nKuyie ndo ti nɑ̀kɛ́mɛ̀ Bɑsɑɑ kpɛ́í nnɛ̀ ku pɑ̃ɑ̃nɑ́ɑǹtì nɑ́ɑǹtò Seuu nùù miɛkɛ. 
\v 13 Dɛndɛ kó dimɑ̀ɑ̀ dɛ̀ ò tùɔ̀kɛní o yɛi kpɛ́í nkɛ nɛ̀ o birɛ Edɑɑ kɔ̃mɛ ò do dɔ̀ɔ̀ mɛ̀ kɛ́tɑnnɛ́ Isidɑyɛɛribɛ mɛyɛi mmiɛkɛ kɛ́yíi nti Yiɛ̀ nKuyie mmiɛkɛ nɛ̀ bɛ kó mubɔɔféù.
\p
\v 14 Edɑɑ dɔɔ̀rìmɛ̀ tɛ̃mɛ̀ ò dɔ̀ɔ̀ dɛ̀ɛ̀ kó dimɑ̀ɑ̀ dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ\f + \fr 16:14 \fr*\fk ...kpɑ̀ɑ̀tìbɛ̀ dɔɔ̀rìmɛ̀ pɑ́tíri: \fk*\ft Bɛ̀ nɑ̀ɑ́ ndìì pɑ́tíri kpɛ́í diɛ\ft*\f* ndɛ̀ í tú Bɛkpɑ̀ɑ̀tìbɛ̀ tɔ̃mmú pɑ́tíri ketirì yoo didɛ́rì, bɛ̀ nɑ̀ɑ́ nyɛ̀mɑyɛ̀ kpɛ́í nkɛ kɛ̀ dɛ kó yɛpɑ́tɛ í bo nkɔkɛ́ Kuyie nnɑ́ɑǹtì pɑ́tíri miɛkɛ.
\s1 Simmidi nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 15 Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìdɛ́ nɛ̀ diyiénnì miɛkɛ nkɛ̀ Simmidi nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛwe yɛ̀yiekɛ̀. Dɛ̀ do sɔ̃́ mbɛ̀ pi Kibetɔ̃ɔ̃ nwe Fidisitɛ̃ɛ̃bɛ ɛì. 
\v 16 Bɛhɑ̃ɑ̃pɔ̀mbɛ̀ kèè dìì mɔ̀nnì bɛ kɑrì kɛ dò nSimmidi bɔ nhokpɑ̀ɑ̀tì koò kùɔ. Dɛ kó diyiè dìmɑ́ɑ̀ miɛkɛ kɛ̀ Isidɑyɛɛribɛɛ pĩ́ nhohɑ̃ɑ̃pɔ̀nkótì Omidi tikpɑ̀tì dɛndɛ dihɑ̃ɑ̃pɔ̀nkɑrì. 
\v 17 Dɛ mɔ̀nnì Omidi nɛ̀ o ɑ̃ɑ̃pɔ̀mbɛ̀ kɛ̀ bɛ̀ɛ ítɛ́ bɛ do kɑri dɛ̀ kɛ́pi Kibetɔ̃ɔ̃ kɛ́kɔtɛ kɛ́do Tidisɑɑ. 
\v 18 Simmidi sɔ̃́ ndìì mɔ̀nnì bɛhɑ̃ɑ̃pɔ̀mbɛ̀ do dihɛì kòo kɔtɛ kɛ́tɑ tɛkpɑ̀ɑ̀tìcĩ́ɛ̃̀tɛ̀ o kó kudieku kɛ́cɔ́u nkɛ̀ tɛ̀ɛ ò wɛ̃nnɛ́nɛ̀ kɛ́cɔ́útɛ́ kòo kú. 
\v 19 Dɛndɛ ò tùɔ̀kɛní o yɛi nkpɛ́í nkɛ, ò dɔ̀ɔ̀ mɛ̀ ti Yiɛ̀ nKuyie nyí dɔ́ dɛ̀, kɛ tũ̀nnɛ o cicɛ Sedoboɑmmu kó mɛyɛi nhò do dɔ̀ɔ̀ mɛ̀ kɛ́tɑnnɛ́ Isidɑyɛɛribɛ mɛyɛi miɛkɛ.
\p
\v 20 Simmidi dɔɔ̀rìmɛ̀ tɛ̃mɛ̀, ò bɔmmɛ̀ okpɑ̀ɑ̀tì, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ.
\p
\v 21 Dɛ mɔ̀nnì kɛ̀ Isidɑyɛɛribɛɛ totɛ́ kɛ̀ diwɛ́tirìi tũnnɛ Kinɑti birɛ Tibinni kɛ́ we mpĩ́ ntikpɑ̀tì. Kɛ̀ diwɛ́tirì tɛrì nkpɑɑ́ tũ nhOmidi. 
\v 22 Omidi kó ditĩ̀nnì diì do nɑ Tibinni kpɛri kɛ̀ Tibinnii kú kɛ̀ Omidii nɑɑ́ nhokpɑ̀ɑ̀tì.
\s1 Omidi nɑɑ́mmɛ̀ Isidɑyɛɛribɛ kóò kpɑ̀ɑ̀tì
\p
\v 23 Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìtɑ̃ɑ̃ti nɛ̀ dìmɑ́ɑ̀ miɛkɛ nkɛ Omidi nɑɑ́mmɛ̀ Isidɑyɛɛribɛ kóo kpɑ̀ɑ̀tì kɛ́mbo Tidisɑɑ kɛ dɔ̀ yɛbie nyɛ̀kuɔ̀. Ò do tɔ tikpɑ̀tì kɛ dɔ̀ yɛbie ntɛpíítɛ̀ nɛ̀ yɛ̀dɛ́ɛ̀ ndi. 
\v 24 Dɛ kó difɔ̃nkúò kɛ́dontɛ́ Simmɛdi borɛ̀ Sɑmmɑrii tɑ̃rì mɛdítíbii nsikɔupísìkuɔ̀ (6000) kɛ́mɑɑ́ dihɛì dɛ kó ditɑ̃rì ĩ́nkɛ̀, kɛ́ dì yú ò dì dontɛ́nɛ̀ wè kó diyètìrì kɛ dɔ̀ Sɑmmɑrii. 
\v 25 Kɛ̀ Omidii dɔɔ̀ ti Yiɛ̀ nKuyie nyí dɔ́ dɛ̀ kɛ́pɛ̃ɛ̃tɛ́ bɛ̀ɛ̀ ò niitɛ́nɛ̀ kɛ di tikpɑ̀tì. 
\v 26 Ò do tũ̀nnɛ Nɛbɑti birɛ Sedoboɑmmu kó mɛborimɛ mmɛ, ò do dɔ̀ɔ̀ mɛ̀ɛ̀ yɛi nkɛ́tɑnnɛ́ Isidɑyɛɛribɛ mɛyɛi miɛkɛ kɛ́yíi nti Yiɛ̀ nKuyie mmiɛkɛ nɛ̀ bɛ kó mubɔɔféù.
\p
\v 27 Omidi dɔɔ̀rìmɛ̀ tɛ̃mɛ̀ nɛ̀ ò dokɛ́ mùù doò dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 28 Kòo kú kɛ̀ bɛ̀ɛ ò kũnnɛ́ Sɑmmɑrii kòo birɛ Akɑbuu sɔɔtɛ́ o kpɑ̀tì.
\s1 Akɑbu nɑɑ́mmɛ̀ Isidɑyɛɛribɛ kóo kpɑ̀ɑ̀tì
\p
\v 29 Sudɑɑ kɔbɛ kóo kpɑ̀ɑ̀tì Asɑɑ kpɑ̀tì benni sipísìtɑ̃ɑ̃ti nɛ̀ diniínnì ndi, Omidi birɛ Akɑbu nɑɑ́mmɛ̀ Isidɑyɛɛribɛ kóo kpɑ̀ɑ̀tì, kɛ́ntɔ tikpɑ̀tì kɛ dɔ̀ yɛbie nsipísìdɛ́ nɛ̀ yɛ̀dɛ́ɛ̀, kɛ bo Sɑmmɑrii. 
\v 30 Kòo birɛ Akɑbuu dɔɔ̀ ti Yiɛ̀ nKuyie nyí dɔ́ dɛ̀ kɛ̀ dɛ̀ɛ pɛ̃ɛ̃tɛ́ bɛ̀ɛ̀ ò niitɛ́nɛ̀ kɛ di tikpɑ̀tì. 
\v 31 Ò tũ̀nnɛmɛ̀ Sedoboɑmmu borimɛ kɛ̀ dɛndɛ ntú mpútì, kòo kɔtɛ kɛ́túótɛ́ Sidoniibɛ kpɑ̀ɑ̀tì Itibɑɑdi kóo sɑpɑ̀ɑ̀ nSesɑbɛɛdi kɛ́puokɛ kɛ́nínkú dibɔɔ̀ Bɑɑdi ììkɛ̀ kɛ́ dì fìé iwũɔ̃, 
\v 32 kɛ́mɑɑ́ dibɔɔ̀ Bɑɑdi ditou Sɑmmɑrii kɛ́mɑɑ́ dɛ kó ditou miɛkɛ diwũɔ̃tɔ̀nnì, 
\v 33 kɛ́fíínnɛ̀ ndibɔɔ̀ Asedɑɑ kó kutedɔú kɛ́yíi ti Yiɛ̀ nKuyie mmiɛkɛ kɛ̀ dɛ̀ɛ pɛ̃ɛ̃tɛ́ Isidɑyɛɛribɛ kpɑ̀ɑ̀tìbɛ̀ sɔmbɛ bɛ̀ɛ̀ ò niitɛ́nɛ̀ kɛ di tikpɑ̀tì.
\b
\p
\v 34 Dɛ kó yɛmɔ̀rɛ̀ miɛkɛ nkɛ Iyɛdi Betɛɛdi kou wɛ̃̀tɛ kɛ mɑɑ́mɛ̀ Sedikoo kó kuduotí kɛ́ nkù pũũku kɛ̀ o kóo po Abidɑmmuu kú, kòo nkpetì yɛcɑ̀kɛ̀ kòo bíyɑ̃ɑ̃tɛ̀ Sikubuu kú, ti Yiɛ̀ nKuyie ndo tì nɑ̀kɛ́mu Nunni birɛ Sosuwee.
\c 17
\s1 NKuyie mpɑ̃ɑ̃nɑ́ɑǹtì nɑ́ɑǹtò Edii nɑ̀kɛ́mɛ̀ kutɑyiɛtí kpɛ́í
\p
\v 1 Kɛ̀ Edii, Tisibii ɛì kou, Kɑdɑɑdi tempɛ̃ nkouu nɑ́kɛ́ okpɑ̀ɑ̀tì Akɑbu kɛ dɔ̀: Ti Yiɛ̀ nKuyie nyIsidɑyɛɛribɛ tũ nkù bomu kɛ̀ n tu ku kóo tɔ̃ntì. Timɑɑ̀ntì í yóó mɑntɛ̀, fɛtɑɑfɛ̀ mɛ nyí yóó ni, kɛ̀ míì sɑ̀ɑ̀ í bɛ́i nkɛ tú fɛ̀ɛ ni.
\s1 Edii bomɛ̀ Kediti kó tɛkóntɛ̀
\p
\v 2 Kɛ̀ ti Yiɛ̀ nKuyie mbɛ́innɛ̀ Edii kɛ dɔ̀: 
\v 3 Ítɛ́ kɛ́kɔtɛ diyiè yìɛ̀ní kɛ̀ɛ̀ bíɛ́kɛ̀ kukó nSuditɛ̃ɛ̃ kɛ́nsɔri Keditii kó tɛkóntɛ̀ miɛkɛ tɛ̀ɛ̀ bo Suditɛ̃ɛ̃ yɑ́ɑ̀ diyiè yìɛ̀ní kɛ̀ɛ̀ bíɛ́kɛ̀. 
\v 4 A yó ntɛ nyɔ̃ nkɛ̀ n duɔ́ nkɛ̀ yɛkɑ̃kɑ̃ ndɑ duɔ̀ mmudiì.
\p
\v 5 Kòo dɔ̀ɔ̀ ti Yiɛ̀ nKuyie nhò nɑ̀kɛ́ tì kɛ́ítɛ́ kɛ́kɔtɛ kɛ́mbo Keditii kó tɛkóntɛ̀ miɛkɛ Suditɛ̃ɛ̃ diyiè yìɛ̀ní kɛ̀ɛ̀ bíɛ́kɛ̀. 
\v 6 Kɛ̀ yɛkɑ̃kɑ̃ níí ò duɔ́ mudiì nɛ̀ imɑɑ ndikṹnweńnì nɛ̀ kuyuoku.
\s1 Edii kɔ̀tɛmɛ̀ Sɑdɛputɑɑ okúpokù cĩ́ɛ̃̀tɛ̀
\p
\v 7 Kɛ̀ dɛ̀ mboní kɛ̀ tɛkóntɛ̀ kó mɛniɛ nkṹṹ kɛ yɛ̃́ fɛtɑɑfɛ̀ tɛ̃́nkɛ do í niùmɛ̀. 
\v 8 Dɛ mɔ̀nnì kɛ̀ ti Yiɛ̀ nKuyie nhò bɛ́innɛ̀ kɛ dɔ̀: 
\v 9 Ítɛ́ kɛ́kɔtɛ Sitɔ̃ɔ̃ tempɛ̃ nSɑdɛputɑɑ ɛì kɛ́mbo, n nɑ̀kɛ́mu okúpokù mɔù dɛborɛ̀, kòò bo ndɑ duɔ̀ nkɑ̀ɑ yo.
\p
\v 10 Mɛm̀mɛ kòo ítɛ́ kɛ́pĩ́ nSɑdɛputɑɑ kó kucɛ, kɛ́tuɔkoo dihɛì kó dibòrì kɛ́yɑ̀ okúpokù mɔù kòò kɑu idɛí. Kòo o yu kɛ dɔ̀: M pɑ̃ mɛniɛ nkɛ̀ n yɑ̃.
\p
\v 11 Kòo nitipòkù nkɔri kɛ bo yɛ̃ntɛ́ní kòo wɛ̃tɛ kóò yu kɛ dɔ̀: Á m pɑ̃ní mudiì. 
\v 12 Kòo nitipòkùu ò tɛ̃̀ńnɛ́ kɛ dɔ̀: Ti Yiɛ̀ nKuyie nhɑ tũ nkù yɛ̃́mu n yí mɔkɛmɛ̀ mudiì mɑmù mùù bèńnɛ́, muyuo mmuù kpɑɑ́ tɛconkutɛ miɛkɛ kɛ mɑ̀nnɛ̀ ɑ bo pikúmɛ̀ dinɑcɛkutiri, mɛkùɔ̀ nsɑ́m̀pɔ́ dikɔdénnì miɛkɛ. M mɛ̀ nkɑu idɑbí kɛ yóó dɛ ndɔɔ̀, nɛ̀ m birɛ kɛ̀ ti di kɛ́deè kɛ́mbɑɑ mukṹṹ. 
\v 13 Kɛ̀ Edii ò tɛ̃̀ńnɛ́ kɛ dɔ̀: A bɑ́ nyĩɛ̃̀kù, kɔtɛ kɛ́dɔɔ̀ ɑ dɔ́ kɛ́dɔɔ̀mɛ̀, kɑ̀ɑ dɔ̀ɔ̀ ɑ́ ketɛ́ kɛ́kɑkɛ dikɑ̀tìndɑ̀ɑ̀ sɑ́m̀pɔ́ kɛ́kɔtɛnní kɛ́ n duɔ́ nkɛ nɛ́ nɑ kɛ́kɑkɛ fɔ̃́ nnɛ̀ ɑ birɛ di kpɛri. 
\v 14 Ti Yiɛ̀ nKuyie nyIsidɑyɛɛribɛ tũ nkù bɛ́immu kɛ tú: Muyuo nyí yóó deè tɛconkutɛ miɛkɛ, mɛkùɔ̀ mmɛ nyí yóó deè dikɔdénnì miɛkɛ, kɛ̀ kù yɑ̀ɑ duɔ́nnɛ̀nní fɛtɑɑfɛ̀.
\p
\v 15 Kòo kɔtɛ kɛ́dɔɔ̀ Edii ò nɑ̀kɛ́ tì, kɛ̀ bɛ̀ nyo mbɛmɔu wenwe nɛ̀ o birɛ nɛ̀ Edii. 
\v 16 Muyuo nyí ndèè tɛconkutɛ miɛkɛ, mɛkùɔ̀ mmɛ nyí ndèè dikɔdénnì miɛkɛ, ti Yiɛ̀ nKuyie ndo ti nɑ̀kɛ́mɛ̀ Edii kòo ti bɛ́i.
\s1 Edii fòùkùnnɛmɛ̀ okúpokù birɛ
\p
\v 17 Kɛ̀ okúpokù Edii bo wèè cĩ́ɛ̃̀tɛ̀, kòo birɛɛ muɔkɛ kɛ̀ dɛ ncɛ̃́ɛ̃̀ mɛdiɛ̀ nkɛ̀ dɛ̀ɛ kú. 
\v 18 Kòo nɑ́kɛ́ Edii kɛ dɔ̀: Ti kpɛti dòmmɛ mí nnɛ̀ fɔ̃́ nti Yiɛ̀ nKuyie nkóo nìtì? A kɔ̀tɛní n cĩ́ɛ̃̀tɛ̀ kɛ bo dentɛ n yɛi mmɛ ti Yiɛ̀ nKuyie nkɛ́kuɔ m birɑɑ̀?
\p
\v 19 Kɛ̀ Edii dɔ̀: N duɔnní ɑ birɛ.
\p Kòo dɛ̀ cɔutɛ́ onitipòkù nɔu miɛkɛ kɛ́dekɛnɛ̀ kudɑ̀nkù kudieku nhò ɑ̃ dɛ̀, kɛ́ dɛ̀ dɔú nho dɔ́ù ĩ́nkɛ̀, 
\v 20 kɛ́bɑ́ntɛ̀ ti Yiɛ̀ nKuyie nkɛ dɔ̀: Ti Yiɛ̀ nKuyie n tũ nkù, ɑ dɔ́ kɛ́dɔɔ̀mu mɛyɛi nhonitipòkù yie nkɛ kùɔ o birɛ, wenwe wèè n cɔutɛ́ o cĩ́ɛ̃̀tɛ̀ miɛkɑɑ̀?
\p
\v 21 Kɛ̀ Edii nhokù dɛbirɛ ĩ́nkɛ̀ kɛ dɔ̀ kucɛ mɛ̀tɑ̃ɑ̃ti kɛ bɑ́ɑ́ nti Yiɛ̀ nKuyie nkɛ tú: Ti Yiɛ̀ nKuyie n tũ nkù, n dɑ bɑ́ɑ́mmu yóu kɛ̀ dɛbirɛ wɛ̃nnìi wɛ̃tɛní dɛ miɛkɛ.
\p
\v 22 Kɛ̀ ti Yiɛ̀ nKuyie ncɔutɛ́ Edii bɑ́ɑmmìi, kɛ̀ dɛbirɛ wɛ̃nnìi wɛ̃tɛní dɛ miɛkɛ kɛ̀ dɛ̀ɛ foutɛ. 
\v 23 Kòo dɛ̀ cùtɛ́nní kɛ́duɔ́ ndɛ yɔ̃ kɛ dɔ̀: A birɛ fòùmu!
\p
\v 24 Koò nitipòkùu ò nɑ̀kɛ́ kɛ dɔ̀: Di mmɔ̀nnì m bɑntɛ́mu kɛ dò nhɑ tú Kuyie nkóo nìtì, kɛ nɑ́ɑ́ ntimɔ́mmɔnti ti Yiɛ̀ nKuyie ndɑ duɔ̀ ntì.
\c 18
\s1 Edii nɑ̀kɛ́mɛ̀ fɛtɑɑfɛ̀ yóó wɛ̃tɛ kɛ́nimɛ̀
\p
\v 1 Kɛ̀ dɛ̀ɛ mɔntɛ kɛ́mmɔkɛ yɛbie nyɛ̀tɑ̃ɑ̃ti kɛ̀ ti Yiɛ̀ nKuyie mbɛ́innɛ̀ Edii kɛ dɔ̀: Kɔtɛ kɛ́bɛnkɛ ɑmɑ́ɑ̀ Akɑbu, n yóó duɔ́ nkɛ̀ fɛtɑɑfɛ̀ɛ nimu.
\p
\v 2 Kɛ̀ Edii nkɔri kɛ bo bɛnkɛ omɑ́ɑ̀ Akɑbu.
\p Dɛ do sɔ̃́ ndikònnì dɛukɛmu Sɑmmɑrii. 
\v 3 Nɛ̀ dɛ kpɛ́í nkɛ Akɑbuu yú Abudiɑsi wèè bɑkɛ́ tɛkpɑ̀ɑ̀tìcĩ́ɛ̃̀tɛ̀. Abudiɑsi do tú wèè dé wenwe ti Yiɛ̀ nKuyie. 
\v 4 Sesɑbɛɛdi do kɔù dìì mɔ̀nnì ti Yiɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ̀ weè sɔnnɛ Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɛkɔ̀ùtɛ̀ (100) kɛ́ bɛ̀ totɛ́ yɛtĩ̀rɛ̀ yɛ̀dɛ́ɛ̀, dii nsipísìnùmmù, ditɛrì mɛmmɛ kɛ́ bɛ̀ sɔnnɛ titɑ̃dèntì tìdɛ́tì miɛkɛ, kɛ́ mbɛ̀ duɔ̀ mmudiì nɛ̀ mɛniɛ. 
\v 5 Kɛ̀ Akɑbuu ò yu kóò nɑ̀kɛ́ kɛ dɔ̀: Ti ce ndihɛì dimɔu sibií borɛ̀ nɛ̀ ikó mborɛ̀, kɛ́yɑ̀ ti bo pɛ́tɛ́ timútì kɛ́duɔ́ nsisɛ̃ĩ́ nɛ̀ sɑ̃mmɑrímúbɛ̀, kɛ̀ dɛ̀ɛ yie nkɛ̀ ti bɑ́ɑ́ kuɔ iwũɔ̃.
\p
\v 6 Kɛ̀ bɛ̀ɛ totɛ́ dihɛì yɛwɛ́tiyɛ̀ bɛ̀ yóó ce nyɛ̀. Kɛ̀ Akɑbuu kétɛ́ o kó kucɛ, kɛ̀ Abudiɑsi ketɛ́ o kó kupíkù. 
\v 7 Ò kètóo mɛmmɛ kɛ́conɛ̀ Edii kóò bɑntɛ́ kɛ́nínkú kɛ́sĩ́nnɔ́ɔ o ììkɛ̀ kɛ dɔ̀: Okótì Edii, fɔ̃́ nweɑ̀? 
\v 8 Kòo ò tɛ̃̀ńnɛ́ kɛ dɔ̀: Mí nwe! Kɔtɛ kɛ́nɑ́kɛ́ okpɑ̀ɑ̀tì kɛ tú n kéróomu. 
\v 9 Kɛ̀ Abudiɑsi kuɔ́nko kɛ dɔ̀: N dɑ cɑ̀kɛ bɑ okótì kɑ̀ɑ yó n fítɛ́ kɛ̀ Akɑbu m pĩ́ nkɛ́kuɔ? 
\v 10 Nɛ̀ ti Yiɛ̀ nKuyie nti tũ nkù, dihɛì mɑrì í bo okpɑ̀ɑ̀tì í tɔ̃ ndì bɛnìtìbɛ̀ kɛ̀ bɛ̀ bo dɑ wɑmmú, kɛ̀ dihɛì mɑrì kɔbɛ yoo dikpɑ̀ɑ̀tìyuu mɑrì yĩ ɑ í dɛ̀ bo, bɛ̀ɛ duɔ́ nkɛ̀ bɛ̀ɛ pɑrìkɛ̀ kɛ dɔ̀ bɛ̀ í dɑ yɑ̀. 
\v 11 A nɛ́ mɛ̀ ntu n kɔtɛ kóò nɑ̀kɛ́ ɑ kéróomɛ̀. 
\v 12 Kɛ̀ n yìtɛ́ kɛ̀ ti Yiɛ̀ nKuyie nYɑɑ́ ndɑ tùótɛ́ bɑ́ n yí yɛ̃́ mù dɑ kɔ̀tɛnɛ̀ kɛ̀, kòo kpɑ̀ɑ̀tì kɔ̀tɛní kɛ dɑ mɔ̀ńtɛ́ ò yóó n kuɔmu. M mɛ ndému ti Yiɛ̀ nKuyie nnɛ̀ m bíkɛ́mbɛ́ntì. 
\v 13 Okótì bɛ̀ í dɑ nɑ̀kɛ́ Sesɑbɛɛdi do kɔù Kuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ̀ n dɔ̀ɔ̀rɑɑ̀? Míì do sɔ̀nnɛ Kuyie mpɑ̃ɑ̃nɑ́ɑǹtì nɑ́ɑm̀bɛ̀ tɛkɔ̀ùtɛ̀ (100) kɛ́ bɛ̀ totɛ́ yɛtĩ̀rɛ̀ yɛ̀dɛ́ɛ̀, kɛ́ bɛ̀ sɔ̀nnɛ titɑ̃dèntì tìdɛ́tì miɛkɛ, kuu nsipísìnùmmù kutɛkù sipísìnùmmù, kɛ́ mbɛ̀ duɔ̀ mmudiì nɛ̀ mɛniɛ. 
\v 14 A nɛ́ mɛ̀ ntu n kɔtɛ kóò nɑ̀kɛ́ ɑ kéróomɛ̀, n yóó kɔtɛ kòo n kuɔmu.
\m
\v 15 Kɛ̀ Edii bɛ́i nkɛ dɔ̀: Ti Yiɛ̀ nKuyie Mpɑkɛdɑɑ bomu kɛ̀ n tu ku kóo tɔ̃ntì. N kɔrimu yie nkɛ bo bɛnkɛ m mɑ́ɑ̀ Akɑbu.
\s1 Edii nɛ̀ Akɑbu bɛ̀ mɑ̀útɛ́mɛ̀
\p
\v 16 Mɛm̀mɛ kɛ̀ Abudiɑsi kɔtɛ kɛ́conɛ̀ Akɑbu kɛ tì nhò nɑ̀kɛ́, kɛ̀ Akɑbuu kɔtɛ Edii borɛ̀. 
\v 17 Ò yɑ̀ dìì mɔ̀nnì Edii kóò nɑ̀kɛ́ kɛ dɔ̀: N dɑ yɑ̀mu! Fɔ̃́ nwèè te kɛ̀ mɛyɛi ndo Isidɑyɛɛribɛ.
\p
\v 18 Kɛ̀ Edii ò tɛ̃̀ńnɛ́ kɛ dɔ̀: Míì í te kɛ̀ mɛyɛi ndo Isidɑyɛɛribɛ, fɔ̃́ nnɛ̀ ɑ cĩ́ɛ̃̀tɛ̀ kɔbɛ díì te, kɛ yɛ̃́ di yetɛmɛ̀ ti Yiɛ̀ nKuyie, kɑ̀ɑ feu iwũɔ̃ yɛbɔkɛ̀ Bɑɑdibɛ. 
\v 19 A nɛ́ kɔtɛ kɛ́nɑ́kɛ́ Isidɑyɛɛribɛ bɛmɔu kɛ̀ di kɔtɛní m borɛ̀ Kɑdimɛɛdi tɑ̃rì ĩ́nkɛ̀, kɛ́nnɛínɛ̀ní Bɑɑdi kó bɛpɑ̃ɑ̃bɛ̀ sikɔusìnɑ̀ɑ̀ nɛ̀ sipísìnùmmù (450), nɛ̀ Asedɑɑ kɔbɛ sikɔusìnɑ̀ɑ̀ (400) bɛ̀ɛ̀ yo nSesɑbɛɛdi borɛ̀.
\s1 Bɛ̀ fìémɛ̀ iwũɔ̃ Kɑdimɛɛdi
\p
\v 20 Kɛ̀ Akɑbuu tíí nyIsidɑyɛɛribɛ bɛmɔu nɛ̀ Bɑɑdi kó bɛpɑ̃ɑ̃bɛ̀ Kɑdimɛɛdi tɑ̃rì ĩ́nkɛ̀. 
\v 21 Kɛ̀ Edii kɔtoo bɛ borɛ̀ kɛ bɛ́i nkɛ dɔ̀: Dɛ̀ yó nkɑ̃́ɑ̃́kɛ́ dɛ kɛ̀ di yóu di bo ncɑɑtimɛ̀ tipíìtì tìdɛ́tì? Kɛ̀ ti Yiɛ̀ nKuyie nkuù tu, tũnnɛnɛ̀ ku! Kɛ̀ Bɑɑdi weè mɛ ntu, tũnnɛnɛ̀ we!
\p Bɑ́ bɛ̀ í nhò tɛ̃̀ńnɛ́ tìmɑtì. 
\v 22 Kɛ̀ Edii bɑɑ nkpɑɑ́ sɔkɛ́ o nɑ́ɑǹtì kɛ́bɛ́i nkɛ dɔ̀: Mí nwèè nɑ̀ɑ́ nti Yiɛ̀ nKuyie mpɑ̃ɑ̃nɑ́ɑǹtì n kpɑɑ́ m mɑ́ɑ̀ ndi, díndi Bɑɑdi kó bɛpɑ̃ɑ̃bɛ̀ kɛ̀ di bo sikɔusìnɑ̀ɑ̀ nɛ̀ sipísìnùmmù (450). 
\v 23 Ti duɔ́nnɛ̀ yɛnɑɑdɑkɛ̀ yɛ̀dɛ́ɛ̀, kɛ̀ dí dɛitɛ di kpɛri dìmɑ́ɑ̀, kɛ̀ dí dì kùɔ kɛ́kékɛ́ kɛ́dɑɑ́ nyidɛí ĩ́nkɛ̀, di mɛ̀ mbɑ́ɑ́ ɑ̃nnɛ́ muhɑ̃ɑ̃́. Kɛ̀ n kùɔ n kpɛri kɛ́kékɛ́ kɛ́dɑɑ́ nyidɛí ĩ́nkɛ̀ m mɛ̀ mbɑ́ɑ́ ɑ̃nnɛ́ muhɑ̃ɑ̃́. 
\v 24 Kɛ̀ dí yú di kó dibɔɔ̀ Bɑɑdi kɛ̀ n yú ti Yiɛ̀ nKuyie. Kɛ̀ Bɑɑdi duɔnní muhɑ̃ɑ̃́ nweè tu. Kɛ̀ ti Yiɛ̀ nKuyie nkuù mɛ nduɔnní muhɑ̃ɑ̃́ nkuù tu.
\p Kɛ̀ bɛ̀ɛ yie mbɛmɔu kɛ dɔ̀: Dɛ̀ wenni. 
\v 25 Kɛ̀ Edii nɑ́kɛ́ Bɑɑdi kó bɛpɑ̃ɑ̃bɛ̀ kɛ dɔ̀: Ketɛ́nɛ̀ kɛ́tɑ̃ɑ̃tɛ́ di kó dinɑɑdɑɑ̀ kɛ yɛ̃́ díì sũmɛ̀, dí yú Bɑɑdi, di mɛ mbɑ́ɑ́ ɑ̃nnɛ́ muhɑ̃ɑ̃́.
\p
\v 26 Kɛ̀ bɛ̀ɛ túótɛ́ dinɑɑdɑɑ̀ kɛ́kuɔ kɛ́dɔɔ̀ kɛ́deè, kɛ́nyu bɛ bɔɔ̀ Bɑɑdi kɛ tú: Bɑɑdi keè ti dɑ yumɛ̀! Kɛ̀ bɛ̀ nyu dikṹnweńnì kɛ̀ diyiè yɑ̀ɑ cónnɛ́nɛ̀ yɛyɔ. Bɛ̀ í nkèè tìmɑtì yoo bɛ̀ɛ yɑ̀ mɛtɛ̃́nnímɛ̀ mɑmɛ̀, kɛ̀ bɛ̀ nhɑu kɛ ninku diwũɔ̃tɔ̀nnì ììkɛ̀. 
\v 27 Diyiè còḿmú dìì mɔ̀nnì yɛyɔ kɛ̀ Edii ndɔ́ kɛ́ bɛ̀ dɑɑ́ kɛ dɔ̀: Yúnɛ̀ mɛdiɛ̀! Bɑɑdi mɛ ntúmɛ̀ nKuyie nku, ò bo ntoti o yɛ̀mmɛ̀ mmɛ, yoo o nɔ̀ùtɛ̀ í feí, bɑ́ ò mbo kupɔ̀ɔ̀kù, yoo ò yɛ̃̀ nkɛ duɔ́, yúnɛ̀ we mɛdiɛ̀ nkòo entɛ!
\p
\v 28 Kɛ̀ bɛ̀ɛ wekii mɛdiɛ̀ nkɛ́nyɔ́únɛ̀ bɛmɑ́ɑ̀ yɛse nɛ̀ yɛkpɑ̃ɑ̃̀ nkɛ̀ mɛyĩ̀ĩ̀ nyìɛ̀, kɛ́ndònnɛ̀ bɛ̀ do mɔkɛmɛ̀ dɛ kó mɛmɑntímɛ̀. 
\v 29 Diyiè tũ̀ntɛ dìì mɔ̀nnì kɛ̀ bɛ̀ɛ ítɛ́ ihúu kɛ̀ kutoweku ndɑ́ɑ́tí kɛ yɑ̀ɑ tuɔkɛnɛ̀ kuyuoku bɛ̀ ɔ̃ɔ̃ fíé dìì mɔ̀nnì iwũɔ̃, bɛ̀ mɛ nyí nkèè tìmɑtì yoo mɛtɛ̃́nnímɛ̀ mɑmɛ̀ yoo bɛ̀ɛ yɑ̀ mɛcɑnnimɛ̀ mɑmɛ̀.
\p
\v 30 Dɛ mɔ̀nnì kɛ̀ Edii bɛ̀ nɑ̀kɛ́ kɛ dɔ̀: Tɔ́ɔ́nnɛ̀nní m borɛ̀! Kɛ̀ bɛ̀ɛ tɔ́ɔ́nní bɛmɔu o borɛ̀, kòo wɛ̃tɛ kɛ́tũntɛ ti Yiɛ̀ nKuyie nkó diwũɔ̃tɔ̀nnì dìì do pɔ̀ntɛ, 
\v 31 kɛ́deè kɛ́tuótɛ́ yɛtɑ̃́rɛ̀ tɛpíítɛ̀ nɛ̀ yɛ̀dɛ́ɛ̀ kɛ̀ yɛ̀ mbo Sɑkɔbu bí do mɑmɛ̀. Ti Yiɛ̀ nKuyie ndo nɑ̀kɛ́ wè kɛ dɔ̀: Di mmɔ̀nnì bɛ̀ yó ndɑ yu kɛ tú Isidɑyɛɛri nwe. 
\v 32 Mɛm̀mɛ Edii mɑɑ́mɛ̀ diwũɔ̃tɔ̀nnì nɛ̀ yɛtɑ̃́rɛ̀ ti Yiɛ̀ nKuyie nkpɛ́í, kɛ́keú difɔ̃̀tìrì kɛ́fitɛ́, kɑ̀ɑ bo dɛ̀ cũɔ̃́ mɛniɛ mmɛ̀ mbo dítìrì sipísìtɑ̃ɑ̃ti. 
\v 33 Kòo dɑɑ́ nyidɛí kɛ́kuɔ o nɑ̀ɑ̀fɛ̀, kɛ́kékɛ́ kɛ́nɔ́ɔ́ nyi ĩ́nkɛ̀. 
\v 34 Kɛ dɔ̀: Píɛnnɛ̀ mɛniɛ nsicee sìnɑ̀ɑ̀ kɛ̀ bɛ̀ɛ sì píɛ. Kòo dɔ̀: Cóúnnɛ̀ idɛí nɛ̀ fɛnɑ̀ɑ̀fɛ̀ dɛ ĩ́nkɛ̀. Kɛ̀ bɛ̀ɛ cóú. Kòò dɔ̀: Yíɛ́nɛ̀ kucɛ mɛdɛ́rímɛ̀.
\p Kɛ̀ bɛ̀ɛ yíɛ́. Koò dɔ̀: Yíɛ́nɛ̀ kucɛ mɛtɑ̃ɑ̃́mmɛ̀.
\p Kɛ̀ bɛ̀ɛ yíɛ́. 
\v 35 Kɛ̀ mɛniɛ mpɔ̃ntɛ́ diwũɔ̃tɔ̀nnì, kɛ́píɛ́ ndifɔ̃̀tìrì bɛ̀ keú dì kɛ fitɛ́.
\p
\v 36 Dɛ̀ tùɔ̀kɛ dìì mɔ̀nnì bɛ̀ ɔ̃ɔ̃ fíé dɛ̀ kuyuoku iwũɔ̃ kɛ̀ Edii Kuyie mpɑ̃ɑ̃nɑ́ɑǹtì nɑ́ɑǹtò tɔ́ɔ́nko bɛ borɛ̀ kɛ́bɛ́i nkɛ dɔ̀: Ti Yiɛ̀ nKuyie nhAbɑrɑhɑmmu nɛ̀ Isɑki nɛ̀ Sɑkɔbu bɛ̀ do tũ nkù, dɔɔ̀ yíe nkɛ̀ bɛnìtìbɛ̀ɛ bɑntɛ́ ɑ túmɛ̀ ti Yiɛ̀ nKuyie nyIsidɑyɛɛribɛ tũ nkù, kɛ̀ ǹ tu ɑ kóo tɔ̃ntì, kɛ̀ fɔ̃́ɔ̃̀ n nɑ̀kɛ́ kɛ̀ ǹ dɔ̀ɔ̀ m mɛ̀ ndɔ̀ɔ̀mɛ̀. 
\v 37 Ti Yiɛ̀ nKuyie ndɔɔ̀ n yɛ̃mmɛ̀, dɔɔ̀ n yɛ̃mmɛ̀! Kɛ̀ bɛnìtìbɛ̀ɛ bɑntɛ́ fɔ̃́ɔ̃̀ tumɛ̀ ti Yiɛ̀ nKuyie nkɛ ceeri bɛnìtìbɛ̀ yɛ̀mmɛ̀, kɛ̀ mɛ̀ wĩɛ̃tiní ɑ bíɛ́kɛ̀.
\p
\v 38 Kɛ̀ ti Yiɛ̀ nKuyie ncṹũnní muhɑ̃ɑ̃́ nkɛ̀ mùu cɔ́útɛ́ fɛnɑ̀ɑ̀fɛ̀ nɛ̀ idɛí kɛ́sũɔ̃too mɛniɛ mmɛ̀ɛ̀ bo difɔ̃̀tìrì miɛkɛ. 
\v 39 Kɛ̀ bɛnìtìbɛ̀ bɛmɔu yɑ̀ dɛ̀ɛ̀ dɔ̀ɔ̀ kɛ́do kɛ́sĩ́nnɔ́ɔ kɛtenkɛ̀ kɛ́bɛ́i nkɛ dɔ̀: Ti Yiɛ̀ nKuyie nkuù tu Kuyie! Ti Yiɛ̀ nKuyie nkuù tu Kuyie! 
\v 40 Kɛ̀ Edii bɛ́i nkɛ dɔ̀: Pĩ́nnɛ̀nní dibɔɔ̀ Bɑɑdi kó bɛpɑ̃ɑ̃bɛ̀, di bɑ́ɑ́ yie nkòò mɔù cokɛ́ bɑ́ òmɑ́ɑ̀.
\p Kɛ̀ bɛ̀ɛ bɛ̀ pĩ̀ńní kòo bɛ̀ kɔ̀tɛnɛ̀ Kisɔ̃ɔ̃ kó mborɛ̀ kɛ́ bɛ̀ fìé.
\s1 Fɛtɑɑfɛ̀ wɛ̃̀tɛ kɛ nimɛ̀
\p
\v 41 Mɛm̀mɛ kɛ̀ Edii nɑ́kɛ́ Akɑbu kɛ dɔ̀: Kɔtɛ kɛ́di kɛ́yɑ̃̀, n kèèmu fɛtɑɑfɛ̀ kuɔ̀mmɛ̀.
\p
\v 42 Kɛ̀ Akɑbu nkɔri kɛ bo di kɛ́yɑ̃̀. Kɛ̀ Edii ítɛ́ kɛ́dekɛ Kɑdimɛɛdi tɑ̃rì yómmɛ̀ kɛ́nsĩ́ĩ́ nkòo yuu sokɛ́ o núù nsɑ̀ku. 
\v 43 Kòo nɑ́kɛ́ o kóo tɔ̃ntì kɛ dɔ̀: Ítɛ́ kɛ́dekoo kɛ́wéntɛ́ dɑ̀mɛ́ɛ̀rì bíɛ́kɛ̀.
\p Kòo dekoo kɛ́wéntɛ́ kɛ dɔ̀: N yí yɑ̀ dɛ̀mɑrɛ̀ bɑ́ sɑ́m̀pɔ́.
\p Kɛ̀ Edii ò nɑ̀kɛ́ kɛ dɔ̀: Nwĩɛ̃ti kɛ dɔ̀ kucɛ mɛ̀yiekɛ̀. 
\v 44 Kucɛ mɛyiémmɛ̀ mɔ̀nnì kòo tɔ̃ntìi wɛ̃tɛní kóò nɑ̀kɛ́ kɛ dɔ̀: N yɑ̀mu diwɛtirì dɑ̀mɛ́ɛ̀rì bíɛ́kɛ̀ kɛ̀ dì mɑ̀nnɛ̀ tɛnɔ̀ùtɛ̀ kó mɛpɛ̃kùmɛ̀. Kɛ̀ Edii dɔ̀: Dekoo kɛ́nɑ́kɛ́ Akɑbu kòo cɑ́tínnɛ́ o sɛ̃ĩ́ tɛnɑɑsɑ̃ntɛ̀ kɛ́cútɛ́ fɛtɑɑfɛ̀ yɑ̀ɑ̀ bo ò pĩ.
\p
\v 45 Kɛ̀ dɛ̀ nyóó yíɛ́ kɛ̀ yɛwɛtɛ̀ɛ ɑ̃nnɛ́, kɛ̀ kɛĩ́nkɛ̀ɛ sɔutɛ, kɛ̀ kuyɑɑkùu fuutɛ kɛ̀ fɛtɑɑfɛ̀ɛ ni mɛdiɛ̀. Kɛ̀ Akɑbuu dekɛ o nɑɑsɑ̃ntɛ̀ kɛ́nkũnti Sisedɛɛdi. 
\v 46 Kɛ̀ ti Yiɛ̀ nKuyie nkó muwɛ̃rímúu cútɛ́ní Edii ĩ́nkɛ̀, kòo boú o nɑɑ̀kɔ̃̀nfɛ̀ kɛ́cokɛ́ kɛ́niitɛ́nɛ̀ Akɑbu kɛ́tuɔkɛ Sisedɛɛdi.
\c 19
\s1 Edii cokɛ́mɛ̀ kɛ́kɔtɛ Odɛbu tɑ̃rì
\p
\v 1 Kɛ̀ Akɑbuu nɑ́kɛ́ Sesɑbɛɛdi Edii dɔ̀ɔ̀ dɛ̀ɛ̀ kó dimɑ̀ɑ̀, nɛ̀ ò fìémɛ̀ Bɑɑdi pɑ̃ɑ̃bɛ̀ bɛmɔu. 
\v 2 Mɛm̀mɛ kɛ̀ Sesɑbɛɛdii tɔ̃ nkɛ̀ bɛ̀ɛ nɑ́kɛ́ Edii kɛ dɔ̀: Sesɑbɛɛdi tu kɛ̀ dɛ̀ nɑɑ kɑ̃́ɑ̃́kɛ́ miɛ nkòò í dɑ kùɔ ɑ kùɔ mɛ̀ɛ̀ botí Bɑɑdi pɑ̃ɑ̃bɛ̀ o bɔkɛ̀ɛ ò dɔ̀ɔ̀ yɛ̀ dɔ́mɛ̀! 
\v 3 Kɛ̀ Edii tì kèè kɛ̀ kufɔ̃wɑɑ́ nhò pĩ nkòò cokɛ́. Ò tùɔ̀kɛ dìì mɔ̀nnì Bɛɛrisebɑɑ Sudɑɑ tempɛ̃ mmiɛkɛ kɛ dɛ nyóu o kóo tɔ̃ntì, 
\v 4 kɛ́ntṹṹ kɛ centì dikpɑ́ɑ̀ miɛkɛ kɛ́tuɔkoo mutie mɑmù tɑkɛ́ kɛ́kɑroo kɛ́bekɛ Kuyie mmukṹṹ nkɛ dɔ̀: Dɛ̀ ǹ tontɛ́mu! N Yiɛ̀ nKuyie túótɛ́ n wɛ̃ǹnì, n yí wenni kɛ pɛ̃ɛ̃tɛ́ n yɛmbɛ̀.
\p
\v 5 Mɛm̀mɛ kòo duɔ́, kɛ̀ munɔndɔmmúu ò pĩ kòo yɛ̃̀ nkɛ́duɔ́. Kɛ̀ ti Yiɛ̀ nKuyie ntɔ̃nnì mɑrìi kɔtɛní kóò bɑ̀ùtɛ̀ kɛ dɔ̀: Ítɛ́ kɛ́di!
\p
\v 6 Kòo ítɛ́ kɛ́wéntɛ́ kɛ́nsɔ̃́ nkupɛ̃́mpɛ̃nkù duɔ́ o yuu do bo kùù píkù, kɛ̀ mɛniɛ nyĩ́ĩ́kú nɛ̀ didénnì, kòo kù tùótɛ́ kɛ́cɑ́ɑ́kɛ́, kɛ́yɑ̃̀ mɛniɛ nkɛ́wɛ̃tɛ kɛ́duɔ́. 
\v 7 Kɛ̀ ti Yiɛ̀ nKuyie ntɔ̃nnìi wɛ̃tɛní kucɛ mɛdɛ́rímɛ̀ kóò bɑ̀ùtɛ̀ kɛ dɔ̀: Ítɛ́ kɛ́di! A cɛ kpɑɑ́ dɛ́tirìmu mɛdiɛ̀.
\p
\v 8 Kòo ítɛ́ kɛ́di kɛ́yɑ̃̀, kɛ̀ dɛ kó tidiitìi ò duɔ́ mmuwɛ̃rímú kòo ncentì kɛ dɔ̀ iyie nsipísìnɑ̀ɑ̀, dɛyènnɛ̀ sipísìnɑ̀ɑ̀ kɛ yɑ̀ɑ tuɔkɛnɛ̀ ti Yiɛ̀ nKuyie ntɑ̃rì Odɛbu.
\s1 Ti Yiɛ̀ nKuyie mbɛnkɛmɛ̀ kumɑ́ɑ̀ Edii
\p
\v 9 Kɛ̀ Edii tuɔkoo Odɛbu tɑ̃rì kɛ́tɑ kutɑ̃dènkù kɛ bo yié nkɛ̀ ti Yiɛ̀ nKuyie nhò bɛ́innɛ̀ kɛ dɔ̀: Edii ɑ dɔ́ bɑ diɛ?
\p
\v 10 Kòo kù tɛ̃̀ńnɛ́ kɛ dɔ̀: N kɔ̃̀ntì yɑumu fɔ̃́ nti Yiɛ̀ nKuyie Mpɑkɛdɑɑ ɑ kpɛ́í nkɛ̀ dɛ̀ ǹ yóù Isidɑyɛɛribɛ dootóomɛ̀ ɑ bɛ̀ dɔ̀ɔ̀nɛ̀ mɛ̀ɛ̀ tɑummɛ̀, kɛ pùɔ nhɑ wũɔ̃tɔ̀rɛ̀, kɛ kùɔ ɑ pɑ̃ɑ̃nɑ́ɑǹtì nɑ́ɑm̀bɛ̀ kɛ̀ n kpɑɑ́ m mɑ́ɑ̀ kɛ̀ bɛ̀ dɔ́ kɛ́ n kuɔ. 
\v 11 Kɛ̀ ti Yiɛ̀ nKuyie ndɔ̀: Yɛ̀nní kɛ́cómmú ditɑ̃rì ĩ́nkɛ̀ n yììkɛ̀, n yóó pɛ̃ɛ̃tɛ́mu.
\p Mɛm̀mɛ kuyɑɑkù diɛkù ìtɛ́nímɛ̀ kɛ́nfuutí ti Yiɛ̀ nKuyie nyììkɛ̀ kɛ̀ yɛtɑ̃rɛ̀ yɑú, kɛ̀ yɛpèrɛ̀ pùɔ̀. Ti Yiɛ̀ nKuyie mɛ nyí bo dɛ miɛkɛ. Dɛ kó difɔ̃nkúò kɛ̀ kɛtenkɛ̀ɛ ɑɑ́, Kuyie mmɛ nyí mbo dɛ miɛkɛ. 
\v 12 Dɛ kó difɔ̃nkúò kɛ̀ muhɑ̃ɑ̃́ ncɔ́útɛ́, ti Yiɛ̀ nKuyie mɛ nyí mbo mu miɛkɛ. Dɛ kó difɔ̃nkúò kɛ̀ muyɑɑ́ nyɔɔ̀mmù mɑmùu tuɔ̀kɛní. 
\v 13 Edii mù kèè dìì mɔ̀nnì kɛ́kɑ̃ɑ̃́ nho yɑɑ̀bòrì o ììkɛ̀, kɛ́yɛ̀nní kɛ́ncómmú kutɑ̃dènkù bòrì, kɛ̀ ti Yiɛ̀ nKuyie nhò bɛ́innɛ̀ kɛ dɔ̀: Edii ɑ dɔ́ bɑ diɛ?
\p
\v 14 Kòo kù tɛ̃̀ńnɛ́ kɛ dɔ̀: N kɔ̃̀ntì yɑumu fɔ̃́ nti Yiɛ̀ nKuyie Mpɑkɛdɑɑ ɑ kpɛ́í nkɛ̀ dɛ̀ ǹ yóù Isidɑyɛɛribɛ dootóomɛ̀ ɑ bɛ̀ dɔ̀ɔ̀nɛ̀ mɛ̀ɛ̀ tɑummɛ̀, kɛ pùɔ nhɑ wũɔ̃tɔ̀rɛ̀, kɛ kùɔ ɑ pɑ̃ɑ̃nɑ́ɑǹtì nɑ́ɑm̀bɛ̀ kɛ̀ ǹ kpɑɑ́ m mɑ́ɑ̀, kɛ̀ bɛ̀ dɔ́ kɛ́ n kuɔ.
\p
\v 15 Kɛ̀ ti Yiɛ̀ nKuyie nhò nɑ̀kɛ́ kɛ dɔ̀: Wɛ̃tɛ kɛ́tũnnɛ kucɛ kùù yìɛ̀nɛ̀ dikpɑ́ɑ̀ kɛ kɔrì Dɑmɑɑsi. Kɑ̀ɑ tùɔ̀koo ɑ pĩ́ nhAsɑyɛɛdi tikpɑ̀tì kòò mbɑkɛ́ Sidii. 
\v 16 Kɑ̀ɑ cóú mmɛkùɔ̀ nNimmusi birɛ Seuu kóò pĩ ntikpɑ̀tì kòo mbɑkɛ́ Isidɑyɛɛribɛ. Kɑ̀ɑ pĩ́ nSɑfɑti Abɛdi-Mɛodɑɑ kou birɛ Edisee, kòo cɔutɛ́ ɑ fɔ̃̀tìrì kɛ́ntú m pɑ̃ɑ̃nɑ́ɑǹtì nɑ́ɑǹtò. 
\v 17 Kɛ̀ wèè yentɛ́nɛ̀ Asɑyɛɛdi siè Seuu ò kùɔ, kɛ̀ wèè yentɛ́nɛ̀ Seuu kpɛri Edisee ò kùɔ. 
\v 18 N soómmu Isidɑyɛɛribɛ miɛkɛ bɛnìtìbɛ̀ sikɔupísìyiekɛ̀ (7000) bɛ̀ɛ̀ í nìńkú dibɔɔ̀ Bɑɑdi tenkɑɑnìtɛ̀ ììkɛ̀ kɛ tɛ̀ dɔu nkɛ tɛ̀ wɑɑrɛ.
\s1 Edii tɑ̃ɑ̃tɛ́mɛ̀ Edisee kòo bo sɔɔtɛ́ o tɔ̃mmú
\p
\v 19 Kɛ̀ Edii kɔtɛ kɛ́yɑ̀ Sɑtɑti birɛ Edisee kɛ́sɔ̃́ nhò dùɔ̀nɛ̀ inɑ̀ɑ̀kɛ ìdɛ́ì dɛì titɔ̃ntì tɛpíítɛ̀ nɛ̀ tìdɛ́tì kòo tɔ kutɔ̃nkù tɛpíítɛ̀ nɛ̀ kudɛ́ríkù kpɛyi, kɛ̀ Edii dɑ́tɛ́ o yɑɑ̀bòrì kɛ́ dì dootóo o ĩ́nkɛ̀. 
\v 20 Kɛ̀ Edisee yóu o nɑ̀ɑ̀kɛ kɛ́cokɛ́ tũnnɛ Edii, kóò nɑ̀kɛ́ kɛ dɔ̀: Yóu kɛ̀ n kɔtɛ kɛ́cɑu n cicɛ nɛ̀ n yɔ̃ kɛ́wɛ̃tɛní kɛ dɑ tũnnɛ. Kɛ̀ Edii ò tɛ̃̀ńnɛ́ kɛ dɔ̀: Kɔtɛ kɛ nɛ́ nyɛ̃́ n dɑ dɔ̀ɔ̀ dɛ̀.
\p
\v 21 Kɛ̀ Edisee kɔtɛ kɛ́túótɛ́ inɑ̀ɑ̀kɛ ò do duɔ̀nɛ̀ ì, kɛ́ i fèútɛ́ ti Yiɛ̀ nKuyie nkɛ́túótɛ́ kudɔú ì do bukú kù kɛ́tɔtìnnɛ kɛ́ ì bèńnɛ́, kɛ́duɔ́ nho kɔbɛ kɛ̀ bɛ̀ɛ cɑ́ɑ́kɛ́. Kòo ítɛ́ kɛ́tũnnɛ Edii kɛ́ntú o kóo tɔ̃ntì.
\c 20
\s1 Sidii kóo kpɑ̀ɑ̀tì pimɛ̀ Sɑmmɑrii
\p
\v 1 Kɛ̀ Sidii kóo kpɑ̀ɑ̀tì Bɛnni-Adɑdii tíí mbɛhɑ̃ɑ̃pɔ̀mbɛ̀ bɛmɔu, kɛ̀ bɛkpɑ̀ɑ̀tìbɛ̀ sipísìtɑ̃ɑ̃ti nɛ̀ bɛ̀dɛ́bɛ̀ nhò bonɛ̀ nɛ̀ sisɛ̃ĩ́ nɛ̀ sikpɑ̀rìnɑɑsɛ̃ĩ́ kɛ̀ bɛ̀ɛ kɔtɛ kɛ́pi Sɑmmɑrii kóo do. 
\v 2 Kòo tɔ̃ nkɛ̀ bɛ̀ɛ nɑ́kɛ́ Akɑbu Isidɑyɛɛribɛ kóo kpɑ̀ɑ̀tì dihɛì miɛkɛ kɛ dɔ̀: 
\v 3 Bɛnni-Adɑdi tu weè te ɑ mɑ́tì pɛ́ítì nɛ̀ ɑ sɔɔ, nɛ̀ ɑ pobɛ̀ nɛ̀ ɑ nitidɑbí sɑ̀ɑ̀yì. 
\v 4 Kɛ̀ Isidɑyɛɛribɛ kóo kpɑ̀ɑ̀tìi ò tɛ̃̀ńnɛ́ kɛ dɔ̀: Okpɑ̀ɑ̀tì n yiemmu ɑ bɛ́i ntì, fɔ̃́ɔ̃̀ n te nɛ̀ n kpɛrɛ dɛmɔu. 
\v 5 Kɛ̀ bɛ̀ do tɔ̃nní bɛ̀ɛ yíɛ́ wɛ̃tɛní Isidɑyɛɛribɛ kóo kpɑ̀ɑ̀tì borɛ̀ kóò nɑ̀kɛ́ kɛ dɔ̀: Bɛnni-Adɑdi tu, ò do yɛ̃ nhɑ́ ò duɔ́ nhɑ mɑ́tì pɛ́ítì nti nɛ̀ ɑ sɔɔ nnɛ̀ ɑ pobɛ̀ nɛ̀ ɑ bí. 
\v 6 Dɛ̀ nɑɑ bo nkɑ̃́ɑ̃́kɛ́ miɛ nkòò tɔ̃nní o tɔ̃mbɛ̀ kɛ̀ bɛ̀ɛ tɑ ɑ cĩ́ɛ̃̀tɛ̀ nɛ̀ ɑ tɔ̃mbɛ̀ kpɛsi, kɛ́kuti, kɛ́túótɛ́ ɑ yɛ̀mmɛ̀ nɑɑtinɛ̀ dɛ̀.
\p
\v 7 Kɛ̀ Isidɑyɛɛribɛ kóo kpɑ̀ɑ̀tìi tíí nho ɛì kó bɛkótíbɛ̀, kɛ́ bɛ̀ nɑ̀kɛ́ kɛ dɔ̀: Bɑntɛ́nɛ̀ kɛ dò nhonìtì yie nni ndɔ́nɛ̀ mɛyɛi mmɛ, ò m bekɛ m pobɛ̀ nɛ̀ m bí, timɑ́tì pɛ́ítì nɛ̀ mɛsɔɔ m mɛ nyí yetɛ.
\p
\v 8 Kòo ɛì kó bɛkótíbɛ̀ɛ ò nɑ̀kɛ́ kɛ dɔ̀: Ntì bùútí! A bɑ́ɑ́ tì yie.
\p
\v 9 Kòo nɑ́kɛ́ Bɛnni-Adɑdi kó yɛtɔ̃rɛ̀ kɛ dɔ̀: Kɔtɛnɛ̀ kɛ́nɑ́kɛ́ okpɑ̀ɑ̀tì kɛ tú: N yɛ̃ nhò m bekɛ tì mɛketimɛ̀ m bo tì dɔ̀ɔ̀, tiì ntii m bɑ́ɑ́ nɑ kɛ́ tì dɔ̀ɔ̀.
\p Kɛ̀ bɛ̀ɛ kɔtɛ kɛ́ tì nhò nɑ̀kɛ́. 
\v 10 Mɛm̀mɛ kɛ̀ Bɛnni Adɑdii tɔ̃ nkɛ̀ bɛ̀ɛ ò nɑ̀kɛ́ kɛ dɔ̀: Bɛnni-Adɑdi tu: Kòò pɔ̀ntɛ Sɑmmɑrii, kòo tɑ̃́ɑ̃́ nsɑ̀nnɛ̀ bɛ̀ɛ̀ ò nɛinɛ̀ bɛ̀ bo pikúmɛ̀ bɑ́ wè dinɑcɛkutiri o bɔkɛ̀ɛ ò dɔ̀ɔ̀ yɛ̀ dɔ́mɛ̀. 
\v 11 Kɛ̀ Isidɑyɛɛribɛ kóo kpɑ̀ɑ̀tìi bɛ̀ nɑ̀kɛ́ kɛ dɔ̀: Kɔtɛnɛ̀ kóò nɑ̀kɛ́ kɛ dɔ̀: Bɛ̀ ɔ̃ɔ̃ í nkɔ̃ti kɛ euti.
\p
\v 12 Bɛnni-Adɑdi tì kèè dìì mɔ̀nnì kɛ sɔ̃́ mbɛ̀ kɑ̀ri bɛ touti kɛ yɔ̃ mmɛnɑɑ̀ nwenwe nɛ̀ bɛkpɑ̀ɑ̀tìbɛ̀ bɛ̀ɛ̀ do ò bonɛ̀. Kòo pɛ́i nho ɑ̃ɑ̃pɔ̀mbɛ̀ kɛ dɔ̀: Bɑ́ wè wèe kɔtɛ o cónnì! Mɛm̀mɛ kɛ̀ bɛ̀ɛ cómmú kɛ́wetínnɛ́ dihɛì.
\s1 Isidɑyɛɛribɛ nɑmɛ̀ Bɛnni-Adɑdi
\p
\v 13 Mɛm̀mɛ kɛ̀ Kuyie mpɑ̃ɑ̃nɑ́ɑǹtì nɑ́ɑǹtò mɔùu kɔtɛní Isidɑyɛɛribɛ kóo kpɑ̀ɑ̀tì Akɑbu borɛ̀, kóò nɑ̀kɛ́ kɛ dɔ̀: A wúó nkunitisṹkù kuu nɑɑ̀? Ti Yiɛ̀ nKuyie ntu kù bɛ̀ ndɑ duɔ́mmu kɛ̀ dɛ̀ bo yie kɑ̀ɑ bɑntɛ́ kɛ do nkù tú ti Yiɛ̀ nKuyie.
\p
\v 14 Kɛ̀ Akɑbu dɔ̀: Nɛ̀ we mborɛ̀ ndɛ kù yóó bɛ̀ nti duɔ́mmɛ̀? Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò dɔ̀: Ti Yiɛ̀ nKuyie ntu bɛ̀ɛ̀ bɑkɛ́ itempɛ̃ nnɛ̀ bɛ kó bɛhɑ̃ɑ̃pɔ̀mbɛ̀ borɛ̀ ndɛ. Kɛ̀ Akɑbu dɔ̀: We nyóó ketɛ́ mudoò? Kɛ̀ Kuyie mpɑ̃ɑ̃nɑ́ɑǹtì nɑ́ɑǹtò dɔ̀: Fɔ̃́ nwe.
\p
\v 15 Kɛ̀ Akɑbuu kɑɑ mbɛ̀ɛ̀ bɑkɛ́ itempɛ̃ nnɛ̀ bɛ kó bɛhɑ̃ɑ̃pɔ̀mbɛ̀ kɛ̀ bɛ̀ mbo sikɔusìdɛ́ nɛ̀ sipísìtɑ̃ɑ̃ti nɛ̀ bɛ̀dɛ́bɛ̀ (232). Dɛ kó difɔ̃nkúò kɛ́kɑɑ mbɛhɑ̃ɑ̃pɔ̀mbɛ̀ nɛ̀ Isidɑyɛɛribɛ bɛmɔu kɛ̀ bɛ̀ mbo sikɔupísìyiekɛ̀ (7000). 
\v 16 Kɛ̀ bɛ̀ɛ yɛ̀nní kɛ bo bɛ̀ do, kɛ sɔ̃́ ndiyiè còḿmú yɛyɔ, kòo kpɑ̀ɑ̀tì Bɛnni-Adɑdi nɛ̀ o kɔbɛ bɛkpɑ̀ɑ̀tìbɛ̀ sipísìtɑ̃ɑ̃ti nɛ̀ bɛ̀dɛ́bɛ̀ bɛ̀ɛ̀ do ò bonɛ̀ kɛ̀ bɛ̀ kɑ̀ri bɛ touti miɛkɛ kɛ yɔ̃ mmɛnɑɑ̀ nkɛ muɔ̀. 
\v 17 Bɛ̀ɛ̀ ni itempɛ̃ nnɛ̀ bɛ kó bɛhɑ̃ɑ̃pɔ̀mbɛ̀ bɛɛ̀ do niitɛ́ kɛ́yɛ̀nní. Kɛ̀ bɛ̀ɛ tɔ̃ nkɛ̀ bɛ̀ɛ nɑ́kɛ́ Bɛnni-Adɑdi kɛ dɔ̀: Bɛnìtìbɛ̀ yɛ̀nní Sɑmmɑrii. 
\v 18 Kòo dɔ̀: Kɛ̀ bɛ̀ yɛ̀nní kɛ dɔ́ ti nɑrikɛmu dí bɛ̀ pĩ ndi bɑ́ɑ́ bɛ̀ kùɔ, kɛ̀ bɛ̀ mɛ ndɔ́ mudoò mmu di bɛ̀ pĩ ndi bɑ́ɑ́ bɛ kùɔ.
\p
\v 19 Bɛ̀ɛ̀ bɑkɛ́ itempɛ̃ mbɛ kó bɛsɑ́m̀pɔ́bɛ̀, bɛɛ̀ do ketɛ́ kɛ́yɛ̀nní kɛ̀ bɛhɑ̃ɑ̃pɔ̀mbɛ̀ sɔmbɛ mbɛ̀ tũ. 
\v 20 Bɑ́ wè kòo potɛ́ o dootitɔù kɛ̀ bɛ̀ɛ cokɛ́ kɛ̀ Isidɑyɛɛribɛɛ bɛ̀ bɛ̀ti, kɛ̀ bɛ kóo kpɑ̀ɑ̀tì Bɛnni-Adɑdii dekɛ o sɑ̃ntɛ̀ kɛ́cokɛ́. 
\v 21 Kɛ̀ Isidɑyɛɛribɛ kóo kpɑ̀ɑ̀tìi yɛ̀nní kɛ́túótɛ́ sisɛ̃ĩ́ nɛ̀ sikpɑ̀rìnɑɑsɛ̃ĩ́ kɛ́ɑutɛ́ Sidii kóo kpɑ̀ɑ̀tì mɛdiɛ̀.
\s1 Akɑbu wɛ̃̀tɛ kɛ nɑmɛ̀ Sidii kóo kpɑ̀ɑ̀tì
\p
\v 22 Mɛm̀mɛ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò kɔ̀tɛmɛ̀ Isidɑyɛɛribɛ kóo kpɑ̀ɑ̀tì borɛ̀ kóò nɑ̀kɛ́ kɛ dɔ̀: A kɔ̃̀ntì bɑ́ɑ́ yɑ̃rikɛ, dɑɑtɛ kɛ́yɑ̀ ɑ yóó dɔɔ̀mɛ̀, dibenni yó nfitiní kɛ̀ Sidii kóo kpɑ̀ɑ̀tìi wɛ̃tɛ kɛ́ dɑ domu.
\p
\v 23 Kɛ̀ Sidii kɔbɛɛ nɑ́kɛ́ bɛ kóo kpɑ̀ɑ̀tì kɛ dɔ̀: Akɑbu nɛ̀ o kɔbɛ bɛ Yiɛ̀ nKuyie ntu yɛtɑ̃rɛ̀ kɔku nku, dɛɛ̀ te kɛ̀ bɛ̀ ti nɑ, ti bɛ̀ do kubiriku ti yóó bɛ̀ nɑmu. 
\v 24 Ntɛ ɑ dò nkɛ́dɔɔ̀mɛ̀: A dennɛ bɛkpɑ̀ɑ̀tìbɛ̀ kɛ́túótɛ́ bɛ̀ɛ̀ ni itempɛ̃ nkɛ́cónnɛ́ bɛ fɔ̃̀tɛ̀, 
\v 25 kɛ́pĩ́mmú bɛhɑ̃ɑ̃pɔ̀mbɛ̀ kɛ̀ bɛ̀ nsũ kɛ mɑ̀nnɛ̀ ɑ do mɔkɛ bɛ̀, nɛ̀ sisɛ̃ĩ́ nɛ̀ sikpɑ̀rìnɑɑsɛ̃ĩ́ kɛ̀ tí bɛ̀ do kubiriku ti yóó bɛ̀ nɑmu.
\p Kòo yie mbɛ kpɛti. 
\v 26 Mɛm̀mɛ kɛ̀ dibenni nfitiní kɛ̀ Bɛnni-Adɑdii tíí nSidii kɔbɛ, kɛ̀ bɛ̀ɛ kɔtɛ Afɛki kɛ bo do Isidɑyɛɛribɛ mudoò. 
\v 27 Kɛ̀ Isidɑyɛɛribɛɛ tíí mbɛtɔbɛ̀ kɛ́wɑɑ́ ntidiitì kɛ́nkɔri kɛ bo dokɛ́nɛ̀ Sidii kɔbɛ, kɛ́tuɔkoo kɛ́bɑ́tɛ́ bɛ ììkɛ̀, kɛ́nkɑri kɛ mɑ̀nnɛ̀ tibɔcɛ̃nti sɑ́m̀pɔ́tì tìdɛ́tì. Kɛ̀ Sidii kɔbɛ pitɛ́ kɛtenkɛ̀ kɛmɔu. 
\v 28 Kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtòo nɑ́kɛ́ Isidɑyɛɛribɛ kóo kpɑ̀ɑ̀tì kɛ dɔ̀: ti Yiɛ̀ nKuyie ntu Sidii kɔbɛ mɛ̀ mbɛ́immɛ̀ kɛ yɛ̃ nkù tu yɛtɑ̃rɛ̀ kɔku nku kɛ̀ ku í bo kubiriku, kù ɑ̃nnɛ́ dɛ kó ditĩ̀nnì dimɔu ɑ nɔu miɛkɛ nkɛ. Kɛ̀ dɛ̀ bo yie nkɑ̀ɑ bɑntɛ́ kɛ do nkù tu ti Yiɛ̀ nKuyie. 
\v 29 Kɛ̀ bɛ̀ nkɑri kɛ wetí bɛtɔbɛ̀ kɛ dɔ̀ yɛwe yɛ̀yiekɛ̀. Dɛ kó difɔ̃nkúò kɛ̀ mudoò ketɛ́ kɛ̀ Isidɑyɛɛribɛɛ kuɔ Sidii kó bɛhɑ̃ɑ̃pɔ̀mbɛ̀, tɛkɔupíkɔ̀ùpíítɛ̀ (100000) diyiè dìmɑ́ɑ̀. 
\v 30 Kɛ̀ bɛsɔmbɛ bɛ̀ɛ̀ do kpɑɑ́ fòù kɛ̀ bɛ̀ɛ cokɛ́ kɛ́tɑ Afɛki ɛì kɛ̀ kuduotíi donní kɛ́ bɛ̀ yɑ̃̀kɛ.
\s1 Akɑbu coommɛ̀ Sidii kɔbɛ kóo kpɑ̀ɑ̀tì
\p Bɛ̀ do bo sikɔupípísìdɛ́ nɛ̀ sikɔupísìyiekɛ̀ (27000) ndi. Dɛ̀ do sɔ̃́ mBɛnni-Adɑdi cokɛ́mu kɛ tɑ dihɛì tɛcĩ́ɛ̃̀tɛ̀ mɑtɛ̀ kɛ sɔri kufɑ̃́ɑ̃́ mmiɛkɛ. 
\v 31 Kòo kɔbɛɛ ò nɑ̀kɛ́ kɛ dɔ̀: Ti kèè kɛ̀ bɛ̀ tu Isidɑyɛɛribɛ kó bɛkpɑ̀ɑ̀tìbɛ̀ mɔ̀kɛ bɛnìtìbɛ̀ kó mɛsémmɛ̀ mmɛ. Ti yóó yi tifɔ̀ɔ̀tɔ̃̀ntì nti kɛ́mpĩ́ nti yɔ kɛ́kɔtɛ kóò yɑ̀, kɛ̀ dɛ̀ nɑɑti ò dɑ yóu kɑ̀ɑ nfòù.
\p
\v 32 Mɛm̀mɛ kɛ̀ bɛ̀ɛ yi tifɔ̀ɔ̀tɔ̃̀ntì, kɛ́mpĩ́ mbɛ yɔ, kɛ́kɔtɛ Isidɑyɛɛribɛ kóo kpɑ̀ɑ̀tì borɛ̀ kóò nɑ̀kɛ́ kɛ dɔ̀: A kóo tɔ̃ntì Bɛnni-Adɑdi weè tu ɑ́ yóu kòo nfòù. Kòo bɛ̀ tɛ̃̀ńnɛ́ kɛ dɔ̀: Ò kpɑɑ́ fòùmɑɑ̀? Ò tu n tebitɛ ntɛ.
\p
\v 33 Kɛ̀ bɛ̀ɛ bɑntɛ́ o yɛ̀mmɛ̀ kɛ́poo nhò yĩmù kɛ dɔ̀: Bɛnni-Adɑdi tu ɑ tebitɛ ntɛ. Kɛ̀ Akɑbu dɔ̀: Kɔtɛnɛ̀ kóò yuní! Kɛ̀ Bɛnni-Adɑdii tuɔkɛní kòo ò dèe nho kpɑ̀rìnɑɑsɑ̃ntɛ̀ ĩ́nkɛ̀. 
\v 34 Kɛ̀ Bɛnni-Adɑdii ò nɑ̀kɛ́ kɛ dɔ̀: M bo dɑ tɛ̃́nnɛ́ n cicɛ do fìètɛnɛ̀ yɛ̀ɛ̀ ɛkɛ̀ ɑ cicɛ, kɑ̀ɑ dɔɔ̀ yɛkɑ̃̀ɑ̃̀tɛ̀ Dɑmɑɑsi kɛ́ndònnɛ̀ n cicɛ dɔ̀ɔ̀mɛ̀ Sɑmmɑrii. Kɛ̀ Akɑbu dɔ̀: N yóó dɑ fĩ́ĩnkomu, ti nɛ́ dò nkɛ́dɔɔ̀ mɛtɑummɛ̀ mmɛ.
\p Mɛm̀mɛ Akɑbu ò dɔ̀ɔ̀nɛ̀mɛ̀ mɛtɑummɛ̀ kóò fĩ́ĩnko.
\s1 Kuyie mpɑ̃ɑ̃nɑ́ɑǹtì nɑ́ɑǹtò mɔù nɑ̀kɛ́mɛ̀ Akɑbu ò dɔ̀ɔ̀ dɛ̀ í wennimɛ̀
\p
\v 35 Kɛ̀ ti Yiɛ̀ nKuyie nnɑ́kɛ́ ku pɑ̃ɑ̃nɑ́ɑǹtì nɑ́ɑm̀bɛ̀ miɛkɛ òmɔù kɛ dɔ̀ wèe nɑ́kɛ́ otɔù kòo ò potɛ́. Kòo ò nɑ̀kɛ́ kɛ dɔ̀: Ti Yiɛ̀ nKuyie ntu ɑ́ m potɛ́! Kòo nɛ́poo yetɛ, ò í nhò potɛ́. 
\v 36 Kòo ò nɑ̀kɛ́ kɛ dɔ̀: A í mɛ̀ nyiemmɛ̀ ti Yiɛ̀ nKuyie ndɑ nɑ̀kɛ́ tì, dicìrícìrì bo dɑ kuɔ.
\p Kòo ítóo kɛ́conɛ̀ dicìrícìrì kɛ̀ dìi ò pĩ nkɛ́kuɔ. 
\v 37 Kɛ̀ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtòo kɔtɛ kɛ́yɑ̀ otɔù kɛ dɔ̀: M potɛ́! Kòo ò potɛ́ kóò kɔ̀ùtɛ. 
\v 38 Kòo kɔtɛ kɛ́mbɑɑ okpɑ̀ɑ̀tì kucɛ. Ò do boú kuyɑ̀ɑ̀kù nku o ììkɛ̀, dɛ̀ í ndò nhokpɑ̀ɑ̀tì bo nɑ kóò bɑntɛ́. 
\v 39 Kòo kpɑ̀ɑ̀tì mpɛ̃nkɛ́, kòo kuɔ́nko kɛ dɔ̀: Okpɑ̀ɑ̀tì! Mí nhɑ kóo tɔ̃ntì n do bo mudoò miɛkɛ nkɛ, kòò mɔùu yɛ̀nní fɛkpɑ̀rìnɑfɛ miɛkɛ kɛ tɔ onìtì kɛ wè nni nduɔ́ nkɛ yɛ̃ nní nhò bɑ̀ɑ, kɛ̀ ǹ yóu kòò cokɛ́, mí nwe bɛ̀ yóó kuɔmɛ̀, kɛ̀ mɛɛ̀ dɔkɛ n yietí mɛdítíbii nsikɔupísìtɑ̃ɑ̃ti (3000). 
\v 40 Okpɑ̀ɑ̀tì mí nhɑ kóo tɔ̃ntì n nɔ̀ùtɛ̀ í nfeí, kòo cokɛ́. Kòo kpɑ̀ɑ̀tì dɔ̀: A bekɛ́nɛ̀ ɑmɑ́ɑ̀ ndi.
\p
\v 41 Kòo dɛitɛ kuyɑ̀ɑ̀kù kùù do boú o ììkɛ̀. Kɛ̀ Isidɑyɛɛribɛ kóo kpɑ̀ɑ̀tìi bɑntɛ́ ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ kóò mɔù nwe mɛ̀. 
\v 42 Kòo nɑ́kɛ́ okpɑ̀ɑ̀tì kɛ dɔ̀: Ti Yiɛ̀ nKuyie ntu, ɑ mɛ̀ nyóumɛ̀ onìtì kù do yɛ̃ mbɛ̀ɛ kuɔ wè. Fɔ̃́ɔ̃̀ yóó cómmú o fɔ̃̀tìrì, kɑ̀ɑ nìtìbɛ̀ɛ cómmú o kɔbɛ fɔ̃̀tìrì.
\p
\v 43 Kɛ̀ Isidɑyɛɛribɛ kóo kpɑ̀ɑ̀tì ììkɛ̀ɛ sɔutɛ, kòo kò nho ciɛ Sɑmmɑrii nɛ̀ kɛmiɛkɛ.
\c 21
\s1 Nɑbɔti yetɛmɛ̀ ò bo duɔ́mmɛ̀ o pɑku Akɑbu
\p
\v 1 Ntɛ tìì do dɔ̀ɔ̀ dɛ kó difɔ̃nkúò: Sisedɛɛdi ɛì kou mɔù weè do bo kòo yètìrì tu Nɑbɔti, kòo pɑku tɔ́kɛ́nɛ̀ Sɑmmɑrii kóo kpɑ̀ɑ̀tì Akɑbu cĩ́ɛ̃̀tɛ̀. 
\v 2 Diyiè mɑrì kɛ̀ Akɑbuu ò nɑ̀kɛ́ kɛ dɔ̀: N duɔ́ nhɑ pɑku kɛ̀ n dɔɔ̀ mupérímù kù mɛ ntɔ́kɛ́nɛ̀mɛ̀ n cĩ́ɛ̃̀tɛ̀, m bo dɑ duɔ́ nkupɑku tɛkù kùù kù pɛ̃ɛ̃tɛ́, kɑ̀ɑ mɛ ndɔ́ n kù dontɛ́.
\p
\v 3 Kɛ̀ Nɑbɔtii nɑ́kɛ́ Akɑbu kɛ dɔ̀: Ti Yiɛ̀ nKuyie mbɑ́ɑ́ yie nkɛ̀ n dɑ duɔ́ n yɛmbɛ̀ tenkɛ̀ ti Yiɛ̀ nKuyie mbɛ̀ duɔ́ nkɛ̀.
\p
\v 4 Mɛm̀mɛ kɛ̀ Akɑbu ììkɛ̀ sɔutɛ́ kòo ítɛ́ nɛ̀ kɛmiɛkɛ Nɑbɔti ò nɑ̀kɛ́ tìì nɑ́ɑǹtì kpɛ́í nkɛ tú ò í yóó ò duɔ́ nho yɛmbɛ̀ kó kɛtenkɛ̀ ti Yiɛ̀ nKuyie mbɛ̀ duɔ́ nkɛ̀. Nɛ̀ dɛ kpɛ́í nkòò nduɔ́ kɛ cĩmmu o ììkɛ̀ o dɔ́ù ĩ́nkɛ̀ kɛ́yetɛ mudiì. 
\v 5 Kòo pokù Sesɑbɛɛdii o bekɛ kɛ dɔ̀: A yɛ̀mmɛ̀ cɑ̀ɑ̀rɛ̀nɛ̀ bɑ? Dɛ̀ dòmmɛ kɑ̀ɑ yetɛ mudiì? 
\v 6 Kòo ò tɛ̃̀ńnɛ́ kɛ dɔ̀: M bɛ́innɛ̀ Nɑbɔti nwe Sisedɛɛdi ɛì kou kɛ tú ò n fítɛ́nɛ̀ o pɑku, kòo mɛ ndɔ́ nhò cèètɛ kutɛkù. Kòo yetɛ kɛ tú ò í yó n duɔ́ nho pɑku.
\p
\v 7 Kòo pokù dɔ̀: Kɛ̀ fɔ̃́ɔ̃̀ bɑɑ tú Isidɑyɛɛribɛ kóo kpɑ̀ɑ̀tɑ̀ɑ̀? Ítɛ́ kɛ́di! Cɑ́tinnɛ ɑ yɛ̀mmɛ̀, mí n yóó kù ndɑ duɔ́mmu.
\p
\v 8 Mɛm̀mɛ kɛ̀ Sesɑbɛɛdii wɑ̃ri yɛpɑ́tɛ nɛ̀ okpɑ̀ɑ̀tì yètìrì kɛ́ĩkú okpɑ̀ɑ̀tì kó mɛcɑnnimɛ̀, kɛ́ yɛ̀ duɔ́ ndihɛì kó bɛkótíbɛ̀ nɛ̀ muwɛ̃rímú yɛmbɛ̀ bɛ̀ɛ̀ bo Nɑbɔti bo dìì ɛì. 
\v 9 Ò do wɑ̃̀ri tì dɛ kó yɛpɑ́tɛ miɛkɛ tiì tu: Dɔúnnɛ̀ mɛnùboúmmɛ̀ kó diyiè, kɛ̀ dì tùɔ̀kɛ di kɑnnɛ Nɑbɔti dɛ ììkɛ̀, 
\v 10 kɛ́kɑnnɛ bɛnitiyonkubɛ o ììkɛ̀ bɛ̀ɛ̀ yóó yĩ́ ò sɑ̃̀ɑ̃́ nti Yiɛ̀ nKuyie nku nɛ̀ okpɑ̀ɑ̀tì, kɛ̀ dí ò dènnɛ ditowɑɑ̀ kóò bùɔ́tí yɛtɑ̃́rɛ̀ kɛ́kuɔ.
\p
\v 11 Kɛ̀ Nɑbɔti ɛì kó bɛkótíbɛ̀ nɛ̀ muwɛ̃rímú yɛmbɛ̀ kɛ̀ bɛ̀ɛ dɔɔ̀ Sesɑbɛɛdi bɛ̀ wɑ̃̀ri yɛ̀ɛ̀ pɑ́tɛ yɛ̃ mmù. 
\v 12 Kɛ̀ bɛ̀ɛ dɔú mmɛnùboúmmɛ̀ kó diyiè kɛ̀ dìì tuɔkɛ kɛ̀ bɛ̀ɛ kɑnnɛ Nɑbɔti ditĩ̀nnì ììkɛ̀. 
\v 13 Kɛ̀ bɛnitiyonkubɛ bɛ̀dɛ́bɛ̀ɛ kɑri kóò wetínnɛ́ kɛ bɛ́i nkɛ dɔ̀: Nɑbɔti sɑ̃̀ɑ̃́ nti Yiɛ̀ nKuyie nku nɛ̀ okpɑ̀ɑ̀tì.
\p Mɛm̀mɛ kɛ̀ bɛ̀ɛ ò dènnɛ dihɛì kóò bùɔ́tí yɛtɑ̃́rɛ̀ kɛ́kuɔ. 
\v 14 Kɛ̀ bɛ̀ɛ deè kɛ́tɔ̃ nkɛ̀ bɛ̀ɛ nɑ́kɛ́ Sesɑbɛɛdi kɛ dɔ̀: Ti bùɔ́tímu Nɑbɔti yɛtɑ̃́rɛ̀ kɛ kùɔ. 
\v 15 Sesɑbɛɛdi kèè dìì mɔ̀nnì Nɑbɔti kumɛ̀ kɛ́nɑ́kɛ́ Akɑbu kɛ dɔ̀: Ítɛ́ kɛ́túótɛ́ Nɑbɔti Sisedɛɛdi kou pɑku ò do yɛ̃ nhò í yóó dɑ fítɛ́nɛ̀ kù. Ò kumu, ò tɛ̃́nkɛ í kpɑɑ́ fòù.
\p
\v 16 Kɛ̀ Akɑbuu tì kèè kɛ́ítɛ́ kɛ́kɔtɛ Nɑbɔti Sisedɛɛdi kou pɑku borɛ̀ kɛ bo kù tùótɛ́ kɛ́tiekɛ.
\s1 Kuyie nkpɑnnɛ̀mɛ̀ Akɑbu nɛ̀ Sesɑbɛɛdi
\p
\v 17 Kɛ̀ ti Yiɛ̀ nKuyie mbɛ́innɛ̀ Edii Tisibiti ɛì kou kɛ dɔ̀: 
\v 18 Ítɛ́ kɛ́kɔtɛ Sɑmmɑrii kɛ́yɑ̀ Isidɑyɛɛribɛ kóo kpɑ̀ɑ̀tì Akɑbu, kòo bo Nɑbɔti pɑku miɛkɛ, ò kɔ̀tɛ kɛ bo kù tùótɛ́mu kɛ́tiekɛ. 
\v 19 Kɔtɛ kóò nɑ̀kɛ́ kɛ dɔ̀: N tú ò kùɔ onìtì kɛ dèè kɛ tóú o pɑku yɑ́ɑ̀bɑ? Nɛ̀ dɛ kpɛ́í mmí ndi Yiɛ̀ nKuyie m bɛ́immu kɛ tú simɔɔ́ dìɛ́ dɛ̀ Nɑbɔti yĩ̀ĩ̀ nsì yóó dɛ ndíɛ́ o kɔ̃mɛ. Kɛ̀ Edii kɔtɛ kɛ́yɑ̀ Akɑbu.
\p
\v 20 Kɛ̀ Akɑbu dɔ̀: Edii n dootitɔù ɑ wɛ̃̀tɛ kɛ m pĩ̀ḿmɑɑ̀? Kɛ̀ Edii dɔ̀: Ɛ̃ɛ̃, n dɑ pĩ̀ḿmu kɛ́yɛ̃́ ɑ dɔ̀ɔ̀mɛ̀ ti Yiɛ̀ nKuyie nyí dɔ́ dɛ̀ kɛ sɔ̀nnɛ. 
\v 21 Kuyie ntu kù yóó duɔ́ nkɛ̀ mɛyɛi mmɛɛ̀ dɑ́ tuɔkɛní, kù yóó kɑ́útɛ́mu ɑ kó kubotí. A cĩ́ɛ̃̀tɛ̀ miɛkɛ òmɔù í yó nkpɑɑ́, onitidɔ̀ù yoo kudɑɑkù yoo wèè te omɑ́ɑ̀. 
\v 22 Kù yóó dɔɔ̀ ɑ cĩ́ɛ̃̀tɛ̀ kù dɔ̀ɔ̀ mɛ̀mmɛ Nɛbɑti birɛ Sedoboɑmmu kpɛtɛ nɛ̀ Aiyɑ birɛ Bɑsɑɑ kɛ yɛ̃́ ɑ tɑnnɛ́mɛ̀ Isidɑyɛɛribɛ mɛyɛi mmiɛkɛ kɛ íi ti Yiɛ̀ nKuyie mmiɛkɛ. 
\v 23 Kɛ̀ ti Yiɛ̀ nKuyie n nɑ̀kɛ́ tìì yóó tuɔkɛní Sesɑbɛɛdi kɛ dɔ̀: Simɔɔ́ siì yóó cɑ́ɑ́kɛ́ Sesɑbɛɛdi kupɑku bɛ̀ tú ku Sisedɛɛdi ku miɛkɛ. 
\v 24 Akɑbu cĩ́ɛ̃̀tɛ̀ kou wèè bo ku dihɛì miɛkɛ simɔɔ́ siì yóó ò cɑ̀ɑ́kɛ́, kɛ̀ wèè kú dikpɑ́ɑ̀ tinɔ̀tìi ò cɔ̀.
\p
\v 25 Òmɔù í bo wèè duɔ́ nhomɑ́ɑ̀ mɛyɛi ndɔɔ̀rìmù Akɑbu tɛ̃mɛ̀ kɛ dɔɔri ti Yiɛ̀ nKuyie nyí dɔ́ dɛ̀ kɛ sɔri. O pokù Sesɑbɛɛdi weè do ɔ̃ɔ̃ duɔ́ nkòò mɛ̀ dɔ̀ɔ̀. 
\v 26 Kòò dɔɔ̀ isɔkɛ dihɛì ò fìémɛ̀ yɛbɔkɛ̀ Amɔriibɛ do dɔɔ̀rìmɛ̀, kɛ̀ ti Yiɛ̀ nKuyie mbɛ̀ bɛ̀ti kɛ kɑ̀nnɛ Isidɑyɛɛribɛ.
\s1 Akɑbu bɑntɛ́mɛ̀ o yɛi nkɛ cèètɛ
\p
\v 27 Mɛm̀mɛ kɛ̀ Akɑbuu keè dɛ kó tinɑ́ɑǹtì kɛ́kɛ̃tɛ́ o yɑɑ̀bòrì kɛ́dɑ́ɑ́tí kufɔ̀ɔ̀tɔ̃̀nkù mɑ́ɑ̀, kɛ́boú dinùù, kɛ́ndɔunɛ̀ dɛ kó kufɔ̀ɔ̀tɔ̃̀nkù, kòò ìtɛ́ wèe bɑ́nnɛ́ kɛ́nkérí mɛyɔɔ̀mmɛ̀. 
\v 28 Mɛm̀mɛ kɛ̀ ti Yiɛ̀ nKuyie mbɛ́innɛ̀ Edii Tisibiti ɛì kou kɛ dɔ̀: 
\v 29 A yɑ̀ Akɑbu kɛ̃́kùnnɛmɛ̀ omɑ́ɑ̀ n yììkɑ̀ɑ̀? Ò mɛ n kɛ̃́kùnnɛmɛ̀ omɑ́ɑ̀ n yììkɛ̀, n tɛ̃́nkɛ bɑ́ɑ́ yóu kɛ̀ mɛyɛi ntuɔkɛní o kó dimɔ̀nnì, o birɛ kó dimɔ̀nnì ndi n yóó yóumɛ̀ kɛ̀ mɛyɛi ntuɔkɛní o cĩ́ɛ̃̀tɛ̀.
\c 22
\s1 Mudoò wɛ̃̀tɛ kɛ ɑ̃nnɛ́mɛ̀ Sidii kɔbɛ nɛ̀ Isidɑyɛɛribɛ bɛ cuokɛ̀
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 18:1-3)
\p
\v 1 Kɛ̀ dɛ̀ dɔ̀ yɛbie nyɛ̀tɑ̃ɑ̃ti bɑ́ mudoò í bo Sidii kɔbɛ nɛ̀ Isidɑyɛɛribɛ bɛ cuokɛ̀. 
\v 2 Dibenni tɑ̃ɑ̃́nnì miɛkɛ kɛ̀ Sudɑɑ kɔbɛ kóo kpɑ̀ɑ̀tì Sosɑfɑtii kɔtɛ kɛ́yɑ̀ Isidɑyɛɛribɛ kóo kpɑ̀ɑ̀tì. 
\v 3 Kɛ̀ Isidɑyɛɛribɛ kóo kpɑ̀ɑ̀tìi nɑ́kɛ́ o kó bɛhɑ̃ɑ̃pɔ̀mbɛ̀ kɛ dɔ̀: Di yɛ̃́mu kɛ dò ntíì te Dɑmɔti ɛì dìì bo Kɑdɑɑdi tempɛ̃. Ti pĩ́ mbɑ? Ti bo kɔtɛmɛ̀ kɛ́ dì fìètɛnɛ̀ Sidii kɔbɛ kóo kpɑ̀ɑ̀tì. 
\v 4 Kɛ̀ bɛ̀ɛ bekɛ Sosɑfɑti kɛ dɔ̀: A bo n nɛinɛ̀ kɛ̀ tí kɔtɛ Dɑmɔti ɛì Kɑdɑɑdi tempɛ̃ ndikpɑ̀nnɑ̀ɑ̀? Kɛ̀ Sosɑfɑtii ò tɛ̃̀ńnɛ́ kɛ dɔ̀: Ti yóó nɛimu, ti dò nhonìtì omɑ́ɑ̀ ndi n nìtìbɛ̀ nɛ̀ ɑ kɔbɛ, n kó sisɛ̃ĩ́ nɛ̀ ɑ kpɛsi.
\s1 Kuyie mpɑ̃ɑ̃nɑ́ɑǹtì nɑ́ɑm̀bɛ̀ soutɛ́mɛ̀ Akɑbu
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 18:4-11)
\p
\v 5 Dɛ mɔ̀nnì kɛ̀ Sosɑfɑtii nɑ́kɛ́ Isidɑyɛɛribɛ kóo kpɑ̀ɑ̀tì kɛ dɔ̀: N dɑ bɑ́ɑ́mmu ketɛ́ kɛ́beé nti Yiɛ̀ nKuyie nkɛ́yɑ̀.
\p
\v 6 Kɛ̀ Isidɑyɛɛribɛ kóo kpɑ̀ɑ̀tìi tíí nti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ kɛ̀ bɛ̀ mbo sikɔusìnɑ̀ɑ̀ (400), kòo bɛ̀ bekɛ kɛ dɔ̀: Ǹ kɔtɛ kɛ́do Dɑmɔti dihɛì dìì bo Kɑdɑɑdi tempɛ̃ mmudoòɑ̀, yɑ́ɑ̀ n yóu? Kɛ̀ bɛ̀ɛ ò tɛ̃̀ńnɛ́ kɛ dɔ̀: Kɔtɛ kɛ̀ ti Yiɛ̀ nKuyie nyóó bɛ̀ ɑ̃nnɛ́mu ɑ nɔu miɛkɛ.
\p
\v 7 Kɛ̀ Sosɑfɑtii bekɛ kɛ dɔ̀: Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑǹtò mɔù í kpɑɑ́ ti bo nɑ kɛ́kɔtɛ wèè borɛ̀ kɛ́beé nKuyie nti dɔ́ tɑ̀ɑ̀? 
\v 8 Kɛ̀ Isidɑyɛɛribɛ kóo kpɑ̀ɑ̀tì tɛ̃̀ńnɛ́ Sosɑfɑti kɛ dɔ̀: Kuyie nkóo nìtì kpɑɑ́mu ti bo nɑ kɛ́kɔtɛ wèè borɛ̀ kɛ́beé nti Yiɛ̀ nKuyie nti dɔ́ tì, m mɛ nyí dɔ́ o kpɛti nh ɔ̃ɔ̃ í nhò beé ntìmɑtì kòò n nɑ̀kɛ́ tisɑ̀ɑ̀tì, ò ɔ̃ n nɑ́kɛ́ tiyɛiti nti. Imidɑ birɛ Misee nwe.
\p Kɛ̀ Sosɑfɑti dɔ̀: Okpɑ̀ɑ̀tì bɑ́ nnɑ́ɑ́ mmɛmmɛ.
\p
\v 9 Kòo kpɑ̀ɑ̀tìi yú bɛ̀ fɔ̃̀ntɛ wè kòò tu tɛkpɑ̀ɑ̀tìcĩ́ɛ̃̀tɛ̀ kóo kótì kóò nɑ̀kɛ́ kɛ dɔ̀: Kɔtɛ mɛcɑ̃ɑ̃ nkɛ́yúní Imidɑ birɛ Misee.
\p
\v 10 Isidɑyɛɛribɛ kóo kpɑ̀ɑ̀tì nɛ̀ Sudɑɑ kɔbɛ kou kɛ̀ bɛ nkɑri bɛ̀dɛ́ bɛ kpɑ̀ɑ̀tìkɑ̀rɛ̀ ĩ́nkɛ̀ kɛ́dɑ́ɑ́tí yɛkpɑ̀ɑ̀tìyɑɑ̀bòrɛ̀ diɛyɛ̀, kɛ kɑri Sɑmmɑrii ɛì kó dibòrì borɛ̀ ditíínkɑrì, kɛ̀ Kuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu nɑ́ɑ́ mbɛ pɑ̃ɑ̃nɑ́ɑǹtì bɛ ììkɛ̀. 
\v 11 Kɛ̀ Kenɑɑnɑ birɛ Sedesiɑ duɔ́ nkɛ̀ bɛ̀ ò mɑ́ timɑ́tì mɑtì kɛ̀ tì dò nyɛyìè, kòo bɛ́i nkɛ dɔ̀: Ti Yiɛ̀ nKuyie ntu nɛ̀ yɛ̀ nyìè nyɛ ɑ yó nkũmmùmɛ̀ Sidii kɔbɛ kɛ yɑ̀ɑ bɛ̀ dèènɛ̀.
\p
\v 12 Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu kɛ̀ bɛ̀ ti nnɑ́ɑ́ nkɛ tú: Kɔtɛ Dɑmɔti ɛì dìì bo Kɑdɑɑdi tempɛ̃, ɑ yóó di nɑmu, ti Yiɛ̀ nKuyie nyóó di ɑ̃nnɛ́mu ɑ nɔu miɛkɛ.
\s1 Kuyie mpɑ̃ɑ̃nɑ́ɑǹtì nɑ́ɑǹtò Misee nɑ̀kɛ́mɛ̀ Akɑbu ò yóó yĩɛ̃kɛmɛ̀
\p
\v 13 Mɛm̀mɛ bɛ̀ tɔ̃ nwè kòo bo yúní Misee kòo kɔtɛ kóò nɑ̀kɛ́ kɛ dɔ̀: Ti Yiɛ̀ nKuyie mpɑ̃ɑ̃nɑ́ɑǹtì nɑ́ɑm̀bɛ̀ bɛmɔu bɛ̀ wɛ̃ ndinùù ndi kɛ nɑ́ɑ́ ntìmɑtì mɑ́ɑ̀ okpɑ̀ɑ̀tì, ɑ tũnnɛ bɛ kpɛti kóò nɑ̀kɛ́ weè yóó nɑmɛ̀.
\p
\v 14 Kɛ̀ Misee ò tɛ̃̀ńnɛ́ kɛ dɔ̀: Ti Yiɛ̀ nKuyie mbomu, kɛ̀ kù n nɑ̀kɛ́ tì n yóó ti mbɛ́i!
\p
\v 15 Ò tùɔ̀kɛ dìì mɔ̀nnì okpɑ̀ɑ̀tì borɛ̀ kòo ò bekɛ kɛ dɔ̀: Misee, ń kɔtɛ kɛ́do Dɑmɔti ɛì dìì bo Kɑdɑɑdi tempɛ̃ mmudoòɑ̀, yɑ́ɑ̀ n yóu? Kòo dɔ̀: Kɔtɛ ɑ yóó bɛ̀ nɑmu, ti Yiɛ̀ nKuyie nyóó bɛ̀ ɑ̃nnɛ́mu ɑ nɔu miɛkɛ.
\p
\v 16 Kòo kpɑ̀ɑ̀tìi ò nɑ̀kɛ́ kɛ dɔ̀: Nɛ̀ yíe ndɔkɛ ndɑ bɑ́ɑ́mmɛ̀ kɛ tú ɑ́ n nɑ́kɛ́ timɔ́mmɔnti ti Yiɛ̀ nKuyie ndɑ nɑ̀kɛ́ tì.
\p
\v 17 Dɛ mɔ̀nnì ndi Misee bɛ́immɛ̀ kɛ dɔ̀: N yɑ̀mu Isidɑyɛɛribɛ bɛmɔu cìɛ́tɛ́mɛ̀ yɛtɑ̃rɛ̀ ĩ́nkɛ̀ kɛ dònnɛ̀ tipìètì tìì kpɑ ocɛ̃nti. Kɛ̀ ti Yiɛ̀ nKuyie mbɛ́i nkɛ dɔ̀ bɛ̀ tɛ̃́nkɛ í mɔkɛ wèè bɛ̀ ni, bɑ́ wè wèe kò nho cĩ́ɛ̃̀tɛ̀ nɛ̀ kunɑɑtí.
\p
\v 18 Kɛ̀ Isidɑyɛɛribɛ kóo kpɑ̀ɑ̀tìi nɑ́kɛ́ Sosɑfɑti kɛ dɔ̀: N do í dɑ nɑ̀kɛ́ kɛ̀ n dɔ̀ ò ɔ̃ɔ̃ í nni mpɑ̃ɑ̃́ tìmɑtì kɛ̀ tì ntú tisɑ̀ɑ̀tì n kpɛ́ínɑ́ɑ̀? Ò ɔ̃ n nɑ́kɛ́ tì timɔu bɑɑ ɔ̃ ntú tiyɛiti nti.
\p
\v 19 Kɛ̀ Misee sɔɔtɛ́ o nɑ́ɑǹtì kɛ́bɛ́i nkɛ dɔ̀: Okpɑ̀ɑ̀tì kéntɛ́ kɛ́keè ti Yiɛ̀ nKuyie ntu mù: N yɑ̀mu ti Yiɛ̀ nKuyie nkɛ̀ kù kɑ̀ri ku kpɑ̀ɑ̀tìkɑ̀rì kɛ̀ kɛĩ́nkɛ̀ kó bɛkperíbɛ̀ còḿmú, biɛ nho bɑkù yoú bɛtɔbɛ̀ kucɑ̃̀nku. 
\v 20 Kɛ̀ ti Yiɛ̀ nKuyie ndɔ̀: We mbo kɔtɛ kɛ́soutɛ́ Akɑbu kòo kɔtɛ kɛ́do Dɑmɔti ɛì dìì bo Kɑdɑɑdi tempɛ̃ nkɛ̀ bɛ̀ɛ ò nɑ? Kɛ̀ yie ndɔ̀ muu nkòo tɔù dɔ̀ mutɛ̃mù. 
\v 21 Dɛ mɔ̀nnì kɛ̀ bɛ̀ɛ kperíbɛ̀ kóò mɔù còḿmú ti Yiɛ̀ nKuyie nyììkɛ̀ kɛ́bɛ́i nkɛ dɔ̀: Mí m bo kɔtɛ kóò soutɛ́. Kɛ̀ ti Yiɛ̀ nKuyie nhò bekɛ kɛ dɔ̀: A yóó yĩ́mɛ? 
\v 22 Kòò dɔ̀: M bo nɑɑ́ mmɛyɑ́ɑ̀bìsíyɛ̀mmɛ̀ kɛ́tɑ ɑ pɑ̃ɑ̃nɑ́ɑǹtì nɑ́ɑm̀bɛ̀ bɛmɔu nɔ miɛkɛ. Kɛ̀ ti Yiɛ̀ nKuyie ndɔ̀: A yóó nɑmu, kɔtɛ kóò soutɛ́, kɔtɛ kɛ́dɔɔ̀ mɛmmɛ. 
\v 23 Ti Yiɛ̀ nKuyie nkuù ɑ̃nnɛ́ mɛyɑ́ɑ̀bìsíyɛ̀mmɛ̀ ku pɑ̃ɑ̃nɑ́ɑǹtì nɑ́ɑm̀bɛ̀ nɔ̀ miɛkɛ bɛ̀ɛ̀ bo ɑ borɛ̀, kù tũ ndɔ́ kɛ dɑ dɔɔ̀ mɛyɛi mmɛ̀.
\p
\v 24 Dɛ mɔ̀nnì kɛ̀ Kenɑɑnɑ birɛ Sedesiɑ tɔ́ɔ́nko Misee borɛ̀ kóò bèntɛ kɛ dɔ̀: Ɔ̃nkɛ bíɛ́kɛ̀ nkɛ̀ ti Yiɛ̀ nKuyie nkó muyɑɑ́ nyɛ̀mɛ̀ m borɛ̀ kɛ dɑ bɛ́innɛ̀?
\p
\v 25 Kɛ̀ Misee dɔ̀: A yóó dɛ̀ yɑ̀mu ɑ bo ntɑti dìì yiè sicɛ̃́ĩ kɛ sɔɔti kɛ wɑnti ɑ bo sɔri dɛ̀.
\p
\v 26 Kɛ̀ Isidɑyɛɛribɛ kóo kpɑ̀ɑ̀tì dɔ̀: Pĩ́nnɛ̀ Misee, kɛ́duɔ́ nhAmɔɔ wèè do tú dɛ kó dihɛì kóò kùmɑ̀ndɑ́ɑ̀ nɛ̀ okpɑ̀ɑ̀tì kóo dɑpɑ̀ɑ̀ nSoɑsi, 
\v 27 kɛ́ bɛ̀ nɑ̀kɛ́ kɛ dɔ̀: Okpɑ̀ɑ̀tì tu di kpetínnɛ́ dɛ kóo nìtì kɛ́ nhò duɔ̀ mpɛ̃́ɛ̃̀ sɑ́m̀pɔ́ nɛ̀ mɛniɛ nkɛ́mbɑɑnɛ̀ ò bo wɛ̃tɛnnímɛ̀ nɛ̀ kukɔ̃ǹnɑɑtí.
\p
\v 28 Kɛ̀ Misee dɔ̀: Kɑ̀ɑ wɛ̃̀tɛnní kukɔ̃ǹnɑɑtí nɛ̀ míì kó dinùù dɔkɛ, ti Yiɛ̀ nKuyie mbɛ́immɛ̀ kɛ́deè kɛ dɔ̀: Díndi bɛnìtìbɛ̀ dimɔu kéntɛ́nɛ̀ n tú mù.
\s1 Akɑbu kumɛ̀ Dɑmɔti ɛì Kɑdɑɑdi tempɛ̃ mmiɛkɛ
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 18:28-34)
\p
\v 29 Mɛm̀mɛ Isidɑyɛɛribɛ kóo kpɑ̀ɑ̀tì nɛ̀ Sudɑɑ kɔbɛ kou kɛ̀ bɛ̀ɛ kɔtɛ kɛ́do Dɑmɔti ɛì Kɑdɑɑdi tempɛ̃ mmiɛkɛ mudoò. 
\v 30 Kɛ̀ Isidɑyɛɛribɛ kóo kpɑ̀ɑ̀tìi nɑ́kɛ́ Sosɑfɑti kɛ dɔ̀: N yóó ceetɛ m mɑ́ɑ̀ ndi kɛ́tɑ mudoò miɛkɛ, kɛ̀ fɔ̃́ nní nhɑ̃ ɑ kpɑ̀ɑ̀tìyɑ̀ɑ̀tì.
\p Mɛm̀mɛ Isidɑyɛɛribɛ kóo kpɑ̀ɑ̀tì cèètɛmɛ̀ omɑ́ɑ̀ kɛ́tɑ mudoò miɛkɛ. 
\v 31 Dɛ̀ do sɔ̃́ nSidii kóo kpɑ̀ɑ̀tì nɑ̀kɛ́mu o kó bɛhɑ̃ɑ̃pɔ̀mbɛ̀ bɛ̀ɛ̀ ni bɛ̀ɛ̀ dekɛ o kpɑrìnɑɑsɛ̃ĩ́ kɛ yĩ bɛ̀ bɑ́ nwɑnti bɛhɑ̃ɑ̃pɔ̀mbɛ̀ sɑ́m̀pɔ́bɛ̀ yoo iwɛ̃ĩ yɛmbɛ̀, bɛ̀ nwɑnti Isidɑyɛɛribɛ kóo kpɑ̀ɑ̀tì mɑ́ɑ̀ ndi. 
\v 32 Bɛ̀ɛ̀ ni sikpɑ̀rìnɑɑsɛ̃ĩ́ kó bɛdèèbɛ̀ kɛ̀ bɛ̀ɛ yɑ̀ Sosɑfɑti kɛ́nyɛ̃́ kɛ tú Isidɑyɛɛribɛ kóo kpɑ̀ɑ̀tì nwe, kɛ́kétóo o bíɛ́kɛ̀, kòo kuɔ́nnɛ̀ ti Yiɛ̀ nKuyie kɛ̀ kùu ò teennɛ̀. 
\v 33 Bɛ̀ɛ̀ ni sikpɑ̀rìnɑɑsɛ̃ĩ́ kó bɛdèèbɛ̀ kɛ̀ bɛ̀ɛ bɑntɛ́ kɛ dò nyIsidɑyɛɛribɛ kóo kpɑ̀ɑ̀tì dɔkɛ kóò yóu kɛ́pɛ̃ɛ̃tɛ́.
\p
\v 34 Kòo nìtì mɔù ntɔ mutɑ̃mmù kɛ́tɑ̃ũ cɛ̃́nkoo kɛ́mɑ́ɑ́nɛ̀ Isidɑyɛɛribɛ kóo kpɑ̀ɑ̀tì, kɛ̀ kupie ntɑ dicĩ̀ncĩ̀nkɔ̃̀nnì mɑ̀nku dì tuutɛ́nɛ̀ dɛ̀ ibɑɑtí. Kòo nɑ́kɛ́ wèè piú o kpɑ̀rìsɑ̃ntɛ̀ kɛ dɔ̀: Tũntɛ tɛsɑ̃ntɛ̀ kɛ̀ tí yɛ fɛkpɑ̀rìnɑfɛ miɛkɛ, bɛ̀ n kɔ̀ùtɛmu.
\p
\v 35 Kɛ̀ mudoò bintɛ́ dɛ yiè kòo kpɑ̀ɑ̀tì mbo o sɑ̃ntɛ̀ miɛkɛ kɛ̀ bɛ̀ ò pĩ nkɛ́cómmúnɛ̀ kɛ wetí Sidii kó bɛhɑ̃ɑ̃pɔ̀mbɛ̀. Kɛ̀ mɛyĩ̀ĩ̀ nyìɛ̀. Kɛ̀ dɛ̀ nyóó yĩ́ kuyuoku kòo kú. 
\v 36 Diyiè tɑti dìì mɔ̀nnì kɛ̀ bɛ̀ɛ pĩɛ̃kɛ́ dihɑ̃ɑ̃pɔ̀nkɑrì kɛ dɔ̀: Bɑ́ wè wèe kò nho ciɛ, o ɛì, 
\v 37 okpɑ̀ɑ̀tì kumu.
\p Mɛm̀mɛ kɛ̀ bɛ̀ɛ ò kɔ̀tɛnɛ̀ Sɑmmɑrii kɛ́kũnnɛ́, 
\v 38 kɛ́kɔtɛnɛ̀ o kpɑ̀rìsɑ̃ntɛ̀ kubinkɛnkɛnkù mɑkù Sɑmmɑrii ɛì mɛniɛ nsũ dɛ̀ kɛ tɛ̀ ɔ̀ú, kɛ̀ simɔɔ́ diɛ́ dɛ kó mɛyĩ̀ĩ̀ nkɛ̀ bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ kɛ̀ bɛ̀ɛ wuɔ, kɛ́ndònnɛ̀ ti Yiɛ̀ nKuyie ndo ti bɛ́immɛ̀.
\b
\p
\v 39 Akɑbu borimɛ tɛ̃mɛ̀ ò dɔ̀ɔ̀ mɛ̀ɛ̀ kó dimɑ̀ɑ̀, ò do mɑɑ́ tɛ̀ɛ̀ cĩ́ɛ̃̀tɛ̀ kɛ́ tɛ̀ dɑ̀ri yɛpɑ́pɑ́nìì nnɛ̀ yɛhɛkɛ̀ ò mɑɑ́ yɛ̀ɛ̀ kó dimɑ̀ɑ̀, dɛ̀ wɑ̃̀rimu Isidɑyɛɛribɛ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 40 Akɑbu do ku kòo birɛ Aɑsiɑ weè sɔɔtɛ́ o kpɑ̀tì.
\s1 Sosɑfɑti tumɛ̀ Sudɑɑ kɔbɛ kóo kpɑ̀ɑ̀tì
\r (Wéntɛ́ 2 Bɛkpɑ̀ɑ̀tìbɛ̀ tɔ̃mmú 20:31-21:1)
\p
\v 41 Asɑɑ birɛ Sosɑfɑti do nɑɑ́ nSudɑɑ kɔbɛ kóo kpɑ̀ɑ̀tì Akɑbu Isidɑyɛɛribɛ kóo kpɑ̀ɑ̀tì kpɑ̀tì benni nɑɑnnì miɛkɛ nkɛ. 
\v 42 Sosɑfɑti do mɔkɛ yɛbie nsipísìtɑ̃ɑ̃ti nɛ̀ yɛ̀nùmmù ndi kɛ́di tikpɑ̀tì, kɛ́mbo Sedisɑdɛmmu kɛ dɔ̀ yɛbie nsipísìdɛ́ nɛ̀ yɛ̀nùmmù. Sidii kóo sɑpɑ̀ɑ̀ Asubɑ weè do ò pɛitɛ́. 
\v 43 Kòo tũnnɛ ò cicɛ Asɑɑ kó mɛborimɛ weti weti kɛ́ndɔɔri ti Yiɛ̀ nKuyie ndɔ́ dɛ̀. Yɛtɔ̀rɛ̀ yɛɛ̀ mɑ́ɑ̀ do kpɑɑ́ kɛ̀ bɛnìtìbɛ̀ feu iwũɔ̃ kɛ tuɔ̀nnɛ̀ tihúúntì. 
\v 44 Sosɑfɑti nɛ̀ Isidɑyɛɛribɛ kóo kpɑ̀ɑ̀tì kɛ̀ bɛ̀ɛ nɑrikɛ.
\b
\p
\v 45 Sosɑfɑti kó mɛborimɛ tɛ̃mɛ̀, ò do mɔkɛ dìì kɔ̃m̀bùɔ̀ nɛ̀ ò dokɛ́ mùù doò. Dɛ̀ wɑ̃̀rimu Sudɑɑ kpɑ̀ɑ̀tìbɛ̀ dɔɔ̀rìmɛ̀ pɑ́tíri miɛkɛ. 
\v 46 Bɛnitipòbɛ̀ bɛ̀ɛ̀ dɔuti dɔutinɛ̀ bɛnitidɑɑbɛ̀ bɛ̀ɛ̀ do sùɔ́ nho cicɛ Asɑɑ kó dimɔ̀nnì, kòo bɛ̀ dènnɛ o ɛì. 
\v 47 Okpɑ̀ɑ̀tì do í bo Edɔmmu. 
\v 48 Kɛ̀ Sosɑfɑtii dɔɔ̀ bɑ̀tóòbɛ̀ diɛbɛ̀ tɛpíítɛ̀ Esiyonni-Kebɛɛ kɛ̀ bɛ̀ bo nkɔrì Ofii kɛ wɑɑ̀nní mɛsɔɔ. Dɛ kóo bɑ̀tóòbɛ̀ mɛ nyí nnɑ kɛ bo kɔtɛ, kɛ̀ bɛ̀ɛ puɔ Esiyonni-Kebɛɛ. 
\v 49 Dɛ mɔ̀nnì kɛ̀ Akɑbu birɛ Aɑsiɑ nɑ́kɛ́ Sosɑfɑti kɛ dɔ̀: Yóu kɛ̀ n kó bɛtɔ̃mbɛ̀ɛ nɛinɛ̀ ɑ kɔbɛ kóo bɑ̀tóòbɛ̀, kɛ̀ Sosɑfɑtii yetɛ. 
\v 50 Mɛm̀mɛ kɛ̀ Sosɑfɑtii kú kɛ̀ bɛ̀ɛ ò kũnnɛ́ o yɑ̀ɑ̀rì Dɑfiti ɛì. Kɛ̀ Yodɑmmuu sɔɔtɛ́ o kpɑ̀tì.
\s1 Aɑsiɑ tumɛ̀ Isidɑyɛɛribɛ kóo kpɑ̀ɑ̀tì
\p
\v 51 Kɛ̀ Akɑbu birɛ Aɑsiɑ nɑɑ́ nyIsidɑyɛɛribɛ kóo kpɑ̀ɑ̀tì kɛ́mbo Sɑmmɑrii. Sudɑɑ kɔbɛ kóo kpɑ̀ɑ̀tì Sosɑfɑti kpɑ̀tì benni tɛpíítɛ̀ nɛ̀ diyiénnì ndi ò do nɑɑ́mmɛ̀ okpɑ̀ɑ̀tì, kɛ́ntɔ tikpɑ̀tì kɛ dɔ̀ yɛbie nyɛ̀dɛ́ɛ̀, 
\v 52 kɛ́dɔɔ̀ ti Yiɛ̀ nKuyie nyí dɔ́ dɛ̀ kɛ́tũnnɛ o cicɛ nɛ̀ o yɔ̃ bɛ̀ do tũ nkùù cɛ nɛ̀ Nɛbɑti birɛ Sedeboɑmmu do tũ nkù kɛ́tɑnnɛ́ Isidɑyɛɛribɛ mɛyɛi mmiɛkɛ. 
\v 53 Ò do fìé iwũɔ̃ nyi dibɔɔ̀ Bɑɑdi kɛ́nninku di ììkɛ̀ kɛ́yíi nti Yiɛ̀ nKuyie nyIsidɑyɛɛribɛ tũ nkù miɛkɛ, o cicɛ do dɔ̀ɔ̀mɛ̀.