\id 1JN di63.all F{evrier 1999 BJ Parakou B{enin
\ide UTF-8
\h 1 Isɑ̃ɑ̃
\toc1 Isɑ̃ɑ̃ wɑ̃̀ri dìì pɑ́tíri ketirì
\toc2 1 Isɑ̃ɑ̃
\mt1 Isɑ̃ɑ̃ wɑ̃̀ri dìì pɑ́tíri ketirì
\imt1 Di mpɑ́tíri tɔ tìì nɑ́ɑǹtì
\ip Isɑ̃ɑ̃ wèè wɑ̃̀ri tinɑ́ɑǹsɑ̀ɑ̀tì kó dipɑ́tíri weè wɑ̃̀ri dii. Ò wɑ̃̀ri dɛ kó dipɑ́tíri kɛ bo teennɛ̀ Kirisi kɔbɛ mbɛ kɛ̀ bɛ̀ mmɔkɛnɛ̀ Kuyie mmɛtɑummɛ̀ sɑ̀ɑ̀mɛ̀, kɛ múnkɛ ntɑunnɛ̀ bɛtɔbɛ̀ kɛ̀ dɛ̀ wenni. Isɑ̃ɑ̃ nɑ́ɑǹtì miɛkɛ ò ĩkú dìì tɑnyuu tú ɑ bo ndɔ́mɛ̀ ɑ kou tɔù. Kɛ̀ Isɑ̃ɑ̃ dɔ̀ kɛ̀ wèè yetɛ, kɛ tú Yesu í tú Kirisi Kuyie ntɑ̃ɑ̃tɛ́ wè, dɛ yiɛ̀ ntɔ̃̀tɛ mɛtɑummɛ̀ mmɛ nɛ̀ Kuyie nkɛ mɛ̀ tɔ̃̀tɛ wenwe nɛ̀ bɛnìtìbɛ̀. Ti fòmmu dò nkɛ́nwennimu kɛ̀ tí ntú kuwenniku kó ibí, dibiìnnì bɑ́ɑ́ nɑ kɛ́nkɔkɛ́nɛ̀ kuwenniku.
\is1 Di mpɑ́tíri nɑ́ɑǹtì duɔ́ kɛ dòmmɛ̀
\io1 1. Yesu bɛ̀ yu wè kɛ tú Tinɑ́ɑǹtì tìì duɔ́ mmufòmmu 1:1-4
\io1 2. Ti bo nfòùmɛ̀ kuwenniku miɛkɛ 1:5-2:17
\io1 3. Kirisi kpɑntídɛ̀ntɔù 2:18-29
\io1 4. Mɛborimɛ mɛ̀ɛ̀ bɛnkú ti túmɛ̀ Kuyie mbí 3
\io1 5. Ti bo mbɑɑ̀tìmɛ̀ dɛ̀ɛ̀ tu mɛyetímɛ̀ nɛ̀ dɛ̀ɛ̀ tu timɔ́mmɔnti 4:1-6
\io1 6. Wèè dɔ́ ò ɔ̃ ndòmmɛ̀ 4:7-21
\io1 7. Ti bo yiemmɛ̀ Yesu dɛɛ̀ bo nte kɛ̀ ti nɑ mɛyɛi 5:1-21
\c 1
\s1 Bɛ̀ tu wè Tinɑ́ɑǹtì
\p
\v 1 Mɛketimɛ̀ mɔ̀nnì kɛ̀ bɛ̀ tu wè tinɑ́ɑǹtì kòò bomu, kɛ̀ Kuyie nhò duɔnní kɛ̀ ti ò yɑ̀, kɛ kèè ò nɑ̀ɑ́mmɛ̀, koò kɑ̀ɑ́kɛ́, weè duɔ̀ mufòmmu. 
\v 2 Ò kɔ̀tɛnímu kɛ̀ ti ò yɑ̀, weè duɔ́ mmufòmmu. Dɛɛ̀ te kɛ̀ ti di nɑ́ɑ́ nkɛ tú ti yɑ̀ Odɛɛtíwè, wèè tu mufòmmu mùù bo sɑ̃́ɑ̃̀, ò do bo ti cicɛ Kuyie mborɛ̀ ndɛ kɛ kɔ̀tɛní. 
\v 3 Ti yɑ̀ dɛ̀ nɛ̀ ti kèè tì o borɛ̀ ti mɛ̀nkɛ ti ndi nɑ́ɑ́, nkɛ̀ di bo ti wɛ̃nnɛ́nɛ̀ kɛ̀ tí ntɑunɛ̀ ti cicɛ Kuyie nnɛ̀ ku Birɛ Yesu Kirisi. 
\v 4 Ti di wɑ̃̀ri dɛ kó tinɑ́ɑǹtì kɛ̀ ti wɛ̀ì diì bo píɛ.
\s1 Kuyie ntumɛ̀ kuwenniku
\p
\v 5 Ntɛnɛ̀ tinɑ́ɑǹtì ti kèè tì Yesu borɛ̀ kɛ̀ tì ndi nɑ́ɑ́, Kuyie ntú kuwenniku nku dibiìnnì í bo ku borɛ̀. 
\v 6 Kɛ̀ ti yɛ̃ nti kù tɑunɛ̀ kɛ kpɑɑ́ dibiìnnì miɛkɛ, ti soú ntimɑ́ɑ̀ ndi, ti í tũ ntimɔ́mmɔnti. 
\v 7 Kɛ̀ ti mɛ mbo kuwenniku miɛkɛ Kuyie mbomɛ̀ kuwenniku, ti kù tɑunɛ̀mu kɛ tɑunɛ̀ titɔbɛ̀ kɛ̀ ku Birɛ Yesu yĩ̀ĩ̀ nhɔu ti yɛi mmɛmɔu. 
\v 8 Kɛ̀ ti tú ti í mɔkɛ mɛyɛi, nti soú ntimɑ́ɑ̀ ndi, ti í nɑ́ɑ́ ntimɔ́mmɔnti. 
\v 9 Kɛ̀ ti mɛ ndɑ́ɑ nti yɛi, nti bo nɑ kɛ nyɛ̃́ weti weti kɛ dò nkù ti cĩ̀ɛ̃́ nkɛ ti wénkùnnɛ ti yɛi mmɛmɔu kɛ yɛ̃́ kù dɔ̀ɔ̀rimɛ̀mu kù bɛ́i ntì. 
\v 10 Kɛ̀ ti tú ti í mɔkɛ mɛyɛi nti yu Kuyie nku siyɑ́ɑ̀bìsí yiɛ̀, ti í yie nku nɑ́ɑǹtì.
\c 2
\s1 Kirisi tumɛ̀ wèè ti pɑɑ̀tì
\p
\v 1 M bí n di wɑ̃̀ri ti nnɑ́ɑǹtì kɛ̀ di bɑ́ ndɔɔri mɛyɛi mmɛ, kòò mɔù mɛ ndɔ̀ɔ̀ mɛyɛi nti mɔkɛmu Yesu Kirisi, wèè yóó nɑ́kɛ́ ti kpɛ́í nKuyie mborɛ̀ wenwe wèè kpɑ mɛyɛi. 
\v 2 Weè duɔ́ nhomɑ́ɑ̀ kɛ̀ bɛ̀ ò kùɔ ti yɛi nkpɛ́í nkɛ̀ Kuyie mbo ti cĩ́ɛ̃́, dɛ̀ í tú timɑ́ɑ̀, bɛnìtìbɛ̀ bɛmɔu ndi.
\p
\v 3 Kɛ̀ ti yíé nKuyie ntɑnnɔ̀ mɛm̀mɛ ti bo bɑntɛ́mɛ̀ kɛ dò nti kù yɛ̃́. 
\v 4 Kòò mɔù tu ò yɛ̃́ Kuyie nkɛ̀ nɛ́ í tũ nku tɑnnɔ̀ ò soúmmu. 
\v 5 Wèè mɛ nyíé nKuyie nkpɛti, weè kù dɔ́ mɔ́mmuɔ, nɛ̀ dɛndɛ ti bo bɑntɛ́mɛ̀ kɛ dò nti kù tɑunnɛ̀. 
\v 6 Wèè yĩ́ ò tɑunnɛ̀ Kuyie, nho borimɛ ńdò Kirisi kɔ̃mɛ do dòmmɛ̀.
\s1 Ikuɔ́ pɑ̀nyì kó tinɑ́ɑǹtì
\p
\v 7 N kɔbɛ n dɔ́ bɛ̀, dɛ̀ í tú ditɑnnùù pɑ̀nnì ndi n di wɑ̃̀rimɛ̀, di dì yɛ̃́mu nɛ̀ dimɔ̀nnì, bɛ̀ dì ndi nɑ̀kɛ́mu. 
\v 8 Kɛ̀ dì nɛ́ tú dipɑ̀nnì, kɛ yɛ̃́ Kirisi weè dì nti bɛnkɛmɛ̀ nɛ̀ o borimɛ miɛkɛ kɛ̀ ti mɛ̀ tũ̀, ti yie ndìì mɔ̀nnì dɛ kó ditɑnnùù, dibiìnnì ɔ̃ɔ̃ pɛ̃ɛ̃tɛ́mu kɛ̀ kuwennikuu yɛ̀nní.
\p
\v 9 Wèè yɛ̀mmɛ̀ dò nhò bo kuwenniku miɛkɛ, kɛ nɛ́ níí nho kou tɔù ò kpɑɑ́ dibiìnnì miɛkɛ nkɛ. 
\v 10 Wèè dɔ́ o kou tɔù, weè bo kuwenniku miɛkɛ, wè í yóó do. 
\v 11 Wèè níí nho kou tɔù ò bo dibiìnnì miɛkɛ nkɛ, kɛ̀ dì ò yɛ̃̀ĩkùnnɛ bɑ́ ò í yɛ̃́ ò kɔ̀ri kɛ̀.
\p
\v 12 M bí, n di wɑ̃̀ri kɛ yɛ̃́ Kuyie ndi cĩ̀ɛ̃́mmɛ̀mu di yɛi nnɛ̀ Yesu Kirisi kpɛ́í. 
\v 13 Díndi bɛkótíbɛ̀ n tì ndi wɑ̃̀ri kɛ yɛ̃́ di yĩ̀ɛ̃́tɛ́mɛ̀ weti weti Kirisi wèè do bo kɛ̀ Kuyie mmu nyí dɔ̀ɔ̀ kutenkù. Díndi bɛdɑpɑ̀mbɛ̀ n di wɑ̃̀ri di nɑ mɛ̀ɛ̀ kpɛ́í nkɛ oyɛiwe.
\s1 Ti bɑ́ ndɔ́ kutenkù nɛ̀ ku kpɛrɛ
\p
\v 14 Díndi ibí n di wɑ̃̀ri kɛ yɛ̃́ di yĩ̀ɛ̃́tɛ́mɛ̀ ti cicɛ. Díndi bɛkótíbɛ̀ n di wɑ̃̀ri kɛ yɛ̃́ di yĩ̀ɛ̃́tɛ́mɛ̀ weti weti wèè do bo kɛ̀ Kuyie mu nyí dɔ̀ɔ̀ kutenkù. Díndi bɛbɛ́m̀bɛ̀ n di wɑ̃̀ri, kɛ yɛ̃́ di yiemmɛ̀ Kuyie nnɑ́ɑǹtì kɛ̀ tì pĩ nkɛ̀ tì di kpénkùnnɛ kɛ̀ di nɑ dibɔɔ̀.
\p
\v 15 Bɑ́ ndɔ́nɛ̀ kutenkù kuu nnɛ̀ ku kpɛrɛ. Kòo mɔù dɔ́ kutenkù ò í dɔ́ ti cicɛ Kuyie. 
\v 16 Kutenkù yɛiku kuu mmiɛkɛ ɑ bo ndɔ́mɛ̀ kɛ́dɔ̀ɔ̀ mɛyɛi nkó mɛyɛ̀mmɛ̀ mɛɛ̀ bo, kɑ̀ɑ yɑ̀ dɛ̀ ɑ́ ndɛ̀ dɔ́, kɛ́mpɔtì ɑ mɔkɛmɛ̀. Kutenkù kpɛrɛ í wɛ̃nnɛ́ Kuyie nkpɛrɛ. 
\v 17 Kutenkù pɛ̃nkɛ́mu nɛ̀ ku kpɛrɛ, bɛnìtìbɛ̀ wùó ndɛ̀, kɛ dɛ̀ yɑ̀ɑ́. Wèè dɔ̀ɔ̀ri Kuyie ndɔ́mɛ̀ weè yó nfòù sɑ̃́ɑ̃̀.
\s1 Kirisi kpɑntídɛ̀ntɔù diɛwè kó tinɑ́ɑǹtì
\p
\v 18 M bí, kutenkù ɑutɛ́ kɛ bo deèmu, di kèèmu, bɛ̀ tumɛ̀ Kirisi kpɑntídɛ̀ntɔù dò nkɛ́kɔtɛní, Kirisi kpɑntídɛ̀ntɔbɛ̀ í sénní di mmɔ̀nnì. Dɛɛ̀ te kɛ̀ ti bɑntɛ́ kɛ dò nkutenkù ɑutɛ́ kɛ bo deè. 
\v 19 Dɛ kó bɛnìtìbɛ̀ do bo ti cuokɛ̀ nkɛ kɛ ìtɛ́ kɛ yɛ̃́ bɛ̀ do í túmɛ̀ ti kɔbɛ mɔ́mmɔmbɛ, kɛ̀ bɛ̀ do ntú ti kɔbɛ mɔ́mmɔmbɛ bɛ̀ nɑ nti kpɑɑ́nɛ̀mu. Bɛ̀ yɛ̀mu bɑ́ wè kòò bɑntɛ́ kɛ dò mbɛ̀ do í tú ti kɔbɛ.
\p
\v 20 Díndi mɛ nyí bɛ̀ dònnɛ̀, Kirisi di duɔ́mmu Muyɑɑ́nsɑ̀ɑ̀mù kɛ̀ di yɛ̃́ timɔ́mmɔnti. 
\v 21 N yì di wɑ̃̀ri kɛ yɛ̃ ndi í yɛ̃́ timɔ́mmɔnti, di tì yɛ̃́mu kɛ bo nɑ kɛ́bɑtɛ timɔ́mmɔnti nɛ̀ siyɑ́ɑ̀bìsí.
\p
\v 22 Siyɑ́ɑ̀bìsí yiɛ̀ ntu we? Wèè yetɛ wènwe kɛ yɛ̃ nYesu í tú Kirisi, weè tu Yesu kpɑntídɛ̀ntɔù, kɛ yɛ̃́ ò yetɛmɛ̀ Kuyie nnɛ̀ ku Birɛ. 
\v 23 Wèè yetɛ Kuyie mBirɛ ò yetɛmu Kuyie, kɛ̀ wèè yie nKuyie mBirɛ ò yiemmu Kuyie.
\p
\v 24 Dɛɛ̀ te kɛ̀ n tu nyíénnɛ̀ bɛ̀ di tié nyìì tié mmɛketimɛ̀ mɔ̀nnì. Mɛmmɛ di bo ntɑunnɛ̀mɛ̀ Kuyie nnɛ̀ ku Birɛ sɑ̃́ɑ̃̀. 
\v 25 Kuyie mBirɛ ti nɑ̀kɛ́mu kɛ tú dɛ̀ bo ti duɔ́ mmufòmmu mùù bo sɑ̃́ɑ̃̀.
\p
\v 26 N di wɑ̃̀ri dɛ kó tinɑ́ɑǹtì bɛ̀ɛ̀ di soú mbɛ̀ kpɛ́í nkɛ. 
\v 27 Kirisi di duɔ́mmu Muyɑɑ́nsɑ̀ɑ̀mù kɛ̀ mù bo di miɛkɛ, dɛ̀ tɛ̃́nkɛ í dò mbɛ̀ di nɑ́kɛ́ dɛ̀ɛ̀ wenni nɛ̀ dɛ̀ɛ̀ sĩ̀, mmù di tiè ntì tu timɔ́mmɔnti nti, mù í soú. Nyíénnɛ̀ mù di tiè ntì kɛ́ mmù tɑunɛ̀ sɑ̃́ɑ̃̀.
\p
\v 28 M bí di ntɑunnɛ̀ ti Yiɛ̀, kòo nwɛ̃tiní bɑ́ di í yĩɛ̃̀kù kɛ̀ ifɛi di bo. 
\v 29 Di yɛ̃́mu kɛ dò nKirisi do dɔɔri Kuyie ndɔ́mɛ̀, di dò nkɛ́nyɛ̃́mu kɛ dò nwèè dɔ̀ɔ̀ri Kuyie ndɔ́mɛ̀, weè tu Kuyie mBirɛ.
\c 3
\s1 Kuyie mbí í dòmmɛ̀ kɛ́ndɔɔri mɛyɛi
\p
\v 1 Wéntɛ́nɛ̀ ti cicɛ Kuyie nti dɔ́ kɛ̀ dɛ̀ dɛu kɛ mɑmɛ̀, kɛ̀ ti yu kɛ tú ku bí, kɛ̀ ti mɛ̀nkɛ ì tu. Bɛ̀ɛ̀ yetɛ Kuyie mbɛ̀ yóó ti yetɛmu, kɛ yɛ̃́ bɛ̀ í yɛ̃́mɛ̀ Kuyie. 
\v 2 N kɔbɛ n dɔ́ bɛ̀, ti tú Kuyie mbí nyi di mmɔ̀nnì, ti nɛ́ mu nyí yɛ̃́ weti weti ti yó ndòmmɛ̀, ti nɛ́ yɛ̃́mu kɛ dò nhò bo wɛ̃tɛní dìì yiè ti bo ò dòntɛnɛ̀, kɛ yɛ̃́ ti yóó ò yɑ̀mɛ̀ ò dòmmɛ̀ pɑ́íí. 
\v 3 Wèè bɑ̀ɑ kɛ bo dontɛnɛ̀ Kirisi, wè nwénkùnko omɑ́ɑ̀ pɑ́íí Kirisi dòmmɛ̀.
\p
\v 4 Wèè dɔ̀ɔ̀ri mɛyɛi, nhò yetɛ Kuyie nkuɔ́ nyi, kɛ yɛ̃́ mɛyɛi ntúmɛ̀ ɑ bo yetɛ́nɛ́mɛ̀ Kuyie nkuɔ́. 
\v 5 Di yɛ̃́mu kɛ dò nKirisi í mɔkɛ mɛyɛi nkɛ kɔ̀tɛní kɛ bo dɛitɛ bɛnìtìbɛ̀ yɛi. 
\v 6 Wèè ò tɑunnɛ̀ ò ɔ̃ɔ̃ í nkpɑɑ́ dɔɔri mɛyɛi. Wèè mɛ nkpɑɑ́ dɔɔri mɛyɛi nhò í ò yɛ̃́, ò ketɛ́ kɛ í ò yɑ̀. 
\v 7 M bí, di bɑ́ɑ́ yie nkòò mɔù di soutɛ́, wèè dɔ̀ɔ̀ri Kuyie ndɔ́mɛ̀ weè wenni kɛ dònnɛ̀ ti Yiɛ̀ nYesu. 
\v 8 Wèè kpɑɑ́ dɔɔri mɛyɛi nhò tu dibɔɔ̀ kou nwe. Kɛ yɛ̃́ dibɔɔ̀ dɔ̀ɔ̀rimɛ̀ mɛyɛi mmɛ nɛ̀ dì bomɛ̀. Kɛ̀ Kuyie mBirɛ kɔ̀tɛní kɛ bo pɑɑ ndibɔɔ̀ kó mutɔ̃mmú.
\p
\v 9 Wèè tu Kuyie mbirɛ ò ɔ̃ɔ̃ í nkpɑɑ́ dɔɔri mɛyɛi nkɛ yɛ̃́ Kuyie nkó mɛborimɛ bomɛ̀ o miɛkɛ. 
\v 10 Ntɛ dɛ̀ɛ̀ bɑ̀ɑ̀tì Kuyie mbí nɛ̀ dibɔɔ̀ kpɛyi. Wèè í dɔɔ̀ri Kuyie ndɔ́mɛ̀, yoo ò í dɔ́ otɔù ò í tú Kuyie mbirɛ.
\s1 Ti bo ndɔ́mɛ̀ titɔbɛ̀
\p
\v 11 Ti kèè tì mɛketimɛ̀ tiì tu: Tí ndɔ́ titɔbɛ̀. 
\v 12 Ti bɑ́ ndònnɛ̀ Kɑyɛ̃ɛ̃, wèè do tú dibɔɔ̀ kou, kɛ́kuɔ o nɑntɛ̀, kɛ nɛ́ tɛ̀ kùɔ bɑ nkpɛ́í? Tɛ tɔ̃mmú wenni mɛ̀ɛ̀ kpɛ́í nkòo kɔ̃mu sĩ.
\p
\v 13 N kɔbɛ kɛ̀ kutenkù kɔbɛ bɛ̀ɛ̀ yetɛ Kuyie nkɛ̀ bɛ̀ di níí ndɛ̀ bɑ́ɑ́ di di. 
\v 14 Ti yɛ̃́mu kɛ dò nti yɛ̀ mukṹṹ nkó kucɛ, kɛ tɑ mufòmmu kɔku ti dɔ́ mɛ̀ɛ̀ kpɛ́í ntitɔbɛ̀. Wèè í dɔ́ otɔù ò kpɑɑ́ mukṹṹ nkó kucɛ miɛkɛ nkɛ. 
\v 15 Wèè níí nho kou tɔù ò tu onitikɔ̀ùtì nwe, di yɛ̃́mu kɛ dò nhonitikɔ̀ùtì í yó nfòù sɑ̃́ɑ̃̀. 
\v 16 Yesu duɔ́mmɛ̀ omɑ́ɑ̀ kɛ̀ bɛ̀ ò kùɔ ti kpɛ́í ndɛɛ̀ bɛnkú ò ti dɔ́ mɛ̀, ti múnkɛ dò nkɛ́duɔ́ ntimɑ́ɑ̀ ndi titɔbɛ̀ kpɛ́í. 
\v 17 Kòò mɔù mɔ̀kɛ o kpɛrɛ, kòo tɔù kpɑ, kòò í dɔ́ kóò pɑ̃, ò bɑ́ɑ́ nɑ kɛ́ntú ò dɔ́ Kuyie. 
\v 18 M bí, ti bɑ́ ndɔ́ titɔbɛ̀ nɛ̀ ti nɔ mɑ́ɑ̀, yóunɛ̀ kɛ̀ ti dɔɔ̀rìmɛ̀ mɛɛ̀ mbɛnkú ti dɔ́mɛ̀ titɔbɛ̀.
\s1 Ti bo mbɑ́ɑ́mmɛ̀ Kuyie nkɛ bɑ́ nyĩɛ̃̀kù
\p
\v 19 Mɛmmɛ ti bo bɑntɛ́mɛ̀ kɛ dò nti dɔɔri Kuyie ndɔ́mɛ̀ kɛ bɑ́ nyĩɛ̃̀kù. 
\v 20 Kɛ̀ ti yɛ̀mmɛ̀ mɛ nti bekùnɛ̀, Kuyie mpɛ̃ɛ̃tɛ́mu ti yɛ̀mmɛ̀, kɛ yɛ̃́ dɛmɔu. 
\v 21 N kɔbɛ n dɔ́ bɛ̀ kɛ̀ ti yɛ̀mmɛ̀ mɛ nyí ti bekùnɛ̀, ti mɔkɛmu dikɔ̃m̀bùɔ̀ Kuyie mborɛ̀. 
\v 22 Kù ti pɑ̃ɑ̃ nti kù mɔ́ú dɛ̀ɛ̀ kó dimɑ̀ɑ̀ ti yie mmɛ̀ɛ̀ kpɛ́í nkɛ ku kpɛti kɛ dɔɔri kù dɔ́mɛ̀. 
\v 23 Kuyie nti nɑ̀kɛ́ dìì tɑnnùù tu: Tí ntɑ̃́ ku Birɛ Yesu Kirisi nwe, kɛ́ndɔ́ titɔbɛ̀. 
\v 24 Wèè yíé nKuyie ntɑnnɔ̀, ò kù tɑunɛ̀mu kɛ̀ kù ò tɑ̀unɛ̀. Muyɑɑ́nsɑ̀ɑ̀mù Kuyie nti duɔ́ mmù muù ti nɑ́ɑ́ nkù ti bonɛ̀mɛ̀.
\c 4
\s1 Ti bo mbɛímɛ̀ tìì tu Kuyie nkpɛti nɛ̀ tìì í ti tú
\p
\v 1 N kɔbɛ n dɔ́ bɛ̀ di bɑ́ nyíé bɛnìtìbɛ̀ bɛmɔu kpɛti, bɛ̀ɛ̀ tu bɛ̀ nɑ̀ɑ́ ntì bonní Kuyie mborɛ̀, di níí bɛ̀ yɑ̀ɑ́kɛ́, kɛ́yɑ̀ kɛ̀ bɛ̀ nɑ̀ɑ́ ntì bonní Muyɑɑ́nsɑ̀ɑ̀mù borɛ̀, kɛ yɛ̃́ bɛsṹkùbɛ̀ soúmmɛ̀mu kɛ tú bɛ̀ nɑ̀ɑ́ nKuyie nnɑ́ɑǹtì. 
\v 2 Ntɛ di bo yĩ́mɛ̀ kɛ́bɑntɛ́ wèè nɑ̀ɑ́ Kuyie nkpɛti. Wèè nɑ̀ɑ́ nweti weti Yesu Kirisi nɑɑ́mmɛ̀ onìtì, weè nɑ̀ɑ́ ntìì bonní Muyɑɑ́nsɑ̀ɑ̀mù borɛ̀. 
\v 3 Wèè mɛ nyí tì yie nhò mɔ̀kɛ Yesu kpɑntídɛ̀ntɔù kó mɛyɛ̀mmɛ̀ mmɛ. Bɛ̀ di nɑ̀kɛ́mu ò kpɛ́í, kòò ketɛ́ o tɔ̃mmú kutenkù miɛkɛ kɛ dèè.
\p
\v 4 M bí, Kuyie nkuù di te kɛ̀ di nɑ bɛ̀ɛ̀ soú nkɛ tú bɛ̀ nɑ̀ɑ́ nKuyie nɑ́ɑǹtì, kɛ yɛ̃́ wèè di bonɛ̀ ò kpeńnìmɛ̀ kɛ pɛ̃ɛ̃tɛ́ wèè bɛ̀ bonɛ̀. 
\v 5 Bɛ̀ tu kutenkù kɔbɛ mbɛ, kɛ̀ bɛ nɑ́ɑǹtì tu kutenkù kpɛti, kɛ̀ kutenkù kɔbɛ bɛ̀ kèḿmú. 
\v 6 Tínti tú Kuyie nkɔbɛ mbɛ, wèè dɔ́ Kuyie nweè kèḿmú ti kpɛti, wèè í yie nKuyie nwe í yóó yie nti nɑ́ɑ́ ntì, dɛǹdɛ ti bo bɑntɛ́mɛ̀ bɛ̀ nɑ̀ɑ́ ntì tumɛ̀ timɔ́mmɔnti, Muyɑɑ́nsɑ̀ɑ̀mù nkpɛti.
\s1 Kuyie nti dɔ́mɛ̀
\p
\v 7 N kɔbɛ n dɔ́ bɛ̀, ti ndɔ́ titɔbɛ̀ kɛ yɛ̃́ Kuyie ntúmɛ̀ mɛdɔ́kùmɛ̀ yiɛ̀ nwe. Wèè dɔ́ otɔù weè tu Kuyie mbirɛ kɛ yɛ̃́ Kuyie. 
\v 8 Wèè í dɔ́ otɔù, wè í yĩ̀ɛ̃́tɛ́ Kuyie nkɛ yɛ̃́ Kuyie ntúmɛ̀ kùù dɔ́ kùnku bɛnìtìbɛ̀. 
\v 9 Kuyie mbɛnkɛ kù ti dɔ́mɛ̀, kù duɔnní mɛ̀mmɛ ku Birɛ dɛ̀ɛ̀ bo dɛmɑ́ɑ̀ kutenkù miɛkɛ kɛ̀ dɛ̀ bo ti duɔ́ mmufòmmu. 
\v 10 Dɛɛ̀ bɛnkú kù ti dɔ́mɛ̀, dɛ̀ í tú tíì kù dɔ́, kuù ti dɔ́ kɛ duɔnní ku Birɛ kɛ̀ bɛ̀ dɛ̀ kùɔ ti yɛi nkpɛ́í.
\p
\v 11 N kɔbɛ n dɔ́ bɛ̀ kɛ̀ Kuyie nti dɔ́ mɛmmɛ, ti múnkɛ dò nkɛ́ndɔ́mu titɔbɛ̀. 
\v 12 Òmɔù í yɑ̀ Kuyie mbìtì, kɛ̀ ti dɔ́ titɔbɛ̀ kù ti bonɛ̀mu kɛ te kɛ̀ ti dɔ́ titɔbɛ̀ kù ti dɔ́ mɛ̀ɛ̀ botí.
\p
\v 13 Kù ti duɔ́mmu ku Yɑɑ́ ndɛɛ̀ te kɛ̀ ti yɛ̃́ kɛ dò nti kù tɑunɛ̀ kɛ̀ kù ti bonɛ̀. 
\v 14 Ti yɑ̀mu Kuyie mBirɛ, kɛ nɑ́ɑ́ nkɛ tú kù dɛ̀ duɔnní kɛ̀ dɛ̀ bo dɛɛtɛ́ kutenkù. 
\v 15 Kòò mɔù nɑ̀ɑ́ nYesu túmɛ̀ Kuyie mBirɛ, ò kù tɑunɛ̀mu kɛ̀ kù ò bonɛ̀. 
\v 16 Ti bɑntɛ́mu Kuyie nti dɔ́mɛ̀, kɛ kù yie.
\p Kuyie ndɔ́mu bɛnìtìbɛ̀. Wèè mɔ̀kɛ mɛdɔ́kùmɛ̀ weè tɑunɛ̀ Kuyie nkɛ̀ kù ò bonɛ̀. 
\v 17 Nɛ̀ ku ti kó mɛwɛ̃nnímɛ̀ kpɛ́í nyó nte kɛ̀ ti nɑ kɛ́mmɔkɛ mɛdɔ́kùmɛ̀ mɔ́mmɔmmɛ kɛ̀ bɑ́ nyĩɛ̃̀kù. Kuyie mbeéntì yiè, kɛ yɛ̃́ ti fòmmu dòmmɛ̀ Yesu kɔ̃mu do dòmmɛ̀. 
\v 18 Kɑ̀ɑ dɔ́ otɔù kufɔ̃wɑɑ́ ntɛ̃́nkɛ ɔ̃ɔ̃ í nwè ndɑ bonɛ̀. Wèè dɔ́ otɔù mɛsɑ̀ɑ̀ kufɔ̃wɑɑ́ nhɔ̃ɔ̃ yɛ̀mu, kɛ yɛ̃́ wèè yĩɛ̃̀kù ò yĩ̀ɛ̃̀kùmɛ̀ tibeéntì nti.
\p
\v 19 Ti dɔ́ Kuyie nkɛ yɛ̃́ kuù ketɛ́mɛ̀ kɛ ti dɔ́. 
\v 20 Kòò mɔù tu ò dɔ́ Kuyie nkɛ í dɔ́ o kou tɔù, ò soúmmu. Kɛ yɛ̃́ wèè í dɔ́ o kou ò wùó nwè ò bɑ́ɑ́ nɑ kɛ́ndɔ́ Kuyie nwè í wúó nkù. 
\v 21 Yesu bɛ́immu kɛ tú, kɛ̀ wèè dɔ́ Kuyie nwè ndɔ́ o kou tɔù.
\c 5
\s1 Ti bo yĩ́mɛ kɛ́nɑ mɛyɛi
\p
\v 1 Wèè yie nYesu Kirisi tumɛ̀ Kuyie mBirɛ dɛ yiɛ̀ ntu Kuyie mBirɛ ndɛ. Wèè dɔ́ ti cicɛ Kuyie nwe ndɔ́ ku bí tɛì. 
\v 2 Kɛ̀ ti dɔ́ Kuyie nkɛ tũ̀ nku tɑnnɔ̀ ti bo dɛ mbɑntɛ́ ti túmɛ̀ ku bí. 
\v 3 Kɑ̀ɑ dɔ́ Kuyie ndɛ̀ ɔ̃ɔ̃ í ndɑ yóunɛ̀ ɑ bo ndɔɔrimɛ̀ ku tɑnnɔ̀ yɛ̃mmɛ̀. 
\v 4 Kuyie nkó ibí nɔmmu kutenkù mɛtɑ̃́kùmɛ̀ mɛɛ̀ ɔ̃ nte kɛ̀ ti nɑ kutenkù. 
\v 5 We nhɔ̃ɔ̃ nɑ kutenkù kuu? Wèè tɑ̃́ wènwe kɛ dò nYesu tú Kuyie mBirɛ.
\s1 Yesu mɛ̀nkɛ túmɛ̀ Kuyie mBirɛ
\p
\v 6-7 Dɛnɛnnɛ̀ bo dɛ̀tɑ̃ɑ̃ti ndi dɛ̀ɛ̀ ti nɑ́ɑ́ nYesu túmɛ̀ Kuyie mBirɛ. Kuyie ntɑmmɛ̀ bɛ̀ do kèè mɛ̀ bɛ̀ ò ɑ̃ɑ̃̀ dìì mɔ̀nnì bɑ̀tɛ́mmù, nɛ̀ tìì do dɔ̀ɔ̀ o kṹṹ mmɔ̀nnì, nɛ̀ Muyɑɑ́nsɑ̀ɑ̀mù mmùù bo ti miɛkɛ mù ti nɑ́ɑ́ ntì. 
\v 8 Mɛniɛ nnɛ̀ o kṹṹ nɛ̀ Muyɑɑ́nsɑ̀ɑ̀mù dɛ̀ wɛ̃ḿmu dɛ̀ nɑ̀ɑ́ ntì. 
\v 9 Kòo nìtì yɑ̀ dɛ̀mɑrɛ̀ kɛ bɛ́i, nti ɔ̃ɔ̃ yiemmu. Kuyie mpɛ̃ɛ̃tɛ́mu onìtì, ti dò nkɛ́yiemmu kù bɛ́i ntì kɛ yĩ Yesu tú ku Birɛ. 
\v 10 Wèè yie nKuyie mBirɛ ò yie nKuyie mbɛ́i ntì nti, wèè mɛ nyí dɛ̀ yie nhò yu Kuyie nku siyɑ́ɑ̀bìsí yiɛ̀, kɛ yɛ̃́ ò í yiemmɛ̀ kù bɛ́i ntì ku Birɛ kpɛ́í. 
\v 11 Ntɛ Kuyie nnɑ̀kɛ́ tì kɛ tú nɛ̀ ku Birɛ borɛ̀ ndɛ kù ti duɔ́mmɛ̀ mufòmmu mùù bo sɑ̃́ɑ̃̀. 
\v 12 Wèè tɑ̃́ Kuyie mBirɛ weè yó nfòù sɑ̃́ɑ̃̀, wèè í dɛ̀ tɑ̃́ ò bɑ́ nfòù sɑ̃́ɑ̃̀.
\s1 Wèè tɑ̃́ Kuyie mBirɛ ò mɔ̀kɛmu mufòmmu mùù bo sɑ̃́ɑ̃̀
\p
\v 13 N di wɑ̃̀ri dɛ kó tinɑ́ɑǹtì, kɛ̀ di bo nyɛ̃́ di mɔkɛ mɛ̀mmɛ mufòmmu mùù bo sɑ̃́ɑ̃̀, díndi bɛ̀ɛ̀ tɑ̃́ Kuyie mBirɛ. 
\v 14 Ntɛ dɛ̀ɛ̀ te kɛ̀ ti í yĩɛ̃̀kù, kɛ̀ ti mɔɔ dɛ̀mɑrɛ̀ Kuyie, kɛ̀ dɛ̀ tu ku kó mɛdɔ́kùmɛ̀ kù ɔ̃ɔ̃ ti kéntɛ́mu. 
\v 15 Kɛ̀ ti yɛ̃́ kɛ dò nkù ti kémmú, ti nyɛ̃́ kɛ dò kù ti duɔ́mmu ti kù mɔɔ dɛ̀.
\p
\v 16 Kòò mɔù yɑ̀ otɔù kòò dɔ̀ɔ̀ri mɛyɛi mmɛ̀ɛ̀ dò nKuyie mbo ò cĩ̀ɛ̃́ nwèe bɑ́ntɛ̀ Kuyie nkɛ̀ kùu ò cĩ̀ɛ̃́. Mɛyɛi mmɑmɛ̀ bomu Kuyie nyí cĩ́ɛ̃nko mɛ̀ n yí yɛ̃ ndi mbɑ́ɑ́ Kuyie mmɛɛ̀ kpɛ́í. 
\v 17 Mɛyɛi mɛmɔu tú mɛyɛi mmɛ, kɛ̀ mɛ̀mɑmɛ̀ nɛ́ bo kɛ̀ Kuyie mmɛ̀ cĩ́ɛ̃nko.
\p
\v 18 Ti yɛ̃́mu kɛ dò nKuyie nte wè ɔ̃ɔ̃ í nkpɑɑ́ dɔɔri mɛyɛi, Kuyie nte wè tu wè, kù ɔ̃ nhò bɑ̀ɑmu dibɔɔ̀ kɛ̀ dì bɑ́ɑ́ ò kɑ̀ɑ́kɛ́.
\p
\v 19 Ti yɛ̃́mu kɛ dò nKuyie nkuù ti te, kɛ̀ dibɔɔ̀ te kutenkù kuu nkɔbɛ bɛ̀ɛ̀ yetɛ Kuyie nkpɛti.
\p
\v 20 Ti yɛ̃́mu kɛ dò nKuyie mBirɛ kɔ̀tɛní kɛ ti teennɛ̀ kɛ̀ ti yĩ̀ɛ̃́tɛ́ Kuyie nkumɔ́mmɔnku, kɛ kù tɑunɛ̀ ku Birɛ Yesu Kirisi kpɛ́í, nweè tú Kuyie nkumɔ́mmɔnku, kɛ duɔ̀ mufòmmu mùù bo sɑ̃́ɑ̃̀.
\p
\v 21 M bí mɛntɛnɛ̀ dimɑ́ɑ̀ yɛbɔkɛ̀!